محتوى القصة
لوؤي : ( مطول فيها الشوفة ) بحالاش مثلا !!! شنو غانقدر ندير ليك ؟ شنو غانمنع عليك ؟؟؟؟
قدس : لوؤي ( كتقرب عندو بجدية ) انا مزااااال باغا نعيش حياتي .. مزااال باغا لاجات شي فرصة وبغا بابا نسافر غير مع صحاباتي نساااافر .. مزال باغا نشبع من حياااااتي وانا صغيرة .. نشط نضحك .. نخررج ... بلا منحس براسي حريتي مشات مني ووليت مسؤولية ديال واحد آخر يتحكم فيا كي بغا...
لوؤي : علاش هادشي تاااانخطبك قدام العائلة عاد غندخل فيه ؟ دابا زعما غنخليك ؟؟؟ واش نتي شوية لاباس !!!
قدس : ودابا بعدا الى تدخلتي فهادشي ... غنقولييييك سيييير عطيني تيييساع وغاااانفرتك هادشي لي بيناتنا ..... حيت كوووولشي نستحملو الاااااا .. الاااااا تدخل ليا فحيااااتي وتزمتها كتر ما زمتها ليا بابا وخويا ... نتا رااااه عشتييييي حياااتك ودرتي لي عجججبك ... علاش تزمتها عليا انا ؟؟؟؟؟ ..انا باااغااا نديرررر لي عجبني بلاااا متدخل فيا داباااا
لوؤي بالفقصة جاتو الضحكة وضار كيضحك وهي كتشوف معاه وهو كيدوز يدو على وجهو تايرجع شعرو لور وتايضور راسو بنفي وكيحاول يتحكم فعصبيتو وماااتخرجش ورجع ضار عندها كيتصنع الهدوء ...
لوؤي : شنو كتقصدي بهاد غاديري لي عجبك !!!! وشنو كاتقصدي بهاد نتاااا عشتي حياتك ؟؟؟ ( جات تهضر وجبدها من يديها قربها لعندو كتشوف فيه ) اسمعي ليااااا اش غانقوليك ... انا ملي كنت صغير كان راسي عااامر غا بصوت ديال سطااافييبط والتقرقيب دالمينوط ، كنحلم بيهم فايق ولا ناعس ... وملي وليت مراهق حياتي كلها عمرات بالقراية و مونسيو دالباك باش نحقق هادشي لي بغيت .. وملي مشيت نقرا ... راسي كان عااامر غير بقراية كيغاندير نبدلها منبعد لاليصونص و هاداك المناجمتت لي كنقراه بزز عليا ... ومور ماخديت ليصونص ورجعت للمغرب .. من تما .... وانا كانفكر فيييك غا نتي .. حيااااتي كاملة عشتها وانا يا اما كنفكر فيك .. يا اما كنشوف فيك ... يا اما حاضيك .... يا اما مضااارب معاك .... ( كايهضر بعصبية ) مشييت مع الدراري لبيران .. هوما تايشربو ويطلعو البنات للفوق .. وانا كنشرررب ونتفرج فتصاااورررك تااانصحى .... هوما كيسكرو ويخرجو السكرة فالقحبات .. وانا كنغمض عيني ونتفكرك نتي ... ( قدس كتشوف فيه ) عمرررررني فحيااااتي عطيت مجال لعيني يشوفو شي وحدة من غيرك ... ولا قلبي يتحل لشي وحدة من غيرك ... من نهار عرفت بلي القلب كيدق وهو كيدق غااااليك نتي .... هاد الحياة لي كتهضري عليها كان عندي فيها غا القراااية ونتي .... غاااا احلااامي ونتي ... غاااا الحررب ديالي مع الواليدييين ونتي ... غاااا التفكير فالمستقبل لي بااغيه يكون معاااك نتي ( مزير على سناانو ) كنعس كنفكر فيك نتي .. وكنفييييق باااش نجي عندك نتي ... ( قدس نزلات ليها دمعة كتشوف فيه كيفاش كيهضر مغزف وعرق فجبهتو وضاااح ولونو ولا حمر ) وتخيلي هااااادشي كامل ......باااش ملي نوصلو لهاد المرحلة لي نعطيك فيها الخاتم .. توقفي وتقولي ليا فوجهي انا باااغا نعيش حيااااااتي .. وانا .. ( مغزف على الحروف ) اناااا حيااااتي كااااااملة عششتها غاااا بيييك نتيييي
قدس : ( نزلات راسها مسحات دموعها وعلات عينيها فيه ) واش انا كنقوليك غانعيشها مع شي واحد آخر ؟؟؟؟ هاااادشي لي كيعصبني فيكم حيت ديما كتخلطو بين باغا نعيش حياتي ونعقل عليها ونشبعها .. مع الدراااري والانحراف .. وماابااغاااش نخرج الطريق باغاا غانعيش حياااااااتي ...
لوؤي : وااااعيشيها معايا انا .... بغيتي تسافري غتسافري معايا .. بغيتي تسهري تسهري معايا ... بغيتي ضحكي غاضحكي معااايااااا ... واش انا كنشوف الزواج معااااك هو لي غاانعيش فيه حياتي ونتي كتشوفي الزواج معايا غااااتسالا حياتك ؟؟؟؟! واش فنظرك نستاهل تردي ليا هاد الحمااااق لي كنحسو من جهتك بحال هاكا ؟؟؟؟ واش ماشي عيييقتي شوية عليا لا؟؟؟؟؟
قدس : لووووؤااااي ...( بدموع والبكاااا ) نهار نبغي نستقر غااانستقر معاك ( ضربات فصدرو ) نتتتاااا .. نهار نبغي ندير اسرة غااانديرها معاك نتتاااااا ( كضرب فصدرو كتشير ليه ) نهاااار نبغي نتزوج غاااانديك نتا ... نهار نبغي اب لولادي غااااتكون نتا ... نهار نبغي سند ليا فهاد الحياة غااااانختارك نتااااااا .. نهاااار نسني على ورقة العدوووول غااانشد الستيييلو علييييك نتاااااا .... نهار نفكر فالمستقبل غااااانفكر فييييك نتاااااا ( شداتو من حوايجو كتنهج وعلات فيه راسها مخفضة نبرة صوتها ) ولكن مزاااال عندي بزاف دالحوايج باغا نشبع منهم مزال الوؤي ... انا باغاااا نعيييييش ... باغا ناخد راااحتي فخصوصياتي بلا مادخل فيهم نتاااااا ... كااااع الناس عايشين حيااتهم عااادي .... ماما عاشتها .. ماماك ... خالتي اريج خالتي حيااااة ... بيلساااان ماااجدة .. كولشي مستمتع بداك العشرينية ديالو ... دايرين مغامرات يعاودو لولادهم عليهم وشبعو من حيااااتهم ..... ( علات عينيها فيه بجدية ) يمكن زواج بنسبة ليك غاااانعيشو حيااتنا وماانولدو تاااايقولها لينا راااااسنا ونعيشو عادي .. ولكن زواج بالنسبة ليا .. هووو تغييير شاااامل ... زواح بنسبة ليا مسؤووولية ...زواج بنسبة ليا هو عقلي خاصو يفكر فجوج حوايج فقط .. لول هو نخدم على شخصيتي لي غنوجدها تكون أم ... الثااااني هو تربية هادوك الولاد ... الزواج كنشوفو هو نجيب حتى انا جيل آخر لهاد دنيا نربيه ونعطيه كااااع داك الحناااان لي ماشبعتووش مع راجل كنبغييييه وكيبغيييييني ...
لوؤي : ( بهدوء كيشوف فيها ) اشنو دابا ... نتفارقو ياك ؟ نتفارقو وسيري عيشي حيااتك .. خرجي مع صحااباتك عيشي دوك المغامرات ديالك لي مزال معرفتهمش شنو هوما .. وملي تشبعي وتسااااااااالي .. عيطي ليا قوليلي .. اجي الوؤي دابا نتزوجو باش نولد معاك الولاد لي نعطيهم الحنان لي كان ناقصني ... ياك ؟ بحال هاكا !!!
قدس: ماشي بهاد طريقة را (قاطعها )
لوؤي : لا راها بهاد طريقة ... الى نتي كتشوفي زواج مني غا باش نديرو الولاد .. انا قادر نبقى معاك حياتي كاملة بلا ولاد ماعنديش مشكل .. انا بااااااغيك نتي .. باغي نعيش معاك الحوايج لي مقادرش نعيشهم دابا معاك ... باغي نخرجو فثلاثة دصباح نتمشاو حدا البحر تالصباح .. باغي نعيش معاك المراهقة لي ماعشتهاش ... باغي نتعلم معاك الحوايج لي باغي نتعلمهم .. هادوك المغامرات لي غنعاود لولادي عليهم باغي نديرهم معاك نت ... باااغي نبغييك فالحلاااال ، نبغيييك بوجهي حمر ماشي مخبي ... باغي نكون معاك ونتي كطلعي درجة درجة فمستقبلك .. نكون معاك فانجازتك و فالماستر ديالك فالدكتوراه ديالك ... باغي نكبر حداك ... وتكبري حدايا .. بلا خوف .. بلا تخبية ... بلا حراااام ...
قدس : ( شدات يديه وعينيها عامرين بالترجي ) لوؤي .. عافاااااك .... ماضغطش عليا فهاد الموضوع حيت خيييييفانة منو ديااااال بصح .... عاااااافاك نسااااه ...
لوؤي بقى كيشوف فيها ولهادوك الدموع لي نزلات من عينيها وهي كترجاه وعوج راسو بشوية شاف لداك الخاتم على طبلة .. ورجع شاف فيها ... ابتسم بهدوء ودوز يدو على حنكها وقرب بشوية باسها بحنية وهمس ..
لوؤي : نفضل نعيش معاك ديما فالتخبية تاطيح روحي شي نهار على يد باباك ولا خوك ... والا نشوف دمعة نزلات من عينيك بسباااابي ..... هااانااا غانسى ...
رخاها من يديه وبعد راسو ومشا باتجاه البوابة الكبيرة ديال داك الدار ودخل ...
كان هااارب من دموعها من ضعفو من حبو من خوفو ... كان هارب من كولشي لشي بلاصة لي تكوووون باردة .. تبرد هاد الحرارة لي شعلات فالجسم ديالوووو ومالقاش ماحسن من رشاااااش دالمااا بااااارد يخشي تحتو راااااسووووو ....
اما هي مشات بشوية تاجلسات على الكرسي وتكمشات فوق منو بسببب الريح المحرك جامعة دراعها لعندها .. الدموع كينزلو وعينيها كيشوفو فداك الخااااتم ... هضرتو كتعاود فمسامعها .... جسمها كلو مقشششعر وكولها مزيرة ومخربقة .. الاحاسيس مضطربة فجوفها والغصة فحلقها ..
يلاه خرجات تنهيدة باش تنوض تجمع داكشي ، وهي الكهرباء ديال الجردة كلهااا طفااااااات !!!!!! طفات دقة وحدة وعم الظلااااااام فداك الجردة كاااااملة تامبقى كيبان والو ... قلبها بدا يضرب بالجهد والريق نشف فحلقها بسبب الفوبيا ديالها ولي هي الضلاااام ... رجليها لي ينوضو على الكرسي فشلو ... وتالصوت باااش تغووووت بسميييتو مقادرش يخرج .. كتحس بحالا شي حد غاايجيفها ولا شي حد غيقيسها من لوررر لدرجة بدا يتهيئ ليها بلي بصح شي حد كيقيسها .. حسات براسها فالجاثوم .. وبحالا غادي تسخف .. بدات كتصبر فراسها تقنع راسها انها غالفوبيا ديالهاااا عادي وشوية غاايجي لوؤي يشعل الضوووو .... ولكن ماااقدراتش ....
لوؤي حس الضو طفا عليه فدوش وعلا راسو بدا كيحاول يخرج ويقلب على تيليفونو فين مليوح وتفكر بلي خلاه للتحت .. كان شوووية ديال الضو داخل من الزاج ديال داك البيت من الگمرة .. شوية علا حجبانو !!!!! كان تفكر الفوبيا ديالها من الظلااام .... وحاول يقلب على الباب بزززربة والدروج ينزل عندهااا عاارفها مكتستحملش الضلمة .... ولي زاد عطلو هو محافضش الدار مزياااان والظلام كان داااااامس ...
قدس حسات براسها غادي تسخف وقلبها كااااايضرب بقوة كبيييييرة ....رجليها فاشلين وكتحاول تتمشى شادة فطبلة غير توصل لشي حاجة الى لاحتها فالارض يسمعها لوؤي و لا تلقى تيليفون على الاقل .. وهي متأكدة انه على طبلة ولكن يديها فشلوووو .. شفايفها بيااضوو ويبسو و الغوتة تخنقات ليها فحلقها .... كتتهضر بصوت متقطع وغير بشوية كانها كتنازع فشي حد كيجيفها ....
قدس : ل . لو. لو .. لوؤا
راسها ثقاااااال عليها بحالا مبنج ... وكتمنى حااجة وحدة دابا غير تحس بيه .. غير تسمعو .. غير يجي .. غير تتخشى فييييه وتبكي ..
لوؤي : ققققققدس
سمعات صوتو وهي تششششهق بببجججهد وكلها كتتترعد .. وهو كيحاول يقلب فظلام عليها وهي بحال شي حاجة شعلات فيها العافية وخواو عليها مااا باااارد ....
لوؤي : قققدس هههضري نشوووفك فينك ... قدس متخااااافيش غير الضو لي تقطع .. قدس هضضضضري نسمعك ... ( بخوف ) قققدس
قدس : ( سرطات ريقها وكتحااااول بكل مافيها من جهد طلع الصوت ) لل لوووؤااي
لوؤي : ( كيقيس بيديه يعرف طبلة فيناهيا ) مااااتخلعييييش راه غا ضو .. انا معاك انا هنااااا .. ماااااتخلعييش .... قررربي اجي لعندي. ...
قاس طبلة بيديه وبدا يقلب بزربة تاشد تيليفونو وشعل البيل هو يشوفها طايحة فالارض شادة بيديها الكرسي وتلاح بزرررربة عندها عنقها عندو .. غير ضمها لصدرووو وشهقاااات بجججهد وبكل قووووتها كتتتتبكككككي وهو مزيرها لصدرو
لوؤي : ششششش .. متخاافيش انا معاااك .. انا معاااااك .....
قدس غير كتبكي وهو حاضنها كيبوس فراسها شاعل البيل، وهي عااااد رجعات فيها روح مزيرة ليه فحوايجو كتتتتبكي وعلات يديها عنقااااتو بكل قوتها كتبكي بجهد و الصوت تطلق ليها ملي جا عندهاااا بحالا فااقت من داك الجاثوم ولكن باقا الخلعة ماحيداتش منها وباقا كلها كترعد وتبكي بجهد ...
قدس : علااااااااش عع . ع علاش . علاش خليتيني بوووووحدي .... د درتيها ليا بالعااااني ي .. يااااك
لوؤي : حمااقيتي ؟؟؟ طلعت غير غسلت وجججهي انا معااااك احبيبتي واش انا نخلييييك تسطيتي انا معاااااك .. والله ماعرفت غيتقطع ..... متخااافيش .. ( مزيرها عندو كيهدنها ) متخااافي من تاشي حاجة ملي نكووون معاك .. (كيبوس فراسها ) محسااابتنيش غيتقطع ما انا نطلعك معاياااا .. نوضي اجي ... اجي تشربي الما وتنفسي ....نمشي نشوووف مال الضو ....
قدس : ( شدات فيه بزربة ) اااااالااااا لاااا ماتمشيش لاا عفاااااك بقا هنا لاااا ..
لوؤي : جووووج دقايق انا معاك .. ها البيل شاااعل
قدس: لاااااا بقاااا معايا ( كلها كتررررعد محاساش براسها ) نبقى معاك حياتي كاملة فظلاااام على تخليني جوج دقايق بوووحدي لاااااا ... لا بغيتي دابا نتزوج نتزوج غير متبقاش تقوليا غااااتخليني بوووحدي بحال هاااااكاااااا
لوؤي : ( جلس كامل فالارض وتنهد مزيرها لصدرو كيهدنها ) شششششش ..... مغااانخليكش مزوجة بيا ولا مامزوجاش مغنخليكش غير تهنااااي .... اجي نوضي غير بشوية عليك شربي الما ويالاه معاااايا نشوفو مناش المشكل ....
قدس : ماتشوف والو يلاه نمشيو فحاااالنا عافاك صافي .. يلااااااه
لوؤي : ضروري نشوفو اش واقع باش مايكونش شي سيركوي يتحرق شي فيزبيل ويضيعو فالسلوكة ديال الضو .. نشوفو اش كاين وفين المشكل ونمشيو .. ( جابها قدامو كيحيد شعرها على وجهها وجبدها من يديها مقربها لعندو ) متخااااافيش انا معاك ....
قدس: ( بعدات راسها وتخشات فصدرو معنقاااه ) مااااااتبعدش من حداااايااااااا ولا نموووووت
لوؤي : ( جاتو الضحكة وسط الخلعة لي تخلع معاها وعنقها عندو كيمشط على شعرها وطلق رجليه فالارض مسگد الجلسة ) هااااانا گااالس الاااالة .....هااانااا معاك هنا تاايطلع الصباااح ...
سكتات مجاوباتوش كيسمع غير انفاسها كيتنظمو شوية بشششوية فصدرو وهو مبتسم كيدوز يدو على شعرها ولاخرا على ظهرها هي ناعسة على صدرو وهو علا راسو كيشوف فالگمرة والنجوم ....الپيل مشعول للجنب ... اختبائها فيه خلاه ينسى كاع اش وقع. ....
كانت كتاخد انفاسها على خاااطرهااا وهي بحالا فايقة من شي حلمة خااايبة ...
صدرو لي ناعسة عليه .. صوتو .. لمسااااتوو ... الامااان لي حساااات بيه فاااش جاااا وسمعات سميتها بصوتو .. كان واحد الشعور بالامااااان لي خلاها فثوااني تتغلب على الفوبيا ديالها ... لي خلاها فثواني تتخيل راسها كون مكانش لوؤي فحياتها كيفاش غاتكون .... بدون شعور منها .. بدون احساس .. رغما على كبرياءها غرورها وكاع معتقداتها .. عنقااااتو كثررر وهمسااات ....
قدس : الى تخطبنا ... مغتقولش ليااا نتزوجو .... زواااج مزااال ياك ؟؟!!
لوؤي : حتى تبغي نتي ....
قدس : مغاااتبدلش عليا ورا الزواج الووؤي ياك !! ....
لوؤي : ههه .... غايتبدل غا حماقي معاك ... حيت غيزيد يكبر ...
قدس : مغتبقاش تخليني بوحدي فالظلام ؟؟؟
لوؤي : راه على ود داك الضلام باغي نتزوجك اصلا ههه
قدس : الى بغيت نشوف ديسكو كيداير من داخل تديني؟
لوري : هههه نخويه ونديك ...
قدس : والبار ؟
لوؤي : تاهو ..
قدس : ( ناعسة على صدرو وهو كيمشط على شعرها وكتهضر) بغيت نتسارا فشوارع كوريا
لوؤي : نديك ...
قدس : بغيت نشوف تاج محل
لوؤي : نديك ...
قدس : بغيت نشوف صور الصين العظيم
لوؤي : نديك ...
قدس : بغيت نشوف القطب المتجمد وندوز فيه راس العام
لوؤي : نديك ...
قدس : مكنعرفش نكون رومانسية ..
لوؤي : نعلمها ليك
قدس : كنتعصب دغيا ...
لوؤي : كنعرف نطفيك
قدس : خوااااافة
لوؤي : غنحميك ....
قدس : ( علات راسها فيه ) باش عرفتي قياس صبعي ؟
لوؤي : من ديما كنشوفك نتي هي النص ديالي .. يعني قياس صبعك هو النص ديال قياس صبعي انا ....
قدس : ( رجعات نعسات فصدرو ) معجبنيش بزااااف الخاتم
لوؤي : ( بابتسامة فرحانة ) نبدلوه
قدس : ( بدلال ) يلاه نوض جيبو نشوف كيفاش غيجيني فيدي ....
لوؤي : ( علا ليها راسها بيدو لعندو ) ناس كيقولو يااااس .. كيقولو اه .. كيقولو بغييييت نتزوج بيك ....
قدس : واااتااااايعجبني الخاتم بعدا ونشوووف ...
لوؤي بدا كيضحك وتكعد بشوية لطبلة وهي شادة ليه فسروالوووو باش ميبعدش تاجاه الضحك عليها وهز البواااطة وحط البيل دالتيلي مكاليه مع رجل الكرسي وهوما جالسين فالكازو وحيدو من البواطة وقدس طلقات ليه يديها وهو هبط بشفايفو بشوية باسها ليها وقلبها باسها من كفها .. عاد ركب ليها الخاتم بشوية وهي كتشوف معاه وغير الپيل لي مضوي عليهم ..
هز يديها عندو كيشوف فيها وهي هزات يديها فالسما كتشوف كيجاهااا
قدس : اممممم .. مااابييهش .. صراحة جا قدي ... ولكن بحالااااا ( قاطعها )
لوؤي : ( شاد تيلي ) رااااه غاااانطفي الضووو
قدس : لا لا صافي زوين زوييييين ...زوين واااعر
لوؤي : يعني ....
قظس : يعني .. يعني.... خاتم زوين ...
لوؤي : اهااااه !!!!
قدس : صااافي .. اش بغيتي اخر ! .. خاتم زوين عجبني مرة مرة نلبسو فاش نكون لابسة شي حاجة كلااص ....
لوؤي طفى البيل وهي تلاح دغيا لصدرووو معنقاااااه وهو كيضحك
قدس : ( مغمضة عينيها مزيراهم باش متشوفش الضلام) صاااافي صاااافي وااااخا الززمررر وااخا صااااافي ، وآه ....آآه صاااافي ...
لوؤي : هه ... نجيو نخطبوك ملي يجيو عمي وماماك ؟
قدس : واااااشعل ضوووو
لوؤي : وااااش نجيو نخطبوك ملي يجي ( قاطعاتو )
قدس : وهاااادشي راه تحت التهديييد ، شعل الضووووو
لوؤي : واااش نجيييو نخطبوك ( قاطعاتو تاني )
قدس : صاااافي اجييييووو .. غاااشعل الضوووو
لوؤي ضحك وشعل الببيل يالاه غتعلي راسها تهضر تاكان غاص وسط شفاااايفهاااا ....... قبلة خفيفة دغيا فصلها .. ثم اخرى اطول من الاولى .. ثم ثاالثة وراابعة حتى تلف عليهم الحساااب ... والوقت .. والظلام ... وتلفو حتى هوما .....جسدو لبس جسدها .... وكون ماشي الضو لي رجع وضوااا المكان.... كانت غتكون نهايتها هلاك فالظلام ....
وعلات قدس عينيها فيه كتنهج وكاتشوف مع الاعمدة لي شعلو وتاهو خل عينيه وهز راسو كايشوف فيهم مخاطبهم...
لوؤي : ننسى كووولشي ومنسااش خيركم هاد الليلة هههه ..
قدس : ( ضرباتو لصدرو ) مابقيتي حتى درتي لي فراسك ... اشنو طرا لسياستك معايا ... صافي دغيا عييتي ؟ دغيا بغيتي تخطب
لوؤي : مكتنفعش معاك السياسة نتي ... درتها معاك ولقيت راسي غانزيد نضيع فالسنين وهبالك عمرو يسالي ... ( رد شعرها ورا وذنيها كيتأملها وشاف فعينيها ) السياسة مكتنفعش معاك ....داكشي علاش ختاريت نستعمرك هو اللول .... ونتفاااوضو من بعد ........
قدس : واخا عارف بلي السلاح لي عندي كتر من لي عندك ؟ التفاوض معايا اصلاااا صعيب ...
لوؤي : عندك سلاح وااااحد لي مكنقدش عليه ( دوز ابهامو على شفايفها ) هوما هادو ( علا عينو فيها ) الى نتي غتحاربيني بيهم ... مستعد نبقى طوووول حياااااتي كنتحارب معاك ..... يمشي يقود التفاوض ....
قدس : فخبارررك مكتسواش !!!! طلعتي نصااااااب .. هاكا بديتي معايا حتى قبلت تكون بيناتنا علاقة سولتك واش تسنى قلتي ليا اه ... ودابا ها الخاتم فيدي شوية غنلقى راسي كنسني ورقة دالعدول شوية غنلقى راسي كنتوحم .... بلا منحس .... ( شداتو من حوايجو ) راااااك مكتسوااااش
لوؤي : ههههه احبيبتي راه الرجاااال كااااملين مكيسوااوش .. كلهم حيوانات مفترسة .. الزوييييين فيهم كيكون ذيب صباااار ... وانا ذييب آه ....ولكن مااااصباااارش
قبل متجاوب كان قلبها لاحها فالكازو وجا فوق منها غااارق فعنقها بتقبييييل كيأكد ليها مقولة الرجال حيوانات مفترسة كل التأكيييييد....
اليوم الموالي ...
ميناء طنجة ميد ..
متكي على طموبيلتو شاد تيليفونو ... البرد كان محرك على الساحل ... الساعة كانت كتشير ل حداش ونص ...
كيتفرج فالموظفين خارجين جارين لي فاليز ديالهم وكيتسناها تبان ... كل شوية يشوف الوقت ويرجع يشوف للبوابة ...
تابانت ليه خارجة ... كانت بلباس كاجوال عادي وهازة على كتفها كارطابل جلدية ... كاسكيط ونضاضر كحلين ... وموراها صفاء والمساعد جار لافاليز ديالها .... كانت جايا بخطوات سراع وملامح جديين وفيهم تخنزيرة واضحة ، لي خلات تاصفاء تكون غير ساكتة ....
شافتو وتمشات بسرعة بجيهتو تاوصلات لعندو وهو قاد وقفتو وعنقها وتاهي بادلاتو عناق عامر بالتنهيدات مع ابتسامة عيانة...
جود: على سلااامة كابيتين ! ( جابها قدامهو وعلا ليها نضاضرها وهي بقات تلعب بعينيها فالارجاء ) ياك لاباس ؟؟؟ ماعجبتنيش !!!
قسم : صافا اخويا غير راسي كيحرقني شوية .. نتا صافا ؟؟؟
جود : ( باستغراب ) قسم ؟ ياك لاباس !!
مجاوباتوش من غير مشات وركبات فطموبيل والمساعد لي حط الفاليز فالكوفر حيا جود براسو ومشا وجود شاف فصفاء بغمزة متسائلة وهي جاوبات غير بنظرة مستغربة ومشات .. وهو تنهد وركب فطموبيل ... ورك على الزر ديمارا وشاف فيها ....
جود : قاليا الواليد مغتكونيش بوحدك !!! قاليا معاك داك السيد ... فيناهو !
قسم : ( تنهدات وهزات راسها بعد مكان متكي على الزاج وشافت فيه ) جود ... هضر معايا فكولشي .. ومتجبدوووش ليا هو بالخصوووص
جود : ( علا حاجبو بجدية ) اش دار ليك ؟؟؟؟؟ ( قلب ليها وجهها مزير على فكها وغوت) وماااااتحمقييييش ديييييلمي هضري
قسم : ( نترات وجهها منو ) ططططلق ... مادار ليا والو ومكااااين والووو .. ومكاين تاحاجة خاص نقولها .... حاجة وحدة لي كاينة هي متبقااااوش تجبدوه ليا وداك خييييينا صااافي صفحتو تطوااات وخرج من حياااااتي بمرة ( قلبات راسها لجنب وعينيها حمرين وكلها معصبة )
جود : علاش ؟؟؟؟؟ اش واقع !!!!
قسم : ( ضارت عندو ) جووود ... علاش و اش واقع كااايخصووني ... لي كيخصكم نتوما هووو هاداك السيييد متعاودوووش تجبدوه ليا .. دابااا عاافاااك ... كااانرغبببك دير فيا خير واحد هو وصلني للدار نرتاااح حيت باقي ليا شوية ونطيح بالعياااا .. سيييمانة وانا وااااقفة وخدامة ... بغيييت غير نرتااااااح ... عاااافااك ...
تنهدات ونزلات الكرسي لور ونعسات مغمضة عينيها وحاطة دراعها على وجهها وجود كيشوف معاها ... فلخر تنهد تاهو وضور الفولون كيحرك راسو بالنفي ... مزاااجها واضح ماشي ديال الهضرة ومغيفهم منها والو وهي معصبة قد هاكا ..... الامر باين انهم تفارقو ... ولكن خاصو يعرف علاش تفارقو وعلاش هي معصبة .... رجع مارشاريار وخرج من الميناء مخليها على خاطرها تاتبرد عاد يستفسر اش واقع .... واخا الامر مكيخصوش ولكن خايف يكون دار ليها شي حاجة ويمشي ينحيه من هاد الدنياااا .....
الدار البيضاء - مقهى على البحر ....
جالسة رتاج وقدس ... وقدامهم فطور خفيف كيفطرو بهدوء ....
قدس : مانظنش يزيدو حتى غذا .. غالبااا غذا غيجيو صافي ، بابا راه مكيبغيش يغيب على الخدمة بزاف
رتاج : صراحة والله الى كاع عييينا هاد العام .. حيت مارتاحيناش فالصيف ... موالفين ناخدو كونجي ولكن راك شفتي ماجلسنااش .. ( مسحات فمها بمنديل من رغوة دالقهوة وحطاتو وربعات يديها كتشوف فيها ) ونتي .. فوقاش غتبداي القراية ..
قدس : مزال ليا واحد عشرين يوم ....
رتاج : وشنو كتفكري ورا لاليصونص ؟
قدس : ههه ... ( حطات الفنجان مبتسمة ) انا احلاااامي ساااهلين اخالتو هههه ناخد غير الماستر ديالي بحال خوتي .. ونبدا فشي مشروع صغير ....
رتاج : ( بابتسامة فخورة بيها ) اخر وحدة كنا كنتسناوها دير التجارة هي نتي ههه
قدس : انا يمكن غاتضحكي عليا .. ولكن حتى الى درت مشروع مغاديش نسييرو .. انا باغا داك الحيااااة العاااادية ديال ناخد ماستر ... وتكون شي حاجة فسميتي باش بابا ميبقاش مصدعني .... ونمشي لدار نگلس هههه انا ماعنديش مع تمااااارة .. انا باغا هاداك لي ندي هو لي يخدم عليا .....
رتاج: ههههه زوينة هادي ههه ومغيجيكش الملل ؟ الجلاس فدار راه كيخنق ! عامر روووتين ابنتي !
قدس : لا شكرااا .. عامر روتين ليكم نتوما انا عندي بزاااف مايدار .. كاينين المسلسلات .. كاين السپا .. المساج ... السبور ... نتعلم نطيب مرة مرة ... نسااافر .. نتسااارا .. نمشي ندير شوووبينغ .... عطى الله مايدار ... اما باش نفيييق بكري ونكون مسؤولة ونخدم ومنعرفت اش .. لا شكراااا .. خليت ليكم الاندبندنت ووومن .. انا باغا نكون هااااپي واااايف خدام عليها رااااجلها .... ( كتشرب من فنجانها بهدوء)
رتاج : هههه اول اسماااااعيلية كتفكر بحال هاكا وآخر وحدة ههه ...ولكن لنفترض هاد الراجل ماصدقش .. ضيعي !
قدس : نووو !!! عندي بابا الله يخليه ليااااا يعيشني برانسيس حيااااتي كااااملة ( رتاج كتشوف فيها مبتسمة ) واش انا من نهار تزاديت وانا كنفيق بكري ونحفض ونقرا ونزيد نخدم عاد ! لاااا .. الرجال قوامون على النساااء ، هو يخدم ....
رتاج : على ذكر هو .... قررتي شكون يكون بعدا !!
قدس : ( بابتسامة ) ولدك اخالتو ...
رتاج : ( بضحكة ) هي فكرتي فهضرتي دلبارح !!!
قدس : ( حطات فنجانها وشافت فيها متنهدة ) خالتو .... سمحي ليا ولكن .... انا خرجت مع لوؤي لبارح .... ( رتاج عوجات راسها وربعات يديها ) لقيتها فرصة باش نهضر معاه حيت ميمكنش هادشي نفكر فيه بوحدي ..
رتاج : اهاه ... وباش خرجتوها !
قدس قربات لصاكها لي معلق فالكرسي وحلاتو وجبدات هاديك لابواط و حطاتها على طبلة ورتاج علات حجبانها وهزاتها ، غير حلاتها وهي تحل فمها كاااامل وبانت الفرحة فعينيها تاضحكات وشافت فيهاااا ...
قدس : ( بابتسامة ) طلبني للزواج البارح ....
رتاج : ( سدات البواطة وحطاتها الفرحة باينة فعينيها ) اوا !!! شنو قلتي ليه ؟؟؟
قدس : ( تنهدات ) فلول جاتني صعيبة ... ولكن معرفتش كيفاش دار ليها تاقلت آه ...
رتاج : ( بغات تغوت ولكن ناس جالسين ولقات راسها كبرااات على هاد الحركة لي غادي دير وهي تجمع راسها وشدات يديها ) الله يسسسسعدكم احبيبتي ... الله يجججمع بينااااتكم فالحلاااال ....
قدس : امين ...ولكن اخالتو قبل من كوووولشي ... ( بترجي ) عاااافاك .. نتي كنتيق فيك هو لا ... عافاك انا مباغاش نتزوج دابا ..... غانديرو غير خطبة قدام العائلة باش عمي عدنان ميبقاش يضغط عليه وباش منبقاوش خييفانين .... ولكن زواج لااااا
رتاج : تانا احبيبتي مغانبغيش تزوجو دابا .. تاهو باااقي صغير .. على الاقل بعدا حتى تاخدي ليصونص ....
قدس : لاااا .. تااناخد الماااستر ونسالي قرااايتي ونرتاح واحد العام عاد ندخل فمسؤولية الزواج ....
رتاج : ان شااااء الله ... لي دارها الله هي لي تكون .. حنا كنهضرو وصافي .. المكتااااب راه مقاااااد ابنتي ....
قدس : ودابا انا غير قلت ليك حيت كنثيق فيك نتي اخالتي .. غانديرو خطبة آه .. ولكن راه الى بدا كيدخل بزاااف فحياتي راه غانحيد هاد الخاتم ....شوفيها من المنظور ديال بنتك ماشي خطيبة ولدك .. واش تبغي بنتك يجي شي واحد يزمت ليها حياتها ؟ نتي عارفاني اخالتو مكنافقش كنقول كوووولشي داكشي لي فخااااطري .... انا قبلت الخطبة آه .. ولكن مستحيييل نخليه يزمت ليا حياتي ....
رتاج : هذا راه غير خوف فيك الداخل ابنتي ، الزواج ولا الخطبة عمرو ماكايزمت الحياة .. بالعكس كتبدا حياة اخرى معاه هو .... ولكن انا هادشي منهضرش فيه دابا حيت مغتفهميهش بالهضرة .. غااانخليك حتى تعيشيه وغتفهميه بوحدك .. نتي راااسك غتلقاي راسك الا بغيتي تخرجي تمشاي غتمشي معاه هو .. ولا بغيتي تضحكي كتعيطي ليه هو ... هادشي غاديريه بووووحدك بلا حتى مايقولو ليك شي حد ولا يبززو عليك شي حد ...
قدس : نديرو راسي اه .. ولكن يتفرض عليا لا .. مبغيتوش زعما يقول صافي هانا خطبتها صااااافي غاااانوض ندير عليها سي السيد ......
رتاج : انا غنهضر معاه فهادشي .. لوؤي راه ماغيبغي ليك تاحاجة من غير مصلاحتك تاهو ... واحسن مادرتو ... حيت كيفما قتليك ، اييييما العائلة تعرف ايما حبسو هاااادشي .. حيت انا منقدرش نبقى ساكتة كنشوف فلامار وانا عارفة ولدي داير علاقة مع بنتها فالسر ! مابغيتش نضيع صحبتي وعلاقتي بلامار ..... من نهار عرفتكم بجوج وانا جبل محطوط على كتافي .... ودابا عاااد تزاااح ( جرات هاديك البواطة دارتها فصاكها ) هادي غتبقى عندي تانجيو لداركم ونجيبها مع خاتمو باش ميشوفوهاش عندك ....
قدس : داكوغ ... حسن ... لاشافها جود ولا بابا نهاري ميطلعش فيه الضو ...
رتاج : اصلا مغنعطلوش هادشي .. غير يجيو باباك وماماك ... ونبداو نفكرو اشمن نهار نجيو ...
قدس : ( وسعات عينيها ) لااااا .. غير بشوية اخالتي .. خليو تايفوت الماتش ديالي على الاقل
رتاج : كل ماتعرف هادشي بكري كل ما مزيااااان وكل ماهربتو من المشاكيل .... ( حيدات ليها شعرها على عينيها ) متخافيش ابنتي مغايكون غير الخير .. وكون ماعارفة ولدي كيداير ... مغنفرحش ليكم .....
قدس : ( حطات يديها على يد رتاج ضاحكة ) فخبارك انا فرحانة لي غاتكوني نتي هي حماتي كتر ما فرحانة بلوؤي ! هههه
رتاج : هههه سكتي عنداك يسمعك هههه
قدس : عرفتي اخالتو من دييييما كنكون هازة الهم بشكون هذا لي غاندي وعاااائلتو وكيغاتكون ماماه وواش غتعاملني زوين ولا لا ههههه فلخر لقيت راسي ماماه هي ماما اصلا ههههه
رتاج : الله اودي ابنتي ... شكون عندنا حنا عز من ولادنا ....
قدس : والله تازواج بلوؤي فيه بزااااف دالمزايا .. اللول هو تايبغيني .. تاني هو غيييير فعائلتي ، ماغنمشي فييين مغنجيب براني للعائلة .... مرتااااااحين ههههه
رتاج : ( كتشوف فيها كيفاش فرحانة واخا مكتبينش ودايرة العائلة سبة ) الله يدومها رااااحة ...
قدس : امييين ... ( شافت لساعتها ) جود وقسم غيكونو قربو يوصلو ...
رتاج : ( هزات ساعتها لقاتها قربات الوحدة ) انا وياك خلطنا الفطور والغذا .. نوضي يلاه نوصلك .. ( ناضت كتحط تيليفون فصاك و خرجو باتجاه الطموبيل ) بلييل دابا نجبد الموضوع مع عدنان وباشما كان دابا نرد عليك فميساج ... ( بحماس ) غااااايفرح لاسمع هاد الخباااار ....
قدس : عرفتي ...واخا هاكاك حشمانة منو هههه عمي عدنان كنموت عليه بحال بابا ... ولكن فشششكل جااااتني ههه
رتاج : بالعكس احبيبتي عادي .. كون تشوفي على جبل تزااااح على كتفنا .... الله يسعدكم يااااااربي ....
قدس : ( تكات على كتفها غادين جيهة الباركينغ ) اميييييين
رتاج : بليل دوزو تعشاو معانا نتي وخوتك
قدس : منظنش اليوم يبغيو .. قسم كتجي عيااانة .. خليها تالغدا لامجاوش بابا وماما ولا لمرة اخرى ...
رتاج : ان شاء الله ....
باحة الاستراحة ...
طريق كاملة وهي ناعسة ... او بالاحرى مغمضة عينيها باش تتفادى اسئلة جود والتحقيق لي غايدير معاها .. تاحسات بيه وقف عاد كعدات الكرسي و تكات كاتشوف قدامها، ربع ساعة وهي على هاد الحالة ... غمضات عينيها مزيرة عليهم وعلات راسها للفوق كتحاول تتنفس وصدرها ضياااااق ..
تاحسات بالباب تحلات عليها وضارت عندو بعينين عيانين ... كان هاز فيدو جوج طيسان دالقهوة و لاخر مادو ليها ، شداتو عليه وتنهدات جغمات منو ، كانت فعلا محتاجاه ... اما هو متكي على جنب طوموبيل كايشرب قهوتو وكايتسناها تصحصح شوية ... هز تيل شاف شحال فساعة حيت داير مع واحد يجيب ليه شي سلعة ...ورجعو لجيبو وشاف فيها ....
جود: شوية !
قسم : ( علات عينيها فيه ) انا بيخير آجود ....( بابتسامة ) بيخير ...
جود : ( تنهد وحط الطاس على سقف دطموبيل و تحنى عليها شاد بيديه فالباب ططموبيل المحلولة ) اهاه .... ودابا ، نقدر نعرف مالك !
قسم : ( شافت قدامها غير ساكتة )
جود : يلاه ماحدي كنهضر بشوية ومبرد ... اش دار ليك هداك خينا !! همم !!!
قسم : ( علات عينيها فيه حمرين وعامرين بالدموع )جود ... حنا تفارقنا .... كلها غايشد طريقو .... ( رجعات شافت قدامها ومسحات دمعتها لي نزلات كتحكم فراسها تبقى ثابتة ) كان ... كان الفواياج الغرض ديالو نزيدو نتعرفو شوية .. ويعرف المجتمع ديالي كيداير .... لاسف ....( بغصة فحلقها كتخرج الهضرة بزز ) ماتفاهمناش .. وكلها شد طريقو ....
جود : ربع شهور هادي ويالاه نتوما تعرفتو وماتفاهمتوش !! علاش كنتو مفاهمين شحال هادي !! اش وقع اقسم بلا متزوقي ليا الهضرة ... قاليك شي حاجة ماهياش !!! دار ليك شي حاجة ماعجباتكش !!
قسم : كنا مفاهمين حيت كنت غي انا لى كنعرف المجتمع ديالو .. وانا ماعنديش مشكل فيه ..ملي عرف هو المجتمع ديالي .... لقى عندو مشكل معاه ....وتفارقنا .....
جود : انا من لول ماعاجبننيش هاد الخرا كامل ومرتاحيتش لهاد التخربيق ديالك .... مرتاحيتش ليه ومغانرتاحش ليه ... ولكن راجع اللور ومكندخلش .... اولا حيت نتي بنت كبيرة وبعقلك ...تانيا حيت الواليد مكلف ... منقدرش ندّخل ...ولكن راه لاكان دار ليك شي حاااجة برب تانحرقو فدارو واااقف .....
قسم : ( علات راسها فيه بزربة ) مااداار ليا والو اجود ... تلااقينا مزيااانين وتفارقنا مزيااانين ...
جود : العصبية باش تلاقيتني قبيلة وهاد الوجه لى كانشوف قدامي ..مكايبينوش ليا هاد البساطة لي كتهضري بيها ..
قسم بقات شحال ساكتة كاتشوف قدامها عاضة الى شفتها التحتانية ...ساكتة وحابسة البكية وجود تنهد وزاد تحنا كتر تاتحطاات ركبتو فالارض وجبدها عنقها عندو وهي تنهار كلها على كتفو كاتبكييي بصوووت مسموووع وكتتشششسهق وهو كايدوز يدو على شعرها ومعلي حاااجبو بغضب ....
قسم : ( بحرقة ) ورجعنا تاني .... رجعناااا للفين تلاااقيييينا ، ررجعت قسم لي كانت كتفيق باش تمشي للخدمة .... ورجع هو اصيل لي كايفيق باش ينزل للمرصى. ...... رجعناا تاااااني للنقطة لي تلاقينا فيها اخوياااااا ......وخلينا داك الحياة جديدة لي بينانها كلها ورا ظهرنا .. كانت حلمة ... ودابا فقنا ..
جود مكانش كايهضر من غير مخليها تنهار على خاطرها وتخرج كاع اش فقلبها ....
قسم بعدات عليه بشوية وعلات عينيها فيه وهو كايشوف فيها و يتجنن عليه فللداخل ديالو وكون يشدو مغايطلقش منو تاااطلع روحو بسبب هاد دموع كاملين لي تسبب فيهم ، وهي وجهها كان حمر وفااازك .. كان كايبان بحالا قلبها طاح من شي بلاصة عاااااالية بزااااف .. فجأة ابتسمات ابتسامة كلها مضطربة والدموع نازلين....
قسم : كان ديما كايقول ليا ... طريقنا طويل ....( عضات على شفتها ) بالعكس ... صدق قصيييير بزاف .... ماحسيتش كاع كيفاش دغيا وصلنا !!!!
جود : ( تنهد وجابها قدامو وبدا تايمسح ليها دموعها ) قسم ... كتجيني غييير الدوخة وكندير جهدي كامل باش مايوقع ليا والو غير باش منشوفش دموعك فالزاجة دالانعاش ... ودابا وانا كنشوفك كتسييليهم على واحد آخر ... لي انا معارفش واش يستاهلهم ولا لا ... العافية كااااتشعل فيا ... راااه مزال ماخلااقش اقسم لي يدخل لحياتنا يرونها ... ماشي حنا خلييينااا كولشي مورانا غا على ود الوالدين والخوت مانبكيوهمش يجي واحد آخر يبكيهم ليا !!!!
قسم : ( شدات يديه بجوج ) جوود .. تيقني الى قلت ليك راه تاهو دابا غايكون كفس مني ... غير هو مغااايبكيش .. مكيقدرش يبكي حيت مولف يكون ديما هو داك الشخص لي داير بحال الحيط، كاينسى بعد مرات راسو واش بنادم فيه الروح ... و تيقني الى قلت ليك بلي يستاهل هاد دموع .. ويستاهل كاع اش درت عليه ... هو ماشي واحد بنادم لي خايب .. وانا مكنبكيش حيت دار ليا شي حاجة .. انا كنبكي حيت حلمت بزاااف و فقت قبل مانحقق .... كنبكي بحال شي واحد كان محبوس بالمؤبد وجاه سراح وجمع حوايجو و توادع مع النااااس وبدا يخطط شنو يدير فاش يخرج .. شوية قالو ليه لا غير غلطنا ليك فالسمية ونتا مغاتخرجش... وكيحط داك لافاليز يرجع لسريرو ينعس ومااالقى تااااحاجة من داكشي لي حلم بيه وخطط ليه وكان مأكد انه غايعيشو .... واقع ليا بحال هاداك لي كان مخطط يسافر ويجمع حوايجو وتوادع مع العائلة و الناس ، فللخر تلغى ليه السفر !!! لا هو غاايسافر لا هو عاارف اش غادير داك الليلة .. هاديك لحظة ادراك لي كتجي هي لي صعييييبة وهي علاش كنبكي ( كتمسح دموعها ) انا راه مبغيتوش غير هو .. بغيتو هو وحيااااتي لي قاديت معاه ... ولكن الغلط لي دار .. ماشي حيت مفهمنيش لا .. حيت كان قااادر يفهمني ومابغااااش يفهمني ....
جود : راه بعد المرات اقسم ... كنبغيو نتقاتلو على قبل بعضياتنا ... تانلقاو راسنا فلخر غير كنقتلو فبعضياتنا ... الا كانت علاقة غايجيك موراها غير البكا ماعندها لاش اقسم ( زير ليها على يديها ) نتي باقا مادرتي والو ... ماعاطية حتى وعد خاصك توفي بيه .... الى لقيتي راسك هاد العلاقة غتجيب موراها غير المشاكيل .. بلاااااش اقسم .. كيفما تسنيتي 28 عام غتزيدي تسناي .... مااتبكيييش بزاف على احلام مغيتحققوش .. حيت راه شجرة ملي كتقطع مكطيحش للتحت .. كطيح للجنب لي مايلة ليه .... مكنربطوش الاحلام بشي واحد ... احلامنا كنربطوهم بيينا وكنحققوهم حنا .... الى عندك شي حلم حققيه نتي متسنايش من شي واحد اخر يحققو ليك ! ...ويلا كنتي كتشوفي هاد السيد غير واحد خينا تحققي معاه احلامك ... بلااااااش اقسم ... بلااااااش اختي ...
قسم : ( علات راسها لفوق عاضة على شفتها ودموع كيسيلو ) وخا نعيا نوصف ليك .. التغيير لي دار لحياتي منقدش .... واخا نعيا نوصف اش كيعني ليا منقدرش ... واخا نهضر عليه تالصباح .... وعارفة واخا نزيد مية عام بحالو مغنلقاش ...
جود : الى كنتي غتفرقي معاه باش تقلبي على واحد بحالو غا خليييك معاه هو نيت !!! اش هاد المنطق دالخرا !!!!
قسم : ( علات عينيها فيه دمعانين ) تعقل على اخر عيد زواج ديال ماما وبابا !
جود : ( باستغراب ) عاقل
قسم : بغيت تطرا ليا شي حاجة لي تخليني نرجع ليه ... ننسى كوووولشي ونفيق فداك النهار هاداك .... ( بانكسار ) كنت نهار الاثنين مغاانمشيش لجمعية نشوف المنحة .. كنت غنمشي لصيونص دالليزر لي أجلتو .... كون داك نهار مامشيتش لتما ومشيت لصيونص ديالي ، ولا غيييير كون قلت بلاا مادخلو ليا داك البنت ، ولا على الاقل نكون ماشفتش غيييير تاريخ ازدايدها وعيد ميلادها ... مكنتيييش كاع تلقاني دابا كنفرع ليك راسك بالبكا ديالي على علاقة مستحيلة .... علاقة دايرة بحال شي حاجة ثقيييلة كندفعوووها شوية بشوية بجهدنا كامل ....وفاش وصلات للجرف تكركبات لينا بززززربة لتحت تامقدرنااش نلحقو عليها .... ( حطات يديها على قلبها ودموع تاينزلو ) بحاال شييي خنجر مغرووز فيا اجود ، ماقادة نحيدو ماقدة نخليه ... ربع شهوور تعلمت فيهم نضحك .. نعطي وقت لراسي .... تعلمت فيهم نعاود نحلم من جديد ....مشااااو !!!! ....( تنهدات ) احسن حاجة خاصني ندير ... هي ننسى هاد ليام .... كانت حلمة زويييينة .... كانت كتستحق كاع هادشي لي درت على قبلها وماندمااانة على والو ... كان كولشي فيها كيطلب مني نتقاااتل .. ولكن خاصنا نفيقو منها ... حيت ميمكنش ... ميمكنش غير انا لي نحاول .... ميمكنش نضغط كتر عليه مادام معاجباهش حياتي .. ميمكنش نتولد من جديد بطريقة لي بغاها هو .. ( بانكسار ) انا قسم الاسماعيلي ... وهو اصيل الشريف ..... والمكتاب مبغاناش بجوج .....
جود : ( ماعرف مايقول ليها ورجع قاد الوقفة ديالو ) خليك دابا ترتاحي اقسم .... رتاحي وفكري مزيان .... ملي قد هاكا حفر فيك لداخل ماتسرعيش .... فكري مزيان .... ملي ترتاحي ونهضرو ، بطريقة اخرى ... مزال ماساليناش. ...
غمضات عينيها مزيرة عليهم حيت عارفة مزيان غايقول ليها تنهي هادشي وتنهي هاد العلاقة .....
وهو دخل فطموبيل ديمارا وزاد وهي بقات مغمضة عينيها كتحاول تبرد هاديك الغصة لي فقلبها وتحاول على الاقل تتخطاها باش تعرف تفكر ....
∆قصر الاسماعيلي - 15:30
نازلة قدس فالدروج بعد ماشافت طموبيل دجود دخلات للقصر ... كسيوتها طويلة شيبية فندها فتحة للقدام .... وشعرها مرفوع للفوق واقراط ذهبيين كبار... ابتاسمات ملي بانو ليها داخلين وجود جار لقسم الفاليز ديالها وهي تابعاه طااافية وعيانة .... غير شافت قدس تبسمات ليها وقدس قربات عنقاتها ...
قدس : على السلاااااامة اختي ....
قسم : ( عنقاتها مبتاسمة بزز وعيانة) الله يسلمك احبيبتي
قدس : ( عنقات جود ) تعطلتو ...
جود : سمحنا فيك الفارة ...
قدس : واايييه بقيت بوحدي والبارح دوزتو مع عمي عدنان ( عنقها للجنب وداخلين للدار ) جيت صباح قتلني القنط فاش مكاين تاواحد .. دوزت الوقت غيير مع اسبروو صونا ليا ....
جود : اش كيعاود ؟
قدس : ( ضحكات ) عرفتو .. راه قاليا فاي لحظة يقدر يجي
جود : ( تلاح على الفوطوي جلس معلي راسو للفوق كاتكسل مع لعيا دطريق وتا قسم جلسات عيانة غير كتنهد وقدس جالسة حداه ) واايلي !!!
قدس : سولتو واش مغيدخلش هاد العام .. قاليا بلي لاكملو ليه شي اومور ... يقدر يدير لينا شي مفاجأة .. توحشناه الصراحة ( شافت عند قسم ) قسوووم ؟؟؟؟ مالكي ساكتة ! ( شافت فجود ورجعات شافت فيها ) ماعجبتينيش ؟ ياكما طرا شي مشكل فالفواياج ؟؟؟؟
قسم : لا احبيبتي كولشي مزيان غير راسي ضارني ( وقفات كتعوج فعنقها ) انا غنطلع نعس والله تااا عيااانة .... ( تحنات باست راس قدس ) نفيق ونونسك شوية ...دابا اختي باغا غااانعس ...
خلاتهم ومشات وجود متبعها بعينيه مطلع حاجبو وقدس كترمش بعينيها وضارت شافت فجود
قدس : اش واقع ليها ؟؟؟؟ ياك لابااااس !!!
جود : ( تنهد ) اودي هاديك تادارت 28 عام وبغات ترجع تبرهش علينا .... خليها تادير عقلها فراسها وتكون هضرة اخرى ( ناض ) انا داير مع واحد السيد ( شاف لساعتو ) ديجا تعطلت عليه غنمشي نشوفو
قدس : ( محزنة ملامحها ) هاااء !! من قبيلة وانا كنتسناكم فلخر وحدة طلعات تنعس وواحد غيخرج !!!!
جود : يلاه تمشي معايا الى قنطانة ... خليها تجلس بوحدها ... يالاه تحس بختها لي نزلات موحشاها وخلاتها وطلعات ....
قدس : ( شافت لدروج محزنة ملامحها ) ماعليش تاهي راه عيانة يلاه وصلات. ..
جود : سيري لبسي عليك شي حاجة لحقي عليا انا نتسناك فطموبيل ..
قدس : واخا ... فين غانمشيو بعدا !
جود : للكاراج ..
يالاه غتهضر هوما يشوفو ماجدة داخلة وقدس علات حجبانها وجود علا حاجبو تاهو مافهمش علاش جايا هادي فهاد الوقت ... كانت ببوي فراند ديال دجين طاوياه من تحت مع صندال عااالية وطوب بيج وشعرها مطلوق وصاك ديور على كتافها وسويعة ذهبية ... بارفانها كان سابقها وشافت لقدس وضحكات وجود غير كيتنهد ...
قدس : ( عنقاتها ) ماااجدة ! ( جابتها قدامها كتشوف فيها ) اش هاد السوربرايز !!!
ماجدة : ( مكتشوفش جيهة جود ) غير كنت دايزة من هنا وقلت نجي نشوفك ( كتشوف لجنب فجود ) اصلا بقاتلي غير ربعيام ونسافر ... قلت نشبع منك شوية .... نتي بووووحدك لي غنتوحش بزاف صراحة
قدس : اااه صافي غتمشي!
ماجدة : واضروري ... المستقبل هو اللول ...
جود : ( تحنحن ) كيبقات ماماك شوية !
ماجدة : ( ضارت عندو ) اهليين جود .. كاع ماشفتك ههه صافا عليك !!! اااه ( شافت فقدس وفيه ) وسمحوو ليا داك نهار محضرتش للخطبة .. حيت مابغيتش نخلي ماما بوحدها .. صونيت باش نعتذر ليك ولكن بلوكيتيني ومالقيت كندير نبارك ليك.... ( قدس علات حاجبها ) ماشي مشكل هاانية .... مهم مبرووووك عليك وعلى بيلساان .. تواتيتو ، ولاد العم جييتو فنيييين مع بعضياتكم .. حتى هي تستاااااهل شحال وهي تسنى فييييك ...
جود : ( تنهد ) ممم ....ودابا قلتي كولشي ومزال ماقلتيش ليا كيبقات ماماك ؟
ماجدة : لاباس عليييها ربي يخليييييك ( شافت فقدس ) قالو ليا عمي ومراتو مسافرين ! الى مزال ماتغديتي ننزلو نتغذاو انا وياك للتحت .. نيت توحشت الجو دالمنطقة ....
قدس : ( كتشوف فجود وتهضر محرجة وشافت فيها ) لا كنت خارجة مع جود ولكن ماشي مشكل نزلو ...
جود حرك ليها راسو باه ومشا وماجدة تبعاتو بعينيها لي عامرين بالفخر لراسها لي ماداتهاش فيه ، و شافت فقدس
ماجدة : فين قسم ؟ مزالا ماجات !!
قدس : جات غير طلعات تنعس مهم تسنااي نجيب صاكي ونجي ...
جلسات ماجدة جات عندها الخادمة طلبات غير عصير و قدس طلعات لجناحها يلاه غتهز صاكها وهي تسمع تيلي ومشات لجهة طابل دونوي ، غير شافت نمرتو وتبسمات ....
قدس : لوؤي
لوؤي : ( بصوت ناعس كيتجبد ) صبااااح الخييير
قدس : عاااد فقتي !!!
لوؤي : امممم ( كيهضر ثقيل وتقلب فالفراش ) جاو خوتك !
قدس : سي جاااو ... جود خرج وختي نعسات .. انا جات مورايا ماجدة غنزل نتغداو انا وياها لتحت
لوؤي : فيين !!
قدس : غير هنا فلازون ..
لوؤي : امم ... ومتبقايش تكتري مع داك خيتي بزااف
قدس : لوؤي ! بدييينا !
لوؤي : هااااهوا ساااكت .... صبحتي مزيان آلحب ؟
قدس : ( كتجمع فصاكها لي تحتاج ) مزيااان ... فيقاتني خالتو رتاج وفطرت انا وياها وهي لي جابتني لدار .. وو .. وراني ... ( تنهدات ) قلت كولشي لخالتو رتاج
لؤوي : مزيان .. حيدتي عليا تمارة .. يالاه سيري تانعاود نصوني عليك .. انمشي نهضر معاهم ... دوزي نهار زوين ....
قدس : ههه داكوغ ...
قطعات عليه وهزات صاكها ونزلات عندها لقاتها كتسناها حطات كاسها ومشاو باتجاه طموبيل ماجدة ...
مسافة الطريق وكانو وصلو لواحد من فنادق المنطقة ... كان كيطل على البحر وعامر بالناس لي جايبن يديرو الكواد ....
دخلو من الباب الخلفي وطلعو للجناح الخاص شدو طبلتهم قريب للزاج ... خداو غداهم ... وجلسو كيضحكو ...
ماجدة : دابا المشكل مكانش فشعرها .. المشكل فداك الاكستانشن لي طااار ليها فاش تحركات الكوبطير ... ناري راه كنا غنموتوو بضحك عليها ههههه
قدس : وداك التسنطيح كااااامل ومامشاتش تاداوي شعرها وتقويه !!!!
ماجدة : ناري عرفتي الشفاررر طااارو الشعر طااااار .. كنا كنتسناو شي حاجة طير من صدرها تاهو ههههه
قدس : وجالسة داك نهار كتنمر عليا حيت غلاضيت !!!!
ماجدة : ويلي عرفتي راه شوهة كولشي ضحك عليها هههه الكلوب كامل كان كيهضر عليها لبارح ( حطات صاكها لور والسيرفورة كان كتحط الغدا ) مييغسي .... ( مشات السيرفورة وهي بدات كتنقب ) على ذكر الكلوب ....واش نتي مزال ماباغا تشرفينا ؟ قتلوووني اصاحبتي بالتسوال عليك .... حكيم سولني عليك البارح .. قاليك كيصيفط ليك فانستغرام والسناب ومكتجاوبيهش
قدس : ( كتاكل وتهضر ) انا راه شحااااال هادي مادخلت لانبوكس ديالي .. وبيني وبينك مبقاش عندي معاهم بزاف .. وليت باغا غاندوز الماتش ديالي نخرج تامن الكلوب دسبور ....
ماجدة : اويلي مالكي ؟ شرفتي قبل الوقت !!!
قدس : ماشي قضية شرفت .. غير داك الكليكة ولاو كيبانو ليا برااااااهش ... مبقاوش كينغموني
ماجدة : ناري عرفتي البارح فالكلوب جا ولد مول شي .... نااااااري كاااايسطي اصاااحبتي ، كون تشوووفي على طووولة وعلى تجريدة .... دخل ليك فسباق مع رحاااب فالخييييل ... كانت غتموت لينا البارح بالحماس ..... كون كنت نتي تما كون طيحتيه ههههه هاد البلانات غير ديالك هههههه كون ماخليتيه لتاوحدة فيهم هههه ملي كتكوني فشي قنت مكيبقاوش يطمعو معاك فشي وااحد ههه كون راك لعبتي بيه تاني شي يوماين وسيفطتيه عند خوتو ههههه توخشت هاد البلانات ديالك اصااحبتي
قدس: ( تنهدات ) اوا كل وقت بوقتو ... دابا انا مشهية غا شي سفر ولا شي حفلة .. عررررفتي قنطاااااااانة خصوصا فعائلتنا هانتي شفتي كنا غير من موصيبة لموصيبة .. نشطنا شوية داك نهار فخطبة جود وبيلسان ( ماجدة قلبات عينيها ) ولكن دغيا سالات الليلة ...
ماجدة : وانتي مابغيتيش اصاحبتي تجاوبي البنت .. شحال وهي تصيفط ليك ... وديما كتوصيني نقولها ليك ... راه عيات تعرض ليك لبارتي د توديع عزوبيتها ومبغيتيش
قدس : واش ايمان ؟ واش مزال مادارتوش ؟ ياك كان عندها البارح نورمالمون !
ماجدة : الا راه أجلاتو على ود وداد كانت مسافرة ... راه عندها بعد غدا
قدس : مااعرفتش والله ... حيييت مستحيل يخليني بابا
ماجدة : كولشي عندو الحل .... الى بغيتي تمشي غير قوليها ليا انا نعاونك ... غادي ديرو فواحد الكلوب نايت فعين دياب يالاه تحل ..... وراه عارضة غير للبنات يعني ماعندك مناااااش تخاااافي .... انا بعدا من دابا متحمسة .. ياختي غااندوزوها زاااااااااهية
قدس : ماعرفتش ... دماغي عامر بالماتش دابا ....
ماجدة : ويلااااه تونسي شوية اصااحبتي كووومااان !!! شوفي كيوليتي بحال شي شااارفة تهضري وتنهدي ... كاع لبنات غيحضرو مالكي نتي ماتحضريش !!!!
قدس : كنهرب من المشاكيل مع بابا اماجدة راه مستحيل يخليني
ماجدة : ماعندو منييييين يعرف ازمر .. زايدون ياك الالة قسم مدوزة ليك سفر مع شي صااااحبها فالبااااطووو و قالك داك صاحبها كان ضيييف د اسد الاسماعيلي يااالالة ... ونتي تامع صحاباتك مكيخليوكش !!!! شهاد الفرزيات ؟
قدس : ( حطات كاسها معلية حاجبها ) وباش عرفتي نتي هادشي ؟
ماجدة : صاحبتي كانت تما وقالتها ليا .. الباطو كامل عرف قسم معاها صااااحبها ...
قدس : ( بتخنزيرة ) ماجدة ... متخرجيش هاد الهضرة على فمك ، مزال مكاين والوووو .. عنداك يسمع شي واحد هاد الهضرة
ماجدة : واش منيتك اصاحبتي واش انا برانية ؟ بعد المرات كتحسسوني بحالا انا غريبة عليكم .. هانتي شوفي غا نتي انا مكنخبي عليك والو ونتي ماقلتيش ليا قسم عندها شي واحد فحياتها تاعرفتها من صاحبتي
قدس : حيت ماكاين والو .. وهو مشا معاها غير صدفة ماكناش معوليين عليها ... راه ماشي صاحبها غير كاايتعرفو وبابا ماقال والو حيت صديقها هااداك .... وانا براسي تاقالتها ليا ماما .... معارفا والو .... وزمي فمك عنداك هاد الهضرة تمشي تخرج ، كنضحكو آه . ولكن اومور عائلتي منعقلش عليك اماجدة
ماجدة : امممم لا لا باينة باينة صديقها الله اودي .. مع قسم تبارك الله كادييير الاصدقاء .. ممم ايينيواااي ... انا ماسوقيش فيها هي منخلااااني تانا مكندخلش فيها ضبر راسها ... ولكن نتي عندي عزيييزة وقريبة ليا .. كنقوليك مدفنيش حيااااتك راك باقا صغييييرة .. عيشي اصاحبتي ويالاه تفوجي معانا ... الى بغيتي تمشي بلا مايسيق الخبار باباك انا نجي عندك تالدار ونديك فطموبيل بلا مايشوفوك الكارد ونردك ....
قدس : وامن هنا لتما يحن الله .. تانجاوب البنت بعدا ونشوف هاد الحفل كيداير وعلامن عاارضة
ماجدة : ( كتشرب من كاسها وكتشوف فيها هي لي جاالسة ابتسامة شر كتبان على وجهها ) بشششوية عليك احبيبتي ... تيليفووون بيناااتناااا
كملو غذاهم ونزلو جهة البحر يتسناو الغروب شادين قهيوات كتعاود ليها على كاع الجديد لي دازها هاد الصيف .. وقدس كضحضك حسات بماجدة رداتها شوية للحياة لي بعدات عليهااا ورداتها لهاداك الجو لي كانت عايشااه .. جو المرااهقة و الضحك والتنمرر .....
اما قسم ، نهار كامل داز غير فبيتها كتحاول تسد عينيها وتغرق فالنعاس لي من البارح وهي كتتمناه يكحل عينيها ولو ربع ساعة فقط .... كتبقى تتقلب ففراشها حتى كتلقى راسها تكات على كادر د السرير شاردة فالتفكير و او تلقى راسها على الكرسي فالبالكون مربعة رجليها وسااااهية فشي نقطة منعدمة .. شي نقطة لي كتكون بحال شاشة الماضي ، كل مرة واشمن مشهد يبان ليها فيها .. اصوات وافكار ومشاعر ....
كتضارب مع راسها باش تتخلى على هاد العلاقة ... وكتلقى ان حجم التضحيات لي دارو على قبل بعضياتهم ميستاهلوش هاد التخلي البارد! فنفس الوقت كتلقى انه لاكملو فهاد العلاقة غيزيدو يضحيو ببزاف دالحوايج وغيرجعو ثااني لنفس النقطة ويتفارقو فيها ... مجهوداتهم كانت بحالا كيبنيو فوق ارض مهددة فاي لحظة بالزلال ....
اما فهاد اللحظة .. بنظراتها الباردين ودموعها لي كيسيلو من عينين جامدين .. كتبكي بلا متكمش ملامحها مع البكاء ... كأنها كاتقول " انتهت محاولاتي ، افلت يدك ، يمكنك الذهاب"
بينما كانت كاتجارا فحياتها و مسؤولياتها كبكر الاسماعيلي ، تعثرات بيه فطريقها .. تلفتات لعندو ، شوفة لولا وثانية قادات شعرها و ضحكات ... مدات يديها ليه وشد فيها ... وقررو يغيرو الوجهة ... لاحت الكمبوتر و الطالون و كاع اجتمعاتها و تبعاتو بالحفة ... مشاااااو لبعيد .. وفلحظة كايطلقو من يدين لعضياتهم ...كتسد عينيها وتحلها وهي فنفس النقطة فين تلاقتتو ... حدا طالونها و كموبيوترها لي طايحين فلارض ... لاهي عارفة تتحنى عنهم تهزهم ولا هي عارفة تبكي عليه! ... مابغاش ترجع لحياتها لولا .... ومابغاش تكمل معاه فحياتها الاخرى .. هي بحال لي فقد البوصلة ديالو فصحرااااء شاااااسعة .... زكلس الارض كاتسنى شمس تغرب باش ينعكس الظل ديالو على الرمال ويعرف الشرق من الغرب ...... وعلى الاقل يغمض عينيه ينعس شوية....
عند جود ...
كان جالس على آخر درجة فالكاراج ديالو ....حوايجو كلهم مغبرين ويديه عامرين بلاكريس ... طاويهم على ركابيه وكيتفرج فربعة دالهياكل دالسيارات محطوطين حداه ... كل مرة كيعوج شفتو بتفكير ... واش هادشي لي دخل فيه مزيان ولا غير غايزيد يعقد الامور ! ...
يخدم بلا وراق بلا رخصة ! ...
كانو ربعة دهياكل دسيارات خداهم من النوار على واحد السيد كيبيع اجزاء السيارات والهياكل ديالهم وحتى سيارات بنفسهم بلا تعقديات ولا عقود للبيع والشراء ....
مكانش قادر يصبر حتى يسالي القراية ويوجدو الوراق باش يبدا .. وهو كيشوف راسو فحافة المستقبل وضيع بزاف دالوقت وفلوس باش يتزوج ويستقر ماعندوش ...
شي لي خلاه يبدا خدمة غير قانونية بينما وجد وراقو باش يربح منها على الاقل فلوس ياخد دارو مستقلة على الواليدين ويقدر يتزوج ومايبقاش معلق البنت ...
واخا هو هاد ااسبب كاينطق بيه فجوفو باش يقنع بيه راسو ، بينما السبب الحقيقي كان هو يزرب قبل مايلقى راسو باغي يتراجع !!!! .... ملي مشات لكندا وهو كل ليلة مور مكايهضر معاها ، كايحل صورتها وكالقى عندو غير مشاعر الاعجاب ... خايف بزاف من برودو تجاه هاد العلاقة ، فنفس الوقت كايقول انه ممكن يكون فقط بسبب انهم يلاه تعرفو ، صعيب يتكون حب فشهر !! ...
الساعة كانت تقريبا العشرة دالليل وهو غير جالس وكيشوف فيهم بعد مامشى السيد لي جابهم ليه فالديباناج .... ربعة دالسوايع وهو غير كاايصور فيهم ويعبر قياساتهم ويقيد فالاجوندا ديالو باش يبدا الخدمة عليهم .. وتاالجهد لي يرجع يطلع للفوق يبدل حالتو المغبرة ماعندوش .. كيحس براسو مسخسخ ودوز نهار صعييييب ... وحتى من مشكل قسم مابغاش يبعد من دماغو .. وهاد السيد لي دخلات لحياتها باش يرونها ليها ويرونهم معاها شكوون يكون ....
لقى راسو ثقال عليه وبدات كتخيم عليه الدوخة هو ينوض ...
ملي كاايخلط عليه بزاف دالامور كيتلف ... وقف كينفض فسروالو من الغبرة و لاگريس ... وبدا كيقلب على الفيست ديالو حيت كان غير بتيشورت كحلة والبرد كان تحرك شوية .... لقاها فين معلقها و هز سوارتو وتليفونو وخرج ، العساس شافو خارج وجا عندو بزربة سد موراه الباب وهو ماشي بجهة طموبيلتو كينفض فداك الفيست هو يصوني ليه تيليفون ... شاف نمرة لقاه لوؤي وجاوب ...
جود : وافين
لوؤي : وافين نتاا .. ساليتي شغالك ولا مزال !!
جود : يالاه ساليت ... باش عرفتي كنت مشغول !
لوؤي : وااارييييح اصاحبي .. راه صونيت عليك قبييييلة وقلتي ليا مشغوول هاد العشية ..
جود : ( مكمش عينيه كيتفكر ومعقلش ) مااااعقلتش صراحة ...
لوؤي : مااعليش .. ياك راك صافا ؟ مال هضرتك مرخية !
جود : اغا عيااااان شوية راسي ضرني ... ماعلينا .. ياك لاباس ! بغيتي شي حاجة ؟
لوؤي : سي باغيك ... عندي شي هضرة باغي نكولها ليك
جود : ميمكنش تأجل ؟ راسي ضارني شوية ...
لوؤي : لا وااالوو .. خاصها تقال هاد الليلة ... اجي لفين كنريحو ديما انا هنا كنتسناك ....
جود : سلطان مكاينش!
لوؤي : مسافر ..
جود : اندوز بعدا للدار نبدل حالتي ونجي ....
لوؤي : سير على الله ...
قطع عليه ولبس الفيست ديالو وحل طموبيل وبقا شحاال مصغر عينيه كيفكر بلي كان باغي يقول شي حاجة للعساس .. زير سناااانووو حييت نسى بزااااف هاد العشية بسبب تمارة وبسبب ختو وهضرتها لي خلات فيه الهم وبقى هاز همها فدماغو ... وهمو تااااهوو لي معقدو ....وهو غير شي شوية ديال التوتر كيخليه يفقد السيطرة على مرضو ...
العساس : ( كيشوف فيه ) بغيتي شي حاجة اسي جود ؟؟
جود : ( مصغر عينيه كيحاول يتذكر فلخر تنهد وشاف فيه ) خلي تااانعيطليييك .. نسييت دابا شنو كنت باغي نقوليك ...
خلاه وركب فطموبيل وداك العساس متبعو بنظراااات شافق على حالتو ...
ديمارا طموبيل وهز تيليفون ودخل لالاغام وقيد تما بلي خاصو يتلاقا مع لوؤي .. وطفى تيلي وزاد كيصوك وهو كيوكض فراسو بلي خاصوو يمشي لدار يبدل حوايجو باش ماينساااش الوجهة .....
راسو كان بدا يضرو وضرب فالفولون بجججهد حيت مجابش معاه دواه ..
قلب عينيو هز قرعة دالما وهبط عليها كاااملة شررربها .. حس بيها وكضاتو شوية وخرج للطريق ...
الطريق كان فرعي وتقريبا معامرش بزاف بطموبيلات .. البرد كان محرك وهو حال سرجم ومدلي عليه دراعو لي فيه كارو شاعلو باش يخفف عليه شوية .. كل مرة ينتر منو وينفت دخان .. حتى كيتلف على طريق وكيلقى دماغو هرب بيه لبلايص اخرين .. ايما كيهرب بيه لهاد المشروع لي بغا يبداه غير قانوني .. اما يهرب بيييه لعند قسم وحياتها الجديدة وهاد العلاقة لي مامرتاااحش ليها قلبو وخايف منها وخايف تتأدا ختو وتقلب حياتهم .... تاكيلقى الدوخة جاتو عاد كيتوكض ويحاول يركز مع طريق .. كيحل عينيه بزز ..
سف اخر مابقى من السيجارة ولاحها وشد الفولون بجوج يديه كيحاوووول يركز مع داك طريق لي غادي فيها ..... وكل مرة يحك فعينيه حااالهم بزز .....
في مكان آخر .....
من مخرج السيارات ديال احد الفنادق ، كانت خارجة طموبيل من نوع اودي سبور ... دايرة السينيال على ليمن .. تسنات طريق تخوا وهي دخل وسط السيارات وشدات الوجهة ديالها .....
البنت لي كانت صايگة كانت شادة فالفولون بجوج يديها مقربة الكرسي تاقرب راسها يدخل فالباربريز ومركزة كل التركيز مع علامات المرور ومع الناس ومع المراية كتشوف شكون وراها ... وكتوقف فالفوروج قبل تا مايشعل الحمر بقوة الخوف ...
قلبها كيضرب ومخلوعة من الصوگان فمدينة كبيرة قد الدار البيضاء ... واخا يوماين باش جات ولكن مقدراتش ابدا على الزحام ديالها وسرعة ديال سائقيها .. وعشوائية الطاكسيات والمواطر .... واخا هي جاية من مدينة كبيرة قد مدينة فاس .. الى ان الصوگان فالدار البيضاء خلعها حتى خلاها شحال من مرة تركن طموبيل وتكمل الوجهة فطاكسي ...
مركزة مع الطريق كل التركيز ... كتغزز فشفايفها ، حتى تخطف قلبها مع صوت لابيل لي داخلة ليها ولي كان الصوت مجهد فطموبيل خلاها تقفز ....
نزلات عينيها للشاشة وهو يطلع ليها اسم " MAMA " ....
بقات كتشوف بزربة عين فشاشة وعين فطريق وكلها متوترة ... مقداتش حتى ثانية تبعد عينيها على طريق باش تجاوب .... حتى ولات كتقلب على بلاصة فين توقف ....
كانت تقطعات لابيل ملي شدات ليمن ووقفات جنب الطريق ، حيدات السمطة وبدات تعاود ليها لابيل وهي كتاخد نفس ... حتى جاوباتها .....
الام : ياااسمين !! علااش مكتجااوبيش !!!! بديت نتخلع
البنت علات عينيها للمراية يلاه كتشوف راسها وشعرها لي تشعكك ليها بالخدمة وكتردو للور وكتهضر ..
ياسمين : علاش غتخعلي اماما ! ياك كنقوليك متبقايش تعامليني بحال شي بنية الصغيرة مكتعرفش تقطع الطريق ..
الام : فينك دابا ؟ راها العشرة ونص هادي باقا فلوطيل ؟ وعلاش مجاوبتينش فاش صونيت المرة لولة ؟
ياسمين : منيتك اماما ؟ علاش مغنجاوبكش ! راه غير كنت صايكة ومقديتش نجاوب ... زايدون راني ساليت الخدمة ياك قلت ليك غنسالي مع العشرة ...
الام : وفينك دابا علاش خارجة ؟
ياسمين : ( كاتقلب فوراقها واش كولشي هو هاداك ) غنرجع فحالي اماما صافي ساااليت اش غنبقى ندير هنايا ؟
الام : اويلي وحدي فين راجعة دابا فهاد الليل ؟؟ .. سيري تنعسي ابنتي الله يرضي عليك تالصباح واجي
ياسمين : لا اماما مافيا لي يزيد عليا ليلة خرا فلوطيل فلوسو زايدين فيا ... الطناش دالليل انا معاك ... غا خليو ليا حقي دالعشا ...
الام : كون تساعفيني ابنتي بااااتي ، طريق دالليل صعييييبة ونتي صوگانك باقي على قدو كون ماشي خالك لي ضسرك بداك الطموبيل
ياسمين : الا اماما ... انا كنخاف فالمدينة لداخل .. لوطوروت ماعندها ماتخلعني .. وطريق عااامرة راك عارفة كولشي راجع ملي غتبدا القراية .... مهم قطعي اماما ، الى جاك النعاس غير نعسي تانجي ونصوني عليك راني مهزيتش سوارت ...
الام : وقرايتك ماقالو ليك والو .. لايمشيو يقولو ليك علاش راجعة دابا !
ياسمين : وقرايتي علاش ! ياك كان عندي سطاج ديوماين ساليتو هوما اش دخلهم فين غانبات حماقيتي ؟
الام : اوا اجي بشوية عليك .. مااتجريييش ... نيت يالاه خالك قطع معايا وقاليك الى صافي ساليتي سطاجك مكاين لاش تبقاي ضوري تما رجعي فحالك للدار ...
ياسمين : واش انا عندي شي وقت للضوران اماما ! واش حسابتكم جايا نضور ؟ ياك كنت كاانقوليك سطاج ونتي علم الله عقلك فين كيمشي نتي وخالي ... دابا خليني نشد طريق كضيعي لياا الوقت ....
الام : ويالاه بشوية عليك احبيبتي ... تا باباك نييت مزال مادخل .. راكم مسهريني بجوج بيكم
ياسمين : ( دارت بزطام وراقها فالبوش وقربات للشاشة كتهضر وتعبر بصبعانها ) ماما ... انديرها معاك من دابا ... ماااتخلينيش حتى نوصل عيانة وتقولي ليا سيري قلبي على باباك فين سهران .. راه والله مغاااانمشي و والله مغااانجمعو من شي بلاصة .. ساااااليييييينا .... خليييه يضبرر راسووو
الام : ماشي حمقة انا مزال نصيفطليه بنتي .. خليييه يمشي يموت ...
قطعات تيليفون كتنهد ... وطلعات يديها وركات على الزر هو يشعل الضو فطموبيل ....
بدات كتشوف فعينيها العسليين فالمراية وتقيس بصبعها تحت منهم شحال منفوخين وعيانبييين بالسهير ديال يوماين دسطاج منعساتش فيهم بالعمل الشاق لي كان عندهم فمطبخ الفندق ... هزات شعرها المجعد كااامل لفوق وجمعاتو بفيليل على شكل فراشة صغيرة بقاو غير شي زغيبات على جبهتها وفوق ودنيها ، حلات الپوش جبدات مرطب شفاه ودوزاتو على شفايفها الممتلئين بعد ماحساتهم يبسو ليها بالعياء ... مصصات شفايفها ... و علات كمام البودي ديالها .. وخدات ثاني نفس عمييييق وديمارات الطموبيل ....
بدات كتسنى الطريق تخوا باش دخل وسطهم تاني وهي شفايفها كيرددو غير " يااربي سلامة يااااربي سلامة يااربي سلاااامة " ....
دارت سينيال داليسار وشعلات جيبي ايس قدامها ، ماقداتش تركز معاه بسبب لومبوطياج دكازا ... حتى خرجات شوية لطريق الفرعية عاد ركزات مع جيبي ايس ... ولكن واخا هاكاك بانليها الپياج بعيد وهي تشوف البوليس ....دارت سينيال ووقفات حداهم نزلات الزاج والشرطي شاف فيها ....
ياسمين : سمحليا نسولك عافاااك
الشرطي : نعام ؟
ياسمين : بغيت نخرج لطريق لوطوروت .. شادة طريق لفاس ... واش ضروري ندخل تالمحمدية !
الشرطي : وماعندك كيف دييري .. غادخلي ليها .. سيري على عين حرودة ....
حركات راسها بالايجاب شاكراه وشدات طريق ... واخا الريح محرك وحالة شرجم ولكن جبهتها تعرقات بالتوتر .. تامن عنقها حماااار ... بقات تابعة جيبي ايس حيت نفس داكشي لي قال ليها البوليسي ...
خرجات للطريق الفرعية عاد ردات شوية النفس ملي لقاتها خاوية ومعامراش بحال كازا .... كانت طريق ساااحلية على البحر .... والهوا ديالو داخل ليها من الشرجم خلاها ترد الروح ... عاد شافت للكوسان ، وهزات قرعة صغيرة فيها فرشات صغار ، حلات ليها الغلاقة وبدات كتشرب من عصيرها لي قادات اليوم بالفواكه الموسمية ... ولي خدات عليه علااااامة زوينة فقرايتها ....
عاد قدات تشعل شوية الموسيقى وتستمتع بالطريق وتحيد الخوووف ....
مركزة مع طريقها وكتحرك راسها مع الموسيقى و ضرب فالفولون ومرة مرة تجغم من عصيرها ....
طريق كانت مظللمة وشعلات الفار وخرجات يديها من براااا كأنها كتقيس فداك الهوا ديال البحر ، لدرجة افكار حمقين بداو كيوسوسو ليها باش تركن طموبيل جنب وتتفرج فالمواج ولكن الليل والخوف ماخلاوهاش ....
نزلات عينيها للشاشة ططموبيل كتقلب فالاغاني على اغنيتها لي كتعجبها كل شوية كتعلي عينيها لطريق .. تالواحد اللحظة علاتهم بزربة فاش شافت قدامها طموبيل كتتمشى ببطئ كبيييير وشادة طريق كاملة ....
كمشات ملامحها وركزات مع طريق ...
ياسمين : مال هذا ؟ طريق ديال باه !!!! ( بدات كتعطيه الضو باش يخوي ليها طريق ) واااااا شرييييف ....
مافهماتش علاش طموبيل كتمشى وسط طريق شادة ليمن وليسر وكاااتلعب فالتوازن ديالها ....
ياسمين : يااااااربي سلاااامة ...( كتكلاكصوني بججهد ) واش هذا نعس ولا سكراااان ولا مااالوووو !!!!!
عند جود ....
شاد الفولون بجوج يديه وعينيه كيتسدو ... ضباااابة كانت مخييييمة عليه وطموبيل كتهرب ليه من بين يديه وكيشد توازن غير بزز .... اجهزة الانذار فطموبيييل كانو كلهم كيسينيو ليه بالحمررر ... ومقادرش يتحكم فالفولووون ... راسو تايبغي يطيح ليه واليد لوخرا تاتقلب على قرعة دالمااا ....
فوحدة من اللحظات عينيه بغااات تسد كون ماشي كلاكصوون من موراااه مجهههد كيفيقو شوووية ... والفار لي كيضرب لييه فالمرااية تاقرب يعميييييه ...
علا عينيه للمراية وهي تبانليه طموبيل من موراه كتعطيه الضووو وكتكلاااكصوووني ..تمنى هادا لي كايكلاكصوني موراه ماااايحبسش حيت هووو لي مخليه يبقى فالوعي ، بدا كيحاول يتووكض وينفض فراسو ويشد تواااازن ... زاد كسيرا شوية يخلي مسافة الامااااان وكيخوي طريق باش يدوز لي موراه ولكن واخا هاكاك طموبيل كتلعب بيه يمين وشمال ....
عند ياسمين ...
ياسمين : ياااااربي تحفظ ياااربي تحفظ .... هذا واقيلا سكران ولا نعس ولا مالو ؟؟؟؟! ( كتشوف فطموبيل كتلعب بيه وهو غادي لليمن وتما كااين جرف صغيييير مطل على البحر ) لا لاااا لااااااااا ( كتكلاكصووني ) وااالااااااا وااا ااااش كاااااااديييير .. ( كتغوووت من السرجم مخرجة راسها) وواا ااااش كااااااااديييير .... ( دخلات راسها من زاج كتكلاكصوني وتعطييه الضو ) ياااارب تتتتتخففففظ يااااارب تتحفظ ياااربي ياااربي شكون مااا كان تما ياااااربي تتتحفظوووو ( صغرات عينيها كيبان ليها من زاج كاين غير سائق واحد ) يااااربي تحفظو يااااااربي .... لااااا لاااااا فين غااااادي فيييييين غاااااااادي ... وااااجرررررف فيييين غااادي واش باااغي تموووت
كسيرات كثثرر تاوصلات لعندو ونزلات زاج من جهة لوخراا هو يبان ليها شاد الفولون وعينيه كيتسدددو وبدات كتكلاكصووووني بجججهد ....
ياسمين : وعندااااك الجرررررف .. وااا خووويااا تووووكض ... وااش كتتتتسمعني ؟؟؟؟, واااكااااين جرررف بببعد من تماااا ... وقااااف اخويااا وقااااف ... ووقااااف الله يخلي لييييك ميمتك لامااا وقف
جود بدا كيتسمع ليه الغواااات وهضرتها كانسمع ليه غااااارقة .... وكتكلاكصووني بزاف وقلب راسو لعندها كااايحل عينيه بزز. ... وهي عين فطريق وعين فيه وبدات كتقلل السرعة باش تراجع للخلف ويرجع هو لليسر لفين مكاينش الجرف واخا ماشي طريقو ....
ياسمين : ياااااااربي مااااتجي تاشي طموبيل ياااربي ماتجي تاشي طموبيل يااااااربي تحفظو يااااااربي تكون معاه يااااربي تيسسر يااااربي رضاااة الواااليدين ياااااربي لاماتشوف من حالة والدييييه يااااربي راه باااقي صغيييير
يديها بزوج كيترعدو وهي باقا كتكلاكصوني باش توكضووو ودازت لليمن وجود بدا كيحاول يحل عينيه ... وحل فمو كيحاول يتننفس الدووخة مسيطرة عليه ...بدا كيقلب الفولوون بسررعة يهرررب من الجررررف ومشا بسرعة لجهة دالليمن وفقد السيطرة بالكامل على الفولون من غير السرعة لي نقصها وخلا طموبييييل تمشي بوووحدها عينيه كااايتسدوووو فخطرة تاااغاااب على الوعي .....
ياسمين : لا لاااا لاااااااااااااااا لاااااااااا
مع غوتات مع طموبيل ارتطمااااات فالشجرة ووقفاااات ، ودخان طلع من الكاپو ...... وهي حلاااات فمها بصدمة والخلعة .. معرفاااتش كيفاش داااارت تاوقفات طموووبيل لجججنب وخرجاااات كتتتجري تتتعتقوووو ...
قطعات طريق ماشية كتجري باتجاه طموبيلتو ... مشات بزربة للباب ديالو ، كتشوفو من زاج المحلول ... بانليها راسو شداتو الايرباگ لي تفركعات من الفولون ، و كبيانليها صدرو كيطلع ويهبط بحال شي واحد كيتخنق باش يتنفس .... وخشات يديها من زاج كتحرك كتفووو ....
ياسمين: خووويا تاتسممعني ... خووويااا !!!!
بدات كتعافر تحلها من برا مالقاتش منين كتحل كانت اوطوماتيك ... وخشات يديها من داخل حلاتها .. كتشوف فيه كيتخنق بالايرباغ .. ومحتاج يتنفس ويديه كيحركهم ثقال ودماغو غايب على الوعي .. وهي تبدا تجبدو من يدو تخرجو من طموبيل والكابو كان مطلع دخان ومعاه ريحة مجهدة دالفيلترات دطموببل لي تحرقو بالصدمة ... كتجر فيه معاااافرة معاه وقلبها تايضرب بجهد ..
تاوقفات طوموبيل اخرى حداهم وسمعات منها رجل اربعيني كايسول .....
- يااااك لاااباااس ؟؟؟؟ مجروووح ؟؟
ياسمين : ( علات راسها كتهضر بجهد متوترة ) مخنوووق .. يمكن ازماااتيييك .... اجي خرجوووو معايا عفاااك الايرباااغ زادت خنقااااتو .....ماقديتش بوووحدي
حبس مول داك طموبيل لي كيبان معاه عائلتو فطموبيل ... وجا باتجاهها بزربة وبدا كيجبدو معاها تاطاح للارض وتكاوه على طموبيل ....
الراجل : حاول تنفس مزيااان اخويااا .. حاول تنفس ... ( لياسمين ) ياكما مضروب ؟
ياسمين : ( حطات ركابيها فالارض محنية عليه كتقلب واش مضروب فراسو ولا واش مجروح ) لا ... مامضروبش .... خويااا كااتسمعني ؟؟؟؟
الراجل : انا نعيط لجوندارم عيطي نتي لومبيلونص ...
بعد هاداك الراجل جابد تيليفونو وطموبيلات بداو كيوقفو وكيطلو غير براسهم .. كاين لي كيطل ويزيد وكاين لي بقا كيتفرج .... وياسمين يالاه غاتنوض تمشي لطموبيلتها لي فيها تيليفون وهي تسمعو بصوت خاافت ..
جود : لما .... ال ... ما ..... لما ...
ياسمين : الما ؟؟؟ و و اخا .. واخا اخويا صبر ....
تلاحت دغيا لطموبيلتو كتقلب وهي تلقى قرعة مليوحة ولكن لقاتها خاااوية .... وشافت عند داك الراجل ....
ياسمين : عندك الماااا ؟؟؟؟
مشا لطموبيلتو وعطاها قرعة صغيرة فيها النص ....وتحنات عليه كتشربها ليه وداك السيد قرب عنها ...
السيد : مايكوون باس اخويا مايكون باس ... راه عيطت اختي لجوندارم .... انا غايخصني نمشي تابعاني طريق .... الله يشاااافيه ويكون معاه ... تفوووت غا اارااااس تجي فاش بغات ... الحمد الله جات فالحديد .....
ياسمين اشارت غير براسها وهي كتشربو الما وداك السيد ركب فطموبيلتو مشا ... والسيد لاخر لي كان واقف تاهو تبعو مشاو .... شرباتو هاديك القرعة كاملة ويديها كاترعدو بسبب ماضيها الاسود مع حادثة سير مميتة ....
ياسمين : كتسمعني ؟؟؟؟ نعيط لشي واحد من عائلتك ؟؟؟
ماكانش كيجاوبها فقط معلي رااسو لفوق كيحاول يتنفس وهي تنوض مشات قطعات طريق بزززربة لطموبيلتها كتقلب على تيليفون .. واحد طموبيل وقفات غير طل براسو ومشا .... وهي بدات كتصوني لومبيلونص وكتمشي وتجي ... خايفة يكون عندو شي مرض مزمن ولا كاايموت .... تاجاوبوها ...
ياسمين : الو ..
الاسعاف : الو السلام وعليكم ...
ياسمين : ع عافاك واحد لاكسيييدون .... طريق المحمدية ....
الاسعاف : شحال من سيارة ؟
ياسمين : ( كتهضر بهستيرية مخلوعة وكنحس بصدرها ضياااق مكتحملش الحواادث دالسير ) ا لا لا غير طموبيل وحدة ضربات فالشجرة كانت قدامي فيها واحد الولد سخفان ....
الاسعاف : قداش هاد الولد اختي ! .. حاولي تنفسي ودوي معاياا نفهمك مزيان اش كاتگولي ....
ياسمين : م معرفتش .. معرفتش .. يكون ثمنية وعشرين ولا تسعود وعشرين فعمرو مااعرفتش ...
الاسعاف : معاه شي واحد ؟
ياسمين : لا مامعاه تاحد ....
الاسعاف : مجروح ؟؟؟ فاقد الوعي !
ياسمين : لا .... خ خرجناه من وطموبيل حيت كان مخنوق
الاسعاف : مكانش عليكم تقييسوه اختي .. خليييه كيف ماهو .. عيطتو لجوندرام ؟
ياسمين : ا اه عيط ليهم واحد السيد
الاسعاف : الرقم لي غيوصلك منو دابا واحد الكود .. عاودي نسخيه ورسلي معاه لوكاليزاسيون ديال التيليفون ديالك ... وسربي عافاك ...
ياسمين : وا واخا انصيفط ليكم دابا .. ع عافاك سربيو راه مكيجاوبنيش وبحالا سخفان ومخنوق ...
الاسعاف : الى كان كايتجاوب معاك وماعندو تاشي ضربة فالجسد ديالو وفقط سخفان ... حاولي تعطيه الما .. احتياجو دالاوكسيجين غياخدو فالما على ما نجيو ....
ياسمين :ع ... عطيتو .. عطيتو تقريبا نص قرعة ديال ربع يترو
الاسعاف : مكافيش .. زيدي عطيه الما حنا نجيو دابا ....
قطعات وبقات كتقلب فطموبيلتها على الما تاوصلها الكود .. ونسخاتو دغيا مبارطاجيا معاه البوزيسيون ديالها ... ورجعات كتقلب فطموبيلتها بهستيرية على قرعة دالما .. لقاتها خاوية وهي تحبس التقلاب فاش شافت لداك القرعة دالعصير على الكوسان دطموبيل ....هزاتها ومشات بزربة قطعات طريق لعندو ... كان جالس فالارض متكي على الطموبيل معلي راسو لفوق كيحاول يتنفس وشبه غايب على الوعي .... وتلاحت فالارض حداه كتحل داك القرعة وتهضر معاه
ياسمين : راني عيطت لووومبيلونص شوية وغيجيو .. ان شاء الله غتولي بخير متخافش .... حاول تشرب شوية .... الما ماعنديش ولكن العصير فيه الما ...( بدات كتقرب القرعة لفمو شادة معاه تاخشات ليه التيو ديال داك القرعة الصغير فمو وعوجاتها كتشربو منها ... وهو كيحل عينيه غير بزز يشوف فيها ويوعى شوية بشنو ضاير بيه ... مذاق هاداك العصير بدا كيهبط مع حلقو بارد ..... بدا كيحاول يحل عينيه غير بشوية وهي محنية عليه كاملة ، شعرها المجعد كووولوو مكبوب على صدرو وعينيها مخلوووعييين .. والسينيالات ديال طموبيلتو بربعة كيضربو فوجهها مرة يشعلو مرة يطفاااووو .... حيدات القرعة من فمو ملي شافتو بحالا باغي يكح وجبداتو من الفيست ديالو كتحاول تكعدو وهو كيرد وعيو شوية بشوية ....
ياسمين : تنفس مزيان اخويا والى كنت كتسمعني دير شي حرررركة ....
يالاه كملاتها حسات بيه زير على يديها لي محطوطة على صدرو ...
ياسمين : متخافش الاسعاف غتجي دابا راني هضرت معاهم .. غير حاول تبدا توكض شوية بينما جاو .... نزيد نعطيك تشرب ؟ ( سد عينيه وغمضهم بقوة كيتأنن من الحريق لي فراسو وكيحرك ليها راسو بالنفي ) واش فييك الحريق ؟ واش تضربتي فراسك ؟؟؟ عندك شي ضربة فشي بلاصة ؟؟؟؟
زير على عينيه بالم ورجع حلهم فيها مباشرة فوجهها المخلوووع .. كان كيبان شوية ليه فاش كيضربو فيها الاضواء ديال السينيالات دطموبيل ... ويدها شادة فيديه وهو طايح فالارض كيحاول يلتاقط فانفاسو وكل مرة ترد شعرها لور لي طايح كامل عليها وقلبها ماهناهاش تمشي وتخليه ... تاتجي الاسعاااف ... واخا الطموبيل لي وقفات كطل عليهم شوية وكتمشي ...
علات راسها فاش شافت طموبيل اخرى وقفات وجات تنوض عندهم طلب الما وهي تحس بيدو زيراااتها تبقى وشافت عندو محنية عليه ....
ياسمين : اناا معاك ، انا هنا ... غانشوف غير الماا واش عندهم .. راه خاصك تشرب ...
فلتااات يديها من يديييه بمشقة حيت كان مزير عليها بسبب الالم لي كيحس بيه .. ومشات بزززربة لعندهم والشيفور هبط الزاج
- ياك لابااس اختي؟؟ كاين سي آفات ؟
ياسمين : سسخفاااان ... عفاك واش نلقى عندكم الما؟
- ( مد ديو عطاها قرعة دسيدي علي ) هاكي اختي ؟ كاين فاش نعاونك؟؟؟؟
ياسمين : عيطت لاسعاف وواحد سيد عيط لجوندارم ...
خلاتو ومشات كتجري عندو وهو نزل من الطموبيل لعندهم .... وبدات كتشربو الما ثاني وداك السيد وقف عليهم
- مايكون بااااس مايكون باس .. الله يكوون معاااك اخويا .... رضااااا الواليدين معاك ....
بدات ياسمين كتشربو الما ثااااني ....
- هذا ماشي ولد الروكان ؟؟؟
- ( محنية عليه مركزة معاه كاتشربو ) معرفتش اخووويا ... مكانعرفوش ... ( سمعاتو ثاني كيكحب وقربات القرعة ) خويا واش نقد نعيط لعائلتك ؟ عطيني شي سمية كاينة فتيليفونك نعيط ليها ؟
- كيشبه ليه .... شوفي فالطموبيل تقدري تلقاي تيليفون واتصلي بعائلتو .. الى كان ولد الروكان راه غادخلي راسك فالمشاكيل اختي .. غايقولو ليك اش داك ليه تقيسيه ...
ياسمين مكانتش كتسمعو من غير بدات كتقلب فطموبيلتو تالقات تيليفونو وجات حداه وداك السيد خاف ومشا تاهو ....حيت كولشي لي كايعرفوهم وكايسمعو عليهم عارفين بمرض ولد الروكان ....
وياسمين محنية عليه كتحاول تهضر معاه ومدات يديها شدات وجهو كتوكضو ....
ياسمين : خويا كتسمعني ؟؟؟ واش تقدر تعطيني شي سمية ؟ نعيط لماماك ؟
جود كان كيسمعها وكان كايشوف شوية ولكن حاس بلسانو ثقيل بزاف وماقدرش يحرك الفك ديالو يهضر وكيحس براسو بحالا راه فشي بيير غاااااارق .. وياسمين شعلات تيليفون يلاه داخلة لريبيرطوار تقلب على اسم ماما ولا باباا .... وهي تسمع صوت الجيپ دجوندارم جايا ولاحت تيليفون وناضت بزربة لجنب طريق باش يشوفوها ، وهوما وقفو حدا الطموبيل ....
الدركي : الدرك الملكي ...السلام وعليكم ... نت معاه ؟
ياسمين : لا لا ( اشارت بيديها لطموبيل فجهة لوخرا ) انا راه طموبيلتي .. غير كان قدامي وصافي ...
مشات تابعاهم وهوما ماشييين بجهتو وتحناو عليه والدركي لاخر كيشوف لطموبيل ....
الدركي : كنتي حاضرة فاش تضربات طموبيل ؟
ياسمين : اااه راه كان قداااامي ...
الدركي : اوراق السيارة من فضلك والهوية ديالك ...
خلاتهم ومشات بزربة لطموبيل والدركي شاف عند صاحبو ..
الدركي : ولد روكان هدا لا ؟؟؟.. جود الاسماعيلي هدا !!!!
الدركي : ( تحنى شافو ) هو والله تاهو .....نعلموهم ؟؟؟؟
الدركي : عيط للمكتب ديالهم عيط ...
بعد باش يتصل وياسمين قربات لعندهم وعطاتو من صاكها وراق طموبيلتها والهوية ديالها وبداو كيقيدو ..
الدركي : عيطتي لاسعاف ؟
ياسمين : ااه قبييييلة ...
الدركي :كيفاش وقع تاتضرب ؟
ياسمين : د د ( كتحاول تلتقط انفاسها ) دابا كان قدامي طموبيل كانت كتلعب بيه بحالا دايها الريح .. مرة كيمشي لليمن مرة كيمشي لليسر فلول حسابتني سكران ولا داه نعاس .. ولكن فاش شفتو غادي يمشي لهيه جهة الجرف قربت عندو وبديت كنحاول نهضر معاه من زاج وبانلي بحالا سخفاان .. يعني هو كان سخفان وتاوهو صايك ماشي تاتضرب .... ولكن فاش تضرب بحالا سخف .. م معرفتش .... تاتضربات الطموبييل فشجرة ... و وقفت نزلت عندو انا وواحد السيد خرجناه من الطموبيل ...
هي كتعطي اقوالها وطموبيلات كل مرة يوفقو يشوفو ، وجود كيكحب وهي كتهضر معاهم وكتشوف فيه ...
الدركي خدا اقوالها وبداو كيقيدو الكوسطا ولاخر كيضور بطموبيل ... وهي قربات عندو شادة بوشيط دالوراق ديالها ... وتحنات لعندو كاتشوف فيه بملامح متأسفين ....
ياسمين : خويا ... الاسعاف غاتجي .. انا غايخصني نمشي .... ( شدات يدو ) كتحس براسك بيخير شوية ؟ الى اه حاول تزير عليا ( حساتو مزيرش عليها ووقفات كتشوف فيه ) واش نتا ازماتييييك ؟ واش مكتقدرش تهضر ؟؟؟؟ كنحاول نهضر معاك باش متغييبش ثاني .. حاول تبقى واااعي معايا غير على ماتجي الاسعاف .. الجوندارم راهم هنا .. متخافش ... الحمد الله ماطرا ليك والو ... مهم انا راه غايخصني نمشي اخويا .... ( زير ليها على يديها مزير عينيه بالحريق وكيهز بشوية صدرووو يتكعد وهي كمشات ملامحها ) خويا راه معرفتش شنو عندك ؟.... وماعنديش تاكييف ندير نعااااونك .... واش نزيدك الما ؟؟؟؟ تشرب !!!!
حساتو زير على يديها وهي تهز القرعة والدركي كيشوف معاهم ويقيد مع لاخر كيتسناو لومبيلونص ... وبدات ثاني كتشربو .. وهو حال عينيه فيها كيشوف فيها مباشرة وهي ابتاسمات ليه وملامح الخوف باقين فعينيها العسليييين .. علات عينيها لفوق ملي سمعات صوت الاسعاف وهي تنوض بزربة ..... الاسعاف وقفات ونزلوو الحمالة بزربة وهي علات راسهااا لفوق كتنفس ....
هو كان سامعهم وحاس بيهم .... ولكن الوعي مزال مارجعش ليه بالكامل .. كان نصف واعي .... والدركي قرب عند المسعف ونزل حتى الشيفور ... وياسمين كتشوف فيهم داروه فالحمالة وربطوه بالسماطي .. وهي تسمع تيليفونو فالارض كااايصوني وشافت بزربة فين ....وهزات تيليفون .. وهي تجاووب مخلوعة...
ياسمين : الوووو
لوؤي : ( باستغراب ) الو !!! ( كيشوف فنمرة ياكما غالط وعاود رد تيليفون ) شكون نتي ؟
ياسمين : ا السيد لي كتصوني عليه دار اكسيدون .. و وانا معاه هنايا .....
لوؤي : شششششنو ؟؟؟؟؟
ياسمين : متخافش راه جات لومبيلونص اخويا وراهم غيديوه دابا وراه هنا تاجوندارم ....
لوؤي : دوووزيهم ليا ... دغياااا
مشات بزربة ومدات التيليفون لدركي وخلاتهم ومشات بجهة لومبيلونص كانو دخلو ليها جود وركبو ليه لوكسيجين بقات غير كتشوف من باب الاسعاف وهو كيركبو ليه جهاز الاكسيجين وحال عينو كيشوف فيها وهي ابتاسمات ليه واشارت بايباي بيديها وعينيها لامعين لي تنقد وماوقع ليه والو ..... وهو مصغر عينو فيها ... حاول يعوج فمو شششوية يقول شي حاجة ليها .... ولكن ماقدرش ، ماقدرش تايرسم ابتسامة شكر ... كان كولشي فيه ثقييييل ..... تاسدو عليها بيبان الاسعاف ...
الدركي : واخا اسي لوؤي .... متخااافش غايمشي لمصحتكم ..... انا غنهضر مع السائق .. تحيااااااتي ..
مد ليها تيليفون ومشاو بجهة الجيپ و الاسعاف مشات وهي بقات كتشوف فداك تيليفون فيديها فلخر دارتو فطموبيل ديالو وسدات الباب بالكونطاكط .. ومشات للجيپ كانو غيديمارو يمشيو ....
ياسمين : سمحو ليا عافاك .. ( عطاتهم الكونطاكت ) هذا راه ديالو .. انا مكنعرفوش باش نردو ليه ....
الدركي شد عليها الكونطاكط ومشاو وهي بقات كتشوف فداك طموبيل وتنفساااات بعمق كأنها فاقت من حلمة خاااااايبة ... رجعات شعرها لور وخدات نفس عميق وقطعات طريق ومشات لطموبيلتها .... بقات شحال شادة الفولون كتحاول تحكم فيديها لي باقين كاااايترعدو ... خوفها من حوادث السير مابغاش يتحيد من دماغها من نهار دارت حادثة مع باباها وفقدو ختها الصغيرة .... غمضات عينيها مرجعة راسها للور وهي كتفكر داك المآساة ..... كانت باقا بنت 15 عام وهي تتمخض فختها لي كانت عندها غير ثلت سنين باش تردها للوعي ..... كانت كلها دماياات ومكتنفسش ، كانت ميتة وهي كتسناها تحل عينيها وتغوت .....
غمضات عينيها مزيرة عليهم ونفضات راسها بزربة باش مترجع لداك الذكريات لي دوزات اربع سنوات من حياتها كتاخد عليهم الدوا باش تنعس بلييل ....
حادثة هاد الغريب خلاتها تسترجع داك الخوف لي كانت كتحس بيه بحالا شي وواحد كتعرفو .... حيت هي كتعرف مزيان شنو كيعني فقدان الارواح فحوادث السير .....
سرطات ريقها وديمارات طموبيل كتردد اية الكرسي .. و طالبة السلامة ..... وكملات طرييييقها وهي كدعي معاه يولي بخير واخا مكتعرفوش شكون ولكن حالتو كانت كتبين انه انسان مريض وواقعة ليه شي حاجة خلاتو يدير هاد الحاااادثة ...... ولكن بالها على الاقل هااااني لي شافتو حال عينيه فالاسعاااف .....
بعد 3 ساعات ....
كان واقف لوؤي داير يدو فجيابو وكيشوف فيه من زاج مدخلينو للاشعة ....كانو منعسينو على السرير طويل غايدخل بيه ليريم ... وهو كيشوف فالسقف كاارع راسو ومرضو وكلشي فيه ......
تاسمع تيلي كيصوني فجيبو ..جبد تيلي شاف نمرة وجاوب ...
لوؤي : اعمي .... وي راه فليريم دابا ... لا متخاافش راه بيخير وراك سمعتيه .... وقع ليه كيف ديما وصافي .... متخااافش انا غاانبقى معاه .. يخرج وغندوزو ليك وبلا متخلع خالتي لامار راه بيخير ..... متخاااافش .... انا معاه ....
قطع تيلي وبدا ثاني كيشوف فيه ويتنهد ندمان علاش ملي سمع صوتو مرخي خلاه يصوگ .... ورجع ثاني كيحمد الله لي دازت بالسلامة وماوقع ليه والو .... شوية ثاني سمع التيليفون، عارف هاد النهار مغيسكتوش وهو يجاوب ...
لوري :الوالييد .. وصاااافي راه هضرة وحدة قلناها ليكم راه بيخير .... شكون ؟ عمي سفيان! لا يالاه مشا قاليه جود غير سير راه بييييخر ... دابا دخلوه ليريم .. انساليو ونمشيو لدار .... واالا ثاني خليوه يرتاااح تالغذا ودوز شوفو خليوه دابا .... والله تارااااه بيخير بالله ، جات فالطموبيل وصافي. ... دازت طريفة .... صافي واخا ... يخرج نقولها ليه ...
رد تيلي لجيبو ... هو يشوفهم خرجوه من تما وكيلبس حوايجو ... ومشا حل الباب دخل عندو ....
لؤوي : شوية دابا ؟ ( جود حرك راسو بالايجاب للوؤي وهو شاف عند دكتور الاشعة ) صافي نقدر نخرجو ؟
الدكتور : وي تقدرو تخرجو ( قرب لعندو ) موسيو جود .. هادشي راه ديما كنقولوه ليك وخاص تكون حافضو .. بعد على السيااااقة فاش تكون متوتر ولا حاس براسك فيك دوخة .... ماتصوگش ونتا حاس براسك ثقييييل عليك ولا معصب شوية ..... الحمد لله دابا خرجات طريفة ولكن تقدر المرة جاية تكون شي حاجة كبر لا قدر الله .... مهم النتائج غانسيفطهم فالايمايل ديال سي اسد ... مايكون باس ....
لوؤي: ( كيشوف لجود لي كيلبس السمطة دالسروال ) سمعتيه ياك ؟ سمعتيييه ...
جود غير كيتنهد والدكتور ربت على كتف لوؤي ومشا .. وهو سد السمطة دالسروال وجلس على الكرسي ددكتور شاد راسو بين يديه كيتنهد ....
لوري : ملي شششفتي راااسك قبيلة ديخان وكنت كنهضر معاك .. وتااااا قول ليا اصاحبي نجججي نديك ... ونتا راك عارف حالتك وعارف ( قاطعو)
جود : لوؤي صافي .. .صافي الله يرحم باك هاد الكاسيطة سمعتيها ليا خسمين مرة صااافي طييبتيني ...
لؤي : وواخاا هاكاك مكتسمعش .. تاااادير لي فراااااسك ....
جود : ( تنهد ووقف كيلبس الفيست ديالو ) وصااافي دابا متفرعش ليا كري ....
لوؤي : فرييع الكررررر هو كوون وقعات ليك شي حاجة ولا شي ضربة تخلينا نهبطو والديك تگلاصا فالفريييكو وتعرف شنو هو فرييع الكر ... ( كيتفكرو فاش كان كيعاود الحادثة لي دار قبل مايدخل ليريم للدكتور ) دابا كون مكانتش هاديك البنت لي وگضاتك بالكلاااكصون فين كناا غانولييييو !!!! نجمعوك مفرتت على الجرف ؟؟؟؟
جود : ( بقا شحال كيشوف قدامو وضار عندو ) مجاتش مع الاسعاف هاديك البنت ؟
لوؤي : لا .... ملي نزلوك كنتي بوحدك ، انا كنت هنا ... هضرت مع ليجوندارم قتليهم مايعيطوش على ديباناج .. يلاه نطلعك للدار ترتاح وانا غنمشي باش نشوف طموبيل ديالك .. ياك مقاطعاش طريق ؟
جود : منعرف .... ( باقي ديخان ) منضنش راه كانت خرجات على طريق ضربات فشجرة ....
لوؤي : خليتي فيها الوراق ديالك ؟
جود : واااش كتسولني انا !!! اصاحبي راه مكنتش واعي تا بشي حاجة كنتفكر داكشي بحال شي حلمة .....
يلاه غاايخرجو هو يحل الممرض الباب وقرب بجيهتهم ومد الكونطاكط لجود ...
الممرض : سي جود مايكون باس .. هاد الكونطاكط جابوه ليجوندارم قبيلة ... قالو بلي عطاتو ليهم البنت لي كانت معاك فموقع الحادثة ...
شدو عليه والممرض مشا وهو بقى كيشوف فداك الكونطاكط شعلو هو يعطيه السيارة مسدودة ... وشاف فلوؤي بابتسامة خفيفة بالكاد كاتبان فقط فعينيه ...
جود : سدات الطموبيل مسكينة !
لوؤي : واطحتي بعدا فبنت الناس متبتة ماكون راك مليوح اولد اللذينة على الجرف مكاين لي يجيب خباااارك ...
زادو خرجو وجود دار الكونطاكط فجيبو ونزلو لجيپ لوؤي ، وجود كيهضر مع باباه ولوؤي ديمارا الطموبيل ..
جود : دابا عاد خرجت ....والله تااراااني بخييير ....
اسد : اوا الحمد الله بعدا دابا كتهضر حسن من اللول ....واش مكنتيش واخد دوا ديالك ولا شواقع ؟؟؟؟؟ واش انا نغبر شوية طرا كارثة !!!!
جود : والله ماكاينة شي كارثة بالله .... راه قلت ليك لي كاين ... ضربات طموبيل فشجرة .. انا راه بيييخير .. غير دخت شوية فالطريق ....
اسد : ( كولو متوتر ) علااااش .. علااش تصوووووك ديخان علاش ؟؟؟ واش باااغي تسكت لينا القلب اولدي ولا مالك ؟؟؟
جود : واش انا عارف غايطرا هادشي ! قبل مانصوك راه كنت مزيان قلت نطلع غير للدار .... و دابا دازت طريفة .. ماتبقاش هاز الهم والله تالاباس .. عنداك تقول شي حاجة للامار ولا للبنات ووسيم
اسد : مغانقول والو .. سير طلع شرب دواك ونعس .. غدا غنكونو تما .... البيلوط مكاينش هنا باش نجي دابا ....
جود : واشتي داابااااا .....
اسد : خليتي ليا شي مورال للسفر .. سير ترتاح غدا تفيق تلقاني حداك ...
قطع عليه وجود لاح تيلي للوؤي .... وعلا راسو للفوق كيتنهد
لوؤي : وهادي دير ليك عقل باش مرة اخرى .. لا مكنتيش كتفكر فراسك فكر فواليديك ..
جود : ( ضربو بباكية دالكاغيط ) ققققطع حسسك
لؤي : هاهوااا ساكت ....
جود : ( شاف للطريق ) فين غادي ؟
لوؤي : للدار !
جود : لاا .. يلاااه لطموبيل نشوفها بعدا اش واقع ليها ، ويلاه نطلعو
لؤوي : انا لي غاانمشي لطموبييييل ..نتا غاااطلع لداركم ، غانعيط لديباناج وغانجيبها ليك تالبااركينغ
جود : لا ... انا نعيط لديباناج يهزها للكاراج .. هاد المرة غنصاوب طموبيلتي راسي .... مافيا لي يطلع دابا لدار ، باااغي نشم شوية دالهوا
لوؤي : الهوا شمو فالبالكون متمرگنش عليا ، طلع ترتاح
جود : وراه قلنا الاااا ابنااااادم ..... سير لفين كاينة الطموبيل .... انا راه لابااااس .. دوخة وفااتت شحال غاتكبرو فالموضوووع ....
لوؤي تنهد عارف راسو قاااسح وقلب السينيال لليسر ودخل على المنعطف لاخر باش يرجع للمخرج دالمنطقة بعد مكان غادي للقصر....
وؤي طريقو كلها غير كيتنهد وكيتخيل كون وقعات شي حاجة ليه كيفاش كانت غادوز عليهم هاد الليلة ثاني ... اما جود كان غير متكي حال عينيه فالفراغ ... كان كيتفكر هاديك اللمعة لي فعينيها وهي محنية عليه وكتعطيه فالما .. حرارة يديها باقي تايحس بيها فيديه ... ومذاق العصير لي شرباتو مابغاش يبعد من حلقو ..... عينيها العسلييين الخيييفاانين .. الرجفة لي كانت فشفايفها ... كانت كتحسسو بانه شي واحد كتعرفو ومخلوعة عليه ماشي غير غريبة صادفاتو فطريق!!! .... هاديك النظرة لي تشاركها معاها .. مكانتش نظرة عادية ، كانت كتحمل فطياتها بزاااف دالطمأنينة ..
سد عينيه وهو كيتفكرها كتغوت عليييه من الزاااج ييتوكض .... ورجع ثاني حلهم كيتنفس ولوؤي عين فيه وعين فطريق ....
لوؤي : نعطيك الما تشرب ؟ ( جود حرك راسو بالايجاب ولوؤي هز القرعة مدها ليه ) ...
تحلو الباريات دالمنطقة خرجو منهم ... وتمشاو باتجاه طموبيل لي كانت مابعيداش بزااااف على المنطقة .. مسافة اربع دقايق وكان لوؤي دار السينيال دليمن ووقف حداها ....
جود مكمش عينيه كيشوف فيها وكيتفكر الحالة لي كان فيها ولي فواحد اللحظة لقا راسو غيتلاح على الجرف كون ماشي غوات هاديك البنت والكلاكصون المسستمررر .....
حل الباب ونزل ... ولوؤي تاهو نزل كيشوف مع الطموبيل مكمش ملامحو
لوؤي : واا ضربااااا اصاحبي .. الكاپو مشاااا ....
جود : ( كيشوف الكابو ويقيس بيديه ) ويااااه .... تا رادياطور غايكون تقاس ... ( شعل الپيل فتيل دلوؤي وتحنى حاط ركابيه فالارض كيطل عليها مع تحت وهو يشوف الارض فاازكة بالما لي تخوا كامل ) لا راه ماشي تقااااس راااه تفررررع ....
لوؤي : ( حل الكاابووو كينش بيديه مكمش ملامحو ) ففففففف .... كولشي تفرع ... تالموطور تعوج ...
جود : ( وقف كينفض فيديه ) انعيط لديباناج ....
جبد الكونطاكط وحل الطموبيل وركب من جهة لوخرا حيت جيهتو مسدودة بالايرباغ ... لقا تيليفون محطوط تما وصونا على الديباناج لي كيخدم معاه وعطاهم فين يجيو ... يلاه غينزل من طموبيل هو يشوف شي حاجة طايحة تما كاااتلمع !!! ...
كمش ملامحو وتحنى عليها هزها ، كانت طايحة على البواط آفيتاس .... هزو فيديه كان فيليل صغيييير على شكل فراشة نحاسية ....
بدا كيضورو فيديه هو كيتفكرها فاش كانت كترد شعرها لور بيديييها وكيفاش كانت مبرزطة غير مع شعرها .. واخا ملامحها مضضبين فعينيه ولكن عاقل على تفاصيلها وحركاتها وصوتها .. تبسم بدون شعوررر منوووو تاحس بلوؤي قرب ليه هو يجمع داك الابتسامة وبدا يعوج فعنقوووو ...
لوؤي : اش داكشي!
جود : ( وراه ليه) ديال داك البنت ....
لوؤي : اااه ....يمكن ملي كانت كتجبدك
جود : غاالبا ....
مشا لوؤي وهو تبسم وهز الكونطاكط ديالو وعلقو فيه .... وردو لجيبو .... ونزل من طموييل كيضور بيها ويشوف روايض شاعل الپيل .... وهو يشوف تا داك القرعة مليوحة .... وتحنى هزها ... وشدها وشاف فيه مبتسم ....
جود : هذا هو داك العصييير لي قلت ليك ... نساتو هنا ....
لوؤي : ( قرب عندو كايشوف .... كانت قرعة تاهيا عامرة بالفراشات فالڤيولي) واش شي بنت صغيرة هادي ؟
جود : ( معوج شفتو للجنب ) مم .. معرفتش شحال يكون عنها ...ولكن صوتها عاقل عليه ... صغير ( شاف فيه ) شتي كون ماهاد القرعة وهاداك الفيليل ديالها .... والله حتى نقول حلمة بالله .. كنتفكرها دابا كيجيبلي الله بحالا مكايناش داك بنادمة ... غير كانتخيلها !!
لوؤي : وراه كنتي ديخان نورمال ....
جود : من غير ديخان ... حيت يجي شي واحد يقوليا بنت وقفات فهاد الليل فطريق خاوية بحال هادي تعاون واحد مكتعرفوش وتبقى معاه .. راه قليل لي غااايديرها .. راه رجال وقفو ومشاو ....
لوؤي : وياااه ..... ( ضار داير يدو فجياب سروال ) ودابا فوقاش يجي هاد الديبناج .... تحرك للبرد ...
قرب داك القرعة لنيفو كيشمهاااا حيث كان تخوا منها داك العصيررر .. وتايحاول يعرف اش من مذاق كان فداك العصيير وديالاش داك الريحة !!!! ... كان واحد العصير لي عمرو ذاق بحااااالو .... ولا مذاق داك العصير .. لا وجهها لا صووتها لاهاداك الفيييليل ، كلهم كيحس بيهم خيااالييين ومكيانينش فالوااااقع ...
جات ديباناج وهزو الطموبيل وعلمهم يديوها للكاراج وركب مع لوؤي تابعينها ، وهو غير جالس كيضور داك القرغدعة فيديه وكل مرة يقربها لنيفو يشمها سااااهي كايسترجع هاديك الحلمة لي غاتبقى غييير حلمة بنسبة ليه ...
ولوؤي مرة يشوف فيه مرة للطريق ... كان مرة مرة كايدير ابتسامات صغاااار وه تايتفكر وجهها فباب الاسعاف كادير ليه بايباي .. هاديك الابتسامة الناعمة مابغاتش تبعد من قدااام عينيه .. تاسمع لوؤي ....
لوؤي : اولد عمي .... ( قفزو تاشاف فيه ولوؤي كايهضر بنبرة فيها التحدير ، حيت مغايفهم داك الابتسامات غير واحد بحالو ) واحد الخطيبة عندك مغتكونش تشوشات عليك ؟؟؟ ماشي خاصك تعيط ليها ؟؟؟ ....( جود شاف فيه كانه فيقو من شي حلم للواااقع ) انا قلت نفكرك وصافي ... شتك بحاالااااا سهييييتي ....قلنا نفكرووووك .... سبحان لي ماااايسهى ...
جود سرط ريقو وشاف لداك القرعة ، ورجع لاحها من زاااج !! ولوؤي علا حاجبو علاش لااااحها ..
وقاد جلستو كيحنحن ويقاد جلستو .... وجبد تيليفون كتب ليها ميساج بالانجليزي " نعستي ولا مزال ؟ ماتصلتش بيك اليوم كتت مشغول شوية ، نتي صافا ؟ " ......
ورجع تكا على الكوسان مغمض عينيه ......
يتبع...
التعليقات
لا توجد تعليقات بعد، كن أول من يعلق.