محتوى القصة
اسد : مغانتيق فيك ديال بصاح تانشوفك قدام العدول ... مافيكش التيقة نتا ...
وسيم : انا ديالي بان ليا غايعششو فيه الحوووت.....
لامار : ياولدي راه بحال رمشة العييين تانشوفك جاي عندي تانتا ماما غاانتزوج وراه قلتها لبابا وبابا موافق وجود وموافق وقسم موافقة وقدس موافقة .. بقيتي غيير نتي لخرة طبعا .....
جود : زعمااا نتي واااااالو مكتفاكيييش ...
لامار : الحمد الله ماماكم قلبها بيض ودغيا كاتسامح .. ماانتومااا والله مااديال العشرة ...
اسد : لا وهو من ناحية دغيا كاتسامحي هادي كاينة .. غير هو كاتبقاي حياتك كاملة كتفكري بنادم راك سامحتيه ...
لامار : ههه اوا شنو كاينة شي حاجة بالساهل .. يلاه اولدي ديرو فيكم النفس نشوفو شكون غايحرك الباطو ديالو اللول . . ( شافت عند قسم ) اما نتي بااااانليا ابنتي داك ااباطو غانزيدوه على سفينة تيتانيك .....
جود : غابداي تحگري فيها .. غاتحركو قبل مني
لامار : ( علات دييها ) ياااااربي ... على الله .. نهاررر لي غتقرر هادي تزوج غانديرليها العرس فالمريخ انا .... مغانديروش فوق الارض ...
قسم : هههه دابا نوقفك على هضرتك ( وقفات كتحيد الكاب ديالها حطاتو على الكرسي ) غاانزززل ....
مشات بشوية جيهة فين كايتلاحو وهي تتلاح فالبحررر وحتى ققدس تبعاتها تلاحت .... بقى غير وسيم لي متكي على الكرسي وطاوي رجليه على الكرسي لاخور ولابس كاسك وكايلعب فالگيمينغ .... وجود تاهو حيد تيليفونو من جيب حطو على الرولاكس وتلاح موراهم ...
واسد شاف فلامار وطلع 3 ديال صبعانو كايحسب بييهم
اسد : ثري ... تو ... واااان
قدس : بااابااااااااااااا
لامار : جووووود طلق من خختك.... جووووود ( مشات طلات عليهم ) جووووود كاتعرفها خوافة طلق منها ....
اسد : ( جا وقف حداها كايطل عليهم ) اشحال فيييها ديال الفشووووش والغووااات .....
لامار : راه هو لي كاينبشها وهي خواافة شوف راااااه كايجبدها من تحت الجن ....جوووووود
بقاو اسد ولامار كايتفرجو فيهم من فوق و جود ركب قدس فوق ظهرو تايعوم بيها وقسم فوق السطح داابحر مروولااااكسية كتحاول تنسى الشمتة ديال هاد النهار ..
دازت عندهم عشية هادئة مرة يهبطو يعومو مرة يطلعو يتبرونزاو .. اياد وبيلي كانو فطيارة وبيلي متكية علي الفوطوي وكاتشوف فالغيوم وعقلها ساااارح كولو مع جود .... وعلاش معاودش رجع هضر معاها ولا حاول يعيط يصلحو الاومور .... دبازهم فالماضي مكانش كايتجاوز ساعة دالمگانة .... واش صافي ؟ غايسالي هادشي .. حيت لقاها كتكمي ..... كاتحس بانه احسن قرار خدات هو غاتمشي لكندا على الاقل ماتبقاش تما حداه وعلى الااقل تعطيه فرصة فين يفكر بشوية عليه وفين يعرف راسو شنو باغي بالضبط وواش غادي يتوحشها ولا عندو عادي ... بغات دابا تعرف قيمتها فعلا عندو ... ورجعات غمضات عينيها كتحاول تنعس شوية وتحبس من التفكير .... واياد حداها كايضور فكاسو ديال الويسكي وكايفكر فهاد الكوابيس لي ولا كايعيشهم كل ليلة بالتناوب ... و فين كاين الخلل ؟ اشنو واقع ليه ....
سفيان وولادو تاهوما دوزو النهار فالبحر لي فالمنطقة ديال قصر الاسماعيلي ....اما عدنان مدوز عشيتو كلها هو خارج داخل على لوؤي لبيتو كايفزك سربيتة ويديرها فوق راسو ... ومرة مرة يعبر ليه الحراراة ولوؤي داخل كووومة فاالنعاااس مكيتململش بسبب العيا والمرض ودوا دالحساسية لي كاينعس ووجهوو حمممرررر وداتو كلها سخونة ...
واريج دوزات نهار غير نعاااس هي ورقية حاسة بفراااغ كبييير ملي خواو عليها كاملين عطاتها غير البكااا وعاد رجع معاها موووت باباها ورقية مرة تواسيها مرة تبكي معاها فالاخير أصر عليهم يونس ينوض يخرجهم يبدلو الجو .....
غربات الشمس على عائلة اسد فاليخت وهوما مجموعين فسطح اليخت جالسين فجليسة ارضية واليخت كولو شعل الاضواء ديالو الخارجية لي كانت زرقاء والداخلية لي كانت صفراء .. كانو دوشو وبدلو حوايجهم لامار بغوب حمراء وجامعة شعرها لفوق ومتكي وسيم على رجليها بشورط كحل وشعرو باقي فازك لانو يلاه طلع من البحر ... ودغيا وجهو حمااار ليه تبرونزا ... واسد جالس مقابل معاها وقدس ناعسة على كتفو لابسة غوب مزوقة بين البيض والغوز ... وقسم تاهي متكية فوق واحد المخدة بغوب زرقاء الظهر ديالها عريان فيه غير خيوط .... وجود ناعس على رجليها مغمض عينيه مسترخي .... وقدامهم بلاطو فيه كيسان ديال شاي بالاعشاب وكيسان دالقهوة وشوكولا الداكنة ...
لامار : ( كاتمشط لوسيم شعرو بيديها ) نققصو اولدي شوووية مكيصصهدكش ..
وسيم : نو ....عاجبني ... مزال باغي نصبغو
اسد : هه! باش بالاخضر ؟
وسيم : نزعرو ....
جود : نشوف شي زعورية تما نقرعو لييك
وسيم : الى بغيت نصبغو غاتحيد ليا نتا
جود : غانحيييدو هو ... غانقرعو ليك بالزيرو ... خلي شعرك كيفما هو باركا من تخربيق ... واش نتا درية ...
وسيم : علاش غي البنات لي كايصبغو
لامار : هاهوما غاببداو تاني ....
جود : عقلية الميريكان خليها فالميريكان ....
لامار : شعرك زوين هاكا علاش غاضييعو ... خلي غا هاادييك حرقات شعرها كامل
قدس : ( هزات نهاية الظفيرة ديالها كاتشوف فيها ) فيين هاد محروووق .. زويييين ... كايعجبني شعري
قسم : بالعكس جا معاها الكحل زووين ....
لامار : لونها الاصلي حسسن ... مارون كان جاي معاك شوفي ختك كيف خلاتو على طبيعتو ...
قسم : تانا كنفكر نزعرو شوية
جود : واش جهلتو !
قسم : ( بدات ضحك وضرباتو لراسو ) مالك مع زعورية واش باغي غاا بيلي ديالك لي تبقى زعرة ولا كيفاش ..
جود : هاديك راه مصبغاتوش هاداك شعرها نتوما لي باغييين تغيرو اصلكم ..
لامار : اجي بعدا نتاا ... شنو قررتي دابا !!!!!
جود: انا قراري راه قلتو ليكم .. تفوت ربعينية دجدي ويبان ليا مايداير ...
لامار : واش باغي صافي دير خطوبة رسمية ...
جود : ان شاء الله ...
اسد : واش باغي تعلم البروتوكول ولا غير بيناتنا !
جود : لا لا غير ببناتنا دابا .. تانبغي ندير لاكط انا وياها ونعلمو البروتوكول داك ساع .. دابا خلينا نتعرفو شوية بشوية ..... قلت نخطبها من والديها هاكا بخبار لعائلة حسن مانبقى نخرج معاها ونهضر معاها بتخبية ونعاودو تاني داكشي القديم ....
لامار : لا لا هااااكا مزيان ... تا بيلي بنت ضريييفة راها بنتنا .. الله يكمل عليكم بالخييير .... وراه كتبغييييك بنيتها اولدي مسألة شوية ديال الوقت وتتعود عليها .....
جود : ان شاء الله ...
اسد : مفاهمين شوية فالعقليات !! كيف جاتك ...
جود : مغانكدبش عليك الواليد مزال ماجات داك الفرصة لي نعرفها مزياااان .. راه مكندويوش انا وياها ومكنخرجوش... مي كايبان ليا راسها صغير شوية ... وعندها شخصيتها ... الباقي كتصلحو ليام .... مهم لاباز عجباتني .....روتوشات صغار دابا يتصلحو مع الوقت .....
الامار : اوا لله يكمل بالخير يارب ....
قدس : صافي ..... هي غاتخوي علينا اجود
لامار : فيين غايخوي ؟؟؟ يكككلس معاياا اشمن يخوي
قسم : هههه ها لامار العكوزة ناااضت هههه
جود : فين غنكلس معاك ا لامار فين ؟ واش منيتك ...
لامار : وفين غتمشي !
اسد : اهااااه ... فين غتمشي !
جود : غناخد داري ... الى كانت غانتزوج وساكن معاكم غا بلااااش .....
اسد : باش غاتاخد هاد الدار ؟ خدمتي بعدا ...
جود : على دوك الهياكل لي كنبات سهران معاهم غنعيطيهم ليك فابور اسي روكان؟؟؟؟ .....
اسد : ودوك الهياكل اشمن عام غيكملو !
جود : عام ونص تالعامين يكونو واجدين .....
اسد : غتخلي البنت معلقة عامين ؟
جود : وبين ماكملات قرايتها ... باقي ليها هاد العام واقلة ...
قسم : اويلي على غتبقى عامين ؟
جود : ومالنا على الزربة ! تكمل قرايتها ويكون خير ...
اسد : بغيتي تا ست سنين تاهي مزيانة غاا هووو داك السبوع بلا عرس راه مكنعرفوش اناا .. وضبر راسك ...
جود بدا غير كيضحك حشم يجاوبو وبدا يحك فشعرووو حابس ضحكتو تاولااا حمررر وقسم بدات ضحك عليه وشدات وجهو
قسم : وييينوو حححشم هههههههه
.
قدس : هههههه تزنك ههههههههه
لامار : ههه بعدو من الولد ....
جود : ( دفع ليها يديها ) هنييينا بارااكااااا من التخربيق .... اشمن حشم ...
وسيم : والله الى طلع كيحشم ههههه
اسد : ( كيشوف معاه مبتسم ) والله اولدي واخا دير خمسين عااااام .. باااقي غنشوووفك وليد صغيير حدايا ..
جود : راه غااانوووض ....
لامار : صاافي صاافي هاحنا ساكتييين بعدو منو ... فففف تمنيت هاد النهار مايسااااليش ..... كنتوحش ولادي وهوما حداياا علم الله الى بعدو .... كيجاتكم الخرجة
قدس : وااااعرة
قسم : كنا محتاحينها صراحة
جود : كون غا صرفتوها لينا فلوس ... راه مكاينش لي كايفرحنا قد داك الميساج لي كايجي من البنكة ....
لامار : ومكتعرفش نتا واحد الحاجة سميتها السعادة المعنوية ! شي حاجة مكتشراش بالفلوس
جود : اه هاد اليخت كايمشي بالما ... ومشري بكيل ديال الگمح والشعير ...
لامار : ( ضرباتو بمخدة) مااالك تمووووت على الطنز مااالك ...
قسم : ههههه ماديش عليه والله تادازت واااعرة ....
لامار : اااجي حقاااااا ... وييييلي نسيييييت ......
قدس : اشنو ؟
لامار : ( شافت فاسد ) قلتي ليا تاتفيق قسم وسوليييها ( قسم وسعات عينيها ) علاش قلتي ليا جا لي يزاحمك فقسم .... ( اسد كيومي ليها تسسسكت ) شكون هذا لي جاي يزاحمك وكون مجبتيهاش فالسبعة دصباح مغتلقاهاش ؟ هاااااا
قسم : ( شافت فاسد موسعة عينيها ) يااااااك ابااباااااااا
اسد : انا قلت بحال هاكا ؟
لامار : اااه وبليمارة فاش قلت ليك شكون قلتي ليا تاتفيق سوليها .. وهاهيا فااااقت .. يلاه قولو ليا شكون .... رااسي بقى ضاااارني ....
جود : ششتي نتا الوالييييد ... ماااعليييييكش .. بربي تااصررعتييييييهم ...
قسم : ( هبطات شفايفها ) ياك ابابا يااااك ....
لامار : وااادووييو دغيا قولو ليا اش كاين ... واش خدمات شي خدمة جديدة ؟؟ شي اونگاجمون جديد اقسم ؟؟؟؟
جود : وا انوكاااااجموووون هو ... ولات عندها خدمة كتبدا تالطناش دليل .....
قسم : ( ضرباتو على راسو ) جووووود ....
لامار : دااباا مغااادوويوش ....
قسم بقات كتشوف فاسد لي كيومي ليها بمعنى ماااشي سوقي منك ليها ... وفلخر تنهدات وشافت فيها موكلة امرها ليها ..عارفة الى غتفضح غتفضح اسد مايقدرش يزيد يخبع على لامار شحال مابقى غايگولها ... وشافت فيها ..
قسم : ماما .... صافي انا غنقوليك .. ولكن واااعديني متقلقييييش ......
لامار : علاش غنتقلق ؟؟؟ شنوو درتي تانتي تاااااني ....
قسم : ( ضارت شافت فيها وجود ضحك كيتشفى فيها لي جا دورها وقدس ووسيم غير كيشوفو ) ق .. قوليا ليا اماما ... اححم ( اسد مربع يدو كيتسناها تهضر ) شششو .. دابا .. زعما .. شنوو اقبح حاجة تجي فبالك غنكون درتها ... وغتقلقك بزاف
لامار : هي تكوني درتي شي حاجة تانتي وانا اخر من يعلم ......
قسم : ( سرطات ريقها ) و ... وشنو احسن حاجة تفرحك بزاف ؟
لامار : يكون شي واحد دخل لحياتك ياااااربي ياا ربي ونشوفك عروسة
قسم : ( سرطات ريقها بقات كتشوف شحال وعلات راسها فيها مدبلة عيونها باسف ونطقات بصوت خافت خيفان من ردة فعلها وقالت عاضة على لسانها ) درتهم بجوج ....
جود : ههههه جمعاتهم ليييك فخطرة وحدة ههههه
قدس : ( وسعات عينيها ) نوووو وااااااي !!!!
وسيم : سييريوووزلي !!!!!!
لامار : ( كترمش بعينيها ) ها !!!!! ( بقات كتشوف فيهم ...وهي تكعد وقادات جلستها مزيان ووسيم ناض على رجليها وهي رجعات شعرها لور كتشوف فقسم ) ش .. . ش شنو درتي ؟؟؟؟؟
قسم : ( شافت فاسد بترجي ) بابا ... فكككني عافااااااك ...
اسد : منك لييييييهاااا..... ( ريع يدو ) بيينااااتكم ...
جود : ( شاف فلامار ) اشوفي ياه ماشي كتعرفي تحگري غا عليا .... عطيييها تاهي علاش كتقققلب ....
لامار : لا صبر .. صبر .. صبر نستوعب ... ( كتشوف فيها بصدمة ) واش نت مع شي واحد ؟؟؟؟؟؟
قدس : حححلفي بالله !!!!!!!
قسم : ( هبطات راسها كتحركو بالايجاب ) ر . ر راه ... راه كنت غنقولها ليك كنتسنى غير الفرصة المناسبة .....
لامار : شكون هدا ... كنعرفوه ؟؟؟
قسم : ( شافت فاسد وبدات تحرك راسها بآه ) امممم
لامار : اياد ؟؟؟؟ .... ( وسعات عينيها ) ياااكماا لووؤي
قدس : ( وسعات عينيها وحلات فمها ) واااااات ؟؟؟؟؟؟ اويييلي
اسد : لامار يهديك الله راه قسم هادي ...
لامار : صافي انا رووونتوووني مابقيت عارفة شكون مع شكووون .... معااامن نت تااااني ....
قسم : ( شادة على راسها ) اويلي على لوؤي اويييلي ..... ماما تبتي معااياااا راه مكنعرفش غير عمامي فهاد الحياة ..
لامار : وعلاش كتعرفي نت من غيرهم ؟ من امتى ابنتي ؟؟؟؟؟؟
قسم : ( تنهدات وشافت فيها ) منهار دقات بنت عليا باب المكتب وقالت ليا بغات منحة فكلية الطب ..... من تم و انا كنعرف عائلة اخرى ....
لامار : ( كترمش بعينيها وكتنعش ءاكرتها ) منجة ؟؟؟ منحة .. منحة ....
قسم : البنت لي كانت فالدرب لي كنت كنمشي ليه اماما ......
لامار : ( علات حجبانها ) اااااااه .... عرفتها .. لي كنتي باغا ديري بروجي فداك الدرب ( تنهدات ) فففف ... تاافرحت على والو حسابتني غير شي واحد دخل حيييياتك ...... صدق غا برووووجي .... مفرحيييني على وااالووووو ..
قدس : اماما شمن بروجي واش هي قاتلك راها دارتهم بجوج سيطاديغ تعرفات على شي وااااحد مالكي تكلختي ...
لامار : وهي كتقووليك دقات بنت باب مكتبها بغات منحة .... مالها غتزوج بينت !
قسم : مااااامااااا
اسد : ( تنهد ) لا اله الا الله .. ( ناض ) انا مافيا لي يسمع لهاد البولشيت " تخربيق " ديالكم .... الله يعاون .....
خلاهم وزاد ماشي كيحيد تيشورت ديالو وتلاح فالبحر .... هو العومان عندو تاليل عاد كيحلا ليه .. وجود ناض تاهو باش ميحرجوهاش وتعاود لماماها فخاطرها لاكانت شي حاجة خاصة ..
جود : لوؤي گاليك هههه ( ضرب فوسيم ) نوض تفزگ شوية نوض ....
وسيم : خليني نفهم هاد روينة بعدا ....
زاد جود تاوصل باش يتلاح وبدا يعيط عليه
جود : وسيييييم ....
وسيم تنهد وناض تبعو وجود واسد بلعاني انسحبو عارفين واخا معاودة ليهم ولكن التعاويد مع الام غيكون مفصل كتر ... وتلاحو كاملين يعومو .... ووسيم كيتحلف فجود يعاود ليه اش واقع ....
قدس : ( قربات عندهم ) دوي دغيييا راه كولي كنغلي .....
قسم : صافي انا غنعاااود ليكم ....
لامار : دابا صبري .. واش بصح شي واحد فحياتك ؟؟؟؟
قسم : اااه ..
قدس : ( شدات على فمها ضاحكة ) اومايكاااد .. فااااينااااالي ....
لامار : شكون هذا ؟ واش شي واحد يلاه تعرفتي عليه ؟ شكون عرفك عليه !!!
قسم : تعرفت عليه بوحدي ...
قدس : دغيا عااودي لينا ... شكون هو .. وشنو كيدير
قسم : ماما ياك ممقلقاش مني !
لامار : دابا طلقيني للهضرة ... اراي ليا المفيذ
قسم : مهم ... البنت لي كانت طلبات مني المنحة ... هذا راه خوها ....
لامار : لي مكانش باغيها تقرا ؟؟؟؟
قسم : هاااداااك
قدس : وكيدرتو تعرفتو ؟ وجود وبابا بانليا فخبارهم
قسم : جود عاد قلتها ليه نهار عاود ليا على بيلي ... وبابا راكم عارفين مكتفلت ليه تاشي حاجة .... كنت كنشاورو فاش كنت تالفة وماااكنت عارفة مندير .. وديما كنت كنهضر ليه عليه قبل حتى متولي بيناتنا شي حاجة ....
قدس : على بعدا بيناتكم دابا ؟
قسم : ( رجعات شعرها لور وحاولات تبسم ) اه ... ماشي بزاف يلاه يومين باش ولينا مع بعضياتنا .....
لامار : وشحال ونت كتعرفيه !!!!!
قسم : مااشي بزاف ... منهار عرفت داك البنت ... وعرفت داك الدرب ورتاحيت ليه ... كنت تلاقيتو فدارهم .. ( تبسمات وهي كتذكر داك النهار لي كان نازل من الدروج كيشوف فيها وتذكرات صدرو العاري وعينيه الزرقييين وشعرو الفاااازك ) ملي شفتو اول مرة .... معرفتش شنو كان وقع ليا .... اول مرة نحس براسي تعجبببت بشي واحد لداك درجة .... عندو واحد الكاااريزما غاالبة بزااف وسابقاه بلا قيااااس ...( قدس حطات يديها على حنكها وكتبسم بعينيها وكتسمع ليها ) ولكن واخا هاكاك كان غير اعجاب دغيا نفضتو من راسي .... العلاقة ديالنا بدات بالكدوب ... حيت البنت كانت مخبعة عليه انها بغات منحة ... وانا باش منفضحهاش فاش سول عليا شكون قلت ليه كنليفيري البيتزا .....
قدس : وااااات !! هههههههه اويلي على البيتزا
قسم : وايه داكشي ماجا فبالي كتعرفوني مكنعرفش نكدب ... معرفتش واش كان تيقني ولا لا ... وحيت مكانش بغاها تاخد المنحة والبنت بقات فيا حيت حلمها انها تقرا خصوصا انها ماعندها لا باباها لا ماماها .. خديت انا المبادرة باش نقنعو وليت نتلاقى بيه يووووميااا على امل نقنعو زعما ....
قدس : اوااااا
قسم : معرفتش واش كنت باغا غير نقنعو ولا كنت كنلقاها حجة نشوفو ... كل مرة شنو كيطرا فداك درب عندهم .... وولفت المشية لتما بزاف .. حسيت براااسي حرة بلاااا قياااااس .. حسيت براسي تما قسم .. قسم وصاااافي ... كنتصرف تما بلا بروتوكول بلا والو ... تعرفت على دوك جيران .. حضرت معاهم لعرس ( لامار كتفكر نهار كانت دخلات فرحانة ) نقشت الحنة كليت ليزيسكاغكو .... مشيت للمرصى وطليت على الباطوات بحالا انا ماشي كابيتين .. عاد حسيت براسي بلي راني بحال كاع البنات .... مشيت لمقشدة كليت المسمن والحرشة ... لبست من البااال بلا تصبين غير باش يتيق بلي راني اانا غير بنت الدرب بحالو ... وملي شافني لبستهم بلا تصبين ودارولي الحساسية مشا شرالي جوايج جداد ..... نهار بغا يوصلني لدارنا معرفتش شنو نقول ليه وبقيت غير غادية بيه فطريق باش نتلفو ويحطني قدام شي دار اخرى وندير راسي راها دارنا تاكنلقى راسي قدام الخيرية .... ركبت فطووبيس وماعرفت كندير نخلص .... كاان دايني على قد عقلي ... نظراتو فاش كان كيهضر معايا وطريقة باش كيشوف فيا .. طريقة باش كان كايسمع ليا ... كيفاش كايضحك وكيفاش كايهدا وكيفاش كايتعصب ... عناااادو لي كان كيعجبني نتحداه .... كان كيبان فيه مهتم ليا واخا مكيبينش .... ملي كنكون كنهضر كيسمع ليا وكيتسناني نسالي عاد يجاوب ....طول المدة لي كنت كنقنعو فيها يخلي ختو تقرا وانا عايشة كنقنع فراسي بلي راه مكنطيحش شوية بشوية فيه .. بلي راه غير راجل عادي عندو كاريزما دايز وعابر فحياتي و غايمشي ملي يسالي فيلم المنحة.... ولكن كنت شوية بشوووية كننغغرق ... وجهو لي وليت نشوفو كل مانسد عيني .... رييحتو هضرتوو ... متصورووش شحال جدباتني شخصيتو .....
قدس : ( القلوبة ترسمو فعينيها ) اوومااايكاااد ... اوا ؟؟؟؟ وهو ...
قسم : هو بحال شي حيط .. مكيبين ليك والوو .. خاصك تكوني كاتقراي افعاااالو باش تفهمي ... مرة كيبان ليا ضريييف ومرة كايشعل وتيقلب عليا ... وانا مكنتش فاهمة شنو واقع وعلاش مرة يضحك معايا وتيعامل زوين ومرة يقلب عليا ويزعف ويمشي ويخليني ...و ما ( قاطعاتها لامار )
لامار : كان عايق بيك تتكدبي عليه ...
قسم : ( كترمش فيها ) ا . اه ..... ه هادشي فهمني بابا منبعد ...باش عرفتيها تانت
لامار : ( رداتها سنيييين لور وتبسمات لي الزمان انعاد من جديد على بنتها ) راخا باينة ابنتي
قسم : تا بابا فهم .. غير انا لي مكنتش فاهمة .... وواحد نهار لقاني كنبكي وتالفة وعاودت ليه كولشي وبلي راني كادبة عليه فشكون انا وبنت من .. هو يقول ليا اذن راه عايق بيا ... وبلي حيت انا مزال مغرقة فكدوووبي .. داكشي علاش هو كيتقلق .. يعني كيكون عايش معايا مزياااان ولكن ملي كيييشوفني مزال مطولة فكدوبي عليه كيتعصب ..... وقاليا نمشي نقول ليهم كولشي حيت واخا عارف غايكون ( قاطعتها )
لامار : غايكون كايتمنى تمشي تعترفي لييه نت بفمك ....
قسم : ( باتسغراب ) ماما !!! واش فايتين عشتو شي حاجة بحال هاكا نت وبابا !!!!!
لامار : ( تنهدات ) الدنيا كلها تجارب وحنا دوزنا بزاف .... كملي
قسم : صافي .... مشيت اعترفت ليه
قدس : بابا عاودتي ليه كااع هادشي ؟؟؟؟؟
قسم : ماشي بهاد الطريقة ولكن ....فهم بلي راني معجبة بيه ...
قدس : وماقال والو ؟؟؟؟ خلاك !!!!
لامار : سكتي نت واش هو من سعداتو تتعرف على شي واحد راه كنباتو هازين همها .... كنا كنخافوها عمرها تبغي تزوج كاع .....
قدس : وعلاش تانا متهزوش همي !!!!!
لامار : باقا صغيرة وصلي قدها وندعموك ... كملي نت ...
قسم : اعترفت ليه وقلب دنيا فوق راسي ...قاليا بلي انا وياه بعاد اجتماعيا وبلي هو غير ولد درب وخدمتو صيااااد وانا بنت الاسماعيلي ومغيقدش عليا .. ديما كنت كنحاول نوضح ليه اننا ماعندناش هاد الفوارق وبلي مكنتسوقوش للمهنة دالواحد ارا يكون غير راجل ... ولكن مبغاش بالمرة راسو كااااان قاااسح .. مباغيش يبان بحالا طماع ومارضاش
لامار : شحال فعمرو
قسم : معرفتش عمرو بالضبط ... ولكن راه تلاتيني ....
لامار : واش كبير بزاف ؟ قد خالك مروان ؟
قسم : لا الاااا لاااااا ... صغير عليه .... معرفتش لمن نشبهو ليك .. مهم راه مغيكونش فايت الربعة وتلاتين ....
لامار : وشنو خدمتو قلتي ؟؟؟؟
قسم : ( تنهدات ) صياد ... بصح دابا راه غيبدا مشروع جديد ( تبسمات ) دارو على قبلي ....
قدس : شوفي اه .. هاد التقطار دالهضرة مافهمت فيه تاوزة عاودي بشووووية ومن لوووول
قسم : ( هزات معصمها شافت لساعتها ) راه غنتعطلو والله ... هاهيا تسعود دابا
لامار : ( شداتها من يدييها ) هههضري دغياااا ولي تما خويييييه .. .سربيني دغيا ...
تبسمات قسم وبدات تعاود ليهم بليديييطاي من لوووول حتى للخرررر وكاع اش طرا بيناتهم فقط القبلة لي احتافضات بيها ليها ومشاعرها كاملين قالتهم ليهم وشنو كتحس من اتجاهو ... وشكون هو وعائلتو وجدو واسد منين كيعرفو ......
لامار : كان عاودلي اسد على عاد المختار الشريف شحاااال هادي .... هي قول ليا جدووو
قدس : ياااه على صدفة ....
لامار : ومو ماعليها خبار ؟؟؟؟
قسم : مبغيتش ندخل ليه فداك التفاصيل اماما .. المووضوع محرج وخاص بنسبة ليه .... ومزال موصلنا لداك درجة فالضسارة على بعضياتنا باش ندخل فبحال هاد المواضيع كتعرفيني كيدايرة .. كيعجبني تبقى واحد شوية دالخصوصية بين جوج ...
قدس : وختو كيدايرة ضريفة ؟
قسم : غزاااااالة .. ضريفة بلا قياااس وكيوووت وبريئة ومساالمة لاقصى درجة .. مسكينة كتخاف منو هههه ... تستاااهل السعادة داك البنت والله .. متصوووروووش سحال زوييييونة وعينيها فنييين بحال خوها. ..عيطات عليا لبارح كان خرجها وفرحات ملي لقاتو مهدن وعندو الموورال جاتها فشكل ...
قدس : وعلاش لي ميكونش عندو المورال و المادموزيل قسم كاملة فحياتو ههههه ( كضربها لكتفها ) اش كديري ليه اصكعة ....
قسم : اووودي هو لي اش كايدير ..... وااااماما غتبقاي مخنزرة فيا هاكا .. وهانا عاودت ليك كولشي بليديطاي لي معارفو تااحد سيري عاوديهم لبابا والله تااناااكلك
لامار : ودابا عاد جايا تقوليهااالي .. علاش مقلتيهاش ليا شحال هادي ...
قسم : وهانا عاودتليك كيفاش كل مرة كنا كنتلاقاو ونتفارقو .. مبغيتش نفرحك على والووو ... قلت حتى نتأكد منو ملي طلبني لعلاقة رسمية هانا جيت خبرتكم ....
لامار : خاصني نشوفو ....
قسم : ششفتو تااا انا بقااا غا نت ......
لامار : راااا قلت ليك خصني نشوفو
قسم : وراه اكييد غااتشووفوووه ... كنتسناه غير يستعد ... مبغيتش نحكر عليه ... هانتوما خليوني نسالي العسكرية .. ونحاول معاه ... راه واخا هادشي كاع لي عاودت ليكم وشخصيتو .. راه حشومي ... ومعقووول بلا قياااس وعندو رزانة فشكل ... راه قتلييك كيفكرني غير ببابا ...
لامار : سييري بعدي لهيه باااك مكاينش لي كيشبببهو ....
قسم ،: الالة خلييناه ليييك ...
قدس : ورينيي تصوييرتووو
قسم : منين غنجيبها ... ماعمرنا تصورنا .. ووهو حسابو فانستاغرام صيفط ليا منو فولو و مداير تاشي تصويرة ... بروفيل ديالو فيه غا البحر ... واتساب داير تصويرة ديال باباه قديمة ...
لامار : ارا نشوف ....
قسم تنهدات وجلدات تيليفونها ووراتها ليها غير من برا باس مدخلهاش لديسكسيون ولامار بعظات تيليفون على عنيها مصغراهم كاتشوف
لامار : امممم .. كايبان زوييين الله يرحمو .. غير من باه باينة يكون زوين ... مممم عندو خالة فوجهو ...
قسم : ( حيدات ليها تيليفون ) تي طلقي راه غانقولها لبابا قالاك زوييين .. بقاو ليك غالميتين
قدس : عطيييني نشوووووف ( وراتها ليها ) ياختي كايبااان حنيييين .... الله يرحمو .... ( قسم ردات تيليفونها ) اجي .. وبابا ماقال والو على خدمتو .. زعما مستقبلا فين غتعيشو وهاكا ..راك شفتيه كيفاش كيحكر على جود ...
قسم : قااال ... قال ليا لابغيتو ديرو خطوة خاصني نشوف مستقبل ونشوفو تاهو دار خطوة باش تعيشو مزيان اما تمشي لدرب ويعيشك بصيادة لا ... داكشي باش مسكين مشى تسلف وشرا الريسطو لي قلت ليكم ...... عارفة راسي غررقتو .. واكن راه هو لي بغى انا ماعنديش مشكل
لامار : وااااالا متزيروش تاني على الولد ... على حنا خاسرين عليك زبابل دالفلوس فالقراية وموجدين ليك مستقبل باش نزيرو على ولد ناس يصرف عليك ؟ حنا اش كنديرو ...
قسم : وراه هادشي لي مدخلش ليه هو لراسو ... تايقولك نصرف عليك انا ... راه عيييت فيه غير باش نعاون غييير شوية فداك ريسطو فالخلاص مبغااااش كيقول ليا هادوك فلوس باباك وانا مخااادمش فيييهم .... وماطامعش فيهم
قدس : عنداك الجنية يكون كيدير بحال هاكا غير باش يتبتك زعما .....
قسم : لا لاااا مدايرش هاكا هووو راه فشكل دابا تعرفو عليه وتفهمو .... هاكا طبعو تاداك المنحة لي عيت نقنعو بيها وافق بشرط هو يخلص الكلية ....
قدس : وا ختي لاكان بحال هاكا صراحة راااجل والله ... راجل ونص سعداتك بيه .. شنو فالراجل من غير النفس ديالو .... عععجبني صرااااحة
قسم : وهادشي علاش عجبني .. واش انا ختاريتو غير هو من دون الرجال كاملين غير هاكاك .. راه كنت كنقلب على هاد الحوايج وهاد التفاصيل ... بحال هاد الرزانة والنفس و الرجلة والكاريزماااا .. اما الرجال راه مشتتين قدامي ....
لامار : وماعندو خالات ماعندو عمات ماعندو جدات لفعات ..... طاسيييلة نعرفوها .....
قسم : مقال ليا والو ... قلت زعما تانعاودو نتالاقاو ويعاود ليا على عائلتو ... راحنا يلاه كنتعرفو ... اوا ومن زهري والنحس ديالي تالنهار درنا علاقة عاااد انا بديت غير من كارثة لكارتة .... ها لوؤي ضااارب .. ها العسكرية ها هاد نهار لي ضيعتو كامل هنا وغنمشي نساافررر شهر ونص ... ديجا كنت دايرة نشوفو هاد الصباح وملي صيفطتو لينا كتبتلو غير مسج بلي ميمكنش ليا تالعشية وهاحنا باقين هنا .... حسيتو بحالا تقلق .....
لامار : ومنبعد .. مالو عاقد عليك ... عائلتك اولى بيك هو يالاه عرفك البارح
قسم : ودابا نوبتك تانتي .. ياااااه واخا تعرفت عليه البااارح راه ولفتو وكنبغيه .... تصيفطوني انا شهر ونص بلا منشوفو والله الى حشووووومة عليكم
قدس : انا مزال ممتيقاش قسم كتبغي شي واحد !!! حاسة براسي فالخيال .... ولي مستغرية فيه هو بابا وجود كيفاش داعمينها .. كون كنت انا كون دفنوني حية
قسم : وانتي ماشي ديال الزواج ... نتي مزال مباغينش نزوجوك ونت براااسك مباغياش تززوجي واش تجي تقولي ليهم انا راني تصاااحبت ؟ انا مقلتش ليهم تصاحبت قلت ليههم تعرفت على واحد غيجي يتعرف عليكم وناوين الحلال .... يعني غنكمل حياتي معاه .....
لامار : ماقربش ليك !
قسم : ( شافت فيها ) ها ! لا .. لا ...
لامار : ( مصغرة عينيها فشفايفها ووجهها وعنقها وشافت فقدس ) نزلي نت جيبيلي ديمايكون والقطن
قسم : ( كضور عينيها ) علاااش !!!!!!!
لامار : انا عارفة علاش ....
قسم : ماما يهدييك الله
قدس : هههههههه شنو زعما تكون مغطية بالكونسيلر ههههههه
لامار : وغيخفاو عليا هاد الفعايل ( كتمسح ليها فعنقها وتشوف لصبعها ) دايرة كوونسيييلرر هانتي شوووفي
قسم : ماااما واش حماقيتي راه غير زيييت دالبرونزاج
قدس : لا لا راه مع الما يكون تحيد مادايراش .....
لامار : دايرة كونسيلر ديال لما .. هاهو كيبان كيلمع ...
قسم : ( ناضت ) ياااه زدتوووو فيه بناقص كاع لي يعاود ليكم .. ( ماشية لجهة الخلفية )
لامار : والله ويسييقو اسد وجود الخباااارررر ... وتشوفي الدعم كييداير ( شافت فقدس ) والله الى بااااسها ... توريييني انا .. كاين شي علاقة بلا بوسان
قدس : هههه صراحة مكايناااااش ....
لامار : ( علات فيها حاجبها ) ياااك !!!
قدس : ومالكي دابا ضرتي ليا انا .. انا عندي شي حد ! شوفي معاها هي ...
لامار : ( رجعات كتشوف قدامها كتفكر ) دابا فوقاش غنتعرفو عليه ... نجمعوهم هوما وخطابة جود قد قد ؟؟ ... ( كتعيط ليها ) قااسااااام اااجييي لهنا ... قااساااام .. ( قسم طلات عليها )
قسم : شششنو
لامار : نجمعووك نت وجود فنهار واحد
قسم : ماما واش منييييتك ؟؟؟؟؟ نمشي انا نخطبو ؟؟؟؟؟
لامار : وراه خاصنا نتعرفو عليه
قسم : وهو لي خاصو يتعرف عليكم ... راه هو لي خاصو يجي لعندكم ماشي حنا نمشي عندو .. واش انا نجرو من يديه نقوليه يالاه تعرف على عائلتي بزز .. صافي راه تاهو قال ليا نكون مستعد غيجي ...
لامار : وقتاش هاد الاستعداد
قسم : ( علات راسها لفوق ) واااااااه ..ها علاش مبغيت نقولك والو .. عرفتي شنو هزي الورد وشوكولا ويالاه نمشيو نخطبوه حنايا .. راحنا يلاه يوماين هادي عاد كنتعرفو تسناي شوية ...
لامار : جدااااك راه مغتبغيش هادشي .....
قسم : على جدة شكون غيقولها ليها ؟؟؟؟
لامار : انا
قسم : ماماااااااااا
قدس : ههههههههه والله ابنتي لا معندك فين نڤنفني هههه
قسم : والله تا ندمتيني ... مااما راه باقي مدرت والو ..
لامار : اشنو دابا نخليه تايجي لدار عاد يتصدمو عمامك وعيالاتهم وجداتك .. جداتك تنوص ليا انا تقوليا خبعتي عليا ... انا ابنتي مكنخبيش على ماما بحالك ...
قسم : اااه فخبارنا فخبارنا ... راه قالتها لينا .. ماعلمتيها كتبغي بابا تاقربتو ديرو دراري وهي لي حصلاتكم فالدرب ... مااااعليييينا بلا منجبد ليك قديم وجديد .. ماما خلي هادشي بيناتنا .. على الاقل تانرجع من العسكرية ويكون خير
لامار : ترررجعي وحنا مالنا ؟ ياك هو مغاديش .
. هو غا هنا .... اوا يجي ينتعرفو عليه ماتجي فين تجي نت تانكونو ولفناه
قسم : اوييييييلي ياويلي ولللفتو حتى انا .... علاش غاتولفوه. . نت لي غاديه؟؟؟؟ مغايجيش هو الى مكنتش غاتهناي. .....
قدس : هههههههه ياسيدي ياربي غانتكوانسا بضحك هههههه ديرو ليه سويت ديالو تاهو ويبقى يجي عندنا من ويكاند لويكاند ماتجي فين تجي قسم تااايكوووون وللللف تباركالله غانوليو حنا نعرفوها عليه ههههه
لامار : سسسكتي نت انا مكنضحكش ... تكمل العععسسكرية ... تجيبيبه لدارررر
قسم : صااافي وااخا واخا نجرو من يدو ونقوليه يلااااه .... صافي على خاطرك ؟؟؟ .. وقولي لبابا يلاه نمشيو دغيا .. ياربي يبقى ليا غير نص ساعة فين نشوفو ....
قدس : ههههه مابغيتش نتشفى فيك اختي ولكن دابا راه تسعود ونص والا قلعنا دابا غنوصلو تالحداش ولا طناش .. يلاه تجلسي مع عمامك وتنوضي تشدي طريق ههههههه ...
قسم : ( نزلات شفايفها ) ففففف على زهررر .. غيحسابتو غير كنتهرب منو داباا .... اجيو قنعوه راني فوسط المحيط ....
لامار : لاكان كيبغيك دبصح خاصو يثيق فهضرتك ....
قسم تنهدات ومشات كطل عليهم
قسم : بابااااااا .. بااباا يلاه نمششيو .... بابا راه غنحرك الييييخت ونخليكم هنا ... والله حتى غااانمشي ... بااابااااا ..
اسد كان بعيد هو وجود ووسيم وهي ضارت عند ماماها
قسم : شتي كون ماحشمت شوية غنحرك هاد اليخت ونمشي .....
لامار : انا منتحركش بلا راجلي
قسم : نلوووحك لييه ونزيييد ....
لامار : اه اه اه ... ( كتشوف فقدس ) شووفي لييييك قسوووووم ولا يبان ليها غير هاد خييينا ولاحت واليديها هي كاع .... ساحر ليها هادا باينة عندو شي عماتو كراطط شواو عليه هيضورة العيد ....ضرباتنا بركلة ....
قسم : ونتوما 28 عام وانا معاكم باركا ... فففففف ( ضربات على الحديدات ) على ززهررررر .. بابا دارها بلعاااني .. كون خليتوني نشوفو غير نص ساعة دالمكانة ....مالكم على هاد السم ...
قدس : كنت كنقولها ليك ... كنقوليك راه غتحنتنا هههههه ... قذساام ديني معاك نشوفو تانا كيداير ... خسارة كون غير كان عندو شي خوه ....
قسم : اش غاشوفي فيييه .. ( رجعات جلسات معاهم وتنهدات ) ماما ... قولي ليا
لامار : اشنو
قسم : ياك اصيل .. مغيلقاش مشكل مع الصحافة والعائلة وكدا .. زعما حيت هو من طبقة متوسطة .. مغيبقاوش يكتبو عليه شي حاجة تحرجو ... راخ داك الزمر فين النفس كتر من الرابوز ...
لامار : وخاصو هادشي يكون فبالو وميتسوقش ليه .. الاهم هو نت وحنا مكيهمناش هادشي وكيهمنا غير يتههلى فيك وتكونو كتبغيو بعضياتكم ...ويطلع راجل معاك وتعرفو ديرو اسرة صغيرة ديالكم ... فنفس الوقت يكون خدام بالحلال مكييهمش شحال كادخل كتر مكيهم انه الاساسيات يكونو عندكم ..... ( عنقاتها عندها كتمشط على شعرها ) فرحت ابنتي .. فرحت لي لقيتي لي يرتاح ليه قلبك .. كنت هازة همك قد جبل فووق ضضضهري .... فرحت لي لقيتي لي يوالمك ... امنيتي من الله يحافظ علييك ويبغيك حتى هو كيفما كتبغييه .. راه باينة فعينييك كتسطاي عليه ...
قسم : ( تخشات فيها كتر معنقاها ) بزاااااف اماما .. بزاااف ....
لامار : والله يجمعكم بالخييير ... من هادشي لي عاودتي ومدام باباك مرتاح ليه اذن راه ولد الناس .. الله يوفقكم ...
قسم هضرة ماماها دابا نساتها فكاع اش طاري وتبسمات وهزات يديها باستها ...
قسم : الله يخليك ليا
قدس : ( شادة على حنكها ) الحب شحاااال زويييين كيرد بنادم حنييين ههههه
قسم : اممم ( شافت فيها ) ونت ا داك الجنية .. زعما مكاين حد .. غا هضري انا راه ماشي بابا ولا جود هههه
قدس : لا ... مكاينش غير واحد هاد ساعة كاينين ستة وتلاتين
لامار : اوييييلي
قسم : نتي را بوحدك نتي .....
قدس : كنضحك وصافي وخالقة الجو لراسي ... كيعجبني واحد خاصني نولي معاه واحد سومين ونقلب عليه ... زواج وانني نتأونكاجا مع واحد مزال مدخلش ليا لراسي ... وباش نجرب نهضر على شي واحد ونبغيه بهاد طريقة لي درتي نت دابا ..... كانشوف بلي مزال عليا شوية الحال .. نهار نبغي شي واحد .. وونستعد نفتح ليه قلبي غنبغي نكمل .. وانا الزواج مستحيل نقدر عليه دابا ....
قسم : وراك باقا صغيرة ... تاتكملي قرايتك .... مكاين زعما تاشي واحد عجبك دبصح .. مختلف !
قدس : ( بقات شحال كاتشوف لجنب وشافت فيها ولامار متبعاها ) كاين ...بصح كنحاول منحلش ليه قلبي كاااع ....
قسم : علاش ؟
قدس :انا مااباااغاش نبغي شي واحد ...
قسم : راه هادشي مكدخلوش فيه
قدس :ولكن نعرفو نتحكمو فيه .... الى خليتي قلبي يگيديني غانمشي فيها ... بابا مغايقبلش نبقى غير مصاحبة وما مابغاش نتزوج .....
قسم : واش كتعرفيه ؟ بيناتكم شي حاجة
قدس : لاااا .. ولكن هو تايقول بلي كايبغيني .... ومعاملتو ليا عامرة اهتماااام ... ومنكدبش انه كايعبجبني ولكن متسلط ... انا باغا نهار نزوج ندي شي واحد كووول ... مامعقدين راه طالعين ليا فراسي ( لامار غير من هاد النتفة لي كدير للمخدة وهي كتهضر عرفاتها علامن كتهضر ) .. اون پليس دو صا ... مزال باغا نعيش حياتي ونشبع من الصغر ديالي و فشوشي ... نخرج وندخل براحتي ... هانتي شوفي راسك دابا هازا ليه الهم لايتقلق .. انا را منعرفش لهاادشي كيعجبني نعيش لراسي ونتقلق من راسي ونحزر راسي منعرفش نحزر شي واحد .. مستحيل نصبر على حكام شي واحد .. مزال باغا حريتي ...
قسم : ومالو هاد الواحد غيقطع راسك ولا يحطك فالحبس
قدس : منعرف كيجيني زواج بحال الحبس .. خينا نهز ليه الهم واش يتقلق مني .. ونولد الولاد .. ونربيهم ... فففف كوشماغ بنسبة لياااا .. امبوسيبل
قسم : ههه عادي راه عقل الصغر ملي غتزيدي تكبري شوية غتبدل ليك هاد الفكرة وتولي كتقلبي على لي ترتاحي ليه وتكوني معاه اسرة حيت شبعتي من الحياة ....
لامار : والله يسعدكم ويجيب لي يسعدكم .... ( كاتحك فدراعها ) بببرردت .... كون غير يجي اسد نتحركو ...
قسم : نوضي عيطي لبابا على الله يسمع ليك ...
يالاه غتعيط وهي تسمعهم جايين من الجهة لوخرا كيردو شعرهم لوررر وجود شاد فوسيييم وتلاحو على لي رولاكس كيمسحو بالفوطة
قسم : تعععطلتوو اباباا
اسد : ( مسح شعرو ) وها حنا تعلطنا .... اش واقع كاع .... ( هز تيليفونو ) يلاه العشرة هادي
قسم نزلات شفايفها بأسف ولامار جاتها الضحكة عارفاه شاد معاها العكس ...
اسد : نزلي حركيه يلاه .... بروغراميه وطلعي ...
قسم : شحال نبوغرامي .. معارفاش فين حنا بالضبط
اسد : ديري 154 v و 80 out ... و ديري على الغرب 160 درجة .. و فالشرق سيري نيشان لتسعين ...
قسم : ملي الشرق غير تسعين غنمشي ب 200 v
اسد : قلبييينا حسن .. قلبيييينا ..... خلينا غاديين بشوية علينا ...
قسم ناضت كتأفف وهبطات للطابق المتوسط للكابين وبدات تبروغراميه وهزات اللاسيلكي كتعلم الميناء ...
قسم : هالاااو .... " REQ-34001 " تريپ ... ايز اين تا بروسيس اوف سيلين .... وان هاندرد اند فور "ڤي" ... آيتي "آوت" .. ويست از وان هاندرد سكستين دوگري ... ايست ايز ناينتي دوگري ...
حطات لاسيلكي تاسمعاتهم ردو عليها
- هالاو ذا "REQ-34001 ".... وان آور آند ثورتي ثري مينيت . ... هاف آگود تريب " ساعة و تلاتة وتلاتين دقيقة ، رحلة سعيدة "
قسم : اوكاي .... ثانكيو ...
رجعا الكابل وبدات كتقاد البروغراماسيون ... ومشات هزات المرساة ... ورجعات تنهدات وتكات على طابلو دلاكابين كتفرج فاليخت كيتحرك .. وعاقدة شفايفها ... مستحيل تقدر تشوفو ... وزيد ان معندهاش الجرأة لي تقول لباباها غنشوفو خصوصا فليل ...
عارفاه داير ليها خاطرها وداعمها ولكن الا ضسرات غيتقلب عليها ... مغيوصلو تال منتصف الليل ويلاه تجلس مع عمامها و خاصها تتشد طريق لطنجة .... ماعندها تا فسحة فين تشوفوو .... استسلمات لنحسها وطلعات فالدروج عندهم لقاتهم ضاحكين كيهضرو ..
قسم : علمتهم قالك ساعة ونص ...
لامار : مزيان تانا درت مع عيالات عمامك مع المينوي نيشان نتلاقاو تما ....
قدس : والله الا داااز نهار زوييين صراحة .... كنا محتاجين خريجة بحال هادي مؤخرا طحنا فالروتين
اسد : راه غير الوقت لي شادنا ... تاحنا مكرهناش ندوزو حياتنا كاملة معاكم هاكا ولكن الخدمة والمسؤوليات كلهم فوق ضهرنا ....
لامار : جود .. عطينا دابا كلمة وحدة .. باش نعلم اريج ... فوقاش نمشيو نهضرو معاهم فالبنت ...
جود : ( بدا كيتحنح وكيحك فشعرو وكيفكر ورجع شاف فيها ) مور الربعينية ديال جدي لله يرحمو .. كاين الافتتاح دعمي عدنان ياك ؟
اسد : دوزيام جوغ ....
جود : دونك انا طخوازيام جوغ ....
قسم : يعني موووراااه مباشرة .... صبررو صبرو ... شحال باقي لربعينية !!!
اسد : شهر و وربعيام نورمالمون .... ولكن حنا مغنديروها حتال لخر ديال لشهر غيكون عندنا شوية دالرخف ... دونك شي شهر و سيمانة هاكاك ....
قسم : يعني مغنحضرش ! لا لربعينية لا لافتتاح !
لامار : عندك شهر وعشر يام غتسالي نهار الافتتاح دعمك نيشان .. الى ساليتي بكري اجي بعدا غير لسواغي ... توصلي بليل
قسم : يااااا على زهر .. صعيبة اماما نسالي فصباح ونحضر لسواغي بليل راه غنكون مسخسخة .. ففففففف على نحس تابعني ...
لامار : ماعلييش ... اجي لاغدا وباركي لعمك .. ( شتفت عند جود ) هي دابا قول ليا نتا لاغدا ديال السواغي .. نمشيو عندهم !
جود : سي ( شاف فقسم ) تكوني جيتي ..
قسم : وي ....
اسد : ان شاء الله ... يخرج هاد الشهر بعدا ويكون خير
جود : انا هاد الشهر راه غنغبر عليكم شوية داك الكاراج خاصني نأڤونسي فيه الخدمة كنت درت مع موالين الخشب لي ندير فالبلافون يجيو ليوم وأجلت ليهم .... دابا غايجيو تالغدا ... غنتلهى معاهم وموراها غنبدا فالديزاين بغيت نخدمو بيديا كولشي غانديرو لاباز ديالو من الطبيعة ... .دونك هاد الشهر هذا عااامررر ......
لامار : وانا فوقاش غنشوف هاد الكاراج ؟
جود : غدا الا مخداماش يالاه معايا .. ساليت صباغة غيبان ليك دابا حسن ...
اسد : صافي صباغة كلها تسلات ؟؟؟؟
جود : كااملة بقى غير من برا حتى نفيني كولشي ونجيبهم ....
اسد : وداك ليسباس قدامو وموراه محاطوش مولاه لبيع
جود : مسولتش حيتاش هامني غير الكاراج يتصايب ومنعد ونوسع ... راه باغيه غير اطوليي بسيط ... المعرض غيجيني فبلاصة وحدة اخرى .....
اسد : فين
اسد : منبعد ونديكم ليييها .... عند عمي عدنان معاها ماضي هههههه ....
قسم : صافي عرفتها ههه
قدس : تانا عرررفتها ... هههههه
لامار : وحنا لي عشنا معاهم داك الماضي ومعرفناهاش ونتوما عرفتو هههه ...
وسيم : وانا دابا فوقاش غنرجع !!!!
لامار : وتاتبدا القراية
وسيم : ومسافرتش ومتحركنا موالو .... على الاقل خلييوني نسافر قبل ماتبدا القراية ....
لامار : يفوت هادشي لي فوق راسنا ويكون خير ...
قدس : وسيييم ... شحال هادي ماضربتي لينا الغيييتاررر ...
وسيم : وايلي تااانتي ....
قدس : لا دبصح والله لا نتا لا جود .... عرفتو شحال هادي مسمعتكم كضربوه ....
لامار : جود نساه واقلة كاع ... ( جود عوج ليها فمو بمعرفتش ) كننو منشطينا ملي كنتو صغار كبرتو تعقدتو
اسد : ررراه غير لتحت الى بغيتوه ..
قدس : بصصصح اباباااا ؟؟ كااااين
اسد : هبطي لسينيما روم غتلقايه ...
نزلات قدس كتجري وقسم كضحك
قسم : والله تا دارتها بصح .. يلاه وريونا شكوووون ييضرب
جود : انا بعدو مني .. نسييت كولشي ...
وسيم : ششحال هادي مضربت والله مابقيت عاقل ....
لامار : ودابا جرررب .... نديو بيكم طريق شوية على منوصلو ....
طلعات قدس كتجري وفيديها كان غيتار كحل كبير ...
قسم : ( شداتو عليها ومداتو لوسيم ) شششد .... يلااااه
وسيم حطو كايقادو
وسيم : رااه ممقادش .. كان غير ديكور واقلة
لامار : هدااا قديييم ديال عمك سفيياااان ومبقاش كيضربو وكان بقى عندنا فالدار شحال وواحد نهار جبناه معانا حطيناه فسينيما ديكور وصافي ....
جود : زيير هاديك لفووووق ...
وسيم : معرفتش ..... هاكا قااادو نتا ..
هزو جود كيقاد فيه ويزير ويجرب واش هو هاداااك ... وهوما تجمعووو مغطيين كتافهم غير بملايات خفاف واسد معنق عندو لامار مخشية فيه من البرد وحاط راسو متكبه فوق راسها .... والريح كيطير شعرهم ملي بدا اليخت كيتحرك .. النجوم كانت مزييينة السما وفناجلهم دالقهوة فيديهم ولامار واابنات شادين شاي بالاعشاب ... قادو جود مزيان ومدو لوسيم ووسيم قاد الجلسة ديالو حطو فوق رجليه كيضرب وتسمعات الرنة ديالو حاااادة ....
وسيم : ممم دابا مزيان ... شنو تبغيو !!!!!
قسم : ماما تختاار هههه
لامار : ههه .. واخا ..د ممممم ( بدات كتفكر مدة وهي تعلي عينيها فاسد لي غير كايشوف فيها تاهو وضارت عندهم ) تفكررررت واحد الاغنية .....
وسيم : على الله نكون عارفها .....
لامار : موهيم هي قديمة شوية ..... ( كتشوف فاسد ) كانت تعزفات وتغنات قدام باباك قبل ميبدا يسمع ... وكنعقل كان قال بلي تمنى كون قدر يسمعها .. ومن داك الساعة مجاتش الفرصة ( اسد تفكرها وبقى غير كيرمش فيها) ودابا علاش لي ميغنيوهاش ليييه ولاااادوو !!!!
قدس : اهاه فكرررة زوينة .... شنو سمييتها
لامار : سمتيها ... الشمعة
وسيم : ديال مالي مالي ومال الشمعة ؟؟؟؟؟
لامار : هاااديييييك
جود : باغين تنزلو علينا الضيم نتوما ....
قدس : عررررفتها الله اووودي
قسم : زوويييينة ...
لامار : يلاه غنيوها لباباكم ....
اسد : عمرها جات فبالي نرجع نسمع ليها ... سمعت لكاع اش كان فبالي نسمعو وكنت كنتمنى نسمعو وهي نسيتها .. وكانت من الحوايج لي فغيمون تمنيت كون سمعتهم ...
وسيم : هانتا ا بابا غتسمعها من عندك ولادك .... ولكن غاتغنيو معايا ......
قسم : صاافي على قبل بابا والله تاتغنيييييو .....
وسيم استعد وبدا العزف ديالها ولامار سدات عينيها وهي كتنغم الريتم ديالها كيحمقها واسد معنقها وكايسمع .... وقدس وقسم بداااووو كيغنييوها بصوووت حنييين وهادئ .... وجود شاد الكاميرا كيصووورهم .... قسم وقدس كان صوتهم زوين فالغناااء بحال ماماهم خصوصا مع اغنية هادية و شاعرية ووسيم بالعزف ديالو زااادها روووعة ... واسد عاد كيتنغم فكلماتها علاش كانو معبرين لداك الدرجة واللحن ديالها شحال هادئ زوين .... ولامار سااافرات لدوك لياااام ودكرياااتها معاه وقسم ملي كتحبس وتبدا قدس لي تغني كتتسسسهى كاتفكرووو .... وحود شاد كاميرتو كايصور كأن الكلمات تكتبو عليييه وتفصلو خصيصا على قبلو ......
🍁🍁🍁🍁🍁🍁🍁🍁🍁🍁🍁🍁
مالي مالي و مال الشمعة ما ضواتلي في ظلام
مالي و مالي السعد ما سگملي ليام
حتى نصيب ما فرّحني ... نسّاني في ليام
اللي مضاو عني مرار ... خبلني التخمام
سقمي دام بي يا مُقام ... بدلي حلمي بأوهام
لا طالب ولا طبيب عالج ليا السقام
نوم هاني يا ليل أنا عليك عساس
المبنيين على الخدع حرمولي نعاس
ما تمناوه صار ... قاموا عليها لعراس
من يدهم أشربت المرار كاس يتبع كاس
مالي مالي ومال شمسي غطاوها لغيوم
مالي مالي ومال سمايا ما قعدت فيها نجوم
مالي مالي و مال الشمعة ما ضواتلي في ظلام
مالي و مالي السعد ما سگملي ليام
الفرقة من بعد الولف ما كان كيفهم صعاب
علاش كي تونست بيك جاو حسدوني فيك
ما عذروني ما ذاقوا ذوق لا يبغيك
روحي روحي يا العذراء و أنسي من يبغيك
هذا حقنا من الله كتبو عليا وعليك
مالي مالي ومال شمسي غطاوها لغيوم
مالي مالي ومال سمايا ما قعدت فيه نجوم
مالي مالي ومال شمسي غطاوها لغيوم
مالي مالي ومال سمايا ما قعدت فيه نجوم
من هاذ الهموم يا وخَيي أنا باغي نرتاح
نهنّي جسمي العليل ونعالج الَجراح
نوب عليا يا الله نوبة تجي في الصواب
كل سؤال الّي طرحتو ما لحقوني بجواب
مالي مالي ومال شمسي غطاوها لغيوم
مالي مالي ومال سمايا ما قعدت فيه نجوم
مالي مالي ومال شمسي غطاوها لغيوم
مالي مالي ومال سمايا ما قعدت فيه نجوم
00:12
كان باركينغ دقصر الاسماعيلي تحطو فيه سيارات د سلطان وسفيان و يونس و رتاج ... وكانو كلهم لداخل ... رجاء واقفة على الخادمات وهوما كيحطو القهوة والعصير والحلويات ... وهوما كل مرة يشوفو لساعتهم
رتاج : تعطلو
اريج : مزال ماشعلو تيليفون ؟
سلطان : ( كيصوني لجود ورجع حيدو من ودنو ) طافيه ...
حياة : دابا وهوما جاو ...
رتاج : تا عدنان تعطل ...
سفيان : خدم ليوم !
رتاج : وي غيكون مشى .... خليتو غادي يخرج .. انا راه هاد نهار تلاتة دالعمليات ماهزيييتش راسي تالحداش عاد ساليت جيت لهنا ديريكت ... حسابتني غالقاه هنا ....
فيصل : تانا خرجت قبل منو ...
رتاج : مرجعتيش لدار ... كيبقى لوؤي !
فيصل : نووو .. جبت انس جيت ديريكت لهنا ... جينا قبيلة حنا .. كنا مع الخيل ...
رتاج : كنصوني عليه كيعطيني تيليفونو باقي طافي غايكون نعس وخلاه و ديشارجا
سلطان : مالو
رتاج : خليييتو مريض .. بات فالمتحف وهو عندو الحساسية اوا جا الصباح كولو سخاين وعروقات
اريج : ناضت عليه داك الحساسية تاني !!! كتخررجها منو
حياة : وصاحبتي عارفينو مريض علاش مخليينو مع الغبرة
رتاج : ياختي باباه ماشي انا .. تزيرات شوية الخدمة وعطا لاطاك صدق بايت تما .. جا كولو غبرة وطلعات ليه السخانة
اريج : مااايكووون بااااس ... داك السخانة كارتة
رتاج : راه دابا مغيتوكد تالغدا كنعرفو فاش كيشرب دوا كينعسو نيشان ....
رقية : انا غاااا وكان تجمعو ليا وتجي قويسم بالسلااامة نطلق البخوووررر نحيدو هاد العييين .. ياربي سلااامة كل مرة وفيمن تخرج ...
يونس : ( كيصوني على عدنان تاجاوبو ) وااعدنان .. وفينك اصاحبي
عدنان : هانا جاي هانا جاي ...
يونس : ويلاه راحنا كنتسناوك .. تا اسد باقي معطل ..
عدنان : هانا نجي دابا ... نسيت كاع ولدي لهاني ....
يونس : واش مريض بزاف ولا
رتاج : راه معاه .. دوزووو لياااا ...
عدنان : شوية دابا ..... الحمد الله بردات جبهتو بعدااا ...
يونس : اوا الحمد لله هاك ها مراتك ...
رتاج : عدنااان ... واش راك مع لوؤي ؟
عدنان : وعلى مالي نخليه ... عندي كبدتك انا
رتاح : وباااز .. كيبقى .. واش ناعس ؟
عدنان : ملي شرب دوا ماكعد الراس راه ناعس ... بزز باش هبطات ليه شوية داك سخانة من قبيلة هو يترعد ...
رتاج : على نتا بقيتي معاه ؟؟؟؟؟؟
عدنان : ونسمح فولدي عيان ونمشي !
رتاج : ههههه زعما قلبك نتا والله مكاين بحالو هههه الله يخليييك ليهم .... .
عدنان : انا جاي انا جاي ...
قطع عليها تيليفون وبقى يشوف فلوؤي لي ناعس على الفراش الغطا مغطي غير النص ديالو ملي شافو عراق بزاف نزلو ليه ... ووجهووو حمرررر ونيفو كتررر وكل مرة يشمر ومرة يكحب ... وعدنان من قبيلة وهو على نفس الكرسي مقابلو مرة ينعس مرة يفيق ... ناض شوية كيعوج فعنقو من الجلسة المعنكشة على داك الكرسي ومشى لعندو قاس على جبهتو بان ليه بردات شوية ... وهبط يدو لعنقو كيتحسسو تابان ليه بدا كلينيين وبدا كيرمش بعينيه كيحلهم ...
عدنان : ولدي ؟ ..لوؤي ...
لوؤي بدا يرمش بعينيه تاتوگض كيشوف فيه وحاول يبتسم وناض بشوية تكا
عدنان : بشوية غارتاح .. رتاح ...
لوؤي : الواليييد ... ( تكا كيعوج فعنقو وهز كلينيكس من على طابل دونوي كيمسح نيفو و يشمرر ) فوقاش جيتي ..
عدنان : يالاه جيت دابا عاد ... كيبقيتي ؟؟؟؟
لؤوي : صافاا ... ( ضور راسو لطابل دونوي هو يلمح بانيو وسربيتة وضحك غير بعينيه وشاف فيه وصوتو مبحبح و صدرو مدعدع ) اودي راه مكاينش بحالك ههه ...
عدنان : رحاب لي جابتهم قلت ليها ديرهم ليك فوق راسك .. يلاه نوض تكعد باراكا من الفشوش دوش وكول ورجع تنعس ..
لوؤي : ههه ... واخا الواليد واخا ...
عدنان : انا غنمشي لعند اسد ... قسم غتسافر ... تكعد ونزل تاكل .... وعيط ليها غير فتيليفون نتا مريض عنداك تخرج يضربك البرد تاني
لوؤي : واااخااا ...
عدنان : شرب دواك راه خليتو ليك تما .. شرب غير كينة وحدة ونعس ... لوخرا راه غيباتك ...
لؤوي : صافي .. صافي ... ندير كاع هادشي ...
عدنان : يلاه بشوية علييك ... الله يرضي عليك
خلاه ومشا ولوؤي تبعو بعينو مبتاسم وكيتنهد .... على قبل ضحكة باباه وعلى قبل كلمة الله يرضي علييك يقدر يخدم صباح وعشية مكيهموش الامر كتر مكيهمو انه يخدم و يدير شي حاجة و يفتخر بيه ... تنهد كايعوج فعنقو وناض محيد عليه الغطااا وهو كيشوف الكتاب كيفاش محطوط عرفو راه كااان هنا العشية كاملة .. فين كاين شي حب يعادل حب الواليدين .. ورجع لبس صندالتو وناض بشوية لدوش ... حيد حوايجو كاملين لي ولاو فااازكييين بالعرق ... وتخشى تحت الرشاش غير تخوا عليه الما بارد شهق وشعرو كامل طاح على وجهو الاحمرررر ... شوية بشوية بدا كيستحلا الما بارد عاد بدا يتهدن تحت للما حاط يدييه بجوج على الزاج قدامو والما كينزل عليه حال فمو كيتنفس منو حيت نيفو تسد ليه .... مكيعرفش علاش فين مايسهى كتجي صورتها قداااامو .. فين مايقلى راسو عيان كيبغيها غير هي تكون قدامو يعنقها عندو ويشم ريحتها وينعس على رجليها .... معرفش علاش حس براسو توحشها ... واخا يالاه شافها .... فكل مرة كايحس براسو كايموووت على تفاصيلها .. وعلى ضحكتها وعصبيتها وحلاوة شفايفها .. مكنحيدش من بالو بمرة .. كايحس السعادة فكفة وهي فكفة ...
هز الشومبوان ديالو وبدا يغسل فشعرو بزربة وهز الباندوش .... سالا الدوش وخرج لبس سروال دجين كحل وتيشورت كحلة ونشف شعرو ومشا فرش السجادة صلا نهار كامل ليه فيييه بسبب المرض ودوا دالحساسية لي نعسو ... وعاد ناض للمجر دسوايعو هز ساعة جلدية وهز طربوش كحل صغير حس براسو برررد ليه وجاتو بحال تبوووريشة .... ومشا هز كويرة كحلة لبسها .. ولبس تقاشرو وكاط كحل ... ونزل فالدروج تيقاد الطربوش الصوفي لي كيبانو من تحتو زغيبات شعرو طايحين على عينيه فازكين ... تاتلاقاتو رحاب
رحاب : أ؟ .. موسيو لوؤي ؟؟؟؟ تبغي شي حاجة .. واش خارج
لؤوي : اممم .. الواليد خرج
رحاب : وي قبيلة ...
لؤوي وما ليها براسو وخرج للباركنيغ ودخل وسط طموبيل وهو كيحس بالتبوريشة وبدا يكحب .. وكيحك فعينيه ... وديميارا طموبيل وزاد كيقفقف بالبرد ......توحشها وحس انه الى ماشفهاش مغايعرفش يكمل نهارو تاني غدا ... واخا يشوفها غير خمسة دقايق .... هز تيليفونو من على الكوسان وحلو وهي تبان صورتها لي ديما تيليفونو محلول على انستغرامها ... بدا كايرمش فيها وهي معنقة راس المهرة ديالها ولابسة خودة دالخيل ضحكتها ... ويديداتها .... سنيناتها .... كايخليوه يفقد صوابو وكايحس مقادرش يتسنى حتى تولي ديالو. ... ورجع تنهد ولاح تيليفون على الكوسان متصلو بالشارج وشظ فولون بحوج يديه وكولو كايترعد بالتبوريشة وعينيه مدمعين...
فالقصر ....
وصلات طموبيل اسد لي جابها ليه الشيفور راكبة معاه لامار وقسم ... عاد وصلات طموبيل جود من موراه لي فيها جود و وسيم حداه وقدس ... نزلو كيتكلسو من عياء طريق كلهم باقين بلي غوب ديالهم ودراري غير بشورتات عاد حل جود الكوفر كيلبس تيشورت ديالو ولاح تيشورت على وسيم تاهو ... والمساعدات تلقاو ليهم هزو الحوايج ومشاو ... وهوما تبعوهم والضو مشعول فالقصر باكمله ... عرفوهم كلهم جاو غير من طموبيلاتهم
لامار : ششتي تعططلنا .. بنتي سلمي وطلعي لبيتك دغيا فيريفي حوايجك راه جمعاتهم ليك رجاء فيريفهم واش هوما هادووك وبدلي حالتك .... ونزلي جلسي مع عماماك ...
قسم : دااكوغ ... ( شافت فاسد ) بابا ياك الباطو غيخرج تالتمينة ... تالسبعة دصبح ونمشي ...
اسد : انا راه قتليك مايهمنيش وقتاش باغا تمشي ... كيهمني ستة خاصك تكوني فالباطو
قسم : علاش ستة .... تالسبعة ....
اسد : ( بنرفزة ) دابا مالك مفهمتش ... مالك !!!!
قسم : ( خلعاتها نبرة باش زعف عليها ) مم .. مماليش .. غير كنسول ..
لامار : ( جراتها من يدييها وزادو كتهضر فودنيها ) سكتي راه داابا ينوض معاك كتبي ليه مسج قولي ليه ميمكنش ليك وملي تجي شوفيه .. صافي هنينا
قسم : اوووف اماما راه بزااااف مغنشوفو والله .. ياااا على زززهرررر ....
قدس : ( جات بزربة شدات فيديها بهمس كضحك ) ياختي بلاصتك نموت بالفقصة ههههه .
قسم : سسسكتي متزيديش عليا
دخلو كلهم للقصرر وهوما يوقفو العيالات ضاحكات
رتاج : واعلاا السلاااااامة ...
اريج : قلنا صافي راه مغيجيوش ومغنشوفوش قسم
قسم : هاانااا اخالتي هانا ( عنقاتها ) واش نمشي بلا منشوووفكم ...
ضارت عند رتاج عنقاتها تاهي وحياة ومشات تسلم على عمامها تاهوما وفيصل واية و انس ومشات جلسات بين سفيان ورقية معنقاها
رقية : وشووووف شنوو كان مكتاااب عليك
لامار : ( كتسلم عليهم وجلسات ) واايه والله مدرناها فالحساب نسينا العسكرية ديالها ...
سفيان : ولاباس هاد المرة جات خفيفة غا شهر وعشر ايام ... انا حسابتني سيير شي عام ونص تاني
قسم : صافي عندي هي لخرا ونتهنى .. واخا مااافياااااش عكزااانة والله
رقية : قوليا ابنتي دابا هاد القراية هادي ... هاد العسكر لي غادا ليه .. كيعطيوكم السنّاح ..
قسم : هههه السلاح اجدة السلااح .. لاااا مالنا غنمشيو لايران .. راه غا عسكرية بحرية والفوج ديالي انا بوحدو .. يعني باش نولي قبطانة خاصني نكون فايتة فالعسكرية وعارفة البحر والقانون ديالو والنظام ديالو .... هدا مكان
رقية : هااا خيااااررر ....
اسد : فين عدنان
رتاج : هاهوا جاااي ...
جود : ( كيشوف فيونس واريج بوحدهم وبدا كيحك مور وذنو معرفش كيدير يسول ) فيين زياد ؟
اريج : مشى الصبااااح .. خوااو عليا الدار كاملين بيهم
لامار : علاش فين اياد وبيلي ؟؟؟؟
اريج : مشااااووو تاهوما لكندا ..
جود : ( علا حجبانو وهضر بنبرة مستفسرة فبها نوع مم الغضب ) نعااام .؟؟؟؟؟ فين مشاو ؟؟؟؟؟؟؟
اريج : راه غيرجعو اولدي غيرجعو ......
قسم : وعلاش مشااااو ؟؟؟؟ ياك اياد صافي كان غيبقى
اريج : والو قالك اسيدي مكينعسش مزيان وماولفش وقنط .. وبيلي سمعاتو غادي قاتليه نمشي معاك تانا قننططت ...
جود : وكيفاش هاد قنطت هادي ؟؟؟؟ مافهمتش انايا !!!
اسد : جووود .... ( وما ليه بمعنى دخل سوق راسك ورجع شاف فاريج ) مزيان يبدلو شوية الجو .. فوقاش غايرجعو ؟
اريج : درنا معاهم فالربعينية يكونو هنا ....
جود : هاااكدااااك ... حسااابتني ....
اريج : ( جاتها الضحكة ) اش حسابتك ؟؟؟؟
جود : ( خرجها بغفوية ) حساابني مشاو فخطرة ....
رقية : ( ضرباتو بمخدة تا قفازو ) وتاا مااالك تااااا. مالك ... تا بوووها خوووهاااا ضارب عليها الكاغيييط الزنااااتي ... تااا ماااااالك تا
جود : هههه هنييينا اجدة كنسول علاش منسووولش ماشي ولاد عمي .....
رقية : ( ضرباتو بمخدة اخرى ) الله ينععل تررريكتك .. بالمطيااار لاااخوووور ماتحشمو ماتستحييياو كولشي ولا عندكم بالعلالي والخيل تشالي ...
جود : ( كيشد عليها المخاد لي كضربو ييهم وسلطان ميت عليهم بالضحك ) دابا انا اش درت اش درت مفهمتش .... جالسة تنعليليا فتريكتي وهي جالسة حداك ... ( شاف فلامار ) هاد مك هادي ديكتاتورية ...( شاف فرقية ) ماااالناااا
لامار : عبرات علييييك ... هي لي كتعرف ليك
قسم : خالتي اريج علاش مالو اياد مكينعسش مزيان ؟؟؟؟ ياك لاباس
اريج : معرفتش ابنتي قبيلة قالك كيحس براسو مخنووق وقققنط ... وقاليك يمشي يدي معاه بيلي تونسو فالدار وفالاربعينية يرجع هو وياها ...
قسم : مافيها باس ... تاهي تلقايها توحشات كندا ...
اريج : وي هي من قبل الكونفينمون مامشات لتما ... اوا نتا افيصل فوقاش الديپار ؟
فيصل : واحد الشهر هاكاك .....
اية : ( باسف ) صااافي غاااتمشي !!!
فيصل : ( شاف فيها مبسم ) اشنو غتوحشيني ؟؟؟؟؟
اية : اوفكووورص ...عندي شي حد انا من غيرك
سلطان : غتخليها عليها خاوية وهي مولفاك ......
فيصل : غنبقى نرجع فاي عطلة وراه تيليفون كاين تانتي تاخدي البكالوريا ديالك ولحقي عليا
سفيان : تعطل عدنان ....
رتاح : دابا هو جا ... هاد نهار بقى مع لوؤي ههههه قتلني بالضحك والله
لامار : علاااش ؟؟
رتاج : بات مسكين لوؤي فالخدمة وصبح مريض ( قدس علات حجبانها وحطات تيل كاتسمع ) اوا وعدنان قبل ميدخل لوؤي ... جالس عليا فييين باااايت وكيغووت وعاقد حجبانو .. وخاصك متفششيش الولاد والولاد خاصصصهم قصووحية ....
انس : ههههه وملي جا لوؤي ولقاه مريض ضرب كولشي فزيرو هههه
رتتج : هههه والله تاضحكنا بالله .. لقاه مريض بدا يترعد ... اوا انا حسابني الرااجل مشى لخدمتو ... صدق بقى عند راسو هههه
لامار : هههه عدنان يعيااا يقساااااح غير تجييه للمرض كيولي رطب منو مكاين ههههه
رقية : او الله يخليييه لوليييداااتووو
يونس : وتانتوما تاني متفورصيوش على الولد بزاف ...
قسم : واش الحساسية تاني ؟؟؟؟؟ ناري كتتهلكووو
قدس : ( بخوف ) واش بزاااف ؟؟؟
رتاج : وااايه سهطاتو تاني .... شداتو من الغبرة و الخشب باقي جديد
قسم : ففف الله يشافيه ... مهم .. انا غنطلع نشوف حوايجي واش هوما هادوك ونبدل ونزل ...
اريج : سيري سيري يالاه يقدك الوقت .... ( طلعات قسم )
حياة : سارة مغاااتجيش ؟
اريج : انا لي قلت لامار بلا متعيط ليها ...
رتاح: علااش ؟؟
اريج : اختي هي الكنازة ومجات غير بالتقطااار علاش غاتجي دابا تقول بسلامة لقسم مالها مشوقة فيها
رتاج : اويلي اريج يهديك الله
رقية : قققااالت الحق .. جايبين المراة مسكينة كبيييييرة مرييضة جلسوها هنا فالركنة تنوب عليهم وهوما ممسوقينش بنتهم جات طالية المكياج ومققزربة .. يحتارمو الميييت .. والمرحوم كانت عندو عزيزة لا هي لا رااااجلها .. ونهار ماااات جات بحال البراني ... البراني اعباد الله وبقى معانا تلتيام
لامار : واش حنا مكنعرفوش سارة ؟ عادي راه كانو مشغوولييين سينوغمال ... ومكنتسناوش منها شي حاجة كتر .....
يونس : حيدو عليكم هادشي كيطلع غير العداوة والدنف ... لي جا مرحبا بيه ولي مجاش هنا راسو وهنانا معاه ... حنا مصاب نتكافاو غا مع راسنا وولادنا .. واش حنا نطلبو بنادم يجي ولا ! جات مرحبا محاتش تاهي مرحبا
اريج : مبقاتش ايونس فنطلبو بنادم ولكن بقات فكتعرف قيييمة بنادم عندك ... وقيمتك عندو ... انا متجيش عندي فالفرح ولكن فالقرح كون معايااا ... وقف فجججنبي .... راه بانا هاداك وجد الدراري ... الى كانت كتحس براسها وحدة منا كون بقات معانا تلتيام .. تواسينا و تواسي الدراري .... تلعب دور العمة لاكانت كتعتبر راسها عمة لهاد دراري
سلطان : وااااه .. كي بان ليك دابا راه ملي مجاتش تواسينا راه مالقينا لي يواسينا كااااع .... راه جود حيدنا ليه دوا الفار من يديه ...
قدس : وايه زعما كون كانت معانا كون ردات لينا جدي للحياة ..
لامار : نتوماااا دابااا علاااش ... نتوما عندها عزازين ...
سلطان : تاااحنا كنموتو عليها ..
حياة : ( ضرباتو مخدة ) حرااااام عليك .... شنو دارت ليكم نتوما ؟؟؟ عندها عزازين....
سلطان : الوالدة داك زواق ونفاق مكنعرفش ليه .. خلينا ساكتين ...
لامار : وصافي دابا ماشي مشكل .. الله يسااامح ...
اريج : اسيدي مغنبقاو نعيطو على حد ومنعلمو حد .. كون كانت كتهمها العائلة راسها تهز التيليفون وتعيط وتشوف اش كاين وتسول فالولاد ... وراسها تبغي تجي تودع قسسم ماشي حنا نجيبوها .. يااااه .... نبقى حنا نراريو بنادم ولي فينا مكفينا ..
جود : اه اه اه ..... يالاااااطييييف ... على هم فيكم قدااااش !!! كااااع هادا هم ... خصنا نشوفو ليكم شي بسكياطخ يعاونكم .... مشواقين حنا فسارة تجي تواسي !!!!
سفيان : ( متكي يدو على المخدة كايتفرج ) والله الى سعداتكم ملي غير هادشي لي عندكم ....
اسد : شتي الهم عند الناس كيداير ..... ونتا هز الهم لداك الباطو لي طاح اونبان فالبوانتإيرور واش غايوصل ولا لا ....
سفيان : والله الى تسالا ليكم الشغل بالله ......
جود : شحال عزيز عليكم الهيت الخاوي ... ( ناض ) نطلع نبدل و نجي ...
طلع جود و قدس بقات غير كتشوف وبالها مع لوؤي واش غيجي ولا لا معرفاتش واش تسول ولا تسكت .... وقالت تسنى تشوف تايجي عدنان يقدر يجي معاه .. ويقدر لااا .... معرفاتش علاش حسات الجلسة ناقصة ليها ملي مكاينش هو .... خصوصا ملي سمعات مريض وهي عارفة الحساسية كاتسهطو .... جبدات تيليفون يلاه دخلات لانسطا تكتب ليه فلخر دارت بناقص وخرجات خافت ببقى يطنز عليها .....
وسيم طلع لبيتو واية متبعاه بعينيها ... من ديما وجودو قلييل .... ورجعات ضارت عند فيصل لي كان كايهضر معاها ..... سلطان خرج لجردة كيكمي وهوما كيهضرو .... واسد وسفيان ويونس دخلو لبيرو جلسو ورجاء جابت ليهم فهوة لتما ..
اسد : ( حط افيكس ) صافي راه قلع ..
سفيان : اوا الحمد الله .. راه علومهم بلي كاين روطار ... تايجي عدنان نشوفو واش ردو عليهم غلى حساب السلعة لي غايردو فيه .. غيكونو خرجو السلعة ميخليوهاش تالغدا سطوك عامر ....
اسد : وي داكشي لي غايكون .. ( بدا يضرب بصبعانو شحال فالبيرو وشاف فيونس ) يونس .. ( يونس شاف فيه ) راه جود صافي مقرر ... اش باليك !!!!
يونس : ( تنهد كيحك فجبهتو ورجع شاف فيه ) انا هاد موضوع دهاد الولاد والله الى محيرني كنبات كنفكر وكنصبح كنفكر ... والله ماعرفت منقولك بالله .... جود راه ولدنا ماشي شي واحد براني .. وديجا راني عطيتها ليه شحال هادي ..... طرا الغلط وتصلح .... وجا المكتاب كلها شد طريق و داكشي نسيييناه .. والله مكانت فالبال والنوايا غنعاودو نحييو هادشي ..
اسد : نتا راك عارف الموقف ديالو وشخصيتو كيدايرة ... قالك عطيتك الكلمة نكمل عليها وبيني وبينك كتبانليا حتى البنت عاجباه .. حتى انا شفت حتى عييت وقلت لاكانو باغيين بعضياتهم الله يكمل بالخير ...
سفيان : اودي لاكانو مكتابين والله مغتحيدوهم ... مزياااان يتوكلو على الله غا هووو واش بااغي البنت نيت ولا باغي غيرر يصحح الغلط
اسد : راه كنأكد ونعاود نأكد وهو تيقولك باغيها .. هدا جهدي ...راه بعقلو ماشي صغير نگيديه ... كنتحكم فكولشي فالا فالزواج مكندخلش ليهم فاختياراتهم وقراراتهم شغلهم هاداك ....باش ماشي منبعد يطرا المشكل يجيو يلوموني انا
يونس : ويكون خير يكون خير ...
اسد : هضرنا قبيلة وبغى مور الافتتاح دعدنان نجيو عندكم
يونس : ( غير كيتنهد ) والله ماعرفت ا اسد القضية باقا مرونة اياد باين ليا را ماباغيش ... ماماها تاعي باقة مامرتاحش .. راك عارف بسبب داكشي راه عشنا ربع سنين دالعداب فخصامها هي واياد .. كنا نتمناو اصاحبي غا فوقاش يتجمعو ولادنا على طبلة وحدة .... ( رجع تنهد ) كيف قال سفيان ... لاكانو فالمكتاب ماعندنا مانديرو ....
اسد : شاور نتا عائلتك بشوية عليك جلس معاهم هضرو تحاورو ويكون خير ..
سفيان : ودابا راه مشاو .....
اسد : تايرجعو ... نتا عارف ايونس .. بيلسان راه بنتي ....قلتها ليك من شحال هادي وغنقولها ليك حتى دابا ... ماشي غير كون هاني .. راه خاصك تكون هااااااااني .... بحال جات عند باباها الدوزيام ....
يونس : خلاااص ا اسد واش انا توريني فيك وفلامار ولا فالبنات ... راها هنا تربات وهادشي لي مهنيني شوية زعما لي كنعرفوه حسن من لي مكنعرفوهش .... جود حسن ليها من شي مسخوط الواليدين نكون مكنعرفوش يجي يتكرفص ليا على البنت .. وهي راك عارفها مغنااانة وعكسية صعيب لي يشد ليها الخاطر ....
اسد : يكون خيييير يكون خير .... نخليوها فيد الله ....
عند قسم ...
دوشات من الملحة لي بقات مزال فشعرها ... وخرجات لبسات سوال كحل ايلاستيكي خفيف للسفر وتيشورت بيضة وسبادرين بيضة وطلقات شعرها ونشفاتو وقاداتو بغات تبقى مرتاااحة ... ودازت تاني لطبايع لي فعنقها بدات كتغطيهم فنفس الوقت عاضة على شفتها وحابسة البكية .. ومشات باتجاه تيليفونها حيداتو من الشارج وبدات كتشوف والو ممعيطش ليها وهي تقريبا عشرة دالمرات وهي كتصل ومخلية ليه ميساجات ومكيجابوش ... عرفات الى قفراتها معاه ... بدات كتصل تااني بلا ميجاوب وهي تلوح التيلي فالناموسية ...
قسم : يااااه .. اناا مالي انا لخاااااطري .. . يااا على بنااااادم .. فففففف ... تقلق لاااابغيتي ..... واااابزاااااف آووو ..... مالي درتها بالعااااني
مشات بالنتير وعصبية حلات لمجر كتقلب فالسوايع وهزات ساعة أبل لبساتها وليفاليز ديالها كانو مجموعين والصاك لي فيه اللبسة العسكرية ديالها فيريفيات ليبردوي ديالها واش كولشي هو هداك وهزات تيليفونها وبقات كاتشوف فبيتها كاتودعو . . ورجعات تاني كاتشوف فتيليفون لقات بلي مستحيل صافي تشوفو ... تنهدات من اعماق قلبها وبدات كتسجل ليه فوكال .....
قسم : اصيل .. درت جهدي كامل والله ... ماقدرتش تانا مكرهتش نشوفك ولكن ماكتابش ... تا نرجع ان شاء لله ( بقات ساكتة شحال عاد نطقاتها ) غنتوحشك بزاف ....
خرجات تنهيدة وخشات تيليفونها فجيب لور وهزات صاك صغير رياضي كايتعلق فالكتف والصدر ... ونزلات فالدروج لقاتهم مجميعين كاملين ... هي نازلة وعدنان داااخل غير شافتو ومشات باتجاهو دغيا عنقاتووو ..
قسم : عمووو
عدنان : ( باس راسها وجبدها قدامو ) صااافي ... غااتمشي وتخلينا تاني ..!
قسم : والله مكرهت كون كلست ... ولكن ماعندي ماندير. ..
عدنان : مااعليش ابنتي المستقبل هو اللول .....
رتاج : ( وقفات ) عدناااان مجاش معاك لوؤي ؟ ..
قدس علات عينيها بزربة تشوف وبقات كاتشوف مور ظهر عدنان ....
عدنان : ( زاد جار قسم فجنبو )لاا مريض فييين غايجي ... ( دخل كايسلم عليهم )
لامار : مايكون عندو بااااس ...
عدنان : امييين .. فييين لوخرين ....
اريج : راااهم فالبيرو ..
وما ليهم براسو مشا البيرو وقسم وقدس غير كاتفرك فيديها .. فلخر لي فيها ماهناها. هزات تيليفونها وبعدات لباب الجردة بدات تقلب بعينيها تابان ليعا سلطان بعييييد كايلعب مع كلب الحارس ... عاد هزات تيل ودوزات نمرتو .. هو كايصوني فودنيها وهي كتعض فشفايفها ... حسات قلبها ماهناهاش تعرفو بعدا غير كيف بقى .... تصرفات بقلبها اش ملا عليها بدون تفيكر
لوؤي كان صايك وكايجغم من القهوة لي شراها ... هو يقلب عينيو لشاشة ددطموبيل شكون كايصوني وهي طلع ليه مكتوبة " ❤️ My future " ( مستقبلي❤️) .... علا حاجبو باستغراب .. اتصال منها من المستحيلات السبع ولكن دغيا قدر يتوقع انها عرفاتو مريض .. وضحك وجاوبها ووهو دايز من نقطة التفتيش ديال أمن القصر ... وعلاو ليها الباريا يدوز ....
لوؤي : راني بااقي حي ... متفرحيش بزاف ...
قدس : ( وسعات عينيها ملي جاوب وصوتو مبحبح ) لوووؤي !!!! صافا ؟؟؟ سمعت مريض
لوؤي : ( كايضحك ) نموووت فلي يخاف عليا ....
قدس : وهاانتا بديتي تخربق .. راك ولد عمي واقلة لا ؟؟؟ سينوغمال نسول فيك .... كيف بقيتي ؟ واش عيان بزاف.
لوؤي : مخنوق شوية ...
قدس : اويلي ؟ ودرتي الڤاپور دالاكسيجين ؟
لوؤي : تقاضاا ليا ( كابتسم ) راني خرجت باش ناخدو ...
قدس : وعلاش خرجتي نتا كنت تسيفط شي واحد ...
لوؤي : لا لا اكسيجيني انا مكنبغي حد يقيسو ليا ... نمشي عندو بيدي ....
قدس : وقادر تصوك ؟؟؟
لوؤي : الواحد ملي كايتخنق .. راه يدير لي كان باش ينعش راسو دغيا ...
قدس : خلعيتني فخبارك .... واش طالعة سخانة بزاف صوتك راه تايبان حااالتووو
لوؤي : وهانااا عيااان بزاف .. اش غايدري ( واقف كايتسنى البيبان دالقصر يتحلو ) همم ؟؟؟
قدس : لوؤي باركا من طنز ديالك راه كنهضر من نيتي ....مكانش عليك تصوك ونتاا فهاد الحالة ( كاتشوف البيبان كاتحلو ) واش نقولها عمي عدنان ؟
لوؤي : هانا راه وصلت ...
قدس : فييين ؟؟؟ لكلينيك ؟؟ منين كاتاخد الأكسجين ؟ ( كاتبان ليها طموبيل داخلة وهي توسع عنييها )
لوؤي : كناخدو من عينيك .....
قدس: تتا راااااك تسيطيتي
لوؤي : شحاااال هادي ههه ..
قدس : والله تااااا منيتي كالسة نسول فيك كي الهبيلة ( نزل الزاج كايشوف لعندها واخا بعيييدة وهي كاتوشف فيه وتهضر معصبة ) ساااعة نتا سبعة دالارواح ....
لوؤي : وبسبعة بيهم فيديك ...
قدس : لاباقي عيطت ليك خصني للعقل
لوؤي : قررربي راني مخنوق ... اجي وغانولي صافا ....
قدس قطعات عليه تيل ودخلات منرفزة وهو حل لباب كايضحك عليها. يضور فراسو .... وسلطان وقف وجا باتجاهو
سلطان : باااقي حي ( كايسلم عليه ببونية )
لوؤي : على حنا كتگر فينا شي حاجة ...
وقفو هو وياه كايهضرو وسلطان باقي كايسول على مستجدات حسام .... و قدس دخلات كلسات حدا ماماها ندماااانة كاع علاش تصرفات بلا عقل وعيطات ليه. ... فنفس الوقت شفايفها كايسرقو ابتسامة بلهاء لغزلو ودغيا كاتحمعها وتحنحن .... ورجاء جات عند لامار
رجاء : مدام العشا واجد ...
لامار : ربع ساعة هاكاك بداو توجدوه ...
رجاء : على برا ولا هنا
لامار : غيير هنااا ...
مشات رجاء و قسم باقي عندها امل يجاوبها فاتحة ديسكيسيون كاتسناه والميساجات ديالها كولهم جوج شرطات ولكن هو اخر ظهور ديالو كان قبل من ربعة دسوايع .. هي مولفاه مكيحلش بزاف وماعندوش مع سوشيال ميديا بزااف ولكن قالت ان الوقت مغايمنعوش يكتب ليا غير مسج ..
كلسو جميع واارجال خرجو من اابيرو وجود وسيم تاهوما نزلو بعد مابدلو ....
يلاه كالسين تاسمعو الهضرة داخلة وعلاو عينيهم لباب ملي سمعو الكحبة ديالو مدعدعة مخلطة بضحك سلطان .. ورتاج ضحكات بحنية لي تحسن وقدر يجي و عدنان علا حجبانو و وقف
عدنان : علاش نضتي من الفرااااش ؟؟؟؟؟؟ اراك مريض ياهاد الولد .....
لؤي : ( قرب عندهم ومد يدو غير بشوية لقسم مبعد وجهو) مانقولوش بسلامة للكابيطان ديالنا ميمكنش .. ( وقفات عنقاتو وبعد وجهو تاني ) لااااا نعادييييك
قسم : ( ضرباتو غير لكتفو) نتا راه مكاينش بحالك ..... كون بلا ماعدبتي راااسك والله .... راك مريض ...
لامار : كيبقيتي شوية ؟؟؟
لؤوي : صافا صااافاااا... ( سلم عليهم كلهم غير ببونيات بيديه وصل تالقدس هو يضربهاليها فجبتها ومشا ملي مبعد عليهم وجلس ) اوا شنو ..... غاتشدي طريق دابا ؟
قسم : سي ... واحد الساعة غانخرج ...
اسد : جود غايمشي معاك هاد المرة ... عندي اجتماع مع سبعة ديال صباح..
جود : واخا ...
سفيان : ( شاف فسلطان ) سير معاه تانتا الليل هادا ...
سلطان : الله اودي ( عنق قسم ) عندنا حنا جوج منها.
رتاج : شربتي دوا ديالك الؤي ...
لؤي : حتى نرجع
عدنان : نتا راااه معككس ..ياك قتليك بقى فالفراش قبيلة كنتي كتمووووت
لؤوي :وصافي الوليييد راني صافااا ( كايحك درعانو )
عدنان : منين هاد صافا منييين .. ( شاف فقدس ) جيبيلوو ابنتي شي مانطة شو كيف كايترعد ...
لؤي : ( مد يدو لعندها شدها رجعها تكلس وهي غير قاسها تخطفات كاملة ) كككلسي... اشمن مانطة واش انا وااالد ...
عدنان : سيري جيبيها ليه متسنطييش ليه ... ..
مشات قدس نزلات فالدروج تلاقتها رجاء وطلبات مانطة رقيقة تجيبها ليها من بلاصة المانطات والفوطات وبقات تما كتسنى وتفكر وجهو الحمررر وعينيه لي دبالو بالمرض .. باينة فيه مسخسخ بزاااف وجا غير بالسيف باش يودع ختها .... معارفاش الى نص مجيتو على قبلها هي .... رجعات كتبسم بشوووية و كحبتو بقى كتمسع ليها فودنيها ... مهبطة شفايفها بأسف ... تاجابت ليها رجاء الملاية وهزاتها فيديها وطلعات جات من موراه و بدات كتحطها على كتافو وهو غمض عينيه كايستنشق ريييحتها لي ضايرة بيييه مزير بيديه على جناب الفوطوي كايتحكم فراسو ... كايستنشقها بهدوء عاد عرف شنو هو الاكسيجين بنسبة ليه هو ...
مشات كلسات وهو كاايشوف فيها ومرة مرة يشتت بصرو باش مالفتش الانتباه .... تاجات رجاء نوضاتهم باش يتعشاو .. خداو عشاااهم بهدووووء ولوؤي غير نقبورجع لفوطوي الشهية كانت عندو مسدودة ...... خداو ديسيرهم عادرجعو لبلاصتهم وجود طلع لفوق نزل بزطام وراقو و شارجورو لقاهم جالسين فالصالون .....ومشى كلس حدا لوؤي ضرب ليه فكتفو .....
جود : هاد سبعة دااروااح هاااداااا .. واش بعععقلك بايت وسط متحف ؟؟؟؟
سلطان : يمكن كان حاط راسو على صباط رمسيس التاني ههههه
لوؤي : ( شاد تيل ديالو وكايجاوبهم ) غااضحكو ... مالقيت ليكم جهد دابا ...
لامار : متبقاش تجهد على راسك اولدي ... خدم على قياسك ....
علا راسو من تيل حطو كايومي ليها بواخا ومد يديه لكاس دالما كايشرب ... وقدس كاتشوف معاه كيفاش كايترعد بالبرد ... وهيي يوصلها مسج وحلاتو لقاتو منعندو وشافت فيه كان شاد الكاس كايشوف فيه مشافش فيها ورجعات حلاتو لقات كاتب ( miss u )
ماعرفاتش علاش حسات بكرشها اتخبطات ليها ورجعات عضات على شفتها ومجاوباتوش تاحمااار وجهها ولات مزززنكة ...
جود : (شاف لتيليفون ) قسم نوضي تهزي ... الربعة هادي ....
سلطان : ( وقف تاهو ) معاش غايخرج الباطو
قسم : وقالو تمنية ولكن خصني نوصل بكري .... هانا سهرتكم تصليو الفجر هههه
سفيان : راه ديجا فقنا معطلين هاد النهار ....
بداو الخدامات كايخرجو حوايجها لطوموبيل جود وهي عينيها دمعو مشات عند ماماها عنقاتها
قسم :غااانتوووووحشكم .... ..
لامار : ( عينيها تعمرو بدموع ) تهلاااي احبيبتي راه مستقبلك هو الاول ردي لبال لراااسك كوولي مزياااان والى عييتي قولي ليهم عييييت ... .
قسم : داااكوووغ ( كاتبوس فيها ) كانفكر شهرر مغانشوفكمش كانبغي نموت
لامار : ( شدات يديها وبدات تمسح دموعها ودموع قسم ) هانتي ابنتي ان شاء الله دغيا دوز وتجي مع المناسبات ان شاء الله ونفرحووو بيييكم ياااربي ... .
قسم : اميين ( شافت فباباها وهو تبسم وفتح ليها يديه ومشات تلاحت عنقاتو كتبكي ) ولله تغااانتوووحششكم .
اسد : ودابا غاديري لينا كنازة تاني على شهر وعشر يام ... نسيتي ليام لولين شحال كنت دوزي ...
جود : وصاااافي شحااال غاتعنقو .... بحالا غادا للحج ....
طلقات من باباها ومشات عنقات قدس ووسيم وبدات كتسلم على العائلة كاملة والعيالات كاع دمعو عينيهم ولامار كاتبكي وقدس تاهي مسحات دمعتها .. ولوؤي بعد وجهو وهي جراتو عنقااانوو ..
قسم : اااجييي عنقني نيت باش نمرض يعطيوني شوية دالراحة هههه
لؤي : دايرانيي سبة ههه ... كون مكانتش عيان كون مشيت معاك تانا ولكن الصباح خصني نكون فالمتحف تاني .. تهلاي فراااسك ....
رقية : واقويسم .. راه وصيييت قبييلة رجاء راها حطات ليك واحد بواطة تما راه فيها كعب غزاال وفيها لفقاص فطري بيهم وطاسة اخرى راها فيها رغايف .. ودووفي صحابك
قسم : هههه واخا اجدة واخا ههههه لهلاا يخطييييكم عليا ... ( كتمسح دموعها ) غاانتوحشكم والله
حياة : تاحنا غانتوحشووك احبيبتي ولكن قرايتك هي لولا
رتاج : وماشي ملي يسمحو ليك ليزابييل تعيطي غير لامار وباباك .. وسولي فينا تاحنا راه غانتوحشوك
قسم : ضرووووري. .. فرررحت حيت شففتكم ... ( عنقها سفيان تاني ) اااحسسن عااائلة فلكووووون
رقية : الله يبععد عليكم عينيين الحساااد ....
خرجات لبرا وهوما موراها تابعينا باش تاهوما غايمشيييو والمساعدات كانو دارو حوايجها فالكوفر ديال طموبيل جود وهي تحنات عند اية باستها
قسم : عنداك تنساي اليكني ديالك فالوووقت احبيبتي متهاونيش ومتكاسليش
اية : ( شدات وجهها )واخا اختي ... تهلاي فراسك حتى نتي وردي بالك ....بغيينا نشوفوك كابيطيييين كبييييييرة .....
قسم : ههه واخا احبيبتي .. ( وقفات كاتشوف فيهم ) عرفتو .. راه مكاينش بحالكم هههه
رتاج : معنقة قدس والبرد د الفجر كايضرب فيهم ) الله يخلينا ديما مجموعين ...
جود : ( ركب فطوموبيل و سلطان ركب تاهو ) يالاااااااه ....
اسد : شووف عندي ... غاتوصلها تالميناااء وماتمشي حتى يبان ليييك الباطو غاايقلع .. صافي ! غاتبقى قداااام عينيك
جود : ( جاتو ضحكة ) وااخا ااوليييد وااااخاااا مايكون غير خاطرك .... طلقينا ا قسم دغيا .... غانتعطلو ....
قسم : ( رجعات عنقات لامار ) ردي لبال لراسك ومتعصبييش بزااااف
لامار : ههههه لي والد هاد الزين كامل يتعصب ههه سيري ابنتي الله يوووفقك والله يسسر ليييك والله يدير ليك فكل خطوة تيسير ان شاء الله
قسم : يااااربي امييييين .. ( كتشوف فيهم مهبطة شفايفها ) ياااااا ..... غااانتوووحششكم ....
وسيم : ( حل ليها الباب لور ) ركبي راه غتبقاي نهار غا هنا ... يلااااه ....
قسم : هااانا غنركب خاصكم غاتهناو مني ... بابااا تهلاا فماما
اسد : ( جاتو ضحكة وعينيه حمرين ماسخاش بها ) راه غا شهر وعشريام اقسم
قسم : طويييييلة .. شهر وعشر يام را عمر .. تهلااااو ( شدات فيد لوؤي ) الله يشااافييك يارب ونتمى يكون احسسسن وانجح افتتاح داااررر فتاريخ الروووكان هههه
لوؤي : واقف عليه انا ومبغيتيش يكون احسن واحد هههه سيري طريق السلامة بون كوغاج ....
قدس : آل دا بيييست سسسييستااااا ...
عدنان : يالاه ابنتي متعطليش سيري وبالتوفيييق ان شاء الله ..
دارت ليهم بايباي بيديها وركبات فطموبيل لوررر وهوما كل واحد قصد طموبيلتووو ولامار بقات واقفة واسد معنقها لي عينيه دمعو تاهوو وهز يدو كيمسح دمعتو بزربة وشمر بنيفووو ... وقدس تاهي ولا جهها حمرر حابساهاا وكدير ليها بايباي وجود كلاصكونا وزااد عافط كيف ديييمااا .. وهي غير خرجو من المنطقة تكات لورر مزيااان كل مرة تهز تيليفون تشوف واش عيط وترجع تحطو كتنهد ....
قسم : ( بقات كتفكر شحال وهي تقرب للكوسانات لقدام شدات عليهم خاشية راسها بين جود وسلطان ) جوووود .. تشهيييت داك .... داااك لي بالحليب ... ( كتفكر )رر ... راايب ... سميتو رايب .....
جود : ومنييين غااانريبو ليك انا فربعة دالصباح صافابا (سلطان جاتو ضحكة وقلب راسو وجود ضربو لكتفووو ) هنيييناااا نتا ...
قسم : اا .. كاااين فالمدينة القديييمة ... يلاه نمشيو لتما عاد نشدو الطريق
جود : واش قالو ليك المدينة القديمة راه صبح عندهم الحال ؟ فين غنلقاه ليك ....
قسم : ففففف ... وو ... يالاه نمشيو لتما .. وو نسولو
جود : ( بدا كيضور راسو ) ررجعي تكمشي رجعي لووور ... نتي راه مباغاش الرااايب نت راه باغا الصداااع ... رجعي لوووورررر
قسم : ( ضربات فالكوسان ورجعات لور غضبانة ) فففففففف والله ماعندك القلب ..
سلطان : امااالكي ! كتوحمي
جود : هادي راها جاها واحد الوحاااام فشكل ... وححم كبييييير هدا ..
قسم : نتا وبابا انااانييين فخباركم
حود : ايييه اييه فخبارنا ... شدي طريق لقرايتك باراكا من الطييرااان .. تقلي شوية ... شوية دالتقالة راها مزيانة ... حسن من الرايب ....
قسم : هاني شادة طريق اش بالك كندير ؟؟ غنطير من السرجم مثلا
جود : ماشي بعييد ....
بدات كتحرك كتافها بغضب وشفايفها نازلييين ودموع كينزلو ليها بالفقصة .....مقالت حتى ولا ديالها ومنهار ولات معاه ماشبعاتو فخاطرها .... بدات كتحاول تنعس تنسى شوية وهي عارفاه غيكوون نعس مقلق حيتاش غيحس بلي تهربات منو .... كيغايدير تبرر ليه بلي جاو تالطناش .. هافت يكون كايضن كديرها بالعاني ....هو معقول معاها وپونكتييال وهي غاتبان حداه ماعندهاس لكلمة
داتها عينيها مدة ...
تاسمعات سلطان كيفيق فيها عاد بدات كتحل عينيها كتبان ليها السمااا زرقة وطموبيل واقفة .... وجود على برا كيشرب الما .. وبدات كتوگض و كتعوج فعنقها لقات راسها وصلو ....
قسم : ( كتحك فعينيها ) ووصلنااا
سلطان : سي انعاسة وصلنا .... نوضي
قسم هزات تيليفونها بزربة وهي تلقى تاني لا مساج لابيل تا طريق سلامة ممصيفطهاش ليها تنهدات وشافت لساعة كانت ستة و خمسين دقيقة ونزلات من طموبيل وجود حط القرعة وضار عندها
جود : يالاه نمشيو نريحو لهيه فداك الكافي على ماوصل وقت الباطو ....
قسم : بلا منعذبكم والله .... باقي تابعاكم الطريق غير سيرو انا غندخل للباطو ديريكت
سلطان : غنكلسو غنكلسو نشربو قهوة يلاه كلسي معانا تايوصل الوقت وسيري ....
يلاه واقفة معاهم وهي تشوف صفاء جاية من كتجري شادة على نظاظرها ميطيحوش ... بسروال دجين وسبادرين وشوميز .. وهازة تيليفوناتها ...ووقفات حداهم كتنهج وكتهضر يزربة تأدي خدمتها ...
صفاء : بونجوغ لي موسيو .. بونجوغ مادموزيل .. جيتي فالوووقت تماما .... ( كتومي للمساعدين لي معاها يمشيو الكوفر يهزو الحوايج ) غندخلو ليك ليفاليز للشومبغ ديالك فالباطو ...
قسم : داكوغ .. انا باقى شوية هنا مع خوتي .. تايقرب الوقت ونجي ....
صفاء : غنقلعو مع تسعود الا مكانش شي روطار .. تمنية ونص دخلي ....
قسم : داكوغ
صفاء : ( مدات ليها يديها ) عطيني وراقك نقاد الاومور
قسم : ( مدات ليها داك الصاك كامل لي كان معلق فصدرها ) شدي راه تما كولشي ....
صفاء : داكووغ .. نهاركم مبروك لي موسيو ..
وماو ليها براسهم وهي مشات
سلطان : اه اه اه ساااررررطة كاسييطة ... واش مكتحبسش شوية تتنفس !
جود : واش لي خدام مع الروكان كيتفس ... مانسيتي والو فطموبيل
قسم : لاا ... ( غمضات عينيها وكتشم نسيم البحر ) البررررد ..
جود : راه لافيست ديالي لور جيبيها حطيها فوق كتافك
قسم حلات الباب لور هزاتها دفات بيها وزادت موراهم لكافي لي قريبة لميناء ضومونداو قهوة وجلسو كيتسناو الوقت وهي غير هازة تيليفونها وكتشوف بلي ماحلش كاع ... مكلفش راسو تايقول طريق السلامة ؟؟؟؟ هذا هو الاهتمام ؟؟ لي مهتم واخا يكون مقلق غيسول ... ولا على الاقل يستودعها بكلمة زوينة قبل من العسكرية .... خدات نفس كتحس براسها غاااتبكي وشافت فجود ..
قسم : جود صافي غنمشي للباطو .. تانتوما سيرو متعطلوووش ...
جود : ( شرب قهوة وطفا تيليفون دارو فجيبو ) وي نمشيو .. غايجيو صحاب الخشب مغايلقاونيش ...
قسم : يلاه بشوية عليكم فالطريق ... انا غنمشي نتأنسطالا ونشوف الجروب لي جيت فيه ...
ناضو خارجين من داك القهوة وهازين معاهم ديكافي اونبوغطي باقي كيجغمو منهم وقسم قربات عند جود عنقاااتووو
قسم : تهلاا فراااسك احبيبي .. ورد البال ومتبقاش تجهد على راسك فالخدمة ف الكاراج هانتا شفتي لوؤي جابها فراسو ....
جود : داااااكوغ الالة .. تانتي ردي الباال لراااسك ...
قسم : ( تقلبات عند سلطان عنقاتو ) غاانتوووحشكم
سلطان : ( كيضرب على ظهرها ) كاع غنتوحشوك ... آل دا بيييست ...
تبسمات ليهم وتنهدات ومورال عندها طايح وجود عارفها علاش مقلقة قد هاكا .. ومشاو لطموبيل هو وسلطان وديمارا مشا وهي غادا فالممر تمشي للميناء بالعكز وكضرب رجليها مع الارض ودموع بداو كينزلوووو وبدات كتمسح فيهم وتقلبات لحديدة شدات فييها كتبكي غير بالشوية تاتحولات لشههقاااات وحدة مور وحدة ...معرفاتش علاش كيدير معاها بحال هاااكاا وعلاش يتقلق على امور بسييطة ويضيع اومور اساسية بحال انه على الاقل يخلي ليها كلمة زوينة قبل ماتمشي ... قادات وقفتها حيت الناس كيضورو كيشوفو فيها وبدات تسرط فريقها وتمسح على راسها عينيها تنفخو يالاه غتزيد وهي تسمع موراها
اصيل : ققساام ....
قسم وسعات عينيها على حددهم وحلات فمها ممدة غير ممصدومة ..... شدات على فمها ممتيقاش واش صوتو هذا وضاارت بشوية وهي تلمحووو واقف وطموبيلتو موراه باقا مديمارياااا يلاه شافتو وعينيها تضببو بدموووع ... قدرات شوية تلمح انه حل ليها يديه وهي تمشي كتجري وتلاااحت عليييه عنقاااتووو بجججهدد وهو مزير علييها كيبوس فراااسهاااا ....
قسم : ( معنقاه ومزيرة عليه ) كنحلم ياك ....
جابها قدامو وكيشوف فيها كيفاش وجهها عامر دموووع وفازك ونيفها حمر وبدا يمسح ليها دموعها ..
اصيا : علاش كتبكي !!!
قسم : ( ببراءة كتمسحهم وباقا كتشهق ) ح .. حسابتني ... حسابتني تقلقتي ..
اصيل : ( بنصف ابتسامة ) واش منيتك ؟؟؟؟ علاش غنتقلق ؟؟ ..
قسم : ( كتشهق ) حسابتني صافي .. غ غنمشي بلا منشوفك .....
اصيل : ششش ...( تيمسح ليها دموعها ويسرح ليها شعرها لور ملي كيطيرو الهوا دصباح على وجهها ) راه واخا نعرف نجي لداركم ومتمشيش بلا منشوفك ....
قسم : ( علات فيه عينيها لي باقين حمرين بالبكا ) ي يعني .. مكنتيش مقلق مني ! ..
اصيل : واش مسطية نتي ! رديتينا دراري صغار ؟
قسم : ر را ... ( زيرات على يديه لي شادة فيديها ) را بابا شد معايا العكس .. والله النهار كامل وحنا فالبحر .....
اصيل : عارف ... وعارف مزيان كون كان عندك غير نص ساعة كنتي غادي تقوليها ليا .... وعارف بلي باباك مغيطلقكش ونهار مكافيكش تشبعي فيه من عائلتك ... وانا براسي ختي تكون غتسافر شهر ونص غنبغي نبروفيتي منها انا قبل من واحد اخر ... داكشي علاش جيت لهنا نتسناك .. واخا غا ربع ساعة متيهمش ... مهم متمشيش وانا كاع مشفتك ...
ابتسم ليها ابتسامة لي ناذرا مكتشوفها وكتواتي ملااامحووو وهي تخشى فصدرو عنقاااتوو وهو تحنى لعندها ...
قسم : فرررحت حيييت شفتك قبل مانمشي ....
اصيا : مكانش كيحسابتني بكاية هه !
قسم : ( رجعات كتشوف فيه وكتمسح دموعها وكتحاول تضحك ) ماشي بزاااااف ...
اصيل : ( شد وجهها بين يديه وقرب راسو تاحط جبهتو على جبهتهها ) حتى ونت كتبكي .... كتدي العقل ..
قسم : ( كتشوف لتحت مقداتش تعلي عينيها فعينيه ) علااش مكنتيش كتجاوبني
اصيل : مكانتش غتجي حسن من ديال الغفلة ...( تهند بنفاذ صبر) علي عينيك اقسم واش انا ضارب طريق باش نشوفهم ونت حادراهم ...
قسم : ( علات فيه شوية عينيها ) كون حسابتني غنلقاك هنا كون جيييت قبييييلة
اصيل : تادابا ماشي مشكل .. ( قاد وقفتو ومد ليها كلينيكس من جيبو ) وصااافي باراكااا كون حسابتني غنبكييك كون مجيتش ....
قسم : ( شدات عليه كلينيكس وبدات تمسح تحت عينيها وشافت فيه ) لا راه ماسخيييتش والله ... عرفتي ... اول دورة غنمشي ليها عكزانة بحال هااااكدا ... بغيييت نبقى معاك
اصيل : والا ... انا مدخلتش لحياتك باش نخربقها ... غتبقاي غااادية على نفس روتينك ... الامور لي جدية وفيها مستقبلك مافيهاش الضحك .. غنصبر وغتصبري ... حتى ترجعي ...
يلاه غتهضر قسم وهي تسمع جري موراها وضارت براسها مصغرة عينيها فالشمس لي شارقة ويديها باقا شادة فدراع اصيل لقاتها صفااء جايا كتجري
صفاء : ( كتنهج ) مادموزيل قسسسم .. طليت على لاشومبغ ديالك وملقيتكش تخلعت حسابلي رجعتي ولا لاش واقع .. موسيو اسد كيتصل وكيقول ان تيليفونك طافي و كيأكد عليا دابا تكوني فالباطو ..... ( اصيل كمش عينيه من الطريقة السريعة باش كتهضر ) وحتى الباطو دابا هو خرج خاصك تأسنطالاااي وتعرفي على الكروب ... وكلشي كيتسناك
قسم : وااخا اصفااء وااخا ( جبدات تيليفونها من جيبها لقاتو طفا ) مرضيتش ليه البال ... سبقيني انا جايا ....
صفاء : اا منقدرش نسبقك امدموزيل .. موسيو اسد كيأكد عليا باش نديك فيدي و ( قاطعها )
اصيا : كتهضري بزاف اختي صفاء .. بزاف .. رتاحي شوية هاهي غدخل دابا ...
صفاء : وي ولكن ....
غير ضارت شافتو وبقات كترمش بعينيها فعينيه وتبسمات شوية بشوية تاتحولات لضحكة بلهاء ومدات يديها بلباقة هايمة فزرقة عينيه .....
صفاء : سلاام سميتي صفاء .. المنادجر دمادموزيل قسم الاسماعيلي ...
قسم عوجات معاها راسها بنظرات دياال منيييتك واصيل جاتو ضحكة ودبا يحك بصبعو فوق حاجبو ورجع مد يدو ليها
اصيل : مشرفيين اصفاء ...
صفاء : ( سلمات عليه ضاحكة وهو دغيا خطف يدو وبدات كتشوف فقسم وتلعي بحجبانها بمعنى اش هاد الزين ورجعات شافت فيه ) اول مرة نشوفك ... نتا ماشي من العائلة !
اصيل : لا ..
صفاء : اااه .. و و( كتشوف فقسم لي محمرة فيها ورجعات شافت فيه ) وو .. زعما ... اش كتجيها .. بغيت نقول واش كوليگ ... ولا صديقتك ؟ ولااا ت( قاطعها)
اصيل : ( عنق عندو قسم لجنبو ) حبيبتي ...
قسم وسعات عينيييها وهي كتعاود فودنيها كيفاش نطقها يالاه كتستوعب وهي تبان ليها صفاء شهقاات شادة على فمها مصدووووومة
صفاء : اومايييكااااد ...( بدات كتشوف فجنابها متوترة ) ااا خاصني نمشي داابااااا .. ( مشات وقسم كتهضر معاها ضاحكة )
قسم : ههههه فيييين غاداااااا
صفاء : ( كتهضر بجهد غادا جيهة الباطو ) غااانمشي نصصصلي ونطلب السمااااحة من الناااس .....
قسم : علاااااااش
صفاء : قسم الاسماعيلي عندها بويييفراااند .. سووو الدنياا قربااات تفنننى وماباغااش ندددخل لجججهنم ... ( ضارت عندها ) مااااتعططططليش ...
بقاو متبعينها قسم واصيل بعينيهم ضاحكين عليها وقسم شافت فيه
قسم : حتى ماما وختي دارو نفس الرياكشن هههه
اصيل : قلتيها ليهم ؟
قسم : ممم لبارح .. بابا حطني بوجهي ....
اصيل : اش قالت ماماك !
قسم : عجبها الحال ولكن مأكدة عليا بزاف باش تعرف عليك
اصيل : قريب ... سالي العسكرية ديالك ويكون خير ...
قسم : ( زيرات على يديه ) كنتخيل راسي كون مشيت بلا منشوفك ...
اصيل : ( شد وجهها عندو وقرب باس راسها كايووف فيها ) مكنعرفش نصوم بلا منتسحر .....
قسم : ( حاتها الضحكة وهي كتفكر ) قلت لخويا فطريق يدوزني لمدينة لقديمة حيت تشهيت الرايب قلت واخا ندوز غير من حدا دربكم ونهرب ليه ومانمشيش بلا منشوفك ... ساعة عاق بيا ... قاليا مكاينش ارايب فربعة دصبح
اصيل : بقاي ديري كولشي الا الكدوب ...مكتعرفيش ليهم (( قاد وقفتو وضرب ليها على نيفها ) ومرة اخرى ملي تبغي تشوفني .... بلا متحطي راسك فموقف محرج مع عائلتك ... قوليها ليا وانا لي غانجي عندك فينما بغيتي تكوني ... ماشي نت
قسم : ( حركات ليه راسها بالايجاب ).... مهم .. الرقم ديالي مغيبقاش خدام .. كيسمحو لينا بجوج دليزابيل فالنهار ومن الرقم ديالهم ... غنبقى نتصل بيك فلابيل التانية ( اصيل غير كيشوف فيها كيتخيل كيغايدير لهاد لابيل لي غتكون
محدودة ) نتمنى دوز دغيا .... وملي نكون غنرجع ... ( كتمسح دموعها ) غاانعلمك ... واخا عارفة عائلتي غيجيو لهنا وميمكنتش نتلاقاو .. ولكن غير نمشي لكازا نتا لول لي نشوفك .. ندير جهدي كامل ....
يالاه بداو يدمعو عينيها هو يجببدها من يديها وعنقها عندو مزير عليها وهي عضات على شفايفها وبدات كتبكي
اصيل : غنتوحشك ....
قسم : ( مزيرة عليه وكتشم فريحتو ) تا انا غنتوحشك ....
بدا كيتسمع صوت الباطو عاطي انذارو شوية وينطلق وصفاء كتعيييط بالغوات وقسم واصيل وضورو راسهم لتما ورجع شاف فيها
اصيا : سييري .... وردي لبال لراسك مزيان ( كيقاد ليها الجاكيت دجود على كتافها )
قسم : حتى نتا .. رد بالك .. وتهلى فراسك ... وتهلى فسلمى .....
اصيل : داكوغ ... شي حاجة اخرى هه !
قسم : هههه وفكر فيا ههه
اصيل بقى غير كيشوف فيها مبسم هو يجبدهاااا وشرك شفايفهم مع بعضايتهم وتاهي دورات يديها مور شعرو وهو شاد وجهها والباطو قالب الدنيا بانذاراتو باش كولشي يلتحق وصفااء كتعييييط وكلشي داخل كيجري وهي مكانتش فداك العالم مستمتعة بقبلة وداعها كتحاول تاخد اكبر جججرعة ممكنة منووو .. وهو بدورررو مقادرررش ابدا يبببعددد كانووو صائم فساعة السحور كيستعد لنهار طويييييل .... بعدات منو كتنهج وضحكات وهو كيشوف فيها مااساخيش بيها مكررهش يوقف زمااان هنا عندهم تايشبعها عاد يطلقها ... وهي تسلتات منو دخلات كتجررري تاوصلات حدا صفاء وضارت لعندو لقاتو واقف فبلاصتو وبدات كتشير ليييه بايباي ودموع فعينيها ... وهو يدير يدو فجياب سروالو كيشوف فيها بابتسامة ووما ليها غير برااااسو ... وهي دخلااات غبرات على عينيه ... عااد تنننهد معععمق ... ومشا باتجاه الطموبيل ركب فيها ودفن راسو فوسط الفولون .... فللخر رجع راسو لور دالكوسان متكي ومعليه لفوق وعينيه حمرييييين ....
ماقال حتى ولات ديالو و كيحاول بكل ماعندو وحاط حياتو على المحك باش يقدر شي نهار يغطيهم سقف واحد هو وياها ... مزال ممتيقش الى دارها بين يديه حتى كيجي هاد السفر لي كيقول ليه غتحرم منها كتر من شهر ... وهو كانت غبرات غير شوية ومبقاتش تجي لدرب المورال خسر ليه .... كانت هي لي محلية حياتو .. ودابا كيحس براسو غيرجع لداك الضلام تاني .. تنهد وقرب لطموبيل ديماراها وبقى راجع مارشاريار وهو كيحاول هاد الشهر لي مشات فيه يدير فيه جهدو يكمل خلاص الريسطو على الاقل يبدا الاصلاح فنفس الوقت يتعالج مع الطبيب لي رجع ليه لبارح باش يبدا معاه العلاج رسميا بعد ماخبرو انه على مشارف الزواج .... غادي فالطموبيل وهضرة الدكتور كتعاود فودنيه
- اكييد كاين امل اولدي ... كاين امل فالشفاء .. الامل ديما كاين .. ولكن خاص شوية دالاجتهاد منك .... هاد البنت لي دخلات لحياتك الى كانت رغبتك فيها قوية وكتبغيها بزاف .. حاول ما امكن مدخلش معاها فحتى شي علاقة حميمية والا غتفقدها فخطرة وحدة ... راه الرغبة القوية هي لي كتزييييد من الصعوبة دالامر راه كلما بغيتيها كتر كلما فقدتي الوعي كتر وكل مافقدتي ااسيطرة ... قد حجم الرغبة قد حجم العنف ... حيت كولشي متعلق بالجهاز العصبي ديالك كل مكانت النشوة فالشخص كثيرة كل مكان التعديب كتر باش تقدر توصل لبليزيغ ديالك .... الامر يقدر يأدي بيهااا للوفاااة .... راه شحال من حااالة حتى قتل شريييكتووو عاد برد .... متستاهنش ب المرض ديالك .. داكشي علاش بقى بعييد على العلاقات الحميمية ... حتى نبداو نشوفو علامات للشفاء وحنا غنعلموك انا و الطبيب النفسي ... السيدة لي غادي تكون كتعاشرك ضروري منشوفوها وخاصها تعرف المرض وتعرف تعامل معاه .... شوية بشوووية غيبداو يقلالو عندك الاعراض حتى تشافا .. مغنقولوش غيكون شفاء كااامل ولكن نتا وهاد السيدة غتلقاو راسكم خلقتوو نوع من العلااقة ديالكم نتوما ولي كترتاحو فيها نتوما بلا متآديو بعضياتكم ... اما دابا .. مكنصصصحك بحتى شي نشاط جنسي .. وهاد الادوية لي غنعطيك هوما لي غيخليوك تحكم فراسك كتر وفرغبتك الجنسية ومغيخليوكش تنتاصب بسهوووولة من غيررر لا بغيتي نتا وعطيتي اشارة لدماغك .... و الا رافض مغتنتصبش بمرة .. هذا هو مفعول هاد الكينات ..
اصيل : مغيأثروش على الولاد مستقبلا .. و على القدرة فالانجاب ؟
- ابدا ... مجرد متقطهم كترجع انسان طبيعي .. هادو غير غيعاونوك هاد الفترة قبل متببرا .. فحالة ما الى كان شي تواصل حميمي خارجي .. ميوقعش ليك انتصاب .... والشريكة ديالك ضروري منشوفوها تاهي ... حيت العلاج غيكون معاكم بجوج .... خود هاد الدوا وتبعو مع الوقت .. وان شاء الله غتكون النتيجة اسرع فأقل من سنتين غيبدا يبان الفرق .... ..
رجع بداكرتو للواقع ملي سمع كلاصكون فالطريق حيت كان ساهي فيييقو من سهوتو وبعد من طريق والسيد ضوبلوو .. زاد تاوصل قدام البحر ونزل من الطموبيل ... وهبط الزاج كيتنفس ....وكيسول راسو اشمن طريقة غيصارحها بيها .... مرضو هازو بحال شي حمل فوق ظهرو .... كيخافها ترفضو ومتستحملش .. شي عقل كيقول ليه سكت ومتقوليها والو تاتبرا ... ولكن كيخااف يتسمى بلي كيرفضها ولا مباغيهاش ولا كيأجل زواج بدون سبب .. وشي عقل كيقول ليه الى قلتيها غادي تخليييك ... دفن راسو بين يديه وهو كيسوووط وييفكر كيفاش غيدوز شهر وعشر ايام ... بلا ميشوفها .....
رجع ركب فطموبيلتو وزاد هو يصوني ليه السيد لي كينظم ليه الكومبات وعلمو ان غدا كاين كومبا جديدة .... ومع نفس القمار لي هو بيتر ... والمبلغ خيالي .. تنفس مزيان وجاوبو باه قابل ... ومشا يقلب على اوطيل فين يجلس لان الماتش غير فطنجة ...
يتبع...
التعليقات
لا توجد تعليقات بعد، كن أول من يعلق.