محتوى القصة
ففاس ....
كانت غرفة مربعة صغيرة .... متكونة من بلاكار أبيض الباب الوسطانية ديالو مراية وعامرة بالستيكرزات ديال الفراشات .... مكتب صغير ابيض الكرسي ديالو فالموڤ .... عليه كمبيوتر و بزاااف داكتب و اوراق مربعة ملونين ديال النوط معلقين فالحيط وفالبسيي .... ستيلوات ملونين .... نافذة بستارة خفيفة كانت محلولة والستارة كيديها الريح .. طابل دونوي صغيرة ومحطوط عليها اباجور تاهو على شكل فراشة شاعل بضو خفيف ... كانت متكية على فراشها ، ببيجامة بيج خفيفة وشعرها مجموع لفوق وجهها باقي كيلمع بالسكين كير الليلي لي دارت و لسقة دانتفاخ الهالات تحت عينيها .... شادة تيليفونها ولكن عينيها كانو كيشوفو فالسقف ..... وشااااااردة .... تاتحلات الباب عاد شافت جيهتها ....
دخلات ماماها .... لي كانت امراة فآواخر ثلاثينيتها ... امراة شعرها قصير جامعاه بقراصية لور .. لابسة كسيوة ديال النعاس حريرية سوداء وفوق منها بينوار طوييييل حريري تاهو حالاه ... ملامحها كانو كيشبهو بشكل كبير لملامح بنتها ... كيتميزو ببشرة حنطية وعيون عسلية وشعر بني كثيف ... رغم ان الام مقصراه الا ان كثافتو باينة ....
الام : شفت ضو د الفايوز من الزاجة ... واش مجاكش النعاس ؟
ياسمين : ( تنهدات وحطات تيلي على طابل دنوي وشافت فيها ) طار عليا صراااحة ....
الام : وراه ثلاتة دصباح هادي ابنتي .... ونتي غذا قااارية ... فوقاش ناوية تنعسي ؟ ...
ياسمين : ( شافت شحال للجنب وشافت فيها ) عقلي كولو مع داك الولد اماما ......
الام : ( تنهدات وقربات جلسات حداها فالسرير ) ابنتي .. نتي درتي لي عليك ... ماجيتي تاركبتيه فلومبيلونص ... راه ماشي كولشي غااايموت بحال ختك ابنتي ...
ياسمين : ( خدات تنهيدة ) معارفاش اماما ... هو قبل تامايدير داك الاكسيدون كيبان مريض .... انا فلول كان كيحسابتني سكران ..ولكن لا ... مكانش فيه ريحة الشراب ...
الام : ( صغرات فيها عينيها ) ونتي منييييين كتعرفي ريحة الشرااااب ؟؟؟؟
ياسمين : راه واحد سيااااادة راجلك كنجمعو كل نهار سكراان ... فين غانعرفووو مثلا !!! كون ماشميتوش فيه
الام : ( تجاهلات الموضوع بزربة وقلباتو ) اوا هانتي غتبقاي سهرانة شنو غادي تقضي ؟؟؟ ياك درتي لي عليك اوا نعسي .. وهو الله يحفظو لواليديه ويكون معاه ...
ياسمين : امين ( تبسمات ) ماايستاهلش صراحة .. باااقي صغير ( شافت فيها والضحيكة بانت فعينيهاااا ) كون تشووووفي اماما شحاااااال زويييين .... وشحال كيبان حنييييين .... مقادراش ننسى فاش حس بيا غانوض كيفاش شد ليا فييييدي .....
الام : واخا مقاداش تنساي ، غااااتنساي حيت خاااصك تنعسي ( ناضت كتقادها ففراشها وياسمين مبتسمة ) وغداااا خاصك تفيقي تمشي لقراااايتك ... باباك راه دخل .... والى شافك باقا فايقة غاايبدا تااااني يسمعنا داك الدياااااسك ديالو ... ( كتغطيها ) ياااالاه احبيبتي نعسي ومتفكريش بزاف .. وهو الله يكووون معاه والله يشااافيه لعااائتلو وحباااابو ( تحنات باستها من جبهتها ) يالاااه منشوفش الضو شاااعل مزال .. باباك قلت ليه راه نعساااات ....
ياسمين تبسمات وحركات ليها راسها بواخا .... ومدات يديها طفات ليها لاباجور ومشات .... وياسمين تقلبات لجنب مغمضة عينيها جرات الكوفرلي ديالها بيديها حاولات تنعس ولكن غير صورتو لي كاينة بين عيييينيييهااااا تاخلاتها تحلهم من جديد وتتبسم .....
-----
فالوقت لي لوؤي مع موالين ديبانج كينزلو طموبيل ، هو كان جالس فالارض متكي على طموبيل دلوؤي كيضور هاداك الفييييليل فيديييه مرافقو بتنهيدات متتالية .. كيتسائل .. شكون تكون هااد ل " crazy haired butterfly " "الفراشة المشعككة "
اليوم الموالي ... الساعة 12:00 .....
∆فالقصر - جناح جود ...
كان ناعس على كرشو ... ايزار كحل على نصو وظهرو ع*ريان ، الجناح كان نصف مضوي بسبب ريدوات لي طالعين للنص ....
بدا كيتحرك فبلاصتو وتتسمع انفاسو كيفيق ويعوج فعنقوو ... حل عينيه شحاال وهو كيسمع شي تخرشيش عند راسو .... علا راسو بزربة مضيق عينيه ....
هو يبان ليه راجل واقف كيشوف فالدوا ديالو لي على طابل دونوي .... شوية هو يشوف مراة اخرى تقدمات بزربة تاهي جلسات على السرير وعنقاااتووو ....
لامار: جوود فقتي .... ( معنقاه ) الحمد الله ياااااربي ماهنا خاااطري تاشفتك
اسد : ( تحنى عليه بشوية كيشوف فيه مستغرب فيهم عرفو راه مزال ديخان بالنعاس) باااباك اولدي .... وهادي ماماك .... ( خوا كاس دالما وعطاه ) ششرب بشوية عليك ....
جود بقى غير كيرمش ... وخدا داك الكاس دالما شربو ... وزير على عينيه كيدوز يدو على وجهو وذكرياتو كترجع وحدة ورا لوخرا ... وتبسم فيهم وتكا على السرير وزاد عنق عندو لامار لي حابسة دمووعها غير بزز كتعاايش مع حالتو ....
لامار : ( علات عينيها فيه ) كيصحبتي شوية ؟ ماعندكش شي حريق !!!
جود : ( بصوت بحوح بالنعاس ) انا بييخير الامار ( علا عينو فاسد وشاف فيها ) وهاااادشي لي مابغيتش .. علاش دابا خليتو سفركم وجيتو ( شاف فاسد ) ياك قلت ليك راني لاباس
لامار : ماخليناهش على ودك اولدي اصلا كنا راجعين ...وانا والله ماقال ليا باباك شي حاجة تاوصلنا لدار دابا شوية عاد قالها ليا ... الحمد الله فسلامتك اولدي ...
اسد قرب جلس تاهو على السرير وجود مد يديه للطابل دونوي لوخرا كانت تما تيشورتو لي حيدها وبدا كيلبسها كيحشم يبقى عري*ان حدا واليديه ....
اسد : البيلون ديالك راه صيفطوه ليا .. الحمد الله ليريم مافيهم تاشي حاجة جديدة على حالتك ... ( شد على يدو ) عااام لي بقات اولدي صبرها .. عااام وغانديرو ليك العملية الاخرى وغينقص ليك شوية هاد الارتجاج على الاقل غاتولي تحكم فيه كثر ...
لامار : شفتي علاش اولدي كنقولو ليك خلي الگارد يتبعك ونتا مكتبغيش ؟
اسد : من هنا للفوق راه مغااانسمعش ليك اجود .. هادوك الكااااارد غادي يتبعووووك ... بغيتي ولا كرهتي هادشي مافيهش اللعب
جود : ( كيتنهد معلي راسو لفوق كيرد شعرو لور ) وصافي دابا ماتبقاوش تحكو على ضبرة بزاااف
لامار : كي وقع ليك اولدي ثاني ؟ شنوووو عصبك ؟؟؟
جود : ( شاف فيها معوج شفتو وشاف للجنب شحال كيتفكر وشاف فيها ) كنت بيييخير ... مكنتش معصب .. جاتني شوية ددوخة قلت نطلع لدار نبدل ونمشي عند لوؤي كان كيتسناني .... فاش قربت هنا لازون .. معرفتش واش الظلام ولا الهوا دالبحر كولشي تخلط عليا وترونت ... شداتني واحد دوخة صعيبة ماااابقيت كنشوف وااالوو .. كانت غا ضباااابة ... مكنتش كنشوف الطريق ( اسد مزير على قبضتو لي سمع ليه ودار ليه خاطرو وفصل عليه الگارد) كنت كنقول نزيد غيييير شوية ندخل غير لازون راه غايكونو الكارد .... ولكن طموبيل كانت كتهرب بيا .. مكنتش كنشوف طريق .. كنت متحكم شوية غير فالسرعة ديالها ..... ( تنهد ) اوا قدر الله ماعندي ماندير ... كانت مكتابة ...
اسد : ونتا عارف تماك جرررف الى مشيتي تاطحتي من تما راه مانفرحووش بيك و مااتوقفش طموبيل وتعيط على الكاااارد !!!! شتي اش كااااديررر !!
جود : وانا راه كنت مرفووووع ا الواليد ، راه كنت كل شوية كنسى تافين انا وشكون انا ... راه كون ماشي واحد البنت من ورايا بقات كتلاكصوني وتعطيني فالضو كتوكضني كون ماعرفت اش وقع .. تقريبا 2 كيلومتر وهي تابعاني بالكلاكصون .... كنت شوية كنفيق شوية كانغيب ... تافاش قربات كتهضر معايا من زاج وتغوت .. كنت كنسمعها واخا صوتها كان كيوصلني غاااااارق .. ولكن وگضاتني وفهمت الا كاين جرف وعرفت راسي فين راني .. خوات ليا طريق باش ندوز لجهة الاخرى ... داك ساعة نقصت غير الفيتيس وقلت فين مابغات تضرب تضضضرب .... غتوقف راسها ....
لامار : الله ياااااااربي الله ... حفظك الله ياولدي .. ( شافت فاسد ) البنت لي قاليك لوؤي عيطات على الاسعاف
جود : اودي داك البنت الامار راه لاكنت هاد الصباح حي معاك راه هي السبب ... راه حتى فاش ضربات طموبيل .. وتفركعات الايرباغ .. مكنتش كنقدر نتنفس ولا نبعد راسي منها ... كنت غنموت غا تما مخنوق بيها .. عاااقل شوووية كااانت كاتجبدني من تما ...
لامار : ولكن تاني اولدي كون كانو عروقك منفوووخييين وحركات ليك راسك كنا غنوليو فموصيبة اخرى ...
جود : كون كانو منفوخين ولا حسيت بيهم ضاريني بزاف انا براسي مغنخليهاش تقيسني .. انا كنت محتاج نخرج من تما ... حيت الجهد باش نتحرك مكانش عندي والايرباغ كملات عليا ...
اسد : حفظ الله اولدي حفظ الله ... ( ربت على كتفو ) هادي دير ليك العقل واخا دازو بزاف ومادرتيهش ... مرضك مامعاهش اللعب اجود .. نحس بدوخة نحبس الطموبيل ... نحس بالدوخة مااانصوگش .. نحس بدوخة نهز تيليفون نعيط ... مكنتهوروش فالمرررض اجود ....
جود : وصاافي صااافي دابا والله تاراسي غيتفركع .. صافي طويو الموضوع بلا مايسمعو البنات غايقلبو ليا راسي
اسد : ( تنهد وناض ) نووض من تما نوض ... تاهاد نعاس تالطناااش غايكمل عليييك ... نوض نفطرو مجموعين يالاه ....
جود : ( حرك ليه راسو بالايجاب وشاف فلامار لي باقا كتشوف فيه مخلوعة وشد يديها باسها وشاف فيها ) انا بييييخير الامار .. بيييييخير .....
لامار : ( قربات باستو من جبهتو ) يالاه احبيببي نوض .. هاد الصباح انا نزل نوجد ليكم فطور ... مشهي شي حاااجة !!
جود : الخلييييع الامار .. الخلييييع
لامار : ههههههه واخا انشوف واش كاين ولا نصيفط عليه عهه .. يالاه نوض احبيبي ...
ناضت من حداه وخرجو هي واسد يخليوه يبدل ... وهو بدا كيتكسل فالفراااش ... يالاه غينوض بدا تيلي كيصوني لقاه لوؤي وبدا يتكسل فبلاصتو وجاوب ....
جود : باااقي حي ماتخافش باقي حي ..
لوؤي : نهار حي ونهار ميت .... نزل راني فلازون فطر معايا
جود : تا لا راه قلت للامار دير الخليع ، طلع تفطر ...
لوؤي : الخليع هو لي عشيتيني بيه البارح .... ماعندي فين نزيد شي خليع اخر ....
جود : وتنسى نفطر ونجي ...
لوؤي : ماعندكش شي حاجة اليوم !!
جود : عندي شي خدمة فالكاراج علاش ؟
لوؤي : اوا صافي ، سالي فطورك تلقاني تما كنتسناك ...راه قلت ليك البارح باغي نقوليك شي هضرة
جود : ياك لاباس !
لوؤي : وتانتلاقاو ....
قطع عليه وناض كيتكسل ويعوج فعنقو باتجاه الدوش ....خدا دوش خفيف .. ووقف قدام المراية دار الة الليزر فسنانو فنفس الوقت كيقاد لحيتو مع جناب ..
سالا ... وخرج لاوي عليه غير فوطة .. باتجاه دريسينغ .... لبس سروال گري وتيشورت كري ... صبادرين وهز فيست ديال دجين ... رش بارفانو وخرج كيلبس فساعة جلدية سمارت ... هز سوارت الكاراج والكوفرات ديالو وبقا تايضور فالجناح كيشوف واش نسا شي حاجة ...
ومشى باتجاه طابل دونوي يهز تيلي هو يشوف هاداك الكونطاكط لي معلق فيه الفيليل ديالها .. تبسم بجنب فمو وهزو كيضورو فيديه وكيتفكر هضررتها تاني وخوفها وهستيريتها .... "" وعندااااك الجرررررف .. وااا خووويااا تووووكض ... وااش كتتتتسمعني ؟؟؟؟ واااكااااين جرررف بببعد من تماااا ... وقااااف اخويااا وقااااف ... ووقااااف الله يخلي لييييك ميمتك لامااا وقف """ """خويا راه معرفتش شنو عندك ؟.... وماعنديش تاكييف ندير نعااااونك .... واش نزيدك الما ؟؟؟؟ تشرب !!!! ""
فاق من سهوتو معلي راسو للفوق كيتنهد ...وابتسامة صغييرة مشققة على شفافو .. حيد داك الفيليل من تما وجبد سوارت الكاراج ... حيد J لي كان معلق ... وعلق بلاصتو هاداك الفيليل ..
رد السوارت لجيبو وهز تيلي .. يلاه غيردو لجيبو هو يصوني ليه هزو هو يشوف نمرة BAYLASSAN ، وجاوب غادي جهة كاسكيطاتو ...
جود : بيلسان صبااح الخيير ...
بيلسان : صبااح نووور ... كيصبحتي ؟
جود : صافا ( هز ساعتو شاف الوقت بلي يلاه عندها ستة دصباح ) فايقة بكري !! اش مفيقك؟
بيلسان : سي راني فالمطار انا وزياد ... عندنا طيارة مع الحداش غنمشيو لامريكا ...
جود: علاش ؟
بيلسان : ياااك غير البارح فصباح قلت ليك غنرجع لامريكا على ود الانتقال ديالي ...يمكن نسيتي ...
جود : اااه ... داكوغ ... صبحتي صافا ؟
بيلسان : بيييخير احبيبي ... غير مساخياش بقرايتي تما .. صعيب نولف فكندا ثاني وسيستيم صعيب دالقراية هنايا راك عارف
جود : وياااه .. خاصك ضروري تفاليدي ... مكاينش راطراباج لي مضسركم نتي ووسيم .... العام اللخر ركزي مزياااان وهزي ليصونص ديالك ...
بيلسان : ومغاديرش ليا تانتا دابا محاضرة كثر من بابا وماما البارح ... صافي اصلا اش غاندير لامقريتش ...
جود : وااا نت تعرفي ( كيلبس كاسكيطتو قدام مرايا ) قرايتك هي نت آمادام الاسماعيلي .....
بيلسان : هههه تانقوليك راني باقا مادموزيل ...
جود : (كاجرب الكاسكيطات مع المرايا ) علاش مجاوبتيش على ميساجي لبارح ! فين كنتي ؟
بيلسان : والله الى يلاه شفتو دابا .. مكنتش نعست ولكن كنت كنوجد حوايجي وخرجنا شريت دي كادو لصحاباتي تما ...
جود : شحال غاتكلسو ؟
بيلسان : شي سيمانا هاكاك بينما كملو الاجراءات ....
جود : ممم داااكوغ ....
بيلسان : ماااتوحشتينيش ؟؟؟
جود : سي ... توحشتك ...
بيلسان : وزيد شوية واجي عندنا واخا غير سيمانة نشوفك ...
جود : ان شاء الله ... نسالي الوراق دالقراية ديالي ونمشي نقاد اومور دلانسكريبسيون تما ونجي عندك ...
بيلسان : اوووكاي لوڤ .. يلاه غاانخليك غنمشي راه بان ليا خويا جاي كان غير فالمسجد .. يالاه وذن عندنا الفجر ....
جود : طريق سلامة .. ملي توصلي خلي ليا ميساج ...
بيلسان : وااخااا احبيبي .. تهلا فرااسك ....
قطعات بيلي وهو رد تيلي لجيبو وخدا كاسكيط لي بغا ونزل فالدروج ....
∆فالقصر - على طاولة الافطار ...
كان اسد عل رأس الطاولة ، على يمينو لامار و قدس و على يسارو قسم و جود .....
كان الفطور فهدوء متخللينو بعض الضحكات العفوية من احاديثهم .... رجاء واقفة على السفرة .. الفطور كان من ايادي لامار ... لي صاوبات لكل واحد اش كيبغي .... ملي سلاو المساعدات الحطان تراجعو وخلاوهم بوحدهم ....
قدس : والله تاكااايخلي بلاااااصتوو ...
قسم : ( حطات الفورشيت وشافت فباباها وماماها ) هاد الصيف لخر لي جا ماعجباتنيش حالتو بزاف .. تقريبا ماشفناهش !! وانا مامولفاش نشوف وسيم بحال هاكا ...
اسد : حنا ابنتي ولفنا واحد الوقيتة فعمركم كتوليو هاكا ماشي شي حاجة جديدة ... غانستغرب ونحس بالخطر الا شي واحد فيكم فات المراهقة ورجع ليها ( شاف فقسم ) ....فواحك االاج لي ماشي ديال الهبال ...( شاف فجود ) ولا فشي واحد باااغي يعيش الشيخوخة فسن صغيييير ( شاف فقدس ) ولا شي واحد مااباااغيش يفووتها واخا داز وقتها ....( رجع شاف فيهم كاملين) اما لي باقي مراهق كنعذرو .. هرموناتو كيتغيرو وجسدو كيستعد للرشد ... جسمو كيحتاج بزاااف ديال الطاقة باش يدير هادشي .. شي لي كيخليه هو يحس براسو ماهواش ... مكتئب وعيان .... يعني امور عادية هادي ....
قسم : ( حاولات متبينش انهم كلهم مقصودين فالحديث وكملات) كنتمى تكون غير مراهقة ويفوتها ... مبغيتش تكون شخصيتو هي لي تقلبات كاملة ... وسيم الضحوكي ديالنا و لي تاايهضر بزاف جاتني فشكل نشوفو هاد الصيف ساكت بزاف وبحالا عندو شي مشكل !!! ....
لامار : كيف قال باباك ابنتي ... مسألة مراهقة ... حنا هادشي دوزناه معاكم ( شافت فقدس ) هااا واحد المثال قدامك ( ابتسمات ودوزات يديها على شعرها ) يالاه وليت كنسمع صوت بنتي وولات تجي تهضر معايا وتعاود معايا
جود : عجباتو الاخوين ؟ خليتيه فنفس البغونش ولا بدلو ؟
اسد : لا بقى لو ميم ... وبسيف عليه تعجبو حيت هو مكاينش فاوطيل ... هاديك راه جامعة خاصو يقرا فيها ... نتوما عارفيني اولادي ناخد بذوقكم فكولشي و ناخد برايكم فكولشي الا فقرايتكم ... مكنساعفش ومكنتساعدش .... مراهقة اه .. ولكن القراية واجبة ...
قدس : على ذكر القراية ابابا ... العام الجاي غناخد ليصونص ديالي ... فقلت اون باغاليل ديال الماستر ... نخدم وناخد شوية دليكسبيريونص فعمر صغير ....
اسد : ( مسح فمو بمنديل وشاف معاها بتركيز ) فاش ابنتي !
قدس : ( شافت فيهم وشافت فيه ) ياك ابابا عيالات عمامي وخالتو شيماء غيحلو شركة هنا .... ياك خالتو اريج قالت غتعوضها داك عاليا خت جنان فالادارة ... خالتو شيماء غتجي هي ... اما خالتو حياة وخالتو رتاج .. مزال مكاينش لي يعوضهم وقلت علاش منكونش انا ... !!!
اسد : غتاخدي الادارة ! بليصونص !
قدس : ومالها ليصونص !
اسد : الادارة والماستر !! كيغاديري ليهم ؟؟؟
قدس : غنحاول نوفق بيناتهم ...
اسد : الشركة ديال الفاميلي اه .. ولكن ابنتي امور الادارة خاصهم الخبرة ... ونتي مزال ماعندكش باش واحد جوج ثلاتة تلاحي ليها !!! خاصك تسطاجي شوية
قدس : اوا نسطاجي تما ....
اسد : ( شرب من قهوتو وحط الفنجان ) هادشي دابا باقي بعيد .. ركزي مع ليصونص ديالك ومع الماتشات ديالك ويكون خير ...
قدس : وبنسبة للماتشات .. بغيت يكون هذا اخر ماتش .... صافي مابقاش عندي مع عالم الرياضة بزاف !
اسد : علاش ؟ فين هوما طموحاتك فاش كنت صغيرة انك تولي لاعبة مشهورة !
قدس : مبقاتش عندي گانتو .. كانت احلام الطفولة وصافي لعبت و حيدت الشوق ديالي ....
لامار : وانتي تعرفي ... نت بغيتي التنس دخلناك للتنس .. عادي يتبدلو احلامك حتى قسم ملي كانت صغيرة كانت باغا تولي دانصر دالباليه ودابا بعدات منو .... كتكبرو وكيتبدلو فيكم بزااف دالحوايج .... غير هو مااتطفواااش .. ماتشرفوش بلا وقت ...( شافت فجود ) خوك ولا كيبان ليا ولات عندو سبعين عام !!!! شرف كثر من باباه !!!! مالكم طفيتو اولادي .. مكنتوش هاكا !!
جود : وعلاش فنظرك لي الشارف كيطفى الامار ! ... حيت هو عارف بلي العمر ديالو ولا قصير وماعندوش بزاف فين يحقق شي احلام اخرى .. داكشي باش مكيبقاش يحلم وكايطفى .. وكاايولي يتسنى غير يتقاضا داك العمر .... سينورمال ملي كيمشيو احلامك ونتا باقي صغير تايكون ما فارقك على داك الشارف غير العمر .... هو عمرو قصير .. ونتا عمرك طويل ولكن عارف راسك مغادير فيه والو .... كنوليو جارين داك طوبية وفينما بغات توصل توصل ....
اسد : ( تحنحن و هضر بجدية ممزوجة بنبرة حنين نصوحة) الطبيعة ديالنا ... خلقات شي حاجة سميتها البديل .... ملي كاااطيح الشتا على الارض .. الى كانت مزروعة ببذرة كطلع شجرة ... والى ماكان مزروع والو .... هاديك الارض غاضيع بقوة الشتا وملي غتشرق الشمس ويجي الصيف داك تراب غيولي غير صااالح للزراعة حيت كايبس وكتنقص منوو الخصوبة .. داكشي علاش الطبيييعة لقات واحد البديل .... هو الشوك والنباتات اللابذرية .... نباتات كطلع غير هاكاك بسبب انسجة صغاااررر ديال بدرات كيكونو متحللين تما تحت الارض كيصنعهم الدود .... وهادشي كاااامل باش داك الارض الا مكانتش فيها بذرة ... ماضيعش .. طلع لينا حاجة اخرى بينما تزرعات شي البذرة .... وهاد قانون البدائل كنشوفوهم فبزاف دالحوايج من غير الطبيعة .... حتى من لي كيصايبو طرقان .. الى قطعو ليك طريق باش يصلحوها .... كيديرو ليك وحدة فرعية دوز منها علاما تصلح هاديك ... ثقافة البدائل ... نهار توليو تعلموها .. وتبدلو حلم ضار بحلم نافع .... مغاااتشرفوش قبل الوقت .. نهار توليو تشوفو الحياة بعين اخرى .. وتشوفو ان فيها بزاف الحوايج غير نتوما مزال ملتافوتش ليهم .. مغاطفاوش ... الحياة صعيبة اه ... ولكن دايرة كيف شي مراية .... شنو ماعطيتيها كتعطيك .. بغيتيها .. تاهي كتبغيك .. كتولي تبان ليك زوينة وحيوية وملونة ... .. عااندتيها كتعاندك كل مكان راسك قاسح كتزيد تنزل عليك المصايب حتى تشوف شكون فيكم يتهد ... كرهتيها كتكرهك ... كتبان ليك كلها كحلة وتاشي نهار تلقى رجليك فوق شي جرف باغي تنتاحر .... الحياة هي مرايتك ... كيف كتشوف فيها ... كتشوف فيك .... الصورة لي راسمها على حياتك .. كتبان ليك .... الحياة مكاااتبغيش بنادم لي كيتذمر بزاف وبنادم لي معكاز .. الحياة كتبغيك تكون كتطيح وتنوووض ....
قسم وقدس شافو بجوج فجود لي محني على كاسو بمعنى الكلام واقلة عليك ! ولامار شافت فاسد معلية حجبانها باش مايضغطش عليه وجود تنهد وشاف فيهم ....
جود : بصح ... زوين يكون البديل ... غا هو ... فرق كبييييير بين طلع ليك الشجرة لي مخطط ليها و زرعتيها ... وبين يطلع الشوك لي غيير بديل باش ماضيعش الارض .... الشجرة على الاقل ... غتاخد منها شي حاجة ... كاع لامكانتش غتولد ليك غادير ليك الظل .... الشوك راه ماعندو مايعطيك .. من غير كيجرحك مرة مرة و يخليك تتلاها مع جرحتك على ما تبرا باش يجحرك تاني .... يعني الواليد عمر البديييل يخليك ماطفاش .. بالعكس ... هو لي كايزيد يطفيك مزيااان ... ولكن واخا هاكاك ..... بعدا راك كادير شي حاجة ، حسن من والو . . ( خدا تنهيدة ووقف ) مهم صباحكم مبروك ... ( شاف عند قدس ) زيدي نتي نوصلك فطريقي ...
قدس : ( كملات كاسها وناضت بزربة ) احسن مغااادير ...
قسم : واش نتي مزال ماباغاش طلقي يديك فالصوگان !
قدس : اناااا تخلققت باااش يصوووكو بياااا ( مشات جهة صاكها دالسبور لي محطوط فوق الفوتوي )
قسم : ههه سيري الخوافة سيري هههه
اسد : متنساوش بليل غااايجيو عمكم سفيان وعمك عدنان ، ماديرو تاشي بلان اخر ...
قدس : ( ضارت بزربة مخلوعة ) علاااااش !!!
اسد : كيفاش علاش ابنتي !!!
قدس : ز ز عما .. ( بدات كتقلب على شي حاجة تقولها ) اا .. حيت ليوم ماشي ويكاند ... وهوما ماتيجيوش من غير الويكاند !!! ز زعما ،و واش كاين شي سبب ؟؟؟
لامار : جايين يشوفو خوك راه بقى بالهم معاه ( جود علا فيها حجبانو عاد سرات معاها )
قسم : علاش مالو جود؟ ( شافت فجود ) ياك لااباس !!!
جود : ( دوز يدو على وجهو ) هااانا قداااامك واااقف ، لااااباس
قسم : جوود !!!!
جود : دخت .. كنت غادي فالطريق ودخت .. وغادي يجيو حيت دخت ... صافي هادشي لي كاين
قدس : ( جايا جيهتو ) كيفاش دختي !!!
اسد : ومااتححكروش صافي .. البارح جاتو دوخة وداه لوؤي عاود الاشعة ديالو مي الحمد الله صافا ...
قسم : لا لا بابا .. اكسكيوزمي ولكن عمامي مغيجيوش على دوخة وصافي !!!!
جود : ( جر قدس لي هزات صاكها فكتفها و الحمالة دالمضرب ) منين يجيو قوليها ليهم .. يلاه نتي ...
جر قدس ومشاو هي باقا كتسول اش وقع ليه وكتحلف على لوؤي لي هضر معاها الصباح وماقال ليها والو ... واسد عاود باختصار لقسم ...
قسم : ( بخووف ) انا معععععاارفاش كيفاش كااايفكر !!!! علاش تااايصوك ملي تايكون ديييخان !!!!
لامار: ودابا مااضبرووهش بالاسئلة بزاف .. هو راه راسو حجرة كيدير لي مسلكو ... ولكن من دابا لفوق مكاينش الخروج بلا كارد .. راه غيتحرك دابا غيتحرك موراه ....
قسم : ( تنهدات ) يااااربي دوزها على خير ويبرا شي نهار نتهناو من هاد الكوشماغ ياربي ... ( جات نايضة ) مهم نخليكم ... عندي شي شغال فالجمعية غبرت عليهم بزاف غنمشي نشوف فين وصلو ... وندوز لواحد المعرض .. عندي دعوة شرفية غنتعطل شوية .... يلاه نجي مع عمامي نيشان
اسد : ( يلاه غتنوض شد ليها على يديها وعلا راسو فيها ) رجعي بلاصتك ...
قسم : ( عارفاه اش غيقول وشافت لساعتها فيديها ) بابا راني ديجا معطلة .. خاص يبقى ليا الوقت لمعرض ...
اسد : قلت ليك رجعي لبلاصتك ....
قسم تنهدات موكلة امرها الله ... كاع هروبها من الموضوع وهااهيا تشدات دابا .... ورجعات جلسات كتشوف قدامها واسد قاد جلستو ودار رجل على رجل ...
اسد : اهاه !! ... ماعندك ماتگولي لينا ...
قسم : مكنضنش واش كاينة شي حاجة مهمة ابابا ....
لامار : ( بغضب ) قااسااااام .....
قسم : ( شافت فيها ) نعام اماما !!!! شنو ماعجبكش فجوابي ... راه دبصح مكايناش شي حاجة مهمة لي غنقولها ليكم .... كاين حاجة وحدة وغتكون عارفها ابابا .... انا واصيل .... تسالات طريق لي كانت جامعنا ..... وكلها رجع لبلاصتو ولطريق لي جا منها ....
اسد : ( ضرب فطبلة تاقفزات ) قساااااااام ... ( لامار وسعات عينيها ) كان كيحسابتني عندي بنت بعقققلها .... كنكتشف عندي مراهقة فداااار ... كانت معاه صافا غاتكون معانا صافا .. تخاصمات هي وياه توتر ليا الجو فالطبلة مع ولادي .....جود قبل مايدوخ البارح .... هضر معاااياا فتيليفون .... وسولني على داك السيد واش كنعرفو مزيان وخوك باقى فيه الهم ديااااالك نت .... وانا متأكد ان اش وقع ليه بسبب راسو لي تنفخ بموضوعك نتي .... ( قسم نزلات ليها دمعة موسعة عينيها فيه ) الى مااباغا حد يدخل فيك .. مادخلييش ليااا علاقققتك لوسط داري ..... سمحت لهاد الهبال ديالك حيت عندي بنت بعقلها عاطيها وقت تتعرف على داك السيد واش صالحين ولا مصالحينش .... منبعد يا يتجمعو فالحلال تحت البركة دالوليدين .. يا الفرااااق .. ولكن باش تخسري ليا الجو فالدار .... هاااادي مكايناش اقسم ......
قسم : ( بالبكا ) علاش كظن ساهلة عليااااا ؟؟؟؟ علاش كتسناو ديما نكون هاديك الرووبووو فالدار ؟؟؟ وراه انا بنااااااادم ... تانا كنتجرح .. كنكتئب كنمرررررض .... كيفاش ندير نضضضضحك وانا القلب ديالي كاااايتعصصصصر من داخل ... منييييين غانجيب هاد الضحك لي غانضحك معاكم ابابا منيييين .. وفهمو شوية ان قسسسم انساااان .. بشششششر .. كاايفرح كيضحك كااايغضب كاايبكي كيتقلق ..... انا بشششششر ....
اسد : ( بالغوات كتر ) ببببكي ..شكون حيييد ليك متبكيش ....ببببكي !!! .... اجي عند بااباك و ماماك سدي عليك معانا فالبييت وبككككي ... قولي اش عندك .. ولكن باش تجلسي ليا فالطبلة معلية حاااجبك لللسمااااا .. حنا كنهضرو ونتي موترة الجو .. نسولووووك ضوووري فينااا ....انا ماعندي مانقوليكم وانا طريق لي جمعاتنا تساالاااات ... والعصبية فالهضرة وماعندك خاااطر لاااا ... هذا سميييييتو الفشوووش ( ضرب فالطبلة ) وانا ماااعندبييش مع الفشووووش .... باغا دخلي فعلاااقة نضضضجي ... كببرري حتى فعقلك ماشي غير فلاج .... مقاداش على هادشي جلسي حدااا باااااك .... اما بااااش تخااصمي معاه وتجي تقلبي ليا انا الجو فالدار لا ..... هانا انا وماماك تانقلبو دنيا فالبيت بيناتنا ... تانخرجو داكشي كنهضرو كنحطو اومورنا فوق طبلة .. تانفكو الموضوع باش نهبطو عندكم نتووووما صافا ومنضيعوووش ليكم الجوو .....
قسم : ( كتمسح دموعها )واخا صافي ابابا .. صافي منعاودش .... مرة اخرى .. لي وقع غنخليه فقلبي ونضحك معاكم .... حتى نطرطق شي نهار .. صافي متخافوش مغنضيعش ليكم الجو فالطبلة ...
اسد : ( شاف فلامار ) شوف انا فين كنهضر وهي فين كتهضر .....
لامار: باباك مقالش ليك بحال هاكا ابنتي .... حنا كنتسناو منك تجي تجلسي معانا .. كيفما عاودتي لينا ونتي فرحانة بعلاقتك معاه ... اجي عاودي لينا تاخصااامك معاه وبكي معانا .. بغيينا نعرفو اش واقع .. وحنا ابنتي ماشي الواليدين لي غااايسدو على البنت تايجي شي عريس مغمض لي ماترتاحيش ليه ، وماشي الوليدين لي غيطلقو بنتهم دير مابغات ... حنا فالنص .. مكااانطلقو مكاانشدووو .. كنبغيو نكونو قراب ليكم .. انا وباباك منهار بديتو تمشاو وحنا موجدين راسنا لنهار لي غاتلقاو شريك حياتكم تانتوما .. ولكن ابنتي بحالا شديتي الموضوع بشكل ( شافت فاسد وشاف فيها ) هوسي شوية لا !!!! ... وهادشي معاجبناش لا انا لا باباك .... اما باش تقولي نشدها فقلبي ومنضيعش ليكم الجو .... حنا ابنتي كنفهموك من عينيك واخا تعياي تخبي ....
قسم : ( كتمسح دموعها ) تانا .... تانا مكرهتش نفرحكم شي نهار ونتزوج ... نجيب ليكم حفايد .. انا عارفة بلي كبرت ... ( اسد كيتنهد من هاد الهضرة ) عاارفة بلي خاصكم تفرحو بيا وكتسناوني فوقاش حتى انا لقا شريك مناسب ليا .... ولكن اش غاندير !!!! راه كيفما درنا ليها ماصدقااااتش ... مامتفاهمين فحتى حاجة ... كنعذب فيه وتيعذب فيا ..... كيغاااانديرو اماما كيغانديرو ؟؟؟؟ ......
اسد : اولا .. يلاه عندك 28 عام ... ولي يسمعك كتقولي هاد الهضرة غاايضحك عليك ... تانيا حنا ولادنا كنفرحو بيهم غير الاا جلسو معانا فطبلة وضحكو معانا ... مااااشي حتى يتزوجو ويجيبو ليتنا حفيد ، حنا البراهش طلعو لينا فراسنا ... حنا البرااهش تزوجنا وولدناااهم وكبرناهم .. الا كنت غتزوجي على ود تجيبي ليا حفيد غا جلسي .. تزوجي على ود تجيبيه لراسك اما انا ولدت وساليت ..... انا بغيت حاجة وحدة تفهميها .... هاداك الولد هضرت معاه .. ماعندي مانقول عليه .. ولكن القرار ديالكم .. انا باباك هزيت يدي لفوق حيت بنتي عارف اش كتسوا وهو راه باين اش كيسوا ... يعني سوقك هاداك ... انا راضي على اي قرار غتاخدوه حيت نتوما لي غتعرفو الكمياء بيناتكم واش تفاعلات ولالا .... ولكن من حقي نعرف اش واقع ... ومنحقي نتبعكم ماحد مزال مكاينة تاحاجة رسمية بيناتكم .....
قسم : ولكن راك عارف ابابا كولشي!!! زعما نتا معارفش !!!!
اسد : باغي نسمع من بنتي .... كيفما سمعت منو ....
قسم : ( وسعات عينيها ) كييييفاش !!!!!
اسد : شنو لي كيفاش ؟ شو لي صدمك ؟ صدمك انه عيط ليا كيعتذر مثلا !
قسم : م .. مافهمتش ابابا ( شافت فماماها وشافت فيه ) فوقاش عيط ليك ؟؟؟...
اسد : لبارح ....
قسم : و .. ولكن علاااش !!!
اسد : كيفاش علاش ! ... داكشي لي دارو هو, كنت كنتساه من بنتي .. لي قالك ماااااعندهاش فاش دوي معانا !
قسم : ( سرطات ريقها وشافت فيه ) دابا فهمني شنو قالييك ؟
لامار : وعلاش كتسولي .. لي قالو راه قالو لباباك .. دابا نتي عاودي لينا اش وااقع .... ياك مابقاش كيهمك .. ومايهمكش حتى اش قال
قسم : ( شافت فيه ) لا بغيت نعرف يقدر يكون كذب عليكم
اسد : والى نتي مثايقاش فيه وكظني انه ممكن يكذب عليك .... اش مجلسك معاه؟
قسم : ( شدات على راسها ) ماعرفتش ابابا ماعرفتش .. انا دابا راااسي منفوخ وكملتي عليا دابا ... اش قال ليك ؟
لامار : صونا عليه البارح فالصباح .... كنتو نزلتو ... وقال ليه بلي كيعتذر حيت السفر مدازش مزيان وشي امور متفاهمتوش فيها .. وهاد الاومور هي لي بغينا نعرفو منك حيت هو مقال والو ... ومبغاش يقول .. حنا عارفين شي حوايج ولكن بغينا نعرفو واش طرات شي حاجة قبل معارفينهاش حنا ....
قسم : ( جاتها الضحكة بالفقصة ) هه ! يعني مدام قال هاكا ... هو كيعلن بلي صافي مابقى والو بيناتنا !
اسد : وكنظن هادشي لي قلتيه ليا تانتي دابا شوية .. علاش مامنحقوش تاهو يقول نفس الحاجة !
قسم : بابا !!!! دابا نتا معامن ؟
اسد : مع المنطق ... طريقة باش هضر معايا قبل ماتمشيو .. ماشي دواحد دغيا غيتراجع على هضرتو ... يعني اش واااقع اقسم حتى تراجعتو .....
قسم : مزال مفهمتش علاش عيط ليك والله !!! واش بغا نبان انا لي خايبة ؟؟؟
لامار : حيت ابنتي هو واخد الامور بجدية ... وكيعرف هاد البنت ماتزادتش فمحبق عندها واليدين كايهتمو ليها و خاصهم يمكن يعرفو اش واقع مدام سافرتو فداك الباطو بالارادة ديالنا حنا .. هاداك الولد معقول .... اما كون لقيناه شي شماتة كون قلنا الحمد الله تهنيتي منو ويمشي باك يخلي دار بوه ..... ولكن علاش قال لباباك بلي درت جهدي باش نتقاد معاها ولقيت راسي مغانقدرش ؟؟؟ اش وقع بيناتكم فالباطو .. ياكما جرحتيه بشي حاجة؟
قسم : ( شافت للفوق كتنهد ولامار ربعات يديها وهي كتنشف عينيها وجفونها من دموع وشافت فالفراغ ) عندو الحق .. عمرو غيتقاد معايا ... حيتاش هو باغي يبقى ديما معلي راسو للفوق ، ماجربش يتحنى شوية لجيهتي ويشوف الامور ببساطة .....
اسد : متهضريش بعصبية .... هضري بالعقل ... خلي دابا التقليقة ديالك فالجنب .... هضري معانا بالعقل ....
قسم : كانت الاومور صافا بيناتنا .. دازو اومورر كباااار وتفاهمنا عليهم ، ولكن موضوع الطبقات هو الحاجة الوحييييدة لي ماابغاش ينقزها .. كيضور يضور وكيرجع لييييها .. انا مكنقولش ليكم هو خايب ... ولكن بهاد طبع ديالو القاسح مغنوصلو لتاشي نتيجة ....
اسد : وهادشي نورمالمون راك عارفاه عليه مدام من اللول شفتيه انه قبل ختو تقرا ولكن ماخداش المنحة ... يعني عارفاه متعصب فهاد المسائل .. ومع ذلك كملتي معاه .. شنو لي جديد عليك دابا؟
قسم : انا قلت هادشي غيتبدل ابابا ...
اسد: دابا ملللخر قولي ليا اش وقع !!
قسم : ( خدات نفس ) الموضوع كامل بدا من نهار اللول لي بحرنا فيه .. هو كان كيبقى غير فالبيت ساد عليه وحتى الى قتليه خرج شوية ضور ماتابيغيش وتايحسسني بحالا حااابساه تما وجايباه غا بزز .. ومابغاش يكون معايا فبلاصة وحدة .... ماباغي يضحي بحتى حاجة .... الموضوع ماشي و كيطور شوية بشوية .. حتى نهار اللخر فين جاو دوك الپارتنرز ديالنا .... وانا متأكدة كوحدة حافضة باباها مزيان انك بلعاني قلتي ليهم معاها ضيف ماشي باش منمشيوش انما باش نمشيو بجوج باش تحطنا امام امر الواااقع وتشوفنا كيفاش غنتعاملو قدام المجتمع فااااص انا وياه ( اسد عوج معاها راسو) وكان احسن اختبار درتي .. حيت بصح الاومور ماصدقاتش ....
اسد : اممم ... اذن مطرات تاحاجة اخرى قبل من داك العشا ...
قسم : لا غير العشا لي ( قاطعها )
اسد : عارف العشا شنو فيه
قسم : انا عارفة غتكون شفتي كولشي فالكاميرات .. ولكن نتا معارفش شنو تقال وشنو لي (قاطعها )
اسد : الى نسيتي باباك كيسمع بعينيه .... انا مانسيتش بلي بنتي واحد نهار كانت كتنمر على صحاباتها حيت مكانوش كيدويو بالاكسنت فالفرنسية مزيااااان ......حسابتني بنتي كبرااات!!!
قسم : ( علات فيه حجبانها ) بابا !!!!! يشك فيا هو واخا .. ولكن تانتا ابابا ؟؟؟ لاااا ....باااش غنعرررف انا بلي راه كيهضر بلوونگلي وكيفهمها !!!!
اسد : ( خدا تنهيدة وشرب من كاس دالما وتقابل معاها بجدية ) انا غنهضر ليك مزيان على داك العشا لي كان قداااامي فالمباشر وشفت شي حوايج مشفتيهش نتي ..... انا غااانهضر معاك .. ومغنتسناش جواب ... غتفكري مزيان فهادشي وعاد اجي عطيني قرار .... كيفما قال ليا هو فالتيليفون انه محتاج شوية دالوقت يرتب افكارو .... وماعلنش الفراق بزربة ... تانتي خاصك ترتبي افكارك .... وانا غنعاونك ترتبيهم ( رجع بالكرسي لور ودار رجل على رجل وقسم كتشوف فيه ) الحاجة لولا لي درتيها معاه غلط .... هي سيطرتي .. والراجل كيكره المراة تسيطر عليه كيحس براسو فقد هاديك الرجولة .. حيت حنا الرجال ابنتي تعلمنا نكونو قوامون ... يعني هو لي يسيطر على العلاقة حيت العيالات مخلوقات عااااطفية الى صاكو بيك غايغرقوك .... الراجل نعم عليه الله بالمنطق واخا ماشي كاع ذكورة رجال .. يعني الراجل ملي كيشوف المرا بغات تسيطر كيتحسس شوية وكايديرونجا .... ووملي شريتي ليه حوايج بلا متاخدي رأي ديالو راك ابنتي درتي تصرف مامقبولش حيت داك السيطرة ديريها على اومور الزوج ماشي واحد باقي مكتربطك به تاحاجة رسمية.... والى تحطيت فبلاصتو .... وكنت ضيف عند ماماك فدارها وهي وباباها وعندهم شي ضياف كيعرفوهم هوما ومشات شرات ليا حوايج وجات عندي تلبسهم ليا وتديني نتعشا معاهم وانا تابعها بحال شي موونيكة !!! ماعندوش دور ... هادشي كيزعج واخا نتي مشفهتيهش بهاد طريقة هو شافو هاكاك ... حيت مغتفكروش بنفس طريقة ونتي مراة وهو راجل ... ولكن انا غنفهمو وماماك غتفهمك ... ثاانيا على الطبلة وسط الضياف ماخليتيهش يهضر ... واش فنظرك نتي .. هو غيطيح بيك الى هضر ؟
قسم : لا لا ابابا ماشي هاكاك .. انا راه مبغيتش يقول ليهم مثلا مهنتو حيت غيحكروه وهو على سبة
اسد : هو راه مغيشوفهاش بهاد طريقة واخا حتى الى شافها بهاد طريقة ماعندها معنى ! علاش غيحركوه ؟؟ وملي نتي خايفة عليه اش داك تكوني مع واحد لي غيحكروه الناس ومغيقدرش يفرض احترامو !!!
قسم : ولكن ماشي بحال هاكا ... راه غايفرضو وغا( قاطعها )
اسد : اوا ملي نتي عاارفاه غاايفرضو ... خليييه يهضر .... هو عارف اش كيقول واش كايدير .. يعني نتي كان خاصك تحترمي شخصيتو ... وثيقي فيه .... ماشي تفرعي ليه راسو باش ينسجم مع مجتمك وملي بغا ينسجم ماخليتيهش تايهضر !! ( قسم نزلات راسها كتفرك فالفيست لي لابسة من تحت طبلة) قاطعتيه شحال من مرة وعصبتيني انا لي باباك وغير كنتفرج .. وكون تحطيت بلاصتو غنقلب عليك داك طبلة .... وهو انا عارف غايكون دار الخاطر حيث راهم معاك فالخدمة مبغاش يدخل فشي اومور بعيدة عليه ويدير مشكل .... وفضل يخلي ليكم العشا ويمشي .... ولكن باش انك ابنتي تكوني بحالك بحال لوخرين وتقولي بلي الفقر هو الامية .. ولا ابنتي لا اااا
قسم : ااابدااا ابابا واش فكرت بحال هكا .... انا قلت مادام انه خرج من الباك ومكملش ورا لباك ....ماعندوش الوقت يعني فين يقرا ... وعمرني عرفت عليه معلومة بحال هادي
اسد : وعلاش انا عارفها ..؟ علاش متسوليهش !! الى هو يمكن مكيهضرش على راسو سوليه .... ابنتي ملي كنبغيو شي حد كنهتمو بييييه .... عارفة شحال فعمرو ؟؟؟؟ ( قسم نزلات راسها ) عارفة نهار البرذاي ديالو ؟ عارفة فين تزاد ؟؟ عارفة الباك ديالو واش سيونتيفيك ولا ادبي !!! ماااعاااارفة عليه تاحاجة ابنتي ، ولكن لاسولتيه هو عليك عارف عليك كولشي .... وانا متأكد من هادشي ....
قسم : وباش غنعرف هادشي وهو ماكيقول والو
اسد : سولتيه وماقالش ليك ؟(نزلات راسها ) لا .... حنا الرجال ابنتي ماشي بحالكم .... حنا مكنعرفوش نهضرو على راسنا .... كنا كنعرفو غا نجاوبو لا تعطى السؤال .... حيت دماغنا عااااامر بالمطاااارق .. كتشوفيه جالس ساكت ولكن راه مية مطرقة فراسو .... مامساليش يهضر .... عندو 34 عام ابنتي ... باك ديالو صيونص ماط وخدا نقطة لولا فجهة الدار البيضاء الكبرى( فسم علات عينيها فيه), .... مورا الباك قرا اللغات باش يمشي للخاريج وماكتابش ليه .. كان دفع كونطرا لطاليان وقرا طالياااانية ، مرضت ختو ومامشاش .... منبعد جاتو خدمة فاسبااانيااا وعام وهو كيقرا فالاسبانية و مشا خدم غير ثلت شهور ورجع بحالو بسبب مشكل وقع ليه تما مع الباطرون ..... قرا الانجليزية باش كل عام كيدفع للقرعة دامريكا ..... منبعد فاش مشا ليه هاد الهوس ديال يخرج البلاد ..... حبس وشد لارض ورضى بالمرصى باش يبقى حدا ختو ....
قسم :ونتا باش عرفتي هادشي !
اسد : حيت انا هامني امر واحد غايدي ليا بنتي .... ونتي لي غاتديه كااملة وماهتميتيش تعرفي الماضي ديالو !!!!
قسم : بابا انا متيهمنيييش هادشي انا باغاه كييييفما هووو
اسد : لا ابنتي كااايهم .. كون مكانش كايهم مكانش مشكل قد السخط دابا طاري ليكم بسبب هاد المعلومة الصغيرة انه كيهضر ب4 داللغات ... الى كنت غتكوني معاه باش تحگريه وتبداي تخافي عليه من الناس وهو مااااخلاااا مادوز فحياااتو ونتي باقا كتلعبي بمونيكتك ، ماخلا ماواجه وما قاسا ، باش تجي قسم توريه كيفاش يهضر مع الناس ! .. كنتزوجو نهار كنثيقو فشريكنا .. ماشي كنتزوجو غاااااا حييييت لقيت راسي معاه فرحانة وضاحكة وكتعجبني حوومتووو ...صافي غنبقى دييييما فرحانة وضاحكة ونهار غااانبكي شوية منعقلش عليه ..... فهاديك الطبلة هو مكانش كيواجه غير داك العائلة ونتي ..راه تحت طبلة شي حوايج نتي مشايفاهمش .... يعني ابنتي فالخصام متشوفيش غالجيهتك شوفي شوية من جوج جوايه .. انا معرفتش شنو طرا بيناتكم تما اخر حيت مبغيتش نطفل على خصوصيتكم ... شفت تسجيلات العشا غير ملي عيط ليا وبغيت نعرف اش وقع ليه ... واش وقعات شي حاجة نيت ولا زااااد فيه و وتراجع حيت خواف وصافي .... سمعي ابنتي .... كنتي باغا المعقوووول .. هاداك هو ولد المعقول .. كنتي باغا علامن تفششي ... هاهوا باااااك .. بااااك يهز فشوشششك تالخر دعمرو ولكن ولد الناس خليه فالتيقااااار .... لي فيييه كااااافيه وعندو مشاكيلو تاهو ...
قسم : ( بخيبة) دابا قاليك جوج كلمات عمرك عليا صافي ؟ وليت نبان انا لي خاايبة دااابا ياك !!!!
لامار : باباك ابنتي هضر معاك بمنطق الرجال .. انا فاااهماك وعاااارفاك كيفاش كتفكري وماقصدتي تااااحاجة من هادشي هو كيوريك الاومور من جيهتو باش تعرفي تفكري ومتسرعيش ..... وباش الى كملتوو تعرفي الغلط فين درتيه ومتبقايش تعااااوديه ....
قسم : كنظن مكاااااين لاش ( وقفات ) ومااابقيتش بااااغاااه وماغااانديييهش حيت بانليا واقيلا غيولي هو ولدكم وانا لي البرانية ......الى هاكا بنااااقص .... ( شافت لساعتها ) غانمشي لخدمتي ...وهاد موضوع ساليناه وهاداك ولد الناااس يمشي يقلب ليه على بنت الناس .. انا غا وحدة كاتفشش حيت كاتفكر للناس كتر ماتتفكر لراااسها .....
خلاتهم وجرات الكرسي ومشات بجهة صاكها وصاك البيسي ديالها هزاتهم ومشات غضبانة ومقلقة واسد متبعها بعينيه ولامار شدات على راسها ...
اسد : يلااااه ....زيدك معاها .....
لامار : هههه واخا عصباتني ضحكاتني .. مالقاات ماتقول وهي تقوليك فضلتوه عليا هههه ..المغيااارة ههههه .... فكراتني بماما منيين كاااتجي من جيهتك ( شافت فيه ) واهو صراحة الموضوع كااايعصب ههههه كانت كتعصبني ماما فاش كنشكي ليها منك وتقول ليا اش درتي ليه .. مكتقوليش اش دار ليك
اسد : وراه عندها الحق .. فوقاش درت ليك انا
لامار : ( شافت فيه بجدية ) شنو بانليك ا اسد نعرضو عليه هو وختو يمكن يتصلح المشكل .. انا سمعت غاهضرتو معاك البارح ودخل ليا لخاطري ...
اسد : لا .. مدخلناش فيهم ... نهار تكون شي حاجة رسمية ندخل دابا غا كيتعارفو ماشي فلخر نولي انا السبب .... بيييييناتهم .... ( جر الكرسي ) نوضي نتي راه استحليتي الراحة ونسيتي خدمتك
لامار : ( كتكسل فالكرسي ) الله ياربي الله ..... كووون غاتخليني نقابل غا ولادي ومشاكيلهم ماعندي ماندير بشي خدمة
اسد : باش تولي ليا هنا كلك امراض وعقد نفسية .. نوضي تخوي طاقتك فالبيرو باراكا من العكز ....
بعد اربع ساعات ....
فالكاراج .....
الكابو دطموبيل دجود لي دار بيها الاكسيدون محلولة وهو لابس بلوزة زرقة وخاشي راسو فيها كيحيد لي خاص يتحيد .... وجهو عامر بلاكريس ويديه كحلين وشعرو جامعو لور ببانضة كحلة باش ميطيحش على عينيه ...
الارض عاامرة بالماطيريال و الدوزان دالميكانيك ....
لؤي موراه داير يدو فجيبو كيشوف لواحد اللوحة معلقة فالكاراج من ملصقات سباقات موناكو .... عينيه فيها ودماغو سااااهي .. من قبيلة هو يضور بيه ، مرة يصور فيه ، مرة يشوف معاه ....
فلخر دار عندو كيضور بيه ويحك فلحيتو وتحنحن ....
لوؤي : ودابا نتا باااقي مغااتساااليش !!!!
جود : ( مركز مع خدمتو ) مزال شوية ....
لوؤي : ( كيهز فدوزان يشوف فيهم ويحط ويتنهد ) ويلاااه نتغذاو ورجع كمل
جود : ( علا راسو من الكابو كيشوف فيه ) لوؤي عندك شي حاجة قووووولها ..ماتبقاش ضور ليا قدام رااااسسي ( اشار ليه للكرسي ) سير تريح لهيييه ... درتي ليا الشقيقة
لوؤي : وراااه باينة باغي نهضر معاك .. من لبارح ونا تابعك ....
جود: ( كايفسخ فالموطور ) واگول اش باغي تگول ...
لوؤي : واا لي باغي نگولو ليك منقدش نگولو ونتا هاز داك الساروت دالتسعود فيديك ... حطو عاااد نهضر ....
جود : ( علا عينيه فيه ثاني بشك نعلي حاجبو ) اش درتي تاااني امسخووط الواليدين ؟؟؟؟ ياااكما طلعتي لنااازا !!!
لوؤي : تاااا شمن نازا. ... فكيناها تافلرض بقى غافسما ...
جود: اوا اش درتي !!!!
لوؤي : (ببراءة ) ماااادرتش ..... ( جود نزل راسو على الكابو ) و ولكن .... ناوي ندير ( علا فيه راسو وهو تشجع وقاالها بتحدي ) وغااااااااندير .....
جود : ( وقف كامل ) اش غادير ؟؟؟
لوؤي : ( شاف ليدو ) وااحط الساااروت دالتسعووود ونقوليك
جود : ( هزو للفوق ) دوي ولا غنعطيك بيه للراس ...
لوؤي : ( سرط ريقو وتشجع وقالها ) باغي نتزوج ...
جود : ( نزل راسو على الكابو كيكمل خدمتو ) ولقى المراة بعدا ونزوجوك ...
لوؤي : ( حك فشعرو ملور وقال بتردد بصوت بالكاااد كايتسمع ) لقيتها
جود : ( علا عينيه فيه ) فين لقيتيها ؟
لوؤي : فالمجر ! .. فييين غنلقاها اجود ... لقيتها وصافي ...
جود : ( علا راسو و حاجبو كيشوف فيه ) شكون هادي !!!!!
لوؤي : ( كيحك ورا قرفادتو ) واااحط دااااك الساااااروت دتسعووود ونقوليييك ، الهضرة لي باغي نقوليك مكتقالش وسط السوارت والدوزان ... حط داكشي من يديك ويلاه نخرحو للخلا برا .... وندويييو ...... الساروت دالتسعود لا ....
جود قاد الوقفة وهو معلي فيه حاجبو باستغراب ... ورجع حط هاداك الساروت موراه وبدا كيحيد ليكات كحلين غلاض من يديه ولوؤي كيرمش فيه مستعد لاي ضربة غادي تفلقو اليوم ...
جود كيحيد فليكات ويمسح فيديه ولوؤي راجع بلور وضار عندو ...
جود : من البارح ونتا فارع ليا كري باغي نهضر معاك باغي نهضر معاك ... ودابا كتقول ليا غتزوج ... بنتليك عندي مورال دطنز دابا !
لوؤي : حاااشاا .. حااشااا اولد عمي ... شكون طنز عليك ؟ انا راه داوي من نيتي
جود : وكيفاش حتا نضتي فخطرة واحدة باغي تزوج !!! واش عاجباك شي وحدة !
لوؤي : ( كيحك فشعرو ملور وشاف فيه ) وو ... واهو .. دابا .. ماشي نضت فخطرة ..... د دابا ... ( جود قاطعو)
جود : ابلاتي !!!! داوي بصح !!!
لوؤي : واش بانليك كااانضحكو هنا !
جود : وشكون هادي !!!
لوؤي : وو وااا ... ( كيسرط فريقو وجود كيرمش بعينو ) و ... ( تشجع وقاد الوقفة ) ااصلا نتااا ماخصكش تهههضرررر .... نتا برااااسك تالنهار اللخرررر عاد سمعناها .. وااا بلااا متعصب عليا دابا ( كيشوف فيه من تحت بنظرة مشاكسة )
جود : تالنهار لخر ؟ ي يعني ... ( كيرمش فيه ) يعني نتا راك فنهار اللخر !!!!
لوؤي : ( كيشوف يمين وشمال فيه متررد خايف صوتو يتسمع ) اا . .. ل ... ليوم غنخطب .... ( كيشوف فيه من تحت )
جود : ( وسع عينيه ) كيييييفاش !!!
لوؤي : وااانا بعدا راه جيييت قلتها ليك ... اما نتا راه سمعناها غااا منهاا وسط الطبلة
جود : ( كيقرب عندو وهو كيبعد ) انا بعداااا راه الى خطبت وباين شكون .. وباين لا واحد نهار كنت خاطب ..... وباااين علاش خطبت بزربة .... نتا كيدرتي ليها !!! يعني نتا من شششحال هادي عندك شي وحدة كتبريباري معاها لهاد النهار وانا عاد جاي تقولها ليا وسط لاگريس والكابو دطموبيل كولو مشخشخ ! كاتقول ليا غااااتخطب ليوم ؟؟؟ دابا عااااد كاتگووولها!!!!
لوؤي : ( سرط ريقو وكيقرب عندو كينفض ليه على صدرو ) لا .. لا راك هو هاداك .... غ غير دوش خفيف وهانتا واجد .. ا اصلا ... اصلا حنا غير غندويو ماشي غنخطبو ... الخطبة باااقي ... غير هضرة ..... و و ماشي البرااااني .. غير بيناتنا وصافي ... متحتااجش تكون زعما .. واجد على بكري ( رجع لور بزربة وجود مخنزر فيه ومستغرب مامثيقش )
جود : وشكووون هادي لي معارفينهاش حنا وماشي برااااني !!!!
لوؤي : وو ... ودابا داااخلنا عليك بالله اولد عمي فين انا كنعرررف شي واحد من غيييركم !!!!
جود : ومنين جات هادي ! ياكما خطبها ليك عمي عدنان !
لوؤي : لاااااا ( شاف فيه ) لا الكذوووب حررااام ... جبتها لرااااسي و فراااسي ... فيين عمر انا جابها ليا شي حد ..ديما كنمشي لمصايب بررجلي منتصب القاااامة أمشي
جود : ( علا حجبانو ) وملي كتعرفنا غا حنا ... شكون هادي !!
لوؤي : و ... ( رجع لور خطوة ) من .. من الفاااااميلي ....
جود : ( كيرمش فيه ) بلاتي بلاتي ... خررربقتي ليا سلوكة دابا درااااسي كتر ماهوما مخربقين ... كيفاش من الفاااميلي !!!!! ( لوؤي كيرمش فيه وجود وسع عينيه فخطرة ) مااااجد (قاااطعو لوؤي بزربة )
لوؤي : لاااااااا .... لااا اولدي عمي لااااا ماااانسمحش لييييك ... الى نتا مضروووب فراسك راه ماشي كولشي بحالك ...
جود : ( علا حاجبو ) مااااتگووووولهاش !!!! ( لوؤي نزل راسو وحركو بالايجاااب خيفان من ردة فعلو تاسمعو ) داااك عااااليا ولامنعرفت اش سميتها !!!!!
لوؤي : ( علا فيه راسو بزربة بملامح دمنيتك ) تاااااشمن عااليا ولا حااادرة ... تااارييييح اصاااحبي كنقوليك من الفاااميييلا .... الفاااااميييييلااااا ( جود كيشوف فيه بتفكير وهو علا عينيه موسعهم بملامح مصدومة ، ولوؤي كايضور فراسو عرفو فيمن فكر ) ولاااا اصاااحبي لاااااا ... واش انا بيييدوفيل لااااا ( جود نزل راسو تاني ملي ماشي آية وهو كااايفكر ) و ... وهانتا غااالامابغيييتيش تعرف ... و وراااه وحدة لي بقاات اولد عمي نطقها خلااااص فكنا تاااابعنا مااايدااار ......( جود رجع تاني نزل راسو تايفكر واش خلا شي بنت اخرى باقي مافكرش فيها من غير ختو )
جود : ( كيشوف فجنب بتفكير هو يعلي راسو بزززربة مخنزر فاش لقى راه مابقى حد من غيرها هي وبيلساااان وممكن تكون ختو !!!! .. ولوؤي هرب ورا طموبيل وجود نطق بصدددمة ) قَااا ( قاااطعو لوؤي بزززربة )
لوؤي : بالضمة بالضمة .... قُوووو قوو قوووووووو
جود هز داك السارووت ولوؤي عطااا رجليه للريح وجووود تبعووووو كاااايجرررري وهو هربااان منو .....
لوؤي خرج من الكاراج هربان فالغابة لي وراه كاايجري وجود تابعو وهو كيضور ليه مع الشجر ويهضر هرباااان .....
لوؤي : وغاااانتفاهمو غاااانتفاااهمو تااااماااالك عنصررري اااصاااحبي ( هااارب )
جود : ( تابعو كاايجري ) خخخختي اووولد القححححححبة خخخختي !!!!!!!
لوؤي : والله يررررررحم باااااااك لامحط داك ساااروووت غاانششششرح لييييك
جود : وووقااااف ... وقااااف آللحححححبس .... وققققف ونوووريك شكووووناهيا ختي
لوؤي : وووكااانعرررفهااااا غاااااحط داااك سااروووت نهضرو بالعقل ( تيهرب بين الشجر ) وغااااانشرح ليك ابناااااادم ....
جود : ققققدس اوووولد القحححبة ... هااااديييييك راه باقا طفلة
لوؤي : وااااانتاا لي ططططفل .... تاااريييييح القلاااوي نهضرو ...... تاااااشمن طططفلة اصاااااحبي وهي فاااايتاها بييييلي غااا بعااااام .... تاااامااالك موووتاااقانض ..... موووتااااناااااضيق ( وقف باش ينطقها مزياان ) مووتاانااااقيض ( كمل الجري)
جود : بيلساااااان مغاااتززوجججش دابا .. بااااقي لييييها عام ... مااالك شااايفني جااارها لعدول قبل مااتكمل قراايتها باش تجي تقااااارن معايا ؟؟؟؟
لوؤي : ( هارب وصوتهم كيتسمع فالخلااااا وجوج كيسرحو الغنم كيتفرجو فبهم ) ونتا بعدا رااا عاااااام تااتكمل قرااايتها .. انا راه محكوووووم بعشر سنييييين نااااافذة تاااتكمل شباااابها كااااااامل ( جود وقف كيلهت محني شاد على ركابيه و لوؤي وقف تاهو متكي على الشجرة كيلهت ويهضر وينهج )
جود: ماااالقيتي غااااختي ( كاااينهج)
لوؤي : و والله .... ( كاينهج) والله اخوياااا مااالقيييييت غاااا هي ..... ومغااااانلقى غا هي ومغاااندي غا هي ... هز الساروت تسعود ولا هز تااااتمنطااااش .... ( جود كينهج ولوؤي بدا يضحك ) اشنو زعما باغي تتفلقني باش نساها بحالك ؟؟؟؟ وبررررب واخا تشششقو لياااا على جوج ( جبد تيشورت ديالو جيهة صدرو ) بررررب وماااسكت هااااد القلب لاااااانسيتها .....
جود : ( تكا على شجرة كينهج ) ولد القححبة باااااقي كاااايههضررررر
لوؤي : وهااانا جييت قلتهاااا ليك وكبررنا بيييك اصااااحبي مال والديك دابا مااااالك
يلاه كملها شافو جاي كيجري بجيهتو هو يهرب كيجري ويضور يشوف موراه كيلقاه تابعو
لؤي : والكاراااج محلووول اولد القحبة غاايسرقونا الكاااراااج محلووووول
جود : ووقاااف ولا برررب تامصاااارنك غاااييرعاااوهم النعااج اليووووم
لوؤي : وحط غاا السااااااارررروت ( هاربليه بين شجر ) وووخلي فيااا شوية دجججهد نهضضر مع بااااك ... نبووووس راااااسك لااامادوز ليا غااااهادي ...
جود : ( وقف كينهج ولوؤي تاهو تحنى كينهج ويكحب ) من امتى ونتا حاط العين على ختي اولد القحبة !!!!!
لوؤي : ( علا عينيه فيه بشوية كينهج وهو باقي محني شاد على ركابيه كيرد انفاسو ودوا بابتسامة ) منهار حليت عيني
جود : ( لاح الساروت من يدو كيقرب ليه ) قربتي ليها !!!!
لوؤي : ( وقف كينهج كيشوف فيه جاي عندو ) كاع داك دروس لي قريناهم معاك حنا باقين نعاودو ؟؟؟؟ ( يالاه كملها حس بكروووشي قلب ليه الحننك لجنب تاعواج ليه الفك وبدا يعوج فمو يقاااادو ورجع وقف وجود كيشوف ليه )
جود : ختي !!!! ختي آلكلب !!!
لوؤي : واش محرمة علياااا ؟ ( ضربو بزربة لجهة لاخرى تاكان غايطيح الارض شد على فكو لي عواج من جهة لوخرا ) رييييييح اجووووود ( يلاه غاايضرربو وهو يو لوؤي وضربو تاهو تارجع بلور ) ريييح راه غاانرد مك تعااااود ليريييم بربي تاايحيرو فيك الطبااا تااارييييييح ........خااااطب بالشوا وصاااابح على العصاااا تاشهااااد التريكة السوووفااجية وااالد عمي !!!!! تاااشووووف معاااامن غااانتاااسب وصاابر
ماجا فين يكمل هضرتو تاكان شدو من حوايجو وعطاه كروشي للحنك تحت عينيه تاطيحووو كامل فالارض شاد على حنكوووو وجود علا سروالو على فخاضو بيديه و تحنا عندو جالس القرفصاء وحط يديه على ركابيه كيشوف فيه
جود : باقي عندك الوووجه تهضضضر بااااقي !!!!!
لوؤي : ( تكعد كامل من الارض كيقيس بيديه لحنكو ويشوف واش فيها الدم ... وكايماسيها بيديه مصغر عينو فالشمش كيشوف فيه ) عجباتني مشيت هضرت مع باها شحااال هادي ..... مدرتش داكشي لي درتيه نتا ملي كنتي صغير غاااااتهنى .. ومابغيتهاش وانا مراهق ... كنهضر معاك وانا فهاد لاج باغي نتزوج بيها .. ماباااغييش نتفلااا ..... كون كنت باغي نتفلا كون قلتها شحال هادي .... نهار لقيت راس مستعد للمعقول هانا جيت هضرت معاك ... اما باها راه هضرت معاه شحاال هادي باش مايعطيها لشي وااااحد ، مكنتفلاااااش غاا ريح ....
جود : ( مخنزز فيه ) وهي اش كتگول ؟؟؟؟ ضحكتي عليها بجوج كلمات !
لؤوي : هنينا اصاحبي واش مكتعرفنيش ! ( جلس كامل لارض شاد على حنكو كيماصيه وكيشوف فيه ) كنهضر معاك من نيتي اجود .... البنت راه منهار رجعت من الخاريج وانا كنحس بشي حاجة تاتجبدني ليها وماقربت ليها ما والو ... كنت صغير وكانت صغيرة داكشي باش خليتها عندي ورجعت لور تانكبرو .. ملي كبرنا راه قصدت عمي اسد هو اللول .... وهي راه طلبتها للزواج دريكيت ... مكنتفلاااش عليها اجود .... غاااتهنى ..
جود : اش قال الولليد !
لوؤي : قال صغيرة .... وايه بصح صغيرة ماقلناش .. ولكن اجود راني وااااحل .... الواليد راه باغي يزوجني وانا مافيا لي يطيح فشي وحدة ماابااغيهاش نديها بزز .. باغي ندي البنت لي باااغيييييها .... راه غانجيو نخطبوها رسميا باش ماشي ليوم غدا تقول ليا كتفلى ليا على ختي .. ونهار تكبر وتستعد .... نتزوجو .... ( كيشوف فيه بجدية ودوز لسانو على شفايفو ) نت رااا خووويا اصااااحبي .... واش انا غنغدرك فختك واش حماقيتي !
جود : ( كيشوف فيه بجدية ) تا اياد كان واحد نهار يمكن خويا !
لوؤي : كنتي صغييير اصاحبي ... انا مكنهضرش معاك فداك لاج ... العقل تايتبدل .... انا مدرت تاحاجة مامعقولاش .. مكنعرف حد من غيرنا اجود ... حليت عيني على بنت عمي من صغرها وهي عاجباني ... نهار نويتها نيشان للمعقول كانت هادي عماين .... وراك شفتيني تافاش كنقصرو فهاد عماين لخرا مكنقرب لحد ..... ومغنقرب لتاشي وحدة الله يجعلها تكون عشر سنين ولا خمسطاش ..... جود ! برررب مكنتفلى .... الوليدين راه فخبارهم ... وراه جايين هاد الليلة على قبلها ....
جود تنهد وجلس كامل فالارض متكي على شجرة معلي راسو للفوق تايفكر ولوؤي مكمل هضرتو
لوؤي : انا عارفك دابا فاش كتفكر .... راه اصعب موقف هو لي تحطيت فيه انا دابا معاك ..... غاتبقى تفكر كاع داكشي لي عاودو ليك عليه غيحسابتك تانا بحالك .... جود كون كنتي دابا فهاد اللاج مغاديرش داكشي ! .... را كنتي باقي صغييير .. وكانت تاهي صغيرة كنتو طايشين وخلصتو ضريبة دالطيش ديالكم .... والحمد لله راكم صافا دابا وتصلحات الامور متبقاش تفكر فداكشي .... انا وختك ماشي بحالكم .... انا ماقربتش ليها قبل مانطلبها من باباها .... تافاش طلبتو ( كيرجع فشعرو لور عارف راسو تايكدب ) ماقربتش ليها ..... تاطلبتها للزواج ..
جود : ( شاف فيه ) امم ! و اش قالت !
لوؤي : ( شاف للفوق ) دابا هي قالت اه فظروووف مضلمة شوية .... ولكن ... الموهيم قالت اه .. كييييفاش ماااسوووقكش ...المووهيم بغات !
جود : دابا نتا باغي تقنعني بلي مكان بيناااااتكم والو ..... وجيتي عندها على غفلة تزوجي بيا قالت آه !!!!!!
لوؤي : اااه. ... مكان بيناتنا والو ... ولكن لي كنحسو من جيهتها تتحسو من جيهتي وساااااكتييييين وصاااافي هدا مكاااان كلها مكمدها عندو وساااكت ....( جود مخنزر فيه ) وهنيينا اصاااااحبي ... راه كون مكنتيش خويا وعشيري نخليك تاتسمعها بلييييل .....علاش نجي ناكل خلا دار بويا
جود : علاش ماقلتيهاااش شحال هادي !
لوؤي : اش غنقوليك اصاااحبي ! السلام وعليكم كتعجبني ختك ؟؟؟؟؟ شوية لاباس لا !!!!!
جود نزل راسو بين بديه ....
لوؤي : ودابا ماااالك اصاااااحبي مالك! فييين غتلقى نسيب بحالي فييين !!! تزرررق ليه حنننكووو ويحزرك .... فييين غتلقى بحااالي !!!!
جود : ( كمشو من حوايجو مقربو ليه ) برررررب امسخووط الوالييييدين ونشم ريييييحتك قررررربتي لييييها تااااانحررررك
لوؤي : ورااااا غااااااانخطبهااااا آآلللحبس
جود : ااامكاااايهمنييييش اناااياااااا ..... ملي تزووووجها سيييير نتا ديها تالاندووووشين مانشوفوك مانشوفوها .....ولكن دييير فيها مررييگل و جاااي تجمع العمام وتقرا جوج كلمات دالصواااب و الفااااتحة بلا بسم الله وتقول صاااافي راه ندير لي بغيييييت بررررررب تاااانحرررررررك من الورييييد للورييييد
لوؤي : ( شاد معاه يدو ) وغااااطلق طلق ... طلق اولد لذينة مقااادين على انعاش معاك تاني صافي غاااطلق .... طلق راه نخاف يمشي ليك الريزو تااااني ضييع ليا هاد السواري شحال وانا نتسنى .. توكض اليوووم ....
طلقو جود من يديه ولوؤي كيعلي عينيه فيه ويرجع يحدرهم وقال بمكر
لوؤي : لي درتيه لبيلسان نديرو لييها ..... ( شاف فيه بزربة ) حرام عليا حلال علييييك !!!
يالاه غايشدو كااان وقف هارب ليه كيقاد حوايجو لي كمشهم ليه وحنكو حمااار بداك كروووشي
لوؤي : تاامغرااابيت دالخرا .. ندير مابغيت فبنت الناس ....و لكن ختي لاااااا .... ياخوياااا هي باغاني ؟ بااها باغيني ! مااااماها باغاني ؟؟ واليديا باغينها !!! وااااضورررررر تقاااااود اصااااااحبي ضوووور تقااااود
جاي نايض عندو هو يهرب تاني كااايضحك فرحاااان لي خوا قلبو وحيد عليه هاد الحمل وجود واخا عصبوو ملي جاه على غفلة و لكن فاللداخل ديالو كان راضي ومباغيش يبين ليييه .... تاوقف قدام جيب ديالو كينهج ويشرب فالما و جود هز ساروت ديالو فين كان مطيحو وجاي باتجاهو مخنزر فيه وضرب ليه داك القرعة دالما تاتخوات عليه كاملة بقى غيييي كاااايكحب ومشا للكاراج ولوؤي كينتهد ويضور فراسو وتحنا هز داك قرعة سدها وتبعو لقاه رجع يلبس ليكاتو ...
لوؤي : وراااه شريييييت خااااتم
جود : سير وريه ليها ولباباها وماماها علاش جاي عندي انا
لوؤي : دويت مع الواليدين لبارح ... الخطوبة تاتفوت الماتش ديالها ونديروها .... برررربي وماتجيب ليا دقااااايقية لااااتفاكيت معاك ( جود مكيجاوبوش محني على الكاپو كيخدم ) العرس ماشي دابا تاتاخد ليصونص ديالها ونبدا نقنع فيها لعل وعسى تنقصلنا شوية من داك عشر سنين ونعاودو الاستئناف ( هو ساكت ولوؤي كيهضر ضااحك عارفو راه مهتم بالموضوع واخا داير فيها مقلق ) ولا كاااع ندير لاكط ونخليها فدار باها .... تااااااتشبع مااااامزروبييش ..... انا نجي نعيش معاااها عندكم .....
جود : ( هز الساروت ) غااتقود ولا بربي تااانحل ليك راسك
لوؤي : و اش غااايتبدل ! غاضربني زعما باش مانقوليكش باغي ختك ؟ ... غااتحلو ليا غاااتلقاها .... صوت وصورة ... ( جود كيسمع ويضور فراسو ) انا راه ماباغي نصلح غالاط ماباغي نجر طوبية ... انا راه باغيها دبصح مااااعندك مناش تخااااف .. مااااامراهقة مااااااطيييش ماااااتفلية ماااالعب( جود مخنزر فيه وهو كمل بزربة يرقعها ) مااااااااكنمعني عليك .... ( جود نزل راسو كيخدم ) وصراااحة غاااااااتخلي بلاااااصتك فاش غااتمشي ليابااااان .... غااااتخلييها خااااااوية .....
يلاه كملها السااروت كان ضرب فالحيط حداه كون ماهربش رااااسو وهو يضحك ومشا لباب دالكاراج كيضور فراسو ... ورجع ضار عندو ....
لوؤي : وهااانا غاااادي .... وررررد البااال تما فالجاپون .. قاليك تايقصييو الكلاااب والعياذ بالله ...( جا ماشي ورجع ثاني عندو ) عنداك ييقصيييوك بالغلااااااط ..... ( جود كيضور فراسو ولوؤي ضاحك ) والهوووووهيم ... انا ااااانمشي نقااااد راسي ... هادشي دالزواج مسااهلش .. رااه غاااانخطب زعماا ... ( كيمشط شوية على لحيتو ) نقص شوية منها ياك ؟ ( صغر عينيه ) تخيل دابا تنسى كاع هادشي لي قلت ليك ونعاود من اللول !!!!!!
جود : وسييير تخطب ولا سيييير تقود ولا سير تموووووت كااااع .... عطيييييني تييسساع
لوؤي : (مصغر فيه عينيه بمكر) واش كااااتغير عليا !!!!
جود يالاه غااايزف تاني بساروت آخر و لوؤي هرررب وجود بقى كيتنهد ورجع تحنى على الكابو كيضور فراسو ولوؤي غادي كيضحك كيعوج فحنكو لي عواج ليه وطلع فطموبيلتو و شاف للمرايا كايقيس بيدو بشوية فوق ضربة ...
لوؤي : ولد القحبة ماخلا ليا وجه نخطب بيييه ....( ورك بيدو حل الفريجيدير وجبد كانيطا مثلجة دارها فحنكو تحت عينيه وديمارا بيد غادي واليد لوخرا كيماصي بيها ضربة بالثلج باش متنفخش ....
جود سمع الطموبيل مشات هو يعلي راسو من الكابو كيشوف فالفرااغ ....
تمنى لو زمان يرجع لور ويكون شجاع بحاااالو .... ويدير خطوة بحالو ..... ولكن للاسف ! الاومور مشات بطريقة نذلة خلاتو يكره رااااسو الف مرة ..... معارفش واش يلوم السن ولا الطيش ولا المراهقة ..... واش يلوم الشجاعة لي مكانتش عندو ... ولا يلوم الحب لي مكانش عندو باش يخليه يتشجع !!!!
المثال تعاود قدام عينيه للمرة الثاااانية .... كيزيد يوضح ليه كيفاش كيتصرف لي بغا من قلبو ....مع لي بغا من بلاصة اخرى !! وكايزيد يحقد على راسو شحال كااااان حيوااااان !!!!!!!
مشا لوؤي للدار لي كانت خاوية ، الكل دوز نهارو فخدمتو .... وطلع لبيتو ديريكت طاح على ظهرو كيشوف فالسقف فررحاااان لي حيد على ظهرو اكبر هم واخا حنكو باقي ضارررو ....ولكن ماااحسش بالم الضربة بقوة الفرحة .... حس براسو يالاه غا ينعس فخااطرو بقوة ما دوز ليلة كاملة كاااايتگلب .... شاد تيليفون تايدوز فتصاورها مبتسم مامثيقش الى ليوما غيتهنى من اكبر كابوس فحياتو وغتولي رسميا ديالو !!! واخا مزال ماشي بالحلال .. ولكن على الاقل يحيد الخوف ديال يديها ليه شي واحد ولا تديه شي وحدة ...
......
قدس دوزات نهار كامل فليشوفمون ، كتحاول ما امكن تتجاهل سلفادور لي دار جهدو كامل باش يتقرب يهضر معاها وهي كتحجج باي حاجة تهرب منو .... فلخر خلاها على خاطرها مراقبها من بعيد وكلما تحركات فالحركات ديالها كلما كيصورها من بعييييد ويصور فالفورمة ديالها .. الفخد بوحدو والمؤخرة بوووحدها و كيركز على وجهها وشفايفها وكيصيفط لليگيب ديالو .....
من بعد ليشوفمون خرجات ديريكت للباركينغ مبعد ماصونات للشيفور قبل مدخل للدوش ، لقاتو كيتسناها ... ركبات دغيا قبل ميلحق عليها سلفادور لي شافتو تابعها ، زادت وسلفادور بقا واقف كااايشوف .....
وصلات للدار وعاودات دوش اخر ولقات راسها باغا دوز عشيتها مع الخيل مادام الدار خاااااوية .... وداكشي لي دارت نزلات عند الخيل ....
جود من ورا هضرة لوؤي التركيز مشى ليه بالمرة ودماغو ترون ... طلع للدوش حيد حوايجو خدا دوش خفيف ولبس حوايج اخرين ونزل ... مشا لاجوندا قيد كاع داكشي لي صلح فالطموبيل وشنو ناوي يصلح مزال ... وخرج من تما لاح سوارت للعساس وركب فطموبيل حاس براااسو غاادي يغيب ثاني وحاااول يبقى صاحي ويفكر حوايج زوينين .... جاه روووكسي لبااالو يمشي ينسى معاه هاد الموقف لي تحط فيه ولي زاد فكرو فنذاااالتو وشحال ضلمها معاه ....صايك للمنطقة وغير تيتنهد ....
.......
وصل ديريكت مشا لروكسي طلقو وخرجو من لباب الخلفي نزل بيه للجردة .... وجلس كااايحاول ما امكن يترووولااااكسا معاه وينسى شوية باش متجيهش شي كريز ويخلع عائلتو ويضيع على ولدو عمو لي تيبان شحال فرحان نهار بحال هذا !!!! ويحاول يفكر غير فيهم وفهاد القرار لي مداروش فحساباتو !!! هو فعلا مغيلقاش حسن من لوؤي لختو وهو عارف مزيان المعدن ديالو كيداير .. ماعندوش ابدا نفس نظرة اياد ليه هو شحال هادي ، بالعكس .. حيت هو لاحظ موخرا عزوف لوؤي على البنات وكيفاش جالس بوحدو ، كان لا هو لاسلطان متاكدين ان كاينة شي وحدة فحياتو صاينها فقلبو شي لي كايعني بلي باغيها ديال بصح !! ... ولكن ابدا مجاتش على بالو تكون قدس !! لي باقي كيشوفها بنية طفلة وصغيييرة قدااامو. .. وجاتو فشكل تكون وافقات وتاهيا عندها مشاعر للوؤي ! كيعرفها انها مكتحملوووووش !!!
واش فعلا صافي هوما كبروو !!!! قسم لقات شريك حياتها لي كتهضر عليه وعينيها تايلمعو لا وهي كتبكي ولا هي ضاحكة .. قدس دابا !! وهو !!! واخا ماشي بنفس الشغف ولكن تاهو عندو شريكة حيااااتو والبنت لي تااااتبغيه ولي غايكمل معاها حيااااتو ..... سهى بتفكريو تاحس بروكسي كايلحسو فيدو وهو ينوض كاااامل هوو ويااااه حيت عارفو حركي مغيبقاش جالس حداه خصوصا ملي خرجو للبرا كايتمجهد .....
--------
جا الليل .....
بداو اضواء قصر الاسمااعيلي كاااايشعلوو .... الغروب باقي تااارك شوية من خيوطو فالسماء لي بدات كتسوّد .... طالع هو وروكسي من البحر بجوجهم بيهم فااازگين وروكسي كل شوية كاتنفض ... وطلعو ديريكت فالسانسور لبيتو ....
قدس من بعد عشية كاملة مع حصانها "بلازر" حتى للغروب ... خلاتو تاهو وطلعات لبيتها تختار شي دريس مناسب لهاد الليلة لي عارفة غايجي عمها عدنان .. عمرها مكانت كتتجهز على قبل شي حد تااااولات كتلقى راسها فينما كتسمع لوؤي جاي كتلبس احلى ماعندها !!!! ......
اما قسم كانت باقا فالمعرض لي معروضة ليه كادور بين طابلوهات و الرسام كايشرح ليها المعاني ووهي واقفة قدام طابلو اسود مرسومين فيه عينين زرقين بحجبان كوحل كثاف ، تالقات راسها خرحااااات من داك المعرض ومشات لبعيييييييييد .... لعالم آخر كاينة فيه غا هي وعينيه !!!
∆فالقصر
التاسعة ليلا ...
فالصالون كانت جالسة لامار و رقية وحياة ... أما اسد وسفيان كيف العادة فالمكتب بعد مادخلات ليهم الخادمة القهوة ... و قدس جات باتجاهم لي كانت فجردة ....
كانت بغوب سوداء يديها حريرين وصدرها مجموع بخيوط مربوطين للوسط ... كانت حد ركابيها مع صندال سوداء عالية بالخيوط .... شعرها كان مبوكلي ومطلوق على راحتو ومكياج خفيف يليق بسهرة عائلية ...
تقدمات وجلسات حدا ماماها كتفرك فدرعانها ....
قدس : بدا يبرد لحااال بالليل ... توحشنا البرد صراحة...
حياة : غير ملي نتوما هنا قراب للبحر .. اختي انا عندي باقي الموت دالصهد .....
لامار : (كتوريها فتيليفون ضاحكة ) شوووفي شوفي البيبي دحيااااة
قدس : ( حيدات ليها تيليفون من يديها كان فيديو ديال الايكو ) اوومااااايكااااااد ....سووووو كيووووت ( شافت فحياة ) واااااو كيف كيبان .. هو هذا يااااك ( كتوريها بصبعها )
حياة : اااه هو هاداك هههه
قدس : مزال ماعرفتيش شنو عندك ؟
حياة : لا .. قاتليا مزال ماباين مزيان ....
رقية : اودي الله يجيب غا الصورة المكمولة و الفكاك ... عندك البنت عندك الولد لي جا مرحبا بيه ....
لامار : ( عطاتها تيليفون ) ان شاء الله ياااربي .. نشوفو هاد الاسماعيلي الصغيور تاني اش غايدير ههه ماهادو شييبوناااا ..
يالاه كملات كلامها سمعو طالون ديالها وعلاو عينيهم ... كانت رتاج لي جاية ضاحكة حداها انس و عدنان ....قدس وقفات مبتسمة وتاهوما وقفو لاستقبالهم .... وقدس كل شوية تعلي عينيها لباب علاش مزال مجاش ... وجلسو جميع وعدنان مشا لعند اسد ...
لامار : اوا شهاد تعطيلة .. ديما نتي هي اللخرا !!
رتاج : والله ماساليت هانتي راني باقا بحوايج الخدمة ...حياة كيبقيتي ؟ ماما رقية كيبقيتي تانتي شوية من داك طونسيون !
رقية : اوا الحمد الله كنسلكووو ونعدييييو .. صحيحة مااااابقااتشاي ابنتي وااااالو .....
حياة : دزت قبيلة لكلينيك كان عدي رونديفو مع الجينيكو ومبغيتش نبرزطك .. قالو ليا راك فالبلوك
رتاج : وي اليوم داز ثقيل ... ( شافت فرقية ) ماعيطاتش ليك اريج ؟ مجايينش ليوم ؟ كنصوني مكتجاوبش
لامار : هضرت معاها انا قبيلة كانو جايين ولكن شي عمتكم عرضاتهم غاايتعشاو عندهم هاد الليلة وصافي بقات تالغدا ، يمكن راها تما داكشي علاش ماملهياش مع تيليفون ...
رتاج : وراه قلتها ليها هي لي مكتسمعش ، قلت ليها يوماين ففاس ماعندها مادير ليك ، العائلة كاملة كتبغي تدير ليهم الضيافة
رقية : مع خلاص دابا ملي عارفينها باقي ليها ولد بلا زوااااج .. غااتزييييييد تعزاز
رتاج : ههههه وايييه .. كانت قالت ليا نمشيو انا وياها ويونس يبقى ولكن واااالو ماسااااليتش ... اوا مشات هي وياه ....
حياة : وماعليش يشوفو العائلة تاني باش مايبقاش فيهم الحال ...
لامار : ( شافت فرقية ) عنداك يتقلقو منك تانتي لي ممشيتيش شفتيهم ... كون غا مشيتي
رقية : ااااا ابنتي ماعندي صحييييحة لطرقااان ... باراكا غا طريق لي تابعااااني ...
قدس : هههههه صحيحة ماعندكش غا على فاس .. افران مشيتي كاطيري ههههههه
رقية : شوووف ليك المطيارة لووخرااا كي حاضيااااني .... ( هزات كاس اتاي على الخادمة لي كاضور عليهم )
رتاج : ههههه راك كتقلبي عليها ... فين جود وقسم !
لامار : قسم باقا ماجات جود عاد كان معانا يالاه طلع ....
رتاج : وسيم كيف خليتوه ؟ عجبو الحال تما !
لامار : واهي جاتو صعيبة يولف ... ولكن ماعندو مايدير تاتما قراية مزيانة وبيني وبينك حسن يبقى الولد قريب لينا ....
رقية : ياااكما حيت انا مبغيتش نجلس فدار الحاج راجلك مابغاش يخليه يمشي معاياا لعند خالو ؟؟؟ اويلي بناقص كاع طججتو هاد دراري كون حسابتني هاكا ندير حجرة على كلبي ونجلس غار خليوهم فسكويلتهم ولفوها تما
لامار : وراااه قتليك اماما والله ماعليك نت .... هوما تما كانو دايرين ماعليييهم ... هنا بعدا قدام عينينا خلفة ديال الطريق ساهلة ماشي بحال تما .... دراري دابا كاايكبرو ومسؤوليتهم كتصعاب ماشي بحال فاش كانو صغاااار كنتي كاتغلبي عليهم ...
سمعو صوت صباطو وعلاو عينيهم وقدس قادات الجلسة وعلات عنقها للفوق وردات شعرها لجنب وهو كيلعب بالكونطاكط دطموبيل فيديه وقرب باس راس رتاج لي فالطرف وسلم عليهم كاملين وكيف العادة هي ديما كيضربها لنيفها، وجلس كيف ديما موسع رجليه ولاح يدو ورا ظهر رقية ....
لوؤي : ( كيشم ليها ففولارها ) بغيت غانعرف هاد البارفاانات منين كتجيبيهم اجدة !!! عندك شي بارفانات فشكااال !!!
رقية : وماااال جداااك حسابتك سااهلة .. راه عندي تما فميريكان واحد بلاكار عامر غا ريايح كان المرحوم يظل ينقلل ليا فالريايح
لوؤي : ايهايهاي .... هادشي كان عندكم مججهااااد ارقية ...
رقية : يحسااابتكم بحااال جييييلكم ... حنا راه قريعة دالرييييحة كانت كتفرحنا ...
لوؤي : ودابا مالك اجدة كلمة جوج تقولي جيلكم جيلكم هضري غا على جيل لي قبل منا بعدا ( شار لامار ) ها بنتك طلبات جزيييييرة كاع ....
رقية : ماااطلباتهااااش هو لي شراها وكتبها ليها فسميييتها وليدي لي الله يحفضووووو ليا ...... جيييلنا حنا كانت المراة ماتشرط والراااجل مااايفرررط .. المراا تراااااري ودير الدرااااري اوا والراجل يجيبها من فم سبع ...وملي يدخل ، بانيو دالما سخون يكمد رجليه و بريريد اتاااااي ولويزات وكريكيعااااات وكعيبات باللوز .... ( كتشوف فيهم كضحك وهوما ضاحكات ) كان المرحووووم مسكين وقتما جلست حداه وحطيت الصينية... كيقووول ليا نت هي الوريييييدة لي منورة فالجرييييييدة ديال قلبي ......
قدس : وااااااو هههههه جدي كان كيقول بحال هاكا !!! ههههه
لوؤي : ( كيلعب فالشال ديالها مبتسم ) ولكن اجدة ....الى كان قلب جدي جردة .....الجردة راه مكاتكونش فيييها غاوردة وحدة .... ( رقية شافت فيه بزربة ) اوا شتي .... ماطلعتيش مطورة فهادي !! ....
رتاج : صافي بقا ليك غا جدك فقبرو تشريها ليه ! ....
سلطان : ( داخل ) نتوما كيتقاضااو ليكم الحيين كادوزو للميييتين ....
بداو كيضحكو وسلم عليهم وتلاح جلس حدا حياة ....
سلطان : واش نتا داك طموبيل فينما جاب الله كتلوحها واش مغنباركيوش معاك حنا !!!!
لوؤي : ونتا مااباااانت ليك غا فين واقفة هي !!!
سلطان : على هي واقفة ! راه قااااطعة طريق .... دخلها لباركينغ لداخل نلقاو منين ندخلو .....
حياة : ( كتشم فيه ) اش هاد الريحة فيك !!!؟
سلطان : ( كتشم حوايجو ولوؤي حابس الضحكة ) اشمن ريحة !
حياة : فشكل !! بحال البخور محروقين !
سلطان : اااه .. .يمكن ...
حياة : ( علات حجبانها ) رررررجعتي تكمي؟؟ ياك قلتي قطعتييييه فرمضان ؟؟؟؟؟
لوؤي : اوا فرمضاااااااان اخالتي .... حتال رمضان لاخر ان شاء الله ويقطعو .. المهم هي العزيمة .....
رقية : على نتا كتكمي اصكع ؟؟؟؟؟
لؤوي : وايلي اجدة ههه واش هو باقي ليه غا الكرافص مزال ماكماهش و كتقولي ليه واش كااتكمي !!!
رقية : اويلي على تربية اويييييلي .. ماااربيييييتو والو .. عييتو طيرو لا نتوما لارجالتكم وماربيييييتو غا الخلا
لوؤي : ( كيلعب ليها فالشال ديالها ) ولاواه اجدة لاواه .... واحد مروان راه تايسيق معاهم البار فالصباح ... راه كيخرج هو والبارمان دقة وحدة وبعد المرات تاكيجمع معاهم الكراااساااااا ....
لامار : هي كتشوف غا لعندنا حنايا .. نسات تربيتها .....
فالمكتب ....
اسد : ( شرب قهوتو وحطها فالطبسيل وشاف فعدنان ) انا راه مزال الهضرة لي قتليه شحال هادي لي غنقولها ليه تادابا ... البنت باقا صغيرة ... هي فعلا اه ممكن تقرا ورا الزواج ... ولكن المسؤولية راها كتلف شوية وانا مابغيتهاش ترااطي شي عام .... تكمل قرايتها وانا اصلا مغنلقاش حسن من لوؤي لبنتي ... انا ضد الزواج فهاد السن ...منغير هادشي انا مكندخلش فقراراتهم لي كتخص زواج وملي كانو صغار ونا حالف مندخلش ليهم فشكون باغين يكملو معاه حياتهم .... هوما يختاروه وهوما يتحملو مسؤوليتهم اختياراتهم .....
سفيان : وهي هضرتو معاها بعدا ؟؟؟
عدنان : هضرات معاها رتاج ... هوما راه تايقادو اوموووورهم راسهم عاااد كايجيو عندنا حنايا .... مالو دابا هو غا تاطاح عليه الوحي وجا عندي نخطبو ليه بلا مايشاورها !!!! .. راه باااينة هضر معاها هي وقاااادو الاومور بيناتهم عااااد جا لعندي انايا ....
سفيان : اوا الى كانو موافقين بجوج على بعضياتهم وختارو الحلال .. ماتعكسوش الطريق ... بالتيسير والله يجيب ليهم الربح .... تاهوما نيت مايليقو غالبعضياتهم ... وخليونا بيناتنا حنا مانعرفوش للبراني .....
عدنان : داكشي لي قلت حتى انا .. لوؤي راه مكاين لي غايهدو ليا كتر من زواج ..... خصني نزوجو لابغيتو يتهد
اسد : لا اعدنان .. لا .. مكنزووجوش الدراري باش يتهدو .. كنزوجوهم باش يديرو اسرة .... اما الى باغيه يتهد راه الدييبو وراه الحبال ربطو تما واحد الشهر .....
سفيان : انا والله مزال مافهمت مالك معاه .. مزال ماعرفتش اش كايدير ليك !!!
عدنان : وااامباغيش اصاحبي يخدم مابااغيش ... شو قداش ولا ومزال ماباغيييش يخدم مابااغيييش يستقررر ... لا طموووح لا تاحاجة مكاايكسابها كل مرة هاز راسو ومسافر ... ويطفي التيليفون علييينا .. مكنعرفوه فين كيمشي .... نهضر معاه يخدم بحالا كنهضر معاه يتعدم ....
سفيان : وراه شاد معاك الكونطرير .. ملي كان باغي يدخل للمجال لي بغاه ماخليتيهش ... راه تما قاليك انا غانقرا هادشي لي بغيتيه ولكن راااه مغانديروش ومغانخدمش فيه ... راه قالها ليك ودارها معاك ...
عدنان : او اشنو نبقى نشوف فيه جالس!!!! نصيفطو يعاود القراية لي بغا ؟؟؟؟
سفيان : ودابا ماعندو مابقرا ليك فهاد اللاج ... ناس دابا راه تخرجو وخدمو .... من لول خليه يدير اش بغا ....
عدنان : باش شي نهار لقى ولدي مقتوول فشي واد يشدو معاه الزگااارة .... داكشي دزنا منو وعارفينو .. وعارفين فاش كيخرج شي واحد لشي عصابة اش كايديرو ليه باش يحيدوه من طريق ومايصدعهمش ... داك مجال صعييييب ونا منقدش نخاطر بزلدي ، ومغايدينيش نعاس وانا عارفو معامن كايتواجه ...
سفيان : ودابا زعنا لاخطب غايجي عندك للشركة !!! مكنعرفوش لوؤي حنا. !
عدنان : ماقلتش يجي ، ولكن على الاقل يفكر فشي مشروع دياااااالو .... راه مكاين من غير زواج لي غيخليه يتبت للارض ويفكر فمستقبلو ومنين غيوكل هاد المرا ويصرف .... الزواج غايهنينا شوية من المشاااكيييل ديالهم .. كيتهدو ....
اسد : هه ! غتهنى من المشاكيل ؟؟؟ هههههه .. ( بدا كيضور راسو كايضحك بخزيت وشااف فيه ) عااااااد ما غايخرجو لييك واحد المشاكيل اخرييين فشكااااال .. واحد مشاكيل صغيييورين سميتهم مااتفهمناش اباابااااا .... كل واحد فطريق .... واحد المشاكيل سميتهم صالحوني معاه ولا نبقى عاااقد الغوباشة وندير ليكم كريز فالدار ونوحل فيكم الدغمة .. سميييتهم انا فطريق هو فطريق ... سميييتهم راه مابغاش يضحي معااايااااا .. مابغاش يتنازل .. ماابغاااش يسمع هضرتي .. هو فاعل .. هو تارك .. دارليا ... فعل ليا .... قااالياااا .. قلت ليه ... داااار ليا درت ليييه ( كايضور يديه بحركة دائرية فالهوا ) وتما كتبقى كاضوووور وتفكرر فمشاكييييلهم تااهووما تحلهم ليييهم ... كنتي فواحد غاااتولي هاز الهم دجوج .. هوما يعقدو الحياة ويتخااصموووو ونتا خاصك تجي توضحها ليهم وتلقى ليهم الحل باش يرجعو يتصالحوووو ويرجعو يضحكو شوية معاك ومااايكهربوش ليك الجو فالدار .....هه !!!! يتسالاو المشاكييل قالك ، دابا تشوف واحد مشاكيل من نوووع آآخر ( هز فنجالو كيشوف فسفيان ) هاااد خوووياااا مسكييين .....
يلاه كيهضرو هو يدخل لوؤي ... شافهم وتبسم ابتسامة بريئة تاتسدو عينيه .... شاد فلباب ... واسد بدا يضور فراسو وهو سد الباب ودخل سلم على سفيان واسد وجلس ... كيشوف فعدنان وسفيان وفأسد ويرجع يشوف فعدنان ...واسد تنهد ....
اسد : قاااالها ليا قاالها .....
لوؤي : ( رخا النفس عاد قاد الكلسة وشاف فييه مرتاح) إواااا !
اسد : ( ربع يديه كيشوف فيه ) اوا اولدي شغنقول ليك .... حفظنا الله جاي تخطب غير من عمك ...انا ديالك ماعليش .. اما تمشي عند شي حد براني باش تخطب منو بنتو وتقوليه إييوا !!! راه يجريو عليك اولدي نتا ونوارك ماااتشوفش موراك ...
لوؤي : ( حنا راسو كيضحك وكيحك فجبهتو وشاف فيه ) ودابا راك عارف اعمي اشنو تما ... حنا كلفنا الواليييد ... مانعرفوش حسن منو .....
اسد : راه الواليد ديالك براسو نهار بغا يخطب جا عندي نخطب ليه ... ( شاف فسفيان ) ختار تانتا لولدك شي وحدة غاااامنا حنا ... ماتحاشموناش مع البرااااني ..
سفيان : اوا الا تولد لينا شي بنت اخرى ... كان عليكم من لول تولدو قد البنات قد الولاد .... ( شاف فعدنان ) نتا لي والد ثلاتة كلهم ولاد .. كون انس جبتيه بعدا درية ....
لوؤي : ودابا نتوماااا جاين تخطبو ليا ولا لسطان .. قضيو معاياا غاراض انا بعدا .. ونشوفو سلطان نولدو ليه شي امبراطورة ( شاف فاسد ) دابا واش نديها ولا لا !
اسد : ( ربع يدو على البيرو كيشوف فيه ) اولدي واش عندي پياسة !! راه بنت هاديك اولدي .. بنت ...
لوؤي : وايه ايه ... زعما واش صافي نحددو نهار لي نخطبوها رسميا ؟ صاافي .. الاومور مقادة !!!!
عدنان : هاهيا خطبناها ليك ... بغيتي قدس خطبنا ليك قدس .. وحناا كاملين هنا موافقين والاومور مقااااادة ... وباباها قالك تكبر وتاخدها ... ولكن انا لا ... مغنعطيهاش ليك فاش تكبر .... ( لوؤي علا حجبانو ) اتاخدها نهار نشوفك استقليتي ودرتي دارك وخدمة منين غتعيش هاد البنت .... نهار دير هادشي بفلووووسك الخاااصة اتاخدها ..... انا مغانقبلش بنتي تدي واحد كايصرف عليه باه ..... يدير بعدا غاااا دااارو ... راه تا طير فاش كايبغي يدير الولاد كاايسبق بالعش ....
لوؤي شاف فاسد واسد حرك ليه كتافو بمعنى ماعندي مندير ليك وشاف فباباه
لوؤي : دابا واش نتا جاي تخطب ليا ولا مني ولا منك ولا مااافهمتش !!! ( قاد الكلسة ) كيفاش داري ! شنو دابا ... منسكنش معاك !!!!
عدنان : لا .... انا اولدي كتنسى بليل والنهار امتى يكبر انس ونسيفطو تاهو لشي بلاد ونتهنى من البراهش .. نووض نزيد براهش اخرين ؟؟ .. لي ولد شي يربيه ... الخير لي دير فيا جيب ليا ولادك نشوفهم من جمعة لجمعة ياكلو معايا كسكسو ...
لوؤي : ( قاد الجلسة على الكرسي ) اوا ....نعيشو مع عمي اسد ....
اسد : الى باك باغي يشوفهم من جمعة لجمعة انا مادات بيا تيجيوهم ليا غامرة فالشهر اولدي ....
لوؤي : ( قاد الجلسة وتنهد ) واخا .... غذا نمشي ناخد دار .... مزيانة ؟
عدنان : وباش غتعيشها ؟
لوؤي : عندي فلوسي فالكونط
عدنان : وملي يتسالاو ..! تردها لينا .. داااير ابونمو ؟
لوؤي : كاايدخلو كل شهر الى مكانش فخبارك زعما !
عدنان : هادوك ماشي ديالك ... فلوس ماعرقتيش فيها مغتكبرش ليك الولاد ومغاديرش ليك مستقبل .... نهار تتزوج .. غامحبس ليك داك الفلوس لي كدخل ليك من بروتوكل ومن الماذر كومپاني ...
لوؤي : ( تنهد ) واخا ..وااخا ... حبس كولشي .ولكن ماتسولنيش منين كاااانجيب الفلوس ...
عدنان : ( شاف فاسد ) شوف مع نسيبك شنو كتوكل ليه بنتو .. واش حلال ولا حرام .... انا ماعندي مانقول ليك
لوؤي : ( كيشوف فاسد باستنجاد وسفيان كايضحك ) ععععمي !
اسد : بينك وبينو ... هو رباها كتر مني ....
لوؤي : ( شاف فسفيان ) كانو كيقولو ليا نسسيييبك كان صعيببب .. ماجربتيش اعمي يكونو عندك جوج !!!
فالخارج ...
حياة : ( شادة كتاب وكتقرا مع انس ) هانتا ... قالو ليك دير علااامة فالرموز لي عندها علاقة بلونڤيغونمون .... دييير هنا ..
رتاج : انس ... خلي اولدي دابا داكشي تالبلاتي وتخدم معاك قسم .. خالتو حياة عيانة
حياة : اغييير خليه بالعكس .. توحشت نخدم تمارين هههه
رتاج : هاهوا غتولديه ابنتي وترجعي لتمارين والغوات ... ( شافت فلامار ) موهيم الامار .... ( شافت فقدس لي شادة تيلى وفرقية ) كنت باغا تاتكون ختي هنا .. ولكن راه مغنشدهاش غذا يالاه غيجمعو حوايجهم تاني وغيمشيو .... والى ماقلت ليك والو ليوم لوؤي مغيخلينيش ندخل لدار
غير كملاتها قدس علات عينيها بزربة موسعاهم ...
لامار : ياك لابااااس !!
رقية : ( حطات تسبيح فحجرها وقادات الكلسة ) ياك شي باس مكاين !
رتاج : لا الا .. غا الخيير ان شاء الله .... ( شافت فقدس وهي حطات تيليفون كتسرط فريقها وكتبعد من حدا ماماها بشوية فالفوطوي ) والموهيم مابقى مااايتخبى ... حنا هاد الليلة جينا .. نهضرو معاكم على ود .... ( قاطعاتها )
قدس : ا ا خالتو .... اا .. تاااتكون معانا خالتو اريج !!! ز ز عما ت ت كون باغا تقولي شي حاجة مهمة وخالتو اريج غتقلق الى ماقليتهاش ليها تاهي ...
لاما : تي سكتي اشمن غاتقلق ... دوي دغيا خلعتيني ياك لاباس !
رتاج : مهم راه بغينا ... بغينا قدس للوؤي ....
لامار علات حجبانها رقية كمشات عينيها فرتاج وقدس بدات تفرك فيديها مع حوايجها ...
حياة : ( جمعات كتاب دانس ) انس .. سير اولدي عند سلطان لهيه ( كاتشير ليه لصالون لاخر فين جالس شاد تيل ) يعااااونك .... سير عندو يخدم معاك سير( سيفطاتو وشافت فرتاج ) كيفااش ؟؟؟ لؤي !!!!! واش قدس ديالنا !
رتاج : وديالمن احياة ! د فلسطين !!!... قدس وحدة لي عندنا
لامار : ( شافت فقدس لي منزلة راسها و شافت فيها ) او شغانقولك ارتاج انا ساااامعة شي تنقنيقة هههه ولكن محسابتنيش بهاد زربة ..... شوفي معاها هي ومع باباها انا ماعندي مانقوليك ههه لوؤي ولدي وعزيز عليا ...
رتاج : ( كضحك وتشوف فيها ) هي راه فخبارها ومقااالت والو الالة قالت الهضرة هي ديال واليديها ... وباباها راه باغيها تاتكبر شوية وتاحنا قلنا مافيها باس نخليوها للوؤي ...نختارو نهار تكون العائلة مجموعة ونديرو خطوبة رسمية قدام الوالدين .. باش مايطراش شي مشكل من بعد .... ويكون خير ديك الساع فالعرس بالشوية تاااا تسالي قرايتهااا ويتافقو هوما داك ساع امتى يستقرو ... حنا ماعلينا غانكملو بالخير ....
رقية : لا لا لاااا لاااا ( قدس شافت فيها ) لا هادشي مكاين لا فالعادة لا فالقواعد لا .... مانعطيوش ليكم الصغيرة قبل الكبيرة .... ديو قسم هي لولا (قدس وسعات فيها عينيها) .. لا لا ...حنا مانقزوش الكبيرة ونعطيو الصغيرة .....
لامار : سسكتي يا ماما عنداااك تسمعك اجاب مايسكتها لينا .. واش قسم قدو ؟ واش حنا كندخلو فهادشي !
رقية : لا ياااااه ... عمر مكانت الصغيرة تتزوج قبل الكبيييييرة , المرزنة تبور و المطيارة تتزوج !
قدس : يااااااك اجدة !!!!!
رتاج : ههههه شحال هادي مسمعت هاد المصطلح ديال تبور ههههه
حياة : ههههه راه لا مشينا على فهامتك اخالتي و لابقينا كتسناو قسم .. راه قدس لي غاتبور لينا مسكينة ههههه
رقية : بغيتو تخطبو من بنتي لولدكم ....الله اوووودي على الراس و العين فين غالقاو بحاااال لوؤي ... غا هووو دييرو الكبيرة ... الصغيرة بلااااتي عليها ( قدس علات فييها حاجبها )
رتاج : ههه ودابا اماما رقية راه ماشي حنا لي كنختارو ليهم راهم هووما لي مفاهمين وهوما لي كايختارو اش بغاااااو ....
يلاه غاتحاوب رقية وهوما يسمعو طالون دقسم كانت يلاه داخلة بلبلاس كلاص ، سروال ايفازي كحل و طوب خضراء وهازة الفيست فيديها مع الكاغطابل دبيسي
قسم: بووون سوااااغ ( دازت كتبوسهم ) توووووحشت نشوفكم مجمووووعين ... ( باست رقية ) وااخا مقلقة منك اجدة سمحتي فييييناااا ولكن ماشي مشكل ....
رقية : اوا مك لي خلاااتي ومشااااات ... شغاندير ليها انايا
لامار : وبااااز ! سافرت يوماين !! ( شافت فقسم ) كلسي ابنتي كلسي ....
قسم : لا لا انا تانطلع ندوش و نبدل عاد نكلس فخاطري .. بابا و عمامي فالبيرو !!! انمشي نشوفهم ( جات غادة و هي توقفها )
حياة : اجي ااااجي بعدا تسمعي ااجي كنا داوين عليك ( رقية كاتومي ليها تسكت ) دابا كاتغمزي ليا ! واقوليها حداها ولا كتخافي منها هههه
قسم : هه ! ياك لاباس ؟؟ اشنو تاني اجدة !
لامار : ههه ( شدات يديها كانت واقفة حداها ) خالتك رتاج جات خطبات ختك للؤي .....
قسم : ( شافت فقدس ) اوا مبرووووك على سلاااااامتكم ههههه
لامار : هي غي انا لي مقلوبة عليا هنا القفة !!!! ( شافت فقدس ) يااك اينتي ياك ! ختك فخبااارها !!! زعما مايخرجش ششي واحد فولادي مرضي ويجي يهضر مع ماماه !
قسم : يهديك الله اماما .. راه غي العمى لي مايعيقش بيهم ههههه ونا ماقالتش ليا .. غاا عقت بيها وگرات بسيف عليها هههه .... و زايدون باينا قالها ليك بابا باركا مادير فيها زعما ماعااارفة والو ..كاتستري غاشكون بغيييتي هههه
حياة : اوا الالة راه جداااتك مااابغاااتش .....
قسم : ( شافت فقدس لي دارت مخدة على رجليها و كتضور راسهااا كتظعي الصبر وشافت فحياة ) ههه علاش !!!
حياة : قاتلك مانزوجووش الصغيرة قبل الكبيرة .. قاتليييهم ديييو قساااااام .....
رقية : اوا ابنتي هدا هو المعقوووول اولا !!!! نزوجو الصغيرة ونخليو الكبيرة يضحكو علينا الناس !!
قسم : ههههه الله اودي ( شافت رتاج ) حشومة عليكم ..نقزتوني انا ...مالي انا ناقصاني يد ولا ورجل !
يلاه غاتجاوبها هو ويجي لوؤي باتجاههم ...و وقف حدا قسم كايشوف فيهم كيضحكوو ....
قسم : ( جبداتو من يدو ) اجي جااااابك الله ... قالوليا جيتي تخطب !!! ( لؤي كايشوف فيهم ) ولكن راه مابغاوش يعطيوها ليك ....
لوي : على هادو غايعطيوك شي حاجة غا هاكاك ضروري يخرجوها منك .... رجال طلبو الدار وخدمة .... نتوما اشبغيتو تاني !!! شهر العسل فالخزيرات !
قسم : ( حاطة يديها على كتافو راشقة ليها تنطز وتنسى همها ) لااااااا ... قالوليك خاصك تدي الكبيرة هي لولة .... جداااتك مابغاتش قاتليك الكبيرة تزوج عااااد الصغيرة .... ماااتنقزونيش انا... راه كنتقلق وغايبقى فيا الحاال ....
لؤي : اهاااه ماقلتي عيب اجدة .... ولكن تاني لادينا الكبيرة ...الصغيرة شكون يديها مسكينة ؟!!!
جدة : ( شافت فسلطان لي فالصالون لاخر ) وااارااااه ولد حيااااة ... كوايري مزيناتو ....
قدس : (هزات المخدة خبات وجهها ) ياااااربي تصبرني ياااربي ....
لوؤي : سلطااااان ... تا اجي لهنا راه كايفرقوو العرووساااات اصااااحبي ... اجي ....
سلطان علا راسو شاف فيهم وحط الكتاب لانس وتم جاي كايوشف فييهم مستغرب ..
لؤي :قالوليك اسيدي انا ندي قسم .... ونتا دي قدس
سلطان : فييين !
لوؤي : يضربو ضويرة فعين دياب ... قنطو مساكن
قسم : اشمن عين دياب .... زوااج ... تدييونا زعما تزوجونا ....
سلطان : وعلاش !!!!
قسم : هاكااااك .... مالقينا مايدار قلنا نتزوجو نبدلو شوية الجو ههه
سلطان : و ضروووري زززعمااا !
قسم :ضرووووووري
سلطان : ( گلس مفرق رجليه لايح يدو ورا ليفوطوي ) لا باقي باغي نكمل قرااااايتي
لوؤي : ( شاف فرقية ) نديهم بجوج ؟ نييت باشما يقنطوش .. تونس مع ختها .. ياك الشرع عطا ربعة
رقية : دروك سايرين طنزو عليا ؟ ( شدات تسبيحها) ديهم بجوج ولا كلس ، مهم عندي الصغيرة ماتزوجش قبل الكبيرة
لوؤي : ههههه ( طلق من قسم ومشى كلس حداها ) دابا اجدة راني مجارهاش للعدول ...راه ( شار لقدس ) هاديك خيتي .. مغاتبغي تزوج بيا و مغايعطيهاليا داك باها لداخل .. تاتكون قسم قربااااات دير النسييييب .. دابا انا غااااا داوي .. داوي فيها باش مايعطيوهاش لياااا لشي واحد اخر ... وباش مايهرسش ليا جود شي نهار سناااني
رقية : اااااه .. كي شغل زعما معربنها !
سلطان : بلاتي بلاااااتي ( قاد الكلسة ) واش نتا كتخطب دبصح ؟
لوؤي : واش كانلعبو هنايا
سلطان : وااقوووولي كادويو بصح ..( شاف فقدس ) واش غادي تدي لوؤي دبصح ( قدس كتنهد وضور راسها وجهها حمر كاتغزز شفايفها ) ااااه اوا ملي بصح صافي عطيوني قسم ( قسم كضحك ) الكبييييرة تدي الصغير ... يلاه دير ليا عقلي
قسم : داااكوغ ..فين نلقى حسن منك .... هانتا انا غانطلع ندوش ونبدل حوايجي بينما تافقتو شكووون يديييييني ونننزل صافي ! هههه
خلاتهم وطلعات و سلطان شاف فلوؤي
سلطان : تا واش داوي دبصح !!!
لوؤي : واش باليك؟؟
سلطان : دابا انا راه قرييييت داك ميساج لي كتبتي ليا ولكن ماقلتيش ليا قدس ( شاف فقدس غامز ليها ) كااااتغفلووووو
لوؤي : و شكون غانخطب من عند عمي اسد ؟ رجاء ! تاماااالك ديما ثقييييل فالفهامة اصاحبي ....
سلطان : وانا قلت سبحان الله تكون جاي عندو باش يمشي يخطب معاااك
رقية : ومالو اولدي هو ماعندوش باه ! و زايدون علاش يدي عمو يخطب ليه وعمو عندو جوج بنات كي البلاراااات ! ينقزهوم ويمشي لبراااااني
حياة : سمعتي !! وسييير نتا نقز العائلة وسير للبراني
سلطان : تي مال هاد للعائلة خلات ليا شي وحدة نديها بعدا !! وحدة نقز عليها جود هادي لي بقااات لينا هاهو طار عليها هادا وفرقوهم غا بيناتهم اشنو خلاو ليا انا ؟ بيان !
حياة : ومالها بيان .... واحد سبعطاش لغام وهاهي واجدة ..
سلطان : ومنهنا لسبعطاشر عام راه خصني نكون كنفكر نحج .. ماشي نتزوج ...
لوؤي : غاتوكل على الله اخويا ... راه تكبر بيان وتتزوجها وتلقاااني انا بااااقي كنتسنى ...
رقية : توما شمن بيااااان ... الولد راه واجد ... زايدون الاولاد غا يبلغو خاصكم تزوجوهم ... الشيطان كااايضووور ...
حياة : وريت ليه داك نهار واحد بنت صاااحبتي ومابغاش ..
رتاج : شكووون !!
حياة : سندس بنت وفاء صاحبتي ..
رتاج : اولي داك لي دارت داك العملية هرسات ضلوعها !!!!
لوؤي : ههههه سلطان وسندس هههه كي سمية دشي روسوم متحرك هههه تانتي اخالتي حياة والله ماعندك الدوق .. مالقيتي ماتختاري لولدك غا داك خيتي فورمتها بحال قرعة دالبلاستيك فاش كنخويو عليها لما سخون ....
سلطان : سكت ماتنمرش على بنت الناس .... واخا فورمتها بحال البناء العشوائي ولكن راه دايزة داااايزة غا انا مزااال باغي نزهى
رقية : شكووون هاد نزهة تاني .. واتاتجيبو شي سميات كتعرفوهم غانتوماااا !
لؤي : لا ... انا جبتليك قدس .. كنعرفوها كاملين .. انا كاعما عندي مع لبراااااني .... ودابااا
قضيو معياا لغرااااض .. نهار يوقف داك لبغل على الزواج وديرو ليه نهارو. مادخلوهش ليا فنهاري .... دابا اش قلتي اخالتي لامار ؟ والله ماتلقاي ماحسن مني والله ....
لامار : هههه اولدي شوف معاها هي هههه انا واش غانتخير فولادي .. راك واحد منهم ( شافت فقدس ) اش قلتي ابنتي
قدس : ( شافت فيه وفيهم لي كلهم كيتسناو فيها تهضر ) و ... وا ....
باقي ما كملات هضرتها .....جا جود لي سمع حديثهم وهو جاي .... سلم على رتاج ... وتلاح على الفوطوي موسع رجليه ولؤي غير شافو وتفكر الضربة لي فحنكو وزاد هبط الكاسكيط لي لبسها خصيصا باش ضلل ليه وجهو وماتبانش بزاف ....
جود : واهضري مالك سكتي ! كملي اش كنت كاتگولي ...
قدس : اا ... م ....
جود : بغيييتيه !
رقية : ومالك كاتهضر معاها بحالا غاااتسرق ! راه غا الحلاااال ... ولا الحلااال ولا يجيكم عيب !
لامار : ( كاتشوف فيه ) راه لؤي اولدي ( قاطعها )
جود : فخبااااري الامار فخباري ...
سلطان : ( قرب راسو للؤي كايشوف فيه مصغر عينيه تحت حنكو لي كان كايبان شوية منفوخ ) اااااه .. لا فخباااارو اخالتي فخباااارو .... ( شاف فجود )ومواااافق تاهو .... غااا زغرتي اجدة .....بالبنان والبانون ...( شاف فقدس ) هاكا تايقولو ليها ؟
قدس : ( تحت سنانها ) كادعي معايا بالبنان انا قردة ؟
لامار : اوا شنو قلتي ابنتي ! راه كولشي بخاطرك نتي
قدس: ( كاتشوف فلؤي وفخوها و تسرط ريقها ) للا ...م ...مم ...ماشي مشكل صافي ... نديييه ماشي مشكل ...
سلطاان : هههههههه لا مابغيتيش بلاش هههههه كتهضر بحالا غادير فيه خير هههه ديه مسكيييين ديه هههههه
لوؤي : ( ضربو مخدة ) سسسسكت شوية ( شاف فقدس ) تي كيفاش ماشي مششكل !!!!
رتاج : والبنت حشمات ياه ! صافي علاش غاتحكرو عليها .... الحلال مكيهرب منو تا واحد ....
سلطان : ( ضرب جود لكتفو) نووض اصااحبي خلي البنت دوي ، نتا ززززمتيها نوض ....
جود : ( ناض وقف ) هاهو ناااايض ( داز من حداها وجبد ليها وذنيها تازيررااات على عينيها ) منننبعدد ونتفااااهمو ...
خلاها ومشا لبيرو عند باه يشوفو اش كايقول وقدس بقات تحك فودنها وكاتشوف فماماها..... وسلطان بقى يضور راسو ضاحك وناض تاهو باش تهضر معاهم على خاطرها ومشى يكمل مع انس .....
لامار : ههه متخااافيش راه غا كايهضر ...
رقية : اوا اولدي ( شافت لعند لؤي ) وفااااش خدام !!!!
لوؤي : هههه ( جاتو الضحكة وقاد الجلسة وشاف فيها ) واهو انا ماخدماش .... ولكن كانضبر على راسي ..... متخافيييش
رقية : لا .. .قوليا خدمتك ملي باغي تزوج .. انا في علمي باك لي كيصرف عليك ....
لوؤي : وتاحنا اجدة مغنتزوجوش دابا .. سير واحد عماين
قدس : عمااااااين !!!!
لوؤي : ( شاف فيها ) ثلث سنين ؟
قدس : تسع سنييييييين
لؤي :واابزاااف .. هانتي نديرو ربع سنين ؟
قدس : ثمن سنييييين
لوؤي : نخليوها خمس سنين !
قدس : سبع سنين مغانزيد عليها تاشي عااااام
لوؤي : ست سنيييين ...( قدس كترمش فيه وهو سلم على رقية ) الله يررررررربح .... راه والله مغاتلقااو بحال هاد الثمن فالسوق بالله .....
رقية : تاشناوهوا هادشي لي تفاهمتو عليه دابا ؟ الصداق ؟؟؟؟
لوؤي : لا ... هذا الحمااااق ... كيجي لبنتكم مرة مرة ونا خصني نهزها على قد عقلها ...
حياة : ههههه هادو راه السنيييين اخالتي الحاجة .... قاتليه خاصك ست سنيييين يتسناها عااااد يتزوجو ....
رقية : هاااويليي على ست سنين كلها ؟ مالك ابنيتي شارية بلان فشي تجزئة مزال ماطراساوها !!!
لؤي : وا غا خليها دوي اجدة ... غامادخلوووش لينا الضو لداك التجزئة ومايكون غا لخير ....
قدس : ماشي ديما غاتصدق ليك .....
رقيو. شناهي هادي لي غاتصدق ليه ؟
حياة : غا واحد الكيكة اخالتي الحاجة ماديش عليها ....
قدس : انا موافقة اه ... وو لكن مغاانتزوجش داباااااا
رقية : تزوج قويسم ويكون خييير ...
لؤي كيشوف فقدس لي تقاداو ليها ودارت مخدة على رجليها كتنهج ....
لوؤي :هانتي ملي يخطبوها جري ليها على الخطاب هههه
سلطان : ( كايعيط ليه ) لووووؤي ...... تا اجي اصاااحبي ( كالس مع انس فالارض و حاطين تمارين على طبلة د زاج ) اجي راه هاد المضااااارع شحال هادي ماسمعتو ....اجي فكني من خوك اصااااااحبي ....
لؤي : مضارع ! داكشي ديال كان وخوتها لا !
يتبع...
التعليقات
لا توجد تعليقات بعد، كن أول من يعلق.