محتوى القصة
اسد غير وصلو خبارها دخلات لباطو عاد هدن فيه النفس وكمل اجتماعو .. اما جود غير وصل سلطان لدار يكمل نعاسو مشا دريكت لكاراج لقى الناس لي دار معاهم كيتسناوه ودخل حيد حوايجو لبس كومبيليزون بحالهم وبدا الخدمة ... منعايسش لا نهار لا ليل ....
بيلسان غير وصلات لكندا تحطات طموبيل دالشيفور ديالهم قدام الفيلا ونزلات كتستنشق عبير حديقتهم لي توحشاااتها ... ومشات ديريكت لبيتها لي كانو خملوه الخادمات بعد ماعلماتهم اريج وطاحت على السرير على ظهرها .. اول مادارت هو شافت تيليفون مالقات حتى اتصال وحتى رسالة واخا غيكون جاه خبارها انها سافرات مكتراثش يسول ! .. وهي تطفيه فخطرة وجبدات مجر ولاحتو فيه وسداتو .. ورجعات طاحت على ظهرها كتواعد راسها ان هاد الشهر مغتهضرش معاه ... وغتحاول تفكر وهي بعيدة عليه بدون عاطفة .... جود لي كان ربع سنين وهي كتبكي عليه .. هاهو بين يديها دابا .. اوا ... ؟ شنو هي المرحلة التالية فحياتهم ؟ واش غتبقى حياتها كاملة كتبكي بالفرحة وتشكر الله حيت ولاو مع بعضياتهم ؟ كيغادير لهاد العقلية جديدة ديالو ؟ خاصها شهر يلاه تقنع راسها انها مرتابطة بشخص جديد وماشي جود ... شخص مغرووور بلا قيااااس على انه يخضع عليها ... فنفس الوقت كببررر فعقلو ومغيجلسش يلعب معاها بحال شحال هادي .. جود دشحال هادي لي كان كيلقاها شادة جوان ويضربها ضريبات خفاف للوجه او يتقلق منها حتى تتواعدو انها مغتعاودش ويرجع يعنقها .. ماشي هو جود ديال دابا .. لي مرمرد بانوثتها الارض بنظراتو الباااردييين .. وسؤال واش "نت فيييغج" خلاها تتصرفق .. وتعاود حساباتها ... وتستوعب انها مع واحد لي تبدل مية وتمانين درجة .... شخص اخر فجسد جود .... خدات نفس عميق وهي كتحاول تخرج من المود ديال بيلي العاشقة ديال جود ... لبيلي القوية لي تقدر تواااجه واحد بشخصيية جووود الجديدة ... وتولفها وتزيد لقدام ....
لوؤي غير رجع لدار نعس وملي فاق حس براسو حسن من لول ..رغم انه عدنان عفاه ولكن بغا يمشي يكمل .. بغا يوصل لباباه بلي قاااادر يدير شي حاجة وماشي ولد فاشل كيفما كيظن ... بغا يبين ليه بلي غيقدر يعول عليييه .. باش حتى الا سافررر لخدمة اخرى غيكون خلا موراه شي حاجة زوينة دارها لباباه .... خدا من الدورية كونجي وهو مهني ان قدس فالعطلة ومكتخرجش بزاف باش تلاقى سالفادور ومهني كتر ملي عرف ان سالفادور سافر ملي تأجل الماتش .... خدا الكونجي وانغمس فالمتحف مكيطلعش الراس حتى يظلام الحال ويرجع ينعس وينوض تاني الصباح للخدمة ومرة مرة كيجي عندو جود كيعاونو .... سلطان شد طريق مع الاكواذورية للمالديييف .. حياتو مرتبة ايطاب باغ ايطاب ... كرة القدم قادرة تقنع باه انها خدمة وقادر يدخل منها مدخول يعيشو فمستقبلو .... ولكن رغم الرخاااء .. رغم كاع الملذات لي كايعيش .. رغم انه جالس على جناب لابيسن وقدامو صينية عليها أنعش المشروبات وكل الفواكه البرية والبحرية ... وقدامو اجمل العارضات الاكواذوريات ... الى انه كيحس بالملل ! كيحس بالشغف معندوش .. مكيحسش بالسعادة الكااااملة .. كانها شي حاجة ممرتباش .. شي حاجة ماشي هي هاديك فحياتو .. كانه مل وزهد من كولشي ومبقاتش شي حاجة كتغرييييييه ... كيضحك للجميييع ويبان عادي ولكن من داخل كيعيش واحد الحالة نفسية صعيييبة ... انه صعييب يلقى شي حاجة تعجبو .. كولشي ولا يجيه عادي .. حياتو مرتبة لواحد درجة كتخنق .. شحال من مرة كيشوف مشاكل لوؤي مع باباه .. مشاكل جود .. العقبات لي فحياتهم .. رغم انه مشكل بنبسة ليهم .. الا ان بنسبة ليه شي حاجة زوينة .. انه عندهم شي حاجة كيفكرو ملي كينعسو .. كيحس براسو قتلو املل .... البنات ولاو كايبانو ليه كاملين بحال بحال ... كامليين مملييين .. تاشي وحدة مكتقدر تهز الشغف فصدرو وتاشي وحدة مكيقدر يحس معاها بشي متعة جديدة .. نفس المتعة مع الجميع .. حتى مل داك المتعة ومل هاد الحياة ... وزهد فكولشي ... ضرب الطابلة وناض لابس غير سروال بيض وشوميز محلولة بيضة على صدرو العاري ودخل لداخل مخلي موراه عشيقتوو لي متكية على رولاكس بدوبياس غير كتشوف مستغرربة .... وجمع حوايجو وشد طيارة لفرانسا كمل عطلتو بوحدو ..... بدون تفسير ....
من بعد عشرين يوم .... لي دازت فيهم 5 مباريات على اصيل .... قدر يخلص المواتيي ديال الثمن دالريسطو واليوم مشا باش ياخد السوارت ... جاو موالين الكاراج نفسهم وقدمو ليه السوارت ديال الكاراج ... وبقات خاصة 50 مليون باش ياخدو كامل ... سنا معاهم على التزامات باش يبدا الاصلاحات ... ونضاضر فعينيه مخبيين الكدماااات .... مخبييين العلاامات لي خلص بيهم هاد الريسطو .. الهدف لي بين عينيه كان كيخليه يشوف الخصم بحال شي قنطرة من القناطر لي كيوصلوه شوية بشوية عند قسم .... بييتر مابقاش عارف يعيش ولا يلعب بلا شي حاجة سميتها اصيل .. مباريااتو فاش كيتفرج ليه كيحس بالجنوووون .. الفلوس ولات داخلة بحال الشتاااء ... ولا شبه مجنون لاسم ذ واااانس ... ومهوووس بانه شي نهار يقدر يقنع اصيييل بعقد العبودية بعد مارفضو خمسة ديال المرااات وبلي باغي يلعب حر .. باغي غير يسالي الخلاص ويسالي هادشي مبغاش يبقى يتبعوه وهو ديما كيرفض هاد النوع من العقود ... الفلوس ولاو داخلين بقوة عند بيييتررر تاولا مهووس غير ييه ...مبارة مور مبارة كايخليه يفقد عقلو .. يحالا لقى دجاجة كتبيض دهب ... اما اصيل هدفو كان فقط يشد سوارتو ونهار يسني على عقد البيع والشراااء ويقدر يدير روجيستر دكوميرص ويدخل لقصر الاسماعيلي من بيبانو يطلب فيد قسم .... كواحد قادر يأمن ليها مستقبلها ..... غايخلي كولشي موواه....
بعد مرور شهر وتسعة أيام ....
11 صباحا
تقدمات العارضة لي كانت بغوب حمراء وهازة فيديها مخدة صغيرة حمراء موبرة فوق منها مقص ذهبي لعند عدنان لي واقف امام بوابات المتحف المنقوشين ... بجنابو رتاج لي شادة فدراعو ولي لابسة طلة كلاص سروال ابيض وشوميز ارجوانية ونضاراتها دالشمس والعائلة الاسماعيلية كلها متواجدة فالخلف ديالو والصحافة كيصورو الحدث د قص الشريط والمدعوين القلال لي غيحضرو للافتتاح منهم مسؤولين وباحثين فالاثار و مختصين اما الضيوف حتى للسهرة ديال الليل ....
يالاه غيقطع الشريط هو يشوف لجنبو للوؤي لي كيتسناه يقطع بابتسامة على وجهو هادئه .. كان لابس تاهو طلة كلاس فالازرق .. وما ليه يقرب لعندو ولوؤي تبسم ليه ورتاج جراتو وقف حداه وشد معاه المقص ومدو معاصمهم بجوج لجيهة الشريط ...
جوج دالمعاصم كأنهم كيرويو قصة بين الماضي والحاضر ... نفس السمرة .. نفس القوة .. نفس الشعريات .. نفس الخشونة ... يد شبابية يلاه قالت بسم الله فالحياة و وعقابيها وحفرها .. ويد ضربات فزماااان حتى عيااات وتجعدات .... وبقى محافضة على قووتها وقوة عروووقها ... دم واحد فيهم تيغلي .... كايغلي بالنفس والكبرياء والقوة والشهامة والنخوة ....
قطعو الشريط تحت تصفيقات الجميييع وضار عدنان بابتسامة محييهم .. وتقدمات العارضة حلات الباب دالمتحف .... باش يفصح على شجرة الارز الشاااامخة لي مستقبلااااهم احسن استقبال ولي كانت هي واجهة المتحف وهي المركز ديالو ... كانت على شكل غومبوان صغير وسط من البناية .... ودخلو كلهم النصف من اليسار ديالها ونصف من اليمين كيشوفو مع الفسيفساء ومع النقوووش ومع السسقف الخشبي المنقوش ... ومع التحف لي معلقين فصناديق زجاجية على جذوع شجرة الارز .... شي لي خلا عدنان كل مرة يقلب على لوؤي بعينيه باش يبادلو بنظرة انبهار على هاد الافكار لي متخيلهمش يخرجو من راس ولدو لي كان كيظن كيعرف غير يخرج يسهر ويسافر وياكل وينعس ...
ولوؤي فقط مبتسم ليه بفرحة لي عجبو الديكور .. رغم ان الجميع منبهر الى انه هو هامهاه فقط نظرة باباه ...
الصحافة كيصورو وعدنان واسد وسفيان ويونس فالمقدمة ومعاهم الباحثييين وعدنان كيقدم ليهم كل تححفة على حدى ... ويشرح تاريخها .... اما لوؤي رجع لور فين واقف جود وسلطان لي كانو تاهوما بالرسمي لي كيناسب هاد المناسبة ... جود كان بسورال اسود وشوميز تاهي كحلة معلي ليها يديها معريين على معاصمو لي مزين ليسر ديالو بساعة فضية ومرجع شعرو لور وتحسينتو مرتبة .... ومعاه سلطان لي كان بسروال بيج مخطط و شوميز مارون وجيلي بيج بثوب السروال وسنسلة فجيب لي فصدر ... وتكا حداهم على السارية وهز على النادل المشروب ديالو كيتفرج فالحضور وفرحان حيت باباه كيبان عاجبو هادشي حس بجهدو ممشاش هباء ...
سلطان : صافي من هادي لزواج ابنعمي .....
لوؤي : ( كايتفرج فيهم ) بحالا كرهنا ....
سلطان : ها جود قال بسم الله ... تبعو نتا .. انا خليوني نربي ولادكم ....
لوؤي : بايبي سيتر نتا !
جود : علاش نتا قطعوه ليك !
سلطان : كون كان الزواج فيه غا ل*وا نتزوج من غدا ...
لوؤي : وشنو فيه ؟ ...
سلطان : سول باك يقولك شنو فيه ...
سلطان ( شاف لجود ) قسم مغتجيش ليوم !
جود : لا ... تالغدا ...
لوؤي بدا يرشف من كاسو كيشوف بعينيه و كيقلب عليها .. تابانت ليه بعيدة واقفة حدا ماجدة وبدا يطلعها يهبطها من لي نزل من طموبيل تعرمات صحافة مقدرش يشوفها فخاطرو ... كانت باونسومبل فالخضر وفوق منو شوميز بيضاء ...
وهازة صويك صغير فيديها بلباااقة وكتمشى كيف شي اميرة ديما دافعة انوثتها لي كتخليها تبان ديما محط الانظار وطاغية .. ومكتخلي ل تاشي واحد يكون حداها انه يسرق منها الاضواء .. ديما هي الملفتة بنظراتها وبثقها فنفسها ومشيتها وحركاتها ... وهو كيجغم من كاسو وكيتنهد وينفت انوثتها لي كايحسها بحال شي جرثومة كتغلب على مناعتو ...
وماجدة كانت واقفة معاها بغوب كلاص بيضاء و جامعة شعرها لفوق وحلقات كوحل كبار فودنيها .... قلبات عينيها لجنب هو يبان ليها جود واقف مع سلطان ولوؤي ... بقات كطلعو وتهبطو عاضة على شفتها تحتانية ... كل مكانو كيجيو للقصر فليلة السبت مكانتش كتلاقاه بمرة .. كان كيدخل معطل ويفيق يخرج بكري .. مكرهاتش كون عرفات الكاراج فين جا ولكن تاحد ماقدر يعطيها راس لخيط .... وهي ضور عند قدس ...
ماجدة : بيلسان مغتجيش لسواغي بليل ؟
قدس : سي غتجي ... فليل غتكون وصلات ...
ماجدة : مممم علاش مجاتش لبارح فالاربعبنية دجدها .. ولا فيهم غير دموع التماسييح !!!!! ( جغمات من كاسها )
قدس : ( ضارت عندها ) منيتك !!! راه كانو جايين واياد وزياد خرج ليهم اجتماع وعمي يونس لي قاليهم يجلسو تاليوم .. زايدون فراق جدي كاين فالقلب مكنبينوش على برا باش بنادم يشوف راحنا مقهورين ....
ماجدة : راه جدنا كاملين اقدس .. علاش كتنفيوني بحال هاكا
قدس : شكون نفاك ؟ راه نت لي كتنفي راسك .... واش عمرك شفتينا حنا قلنا شي هضرة ناقصة ولا استهزئنا بشي واحد من الاسماعيلي .. وعلاش نتي شاداها مع بيلسان قد هاكا .. اش دارت ليك كاع ؟
ماجدة : ماشاداها مع تاشي واحد .. نت عارفاها مكتسرطش ليا وكتجيني حامضة فوق القياس ...
قدس : والا كانت هي حامضة متكونيش نت باسلة ( ضارت براسها كتشوف لواحد لافيش )
ماجدة : كون مامربياش معاك ومكنعرفش لسانك ديما كايقطر العسل كان غايبقى فيا الحال ههه .. ( رجعات جغمات من كاسها ) علاش سااافرات ؟؟؟ زعما كانت يالاه جات ..
قدس : ( باقا كتشوف وتستكشف ) معرفتش ..يمكن قنطات ..
ماجدة : قنطات وجود كاين !
قدس : ( كتقلب بيديها فالصفحات ديال لافيش لي معلقين ) علاش جود قالو ليك كيدير ليها لانيماسيون بليل ...
ماجدة : لي قصدت انو زعما عارفينها ميتة علييييه ... مغتسخاش بيه وتمشي
قدس :ماعرفتش اماجدة ... بيناتهم ......(كاتقرا فلافيش ) واااااو 800 قبل الميلاد !!!
ماجدة : ( شافت لفين كتشوف ورجعات تنهدات وقلبات عينيها بملل ) معرفت فوقاش يسالي هادشي .. رجلي حرقوني .... حقااا ( ضارت عندها ).. كيسولو فييك البنات اصاحبتي .. تلاقيت بيهم نهار السبت فالكلوب قالك قلبتي عليهم
قدس : ( زادت كتشوف ) هوما لي قلبو وانا ماعندي مندير بالمنافقات
ماجدة : هاء ؟ ياك كانو صحاباتك وعندك عزاز .. راه رانيا وليليا كتعرفيهم من البيريمير زعما
قدس : نورمالمون تاهوما خاصهم ياخدو هادشي بعين الاعتبار ... وبلي كنعرفهم من البيريمير ... ويديرو بوجه هاد العشرة ...
ماجدة: اجي ! بصح تخاصمو على ود داك الكليكة جديدة لي دخلات ؟
قدس : اه ... ملول شافوني ماحملتهمش .. ماعجبووونيش ماشي ضروري نجلس معاهم .. انا لي بنت الروووكان وممكبراش قدهم .. متسرطووووش ليا ومعندديش مع التبعكييك .. اوا ملي شفتو صاحبتكم رجعات لور تبعوها .. ماشي تفضلوهم هوما عليها .... خليهم ينفعوهم ...
ماجدة : وراه رجعو ليك ومبقيتيش كتجاوبي تانتي اصاحبتي شحال كتححقدي .. راه قلبو عليهم تاهوما وديما كيسولوني عليك ....
قدس : ماجدة .. انا كنعطي نيتي .. ونهار نقلب كنقلب فخطرة .. مكنرررجعش ... وملي تلاقايهم قوليلهم يفوتوني انا عارفة عمي عدنان غايعارض على بواتهم هاد الليلة وعارفاهم غيكونو ... قوليلهم يقققلبو علياا حسن منشوههم وراهم عارفيني كيدايرة ...
ماجدة : وي معروضين قالوها ليا ...ومعروضين تاداك كليكة راك عارفة داك صوفيا باباها هو شريك خالي عدنان ....
قدس : ومزيان .... يبعدو غير مني ...
ماجدة : وصاافي بردي بردي ونت كتششعلي اصاحبتي بحال العافية .... وهانتي خسرتي صحاباتك على رباعة دالقحاب
قدس : انا كنخاف احبيبتي الى خسرو ليا ضفاري ولا الى خسارت ليا لاطاي ولا خسرت شي ماتش بلاي مع خويا وسيم .... اما صحابات هادوك اخر همي .... مانربي الكبدة تاعلى شي بنت الكلب ... يمشيو يقودو جملة ...
ماجدة : ( حطات الكاس وعنقات دراع قدس ) الالة خليني غير انا صاااحبتك بااااراااكا عليييييك ... وحدة من الاسماعيييلييين مغتجي معاها غير اسماعيلية بحالها ...
سلاو من الجولة ديالهم على المتحف واتجهو لقاعة المؤتمرات كانو الكراسي كلهم محجوزين باسم كل واحد اما المنصة مخصصة لعدنان صاحب المتحف وحداه الباحثيين والمجمعين دالاثار لي تما و المدراء دالمتحف والمسؤوليين ديالو قدامهم الميكروفونات ... كل واحد شد بلاصتو وعم الهدوء والصمت فالقاعة والصف الاول كان مخصص للعائلة الاسماعيلية ... والصحافة فجناب مقادين كاميراتهم ولي ميكخو ... والصحافة لي غاتسأل جالسيين ....
وبدا النقاش حول الاثار والتحف لي مجمعة فالمتحف والرخص ديالها و المكان فين كانت من قبل وكاع المعلومات لي كتحتاج باش يكملو المقال الافتتاحي ديالهم ..
الاشبال حسو براسهم بحالت كاينين فشي حصة ديال ساعتين دالفلسفة مباغاش تسالي وتاتيليفون ممنوع يجبدوه يدوزو فيه الوقت ضروري يجلسو بظهر مستقيم ويسمعو .. ويصفقو بلباقة و ايتيكيت لان كولشي كايحتمو عليهم البروتوكول ومحسوب عليهم ....
الصحافة سؤال تابع سؤال بنظام مرة يجاوب عدنان مرة الباحثين لي حداه كل مرة والسؤال لمن كيكون موجه ... ورتاج معوجة راسها وكتفرج فيه .... واخا كبر ... واخا لحيتو تلبسات ببعض خصلات الشيب .. رغم كولشي ... كيبقى فعينيها ديما عدنان لي كافحات باش توصل ليه ولي كافحات باش توصل لنهار لي تشوفو حقق احلامو وولادو كيتفرجو فيه بافتخار ... لوهلة سهات وهي كتفكرو فالبلوك وقلبو بين يديها كيدق للمرة التانية .... من داك ساع وهي كتحتفل ليه بجوج اعياد الميلاد .. تاريخ ازديادو الاول وتاريخ ازديادو الثاني .... قلبات عينيها فين جالسين لوؤي وفيصل ... اما حتى انس مامفروضش عليه يحضر لبحال هاد المناسبات بحكم انه باقي صغير ... كتشوف ولادو كيفاش كيتفرجو فيه ... طريقة باش جالسين لي كتحسها كلها فيها مقتطفات من عدنان ... سمرتهم الاشبه بالرجال الاتينيين وهي السمرة لي كتميز رجال الاسماعيلي .. نظراتهم الثاقبة والحادة .. ثقتهم فنفسهم ... جادبيتهم ... شعيرات يديهم الرجولية .... نخوتهم ... كتخليها تحس بافتخااررر كبير .... لحلم تعبات باش تحققو ... كل مرة كانت كتجيه كريز وولادو صغار كيقول ليها موحال نعيش تانشوفهم رجال .... وهاهوما رجال كيتفرجو فيه .. معرفاتش علاش دمعة نزلات بلا متحس ومدات صبعها تحت عينيها بلباقة مسحاتها وحلاوت تبسم وتشوف للمنصة باش متلتقطش الصحافة شي صورة ليها ويطلعو الاشاعات ...
وصلو الصحافة لاسئلتهم حول الديكور والديزاين دالمتحف هو يقرب للمايك ..
عدنان : مغنقدرش نعطي شي معلومة حول الديزاين وماشي انا لي تكلفت بيه .. الديزاين تكلف بيه آن اوطخ بيغسون ...
الصحفي : يشرفنا نتعرفو على هاد الفنان ...
لوؤي علا ححبانو بجوج باستغراب لهاد "الفنان" لي سمع وجود سلطان كيضورو فريوسهم ضاحكين عليه .... وعدنان شاف فيه بنظرة افتخار ...
عدنان : ولدي ....
لوؤي بعد مكان كيشوف لتحت .. غير سمع داك ولدي طلع عينيه بزربه فباباه .... وشاف النظرة والطريقة باش قالها ... كترجم رضى وافتخااارر كبير قدام الناس وقدام الكاميرات ... طالما تمنى يشوف هاد النظرات فعينيه اتجاهو .... طالما تمنى شي نهار يدير شي حاجة لي تخلي باباه يفتخر بيه وسط المجالس ... ولكن مكانش ابدا باغيها تكون فهاد المجال .. كان باغيه يفتخر بيه وهو فطريق لي باغيها هو ... كان كيظن عمر باباه شي نهار غيشوف فيه بحال هاكا ... ولكن رغم كولشي حس بقلبو فرح .... رغم انه شد هاد المتحف بزز وباقي بين عينيه المشهد لي لاح ليه الضوسي دالمتحف لي باقي كولو غير كادر وقاليه غتكلف ليا بيه وباصلاحو وتنظيم الافتتاح .. كيفاش كانت كتبان ليه المهمة صعييييبة .. وكيفاش غيقدر يوفق بينها وبين خدمتو ... وغير على قبل هاد النظرة هو زعم ... خدم ليل ونهار .. مرض ... عيا ... انسحب شحال من مرة .. ورجع كيكمل ...فقط على قبل يبين لباباه انه ماشي ولد فاشل كيفما كيحساب ليه ... حاول يبتسم ليه تاهو بحنية رغم ان معندوش مع المواقف لي يتسلطو فيهم الاضواء عليه ... ولكن وما لباباه غير براسو بمعنى هدا واجب ... وقدس كتشوف فيه وعلى شفايفها ابتسامة معارفاش شنو سبابها ..كاع هادي فرحة وافتخار بولد عمها ؟ ... بداو كيصفقو عليه والصحفي تدخل
- ممكن تجاوبنا على بعض الاسئلة ...
لوؤي علا حجبانو ورتاج كتومي ليه ينوض وهو بدا يحك مور عنقو محاملش ... ماعندوش مع بحال هاكا وواحد من الرجال لي حدا عدنان وقف باش يخلي ليه بلاصة هو يتنهد وناض وكيومي ليهم غير براسو شاكرهم على التصفيقات ... وطلع للمنصة حدا باباه لي كيشوف فيه وجلس حداه ... وقدس كتشوف للتوتر ديالو و الاحراج فعينيه .. هدا هو لوؤي لي كتعرف !.. لوؤي لي مستحيل يحشم من شي حد ولا من شي حاجة ؟.. صدق كايحشم ؟
كتحس براسها وهي جالسة على الكراسي مع الناس كتشوف فيه هو لفوق بحالا كتشوف لوؤي الاسماعيلي لي كيشوفو ناس .. ماشي لوؤي لي كتعرف هي .. وعاد كتفهم علاش عندو دوك المعجباااااات كاااملين ... وعلاش فالانسطا كتر من مئة باج دليفان ...عضات على شفتها وهو كيشوف بجدية وماحساتش تاقالت فنفسها " يااااا شحااال زويييين ديلمو !!! " ... حسات براسها شنو قالت وهي تجمع ضحكتها وقادات الجلسة كتشوف فيه بتركيز ....
الصحفي : قول لينا موسيو لوؤي .. منين استلهمتي ! يعني كيف لاحظنا جميع .... ولي لفت انتباهنا هي العشواائية لي محطوطين بيها التحف ..
لوؤي : ( تنحنح مسرح صوتو وقرب للميكرو كيهضر بجدية وعدنان كيشوف فيه ) ولفنا اننا نشوفو متاحف فيهم التحف مرتبين فخطوط متوازية ... ومقادين بالميليم ... ديكور روتيني وكيجيب الملل لي ناس لي كيمشيو للمتاحف غير بزز باش يديرو لخاطر لباباهم بحالي ( عدنان علا حجبانو وهوما شدو ضحكتهم حيت مكيعرفش يزوق فهضرتو ) داكشي علاش حاولت نبدل شوية ونخليهم عشوائيين وانه تقدر تشوف واحدة من التحف فشي بلاصة غير بارازار حيت كنتي كتشوف لتما .... باش حتى لاكنتي غير جبروك تمشي لمتحف ... ومافيك متشوف ... غتشوف بزز عليك ....
الصحفي : هههه فكرة جميلة هادي .. ومنين جا الالهام ؟
لوؤي : الواليد نهار حط المشروع بين يديا ... كان الشرط الاساسي و العنصر الرئيسي فالديزاين .. بغاه يكون شجرة الارز .... اول مجا لبالي هو الشجرة كيكونو جدورها عشوائين ... شي لي خلاني ندير التحف بشكل عشوائي معلقين بحال جدوع شجرة الارز ...
الصحافي : ممتاااز .... وهادشي لي لفت انتباهنا فالاستقبال الشجرة لي كاينة فالوسط عطات جماااالية للمتحف وغيرات الروتين ....كنعرفو ان الكونسيبت دالمتحف هو الطيران و كل ماكيخص الطيران فالقرن العاشر حتى الخامس عشر ... شنو العلاقة بين شجرة الارز ومجال الطيران .....
عدنان : مكاينش علاقة .. فقط انه المتحف كاين فالمغرب .. بغيت لمسة مغربية ومالقيتش ماحسن من شجرة الارز .....
الصحافي : اختيار موفق حتى الرائحة لي كنشمو فالمتحف كلها كذكرنا بهاد الشجرة وكاننا كنضورو فوحدة من غابات ازرو و افران .. الافتتاح والديزاين كان جد موفق ... ولي سمعنا انه تهيئ فاقل من تلات اشهر ... موسيو لوؤي .. كيف قدرتي تنجح افتتاح بهاد الروعة فهاد الفترة القصيرة ...
لوؤي : ( شاف فباباه ورجع شاف ليه ) الى بانت ليك شي حاجة صعيبة باش تندار ... قلب فيها على هدف .. كان عندك هدف فداكشي راه غتنجح فيها .. مكانش .. راك مغادير والو .... وانا فهاد الافتتاح عندي هدف ... يقدر يبان ليكم نتوما الهدف هو افتتاح ناجح ... بنسبة ليا لا .. الافتتاح مكان غير وسيلة ( شاف فباباه ) باش نقدر نقدم شي حاطة للواليد ديالي بعد ما قدم ليا كولشي فهاد الحياة ....
رتاج الدمعة لي كانت مسحاتها قبل رجعات نزلات وبغزارة هتد مرة تاعضات على شفتها بفرحة وعدنان كيومي ليه بالايجاب و قدس كتصفق معاهم فرحاانة ليه .... واسد كيشوف فيهم خاشي صبعو صغير ففمو .. ومبتسم ومفتخررر بيه ...
الصحافي : جواب جميل ابدا ماتوقعتوش ... وفعلا الافتتاح كان ناجح .... نتمناو ليكم مزييدا من النجاحات الاخرى ...
الصحافي 2 : موسيو عدنان ... كما ديجا عرفنا فاش كان الموسيو لوؤي صغير انه الميول ديالو للامن .... واش الحلم تحقق ولا مزال فطور الانجاز ... وواش غيدخل للامن او انه غيتبع المجال ديالك بعد النجاح لي كنلاحظو من خلال هاد الافتتاح انه بدا تيقرب لمجال ديال بابااه ... وبدا يدير فيه الخطوات الاولى ......
لوؤي شاف لعدنان محاااملش ابدا هاد السؤال والمورال تبدل ليه وعدنان ابتسم وقرب لميكرو ...
عدنان : لا هادشي مكاينش .. كان حلم طفولة ومابقااش ... منقدرش نسخى بولدي يدخل لشي مجال لي يقدر يديه عليا ... طبعا مجال ولدي لوؤي غايكون هو المجال ديالي ... فقط باقي كيتعلم ...
اسد عض على شفتو .... ولوؤي وااضح من ملامحو كيفاش تغييرو وهو هادشي كامل دارو غير باش يبين ليه انه قادر يديرهم بجوج ... تنهد محاملش راسو واستأدن منهم وجر الكرسي وانسحب نازل من المنصة و تاهوما كانو سالاو اسئلتهم الموجهة ليه وخرج من البناية بمرة واسد متبعو بعينو وتاعدنان ماحاول يبين والو ورتاج بغات تبعو ومبغاتش تاهي تلفت الانتباه .... فلاخر ناض موراه جود ... وسلطان بقا كيشوف ووفلخر تبعهم .... وهوما كملو كلمتهم الاختتامية ... وقدس كتشوف للباب لي خرجو منها عاضة على شفتها وهي عارفة ان هاد الهضرة حساسة بنسبة ليه وديما كان نايض عليها الصداع ...
خرج لوؤي لبرا حدا طموبيل دجود جابد كارو كانت دنيا تما خاوية كولشي لداخل ... تاتبعو جود ...
جود : تسطيتي ولا مالك نتا .. علاش مبين ليهم اصاحبي !!!!! ...
لؤوي : ( كينفت دخان ) انا راه مكنعرفش لهاد ال**وي ... ييدورو يتقوااودو ...
جود : ( كان كيمشي ويجي وشدو فيكساه معاه وسلطان لحق عليهم ) شووف فيا .... ( لوؤي كيشوف لجنب كيشوف مغزف هو يهضر جود بحدة ) شوووو فيا
لوؤي : ( طلع فيه عينيه )
جود : راك فالبوليس !
لؤي : ( بقى غير كيرمش وفلت منو بتوتر ) اشمن بوليس ....
جود : ( كيشوف فيه بشك وسلطان تاهو مصغر عينيه .... وهضر بحدة وجدية ولوؤي كايشوف فيه) لوووؤاااي راه مكنعرفكش غير البااارح باش تجي تبيدقني ..رااا بررربي الوؤاي وتكون كتكذب هاكا عيني فعييينك ونتا مخبع عليا شي حاجة .. بررربي لابااااقي شششفتي ووجهي ... دوزت ليك لولا مغاندوزش تانية ....
سلطان : ( دفع جود وقرب عندو ) درتيييها آ لوؤي !!
لؤوي غير كيتنهد ولاح الكارو زطم عليه وحيد الفيست دالكوستيم لاحها فوق الطموبيل وبدا يرخف الصدايف ديال الشوميز وهوما كيشوفو معاه وشاف فيهم ساخط حاط يديه على جنابو كاينفخ كيحس براسو غيطرطق
لوؤي : مال ديييلمكم مضووريني .. اش واااقع ...
سلطان : هضضضر
جود : ماامضوييرنك ما تااا*لوة .. غاااتجااوب وبلا كدوب ... واش رااااك مع البوووليس ....
لوؤي : اااه ... راني معاهم .. ومنبعد ....
سلطان حل فمو وجود بقى غير كيرمش فيه وضار كيمسح على وجهو بصدمة ورجع شاف فيه.
جود : والبورتوووكول ؟؟؟؟؟؟
لوؤي : مفخباروش ومغيمنعنيش ( بدا يجبد كارو اخور )
سلطان : كيفاش هاد مفخباروش .. على فين خدام ؟؟؟؟؟
لوؤي : ( شعل الكارو تاني وبدا يسوط الدخان كينهج وكيشوف لجنب ) FBI
جود : ( بصدمة) واااااات !!!!!!
سلطان : اي كانت بلييييف ايت ...( مامتيقش )
لوؤي : ( رجع كيشوف فيهم ) مبغيتش هاد الهضرة تخرج ... راني آجون ... secret agent ( عميل سري)
جود : ( ملامح الصدمة مزال ماتمحات من وجهو ضار شاف موراه ورجع قرب ليه كيهضر بشوية ) واش عارف اش كتگول ....
سلطان : ( بعصبية) واش نتا بعقلك ؟؟؟؟؟ هادشي علاش كتمشي لواشنطن ! .... واش عارف العائلة لاساقت الخبار ..( بنرفزة) واش نتا مرييييض فككررررك ولا مالك !!!!!!!...
لوؤي : ( سف من الكارو تاني وشاف فيهم وعينيه حومر ) فخبار عمي اسد .... هو لي لقى ليا بلاصة معاهم ملي كملت قرايتي ....
جود : اشمن قراية ؟؟؟؟؟ اااشمن قراااية اااولد الذيييينة ياك باك صيفطك لمناااجمنت
لوؤي : بدلت ...
سلطان : واش عارف باك لاجاب خبار هادشي غتجيب ليه لي مايبقاش .... غنحفرو قبرو ....
لوؤي : ونتا عارف بلي هادي اخر حاجة كنتسنى نسمعها دابا ....
جود : ( ضار كيشوف لجنب ورجع دغيا ضار عندو شدو من عنقو ) لووووؤاي راك تترون .... كلنا عندنا حوايج باغيين نديروهم ولكن ماشي على حساب عائلتنا .... كنضحيو براسنا باش هوما يبقاووو بيخير .... ( زاد زير ليه على قرفادتو مقرب جبهتو لعندو وكيهضر مغزززف والعروق فجبهتو ) راه برررب وتوقع شي حاجة لعمي عدناااان لاسمح ليك شي واحد .. نتا ومغتسحمش لراااسك .... ( نفضو من يدو تاكان غايطيح ) مكانش يسحابلي اناااني اصااااحبي ... كتفكر غير فكككرك .. وراك غاتجيبها فيه ...
لوؤي : ( ماحس براسو تاضربو ببونية تاعواج وجه جود لجنب وسلطان وسع عينيه ) غاااتعاود تنفضننني بحال هاكااا غااان**وييييك
جود دفعو بيديه من صدرو تاااتضرب ضهرو فطموبيل
جود : ( هز يدييه فوجهو بحالا غيضريو ) جمع يديييك راه غاانصلييييها مع مممك ... كتقلب عليااا نهههرسك ولا مالك ...
سلطان : ( جر جود بعدو ) ااااشرفة .. ااابنااااادم واش نتوما مراض مالقيييتو فيين ضاربو راه غيصوركم شي واحد هنييييونا ... ( ضار كيشوف موراه ورجع شاف فيهم ) يلاه نقاودو منهنا ونهضرو فشي قققنت .. ماعندنا مامنديرو بصداع
لوؤي : ( هز الفيست ديالو وماشي لطموبيلتو ) مافيا لي يهضر مع شي زامل فيكم قووودو عليا ...
سلطان : ( متبعو بعينيه ) على باشاار كييداييرر ....
جود : هذا راه كيقلب على المشااكيييل هذا ...
ضار سلطان براسو ملي سمع الهضرة بانو ليه خارجين هو يتنهد وجود قاد حوايجو ... ووقفو مقاديين واخا التخنزيرة لي على وجههم مكيعرفوش يحبسوها ... بداو الفلاشات تاني كيضربو من حيث لا يدرون ... واسد قرب عندهم داير يدو فجيب سروال وكيحاول يبان مبتسم للجميع وشاف فيهم
اسد : فين لوؤي
جود : ( شاف لجنب كيحك فوق حاجبو ) غايكون مشا ... ماشفنهاش ...
اسد شد جود من لحيتو تحت فمو مقرب جهو لعندو جود غير كيشوف ....وشاف ليه تحت شنافتو حمرة وجود رد البال فين كيشوف لشفتو هو يعض عليها مصها بلسانو عرف راه تما اادم وطلقو اسد ......
اسد : امممم ....
جود قلب عينيه وسلطان غير كيشوف واسد تنهد ومشا لطموبيلتو ولامار طلعات وقدس ركبات لور اما تاوسيم ماحضرش ... مشا جود لطموبيلتو وسلطان تاهو .... وكلهم ركبو .. وبداو الكارد كيصايبو ليهم طريق وتصافو خرجو طموبيل مور لوخرا .. ميرسيديس د عدنان موراها هامر دسفيان ... . مازيراتي ديال اسد و اودي ديونس ... رونج دعمران وفريراي كري د سلطان و بورش دجود ... زادو وتبعوهم رانجات كوحل دالكارد ... عاد بداو يخرجو موراهم طموبيلات دالحضور .... الكل اتجهو لديورهم حطو العيالات لي خاصهم يصايبو راسهم تاني للسواغي بليل وهوما مشاو لخدمتهم ....
سواغي كانت فالجردة لي ورا المتحف .... الدعوات ترسلو للجميييع والجميع كيتسنى هاد السواغي تاني يتلاقى بالعائلة الاسماعيلية والبنات المعروضات مع باواتهم فالصالونات ومع الميكاب ارتيست ديالهم كل وحدة كتنافس مع الاخرى شكون تقدر تخطف انتباه واحد من الاشبال .. والشباب حتى هوما كيلقاوها فرصة يخطفو وحدة من الشبلاات .... والناس الكبار فرصتهم لصفقات جداد مع كبار الاسماعيلي وصداقات جداد مع نسائهم ...
جود مشا ديريكت لكاراج ديالو .. كان مصبوغ كولو من برا باللون الاسود والرمادي بيبانو حمرين وفوقهم لوغو ديال سيارتوو فالرالي .... وفالحائط ليسير دار نصو زجاج كتبان منو سيارة عتيييقة سوداء .... والحائط دالطابق الثاني الزجاج فيمي .... من برا كتبان بناية راااقية مختلفة تماما على كيف كانت فلول ليسباس لي ضاير بيها قادها ببوطويات ديال الانارة وبعض الاشجار لي ضايرين بيها وهيكل سيارة فيراري من اول ماخرجات ماركة FERARI .... جبد سوارت وحل الباب ودخل .. شعل الضو هو يبان الكاراج لي كان كولو باللون الاسود والاحمر ...
فالحيط معلقين روااايض و كاع معدات الاصلاااح على شكل ديكور.. وخزنات دالماطيريال .. كان ايسباااس كبير ومفروق لخمس فضاءات ... باقي مدخلش السلعة كيبان كولو خاوي منغير معدات الاصلااحات و طابلاات فين كيتحطو اوراق للتصميم ... ماشعلش الضو ديالو كامل بان غير المقدمة ديالو ..... واتجه للدروج لي فجنب لي غير كيقرب كولو كيشعل بالازرق .... الطيم كولو ديال السيارات والسرعة ... والاضواء وطالعين معاه بوطويات ديال الضو بحال لي كايكونو فالرالي ...
وفالحيط لي فجنب الدروج طاوبلوات ديال السيارات و صورو فالرالي وميدالياتو معلقين وشواهدو ... وفنهاية الدرج مرسومة الرسمة لي كاتكون فنهاية الرالي لي كانت عبارة على مربعات بالبيض والاسود مكتوبة فوقهم FINISH بالاحمر ....
وصل للطابق لي كيرتاح فيه ولي كان عبارة على النصف دطابق ااسفلى كانت بناية على شكل كاراج عاااالي و قسمو على جوج طبقات شي لي كايخليك من تحت تشوف للفوق اش كاين ويبان المكتب والفوطوي وtv حيت فارق غير بالزجاج والخشب ...
كان فالزاوية لي فيها الحيط الزجاجي مكتب ديالو زجاجي تاهو وفوق منو الپيسيات ديالو و آلة الطباعة وخزانة عامرة اقلاااام ومسطرات ... مقابل مع البيرو فوطووي احمررر كبيييير عامر مخاد ومريح فالجلسة قدامو تلفاز بسينيما وطابي وراهم مطبخ صغير محلول كولو مرون .... مشا ديريكت لالة القهوة ضغط عليها تعصر ... عاد داز لبيتو لي فالجانب لاخر حل الباب ولاح الفيست على سرير ودخل لدوش لي فالزاوية كيغسل وجهو وقرب شنافتو للمرايا كيشوفها غادي تنفخ ليه ببونية دلوؤي .. ونزل عينو لخزانة تحت لافابو جبد فاليز د الاسعافات وبدا يداويها .. كان دوش صغييير كولو زحاااجي بالكامل ... وبيت نعاس صغير وهادئ وبسيط ... سرير بايزار اسود وطابل دونوي عليها اباجور ... شرجم صغير وبلاكار مفتوح فيه بعض من ملابسو .... داوا جرحتو وخرج من دوش حيد حوايجو وهز غير شورط بيض لبسو وهز تيليفونو وخرج لكوزينة هز فنجالو دالقهوة وحل تلاجة هز قرعة دالما صغيرة ....ومشا لبيرو ديالو حط الفنجال وتيليفون وحل البيسي لي فجنب لي كيصمم فيه ... تحل ليه على التصميم لي كيوجد فيه كيفما سدو قبل ميخرج هاكاك بقى .... يلاه غينغمس يكمل فيه تاكيوصلو اشعار لتيلي وقلب عينيه هو يطلع ليه انه جا من الاسنطا د بيلي ... علا حاجبو باااستغراااب !!!! .... ملي مشات ماحلات انسطاكرام وماحلات نمرتها ... شعلات تيليفونها !!! ...
يحلو وهو يبان ليه مصورة سطوري من الطيارة كتحلق على الاراضي المغربية ....
عوج شفتو لجنب وحطو وداز كيكمل على البروجي ديالو .. دقايق كايبان فيها منغمس الى ان واحد الابتسامة بدات كتشقق على شفايفو ... معارفش شنو لي خلاه يبتسم هاكا بعد ماشاف هاد السطوري .. مايكدبش انه من نهار مشات وهو شاك انها مغترجعش صافي ... وكان كيقول الا مرجعاتش غيمشي هو ... ومعارفش حتى علاش غيدير هاد الخطوة ... ياك هو داير هادشي غير باش ميحسش بالذنب .. وياك هي لي مشات خلاتو .... علاش غيتبعها ؟ واش دبصح باغي هو هاد الزواج ... دبصح ولف سمية بيلسان تكون حدا سميتو ......
تنهد وهو كيفكر انه غدا غيتقلب مصير حياتو والبنصر ديالو غيتزين بخاتم فضي .... طالما كان كيشوفو عند عمامو .. عند باباه ... كان من ديما كيخليه يطرح واحد السؤال ... ديال انه واخا فاتو سنين عمرهم ملو هاد الخاتم ؟ عمرهم بدلوه ... عمرهم حيدوه وضيق عليهم ... باغي يجرب تاهو احسااس العشرة .. احساس يكمل مع وحدة حياتو كاملة بعد ماولف كيدير بنت فاالشهر .. بنت يعطيها سميييتو ونيتو واسرارو .... ويكمل معاها حتى للخر ....
بدا يتنهد ورجع كينغمس فخدمتو باش ميتشتتش ...
اما لوؤي مشى لدار قبل منهم بدل حوايجو ورجع خرج مشى للفيرمة دالمحمدية .. الدار لولة ديال باباه ملي تزوج ... تما فين كيحس براسو كيرتاح وتما فين تزاد .... حط الطموبيل وتلقاه ( مختار ) لي هو السيد لي كيحضي الفيرمة من فاش تزاد هو وساكن فيها هو ومراتو ولادو .. عطاه السوارت ودخل لدار طلع ديريكت لبيتو وتلاح فوق السرير مغمص عينيه وريحة اشجار التفاح والبرتقال والحامض ... كلهم كدخل ليه من الشراجم .... غمض عينيييه دغيا داه النعاس بسبب الليلة لي بات فايقها فالمتحف كيوجد فيه اخر اللمسااات ... واخا ضاع ليه كولشي فلخر ولكن نظرات الافتخار لي دار باباه كفاوه ...
بعد 3 ساعات عاد فاق على صوت الدقان حل عينيه على شكل غمزة كان معنق عندو مخدة ورجع تكا على ظهرو وهضر بصوت مبحوح ....
لوؤي : دخل ....
حلات الباب خديجة ( مرات مختار ) كانت مراة بشوووشة بقميص مطلعة ليه يديه بلاستيك ومكفضاه كيبان تحتو سروال قندريسي خضر ...
خديجة : وليييدي ... ياكما فيقتك ؟؟؟؟؟
لوؤي : ( تحنحن سرح حلقو وتكا على السرير كيعوج فعنقو وهز تيلي لقاها خمسة ونص دالعشية وشاف فيها ) لا لا ماشي مشكل هذا الوقت ... شي حاجة اخالتي !
خديجة : غير بغيت نسولك اولدي واش تغديتي ولا نحط ليك لتحت ... وشنو حبات الخاطر ....
لوؤي : ( شاف لجنبو كيفكر ورجع شاف فيها ) ماعندي شهية صراحة ... ديري ليكان ....
خديجة : واخا اولدي ندير ليك البايلا لي كتعجبك ... قول ليا اولدي كيدايرة ماماك وباباك .. وخوتك ... ياك كولشي لاباس ؟ جيتي ط هاكا خلعتينا ... معلماتنيش ماماك مانا نخمل ليك لبيت عنداك تكون هنا شي غبرة ونتا فيك حساسية ؟ ... زعما لبنات يلاه خملو
لوؤي : لا لا .. مزيان .... غير جيت نرتاح شوية وتوحشت هنا الهوا نقي ...
خديجة : واخا اولدي يلاه تاتنزل تاكل ...
خلاتو ونزلات وهو بدا يتفوه وقلب عينو لتيلي بان ليه اشعار من انسطا د بيلي يلاه شافو ... ضرب لساعة عرف غتكون دابا وصلات ... بدا يعوج فعنقو وبدا يدوز لابيل لجود ... جوج دمرات عاد جاوب كان عينيه فالبيسسي
جود : اش كاين ..
لوؤي : جوود ... نسلتو هاد اللية ...
جود تفكر هاد الكلمة ماسمعها منو من ايام لي كانو كياقراو فالابتدائية ... بدا غير كيضور فراسو وابتسم ....
جود : ماشي كبرنا شوية عليها لا ..
لوؤي : والله ماااافياااا بالله .....
جود : زعما انا راني فالباب كنتسنى يحلو ليا ندخل ... راه كلنا مافيناش ... هربانين من الصداع وصافي ... هادي هي حياتنا مغنبدلوهاش .. حط حجرة على قلبك وباراكا من العكس ...
لوؤي : لي عطاك ااعقل يعطينا شوية تاحنا ! غاقوليا منين جبتبه
جود : اودي انا راه عييييت من صداااع حق الرب .... تهدييييت .... ( تنهد ) فينك
لوؤي : فالمحمدية ...
جود : بردتي شوية
لوؤي : اووودي ( كيحك فشعرو )
جود : راه باقي ماكملناش الهضرة ... فخبارك ياك ..
لوؤي : وايييييه ( غير كيسوط ) دابا ضرووووري من هاد المشية ...
جود : ماعندنا منديرو ...
لوؤي : ... الحيبانة راه جات ...
جود : ( مكمش حجبانو ) شكووون !!!
لوؤي : تانا خاصني العقل لي داير راسي ف مزهمر .... بيلي اصاحبي ...
جود : علاش كتقولو هاد بيلي هادي .. نطقو سمية البنت نيييشااان اصاحبي مالكم
لؤوي : والله اولد عمي ... الا نتا لي سميتيها هاكا ونتا لي ولفتينا كاااملين نقولوها هاكا ... باغي تردنا تاني نعيطو بيلسان .... كتلعب بينا دابا ...
جود : قود عليا خليني نكمل شغالي .. يالاه تانتشاوفو
لوؤي : ... تاتخلي ليا سوارت .. راه مابقى فيا منبقى نشد طريق تالمحمدية باش نهرب منهم ... عطينا سوارت نلقاو فين نهربو
جود : تادوز وخودهم ...
قطع عليه تيلي لاحو على السرير وبقى كيعوج راسو يتوكض ... وكتب مسج لسلطان يتلاقاوه يمشيو يشربو قهوة يصحصح ....
نزل لتحت لقا خديجة موجدة ليه الغدا فوق طبيلة خشبية بايلا على حقها وطريقها كيف كيبغي وفورشيت وموس على جنب دييسير وكاع اش كيبغي فالغذا ... جر الكرسي كيشوف للطابلة وشهيتو مسدودة لاقصى درجة .... هز الفورشيت كياكل بشوية .. كيخليها ربع ساعة فمو عاد يسسرط بقوة مامباغيش ياكل وسااااهي ... شي عقل كيقوليه متمشيش ولا سافر ولا قلب فين تمشي ماحاملش يشوف فوجه باه بعد مانهضر على حلمو بهاد طريقة و حگرو لهاد درجة وهو لي تلت شهور وهو كيخدم صباح وعشية غير باش يقنعو بلي راه لابغا يخدم راه غيقدر غير مبااغييش داك الخدمة اما هو راه قاااادر عليها ماشي فاشل ... رجع كيكال وهو مصمم مغيمشيش لسواري ..... تاشوية جات لبالو قدس .. وجا لبالو كمية الانتباه لي كااتلفت فالحفلاات .. عامين لخرا لي برزات فيها انوثتها ولات هي محط الانتباه درجال كاملين ... غير بدا تيفكررر انها غتكون تما وسط عينين الدياب لي غيلتاهموها ... كيزيد يتخنق صدرو وضرب طبلة وناض مشا ....
فيلا يونس ...
خارجة من دوش ملوية عليها فوطة على خصرها وفوطة فوق شعرها وحنيكاتها حمييمرييين .... شافت لجنب وهي تبان ليها مانكان فيها الغوب ديالها لي دخلوها ملي كانت فدوش .. كانت غوب قصيرة فالبينك بسمييطات وثوبها حريري كيواتي طايتها وفتحة فحنب ... سااامبل كيف كتلبس فستايلها ... وديجا لبروتوكل مانع عليهم قوة الاحجاااار والحوايج لي اوووفر وقوة الالوان ممنوعين ... بدات كتشوف مع توبها عجباتها ماماها كتعرف ذوقها مزيان .... وهزات فنجال قهوتها لي طلباتهم يدخلوها وخرجات لبالكون كتفرج فالبحر لي كان بعيد شوية وترشف من قهوتها .... شافت لتيليفون لي محطوط على حافة حيط البالكون وشعلاتو من جنب بانليها مكاين تاشي اشعار من جود .. وتنهدات معمقة ... تعمدات دير داك سطوري قالت ممكن يتحرك فيه شي حاجة .... وهي ملي شعلاتو فالمطار طلع ليها انه جرب يتصل جوج مرات وهي نهار لول لي كانت مشات فيه ونهار 15 ... من تما معاودش حاول يتصل ... تنهدات على هاد الغرور كامل لي ولا فيه .... و خرجات جالسة على سريرها وعرات الفوطة على رجليها كدهن رجليها بحليبها ... رجيلاتها كانو بييييضييين وركيباتها غوز ... رطبات رجليها تابقاو كيلمعو وطيحات الفوطة ومشات باتجاه دريسينغ هزات دوبياس بينك ... مشبكييين والسوتيام لاسق فالسترييينغ .... وبدات كتقاد السوتيام مع المرايا ... كانت طاايتها رشيييييقة للغايية ولحمها مججبببدة .... عندها ارداف متوسطين ومؤخرة متوسطة ومشدودة بالرياضة .. بطنها كانت مخدوووودمة كلها مفتولة ... وصدرها متوسط بعد مادخلات للعشرينية زاد برز بعض الشيء ... و فوق الثدي ليسر عندها فراشة صغيرة موشومة ...
سمعات دقان فالباب وطلات غير براسها من دريسينغ لقاتها ماماها طالة براسها
اريج : بييلي حبيبتي وجدتي ولا مزال
بيلي : ( خرجات عندها والفوطة باقا فراسها ) مزال ملبستش .. ديجا مزااال الحااال يالاه الخمسة ونص هادي
اريج : على ود لاكوافيغ والميكاب ارتيست غيتعطلو .... راك عارفة تمنية خاصنا نكونو تما
بيلي : ماما بلاااش ميكاب ارتيست ... مافيا لي يدير شي ميكآب ... خليني شوية ناتيريل غندير غير شي حاجة خفيفة ... جيبيلي غير لي يقادو شعري عكزانة عليه ....
اريج : مهم نت تعرفي انا كاع معندي مشكل بالعكس مكياج خفيف كيجيك حسن نت زعيعرة الى درتي غير شوية راه كيبان بزاف .... يلاه غا سربينا
بيلي : ماما تمنية ماشي بزاف !!! ياك لاسواغي تالعشرة
اريح : اوا انا لاسواغي دختي وندخل يحال المعروضين ؟؟؟؟؟
بيلي : مهم تاتبقى ساعة ونص ويجي مول الشعر باش ميخسرش ليا ....
اريج : ليزاكسيسواغ اش غاديري ؟
بيلي : اخر وحدين كنت جبتي ليا هوما لي عاجبيني دابا
ايج : داكوغ احبيبتي غنمشي نشوف خوك ... تمشي معايا ولا حتى تجي مع جنان وزياد
بيلي : نت غتمشي بككري .. انا ماعندي ماندير تما تالداك تسعووود ونص ونمشي ...
اريج : اوا صافي ... كون نعستي دابا ترتاحي شوية من الطريق ...
بيلي : ماعليش انا صافا ..
عطاتها بوسة فالهوا ومشات وبيلي حيدات الفوطة
وترخا شعرها الذهبي بدات كتنشفو غير بفوطة ولاحتها خلاتو يتطلق على ظهرها وخصلاتو الفازكين لصقوو عليها ... شافت لساعة لقات بااااقي الحال على تلبس دابا ومشات تكات فوق سريرها شادة تيليفونها ... يلاه بغات دخل ليميساج ترد على صحابها وهي تلقى راسها فالانسطا ديالو .... كالعادة هادي كتر من شعراين ماحط شي صورة اخر ماحط كان بوسط العزاء ملي مات جدهم .. تنهدات ودخلات لبلاصة دليفان وهي تلقى تصاور ديال قبيييلة فالافتتاح .... كانو صوروه كينزل من طموبيلتو فاش يلاه وصلو ... و الصور فالمتحف لداخل وحدين فالمؤتمر ووحدين على برا ... كل مرة تزومي عليهم وتعض على شفتتتتهااا ..... جمالو وجادبيتو واثارتو كتخليها تنسى عقليتووو بالمرة ... حطات تيلي وبدات تنهد شادة على قلبها ...
بعد ساعة ونصف
.... اريج كانت وجدات راسها بغوب فالاخضر الغامق .. مع اكسيسواراتها وطلقات شعرها القصير مرولياه مع جناب وطالون عالي .... ونزلات شادة فدراع يونس لي كان تاهو بطلة رسمية انيقة .... وركبو فطموبيلتهم ومشاو خاصهم يكونو بكري باش يوقفو مع عدنان ورتاج ... جنان تاهي خرجات من عندها الميكاب ارتيست كانت بغوب طويلة فيها فتحة فجنب حد الفخد وصندال عااالية وشعرها كلو للوراء هي شعرها ديما حريري مكتحتاحش كوافيغ .. وحلقات دهبييين فودنيها وزياد تاهو خرج من الدريسينغ كيقاد شوميز ديالو وسد السمطة .. ولبس جيييلي وكيشوف مع مراتو لي كانت فابهى حلة والكحل كيزيييدها اثااارة ... وداز باسها فجنب حنكها وهي كتشوف معاه فالمرايا
زياد : مرة مرة بقاي تفكريني راه تزوجت بيك وولدتي ليا بنية ... باقي كنتعجب بيك بحال اول مرة شفتك ...
جنان : هههه ( شافت معاه وشدات ليه الكرافات كتقادها ليه ) غنفكرك احبيبي وغتفكر حتى بنتك لي واعدتني غاتشدها نتا هاد السواري ....
زياد : هههه واخا الالة مايكون غير خاطرك ... دوزي عند بيلي شوفيها واش وجدات باش نمشيو ...
جنان : اوووكاي ...
رشات بارفانها و عطاتو بوسة فالهوا وخرجات باتجاه شومبر ديال بيلسان دقات تاسمعات الاذن وحلات طلات عليها لقاتها لبسات لاغوب ديالها وشعرها باقي مامصايب جالسة دايرة رجل على رجل على الفوتوي كتشوف فتيلي
جنان : هاء !!! باقا معطلة ؟؟؟؟؟
بيلسان : وي .. يلاه علموني غيجي دابا لي غيقاد ليا شعري ... ديجا الحححفل راه غيبدا تااالعشرة ماعرفتش علاش غنمشيو بكري
جنان : وي مي راك عارفة خالتي رتاج كتأكد باش تمنية نكونو كاملين ومنجيوش مع البراني ...
بيلسان : وانتوما غتعاونوها انا ماعنديش مندير ... غير سيري نت وزياد .... انا تانوجد ودابا نجي
جنان : اوكي سويتهارت .. ( شافت ليها الغوب) اييميزنغ ...
بيلسان : ثاانكيو ( كطلع معاها وتهبط ) يو تو " حتى نتي زوينة "
عطاتها بوسة فالهوا ومشات جنان علمات زياد انه باقا معطلة وهزو بنتهم ونزلو ...
اياد تاهو خرج من دوش بعد ماخدا دوش دافئ .. هدئ فيه نفسيتو لي مخربقة مؤخرا .... ملي وصل للدار وهو جابدها عليها بنعسة ... لقا العلاقة فيها كوستار ديالو وجدوه ... وبدا يلبس كان كوستار فالزرق غااالق غااية فالفخامة كيواتي راجل بحاااالو .... كيواتي سمرتو ... وعيونو الثاقبين وحجبانو المبعثرين وسواعدو الرجوليين وكتافو العراض وظهرو المفتوول ... جلس على السرير ولبس صباط لامع عندو سيور خفاف ... وهز تيليفون وشاف لساعة لقاها سبعة ..تلفت لمراية قاد شعرو غير بصبعان يديه عندو رطب وفاش كينشف كيقاد راسو براسو مكيعدبوش ... لبس ساعة فضية فيديه .. وقاد صدايف الشوميز لي كانو تاهوما فضيين ... ... هز سوارتو خرج يقلب على شي بلاصة يشرب فيها قهوة عاد يمشي ....
بيلسان كان جا عندها لي غايقاد ليها شعرها ... بلاكاه ليها كااامل مسرررح حتى قرب يوصل للمؤخرة ديالها ودارو ليها مور ودنيها باش يبان وجهها المدور ودارت فرقة فالوسط وقادها ليها مزيااان بالجيل ... شكراتو ومشا وجرات الكرسي دالمرايا تقاد مكياجها بعد مكانت ساعة سبعة ونص .... اكتفات بايشادو غوز فااااتح ومااسكارااا مارون زادت بينات شفارها الطوااال الزعرين لي فاش كديرليهم ماسكارا كيزيدو يبانو كتررر كباارين ... حاميين عينيها البلورييين .. دارت خط مارون خفيف فعينيها ... ومع دالك بانو بارزييين كباااار ... حطات هايلايت تحت عينيها لي زاد عطا لوجههاا الاشقرررر لمعة وكملات اللوك بكلوز غووز نفخ ليها شنييييفاتها كتر مانفوخين وبلوش غوز ... جات كتبان بحال دمية باااربي تماما ... بقات كتشوف لوجهها فالمرايا عجبها وبدات كتعطي بوسة لراسها وتضحك ... ركبات حلقاتها لي كانو من الطاقم الماسي لي خدات ليها ماماها بفعيد ميلادها بسسيييط وخفيف كيناسبها ... لبسات سنسلتو وخاتمو فسبابتها وبراسلي .... وهي تسمع الباب كدق ....
بيلسان : وي ...
حلات الخادمة ودخلات هازة فيديها صندوق بيض كبيييير وبيلسان وقفات مفاهمة والو كتشوف فيها وكتشوف الصندوق
بيلي : شنو هدا ؟
الخادمة : هذا صيفطو موسيو جووود ....
بيلي : ( علات حجبانها بجوج ) شكون قلتي ؟؟؟
الخادمة : مووسيو جود ...
بيلي بقات غير كتشوف فيها وفالصندوق مصدومة وهي تحطو ومشات وبيلي تلفتات ليه كان بيض ومقاد بشريط ذهبي .... لمحات بطاقة فوق منو وهزاتها لقاتها مكتوب فيها ( for u my blondy lady ) ...
بقات غير كترمش بعينيها مافاهمة والو وهي تحل داك الشريط ... وحيدات الغطا وبدات تحل الثوب البيض الحريري لي مغطي المحتوى ....
تااابدا يبان ليها فالوسط ثوووب اسوووود هزاتو بين يديها بشوووية وعلاتووو تاتحل كامل قدامها .. كان عبارة على غوووب كحلة طويييلة تالتحت وفصالتها بحال شي سمكة ... ويديها مششبكييين حتى للتحت وفالخصر سميطة رقيقة .... وفالظهر صدايف ... بقات غير كتشوف مفاهمة والو .... واش هذا ختار ليها دريس دهاد الليلة ؟؟؟ واش بغى يلبسها على دوقو ؟؟؟
لي لاحظات انها ان الكسوة كوولها مغطية .... فنفس الوقت انيقة وفخمة ... عضات على شفتها مفاهماش ابدا شنو بغا يقصد بهاد الجيست .. واش اعتدار ولا استقبال ولا تسلط ولا اش ؟؟؟؟ ومعرفاتش واش تلبسها ودير ليه الخاطر ... ولا تبقى بالغوب ديالها وتبين ليه ان تاهيا عندها شخصيتها ... بدات كتفكر فلخر تبسمات بشياطنية .... ومشات لتيليفونها كتصوني .. تاجاوبوها
بيلي : الو .... وي ... شكرا ... اه ان شاء الله ندوز ... يلاه جيت ليوم .... وي راني يلاه وصلت .... ربي يخليك .. عفاك ... الكوليكشن ديال الرجال لي خرجات ماما لبارح .... وي ... هاديك ... بغيت واحد من الكوستارات الكحلين ... يتصيفط لقصر ديال الاسماعيلي ... يتصيفط خصيصا لجناح جود ..... مبغيتش روطار عافاك ياريت يوصل فساعة دالمكانة .... اااه صافي تا 40 دقيقة مزيانة ...شكككراااا ليييك اخالتي ....
قطعات تيل عاضة على شفتها .... وبقات كتشوف شحال بعينيها كتفكر .... ومشات جلسات على الفوطوي هازة الكسوة فيديها كتشوف فيها ولروعة الثوب ديالها .. ورجعات كتقول مع راسها ... لبس داكشي لي صيفطت ليه ... غنلبس حتى انا ... مالبسش .. مغنلبسش .....
وهزات تيليفونها باش تراقب لي باج دليفان ديالو لي دغيا كيحطو تصاور ديال طلاتهم فالحفل وحلفات ماتمشي هي تاتشوفو هو شنو لبس وباش مشا ....
وجلسات دايرة رجل على رجل كتسنى ....
قصر الاسماعيلي ....
وصل بطموبيل ديالو لابس غير شورط لي كان بيه فالكاراج والتيشورت معقلها فعقنو .. نزل من الطموبيل كان ظلام الحال وساعة تمنية وربع .... يالاه داخل هو تبان ليه ماماه نازلة فدروج .... بعباية فخمة سوداء لااامعة ... وشالها الحريري وبروش ماااسية مع طاقمها .... وصاك فيديها لامع ... شافت جود يالاه داخل وباقي ما وجد راسو وهي تعلي حجبانها وقربات عندو
لامار : اويلي نتا يلاه جيتي ؟؟؟؟ غتعطل اولدي شوف حالتك ...
جود : ( شدها من صبعان يديها وبدا يضورها ويصفر ) بربي تاروووكان راضية عليه موووو ... انا كنحسدو عليك ههه
لامار : ههه والو اولدي مابقى زيين دابا كبرنا وشرفنا خلينا ليكم نتوما الصغار وريونا علاش قادين .. ماجيتينييش احبيبي فيااامي هههه
جود : هههه هاهو باين العربون ( كايومي ليها ليه ) من هاد زين لي ولدتي ..
لامار : هههه الغرور كتعطيه صلية هههه طلع اولدي قاد راسك دغيا هاد نهار نتا وباك غتسطيوني .. تاهو يلاه دخل مزال كيدوش ...
جود : وبشوية راه مزااال مالكم غتمشيو تستفو طوابل
لامار : وحشومة درنا مع رتاج تمينة نكونو عندها .... تبغي تحتاج شي حاجة بعدا نكونو معاها هي ديما معانا هي لولا .... انا كتعطلوني غير نتوما وباباك تعطل باش دخل ...
جود : وصافي شوية وينزل .. يلاه انا طالع ...
لامار : راه كوستارك واجد احبيبي .... جيب معاك وسييم ملي تكون جاي .. قدس غنديها معايا
جود : ( كان طالع فدروج ورجع ضار عندها ) عيطات قسم ؟ صونيت قبيلة تيليفون باقي طافي مزال مكملوش يمكن
لامار : عيطات قبيلة .. مغيعطيوه ليها تال 00 دليل راهم دابا فطريقهم لطريفة .. غيباتو تما وعاد غذا يعلنو على نتائجهم فصبح ويطلقوهم يجيو ...
جود : معاش قالت ليك تكون هنا
لامار : قالت الربعة راه غتكون هنا .... باش هاكاك داك ستة سبعة نمشيو لدار عمك يونس ...
جود علا حجبانو كان ناسي كاع واش غذا خطابتو حيت متجبداتش لهضرة وهو هاد الشهر ماعمرش فالدار .. ورجع تنهد وما ليها براسو وطلع فالدروج ...
لامار كلسات فوق الفوطوي دايرة رجل على رجل كتسنى فاسد تاكتبان ليها رجاء جايا عندها ....
رجاء : مدام لامار .... وحدين من لاطولي دمدام اريج جابو كوستار لموسيو جود .. قالو بلي صيفطاتو المادموزيل بيلسان ....
لامار : ( علات حجبانها ) بيلسااان !!!!! ( رجاء ومات ليها باه وهي غير كتشوف فلخر تبسمات) واخا طلعوه لبيتو ونزلي لاخور ....
ومات ليها بالايجاب ومشات ولاماى بقات معوجة شفتها كتهضر غير مع راسها
لامار : وهاااانتي .... هاد الجيل مسااااهلش ....
يلاه كتهضر وهي تشم واحد البارفان كيااخد العقل .... غير استنشقاتو عرفاتو دوق من ... دوق بنتها الصغييرة مولات البارفانات الهاديين ديال الورد .... ضارت موراها كطلعها وتهبطها كانت نازلة بغوووب فالبلو بيبي كانت منحووووتة على طااايتها وضهرها فايتة الركااابي لاسقة عليها فجناب كانو پليات زادو عطاوها الفوليم .. وصباط فالبيج وصاك بيج ... عنق الغوب كان مغطي غير الصدر واليدين طايحين على الكتاف ... وشعرها طالقاه ومرولياه من تحت .. مع اكسيسوارات خفاف وبراسليات ذهبيين رقاق فيديها ومكياج هاااادئ كيناسب ملامحها المثيرين ..
لامار : ( وققات ) بسم الله ياااا مااا شااااء الله ... ( شداتها من يديها ) لا لا خوك مكذبش .. راني والدة الزيييين ...
قدس : هههه ياك بعدا .. ( بدات كضور ) كيجاااتني الغووووب ...
لامار : زوييينة ابنتي لي لبستيه كيجي معاك غير هو. .. راااااه مزييييرة .... تخافي باباك ولا جود يقولو شي حاجة
قدس : نو ....فلي سواغي كيكونو ملهيين زايدون راه كنكون معاكم وبابا ملي كنكونو معاه مكيقول والو ... مكيبغيش فاش كنكونو بوحدنا ... ومامزيراش بزاف ( كتشوف مع راسها ) بالعكس راه هاكا كيتلبسو ....
لامار : وراني عرفت .. هادشي علاش كنقوليك ضعافي شوية باش تلبسي على راحتك ... وليتي لي كتلبسيها كتجي معيييقة ...
قدس : وي وي راااه غانبدا ننقص عرفتي راه ولات عندي كريييشة راني زيرتها غير بلابوند ( وقفات جنب حاطة يديها فوقها) ياك مكتبانش معيقة شببعت بكا فاش شفتها بحال هاكا
لامار : وابقوة السرييييط ابنتي ومكديريش سبوور سينورمال ... نت باقا صغييرة وكتباني كبيييرة بزاف .... صافي كتباني مراة عندها جوج ولاد هههه انا نهار ولدت قسم وجود ومكنتش قد هاكا ... ( ضرباتها لمؤخرتها ) فيين باغا تزيييدي بهادي فييين
قدس : هههه طلقي .... بابا عطاني كنية الاسماعيلي ونت ورثت منك هادي ... هههه بابا مزال مانزل ؟
لامار : هانا كنتسناه دخل معطل ...
جلسو بجوج كيتسناوه .... تاشوية سمعوو تحنحينتو وصوت صباطو فدروج وضارت قدس اما لامار كانت كتشوف فتيلي .. هو يبان ليها نااازل بكووستار اسود فخخخم نازل كيقاد كمام يديه وشعرو مرجعووو لوور ولحيتو قادها مرررتبة .... وهي تعض على شفتها وضحكات ومشات باتجاهو وهو شافها وابتسم ليها ...
قدس : ( قربات لودنو ) بابا ... ممكن نديك شوية من ماما وتشد فيديا انا هههه باغا نخطف بيك الاضواااء هههههه
اسد : هههه .. ( عنقها عندو ) غانشدك كاملة ماشي غير يدك ....
زاد بيها كيضحكو لعند لامار ولامار وقفات
لامار : على سلاااااامة .... حشومة كااعما وقفنا معاهم غندخلو بحال المعروضين .....
اسد : ( شاف لساعة ) مزال الحال ....
لامار : ( بدات كطلع وتهبط وبدات ضحك وقدس تاهي ضاحكة ) لا لااااا ... هادشي بزاف عليا .... ( شافت فقدس ) واش هذا راجلي
قدس : هههه يهديك الله اماما خليني غير تا منكووونش ههههه
لامار : زين دا اازييين وولدوو الزين هههههه
اسد : هههه ( جرها عندو ) اجي عندي امولات الشي اجي ( باس على راسها ) راه تيقولك ملي كطوال العشرة راه كيوليو يتشابهو .. راكي غير عاديتيني وصافي هههه
قدس : ايهاااااي .... غرت انا غرت ... بابا ..( طلعات راسها فيه ) ماما كتقول ليا غلاااضيت واش بزاف ؟؟؟؟
اسد : ( كيطلعها ويهبطها ) داكشي لي لابسة راه معيق هادي اولا .. اما هاد غلاضيتي انا كتجيني بنتي باقاا صغيييورة هي هاديك ... كولي تكبري ليا ....
لامار : كتجيك هي هاديك حيت نتا جبببل ... جبل كتبان ليك صغييورة ... شوف كي ولات .. ولات دير مني جوووج ...
اسد : معجباتنيش لاغوب ابنتي .... شكون ختارها ليك ! .... نت باقا صغيرة لبسي حاجة دلاج ديالك هادشي مازوينش.....
قدس : انا ختاريتها ... واصافي دابا لبست منقدرش نبدل ...
اسد : داكوغ ... خليك حدا ماماك .... يالاه مشينا !
قدس : يلااااه ...
عنقهم كل وحدة فجنب ومشاووو ولامار كضحك
لامار : طلقي من باباااك سيري لهيه غيسحاب ليهم غيير ضرتي ....
اسد : ششش تعقدي ليا بنتي راها باقا صغغيييرة
لامار : خليها دير فيها النفس باش ضعاااف ...
زادو ضاحكين لطموبيل وديماراو مشاو ... جود دوش وخرج لجناحو كينشف شعروو بفوطة كان كولو عاطية منو ريحة ليبرودوي وشومبوان ... دخل لدريسينغ وهز سوشوااار بدا ينشف شعرو وكيقادو مرجعو لور ... باقي غير بفوطة زرقة ملوية عليه وتقلب بان ليه الكوستار معلق ... عرف غيكون وجوده ليه بلا حتى ميعرف شكون صيفطو عارف ماماه لي كتكلف .... وبدا يلبس بزربة ملي شاف راسو تعطل ... تاسمع دقااان وخرج غير بسروال وشوميز محلولة على صدرو العاري ... كيقاد الصمطة حل الباب بانليه وسيم لي كان تاهو بالكلاااص ... سروال كري وشوميز كحلة وجيلي كري .... والكوستيم هازو فيديه ....
وسيم : واش باقي معطل !
جود : دخل .. تسناني تانلبس ...
دخل وسيم جلس على الفوطوي لي تما شاد تيليفونو ... وهو لبس الشوميز ودخلها فالسروال كان الكوستار كولو كحل ماااااط ... وزير سمطة لي كانت من فيرساسكي ... ولبس الفييست لي جاات متججردة هلى كتاافو .. عجبو الثوب دالكوستار من النوع الواقف لي كيبغي هووو .. لبس ساعتو وصباط ورش بارفانو خمسة دقايق كان سالا فيها مشط لحيتو لتحت وقادها بالجيل ديالها ... وهز سوارتو دطموبيل وخرج عند وسيم ونزلو فدروج مشاو باتجاه المتحف .....
غير وصلو لفين غيحط طموبيل بانليه ان البااركييينغ مككتض وواضح ان الناس صافي وووصلووو .... غير هو غيباركي و طموبيل دسلطان دخلات موراها حيت مخصص غير لهم ... نزلو جود ووسيم فكامل اناقتهم ... وهو ينزل سلطان لي كان تاهو بكوستار فالبيج ولكن ملامحو كانو ماشي هوما هادوك وجود علا حاجبو تاوصل عندهم سلم عليهم
جود : امالك !
سلطان : ( تنهد ) غير مع اية ...عصبات جد مي .. غوووت عليها وندمت ...
جود : علاش !
سلطان : مبغاتش تجي ... وصاتني الواليدة نجيبها معايا ملي مشيت عندها لقيتها مبغاتش وملبساتش ....
وسيم : وعلاش مبغاتش ؟؟
سلطان : قالك اسيدي صحااابها كاع غيجيو هنا مع باواتهم وهي مابغاش تشوفهم .. من لول كنشوفها كتهرب بحال هاكا عصباااتني حيت ديما كتحس براسها قل من عباد الله .. كاع الناس عندهم شي حاجة ناقصة هي كتشوف كولشي كامل غير هي لي ناااقصة .... قققلبات ليااا رااااسي ... غوت عليها وجاي فطريق دابا ندمت كاع ... خليتها تتبكي ...
جود : ولا اصااحبي نتا عارفها حسااااسة ...
سلطان : وراه خرجاتني على طووعي .. مكنبغيش نشوفها بحال هاكا ديما كتحس بالنقص .. مكتمشاااش صافي راها كدير حوايج اخرين كتشوف كتسمع كتفهم كتاكل ... معرفتش واش كيتنمرو عليها ولا اش واقع .... غتبقى حياتها كاملة معزولة ولا كيفاش .... ؟؟ خاصها تيق فراسها وتصالح مع ذاتها ....
وسيم : واش تبغيني نمشي نجيبها ؟؟؟؟ تقدر تسمع مني ....
سلطان : غاا خلييييها .... راه مخليت كيف درت معاها
جود : خليه يجرب ... سييير مع شيفوور قنعها تجي ( شاف فسلطان ) هوما قراب فلاج يفهمو بعضياتهم .... وملي تجي بقى حداها وجلس معاها
وسيم : داكووغ ...
فيلا سفيان ...
تحطات الطموبيل ...
ونزل شيفور يلاه غايحل ليه الباب كان نزل ماشي باتجاه الدار، يلاه طالع فالدروج لبيتها هو يسمع موراه ...
فريدة : موسيو وسيييم ... مررحبا بيك ...
وسيم : ( ضار عندها تبسم وباينة فيه مزروب ) شكرا ...آية فبيتها ؟
فريدة : وي ... بغيتيها فشي حاجة ؟
وسيم : سي ..
خلاها وطلع فالدرزط وفريدة علات حجبانها بعدم فهم وهي ملول عاىفة ولاد اسد مكيقويوش الهضرة علاش طرحات هاد السؤال وهي عارفة مغايخسرش عليها كتر من جوج احرف ..
وصل لبيتها وبدا يدق.. جوج دقات عاد سمع صوتها وكايبان بعيييد .....
اية : دخلي اادادا ....
حل لباب بشوية وطل بعينيه بان ليه خيالها فالبالكون ....
زاد بشوية وطل براسو كانت كاتشوف لطابليتها وبدا يطلعها ويهبطها اول مرة فحياتو يشوفها بلباس مكشوف بحال هاكا ....كانت غير بشورط قصير حريري ديال البيجامة و سوفيطمة ديالو بسمييطات ... ماعرف كيدير يتعامل واش يخرج ويعاود يدق ... عارفها غااتحرج لاشفها هاكا ....
ضور راسو كايحك فشعرو وهي ملهية كاتفرج واضح فملامحها انها زيرو مورال ... ورجع تاني كايشوف فيها بلا شعور منو... كايطالع رجيلاتها لبيضين الصغااارر لي كايبانو كي رجلين طفلة صغييرة هازين جسد انثى ... اول مرة فحياتو يلاحظ انها انثى !!! كتمتالك معالم انوثية جدابة ديما خازناهم وسط كساوي واسعين طفوليين ....
سرط ريقو وخرج من البالكون كايقول فبالو حشوومة ...
ماعرفش علاش !! .. هو موالف كايتتغزل بالبنات ودار علاقاااات ويلا شاف شي وحدة انوثتها بارزة مكاينزلش عينو ومكيحشمش .. ولكن اية ماعرفش علاش ماباغيش ضيع صورة ديك البنوتة البريئة لي راسم فدماغو .. ومشا تاقرب لباب دبيتها ورجع حلها ووقف فيها كانه يلاه داخل...وبدا يعيط ...
وسيم : آية ... نقدر ندخل .... !!!!!
اية علات عينيها بزربة مخلوعة ؟؟؟ واش هادا صوتو ولا كتخييييل .... !!!!!!
اية :ااء !!!! و سيم؟؟؟؟؟؟ ( بصوت مرتفع ) وسيم ؟؟؟؟؟
وسيم : واش نقدر ندخل ؟ ...
اية تلفتات دغيا لمنظرها وانها لابسة غير حوايج لي كانت غاتنعس بيهم ... وعضات على شفتها
اية : ااا دقيقة عافااااك ....
وسيم : داكووغ ....
رجع خرج وسد الباااب ... وهي خرجات من البالكون ومشات بزربة بالكرسي ديالها ودخلات الدريسينغ خداات كسوتها .. دريسينغ ديالها كامل عبارة على كساوي حيت هوما لي كتعرف تلبسهم بلا مساعدة .... لبسات كسيوة بيضة بصداف .. تعافرات باش بدات تهز شوية من الكرسي نزلاتها على مؤخرتها بالكشايف ...
عاد خرجات باتجاه الباب لي البوانيي دياالها حادر على قبلها وحلاتها ليه وهو تبسم ليها وهي مزال مامتيقاش بلي جا ... بدات كاتشوف انه لاابس عرفاتو جاي من الحفل وتبسمات ليه ورجعات بالكرسي بللور فاسحة ليه الطريق يدخل ..
وسيم : ( دخل الداخل ) ياكما كنتي ناعسة؟ نكون فيقتك ...
اية : لاااا ... ( كترد شعرها مور ودنيها ووجها كايولي حمر حداه ) غير ... كنت كانشوف واحد الفيلم. ... و ..( بتوتر حداه ) وكنت غادي نعس ...
وسيم : ( ككلس على سريرها كايشوف فيها) مابغيتش نمشي بوحدي ....
اية. : ( علات حجبانها بجوج ) مافهمتش ؟
وسيم : تمشي معايا ندخلو اونسومبل؟
اية : فييين ؟؟؟ سواغي ؟؟؟؟
وسيم : ( وما بالايجاب ) اممم ..
اية : ( شافت مدة لتحت ورجعات شافت فيه) وسيم انا بيييخير .... ومافياش لي يمشي .. ماشي حيت ماعنديش لي يمشي معايا ....
وسيم : راه انا لي ماعنديش دابا لي يمشي معايا ماشي نتي .....
اية : ( عينيها تعمرو بدموع وهي كتعض فشفتها وشافت فيه ) وسييم مكايعجبنيش بحال هاكا ... انا عارفة بلي لي شفتي فيها بعينيك راه قادرة تمشي معاك .. بلا متكدب كدوب مفروشين ....
وسيم : لي شفت فيها بعينيا قادرة تمشي معايا؟؟؟؟؟
اية : اه ..
وسيم : الى شفت فيك تانتي ....( بابتسامة ساحرة ) تمشي معايا !
اية بقات غي كاترمش فيه وقلبها كيضرب بجهد وكاتسرط فريقها ووهو تبسم .....
وييم : باغيك نتي .... لي تمشي معايا .....
فالحفل
بجانب البار
كان واقف سلطان وجود وحداهم كؤوس الويسكي المخفف .. وكايشوفو فالحضور ..... كانو خااطفييين الاضواااء ... والبنات عاضين على شفاااايفهم وينقزو وكل وحدة كتنسج احلامها فالزاوية ... وهوما كايرشفو من كيسانهم وكايشوفو غير من تحت لتحت بعيونهم الثاقبين .... ويقلبو براسهم على الحضور شكون جا .. موالف جود فين مايدخل لشي سواري يقلب بعينيه واش كاينين بنات زوينات الا هاد سواري هادي لي عينيه كايقلبو على وحدة فقط ..... كانت واحد المجموعة فيها عمامهم مع الرجال لي ابتسمو ليهم وتاهوما وماو ليهم براسهم فاش شافوهم جاو .. وزياد واياد واقفين بعيد وسلطان دار ليهم غير حركة بيديه وتاهوما ابتسمو ليه .... اما نساء الاسماعيلي كانو جالسين فكوان قصبي معاهم العيالات و جليسة فيها قدس وماجدة وبعض البنات ...
سلطان : ( كيهضر وكايشوف ) كاع هادو معارف ....
جود : بحالا هادشي زعما جديد علينا
سلطان : لوؤي خليتو فلوطيل ومشيت نبدل .... مبغاش يجي ...
جود : كنت عارفو مغايجيش ... هاداك قال لقسوحية راسنا مكتعرفي والو .... شي نهار غيطيح باه بشي كريز ويموت فيها بالندامة ...
سلطان : اودي مامهنية غير جدة ....
جود : دابا نفهمو من كلامك مانتهناو تاحنا تانوليو قدها ...
سلطان : واييييه ...
جود بدا يشرب فكاسو وكيضووورر بعينه .. جمييع البنات كانو كيشوفو فيه ويبتسمووو ليييه وهو عينيه كتقلب غير علييها كل مرة يتسائل فين هي واش مجاتش !!! كون كانت كانت غتكون مع قدس ولا مع ماماها ومرات خوها ... فين هي ! ...عيا يقلب وااالو مبانتش ليه عرفها راه مزال مجات .... ولا يمكن مغتجيييش ... اعترف لراسو ومنكرش احساسو ومهربش منو ... انه باااغي يشوفها وانه فعلا توحشها .....
عند بيلي ...
واقفة قدام المرايا بلاغوب لي بعد ماشافت جود لبس لي سيفطات ليه تاهي بغات دير خاطرو ... قالت مدام لبس اش ختاريت ليه تاتا لبس على دوقو .... وبدات كضور حدا لمراية عجبها راسها وعضات الى شفتها فرحاانة لي هو لي فكر فيها وهو لي بادر ... كانت قالت غاتلقاه مقلق وصعيب يرجع لطريق .. ساعة فاجئها .... عاد تفكرتت الى هو مريض بزهايمر حتى فقلبو من صغرو مكيحقدش مدة طويلة ...
لبسات صندال فضية عالية والغوب كانت طويييلة من لور كتر من القدام ... هزات صاك ديور حطات فيه پارفانها وگلوز وديزانفيكطون وتيليفونها .... ونزلات بشوية فدروج شادة غير بظفيراتها لي كانو مصبووغييين بغوز بيبي هادئ وطواال ....
مشات باتجاه طموبيلتها و ديمارات وشدات الطريييق تاوصلا للمتحف تابعة لوكاليزاسيون ...
غير نزلات من الطموبيل ، ابتسمات للكاميرات لي شعلو اضوائهم باتجاهها ..... تلاقاو ليها باخدو صور اطلالتها .. عطاتهم جوج ثواني وومات بيديها بمعنى باركا ... وتحنات لطموبيل هزات صاكها عاد طالعات راسها كتسد لباب وهي تسمع موراها تصفيييرة وضارت براسها بشوية ......
- افييييين ازيييين ... ماتعطيناش شوية دالوقت !!!!! ....
عند وسيم واية
اية شافت لجنب مدة قالبة راسها .... وكتحاول تدخل لراسها فكرة انه غير شفقان عليها باش ماتسرحش بعيد ورجعات شافت فيه
اية : ،سيفطك سلطان ؟ ولا ماما ؟
وسيم : تلاقينا سلطان فالباب معصب حيت مابغيتش تجي معاه .. وقلت ليه غانمشي عندها انا .. حيت مغاتردهاش فوجهي .... (بابتسامة وهي كتحاول تافادى تشوف فيه باش متغرق كتر فوسامتو لي اسم على مسمى) ولا ياكما غاترديها ليا فوجهي ؟؟؟؟؟؟
اية : ( تنهدات ) وسييم عافاك ... راه ماباغاش نمشي ماشي على ود شي حاجة .... غير حيت مافياش وباغا ننعس ...
وسيم : ترديني هاكا دابا ؟؟؟؟ بوحدي ...
اية : ( علات عينيها فيه وهضرات من اعماق قلبها بلا متحس) يااك ااسواري عامرة بنااات زويناااات .... علاش جاي كضيع وقتك هنايا !!!
وسيم طول فيها الشوفة وعينيها كيفاش حمارو وحمار تانيفها ومنظرها لي غاااية فالكياااتة تا وهو حزين .... وناض على السرير وتحنى على ركابيه حداها وهي كاتشوف فيه .....
وسيم : السواري عامرة بنات زوينات .... ولكن نت .... سپيييشل ... ديييفرنت .... ( شد فيدها وهي كلها تشوكات وبدات كطلع نفس بزز ) يوو آررر ديفرنت براانسييس .... بيكوز ... يوو آر .. اسمااائليز دوتر ..... { ولكن نت مميزة. .. مبدلة ... نت مبدلة الأميرة ... حيت ... نت ... بنت الاسماعلي .... }
اية : ( منزلة عينيها كتشوف فيديه لي شادين يديها وبدات كتحاول تسلتهت حيت حسات برااسها غادي تسخف ومكتبغيش تبين باش تقاوم اعجابها بيه وهو قدامها بهاد القرب كامل ... كتحس انها خصها قوة كبييرة ....وشافت فيه وعينيها مضببين بدموع ) ياس ... يو آر رايت .. آيام ديفرنت ... بيكوز .... آيام .... ديسايبلد وسيم ....( نزلات دمعة ) ديسااايبلد ....{ اه عندك الحق ... انا مبدلة ... حيت انا .... مقعدة اوسيم .... مقعدة ... }
وسيم طلع عينو فيها كاتنهد وهي تبان ليه دمعة فخدها وهز يدو بشوية مسحها ليها وهي ساهية فيه وشاف فعينيها وهي ماحملاش تهز راسها بعد ماكتحسو تاهو بدا يشفق عليها وجابتو الشفقة .... تمنات لو لقات هاد الاهتمام لطريقة اخرى ... ولكن اكيد جاي غير باش يواسيها ماشي حيت باغيها وشايف شحال عي متعلقة به ومعجبة بيه ...
وسيم : هاد الهضرة كاينة غير عندك نت ... حنا مكايناش عندنا ... هاد سواغي .. ديال عمك .. لي نتي عارفة شحال عزيزة عليه ... وفيها عمامك كاملين لي تيحماقو عليك .... وفيها ولاد عمامك وبناتهم وعيالاتهم .. فيها عائلة الاسماعيلي لي كتبغييك .. حيت نت .. اسماعيلية .. ماشي حيت اونديكاپي " مقعدة" ...غتنساي هاادو كاملين لي كاببغيوك ..... وغضربيهم عرض الحيط ومغيهموكش ... وغيهموك غير لي كيشوفوك ديسايبلد !!!!! ( تنهد ورجع وقف كيشوف فيها .... وهي كتشوف غير فالفراغ وتمسح دموعها ) على هاد الحساب عندك نظرة الناس اهم من نظرات عائلتك والناس لي كيبغيوك ... كتشوفي النص الخاوي من الكاس وكاع مكتشوفي النص العامر .... نت ماشي اونديكابي فرجليك .. راه فعقلك .....
اية: (مسحات دموعها وشمرات بنيفها وطلعات طلعات راسها فيه كلها حمرة ) ملي كتكون مناسبة فيها غير عائلتي كنكون انا لولا .... وملي كيكون البراني ... عاد كنهرب .... حيت مافيا لي يسمع كلمة مسكيينة آوسيم ( بدات كتشهق بالبكا ووسيم كيشوف فيها ) داك الكلمة مبقيتش كنقد نسمعها مبقيتش كتقدر نتحملها .. علاش مسكينة علاش ؟؟؟؟؟؟
وسيم : ( تنهد عاض على شفتو ورجع تاني نزل عندها وشد يدييها وهي كتخطف فلخر زير علييهم ) ششششش ... وشوفي فيا .... ( علات عينيها فيهم دموع كيقطرو ) تاااحد .. تاحد فداك سواري ... مكايسوا قدامك ( هز يديه جمع جوج صبعانو ) قد هاااااكا .... خاصك ترفعي راسك حيت نت ... بنت الاسماعيلي ... وكولشي غايشوف لعندك .... الاضواء كلهم كتخطفيهم بوجهك الملائكي ا اية ( اية كترمش فيه ) واش عارفة عينيك شحال زوينين ؟؟؟؟ هممم !!!!!
اية حبسات من البكا وشافت فيه باهتمام كترمش بعينيها وفهاد الحظة مكرهاتش بصح تلفت لمراية تشوف وهو كيشوف فيها بجدية
وسيم : اية ... واش عارفة ضحكتك شحال زوينة ؟؟؟ (بابتسامة ) شحاال كتاخد العقل ؟؟؟ واش عارفة ان هادو كلهم لي كيقولو عليك مسكيييينة .... هادوك كلهم كيتمناو غييير شوية من جمالك الطبيييعي .... لي هوما قتلوه بالفيلر والبوطوكس والعمليات د التجميل ... ( هز يديها ) واش عارفة يديك شحال زوييينين... صوتك .... هضرتك .... شعرك ... واش عارفة شحال من حاجة فيك زوينة مارداش ليها البال .....
اية : ( مأثر فيها وكتشوف لتحت وقلبها كيضرب بجهد ) م .. لا ... م ماشي ..ل لداك درجة
وسيم : اه لهاد درجة .. ومكنزيدش فيه .. مرة مرة تلفتي لراسك شوفي راسك شحال نت حسن منهم ... وشحال هوما مسااااااكن قدامك ..... واش عارفة شكون هي البرانسيس د الاسماعيلي لي كيكتبو عليها فالجرائد ... واش عارفة شحال من واحد كيتمنى تشوفي فيه ...
اية : ( علات حجبانها بجوج وشافت فيه بذهول ) انا
وسييم : اااه .. نت .... يقدر يحط لي قدامو ولي وراه .. باش يكون هو رجلييييك .....
اية : ( رجعات ضورات راسها لجنب ) مكاينش هدا غير تهنى ....
وسييم : كاااين ..... وموجودين ومنهم بزاف ... غير نت كتلهاااي مع لي كيقولو مسكينة ومكترديش لبال لوخرين وهادشي لي خاصك تبدليه ولي قالت عليك مسكينة علي فييها رااااسك وقولي ليها تشرفت بمعررررفتك .... راه هي لي مسيكينة ماشي نت الهبيلة .....
اية : وسيم .... ( شافت فيه ) انا عارفاك غير باغي تت...
وسيم قاطعها وناض وقف ومشا بجهة سرير وحيد الفيست ديالو حطها وجلس
وييم : داااكوغ .... هاحنا كالسين .... مماشيينش الالة ... نبقاو هنا ... ( شاف فيها ) نكملو الفيلم ؟؟؟؟
اية : ( بدات غير كترمش فيه مدة مقدراتش كاع تجاوبو تبسمات بشوية بلا متبينها ؟.وعينيها باقين فازكين بدموع ) وسيم .... سير .... سير لسواري علاش غادي تبقى هنا على قبلي.....
وسيم : قلت ليك ديجا مباغيش ندخل بوحدي .... تمشي نمشي .. ماتمشيش هانا كالس .... مالنا خاسرين شي حاجة تانا كنقلب غير على السبة .. ياالاه عطيني فاش كتفرجي نتلاهاو ....
اية : ( علات عينيها لفوق ... ورجعات كتشوف فيه ) وسييم .. راك ممحتاجش دير هادشي وانا ماشي بنيتة صغيييرة ..... راه مفاوتين انا وياك غير بعام ونص ....
وسيم : واش مريضة نت اا ؟ لا وراه واقلة مريضة .... اشمن بنيتة صغيرة ؟؟؟؟ راحنا كلنا صغااار ... كيجيتك دابا انا ؟؟ واش باغا تكبرينا بزز ....
اية تنهدات وجرات كرسيها للبالكون ماشية وكتهضر
اية : سير لسواغي .... بلا متعدبو راسكم معايا انا بيخير ....
خلاتو ومشات لبالكون وهو بقى متبعها بعينيه وهضر وهي فالبالكون .....
وسيم : واخا ..... رديتيها فوجهي ؟ جيت حتال هنا .... وكالس نرغب فيك .... باش فلخر تصييفطيني خاوي .... عمرني طلبتك انا على شي حاجة ؟
اية : ( كتهضر بجهد باش يسمعها فنفس الوقت باغا تبكي وحابساها ) سييير من هنا اوسييييم .....
وسيم : هاهو غاااادي .... ( ناض )
مشا باتجاه الباب حلها وسدها وهي عاد طلقات داك البكية بببجهههد كتشهق وهو مزال فالبيت كيسمعها دارها ليها غير بلعاني وهي كتبكي بجهد بقى غير كاتنهد على حالها ..... وقلب عينيه كانت العلاقة لي فيها كسوتها باقا معلقة ... هزها فيديه وبقى واقف كيتسنى تسكت شوية من البكا .... تابانت ليه بقات غير كتنخصص عاد دخل للبالكون تا تخطفات
وسيم : ساليتي ؟؟؟؟؟ يلاه لبسي نشووووف .... الخضر غيجيك وااعر ....
اية : و واش ... واش نتا مكتفهمش ( كتمسح دموعها )
وسييم : نوووو ..مكنفهمش .. يلاه دغيا بغيت نشوف هاد الكسوة كيف تجيك
اية : وسيييم ... عافااااك ....!!!!!!
وسيم : مكنترغبش انا ... غانحسب حد خمسة .... والله ومااا شديتيها تلبسيها والله تاغنللبسها لييييك انا بيدي ... وختااااري ...
اية : ( طرطقات فيه عينيها ) واش حماقيتي
وسيم : واااان ....
اية : وسيم راه غير كتعذب راسك
وسيم : توووو
اية : دابا علاش كدير هادشي مفهمتش
وسيم : ثثثثثري
اية : وسيييييم
وسيم : فوووور .....
اية : راااه قتلييييك خرج
وسيم : فااايف ..( قرب عندها ) بغيتي لبسها ليك .. واخا ميكون غا خاطرك ......
يلاه غيحل ليها صدافة دكسوة لي لابسة وهي تخطف الكسوة من يديه ودخلات جارة لكرسي بسرعة وهو كييضحك
وسيم : واخا نت هي البرانسيس الكيوت دالفاميلي ..... كتبقاي اسماعيلية ضروري تحكي تانتي عاد تعطي الريحة ههههه لبسي هانا هنا كنتسناك ... الى حتاجيتي نعاونك عيطي ليا
اية : ( ماشية جيهة دريسينيغ ) مااامحتااااجاش ....
دخلات لدريسينغ وتقابلات مع المرايات والكسوة فيديها ... ملامحها كانو حزينين تاشوية بشوية بداو كيترخااو وبدات تشقق ابتسامة وهي تقلب راسها لبااب دريسينغ وهضرتو كتعاود فودنيها " يو ار ديفرنت .. يور سبيشل .... " شافت لكسوة وهي تشوف تاني فالعدم كتفكر " واش عارفة عينيك شحال زويييين " قربات بشوية للمراية وبداا ترمش وكتشوف فعينيها " وضحكتك " وبدات كضحك بشووووية وبانو ملامح وجهها وهي تبسم بعينيها وشفايفها وشافت لداك الكسوة عاضة على شفتها وبدات كتحيد الكسوة ديالها ....
لبسات بشوووية كتعاافر معاها تانزلاتها وبقات السنسلة لور معرفااش كيفاش دير ليها ... كانت كسوة فالاخضر حد ركابي وعندها صميطة ذهبية فالخصر .... عيات تعاافر ووالو ... فلخر خرجات بشوووية بالكرسي حشمانة تقولها ليه وهي تمشي جيهة الطابل دونوي يالاه غتصوني لفريدة طلع عندها وهو يخرج
وسيم : بغيتي شي حاجة !
اية : ب .. بغيت غير دادا
وسيم : علاش !
اية : ( سرطات ريقها باحراج وبدات كتومي لظهرها ) غير ... غير السنسلة ... تصايبها ليا
وسيم : وقالو ليك معندناش اليدين ...
اية وسعات عينيها وهو جاي باتجاهها ..عضات على شفتها بتوترررر معرفاتش علاش كيوقع ليها بحال هاكا واخا تعيا تحكم .... وهو قلبها بالكرسي وجا ضهرها قدامو ... وهبط التكاية دالكرسي لتحت .... واية كلها تنزكات وكارزة على يدييييها .... وبدا يطلعها ليها شوية بشووية و الكسوة كتحمع على ظهرها وهي كلها كتننهج بتوتررر وهو مبتسم ... ومرة مرة كيشوف لانحنائات ظهرها وكيهرب باش ميطولش شوفتو واخا جدباااتو ولكن عارفو شوفاتو خبثين وهي غير صالحة للخبث ديالو.... قاد السنسلة وقلبها عندو وهي غير كترمش
وسيم : هااااحنا سالينا ....
ضار براسو هو يبان ليه فوق الفوطوي فين كانت الكسوة كارطونة بيضة عرفها دصباط حلها كان صباط وبوشيت ... كان سباط ذهبي ايسكارپان بطالون متوسط .... وهزو ومشا تحنى على ركبتو وهي عضات على شفتها باحراج تاولات ححمررراااا وبدا يلبسو ليها بجنتلماانية كانها سندريلا بين يديه .... الرجل اللولة والثانية بالهداوو... وعلا راسو فيها
وسيم : جيتي زوييينة ...
اية : ( غير كترمش ) ششكرا ....
وسيم تنهد ووقف وهو كيشوف و كيطلعها ويهبطها وماينكرش انها بصح جات زوينة .. علاش حتال ليوم عاد رد ليها البال ؟ واش هو حتال اليوم لي قدر يخرجها من ايطار طفلة ويدخلها فاطار انثى مراهقة .. كيشوف لنعومة بشرتها واحمرار خدودها ووردية شفايفها ... وعسلية عيونها .... ورجع تحنى عندها وهي علات عينيها فيه بزربة كترمش برموووشها الكباااار ... ومد يدو لبانضة ديال شعرها لي كان مربوط كوپ شوفال وحيدها تاترخا شعرها على كتافها وبدا يقادو بيديييييه ويمشطو ليها بصبعاانوووو على جبهتها كان حريري وانسيااابي فيديه وهو مبتسم وهي موسعة عينييها ومزيرة بيديها على جناب الكرسي كتحس براسها بقى ليها شوية وتبكي ....
وسيم : ودابا ..... مزيااااان ..... ( ابتسم كيشوف فيها ) مشييينا ؟؟؟؟؟
اية مخدرة فعينيه وومات ليه بالايجاب وهو هز بوشيت ديالها مدها ليها وقاد ليها ظهر الكرسي طلعو باش تكى عليه وجرها بالكرسي ماشي بجهة السلم المخصص ليها لي مافيهش الدرجات ... كان نازل پلا .... نزلو تتلتحت خارجين باتجاه الباب وهي تشوفها فريدة وعلات حجبانها فآية لي اقتنعات تمشي بعد جميييييع الطرق لي داروهم معاها هي وسلطان وكتبان فرحانة من الفوق ....
فريدة : ايية ؟؟؟ غتمشي ابنتي ؟؟؟؟
اية : ( يلا غتجاوب قاطعها )
وسيم : غااتمشي .....
ابتسم ليها وزاد بآية وهي غير كتشوف مصدومة تاوصلو لطموبيل والشيييفور جا هزها حطها لور وحط الكرسي فالكوفر وركب وسيم حداها وانطلقو ... وهي ضورات راسها شافت فيه وهو بادلها بابتسامة حنينة ورجع قلب راسو لشرجم وقلباتو تاهي .....
عند بيلسان
ضحكات ليه فاش شافتوو و زادت بشوية لعندو وقربات وجهها سلمات عليه بلاابيييز وبدات طلعو وتهبطوو من ديما كاسطيوها ولاد عائلتها ملي كايلبسو الرسمي ..... كانه الكلاص تخلق غير ليهم ....
بيلسان : ااااهاه علاااش لاااا ... شحال بغيتي مني دالوقت ؟؟؟؟
لوؤي : هههه ( كيحك تحت لحيتو ) بغيت نهضر وخفت على عضامي هههه ... قالو ليا مبقييتيش ديال راسك
بيلسان : هههه ... ( قلبات راسها وبدات ضور حداه ) كيييجيييت !!!!!
لوؤي : واااعرة ... يالاه اري شي تعنيييقة وشي ضحييييكة للكاميرا نبانو غدا فجورنال نفقصو الميكانسيان ...
بيلسان بدا تضحك وعنقاتو و شافو لكاميرات لي مستفييين كيصوروهم .. ورجعات ضارت عندو وهو مد دراعو وخشات يديها فيدو ضاحكيين تاوصلو للمر لي غيخرجهم لجردة
بيلسان : تفرجت فالمؤتمر ... مغانفوتش المناسبة باش نقوليك برافو ....افتتاح ناجح ... كايليق بكم ...
لوؤي : شششكرا .....من ذوقك ...
بيلسان : وكنتأسف لشنو وقع منبعد ...قدرت نلاحظ كوحدة حافظة نظرات ولاد عماماها ملي كاتقلقو
لوؤي : ( شاف فيه بضحيكة ) جيتي زوينة .. وغاتزيدي تزياني كتر الى ماهضرتيش فهاد الموضوع ....
بيلسان : ههههه واخا ( زادو غادين ) نهضرو مثلا على العنوان لي غايتحط غدا على صورتنا ....
لوؤي : الميكانسيان هادي هي لخرة ديالي معاه ... .
بيلسان : وزعما هاد الميكانيسيان غير مسوق لياااا
لؤوي : مااضلمييش ماضلمييش ...
بيلسان : هانا اسيدي .. هاحنا غنشوفوووو
لوؤي : اجي حنا نديرو بلان واعر كاع .... يلاه نهربو انا وياك كاع ... نصلاح ليك حسن منو
بيلسان : گووود إيديااا ... صاافي نرجعو ونمشي نجمع حوايجي ...عندك تخليني !!!!
لوؤي : هه عنداك تخليني نت لي قلبك عامر ...
بيلسان : ممممم .. زعما نتا قلبك خاوي
لوؤي : و اش بالك ؟
بيلسان : بانليا عااامررر وقرب يطرطق هههه ( وصلو لمدخل الحفل وكولشي تلفت ليهم وهوما ضاحكين للجميع ) حييت اولد عمي كون كان خاوي ... من مور داك الانسحاب لي درتي فالمؤتمر من جواب باباك مستحيل كنتي غتحضر لهاد السواري كون مجابتكش هي ..
غمزاااتووو غير بالهداوة خلاتو جامع ابتسامتو وغير كيرمش هادي كيفاش قرات افكارو !!!!! عارفها دكية ومكدوزش عليها ولكن ماشي لهاد درجة ورجع تبسم ليها وهي زادت كتمختر داخلة وهو تنهد وتبعها كايطلب الصبر للجود ....
جود كان كيشرب من كاسو وسلطان بدا يومي ليه يشوف موراه ... هو يقلب راسو وبدا يطلعها وينزلها وهي داخلة مبتسمة لناس وكتحييهم براسها وكتمشى متمخترة كيف شي عاارضة على البسااط الاححمررر ..
خصلاتها الذهبيين مطاايرين مع الريح .... ومكياجها الهادئ وعيونها المائيين كيخليييو الجميع يتلفت ليهااا باعجاااب ....
وجود تبسم بجنب شفتو لي لبسات الدريس لي ختار ليها .... ولي من خلالو بغا يختبر واش راسها صغير ولا لا ...
لؤوي موراها مشا بجهة زياد واياد لي بانو ليه هوما لولين .... واريج معلية حجبانها كتشوف منين جابت هادي هاد لاغوب ..... وجنان كتسائل امتى بدلات ...
حط جود كاسو موراه وزاد بشوية باتجاهها وهي غير شافتو جاي عندها زادت تبسمات .. واابنات كلهم ولاو يشوفو فبعضياتهم لانه غادي عندها بابتسامة و نظرة اعجاب كبيرة ....
مامكترررث لتا شي واحد باغي يعرف الجميع انها ديالو ....
واياد متبعهم بعينيه وكولشي كيشوف فيهم وهي عينيها فعينيه تاوصل لعندها وشد يديها عندو بلباقة وقربها لصدرو سلم عليها بلابييز .... ولامار كضحك فرحانة وقدس دايرة يدها على حنكها كتشوف فيهم وماجدة مزيرة على الكاس فييدها .. هادو امتى طورات علاقتهم لهاد درجة ؟؟؟ ... مقدراتش تااتهضررر وهي كاتشوف قدس ضاحكة وفرحانة ليهم ..... خافت تقمعها ....
ورجع شدها من يديها غادية فجنبو داخلين بعد ماستقبلها بداك اللباقة قدام الكككل وهي عاضة على شفتها بالفرحة فنفس الوقت مباغاش تبين ليه ومشيتها واثقة قدااموووو ... متوقعاتوش ابدا انه غيجي عندها خصوصا بعد خصامووو ... تبدل فيه كولشي الا قلبو البيض لي كينسى الخصام ومكيبقاش يحكر فيه .....
غاديين فالممرر والعيون كلها تالبعاهم وهي يديها فيديه عالنين للجميع انهم مرتبطين والفلاشات دالكاميرات ضايرين بيهم ولوؤي عرف انه اابلان ضاع وبقى غير كايضحك ....
جود : ( نزل راسو لعندها وتاهي علاتو فيه ...كايطلعها ويهبطها ورجع كيشوف قدامو وهضر بصوت كتسمعو غير هي ) I like your dress " عجني لباسك "
بيلسان : ( ابتسمااات ابتسامة ساحرة وجاوباتو بنفس نبرتو ) I like your taste " عجبني ذوقك "
جود : ( تبسم على جوابها ورجع شاف فوجهها ليمقدرش ينزل منو عينو ورجع ثاني شاف قدامو غاديين جيهة البار ) I like your make up " عجبني مكياجك "
بيلسان : ( عضات على شفتها مدة وجاوبات) I like your smile " عجباتني ابتسامتك "
جود بدا يضور راسو بضحكة تاكانو وصلو قدام البار وسلطان بعد على الكونطوار لي كان متكي عليه وقرب سلم عليها بلابيز وجود عوج راسو لجنب لي واضح الحركة معجباتوش ونوطاها عندو تالمنبعد .... ورجع شاف فيهم ...
سلطان : على سلااامة .. تاقلنا مغاتجيش ...
بيلسان : ( ضارت شافت فجود وشافت فيهم ) نتا وشكون قلتو ماغانجيش !!!
سلطان : ( شاف فجود ورجع شاف فيها وضحك وهز كاسو ) تهلااااو ...
بيلسان : ( تبعاتو بعينيها غادي ) بقى معانا ..
سلطان : لا انا سينغل ومشاعري مرخاصينش عليا باش نحطهم بين يديكم نتوما ...
غمزها وهي ضحكات ليه ومشا باتجاه لوؤي واياد وزياد لي كانو تاهوما كيشوفو فيهم واياد مخنززرر مزال متسرطاتش ليه علاقتهم ومبغاتش دخل ليه لراسو ... والبارمان عطا كوكيتل لبيلسان شداتو عليه وشافت فجود كترشف منو
بيلسان : ( كتشوف مع كوستارو ) عجبني حيت لبستي على دوقي حتى نتا ....
جود : ( بدون فهم ) هم !
بيلسان : كوستار .... لي سيفطت ليك ...
جود : ( قلب عينو كيشوف فكوستارو ورجع شاف فيها وحاول يبتسم وهو كيحك فوق حاجبو بصبعانو مكانش عارف هي لي صيفطاتو ومبغاش يبين فنغس الوقت .. وفنفس الوقت كايتسائل علاش هاد الحركة .. وحيت كتسنى جوابو أجل التحليل لما بعد ) اااه ... عجبني ....
بيلسان فقط تبسمات ليه وضارت بعينيها كتشوف فالحضور وهو كيرشف من كاسو وكيشوف فيها ...مزال ماشبع منها ... وهي تقلب راسها لعندو وجات عينيه فعينيها وتبسمات ليه كدير شعرها مور ودنيها بتوتر من النظرات لي كيدير فيها ...
جود : مكرهتش نعرف ( كيضور براسو على الارجاء ) واش عمي عندو هنا شي كوان بعيد شوية .....
بيلسان : علاش !
جود : ( كيشوف فيها باعجااااب ) منضمنش ليك انني غنبقى شاد راسي كتر من هاكا .....
بيلسان : هه ! ... لاسف مكاينش .... وغيخصك تشد راسك ....
جود : ( رجع رشف من كاسو كيشوف فيها ) علاش مشيتي ....
بيلسان : نتا اكتر واحد خاصك تكون فاهم علاش مشيت .... حيت نتا لي ديما كتواجه مشاكلك بالسفر والهروب ....
جود : كنقاد افكاري
بيلسان : ( قربات ليه كاسها لكاسو وفرقعاتهم بالنخب ) هانتا جاوبتي على سؤالك ....
جود : ( علا راسو معاها كيومي بالايجاب بابتسامة عااادية مشافتهاش من نهار جااات قد هاكا عرفات الى ليوما عجبااااتو دبصح شيلي خلاها تزيد تيق فهاد العلاقة ) وباش خرجتي من هاد السفر !
بيلسان : ( رشفات من كاسها وحطاتو ومات لبارمان يزيدها واحد اخر ) كتعرف شكون اعز وحدين عندي فهاد الحياة !
جود : ( باستغراب ) واليديك !
بيلسان : وخوتي
جود : اهاه !
بيلسان : وبحياااتهم .... بحياتهم ، انا كنواعدك مغيعاودش يجي ففمي ....
جود بقى غير كيشوف فيها وتبسم ليها غير بعينيه وكيومي بالايجاب براسو ... عجبو الحااال بزاااف ونساتو ففعلتها ... انها تتغير على قبلو اهم ليه من كولشي .. ورجع رشف من كاسو وشاف فيها
جود : راه لمصلحتك ولصحتك كتر ....
بيلسان : وحتى انا قطعتو على قبل مصلاحتي .. وعلى قبل الا كانو عندي شي ولاد مستقبلا ميقلدونيش .... ( شدات الكوكتيل على البارمان وشافت فيه ) مبغيتش تاباباهم يشمو فيه ريحة الحشيش ... وغايدير زوين الى قطعو وعاوني باش منشمش فيه ريحتو ونرجع عليه ....
جود طول فيه الشوفة ... و وما ليها بالايجاااب كيشوف فيها .. جاتو رغبة انه يحضنها وتحكم فيها ... ورجع قلب راسو لجنب كيهضر
جود : واش متاكدة معندوش شي كوان خاوي ...
بيلسان : هههه لااا .. ماعندوش ....
جود : اممم ... ( رجع شاف فيها ) شهر وعشر يام ... ماشي مدة طويلة شوية !. ...
بيلسان : نفهم من كلامك ... توحشتيني ....
جود : هادشي لي باليك ؟
بيلسان : هممم ... باينة صراحة ...
جود : ( قلب راسو تاني لجنب ) عيطت ليك بزاف دالمرات ...
بيلسان : عيطتي ليا جوج دالمرات آجود ....
جود : ( شاف فيها ) علاش جوج ماشي بزاف ؟؟؟
بيلسان : هههههه
بيلسان بقات غير كضخك بالفقصة وسنيناتها بحال البلوووررر وكولشي كيشوف فيها وهو ساهي فضحكتها ومزير على الكاس وقرب ليها كتر واسد كيشوف معلي حاجبو ...
جود : مزال متأكدة انه مكاين تاااشي كوااان خااوي !!!!!
بيلسان : ( كضور راسها بلا ) ههه متأكدة ...
جود : ( تنهد وبعد راسو كيرشف من كاسو ويتنهد ) غنخطبوك غدا ....
بيلسان : ( كتشرب من كاسها ) قالتها ليا ماما ....
جود : شنو كان جوابك ....
بيلسان : بغيتي تعرف جوابي !! .. كاينة واحد طريقة زوينة كيعرفو بيها جواب البنت واش قابلة تزوج بيك
جود : ( شاف فيها بنظرة متسائلة ) شنو هي
بيلسان : كتثني واحد الركبة فالارض وكتوقف عليها ورجليك لوخرا كطلقها وكتقدم الخاتم وكتقول .. ويل يو ماري مي ! { واش تزوجي بيا}
جود : ههههه .. ( جاتو ضحكة وبدا يضور فراسو ورجع شاف فيها ) وفلخر كيمشي يخطبها ثاني من دارهم ... ونفس السؤال كيعاودو يسولوه والديها ... ونفسو تاني كايسولوه العدول .. علاش هاد تمارة كاملة اش فيها لاخدينا الاومور ملخر ديالها .....
بيلسان : واش فيها لاكنتي جنتلمان شوية ....
جود : انا هاد الساعة معاك غير مااان " راجل " ... ماي بلوندي لايدي ...
بيلسان : ( بدات كضحك وقربات عندو ) كنتي شحال هادي كتقول ماي بلو ايز ... عجبني الميزاجور ....
جود : قالو ليا انا لي سميت عليك حتى بيلي ! ودابا كتقولي ليا بلو ايز .... خليتيني دابا نشوف ان علاقتي معاك هاداك ااعام دازت كولها كنخترع ليك فالسميات وصافي ...
بيلسان : ههه لا ... دازت احسن صراحة .. اخترعتي ليا بزاف دالحوايج .. مبغيتش نفكروهم ليك .. حيت غنفرح لاتفكرتيهم راسك ...
جود : مغنتفكرهمش ... ولكن غنحاول نخترع وحدين جداد .....
بيلسان بدات كتشوف فيه ولابتسامتو لي ابدا ممولفاهاش وهدوووئووو وريحتو .. وهاد النبرة الهادئة والابتسامات المتتككرة لي مكيبتسمهوش فالعادة عرفات ان سبابهم غير كاس الويسكي لي فيديه ولي واضح كتر منو ... النبرة لي كيهضر بيها والهمس ديالو خلاوها تفقد عليها تاني ....كريزما ديالو مكتقدرش تقااااوما كتخليها تسد وعيها على الجميع وتنتبه غير ليه .... وهي تنهد وبدات تحك ورا عنقها بحالا جاها الصهد وشافت فيه .....
بيلسان : واقلة غنمشي نتأكد واش بصح مكاينش شي كوان خاوي ......
تحطات الطموبيل قدام البوابة دالمتحف ... ونزل الشيفور باتجاه الكوفر نزل الكرسي ديالها .. بينما وسيم حل ليها لباب وهزها تاحطها فوق الكرسي وحط تيليفونها وبوشيط ديالها فوق رجليها وهي علات راسها فيه وهو مبتسم فيها والفلاشات ديال الصحافة كيضربو فيهم ......
كانت كتشوف فيه بفرحة كبيرة .... بامل كبير ....
كانت كتشوف فيه بحال المنتصرة فحرب دامت 6 سنوات بينها وبين برودو اتجاهها ... عمرها ظنات شي نهار غيحل ليها الباب بحال هاكا ويرافقها فوحدة من الحفلات ... عمر ماظنات شي نهار وسيم هو لي غيقاد شعرها فوق كتافها ... كانت كتشوفو حلم بعيييد بزاف .. !! تحقق ....
اه حلم .... كوحدة تزادت موفر ليها كولشي .... تزادت الحب و الحنان غامرينها من جميع النواحي .... حب عائلتها ... وواليديها .. خوها .. مربيتها .... اساتذتها ... الطاقم الطبي المشرف على ترويضها ... من ديما كانت محبوبة الجميع .... ولكن عمرها جربات تتحب بطريقة اخرى .. بطريقة تحسسها انها انثى .... هي عارفة ومتأكدة انها باقا صغيرة على هاد القصص ولكن قلبها ملقاتش عليه سيطرة من نهار وعات وبلغات ... بلغات على عينيه وضحكتو وشقاوتو ... من وهي طفلة ذات العشر سنوات وهي كتبعو بعينيها .... وكتسنى وكتمنى فقط نظرة .. فقط اهتمام ولو بسيط وكانت كتلقى غير الجفاء لدرجة كايدوز فطريق بدون حتى ماتبان ليه كاينة تما ... بغاتو بينها ويين نفسها طفلة ماحدها كتكبر ماحد رغبتها كتزيد .... واملها كينقص .... خصوصا فهاد المجية اللخرة ديالو من امريكا وشافت شحال تبدل .... الامل تلاشى بمرة .... مستحيل واحد بحالو يشوف لوحدة بحالها ..... حتى لهاد الليلة لي بعثر ليها جميع القيود لي دارتها بينها وبينو وقيدات بيهم حبها وحبساتو .. جا طلق ليه سراحو من جديد ..... جا باش يعطيها امل اخخررر ....
ابتسامة ملااائكية حافرة جوج حفرات فخدودوها كانت رامقاه بيها وهو رجع موراها ودفع بيها الكرسي باتجاه الممر الطويل لي غيدخلهم لجردة فين كاين الحفل وهي غير كتعض على شفايفها وتضحك فرحانة ....
وسيم : هانتي جيتي .. اشنو وقع كاع ! ..
اية : ( هبطات عينيها لتحت شحال ورجعات علاتهم كتشوف الممر لي غاديين فيه وعقلها باقي فاللحظة لي كان على ركابيه وشاد فيديها وكيفكرها انها ضحكتها زوينة ) وقعو بزاف دالحوايج ..... لي كنشوفهم انا بوحدي ... ..
وسيم : اممم .. بحالاش ....
اية : خاصيين بيا ...
وسيم : اووووو ههه ! خصوصيااات يعني .... مممم خليني نفهم .... شنو يكون زعما شي واحد فهاد الحفلة نتي هربانة من شوفتو ولا كيفاش !
اية : هه ! ( نزلات راسها حشمانة ورجعات تنهدات ) وفنظرك نتا .. وحدة بحالي .. فهاد لاج لي انا فيه .. يكون عندي شي واحد فحياتي ! من حقي نبغي شي واحد ويبغيني تاهو ؟ شي واحد لي يكون كيشوف ضحكتي وشعري وكاع داكشي لي قلتي !
وسيم : هادي هي الضريبة ديال تكوني نت اخر العنقود غتبقاي ديما كتشوفي راسك وكيشوفوك صغيرة ... مي كنعرفهم فلاااج ديالك راه مكيعرفوش شنو هو اللاج .... دونك منستغربش لاكان شي واحد فحياتك هذا هو اللاج لي كيكتشف فيه الواحد ميولاتو .... وهذا هو لاج لي كيعيش فيه العلااقات العابرة لي مكتنساش ليه حياتو كاملة .....
اية : العابرة قلتي ! علاش لي مادومش ؟
وسيم : قلييل فين تلقاي علاقة تكبر معاك من هاد العمر هدا تاتوصلي للعمر ديال الزواج .... هادشي الى مكانش مستحيل ...
اية : جود وبيلسان .... حتى هوما بداو صغار ...
وسيم : هههه دابا هذا تشبيه لقيتي هههه !!! هاد جوج هوما الوحيدين لي ديري كولشي وماديريهمش قدوة
اية : ( نزلات راسها كتضحك ) هههههه بالعكس ...غير الزهر مواقفش معاهم وصافي ....
وسيم : صكع وصكعة كيفاش بغيتي تكون علاقتهم هههه منحوسة كتر منهم ....
يتبع...
التعليقات
لا توجد تعليقات بعد، كن أول من يعلق.