أشبال الأسود الجزء الثالث

وصلاتها للخدمة و اتجهات تاهي للبيرو لي كدوز فيه معضم وقتها ملي مكاتكونش فالباطو .. مع الدخلة تبعاتها صفاء تاني بالاجوندا اليومية حتى دخلت لمكتبها ... علقات لافيست وعلات البيسي ... عينيها فالخدمة وعقلها مسافر كتفكر فداك الحي .... وببساطة دوك الناس ... تفكرات دوك الوليدات ....تبسمات ودوزات ابيل ... عاد رجعات كملات تادخلات عليها صفاء .. طلعات عينيها فيها ورجعات حدارتهم كتكتب ...

صفاء : ( كلسات ) اتصلو بيا من واحد المحل ....قالو وجدو ليك داكشي لي بغيتي ... لمن بغيتي تعطي هادشي ؟ لشي دار الايتام !!

قسم : ( خدامة وكتهضر ) نو ... لواحد الحي ...

صفاء : آه شي حي مهمش هدا ؟ ... دونك عطيني لادغيس نعطيهم يمشيو

قسم : ( بهدوء) غانمشي انا

صفاء : اء ؟؟؟؟؟ ميمكنش امادموزيل !!! تدخلي لاحياء شعبية بوحدك ...مي سي امبوسيبل

قسم : ( علات فيها راسها ) على مالي كيف جيتك ؟ كيف جاك الحي ؟ بكل افتخار كنقول فيه تربات ماما .. وجدة .. وبابا .... كلهم تزادو فحي شعبي .. علاش منمشيش ليه ؟؟؟؟ كاياكل البشر ؟

صفاء : لا ابددا مقصتدش الاهانة ... فقط لاجل سلامتك

قسم : ( رجعات كتخدم ) غايمشي معايا الكارد ... علميهم يوجدو داكشي فطرونسبور ديالهم غاندوزو موراه

صفاء : ( تنهدات ووقفات مكتقدرش تزيد معاها الهضرة ) داكوغ مامدوزيل .. وشوتينغ ؟؟؟

قسم : أجليه ....

صفاء : ع على قبل حي تأجلي شو( طلعات راسها خنزرات فيها وهي تسكت )

نلضت صفاء مشات هاربة من شر تخنزيرها ... و قسم كملات خدمتها وهزات الفيست ديالها وهبطات لطموبيل .... زادت و تبعاتها رنج ديال الكارد .... ودازت حدا داك المحل لقات طموبيل ديالهم عمروها بداكشي لي طلبات .. عبارة على محفظات ديال الدراسة ومعمرين بجميع الادوات ... وباقة ديال قصص الاطفال ... و بيسكليطات لكل واحد ...

مشات هي لولة وهوما تابعينها حتى وصلات لداك الدرب .... وتاني تجمعو وتجوقو عليها حيت عرفوها هي لي عطاتهم النفاخات ونزلات تضحك معاهم وتفرق داكشي .... حيدات النضاضر عاد عرفوها لي كايتابعو الاخبار خصوصا البنات الشابات وكولشي جا كاتصور معاها ... والشركة لي جابت داكشي كتفرق على دوك الوليدات وهوما كايهزوهم بالفرحة وشي عيالات كايزغرتو نوضات الروينة فالحوووومة ....انور غير كان

دايز شافها ... عرفها الى هي مولات ااصاك ومشا كايجري للدار ديالو ....

اما هي تخشات وسط العيلات كتسول فيهم وتعرف شنو كايعرفو يديرو وكل وحدة منين كتعرض عليها .تدخل لدارها .. ولي مكتعرفاش ولات كتعرفها .. ولاو كايعطو ليها غير مولات التلفازة ... حسابتهم جاية من شي برنامج..

سلات معاهم وقبل ماتمشي ضارت شافت فدار سلمى ... ابتسمات و قالت تدوز تسلم عليها عاد تمشي ... قالت للكارد يتسناوها فطموبيل ... ومشات دقات الباب

سلمى كانت صابحة كتقرا الابراج فالمجلة على الله وعسى تشوف شي حاجة فمستقبلها كتفرح .... حتى كتسمع دقان ..

سلمى : شكون غايجي ؟؟ حسنى مسافرة وخويا ناعس ؟؟؟

ناضت بتثاقل حلات لباب وهي تشوفها وتبسمات حتى لودنيها بالفرحة

قسم : صبااح الخير ....جيت لهنا وقلت ندوز نشوفك قبل مانمشي ..

سلمى : مرحبااااا بيك .. زيدي دخلي احسن مادرتي ....

قسم : مكاين علاش راني غانمشي دابا ..... بغيت نطمن عليك !! هضرتي مع خوك ؟

سلمى : حتى دخلي ونهضرو ماتبقاااايش فالباب حششومة ...

جرتها من يديها دخلاتها وقسم ومات بيديها للكارد يبقاو بعاد ... ودخلات معاها وقفو حدا الباب

قسم : والله الى مزروبة دزت غير نشوووفك ....مرة اخرى ان شاء الله

سلمى : واش جيتي على ود الصاك لي تشفر ليك ؟؟؟ لقيتيه

قسم : نو ... جيت على ود حاجة اخرى ....( بابتسامة) كايبان ليا واقلة غانقرب كتر من هاد الحي ... شي حاجة كتأتيريني ليه

سلمى : ( حلات عينيها ) حللللفي ؟؟؟؟ هي غاتولي تجي عندنا بزاف ؟؟؟؟؟

عند اصيل ...

صوت دتيليفون هرس ليه راسو وهو ناعس كل مرة يتقلب لجنب حتى ناض منرفز جاوب بصووت بحوج

اصيل : شكااين على صبااااح

انور : اصيييل عتق اخويااا عتتتق .... البنت راها هنا .... هي و الكارطكور ديالها ... باينة جاو عل ود الصاك

اصيل : ( حك فراسو رد شعرو لور كايحل عينيه بزز) وايلي !

انور : ديت شي دراري دالحومة و صحاب المسخوط غانمشيو لبراكاصة نخلصو هاداك لي تما لعلى وعسى يخلينا نقلبو على صاكها .... والا غايمشي فييييها البرهوووش ونمشيو معاه حتى حنا فالرجلين

اصيل : مزيان .. من الاحسن تلقاوه وردوه ليها وهادي تكبر ليه الراس ...

انور : شوف انا دابا غادي لبركاصة فالبيكوب بسيف باش ديماراتليا بنت القحبة نهار مععععكس ... نتا عينيك على الدرب الى شفتي كايسولو الناس علمني الله يرحم باك

اصيل : دابا غانولي برگاگ عند باك انا ؟

انور : ولعاار لعاااار اصييل خووك انا...

اصيل : ....صبحاتو الله ...

نفض الايزار بغضب ودخل لدوش ...

لتحت ..

سلمى : وعااافاك ديري ليا خاطري ودخلي .. اويلي تبقاي واقفة فالباب حشوومة

قسم : كون كان عندي الوقت علاش لا ... مي دابا مزروبة .. مرة اخرى وتكوني حليتي فيها امورك ووافق خوك على المنحة .... نجي فظروف احسن ان شاء الله

سلمى : ان شاء ( باقي ماكملاتها سمعات خطواتو و التنحنيحة ديالو فدروج وهي تقفز موسعة عينيها): ن . ناري فاااق ....

قسم مافاهماش علاش هاد الخوف كامل من اخ فاق من النعاس !!!

قسم : سلمى تهدني ...

سلمى : ( كاترعد ملي سمعات خطواتو نازلين فالدروج لان خايف يكتشف خبر منحتها بهاد طريقة يقتلها ) خختي ... ختي قسسم عفاااااك ... ( كترجاها بعينيها ) عنداك تقولي ليه جيت نطلب منك الممنحة ... راه غايعرفني جيت عندك وخرجت بلا خباارو غااايدبحني.. خصني حتى نقولها ليه بطريقتي .. عفاااك .. ماتقولي ليه وااالو دابا ..( سطريساتها معاها)

قسم : ششس تهدني ماااالك ... و آش غانقول ليه ؟؟؟ بشووووية راك خلعيتني معاك ....

سلمى : ماعرفت مااعرفت اي حااااجة ...( غاتبكي بالخلعة ) غير ماتقووليش ليه الحقيقة والله حتى غايقتلني .... ناااري ويعرفها بهاد طريقة عمرني نحلم بشي منحة

قسم : صااافي تهدني ... مالك كاع مخلوعة قد هاكا شكون غايكون كااااع هادا... تهدني انا غانتصرف ...

زادو الخطوات قربو وقسم قلبها ولا يضرب معاها واخا مكيخلعها حد مي خافت عليها .... هوما يشوفوه نااازل وحاني راسو باش يقدر ينزل فالدروج بسبب الطولة .... قسم سرطات ريقها وطرطقات عينيها ملي شااافتو ...... وسلمى شافت معاها كيف تبدلات هادي لي معولة عليها زعما شافتو وهي تحل عيينيها بحالا شافت شي زومبي ... كان يلاه واخد الدوش ... البنية عريااانة لابس غير كيطمة بالسيور وصندالة دالنايك ... شعرو مرون فازگ ونازل على عينيه الزرقييين لي بحال السما تماما بحال ختو ... زررقة صاااافية جداااابة .... كتاف عراااض وطووولة .. ونازل مطلع حاحبو قسم اش كدير عندهم !! وآش جابها تاالدار عندو ؟ واش حيت بات كايشوف فتصويرتها صبح دابا كااايحلم بها !!!! شنو علاقة بنت بحالها بدارو؟؟؟ ....

وصل عندهم بملامح مستغربين وتكا على جنب الحيط مربع يدو ...فنفس الوقت ماباغيش يبين انه كايعرفها

سلمى: ( تلعثمات بخوف) اا .. خ خوويا .. ه هادي غير( شافت عند قسم لي حالة فمها فيه كتنغزها تفكها)

قسم : أنا ... ( ضحكات تابانو ضراسها ببراءة قاالت)أنا كنوووصل البيييتزاااا

سلمى طرطقات عينيها اش هاااد الكدبة المفروشة .. واصيل طلع معاها وهبط وهي غير صاكها بان ليه ساوي هاد الدار كاملة .. وتحنحن وقال بصوتو الخخخشن الثقيييييل لي زاد زعزعها ....لان شاف القضية فيها الكدوب . دونك شي حاجة مخبعاها عليه سلمى

اصيل : مممم بيتزا .. كتوصلي بيتزا فالفيراري ؟؟؟؟

قسم عضات على شفتها ملي تفكرات راه جات بطموبيلتها وغايكون شافها ...

قسم : اا ف فيراري ؟؟؟ اااه .. الفيراري ... ( كضحك تنسي شوية التلعثم ) داك .. الحمرة لي على برا ياااك ( اصيل كايحرك ليها راسو بمعنى آه بالثقااااالة) د ... داك لي محطووطة لهيه .... اااه هااااديك ديال م .. مول الريسطو .. ااه ديال مول الريسطو لي ك كايفرق البيتزا ... ( بغات تقلب دغيا تفافات ) عندنا واحد بييتزا زوينة بزاف ولديدة ومودزاغيلا ديالها م(قاطعها)

اصيل : غاتكون هاد المودزاغيل مصنوعة من الفضة ياك !! مدامها كتفرق فالفيراري ..

قسم : ها !!! ( هدا طانز عليا ولا مالو ) ل لا ... و ومالها الفيراري ... ع عااادي دابا دنيا طورات ( كتضحك بتوتر خصوصي النظرة لي داير فيها مقاداش تصبر قدامها ) ولاووو يفرقو فالفيراري و البوررش .. و ولا لا اسلمى .. المغررب تطووور ياااك

اصيل :الاخت يمكن عايشة فشي مغرب آخر ... اما هاد المغرب لاكنتي كتفرقي بيتزا ... صاليرك موحال يشري ليك حتى اليد ديال داك الصاك ... ( جا ماشي ووقفاتو خيفانة على سلمى يضربها لي قربات طيح بالخلعة)

قسم : ل لا .... ا انا بصح كاننفررق بييتزا ... (ببراءة) ماتيقتينيش!!!!!

اصيل : ( رجع عندها هو كايقرب وهي كتبعد وتسرط فريقها ) اهاه ... بغينا بيتزا .. فين هي !!!!

قسم : فين هي ( كضحك بنبرة قربااات تبكي ) ف فيين هي .. اا اه نوغمالمون خصها تكون عندي وي ...،خصها تكون عندي ... غ غير خ خداو جييران ... و،ونتوما جيت نسولكم واش بغيتوها .... ها ؟؟ تبغيوها ... ( دايبااا فنظراتو الشوكيين ) ب بال.. بالحوت .. و ولا ب بالكبدة .. ولا .. بب بب بمعرفت آش ...خوويا ممكن تببببعد شوية نننهضر ..

اصيل بعد عليها وهي بقات تضور فعنيها هنا وهنا وشاف عند سلمى بثقالتو وختوريتو المعهودة

اصيل : شكون هادي

سلمى : ( بتوتر كبير النص احراج حدا قسم ونص خوف من خوها ) ..ا ... غ ير .. غير صديقة ديالي ...

خنزر فسلمى وهي فهمات تخنزيرة ديالو اش كتعني ... بقا قلبها كايزدح و قسم حسات بالذنب لي خلقات ليها مشكل لانو دار فيها واحد شوفة خطيرة ديال القتيلة... وفزفس لوقت كتحس باسها تااللفة ملي شافتو ... اصيل طول الشوفة قسم حتى خلاها ترتبك و قرب لودن سلمى وهمس

اصيل : منعبد ونتفاهم معاك ... شدي هاد البنت هنا ماتمشيش حتى نجي ... الى مشات عيطي ليا ...

سلمى : علاش اخويا و .. ( قاطعها بتخنزيرة وخرج )

سلمى سرطات ريقها وشافت عند قسم بإحراج

سلمى : س سمحيليا عفاااك ... م ماكنتش كايحسابتني غايفيق دابا ..

قسم : ( حاسة براسها بحالا مضروبة بشي تصرفيقة ) و واش .. واش هدا هو خوك ؟؟

سلمى : ( باسف ) مممم ماشي لخاااطري خويا ...

قسم : ( حكات يديها مع بعضها وتنهدات ) ممم . موهيم انا غانمشي .. ( شدات على كتفها ) نتمنى مانكونش خلقت ليك شي مشكل بمجيتي .. برأيي صارحيه ... وباش مايتسماش كدبنا عليه ويزيد يشد العكس ... ماتقوليش ليه انا لي غانعطيك المنحة ....

سلمى : صافي كوني هانية ... و ولكن خليك هنا مزال ... عفاك مسخيتش بيك

قسم : منقدرش غير سمحي ليا ( حاسة بارتباك ودماغها فيه التشويش )

سلمى : و ولكن ... ( عضات على شفافيها وهضرات ) خويا قاليا متخليهاش تمشي .. يمكن ماتاقش بينا

قسم : هو قاالهاليك ؟؟؟

سلمى : والله القسم الى هو ... عفاك خليك ... قاليا منبعد ونتفاهمو الى جا ولقاك هنا نسيوه بشي حاجة ومغايدابزش معاااياا عفاك بقاي ...

قسم تنهدات ودوزات يديها على شعرها

قسم : ففف مكانش عليا نجي ...

سلمى : ( هبطات راسها ) سمحيلي كولشي بسبابي .. ن نتي باينة مامولفاش هادشي وانا ..( قاطعاتها )

قسم : بديتي عاوتاني ... زيييدي زيدي يلاه نشوفو هاد للحريرة فين غاتخرج ...دابا بدينا بدينا نكملو ....

دخلاتها ودخلو لدار وقسم جبدات تيليفون صونات لماماها علماتها غاتعطل مغادوزش موراها وجلسات مع سلمى ... وقسم كتحاول تبيين ليها بلي عادي واخا ماعجبهاش الحال ... فنفس الوقت نظراتو ليها حساتهم اختارقوها بحالا شكلو فدماغها شي ثقب ... مكانتش كتخيلو غايكون هاكاك ؟!! فهاداك الجمال والشخصية والفحولة ..

من بعد نص ساعة..... على برا ...

نزل اصيل من واحد الپيكوب .. هاز صاكها فيديه كاع موسخ بداك المزبلة لي كان مليوح فيها ... و انور طل عليه من سرجم

انور : اصيل مابغيتش اخويا نطيحك فشي مشكل .. عيطني نعطيه ليها رااسي

اصيل : سير تخدم شغلك عارف اش كاندير

انور : شوف ... حط ليها تما تيليفون ديالها وعيه ليها قوليها لقيناه طايح .... صافي ؟

اصيل : راه قتليك سير تخدم شغلك ...

مشا انور وهو تاجه لطوموبيلتها كان الكارد تما واقف غير قرب لطوموبيل خرجو عندو

الكارد : ( بالانجليزية ) باغي شي حاجة ؟

اصيل تنهد عرفو ماش مغربي وكايزيد يتصدم فنفوذها ورد عليه تاهو بالانجليزية لي مكتبانش عليه واش كايهضر بها

اصيل : هاد صاك ديال مولات هاد طوموبيل كنضن .... بغيت نرجعو ليها ومابنتش ليا هنا

الكارد : ( شدو وفتحو شاف الوراق ورجع تبسم ) اهاه ديالها ... فين لقيتيه

اصيل : طايح ... الاهم هو ردو ليها ...

الكارد : شكون نتا ؟ نقدر نشوف الهووية ديالك

اصيل : كايهمك هادشي ؟؟؟ ..

طلعو وهبطو ومشا خاشي يدو فجيابو حتاوصل لدار وجبد الساروت حل ودخل ... قسم كانت هي وسلمى كايهضرو وهو كتيشوف فيها من بعيد ...

سلمى : مزال مفهمتينيييش ... راه ماش كنخاف منو بحال شي عدو .. لا .. راه خويا وعارفاه كايبغيني وكايخاف عليا وهو الامان ديالي... ولكن .... معرفتش قاسح شوية مكنزعمش عليه

قسم : ماعرفتش انا اصلا اش فيه مايخليك تخافي ؟؟ عااادي ولد بحال كاع الولاد .. ولا كبير شوية على ولد .. مهم نقووولوو راجل ... واصلا منين جاتو ؟ لي يهز يدو على ختو راجل ؟؟ غااااا ولد باراكا عليه ... باااش زاااايد عليك مافهمتش ؟؟؟ ( اصيل مصغر عينو كايسمع ) ايييه زوين وعينيه زورق وطوييييل مااقلناش ... ولكن يهبط شوية الارض قبيلة كالس يهضر بتعفااااررر راه لاجيت لتعفار حتى،انا راني نهبطو يجفف الارض .... مافهمتش شنو خلاه معفر بحال هاكا ومالك الكوووون .. ياك اودي لاباس ... ( سلمى موسعة عينيها شافتها خرجات ليها على الموضوع ) نافخ ريشو بحالا غير هو لي كاين على البسيييطة .... لا وباش كملها خاشي فيا راسو بحالا دايرة شي جريييمة كالس كايستنطق فيا كون ضربني حسن .. وهانا حيت نشوفك شغلو هو ؟

سلمى : (حالة فيها عينيها و عطاتها كاس دالما ) تشربي ؟

قسم : ( شدات عليها الكاس ) هداك راه خصو شي واحد نيييت لي يوقفو عند حدو ... بحال هاد الرجال انا حافضاهم فاش كايلقاو شي حدة درويشة كايركبو على ظهرها ويبنيو عضلاتهم .... لا وفاش كتقتليني ملي كاتقوولي كايخوفك ... كتخافي منو ؟ شكوووون يكون هدا لي يخعلك ؟ اش عندو مايدر ليك كاع ؟ كايقطع الريوووس ( كاتشرب من الكاس تبرد على راسها )

اصيل تبسم جانبيا باستهزاء ... ودخل عليهم تحنحن تازعزعهم

اصيل : احم احم ..

سلمى حلات عينيها بسرعة وقسم بزقات داك الكامل وبدات كتكحح.

سلمى : ( كتسرط ريقها وكضرب ليها على عنقها ) بب بشوية غليك بشوية عىيك ...

اصيل دخل وكلس مفرق رجليه ومربع يديه كايشوف معاهم ...

قسم : ( طلعات رسها وعينيها حووومر بسبب الما لي تحنق فيها وهي كتلعب بعينيها مقادراش تشوف فيه ) ا ... انا خصني نمشي .. ( وقفات ) تعطلت

سلمى : ( كاتشوف فيه وفيها ) اا،.. مم ( ماعرفات ماتقول )

اصيل : ( مد يدو جيهة الباب ) تفضلي ..

قسم : ( طلعات فيه حاجبها ورفعات راسها ) مافهمتش ؟؟؟؟؟

اصيل : قلتي بغيتي تمشي

قسم : اه .. حيت انا بغيت نمشي ... بلا هاد الحركة المستفزة ديالك

اصيل : ممم يلاه بزربة قبل مايكرطو ليك دراري الصغار الصبااغة دالفيراري ديالك ....

قسم : ( صغرات عينيها فيه ) راه قتليك مااشي ديالي

اصيل : ( عينيه فعيننيها وسلمى فالوسط ) اوووه سمحي ليا ... بغيت نقول بزربة قبل مايكرطو دراري الصغار الصباغة دلفيراري ديال مول المحل دلبيتزا لي خدامة عنددو

قسم : ( ضربات شعرها رداتو لجنب ودات عقلو معاه ) هاكاك ...

زادت وهو متبعها من لور وسلمى ناضت بتوتر موراها وهو وساعت الضحكة على فظو وعلا راسو لفوق كايحك على شعرو ويضور راسو ...

وصلات قسم للباب و سلمى عنقاتها

سلمى : سمحي ليا عفاااك .... شكرا بزاف حيت مفضحتينيش

قسم : متبقايش تخافي وعطييييه حتى نتي خرجي فيه عينيك ...

سلمى : ههه غانحا ل ( شافت موراها ورجعات شافت فيها ) عجبتيييني فييه هههه ..( سمعات صوتو وقفزات) يلاااااه هاهو كااااييييعيييط .....

اصيل : سسسلمى

سلمى : ا انا جاياااا

قسم : الاطيف آلاطيف على حلق عندو ... سيري سيري

دخلات عندو وقسم حلات لباب خرجات ... غير ضرب فيها الهوا وهي ترد النفس بحالا كانت قاطعها ... وبقات شحال واقفة فلخر تبسمات ببلاهة وزادت لطوموبيل ...

سلمى دخلات عند أصيل وهي كتفرك فحوايجها بالخوف وكلسات مقابلة معاه

اصيل : مشات !!

سلمى : ااه .. م مشات

أصيل : واخا دابا نقدر نعرف شكون هي هاظ البنت ؟ واش كدير عندي فالدار

سلمى : اا ... ه هي ... ر راه شوف اخويا ... انا عارفة راسي غ غالطة حيت مشاورتكش ...

اصيل : اهاه ! ...

سلمى : ففف ... مهم ... ه هادي .. ع عندهم و واحد جمعية ... ك كاتفرق المنح الدراسية ... ففف بغيت نقول هي كتفرق البيتزا ولكن كتعرف شي ناس ف( قاطعها )

اصيل : بلا مدوخي عليا .. عارفها مكتفرقش البيتزا .... هضري نيشان راك عارفة معنديش مع الكدوب

سلمى : ففف واخا .... ولكن ه هي مابغااتش نقولك .... مهم هي ع عندهم واحد الجمعية كايفرقو المنح دراسية فكلية الطب الخاصة ... و ... وجات عندي ... ب بغات ( قاطعها )

اصيل : جات عندك نتي من دون كاع البنات دالحومة ؟؟؟؟؟؟؟

سلمى : لا ... جات عندهم كاملين .... و وحسنى سيفطاتها عندي ... ح حيت حسنى عارفاني عندي الباك .. و وباغا نولي طبيبة ...

اأصيل : اهاه ... وعلاش الكدوب ؟ علاش قالت كتفرق بيتزا ؟

سلمى : حيت انا .. ملي سمعتك هابط فالدروج خفت ... وقلت ليها عفاك ماتقوليش ليه جاية على ود المنحة .. ح حيت نتا رافض نقرا .. وخفتك تخاصم عليا و...

اصيل : مممم ... وشكون لي كنرفضو انا كتر .. القراية ولا لكدوب ؟؟

سلمى : راه مكدبتش عليك ... غير ... ( هبطات راسها كترعد بالخوف )

اصيل : ( قاد كلستو ودوا بجدية ) سلمى رأيي فالموضوع راك عارفاه .... نتي مامحتاجاش منحة كون شفت القراية مزيانة ليك ....غانقريك بلا مايمدو لينا شي ريال .. ولي عارفاه كتر طول حياتي موكلك من عرق كتافي وقادر نقريك حتى فالسويد نبيع عليك حوايجي لي لابسهم ... واش انا حرافت ليا فالفلوس ؟؟؟ .... ولكن القراية لي يجيني وراها الصداع معندي ماندير بيها ومعندك ماديري بيها .... ( وقف ) مرة اخرى لاجات عندك قوليلها نهار نبغي نقرا خويا قاد بيا وفلوسك خليهم عندك حنا مامحتاجين لوالو الى بغات هي نعطييوها .... وملخر باش تقطعي لياس ديالك فخطرة ..راه مغاتقرااايش .... مفاهمين؟؟؟

سلمى: ( دمعو عينيها ) خويااا علاااااااش كدييير ليا بحااال هاكا ( بصوت باكي) بغيت نقرا انا كنبااات نحلم بالقراااية لي حرمتيني منها ..علاش كايعجبك تعدبني وتبكيني

اصيل : نبكيك حسن مايجي شي وقت نبكيو فيه انا وياك ...لموضوع هضرنا فيه وتشد شحااال هادااا ..... اخت وحدة لي كنكساب ... وانا لى يعارف بحق الزنقة ...وانا لي عارف اش يصلاح ليييك .. وهاد المرة هاني دويت بفمي واخا باين ليا كتستهلي على هاد الفعلة شي قتلة .....

خلاها وطلع وسلمى بقات كتنخصص وهي تطلق لبكية بجهد وخشات راسها وسط المخاد كتبببكي ... .

قسم وصلات لطموبيل يلاه غاديماري ... وهو يجي عندها الكارد طل عليها من سرجم

الكارد : ( مد ليها الصاك ) ديالك هدا امادموزيل ؟

قسم : ( شداتو بجوج صبعانها حيت موسخ كاتشوف فيه ) ااه ؟؟؟؟؟؟ فين لقيتيه ؟؟؟؟ شكون عطاه ليك ؛!! ومالو هاكا فين كان

الكارد : ماعرفتش الالة .. جابو واحد الولد وقال لقاه طايح ...

قسم : ( صغرات فيه عينيها ) ماااشي بابا لي قالكم تقلبو عليه ؟

الكارد : نو مادموزيل ... واش كان مختفي ليك ؟؟

قسم : صافي نسى ... ( حلاتو كاتشوف وراقها ) تيليفون مكاينش !!!!

الكارد : تتبغي نتبعوه ؟؟؟؟

قسم : لا ....( مع راسها ) غايكون ملي شافني رجعت خاف وردو ... ( شافت عند الكارد ) صافي يلاه غانتحركو...

حطاتو قدامها وديمارات مشات ..

∆ فملعب التنس ...

قدس فالفيستيار دوزات التدريب الصباحي ولبسات واحد تجاكيت فوق من ديباردور ... يلاه غاتهز الصاك دالمضرب ديالها وهي تسمع من موراها

المدرب : ( بالانجليزية ) انسة قدس الاسماعيلي

ضارت عندو غير شافتو تبسمات بخجل واعجاب كبير فعينيها

قدس : ن نعام هي انا ...

المدرب : عرفتك ... قلت .. الى مكان عندك تاشي مشكل ... نتغداو بجوج؟؟؟

قدس : موشكيل ؟؟؟ ااه .... ( كتفكر بلي دارت مع ماماها وباباها يتغداو مجموعين وفلخر ضحكات ) لا معندي واالوووو .... م معندييش ....

المدرب : مشينا ؟؟؟ ...

قدس : ( شافت مع راسها ) خ خصني نبدل

المدرب : ( جرها من يديها ) حتى هاكا زوينة ...

تبعاتو وهي غاطير بالفرحة عاضة الى شفتها والبنات متبعينها بعينيهم حاسدينها ...

لوؤي كان حابس بطموبيل حدا الملعب كايكمي الكارو ديالو تاشافو ركبها فالطموبيل هو يقاااد الكلسة مخنزر .... ولاح داك الكارو من يديه مراااقبهم .... غير مشااو ... ديمارا تااهو وتبعهم ....

فطموبيل ...

المدرب : سمتي سالڤادور ... جنسية ديالي اسباني ولكن كبرت فامريكا

قدس : مشرفيين ... انا ( قاطعها )

المدرب : قدس الاسماعلي ... بنت اسد الاسماعلي او كيف كايعرفو العالم كابيتين الروكان ... الكابيتين البحري لي ماكاينافسو حتى شي واحد .... شرس وقوي و صاحب الصدارة .... وبنت لامار الاسماعيلي .. سيدة الاعمال النااااجحة ... و اخت قسم الاسنماعلي ... القبطانة لي كايتضرب بيها المثال فالقوة الننسوية وتحقيق الذات .... و جود لاسماعلي لي اسمو بدا يبان مؤخرا فجرائد موناكو .... ( كايهضر وكايسوگ وهي حالة فمها فيه ) فعمرك 19 سنة كتعشقي التنس من ونتي صغيرة .. وكتعشقي حتى المسرح و السباحة وركوب الخيل .. الاكلة المفضلة عندك هي الكسكس لي كتصاوب الجدة ديالك ... واللون المفضل عندك هو الازرق ... كتقضي وقت فراغك كامل بين الملعب و بين الكلوب نتي وصحاباتك ... و كتطمحي تكوني سيدة اعمال بحال ماماك ملي تكبري ( شاف عندها ) غلطت فشي معلومة

قدس : ههه .. لا ولكن نتا .. ب باش عرفتي عليا هادشي كامل ؟؟؟؟؟

المدرب : عادي ... ملي كتعحبني شي بنت ... كنبغي نعرف حتى اصغر تفاصيلها

قدس : ( غااطيير بالفرحة ) ك كيفاش كتعبجك شي بنت... دابا انا كنعجبك؟؟ .

المدرب : ونت شكون لي متعجبيهش ...

كايهضر معاها بهدوء وبواحد الكاريزما وشخصية كاتخليها تدوب فبلاصتها ... ومراهقتها غير مكتزيد تعاونها تذوب فيه وفطريقة كلامو المعسول .... حتى وصلو قدام واحد المطعم ... ونزل فتح ليها الباب ولوؤي حبس طمويل موراهم

المدرب : طبعا مغايكونش بحال الماطعم ديالكم... ولكن غاتعجبك الماكلة ديالهم ..

نزلات معاه ضاحكة وهو شد الباب وحط يدو ورا ظهرها جارها للمطعم ولوؤي شاد على الفولون كارز عليه والكيت فودنيه كايهضر مع واحد من العملاء لي فالفرقة ديالو

- مزززياااان اصاحبي احسن مادارت ...هاكا غاتقدر بنت عمك تعطينا عليه معلومات كتر

لوؤي : ( بعصبية ) واااااش منتيك آل*لااااااوي ؟؟؟؟؟؟ كانقووليك غااايستغلها راها باقا صغيييرة ..... واش بانتليد بنت عمي انا شاااايطة دخل لهادشي ؟؟؟؟؟؟ فأر تجارب ديالك ولا آش كايجيب ليك الله ؟؟؟؟؟

- اااه اش فيها على حنا غانضروها ؟... هي تحاول غير تعاون القانون وتعطينا معلومات عليه ....هي لي تقدر تقلب فتيليفونو وتعاونا

- لوؤي : ( فتح الباب طموبيل نازل بجهالة ) سير جيييب ختتتك جججرب بيها مااااشي بنت عمي .....

العميل : لؤي ... لووؤي عندك ديرر شي غلطة ضييع لينا كووووولشي ...

لوؤي :الخدمة خدمة والدم راه دم .... سير تقوووووود نتا ويااااه الى تقاااست شععععرة وحدة منها ولا من دمي مغانقعلش على ديلمكم كااااااملين ...

نتر الكيت من ودنو ودخل لريسطو بعصبية وجهالة

وصلات قسم لدار لي الطريق كلها وهي ماعرفاش كيف دارت حتى وصلات ...

طلعات ديريكت لبيتها تا شدات لباب عاد تنفسات بحالا تابعها شي حد .... ماعرفاتش كاع آش واقع ليها .... اشمن سحر قرا عليها لي يخليها تنسى راسها وشكون هي وتتصرف كطفلة صغيرة بريئة شدوها وهي كتسرق الحلوى !! .....

حيدات الفيست ديالها وبدات غير كاتمشي وتجي فالبيت كاتفكر فاشنو وقع وتعاود الحدث قدام عينيها للمرة لعشرين ...تاسمعات تيليفونها كايصوني ومشات جاوبات

صفاء : مادموزيل .. واحد البنت على الخط كاتطلب الرقم ديالك ، قالت اسمها سلمى الشريف وغاتعرفيها ...؟ كاتعرفيها مادموزيل ؟

قسم : ( تنهدات ) عطيه ليها .....

قطعات وحطات تيل تدخل تدوش حتى سمعات جاها مسج و مشات حلاتو لقات فيه

سلمى : شكرا بزااااف مادموزيل قسم ، عمرني ننسى خيرك ومُحرجة منك بلا قياس ... خويا تكلمت معاه فاومور المنحة وللاسف رفض ، ماشي مشكل عادي ولفت خيبات الامل ، بغيت نعلمك باش تمسحو اسمي من اللائحة ... حتى الى ماخديتش المنحة انا فرحانة حيت تشرفت بيك شخصيا مادموزيل وهادي احسن حاجة طرات ليا نعيا نوصف منقدش ... بغيت نتصل بيك وخفت نخلق ليك شي مشكل وفضلت نخلي ليك رسالتي .... شكرا على كولشي مادموزيل 💓 ....

قسم بقات غير كاترمش !!! ... علاش مايقبلش ؟؟؟ علاش هدا متخلف لهاد درجة !!!! رجعات تنهدات وحطات تيليفون ودخلات تدوش .....

∆في المطعم ...

كالسة قدس و سلڤادور كاتغداو ويضحكو ووهو عارف مزيان طريقة التعامل مع المراهقات ... وطريقة دهضرتو معاها كاتخليها تذوب ....

اما لوؤي فالطاولة المجاورة شاد غير قهوة و مراقبهم جامع حجبااانو مخنزر ... وتيل كايصوني حداه صيلونص من العملاء لي معاه ولي خايفين يدير شي غلط ... وهو مارهاش تما كاع عينيه غير عليهم ... وكايحاول يوفق بين حبو لعائلتو وحبو لخدمتو .... وحبو ليها هي بالذات .....

سلڤادور : ( كايشوف معاها فالموني ) خودي هذا ، نت كايعجبك الكراميل

قدس : ( طلعات فيه عينيها وباقة ضاحكة ) باش عرفتي كايعجبني !!!

سلڤادور : راه قتليك ملي كاتعجبني شي وحدة كنعرف اصغر تفاصيلها ....

قدس : ( سدات الموني وشافت فيه ) وشنو كتعرف عليا تاني !!

سلڤادور : بزااف ... ( بابتسامة ساحرة ) واهم حاجة هي سينغل ....ما فحياتك حتى شي واحد

قدس : ( تبسمات ) مممم .... و متأكد ان معلوماتك صحاح !!

سلڤادور : كون كانو غالطين غاتكوني قبلتي تغداي معايا ؟

قدس : مدرب ديالي وكنتغداو ....عادي

سلڤادور : مدرب ديالك فالملعب ... هنا انا غير سلڤادور لي طيرتي ليه عقلو من اول نهار شافك

قدس غير هبطات راسها كتبتسم وتلعب بشعرها .. ولوؤي عينو عليهم كايرز على القبضة ديالو متحكم فراسو بزز .... خداو الديسير وخلص سلڤادور بلباقة و خرجو من الريسطو ضاحكين وهو حاط يدو على ظهرها .... وهي تجمع ضحكتها تسعين درجة ملي شافت شكون قدامها متكي على جيب ديالو ومغطي بيدو على الكارو من الريح كايشعلو وعلا راسو كاينفت الدخان ... وهي تبعد ظهرها على سلڤادور لي غير كايشوف كيفاش توترات ...

قدس : ل .. لوؤي !!

لوؤي : ( كايطلعو ويهبط وشاف عندها و دوز لكارو لجنب فمو وهضر ) شكاديري هنا ... شكون هذا ؟

قدس : ااء ( كتحاول تبتسم و تحيد التوتر والخلعة لي عطاها كتخاف يوصلها لباها ولا لجود ) هدا .. هدا سلفادور ، مدرب ديالي .... ( شافت عندو وتكلمات بالانجليزي) لوؤي ... ولد عمي

سلفادور : ( قرب ليه مبتسم ومد ليه يدو ولوؤي كايشوف معاها ) تشرفت بيك ... سلڤادور پيراليس ... مدرب تنس

لوؤي شاف مع يدو ... وهز يدو حك بابهامو تحت فمو و شاف عند قدس وهو يجمع يدو مُحرج ...

لوؤي : تغديتو !!

قدس : ( كاتشوف فيه وفسلفادور ) ا ... اه ...

لوؤي : ( حل لباب لي كان متكي عليها ) يلاه طلعي ..

سلفادور : ( فمهو بغاها طلع ) انا جبتها ونردها متخافش

لوؤي : ( دار راسو مسمعوش وعاود كلامو بنبرة حادة ) طلعي ...

قدس زيرات على سنانهها مخنزرة فيه بلا متبين وضارت عند سلفادور ودعاتو فجو مكهرب و طلعات لور على عادتها ... و لوؤي شاف لعند سلفادور لي باقي واقف وهو كايكمي وينفت دخان

لوؤي : ( متكي على طموبيل ومطلع فيه راسو مصغر عينيه فالشمس) كتسنى شي حاجة !!

سلفادور غير رمش بعينيه ومشا باتجاه طموبيلتو و لوؤي جبد اخر سفة و لاح الكارو ديالو وزطم عليه بالكاط ديالو بجهد كايتخيلو راه وجه سلفادو ... طلع فطموبيل كايشوف فيها من المراية

لوؤي : تغديتي مزيان ابنت عمي !!

قدس : مافهمتش انا واااش تاااابعني ؟؟؟ واش دايرينك عليا عساس !!! علاش اخويا تجي تديني قالو ليك عندي سبع سنين

لوؤي : ( ديمارا وزاد ) تمشي لدار !!

قدس : كااانسوووولك واش كاتبعني ؟

لوؤي : ماحسابتنيش الريسطو مكتوب انه تدخل تتغدى فيها غير قدس اسماعيلي و سلڤادور پيراليس ......

قدس : اوووه زعما نتا من ريسطويات دالمدينة كاملة بان ليك غير هدا !!! باغيني نتيقك ؟؟

لوؤي : على اساس الى متيقتيش اش غايوقع ... ( كايش ف فيها من مرايا ) داك سرة علاش مافكرتيش ديري ليها برسينغ غاتبان حسن ....

قدس : ( عاد شافتها و سدات سلسلة دجاكيت ) ديها فراسك ..

سكت لوؤي واخا مكيبينش ليها من داخل كاايطحن فسنانو ... حتى وصلو لدار يلاه غايباركي هو يحس بيديها فوق كتفو من لور و شاف فيها من مرايا وهي تهضر بصوت حنييين

قدس : لوووؤي ... ياك انا عزييييزة علييييك ، ماتقوووولش لبابا ولا جود بلي شفتني كنتغدا مع مدرب .... راك عارف غايفهمو غالاط

لوؤي : ( باركا طموبيل وضار عندها بنبرة خاافتة ) دابا نت كتخاااافي !!!!

قدس : ماشي خوف ... مابغاش نتحرج وصافي (حلات باب طموبيل نزلات وهي ضور لعندو طلات عليه من سرجم تستملح الجو زعما وتبدل الموضوع ) ياك كنتي مع جود !!! واش جييتو كاملين ؟؟

لوؤي : ( كايهضر منرفز ) بوحدي ....

خلاتو وزادت دخلات وهو ديمارا مشاا فحالو و دار الكيت فودنيه ...

لوؤي : شكاااين !!!!!

العميل : مدرتييييش شي غلط لي ندمو عليك ياك !!

لوؤي : حدود خدمتي عارفها وحدود عائلتي حتى هي .....

قطع عليه وكمل طريقو ....

قسم دخلات من البالكون باقا ببينوار دوش و شعرها مطلوق فازگ كاتصوني فتيل حتى جاوبها

لوؤي : كابيتين اسمااعيلي

قسم : لوؤي شفت طموبيلتك ؟ علاش جييتو !!

لوؤي : جيت غير انا ، راه بقى معاه سلطان عندي شي خدمة هنا منقدرش نخوي دابا ..

قسم : ااه حسابتني دابزتو ولا شي حاجة ... هو صافا ؟ ياك بصح كايشوف طبيب !!

لوؤي : وي ماتخافيش عليه .... ( كايحك فوق حاجبو ) قسم ...

قسم : وي !!

لوؤي : تقربي من ختك شوية .. نت عارفاها فمرحلة و سن شوية حساس .. حاولي تقربي منها شوية ووعيها بخطورة هاد السن لي راها فيه

قسم : ولش داارت شي حااجة ؟؟ شواقع ؟

لوؤي : ودابا نخليو حنا حتى دير ؟؟

قسم : شفتي عليها شي حاجة ؟؟

لوؤي : انا دابا غير هضرت ... يلاه حتى ننتشافو

قطع عليها خلاها غير كاتشوف ، عرفات الى شاف عليها شي لقطة .... لبسات كسيوة بيضة خفيفة و مشات لبيتها سمعاتها كدوش .. وتيليفونها محطوط على الطابل دونوي ...بقات كاتشوف لعندو ولعند دوش وصبعانها كاياكلوها تهزو تقلبو ليها ... فلخر نعلات شيطان لان عارفة مبدئهم هو يحترمو خصوصيات بعضهم و بقات كتدوز فيديها على الكتب ديالها تاحلات دوش ملوية عليها فوطة

قدس : قسم !!

قسم : ( ضارت عندها كاتنفض فيديها ) هاد الكتوبا مااحطوش هنا يتعمرو بالغبرة اولا !!!

قدس : عندي امتحانات واش انا مسالية ليهم ( حلات مجر كاتقلب فليدوبيس ديالها )

قسم : وتيليفون كاتلقاي وقتو

قدس : وااختي يهديك الله ، واش غير نت معندكش معاه تحرمي علينا ؟

قسم : لا حااشا ( كلسات على السرير ) قرايتك غدا مزياان

قدس : ( كاتلبس ) صاافاا ... راك عارفة الرقابة ديال بابا غير تهناي

قسم : عارفة الرقابة ديالو ومجرباها قبل منك .. ولكن مافيها باس نسول على ختي ونحاولو نجبدو موضوع اولا !!

قدس : ( كاتنشف فشعرها وكاتشوف فيها ) قسم ... بابا علمك كولشي الا تعرفي تكدبي .... جيني من للخر نت ماموالفاش تجي عندي لبيتي وسط مشاغلك كاملة تجبدي معايا انا موضوع !!

قسم : وعلاش اش فيها الى خويت واحد النهار بغيت نهضر فيه مع ختي ونخرجو بجوج !

قدس : ( بدات كتبسم حتى ضحكات و مشات لديريسينغ لي مفتوح فلبيت كاتقلب ماتلبس فوق لي دو بياس ) ههههه صافي فهمت ... فهمت ، دابا نت حود سافر لموناكو .. جاك لملل بانت ليك قدس ياك ؟؟؟

لوؤي كمل الطريق حتى وصل لشركة ، الفرع لي شاد الاب ديالو ... نزل من طموبيل ودار نضاضرو و دخل لشركة يديه فجيابو على عادتو وكايشوف هنا ولهيه و كاع الانظار متبعاه و الكل كايتهامس عليه و الموظفات عينيهم كايلمعو من ديما كايتسناو زيارتو رغم انه مكيجيش بزاف الى ان النهار لي كايجي كايولي كولشي حاضيه .... طلع فالسانسور مباشرة للمكتب ديال باه و لي شاف عندو تايومي ليه غير براسو .... الكاتبة شافتو ووقفات مبتسمة

الكاتبة : مرحبا بك موسيو لوؤي ... السيد عدنان فاجتماع

وما ليها براسو مع ابتسامة خفيفة ودخل لبيرو ... كان مكتب زجاجي بسييييط وانيق .. جر الكرسي وكلس و هز الصورة لي كانت محطوطة على البيرو ... كانت غيها رتاج فآخر تكريم ليها فهيئة الاطباء ... وصورة اخرى فيها هو ملي كان باقي صغير ... بقى كايشوف فيها ويتفكر راسو ملي كان مراهق والاحلام لي كانت عندو ... حتى كتحل لباب وطلع عينو بانليه عدنان داخل بكوستارو الانيق و الكاتبة معاه كتقاد ليه الوراق و موظف اخر كايتناقشو ... لوؤي غير شافو داخل ووقف وعدنان طلع راسو و شاف فيهم

عدنان : داااكوغ فاكسي ليهم هادشي ....

ابتسمو للوؤي ومشاو وهو زاد و لوؤي عنقو بسلام رجولي .... وجلس قدامو

لوؤي : بغيتيني آلواليد ياك لاباس !!

عدنان : ( كايقاد الوراق ويهضر ) واقلة راه منهار الاحد ماشفتي باك لا ! باقي هاز خنافرك ولا شنو

∆عند قسم

قسم وقفات لعندها ومشات باتجاهها ....

قسم : مافهمتش انا علاش كاديري هاد المقارانات الخاوية !!! حنا خوت كاكلين واقلة لا !! ...

قدس : ( ضارت عندها ) متنكريش انك كتفضليييه اقسم

قسم :ونت مكتفضليهش ؟ ماعزيزش عليك خوك ؟؟؟ هدا لي كاتقولي ليا دابا كانفضلو ، ملي كايتعطل الباطو غير خمسة دقايق شكون كانلقاه مشوش عليا و تيليفوني عامر بليزابيل ديالو ... نت كاتسولي عليا بحالو ؟ فين عمىك هزيتي تيليفون قلتي نعيط لختي !!!

قدس : وااحييت جوود كاتقولي ليه امتى غاتمشي و امتى غاترجعي .. انا كاتقولي ليا ؟؟

قسم : فيييين غالقاااك فين ؟ ملي مكتكونش خدامة كانبغيك تخرجي معايا كاتفضلي صحاباتك عليا ... كانجي عندك بليل كديري راسك ناعسة ... حتى من الخرجات ديالنا مع العائلة مكتجيش ليهم ... فين غانلقاك انا نهضر معاك ؟!!!!

قدس :دابا واش جيتي باش ندابزو ...

قسم غمضات عينيها كتحكم فراسها لانها فعلا عصباتها و رجعات شافت فيها

قسم : تعلمي تهضري مزياااان مع خووتك لي كبار منك .. على الاقل غير احترميهم كاع ماتسوليش فيهم ...

خلاتها وخرجات معصبة كتنفس واحد اللحظة حسات راسها تخنقات ومشات كاتجري لبيتها ضبابة فعينيها كتحل فالمجورا حتى لقات رابوز ديالها رشاتو عاد تنفسات وكلسات كتنهج .... ولاحتو من يديها معصبة .... ماعارفاش كاع كيفاش غادير تتقرب منها ولا حتى كيفاش دير تكسبها .... ختها وبعيدة عليها هاد البعد كااامل رغم انها عارفة متأكدة مغايدوزوش بعضياتهم ولطن شخصيتها الوقحة كااتعصبها ....

خرجات للبالكون كتتنفس مزيااان حتى تقادو انفاسها و تهدنات مزيااان .. عاد دخلات لبيت لي كاترسم فيه ولي كاترتااااح فيه وكتنعزل على العالم ....

علات الورقة البيضة على طابلو و بانت الرسمة لي بداتها ومزال مكملاتها ... كان جنب ديال وجه ...بقات كاتصغر فداك الرسمة عينيها حتى حسات براسها تلقائيا تبسمات وهي كاتفكر الوجه لي جا لبالها حاليا ... وهزات الريشة ديالها ثم غطساااااات فعالمها .......

∆فمكتب عدنان

لوؤي : حاشا آلواليد .. غير راك شفتي عاد جيت من موناكو ...باقي الوالدة تاهي ماشفتهاش

عدنان : ( كايشوف فملفاتو ويهضر ) جود باقي مقسح رااسو !

لوؤي : ( كايلعب بكونطاكط ديالو على البيرو ) كادير لي مرتاح فيه .. كيفما كانت نتيجة المهم هو داير شي حاجة لي هو ختارها ....

عدنان : ( علا عينو شاف فيه ورجع هبطهم كايوقع على الوراق ) داك الباب آولدي واخا تهرسو مكاينش لي غايحل ليك ...( شاف عندو ولاح ليه واحد الملف ) المتحف ديال الشهر الجاي تكلف بيه غانكون مسافر

لوؤي : ( كايشوف فالضوسي و البلان وكايشوف فيه ) الواليد صاڤاا !!!

عدنان : ( كايسني على الوراق مراهش تما ) صاڤا .. ديه قراه مزيان نجي بليل نفهمك شي اومور اخرى ... تكلف بيه

لوؤي : ( قرا داكشي غير ملفوق وسد الملف ) فين غانفهم انا فهادشي آلواليد ؟؟؟ غا خربقتيها مغانعرف ندير والو

عدنان : وشنو كاتعرف دير نتا ... غير تهز حوايجك وتضبح مكاينش ؟ امتى تولي تعرف ؟ امتى نعول عليك انا

لوؤي : ريّيح آلواليد ...الولاد كنولدهم باش كنزيدو من الكثافة السكانية ونوسعو النسل ... ماشي باش نكبروهوم ونخدموهم خدمتنا .... كون جات البشرية هاكا كون كلنا كنخدمو خدمة وحدة ...

عدنان : ( ربع يدو على البيرو كايشوف فيه ) عندك شي خدمة اوليدي انا ماعارفهاش

لوؤي : ( هبط راسو ) لا

عدنان : يلاه هز داك الملف ولهي يديك يرتاحو شوية من بريم جوانات .... ( وقف كايجمع داك الوراق ) عندي اجتماع آخر ... بليل نلقاك فالدار ....

خلاه وخرج ولوؤي متبعو بعينو كايدوز لسانو على شفتو مغدد فللخر ضرب الكرسي بركلة تالسقو مع الحيط وهز داك الملف وخرج معصب .....

∆عند أصيل

واقف فالسطح حاط على الحيط الدكيكة ديالو وكايكمي ... وعينيه مصغرهم ساهي بدماغو كايبني ويريب و يعاود فالهضرة ديال أنور ...والمشهد دال*حبة لي كانت غاتموت بين يديه كايتعاود عليه.. معارفش راسو اش وقع ليه حتى ترفع لداك درجة ونسى راسو اش كايدير ... علما انه متأكد مكان واكل والو و مامقرقب ما شارب ... الامر خلعو بالمعقول و إلا شنو غايخاف عليه الراجل منغير الجانب درجولتو لي فالفراش ....

كمل الكارو ديالو و عوجو فالطفاية و هز قهوتو فيديه كايجغم دخل لبيتو شاف لساعة لقا باقي لحال هو يلبس قبية ديالو و هز فلوس دارهم فجيبو لور و خرج ... مايقدرش يبقى عايش فهاد الشك ، قال يمكن انور عندو الحق يشوف طبيب ويهني راسو ...

قسم كملات النص فالوجه بالتفاصيل ديالو وصغرات عينيها كتحس شي حاجة ناقصة ... وهي تحل لي بوماض ديال صباغة و بدات كتخلط الازرق مع الابيض و كاتجرب .. كايجيها مكيشبهش للون لي بغات .. ترجع تاني تغلقو ووالو .... عيات تلعب فدرجات داك اللون ماطاحتش فاللون لي بغات وهي تحط داك صباغة ويديها عمرو ولاو زرفين كاتمسح فيهم وتشوف فطابلو .. مايمكنش يكمل بلا داك اللون الازرق لي كاتقلب عليه .. حتى تعرف تقادو عاد تكمل اللوحة وهي تهبط عليها الصفحة البيضة وخرجات كاتغسل فيديها وهي غير ساهية ودماغها كايمشي للحظة.......{اهاه ... بغينا بيتزا .. فين هي !!!! }{فين هي ف فيين هي .. اا اه نوغمالمون خصها تكون عندي وي ...،خصها تكون عندي ... غ غير خ خداو جييران ... و،ونتوما جيت نسولكم واش بغيتوها .... ها ؟؟ تبغيوها ... ب بال.. بالحوت .. و ولا ب بالكبدة .. ولا .. بب بب بمعرفت آش ...خوويا ممكن تببببعد شوية نننهضر ..}

ماحساتش براسها تالقات على شفايفها ابتسامة بلهاء مسروقة من ملامح مراهقة كتجرب الاعجاب للاول مرة ..... جمعات راسها دغيا وغسلات وجهها بالما ...

∆العيادة

دخل اصيل للعيادة فيديه الضوسي و شي اضرفة .. ووقف عند الكاتبة وهي توقف شداتهم عليه

الكاتبة : صافي خرجو التحاليل !! زيد معايا ...

زادت هو تبعها لمكتب دكتور لي دخل عندو فلول ومابغى يعطيه تاخبار تايخرجو تحاليل و دخلاتو لعندو و خرجات وهو كلس فالكرسي قدامو والدكتور رجع لبس نظاظرو وبدا كايقرا فالتحاليل وحجبانو مرة يطلعو مرة ينزلو ... كايشوف فأصيل وكايشوف فيهم ... اصيل لي اعصابو كاتحرق .. ومزير بيديه على تكايات الكرسي ....

قرا داك التحاليل بعناية وحطهم حيد نضاضرو كايشوف فيه .... من بعد تنهيدة تكلم

الدكتور : كاع النتائج غير مزادو أكدو ليا داكشي لي كنت خايف منو ....

اصيل : ( رجليه كايتزعزو بالتوتر ) نقدر نعرف شنو عندي

الدكتور : المرض ديالك آولدي ... غانتحمل كل المسؤولية انني نشخصو فخانة Paraphilic disorders او ما يسمى ب Sexual sadism disorder ... ( اصيل عض على شفتو لي مكانش باغي حتى يفكر فيه انه هو لي عندو ... طاح فيه ) بالعربية كايتقال المصطلح الشائع بالسادية ... ماااتخااافش اولدي هادشي عندو علاج مع شوية دالارادة والاصرار .... غاتتخطى كولشي ، الاهم هو انك ماختاريتيش تتماذى فيها وختاريتي العلاج ...

اصيل : ( دوز يدو على وجهو كايتنهد وجمع كل قوتو وحمد الله على كل حال ورجع شاف فيه ) نقدر نعرف كتر على العلاج !!! وعلى هاد المرض ، ماعندي حتى فكرة

دكتور : العلاج غايتم مع الدكتور النفسي .. ومع بعض الادوية لي غانوصفها ليك انا وياه .. يعني العلاج غانحاولو نسقوه انا و البسيكياطخ ...بنسبة لمرضك آولدي هو هاد السادية هادي ... راه فيها انواع ، كل واحد كيفاش كايخرج داك السادية لي فيه ،بنسبة ليك نتا طغات عندك جنسية .... قوليا اولدي بنسبة لسلوكاتك منغير الفراش ... يعني مع داركم او صحابك جيران لي كوليگ... فاش كايعصبك شي واحد مكتلقاش راسك ضربتيه بلا متحكم فراسك !!!

اصيل : لا كنقدر نتحكم فراسي الى مابغيتش

دكتور : اه اذن الجنس بوحدو لي ماقدرتيش تتحكم فراسك فيه ... حكي ليا كتر .. واش كنت واعي ولا حتى ساليتي عاد تفكرتي

اصيل : ماعرفتش مقادرش نحدد الصورة ، بحالا كنت واااعي ولكن مقادرش نتحكم فنفسي ولا نسيطر على راسي حتى لبعد مدة عاد رديت لبال اش درت ....

دكتور : نتا اولدي راك وصلتي لمراحل متقدمة ولابد فاقرب وقت تبدا العلاج و تلغي نهائيا من راسك شي حاجة سميتها العلاقة الجنسية ماحدك فهاد الحالة ... لانك تقدر تقتل الطرف الاخر بدون ماتحس ... وباش نقدر نحطك فااصورة وتفهم المرض ديالك .. لانه ماحدنا كانتقربو من المرض ونفهموه ماحدو كايبان صغير قدامنا وكانتغلبو عليه بسهولة .... السادية آولدي هي مشاعر كاتكون فيك قديمة ربما من الطفولة ...هادشي علاش ديما كانصحو الامهات انهم مايعلموش ولادهم يكبتو ويخبيو الغضب ديالهم لداهل .. بالعكس يعلموهم يخرجووه .... الام لي تشوف ان طفلها رجع لدار و تجنن على المخاد وهو كايشوف فيهم صحابو لي ضحكو عليه فالمدرسة مثلا و ماخرجش الغضب ديالو فيهم وكبتو لداخل ....( هو كايهضر واصيل كايرجع بذاكرتو لطفولتو وكاتسمعو فودنيه اصوات لي تخلطو مع هضرة الدكتور حتى غمض عينيه ) تما تحاول تدي ولدها لطبيب نفساني لي يدربو يخرج الغضب ديالو ... ومايتجمعش بحال واحد الكرة فالداخل ديالو حتى يصعب عليه يتحكم فيها من بعد .... هاد الطفل او المراهق او الشاب لي كبت الغضب ديالو بصورة متكررة ... هو لي يقدر يخلق ليه فغالب الاحيان اضطراب السادية ... يعني مايمكنش يخرج مشاعرو او يوصل لذروة نشوتو بدون عنف .... كايولي يخرج كاع المشاعر ديالو بالعنف ....حتى الى بغا غير يضحك كايلقى راسو ضرب على كتف ذلك الشخص بقوة ... اما فالجنس ... مع القوة ديال النشوة الجنسية والضغط لي كايوقع على الدماغ .. المريض كايدخل فحالة هيستيرية كاتقوا كل ما قوات الرغبة ديالو ... حتى يوصل بيه الامر انه يشوف الدم عاد يوصل للذروة ديالو ....

اصيل : ( كايتنهد ) العلاج شحال كاياخد ديال الوقت

دكتور : منقدرش انا نجاوبك .. نشوفو مع البسيكياطخ .... لي خصك تعرف هو الرحلة قدامك باقا طويلة مع العلاج .... ( تلفت للبيسي كايكتب لوردونونص ) انا غانكتب ليك هنا بعض الادوية لي تقدر تاخدهم في حالة ما لاجاتك رغبة جنسية باش متأثرش عليك لانه ممنووووع اي علاقة ولو قبلة اولدي ممنوع ... و غانكتب ليك عنوان الدكتور النفسي ... واحد الدكتور مزيان بزااف وغاترتاح معاه ... ( كتبها ورسلها للكاتبة وضار عندو مبتسم ) مادير فبالك والو .... ان شاء الله غاتبرا ... المهم هو جيتي لطبيب .. راه كاينين عايشين هادشي وساكتين ... الثقافة الجنسية الى مادخلاتش فالمقررات الدراسية راه غاتوقع شي كارثة فالاجيال جديدة ...

اصيل : ( وقف ) شكرا ...

دكتور : نشوفك بعد ما تشوف دكتور النفسي .... انا غانتصل بيه وندرسو حالتك مزيان مايكون غير الخير

خرج لعند لكاتبة خلص و خدا لوردونونص وزااد مكايشوف تاواحد قدامو ... هاز الضوسي ديالو و كايتمشى مرفوووع .... آخر شي كان كايتوقع انه يجيح فيه هو هادشي ...منلول هو عارف ان حياتو ضاعت ... ولكن مكانش كايضن لهاد درجة .... الدنيا كحالت بين عيييينيه وولا كايبان ليه كولشي مافيهش الفايدة وتاحاجة مغاتغريه .. تشققات ابتسامة على فمو بااااهتة كلها استهزاء بالوضع ، ماحس براسو تالقى رجليه وصلو لصيديلة ودخل مد ليها داك لوردونونص عيااااان .. بحال شي جثة كايديها الريح ...

وهي خدات الورقة كاتقرا وكاتشوف فيه وهو مراهش فداك العالم .. كاتسغرب اش غايبغي بدوا بحال هاد وهو كايبان فأوج عطاؤو الجنسي ....

بدات كاتجيب دوا ومشات لسكان دو بخي وهو كايجبد الفلوس من جيبو لور و كايشمر بنيفو وغير من وجهو واضج عليه شخص يائس من الحياة ووحدة معاها كاتهضر

- ماشفتيش داك سربيتة دالغبرة ؟

- ( كاتدخل الدوا ) لا شوفي لهيه يمكن ... ( شافت عندو ) عندك هاد الكينة وهاد الجيل عندنا .. ولكن هاد الكينات بجوج خصني ندير ليك عليهم دوموند اسيدي ...حيت غاليين شوية منقدروش ناخدوهم هنا بدون مايكون طلبهم شي واحد كايتپيريماو و يبقاو فراسنا ...

- شحال تما ...

- ( كاتشوف فالبيسي ) عندك اسيييدي فهادو بجوج .. سبعمية و خمسة وخمسين درهم ...ولي غانضومونضيهم ليك دايرين بجوج الفين وخمس مية درهم .. كاتب ليك طبيب هنا طريطمون ديال خمس شهور .. واش نطلب ليك خمسة ... عندك لا مِتيّال ؟

اصيل : شحال قلتي ؟؟؟

- طوطال كامل تلتلاف وميتين وخمسة وخمسين ....

اصيل جاتو الضحكة وهو فجيبو الف درهم ... وشاف عند البنت لوخرا وعاطاها لوردنونص

اصيل : مسحي بهادي الغبرة حسن ....

خلاها و زاد داير يدو فجيابو و مولات الفرماسيان بقات غير كاتشوف .....

يديه فجياب القبية على عادتو ...راسو بين رجليه والكاسكيط مغطية النص فراسو .. ثقل آخر تزاد على ظهرو مع الاثقال لي هازها من صغرو ... عينيه مكمشين وحجبانو مجموعين مخنزر كايلعن فالزهر ديالو و فهاد الحياة لي سلباتو كتر ما عطاتو ... كايسول راسو اش كايتسناه مزال ... واش مكايناش شي حاجة فحياتو كتفرح ! تفكر ختو و رتاح نسبيا انه على الاقل باقي قدامها مستقبل ويقدر يشوفها فدارها ويهز ولادها ...يدير لي فجهدو ومايضيعش مستقبلها حتى هي واخا يبقى حابسها فقرعة ، تنهيدة وراء تنهيدة .... يلاه داخل للدرب هو يحس بشي حاجة وقفات قدامو ... ووقف مدة ورجع علا راسو ... بانتليه فارگونيط كحلة كاتلمع وقفات قدامو .... يلاه كايحاول يتكهن شكون مواليها حتى تحلات لباب بالسبيكة و نزل منها وجه هو كايعرفو ... غير شافو زاد خنزر وضور وجهو لجنب بمعنى هدا لي كان خاصو ويكمل هاد النهار دالزفت !! كان الشخص لي ضرب أنور بموس ... جاي بجيهتو ضاحك بحالا باغي يشري المعرفة وسبارادرا فوق حاجبو والكدمات صبحو باينين على وجهو ... و وقف حداه

- وااافين آزروق ...

اصيل مكايجابوش غير مخنزر فيه ....

- وااابرااااااد برّاااد .. مجايش ندابزو غير تهنى ( غمز ليه لجيهة طموبيل ) أفير آولد الحومة .....

اصيل جا ماشي فحالو هو يشدو ونزل واحد آخر من طموببيل لقدام .. مكلضم ولابس كوستيم كحل والكيت فودنيه من ذوي البشرة السوداء شدو معاه و اصيل تنتر منهم بكتافو ويديه فجيابو مخنزر فيهم ....

اصيل : اش بغيتي

- طلع وغاتفهم ....

اصيل : ( شاف لطموبيل وشاف عندو ) نتا عارفني مامساليش ليك ....

يلاه كملها تاكان الكارد جرو بقوة و هو كايتنتر منو و الآخر تاهو جرو تالطموبيل هو يهز يديه ضرب داك الكارد ببونية رعفوو تابعد عليه يلاه جا يضرب لاخور هو يسمع صوت رخم جاي من طموبيل ...

- تهدن .... حنا غير غاانهضرو ....

ضار براسو ببطئ .. هو يبان ليه رجل راكب ، بكوستار انيق و السيگار فيديه ... طلعو وهبطو وشاف عند الشخص لاخور

اصيل : شكون هاد خينا

- رااه قتليك طلع وتفهم .. مال راسك قاسح آصااحبي ..طلع راه باغين غير نهضرو ....طلع سمع بعدا اش بغا .... راه مغايطلقش منك

اصيل بقا كايشوف فللخر طلع .. يلاه الكارد غايشد لباب هو يحبسها ليه .... و داك الراجل آشار بيدو بمعنى غير خلي لباب ... و لاخور تاهو طلع كلس حداهم ضاحك كايفرنس .... اصيل غير كالس و مخنزر فيهم كايتسنى شي واحد يهضر ... وداك الراجل آشار للي معاه بعينيه .. هو يضحك وجبد فاليز صغيرة و حلها حدا أصيل .... كانت كلها زررقاااات .. ربطات ديال 200 درهم مستفين ....واصيل شاف فيها وشاف فيهم ....

- ( كما من السيگار وهضر بصوت متهكم ) الى درتي عقلك ... وسمعتي لكلامي .... هادو ديالك ...

اصيل : ( بحدة ) مكنسعاش عليك ...

لاخور جمع تفرنيستو ملي سمع الجواب و سد الفاليز .. اما الرجل الاخر علا حاحبو بمعنى آهااا ... ورجع تقاد فالجلسة ..

- حنا ماباغين ليك غير الخير .... حنا مرسولين وغانوصلو الرسالة .....

- سمع آزرووق ... انا راني فتاح ولد حومتك غاتكون كاتتعرفني كنتعامل مع عشيرك ...واخا داك البلان ولكن راه كنت معاه رجولة ... كنعطيه السلعة هو لي ماكيخلصناش ... آسيدي سمممح لينا ولكن راه نتوما لي سبقتو للعيب وبديتو ضاااربو ماكناش باغين نوصلو لداك المواصل .... ماعلينا ... ( شاف عند شخص لاخور ) سي فريد راه جا من طنجة على ودك .....

فريد : انا اليد ليمنا للراس الكبير هنا فالمغرب .... وصاني نقلب ليه بوديغارد خاص ليه من هنا .....ملي عاودو ليا الدراري اش طرا .. ( شد على كتف فتاح ) وفتاح و فريد مكاينش لي يتعزع قدامهم قضيتي عليهم نتا ... ملي تفرجت فالفيدوات د القتال الحر لي كادير فالشارع ... لقيت علاش كانقلب ... الفرصة جات حتى لبين يديك ... شحال قدك تبقى كاتسني على حياتك يقمرو عليك القمارة على جوج دريال ؟؟؟

فتاح : عندو الحق آصاحبي .... داك المرصى تاهي ولات فاالصو ... جمع راسك راك مطلوووووب .. واش عرفتي شنو هي غاتمشي لعند الرااااس الكبير ... للخاريج اصاااحبي ....

فريد : ( وما ليه للفاليز ) هادي غير الدفعة لولا ...وفاش تمشي غايتهلا فيك مزيااان ......

اصيل خلاهم حتى كملو وجاوب ...

اصيل : ساليتو !! ( ناض باش يمشي حاني براسو ينزل ) الله يسهل ....

يلاه نازل هو يشدو فتاح

فتاح : مالك اصاااحبي هاكا .... واش كاين شي واحد غايفلت عليه هاد لافير . ... واسي فريد برااسو جاي على قبلك من طنجة آصاحبي .... تاخلينا نضبرو معاك صريف فهاد البريكول ،

اصيل : ( ضار لعندو )واش مابنت ليكم غير انا !!!

فريد : موجوود الخير ... اصلا رااه عندو الرجال بالعراااارم ... هو باغي واحد لي يتييييق فيه ... يدو ليمنا .. واحد لي كان غايقتل على صاحبو و باع عليه طموووبيل كاع ( اصيل زاد خنزر ملي عرفهم كايراقبوه ) هداك هو لي كانقلبو عليه ... لي كان يدو ليمنة مااات ... وباغي واحد آخر ... كلفني انا نلقاه ومالقاش منغيرك .... مضيعش فرصة جات لبين يديك ، راك نتا لي مستفد حنا غير دااين الاجر ...

اصيل : تحركو منهنا ( شاف عند فتاح ) ونتا بالخصوص منعاودش نشوف كماارتك قدامي ولا غانكمل اش بديت .... (شاف عند فريد) انا مكنتشراااش ومكنتباعش ...

خلاهم ومشا و فتاح شاف عند فريد

فتاح : واشنو دابا !!!

فريد :الحوتة كاتعيا متعاند ... كطيح فالمقلة ...غير بشوية عليه ....

فتاح : كون غير ماعلمتيش اسي فريد البوس ... كون راه قلبنا فشي واحد آخر دابا

فريد : دابا لي وقع وقع ... ملي شافو قال الى مجبتوش ليه ، حتى انا مغايعلقش عليا ... زير معايا ... حضيييييه مزيان ... خبارااتو كلها بغيتها بالتفصيل .. حنى نلقاو باش نزيروه ( حل لفاليز وهز ربطة من تما مدها ليه) يالاه غبر

فتاح : ( باسها ) يتوووووب .....

∆قصر الإسماعيلي

تحلات البوابة باش تدخل طموبيل د أسد .. لي صايگ والكاميرا ديال الكارد مطلوقة قدامو مكيغبر عليه حتى ثانية .... پاركا ونزل هاز تيل فيديه وبعض الملفات لي جاي يكملهم فالدار .. وهي تبان ليه قسم كالسة فالجردة شادة كتابها و كتاخد قهوة ... شافتو ووقفات مبسمة باتجاهو عنقاتو ...

قسم : بابا كنت كنتسنااااك .....

اسد : ( عنقها بيدو غادي بيها لفين كانت جالسة ) مامشيتيش لبيرو ...

قسم : مااافيااش ( جلسو وطلات ليه على تيل ) واش جوود !!!!اش كايدير

اسد : راهم فكافي ... ماشافش الطبيب ليوم

قسم : صافي ابابا ... حاول هاد المرة تيق فيه .... خليه هاد المرة على خاطرو ... عافاك

اسد : مكرهتش .. واش انا نكره ليه يحقق اش كايتمناه .. راه مايمكنش .... ايما نختارو هو ايما نختار احلامو .....

قسم : هاد الرالي راه مهم بنسبة ليه .... نتمنى مايوقع والو ... وان شاء الله نحاولو نقنعوه يكون آخر رالي .. ياك ديجا بغا يدير الهيكلة ... هاكا غايتشغل بيها وينسى موناكو

اسد : هو كاع ما مؤهل لمجال بحال هذا ... ماعندو لا تجربة لا خبرة ... الحلم كاين ولكن خصو التمريس والتكوين باش يدخل للسوق ... وهو ماباغي يتأونگاجا فحتى شيي مسؤولية يصبح ناسيها ... ( حط تيليفون ) مابقيتش عارف كيفاش غاندير نتعامل ونبني ليه مستقبل من جديد

قسم : اذن خليه يبنيه راااسو ...

اسد : مغايبنيهش ابنتي ... مغايبني والو .. جود باغي غير يعيش نهار بنهارو .... وانا هادشي مغانقبلوش ....

قسم : غير بالحوار وشوية دالخاطر كولشي يتحل ... ماعجبتينيش ابابا !! واش زعما السبب غير جود ؟ كاينة شي حاجة أخرى ...

اسد : ( حك على راسو ) شحااال قدني نحضي ...وسيم مابقاش عاجبني حالو حتى هو .. كانفكر نرجعو للمغرب ....

قسم : وسييم !! يالاه هضرنا قبيلة قال راه صافا !! ولكن راه مغايبغيش يرجع راك عارفو مكايتفاهمش مع جود .. هو و پيلي راه ولفو تما

اسد : خبارو مابقاتش عاجباني .... رغم ااني كنحاول نخلي ليه حريتهم فهاد المرحلة من حياتهم هو وقدس .... كايبانليا بغاو يتعداو الحدود لي راسم ليهم ...

قسم : راهم صغاار ابابا .. دابا يكبرو ويتعقلو كلنا دزنا من هاد المرحلة ... وسيم مايديرش لي يعصبنا منو غير تهنى .... نتا راك عارفو كيداير ...( تبسمات ) ولا قووول ليا تووحشتيه وصااافي ...

اسد شاف عندها مبسم ورجع تكا على الكرسي كايشوف فيها ...

اسد : ونت شنو خبارك ...

قسم : مدايرش لي يتبعني ويجيب ليك خباري حتى انا هههه ...

اسد : نهار نلقاك حتى نت كاتبعدي على الحدود غانديرو ..

قسم : ( شدات فيديه ) نتا عارفني ندير أي حاجة ومانقلقكش .... ( باستها ) الله يخليك ليا ....

اسد : قالت ليا ماماك شي حاجة كاضور فدماغك .....

قسم : صرااااحة آه .. هضرت معاها صباح وقالت ليا حتى تكون نتا ...

اسد : ( شاف لسعتو ) شوية وغاتجي .... غانطلع نبدل حوايجي بينما جات ..

خلاها طلع كايعوج فعنقو وقسم متبعاه ... عينيها تبدلو نظرتهم ... تمنات لو فعلا حتى هي يدير لي يراقبها .. ولي يجي يقول ليها شحال كتحس بالخنقة و الروتين .. وشحال محتاجة لشي حاجة تدخل الانتعاش لحياتها ... شي واحد يقوليه ان قسم مابقاتش قادة على كل داك المسؤوليات لي على كتفها ... شي واحد يقوليه بنتك لاماغين ماشي هي حلمها .... ومسارها الدراسي مختارتوش ... شي واحد يقوليه ان قسم مكتحس بحتى شي حلاوة فالحياة الروتينية لي عايشاها ....

ورجعات تكات على الكرسي وهزات كتابها من جديد كاتسنى ماماها .....

∆قصر الاسماعيلي

على طاولة الغداء ... كانو الخادمات كاينزلو الغدا والطاقم اليومي ديال العائلة ... دخلات قسم شدات بلاصتها كتسناهم ، كالسة وجابدة تيليفونها كاتعاود تقرا فالمسج ديال سلمى ... حتى سمعات شي حد داخل و طفاتو ، كانت لامار يلاه داخلة من الخدمة ، حطات صاكها على ليفوطوي وتقدمات عند قسم باستها من للور ...

قسم : على سلاامة لامار فلاور .... تعطلتي

لامار :فيا موت دجوع .. فين باباك !!

قسم : لفوق يلاه جا تاهو ..

لامار : وقدس !!

يلاه كملاتها حتى سمعاتها فاالدروج

قدس : هانا آماما ( باستها وقربات لطبلة هزات سيگار دالفرماج عضات فيه كتهضر وتمضغ ) معطلة على لكوغ ....غير بصحتكم

لامار : على قاارية ؟؟ ( شافت لسعتها ) اشمن كوغ عندك نت مع الخمسة ؟

قدس : عيطو لينا .. غانحضرو كوغ دواحد الاستاذ مغايجيش غدا

اسد : ( نازل فالدروج كايعلي فكمام سيرفيت ) اشمن استاذ هدا لي مغايجيش

قدس : ب .. بابا !! اا .. استاذ دالماط ....

اسد : ممم ...( وصل لعندها عنقها لجنبو ) كيفاش البلان دابا ... نورمالمون الكوغ دماط عندك غدا .. وحيت مغايجيش غاتقراوه ليوم

قدس : آه ... آه ابابا

اسد : ( كايدوز يدو على شعرها و كايطلع ويهبط فلامار ) اهاه .. وامتى ابنتي كان عندك كوغ دالماط فالخميس ...

قدس : ( كتسرط ريقها ) اا .. ب بغيت نقول لا .. ماشي استاذ الماط ( قسم عير كاتشوف )

اسد : كلسي تغداي ....

قدس : ب .. بابا راه والله تا(قاطعها )

اسد : مااااتحلفيش ... بغيتي تخرجي قولي غانخرج .. امتى تعلمتي لهاد الكدوب كاملين ... علامن كتكدبي همم؟!

لامار : عطيييني داك شكااارة لهنا نشوف هاد الكوغ دالماط .. كتكدبي علينا فوجهنا ....

قدس: فيها غير كتووبي .. ( بزعفة ) صاااافي مغااانمشيش ...

تنترات منو وطلعات فدروج كاتجري هو متبع ليها العين و رجع شاف عند لامار

اسد : اش داك سروال نتي !

لامار : ديهااا غير فبناااتك ..

خلاتو وجرات الكرسي وهو تنهد و جر الكرسي ديالو وجات الخادمة كتحط فطباسلهم

اسد : غيير بلاتي عليكم ... تاشي نهار نجمع والديكم من الصغير للكبير ...

لامار : مالو السروال كيف جاك ..راه كنت لابسة معاه لافيست راها فين حطيتها .... خليني غير فحريرة هاديك للفوق لي ماعرفت اش باغا تصنع بهادشي ديالها

اسد : هاديك انا عارفها اش كادير .... هضري معاها تقابل قرايتها حسن مانهضر انا ونحرجها ...

لامار : اش كادير !!

اسد : ( شاف عند قسم ) قسوم ...اشمن موضوع عندك بغيتينا فيه !!

يالاه غاتجاوب وهي تقاطعها لامار

لامار : جاوبني بعدا !! دارت شي حاجة ؟؟؟

اسد : خليني نهضر بنتي ...

قسم : ماعليش غير هضرو تاتساليو ...

اسد : ماعندنا فاش نهضرو ... بغيتي تعرفي نت مال بنتك قاااابليها ... ( شاف عند قسم ) شنو بغيتي ابنتي ....

لامار : ( تنهدات وشافت عند قسم ) هضري ابنتي مع باباك .... انا غانطلع ، بصحتكم ...تشدات ليا ااشهية ...

لاحت السربيتة وطلعات و اسد متبعها بعينيه و شاف عند قسم لي حزنو ملامحها

اسد : دابا هادو يتغدا معاهم الواحد فهاد الدار ؟!

قسم حطات فورشيت ديالها بهدوء وتبسمات و شدات يد باباها

قسم : ماشي مشكل آبابا ، الموضوع اصلا ماشي مهم ... طلع هضرو بالعقل .. راه عصباتها قدس وصافي

اسد : تغداي ابنتي تغداي ...

خلاها وطلع وهي هزات الفورشيت تكمل ماكلتها ، يلاه وصلات الدغمة لفمها وهي تحطها وتنهدات كاتشوف مع الكراسى خاويين والشهية تسدات ليها ...فلخر حطات حتى هي سربيتة وناضت طلعات ....

∆مصحة الحياة

واقف بالجيب ديالو امام المصحة ... عين على لباب كايتسنى ماماه تخرج وعين على دوك الملفات لي محطوطين على الكوسان ... شوية بانت ليه خارجة كتلبس فنضاضرها ... وقطعات عندو طريق ضاحكة ليه ركبات سلمات عليه معنقاه

رتاج : نهار واحد غبرتي عليا توحشتك

لوؤي: كانقوليك قلبي على داك الواليد يلاه نمشيو انا وياك لبلاد اخرى نعيشو مكتبغيش ...

رتاج : بديتي فالطنز ديالك تاني ( حسات بحالا كلسات على شي حاجة جبداتها كاتشوف )جود لاباس عليه ؟ ..ديالاش هادشي

لوؤي : ( ديمارا يمشيو ) هاد شوية دالعقل لي عندي مغايتهنى تايخرجو ليا داك راجلك

رتاج : ( كاتقرا ) متحف !!!!؟ آآآآه ديال آزرو ... علاش عطاه ليك ؟؟

لوؤي : قال ليك انا نتكلف به .. اش عرفني انا فهادشي ؟!!!

رتاج: ومافيها باس آولدي ، هو غايسافر تكلف ليه ... اش فيها كاع لا حس بيك شي نهار كتف يعول عليه .. مالكم مكتنفعو مكتشفعو

لوؤي : وااماشي اختصاصي آلواليدة واش باغيا تحمقني حتى نت !!!!

رتاج : ( سدات الملف ) لوؤي ، مصارني كايتلواو بالجوع .. ديني نتغدى وبينك وبينوو

قسم گالسة فبالكون ، جو الغروب مخلي خيوطو البنفسجية تونسها فالجلسة ... كاضور تيليفون فيديها ودماغها ساهي ... مايمكنش تبقى مربعة يديها وهاد البنت ضيع !! صوتها وفرحتها نهار عرفات غاتاخد المنحة عمرو يتحيد من بين عينيها ... !! مايمكنش مادير والو ..

ناضت من بلاصتها وفتحات بلاكار لي فيه ملابسها الروتينية ... ختارت السپور لي ترتاح فيه و لي تبان فيه على طبيعتها وسط الحي ، سپادرين اديداس مريحة جبداتها من كرطونتها و كاسكيط لي كاتخبي فيها وجهها من لي تحسهم غايعرفوها .. فتحات المجر تهز سوارت طموبيل هوما يجيو يديها على كونطاك الفيراري ، تفكرات اش طرا آخر مرة لي اضطرات تنسبها لمول الپيزيريا وهي تهز كونطاك دوحدة اخرى و نزلات ...

خرجات لبرا متجهة لطموبيل يلاه حلاتها قرب عندها الكارد ..

- خارجة مادموزيل !!

قسم ومات غير براسها وركبات زادت .. وهوما تبعوها فرنج كحلة .. شافتهم من المراية وتأففات .... طريق كلها وهي كتفكر فآشمن طريقة تخليه يوافق ! وكيفاش غادير تهضر معاه وهي آخر مرة نظرة فعينيه غرقاتها ونساتها حتى فكيفة السباحة !! ....

مسافة طريق طويلة شوية حتى كانت وصلات للحي .. ملي كاتوصل لتما كاتولي كاتصوگ وخيفانة مقربة لكوسان للفولون لادخل فشي قط ولا شي ولد صغير ومصغرة عينيها حاطة تركيزها كامل ... وقفات طموبيل فالدخلة ديال الحي و لي داز كايشوف مع الحديدة ويطل عليها ... والكارد تاهوما پاركاو وراها ... حطات راسها على لفولون كاتسول راسها .. هانا حيت !! شغاندير دابا ؟ طلعات راسها كاتشوف مع الحال ظلاام .. ولاحت عينيها لساعة فطموبيل كانت التسعود دلليل ... ولكن مع الجو الصيفي دشهر يوليوز كايبان الشارع مكتض .... وكايتسمع منبعيد صوت الدقايقية لي واضح انه كاين شي عرس فالجوار .... كضرب بصبعانها فوق الفولون مترردة واش تنزل ولا دير بناقص !!! وهي تجمع قوتها ودارتها فيد الله ونزلات .. كاتشوف مع جنابها و هبطات الكاسكيط كتر على وجهها .... يلاه غاتشد طموبيل قرب ليها الكارد ...

قسم : ( عطاتو الكونطاكط ) خليكم هنا .. غانقضي غراض ونجي ....

الكارد : حاضر مادموزيل ... ولكن سي اسد قال ( قاطعاتو )

قسم : هضرت معاك لا !! ... بقاو هنا الى حتاجيتكم انا غانعيط ليكم ...

خلاتهم وزادت دايرة يديها فجياب الجيلي لي لابسة ... و الكارد سيفط صاحبو يجيبليهم قهوة كحلة يگلسو يتسناوها .. وجبد تيل يعيط على اسد يعلمو ....

∆قصر الاسماعيلي "جناح اسد ولامار "

لامار يالاه كتحل عينيها من النعاس وناضت على سرير كاتشوف مع جنابها الحال ضلام ... وهزات من على طابل دونوي طيليكوموند شعلات ضو ... ملي طلعات لفوق رفضات تتكلم معاه بحكم عيانة وغااتنعس .. وهي غير العشرة لي علماتها انه ملي يكونو شاعلين تتفادى معاه النقاش ..

نزلات من سرير كتلبس بينوار طويل فوق من كسيوتها دالنعاس هو يبان ليها فالبالكون كايشرب قهوة وقدامو پيسي كايقرا فالمعلومات دالمدرب الجديد دالتنس دقدس وكايشوف انه محاطين عليه تاشي معلومات بمنين جا وقرايتو و ديپلوماتو تكويناتو ؟! .... فقط معلومات عادية بحال اسمو و امتى التحق يدرب .... تاحس بشي حد گلس مقابل معاه علا عينو بانت ليه لامار لي جلسات و قلب الصفحة طلع الصفحة ديالو ....

لامار : نعست بزاف .... علاش مافيقتينيش ..؟

اسد : ( كايشرب من قهوتو وكايشوف فالپيسي ) عندك مايدار !

لامار : لا ... غير نهار اللخر ديال قسم كانتعشاو اونسومبل .. غدا عندها الفواياج ...

اسد : خرجات

لامار : فهاد الوقت ؟ فين مشات

اسد : ماعندهاش 17 عام باش نسولها فين ماشية آلامار لگارد موراها ، غاتكون باغا تبدل الجو ...

لامار : ( بغنج ) ومالك كتهضر معايا منفووخ !!!

اسد : ( علا فيها عينو ) نوضي بدلي ساعة باخرى الله يرحم باك ...

لامار : ( تنهدات ) أسد .... انا جيت عيانة من الخدمة راك عارف داك الصفقة دالمانيا شحال مواليها معقدين الامور ... شفت داكشي من قدس كملتي عليا نتا كالس كتقمع فيا ... سينوغمال نتعصب أولا

اسد : ( سد البسي وقرب لطبلة ) سمعي ليا آلامار ... حنا فهاد الوقت مامحتاجينش نتعصبو على هاد المسائل ... ولادنا راهم فسن صعييييب ... ماشي غير قسم مدوزاتهاش علينا فداك السن وكان الجدول ديالها عامر بالقراية ومالقاتش وقت للتفاهات دالمراهقة .... وجود فداك فترة مرض فيها ... راه صافي حتى قدس و وسيم مغايعيشوهاش ...؟ وسيم غانعرف ليه .. اما قدس ماشي انا لي غانتقرب منها فحياتها الشخصية .. راه نت .... انا راه غاتحرج مني لاجيت نهضر معاها ...

لامار : اش غاندير معاها آسد واش مكتعرفش بنتك ولا شنو ؟ نتا عارفني كنخلي ليهم ليسپاس فين يتنفسو و انا كونطخ ندخل فخصوصياتها غير ماتفوتش الحدود ....

اسد : غاتفوتهم آلامار ... الرقابة داير فيها جهدي وكتر ولكن راه خاصك تعاونيني ... قسم لي حشومة تقلبي ليها فتيليفونها دابا ... اما قدس قلبيييه ... سمعيها معامن كتهضر بليل ... خودي فكرة على شنو ضاير بيها ... حضييها ...خودي نت كونجي د خمس سنين كاااع حبسي ديري مديرة اخرى و راقبيها تادير عقلها وتفوت هاد المرحلة ...

لامار : واش حماقيتي ؟ قدس تربية يدي وعارفها مغاديريش شي حاجة لي خاايبة ... واش توريني فبنتي

اسد : غادير الى لقات لي يجرفها ....

لامار : عرفتي الى حسات بيا كانتبعها راه غادير كتر من وسيم يشدها لينا هنا شي اكتئاب تاني تسيفطها تاهي لمريكان ..

اسد : اساسا اكبر غلط درناه هو درنا الخاطر لوسيم و سافر .... ولادي مغايبعدوش قدام عيني حتى يديرو عقلهم .... ولاادنا صعااااب آلااامار ، صعاب كتر ماكتصوري وماحدهم كايكبرو ماحدهم كايزيدو .... وانا ماشي روبو .... راه كايجي مشكل ديال واحد فيهم كايخلني مرفوع غير فمشاكيلو سيمانة كاملة... ( لاح ليها على الطبلة تيليفونات ) واش نتبع تيليفون لي فيه الكاميرا د جود ... ولا لكاميرا د وسيم ..ولا دقدس ... نفكر فطبيب دجود ولا فين كايخرج وسيم بليل ولا فلينوط دقدس ولا خدمة دقسم ولا خدمتك ولا خدمتي .... شحال قدي انا !!! هزي عليا غير وحدة .... بنت فهاد السن راه مكتفهمها غير ماماها

لامار : راهم كاملين ولادي آ أسد .. مستعدة وقادة نتقرب منهم كاملين ... ولكن فهاد الفترة لي مكايبغيو يعاودو ليا والو

اسد : حيت كاتهضري معاهم لامار ديال واحد وخمسين عام .... حاولي ترجعي للسن لي كنت فيه قدهم وطريقة لي كنت كتفكري بيها يمكن غايحسوك غاتفهميهم وغايهضرو .... ( رجع لور وتنهد ) وإلا غانوصلو لشي مواصل مغايجبوناش الامار .. منكدبش عليك انهم ماحدهم كايكبرو ماحدي كنحس بالحبل لي رابطهم بيه كايتقطع فيدي ....

لامار : ( حطات يدها على قلبها ) الله يستر ياااربي ... لااا ، ولادي مربين احسن تربية .. واخا يوقع لي وقع مايديروش شي حاجة خاايبة انا عااارفهم .....

يلاه كايهضرو وهو يصوني تيليفون دأسد وجاوب ...

اسد : اهاه .... فين ؟ ... ممم ، داكوغ بقاو معاها....(قطع وشد على راسو كايسوط )...

لامار : شواقع ؟؟؟

اسد : اش كااادير هادي حتى هي ... فففففف ( كايرد شعرو لور )

لامار : هضر خلعيتيني

اسد : قسم ملي جات من الفواياج وواحد الكارتي خدا ليها عقلها .. ماعرفتش اش كايضور ليها فالدماغ

لامار . آآآه .. هضرات ليا عليه صباح ... بغات دير فيه شي حاجة مع دوك العيالات وهذا هو الموضوع لي كانت باغا تهضر معانا فيه ...

اسد : ممم ... اوا نتمنى يكون غير هادشي .. بلا منزيد كاميرتها حتى هي ( جبد تيليفون كايصوني تاجاوباتو داير السبيكر كايختبرها واش غاتكدب ولا لا )

قسم : وي بابا

اسد : قسم .. اش هاد الهارج .. فينك ؟

قسم : انا !!!! فداك الكارتي ابابا لي فيه البنت مولات المنحة عقلتي .. هضرت ليك عليها !

اسد : و آش كاديري تما

قسم : خوها رفض تاخد المنحة .. وبقات فيا ... غانحاول نهضر معاها على الله نقنعو يخليها تقرا

اسد : قسم مادخليش راسك فشي مشاكيل حنا مناقصينهمش ....

قسم : متخااافش عليا ابابا ... ها الكارد معايا غير تهنى ..ختارو شي عشا فالريسطو زوين ...نسالي ونلحق عليكم نتعشاو اونسوبل غدا غانسافر بكري

اسد : اش تشهات ليا قسوم ..

قسم : اي حاجة من ذوقكم غاتعجبني .. تصالحتي مع ماما ياك !!

لامار : ( تدخلات) غير سمحيلي ابنتي على قبيلة كنت عيانة شوية من الخدمة ...نعوضوها هاد لليلة ونهضرو

قسم : جيبو معاكم قدس غاتكون تاهي باقا مقلقة ... يلاه تانتلاقاو صداااع مكنسمعكومش مزيان .. يمكن شي حاجة هنايا عرس ولا منعرف ... هانا قربت للدار عند لبنت بسلامة ...

قطعات عليهم ودارت تيل فجيبها للور وزايدة مع الشارع الضيق مصغرة عينيها فشنو قدامها .... كانت خزانة " خيمة " منصوبة فالزنقة طوييلة بيضة و فيها اشكال كحلين ... الدقايقية مدخلين العروسة و الزنقة والحومة كولها مكبوبة تما ... لي مكاينش فالزنقة راه فالسرااجم كيطل ... البراهش على برا كاينقزو .... العرس قايم فالحومة و الكل معروض .... العيلات كابابل شادين الشقا و مقابلين طيابة و الخبز والموناضا لا يتسالاو ، و البنات نص داخلين مع العروسة ناشطين معاها كايشطحو و النص كالس كايميق فيها ويعيب ... العروسة لي عليها دقايق بالعام فوقاش دير لهم باي باي و تقلش الرجلين و تلوح الجمر فعينين لعديان ... المعروضين المُهيمين جالسين فالخزانة لي نصبوها ولاد الدرب ... الحاصول لعرس كامل قايم غير بالدعاء ورضاة الوالدين ، شوية من التريتور مسامح ليهم فيه شوية من نكافة معاونة بيه .. و شوية من الحباب .... عائلة العريس جايبين معاهم عائلتهم ضاربين تكاشط الكرا كولشي كايشقشق آراك من بعيد ، ماكاين غير الخضر و الأحمر و صقلي و المدني وشعورات كل مرة اشمن بنت تغوت بشعرها لي كايوحل ليها فالموزون دتكشيطة دشي وحدة ..... الدقايقة لداخل مرويين دنيا و كولشي فرحان كايشطح و مت العروسة كترش بالمريشة و تخمس من العين ...

ميلات شفايفها قسم بابتسامة و عينيها لمعو .. سهات فداك الجو كاتفرج تاحسات براسها كاتفرنس غير راسها وهي كاتشوف عالم جديد عليها ! .. زادو بيها رجليها تقرب لان كولشي دخل لخزانة بقاو غير الرجال الكبار فالكراسا على برا ... دايرة يديها فجيابها وزايدة كتفرج نسات تا علاش جات !!! ....

وصلات لفتحة دالخزانة و بانو ليها الطبالي مستفين بالكراسا فالجنب كالسين الناس و الزرايي حمرين عامرين بالوسخ وقشور الحلوة و المسكة .. و فالراس كاينة البرزة لي ماشية بجيهتها العروسة باللبسة البيضة و عريسها شاد فيها و نكافة تابعاهم كاتسرح موراها تكشيطااتها لي العروسة كاتعفط عليها بحالا كاتعفط ليها على قلبها ....العريس غير كايفرنس الليلة ليتو .. ضاحك لصحابو بمعنى واهااانا درررتها ..

ابتسمات قسم عينيها لمعو مكرهاتش تزيد عاد تطول الفراجة ولكن تفكرات الغراض لي جات عليه وجات راجعة تاحسات بشي حاجة شداتها ضارت لقاتها وحدة من سكان الحومة لي كانت تعرفات عليهم نهار جات وعطات الهدايا لولادهم ... هازة تكشيطتها و عاقدة زيفها لور

- ( ضاحكة تكايبانو ضروسها لي بلاصتهم خاوية ) ... من لهييييه كانسوول فنجية واش هي ولا ماشي هي .... ياااا مرحبااااا وزااارتنا الباااركة ( طلقات تزغريتة تالحقات عليها الجارة لوخرا وقسم كمشات عينيها من صغرها عندها حساسية مع زغاريت )

نجية :والله يتاا هي ... مرحباا بموولات التلفااااازة ( جبداتها تاني تسلم وتبووس تاطابو حناكها )

قسم : ربي اخليكم ، الله يكمل كولشي بالخيير ... كنت غير دايزة ... نخليكم ..

يلاه غاتمشي جبدااتها نجية

نجية : يااااوعليا باليييمين وباش يحلفو العيلات الحرااات مانتي منها مزعزعة ...هاويلي وحدي مولات تلفااازة كااااملة عندنا فالخزانة ومادخلش تتعشا ...

قسم : (كتحاول تفلت منهم ) لا لاا لا والله تااامزرووبة ... غير سمحوليا مرة اخرى

نجية : حلللفت وماغنصوومش تلتياام فهاد الصهوودات ... خديييجة عيطي على توورية فين هي قوليلها مولات تلفازة جات ...

خديجة : غااا دخلي ابنتي حسبييي العرس عرسكم .. دخلي شطحي وفوجي ليك هاااو سيري ... راه عندنا عيييييب لي يوصل لخيمتنا نهار العرس وماياكلش ...وااتووورية وتي تعاااااالي ياه ونت مقاااابلة غاالغرامة فين كااطيح .. تعاالي ها مولات تلفااازة جات ...

جات تورية لي خزنات الف ريال فصدرها ، مراة كبيرة لابسة قفطان بيض ومضورة عليها طابلية دكوزينة خاشية فجيبها سوارت البيوت كاملين ... غاشافتها تلاحت تسلم وتبوس فرحااانة بعرس بنتها لي تلاقاتو تشلقمو

تورية : ياااا مرحبااا وزاااارتنا الباركة و قدااامك قدام الربح .... سير انا بغيتك فين ماحطيتهم ينوض بلعمااان سيييير اناا بغيتك ديما لفوگ لفووگ الطويل يعنق و اقصير يتعلق .... بغيتلك شي سعععد كيف سعد بنتي ياااااربي ... وعااارك لامااا دخلي و لاضيعيش خاااطري

نجية : وهانتي ها مت العروووسة براااسها كتعرض عليك .. ودخلي دخلي عااااايشك ....

قسم حرجوها و ضورها وسطهم جارينها للداخل وهي مهبطة راسها و الناس كايشوفو ماعارفين شكون هاد خيتي لي داخلا بالدجين وسبادرين للعرس و البنات كايطلعو وهبطو فيها و لي عرفات تقدر ثمن السبادرين طرطقات عينيها وبدات تولول ....

تورية : حسبي رااااسك فحال الى وسط حباباتك ... هنا غا صحاب والحباب ... نجية و خديجة كاتعرفيهم ... هادي سعاد بنتي لعزبة لكبيرة مزوجة وهاديك لي كاتشطح لهيه عروووستي ... و طابلات لي لهيه دوك لي لابسين مهرجان للوان ( قالتها بالحس ) طاااسيلة العرييس

قسم دااخت ماعرفات ماتقول و دقايقة كانو حبسو غير الهراج لي كايتسمع فالخزانة لداخل وغوات الدراري صغار .... اما لكبار ملي دخلات حطو عليها العين وتجمعو فلباب كلها كايتحك مع لاخور كايسولو شكةن هاادي ....

تورية : ( كاتعيط لتريتور لي غادي زربان بصينية ) اوليدي يعطيييييك الستر شوفلها بليصة مزيااااانة تهلا ليا فيها عندااااك

تريتور : ( شاف فيها مع علات راسها مع صينية كانت غاطيح هو يتفتف ) ها !! آ أ .. الله اووودي الحااجة .. زيدي اختي مرحبااا تفضلي ...

خلاتها ليه وقسم ضارت براسها متبعاها ورجعات شافت فيه كضحك بزز .. وهو غادي بيها لفين تجلس وهي تابعاه مرفوعة بحالا تحطات فشي عالم مكتعرفوش .... تادار ليها بلاصة فواحد الطبلة وجلسات ... شافتهم كايشوفو فيها وتبسمات ليهم ابتسامة صفرة وتقلبات كاتشوف فجواء العرس حتى تطلق الشعبي والجرة فالبيفان لي فالقنات ... و البناات تجمعو فالوسط كايشطحو بشعرهم ويتحيرو .... والعريس تاهو ناض طالق يديه بحالا غايطير كايتمايل كيف شي سراق زيت مع ضعيييف وطويل ولابس الكحل جا بحال الموري دشي ساعة قربو يخسرو ليها الحجر .... والعروسة كتغمز ليه من بعيد يجلس ...

قسم شوية بشوية بدا يعجبها الجو واخا حاسة باستغراب ولكن مستمتعة كاتعيش تجربة جديدة عليها ... حطو قدامها اتاي و بداو يفرقو فالحلوة .... تاسمعات لي حداها هضرات فودنها لجهد تغمضات قسم عينيها

- قوليلهم عندك البز وهزي ربعة

قسم : (باستغراب مافهماتش ) باغدون !!!

العرس باقي خدام برضاة الوالدين وقسم فالسوط بحال الغشيمة كتاكل فالحلوة وضور عينيها ، الحلوة كاضور و تطلقات معاها موسيقى أندلسي تتسمع فارجاء ، و الدراري ولاد الدرب معاونين كايسربيو ... منغير واحد لي من قبيلة فيه الدودة يدخل ويخرج ويحك فشعرو شدو الشعط على قسم ... غير يشوفوه صحابو غايقصدها كايجروه لبرا يردو ليه عقلو ... عارفينو كايتقرقب تنةض تقمعو يجبد عليها المضا .....

الدىاري كايقادو فالكراسا و يحطو القراعي د الما ، ولكن النظام حاجة شبه مستحيلة ، لان البراهش داخلين خارجين لاعبين غماض البيض و الحابة حتى من عائلة العريس نزعجو ....

العگوزة : ( لابسة تكشيطة من عام تمانينات دايرة زيف حياتي و زيف مود من فوقو و شادة زيف فيديها تتشيش بيه و مدورة وجهة تتهضر مع أخت عريس بلا ماتبين وقين فطبلتهم غير كتشوف والحديث كايتسنع ليها ) البراهيييش ياكلو من العينين ... تربية البرطقيز .. هاااويلي هاويلي ومعامن غايناسبني الصگع ...

قسم وسعات عينيها بذهول ... جاتها فشكل تهضر فيهم بهاد الطريقة وهوما باقين فالعرس !!!! ...

اخت العريس : ( لابسة جلابة مليفة عاقداهم تتهضر مزيرة على سنانها تتطول وتلحن فالهضرة بحال لموال ) و العرس لمااااالييييه و زهااااگة للجيرااان ... و والخطية نخلصوها حنا ....

العكوزة : ( حركت راسها بتأكيد ) آ لوانا جوع ! من صباح هما يسقيو فالما ... بقات فالحلوة دالزيت و الطحين ...

اخت عريس جات تجاوبها هو يجيها ولدها تيجري جرية التبرية وبدا يهضر بالبكية

الطفل : انا داااباااا ( كايضور وجهو كايقلب عن الدليل ) انا دااابا فيا جوووع ( كايشوف فيهم كايأكد هضرة ) وهداك خو العروسة ؟ هداك لي لابس قشابة ، ( بصوت هامس الام نزلت كاتسمع و الجدة تاهيا هو كايحرك ليهم فراسو ) عطاوه الخبز فيه دجاج ولحيمة و انا لاا ...

بمجرد كمل هضرتو العكوزة وقفت جارة كرسي و تتقاد المضمة بحركة تتعلن عن اعلان حرب من جهة عائلة العريس ، سبة ولقااااوها ....

اخت العريس : ااا مي فين غادة؟

العكوزة : تي الولد الصغير لاويه جوع مصارنو يزغرتو مايعطيوهش تا لگمة ؟ اليوم نفرتكو هاد الزواج الملاوط ... ايهايهااااي ....

فسم ماعرفات تتدخل ماعرفات دير راسها ماسمعات والو ... ربعات يديها وقلبات راسها كاتفرج لجنب ودير راسها ماسمعات ماشافت وتقول فراسها " ماسووقيش انا ماسوقيش "

العكوزة ماشي من العاكزين غادا قاصدة الگاراج لي فيه الطيابة و بلا ماتحتاج للنعت ... لان الريحة واصلة منو و رباعة البراهش واقفين تما كايتسناو حقهم مرة مرة يسرقو من اللوز المقلي و يخليو طيابة كاتجري عليهم بالمغرف ....ولوخرين حاضيين واش يرجع شي طبسيل ...

دخلات بلا سلام بلا كلام عاقداهم بنبرة تهديد ونفس الوقت عيونها كايضورو على الكراج بلي فيه من طيابة و تلاتة عيالات جنبها

العكوزة : اوا خويتي ماحشمتي ماراعيتي ؟ كي جاتك ولد ابنتي تصيفطوه بالدموع على طريف د الدجاج ؟ تي عمر بونا شاف الخير ؟ قالولك جايبنا الجوع !!! ....

الطيابة : ( تتنهد و تسمح وجهها من العرق بفوطة ضايرة فعنقها ) اوا آش نكول ليك .. قواو عليا لبراهيش الا جيت نعطي كولشي راه مابقشاي .. باش غانعشيو الناس ...

العكوزة: اوا ولد ابنتي سبق ! ولد بنت خو العريس سبق اولا ؟

الطيابة: اوا انا غااا طيااابة

العكوزة : ( طلات لجنب ) ودوك جوج دجاجات لي دفعتيهم جنب باطك علامن عارهم ؟ محضناهم ؟

الطيابة : ( دارت راسها ماسمعاتش و هزت طرف دالخبز و غمزت للمراة تهز الطاوة من الشايط د دالجاج ) اوا هو لول الالة ... الله يجعل كولشي مبارك مسعود .. غاوسعي خااااطرك

العكوزة: ( ماعجبهاش انه تعطيه من ديشي دجاج نطقت معفرة ) لالا خويتي لهلا فين يكون لا مبارك لا مسعود ... عمرنا شفنا دجاج ؟ راه نعطيوه عاا الكلاب ... ولد بنتي ماياكل شياااطة الهجيج ...

الطيابة هزت يديها تتحك الراس لي تتحس بالشيب غايزراق ليها مع هاد البشار ، ما حيلتها للدجاج ولا اللحم ولا سرباية ولا مالين العرس تزيد حتى ماين العريس ! بردت و جاوباتها بصواب

الطيابة : الالة أم العريس تي مولات الخير ... و مولات العقل ... واش نخسرو فروج على قدو ؟ وماجاتشاي

العكوزة : ( بإصرار ) اياااه ! و مالو نخسرو بوووه ... ياك عا فروج طيرو ليه الكراع ؟

طيابة تشهمت ومابقات ليها حيلة ولي معاها غير ساكتين ، فيهم ما يجاوبو ولكن السبة تجي عليهم اللهم يضربو الطم ... باقين هاضرين وهي دخل عمة العروسة " خديجة "

خديجة : آدريسية واش نبقاو نعزلو فالفرارج ؟ نهاك الله ... البرهوش ياكل مع البراهش .....عرس هدا ماشي وزيعة

العكوزة: ( قادات الوقفة كاتقاد زيفها ) تي كولي عاا السلام ...

العمة: لا تي خليتي فيها شي سلام ؟ ياك الخزانة درناها لضياف شدخلك لكاراج ؟

العكوزة: اياه لا السلام لا كلام ..... بنادم ولا يجري علينا بلعلالي ؟؟؟

العمة : حاشاااا .... الله يجيبنا فالصواب غا هو ماعندناش لي يتلاح على طيابة وهو غا ضييييف

العكوزة : عرررررس وووولدي

الحوار تصاعد وشخد و مني منك مني منك ! العمة تتجر عندها الكلام و العجوزة حاسبة فراسها هيا العدول و ناضت القيامة على واااااالو .....

العجوزة : ( ضربات ففخاضها ) يا حرامي ... ياااااا بحلوووووووفي لا كمل هاد العرس د المجواعين ... الله يجعلني نفرتكو على فرووووج ...

العمة: مايهضر على الجوع عا لي عارفو ..... ولدك لي لاسق فبنتنا .... ماحنا ماهي من سهمو ماهو من سهمنا ...

العكوزة : عليها غا لقيتوه وهرفتو عليه ولويتوه بسحاحر ياااااربااااعة السحارااااات ... يااااحرامي لاا كمل ....

خرجات هازة جلايلها والعمة تابعها كتنگر وطيابة شدات الطناجر كتقلب على جلابتها عرفات مابقى عرس تنوض تلحق المركوب .....

الديدجي حبس ملي سمع زغاريت من نوع اخر داخلين ... العريس غاشاف مو داخلة مكشكشة وقف مشبح .. و العروسة وقفات تاهي ومت العروسة قريبات اما قسم غا كتشوف وتقلب منين تخرج .....

مت العروسة قربات مطلعة حاجبها و علات جلايلها مع المضمة

ترية : دريسية ؟؟؟ شي باس ما كاين ؟؟

دريسية : ( مجاوبتهاش وشافت عند ولدها ) زيد نتا گووودامي ...

قسم وسعات عينيها و العريس شاف عند العروسة ، غاسمع غوتة اخرى منعند مو تنفض ومشا عندها بالجرا قبل ميوصل شداتو تورية والناس كاملة تتفرج

تورية : نسسيييبي وضااااارب القاااعيط ... ماعندو فين يمشي

العكوزة : ووولدي وراااضع مني ...

تورية : حليب الناگة !! ماولدتي عا نت ؟ .. من قبيييييلة ونا حاضياك تتهزي وتتحطي و نقول مافيها باس .. العرس بفلووووسي ..حضري وشطحي وكولشي وشدي لباب

العكوزة : زمان العجب .. للرااجل بغيييتووه .. وطاسيلتو لا

تورية : على زينة طااسييلتووو

ماكملاتها تاكانو ناضو عماتو و خولاتاتو المناااتفة و العجاجة ناضت و قسم غا لسقات فالجنب دالخزانة مفاهمة والو ... العرس ترون والكراسى كايتشايرو مابقى باين الضارب من المضروووب .. و بدات كتحاول تقلب منين تفلت .... يلاه غادة مع جنب الخزانة تقلب المخرج تاكتحس بشي حاجة جات فجبهتها تاغوتات ...... لقاتو طاااالون شيرو بيه جا فيها .. شافتها خديجة ومشات عندها كاتجري وهي شادة على جبهتها

خديجة : وييعطييهم اابططططل و الرزاااا و الموت بلا لعزاا .... التلج ابنتي التلج ...تووما جيييبو التلج

قسم: لا لا لا .. غا خليني نمشي فحالي فكو غير هادشي ...

خديجة : تاهادي حااالتهم ... دوزي معايا ندير ليك الثلج

قسم : نووو ... صافي غانتكلف براسي ... عنداك غير طرا شي حاجة هنا ؟؟

كاتشوف معاهم مخلوعة مامولفاش هاد الاجواء .. اما المقرقب على برا كاع ماراه فداك العالم غير كايمشي ويجي ومرة مرة يشرط بشي عود فالارض تاكينوض العجاج

المقرقب : أناااااا بغيييييييت الفررررماااااج

واحد من دراري : تا ريح اصاااحبي ... هاديك راها هي داك الملعقة لي جات داك المرة .. ريح ماتجبظش على كرك صداع

المقرقب : ( جيفو بيديه ) تااا برررررربي ومتحضروووو ليا الفرمااااج تاااطيح الروووح .. الفرررمااااج الفررررمااااااج ....

ڤيلا عدنان ...

دخلات مرسيديس لامعة آخر موديل ... وخرج شيفور حل ليه لباب ونزل كايهضر فتيليفون ووراقيه ولافيست ديالو فيديه ... تادخل للدار ، رتاج كانت نازلة فدروج شافها وعنقها بيد باسها مكمل هضرتو ماشي بيها للصالون ... تاسالا وشاف لعندها مع بوسة فراسها ....

عدنان : جيتي بكري ! ساليتي لوبيغاسيون ؟؟

رتاج : نو أجلانها تالغدا .. ليزاناليز ديالها باقي مكملوش ...

عدنان : آه داكوغ .. فين ولدك

رتاج : لؤي ؟! .. فبيتو

عدنان : لوؤااااااي .... ( مشا كلس كايرخف الكرافاط ورتاج كلسات على جنب الفوطوي كادير ليه مساج لكتفو )

رتاج : قاليا كلفتيه بالمتحف د آزرو

عدنان : ممممم غانسافر .. ديجا ديريها فبالك خوي اللخر دالشهر غاتمشي دعايا

رتاج : منقدرش اعدنان عندي اخدمة حماقيتي

عدنان : حتى انا كتعرفيني مغانسافرش مدة طويلة بلا بيك

رتاج : والدراري ! لوؤي حسابتك غايقابل خوتو ؟

عدنان : غايمشيو لدار أسد حتى نجيو .... ( باس ليها يديها بمعنى شكرا على لمساج ) العشا احبيبتي .... غاندوش ونعس ... عيااان

رتاج : وااجد .... غانطلع نجمع الدراري ... وسهام غاتحط لعشا ....

ناضت علمات الخادمة تحط العشا وطلعات علمات انس وفيصل و دخلات لبيت لوؤي تعلمو تاهو .... غير حلات عليه لباب شافتو دغيا قطع تيليفون بتوتر تاطلعات حاجبها ...

رتاج : لوؤي !! مالك ؟ !!! .....

لؤي : نو ... ( دار تيليفون فجيبو لور وقرب عندها مبتسم ) تاحاجة آلواليدة

رتاج : علاش قطعتي بداك الطريقة ... معامن كنتي داوي

لوؤي : وتااانتي الواليدة ماتعرفيش تخلي ليا شوية دالخصوصية ....( عنقها كايضرب بيدو على جبهتها بحركات خفاف ) تي دددقي ادكتورة دقي لباب ....

رتاج : مممم مع شي وحدة ؟؟؟؟؟ واقول ليا متخبعش عليا .. شكون هي ؟ كانعرفوها

لوؤي : معرفتش علاش ولكن مشهي كسكسو ... ديريه لينا غدا ...

رتاج : سبحان الله ... فولادتك آولدي نتا بعدا غااا تصخرت .... طلعتي بحااااالو ... يموت الواحد وماعرفش شنو عندكم فداك الراس ....

لوؤي : ( مشط بيديه شعرو لور ) ننقصو شوية !!! .. هو لي فراسي هاد الساعة ....

رتاج : نزل نزل ...باباك جا غانتعشاو ...

لوؤي : واخا آلحوب .... نبدل حوايجي وانا معاك

خلاتو وخرجات وهو جبد تيليفون كاتنهد كان غايتفضح خصو يرد لبال كتر ... عاد كمل الهضرةد فخدمتو .... ونزل موراها يتعشاو .....

عند قسم

العرس على فروج ترون و تحول للمعاطية ، شي كاايشخد وشي كايطفي ويدخل يصالح و قسم شاداها خديجة فالجنب على واحد لكرسي كدير ليها الثلج فجبهتها ...

الدريسية : الجججهل يااا تريكة الجهل ( جارة ولدها من يد ) زيييييد گودامي

العروسة : ( شاداه من اليد لوخرا ) نسسسسيب مي وراااجلي

الدريسية : ( كاتجرو وهو وسطهم ) زززحمتي عليييييه ؟؟؟؟؟ ررضعتيييهظ

العروسة : ونتي لي غاااتبردييييه لييييه ؟؟؟

الدريسية : عطااااا الله الحشاااااااشن غااابمتين وستييييين

قسم : ( وسعات عينيها وشدات على فمها ) وااااات ؟؟؟؟؟؟؟

خديجة : مييكي ميكي ، شي سمعيه شي ديري راسك ماسمعتيه ..... ( كاتشوف ليها للضربة وتسوط ) ناااااري غانتفخ ليك الصكعة ... علم الله ديالمن هاد الطالون الله يعطيها الگرض

قسم : ( جات توقف ) غير خليني نمشي ديجا راني تعععطلت

خديجة : ( شداتها ) تي كلسي غااا نديرو ليك الثلج اناري

العريس : ( حاول يتدخل ) آنهاااكم الله .... ديرو عقلكم تفرتكو ليا الليلة على فروووج

تورية : وااااگووولها لمك لي سايرة تعاير مادارت لا بوجه نسوووبية لا بوجه الحبااااب لي يزاوگو ...

الدريسية : انا ماعندي ماندير بنسوبية المجوااااعين

تورية : كون كنتي بخيرك كنتي ديري لولدك ليلتو بفلووووسك .... خمسة وربعين الفريال لي عاطيين غالصدااااق تااااهي فلوووووس ؟؟؟؟؟؟

بداو يتدخلو العائلة يصالحو ونطقات خالة العريس

- واااتورية .. وادريسية راكم بعقلكم .. ديرو غا بوجه هاد العرسان ... ديرو غابوجه العشرة والجورة ... ( شافت عند تورية ) اوا وداك طعام والملح لي تشااركنااااه ؟؟؟

تورية : خرييييييناااااااه .....

يلاه غااترد عليها تادخل عليهم المقرقب هاز سيف على قدو و عينيه حومر مقلوبين ودراري شادنو وقسم ناضت بالخلعة لسقاااات فجنب الخزانة شادة على قلبها ملي شافت داك سيف خايفة يتجرح شي حد

المقرقب : جيييييبوووو ليا الفرمااااج .. واتوووورية بررررررربي و ماتزوجوووني الفرماااااج لاتزووووج ولدك .....

يتبع...