محتوى القصة
قسم ركبات فالطموبيل ديالها ... غير سدات لباب حطات راسها على الفولون مدة كتنهد .... ليلة كاملة بلا نعاس ... حلف واش يكحل عينيها .... البكا لي بكاتو فموت جدها جبد عليها بزااااف دالمواجيع ... خلاها تفكرررر فحياتها كاملة .... ملي تهز جدها فوق المحمل ودخل للاسعاف ومشا للقبر وتسالات حياتو .... خلاتها هي تفكر حياتها ؟؟ ملي يجي واحد نهار تهز تاهي فوق الكتاف وتمشي للروضة واش الحياة لي عاشتها من قبل ... كافية تسمى انها عاشت !!!! ....
رجعات علات راسها كتنفس ..كانت كتسنى غير الشتا تحبس وتلبس عليها وتخرج لشي بلاااااصة بعيدة فييين ترتاح وفين تتنفس .. رغم ان القصر كبيييرررر وعريييض ... الا انها كتحس فيه بالللخنقة .. كتقلب على بلاصة اوسع .... تكون فوقها غير السما .....
ديمارات الطموبيييل وزادت وهو يديماري الكارد ديالها موراها وخرجات واسد مراقبها من البالكون !!! مزاجية ولادو كيعرفها غير من مشيتهم ... مالها !!!
بلا ميتردد هز تيليفون وبدا يصوني عليها .. وهي كانت صايگة كتشوف غير قدامها تاسمعات الروبو دطموبيل كيخبرها ان باباها كيتصل .. وهي تحل الاتصال ....
قسم : وي بابا !!
اسد : قسم .. ياك لاباس ؟ فين غادية
قسم : ( شمرات بنيفها ) لا ابابا .... بيخير .. غير بغيت نتنفس شوية حسيت بالخنقة
اسد : ممم ... داكوغ .. متعطليش ...
قطع عليها تيليفون مبغاش يزيد معاها كيعرف داك الخنقة منين كتجي ... وخلاها تاخد راحتها ودخل لبيتو يرتاح كيحس بدماغو غيتشق عليه غير ملي دخلو داك الجوج تهنى بعدا .. اما قسم كيعرفها حتى كتبرد وكتعاود ليه كولشي ..... ومن نهار تقطعات علاقتها باصيل وهو كيشوفها بااااااردة .. وحتى من ضحكتها كيشوفها غير من ااشفايف لفوق .... هو حافض بنتو عارفها مزيان ... حتى قبل مايبان اصيل فحياتها كانت روتينية .. ولكن رغم الروتين كانت ضحكتها من القلب وكانت رااااضية بحياتها وروتينها .... ولكن من نهار تعرفات على اصيل ... ومن نهار جات مضروبة فجبهتها وجلسات معاهم على طابلة العشا كتعاود ليهم على العالم ديالو وداك الضحك كااااامل لي ضحكاتو ... كان مختلف !!! عمرو تمحى من داكرتو ولا غيتمحى ليه داك الضحك ..... وملي كيوقع ليها شي مشكل معاه كذباااال ... طريقة باش كتجي تهضر عليه كتوضح شحال هي متعلقة بيه ... ماشي غير لكونو اصيل .. بل حتى كونوو واحد جا غيّر ليها روتينها وجا وراها حياة اخرى !! ومنبعد فراقو .... ماقدارتش مزال ترجع للروتين القديم ديالها وترضى بيه ..... هو قاري بنتو وعارفها مزيااان باش كتحس واخا ساكت ومخلي الامور تمشي فمجراها الطبيعي وميدخلش فولادو الكبار لي فاتو سن الرشد لي بنبسة ليه ديپاصاو الخمسة والعشرين والمراهقة .... كيحاول يبقى بعيد ويراقب فقط انهم بيخير ويبعدهم من شي حاجة فيها الخطر والمشاكيل ..... حيت عارفهم نضجو وامورهم قادين يتصرفو فيها بعقلانية وانضباط ... حيد عليهم هم جوج .. وبقاو ليه فقط جوج كيتسناهم يكبرو ويرتاح فخطرة من جيهتهم وجيهة علاقاتهم العاطفية .....
حيد البودي ديالو ودخل ففراشو غير حط راسو على المخدة شاف للجنب وهي تبان ليه لامار ناعسة ودار ضحكة مستهزأة ! وعنقها عندو وحط راسها فصدرو وهي تخشات فيه كتر وهو معنقها وكيدوز يدو على شعرها
اسد : اييييه اروحي نعسي ... نت ولدي ونعسي ... وانا نبات بلا نعاس ..... نتي لي طالعة ليك .....
باس على راسها و حاول يغمض عينيه فنفس الوقت راد البال مع تيليفون واش يصوني عليه الكارد دقسم لان خلا ليه مسج يقول ليه اش كدير ....
قدس ضرباتها الفيقة مع صوت رعاد بليل وهي تلقى راسها ناعسة على فيست لوؤي تخطفات كاتقول عنداك يكون دخل شي واحد وشافها ماظناتش غايديها نعاس وتنساها وهي تنوض تخبعها عاد حاولات تنعس ....
قسم خرجات المنطقة شادة طريق الرئيسي ومعارفة فين غادية ولا فين غتكون الوجهة ... مهم تخرج المنطقة وتحرر من اسم قسم الاسماعيلي البرتوكولي ....تمشي لشي بلاصة فين تحس براااسها ححححرة وطفلة صغيييييرة مزال كتحلم .... ومزال باغا تحقق .. بغات تقلب على بلاصة لي متحسش براسها فيها قسم الاسماعيلي .......بقات كتفكر تاشوية عضات على شفتها ملي لقات داك البلاصة !!!!! فعلا مكاينش ماحسن منها لي غتجرد فيها من بروتوكول الاسماعيلي ..... كاينة بلاصة وحدة فهاد الدنيا لي خلاتها تحس براسها ماشي الكابيطين قسم .... وهي تكسيري لتما مباشرة .....
جود وصل بيلسان لي كانت كتموت بالنعاس لبيتها .. وصلها حدا الباب يلاه غيخليها ويمشي وهي تشدو وشافت فيه بعيون باقين مرهقين ...
بيلسان : جود .... ( شدات فيديه ) بقى معايا تانعس ....
جود : ( قرب عندها هضر بهمس ) مكنضنش فكرة مزيانة .... غيدخل شي حد
بيلسان : ياك مكيهمش !!! ياك انا بنت عمك الصغيرة ( جراتو من يديه ) يلاه .....
حلات باب الجناح ودخل موراها وموكل امرو لله وضارت عندو
بيلسان : كانت ليلة زوينة بزاف .. ردات ليا فيها جود .. جود لي ربع سنين وانا موحشاه .. ولكن جود .... ملي كان كيوصلني لبيتي كيبقى معايا تاكنعس ..... ( بابتسامة ) غيير قلت زعما نفكرك وصافي ......
جود بقا غير كيشوف فييها ....و حرك ليها راسو بواخا بعياء .. وهي حيدات جاكييييت ودخلات لدريسينغ تبدل حوايجها وهو بقا غير وااااقف كيشوف ويدوز يدو على شعرو وييسوووط .....
عند اياد
اياد لييلة كااااملة النعاس مبغاش يجييه كيتقلب يمين وشمال وصورة جدو مكتبغيش تمحى من قدام عينيه .... غير كتمحى صورة جدو تجي ليه صورة باباه وهو كيقوليه بيلسان فاوكرانيا .. وترجع تجيليه صورتها وهي كتبكي فالاسطبل والكلام لي قالت .. وهو يلوح المخدددة وناض بزعفة هز جاكييطتو لبسها وخرررج ..... مشا بطموبيلتو ... تاخرح المنطقة وشد طريق لأنفا ... ودخل لواحد الريسطو ديال لوطيل ديالهم ومشا لواحد الكرسي وجلس غير مع رررااااسو كييييفكررر كيحسو غيطرطق عليه تاصبح عليه الصبااااح وهو غير على داك الركسي كيشرب قهوة مور قهوة وكارو مور كاررو وكيشوف للبحر من الزااااج ...... تاصبح الحال هو يحس باللللقنطة ... تفكر غير ولاد عمامو .. يلاه هز تيليفونو يصوني على واحد فيهم يجي يونسو ... هو يتفكرررر جوود !! كان كلما جلس فهاد الريسطو وقنط ... كيصوني ليه يجي لعندو ويفيقو من نعاسو بزز ..... ورجع نفض راسو متحسر على جود القديم فين مشى .... ويلاه غيتصل بلوؤي هو يتفكرو بلي مأزم كترررر منووو حسن ليه يرتاح هو يدوز لابيل لسلطاااان .....
سلطان كان يلاه بدا يديه النعاس تاسمع التيليفون كيصوني هو يلوح يديه لطابل دونوي ودارو فودنيه ... بلا ميشوف حتى شكون متصل ..
اياد : سسلطان !!!
سلطان : ( حل نص عينيه ) اياد ! صباح هدا
اياد : راني عارفو صباح ... نزل لعندي ....
سلطان : لاا ومنجيبليكش شي عصير !
اياد : لا بغيت حاجة اخرى ...
سلطان : واش نتا مريض ولا مالك واش انا تهنيت من داك الجوج جايني نتااا
اياد : صبر عليا قريب غنمشي ... نزل مبغيتش نفيق لوؤي عيان
سلطان : اه على اساس انا باااايت مع النعام .... اش كاين !
اياد : نزل اصاحبي عندي غنبقى هنا انا وهاد الطاس دالقهوة تانطرطق ... نزل عندي
سلطان : ( تنهد ولاح المخدة وناض ) نعسنا بكري ... بررررررب مانتوما ولاد العم .. نتوما ولاد الهم .....
اياد : هه ! نزل نزل ..
سلطان : فيييينك ...
اياد : فريطسو دلوطيل
سلطان : اشمن منطقة ... هادي لتحت !
اياد : ماشي فالمنطقة راني فآنفا ... شوووف .... كمل خييرك ودوز عند داك المحل لي تييييدير داك اللعيبات المضورين راه تتنسى ليا سميييتهم .. تعقل كنا كنمشيو نشريوهم نيت تما ... داك المحل لي قريب للمدينة القديمة ...
سلطان : اااه عرفتووو ... راه باقي كناخدهم ....
اياد : سيير جييب لينا شوية توووحشتوو ملي جيت للمغرب وانا كنقول نمشي نشريه ...
سلطان : وماشي تفششتي بزاف لا ... منوضني من فراشي فستة دصبح نهبط حتتااال المدينة القديمة ونطلع لانفا واش نتا شوية لاباس
اياد : وانوض يضرررب فييك الريح .....
سلطان : غضور تقووو•د لا ...
قطع عليييه وبغاا يرجع ينعس هو يلوح دااك المخدة كيتنهد وناااض كااايسب وكيلبس فتيشورت ديالو هز نظاظرو وسوارتو وخرج .....
عند قسم
قسم وصلات بطموبيل لبلاصة لي بغات .... پاركات وبقات شحال غير كتشوف من الزاج ... ورجعات تنهدات وخرجات من طموبيل ... غير سدات لباب الريح دا شششعررها .. واخا الشميسة شرقات باقا الريح الباردة ديال اللليلة لي فااتت ... وحتى البحر لي قدامها مخلي ريح يجهااد ... شعرها طاير مع الهوا و ملامحها غير مزادو باااانو شحال هوما مرهقيييين وعيااانيييين !!! ... ضارت براسها بشوووية بانت ليها طموبيل دالكارد باركات وعطاو ليها تحية براسهم .. تبسمات باستهزاء !!! واخا تمشي للتلت الخالي .... صعيييييب تتهنى من شي حاجة تذكرها انها بنت الاسماعيلي ..
وهي ترجع تمشات دايرة يديها فجايب جاكييييت پينك لابساها ملفوق مع سروال دجين وسبادرين بيضة وتيشورت بيضة .. شعرها كان مطلوق على راااحتو .... زادت بشششوية حتى وصلات لداك الحيط القصصصير .. وهي توقف حداه وطلات على المرصى لتحت !!!!! البلااااصة الوحيدة لي نهار جاات ليها وطلات على الباطوات ملفوووق ... خلاتها تحس براسها ماشي الكابيطين قسم !! خلاتها تحس راسها بنت عادية كتفرج فالبحّارة وبنت معمرها ركبات فالباطو وكتخيلو من داخل كيداير ... بقات مدة وكتشوف فيهم هي طلع يدها بشوية وعلات الجاكيت على معصمها هي تشوف داك الخيييط الحمر لي عقد ليها اصيل فيديها فهاد البلااااصة بضضضبطط ....
ابتاسمات بانكسار ملي تفكرات اتصالو البااارح وتنهدااااات معمقة مرجعة يديها لجيااااابها .. مغمضة عينيها ومعلية راسها وكتنفس نسيم البحر وصوت النوااارس مااالي المكان ... كان الجو باقي الصباااح وجو نقي وزوييييين وهادئ .. رغم ان المدينة القديمة موراها الصخب ديالها الى ان هاد البلاااااصة كككترررريح !!! ..... حلات عينيها كتشوف فداك الحيط القصييرر وهي تعوج راسها ملي بدات تقرا دوك النقوش لي فيه .. شي منقوش بمسمار و شي مكتوب بالمداد ... كانو اغلبيتهم شعارات ديال كرة القدم .. هالا مدريد ... اف سي برشلونة .. وشعاراتهم .... وهي تبدا تلمح قلوب ووسطهم حروف ( a+h = love ) وبزاف دالمرات كاينين اسماء وحداهم تساوي حب ... ضضضحكات بملل وبدات تقرا داكشي ..... وكتتخيل هاد العشاق وهوما كيكتبو هاد الحروف وينقشوهم على هاد الحييط ..... غير من خطهم واضح انهم تكتبو بحماااس !!!! بفرحة ....
تخيلات وجه هاد البنت وصاحبها كاتب حرفها وناقشو ... كيفاش غيكون !!!! جييييست لي عااااادي جدا وغير مكلف ومكيتشرااااش بالفلوس ... غيكون فرحها بزاف !!!! هاد البساطة هي لي كتقلب عليها .. هاد النوع من الحب .. لي قلة المادة ماتمنعوش انه يقدم ليها جيست يفرحها ..... كدوز صبعانها بشوية على داك الحروف بمبتسمة وهي تعلي راسها عينيها حمااااارو ودمعو ..... خصوصا ملي رجعات ذاكرتها لكلمات ختها وهي كتقول ليها " اشنو بغيتي تانشرف عاد نعييش !!!! " .. فعلا !!! فين قدات قسم مراهقتها ! طفولتها ... فين مشاو ؟؟؟ كانو كلهم درااااسة وكلهم اجتماعات .. كانت فعمرها عشر سنين نهار ترأسات اول اجتماع ولبسات كوستيم حدا باباها .....
كتحس بالندامة على دوك السنين لي معاشتهمش .. لي دازو فالضلام وباقيا فالضلام .. كتحس بالضياع كتحس بنغمة الحياة ماعندهاش .. كتشوف كولشي رمااااادي قدامها .... حب الواليييدين كبييير وكافيها .. ولكن هي محتاجة حب من نوع اخر .. حب لي ميحسسهاش انها الكابيتين قسم الاسماعيلي ....
دارت يديها فجايب الجاكيت وبقات تتفرج فالمرصى لتحت وكتخرج تنهيدة مووررر تنهيدة على حياتها لي كتشوفها غادية وكتكحاااال وتذباااال بالروتيييين ...... ومغمضة عينيها كتحاول تشم ريحة البحر بلا متشوف فيه .....
كان سالا خدمتو .... وكان طالع من البحر بعد مابدل حوايجو وطالع عياااان يمشي ينننعس ...كايعوج فعنقو ويخربق فشعرو ....طالع مسخسخ وفيه النعاس ....
حتى كيوقفو واحد المنظر بان قدام عينيه فواحد البلاصة لي ابدا مموالفش يشوف فيها بحال هاد المنظر .... كانت طموبييل اخرررر مووودييييل محطوطة وموراها جوج ديال رونج روفرات كحليييين وعامرين لداهخل بالفياذر .... ماعرفش علاش اوطوماتيكمو فكر فقسم !!!! ... رجع نفض راسسو و زاد طالع يخرج من المدينة القديمة حتى ضور راسو وهي تبان ليه عاطية بالضهر وكتتشوف لتحت لبحر .... علا حجبااانووو بجوج مامتيقيش اش كيشوف !!!!! قققسم !!!! ....
عوج راسو كيشوف معاها وعلى داك الوقفة لي دايرة وشعرها كولو كيديه الريييح ويديها مخشيين فالجاكييييت لي لابسة وواقفة بدون حركة فقط كتأمل !!!! ...
جات على قبلو ؟ لا .. كون على قبلو كانت غتعلم !!! ولا تجي لدار .... على قبل من جات لهنا !!! علاش جات !! .. تفكر صوتها البارح ... هو يمشي بلا ميترردد .... حتى وقف حداها .... وقسم تبسمات غير بشوية وهي باقا كتشوف قدامها .....
قسم : كنت متأكدة غتشوفني ..... ( ضارت شافت فيه وهو باقي مصدوم من مجيتها ) ولكن مكنتش متأكدة واش غتجي لعندي ....
اصيل غير كيشوف فيها وهي ملي وقفات هنا عارفة خدمتو قريييبة ... وعارفة يقدر يطلع فاي لحظة ويلقاها ..... ولكن واش غيجي عندها ولالا ... داكشي لي خلاتو فيد الله ..... متكدبش ان مجيتها لهنا كانت على جوج حوايج ... لول باش تتنفس بطريقة مختلفة .. وتاني باش تشوف هاداك لي علمها تنفس بداك الطريقة .. اصيل كان كيشوف غير لملامحها الذابلين .... وهي كتشوف فعينيه الزرقييين لي فاش كيتقابلو مع السما والبحر كيولو حكااااية اخرى .... كتشوف لدوك الملامح شحال توووحشاااتهم .. عارفة بلي نشوة عينيه غتشوفها وتمشي تاااني فخطرة .. عارفة بلي صعيب يكون معاها .. ولكن على الاقل تروي عطشها واحد الشوية بيه ...... حسات براسها محتاجاه بزااااف هاد الصباااح .... وكون ما الاتصال ديال لبارح مكانتش غتفكر تجي لهنا ..... مبغاتش تمشي لدارو ودق عليه .... بغااتو هو لي يقررر واش يبغي يشوفها ولا لا ...
اصيل : قسم ؟؟؟؟ اش كاديري هنا ! ( كيطلع معاها ويبهط وركز فعينيها الباكيين ) واش نت بيخير !!!
قسم فقط اكتفات انها ضورات راسها بلا وهي تهبط دمعة ورجعات شافت لقدام وهو فعلاااا خلعاتو حالتها !!!!
اصيل : واش غير موت جدك ولا كاينة شي حاجة اخرى انا معارفهاش !
قسم : ( ضورات راسها لعندو وشمرات بنيفها ) علاش ! الموت دجدي مكافياش
اصيل : ( زاد لعندها حتى وقف حداها ) وجهك ديال واحد تسالات حياتو !! منضنش موت جدك سالا ليك الحياة !!!!
قسم : علاش ؟ حياتي بدات بعدا باش تسالي !!
اصيل : ( غمض عينيو ورجع حلهم ) قسم ديال بصح .... مالك !
قسم : ( رجعات شافت قدامها ) الى قلتي ليا مالك راه غنگوليك ماماليش .... والا قلتي ليا واش نت بيخير غنقول ليك لا .... بمعنى اخر .. انا ماشي بيخير بصح معارفاش شنو السبب بالضبط .....
اصيل : ( كيشوف فيها خالعاه ) واماايمكنش
قسم : ( رجعات قلبات عينيها لي دمعو ) مالك درتي بحال هاكا ! بحالا تاانهمك !
اصيل : وعلاش لي مغتهمينيش ! ...
قسم : وعلاش لي غنهمك !
اصيل : ( حس براسو بدا يتنرفز ) دابا بلا دخول وخروج فالهضرة .. داوي معاك دبصح .. مالكي !!!!! راك خلعتيني
قسم : ( كتشوف فيه بنص ابتسامة مرهقة ) وعلاش لي غاااتخلع .... ( اصيل غير شاف فيها وهي تقاد الوقفة تقابلات معاه ) وعلاش جيتي لعندي .... وعلاش وريتني هاد البلاااصة ... .... ( شافت فعينييه ) وعلاش عينيك زوينين بحال هاكا ! .... ( شافت فيه ) وعلاش لي نتا داير هااااكدا من الاسااااس !!!!!!
اصيل : قسم !!!!
قسم : كنحسدك فخبارك
اصيل : ( علا حاجبو ) علاش !
قسم : حيت نتا هو الباطرون دراسك وتاحد مكيتحكم فيك .. عندك حياة صغيرة وزوينة ومتحكم فيها كيف باغي وكتقررر لراسك ومكاينش لي يقرر بلاصتك .....
اصيل : ( كيشوف فيها كيحاول يفهم اش كاين ) واش شي حد تعصب عليك فداركم !!! واش دابزتي مع باباك !!!!
قسم ضحكات باستهزاء وقلبات عينيها للبحر
اصيل : ااااش كايين !!! البارح صوتك معجبنيش .. اييه الموت حنا عارفين اش كاين والله يحرمو ويوسع عليه .. ولكن نت فشششكل .. معجبتينييييش شي حااااجة اخرى تمممماااا .... مغتجيش نت لهنا غير هاكاك .....
قسم كانت متكية على الحيط بجوج يديها وقلبات راسها لعندو وشعرها تقلب معاها للجنب وعينيها الريمييين ضربات فيهم الشمس لي شاارقة من وسط الغيووووم وخلاتهم كيبانو كيف قطرة دالعسل من الشهد وهو سرط ريقو تاتهزات تفااحتوو كيحاول يتحكم فداك الاعجاب لي كيقتل فيه ملي كيشوفها بحال هاكاك فملامحها الطبيييعيييين
قسم : لا دبصح اصيل .... واش نتا باغي تعرف مالي !
اصيل : واش كندير انا دابا هنا ..... كون مكنتش باغي نعرف مغنجيش لعندك ....
قسم : بغييييت نعيش ا اصيل ... بغيييت نتزاد ... ماما جابتني لدنيا .... ومجابتنيش للحياة ... بغيييييت نعييييش ...
اصيل : علاش مالها حياتك ( قرب تاتكا على الحيط كيشوف فيها ) اش كاين !
قسم : زوينة ... حيياااتي زوييينة بزااف ومثالية لواحد الدرجة لي كاتخنق .....
سكت ملي شاف نظاراتها تبدلو وتحولوو للبكية وداك الابتسامة تجمعات وتكات على الحيط عطات بالظهر للبحر وخشات يديها فجاكييييت وعوجات راسها لجنب كتشوف قدامها فطموبيلتها وفالكارد لي مور طمويييل وموراهم كاينة المدينة القدييييمة لي عااامرة بالناااس كاايمشيو وكييييجيو ....
قسم : انا ا اصيل .... بغيييت نكون بحال هاديك لهيه ... لبسات جلابتها وهزات قفة فصباح وخرجات .... وتاحد مارد ليها البال حيت هي ماشي بنت الاسماعيلي وتا كاميرا مغتصورها وتاكارد مكاين من موراها ... عاااايشة اليز تقدر تمشي فيين بغات ماشي غير لبلايص محددين .... تقدر دير لي بغات متخافش من شي كاميرا تصورها وتوصل خبارها لهيئة البروتوكول ويسحبو منها وسااام ديال السلوك .... تمنييت ا اصيل تكون عندي تمنطاش لعام ونهرب لدارنا باش نتلاقى داك الولد لي كنبغي ... ونجي تانا وياه لبلاصة بحال هادي وينقش سميتي هنا ... ونرجع للدار فرحااااانة كنتسنى امتى يجي غدا لي نشوفو تاني .... مليييت من هادوك لي كيجي لابس كوستيم وكرافات ومعاه ماماه وباباه ويبغيو يشوفو بابا باش يلاقيونا نتزوجو ... بغيت واحد لي يسولني شحال فعمري .. ماشي شحال من وسام وشحال من سوسيطي عندي .... كوولشي تايقول ليا .. قسم علاش ماباغاش تزوجي .. قسسسم اش كتسناي .. كااانتسناه هو ... هاداااك لي ميكونش بحالهم ... وحتى كاع الى لقيييتو .. مستحيل نكون انا وياه .. حييييت انا قسم الاسماعيلي .. ومكتوب على جبهتي غير هاداك لي غيجيب ليا خدامة وميعلمنيش نطيب ويدير ليا شيفور وميخرجنيش شاد ليا فيدي يقطعني الطريق .....
اصيل : قسم .. هادشي لي كتقولي راه كاين غير فالخيال ديالك وزوين غير تما ... هاداك لي غيسول على شحال فعمرك ويعلمك طيبي ويقطعك الطريق .... راه مغيوكلش اقسم .. ومغيعيشكش كيف نت عايشة .. هاداك لي جاب صاحبتو لهنا وكتب ليها سميتها هنا .. اما راه حرگ يمشي يدير وريقات وهي تزوجات .. اما تزوجها وبسباب الميزيرية كلها شد طريييقو .... البطالي مغيشبعكش اقسم .....
قسم : مكنقصدش انا من ناحية الفلوس .. هاهو بابا ماشي بيطالي وكيشد لماما فيديها ... ولكن فين غنلقى انا بحال بابا واخا نرررسمو ... ( شافت فاصيل ) خاايفة اصيل .. خايفة دبببصح على مستقبلي مع هاداك لي غنتزوج شي نهارررر .. خااايفة يزيد يكحل حياتي كتر ماهي كحلة ....
اصيل : نت عارفة لو كانت شي طريقة نولي بيها غدا فمستوى عائلتكم كنت انا لي غنديك ومكنتش غنخيك لحتى شي واحد اخر .... ياك عارفة هاددشي !
قسم بقات ساكتة شحال وهي تبسم باستهزااااء تابغاو ينزلو دموعها وحبساتهم بزز وضارت تاني لبحررر وهو قلبو تااايتقطع مع كل كلمة كتخرررج على فممها ...
قسم : داك الحاجة هي لي ضاير عليها الفيلم كون كانت عندي تانا داك الحاجة كنت غنطلب منها انا لي نولي فالمستوى لي عايش فيه نتا ... ماااشي على قبلك ... ولا على قبل نتوالم معاك .. لا .. غير على قبل نعيييييش .... نجرب الحياة دبصح ونحس بالمذاااق ديالها .... ( شافت فيه ) لا ديال بصح آ اصيل قول ليا ... واش مكتحسش بمذاق الحياة ؟؟؟
اصيل : اشمن حياة !! حياتي انا ! هه !!! ...
قسم : علاش ضحكتي .. حياتك زوييينة بزاف
اصيل : اممم ... زوينة .... زوينة ...
قسم : اوا هاكاك .... ( رجعات شافت قدامها ) تعيا تكون كيفما بغات تكون هاد الحياة عندك متكونش كيفما حياة وحدة تاااوصلات تمنية وعشرين عاااام .. عاد كتكتشف انها كاع اش قرااااات وكاع اش وصلاااات .. مراضياش عليه ومبغاهاش وماشي ديالها .... تادارت تمنية وعشرين عام عاد باباها كيقول ليها لابغيتي ديري فاش ترتاحي ديري..... على اساس انا عارفة فاش كنرتااح !!!
اصيل : علاش داباا نتي كيجيب ليك الله كبرتي ولا كيفاش ...
قسم : على انني نقرر فمستقبلي اه ... هاد الوقيتة خاصني نكون عايشاه ماشي عاد كنقرر ليه
اصيل : ( تنهد مدة وهي ساكتة كينزلو دموعها ) قسم ... شوفي فيا ( قسم ضارت عندو ) نتي ماشي حياتك مازويناش .. راه نت لي مباغاش تشوفيها زوينة .. شي نهار خاصني نديك لدار الايتام .. ونديك للسبيطارااات .. تشوفي شحال من واحد مقطعين ليه رجليه وشحال من واحد عايش بالدوا وماعندوش حتى فلوس داك دوا .... خاصني نديك عند ناس ماعندهمش حتى الوقت فين يفكرو بحالك واش حياتهم زوينة ولالا .. خااصني نديك عند وحدة مات ليها الراجل وخلا ليها ربعة دالولاد خاصها تخدم عليهم ... خاصني نديك تشوفي واحد مات ليه باه وهو عندو تمنطاش لعام ومخلي ليه بنت صغيرة خاصو يكبرها و بوووحدو يوكلها ويكسيها ... خاصني نديك تشوفي الناس كيفاش عاااايشة ... وحامدة الله .. ونتي لي موفر ليك كولشي .. معايشاااش !! راك نتي لي مباغااش تعيشي .. علاش شنو تايمنعك متمشيش بحال ديك لي لابسة جلابتها وهازة قفة ! تقدري تعييشي كيف بغيييتي غا نت مكتعرفيش ..... نت راه وحدة لي شببببعااااات بزاف تامبقاش كيجيها جوع .. وخاصهااا تجوع وتوحش الماكلة يلاه تبث للارررض ( مسح ليها دموعها بنرفزة ) مسسسحي هاد الوجه بااارررااكا من دراااما ياهاد البنت راك كتبغي تبكي راااسك غير هاكااك .. خلعتينا حسابتنا غير اش واااقع ...
قسم : ( جاب ليها الضحكة ومبغاتش تبينها باقا كتشوف فيه ) علاش اش كان غيكون واقع مثلا
اصيل :قلنا غا بااااك جاب ليك شي تزويجة بززز بشي شاااارف
قسم شوية بشوية بدات توسع داك الضحكة وبدات تضور راسها وهو قالها بلعاني غير باش تضحك وضارت للبحر كاااتضححك وتهز كاملة وهو عاض على شفتو كاع كلامها فهمو وحس بيها ومينكرش انها من حقها تحزن .. ماحياة ماوالو هاد الحياة لي مفييهاش شششعف ومافيها هدف ... ولكن مبغاش يبين ليها وحاول يحببها فحياتها ويخفف عليها تاسمعها ....
قسم : بابا عمرو غيزوجني بزز غير تهنى ...
اصيل : ( وقف حداها فالحيط ربع يدييه وهي مطلعة راسها فيه لي طويييل عليها ) مااابلااانش ...
قسم : ( علات حاجبها ) علاش !
اصيل : كنت كنفكر فشي طريقة تخليينا نتزوجو .. وقلت نخطف ماماك ونقوليه الى رجعتليك مرتك زوجني بنتك ..... ( قسسسم ضحكات ) ولكن ملي مكيزوجش بزز .. مغتصدقش ليا ... نتعذبو على والو ....
قسم : ههههه هههه هههه
قسم بدات كتخيل ماماها ومخطوفة وكتمووت بضحك وهو ساهي فضضضحكتها لي مع الشمس كتبان ملاااائكية .. داك الضحكة وسط الدموع بحال هاد الشمس لي شرقات بين الغيووووم وهي كضضحك كاملة على كلااامووو وضارت شافت فيه كتحاول تحبس الضحكة
قسم : هههه ومالك على هاد تمارة كاملة .. خطفني انا نييييييت ...
اصيل : ( حك فوق حاجبو بتفكير ) تاهدا بلااان .. معرفتش كيفاش مفكرتش فيه ... ( رجع شاف فيها هي لي باقا حاة وجهها تغير فصانية ) ولكن نوااعدك نفكر فيه ....
قسم : ههههه آآه اصييييل ... كون كانت الهضرة بحال الفعل ...
اصيل : دابا بكككل تواضع .. اقسسم زعما ... بغيييت نعرف .. اش عجبك فيا !!! ( قسم نزلات راسها كضحك تاني ) لا والله بغيت نعرف .. زعما عييت نفكر شنو فيا كيعحب مالقيت والو .. واحد مريييض فراااسو ماعندو فلوس ماعندو طموبيييلات ماعندو عائلة ماعندو زهررر ماعندو تاااااشي حااااجة ... اش عجبك فيه
قسم : ههههههه ههه اصيل سكت والله مافيا ميضحك ههه ....
اصيل سكت بقا غير كيشوف فيها وهي كضحك وشعرها كيطير معاها ... سكت مدة وبقا غير كيشوف فيها وهو يحيد شعرها على وجهها ردو مور ودنيها تاجمعات ضحكتها وتوترررات كاتشوف فيها دغيا كايضهشرها ....
اصيل : ملي شفتك من بعيد واقفة بحال هاكا .. كنقول مع راسي كيييييغاندير نطلع المورال لهادي دابا .... ماسحابليش ساااهل يطلع ... ساااهلة بزاف .... ساهلة تبكي ... ساااهلة ضحكي ... ساهلة تعصبي .. ساهلة تبردي .. هادشي كامل شفتو فيك منهار عرفتك .. ساهلة فكولشي ... صعيييبة فحاجة وحدة .....
قسم : ( كتشوف فيه وقلبها كضرب بجهد فلحححظة قدرر ييحبس ضحكتها ويبورشها ) ششنو هي
اصييل : ( بشوفة كاسرة ) صعيييبة تبقاي معايا ...
قسم قلبها حساتو ضرب بجهد وسرطات ريقها بزز وقلبات راسها للبحر عاضة على شفتها ويديها خشاتها فجيبها باش ميبانش شحال مزيرة عليها وهو رخف فيه النفس ورجع كيشوف ..
اصيل : هادشي لي فيك صعيييييب .... ما الباقي كولشي ساااااهل فيك ....
قسم بقات مدة كضور كلامو ورجعات شافت فيه
قسم : ماصعيبة والو اصيل .... نتا لي صعبتيه
اصيل : ( رفع حجبانو ) انا !!
قسم : اه نتا .....
اصيل بقى ساكت شحال وهو كيفكرر فالليالي لي كيدوز كيتفرج فتصاورها ويتحسرر حس بلي مابقاش عندو علاش يخبي هادشي .... مايبقاش دافنو وغير بوحدو كيتعدب وهي كيجيب ليها الله مامسوقش ومحملاه الذنب كامل ..... وعند بالها ملاقيتهم ولا فراقهم فيديه هو .. معارفاهش الى هو بااغييييها كتررر ...... وهو ينطق مخرج لكلام من اعماقو ومحسسسر مع كل حرف ....
اصيل : غير كيجيب ليك الله ا قسم ..... تانا بحالك ... الى نت جيتي لهنا ليوم وبكيتي على حياتك لي مبغيتيهااش تكون بحال هاكاك وبغيتي مستوى صغر منها وتجي تعيشي فهاد المدينة وتلبسي جلابة وتهزي گفة باش يالاه تعيشي مع هاداك لي يقطعك الطريق ويعلمك طيبي ... انا راه كنتمنى كون كانت عندي حياتك حتى انا ونصوك طموبيل بحال هاديك لي موراك ونجي مع وحدة بحالك ونقدر نتقدم لداركم ...
قسم : نتا راه معارفاش حنا مااا كن ( قاطعها )
اصيل : عااااارف غتقوليلي نتوما متواضعين مكتعتارفوش بالطبقات وغيرضاو بيا ... اييييه .. فهمممنا .. راه المششكل هو انا لي مغااانرضاااش تاااايجي واحد يرضى عليا ..... راه معندييش شي حاجة من غير هاد النفس لي طالعة نازلة اقسم ....
عند اياد ....
كان جالس فالريسطو شاد قهوتو عندو الشمسس شرررقات وريسطو بناس لي دخلو يفطرو ... وهو كيضور ففنجالو ومتكي على الكرسي كيشوف من الزاج فالبحررر لي حدااااه ....
كيتسنى فسسلطان يجي عااارررفوو مغيبغيش يخسر ليه الخاااطر كيعرف قلب ولاد عمامو كيداير .... لقى راسو محتاج معامن يهضر وشكون يعلي ليه المووورال ومكاينش لي كيتفاهم معاهم كتر من ولاد عمامو .... تاتجر حداه الكرسي هو يعلي حاجبو .... وشاف قدامو شكون جلس ..... غير شافها علا حجبانو بجوج وحط داك القهوة مسسستغرب وكيتفكررر فين شاافها !!! ... وهي تبسماااات ودوزات شعرها للجنب وحطات صاكها ....
سجى : حااااول ..... غتفكرني ......
......
عند قسم
قسم : اصيل مغنعاودوش نفس المواضيع والله تاعييييت منهم .... من هااادشي كااامل واخا مجيتي لهنا مكانتش على قبل هاد الموضوع ولكن ملي تجبد مزيان نعرفو .. انا من هادشي كامل جاوبني على حاجة وحدة ..... ( حرك ليها راسو بمعنى اش ) واش باااغي تكون معايا !!!
اصيل بقى كيشوف فوجهها مممدة وحرك ليها راسو بآه ببطئ .... جواب ابدااا ماتحكمش فيه خرررج راااسو ورغما عليه .....
قسم : لا ا اصيييل .. مباغيش ... كون كنت باغي كنت غتلقى الحل ....
اصيل : بحالاش هاد الحل اقسم ! نقلب على شي جن ! انا را سميتي اصيل ماشي علاء الدين ....
قسم : وعلاش انا بقيت كنقلب على الحلول !
اصيل : ولقيتي حل !
قسم رمشات عينيها ورجعات ضارت موراها مدة وهي تخرجها
قسم : دويت مع بابا ...... وقتليه ( اصيل وسع عينيه وقاد الوقفة ) ببغيت نكون معاك
اصيل بقى واقف شحال هو يهبط راسو عندها بشوية وطل عليها بذهول وصدمة
اصيل : اااش دررررررتي !!!!!!!!
عند سلطان ....
وكل امرو لله وشد الطريييق للمدينة للمحل لي كيمشيو ياخدو عليه "تشورو " ولي مولاه كيعرفهم غير كيحطو طموبيل كيجيبو ليييهم ..... غير وصل حداه كلاكسونا عليه وهاداك السيد بطابليتو البيضة ضضحك لييييه ومشا عمرر ليه شحال موالفين ياخدو وجا عندو للزاج عطاه وسلم عليييه .. خلصو سلطان وشد طريق كينقب منووو شاد طريق للريسطو لي فيها ولد عمو والنعااااس كيديه وكيحاول يييتوگد ... ملي عيط عليه اياد ادن باينة غيكون محتاجو وباينة راه عييياااان .. بحال هاد الوقت لي كنحتاجو الناس ... ماشي غير فاش نكونو فرحانين هادي لي كتسمى الشدة ...... واخا فيه النعاااس واخا مسخسخ ... ولكن Family above all " العائلة قبل كل شيء"
كانت خارجة من المحل ديال المجلات وغادة بززززرزبة تقطع طريق معنقة مجلتها عندها لي صاحبتها لي كتجيبها ليها سافرات وهي متقدرش تبقى بلا متعرف اش كتبو ليوووم تاني على العائلة لي مهووسة بييها .... غادة كتجري قبل مايجي خوها من الخدمة ويلقاها مكايناش ..... وسلطان كان غادي وكيحرك راسو ويرمش بعينيه باش مايديهش النعاااس بالعيااااا ... نزل راسو يهز وحدة ياكلها وهي تخرج لييه فالطريييق فرااانااااا بببببببجهدددد تاااتقلبات الدنيا بصوت داك الفران لي دار والبنت قفزاااات وغوتات والمجلة طارت ليها من يدييييها تلاحت على الباربرييز ديالووو وصورتهم فالمؤتمر دموت جدهم هي لي فالغلاف ..... وهو مزال مصدوم حال فمووووو كيسول راسو ... واش انا ضرررررربت شي حد !!!!!! .. والناس تججمعووو بزززرببة ضااايريين كيشوفو فداك البنت لي طاااااحت ضرباتها طموبييييل ...... هو واقف مصدوم معارف مايديييييررر ..........
عند جود ....
بقى كيتسنى فبيلسان تخرج من الدريسينغ وكيشوف مع جنابو ماعارف اش يدير ولا كيفاش يتصرف ! ..... كيفاش يقول ليها لا مغانبقاش .... وتحس انه مباغيهاش ... ولكن هو فقط خايف يدخل دابا شي حد يفهم غلط قبل مايكون هاضر معاهم ويعاود تاني نفس الغلطة !!!!!! ... ورجع هز معصمو شاف للساعة لقاها مزال الحال باش غيكونو فاقو حييييت نعسو معططليين ... رتاح نسيبا و حول عينيه للسرير هو يجيبليه الله بحالا شاف شي حاجة !!! .. هو يضور راسوووو بزربة لواحد لافيطخين فبييتها .... وصغر عينيييه من شنو داكشي لي كااايشوف ... تمشى بشوووية ووببطئ تاوقف مقابل معاها .. وهي تبان ليه نيشان .. كانت الطموبيل لي عاطاها قبل مايمشي لموووناكووو .. فعلا نفس الطموبيل لي شاف فالكاميراا !!! غير شافها تفكر الورقة لي قاتلو الفضول يعرف شنو كاتب ليها فيها ..... وحل البييان ديال داك الفيطخين الزجاجية .... وهزها بششششووية فيديه وقلبها فجيهة لي كان خاشي فيها داك الورررقة باش يتأكد واش باقا تما .. واش قراتها ولا لا !!! شنو كان كاتب !!!!! ..... حلها من جيهة فين كايكون الباطري ديالها .... هو يلقى داك الورقة باقا تما !!!! واش ماشافتهاش !!!!! هو يهزها عندو حلها .......
عند اسد ....
عيا يتنهد ويضور هنا ويضور لييييه .. النعاس والو مبغااااش يجيه .... هو ينوووض .. باقي فيه الهم دقسم وديال جود اش دار مع بيلسان واش تافقو واش هضرو اش واقع .... ناض و النعاس طاير ليه .... هز البودي ديالو وقال يمشي يطمن على ولادو لوخرين وينزل لبيرو مابقى ليه نعاس ....
خرج كيحك فراسو وبدا بجناح قدس لي حداه .. حلو دخل شافها كيف بقات .. قرب بشوية لسريرها كانت ناعسة مكمشة ففراشها .. غير كيشوف ولادو ناعسين بهاد الشككل كبيتسم بلااا مااايحس .... وقاس جبهتها واش تكون طالعة ليها السخانة حيت بكات لبارح بزاف .. وتحنى عندها باسها وغطاها مزياااان .. وخلاها وخرج مشا لجناح وسييم ... حلو علييه .. لقاه تاهو ناعس فطرف السرير على جنبو .... كيمشي حتى للطرف ويتكمش .... ناعس والكيت فودنيه قرب ليه راسو هو يسمع القران مطلوووق وهز تيليفونو بشوووية حبسو ليه وحيد ليه الكيت من ودنيه وبدا تايغطيييه .. شافو مكعنكش فداك البلاصة معذب هو يهزو بشوية عارفو نعاسوو تقييل وقادو فوسط السرررير هو يضور وسيم لطرف لاخر تاني وجبد عندو الغطا .... مشا للطابل دونوي هز تيليكوموند هبط عليه ريدوات هو يلمح شي حاجة كتبان فالمجر لي محلول ددطابل دنوي .. علا حاجبو وحل المججررر هو يلقا ساشية غرييبة !!!! .... بقا مكمش ملامحو كيشوف .. كانت ساشية ديال ديك الكينة لي البارح حتاجها ومالقاهاش وبقا يلحححس فالساشية .. جبدها بشووية هزها وبدا كيضورها فييييديييه مسستغرب هو يقربها لنييييفووو وبدا يشششمها تارفع حجبااانووووو بجوووووج وطاحت من يدييه !!!!!!!!
مربع يديه فوق الحيط القصير ودافن راسو وسطهم لي كيضربو بشوية مع داك الحيط وقسم واقفة عند راسو ...
قسم : دابا ماااالك ابنادم .... عااادي اش فيها!
طلع راسو فيها كيرمش مدة وتقاد فالوقفة وميل معاها راسو مزال مابغاتش دخل لدماغو
اصيل : اش فيهااا !!! قلتي عادي اش فيها !!!!!
قسم : اااه .. اش فيها ! عااادي ... اصلا انا مكنخبي على بابا والو .... اول واحد دخل لدماغي ومغنقولوش ليه !
اصيل غير واقف مصدوم كيشوف فيها وكيرمش بعينيه
اصيل : دابا ( كيحك فلحيتو ويشوف هنا وهنا كيستوعب ) دابا ... عندكم هادشي عادي !!!! سلام بابا كنبغي شي واحد !!! ....
قسم : ( قسم عضات على شفتها مدة مبتسمة وهو كيسولها بعينيه واش عااادي وهي تجاوبو ساهية فعينيه ) انا مقلتش هاكا ...قلت ليك بلي قلت ليه غير بغيت نكون معاك .... ( عوجات راسها معاه وهو مزال كيحاول يصدق ودنيه ) ولكن تاهاد كنبغي شي حد .... عجباتني ..... ( ضحيكة )
اصيل بقى كيرمش فيها فلخر ضور راسو لجنب وبدا كيرد فشعرو لور ويتنهد وهي ساهية فحركاتو ملي كيتوتر ويحشم .....
اصيل : ماقصدتهاش بهاد المعنى .... دويت اونجينيغال
قسم : لا تاهاد المعنى عجبني ...
اصيل قلب راسو لعندها : اش قلتي ليه !!
قسم : ( علات حجبانها مزال واحلة فالحركة لي دار ملي رد شعرو لور ) هم ؟؟
اصيل : ( سرط ريقو وقاد الوقفة معاها كايوشف فيها مباشرة ) باباك اقسم ... اش قلتي ليه بالضبط ....
قسم : ( ساهية فعينيه ) بغيت نكون معاك ...
اصيل بقى غير ساكت ... هنا بالضبط هرب ليه كولشي .. هرب السؤال وحتى الجواب .... كايتنفس تاكيتعلا صدرو .. معارف كيف يدير يتعامل .... وقرب ليها جوج خطوات وهي كتشوف فيه بعوينات طفلة كتترجى باباها يشري ليها الشوكولا ...
اصيل : قسم .... واش عارفة راسك اش كاديري !
قسم : ( بلا تفكير هايمة فزرقة عينيه ) عارفة
اصيل : واش مخايفاش تندمي !
قسم : مخايفاش ..
اصيل : هادشي كنديروه على شي واحد متأكدين انه باغينا ..... ( قسم تنفضات وشافت فيه بجدية ) واش نتي متأكدة حتى انا باغيك !
قسم : ( مدة كتشوف فيه بغاو يدمعو عينيها ) مباغينيش !!!!!
اصيل : هاد سؤال ماشي دابا خاصك طرحيه .... كان خاصك طرحييه قبل ماتهضري لباباك عليا ... قبل ماديري خطوة رسمية ......
قسم قربات جوج خطوات اخرين حتى مابقا كيفرقهم والو وتعلات على صباعها وهو غير قربات ريحتها كتر لعندو غمض على عينيه مزير عليهم
قسم : انا قسم الاسماعيلي ... قسم لي فعمرها تمنية وعشرين عام وكتعرف على عشرين فسيمانة متقدمين ليها ومكتشد فيد تاشي واحد .... مغتجيش وتشد فيد مامطلوقهاش ليها ... قسم الاسماعيلي كون ماتمداتش ليها داك اليد وحسات بالدفئ فيها مستحيل تبغيها .... ( كتهضر وهي كتشوف فعينيه ) قلتيها بفمك .. علاش غنبغيك !!! على حتى حاجة ... ماعندك حتى حاجة نبغيك عليها .... انا بغيتك .... حيت لقيت عندك داك الاهتمام لي كنت كنقلب عليه .... والاهتمام مستحيل يقدمو لينا شي واحد لي مباغيناش ..انا ماجيتش وبغيتك .. انا بغيتك حيت لقيت حبك ممود ليا .... شوفاتك ليا .. ( علات يديها ) هاد الخيط .... الضحكة لي كتخليني نضحكها وانا معاك .... خوفك عليا واخا ماشي بزاف باش عرفتيني ..... الحوايج لي شريتي ليا باش منمرضش .. هاد التفاصيل هوما لي كنت كنقلب عليهم .. وماشي اي واحد غيقدمهم ليا .... هاد التفاصيل حسن بزاف من هاداك لي كيتحنى ليا ويقول ليا بونسواغ مادموزيل ويجر ليا كرسي فريسطو ويخليني نطلب عشا على دوقي وناكلو فالملل وبشي مواضيع بايخة وضحكتو الباسلة و يوصلني لباب دارنا وينزل يحل ليا الباب .. هاد البروتوكولات لي حفضوهم ليهم فقانون الرومنسية و الجنتلمانية ماعندي مندير بيهم ومغيشدونيش للواحد وماشي هوما لي غيخليوني نقول هاد الولد باغيني .... لي كيبغيني كيقدم ليا رومنسية ماقرهاش .... رومنسية مشافهاش عند عنتر وعبلة .... اهتمام ديالو كايقدمو ليا بلا مايحس بيه ... مكيقدموش باش يبان مهتم .. كايقدمو حيت هو مهتم اصلا ...جنتلمانية بطريقتو ..... ( علات فيه عينيها كتر بثقة وهو هايم فيها ) تيق بيا ا اصيل ... الى كنت انا تعلقت بيك لهاد الدرجة ... راه حيت نتا السباب .. وحيت نتا لي خليتيني نتعلق بيك ......
هبطات على ݣدامها وقادات وقفتها ورجعات للحيط القصير تقلبات كتشوف للبحر بعد مالاحت ليه داك الكلمات وخلاتو يلملم تفاصيل ملامحو لي بعثراتهم على خاطرو .... وضار كيشوف غير فشعرها لي كيحركو الريح وهي عاطياه بالظهر ونطق بلا مايحس ....
اصيل : الا كان نت هادشي لي خلاك تعلقي بيا .... ( سكت مدة وهي كتسناه يكمل ) انا شنو لي خلاني نتعلق بيك !!!!!! ....هم ؟؟ ...
ضارت قسم بشوية لعندو تاتقابلات معاه بملامح مبعثرين كتر من دييالو وهو قرب لعندها تامبقى كيفرق بيناتهم والو وهي تسرط ريقها وسدات على عينيها مزيرة على يديها كتحاول تستحمل هاد القرب وتتحكم فراسها .... تاحسات بيديه قاسو وجهها وهي تزيد تزير على عينيها ويديها تابدا يدوز ابهامو بشوية على خدودها ووصل لشفايفها وكيضهر بهمس ساهي فيها ومركز غير مع كلامو لي كيخرج من قلبو بلا حتى مايحس بيه كيفاش كيخرج ... بحالا اعتزل على عالمو ودخل عالمها ... فقط صوتو ولمساتو وريحة البحر لي كتحس بيهم حاليا
اصيل : هاد الضحيكة !!! ... ( علا ابهامو لخدودها ) ضحكتك لي بحال البنيتة الصغيرة ... ( علا يديه لعينيها وهي كتسرط ريقها وقلبها بدا يتهز تاولا يبان على صدرها ) هاد العينين لي ماعرفتش واش سرقيتهم للغزال ولاهوما لي سرقوهوم منك .... ( نزل يدو لخدها وشدو ) الا نت تعلقتي بيا تاعرفتيني .... انا تعلقت بيك قبل مانعرفك ( قسم حلات عينيها فيه ) قبل حتى ماتعرفيني نت ..... ( قسم غير كتىمش مافهماتش ) قبل حتى مادخلي لداري .... قبل حتى مانلقى وجهك فوجهي ونسول راسي كيف الهبيل واش حيت كنبات كنلحم بيها كنشوفها دابا ..... تعلقت بيك من هاد الضحكة ومن عينيك لي قريت فيهم الصفى .... ولكن ..... الطريق ليك كنشوفها مسدودة ..... خزنتها عندي وسكت ...
تنهد وحيد يدو من وجهها وخشاها فجيبو وضار للبحر
اصيل : وقادر نزيد نكمل فسكاتي .... غير مانديرش فيك لي ندم عليه واحد النهار ...
قسم واقفة فبلاصتها كتستوعب ومشات تاوقفات قدامو بتساؤل
قسم : كيفاش !!! مفهمتش ؟ كتعرفني قبل منعرفك !!!!!!
عند جود
كيشوف موراه واش مجاياش ورجع كيشوف لداك الورقة البيضة المطوية كيحلها فيديه كانت مطوية بزاف تااحلها كاملة كلها فيها اثار الثنيات وكتابة بالانجليزي .. حط داك الطموبيل ومشا للسرير جلس وبدا كيقرا مصغر عينيه .....
" بيلي .... ماي بلو ايز ... ماي بيورفل كازن .... موناكو هي حياتي ... و نت وحدة لي دخلات لحياتي ... ولقيتي موناكو فيها قبل منك ، سمحي ليا بزاف ... انا عارف راسي غالط فحقك ولكن هادشي خاصو يحبس هنا .... نت متستحقيش واحد بحالي حياتو كلها فالخطر .. نت تستحقي لي يعرف بقيمة عينيك ... انا هادشي مغنتخلاش عليه ... ونت وحدة لي وراتني ليام انك مغاتصبريش عليا كيف ما انا .... من حقك .. نت باقا صغيرة وتستحقي حياة حسن ... غتبقاي ديما بنت عمي الزوينة لي دوزنا انا ايام زوينين .. وغتنسايني وغتركزي على قرايتك ومستقبلك .. تيقي بيا هوما لي غينفعوك كتر مني ... خوك عندو الحق ... انا مغنستحقكش .. واخا نعرف حياتي كاملة نبقى كنطلب منك السماحة .... مغانحبسش حتى تسمحي ليا بقلبك صافي .... شوفي حياتك ابيلي اما معايا غير غتعذبي ...... "
يلاه كمل داك الرسالة هو يحول عينو لجنب كيفكر فهادشي تاسمع الباب تحلات وكمش داك الورقة بزززربة وخشاها فجيب الفيست ديالو وحاول يبتسم ....
بيلسان : ( مصغرة عينيها كتشوف معاه ) اش داكشي !
جود : ( سرط ريقو وحاول يتبسم ) وااالو .. ( ضار شاف ف داك الطموبيل وهزها ) شفت غير هادي عجباتني ......
بيلسان : ( شداتها عليه وتبسمات بحنية وشافت فيه ) عقلتي عليها !
جود : ( عوج شفتو لجنب ) نوو !
بيلسان : هادي نتا لي عطيتيهالي .... ملي كنتي غادي لموناكو ... ق ... ( حزنو ملامحها ) قبل من داك لاكسيدون .. فاش كانت حياتنا زوينة ......
جود : بيلي ....( بيلي علات فيه عينيها لي دمعو وهو كيشوف معاها ) وقدرتي تسناي ! ... علاش مشفتيش حياتك ؟..
بيلسان : بلا بيك ! ( شافت فيه مدة ) مغنعرفش .... مغنعرفش نعيشها .. كنعرف نعيش حياتي غير معاك .....
جود : مشيت لموناكو ابيلي .... واخا مابغيتيش ...تخليت عليك ..... ( شد يديها بجوج وكمل بحرقة ) خلييتك .... اش خلاك باقا كتبكي عليا ... كان خاصك تشوفي حياتك ... ختاريت موناكو عليك ...
بيلسان : ( هبطات دمعة ) جود حياتي هي نتا ... ماعنديش شي حياة اخرى ..... ( قربات عندو ) السعادة كلها لي كنعرف عرفتها معاك ... وطول ما انا بعيدة عليك ماعرفتش شنو هي السعادة تا رجعتي دابا ... حتال هاد الليلة لي ضحكت من قلبي .. ضحكتي كتعرف غير نتا تخرجها اجود .... راه مغنعيشش بلا بيك ..... ومغنعرفش نعيش.....
جود سرط ريقو وجبدها عندو عنقها وهي بقات كتبكي فصدرو مزال متتيقاش الا عذابها سالا ..و هي بين يديه دابا كيدوز يدو بشوية على شعرها وكيشوف لنقطة وحدة قدامو نقطة وحدة لي محطوط فيها جود القديم لي كاااااررررهووو .. كرهو وزاد كرهو مور هادشي لي قرا .... وهبط راسو لراسها باسها
جود : شششش ....
علات بيلي عينيها فيه مدمعين ومع دلك تبسمات وهو كيشوف فيها
بيلسان : نسى عليا داكشي كاااامل .... صافي .... خلينا نبداو من جديد ...
جود : ( تبسم ليها وحرك راسو باه ) واخا ....
بيلسان بقات كتشوف فيه مدة وهي تقرب عندو وتعلات على صبعانها وهو علا حاجبو عرفها اش غادير وهي تشرك شفايفهم وبقى راجع بلور تا لصق فالحيط تكا عليه عاد عنقها عندو غارس يد فشعرها ويد فظهرها منساجم معاها فالتقببل ... كانو قبلات دااافيييييين من شفايفها وجامحين من شفايفو ... عاد بعدات شوية بشوية عليه وهو بدا يحل عينيه .... وقالت وهي كتشوف فيه بانتشاء
بيلسان : آي لاف يو كازن ..... آيلافيو سو ماتش
عند قسم واصيل
اصيل هي كتهضر وهو منزل عينيه لعندها وحاط يديه فجيبو ....
اصيل : ممم .. كنعرفك .... ( جبد تيليفونو من جيبو وشعلو من جنب وهي تبان تصويرتها تاوسعات عينيها )
قسم : ( شدات تيليفونو بزربة كتشوف فداك الصورة لي حاطها فليكخون ) اء !!!! ( كتشوف فيها وتشوف فيه ) منين جاتك هاد تصويرة !!! محاطاهاش فلي ميديا هادي كانت غير عندي انا .....
رجع خشا يدو بجوج هاد المرة فجيابو وشاف قدامو
اصيل: نهار جيتي وتگريسيتي عندنا .. كريساك خو الدري صاحبي ...ملي رديت ليك الصاك ... ماسخيتش بالتيليفون .... غير حيت كانت فيه هاد الصورة .....
قسم يلاه تفكرات بلي كانت دايراها فليكرون وهي تعلي عينيها فيه باقا شادة تيليفونو
قسم : وعلاش مرجعتيش ليا التيليفون !!!!!
اصيل : مبغيتش نقطع كاع الحبال لي بيني وبينك .... بغيت نخلي واحد يقدر شي نهار نبغي نشوفك ونلقاه سبة .. ( بقات مشوكية فيه وهو تبسم بطرف شفاهو وضربها بصبعو فنيفها ) غير ضحكت معاك .... خبيتو حيت مكنتش باغيك تعرفي شكون كريساك
قسم : هه !!! ( ضارت براسها لجنب فرحانة كتحس بضلوعها كيتهزو بالفرحة ) تقت غير باللولة متخافش هههه ...
يلاه كتكمل هضرتها هو يصوني تيليفونو فيديها وشافت رقم ومداتو ليه
قسم : شي حد كيصوني عليك !!
شد عليها التيليفون مصغر عينو فالنيميرو لي ماعرفوش
قسم : ( كتشوف فالتيلي وتشوف فيه ) شكون كيصوني عليك !!!!
اصيل علا غير عينيه فيها وراسو باقي هابط على التيليفون بنفس دوك النظرات لي كايتلفوها ... وهي تعلي يديها وعوجات فمها لجنب
قسم : نعتذر نعتذر ...
اصيل تبسم بطرف شفايفو على غيرتها العوجة ودار التيليفون فودنيه
اصيل : آلو ( زاد علا حاجبو ) ايه انا هو .....
شوية تجمعو ملامحو وقسم كتشوف فيه مخلوعة تابان ليها قطع التيليفون ومشا كيجري معارفش تافين غادي وهي تبعاتو كتجري شداتو ..
قسم : اصيييييل شواااااقع ححححبس قولي اش وااااقع
عند جود
تبسم ليها بحنية وشد وجهها عندو وقرب راسها لعندو وحطجبهتو فوق جبهتها وبقى مدة على داك الوضع ويد حاطها من مورا عنقها مقربها لعندو ...تاسمعتاو
جود : غاندير لي فجهدي .... باش نعوضك على هاد الربع سنين . .. وحتى نت عاونيني ... عاونيني بحاجة وحدة ... نساي جود القديم .... وحاولي تأقلمي معايا انا ... بعقليتي انا ..... الى كتبغي جود .. راه جود هو انا .... الى كتبغي دلك المراهق القديم ... راه مات فموناكو .....
بيلسان : ( علات عينيها فيه ) حبيبي راه نتا هو جود ... وانا كنبغيك نتا ( علات يديها لوجهو ) بهاد الملامح ديالك وهاد الفم وهاد النيف وهاد العينين وهاد اللحية لي كنغرق فيها .... مكاينش شي جود اخور .. كاين واحد .. هو هذا لي قدامي .. ولي كنموووووت فيه ... وفكاع هاد التفاصيل فلباسو فسيتلو وفشعرو ... فعيييينيييه فضحكتو وفنيابو فصوتو ... فكولشي ...
جود تنهد وبعد شوية عليها وشاف فيه بجدية
جود : نتمنى تا عقليتي تعجبك كيف عاجبك البروفايل ...
بيلسان : ( شدات فيديه ) واش انا عقليتك تخفى عليا ! راه كنعرفها احبيبي ...
جود : راه فتليك لي كتعرفيه نت مات فموناكو ......
ابتسم ليها خلاها غير واقفة ومشا للباب حلها ورجع ضار عندها ...
جود : نعسي ترتاحي ... ماتفيقيش ليوم ... رتاااحي ...
تبسمات ليه بفرحة لاهتمامو وحركات ليه راسها بواخا وهو تبسم ليها ومشا لبيتو وهي شدات على قلبها ومعلية راسها لفوق فرحاااااااانة بحال احساس شي حاجة عزيزة كانت موضرة سنين ولقاتها .... ومشات تكمشات فسريرها مبتسمة معنقة مخدتها كتفكر فالليلة لي دوزات معاه و ريقو لي باقي فشفايفها .. عارفة راسها كتسناها حرب مع عائلتها ولكن قلبها ماعليه حكام ..... تبعاتو تاني كيف كل مرة ......
جود دخل لبيتو وبقى يمشي ويجي وحيد داك الورقة من جيبو سرحها تاني كيقرا فيها للمرة الثانية بحالا متاقش بداكشي لي كان كتب وكيسول راسو كيفاش بسهولة كان غيتخلى ! تاولا كولشي رسمي ودخلات العائلة وخاصمها مع خوها .. عاد كان غيتخلى بحالا مادار والو !!!!! واش هذا هو الحب ؟؟؟ واش فعلا كان كيبغيها ولا كانت نزوة .. رجع كمش داك الورقة مجنن وكيقول فراسو يكون لي كان بغا يكون المهم هو دابا ... خاصو يصلح داكشي لي كان غيريب جود القديم .... شكون بحالو بنت عمو زوينة وتتموت عليه .... وقابلة على مرضو ... هادي هي نصيبو وخاصو يحافظ عليها .... مشى خبا داك الورقة باش ماتمشي تشوفها وحمد الله لي ماحلاتهاش ونصل حوايجو دخل لدوش يترخى فيه ويرجع يضربها بنعسة باغي ميفيقش هاد النهار كامل يالاه يرد عقلو مزيان .....
∆فالقصر
مكتب اسد
جالس فالبيرو ديالو وداك الساشي محطوط على البيرو وهو كيضرب بصبعانو على التكايات دالكرسي و رجع نزل عينيه لداك الساشي مطووول فيه الشوفة .... تاتسمعات دقة فباب البيرو وتحل وعلا عينيه كانت رجاء
رحاء : سي اسد ... كاين ضيف علا برا قال طلبتيه ....
اسد : دخليه ... ومادخلي عندي تاحد حتى يمشي ...
ومات بالايجاب ومشات دخلاتو ... كان رجل فمقتبل العمر لحية بيضاء وشعر ابيض لابس كوستيم كري وهاز فاليز كبيرة سوداء فيديه واسد وقف سلم عليه وجلس ووما ليه يجلس تاهو ....
الضيف : قالو ليا طلبتيني وجيت بزربة .. ياك لاباس ..
اسد : جبتي ماطريالك ...
الضيف : اهاه جبت كولشي ...
اسد : ( كحز ليه داك الساشي لعندو ) شوف ليا هادشي شنو هو بالضبط ....
الضيف مصغر عينيه فداك الساشي وشدها وشاف فيه يلاه غينطق اسد
اسد : عااارفها لادروك .... بغيت نعرف اشمن نوع بالضبط ....
الضيف : حاضر ....
حل داك الدكتور لافاليز لي كانت عامرة بالماطريال والبيسي ديالو واسد مربع يدو ورجع بالكرسي لور ... صباح كامل وراسو غيطرطق عليه بالتفكير ...كتجيه شي حاجة من الخيال انه يكون ولدو كيتعاطى ...وشكون .. الصغير فولادو !!! المدلل
ديالو !!!!! .. كون لقى هادشي عند جود ميستغربش ... ولكن وسيييم !!!! مابغاتش دخل ليه لدماغو .. ولي مبغاش يدخل كتر وهو علااااش كياخد هادشي اشنو ناقصو بالضبط !!!!!! ....وعلاش ماقدرش يلاحظ عليه ؟؟؟؟ واش مدمن ؟؟؟؟؟ ولاغير طيش المراهقة !!!!! .... مابغاتش دخل لدماغو بالمرة .... كايحاول ماامكن يتصرف بعقلانية فهاد الاومور وميتسرعش فاومور حساسة بحال هادي ... ملي لقى هادشي وهو كيشوف فيه ناعس كان باغي يهزو من عنقو يعلقو يييسسلخو على هادشي .. وملي فكر وتحكم فراسو .. لقى مكيتعالجش بهاد طريقة .. باش يلقى عند ولدو المراهق لادروك فالبيت .... خاصو يخدم عقلو مزيان ... الى بغا ينقد ولدو من هادشي ..... خاصو يفهم بعدا اش واقع .... عاد يعرف يحكم ويعرف يعالجو ..... مستحيل وسيم يكون تلاح لهادشي غير هاكاك مستحيل .... غير كيفكر ان ولدو كلا شنو فهاد الساشي كيبغي يحماق دفن راسو بين يديه وداك البروفيسور كيخدم وكيشوف فيه وهو كيتنهد باغي يتسطى .... ومعارفش كيفاش يتصرف موصيبة وطاااااحت على راسو ... وكون يشد هدا لي عطى لولدو هادشي وعلمو هادشي غيشرب دمو ...
البروفيسور : ( حظ المنظار وحيد كمامتو ...ونصل ليغات بعد مكان كيفحص فبقايا لادغوك المجهرية لي بقات فالساشي وشاف فاسد ) هادو حبوب ماشي غبرة .... لادغوك كومبخيمي ... النوع ديالها هي حبوب منشطة ....
اسد : كيفاش حبوب منشطة !! اش جابها لادغوك
البورفيسور : داخلين فخانة المنشطات ولكن الا تخادو بكترة .. كيوليو مهلوسات .... وكيولي الانسان مقادرش يتحكم فلادوز لي كياخد ... ومقادرش يتحكم حتى فردود افعالو الا مكانوش ... هاد النوع دالحبووب معندهمش اسم اخر حيت اسمائهم مختلفة وكل واحد كيفاش كياخدهم ولكن عندنا حنا فمجالنا كيتسماو des pilules stéroïdes ...كنعطيوهم فالمجال الطبي للمريض لي الجسم ديالو مقادرش يأدي الوظائف ديالو بشكل طبيعي لا بالنسبة للتفكير او الدراسة او العمل ... وحتى فحالات الانجاب ... لكن هاد الحبة لي هنا مخلطة بين السترويد و بين لادغوك المهلوسة .. لي كتعطي الشعور بالشنوة والراحة .... السترويد لي كيتباع فالصيدليات ولي كيوصفو الطبيب خالي من المخدرات .... ولكن السترويد لي كتباع فالنوار تايكون مخلط .... والادمان دالستيرويد شي حاجة صعيبة على جسم الانسان لانه مكيبقاش قادر يأدي وظائفو بوحدو .. ضروري ماخاصو ياخدو لان السترويد ديال الجسم ديالو قتلو بالمرة .... كيخصو ياخد الحبوب باش يلاه يقدر يركز او يفكر او يحفظ او يلعب او يقدم شي نشاط بحيوية ... نقدر نعرف ديال من هاد الحبوب باش نقدر نشخص الحالة !!! وحنا عارفين الامور عائلية والسرية معندك مناش تخاف راني دكتوركم اسيدي ...
اسد : ( غير مربع يدو وخاشي صبعو الصغير ففمو ومتبع معاه ورجع حيدو وتنهد وشاف فيه ) ولدي الصغير
البروفيسور : سي وسيم ؟؟؟؟؟ خساارة والله ... ماباينش عليه كاع ادمان الستيرويد .... ولكن .... مادامو مكيأديش شي رياضة لي يحتاج منشطات .. فغيكون فغالب الاحيان التجئ ليهم بسبب الدراسة ....واش عمركم زيرتو ليه على شي معدل معين او زيرتو عليه فموضوع الدراسة .....
اسد بدا يتفكر فاش كان قاليه الى مجبتيش مونسيون غترجع للمغرب ورجع شاف فالبروفسيور ...
اسد : بحال جميع الواليدين
البروفيسور : غالبا هدا هو السبب ..
اسد : ( تنهد وقرب للطابلة كيحاول يحل هادشي بالعقل ويتبت راسو ) بروفسيور .. ولدي ديجا كان جاه اجهاد بسبب الدراسة ومشا ليزيغجونص فلاميغيك وخرجو ليه السترويد وكان كايخدو انا عارف دواه وكاع لي طخيطمون ديالو وحتى ليكومپليمون اليمونطيغ كايتخادو فالوقت بجرعات مناسبة ...الستيرويد خداه جوج اسابيع هاداك الوقت صافي وقطعو ... ماعرفتش اش هادشي بضبط ... سمع ابروفيسور انا باغيك درس حالة ولدي بالتدقيق باش نعرف اش ندير ...( خرجها وقلبو كيتعصر ) بغيت نعرف واش وصل لمرحلة الادمان ولا لا
بروفيسور : فهمتك اسيدي ... ولكن خاصنا ضروري حضور سي وسيم والمعاينة ديالو والفحص باش نقدر ندرس الحالة ....
اسد : لا .. الى عرف غينكر هادشي وغيزيد يمرض ... خليه عليك هو .. خليني بيني وبينك دابا تانعرف مزيان شنو عندو .. باش الا كان وصل لمرحلة الادمان عاد غنعالجو ماوصلش ويالاه فالبداية غنحاول نحضيه بلا مايكون فخبارو ونحضي كاع الطرقان لي غيديوه لهادشي ... ولدي مراهق ابروفيسور... وهانتا كتشوف اش كيتعاطى اي تصرف مني ماشي هو هاداك ... غنخسر ولدي ...فتربية ولادي وخصوصا فمراهقتهم راني كنتعامل بحالا كنبني برج بالعملات ... اي تصرف خطأ مني نريب كاع اش بنيت.
البروفيسور : ولك انا را ( قاطعو )
اسد : فهم شعوري كأب مباغيش يخسر ولدو ويندم .... وهادشي مفيهش اللعب .... ولدي باقي صغير .. مغنضيعش حياتو وسمعتو ....خليني ندرس حالتو بعدا ...
بروفيسور : داكوغ .. داكوغ موسيو الاسماعيلي ... متفهم الوضع .. اذن غتحاول تعطيني شوية من دمو باش نديرو التحاليل ... فاقرب وقت ... بقايا اللعاب ديالو لي شفت فالمجهر باقين فهاد الساشية يعني غالبا عاد تعاطى ... خاصنا التحاليل باش نعرف لادوز لي كيدخل للجسم ديالو وخاصنا جلسة مفصلة تحكي ليا فيها على حياتو والتواريخ لي خدا فيهم السترويد ... حيت على ماشكيت غيكون سالا السترويد ديالو ومالقاش منين يجييو والتجئ للنواغ وتاجرو فيه مزيان .. خاصك تحمد الله من واحد الناحية ان ولدك ماخداش كوكايين ولا هيرويين ولا لادروغ لي كياخدوها للاكتئاب .. ولكن خدا غير منشطات على ود دراستو .. وحيت صغير ومعارفش هاد الطريق خاصو لي يشد بيديه .... ونعم الاب ....
اسد : تقدر تمشي دابا ... انا غنجي عندك للمصلحة فاش نساليو مراسيم العزاء ... ... التحاليل مكاينش شي طريقة من غير الدم !
البروفيسور : تقدر تعيطيني شوية من اللعاب ديالو ...
اسد : داكوغ انا غنشوف كيفاش وغتوصل بيهم هاد الليلة دير تحاليلك وملي تخرج النتيجة انا لي غنجي عندك .... ( وقف ومد يدو سلم عليه ) شكرا ...
البروفيسور : الله اودي اموسيو الاسماعيلي هادي خدمتي ....
اسد : منوصيكش ..
البروفيسور : كووون هاني ...
خلاه ومشا واسد رجع كلس كيتنهد وشد راسو بجوج يديه ......
عند اياد
اياد مصغر عينيه فيها وهي جلسات مبتسمة فيه ... عاد علا حجبانو ملي تفكرها .... وهي زادت وسعات داك الابتسامة ..
سجى : عقلتي دابا !!!!
اياد : ( ابتسامة كاع ماباينة ونطق بانجليزيتو الخشنة) كون ماشي ملامحك لي كيشبهو لخوك مكنتش غنعرفك ...
سجى : ممممم .. ( دارت رجل على رجل ) وعلاش انا بقيت عاقلة علييييك ....
اياد : ( شد فنجالو شرب منو ورجع حطو شاف فيها) مفروض الجواب غايكون عندك ..
سجى : هههه ( قربات كتر للطابلة ) خويا وماما مشاو .. وانا بقيت خصيصا باش نعزيك شخصيا .... مبغيتش نمشي قبل منعزيك وانا جيت تال هنا على قبلك ....
اياد : ( قاد الجلسة وحك مور عنقو وهي ساهية فدرعانو وفالبراسلي ديالو ودوقو الرفيع فانتقاء لباسو واكسسواراتو ) شكرا .. مامشى معاك باس ...
سجى : ( كتحاول تحكم فراسها وتتصرف عادي قدام هاد الكتلة دالكاريزما ) باقي عاقل على سميتي ياك
اياد : ( تنهد وشاف فيها ونوع من الاحراج تخلط بالجدية فعينيه ) ماقاصدش فيها الاحراج ... ولكن فعلا عندي ذاكرة ضعيفة بزاف من ناحية نبقى عاقل على كاع الناس .... فكريني ..
سجى عضات على شفتها فنفس الوقت عجبها الحال قالت كيفما مامسوقش ليا مغيكون مسوق لحتى شي وحدة من غيري وهي اصلا من عشاق الراجل الثقيل الخاتر ماشي الزهوازي وجاوباتو بابتسامة راقية
سجى : سجى ...
اياد : اااه .. سجى .... ( حاول يتبسم ) غنحاول نعقل عليها ...
سجى : ههه زعما ! ..حقيقة ولا غير مجاملة
ايتد : لاحقيقة ... مكنجاملش .. اهتمامك بعزاء جدي اقل مايمكن ليا ندير باش نردو نبقى عاقل على سميتك ...
سجى : هههه واخا اسيدي انا تقت ...
اياد : ( شرب ثاني من فنجانو وحطو وحك فوق حاجبو حاس بالعياء ) تشربي شي حاجة !!
سجى : ق ..
يلاه غتكملها وقف عليهم سلطان لي وجهو متوتر ومخلوع وحاول يتبسم ليها بزز واخا معارفهاش شكون ولكن مدام مع اياد دونك كيعرفها ..
سلطان : صباح لخير ...
سجى : ( غير شافتو عرفاتو وتبسمات ليه ) سلطان الاسماعيلي .. مشرفة بيك ..
سلطان : شرف ليا ... ( شاف فاياد وشاف فيها ) ممكن واحد دقيقة الى سمحتي ..
سجيى : اااه ماشي مشكل تفففضل جلس ..
سلطان : ( دوز لسانو على شفتو واياد جاتو ضحكة وهو حاول ينطق بابتسامة لبقة ) لا تفضلي نت عافاك ..... وسمحيلنا ....
سجى تجمعو ملامحها وشافت فاياد لي اكتفى انه علا حجبانو بجوج بمعنى ماعندي ماندير ليك وهي وقفات محاولة تبان عادية ومتقمعاتش وواضح غير من توترو انه محتاجو بلا متكبر الموضوع راه مكيعرفهاش وباينة الموضوع كيخصهم
سجى : داااكوغ ماشي مشكل ...( شافت فيه ) اياد غنتشاوفو ياك ...
اياد : ان شاء الله ..
سجى : باقي عندي بزاف مانقول ليك .... سلطان تشرفت بيك ... بسلامة ...
هزات صاكها وتمشات واياد متبعها بعينيه هو يشوف عند سلطان لي جلس بزربة فبلاصتها.
سلطان : برررربي تاكنكوون هاني داخل سوق كر•ي وكاتسلطو عليا نتوما ...
اياد : اش واااقع !!!!
سلطان : ( شاف مع جنابو وشاف فيه ونطق بالحس ) ضربت واحد البنت بالطموبيل
اياد : ( حط كاسو بزربة ووسع فيه عينيه ) وااااااات !!!!!!!!
سلطان : ماااااعرفتش كيفاش وقع ( متوتر كايغزل وجبهتو متعرقة وكيفرك فيديه ) ماعرفتش كاع كيفاش درت والله .... محافضش داك الطريق مزيان وهي ترمات قدام الطريق ماشافت كاع قدامها
اياد : واخا ... واخا .. دابا لي مهم .. واش البنت صافا !!!
سلطان : .. ماعرفتش ..
اياد : كيفاش معرفتش اسلطان .. قول ليا كولشي
الا انك هربتي ..
سلطان : واش بغيتيني ندير !!!! واش باغيني نخرج على حياتي .... واش باغي عمامك والواليد يعلقوني حنا ناقصين مصايب وسكوندال ! .... ماتشوفش فيا هاكاك راني كون شفت الخطر مكنتش غنهرب وكنت غنتحمل مسؤوليتي بعدت شوية وخبيت وجهي وبقيت كنشوف تابانت ليا واقفة على رجليها وراه صافا عاد كسيريت ومشيت .... كون كان الخطررر راه مغنهربش وعيطت ليها على اونبيلونص و عيطت على فؤاد " مدير اعمالو الخاص " باش يوقف خصيصا حتى تعالج الا عندها شي حاجة ويخلص ... غالبا توعتات فرجليها حيت شفتها كتعرج ملي وقفوها الناس ... راه فؤاد تما دابا فسبيطار يجيب ليا خبارها لاكانت شي حاجة راه غايتدخل ...
اياد : وكون قتلتيها اصاحبي واش تسطيتي رد الباااااال
سلطان : شحال غاترد شحال .. صافي راه طرا الغلط ..... مافكرت فحتى حاجة وهربت .. كون بقيت كون درت سكوندال على والو كتعرف بنادم ولا خاصو غير منين يدوز لينا....
اياد : و فؤاد مغايعرفو حد منادجر ديالك
سلطان : راه قلتليه حضي غير من بعيد متبانش فالفاص ...
اساد : مشاااكييييييل حق الرب ... تأكد متنعس هاد الليلة تاتعرف داك البنت صافا ... راه الروح دبنادم اصاحبي صعييييييبة .... دابا هربتي غيحسابوك غاشماتة ..
سلطان ماردش عليه غير دفن راسو واياد كيشوف معاه ويتخيل كون وقعات شي حاجة كانت غتقلب العائلة تاني ... مع دلك باقي فيهم الهم ..... وهو يطلع سلطان راسو شاف فيه
سلطان : شفتها غير من البعيد .... ( كايتفكرها ملي فاش الناي نوضوها ووقفوها وكان كيبان ليه غير شعرها و نطق ) باينة باقا صغيرة .. كنتخيل كون وقعات ليها شي حاجة راه عمرني غااانسمح لراسي اصااااحبي ....
اياد : ودابا صافي بلا هاد الافكار السلبية .. طمن على البنت ... راه قتليك ماتنعس تا تاكد راها صافا وناعسة فدارهم عاد تنعس نتا هاد الليلة ... باش لاكانت شي حاجة كغاف تحمل مسؤوليتك
سلطان : ( بقا يفكر شحال وشاف فيه ) را دبصح اصاحبي غيقولو عليا شماتة ... واش نصيفط ليها الورد وشي حاجة تقبل الاعتذار!!!! .. راه منقدرش نبان بوجهي يعلللقوووووني لاخرج خباري بلا منهضرو على ليكيب بربي لاحلمت نلعب كورة ....
اياد : عااارف لي كاين الحمد لله ماطرا والو .... داكشي لاخور غتعرف فيه حسن مني ....
شاف فيه مطول كيفكر ورجع دفن راسو تاني .....
مستشفى موريزكو ....
تحطات طموبيل دقسم بفران قوي ونزل اصيل لي كان صايكها بلا عقل حيت قسم مكتعرفش تصوك بسرعة ووقفها فنص الطريق وكمل هو ... وهوما يپاركيو جنبهم طموبيلات الكارد ونزل بلا عقل داخل مخلوع وقسم تابعااااه مامسوقاش كاع لفين داخلة ولا غيتعرف عليها شي واحد حاجة وحدة كضور فاسها هي سلمى لي عيطو ليه من سبيطار انها دارت حادثة تكون بيخير .... تلاح على ريسيبسيون بجهالة كيسول على سميتها و وجهوه يمشي للمستعجلات ودخل كيجري كيقلب عليها بعينيه ويضور فريدوات بجهالة وقسم كتشدو وهو ما واعي بوالو كلمة ختو دارت حادثة هزاتو من داخل مافكر لا فكيفاش خرجات لا علاش خرجات .... كيفكر فحاجة وحدة انه يشوفها قدامو .... واخا قالو لبه موعتة غير فورجليها ماتيقش ...
حتى بانت ليه فوق واحد السرير وكيديرو ليها الكبص لرجليها وهي مخلوعة كتفرك فيديها خيفانة يمشيو يعيطو عليه ملي شدو صاكها وتيليفونها .... تاكتعلي عينيها ملي كيبانليها واقف كيشوف فيها وكيشوف فيهم كيديرو ليها الكبص .. ويرجع يشوف عندها هي لي رامقاه بنظرات مخلوعة .... هو يتلاح عليها ودفع هاداك لي كان كيدير ليها الكبص وشدها من كتافها كيييغوت عينيو فعينيها كيحس براسو غادي يحماق بالخلعة
اصيل : اش خخخررررررجك ... ااااش خررررجك !!!!!!
قسم غير سمعات غواتو تلاحت دغيا بزربة كتشدو من تيشورتو لور وهو جبل مكيزعزعش. .. وسلمى غتسخف بين يديه بالخلعة
سلمى : وو.. والله .. والله ( مخبية بيديها وجهها ) والله ااخويا . ح ح تى غي ..
اصيل : ( مزير عليها مغزززززف ) اش خررررررج ديييلمك من الداااااار ... فيبييين كنتي كييييفاش وقع هاد الخرااااا
سلمى : و .. ع عا فا ك ... عافاك غ اصبر
قسم : اصيييييل واش حماقيتي طلق من البنت ...
اصيل : ( شد فكها مزير عليه بيديه وهي كتبكي ) ياااااك كنقول لديييييلمك ماتخرجيييش بلا خبااااري فيييين كنتي ..فييييين مشيتي
سلمى : و . و غ .. غا ص. غاصبر
قسم : اصيييل واااش مريض ولا مالك كتشوف فالبنت موعتة طلق نفهمو اش واقع
اصيل : ( دفع قسم بيدو ) بعدي نتي لهيييييه ... هضضضري فين كنتي !!!!! عجبك هادشي كووون متي ها ؟؟ كووون قتلووووووك ... شششكون ضررربك هضضضري شكون ضررررربك ؟؟؟؟؟؟ ....
داك الفرملي لي كان كيدير ليها الكبص خرج من تما كاع يتشكى و الناس لي تما كولشي واقفين كيتفرررجو
سلمى : ( بالخلعة والغوات وجهها صفر ) ماشفتوووش ماشفتوووش .. و الله ماشفتووووو
اصيل : و ااااااش خرررج ديلمك .. وااااش باغا تسطيييييييبني .... هادي هي الثقة اسلمى كتخليني تانخرج وديري ماعلييييك .... ( بعد عليها كينهج وقسم شاداه بززز ) كون قققتل والديك دابا .. كووون قطعو رجليييك .. ها !!!! ياك كانگووليك بقااااااي فالداااار .. واش باغا ترزييييني فييييك .. شكووون عندي انا فهاد الدنياااا شششكووووون ....
سلمى : ( كتبكي وتنخصص ) والله ا خويا غير خرجت .. ن تسخر و وصافي . وو و الله محسابتني غيوقع هادشي و والله مامشيت لشي بلاااااصة
قسم : مريييييض نتا بالله واش حنا فهادشي ( دفعاتو ومشات لعندها ) واش نت بيييخير .. مقسحة فشي بلاصة اخرى ؟؟؟؟
سلمى غير كتشوف مع قسم ماعندهاش تافسحة فعقلها فين تسول اش كدير هنا بالخوف والخلعة وهي تحرك راسها غير باه وشافت فخوها كيفاش مركز مع جوابها من مور السؤال دقسم وهي تهضر بزربة
سلمى : ت توعت غير فرجلي .. انا بيييخير مواقع والو .. غير شوية فرجلي قالولي نديرو ليك الكبص باش ماتهرسش وصافي .. غير خمسطاش يوم ونحيدووو
اصيل ضار موراه كيرد شعرو لور وينهج ورجع شاف فيها
اصيل : واااشتي طيران ديالك دابا !! تكبببصي دابا يالاه تشدي لارررررض .. بررربي مافديلمك شي ثقة ... عند بالي نتي كتسمعي للهضرة .... و نت كتخليني نمشي لخدمة و ديري ما عليك غااااا بلاتي اسلمى بلاااااااتي .... بشششششوية عليك ...بغيتي غاالقفل هانا غاااانديرو لوالديييك
قسم : ( دفعاتو لبرا هو كيشوف فسلمى وهي كدفعو ) دير القفل نتا مرربي حمااامة .... خررج من هنا سييييير ..خرررج .... شوف كاع بنادم كيتفرج اش هاد الشوهة .. .سير شرب قهوة ولا الما ولا شوف اش غادير خلي البنت يكملو ليها الكبص باراكا غير الخلعة لي فيها جيتي تزييييدها .. سيييييير من هنا ....
دفعاتو لبرا ورجعات لعندها وهو مشا لكولوار كيمشي ويجي ويرخف فصدايف التيشورت الفواقا لي لابس و يحمد الله لي مواقع ليها والو كيتخيل كون وقعات ليها شي حاجة كيبغي يتسطى .... كيخاف عليها من الندى دصباح ينزل عليها هادشي علاش مكيحملش تخرج بوحدها غير كيتخيل بلي غتوقع ليها شي حاجة خايبة ويتحرم منها وهي لي عندو .. بنتو وختو وصديقتو وكولشي كايبغي يحماق ....
وقسم قربات عندها كتهدنها
قسم : ششش غير بشوية .. راه غير معصب معارفش اش كيقول .. ماديش عليه دابا يبرد ..... ( بدات تقلب بعينيها على الفرملي لي كان كيكبص ليها ملقاتوش وهي تشوف فواحد الممرضة ) ختي .. السيد لي كان كيدير ليها الكبص فيناهو يجي يكمل ....
ممرضة : ( مصغرة فيها عينيها ) حمييد !! .. واخا هانا نعيط ليه ... ولكن اختي نسولك !!! شبهتي ليا لشي حد.. شايفاك فشي بلاصة لا !!!
قسم : ( بتذمر بدات تسوط بحالا هادشي لي ناقصها ) لا غير شبهتيني .. عيطي ليه اختي عفاك ( شافت عد سلمى ) كيف وقع ليك اسلمى واش ضربك شي حد !
سلمى : ( كتحاول تتنفس وتعرف تهضر مزيان ) معرفتش ..خرجت باش نجيب المجلات ... و ... وملي كنت قاطعة الطريق حسابتني غيوقف ليا نقطع ساعة زااااد الحمد الله فرانا فاخر لحظة ... مقاسنيش بالطموبيل ولكن الهربة لي كنت غنهررب مع الفران تلوات ليا رجلي فالارض وطحت .... وهو زاد مشا ...
قسم : ولد الحرام .. منزلش حتى يطمن ! كون وقعات ليك شي حاجة
سلمى : اش غينزل .. من طموبيلتو باينة شي واحد لاباااس عليييييه غيكون شي ولد الفشوش .... فاش بداو الناس كيعطيوني الما جات لومبيلونص يمكن عيط عليها شي واحد وجابوني لهنا فلول مابغيتش نجي ولكن رجلي كانت عاطياني صداع بزاف ...
قسم : ودابا كتحسي براسك بيخير
سلمى : لالا عطاوني كالمون .. راه كنت غنكبص ونرجع فحالي بلا منخلع خويا ويمكن فاش شدو صاكي عيطو ليه
قسم : ماااعليش ماعليييش ...الحمد لله دازت .... ( كتمشط على شعرها ) متخافيش منو راه دابا يبرد ... راه كان مخلوع عليك بزااااااف داكشي علاش .... تخلعنا صراحة ..
سلمى : ( سرطات ريقها كتشوف فيها ) و .. واش .. كنتو بجوج ؟؟؟؟؟
قسم : ( تنهدات ) نساي دابا هادشي منبعد ونهضرو فيه ... كان جامعنا شي شغال وصافي.
يالاه كتهضر سلمى هو يجي الفرملي وتحنى كمل ليها و قسم خرجات كتقلب عليه بان ليها فالكولوار واقف وحاط راسو على الحيط مطلعو لفوق وساد عينيه
قسم : اصيييل .... ( اصيل ماتحركش ) الحمد لله دازت بيخير .... صافي رخف فيك النفس ...
اصيل : ( كيهضر راسو باقي متكي وعينيه مسدودين ) قاتليك شكون ضربها
قسم : قالت ليا هرب ..
اصيل : ولد القحححبة .... ( حل عينيه شاف فيها هي موسعاهم ملي خسر الهضرة ) بررررربي ويطيييح فيدي ..... الشماتة لاخوررررر
قسم : وصافي الحمد الله مواقع والو ... هاهي غتسالي دابا عنداك تمشي تخاصم معاها تاني راه ماعليها والو ... مالها هي مسكينة مغتسخر مغتحتاج والو ساد عليها فالدار واش بگرة صافابا ...
اصيل : سكتي حتى نت ... هاهي تطلقات وخرجات هانتي كتشوفي
قسم : انا نا غادي تمرضني بهاد العقلية عندك خليني نرجع عند البنت حسن النقاش معاك عقيم .... وضبببط راسك شوية قدامها البنت وجهها صفر وجاي تكمل عليها بناقص من مجيتنك ....
خلاتو ومشات وهو متبع ليها العين فداك الكولوار ودخلات بقات واقفة على سلمى والفرمليات وحدة كتشوف للوخرا كيتسآلو فين شافوها ... تاسالا الفرملي وعطاهم دوا لي خلا ليها طبيب وشداتو عليه قسم ... وبدات كتحاول توقفها
قسم : تكاي عليا بشوية عليييك ...
تكاتها عليها وبقات غادا بيها وهي كتعكز ومشات لجيهة الكولوار يخرجو
سلمى : غاسمحيلي امادموزيل ... والله مابغيتك تحضري لهاد شي ..
قسم : هاد مامدوزيل معجباتنيش اختي .. سميتي قسم .. مالي سميتي معجباتكش ...
سلمى : هه .. بالعكس زوينة بزاف ..
قسم : كاينين شي دريجات لتحت حاولي معايا فيهم والطموبيل هاهي غير قريبة ...
سلمى : لالا راه نعرف غير بهاد الرگيلة ...
قسم : نقلبو ناخدو هاد دوا وشربيه ونعسي رتاااااحي .... والا زادت عطاتك صداع سيري ديكلاري بيييه غرقييه .. مال رواح الناس ساهلين نضرب ونهرب ....
سلمى : لالا صافاااا .. ماشي شي حاجة مولفة بهاد توعيتة شحال من مرة طحت فالدروج ....
يلاه وصلو لداك دريجات اصيل كان على برا شافهم طفا الكارو وجا لعندهم شدها على قسم وهزها فيديه وهي غير ساكتة مزال مخلوعة منو نزلها حتال حدا الطموبيل ... وحطها فالارض كيشوف معاها وهي تنطق
سلمى : راني بيخيييير اخويا ....
اصيل بقى غير كيشوف فيها هو يجيبها عندو عنقها وقسم جاتها الضحكة كتشوف لحركاتو الحنان شحال ماقسح قلبو .وبقات ضاحكة والحنية فعينيها كاتشوف فيهم وتتفكر راسها ملي كتخلع على خوتها .. حب الاخوة نعمة كبيييييرة خصوصا لاكانو حنان ... وسلمى فرحاااات لي برد معارفاش الى حداه حاليا كتلة كتخليه يشوف كولشي زوين .. وهبطو دموعها فصدرو وهو باس على راسها وخاشيها فيه بحال شي نملة صغيرة وسطو ..
اصيل : باغا تحمقي خوك ياك ... باغا تسطيه ...
سلمى : صافي اخويا والله منعاااااود ...
اصيل : معاطياكش صداع ؟
سلمى : لابيييخير ...
قسم : ( وراتو الروقة ) خرج ليها طبيب هاد دوا .. قريتو بان ليا لي كالمون و واحد البوماد واقلة تاتحيد الكبص
شدها عليها كيشوف ليها ورجع شاف فسلمى ...
اصيل : تقدري تمشاي ! اجي بشوية جلسي لهيه على مايجيب انور الطموبيل راه عيطت ليه راه غير قريب ....
قسم : ( وسعات عينيها فيه ) اصيييييل حرااام عليك !!!!!
اصيل : ( شاف فيها ) لا اقسم .. ماقصدتش شي حاجة .. نت راه عندكم عزو بلا منعبدك حتى للدرب .. سيري راه غيتخلعو عليك ولاشي حاجة ..
قسم : واش تسطيتي ! نخلي البنت هاكا واقفة كتسنى الطموبيل .. وباراكا من هاد النفخة الخاوية وزيييييد ... شحال فيك تااانتا ( لاحت ليه السوارت تاشدهم ) سسسربي يلاه نلقاو ليها دوا .. شوف البنت كي صفرة .... خاصها حتى الفيتاميييين ....
جبداتها تكاتها عليها حلات الباب لور وعاوناتها تركب واصيل بقى غير كيشوف فالسوارت فيديه ورجع تنهد ومشى ركب و قسم ركبات حداه وسدات الباب ودارت السانتير ... اصيل ركب فنفس الوقت كيعيط فالتيليفون ويد كتبرك على البوطون كيديماري .. .
اصيل : صافي ا انور غادوز ديريكت لشغالك ......
قطع عليه وحط تيلى وديمارا بجهة الفرمسيان وقسم كل مرة ضور تتاكد واش سلمى بيخير .... والكارد ديمارا موراهم اصيل غير شافهم فالمرايا بدا يسووووط .... تاوصل لحدا واحد الفرماسيان ونزل بقاو كيتسناوه حتى جاب الدوا وركب عطاه لقسم وزاد وقسم حلاتو وبدات توري لسلمى شنو خرجليها وزاد للدددرب ودخل حدا الدار باركا وطموبيلات الكارد باركاو بعاد كيف كتقول ليهم ديما .... ودخلو لدار وقسم معاوناها تادخلاتها لبيتها واصيل داز ديريكت للكوزينة ...
سلمى : سمحي ليا على التعديبة والله
قسم : واش حماقيتي ..( دارتها ففراشها ) رتاحي طير منك الخخخلعة .. مافيكش دوخة ! ..
سلمى : لااختي ...
دارتها ففراشها وهي غير كاتشوف فيها وطريق كاملة وهي مراقبهم كيفاش كايهضرو وكيفاش مرتاحة معاه فالهضرة .... وتبسمات فيها عاد نطقات
سلمى : علاقتك مع خويا عجباتني
قسم : ( كتغطيها ) لي فيك مامهنيك .... ياودي راه مكاين والو
سلمى : وتانا ماقلت والو ... غير عجبني نشوفكم مفاهمين .... وليتو ديزامي !
قسم : امم تقدري تقولي بحال داكشي ... ( جبدات تيليفون من جيبها لور لي كان كيصوني وشافت نمرة وجاوبات ) وي ماما .... اااه .. لا راني غير خرجت شوية نشم الهوا ونبدل الجو دالعزا ... متخافيش ( اصيل داخل ) انا شوية ونجي ... داااكوغ .. داااكوووغ صافي قتليك شوية ونجي ... بسلامة ...
قطعات عليها وشافت فاصيل لي كان جايب جوج كيسان دالعصير عطى واحد لسلمى لي تكات شداتو عليه وعطا لاخور لقسم لي واقفة شداتو
قسم : شكرا ....
اصيل : راه قتلييك غيتخلعو عليك
قسم : نو ..غير كيجيو الناس وكيسولو عليا وصافي اصلا بدلت شوية الجو .. تخنقت بجو العزا ....
سلمى : غاسمحي لينا والله .....
قسم : ( شافت عند اصيل ) ختك مبروكراميا على كلمة وحدة سمحي ليا سمحي ليا سمحي ليا ودابا بدلاتها رجعاتها لينا ههه ... ( شافت فيها ) رتاحي الهبيلة شربي عصيرك وشربي دواك .... انا غيخصني نمشي ( جغمات من العصير ) مم لذيييذ .. صبرو نكملو ... ( كملاتو فجغمة وحطات الكاس كتمسح فمها و اصيل غير كيضور راسو لي يشوفها هاكا ميقولش بنت البروتوكولات ) ماعليييينا .. سلمى رتااااحي ومتفورصيش على رجلك. . هادي فرصة تففشي عليه شوية ( شافت فيه مبتسمة وشافت فيها ) يطيب لييييك ويجيب ليك للفراش ماتنوضييييش ..بقاي عليه غير اصيييل جيب ليااا اصيييل حط لياااا
سلمى : هههه واخا تا نبغي مايعطينيش خاطري ههه
قسم : وجه تمارة ههه يلاه خليتكم ...
اصيل : بقاي ففراشك انا نوصلها ونجي .... شربي دواك عنداك تنسايه
سلمى : صافي اخويا غير تهنى ..بسلاااامة اقسسسسم
دارت ليها باي باي وخرجات وصلات للباب وهو سد الباب وهي شافت فيه
قسم : فامكاني نقول ليك بلاش ... وراه جايبة طموبيل والكارد معايا .. ونتا لي معندك فاش ترجع وبلا منعدبك حتال منطقتنا .. ( عوجات راسها معاه مبتسمة ) ولكن بغيييتك توصلني .....
اصيل حدو تبسم بطرف شفاهو مضور راسو يمين وشمال ... وزاد وهي تحط سوارت فيديه
قسم : عارفة قبيلة فقصتك بصوكاني ملي كنا غاديين للسبيطار .. شد صوك نتا
خلاتو ومشات ركبات وهو زاد ركب حداها وهي باقا كدير السانتير
اصيل : لي يشوف داك الصوكان ميقولش خوك فالرالي
قسم : ( هو ديمارا وهي كتشوف فيه) وعاااارف بعدا خويا فالرالي
اصيل : ( خارج من الدرب محااااملش بنادم كيشوف ) منيين عرفتك شكون قلبت شوية على عائلتك .. تقدري تقولي فضوووول ....
قسم : ممم مزيان وشنو عرفتي كاع
اصيل : عمامك ولاد عمامك .. خوتك ...( شاف فيها ورجع شاف للطريق ) عندك واحد ختك زوييييينة .....
قسم شافت عندو بزربة معلية حاجبها وهو يضحك واخا معندوش الخاطر
اصيل : متخافيش انا طالبها كبيرة .. ( شاف فيها ) عيني على الكاپيطان ....
فالقصر
دخلات طموبيل ديال سلطان و وراها طموبيل اياد باركاو ونزلو كيشوفو مع الطموبيلات لي تما
سلطان : ( تنهد وتكا على الطموبيل ديالو ) مغنساليوش
اياد : علاش كنتي عوال تسالي اليوم ( جبد كارو ديالو شعلو وتكا تاهو حداه على الطموبيل )
سلطان : ( راد راسو لور مغمض عينيه ) انا راه غير كنتفكر كنت غنقتل روح ليوم كنبغي نتسطى
اياد : صافي هنينا فرعتي ليا كر•ي ...
سمعو تيليفون سلطان وهو يشوف معاه لقاه فؤاد وجاوب
سلطان : اشنو ..داك البنت صافا ؟
فؤاد : وي .. قالو موعتة فرجليها ودارو ليها الكبص وسولت من بعيد قالو حالتها ماشي شي حاجة خطيرة مسألة عشر ايام ولاخمسطاش غتحيد الكبص وتولي صافا ..تاشهادة طبية مدرتهاش معندك مناش تخاف مناوية على والو...
سلطان : مامهرساش !
فؤاد : لامامهرساش غير موعتة شوية .. ماعلينا .. الامر المهم هو راه المادموزيل قسم كانت هنا
سلطان : نعام !!!!! ( قاد الوقفة ) اش جاب قسم لتما ( اياد شاف فيه )
فؤاد : ماعرفتش ... راه كانت معاها وداتها فطموبيلتها.
سلطان : صافي . صاافي ... انا غانشوف هادشي ( يالاه غيقطع رجعو لودنو ) اه .. والخلاص ! ..
فؤاد : ماجيت فين نتكلف تالقيت خوها خلص ومابغيتش نبان .. عيطو لخوها
سلطان : مجاوش بوليس ولاشي حاجة ماسول حد شكون ضربها
فؤاد : لالا قلت ليك ماشي شي حاجة خطيرة لي يجيو البوليس غير تهنى ...
قطع عليه سلطان وهو كيشوف غير قدامو وشاف فاياد
سلطان : اش كانت كدير تما قسم ... مافهمتش
اياد : مية فالمية راه شي واحد عرفك ومشات تنقد الموقف .....
فالداخل ..
كانو النساء فالصالون لي عامر بالعزايا جالسة لامار دايرة رجل على رجل و حداها اريج ورتاج و عمامات اريج ورتاج جالسين وبعض العائلة الاخرى لي جات من فاس كلها تما ... والرجال فبلاصة اخرى معاهم رجال تاني واسد فالبيرو ديالو مشغول غير مع ولدو وهمو وكيهضر غير مع البورفيسور فالتيلفون ويعرف المستجدات .... ويبحث فصحابو و آمر رجالو يجبو ليه رييبرطوار ديال ولدو كامل فتيليفون ..
اما جود وبيلي ملي دخلو صباح ونعسو مزال تاواحد فيهم مافاق جود مظلم جناحوو وناعس و بيلي كذلك معنقة مخدتها ناعسة ... وحياة تاهي فطرات وطلعات ترتاح مع الحمل مبقاتش كتقدر وبنتها معاها فبيتها ناعسين فنفس السرير معنقاها عندها ... ولوؤي مشى للمتحف ديال باه يشوف فين وصلو لان ملي سافر مشافهمش ... وقدس يلاه فاقت وخدات دوش وهاد المرة عيات من داك الكوستيم ولبسات كسوة كحلة طوييييلة بالصدايف تالتحت ذهبيين و سميطة كحلة بنفس توب عقداتها فجناب و يدين الكسيوة كانو دونطيل لاسقين على اليد ... وعلات شعرها لفوق جمعاتو ودهنات وجهها رطباتو ممنوع عليهم المكياج فهاد الفترة وحتى كون كان مامنوعش ماعندهمش الخاطر ليه ولبسات صندال پلا خشاتها فرجليها كحلة ديال ديور ونزلات لتحت شادة بصبيعاتها فشباك الدروج ونازلة درجة درجة كتشوف مع الدار تاني لي عامرة بالهاراج واليوم تقريبا غير فواسا عائلة الحاج لي هنا حيت المعارف ديالهم فكازا كلهم جاو لبارح .. دابا غير البعاد و العائلة .... وهي تشوف ماماها وعيلات عمامها جالسين فالصالون ومشات باتجاههم ابتاسمات للعيالات لي بانوليها يلاه جاو مشافتهمش البارح وجلسات حدا ماماها لي عنقاتها عندها كيهضرو غير بيناتهم
لامار : فقتي احبيبتي ... طليت عليك قبيلة مبغيتش نفيقك قلت ترتاحو شوية
قدس : لا صافي راه الجوج هادي ... فين قسم
لامار : قسم صونيت عليها قاتليا خرجات تشم شوية الهوا خليتها .... راه شوية وغتجي ...
قدس : وجود و وسيم
لامار : بجوجهم ناعسين .. خليهم ينعسو حسن ....
يلاه كيهضرو وهي تنطق مرات عم اريج وريتاج ...كانت مراة فمقتبل العمررر ومهلية فراااسها بكاري اسود وجلباب انيق كانت سيدة اعمال وصاحبة مجموعة صالات رياضية ..
غيتة : البنيتة ديالك هادي .... الصغيييرة ياك ..
لامار : ( عنقاتها عندها و قدس حاطة راسها فوق كتف ماماها ) اه هادي هي صغيرة دبناتي وكاين خوها صغر منها
غيثة : ( كطلعها وتهبطها وهي دايرة رجل على رجل بحال ماماها وبانو صيگانها من فتحة الكسوة بيضين بحال قالب السكر وغيثة كتعوج ففمها باعجاااب ) تبااااارك الله وتبارك الرحمان وما شاء الله .. غير صورة طبق الاصل عليييييك ماا شاااااء الله
لامار : ربي خليك ...
قدس غير ساكتة وجبدات تيليفونها ملهية معاه ماعندهاش مع جموع العيلات وهوما عاطيينها لدودودو بحالا ماشي خوهم لي مات ... تاتم داخل سلطان واياد ودازو حداهم بحال الريح مبغاوش يوقفو حدهم وماو غير براسهم ماشيين جيهة فين كاينين الرجال وهي تنوض واحد عمتهم شدات فاياد ووقفو محاولين يبتسمو باحراج
- اااجي غاااانسسم عليك يااااولد وولدي .. غااابششششوية !! معاااقلتييش عليا ياااك ....
اياد : ( سلم عليها ) سوري .. اي ديدنت ريممبر يو "سمحيلي معقلتش "
العمة شافت عند اريج : والو العربية ياك هههه ... اسيدي مهم فاهمني منعرفش انا نهضر بلونغلي ههه نباركو ليك غازواج بعدا واخا ماشي وقتو .. ونباركو ليك البنية ...
اياد تنهد مل من هاد التشبيهات دواالو وهي تنطق اريج ..
اريج : لا اعمتي . هادا اياد ... زياد لي مزوج راه لداخل ... هادي عمتي خديجة آ اياد ... غير حيت شافك ملي كان صغير مابقاش عاقل
اياد : ااه ... اوكاي ...
العمة : وبسييييف ونتوما ماتعرفو خوال ماتعرفو عائلة مكم .. حنا نعرفوكم ونتوما لا هههه غاكنضحك معاك اولدي ماديشاي عليا ... البركة فراسك احبيبي وعزانا وعزاك واحد ... راه نعرفك جابتك ملي كنت صغييير ودابا كبرتو تباركاالله تحنتو العدو ..زييييين سلااااااالة .....
اياد : ثانكيو
العمة : الله يححححفظكم .. ( طلات على سلطان لي شاد تيل واقف بعيد شوية كايتسناه ) ولد حياة هدا ياك ؟
غيثة : وخلاااص آخديجة ماعرفتيش الكوايري ...(سلطان هز فيهم عينيه وحاول يبتسم ليهم واياد واقف بحالا شادينو جوندارم ) البركة فراسكم اولااااادي الله يبدل محبتو بالصبر
سلطان : مامشى معاك باس شكرا ...
خلاوهم ومشاو والعمة رجعات جلسات بعد ماكانت واقفة حداه ... وجبدات تيليفون
العمة : نسول فولدي عبد الرحمان واش وصلو ... يعرفو طريق ياك اغيثة !
غيثة : اويلي راها باينة يديرو جيبي ايس كيدرنا حنا ...
اريج : ملي يوصلو انا غنصيفط مسج لاحلام نتأكد باش ميغلطوش فالطريق ....( وقفات) نخليكم نطلع نشوف بنت ولدي واش فاقت ماماها عيانة شوية من البارح وخليناها تنعس..
استأدنات وطلعات لبيت بيان لي معاها مربيتها اما جنان مامولفاش يخسر وقت نعاسها وراسها حرقها تاهي مضلمة جناحها وناعسة واريج هزات بيان عندها ومشات لبيت بيلي تشوفها واش فاقت لقاتها باقا ناعسة ودازت لجناحها حطات بيان وتكات حداها تاهي ترتاح شوية شادة على راسها...
بقاو جالسين تما كاملين تاكتنوض لامار ملي شفات بعض النساء من جمعيات ديالهم جاو ومشات تستقبلهم اما قدس مابغاتش تحرك ليها بالعيا بقات فبلاصتها جالسة شادة تيليفونها ورتاج تاهيا ناضت مع لامار ... ودوك العيالات تما جالسين عاطيينها للجمووووع تابدا كيتسلل الحديث لودنين قدس لي جالسة حداهم ومارادينش ليها لبال ..
- وراه داكشي لي قولت ليك حتى انا .... غا سمعي ليا وعطيني ودنيك ... انا قلت ليك مايصلاح ليه اغا ولد رتاج ... اما ولد اريج فالغربة انا مابغيتش بنت وليدي تغرب علينا .... ولد رتاج شهوة منو تشوفو تحماق عليه .. وبطبيييعتوو ويهضر و يتهاود ماشي بحال هادا لي عاد شفتي مايهضر مع حد يعرف غا تريكتو .... ولد رتااااج هو لي يليق لينا ..
قدس غا سمعات القضية فيها ولد رتاج وهي تقلش وذنيها وعلات فيهم عينيها
غيثة : وخاصو يشوفها
العمة : يشوفها تححمقوو .. فين غيلقى بحال احلام يالاه سلات الماستر ديالها ... خليهم ياختي يلاه شوية يرجعو لاصل مهم هوما مايعرفو لا خوال لا خالات ... يجيبوهم اريج ورتاج مساكن بسييييف فالعياد ... واحد فيهم نفوزو بيه حنا بعدا ....
غيثة : تا هادا لي دخل دابا شهووووووة منو .. قققلللدة تبارك الله ... لي يشوف ايج مايقول والدة عزارا قد هاكا يبانو هوما لي والدينها
العمة : راه قلت ليك هداك مغرب راه فكاندا والعربية وهانتي شفتي ميهضرهاش ... ولد رتاج حسن انا عارفة عبد الرحمان ميسخاش ببنتو يصيفطها لكندا ... خليه على الله يشوفها ولد رتاج راه تعجبو خاصنا غانجلسوهم بجوج .هادي هي لوجيبة منغير هاد الوجيبة ماعندو فين يشوفها ... نفوزو بواحد ولا والو كاع اويلي بنات خويا والدين غالعزارا ومانفوزو بحتى واحد !!!! هانتي شفتي داز حدانا بحال الريح ماتقوليش راه عمامات مواتهم حنا كون ظشديتوش ... يعرفو غا تريكتة باهم ...
قدس حطات ااتيليفون وتقادات فالجلسة وتحنحنات ملي شافت زادو فيه ... وهما يضورو شافو فيها وغيتة وسعات عينيها نساوها واش جالسة تما .....
قدس : داويين على ولاد عمامي لا !!!!!
العمة بقات غاكتشوف فغيثة ودوك العيالات لوخرين كينغزو فيهم بمعنى راكم قفرتوها وهي تضحك غيتة
غيثة : ايييييه احبيبتي على ولد بنت لوسي ... راه انا هي مرات عم ماماه .... وهادي عمتها ... وهاديك لهيه تاهي عمتها .... هادو كيسكنو فرباط وانا ففاس ... وهاديك لهيه تاهي ( شافت عندها قدس حيت هادي كتعرفها كانت بعيدة عليهم وشادة غير مصحف مكتهضرش بزاف ) تاهي عمتهم الكبييرة لي رباااتهم راها بحال مهم خلاص تكوني تعرفيها راه كلسات مع جداتك فالميريكان بزاف ...
العمة : نيت فين هي رقية ملي مشات تصلي الظهر مابانت
عيثة : غاتكون نعسات عياو الله يحسن العوان .. كيف قلتليك احبيبتي حنا هنا غير العائلة المقرية تباركالله عائلة الباني راها كبييييرة .
قدس بقات غير كترمش لاش كتعاود ليها هادي شجرة عائلتهم كتنسي ليها ! وهي تسرط ريقها ماااحملاااتش علاش كيخططو فوق راسو هاكاك وحسات بنفسها سخووونة فيها لداخل باغا ضااارب وما عارفة كيفاش بغات تهضر وكتشوف كيغادير تخرجها .... مكرهاتش دابا تنوض تعرعر وكابتاها حيت كاتشوف غير غاتفضح راسها ... ماتسرطاتش ليها ولد عمها لي كيتسطى عليها ولي خلاها تاهي تولي تشوفو غير هو جالسين يقلبو ليه على عروسة و ينمنمو فيهم .... وناضت من تما مقلقة وداك غيتة دارت يديها على حنكها
غيثة: ويييلي ويلي على شووووووهة .. ياخديجة ماتعرفي تشدي داك الفم ملي كتحلييييه جااااب مايسدو .... جالسة تهضري فتريكة باهم والبنت جاااااالسة
العمة : وفين شفتها انا وهي جالسة فداك القنت مخبية ....
قدس بقات تقلب بعينيها على ماماها ورتاج فين هوما تخوي ليهم قلبها وشنو كيقولوا على ولد عمها وتشكي تابانو ليها فواحد الكوان واقفين مع شي عيالات يلاه ماشية جيهتهم وهي يبان ليها لوؤي داخل ومشات بزربة لعندو حدا الدرجات دالباب حابساه بيديها مايدخلش
قدس : فيييين غادي ... ..
لوؤي : ( بدا يطلعها ويهبطها وشاف للدار وشاف فيها ) داخل ننعس ...
قدس : ومالقيتي امتى دخل .... من قبيلة ونتا غابر دابا عاد جاي .... غاا سييير رجع فييين كنت تاليل واجي ...
لوؤي : ( عوج راسو معاها وعلا حاجبو وهي معارفاش راسها اش كادير .. الغيرة كتاكل فيها ) قدس ... نت صافا ! ..
قدس : صاافاااا .. سير ماعندك مادير هنا لداخل عماماتك غيفرعو ليك راسك .. سير تاليل واجي ... ولا سير رتاح فداركم حسن ليك
لوؤي : ( معلي حاجبو مفاهمش مالها ) بعدي من طريق راني عيان ....
قدس: لاااااا مغااانبعدددش
لوؤي : ( علا حاجبو باستفاهم ) آمااااالكي
قدس: (نفاجرااااات عليه بلا متحس ) داك عماماتك ولا عمامات مك ولا خوالاتك ولا منعرف اش كيجيييوك جالسيييين ولد رتاج ماولد رتاج نفوزووو بيييه نزوجووووه لاحلااااام ( علا حجبانو بجوج جاتو الضحكة وهي كتعوج باش تقلدهم ) لا خاصهم يعرفو تريكة مهم كيعرفو غا تريكة باهم وجالسين يزوجو ويطلقو ويتخيرو فيك نتا واياد لا حقا هاداك فكندا ونتا فالمغرررب ورتاج واريج والدين الولاد وهوما خاصهم واحد .. نينينينيننيني تخربييييييييق .. جالسين يتخيرو ليا فولاد عمامي وانا جاااالسة غاااحشمت كنت غاااانقلب عليهم داك طبلة .... مزيان تباركالله ولد عمي منهار عرفتو هو قدام عيني تجي نتلي مكتعرفيش تاشحال فعمرو تقولي نفوزو بيه ..شكوووون نتوما شكووون...
لوؤي غير كيرمش فيها كيشوف فهاد الغيرة لي ماعهدهاش فيها لي ميكدبش انها هزات شي حاجة فالداخل ديالو حس بللحموو تبورش علييييه وهي محاساش براسها اش كتقول الفقصة كتاكل فييييها وهضرتهم باقا فودنيها ولات حمرة بالعصااااب وهو زاد دخل وهي وسعات عينيها بان ليها داز وتبعاتو بزربة ولامار عوجات راسها كتشوف مال هادي تابعاه ورجعات كتشوف فالمراة لي كتهضر معاها وتعلي عينيها فقدس .. وقدس تابعاه بزربة كتحاول تهضر غير بالهمس
قدس : لوووووؤي .. وووقف ... ععجججبك الحال باااغي تزوووزج ... ووووووقف ...
مامسوقش ليها غادي وهي تابعاه مفقوووصة تابان ليها داز حداهم بحال الريح ومشا باتجاه الدروج وهوما غير كيشوفو وداك العمة شافت عند غيثة
العمة : مال هذا داز حدانا ومقالش حتى ييسلم !!! مال هادو مايعرفو لصواب منين يجيوه ...( تقادات فالكلسة شادة كاسها دلعصير عندها) ايييييه يا اخويا الله يرحمك ... بناتك رباو غا لخلا ....
قسم بكلمة كايشعلها وبكلمة كايطفيها .... دغيا هبطات داك الحاجب لي كانت علات .... وشافت للزاج تزنكووو خدودها .. كتكون معاه مزيان كتصرف بعفويتها غير كيشوف فعينيها و يلوح نويطاتو كايتلفها ... و كيدوووبها ويرجعها شرويطة فيدييييه .... وهو صايك وكل مرة يتنهد و كيسول راسو اصيل اش كادير .. اصيل راك زايد وكتغرق .. فنفس الوقت كينفض راسو وكيحاول يبقى عايش اللحظة ويخلي داك التأنيب حتى تسالي اللحظة وميخسرهاش ماشي ديما كتكون هاكا بين يدييه ......
وصلو للمنطقة وهو يوقف غير فالدخلة ديالها وسكت الطموبيل وهي تشوف عندو
قسم : وااا زيييد ...
اصيل : (علا حاجبو ) فين غنزيد !
قسم شافت لبيبان المنطقة ولي تحلو قدامهم ورجعات شافت فيه ...
قسم : و وصل بعدا غير للدار ... ..
اصيل جاتو الضحكة ونزل راسو كيضحك ضحكة خفيفة .. ضحكة ديال خزييييت وكيحك فوق حاجبو يضور راسو ورجع علا راسو فيها شحال عاض على شفتو كيشوف فييييها بعينيه الزوورق لي ملي كيضحكو كيوليو كيلمعو وهو كيرمش فيها ورغبة جامحة فالداخل ديالها تعنقوووو وتتحس هاد الوجه وتقيسو بدييها تاسمعاتو نطق وهو هايم فعينيها
اصيل : خلي مجيتي لداركم حتى تجي بحلاوتها ....
قسم شوية بشوية بدات تشقق ابتسامة راضية .. حنينة وحركات ليه راسها بواخا بشوووية وهو طول فيها الشوفة ونزل عينو لفمها كيشوف فشفايفها لي كااايهزوه من لداخل باش يقبلهم ويطفي ناااارو ... ونعل الشيطان وحل الباب خرج وهي عاد تنفسات كانت كتقول صافي غيبوسها ولكن دغيا تراجع .... ونزلات تاهي ...و لاح ليها سوارت شداتهم ...
قسم : صافي غتمشي !!
اصيل : ( حرك راسو بالايجاب كايشوف فيها وحط يدو فجياب السروال ) .... تهلاي فراسك ....
قسم : ( بقات مدة كتشوف وقربات عندو جوج خطوات ) غنعاودو نتشاوفو ياك !
اصيل تنهد ورجع شاف فيها مطول وابتسامة جانبية على شفايفو وحرك ليها راسو بآه ببطئ فهمات من خلال داك الايماءة انه قصد غاااانحاول .. وتبسمات ليه تاهي ومشات باتجاه الطموبيل حلات الباب وشافت فيه
قسم :بسلااااامة ...
اصيل : ( كان راسو لتحت غير قالت بسلامة علاه كيشوف فيها وشعرها كولو كيديه الريح ... وعلا عينيه مع داك البلاصة .... ودوك الشجر الطوال لي كلهم سلوكة وريزوات وكاميرات وشاف فيها ) كون ماشي الكاميرات كانت غتكون هاد بسلامة بشكل اخر ..
قسم بقات شحال عاد فهمات وضحكات ليه
قسم : اوا بغيت غير نبشرك بلي روكااان راه كيفهم الهضرة غير من الشفااااايف بلا مايسمعها .... يعني هاد بسلامة ديااك راه وصلاااااتو ...( اصيل وسع فيها عينيه وهي ضحك تاني وركبات فطموبيل ونزلات الزاج كتشوف فيه ) ههههه غير تهنى .. مكيشوفش الكاميرات ... يعني راك ضيعتيها عليك وصافي ...
اصيل ضحك ليها وتحنى لعندها مدة غير كايشوف فيها ... مكيسخاش ابدا يهز عينيه ... مكيكرهش يبقى غير كيشوف فيها بلا تاكلمة ....
اصيل : ردي البال لراسك اقسم ... وحاولي تشوفي حياتك زوينة باش تولي زوينة ...
قسم : ( سهات فيه شحال عاد هضرات ) بقى فيها نتا وغتبقى ديما تبان ليا زوينة .....
تبسمات ليه وتنهدات وديمارات مشات وهو عاد قاد وقفتو متبعها حاط يديه فجيابو والكارد تاهو تبعها وتسدو البيبان هو يغمض عينيه مزييير عليهم مددددة ورجع مشا .....
لوؤي طالع بزربة فالدروج وهي تابعاه كتففقققص تاوصل لجناحو وحل الباب وهي محاساش كاع بلي تابعاه تاسد الباب وهي دخلات هو يشدها من دراعها رجعها تكات على الباب . وحط يديه بجوج موراها كيشوف فيها .. وهي كتنفس وتسرط فريقها عاد عرفات راسها اش دارت وبلي تبعاتو تالبيتو بالفقصة
لوؤي : اهاه ( كيشوف فيها مهبط راسو لعندها وكيطلع ملامحها الطبيعين وشفارها الكوحل وبشرتها البيضة وخدودها الزهريين لي كيسطيوه ) شنو قالو اخر ...
قدس : ( كتسرط فريقها ولاصقة مع الباااااب وهو متكي عليها وصدرو قريب يقيس صدرررها ) اا.. ع لاش ..علاش دخلتي هاكاك ملي مغا .. م( كتفادا تشوف فعينيه ) ملي مغتمشيش عندهم .. وجاي غير لبيتك . قولها ليا .. قول ليا جاي غير لبيتك ( معلية عينيها بشوية تشوف فيه )
لوؤي : ( نزل ثاني عينيه لشفايفها مدة وطلعهم كيشوف فعينيها وتبسم بشوية وهي كتسرط فريقها وتفرك فصبعانها لي ملسقاهم مع الباب ) مكانتش عندي شي طريقة نطلعك بيها تالعندي ....
قدس : اا .. و .. ( شافت فيه وهي كولها كترعش مززييييرة على راسها وهو كيشوف هاد توتر كامل لي نازل عليها ) ه هانا دابا طلعت .... خ خليني نمشي غاتسول عليا ماما .. ا غيشوفنا شي حد
لوؤي: ( عسل فيها عينيه بالعيا وقلة النعاس وزادتو هي بشقااااوتها وهاد الغيرة لي سطاتو ووضارتو على لقبلة ) لا. . ماعندك فين غتمشي ...
طلع يدو قرب راسها لعندو تاحطو على صدرو بحالا عنقها وهي ما عارفة شكايدير وهو غير باش دوز يدو للبانضة ديال شعرها طلقو ليها عاد رد ليها راسها كيكان ولاح داك البانصة لجنب وشعرها تطلق على كتافها وبدا يقادو ... ..
قدس : ط ... ط طلق .. ك كيصهدني ...
لوؤي : ( كيصاوب فيه على كتافها وهضر منتشهي ) كون تشوفي انا اشنو كايدير فيا ( طلع عينو فيها ) وشنو كديري فيا نت ....
قدس ضرباتها الساكتة كتحس بكرشها كتلوى عليها وصدرها كيطلع ويهبط وهو خشا راسو فعنقها تازيرات على عينيها غااتسخف كيستنشق شعرها وطلع حدا ودنيها وهي كتحس براسها صافي غادي دير جوج حوايج اما تشدو تبوسو واما غتسخف ليه هنايا .. ولا لحمها بحال الششوووووك وهو كيهضر فوذنيها بهمس وكيشم فشعرها ويدو حاوطها بيها من خصرها قربها لعندو و يد فالباب
لوؤي : اشنو ؟ ننزل نتفاهم معاهم علاش عصبوك ليا قد هاكا .. هم !
قدس : ( مزيرة على راسها كتسرط فريقها وتحاول تبين انها عادية وماساااحتش ودابت ) ا.. راه ماشي هاكاك ...عادي ... ا اي واحد ل لا سمع جالسين يخططو لولاد عمامو مور ظهرهم مغيعجبوش الحال. م ماشي ( كتحاول تتحكم فراسها وهي كتحس بكرشها كتلوا بنفسو لي كضرب فعنقها ) م ماشي ... كيف فهمتيها نتا ..
لوؤي : اممممم ( طلع لوذنيها) وكيف فهمتها انا
قدس : احم .. ل وؤي .. ب بعد خليني نهضر .... ققصدت .. زعما تخيل كون كنا جالسين و يهضرو هوما فبنت عمك .. ويقولو .. غيزوجها لشي واحد .... م ظغاتفقصش
لوؤي : ( خشا راسو فشعرها كايستنشقو وزاد جرها لعندو من خصرها مزير عليه بيديه ) شكون فيهم من بنات عمامي ....
قدس : ا ... انا مثلا .... شنو كنتي غادير ....
لوؤي : ( تسمعات منو ضحكة خفيفة حساتها فعنقها كانت غتقتلها وقرب لودنيها بشوية ونطق بالهمس مزير على الحروف وعلى خصرها بيييديه ) كاااانت غاطيييح الرووووح ابنت عمي ..... الرووووووح طييييييح ......
يتبع...
التعليقات
لا توجد تعليقات بعد، كن أول من يعلق.