أشبال الأسود الجزء 29

ضار لعندها طول فيها الشوفة وهي تتبكي وشاف لسريرها مشا هز سوارتو وخرج .... غير مشا هي طاحت على السرير جالسة بقات مدة كترد انفاسها مغمضة عينيها كتحمد الله لي خرجات سالمة اما هو مشى نيشان لبيتو سد لباب وبقى شحال كيشوف غير قدامو كينهج ... هو يتلاح على الكنابي معلي راسو لفوق كيرجع شعرو لور وكيتنهد ...

كيحس براسو ضعيييف بزاف قدامها ... ضعيف انه يزيد يصبر حتى تسالي قرايتها ويوافق باها على زواجها ... كيحس براسو مقادرش ... الفكرة لي كضور فراسو انه يهضر مع واليديها يخطبوها ليه على الاقل ميبقاش خيفان وتكون فخبار العائلة وميعاودوش مآساة جود وبيلسان لي كانو بمثابة درس فقصر الاسماعيلين .. فنفس الوقت هي مغتوافقاش .. لحد الان مبغاتش تعتارف بحبو .. عارف طيشها و سنها ومراهقتها كيخاف انها لاسمعات زواج تزيد تخاف كتر ..... كيحس مقادرش يخبي غيرتو عليها و لا حبو ولا اعجباو بيها .... باغي غير امتى تكون ديالو ...

العظام لي ينوض بيهم يحيد حوايجو مبقاوش عندو وبقى هاكاك متكي كيديه نعاس فوق الكنابي بحوايجو ....

بعد اربع ساعات

جناح أسد ....

واقف قدام المرايا الطويلة كيقاد الصدافة دالشوميز فيديه تاسمعها من موراه كتنين باش تنوض وضار براسو ... كانت يالاه كتكسل فالفراش وحلات عينيها مصغراهم فالضو لي داخل من لي بالكون وتلفتات لتيليفونها طلات عليه بغمزة لقاتها العشرة دصباح .... عاد شافت لعندو

اسد: صباح النور ....

جاوبتو غير بابتسامة مجبدة وهو ضار براسو عندها .... وهي تكات ففراشها كتكسل

لامار : صبااااح الخيير .... خارج !!

اسد : ( رجع كايشوف لصدافتو داليد الاخرى ) أممم ....

لامار : ( كتعوج فعنقها ) أجي حدايا شوية ..

أسد تبسم غير بجنب شفاهو على هاد اجي حدايا عارف الى راه توحشاتو يجلسو بجوج .. و قاد الكول دقاميجتو ومشا كلس على جنب السرير حداها وهي حطات راسها على صدرو وبقا يمشط فشعرها لور بيديه ....

اسد : سمحت فيك احبيبتي يااك !!

لامار : اممم ... عارفة ماشي لخاطرك ... راسنا وسمحنا فيه ...( علات راسها بزربة فيه ) لوؤي جا !

اسد : طموبيلتو لتحت .. سيطاديغ جا ..

لامار : الحمد الله ...

اسد : أجلت السفر

لامار: ( صغرات عينيها كتفكر ) ديالاش

اسد : لاطوغ ... ( الدورة السنوية على الفروع العالمية )

لامار : هااء ؟؟؟؟ وشكون غايمشي بلاصتك ؟

اسد : تاحد ... أجلتها للعام الجاي

لامار : علااش !

اسد : ولادي هانا حداااهم و غايديرو شي كارثة .. اما الى سافرت ... اش غايديرو !

لامار : ولكن راه ضروري من لاطوغ .. العام الجاي غيتجمع عليك بزاف .. نمشيو ولكن غير شهر

اسد : شهر مگادني فوالو آلامار ... نتي عارفة خمس شهور يلاه نسالي ... ( كيلعب فشعرها ) ديجا قلت الپوز نستغلوها شوية لينا حنا .. نسافرو اونسومبل نجلس شوية مع ولادي .. على الاقل الصغار بعدا وسيم وقدس ....اما تاقسم وجود عارفهم مغيتشدوش ليا .... لاطوغ العام الجاي ونختارو ليها وقيتة .....

لامار: سييير غير نتا وانا نبقى معاهم

اسد : اه باش نجي لقاهم باعوك ليا فشي مزاد ههه .....

لامار: هههه ..عرفتي والله حتى بايتة كنفكر .. ماحدهم كيكبرو ماحدهم كيصعابو

اسد : انا بقا فيا غا عدنان .. مبقاش كيقدر يتحمل بالمرة .. ولوؤي صعيب و باقي ليه جوج اخرين .... انا والله حتى بديت كنعيا من مشااااكلهم .... راسهم القااااسح مابقيتش كنقد عليه ... وليت غا كنساير .. الجهد سالاوه ليا

لامار : واش قدرتي تفهم اش وقع لبارح !

اسد : ورا غير لي مابغاش يفهم آلامار ....

لامار : ( كتشوف لجنب ورجعات شافت فيه ) فخبارك الى مشا تارد الخبار جود لهادشي ...

اسد : انا بغيت نعرف غير آشنو داااار بالضبط ....

لامار : مروان مبغاش يقول ليا ...

اسد : ( كيمسد جبهتو ) عرفتي لامار راني محطوط فواحد الموقف .. عمرني ظنيت راسي غا نتحط فيه بحال هاكا ... كنت كنظن شاد الحبال لولادي كاملين .. ولكن ماحدهم تايكبرو ماحدي كنتحرج ناقش معاهم امورهم العاطفية .... فنفس الوقت تايق بيهم ... وفنفس الوقت تاني خااايف عليهم .... من حقهم يبغيو .. من حقهم يكون شريك حياتهم كيرتاحو ليه وختاروه هوما ... ولكن فنفس الوقت منبغيهمش يديپاسيو الحدود ديالهم ... لبارح كلشي واضح وباين قدام عينيا انا را مناعسش على راسي .. ماقدرت نقول لقدس والو ... مغنقدرش نحرجها فامور بحال هادو واخا معاجبنيش الحال .. راه فعلا مبقيش قادر نتحكم فامورهم العاطفية دابا ملي كبرو ..... تخيلي !

لامار : حيت مبقاوش صغار .... حيت من حقهم .. وحيت اللاج ديالهم ديال واحد بالغ ... قلبو خدام يقدر يبغي ويتعجب .... ولكن كيف قلتي نتا الرقابة ضرورية وليليميت " الحدود" مخصهمش يتعداوهم ...

اسد : ( حك مدة مور ودنو ونطق ) لوؤي جا هضر معايا على ود قدس

لامار : ( وسعات فيه عينيها ) نعااام !!! وكالعادة انا اخر من يعلم

اسد: يلاه جات فرصتها ...

لامار : اهاه ... وشنو قال ليك !!

اسد : باغيها للزواج ... قتليه حتى تكمل قرايتها وتكبر ....

لامار : عرفتي ا اسد .... لوؤي هو الرجل الوحيد لي كنتمناه ليها ...انا لي عارفة شحال كيبغيها ...

اسد : وعلى هاد الحساب انا لي آخر من يعلم ... ( تكا كايمشط على شعرها ) مااااقلناش ... تانا هداك راه ولدي .. ولكن ليليميت الامار .. البنت باقا صغيرة مابغيت تاشي حاجة تشوش على قرايتها ولا مستقبلها ...

لامار : ونتا فنظرك لوؤي غيضيعها فمستقبلها ؟

اسد : مكيتحكمش فراسو واعصابو .... ومااابغيتش يقرب ليها ا لامار ....باقا صغيرة .... كون كانت قد قسم مغانهضرش .. هي لا .... مزال مدارت والو فحياتها ...

لامار : واش غنقدرو نحبسوهم واش حماقيتي !!! واش نتا انا مشيت معاك تال الميكسيك حبساتني ماما ؟؟؟؟ واش نسيتي شحال من مرة عيطتي ليا فنصايص ليل جيت لعندك حبسني شي واحد ولا حبسك شي واحد ... واش نسيتي رتاج و حياة تا من العصا كلاوه فدارنا ؟؟؟ نسيتي اريييج لي كان شوية و يقلب علينا الدار يونس ... راه مستحيييل تقدر تحبسهم .... هادو راه ولاد الاسماعيلي وداك الجذع من داك الشجرة .... انا لوؤي كنتيق فيه وكنتيق حتى فولادي ... ملي كايبغيو ، كيبغيو بقلبهم وماغدارينش ومغيقربوش لبنات لعائلة ولا يغدروهم .... والدليل غير ولدك جود ... غير عرف راسو كان خاطب هاهو بغا يكمل ... نخاف عليهم من البراني اما من دمهم مستحييييييل نخاف ..... انا غنكون مرتاحة بزاف لاعرفت لوؤي هو لي غيدي بنتي ....

اسد : ( كيتنهد ويدوز على لحيتو ) وتانا مرتاح ... واش نتي عارفة عندي ما عز منو ؟ ولكن ماشي بحال هاكا ...

لامار : راك غير فيك داك الغيرة د الاب ههه اما هو الولد مدام هضر معاك راه مخاطيش الصواب ونكذب عليك انا مباغاش ولادي حتى يتزوجو عاد ينوضو يتعرفو على شركاء حياتهم ... كيف عشت انا علاقة زوينة ونهار كنسني عند العدول وكنشوف فعينيك ونتفكر كولشي تاهوما بغيتهم بحال هاكا بغيت نهار عرسهم يكون غير احساس الفرحة بوحدو لي عندهم ميكون لا خوف لا تردد .....

اسد : ماعرفتش الامار .. ماعرفتش

لامار : اسد خلي الولاد على خاطرهم .. حشوما نحرجوهم فهاد العمر هدا ...

اسد : راه نخليهم على خاطرهم غانوليو فالسبوع قبل من العرس .. حنا كنا بعقلنا هادو راه مكيعرفو لا عقل لا حدود ... شوفي غير كيف رد السيد البارح ... جود فنظرك غيتعامل بحالي ؟ تاهو راه لاسمع لوؤي باغي قدس ولا بيناتهم شي حاجة راه غينوضو يتقاتلو ...

لامار : انا متأكدة مابيناتهم والو .. بنتك مزال ماباغاهش راها باينة ... اما من ناحية جود غير الله يحضر سلامة ... خاصو تكون فراسو بلي هضر معاك ...

اسد : ففففففف ( كايدوز يدو على شعرو ) انا كنحس باقي ليا شوية ونتسطى .... (تنهد ووقف ) ماعلينااا ... غنوض نشوف الكارتة ديال داك ااسيد راه هزوه لكلينيك .....ونمشي لبيرو ... عاد نجي نشوف لوؤي هنا علاش طاوي ... ( كيلبس الفيست ) نمشي نشوف عدنان بعدا ....

لامار : داكوغ حتى انا راه غنمشي لشركة راني غبرت وتجمعات عليا الخدمة تما بلااااا قياااااس .... ( حيدات عليها الكوفرلي وناضت كتكسل ) موحال نجي نتغدى ... غناكل غير شي حاجة تما حتى الليل يلاه نكون ساليت ... اجي بعدا ... وجود ؟

اسد : وحدة وحدة عليا الامار .. وحدة وحدة ... نفكو حريرة هذا و نشوف جود .... يلاه بسلامة ... انا الى ساليت بكري غندوز نعاونك..

قرب لفمها باسها بوسة طويلة وخرج ... هو يتلاقا مع رتاج جايا فالكولوار باتجاه جناح لوؤي ...

رتاج : صباح الخير ..

اسد : صباح نور .. كيف صبح عدنان !

رتاج : غاااادي نتسطى ... انا صافي غااادي نتسطى والله ... مشا لكلينيك ... غييير بزز باش شديتو مايشيش عند لوؤي .. مكيحاولش على صحتو بالمرة .. حتى يطيح بشي كرييز ( تعمرو عينيها بدموع والعياء فوجهها ) ويرزينا فيييه عااااد يحس بياااا ...

اسد : وعلاش مشا هو لكلينيك ياك معاه مروان واياد !

رتاج : مكتعرفوش هو .. قالك يمشي يشوف بعينيه ويتأكد بلي راه صافا .. مبغاهش ينوض يرفع شي دعوة على ولدو ...

اسد : مالنا حنا غنرغبوه ولا .. بغا يرفع يرفع

رتاج : راك كتعرف خوك حسن مني .. تيقولك انا دوك الاوسمة و الظل دالبرتوكول هو لي مخليني مهني على ولادي فاش كيسافرو ولا يبعدو عليا راهم محميين ومستقبلهم مضمون ... كيقولك انا عايش بحجرة فقلبي فاي لحظة نقدر نموت غنكون مرتاح لاكانو محميين ...( كتمسح دمعتها ) هااادشي باش كيعصبني انا

اسد : الموت غااانموتو حنااا كااااملين ماشي غير هو تاحد مغاايبقى .. ولي خاصنا نعلموهم يديروه هو نخليوهم هوما يتحملو مسؤولية اخطائهم ويشوفو عواقبها ماشي ديما نگادو ونريپاريو من موراهم هادشي لي كنغلطو فيه ديما حنايا ... مكانش عليه يمشي هو .. يمشي لوؤي براسو

رتاج : ( جاتها ضحكة وسط دموع ) لوؤي ؟ ههههه واخا تجرو بسلااسل مكتعرفش راسو شحال قاسح ... مشيت قبيلة طليت عليه نهضر معاه لقيتو ناااعس گااالس و بحواييجو ...علم الله فوقاش دخل .... والله حتى بااقي ليا شوية ونتسطى بينو هو وباه

اسد : كاااملييين قربو يسطيونا .... رخفي النفس .. انا غادي نلحق على عدنان وان شاء الله مايكون غير الخييير ويتحل هادشي كاامل

رتاج : راه مكتحل حاجة تاكتعقد حاااجة .. راه مامكتابش علينا نرتاحو

اسد غير تنهد وربت على كتفها ونزل فالدروج وهي مشات جهة حناج لوؤي حلات تاني تشوفو واش فاق لقاتو مزال ناعس بنفس الطريقة وتنهدات مشات باتجاهو تحنات فسخات ليه سيور الكاط ديالو حيداتو ليه ومشات لسريرو هزات مخدة وعوجات ليه راسو لجنب حطاتها تحت راسو وغطاتو بليزار وهو تكمش وجرو عليه .... قربات بشوية لجبهتو باستو .... وخفضات من نسبة اابرودة فلاكليم ...

وخرجات لجناح ولادها لاخرين تأكدات انهم ناعسين مزيان عاد مشات لخدمتها .... غير خرجات طموبيل رتاج تبعاتها طموبيل حياة وبنتها داياها لترويض لي فايقة وملقاتش سفيان حداها مزال معارفاش كاع اش واقع .... النهار اللخر ديالهم فالقصر حيت الكنازة سالات وخاص كل واحد يرجع لخدمتو ...

قسم بسبب الليل لي نعساتو معطل اول مرة تطفي تيليفونات وتشد عليها البيت وتنعس بلا حتى مسؤوليات ... وسلطان كان عندو تصوير اشهار فيقو المنادجر ديالو ومشى ليه بكري لاكادير مكمل نعاسو فطيارة ... اما اياد ومروان هوما لي مشاو مع حسام لكلينيك تالحق عليهم عدنان كيتأكدو من الحالة الصحية ديالو ....

قدس كيف فاقت بقات فبلاصتها جالسة وكتلعب بسلستها فعنقها وكتفكر .. عقلها مزال مقادرش يتقبل بالمرة هاد العلاقة ! رغم انها عاجباها ولكن خالعاها كتر ... هي زهوانية وكون جا لوؤي على برا كانت غتقبلو طايرة ... ولكن حيت ولد العائلة خايفة بزاف .. خايفة شي نهار يسيق ليها شي واحد الخبار ... خايفة يكون لوؤي دايرها غير نزوة وتخسر صورتها فالعائلة على والو .... مغمضة عينيها ومخلوعة بلا قياس ولات كتحس وجودو بحال كوشماغ بكتر مكيعجبها كيخلعها ....

اما لوؤي على نعستو فالكنابي بقى هاكاك متحركش تاساعة بدات تضرب 12 ...

عاد بداو عينيه تايرمشو باش يتحلو ... كيحس بالوجع فعنننقو وصدر انين خافت من الم النعسة العوجة لي دار ... عاد ناض بشوية كيجبد فعنقو يمين وشمال وكيحاول يحل عينيه ... فاق راسو كيتشقق عليه بسبب لالكول لي كتر منو وشاف لارض بان ليه الكاط ديالو محيد ... ومغطي ... عرف راه رتاج دخلات عندو وعوج عنقو كيكسل فيه هو يشوف لجنب ...حتى بان ليه جالس على الكرسي شاد تيلي ديالو ورجليه طاويهم على طبلة .... صغر عينيه فيه تاسمعو ...

جود : ( عينيه على تيليفون ) صباح الخير ... ( علا عينييه شاف فيه ) ياكما السرير مابقاش هازك ... نبدلوه لسيادتكم ....

لوؤي : ( تنهد معمق عارف راسو كيتسناه نهار ديال الاستفسارات .... وواضح البدية مع جود وهو يلوح عليه داك الغطا وجلس مقاد كيرد فشعرو لور ويحك فلحييتو لي صبحات مشعككة ..) مغنفطرش انا بداك ولد القحبة .... نقاد دماغي وانا معاك

جود: ( لاح عليه باكية دالكالمون لي كاياخدو مور لالكول ) يلاه گاد نشوف...

لوؤي : ( شدها و شاف فيه ) دابا مالك مالك ...اش كاين على الصباااح ....

جود : لا ماماليش ....( حط تيلي وشاف فيه ) ملي كنت خارج لبارح مزروب ....راك تعترتي برجليك فالدنيا وقلبتيها علينا .... ردتيي ليها البال ولا لا !

لوؤي : باقي عايش !!!

جود: باغي تمشي تكمل عليه !

لوؤي : الى مزال مبغاش يحشم ...

خلاه وناض لدوش وجود وقف

جود : انا لتحت .. تسالي لحق عليا ....

وما ليه براسو وجود خرج .. ولوؤي عاد دخل لدوش يلاه حل روبيني غيخوي الما على وجهو هو يسهى فالمرايا كيفكر ... بعد مافاق هاد الصباح صاحي من الشراب عاد حس بشنو دار ! .. كيفاش غيبرر دابا هادشي لعائلتو ؟ يقول كولشي ! الا قال كولشي هادشي كيعني حاجة وحدة خاص تم الخطبة الرسمية العائلة مغايخليوهمش هاكاك غايديرو لانطونسيون كتر .... وهو هادشي فصالحو ولكن حاس بلي هي مغتبغيش ... وغيصدق مضيع صبر ديال سنين فلحظة تهور .... مزال مولفاتوش لدرجة تقبل تزوج بيه ! هبط راسو على لافابو كيرد فشعرو لقدام ويرجعو تاني لور بحركات سراع مغززززف على هادشي لي دار وكيفاش دغيا متحكمش فاعصابو .. ولكن غير تيفكر اش كان كيقول حسام كيحس براسو انه خاصو يزيييييدو مزال .. وكون تعاود الامر كاااان غيعاود نفس الغلطة .... خدا نفس عمييييق كيحاول يوصل لشي حل لي ميصعبش علاقتو بيها لي كيبنيها بحالا كيبني شي برج بالقطع المعدنية .. اي قطعة حطها غالطة غييير شوية غتريب ليه كولشي .... وهو ممستعدش يخسرها ....

سد داك الروبيني وبدا يحيد فحوايجو دخل تحت الدوش .....

لتحت ....

خرج جود لجردة فجليسة قصبية تحت من مظل بيضة مربعة دايرة الظل على الجليسة ...غير جلس الخادمة جابت ليه القهوة ... وشد عندو فنجال متكي ظهرو مرجعو لور وكيتفرج فمدخل القصر .. عينيه تما وعقلو مزال لاصق فليلة لبارح .... حاط الفنجال حدا فمو ولكن المشاهد لي كيدوزو قدام عنيه مخلاوهش يفكر يرشف منو ... باقي عقلو فمشهد بيلي وهي قريبة من مروان لداك الدرجة .... لي عارف هو خالو مروان دارو بوحدها ..يعني مساكنينش فنفس الدار حتى يكونو بداك القرب كامل ! ... وحتى الى خدام فالكلية لي كتقرا فيها هي هادشي ماشي كفيل يقنعو ... امتى تقربو من بعضياتهم قد هاكا ! الى كانت غير صداقة عادية ... واش بيلي مولفة دير صداقات دراري وتقرب منهم بحال هاكا لدرجة جالسة و كتلعب ليه بصبعان يديه !!!!!! وهو مركز معاها بحالا هي لي كاينة فالكون .... مبغاتش ابدا دخل ليه لدماغو بالمرة .. لابيز لي سلمات بيها على حسام بإريياااحية .... تاهي غير مازادت الطين بلة من تحررها الزايد على حدو ولي ابدا مكيوالمش عقليتو التقليدية ....

تنهد ورشف من القهوة هو يجي لبالو لوؤي تاني لي منعسش هاد الليلة بالتفكير .... كيفاش لي دخل لدار يحترم بناتنا !!!! اش دار ؟ وعلاش لوؤي نوض هاد الروينة كاملة !!! وشكون لي قلل عليها الاحترام فبنات الاسماعيلي !!!! .... لوؤي مغيفقدش اعصابو غير هاكاك .. شي حاجة قوية لي خلاتو يدير داك الروينة كاملة وهو عارف خطورة الوضع بنسبة ليهم .. هوما كأشبال صغار اخر حاجة كتهمهم هوما داك الاوسمة .... ولكن واليديهم نهار دخلو للبروتوكول ... دخلو ليه على ودهم .. احترمو قوانينهم على ودهم هوما وعلى ود يعيشو مزيان فالمستقبل وولاد ابتهال هوما اكتر وحدين صعيب عليهم يتمشاو بالقوانين ولكن على ود مصلحة جيلهم التاني والتالت دخلو فهاد المعمعة ... مغيجيوش هوما لي يضيعوه ليهم بيديهم دابا .... لا جود لا لوؤي لاسلطان لا اياد لا اي واحد من الاشبال ... اكتر حاجة كتنفرزهم فحياتهم هو هاد البروتوكول لي خاصهم دييما يديرو ليه اعتبار فتصرفاتهم ولا غيتسحبو منهم اوسمتهم ... وهوما كأشبال ماعندهم تاشي دخل سطابل وتا شي شركة وتاشي مشروع مسيييرينو .. الاوسمة هوما الحاجة الوحيدة لي ضامنين بيها مستقبلهم .... وعلى قبل واليدهم يكونو هانيين عليهم رادين البال لتصرفاتهم وكيفكرو مية مرة قبل ميديرو شرع يديهم ... من بعد الاعتداء على الصحافي الهيئة دالبرتوكول الى وصلها خبار انه كاين تبليغ اخر الى بلغ حسام اكيد غيتسحب من لوؤي وسام حسن السيرة .... وبالتالي ماغادعمو الهيئة فحتى شي قضية قضائية مزال ومغادعمو فحتى شي مشروع يبغي يدييرو .... وبلا دعم الهيئة العليا المشروع ديما غيكون مهدد بالافلاس ولا بالشركاء النصابين او بالبلوكاااج ..... ماشي بحال يكون البرتوكول لي داعم .... هادشي كامل ورادين لبال .. كايفكر كون مكانش هاد البرتوكول لي شادهم شوية كون اشنو دارو ؟؟؟؟

يلاه غيحط الفنجال هو يبان ليه لوؤي نازل فدروج واضح فملامحو خااااسر ... شعرو باقي فازك راجع لور ولابس تيشورت بيضة وشورط ديال دجين مطوي جيهة الركبة وتقاشر وسبادرين دلاكوست .. لابس نضاضر مخبيين نفوخية عينيه وهاز كاسكيطتو وسوارتو فيديه ...

غير وصل لعند جود تلاح على واحد من الكراسة بعياااء معلي راسو لفوووق وجود كيشرب قهوتو وكيشوف معاه ...

لوؤي : ( بصوت عيان ) مكاين حد ...

جود : ( ضور عينيه للباركينغ شاف النص دطموبيلات ناقص ) سالات العطلة ....

لوؤي : ( حط الكاسكيط على وجهو من شمس متكي راسو لور ) اممم ... لا كانت هادي عطلة تمارة كيدايرة ...

جود : مغتمشيش للمتحف ...

لوؤي : ماعنديش الخاطر ...

جود : ( كيشوف الخادمة جايا بالقهوة للوؤي ) نوض شرب قهوووتك ... وطلقنا فالهضرة دغيا بلا منبدا نجبد ليك لسانك بحال دراري صغار ...

لوؤي : ( تنهد وقاد جلستو وشد الكاس على الخادمة وهي مشات وهو رشف منو وشاف عند جود ) مكااين تاشي حاجة ... جوج ولدو ومروباوش مزيان جا لهنا عاودنا ليه تربية .....

جود : اش دار !

لوؤي : لي دار راه دارو

جود : ( بانفاعلية ) ودابا غاااااتطلقنا ولا لا ... لبارح كالس بناتنا ما بناتنا ... علامن قلل الاحتراام فيهم ؟؟؟؟؟

لوؤي : ( شرب من قهوتو وشافيه مطول عاد نطق ) قدس ...

جود : ( علا حاجبو ) قدس ؟؟؟ ختتتي !!! اش دار ليها ؟؟؟؟؟؟

لوؤي : شتي داك مروان ... واخا خاااالك .. برررررب مارااااجل ...

جود : ( حط كاسو دالقهوة وشاف فيه وعاود اش قال ) اش دار ليها ؟

لوؤي : ( بعصبية كيهضر ووجهو حمررر وقلبو عامر ) ملي دخل ولد القحححبة هو كيشوف فيها بحالا حاطين ليه حنا يعزززل .... وملي كان خارج هو وداك خالك جالس عليه زوينة خلخلااتني .. سطاتني .... نتزوجها ... ولا معرفت ااااش ...اابنت قد بنتو .. كاالس كايتشهى فيييها. ..... تخخخربيق ....

جود : وشنو قاليه مروان ؟

لوؤي : ماعرت لمو .... جالس عليه دير عقلك مادير عقلك ... عطييييه للعقل اصااحبي عطييييه لدماااغ وغيدير ععقلو .... نجيب انا صاحبي لقاع الفاميلا ويخرج كيتشهى ليا فبنت ختي بررررب تاااانحرو ..... تربية دالميرريكااااان ...

جود ضرب الطبلة بركلة وناض ولوؤي علا معاه عينيه ... وتبعو ....

لوؤي : جوود ... جووووود ... تتتسسنى اصاااحبي ...

بانليه مشا كيضرب فالساسنور لي كينزل للباركينغ ديالو وبقى واقف تما كيتسناه .. تابانو ليه جوج بيبان تحلو فالججنب عرفو راه طااالع ووقف قدامو كيضرب ليه فالكاپو باش يوقف ... وقف ليه وعينيه حممرييين كاارز على الفولون بمجرد ماتخيل دخل لدار وشاف فختو نظرة شهوانية كيبغي يجبدلو مصارنو بين يديه وركب لوؤي معاه وهو زااااد تاشد لوؤي الباااب

لوؤي : تسسنى غااانسد الباااب اصااحبي باغغغي تتقتلللنا ( حلو ليه الحرس بزربة ) فييين غادي

جود مكيجاوبوش غير مكسيييري ولوؤي غير كيدعي سلامة ندم كاع علاش قالها ليه تابان ليه وصلو قدام الكلينيك عرفو راه جاي يكمل عليه

فالكلينيك ....

نزلو من الدروج اسد وعدنان خارجين لباركينغ .. بعد ماتنفخ راسهم بالهضرة مع الاطباء على حالتو ... ومشاو بجهة طموبيل عدنان تكا عليها كيتنهد واسد تاكان حل الباب ورجع شدو ...

عدنان : سيد ديجا مريض يجي يلقى علينا سبتو مالو لوؤي لي دار ليه الفشل الكلوي !

اسد : كنت عارفو غيكب كولشي على راسو ...

عدنان : ايمشي يقاااود ... هضرة وحدة راه قلناها .. مسؤوليتنا معاه راحنا درناها وجبناه لكلينيك ياك مصيفطناهش بدماياتو ... يكون راجل و يواجه ويقول علاش ضاربو هو وياه .. واش انا ولدي كامي المار•يخوانا لي داز حداه كايشير عليه !!!! راه واضح دار ليه شي حاجة ....

اسد : قلتها قبيلة وغنعاودها .. هذا راه داير علاش وكيقلب فيمن يلصق داكشي لي دار .. تضرب فالدار عندنا دونك مسؤوليتنا راه درناها و داويناه ... منبعد ماعندنا مانزيدو ليه .... باش يتعلم ملي يكون كيضربو شي واحد يهز يديه يدافع شوية على راسو ماشي يتمرغ فالارض ...

عدنان : ( تنهد ) فاش فاريتيها معاهم فلخر

اسد : قلت ليهم يتكلفو ليه غير بالجروح الجداد لي واضحين ديال الضرب الفشل الكلوي يمشي يداويه راسو

عدنان : وراه قاليك ضربو لتما ...

اسد : واش هاديك كلوة ولا بيضة غيفقصها لوؤي ببونية ! يضور يقود

عدنان : هضرت حتى مع مروان قتليه الا بان ليك باغي يدير شي شكاية علمنا ...( حل الباب ركب ) طلع طلع داك الاجتماع راه اجلناه بما فيه الكفاية ...

اسد حل الباب ديمارا تاهو مشى ....

اما اياد بقى مع مروان لفوق فالشومبر مع حسام لي باقيين كازيدوه الدم ... اياد بقى يشوف فحسام ويشوف فمروان وفلخر غمز ليه بمعنى تبعني وخرجو بجوج من الشومبر ديالو

اياد : ها عمي اسد وعدنان خرجو ... هضر دابا قوليا اش كاين .. اش دار للوؤي هدا ..

مروان : مادااار والو اصاااحبي ... لوؤي من لول محاملوش راك شفتيه ملي كنا كالسييين ... ديما تانقولها لختي ... ومع احتراماتي ليك ولادهم مغووولييين راه تايبغيو غير بعضياتهم ودمهم .. من ولاد ختي وجبد ... برب لاابغاااو ليك البراني دمهم واخا .. نجيب ليهم البراني ميحملوهش

اياد : دابا اش كترون اش كااترون ... الكنازة كاملة عامرة براني واش شفتي لوؤي شاد الهراوة وبدا من البااب كيضرب فعباد الله ولا كيفاش !!! تاشمن براني ولا اش كتخراااا داباااا

مروان : وراه متنهضرش عليك نتا اصاحبي كنهضر على هادو لي فالمغرب

اياد : حنا راه ماعندناش وحدين دالمغرب وحدين دقندهااار ... راك كتهضر على ولاد عمامي راه بحالا كتهضر عليا انا ....

مروان : ودابا غير بيني وبينك .. عمرك شفتي رحبو بالبراني ولا عندهم شي صاحب من غير بعضياتهم ؟ راه تايجيب ليهم الله البراني كولووو ميسواش غاهوما لي كاينين ....قوة الفشووووش ونافخينهم على الخاوي .. السيد صااااحبي كنعرفو ملي كناااا باقين براااهش وكنعرف واليديه وعائلتو وشاد الطريييق اصاحبي ضاربها جاي يعزي معايا الوالدة ويدير ليه واحد قد ولدو داك الحالة

اياد : راااه مستحيل هاد الهضرة دخل ليا لكري انا ... راه لوؤي مغيجيش ويضرب .. خليني من هاد لهرد دياللك كامل وقوليا اش وووقع بضبط حتى ضربو

مروان : دابا لي وقع ولي ماوقعش مكيهمش.. كان عليه يدير على وجهي انا وحيت شافني انا يييحشم ... يدير لي يدير يجي عندي انا يقول ليا داك السيد مرتاحيتش ليه ولا ها اش دار منعاودش نجيبو العيب والعااار ماشي داخل فالسيد بدمااااغ مشتتو لينا فالارض والسيد ديييجا مريض كيدير دياليز فين غنحط وجهي معاه انا وعائلتو ملي كنمشي كيهزوني فوق راسهم و خووتو كيفاش كيتعاملو معايا .... السيد عجباتو قدس ... قاليا مقلتيش ليا عندك بنت ختك ونتا عارفني باغي نتزوج قتليه راه صغيرة عليك وسدينا الموضوع جا هاداك تلاح علييييه

اياد : هاداك !

مروان : اااه هاداااك .. مال السيد قال شي عييب ! اولا مشا جرها لقنت هضر معاها ؟ السيد هضر على الحلال بالادب مع خالها ....

اياد : ( طلعو وهبطو ) والله مااتسوى ....

مروان : ( علا حاجبو ) ياك !

اياد : دابا نتا جيتي فصف صاحبك ... وناكر ولد الفاميلا !

مروان : علاش صافي غير ولد الفاميلا نجيب انا صاحبي يتكرفص ليا عليه ... علاش هادشي لي عاودت ليك يستاهل يتضرب عليه !

اياد : نتا قلتي غا ليبغيتي كون كان قال غير هاكا برررربي لاضربو .. السيد كان باقي ليه شوية ويقتلو وكتقول ليا غير هاكا .. علم الله اشمن فيرسيون هادي كتخبر عليا بيييها .... ومرة اخرى ملي اسيدي حنايا كنبغيو غير بعضياتنا ومكنبغيوش البراني ... جمع رجلييييك عندك وشد لوطيل ...

مروان : ( علا فيه حاجبو ) راه واقلة كتهضر على دار ختي اشريف

اياد : الى نتا دار ختك حنا راه دارنا تزادينا فيها وكبرنا فيها الى نتا كتجي ليها من الصيف لصيف ....

خلاه وزاد ومروان متبعو بعينيه مخنزر فيه ...

نزل فالدروج ماشي بجهة الطموبيل تاسمع طموبيل دجود فرااانات حدا باب الكلينيك وهو يضور بانليه نازل بجهالة ولوؤي تابعو ومشا بزربة تبعههم ...و جود غير دخل تلاقاو ليه ...

- ( بخلعة ) مووسيو جود !!!!!

جود : ( كيشوف قدامو لشومبرات لي لتحت ورجع شاف فيها ) داك خييينا لي جا صباح مضروب ..... منعرف اش سمييتو ..فيناهو !

- اا ... ف ف .. فلاشوميغ ديالو اسيدي يلاه خرج من عندو موسيو اسد وموسيو عدنان ... و

جود : ( قاطعها ) يخرج يقود ( طرطقو عينيهم ملي خصر الهضرة واياد لحق عليه ) يخرج من هنا يمشي يقلب فين يداوا

_ ااء !! ولكن ميمكنش اسيييدي ! راه يلاه كايتزاد ليه الدم وباقي حالتو مامستقراش

جود : ( بعصبية ) واااش غنبقى نعاود الهضرة ( ضرب ببونية فريسيبسيون ) يخرج يقووود هي يخررررج يقووووود ...

اياد : ( تدخل ) جووود دير عقلك فين غيخرج سيد راه مريض

لوؤي : ( كيجرو ) جود يلاااه منهناااا ...

جود : ( فلت منو ) طططلق .... ( شاف فالمسؤولة ) دابا نتي غتبقاي كتفررررجي فيااااا

خلاتو ومشات كتجري للبيرو ديالها تعلم وهو شاف فلي جالسة فالريسيبسيون

جود : اشمن شومبر جالس فيها !

- اا مم .. م .. معرفتش اموسيو جود

خلاها وزاد كيحل فالبييبان وهي هزات تيلي دغيا كتصوني

لوؤي : جووووود .... وااااصاحبي وووقف غانهضرو معاك

جود : ( كيحل فالبيبان ) الكلييينيك ديال باااااه .... لاااا وحنا ندااويييوه ملفوووووق ....

اياد : ( جر لؤوي ) اش واقع

لوؤي : اودي راه هضرت معاه وندمني ...

سمعو صوت السانسور ومشاو بزربة تبعوه وهو طلع لفوق يلاه غيحل واحد الباب هو يبان ليه مروان كيمشي ويجي فواحد الكولوار ومشا باتجاهو ومروان وسع عينيه ملي شافو جاي وازن تسعين عرف غيكون قاليه لوؤي كولشي على قدس هو يشدو من صدرو

مروان : جوووود ... هنييييينا السيد يلاه كيزيدو ليه الدم

جود : ( دفعو تالصقو مع الحييييط ) ببببعد لهييييه نتااااا

حل عليه الباب بجهالة هوما يتخطفو الممرضين وهو وسع عينيه وجهو صبح منفووووخ وجود علا عينيه للسقف بانتليه كليما شاعلة

جود : ايهايهاي .... جيبوليه نيت تاشي قرعة دالفودكا وطلقو ليه الجاز .. وجيبو ليه القحاااب تاهوما ( الممرضين واحد بدا يشوف عند لاخر ومروان تبعو تاهو ) اش باليك حنا نديرو ليك صالييير كاع .. عييييش نتا أليييز الاسماعيليين يخدمو علييييك الله اودي ... ( شاف عند الممرضين ) جمعو هادشي عليا من هنا دغيا يخرج يقود فحالو ..

الممرض : م مم وسيو جود ( قاطعو )

جود : هضضرة وحدة راه قلتها ...

اياد : ( شدو ) جوووود

جود : ططططلق مني راه مغااانضربش ... علاش خلا ليا ولد العم فين نحط يدي مزال ... ( شاف عند حسام ) نوووض عليا منهنا قلب فييين داوي راسك ( شاف عند الممرضين ) عطيوه داك القرعة ددوا الحمر يديها سوفوونييير .... نوووض تقاااود ...

حسام : ( كيشوف لمروان ويشوف فيه مغززف ) هادي هي الضيافة عندكم

جود : غاتنوووض تجمع راسك قبل مانوصل معاك تالدييسسيير ....

لوؤي : باقي عند ديلمك نتا الفم لي يههههضرررر ....

جود : يالاه خوي علييياااا منهناااا ....

خرج هو يتبعو مروان شدو

مروان : فييين غااايخوي !!!!! فييييين ؟؟؟؟ مكتشوفش حالة السيد ؟؟؟ واش نتوما مربببين فغاااابة ؟؟؟؟؟

جود : نترباو فغااابة كناااكلو القناااافد ومنترباااوش تربيتك نتا لي يجي ولد القححبة يتشهى ليك فبنت ختك ونتا حال فمك كي البغل ...

مروان : جججمع راسك اجوووود ....راه نولد قدك

جود : احييييد عليا من الهضرة الخااوية كتزيدو غا فالعمرر والعقل الله يجيييب

مروان : السيد مقال تاشي عييب باش نوض انا نسسخلو كون شفتو قلل صوابووو كنت غنهضر قبل هو ميدير هو يديه

لوؤي : ( دفع جود لجنب وزاد عندو ) صصصبر اجود ... كحز لهيه .... هاااد هو هدا راه باقي عااااايش .. كذب على الميتييييين .. شششتي نتاااا ابررررب تعاالى ماعندك ( جمع صبعانو) ققققد هاكا دالرججججلة ....

مروان : لوووووؤي راه غنخسر معاك

لوؤي : فييين غتزيييد تخسر مزال .... الله ييييخلف الله يعمرررر خسرتي وفتي لهييييه ....

مروان : ( شاف فجود ) مقال والو بغى غير الحلااال تاهو مالو شفتوه مقنتها فشي حييييط

جود : الحلال مكيدارش بحال هاكاااااك ... كون بغا الحلال كون قصد واليديها ماشي يجي يتشهى عليييك

مروان : انا مضاااسر معاه داكشي علاااااش

جود : آزاااامل مضاااسر معاااه ايييه ولكن مضضضسروش على بنت ختتتتك واخا يكووون خوووك ماشي غا عشيرك ....

مروان : متخسرش الهضضضرة وباراكا ماديرو عليا هاكا بحالا منعرف منين جاييين .... هو راه ماشدهاااش وقنتها مع الحيييط وشبع فيييها بوووسااااان كيييف كادير نتا

يلاه غااايدخل فيه جود تاكان اياااد دفعو تالسق مع الحييييط

اياد : ااااااجمممع راااااسك اصاااحبي تخخخلطو عليييك الوراااق .... خريييييييتي فيييه كااااع نتا .. هادي كاملة معزة لييك فهاد صاحبك هزو وقووود علييينا من هنا خريييتووو فيه كاااااع ....

مروان : ياااك ا اياد دايرين عليا الحمية دابا ... كبرتو .. كبرتو الكتااف !!! دابا عاد جاتك النفس على ولد عمك

اياد : وهادي دير ليك العقل باش متعاودش دخل وسط الدم ....

مروان : صافي نكرتيييه ؟ ياك كتعرف حسام حتى نتا ...عمرك شفتيه قلل الاحترام !

اياد : معرفتي فجيه والفاميليا فجيييه امروان ...

تحل السانسور وجاي اسد وعدنان لي ردوهم من وسط الطريق والاطباء لي كانو مكلفين بحسام تاهوما موراهم

اسد : اش وااقع هناياااا

عدنان : مااااالكم عااااود

جود : هااااد خييينا ( ضرب بالبونيات فالباب دشومبر بجهد ) ببببرررررب هنا لااابااااات ... دااباااااا يخرج يقووود عليا من هنا

اسد : ( جيفو بيييد وححدة ولوؤي وسع عينيه ) ملي تكوووون كتهضر معاييااااا غااااتتتنزل صووووتك لارض وماااتغوووووتش

لوؤي : ( شد اسد ) لا عمي طططلق منوووو راه غا مععصب طططلق الله يييحفظك ....

جود : ( نتر عنقو من يد اسد ) ولااا وجايبو لكلييينك كاع وشومبر ملكيييية ... نفرشو ليه الورد حنا لااااا ؟؟؟ السيييد راه ضسررر على خخختي الوالييييييد ... يييمشي يقوود عليا منهنا .. بررررررررررب تعاااالى هنا لابااااااات ... واش لوؤي غيجييي ويضضربو .. يييدخل لقاع الدار يتشهى ليا فختي وهااااد ( شاف عند مروان ) الخااااال هااادااا كيسمع لييييه وجالس يداااافع عليييه .... ووولللد الزنااا يخرج عليا من هنا يقلب فين ييييزني

اسد : ( عصبو بتخصار الهضرة وضربو لصدرو تاتلتخ راسو مع الحيييط ) ججججمع فمممممك وووسكتناااا واحترم عمك ...

اياد : ( وسع عينيه دخل بزربة خلعاتو داك اللتخة لراس ) لاا اعمممي لا راه مرييييض ...

لوؤي : ( شد فراس جود ) نتا لابااااااس ؟؟؟؟؟؟

اسد ضار كيحك على لحيييتو ويرد شعرو لور وجود وما ليه بآه لاباس حاط يدو على راسو فين تضرب

جود : لاابااااس

اسد : ( ضار شاف فيه قرب لعندو وشدو من قرفادتو ) ضرااااتك ؟؟؟؟

لوؤي بجهالة ملي شاف اسد ضرب جود على ود حسام مشا حل الباااب ديال الشووومبرر مغززف واياد تبعو هو يهز حسااام من حوايجو لتخو فالاااارض

لوؤي : ( بالغوات ) وااااخرااااااااااج تقاااااااااود علييييييناااااااا منهناااا

عدنان : ( شد لوؤي ) لووووؤاااااااي راه غااانضرررب مللللتك

اياد : ( شد عليه لوؤي ) صاااافي اصااااحبي بردو السوووووق

اسد : ( جر جود وخاطب الاطباء ) كملو ليه الدم وخرجوه

الدكتور : ااء ؟؟؟ ولكن ووو ...

اسد : صافي هضضرنا ....( كيومي ليه بيدييه بمعنى خليوه تايبرا ) عيييط لطبيب دجوووود

جود : راااني بييخيير غييير خرج عليا هدا من هنا

اسد : قققطع حسسسسك ...

زاد بيه واياد تاهو خرج لوؤي بالكشايف تابعهم عدنان كيييسوووط ولوؤي كل مرة كيضور يطل على باه واش صافا

عدنان : علاش كاااضور لعندي دابااااا

لوؤي : ( بعصبية ) كنشوفو غا واااش رااااك بيخييير

عدنان : قتلونا عاد تهنااااو قتلووونا .. البرااااااهش ... ( دفعو لسانسور ) زيييييد ....

دخل اسد عند دكتور د جود وجود غير كيسوط دار ليه فحص يتاكد راه بيخير .. عصبو بغواتو تامبقاش كيعرف اش كيدير نسى كاع مرضو وبلي راسو حساس ... طمن عليه عاد خرجو لبرا نزلو فدروج هوما يبانو ليهم لتحت واسد مشا باتجاه طموبيلتو

اسد : زيييييد اعدناان زيييد خلييهم يرجعو يتقااتلو الله ييينعل لي يدير عقلو فيييهم .. خلييييهم تايسدو على والديهم فشي بنييييقة ويعرفو بحق واليديهم لي تابعينهم

جود : ياك مغااايبااااتش هنا

اسد : غتزيد كلمة اخرة نتا لي مغتبااااتش فالدار ....

ركب اسد وعدنان ركب حداه ومشاو واياد تاهو خلاهم بحكم باقي مكيهضرش مزيان مع جود مشا لطموبيلتو وجود بقى كيمشي ويجي ولوؤي حداه هو يضرب الرويضة بركلة

جود : باقي مااابرد ليااااا ولد القققققحبة .....

اسد زاد فالسرعة كيصوني فالتيليفون تاجاوبوو مروان

اسد : مروااان ... مااايعرفش جووود الى باقي راه فالكلينيييك ... خليتو تما غير باش ماااتجيهش شي انفيكسيون ويزيد يعمر الضوسي على لوؤي .... غتأكد بلي راه صافا وقوليه الا مزال ضار بساحة ولادي ولا جبد بنتي على فمو راه برب لي غانديرو فيه انا مداروهش ولادي ....

نتر الكيت من ودنو كيسوط وعدنان تاهو كتر منو راسهم غيطرطق ....

اما لوؤي ركب فااطموبيل صاك بجود وجود غير متكي براسو على الكوسان تاوصلو لكوان لي كايعمرو فيه فلوطيل ديالهم ونزلو مشاو ديريكت لبلاصتهم ...

جود غير متكي راسو وكييلعب برجلييه بالفقصة ولوؤي برد شوية من جيهتو ملي غيخرجو اسد من تما وملي كلا داك طرحة دالعصاا ..

جود : كون مكنتش نعرف جدة شكاتسوا بررب تانقول عليه ولد القحبة ...

لوؤي : راه قتليك تربية الميريكان

جود : بنادم راه خاصو يبقى فصباغتو واخا يتربا تااا فكولومبيا ....

لوؤي : صااافي طوي عليا هادشي راسي غااايتششق ....

جابو ليهم قهاوي وتكا لوؤي لور وجود بدا يجغم منها ... دام الصمت بيناتهم كيحاولو يبردو اعصاابهم كل واحد ملهي فتيليفونو ..... تاطلع لجود مسسج فانسطا من عند بيلي " جود فقت مالقيتكش فالدار ؟ فييينك .." ... جود علا حاجبو جاتو فشكل شي وحدة تسولو فييينك ... ورجع جاوبها " شوية ونجي " .... وحط تيلي وعلا عينيه فلوؤي

جود : اجي نتا بعدا .. راه باقي مساليييناش الهضرة .... دابا نتا داك القتلة دالعصا لي عطيتيه .... جاتك النفس على ختي !

لوؤي :وعلامن !

جود :ونتا هاد النفس ضرباتك غا على ختي ..

لوؤي :وراه بنت عمي !!!

جود : وراه كانو جوج بنات عمامك خرين ملي دخل وهو يتملق فيهم ... وحدة سميتها قسم وحدة سميتها بيلسان شبع فيها تعناق مجاتكش النفس عليها

لوؤي : جممعتهم لييييه ... ولكن قددس زااااد فيه كااااع

جود : امممم ( معلي حاجبو ) مزياااان ...( رجع شد تيليفونو )

لوؤي : مالك دابا !

جود بقى غير كيشوف لتيليفونو كيحاول يبعد داك الشكوك لي جاو ليه لبالو وضور راسو بلا

جود : والو ....

لوؤي : جاتك الغيرة على بيلسان !!

جود : ( حط تيل وشاف فيه ) اجي بعدا .. مزال متفهماتش ليا واحد القضية انا مابغاتش دخل ليا لراسي .... دابا هي وخالي مروان ...كيفاش بلانهم ؟

لوؤي : ( وسع عينيه وهو تيتفكر هضرة لبارح وشاف فجود ) اا . .. ك كيفاش !!!!!

جود : جاوني قراااااب لبعضياتهم بزاف ...؟؟؟؟ واش من ديما هاكا

لوؤي بقا غير كيرمش ماعرف مايقول .. ميقدرش يقول شي حاجة ويصدق مخاصم الولد وخالو وماعندوش تادليل على هضرتو وهضرة كبيرة بحال هادي ولامار كيحترمها وعزيزة عليه وجداه تاهي .. وسرط ريقو كيحاول يفكر فنفس الوقت مكيقدرش يكذب على جود مكرهش يقوليه كولشي ... ورجع تنهد

لوؤي : هدا عليا اجود راه يلاه هاد العام لي جاا فيه تانا شفتهم قربو شوية من بعضياتهم يمكن حيت الكونفينمون دوزوه انونسومبل ...

جود : وماشي بزااااف داك الشوفات مكنديرهمش تا انا

لوؤي : ( عاض على شفتو كيتمنى يكون داك الحب غا من طرفو ومداخلاش فيه بيلسان ورجع شاف فيه ) تالتما ماعندي مانعرف .... خليني غييير فيييك نت لي مزال ماتفهمش ليا غاتزوج

جود : ( تنهد ) اووووودي .....

لوؤي : شنو ! كنتي باغي دير ليا داك القضية ديال كولشي جا على الغفلة ... وهاديك كنعرفها ديال الدريات ...

جود : ورا دبصح جات على غفلة ...

لوؤي : دابا نتا غتزوج وبيمن ببيلسان !

جود : وعلاش مالها ! واش المشكل فيا ولا فيها

لوؤي : فيكم بجوج .... واش باغيها؟

جود : باغي نبغيها

لوؤي : هدا سميتو التقحبييين

جود : اخليني نتقحبن اخويا ....

لوؤي : مااالك كتهضر بحال هاكا بحالا مبززينها علييييك

جود : ماشي قضية مبززينها .. البنت راه زوييينة فنيييونة كتبان حنينة و بنت عمي ... لي واقع هو مزال كنولفها ....

لوؤي : وعلاش فكرتي فزواج

جود : وصاحبي راه كنت خاطبها .... واش نططلع شماتة ولا كييييفاش

لوؤي : وراه داكشي تسد

جود : ماتسدش .. ماحد هي باقا منساتش وبااقا باغاني متسدش ....صافي طوي عليا هاد الموضوع انا راه قررت وساليت

لوؤي : راه غا كترون

جود : عارف ... زعما ملي كنت كنرتب شنو طلع ليا ! خليني نجرب روينة تاني ....

لوؤي : راه عقلياتكم بعااااااد اجود راه انا لي كنعرفك

جود : عارف وملاحظ هادشي .. ولكن لي عجبني فيها راسها صغيير .. مكتعكسش بزاف ريكلاميت شوية على حوايجها ودات ليا بهضرتي .... شوية بشوية غااادي تولف عليا ونولف عليها .... فكل الاحوال كنحس براسي غنكون فرحااان معاها وعاجبني الحال

لوؤي : ونتاااا تعررررف انا راه ماعندي فييين ندخل ليك مانشوفكش داير شي حاجة ماهياش وصافي ... بيلسان تاهي بنت الناس وكيف قلتي كتبقى بنت العم مغتفكوووتكش واخا يطرا لي يطرا .... مبغيتش ندخل معاك فالتفاصيل داكشي كيخص حياتك .. انا جاوبني بحاجة وحدة .... واش ملي كتشوف فعينيها كتحس براسك فرحان !

جود : ( عوج شفتو لجنب ) ممم ... فرحان صراااحة ( شاف فيه ) زوييينة مقبولة كتبغيها العييين ... مشاغبة شي شوووية ... مي كاااتبغيها العين صراحة .. وراه مزال ماولفتهاش يلاه قررت هادشي .. راه الوالدة ويلاه قلتها ليها لبارح

لوؤي : ممممم .. زعما هادشي ماشي قديييم !

جود : فين قديم فييين والسيدة يلاه جات فالعيد الكبير

لوؤي : قصدت واش قررتي قبل الكنازة ولا بعدها

جود : تال منبعد اصاحبي .. شتيني كنت فاوكرانيا

لوؤي :وراه هادشي لي منفهمش ليا .. السيد يالاه عارفو كان فاوكرانيا وشاد ليه روسية ... شوية نسمع راه باغي يتزوج ...

جود : وشتي لياااااام .. ( حط كاس القهوة ) ها جود دار عقلو .... غانوض نمشي الدار ( وراه جيهة كتفو تيشورت تقطع عليه ملي كان معصب قبيلة ) غنبدل هاد تيشورت تقطع يلاه شفتو ... عاد نخرج ... تمشي !

لوؤي : لاااا ....غير سييير مافيااا لي يمشي لشي دار دابا .. الوالدة غتكون مقلقة شوية غندوز نتغدا معاها نحرزو شوية راه برضاهم باش مكملييين ...

جود : احسن مغاادييير ...

خلاه وناض غيمشي هو يعيط ليه وضار عندو

لوؤي : والله تا باغييي ليك شي تزويجة حسن اجود ....

اجود : بحالاش

لوؤي : بشي وحدة بااغيييها ... ماشي دايرها فيد الله .....

جود : ياك ديما كنقوليك كنبغي مراة وحدة هي لامار وتزوجها عمك .... غاااكون هاني .... على الاقل مرتي بوكوصة ههه ....

لوؤي : لا من ناحية بوووكوصة ماعندي مانقول .. غا هو القلب مكيميلش لزين راك عارف ... كنعرفك شبعان زيييين عند القحاب ...

جود : قلبي غيميل ليها ملي غتبقى هي بوحدها فحياتي ...ومتبقاش تقارنها ليييا بالقحاب ....

لوؤي : ههههه لا لا غاملي قلتي هاكا راك بديتي تكالا هههه اسيدي الله ايكمل بالخيير ديرولنا غير شي عراااسية نشطو فيها ....

جود ضور راسو كيضحك ومشا ولوؤي بقى متبعو بعينو .... عارفو وحاس بيه .. كايعرفو مزيااان من عييينيه كتر مكيعرف راسو وجود من اقرب ولاد عمامو ليه ... كيعرفو ملي كيكون باغي شي حاجة بصح وملي كيكون غير مساااااير ولكن عارف ان بيلسان كيف خلات قلبو ينبض المرة لولة .. غتخليه ينبض المرة التانية .... وتنهد ورجع شد كاسو دالقهوة ... وصونا على الشفيور يجيب ليه طموبيلتو

اما جود مشا لطموبيل ركب غادي لقصر وعقلو غير مع هضرة لوؤي .. علاش اي واحد هضر ليه على الزواج كيبقي يقول تأكد وكيحس بيه متخوف من جيهتو .. واش لها ددرجة كيبانو مموالمييينش .... عوج شفتو لجنب وشاف على الكوسان هز تيليفونو وحل الكالوغي بدا يقلب فالتصاور عين فطريق عين فتيلي كيطلع تصاور لي سكرينا من الانسطا وحط تيل قدامو فطابلو .. عين فطريق وعين فملامحها وابتسم بجنب شفايفو ....

جود : مسسطييين هادو ... انا باقي ليا نزيد جوج شوفات ونجيب العدول هوما تيقولو ليا تأكد ...

ضحك كيعوج فراسو وشد طريق القصر .. غير وصل كتب ليها مسج ...

جود : دوزي لبيت جيبيلي تيشورت و نزلي عندي راني حدا الخيل ....

صيفط الميساج فالواتساب بانليه غير شرطة هو يعوج شفتو علاش طافية هادي تيليفونها !!..

رجع تمشى جيهة الاسطبل يلاه غيهز تيلي يعاود يصوني عليها وهي تبان ليه تما ... حيد تيلي من وذنو وصغرر عينيه فشنو كيشوف هو يلمح دخان طالع من جنبها وهي عاطية بالظهر متكية على السياج كتفرج فالخييل كايمشيوهم الخيالة .... وبدا يقرب عندها شوية بشوية تابدات توصل ليه ريحة الحشيش ....هو يعلي حااااجبو

جود : بييلساااان !!!!!!!!!

ضارت عندو بزربة مخلوووعة هو يطيح جوان من يديها وبدات تسرط فريييقهااا

بيلسان : ( بببخوف ) جج جوود !!!!

جود بدا تايقرب عندها خطوة بخطوة مامستوعبش كيحاول يكذب عينيه ... وهي غير كتسرط فريقها ولااات حمرة ومزيرة على صبعانها فقبضتها من هاد الموقف المحرج لي بانت فيه قدامو ... وهو قرب لعندها ونزل عينو لارض لجوان لي طاح من يديها وتحنى هزو بجوج صبعانو وهي عينيها قربو يبكيو بالخلعة ... بقى يشوف فيه ويشوف فيها

جود : شهااادشي !!!!!

بيلي بدات غير كضور راسها بلا كلها كترعد .. هي عارفة جود مزيان وعارفة كيفاش كان كيتصرف ملي كيشوفها كتكمي وشحال مكانش كيعجبو الحال ولي خالعها دابا هو معارفاش هاد جود لي قدامها كيفاش غيتصرف .... وسرطات ريقها وشافت فيه بنبرة ترجي

بيلسان : اا ..آ .. خر .. مرة .....

جود : ( قرب ليها ودنو فقمة عصبيتو ) نعااام !!!!!مااااسمعتش ؟؟؟؟

بيلسان : ( رفعات شوية من صوتها ) ق .. قلت .... قلت ليك ... ا اخر مرة .. و والله ...

جود : ( بعد عليها راسو وبقى يشوف فالجوان فيديه كيضورو بين صبعانو وطريقة لي بارماه بيها وشاف فيها ) نتي لي صايبتيه !

بيلسان : ( كتسرط فريقها وحركات راسها بآه ) غ .. غ .. غير .. اخر مرة والله ...

جود عض على شفتو مدة كيحاول يتحكم فعصبيتو ويحاول يستوعب هاد الصورة ويلاقي بيلسان مع الجوان دالحشيش .. ورجع لاحو فالبوبيل لي فجنب السياج وشاف فيها داير يديه بجوج فجيااابووو وملامحو تتخلع ...

جود : اهاه ... وشكون كيجيب ليك الحشيش!!!!!

بيلسان : (كتحس راسها باقي ليها شوية وطيح من هاد تخنزيرات لي داير فيها ولي ابدا مامولفاهمش فيه بحالا واقف حداها شي واحد مكتعرفوش ) غ .... غ غير الصحاب .. ك .. فففففف .. ج جود شوووف ... راه كنحاول والله .. من .. منهار عطيتك وعد شحال هادي راني كنحاول نقطعو .. ولكن راه صعيبة نقطعو فخطرة وحدة ....

جود : شحال هادي خليها لهيه فالجنب انا مكيهمنيش شنو كان شحال هادي .. انا جاوبيني غا على قد أسئلتي .... قلتي الصحاب ! فين هاد صحاب؟. .هنا ولا لهيه ؟؟

بيلسان : ( سرطات ريقها وشافت فالارض عارفة غيمشي عقلو لبعيد دابا ورجعات علات راسها فيه مستسلمة لمصيرها لي دارتو بيديها ) لهيه

جود : كتكيفو جميع !

بيلسان : (بزربة جاوبات بخلعة ) لااااا .. غ غير كيبيعوه وصافي ...

جود: وسيم تاهو !

بيلسان : ( وسعات عينيها ورجعات سرطات ريقها مخبية عليه باش ميضربو ) لااااا .. وسيم معارفنيش تانكمي ...

جود : را تتكيفي ابيلسان .. مكتكميش ....( بيلسان نزلات راسها ) شكون عارف هادشي !

بيلسان : تاحد .... غ .. غير نتا دابا ....

جود : عارفة لا ساقو لخبار واليديك ولا خوتك اش غيوقع ولا انا لي نقوليك !

بيلسان : ( غمضات مدة عينيها تاتعمرو بالدموع وشافت فيه ) جوووود راه والله مالخاطري ..حتى نتا كتاخد الحشيش وغتكون فاهمني .. كتجي واحد المرحلة دالمراهقة كنكونو ضعاف وكنجربوه وكنبقاو حتى كنتبلاو .. ولله تاكنحاول نحيييدو ومكنقدرش ..

جود : اااه ... دابا نبغي نفهم من كلامك .. المراة لي غنتزوج بيها ولي غندير معاها وليدات وغتربيهم ليا ... كتقاد جوانات حسن مني وتتكيف ... ( بيلسان طلعات فيه عينيها موسعاهم ودمعة نزلات ) امممم .. يعني المراة لي كنتسناها انا تجي باش على ودها نقطع البليات ديالي ونبداو نقييين ... غادير معايا جليسة ونبرمو جوانات بجوج بينا ونطلقو الروج فالمالا .... ونربيو الولاد .. ياك !

بيلسان : د .. دابا اش هاد الهضرة كتخربق عليا بها !!! اش هاد العقلية هادي

جود : ( كيهضر مبرد ) ماعجباتكش هاد العقلية !!!!!

بيلسان : ( نزلات دمعة اخرى ومسحاتها ) جود ضرب و سب وغوت ... ومتجرحش بحال هاكا

جود : علاش غانضربك ونسبك .. اشمن حق عندي عليك نهز يدي ! واش باغا لي يسلخك ابيلسان ؟ باغا لي يشوفك كتكيفي يجبدو من فمك يضرب معاك جبدة ! وكنت تمشي عند شي واحد ضارب الراسطا لشعرو وضارب حاجبو وهاز سيف مورا ضهرو ..... علاش جايا عندي انا

بيلسان : علاش نتا مكتكميش !

جود : اه كنتكيف ... ولكن تكيفي نت لصقك مع الحيط .... الى كنت كنبغي شي وحدة راه غنبغي ليها مصلاحتها .. الى دعدعت صدري انا وغلاض صوتي وزراق فمي راني راجل ... الى درتي نتي هادشي اش بقى فيك مانبغي ! مغتبقايش الفيونصي ديالي راه غتولي عشيري داك ساع .....

بيلسان : ( شافت الارض صدرها كيطلع ويهبط ورجعات شافت فيه ) انا ماشي شمكارة اجود .. بلية شديتها فالمراهقة كنحاول نحيدها ودايرة جهدي كامل وغنحيدها ... ونتا فكر فيا كيف ما بغيتي مكيهميييش انا عارفة راسي اش كنسوا ... ديجا اش قلتي راه كافي ووافي ... والى مكنتيش باغي مراتك تكون كتكمي .. سير جيبها من الجامع ...

خلاتو وجات ماشية هو يشدها من دراعها ورجعها بزربة لبلاصتها تاتلتخات مع السياج وزير على سنانو

جود : ووووقفي مزال ماساليت هضرتي .... توصلي نتي لبنت الجامع ! توصليييها ؟؟ ... كتستهزئي بدينك !!! ... ( علا ليها راسها بصبعانو ) علي راسك شوفي فيااااا ( علاتو فيه وعينيها حووومرر ) جااوبي بلا ماااديري عليا فيها الدراما دوالو ... ( بيلسان بقات غير كتشوف فيه ) فييغج ولا لا!

بيلسان : ( دفعات ليه يديه ورفعات صوتها ) وااااقلة عييييقتي لااا ؟؟؟؟؟؟

جود : ( شدها من دراعها مزير عليها ) ششششش ... ديري بووووق وعيطي على مالين الدار يجيو يشوفوك تتكيفي .... ملي وليتي تضربي الحشيش وتبرميه حسن مني وتجلسي تكيفي وتلوحي دخان من نيفك اشنو بقى !

بيلسان : ( بعصبية ونبرة البكاء ) ماااشي لديييك درجة اجووود ...

جود : بلا ماترطاي عليا دابا .. سؤال واضح جاوبي .. كنت انا قوليها كان شي واحد اخر قوليها .... غا هضري دابا لي درت راه درتوووو .. غاهضري نعرف بعدا غا واش عطيتي كولشي ولا باقي فيك شوية دالضو ....

بيلسان : ( نترات يديها منو ) احححترم راسك .. ماعندكش الحق اصلا تسول سؤال بحال هدا ... باقي شي واحد كيسول على الڤيغجينيطي ! انا قالو ليا نسيتي غير فترة من حياتك ماشي رجعتي للتمانينات ....

جود : اسييدي انا من التمانينات انا متخلف ... انا باااااغي نتزوج وفليلة دخلة لقى مرتي فيييغج انا لي نسيل دمها ... انا مغغغغريبي بببلدي جاي من الخمسيينات كااااع ... مزيان هاكا !!!!

بيلسان : ( قربات عندو طلعات فيه راسها كتشوف فعينيه ) اشنو كتحاول تبين ليا بهاد تصرفات دابا هم ؟؟؟ كتحاول تكرهني فيك باش تهرب من مسؤوليتك ؟ واااااعفييييتك ومادايراش ليك السيف فالرقبة اولدي عمي .. وماشي انا لي قتلييييك زيد تزوجني انا عفييييييتك انا مواقفاش على زواج ... لاكنت قبلت بيك .. والى كنت كنحاول نولفك والا كنت فررررحت بخطابتنا وعجبني الحال ... حييييت تانبغيييك .... وحيت دوزت معاك عااام عمرني دوزتو فحياتي وعمر شي واحد حسييت معاه كيفما حسيت معاك نتااااا ( بداو دموع كيسيلو ) اااه .. كنكمي وكنتكيف وكنشرب ودددرررت علاقاااات حتى انا لي مطولتش فيهم حتى تلتيااام حييييت نتا ( ضربات لصدرو ) معععشش ليا فراااسي .. عييت نشوف حياتي ونبعد علييك ماااقدرتش .... الى كنت كنتكيف راه اول مرة دددقتو .. دقتو عندك نتااااا .... اول مرة غنشم الحشيش ونعرفو عرفتو عندك نتا .. بغييييت الحشيش حيت نتا كتبغيه .. بغيييت الحشيش حييت ريحتو شميتها فييييك ... كنت صغيييرة اجود صغيرة لدرجة كنتي نتا هو القدوة عندي فكوووولشي .. كميتي نكمي شربتي نشرررب نعستي نعس فقتي نفيييق .. عليييك حليييت عيني .... والبلية راك عارفها صعييبة كنحاول ومزال ماقدرتش .... واش انا غنبغي فنظرك نكون ام ويشوفوني ولادي كنكمي !!! مربية برا ايييه ولكن راه تانا مغربية ماشي غيييير نتا ..... و واخا تكون جاي من الخمسينات مكاينة حتى شي مغربية تررضى خطيبها يسولها واش نت فيييييغج .....( كتسمح دموعها لي كينزلو وهي كتهضر بعصبية وججها ولا حمررر ) كنبغيييك اه .. كنموت علييييك كاع .... الناس عندهم اهداف وانا هدفي غا امتى نكونو تحت سقف واحد ولكن هادشي مكيعنيييش غاتمرمدني كيف بغيييييتي تانا ينت الاسمايعلي وراه نقدر نجفف بيك القصر بهضرة وحدة مني تخليك ليل كامل بلا نعاااس ...... مدرتش عليك السيف وقلت ليك رجع ليا .. ومدرتش عليك السيف وقتليك تزوجني .. نتا لي بغييييتي ... نتا لي اختاريتي ونتا لي اقترحتي ماضربك حد على يدك .... خزنتها ربع سنين وقادرة نزيد ... ولكن خليك فعيني جود لي كنبغي بلا متبقى ضيع صورتك عندي بحال هاكاااا ... وحتى الى كنت بصح ماشي فيييغج او شي نهار فرطت قررت نديفيغجا ..... راه غتكون غيرررر نتا .. حيت ماعمر شي ولد المراة قدرت نعطيه نيييتي كيما عطيتها ليك نتاااا .....

دفعاتو لجنب وزادت معصبة وهو بقى كيشوف قدامو فلخر ضرب السياج برركلة و الخيالة كاع تلفتو مخلوووعين وبقى كيمشي ويجي ويززززفرر النفس السخوووونة ......

فلخر زاد مشى لباركيينغ ركب طموبيلتو وخرج .....

جناح قسم ...

خرجات من الدوش ببينوار پينك قصير وجامعة شعرها ففوطة وجها مزنك حميمر وتمشات حتى لفين كاينين برودوياتها هزات الحليب المرطب وجلسات على الكرسي ديال السرير كتدهن فرجليها وترطبهم وهي تفكر لوؤي وتلفتات موراها هزات تيلي الشخصي كان على السرير وحيدات المود آفيون ودخلات ديريكت لنمرة لوؤي بدات تصوني عليه تاجاوبها كان فطموبيل صايك ...

لوؤي : وي قسم ..

قسم : لوؤي ؟؟؟ صافا !!!

لوؤي : صافا اختي صافا .... ماديريش فبالك ...

قسم : فينك نتا دابا

لوؤي : مدوز الوقت ...

قسم : واش جيتي لدار ولا لا

لوؤي : سي جيت وعاد كيف كان معايا جود .... متخافيش طو ڤا بيان

قسم : داك خينا فيناهو دابا

لوؤي : فين مابغا يكون يكون يبعد غير علينا

قسم : دابا قول ليا اش وقع آلوؤي

لوؤي : والله مكاين شي حاجة .. قلل شوية احترامو على قدس خدا اش كيستاهل ومشا فحالو .. هذا مكاين

قسم : اويلي على قلل احترامو على قدس ؟؟؟؟؟ اش دار ليها

لوؤي : كون دار كون راه سورة ياسين كتقرا عليه دابا ... مهم مديريش فبالك ....

قسم : تاتجي لدار وعاود ليا نيشان ماتبقاش تقطر عليا

لوؤي : راه تما جود يقول ليك والله مافيا لي يجي ليوم باغي نجلس شوية بوحدي ...

قسم : مممم داكوغ .. على خاطرك .... مهم الحمد لله راك صافا ...

قطعات عليه ورجعات حلات كتشوف لبواط ميساجغي ديالها وهي تلقى جوج دليزابيل من اصيل فلابواط ودخلات لي مساج لقات ماردش عليها .... وتنهدات ... اول نهار فعلاقتها معاه تقلبات الدار مزال مالقات الوقت تاتفرح على خاطرها .... بدات كتصوني عليه وحطات تيلي على الطابل وبدات كتنشف شعرها بالفوطة ... تاسمعات صوتو

اصيل : على سلامة ...

قسم: اصيييل ... صباااح الخير ... والله حتى يلاه فقت

اصيل : اش وقع معاك ؟؟ قريت مسج ديالك حاولت نصوني لقيت تيليفون طافي ...

قسم : طفيتو على ود الخدمة مكان فيا ماندير شي حاجة .... غير ولد عمي البارح دابز مع واحد السيد هنا فالدار وترونات عندنا شوية الدنيا داكشي علاش ...

اصيل : ياك كولشي لاباس !

قسم : وي الحمد لله .. يالاه هضرت معاه قدرت نفهم من هضرتو بلي دازت على خير .. ولكن مزال تانفهم من بابا وخويا .... فينك نتا !!

اصيل : فالدار ... كنلبس باش نمشي لداك ريسطو ... الى مغتقدريش تجي نأجل المشية لتما حتى تكوني معايا ..

قسم : لا نجي .. ديجا باغا غير نرتاح شوية

اصيل : وي داكشي علاش قلت يمكن متقدريش تجي كتباني ليا عيانة ...

قسم : ( بابتسامة وشافت للجنب مدة ورجعات شاف لتيلي ) راه كنرتاح معاك ا اصيل ....

اصيل : ( كان كايلبس تيشورت هو يحبس وضحك تاتسدو عينيه غفلاتو ) وااايلللي .... !!!!

قسم :صافي ماتنفخش بزاف ...

اصيل : هههه ... ( نزل التيشورت على صدرو ) عصبتي جدمي صراحة ملي لقيت تيليفون طافي ولكن صلحتيها ماااااااعليكش .....

قسم : والله مادرتها بلعاني ... لقيت راسي هاد صباح بغيت نعس ومابغيتش يصدعوني صفاء كل مرة فارعة ليا راسي اجي كاين تصوير اجي كاين هادي كاين هدا .. صافي بغيت نرتاح ...

اصيل : وديرري جوج تيليفونات خلي لينا واحد نعرفو غير اش واقع معاك حيت دبصح تخلعت ..

قسم : وراه عندي جوج وصفاء عندها تا نيميغو بيغسونيل ديالي

اصيل : شكون هاد صفاء تاني

قسم : البنت لي شادا ليا الاجوندا ...

اصيل : وقوليلها تكتب تما راه واحد اصيل كيتسناك تلحقي عليه لريسطو باش متنساي ....

قسم : نتا متحتاجش تكتب فالاجوندا غير تهنى ... اسيدي نديرو على قبللك تيليفوووون ثالث وصوني فيه نتا .. مزيان هاكا !

اصيل : ( نازل فالدروج ) انا متفهماتش ليا البنت منهار عرفتها وهي تصبح عليا هنا فالدرب على تمنية دصباح بحالا غندير ليها السوايع فالماط ( قسم كضحك) ونهار درتها ديالي وبغيت انا نعيط عليها طفات تيليفون هي كاع وبغات تنعس تالوحدة وناضت عندهم روينة فالدار .. هذا كامل نحس هاا !

قسم : هههههه والله حتى قلتها مع راسي قبيلة هههه عمرني ماطفيت تيليفون ههههه

اصيل : هههه وااااشتي ... تسناي اقسم خليك معايا .... ( دق دقة وحل الباب على سلمى لي كانت ناعسة فسريرها ورجلها قدامها محطوطة على مخدة وشادة تيلي ) سلمى غنخرج .... داك دوا هو هاداك !

سلمى : لا هو هاداك .. راه غير عذبتي راسك مبقاتش كتحرقني بزاف ( ضحكات ) قوليا فوقاش غتخرجني فالطموبيل جديدة ؟؟ ياك قلتي ليا البارح غتخرجي ليوم

اصيل : تالعشية دابا عندي مايدار ...

سلمى : صافي نتسنااااك والله تاااقنطانة ...

خلاها وسد الباب ورد تيلي لوذنو ماشي باتجاه الباب وخرج

قسم : اصصصيل !!!! شريتي طموووبيل ؟..

اصيل : ( حلها وطلع ) اه البارح ...

قسم : هاااء !!

اصيل : ( ديمارا وتيلي تأكتيفا مع البلوثوت وبدا الصوت كيتسمع من الطموبيل وحط تيلي خارج من الدرب ) مالكي ..

قسم : ( بدات كتفكر هضرة خوها وهي تنطق ) منين جبتي الفلوس ا اصيل !

اصيل : كانت عندي شي حاجة اقسم ..

قسم : متأكد !

اصيل : واش قالوليك ماعندي مناكل ولا كيفاش

قسم : لا عارفة ماشي لداك درجة .. ولكن عارفة تاني الدخل دالصيدة مغيجمعش ليك بزاف اولا ! واش سلفتي من داك السيد لي قلتي !

اصيل : راه كان عندي فالبنكة .. الدار لي خلا الواليد وبعناها وتحولنا لهنا بقى منها شي شوية دالفلوس راني محرك بيهم ....

قسم : ( علات حجبانها عاد فهمات ) هاااكااااك

اصيل : وشنو كيسحابلك .. خدام فالحشيش ههه ..

قسم : ومنعرف كولشي طاح فبالي .. عارفة ماشي منحقي نسول هاد الاسئلة ولكن كنسول حيت خاااايفة تكون كادير شي حاجة تأدي بيها راسك وصافي

اصيل : وتانا راه مامنحقيش نجاوبك ومكنجاوب حد فمسائلي المالية ولكن كنجاوبك باش نت تاكدي بلي مكاااين تاااشي شي حاجة وكنشرح ليك ملفوق ... مزيان !

قسم : ههه( حمارو خدودها عجبها الحال ) اصيل فخبارك !

اصيل : شنو !

قسم : غاتزيد شوية غنولي نبغيك

اصيل : هه ! شحال كاع هاد شوية باش ناخد عباراتي ....

قسم : مانعرف ....

اصيل : وهانتي غير ملي تبغي .. بغي غير بشوية راني على قد الحال هههه

قسم : هههه خليني خليني نلبس .. معاش بغيتي نجي عندك

اصيل : انا راني فطريق دابا ... سيد درت معاه ( شاف لساعتو ) من هنا نص ساعة يلقاني تما .. ناخد سوارت ونتسناك تاتجي

قسم : صااافي داكوغ ... عرفتي متشوقة نشوووفها من داخل ...

اصيل : هانا نتسناك تما متعطلييش ...

قسم : نوووو .. ساعة هاكاك انا معاك ... بينما لبست وفطرت

اصيل : اجي فطري معايا ...

قسم : هههه وتديني لداك مقشدة

اصيل: نديك فين بغيتي ...

قسم : هههه شوية وانا معاك ....

قطع تيلي وكمل طريقو وهي مشات لدريسنغ شافت السيريات لي طلعو ليوم كانو رسمييين حيت فكرو غتمشي لخدمة ...

ومشات كتقلب بين الحوايج تاهزات سروال بويفرند دجين فلون گري وطوپ بيضة عنقها مفتوح كتلبس فوق الكتاف عندها خيوط فالصدر ولاستيك من تحت ويديها قصار منفوخين وتوبها حريري ... وجبدات من البواط صبادرين بيضة اديداس بدات كتحيد ليها الساشيات ديالها وجلسات على الكرسي لبساتها مع تيقشرات قصار... تامشات تهز صاك ودارت منو بناقص ودازت ليزاكسيسوار ديالها اكتفات بالساعة لي جاب ليها جود وفرقبتها خلات السنسلة لي جاب ليها اصيل ونشفات شعرها بلا متصاوبو بقى على طبيعتو ديجا عندها رطب وطلقاتو على كتافها ولبسات كاسكيط بيضة اديداس .. تلفتات لطابل ماكياج ديالها يلاه غتحل المجورا وهي تلقى راسها ماعندها خاطر ليه و بغات يبقى وجهها منفس اكتفات غير بكلوز و وايكرون ... وبارفانها ... وهزات سوارت طوموبيل وتيليفوناتها وخرجات لكولوار طلات من الشباك لتحت كان القصر خاااوي ومكايناش الهضرة .... مشات باتجاه جناح واليديها وهي تبان ليها الخادمة جايا فالكولوار جارا كروسة فيها مواد التنظيف

قسم : ختي واش مكاين حد !

- بونجوغ مادموزيل قسم .. موسيو اسد ومدام لامار مكاينينش .. كاينة مدموزيل قدس و موسيو وسيم فجردة لتحت ومدام اريج راها مع الحاجة فالسويت ديالها .... ومادموزيل بيلسان حتى هي فالسويت ديالها ...

ابتسمات ليها ومشات وقسم دازت لجناح ختها حلات الباب وهي تبان ليها ناعسة ففراشها مهبطة ريدوات .. خلاتها ومشات باتجاه جناح رقية حلاتو وهي تبان ليها رقية واريج هازة بيان وكيتغداو ...

قسم : صباااااح الخييير

رقية : هاااا قوييييسم

اريج : ( ضحكات ) صباااح نوور .. دخلي احبيبة ....

سدات موراها لباب ودخلات سلمات عليهم وكلسات على تكاية دالفوطوي درقية

قسم : الناس كيتغداو وانا باقي تامفطرت

اريج : والله حتى عجبني الحال ملي عرفتك صبحتي ناعسة يابنتي رتاحي ليك شوية

قسم : ههه اانا والله تادرت نعسة دالغدايد طفيت التيليفون وجبدت عليها ... جدة كيف صبحتي ؟

رقية : لاباااس ابنتي هاااحنا كنعديو

اريج : جبتيلها الماكلة غابسيييف.. قطعات الماكلة نييشان .. قلت ليها اويلي حنا لي بناتو وعندنا غير هو ومدرناش حالتك

قسم : ايييهااااي اخالتو اريج الفراق راه فراق وصافي واخا تكوني دوزتي معاه غير سيمانة .. ولكن اجدة خاصكي تعرفي الحياة كتطير وهو مغيبغيش يوشفنا موقفين حياتنا .. شفتي مسكين شحال كان عزيز عليه يشوفنا ضاااحكين وفرحانين .. خاصنا ملي نتفكروه نترحمو عليه

رقية : ( تنهدات ) الله يحرمو ويوسع عليه .. بلاصتو بقاااااات ابنتي .... بقااااات كبيرة

قسم : ( عنقاتها وباستها ) هاحنا معاك شوفي تبارك الله راه نتي لي مزوجة حق الله .. تزوجتي بجدي اللول جبتي ماما هاهيا جابت ليك ترييييكة وتزوجتي بجدي التاني وها خالتو رتاج وخالتو اريج تاهوما جايبين ليك تريكة هههه شوفي شحال خلاو ليك هه ... قولي الحمد الله راه كاينين اجدة كيموت راجلهم وييببقااااو بووحدهم وكيلوحوهم ولادهم لدار العجزة سوليني انا اش كنشوف فالجمعيات

اريح : الاطيييييف

رقيو : اوا الله يهدييييهم .. والله يصلحكم حتى نتوما تانفرح بترييكتكم تانتوماااا

اريج : قسم زيدي تغداي معانا

قسم : اويلي يلاه غانزل نفطر منقدش ناكل شي حاجة ثقيلة دابا غنشرب غير قهوة وشي حاجة خفيفة وغنخرج

اريج : خدمة ؟

قسم : نوو بغيت نبدل شوية الجو وصافي ... حقا لوؤ ( يلاه غتهضر وهي تغمزها اريج حيت رقية مفخبارها والو ) ااااه .. بغيت نقول خصني نمشي ( وقفات ) يلاه تالعشية ...

اريج : سيري ابنتي تاحنا شوية وغنمشيو

قسم : فين غتمشيو ؟

اريج : غنمشيو انا وجداتك لدار ... ونبداو نتنفسو شوية تا حنا .. و واليديك تاهوما خصهم يرتاحو راه محدنا مجموعين ماحد ناس غايبقاو يتكبو راه مزااال جايين حسابتك سالينا ...

قسم : اويلي اخالتي تاهادي هضرة ... راه داركم هادي ... بقاو موونسيينا

اريج : عارفين وراه هنا كبرو ولادنا ولكن عاود ابنتي خاصنا نتنفسو شوية من الضياف ورتاحو شوية ...

رقية : خليييها ابنتي ... باش الولاد يتفرقو شوية ..... لا بقاو الصكعين هاكا خيطيي بيطي فدار وحدة ماحنا فربح .. انا لي قلتها لييييها ... خلي الدراري يتفرقو شوية راه كيدخل غاشيطان ...

قسم : شنو زعما جود وبيلسان ؟ وتانتي اجدة راهم بعقلهم ... والله الى غير بغيتو تخويو علينا .... وبقاي اجدة نت بعدا

اريج : وتخليييني بوووحدي هههه

قسم : هاء ! ياك معاك عمي يونس و وولادك اش بغيتي

اريج : زياد راه غادي فحالو غذا ....آجاب مايسخيني بهاد الفارة ( باست بيان ) جنان عيطو ليها من الخدمة ومبغاش يخليها تمشي بوحدها

قسم : والى درنا شي حاجة لجود وبيلسان ؟

اريج : كاع لابغينا نديرو ليهم شي حاجة وصدقات شي حاجة بصح ودارو الطايلة ..... حتى تفوت ربعينية .. وراه دابا يرجع ... اياد شديتو غابزز يبقى معايا تاهو باغي يمشي ... كون مشافش زياد غيمشي يقابل شوية الخدمة كاع ميجلس ... والحاجة تاني راك عارفة العزاية كيجيو لعندها وراه باقين مساليناش العائلة وباش نفرقو شوية الدرك راه باباك هنا وماماك راه عياو مساكن الله يحسن العوان واش ماحيلتهم لولادهم ماحيلتهم لضياف .. صافي الله يخلف الله يجعل البركة ...

قسم : وااانتوما تعرفو ....

رقية: اوا اجي نت اصوبيصة متعرفيش طريييق .. اجي نت ....

قسم :مادويش معايا دابا اجدة مصدقتيييش كديري الفرز بين بناتك ختاريتي خالتو اريج وخليتي ماماا

اريج : ياااااك .. تاكلي وتنكري .. شوفي شحال وهي معاكم ... ملي داتتها اريج واحد شوية ولات فرزيات ...

قسم : ماما متخليهاش اصلا

اريج : ماماك غنهزها تالعندها للبيرو ونقوليها هااا مك شوفيييها والله يعاااااون ... سيري الله يجييك على خير ... راه ماماك ولات باغا غافين تشد باك بجوج بيهم يتارحو شوية ... كون تفهمو راسكم نتوما وتهزو باكاجكم واجيو لعندي يبقاو يرضيو عليكم حياتكم كاملة ههههه

قسم : هههه والله مكذبتي .. مهم راه نتوما تعرفو واخا راااني عارفة هاد المشية كاملة والله ماعلى الضياف غا على قبل بيلسان وجود هههه خايفييين من شي بيبي يجي قبل العرس ياك هههههه

رقية : وحسابتك ميديروهاش

قسم : اممم زعما غاتشدوهم لابغااااو ..الولاد راه تايدارو تا فطموبيل غااا ربع ساعة غايقضيو الغراض ......

رقية : ( ضرباتها بمخدة ) سيري الله يقلل حياك كيفك كيف مك ... قالوها .... الحنش ميولد غا مطول منو ....

قسم : هههه مال ماما انا جابتني قبل زواج !

رقية : مك كون غفلت عليها غا شوية كون راه مغتبانش ليها الورقة دالعدول بالكرش ... كنت نجرها بحالا كنجررر القط عالحسييرة وهي غااا لاااصقة فيييه كانت تمووووت عليه .. ضور وتنننعق

قسم : هههههههه وماااالها راه عرفات تختااار

رقية : ايييه وما هااادي .. ( شافت عند اريج ) هادي راه فاش تزاديتي نت فالباطو راه كان يييزنكها كانت تجي عندنا حححمررررة وحسابتها رقية مكتفهماش ..وكانو لا ورقة لاااا جووج

اريح : بوراااقييينا قالاك ... راه غا مكنتش عارفة ..

قسم : ههههههه لازدت معاكم شوية غانصدق مخلية شغالي وانا مزروبة .. .باااااي ( باست بيان ) بسلاامة كتيييكيتة

اريج : ممم ياك قلتي باغا غادوري .. وليتي دابا ( لحناتها ) مزرووووباااااا !!!!!

قسم : ايهديك الله اخالتو نعيا نزرب منوصلش لزربتكم نتوما ههههه بسلاامة ...

خلاتها ونزلات طلبات منهم يجيبو ليها قهوة وشي حاجة حلوة لطموبيل ... نزلات باتجاهها وومات بيديها لشيفور يبقى بعيد تصوك هي ... وركبات تاكدات من كلشي وراقها تما وبقات كتسنى كضرب بصبعانها على الفولون تاجابو ليها قهوتها وكيك ... وديمارات ديريكت باتجاه داك ريسطو ضاااحكة كتاكل وكتصوك .... وفرحانة لي غتلاقى باصيل تنسى معاه شوية الدنيا .....

لامار فلاور ...

خارجة من اجتماع بلباسها الرسمي .... كتبتسم للجميع حتى وصلات لمكتبها ومشات تلاحت على الكرسي كتعوج فعنقها ... شافت لسويعة فمعصمها لقاتها قرب وقت غداها ... وحاسة بجوع ... يلاه غاتهز تيلي تعلمهم يدخلوه ... وهي تحل الكاتبة الباب بابتسامة وموراها تبعوها اريج ورقية لي باقا بلباسها الابيض ولامار وقفات مبتسمة .....

لامار : مرحباااااا ... شوفو شكون شرفني هههه ( مشات بيهم لصالون لي اونفاس مع المكتب ) والله الى البيرو نور بيك ( باست راسها ) اماما الحبيبة

رقية : ( جلسات على الكرسي كتشوف ) تي بدلتي الصباغة !!!

لامار : ( شافت مع الحيوط ) شحااال هادي .... بغيت نفتح شوية ... اريج كيصبحتي ؟

اريج : لاباااس احبيبتي ...كنا ماشيين للدار وقلت ندوزو نشوفوك هو اللول

لامار : صافي لي فراسكم فراسكم

اريج : والو مكاينش النقاش ههه

رقية : اوا ابنيتي راحنا غا فدورة والحمد الله كلكم بحديدكم بقزادركم مابقى حد بعيد على حد ... غا هو تاني الراجل ديالك يبغي يرتاح شوية ومنها نيت ينقصو الضياف

لامار : اسد نتوما راكم عارفينو عندو هاااانية ... بالعكس مغيعجبوش الحال الا شافكم مشيتو

رقية : اودي راه نكلسو ولكن راه مغيخلينا حد ابنتي والولاد كتار والعين كاينة و كيحضر الشيطااان .. عييييتو تخبعو هاو فضحكم يونس ... تخبعو على مكم يااااك

اريج : ( تنهدات ولامار كتشوف فيها ) كنت طالقة بلوتوت فطموبيل ويونس مكيسكتش فركع ليا كولشي ....

رقية : وشحاال قدكم تخيبيو .. واش انا اتوريوني فولادكم ؟ مكنعرفوهمش .... ياك ديما كنقولها ونعادوها وكتردوني غا شارفة وخرفات ومابقات تعرف .. العييييين كاينة .. ومدكووورة فالقرآن .. ملي كيتجمعو الولاد راه غانتوما تعينوهم الشيطان كايحضر وتوليو فالمصايب ... مزياااان العائلة تجمع ولايني بالحدووود .. بالقياااااس

لامار : والا مشينا على هاد الاساس اماما راه تا واحد ميعرف شي حد

رقية : واااافطمزهرا .. دراري كبروووو ... دراري ماشي نت دابا لي غتجي تورهيم ولاد عمامهم راه يتلاقاو على برا ... دراري كبببرووو ولد رتاج وولد حياة وولد اريج عزارة و نت عندك باقا البنت صغيرة ... هاو جود عزري و اريج عندها البنت .... غتبقاو نتوما طالقينهم تاتوليو فشي مووووصيبة تاني ونتوما عارفينهم كلهم عوافي مايقد عليهم غاليخلقهم ! نتوما لي والدينهم شهموكم ... وليدي اسد كان بهز قبيلة زماقد عليهم ......ياودي راني كنهضر مكتسمعولييشاااي

لامار : الحاااضي الله اماما

رقية : ايييه الحاضي الله ولايني جبدو ودنيكم تانتوما ...

لامار : واماما تانتي بحالا ساكنين عندنا راه غير حيت الكنازة ماجاتش يخويو الدار .. راه كنطلبوهم لدوا ومكنلقاومش .... شي ايام كيقتلني القنط كلها فخدمتو والله ماتشوفيهم تولي ترغبي عليهم ...

رقية : وتانا ماااقلتشاااي ... قلت بالقياااااس وبالقااااعيدة ... ايييه الجيل كيتبدل ولايني علاش تربينا وعلاش طلعونا واليدينا منلوحوش كولشي مورا ظهرنا راه حنا مسلمين اولا .... ولاااادكم را كبرو ... كاع لامكانوش البنات راه غا بيناتهم ينوض الصداع راه شيطان كااايحضر .. شيطان عزيز عليه يفرق المجااااامع آآ بنااااتي وسمعووو ليا اش كنقوليكم راكم توقفو على كلامي ...

لامار : وصااافي اماما تانتي ... الله يحححفظهم والله يخليهم مجموعين ..

اريج : خلينا دابا من هادشي اماما رقية ... عندك الصح ايييه ولكن حنا راه ربيناهم مجموعين ... فالمناسبات هاكا راه دار اسد هي فين كنتجمعو .. مانجيوش نبدلو كولشي ... ماااعلينا دابا .. ( شافت فلامار ) دزنا على ود داك المسااااخط لي عندنا لي شي نهار غيخرج ليا بسبتهم شي شيييب فشي لون مزال مخرجش .... واش هضر معاك جود نت ؟ شنو تحت راسو

لامار : هضر وما هضر ... الهضرة قطرها عليا بحال الگوطاگوط ... قالك تانكلسو بالعقل ونهضرو .. اسيدي قااالك هو قراااار وسالاا وشاور بااااه وهضر مع ختتوو .. باغي يتزوج ...

اريج : داكشي لي قالت ليا بنتي ..قالك طلبها للزواج اسيدي هبلاتني درت يدي فوق راسي كنشوف

رقية : لي هرب لزواج هرب لطاعة .... غا هو هادشي يداكرو فيه الكبار ... ياك هوما باغييين .. اوا يتسوخرو لور

لامار : يااااماما ياا ماما واشمن كبار .. هوما لي ولاو يفهمو وهوما لي ولاو يقررو .. حنا راه ولاو غير كيجيو يعلمونا .... اااشمن كبار بقاو .... انا بعدا وليت مكنجيب الخبار تايكون قرب يضضضرب الفاس فراس عاد كيجيو عندي اماما ها اش درنا ....

اريج : انا منكدبش عليك الامار .. والو قلبي مامرتاحش .... فرحنا ليهم شحال هادي ووجدنا الخطبة و كولشي .... جود راه ولدي ماشي ولد ختي ... ربيت ولادك وربيتي ولادي ... جود حسن ليها من البراني وعاااارفة راسي بنتي انا مااايصلاح ليها براني .. هاديك مايهدها غير دمها ... ولكن كون كملو على شحال هادي ماشي هو ربع سنين هو ناسي وهي يلاه جات ... تاقالك بسم الله غيتزوجو ...

لامار : نكدب عليييك ... والله ماعرفاه اختي اش كيدير .. ملي قال زواج راه بغاها ..

اريج : شوفي الامار .. جلسي مع ولدك .. هضري معاه ... نت عارفاني مغنهضرش انا معاه ومغنحرجوش ...هضري معاه قولي ليه لاكان داير هاد زواج غير حيت حشمان عطا الكلمة .. قوليليه حنا نسييينا كون مجبدش هو الموضوع ... واش غيدي عليه عمو ؟ كون كان البراني واخا يدير هادشي .. اما حنا راه بحال واليديه ... الا كان باغي بنتي دبببصح .. وقااااد عليها وقاد على عقليتها وطيشها وراسها القاااسح .... ياودي منكملو ليهم غير بالخييير .. ولكن لاكان غاباغي يصلح داكشي لي دار شحال هادي ... غير يرجع لور مافيا مايزيد مييتعدب معاها ... زواج بلا حب راه غا تخربيق لا هي غاتقد عليه لا هو غايقد عليها ..

رقية : كاان زواج شحال هادي ماكنا نعرفوه تاليلة العرس .. ولايني كنا معقلات كنا نتزوجو باش نديرو خيمتنا ونولدو وليدات هاو نكبروهم ونديرو دويرتنا تاحنا ونلمو الشمل ... اما جيل ديال دابا راه هادشي ميعرفوش ليه ... يتزوجو غا باش يعيشو ... هوما لامكانوش غيعيشو كيف قالت اريج عااااايتسوخرو لووور

لامار : عااارفة هادشي وانا براسي يالاه قلتها لاسد قبيلة ولادي لامشفتهمش كيبغيو شي واحد بقلبهم مغنوافقش على زواجهم ... باغاهم يعيشو الحياة ماشي يعيشو على شي هدف اخر ....

اريج : وهانتي هضررري معاه وشوفي نيشان اش تحت راسو .... بليسان عندي مشعووووطة عليه راك عارفاها ولكن لاكان هاد زواج مايكون فيه خييير ... وقلنا ليها حنا لا وباها مبغاش راه مغاتزوجش بيه ... تمشي تنساااه اللهم قضية عوام قلال وتنوض تعيش حياتها ولا تدوز عمرها كامل مع واحد مكيبغيهاش ....

لامار : يكووون خير .... هانتي شفتيني راحنا من هادي لهاااادي .... والله مزال مالقينا الوقت لي نكسلو ونداكرو ... جود راني عارفاه راه جبدتو من كرشي راه الى مبغاش شي حاجة مغييديرهاش .. غيلقى الف سبة ومايديرهاش .. شتي كون مكانتش عاجباه .. والله لاااااطلبها لشي زواج .. غيمشي يطلب السماحة ويهز صاكو ويغبر حتى تمشي .. توريني فولدي ! رااا عاااجباه

رقية : الحاااصول .. هضري نت مع ولدك ... كان باغي البنت نيييييت ومغاايديروش المشاكيل

.. الحلال راه حبو مولانا ... السنة يديروها ... غيجيب الخطابة وتجيو لدار البنت وتقراو الفاتحة ..... متخليوهمش سااايبين والملائكة يلعنو فيكم ...

اريج : تااانتي بحالا حنا غنحكموووهم .... مصاااب غااا متجيش ليا بشي كرش مابقى فين نحط وجهي مع الصحافة كولشي غيسول ... اما لاكان غالبوسان كاع دوزنااه .... ( وققات ) نوضي نوضي اماما راه تعطلنا

لامار : لااااا .. جلسو تغداااو معايااا عافااااك

اريج : والله ماكرهنا .. راه تغدينا عاد جينا دايرة مع الشركة دالميناااج يجيو لعندي تلقايهم حدا الباب كيتسناو راه وصيت غير بيلسان تمشي دخلهم ... جريتها بزز هاديك راه غاتحل ليهم وطلع تنعس .... راك عارفة الدار غبرت عليها خصني نوقف عليهم ...خلييييتك على خير التيليفون بيناتنا

لامار : ماما .. واحد اليومين ورررجعي عنداك ...

رقية : جللسي بعدا شوية مع رااااجلك ... عطي شوية الوقت لولادك وفكي حريييرتك ... هاو تجي مك ... مك معندها فين تهرب هاهي غااا فالدووورة ....

وصلاتهم لباب حتى مشاو وهي سداتو وتكات عليه كتنهد ومشات لبيرو وبدات كتصوني عليه تاجاوبها

جود : وي لامار

لامار : ولدي .. فين راك !

جود : ( كتسمع صوتو كيتعاود جوج مرات بالصدى ) فالكاراج ...

لامار : مزيااان ... اش كادير تما

جود : واحل فالصباغة كنت وقفت فالكنازة ورجعنا نكملو ...

لامار : مزيان ... ماتجيش تغدا معايا

جود : ( كيدوز يدو على وجهو لي عامر صباغة ) والله احبيبتي ماعندي غراااام دالخاااطر ... طااااالع لجد مي الخز .. نعوضها ليك مرة اخرى

لامار : ياااك لااباااس ؟؟؟؟؟

جود : غير مع الصباغة ... كنت باغيها فشكل وطلعات شكل اخر ديرونجاتني شوية وغتضوبل عليا الخدمة .. هدا مكان ...

لامار : اوا الله يعاونك اولدي متقلقش راه هادو هوما الاشغال وريپاراسيون .... صافي ماشي مشكل ... اجي بكري بالليل

جود: ان شاء الله ....

قطعات تيليفون وطلبات الغدا وحلات لبيسي ديالها تكمل خدمتها وكتلقى عقلها غايب غير مع ولادها .. تاتكون خدامة وكترجع تسهى وهي ترجع بدااك الكرسي لور شادة على راسسسها ... بدات كتسوط وحلات المجر جبدات الدوا دارتو ففمها شرباتو تاجابو ليها الغدا ديالها ...

عند اصيل ....

وصل قدام الكاراج .. الشمس كانت قاااسحة وجبد الكاسكيط ديالو لبسها ولبس نضاضرو دالشمس ... عاد نزل كيصوني فتيليفون لسيد لي غيجيب ليه السوارت وقاليه بلي قريب يوصل .. وتكى على الطموبيل مظللة عليه واحد الشجرة وكيشوف مع المساحة لي ضايرة بالريسطو وكيخطط اش يكون فيها علما انها المساحة الصغيرة لي ضايرة بريسطو داخلة فالبيع ... كل شوية يشوف لساعتو تاسمع طموبيل جايا وقلب عينو وهي تبان ليه طموبيل ديال داك السيد لي هو خدام عند هاد الخوت لي غيبيعو ... تحطات كليو ديالو ونزل منها باتجاه اصيل ...

- ياكما تسنيتي بزااااف

- اصيل : ( سلم عليه وقاد وقفتو ) ماشي بزاف تانا يالاه واحد عشرة دقايق باش وصلت ...

- واحد البلووووكاج خطير جيهة التويين هو لي عطلني .. الله يعفو على هاد كازا .. لي على رجليهم مهنيين كتر من لي عندهم الطموبيل ... عمرااااات بالربج دالبااشااار .... ( تحنى لطموبيل جبد سوارت ومدهم ليه ) هااا سوييرتاااات .... هانتا دخل ضرب ضوورة على خاطرك هانا نتسننااااك بشوووية عليك تاتجيبلي سوريتات ...

اصيل : قول ليا ... ( شدهم عليه ) منين مات السيد مولاها .. ولادو مافكروش كاع انهم يعاودوها ولا عاودوها ومصداقتش

- هوما ماشي عاودوها .. ملي مات الحاج الله يرحمو بغاو يكملو عليها كيفما خلاها ... ولكن هو كان تاني عاااامر كريديات ومشاكل مع الناس ... راه كانو بداو فيها شي اصلاحات ... من بعد ماخلاوهمش الناس كايجيو باغين فلوسهم .... قالو باش يتنهناو من صداع يبيعو ويخلصو ليه كريدياتو ومسائلو ويعيشو هانيين .. هوما راه خاااانزين فلوووس مواقفينش عليها بغاو غير يتنهناو من الصداع ....

اصيل : مممم فهمت ... داكشي لي قال ليا المحامي ...

- دخل زييييد ...يلاه

اصيل : لا كانتسنى واحد السيدة مزال

- شي شريكة هادي ! ...

اصيل : ( قلب ليه الهضرة ) بنسبة لاميديطي " الرطوبة" هنايا. ... جاتني بحالا زايدة شوية .. راك عارف ريسطو فبلاصة دلاميديطي مال آفير ....

- لا لااا كوووون هااااني ... هي ايه كاينة شوية راك عارف البحر قرييب ...ولكن الحاج الله يرحمو لداخل مقاد الامور دالتهوية ماعندك مناش تخاف .. حتى الكوزينة لتحت مهوية ومقاد ليها المسائل كامليييين كون هاني .... شوف ماشي كنشكرها ليك .. ولكن راه الموقع واعر .. عرفتي راه الاغلبية دابا ولاو كيقلبو على ريسطو بعاااد على لومبوطياج والصداع تيقلبو فين ياكلو هااانيييين ... وهاد البلاصة راه وااعرة طبيعية هانتا لور الطبيعة كيف كتشوف .. مضيعاها شوية هاد طريق راه قتليييك غادي يصااايبوها ... راه غتكون شفتي البانو لتحت .. ماتجي فين تكمل نتا الاصلاح تاتكون طريق نااااضية .... واش باغي ديرها بار ريسطو ولا تبدل ليها الستيل ! كانو جاو قبل منك بغاو يديرو صال دالافراح وماتفاهموش فالثمن

اصيل : ( بدا كيحك بابهامو جبهتو لي معلقين فيه سوارت صدعو بقوة الهضرة ) نشوف ويكون خير ....

يلاه غيهضر تاني هوما يسمعو طموبيل طالعة مع لابسيت كتنوض العجاج .... ضار داك السيد وعلا حجبانو على الحديدة لي كيشوف كانت كحلة ماط ... غير وصلات لعندهم ابتسمات من الباربريز ونترات تيلي ديالها من الكابل ونزلات من الطموبيل هو يقرب لعندها اصيل بابتسامة وتاهي ضحكات ليه يلاه جات تمد يديها تسلم عليه هو يشدها من خصرها وقربها لعندو باس حنكها وهمس فودنيها

اصيل : سلمي عليه غير براسك ويلااه ...

جرها من يديها وهي تحرجات معرفات كيف دير تصرف .... وتبسمات لداك سيد ومات غير براسها كيف قاليها وتبعاتو غاديين لريسطو وداك السيد غير كيشوف وكيرمش بعييينيه كيقول شكون هادي ! و كيضور يشوف الطموبييل وتابعهم ...

وصل اصيل قدام باب الريسطو وقسم ضاحكة فرحااانة ومتحمسة ... حل الباااب وبدا يدفعها بقوة باش تحل بقوة ماشحال هادي وهي مسدودة .. عاد تحلت ليه ودفعها بشوية والمكان لداخل مضبب بالغبرة

قسم : ( يلاه غيدخل شداتو ) صبر جداتي ديما كتقول لينا باش ربي يبارك لينا فشي حاجة خاصنا ندخلو برجلينا ليمنة هههه

اصيل : ههه يخليلي هاد ليييينا ...

قسم : ومالها ماااشي لييينا هههه

اصيل : ( دار ليها خاطرها وزاد برجلو ليمنة ) اوووودي كولشي على ودك غازيدي ...هاد جداتك هي مولات المسمن يالجبن ياك ...

قسم : هي هاديييك

اصيل : عجباااتني ...

دخلو لداخل وقسم كتشوف هو ضار يسد لباب ....هو يبان ليه داك السيد تاهو غيلوح الخطوة يدخل معاهم ... ملي وصل شد فالبااب تبسم ليييه موسع ابتسامتو بلا مايسد عينيه " ابتسامة صفرة " وداك السيد فهم راسو ورجع لور

- اااه ... واااخا ....

اصيل : شششكرا ... تقدر تمشي ضرب شي ضويرة راه نسالي نعيط ليك ...

- لا لا هانا غير فطموووبيل خود راحتك ...

وما ليه اصيل براسو وهو مشا باتجاه طموبيلتو اصيل سد لباب وضار لعندها هي لي داخلة كتشوف مع الارجاء وهو بدا ينش بيدو على وجهو من الغبرة وبدا يحك فنيفو ... تمشى جيهة الشراجم بدا كيحل فيهم وتاهي دارت بحالو حلو كاع السراجم لي تما .... عاااد تضوااات داك البلاااااصة وزاد اصيل شعل الضو وبداو كيشوفو كانت كلها خاوية ولكن مليوحين تما الكابلات ديال الضوووو و التيووات والقوادس والبقايا دالكراسي وطبالي وشي فيزان وواحد تلفازة محطوطة فالقنت كلها بيضة بالغبرة وتريات فالارض ... وكونطوار كان دائري فالوسط كبيير كولو اكتساتو الغبرة وفوق منو طيسان دصباغة يبسات .. والفريني ....

قسم : واااااو .... ( كتشوف مع الارجاء ولفصالة) لداخل حححسن من برااااا.... ( دازت حدا الساريات كتقيس فيهم وتشوف الرخام لي فيهم ) عرفتي باااينة مول هاد الريسطو كان عندو الدوق والله ... هادشي جامع بين لاكلاااااص ديال السبعينات وتمانيييينات وبين الموديغنيطيي ديال دابا ...

اصيل : ( كيشوف الخيوط ددضو معريين وصباغة مقشرة ) فيها خدمة كتيييرة مزااااال

قسم ( كضور وتستكشف ) : صراااحة حمقااتني الفصالة والله فكراتني بدوك الريسطورات ديال ڤينيسيا فايطاليا

اصيل : ( كيشوفها كتقيس فالخشب ) متقيسيش بييدك راه كولشي مغغغبر .....

جمعات يديها كتشوف فيها بان ليها مد ليها كلينيكس وشداتو عليه مبتسمة ودخلات فين كاين داك الكونطوار وهي تغووووت بجهد تاخلعاتو وضار بزربة وهي تلاح عليه كتتغووووت

اصيل : ششششش .. اش كااااين .. .( كيحاول يشدها وهي تعلقات فيه ولسقااات كتغوت ) اش واااقع

قسم : فااااار فاااااار فاااااااررر

اصيل : وغاابشوية نزززلي ميدير ليك والو

قسم : لاا لاا الاااا .. حل ليا نمشي لاااااا

اصيل : ( كيحاول يشدها وهي كتعلق فيه ) وغااانزلي والله مايقرب ليييك .. راه هو تلقاك خلعتيه ... نزززلي

قسم : لا لا والله منززززل ( كضور شوية براسها ) نربي سبع نربي نمر نربي فيييل كاع .. فاااار لا لا غنمووووت

اصيل : ( جابت ليه الضحكة وهي معلقة فيه وشادها ) ودابا غيير نززلي مغاتمووتيش .... نزززلي راك جيفتيني ....

قسم : ( بالغوات ) لا لا قتلو هووو لول

اصيل : ششش بلا غوات السيد على برا يسحابلو غير اش كندير ليييك ...

نزلات بشوية قلبها كيضرب غير كتفكر راه حداها ويقدر يدوز حدا رجليها جسمها كيقششعررر وهو زاد بشوية طل من الكونطوار مابانش ليه

اصيل : را صافي غيكون تخخخبى ... راه تاهو تايخاف ...غايشوفنا غايتخبى

قسم : واااقتلووو عافاك ... مغنكونش فراحتي

اصيل : باش غنقتلو واش غندخل فيه براس ... صافي الا رجع خرج ولا بان ليك وريه ليا ... ودابا مغنضيعوش حنا الوقت كنقلبو على فاااار ..

قسم : ( قربات بشوية حداه كتشوف فجنابها ) والا خرج !

اصيل : مغاااايخرجش .. هاحنا اسيدي غنخليوه ونطلعو لفوق نشوفو ( شد ليها فيديها جارها ) يلاه

قسم : وااا متبعدش من حدااياااا

اصيل : هااانااا حداااك .... ( جرها من يديها ) زيييد الخوافة زيدييي

قسم : مخواافاش ولكن هادشي ديال فيران وهادشي الصغيييير كيطلع ليا قلبي .. كنحس الى قاسني نقدر نموت ..

اصيل : ( طلع فدروج كيضحك وهي شادة فيدييه تابعاه ) ههههه ويييينو

قسم : مماااطنززش ...

وصل قدام جوج بيبان كبار ديال الحديد وفالوسط الزاج كيبان طيراس منو وجبد السوارت كيقلب سوارت لي يدخلو فالقفل ديال دوك البيبان حتى حلهم وخرجو وهي تصغر قسم عينيها فالشمس .... ابتسمات بحماس على روعة هاد البلاصة من لفووق والبحرر كيباااان واخا بعييد شوية ولكن عاطي منظر زويييين ....

قسم : وااااو هنا عالم اخر ( طلقات من يديه ماشية كتشوف ) اومايكاااااد ..

اصيل : وعنداك يخرج ليك شي فار تاني تقلبي دنيا

قسم : ( كتشوف مع رجليها ) هاانا حاااضية ... ( كتشوف مع الارجاء ) عرفتي غير شفت هاد البلاصة ( شاف فيها اصيل مركز معاها ) تخيلت بحال الطيراس ديال الباطو ... هناا ( اشارت للوسط ) خاص يكون شي بييسين صغيير هاكا غير ل لاديكوغاسيون .... وهاد البلاصة كولها تعمر بليبلووونط والشجيرااات يعني تكون مبهجة بحال شي جريييدة وجليسات قصصبييين ...ششموووع والانارة .. حيت شمس هنا قاسحة غالبا هاد البلاصة ديال الليل ماشي ديال النهار .. النهار غيكون لتحت ... لهييييه تكون شي صين ديال الانيمااسيون .. سهرات هاكا بالليل .... كونطوار ديال الكوكتيل ( مشات للحيط القصير ) ويريب هدا كامل ويدار بلاصتو الزاج ... عرفتي راه البلاصة غااتجي واااااعرة خصوصا بالليل المنظررر غيكون زوييين بزاف ..

اصيل : صافي دونك معندنا منديرو بالمهندس

قسم : ( شافت فيه ) هههههه لا لاماشي لداك درجة .. غيرر تحمست ....

ضارت كاتشوف تاشوية وسعات عينيها ملي حسات ليديه حاوطو كرشها ... جا موراها وعنقها من لور وخشا راسو فعنقها وهي تسمرات فبلاصتتتها عاضة على شفتها وقلبها بدا يضرب وجسمها كولو اقشعر

اصيل : لااا بالعكس .. عجبني حماسك ... ( باسها مور ودنها ) وتا افكارك زوينين .... ( عضات شفتها و غمضات عينيها ) وريحتك حتى هي ....

قسم بدات كتسرط فريقها ولسانها تبكم ليها وقلبها بعد مكان كيضرب بجهد ولات تحسو تباطئ بحالا غتسخف كون مابعد راسو دغيا من عنقها وجرها من يديها من موراه مستحيل كانت غتبقى واقفة ومتزنة .....

اصيل : اجي تشوفي واحد البلاصة لتحت ...

تبعاتو تاوقفها قدام الحيط القصير وطلات بانليها من الجهة الخلفية دالريسطو كاملة ارض خاوية كبيرة

اصيل : دلك النهار مور مامشيتي نتي بانتليا هاد ليسپاس لور ... متنهضرش على دابا ولكن مستقبلا لاتحطات للبيع غاتوووسع من الريسطو مزيان ...

قسم : والله تافكرة واعرة ... تما يجيك اوطييييل وااعر ... ولكن راه خاص هاد الريطسو تخدم ديال بصح باش تشري ليك ارض تما ...

اصيل : نتمناو ... ( شاف عندها وهي تبان ليه مصغرة عينيها فالشمس هو يحيد نضاضرو ولبسهم ليها تاوسعات عينيها )

قسم : ونتاا ؟؟؟؟

اصيا : ( ماردش عليها وشاف لتحت ) ملي فكرت فشنو نوع ليپلا لي يكونو مابغيتش يكونو بزاف .. بغيت نخلي غير الحوت واي حاجة متعلقة بالحوت ... والفكرة دلي كوكتيل يالاه زدتيها ليا فراسي ....

قسم : ( قادات نضاضرو مزيان على ودنيها وقربات عندو بجدية ) اصيل .... قبيلة فاش دخلنا مع الباب .. شنو قلت ليك !

اصيل : ( شاف عندها ) شنو ؟

قسم : قلت ليك ... يبارك لينا ... يعني لينا بجوج

اصيل : وانا لمن داير هادشي !!!!

قسم : عرفت ...ولكن بغيت نكون حتى انا وسط هاد المشروع ..... فعلا وماشي غير قولا ...

اصيل : مفهمتش !

قسم : مؤخرا قلت ليك اني هضرت مع بابا على حياتي .. وانه قاليا لامكنتيش كتشوفي راسك كابيطين ... راه تقدي تشوفي طريق اخرى ليك .. وقلت ليه راني موضرة ومعارفاش راسي شنو باغا .... وباقا موضرة حاجة وحدة لي متأكدة منها ان خدمة كاپيطان كنحسها كتسرق ليا من عمري .. كتتتديني بزاااف على العائلة وكندوز حياتي كلها سفر .. مامتخيلاش راسي دايرة اسرة وانا كابيطين ونشوف ولادي مرة فالسيمانة !!!!! ... فهمتيني ياك ! ( اصيل كيشوف معاها وهي كتحاول تشوف لجنب باش متلفها زرقة عينيه وهي مركزة مع هضرتها ) ( اصيل بقى غير كيشوف ولي من نظرتو واضح انه مقابلش بهاد مرة غالسيمانة ) داكشي لي فكرت فيه .... مابغيتش نبقى كابيطين ..... الخدمة هنا غاتكون حسن الى خليتنا نتعاونو ونكبرو المشروع .. حسن مانمشي نديرو فبلاصة اخرى بوحدي نديروه بزوج ....اش باليك !!!

اصيل : الى كتشوفي راسك مغتقدريش على خدمتك .... ماتبقايش فبلاصة مامرتاحاش فيها .. زمامحتاجاش تمشي ديري مشروع فبلاصة اخرى ( شد فيديها وتقابل معاها ) وانا لي عليا غنديرو معاك ... والله مغتخصك شي حاجة ..

قسم : عااارفة اصيل مغاتخصني تاحاجة .... مغنقدش نكمل كابيطين فنفس الوقت مغنجلسش فالدار ... مقريتش شحال انا باش نجلس فدار ونتسناك تصرف عليا .... بغيت نخدم حتى انا .... بغيت نخدم هنا معاك

اصيل : واش انا غانحيد ليك تكوني معايا ؟؟؟ .... ديجا هاد البلاصة درتها لجوج دناس .. ليك نت ... ولختي ... بلاصتكم .. يعني ديالكم ..

قسم : راني فهمتك ... ولكن انا مغنشدش بلاصة ونقول ديالي وانا معاطية فيها والو ااصيل

اصيل : كيدايرة هاد معاطية فيها والو تاني !!

قسم : خاصني نكون معاوناك حتى انا هنا ماديا .... ونحلل رزقي حتى انا معاك ... نكونو بجوج اه .. ولكن فالخدمة مكنعرفووووش بعضياتنا .. غانكونو ششركا ... الى وافقتي عليا طبعا هههه

اصيل : ( تنهد كايدوز يدو على وجهو ورجع شاف فيها ) ... ماماك نت ... فاش خدامة ؟

قسم : تجارة ..

اصبا : من قبل متعرف باباك ؟

قسم : لااا ... لي عارفة انها مكانتش خدامة قبل متزوج ببابا .. ماما فاش كانت صغيرة مكملاتش تعليمها حيت مات جدي وهي صغيرة .. وماما كانت على قد الحااال تاتزوجات بابا وولدات خويا جود عاد دارت باك ليبغ وكملات تاخدات الماجيستير ...

اصيل : على مكنعرف .. عندها شركة ددالديزاين... دارتها هي !

قسم : لا .. بابا .. ولكن اسسها ليها وهي لي خدمات عليها تاكبراتها ....

اصيل : وقالت ليه نخلص معاك حقي نهار اسسها !

قسم : ورااا ماكااانش عندها ....

اصيل : وكون كان عندها .. باباك يبغي !

قسم : ماااعرفتش صراحة ....

اصيل : مغايبغيش ....

قسم : نفهم من كلامك انك ماباغيش

اصيل : قسم .. هادشي درتو على قبلك بالخصوص ... وعلى قلبنا بالعموم .... غنكون فرحان الى خدمتي معايا فبلاصة وحدة وكبرتيها معاياا .... الى بغيتي تزيدي معايا لقدام .... ماخصش بيناتنا يبقاو هاد الفوارق .....

قسم : الفوارق را نتا لي دايرهم بيناتنا .. ملي بغيتي نقبل فلوسك ونديرهم فلوسي .. حتى نت غادير فلوووسي فلوووسك وفولسك فلوسي

اصيل : وافلوسي فلوسك ايه .... ولكن فلوسك فلووووسك .... كون كانو ديالك نت ... اه ... ناخدهم ليك كااااع بلا تاامنطلب ... ولكن فلوس باباك اقسم .... لا ....

قسم : خددمت فيييهم

اصيل : لاباز كاملة ديال باباك .. نت راه باقا صغيرة على ديري راس مال ديالك نتي .... الفلوس لي ضمن ليك باباك ودارها ليك غتخليها على جنب لييييك نت .... بوحدك ... تصرفي فيها كيف بغيتي وملي تخدمي معايا هنا ... وديري فلوسك هنا ... نتحكم فيها انا وياك ..... الكريساج لي غانولي نكريسيك فين غايبان هاداك لي دار ليك فالدرب ...... ولكن دابا فهاد الحالة لا .... باباك خدم على ود ولادو ... على ود يخليهم لولادو .... مغانجيش انا نديهم .... باشمن صفة !!

قسم : هانتا ... باش تبقى على خاااطرك .. غنعيط لصفاء تجيب معاها المدير دالمسائل المالية ديالي فالبنكة ... وغنقوليه يعطيني لاصوم دخدمتي انا كاااملة ودالاوسمة ديالي ... يحطها فكونط بوحدها .... واافلوس لي كدخلني من كروب الروكان تبقى بوحدها .. والكونط ديالي تخليني نعاونك بيه هنايا ....

اصيل : هضرة وحدة راه قلتها مغنزيدش جوج ......

قسم : ( بحزن ) دابا مالك معكس ماااالك .. اش فيها .... ياك نتا باغي ديرو ريسطو دالحوت .. اوا علاش غتكري الناس لي يجيبو ليك الحوت ... خلي الباطو على حسابي .... انا نشريه ....

اصيل : واش منيتك نشري انا باطو ؟؟؟

قسم : انا نشريييييه

اصيل : مغاتشري تاشي حااااجة ...

قسم : دابا ماااالك مقسح راسك

اصيل : راه نت لي مقسحة راسك .. والى بقيتي على هاد القسوحية راه غنخليك تشري معايا حاجة وحدة

قسم : شنو هي

اصيل : الصداع

خلاها وزاد نازل فالدروج وهي كاتجري تابعاه

قسم : اصييييل ... واااصبر .. راك والله الى كتكبر الموضوع و تععقدو غييير راسك ( تابعاه كتجري وهو نازل للاكاف لتحت ) وااصبر .... شعل الضو راه مابقيت كنشوف والو .. ( شدات فالحديدة ديال الدروج تاشافتو شعل الپيل ديالو كيقلب فالحيوط تابان ليه منين يشعل الضو عاد ضوا المكان ) واش تقدر تسنى راه غيخرج ليا شي فار غنصدق مكركبة ..

اصيل وقف فبلاصتو كايتسناها وهي نازلة بشوية فدروج تاوصلات عليه

اصيل : ( عنقها بيدو لي فيها ابيل ونازل بيها ) لقيتيني كنتسنى اشمن كسيدة غاديري هنا حيت مستحيل نتلاقوو وترجعي لداركم هي هاديك ....

قسم : هههه الله يستر ... ( كتشوف براسها بلي وصلو لاكاف وغاديين فالكولوار عااامررر خيوط فالسقف وقوادس دلاليمينيوم ) شنو هنا ! كويزين ؟؟؟؟

اصيل : واقيلا ....

طلو فواحد دخيلة كانو ماكينات دالصابون بزااااف وطواليطات وطفايات دااعافية معلقين ... وعاد زادو تادخلو فايسباس كبير كولو ضاير بكونطوار معدني فالوسط كاينة الكوييزيني كبيرة كضم كتر من عشرين راس فوق منها هوط كبيرة .... وكولشي بيان إيكيبي ....

قسم : وااااو ... برفيكت ....

اصيل : ( كيحل فالمجورة بانو ليه كيتحلو غير بزز ) مزيانة .. مع الاصلاح ترجع حسن ... حضي رجليك كيبان ليا الزاج بزاف فالارض .. شي حاجة تهرسات هنا وخلاوها ...

نزلات قسم عينيها بانت ليها الارضية كلها موسخة وواضح الزاج ديال البيبان هو لي مهرس تما ....

قسم : مهم كتبان البلاصة زوينة و كبيييرة ... الاساسيات كاينين ... الاصلاح راه لابد منو

اصيل : مممم ....مغنفهمش فهادشي ولكن كتبان ليا مرتاحة للطياب ... كبيرة وكاين ايسباس فين يتنقل الواحد ...

قسم : سي ..هادشي لي قصدت ... ديجا طياب دليغيسطوغون كيبغي الززرربة وخاص الواحد مساحة فين يجري ويتنقل ... خاص غير تزيد لهيه فداك الجنب لي خاوي بيت كبير غاديرو فخيجيديغ حيتاش لاباز راها الحوت راك عارف ...

اصيل وما براسو وزاد خرج وهي كتشوف تابعاه تادخلو فكولوار اخر منين مادازو كيضوي بالبيل حتى كايشعل الضو .. كانو شراجم صغاررر كيبانو عااليين حيت هوما فلاكاف ... ولكن التهوية كاينة .... حل واحد الباب غيرر بزز بسوارت لي عندو ... ضوا بالبيل تاشعل الضو هو يبان ليه مكتب .. وعلى عكس الفوضى لي على برا هاد البلاصة كتبان منظمة ... ومهوية كتر حيت شرجمها كبير ... زاد حتى لعندو حلووو وزاد لباااب حلها وهو يبانو ليه دروج كيطلعو لفوق وداخلة منهم الشمس ... البيرو كان نقي وواضح من هاد الباب انه كيجيو ليه ديما منهنا مكيدخلوش من الريسطو ... قلب عينو للخزانة لي فجنب كانت فيها ضواسا وارشيفات .... البيرو كان خشبي من اللون البني ... وقدامو لي فوطوي مارون ديال الجلد وطبلة خشبية .... وكرسي دالمكتب كبير ومريح .. ستيل كلاسيكي هاادئ وزوين ...

قسم : هاد البلاصة نقية .. تالغبرة مكايناش

اصيل : غالبا كيجيو لهنايا .. هاد الباب دغيا تحلات ليا من هنا ( شار ليها جيهة دوك دروج ) كيجيو لهنا حيت وراقهم باقين هنا

قسم : وعاطيينك سوارت البيرو واخا هنا وراقهم

اصيل : ( كيشوف لداك الخزانة ) منضنش واش خلاو شي وراق مهمين ...

قسم : عرفتي ااصيل ( كتشوف مع الارجاء ) هاد البلاصة راه زوينة بزاف ... متكاااملة ... ولكن راه غاااااطلب مصاااريف كتييييرة ....

اصيل تنهد وتكا على واحد السارية فالجنب وربع يديه

اصيل : عاارف .... ( كايشوف مع الارجاء ) لي معارفش هو منين غنبداها .... وواش غنعرف ليها ..... !!

اقسم ضارت لعندو هي تشوفو كيشوف لجنب وعينيه فيهم تلفة كبيرة وقربات عندو

قسم : غاااتعرف ليها .... اولا بغيت نقول ... ( شافت فيه ) غااانعرفو ليها... هاد البلاصة عجباتني ( ضورات راسها كتشوف معاها ) وغادي ناخدها ليك ... الى مبغيتيش تقسمها معاياا .... ههه

اصيل دار ضحكة جانبية وجبدها من يديها لعندو تاتلتخات فصدرو موسعة عينيها وعنقها من ظهرها وهي جامعة يديها محطوطين على صدرو وكتشوف فيه كتحاول تبان عادي وبلي راه بدات تولف القرب ديالو واخا مزال كايقششعر بدنها وهو كيطلع وينزل فوجهها و رجع شاف فعينيها وعلا عليهم نضاضر حيدهم ليها ... بدات كاترمش فيه وهو ساهي فعينيها الكبااااررر ..... وهي مرة تشوف فيه مرة تنزل عينيها ....

اصيل : باغا تاخدي شي حاجة لي ديالك ؟....

يتبع...