محتوى القصة
قدس : ( طلعات راسها فيه وهي باقا فحضنو ) خصك تزيد
لوؤي : ( مهبط راسو فيها كايتأملها عاد كيجاوب ) باش نزيد ؟..
قدس : زييد بين ليا ... غير بانك قادر تحميني الوؤي .. ومتوقع تاشي حاااجة تخرج على حياتي
لوؤي : مكنعطيش شي كلمة مكنوفيش بيها ... قلتها ليك وغانعاود نقولها .. ماحدي عااايش تاحاجة مغااتقيييسك وندير لي فففجهدي كااامل .... باش حياتك تبقى مستقرة .... ( شبه ابتسامة خفيفة بانت غير على عينيه ) معايا .....
قدس يلاه بغات تشقق ابتسامة صغيرة على شفايفها وهي تجمعها دغيا ودفعاتو جيهة لباااب وعاد بانت داك الابتسامة
قدس : هههي لاخرجتي عليااا منهنااا داابااا
لوؤي : ( دافعاه وهو راخي راسو ليها ) ههههه .. هاااهوا غااادي ... ( وصلاتو تالباب وضار عندها ) عطيني بعدا بوسة اخرى
قدس : لااا ... سيييير منهنننااا
لوؤي : ( شاد فالبواني وضار عندها براسو ضاااحك رشقات ليه ) على فكرة .... غانولي مستتتقرررر هنا
قدس : وااش حماااقيتي
لؤي : ( جبدها من يديها لعندو بزربة ) مككنشبعش من الشوفة فيك ....
قدس : ( كدفعو ) سيييييير ... سير غسل غير وجهك وصحى بعدا ...
لوؤي :من السكرة ولا منك
قدس : لوووؤاي ... سسير ... عنداك غي تصحى وتنسى كاع هادشي مافيا لي يعاود من اول ...
لوؤي : واخا يضربوني على رااااسي منساش هاد اللية ... حسابتك انا هو خووك
قدس : بببعد ليا من خويا وخرج عليا ... صصصبر ! وقف
حلات لبااب شوية طلات بعينيها كاتشوف الكولوار اما هو كيشوف غير فيها مكتهمو تاحاجة اخرى من غيرها .... وشافت فيه هو لي غير ساهي فيها
قدس :خخرررج يلاااه ... سسسربي ...
لوؤي طول فيها الشوفة وهي كترمش فيه كتسناه يخرج ودفع الباب بيدو بشوية جابها من مور الباب وتكى عليها بقبلة اشبه بالاولى فحنيتها وهداوتها لاكن كانت اخف منها ... ونزل عينو لعنقها لي كان باقي حمر بداك التجيفية لي دار ليها ونزل شفايفو كايبوس بوسات خفاااف فوق كل ندبة وهي مغمضة عييينيها ...
عاد خلاها وخرج وهي سدات لباب بزززربة وتكات عليه شدات على قلبها معلية راسها لفوق والابتسامة كتحول لضحيكة لي ماعرفاتش سببها ..معرفاتش علاش فرزات هاد الادرنالين كامل ... وعلاش القلب كيضح الدم بهاد السسرعة ... احساس اول مرة تحسو مع شي وااااحد ... واش الاحساس لي مختلف ولا هاد الشخص هو لي مختلف ..وهي تمشي لدريسينغ تبدل حوايجها ضااحكة كيف شي وحدة كاتشوف شي راجل لاول مرة ...
اما اوؤي دخل لدوش مباشرة وطلق الرشاش وحيد شوميز لاحها وتخشى تحت الرشاااش شاد بجوج يديه على الحيييط والما كيتساقطو قطارتو على هضبات ظهرو الاسمر المفتووول نازلين مع السلسول ديالو لي كولو وشامات خفاااف احرف مبعثرين لي كانو .. اول احرف كنيتو .. واول احرف اسم ماماه ... واول احرف اسم باباه .. وخوتو ... وفجهة دالشق الليسر وراء القلب كانو اول احرف اسمها QOD لي كانو بخط كلاسيكي رقييييييق .... وفوق من السمطة دالسروال كانت عبارة كبيرة " you can win if you want "لي كلهم اشبال الاسماعيلي تقريبا واشمينها .....
شعرو كاااامل سرد و غطى ليه عينيه ... والابتسامة باقا على شفايفو باقي مامصدقش الى زعمات واعترفات ... من لول عارف كتميل ليه تاهي ولكن الاعتراف كاان حاجة اخرى .. كان بداية لعلاااقة و من اجمل مايمكن يعيش فحياتو .. هي علاقة مع بنت كيتسطى على تفاصيلها .... تنهد مرتاح لي طرات حاجة زوينة بهاد الشكل فهاد النهار لي كان تقيل بالنسبة ليه وبدا يفسخ فسمطة دالسروال ....
اليوم الموالي
على طابلة الفطور ... جالسة لامار كتشرب قهوتها بلباسها الرسمي لي غتمشي بيه للخدمة واسد بعيد شوية عليها كيهضر فتيليفون .. ورجاء واقفة كتصب القهوة وترجع لور ... تاقاطعهم اسد وجا جر الكرسي ديالو وجلس
اسد : معاش غتسالي !
لامار : طناش نكون مسالية .. الورد وجدوه ليا البارح ... الخواتم يمشي هو ياك ؟
اسد : هداك شغلو ...
لامار : صافي دونك نسالي الاجتماع نجي ديريكت ... تالداك جوايه سبعة دالعشية ولا ستة عاد نمشيو
اسد : ( كيشرب قهوتو ) ان شاء الله ...
لامار : عيطات قسم
اسد : مزال ماعطاوها تيليفون هاد الصباح .. ملي هضرنا البارح
لامار : الباطو غيوصل مع الربعة كيف العادة .. دونك نتسناوها تاتوصل لهنا عاد نمشيو مجموعين
اسد : منعرف واش غاتجي .. نهار اللخر كتبغي ترتاح
لامار : ودابا راه الحال مختلف .. راه خطابة خوها .. ضروري تجي ليوم مغتخليهش بوحدو ...
يلاه كيفطرو هوما يسمعو خطوات نازلين فدروج ... لامار ضارت شافت شكون نازل وهي توسع عينيها محسابتلهاش راه تما كان لوؤي نازل بسروال مارون وشوميز مارون مطلوقة يلاه كيعلي ليها الكمام لدراعو على عادتو
لامار : لووؤااااي ؟؟؟
اسد متفاجأش بحالها حيت عارفو كاين وهو تبسم ليها وقرب باس ليها راسها وضرب اسد ببونية وجلس
لوؤي : صباح الخير
لامار : بايت هنا اولدي ؟؟؟
اسد : وشنو كتعرفي عليه ملي كينوضها مع باه اللول ... ( شاف فيه ) كيجي عند باه التاني ...
لامار : ههههه شفتي شحال زوينة يكون عندك جوج دالاباء هههه
لوؤي : وايييه ... كيف صبحتو صافا ! .. كيف جاتكم السواغي ( رجاء كاتصب ليه القهوة وهو صابح ناشط)
لامار : لا لا داكشي واااعررر احبيبي ... ماعندي ميتسالك ...
اسد : باك عيط صباح كيسول فين بايت .. كون ماقلت ليه راك هنا ... كنتي غتقتلو بالخلعة
لوؤي : راه هادشي هو لي كيعصبني فيه .... فييين غنبات متلا فين غنكون ؟ غنخرج لبرا غنتوضر ؟ مغنعرفش نقطع طريق .. هاد نظرة لي كيدير لولادو وعمرو يشوفنا كبرررنا راه هي لي تتعدبنا وتايعدب تا راسو معانا ....
اسد : وهادي راه حاجة خاصك تفرح ليها ... باباك كيخاف عليك .. راه كاينين ممهتمنيييش ومعارفينش تاولادهم شحال فلاج ديالهم ... فطر وسير سبق ييه هو اللول هضر معه صلح المشكل
لوؤي : مافيا لي يهضر دابا .. كيتسناني الكونطابل ندوزو لي سالير لهادوك لي خدمو لبارح ( شاف لساعتو فمعصمو ) ديجا راني معطل عليه صبحت ناعس ...
اسد : غتسالي شغالك وغادوز عندو .. حسن مايجي واحد نهار تتمناه تهضر معاه ومتلقاهش
لامار : ودابا هادي هضرة على الصباح ااسد
لوؤي : نهار يولي يحترم رغباتنا ويشوفنا كبرنا وقاديين نتحملو قرارات كتخص حياتنا .... غنوليو نعرفو نهضرو انا وياه .... وياريت بلاصة متبقى كل مرة تهضر غير معايا .. هضر معاه شوية .. حيت هادشي ليكايدير راه ممزيااانش ... حيت باقيين تابعينو جوج ولاد اخرين تاهوما ميولاتهم مختلفة على المجال ديالو .. مانضيعوش كاملين .. .( وقف ) يلاه نهاركم مبروك
لامار : كلس تاتكمل فطووورك
لوؤي : لا صافي ... قهيوة قضات غراض ... .
وما ليهم وخرج واسد غير كيتنهد على حالو هو وعدنان ... تاتمات نازلة قدس لي كيعرفوها غير من جرة درجليها كتمشى تقييييلة ... لابسة غير صندال بلا هيرميس وكسيوة فايتة شوية ركابي موردة وجامعة شعرها لفوق مع حلقات مضورين ... ووجها حمرر ونيفها كترر وغير كتشمرر .. قربات لقاتهم كيفطرو وباست باباها وماماها غير ملور وجلسات باقي كتفوه
لامار : ايهاي على قققدددس مببببكرررة ....
قدس : ( بصوت مدعدع ) صباح الخير
اسد : ( مد يدو لجبهتها ) ضربك البرد ؟
قدس : امممم ... صصبحت مسخسخة ...
لامار : غا الريح دايز راه كولشي مسهوط تا سارة واكلها بزز باش هضرات معايا قبيلة كاتجاوب مخنوقة ..
اسد : قلتي ليها على الخطبة
لامار : نو .. حشمت سيدة مريضة كتهضر غا بزز نقوليها الخطبة خفتها تحشم وتصدق جايا وهي ماقاداش ...زايدون ماسولاتنيش على الولاد تانا ماقلت والو ...
اسد : (ماعطاش للموضوع اهمية كبيرة وشاف عند قدس ) وهانتي دابا ومالابسة والو. .
لامار : ديري فوقك شي فيست ....البارح تعطلنا راه كانت كترعد غا بوحدها بالبرد كون ماشي الفيست دجود ..... كون غابقيتي ناعسة علاش فقتي دابا
قدس : واش انا كرهت .. عيطات ليا بيلسان قاتلي نخرج معاها
لامار : وماافيها باس نيت تعاونيها .. نهارها هذا هي وخوك ...
قدس : عرررفتي راه مقاداااش غانمشي غيير بزز .. ونرجع ننعس ... فيا تبوريشة
لامار : وماعليش متخسريش ليها خاطرها بحرا تنساي تانت المرض ... غاتجي موراك ؟
قدس : اه .. قاتلي شوية غدوز مورايا ...
اسد : شششربي شي دوا عاد خرجي .. مزيان تخرجي غتلقاي راسك صافا الى بقيتي فالفراش غتكملي .. ديما كنقول ليكم لاگريب متبقاوش ليها فالفراش ...
قدس بدات غير كتنهد وحولات عينيها لكرسي لي حداها بان ليها فنجان دالقهوة مشروب منو ... وعوجات شفتها كتقول واش يكون سبقني وخرج ؟ ولا باقي ناعس ... وهي تشوف فماماها
قدس : شكون فطر معاكم ؟ جود ؟
لامار : لااا .. كاس لوؤي هداك يالاه لقيتيه خرج
قدس : ( علات حجبانها دايرة راسها متفاجأة ) ااه لوؤي كان هنا ؟؟؟؟
لامار : ااااه ... جا يمكن قبل منا ولا مورانا منعرف ...
قدس : مم .. مزيان ....
اسد : ( مسح فمو ) يلاااه تككعدي .. باراكا عليك
لامار : نكمل غير كااسي ...
اسد : ( كيجرها من دراعها ) يلاااااه ...
جغمات كاسها دغيا وعطات لقدس بوسة فالهوا ومشات تابعة اسد لي جارها يمشيو لخدمة .. وقدس بقات جالسة كضور فنجالها وبقايا ليلة لبارح مزال مبغاوش يحيدو من قدامها ... واخا صبحات مسخسخة والسخانة ومدعدعة باقا كتبسسسم ملي تتفكر ... وهي كتشوف ففنجالو ... وتفكر هضرتو .. نظراتو .. حركاتو ... ولي مبغاش يحيد منها .. هي رييييحتو .... مدات يديها بشوية لفنجالو هزاتو وبقات تشوف الاثر دالقهوة عرفات منين شرب وهي ديرو ففمها وغمضات عينيها مبتسمة كاتشرب منغمة ..... ورجعات حطاتو ملي سمعات تيل كايصوني عرفاتها جات وناضت خرجات لبرا ... ومشات باتجاهها لقاتها واقفة كطبل بيديها فالفولون كتسناها تجي ... وهي تحل لباب ركبات حداها
قدس : كون غير خليتيني نجي عندك فين نتي علاش تعدبي تالهنا
بيلسان : ( راجعة مارشاريار ) راه كت غير هنا قريبة ليك .. رشقات ليا نهبط هاد الصباح للبحر نتمشى شوية
قدس : ( شافت فيها ) مسطريسية ؟
بيلسان : ( تنهدات بعد ماعطات ايماءة براسها للحرس يطلعو الباريار ومشات ) معرفتش اقدس والله ... عيطت ليك فواحد الوقت لي محتاجة يكون معايا شي وااحد .. هاكا صغير قدي يفهمني ...
قدس : ياك لاباس ؟؟؟
بيلسان : لا لا .... غير معرفتش .. صبح خاطري فشكل .. اه فرحانة .. وكنبغي خوك .. لا وكنموت عليه كاع .. ولكن زواج حاجة اخرى ... خايفة منتوفقش فالمسوؤيلة .. جود عارفاه غيبغي الولاد .. بزاف دالحوايج تكبو عليا هاد الصباح حتى تلفت ونزلت لبحر نشم الهوا .....
قدس: بيلسان .. حاولي ترخفي فيك النفس .. نتوما راه مغتزوجوش ليوم .. هادي خطبة موافقين عليها بجوج .. يعني من هنا حتى لنهار لي غيتقرر العرس .. غتكونو تفاهمتو مزيان وعرفتو شنو باغين .. وتافقتو ... راه عندكم الوووقت الكااامل ... لامتفاهمتوش غاتبقاو وولاد العمام !!! دونك بلا متسطريساي وعيشي اللحظة .... باش تكملي على علاقتك معاه بلا خوف .. هانتي قدام العائلة وكولشي و مدام قدرتي دخلي فعلاقة جدية وترتبطي ... غاتقدري تاعلى الزواج
بيلسان : معرفتش اقدس .. مبغيتش تانفرحو تاني العائلة ونتفارقو
قدس : دابا علاش كتقولي بحال هاكا ؟ واش شاكة فحبك ليه ؟
بيلسان : لااا بالعكس متأكة منو 100٪ ... انا راه شاكة فحبو هووو ليا ... تخيلي لبارح كاعما صونا عليا بمممرة
قدس : شوووفي بيلسان .. جود راه هاكا داير ... حنا راه نسينا جود القديم حنا كنعرفو هدا .. راه مستحيل يهز تيليفون يهضر ولا يسووول ... قلييييييل فين تيتفكر تيليفونو .. ياك حنا عائلتو كيسافر الى ماصونيناش حنا هو مكيصونيش ... راه مكايديرهاش بالعاني ... راه خصك تولفي المرض ديالو ... عندو حوايج قلال لي تايتفكر يديرهم هادشي الى مكانش داير لالارم ومقيدهم .... راه تلقابه لبارح ناااسي واش خاااطب ولا عندو شي وحدة تاااتفكرو شي حاجة عاد يتفكرك ....عندك جوج حلول قدامك .. يا بقاي تعيطي نت فكريه بيك تايتعود ... ياااا حاولي نت تعودي عليه انه هاكا داير
بيلسان : وعلاش مكيعيطش كاع مفهمتش ؟ مغيتوحشش
قدس : واااالعاداو اشمن لغة نفهمك واش جود عندو شي حد اعز من ماما وبابا وراه والله وماعيطو هوما لاعيط هو .. وكاااينسى بالمرررة كااااع ...
بيلسان : فففف .. مكانش بحال هاكا اقدس ..
قدس : راه اووول خطوة غاديريها ليوم لابغيتو تكملو فهادشي .. هي تنساي القديم ... راه مرضو زاد فلاكسيدون دموناكو ... وباقي كاتسناه واحد العملية ولكن قالو خاص حتى تكمل سبع سنين على اخر عملية دار ...
بيلسان : ففففف .... فين كان مخبي ليه هااادشي .. ( شافت فيها ) والله اقدس تا كنحااااول .. والله تكنحاول ... بات تراست مي .. ايتس سو هاارد فور مي " ولكن تيقي بيا .... صعيييب الامر عليا بزاف "
قدس : تاحاجة مكتجي ساهلة .. ديما داكشي لي كنبغيو كيتعقد لينا من شي جيهة .... ( شافتها غير ساكتة كتنهد وكملات ) بيلسان ... هادي خطبتك نت وياه .. اول خطوة لعلاقة رسمية ضروووووري من هاد سطريس والتخوف .. ولكن اين فوا يدوز اليوم .... ودوز سيمانة ويدوز شهر غتعووودي على هاد الفكرة وتقبلياها ... وشي لي غيخليكم أليز كتر هو الصحافة مغادخلش دابا حتى تقررو ديرو لاكط ماغياج .. يعني غتعيييشو اليييز مخايفين من والو ومدايرين فطاجين مايتحرق لالقيتو راسكم متفاهمتوش راه ماشي اخرر الدنيا
بيلسان : سكتي اقدس هاد العبارة بضبط مباغاش تانفكر فيها
قدس : ومدام باغاه قد هاكا دووونك هنيييييناااا .. زيدي يالاه بقينا هنا ...
بيلسان : ( خدات نفس عميق وزفراتو ) انا بيخير ونهار غيدوز زويييين وغنتفاهمو وغنكملو حياتنا مع بعضياتنا بلا حتى شي مشاكيل .. تا اياد غيدير عقلو وكولشي غيدوز مزيان ( شافت فقدس ) ياك
قدس : اااه .. غير ردي البال مع طريق ونقصي قداك الموووري حيت ماشي غير خويا فرالي راه نقدر على هاد الفيتاس كاملة ....
بيلسان : ( عاد ردات البال غادا بسرعة كبيرة حيت مولفة تصوك هاكا ورجعات كتنقص ) خوافة ...
قدس: هه !وراه قالوها مايتزوجو تايتشابهو ...
قدس زادت فالمزيييكا تخرجها من سطريس وحطات راسها عالى زاج تاسمعات فيب فتيليفون وهزاتو وهي تلقى مسج غير شافت سمية تبسمات وحلاتو بزربة " كتباني زوينة ونت ناعسة .... "
قدس وسعات عينيها كتقول هذا واش دخل عندي ولا كيفاش ... يالاه كتسائل تادخل مسج اخر فيه " وتالبوسة ديالك ونت ماحساش ... حلوة " .....
بقات غير كترمش وكتقول هادا غيبقى تايفضضحنا .. فاخر شدات تيليفون عندها وبدات غير تتبسم كيف الهبيلة .. ممثيقاش واش كاين ش واحد كيبغيها لهاد درجة ... وبيلسان ردات ليها البال
بيلسان : زعما مكاينش شي طريقة يعلمو شوية تاهو ؟؟؟
قدس : ( شافت فيه بالزربة ) نعام ؟
بيلسان : قولي ليه يعلم شوية خوك يكتب تاهو مسج يضحكنا بحال هاكا ....
قدس : ش شكون ؟؟؟
بيلسان : هههه والو والو .... شووفي ... مابغيتش داكشي لي غتجيب ليا ماما .. بغيت نلبس كوستيم على دوقي ... يلاه معايا اختاري ... عجبوني شي وحدين تحطو هاد سيمانة فديور ...
قدس : الصحافة ابيلسان ...والله مافيا لي يسمع شي نكير دبابا
بيلسان : غنعيط دابا ل إيڤا " مديرة اعمالها " تعلمهم مايصور تاشي واحد ....
طنجة
قدام المطار ... مباركي طموبيلتو ومتكي عليها مربع يديه .. كان بسروال كحل وشوميز وكويرة كحلة مطلع سلسلتها من برد لي صبح محرك .... كل مرة يشوف لساعتو متوتر ... مقادرش مزال يزيد يصصبر .. كيتسنى الوووقت بفااارغ الصبرررر يدوز .. كيحس بدقاااايق غير مكيزيدو يتقالو .. من تسعود وهو كيتسنى وملي بقات غير خمسة دقايق مااقدرش ... كيمشي ويجي ويحك فشعرو ويرجع كاسكيطتو .. مرة يحيدها مرة يرجعها لور ... مرة يرجع يتكا على الطموبيل كيتنهد .. جوج قهاوي لي شرب فطموبيل وهو كيتسنى ... شهر ونص داااز بلا ميشوفها .. بعد مرات فاش كانت كظلام دنيا بين عينيه ولا يحس براسو مديبريسي ولا يكون تابعو شي كومبا .. كان كيحتاج غير شوفتها .. غير يسمعها ... كانت منورة حياتو مشات وخلاتها طافية من موراها ... لدرجة عرف قيمتها قداش فحياتو ؟؟؟ .. بحالا كانت هي العوض على كاع ايامو الكحلة ... كيتسنى بحال شي واحد كيتسنى الفرج ديالو .... شهر ونص وهو كيهضر معاها غير فمرة فسيمانة فاش كتقدر ترغب على شي ابيل ثالتة ..
تاشوية بانو ليه الناس كيخرجو من المطار ... عاد تنفس كيشوف فكككل الوجوه كيتمنى يشوف وجهها دغيا .... ملي خبراتو البارح انها غتنزل مع الحداش فطنجة ومغتجيش عائلتها حيت مفخبارهمش بانها راجعة ... محسش براسو تالقا راسو حدا المطار كيتسنى .... كيقلب فكاع الوجوووه وكيعوج فراسو مع الناس لي خارجين و وقتاش تبان ليه ..... كيسرط فريقو وكولو متوتر امتى يشوفها ممتيقش غيديرها بين دراعو بعد شهررر ونص دالاشتياااق .... تابااانت ليه !!
كانت خارجة وغير صاك صغير معلق فكتافها بلباس رياضي مريح وكاسكييط كتقلب بعينيها ... تبسم بلا مااااايحس وهو كيشوفها جاية .... وبدا كيقرب عندها ماشي على رجليه وهي كتقلب بين الطموبيلات لي واقفين كلهم برا كيتسناو ... تادازت عليه بعينيها ورجعات شافت لجنب ورجعات تاني شافت فيه بزربة فاش لقاتو راه اصلا هاداااك .. وهي توسع عينيها على حجججمهم وضحكة واااسعة بانت على فمها ... وشداااتها بججججرية من بااااب المطااااار وهو جاي عندها بزرببة تاااتلاحت عليه كااااملة مزززيرة عليه بكل جهدها وهو هزها تاولاو رجليها كيلعبو فالهواا كااتغووووت بالفرحة ضاااحكة و رجع حطها ضاحك و شد وجهها
قسم : ( علات يديها شدات تاهي وجهو ) صببر نتأكد بلي بصح راك حدايا هههه
اصيل : ( هبط على شفايفها ببوسة خفيفة حيت الناس ماشيين جايين ) تووحشت ديييلمك ... تووحشتك ....
قسم : ( رجعات تاني عنقاتو ) تاااناااا .... ماقلت حتى داااز هاد الشهر ..
اصيل : اطول شهر شفتو فحياتي ....
قسم : ( رجعات كتشوف فيه فرحانة شادة فيديه بجوج ) صافااا نتا لاباس عليييك ؟؟؟ سلمى لاباس عليييها ؟؟؟؟
اصيل : كووولشي بيخر .. ( هز يدو كيدوزها على وجهها ) سماريتي ...
قسم : قووول كحاااليت .. وليييييت حاالتي بالشمس
اصيل : ( كيشوف معاها ) علاش ضعافيتي بحال هاكا .. مكنتيش كتاكلي مويان ؟
قسم : نو ماشي قضية ماكلة .. راه كان ضروري نطيح ستة كيلو ....
اصيل : ففف ! ... ( رجعها لصدرو معنقها ) عذبوك ليا ...
قسم : عععرفتي كككنحس بالمووووت دالجووع .. توحشت الماااااكلة ديال بصح .. عييت من داك شلايض دالعبار ...
اصيل : ( جاتو الضحكة وشاف فيها ) هه ! واخا .. زيدي طلعي
قسم : ههه علاش كضحك هههه ..راه تانا توحشتك وبزاف هههه
اصيل : كيبانليا توحشي المالكة كتر مني ( خربق ليها فشعرها ضاحك ) فين باكاجك
قسم : باكاجي دابا يمشي فالباطو ههه .. راه تاواحد معارفني جايا اليوم فالطيارة
اصيل : واااايلي !!! ( علا حاجبو ) ماقلتيهاش ليهم
قسم : لا .. كون قلتها كيغاندير نشوفك فنظرك
اصيل : داكشي لي لقيتيني جاي كنفكر فيه ! كيفاش ماجا عندك تاحد
قسم : داكشي علاش سكت .. ديما ملي كندووز العسكرية كيعرفوني كنرتاح نهار ... يعني راه عارفين غانجي تالغدا .... ( شدات يدو ) بغيت ندوز معاك اليوم فخاطري .... عاد نمشي ...
اصيل : مغيتخلقش ليك شي مشكل !!!!
قسم : نووو كون هاني ....
ضحكات ليه ومشات لطموبيل ركبات وهو تبعها طلع تاهو
قسم : ( نزلات المرايا كاتشوف فوجهها ) غيخصني شهر ديال لي سيونص دالكوماج يلاااه نرجع للون ديالي ...
اصيل : ( كيديماري ) حتى هاكا زوينة ....
قسم : ( شافت عندو مبتسمة وردات المرايا وتكات على كتفو معنقاه بيديها ) والله متقدر تخيل شحال تووووحشتك
اصيل : ( حط راسو على راسها راد البال مع طريق ) راه انا مزال خاصني شوية عاد نستوعب راك جيتي ههه ...
قسم : كيف دوزتي هاد شهر ونص بلا بيا .. شنو كنت كدير ؟
اصيل : كنفكر فيك ...
قسم : ههه واشنو اخر ...
اصيل : كنحاول نعيط ليك
قسم : ( هزات راسها على كتفو كضحك ) هههههههه غير خليها على الله .. بابا شد معاك العكس ديال بصح هههه عرفتي .. راه كان كيعيط ليا فلابيل لووولا ... ويقول ليا عيطي لعمك عدنان راهو كيتسناك ويقطع .. بلعاني باش منهضرش معاه فداك لابييل ونعيط فالتانية ههههه ....ومنلقاوش فين نهضرو هههه راااني عااايقة بيه ... وساكتة
اصيل : حتى هو تلقايه دابا عايق بيك وساكت
قسم : نووو مغيعيقيش دابا ... ميغيجي فين يعيق تايكون سالا عندي النهار هههه
اصيل : فين نديك تاكلي
قسم : مكرهتش شي بلاصة بلدية توحشت ماكلتنا .... هنا كيديرو واحد اللعيبة زويييينة .. فواحد ريسطو كنت كنمشي ليه مع خويا ...
اصيل : شنو هي هادي ؟
قسم : داك لي دايرا بحال شي پيغي وكتكون لاباز ديالها الفول .. ولا لي پوا كاسي .... صبر نتفكر سميتها ... اااا .. بيييصارة ... سميتها البييصارة
اصيل : بيصارة !!!!!
قسم : هااااديك .. راه تايديرو فيها زيت بلدية والكامون والحار يييييي تشهيتها
اصيل : هههه هادشي ماتشهيتي ...
قسم : غير سير انا غنوريك فين كناكلوها واحد المحل صغير مغنتبرزطوش ومولاه تما راه كيعرفني ...
اصيل : واااخا ... ( هز يديها عندو باسها ) ندي حبيتي فين بغات ...
قسم : ( عضات على شفتها وشافت فيه ) جاتني فشكل نسمعها منك ههه
اصيل : علاش ! من عندمن موالفة تسمعيها ؟ ( شاف عندها ) هم !
قسم : بابا ... خويا .... ماما ... عمامي .. ولكن منك .. سبيسيال ....
اصيل : اجي عندي اااجي ...
فتح ليها يدو وجرها وجات ثاني حطات راسها على كتفو وهو معنقها عندو بيد الاخرى كيمشط على شعرها ومرة مرة كيدوز بيها الفيتاس وهي تتعاود ليه كاع التفااااصيل ديال تدريبها وشنو دازت منو ... وكيف العادة غير كيسمع ليها ويبتسم ...
وصلو لواحد محل فواحد درب ضيق ... كان ريسطو شعبي ... وتياكلو فيه ناس داك الحومة لي قليييييل فين كتلقى شي واحد كيعرفها وديما كتجي هي وجود ولا ولاد عماماها براااااحة ياكلو هنا ... نزلات هي واصيل واصيل كيشوف مع الارجاء كانت داك الحومة مبهجة بالالوان وولادها خادمينها مزيان .. ونقية ... وشد فيديها ودخلو ... كان محل صغير عبارة على كاراج كولو بالزليج بلدي وطابلات خشبيين ملونين وكراسا خشبين .... وكونطوار لي كيسربيو منو طويييل فالجنب واقفين تما تلاتة دالولاد لي هوما ولاد مول المحل حيت كيخدم تما هو ومراتو وتلاتة دولادو وجوح بناتو .... وقسم مشات لكونطوار هو يضحك ليها واحد تما
- ممررررحبا ختي قاسام ديالنا نورتييينا نهار مضاخم لي تشوفناك .. شني هاد الغبرور مكذزورناشي مّارة ( شاف عند اصيل ) مررررحبا اخاي ديالي .. زييييدو ... وا آ نوااارررر مسح داك طبلة لهيه مسح ( وما ليه اصيل براسو مبتسم ليه )
قسم : ربي يخليك .. فييين عمي العربي ؟
- هاوا مااااجي اختي .. زيييد الخوا ديالي تفضلو مرحبا ...
زاد بيهم لطبلة لي كان خوه صغير مسحها وحط فوقها الكاغيط وكلسات هي وياه ... وحطو ليهم الما ... وهي مبتاسمة من عينيها واضحة فرحة كبيرة لي راه فبلايص كيعجبوها مع شخص كتبغيه ...
قسم : كيييجاتك البلااااصة !!!
اصيل : ( كيشوف مع الارجاء ) نقية .. زوينة ...
قسم : ديما كنجيو لهنا ... راه هاد العام عاد وسعو هاد البلاصة كانت غير محل صغير وكان هنا غير عمي العربي وداك الولد كبير لي كان كيهضر معانا .. مراتو وبناتو لداخل .. كلهم الله يعمرها سلعة .. ديما كيرحبو بالكليان بحالا داخل لدارهم .... هنا واحد الروح متلقاهاش فدوك ريسطو لي كنمشيو ليهم ... كاع ماعندنا فكازا بحال هاد البلايص
اصيل : كازا ديالكم لي مافيهاش .. كازا ديالي فيها هههه ... ومولف انا بحال هاد البلايص خاص غير تكون الحاجة نقية ....
قسم : وعلاش مكتدينيش ليهم ؟؟؟
اصيل : مكنعرفش شي بلاصة محترمة بحال هاكا .. اغلبية كيكونو فيهم الرجال .. قليل فين تلقاي مراة جالسة ...
قسم : لا هنا كيجيو عائلات ... كلشي كيجي ...
اصيل : بلاصة سياحية سينوغمال ...
يلاه كيهضرو قاطعهم الولد الصغير حط ليهم جوج طواجن صغار مع براد اتاي والخبز ومشا
قسم : عرفتي راااه اااحححسن بيصارة تقققدررر دوق
اصيا : هه ( داق معلقة وشاف فيهم ) ممم ... لذيذة ..
قسم : بزااااف ههههه ... ( خشات وجهها كتاكل ) بغييت ندير فوطو لجود نجنن فيه ولكن غيعيق بيا جيت هه
اصيل : ( مسح فمو وشاف فيها بجدية ) متعاوديهاش .. راه قلتها ليك قبل ماتمشي .. مبغيتش ندخل لحياتك ونخربقها .. ماحدك تتكدبي على واليديك باش تلاقايني الامر كيحرجني شوية ...
قسم : راه ماشي كنكذب حيت خايفة ولا راه عندي سبعطاش لعام .. راه غنرجع غنقوليهم كنت معاك .... انا مقلتش ليهم حيت عارفة غيديرو شي سبة ومغيخلينيش بابا نشوفك .. وانا راه توحشششتك ....
اصيل مدة كيشوف فيها وهو يبتسم ليها بحب وهز كلينيكس مسح ليها جنب فمها لي كاع عمراتو بالماكلة بزربة
اصيل : بششوية عليك
قسم : راه قتليك فيا الموت دجوع
اصيا : ( كيتفرج فيها وهي كتاكل ) شنو دابا .. نديرلك شي فوطو نبوسطيها فانسطاغرام يشوفو البرينسيس دالاسماعيلي ... لاحت الايتيكيت ديالها وجالسة ضرب فالبيصارة !
قسم : ههه مغيتيقوكش غيقولو فوتوشوب
اصيل : هههه علاش !
قسم : ( بقات غير مبتاسمة كتشوف فطاجينها فلخر طلعات فيه عينيها بعد ماسرطات دغمتها مزيان وشربات الما وشافت فيه ) حيت قسم هادي لي معاك .. ولي كتكون مع خوتها .. مع واليديها ... ماشي هي لي كتكون مع الصحافة ولا فالبيرو .. كاين لي كنباليه قاصحة .. كاين لي كنبانليه مععقدة كاع .. مكنعرفش نضحك ... وماعنننديش مشكل صراحة يشوفوني كيف بغاو .. يكفي انني عارفة راسي شخصيتي كيدايرة ... وعارفة فين نبين داك الشخصية ومعامن .... فين نقدر نجلس ونتعامل وانا لايحة البروتوكول مور ظهري ...
اصيل : فخبارك انا هاد قسم لي كتهضري عليها ولي كيعرفوها ناس لاخرين عمرني عرفتها انا ! من اول نهار عرفتك عرفتك على طبيعتك .. علاش من لول شفتك بشخصيتك هادي لي كتبان غير لواليديك وخوتك ؟ واخا مكنتيش كتعرفيني !
قسم : ماعرفتش !!!!! يمكن حيت حسيت فيك شي حاجة منهم
اصيل : من ناحية اش
قسم : حيت نتا ملول فرضتي عليا نتعامل معاك طبيعية حيت نتا تعاملتي طببيعييي ! اما انا موالفة نتلاقا جوج انواع دالناس ... نوع لول عااامر تبوزيق وتصنع .. ونوع تاني عاامر صباااغة ولحيييس .... راك نتا وعائلتي نتوما الوحيدين الطبيعيين فحياتي ... سينوغمال نكون معاهم طبيعية ! ( ضحكات وعوجات فيه راسها ) ولا تبغيني نجبد ليك قسم لوخرا ههه
اصيل : ( هي كتهضر وهو على عادتو متبع معاها بتركيز وابتسامة خفييفة ) لا ... خليك ديما بحال هاكا ... حيت نت هي قسم .. لي انا بغيت ... الى بينتي ليا شي وحدة مغنعرفهاش و مغانبغيهاش .... انا بغيت هاد البنية ( جبد ليها نيفها وهي ضحكات ) الصغيورة لي حداايا ....( هبط تاني ابهامو كيمسح تحت شفتها ) لي ديما خصها ترون الحالة وهي كتاكل ...
قسم نزلات راسها كيعرف يحمسها وكيعرف يحشمها فثانية وحدة ... ونزلات تكمل ماكلتها ويلاه كتاشفات انه ثقيييييل فالماكلة عكسها هي لي كتاكل بزززربة ... كلما زادت تعرفات عليه كتزيد تعرف انو ثقييييل فكلشي .. هضرتو .. مخارج حرووفو ... مشييتو .. عقيلتو .. افكارو .. قراراتو .... ديما مرزن وكيعرف اش كيخرج على فمو ملي يكون كيهضر ... جا عندهم مول المحل الكبير مرحب بيهم .... كانو يلاه سالاو ماكلتهم .. خلصو وخرجو مخليين طموبيل تما بغاو يتمشاو على رجليهم فدهاليز داك الحومة الشعبية لي كانت عبارة غير على سياح اجانب ... غاديين بشششوية وهي متكية على كتفو وهو معنقها عندو كيهضرو ...
قسم : لااا قلتي ليا اتعاود ليا .. عااود ليا .... غير انا لي نهضر
اصيل : راه بصح .. ماعنديش شي حاجة سبسيييال بحالك ... راه قلتها ليك داك نهار وغنعاودها .. عائلتي كلها .. فيها سلمى ... داكشي لي عندي ....
قسم : زعما مكيجيوش عندكم العائلة ديالكم كاع .. مكيتفكركم تاحد ميمكنكش ؟؟؟؟ ونتا كان عندك اب و ام وجد .. يعني ضروري غاتكون العائلة كبيرة
اصيل : مؤخرا .. فالعيد ... جات واحد السيدة كتكون بعد المرات عمتي .. ومنظنش غاتعاود تجي ...
قسم : ( علات فيه راسها ) كتكون بعد المرات ؟؟؟ هه !! وات !!!
اصيل : اه .. هاكا دايرة عائلتي انا ..بعد المرات كيبغيو يكونو وبعد المرات لا .. على حساب اش باغيين .... ( هبط راسو فيها مبتسم ) فهمتي !
قسم : لاااا ههه
اصيل : بلاااش عليك ...
قسم : زعما مكاين تاشي واحد فالعائلة عزيز عليك
اصيل : سلمى ...
قسم : وشي واحد قريييب ليك؟؟
اصيل : نت ...
قسم : ههه ( بالفرحة زادت تخشات فيييه وعنقاااتو ) باااااركا عليك ... الى كان شي قرب كثر من هذا قولهالي نزيد هههه
اصيل : راه كون ماشي باك يقول ليا فين درتي ليا بنتي كون خشيتك لداخل هههه
قسم : ههههه .. ولكن صبر باش ماتنسينيش فواحد السؤال .. ضرني فراسي شهر ونص كنتسنى فوقاش نجي نسولو ليك
اصيل : ياربي سلامة ...
قسم : علااااش ديما ملي كنتلاقاو انا لي ديما كنهضر بزاف ... واش مكتبغيش تهضر ولا نتا هاكا داير
اصيل : هه .. قسم .. راه نتي اكثر واحد كنهضر معاه بزاف .. فين بغيتيني نزيد
قسم : ولكن ماتوصلنييش !!!
اصيل : وحيت نت عندك حياة عامرة ببزاف دالحوايح غتهضري فيهم ... انا عكسك نت ... حياتي خاوية وماعنديش فاش نهضر ... باغي غير نبقى نسمع ليك ..
قسم : هههه راه الى بقيت نهضر غير انا غنصدعك ؟
اصيل : هو راه ماعنديش مع الصداع .. ولكن صدااعك نت حلو ... كيعجبني .. ( زاد عنقها ) غير صدعيني ...
قسم : ( شافت واحد البلاصة طويييلة قرييبة لبحر فيها كراسى وجراتو ) يلاااه نمشيو نجلسو ليهيه بلااصة زويييينة ...
اصيل : بعدنا على الطموبيل ... ملي نكونو راجعين غتعياي ...
قسم : ( مشات قدامو بزربة وهو غادي بشوية وضارت عندو ضاحكة و شعرها كيديه الريح ) داك ساع هزززززني ...
اصيل :ههههه اهاه .. تاهذا حل زوين ههه
قسم :: ( شدات ليه يديه جاراه ) يلاااااه .. شحال ثقييييل ...
تبعها تاجلسو على واحد من دوك الكراسي كيدوزو حداهم لي كيبيعو زريعة وشيبس والقهوة ... وخداو كيسان دالقهوة .. مكملين حديثهم
قسم : ( موسعة عينها ) اوومايكاااد ؟! يعني صافي راه بديتي تصلح ؟
اصيل : مزال ... جبت غير لي نقاو داك البلاصة خرجنا داكشي .. تسيقات داك البلاصة ... قلت بالوقت وبالخاطر غيتقاد داكشي منزربوش
قسم : يعني صافي كملتي المواتي دالخلاص ؟؟؟ كيدرتي ليها
اصيا : منهنا ومهنا ...
قسم : هاء ؟؟؟؟ اصييل عنداك تكو مزير على راسك
اصيل : هاد السؤال بضبط متعاوديش طرحيه ... ( قلب ليها الموضوع وجغم من كاسو وشاف فيها ) مستاعدة ترسمي ليا البلان ....
قسم : ( وسعات فيه عينيها وضحكات ) حلف والله حتى انا لي غنصمم ؟؟؟؟؟؟
اصيل : نت .... غانبدا غير بالبلاصة ددطياب .. على حساب الفلوس لي عندي دابا .. وملي يسهل الله تاني نكملو .. كل مرة نقضيو حاجة ....
قسم : راك نتا لي راسك قاسح وكون بغيتي ت ( قاطعها )
اصيل : الجوو واعر اليوم .... ياك !
قسم : ( تنهدات وكتشوف فيه بمعنى عايقة ييك وهو داير فيها نظرة براءة ) والله مكتشحم
اصيل : علاااش ؟؟؟ اش درت
قسم : حنا فالجو دابا ؟
اصيل : فاش ؟ ااااه كنا كنهضرو على ريسطو .. قلنا غنبداو ببلاصة لي غايطيبو فيها .. عندك شي تخطيطات !!!
قسم : ( كضور راسها وتضحك ) هههه الله يصبببرني .. الله يصبرني .. ماااعلينا اسيدي ... اييه كنا فالكووووزينة ... معنديش بزاف حيت مكندخلش ليها اصلا و ( قاطعها )
اصيل : هي دابا غتخلينا بجوع ؟ انا راه مغنجيبش ليك خدامة ...
قسم : علاش انا قلت ليك جيبها ..
اصيل : وشكون يطيب
قسم : نتا .. قالت ليا ختك كتعرف طيب
اصيل : ياااك ههههه ...
قسم : ومالها اش فيها ..
اصيا : ونت اش ديري
قسم : ( بصوت ونظرات كيوووت ) انا نجييييب لييييك باااايبي
اصيل : ههههه ( عنق راسها عندو ضمها لصدرو وهي كضحك ) صافي .. غدا نجي لداركم ....
قسم : ههه باغي تجيب بايبي ؟
اصيل : اهاه .. نجييييبوه ... ههه
قسم : ( علات فيه راسها ) علاااش كضحك ههه
اصيل : والو .... ( هبط راسو فيها ) ونت بغيتي بااااايبي !!!
قسم : ااه .. يكون كيشيه لييييك .... على فكرة .. نقدر نجيك بلدية شوية .. ولكن انا راه ماعنديش مع داك لا حقااا تااانعيشو حياتنا .. لا حقاااا تااانتساااراو ولا منعرف اش اش عاد نولدو .. لا اخويا انا بغيت مع بسم الله مع نسمع غواتو هنههه
اصيل : هههههه ( شد ليها دقنها بشوية كيجبدها منووو معوج ليها شفتها ) هااا علاااااش باااغيييك انا .... بلدية بحالي ....
قسم : ههه والله كيجيني فشكل داك حتى نعييشو وكدا ومنعرفت اش .. مالنا زعما لاولدنا مغنعيشوش .. نعيشو معاااه ... يعيييش معانا .. غانحير انا فرضاعة وليكوش وسهير بليل ...؟
اصيل : غتحيري غير فليكوش .. ما داك جوج لوخرين غيولفهم ليك باه قبل مايجي هو ...
قسم : ههه ( كضحك عاضة عل شفتها وضرباتو لصدرو باحراج )
اصيل : هههه مكاتبغيييوش بنادم يكون صريح ههه ...
قسم : اه نسيت ( علات فيه راسها ) هاد الشهر ونص .... قررت فيهم واحد القرار كايهم حياتنا شوية .. غنقولو ليك قبل مانمشي ناقشو مع بابا
اصيل : اهاه !!
قسم : مهم ... نتا عارف بلي حنا تحت البرتوكول البريطاني.. عندنا شي قوانين مبدلين على العائلات لوخرين لي بروتوكولهم فرنسي ولا اسباني ... حنا عندنا الدااينت ... يعني القوااانين كيف كتسمى فالبروتوكول ... البنت فاش تفكر تزوج عندها جوج حلول ... اما تخرج من البرتوكول وتاخد كنية راجلها ... اما هو يدخل للبروتوكول ... وياخد كنيتها ...
اصيل : ونتي شنو قررتي ؟
قسم : قررت باش نجي نشاورك .. هذا هو القراار ههه يعني قبل منشوف مع بابا قلت نشاورك حيت هادشي كيهمك حتى نتا
اصيل : وفنظرك ؟؟؟
قسم : مليووون فالمية مغتبغيش دخل فكنيتي ... وغانودع البروتوكل ....
اصيل : هههه ...ودعيه احبيبتي ودعيه ...
قسم : ديجا اصلا ماعنديش مشكل ... حيت من نهار قال ليا بابا نفكر ندير بروجي ديالي وانا باغا نخرج على البرتوكول .. لان الى بقيت تحتو البروجي كيولي يمولو ليا هو .. ويحضيه ليا هو من الازماااات ... عرفتي الامر غايكولي بحال كاتلعب شي لعبة اون لاين ومافيييها حتى قااااانون .... مكايناش المتعة كاع .... كتحس بالملل ! كذالك الخدمة ... يعني مدام غنكون بروجي صغير بغيت نتقاتل معاه ونجحو ونخاف عليه من الخسارة ... ماشي البروتوكول يتكلف ليا ...بحال بابا كيفاش بدا .. راه بدا بلا بروتوكول وخدم وسهررر تانجح داكشي ... يعني حس بالحلااوة والطعم دالخدمة .... عاااد دار البروتوكول باش يضمن رزق ولادو ..في حااال مازال وقعات شي حاجة مايمشيش جهدو هباء ... دونك .. باغا ننسحب من البروتوكول ...
اصيل : حتى تناقشي الامور مع عائلتك وباباك ... هوما غيعرفو مصلاحتك كتر منك وكتر مني ...
قسم : ولكن مغيعرفوش راحتي فين
اصيل : واخا هاكاك ناقشي معاهم .. وماشي ديري ليه داك الدخلة ديال صااافي شااورتو وقررت وساليت وبحالا جايا تعلميه .. تكرهي فينا السيد قبل تا مايعرفنا ...نو ... سيري تاهو شاوريه .... الى شفتي هو مبغاش تخرجي من البروتوكول .. نحاولو نوصلو معاه لشي حل .. حيت انا مباغيش ندخل فهادشي ديالكم ومغنقدرش عليه ...
قسم : يكوون خير .. مكنظنش بابا غايعارضني ... حيت مكيييفرضش علينا هاد الامووور لي كتخص حياتنا ... دونك انسحابي من البروتوكول ليه جوج دالاسباب .. لول باش ندير بروجي فخاااطري ونحس بحلااوتو .. تاااني باش نعيش معاك أليييز بلا قواانييين
اصيل : شنو فارض عليكم اخر هاد البورتوكول
قسم : لي كيخصنا انا وياك غير هاد الامر هدا مدامك واحد خارج على البروتوكول متحتاجش تعرف هه ... الباقي كيخص لي داخلين فيه ... مثلا مفروض علينا منلبسوش حوايج مزوقين بزاااف .. ويكونو نوعا ما محترمييين ... ولكن عندنا داكشي بالدرجات ... بحال مثلا ملي كتكون عمرك بين خمس سنين وعشر سنين ضروووووي لباس طفلة .... يعني ديما كسيوات ... ممنوع داك الاسكسيسوارات بزاف .. يعني نحافضو على طفلة فاللبس .. ومابين خمسطاش لعام لربعة وعشرين عام .. مكيكونش بزاف ديال زيار فاللبس .. غير متكونش شي حاجة لي كتوحي بدوك الالوان والاثواب ديال الايحاءات الجنسية راك عارف سن المراهقة... مور ربعة وعشرين سنة .. صافي كيولي ممنوع كاع دوك ليميني جيب القصااااررر بزااااف .. ممنوع علينا حتى دوك ليباموس ليكيبينو اللحم ... داخلين تاهوما فالخانة ديال الملابس الفاضحة هههه ... ممنوع قوة الاحجااار وداكشي الاوووفر ... يعني لبسو خفييييف وسامبل .... ممنوع علينا البيرسينغ فالوجه ... ممنوع المكياج الاووووفر ... ممنوع دوك تسريحات دالشعر لي تاهوما اووفر ... ممنوع نطولو ضفار بزاااف ... بنسبة للتصرفات .. ممنوع المضاربة ... تيجينا فيها ديما انذار خصوصا مع خوتي ... والى تفاقم الامر كيتسحب وسام السلوك .... ممنوع علاقات غرامية ماعالنينش بيهم للبروتوكول ... كيتسحب لينا وسام الشرف ... يعني اي علاقة فحياتنا خاص نصرحو بيها .. حنا لي فوق ربعة وعشرين عام ... حيت البروتوكول كيقول ممكن يدخل لحياتك شي نصاب ولا مختل وهوما راه خدمتهم هي يحمييييوك ... ممنوع ندخلو لبيييران لي كيكونو حانات رخاااص وكدا .. يعني بلايص مشبووهيييين ممنوع .. من غير بار يكون فاووووطيل لي معروف ولا ديالنا .... البلايص المشبوهين ممنوعين ... ممنوع نديرو شي تصرف جنسي .. بحال مثلا البوسان ولا شي حاجة فالهواء الطلق هههه خاصنا نردو لبال من الكاميرات ... ممممم .. شنو اخر .... بزاااف دالقوانين حنا راه عندنا كتاب هههه ... مهم تالشي نهار ونعطيك الكتاب قراه ههه داكشي باش حياتنا معايشينهاش اليييز بزاف .. متحكمين فينا بلا قياس ... يعني عائلتنا كتسمى عندها بروتوكولهم .. عائلة ملكية .. دونك خاصها تمشى ببروتوكول ملكي بالنسبة لقانون بريطانيا ...
اصيل : وليكارط ناسيونال ديالكم .. على المغرب
قسم : ااااه .. حنا كنتسماو عائلة مغربية ببروتوكول بريطاني ... بالعكس عاد كنقدمو الثقافة المغربية ديالنا ف الاجتماعات و الحفلات لي كيكونو ديال العائلات كاملة .. حيت خاصنا نمشيو بلبااااسنا المغربي وكاع لي فامي لي من دول مختلفة كيجيو معترفين ببلادهم وثقااافتهم لتما ... وحنا حيث عائلة اسلامية البرتوكول كياخد هاد النقطة بعين الاعتبار حيت كاين تاني واحد الصفحة دالقوانين خاصة غير بالدييين .... يعني الشعائر الدينية ضروري يتقامو على اكمل وجه ... يعني مثلا يشرب شي واحد فينا فرمضان فالعلن .. غيمشي ليه وسام السلوك ... العمرة كاع درناها ... وبزاااف دالحوايج ....
اصيل : فهمت .... هادشي مزيان من واحد ناحية ... ولكن ديريه بخاطرك حسن مايكون فارضو عليك شي واحد
قسم : تماااماااا ... ( بدات كتكسل) باقي فيا النعاس هههه
اصيل : هه ! يلاه نتحركو شوية !
قسم : يلااااه ...
فالقصر ...
ساعة 15:00
دخلات طموبيل بيلسان لباركينغ القصر ... وقدس سلتات السانيتر
قدس : نزلي !
بيلسان : لاااا .. باقي تابعني بزاااف مايدار راك شفتي ماما من قبيلة وهي تغوت ...( شدات فيديها وابتسمات ) شكرا حيت كنت معايا ليوووم ومخليتينيش بووحدي ... كنت غنتلف كوحدة ماعندهاش خواتات
قدس : ههه الالة هانتي غيوليو عندك جوج ههه واخا هوما ديجا عندك ... كوستيم جاك زوين .... وغيدوز كولشي زوين .... ( دارت يديها تاهي على يديها ) متسطريسايش بزاف ... غاتكوني اجمل عرووووس
بيلسان : هههه ( قربات عنقاتها ) شششكرا ... ( رجعات شافت فيها وجبدات ليها نيفها ) ههه قريب نشوفك حتى نت عروووووس
قدس : هههه لا اختي شكرا مزال ماشبعت من حياتي باش نعطيها لواحد اخر هههه
بيلسان : ههه اودي نتي لي فاهمة الحياة هههه
قدس : ههه سيري باش ماتعطليش خالتي اريج غتنتف راسها ... نتلاقو بليل
دارت يديها على جبهتها ...
بيلسان : ديري شي دوا اصاحبتي شوفي سخانة باقا طالعة ليك
قدس : مباغا والو منغير نطلع لفراشي ونتخشى فيه ... ذاتي كترعد عليا كنت واقفة معاك بسيف
بيلسان: ومتنعسيش تاني بزاف غتكملي على راسك شوية نوضي ديري شي دوش وخودي فيتامينااات ..
قدس : دااكوغ .. وهضري مع ماماك ديرو لينا شوووية دالنشاااط اصاحبتي راه توحشنا نشطحو .. عنداكم ديرولنا بحال عرس خوك زياد .. ننتف شعري
بيلسان : ههه سيري سيري ونتي لي فيك ميهنيك .. غادي تموتي بسخانة وباغا تشطحي
قدس : خطابة خووووويا الى مفررحتش فيها فين نفرح
بيلسان : الله يخليك ليه .. خوك غيتزوج بحيييط ... فرحانة غا بيه ...
قدس : ( كانت نازلة ورجعات ) حقا ... كل مرة كنقول نسولك وكتنسيني شي حاجة .. اياد اش كايقول
بيلسان : ( رجعو حزنو ملامحها ) مزال ماعطاش كاع شي رأي .. حدو قالتها ليه ماما صباح قاتليه راه اليوم غيجيو فكراتو زعما باش تشوف اش غيقول ... هو يقولييها ضبرو راسكم .. انا محاضرش
قدس : ووااايلي ؟؟؟ زعما يعطييه خاطرو ميحضرش
بيلسان : انا عارفاه مغيحضرش ...
قدس : زعما لاهضرتي معاه يقدر يسمع منك ؟ ميبغيش زعما يخصر ليك خاطرك ونهارك هدا
بيلسان : الى لقيتو فالدار غنهضر معاه .. حيت ملي قالتها ليا ماما كنت كنصوني عليه ومكيجاويش ...
قدس : اوا على الله يجاوب ولا يجي لدار ... مابغيناش شي حاجة تكون ناقصة صراحة .. ( رجعات سلمات عليها ) يلاه بسلاامة .... وهانا غانكون عااادييييتك وغاتركبي الخاتم ونت كتعطسي هههه ..
بيلسان : هه مرحبا الالة بيك وبمرضك ههه
نزلات قدس وهي رجعات مارشاريار ومشات ودخلات باتجاه جناحها مبااااشرة باغا غير تخشى ففراشها وتنعس ...
وصلات بالكشايف لدرجة استخدمات السانسور وماطلعاتش فالدروج ... دخلات لجناحها لاحت صندالتها وتلاحت ففراشها ذاتها كلها كترعد بالبببرررد .. تاحلات عليها الخادمة الباب لي كان موصيها اسد تعطيها ليفيتامين حيت خلاوها مريضة شرباتهم ليها ففراش ومشات وهي رجعات تخشات ففراشها عينيها حمرييين مدمعين ونيفها مسدووود وحمر تاهو كل مرة تمسحو بكلينيكس مخرجة راسها ويديها شوية من الفراش طالعة نازلة فالتيليفون تابانتليها ابيل داخلة منو وهي تبسم وجاوبات..
قدس : مكتعياش
لوؤي : علاش مكتجاوبيش
قدس : كانت معايا بيلسان
لوؤي : داك ساعة كتبي ميساج .... مال صوتك
قدس : فيا نعاس
لوؤي : دابا ؟؟؟؟
قدس : اه
لوؤي : واش مريضة ؟ راه صوتك واكل الدق
قدس : ماشي بزاف .. خديت ليفيتامين شوية وندير لباس ..
لوؤي : اش مرضك ؟؟؟
قدس : نتا
لوؤي : هه ! وشنو نخليك تمرضيني غير نت
قدس : انا مولفة ندير ليك لاكريب ؟
لوؤي : نتي مولفة تمرضيني فعقلي ... نجي عندك؟ عنداك تمشي ديري شي كوما بحال هاديك ديال داك نهار ... الجهد دشي خلعة اخرى مابقاش عندي
قدس : ههههه لا ... راه خديت فيتاميييين .. بعد مني خليني نعس ...
لوؤي : خليك معاياا شوية مزال .... شاد بيك طريق ..
قدس : ؟؟؟؟ علاش فين غاااادي ...
فجناح جود ...
كان جالس على السرير .... لابس غير شورط بسيور .. وملفوق عريااان .... وجهو واضح انه مخسر بالنعاس ... شعرو مررربل ..... كالس وكيشوف فالكوستار لي معلق قدامو .. لي واضح دخلوه ملي كان ناعس .... كيشوف فيه مططططول .... كان اغرب فياق غيديرو هو هذا ... هو يصبح على كوستيم ديال خطابتو ... لي عمرو ظن انها غتكون شي نهار !!
موالف يفيق بفقدان ذاكرة مؤقت ... ولكن هاد المرة فاق نورمال ... غير شافو .. عاد حس براسو جاه فقذان الذاكرة .. نسا راسو كاع شكون هو ... شنو باغي .. شنو كيدير .. فين باغي يوصل .... كان مقاد طريق البارح .. علاش تخربقات ليه هاد الصباح .... حس بصدرو ضياق .. تغلب عليه شوية دالخوف من المسؤولية .. مخايفش من شي حاجة اخرى كتر ماخايف انه مايكونش ليها الزوج المثالي ... مايكونش الاب المثالي .... اه هادي غير خطابة .. ولكن كتعني ليهم بزاااف .. وكتعني ليها بالخصوص بزاااف .. مباغيش مزال يشوف الدموع فعينيها .. باغي يسعدها ... باش يمكن حتى هو ... يقدر يحس بشوية دالسعادة داك ساعة .... يمكن ملي يشوف راسو ... قد على مسؤوليتو ... وقادر يخلي مراتو فرحانة .... يقدر يحس بطعم السعادة وانه كيدير شي حاجة مزيانة فحياتو واخا لاول مرة .... علا راسو لفووووق وخدا تنهيييييدة طويييييلة .. كيحاول من خلاااالها انه ييستعد .... باش يشرك حياتو مع وحدة اخرى .... باش يكون قد المسؤولية ..... ويدير اسرة صغيرة خاصة بيه .... تبسم ملي جات لبالو انه ممكن يكون عندو وليدات صغاار يشدو فيديه ويقولو ليه بابا ! حيت هاد التفكير مستحيل كان يفكر فيه قبل ميعرف بيلسان وقبل مايعرف كاينة لي تبغي تزوج بيه بالرغم من المرض ديالو ..... وكاينة لي تصبر عليه ... وتقدر على مرضو وتفهمو .... شي وحدة تواتيه .. ديال بصح .... مكاينش ما حسن من الواحد فاش كيلقى لي تبغيه .. بكاع عيوبو ومزاياه .... شي واحد من عينيه كايقرا شحال باغيييه .... كيولي غير داك الشخص ... كافيه .. بحالا كيبغيه العااالم كااااامل .... وهو لقاه .. لقى هاد الحب فشقراء بعيون زرقين جات لدارهم فالعيد ولقاها كتبكي مع الخيول .. فوحدة تسلتات لبيتو وخدات ريييحتو .. وحدة لي باقية محافظة على صووورررتو ... ولي باقي كتشوف فيه وتسهى .. ولي ربع سنين مقدراتش تنساه .. امور كافياه باش يعرف شحال كتبغيه فنفس الوقت خالعاه .. خايف تكون كتبغي غير جود القديم ....
طرد هادشي من راسو حيت ماشي وقتو ... وواعد نفسو انه يوقع لي يوقع وتكون هاد البنت كيفما بغات تكون خاصو يكون راجل معاها ... وميتخلاش على هادشي ويدير جهدو كامل .. وايلا عوجة .. ميلوحهاش ... يسرحها ! ...
ناض من السريرر وعلا راسو لساعة لي بانت ليه ثلاثة ونص عرف راسو غرق فالنعاس لانو فاق مع الفجر هبط جرا وعاد رجع نعس .... دخل لدوش .. خدا دوش بالخف .. وخرج قدام المراية كايقااد لحييييتوووو ... شعور فشكل غااامروو ... انه كيوجد راسو لخطبتو !! شي حاجة مكدخلش للعقل .. فنفس الوقت تااالف .. ومتوتر نوعا ما ... ومشوش من جهة المستقبل لي مزال غامض بين عينيه ... قاد لحيتو مزيااان ورازاها من عنقو معري على تفاحة ادم المتوسطة ... عاد خرج لدريسينغ لبس سروال ديال سيرفيط بيض بالسيور و تيشورت كحل بغا يبقى اليز .... يلاه كيلبس سمع تيليفون ومشا جابو
جود : لامار !
لامار : جووود .. .شفتي الخواتم كيجاوك ؟
جود : اشمن خواتم ؟
لامار : ( بعصبية ) جوووود ؟؟؟ ياك هضرنا لبااارح .. ودخلت صباااح عندك واكدت علييك باش تمشي مع الجوج لاطووليي دباباك تشوف خواتمك باش الى معجبوكش دغيا يبدلوهم لموديل اخر وميتعطلوووش
جود : ( ضهشراتو ) فوقاش دخلتي فصباح ؟
لامار : جود واش تتطنز عليا
جود : ( دار يدو على وجهو ) قفففففف ... راه ماعقلتتتش الااامااااررر
لامار : ( عاد سرات معاها كايهضر بصح ) مااااعليش اولدي ... مااااعليش ... فينك دابا
جود : فالدار خارج للكاراج
لامار : اشمممن كاراج واش باغييي تحممقني اجود .. دووووز شوف الخواتم الباقي انا غنتلكلف بيه وسربي اولدي الله يرضي عليك ...
جود : راه يلاه تلاثة الامار ...
لامار : الوقت كيطيير .. سربي راسك يالاه ...
تنهد مشا من بالو كاااع هادشي ومشا كلس على واحد الكرسي لبس تقاشرو سبرديلتو وهز سوارتو تاوصل للباااب هو يتفكر نضاضرو وساعتو .. ورجع ثاني لبسهم ... وخرج لسانسور ومشا لباركيينغ .. غير دخل للطموبيل ديالو حط راسو على الفولون كيشوف بلي الخواتم ونساااهم .. عساااك المسؤووولية .. وبقى يضور راسو بثقااالة على الفولون فلخر علاه لفوق كيتنهد ..عاد كترجع ليه صورة ماماه دخلات فيقاتو كتأكد عليه ..... بقى يتنهد حاس براسو تااااالف .. وهو يصوني على لوؤي .... بقى شحال عاد جاوبو
جود : افين
لوؤي : ها حنا اولد عمي ...
جود : تلاقاني للاطوووولي د ليبيجو
لوؤي : علاش
جود : شوف معاياا داكشي مكنعرفش بزاف فذوق ديال العيالات
لوؤي : اش غنشوف ؟؟؟
جود : خواتم الوووؤاي ؟
لوؤي : اينا خواتم اصاحبي ؟
جود : لووؤي ماتسطاش عليا الله يرحم باك راه شرطة لي عندي .. راه انا الي مضروب فراسي ماشي نتاا .. ليوم خطبتي واقلة لاااا
لوؤي : ( بقا شحال ساكت ) جووود .. الله يرحححم باك لاما دوز ليا غير هادي
جود : كيفاش ؟؟؟
لوؤي : وووعلااش مقلتيهاش لبارح اصاحبي فكرنا راه اليوووم ... راااه نسييييييت
جود : نسيتي ليوم خطبتي ؟
لوؤي : وفكرووونا اصااحححبي .. ودابا راه شديييت طريق راني مسافر
جود : فين ؟
لوؤي : راه يلاه نزلت من المطاااار غاندير ليسكال ...
جود : ( بقا غير كيرمش ) واش منيتتك الوؤي ؟
لوؤي : والله اجووووود تاااانسيييت بالله .. مافكرتيناش .. اه عااارف عندك خطبة ونسييييت الى اليووووم اصاحبي ... حسابتني تالسيمانة جايا .. واافكرنا ... هضضضر .. قووولها
جود : ضضضورررر تقووود ... ( قطع عليه)
قطع عليه تيليفون ولاحو على الكوسان هو يطلع ليه ميساج منو قراه غير فاالشاشة د الطموبيل كيطلب منو السماحة وهو غير داير راسو فوق الكوسان كيتفس فلخر رجع هز تيليفون ودوز لابيل لسلطان ... وهو يجاوب بالنعااس
سلطان : الميييكانيسيان ..
جود : فينك
سلطان : نااعس .. ( كيتفوه ) ياك لباس
جود : ياكما تانتا معارفش اليوم شنو !
سلطان : ليوم لاربع ... علاش
جود : بربي تا غان*ويييكم قبل منها ....
سلطان : وطلقنا اصاحبي شكااين راني وصصلت مسخسخ هاد صباح
جود : ( علا حاجبو ) على نتا فين !
سلطان : فرنسا .. عندنا هنا ماتش غدا .. ( جود غير سكت كيرمش ) الو .... الو ...
جود : عرفتي شغادير
سلطان : اهاه
جود : رجع تنعس .. نرد ليكم هاد الوقفة لي درتو معايا فساعة الخير ...
سلطان : اش واااقع اصااااحبي والله تاخلعتيني دابا ...
قطع عليه تيليفون كيسسب
جود : ولاااد القحااااب عللامن معووول انا ....( دار تيلي ثاني فودنو كيتنفس غير لقاه شاااعل عاد رجع فيه الروح وهي تجاوبوو )
قسوم : الحب ديالي .. العريييييس ديالي ....
جود : مزيان بعدا باقي شوية ديال الضو فيك .... فينك
قسم : فين غنكون اخويا .. مجبدة فوق ناموسيييتي خاصني تلتيام هاكا على ضهري يلاااااه يلاه نرتاح شوية
جود : فوقاش غيقلع الباطو
قسم : مغنجيش اليوم اخويا .. تالغذا فصباح وانا معااااك .. عاودو ليا الخطططبة ههه مكتابش نحضر
جود : قسم ! كضحكي معايا ؟
قسم : والله اخويا تاداوية معاك بصح ... بغيت نرتاح اليوم راني مسخسخة ... غدا انا معااااك ....
جود : ( صوتو تجرح ) واش عارفة هاد نهار شنو كيعني ليا اقسم !
قسم : جوووود راه غير غتمشيو تهضرو متسطريساش بزاف .. راه باااقاا الخطبة ... قاتليا ماما غير غتهضرو .. عنداكم تمشيو ديرو شي خطبة بلاا بيااااا والله منننسمح لييييكم ....( جود غير ساكت كيتنفس ) جووود .. ياك غير غتهضرو ؟؟؟؟؟ عندااااكم تكونو غتركبو الخواتم ؟؟ جووووود .. وجاااوبني ازززمررررر
جود : علاش شنو قالت ليك ماماك
قسم : ملي هضرو معايا البارح قالو ليا ليوم غتمشيو غير تهضرو مع عمي يونس وطلبو بيلسان يعني جلسة عائلية وصافي .. قالت ليا الخطبة تاتعلن للبروتوكول ....
جود : اه وقلتي انا بلاش مانكووون تالنهار يعلم البرتوكول ونحضر معاه بحال البراني ياك .... ( سرط ريقو كيحس بقلبوو تزير عليه كررره حياتو ) يعني فنهار بحال هذا ... لي كيعني ليا بزاااااف .. مغنلقى تاواحد معاياا؟؟؟؟
قسم : جووود وهانتا غتبكيييني .. راه غيير هضرة هااادي .. عااادي
جود : عادي ! ... داااكوغ ... غير هو نهار توقفو عليا تانتوما ومتلقاونيش .. ماييتشكى تاواحد ...
قطع عليها تيليفون وبقات كاتصوني حتى طفاه كاع ولاحو على الكوسان وكسييراا بجههد طااالع ليه الخزز لراااس كاااره حياااتو ... تلاتة ديال الناس لي من اهم وحدين كيكونو معاه فكاع مراحل حياتو ... ملي بغاهم ملقاهمش .. كلهم استهانو بنهار بحال هدا .... وكلهم محسبوووهش ... ونساوه كاع .. هنا عارف راسو ان امرو ما مهم عند تاشي واحد وانو واخا هو مرييض وكينسى عمرو مانسى شي حاجة مهمة فحياتهم ونهار خطبتهم متأكد من راسو انه غيكون اول الداااعمين ليهم اوول واحد غيوقف معاهم ويفرح ليهم .... عييينيه حمااااارو والنفس ضياقت ليه وكيحاول يتنفس باش ميصدقش ممرررض رااااسو تاني وهو صااايك .. كيحاول يثبت و راد البااال .... كل مرة يوقف يرتاح شوية تاتفوتو الدوخة عاد كيكمل الطريق تاوصل لاطوليي .. كيحاول يعول على رااااسو .... وميبقى يعول على حد يوقف معاه .... هنا عرف بلي فالهضرة كولشي كيكون معاك وفالصح كولشي كيخوي الطريق .. معارفش واش المشكل فيهم ولا المشكل فهاد الخطبة لي مامآمن بيها تاشي واحد لدرجة لي نساوها كاع بحال شي نهار عادي ....
تحل بيه السانسور وخرج غادي وكيومي غير لناس براسو لي كيحيوه مخبي عييينيه الحمرين بالنضاااضر ... وكارز على سوارتو فيديه لي درعانو كيبانو معععرقييين بقوة ما شاد عضلاتو بالاعصاب ...
دخل لقاهم كيتسناوه وجر الكرسي جلس قدام واحد جليسة زجاجية مضيئة والصانع حط قدامو ربعة دالخواتم لي تصنعو على قبلهم .. الفقصة ديال ولاد عمامو وختو مزال مبغاتش تنسى ليه مقدرش كاع يركز غير اشار بيدو لواحد لي بانليه لفت انتباهو بزاف كان خاتم ماسي بسسييط ومتوسطاه حجرة صغيرة والخاتم محاط بتصميم بحال جدع ديال شجرة ضاير عليه ... كان تصميم روماني .. كيعني الغصن المتيييين للعلاقات القوووية .. هزو بين يديه هو يلمح جملة منقوشة فالداهل ديالو .. كان مثل روماني .. مكتوب بالفرنسي بخط كلاسيكي رقيق صغر عينيه وهبط نظاظر كيقراه .. كان مكتوب
" Soyez mon arbre fructueux ...Je serai pour toi une branche solide qui ne se cassera jamais " "كن لي شجرة مثمرة .. اكون لك غصنا مثينا لا ينكسر " ...
العبارة خرجاتو شوية من فقصتو وبانت شوية دالراحة فعينيه وتذكر ان الرومان كانو كيعبرو على الزواج بزاف بالغصن ديال الشجرة وتبسم بجنب شفاهو ملي عرف باباه مول التصميم ومول هاد الفكرة الرومانية ... كيضور الخاتم كيشوف داك الغصن لي كان ملوي على الخاتم وشاف فالصانع بالايجاب بمعنى جمع هدا ... وهو يعطيه الخاتم لي مرافقو لي كان بيض سااامبل عاااادي بنفس العبااارة منقوشة فالداخل ديالووو .... دارهم ليه فبواطات كحليييين ... مكنقوش اسمائهم فوق كل بواطة .. هوما يحطو ليه المجوهرات الاخرى لي كانت وصات لامار مفهمش فيهم بزاف حدو قاليه لي بالكم زوين جمعوه .. كانو سوايع واونسومبلات ....
وناض معاه لبيرو كان قدام الصانع واحد الورقة طويييلة بحال شي ورقة دالاشجار وجبد ريشة والحبر وجود كيشوف معاه مستغرب بحالا رجع لقرن 19 .. وكتب ليه تهنئة وطواها فالشريط ومدها ليه
الصانع : باسمي وباسم كاع لي خدمو معايا فهاد الخواتم والاطقم ديال خطوبتك نتا والسيدة بيلسان ... كنتمناوو ليكم حيااة سعيدة .... كلها رفاه .. وبنين ...
جود : ( كيشيوف فيه باسى .. البراني وقال كلمة زوينة خدا عليه الورقة وشكرو براسو ) شكرا ...
جا واحد اخر مد ليه الصاك لي فيه داكشي وجود سنيا على روسيات ووقف كيجبد من جيبو لور بزطامو وجبد لاكارط والصانع بقى كيشوف فيه وفالعمال ديالو
الصانع : و ولكن . م موسيو .. هادشي .. راه دياا .. دياال ( قاطعو )
جود : دالواليد .. وهادي خطابتي انا ( مد ليه الكارط الخاصة ديالو لي خارجة على البروتوكول ) تخلص ...
الصانع : اه واخا اسيدي .. و ولكن راه ماشيي انا لي كنصنع انما كاين الفريق لي مكلف
جود : داكوغ .. دونك .. غتقاد ليا الطوطال ... سيفطو لنبيل " مدير اعمالو " غيتكلف...
ضرب ليه على كتفو وخرج حل الباب لور حط داك الصاك لور وضار ركب بقا شحال كيفكر فداك العبارة .. ميكذبش انها عجباتو ....فنفس الوقت حيراتو ... معرفش شكون لي خاصو يكون شجرة وشكون لي خاصو يكون الغصن .. ولكن لي قدر يفهم منها ... هو ان لي غايكون الشجرة هو لي غيبادر بكولشي وهو لي غايخخصو يكون مثمر .. وهو لي غاايدير بلاصة لدلك الغصن فين يكبر ويمتان ......
تنهد ورجع ديمارا الطموبيل غير كيتفكر فقصة لوؤي وسلطان وقسم كيرجع ليه الضييييم ... شاف راسو فاشل عاد عرف انو مفاطرش ... داز لوطيل ودخل شد كرسي وطلب فطورو وجلس شاد قهوتو وكيشوف للبحر من الزاج ... ويرجع يشوف لكاسو دالقهوة .. علاش مالها قهوتو ... مالها مغاتواسييهش ؟ .. مغدعموش ؟ .. مغاتخففش ليه صداع الراس ! ضروووري بنادم !!!! شي لي كيحرقو كتر هو علاش هو نية بزااااف !!!!
علاش نهار كيبغي كيبغي ييعطي كووولشي ... كون كان ليوم خطابة واحد فدراري كان غيكون متحمس كتر منو .. مبقاتش فانها غير هضرة .. بقات فانه قراار كاااايتخاد ... قراااار مصيري .. زعما لهاد درجة خطابتو ببيلسان ماهماتش العائلة ؟؟؟؟؟ واش مزال شاكين انهم يقدرو يكملو بحال لول داكشي باش مامحمسينش !!!!! ..
لقا راسو تاني غايبدا يتفركع عليه بقوة الاسئلة هو يخشي وجهو ففطورو ملي شاف فساعة ديال يدو بلي قربات ستة ونص .... وهو عاد كااايفطر ...... ناض شد الطريق ديريكت لقصر تاكان ساعة سبعة ونص .. نزل .... وطلع فالاسانسير تحل بيه مباشرة وسط القصر وتمشى جهة الدروج وهو يشوف لامار نازلة كاااتجري كللللها متووووترة ... غير شافتو وهي تغووووت
لامار : فيييين كنتي .. علاااش طافي تيليييييفون كنت غااااانحماق
جود : شششش .. كالم طوا .... مشيت لاطولي
لامار : تعطلتي اولدي راه تخخخلعت وطافي تيلييييفون قلبي كان غااايسكت .... كون ماشي الكااارد لي قال لباباك راه موراك
جود : ( تنهد ) بررردي شوية راه هذا غير نهاااار عادي .. غييييير هضرة .. بردي شوية
لامار : ( كتشوف معاه وكترمش ) مالك ؟؟
جود : مماليش .. ( جا طالع وهي تشدو )
لامار : جود ؟؟؟ ياكما مقلق من ختك .. يلاه لقيتيني قطعت معاها تيليفون ..... ماااخليييت ليييها فين تحط معايا كللمة .. نورييها شنو هي خطابة خوها وماتجيش ... قالك هي عاااد تجي دابا توصل عندي هنا تالوحدة دالليل غير بلاش
جود : ماااعليش الامار ماعليش .. كل واحد كايدير اش غايدار ليه .. باش تانا نحل عيني شوية
لامار : ومتقلقش تاني بزاف راه هي مفخبارهاش ليوما الخطبة .. الغلطة ديالي مقلتش ليها غتركبوا الخواتم ... بغات تجي دابا ومخليتهاش ..
جود اشار ليها براسو بحركة عيااااانة ومكتئبة وجا طالع وهي تشدو تاني
لامار : شفتي الخواتم عجبوك ؟ باباك لي ختار
جود : شفتهم .. راهم فطموبيل .. ملي نكون نازل فكريني ...
لامار : واااقوول ليااا ( بضحكة بغات تبدل ليه المورال حيت شافتو شحال طافي ) كييييجيييت
( بدات كضور حداه وهو تبسم غير بشوية كانت بجلابة مخزانية فالخضر ملكي وطالون كحل عااالي وصاك كحل وشال كحل كيف العادة غير محطوط فوق راسها كيبان شعرها شوية تحت منو
جود : ( بصوت عياااااان ) بيرفكت ...
لامار : يييخلياااا ليااااااا اااجمل عريس فالدنيييا ( جبدات ليه حنكوو بيديها وهو بعد راسو مبتسم بخاطر ضيق ) وصافي احبيبي متقلقش فنهار بحال هذا .. تتجي ونووووريها ... اه نسيت .. راه خديت الورد تشوفو ؟
جود : صافي تاذوقك راه زوين ... منعرفش بحالك . .شنو خديتي ليها اخر
لامار : الورد ؟؟ قال باباك نزيدو شوكولا قلت ليه مكاين لاش ... جاتني غير هضرة عاااادية ماشي ششسي حااااااجة ..
جود كان فوق واحد درجة ورجع هبطها ملي سمعها
جود : كيفاش ماشي شي حاجة حتى نت ؟؟؟ كيفاش غير الورد ؟؟؟ (بالغوات ) لامار واش باغين تسسسطيوووني هاد النهاااار ولا كيفاش ؟؟؟؟
لامار : ( وسعات عينيها كيفاش تعصب ) اا .. ز زعما قلت ا الورد ولي بيجو باراكا ..حتى للعرس وداكشي عاد ... فففف... صااااافي مايكون غير خاطرك اولدي شنو بغييييتي ودابا نقوليهم يجيبوه ...
خلاها وطلع فدروج مخنززززر والسكار كيطلع شوية بشششششوية
لامار : جوووود .. جود اووولدي والله ماقصدت فيها شي حااااجة
جود : ( وقف فنص دروج وضار عندها ) لاماااار ... ( رجع تاني هبط تلاثة درجات كيشوف فيها مخنزر ) واش هاد البنت مباغينهاااش ولا مالكم ؟؟؟؟؟؟؟
لامار : ( وسعات عينيها ) لااااا بالعكس اولدي فرحااانين
جود : مبااانش ليا !!! ... كاينة شي خطبة غير بالورد الامار ؟؟؟؟؟ كنتي تقوليها انا نتكلف بالاومور راسي متقوليش ليا انا غنتكلف بكووولشي !!! راه عووووولت عليك انا مكنفهمش فهاددي ولكن داك البنت راه مااارخييصاش لهاد دررررجة الامار
لامار : حااشااا حاشا اولدي واش رخصناهااا .. راه غير قلنا زعما جيل ليوم ماعندكمش مع داكشي بلدي ....
جود : ( طول فيها الشوفة ونطق ) لامار .... انا مكنعرفش لا الجيل ديالكم لا ديالها لا شنو كيدار فهاد المناسبات .. انا كنعرف حاجة وحدة .. داك البنت .. كتستحق .. اهتمام حسن من هذا ...
خلاها وطلع فدروج وهي غير كترمش تاتم داخل اسد من برا لي هاز كوستيم فيديو وشوميز حال ليها الصدايف مسخسخ
اسد : واجدة !
ضارت عندو وهي باقا متبعاه ب عينين حمرين دامعيييين ومشات تلاحت فحظن اسد معنقاه وبدات تبكي
لامار : عصصصبتو فنهار خطططبتو اا اسد ....
الفوق ...
طلع بزربة تاوصل لكولوار هو يرجع بلور متكي على الشباك كيتنفففس وكل مرة ينفض راسو حيت ملي كيتعصب كيحس براسو بحالا غيفقد الوعي بحالا غاااايغيب ... مزال ماقداش يفهم فين هو المشكل .. واش فيهم ولا هو لي زاد فيه ؟؟؟؟؟ غمض عينيه مززززير عليهم كيحاول ياخد نفس وكيحاول ميديش عليييهم بزاف ويقول ماااعليش مااااااعليش ....لي منعدو زهر راه معندوش وصافي واخا منعرف اش يدير ... وهو يتمشى بثقالة لجناح قدس ودق جوج دقات وبقى شوية عاد حل لباب ... غير حل ببااانليه الظلاااام !!! ...
علا حااجبو كيقول فين هادي .. دخل وشعل الضو فالكولوار ديال جناحها كايعيط قبل ميدخل
جود : قدس .... ققدس ... .
يلاه غيزيد هو يسمع صوتها بانييين
قدس : جوووود ...
دخل بزربة مخلوع وشعل الضو وهي تبان ليه مغمومة فالفراش كيبان غا راااسها ونيفها حمررر ووجهها كترررر ....
جود : قددس ؟؟؟؟ ( دار يدو على جبهتها لقاها كترجف ) من امتى ونت واكلها هنايا !!!!! هضري يييجي طبييب
قدس : لا لاااا اجود .. غير كريب عادية دابا يفوتني الحال .. خديييت دوا ...( شافت فيه بابتسامة متأسفة ) كنت باغا وبزاااف نكوون معاك اليوووم اجود ... خصوصا صباح كنت مع بيلسان وشفتها شحال متحمسة .. اعتذر ليها فبلااصتي عافااك راه مقاداش نتككعد .. وتا بابا ماخلانيش قبيلة نوض
جود : ( كيشوف معاها كيف مهلوكة ) ماااعليييش رررتاحي ماشي مشكل .. فوقاش شربتي دواك
قدس : شربت صباح .. وششرب ليا واحد بابا فاش جا ويلاه شربت تاني دابا
جود : رتاحي ... خلي تيليفونك شاعل .... ولا عرفتي شنو .. ( كيشوف معاها عارفها مناعتها قلييييلة ) نوضي واخا نعرف نلويك فماااانطة ويلاه معانا متبقايش يوووحدك
قدس : لا راه نتوما غتمشيو ورجاء غتبقى معايا متخاااااافش .. ( عرات شوووية يديها من المانطة وشدات فيديه لي حرقاتهم بسخانة ) سسسسمح ليا عافاك .... كنت باغا نكون معااااك .... ومع بيلساااان ...
جود : نت بعدا راه ماشي لخااطرك .. ماشي مششكل رتاااحي .... ( هبط على جبهتها باسها )
قدس : دييييرليا تصاور عااااافااك ولا طلق ابيل فيديو
جود : واااخا .... نعسي .. الله يشافيك ...
خلاها وخرج من جناحها كيتنهد وغير كيضور فراسو على هااد زهر لدرجة بانت على فمو ضحكة مضطررببة ... لي قالو عليها كترة الهم كضضحك .... ضحكة دالفققققصة .... يلاه ماشي فالكولوار هو يبان ليه وسيم طالع فالدروج غير شافو بدا يحييد الكيت كان بحوايج السبور
وسيم : افين العريس !
جود : فين غادي حتى نتا ؟ فرنسا .. راجع لامريكا ... نازل لورزازات !
وسيم :هههه علاش ! مغادي فين انا .. انا غادي نلبس حوايجي نلحق عليك راه الواليدة دارت ليا سكوندال لتحت بحالا عندنا امتحان خاصنا نمشيو فالوقت ... ( جا ماشي لبيتو ورجع ضار ) اجي حقا الواليدة جالس عليا لبس كوستار ماكوستار .. ومكاينش لاش داكشي نخليوه ليك ... راك عارف ماعنديش مع داكشي ... لبس عادي وصافي .... راه غنمشيو غا عند عمي يونس ..
جود : ( كيشوف معاه مطووول وبلي اصغر واحد فالعائلة ومستهن بالموضوع تاهو ) يلاااه هاكاك كاع بلاش عليك تبدل
وسيم : تا لااااا ماشي لهاد درجة ههه ..
خلاه وزاد لبيتو وجود غير كيشوف .. لا هنا دبصح تأكد بلي تاواحد مامآمن بهادشي لي كايطرا وتاواحد مافرحان لهاد الخطبة هنا ... و واقلة حتى هو نيت ! ..
خدا نفس ودخل لبيتو يقاد راسو واخا المورال زيرو تاداك التيليفون حلف مايشششعلو .. هز كوستار ودخل لدريسينغ ... وبقى كالس شحال فوق كرسي كيتنهد وهو كيشوف فيه ....
فيلا يونس ...
كانت بيلسان جالسة فوق كرسي ديال مرايتها .. لابسة غير بينوار قصير ... وشعرها مجموع بليبوكل ... والميكاب ارتيست واقفة كتجمع ماتيريالها .. كانت ماكات ليها مكياج خفيف خاص ببحال هاد المناسبة ... وضحكات ليها وخرجات ... اما هي باقا على نفس الكرسي كتشوف لكوستيم خطابتها معلق قدامها .... ووقفات بشوية حتى وصلات حداه وبدات دوز بيديها عليه وعلى تفاصيلو لي كلهم كيوحيو برسمية هاد الحدث ... ورسمية هاد العلاقة لي غادي دخل ليها مع جود .. مع حب مراهقتها .. حب حياتها ... كانت كظن مستحيل توصل معاه هاد اللحظة ... منهار تفارقو .. بدات كتحاول تحط فمخيلتها راجل اخر لي غيكون كيركب ليها الخاتم شي نهااارر .... ولكن ابدا معمرو ركب ليها فمخيلتها شي واحد من غير جود .. كان كولو مسيطر على دماغها .. على مخيلتها فمستقبلها وماضيها وحاضرها ..تبسمات بطرف شفايفها لي كانو كيلمعو بلكوز غوز خفيف ... وهي تبدا تحل حزام البينوار بشوية تاطاح كامل وبقات غير بدو بياس بيضين ... والاصوات كتطرق فمسامعها بلا هواها ...
_ غاندير جهدي كاااامل .....
..........
كان جود كايقرب لكوستيم ديالو .... نصل سروال دالسيرفيت ... وبدا يبلس سروال الكوستار لي كان زرق غالق .... والافكار مزال كيضورو فدماغو بزاف دالاسئلة كايطرها دماغو عليييه وكيحاول يجاااوب بجواب يقنعو ... فنفس الوقت كايسد صدافة السروال
- باش نسعدها .....
.........
لبسات بيلسان سورال كوستيمها لي كان فالغوز بيبي فاااتح اقرب للابيض ... وسدات ليه صدافة لي كان مزيير جهة فخادها ومطلوق من تحت وغاية فلاكلاص .... واقفة فالمراية كضور ولفوق باقا بلي سوتيان وطولات الشوفة فالمراية بابتسامة
- باش يكون معايا فرحان ...
.........
خشا الشوميز الكحلة تحت السروال لي كان ساد صدايفها لي مزيرة على صدرووو وحال ليها جوج صدايف لفواقا باش يتنفس عنقو العريض .. وهز الصمطة من البواطة كايحيد ليها الغشا ....
- باش عمر عينيها يبكيو مزاال ....
.........
عاطية بظهرها قدام المراية وكطل براسها كتحاول تربط خيوط الطوب لي لبسات من فوق مع المراية .. كان طوب ساطان بسماطي وملور كايتشد بالخيوط ... ربطاتهم عاد وقفات مستقيمة كتشوف وتبسمات ...
- باش نكون المناسبة ليه ....
.........
كيصد صداف الجيلي لي ازرق بتوب السروال ولبس فوقو الكوستيم لي كان تاهو ازززرق وخلاه محلول وبدا يقاد ليه الصدايف ديالو فيديه وشاف فالمراية ...
- باش نكون المناسب ليها ....
..........
طلعات الكوستيم فوق كتافها لبساااتوو فوق من داك الطوب الحريرية .. كان بتوب السروال ونفس اللون .... وصدايفو ذهبييين وايييفاازي جيهة الخخخضررر ....
- معرفتش واش غنكون قد المسؤولية .. ولكن ...
..........
كلس على كرسي كيربط سيور صباط كلاص لامع ... عاد وقف وخدا تنهيدة عميقة ...
- غاانحاول ....
........
ركبات بروش ماسي على شكل فراشة صغيييرة فالكول ديال الكوستيييم .... و لبسات سلسلة خفييييفة فيها حجرة ماااسية لااامعة ، وبدات تهز خويتمات صغااارررر ورقاق ماسيين لبسات جوج فابهامها .... وواحد فاصبع سبابتها .... وهزات سويعة فضييية رررقيقة محجرة لبساتها وحركاتها بطيئين كاتستمتع بكل حركة .... وعلات عينيها فالمراية ....
- نكون ليه .... السعادة ....
.........
حل المجر بشوية وحيط يدو على بارفان dolce & Gabbana وقربو لعنقو معلي راسوو رشو ... ونزلو رشو فمعاصم يديه وحكهم مع بعضياتهم .... عاد حل مجر الساعات .. وهز ساعة روليكس حديدية ... ولبسها فيديه ...
- السند ....
........
رشات بارفانها كريستيان ديور مغمضمة عينيها كتستنشق داك الرذاذ لي كيبان وسط من الدريسينغ لي مظلم نوعا ما ... وجلسات على كرسي صغير وجبدات من كارطونة ديور صباط دومي طالون بيض لبساتو ... عاد وقفات قدام المراية وبدات ترخي فدوك ليبوكل تاتطلق شعرها كااامل .... وبدات تنفخو بيديهااا للتحت ... خصلاتتو الذهبييين لي مموجين فوق ظظهرررها ... وتبسمات بشششوية للمرايا وهي كتشوف لاطلالتها وقالت بصوت مسموع ...
بيلسان : كنبغييييك ....
.........
قاد شعرو غير بصبعان يديه لور وترخاو ملامحو كانه غيبتاسم بدون متبان على شفاهو بسبب مورالو الطايح ..... وهضر بصوت كانه كيخاطب نفسسو ويقنعو
جود : غاانبغييك
خدا جود نفس عميييق ...
وخرج من ديريسنغ ديالو .... يلاه غيهز الريمودات يطفي ليكليما و الضواو ... هو يتفكر بلي راه غادي غير بوحدو ... الوحيد لي فجنبو هو خوه وسيم .... حاول ماضيعش ليه هاد الفكرة نهارو .... وانو الاهم هو خطبتو بيها .. الباقي كلو مكيهمش ... الاهتمام مكيتطلبش .. ومكيتفرضش .... مدام مالقيتيهش ... حاول تخلقو نتا لنفسك .... والى لقيتيه .. حااافظ مزيان .. على دوك الناس .... حيت وجودهم ... قليييييل فحياتك ... ونااااذر .. هوما لي تايبينو ليك قيييمتك فهاد الحياة .. وانك شحااال غاالي فقلوبهم .. بحركات بساااط ... بحال مثلا يكونو معاه .. فنهار بحال هذا ....
تنهد بعد ماتأكد انه لامدرتيش قيمة لراسك راه مكاينش لي يديرها ليك ... كيعرفوك فالضحك .. ولكن فالصح قليل فين تلقى السند الحقيقي ....
خرج من الشومبر ديالو كيسمع صوت لامار من تحت ملي سمعات خرج من الجناح ...
لامار : جووووود .... واااسررربي اوووولدي راااحنا معععلططططلين ... ارييج كاتصوووني .. واااسربي .... باباك ووسيم كااايتسناااااو ....
خدا نفس عمييييق وهو غادي فالكولوار وكيسمعها كتغوت لتحت ديال الدروج ... ونزل عندها كيتمشى بشوووية وخاطرو ضيقة عليه .. ميكذبش انه كان فرحاااان ... وكيحاول يبقى متفاائل بخطبتو بيها وبداية جديدة فمرحلة فحياتو مكانش داير ليها الحسااااب .. ولكن الجيست لي لقاه من ولاد عمامو وختو بدل ليه المورال كاااااامل ....
لامار : ( كتشوف فيه نازل بكستااارو .... وتبسمات تادمعو عينيها وهزات يدييها حطاتهم حدا فممها ) مشااااااااء الله .....
تسناتو تانزلو كامل وهو مورالو طااايح ... وهي تقرب عندو وعنقاتو وتاهو تحنا عندها كيطبطب على ظهرها وهي مصبراتش دغيا بكااااات ورجعات شافت فيه شادة وجهو
لامار : فوووقاش كبررررتو ... فوقاش ؟؟؟؟؟ مااااحسييييتش
جود : ( ساهي فيها وفدموعها وهز يدو كيمسحهم ليها ) تاحنا ماحسيناش ....
لامار : عرفتي .... كنحمد الله لي خلاني حتى نشوف ولادي عرسان .... هاااكا ( شدات يديه كتشوف مع اطلالتو ) بحال السبوووعة .... كندعي فكل صلاة نعيييش تانشوفكم هاكا .... ونشوفكم مستقريين ودايرين عائلااات صغيررة ديالكم وتجربووو داك الاحساااس ديال يكون عندك وليييدات وكتخافو عليهم وعايشين مع هاداك لي كتبغييييوه ....( دوزات يدييها على وجهها ) رررربي يسسسسسعدك اولدي ... راه تستاااهل الفرررحة .. تستااااهل اولدي تعيييش حتى نت .. تستاااهل تفرح فحياااااتك ...
جود : ( غمضض عينو وقلب راسو باس يديها لي فوجهووو وشاف فيها ) خليكم نتوما معانا ... وكولشي غايكون مزيااان ..
لامار : ( بدات كتحاول تمسح دموعها ملي سمعات كلاكسون برا ) اااي ... تعععلطططلنا .... اسد غيقلب علينا الدنيا ... يلاااه ... ( شافت لساعة ) ثمنيية هادي اولدي ...
جود : سيري انا غنزل نهز الخواتم راهم فطموبيل
لامار : لا اولدي يلاه معانا ... علاش نديو جوج ...
جود : ماعليش غير سيرو انا موووراكم ... شفتي قدس ؟؟
لامار : اه راه خليت معاها رجاء .. ديجا مغنتعطلوش .. يلاه اولدي ...
خرجات لامار من الباب دالقصر وهو تاجه للسانسور نزل لباركينغ ديالو وقف قدام الصف ديال الطموبيلات مصغر فين لي كان راكب فيها قبييلة ... غمض عينيه كيتفكر .. عاد لقا راسو كانت فلوون المارون !!! دونك كان فالجيپ ... من ديما كيعتمد هاد الطريقة فالتفكير انه كيرجع شوية لور ويتفكر الالوان الريحة ولا الموسيقى ... لي تقدر توصلو لشنو باغي يعرف .... مشا باتجاهها لقا راسو مخليها محلولة اصلا ... جبد دوك لي صاك لي كانو لور وهز تيليفون لي بقى مليوح تما ... واتجه ل اودي هي لي نزل معاه كونطاكط ديالها وانطلق ... يلاه طالع لقا باه فالبوابة غير شافو من موراه عاد زاد وزاد هو تبعو ...
شدو طريق لمنطقة B ... فين كاينة الفيلا ديال يونس ... طريق كلها هو غير ساهي وكيتنهد ... عاد شاف لتيليفون وشعلو ... غير شعلو بداو يطلعو ليه بزاف دليزابيييل لي مشدودين فلابواط وليميساج من قسم وسلطان و لوؤي لي كلهم عبارة على اعتذارات لي ماغيرو والو فنفسيتو !! .. وليزابيل دالمنادجر ديالو والبنك واسبرو ... تخطى داكشي كامل ودخل لديسكيسيون ديالها عين فتيليفون وعين فطريق .. كانو غاديين فجو الغروب كتبان الشمس كطيح فالبحر لي فجنب طريق وجنب لاخر كان ضلااام فالغابة .... وكتب ليها
جود : ار يو ريدي " واش مستعدة "
حط تيليفون بضع تواني وسمع الجواب دخل ليه وحلو لقاها كاتبة ليه ...
بيلسان : اي دونت نو .... ليتل نيرفز " معترفش .. متوترة شوية "
جود : واي .. ايز ايت د فورست تايم يو ويل نو مي " علاش ... واش هادي اول مرة غتعرفيني ؟ "
بيلسان : اي جيس ... يس ... " كنظن .. اه .... "
تنهد وحط تيليفون وكمل صوكانو ... وسط افكارو تالقا راسو داخلين لازون بي .. ضرب غير يدو صافح من شرجم فالمسؤوول ديال داك لازون لي كان فالاستقبال .. وزاد داخل وسط الفيلات والبحر كان من موراه والحال ضلااااام ...
عند اسد ..
كان صايك لي تاهو بكوستار نواغ انيييق كيليق بمناسبة خطوبة ولدو .. ولامار حداه ووسيم لور ملهي فتيلفونو ... ولامار غير كتشوف
لامار : يااا على دنيا كيييدايرة ! كنا كنجيو لهاد الطريق ومورانا عدنان ولا يونس .. ماتهنينا تاداو اش بغاو .. مكانش كيحسابلي ان غنوليو نجيو و غيكون ولدي هو لي مورايا ....
اسد : دنيا توقعي منها كولشي ....
لامار : ( شافت فيه ) صراحة فرحااانة ... اريج اعز ماعندي ... فاش كنا صغارات .. كنا كانقولو حياة بعضياتنا نعطيوها لوحدة فينا لاحتاجتها وماتغلاش عليها .... كبرنا ووفينا بوعدنا .. عطيتها حياتي .. لي هو جود ... وعطاتني حياتها .. بيلسان .... مرتاااحة حيت ماشي لبراني ...
اسد غير كيومي براسو بابتسامة صغييرة ونطق بصوت مستغرب
اسد : كيكبرو بزززربة .... يلاه لبارح كانهزو فيديا مكيبغيش يتمشى ...
لامار : ههه .. راه متصورش فاش شفتو لاابس .. عرفتي .. راه قلبي تههز من بلااااصتو ... ترررعد ليا ... شوفتو بحال فاش شفتك نتا اول مرة فالخطبة ههه ... داااي منك بزااااف ...
اسد : وراه ولدي اش بغيتي ..يدي غير منك ... ( شاف فالمرايا ) وسيييم
وسيم : ابابا ...
اسد : فرررحان !
وسيم : اااه .. علاش لي منفرحش راه خويا واحد لي عندي ....
وصلو قدام فيلا داريج يلاه غايباركي اسد وجود تخطاه وباركا قدامو من الجهة الاخرى دالباب .... كانت الفيلا كلللها مشششتعلة بالاضوااااء ... شاف اسد لجنب بانو ليه طموبيلات عدنان ويونس وسفيان وزياد مصافين تما ... وحل طموبيل ينزل ... جود يالاه غينزل هو يبان ليه تيليفونو فوق الكوسان شعل بالضو ... طل عليه هو يلقاها نمرة ماجدة !! علا حاجبو كيقول اش بغات هادي دابا ! .. فلخر قطع ودارو فجيبو ... ونزل من طموبيل حل لور هز داك الصاك هو يشوف باباه جاي بجيهتو ... وعلا فيه عينيه وتبسسم .. واسد حل ليه يديه وجود قرب عندو عننقوو عناق رجوولي بالكتاااف .. وبعد عليه اسد وزير ليه على كتفو ...
اسد : منخافش عليك .. عارف شنو ربيت ....
جود : ( ايماءة براسو مع ابتسامة ) كووون هاني ...
جرو اسد : يلاااه ...
جود : فين لامار
اسد : كتهصر فتيليفون مع سعيد ... هاهيا غتبعنا ...
جود : صونا عليا تانا ... نساليو ونعاود ليه
زاد جود واسد معنقو يلاه غيوصلو لباب هوما يسمعو لامار
لامار : صصصبروووو .. الووورد اجوووود .. صصبرووو ...
مشات بزربة لكوفر هزات بوكيه دالورد حممررر وقربات عندو
لامار : ( هزات عليه الصاك ) عطيني هاداك غنعطيه لاريج .. وشد هادا
جود : ( كيشوف فداك البوكي ) مكاااينش للااااش .. عطييه لوسيم ولا جيبيه نت
اسد : هز الورد قالاك جيبيه نتي
لامار : من قبيلة ونت قالب عليا دنيا .. باغي تكبر بيها والورد مغتهزوش .. هززز وهنينا ...
هز عليها البوكيه وهي رجعات بزربة لطموبيل تهز صاكها وتجي هي ووسيم ... الباااب الكبيرة ديال الفيلا لداخل كانت محلولة وكيتسمع شوية من الهارااج والباب صغييرة كانت مردودة وجردة كتيان منظمة ... حل اسد داك البااااب الصغيرة يلاه داخل جود حاني راسو .. هو يطلعو بزربة مخطوووف !!!!!!
تسمعاتليه الدقة المراااكشية و تشعلو بروجيكتوورات ديال الجردة !!!!! ..
وقف فبلاصتو جااامد مووسع عينيه ماامستووعبش !!!!
واسد مبتسم فيهم ... وجود غير حال عينيه كانو فرقة ديال الدقة المراكشية بجلالب صفرين و طرابش حمرييين وطقيطيقات فيديهم وعلا عينيه لباب لفوق لي كانت واقفة اريج ضاحكة خارجة للاستقبال بجليليبة شيك قصييرة وحداها جنان لي لابسة كوستيم كلاص فالاخضر هازة بنتها وحداهم زياد ويونس بالرسمي حتى هوما .. ورتاج لي كانت تاهي بجلابة مخزنية وحداها عدنان بالرسمي و سفيان تاهو بنفس رسميتهم ملابسش غير لافيست وحداه حياة بجلابة حتى هي واية فكرسي بكوستيم غوز كتصفق بيديها فرحاانة حداها أنس...
مزال كيرمش غير بعينيه ... تا حس بشي واحد جرو شوية لجنب بعدو ... ضور راسو بان ليه الكارد ديالهم دااخلين بطيااافررر ذهبين وعلاا حاجبو مفاااهمش منيين جا هادشي ؟؟؟ وهي طموبيل لي كانت هازة قوام الخطبة يلاه حطات موراهم ...
عاد بانتليه لامار لي جاية معنقة وسييم ضاااحكة ليه ولي خلاه يعلي الحاجب لاخور هو وسييم لابس الكلااااص بحااالو بنفس الكوستار وداير فيه ضحكة شرييييرة وهو يضووور براسو لعند باه مصدوم كيسولو براسو شوااقع !!!
وهو يومي ليه اسد يشوف شكون جاي .. وشاف لجردة وهو يبانليه لوؤي وسلطان حيدو لدوك الفرقة طرابشهم لبسوووهم ووقفو وسسطهم كااايشطحو وتقيتيقات فيييديهم كااايشوفو فيه بببضحكاات ماااكرين وهو داير فيهم داك الشوفة ديال " الى شدييييتكم راه نقتلكم !!!! " مخلطة بصصصدمة وعدم استيييعاب ... جاب ليه الله بحالا كايحلم !!! ....
باااقي مصدوووم فيهم تاااحس شي واحد عننقووو ملووور وهو يضور وتلاحت فحضنووو عنقاااتو كضحك عاد بعدات شادة وجججهوو كتهضر بجهد من صدااع ديال الدقة
قسم : عرييييييسي الغزااااااال ...
جود : ( بصدمة ) قسسسسم !!!!!
قسم : ( بضحكة شرييرة قربات لوذنو بصوت مرتفع من الصداااع باش يسمعها ) سسسسسمح ليييينا ....
يلاه كيرمش بعينيه تاحس شي حد كيضرب فضهرو بصبعو وضار براسو وهي تعوج راسها كطل عليه
قدس : هااااي ...
شاف فيها مامتوقعهاش وشد البوكيه بيد وحط يدو على جبهتها حس بيها باقا سخونة كتشمر بنيفها وهي تقرب عندو لجنبو عنقاتو
قدس : ننشششط معاك ونبراااا بزز عليا هههههه واخا تكووون داخلاني الموووووت نكوووون معاك فنهاااارك .....
قسم شافت فباباها بضحكة لي تاهو وما ليها براسو كانت سلمات عليهم قبيلة فاش وصلااات لدار وهو كان فلاطوليي .. وشدات فيد جووود من جهة لوخرا وسمعو تزغريييتة عوجة د رتاج واريج كيشطحو فرحاانات ... وجود شاف فلوؤي وسلطان لي كيجننوه بالضحك لي كيديرو ليه ودوز يدو تحت عنقو بمعنى غندبحكم وفرررحة كبييرة فعيييينيه بحال شي طفل صغير حيدو ليه لعبتو تابكاوه ورجعوها لييييه ... لدرجة عينيه حمااااارررو ليييييه وابتسامتو مبغاتش تجمع .... وهو يقرب عندو سلطااان كاايشطح بتقييتييقات مهبط داك طربوووش على راسو كيف مراااكشيين كيغني معاااهم
سلطان : هااااهوو لييييك اولد العم الله يهدييييك ... ( كيقرب عندو حاضي لاتجيه شي ضربة ) بييييتي بييييلي نخطبوووها ليييييك ( فتح يديه معوج راسو ضاحك) اجووود الله يهدييييك
الفرقة : اااه ااهووو ليييك اجووود الله يهييييييدك ...
لوؤي : ( كيقرب عندو كيشطح كايضور بيه كيجنن فيه ) بيييتي البححرررر نجججرووو ليك اااجووود الله يهدييييك ...
زادو قسم وقدس كيشطحوو فالوووسط
الفرقة : اهوووو ليييك اسي جود الله يهديييك
لوؤي : بيتي سكاااارررر نجييييو ليييك اجوود الله يهدييييك
جود : ( كيشوف فيه مكرررهش يهبط عليه بضربة وحدة لكومة ديريكت بالاعصاب لي ركب فيه ) راك طلعتييييه بااااركا علييييك ...
لويي : ( بعد عليه باش متجي فيه شي ضربة ماحسو غي زف عليه بداك البوووكي ورجع لور كيضحك ) تااا ريييييح ...
جود شاف فسلطان لي جاالس كيضحك وكيشطح برااسو مع تقيييتيقااات وشاف فلوووؤي بمعنى حضي راااااسك غايعططببنا .... كون مجاتو نهار خطبتو ومحرررج ومتوتر كوووون سيفطيهم لسبييييطار والفرقة بدات كتتتصفق بييديها على الطريقة المراكشية و لوؤي وسلطان دارو دوك تقيتيقات تحت يديهم وبداو يصفقوو معاهم بحالا جايين من الداوديات ماشي ولاد كازاااا .. تاحححبسو وبداا يتسمع غير ضحك العائلة ولامار لي كانت وصلات عند العيالااات وهو يتخبى سلطان ورا لوؤي وجود كيشوف فيهم محلف
سلطان : والله ما انا بالله ههههه هااااهووو مول الفكككرة ... انا غااااا درويييييش ... ريييييح امعلم
قسم : ههههه والله اخووويا مكنت غانكدب عليك هههه هي بصح كنت غانديرها ليكم سوبرايز ولكن ملي عيط ليا لوؤي عجبني نلعب شوية على اعصاااابك خهههه
قدس : تاااناا والله مكانت باغا نكذب هههه اصلا كنت جاااايا واخا مريييضة .... هوو لي قالي قوليليه منمشيييش ... شوف معاه هووو ... حنا بريييئييين ...
رتاح : ههه كبييتوها ليه فوووق ضضضهرو
لوؤي : ( كيرجع لووور وجود مخننزرر فيه غير بحجبانو ولكن وااضحة الفرحة على وجهووو والابتسامة عل شفايفوو ) هاانتا بالعقل ... بالعععقل نتفاااااهموووو ... بالللعععععقل ... بالعععقل ...
جود نزل راسو كيضورو ويضحك بالفقصة لي داروها بيه مخلطة باارضا عليهم ... وهو يحححل لوؤي يديه ومشا عندو عنننقووو كيبارك ليه وبعد ضرب ليه فكتفو
لوؤي : واخا نكووونو فالقمر اصاحبي راه غاانزلو .... شحال عندنا حنا من للميكانيسيان والشششهبة
سلطان : ( قرب عندو تاهو عنقو بمباركة ) الله يكمل كولشي بالخير اوووولد العم عقوووبة ليناااا ....
قسم : ( زادت تحشات فكتتفووو ) شحاال عنندنا منك شحاال ...
نزلات اريج من الدروج بضحكة هي ويونس وتاهو تبسم ليه وعنقووه سلمو عليه وشدو عليه البوكيييه
اريج : ممرحححباا اووولدي ...
يونس : مممرحباااا .. الله يكمل بالخييير اولدي ... الله يرضي عليكم ...
جود معرفش علاش تزييير واخا راه عموو ومرات عموو ولكن حس بالسخانة طلعات معاه ماموالفش يتحرج هاكا ... وعلا عينه شاف فباباه لي كان واقف حدا عدنان فبااب الفيلا ...بحال داك ولد صغير لي كان حتى كايعطيه باه الاشارة عاد يدير شي حاجة .. حس براسو محتاج اشااارتو تاني واخا كبر ..... ولامار عاطياها للهضرة وضحك مع حياة ورتاج ... قلب بعينيه على بيلي مابااانتش لييييه ... هو يسمع سلطان كايخاطب الفرقة
سلطان : زييييد اصاااحبي جبناااااكم باااش تسكتووو بربي مغااينعس شي واااحد اليووووووم ... ( شاف عند المعلم ديالهم ) اشوووف عندي .. العريس عندنا كااينسسى ... انا بغيييت عاد اللية ماااينساااهااااش واخا نضربوووه بمققدة
سضربو جود لجنبو تااازواااه وقطح الحححس شاد على جنبو ... ولوؤي علا فيه حاجبو بمعنى ششد كايضحك .... هوما يبدااو و تااااني محمييين طررررح وسلطان جرررر قسسسم ولوؤي جررر قدددس حداهم كيييششطحووو و العيالات تاهوما تبعوهم و وسيم فماماااه ... اما جود غير واقف كيصفق غير بديييه مححرج غير مبتسم مخلط عليه الحماااس والفرررحة بيييهم والافتخار بولاااد عمامو ... لي يفديهم بدددموو بعد هاد الجييست لي دارو ... وهو يهبط زياد جار مراتو وانس واقف حدا اية كايصورو ويضحكو .... ورجال غير واقفين تااهوما كيتفرجووو وجود كيمسح حبييبات العرق لي فجبهتو بقوة الاحراج والسخانة لي طلعات معاه والتوتر .. وكيشوف فيهم فرررحان ..
تاعلا عينيه للباااب فاش بانتليه وااقفة هي ورقية لي كترش عليهم الزهرر بالمرييشة وتتزغرررت لي كانت بقفيييطييين بيييض ببلدددي تقليييدي شادة فيديها بيلسااان لي جابتها معاها ... تاهي كتشوف فرحاانة بعينييين لااامعيييين .. مكانتش متوقعة كاينة الدقة المراكشية تاصدموها فاش سمعاتهم حيت تاواحد مداير بحسابها جابها غير سلطان ولوؤي ... غير شافها سلطان هو يمشي عندها بززربة ججرها من يديها وهي كضضضحك نزلها لعندهم وهي واقفة وكتشوف فجود لي مبتسم فيها وفاطلااتها الانيييقة هو يجررو سلطان من اليد الاخررى دخلووهم الوسط وجود غير دوز يدو على خصرها معنقها لجننبو كيبتسسم ليهم وبيلسان غير كتصفق بيييديييها وهوما نااشطيين الوسسط محيييحييين ووسيم داير لامار فالوسط وهي فرحانة لي ولادها طلعو كايشبهو ليها فالنشاااط والشطييييح ...
الفرقة : ( كاييشوفو فبيلسااان لي عينيها كالمعو بالفرحة كضحك ) ااهووو ليك البنية الله يهدييييك .... وببيييتي طوبيس نجيبو ليك .. ماتمشيش على رجلييييك .... بيييتييي جووود نجيييبووووو ليك ااالبنية الله ييييهديييك .... الغزاااالة .. الالة .. يااااو الغزاااالة ....وهاا زيييين ومحلااااااه ... ( كتشوووف فيهم و لوؤي وسلطان كيغنييو مع الفررقة وهي غطات وججهااا لي ولاا حمررر وكضحك ضضحكة وااسعة محححرجة ) اآآآآ هااااهو ليييك الغزالة الله يهدييك ولي بيتيه نجييو ليك البنية الله يهدييييك ... وشووكووولا دابااا نعطيييك ... الكبيييدة الله يهديييك ( علات بيلسان عينيها ضااحكة فجووود لي كيمعنيو على سموريتو و رجعات كتشوف فيهم فرحااانة ) الى جاب الله تانمووت ديرو قبببري فطرييييق .... وتكووون الشششهبة حاااضرة ... وتكون شهببة حاضرة والعزارة وااقفييين بجنااوييهم ماااضيين وووو العااااار الحباااااااب جوووجوووهااا
اللكل : جوجوووها
الغرقة : آويلي ويلي جوجووووهاااا
الكل : وجوجوها
الفرقة : الى مااادااتوش هووو العيشة ماااتكوونش حيييلوة .... لعااار آلحباااب جوجووهااا ....
بدات غيرر كضحك وهوما محميين الطرح وجها ولا حمررر مززززنك وقسسم كتتشطح مع سلطاااان وقدس مع لوؤي لي شاد يديهاا كيضورها نساات المرض بالفرحة دخطبة خوووها ورتاااج كتششطح مع اريج وحياة مع سفيييااان ... وجوود واقف كايصفق غير بيديه حشمان .... وهوما ضايرين بيهم تابدلات الفرقة الريتم لاغنية لي كاتعجبهم كامليين وهوما يبداو يغنيييو معاها كاااامليييين صواتهم كيتسمعو كثر من الفرررقة معنقيين بعضياتهم
- ومال حبيبي مااالو مااجاااااش اممااااممااا .... مشااا لبلاااااد بعيييدة ومولااااااش اااممميييييمتي .. ومال حبيبي مالو ممجاااااش اممااممما . .مشاا لبلااد بعييدة ومووولاش اميييميتتتتي ...
جهاد الريتتم وبداو يشطحوو بييناااتهم بعيد على بروتوووكوولهم وايتيكيتهم وداك العرق دالنشاط لي كيينفففض فيهم ولي وارتينو من موااااتهم خرج هاد الليلة بفررحتهم لجود وبيلسااان .. ششحفو معاهم الفرررقة نوضو العجاججة فالجردة وجبهة لوؤي وسلطان كلها كتتتلمممع بالحبيبات دالععرق
الفرقة : حرااام غايك احبيبي ووووولي لدّاااار اماااما ... منهااار نتا لي مشيييتي و قلبي مكوي بالناااارر آمييييمتي ...
هبط تا يووونس شد فيدين بنتوو كيشطحها فالوووسط ككلهم فرحااانييين هو يجر لوؤي رقييية لي علات القفطان مع المضضمة وعطاتها لرركيييز معاه وهومااا كاااييصفقوو ليههاااا وهي تجر جود لعنندها كتشطح هي وياه وهوما ضااايرين بييهم والفرقة بدلات ليهم الرييتم ملي شافتهم شاااخدين شخدات معاهم
الفرقة : وااا ططلقت لااالة دوك الشعوووورر في غااابة خخخليييوية ... مااايرويها غير زيوت وحنااني وردية ....آآآ ويلا جات ويلا جات .. سالوها واش بغات .. يعطيها زووورة للنبي يعطيييهااااا شيييي ححححجة .. وهااااكدا خلاووه مواليييه .... الملللحة والسررررر عليييه ... وووالحلااااة فيييين كاااينة ؟؟؟؟؟
الكل (كيشيرو لجود بيلسان ) الحلاوة كاااينة هناااااا
الفرقة : السلااامو عليييكم
الكل : وعليييكم اسلاااااام
الفرقة : سسيييدي العرييس كييجااااكم ؟؟؟؟
الكل : بوووووكوووص يااا سلاااااام ...
الفرقة : لاالة العرووسة كييجاااتكم
الكلة : تيييتيييزة ياااسلااااااام ...
الفرقة. وااش كيستاهل العريييس
الكل : الششهبببة والسقلي والشععرررر مدددددلي
ولاووول مرة فتاريخ عائلتهم لوؤي غيجيب يدين اسد وعدنااان للوسط بزز علييييهم يشطحو .. لامار غير شافت اسد مشات عندو شدات فيديه كتشطح معاه هو مساايرها مبتسم بالفررحة دولدو لي خلاااتو يييشطح هاد نهاار واخا غير كايصفق بيديه ... وقسم شدات فعدنااان كتشششطحو معاها واية كتتصفق بييديها فرحااانة حداااهم ...
الفرقة : مااال حبييببي مالوو ماااجااش امااماااا
لوؤي : واارااهاا جاا اصاااااحبي ( شد جود من يدو ) زيييد راه مبنتييش لييهم ... مدييوش علييه رااا حشامااااان
الفرقة : سييدي العرييييس شي شششطييييحة
الكل : الله يعطيييك الصحييييحة ...
جووود غيير كااايضحك وحياة كتتصوور وكانو كلهم وجوووه مبتااسميين وزياد قرب عند جود ولوووؤي ككاايشطحو ...
والفرقة كتزيييد تشششخد الطررررح ورقية فالوسط هازة قفطانها كتركز .....وهوما كايصفقو ليها ضاحكين ....
الفرقة : وتكايسووووو على صغرركم .. هااادييييك الحااااجة هااااديييييك
الفرقة : يلاه كولشي معانااااا .. تعاااالي حدايا .. اججججي ونسيييني .. تعالي حدايا اللليل طويل والروج قليييل .. تعاااااالي حدايا .... اااجييي ونسيييني .. تعااالي حداايااااا والليل طويييل والرووووج قاييييل ...
الكل : ااا لاااا زهر لا ميييمون ينعل بوووو زييييييين ...
الفرقة مصدومين فييهم كيفاش هادو ناس بروتووكول شعبيين لهاد لدرجة حافضين الاغاني كلمة بككملة مكانوش عارفيين را النشاااط المغريبي عندهم فالدم كااايجججري من مواتهم ورتوووه .. لدرجة حسو راسهم فشي حححي شعععبي داايريين خطبة ماشي عند الاسماعيلييين ...
الفرقة : وبيلساان وياااا همممة .. واااكوووولشي تممماااااا ... يلااه كووولشي معاياا .. واااهيا العريييييس
الكل : واهييااا العريييييس ضووي بالشمع الببلدي وييلا جاااك زييين ضووووي بالترييسييينتي ....
الفرقة. وااهي مووولاااي سسسلطااان علييي عييينك تشووووف الزيييييين ... واتاااااهااا واتاهااا
- والله الى وااتااهااا
الفرقة : وتااتوو وتااتووو
- والله الا واا تااااتوووو
الفرقة : هاكاا يكووونننو
- بناات الرجااااال المححضية
الفرقة : سييييييييير .... وهاااكاا دييييماااااا
الكل : الضصحكة وتبسييييمة
الفرقة : هااكاا ديييما
الكل : الضحكة وتبسيييييمة
الفرقة : اااو وهادي ساااعة مباركة مسعووودة لحباااب حاااضرييين .... مع سيدي جووود ولالة بيلساااان فررحانييييين ... يلااااه كووليشي معانا وتن تن تن ..... زييينها كااايففففتن .. لااالة بيلساااان
الكل : لااااالة بيلسااان
الفرقة : وووو سيييدي جوود ..
الكل : سييدييي جووود
الفرقة : مووولاي سلطااااان ..
الكل : ييييحفضووووو ررربي ...
الفرقة : اووولااالة قسسسسم
الكل : بييحححفضهاااا ررربي
الفرقة : ولااااالة اااية
الكل : يييحفففضهااا ربي
الفرقة : ولاااالة قققدس
الكل : يييحححفضها رررربي ...
الفرقة : ولااالة جناااان
الكل : بييحفضهااا ربي
الفرقة : قووولو لييها يااقوووتة
الكل : ياقووتة ياااقوووتة
الفرقة : وتاااان تاان تااان
الكل : زييينهااا كااايييييفتن
الفقة : الله الله وقوولوو تبااااارك الله
الكل : تبااارك الله
الفرقة : يلااااااه .. هاااوو هادي ساعة
الكل: ساعة مباركة فاش تلاقينا بالرمى و الطلبة و الرجال شلى و االعزييييز على مييييمتووووو عمرو ماااايتتتخص
الفرقة : ( حبسووو الطبول والتقيتقات بدا يتسمع غا الضحك ) الله يعطيييكم الصصصصحة ...
يالاه بداو يتنفسو كلللهمم كاااينهجججو وجبهتهم كتتتلمع بالعععرق ضااحكيييين والفرقة بعدو شوية يرتاااحو
سفيان :(كاينشف جبهتو بمنديل ) اسييدي راكم كنتو مربووووطين
قسم : ( كتنش على جهها ) وتوووحشنا فيين نشطو اعمي ..
اريج : الله يعطيييكم الصصصحة ....هه هاد سللطان ولؤوي غيدخلو الجننننة ههههه
سلطان : وششنو نخليوها ميتة . .شمتونا فالعرس دزياااد مغديروهاش بينا فديال بيلسان وجووود ...
رقية : اللله ييحجبكم ويخلييكم مجموووعين .. زيييدو يلاااه سسسخفتوووونا واش حنااا قدددكم
لامار : ههههه ماما قالك فيها سيااتييك ههههههه
رتاح : ( داخلين لدار ) ولاهيلا فوجنا على قلبنا قتلنا الضيييم هههه ... الله يجعل البركة فالدراااري امااا حنااا والو ماافييدناااش
زاادو كلهم دخلو لصاالون لي كانو مستفين تما كاع دوك طييافر لي جابو الكاارد كانو عبارة على هدااايااا تقيليييدية مرشوشين بالووورد ... والخميسات ديال الذهب ... كانو جوح دالخادمات واقفين فالانتظار بصواني دالحليب وبلاطويااات دالتممررر ...
خداو عليهم داقو وكلسو وهوما باقين كينشو على وجههم واخا دار باردة بكليييما باقي فيهم الصهد ديال الششطيح ... كلسو فالمقدمة اسد وعدنان ويونس وسفيان وعيالاتهم ورقية فجنب ... الفوطوي لي مقابل معاهم كلس جود حداه سلطان ولوؤي وزياد ووسيم .. والفوطوي لاخر فيه البناااات ..
لامار : ( كتنش بشالها على وجهها ) والله تارديتووني شي عشرين عام لور ولا كترررر .... شحال هادي مشطحت هاكااا
سلطان : ( هز عليهم تمرر لي بافين تايفرقوه تينقيه من داك العمارة معندوش معاها ) وهذا هو الحل الوحيد باش نسيييوه ماايذبحنااااش هاد الليلة هههه
لامار : انا والله الا على شوية كنت غنفضخ ليكم كولشي بقى فياااااا هههه
رقية : اودي راه لعععبببكم بااااااسل قتليكم بعدو من الوولد مرييض
قسم : عرفتي انا فاش طفى علينا تيليفون صافي ققللبي كان غيسكت تانقول للوووؤي والله حتى ننننقتلك هههه
جود داير صبعو الصغير ففمو وكايتفرج فيهم شوية ابتسامة وشوية كايتحلف ....
بيلسان : اش درررتو ؟
اريج : انا تاجاات قسم وقددس بووحدهم مافهمت وااالو .. عاد قاالييك راه قالو لجود مجاااينيش وخلاوه بوووحدو هههه
زياد : وااايلي !!!!
قسم : كوولشي من تحت راااس هذااا ( ضرباتو برجليها لرجليه لي كان طالقهم وهو كياكل تمر ويضحك ) كنت جاياا فيييي اماااان الله نحضر لخطبة خوياااا ... تا قال ليا واش عيط ليك جود قلتيه نو مزال قاليا لاعيط ليك قوليليه ماااجاااياااش وانا باااقا فاسبانيا وانا راني شادة طريق داك ساعة قرب ندخل لكازا هههه
قدس : انا محكرش عليا بزااااف شافني مرييضة دغيا تيييقني معارفش الى واخا تكون شادااني المووووت هههه
لامار : خخخاصكم تشوفوو الزعفة لي دااار ليا ( جود حمر فيها وهي كضضحك ) صافي كنت غنقوليه اجي اولدي غاكنضحو معاك .. عرفتو راه عييينييه حماااارو .. يمكن هادو عصبوووه وكملت عليه انا قتليه راه غير خطبة عااااادددددية ونهااررر عاااادي وهو ويقول ليااا ( قاطعها بتحذير واحراج )
جود : لااااامااار !
لامار : هههه والله حتى ننهضر ههه قاااال ليااا انا باااغي نكككبرر ببيلساااااان يا لااااالة الا حنا مبغييييناش ههههه
بيلسان حمااارو خدودها وعلات راسها فييييه بابتسامة وهو غير كيضور فراسو
لوؤي : وهو بغى ليلة ماينساهاش .. هاهو مغينساهاش ههههه
جود : نتا حسااابك مزاااال ... راك كدير غير شنو غيرجع لييييك
سلطان : انا قلت غيعيق بيا حيت ماجابد حس تاشي مااااتش هاد سييمانة ... ولكن وااالو دازت عليه ههههه
رقية : اوالله الى راااكم يييهووووود ... تعصبو ليييااا وليييدي فنهاارو
يتبع...
التعليقات
لا توجد تعليقات بعد، كن أول من يعلق.