محتوى القصة
قسم وصلات طموبيلتها حدا الدار نزلات و الكارد تاهوما .. باركات ونزلات بعد ماعطات السوارت ودخلات ديريكت لدار كتحيي غير بعينيها متجهة لبيتها تاشداتها ماماها فالطلعة دالدروج وضارت عندها والضحكة باقا على شفايفها مكتحكمش فيها باش تجمعها ...ملي كتكون مع اصيل ... ولامار كتشوف فيها ...
لامار : فين كنتي
قسوم : موم ... نو ( كتخبي الشعر ورا ودنها وتحاول تخبي عينيها كتحس بلي اصيل كيبان فيهم ) غير خرجت نشم الهوا
لامار : ( كتشوف مع داك الضحيكة ) قسوم ! كاينة شي حاجة زوينة طرات معاك ؟ ..شفتك فرحانة ؟
قسم : ( كتحاول تجمع ابتسامتها وهي بانية فعينيها ) لا .. اش غيكون .. بالعكس .. كنت شوية مضيومة وخرجت نبدل جو ... و وصافي .. هادشي لي كاين ... ( لامار كتشوف فيها بشك ) يلاه اماما غنطلع نبدل هاد الحوايج الناس هنا ... وننزل
طلعات كتجري فالدروج ولامار متبعاها بعينيها غير كترمش !!! كيفاش هادي دخلات بهاد الضحكة وهوما اصلا فجو ماشي دهاد الفرحة وغير البارح كانت بحال الجثة بلا روح ... اش واقع مع هاد البنت ! سمعات كيعيطو عليها وضارت متقمصة واحد الابتسامة لبقة ومشات و قسم غير وصلات لجناحها سدات الباب وقلبها كيطلع وينزل بحالا كانت هاربة ! شادة عليه بيديها والابتسامة بدات كتشقق على فمها .. كتحس براسها بحال داك المراهقة دتسعطاش لعام لي اول مرة تتعجب و تخرج معاه وتجي لدار خيفانة ! معرفاتش علاش كتحس فقلبها لداخل بحال شي عصفور كيطير .... غمضات عينيها وبدات تستنشق بنيفها كتحس بلي ريحتو باقا عالقة فيها .. واحد الريحة هي مكتقدرش تحددها .. ريحة كتشمها غير فيه وحداه .... ريحة كتجننها .... ورجعات نفضات راسها والضحكة مبغاتش تجمع رغما على ملامحها ومشات لدريسنغ تلبس الرسمي باش تستقبل الناس حيت كانت سبور ....
جود فاق من نعاس مشقلب تاني كيف كل عادة ربع ساعة فسريرو يلاه كيتفكر مزيان اش واقع ويرد الاحداث عاد لاح ليزار وناض بالحفا وغير بشورط وعريان من لفوق كيحك ورا عنقو ويجبدو ويجبد فعضلات ظهرووو ويحك فشعرو وعين مسدودة وعين محلولة دخل لدوش كايخبط وجهو بالما وهو ينوض روكسي من السرير فين كان ناعس حداه وتبعو للدوش كيتمشى مع رجليه وهو كيحك فسنانو وينزل عينيه عند روكسي لي كيتلوا مع رجليه شلل فمو ودار الة الليزر ديال سنانو ففمو وخرج للدريسينغ وروكسي مع رجليه وهو كيقلب فالعلاقات لي حطو ليه اليوم كولشي كان كحل ... هز سروال دجين كحل لبسو .. و شوميز كحلة ... علا ليها الكمام مطلوقة ومحلولين صدايف الفواقا والتحاتا ... وبدا يلبس ساعتو الجلدية و هز كاسكيطتو كحلة لبسها بالمقلوب ومشا للافابو حيد الآالة من فمو ... وخدا كريم دار قطرة فيدو ودهنها للحيتو ورد الكاسكيط لقدام ... و خرج مداعب روكسي باتجاه تيليفونو .. غير شعلو هوما يبانو ليه ليزابيل ديال داك الروسية وشلااااا ميساجات .... وجلس على طرف السرير باغي يمسح داكشي هو يتفكر بلي بزاااف شحال قدو يمسح ... وناض حيد داك الكارط كاع هرسها بسنانو لاحها فالبوبيل حداه ... وحل المجر جبد وحدة جديدة خدمها ودخل لسوشيال ميديا بالضبط للانستغرام ديالو وتويتر ومسح كاع دوك البنات لي عندو تما وكاع دوك التصاور وحيد الفولو ديالو بقاو ليه غير ولاد عمامو والعائلة و المعارف الخاصين وصحابو فموناكو ... عاد حس برااااسو رتاح دابا من ناحية هاد تيليفون ويقدر يتأونكاجا فعلاقة جدية .. واخا الامر جاه غرييب ! جاتو عجيبة انه فدقيقة قدر يتخلى على نزواتو وكاع البنات .... ماجاتوش صعيبة ابدا ... كان فقط خاصو لي تخليه يقرر يمسح عليها هادشي ويشد معاها طريق وحدة ... وملي لقاها دابا ماعندو مايدير بهادشي كامل .. باقي مشغول مع التيليفون تحلات الباب ودخلو الخادمات الفطور .... ورجع خشا تيليفونو لور ورد روكسي لبلاصتو وشكرهم ومشاو وجلس كيفطر وكيفكر ساهي شاد فنجالو دالقهوة كيضورو بيديه ... وكيسول راسو .. واش تستاهلني ؟ واش نستاهلها ؟ .. واش تستاهل نحبس عليها كولشي وننسى كاع نزواتي ونكون ليها الرجل المسؤول لي يستحقها ؟ واش تستاهل هادشي .. وانا واش نستاهل وحدة لي تصبر على مرضي وشخصيتي وتبقى كتبغيني وميتغير والو فحبها ليا .... !! واش تستاهل ندير عليها هاد الخطوة لي عمرني فكرت نديرها على ود شي وحدة ... خطوة اني نتزوج ونتأونكاجا فعلاقة وحدة ونكتفي بيها وندير اسرة صغيرة خاصة بيا ... واش متسرعتش ! والا مبغيتهاش ؟ ....ورجع نفض راسو باش ميتملكوهش افكار التردد وهو خاصو يصلح هادشي ميمكنش تاعطى كلمتو و يتراجع ..... وحط داك الفنجال ونزل لتحت باتجاه فين كاين الرجال بعدما حيا غير بعينيه هادوك لي تما فوسط القصر....
عند قدس ....
قدس غير كتسرط فريقها مزيرة على عينيها ماعارفة كاع كيفاش تتعامل وكتحس بقلبها غادي يسكت فصدرها بقوة مانبض بسرعة .. معارفاش كاع شنو سباب هاد التبوريشة كاملة وشنو هاد الاحساس لي كيدوز بحال صعقة الكهرباء فقلبها ومعدتها ... وهي تحل عينيها فيه مباشرة لقاتو كيشوف فيها بابتسامة جانبية لي بدات تتجبد شوية بشوية ملي حلات عينيها فيه وهز يدو بشوية كيدوزها على وجهها ... وهي تنطق بلا متحس بنبرة فيها الخوف
قدس : لوؤي ... لؤوي طلق ... طلقني نمشي فحالي .. ومتعاودش دير بحال هاكا راه الا مشا شافنا خويا ولا بابا راه غااانمشيو فيها انا وياك ونتا راك عارف هادشي مزيان .....
لوؤي : عارف ... عارف الطريق ليك طويييييل .... وعارف باش نوصل ليك .... ونوصل لوقت لي غتكوني معااياا فبلاصة وحدة بلا منخاف من والو ... خاصني نصصبررر بزاف ..... عارف هادشي لي كندير دابا معاك غالط .... عارف باش نقيس شفايفك انتحار ... عارف باش نعنقك اعدام .. عارف باك وخوك ينحرو على قبلك ... ولكن مقادرش نحبس راسي اقدس .... كنشوف عينيك كنحط العقل و كنولي تابع حماقي ...وفين مابغا يوصلني يوصل .... نت راه ماشي العمر ديالي .. راه العمر ديالي هو لي بين يديك .... ( قرب ليها كتر حاط راسو على الحيط وصدرو تحط على صدرها ) كولشي على ودك قابل بيه ... يتهرس نيفي ويتهرس ظهري وينفيني باك ... الاعدام كامل على ودك مقبول .. لاكنت غانموت على ودك غير نموت .... ( قدس وسعات عينيها ) مقادرش نصبر حتى تكبري ... مقادرش نصبر تاتكملي قرايتك .... الشوفة فيك بلا منقيسك بلا منبوسك بلا منشم ريحة شعرك لي كتسطيني راه احتضار .... اللهم الموت ولا نبقى كل مرة نتحضر .... اللهم الموت فخطرة وحدة ويحصلونا ولا هاد العداااااب ....
قدس : ( قلبها كيضرب بجهد وكدفعو ماعرفات كيدارت تاسلتات ) ل لوؤي .. كتخلعني بهاد الهضرة
لوؤي : شششش .. انا عارفك كتقولي هذا غير كيخربق عليا ولا كيهضر كيف كيف كيهضر مع كاع البنات ... ااه .. انا واحد لي علاقاتي بزاااااف .. شفت وعرفت ونعست مع بنااات بزاف .. بست وعنقت بنات بزاف .. ولكن نهار جلست ووعيت براسي انا شنو باغي وشكون كنبغي وعرفت نحدد داكشي لي كنحسو من جيهتك شنو هو .... الفجر وذن عندي وصمت .... وحاااالف ... مايوذن المغرب ديالي غير على عينيك .... ومانفطر غير بشفايفك ... وربي شاهد عليا مادمت نفسي كطلع وتنزل ( شاف فعينيها ) ماتحطش عيني على غيييييرك ..... ( قدس غير كتشوف فيه ومتكدبش انه بغات تضحك وخباتها عندها ) نت بوحدك لي كانت ولي كاينة ولي غاتبقى ولي معايا غاتفنى .... ( شد وجهها بيديه بجوج وشاف فعينيها مباااااشرة وهي رامقاه بنظرة كااتزيييد ذووبووو وقلبها ساح بيين يديه ونزل على فمها تاغمضات عينيها وبدا كيقبل فييييها بدون ماااايييتحكم فراسو وسرعتووو وخصووصا ملي حس ييديها ضارو على ظهرو ... وتجاوبات معاااه غير مزاد فسرعتووو تاحس بطعم الددددم ففمو وهو يبعد ... كينهج وهي محاساش كاع واش تعضو شفايفها .... وحلات عينيها بشوية فيه وهو يسرط ريقوو عينيه حومر وتلاح دغيا شد وجهها عندو بحالا غتهرب ليه وقال مخرجها من اعماق قلبو ...
لوؤي : كااانموت على طواسل مك ... .. بزاف وبزاف وبزاف ... ( كيضور راااسو معاها وكايهضر مجبببدها ) و بزااااااااااف .. وبزاف .....
شافها مكتردش غير قلبها لي كيضرب بجهد وهو يبتسم بجنب شفايفو وقرب لجبهتها باااسها مطوووول تاسدات عينيها وحل موراها الباب بشششوية ... عاااد حسااات بالجرس دقلبها دق بحالا كانت محبوسة وهو شاف عندها مبسم ..
لوؤي: خرجي قبل ماتسخفي ليا هنا هههه .....
بقات غير مشوكية كتشوف فيه تاشوية عاقت براسها ونفضات راسها وشافت فالبانضة ديالها فالارض وهو شاف فيها ونزل ليها شدها كانت فيها شوية من شعرها .... بقا يشوف فيها وقرب داك البانضة لفمو باسها وهي كتشوف معاه وخشاها فجيبو ...
لوؤي : حسبيها تسرقات .. غير نت لي تعرفي تسرقي ....
قدس: (غير شفايفها لي كيتحركو ) شنو سرقت
لوؤي حدو عوج راسو معاها بابتسامة ودار يديه فجياب السروال بجوج وهي بقات كترمش .. عرفات اش قصد وبلي داوي على قلبو وهي تشد فالبواني دالباب بززززربة ومشات خارجة وهو قرب للباب وصفر وهي ضور بعد ماكانت نازلة فالدروج ...
لوؤي : نزلي عند هادوك لتحت قوليلهم يشوفو ليهم مع اياد ...لوؤي راه لي عطى الله عطااااه ......
قلبات راسها بزربة ونزلات كتجري فالدروج والابتسامة على فمها بدات تجمعها بشوية بشوية وجهها مززززنك وشفايفها مجروحين .. يلاه نازلة وهي تزدح فلامار لي كانت طالعة لعندها مشوشة فين تعطلات بعدما شافتها تبعات لوؤي ...
قدس : مم .. ماما !!
لامار : ( كتشوف لفوق وتشوف فيها ) غابشوووية ابنتي مجرييين عليك ...؟
قدس : اا لا .... غ غير كنت ف فبيتي ... و و ... وجاني ملل ونزلت
لامار : بيتك !!! ( شافت لشفايفها وهي تصغر عينيها ) شداكشي !
قدس وسعات عينيها وبدات تقيس تما وشافت فصبعها وهو يبان ليها دم وهي تسرط ريقها بزربة ولامار جراتها من يديها للكوان لي فيه الصال امونجي وطلقاتها .....
لامار : قرررربي عندي هنا نشوف ( جبداتها من يديها كتشوف وقدس كتمص بلسانها باش مايبانش ) شهاشدي
قدس : ا .. وو الو .. والو حماقيتي اش غايكون !!
لامار : ( شداتها من دراعها مزيرة عليها ) واش انا غتوريني فالبوووسان !!!!! علامن جايا ضحكي عليا انا ؟؟؟؟؟
قدس : ( وسعات عينيها كتشوف فيها مخلوعة وقلبها غيسكت ) ل اا .. لا .. ا اشمن بوسان حماقيتي !!!!!
لامار : راحنا فعزوو واقلة لا !!!!!! ...
قدس : ماما يهدييييك الله ططلقي يشوفنا شي وااااحد ....
يلاه كيهضرو واسد كان جاي باتجاههم يمشي لفين كاين رجال هو يشوفهم وبقى واقف كيشوف مصغر عينيه مال هادو ،!! ...
لامار : راااني شفتك تابعاه .... علاش تبعتيه اش وااقع ؟ وشنو بيناتكم ...
قدس : ماما دابا غير طلقي يدي راه تاضريني وغنضهر .... ماعندك علاش تخلعي مكاين والو
لامار : ( طلقاتها ) يالاه دوي
قدس : ( كتحك فراسها ورجعات شعرها لور ) اا .. م موهيم تعصبت شوية قبييييلة .. د ... داك عمات خالتي اريج وخالتي رتاج عصبببووووني ... نتوما مشيتو انا لي سمعت اش كانو كيقولو
لامار : اش قالو ؟
قدس : بغاو يلبقو شي كوفرة ولا شي عوجة من هادوك ديالهم للوؤي .... قالك بغاو يجبدوه لعندهم حيت منحاز لعائلة باباه وجالسين كيهضرو فين بكل وقاحة وانا جالسة مااارضيييييتش ومامحملتش ... تععصصبت ... و .. ومشيت قلتها ليه يرد بالو
لامار : وعلاش لي يرد بالو ؟ اش فيها كاع لا كان غيتزوج ؟ نت هادشي فاش عصبك !!!! ( معلية فيها الحاجب )
قدس : ماما .. م ماشي تعصبت على ود شي حاجة ... فففف ( كتشوف لجنب ورجعات شافت فيها ) راه ولد عمي اماما ... من حقي ندافع عليه فظهرو
لامار : دافعي عليه فالعيب ماشي فحاجة بحال هادي .. لاكنتي تعصبتي من هاد الاومور هادشي كيفسر حاجة وحدة ... كيفسر بلي بيناتكم شي حاجة
قدس : ( غتبكي ) لااااا لا ماما كنقسم ليك بالله .... وهانا قسمت ليك كاع .. كنحلف ليك مابيناتنا شي حاجة واش تسطيتي ... وو .. مكاين والو ... و ... ولكن ( شافت فماماها مزال كتسنى وشافت فالارض ) ك .. كاينة شي حاجة .. و ولكن ... والله اماما .. والله ماما مكاين شي علاقة راه ولد عمي .... ر .. راه صعيب اصلا غير باش نسيپاري بين معزتو وهو ولد عمي ومعزتو وهو شي حاجة اخرى ... مقادراااش اماما نحدد هادشي لي كنحس بيه من جيهتو شنو هو ....
لامار : ( علات حاجبها كتر وربعات يديها ) وهو ؟
قدس : ( سرطات ريقها وشافت فالارض ) قال كيبغيني ..... ( رجعات شافت فيها مترددة وكتفرك فيديها ) وقال ... كيتسناني نكبر .....
لامار : يتسنااك ؟ وهادشي من امتى ... من امتى فخبارك ؟
قدس : ( خافت تقول ليها علاش مخبية عليها ) اليوم ... غير .. غير قبيلة ملي حدرتو منهم ... قالها ليا ....
لامار : ااه وغير جا وقالها ؟ ماطرات تاحاجة اخرى
قدس : ( كترد شعرها مور ودنها بتوتر واحراج ) حماقيتي ... ا اش غايكون ....
لامار : ( قربات ليها كتر كتشوف فيها وهي مأكدة مليار فالمية ان داك العضة لي فشفايفها راه بوسة ومبغاتش تحرجها كتر والجو غير مناسب) ونت !!!! باغاه ؟
قدس : ماعرفتش اماما ... ك .. ك كايعجبني ... ( قالتها وتزنكات )
لامار : ( مدة كتشوف فيها وتنهدات ) سيري تجلسي وهادشي من بعد غنهضرو فيه مزيان هادشي ماشي داللعب هادشي فيه عائلة على قدها وكارتة جود وبيلي مبغيناهاش تعاود علينا ... سيري تكلسي دابا ومنبعد نشوفو هادشي..
قدس نزلات راسها للارض ومشات ولامار تنهدات وضارت من جيهة لوخرا تمشي هو يبان ليها اسد واقف وحاط يدو فوق واحد الكرسي .. كان منزل راسو وهو يطلعو فيها بشوية مدة مطووول فيها الشوفة وهي تصعقات ماعرفات ماتقول خصوصا انها هضرات على البوسان .. قلبها بدا يضهرب بجهد كتخاف يكون سمع كولشي وهو حرك راسو بالايحاب بمعنى منبعد الامار منبعد .... ومشا لبيرو ديالو داير بناقص كاع من شي جلسة مع الضياف وهو عقلو خربقوه ولادو .....
لامار قلبها ايسكت وبدات دعي الله يخرجها على خير ومشات بشوية كتحاول تتبسم للناس واخا عينيها مخلووووعين .... واسد دخل لبيرو جر الكرسي جلس ودفن راسو بين يديه .... فاش كيتجمعو عليه كيحس براسو تخربق ... مكيعرف اشمن حبل يشد كيترونو فيديه ويدهشوه ..... تاسمع دقة فالباب وتحلات علا راسو بشوية هو يدخل جود ... وتنهد وعلا راسو مزيان واشار ليه يجلس قدامو وجود سد الباب وضربو ببونية للمعصم ديالو بحركة كانو كيسلم عليه ... وجلس قدامو
جود : صباح الخير ... تسنيتك تدخل ماجيتيش وجيت انا عندك ... ايز دير ا بروبلم " كاين شي مشكل " !
اسد : ( تنحنح وقاد جلستو ) نووو .. علاش !
جود : حيت شفتك ماخرجتيش ...سولو عليك بزاف .... مكنشوفكش كتجلس فالبيرو بزاف غير لاكان شي مشكل ...
اسد : لا .... ( شاف لعينيه زورق من تحت ) منعستيش مزيان !
جود : ( حك بصبعو فوق حاجبو ) بالعكس نعست صافا ... غ غير ... يمكن من العيا ... ( حل عينيه مزيان فباباه ) واش بزاف .. ندير نظاظر !
اسد : لا ماشي لداك درجة .... ( ربع يدو ) ياك لاباس ...
جود : ( تبسم تاتسدو عينيه ) الواليد .. ضروري تكون شي حاجة باش نسول فيك ولا !
اسد : لا اولدي .. غاهو عينيك ( اشار ليه بصبعانو ليهم كيضور صبعانو ) ملي كيبقاو يضورو بحال هاكا .... كنعرف راه باغي تقول شي حاجة ...
جود : ( ضحك ودوز لسانو على شفايفو تا تاتوردو وشاف فيه ) مكاين تاشي واحد على وجه هاد الكرة الارضية كيعرفنا بحالك الواليد .....
اسد : ويلا ماعرفتش ولادي شكون نعرف ... عندي انا شي شغل من غيركم ...
جود : ( تكا دراعو على البيرو كيلعب بيديه فواحد ديكور ) مكدبتيش .... جاي باغي نهضر معاك الواليد .... عارف الوقت ماشي دهادشي ولكن بنسبة ليا مكاينش شي وقت اخر
اسد : اهاه ( عمر رييتو بالاوكسيجين كيتنفس يستعد تاني ) مرحبا ... مرححبا اولدي .... الله اودي ...
جود: ( عض على شفتو مدة وكيشوف فيه هو يهضر ) فكرت فهضرتك .... وقررت ....
اسد : اش قررتي !
جود : حبال الماضي الواليد باقي شانقيني .... ولدك قرر يتحمل مسؤوليتو ....
اسد : اهاه !
جود : غنتزوج ...
اسد : ياك !!!! غتزوج ؟ ( رجع بالكرسي لور ) امتى تقرر هاد ااقراار ....
جود : لبارح ...
اسد : ملي خرجتي نتا وياها وجيتو تالصباح ... ياك ؟
جود : ( علا حاجبو بدون مايستغرب عارفو يديرها ) ايه ا الواليد اييييه ... تما انا قررت ...
اسد : ولدي سبعة وعشرين عام وحنا كنقنعوه يتزوج .. نهار قرر يتزوج قررها فكنازة ... فكنازة جدو .. جدو باقي خضر فالتراب وهو قالك يتزوج ... قالك يحيي الماضي .....
جود : ( جاتو الضحكة ورجع جمعها ) مكنقوليكش جيب العدول هاد الليلة .. غير علمتك مانا راه عارف تاتفوت الربعينية دجدي ..
اسد : ( عوج شفتو لجنب بطنز ) اووووو .. كنفتخر بيك ... جدك غيكون كيشكرك من قبرو على هاد الجمييييل .... ( شاف فيه ) انا مفهمتكش اولادي ماجاكم الحب وطاح عليكم حتال جنازة جدكم ... واش نتوما يهود ؟
جود : ( صغر فيه عينيه وتكا يديه بجوج على البيرو مربعهم وقرب ليه راسو ) قلت ليك قبيلة كتعرفنا مزيان ياك ( اسد غير كيشوف فيه ) وماقلتش ليك بلي تاحنا كنعرفوك ..... شكون من غيري لي نزل عليه هاد الحب لي قلتي فهاد الجنازة باش يكون قلبك طايب هاكا ! ( صغر عينو كتر ) هممم !
اسد : ( حل البيسي ديالو تقلب ليه ) حسب لربعينية دجدك .. ملي يوصلها جرها لعدول .... راك كتعرفهم فين جاو ولاكارط ديالك راها عندك .... بعدو مني انا .....( مع راسو ) ياك تزوجت على سنة الله ورسوله مافهمتش علاش ولدت ليهود .....
جود : يااااك !!!!! ( بنوع من دلع ) دابا مغاتمشيش معايا نجيب مرتي انا !
اسد : مراة وحدة لي كنعرف راه جبتها ..... ومناويش نزيد .... باغين تزوجو راه دار القاضي ... ( رجع شاف فيه ) غيييير هو ... داك دار القاضي اولدي .. غدخل ليها مرة وحدة .. الا شايف راسك غادي ترجع دخل ليها ... غاابلا مدخل ليها ملول ....
جود : ( تنهد ) غير تهنى .... نتا راه عارف ولدك ... الى بقى حتى دخل لدار القاضي مع شي وحدة .. راه يموت معاها واخا تكون كيف بغات تكون ... من غير لا رجعات ليها هي .....
اسد : ( عينيه فالبيسي وتنهد ورجع شاف فيه ) وحيت انا عارفك مزيان كيداير . وحيت انا عارفك كتسبق السعادة دناس على ديالك ..غنقوليك فكر مزال ....
جود : الى فكرت مزال غنتراجع .. ومابغيش نترااااجع.....
اسد : ( طول فيه الشوفة ) ملي غادخلو لدار وحدة وتسد عليكم للباب ... ما غيكون معاك لا انا لا باباها لا خوها لا حبال الماضي ..غتكون غير نتا وهي .... فالا كنتي غتبني هاد زواج على شي حاجة بنيه عليك نتا وياها .. ماشي على العائلة ولا واليدها ولا خوها ولا عليا ولا على الماضي .... حيت هادشي مغيبقاش نافع .... حيت بنتيه علينا حنا عول غايريب فوق راسك .....
جود : ( بقى شحال عاض على شفتو كيفكر وضحك بعياؤ شاف فيه ) دعي بالتيسير آلواليد .... دعي بالتيسير ....
اسد غير كيشوف فيه وتنهد ناض مشا لباب يلاه حلو سمعو عيط ليه وضار عندو
اسد : باك مادامو فالحياة ... ماشي غير الزواج .. كااااع مشاكل حياتك .... غتلقاه فكتافك ..... راك سبع ولد السبع ... علي راسك .....
جود تبسم ليه برضااا و خرج يلاه غيسد لباب وهي تجي قسم داخلة
قسم : ماااي لوووڤلي ( تعلات باستو فحنكو وهو هبط راسو لعندها ) بابا هنا ؟
جود : لداخل ..علاش ؟ واش هاد ضحكية ( بغمزة ) اش وااقع ؟
قسم : هاء عادي !
يلاه كيهضرو هي تقاطعهم رجاء دخلات لي بوكي دالورد لي كيجيو حطاتهم فالبيرو وخرجات ...
جود :عادي فشي نهار اخر ماشي فجنازة ....
قسم : تا حاجة اجبيبي غير توحشت بابا ومشفتوش هاد الصباح ...
جود : واجمعيها .. حشووومة ...( بعدليها من طريق ) دخلي ... بليل ملي يسالي هادشي اجي عندي محتاجك ...
قسم : الله اوووودي احبيبي ...
خلاتو ودخلات لبيرو وسدات الباب واسد علا عينو من البيسي هو يسدو كاع وتكا على الكرسي لور وربع يديه
اسد : يااااا بسم الله .. ولادي مكيعطيونيش فسحة نتنفس ....
قسم : هههههه بابا .. عندي ليك خباار زوييين ( جلسات على الكرسي ) هههه ... ( عضات على شفتها ماعرفاتش كيفاش تخرجها ) تصالحنا انا واصيل. ...
اسد بقى غير ساكت كيشوف فيها وكيرمش وهي كتسنى جواب هو يهز واحد البوكي دفلوغ كان على الارض وحطو ليها على البيرو ...
اسد : شدي ...
قسم : ( شداتو رمشات فيه وشافت فباباها ) علاش هدا
اسد : سيري خطبييييه ...
قسم : ( ضحكات وحطاتو على البيرو وشافت فيه ) ههههه راه هاضرة بنيتي ....
اسد :آولادي ... آ افلااااذ كبدي .... راه هذا سمييييييتو عزو ...عزو اولادي راحنا فمناسبة مأساوية فقدنا فيها جدددكم .. جدكم لي باقي خضر فتراااابو اولادي ..اححترمووووه .... عزووووو اولادي عزوووو ... ( وقف ) هادشي درتوه فالعزو .. علم الله فالايام العادية اش كديرو .... ( مشا جيهة الباب وقسم موسعة عينيها )
قسم : اا .. باباا .. وتنسى نكمل هضرتي .. رراه عارفة عزو ..ومادم هادشي مفرحني وسط هادالعزو الاا وا شيحاجة كتعني ليا بزاف لهاد درجة لي ضحكني وسط دموعي.
اسد : بببعدو مني ... لي باغي شي واحد ولي بغا شي وحدة يجرها راه العدول كتعرفوهم .... ( خارج كايهضر مع راسو حمقوه ) وااااالد ليهووود .....ل يييهود لي والد انا ..... ابلاتي الامار غابلاتي پيليل كانت غامليوحة فالمجر ماتعرفيش تشربي الخرا. .....
عند جود ....
خرج من اابيرو دباه وخرج لجردة باتجاه الاسطبل يكمي ...يلاه كايجبد الكارو ديالو عضو ويقلب فجيابو على لبريكة تاسمع تخرشيش وشاف قظامو بان ليه اياد واقف عاكيه بظهر وااكارو تاهو فيديه .... وتنهد مطول وحيد داك الكارو من فمو ومشا باتجاهو تاوقف حداه ودار يدو فجياب سروال ..... واياد ضور راسو بشوية شاف لعندو .. ميكدبش انه توقع كولشي .الا يكون جود....
جود: صباح لخير ......
اياد بقى غير كيشوف فيه مدة و جود كيشوف فالاسطبل قدامو ولكن قادر يتخيل ملامحو كيغيكونو دابا .... اياد مدة على داك الحال كيتسائل هذا اش بغا ورجع جاوب على صباح الخير غير بالايماءة براسو ورجع كيشوف قدامو ونتر نترة من الكارو ديالو وساط الدخان ...
جود : بحالا غير البارح ....
اياد هز حاجبو مفاهمش وشاف عندو وجود كمل ..
جود : هادشي لي قلت نهار فقت من الكومة فاقد الذاكرة وعرفت بلي آخر حاجة كنعقل عليها داز عليها تقريبا 10 سنين ..... قلت ليهم بحالا غير البارح ..... حيت بصح ... مستحيل كنت نتيق انه دازو كاع داك السنين .... ( اياد غير كيرمش ورجع كيشوف قدامو وكيفكر داك الوقت لي وصلو خبارو ) ملي جابو ليا المرايا نشوف وجهي ... ماشفتش مطول ... حشمت من لحيتي لي بانت حدا الواليد وانا باقي عندي 13 عام .... واخا كانو قالو ليا فعمري 22 .. كان صعيب نتعود على داك السن لي بنادم كيكبرو نهار بنهار انا سمعتوو غير فجوج ثواني .. نعست فقت لقيت عندي 22 عام ..... ( اياد غير كيشوف مزال مفاهم والو واش باغي يقصد ) خليت حتال الليل .... عاد خرجت كنقلب على مرايا ... لقيتها فواحد الكولوار ... وجلست كنشوف فوجهي .... معرفتنيش .. صراحة ... كان صعيييب نعرف ملامحي وشكون هداك لي فالمرايا ..... كان مستحيل نثيق بلي هاداك هو انا .... معرفتنيش .....
اياد بقى غير ساكت ملي بانليه توقف على الكلام .. تحنحن وحك على نيفو ماعرف مايقول وهو يتمتم ببعض الكلمات خرجو من اللسان لبرا واخا قلبو كان كيتقطع و كيضهر ....
اياد : اا ... ع عادي ... هادشي دابا فات ... حاول تنساه وتبدا حياة جديدة ....
جود : ( عوج راسو لعندو شاف فيه بابتسامة جانبية مامفهومش معناها واش هاد الهضرة رضا بها ولا استهتزأ بيها ورجع شاف قدامو ) هادشي لي قلت حتى انا ... وهادشي لي قالو ليا كاع الفاميلي .... نسا وبدا حياة جديدة .. داكشي لي درت .... ربع سنين وانا كنحاول نبدا حياة جديدة ....وملي قربت ندير 27 عام ... كنرجع لنقطة الصفر ... ومكنعرفنيييش تاني .....
اياد رجع شاف فيه ... وجود جبد من جيبو الكارو ديالو ... ومدو ليه شادو بجوج صبعانو ... واياد تنهد ملي فهمو وجبد البريكة من جيبو شعلو ليه ... ورجع دارو ففمو و وقف كيشوف قدامو .... واياد زطم على الكارو ديالو وجا ماشي هو يشدو جود واياد غير وقف كيشوف ... بعد مانفت دخان عاد طلق يدو ونطق ...
جود : مزال ماساليت ....
اياد رجع تنهد ... ورجع كيف كان واقف وربع يديه فوق السياج دالاسطبل ...
جود : مزال مقادرش نتعرف عليا .... غير الفرق ... داك نهار شفت وجهي فالمرايا .... و دابا شفتو فالكاميرا .... ( اياد رفع حاجبو ) وكااااع ماعرفت راسي تاني .... وعاودت كولشي من زيييرو واخا بديت حياة جديدة وقاديت الجلسة فوق الكرسي دالايام الجاية ... تكركبت لووور ... تيق بيا ا اياد ( شاف فيه) انا ماشي هاداك .... لي كان عندك مشكل معاه .... انا صعيب عليا باش نهز مسؤولية كاع اش دار .... كنحاول ولكن عاونوني بحاجة وحدة .... نساوه .... وتعايشو معايا انا ..... بلا متصعبو عليا القضية كتر .....
اياد : ( مشافش فيه ) مزال معارفش علاش كتهضر !!! ...
جود: ( عض على شفتو مدة ورجع شاف فيه ) كاع اش طرا بيناتنا عرفتو ... وشفتو ... الكاميرات كانو كيصورو كولشي والواليد احتفظ بداكشي و وراه ليا .... ( رجع شاف قدامو واياد وسع عينيه ) من نهار تعرفت على ختك تالنهار لي مشيت فيه لموناكو .... ( ساط الدخان وشاف فيه كيفاش مصدوم ) وحتى نهار هرست ظهرك ..... تاهو شفتو ...
اياد بغا يهضر وحس بالكلام كولو هرب لسانو تبكم .... حاجة مكانش مستعد انه يواجهها حاليا هي هادي .... وجود تاهو عاونو لي ماخلاهش مدة كاينتقي اش يقول وكمل هو بلاصتو ...
جود : ماعرفتش راسي .. جاني فشكل ... واش كنت مبدل ولا دابا لي تبدلت ... مغنكذبش عليك ولكن كرهت راسي ... ( تنهد ) ولا نقولو كرهت هاداك السيد لي انا مكنعرفوش .... لي ارتبط ببنت عمو القاصر وهو باقي برهوش وقلب عائلة سفاها على علاها .... انا جود لي عندي حتى انا ختي والى لقيتها مع ولد عمي فداك الوضعية .... غادي نقتل بلا منفكر ..... هاداك اابرهوش مكنعترفش بيه .....
اياد قلب عينيه لتحت وهو كيتذكر داك نهار وعروق عنقو تنفخووو ووجهووو حماااررر وبدا يشمرر بنيييفو محقد عينيه بحالا داكشي يلاه كيتعاود قدامو ....
جود : ماعرفتش شكون هو داك البرهوش ..البرهوش هو السمية الوحيدة لي لقيت ليه ....
اياد : ( سرط ريقو مدة وتنهد وتنحنح باش ينطق ) من شحال ونتا فراسك هادشي
جود : ماشي بزاف غير شوية قبل موت جدي ..... ( شاف فيه مطول واياد غير كيرمش كيتسناه اش يقول ) وانا واقف حداك دابا .. وكنهضر معاك .. كنحسك عزيز عليا واخا مكنعرفكش .... واش حيت حنا قراااب كيف قالو ليا .... ( عوج شفتو لجنب ) ماعرفتش ... ولكن راه كنحسك عزيز عليا .. وقريييب ليا .... وهادشي ماحسيتوش ملي وقفت قدام ختك ... ماحسيتش بمشاعر فقلبي قدام .... نتا كنشوف فيك مشاعر قدااااام مكنعرفهمش ....هادشي الا جيت نفسرو غنفسرو بطريقة وحدة ... كنت عندي اعز من ختك .على هاد لحساب ! ... ( اياد غمض عينيه ومزير قبضة يديه ) وهادشي لي كيزيد يخربق ليا الضواسا كاملين حتى كنرتبهم ..... ملي نتا اعز من ختك علاش داك روينة كاملة ! .. واش تبرهيش ؟ واش كنت شارب واش كنت كامي شي حاجة ... واش غير عناد مراهقة ... واش غير مارضيتش ..... ( دوز يدو على وجهو مبعد لكارو ) مفااااهم والو ..... ملي كنتي نتا صاحبي وخويا وعشيري ... وهي كانت ربما غير نزوة .... علاش داكشي كامل ... واش لهاد درجة داك البرهوش كان برهوووش !!!!!
اياد غير ساكت ماقدر يقول تاكلمة وهو كيحسو هو لي كيقول كاع داكشي لي باغي يقولو ليه هو ولكن معامن يهضر .. مع واحد ما عاقل على والو ؟ واخا تايبغي يواجهو راه ماشي نفس ااشخص ...ورجع شاف فيه
اياد : راه قلت ليك نسى عليا هادشي .....
جود : لا ..... مغنساش .... وهادشي مكيتنساش ومكيتجاوزش .... انا كنت برهوش .. ونتوما صدقتو براهش كثر مني ... ( منفاعل فهضرتو وعينيه حمارو ) كووولكم ( كيشير بيدو لي فيها الكارو للقصر ) كلكم فهاد دار صدقتو براهش ... ملي سكتو وخبعتو عليا موضوع قد هادا ..... ملي درت داك روينة كاملة .... خاصني نكمل على داك المسؤولية ماشي نرجع بلور .. الروكان مولدش الشمايت ومتزادش لي يسمي ولادو شمايت ....
اياد : فخبارك راك غير كتفزك رملة البحر دابا وهي فازكة نيت ! .... صافي سالينا هادشي وطويناه وجمعناه وكل واحد شاف حياتو شوفها حتى نتا ....
جود : ختك مشافتش حياتها ا ايااد ....
اياد : ( علا فيه حاجبو ) باش عرفتيها ( جاوبو بزربة )
جود : هضرنا ...
اياد : ( علاه كتر ) فاش
جود : خطبتها ....
اياد : ( بحدة ) واش عارف راسك اش كتقول !!!!
اياد تنهد وضار كيشوف فالاسطبل مطول وضور راسو بلااا ....
اياد : اش كتخربق
جود : اياد .. عطيني عقلك متعطينيش غير ودنيك .... راه صعيبة تكون جالس ماعليك مابيك تايقولو ليك كنتب خاطب بنت عمك ومخاري مع خوها على قلبها ونتا ربع سنين وهادشي معارفوش وهي فبلاد ونتا فبلاد .. مقاطعة المغرب مكتجيش ليه على قبلك لا هي لا خوها لي هرستي ليه ظهرو ... ونتا هادشي كااااامل مفخباركش وعايش حياااتك وضضضااارب كولشي بركلة .... راه ميمكنش اصاحبي نبقى مربع يدي .... غنكمل على مابديت داك البنت مكتستاهلش العذاب ... اش دار داك البرهوش .. كولشي غنبدا كنصلح فيه ....
اياد : جود سير تخدم شغالك وكمل حياتك بلا تخربيق ... ماطلب منك تاحد تهز هاد المسؤولية ....
جود : ( تبسم بجنب شفاهو ولكن الابتسامة بانت غير فعينيه ) واخا .....
اياد : غير هني راسك هادشي كولشي تجاوزناه ....
جود : ( علا شفايفو للفوق ) .. وااااضح واااضح
جا ماشي فحالو وهو يوقفو بهضرتو
جود : مغانتحملهاش داك المسؤولية ..... ( مدة ساكت واياد كايتسنى هو يكمل ) بشرط .... حاول دير راسك فاقد الذاكرة من سنين وناسي النهار لي بغيت فيه ختك بالتخبية ونهار لي شفتي داك المنظر وناسي المضاربة ديالنا ..... ويلاه كتعرف عليا انا .....
اياد : دابا نتا اش كترون
جود : ( كمل هضرتو بحالا مسمعوش ) ويلاه تتعرف عليا انا ... بولد عمك لي عجباتو ختك لي جات من امريكا فالعيد .... وجاي لهنا باش يخطبها منك بالاصول قبل مايقرب ليها كاع ..... نسى هادشي وعطيني ختك للحلال ....وتانا غانسى الى كنتحمل المسؤولية وصافي .....
اياد : ( علا حجبانو بجوج وجاي مقرب ليه مغزززف ) واش كتقلب عليا نعاودو القديمة ؟؟؟؟؟؟؟ واش نتا مريض فكرررررك ولا ماااااالك
جود : ( مبسم فيه ) كون نسيتو داكشي لي وقع ولقيت رجعتو لحياتكم كيفما لول وملي شفتوني مضورتوش وجهكم وتفكرتو لي داز ... مكنتش غندير هادشي واخا نكون عرفت كاع اش وقع نكمل تانا حياتي .... ولكن باش نعرف بلي مانسيتو والو وقطعتو المجية للمغرب غير على قبلي وختك مزال عايشة العذاب ربع سنين هادي .. خاصني نتحمل مسؤوليتي .. ( جمع تبسيمتو وقاد الوقفة وملامحو جديين ) انا فايت خطبتها من واليديها ... ولكن عمرني طلبتها منك ... دابا جيت لعندك نتا ... تانقوليك غنتزوج ختك ...... انا ديال دابا .. ماشي البرهوش دشحال هادي ....
شاف للقصر ورجع شاف فيه وبعد مشا وخلا اياد واقف فبلاصتو كيرمش مفاهم والو ..... ربع ساعة على وقفتو غير كيستوعب ويعاود هادشي وهو يمشي بززززربة دخل للقصر داز من حداهم بحال الريح خلا عيالات عمامو غير كيشوفو وتاجه للدروج للبيت بيلسان .. مع الحلة دالباب مع تخطفات هي لي كانت فدريسينغ يلاه فاقت من نعاس وخرجات بزربة غير بحوايج نعاس كتشوف تابان ليها اياد واقف كيقلب عليها بعينيه غير شافها خرجات من دريسينغ تلاح عليها جيفها لسقها مع الحييييط ....
بيلي بقا قلبها غير كيضرب كاع مصايبها طاحو عليها واولهم الحشيش ... كتسول راسها اش درت ؟ كاع مصايبها تفكراتهم ..وهو شادها بداك طريقة مخنزززر فيها
اياد : مزاال مابغيتي تحطي عقلك فراسك نت ....
بيلي : اياااد ... اياد ( ولات كتزعزع بالخلعة ) ا اش درت .. م مالك ...
اياد : واش نت مرييييييضة فراسك ولا مالك ( لاحها للسرير واقف عليها ) وااش باغا تجججحهلي دييييلمي واش مزال مابغيتي توووووبي .... رجعتي ليييه تاني باغين ترجعو تهبلونا تااااني
بيلي : لااا .. ( مخبية وجهها خايفة يضربها) لا اياد عافاك تسنى غير نهضر والله ما كيفاش كيحساااابتك ..
اياد : اششششنو ؟؟؟؟؟؟ مشيتي عندو ؟؟؟؟؟ باش عرفك هو معذبة ها ؟؟؟؟؟ مغتساليش ليا من هاد الدل لي ربع سنين هادي هو معشش معاك....
بيلي : والله ماراك فاهم شي حاجة ( كتسرط فريقها مخلوعة كتسنى يدخل شي حد يفكها ) غير خليني نشرح ليك ونعاود ليك .. و .. والله اخويااا تانقوليك كولشي .. عافااااك مباغياش يتعاود داكشي عافاااااك
اياد : ( جبدها من شعرها مزير عليها وهي مخلوعة ) ملي مباغياش داكشي يتعاااود ججحمعي عليااا كرررررك جمعي رااااسك ... اش داك لييييه ثاااني اش وووصلك ليبيييييه ال****لااااوي .... يييياك تهنينا من هاد الخرااااا ديالكم ربع سيييين مزال مابغبيييتي ديري عقللللك آلححححبس
بيلسان : ( بالغوات مخلوعة خصوصي ملي خسر الهضرة ) ايااااااد وغاصبر نفهمك ططططلق مني مابقى عندي جججهد نعاود الخصاااام .. وغيييييير صببرررر عافااااااك
زاد زير شعرها لعندو وقرب راسها لوجهو وهي تتبكي
اياد : رررررجعتي لييييه ؟؟؟؟؟؟
بيلي : و .. و م م اشي هاكاك
اياد : ( تحت سنانو ) انا سسسسولت ... واااااش ررررجعتي لييييييه
بيلي : وو .. .. آه
مع قالتها مع لاحها على السرريرر وهي هربات مشات مور الفوطوي كترعد ...
بيلي : وعااافااااااك خليني غيييير نهضضضر عطيني فررررصة مالك ابنادم ...
اياد : حمارة ... تاتعرفي شنو هي حمارة .. الحماااارة وعند مها النفس علييييك نت ... برررررب ماعندك قد هاكا ( جمع صبعانو ) دالكراااااامة .... تقاااااودي نتي وياه ....
خرج من الجناح ديالها بعد مازدح الباب ومشا للجناح ديالو كيضور ويتنفس ... فلخرررر غوووت وضرررب كاع اش على واحد طبلة شخشخوووو .....
فوسط القصر ...
جالسين فالصالون وقدس جالسة حدا ماماها وكطلع وتهبط فالبنت لي بغاو يعرفوها على لوؤي ولي يلاه وصلات .. كانت بجلابة كحلة قصيرة وطالون عالي وشعر مارون طالقاه لجنب سامپل .. رغم انها قدس احسن منها بمليون درجة الا ان غريزتها خلاتها تميق فيها .. جالسة حدا ماماها وهوما كلهم مضورينها كيهضرو معاها وقدس كل مرة تعوج عينيها محاملاهاش حالفة ماتنوض من تما خايفة يجبدو الهضرة عليه ومتسمعش .... وهي تقرب لوذن ماماها كتضهر غير بيناتهم
قدس : دابا هادي اش كتجي لهاد الخرا
لامار : ( بصرامة ) متخسريش الهضرة القرآن مطلوق ...
قدس : وقولي ليا اش كتجيهم
لامار : هاديك لي من داك جيهة .. عمة اريج ورتاج وهاد البنت حفيدتها .. يعني حفيدة عمتهم
قدس : ومالها مسكينة فيها السياتيك !
لامار : علاش !
قدس : غاكتجبد بداك الظهر ...
لامار : هنيييينا ... اش دارت ليك البنت
قدس : هادي هي لي بغاو يديو للوؤي ...
لامار : ( علات حجبانها لفوق وشافت فيها ) هاااكداك .. وانا نقول مال هادي محروقة عند جنبي ...
قدس : محروقة ؟؟؟ لهلا يحييها نتحرق على قبلها باقا فيا الشمتة لي جالسين يزوجو فولد عمي ... ( دارت رجل على رجل شادة فنجانها دالقهوة ) هدا راه ولد الاسماعيلي قاليك يربطوه لعندهم ...كانيش ديالهم .... تفو
لامار : قدس ربي ماطلعي ابنتي لبيتك تنعسي
قدس : اه باش تزوجو وطلقو كي بغيتو ...
لامار : واش حمقة نت ( شافت فيها ) راحنا فكنازة واقلة لا ؟
قدس : كنازة عارفاها غانتي .. هادو ميعرفو لا كنازة لا والو .. راه حارنين هنا نابتين حدا الدروج كيتنساوه هو ينزل علاش ملي قلتو ليهم يمشيو لداخل مبغاوش .... واش غتوريني فهاد العقس ... راه كنعرفهم ... كايتسناوه يوريوه سلعتهم .... واش لوؤي مالقى شكون يدي غاوحدة فيها السياتيك رجلين النعامة .....لوؤي حياتو كاملة هو فلاصال والسبور كايخدم فورمتو باش يزوجو ليه وحدة عندها هشاشة العظام
لامار : ( شافت لفوق كدعي فنفسها ورجعات شافت فيها ) ونت دابا اش ضاااااارك ؟؟؟؟
قدس : ماما راااه ولد عمي ...
لامار شدات على راسها كضورو ورجعات علاتو مبتسمة بزز فالعيالات باش مايعيقو وكتنغز فيها تسكت وهي باقا غير كتشوف وتفقص ...
رتاج كل مرة تشرب دوا الراس اريج طلعات تنعس خلاتها واحلة عماماتها وعزاز عليها ولكن فيهملعضرة بزاف وهي فواحد ظرفية لي ماعندهاش لخاطر كاتجاوب غير بالايماءات. لا الابتسامات الصفراء. وباقي مرة مرة تايدمعو عينيها لاتفكرات وتمسح دموعها وترجع تتبسم تقوم بواجبها فاستقبال الظيوف ... ولامار تاهي واقفة معاها عيانة غاطيح كتر منها ومشاكل ولادها زايدينها .....وهوما مجمعين
العمة : لا لاااماتعلقش عليكم مزيااااان راه كانت صغييييرة
البنت : لا عاقلة على خالتو اريج راه جات لعندنا فالعيد مع جدي الحاج الله يرحمو .. راه تلاقينا . .. خالتو رتاج لي ماشفتهاش ولكن كنعرفها.
العمة : هاد الجيل ديال دابا واحد مايعرف لاخور العائلة كبيرة وكلها فين متلوفين .. هادو ا بنتي راه ربيتهم بيديا ملي ماتت مهم
قدس : علاش ماشي رباتهم عمتهم بهيجة لي طلعات عند جدة ؟؟؟؟؟؟
داك العمة شافت عند قدس : كاااااع تعاونا عليهم ...
لامار : ( كضربها فرجليها ) سسسكتينا ....
البنت : واخا مكنتلاقاهمش كنعرفهم من تصاور كنعرفهم كاملين
العمة : وتعرفي ولادهم ؟
البنت : خالتو اريج عندهم بيلسان و اياد و زياد وخالتو رتاج انس وفيصل و لوئ ياك ؟
رتاج غير مبسمة ومات ليها بآه ...
العمة : اييييه .. لوؤي تعرفييييه !
البنت : الله اودي اجدة ....واخا مكنتلاقاوش كنعرفهم فالتصاور .... ( شافت عند قدس ) ونت بنت مدام لامار ... قدس سميتك ياك ؟
قدس : ( بابتسامة صفرة ) اااه قدس ... بنت مدام لامار وبنت عم هااادو لي قلتي دابا ...
البنت : مششرفة بيكم انا احلاااام ....
الكل وما غير براسو وقدس قلبات راسها وهوما باقي دودودو ولامار تنهدات وناضت استقبلات بعض الضيوف اخرين ... ورتاج بقات جالسة معاهم حشمات تنوض وقدس واقفة ليهم فحقلهم تاتم لوؤي نازل مبدل حوايجو وماشي ديريكت جهة الباب وقدس يلاه علات عينيها بان ليها ... وحطت فنجالها ومشات بزززربة لعندو والعمة ضورات عينيها تابان ليها ماشي .....
قدس : ( بابتسامة وضحيكة متبينش ليهم ) شفتي .... غااادير خطوة وتمشي تجلس عندهم .... غيييير نسااا شي حاجة سمييتها قدس بنت عمك ....
لوؤي بقى غير كايشوف فيها .... وقلب عينيه لجنب وهي تبان ليه عمتو ضاحكة ليه وشاف عند قدس كيحاول يبتسم تاهو وهمس ليها
لوؤي : من لول ناسي واش عندي شي قدس بنت عمي اصلا !! ...
قدس وسعات عينيها وهو شاف لعند العمة ....
العمة : هااا لوؤي المرضي ...( وقفااات ) زيييد اولدي زيييد هناا غااااا عائلة ماماك تجي تعرف عليييهم ونتوما ماتعرفو تاحد ....
لوؤي تبسم ليها وزاد وقدس واقفة فبلاصتها مشووووكية من اش قال هدا !!!!! لفوق يشعر عليها وهنا ينكرها ؟؟؟؟؟ ... و هي تشوف لجنب بان ليها جلس مقابل معاهم وداك احلام كتشوف من تحت لتحت و هي تجي بزربة جلسات حداه كتشوف.... ورتاج شدات يدو عندها وهو باسهاليها ...
لوؤي : شوووية ؟
رتاج : شوية اولدي ....
عمة : ياك عقلتي عليا
لوؤي : الله اودي ...
عمة : اوا راه لاخور ولد اريج داز كي الريح كون ماشديت فيه ..... هانتا هادو راك تعرفهم عمامات ماماك ... وهادي عرووووستي. راه ولدي لداخل مع عمامك ...وهادي مرات عم ماماك .... وهادي ( هقنات داك البنت ) احلام بنت ولدي ...
لوؤي : ( شاف فقدس بمعنى واش هادي جات وااضحة ملي شافها طويييلة ورقيقة و قدس قلبات عينيها لجنب ميقة وشاف فالعمة ) مشرفيييين ....
العمة اخرى : كيبقيييتو اولدي وكيييبقات الخااااطررر .. .
لؤي : ( تجمعو ملامحو ولكن دغيا رخاهم مبغاش يبين حزنو ) صافا ....
العمة : اوا اولدي هادي هي سنة الحياة .. عاش لي قسم ليه الله ....
قدس : ( قربات لودنييه كتهضر بالحس ومبتسمة ) كيفاش هاد ناسي واش قدس بنت عمك ؟ نكرتيني كاع ...
لوؤي : ( كايهضر تاهو بالهمس ) انا عندي غير اية وقسم وبيلسان هاد ساعة لي بنات عمامي ....
قدس : اهانا لقيتوني فقفة حدا الدار ياك ماشي بنت عمك ...
لوؤي : نو ... نت حبيبتي ....
قدس وسعات عييييينها على قدهم وبعدات دغيا
مرات العم : ( شافت لتيليفون ) انا واقلة خاصني نمشي باقا تابعاني الطريق وشلا شغالات ( كاتصوني على راجلها ) نتلاقاو فشي ساعة الخييير ( وقفات ورتاج وقفات معاها ) ماسخيتش بالجلسة معاكم .. وفرصة سعيييدة هادي تعرفت على العائلة
رتاح : مرحبا بيك اغيثة ( اشاارت ليها للامار لي واقفة بعيد ) راها لاااامااار ..
غيثة : ربي خلييييك .. وي غنمشي عندها نسلم عليها ( شافت فلوؤي ) لوؤي تشرفت بيييك اولدي ... نتشاوفو ففرصة اخرى احسن .. وعلاش لا شي عراااااسية ....
لوؤي : ( تبسم بجنب شفتو ) ان شاء الله
مرات العم : ( ضارت شافت فالعمة وغمزاتها بمعنى هانا جبدتو ليد وشافت فيه ) ياك راك ناوي بعدا ولا مزال بعييييد
لوؤي : ( طلق يدو مور ظهر قدس بحالا معنقها ودار رجل على رجل وهي تعلي حجبانها وداك العمة كتميق فيها ) لا ناوي ان شاء الله .....
رتاج حمرررراات فيه بمعنى اش كدير واش داك تعنيقة لي درتي لكتفها وهي تبعد قدس دغيا خايفة يجي شي حد وداك مرات العم مافهمات والو استأذنات مشات والعمة كتحاول تقطع الشك ورتاج جلسات كتحمر فيه
العمة : اوا هي كااااينة العروسة ...
لوؤي : حنا اا آ ( شاف فرتاج )
رتاج : خدييجة
لوؤي : حنا اخالتي خديجة بقينا ربعة دالولاد وعندنا ربعة دالبنات داكشي جا بالحساب والعبار .... كل واحد عندو وحدة مكنحتاجوش نقلبو على برا ...
رتاج شدات على جبهتها كضور راسها لي فيه مامهنيه و قدس ماعرفاات تتعصب ماعرفات تحرج ماعرفات بعجبها لحال ...
العمة : ( بصوت ناقص كتشوف فقدس وتشوف فيه ) ااااه .. ممم وهي هي قول فيكم ومنكم وصافي
لوؤي : وااا داكشي لي كاين هاد الساعة .... ( وقف ) نخليييكم انا عندي مايدار .. شكرا على الزيارة ...
خلاهم ومشا وقدس تبعاتو بعينيها تاتقابلو فعينين رتاج وهي تنزلهم بزربة .. ورتاج كتححلف علييه لي فضح الاومور دابا غيطلعو عليه الهضرة وهو مزال مكاين والو ولوخرين بقاو غير كيميقو عرفوه الى داوي عليها غير من كلستو حداها وشوفاتو ليها وتاهي كيفاش كانت كاتشوف فيه وتهضر معاه ....
قسم كانت بعيدة مع شي ناس ودعاتهم ومشاو وجات تتقلب على ماماها تالقاتها وجبداتها لعندها معتذرة لناس لي كانت واقفة معاهم بابتسامة ....
قسم : ماما .... عمتي سارة وعمران وماجدة مجاوش ؟ بانت ليا مامات عمران ولكن فين هوما ؟
لامار : واراه جاو البارح الله يجعل البركة يمكن عندهم الخدمة ..
قسم : اشمن خدمة ؟ ياك عمتي سارة خدامة مع رجلها مغيعطيهاش نهار ؟ وماجدة ياك مكايناش قراية دابا .. ماشي مفروض هادوك عائلة لا !
لامار : وااش نجيبوهم بزز ؟
قسم : لا وماعندناا مانديرو بداك الوجه الزوين لي يعطيوه لينا وفالحزة منلقاوهمش ؟ هاداك راه فمتابة جدنا كاااااملين من عمتي سارة وجبد ... زعما مكتعرفوش ولا ؟ من الصواب ثلتيام دالعزو ...
لامار : انا اقسم مغنحكم حد ابنتي لي فيا مكفيني وراسي غاااايطرطق باراكا عليا غير الهاراج دالناس .. لي بغا يجي راه لباب مرحبا بيه لي مبغاش شغلو هاداك ... الواجب راه داروه .. المحبة مغيجيبوهاش بزز
قسم : على دابا حنا جامعنا غير الواجب ؟ ماشي العائلة ...
لامار : سمعي نقوليك واحد جوج كلمات .. عائلتك كنيتها الاسماعيلي .. عمتك سارة على راسنا وعينينا ولكن راه مغنطلبوش محبتها بزز ... بغات عائلة لقات عائلة ... واجبها هي تحافظ عليها ... حنا مولفيييينها كتجي غير فالظرف الزين وفالمصايب مكنلقاوهاش واش هادي جديدة ؟ .. ومن حقها ... واش نطلبو محبتها ووقوفها بزز .. الواجب راه كاملين كنديروه ... والمحبة راه كتجي بلا منطلبوها وداك المحبة لي تجي باش غاتبين لينا بلي واقفة معانا ابلاش .. اما من القلب اما تكلس فدارها .... وحنا راه كااااافين ووافين ممحتاجين حد منهار حلينا عينينا فهاد دنيا ....
قسم : علاش حنا فاش مات بات عمران وقفنا معاهم ثلتيام ؟؟؟ .... علاش هوما ملي كتكون شي حاجة واقعة ليهم ولا مشكل كايلقاونا حنا اللولين معاهم .. اشمن عائلة هادي ؟ ياك من ديما كاتقولي ليا حنا مببنين على الصح ... علاش هي مامبنياش علىهاد الصح ؟
لامار : ( شادا على راسها ) قسم لي فيا مكفيني ابنتي ضبر برااااسها ....
قسم : انا راه مغنبقاش صابرة بزاف راه شي نهار غانجيها فاااص وراكي عارفاني كيدايرة .... ماشي حنا تنعزوها لا هي لابنتها .. عندنا عزيزة وعاطينها قيمة وحاسبينها وحدة منا وراها منا اصلا من نهار بدلات كنيتها لعندنا وتاهي تسمات الاسماعيلي ... اوا تصرف على اساس اسماعيلية ... حشومة والله ... .. النفاق دوالو .... .
خلاتها ومشات ولامار بقات غير تتنهد ....عارفة كلامها على صح . وعارفة ان الطبع ديال الناس يمكن بتبدل ولكن المعدن ... صعييييييب بزاف باش يتبدل ....وهي ترجع ترسم ابتسامتها وتقلبات عند الناس ....
بيلسان ملي خرج خوها دخلات ودفنات راسها فالدوش .... معارفاش واش دخلات دوش باش تغسل وجهها ولا تبروصي سنانها ... معرفاتش بالضبط علاش دخلات لي عارفاه هو خاصها تبقى تما والبلاصة الوحيدة لي حسات مغيداهمها حد ومغيحل عليها الباب حد وتقدر تفكر فراحتها ... جالسة على حافة الجاكوزي وشادة بيديها بجوج فجنابو ومغمضة عينيها و رجليها كيتهزهزو .... الى كانت هادي ردة فعل اياد .. كيغاتكون د ماماها و دباباها ... وديال العائلة كاملة !!! .... هي خاصها تلقى حل لهادشي .. خاصها تفرض حبها بالطريقة الصحيحة ماشي بالطريقة الغلط ....
حلات عينيها بجوج ملي تفكرات هضرة خوها " الحمارة وعندها النفس عليك " وهي ترجع تغمضهم مزيييرة عليهم تانزلات دمعة ... .اش ذنبها فجنون القلب .. اش ذنبها فعاطفتها الضعيفة ... اش ذنبها فانها ختارت الحاجة لي كتحس براسها سعيدة فيها .. هي مرغماتش راسها عليه مدام هو لي جا .. وهو لي طلب .. وهو لي داوا القلب ....
نفضات راسها يمين وشمال وتوكضات كتحاول تشوف الامور بجدية وبمنطقية كتر .... وتلقى حل مناسب للجميع لي تفرض بيه عليهم حبها لجود بالطريقة الصحيحة .. الطريقة لي مغتقلق حتى حد .... وتتحاول تتعامل بطريقة ناااضجة هاد المرة وتتحمل معاه حتى هي داك المسؤولية وماتلوحش كولشي غير عليه بوحدو ....تاعي مسؤولة فها
العلاقة ....مادمها اختارت ولد الاسماعيلي ....
لوؤي غير خرج لطموبيل يلاه ديماراها وهو يوصلو اشعار ديال اجتماع فواشنطن .. وغمض عينيه كيتنهد كيغايدير تاااااني يمشي والاجتماعات الرئيسية واجب فيهم الحظور ... كل مايصلوبحال هادالاشعارات كايبقى ههاز الهم حتى كتجيه الندامة على هاد الخدمة لي خدمها فالسر ولي محررة عيشتو ... وغير كيفكر انه كيدير الحاجة لي مرتاح فيها كيرجع يكمل .... الخدمة ف الفيديرالية حلم وتحقق ليه ... ولكن صعييييب يفرض وجودو ...... ورجع كسيرا وزاد ....
اما قدس منبعد مامشا وتهنات من جيهتو عاد طلعات لبيتها وربعات فوق سريرها وشدات تيليفونها كتحاول تلهي وقتها تالقات راسها سهات كتفكر جدها تاني وانه صافي مات ومغتعاودش تشوفو .. وهي تلوح داك تيلي وتكمشات ففراشها ودموع كيسيلو على المخدة .....
جود واقف فين كاينين الرجال متكي على واحد السارية وشاد عندو فنجال دالقهوة كل مرة يجغم منو ... والمرتلين كالسين بجلالبهم البيضاء فالصالون التقليدي التراثي لي فداك البهو كايجودو القرآن ... والرجال شي جالسين كيرتلو معاهم فنفسهم وبراسهم وشي على شكل مجموعات كل وحدين فين واقفين كيداكرو و الخدم كيدورو بالبلاطوات .... شاد فنجالو وكيشوف فنقطة وحدة .. لي كيشوف فيها حياتو .... هاد الحياة الجديدة لي عطى ليها صافرة البداية ... واش قادر عليها ؟ واش قاد بيها .... من ديما هو باغي يأسس اسرة صغيرة خاصة بيه .. ولكن عمرو تخيلها تكون بهاد الشكل .... ورجع تفكر بيلسان وضحيكتها و حبها الكبير لي هازاه فعينيها ليه كيزيد يرتاح قلبو ويثبت لراسو انها الشخص المناسب ... هو يحط فنجالو عند النادل لي داز حداه فالبلاطو ديالو ... ومشا خرج باتجاه البوابة الكبيرة بعدما وما لماماه غير بعينيه لي تاهي بدورها سولاتو بعينيها فين غادي وجاوبها غير بأنا جاي بعينيه ... وخرج باتجاه سيارتو ومشا للكاراج يتلف فيه الوقت قبل مايحماق بالتفكير ....
اما سلطان طلع لجناحو ماشي جاي وشاد تيليفون فيديه .. كل مرة يطل على داك الرقم لي صيفطليه المنادجر ديالو لي جابو من الريسيبسيون لي كانت فيها بعد مقيدات معلوماتها فالاستمارة ... واش يتصل يعتذر ؟ واش يطمن !!! .... فلخر نفض راسو من هاد الافكار كيقنع راسو بفكرة ان ياك البنت دابا صافا ! اوا صافي .... ونزل فالدروج باتجاه وسط القصر تابانت ليه قسم مع مجموعة نساء واقفة هو يجرها من دراعها وهي تبعاتو مافاهمة والو تاخرجها لجردة ومشاو باتجاه واحد الجليسة تما وجلسو .... وبقى كيشوف فيها مدة وهي مزال كترمش مافاهمة والو ...
سلطان : قسم .... ( حك مور ودنو ورجع علا راسو فيها ) فين كنتي هاد صباح !!!!! ....
قسم علات حاجبها لفوق .. سلطان كيسول ؟ ميلات شفايفها لتحت مافاهمة والو
قسم : سلطان ؟.... ياك لاباس ...
سلطان : ( كيتحنحن ماعرفش كيفاش يجبد الموضوع بلا متحس) ا .... و واش كنتي فشي اوپيطال ؟
قسم : ( علات هاد المرة حجبانها بجوج ) اه ؟؟؟؟؟ علاااااش
سلطان غير سمع هاد السؤال عرف بلي مكانتش تما على قبلو !! والا كانت غتكون قالت ليه مشيت نصلح لي ضيعتيه ... ولا تعاتبو ... وهو يقاد جلستو وتنحنح ...
سلطان : لا غير ....غير كنت دايز من تما .. وشفت طموبيلتك ......
قسم غير ساكتة ماعرفات ماتقول خافت تتحط بوجهها وهي مكاينة تاحاجة رسمية وتبان حداه مراهقة طايشة وهي فهاد السن ....وحاولات تجاوب متحكمة فراسها وفزمام الاومور.
قسم : اه ... كنت تما .. حيت .. واحد البنت تضربات بالطموبيل .... كنعرفها
سلطان : ( قاظ الجلسة) بنت !!! .. فين كتعرفيها ؟
قسم : البنت لي كنت قلت ليكم .. تكلفت ليها بالمنحة ...
سلطان : ( علا حجبانو بجوج ) ااااااه ... ياك مواقع ليها والو ؟ راها بيخير
قسم : لااا بيخير .. توعتات شوية ولكن صافا ... وصلتها لدارهم وجيت ...
سلطان : ( كيسرط فريقو ومتوتر وطمن من الناحية لي كان مخلوع منها انه يكون تسرب لخبار ) اا .. و وعندها شي عائلة ؟ ز ز عما .. واش معاها شي حد ؟
قسم : نووو .. ماعندها تاشي حد .. عايشة غير هي وخوها ....
سلطان : ( علا حاجبو هضر بلا مايشعر ) وكيداير هاد خوها ؟ بغيت نقول .. زعما ... غيكون .. غيكون تخلع عليها . ح حيت قلتي ليا ضرباتها طموبيل ..
قسم بقات غير كترمش مفااهماش شنو سبب هاد السؤال حاجة وحدة لي جات لبالها هو عاق بيها مع اصيل داكشي علاش كيسول هاد الاسئلة ولا شاف شي حاجة سلطان ماشي من نوع لي كايسول على شي مكيعرفوش . .
قسم : اا .. ا اكيد .. م مكنعرفوش مزيان .. و ولكن اكيد غيكون تخلع عليها
سلطان : ااه .. و وشكون ضربهاا؟
قسم : ماعرفتش .. قالت ليا هرب ..
سلطان : ( علا حجبانو وتحنحن ) مكتفكرش ... زعما .. مكتفكرش ديكلاري بيه !
قسم : نووو منظنش .. هي بعيدة على هاد المشاكل .... الحمد لله غير لي راها صافا وهاداك الله ياخد فيه الحق .....
سلطان مع كملات هضرتها مع وقف ..
سلطان : اا ..انا ... انا خاصني نمشي ...صافي غير بغيت نطمن اش كنت كديري تما ...
ناض ماشي وهي تقاطعو دايرة يديها فوق جبهتها من الشمس
قسم : سلطااان ... فراسك شي حاجة !!!
سلطان : ا ( توتر ) لا .. اش غيكون
ابتسم ليها ومشا وقسم عاد تهدنات نوعا ما ملي مكاين والو وماحس بوالو كانت خايفة يلوموها العائلة على علاقة ماهضراتش ليهم عليها وماعرفاتوش عليهم .. مابغات تهضر على اصيل للعائلة حتى يتعرف باباها عليه وحيت مزال مستقبلها غامض معاه يقدر فاي لحظة يقلب عليها تاني داكشي باش خايفة تتسرع وتخبر العائلة وهي مزال مامتأكداش ...
وهي تنهد وناضت دخلات وسلطان مشا لطموبيلتو ... بقى فيها شششحال كيفكر .. كيقول مدام صافي كولشي غادي مزيان علاش انا غنرون هادشي ..... وكسيرا مشا ...
اما اياد مدة وهو غير جالس فالفوطوي شاد كاسو فيديه و الزاج ضاير بيه والخادمات كيجمعوه فلخر زاد لتخ تاداك الكاس وهز جاكيطتو وخرج ... رتاج بقات متبعاه بعينيها تاخرج لبرا كاع ومعلية حاجبها كتسائل اش غيكون واقع !! ......
نزلات اريج ورقية دقة وحدة وتبعاتهم تاحياة واية ... وكملو نهارهم تاني بين الضيوف والعزايا والذكر الحكيم ... تاكمل النهار الثاني دالعزاء والكل غادر باش يبقاو غير افراد العائلة لي ملي كيساليو مكيبقا عندهم تالوقت فين يكلسو مع بعضياتهم .... وكل واحد كيقصد جناحو واسد كيف كل مرة غير كيدخل فيها لحناجو خاصو يطل من البالكون على الباركينغ يشوف واش كاع السيارت تما .. كانت ناقصة غير داياد ولكن بان ليه تاهو دخل ... عاد رتاح بالو ملي كلهم جاو عاد غينعس نوعا ما مطمن .. علا ساعتو ديديه بانتليه جوج ونص ديال صباح ... غمض عينيه ودخل كيعوج فعنقو من العيااااء توحش الهدووووء .. توووحش روتينهم .. عياااا ، توحش غير ينعس ولكن مابقات ليه راحة حتى يتهنى على ولادو واخا هادشي عمرو غايكون وعمرو غيتهنى غير لادارو عليه التراب والولاد غير مازايدين كيكبرو ومشاكلهم كيتزادو ..... لامار كانت فدوش كدوش وهو خرج لجناح وسيم حل عليه الباب لقاه ناعس .... بدا كيقرب بشوية وهبط ودنيه كيسمع هو يلقاه طالق القرآن فالكيت وناعس ... تنهد وغطاه مزيان وخلاه ليه فودنيه .. معارفش علاش ولات هاد العادة فيه ؟ مزيان بنادم ينعس على القرآن .. ولكن علاش محتاج يديرو عاد كينعس .. واش ولدو كيواجه شي حاجة !! بزاف دالاسئلة كيضورو فبالو والاجابة غيلقاها غير فالمراقبة ... داز بشوية للمرايات الطوال لي فالبيت وبدا على كل وحدة كيلصق عدسة دالكاميرا .. وفالدريسينغ وفاي بلاصة .. كانو عدسات صغار مربوطين بالويفي و خدامين فتيلي ديالو .... جبد التيليفون اكتيفاهم هو يبان ليه جناح ولدو كاامل عاد تنهد وخرج مشا لجناحو ينعس ... لقى لامار يلاه سالات دوشها وتخشات ففراشها كتشوف تيليفونها وترد على العزاء .. وهو غير دخل بدا يحيد فالشوميز ديالو
اسد : بصحة
لامار : ( حطات تيلي وبدات تجبد ) عرفتي كنحس بواحد العيااااااء خطييييير .. عياء نفسي وجسدي وكولشي ....
اسد : ( كيحيد ساعتو ) وشنو المعمول
لامار : ماعرفتش ... والله معارفة راسي شنو محتاجة ...
اسد : انا عارف شنو محتاجة ....
متكية ففراشها كاتسنى شنو هي هاد الحاجة .... وهو دخل ففراشو تكى فبلاصتو وجبدها لعندو حط راسها على صدرو كيف موالف وهي تبسمات وحاوطاتو بيديها وغمضات عينيها براحة ...
اسد : دابا مزياااان !!!!
لامار : ( مغمضة عينيها ) مممممم .... بزااااااف ....
تبسم وهبط على راسها باسها مطول كأنو كيقول ليها قاد نصبر وقادر تقاوم وقادر ندير كولشي فسبيل نت تبقاي مرتاحة .... ومد يدو موراها لتيليكوموند طفا الاضواء ونعسو .....
اما بيلي كتمشي وتجي فالبيت ووتفرك فصبعان يديها ... فلخر هزات كابها ولبسات كلاكيط ديالها وخرجات لجناح واليديها .. ودقات بشوية ...
يونس كان يلاه غيدخل لسريرو ينعس اما اريج فالبالكون كتهضر فتيليفون مع لي مزال كايعزيو من صحابهم لي فكندا ....
دقات ودخلات وهو يشوف فيها يونس باقي شاد الغطا لي كيقادو فوق سرير
يونس : بابا ؟؟؟؟ مانعستيش ؟
بيلي : ( مشات عندو وعنقاتو وهو حط الغطا وحاوطها بيديه ) توووحشتك .. كاع ماشفتك اليوم
يونس : وراك عارفة ابابا مشغولين هاد ليام ....
بيلي : فين ماما
يونس : فالبالكون ...
بعدات عليه وبقات شحال عاضة على شفتها وهي تستجمع قواها
بيلي : داد .... تقدر تعيط على زياد واياد لهنا .... وعطيوني شوية من وقتكم ..
يونس : ( علا حاجبو ) ياك لابااااس !! ..
بيلي : بغيت نهضر معاكم ابابا .. نتوما كاملين ... نتا وماما .. وخوتي .... واش ممكن ؟؟؟؟؟
جناح قسم
لبسات بيجامتها دنعاس بلو نوي حريرية بدونطيل اسود وكلسات على الكرسي كدهن لكريم ديالها ... يلاه جات تجمع شعرها وهي تفكر ان جود قاليها بليل بغيت نهضر معاك وتقلبات كتقلب على تيلي تالقاتو ورسلات ليه ميساج " آر يو اْوايك are you awake ( فايق )! " حطات تيلي وجمعات شعرها ديل حصان تاسمعات ميساج وصل " yes " ...
لبسات صوندال دنعاس فرجليها ومشات تالجناحو دقات ودخلات تابان ليها ضو خفيف فالبالكون عاد زادت لقاتو جالس على الكرسي وروكسي على رجليه كيداعب فالفرو ديالو وقدامو طفاية دالكارو .. شافت للطفاية فيها جوج كاروات وهو كيدعاب روكسي وسااااهي فالغابة قدامو ونجوم الليل ... وهي دخلات وجلسات قدامو ودارت رجل على رجل ... وهضرات تاقفزاتو
قسم : اهاه ! شنو هو هاد الموضوع لي مخليك مارادش ليا كاع البال بلي جيت !!!!
عند بيلسان ....
جالسة على فوتوي وقدامها فالفوتوي مقابل معاها يونس وحداه اريج ... وهي جالسة وكتفرك فصبعانها وطلع عينيها بشوية تشوف فيهم وتنزلهم ..
اريج : مغتقوليش لينا دابا اش كاين
بيلسان : ت .. تا ..( استجمعات قوتها كتلوح عليها التوتر وشافت فيها ) تايجيو خوتي ...
اريج شافت عند يونس يالاه غينطقو هو يتحل لباب دخل زياد بسرفيت واضح انه كان غينعس ... شاف لعندهم باستغراب ودخل جلس كيشوف معاهم وشاف عند باباه وهضر بالانجليزي
زياد : ياك لاباس !!! واقعة شي حاجة ولا ؟
يونس : حتى حنا بحالك ( شاف عند بيلسان ) ختك لي جمعاتنا ....
يلاه غيهضر زياد تحل لباب دخل اياد تاهو لي باقي بحوايجو نهار كامل ... شاف مطول معاهم تاهو كيقرا من تفسيرات وجههم اش واقع .. غير جاو عينيه على بيلسان المتوترة ... عرف الموضوع اش غيكون .. وتنهد سد الباب ودخل بالعكز جلس على الفوطوي تاهو قدامها ... واريج شافت عند بيلسان ..
اريج : ها حنااا تجمعنا .... يلاه هضري ....
بيلسان علات عينيها شافت فاياد لي كيشرب من كاس دالما وحطو ودار رجل على رجل كيشوف قدامو فباب البالكون وشافت عند زياد لي كيشوف لعندها بترقب وباينة من عينيه عيان وفيه نعاس ... وعند يونس لي تاهو مربع يديه كيشوف فيها واريج لي كاتسنى وهي تنهد معمقة و غمضات عينيها مدة كتحاول تقنع راسها انه لي ليها ليها وهدا هو الصواب وهي تسرط ريقها وحلات عينيها وشافت فيهم
بيلسان : انا عارفة .... عارفة مزيان بلي الوقت ابداااا ماشي مناسب .. لي عشناه هاد اليوماين صعيييب .. عارفة مزيان شنو هي خلانا جدي ومشا بحالو .... ومتأكدة انه فشي بلاصة فينا حاضييينا وكيتفرج فينا ..... جدي قبل مايموت ملي كان فامريكا وكانو كيجمعو حوايجهم يجيو للمغرب .. كنت مشيت عندو لبيتو ودعتو ... ( الكل مركز مع كلامها واياد تاهو من غير انه مكيشوفش فيها الى انه كيسمع مزيان اش كتقول ) ملي ودعتو .. قاليا ابنتي .. ديييما ديري داكشي لي كيريحك .... انا متأكدة ( نزلات ليها دمعة وابتسمات ) غايكون فرحاااان لهاد القرار لي خديت ....
يونس : اشمن قرار !!!!
بيلسان : بابا .... كلكم هنا فهاد البيت متأكدين ومتفقين بالاجماع على ان بيلسان بنتكم الطاااايشة ... بنتكم لي كدير اش كيقول ليها راسها ومكتسوق لتاشي واحد .... ( ضورات عينيها عليهم كاملين واياد اخيرا شاف لعندها وهي تحط نظرها على بابااها ) اليوم ..... انا قررت ... باش مندير حتى خطوة فحياااااتي .... حتى تكونو نتوما .. كاملين .. راضيين عليها ... الى مكنتوش موافقين .... والله منديرها ....
اياد : ( تحنحن وقاد الجلسة ) وبالك هدا وقت مناسب لهاد الهضرة ! الى ناسية اشنو واقع نقدرو نفكروك ...
بيلسان : انا عارفة كلشي ... وعارفة مزيان وكتر منك كاع .. ونتوما عارفيني اني اكثر وحدة متعلقة بيه هنا .. ولكن جدي غيكون فرحان لاكنت فرحانة .... ( شافت فماماها ) ماما انا عارفاك عيانة .. ولكن واعدت راسي باش من هنا لفوق مندير حتى شي حاجة بلا خباركم نتوما .....
يونس : اختصري هضرتك راه فينا نعاس ابيلسان .. طلقينا دغيا اش عندك
زياد : الا كان شي تبرهيش راه ممساليينش ليه فهاد الساعة ... خلي تالصباح ...
اريج : ( فهمات الموضوع وكتشوف فيها ) خليوها تهضضر ... هضري .... قولي كاع اش عندك حنا كنسمعو ....
بيلسان : ماما .... سمحي ليا بزاف .. سمحي ليا لاكنت زايداك همي ونت عاد خاسرة باباك .... سمحي ليا حيت مقاداش نحبس هادشي مزال فلداخل ديالي ( شافت فيهم ) وسمحووولي حيت خديت هاد القرار ....
زياد : واش مغتهضريش دابا !
بيلسان : انا غنهضر ازياد .... اليوم ... انا جاني طلب زواج ....
زياد وسع عينيه واريج واياد دايرين نفس النظرة حيت كانو متوقعين الموضوع ويونس علا حاجبو
يونس : نعام !!! ( قرب ليها وذنيه ) مسمعتش !
بيلسان : بابا ... الا مكنتوش راضيين ومباغيينش ..كنحلف بالله مغادي نواقق ... حتى توافقو نتوما .....
زياد : ( بعصبية ) شكون هذا
يونس : علااامن داوية نت شكون هذا
بيلسان : ( شافت فاياد لي قلب راسو وشاافت فماماها لي رامقاها بنظرة صارمة وهضرات ) ولد عمي .... جود ....
زياد : ( بصدمة ) وااااات !!!!!!!
يونس : ( بعصبية ) وااااش عارفة راسك اش كتقوووولي !!!
عند جود ....
جود : ( حط روكسي فالارض وقاد جلساو مع ابتسامة خفيفة ومد يدو شد حنكها قرصها منو بحركة دلوعة ) توحشتك ... مامنحقيش نتوحش ختي ونعيط ليها تجي تونسني
قسم : هه !! فثلاثة دصباح ؟ ار يو شور !
جود : ( رجع لور براحة وحط يديه على التكايات دالكنابي القصبي ) صراحة لا .... كاينة حاجة اخرى ....
قسم : اهاه ... شنو هي ؟؟؟؟
جود : ( طول فيها الشوفة واستجمع انفاسو وقواه وخرجها ) غنتزوج .....
قسم وسعات عينيها وحلات فمها وقالت بصدمة والغوات
قسم : واااااااااات !!!!!!!!!
عند بيلسان
اريج شادة على راسها واياد كيشوف لجنب ملامحو مجموعين وكيضرب يديه على التكاية وزياد باقي مصدوم ويونس كيشوف معلي حاجبو وهضر بحدة محاول يراعي الاجواء دااعزو لي فالدار
يونس : واااش باغا تتخخخرجي ليا عقلي فهاد الليل ؟؟؟؟؟؟؟ ...
بيلسان : بابا .. خليني نكمل هضرتي .... نساليها من لول للخر وحكمو كيف بغيييييتو ....
اريج هزات يديها بشوية حطاتها على يد يونس لي كان نايض عندها ورجع جلس كيتنفس بزز وهي حطات راسها فالارض مكملة هضرتها
بيلسان : نتوما عارفين اش وقع اخر مرة مع جود وكاع داكشي ... ووقفتو معايا حتى بديت كنسى .. بينت ليكم بديت كنسى ولكن بنسبة ليا انا .. عمرني نسيت وعمرني غانسى .... ملي جيت للمغرب ... حاولت نبين لراسي مكنعرفوش ولكن ماقدرتش عيني كانو كيفضحوني .... الدموع مكانوش كيحبسو ابابا .... ( علات عنينها فيه دمعانين ) بابا انا غير بشر .. غير بنت ... بغااات من قلبها ... غير بنت حلماااات وماحققاتش .... غير بنت عيات بصبر .. بنت تمنات شي نهار تمشي الامور كيف بغات هي .... هو لي بغيت حياتي كاملة وهو لي مزال باغاه .. راه لاديت منغيرو عمرني نكون فرحانة منغير لابقيت حياتي كاملة بوحدي .... ولكن واخا هاكاك والله ابابا ماقلت ليه شي حاجة هو لي جا عندي .. وهو لي سول .. وهو لي شك ... ومنعرف واقلة عمي اسد وماماه عاودو ليه كولشي ووراوه تسجيلات الكاميرا ... ( اياد غير كيتنهد ويونس كيرمش ) وتكلم يمكن مع واليديه ... وجا قاليا ... بلي داكشي القديم خاصو يتصلح .. وبلي هو باغيني لزواج هاد المرة ..... وقال ليا حتى قبل مانعرف بلي نت لي كنت خطبتك عجبتيني ..وملي عرفت هادشي دابا قرررت نتزوج ..... ( شافت فماماها ) هو لي بغا اماما ....( شافت عند زياد ) قاليا واش تكملي معايا حياتك .... ( شافت فيهم كاملين ) الى كنتو موافقين ...غانساو كولشي ونعاودو صفحة جديدة مع جود جديد .... وحنا ناس بعقلنا ماشي دوك المراهقين .... والى ماكنتوش باغيييين ... حتى انا غنرفض وغنرجع فحالي ..... وغنطوي هاد الصفحة فمرة وحدة ......
يونس : ( شد راسو بين يديه كيضورو ) انا هادشي مغاااايدخلش ليا لعقلي ( رجع علا راسو ) واش حنا فهادشي دابا ؟؟؟؟؟؟
بيلسان : ياك مكتبغيونيش نخبع عليكم !!! هادشي لي وقع ... هانا قلتو ليكم .... الا كنتو موافقين ... حتى انا موافقة ... كنتو غترفضو ....حتى انا غنرفض ...
زياد : على اسااس نت كتسناي الرأي دشي واحد ؟؟؟؟ شاورتينا ملي مشيتي لاوكرانيا !
بيلسان : وحيت مكنتسناش شوار دشي واحد وغلطت معاكم بزاف .. هادشي علاش انا قررت هاد المرة نتبدل ... هاد المرة نجرب رضاة الوالدين واحساسهم .. واش حاسين جود مزيان ليا ولا لا ...... الا ماكنوش راضيين عليا مغندير تاشي حاااجة .. الخطوبة لي وقعات شحال هادي مكنتوش راضيين عليا مية فالمية داكشي علاش مكملاتش ...انا دابا بغيت الامور تتبدل .... كنطلب منكم حاجة وحدة نسااااااو داكشي كامل ..... وحسبوني بنتكم لي جات للمغرب وشافها ولد عمها وطلبها لزواج ...... ( شافت فاريج ) حتى نتي اماما كنت واحد نهار قدي .... حطي راسك بلاصتي ... لو بغيتي شي وااااحد .... كنت غتخلاي بسهولة فأول طيحة ؟؟؟؟؟؟؟
اريج شافت عند يونس مطولة الشوفة وتنهدات نزلات راسها للارض و يونس غير شاد على راسو ... اما اياد دفع الكنابي وناض مشا وعلا معاه يونس عينيه تاشد الباب ورجع شاف فبيلي
يونس : سيري دابا تنعسي ....هادشي غيهضرو فيه الكبار
بيلسان : خودو راحتكم ابابا .... رأيكم كيهمني .... مشكل ديالي انا وجود كان غيخاصم العائلة على قدها داكشي علاش هاد المرة بغيييت يكون برضا العائلة كاملة ولا مغنديرو تاشي خطوة ..... ( وقفات ) تصبحو على خييير ....
خلاتهم ومشات للباب حلاتها وخرجات لجناحها بقات واقفة شحال فالكولوار كتشوف فباب جناح اياد تاكانت غتمشي فلخر قالت خليه تايبرد ويتقبل الفكرة فراسو .. وتنهدات حلات باب جناحها ودخلات ... غير سدات لباب تلاحت على السرير وغمضات عينيها عاد كتحس براسها رتاااااااح ملي خرجات كاع اش فقلبها ... ودارت بشوار عائلتها وماخايفة من والو الحب ماشي عييييب ... العيب هو تخبيه ويبقى فالظلام مخبع ومرابحة منو غالعداب ...
يونس غير خرجات ناض كيمشي ويجي و اريج غير جالسة تاوقف زياد
زياد : قصة هادو راه مغنساليوش منها ...
اريج : ( تنهدات ووقفات ) سير اوليدي تنعس سييير .... منبعد ونهضرو فهادشي ماشي وقتو ....
زياد وما براسو وخرج عيان واريج شافت عند يونس
اريج : يووونس .... دوز تنعس ترتاح .... غدا تلتيام نهار لخر دالعزو .. من بعد نجلسو مع لامار واسد ونشوفو هادشي .... ونشوفو اش غيقولو تاهوما ... واخا المفروض حياتهم هادي مخصناش ندخلو ولكن قصة بيلسان وجود الا مقاديناهاش حنا غتخرج على العائلة كاملة .....
يونس : ( مشا هز بواطة دالكارو ديالو جبدها ) غير سيري تنعسي نتي .. انا مزاال منعس
اريج : ( شداتو من يدو وحيدات ليه داك البواطة حطاتها وبقات كتشوف فيه وهزات يديها لحنكو ) حبييي .... من ديما كنقوليك ملي يكون عندك مشكل خرجو متبقاش دافنو فالداخل ودير راسك راك صافا وكالم وشاد بزمام الامور .... انا عارفة قلبات ليك راسك دابا .. وعارفة الهم لي هاز ... ماتسكش وتبقى بوحدك كيف ديما .... ( جراتو من يدو ) اجي نعس حدايا ... جود راه بعقلو دابا ماشي شي واحد لي غيلعب بيها وهو كيموت على قطرة دمو .... وتاهي راه تعلمات من خطأها ... اجي نعس حدايا ولا مغنعسش ...
يونس : ( وقف وضورها عنو وشد وجهها كيوشف لعينيها ) نت شوية ؟
اريج : ( تبسمات بزز ) كنحاول ايونس .....
تبسم ليها بزز ابتسامة عيانة وجرها لسرير .....
عند جود ...
جود : غوووتي ديري بوووق نتي كاع
قسم : ( شادة على فمها وحيدات يديها وهي تبان ابتسامة فرحانة ) واش كتضهررر بصصصصصح ؟؟؟؟؟؟ وشكووون هادي ؟؟؟؟؟ شكون هادي لي خلااات قلب جوود يتبدل ويبغي يتزوج ؟؟؟؟ ( رجعات لور كتشوف فنقطة اخرى وتخيل الموضوع ورجعات ضورات راسها بلا ) مستتتتحيل منقدرش نثيق
جود : شكون كتمناي دابا فعقلك نقوليك راها هي ...
قسم : ( علات فيه حاجبها مفاهماش تاشوية بدات تستوعب هضرتو شوية بشوية ومال جنب فمها بابتسامة فرحانة ونطقات ) بيلسااااان ؟؟؟؟؟؟؟
جود تبسم ابتسامة حنينة وحرك راسو بالايجااااب
قسم : ( غوتاات وشدات عللى فمها تاقفزات روووكسي ) كككتهضر بصصصصصح ( وقفات ) للااا انا مامتيقاااااش
جود : ( شدها تجلس ) شششش تسطيتي .. رجعي تكلللسي ....
قسم : ( كلسات وبدات تجمع ضحكتها ) ولكن .. كيدرتي ليها !
جود : ( كيداعب روكسي لي فالارض محني عندو هارب من نظراتو يفضحوه ) عجباتني .. وبغيتها لزواج ...
قسم : (علات حاجبها بشك ) ومااااايمكنش !!!!!!
جود : ( تقاد فجلستو وتبسم وشاف فيها ) عرفت كولشي اقسم
قسم : ( وسعات عينها ) تفكرتي ؟؟؟
جود : لا ... ولكن فكروني
قسم : هي ؟
جود : وعندك الوجه تسولي ... غاابلاااتي عليك حتى نت .....
قسم : دابااا عاااوود ليا من لول
جود : دابا خووووك عياااااان .. بغيت نقوليك غير هاد الهضرة ... تالغذا نديرو شي كلسة انا وياك وغنعاود ليك من لول .... دابا باغي غير نرتاح ونحط راسي
قسم : ( تبسمات بحنية ) واخاااا .. على خااطرك .... غنخليك ترتاح بصصصصح غدا نهضرو
جود : غداا نهضرو ... نتغداو اونسومبل ونعاود ليك ....
قسم : ( بضحكة ) صافي مشااات .... ( ناضت ) نخليك ترتاح تصبح على خيييير .. واخا ندير راسي ماسمعت والو حتى تعاود ليا كولشي هههه
جات ماشية لباب البالكون ورجعات طلات عليه بضحيكة
قسم : تانا عندي ماتقول ليك ...
جود : ( علا حاجبو ) وايلي !
قسم : غدا نتلاقاو ...
عطاتو بوسة فالهوا ومشات وهو تنهد وهز روكسي حطو تاني على رجلو وجبد كارو اخر .. نتر نترة وعلا راسو لفووووق نافت دخان ونافت معاه تنهيدة من اعماق قلبو ..... هو يتلفت لطابلة قدامو بان ليه تيليفون ديالو وهزو .... ومشا لواتساب ديالها ... وكليكا على البروفايل وهي تحل تصويرتها قدامو ... الشقراء الفاتنة لي أسراتو من اول نهار شافها .. بدا يتبسم بشوية وهو كيشوف فضحكتها الطفوووولية وعينيها لي بحال الما فالصفاء .... وخرج من داك الصورة وكتب ليها ميساج ..... كان اول مسج غيكون السباق ليه .... " Have a good night my blondy lady " ( تصبحي على الخير الزعرة ديالي )..... تاكان غيرسلها ورجع ضاف قلب احمر بجانبها ورسل الميساج ... وتكى راسو لفوووق ....
بيلسان غير وصلها الميساج حلات عينيها فالسقف كانت باقا فنفس نعستها وتقلباات للتيلي حداها هزاتوو غير لقاتو جود بزربة جلسات مركزة ... وهي تقرا داك الميساج ... كانو كلمات قلال ولكن بانو ليها بحالا الف كلمة كتقرا وتعاود وناضت كتمشي وتجي فالبيت عاضة على شفتها ... تانسات كااااع تجاووب ... عاد كتباات ويديها كيترعدو بالفرجة " I hop the same for you, my brown man " ..... ( كنتمنى لبك نفس شي ، الاسمر ديالي )
غير وصلو الميساج حلو .. وتبسم بجنب شفاهو وحط روكسي وناض باتجاه سريرو ينعس ....
الساعة الثالثة و النصف صباحا ..عين الدياب - كازا بلانكا ..
وقفات جاغوار كحلة قدام واحد المبنى عالي و أصوات الموسيقى خارجة منو .. البوابة الكبيرة ديالو كانت مفتوحة خارجة منها إضاءة حمراء خفيفة .. منعكسة على الزاج الفيمي ديال الجاغوار هي و اللافتة المضيئة المعلقة فوق الباب باسم واحد من أكبر الكازينوهات فالمدينة < RED NIGHT > ...
حدا الباب كاينين جوج ڤيادر لون بشرتهم سود طوال و عراض .. لابسين نظارات كحلين رغم أن الحال مظلم و سماعات بيضاء فودنيهم الخيط ديالهم نازل مع رقبتهم لتحت التيشورتات الكحلين لي لابسين و لاسقين على أجسامهم المعضلة ... نفس الملامح الحادة فوجاههم بجوج و كيشوفو غير قدامهم ... طابي حمراء مفرشة من الباب نزولا على ربعة الدروج حتى وصلات للطريق بحالا راه حفلة تقديم جوائز ولا العرض الأول لشي فيلم هوليودي ...
تحل باب الطموبيل و نزل السائق ببدلة رمادية قاتمة و ربطة عنق سوداء بحال الشوميز لي لابس ... ملامح أوروبية بيضاء و عيون سوداء .. تمشى بخطوات تابثة و سريعة نوعا ما للباب الخلفي للجاغوار ... حلو و تراجع خطوة للخلف كيخوي الطريق للشخص لي اللور باش ينزل ...
تمدات رجلو اليمنى و تحطات على الطابي الحمراء بسباط أسود من ماركة فرنسية فاخرة كيلمع .. من بعد خرج راسو و وقف برا .. ببدلة سوداء أنيقة مكونة من ثلاثة القطع ... سروال ڤيست و جيلي .. فجيب الڤيست منديل أبيض بحال الشوميز لي لابس ... ساعة ذهبية كتلمع فالمعصم ديالو مزينة بألماسات صغار ا .. مصنوعة خصوصا على قبلو و هادشي واضح من الحرف الأول من سميتو لي منقوش عليها "P" .. سد الصدفة الذهبية ديال الڤيست ديالو و السيگار شاعل بين صباعو .. بشرة لاتينية برونزية و ذقن حليق ... شعر أسود كتتخللو خصلات قليلة رمادية من المقدمة كتوحي على أنه فالخمسينات من عمرو ... 52 سنة و كتافو مزال عراض و قامتو طويلة و ظهرو مجبد ...
رجع السيگار لفمو و هو كيشوف قدامو فالباب ديال الكازينو .. بعيون رمادية باردة بحال شخصيتو .. تجاعيد خفيفة ترسمات جناب عينيه و خطوط قصيرة على جبهتو ... ملامح جامدة مكيبان عليها والو ... حيت طبيعة خدمتو و العالم لي كيعيش فيه كتغسل الإنسان من المشاعر و كتخليه عبارة على قطعة جليد صعيب تقراها .. و فالحالة ديالو هو مستحيل تتعرف عليه بالضبط شكون !...
رجل أعمال ؟ سياسي ؟ مافيا ؟ ولا هوما بثلاثة ؟!
صعيب تحدد من المظهر ديالو حيت كيبانو عليه كاملين ! و لكن لي ساهل تعرفو هو أنه عندو لفلوس .. بزااف ديال لفلوس ...
شاف على اليمين ديالو فطموبيل من نوع چيب لي كانت مبلاصية وراه .. واقفين حداها ربعة ديال الرجال بلباس موحد عبارة على سراول كحلين مع تيشورتات فنفس اللون ... كانو الحراس الشخصيين ديالو لي مكيفارقوهش فينما مشا ... رجع شاف قدامو و تقدم و هوما تابعينو بينما السائق رجع للطموبيل و ديمارا يحيد من تماك يمشي للباركينغ ...
الفيدورات ماتحركوش من بلاصتهم و هو داخل من الباب حيت عارفينو شكون و كانو متوقعين مجيتو ... واحد فيهم دار يدو على سماعة وعلم موالين الشي بلي راه وصل ....
مع الدخلة كان حيط لاسقين فيه مصابيح هي لي جاي منها الضوء الأحمر ... جوج طرقان واحد على اليمين و الثاني على الشمال .. الطريق لي على الشمال هو لي جاية منو أصوات الموسيقى العالية و صوت الآلات ديال القمار ... و صوت واحد الرجل كيسب بالكلام الخاسر و بعصبية و هو مجرور من يديه من طرف جوج رجال لابسين نفس لبسة الفيدورات و فنفس حجمهم ... مخرجينو بعدما خسر فلوسو كاملين فالقمر و نوض الصداع حيت سكران ...
الرجل: طلللقوو منننني اولاد لقحـ***-ـااب راه عندييي لفلووووس ... طللللقوو ...
جروه مدوزينو من حداه حتى خرجوه و لاحوه فالشارع .. و هو ماداهاش فيهم حيت متعود على هاد المشاهد .... ماكانتش حاجة جديدة عليه ولا مشهد أول مرة يشوفو .....
كمل طريقو على اليمين فالطريق لي كيبان هادئ ... ممر مفرش بسجادة قهوية مزركشة طويلة .. على جنابو بعض الأبواب و لوحات كبيرة معلقة فالحيوط .. ديكورات نحاسية و خزفية و تماثيل متوسطة الحجم وواحد كبير فالمقدمة منحوت عليه جسم امرأة عارية .. و ثريات نازلين على السقف على طول الطريق ... بحالا راك فشي ممر فشي أوتيل 5 نجوم .. . كيتمشى بكل ثقة بحالا راه فبلاصة كيملكها .. و دخان السيگار ديالو مرافقو مع كل خطوة كيدير واابوديغارد من موراه بحال العسكر ...
سالا الممر بباب مزدوج أسود كبير ... معلقة فوق منو لافتة ذهبية كتلمع مكتوب عليها بالأسود < VIP > ... قبلما يوصل ليه سبقو واحد من الحراس ديالو بالزربة و حل الباب على قبلو ...
الباب تحل على ريحة السيگار الفاخر و الشراب و عطور نسائية و رجالية و صوت موسيقى كلاسيكية منخفضة و ضحكات و هضرة رجالية بأصوات مختلفة .. صالة كبييييرة بأفخم الديكورات .. جليسات مفرقين كل وحدة و الديكور ديالها .. جليسة كلاس بفوتويات كوير أصلي كحلين و طابلة ديال الزاج ... و جليسة بفوتويات فالبيج و طابلة من الخشب الممتاز .. و جليسات ثلاثة اخرين كل وحدة و ديكورها ...
بار كبير فيه جميع أنواع المشروبات الغالية واقفة فيه بنت شقراء بدوبياس و ميكاب جريئ كتمسح الكيسان و ابتسامة واسعة على شفايفها الحمرين .. الكونطوار من الرخام الأسود و قدامو كراسي طويلة كحلين ... ثرية كبييرة رئيسية كتتوسط القاعة ..
لي جالسين تماك كان عددهم مكيتجاوزش سبعة ديال الرجال مفرقين كل جماعة متكونة من جوج ولا ثلاثة بوحدهم .. واضح من الكوستيمات لي لابسين و الكيسان دالمشروبات الفاخرة لي فيديهم انهم من كبار رجال الأعمال فالبلاد ... واحد منهم .. و بالضبط لوكاس مول هاداك الكازينو غير شاف الباب تحل و شاف شكون دخل حط الكاس من يدو و ناض بالزربة مشا لعندو بابتسامة واسعة واضح عليها التوتر حال يديه بترحاب .. و نطق بلهجة انجليزية أنيقة و مثيرة ...
Lucas : Peeeter !! Welcome to « red night » ..
" بيييتر ! مرحبا بيك ف « الليلة الحمراء » "
بيتر بنفس البرود ضار شاف فالحراس ديالو و بنظرة من عينيه قدرو يفهموه سدو الباب و بقاو على برا .. من بعد بلاما يرد على لوكاس ولا يرد التحية مشا داخل و العيون كلها عليه كتتفحصو .. مع انهم كلهم أغنياء فهاديك القاعة حتى واحد ماكان يقدر ينافسو فأناقتو ولا الكاريزما لي كتحيط بيه .. شق طريقو بحال السهم مباشرة للجليسة بالفوتويات الكحلين و لي كانت محجوزة على قبلو هو و لوكاس و الشريك ديالو ابراهيم ... ابراهيم كان رجل ستيني والمغربي الوحيد بينهم فالشركاء دهاد الكازينو ... بشعر غالب عليه الشيب .. جالس تماك ببدلة زرقاء غالقة و ابتسامة واسعة على فمو و هو كيشوف فالبنت لي جالسة ملاسقة معاه و حاطة يدها على كتفو ... لابسة غير دوبياس كحلين و طالون كحل عاالي و ميكاب مثير مركزة فيه على عينيها .. بينما الثانية لابسة غوب أحمر جلدي لاااسق على جسمها و معري كامل ما مغطي حتى حاجة دايرة رجل فوق رجل و كتخلط فالشراب و تصايب فمشروب فواكه لابراهيم ...
غير وصل بيتر بثلاثة هزو عينيهم شافو فيه .. ابراهيم جمع الضحكة و وقف بينما البنات بقاو كيشوفو فيه بابتسامات مايعة فيها بزاف ديال الإغراء ... هز حاجبو كيستهزأ بمحاولتهم الفاشلة فأنهم يحركو فيه شي حاجة و هوما بلاما يحسو جمعو هادوك الإبتسامات و حدرو ريوسهم .. نظراتو الباردين كان صعيب باش يواجهوهم ...
فتح الصدفة ديال الڤيست و جلس بكل هيبة بينما مالين البار بجوج بنفسهم مامرتاحينش بحالو ... كان كلو غرور و قوة كيخلي الناس لي ضايرين بيه كلهم يخافو منو و يحترموه فنفس الوقت ..
جلسو حتى هوما بجوج بتوتر معاه .....
لوكاس: كون تعطلتي شوووية كنتي غادي تفلت عليك البدية ...
بيتر: ( عينيه كانو على شاشة سينيمائية كبيييرة شاعلة قدامو و نطق بصرامة ) خرجهم كاملين ...
لوكاس: ( رمش عينيه جوج مرات متابعين .. شاف فابراهيم بحالا باغيه يشرح ليه لقاه حتى هو بحالو مافهمش .. عاود شاف فيه و مال شوية للقدام و نطق باستفسار ) نعام ؟؟
بيتر : جيت هنا باش نتفرج براحتي .. خرج كلشي ( أشار بالسيغار ديالو للبنات ) حتى لقحـ…اب ...
ابراهيم بلع ريقو و لوكاس زير على سنانو ... هاد صيغة الأمر لي كيهضر معاه بيها ماعاجباهش و حتى الأمر لي عطاه ماعجبوش .. و لكن ما عندو ما يدير من غير أنه ينفذ حتى تسالي هاد الليلة .. حيت هاد السهرة كانت مهمة بزاف و ايلا سالات كيف بغا غادي يربح بزااااف ديال لفلوس ..
تنحنح و شاف فلبنات شوفات قاسحين و بالزربة ناضو خارجين .. و مشا ضار على هادوك الرجال كاملين كيعتذر منهم و كيجري عليهم بطريقة محترمة حيت حتى هوما كليان مهمين ماباغيش يخسرهم .. واخا طلع ليهم الدم و لكن التعويضات لي واعدهم بيها لوكاس خلاتهم يتقبلو الأمر و يبدلو القاعة بالقاعة الثانية لي فالطابق لي فوق هاداك ...
تسدو البيبان تاني و هاد المرة بقاو غير هوما بثلاثة تماك ..ولوكاس بقى يشوف فالباب منين خرجو وشحال من كليان مشى فسبيل بيتر و شنو غايربح معاه هاد الليلة .. الى ماربحوش هاد النزال يقدر يجيف راسو .....رجع لوكاس انضم للجلسة ديالهم .. فرك يديه مع بعضياتهم و بلع ريقو ...
لوكاس : تشرب شي حاجة ؟
بيتر: ويسكي ...
لوكاس قرب للطابلة كثر كيحل قرعة الويسكي و كيوجد الثلج فلكاس حيت عارفو كيفاش كيبغي يشربو .. و فنفس الوقت كيهضر و هو كيشوف فابراهيم شريكو لي كايتسناه يقدمو ...
لوكاس: هادا ابراهيم .. شريكي لي هضرت ليك عليه ...
ابراهيم: ( ابتسم و قاد الڤيست ديالو من بعد مد ليه يدو و هضر بالإنجليزية بلا لهجة ) متشرف باللقاء ديالك مستر بيتر ...
بيتر: ( بالبرود المعتاد ديالو شاف فيد ابراهيم الممدودة من بعد طلع عينيه شاف فيه ) مكنصافحش قبلما نربح ..
ابراهيم: ( بقا مبتسم بإحراج و جمع عندو يدو المقموعة ) تيق بيا لاقلت ليك من دابا ساعة و يمكن قل .. غاتطلب تصافحني و بالوجه گاع ...
بيتر ماتجاوبش معاه نهائيا و لو بابتسامة ولا إيماءة .. و هنا تدخل لوكاس بعدما حط الكاس قدام بيتر ...
لوكاس: بيتر .. ابراهيم راه مااشي غير هاضر .. ايلا قال كلمتو غير تيق بيها و كون هااني .. و ها نتا غاتشوف بعينيك ...
بيتر: ( أخيرا قناع البرود لي على وجهو تزعزع و قرن حجبانو .. مال للقدام و مد يدو كيضرب على الطابلة بصبعو ) هادي راه تسعيين مليون دولاار أ لوكااس ...
لوكاس: عاااارف .. عارف مزياان شحال راك حاط ..
بيتر : ( رجع باللور و دار السيغار ففمو عاد حيدو و نطق و الدخان كيخرج من فمو مع الكلام ) و عارف هاداك ولد القـ…حبة د مارسيليو شكون جايب ؟
ابراهيم: ( جاوب هو ) جايب The black ( حرك بيتر عينيه من لوكاس لابراهيم لي هضر ) و حيت عارفين مزيان بلاك شكون هو .. و القتال ديالو كيفاش داير .. و أي واحد قمر عليه كيتفرج و هو مرتاااح حيت عارف راسو رابح .. داكشي علاش .. جبت ليك واحد .. أنا متأكد مليوون فلمية بلي غايربحو ..... و فلوسك .. غاتهزها مضووبلة .... تسعين فتسعيين ...
بيتر: ( مال للقدام و هاد المرة باش يحط السيغار فالطفاية ) هادي كلها ثقة ؟ شكون هادا لي جايب ؟
ابراهيم: ( شرب من كاسو بابتسامة ثقة و رجع بظهرو اللور على الفوتوي ) "Once" ...
بيتر: ( رفع حاجبو على الاسم الغير مألوف ) وانس !!
ابراهيم: ( مكمل بثقة و فخر ) اه .. سماوه هاكا حيت ماكيحتاجش لجوج ضربات ... كيربح بالكاو من أول ضربة ... غييير ( رفع كاسو بحالا كيدير نخب ) وانس ..
بيتر: ( شاف فلوكاس و عاود شاف فيه ) منين هو ؟
ابراهيم : من هنا .. مغربي ( بيتر علا حاجبو حيت فهاد النوع من القتال ماعمرو شاف شي واحد مغربي كيبارز ) ماتشوفش فيا هاكاك .. تفرج عاد حكم ...
بيتر: ( شاف فيه مطول عاد بدا كينطق بشوية بصوت حاد و صارم ) على هاد الثقة كلها لي كتهضر بيها .. و المبلغ الكبير لي غامرت بيه بسباب هضرتكم بجوج ... ايلا خسرت .....
بجوج بيهم تجمدو نظراتهم عليه كيتسناوه يكمل .. و شافو فعينيه واحد القسوة ماعمرهم شافوها فحياتهم ...
بيتر: غدا الصورة ديال هاد الكازينو و هو كيتحرق غاتكون فالصفحات اللولين ديال كاع الجورنالات فالمغرب .. و نتوما غانحرقكم معاه ...
لوكاس لسانو ثقال عليه بالصدمة و قلبو بدا كيضرب بالجهد و جبهتو عرقات .. و لكن ابراهيم واخا الخوف واضح فعينيه ماسكتش ...
ابراهيم: ولا ربحتي ؟
بيتر: ( حول عينيه للشاشة كيتفرج ) 10 المليون دولار لكل واحد فيكم ملي يسالي القتال .. ( ابتسم لأول مرة ملي دخل .. ابتسامة جانبية صغيرة باردة حتى هي و مريضة ) هاد الليلة .. نتوما مقمرين معايا بحياتكم .. على هاد الـ ONCE ...
شارع صغير فمدينة الدار البيضاء .. مصابيح الشارع شاعلين بإضاءات خفيفة و لكن معظمهم مهرسين .. هرسوهم البزنازة ديال المنطقة باش يقدرو يبيعو و يشريو فالممنوعات فالظلمة ... الحيوط مكتوب عليهم كلام خاسر و شعارات دالراجا والوداد ...الخيوط ديال الضو معلقين فيهم سبرديلات قدام من السيور ديالهم كعلامة للبلاصة لي كيكون فيها البزناز .. كيتسمع صوت القطوط الجيعانة و الطوموبيلات لي كيكلاكصونيو فالشانطي لي قريب لتماك ...
و صوت واحد سيارة خلا گاع لي مخبين فالظلمة دالليل تماك ودنيهم يوقفو و يركزو بنظراتهم مع اللوطو لي من نوع أودي رمادية .. كلشي بقا حاضيها و هي داخلة مع الشارع حتى وقفات جنب واحد البار صغير و شعبي كاين تماك .. كيجيو ليه رجال الطبقة المتوسطة و الفقيرة باش يشربو و يشوفو الشيخات حتى يجيبو الكاو و يخرجو يتلاوحو لديورهم ...
تحل باب الطموبيل و خرج منها واحد الشاب بملابس كاجوال .. سروال جين أزرق وكاط و تيشورت بيض و جاكيت كوير كحلة .. داير كاسكيط كحلة و مهبطها ... سد الطموبيل و مشا بزربة كيشوف فجنابو لايكون شي واحد حاضيه ... دخل للبار و ضرباتو ريحة الگارو و الشيشة والحشيش ... العطور الرخيصة و ريحة البيرا و الروج و العرق ... و صوت الشيخات و هوما كيغنيو الشعبي بكلمات رخيييصة ..
وحدة كانت محزمة بالموزون فقفطان خفيف شفاف و طالقة شعرها و كتشطح وسط الرجال .. و هوما كيعلقو ليها و يلوحو عليها فالخضرات و الحمرات ... و صحاباتها ثلاثة بنفس القفطان واقفين فمنصة كيغنيو و معاهم كوامانجي بكوستيم قديم ... الإضائة ناقصة و الصخب و بزاف ديال الصداع ...
ماوقفش گاع باش يشوف شنو واقع حيت ماشي هادشي علاش جا لهاد البار لي مكيناسبوش .. كمل طريقو كيشوف فجنابو عارف فين غادي .. حل واحد الباب و تأكد ما داها فيه حد عاد سدو و دخل ... كانت غرفة صغيرة و خاااوية ... فيها غير باب اخر واقفين عليه جوج فيدورات صحااااح و عراض شافو فيه مخنزرين .. جبد هو تيليفونو من جيبو شعلو و ضغط عليه بصباعو بضع مرات عاد ضورو ليهم ... كانت فالشاشة ديالو دعوة الكترونية كحلة و عليها أرقام مكتوبين بالأحمر بحال الكود «8915271» جبد من جيبو الثاني ماصو ديال لفلوس غير شافوه و حلو ليه الباب ... ابتسم الشاب ورجع تيليفونو لجيبو وتقدم دخل .. كانو دروج كيهبطوه لطابق تحت الأرض .. و كلما نزل درجة كلما الأصوات بدات كتسمع ليه بعيدة و ماواضحاش .. حتى وصل لتحت و لقا راسو فغرفة اخرة خاوية كاين غير باب واحد ... مشا ليه حلو و كيف تحل دخل منو لعالم ااااخر ....!!
أصوات التشجيع عااالية بحالا راه فالتيران .. و صوت موسيقى حمااسية حتى هو مجهد فالجو ...
دخل لقاعة كبييييرة بحال المدرج ... قفص حديدي كبييير كحل كتتوسطو حلبة قتال الشوارع .. كتحيط بيها مساحة صغيرة خاوية من بعد دائرة بسياج حديدي قصير فيه أبواب كل واحد بعيد على الثاني بجوج متر ... من بعد هاد السياج كانو الكراسي لي كانو بحال الدروج ضايرين بالقفص ... عااامرين بالرجال و البنات لي هازين الللافتات بعبارات تشجيعية باسم "THE BLACK" ... كلللشي تماك كان مقمر عليه فهاداك القتال لي شهر و هوما كيتسناوه على أحر من الجمر ... الناس لي مقمرين بفلوس قليلة ألف درهم و أقل كانو جالسين اللور ... و لكن لي مقمرين بكثر جالسين لتحت .. كلما حطيتي فلوس كثر كلمت قربتي كثر للحلبة .. اما موالين هادشي كاامل ولي مقمرين بالفلوس الصحاح راسهم فالبيران الفخمين كايتفرجو من الشاشات وكاس الويسكي حداهم بحال بيتر. ....
السقف كان عااامر بالمصابيح الكبيييرة لي الإضاءة ديالهم بيضاء فاتحة ... بيفان كحلين مركبين فكل زاوية ... و كاميرات فكل جهة كيسجلو لجوج ديال لبلايص ... لرجال الأعمال لكبار لي مايقدروش يجيو لهنا و كيتفرجو عن بعد ... و للمواقع لي كتنشر هاد المباريات فالديب ويب ...
حيت هادا ماكانش قتال عادي .. هادا كان قتال غير قانوني لي شارك فيه يقدر يخرج منو حي .. ولا بعاهة مستديمة .. ولا جثة ممددة على الباياص ... المقاتل قبلما يحط رجليه على الحلبة كيوقع عقد بحياتو ... إما يعيش و يخرج رابح و ياخد لفلوس .. يا إما يموت ... و أي حاجة وقعات ليه داخل القضبان حتى واحد ما مسؤول عليها من غيرو ...
قتال القوانين ديالو الوحيدة هي الفوز و الخسارة ... يا يعيش .. يا الكاو .....
وهاد مرة القتال كان كبير ... لان فيه the black و مقمرين ريوس كبار بحال بيتر ومارسيليو .... والمبلغ كبييييير ... اما بنسبة لمقاتلين كانو لاعبين على عشرين مليون ..... شي لي خلا ذا وانس يزعم يقاتل وحش بحال ذا بلاك لا سابقو فالتجربة دالنزالات الكباااا غير على ود المبلع ومابقاش قانع بداك جوج دمليون ولا تلاتة ... موقع موقع على حياتو فاللهم يشد مبلغ كبير ..... وشوية بشوية زايد طالع تايولي يلعب على فلوس صحيحة ....لعبة حظ ... يا تترفح يا تموت ....
الشاب لي عاد دخل مشا مباشرة لواحد الطابلة فالزاوية فين كان جالس واحد الراجل لابس ملابس كاجوال و جاكيت قدامو دفتر كبيير و فيدو قلم كيقيد ... و حداه واقفة بنت بدوبياس حمرين و طالون فيدها دفتر التذاكر ...
حط الشاب لفلوس قدام الرجل و نطق ...
....: وانس ...
خدا الراجل لفلوس كيحسبهم و هو كيفكر بلي قلااااال الناس لي حطو على وانس هاد الليلة ... 95٪ من الحضور كلهم حطو فلوس صحيحة على بلاك حيت سمعتو سابقاه ماشي بحال لاخر ...
كمل و دار لفلوس فالمجر و شاف فالبنت قطعات تيكي عطاتها ليه .. شاف الرقم لي فيها قيدو حدا المبلغ لي كتب و مدها للشاب خداها و مشا كيقلب على الكرسي فين يجلس قبلما يبدا القتال ....
فغرفة صغيرة .. كان واحد المصباح نازل بخيط طويل من السقف .. شاعل بضو خفيف كايترعد بحالا قريب يطفا ... طابلة خشبية صغيرة عليها قرعة صغيرة ديال الماء و كانيطة ديال مشروب طاقة محلولة و صاك محلول كيبان فيه لداخل سروال جينز و تيشورت و قبية كحلة مامرتبينش ...
كرسي خشبي طويل بأرجل حديدية بدا كيبان عليها الصدأ .. جالس جسم رجولي عضلات ظهرو الواسع مطراسيين سووومر .. عضلات كتافو كيتحركو بالتوازي مع حركات يديه و هو كيلوي بانضة حمراء على يدو اليمنى ... حتى عضلات ذراعو بارزين حيت غير قبل جوج دقايق باش ناض من الأرض بعد 200 تمرين ضغط وطراكسيون ... لابس شورت كحل و رجليه حفيانين ملوية بانضة بيضاء على الكوعين ديالو ... و الجزء العلوي من جسمو كامل عرقان ... بحال شعرو لي بعض الخصلات منو نازلين على جبهتو و لاسقين عليها .. صدرو كيتنفخ و يتفش كلما تنفس و شفايفو مفرقين كيتنفس من فمو ... عينيه الزرقين تايهين فالفراغ ساهيين ... كيتسمع صوت أنفاسو عالي و كذلك صوت الصداع لي جاي من الحلبة.. و لكن هو كيسمع غير الأصوات لي داخل راسو ... ولي تايتهافتو كل ما لف لفة من داك الشريط الاحمر الطويل لي كايلويه على كفو على شكل بانضة
¶¶قسم : كنحسدك فخبارك
اصيل : ( علا حاجبو ) علاش !
قسم : حيت نتا هو الباطرون دراسك وتاحد مكيتحكم فيك .. عندك حياة صغيرة وزوينة ومتحكم فيها كيف باغي وكتقررر لراسك ومكاينش لي يقرر بلاصتك ¶¶
¶¶كوولشي تايقول ليا .. قسم علاش ماباغاش تزوجي .. قسسسم اش كتسناي .. كااانتسناه هو ... هاداااك لي ميكونش بحالهم ... وحتى كاع الى لقيييتو .. مستحيل نكون انا وياه .. حييييت انا قسم الاسماعيلي .. ومكتوب على جبهتي غير هاداك لي غيجيب ليا خدامة وميعلمنيش نطيب ويدير ليا شيفور وميخرجنيش شاد ليا فيدي يقطعني الطريق ..... ¶¶
¶¶خاايفة اصيل .. خايفة دبببصح على مستقبلي مع هاداك لي غنتزوج شي نهارررر .. خااايفة يزيد يكحل حياتي كتر ماهي كحلة .... ¶¶
¶¶اصيل : نت عارفة لو كانت شي طريقة نولي بيها غدا فمستوى عائلتكم كنت انا لي غنديك ومكنتش غنخيك لحتى شي واحد اخر .... ياك عارفة هاددشي !¶¶
¶¶ كلية الطب
- مرحبا موسيو الشريف .. وي الضوسي توصلنا بيه ... بنسبة لحرم لجامعي وليفخي ديال التسجيل وحتى الريسطو والتأمنيات كاتجي بطوطال ستين الف درهم ... تمن فالمتناول مع الجودة دالكلية اسيدي ... الاخت ديالك غانقرا فظروف جد مناسبة وسكن فحرم جامعي محترم ... ¶¶ .....
اللفة سالات وضارت كلها على المعاصم ديالو وسالاو معاها دوك الاصوات وهز راسو للفوق كايتنفس .... وغمض عينيه .. هو حاك حياتو كلها هنا ... ايما يموت ... ايما يتولد من جديد ويبدا حياة جديدة بعد مايحقق حلم اختو ويخلص رسوم تسجيلها و بعد مادير اول خطوة مع بنت الاسماعيلي ..... يا يموت ... يا يعيش .... عارف ىاسو ومتأكد انه ىرابح وعارف مهاراتو فالقتال الحر وخصوصا انه هدف قدام عينيه باغي يحققو بداك عشرين مليوم لي غايربحها الى ربح النزال قدام الوحش الصومالي ذابلاك .....
تحل الباب الخشبي و صدر صوت صرير مجهد من بعد تسد بلاما يتحركو عيون أصيل ..
..... : مستعد ؟؟؟
كان الكوتش ديالو لي دخل .. رجل أربعيني أسمر ببنية جسمانية قوية .. لابس سيرفيت كحلة و معلق صفارة فعنقو .. مگفض يديه و معري السواعد ديالو و ساعة الكترونية فالمعصم ديالو ... وقف داير يديه على جنابو واضح عليه فعينيه و صوتو الحماس و كذلك التوتر ... رغم انه ااكوتش ديالو مكيعرف عليه تاحاجة ... لا عنوانو لا علاش كايلعب لا اهدافو ولا حتى اسمو الحقيقي .. اصيل فهاد العالم ورقة كحلة معتمة ..... باغي يبقى مجهول باش نهار يبغي يبعد ويتحرر مايتبعو حد ....
المدرب: ( بحماس ) وانس هادا ماتش مهم ... أهم واحد من نهار بديتي .... ايلا طيحتي بلاك هاد الليلة اعتبر راسك دخلتي للعالمية ... هو راه....
أصيل: ( قاطعو بلاما يهز راسو ) 20 مليون .. غاناخدها كلها ملي نسالي ؟
المدرب: اه ... خليني نقول ليك على بلاك ... عارفك مكتبغيش تسمع على الخصوم ديالك و لكن هادا راه خاصك تعرفو ..
أصيل: غانعرفو ملي ندخل معاه للقفص ...
يتبع...
التعليقات
لا توجد تعليقات بعد، كن أول من يعلق.