محتوى القصة
رقية : ( طلاقاتها بتزغريتة تا صمكاتهم ) عقباااااااال ننزززغرت فعرسهاااا
قسم : لاوااااه اجدة لاواااه ... تزغرتي فتخرجها عاد نشوفو عرسها ... ( كتلوح عينيها فاياد واش غيطلعهم فبيلي)
سفيان : علاش كتزتغرتوو !
وسيم : هااادشي كامل حيت فاليدات !!! .. وفاالراااطراباج عاد .. حنا لا راطراباج لا والو و ماداها فينا حد !!! اووودي الزهر كولو داوه البنات
رقية : يستاااهلو النجااااح .. كانو يضلو مع كنانشهم مساكن يحفضو داك سيمانة د الامتحان مكانوش يبغيو حتى ياكلو ....الله يووووفقهم ....
سفيان : واامبرووووك ..... العقبة للتخرج عاد الفرحة نيشان ....
بيلي شكراتو بتوتر مضاهراش عليها الفرحة وحتى هما حاسين بيها و بالجو وعارفين اش كاين ، غير مباغيينش يبينو وكيحاولو يتصرفو عادي ....
لامار : ( كانت واقفة حداها عنقاتها وباستها ) العقبة لنجاحات اخرى احبيبتي .....
حياة : دابا تشششرطي عليهم فالكادوات ... ايييييه ممنوع شي حد يقلق لينا بيلي ليوووم ... ياااك ؟!!! ......
جود كانو عينيه فالتيلي كيسمع لحديثهم ولكن ماعاطيهش اهمية كتر ماعاطيها لداك الهيكل لي كيشوف فيه .. وهي ميلات عينيها ليه ! كان اول واااحد كايفرررح ليها و يحتفل بها فنجاحاتها !!!! كيفاش دابا متحركش حتى من بلاصتو !!!!! لهاد الدرجة ولاو غرباء ...
قلبها تزير عليها وحسااات بالخنقة والبكية و بالدموع غينزلو لدرجة كلشي رد ليها لبال .... و قدس كتغمز للقسم و قسم تنحنحات
قسم : ااحم ..... بيلي ... اجي حقا نوريك واحد الحاجة زدناها مور الدار كاع ماشتيها ... اجي معايا
جراتها بزربة من يديها وبيلي تابعاها والبكية واحلة فيها ، وصلو مور الدار جيهة لابيسين وهي طلقها و بيلي طلقات الشهقة دالبكية وشدات على فمها بجوووج وطاحت على ركابيها كتبكي بببجهد ..
اما اريج ملي شافت عينين بنتها لي حمارو وفرحتها لي ضاعت ليها ماقدارتش تحكم فراسها وغوتات بجهد
اريج : ايااااااااااد ....
الكل تلفت من داك الغوتة و جود علا راسو واياد تاهو علا راسو ..... ولامار تدخلات دغيا
لامار: اريج حماقيتي !!!!
اريج : ( بالغوات والحرقة ) هضضضضضضرررررنا معااااااك واااااش باغي تتتحححمقني واش بااااااغي تااسسسسسكتو لياااا قلبي واااش باااااااااغيييين تقتلووونيييي
يونس ناض بزربة عندها وقفها
يونس : اريييج .... ارا ابنتي داك الكاس دالما . اريييييج ....
اريج كلهااااا كترعد والضبابة على عينيها ويونس شادها مخلوع عارف داك لي كخيز دالسكر ... واياد ناض بزربة لعندها مخلوع و جود مفاهم والو وزياد كان بعيد كيلعب مع بنتو جا كايجري بزربة .. وسفيان واسد غير كيشوفو واحمد قلبو كيضرب بجهد مخلوع كيهضر بزز
احمد : ا اريج .. ا ابنتي .... ر راه باقين صغار . ص صحتك ابنتي ..
اياد : الوالدة تتتتنفسي .. ( شاد ليها يديها ) صاااافي بششششوية عليك .... بشششوية تنفسي ..
زياد : اش وااااقع !!!!! واااالدة ...
قدس : طاطا اريييج .. واش نجيب ليكم لابااارااي ؟؟؟؟ طاطا !!!!
يونس : ( شاد وجهها ) ارييييج نت لاباااس ؟ اريج ردي عليااااا
اريج كلها كترعد ولاو شفايفها بوووويض و قدس مشات كتججري تجيب لاباراي دالسكر دباباها .... وجود كيسول حياة بعينيه اش واقع . .. تنهدات فقط ماعرفات ماتقوليه وحاطة يديها على كرشها لي حساتها تقلبات بالخلعة...
اياد : ( كيعطيها تشرب الما ) دابا علاش كديري فراسك هاد الحالة .... بيني وبينها
يونس : ططططلق حيييد عليها يدييييك .. البرااااااهش .. سير اخوووياااا راه الزززنقة تقاااااتلووو ... النفااااااخة دالخراااااا ....
اياد زف بداك الكاس دالما فالارض ومشا و يونس كيضرب فوجه اريج ترد وعيها وهي كلها كترعد واسد زير على سنانو كيكره هاد الاجواء لي ملوهم وعيااو منهم .... تاجابت قدس لابراي خداها اسد وكلسوها بدا كيعبر ليها ..
اسد : ارييج حاولي تترخاي ... كتسمعينا ياك !
اريج : ( كتسرط ريقها بزز وكتحرك راسها باه )
اسد : طاايح ..... جيبو ليها التمر ... بشوية عليك ....
لامار : الله يااااربي .... نمشيو لكلينيك ؟
زياد : الواااااليدة كتسمعينا ؟ نمشو لكلييينيك ها ؟؟؟؟ نعيطو لطبيب
يونس : اريييج جاوبي غير براسك .... وااااشدي فراااسك ماديريش تاااني هاكا .. وصيناك وعاودنا خرجي سووووقهم ديها فصحتك ....
جنان : ماما اريج شدي فراسك عافااك .....
قدس : ( كتشربها الما ) نهبطو حدا البحر اطاطا ؟
اريج : ( كتهضر بزز) ا انا ب بيخير بيخير متخافوش
يونس : واشوفي هانتي خلعتي باباك .... توكضي معايا ....
اسد : صافي شوية اتولي بيخير متخلعوش ... فين دواها
يونس : ( لجنان ) طلعي ابنتي جيبيه .....
طلعات جنان .... واريج كتحاول ترد وعيها و تتحكم فراسها خصوصا ملي شافت باباها مريض تما ..... مروان كان مشا بعيد كايكمي كمل كارو ديالو عاد جاي وتلقى بلوؤي و سلطان نازلين الباب لور حيت اجنحتهم فآخر الممر واقرب باب ليها هو دالجهة الخلفية .. يلاه غادين لجيهة الامامية دالقصر فين جالسين هما يباليهم اياد غادي سااااخط لجيهة الملعب مافهمو والو ومشاو بزربة لجردة شافهم مجموعين على اريج ....
لوؤي : خااالتي !!!! ياااك لابااااس اش واقع ....
مروان : (بالهمس للامار ) اش واقع
لامار : شششش خليها على الله
سلطان : ( كلس حدا ماماه ) دابزو !!!!
حياة : وااايه ... عرفتي ترعدت ... ( يديها كيترعدو شد عليهم سلطان )
سلطان : ماااالكم على هاد الحالة ...
لامار : سلطااان ... عطي لماماك تشرب... حياااة راك حاملة زعما ..
اريج : ( كتهضر بزز بالدوخة ومادة يديها لحياة ) حيااااة .. ماتخلعيش اختي ماتخلعييييش ...
سفيان : ( شاف عند حياة لي كلها كترعد ) حياااااة!!!! ( مشا جلس حداها شد على كرشها ) ارا داك الكاس دالما .... واهنينا حتى نت
سلطان : ( رخف ليها زيفها و كيعطيها تشرب ) فففففف مشااااكيل ..
رقية : والله تاا خاااااص بووووكم العقل لي دايرين راسكم فالدرااااري الصغاااار !! ....
مشات جيهة اريج نوضاتها وهي باقا صفرة ..
رقية : زيدي يلاه معايا .. اجي تغسيلي وجهك اجي .. يننننعل گنننننسهم وينعل ترااابيهم ... واااخااااا يااااالمعععكس واخا .. دابا تجي ....زيد ابنتي زيدي . .. حياااااة راه ترابي فكرشك ديري عقلك تانتي تخلعو ليا كي الدجاج .. ياودي لي نعول عليهم
مشات رقية باريج تغسل ليها وجهها توكض و حياة بالخلعة دالغوتة داريج وديونس على اياد قلبهااا بقا يضررررب بجهد تاحسات بكرشها تشنجات عليها وناضت حداها لامار واسد غرس يدو بين راسو وجود زي الاطرش فالزفة ! .... ولوؤي كلس كداه
لوؤي : اش وقع !
جود : وانا عرفت ! .... كااالس تاناضت الحرب ! ...
لوؤي : ( تنهد ) اااودي الله يعطينا زهرك .....
جود : دابا شواقع
لوؤي : كتسولني انا .....نتا لي كنت جالس ....
مروان جر لامار لواحد الجنب
مروان : واش دابزو ولا اش واقع !
لامار : جات بيلي وكانت مخلوعة مسكينة وكتشوف لاياد ماداهاش فيها ... ماقراش عليها تاسلام كنا ضاحكين عادي نبدلو ليهم الجو فرحانين بالنجاح ديالها .. تاشداتها البكية ومشات بيها قسم واريج تعصبات على ولدها وغوتات عليه
مروان : وااااايلي !!!! وجود كااايسمع
لامار : ماااافهم والو تاهو .. ففففف والله تاا ملييينا بالله .. شحاااال مقسح راسو
مروان : هضرت مع بيلي مكتسمعش ، قتليها تشوف كيفاش غير بيناتهم يهضرو بجوج يفكو اومورهم ماشي هاكا قدام كلشي .... عمي احمد تخلع مسكين ...
خلاها مشا لعندو .. ورقية غسلات لاريج وجهها وجنان جات عطاتها دواها و تهدنات شوية
رقية: ( كتمشط ليها شعرها بيديها ) وهاانتي ابنتي خويتك دابا وهي جات ... وتشوفك فهاد الحالة و ليلة العيد والعواشر هادو .. وديرو عا بوجه الكلييسة وخليوهم بيناتهم .. هوووما بيضاااوة وها الفاس ها الهرااااوة ...
اريج : غايحمقووني اماما غايحمقووووني .. راااه عندي كبدة ماشي حجرة عرفتي شنو هي ولادك يتفرقو حداك؟؟؟؟
رقية : مااايتفرقو وااالوووو .. غا عقل الصغر دابا يتصاالحو وتجيبها نت فصحيحتك ...
يلاه كيهضرو هو يدخل زياد
زياد : الوالدة ( كلس حداها،) شوية
اريج : شوية ولدي شوية ، متخلعوش غير تعصبت شوية
زياد : بالله الا خاصك العقل ... شتي غير اياد وبيلي ؟ انا غسلت عليهم يدي والله مابقى هادشي ديالهم كيعصبني ، ربع سنين دالاعصااااب ربع سنين وحنا نرررغبو ونقادو و نتدابزو ونديرو الخاطر ... صاااافي بييييناتهم .....انا مليت موضوعهم بالرب ....
اريج : بقاااااات فيا مسكيييينة ... جايا فرحانة بنجاحها ( كتبكي )
زياد : كلشي هادشي غيفوت ومتلقايش صحتك ..... ردي لبال
رقية : ويالاه ابتتي سمعي لولدك واخا ماااافهمتو اش قاااال ..... وايلاه نوضي ونعلي شيطان ها ختك جاية ونبدلو ساعة باخرى ابنتي المشاكيل راه طلعو لينا فراسنا وهاد الجيل هذا لاتبعتيه اللقمة ماتهبطش ليك ... هداك خصو غا واحد جوج تقريصااااات وتشوفو واش مغنروضيهش بالدحش لاخوررر ... زيدو يلاااه تا بااااك خلعتيه شكوى لله .....
اريج : وااايه بابا مسكين وحيااة ... ماحسيتش براسي كاع
جارها زياد من جنب ورقية من جنب وجنان نوراهم هازة دواها خارجين للجردة ....ورجعات جلسات ..... حياة حتى هي كانت تهدنات شوية واسد و سفيان عاااقدينهم ومباغيينش يدخلو .. اما يونس شاعل البولة الحمرا ، وهي مشات عند باها كتحاول تتبسم و لامار ومروان قربو عندها كيسولو عليها وقدس تاهي جلسات حداها .....
رقية : اسمعوني نقولكم كلام المعقول ... هادي غاااااا العيين دعباد الله .... والله ماعاااادا العييين ضلو بداك تيليفوونات صور هذا صوور هاذاااااك وناس كيعينو فييييكم ... داااك صويبيصصصصة داك الجرانة غاا يلاااه نجحااات حطاتها فداك الساااااطور ولا اش يسميو باباه ... داك غااانتسطا الغراام .. نيت هو لي سطااااهم وخرج عليهم .... لوحو علييييكم التيليفووونات راه عينين الناس مافيهم ربح العواشر هااادو .....
مروان : هههه هنينا الوالدة ...
سفيان : لا عساااك عطيهم الحاجة ضسرو
رقية : الله يقلل حيااااهم مااايعرفو عييد مااايعرفو عوااااشر ماايعرفو واليديييين
جود : واخا ..... دابا شواقع ! نقدر نفهم ؟ انا عارف عندي ديسك محروق ..... شي حد يعاودلي اش تحرق فيه !!! ... اياد و ... ( لقدس ) شنو سميتها تنسات ليا
قدس : ( باسف واريج هبطات راسها ) بيلي اخويا بيلي ...
جود : اياد وبيلي ... علاقتهم ماشي تالهيه !
رقية : نتا غاااااا سكت ... سكت نتا كي داك الجرو لي يرون الفصة مع النخال للدجاج برجليه ... هاو ملي يمرضو ويدبحوهم .... ياكل فيهم الزردة ..... تاكل فيها العطباااااااار
عند بيلي وقسم ...
كالسة على واحد الرولاكس شادة راسها عندها وقسم واقفة عليها
قسم : وصاافي طيبتي داك العينين .... يلاه نطلعو لدار غسلي وجهك نعاود ليك مكياجك ونزلو .. صافي متعصبوش واليديكم كتر من هاكا, ديري بحالا تاحاجة ماكانت .... يلاه راه غيتخلعو ....
بيلسان علات عينيها لفوق لي ولاو حووومر بدموع
بيلسان : انا .... انا بغيت غير نعرف علاش تقلبات حياتي هاكا !!!!!!!
قسم : ( مشات كلسات حداها ) وهاكا الدنيا ابيلي .. دوام الحال من المحال .... وحتى هادشي مغايدومش ....
بيلسان : ( ضورات راسها شافت فيها ) انا راه مكنبكيش حيت ناسيني .... انا راه كنبكي حييييت انا مقادراش ننسى ...
قسم : كلشي غادي تجبرو لياااام ..... تيقي بيا .....( بملامح اسف كدوز يديها على شعرها ) سمعي ليا ابيلي عافاك ، يلاه ندخلو لدار غسلي وجهك و نمشيو ... نتي وسط عائلتك دابا غااانساو كلشي ونعيشو صفحة جديدة ....
بيلي خدات نفس عميق تنغمات هاد الجملة " صفحة جديدة " لي عيات تقنع راسها بيها .. وتقلب الصفحة وتبدا صفحة جديدة كتلقى راسها باقا فنفس العنوان !! .......
ورجعات شافت فيها بعد ماتحكمات فدموعها لي مزال مانزلو حبساتهم .. ولي نزلو مسحاتهم
بيلسان : سيري بعدا نت باش ميحسو بشي حاجة ... انا غندخل نغسل وجهي ونلحق عليك ... صافي ماوقع والو ... ( كتنش على راسها ) متخافيش .. ماضعيفاش لهاد الدرجة
قسم : ( بابتسامة ) وهااااادي هي بيلي لي كنعرف .. غسلي وجهك وجينا ضاحكة .. راه توحشنا ضحتك .....
بيلي تبسمات بزز وحركات ليها راسها بآه وقسم مشات باتجاه العائلة غير كلسات شافت عندها اريج
اريك : فين بيلي !
قسم : نسات تيليفونها لفوق .. غتجيبو وتجي .. ( كمشات عينيها ) خالتو !! مالكي ....
اريج : لا وااالو .. اياد ماشتيهش !
قسم : لا .....( شافت لبلاصتو ) ناااض !!!!
سفيان : ااحم .... بدلو علينا هاد الموضوع.... صونيو على عدنان فين وصل ....
لوؤي : وصلو قبيلة .... راهم غيكونو دابا جايين لهنا اعمي ...
سفيان : داك المتحف فين وصل !
لوؤي : باقي شي حوايج نكملهم مور العيد ... تماااااارة فيه ، حتى كنقول صافي كلشي غادي مزيان وبقاو حوايج قلال ... كنلقى عراااام .....
تقلب المود فالطابلة و تقلب الموضووووع .. وقدس جلسات حدا قسم كتعاود ليها اش جرا و لامار معنقة دراع اسد ناعسة عليه طالع ليها الخز وهو كثر منها وكيحاول مايبينش .. ورقية بالها غير مع احمد وسلطان متكية عليه حياة كايمشط شعرها ....ومروان واقف كيسيفط ميساجات لبيلي .. اية فكرسيها حادرة عينيها على تيلفيونها وكل مرة طلعهم فوسيم لي ناعس على الكرسي القصبي وحاط راسو على رجلين رقية وشاد تيل ملهي مع العاب الفيديو كاااع ماراه فداك العالم ..... وفيصل كان فكرسي تحت الشجرة شاد تيليفونو وكل مرة يعلي عينيه فيها كيشوف النظرات لي مراقبة وسيم بيهم ....
اما جود مكاينش فداك العالم ، الكل حاسدو تما على داك الرخاء والهناء و السعادة اللي عايش فيهم .... ولوؤي كيهضر هو وسفيان ...
الجو هدا عندهم منغير اريج لي واخا ناعسة على يونس وكتبان هادئة الى ان عقلها باقي مشوش ويونس عاقد حجبابو تسعين درجة .......كايفمر واش ينوض يقتلو واش ينوض يجمعهم فشي قنت هو وياها ويشبعهم عصا ... معارفش كاع ميفاش يتصرف خصوصا اياد لي خرج ليه من سيطرتو بمرة ....
بيلي ناضت من تما بعد ما قسم مشات ... ودارت صبعانها فجياب سروالها وكتمشى كتجاول تلتاقط جرعة اكسيجين تخفف عليها هاد التنهيدات الشاحنين ....
كتتمشى وسااااهية .... الجردة كانت واااسعة ومضلمة فقط اضواء خافتين فالارض .. تتمشى حتى تعيا ومتكملهاش .....كانت هااااادئة وكلها سكوووون ....
حتى كتعلي عينيها ملي شمات ريحة المكان وريحة الخيول !!!! .... كتلقى رجليها امام الاسطبل .....
بقات كترمش بعينيها مدة طويلة .....
هذا ماشي مكان عادي بالنسبة ليها .
هدا هو كلشي !!!!!
المكان لي كانت كتهرب ليه وهي طفلة .....
المكان لي كانت كتكمي فيه وهي مراهقة ....
المكان لي كانت كتعيش فيه حبها وهي عاشقة ..
المكان لي شاهد على دموعها وفرحها وحزنها وضحكها ....على شقاوتها و بسالتها و ذنوبها و سلبياتها ومزاياها .....
لاحت الخطوة بشوية وبتردد وهي كتفكر انه هنا كانت اللعنة .....
هنا كانت النهاية ..
هنا بالضبط هي خسرات خووها ....
فاكثر مكان كتحبو !!! ....
قلبها انشرح هي كتشم ريحة الخيول ... ريحة الماضي والذكريات .....الذكريات لي كتمرجح بين الزوين والخايب ...
دفعات البيبان القصااار ودخلات بششوية لايحة خطواتها فالضلمة دهاداك المكان .....
خاوي .. فارغ ! الخيول نعسو !! .... الهدوووووء ......
حتى كسر الهدوء بزاااااف دالاصواااات بداو يتسمعو ليها مندفعيين بقسوة على مسامعها .....
بيلسان : ههههههههه طلق اجود حماقيتي هههه غايشوفنا شي حد
جود : ششششش ... رصااااي
بيلسان : هههه طططلق .... قوليا بعدا شنوو المفاجئة ها !!!!! شنو موجد ليا ؟؟؟ دغيا ماقداش نصبر ....
جود : و واااقفي ونقوليك .... هاربة مني غناكلك .. تي وقفي .... راه غانشدك مكاين لي يفكك مني .....
بيلسان : لا هضر من تما .... كنعرف بسالتك
جود : ( جبد قدامو سوارت مذهبين ) اجي خوديهم
بيلسان : طموووووبيل !!!!!!! ( حلات فمها ) ححححلف بالله ..... ديااالي !!!!!!
جود : ديالك .. ولكن غتبقى مخبية حتى ديري تمنطاش ... ملي ديري بيرمي ديالك .... خوديها
بيلسان : اودددي !!!! بورش !!!! جاغوار ؟؟؟؟ .... قووليا
جود : جوپيل .....
بيلسان : جوپيييل !!!! ماركة هادي !!!! ماعرفتهاش .. .
جود : اوووول طموبيل .... غنرررسم .. وغنيهكل ... وغاااانوجد ..... بغيتها تكون ليك ...
بيلسان : ( حلات فمها وشدات عليه ) جوووووود .. وااااش نتا صممتيها على قبلي ؟؟؟؟؟؟ .... ( زادت حلات فمها كتر ) واش هادي هي داك الخردة لي لقينا فلافيراي انا ويااااك ؟؟؟؟؟ ( جود كيحرك ليها راسو بآه ) نووووو ماامتييقاااش ... جووود غاااانطير بالفرحة
مشات كاتجري نقزات عليه عنقاااتوو
بيلسان : فررحانة فرحانة بزاااف لي انركب فيها . فرحاااانة نكون انا اول وحدة غاتصوك اول طمووبييييل صاوبيتيها ... فرررحااانة بزاف
جود جابها قدامو وبااسها بقوة و عطاها السوارت وهي شدات لكونطاكت بين يديها كان ذهبي منقوشة عليه JouPil عاد فهمات الى جمع حروفهم الاولى مع بعضهم تادمعو عينيها ... باش انه يختار امتزاج اسمهم فماركة من احلام حياتو .... كانت كبببببيرة بنسبة ليها ورجعات شافت فيه
بيلسان : كنبغبيييك بزاف اجود ....
جود : ( دار يديه موراه ) قداااااش
بيسان : ( بضحكة ) قد دنياااا
جود : ( معوج شفاهو ) اممممم
بيلسان : وووو ربي شاااهد عليا
جود : و وقتاااااش
بيلسان : منهاااار حلييييت عينيا ...
جود : وشنووو اناااا
بيلسان : قلبي وكككل مااافيا ....
جود جبدها عندو باسها تايعنكش فيها
جود : اجي الباسلة ديالي اجي ( دارتها تحت دراعو ونزل باسها ) ماشي حلوة بزاف !! غاطلعي ليا السكر هههه .....
بيلسان : هههه ( تسلتات من دراعو وعلات راسها فيه ) جوووود .... مغنبقاش اتا نتسنى تاااااندير بيرمي عاد نركبها ... ياك كتعرف تصوك ... يلاه انا وياك ركب معايا نحركها غير هنا فالمنطقة ... عاااافاااك .. ديني غير نشوفها بعدا
جود : مزال ماكملاتش كاملة... باقي شي حوايج ومزال مامتأكدش واش غاديماري .... ماجربتهاش
بيلسان: غاااااديماري .. نديماريوها بزز على والديها هههه .... ( رجعات عنقاتو ) نموووووت فييييك انا اوووولد الروووووكان ....
عودة
بيلي غمضات عينيها مزيرة عليهم ووجهها تاني رجع يقطر بالدمووووع ودوك الاصوات كتسمعهم مباغيينيش يعطيوها حتى لحظة فين تلقتط انفاسها
بيلسان : ( ناعسة على القش وجود حداها معنقها كايتفرجو فالنجوم ) جود .... كي كتشوف حياتك من هنا شي خمس سنين !!!!! ......
جود : خمس سنين كاع ! ..... معرفتش ... غنكون كملت قرايتي ... غتكوني درتي السن القانوني وفتيه كاع .... غانكونو تزوجنا ... ( حط يدو على كرشها ) وغتكون يمكن هاد الكريشة هازة ولدي ولا بنتي .....
بيلسان : ههههه ... زعما هادشي غيطرا !!!
جود : وغير الى مبغيتيش نتي ......
بيلسان : ( ضارت على جبنها كتشوف فيه ) مغاااتجيش شي وحدة حسن مني زعما !! وتبدلني بيها ... تكووون زوييييييينة و طرمتها كبيييرة كيف كتبغي نتا وصدرها كبيير
جود : ( كيشوف مع جنابو ) فيييين فيييين ... فين هي !!!!
بيلسان : ( ضرباتو لكتفو ) جوووود ...... ياااك !!!!
جود : هههههه ( باس يديها ) ياهاد النحلة شدي الاررض ... ( رجعها لجنبو ) ل* قحاب ابيلي بالعرارم ... ولكن القلب ... مااال لبنت العم ......
رجعات بذاكرتها كلها كتنخصص متكية على واحد الحيط وكتبكي وتمسح دموعها بكفوفها.... عينيها ذبلو ... وزرقتهم بهاتت ....
الذكريات مكيرحمووووش !!!
كيفرضو راسهم على دماغنا بزز منا ...
الهدوء زوين ! ولكن داير بحال داك الصبورة البيضاء الفارغة ..... بقد ما فراغها زووين بقد ما مغري انك تزركشو بالكتابة !!!!
كذالك الهدوء ... مغري للذكريات .....
اصواتهم كتصدح فينا لداخل بلا متاخد الاذن ....
بلا مترحمنا ولا تحس بينا .....
كتتنفس بزز وبصعوبة وجهها حمممر وشفايفها كايرعشو .... ضارت براسها بشوية وهي تشوف المهرة ديالها ... لي مدلية راسها على الباب القصير .....
هزات من جيبها لور تيليفونها وشعلات البيل ضربات فيها وهي تتبسم وسط دمووووعها ..... ومدات يديها المرتجفة كداعبها
بيلي : إيڤيييين ..... ( قربات باستها ) تووووحشتك ..... ( علات فيها راسها كتمشط ليها .. ) كككبرتي .... نتي متوحشتينيش هم ؟؟؟؟؟؟ حتى نتي نسيتيني آ إييڤين !! حتى نتي !!!! ...
حلات الباب عليها ودخلات وبدات دوز عليها يديها والمهرة كتحرك ذيلها وتتحرك .....
بيلي : عقلتي عليا ؟؟؟؟ .... ( عنقات رقبتها ) تانا تووووحشتك بزاف ... عارفة راسي غبرت عليك .. وغبرت على كلشي ... الضروف كانت قوى مني آ ايڤين .. .( كتمشط على شعرها لي مدلي لجنب ) طوال ليك شعرك ..... توحشتي نضفرو ليك ؟ .... توحشتي نخرجك ؟ توحشتي نجريو .. حتى انا توحشت .. توحشت كلشي ا ايفين ... توووحشتك وتوحشتو .... توحشت نركبو فوق ظهرك انا وياه ... ونجريو جنب البحر ... هو لي علمني نركبك ... وعلمني نشد لجامك .... علمني كيندير نحط رجلي فالسرج .... بلا مانقسحك و بلا منجرحك .... علمني منجرحكش ولكن هو جرحني ..... جرحني بزااااف آ ايفييين .... ( كتبكي وحاطة راسها على رقبتها ) عيت فيه .... ترجيتو ... ياك عاقلة .. عاقلة آ إيڤين ؟ ... عاقلة شحال بكيت ... شحال قتليه متمشيش ... عاقلة نهار قتليه انا ولا موناكو ؟ ..... عاقلة شحال بكيت وشحال ترجيتو ..... ( كتنخصص ) علاش دار فيا هادشي ا ايڤييييين ...... ( هبطات راسها كاتبكي مدة عاد كملات ) توووحشتوو .... توحشششت كلشي فيه ..... ( بالدموع وشفايف كيرجفو ) كنبغيه قد الدنيا ..... كنبغيه وربي شاااااهد عليا ..... كنبغيه منهار حليييت عينيا ....كنيغيييه ا ايفيييين ..... مقادراش ننساه .....
طاحت للارض كتبكي متيكة على الارض وراسها معلياه مع الحيييط والبيل دتيليفونها طاح ...
مسحات دموعها ورجعات علات عينيها كاتشوف لفوق مكملة هضرتها ويديها كايحركو فالقش لي تحتها ....
بيلسان : شاف فيا .... كاع ماعرفني ... جود كاع ما عرفني ؟ جود لي كان كيعرفني كتر مكيعرفوني بابا وماما .... مابقااااش كيعرفني آ ايفين ... ؟؟؟؟؟ .... نحماق ؟ نتسطا ! .. نموت ؟ .... اش ندير ؟؟؟؟ ...... ( كضور راسها بلا ) واش انا نعيش مع غيرو مزال ؟ .... انا مغنعيشش لا مع غيرو .. لا معاه ..... مكنبكيش ( كتمسح دموعها ) مكنبكيش حيت نساني ولا حيت باغاه يتفكرني ... انا مبغاهش يتفكرررني .... الى تفكرني ويرجع يهزني تاني ويعلقني بيييه ويصبح ناااسييني غيير بلااااش ..... انا حمدت الله اللي نساااني وحنا مامزوجنيش ... وحنا مواالديييينش ..... بغيييت واحد عمرني نكون معاه ا ايفييين ...... كاين صعب من هادشي ها ؟؟؟؟ .... بيلي علاش كتكمي ؟؟ بيلي علاش كتلعبي بالولاد .. بيلي علاش مديريش نيتك ... بيلي هاداك بغاك بنيتو علاش كذبتي عليه .. علاش ضحكتي عليه ... علاش مبغيتيش تزوجي بيه .. بيلي ولد فلان بغاك ولد فلان كايحماق عليك ... ولد فلان داير عليك المستحيل ...... بيلي علاش مباغاش تعيشي حياتك .. باركا من القصااير باركا من لالكووول باركا من البيييرااان ..... بيلي ديري عقلك ( كضرب بيديها فالارض ) اشمن عععقل ا ايفييين غندير اشمن عقل .. عقل واحد لي عندي دااااه .... داااه ا ايفييين ونسى حتى فييين دارو .... انا معارفاش حتى فين حط ليا عقلي ..... عقلي غيببقى معاه واخا هو عمرو غيكون معاياا .. وانا عمرني غنكون معاااااه ......
حطات راسها على الحيط كتشوف لفووووق وشفايفها كيترعدو وكلها كتنخصص ... جرح ربع سنين يلااااه قدرات تخوييييه ..... تاجات للاسطبل .. للبلاصة لي كتجمعهم واللي كتجمع اسرارهم .... البلاصة اللي فها كل اسرار اشبال الاسماعيلي .. البلاصة اللي كتحفظ اسرارهم ..... ولي كايقدرو انهم يبوحو ليها بكلشي...... بلا مايحشمو ولا يخافو ولا يتحرجو ... حيت هي البلاصة الوحيدة لي كتقبل على ضعفهم ....
بيلي : انا ماخسرتش غير عقلي مع جود .... خسرت خويا .. تعلقي على خويا ا ايفين ؟ ايااااد .... داك خويا لي كان ديما فجنبي ؟ داك لي كان كيقول ليا ... برااانسييس ..... تعقلي عليه ؟ تعقلي نهار كنت نطيح عليك شحال كان تخلع ؟ تعلقي شحال كان يتخلع الى غير تجرحت جرحة صغيرة وينوض القيامة ؟ فينو دابا ..... سيري جيبيه لي ا ايفين .... سيري قولي ليه ختك مجروحة ... وهاد المرة جرحتها كبيييييرة .. كبيرة بزاااااف .. مكتخيطش و مكتداواش ..... ختك محتاجاك ..... ختك خرجات من حربها خاسرة .... خرجات بوحدها .. بلا تاحد .... قوليليه ختك محتاجاك ا ايفيييين ..... خسرتو .. و خسرت كولشي .....
دارت يديها على وجهها كتبكي ببببجهد .....
خطاويه من موراها واقفين ..... واقفين جامدين ....
الكاط ديالو المارون .... مكانش كيبان فالضلام .. ولكن انفاسو المتسارعة كانوو واضحيييين !!!! ..... انفاسو و هو كيسمع بكا ختو ... وكلامها ....
بيلسان كتبكي هاكا ؟ .. بيلسان كتعرف تبكي ! .....
دفع الخطوة للامام .. مزال ماحطها سمع موراه تخرشيش جاي هو يدفع باب صغيرة دخل دغيا تخبع .....
تابداو دوك الخطوات كيقربو .. سبادرين كحلة داخلة وتابعاها ريحة جوان ....
الضو ديال التيليفون كيبان من يديه .. والدخان خارج من فمو .. غادي برجليه لنهاية الممر فين كيجلس .... تاسمع صوت البكا هو يوقف !!!!! ...
رجع جوج خطوات لور .. وركز بعينيه ..
منين جاي هاد البكا !!!!!!! .....
بدا راجع لور هو كيتأكد تا قرب من الصوت ...
كان فالمدخل د المهرة ايفين !
شكون كيبكي هنا بهاد الحرقة كاملة ؟؟؟؟
شهقاتها كانو مسموعين بشكل لي كيضر فالقلب !!!! ...
شكون لي فالعائلة مجروح هاكا ، اش واقع ؟ ...
بعدات ايڤين لجنب وهي تبان ليه طايحة على القش تتبكي .... الضو كان ضئيل .. هو يضرب فيها بتيليفونو ....
غير شافت الضو ضرب فيها علات عينيها وناضت دغيا مخطوفة كتنفض سروالها وتمسح دموعها وقلبها كيضرب بالجهد واش يكون سمعها ؟؟؟؟؟
كيطلعها و يهبطها وقال بتساؤل ....
بتساؤل لي كسر قلبها كتر ماهو مكسور ....
جود : نتِ لاباااس ؟؟؟؟؟ ....
بيلي مسحات دموعها ووسعات ضحكتها كلها متوترة حامدة الله انه ماسمعهاش .....
بيلي : لاااباااااس ... ( كتشوف لوجهو ) انا لاباااس ..... و ... والله حتى .... حتى لابااااس
جود : ( كيشوف فيها وكايسمع تنخصيصا ) متأكدة ؟ ...
بيلي كتحرك راسها بآه بزربة عاضة على شفايفها حابسة البكية والشهقة ......
حابسة بكيتها وحابسة حظنها مايتحلش قدامو وتمشي نجري تعنقو ... حابسة راسها ماتتخشاش فصدرو وتشم ريحتو ....
وهو قرب جوج خطوات ولكن رجعهم ! كايتسائل واش نتدخل ولا مامنحقيش ! عرف الى ان المشكل لي مبكيها غايكون بسبب خوها ..... شنو بالضبط معارفش ... ولكن لي عارف انه مشكل بين جوج خوت مامنحقوش يتدخل وخا بكاها ضرو فخاطرو وتراجع للوراء مكيعرفش كيفاش يتصرف مع شي حد كايبكي
جود : اآآآ .... موهيم ... واخا مكتعرفينيش ... راني ولد عمك ... الى حتاجيني ولا تهضري متحشميش ...
بيلي مع كلامو طلعات شهقة صاااامتة وشدات علل قلبها وهو عطا بظهرو وماشي لساحة الخيول الرملية لي فنهاية الممر ..حتى استوقفو صوتها
بيلي : كنعرفك ...... ( ضار عندها براسو ) انا راه كنعرفك ..... نتا لي مكتعرفنييش .....
جود بقى يرمش بعينيه وضور راسو ... اعدى حاحة عندو هي يبقى يذكرو شي حد انه ناسي واحد الفترة من حياتو .....
وما ليها براسو وزاد مشا ماعاطيش اهمية كبيرة للموضوع بكاها لان خصام الخوت غير لعب ! ... معطاش اهمية لدوك الدموع لانه مشافهمش ! ماحسش بيهم .. كان الضلااام ... عرفها كتبكي ولكن ماركزش فملامحها .... قلبو بااااارد ... مكاينش فداك العالم نهائيا ......
وهي رخات داك البمية بجهد ودارت يديها على فمها ماتغوووتش وهزات تيليفونها وخرجات كاتجري هاااربة من تما ومن دكريات الاسطبل ومن ااغريب لي كان معاها دابا شوية ....
هاربة حتى كتزدح فواحد الصدر !!!!!! .. وهي ترجع جوج خطوات للور وعلات فيه عينيها !!!
كتشوف فيه ووجهها فاازك وحمر .. عينيها ذبلااانيييين و ملامحها كلهم حزن وتعاسة .. كلهم ندم وحسرة .....
كيطلعها بكل ما فيه مزير على يديه وسنانو .... كيتفكر حديثها كولو لي داز ... والحرقة لي كتهضر بيها عليه ... باش فاللخر .. يقول ليها ، مكتعرفينيش ؟ باش فلللخر يخسر عليها جوج كلمات .... كلشي هادشي هازاه بوحدها ؟؟؟؟ بيلي لي كانو يخافو على الهوا يضرها ، هازة هادشي كامل ......كان كايضنها نسات وتجاوزات !
سمع شهقة منها اخرى وطلع راسو فيها
بيلي : ا اياد ..... خ .. خويا .....
اياد جمع النفس فصدرو تاتنفخ ليه وقلب راسي ضاير كان ماشي وهو يسمع صوتها لي استوقفو
بيلي : ( بشهقة بكاء ) ت توووحشتك ......( مدة كتلتاقط انفاسها وهو واقف ) توووحشتك بزاف آخويا ......
اياد بدا كيضور ببطئ لعندها وهي تطلق يديها بجوج
بيلي : هانا ..... هانا .... هانا كيف بغيتني نكون .... هانا خاااااسرة اخويا .... هانا بوووحدي ... ومعذبة .... معذبة بزااااااف ......
اياد غير كيشوف فيها وكيتفكر نهار قاليها هاد الكلام
بيلي : طلعت خاسرة .. خاسرة فحربكم بجوج .... انا لي بقيت بووحدي ..... ( قربات خطوة ) نتا .... نتا مكنتيش عارف تحذرني ا اياد ... نتا قلتي ليا غايفضل عليا بنات اخرين .... داكشي علاش متيقتكش حيت تايقة انه مكاااايناش بنت المراة لي غيفضلها عليا جود ...... ( قربات خطوة اخرى وطلقات شهقة ) علاش .... علاااش نتا مقلتيش غااايفضل عليا احلاامو ... غيفضل عليا موووناااكو ا اياد .... مافضلش عليا البنات ... فضل عليا الرااالي ..... كنت تقول ليا غايفضل عليك موناكو كنت نتيقك .... رالي واحد مشا محاني فيه وجا ! هز عينيه فيا وقاليا شكون نت ؟؟؟؟؟ شكووون انااا !!!!!! انا هي الخاااااااسرة .......
اياد نزل راسو كيتنفس بصعوبة وهو كيتفكر دوك ليام .... وهي كتبكي بالجهد وبحرقة كبيرة ! ختو الصغيرة المظلومة !!! ختو لي عينيها كانو كيعرفو غير الفرحة .. ختو البرانسيس ...... ختو لي زرقة عينيها كلها بهجة ... طفات بحال هاكا ...
كبرات طوالت .. ولات شابة ! شعرها طوال .... ملامحها كبرو ... ولكن مواتاهاش الحزن ....
سرط ريقو بصعووووبة فحلقو و علا راسو لفوق كيتنفس ...
بيلي : ( كتمسح دموعها ) س سمحليا ..... سمحيليا ماتحمكتش فراسي .....
جات ماشية من حداه بالزربة هربانة تاحسات بدراعها تشد وهي تحل عينيها بجهد ... يلاه تتسوعب انه شدها تاكتلقى راسها فحضنو ...... ضامها لصدرو بكل حنان .... بكل أمان .....
أمان الاخ ....... لي مكايزول ... مكايفنى .......
ترخات كااااملة فحضنو وشهقاتها تسمعو بجهد وهو حاضنها عندو ... زيرات عليه بيديها الصغار و البكية مخلطة بالفرحة اللي اخيرا قلب خوها حن .... حن فيها وفهم مشاعرها .... كيدوز يدو على شعرها بهدوء كيتسناها تتهدن ..... تابداو انفاسها يترتبو
اياد : مكنتش باغي هادشي يوقع ....كيفما كان الحال .... كنت غنفرح لو لقيتك فرحانة.... واخا تكوني معاه ..... ( بيلي شهقات وكمشات على حوايجو بقوة ) متمنيتش ليك العذاب من قلبي .... كاين شي حد يبغي يشوف ختو الصغيرة معذبة
بيلي : ( كتنخصص ) س ... سمح ليا .....
اياد : مغنسامحكش .... حيت كون رجع دابا الزمان لور كنت غاترجعي تختاريه عليا .... ودابا كون يتفكرك غتختاريه عليا ....
بيلي : مغيتفكرنيش ومباغياش يتفكرني .. مغنعاودش العذاب جوج دالمرات ....
اياد حيدها منو وجابها قدامو كيشوف فيها هي كتمسح دموعها
اياد : انا كاين ... انا خوك كيفما بغيتي تكوني وكيفما بغيت نكون .... قراب ولا بعاد .. كنبقى خوك لي منحملش نشوف البكا فعينيك ... الى كان هو نساك ... خوك عمرو ينساك ...
بيلي : ع ..... عارفة ... عااارفة ا اياد .... ( كضور راسها بالنفي ) متصورش شحال توحشتك ....
هزات عينيها تاني ومشات كتجري لحضنو عنقاتو وهو تنهد و زيرها عندو وهبط على راسها باسو .....
اياد : congratulations برينسيس ......
بيلي : ( ضحكات وسط الدموع فرحانة وراسها فصدرو وقالت بصوت متقطع بالشهقات دالبكا ) ب .. ب .. بغيت .. كااادوووو ....
اياد : هه !!
بيلي بعدات عليه كتمسح فوجهها ...وتستاعد طاقتها ، تعامل اياد معاها نساها كلشي وعطاها جرعة من الحياة ، على الاقل جيهة وحدة فيها الضو
بيلي : ( كتمسح دموعها ) لا .... ماشي كادو .. بزااف .. فاتوك ربعة ظيال ليزانيفيسيغ ديالي .. وربعة دالنجاحات ... يعني تمنية .. وداليوم تسعود .. والعاشر دالعيد ... عشششرة دالكادوات ....
اياد : عشرة كاع ! على هاد الحساب معنديش مصلحة فالصلح معاك .. نتخاصمو حسن !!! ....
بيلي : منستاااااهلش ؟!!! ...
اياد ضحك بجنب شفاااهو وجرها لعندو دارها تحت يديه ماشي بيها للجردة وقلبو محيد عليه نص الحمل ......
عند العائلة ....
يونس جالس مربع يديه وكيلعب برجليه بتوتر ... ولوؤي يلاه غيجبد تيليفون يصوني على بيلي تاسمعو حسهم وضارو كاملين حيت صوت ضحك بيلي واياد متيقوش فيه غير ودنيهم !!!! وعلى الشوفة لي دارو واضح انهم متيقوش تاعينيهم !!!!!
قسم علات حجبانها بجوج وقدس وسعات عينيها وسلطان غير كيرمش .... ارييج بدات توسع ضحكتها بفرحة و سفيان كيشوف عند اسد ولامارر شدات على فمها ....
اريج : ( وقفات ) بييييييلي .....
بيلي : ( معنقة دراع اياد ) مااايتوحش حد خوه ...
لوؤي : وااااايلي ....
بيلي : ( بفرحة كتشوف فيه ) مااااااي ديييير كااااازن ...
طلقات من اياد ومشات عندو عنقاتو وهو طبطب على ظهرها ووقف سلطان تاهو سلمااات عليه واريج كتشوف فلامار بفررررحة كبيييرة ...
فرحة الواليدين مكانتش ابدا قد فرحتهم .... يونس بحالا تخوا عليه سطل دالما وزياد تاهو مبسسسم ....
سلطان : مبروووك الالة النجاااح ...
لوؤي : الراطرابااااج تاهو نجاااح
بيلي : ومالو الراطراباج .... مالك مدمر الفرحة مالك .... حگار ....
اريج بالفرحة مشات عند اياد وبدات تجبد ليه فحناكو تاعلا حجبااااانو باستغراب
اريج : وووولدي ححبيبي نتا وووووعمري
اياد : ( كيشوف فلعائلة وفيها وهضر تحت سنانو ) موووم .. طططلقي ...
طلقاتو من حناكو وعنقاتو وهي تخطف بيان فيد جنااان من التزغرييييية درقية لي لحناتها مزياااااااان تزغرييييتة حاااااارة حتاكلهم سدو عينيهم واحمد كيضحك و اسد ساد عينيه بالغمزة امتى تسالي ولامار كتبان فرحتها ناااقصة !!!!! تمنات لو هاد العناق يكون داخل فيه تاجود ... وشافت عند اسد هو يومي ليها براسو بمعنى كولشي غايتقاد ، و تبسمات بانكساار وتنهدات ...
كلسو الجميع فرحانين بصلحهم واخا مبغاوش يعلقو عليه ولا يهضرو عليه كيتعاملو كانه عادي وعمرو كان شي خصااام اصلا وبحالا مفاهمين والو هوما غير باش مايحرجوهمش ، هادي هي عائلة الاسماعيلي كاتبغي تشوفك فرحان ولكن مكتدخلش بزاف فعضامك .. حيت كان الامر كيخصها غير هي وخوها مادخلوش فيه ....
بيلي كلسات حدا اياد اللي ماشابعاش منو ناعسة على صدرو معنقاه فرحانة وكتعاود ليه كاع الحوايج لي منعها الخصام تشاركهم معاه ..... واريج مامحيداش عليهم عينيها كيجيب ليها الله غير كتحلم ويونس عاد رخخف فيه النفس لي غيدوز العيد هااااني بحال جميع الناااس
جابت ليهم رجاء المشروبات تا تم جود جاي بعد ماسالا تكيافو غير جا كلس هو يكمش عينيه من المنظر لي كيشوف .. بيلي فحضن اياد معنقاه وتايضحكو ويهضرو عادي .. رجع رفع حاجبو وكلس حدا لوؤي
جود : ( غير بينو وبين لوؤي ) مشيت غير نتكيف !!!! ياكما شي ديسك تحرق تاني ولا اش واقع ! ياك هادو عاد كانو منوضينها ....
لوؤي : نتا راك براااسك ديسك محروق من راسك لرجليك .... تصالحو .. كيفاش علاش الله اعلم ... مشاو مضاربين ... جاو مصالحين .. هدا ماكان ....
جود علا حاجبو كيف كانت كتبكي فالاسبطل ! ودابا كيفاش فرحانة ؟ قمة التناقض .... كاع هدا هم كانت هازاه لاياد ! زعما كان مبكيها غير اياد ؟
البكا ديالها مكانش عادي ... كانت كتبكي بحرقة كانه شي حد مات ليها .....
رجع عوج شفايفو بعدم اكتراث .... وسلطان شادها شات مع اخر مودل سويدية تعرف عليها ...
اريج كتبان ضحكتها عريضة فوجهها وعاد بان فوجهها الحياة .... تاسمعو البيبان تحلو عرفوها طموبيل عدنان ....
بيلي : عمو عدنان هذا .... توحشتهم والله .....
ناضت مشات باتجاه الباركينغ كتجري ....
باركا عدنان ونزلات رتاج لي كانت بجليليبة تقليدية قصيييرة فايتة شوية الركابي وطالون عالي وراخية شعرها على راحتو .... وعدنان بالدجين كري و شوميز زرقاء ...
يلاه كيحل الكوفر يهزو الحوايج هو يسمع
بيلي : آآآننننكككككل .....
علا حجبانو تاكانت نقزات فحضنووو ورتاج وسعات ضحكتها وجات باتجاهههم ... وعدنان هزها لعندو تابقاو رجليها كيلعبو فالارض
عدنان : مااااي ليتل ووولف ( الذئبة الصغيرة )
بيلي : آي ميييسيووووو ...
عدنان : ( جابها قدامو ) مررررحبا بيك ....
رتاج : ( عنقاتها ملور كانت موراها ) خااالتووووو الغزاااالة ديالي زررررقة العيييينين تووووووحشت انا هاد الروييحة دالوووورد .....
ضارت بيلي بالزربة طارت فحضنها عنقاتها
بيلي : نااااري آ خالتو شحال توووحشتك ... ( عنقات تاعدنان ) تووووحشتكم بجوج والله
رتاج : مممم عليها غابرة ربع سنين ....
بيلي : كووووومااان .. هاني حيت دابااا
عدنان : ....congratulations ... عقوبة للتخرج ...
بيلي : امييييين ... وعندي ليكم خبااااررر زوين ... واحسن كاع
عنقاتهم دايرينها الوسط غادين بيها للجردة
رتاج : اهااااه سمعيييينا
بيلي : تصاااالحنا انا و اياااااد
رتاح : ( وقفات ) اووووماايااااكااااد
عدنان : لا صافي شرفتو .... ملي درتو عقلكم راه بديتو تشرفو
بيلي : ههههه .... جا عندي مسكين قبيلة كنت كنبكي .... وعنقني ....
رتاج : ياااا على خبار ( دارت يديها على قلبها ) وهااكاك ابنتي ديرو عقلكم ... غاتكون ارييج فرحات
بيلي : كوولشي فررررح ....
وصلو لعندهم وسلمو على الجميع .. كان الكل فرحان لي واضح صلح بيلي واياد خلا عليهم اثر كبيررر خصوصا انه كانو هازين همهم ورتاج كلسات حدا باباها لي سمعاتو مريض .... وانس و فيصل تجمعو حدا باباهم ....
الجماعة كانت جد دااااافئة ... وفجو مرح وحميمي .....
لامار كتشوف معاهم وفرحانة لي كولشي كاين وكولهم مجموعين خصوصا ملي جات رتاج وعدنان ....
كتشوف اسد ملهي مع وسيم لي كايوريه شي حوايج خاصين بيه فتيليفونو وقدس كتشوف معاهم ... وكتشوف فقسم لي هازة بيان وجنان حداها وزياد .... كتشوف فبيلي لي معنقة اياد وكايهضرو منغمسين فحديثهم ... فمروان لي كالس هو وسلطان ضاحكين .. وفلوؤي لي هو وجود فعالم اخر ... فآية لي كاضحك مع باباها وفيونس لي هاضر هو وعدنان مبتاسمين تاهوما واضح موضوع زوين جامعهم .. وفرتاج لي معنقة باباها واريج لي كتهضر مع رقية .....
حسات بالنفس كلها مطلوقة فيييها والدموع مجموعين فعينيها .....
احسن واجمل وقت بالنسبة ليها هي فاش كتشوف العائلة كلها مجموعة هاكا وفرحانة ... شحال هادي مشافت منظر اياد وبيلي هاكا ... وشحال هادي مشافت اسد هادئ هاكا ... شحال هادي مشافت القصر فهاد الهدوء ....
فرحانة فنفس الوقت قلبها مقبوووووط .... خايفة تجي شي حاجة تاني ترونهم .. شي حاجة تشطنهم ...وشي حاجة تكسر هدوء هاد القصر ...
رخات النفس بتنهيدة كتحاول تطرد هاد الافكار وتستمتع بليلة العيد وبهاد الجو الهادئ .... وهاد الجو الاسري الدافئ ... حتى حسات بيد اسد على كتفها يلاه علات فيه راسها لقاتو جبدها لعندو كان سالا مع وسيم وقدس وخلاهم بجوج فاش لاحظ نظراتها السارحين .... وحطات راسها على كتفو معنقها لعندو
اسد : مال مولات الشي !
لامار : هه !! ... اسد علاش كتعيط ليا مولات شي .. عمرني سولتك
اسد : علاش مااشي نتي مولات الشي
لامار : هه ! باقا مفهمتش
اسد : ( كيشوف فالعائلة قدامو والهاراج ) كون ماكنتيشي نت ... كان غيكون هادشي !
لامار : اسد يهديك الله .. قول كون مكانتش ماماك لي ولدات ليك هاد الخوت انا اش درت
اسد : نتي جمعتيني بيهم .....
لامار بقات ساكنة شحال مبتسمة ... وطلعات راسها فيه وهو هبط عينو عندها
لامار : اسد ... وليت مقادراش نعيش لحظات بحال هادو تاني .... وليت كنخاف ملي كنضحكو بزاف !!! والله!
اسد : لا بالعكس انا مرتاح ! ... ماشي حيت مغيوقعوش المشاكيل .... ( كيشوف فالعائلة قدامهم ) ولكن حيت عندي عائلة ... شادة الوتاد ديالها .... وركايزها صحاح .....
لامار : زعما آ اسد ! ....مغنتفرقوش ؟ ... ينقص واحد نحماق ...
اسد : كون كنا نتفرقو ... كان مشكل جود وبيلسان واياد اول مشكل يشتت لينا الشمل .... ماشي ساهل تفرقي عائلة دارت راسها براسها ..... حنا الامار متزاديناش ولقينا راسنا عائلة .... حنا لي بغينا هاد العائلة وحنا لي ختاريناها .. هنا كل واحد كيموت على التراب ديال لاخر ... كل واحد كيموت على دم الاخر ... يوقع لي وقع ... يتخاصمو يتقاتلو يضاربو يحقدو ... ولكن من بعد الحبل لي رابطهم للوتد غيرجعهم شوية بشوية ......
لامار : الجيل لي طالع صعيييب بزاف ا اسد .. ماشي بحالنا ... طايشين ومتهورييييين بزاااااف .... حنا ما كناش بحالهم .. حنا كنا كنتمناو العائلة وملي لقيناها درنا جهنا كامل نشدو فيها ونكبروها ... ولكن هادو مكيعرفوش هادشي .... كنخاف يفرطو فبعضياتهم ا اسد ....
اسد : مايمكنش تكون كنيتو الاسماعيلي ويفرط فدمو غير تنهاي ..... انا عارف شنو ربيت ....
لامار : جود و اياد ... حتى هما ولاد دم واحد ... شتي كيفاش ربع سنيين زهما مفرطين .... نقولو جود ناسي ... اياد هانتا كتشوفو مناسيش كاع .. ومغاينساش .... وحتى جود الى تفكر .. غيدير نفس رد فعل اياد والله لانسى ....
اسد : اه ... ومغايرجعوش ، وصعيب يتصالحو ، حيت تاحد فيهم مغايطيح الراس لااخر ... ولكن حطي واحد فيهم فالخطر .. وشوفي واش لاخر مايمشيش عندو كيجري .... راه قتليك يعياو يبعدو عندهم الحبل لي جارهم للوتد .... للوتد دالاسماعيلي .... ماعندي مندير بضحكهم الخاوي الى فالشدة مايلقاوش بعضياتهم ،انا باغيهم فالشدة يتقاتلو على بعضياتهم واخا يكونو مقاتلين مع بعضياتهم !
لامار : ههه ( زادت عنقاتو دراعو ) كنتمنى .... كانو عندي شحال هادي امااااني بزاااف صراحة ... وبفضلك نتا ( علات عينيها فيه ) حققتهم كاملين .... دابا ولات عندي امنية وحدة .... ان هاد العائلة متفرقش .... ونبقاو ديما مجموعيييين ... منقدرش نصبر الى كرسي واحد خوا .... مكاينش غير سعيد وشيماء لي مكيجيوش ديييما مع دالك حاسة بشي حاجة ناااقصة عاساك العائلة لي كانشوفها ديما .... نموت الى شي حد فيهم نقص ... باغياهم يبقاو ديما هاكا ضاحكين وكايبغيو بعضياتهم ...ويربيو ولادهم على نفس الشي .....
اسد تبسم ليها بحنان وزاد عنقها عندو تنهدو بجوج وباسها على جبهتها كايخلل خصلات سعرها بصبعانو وكيشوف فيهم حتى وقفات عليهم رجاء كتعلمهم ان العشاء واجد على السفرة ..... عاد ناضو باش كل واحد يشد الكرسي ديالو .....
كانت سفرة غنية بجميع اصناف الطعام وجميع افراد العائلة ....
المساعدات كيصبو ليهم فطباسلهم وهوما مناقشين كل واحد وموضوعو ... كان الهرااااج قوي وصوت الضحك ...
رغم انهم عائلة كتمشي بالبروتوكول الملكي وعائلة من اغنياء البلاد ... الا انهم ملي كيكونو مع بعضياتهم كيكونو عائلة شعبية بامتيار ...
مكيعرفو لا زواااق لا والو .. كيضحكو ويهضرو بكل ارياحية ... شعبييين لاقصى درجة وعزيز عليهم يدوزو وقيتة زوينة ويشدو فبعضياتهم بالطنز و التقشاب ... وتاهضرتهم خالية من التصنع كايهضرو كلهم بعفويتهم .....
بيلي صلحها مع اياد وعمامها لي كلهم فرحانين بها خلاوها تسنى شوية من الماضي ... وتنسى شوية جود لي قدامها بحال شي غريب ......كلسات بعيييدة عليه غير باش متشوفش فوجهو وتضعاف .. غير باش تقد تنسى شوية ... ولو غير هاد الليلة !! .....
كيتعشاو ورقية مزينة ليهم الجو بقوافيها وتعيابها كيضحكو تاكينزلو دموعهم وحياة شادة على كرشها بالضحك .... كيضحكو ويدعيو الله يخرج ضحكهم على خييير بقوة ما ولاو كيخافو .....
من غير اسد وعدنان واياد ومروان و فيصل لي ضحكهم خفيييف ومامسموعش صوتو .. تقريبا ضحكهم غير بالعينين ...
اما البقية كلهم نااااشطييين ....
رقية : عيالاااات تاخيررر زمااان ... حنا بحالكم هاكاك ليلة العييييد راحنا نوجدو البصلة والربيييييع وفطور العيييد ... وندخلو نطلو على الحوالا ... نتوما مازال مجبتوهم تالدار .... مشااا العييييد بحلاتو مع ناس زمان ويام زمان .. عندكم ولا غا تعاويد ...
اريج : هههه لواه اماما راه العيد لي مفروض علينا هو لاضحية تذبح .. داكشي لاخر راه عادات وتقاليييد كيمشيو ويجيو ... شكون هنا دابا غيوجد ليك داكشي يهديك الله ....
رقية : ياااااتي العيد لي مااايكونش فيه گديد عيد
لامار : دابا غير بالعقل اماما .. هاهوما كالسين حداك .... شتي نتحدااااك الى عرف واااحد فيهم شنو هو هاد الگديد والله حتى نصاااااوبو غذا ياللااااه
رقية : ( شافت فاياد ) تعرف نتا الكدييد
اريج : لا مشييييتي نيت عند لي غايعرفو ليك
اياد : وات !
رقية : الگدييييد ...
اياد : ااااه .. يااعني .... ( كايحاول يشرح بيديه ) فاش ، فاش يكون آآ ... هاداك فنفس الطول .. د هاداك آخر ....
سلطان : اهيا !!!
لوؤي : شنو هو هاداك ... ( ركلو سلطان نحت الطبلة)
اياد : هاداك آ صااحبي ... يعني ... سااامثينغ
سلطان : سامثينغ كتعني شي حاااجة .. ماشي هاداك .. قول شي حاجة
اياد : يااااا .... شي هاجة .. ك ... كاتجيب .. كاتجيب ل شي هاجة اخرى ...
سلطان : اش كاتجيب
قدس : بغيتي تقول كاتشبه ....
اياد : يا .....
رتاج : هنييونا بغا يقول گد گد ههههه
اياد : .. هاديك ... راني نعرف نعررف ....
رقية : يااااودي شعندك تعرف .. الكديد راه ماااكلة كايتنكل .. ماشي هي كد گد ( صغرات فيه عينيها ) نتا بعدا البوووو .. ولااا .. قااسح قلبو
بيلي : ( وحلات ليها الماكلة بالضحك ) هههههههههه
اريج : هههههه راه البو راه هههه هاداك قاسح قلبو ههههههه
رقية : آخيااار ... لا لا ملي تصالح مع خيّتو مسيكينة ماعليه كلام ... ونت لي كالسة ضحكي تعرفي الكديييد ، راني كنت نطيبو ليكم
بيلي : داك الوراق الخضرين لي فيهم الزيتون؟
رقية : هاااااويلي وطليتو خضر... لي طنت نطيب ليكم مع العدس ممكنتيش تحملي ريييحتو وتطجي ليا من الدار
بيلي : اااه داك الجلوووود ؟ ( كمشات ملامحها عيفانة ) عوووووك جددددة كنتعشاااووو .....
قدس : شنو هما هادو .... كيفاش الجلود ؟
بيلي : معرررت منين تيحيدوهم ... يمكن من وجه ديال الحولي ولا منعرف .. هوما طوااااال و كايزحتو
سلطان شاف فلوؤي هوما يحبسو داك الضحكة و جود غير كايضور فراسو ...
آية : رجيلاتو ؟
بيلي : نو هادوك سميتهم الكر لعيين
لوؤي ضحكة لي كان حابس طلقها وسلطان ولا حمممررر وسيم دفگ الما من فمو
قدس : اومايكااد ههههههههه
لامار : ( كضربها فضهرها ) سككتي
بيلي : علاش تاضحكو .... قلتها غالطة؟
مروان : حيدي غالاف واللام ويكون خير ههههههه
لوؤي : هههههه ماقراوكش فالبريمار ال القمرية و ال الشمسية هههه
رتاج : لوووؤي هنييينا
رقية : تي لاااااقي هضرررتك هاناري ،الكرعيييين الكرعيييين .....
بيلي : وهاكاك قللتها ....( شافت فقدس ) داير بحال جامبون ! ... فشكل داك العجب
رقية : العجب هما نتوما لي مغاربة عابسمية ( شافت فوسيم كايجيف ) شررب نتا الما ... تمووووووتو على تعواج الهضرة حرام يتزاكل معاكم الواحد ....... جيل وع وع .....
باقين فضحكهم حتى سمعو احمد كيكحب وكلهم سكتو وشافو لعندو .... ورقية كضرب ليه فقرفادتو
رقية : بسسسم الله عليييك بسم الله
رتاج : بابااااا خود تشرررب ( كتمد ليه الما )
يونس ناض عندو من الجيهة الاخرى شدو
يونس : عمي الحاج شرب الما بشوية عليييك ...
هز يونس سربيتة عطاها ليه واحمد شد عليها كيكحب فيها كحة نااااشفة كلشي راد ليه لبال وحتى لي كان كيمضغ حبس المضيغ مخلوع ...
كحب فالسربية و خيدها على فمو ، هو اسد يوسع عينيه فشنوو شاف !!!!! كان الدم فالسربيتة و يونس تاهو شدو ورتاج غوتات وناضت دغيا مخلية موراها كرسيها طايح ......
رتاج : باااباااااااااا
اريج قلبها تخطف و رتاج شداتو بزربة علات ليه راسو ويونس شاد ليه السربيتة
رتاج : بابااااااا .. بابا نتا بيييخير
احمد : ( كيرد النفس ) بيييخير بخيير ابنتي ماتخلعووش ....
اريج : دم ؟؟؟؟ هاداك دددم !!!!!
سفيان : ( توتر ) غ يكون .. غييير .... غير تجىحات ليه الحنجرة بالكحبة .... الحاج ؟؟؟
اسد ناض على الطبلة جبهتو تكمشات وناض دغيا باتجاه احمد جر الكرسي بعدو على الطبلة
اسد : الحاج بشوية عليك .. ( شاف عند جود ) سبقيني ديماري طموبيل ....
اريج : ( كتجري ) باباااااا .. ( كتشوف فاسد ) ف فين غتمشيو ...
اسد :لاكلينيييك
احمد : متشقيييوش راسكم اولادي انا بييييخييير
اسد : سي احمد نتا بيييخير متخافش .. حنا غير غنمشيو نطمنو على صحتك ونجيو ... ( علا عينيه فيونس بمعنى هادشي ماعجبنيش )
رتاج : ( هبطات شدات على رجليه ) بابا ... واش اول مرة تلوح الدم هاكا ( كتقيس على قلبو )
احمد : ( ماقادش يهضر بالدوخة ) اول مرة ....
رتاج : ( قلبها كيضرب بجهد ) علااااش ساكت ابابا علاااااش .....
بدا تاني كييييكحب بجججهد وهما قلبهم غيخرج معاه .. واياد هزوو فيديه ومشا بيه بزربة لطموبيل وكولشي تابعو
يونس : اريييج رجعي لهيه مغنمشييييوش كامليييين .... كلسي مع الحاجة باش ماكان غنرد عليك
اريج : ( عينيها تعمرو بدموع ) باباااا ايووووونسسس بااباااااا
يونس : عااااارف ، راكي مريضة مغانتعرموش تما كاملين .. راه غير غنشوفو اش عندو و نجيو ماتخلعييش ( شاف عند لامار ) هاهي معاك الاماررر شديييييها .. ( دوز يدو على راسها ) سيييري ...
مشا تبعهم ....
كللللهم مشااو من غير لامار ورقية وحياة واريج وجنان والبنااات ووسيم وولاد عدنان كيشوفو بعينيهم مخلوعين ولامار عنقات وسيم لي بان ليها كيرعد بالخلعة
لامار : متخافش احبيبي متخافش .. متخافوش كولشي غيكون بيخير ....
حياة : اريييج .. اجي آحبيبة جلسي اجي متخلعييييش راكي مرييضة تانتي .. ان شاء الله يجيبو معاهم خبار الخير ... مزيان لي داوه لكيلييينك
رقية غير جالسة دايرة يديها على قلبها وبيلي عينيها مصدومييين
لامار : بيييييلي ... وصافي مديروش هاكااا
بيلي : جججدي ...
رقية : اجججي ابنتي الحبيية اجي عندي .....
مشات بيلي عند رقية ... وضربو الطم تامن الهضرة توضرات ليهم كايتسمعو غير شهقات اريح و قسم وقدس جلسو حداها كايحاولو بهدنوها ....
العشاااا بقى كيفما هو على الطبلة ولامار شادة على قلبها لي ممهنيهاش . . كانت عارفة هادشي غيتقققلب ...
واريج رجليها كيترعدو وهوما كايهدنوها واخا كلهم مخلوعين .... حيت شوفتهم للدم لي كحب رونات ليهم كرشهم بالخلعة ....
اياد دار الحاج فطموبيل اسد لي كان ديماراها جود ونزل .... ركبو لور وركب حداه وركب حداههم تا يونس .. ولقدام ركب اسد وعدنان ... وسفيان صاك طموبيل اخرى راكب حداه سلطان لور زياد ورتاج لي كتعيط لكلينيك ، وطموبيل اخرى فيها جود و مروان ولوؤي ..
وصلو لكلينيك بثلاثة طموبيلات مصافين كانو كيتسناوهم لان رتاج علماتهم و نزلات كتجري ..كانو موجدين كرسي متحرك ابيض جلسوه عليه وهو كيحاول يهدنهم انه بيخييير واخا صوتو ولا مبحوح بالسعلة ودخلو بيهم وكلهم تابعينو كيف شي عصااابة كولشي مخلووووع .... رتاج دخلات معاهم لقاعة الفحص كتشرح ليهم و هما بقاو على برا كل واحد منين كيتنهد
يونس : شنو قال ليك طبيب لي جبتو ليه مؤخرا
اسد : كان كيقول كيحرقوه غير ركابيه .. داكشي علاش جا الاختصاصي فالعضام .... قال انه روماتيزم وخرج ليه دوا .... مكانش بغا يجي لكلينيك باش نشوفو اش كاين ....
يونس : يكون بسبب داك الدوا زعما !
سفيان : وي ممكن ..... حيت كان ديجا ضرو فالمعدة
اسد : ( كيضور راسو بلا ) منضنش ....
عدنان : راه هنا فين كانو كايتعصبو بناتو .. عياو فيه يدير تحاليل مكيبغيش .... دم راه ماشي طبيعي يخرج ليه بحال هاكاك .. شي مشكل تما !
بداو كيفحصو فيه لداخل هوما يخرجوه بالكرسي ورتاج عينيها منفوخين بالبكا لي حابسة جاراه وكلهم قربو عندها
رتاج : غندوزو لسكاانييير .. باش مكان نرد عليكم ...
وماو ليها براسهم ومشات طلعات بيه فالاسانسير قلبها كيضرب بالجهد حيت عينين الاطباء وهما كيشوفو لحالتو مكانتش كتبشر بالخييير ....
وحتى الدم لي شافت فالسربيتة ماشي علامة تخليها تتفائل ....
دخلوه يكملو فحوصاتهم و الرجال لتحت فالكافيتيريا مفرقين كل جماعة شادة طبلة خداو قهوة كيتسناو شي خبار..... طبلة فيها اسد وع
عنان وسفيان ويونس وطبلة فيها زياد واياد ومروان وطبلة دجود ولوؤي وسلطان
والعيالات فالدار تاهوما بحالا مقطوع ليهم الراس ....
فطبلة لوؤي وسلطان وجود لي شادين لي طاس دالقهوة وجود سارح تافرقع سلطان صبعانو حدا عينيه
سلطان : آفين مشيتي ....نخافوك غير ماتوليش .....
جود : انا هناا ... ( رشف من قهوتو وقاد جلستو ) قولو ليا ..... ( لوؤي شاف فسلطان كيخلعهم ملي كيدير هاد النظرات وهاد الجدية ) شنو المشكل لي بين هاد اياد وختو !...
سلطان شاف فلؤي ورجع شاف فقهوتو شرب منها وتنحنح
سلطان : مشااااكييل بيناتهم فين شفناهم حنا
جود : وميمكنش ... ظاهر ان العائلة كلها عارفة البلان !!
لوؤي : سي ، عارفين البلان راهم مكيهضروش ولكن شنو تما بالضبط نتا عارفنا مكندخلوش ...
جود : ( علا حجبانو ورشف من قهوتو) ممم .. شي حوايج مزال مادخلو ليا لدماغي . .. كيجيوني مكاملينش ... هاد خينا هدا قلتو انا وياه مدابزين والسبب لحد الان مزال ماقنعني .... وختو تاهي مضارب معاها .... وداك السطريس اللي كان فلامار ملي كان جاي هاد اياد وكتوصي فيا نسلم عليه مزيان .. هو نفسو لي كان فيها تاعلى ختو ! ..... جوج سميات كانت كتسطريسا ملي تجبدهم ليا .. هوما هاد الجوج ... تاداك البنت كاتشوف فيا فشكل ! ..... شي حااااجة تما ماهيااااش ونتوما راه عارفين وساكتين .....وانا ماواكلش التبن ...
سلطان : يهديك الله آولد العم !!! ... اش غيكون كاع
لوؤي : ( ربع يديه على الطبلة ) هاحنا نمشيو معاك على قد عقلك يالاه .... شنو فنضرك غيكون واقع
جود : ( شاف لجنب كيفكر ورجع شاف فيههم ) متكونش شي حاجة متعلقة بيا !!!! وناا معارفهاااش
سلطان : بحاللاااش
جود : ( بجدية كتر ) راه كون كنت عارف علاش غنحفي معاكم الحجرة آسلطان
لوؤي : جووود !!! امالك اصاحبي
جود : مااعرررفتش ..... كنحس بشي حاجة ماشي هي هاديك .. شي حاااجة نااقصة
لوؤي : الحاجة الوحيدة لي ناقصة هي ذاكرتك اصاحبي لي شدات داك الفترة ومحاتها ليك سينوغمال ... نعستي وهذا كالس هنا ( اشار لسلطان ) وفقتي من بعد لقيتيه واقف لهيه .. امتى ناض و وصل للبلاصة راك معارفش ... ولكن علاش ناض غايكون سبب تافه !!! ... هاكا وقع معاك دابا ....
سلطان : علاش كتمرض فراسك نتا دابا .. جوج خوت مخاصمين راهم تصااالحو ....
جود : لا ....ماعرفتش ... شي حاجة كبر .... صوت داك البنت كانعرفو ..
لوؤي : واراااها بنت عمك اصاااحبي وكتعرفها راه باينة غايتكون كاتعرف صوتها
جود : لاااا ....شي حااااجة اخرى ماعارفش نحددها ... ( شاف فيهم ) واش كانت قريبة ليا بزاف ؟
سلطان شاف لجنب كايهضم هاد السؤال لي شتتو ...و لوؤي عينيه حبسو فمنحى واحد ماعرفش كاع اش يقول ليه ..... هو تنهد
لوؤي : سي ، كانت عندك عزيزة
جود : يااك !!! علاش مجاتش لعندي ؟ علاش ماسلماتش عليا كيف سلمات على لخرين !!!!
سلطان : وراااك ناسيها اصاحبي علامن غاتسلم ...
جود : انا لي ناسيها ماشي هي ..... علاش آية نهار فقت جات عنقاتني واخا معاقلش عليها ! علاش هاد البنت تعاملات معايا بحال لغريب ! ... علاش كتسطريسا ملي كانشوف فيها !!!!
سلطان شتف عند لوؤي الهضرة تسرطات ليهم ..... وسكتو .....
وجود خدا تنهيدة كبيرة كيشوف فمنحى اخر وكيضور داك لطاس فيديه ، خصوصا مور صمت لوؤي وسلطان ..... وحتى فاش كايهضرو كايحس بلي كاع اش كيطبلو عليه مكيقنعووش ..... مكيشفيش فضولو بالكامل .. ومكيجاوبش على كاع اسئلتو ....
اسد كان جالس مع عدنان وسفيان ويونس وعقلو سااااارح ... تاشوية علا عينيه كأنه استقر على شي فكرة وناض وقف
عدنان : فين غادي
اسد : انا جاي ....
خلاهم ومشا جابد تيليفونو فيدو دخل واحد الرقم حتى جاوبو ....
اسد : اجي عندي لدروج ...
وقف فنهاية داك الدروج وتكا على واحد السارية مربع يديه ومعوج شفايفو لجنب كيفكر حتى وقف قدامو بطابليتو البيضاء كيحيد الكمامة
الدكتور : سلام وعليكم سي اسد...
اسد : كملتو السكانيبر
الدكتور : مزال شوية ...
اسد : التحاليل امتى !
الدكتور : غير يخرج من سكانير نحيدو ليه من دمو ... ونديرو جهدنا كامل تخرج النتيجة غدا واخا العييد ....
اسد : سمع دابا اش غانگوليك ... غاتاخد دمو ... وغتقول ليهم لابوراطوار مكاينش هاد السيمانة ديال العيد ... والنتيجة غتخرج تال منبعد العيد .... وديرو ليه تحاليل وسيفطو ليا فالايمايل ....
الدكتور : ولكن .. واش كاين شي مشكل !!
اسد : بلا داك تحاليل وبلا منكون طبيب بحالك المرض راه باين ادكتور اولا ؟؟ .....
الدكتور : حنا شاااكين طبعا ... بنسبة 95 فالمية كاع .... لون بشرتو ، صفورية لي فعينيه ... وزنو لي نقص ... شهيتو المسدودة كيف خبراتنا بنتو .... دي طاش حمرين فلوكوغ ديالو .... زائد على الدم لي كحب .... كلنا شاكيين و محاولين منخلعوش الدكتورة رتاج حنى نتأكدو ونحيدو داك 5 ف المية دالشك ...
اسد : مزيان .. هادشي لي بغيت حتى انا .... لاشيميو بنسبة لاج ديالو .... مناسب !
الدكتور : لا لا مستحييييل ... حتى لاكان الامر كيف شكينا ... راه غيكون فمراحل متقدمة مدام وصل بيه الامر انه يكحب الدم ..... وسرطان الدم كيف كنعرفو من الانواع الخطيرة و الصامتة لي مكتبان حتى كايفوت لفوت .....
اسد : ( حدر راسو وحك بصبعو فوق حاجبو بأسف ورجع شاف فيه ) ااسكانير غايبين مرضو !!!
الدكتور : لا ... ضروري تحاليل الكريات البيضاء والحمراء ....
اسد : فاش يخرجو التحاليل خليهم غير عندي .... مابغيتوش يعرف ، ..... غدا العيد بغيناه يدوز وقيتة زوينة مع ولادو وحفادو .... وحتى لوخرين مباغيهمش يعرفو حيت مغايعرفوش يخبيو خوفهم عليه ....
دكتور : ولكن راه من حقهم يعرفو اسي اسد
اسد : دوز بعدا واحد المدة ... عائلتي عاد كيف تجمعات ومباغيش الجو ديالهم يخسر .. وهادشي مزيان حتى ليه ...
دكتور : طبعا فكل الاحوال راه كنا غنعلموكم انه متقولوهاش ليه ويعيش ايامو الاخيرة مرتاح .... حيت مكاينش العلاج ....والى كان شكي فمحلو ... ايامو قصييرة والاعمار بيد الله .....
اسد : دونك راحنا مفاهمين ، حتى رتاج قنعوها ان لابوراطوار مغيخدمش فهاد سيمانة دالعيد ... منبعد انا نعرف كيفاش نهضر معاها ....
دكتور : داكوغ اسي اسد .. مايكون غير خاطرك ....
مشا الدكتور رجع لخدمتو واسد نزل فالدروج مشا باتجاه الكافيتيرا رجع شد الكرسي ديالو كيتسناو ..... حتى بانت ليهم رتاج جاية وكلهم ناضو لعندها ......
يونس : اش درتو ؟
رتاج : سالينا سكانير .... مكاين وااالو !!! .... كتبان الرية عندو مريضة شوية شاكين يمكن هي سبب النزيف ديال قبيلة .... ولكن التحاليل لي غيبيونو لينا كلشي .... راه خليتهم تياخدو ليه الدم
مروان : فوقاش غيخرجو التحاليل
رتاج : عيييت معاهم يسربيو قاليك هاد سيمانة مضغوطة بالعيد .. وبابا محتاج لتحاليل دفحص الدم .. وتحاليل دتكون الخلايا ... كيشكو يكون شي مشكل فالدم ، اللون ديال وجهو و الوزن ديالو لي تراجع خلعنا ...
اياد : يكون فقر الدم ! او شي نقص فشي فيتامين !
رتاج : كنتمنى .. ( جلسات كتنهد وجهها مخطوف ) عيطتو لدار ؟
سفيان : هضرت معاهم ....
رتاج : بابا شوية وغاينزلوه نمشيو ..... ماقديتش نبقى لفوق كانشوف فيه ... ( شدات على قلبها ) قلبي ضاارني
لوؤي : يهديك الله ا الواليدة دابا يصح .... كيف قال اياد غيكون غير فقر الدم
رتاج : فيه ديزيطاش حومر يلاه شفتهم دابا ملي دخل للسكانير .. هما لي خالعيني
لوؤي : عادي راه يمكن يكون نقص فالحديد ... ياك كانو ففيصل تاهو ملي نقص ليه الحديد
رتاج : ماعرفاش آلوؤي ... الامر ملي كيخص الواليدين صعيب علينا نخدمو عقلنا .....
عدنان : ياك دابا التحاليل غيبينو كولشي ... ان شاء الله يكون خبار الخير
رتاج : انا انبقى نتسنى فهاد التحابيل سيمانة دابا ... غادوز عليا كحلة ... ( طلعات عينيها فاسد ) متقدرش تهضر معاهم ... عارفة كلهم كونجي دالعيد ولكن ضروري لاهضرتي نتا غيخدمو ليك ...
اسد : جربت .... ماوافقوش حيت حطو ورقتهم دالكونجي ديجا .....
رتاج : نصيفطوهم لبرا حسن ؟
اسد : غاياخد الامر سيمانة ... يعني فكل الاحوال غاتصبري
رتاج نزلات راسها و اسد تنهد وجا كلس حداها
اسد : رتاج .. غتصيفطيهم لبرا ولا هنا .. لاميم غيّزيلطا غاتخرج ... عرفتيها ليوم ولا غدا ولا سيمانة الجاية كتبقى لاميم ... ليسونسيال فهادشي كامل دابا ... سواء فيه فقر الدم ... او شي مرض اخر كيفما بغا يكون ... خاصو يكون مرتاح .... من شحال وهو كيتسنى هاد العيد لي غيتجمعو كولشي حداه نتي عارفاه شحال كيعجبو هاد الجو ... دونك غنحاولو ما امكن نخليوه مستقر فنفسييتو اللي هي اهم حاجة .. سطريس ديالك متبينيهش.... وان شاء الله لي كاينة فالمكتاب هي لي غادي تكون .....
رتاج : ( طولات الشوفة وتنهدات ) عندك الحق ...
زياد : انا غنطلع نشوف واش سالاو .....
طلع زياد ورتاج غير كالسة ولوؤي حداها .... وعدنان جر اسد لبعيد
عدنان : اشمن لابوراطوار نتا لي مغيكونش هاد سيمانة ياك لابوراطوار ديالك فيه غاليهود ... تاهوما ولاو يعيدو ؟؟؟؟
اسد : اليهود هما حنا الى خلينا السيد مايعيدش هاني مع ولادو ويشوفهم ضاحكين .. سير قولهم جدكم غيموت وشوف كيف غيديرو حداااااه ....
عدنان : واااايلي آ اسد !!!!!!
يالاه كيهضرو هو يتدخل اياد لي تسلت منهم ...
اياد : عمي .... واقعة شي حاجة ياك !
اسد : اش واقع اولدي ؟؟؟
اساد : كيفاش هاد لابوراطوار غايسد سيمانة ... مكنعرفكش اعمي غتعطيك خاطرك تبقى سيمانة بلا خبار !!! كنعرفوك كدخل معاهم لابوراطوار كاع تقرا دوك تحاليل قبل منهم ... واقعة شي حاجة اعمي !
اسد : ( شد فكتفو ) مواقع والو اولدي .. القانون كيسري فالدول الاسلامية كاملة .. فالاعياد الدينية كيخادو الاطباء عطلة ... كيديرو التحاليل و لابوراطوار مفتوح ولكن لي غيقرا النتيجة و يحللها ويشخصها راه كونجي ... هدا مكان
اياد ضور عينيه بعدم اقتناع وعدنان شاف فيه بمعنى هاد الجيل مغديرهاش بيه .....
هما يبان ليهم زياد جار احمد فالكرسي جاي بيه كلهم حاولو يتبسمو ومشاو لعندو واحمد تاهو ضاااحك ليهم وكيهدنهم ويأكدلهم انه بيخييير ....
اسد وقف داير يديه فجيبو كيشوف كيفاش مجموعين عليه .... وكيفاش فرحانين بيه .... وكيفكر اش غيوقع تاني الى وقعات ليه شي حاجة وشكون يقدر يسخى بفراقو وهما من صغيرهم لكبيرهم كيناديوه بجدي !!!! .....
تاحس بشي حد وقف حداه داير يديه فجيبو
جود : دابا كيفاش آبا اسد قضية هاد لابوراطوار هدا لي غيسد سيمانة ..... ياك الحولي كيتسالا فتلتيام ! ......
اسد : هما كيدبحو جمل ....
جود : واااايلي !
بقاو ساكتين شحال كيشوفو فيه و جود شاف فاسد وواضح نظرتو عااااامرة حزن ...
جود : جدي غيموت ياك الواليد ....
اسد تنهد وشاف فيه بنظرة مبهمة وجود هبط عينيه بحالا فهمها ... ومشاو بجيهة الحاج مبتسمين ليه ...
∆فالقصر
اريج كاتمشي وتجي مزالين فالجردة ماقدوش يدخلو ... وهي تجي قسم لي كانت بعيدة كتهضر فتيليفون
قسم : هاهوما جاااين
لامار : آمضرا اش قالو ليك
قسم : دار سكانير والحمد الله مكاين والو ....
حيااة : الحمد الله يااااربي .. اوا شتووو هانتوما كنتو مخلوعين على والو
اريج : ( شادة على قلبها ) اهاه .... وعلاش داك الدم
قسم : غايكون بسبب المعدة غالبا ... ماعرفتش مكنفهمش فهادشي ولكن السكانير قاليك مزيان .....
بيلي غير ناعسة على كتف لامار وبالها مامهنيهاش وقدس كتداعب يد رقية كتحاول تهدنها ... واية حدا ماماها اما اريج واخا طمناتها قسم ماقاداش كاع تكلس حتى سمعو حس الطموبيلات وهي توقف بيلي و اريج مشات دغيا باتجاههم ...
نزل اسد ورتاج لي كانت راكبة لور حدا باباها نزلات كتعاونو ينزل شدو عليها لوؤي وهي جرها اسد بدراعو شوية بعيد ..
اسد : بلا متخلعيهم لداخل بالتحاليل لي كنتسناو .. قولي لهم كولشي مزيان
رتاج : داكشي نيت لي كنت غاندير اريج مريضة بلا والو تسخف لينا قبل منهم .... ان شاء الله مايكون والو ...
سمعو اريج تلاحت على باباها كتعنق فيه و بيلي كايشرح ليها باباها انه سكانير مزيان وكولشي موصيين مايهضروش على التحاليل ....
اريج شافت باباها مزيان عاد ضحكات ...
اريج : خلعتيييينا عليك اباباااا ....
الحاج : ماعندكم علاش تخلعوا اناااا بيخخيير .. شوية دالمرض وصافي الصحة مابقاتشاي ابنتي
اريج : الصحة ماعندناش تاحنا ابابا عاساك نتا . .
يونس : زيدو ندخلو يطلع يرتاح راه جوج ونص هادي ( جرو بالكرسي ) غدا يصبح اونفورم يسلخ لينا الحوالا هههه .....
جرو يونس لداخل تلاقاوه لامار والبقية كايحمدو الله فسلامتو ... ودخلو جميع للدار طلعوه لجناحو ... تجمعو عليه بحال العصابة و بيلي وسيم شادين فيه .. من اكثر الاشبال لي مربين عليه الكبدة بزاف لانه عايشين معاه وكايشوفوه صباح وعشية ... ورقية عند راسو ... واريج جرات رتاج لجناحها .. وسدات لباب
رتاج : اش كاااين
اريج : مااااتكدبيش عليا ... شنو عندو
رتاج : والله ماااعندو شي حاجة آ اريج راه سكانير ديالو سيري شوفيه علاش غانكدب عليك ... واش انا ماشي بنتو .... الحمد الله بيخير
اريج : وشنو سبب الدم ؟؟؟ كحب الدم ارتاج
رتاج : تانا ماعرفتش الحاجة لي خفت منها ماكايناش فالسكانير ... يصح شوية ونمشيو نديرو ليه تحاليل الدم ونحيدو الشك فمرة ....
اريج : ضرووري منهم ... تانطمنو نيشان
رتاج : متخافيش ( شدات على كتفها حتى دمعو عينيها ) بابا غااايكون بيييخير ان شاء الله ...
اريج عنقاتها تاتحلات لباب دخل يونس و رتاج بعدات كتمسح دموعها بطراف صبعانها ...يونس تلفوووه ماعرف كيف يدير يتعامل ولا اش يقول
يونس : اوا متعيقوش تاني باباكم بيخير ونتوما كتبكيو هنا .. يشوفكم هاكا تمرضوه بزز
رتاج : لا لا .. غ غير دموع كاينزلو وصافي .... على حنا شكون عندنا من غيرو فهاد دنيا
يونس : إهانة لينا هادي ادكتورة ههههه
رتاج : هههه ... تانتوما فوق راسنا .. ولكن الاب راه تايبقى اب
يونس : مواااافقك الرأي ... والله يطول فعمرو ويخليه ليكم .....
رتاج : اللهم آمين .. يلاه نخليك نسيت دوا دعدنان تلفت والله فاش شفت دم هاكاك ... تصبحو على خييييير .....
خرجات رتاج واريج ضارت عند يونس
اريج : بابا نعس
يونس : اه خليناه يرتاح معمرين عليه البيت مامخليينش تالاكسيجين يضور سرسربنا اسد مع الباب هههه .... ( جبدها عندو كايمسح دموعها ) متبكيش احبيبتي ... باباك غايكون بيخير ومزااال معانا ان شاء الله تايشوف ولاد اياد تاهو و يشوف بيلي عروسة كيف بغاها
اريج : ( بدات تبكي وتلاحت فحظنو ) ان شاااااء الله ياااااربي
يونس : وصااافي هنييينا .. غايصبحو عينيك منفوخين وغدا العيد زعما ... (جابها قدامو ) عنداك تباني حداه هاكااااا غدا .. تحسسوه مريض وهو ماعندو والو .....
اريج : ( كتمسح دموعها ) ألا ... متخافش .....
رتاج مشات للجناح لقات عدنان كايشرب دواه ...
رتاج : نسييتك احبيبي وللله
عدنان : ماشي مشكل ...
رتاج : لاخر شربتي منو نص حبة ياك ؟ اجي نعبر ليك
عدنان : ( جبدها عندو عنقها ) بلاش ....( كايشوف معاها ) نت لاباس ؟
رتاج : لااابااااس .. ( تجمعو فعينيها دموع عاضة على شفتها ) لابااس
عدنان : ( عنقها فصدرو وهي طلق داك البكية ) ششششش ... و لااا ارتاااج لا ...
رتاج : بابا مريييض اعدناان
عدنان : ياك مزال مابان والو ...
رتاج : غايخرجو التحاليل انا متأكدة انتصدم ....
عدنان : متسبقيش دابا الخبار الخااايب . ...( جابها قدامو ) باباك هانتي كاتشوفيه ضاحك مرتاح و فرحان .. ماتنكدوهاش عليه ...
رتاج : كنحاول اعدنان والله .....
عدنان : ( باسها مطول عاد فرق شفايفهم ) يالاه هي لادخلتي دابا خديتي واحد دوش رتاحي واجي نعسي حدايا ..
رتاج : داكشي لي اندييير ...
رقية صلات جوج ركعات .. سلمات وضارت كاتشوف فسرير وفمها باقي كايسبح ... بانليها نعس ووسيم حداه من واحد جيهة ناعس تاهو و بيلي من جيها الاخرى شابكة صبعانها مع صبعانو وفايقة كتفكر ..
دارت الدعاء وناضت على السجادة كتطويها
رقية : نوضي ابينتي لبلاصتك تنعسي ترتاحي .... جدك هاهو نعس
بيلي : ( شافت فيه وشافت فيها ) نعس مسكين ...
رفية : نوض ابنتي يلاه ( شدات فيديها ) تعطل الحال ....
ناضت بيلي وشافت عند وسيم ... يلاه غاتنطق وهي تتدق لباب شافت لشكون داخل غير شافتو قلبات دغيا عينيها بتوتر ...
جود : ( شاف فيه وهضر بهمس ) نعس !
رقية : ( بهمس ) نعس اولدي غير سيرو ترتاحووو
حود : الى فاق بلليل ولا عاود كحب الدم عيطي لينا .... هداك نعس هنا
رقية : وايه يالاه لقيتيني غانفيقو يمشي لبلاصتو ناعس معدب مسيكين ...
جود : مايفيقش ليك هاداك ...
رقية : اوا خليييه هنا يبات حدا جدو
جدو : لا يبات معدبو ....
تخطاها ومشا لعندو هزو فيديه وبيلي كاتشوف واخا وسيم ولا شاب باقي كايشوفو جود خوه الصغير وهازو فيديه وهو ناااعس وعضاات على شفايفها موحشاااه وموحشة حنيييتو ..... متبعاه بعينيها وهو خرج بخوه يديه لبيتو لي رجليه طواااال هو فحظن جود العريض بحال قط صغيورر
رقية : ( متبعة ليهم العين ) الله يرضي علييييكم ( شافت فبيلي لي متبعاه بعينيها وتنهدات ) الله يصاااااوب ياربي الله يصاوب ...
بيلي تنهدات و حنات راسها ومشات تاهي لبيتها ...
تفرقو وكل واحد قصد جناحو ....كان الخوف ممزوج بشوية الاطمئنان طاغي على الاجنحة وعلى نفسيتهم .. حط جود وسيم فالفراش لي نعاسو ثقل من راسو وبدا ينفض درعانو من ثقلوو كايقول امتى ثقال هدا قد هاكا ..
خلاه ومشا للجناح ديالو ديريكت عند روكسي حل عليه ... يضور فالجناح مايبقاش محبوس ودخل لدةش بروصا سنانو و خرج لبس شورط أليز ينعس فيه كايحس براسو مسخسخ بالخلعة .. لقا روكسي على السرير ومشا حداه معنقو عندو كايمشط على الفرو ديالو وكايفكر فالنظرة لي دار فيه باباه كلي سولو فلاكلينيك .... وكايفكر ان الحاج واضح كايعاني من شي مرض خطييير !!!! هو كايفهم عينين اسد كيما هو تايفهمهم ... عارفو مخبي شي حاجة ...
بدا يتنهد فلخر خشا راسو فروكسي وبداو يحاولو ينعس واخا معنكشو مكيرصاش كايخبط ليه فراسو .......
صـبـيـحـة الـعـيـد
صابح القصر كولو فايح بريحة البخور والمسك .....
كانت الساعة 6 ديال صباح ....
السفرة عليها فطور بلدي بامتياز ....وحتى الطاقم لي مقدم فيه الفطور بلدي بسرابت مطروزين .....
كانت الاضواء تشعلات فالاجنحة لفوق تقريبا فاقو غير العيالات يقادو راسهم للصلااة ..... اما اجنحة الاشبال كلها طافية ....
لامار قدام مرايتها بجلابة بلو سيال و فولار بلو حاطاه على كتافها تاتلبسو من بعد وشعرها مطلوق مغطي ظهرها .... وجهها غير مرطباه واخا صابح كيف البيضة من الكوماجات ديال البارح .... لبسات ساعتها وخاتمها ... وضارت عند اسد كاتفيقو ..
لامار : اسااااد ... اساد وانوض ... يلااه نفطرو باش نصليو ....
اسد حل فيها غير غمزة ضاربو داك العطر دالمسك العربي لي دايرة ... وتقلب على ضهرو طاوي دراعو تحت راسو كايحاول يتوكض وصدرو عريان شااااسع كايشوف فيها بعينين مكمشين بنعاس ....
اسد : ( بصوت مدعدع ) صبااح لاموور .....
لامار : ( معنكشة مع ساعتها لي مابغاتش تركب ) صبااح الخير احبيبي .... يلااااه نووض باقي كايستناك الدووش ...
اسد : ( كايتفوه ) شحال ساعة
لامار : ستة ونص ...
باقا معنكشة تاحساتو جبدها بجهد حتى طاحت عليه وغوتات بجهد
لامار : موووووضية موووضية عنداك تقيييسني موضية
اسد : على انا انا غير تنقيسك تايضيع الوضوء ولا كيفاش هه !!! شيطان انا هههه
لامار : بلا بسالات ديالك على صباح ... نووووض
اسد شد ليها يديها كايقاد ليها ساعتها .... وباس راسها
اسد : جيتي زوينة ..... شفتي شحال كايجي معاك البلدي ونتي لاسقة ليا فداك السراول
لامار : ولكل لبسة بلاصتها مانمشيش بجلابة لشركة ... ( جراتو من يدو ) نوووووض
اسد : جججري يلاه نشووف
لامار : نجر انا جبل .. فيييق ... حوايجك احبيبي راهم معلقين ... انا غاندوز عند ماما نشوف الحاج كيف صبح .....دوش ولبس ولحق عليا .....
لبسات صباطها وخرجات هازة تيليفونها ونضاراتها معلقين فعنقها بسلسلتهم الذهبية غير خرجات من الجناح تفكرات الخادمات لتحت خصهم يمشيو ... ونزلات فالدروج لقات رجاء يلاه غادا للسفرة
رجاء : صبااااح الخير مدام لامار عييييدك مبروك
لامار : الله يبارك فيك علينا وعليييك ارجااء ... تانتي بالصجة والهنا وتفرحي بولادك وتشوفيهم عرساان ان شاء الله ( طلات براسها على السفرة ) صافي الفطور واجد
رجاء : وي مدام لقيتيني اندير طلة نشوف واش ناقصة شي حاجة
لامار : صافي تقدرو تمشيو باش ماتعطلوش حتى نتوما على لي فامي ديالكم ...
رجاء : شكرا امادااام انا غانعلمهم .. قلنا نبقاو حتى تجي ليكيب دالعيد تحتاجو شي حاجة
لامار : لا لا راحنا هنا غير سيرو بلغو التهاني ديالنا لعائلاتكم وعيدكم مبروووووك ... نتشاوفو مور العيد
سلمات عليها مشات رجاء باش تعلم الخدم يمشيو ... ورجعات طلعات لامار للجناح عند ماماها لقاتها فايقة كتفطر احمد لي موالف يفطر بكري ولي فايق حسن من البارح لابس جلابية بيييضة مخططة باللصفر ... وطربوش بيض محطوط عند جنبو واخا وجهو كايبان صفر ولكن الضحيكة منوراه
لامار : تباااارك الله الوجه صابح منور الحااااج هههه ... عيييييدك مبرووووك
الحاج : علينا و عليك ابنتي باش كتمننااااو وبشي عزري اخور
لامار : الله اعمي الحاااج قداش قلتيها ههههه طلبو ليا حفيد واخا هههه ( سلمات على ماماها ) صااابحة مبكرة
رقية : تي الشمش طلعااااات وتوما باقين ناعسين امتى هاد الصلاة دالعيد امتى
لامار : الصلاة تالتمينة هاهوما قربو ينوضو
رقية : اوا هاهي سبعة علاين دابا اش بقى لييييها ... هونا نهار عاباش ينوضو ونهارتاين باش يتجمعو على داك الطبلة
لامار : وصافي هاهوما اينوضو راه وصيتهم لبارح يفيقو مع ستة ....
رقية : نمشيو لجامع ؟
لامار : وي كنا غانمشبو ولكن اسد قالينا نصليو غير هنا حيت بزااااف فين غانمشيو وحنا كي العصابة هههه انصليو فالمسجد لتحت وصافي بحال بحال .. مهم راه جماعة ...
رقية : ومااافيها باس ... تاهنا مزيان ... الصلاة راه صلاة فينما صليتيها توصل لسيدي ربي اىا غايكون القلب مخشع .....
لامار : داكشي لي كاين ... لبسي تانتي اماما ونزلي نفطرو .. بابا الحاج انا نسيفط ليك داباااا جود يعاونك تنزل
رقية : فيييييق ليها يا جووود مع ستة دصبح فيق ليها ...
لامار : غاااايفيق غايفيق هههه .... غا كتحگري ليا ولادي ....
خلاتها ومشات لجناحو .. غير حلات لباب بانليها الصقيل والضلام وهزات ريمود طلعات الريدوات وهي تضرب الشمس فوجهو من البلكونات بانليها مخشي فروووكسي
لامار : ياااااربي ياربي ..... قرااانو مخشيين فعيالاتهم هو مخشي ليا فكلب .. جوووود .. جود هادي هي ستة دصبح لي قتليك فيق عليها ....( كتحيد عليه واحد ليزار كحل مغطي نصو ) جوووود
جود ناض مخسر كيشوف فيها
لامار : لااماار ماماااك ليوما العيييييد احبيبي وقلت ليك الباارح فيق مع ستة .... ماشي وقتو دابا تنسى ( كاتجبدو من يدو ) دددخل دابا للدوووووش ولبس حوايجك ونزل لحق عليا تالتحت وتفكر شكون نتاا وشكون انا وفين حنا .... يلااااه نوض ....دااابااا اجوووود .. دغياا باش تهز جدك تنزلو للتحت راه فايق .....
ناض مخسر كايحك عينيه
جود :اجي ركبي ليا السرج اجي !!!!!! ....
لامار : دوز هز جدك باركا من التبركيم .....وداك الكلب تانقوووليك حييييدو من البيت مايدازش ليك هنا الصلاااة خلييييه برا واش باغي تحمقني .... تحححرك دغيا
جود : ( رجع تخشى فيه) بعدي منو ياك كنصلي لتحت ....
لامار : مامزيانش اولدي والله مامزيان ...
جود : ( مهلي فيها عينيه مخسر بنعاس كايتوكض ) ياك ! النمورا دقسم وناشيونال جيغرافي لي كانت عندها مكانوش حرام بان ليك غير روكسي مسكين ..... عنصرية نت الامار
لامار : وحنا نبقاو ديما فدار غفلون ... الله يسمح لينا .. قولها دابا دخلو لدار والله لااادخل .... يلاه تكعد دغيا نوض حوايجك راهم لهيه .... والله يا جود ياولدي وتهبط عندي بشي شورط ولا شي دجين تانعلقك بلاصة الحولي ....
خلاتو وخرجات وهو ضور راسو ورجع نعس مخشي فروكسي .....
يلاه غايرجع يغفا هو ينوض روكسي لي فيقاتو قبيلة لامار بدا يزطم على وجهو تاجرحوووو
جود : فففف رووووووكسااااي ( ضربو )
غي قاس بيدو لقا الدم هو يتنفض .. الوجه مشاااا .. وناض كايعتر فليزار وقف حدا المرايا لقاه جرحو فوق لحيتو تحت من عينيه
جود : فااااك .. عييييد زوين غايطلع معاك نتا ...
لقاه لاسق ليه فرجليه لور باغي يتعلى معاه ضربو ودخل للدوش كايبركم خاااسر فيه النعااس .....
لامار دازت لجناح قسم هي لي فيها الضو وكتفرحها لقاتها فايقة وقدام المراية كتوجد راسها بجلابة خضراء ملكية وسفيفتها فنفس اللون كانت مخزنية ... ولابسة معاه صباط عالي وشال فالاخضر فاتح حريري حطاتو على كتافها و شعرها معلياه للفوق كتركب حلقاتها ...
لامار : مشااااء الله على الكابيطين ديالي هههه غزاااااالة تبارك الله .... الله يحجبك ليا
قسم : على حنا منين جبنا الزين ... راه منك يا ست الكل ....
لامار : ههه عيدك مبروك احبيبتي ... ان شاء الله العيد الجاااااي نشوفك فداااااارك ...
قسم : ( ضارت للمراية كتضحك ) راني ديجا فداري اماما
لامار : داري هادي منين جااااتك دارك .... ( قلبات شفايفها ) غرررت انا من اريج عندها بنت ولدها وانا لا ...
قسم : هانتي قلتيها .. بيان جابها ليا ولدها ... سيري فيقي ولدك يجيب ليك بنيتة تاهو
لامار : على شكون لكبير شكون
قسم : حطيني حداه وشوفي شكون كايبان الكبير ....
لامار : فيه غاا الجثة باااقي صغييير حبيب ديالي
قسم : ( عوجات فيها راسها ) ياااااك !! انا لي شرررفت
لامار : كااامليين صغاااارين وكاملين كتحمقو ... دابا انا دعيت غير معاك شوفي فين وصلتيني ... ( لاحت ليها بوسة فالهوا ) متعطليش احبيبتي
قسم : هانا نازلة .... جدي كيصبح
لامار : صافا حسن من لبارح .... صابح منور ..... توضاي ونزلي
قسم : توضييييت انا جايا ....
دازت تاني لجناح قدس لقاتها غااااارقة فنعاسها عاد بدات تفيقها بسيف هازاها للدوووش وهي مكملة نعاسها فوق لاشاس ...
دازت للاجنحة دالاشبال لخرين ، وسييم و لوؤي وسلطان واياد واية وفيصل وانس ومروان دازت عليهم واحد واحد منغير زياد لي مع مراتو مقدراتش تدخل .... كولشي فيقاتهم حيت عارفة الى منوضاتش فيهم الرعد مايفيقوووش كلهم نايضين مخسرين خصوصا لؤي وسلطان لي منعسوش بكري بقاو سهرانين فالجردة لتحت .....مانزلات تاتأكدات انهم كولوووهم فيقاتهم ....
نزلات للتحت كانو الخادمات مشاااو ... كاتشوف السفرة لي كانت كيف بغاتها تكون تماما ... بدات كاتقاد الكيسان تاسمعات واحد الطالون نازل علات راسها بانت ليها رتاج ... تاهي بجلابة بيج و شال مارون الى كتافها وصباط مارون و هازة تيليفونها ....
رتاج : صباااح نووور ( سلمات عليها ) عيييييدك مبروك ..... الله يدخلو علينا بشي عرايسات يحمرو الوجه هههههه
لامار : ههههه امييييين يااااربي ....
∆جناح حياة وسفيان
حياة لبسات جليليبة غوز بيبي وجمعات شعرها لفوق ولاحت شالها عليها وخرجات من الدريسينغ باتجاه سفيان تشوفو واش لبس وهي تلقاه باقي ما تكعد تا من الفراش ناعس على كرشو ويديه مشندرين وظهرو عريااان جاها سااهل للخبيط
حياة : سفيااااان هادي هي هانا نااايض ... لبست ووجدت ونتا بااقي ناعس ... نووووض .. اويلي اش خليتو لولادكم
سفيان : ( ضربها بمخدة ) ممممممم
حياة : نووووض .... سفيااان ....
شافتو والو ماسمعش ليها وهي تجمع نفسها وشدات على كرشها وغوتات
حياة : سفيااااان سفيااااان نوووض دغياااا نووووض ككككرشي كرررشي
سفيان ناض مفجوووع دغيا كيقلب عليها براسو لقاها واقفة فجنب السرير وناض كتيعتر فرجليه
سفيان : حياااااة .. ماالكي ؟؟؟ اش كااااااين ..
حياة غير شافتو وقف علات حاجبها وابتسمات وبعدات منو
حياة : زعما تنوض بحال الناس ميمكنش ضروري نخلعك ...
سفيان تبعها بعينيه وهز مخدة زف عليها
سفيان : برررررب تعاااالى مكككتحشمي .....
خلاها ودخل للدوش وهي بدات كضحك ومشات لبيت آية لقات المساعدة ديالها يلاه خرجاتها من الدوش لابسة بينوار صفر و القب ديالو فيه ودينات الارنب ... حنيكاتها حميمرين وشعرها على كتافها طايح فااازك ...
حياة : صباااااح الخير ..... صافي اختي تقدري تمشي انا نكمل معاها ....
داك المساعدة تبسمات وهزات تاهي صاكها مشات وحياة جراتها للسرير كانو حوايجها واجدين على الكرسي
حياة : صبااااح الجماااال على هاد الزين ديالي انا ( جلسات حداها على الناموسية واية مقابلة معاها على الكرسي ديالها ) شكوون ولد هاد الزييين همممم
اية : ههههه مامااا ...
حياة : ( هزات لي سوتيان ديالها ) اااجي قربي عندي
اية : نلبس بوحدي ....
حيدات بينوارها وحياة معاوناها وبدات كتلبس وحياة كتوجد حوايجها وتعطيها
حياة : آياتي .. قوليلي ابنتي ... شنو تبغي يكون عندي .. بنيتة ولا وليد
اية : بنيييييتة .. حيت صافي عندي خويا وكاعما عندي ختي ...
حياة : وتاهو غيقوليك عندو ختو وماعندوش خوه هههه ...( عاوناتها تلبس الكيلوط ) قولي لياااا
اية : هممم
حياة : الى زعما .... فكرت ... مانربيش انا هادشي اللي فكرشي .... تقبلي نتي وخوك ؟
اية : ( كتشوف فيها ) مافهمتش
حياة : مثثثلا ... زعما انا عندي نتي .. وعندي خوك ... عندي وليد وبنيتة كاع اش كتمنى المراة وكبرتكم صافي .. خوك هانتي كتشوفيه راجل بقى غا يجيب ليا عروسة ويردني جدة ... يعني كبرت انا على انني نشري ليكوش والحليب فهمتي ...
اية : علاااش ؟؟؟؟ اش فيها .. فين كبرتي ونت شعرك باقي كحل !!!!
حياة : ( كتعاونها تلبس بودي بيض ) لي قصدت .... هو خالتك شيماء مسكينة هانتي شفتيها مازال ماسهل الله .... قلت يمكن ..... ملي نولد الى وافق باباك ونتوما . نعطيها تربيه .... اش باليك
اية : ( كتقاد البودي على يديها ) ماما واش طحتي على راسك ؟ هذا راه خونا ولا ختنا ... ولد الاسماعيلي خاصو يكبر حدانا .....
حياة : على مالي انا غنكرو .. طبعا غيكون ولدي ولا بنتي وخوكم و كنيتو الاسماعيلي .. ولكن لي اتربيه شيماء ماشي انا
اية : لا .. انا بعدا مقابلااااش .. خالتو شيماء راه تجيها ساهل انها تربي من الخيرية على تربي واحد ماماه كاينة غير حداه وباباه وخوتو .. يعيا يكبر غيبغي يرجع لينا اماما راكي غير كتخربقي اون پليس دو صا بابا والله مايبغي و سلطان تاهو ... كيفاش جاتك هاد الفكرة حماقيتي
حياة : ماعرفتش ( كتلبسها كولون ) انا غير قلت ...
اية : خالتي بحد ذاتها مغاتبغيييش .... وعمو اسبرو تاهو مغيبغيييش ... كون كان مكاينينش واليديه واخا .. كيفاش غايربيو ولد الاسماعيلي والى كبر واقاليك علاش عطيتيني ... ماما ... حنا باغين هاد الولد ولا هاد البنت .... انا باغا تكون عندي ختي ولا خويا اخر ... وخالتو شيماء نتمناو ليها يكون من رحمها ....
حياة تنهدات وناضت حيدات جلابتها من العلاقة ...
حياة : فهمت احبيبتي فهمت .... فخبارك مزال لدابا ماقدرتش نقولها ليها
اية : غتقولها ليها جدة ...
حياة : لا وصيتها متقولهاش ليها ( بدات كتحاول تلبسها ) عاونيني ابنتي وحطي يديك فوق كتافي منقدش نهز تقلك باش نلبسك جلابتك يلاااه بشوية عليك ...
لبساتها جليليبة حمراء مطرزة بالوان مختلفة و ستيلها ديال لاج ديالها يلاه كتقادها تحلات لباب كان سلطان داخل عينيه باقين منفوخين بالنعاس وشعرو مربل لابس فوقية گرونة نصها مخشي مع شورط كحل و صندالة دنايك هاز تيليفونو فيديه وكيمشط شعرو بصبعانو للجنب ...
سلطان : برااانسيس ... (شاف فماماه ) ولكويييين هنا .....
حياة : جابك الله .. هزها احبيبي نقاد ليها جلابة غتكمش ليها
سلطان : هانا تااااني على التفركيسة هاناا تاني ( هزها عندو وباس راسها ) الزبييين ديالي اناااا لي كالس يتفشش علينا ماباغيش يتمشى باش نبقاو نهزووووه
اية : ( عنقاتو ) جات معاك الفوقية هههه
سلطان : ( قادات ليها وحطها ) تي راه خوووك هو اللي جا معاها .... ( شاف فمو ) افيين آلكويييين ... متشوفيلناش سي عروسة ماحدنا لابسين البلدي ...
حياة : على نتوما الجيل ددابا غترضاو بذوقنا ( وقفات كتشوف معاه ) تييييتييييز دماماه ههههه
سلطان : عيني منفوخين بزاف ( كيحل فيها عينيه )
حياة : وااااايييه شكون قال ليك تسهر وحنا فايقين بكري ... اجي نديرلك واحد الكريم اجي
سلطان : آرريييحي شمن كريم .. الحووووب اجي لعند خوووك ( هزها عندو على كتفو وهز الكرسي باليد لخرى ) انا ناااازل .....
اية : هبطيلي معاك تيليفوني اماما ...
هزات حياة تيليفونها و شال ديالها ونزلات تابعاهم .... لقاو لامار ورتاج لتحت
لامار : الحمد الله ياربي كنت هاازة همك نتا متفيقش ساعة صدقتي نتا لوووول
سلطان : توقف عليا مولات الشي ومنفيقش ....
رتاج : غنمشي نشوف انا هاداك غيكون يالاه تقلب لجيهة لاخرى ....
طلعات رتاج لجناح لؤي كيف تووقعاااات نااااعس مراهش تما ... واخا لامار علات الريدوات رجع ينعس مغطي وجهو بمخدة من الشمس
رتاح : لوووووؤاااااي .. والله تاااعيقتو اويلي ناويين تصليو مع الوحدة ؟؟؟؟ نووووض تكعد
لوؤي : ( تقلب لجيهة الاخرى ) غاصليو الواليدة تانفيق ونصلي
رتاج : آش غااتصلي ؟؟ العاصر ؟؟؟ ( كلسات على السرير داتسوف فالظهرو ) منين جاوك هاد الخباشي كاملين .. شكون قمشك ......
لوؤي : ( كايحد ليها يديها من ظهرو ) قداااام الواليدة ريحي .....
رتاج : وشكون قمشك .. دابزتي مع شي حد ! ظفار هادو ( سرات معاها وهي توقف ضرباتو بمخدة ) والله ممككككتتتحشم ....شكون هاد المجعووورة هااادي
مجاوبهااش ناااعس وهي تهز واحد الكاس دالما كان على طابل دونوي وخواتو عليه تاناض بشهقة وحدة وشعرو كامل على جبهتو
رتاج : يلاااااه تككعد دابا ....
لوؤي : ( علا راسو باقي حال فمو والما كيقطر من شعرو ) وااااش تي مي ولا مرررررت بااااا .....
رتاج : انا نسييييبتك .... نوض تكعد الزهواني لاخور .. مشااابهش فباااك .....
لوؤي كيحك فعينيه وكيشوف فيها
لوؤي : كان مريض .. كون كان عندو الجهد غايشد لرض ! .....( شاف فيها ) خليني آلواليدة نعس ياك هوما لي غايدبحو .. علاش دابا انا مفيقاني .. ملي تسااليو فيييقيني
رتاج : يااربي الصبر يااربي شكووون غيعااااون عمامك الى نعستو نتوما
لوؤي : داك ليكييب جاية تشطح احيدوس !
رتاج : ونتا كتعرف عمامك كيخليو ليكيب تتكلف ؟؟؟؟ ( جبداتو من يدو ) نووووووض تكككعد
لوؤي : ( شاف لجنب بانتليه لفوقية ديالو معلقة كتسناه كانت فالبلو سيال ) انا داك العحب راه مغنلبسوش .. غااانمشي نووودن !!!! ...
رتاج : واش انا كل عيد غنعاود نفس لكاسيطة . هي لي غاااااتلبس وتنزل .. سلطان جاتو مزيييناتو ... اودي راه غا حياة لي والدة اما حنا غالمعككسيييين .. نووووض
لوؤي : هاهو نايض .. الستة دالصباح نايضين للگييرا ..
رتاج : راااه سبعة وربع هااادي .....
لوؤي : وهاهي سبعة وربع عندي حصة د الماط ... خدام انا ف ميدي آن ...
خلاها وناض مخسر لدوش
رتاج : دووش ولبسها .. تهبط ملابسهاش غنعاود نطلعك ...
دازت لجناح فيصل لقاتو واجد شاد تيليفونو بسروال و فوقيتو " جبادور " كحلين ومطرزين بالفضي انيقين وتقاشر بيضين وبلغة غير شافتو ضحكات ونظرات لاعجاب فهينيها
رتاج : هانا العريس ديالي ، غانعينكم غير انا ههههه .... الحمد الله واحد فيكم فيه الضو .. يلاه نزل احبيبي نزل ....
خلاتو وطلات على انس المساعدة ديالو كانت باقا معاه كتلبسو كان نفس الشكل دفيصل غير هو فالمارون ....
كاع اطلالاتهم كانت من توقيع مصممينهم الخاصين اما اطلالة العيالات كانت من تصميم اريج ....
وسيم تاهو وقفات عليه قسم حتى فاق ولبس تاهو جبادور گري كالس على السرير كيلبس تقاشر ويبرگم
قسم : والله تاااجااااك زوين ماااالك
وسيم : واش انا غااادي نطهر ....
قسم : وراه العيييد اصاحبي ... غير نصلييييو .. وغيجيو ياخدو تصااوور ... وطلع داك ساع حيييدو ... ساهلة ....ساعة دالمكانة لي غتبقى بيه ....
وسيم : ففففف ( كان غير بسروال وفوقيتو تقليدين ) وبلاااااش هاداك مغنلبسوش ..
قسم : ( هزات الجيلي الطويلة ) وهادي لي زوينة فيه اصلا ..... اسيدي بلااااش غير نزل هاكاك ....
عطاتو البلغة لبسها ووقف كتقاد ليه شعرو
قسم : كل عيد كتشحفووونا معاكم .. مالكم معكسين ...( باستو ) شوووف الزيين المغريبي كيدااير ....واااخيد تغوبيشة راك سميتك وسيم زعما هههه .....
وسيم : بعدي مني ... ساااعة غنحيد هادشي
قسم : سااااعة وصافي غير على ما دوز الصحافة .... يلاااه تبعني ...
نزلات قسم وهو هز تيليفونو ولكيت ونزل ....
تقابل فالدروج مع زياد تاهو بفوقية كحلة وساعة فضية وراد شعرو للجنب وهاز كونة دبنتو لي نااااعسة فيها ... وتبعاتو مراتو بجلابة كحلة تاهي سااامپل على دوقها وصندال عالية و شال على كتافها حمر وشعرها مطلوق ..... نزلو مجموعين للتحت والسفرة بدات كتعمر ....
∆فالحي
على الفرحة العيد نعسو صغار الحي ، لكن الكبار غالبيتهم كادوز لليلة بيضاء .. دازت عندهم ليلة ثقييييييلة وصاخبة منهم لي عاد مسافر ومنهم لي راجع .... و منهم لي كان عاد الحولي موراه فالموتور ودراري تابعينو ..اما نساء الحي كان كلها و الهيت ديالها ، لي مشغولة مع الحلوى وها البوطة تسالات لها ، و لي تتقلب على بانيو و شبكة تالفين ولي بايعة الماتش و مقابلة جمالها والماسكات ...
ها لي كادوش لولادها ينعسو بكري لي بايتين معنقين حوايج لعيد ... ها لي مضاربة هي وختها على ليسور كايصايبو شعرهم .. وها لي دايرة فراشة فراس الدرب تنقش للبنات ومضورة صريف .....
تاحد مانعس داك الليلة فالدررب !!! ......
تامن سلمى بايتة فالسرجم كاتفرج فاجواء الحي والحوالا لي عاد كايدخلو فالدقيقة تسعين .... كاتفرج وتتبتسم مع الجميع !! ابتسامات منكسرة كتتمنى لو تاهي دابا باباها داخل بحولي وتخرج تفرح معاه كيما هاد الجيران .. دخلو ماماها بزغااريت و تصبح الدار عامرة ....
حتى خوها مامقصرش من جهدو .. عيدهم مقوم من كولشي ولكن ناقص اللمة العائلية ! ناقصة الفرحة وناقص بزاااف دالحوايج لي مكيكملهومش غير حولي وحوايج العيد ......
كان الصباح فالحي ساااااكت على عكس الليلة الماضية .... كايتسمع غير صوت " باااااااع ، بااااااع " مخلطة باصوات العتارس تاهوما للعائلات لي مافحالهمش وصحاب الرجيم ....
ابواق المساجد كانت كلها كاتصدح بذكر الله " الله واكبر .. الله واكبر ... والله الحمد ... سبحاااان الله .. والحمد الله .. ولااا الاه الا الله .. والله اكبر " ... ذكر لي نوض البهجة فالولاد الصغاار وناضو يتناقزو دغيا امتى يلبسو حوايجهم الجداد ويبانو على صحابهم فالدرب .....
العيلات كاينة لي عاد صابحة على التسياق وسانكيروا وكاينة لي بدات تعطي ريحة لقهوة من دارها .....
اما من داخل دار اصيل كانت سلمى تتلمط صالون و تتضرب فالمخاد حتى بدات تسمع فالغوات على برا !!!!! شكون لي ناض يدابز صباح العييد ؟؟؟؟ مشات تشوف شكون منوضها من جيران لقاتها جارتهم ربيعة و راجلها لي شانقة عليه ..... كي لعادة .. الدرب الى مناضتش فيه المطايفة مايدوز والو .......
سلمى : (مخرجة نص جسمها باش تتفرج ) اناري صبااح العيد يعطييييكم الجججهل .....
ربيعة : مااااشي هاد حولي علاش تاافقنا اولد الحرام ، خليتني تااااانعست وبدلتييييه ( تتعلى وتزيد تشنق عليه و تتجرو عندها ) ياا تاااا لحولي لكبير فين ديتيييه ؟
الزوج : ( كاايهز يديه طالب لإغاثة ) وااا شهدو عليهاا الجيرااان واااعباد الله وا شهدوو عليها بغات تقتلني صباااح العيييد
ربيعة : ( شانقة مامفكاش ) ااااشهدووو عليه بغى يقتلني بالفقصة !!!!! دااا لصاحبتو لحولي الكبير و اانا و ستة دولااادو مخلي لينا الصغيير . السبعة دالصبح اووولد الحرااااام كيغااندير انا داااباااا كيغانديييررر منين غانجيب حولي بگروونو مخليني نعيد بقط وبنت نعييييمة دات الصرررردي ... ليييوما نعيد بيييك
الجارة : ( تتفك و تتبرد طرح مكفضة بيجامتها ) انعلووو شيطان اراابيعة ... و العواااشر هادي نعلو شيطان ...
ربيعة : مالو هو اخويتي ماتقى فينا الله ؟ ( تتجرو تايبغي يطيح ) يحضر ليا الحولي الكبير قبل مااااايخرجو الرجاااالة من المصلى ولا طيييح الروح
دخلات سلمى راسها من السرجم فاش سمعات خطاويه .... وتبسمات باعجاب ملي لمحااتو !!!!!
كان بفوقية زرقة قصيرة وتقاشر وبلغة خاشي يديه فجيابها والسجادة على كتفو ... شعرو مرطعو كامل اللور باقي فازك من الدوش وريحة الشامبو عاطية منو ولحيتو مقادها .....
طولتو مع عرض كتافو واتات البلدي ... وسلمى ضحكات فرحانة باجواء العيد ....
سلمى : صبااااح الخيير .. غاتمشي دابا للجامع ...
اصيل : ( نطق بصوتو الرخم لي باقي مدعدع بالنعاس ) صباح نور .. انا غادي .. ملي نجي سيري لكوزينة ماطلعيش لسطح غايجي معايا انور تايخرج وطلعي .....
سلمى : واخاا اخوياااا الله يقبل ....ماتفطرش
اصيل : تانساليو .....
مشا اصيل وهي بقات متبعاه من السرجم ومتبعة بنات الجيران فالسرجم كيف كايشوفو فيه وتضحك مفتخرة بخوووها لي كايبان كيف السبع بالبلدي وكولشي حاط عليه العييين ... وناضت بزربة كتقاد اتاي و تقاد الكيكات و المسمن البغرير وكاع اش وجدات .... رغم انهم غير بجوج كتحاول فكل عيد تخلق ليهم الجو .... طلعات البانيوات والكراطات للسطح وطلات على الحولي كاتلعب معاه وتصور فيه ... ونزلات لتحت كاتكتب ميساجات لصاحبتها تبارك ليها ومشات لبسات قشابة لي تعاون بيها خوها .... وكلسات فالسرجم كاتسناه يجي كاتفرج فالجيران غادين بجلالبهم وفوقياتهم للجامع ... وفواحد البلان خاوي قدامهم بداو يوجدو تما فين يشوطو الريوس ومول المكينة لي كتمضي الموااس .... الديور كلشي مفتوحين اليبان بداو لي كايدبحو فالزنقة يخرجو فالبانويات والتيوويات والشباكي على برااا .... كانو غير العيالات القادات لي معلين قشاشبهم عاقدينهم فكرشهم و سراولهم مطوييين مكفضين كايوجدو كولشي باش غير يجيو رجال يفطرو ويبداو رويينتهم لي صباح العيد الكيير عند ناس الشعب بحاااال الحرب بتماااارة ..... ولكن لمة دجيران والشباب مكتخليهمش يحسو بتمارة .....
يتبع...
التعليقات
لا توجد تعليقات بعد، كن أول من يعلق.