محتوى القصة
لامار : نتوماا علاااااش ! بحالكم بحالهم .... اسسسد قوول شي حاجة غاتبقى ساكت عجبك هادشي
اسد : ( طلع راسو فيها ) قلّب عليه ولا ماقلّبش عليه ؟
لامار : اييييه جبدو ولكن ...
اسد : شكون تعدى ؟؟؟...
لامار : عرفنا تعدى عليه ...يتحكمو فراسهم ماشي كولشي كايتحل بالضرب
اسد : شنو دار ليه المرة لي فاتت !!!!
لامار : مشا هضر معاه
اسد : مشااا هضر معاه بالعقل... .سمع ليه ؟؟؟
لامار : لا
اسد : واقطعي حسك ...
لامار : دابا راااه تاتزيدو تنفخوووو فيهم بهاد الهضرة تايخرجو على راسهم ويضيعو عليهم كولشي
اسد : ولادنا مكيتعداوش ... لي جبدهم بلا مايتشكى .... ماحدي عااااايش تاحاجة مغاضيع ليهم ... كون كنت عارفهم كايتعداو ولا دخلوه لتما على شي شغب والله لااااخرجتهم من تما ... اما دابا دارو غا لي خصو يدار ، يالاه داك خييينا يشد لرررض ..... المرة الجاية يبغي مزال يعاود بحال هاد الفعلة ببرررربي تعالى مغاتبقى ليه اليد لي تحط فوق الكلافي ... هداك تايقلب علينا بالمعقول .. من غدا غانلوح عليا هاد الخراااا كااامل وهاد البرتوكول دوالو وندير شرع يدي ..... واخا نعرف نرجع لزييييرو ماعنديش مشكل .. منهار درنا هادشي و بنادم طالع ليا فووووق راسي وانا صابر ليه .... راه ميمكنش نبقى صابر .... عارفة الموقف لي تحطيت فيه هاد نهار !! عارفة شنو هي ولدي فالولاية
لامار : اسد نعل شيطااان ، اشمن نرجعو لزيرو
اسد : حطو الغدا ...
خلاها وطلع وهي شافت عدنان
لامار : لا صافي انا غتسكتو ليا القلب
عدنان تنهد ومشا كلس تاهو ولوؤي طلع يدوش ... وسلطان مشا يجيب آية من ترويض ومو من لافاك تادخلات طموبيل قسسم لي بحال العجاجة ....هدنوها يلاه كايعاود ليها بانليها جود نازل كان شعرو فازك بشورط دجين وتشورط وسبادريين بيضة وهي تمشي عندو كاتجري عنقااتو
قسم : تخخححخلعت عليييك بزاف .... رررد لبال ررد لبال اش داك لشي جلاخة خلييه يكتب اش بغا حنا عارفين راسنا اشنو كنسواو
جود ماردش عليها ماعندو خاطر حدو باسها فراااسها تانزل لوؤي تاهو مدوش كايضور بعينو كايقلب على قدس مبانتش ليه ... وجلس هو ينضم سلطان لي جاب اية وحياة تاهي دخلات كتسول وتعاود ... ولوؤي بالو غير مع قدس فين هي تاسمع لامار
لامار : اجي نتي فييين ختتتك ، مشيتو بجوج ورجعتي بوحدك
قسم : كنّا بجوج ... عيطات ليها رانيا صاحبتها ومشات عندها ...
لوؤي علا عينو بزربة بقى غير كيرمش ، وهز تيليفونو شاف gps فلخر وقف
لوؤي: انا غانخرج تخنتقت ..
لامار : اويلي كلس غير تاتغذا فين غادي
لوؤي : لا امرات عمي والله ماعندو منين يدوز . غانمشي غير جيهة البحر بصحتكم .....
خلاهم وخرج حال gps دطموبيل د سالفادور عندو فطموبيلتو ومتبع الاشارة .. واسد نزل تجمو على الطابلة تايتغداو واخا كانت الخمسة ... جود غي خدا ديسير طلع ديريكت لبيتو ينعس بالفقصة والعصاب واسد شف معاه طلع ورجع شاف فيهم ...
اسد : بحالا گال ليا راه غايبداا الخدمة لا ؟ مافخباروش يمكن
لامار : ههه .. واخليه مسكين ليوما شتي شنو داز عليه ... غدا يبدا .. الحمد الله غاليبغى يمشي
اسد : ( شاف عند خوتو ) شتو العيلااات .. شتو
عدنان : ( شاف عند رتاج ) انا هادي كون نغفل عليها شوية نلقاها رجعات ليه البيبرون ....
تغداو فجو هادئ ، ثم بداو كايتفرقو ... قسم كان عندها اجتماع فالجمعية مشات قضاتو والعيالات رجعو لخدمتهم ... و لامار تاهي لبسات خرجات لخدمتها .. اما اسسد قال عيان وغايكمل خدمتو من بيتو .....
يلاه جلس فالبالكون حل بيسي وطلعوا ليه قهوتو .. حل لابواط ديالو هو يلقى الايمايل لي طلب من البيرو دالامن وصلو ... وبدا كايجغم قهوتو وكايقرا فيه ....
الاسم الكامل : اصيل الشريف ....
السن : 34 سنة
العنوان : ******
رقم البطاقة الوطنية : *****
رقم الهاتف : ******
اسم الاب : حسن الشريف " متوفي "
اسم الام : فريدة الحسوني
المهنة : بدون
الاخوان : سلمى الشريف
المستوى الدراسي : باكالوريا " علوم رياضية " بميزة متفوق حاصل على اول معدل وطنيا
الديبلومات : بدون
اللغات : خريج معهد اللغات سنة **** ، لغة الانجليزية والفرنسية
ااسوابق : بدون
الرصيد البنكي : 35 الف درهم ....
بقا اسد كايشوف فداك التعريف لي جابوه من الضواصا ديالو لي مسجلين عند الدولة ... ولكن حاس بهادشي مكافيهش ... باغي يعرف كثر باغي يعرف مصارنو ... كيفاش اول معدل وطنيا ومامكملش قرايتو !... كيفاش واحد كان داير معهد اللغات فالسنوات لي كان كايقرا فيهم واضح كان شغوف بالقراية مغايخليش ختو تقرا ؟ ... باغي يعرف سلوكو كتر ... وعينو كاتمشي لسمية الاب لي كتضرب ليه فراسو ... فايت سااامع بيها و بهاد الكنية بالضبط .... ورجع صونا على شكير يطلع عندو ... كان فالمنقطة ماتعطلش عليه تالقاه قدامو .. ووما ليه يكلس وسد البيسي
اسد : الايمايل مكافيش .... انا قلت ليكم بغيت نعرف عليه كولشي ...
شكير : لا اسيدي راه دارو تحرياتهم عليه غير هو مابغاوش يكتبو ليك حيت تقرير ماكاملش عاد كايقلبو عليه ... بغاو حتى يكملو التقرير يسيفطوه ليك
اسد : اشنو عرفتو عليه حاليا ... هنا كنشوف المهنة ماعندوش .. باش كايصرف على راسو ؟!
شكير : عرفنا اسيدي انه كايخدم فالمرسى .. صياد ... خدام فالصيادة ولكن مكايبيعش ... يعني مول الباركو راه كايخلصهم على داكشي لي صيدوه ويمشي فحالو ...
اسد : صافي ! ...
شكير : هادشي لي عرفنا حاليا ... كان دفع ضوسي ديالو لطاكسي ولكن من بعد باع داك طموبيل ...
اسد : مافات خدم فحتى شي شركة فحتى شي بلاصة ! ... كنشوفو متفوق دراسيا و عندو لغات و مؤهل لخدمة حسن اولا !
شكير : لا اسيدي مكاين تاشي حاجة لقينا شي سيڤيات ديالو فالهجرة لبرا على ود العمل ولكن كانو هادي تقريبا شي تسع سنين ... يعني داكشي قديم ... حاليا مكتفي غير بالصيادة هادشي غير لي عرفنا
اسد : بحتو ليا كتر ... غايقري ختو فكلية خاصة ... ورافض المنحة يعني عندو باش غايخلص بغيت نعرف واش كيدير شي حاجة ماشي قانونية ....
شكير : اااه حاضر اسيدي ...
اسد : ومو .. عايشة معاه؟
شكير : لا ... على مافهمنا من شي جيران ديالهم .... كانو كيقولو مطلقة غيابيا قبل مايموت باه .. مفاارقين ....وهوما بقاو مع باهم
اسد : اهاه وفين هي !
شكير : ماعندناش معلومات كتر اسيدي .. عاد كانبحثو
اسد : سلوكو اش كايقولو عليه
شكير : كولشي كايشكر فيه صراحة وتايقولو انه داخل سوق راسو لابعد مدى ، مكيجبدش صداع وشاد تيقارو ....كايقولو فيه غير المزيانة .. منبعد عرفنا عندو واحد صاحبو مقرب ليه بزاف هو لي غايفيدنا .. ووحدين من الامن غايمشيو يتكلمو معاه يمكن يفيدنا كتر....وكيف ديما اسيدي كنقولوا ليهم حنا من الاحصاء باش مكنلفتوش الانتباه
اسد : اااه .. مزيان .. غير واحد الحاجة سمية باه ... حسن الشريف .... قلبو ليا على باه .. فايت سامع بهاد السمية وماعقلتش بضبط ... قدييييم بزاااف هاد الاسم فدمااااغي ... شنو مهنتو ؟
شكير : اه مهنة ديالو تاهو بحال ولدو .... كان صياد .. ولكن هو كان كتر منو .. يمكن كان رااااايس ... داكشي علاش فوق مامشى للمرصى كايلقى بلاصتو لان كايقولو باه خلا ليه تما سمعة مزيانة وكولشي كايستقبلو للمعزة ديال باه ...
اسد بقى كايرمش .. ورجع شاف عندو ..
اسد : قلتي رااايس ؟؟؟؟ ( كياضورها فراسو ) وشنو سمية بااااه ؟؟؟؟؟
شكير : جد هاد الولد يعني ! ... وااا صراحة ماعرفتش ، نبحثو ونقولو ليك ....
اسد : شوف ليا واش سميتو الرايس المختار الشريف ... واش كانو فالمرسى ل ***
شكير : اه واخا اسيدي ( وقف ) عطينا غير ساعة دالمكانة ونجيبو ليك صحة الاسم ....
عند لوؤي ...
باركا بطموبيل مور طموبيل ديال سلفادور وكايشوف لداك ريسطو لي قدامو .. كان ريسطو عادي متوسط ... بقى كايصغر عينو واش تبانليه شي حاجة من زاج ولكن الريدوات كانو نازلين ... كيتمنى يطلعو شكوكو غالطين وماتكونش قدس لي تما لداخل معاه .... كايضرب فالفولون بصبعانو ماعارف واش يدخل ولا اش يدير .. خصو يتأكد .. لبس نضاضر ولبس كاسكيط هبطها على وجهو وزاد دخل للمطعم يلاه داخل هو يتلاقاه واحد سيرفور منعو
- ممنوع اسيدي ... سير واحد ساعتين واجي ريسطو ريزرفاه واحد الگاوري هو وخطيبتو دابا ..
لوؤي سد عينيه كااااايتنفس ببغضب و رجع خرج داك تنهيدة لبرا كايحاول يتحكم فراسو ويخدم عقلو ... هادشي داخلة فيه حتى خدمتو خصو يعرف الخطوة فين كايلحوها ... ويفك خيوط عاد القنبلة بلا متفركع فيه ... هو يجبد ربعمية درهم وخشاها ليه فجيب ديال الطابلية لي ضايرة عليه ولاخور بقى غير مبكم ماعرف مايقول ..
لوؤي : متخافش .. مغايردوش ليا لبال ..
داك السريفور فهم الى تما ان فالموضوع وقطع الحس زير على داك ربعمية درهم فجييو ومشا داير راسو مشاف والو كيسربي هادوك لي كالسين على برا ...
كانو جالسين لداخل تايضحكو وقدس فرحانة لي حجز المطعم على قلبها باش تكلس مرتاحة ومايردش باباها الخبار .. كاضن هادشي اهتمام منو معارفاش الا راه صائد كايفرش للفريسة ديالو ... كان مطعم متوسط وسلطة قدامهم كياكلوا وهو ضاااحك معاها وكايعرف يستثر عقليتها... ولوؤي دخل وصوت ضحكها كاييسمع ليه .. مزير على يديه كايحاول ما امكن يتحكم فراسو .. ومشا لواحد الكوان بعيد جاي فالقنت ومخبعو واحد الحيط قصير ماردوش ليه لبال وجلس كايبان شوية رااااسو كايطل عليهم مراقبهم ....
سلفادور : ( شرب من كاسو وشاف عندها بنظرات الحب ) قدس ... كتحسي براسك مرتاحة معايا
قدس : ( كتاكل من السلطة ) مممم .. مرتاااحة
سلفادور بقى يشوف فللخر هز يدو وشد يديها ولوؤي غمض عينيه ... وهي توترات وسلتاتها منو ..
سلفادور : ا انا .. انا عارف فرق الطبقات لي بيناتنا .. عارف نتي بنت من وانا ولد من ...انا غير مدرب بسيط من دولة لدولة خدام على راسي . بصح انا متأكد مغاتخصكش معايا تاشي
حاجة .. باغي ندخل نستقر فالمغرب .. وكنقلب على مغربية نكمل معاها حياتي .... منلقاش ماحسن منك اقدس ، تقبلي تكملي حياتك معايا ؟؟؟
قدس : ( كترمش فيه ) اء . ك كيفاش ؟ زواج !!
سلفادور : ممممم زواج .. انا عارف نتي مسلمة .. ونا مستعد ندخل لاسلام .. على قبللك نتي
قدس :و .. ( حطات فورشيت ) واش كتهضر بصح
سلفادور : واش هادشي فيه الضحك
قدس : و.. ففف .. د دابا .. ولكن راه مايمكنش .. انا مستحيل يقبل ليا بابا نتزوج وانا مزال مامكملاش قرايتي
سلفادور : ماعنديش مشكل نتسناك حتى تكملي
قدس : ص صراحة ماعرفت مانقوليك .. حطيتيني دابا فموقف فشكل .... زواج ماشي بهاد السرعة يعني كيفاش قدرتي تطلبو ونتا مكتعرفنيش مزيان !! مافهمتش
سلفادور : كنعرفك و كنعرفك مزيان ..... وهاد الفترة عاد غانزيدو نتعارفو كتر ، ونا متأكد اننا موالمين بزاف ....
قدس : ( ردات شعرها لور كتنهد طلعات معاها الصهدة ) ماااعرفتش والله ماعرفت مانقوليك
سلفادور : ندير كاع لي يريحك ....انا باغي نتزوج مغربية وندخل الاسلام ... علاش منكونش على يديك ... الا قبلتي عليا نتي وعائلتك طبعا
قدس : حنا ماعندناش مشكل فهادشي ولكن .. انا مزال ماعنديش السن لي نهضر معاك على الزواج
سلفادور : فهمتك .... راه قادر نتسناك وندير اي حاجة بغيتيها ... ( رجع شد يديها ) غير مااتبعديش عليا .... عافاك ...
قدس : ( كاتشوف ليديه فوق يديها لي جابت ليها التبوووريشة وهي تسلتها تاني ) غ .. غنفكر ونرد عليك
سلفادور : ( بتاسم ليها مبين حب كبير ) غنتسنى ردك بفارغ صبري ..... ( اشار لناذل يجيب ليهم لغدا )
لوؤي حاضيه من بعيد كايشوف اش كايقول لاصال كانت خاوية كان كايتسمع ليه كولشي .... عرفو راه كلا ليها دماغها وزاد تبتها بالزواج .. كايشوفها كيفاش كتشوف فيه باينة تاااقت وبدات تخطط لبعيد ... فنفس الوقت كايتراسل مع الدورية بلي هاد السيد راه تايواعد واحد السيدة بزواج .... وقالوا ليه ربما خطة .. تبعو حتى تعرف اش باغي يوصل ليه ....
بقى كيشوف غييير من بعيد فييهم .... ربما الى صبر واستحمل وتبعو فخطواتو تحكم فراسو مضيعش كولشي غايوصل لراس الخيط ويعرفو اش باغي يدير .. حسن مايضيعو من يظيه ويصدق مآديها دبصح .. خاصو يبقى متبع اثارو تايشتد ليه ....
خرجو من داك المطعم غيي هوما ركبو وهو تابعهم ، ماباغي يخليها تالحضة معاه بوحدهم بقوة مخايف عليها توقع شي حاجة خصو ديما يبقى موراها ..... ماتهنى تابان ليه حطها فواحد البلاصة ... ومشا وهي تعيط لشيفور وجا داها ....
عاد مشا لوؤي ....
∆فالقصر
اسد كمل شغالو وخدمتو وشاف لساعتو وناض وقف قصد بيت قدس ، دق شافها مجاوباتش وحل دخل .. مابانتش ليه وفراشها مجموع .. ونزل كاتبان ليه رجاء كتهضر فتيليفون ديال الدار .. وقرب باتجاها كايعلي كمامو دشوميز
اسد : شكون !
رجاء : هادي الصديقة دمادموزيل قدس اسيدي
اسد : اش بغات
رجاء : كاتقول انها كتاصل بها من صباح ومكتجاوبهاش وبغات توصل مواساتها للعائلة بخصوص اش وقع لسي جود .... فنفس الوقت كتعرضها لانفيغسيغ ديالها لي كاين غدا ...
اسد : شكون هادي
رجاء : قالت اسمها رانيا اسيدي ....
اسد : ( علا حاجبو ) اه ... داكوغ ...
خلاها وخرج تفكر ان قسم قالت خرجات مع صاحبتها وبحالا سمع قالت اسم رانيا .. ولكن مامتأكدش .. يلاه خارج لطوموبيل وهي دخل طموبيل شيفور وبانتليه نازلة وضحكات جات باتجاهو ...
قدس : بابا .. ( كاتبان فرحانة ) سلااااام ....
اسد : سلام بابا ( باسها فراسها وكيشوف معاها لداك الضحكة ) شنو مفرحك
قدس : و . والو .. غير طالع ليا المورال ليووم وصاااافي هههه
اسد : ااه يعني آ الغالية ديالي نهار لي خوك تشد وطرات لينا كارتة قد الخلا ... عاد نتي طلع ليك المورال ..
قدس : ( جمعات ضحكتها ) اا .. لا . ماشي هاكاك ... زعما ، كيفاش جود تشد ؟ مافخباااااريييييش .. كيفاش تشششد
اسد : مافخباركش !! ياك تيليفون مكيفارقش يديك
قدس : ل الاااا .... ااء ...ماهزيتوش ليوم كاع ماشفتوش ....اش واقع .. واش تشد ؟؟؟؟ فين جود
اسد : راه ناعس الفوق .. دازت بسلام .... معامن كنتي
قدس : ( بتوتر ) م مع صحاباتي ابابا ... معامن غانكون
اسد : شكون هاد صحاباتك ...
قدس : اا ... ايمان و ليليا و رانيا ....
اسظ : ااه ... يعني صحباتك مقالوهاش ليك
قدس : م ماافخباااارهمش
اسد : بصاح .. حيت وحدة فيهم يلاه اتصالات ... وفخبارها اش واقع ....
قدس : ( قلبها كايضرب بجهد وكتسرط ريقها ) مم،.. م ماعرفتش
اسد : ااه ... يمكن حتى جيتي نتي عاد جابت الخبار ياك ؟ ماعليش ... ماعليش .... بوون ، وجدتوا لانيفغسيغ ديالها ...
قدس : اا ... ... انيفيغسيغ ؟
اسد : قالت عندها انيفغسيغ غدا .. مقالتش ليك
قدس : ااء ... ااه .. انيفغسيغ اااه قالتها ليا وي وجدنا قبيلة فاش كنا اونسومبل ...
اسد : ( دايها على قد جوابها عارفها تاتكدب غير من عينيها ومتحكم فراسو ) وعرفتيها شكون بعدا لي عندها لانيف ؟
قدس : ااء ( صفاارت فوجهها وريق كتسرطو بحال الموس فحلقها ) لل ...... ليليا ؟؟؟؟
اسد عوج راسو لججنب خدا نفس عميق وضار عندها هضر مزير سنانو مزيرها من يديها تاقرباااات تخسف وهضر بنبرة حااادة بالغوات
اسد : معاااااااامن كنتي !!!!!!!! .......
قدس قلبها كايضرب بجهد وهي كاتشوف فيه ونطقات بصوت كايترعد
قدس : بابا .. ط طلق .. ماكنت فييين ...يدي كتحرقني ابابا ...
اسد طلقها من يديها كايشوف فيها مخنزر وهي مقداتش تشوف فيه
اسد : معاااامن كنتي ..
قدس : ب بوووحدي ...
اسد زير ليها على ذقنها مطلع ليها راسها لفوق
اسد : علااااش كتتكذبي .... امتى تعلمتي هاد الكدوووب كاملين ( كايشوف معاها كتبكي ) مالكي كترررعدي عليا دابا .... اشنو دايرة مخلوعة عليه
قدس : ب بابا .. ا اااانشرح لييييك عافااااك ماااضرررربش
اسد طلقها وداير يديه فجيبو كايشوف معاها بحدة و خيبة ظن فيها على هاد التخبية كاملة وهاد الثقة لي كل مرة كتخيبها ...وهو عندو ما اعدى من شي حد كايخبع عليه .... وهي تصرفاتها مؤخرا مابقاوش مفهومين ليه ... تاشاف جود نازل فالدروج لي شافهم من البالكون وجا باتجاههم مخلوع عريان من فوق ... قدس غير شافتو كانت غااتسخف عارفة الى تجمعو عليها بجوج غير تقرا الفاتحة .....
جود : اش واااقع ...
اسد : رجع تنعس ... بيني وبينها
جود : ( كايشوف معاها فداك الحالة وشاف فباه ) اش دارت ....
اسد : قتليك رجع تنعس ....
جود : مالكي نتي كتبكي ( جرها من يديها تاقربات تغوت ) اش دررررتي ....
اسد جرها عليه دارها من موراه كايشوف فيه
اسد : طططلع عليااا لفووق ....
جود : وااافهمووونا اش واااقع كيفاش طلع عليا .... اش دااارات ؟؟؟؟؟
قدس : ( بالغوات ) مدررررت واااالو .. بعدووو مني ..
مشات كاتجري هربانة هو يتبعها جود فالخلفة وحدة شدها
جود : امال وااااالديييك نتي تتغوووتي ياك لاباااس ؟؟؟؟؟ اش وااااقع ..
قدس : ( بالغوات والبكا ) طططططلق مني ... بعدوووووو مني مااادرررررت والو طططططلق مني ...
اسد : ( بحدة تازعزعهم) طلللقها ....
جود طلقها وهي مشات كتجري دخلات لدار وجود شاف فاسد
جود : اش دارت ؟ علاش زعفتي عليها راه شفتكم ملفوق
اسد غير معلي حاجبو ومورالو هبط بممممرة تاجا واحد من الكارد وقف وحنا راسو شافو اسد وجرو لبعيد باش مايسمعوش جود .... وجود بقى متبعهم فلخر طلع تبعها .....
الكارد : بقينا بعاد اسيدي ميمكنش نتحكمو فتحركاتها ....
اسد : شكون هذا لي دخلات معاه وصفو ليا
الكارد : أجنبي ...
اسد : ( تنهد بقوة ورجع شاف فيه ) اشمن ريسطو
الكارد : **** كان محجوز ليهم فقط ... ثم جا من موراهم سي لوؤي دخل .... وخرج تاهو ....
اسد وما ليه يمشي وهو بقا واقف فبلاصتو يدو فجيابو وساااااهي عينيه فمنحى واحد ... كايشوف بنتو التانية حتى هي كتخرج على سيطرتو ... الاولى بعدا فسن الرشد ومؤهلة للزواج .. اما قدس مايمكنش يقبل ليها ... خصوصا انها مخبية عليه الامر ومجاتش صارحاتو .... وهذا لي عطاه انذار وباقي لاصق فيها اش باغي منها ؟ علاش مايقصدوش هو ... الاعصاب كايطلعو معاه مكرهش يشدو يقسمو على ربعة على هاد التحدي كامل ... مامطمنش نهائيا لهادشي ... الراجل لي يخلي البنت تولي تكذب على واليديها مستحيل يكون صالح ليها ....
ومشا كلس فواحد الجليسة فالجردة وجبد تيليفون كايصوني حتى جاوبو
لوؤي : وي عمي
اسد : دابا تكون عندي .....
لفوق ...
جود : ههههضري ماتمرضييييش ديييلمي
قدس : ( كتبكي ) وبععد مني ماادرت والو مااااالكم دايرين عليا بحال هاكاااا مادرت وااالووو ....
جود : مادرتي والو وعلاش كتبكي ؟؟؟
قدس : الحكرة بزاف على الللحكرة .... واش غاقدس لي خصكم تبعوها فالداخلة والخارجة هانتا غير صباح درتي مشكل على قدووووو حاااااسبك شي حد هاااا !!!!!! .... كااتحكرو غير عليا انا ... اش هاد الفرزياااات كاااملين ...
باقي يلاه كتهضر تاكان جمع معاها بتصرفيقة قلبات ليها الحنك وجبدها لعندو مزير على شعرها مغزف عليها
جود : غاااااااتعاااودي لدييييلمك تههزي عليا يددددي غااانرررطب ظهههرك .... غاااااتعاودي لديييييلمك تحطي راسك فراسي غاااااانعووووجك .... غاتعاااااووودي ديلمك تقارني مشاكلك بماشاكيلي نههههرس فيك شي عضم .... گلتليك شنوو درتي جااااوبيني .. مايجييش الواليد يزعف عليك هاااكاك .... اش دررررتي هاد المرة تبرهيشك مزال مابغيييتيش تسااالي منووو ... مزاااال ماباغاش ديري عقلك .. ....
قدس : ( كاتبكي وطير من يديه ) بااابااااااااااا طلللللق مني .. ماااادرررت والو ربييييو غير راسكم بععععدووووو مني كككككرهتتتتكم تفووووو كرررررررهتكم ...
تنترات من يدو مشات كتجري لدوش وهو كايشوف معاها
جود : ابلااااااتي تاااتخرجي نوريك كرررهتكم ابلاااتي ..... الفشوش دوالو
خلاها وخرج نزل عند باه لقاه شاد تيليفون وواضح من ملامحو معصب ...
جود : اشنو دارت ثاني !
اسد : ( شاف فيه ) ملي باها كاين نتا مدخلش .. حتى منكونش ودير واجبك .. دابا انا كاين بلا مطلع الدنف بينك وبين ختك من دابا ....
جود : ودابا ماااااالكم واش انا قطعت راسها بغيت غانعرف اش وااقع ... انا هاد البنت مابقااش عاجباني من زمان عايشة فعالمها غا راااسها وكنسمع عليها لي مايعجبش .... مالها على هاد الخفة كاملة ياك اودي لاباس ناقصنا صداعات !!مكتحتاررم لا صغير لا كبير شي نهار غانقتلها على داك لافاصون دالهضرة
اسد : بنتي قاد بيها ... ( شاف فيه ) لبس عليك وسير لوطيل ، عقد ليك شكير مؤتمر صحافي هضر وسكّت الناس بلا مطلع الهضرة الخاوية على والو ...
جود : ( رجع لور بملل كايحك فشعرو ) واااااعفييني عارفني ماعنديش مع هادشي .. فففففف مررررض تااااني ....
اسد : كتعرف غير دير متتعرفش تصلح !! راه كبرتو باش نولي نهضر بلاصتكم ..... طلع قدامهم ضاااحك ناشط فرحان باش بنادم تبرد فيه داك البيضة ....شرح الموقف منها تهضر تاعلى موناكو واش وقع .. هاكا تسكت علينا الصداعات معندنا منديرو بشي انذارات كتعرفني كيداير كلمة وحدة على ولادي انلوح كوولشي
جود : آلا الواليد حشومة ماشي داك تمارة كاملة فلخر تسمحو فكولشي ... ( وقف ) صافي انا غاانمشي كون هاني ....
وما ليه اسد براسو وهو طلع بدل عليه ... طلّع التفركيسة تاني ونزل لتحت داز حدا باه وما ليه بيدو زعما انا غادي وديمارا ومشا بطموبيل ديالو و الكارد تبعوه ....
يلاه هو خارج وطموبيل دلوؤي مخالفة معاه ووقفو بالمعكوس هبطو الزاج
جود : وافين ....
لوؤي : عيط ليا باك .... فين غادي نتا
جود : ( بملل) الهيت الخاااوي
لؤي : وصبر صبررر ماعندك مادير .. يلاه جيت حتى انا من تما فرعو ليا كري .... حسابتني مغاتمشيش
جود : نديرو الخاطر للواليد وصافي راه قرب مسكين يقطع حوايجو مانعيقوش عليه ..
لوؤي : وعلى انا علاش مشيت ... غاباش يسكتونا شوية ... ( رجع كايقاد كلستو يشد طريق ) تهلا والله يعفو علينا من هاد الحياة المشروكة ....
خلاه وزاد وتا جود مشا ....
لوؤي دخل للفيلا لقى أسد فالجردة ... باركا طموبيل وزاد لعندو سلم عليه ... واسد طلع عينو لبالكو دبنتو ورجع وقف ولوؤي تبعو حتى دخلو لبيرو وجلسو .... يلاه غايهضرو والباب تحلات ...
الخادمة : تشربو شي حاجة اسيدي
اسد : جيبي قهوة ...
مشات واسد كيلعب بواحد المكعب ملون فيديه كايحيد فيه سطريس و لوؤي جالس مقابل معاه تاجابو ليهم القهوة عاد تحنحن لوؤي وقرب لبيرو
لوؤي : ياك لاباس اعمي
اسد : لابااس، نتا لاباس !!!!
لوؤي كايرمش بعينيه ويرجع الذاكرة واش دار شي حاجة ؟؟ ورجع شاف فيه
لوؤي : ل .. لاباس ؟ م مافهمتش
اسد : وليتي كتخبي عليا ، هم ! ....
لوؤي : م ... ماخبيت عليك والو !! .. اش خبيت
اسد : نتا لي عارف اش خبيتي حسن مني .... هضر من عندك حسن مانقوليك انا ....
لوؤي : ( غير كيرمش مافهمش كايجيه لبالو كاع المصائب لي داير ) والله مافهمت اعمي .... م مامخبي عليك والو ( قاطعو )
اسد : فين مشيتي قبيلة ...
لوؤي : لشي شغال وصافي
اسد : كيدايرين هااد الشغال !!! صفرين حمرين ، كحلين ؟
لوؤي طلع معاه البلان عاد فهم عارفو غايكون جاب خبار بنتو وخبارو تاهو ورجع شاف فيه كايتنهد
لوؤي : نتا عارفني اعمي .. مكنخبع عليك والو ... ولكن شي حاجة ماشي بخصوصي منقدرش ندخل فيها ....
اسد : بنت عمك رخيصة عندك على هاد الحساب !
لزؤي : حاااااشا ... كون كانت رخيصة غانتبعها
اسد : ( بغضب ونفض داك المكعب على الطبلة تاتزدح ) اجي قوووولهاااا ليااا ... اجي لعنددددي .....
لوؤي : اعمي متعصبش انا ماشي خبيت عليك ، موضوع بحال هدا راه حساس وغايجبد صداعات .. قدس راها فهاد لاج راك عارف اوبليجي غاتشوف بحال هادشي .... متخافش انا راه حاطها بين عيني ماعندي خواتات نقابلهم هاد ساعة .... واش اجي وقيس بنت الاسماعيلي ... ( خايف يقوليه ان سلفادور مجرم حيت غايمشي يفضح ليه كولشي ومغايصبرش تايخليه يلقى راس الخيط )
اسد : ( رجع لور كايحاول يبرد ) اشنو كانو كيديرو
لوؤي : (مكره ) عرضها لغدا هي كلات اش طلب ليها وهو كلا دماغها .... حجز داكشي غير ليهم باش مايشوفهم حد ... وطلبها للزواج ...ويدخل لاسلام والبلانات الخاوية باش يرطبها ...
اسد : زواج كااااع !!!!
لوؤي : كايتبت فيها وصافي
اسد : اشنو قالت هي
لوؤي : ماعطاتوش راس لخيط قالت ليه انا ماشي قد زواج ....
اسد : ( تنهدد ) منبن خرج ليا انا هذا دابا منين .....
لوؤي: جنسية اسبانية كتحكمو بلادو .... وحتى لابغيتي تفك منو قانونيا ماعندو تاشي تهمة ! حتى البنت ماشي قاصر ... غير الا بغيتي دير شرع يديك غاتولي مخاطر بكولشي تاني ....
اسد : ( كيحك على جبهتو عياااان بالمشاكيل والهم ) دابا بقى ليا هاد البرهوش تاهو ؟ ... ماعندي تا مشكل انا فهاد خينا من غدا نخرجو تا على القااارة كاملة ..... المشكل عندي فبنتي ... هانا غبّرت ليها هدا غايجي واحد اخر .... بنتي لي خصها الاصلاح ماشي هوما ... شحال قدني نقيهوم ليها فالزنقة ...
لوؤي : ڤوالا حتى انا هادشي لي بغيت نقوليك .... الولاد على برا ضارب بهم الشتا مكيتسالاوش .... نحاولو من الجيهة دقدس ما هاد السيد ماعندنا مانصورو منو ... فلخر غايكوليك انا بغيتها حلال وغاندخل الاسلام كيما كلا عقلها ... غايمشي يدير لينا تاني السكوندال بحال هاد خينا على قسم .... قدس لي خصها تكبر عقلها وتديها فقرايتها وتبعد من الخوا الخاوي .... كون مافتحات ليه مجال ماعندو منين يدوز ليها ...
اسد غير ساكت وكيحك تحت ذقنو كيفكر فللخر رجع تنهد وشاف لعندو ...
اسد : صافي نوض لشغالك .. دابا نعرف اش ندير ....
لوؤي بقى فبلاصتو كيرمش ويتقااااتل مع راسو لقا مكاينش شي وقت انسب من هذا هو يجمع شجااعتووو كلها وطلقها بحالا طلق شي قنبلة .....
لوؤي : عمي ... انا ماعندي منخبي عليك .. بنتك باغيها ليا ...........
اسد : ( هبط راسو معلي عينيه كايشوف فيه بنظرات لي تسمى على قبلهم "اسد" ) اهااه !
لوؤي : ( جامع شجاعتو وشاف فيه ) من صغرها و ... وانا ... كنشوف راسي ... غانرتاح معاها .. فالمستقبل .... انا ولد هاد العائلة وعارف شنو هو السن لي كتسمح فيه بالزواج لبناتك .... ماعمرني قربت ليها ... ولا خطيت الصواب ... غير مؤخرا ملي ولات خفيفة بحال هاكا والريح لي جا يديها حضيتها ... من زمان باغي نهضر معاك ومالقيتش الوقت المناسب ... انا اعمي باغيها على سنة الله ورسوله .. منلقاش ماحسن من بنت عمي ليا .... مابغيتش يديها براني ..و مايدينيش انا البراني ..... الى وافقتي عليا .... بغيتها لييااا ...
اسد بقى كايشوف معاه وكايرمش بعينيه ورجع تنهد وشاف لعندو
اسد : ماشي وقت هاد الهضرة دابا لوؤي ... بنتي باقا صغيرة وباقي مسؤولية مستقبلها على كتافها ... نتا عارفني مكنرتاح على واحد من ولادي حتى نشوفو طراسا الطريق ديالو وانا ماشي من الاباء لي كنطراسي الزواج قبل المستقبل والكلام منطبق حتى عليك .... الصواب الى خطيتيه عمرك مزال تعتب داك لباب ... بنت عمك نتا أول واحد تخاف عليها ماشي نزيدك على البراني .... الموافقة ماشي مني تطلبها ... هيا لي خصها تكبر و تسالي قرايتها وتوافق عليك ... ماعنديش المشكل ... بالعكس ... غانكون مهني عليها معاك كتر من مع واحد اخر على االاقل غاتوفر عليا تمارة نقلب على جذورك .... ( لوؤي عحبو الحال وهبط راسو ) انا مغانقررش فبلاصتها .... نتمنى دير عقلها باش ماضيعش حياتها
لوؤي : لا لا اعمي ان شاء الله مانوصلوش لهادشي .... خصها غير شوية دالمفاهمة ... مراهقتها شوية صعيبة وبنادم على برا بحال الذيب كياكل فالدماغ .... كاتشوف راسها حتى هي خصها تشوف حياتها .... وربما كاتشوف ختها مكاتحاسبوهاش بزاف كاتقول حتى انا بحالها
اسد : بحالها كون كانت قدها ... على قسم ملي كانت قدها كانت عندها هاد المعاملة وهاد الثقة ؟ وحتى لو نحطهم فالمقارنة قسم مكتخبيش بحالها و مكتخدلش الثقة ديالنا فيها .. واش غنفرق ولادي ولا كيفاش ....
لوؤي : لا حاشا ....
اسد : ماعلينا ... المؤتمر حضرتي ليه ...
لوؤي : يالاه جيت منو ... حاولت نوضح لي بتوضح ... (رجع وقف) مهم انا غانمشي دابا .... ان شاء الله يكون غير الخير .. وهداك السيد غير حيدو من بالك وكون هااني عليها راه منخليهش يقرب لييها غير تهنى ..
أسد وما ليه براسو عيااان ويديه فداك المكعب ولوؤي وصل لباب هو يضور عندو بعينين كيحاولو يأكدو ..
لوؤي : ياك .... ياك مغتعطيهاش لشي واحد من غيري اعمي !!!!! .... باغيييها لييييا اعمي والله .....
اسد شاف معاه مطول وحاول يتبسم غير بطراف شفايفو للمعزة لي تايكنها للوؤي خصوصا ملي اعترف ليه عاد مازاد كبر فعينيه ، وما ليه براسو بالايجاب ولوؤي تاهو ضحك ليه فرحان وسد الباب ... ومشا ...
اما اسد رجع تاني دفن راسو بين يديه .. راسو تقااااال بكثرة الهم والمشاكل كايحس بالخناجر كلها ومنين كايضربو فيه وهو كايقاوم وباااقي كايقااوم لاخر عرق يبقى ينفض فيه ... غير يشوف ولادو بيخير ....
عمرو كان كايخطط فتربية ولادو انه يطلعهم على التخبية و السرية .. ديما طلعهم على الشفايفة والوضوح واي حاجة يجيو يقولوها ليه ... قدس باقي راسم ليها طريقها فراسو طخاطي مطراسي على الدراااسة والتكوين تايشوفها بمستقبلها بحال ختها عاد يتهنى عليها ... اما دابا عارف عقلها باقي صغير ومغتقدرش تفرق مابين السيد لي باغيها هي نيت وبين لي باغي غير إسمها .... باقي باغيها تركز على قرايتها ..... كل مرة تجيه خبارها مع شي حد وكايدوزها ليها .. ولكن هدا جاه كبير عليها بزاف وغياكل دماغها .... زاد تطمن ملي عرف لوؤي موراها وعارفو الى حط شي حد فراسو .... فنفس الوقت شاك فهاد السيد مامهنيش من جيهتو .... وكايقول ان الهضرة ماشي معاه ، هي كتيمل للشباب كولهم لي غايتلقاوها .. يمشي واحد يجيو عشرة ... خاصها هي لي يشوفها قادة تاخد قرارات ..... فنفس الوقت كيبدا يتخيل شي حوايج تقدر ديرهم تايبغي يتسطا عنداك تهرب ليه ؟ عنداك تمشي مع شي واحد ؟ تنعس مع شي واحد ؟ يحملها شي واحد ؟ يضحك عليها شي واحد ؟ .... يقدر يسد عليها حيااااتها كلهاااا ومايوصلش لهادشي .... خايف على حياة بنتو لي داير جهدو كامل تكون مستقرة يجي يخربوها ليه الدياب ديال برا ... معارفش بأشمن طريقة يتصرف مع مراهقتها ...وهي كتحشم منو فهاد المواضيع .... كيفاش يقد يعلمها خبث الرجال ... اشمن لغة غايهضر معاها ومايحرجهاش ! ومايخدش الحياء لي بيناتهم .... خايف وخايف لاقصى درجة .... خايف دير ليه شي تصرف لي يخليه ياخد شي قرار يقلب حياتها كاملة ...
داز النهار على اسد غير فالبيرو ديالو واحل فالتفكير ..... اما قسم دازت على ماماها لخدمة وجابتها معاها كايهضرو مع وسيم فطموبيل تاوصلو لدار كان ظلام لحال .. قطعو عليه ودخلو .. تلاقاتهم غير رجاء ولامار كاتحيد لفييست ديالها
لامار : ماهنا حد ، فين قددس
رحاء : مادموزيل قدس فبيتها امادام .. موسيو اسد فالبيرو ديالو ... و موسيو جود خرج للمؤتمر الصحفي وباقي مزال ماجاش ....
لامار : داكوغ .... وجدو العشا عافاك دغيا جيييعانين .... ( شافت عند قسم ) عيطي لخوك شوفي فين هو
قسم : غااايضوور فيا مكيحملش لي يعيط ليه وهو خارج ....خليني دابا يجي ... غانطلع نبدل ...
طلعات قسم ولامار مشات لبيرو حلاات عليه لباب وهو يبان ليها فالبيرو جالس ومطلع راسو لفوووق ساهي لدرجة مردش ليها لبال ... ودخلات كلسات كاتشوف فيه وهي تقيس واحد الجرس عندو ديكور فوق المكتب رن .. عاد فاق من سهوتو وشاف لعندها .. وبدا يحك فعينيه بحالا فايق من النعاس ويقاد جلستو كايعوج فعنقو
اسد : لامار( شاف للساعة ) ساليتي
لاامار : همممم .. ( كاتشوف معاه ) حبيبي كاين شي مشكل !
اسد : وامتى مكانوش المشاكل !
لامار : ( كترمش فيه وبدات كتخلع ) و . واش جود ؟ .. ياكما مع جود
اسد : هداك الامار كايسگاد ليا للهضرة .....
لامار : اسد اش واقع خلعيتني ...
اسد : امتى كبرو هاد الدراري امتى .... امتى
لامار : اش واقع ..... ( عينيها بغاو يدمعو ) اش واقع تاااني راااااه عيينا ....
اسد : مواااقع والو .... .غير كلست كنفكر شوية بوحدي ....
لامار : فاش ؟؟ .. زعما بخصوص شكون ؟
اسد : كلهم ... من صغيرهم لكبيرهم .... لكبار لي كنت هاز همهم ... دابا وليت هاز هم الصغار ... فين يبان ديال الكبار ...
لامار بحالا قاس ليها الضبرة وهي ترجع على الكرسي لور وهبطات الشال على كتافها كتحك بدييها ففروة راسها بعياء
لامار : الولاد عمرنا منتهناو منهم تايغطيونا بالتراب وشوف تشوف .... غير قبيلة خارجين وهي تعيط صاحبت قدس لقسم قاتليها مكتجاوبهاش ورا ماشفتهاش ليوم وهي كالت لينا كانت معااها علاش الكدوووب مانعرف ... لقيتيني جاية عالم بيا غير الله .... غااااتحمقني داك البنت
اسد : ممم .... ماتهضريش معااها هاد المرة ... الهضرة مافادت معاها بوالو .. ومغاااتفيدش معاها
لامار : فخبااارك ؟ ....
اسد : واش باليك ...
لامار : غير من هاد الكلسة راه فخبارك ... ياكما دابزززتي معاها !!!!
اسد : لعشية كاملة وانا هنا كنفكر ... الهضرة معاها والله مغتخرج بشي نتيجة .. لان الاج ديالها والمراهقة ديالها وطريقة تفكيرها غادي ظن اننا كارهينها ماشي باغيين مصلاحتها غير مغاتزيد فالزكير ... الى بغيتي تبغيك خاصك تكولي ليها اه سيري ابنتي تغداي معااه سيري خرجي مع هااداك لا هدا حسن لا هاداك حسن .... اما باش تقوليها شدي الارض راه غاتحس كنكرهوها ... فهمتي البلان !!
لامار : وراه هادشي ليطرا مؤخرا ... هانا شفتيني حاولت نتقرب منها وماخرجت بحتى شي نتيجة حتى قسم فطوموبيل قاتليا ليوم خرجاتها معاها الصباح بلعاني باش تجبد معاها مواضيع تقرب منها وهي حييييط قدامها ... مكتجاوبش معاها كاع .. حيت قسم ماشي من النوع لي غتهضر معاها فمواضيع الولاد والشباااب وداك تخربيق .... مواضيع قسم بالنسبة ليها كايجيبو الملل .. وزادت دابا قسم كملات ملي عرفات ختها استخدماتها قبيلة و كدبات عليها جبتها ساعرة
اسد : ( ساط النفس ونطق ) تعقلي فاش كنا كنديوها لفيرمة وكتمشي لبلاصة النحل .. وكنعياو نهضرو معاها ماتمشيش لتما غايقرصوها النحل .... كانت كتسمع !!!
لامار : لا ... ( جاتها الضحكة ملي تفركات طفولتها ) كانت كتخلينا كالسين وتمشي تتحبو حتى لتمااا .. خصها تعرف شنو كاين فداك بلاصة لي كامقولو ليها ماتمشيش ليها ....
اسد : وفوقاش مابقاتش كاتمشي لتما !!
لامار : تاقرصاتها داك نحلة هههه باقا عاقلة نفخات ليها وجهها مسكينة
اسد : دابا فعمرها 19 عام والله لاقربات لتما مزال... هاكاك خصها دابا .... خلييييها تاتقرص .... عاد غاتفهم هضرة واليديها
لامار : اويلي على نخلي حتى يجي الفاس فالراس صافابا ؟
اسد : نحبسها هاا ؟؟ نسد عليها لباب ؟ نمنعها تقراا .... اش بالك خصني ندير ؟ نصيفطها تقراا لكارد شادينها من يديها بجوج ... نحبس عليها النفس .... نحبس الخدمة ونديها بيدي ونجيبها بيدي ونكلس معاها فقرايتها ؟ ... اش غاندير !!!!!!
لامار : ماعررررفتش ااسد .... ولكن انا راه منتفرجش فبنتي ماشية لخطر
اسد : خصها توصل ليه .. تقيس العافية شحال سخونة باش تجمع راسها .. واش انا غنخلي بنتي تحرق .. راه عينيا عليها ... واش نطلع عندها دابا ونقول ليها علاش خرجتي مع فلان وفلان ونزنكها ونحشمها حدايا مغاتعرف تاتهضر ونتي عارفاها كيدايرة .. كيغاندير نهضر معاها انا .. اشمن لغغة غانهضر بيها معاها ؟ ...خليها حتى تغلط وتشوف النتيجة وغاتبعد راسها ..... شحال قدي نحضي وهانا مابقيتش !!! وهانا مكاينش ... شكون غايحضيها الى ماولاتش كتحضي هي راسها
لاماار : ففففف موشكيلة والله .....
اسد : انا راه حرت ... عشية كاملة وانا كنفكر ... نشدها نسلخها ؟ اش غادي ندي بهاد الضرب كاع ؟ غير غانعقدها هي دابا ديال الضرب ؟ ... نهضر مغاتسمعش ... كايجيب ليها الله كارهينها ..... خلييييها تقرب لداك العافية وتشوف الصهد ديالها وغاتهرب راسها .....
لامار : خايفة تمشي لشي حد يلعب ليها بعقلها
اسد : ماعندو منين يدوز ليها غير الا سخات عليه حياتو .. مايمكنش انا نوض نسد عليها كاع البيبان ونحرمها من كولشي باش الشباب اللي بررا يتهناو انا خاصني هي تعللللم تبعد على الخوا الخاوي ....
لامار : ( تنهدات ) يكون خيير يكووون خيييير ..... انا والله حتى عيييت عيييييييت ...
ناضت خرجات وهو تبعها بعينيه ورجع لنفس جلستو تاني معلي راسو للفوق ....
بدلات لامار حوايجها ومشات لبيت قدس يلاه غاتحلو باش دخل وهي ترجع غمضات عينيها ، نص فيها مقلق منها حيت كتكدب هاكاك عليهم ونص فيها تايقول ليها تخليها شوية على راحتها حيت الى دخلات غاتدابز معاها .... ورجعات نزلات وقسم تاهي دوشات وبدلات ونزلات للتحت لقات ماماها جالسة فصالون شادة تيلي كتسنى الخادمات يكملو حطان العشا ... واسد خارج من البيرو تبسم ليها بعياء وطلع ... ومشات كلسات حدا ماماها كتسناها تسالي الهضرة باش تسولها على باباها مالو طالع مقلق
لامار : وسربي اولدي بغينا نتعشاو
جود : مافيا لي يتعشا الامار باغي نكلس شوية مع الدراري راسي غايتفركع ليوم
لامار : كيداز المؤتمر ! مزيان
جود : صافا ...بالله الى قلبو ليااا راسي .... غير تعشاو ... بصحة ...
لامار : وماتعطلش برا بزااف اووولدي الله يرضي عليك ...
قطع عليها وقسم قربات عندها
قسم : ماما مال بابا معجبنيش
لامار : وصلاتو خبار قدس ( كترد تيلي ) داك البنت غاتبقى طير تاتجيبها فراسها ....
قسم : والله مفهمت علاش كدير بحال هاكا .. شنو غتستافد لاخسرات تقتنا انا براسي تعصبت ملي عرفتها كدبات علينا حنا عمممرنا كبرنا على الكدوب حسيت استحمرااااتني وانا بيدي وصلتها لعندو .... كرررهت راااسي قبييييلة والله ...كالسة كي لهبيلة كنتسنى صاحبتها تجي لعندها .... ونا لي مخرجاها نعايا نكلسو بجوج تفتح قلبها ليا .... فللخر استعملاتني
لامار : دابا تكككبر وتعقل .. راها باقا صغيرة هادشي لي قال ليها دماغها
قسم : انا راه وليت خااااايفة علييييها .. هادشي راه كااااارثة والله ... ايه مزيان يكونو عندها خصوصيات ولكن ماشي هاكا اماما !!!! ماشي بهاد طريقة وبالتخبية .... وهي حاليا اصلا حياة وحدة لي خصها تكون كتفكر فيها هي قرايتها ، الناس مساكن كتيتقااتلو باش يقراو فمدارس مزيانين وهي كولشي موفر وتابعة التفاهات ....
لامار : قدس ابنتي انا لي فقدتها زمان .. فقدتها فتربيتها ملي تلهيت مع مرض جود وماعطيتهاش الوقت الكافي ... دابا واخا نبغي نعوضها غتبقى لاصقة فالماضي ....
فسم :وراه هي خدات وقتها كتتتر من وسيم ، مال وسيم مدارش هادشي ديالها !! ..... واش حنا دابا غانتحاسبو معاكم على معاملتكم لينا ؟ نتحاسبو مع الوليدين على حبهم لينا ؟ كاين شي واحد مكيبغيش ولادو .. انا هاااااد الموضوووووع عصبني بما فيه الكفاااااية ..
لامار : وصااافييي ابنتي صااااافي راااااسنا طاااااب .. صافي هنيونا
رجاء : ( جات لعندهم ) مدام .. لعشا واجد تفضلو
قسم : انا مافياش غانخرج نشم شوية دالهوا ...
خرجات ولامار كتعيط من موراها
لامار،: قاااسااااام ... ياك نتي لي كنتي جيعاااانة .. اجي تعشاااااي متعصبينيييش حتى نتي .... وليتوا ليا بحال الشرااااايك فهاد الدار .. ففففففف منيييييين سلاااطيييييتو عليا تريكة المعكسييين ، اجي تعشاااااااااي ....
خرجات قسم لجردة وصلات لابسين وطوات سروالها من تحت وكلسات على الجانب خاشية رجليها فالما كتنهد ....
اسد تاهو بدل حوايجو لبس سيرفيت وخرج تاوصل بيت قدس .. دق جوج دقات خفاف وحل لباب .... شاف لسرير بانتليه ناعسة ومد يدو لفيوز خفيف عند راسها شعلو .... وهو يبانليه عشاها على طابلة متحركة عرف طلعوه ليها ومزال ماجاو ينزلوه ...
هبط راسو يشوف واش ناعسة ولا دايرها بالعاني بانت ليه بصح ناعسة وخدودها حووومر واضح شبعات بكا ..... وهو يلمح مذكرة ديالها على الطابل دونوي وستيلو وسطها ... تردد فللخر هزها لعندو ... وغطاها وهبط باس على راسها مطول كايدعي الله يحفظها ... وخرج مشا لبيتو حطو فالمجر تايقراه ويعرف اش كايضور فدماغها وخا عمرو تخيل يقرى مذكرات ولادو بهاد الطريقة ..... ورجع نزل فالدروج عندهم لقا غي لامار لي على طابلة العشا كاتسناه ، جر الكرسي وجلس
اسد : فين لوخرين ؟ دابا هاد تمارة كاملة باش ناكلو بجوج على طبلة ؟
لامار : ( كتنهد ) هانتاا كاتشوف .. قسم مقلقة من ختها علاش كذبات عليها ، راها برا ( اسد قلب عينيه للزاج، صال مونجي كتطل على بيسين بانتليه كالسة تما ) وقدس قالو ليا طلعولها قبيلة تعشا فاش كنت كندوش .. ونعسات ... جود قاليك قلبو ليه راسو بالهضرة فالنؤتمر راه مع صحاابو ....
اسد : ( كيشوف لاسوب قدامو ) ومالنا حنا هاد الدراري لاماكانوش مناكلوش ولا كيييفاش .. هزي تاااكلي .... ( كيشرب من لاسوب ) بقاي هازة همهم وهوما راه غايجي شي واحد يقلبهم على القبلة مايعقلوش عليك يولي هو لي كيضحكهم وهو لي كيبكيهم وهو لي كيفرحهم لامكانش هو مايفرحوش ، هبط بيه المورال ويطلع بيه حنا غانوليو غا داك الريوس لي ياخدو منهم البركة مرة مرة .... فييين تبقاي تباني ليهم نتي ... تهلاي تهلاااي فراااااسك ... لا هاديك لي برا ولا هاديك لفوق والله لاعقلوا عليك الى بان ليهم شي واحد .. مادوك الشباب تبارك الله نهار يلقاوووها راه يقلبو عليك فليلتهم اولا .....
لامار : ( جابليها ضحكة ) ضضحكيتني واخا ماعندي خاطر ههه ( كتشرب من لاسوب ) والله مكدبتي بالله ... حنا نموتو ونطلعو ونزلو هوما نهار يلقاو لي جيهم على الكانة والله لاتسوقو لينا .....
اسد : هههه ( مد يدو لشعرها خربقو ليها ) تعشاااي اروحي تعشاي ههه ....
الصباح الموالي ....
الاربعاء 4 يوليوز
اسد على للطبلة دالفطور بكوستارو مستعد للعمل والاجتماعات دهاد الصباح .... و لامار حداه تاهي بكوستيم انيق رسمي ... كايفطرو واسد كل مرة يشوف لساعتو ....
اسد : فين تعطل هذا ...
لامار : هههه دابا ينزل .. الحمد الله غير لي فاااق ههههه
اسد : هاد نهار غنبقى نجر فيه كيف شي قط على الحصيرة .... جووووووود ...
جود نازل فدروج مخخخخنننزززررر .. سروالو دالتوب ديال كوستار لالسو بسييييف وصباط لامع وشوميز صدافها مشدودين مخالفين شي طالع شي نازل مطرطقة عليه و الكرافاطا مامشدوداش مزيان والفيست هازها فيديه وشعرو مخربق ، ناااازل فالدروج كااااره الدنيا وعيينيه مبوووقين بالنعاااس معلي حااااجبو ....
واسد شاف معاه بداك الحالة بحال شي واحد لابس كوستار و الفردي عند راسو .... وكلس على طبلة مخنززرر لاح الفيست ... ولامار كضحك عليه
لامار : ههههههههه ... جووود والله اولدي الى هاااااد الشوفات هوما لي ديرتي لينا اول مرة غاندخلوك تقرا هههه ياااك ا ا اسد بحال هاكا فاق لابس حوايج المردسة ههههههعه
جود : ( علا فيها عينو مخزر ) لاااماااارر
لامار : هاهي ساكتة ههههه خوي ليه القهوة ارجاء خوي عههههه مغانسكتش هاد الصباح من الضحك ...... شوف الكرافاطا كيف داير ليها ههه داك الشوميز رديتي عليها الحر ولا كيفاش هههههه
اسد : قررب عندي لهناااا
جود : ( جبدها فعنقو حاقد ) داباااا هاادي علااااش مافهمتش !!!! .... علااش غنلبسها .. شوميز باركا ...
اسد : ( قرب عندو كيقادها ليه ) هادي غانربطك بيها مع شي سارية باش متهربش ..... بحالا هاز معايا بقرة غانبيعيها ماشي ولدي يمشي لخدمتو ....
جود : وخخخدمتك ا الواليد خدمتك .. .انا اراه غااانمشي نعااااونك وصافي
ادس : ( قادها ليه ) شكرا .. شكرا على هاد البليزير امسيو جود الاسماعيلي .... شكرا على المساعدة القيمة ديالك .. .شرب قهوتك راحنا معطلين ....
جود : ( كيشرب محقد وشاف عندو ) دبا اش غاندير تما انا
اسد : غاتسيق الدروج اولدي ...
جود : يالاه ، ها الطنز على صباح !!!
اسد وقف وسد صدفة كوستيمو بيديو وزاد ولامار ميتة عليه بالضحك ... جود شرب قهوتو دغيا وناض
لبانار : هههه آل ذاا بيييييست ماي هييرو هههه قاااد صدااااايف لاشمووويييز ههههههه يااااااربي على هاد الولد ....
جود رجع عندها وقف قدامها مزروب
جزد : قاديهم قاديهم دغيا داك هتلر عندك مكيتسناش
لامار : ( كتقاد ليه صدايف ) وهانتا اولدي سمع ليه لهضرتو ودير اش غايقوليك دابا تووووولف تولي تبغي تمشي بوحدك
جود : ودابا قادي قادي صدايف باركا من تخربيق عندي ربع سنين انا ...وداك الخرا كيهضرو بالفرووونسي انا راه داك الفرووونسيي نسييتها كاع ...
لامار : ههههه ( كتصاوب ليه وميتة بالضحك ) وا هز معاك دوز ميل فيغب فطومبيل سير كتراجع ....هانتا احبيبي لابغيتي تمشي ليطواليط قوليهم جوفو ألي اوطواليط ... عنداك فالاجتماع تمشي تقول لباباك ميطخييز مييطخيييز راه يكرط عليك لحيييتو ....
جود : كطططنزي الاماررر كطططنزي ... طلللق نصاااايبهم راسي تانا داير فيك عقلي ...
خلاه وخرج كايجري لان اسد قالب الدنيا بالكلاكسيون .... وركب فطموبيل ...
جود : صوني للوؤي وسلطان ... تاهوما بغاو يخدمو .... غااانمشيو كاملين ...
اسد : ( حلو ليه لبيبان خارج ) هوما لي بغاو يخدمو ولا نتا لي باغي تشري ليهم مونتيف على صباح
جود : اذا عمت هانت ......
طموبيل اسد وصلات للشركة وهبط ديريكت للاكاف فين كاين الباركينغ ، فرحان بوجود جود معاه وغايولي يجي رسميا للشركة ... كايحس بنوع من الفخر انه غايحضر معاه ولدو لاجتماع مجلس الادارة ويشرفو قدام الكل ، انه عندو ابن ، عندو خلييفة من ورا ظهرو ..... عندو رجل .. عندو شبل
منهار رفرف علم الروكان فوق شركتو وهو كايحلم امتى يجي ولدو يهز عليه المشعل ، وبدا حلمو ليوم كايتحقق .....
نزل من طموبيل هو يشوف عندو لي باقي فطموبيل
اسد : تبقى هنا !
جود : ( بتبركيم ) مكرهتش ...
نزلو .. واسد زاد لسانسور و جود تابعو .... تماما كشبل صغير تابع الاسد فأدغال الغابة .... الاسد لي باغي يعلم ولدو طرق الإصطياد ، طرق الدفاع عن النفس ، طرق العيش فالادغال .... تابعو من موراه بنفس الوقفة ونفس الكتاف و نفس النظرات .....
∆لفوق ...
داخلة موظفة كتجري كتلهت تاوقفات فواحد البوسط مجموعين تما كيجمعو
- ( كتلهت ) مااااايطييييحش فبااالكم شكون جااا مع سي اسد ليووووم ...
- ابشوية علييييك ( مدات ليها قرعة دالما ) شكووون !!!
- ( كاتشرب وشافت فيهم ) ولدووو
- ( وقفااات بحماس ) شكوووون !!!!! لكببير ؟؟؟؟؟
- هووووو ياختي هوووو ...
- ( وحدة اخرى نقزات ) فييين هو ؟؟؟ فين شتييه
- ( كترد النفس ) قبييلة نازلة من طاكسي وانا تبان ليا طموبيلتهم نازلة لباركينغ .... دابا و هما طلعو ... سسسسرررررربيو يلاه دغيا نطلعو
مشاو تايجريو لسانسور يطلعو لطابق لي فيه البيرو د اسد وقاعة الاجتماعات .... تلاحو كلهم على البوسط دالكاتبة د اسد كيقولوها ليها
الكاتبة : حلللفووووو بالله .... جااااي دابا !!! و .. سي جود علاش جا زعما ..
- قالو ليك كايشاورنا .... وراه جابو معاه يعني غايجي يخدم .... ياااااااربي ياااربي يولي يخخخدم هنا نلقاو غير فين نسقيو عينينا
الكاتبة : دابا صبرو .... واش غايولي رسمي معانا هنا ! ولوخرين ؟
- لوخرين غايخدمو مع باواتهم ... ناااري عرفتي كيفاش كايبان من طموووبيل ... اوووووووف كاااايحححمق ....
الكاتبة : بعدووو مني راني بخطيبي زعما الله يتبعكم البلا ... وقفو نيشان دابا هوما جاو يشوفوكم كتكركرو هاكا ..... وقفو متعييقوش ... ماشي تاني تشوفوه وتسيحو حداه ، حمد الله لي مجايش داك ولد سي عدنان هو لي كايسالي معايا انا ، نبعيه عليه خطيبي وخوتي وراجل ماما
- هدا لي جا دابا كايقولو عليه واحد بو بنات مامنو .... ماشابهش فباه ... .
- ياكما حيت لبارح وقع ليه داك المشكل سي اسد بغا يعاقبو وجابو يخدم !
يلاه كايهضرو والسانسور تحل .. خرج اسد وهوما وقفو بزربة مهبطين راسهم باش ميعيقوش كل وحدة شادة طابليطها و جود من موراه محاملش راااسو ساخط ... وهوما كايطلعو عينيهم من تحت لتحت يشوفو فيه كايعضو على شفايفهم والكاتبة وقفات
- مرحبا موسيو الإسماعيلي ، مرحبا موسيو جود
وماو ليها براسهم أما جود ماطلعش راسو كاع ودخلو للبيرو غير سدو لباب مشاو كايجريو عند الكااااتبة
نااااااري غااانسسسسخف غاااانسسسخف ...
الكاتبة : اجمعو راسكم انااااااري ، ماشي حاسب شوية فراسو لا !
- وشكون بغيتيه يحسب فراسو نتي !!! شفااااارو كبر من شفاااري ولد اللذيينة على عينين عندو غانبات نححححلم بيه
- يلاه يلااه نزلو راهم عندهم اجتماع يخرجو يلقاونا باقين هنا ..... مدام جاي لابس الرسمي راه غايخدم
∆فالبيرو ...
كالس اسد بعد ماعلق الفيست لور بقى غير بشوميز و جود قدامو فالكرسي وهو كايشرح ليه
اسد : دابا نتا مغادير حتى شي حاجة ومغاتشد حتى شي بوسط هنا .. نتا اتبقى معايا فالبيرو حتى تتعلم ... داكوغ !!
جود : دابا شغاندير انبقى مقابلك مافهمتش
اسد : تقابلني اولدي انا كنروض هنا الكلاب ... نتا غاتشوف بعينيك غاتحفض غااتقيد فداك دماغ عندك .. ليوم كاين اجتماع مجلس الإدارة .. غادخل معانا غاتسمع اش واقع غاتعرف السيستيم ديالنا الميزانية دهاد الشهر ، الصفقات الجداد ... وقيد فدماغك مزيان ... مفهووم
جود : وا مفهووم ... مفهووم .....
اسد : لا راه خصو يكون مفهوووم .....
جود : دابا انا غابقى كالس حداك هنا .. منخرجش منشوفش انا على برا ! .... والاااا الواليد
اسد : واش انا داير ليك السلاسل .. بغيتي تخرج خرج ...
جود : ( علا راسو لفوق ) بغيت بيرو
اسد : ( ربع يدو فوق للبيرو مسايرو) اش غادير فيه
جود : وانا لاش جاي اصصصلا الا مغاندير والو
اسد : اياك نتا بغيتي تجي .. ضربتك على يدك انا
جود : واااااشتي دابا الارستوقراطية كيدايرة .... منهار خديت لباك وانا كنسمع الكاسيطة ديال اجي معايا لشركة .... ونهار قتليك واخا ، رجعت دابا انا لي بغيييييت ....نتا ارستوقراااطي الواليد .....
اسد : ( تنهد وحنا راسو على ضواسا ) علاش ؟ ماكنتيش باغي تجي !
جود : واااايييلي واش انا نعست هاد الليلة بالفرحة الواليد ... كنت كنتسنى غير صباح يصبح
اسد : ( مد ليه داك ضواسا ) واهاهو صبح .... قرا هادو .... ومنبعد قول ليا ديالاش
جود : ( كيشوف فيهم ويشوف فباه ) علاش نتا ماعرفيتيهمش ؟
اسد : ماقاااريش انا .. قراهم ليا نتا وقول ليا شنو تما وعلاش وقعت تما نشوف واش كتفهم شوية ولا خصني نبدا معاك من اللالفابي ...
جود هبط عينيه على الضواسا واسد حل البيسي ديالو ...
جود : ( شاف فيه ) شي حاجة خاصة هنا بالميزانية .... مافهمتش مزيان
اسد : قرا مزيان ...
جود : واش الخصم دالضرائب ...
اسد : فوالا ... يعني هاد الصباح وصلونا الخصم دضرائب ديال هاد الفرع ... كنوقع عليهم باش يتنقسو من الميزانية .....
جود : وهاد الضواسا هادو ... ضروري يوقع عليهم غير المدير
اسد : حتى المدير العام يوقع ...
جود : وشكون هو المدير العام هنايا
اسد : سيادتك الى هداك الله ....
جود : وااات !!!! ...
اسد : مروبلاصيك السيد دابا ... تانشوفك قاد بداك المنصب ... وغاتشد بلاصتو ....
جود : ( رد ليه الوراق ) الا الوليد ... انا ماباغيش نتأونكاجا هنايا .... نتا عارف اش باغي
اسد : هاداكشي لي باغيه نتا غايكون تابع لينا .... فجميع الاحوال غاتبقى المدير العام ....
جود : كيفاش تابع ليك ! فروع الروكان تجارة وسياحة اش دخل لاميكانيك فالموضوع
اسد : هاددوك الطموبيلات لي غاتوجد .. اش غادير بيهم ؟ تستفهم فالباركينغ عندك
جود : غانبيعهم
اسد : اوا ها التجارة ...
جود : دابا باغي دخلني معاك باي طريقة وصافي
اسد : ( شاف لعندو ورجع كحز عليه البيسي و حيد نضاضرو ) جود .... انا اولدي هادشي فنيت عليه عمري .... فنيت عليه شبابي كامل .. الى نتا شبابك كتعيش فيه انا راه داز ليا كولو قراية وخدمة .. مارتاحييييتش .... ملي توقع ليا انا شي حاجة او جات الموت .... هادشي تبغيه يضيع !!! ...
جود : اشمن موت الواليييد يهديك الله ....
اسد : علاش انا قالولك خالد هنا فالدنيا ! .... واش عارف باك باش كايحس فاش كيشوف شي كليان جاي وجاب معاه ولدو لي كينوب عليه .... . وانا ولدي مكيعرفش تاشركة باه فين جات ! لمن تنخدم هادشي ! ... بغيتي تبدل مجالك وكتفهم فلاميكانيك وكترتاح ليه بتوووفييق اولدي غير هو غايكون تابع لهادشي لي فنيت فيه انا .... وخدم بسمية الروكان ....
جود : ( بقى كيرمش شحال وشاف فيه ) راه سمية الروكان الواليد فوق راسي وعينيا ....شرف ليا نخدم بسمية الروكان ... واش انا مغانبغيش السمية لي فين ماكنسمعها كنحس بالافتخار .... ولكن انا منقدرش نخدم بهاد الطريقة لي كتخدمو نتوما .. عندكم مسؤوليات كتيرة عندكم صفقات عندكم التزامات مع الناس .. انا منقدرش نلتزم .... منقدددرش نبقى عااقل على الصفقات شنو وقعت وشنو لا .. انا ايه باغي لاميكانيك .... ولكن باغي نخدم الييييز .. حتى الادارة مابغيتش نكون فيها ... بغيت غير نرسم ونصمم و نخدم داك طموبيل بيدي .... ونشوووفها كاتحرك فارض الواقع .... ماباغي تاحاجة اخرى ..... راه منقدرش .. كيغاندير نشد التزامات نصبح ناسييييهم ! وا حس بيا الواااليد ، الشيك هو اللهر غانساه امتى غايتدفع ....
اسد : هادشي راه فراسك غير نتا ... الا بقيتي كاتگول هاد الهضرة عمرك غادير شي حاجة ... ملي كايكون عندنا واحد المرض حنا كاع مكنعيشوش على قبل المرض ، حنا كنتعايشو مع المرض ، كنخليو المرض هو لي يعيييش معانا بطريقة لي حنا عايشين بيها ... كنوليو لقاو طرق لي نقدرو نخدمو بيها فالحالة لي حنا فيها .... النسيان لي تايوقع ليك او نوبة لي تتجيك ..الا نساتك فالتزاماتك راه كاينة مذكرة كاينة اجوندا كاينة كاتبة غاتفكرك ... الى كانت عندك الذاكرة مضطربة نشريو ليك ذاكرة حطها حداك تفكرك بحتى شنو كليتي .... باك ملي كان كايبغي يشوف فيلم ومقادرش يسمعو كان كايقلب ليه على الترجمة ... باك ملي كان كايصوني ليه تيليفون وميقدش يسمعو كان داير ليه سنسلة فعنقو ... باك ملي كان مكيقدش يسمع شكون كايدق عليه فالبالب كان داير لومپ كاتشعل ليييه فالبييت ... اي حاجة مخلانيش مرضي نديرها بالطريقة الطبيعية كنلقى ليها طريقة اخرى ... الى مكانتش كنصنعها .... مهم مغانگلسش .. مغانشوفش فالسقف ونقول انا مافيدي والو وانا ماقادر ندير والو وانا مريض ..... لا .... انا مريض اه ، ولكن غانخلي المرض هو لي يعيش معايا ، بالطريقة لي انا بغيتها .....
جود : ( تنهد ) يكون خير الواليد يكون خير ....
اسسد : فوالاااا .. هاكااا بغيتك تهضر ... الحياة مغاتساليش اولدي ومغاتوقفش على المرض ديالك .. العالم خدام والكرة الارضية كدور والشمس كتشرق وتغيب .. مغانربعوش حنا يدينا .... المجال ديالك لي باغي دير زوييين انا معاك فيه ولكن محتاااج لبزاف دالتمريس فالتجارة ... وفالتسيير ... خاصك تتعلم وسير الله يوفق ...
يالاه غايجاوب جود وهي تدق الباب ودخلات الكاتبة
- موسيو اسد ، الاجتماع واجد ...
اسد هز لي ضوسي ووقف وجود تبعو كايحاول يتألقم مع الوضع ، مكرهش يكون فخر لباه ويفتاخر بيه قدام الناس .. الهضرة لي قال ليه حس بيه انه مكرهش يتباهى بيه قدام الناس ... ولكن مرضو كايعكزو ويخليه يخاف يدير شي حاجة وينساها .... كايحس براسو فاشل فكل الاحوال...
وصلو لقاعة الاجتماعات والكل كان عارف جود جاي لان الخبر شاع فالشركة .. الكل وقف يحييهم وهوما داخلين ... جلس اسد فالمكتب ديالو ووجدو كرسي جود على اليمين ديالو وبدا الاجتماع ، كان الكل مركز مع جود وهوما كايشوفو نسخة مصغرة على اسد جالسة حداه .... كان كايحاول ما امكن يركز ووالو كيقلى راسو كايلعب بشي ستيلو ، تاكيسمع تحنحينة باه عاد كايرجع يتوكض .... داكشي مابغاش يدخل ليهم لدماغو قوة الفرنسية و هما كيهضرو بزربة و الرسميااااات بزاف وكولشي منضبط جاه فشكل .... هو مولف يكون حر ويكلس كيف بغا ويهضر كيف بغا .. حس بالخنقة والصهد مقال حتى كملو داك الاجتماع ... عاد جاه الفرج بحالا دق عليه الجرس
وخرجو من الاجتماع غير وصلو لبيرو جود حيد الكرافات و رخف الصدايف دالشوميز كايتنفس
جود : فروونسي فروووونسي ... مكايعياااوش .... الفوكابيليغ عندهم مافيهش سطوكاج ....... مافهمتش انا واحد سميتو عبد الهادي كايهضر بالفرونسي .... مال لعربية ابنادم مااالها فاااش ضراااتك ....
اسد غير كايضور فراسو كايسمع لتبركيمو وشعل البيسي وجر الكرسي واشار ليه ....
اسد: اجي جلس هنا ...
جود بقى غير كايشوف انه قاليه يجلس فبلاصتو ومشا كلس واسد قرب ليه البيسي ...
اسد : كاينة واحد البعثة لتحت كتسناني ... الكاتبة غاتدوز ليك دابا الميزانية لي كنا نهضرو عليها قبيلة ... غاترتبها من 50 فالمية .. حتى لتمانين .. داكشي يجي مقااااد ... منين نصوني عليك نزل عندي لتحت تلاقا بيهم
جوود : ( حك فشعرو ) كيييييفاااااش ! اش نديييير ( اسد دار فيه نظرة ديال نوض نخلطك ) الوااليييد ... داك نقييييشة دالعقل لي عندي بغيتي طيرها ليا دابا تاهي ياك ....
اسد : ( سد عينيه كايحاول يصبر راسو ورجع شاف فيه ) اجووود اااوووولددي .. غاتسيفط ليك الكاتبة الميزانية ... غاتسيفطهاليك فالوورد فيها كتر من مية باج كل باج كتمثل واحد لاصوم .... هادوك لي صوم نتا غاتحسب ليا شحال جات فيها ديال خلاص الشيكات ديال الشركة فالمية ... يعني غاتحسبو بالبورسونطاج ..... مثلا لباج لولا لاكان فيها 800 الف درهم غاتحيد منها 50 الف درهم ومنبعد تحسب داكشي بلبورسونطاج شحال جات و غاترتبهم ليا من خمسين فالمية لتمانييييين .. ..... ففهمممتي
جود : ( كايرمش فيه ) ش شنو لي اانرررررتب !!!!
اسد : ( شد عى راسو ) ... وا داك الطاولة اولدي لي قراوك فيها كان نااااايض فيها الخرررررشف .. يااااك هادشي قرييييتيييه !!!! ماااال والديك دابا !!!!
جود : و دابا غاا بشوية ، شديت غا بروسونطاج وخمسين فالميا .... ( اسد خنزر فيه ) دابا غاتوصلني الميزانية فهمتها ... راني فهمت .. دابا لي باج لي فيهم لي صوم .. داكشي كايكون مكتوب كل باج غايكون مكتوب فيها شحال فيها فالمية ياك !؟!
اسد : ملي غاتكون لاصوم محسوبة و مكتوبة فيهم بالمية ، نتا اش غااااادير
جود : غاااانرررررتب
اسد : ( وقف كيشوف ) عرفتي اش ادير ... نوض مسح الغبرة نتا حسن .... وسيق ورتب داك الكتوبا لهيه ....
جود : تا لا الواليد دابا راني فااااهم .... غا هو داكشي ديال لحساب بالبورسونطاج وداك ليكسييل رااااه نسييييتو
اسد: ملي باقي مفكر الميكروسوفت سميتو ليكسييل راك باقي مفكر كولشي... ( كيلبس الفيست ) كاتنسى غير لي عجبك نتا
جود : والله تاااااحگرتي عليا بالله ... وتمااااااارة فهادشي .. غانبقى نحسب تال غدا
اسد : تابعاك شي حاجة .. نصوني عليك نزل عندي ....
خلاه ومشا وجود بقى يدور بداك الكرسي كايتسنى الكاتبة تسيفط وغير كايسووووط عارف اجاب مايفكو هاد نهار ندم علاش جا .. هو يهز تيليفون كايصوني لوؤي .. مدة تاقرب يقطع عاد جاوبو بصوت ناعس
لوؤي : اش كاااين
جود : وااايلي باقي نااااعس !!!!
اوري : ( كيحك عينييه ) واش باليك
جود : الشباب دوالو ... ناس ناااضو ولبسو وفطرو ومشاو لخدمة ونتا ناعس ....
لوؤي : ( كايشوف لتيليفون يتأكد من الرقم ورجع حطو فودنيه ) ياك جود لي معايا
جود : انوووض تككككعد واش انا نخدم ونتا تنعس نوض اجي قاليك الواليد اجي حسب معايا الميزانية
لوؤي : ( كيرمش بعينيه ) اش كاااتخربق عليا دابااا على صباح ....واش انا ماعااارفش تاشنوا هو اليوم .. اشمن ميزانية
جود : وكنتسناك تاتجي باش نعرفها شنو هي ..
لوؤي : دابا يا اما بااااايت سهراان فشي قنت ويلاه داخل وجاي مطلعها عليا ، يا اما كتقلب عليا فهاد صباح ..... دور تقود خليني نعس
جود : واااااابربي لانعسيتي ... غااااتلبس وغاتجي لعندي لهناااا ، را الواليد غايسخط عليك ... تبغي السخط
لوؤي : دابا اش قاليك
جود : كاليا عيط لولد عمك يجي يحسب معاك ...
لوؤي : شتي نتا لديييلمك حتى كون حلفت منعاودش نجاوبك فتيليفون وكنرجع نجاوبك .. لان عمررررك عيطتي على خبار زوين ... ديما جايب معاك غير الخباااارات المقودين كي وجهك ... غانولي كاتب على نمرتك الغراااب الكحل
جود : كتب تالكوالا غا سربي اجي قبل مايسخط عليك سربي .... ونتا صابح ناعس واش لي سينغل كايصبح نااعس ! نتا مااااعندكش حدامن تصبح ناعس اللهم فيييق ....
قطع عليه كيضحك بشر ودوز الرقم دسلطان ... ثلاثة دالمحاولات عاد جاوبو تاهو كايتفوه
سلطان : ( بصوت مدعدع بالنعاس ) الميكانسيان
جود : تكعد اصاحبي والله تاعيقتو بهاد النعاس ، ناس قضاو غاراض ونتوما عاطينها لشخير .. مافهمتش انا اش كايعجبكم فهاد النعاس ....
سلطان : اشووف آه ..الصباح هذا ... فيك شي زهااايييمر مووووت لهيه ... بلا متدخل ليا التناوي على صباح ....
جود : انوض تكعد الوليد قاليك اجي لشركة مانعرفت اش بغاك ..
سلطان : شكون .. عمي اسد ؟؟
جود : عندي شي واليد آخر نسيتو !
سلطان : علاش .. اش درت ... زعما اش بغا
جود : وانا عرفت .. قاليك نحسبوا الميزانية
سلطان : ديالاش
جود : دالق*ااب شحال كنخسرو عليهم فالعام باش تخرج عليهم فلوس العشور ... انووووووض تكعد
سلطان : مال الق*اب ..
جود : راه كاليك 5 دقايق متعطلهاش خاصك تكون هنا ... لوؤي راه جاااا مع سبعة دصبح حل معاهم البيبان... بقيتي غير نتا
سلطان : دابا اشمن ميزيانية غانحسبو حنا على صباح انا حاااااسب تا فلوووووسي ...
جود : ونوض نفض الغبرة على داك إدارة الاعمال لي قراو ليك ولحق عليا
سلطان : عقلت انا تاعلى جدول الضرررب ( لاح عليه ليزار ) انا جااااااي انا جاي .... فين عمرني نصبح عليك ويطلع النهار مزيان ....
قطع عليه وجود عاد طلع ليه المورال ملي غايجيو عندو كان مخنوق بوحدو وكايتسنى فالكاتبة تصيفط ليه .... واسد نزل لتحت لفين كايستقبلوا البعثات ... كانت بعثة من امريكا متكونة من تسعة درجال وتمنية د عيالات كيناقشو صفقة جديدة ... والموضفين الجو مبدل عندهم فالشركة ملي تما جود ... و لا هو حديث الساعة فالشركة ... حتى وصلات طموبيل لوؤي لي طلع تاهو من الباركينغ ، تاتحل بيه السانسور شافتو الكاتبة وهي تطيح ليها لاباغاي دالفيكس من يديها ورجعات هزاتها كتفتف ووقفات
الكاتبة : موسيو ل ... لوؤي .. مرحبا ليك ...
لوؤي : ( صغر عينيو فالبروش ) أح لام .... ميغسي أحلام ..
الكاتبة عضات على شفايفها بفرررحة عينيها لمعو ودخل لبيرو وهي طارت دغيا على التيليفون كتصوني تقولها للجمييييع ....
لوؤي دخل لقا جود خاشي وجهو فالبيسي غير شافو هو يوقف
جود : ولد ععععمي لعزييييز ..... ( جر ليه الكرسي ديالو علاش كان كالس ) المرررضي دالاسماعلييين .. تتتفضل .... الكرسي دالروكان كااااامل غاااتشرفنا وتجلس عليه ....
لوؤي : ( لاح سوارتو على البيرو ) واش شارب شي حاجة
جود : واااشتي دابا حنا كبرنا بيك ونتا لتختينا مع الارض .. اجي تكككلس هنا .... عرفتي كيغاتبان على هاد الكرسي ....
لوؤي بقى يرمش وضور عندو لبيسي ورجع شاف فيه
لوؤي : باغي فيا الخدمة
جود : دابا حنا علاش عائلة علاش .. حنا علاش كنيتنا الاسماعيلي .. باش نوقفوا مع بعضياتنا . فالحلوة والحارة وفالميزانية وفالحساب وفكرسي دروكان .... أزمات بحال هادو خصنا نكونو واقفين فيهم مع بعضياتنا
لوؤي : دابا الكرسي ديال باك أزمة امسخوط الولدين .... والله مكتحشم بالله ...
∆عند الكاتبة
طلعو عندها لوخرين وتزادو وحدين اخرين عليهم
- نااااااري حلفي تاقااال سميتك
الكاتبة : والله حتا قاااالها قراها لياااا هناا ( اشارت البروش فصدرها ) قالها بحال هاكا ( غلضات صوتها ) اح . احلاام ... ااااااححححلاااااام
- ( ساهين معاها ) احححححلاااااااام
- (نقزات وحدة) ماشي نتي لي عاد كنتي كتقولي لينا تبتو و عنداكم تسيحو ... اشنو نعيطو لخطيبك !
الكاتبة : توما راه لووووووؤي الاسماعيلي وناااااااري على شوية كنت غاندوووب صاااافي كان باقي ليا قد هاكا ونقوليه شي بوووووسة الله يرحم الوالدين
- دابا علاش جا مافهمتش ؟ واش تاهو غايخدم زعما هنا ! مغايكونش مع باه ؟ ....
الكاتبة : لا منضنش ماقال ليا موسيو اسد والو ... وحتى جود مقالش ليا نصاوب ليه البيرو ديالو .. يمكن غير جاو وصافي .. ( شافو عند وحدة مسمرة بحال شي شاشة مبلوكية ) حناان ... حناااااان امالكي ؟
شافو لفين كاتشوف هو يبانلهم سلطان جاي كايحيد نضاضرو وكيرد شعرو لور كايشوف مع جنابو ماعقلش تا على البيرو فين جا ...
- ( بدون شعور ) اماااااااالكم على هاااد الزيييين كامل بغيييييت ليييكم مووووصيبة
- الما المااا .. الما ابنات الحرااام ... المااااا
وصل لعندهم سلطان والكاتبة اللسان باش غاتكول مرحبا مشا ليها ، تبسم ليهم بعينيه وضار دخل لبيرو و هوما وحدة تكات على وحدة تاتكركبو على الكاتبة كلهم سخفانات.....
∆ لداخل
لوؤي : هااااااهو جا ... جابك الله
يلا سمع داك جابك الله عطا بضهرو جا راجع هو يشدو لؤوي دغيا
لوؤي : والله اوووولدي ماعندك فيييين غااتهررررب غير شد الاررض .. الميزانة غاااتحسبها وربي كيير
سلطان : ( شاف عند جود ) واش دابا نتا هاد باك عندو هاد الشركة قد السخط وماعندوش فيها كونطابل .. نجيو حنا نحسبو الميزانية ..
عند الكاتبة ..
- صافي اهيا جمعوا راسكم شويية غادي يعيقو بينا .. نوضو رجعو لخدمتكم ....
الكاتبة : هادو من الاحسن مايخدموش هنا ، والله لاركزات شي وحدة فينا .. باركا نشوفوهم غير فتصاور ....
- وشحااال مصووووااابييين شششفتي الابتسااااامة حسيت مصااارررني ضحكو ليه
يلاه كيهضروو هي تجي الفرفارة دالشركة لعندهم كتجري تلاحت على البيرو
- بصاااااح هادشي لي سمعت
الكاتبة : صافي .. ملي جات هادي الله يخلف الله يجعل البركة
- ولاد الاسماااعيييييلي هناااااا ولا كدبو عليا
- كدبو عليك اختي نرررجس كدبو عليك
نجرس : ياكم المسموومات بغيتو الخبزة تاكلوها غير بيناتكم ( شافت لفوق ودفعات شعرها ) حييت عاارفيين نرجس الى جات بزيييينها تجمع ليكم حب وتتتتبن .... عارفيين متباااااانوووش حدايا
الكاتبة : هههه والله تاضحكتيني ومافياش ، على حنا وصلنا لداك السطاج لي نتصافو فيه قدامهم .... حنا اختي مطامعين فحد ... كانشوفو من بعيد ونتنهدو باراكا علينا
- قوليها ليهاا ، حسابتها غانطيحو ليهم السروال ...
نرجس : و اش عندكم تعرفو ... ياك من ديما كانقوليكم انا زوووجي المسسستقبببلي غايكووون شي ميلياااااردييييير مللعق.. ( قادات شعرها ييديها ) الى منطييحش واحد فيهم اليوم انا ماشي نررررجس ...
- اسيري تكمشي والله ويعيقو بيك تاتبقاي لا خدمة لا الملعق ... سيري تكلسي راهم موالين الشي هادو
نرجس : ( عضات على شفايفها وشدات على قلبها ) ياااااخخختي تخيلو معااياا انا فالعمااارية والصحافة كتصور وتصاوري فالجرائد كاتبين عليا العروووس والكنة الجمييييلة و الجداااااابة للعائلة المخخملية .. عاااائلة الاسماعيييلي
- تهلاو البنات تهلاو .. متنساوش تفيقو هادي تمشي لخدمتها راه واحد البعثة لتحت كتسناها تكتب تقريرهم ....
خلاتها ومشات ولوخرين كايشوفو فيها
- واااااا العروووس الجدابة ... افيقي ابنتي سيري لخدمتك
نرجس : اشمن خدمة اشمن و ولاد الاسماعيلي هنا وانا نخدم اصلا واحد فيهم غايكون راجلي يعني انا غاااانولي غير نآمر هنااايا .... ( شافت عند الكاتبة ) احلاااام .. واش راهم هنا فالبيرو
الكاتبة : ياكما باغا دخلي
نرجس : ( عضات على شفايفها وقادات شعرها ) غاااندخل احبيبة
الكاتبة : اهاه واش غاتقوليلهم ؟ ياكما غتقوليلهم جايبة ليكم اتاي !! .....
نرجس : ماشي سوقك هادي خدمتي .....
- لا لا هادي تسطاااااات .. غاتجيبيها فراسك ياهاد البنت ....
متسنطاتش ليهم قادات شعرها وجبدات عكراها عكرات مزيااااان و دفعات صدرهها دفكاتو لقدام وزادت فتحت صدايف الشوميز و هزات واحد الضوسي كان محطوط على لبيرو دالكاتبة ودقات والكاتبة حالة فمها فجرئتها .. وهي دخل وسدات لباب.. وشافت عندهم كتحاول تبين انوووثتها وهوما كانوا مجموعين على البيسي لوؤي جالس وجود وسلطان واقفين ، طلعو راسهم كيطلعوها ويهبطوها وكايشوفو فيها بمعنى اش بغيتي ، وهي فاش شافتهم مباشرة زاااادت ذااااابت وساااحت و بدات كتحاول تخرج صووووت محححلون مزيرة على سناااانها كتهضر بالشيكي..
نرجس : اا . س سلاااااام ... ا . انا نررجز .... و وبغيييييت .. اااء .....
جود : اهاه
نرجس : ( شافت ل USB محطوط حداهم ) ل يووإيزبي ديال الشركة الا جات على خااااطركم
جود : نعااام ؟؟؟ اش بغييييتي !!!!
نرجس : ( كتعض على شفتها وتفرك فيديها وكتجبد دااااابت مع هضرتو ونظراتو وقالتها بتحلوين كتر مزيرة على سنانها) اليووووإيييزبي
لوؤي : هاااا !!!!!!!
نرجس : اليوو ايييز بي
جود : ( بالهمس بينو وبين دراري ) زبي !!!!!! اشنوا كتقول هادي
سلطان : اش بغيتي ياهاد المخلوقة ...
نرجس كتحك وتلوا وكتومي ليهم بعينيها للبيرو فين محطوط وهوما شافوه عاد فهمو
جود : اليو ايس بي !!
نجرس : وووووي .. هااااادااااك
سلطان : خاسر ليها السين هاد خيتي ... ( مدو ليها ) هاك اختي هاك ....
جود ولوؤي وسلطان وحلو وحلة دالكلاب مع الميزانية كل واحد منين كايحسب وكل واحد منين كايتفهم ... كاع فهاماتهم خرجوها مرة يتناقشو مرة يضحكو مرة يطنزو حتى صونا تيليفون جود ...
جود : آلواليد
اسد : نزلو ...
جود : نزلو ؟ انا ومن !
اسد : راني عارف الدراري معاك لفوق ... درتيهم فبالك هانتا جبتيهم ....
جود : ( سلطان ولوؤي طلعو فيه عينيهم فاش سمعو اسد اش قال وهو حاول ييتسم وحك مور عنقو ) هاحنا نازلين دابا .. هااحنا ...
قطع عليه وناض بهدوء عارف راسو شنو داير مكمش عينيه مستعد لشي ضربة تجيه فراس ...... وسلطان كايشوف فلوؤي مامتيقش ...
سلطان : نتا علاش جيتي ؟!!!
لؤوي : جود عيط ليا ...
سلطان : على ماشي نتا لي جيتي بكري ! مع سبعة؟
لوؤي : اشمن سبعة جيت قبل منك بنص ساعة ...
سلطان علا عينيو فجود يلاه غايزف عليه بالكرافوز لقاه هرب ليه وخرج دغيا ... وشاف عند لوؤي
سلطان : كيجاتك الشمتة اولد عمي
لوؤي : كيجاتك نتا راه جاتني حتى انا ( قاد وقفتو ) ابلاتي عليه .... ابلاااااتي ....وبربي فيييه لابقات ....
تبعوه تاهوما نزلو ، جود كان تحل ببه السانسور لتحت هو لول ومابغاش يزيد كايتسناهم تايجيو ....
متكي على واحد الحيط وكل مرة يتبع وحدة بعينيه ... لتحت كان كولشي منظبط والكل مقابل البوسط ديالو ... منغير وحدات قلال كايشوفوا غير منبعيد وماباغينش يبينو حداه ... كل مرة يتبع وحدة بعينيه غالبا كايركز على المؤخرة تاسمع السانسور تحل وشاف لعندهم نازلين ودار واحد الضحكة عريييييضة زعما ماداير والو .....
جود : ماااااي دير كازنزز ( ولاد عمي لعزاااز ) لي كايوقفو مع ولد عمهم فالازمااات ....
سلطان ولؤي كايشوفوا مع جنابهم ويحاولو يتبسموا للجميع خصوصا انهم محط الانظار وقربو عندوا كايهضرو تحت سنانهم
سلطان : برررربي ماتبقى فيك ....
لوؤي : نردوهاليك فساعة الخير
جود : ( كايسمع ليهم ومتبع البنات بعينيه ) الخدمة هنا حسن من الفوق ....
سلطان تبع واحد خيتي دايزة حداهم مهبطة راسها حشمانة حيت جود كايشوف فيها بطريقة معيقة ... ورجع شاف فيه
سلطان : زيد اولدي زيد ....
لوؤي زاد قدامهم وهوما تبعوه تاوصلو لقاعة لي مستقبلين فيها البعثة وحلو لباب ....
كانت قاعة عبارة على طاولة طويييييلة عليها المشروبات والحلوى ... ولي فوطوي جالسين عليهم .... وشاشة كبيرة فالحيط شاعل غيها اللوغو دالشركة ... والمسؤولة دالشؤون العامة هازة طابليطها بهندام انيق و نظارات طبية عند الراس د اسد ... غير حل لوؤي لباب تبسم للجميع و بادلوه نفس الابتسامة حياهم براسوا وتقدم ودخلو م موراه جود وسلطان ... لي فور مادخلو للقاعة ملامحهم تبدلات وولات جدية كتر .... والكل كايشوف فيهم واسد متبع ليهم العين بواحد النوع من الافتخار ... ثم قدمهم للبعثة بالانجليزي .....
- السيد كارنتن : متشرفين بالشباب .... سعداء بوجودكم معانا اليوم ... ولفنا نتعاملو غير مع الاباء ....
اسد : كنضن خصكم تبداو تتعودو على وجوههم ... لانهم خليفة الاباء ...
لوؤي وسلطان شافو فاسد اما جود غير كايشوف قدامو ولوؤي حاول يبتسم ..
لوؤي : الشرف لينا ...
السيدة ماديسن : دراستكم سالات ولا باقين كاتقراو ... بغيت نقصد انه موازاة مع الهوايات لي كاتمارسوها بحال كرة القدم وسباق السيارات .. واش منضمينها مع الدراسة او ساليتو !؟
اسد غير جالس ومربع يديه داير صبعو الصغير ففمو كايحاول يكتشفهم ويحاول يشوفهم كيفاش كيتعاملو مع المجتمع الخارجي ..... مابغاش يتدخل ....
سلطان : الكورة ... ولا الرالي .. هوما ماشي هوايات ... هوما إيطارات عطيناهم لراسنا ... كايمثلونا وكنمثلوهم .... مغانقولش انهم مهنة ... فنفس الوقت مغانقولوش عليهم مجرد هواية ..
السيدة ماديسن : كنتأسف ماقصدتش ابدا التصغير .... لي واقع هو كانعرفوا ان عائلتكم كلها مرتبطة بمجموعة الروكان البحرية ... الا بغينا نوضحو كتر .. عالم البزنس والاعمال .... يعني راه واضح الابناء غايكونو خلفاء واليديهم .... حنا كانعرفوا اخباركم اكيد .... داكشي علاش كانضنو ان اش كتمارسوا هواية فقط مضيعين بها وقتكم بين ما جهزتو للعمل يمكن .... او لا !
جود : ( تحنحن وقرب عندها ) مضيعة الوقت مكتكونش فالرياضة لي كيتكلمو عليها جميع الجرائد العالمية والمواقع للاخبارية ... مضيعة الوقت مكتكونش فالرياضة لي الجريدة ديالها كاتباع وتقرا وتستهلك كثر من جرائد البورصة ....
السيد كارنتن : ولو ! ... كيبقى داكشي غير تخربيق ومضيعة وقت .... بنسبة ليك نتا وولاد عمامك ....كاشبال الاسماعيلي خاصكم تكونو فمشاريعكم دابا ... خاصكم تكونو فسوق البورصة ... خاصنا نشوفوكم درتو الضوبل ديال اش دارو واليديكم .... ( اسد بدا يرمش بعينيه هنا ولهيه عرف الا هاد الهضرة غاتنوض فيهم الهبال وساكت ماباغيش يدخل باغيهم هوما لي يردو ) ميمكنش واليديكم كافحوا باش يترفع اسم الروكان فالاعالي .... ونتوما تبعو الرياضة ....
سلطان : ( شاف عند كرشو الكبيرة ورجع شاف فيه ) كنفضل اني نتبع الرياضة ..... على انني نتبع عالم الاعمال بطريقة عمياء لي متخلينيش قادر حتى نهبط نربط سيور سباطي ...
الحضور وسعو عينيهم وداك الشخص شاف لكرشو الكبيرة ورجع شاف فيه و اسد بدا يرخف الكرافات ديالو جاه الصهد .....
السيدة ماديسن : كنشوفكم منقصين من مجال ادارة الاعمال ... رغم انه مجال واليديكم .....
لوؤي : ( تحنحن وتقدم ) ماعنديش علاقة بمجال الرياضة ... لكن عندي علاقة باصحاب هاد المجال ... الرياضة مجالهم ، والادارة مجالكم .... بما انك نقصتي من مجالهم .... غاينقصو من مجالك .... معادلة جد واضحة .....
وبما اننا كلنا هنا دارسين ادارة الاعمال ... اول درس كانقراوه فالمناجمنت ساينص " علم الادارة " ... ولي مسطر عليه بالخط العريض .... احترام رغبات الغير فالولوج لمجالات مختلفة .... وبما انك نقصتي من مجال كبير بحال مجال الرياضة .. نتي راك خرقتي اول درس فادارة الاعمال .... ( شافها مطرطقة فيه عينيها ) هذا لي دوا معاك دابا غير واحد خدا اجازتو فادارة الاعمال ... اما الى هضرو معاك ( اشار لسلطان وجود ) اصحاب الماستر MBA " ماجيساير ادارة الاعمال " ... غايصححو ليك كتر مني ......
السيدة ماديسن : ( تلعثمات ) ح حنا ماقصدناش هاد الكلام .... حنا شفناكم اشبال صغار .. و شفنا اخر الاخبار وعارفين جنون الرياضة فين خرج السيد جود ... وقلنا هادي مناسبة تلاقيناكم فيها نقدمو ليكم النصيحة غاتفيدكم ، نصائح من ناس شاب راسهم .....
سلطان : نقدر نعرف شحال فعمرك !
السيدة ماديسن : ( كاتشوف فاسد وفيهم وجاوبات ) 56 سنة ....
سلطان : كاتفوتينا بثلاثين سنة ... يعني حنا عشنا لحد الان غير الربع ديال العمر ديالك ...خدينا فيهم باكالوريا علوم رياضية .... ودخلنا لجامعة هارفرد .... نجحنا فتختبار TOEFL بامتياز ..... خدينا ليصونص والماستر .... كنتكلمو ستة داللغات .... مأسسين 3 جمعيات ... افتتحنا ماركتنا الخاصة وحنا فعمرنا غير خمسطاش ..... واخر الاخبار لي قريتي على جود ، جنون الرياضة كيف سميتيه خرج منوا ب 15 مدالية ذهبية و 25 فضية .... و 8 دالكؤوس موقعة من رالي موناكو ، سبعة دالجوائز و 20 لقب .... وانا حاصل على 45 ميدالية و 4 كؤوس موقعة من الفيفا ..... 16 لقب وجوج جوائز ، جائزة الاسد الذهبي وجائزة جلوب سوكر كأفضل لاعب افريقي شاب ... ودابا حطينا التيفو ..... ونزلنا نستقبلوكم كرجال اعمال ....( ربع يديه) اشنو لي حاصلة عليه نتي ( قرا البادج وشاف فيه ) ميس ماديسن ف التلاتين سنة لي فتينا بها ! ......
جود : كنتمنى غير مايكونش هوس البورصة والاعمال نساوك ديري شي حاجة كترتاحي فيها وتهربي ليها مرة مرة ....
السيدة ماديسن سرطات ريقها وهي كتفكر راسها طفلة باغا تتبع مجال الطبخ ..... كتفكر راسها كل مرة كدخل للمطبخ بسرية تصاوب شي حاجة ... ثم غير سكتات ورجعات لور لعنات فراسها على النهار لي هضرات فيه معاهم ... مكانتش كضنهم بهاد الجرأة وبهاد الالقاب كاملة ......حتى نطق
السيد مارتينيز : هادشي كايفرح انكم تكونو مخرجين من جامعة هارفرد ... اول مرة نسمعو هاد المعلومة ! ، وايضا واخدين هاد الالقاب كاملة ؟ ... وصراحة ( شاف عند اسد ) خصك تكون فخور بيهم لي قدرو يوفقو بين القراية والرياضة .... ونجحو فيهم بجوج ..... ( شاف فيهم ) رغم انكم اشبال صغار .... عندكم بزاف ماتقولو ....
اسد ضور راسو على داك اشبال صغار عرف الا مغاتعجبهمش .... وهو ينطق جود ونبرة الغضب واضحة فهضرتو ....
جود : حنا الاسماعليين ماعندناش اشبال .... صغيرنا ( شاف فلوؤي وسلطان ) أسد ... وكبيرنا ( شاف عند اسد ) كايهز البلد ......
لوؤي تحنحن ورجع لور دار رجل على رجل
لوؤي : اللهم لا حسد ......
الكل سكت ... بقاو يشوفو فاسد وفبعضياتهم اما اسد جالس بهدوووء متابع هاد الحديث .... ومايكذبش انه عجبو جوابهم ... رغم انه جايين لهنا بسيف .... ورغم ان سلطان ولوؤي مانعرف باشمن طريقة جابهم ... تكلمو كانهم جايين بخاطرهم وخدامين هنا سنين .... وخلاو الكواليس محفوظة ... ماخلاوهمش يحسو انهم جايين بالغلط اصلا ... النفس جاتهم على بعضياتهم بطريقة مكتصورش ، ولي عجبو كتر دمهم السخون ودفاعهم عن نفسهم واخا قدام اي واحد .....
البعثة ماقداتش مزال على نقاش معاهم وقلبو الموضوع لصفقة لي جايين عليها .... كانو ماليها هوما مستر مارتينيز و المستر كارنتن و الميس ماديسن اما البقية موظفينهم والمساعدين .....
اغلبهم كان عينيهم على الاشبال ، الطريقة لي جالسين بيها .. نظراتهم و الجدية لي كتبان على ملامحهم ... اناقتهم وعطرهم و الكاريزما ... وكل مرة شكون يتغامز عليهم .. وهوما كاطلعو عينيهم كايلقاو كل وحدة منين كتبسم ويرجعو يشوفة فالسقف ولا فشي نقطة معينة كايحكو فشعرهم....
بدا الحديث على الاعمال و تفاصيل الصفقة واسد كيناقش معاهم لي ديطاي الصغار كيف العادة خاصوا يدقق فالتفاصيل ...
السيد مارتينيز : تماما اسي اسد .. بغينا نبقاو خدامين معاكم بنفس الاساس .. وبنفس وسيلة التصدير ... يعني باقيين في حاجة لدعم مجموعة الروكان البحرية اننا ناخدو عليها اساس المادة ديال البخودويي ... و ان السلعة ديالنا تبحر بسلام عبر السفن التجارية ديالكم ....
اسد : فهمت ... ولكن كيف سبق وخدمنا معاكم مايمكنش نعقد جوج صفقات فعام واحد ... يا اما صفقة المادة ... يا اما صفقة الكراء د الخط البحري ...
السيدة ماديسن : فهمنا اسي اسد البنود ديالك ... لي واقع هو ماكنتيقوش فشي خطوط بحرية كتر من خطوطكم ... وفنفس الوقت المادة لي كناخدو عليكم مكنلقاوهاش فبلاصة اخرى ... يعني حنا محتاجين هاد جوج صفقات فافريقيا ومابغيناش نعقدوهم مع مجموعة اخرى .. حنا خدمنا معاكم نتوما وعجبتنا خدمتكم نتوما ... غراضنا اليوم هو صفقة الخط البحري ... وصفقة المادة الخام ... بجوج بيهم
اسد : القانون مجاش غير هاكاك و تحط .. اللي خلاه مايمكنش ، السطوكاج ديال الباطويات دالتبريد قليل .... فاش انا غانعقد معاكم الصفقة ديال المادة غاتشارجا ليكم لديبويات ديالكم فالمانيا على الاقل غاتحتاجو جوج باطويات فالشهر وهاد ااباطويات غايخرجو ليا من الميناء كتر من اسبوع ... فنفس داك الشهر نتوما كطلبوا خطوط اخرى تستأجروها توصل سلعتكم لدول الاخرى .. يعني بالمجموع غاتحتاجو كتر من خمسة دالخطوط فااشهر ... وحنا مايمكنش لينا نخرجو خمسة دالباطويات لشركة وحدة ....اش غايبقى لوخرين !!! مغالقاوش باش نخدمو .. نخلطو التجارة مع سياحة !؟ نتوما عارفين ان الخدمة العشوائية مكتعجبنيش و كنحكر على النظام ...جوج صفقات ميمكنش .....
السيد كارنتن : فهمتا مستر اسماعيلي ... و الخط الجوي معندكمش !!! ... حيت مقادرينش نتيقو فخطوط اخرى من غيركم
اسد : لا ... ماعندناش ...
السيد كارنتن : صعيب نتيقو دابا فشي تصدير واستيراد اخر من غير نتوما .... للاسف
اسد : لغيو صفقة المادة .....
السيد كارنتن : وكتعرف شي بديل يقدم لينا نفس المادة من غيركم ... !!
اسد : كتسولني انا ! انا كنعرف غي خدمتي .. مكنعرفش لوخرين اش عندهم ....
السيد ماتينيز : مكاينش لي يقدم لينا مادة حسن من ديالكم ....سنين زحنا كناخدوها عليكم مايمكنش ...
اسد : دونك حاولو تفكرو مع راسكم مزيان اشمن صفقة لي تلغيو ... بجوج مايمكنش ....
جود طوال الحديث كان مركز معاهم ... وقرب عند اسد بهمس ..
جود : ندخّل !؟
اسد شاف فيه باستفهام وجاوبو تاهو بالهمس
اسد : هذا ماشي لعب رد لبال ....
جود : عارف ....
رجع اسد لور مخليه يخرج نيابو و شنو كايعرف تاهو ..... هو يقرب جود وقاد جلستو كايشوف فيهم والجدية مغطية ملامحو ...
جود : اشنو لي عاجبكم فالخطوط دالبحرية دكروب الروكان ! يعني شنو لي خلاكم تفضلوهم على الخطوط الاخرى !!
السيد مارتينيز : التبريد فالدرجة الاولى .. سلعتنا المادة الاساس ديالها خصها التبريد و فريگويات بجودة عالية .. زيادة على الطريقة ديال الشاغج لي منظمة بزاف ومرتبة ... جربنا الشاغج فخطوط اخرى نص السلعة ضاعت والنص لاخر نقص .... اما خطوط شركة الروكان البحرية كانقلاو فيهم الامان .. الجودة ... والثمن المناسب .....
جود : يعني دابا نتوما غاراضكم بالتبريد كدرجة اولى ! ... التوصيل ديال الخطوط الاخرى كايكون فالوقت ؟؟
السيد : لا من ناحية التوصيل كايوصل فنفس الموعد لي عطاوه لينا انهم يوصلوه ... ولكن شنو فائدة التوصيل الا المسترد لقا سلعة ضايعة و حتى لومبالانج كايكون تعوج بسببب الشارج العشوائي .. ماشي كيف حنا صدرناه ...!!!
جود : داكوغ ... دونك الصفقة ديالكم هاد العام خليو فيها غير المادة ...و الصفقة دالخطوط البحرية تتلغى ... وفالعام الجاي .. انا بنفسي كنواعدكم انه غايتحل ليكم خط بري جديد ....( اسد شاف لعندو بزربة و سلطان ولوؤي كايقولو اش كايقول هذا !)
السيد مارتينيز : مافهمتش ؟؟ ... كيفاش خط بري !؟؟؟
جود : كاميوات بالحجم دالفريگو لي بغيتو ... فيهم الامان والجودة والثمن المناسب لي كتقلبو عليهم .. نتوما عارفين ان كروب الروكان الهدف ديالو فدرجة لولا ماشي هي يوجد البرودوي ، انما كيفاش يقدر يوجد برودوي مناااسب لحاجيات الكليان لا من ناحة الثمن ولا الجودة..... اما البرودوي كولشي قادر يوجدو .... الكاميوات غايتصممو على يدي انا بنفسي .. غايكونوا ضمن خطوط كروب الروكان وغاتلقاو نفس الجودة .. غير هو الكاميوات غير يوصلو لميناء ، خاصكم تكريو ليهم باطيوات اخرين .....
السيدة ماديسن : اء ! الى كنا غانكريو باطويات اخرين ... علاش غاناخدو الكاميوات !!!! راه نفس الشىء غانرجعو لخطوط اخرى !!!!!
جود : ياك غرضكم بالتبريد ؟! .... ماشي التوصيل ... ولا انا غالط
اسد رخف كرافاطتو ورجع لور كايقول اش تايقول هذا .. ولوؤي وسلطان غير كايشوفو والبعثة كايهضرو مع بعضياتهم ...
السيد مارتينيز : بغيتي تقصد .... انه نشارجيو سلعتنا عندكم ... ولكن التوصيل ماشي عليكم ...
جود : مدام غراضكم غير بالشارج ماشي التوصيل ... هذا هو الحل لي عندكم .....
السيدة ماديسن : ولكن امتى غايتحل هاد الخط البري !؟
جود : كيف قلت .. الكاميوات انا لي غانصممهم .... بين ما تهيكلو وتخدمو ... الخط غايكون واجد ....( شاف عند اسد ) وهاكا غانقدرو نوسعو الخطوط ديالنا فحالة لاجاونا صفقات بحال ديالكم ...... الى كانو الباطويات عندنا سالاو .... الكاميوات غايكونو موجودين .... لي غايكري كاميو فريگو غايكري ليهم الباطو من بلاصة اخرى ... وباش نهضرو من المنظور المالي ... الحمولة ديال الباطو بالشارج ديال 75 فالمية غايكلفكم كتر من 900 الف يورو ... أما الى كريتو الباطو بلا شارج دالفريگو .. غايكلفكم 20 الف يورو .... ياك هذا هو الثمن !
السيد مارتينيز : ( كايشوف فيهم ويشوف فيه ) اهاه تقريبا .... نقولو تقريبا ..
جود : مزياان ... نحيدو من الباطو وندوزو لكاميو ... 75 فالمية كتحتاج عشرة ديال الكاميوات بالتقدير .... كل كاميو الشارج ديالو بالشيفور كايساوي 9 الاف يورو ... غاتحتاجو 10 يعني 90 الف يورو ... الى زدنا عليها ثمن التوصيل فالباطو لي هو 20 الف يورو ... كتولي 110 الف يورو .. ( ربع يديه ) اذن بلاصة ما .... تصدر حمولة 75 فالميا فالشارج ب 900 الف .. غاتولي غير ب 110 وغاتوفرو 790 الف يورو لخزينة دالشركة ديالكم ...
دوك البعثة واحد كايشوف فواحد وكايحركو راسهم بانبهار و كيشوفوا عند اسد لي باقي غير كايرمش كايفهم هادشي لي نزل عليه .... خربق ليه كاع الحساب ، اشمن خط بري ؟ ....
السيدة ماديسن : ماخلييييتي لينا مانقولو ، فكرة الخط البري طلعات حسن بالف درجة ..... و فيها توفير بزااااف ... حنا موااافقين طبعا
السيد مارتينيز : كنتمنى هاد الخط يتحل فاقرب وقت ..... واش نتا مصمم الهياكل ! فعلا قادر عل تصميم كاميوات لي يهزو 7 فالمية بالتبريد والجودة العالية !!!!
جود : اوفكروص ... فين عمر كروب الروكان عطا وعد وماوفاش به !!!!
السيد كارنتن : الفكرة حمساتني بزاف .... وكنضن غايتفتحو ليكم افاق كبيرة مع هاد الخط البري لي كولو توفير .. حنا كرجال اعمال خدمتنا فالتجارة بالبحرية كنهزو هم كبير للتوصيل وكنخسرو فيه كتر مكنربحو ، بنسبة لشركات لي ماعندهمش باطويات ديالهم راهم مأزمين بالفعل مع السعر المرتفع ديال التوصيل .... ونتوما عارفين الكراء ديال الباطو بالقبطان و الشارج شحال مكلف .... فكرة هااااائلة كنحيييكم .... وغانتيقو كتر لاعرفنا ان هاد الشاحنات تصمموا خصيصا من طرف اسماعليين ......
السيدة ماديسن : ( شافت عند اسد ) كانشوف هاد الجيل الجديد داخل بقوة مستر الاسماعيلي ......
السيد مارتينيز : اذن حنا موافقين ... غانوقعو صفقة شراء المادة ... و الخطوط غانتسناو حتى يوجد الخط البري .....مايمكنش نضيعو هاد التوفير كامل .... 790 الف يورو كلها كانت كتمشي لينا !!!! ......
السيد كارنتن : نوقعو الصفقة ؟؟
اسد غير كيتنفس حس بعقلو وقف منين خرج ليه بهادشي .. وعارف راه غير دوخهم بقوة الارقام ... ودغيا وافقو على كلامو .. ماعندو فين يهضر دابا ... ومايكدبش انه حس بيه قد كلامو ... ودارها فيد الله معاه ... واخا عارف راسو ممكن بخاطر بصفقة قد الخلا باش يشوف ولدو علاش قااد ..
قربو المساعدين ديالهم والموظفين الصفقة و وقعوها ، وقعو فقط على كمية المادة لي غاتوجد ليهم هاد الشهر ....
لوؤي : ( بينو وبين جود ) اشمن خط بري !!!! باك فخبارو هادشي
جود : هو لي بغا ندير مشروعي مع كروب الروكان .. اذن يتقبل خدمتي الجديدة
سلطان : واش نتا بالمعقول ناوي تخدم !!! ولا داير ليه الزكير!
جود : غانخدم
كملو التوقيع ووقفو باش يمشيو .. وقف تا اسد لتودعبهم حسب البروتوكول .... والاشبال بقاو جالسين مزال مكيفهموش فهادشي حتى شاف لعندهم اشار ليهم يوقفو ... عاد فهمو راسهم ووقفو حداه ..... بقاو فبلاصتهم و هوما كايسلمو عليهم منسحبين واحد بواحد ...
الموظفات لي كانو فداك البعثة والمساعدات كاتفدمو يسلمو عليهم وكل وحدة كتحط فيد واحد كارت فيزيت ديالها وتغمز ليه بمعنى اتصل بيا ... وهوما ماباغينش يبينو كايديرو فجيبهم ويمدو يدهم تاني لسلام مع شخص اخر ....
ودعو الجميع وهوما جامعين حصيصة دالنوامر فجيابهم ... جاتهم الضحكة والاستهزاء على هاد الحال ، كانو كااالسين تاناضو نوضة وحدة دخلو للاعمال و معرضين لتحرش ملفوق ....
واسد عاد جلس كايرخف صدايفو .. وطلع عينو شاف لعندهم دايرين كيف شي ديااااب واقفين عند راسو .... مطول فيهم الشوفة وهو كل واحد فين كتنحنح عارفينو غاايهضر ....
اسد : كون غير ضربتوهم حسن .....
سلطان : براافو عمي والله .. برافو ليكم لي كتحملو هاد البروتوكل كامل وهاد الهضرة البايخة ديالهم شحال فيهم دالفهامات .... قرينا العلاقات العامة مكنتش كنضنهم بهاد الجو الباااايخ تالهاد درجة !!!
اسد : وشنو قريتو على الكليان ....
سلطان : هو الملك
اسد : واااضحة ... تقال الدم ولا خفاف العلاقات العامة كتحتم علينا نستحملو ... ملي ماجبدتوش ليهم حتى ميدالياتكم هاد الصباح ففنون القتال راه ماعرفت كيف وقع ..
سلطان :كون زادو الهضرة مزال كانو غايشوفهم ..
اسد : اه و انا نسد هادشي ونمشي نربي الجمال ( شاف عند جود ) اجي نتا لهنا .....
جود : نتااااا بغيتيني نخدم .. واخليني نخدم
اسد : كتواعد الناس بالخيال ولا كيفاش !!!
جود : ( مشا كلس حداه ) اشمن خيال الواليد ... بغيتي نخدم معاك !!! هانا بان ليا اطريق .... نهيكل ليك الطرونسپور ... انا لي غانصمم داك الكاميوات ... وانا لي غانطلقهم للسوق .. وهاكا غاتولي عندنا حتى علامة تجارية فالشاحنات .... وتقدر تصدر فيهم حتى وطنيا ماشي غير دوليا ....
اسد: ( جبد ليه ودنيه ) هدا لي قدامك باك لي ولدك نتا مغايدوزش عليه هاد التدويخ ديالك بحالهم .... ضهشرتيهم بقوة الارقام ... اشكوون نتا قاليك حمولتهم فيها 75 فالمية باش ضرب ليها هاد الحساب كامل ....
جود : وهوما براااسهم ماعرفيتش البورسونطاج د الشارج ديالهم نعرفو ليهم انا !!! .... المهم تاقو ان هاداك هو الشارج ديالهم ....
يتبع...
التعليقات
لا توجد تعليقات بعد، كن أول من يعلق.