محتوى القصة
لامار : ( شافت فاريج وهضرتها غير بيناتهم ) شفت سارة ماجاتش ؟؟؟؟؟ عنداك تكوني معيطتيش ليها
اريج : اويلي حماقيتي صووونييت عليها وتأسفات قالت ليا بلي راه مريييضة ومع داك الفيروس مبغاتش تعاادي حيت شاكة عندها كوووفيد ... وعمران مسافر ... عيط ليونس تأسف ليه ... وقلت لبيلسان تكتب مسج لماجدة تعرض عليها بالرغييييب والمزاوكة باش بغات ليا ... ناضت طلعات ليها يمكن الفيييووو وخلاتها وهادي ناضت بلووكاتها كاع ...
لامار : هاء ؟ اويلي مال هادو ؟؟؟؟؟ يلاه لبارح كانت مزيانة
اريج : منعرف .. تاكلمة زوينة ماقالتها ليها مكاينة لا مباركة لا والو .. وهادي راك عارفاها على سببة ضارت فيا قالت ليا نت لي قلتي نكتب ليها هاهي خلاتني بلاكة
لامار : اوا مااعليش يفوت هادشي ونعيطو لسارة بعدا نشوفوها كيف يقات
اريح : صوووتها عياان هضرات معايا مدعدعة
لامار : واغير ريح دايز هاهي تاااقدس صبحات حاالتها ...
اريج : وايه كتبااان فيها مسسكيينة عينيها صغااارو .... ( كتشوف لطيافر ) علااش معذبييين اصاااحبتي راسكم قد هاكااا اويلي واش حنا برانيين
لامار : واش بغيتي مك رقية تخرجني فجورنال ههه بصصصحتها تستاااهل ... احقا .. اياد والو ماهداه الله زعما !
اريج : راني هضرت مع بيلسان و مع يوونس .. غيير خلينا نخليوه على خااااطرو ...ماحدي كنزير عليه ولا كنحككررر راه كيشد زكيير .. راه تاهو غيبغي ليها الخير وراك عارفة جود شحال عندو عزيييز .. قلت ليهم خليوه على خااااطرررو ... يفكر بشوية عليه ملي يشوف العائلة كلها موافقة راه دابا يوافق بزز عليه
لامار : ناقصة بلا بيه صراحة .. فين هو ؟
اريج : اختي ملي خرج صباح والله منعرف فين هو .. .صونا عليه باباه لقا التيليفون طافي غيكون فشي بلاالصة جالس كنعرفو ملي كيتقلق شوية .. دابا يبررررد
لامار : ( تنهدات ) والله يدييير لي فيييها الخيييير
يونس : شووية نزلااات بعددااا
قدس : لاالااااا اعممي صاافاااا ....
رتاج : غيرجع معاك العيااا ( كتجمع ليها كوستيييمها ) ححضي من البرد ....
قدس : ررراه غير گريب عااادية دابا يفووت الحااال ...
حياة : وااايه حتى ااية صبحات غير تاااتكحب هاد الصباح تاعطيتها اونتي بيوتيك ...
اية : عطاتني جدة العسسل .. راه صافا دابا
رقية : دييما فين متجيك داك الكحة شربي عسل ولا زيييت .. شغايديرلها هاد لليتليييبوووتيييك تانتوماا ...
قسم : دابا لي تبدل الجو كولشي غياااككلها ...
سفيان : نت راه ولييتي عززززييية صافي
قسم : دابا انا فوق مانجي من العسسسكرية خاصصصكم تعقدوووني
رتاج : بالعكس جاتها السموورية غزالة .. .يلاه تشبهي شوية لخوتك وعمامك ههههه
جود : فين فيصل ؟؟؟
اية غير سمعات السؤال طلعات عينيها دغيا حيت من قبيلة وهي كتسائل
رتاج : صبح ببببكري مشا لرباط اولدي ... وراه كايسلم عليكم وتمنى يحضر ولكن تما فين شد ليه عدنان الغونديفو
جود : على ود توفل؟؟؟..
رتاج : هاااداك وشي تخربيق اخر على قبل قرايتو راه مابقى والو وهو ماوجد تاحاجة
سلطان : بتوفيق لونگلي ديالو مزيانة ... ينجح ان شاء الله .....
كولشي كيتهاودو ويضحكو وبيلسان مرة مرة تقلب عينيها لعند جود لي مزال مامصدقاش انه لابس كوستار ومقاد لحيتو ومأنق ليييييها .. موالفة تشوفو هاكا فحفلاتهم الرسمية ولكن باش هاد المرة اناقتو تكون ليها هي .. شي حاجة لي كبرااااات فيها لدااخل بزااااف ... فورررمتوو لي مزال كتتحسها تاتخطف عقلها .... ضحككتو نيااابووو شقااوة عييينيه سسموررريتو ملامحو لي اشبه بملامح النمر بسبب حروفوو القهووييين ...
وهو كيشوف لدروج والارجاء كيتسائل علاش مكااااينش ايااد ؟؟؟ فين مشا !!! .... واش مزال مقسح راسو لهاد درجة !!!!! .... اما اية غير كاتفكر علاش سافر وماقال ليها والو ياك موالف اي حاجة يقولها ليه .. فنفس الوقت كاتهرب لعينيها ماتسوفش فوسيم حيت كتحس براسها باقا كارهاه .. وكاتقول علاش نقدني من لابسين و هرب؟؟ واش خاف صاحبتو تشوفو ؟؟؟؟ ....
تحنحن لوؤي مقاطع حديثهم .... وقاد الجلسة وشاف فيهم
لوؤي : احححم ماااعليييينا .... شوية دالانتباه من فضلكم حيت حنا مجينااش نهضرو على لاگرييييب و هاد قليلة المناعة دابا تببرررا ... الموهيم ( شاف فسلطان )
سلطان : اااه حنا جييينا لييييوم .... ( جود معلي حاجبو وكيشوف فيهم ) بببااااش .. ااا .... باش زعممااا رااااكم عااارفييييين .. واقلة ... ولاضروووري نعاودو من لووووول ؟
لوؤي : تا عاااود واش غتخلص عليييها .. تايقولو داكشي ديال راغبين طاالبيييين ... فيييديييها
سلطان : ابغيييناها كاااملة اصاحبي .. هذا راه مغيقنعش لينا بالييديييين
لوؤي : وهي هاااديييك .. ماعليينا ... عمي يوووونس ...
يونس شاف فيهم كيضضحك واسد غير كالس وكيضور فراسو على شقااوتهم لي جاييين يخططبو ليييه وجود كيشوف معاهم فييين غيييخرجوووو
يونس : اوولدي
لوؤي : و ولدنا منحتاجوووش نشششكرووو فيه .. ( كيحسب بصبعانو ) ماااييييكمي .. مااايشررررب .... ( جود شد على جبهتو غييتقبو ليه ضوووسي وكولشي شاف فلووؤوي مصدووم ) مااايشششيش .. مكييييعرفش هووو كااع هادشي ديال النيكوتييين .. الرييية ديالو بحااال وجججهو تبارك الله. .
سلطان : لا لا من هاد ناحية كوووونو هانييين ( شافو فيهم دايرين ديك شوفة ديال يااااك ! ) من لباااا... لا ززعما من الجااامع لدااااار .. مكيييععععرفش مسسكييين كاع داكشي ديال الحرام ...
جود غير مهبط راسو وشاد عليه وكولشي ضاحك عليه وبيلسان كضور فراسها
لوؤي : ضراااافة ورزااانة .. مكيييعليييش الصووووت ديالو .... راه غااتدي وغاااتعرف شنووو كتتتدي لبنتك ....
سلطان : راه صرررردي سنان الحليييب
كولشي تكرشخ بالضحك وجود ضربووو بمخدة يسكت وقسم كتمسح دموع بالضضحك ...
عدنان : ههه غييييعيييدو بييه ...
سلطان : ودابا حنا داويين معاكم ونتوما ضاحكين خلييونا نخطبو لسيد نقضيوو غراااض شحال غتخليوهم معلقيين مساااكن ... شووفي اخختي ديييه على حساااااابي .. اا نعطيك الگراااانطي ... صووتوو متسمعييهش مسسكين كيقول غييير اااااه ... لي حليتي عليها فمك تححضر
لوؤي : واايه راه تقولي ليه جيبلي نجووم يييطوي لييينا السماا كاااملة يجيبها ليييك يخليينا منااا للهاااووا .... نعيشو فااظلام ....
سلطان : ششفتي النملة ؟ متيييعفطش عليييهااا ... بنادم كايدخل فيه براااس كيقولييه ماعليش منهبطش لمستوااااك ... الى خخخخسر الهضرة و تتيقول جمع راسك !! ..... راكم غتعررفووو معاامن غااتنناااااسبو ...
جود : صاافي صاافي رااه قنعتووهم شككرا ... مشكوورين ...
لوؤي : او اشنوو قلتو ؟؟؟؟ ... نديوها ولا ترجعو لينا سكااارنااااا
اريج : ههههه الله ياا سيدي ياااربي اش هاد الولاد عطانا الله ههههه اسيييدي موااافقييين شوفو مع البنت ههههه
سلطان : اشوفي عندي نت .... ربع سنين و نتي تخنني علييينا طلقينا للفرااااجة
بيلسان : ههه ياكما بزز !!! بشوية عليا نفففكررر
لوؤي : لا اختي ... راااه قبل مانجيو عندك خلينا جوج سخفااانات وثلاتة شاديين نوووبة وعاااطيين التسبيييييق .... ققضي غرااااض ولا غدا راه متلقااايهش هاد الماركة راه مطلوووبة ....
بيلسان ضحكات وشافت فجووود وهو اشار ليها براسو للوؤي لي داعمو فهضرتو
جود : يلاه قضي غراض هههه ...
لامار : ههه زعما غير لي بغا يخطب يديكم معاه .. راكم كتعمرو عليكم ضوسي نهار تمشيو تخطبو نتوما غيحطكم بوجهكم ....
سلطان : ودابا داخلنا عليك بالله امرت عمي واش هادشي مكاينش ؟؟؟؟؟
لامار : لا لا لا انا منشششهدش الزوووور ....
اريج : حنا بعدا تيييقناااااكم ... شوفو مع لي غاتديه واش تيقات تاهي ...
بيلسان : لا لا انا تيييقت الله اودي .... واش انا يخفى عليا هههه
سلطان : ( شاف فجود ) واااااشتي يحسابتك متعولش علينا ولا ...
جود : لا لا ترجع ليكم فساعة الخير ان شاء الله ..
سلطان : مهم انا نهار نفكرر نخطب مغنعلمك تالنهار العرس هههه
قسم : تلقاه دابا كيقول كون غا ماجاوش ههههه ... بناقص منهم
رقية : ( شافت فجود ) على اوولدي نتاا كتتتشرب ؟؟؟؟؟ ( سلطان تفركع بضحك )
جود : ( كيحك فوق حاجبو وشاف فيها ) الما ؟
رقية : ( شافت فلامار ) كااايشششرب ؟؟؟؟؟؟
لامار : ( شادة الضحكة ) ونا بقيت نعرف شي حاجة مع هادو هههه ...
حياة : اويلي ياويلي خطبتو للولد بكري هههههه ... كاايشرب القهووة اخالتي واتاااي .. وعزيز علييه الزععتررر و الساالمية ...
رقية : اوا خيااار حسابتني كيشرب داك الحرام .... ( جود ضور عينو كيشوف فسلطان ولوؤي بمعنى اليوم تدفنو وسلطان كيضحك ) عمااامكم اولدي ماحطوش ففمهم الحرام تانتوما متشربوهش ( سفيان كان كايشرب اتاي ددفگو تايكحب)
سلطان : ههههههههههه ( كولشي شاف عند سلطان لضحكة لي دار واسد محمر فيه وهو كيحاول يجمعها ) نستسمح .. نستسمح ....
لوؤي : لا لااا اجدة كوني هانية ... حنا كاعما نعرفو لداك الحرام .. ( قدس موسعة فيه عينيها ) تايقولك مررر وقيييلة تايضر فالحلق .... ( شاف فسلطان وجود ) ياك
سلطان : بحالا حاامض يمكن ... راه قالك مصنوع من ااعنب والعياد بالله .....
رتاج : اودي راه مكاين الحامضين قددكم .... انا منك اجووود .. والله مانعلمهم غانخطب ....
جود : ( تنهد ) وهادشي لي عطى الله ... صااابرييين عليييه ..... اش غاندير ... نردوها ليهم فساعة الخير .....
لوؤي : يلاه زيدك معاه .. واجي نتا خطب ليه ...
اريج : ( هضرات ليها الخادمة فودنيها وشافت فيهم بابتسامة ) ههه تفضلو تعشاو العشا واجد ... لاتبعتو هادو راه مغايساليوش ههه
ناضو حميع فجوهم الكوووميييك ولوؤي كل شوية يحط يدو على جبهة قدس فغفلة منهن كيسولها غير بعينيه واش صافا ... تاخرجو للجردة لورانية .... كانت صال امونجي طوييييلة ضايرة بالفوانييس قريبة للابسييين .... وشدو كراساهم والخادمات كااايسربيو .. دارت اريج عشاء مغريبي 100٪ على حساب مناسبتهم ... بساطل ... و حولي مشوي ... ومقبلاااات وسلطااات كانو ديجا على طبلة ... الكل كااان ضاااحك على داك الطبلة بسبب لومبيونص لي كيخلقوها لوؤي وسلطان .. جلسات بيلسان مقابلة مع جود لي كل ماتشوف فيها كتبتسم ليييه تايتجبدو عينيها ...
رقية : واشوف ليك بقات البلاصة دسارة الزغبييية
سفيان : من قبيلة باغي نسول ... علاش مجاتش ؟
اريج : صونيت ليها قالت مرييضة وعمران مسافر
عدنان : عمران راه ف فرانسا ...
اريج : بيلي عرضات على ماجدة ومااجاوباتهاااش
بيلسان : ( شافت فيها ) مااعرضااتش بيلي .. بيلي عرضات تحت التهديبيد ...
رتاج : ماااعلييش ماعليييش .. الله يسااامح ... العقبة للخطبة الكبيرة ان شاء الله ويكون كولشي حاضر .
حياة : انا والله الا عجبني نكونو غير بيناتنا .. مدام مغنعلموش الصحافة .. تخافو يكون شي واحد ينشر شي تصويرة بلا مايحس ولا يخرج الخبار راكم عارفين ....
رقية : اوا سارة راها منا
حياة : ومقلناش .. ولكن راها مريضة دابا ...
سفيان : ودابا اخالتي الحاجة كاع هاااد ( شار ليها ) التيييرا لي قدامك مقداتكش هههه راه غا حنا باراكا ...
رقية : هههه الله يديييير فيكم البببررركة ...
اريج : ققدس .. وزيييد ابنتي ياك كتعجبك البسطيييلة .. درتها على قبللك نت وجود كتعجبكم .. وهادي ماشي ماكلتك نت زعما لي كتبردي ليا الغدايد ....
قدس : ( كانت كتكال بشوية بسسخانة والحلاقم ) هانا كنااكل اخااالتي ... غير مقاداش وصافي
وسيم : اووووو اش هاد اللحظة التاريخية لي خاصها توثق .. قدددس ماقاداش تااااكل !!!
اريج : ببببعد من البنت تبقاو تابعينها على مااالكلتها تاتسد ليها الشهههية فمررررة
رقية : حجاااااب الله ..... الله يخليها بصحيحتها تااكل رزيق باها مالكم تابعينها
قسم : جوج مرضات بحال هاكا ترجعي لپوا نوغمال ديالك هههه
رتاج : اويلي مالكم بسم الله عليها
لوؤي : انا مزال لدابا مفهمتش مالكم مع ماااكلتها !!!! سيدة تا المناعة راه طايحة ليها .. تزيدوها بالجوع !!
لامار : وداكشي علاش كنقولو ليها تاكل ماكلة صصصحية ... راه باقي شوية ومادخلهاش الباب ههه
لوؤي : وسسسعو الباااب .. فين كاين الممشكل ..( قدس غير منزلة راسها كضحك حيت دااوي من نيتوو )
رقية : والله الى قااال الحق ... تابعينها مسكينة على جوج كيييلو .. ماهي الصحة لي كانت عندنا حنا عيالات زمان ماشي بحالكم نتوما وليتو غا البببخ والريجيم وتمساااس بداك الفوورشييطات ...
كملو عشاهم فجوهم المضحك من غير اسد لي مقلوب ليه المووورال بسبب اياد لي مكاينش ... واخا كلهم ملاحظين ومبغاوش يحككرو ....
سالاو عشاهم خاتمينو بديسير ... وناضو لواحد كلييسة ققصبية فججرردة جللسو جميييع واية باقا شادة تيليفون طتطتب لفيصل لي بقوة ديرمونجمون ديال انه قالب عليها على غير عادتو نسات كاع وسيم وشنو دار ..... وبيلسان جالسة حدا قدس كيهضرو ودراري بوحدهم تاهوما والعيالات بمواضيعهم والرجال تاهوما منهمكين لي ضروري يجبدو مواضيع الخدمة فاي مناسبة ..وساعة كانت ما يقارب لمنتصف الليل ..
قدس : وعلااااش ؟؟؟ مافهمتش .. يعني علاش دير بحال هاكااا !!
قسم : ( قربات ليهم راسها ) مالكم !!!
قدس : بيلي عرضات على ماجدة كتبات ليها مسج فانسطا ... طلعات ليها الڤيو وخلاتها ....
قسم بقات غير كترمش وهي كتفكر دلك الليلة ... ورجعات شافت فبيلسان بابتسامة
قسم : ماديريش فبااالك .... تلقايها كانت ماشي هي هاديك ديجا راه ماماها مريضة وباباها مسافررر
قدس : ولكن تقول بعدا غير شي كلمة تبارك ليها غير بيناتهم حنا مقلناش ليها اجي
قسم : وصاافي قلبو علينا هادشي .... ياك نت درتي لي عليك سيفطتي ليها مسج اوا ضبر راسها تجي ولا لهلا يجيبها
بيلسان : ( تنهدات ) غا خليها هاديك انا عارفة مااالها ..... خلطات التخربيق مع الصح ....
قدس : جاتني بيزاغ والله زعما مولفاها فرحانة معانا .. كتجيني زعما مخايباش لهاد درجة !!! غير حيت يمكن نت وياها مكتفاهموش اما عي ضريفة كاتجيني .....
قسم : مالنا حنا قلنا ليك خايبة
قدس : اجي بعدا نت .... هضرت معاك لبارح مع بابا علاش مقلتيلناش جايا ليوم .. درتيها سوربرايز لجود حنا مالنا ؟
قسم : دايراها ليكم حتى نتووووما ...
قدس : مممم ( كطلعها وتهبط بشك ) وفوووقاش وصصلتي للطنحة مممممم
قسم : ( ضرباتها بمخدة لشعرها ) ققققدس
بيلسان : هههه اش واقع !
قسم : مواقع والو .. هادي شفتها طلعات ليها السخانة نييييت ...
كيهضرو تاسمعو صوت اسد لي كان كولشي شافو فيه وتاهوما قادو جلستهم و شافو فيه ...
اسد : حنا عائلة قبل كولشي كنتجمعو ديما نبدلو ساعة ونساو سطريس دالخدمة و نربيو ولادنا على العائلة .... لدرجة خليناهم يعرفو غا بعضياتهم .... شي لي خلانا نتجمعو ليوم ... نخطبو بيلسان لجود فااحلال ان شاء الله ...
لامار : ياربي تكمل عليهم يالخير والتيسير ... وتسعدهم ونزيدو نفرحو معاهم بأفراح اخرى ان شاء الله .....
الكل : ياربي امين
رقية : والله يجعل الخبزة ديما مجمووعة ياربي يا الحبيب ....
اسد : ( قاد جلستو كايشوف فجود وبيلسان وتحنحن مزجه هضرتو ليهم هوما بالخصوص وللبقية بالعموم ) الزواج حنا عارفييينو نص الديين ... لكن بالنسبة لينا .. بالنسبة للمنهج لي ربيناكم عليه .... الزواج اسرة .. مسؤولية .... عائلة ... تفاهم ... تضحيات .. الزواج ... هو تكون بوحدك ... وتقرر ... تاخد ليك .. سند ... تاخد ليك هاداك الشخص لي مكايناش شي حاجة مغتقدرش تبوح ليه بيها او متقدرش تقولها ليه ... داك الشخص لي كيكون النفس ديالك التااانية .... ( جود غير كيسمع ليه ومرة مرة كيشوف فبيلسان لي تاهي كتسمع ليه ) كاين فررررق كببيير مابين .. انني نكون كنبغي شي واااحد وداير معاه شي علاقة سواء كانت مخبية ولا باينة ... ومابين انني نتزوج بيه ... الغلط لي تيوقعو فيه بزاف دالشباب ولي وقعنا فين تاحنا وتداركناه ... اننا مكنفرقوش مابين داك الشخص قبل الزواج وبعد الزواج .... نهار كنوقفو على رابط مقدس بحال هذا ... هنا كنحاولو نتعارفو بطريقة جديدة ... بمفاهييهم جديدة ... هاديك الغيرة مثلا لي كانت قبل زواج .. كانت كتعجب الطرفين بجوج .. لا و كتجيهم هي الشي لي كيعني انه كيبغيو بعضياتهم !! .. ولكن مور الزواج كيولي المفهوم ديالها حاجة اخرى .. كتولي قلة ثقة ... كتولي وسواس ..... وبزاف دالحوايج لي مكانتش كتعنيهم قبل الزواج .... هدا غير مثال الصغير على المفاهيم لي كيتبدلو فالزواج .... ملي كنقررو نتزوجو .. كتعني ... نتزااااوجو ... كتعني نتمزجو انا ويييااك ...نوليو زوج .... فواحد .... يعني اولادي ... زواج ماشي غير توقيع على ورقة ديال العدول .. ماشي هو غير نجيبو بيبي صغير نربيوه .. هو كبر من هادشي ... هاداك البيبي خاصو واااحد المحيييط لي غيكبر فيه ... ونتوما لي غتصنعو ليه هاد المحيط .... اما نتزوج غير باش نتسمى مزوج ولا باش نعيش مستحقاتي فالحلال وندير وليداتي .. لا .. هادي كتسمى حراثة فالبحر ... ماعندهاش معنى ... كنتزوج باش ... يكون عندي شخص فجنبي نعول عليه فالحلوة والمرة ... باش نهار يتخلى عليا العالم كامل هو يكون معاياا ....ولو نكون اقبح واحد كاين فهاد الكووون هو يشوفني اجملهم ... الشخص لي يكون مرايتي ... لي كيعطيني ثقة فنفسي .. لي كيعااوني على المستتقتبل ونزيدو بيه لقدام ... شخص لي ملي نطسح نلقاه فجنبي بلا جميل ... بلا مايمن عليا ... وملي يطيح يلقاني اللول معاه .. تتهز دنيا نخلي يدي فيديه ونموتو فيها بجوج .... الزواج ماشي هو توو ولاد وتقولو حنا صابرين الى قبل الولاد .. مزايان تبغي ولادك ولطن نهار تحس براسك راه بغيتهم كتر من هسك لي جايتهم ليك ... هنا خاصك تعيد النظر فزواجك ... مور الزواج .... كلمة الحب وداك تخربيق ديال قبل زواج ... تايولي بلا معنى ... حيت تما مكيبقاش الشفوي خدام ... كايولي التطبيقي ... الحب بينو فمواقفك .. عبر عليه ... حيت داك كلمة دالحب كتكبر وكادير عقلها وكايولي شميتها العشرة والمودة والرحمة ... الزوج الصالح .. او الزوجة الصالحة هوما داك الشخص لي كااايغنيييك على العائلة .. حتى لو كنت بلا عاائلة كاع ..كيكون هو داك العائلة لي كتحس فيها بحنان الام .. سند الاب ... حماية الاخوة ... كولشي كيكون هو بنسبة ليك ... ( شاف فجود وبيلسان ) انا مكنهضرش على مستقبلكم ... هاداك نتوما لي خاصكم تصنعوه .. ولكن كنهضر على خطوتكم لولا حيت انا لي شاهد عليها ومتحمل مسؤوليتها لازم نوضح ليكم
شافو فيه براسهم كايميو بالايجاب متأثرين بضهرتو و لامار كاتشوف فيهم بعيون دمعانين حيت فعلا هادشي كامل عاشتو معاه مرحلة بمرحلة والجيل لول كامل ساكت وعارفو مزياااان علا كايهضر.. تنهد اسد بعد ماشرب كاس دالما وكمل
اسد : وانا عند السيد لي غيتكلف ليكم .. بالخواتم ديالكم ... طلب مني النوع لي بغيت ... طلبت ليكم خواتم روماانيين ... حيت فعلا تمنيت لييكم ... رابط مقدس .. كيفما كانو مقدسينو الرومان شحال هادي .. كانت واحد العبارة كتقال .. ولي كتكون منقوشة فخواتمهم ... هي " Soyez mon arbre fructueux! Je serai pour toi une branche solide qui ne se cassera jamais " " كن ليا شجرة مثمرة .. نكون ليك غصن مثين ... ماعمرو غيتهرس " ...
ديجا لاقريتو هاد العبارة فخواتمكم ولا سمعتو بيها من قبل فشي كتاب قريتوه ... غيجي لبالكم ان واحد من الطرفين هو لي كيقول هاد الهضرة للاخور ... غتسائلو شكوون لي غيكون الشجرة وشكون لي غيكون هاد الغصن المثييين .... ولكن ماشي هاكا قالوها الرومااان ... الرومان هنا قصدو .. ان الطرفين بجوج هوما الشجرة ... ولي كيخاطبهم باش يكونو ليه الشجرة المثمرة .. هو داك الراااابط لي غيديروه بيناتهم .. الرابط دالزواج هو لي كيقول ليهم كونو ليا شجرة مثمرة نكون ليكم غصن مثيين .. ولي مقصود هنا بالغصن حيث كيفما كتعرفو الشجرة معندهاش غصن واحد ... المقصود هنا هو كاين غصن .. ديال الحب ديالهم لي غيكبر .. ولي غيكون مثين .. غصن ديال ولااادهم لي تاهوما لقاو شجرة مثمرة ... غيطلعو واقفين على الصح ... غصن دالمستقبل ... غصن السعااادة .. وبزاف دالمفاهيم لي كيعنيها الزواج .... يعني اولادي ... مدامكم هنا اليوم مجموعين باش نربطوكم ببعضياتكم رسميا ... فعلاقة غتنتهي بزواج ... خاصكم هادشي تكونو عارفينو ... وتكونو عارفين نهايتو كيفما عارفين بدايتو ... تكونو عارفين انكم مخيرين وماشي مجبرين ... وانه خاصكم تقبلو بعضياتكم بعيووبكم ومكاين تاشي واحد على وجه هاد البسيطة كااااامل مكمول .. الكمال لله سبحااانه ... بغيتكم تكونو مع بعضياتكم .. فالشدة .. وفالمرض ... فالازمات ... فالفشل ... حيت هادو هما الحوايج لي غتلقاوهم لوولين قبل ماتعيشو السعادة .. الشفاااء ... الفرج .. النجاح .... لي غيجيو من بعد .... الا شي واحد ماقدرش يكون مع لاخر فهاد الحوايج الللولين ... يعني راه ماشي قد هاد الرابط .... ومايستحقش يكون زوج .... الى ماوقفش مع شريكو فالازمات ديالو ..... ( شاف فبيلسان ) بنتي بيلسان ( شاف فجود ) جود ولدي ... نتمناو ليكم السعااادة .. كنتمناااو ليكم الحياة المستتتقرة .. وكنتمناو نشوفوكم قوا من هاكااا ... نشوفوكم بمستقبلكم بوليداتكم ... بحياتكم لي غتأسسوها مع بعضياتكم .... خلقو لينا اغصاان مثييينة نضللو تحتهم .... الله يكمل ليكم اولادي كولشي بالخييير ...
هزات بيلسان صباعها مسحات دموعها لي نزلو بلا هواها مع كلامو ولي كلهم دمعو عينيهم فاش سكت كولشي بدا يشمرر بنيفو ... وقسم عنقات بيلسان لي ولات حححمرة ... وجود كيشوف فيها لي تاهو قنعو كلام باباه ورييييحو بزاااااف ... ولامار تاهي كتمسح دموعها هي وارييج ورقية تاهوما عينيهم حمرييين
عدنان : بسم الله الرحمان الرحيم .. ومن آياته أن خلق لكم من أنفسكم أزواجًا لتسكنوا إليها وجعل بينكم مودة ورحمة إن في ذلك لآيات لقوم يتفكرون ... كنتشرررفو حنا نطلبو يد المصووونة بنتنا لي ماشي غريبة علينا بيلسااااان ... لولدنا .... جووود ... على سنة الله وسنة رسوله
سالا اسد كلامو وختمو ليه عدنان و لوؤي وسلطان جالسين كيشوفو فجود لي شابك صبعان يديه فوق ركابيه وكيشوف للتتتححت .. ميكدبوش ان فالداخل فرحانيين ليه غييستقرر فنفس الوقت جاتهم غريب يشوفوه بعععقلوووو ...
يونس : مكاينش لي كيطلبوه الواليدين كتر من الهنا والسعادة دولادهم ... فراق بنتهم كيكون صعيييب من واحد الناحية ولكن لاكان غيكون الفرااااق من اجل واحد الاسرة مع شخص منااااسب .. مع شخص لي غيتهلا فيييها ... كيتخخف شوية داك الحرقة ديال وداع دار باباها ... ( بيلسان كتشوف فيه لي عينيه حمرييين ) كيكون كبرررها حدا عينيه ... قراااها ... فللخر كيعطيها بييدو لهاداك لي غاايسعدها ويكمل ليها مراااحل حياتها كيما حتى حنا عطاونا عيالااااتنا ... كلنا عندنا عيوب وكلنا عندنا مزايااا ولكن الاهم فالامر فاش كاايكون الضمير غالب ... وفاش كيكون الاصل والاخلاق والتربية ... يحسو ببعضياتهم... ويوقفو مع بعضياتهم فكاع المراحل دحياتهم .... بيلسان بنتكم ... وجود را ولدنا .... الله يكمل كلشي بالخيييير ....
رقية طلقات تزغرييييتة وبيلسان مخلطة عليها الفرحة والحشمة والضحكة وهي تشوف فجود لي تاهو مببسم برزااانة لي معاهداتهاش فيييه جاها فشكل تشوفو هاكا بعععقلو ولوؤي كيشوف فقدس لي ضضضاحكة فرحانة كيقول امتى غيجي هاد النهار لي نعيش فيه نفس اللحظة ونفس الفرحة معاها .... وهو يهز عدنان يديه بالفاتحة وكلهم هزوووها كيقراااو الفااااتحة بوجوه مبشورة وعينين دمعانيييين ....
عدنان : امييييين .... ساااائلييين الله عز وجل ان يبااارك لكم وويفقكم ... ويجعلكم درية صااالحة ويعطييكم درية صالحة ....
سفيان : ههه تزيدو لينا بهاد الكنية لقدام تاانتنساو حنا ويوليو اسماعيليين اخرييين كيتفكرونا ويقولولنا جد جدي ههه ... حافضو غير على الدم والعائلة .. راهم هوما لي كيتوارتو جيل بجييل ...
زياد : الله يكمل كوولشي بييخيير .. الله يسعدكم ...
مسحات اريج دموعها وشمرات بنفيها وشافت عند مساعدات لي فهموها ... تقدمو وحدة هازة مخدة مووبرة حمراااء كبيرة محطوطين لي بواط دالخواااتم وحدة هاازة مخدة اخرى فيها مجوهراتها وبرااسلي خداتو هي ليه ... ووقفو ضاااحكين ليهم وهوما وقفو كامليين وبيلسان شافت فجود لي مد ليها يديه مشاو باتجاه المساعدات والعائلة كلها وقفات كتفرج فيهم ووسيم كيصوررر خدا جود خااتمها من البوااااط على السيدة وهي مدات ليه يديها شد صبعانها وعلا عينو شاف فيها وهي تبسمات ضاحكة ضحكتها الملائكية ... وركب ليها خاتمها ... تحت ضحكاتهم و اريج دموعها كانزلوو وتمسحهم ... هزات تاهيا خاتمو من البواط ومد ليها يديه وهي كتركبوو ليه وكتفكرر نهارر ركباتو ليه فالخطبة لولة لي كانت غير عااادية مدارووش بحسابها ومكتمنى ميكونش نفس النصيييب وهاد الخاتم هاد المرة ميتحيييدش وعلات راسها شافت فيه وهو كيشوف الخاتم فيديو ورجع عنقها من راسها قربو ليه باااس جبهتها وهوما كيصفقووو ليهم ... رجعات لور مولات الخواتم وقربات لي عندها المجوهرات علات بيلسان شعرها ولبس ليها كوولي ديالها وبراسلي .. والبقية قاليها تاتلبسيه راسك هههه وتاهي هزات برااسلي اسووود من البواطة وهو علا حجبانو بمعنى تاهي تفكراااتو .. ولبساتوو ليه وشافت فيه ضاحكة تاسمعو وسيم ...
وسيم : يلااه يلااه عطيييوني هنا وااااحد الضضحيييييكة ...
قاربها عندو جود معنقها من خصرهااا ووسيم كيصور
لامار : بلاااتي تااانا نمشي حدا ولدي لهيه .. ( جرات اريج ) زيييدي يالاه ... صووور مزيان سير خرج ليا وجهي بحالا كنشوف فالشممس .. خيليني تانكون حالة عيني مزيااان
وسيم : وغيير زيدي زييدي
لامار وقفات خدا جود وهو عنقها بالييد لاخرى واريج عنقات بيلسان
لامار :صصصبر نقاااد شالي صصبر ...... ( ضحكاااات ) يلااه صووور دابااااا
صورهم وسيم وهي تمد بيلسان يديها جيهة زياد
بيلساان : عطيني بيااااان ...
جا زياد مدها ليها وكملو تصاورهم وهي تمشي اريج تاني جيهة جود ولامار عنقات بيلسااان وقدس كضحك عارفاه ماعندوش مع تصاور مع ذلك مبتسم داير الخاااطرر عجبها الحال تتشفى فيه ....
قدس : وصاافي بعععدو من تما اوو خمسين تصوييرة ( جرات قسم ) زييدي نت ماما راه مكتششبععععش
قسم : باراكا اماما حيدي لهيه خلينا حناااا تاني ....
مشات قسم حدا جود وقدس حدا بيلسان معنقيينهم ووسيم صور وتصويرة تاانية دار فيها السيلفي ...تاهو صووور رااسو معاهم ضااحك ... هو يمشي سلطان ولوؤي ووقف سلطان حدا قسسم ووقف لوؤي حدا قدس معنقيينهم وجابو اية بالكرسي قداامهم معلية جوج صبعانها بحال الكووريات ضاحكة ... عاد جات رتااج وحياااة وانس ..
وسيم : بلاتي بلاتي الا بقيينا هاكا راه مغنساليوش .. اجيو نديرو وححددة جمااااعية ونوضو فحالنا قبل ماجود يريب لينا الحفلة راه صابر معانا بزز هههههه ( جود كايمسح العرق من جبهتو و تايومي ليه بعينيه بمعنى قضي دغيا غراض ... وهو مد للخادمة تيليفون ) هااكي اختي صووورينا .... .. اااجي ااجججدة .. زييد ابابا كللنا ناخدو معاهم فوووطو ...( شاف عند الخادمة ) بعدي لهييه اختي يلاه تشدي هادي كامل ههههههه ولا طلعي فوق الشجرة ههه
وقف اسد معنق جود ويونس عنق بيلسان ولامار شادة فدراع اسد متكية ليه على كتفو واريج شادة فيونس ولامار واقفة حداها رتاج وعدنان ورايج واقفين حداها حياة وسفيان ومن جنب مستفين ولااادهم من غير لوؤي لي نزل الارض باش مااايغطيهم ررربع قدامهم فالارض عنقق عندو رقية لي تاهي ربعات فالارض حداه وبيلسان شافت لجنب زياد ونزلات راسها حيت تمناتو يكون واقف تما .... حسات بجود زير على يديها وعلات فيه عينيها دمعانين وهو دار ايماءة براسو خلاتها تفهم انه عرف مالها ... ورجعات حاولات تتبسم و شافت فالكاميرا بعينين دامعييين ....
الخادمة : ططخوا .. دوووو .. اااان ...
تضرب فيهم فلاااش وهوما كلم ضاحكين فصوورة عااائلية مجموعين حول جود وبيلسااان .... وبزاااف داابلايص واخا كايبانو خاوييين ولكن هوما كايشوفوهم عامرين ... رقية كاتشوف احمد حداها فرحااان ببيلسان مددلتو فحفايدو ... ولاما كاتوشف بلاصة مروان صديقها لي مكاينش ... اريج ورتاج كايشوفو بلاصة باباهم ... اية كاتشوف فبلاصة فيصل خاوية حداها.. كانو بلايص خرين خاوين بلاصة سارة وعمراان وماجدة ... تمناو لو كولشي كان حاضر كاين لي بعداتو الظروف كاين لي بعدو القدر .... وبكن واخا هاكاك فرحة ان الولاد تجمعو من جديد غالبة على وجههم وبانو غااصورة عائلة متلاحمة ومتكاملة ....
بداو يسلمو عليهم وكيباركو كولهم وبيلسان الخاطر والو ومبغاتش تبين وبداو يدخلو لداخل لصالون حيت تحرررك البررد من غير جود لي جرر بيلسان لي كانت تاهي دااخلة وداها معاه ماشي مور الدار اما هوما كلهم دخلو لداخل جلسو محكروش عارفين خاصهم يبقاو شوية بوحدهم من غير رقية لي كانت راجعة تبقى معاهم ودفعها سلطان قدامو مشا معنقها كاينسيها بالهضرة شاد فيها باش مترجع عندهم ....
جود جار بيلسان موراه مشاو تاوصلو لجردة الامامية وقلبها قدامو وهبط يديو ليديها هز يديها لي فيها الخاتم شاف فيها بابتسامة
جود : او اشنو امدام الاسماعيلي ! صافا ؟
بيلسان: ههههه راه اصلا انا اسمااعيلي هههه شنو تبدل
جود : ( بهداوة ) مبقيتيش مادموزيل ..
بيلسان : نوو بااقااا ....
جود : ماسخياااش ؟
بيلسان : اه هههه .. ( شافت ليه ليديه فالخاتم ) نتمنى هاد المرة ميتحيدش
جود : هادشي دابا راه واقف عليك .. حيت نهار حيدتو المرة لولا محيدتوش بخاطري ... كان عليك تبقاي وترجعيه ليا ... هذا هو الغلط لي كان
بيلسان : فيا انا ! مافيكش نتا لي فضلتي موناكو عليا ؟؟؟؟
جود : ( شاف لفوق ورجع شاف فيها ) ماشي موضوع هادا يتناقش دابا ومن الاحسن مايتعاودش يتجبد .. وانا موناكو حطيتو مور ضهري ...
بيلسان : ( بقات شحال كاتشوف غيه ونطقات ) كنعرفو شحال كيعني ليك اجود ... نتمنى حياتك ماطفاش من موراه !
جود : طفات صراحة .... ( شاف فيها ) داير شوية دالامل فبنت عمي يونس تجي تشعلها هه !
بيلسان ضحكات وتعلات على رجليها حاوطات عنقو بيديها كتشوف فعينيه وهو حاكمها من خصرها
بيلسان : وريني غييرر منييين كااتشعل هههه
جود : وداكشي خاصك تعرفيه راسك .. كون عرفت انا منيين كانشعل ... نشعلني راسي !! ههه اولا !
بيلسان : متعرفش ليها بوووحدك ههه ... كنت كنعرف منين نشعلك شحال هادي ولكن دابا مدامك حدايا واحد اخر ... غانبقى تانعرف تاااني ..
بقى غير كيشوف فيها وهبط عينو لشفايفها يلاه غايقبلها وهي تكمش بيلسان ملامحها ملي سمعات شي صوت وهو تنهد ...
بيلسان : فيبروور ! تيليفونك كيصوني !
جبد جود تيليفون من جيبو وهي طلات على الرقم بانت ليها ماجدة
بيلسان : علاش كتصوني عليك هادي ؟؟؟؟
جود : اش عرفني ... !!!
بيلسان : ( خطفات ليه تيليفون من يدو وجاوبات ) اللللووو ... ااالووو ... مااجدة !!!! ( هبطات تيليفون كتشوف وشافت فجود ) قطعات ملي سمعاتني .... ( دخلات لنمرتها فتيليفونو وهو كيشوف فيها اش كادير ومشات بلووكاتها ومداتو ليه ) ششد ...
جود : ( شد عليها تيليفون جاتو ضحكة ) ههه !!!
بيلسان : هادي راه مضروبة فراسها .. ملي صيفطت ليها انا خلات ليا الڤيو .. ونتا لي دابا واااحد خاطب جالسة كتصوني عليك فنصايص الليل مالها اش بغات .. هادي تتقلب عليا هادي ..
جود : ششش ( كيرد تيليفون فجيب ) ماقلب عليك تاوااحد مدخلييش راسك فهاد التخربيق وخلي شخصيتك فبلااصتها .. لاكان الخاتم فيدي راه ديالك نت ... ولاكنت غنتزوج بشي وحدة راه نت .. دونك كالم طوااا وبلا وسواس كيف قال ( قرب ليها ) عععمك اسد
بيلسان : راه حيت عارفها اش كااتسوااا اجود
جود : ماعندكش فايدة تعرفيها هي ااش كتسوا .. عرفي راسك نت اش كتسواي باراكا عليك ..
بيلسان : انا عااارفة لاا علاااقة ... لكن حط راسك بلاصتي وشي واحد كيضور بيا ويصوني عليا فنص ليل
جود : هاد الامور مكنحطش راسي فيهم فالخيال .. حطيه ليا فالواقع عاد نجاوبك ...
بيلسان : ( تنهدات ) متعاودش تجاوبها
جود : راها حتى الى مجاوبتهاش غنتلاقاوها فالدار ... هاديك راها من العائلة .... معنديش كيفاش ندير انا نقطع الهضرة ....وبنادم يشك ويطلع الهضرة .
بيلسان : اهاه وشنو غانديرو ؟
جود : ( جبد ليها حنكها ) غانديرو الثقة آزوينة ....
بيلسان : راه تايقة فييك وعارفة مكاينش لي تحركك من غيييري
جود : اووووو ... ههه ( بقا كيشوف فيها وهبط عينو لصدرها لي تيبان تحت طوب متوسط منفوخ وهي ضربو لصدرو )
بيلسان : علي عييينك وبلااا متخرج داك البااد بوووي ديالك تاني ...
جود : ههه !! علي حوايج .. باش البااد بوي يعلي عينيييه .. تهبطيهم غيهبطهم ... كلشي واقف عليييك ...
بيلسان : ناري شحال كتكب عليا كولشي ( علات طوب على صدرها وهو ضحك ) هببط ليا راسو ...
جود : ولي تسديه بشي قنبة دوزتها ليك اليوم خطبتك ... مرة اخرى مغادوزش بلباس يحال هادا قدام العائلة ... ( شدها من يديها ورجعو يدخلو ) يلاااه
بيلسان : صبر صبررر .. ( ضار عندها ) غااتولي تتتحكم ليا فحوااايجي !!!!!
جود : لااا .. ( تنفسات براحة هو يكمل جارها ماشيين لدار ) مغنتحكمش غير فالحوايج .. ( وسعات فيه عينيها ) امدام الاسماعيلي ....
بيلسان : بلاا متتتحلم ... ( وقفاتو وضار عندها وهبطات شفافيها ) خلييينا مزال
جود : لا يلاه حيت لابقيت مزال غنبغي نبوس .. والا بست غنبغي ن**حوي .. مالي على هاد تمارة نجبدو انا فنصايص ليل ونوحل فيه
بيلسان : ( ضرباتو لضهرو جارها موراه ) فخباااارك تبدل فيك كولشي الى تقزدييرك ....
جود : ماعندك ماديري بواحد كيحشم .. الحياة معاه مملة .. ( ضار عندها كيضحك ) يجي عندك يقول واش تسمحي ليينا ننننن ... ويحشم يگولها ويهبط رااااسو ويعليييه تاني خيييفان يقوليك برااااااحتك على خاطرك ماشي بزز زعما ... ي**حويك معنكش يالاأدب هههه
بيلسان : ( خسرات ملامحها ) عععع !!! .....مستحيل نكمل معاه ...
جود : يلاااه وا تحرركي .. وحمدي عليا الله راه سمعتى لوؤي اش قال
بيلسان : ههههه بشششوية غانطيح
دخلو لدار لي كانو كلهم مجمعييين فصاالون حداهم كيسان دالقهوة وشاي و العصير ... ورقية كتمشي وتجي تاشافتهم جاو عاد بردات فيها البيييضة .. ومشات جلسات حدا قددس لي بدا ييحرقها راااسها وسخانة كطلع ...
وهي تجي الخادمة مادة ليها بلااطو فيه مسكن و كاس دالما
رتاج : هاهي جابتو .. شربييييه ابنتي راه طلعات تاني ... سخاااانتك مافيهاش التيقة شفتي داك المرة
قدس : ( شدات عليها الدوا شرباتو بكاس الدما ولوؤي كيشوف فيها ) لا لا ماشي بزاف ...
جود : ( حط يدو على جبهتها ) واقلة نمشييو ... باش تنعس .. ( شاف فيهم ) ديجا تعطل الحال .. الحاجة سهرناها معانا
اسد : ( شاف لسعتو كانت قربات جوج ) اااه نوضو ... يلاه لامار ..
يونس : خلينا اصاحبي هاحنا قصارررين .. قدس طلعي لفوق علاش غتشدي طريق نعسي حدا بيلسان تغطاي حتى ترتااحي
اسد : لا لا نمشيو لدااار راحنا صابحين خدامين جوج دالليل هادي ....
لامار : وي تعطل الحااال ... قسم تاهي خاصها ترتاح ... ماما يلااه معااانا
اريج : ودابا الليل هدا خليها معااانا ... فين غتديها فهاد الليل
رقية : تالغذا ابنيتي وندوووز ...
لامار : يلااه غنتسناااك ... مروان ماعيطش ؟
رقية : هضر معايا قبيلة قتليه اجي تحضر لخطبة الولاد قالك باقي مشغول ..
لامار : اوا ماعلييش .. يلاااه تصبحو على خير
رتاج : ( ناضت ) تاااحنا نووضوو .... والله الى دازت قصااارة غزاااالة ...
سفيان : ( وقف ) نوضو نعسو ..
وقفو جميع كيودعوهم وجود غير غمز لبيلسان وخرج لطموبيلتو ركب فيها وقدس تخشات فجنب باباها كتمخشخ فصدرو وتمسح خناينها كاع فزكات ليه لافييست ... سلم عليهم وخرجو وهو وياها ... ولوؤي وسلطان خارحين دازو لعند جود لي باقي فطموبيل مهبط الزاج كيشوف فالتيليفون ميساجات من المنادجر ديالو والامور البنكية
لوؤي : مولاي السلطااان ... واش دابا !...
سلطان : بلاصتك فالبار غتبقى خاوية
جود : مال الكاس غنخون بيه بيلسان ! اش جاب القصارة للخطبة
لوؤي : اودي راك مكتحشمش .. ( ضرب علي كتفو ) تتصبببح على خييير ...
جود : ( شدو من يدو ) اااجي لهنا ... ( ضار عندو لوؤي وهو تبسم ليه ) راااك ولد العم .... منتسالكش ....
لوؤي : هه ! اصاحبي راه هادشي مانكسابو غا هاد الدم لي كايجري فينا ..
جود : ( شاف فسلطان ) اودي راه نتوما لي كاااينييين ...( بجدية بعينيه ) ششكرا على هاد الوقفة
سلطان : اوووو .. ماجاتش معاك هههه .. اسيدي الزواج كاييييعقل
لوؤي : ههه زيد زيييد ( جار سلطان )
جود: ( طل من الشرحم ) ااهياا مابقييتيش باغي سوارت الكاراج ؟؟؟
لوؤي : قاااديييت الاموررر
بدا يضحك جود وسلطان سولو ملي ووصلو لطموبيلة سلطان لي كانو مپاركيين بعاد باش ميشوفهمش جود ملي يجي
سلطان : تصاالحتي مع الواليد ؟
لؤوي : مشيت عندو صباح لشركة هضرنا شووية ...
سلطان : شنو قال
لوؤي : لا لا مهضرناش فداك البلااان ..هضرنا عادي .. هو نسى وانا نسييت .. ماعلييش ..
سلطان : وتهلا تهلا ... ديير شوية دالخاطر ماتقجرش بزاف ...
خلاه ومشا لطموبيلتو ولوؤي تاهو ديمارا وزاد ... خرجو تاني لوخرين كل واحد شد طموبييلتو ومشاااو لديووورهم كايتسمع فداك سكون الليل غير صوت طموبيلات كايقلعو ... من غير جود لي ماديماراااش .. بقى فطموووبيل فبلاااصتو كيطبل فالفولون وكيتسنى ....
وسيم : ( كيشوف من زاج لور طموبيلات لي موراه ) فين جود ؟؟؟؟ سبقنا ولا
اسد : جود بقى تما
لامار : هاء علاش؟ اش كايتسنى ....
قسم : انا عارفاه اش كيتسنى
قدس : شنو ؟؟؟؟؟
اسد : اياد .....
لامار : والى مجاش ..
اسد : غايبات تما ....
لامار : ففف !! جوج ريوس دالحجر تلاقاو ....
كملو طريقهم وقدس متكية على قسسم مسخسخة ووسيم كيشوف التصاور ويصيفط لجود ولبيلي واسبرو ... تاوصلو لدارهم ... هز اسد قدس عندو شافها مسخسخة كتوقف غا بزز زادت سخانة طلعات وداها لبيتها دخلو معاها كاملين ولامار كتحيد ليها صباطها
اسد : واقيلا نعيط لطببيييب حسن
قدس : لا لاااا لا ( بصوت مسخسخ عيان ) غيجي يضرب ليا داك البرا لاااا .. سخانة وصافي دابا تنننززل
اسد : وتبقاي هاكا ابنتي مخلية فينا الهم !
قسم : انا غنبات حداها هنا غير سيرو ..
قدس : صافي هاهيا قسم تبات معايا غير متجيبوش طبيب
اسد : نوضي بعدا دوشي عاد نعسي ...
قسم : اااه حسن .. اجي نعاااونك ...
لامار : سيري نت بدلي حوايجك خيليني انا ندوووش لييها ...
قدس : ولا بلا متزيدو فيه غندخل ندووش بوحدي ... فيا التبوريشة وصافي ... صافي غير سيرو تنعسو راه غنصبح صااافااا ..
تنهد اسد وباسها على جبهتها وباستها لامار ومشاو بدلو حوايجهم وقسم حيدات الفيست دالكوستيم بقات غير بديباردور بييض كان تحت الكوستيم وحيدات ليها تاهي فيست ديالها لحمها كانت سخووونة وحمرة ... ودخلاتها لدوش ...
قدس : غير بدلي حااالتك انا غااندوش بالخف
قسم : برردي شوية الما باش يوووكضك .. انا نلبس بيجامتي ونجي نشف ليك شعرك
قدس : داكوغ ...
مشات قسم وقدس كملات تحياد حوايجها ودخلات تحت رشاش والما دوزاتو شوية للبارد وكلها كتبووورش وتششمرر بنيييفها وكتحاول تولي صافا غير باش ميجيبوش ليها الطبببيب ... غير كتفكر عينيه وتفكر اهتمامو وكيفاش كل مرة كان كيحط يدو على جبهتها وكتبسم وتنسى كاع المرض ...
اما قسم دخلات ديريكت لديريسنغ كتحيد حوايجها ... قبيلة جات غير بزربة الوقيتة لي كان جود فلاطوولي تاخلعاتهم فالدار واسد باقي لدابا محكرش شكون جابها لكازا حيييت عارف شكووون ومتأكد ... غير بدلات وبقات مخبية على جود تا دخل لجناحو عاد هي و قدس مشاو ...
حيدات حوايجها ولبسات بيجامة خفيفة ساطان عبارة غير على شورط وديباردور و بينوار قصيير كحل ... رطبات يديها وجمعات شعرها تامن الروتين ديال بشرتها مافيها لي يديرو وهزات التيليفون بزربة تمشي عند قدس .. يلاه غتحل الباب تخرج وهي تشوفو كايصوني فيديها .. لقاتو اصيل تبسمات وجاوبات
قسم : اصييل باقي فااايق ؟
اصيل : يلاه دخلت
قسم : واش دخلتو لبحر ؟
اصيل : راه ملي حطيتك مشيت ديريكت ... بصح مغرقناش بزاف كنا قراب دغيا رجعنا .. كيف دازت الخطبة
قسم : صافاااا داااازت واعرة صراااحة شططحنا ونشطناا هههه كنا محتااجينها نخويو شوية طاقة السلبية...
اصيل : مزياااان الله يكمل كولشي بييخيير ...
قسم : امييييين ... لقيتيني غادا نبات مع ختي ... طلعات ليها شوية سخانة وهي مناعتها طايحة خفتها تسخف ولا شي حاجة
اصيل : مااايكوون باس ... ماعلييش ... سيري منشدكش بزاف تالغدا ...
قسم : تتصصبح على خير .. اه .. وشكرا على الصباح الزوين لي دوزت معاك كون مكانتش الخطبة دخويا كنت ندوزو معاك كامل ..
اصيل : مااعليييش احبيبتي مرة اخرى ... تصبحي على خير ... تا لغدا ونشوفك
قسم : ان شاء الله .. غدا عندي اجتماع فالجمعية وعندي فالعشية مؤتمر صحفي حيت ساليت العسكرية خاصني نخرج بتصريح تااااني ... وبليل عندي تقديم الشاارة ... نهار شوية عامر دونك نشوفك فصباح ... بغيت نشوف رييسسطووو ونبلاني ل لاكويزين مزيان
اصيل : واااخا غنجي نديك فين حطيتك قبيلة
قسم : الا غير خليك حدا الريسطو ونجي عندك انا ف الصباح ... يلاه تصصببح على خييير ..
قطع ومشات لجناح قدس كتسمع الما باقي فالدوش .. حطات تيلفونها يتشارجا ومشات للخزانة دالفراش وجبدات ملايات رقاق بدات تفرشهم على واحد الفوطووي طويل قريب لسرير قدس ... وخدات مخدة حريرية ... ومشات كدق عليها فدوش
قسم : ققدس .. صافا ؟؟؟ ندخل نعاونك
قدس : لا لا صافا .. هانا غنخرج دابا
قسم : داااكوغ انا هنايا ..
خلاتها ومشات باتجاه طابل دونوي كانت محطوطة قرعة دالما تشرب وهو يبانليها تيليفون قدس شعل بصوت ديال ميساج وكيتلونصا كامل فالشاااشة .. مبغاتش تشوف حيت خصوصياتها ولكن ثارت انتباهها واخد الكلمة بانت ليها وقلبات عينيها دغيا وهي تقرا ميساج مكتوب فيه " وصلتو لدار ؟ واش شوية احبيبتي ؟ " علات عينيهت لسمية هي تلقاه لوؤي !!!!!! .. وعلات حجبانها بجوج وهزات تيليفون عندها كتشوف مصدومة !!!!!! وبدات تعلي فليميساج ديالهم بان ليها اخر ميج من قدس : " ماتصونيش عليا كاينة مع قسم فالطموبيل مابغيتهاش تحس بشي حاجة بيناتنا " .....
قسم بقات غا كترمش كاتشوف اتيل وتشوف فباب ددوش بصدمة ...
كتقرا وتعاود فداك السمية !!! مزال كتحاول تكدب عينيها وتقول هدا شي واحد اخر وماشي ولد عمنا .. لكن صورة بروفايل كانت صورة رتاج فتكريمها ... هي نفسها بروفايلو! اذن هدا لوؤي !!! .....
سمعات الباب تحلات خارجة قدس ببينوار بيض و جامعة شعرها ففوطة و فوطة صغيرة فيديها يلاه كتمسح وجهها وهي تعلي عينيها فقسم لي واقفة وشادة تيليفونها وملامحها مستغربين !!!!
قدس قلبها بدا يضرب ومشات دغيا بززربة جيهتها حيداتو ليها من يديها وقسم باقا على وضعيتها كتحاول تستوعب وقدس شافت لشاشة ...وهي تغمض عينيها وطلعات راسها لفوق كتسوووط
قسم. ل ... لو .. ( شافت فيها معلية حجبانها باقا مصدومة ) لوووؤاي !!!
قدس : ( جلسات على السرير كتنفس ) قسم ... راه من العييييب تهزي ليا التيليفون تقلبيه واقلة !!!!! .. واش انا موالفة نقييس ليك تيليفونك !!!!
قسم : ( هبطات عينيها كتشوف فيها وباقي ملامح الصدمة مرسومين عليها ) انااا جييت نشرررب .. تييلييفوووك ششعل والميساااج بان قدام عييييني ... ( هبطات على ركابيها تقابلات معاها وقدس كتلعب بعينيها هنا وهنا محاااملاااش راسها لي تفضح الامر ) لوووؤاااي اقدس !!!! لوؤي !!!!
قدس : ( زفرات النفس وشافت فيها ) مكااين والو .. غير ضحكو باسل ..
قسم : اااه .. مككنعرفوووش انا لوؤي ... ( ضورات ليها وجهها عندها ) شووفي فيييا راه كنهضر معاك .... شنو بينااتكم ؟؟؟ شنو هي هاد الحاجة لي ماباغانيش نعرفها ؟؟؟؟؟؟
قدس : ( نترات وجهها منها ) تاااحاجة ...
قسم : ( عوجات راسها معاها ) ميييمكنش ...
ناضت قدس من بلاصتها وحيدات الفوطة على شعرها تاطلق كامل سارد وكتشمر بنيينفها وقسم متبعاها بعينيها ووققات ..
قدس : غير ... م .. مكاينة تاحاجة صراااحة ... ر .. راه قتليك ضحكو بااسل .. وو ...
قسم : ( كتقرب عندها ) قدس انا راه مكنحاسبكش انا باغا نفهم .... فبلا ماتخليني نتعصب فهاد الليل .....
قدس : ااش غااتفهمي ؟؟ مكااين وااالو
قسم : ( بعصبية ) لا كاين بزاااف خاضو يتفهم ... ( بنبرة اعلى ) حيت هذا ماشي واحد براني ولا كيقرا معاك .. هدا راه لوؤاااي .. ولد عمنا ... ونتوما ساااكتيييين ... لا نت .. لا هو .. .يعني هادشي فاش كيفكرك .. ها ؟؟ ماجاكش شي دييجا ڤي فوقاااش عشنا هادشي ومعامن !!!
قدس : ( مشات جلسات فوق الفوطوي كتنهد ) ماشي بحال هاكاااك غير تهناي ...
قسم : ( كاتمشي وتجي متوترة وشافت فيها ) عاد اخر مرة دوينا قبل منمشي للعسكرية .. فاش عاودت ليكم على اصيل .. سولناك اش قللتي !! ققلتي انا عندي ستة وتلااااتين واااحد .. ومكنبغي تاواحد .. وماباغا نبغي تاواااحد ... وزواج وانني نتجمع مع واحد مداخلاش ليا لدمااااغي .. ونت .. اش دايرة !!! علااقة مع ولد ععععمك ... وحنا جالسة تككذبي غلينا ؟؟؟؟؟ عينينا فعينيك ؟؟؟؟ واش مكتحشميييش من راسك ؟؟؟ واش ديما غاتبقاي تربيبي هاد ثقة لي كل مرة كنحاولو نديروها فيك ؟؟؟؟؟
قدس : ملي تفككرتي اش قلت داك الليلة تفكري كوولشي ولاا سكتي .... هضررت حتى عليييه ...
قسم كانت كتشوف فيها وبدات كتمشي وتجي وترد شعرها لوور كتتفكررر وقدس غير جالسة وكتشمر بنيفها ولتخات الفوطة محاملاش كاع ملي عرفات قسم وباباها عارف كتحس صاااافي مبقى والو والعائلة كاملة تعرف وتلقى راسها تاهي كتلبس خااااتم وكيتسناها زواااج ... وقسم كتفكر كلامها كامل......
🔙Back
---------------------------
قسم : واش كتعرفيه ؟ بيناتكم شي حاجة
قدس : لاااا .. ولكن هو كيقول بلي كيبغيني .... ومعاملتو ليا عامرة اهتماااام ... ومنكدبش انه كيعجبني ولكن متسلط .. انا باغا نهار نتزوج ندي شي واحد كووول ... ما المعقدين راه طالعين ليا فراسي... اون پليس دو صا ... مزال باغا نعيش حياتي ونشبع من الصغر ديالي و فشوشي ... نخرج وندخل براحتي ... هانتي شوفي راسك دابا هازا ليه الهم لايتقلق .. انا را منعرفش لهاادشي كيعجبني نعيش لراسي ونتقلق من راسي ونحزر راسي منعرفش نحزر شي واحد .. مستحيل نصبر على حكام شي واحد .. مزال باغا حريتي ...
-------------------------------
غير تذكرات كلامها كامل رجعات شافت فيها ...
قسم : يييعني !!!! كيبغيييك بوووحدو !! ومابيناتكم والو .. وقاااادر يكتب ليك مسج .. فيه .. حبيبتي !!! ونت كاتقولو ليه مابغيتش قسم تعرف شنو بيناتنا؟؟؟ علامن كضحكي دابا؟؟؟؟؟ عليا !!!!!
قدس : ( كتشوف لارض مدة فلخر لقات راسها اصلا ماعندها فين تتهرب زعارفة راسها شحال قاسح وشحال مكادوزش عليها .... فلخر علات راسها وكتشوف لجنب )لي قلت كان صحيح ... ولكن لبارح ... تبدلو شي حوايج ...
قسم : ( مشات جلسات حداها كتشوف فيها باهتمام ) اهاه !!!!
قدس : ( شافت فيها ) ششششفتي لالقيت هاد الهضرة خرجات .. غاانكرك واش نت ختي اقسم
قسم : هضري طلقينا .. شنو تبدل لبارح ؟
قدس : ( ساطت النفس وشافت فيها ) مهم ... هو لي كان كيضور بيا ... هو لي ديما تيقول انه كيبغيني .. اهتمامو بيا كان باين ... منكذبش انه كان عاجني فنفس الوقت خااالعني ... معرفتش امتى حتى انا بديت كنتجر ليه ومباغاش نبيين لا ليه لا لراااسي ... ولكن هو مكيتعااااتقش .. بالمرة ... البارح واااحد القققحبة .. استفزاتني .. سمعتها بغاتو ولا منعرررف وغتتمشي عندو وغتهضر معاه مهم بزاف ديال التخربيق استفزاتني .. نسيت راسي كااع متحكمش فراسي وبينت غيرتي قدااامو ... ( قسم علات حجبانها ) بحالا تقولي .. تشديت متلبسة قدامو ... كيف تشديت قدامك دابا وهانا كنعترف ( دوزات يديها على وجهها كتنهد ) ومااقديتش ننكر .... وو .. معرفتش كيفاش نوصف ليك ... ولكن بان ... ليه ... وليا .... انني واقلة ... ( شافت فيها وعينيها حمارو ) كنمييل ليه حتى انا ....
قسم : ( غير كترمش وكتستوعب هادشي وشافت فيها ) واقلة !
قدس : ( شافت لارض ) معرفتش ..
قسم : هادشي راه مافيهش معرفتش اقدس .. راه ولد عمنا ولد العائلة ... كتلعبي بيه ؟؟؟ واش مكتعرفيش لوؤي غنجي نوريه ليك ... عارفة الى لقاك مع شي واحد ؟؟؟؟
قدس : ( بملامح لا مبالية ) فااايت شاافتي .. مادار والو. .
قسم : قبل ماتعطيه الفو فييييغ اقدس قبل مايكون بيناتكم والو ... اما دابا راه بحالا قلتي ليا راك عطيتي انطلااقة لواحد العلاقة .. اولا !!! يعني هادشي كيعني .. يااا هوووو بووووحدو ... يا تقطعي عليك هادشي ... اما لاكنتي باقا عندك داك النية وداك الدماغ ديال غضحكي مع هدا وهداا وهدااا ....هدا راه اسماعيلي ... رااه دمك .... ببييعدي منو ... راك غتجيبيها فراسك وفييييه وفعائلة على قدها حيت هادشي لي كتتتقولي راه صعييييب مع ولد العائلة ..
قدس : قلت ليك بصريح العبارة كنميل ليه ... واش فنظرك غنقدر نميل لواحد اخر .. راه واخا نكون حيوااااانة اقسم
قسم : مااعرفتش .. حيت من عقليتك ومن شنو كنعرف عليك غادوزي معاه واحد سسييمانة وغيبان ليك فواحد اخرررر
قدس كتشوف غير فالارض ساكتة وكتنتف فالفوطة ديال شعرها وقسم وقفات كتمشي وتجي ..
قسم : علاش سكتي دابا علاش .. عندي الحق ولا معنديش .. مالقيتي بييمن تلعبي .. علاقة مع لوؤي كتتعني كاين غير هو .. كتعني جوج حوايج غاتساااالي بزواج .. امااا بروح غاطيح لامدرتيش عقلك وتحملتي مسؤولية هاد العلاقة وخوك كان اكبر مثال ..... ققققدس ( ضورات ليها وجهها بحدة ) .. شوووفي فيا راه كنهضر معاك راه هذا ماشي لعب دراري ( طلعات عينيها شافت فيها وقسم كتهضر بجدية ) واااش كتشوفي رااسك .. غتبقااااي . .غير معاه .. ولا كتشوفي راسك .. مزااال مااشبعتي من مراهقتك !!!!
قدس : ( نزلات راسها تاني )هادشي مناااش خاايفة اااقسم .. هادشي لي مخلاااانيش نقبلو من لول نستسلم ليه ... ووو لكن ماعرفتش لبااارح معرفتش اش وقع ليا وماشي غير لبارح .. فوووق مااانولي غير انا وياه .. مكنعرفش اش كيوقع ليا اقسم .. ييعني لي كنحسو من جيهتو عمرني حسيتو من جيهة واحد اخخخررر ... اه كيعجبني كل مرة نكراشي على واحد نملو ونلوحوو ولكن راه معمرني حسيت هاكا معاه ؟؟؟ قلبي كيضرررب والدموع كيبغييو ينزززلووو ... يعني .. شي حوايج جدااااد ... لي مخلاونيش لبارح نمنع راسي مزال ... خصوصا ... فاش كنجلس مع راسي ونتخيل ونبغي نقنع راسي بفكرة انه يقدر يكون مع شي وحدة اخرى كنلقى راسي تعصبت !!
قسم : يعني راك كتبغيه .... كتبغيه اقدس ... !!!!!!
قدس: معرفتش واااش وصلللت لاني نبغيه ولا غيررر كييعجني ... ما عرفتش .. ( شافت فيها خااايفة ... )
قسم : يعني !!
قدس : ييعني .. ب باغا نرجع لوور ونقوليه ننساو ليلة لباااارح ... فنفس الوقت .. م م مباغاااش ننساو ... ماباغاش نخسرو .......
قسم تنهدات ومشات جلسات حداها وخدات نفس عميق فاش الدمعة هبطات على خدها ومسحاتها ليها وبدات تحاول تحكم فعصبيتها حيت لي وقع وقع وخاص الحل ماشي الخصام ..... وشافت فيها
قسم : ققدس .. وشوفي فيا اختي .. نتي ماشي كيعجبك .. نت راه تتبغيه .. مكنغيروش على لي كيعجبناااا ... كنغيرو على لي كنبغييوه الى جات على لي عجبنا شحال من سطاار كتموتي عليه فداك انسسطا .. مزوج وبولاااادو علاش مكتغيريش عليه ! هدا ماشي اعجاااب ... انا ماشي كونطح هادشي بالعععكس .. لوؤي كنعرفووه حسن من لي مكنعرفوهش ومتأكدة مية فالمية انه غيتهلى فيك ومدام قاالك تاييييغيك راه كيبغيييك دبصح حيت ماشي لوؤي لي غيلغب بدمو ... وولكن ... هادشي خططررر ... خطر بنسبة ليك نت لي بااقي باغا تعيشي وكتقوليها وتعااوديييها .. يعني ماواقفاش على علاقة رسمية ... وشحال قد هاد الحرة تخبى و تبقى فااسر ؟ غير النهار اللول هاهي تفضحات حدايا وغدا بابا وموراه جود .... هاد علاقة لا بقات هاكا مخبية خطر اقدس .... متعانديش معايا خيت انا مامخبياااش !!!!! .... مغاتعاملوش بنفس الطريقة حيت لاحصلوكوم مغايقولوش هدا حب .. غايقولو هدا الغدر .... نت غاتغدري والديك هو غايغدر صاحبو ... خوه .. ولا يشوفك مع شي وااحد ومغييصصبرش .. ولا شي نهار تسوسييه تعدبيه فحياتو وهو راه مغيستاهلش وحنا راه مغانخليوكش تللعبي بيه حيث خووونا كيفما نتي ختتتنا ... ( تنهدات وشدات وجهها فاش شافتها كتبكي ) قدس .... هاد العلاقات فالسررر صافي راه ولات عندنا منهم فووبيا .. يشوفكم جووود نعاودو السيناريو !!!!! مقاااادينش .... والله مقااادين ....
قدس : هادشي كامل راني عارفاااه .. عارفاه حتى انا وكنشوفو قدام عيني ....و قلتو ليه البارح ... قال بلي هو ماشي بحال جود .. وقال بلي ... ففففف ( علات راسها لفوق ) مزال ماقاداش تانفكر فيها .... ( شافت فيها ) .... قال بلي هاضر مع بابا ديجا على حسابي
قسم : ( حبات فمها ) واااات !!!
قدس : .. ملي فخبار بابا .. قولي راها فخبار تاماما .. غاهي كتعرف تفضحنا غير حنا ....بابا لاقال شي حاجة كتتستروووو مزياااان ..
قسم : اومايكاد !! ( بصدمة ) وشنو قاليه بابا ؟؟؟؟؟
قدس : قاليا قاليه تاتكبررر .. عاد يقرر واش يعطيني ليه ولاا لا
قسم : يعني هو مشى طططلبك ؟؟
قدس : معرفتتتش اش كايتسمى هادشي ....
قسم : هادشي كايتسمى حاجة وحدة !! هو لوؤي مايستاهلش تحطيه قدامك طيسطور كاتسنااي تاااااترشق ليك تبغي تتزوجي ..... هو راه تعلم من الغلطة دجود على هاد الحساب .. .يعني تانت خصك تعلمي ( شدات يديها ) الى كان هادشي لي عاودتي بصح لوؤي راه كيبغيك .. الى مقادراتش تبادليه نفس المشاعر ببعددي منووو
قدس : ( نترات يديها منها بزعفة ووقفات بعصبية ) مقاااادرااش اقسم .. مقااادراااااش ... منعدبوووش هو ونتتعددب انا الا شفتو مع وحدة اخرى !!!!!
قسم : ( وقفات معاها ) ومتعذبيه لا هو لا راااسك ... بقاي معاه ومااتخووونيهش ... متتلعبيييش بيييه .....بغيه دبصح كيما هو باااغيك ..... على الاقل غير خخطبة ... غير ماتخباوش اقدس ... جود لي فيه المشكل ماشي بابا .... جود خصو يعرف
قدس : مستحيل اقسم ... داك ساع غايبغي يفرض سيطرتو بزز عليا بحجة داك الخاتم .... اما دابا لا ... قادرة نوقف فوجهو حيت مخبين ولا تعكس غانتفضحو
قسم : هه !!!! بحالا هو لي عندو المشكل لاتفضحتو !!!!! نت لا !!!
قدس غير سكتات كتنهد وقسم كملات ..
قسم : هو .... لوؤي ...موافق على هضرة بابا ... يعني عارف ان مكاينة تاحاجة حتى تكبرو !!
قدس : قلتها ليه و .. وقاليا نتسناك ...
قسم : ييعني !!! نتوما راه دخلتو فعلااقة لبارح مادام اتفقتووو قد هاااكااا ..... واعية بهادشي. ....
قدس : ( ضارت شافت فيها بملامح قلقين ) و .. واقلة !
قسم : يعني اقدس ... نت كتشوفي راسك دابا فعلاقة معاه .. يعني مدخلة لدماغك راه هو لوؤي لي غادي تدي ! راه مكاينش من غيرو .....
قدس : ا اه .. ماعنديش مشكل ... نديه .... باغاه هو لي نكمل معاه حياتي نهار نوقف على الصح .... و ولكن ماااشي دااابااا .. تانولي قدك !!!
قسم : ( وسعات فيها عينيها ) واااات !!! يتسناك تسسع سسنيييين !!!!
قدس : ( شافت لفوق ) اوا االى بغاااا .. من غير هاكا للاااااا ...قال يتسنى تالموووت .. او يتسنى تالموووت
قسم : ( مصدومة فيها ) اومايكاد !!!! الموت اختي راه غتشدو نهار يسمع تسع سنين على هاد الحسااااب !!!
قدس : هوو بغااا .. عارفيني مغنتزوجش دابا
قسم غير كتشوف فيييها وبدات تتنهد كضور فرااسها وشافت فيها
قسم : عندك 19 عام ... وكتعرفي الصح من الغلط ... ومابقيتيش صغيرة ..... ( دارت يديها على فمها ) انا مغاندويش ... هانا غانحترم خصوصياتك ... واخا داخلة فيه عائلتي ولكن معامن كنهضر !!!! مع وحدة كانخليني تاكنسالي هضرتي وضربها ليا عرض الحيط ..... ولكن راه لاوقعات شي حاجة لجود ... راه انا لي مغانعقلش لا عليك لا عليه ... وتحملي مسؤولية عادشي لي دخلتو فيه ....
قدس : ( كتمشي زتجي كاتغزز فضفارها وكتهضر متوترة ) شششكرا ... رتاااااحيت من هضرتك شششكرا على هاد الراحة النفسية ...
قسم : ( غاتحماق ) واااااش باغا تسطيني ؟؟؟؟ دايرة علاقة مع ولد عمك مور البيبان فالظلام نهار يتشعل الضو تريب علينا الدار وهادشي غايطول تسع سنين وكاتقولي راحة نفسية ؟؟؟؟؟؟
قدس : ( كلسات كتنهد ) لي درت راه درتو ... ومغانتراجعش ... ماعندي كندير نرجع لور ...... ومغانزيدش لقدام ... غانبقى واقفة فبلاصتي معاه تاتبان ليا الطريق ..... وجود مغايقول والو الى عرف بابا فخبارو ....
قسم : آزيييين .... ااااختي الغزااااالة .... بابا كون عرف دايرين علاقة ورا البيبان والله تايسد عليك فصندوق بالقفل .... بابا راه طلبك منو فقط وقلتي شحال هادي ... يعني غايكون قاليه مابيناتكم والو .... كاتقولي بابا فخبارو بحالا هو لي كايقوليك سيري ابنتي الغزالة بوسي ولد عمك ...
قدس : ( ضارت عنها بعصبية ) وشكووون قتليك بسسسستو
قسم : وااضحكي ضحكي عليا انا ..... ( ضارت كتشرب الما شحفاتها ) بابا فخبارو قاليك ... انا لي عارفني غانتزوجو كاع وقرييب يجي لدار ونتخطبو رسمي ومامخلينيش تااانهضر معاه فتيليفون ....
قدس : قاااسااام .... عرفتي اش غاديري ؟ انا بريت .. انا وليت صافااا سيري تنعسي فبيتك ... سيرس هضري مع سهيل ديالك ولا منعرفت اش سمتيو وبعدي مني
قسم : ( مميقة فيها كطلعها وتهبطها ) سهيل !!!... ( تنهدات ) شفتي التخلااااط شحال مامزيانش .... سميتو اصيل ... اصيييييل ... سيري نهار يجي قولي ليه سهيل وخرجي عليا ....
قدس : الااالة اصييييل ... سي اصيييييل .... سيري هضري معاه ... وبعدي مني ... ( ضارت كتميق ) اودي هو لي طالعة ليه .. تلاقاوه بااورد ولوؤي ريبو عليه دار ....
قسم : وباااااز اختي بااااااز .....
قلبات قدس راسها مفقوصة وقسم تنهدات كاتشوف طريق لعندها مسدودة و راسها اقسح مكاين فالعائلة .... ورجعات موكلة امرها الله ....
قسم : اااجي اجي نشف ليك دااك الشعررر ... اااحجججي ... ماالقاااا مااايبغيي .. كيقولوها لهلا يطييح حبك على حجرة .. ( ناضت قدس ماشية للكرسي ) وحححجرة نييييت طاح عليها .. جللسي جلللسي ( جلسات فوق كرسي قدام المرايا فين معلق سوشوار ) والله الا تسع سنين قالك ..
هزات سوشوار كتنشف ليها وقدس كتشوف فالمرايا ساااهية وقسم مزال غير كضور فراسها وتهضر جابت ليها الحماااااق ... نشفات ليها شعرها كامل وقدس رجعات وفقات
قسم : سيري بددلي حوايجك غير مغتزيدي تمرضي دابا
قدس : نو حسيت بدوش فاجا عليا شوية ...
قسم : بدلي واجي دخلي ففراشك ...
دخلات قدس للدريسينغ حيدات البينوار لبسات غير بيجامة خفيفة وقسم حيدات الكوفرلي من على السرير وتخشات قدس وغطاتها وتكات حداها كتشوف فيها ودايرة يديها على جبهتها
قسم : نزززلات شششوية ... الحمد الله
قدس : دوش نفعني ..
قسم : (كاتشوف فيها وتنهدات وبدات دوز يديها على شعرها كالسة عند راسها ) قدس ... تعصبت اه .. ولكن راه عحبني تكوني مع لوؤي ... مناسب ليك وتستحقيه ويستحقك ...مغالقاوش ماحسن منو ونا متأكدة مليون فاامية كووولشي غااايفرح .... نت مامحتاجاش تسع سنين ... نت محتاجة غير شوية دالوقت تستوعبي هاد العلاقة ... وغاااتجي راسك تهضري مع بابا .... وراااشك غاتبغي تكوني معاه رسمين حيت مستحيل تتحملي داك كمية الخلعة كاملة لي غاتعيشي فهاد علاقة .... تتفارقو قلتيها انك ماتقدريش ... وتكملي فالسر مغاتقدريش ... داكشي علاش الحل ... غاتلقايه راسك ... وهادشي لا درتيوعقلك وكبرتيه ... خليك صغيرة فعينيه هو فعيني انا فعينين بابا وماما ... ولكن فاامواااقف لا .. خصك تكبري .....
قدس :حركات ليها غير راسها باه مرخية واخا هي عارفة ومقتنعة انها مستحيل تبغي تتزوج دابا ومزاا ماقادراش تستحمل سيطرتو خصوصا فاللبس ديالها ...
شوية تحلات الباب و دخلات لاماررر
لامار : قققدس ..باقيين فايقييين ؟؟
قدس : ( طلات من الفراش ) ماما منعستيش
لامار : لا جيت نشوفك ... ( قربات وحطات يديها على جبهتها ) خفات شوية الحمد الله ... تصبحي لاباااس ان شاء الله .. ( حيدات عليها كوفرلي شافت شنو لابسة لقاتها لابسة سروال وتيشورت على شكل بيجامة )
قدس : اش كتشوفي
لامار : باباك قالي شوفي واش لابسة حوايجها حيت لي فيه مايهنيه راه غيبقى داخل خارج عندك
قسم : ( شافت للبينوار لباستو حيث الديباردور كيبين الصدر كامل ) اليوم غنعسو بالبينوار
لامار : ههه غييير غطي .. ههه ماباغيش يحرجكم ..
قدس : راه قسم معايا اماما غير نعسو ترتاحو
لامار : لا والو طار نعاس هو راه فالبالكون كيتسنى تا خوك يجي .... معارفاهش هو راه مكينننعس تاااا كتنعسو نتومااا
قسم : لهلا يخطيييه علينا ...
لامار : ( شافتها وغطات قدس وقربات لجيهة ديالها ) اااجي نت لهناااااا ... شكون جااابك هم !!
قسم : ضروووري زعما هاد السؤال تحكرووو واخا راكم عارفين .. ضروري تحرجوني !!!
لامار : ( كلسات حداها وقدس كطل بعيويناتها من الكوفرلي ) باباك راه عرفك ملي حطاتك داك طيياااارة ... مقطعة لبيي بلاكااارط ديالك سينوغمااال ... وانا لي قلت ليه خلييييهم ماهو كان جاي عندك ... بقيت عليه شهر ونص مااعلييش ... واصلا مشيتي بلا متشوفيه .. وماخليت ماقريت عليه باش خليتو يكلس .... هو لي جابك لهنا ؟؟؟؟
قسم : وشكون غايجيبني ..... ( شافت فيها بحال قطة مشاكسة ) و .... وراه ماشي مشيت بلا منشوفو ....( حابسة ابتسامتها وبانت فعينيها ) ششششفتو عاد مشيييت
لامار : ( شافت فقدس لي حلات عينيها تاهيا طار المرض وشافت فيها ) وكيدرتي ليها ... ياك جود وسلطان مشاو معاك قالولينا ماجاو تادخلوك للبوغ !
قسم : للبوغ ماشي للباطو هههه ( شافت فيهم مصدومين وهي كضحك ) جا عندي للبوغ ....
قدس : اووووو !!
لامار : ولاايني تاهذا مكيييحشمش
قسم : انا حسابتني تقلق .. ساااعة هو قالي بغيت نديرها ليك سيربرايز وقاليا بلي مرة اخرى ملي نبغي نشوفو ( كتهضر وتضضحك و كتقلي ليهم السم ) نقولهاليه هو يجي عندي بلاااا منتحط انا فموقف مححررررج ... ( لامار وقدس دايرين فيها نظرة ديال ياااااك ) اه وحاجة اخرى .. قاليا عااااائلتك هي لولا وهو ماشي وليييد صغييييير يتقلق من هااااادشي
لامار : اياهايهاي ....
قدس : ( غضات وجهها بكوفرلي ) يااااااااربي تصصصبرررررني. ...اسسسكت يااااالسااااني اسسسكت
قسم ( ضرباتها فوق الغطا ) : لا غااااا هضري .. هضري نشوف
قدس : ( حيدات الغطا كاطل بعينيها ) اودي سهيل لي صدقات ليه
قسم : ( غمضات عينيها مزيرة عليه ورحعات حلاتهم ) اصييييييل ...
قدس : ( كاتبركم ) اودي راح مأصل نيت ... خلينا غا حنا لي لي ولاد ل ...لمانعرفت شنو ....
لامار : شكون نتوما ؟
قدس : ماما .. انا مريضة وفيا السخانة ولا زدتو هضرتو معايا غانسخف ... تلهاي مع ببينتك والمأصل ديالها وبعدو مني .....
لامار طولات فيها الشوفة كاتقول مال هادي ورجعات كاتشوف فقسم
لامار : اوا وفوقاش غايجي
قسم : ( علات حجبانها ) شكوووون ؟؟؟؟؟
قدس : ( كضحك تحت المانطة ) ههههه سهيل
لامار : شكوووون هاد سهيل تاااااني جابدينو ليا هاد الليلة ....
قسم : ماديش على هاد المگلوبة .... واش زعما اصيل فوقاش يجي لدار ؟ ( بدات كتحك فشعرها ) مم ...مزال متناقشنااااش .. ( رجعات كاتوشف فيها ) ماما راه ملي غايجي هو لي غيقولها ليا ماشي انا .. نهار يلقى وقت مناسب راه غيجي ....
لامار : لا ييييطلق راااسو الالة .. خاصنا نعرفووووه !!!
قسم : واااااخا اماما واااخا .... اري شي بييزو وسيري تنعسي غنتوحشكم غدا غنغبر نهار كامل عندي نهار پلااااااان
لامار : وضروري راك رجعتي من العسكرية كون اجلتي الاجتماع لنهار اخر
قسم : راه غاتبدا الخدددمة فوقاش نأجل .. نهار السبت راه غانسافر
لامار : قلبو ليك بروغرااام ؟؟؟؟؟
قسم : لا باقي هو هاداك غير سيمانة لولا مور العسكرية لخرا غنصوك بووووحدي .. عطاوني فيها سييمانة يعني غنسافر سيماانة غيكون طراجي طويييل ... يومين دالابحار ... ويومين نرتاحها .. ويومين غنرجع فيها ...
لامار : مغاتبدلوش ؟؟؟؟ تشديها كلها بوحدك
قسم : .. راه هاكا لي غيصوكو اول مرة خاصهم طريق طويلة .... يعني خليني نحيد عليا اجتماعاتي والمركزز غدااا .... باش الجمعة ندوزها معاكم والسبت غنمشي ...
لامار : الله يا بنتي الله .. باقي تامشبببعناااك ...
قسم : غير سيمانة وغنرجع ... وداك ساع غنبقى خمسطاااش ليوووم ليبر ..... وغااالبا ( ضحكات ) فهاد خمسطاش ليوم نعرفكم على اصيل .......
لامار : اوا على الله .... الله يووفقك ( ناضت ) يلااه نعسوو ترتاحو ... فيقو غذا بكري شوية نتجمعو على الفطور
قسم : لا اماما ... انا غنهبط نتمشى شوية على البحرر توحشت لازون ديالنا ... ودايرة مع اصيل نشوفو هاد الصباح حيت غيبدا الاصلاح وقال ليا انا لي نبلاني ليه لاكويزين ههه غنمشي نشوفها ... وعاااد غاندوز لصيونص ديال الكووماج صفاء راها فوق راااسي ... صيونص ديال السنان شهر ونص مادرت صيونص دونطيغ .. باش نوجد للاجتماع وموراه نرتاح .. يعني مغنشوفكم حتال لليل .....
لامار : اه اه اه .... معمرة نيييت النهااارررر .. اوا الله يعاااونك تالليل ونتجمعووو ... ( ضحكات ) هااد المرة غااندييير عشاااا انااااا .. انا نطيييب ليييكم .. ونتجمعوو كاممليين نفرحو بخووووكم .. مقاداني فرحة هاد النهار
قدس : لا لا ملي غاطييبي نت راك فرحانة نيييت
لامار : وشنو وليدي حبيييي مسسسسكين لي ديما هازا ليه هموو مباغيش يتزوج جاب ليا بنت عموو غزااااالة بحااالو وتتبغيه ... وتاهو بانلي مرتاح معاها .. علاش منفررحش .. ونفرح بهاااد الششنيولة ( جبدات حنك قسم ) تاااهي لي ولات تسبقو علينا قالك الالة تبدا بيه الصباح ....
قدس : الله يدوم الفرحة ... فرحي فرحي بيهم ... ( عنقات مخدتها ) الله يخلي ليا مخدتي
قسم : ( مميقة ) مممم ... مخدة بلحيتها ...
قدس : ( كدوز يديها على لفيرور دالمخدة لي معنقاها ) اااه لحيييتها غزااااالة نحلف عليها بالله سهيل ديالك مااايكساااب بحاااالها
قسم : ايييييه .. الالة .. ايه .... خليك فكلامك وغانبقاو مزيانين انا وياك
قدس : دي معاك بنتك ... بغيت نعس بوحدي
قسم : ( مشات لبلاصتها فالفوطوي كاتوجدها ) ايييي النعسة هنا مانعرفت كيفاش دايرة ....
لامار : هههههه نعسو نعسو ترتاحو .... يلاه براي ليا ابنتي دغيا .. ( باستها وقفات ) تصبحو على خيررر
طفات قسم الضو لي حداها وتكمشات تنعس ... وقدس مدات يديها طفات الاباجور ديالها وتقلبات لجنب مغطية مزيان من التبوريشة دالبرد واخا الموت ديال الصهد على برا ... وهي دخل لميساج ديالو عاد جاوبات .. " صافااا ... بايتة معاياا قسم .. عنداك يقوليك شي عقل تصوني " ... خرجات من ديسكيسيون ودخلات لمحادثة وسيم بانو ليها وصلوها تصاور دالخطبة وبقات كدوور وكتشوف وتضحك حيت كل تصويرة كتفكررر كيفاش التقطوها ونكيرهم تاوصلات لهاديك الجماعية وهي تهبط بعينيها ليه هو لي كالس فالارض هو ورقية معنقها عندو وبدات تزوومي على وججهو ... كان ضاااحك وعينيه مسدوووديين وسنانو كانو بحال اللؤؤلؤ مسستفييين ومشكلين حفرات صغارر وسط لحييييتو ملي كيضحك ... عمرها شاف قبل ضحكتو شحال زويييينة وشحال جدااابة ... كتهبط الزوم لعنقوو الاسمر العرييض لي تفاحة ادم مزيناه فالوووسط وريحت لحيتو كاتجيها لنيفها وغمضات عينيها كانها كاتستنشقها ... كان لابس شوومييز كحلة وكان محيد لافييست كانت محلولة ملفوق كتشوف فصدرووو العرييض ودوز لكتافووو .. كتشوف شحال راجل بجمييع المقااااييس .. وجسدو كافيها يكون بحال شي جدااررر غادي تحمى من موراه .... كتفكر شقاااوتو وضحكتو وبسااالتوو وروحووو المرحة وشحال اكتيييييف رغم المشاكل لي كيعيش مع باباه ورغم حياتو لي ممستقراش واحلامو لي مقادرش يحققهم ... الا انه ديما خالق الجو وواقف مع الجمييييع .... فنفس الوقت دمو حااامي وعصبيتو تاهي ولات كتعجبها .... باقي كتشوف تابان ليها مسج لفوق رد عليها ودخلات لديسكيسيون " ااه داكوغ .. مزيان .. احسن مادرات ... متاخيدش دوايات بزاف .. نتي بلا مناعة وغادي تزيدي تقتليها ... تغطاي مزيان .... " بدات كتجاوبو غير ميساجات وكل مرة ضور عند قسم كتبان ليها ناعسة ... عارفة ختها غير كتحط راسها على المخدة كتتمشييي بسبب العياااا ... ورجعات كترد عليه " نو من اخر حبة شربت تماك ... خديت دوش ووليت صافا " وهو يبان ليها جاوبها " منخافش عليك ... غتصبحي اونفوغم آلكارتة ديالي " تبسمات وردات عليه " يلاه خليني نعس باش نضبح اونفوغم ههه تصبح على خيير ... "
حطات تيلي وبدات تحاول تنعس غير غمضات عينيها حسات بلي فيها موووت دنعاس ونعسات والابتسامة مرسومة على فمها .....
غير غفات تحلات الباب ودخل اسد طل غير شوية عليييها وزاد علا عليها الغطا وهبط بشفايفو لجبهتها بانليه بردات شوية وباسها وشاف عند قسم ... عالا عليها ليزار تاهيا ... وقاد ليها مخدتها ... باسها ... وخرج رجع للبالكون .. لامار كانت تاهي غفااااات ناعسة على جنب فجنب السريررر .... ومشا خرج للبالكون جلس على كرسي طاوي رجليه فالحديد دالبالكون كيشوف لتحت فوقاش تحل داك البوابة يجي جود يمشي ينعس مرتاح ....
الساعة تشير لربعة دصباح ... وجود باقي فالطموووبيل .. طلب قهوووة من كافي دالمنطقة جابوها ليه لطموبيل رد الكرسي شوية لور وحط بيسي ديالو على رجليه كيكمل على البروجي ديالو وكيجغم من القهووة .. مرة مرة ملي كيكون كيطابي فالكلافيي كيلمح داك الخاتم لي كيلمع فالضلااام .. وكييهز يدو يشوف فيها ... كيبتسم ويرجع تاني يكمل خدمتو .... بدا الفجرررر كاايوذن فمسجد المنطقة .. هو يتنهد وسد البيسي وخرج من الطموووبيل ماشي فداك النسييم ديال الفجرر فاتح الشوميز و طاوي يديها والفيست كان محيدها لابس غير الجيلي محلولة ....مشا للمسجد ودخل لبلاصة الوضوووء توضى عاد طلع يصصلي معاهم ..
صلا الفجررر وخرج من الجامع بعد ما سلم على معارفو تما ورجع لطموبيل حل البيسي ديالو تاني كيتسنى تابدات السماء كتزراق واصوات النوارس حيت البحررر قريييب بدات كتملي المكان ... هز عينو فالمرايا فاش شاف طموبيل جاااايا من موررراه ... كانت شاعلة الضو مقدرش ييعرف ... تابانت ليه باركات من موراه وتطفى الضو .. عاد لقاها بورش داياد ...
بقى كيشوف غير من المرايا .. بانليه نزل لابس دجيين وتيشورت وشانق لافيست فيديه غير من مشيتو قدر يعرف انه سكررر وبقى حتى يصحى عاد جا .. ولكن اثار الثقالة باقين فيه ... حجبانو مخنزرين على عادتو ... يلاه غيدخل لدار هو ينزل جود الزاج من جهة الكرسي لاخور لي قريب للباب واياد علا حاجبو ملي سمع صوت الزاج كينزل وضور راسو هو يطل عليه جود ...
جود : صباح الخير .....
اياد كانو يديه فالبواني ورجع ضار كامل كايرمش ليه
جود : ( تكا على البوطونة وتحلات لباب لي من جيهتو ) طلع ...
اياد طول فيه شوفة وتنهد ورجع حل الباب هو يسمع
جود : ايااااد ...
اياد غمض على عينيييه مزير عليهم ... عارف راسو شحال قاسح وعارف مدام هدا بقى هنا كيتسناه الا ومغيتفاكش ... هو يرجع سد الباب ديال دار ... و مشا ركب .. يلاه سد البااب كان جووود انطلق مبااااشرة ... بدون اي كلمة ... واياد تاهو غير كيشوف قدامو تخنزيرتو باينة على وجهو فنفس الوقت عينيه عيااانييين وعااامرين بالوحدة والاكتئااااب ... عينيه تعوجات ليد جود لي ضور بيها الفولون هو يلمح الخاتم كيلمع فييييديه .... جمع حجبانو ورجع عوج راسو لجنب مااحاااملش المووقف .. مراضيش بالمرة على هادشي لي كيسميه مهزلة .... جود كمل طريق مباشرة بين الفيلات تاااسالا داك سيري وضار على جنننب تاني طريييق طواالة مطلوقة والصباااح كيطلع عاد علاو ليه الباااارية وزاااد واياااد ميكدبش ان شي حاجة فاللداخل ديالو فرحات لداك الخاتم .. فرحات لجوود غيستقرر .. الشخص الوحييييد لي كان كيعرف يحط عليه الراس .. الشخص الوحيد لي كان كيفهمو ولي كان كيضحك معاه ولي منهار تفارقو وهو حياتو كوولها دييريسيون ومزال ماقدر تاواحد يعمر الفراغ لي خلاااه جود ... كاانوو بنفس العقليات بنفس اللعب بنفس الششغب ... كاع لي داروه داروه بجوج .. الا الغدررر ....
غيفرح حتى الى شاف الخاتم فييد بيلسان .. كيفما فرح فاش شافو فيديه ... ولكن مباغيش يكونو هوما لي مع بعضياااتهم .... مراااضيش ... وعاارف علاقتهم كلها عدااااب .. عارف غاتزيد ختو تعدب وهو غيتعدب ... وهو كولشي كيقوليه انه كولشي مزيان وجود كبر وتبدل وهي كذلك .. ولكن هو لي عارف انهم هوما بجوج ..... مستحيل كميائياتهم تتفاعل حيت هو اكتر وااااحد كايعرف الجوهر دجود لي مستحيل يقتلو فقدان داكرة .. ومدام تايقولو كولهم جود تبدل الا وكايزيد يتأكد انه تاحد فيه مكان عارف العمق ديالو كيداير .....
مبغاش ابدا يحضر لها دالاحتفالية لي بالنسبة ليه مهزلة ... خصوصا ملي اكتشف مؤخرا ان مروان كيبغيييها ... واخا ساااكت ومكيهضرش ولكن عينيه كييحضييو كولشي شحال من مرة شافووو كيشوف فتصاورها وشحال من مرة عرف نظراتو فين كايشوفو .. وغير كيفكر انه خاال جوود ... كيعرف شي كارثة غتجي ثاني فالطريق ... وحيت عارف هضرتو تاواحد مغيسمع ليها وتاواحد ما غادي يدير بيها ... فضل ينسحب ..
باركا جود فالباركنيغ كانت تحت منهم الرملة ومواج للبحررر .... هز طاس ديالو د القهوة وشاف فاياد بمعنى نزل .. ونزل تاهووو غادي فالرملة اياد بقى فالطموبيل كيتنهد وكيشوف فيه ... تاكان وصل قدام البحر ... واقف كيشرب من الكاس ديالو كيشوف فالبحر وشعروو كيديه الريييح الصباااحي والشمس والسماء بدات تفتح زروقيتها وسط اشعة الشمس لي يالاه كاااتشررق مور الجبال ...
تنهد اياد حيت واضح ماشدوش هاد طريق باش يتأمل فالبحر وهو يبقي فالطموبيل ... خرج من الطوبيل تاضرب فيه الريح كيرررد ششعروو لور وفصح على عييينيه التعبااانيين .. شاف شحاااال للجنب وزاد ماشي باتتجاهو كيتنهد خطواااتوو تقال تاوقف حداه ...وداير يديه فجيااابو .... هو يشوف جود مدليه طاس دالقهوة وعينيه على البحر ... بقى كيشوف لداك الطاس فلخر جبد يدو من الجيب شدو عليه وجغم منها
غير داق منها .... خسر سيفتو محاملهاش ومدها ليه كايشوف قدامو ...
اياد ( بصوت مبحوح عصبي ) منكشربهاش بالسكر ...
جود : ( ضور راسو شاف فيه ونزل عينو شاف فالطاس وتبسم بطرف شفاهو وشد عليه جغم منها وشاف فالبحر ) تانا مكنشربهاش بالسكر .... مكنشربش السكر اساسا ...
اياد : عارف ...
جود : ولكن لي نتا معارفوش ... هو علاش كنشربها دابا بالسكر !
اياد غير ساكت كيشوف فالبحر داير يدو فجيبو ملامحو باقين مجموعين بعدم رضى ... وجود مكمل هضرتو
جود : حيت ..بغيت نجرب .. كيداير الطعم ديال داك الحاجة لي دايرين عليها ممنوع فعقلنا وحاطين كروا حمرا ومكاينش لي غيجي يقنعنا بيها .. بغيت نجرب نذوقها ... نشوف واش كتستاهل داك الكروة حمرا غير عناد مني ... ولا طبيعة ! غير تعودت نقول مكتشربش السكر ... ( تنهد واياد غير واقف ساكت وهو عاود جغم منها كايتذوق ) .. مااابيهااش !! اه .... ماعنديش مع السكر .. ولكن الا بقيت شوية بشوية كنقنع راسي بيه .. يمكن نولي نشربو .. يمكن كاع يولي يعجبني ونولي نطلب قهوة بالسكر ....
اياد : ( تنهد ) مكنظنش جبتيني حتى لهنا باش نهضرو على القهوة ..
جود : ( ضار شاف فيه ) مدامك عارفني مكنشربهاش بالسكر ... علاش ملي عطيتك شربتيها .. قلتي ليا غير مكتشربهاش نتا .. مسولتينيش علاش وليت كنشربها انا بالسكر ؟
اياد : ( عوج شفتو لجنب ورجع شاف فيه ) بالنسبة ليا ... نتا واحد جدييد مزال مكنعرفش شنو كيعجبو وشنو مكيعجبوش
جود : ( تنهد وضار كايشوف قدامو ) انا ... جود ... الاسماعيلي .. لي كتعرف ... درت اكسيدون وتصابيت بفقدان ذاكرة جزئي .. بالتعبير الحرفي كيعني ذاكرتي تمسحو منها الاحداااث .... متمسحوش منها الاذواق ... وشنو كنحس ... راه باقيين هوما هادووك ... نقدرو نقولو كبرنا شوية وتقلبو لينا شي حاجااات فاذواقنا .. ولكن لي كنحملوه باقي كنحملوه .....ولي مكنحملوووهش باقي مكنحملوووهش ....
اياد : باختصار !
جود : باختصار .. مدام ذاكرتي تمسحو منها غير الاحداث .... خاص باش كنحس والمشاعر يبقاو هوما هادوك ... اخر مرة شفتك ... ومن مور ما شفت حتى خوك ...توأم ديالك ... كاتشابهو لكولشي وانا ماتشابهتوش ليا ... والتوأم مكاقدرو يفرقوهم غير لي معاشرينهم ولا معاشرين واحد فيهم مزياااان ... باش يبقاو وجهك مطبوع عندي واخا نسيت كولشي ( شاف فيه واياد شاف فيه بنص عين ) دونك مكانش عشرة عادية !!!! ( اياد طول فيه الشوفة وتاهو مبادلو بابتسامة خفيفة بجنب شفاهو هو يقلب اياد راسو وجود جغم من طاس ديالو مكمل ) .... رتاحيت ليك نتا كتر .... وهادشي قدرت نفهم منو .. بلي قبل لاكسيدون ... انا يمكن كنت مرتاح معاك نتا كتر .... والا زدت تعمقت ... هادشي كيعني بلي انا ختك .. مكانوش بيناتنا مشاعر قوييين فالماضي ونكون كاااع كنت غير كنتفلى عليها .. ويمكن .. مكنتش كنبغيييها .... ملي نتا كنتي غير عشيري و نهار شفتك رتاحيت .... وهي لا !! .... عجباتني اه ... ولكن مكانت عندي تاحاجة قديمة لداخل .... ... حتى داك الحرب لي ناضت بيني ويينك وداك روينة كاملة ..كانت يمكن غير باش نرضي غرووري ... يعني لاكنتي شحال هادي كونطخ داك العلاقة ... انا معاااك ... كان عندك الحق وكان على ختك تسمع لهضرتك حيت كنت مصالحش ليها ... وكون مدرتش داك لاكسييدووون يعلم الله شنو كنت درت فيها .... ( اياد مزير على عينيه ويديه وسنانو) هااادشي عارفو مزيان ... ولكن .... حااليا .... نتا ماعندكش الحق ... حاول تجرب مذاق ديال السكر فالقهوة ... يقدر يعجبك هاد المررررة .... حيت تبدلات حلاوتو .... وتقدر تبدل ليك الرأي القديم .... ( مد ليه الكاس دالقهوة لصدرو واياد كيشوف لداك الكاس وبدا يدور راسو وهز يدو شدو عليه وهو ضرب ليه على كتفو ) تهلللى اولد العم ...
ابتسم ليه ومشا واياد كيشوف لداك الكاس دالقهوة وضار براسو بان ليه طالع لطموبيل
اياد : جوووود ...
جود : ( ضار عندو ) هم !
ضار براسو وما ليه غير بعينيه بمعنى اجي ... وزاد لواحد طبيلة قصبية كانت قدام البححررر الكراسي ديالها مجموعين فوق طبلة ... حيد واحد نفض عليه بيدو وجلس ... حط داك طاس فوق الطبلة وجود رجع تاهو ... وجبد كرسي وجلس حداه ...
جود : كانسمع ......
اياد : ( تنهد كايشوف فداك طاس دالقهوة لي كايضورو بيديه و يضزر معاه افكارو ) كانت غتكون ساهلة الهضرة معاك كون بقيتي عاقل عليا .. حيت مكنعرفش نعرف براسي ....
جود : متحتاجش ... دغيا كنعرف بنادم ...
اياد : ( علا عينو فيه وطلق من الكاس ) وانا ماشي من الناس لي دغيا كيتعرفو ... حيت الحوايج لي غتكون عرفتيهم عليا دابا هو واحد حقووود .. خااايب ... مكيتفاكش .. راسو قاااسح ... مكيبغييش الخييير ... ققلبووو كحل .... ممعقد ... ممنغلللق .. ماجتيماعيش ( شاف فجود ورجع تبسم ) انا مدايرش هاكا .... انا هاكا وليت ... مور ما نتا وياها .. طفييتوني ...
جود : ( تنهد ) عارف الغدر قاصح .. ولكن عارف تاني ان ليام كتصلحو .... مدام غدرتك ... ومقديتيش ترد حقك .. ردو ليك الله ... جيت مشتت فكوبطير ... مشات ذاكرتي .. تفرقت مع ختك ... مشاو احلامي .... مشات مونووكاو ... طفييت حتى انا ... هادشي مزال ... مكفاكش ترد اعتبارك ؟!!! تبرد !!!!
اياد : اولا .... انا مكنقلبش باش نبرد .. انا بااااارد ... وبردت نهار ختارتك نتا عرفت غاتاكلو دقة صحيحة نتا وياها لي تخيايني نتشفى حياتي كاملة ..... انا عيت مانكون بارد ... مليت .... ( كايهضر وعينيه كايحمارو ) انا بغيت نرجع كيف كنت ... و ثاني حاجة ..... انا ماطفانيش الغدر ....كون كان الغدرر هو لي مخليني هاكا .. كنتي نهار غادير الاكسيدون غتلقاني معاك ... حيت كيف قلتي حقي غااايكون رجع ....
جود : علاش شنو لي طفاك ؟ شنو لي خلاك هاكا .. شنو هي هاد الحاجة لي ماعارفهاش انا !!!!
اياد : ( رجع كيشوف لبحر وتبسم ابتسامة مضطربة وعينيه حمريييين معارفش كيفاش وقت تا اول مرة غايهضر مع شي حد بشنو كايحس ) لي طفاني هو عرفت ان ماعندي حتى شي قيمة .. وهضرتي ماعندها تاشي بلاصة وسط عائلتي .. غوووت بجهدي كاامل.. ان هادشي لي كيكبر بيناتكم ولي باغين ديروه وهوما مشجعينكم .. طووووكسيك ... ( شاف فيه وجود كايرمش ) حيت ليلة قبل منشوفك مع ختي .. بايتين انا وياك فاوطيل مع ربعة .... ( ضار تاهو شاف فيه كايهضر بحرارة) ربعة اجود .. كانت فعمرك غير ربعة وعشرين عام .... ولد فعزز شبااابك ومكانش كيبان بلي باغي تخلى على دااكشي ومزال مشابعوش .. هي كانت 16 عام ... كابرة فكندااا .. عقلية كاورية بكاع لي بسبب غواتي عليها انها تبدل عقليييتها وتصرف بحدووود جابوها للمغرب ... 16 عام كتعني انه نتا لي كتبان ليها داك الوقت .. تزيدو واحد عام غتبان ليها فواحد اخر .. اما تخونها اما تخونك ... إما باك لي غايتحشم ... اما الواليد .. جوج خوت كانو غايتفااارقووو .... وواحد فيكم كانت غتااكلو الشمتة حياتو كاملة ... وواحد فيكم كان غتاكلو الندااامة .... ونتا وياها كنتو اعز ماااعندي اجووود ( كايضرب فطبلة بيديه مغزززف ) ... مستحيل نققدر نصبر الا شي واحد فيكم كلا الدقة .. واش نشوفكم غاديين للهاوية ونسكت !!! ملي هضرت .. تسميت مابغيييتش الخييير ... تسميييت حقوووود ... تسميييت غير حيت شفتكم داكشي علاش مابغيتيش ... كون شفتكم لايقين لبعضياتكم غااااانسسسلخك ... غااانهرس نيفك ونتهرس ظهري ... نبراااو .... وغنجي عندك لسبيييطار نقوليك تزوجها ... ولكن ..... ( بدا ينهج وينقص نبرة صوتو بنبرة يائسة) ملااايقييينش اجوووود ...كنت كنشوف فيييها ( جود كيشوف فيه كيفاش صوتو تخنق وتزييير ولي واضح هاد الموضوع ريع سنين يالاه غيهضر فيه حيت كيحسو مععمررر وبحالا غييينفجر فوق هاد الطبلللة وجود غير كيرمش ) انا ماشي حققود .. انا علاش مانبغيش ليكم الخييير ؟؟؟؟ ... انا كنت خاايف عليييكم .. ولكن تاااحد فالعائلة ماقدر يفهم انا علاش كنهضر ولا شنو باغي ... فوجهي تيقولو ليا قلبك كحل هرسليك ضهرك .... هرستي ليه نيفو .. واش عندي مشششكل فالضضهر !!!! واش انا وياك قلييل مااضاررربناااا .... انا على قبلك نهار نسييييتي راسك فطموووبيل ونسيتي الفرااان نقققزتومن طموبيلتي لعندك ورميت راسي قدااام الموووت .... واش انا كايهمني الظهههر؟؟؟؟ واش انا غانفضل راسي على دمي ؟؟؟ انا كون عرفت نتا وياها دبعضياتكم نموت انا وتعيشو نتوما .....( جود كايرمش فيه فللخر تدخل كايهدنو وترو )
جود : د .. دابا شوف ( قاطعو بحدة )
اياد : كنا سكراانين ضاربنا فباااار شخشخت ليك الطمووووبيل هررستيني من يدي وصبحنا الصباااح قايلين ليهم هرسوها ليك فباركينغ وقلت ليهم درت اكسييدون ...دخخخلت ندوووش جيتي ديتي ليا درية من وسط الشومبر و سلختك نتا وياها و غدا *وييينا مها انا ويااااك .....ااه .. ضربة دالغدر فختي قااااسحة ... وكون شفتكم تصلاحو لبعضكم كنت غانصبح تاااني كااانصور فعرررسكم فرحان ....( كيضرب بصبعانو فوق طبلة كيشرح ليه مغزف ) ررربع سنيين وانا بعيد ... حيت مالقيت تاحد فاااهمني ولا فاهم اش كنقول .... وكون كان الامر لي مبعدني غير علاقتك بختي .. علاش فاش تفارقتو مرجعتش !!!!! .... مكانش هذا هو السبب لي طفاني ... كان هو المناااسبة باش يجيو الاسباب لي يطفييوني .... باش تبان قيمتي وسط العائلة ... باش نفهم بلي مكاين تااااا واحد تما كايفهم اياااد شنو باغي وكييفاش هو كايفكر بلا مايهضر ....
جود : وااااهضر ... هضضضر اصااااحبي واش بغيتيهم بععلمو الغيييب !!!!!
اياد : ننا كتعلم الغيب !!!! ( جود غير كايشوف فيه ) اذن عللش كنت كاتفهمني بلاا منهضر !!! .... نهار غاطلبها من الواليد المرة لولا ... قالو ليك اياد دابا يدير عقلو .... قلتي ليهم .... اياد خصو انا ندير عقلي ..... قلتيها نتا .... علاش هوما مافهموهاش ... ؟؟؟؟! يشوفو فعيني ويقولو ليك نتا قلبك كحل مكتبغيش الخير لولد عمك و ختك غير باش ترضي راسك كانت قسسسسح من الغدر لي عطيتوني ......بعدا كنتو صغار بلا عقل . هادو لي كنهضر عليهم ... مواااالين العقل .....( بأسى ) موالين العقل اجووود ......
جود بقى غير كايشوف فيه وهو رجع كايشوف فالبحر وغمض عينيه كايتنفس كايحاااول شوية يهدن من راسو ...
يتبع...
التعليقات
لا توجد تعليقات بعد، كن أول من يعلق.