محتوى القصة
اصيل عوج راسو معاها بانكسار وهو كايشوف فهاداك الخوف لي ترسم على ملامحها ورجع بظهرو لور على الفوتوي كايشوف فالعدم ويديه كايزيرو على جناب الفوتوي .. عينيه حمااارو و جسدو سخن .. ماباغيش يعيش هادشي ولكن لااازم عليه يعيشو .. مضطر يعيشو .... ورجع علا راسو فيها بعيون مستسلمة لكوولشي .....
اصيل : اه .... انا مريض .. ( قسم كترمش فيه ) انا مريض بلاساديك سيكسيال اقسم ....
قسم حلات عينيها على وسعهم !!! وقلبها زااااد فالنبضات ديالو حتى قرب يسخفها .... جاتها فجأة ضبابة خفيفة على عينيها خلاتها تحتاج بزااف دالاكسيجين تابدا كايتسمع صوت انفاسها ... وهو منزل راسو مقادرش يشوف فيها ....
بلا متحس وقفات حالة فمها شوية كتحاول تتنفس نا امكن .... سرطات ريقها مزيااان .. وخدااات نفس. ... يد شادة بيها على جبهتها و يد على خصرها كاتمشي وتجي بعدم تصديق ... ورجعات ضارت عندو وطلقات يديها كاتشوف فيه بصدمة ....
قسم : كضحك معايا ياك ؟؟؟؟؟ حيت هدا ماشي ضحك ... والى كاان ضحك .... راه باااسل ....
اصيل غير منزل راسو بدون جواب ويديه مجموعين قبضات كايضربو ببطئ فتكاية دالفوطوي وهو كاايشوف فيهم ....
قسم : (مشات بزربة وجلسات فالكنابي المقابل معاه وقربات بضهرها لعندو كتر كاتشوف فيه ) اصييييل .... ( اصيل علا عينو بشووية لعندها ) واش سمعتي راسك اش قلتي دابا ؟؟؟؟ ولا انا لي ماااسمعتش مزيان !!!
اصيل : (باستسلام) سامع اش كانگول ...وعارف مزيان اش كانگول .... ( تنهد كايشوف فالارض مقادرش يشوف تعابير وجهها المصدومين ) هادشي كان خاصك تعرفيه ، يا من قبل .... يا دابا ... يا منبعد ... ولكن مزيان ملي تجبد من دابا ... ( علا عينو فيها ) حيت من قبل ماجاتش الفرصة .. ولا نقدرو نقولو ، ماجاتش الجرأة ... ومن بعد ... كنخاف عمرها تجي .... دااكشي علاش ... خاصني نقول ليك كولشي ... دابا ...
قسم : ( قلبها تايضرب بجهد وخايفة من شنو غاتسمع تامن حروف توضرو عليها ، وتمتمات ) ش .. شنو لي خاصني نعرفو ؟؟؟؟ هم !!!
اصيل بزربة ناض ومشى لكنابي لي حداها كلس وشد يديها بجوج عندو مزير عليهم بين يديه كايشوف فوسط عينيها التالفييين ...
اصيل : مااخبيتش هادشي حيت بغيت نآديك بالعكس .. حيت بغيت نحميك ...مجتمعك مكانش بوحدو لي مخليني منقربش ليك ... مرضي حتى هو .... ولكن اش غااندير ( طلق يديها وبدا كايرجع شعرو لور تالف ) بعد المرات شي اومور مكنعرفوش نتحكمو فيها .. حيت هي لي كتمشينا كيف بغات ... ( شاف فيها ) انا بغيتك ..... بغيتك نت ... ودرت الجهد كامل وكتر من الجهد باش كاع داكشي لي مامخلينيش نكون معاك .... نقااادو .... درت جهدي كاااااامل اقسم .... حياااتي كلللها حطيتها فالحافة ..... ( برجفة ) يا نعيش معاك ... يا نمووت .....
قسم : ( كاتشوف فيه مفاهماش والخوف خلا اطرافها يتشلو .. عينيها فقط لي كايتحركو مع حركاتوو وشفايفها كاتهضر بيهم مرعودين ) اصيل .... اصيل قول ليا شنو كاااين ....
اصيل : لاخفتي من حقك .. تا الى قلتي ليا دابا نساااليو كوولشي من ححقك .. والله مغاانلومك على تاشي حاجة ..
قسم يلا ماتحس براسها غوتات بسميييتو وناضت وقفاات مخلوعة ....
قسم : ( بانهيار وبفقدان صبر ) اصييييل .... أصييييل قول لياااا شنووو كتعني انك مريييض بلاساااديك سكيياكل ... شنووو كتعني من غير انك هارد فالسيييكس !!!!! شي حاااجة اخرى ؟؟؟؟؟ ( قربات بشوية لعندو وقفات عليه وعينيها سالو منهم الدموع ) شي حاجة اخرى كبر ؟؟؟؟؟
اصيل : ( علا عينيه فيها كايشوف فدموعها وقلبو كايتقطع ) انني نكون هارد فالسيكس ... داكشي كايكون زوين ومحدقين عليه غير فالنتفليكس اقسم ... غير فالكتوبا ... الواقع حاجة اخرى ....
قسم : ( بصوت منخفض خيفان ) و وشنو هو هاد الواقع ؟؟؟
اصيل : ( ناض وقف كايمشي ويجي ويحاول يتنفس مزيان ) هاد الواقع آ قسم ( ضار عندها ) هو داك الخبارات لي كانشوفوهم فقسم الجرائم فصفحة لولا .... ( كاايهضر مغززف مزير سنانو كاااره الموقف وكايعاودو بكل جرأة وجامع قوتو كلها ) بنت مليوووحة جنب الطرييييق ميتة ... كسدتها مشوووهة .. بحالا نهشوها الكلاااااب ... بحالا تعشى بيها شي ذيب جيييعان ( قسم موسعة عينيها و قلبها كايضرب بجهد ) مطبوعة بالكارو و مضروبة بالرازوار ..... وحتى وهي مييييتة باااقي وجهها تاتعدب ودمياتها دايزين ..... ( مشى كلس على الفوطوي وقسم مصدومة كاتشوف فيه ودمعة نزلات من عين جامدة ) وملي كايشدو داك بنادم لي دار فيها داكشي .... مكاينكرش فعلتو .. كااايعترف ...... ولا تايقول ليهم ماعارفش كيفاش !!!! ومكايكونش كايكدب ، هو بصح معارفش اش دار .... وكايكتبو عليه فالمحضر ... بلي كان مقرقب ... واخد الفانيد ..... وملي كايمشيو يسولو عليه صحابو وجيرانو فالحومة ... اما كايكون أستاذ .. اما شي واحد عندو شي حانوت كايبيع ويشري داخل سوق راسو .. اما طبييب ... كولشي كايتصدم فيه كيفاش دار داكشي كامل ..... ( ساهي فالعدم وهي قلبها غادي يسكت والرعب بان فوجهها) تايگولو للبوليس ... حنا اشاااااف معرفناااش علاش دار هاكا ... هو ماااشي بحاااال هاكا ... هو بنادم الله يعمرها دار داخل سوق راسو و كايلعب مع الكبير و الصغير .. ماااايقتلش !!! ... هو براسو .. بحالهم ..... تاهو معارفش كيفاش ... لي عارف هو فشي ليلة ... غلباتو شهوتو وقال غااانتحكم فرااااسي .... ولكن ووقع لي وقع ... ( قسم مشات بشوية كلسات مقابلة معاه كلها كترعد كاتشوف فيه وهو علا راسو فيها ) هاديييك مقرقب لي كاكتبوها عليه باش يسدو المحضر ويبررو ليه داك الفعلة .... هي لي خلات هاد المشكل عمرو يتعرف عندنا فالبلاد .. حيت السا .. دية ...فالواقع ... حااااجة اخرى ، مولاها كايكون شخص عادي لاقالو ليك اغتص*ب فلانة وعذبها مغاااتيقهمش وغاتقولي كايكدبو عليه .... حيت هو انسان طبيعي ولكن فوسط الشهوة ... مكايكونش هو. ..... هادشي بلاصة مايكونو كايشرحوه ويوعيو بيه .... كايحدقوه فالافلام ... الغلاف بلون حمر و قطاري ددالدم يسيلو من شي جرحة خفيفة كيف درتي نت .... كايبينو ليك داكشي بحال شي اسطوار فنتازية .. بحاال داكشي دالفامبيير .. كايحلقو عليها وكايجيبو بطلة زعرة ملبسينها الحمر .... وبطل فاسخين ليه صدايف شومييز ومضورين بيه سماطي و الحبال ... وشي ريد روم عامرة بالتخربييق لي لا علااااقة بالمرض النفسي .... علاس لي مايعرفوش يوضحو هادشي كيفما هو ؟ علاش لي مايقولوش بلي الس...ادي الى غاب على الوعي مكيبقاش قادر يقلب على سمطة و لا حبل .... ماعندوش مشكل واش يكون فريد روم ولا فطموبيل و لا فشي برتوش فالسطح ، كايحتاج غا لبنادمة شهاتو و غواتها و لحم عريانة قدامو .... علاش مرض بحال هادا ردوه ثقافة جنسية ؟؟؟ ردوه سيكس تايپ .... استلهمو منو باش ينعسو واحد جوج ساعات كايمارسو الهارد سيكس ... اقل حاجة كاتخرج منها البنت هي كايصرفقها !! وفاش كتجي وحدة بحالك مفاهمة والو كايحسابت ليها هاكا حنا !!!! .... لاااا .. انا باغيك تعرفيني على حقيقتي دبصح مباغيش نزوق ليك ... انا ماشي واحد باغي يولي سا... دي .... انا واحد سا....دي جنسيا وماااباااغيش نكوووون .... كااااره راسي علاش انا هاكا .....
قسم قلبها جمد وملامحها كلهم كايرعشووو و اطرافها بردو وهو مكمل كلامو كاايخرج كاااع اش فقلبو بوضوووح
اصيل: علاش كايقولو على السا ... دي مقرقب فالمحضر ؟ خااص يقولو عليه مريض .. ماخصوش يمشي للحبس ، خصو يمشي يتعااالج .... هو مدارهاش بخاطرو .... الذنب الوحيد لي عندو قرب لهاديك البنت .... هو واحد بنادم لي دارو ليه بزااااف دالحوايج ملي كان صغير كبر وهو كااابتهم فيه لداخل ... كبر وهو مقااادرش يواجه مواليهم ويخرج داك الغضب لي فيه .... كبر وكبرو معاه ....كبرو بجوج بيهم .. غير الفرق هنا ، هو كبر .. وهوما كبرو كتر .. .كبرو بزااف تاولاو كبر منو ..... مكيقدش يقول ليهم لا .. مكايقدش يتحكم فيهم .... غير كايعطيهم الفرصة ويضعاف شوية لشهوتو .... مكيبقاش قادر يحبسهم .... ولا يتحكم فيهم ... كولهم كايخرجو بحالا كاينتقمو من داك بنادم لي بين يديه على كاااااع داك الحوايج لي طراو ليه ملي كان صغير و كاع هااادوك لي خلاوه يكبر حاااقد .... كايخرج فهاداك بنادم كااااع اش كان كابت لسنيييين .... ( شاف فيها بضعععف كبير وعينيه دمعووو وحمااارو وصوتو تغنغن ) مغااانسمحش ليها اقسم ..... مغااانسمحش ليها واااخاا ترررركع قداااااامي ... مااااعمري ... مااااعمري غااانسمح ليها على اش داااارت فيا .........
قسم مزيرة يديها عندها كاتشوف فيه وقلبها كايضرب بجهد واحاسيسها تخربقو عليها .. فمها ساكت ولكن رجفة يديها كانت كاتهضر بلاصتها .... سرطات ريقها بزز ونطقات بخروق متقطعة بحالا ماباغاش تقول هادشي ولكن خاصها تعرف فنفس الوقت ماباغاش تسمع الجواب ....
قسم و ... و نتا ..... فايت ...... درتي ... اشنو دار هادا لي شدوه .... وقالو عليه .. م ... مقرقب ؟
اصيل : (كايشوف فالعدم ) درت اقسم ... درت بزاف ... غي الفرق .. هو انا مشدونيش .....
قسم : ( شدات على فمها بزززربة ودموع كايسيلو ) ماا .. ماااتت ش .... شي وحدة ؟؟؟؟
اصيل : ( عوج شفتو للجنب وعينيه ونيفو حمرين ) ماعرفتش ....
قسم غمضات عينها عاضة على شفتها وهو كمل كلامو ...
اصيل : مور ماشفت داكشي ماشي طبيعي ..... مشيت لطبيب ..... تماك عرفت مريض .... تماك عرفت بلي انا مستحيل نبغي شي وحدة و لا نتزوج شي نهار .... حيت بقد مابغيتها بقد مغانعدبها ونقتلها بطريقة خايبة بزاف ..... ماشي انا .... داكشي لي كبر معايا لداخل هو لي غايقتلها ..... حتى جيتي نت .... وخليتي نبغيك واااها مامنحقيش ... خليتني نفكر تزوج واخا مامنحقيييش .... خليتيني نحلم انني انسان طبيعي.... ونا مااامنحقيش ..... ( قسم كترمش فيه كتحاول تلقى مساحة فالداخل ديالها تستوعب فيها) منقدرش نقرب لييك اقسم ..... حتى نبرا ...... ماعمر ماطرا ليا اش كايطرا ليا معاك ..... موالف كنغيب غير لاكانت كنمارس .... اما نت ... كانقرب لشفايفك كانغيب ... كانفكر فيك بليل كنغيب .. كانشوف فتصويرتك كنغيب. ..... نت هي الوحيدة لي منقدرش حتى نفكر انني غانقيسها شي نهار ... حيت مسسستحيل اقسم ...... تبقاي حية ....
قسم : ( ناضت بزربة وقفات بحالا مابغاتش تسمع هاد الجملة .. حلات فمها كتتفس ورجعات ضارت عندو ) علاش مانبقاش حية ؟ شنو ممكن دير ؟؟؟ ( دموع كايسيلو) انا راه مافهمتش .... ماااافهمتش!!!!!!! كااااع اش كاتقول دابا مافهمتووووش وماباغاش نفهموووو
اصيل : انا براسي اقسم ... مافاهمش ..... ( كايشوف فيها باستسلام) مفاهامش كيفاش خليتني نبغيك واخا عااارفةكاع هادشي عليا ......
قسم : ( كاتشوف فيه ودموع كايسيلو) ياك قلتي مكانوش عندك علاقات.... منين جاو هاد البنات لي عدبتي !!!!
اصيل : بنات الليل اقسم .... ( شاف فيها ) كون كانو بنات عائلة غاتبع اش وقع ليهم كون راني مشدود دابا ....
قسم : ( قربات عندو كتر مستسلمة للمصير وجلسات حداه كاتشوف فيه ) كيفاش كايكونو ؟؟؟
اصيل : ( كايشوف للجنب كايتفكر وملامحو نادمين ) .... اخر وحدة .... كانت مضروبة بزاف برازوار .... كانت مغطية كلها بالدم .... ( قسم صدرها كلو كايتعلى و ينزل بخوف وهو شاف فيها ) انا كانقوليك هادشي ومكانفيلتري ليييك والو .. باااش تكوووني عارفة كولشي وماانزوقش ليك مرضي ..... باااش تهربي الى بغيتي تهربي .... باش تمشي فحالك .... حيت انا مقاااادش نتفرق عليك بووحدي ..... خاصك نت تمشي فحاااالك باش انا نساك ..... اما هاكا ..... منقدرش ....
قسم : و ... ولكن ا اصيل .... ( شدات وجهو وضوراتو لعندها ببصيص امل ) ياك انا قسم ؟ ياك نتا زعما كاتبغيني ... غااادير فيا داكشي ؟؟؟؟؟؟ غاااتقد تقتلني ا اصيل ؟؟؟؟؟؟؟
اصيل : ( حيد ليها يديها بشوية من وجهو ) واش انا لخاااطري اقسم ؟؟؟؟؟؟؟ راه فاش كانجرحك غي جرحة صغيييرة كنننبغي نمووووت ..... كنبغي نمووووت غير الى خلللعتك ..... وكاتقوليا ليا نقتلك؟؟؟؟؟ الى درت ليك شي حاجة شي نهار .. غانموتو انا وياك اقسم ....... نقتل رااااسي حداك .....
قسم : ( رجعات شدات ليه وجهو وكاتشوف فيه مغزفة )لاااااا ..... مغاديرش هااادشي معايا انا ...... نتا كاااتبغيني
اصيل : كنغيييب اقسم .... كنغيييب ... ( نتر وجهو منها ) مااتزوقيييش هادشي .... قلت ليك كولشي باش متحلمييش بشي حوايج مكاينينش .... بغيتك يا اما تهربي يا اما تبقاي معايا ونتي عارفة بلي منقربش ليك تانتعالج .. هادي هي الحاجة الوحيييدة لي غانقدر نحميك بيها .......
ققسم رخات يديها بشوية كاتشوف فيه باستسلام والدموع كاايسييلو وهو ناض وقف كايسرط فريقو معلي راسو للفوق مانع دموعو يطيحو .... عاطيها بظهرو ماباغيش يشوف ضعفها وماباغيهاش تشوف ضعفو ... وهي كاتشوف فالارض وشفايفها كايترعدو .....
اصيل : مغاانضمن ليك والو اقسم ، مغاانضمن ليك تاحاااجة من غير ..... ماغانقربش ليك .... حتى نبرااااا .... ( ضار عنها ومشا بجهتها وتحنى على ركبتو وشد يديها بين يديه وهي كاتشوف ف للارض والدموع كايسيلو وتعابيرها جامدين ) الطبييب قال غادي نبرا الى تبعت الدوا والعلاج النفسي .... قال ليا ممكن واحد النهار ينقص هادشي بالتدريج ... ممكن نقدر ننعس معاك بلا منقتلك ..... بلا منكون غايب على الوعي الكااامل .... كناخد الدوا ( ناض ومشاا بززربة للمجر حلو وهز دواه ومشى حطو قدامها على طبلة ) هاهو .... ( كايوريها بهستيرية و عينيه حمرين كايلمعو بدموع لي حابس وكايهضر بضعف ) ه ...هدا .. هدا ( كاشوف فيه ) ااه هدا كانشربو فصبااح ..نص حبة قبل فطور .. (هز واحد اخر ) وهدا فلليل .. قبل منعس ... بعد العشا ..... ( بهستيرية كايشرح خايف يخسرها) هدا هدا لي كاتشوفي هنا ..... مرة فتلتيام ... كانديرو فالما .... ( لاح دوك دوايات من يديه وشد وجهها علاه ليها كايشوف فيها وعينيه مضببين بالدموع ونبرة الترجي فصوتو ) قسم ..... مغاااتخلينيش فهاد الطريق الطويلة بوووحدي يااااك ؟؟؟؟؟؟ ( بخوف ) مغااتخلينييييش ؟؟؟؟
قسم : ( كاتشوف فيه كلللهاااا منهارة وهضرات بصوت منخافض و نبرة ثقييييلة ) ياك نتا ... نتا لي قلتي ليا ..... هربي .....
اصيل: ( رحع شد وجهها مزير عليه ) قلتها .. و ولكن ماااباااااغيهاش اقسم. ...... ( كايبوسها من جبهتها بجنون ) والله مااباااغيها. .... بقااااااي معايا ... والله مااااانقرب ليك ... واخا نعرف نعيش حياتي كلها كانشوف غير فعينيك .... بقااااي معايا
قسم : ا اصيل ......
اصيل : ( بهستيرية شاد ليها وجهها ) احبيييبتي .. طلبي لي بغيييييتي .. لي بغيييتي نديرو
قسم : بغيت نمشي ......
اصيل : ( ملامحو كولهم جمدو وقال بترجي ) قسسسم
قسم : ( زيرات على عينيها كتبكي ) عفاااك اصيل ..... بغيت نممممشي ......
اصيل قلبو لي كان كايضرب بزربة ولا كايضرب ثقييييل .. ملامحووو ترخاااااو .... حس بحالا شي صعقة باااااااردة جرات فعروقووووو ..... ورخا يديه بشوية من وجهها وطاح كلس كامل فالارض كايشوف فالعدم وهي ناضت بزربة ومشات لباب حلاتها وخرجات كتجري ...وهو بقى جالس فبلاصتووو كايشوف فالفراغ ......
بعد المرات ... كنحتاجو للعزلة .... كنحتاجو نكلسو مع راسنا .... غير بوحدنا .. حيت مكاينة حتى شي حاجة لي كتعرف تردك لراسك .. من غير راسك بحد ذاتو .... نتا بوحدك لي قادر تلقاك فين مخبي ....تلقاك فين توضرتي ....
انك تتوضر مكايعنيش ديما انك تكون ناسي الطريق لي جيتي منها .... انك تتوضر كتعني بعد المرات انك توقف فنص الطريق وتلقى راسك فواحد طريق لي مكنتيش عارف فين كاتدي ؟؟؟ مكنتيش عارف انك لاكملتي المشي فين غاتوصل .... او بالاحرى .. نهار دخلتي تتمشى فيها .. مكنتيش باغي تعرف , غراتك .. وغراوك الشجر لي على جنابها والورد لي نابت فيها .... غراتك بالجو لي فيها وشميستها المضوية ... وماوراتكش النهاية ديالها فين ... موراتكش بلي اللخر ديالها ..... جهنم ....
ولكن ... اش غادير .... الى داك الطريق مكنتيش فيها بوحدك .... كنتو بجوج بيكم .... واحد كان عارف وغادي كايختبر فالحظ ديالو تالفين غايوصلو و كايقول يمكن مايجي فين يوصل تكون جهنم بردات!!! واخا عارف عمرها غاتبرد ... وواحد مكانش عارف ... وفجأة بانت ليه نهاية طريق تاهو ... ووقف فنص طريق ..... موضر ، معارفش واش يرجع ... ولا يتبع حظو تاهو ويتيق بلي جهنم ممكن تبرد ..
مكندويوش على خسارة وقت .. ولا خسارة مال .. ولا خسارة شخص ... حنا كاندويو على خسااااارة حياة حاطينها فرهاااان ، متراهنين فيه مع حظهم ....او بالاحرى مع حبهم .....
القوة بعد المرات مكتكونش فشنو كانديرو ولا شنو كانقولو .. كاتكون فشنو كنسكتو عليه ... فشنو كانلتزمو عليه الصمت فالوقت لي خاص يتقال بزاااف د الكلام .... لي ممكن ندمو عليه فللخر ...
كانو بجوج بيهم غايبين على الوعي بعينين محلولين .... وكل واحد فين كان غايب ... كل واحد ولون الضبابة لي جات على عينيه ... كل واحد ونوع الافكار لي غرق فيها ...... ولكن الحاجة لي كانت مشتركة بيناتهم .... هي انهم بجوجهم توضرو .. واحد موضر فطريقو ، حيت هرب منها لشي بلاصة يفكر فيها ويقرر واش يهرب من جهنم ولا يتسناها تبرد .... ولاخر موضر عليه شريكو لي ماعرفوش فين هرب ...
هي اه .... مايمكنش ديما نحصلو على شنو كنتمناو ... ولكن ممكن نحصلو على داكشي لي خدمنا عليه .. وآمنا بيه .. وتعبنا عليه ... ولا على الاقل .. داكشي لي نكونو ... حاولنا على قبلو .....
هو فبلاصتو جامد كايشوف فالعدم كاع دوك الضحكات لي كايعجبوه .... وكاع دوك الابتسامات لي كدير ملي كاتفرح وملي كتوتر وملي كتبغي تكذب .. عينيها ورمشاتها ..... لي يمكن .... مغاايبقاوش ..... وموحال يلقاهم شحال ماقلب عليها فهاد طريق لي توضرات فيها .....
وهي فوق سريرها كتخرج ألم تعاسة الحظ ديالها شهقات ... كتخرج الصدمة كلهااااا دمووووع كايفزكو حوايجها ..... وواقفة فمفترق الطرق تالفة ..... معارفاش اشمن طريق تاخد .... واش الطريق لي ترجعها ليه ويكملو بجوج بيهم لجهنم ..... ولا طريق اخرى .. فين كاينة فررصة للنجاة ... ولفين غتعيش بلا بيه ......
وملي كنوصلو لمفترق الطرق ...... تماك ... بالضبط .... فين كاتبدا ... رحلتنا الحقيقة .
اليوم الموالي ....
بدا كايتأنن فبلاصتو وهو كايحس بألم فعنقووو .. كايحاول يحل عينيه غير بزز بالشعا لي داخل من البالكون لي محلول حداه ... كايحاول يحرك راسو ولكن كايحس بيه مبلوكي ليه بسبب عنقو المعنز حيت بات على الفوتوي معوجو للجنب ....
بدا كايحاول يتكعد وهو معارفش شحال فالساعة وفوقاش داه النعاس !!! عينيه منفووووخييين وحمرييين ....حجبااانو مگرونين.... علا ساعتو لي فمعصمو مصغر فيها عينيه لقاها السبعة ونص .... و هو يصغر عينيه ملي سمع شي تخرشيش !!!! .....
حل عينيه كاملييين و هو يشوف قداااامو .....
كانت كاسة على الفوتوي لي مقابل معاه باللبسة دالكابتن ..... بملامح جدية كاتقرا فوحدة من الباكيات ديال الدوا لي محطوطين على الطبلة لي صبحات عامرة بالكاروات لي كما بليل ....
مزال مامتيقش وكايحاول يستوعب واش هي ولا غير كايتخيلها تاني كيما تخيلها هاد الليلة كاملة مع كل كارو شعلو ...ولكن هاد المرة حس بيها كاينة دبصح حيت مشاعل تا كارو !! .... وهضر بصوت بحوح و عيااااان
اصيل : قسم ؟؟؟؟؟
قسم : ( علات عينيها فيه بجدية ) ااه فقتي !! صباح الخير ... ( وقفات كاتشوف لدتك الدوا وحطاتو ) قلتي ليا البارح هدا كاتاخدو فالصباح قبل الفطور .... ولكن مكتوبة فيه هنا بعد الفطور حيت علما قريت فيه يمكن كايضر فالمعدة ،مجهد شوية ... رد بالك مع دواك .... ( مدات ليه تيليفونو لي كان عندها وهو كايرمش فيها شدو عليها باقي مسحور ) هضرت دابا مع الطبيب دياالك لقيتك مقيد نمرتو .... فيقتو من النعاس و قلت ليه غانجيو عندك انا واصيل السيمانة جاية ... ( يلاه غايهضر وهي تقاطعو كاتشوف لساعتها ) خاصني نمشي لاكابين دابا .... غانشدو الطريق ... نوض كمل نعاسك فوق السرير ( كاتماسي ليه عنقو) شوف كيف تعنزتي غايضرك عنقك ..... ( هبطات بشوية لحنكو باستو وهو بااااقي مصدوم ) رجع تنعس احبيبي مزاال الحال .... ندير پوز ونصوني ليك نتغداو بجوج ( غمزاتو مع ضحيكة خفيفة ) حلم بيا .... هههه ....
خلاتو وخرجات من جناحو وهو باقي شاد تيليفونو كايشوف فداك دوا وكايشوف فالباب لي خرجات منو مااامستوووعبش !!! او بالاحرى ماااامتيقش !!!!
∆قصر الاسماعيلي...
الساعة 12:15 .....
تحلو البيبان ودخلات الجيپ دلوؤي لي كان كايشرب قهوتوو و ضحكة خفيفة على ملامحو وماكرة نوعا ما .... پاركا ومشى نيشان لباب طلع الدرجات بزربة ودخل ، وهي تلفت ليه صفاء لي كانت واقفة كتشرح للخادمات وطابليطها فيديها ....
رجاء : اء !! ... موسيو لؤي ... مرحبا بيك ... موسيو اســ..(قاطعها وهو غادي جهة الدروج طالع بزربة )
لوؤي : عارف ....
طلع فدروج وهي متبعاه باستغراب تاوصل لجناحها .... حلو ودخل وهي تعلي فيه راسها السيدة لي جابت ليها الازياء ديال اليوم كتجمع العلاّقات لي جابت فيهم و تبسمات للوؤي لي اشار ليها براسو تخرج ...
حنات راسها وجرات السيري الحديدي لي معلقين فيه الحوايج لي دات ... وخرجات ... وهو طل على الدوش والبالكون مابانتليهش عرفها فالدرسينغ ومشى بجهتو .... وقف فالباب ديالو متكي على الجنب مربع يديه كايتفرج فيها هي لي ببيجامة حريرية زرقة شورط قصير و شوميز ديالو بصداف كمامها قصار ورجليها حفيانين فيهم غير خلخال خفيف ، شعرها مطلوق كامل لور مصايب ولي واضح يالاه صاوبوه ليها .... كتقلب بيديها فالعلاقات ديال دوك الازياء لي حطو جداد كتقلب شنو تلبس ليوم ...
قدس : مرريم .... ( كاتشوف للجنب واش تسمعها ) مرريم واش مشيتي ؟؟
حسات بيديه حاوطوها من لور تاتخطفات موسعة عينيها وهو زاد زيرها ماتحركش و نيفو فشعرها كايستنشقو من للور. ...
لوؤي : ( بانتشاء ) اممممم مشات
قدس حلات فمها كاتشوف فيديه محاوطين بطنها و ريحتو لي ضايرة بيها و صوتو لي كايتسمع فودنيها ... الفرحة ديال توحشاتو مخلطة ليها مع الخلعة لي قفزها بيها .....
قدس : لؤاااي!!!!!
ضورها لعندو مبتسم وتاهي ماقدراتش تجمع داك الابتسامة لي خرجات بعفوية ملي شااافتوووو وهو شد وجههاا بيديه وعوج راسو منزلو ببطئ تاحط فمو على شفايفها بقبلة هاااادية وعلا عينو فيها .....
لوؤي : تووحشتك .....
قدس : ( كتحاول تجمع هاديك الضحيكة وتتحكم فيها وتسلتات منو ) خلللعتيني !!! ... هضرت معاك قبيلة علاش ماقلتيش ليا راك جيتي ؟؟؟؟
لوؤي : ( جبدها من يديها تاتزدح ليها ظهرها فصدرو ورجع معنقها تاني منزل راسو حاطو على كتافها وهي كتغزز فشفايفها ) كون قلتها ليك مغانشوفش هاد الضحيكة الزوينة لي درتي دابا ملي شفتيني ....
قدس : ( جمعات راسها ) اشمن ضحكة ؟؟؟ وليتي كتخايل واقلة ....
لوؤي : وليييت ؟ انا راه منهار عرفتك وانا كنتخايل ( رد ليها شعرها لواحد الجنب كايقبل فعنقها وكتفها قبلات صغار مفرقين وهي عضات على شفتها كتحكم فراسها ومعدتها لي تلوات ) نكلس نتخيلك كالسة حدايا ... ننعس نتخيلك ناعسة حدايا ... نتخيلك فالناس لي كايديو معايا ... ( زاد زير عليها فالتعنيقة وهي حاطة يديها على يدو باغا تبعدو فنفس الوقت ماباغاهش يبعد) انا راه فين ماضرت ... فين ماتقلبت ... كانشوفك ... هازك معايا فيدي ولا فجيبي ولا فقلبي ولا فيا و لا ماعرفتش .... مهم فين ما مشيت ..... كتكوني
قدس: ( حسات بقلبها زاد فالنبض وباش متنوضش تنقز بالفرحة قلبات لهضرة) بابا راه مسافر اه .... ولكن راه غيقولو ليه راك جيتي ... شنو غانقوليه لا سولني علاش جيتي ؟
لوؤي : ( ضورها عندو كايشوف فيها وكايلعب بخصلات شعرها ) قولي ليه جا يديني .... مابغانيش نبقى هنا بوحدي .....
قدس: ( علات عينيها فيه ) كيفاش؟؟؟؟؟؟؟ فيين غااتديني !!!
لوؤي : شحال غيبقاو مسافرين؟
قدس : ماعرفتش .. ولكن غالبا غايجيو بعد غدا ....ولا يقررو يزيدو ، بابا ماقالش ليا ... بصح راه مغايتعطلوش بزاف حيت الماتش ديالي قرب .... وعندي جوج لقاءات صحفية خاص بابا وماما يكونو معايا ....
لوؤي : امم ..وجود ؟
قدس : جود يمكن غايجي غدا .. ولكن مغايجيش ديريكت لهنا حيت بابا قاليه يمشي لطنجة يجيب قسم .....
لوؤي : ( كايرد ليها قصيصتها ورا ودنيها ) مغاتبقايش هنا بوحدك ... غاتمشي معايا ...
قدس : ( شافت فيه ) حماقيتي لا ؟ اش غايطرا ليا ههه؟
لوؤي : مغايطرا والو .... غير الى كاضني غانفلت عليا هاد اللية لي مكايناش فيها تريكتك ..... راك غالطة ...
خلاها وخرج للاشومبر وهي واقفة فبلاصتها كترمش ومشاات تابعاه .....
قدس : مااافهمتش ؟؟؟؟
لوؤي : ( ضار عندها ) شنو لي مافهمتهيش ؟؟؟؟ ( هز تيليفونها من على السرير عندو وهي كاتشوف ) .. عادي بغيت ندوز ليلة مع حبيبتي كانهضرو انا وياها تالصبح .... فيها شي حاجة!!! ( كايشوف لتيليفونها )
قدس : طططلق تيليفووني بعدا وهضر ( كتجبد معاه تحيدو ليه ) لوؤي عطييني تييليفووني ....
لوؤي : ( كايقلب فالريبيرطوار ) بلاااااتي .. زگااااي ....
قدس : لوووووؤاي طلق تيييليفوووني
لوؤي : ( دخل لواتساب كايقلب ) انا غانعطيه ليك زكاي ... سيري تلبسي حوايجك باش نمشيو
قدس : ( بعصبية ) لووؤاااي واش حماقيتي علاش كاتقلب ليااا تييليفووووني ؟؟؟؟
لوؤي : ( دخل لانستكرام هو يلقى الروشيرش فيها غير سميتو وتبسم ورجع طفاه ملي لقا بلي ماهضرات مع تاشي نمرة غريبة ومكاينش حس المدرب ) هاااكي ....
قدس : ( ماشداتوش عليه وخلات يدو ممدودة وربعات يدييها ) شنو لقيتي هم ؟؟؟؟ شنو لقيتي !!!
لوؤي : والو ... ششدي!
قدس : مغانشدش ... ( قربات عندو مخنزرة فيه ) الى مكنتيش غاتيق فيا .... غاا عطيني تييييساع ... راه مااشي علاقة هادي لي غانديرو الى مغانتيقوش فبعضياتنا
لوؤي : مكنتيقش فلي ضايرين بيك ... ماشي فيك
قدس : بلاااا متزوقها ( شدات عليه التيليفون بنترة ولاحتو فوق السرير ) واش بغيتيني نبقى كل مانشووووفك نقوليك ( رققات صوتها بالتعياب ) كاااانبغيييييك ماانعيييشش بلااااا بيك .. نتا الهواااا لي كااانتنفس وداك التعنااااب دالخرااا يلاه غاااتيق فيا وتقول هادي كاتبغيني ؟؟؟؟؟ ( قربات عندو كتر شدااتو من حوايجو كامشة عليهم وهو نزل عينيو كايشوف فيديها وشاف فيها ) لووووؤي .... انا بنت الاسماعيلي .. مكنعرفش شنو هو الغدر ..... اااه .... انا كنت كنهضر مع الولاد بلا حسااااب وكنتي كااتشوفني وكاتشوفني معاهم ... ولكن ملي كنت ديال راااسي ... نهار دخلت معاك فهاد تخربيق ..... راه كنعرفك غانتااااا .... ولنا ماشي برهووشة باش نلعب بولد عمي آلووؤاي ....ااااخر مرة ... اااخر مرة تقلب ليااا التيليفون ولااا والله لااباااقي ننـ ....
قبل ماتكمل كلامها كان جبدها لعندوو بقوة ... وغاص وسط شفايفها كايقبلهم بعععنف مزير رقبتها لور بيديه ... غادي بيها تالسقات مع المكتبة لي تساقطو منها الكتوبا بالزدحة .... ورد ليها يديها لور شادهم ليها .... كايقبلها بحب ، بشهوة ، بعشق ، برغبة ، بجموح ، بجنون ...... تابانت ليه هدات وبدات تتجاوب معاه ...عاد قلل الوتيرة وقبلو رجعو قبلات حنان ..... مغمضيين عينيهم كاايعيشو لحظة انهيارهم الحلوة و لحظة انهزاهم ملي كاتلاقاو شفايفهم وتسالي قوتهم ...
بعد عليها راسو غير بشوية .... وشفايفو باقين كاايسيلو بريقها حمرييين .... وحل عينو فيها و تاهي حلاتهم بثقالة كأن رموشها كايوزنو طن ...و صدرها كاينهج ....
لوؤي : ( كايهضر قريب ليها وباقين شفاههم كايتلامسو فالكلام ) عااارف لي كاين احبيبتي ... عارف طينتك وشنو تاتسواي ... ماتنخافش عليك اقدس غير من دوك البراهش وعمرني خفت عليك منهم ... انا كانخاف عليك من اي حاجة .. حتى من دوك صحاباتك كنخاف عليك منهم يجروك لشي حافة. ...
قدس : ( بصوت منخفض) قاااااادرة نحمي راسي .... ونا مكنرضعش صبعي وكنعرف اش كندير .. وكنعرف الحافة فين جات ....
لوؤي: ( كايبوس بوسات خفاف فوجهها مقرب لوذنيها ) ماقااادرش .... هادشي لي عطى الله ... كبرتي قدام عيني وولفت نحضيك .. حتى فاش كانت غير عشر سنين كنت كنخاف عليك لاشفتك كتمشاي حدا لابيسين كانبقى حاضيك باش مااطيحيش ... ولفت الهوا لي كايدوز حداك نشوفو تاهوو واش غايضرك ولا لا ......
قدس : قول بلي مكاااتيقش فيا وبلااا ماتبقى تزوق الهضرة
لوؤي : الى بقيتي بحال هااكا ... غانولي نتيق فيك بعينين مغمضين. .. غير ماديريش شي حاجة لي ندمو عليها كاملين ....
قدس : بحالاش؟ شنو كضن انني غانقدر ندير مافهمتش ؟
لوؤي : بحال ديري شي حاجة بلا ماتشاوري معايا ولا مع واليديك .. ولا تمشي لشي قنت بلا مانعرفوه ....
قدس : (دفعاتو من صدرو بعداتو ) والييديا اه .... نتا علااااش؟؟؟؟؟
لوؤي : رريييحي ... ريحي رااااه غاانعوووجك .....
قدس : قرررب لياااا يلاه وريييييني .. عووجني نشووف ....
لوؤي : ( جبدها من يديها لعندو وحاوط خصرها كايشوف فيها وهي كاترمش فيه كيف شي قطة ) ماااتوحشتيينيش هم ؟؟؟؟؟
قدس : الى كنتي غاتجي وتبقى تقلب ليا فتيليفوني بحالا انا شي وحدة غدااارة مكااااين لااااش نتوحشك....
لوؤي : ( كايدوز يدو على وجهها ) احبيبتي ... راه غا قبل مايموت جدي نهار كنتو عندنا قلتي ليا بلي باغا تعييشي و كااتعصبي حيت مكااايخليوكش الدار تصاااحبي .... وباغا تزهااااي ومنعرف شنو وخاااانقينك و كلستي كاتشهااااي عليا راه كاايعجبك المدرررب ومنعرفت اش .. سينورمال غانبقى تابعك شوية تاديري عقلك .... ولا لا !!!!
قدس : هادشي قبل مانكوووون معاك .. منهار وليت معاااك مااهضرت مع تاشي واحد اخر ومااشفت فحتى شي واحد اخر حيت انا مااكبرتش على الغدرر ... كون كنت باغا مزال ندير هادشي مغاااندخل معاك فواااالو .... زعما غااتصعاب عليا نقوليك لا ؟؟ غاتصعاب عليا نقوليك ماااابغيتكش،؟؟؟؟؟ غااتصعاب عليا انني ماانبغيكش !!!! ....
لوؤي : ( عوج راسو معاها بابتسامة طفولية دلوعة مخلطة بملامح رجالين حرشين ) يعني تااااتبغيييني !!!!
قدس : ( تنهدات ) اوااااا الا مكاانبغيكش ، شنو كانرونو هنايا انا وياك ؟؟؟؟؟ شنو كاندير معااك ؟؟؟؟؟؟؟ بغيت نفهم
لوؤي : ( علا راسو لفوق كااايضحك ) ااااااااااااا راه غاااااناكل دييييييلمك شي نهااااار ( هبط راسو شد وجهها ) وعلاااش متاتقوليهاش لياااا ....
قدس : حتى نقووولها ؟؟؟؟ علاش نتا زعما معااارفهاش ؟؟؟؟
لوؤي : عاااارفها ... ( كايضحك وكايدوز قبلات خفاف على جبهتها ووجهها ) ولكن حلللوة ملي كاتقوووليها ....
قدس : اوا خليها بحلاوتها ( كاتبعد وجهها تبعد منو ) بلا منبسلووووها ( عضات على شفتها كضحك كتبعد راسها منو لي كايبوس فيها بوسات خفاف مفرقين ) لوووؤاي .... بلاااتي نهضر ... لوؤااااي
لوؤي : ( علا عينو فيها ) امممم
قدس : فوقاش جيتي ؟؟؟؟
لوؤي : لبارح بليل ....
قدس : غاتبقى ديما تمشي بحال هاكا ؟
لوؤي : ( عوج شفتو لجنب ) ماعرفتش .... هوما راه مغايعيطوش عليا ولكن لابانت ليا شي حاجة نقد نمشي .....
قدس : علاش مغايعيطوش ليك؟
لوؤي : ( تنهد ومشا تلاح على سريرها متكي عليه كاينقب من باكية دالشوكولا سوداء لي محطوطة على طابل دونوي ) ووقفوني آلحب .... قالو ليا سييير تلاها شوية مع قدس ديالك ( كايشوف لداك الشوكولا لي عض منها ) فيها التمر هادي ياك !!!
قدس : ( كاتشوف فيه مافاهماش !! ومشات لعندو حيداتها ليه من يديه وهو كايشوف فيها كايمضغ ) كيييفاش وقفوك ؟؟؟؟ شرح ليا مافهمتش !!!!!
لوؤي : وقفوووني ... يعني مغانخدمش دابا تاتسالا العقوبة
قدس : ( كلسات حداه باهتمام ) اشمن عقوبة ؟ اش درتي ؟؟؟؟
لوؤي : ( هز باكية دالشوكولا كايشوف فيها فين لي يهز ) شي وحدين فالخدمة مارديتش معاهم لبال وباعوني ( هز وحدة اخرى دارها فمو )
قدس : ولكن كييفاش وقفوك ؟؟؟؟ وكيفاش كاتقولها ونتا فرحااان ؟؟؟ واش جراو عليك ؟؟؟؟؟
لوؤي : ( كايشوف لاهتمامها بيه مبتسم ) ماجراوش عليا ... غير توقيف على الخدمة .... عام ولا يمكن قل وغانرجع .... تايجي باباك ونهضر معاه فهادشي ونفهم اش واقع ... وشحال غانبقى موقف ...
قدس : درتي شي حاجة ماهياش يااااك ؟ داكشي علاش بااعوك؟؟
لوؤي : لا ... وماندمانش ويلا تعاودات عليا غانعاودها
قدس : نااري راسك شحااال قااااسح ....
لوؤي : حيت فيه سيااااادتكم
قدس : ( ضرباتو لصدرو ) وانا علاش دايرني فرااسك ....( بدلع ) على ماشي نورمالمون خاصني نكون فالقلب؟
لوؤي : ( جرها من يديها لعندو نعسها حداه وتعلا بيديه فوق منها كايبوس فعنقها وهي كتهر وتضحك ) داايرك فرااااسي وفقلبي وفعييينيي و فرييييتي و وفكبدتي و فالخرااااا كاااااامل دايريك نت ....
قدس : ههههه لووؤاي .. لوؤي غادخل رجاء ببعد .... لوؤاااي ههههه
لوؤي : ( علا راسو فيها ) بقات ليا رجاء تاني نهز ليها الهم ؟؟؟؟...
قدس : اوا هااادشي لي عطى الله
لؤي : ( هبط على شفايفها ببوسة بادلاتو بيها وشاف فيها ) نوضي لبسي حوايجك غانمشي نهز واحد الشارجور ددطموبيل خليتو هنايا .. ( باسها تاني فجبهتها ) ماتعطليش
جا نايض عليها وشداتو ....
قدس : بلااااتي ؟؟؟؟؟ كيفاش لبسي حوايجك ... واش نتا شوية صاااافا ؟؟؟؟ فييين غااانمشي؟؟؟؟؟
لوؤي : قلت ليك مغانخليكش هنا بوحدك ..... يلاه غاتمشي معايا للدار .... راه كي دار باك كي دار عمك ...باباك مغايحيدش ليييك تمشي عند عمك تباتي معاهم ....
قدس : لاااااا ... والله حتى يشك فيا نتا راك مسسطي .. وماما كتتررر .. بابا قاليا بقاي فالدار ..... وانا قلت ليهم غاندوز ليلتي فسينيما لتحت فشي فيلم .... مجاتش دابا نقوليهم غادا عند عمي غاايشكو فيا
لوؤي : والى هوما لي عييطو عليه وقالو ليه قدس ماتباتش تما بوحدها تجي عندنا ... غاتقولي لا ؟؟؟
قدس : والى عيطو هوما ممكن .. اما انا لا ....
لوؤي : ( نااض عليها ) يلاه لبسي دغيا .... غدا ملي يجيو جود وقسم نردك ....
قدس : ( تكعدات على السرير كاتشوف فيه ) واش واليديك قالوها لبابا ؟
لوؤي : مزال مقالوهاش ... ولكن غايقولوها ...تكعدي نوضي ...
خلاها كاتشوف فيه ومشا خرج غادي جهة جناحو وهي بقات غي كترمش ، فللخر بدات كضضحك بلا متحس وهي كاتشوف لداك الشوكولا لي ماكانتش حاملاه فاش جابتو ليها الكوتش .. حيت مصنوع غير بالتمر و الشوكولا السوداء ، وهي تاااكلو هاد المرة بشهية و وناااضت لدريسيينغ كتبنن فيه يلاااه جاها لذييييذ وحلو !!! ....
وهو دخل لجناحو حال المجر كايقلب على الكابل ديالو و تيل فودنو تاجاوباتو رتاج ...
رتاج : احبيبي راني فالخدمة شوية ونعاود ليك ....
لوؤي : بلاااتي بلاتي .. غا واحد الدقيييقة وسيري ....
رتاج : ياك لاباس اولدي ؟
لوؤي : راني عند عمي اسد ... سافرو .. وتاجود مسافر .. جيت لقيت قدس هنا بووحدهاا ...
رتاج : سي قالتها ليا لامار ....مشاو مع وسيم ...
لوؤي : وقدس غتبقى هنايا بوحدها هاد الليلة ماشي حشومة ؟؟؟؟؟
رتاج : اولا اولدي هي ماشي بوحدها الدار عااامرة بلي خدامين فيها .... تاانيا الى كنتي كاتفكر انك تبقى تما غير نسى .... مغانخليكمش اولدي نتا وياها طيط آطيط وانا سلعتي كانعرفها ....
لوؤي : دابا اش كاتروني آلواليدة اش كاتروني ؟ علاش انا غانبقى هنا ؟ شوفي نيتك شحاال طااايحة !!!! .. ( كايحك فشعرو ) انا قلت هي تجي عندنا .....
رتاج : لوووؤااااي !!!
لوؤي : ااشنووو ؟؟؟ واش مابقاتش فيك نت ؟ غاتبقى هنا بوووحدها ؟؟؟؟ تجي عندنا علاش غاتبقى هنا بوووحدها ... ها؟؟؟! على ماااشي بنت صااحبتك ؟؟؟
رتاج : اولدي مايقد عليك غالي خلقك ، صااافي لقيتي الفرصة منيين دوز ، داااكشي علاش راااجع ... ياك كنتي مسافر ؟ ونا نقول هادا علاش رجع بلليل ....( تنهدات) نخرج من لوپيراسيون ونعيط ليها تجي ....
لوؤي : لاااا .. مغاتبغيش قلتها ليها مابغااتش .. قوليها لباباها ولا لماماها باش هوما يعيطو ليها يقولو ليها غير سيري ...
رتاج : والى مابغاوش ؟
لوؤي : علاااااش مايبغيوش ؟؟؟؟ شحال من مرة سافرو وجات بااتت معانا قسم ....شحاال من مرة سافرتو نتوما كايعيط ليا عمي اسد انا ودراري نباتو هنا ... جييتو تااالقدس وبديتو تععكسوو ؟؟ واش انا غاااناكلها ؟؟؟؟؟؟
رتاج : اشوف عندي نقوليك .. قدس راه غاانجيبها عندي .... ولكن راه والله لاقريبتي ليييها ......
لوؤي : وصاااافي فهمنا .... فهمنا ... غاعيطي عليهم قوليها ليهم ....
رتاج : وااااخا ... واخا ..خليني دابا راني داخلة للبلوك ...
لوؤي : بلاااتي تسنااي .. تسناي شوية غايسرا فيه البنج ... ملي تهضري معاهم قولي ليهم بلي عيطتي لقدس ديجا ... عنداااك تقولي ليهم بلي انا لي قلتها ليها راني عارفك الواليدة ديالي زرگة فالكدوب .... قوليليهم نت عيطتي ليها وقلتي ليها اجي .. وقالت ليك تشاوري مع بابا وماما لا خلاوني نجي .... صافي ؟؟؟؟ هاكا قولي لييييهم
رتاج : سييير بعد مني ... قدس راها بنتي وتش حنا بيناتنا هادشي ... سير خليني نمشي نكمل خدمتي
لوؤي : وااااااحق الرررب مغااضربي بشي مقص تاااا تحلي ليا هاد البلان ... داااابا ... داابا عيطي عليهم و نسمعهم عييطو عليها ... وسيري داك سااااع حليه ولا خيطيه ولا فسخيه ولا اش كاع غاديري ليه ....
رتاج : آلوؤي ديالي راك مكاتحشمش .... خلييييني نمشي لخدمتي كايتسناوني ونعيط داك ساع ...
لوؤي : دااااابااااااااا
رتاج : ياااااربي فوقاش عاااد الولد يكبر يااااربي ....
لوؤي : ودايا انا عمرني طلبتك ...طلبتك دابا قضي ليا الغرااااض مالكي ....
رتاج : احبيبي والله تا مشغووولة راني فباب البلوووك ... غانعيط لباباك يقضي هاد الغراض صافي ؟؟؟؟
لؤي : سير على الله صافي .. هانا هنا كنتسنى ... وماتقوليش ليه انا قلتها ليك .... قوليليه نت فكرتي فيها وصافي .....
رتاج : صاااافي صافي فهمناا صاااافي ....
قطعات عليه ، ودوزات لابيل لعدنان .... وهو كلس على سرير كايكتب واحد الميساج ضاحك لواحد من صحابو القدام .... عاد رجع ناض مشى باتجاه جناحها دخل وهي طلات عليه من دريسينغ
قدس : مزااال كنلبس
لوؤي : انا فالبالكون ماتعطليش ....
خلاها ودخل لبالكون جبد كارو ديالو ... وهي لبسات غوب پينك فايتة شوية ركابي على ود البروتوكل و لبسات سبادرين بيضة و شعرها مطلوق مبوكلي من تحت ..لبسات اكسيسوارات خفاف و البراسليات دلوؤي بجوج فيديها ... واحد فيه نجيمات وواحد فيه حلقات صغار و لؤلؤة صغيرة مدلية لي كتعني اول نهار فعلاقتهم ... لبسات خويتمات رقاق فصبعانها كوحدة كتموت على الاكسيسوارات وكل ما هو بنااااتي ... و جبدات صاك بيض صغير و كلسات قدام مراية ماكياجها تالقاتو وقف عليها ...
لوؤي : مزااااال !!!
قدس : بلاتي .... شوف عينيا كيف منفوخين .... ندير غير لونتي سيغن ....
لوؤي : محرك شوية دالبرد ديري شي حاجة فوق داك الكسوة
قدس : بصااح ! ( شافت موراها ) هز معاك داك الڤييست لهيه ديال الدجين ( مشا بجهتها ) لا ماشي هاديك لوخرا .... هاااديك ...
هز ليها لڤيست شادها كايشوف فيها وهي كادير لونتي سيغن تحت عينيها وتبلانديه وهو كل مرة يشوف للساعة تاسمعو تيليفونها كايصوني وشافت فيه .....
قدس : جيب ليا تيليفوني عافااااك
لوؤي : هادا غايكون باباك مية فاامية ( مشا باتجاه تيليفونها هزو ولقاه باباها وتبسم ومدو ليها وهي شافت لعندو وشافت لتيل ) وااجااوبي ...
قدس : ( سرطات ريقها وجاوبات خيفانة ) الو ... بابا
اسد : كتكوتة ديالي .... صباح الخير ...
قدس : صباااح النوور ابابا ( كاتشوف فلوؤي خيفانة وهو شاد الفيست ديالها ومبتسم ) كيصبحتو .. ماما لاباس ؟
اسد : لاباس ، خرجات هي و وسيم ... ( كايجغم من فنجانو ) تغديتي ولا مزال !
قدس : مزال .... فوقاتش غاتجيو ؟
اسد : غانشميو فالعشية لفرانسا ... غالبا واحد اليوماين ونجيو ....
قدس : اااه بصحتكم .. . تأميزاو مزيااااان عقلو على سفركم مكتسافروش ديما ....
اسد : سي .... عيطت ليك حيت عمك عدنان صونا ليا دابا قاليك تمشي تكلسي معاهم تانجيو .... من الاحسن سيري باتي معاهم هاد الليلة باش منبقاش هاز ليك الهم خليناك بوحدك ... ملي يجيو خوتك غدا رجعي ....
قدس : ( علات عينيها فلوؤي كتستفز فيه وهي فرحانة فللداخل ديالها ) ااء !! .... و واش ضروووري زعما نمشي !!!! ( لوؤي خنزر فيييها)
اسد : الى مابغيتيش كلسي ... ولكن من الاحسن ابنتي سيري باش يبقى بالنا هاني ...
قدس : ( شافت فيه كضحك وتستفزو ) كنضنن مكاااين لاااااش ( جاتها الضحكة على نخنيزرتو حابسها بزز ) هه ... صافي .... انا نتغدا ونمشي ... هه
اسد : شوفي شيفور يوصلك .... يلاه ابنتي تغداي مزيان تاتجي ماماك ونعيطو ليك
قدس : واخا ابابا تهلا فراسك وتهلا ليا فماما وسلمو على وسيم ....
قطعات عليه وشافت فلؤي كضحك ...
لوؤي : والله مكاااتحشمي
قدس : هههه ( ضارت للمرايا هزات ماسكارا ) واضروري نلعبو شوية بأعصاابك هههه
لؤوي : وصاافي يلاااه ....اش غاديري تاااني نووضي من تما
قدس : غيير ماسكارا مالك .... شفاري بيااضو بلونتي سيغن ... جيبليا معاك كاسكيطتي عافاك ....
لوؤي : غاتنوضي تكعدي لا !!! ... انا سسخاار باااك؟؟؟
قدس : هههه اوا نتا بغيتي قدس اش غانديير ليك انا ههه ... جييبلي كااسكيطتي .. ديك البيضة .... ( بدلع ) عاافاك
لوؤي بدا كايضور فراسو ومشا هزها .... وقرب لبسها ليها وتحنى لعندها باس فعنقها كايشوف فيها فالمراية ....
لوؤي : اشنو خاص حبيبتي آخر نجيبو ليها ؟
قدس : هههه ( هزات بلاش غوز ) صافي باركا عليك هههه
يلاه كادير البلاش تاحسااات بيه هزها بين يديييها غادي بيها لاشومبر
لوؤي : بااارااكااا ....
قدس : ههههه حطني نهز غيييير حوايجي ههههه حطني مزال ماجمعت والو ههههه بلاتي هههه
لوؤي : ( هازها فيديه كايشوف فيها ) غانهبط .. والله وتعطلي كتر من خمسة دقايق تانطلع نزلك هاكا قدامهم كاملين ....
قدس : صافي خمسة دقايق تلقاني لتحت .... والله متعطل عليك
هبط على فمها باسها وحطها ونزل هاز الفيست ديالها فيديه ... وهي مشات لدريسينغ كضحك ... حلات صاك صغير هزات فيه بيجامة ولبسة اخرى تلبسها غدا ... هزات برودوياتها وشارجوراتها وكاع اش غاتحتاج ... ونزلات للتحت تاتلاقاتها رجاء ....
رجاء : مامدوزيل غداك واجد ؟ غادا لشي بلاصة ؟
قدس : غانمشي لدار عمي عدنان .. غير تغداو ... مغانجيش تالغدا ...
رجاء : اااه .. داكووغ امادموزيل ... علماتني المادام بلي غدا كاين عشاء عائلي كايجمعكم نتوما الخوت ....
قدس : سي ..غاتجي قسم ... ( باستها فحنكها ) بايبااااب تتلغداااا
ابتسمات ليها وخرجات تاوصلات لعندو ... كان متكي على الجيپ ديالو لي قربها تالباب باش متجيش تالباركينغ ... متكي شاد تيليفونو هو يحل عينو فيها ونزل راسو باش يشوفها فوق من النضاضر الكحلين لي لابس .. ملي كاتكون مقابلة معاه كتتمشى بكامل اناقتها وتمخترها ، كتمشى كانها بوحدها لي عندها الحق تحط رجليها فالارض ... مشيتها كلها انوثة وغرور و كاريزما ... صدرها مدفوع للقدام ورقبتها منتصبة للفوق ووجهها ديما مبتسم بثقة ... فورمتها لي كاتجيب ليه التمام ولي كتخلي حرارتو كلها ترتفع كلما شافها .. ورجع شاف للجنب كايستعد من الشيطان باش مااايديرش فيها شي حاجة يندمو عليها بجوج ... فنفس الوقت كايحس بعروقو كايتزيرو فاش كايتخيل ان كاع لي شافها على برا غايحس بحالو ... وكايتسنى غا الفرصة لي ياخد عليها المسؤوولية باش ماتخرجش لحتى شي بلاصة حتى يكون هو .... وتاحد ماياخد فرصة يشوف فيها بلا مايلقاه قدامو ....ورجع تنهد ملي وصلات لعندو وضربات شعرها لور ....
قدس : ( كتشوف مع الجيپ كانت وحدة اخرى من غير ديالو ) بدلتي الجيپ ؟
لوؤي : اممم ( كايرد تيل لجيبو لور وحيد ليها صاك من يديها دارو لور ) لوخرا داها ليا خوك .. بحالا ماكافيهش داك الباركينغ لي راه كايتغبر لتحت ....
قدس : هههه ( غادا جهة الباب الوخرا ) اوا بصحتو مااالك مسموم ... ياك غير طمووووبيل
لوؤي : ( حل لباب وركب وتاهي ركبات حداه كادير الحزام ) والصراحة غا طموووبيل داها ... فين غاتبان قدام ( شاف فقدس بضحكة ) هاد الزين لي ديت ليه انا ....
قدس : ( جاتها الضحكة فنفس الوقت كضور فراسها ) زيد زيد آلحامض زيد ....
لوؤي : ( ديمارا غادي جهة البوابة ) غاااندي حبيبتي ليوم ... تااااكل ااااحسن لينييييم لي كايينييين فيييك يا كااازا ....
قدس : ( وسعاات عينيهاا وشافت فيه بزربة فرحانة ) نااااري مااانسيتييش !!!! هههههه
لوؤي : نووو ( شد يديها عندو باسها ) تشهاي ليا شي حاجة ونساها؟ ... مااايمكنش ....
قدس : ( عضات على شفتها فرحانة ونعسات على كتفو وهو وشاد يديها عندو ) ناااري عرفتي ريقي سال دابا ....
لوؤي : كون تشوفي ريقي انا...
قدس : ( علات راسها فيه ضاحكة ) كايعجبوك لينيم تانتا ؟؟؟؟
لوؤي : ( متبع الطريق ) كاتعجبني بنت عمي ....
قدس : ( ضحكات تاني كاضور فرااسها ونعسات على كتفو ) كانقوليييك راك حامض
لوؤي : مهم كااضحكي ... ههه ...
قدس غير ابتسمات ناعسة الى كتفو وكتحس براسها انها ففرحة عمرها حساتها من قبل .. كاتحس براسها فقمة النشوة دالحياة ملي كتكون معاه .... وبدات كاتفكر مرااهقتها لي دوزاتها فهاد الثلث سنين اللخرة الصعييييبة و شحال كانت الحياة كحلة بنسبة ليها وكاع اهدافها تالفين ، تالنهار بغاااتو وكولشي تضوا !!! ... بعد مكانت كتحس والديها مشغولين عليها ... لقات واحد كايتشغل على كوولشي باش يكون معاها .... بعد مكانت كتحس انها قليلة الاهتمام .... لقات واحد لي فيضو علييها من كل جهة .....ولات كتحس بالثقة زادت فنفسها ومتكدبش انه خلاها تحس براسها ملكة ومنهار ولات معاها وهي ديييما ضاحكة وناااشطة .... كاتشوف فيديها لي فيديه وبدات كاتزير عليه وغمضات عينيها ....
قدس : لوؤي
لوؤي : آلحب
قدس : واخا نقوليك شي نهار .... سير بعد مني .. ماتمشيش ..... ( لوؤي ابتسم ) واخا نقوليك مابغيييتش نشوفك .... ماااتمشيش .....
لوؤي : هههه شحاااال قلتيها ليا من قبل ... ( شاف فيها ) مشيت ؟؟؟ .... ( ساف فالطريق ) نهار تقولي ليا مابغيتش نشوفك ..... غانطفي الضو ونكلس حداك .....
حيدات يدييها من يدو وعنقاتو من بطنو وهو نزل عينو كايشوف ليديها لي وصلو لنص بطنو وبدا يبتسم عليها لي معنقاه بكيااااتة مخشية فيه قالبة شفايفها للتحت نفس الوقت عينيها فرحااانين ... وشاف للطريق ورجع شاف فيها وباسها فجبهتها مطووول ..... ورجع كايشوف للطريق .....
لوؤي : انا بغيت نعرف حاجة وحدة ....
قدس : ( علات عينيها فيه ) شنو هي !
لوؤي : ( مرة يشوف فيها مرة فالطريق ) جيت للدنيا قبل منك ... علاش تااالنهار لي تزاديتي نت عاد تولدت انا ؟
قدس : ( تبسمات بحب بعد ما استوعبات جملتو ... و قالت بدون ماتحس ) ماعرفتش .... لي عارفة هو ... تالهاد الصيف.... عاد تزاديت انا ....
فالباطو ...
الساعة 13:30
فالبار السفلي ....
كان جالس على واحد من لي فوطوي الحمرين ... فواحد القنيتة مطرفة .... البار كان مظلم على عاادتو وإضائتو خفيفة .... على الطبلة قدامو طاس دالقهوة وطفاية دالگارو ... وشاد تيلفون وكارو فيديه كايكميه ... البار كان خاوي تماما بحكم مزال ماحلوه ..... الكراسا كاع مجموعين .. وليفام دميناج كايمسحو وينظفو ... والبارمان مايوجد الكيسان ويستف ... ملي فاق وهو باغي غير يكمي تايتسالاو الباكيات د الكارو ديالو كاملين باش يلااااه يتوكض ويستوعب هاد المرحلة لي نقز ليها فعلاقتو مع قسم شنو غاتبدل فيهم ......
ومالقاش شي بلاصة غاتكون أنسب و غايكون فيها بوحدو كتر من البار ومع الجوج دالنهار .... مامنعو تاواحد بحكم انه عارفينو من موالين هاد الباطو ... ولكن كولشي مستغرب فيه !! خصوصا ملي طلب غير قهوة .... تا من صفاء قاتليهم مايصدعو تاشي واحد ....
كالس فقنينة مرة ينفت الدخان مرة يشرب قهوتو ... كايقنع راسو بلي راه كايتفرج فالفيديوهات لي طالع نازل فيهم فتيليفونو ... ولكن هو عقلو ابدا مكاينش تما .... عقلو كولو فكيفاش تعاملات معاه هاد الصباح !!! .. واخا حاول يرجع ينعس ماقدش .... حس بيها بحالا شي وحدة اخرى مكايعرفهاش .... حس ان لي كانت معاه هاد الصباح ماشي قسم لي كايعرف .... كانت واقفة حداه الكابتن الاسماعيلي .... ماشي قسم .... هاد الصباح هو الصباح الوحيد لي قدر يشوفها كيما كايشوفوها الناس لخرين ..... انسانة عااقلة وناضجة ومسؤووولة !!! ...
ولكن واخا هاكاك قسم ديالو هو عارفها . عارفها غاتكون باتت ليلة كاملة كتبكي وتفكر باش صبحات بحال هاكاك .... عارف انه ورا قوتها وصلابتها لي بينات ليه فالصباح .... مخبية واحد قسم لي باقا خيفانة وكاتقول اش كاندير انا ؟؟؟ .. ولكن عذرها ....لانه بعد المرات جنون الحب هو لي كايخلينا نديرو هاد التصرفات لي مامفهومينش .... معارفش واش الامر خصو يفرحو ويكبر فيه ..... ولا يزيد يخاف عليها !!!! .....
باقي فأفكارو كايدي فيهم ويجيب ....تاسمع خطوات جاين باتجاهو ... وصوتها مرافقهم ....
قسم : ماكايجي للبار مع الجوج دالنهار .... غير لي نسا هنا شي حاجة لبارح جا يقلب عليها .... ولا لي باااغي ينسى شي حااااجة وقعات لبارح ...
اصيل : ( تنهد وحط تيليفون وطفى الكارو فطفاية وقاد الگلسة وهي جات كلسات حداه كايشوفو فبعضياتهم ) وفنظرك نت ؟ هاد الحاجة .... خصني نساها ولا نوض نقلب عليها ؟
قسم : ( عوجات شفتها لجنب دايرة رجل على رجل حيدات شابو ديالها حطاتو حداها ) ماعرفتش .... ( شافت فيه ) حتى الى قلت ليك نساها .. مغاتنساهاش .. والى قلت ليك نوض قلب عليها .. مغاتلقاهاش ... يعني فكل الاحوال ماااابقاتش هاديك الحاجة .. وهادي حاجة كاتفرح .. حيت هاد الحاجة كانت فيك لداخل معدباك ... شديتها لبارح ولحتيها ..... ( بابتسامة مرهقة) كيف كتحس دابا ؟
اصيل : ( كايشوف فيها معارفش واش لي قدامو بنت ولا ملاك ) ولكن راه تلاحت عليك اقسم .... نت لي كيفاش كتحسي دابا !!
قسم : ( رمشات وشافت للفراغ ) هي آه ... كانت ثقيلة شوية ... لا ماشي شوية .... بزااااف ( عينيها حمارو ) ولكن لاكنا غانهزوها بجوج ( علات عينيها فيه ) يمكن ، غاتخفاف ....
اصيل : وشكون قاليك راك مضطرة تهزيها معايا ؟؟؟؟
قسم : الحب لي كايكون من اول نظرة غير تخربيق ... الحب هو لي كايكون من اول موقف .. و لبارح كان اول موقف ليا انا وياك .... الى مكنتش معاك فيه .... اذن داك كلمة كانبغيك لي قلتها ليك غير نافقتك وكدبت عليك ..... ماعندها معنى ....
اصيل : والى شي نهار .... درت ليك شي حاجة !!!!! ....
قسم : مغاااديرش ا اصيل. ... مكنآدويش هداك لي كانبغيوه .... لاكان العقل كايغيب القلب ديما فايق .... ( هزات يديها وشدات فوجهو وعينيها دمعو ) حتى انا مغانسمحش ليها ....حتى انا لي تلاقيييتها .... مااااعمرني غانسمح ليها ا اصيل ..... على اش دارت فييينا......
اصيل تنهد وجبدها لعندو عنقها وهي غمضات عينيها حاطة راسها على كتفو وهو علا عينيه للفوق لي جفوونهم ولاو حمريييين عاض على شفتو مدة كااايقوي فراسو ونطق بصووت ضعيييف ....
اصيل : هاد الصباح اقسم ... انا عرفت ان بنادم متايطيحش فشي واحد لي خلاه يبغيييه ...تاطيح فهاداك لي تايخليه يبغي راسو .... عمرررني ضنيت شي نهار غانكون بنادم طبيعي تانهار عرفتك .... فكرت فزواج وفكرت نولد معاك كاع ......
قسم : ( بعدات منو كاتشوف فيه ضاحكة وعينيها عامرين بالدموع ) غااايكونو ولد و بنت .... غايكونو عينيهم زرقين بحالك و كبارين بحالي .... ( عينيه حمريين داامعين وهي كتهضر بحماس ودموعها كايسيلو ) غاانتزوجو ... وغانبنيو هداك العالم لي حلمنا بيه .. وغانولدو دوك الولاد فيه .... و وغا .. وغايكونو زوينين بحالي ... وبحالك ... غ .... غايكونو ضايرين بعمتهم سلمى ... ( دموعها نازلين ) و جوج خوال ... . وخالة ... غايبغيهم جددهم بزاااف .... وجداااتهم تاااهي غاتربيهم ....حيت غانلوحهم مرة مرة على ماما باش نكلس معاك بووووحدنا ملي نتوحشك ...... ا اصيييل غان...( سكتات مدة كاتشوف فيه وقاالت بضضضعف وانهيار ) اصييل ياك غاااتبرا ؟؟؟؟؟ غاااا نعيييشو هاااادشي شي نهار بااااك .....؟؟؟؟؟؟
اصيل : ( عنقها عندو هي كتشهق فكتافو وهو عاض على شفتووووو مغمض عينيه ) غانعيشوه ..... غانعيشوه اقسم ....
قسم : اه ..... اااه ..جاتني صعيييية ا اصيل .. قااااسحة بزاااف كاااع ... انك تكون بحالا هاكا ، راه بحالا تابعني شي سايكو مريييض غايقتلني الى مشيت حتى قربت ليك ومهددتي مااانقيسكش .... ولكن .... ولكن هادشي مغايكونش صعب من انني نعيش بلا بيك ... ( تسلتات منو كتمسح فدموعها وتشمر بنيفها وترد قوتها كاتشوف فيه ) لاكنتي مريض ، نمرضو بجوج تانبراو بجوج .. نعاونك تانقزو هادشي كيما غانقزو كاع الحوايج لخرين فالحياة .... مكايهمنيييش ا اصيل ... الى كنتي غاتقتلني غاااقتلني ... حسن من نعييش بلا بيييك ....
اصيل : ( تنهد بعمق والكلمات لي غايرد عليها بيهم سالاو ليه .... وجبدها لعندو وحط ليها راسها على صدرو ) بغيت نعرف حاجة وحدة .... كيف درتي حتى لقيتك قدامي هاد الصباح بعد كااع داكشي لي قلت ليك عليا بالليل ....
قسم : ( سهات شحال كاتفكر ليلة لبارح ) ماغوتش. .. ماضربتش فراسي ... ماابكيتش بزاف. .... ولكن تلفت ... توضرت بزااااف ( شمرات بنيفها وخشات يديها فجيبها .... وجبدات درهم مغربية قطعة فضية قدييمة كتوريها ليه ) ولكن هادي ....هي لي جابتني عندك هاد الصباح ونااا تايقة مزياااان فالاختيار لي خديت ..... ومخيفاناش ...
اصيل : ( شاف فداك القطعة وشاف فيها ) مافهمتش !!
قسم : ( كاتشمر بنيفها وتنظف صوتها من نبرة البكا ) هاد درهم عندي منهار كانت عندي 12 عام .... انا ولفت نتلف فجوج طرقاان .. ملي كنت صغيرة ... تلفت فواش نتبع طريق بابا ونكون كابيطان و لا نتبع طريقي وندير اش بغيت انا ... تلفت تاتي فواش نتزوج وندير أسرة ولا نتبع طريق قلبي ونتسنى هداك لي نبغيه تايجي ... تلفت فواش نتسنط لقلبي ونبغي ولد هاديك الحومة البعييييدة عليا ....و لا نتسنط لعقلي و نتسنى شي واحد اخر .... ولبارح تلفت فواش نمرض معاك ونبراو بجوج ولا نكون انسانة طبيعية فعقلي ونهرب ....... ( هزات داك درهم كتوريها ليه ) وهااااادي هي لي كاتفكني ديما وكاتلقى ليا الحل ملي كنحير بين جوج حوايج ....
اصيل : وكيفاش كاديري ليها ...
قسم : ( ناضت قادات جلستها كاضورها فيديها مبتسمة كاتشوف فيها ) كنحط داك جوج خيارات دياولي لي حيرانة بيناتهم قدامي .. وكنختار لكل واحد فيهم يا راس ... ( قلباتها ) يا نجمة ... و ملي كنلوحها و نسد بيدي ..... قبل مااانحل ..... هاديك الحاااجة لي كايتمنى قلبي نلقاها فاش نحل يدي ..... هههي لي كاااانختاااار !!!! ... ( علات راسها فيه ) و ليومنا هدا .... ماعمرني عرفت هاد الدرهم واش كان نجمة ولا رااااس .... كنتبع غير قلبي اش بغا يكون تماااا وصافي ...... حيت بعد المرات .. حنا ماشي مكانسمعوش لقلبنا ... حنا كنكونو غير معارفينش كيفاش نهضرو معاه ( هزات داك القطعة النقدية ) ولكن هاد الدرهم كانت هي لي كتخليني نعرف نتواصل مع قلبي ..... ( سرطات ريقها وشافت فيه ) انا هاد ليلة خديت اكبر قرارات حياتي ويمكن آخر قرار غاناخد ... حيت طريقي منبعد ما ختاريتك نتا من بعد هادشي كامل لي عرفت .. مابقاتش غاتخليني نحير مزال بينك وبين شي حاجة اخرى .... داكشي علاش ( حلات ليه كفو وحطات هاديط القطعة فيه ) مابقيتش محتاجها .... خليها عندك ... ربما تانتا شي نهار نلقى راسك واحل فشي جوج طرقان .... وغاتوريك فيم غاتمشي ... وغاتوريك كيفاش تهضر مع قلبك ..... ( تعلات بشوية باستو فحنكو ) خصني نمشي .... نتلاقاو بلليل
تبسمات ليه بملائكية وهزات قبعتها ومشات وهو كايشوف فهاديك القطعة فيديه وكايشوف فيها طالعة فالدروج الحديدين خارجة من البار ....
عند لوؤي وقدس ...
كالسين فالطموبيل على برا المدينة بعد مادخلو وسطها ، ومشى خدا ليها لينيم ....
كاياكلو هي وياه وهي كتتبنن بالصوت وهو كل مرة يشوف فيها ويضحك ... كتغمسهم فلاصوص وتااكل ...
قدس : ( كتمضغ بزربة تسرط باش تهضر ) ا .. اصل .... اصلا قربت نحيد عليا داك الماااتش وينعل بو شي ريجيم تاااالعام الجاي .... ماباغاش انا نكون لاعبة تنس .. انا باغاا غا ناكل ونعس ... ماااااشي سوووقهم
لوؤي : ( كايسمح ليها لاصوص من فمها لي جخطناتو ) ايه تاكلي ماقلناش .. ولكن بالقياس .... ردي لباال للصحة ماسوقناش حنا فالغلض ولا الضعف .... هادشي ديال برا وهاد لي صوص مرة مرة ماشي ديما حيت ماشي صحيين .....
قدس : ياااه !!!! كيشتي زعما راهم ديما على الطبلة .... ( كتبنن) نااااري آلوؤي على صوص شحاال لذييييذة ... فين كتعرف هاد السيد فين ؟؟؟؟ عندو هادشي لذيييذ
لوؤي : كايعرفو خوك ماشي انا ، هو لي وراه ليا .... شتي راه واخا تشوفي عندو غير داك الكيوسك الصغير ويبانو ليك الكليان لي واقفين عليه قلال .. شتي كاااع دوك الطوموبيلات لي كانو تما مصافيين راه كايتسناو يجيب ليهم ....
قدس : ( كتسرط ) ااااه ....داكش علاش تعطل علينا ... ااه بصح ، شفتو مشى لعند واحد طموبيل اخرى هضر معاهم بحال كيفما حا عندك ملي شافك
لوؤي : سي ... ( كايمسح يدو بالكاغيط وينفض حوايجو ) باش هو غا خدم بنيتك راه كولشي غايجي لعندك من كل قنت .... وتا هاد النوع دالمشاريع كايكون فيهم الربح واعر وتمارة قليلة ... دابا بحال هاد خينا ، راه فيه مااينوض يديير رييسطوو كبييير وقوة تمارة والضرائب ... ولكن حلاوتها فداك الكيوسك الصغير و صف الطموبيلات عندو وخدام ألييييز وواحد كايوريه لواحد ... المشروع الناجح راه مكايحتاجش لقوة تماااارة ... كايحتاج واحد لييخدمو يكون ذكي .... كون كان عندو دابا ريسطو كبير... بالله مغايصور اش كايصور فداك الكيوسك ....حيت النص غايمشي ليه فالضرائب والما والضو .... والنص فلاسينيسيس ديال الخدامة وخلاصهم .....
قدس : ( شربات من الكانيط ديالها وشافت فيه ) صراحة كون غاكملتتي فالمناجمنت .. كون راك ناجح وديتي الرضا وديتي منلفوق هههه
لوؤي : لا .... كنعرف غا نهضر انا .. اما نطبق ماعنديش الخاطر دالبيع والشرا وتجارة والاعمال كايحتاجو لكرافات وديبلوماسية و انا واحد بنادم مكنعرفش نكون ديبلوماسي ومكنعرفش نصاوب كرافاطة ... انا كنعرف غاااا هادوك لي معليين راسهم للسما وحاسبين راسهم لاعبين على الدولة العشرة .. وراهم شادين السما بيديهم وماكينش لي يقد عليهم ولا يحبسهم .. نزل ليهم داك ااراس فشي بنيقة مدلولين .... صااااافي ... هاديك هي القمة دالساتسفاكشن ديالي ....
قدس : وهانتا دابا جراااو عليك ... مانتا بكرافاطة ما نتا بساتسفاكشن ....
لوؤي : ( جببد ليها حنكها ) منين جججبتي هاد جراو عليك تاني ( كايمسح ليها فمها ) كوووولي بشوية .... ماجراوش عليا ... مووووقفيني ... واش نشرحها ليك بالخشيبات ...
قدس : بحال بحااال .... مهم راك بيييطاالي ....
يلاه غايجاوبها هو يصوني ليه تيليفونو وزاد نفض على حوايجو وجاوب ....
لوؤي : آلواااليد ( قدس شافت فيه )
عدنان : دوز مور قدس جيبها لعندي لبيرو ..
لوؤي : اه راني دزت مورا.....( حبس كايستوعب ) فين غانجيبها ؟؟؟؟؟
عدنان : لبييرو ... تانجي بليل ونجيبها معايا للدار......
قدس طلقاتها بضحكة مااقداتش تصصبر وهو شد ليها على فممها ببزرربة وهي كتنخصص بالضحك ...
لوؤي : ( مبعد تيليفون ) شششششش ... ( دار تيل فودنو ) ك كيفاش لبيرو آلواليد ؟؟؟؟؟ تا اشمن بيرو اشمن بيييرو !!!!!!
غادين فطموبيل ، صايك مخنزر وهي مااابغاتش تسكت من الضحك .. شاداها الهيستيرية ... عينيها دمعو بضحك ووجهها حماار ... وهو عاقد غوباشتو ......
لوؤي : الناس عندهم الواليدين .... انا عندي العدياااان ... ( شاف فيها ) وحق الرب تا العدو .... العدو مايديريش ليك هاكااا .... ( شاف للطريق وهي ميتة بضحك ) ولكن غااااا بلاااااتي .. غاابلاتي دابا ترجع ليهم فساعة الخير .... ( كايشوف فيها وفالطريق مغزف كايتحلف عليهم وكايشرب من قرعة دالما ورجع لاحها عليها كتسدها وكضحك) انا ....انا غاااانخليييهم تااانشوفوهم كايصدرو ف انس مع التسعود دالليل ينعس ويحطو العشا مع التمنية و يقولو لينا غاتعشاو حنا شبعااانين ... عااااد غايجيني انا داك الليلة نمرض .. غاااايجييني نتوحش عمي سفيان نعيييط ليه يقصر معانا ... ( قدس كاتموت بضحك ) غا يجيني انا نجمع واليديا ونكلس معاهم نعاود ليهم على أحلااامي و نعاود ليهم على المشاااكل لي عندي ... بررررربي لاااانعست تاااالفجر و بربي لاخويت الدااار .... غااااابلاااااتي ... البلانات كاايعرفو ليهم غاا هوما .... مكنعرفوش لييهم حنا ؟؟؟؟ تااحنا كانعرفو نديرو هاد البلاااانااات ..غييير ماشي يهو*د بحالهم ... جييبها للبيرو .... شغادير عندك فالبيرو ؟؟؟... غاضور بيك الكرسي.....
قدس : ههههههه دابا مالك مفقوص مالك ههههه نااااري ماقاداااش نسكت من الضحك ( شادة على كرشها ) ونااااري كرررشي ضراااتني ... هههه ...ياك دابا قلتي غاا مانبقاش بوحدي فالدار ؟ اوا هانا ماااابقيتش .. غااانمشي نبقى مع عمي هاااء ؟ فين المشكل هههههه
لوؤي : كااضحكي الموصيبة ؟؟ كاضحكي ؟؟؟ ... نتي خاصك نغبر عليييك نييييت .. نقطع على والديك الهضرة واحد الشهر ولا واحد العام ....عاد تولي تحسي شوية بحال بنادم ... ( مد يدو كمش ليها وجهها فقبضتو ) ضضضسرتك يااابنت الرووووكان .... ضسررررتك .....
قدس : ( كتحيد ليه يديه ضاحكة ) سسير يلاه ... غير سييير غبر نشوف هههه حسابتك انبكي عليك ولا ؟
لوؤي : ( هز كاسو دللقهوة جغم منو ) منقدرش نمشي دابا وانا مزال ما ضامنك .... تا نضمنك ...عاد غااانخرج منك هاد الضحك غير بلااااتي .....
قدس : ( شربات الما وسدات لقرعة ) وشنو هي هاد غانضمنك مافهمتش ؟ انا ارض ؟؟ انا فيزا د سويسرا ؟؟؟ شنو غاضمن فيا ؟ شنو زعما غاتزوجني ههههه ... نتا راك غالط اولد عمي .... انا لابغيت نخلي شي واحد .. غانخليه وصافي وااخا يكون كااااتب عليا عشرة دالوراق. ... والى بغيت نكون معاه .. غانكون معاه وصافي واخا يكون بعيد عليا بعشرة دالبحورا ....
لوؤي : ( تايدور سبابتو حدا عقلو قارن حجبانو ) شنو زعما تايقولك داك العقل راه يمكن تفكي مني شي نهار ؟ ( بدا تايضحك باستهزاء ) هههه ( شاف للطريق كايضحك ) شحااال غزااالة عندي هاد البنت ....
قدس : اوا اش غادير بيا لاكانت العيشة معايا حارة ؟
لوؤي : وعلاش غااتحرار ؟
قدس : غانحررها انا الى بغيت نخليك وشديتيني بزز داير فيها راك ضامني بشي ورقة ....مثلا !!!
لوؤي : دابا علاش كتقلبي نتي علاش ؟؟؟
قدس : انا غير جاوبتك على داك نضمنك وصااافي .. شوف نتا علاش كاتقلب بهاد الهضرة لي قلتي ، نضمنك ونمشي !!! باش تعرف بلي تاحد مكايتضمن ، خنا بشر ماشي أراضي ولا فيزااات ( تكات على الكوسان كتلعب بشعرها ) اما انا مااااقلت واالو ...
لوؤي : ( شاف فيها ) ونت فنضرك .. انا واحد لي غااايخليك شي نهار ؟؟؟؟؟
قدس : مغانقدرش نعرف ( شافت فيه ) بيّن ليا مع ليام ......
لوؤي : ( شاف قدامو ) اليد ماكاتشدش بوحدها اقدس .... الى كنتي راخية منها ماعندها ماتشد ... شدي فيها تانت كيفما هي شادة فيك و مغاطلقش منك .... الى بقيت كانعطي غير بوحدي غانتقاضا ....
قدس : ( شافت فيه ) على شنو كتتسنى مني اخر من غير هادشي ؟ نعطيك راسي مثلا !!!! .... هي لي عمرك غاتحلم بيها لا ناعس لا فايق ...
لوؤي : ( هد عليها بيديه ) رااااه غانصمكك ... زعما لابغيتو غاتحيديه ليا نتي ؟ ، كيما بستك وسط بيتك واخا عيتي تررنحي وتببعدي ودفعي ، فللخر تعلمتي تغمضي عينيك وتعيشي .... هاكاك غانعلمك تالفراش .. غايصعاب عليا ؟ ...
قدس : اوا جررب ... الى ماريبتش عليك الدار ...
لوؤي : وتااناا باغي تريبيها عليا ... وعاااد مغاانزيد نبغي والديك لي عروبية بحالي .. ( شاف فيها ) انا لامكنتش مسني داك الورقة معاك ماغانقربش ليك ، صبّرنا راسنا شوية بهاديك البوسة مرة مرة باش متشعلش فينا شي عافية اما حاااجة اخرى خصها شوية دالمعقول وشوية دالعز مغانبسلوش كولشي ..... هاكا حنا تزاديينا عروبيين شغل الحضارة مكااانعرفوش ليه وقداام فعقلنا و متخلفين ... نبوسو و مان*ويوش ....كيما كانسكرو ومكناكلوش الحلوف ....
قدس : اوا على هاد الحساااب اش كتسنى مني نعطيك ؟
لوؤي : كاين بزاف دالحوايج غانبغيهم منك ... مثلا بحال كيف وقع لينا دابا ..... انا مفقوص حييت مغاندوزش معاك الوقت ونتي عاجبك الحااال ؟ ... داك الرغبة بانك دوزي معايا شوية دالوقت ... هي لي بباغيها ... ماشي نحس براسي غير انا لي كانتقاتل هنا !.....
قدس : عادي انا ضحكاتني ردة فعلك ماشي الموقف ... وانا عارفة لامدوزتش معاك الوقت ليوم غندوزوه غدا وبعد غدا .... يعني نتا ولد عمي كبرنا ديما مع بعضياتنا كانتشاوفو ديماااا ....يعني عارفة لامشفتكش ليوم غاانشوفك غدا ....
لوؤي : علاش ... مكنشوفكش ديما حتى انا ؟؟؟ حتى انا كانشوفك ديمااا ... ولكن باش نكونو غير انا وياك ... مكنلقاهااااش ديما ....
قدس: ( شافت للزاج ) اوا الله يوووصلنا تاحنا لداك المقاام ....
لوؤي : لي تولي توحشتني تا نت ؟
قدس : لا ( كاتشوف فزاج ) لي نولي نعرف نقولها ليك تانا كيما كاتقولها نتا .... اما باش نكون كنتوحشك .... ( شافت فيه ) فتناها شوية اولد عمي ...
لوؤي : متعتارفيش ليا الالة. ... مااتقولي والو .. ولفت خضوريتك غا تهناي ... يكفي تووحشيني .... قوليها ولا ماتقوليهااش مايهمش ....
قدس : ( شافت فيه مصغرة عينها ) لوؤااااي ..
لوؤي : آنعام؟
قدس : واش كتشك فيا ؟ كتشك زعما تكون تتبغيني غا نتا ؟؟؟ ونا متلفة بيك الوقت وفاي لحظة غانخليك وباغي ضمني عاد دير مابغيتي زعما ؟ واش كاتشك بلي مكنبغيكش مثلا !!!!
لوؤي: صافا شوية لااا !!!! ..... كون كان بحال هاكا ... عمرني نكون معاك اصلا ..... بنتليك انا من ناس لي تايفرضو راسهم على شي واحد ؟؟؟؟ ... نهار بستك اول مرة ... راه كنت عارف بلي هادشي لي من جيهتك مكنحسش ييه بوحدي و الا راه عمرك تشوفيني تاكنقرب ليك ، الهضرة نهضرها معاك من البعيد بحال قسم و بيلسان و اية بنات عمي لخرين .. تانا ماشي عمى .. تانا راه كنشوف كيفاش كتشوفي فيا ... كنشوف روشيرش ديالك فسوشيال ميديا ، كنشوف داك الايك لي كتفلت ليك فتصاوري وكتحيدها دغيا ... علاش بوحدي فولاد عمامك كاملين لي مكانش عندك معايا ! فنفس الوقت غا تتوحلي تاتبان ليك غانمرتي انا ... وتا فللول واخا كنت عاارف هادشي كاامل عطيتيك الوقت تاااعترفتي على خاطرك ..... يعني هادشي انا عارفو مشاركينو بجوج .... اما انا راه مغانمشيش عند وحدة مباغانيش نفرض عليها راسي واخا تكون كتحط ليا للويز تمشي تقوود شكوووون تكون كاع !!.. بنت ليك مسالي قبي انا نضيع الوقت على شي بنت لقحبة كتلف بيا الليام ! ..... بقاي تفكري شوية بعقلك عاد هضري ....
قدس : اوا مالك ؟؟؟؟ مااالك !!!! علاش بعد مرات كتجيني بحالا كتشك فيا .. وماتاايقش فيا ....
لوؤي : مكنشكش فيك اقدس ... غير لي واااقع هنا .. هو انا علمتك فهاد العلاقة انا لي كنعطي كولشي ، الوقت ، ليزابيل ،الاهتمام .... ولي بااغي منك ....هو خاصك تعلمي تعطي شوية تا نتي باش نوازنوها بيناتنا .... هدا ماكان ....
قدس : اوا هادشي لي عطى الله والسووق ... مكنعرفش نقول كانموت عليك ، ولكن لاجابتها الوقت .....نموووت معاااك ... نتا لي بغيتي وحدة خضرة بحاالي ... ( علات كتافها بلا مبالاة ) استحملني ....
لوؤي : هههههه ( ضحك تاصغارو عينيه وجبدها لعندو نعسها على صدرو ) ههه اجي الخضرة اجي ههههه ( طل عليها براسو ) كاينة بعدا شي بگرة خضرا ؟
قدس : ( ضرباتو لصدرو ) لووووؤي .... البكرة هي...... ( حبساتها )
لؤي : لا غاا كمليها .. .صاحبتك انا ياك ؟ ...
قدس : خرجااااات بلا منحس والله ماااقصدت ....
لوؤي : لا غا كملييها باش نلقى السبة لي نخاصمكم نتي وياها هاد النهار .... وتكلسي معايا هاد العشية ....
قدس : والله ماااقصدت خالتو رتااااج .. خرجات من فمي وصافي
لؤوي : ( شدها من ذقنها معلي ليها راسها لعندو ) عارف الحب عارف ( تحنى على فمها لي طلعو لعندو ببوسة خفيفة مكمل الطريق )
مسافة طريق مونسين بعضياتهم غير بالهضرة تاوصلو لشركة عدنان لي كانت تابعة لمجموعة الروكان البحرية ... وكانت مختصة فهياكل السفن وقطعهم واجزائهم .... نزلو لباركينغ تحت الارض وطلعو هو وياها فالسانسور ضاحكين تاتخل بيهم غاديين فالكولوار ... وهي بعدات منو وطلقات من يديه قدام الموظفين كايحيوهم غير براسهم تاوصلو لمكتب دعدنان لي كان فآخر الردهة ...
دق لوري جوج دقات وحل لباب طل عليه كان جالس فالبيرو محيد الفيست دياو معلقة فالعلاقة حداه و لابس غير شوميز راخف ليها الصداايف والجيلي دالكوستار .... لابس نضاضر طبيين منزلهم شوية على نيفو كايقرا بيهم الوراق لي قدامو .... وعلا راسو فيهم ملي تحلات لباب ... معلي حاحبو فلوؤي لي شافو بوحدو ....
عدنان : فين بنت عمك؟
لوؤي : ( جبدها من موراه داخلين ) هااااهي الواليد هاااهي مغاناااكلوهاش ( سد لباب ) هااهي جبناها ليك كيييف طلبتيها .... تخلص بالشيك ولا لاكارط !!
قدس : ههههه كلوڤو نتا ههه ، رادني كولية .... عمو عدناااان ( مشات عندو عنقاااتو من لور باستو فحنكو ) توووحشتك و تووحشت البيرو ديالك .....
عدنان : ( شاد فيديها ليمعنقاه بيها ) شحااال ماجيتي تااكلي ليا الشكلاط لي كايجيب الكليان !! ...وليت غاكانلوحو .....
قدس : هههه بابا كان قاطعو عليينا (مشات كلسات فالكرسي لي مقابل مع البيرو وكلس لوؤي تاهو كايلعب بواحد ديكور على لبيرو) كنت كااانلقاه عندك هنا كااندير مااابغيت ههههه
عدنان : باقي عاقل نهار كليتي داك البواطة ديال الشكلاط لي فيها لالكول كان جابها داك الميريكاني لي قاليك بوسيني وصرفقتيه.... تعقلي عليه ؟( قدس كتحرك راسها بآه كاااضحك ) .. سيمانة ونت مرفوعة مكتمشيش للمدرسة ..... ونا مابغيتش نقول لباك راه كلات الشكلاط فيه الفوطكا ...
لوؤي : هههههه واااايلي !
عدنان : كااانت صغييييرة ... شي تمن سنين ولا تسع سنين لي كانت عندها ... ( حط الستيلو وربع يديه على البيرو كاايشوف فيهم ) كانو كايسافرو اسد ولامار بزاف مع جود ملي كان مريض وكانت هي كانجيبها تكلس معايا هنا باش متنوضش الحرب هي ووسيم كنفرقوهم شوية كانو بحال القط والفار.... اما قسم مسكينة كانت غالبيرو ديالها وحفاظتها وكتوباتها ... هادي كان كايعجبها تجي لعندي لبيرو تكلس معايا هنا نخرج معاها تمارين .... كاع الشكلاط لي كااايجيبو ليا كانت كاتخلي فيه غير لومبالاج .... كنمشي لاجتماع كنجي كانلقا فمها ودفاترها كاااع كوحل بشكلاااط .... نجي نزعف عليها تبدا تشوف فيا بشي عييينين كايتمسكنو كتهد ليا ركاااابي ....
لوؤي كايشوف فيها مبتسم وفعينيه حب كبير وهي عينيها لمعو ملي فكرها فطفولتها ....
قدس : هههه والله الى باقا عاقلة اعمي بحال لبارح ... كان هاد البيرو ديالك بحال السعادة عندي انا هههه كان كايبغي يديني شوية عمي سفيان مكنبغيش خيت مكانش عندو الشكلاط هههه
عدنان : عمك سفيان كانت كاتمشي عندو قسم كان كايعطيها الخاطر فالتمارين ويشرح ليها ، ونت تااااابعة الشووكولا ( حل واحد المجر وجبد واحد البواطة صغيرة ) هااانتي الالة .. تلتيام وهي هنا محطوطة .... بحالا كان كاتسناااك ......
قدس : ( تحلو عينيها ملي شافتها وشداتها عليه بزربة) كوون حسااابتي هاكا كون جييييت شحال هاااادي ههههه ( حلاتها ) يااااي بصووص دالفريييززز ؟؟؟ وشحال تووحشت الشكلاط الحلو قهروني بداك المسوس داير كي الترااااب ....
لوؤي : ( حيدهاا ليها هز وحدة كايشمها ) بلااتي نشوف تمشي تكون فيها شي فوطكا تاني تبوقي لينا هنا
عدنان : شوووفليك ترابي شوف !!!!! ... مامشاش لبواط يقراها ، لا هو غير يشم يعرف ... تبارك الله على البارمان ديالي .....
قدس : ( حيداتها ليه من يديه ) ماااااشي سوووقك ... غااتاكلها نتا ؟ ياااك انا .... واااطلق لهنا ... دير فيها ماادرتي فااشكلاط لي جابو ليا قبيلة للبيت ( لوؤي حمّر فيها )
عدنان : اينا شكلاط ؟
لوؤي : ( شاف فيها واحل ) اينا شكلاط ؟؟
قدس : ( سرطات ريقها ملي سرات معاها ) اا ؟ شكلاط ... اينا شكلاط ؟؟؟؟ ا .. ااااه داك ... داك لي هزيت فالصاك معايا قبيلة ...
عدنان : اممم .... ( شاف فلوؤي ) ماعندك ماتقضي اولدي؟
لوؤي : لاااا مساااالي.... ( رجع بضهرو لور على الكرسي الجلدي ) انا هنا ليووم ..... عندك شي حااجة نديرها ليك ؟
عدنان : عندي اه اولدي موووجود مايدار ... بصح ماشي هنا .. سير للمعمل راه عيطو ليا قالك دايرين اضراب شي وحدين سير هضر معاهم و شوف المطالب ديالهم وجيبها ليا ....
لوؤي : نشوف المطااالب انا هو الوهبي ؟!!! سيير نتا للمعمل شوفهم و أرا نقضي ليك اش كااادير هنا ( شاف للوراق لي حداه ) ياك غاكتسني هادشي ؟ ... ارا نسنيهم ليك انا .... انحاول نسني بحالك .... ( كايشوف فالتوقيع ديالو ) ياك كتكتب غا عدنان وكاااضرب عليها فللخر ... ساهلة ....
عدنان : ( جر ليه دوك الوراق ) رررخي من هنا ...يااا سييير للمعمل دير اش قلت ليك ...يا سير جيب خوك من المدرسة دوز بدل ليه حوايجو ديه للملعب ماماك خدامة نهار كامل ( شاف لسعتو ) سير بقات ليه ساعة ونص ....
لوؤي : على فوقاش دخل يقرا انس ؟؟؟؟
عدنان : دخل نهار التنين .... سييير نفع فشي حاااااجة نوووض .....
لوؤي : هاااهو نااايض ..( شد على يدين الكرسي وناض منهد كايتحسر على نهارو لي استسلم لضياعو ) دابا نسيفط ليك اش بغاو دوك الخداما ديالك غا فواتساب مافيا مايجي تالهنا .....
عدنان : المطااالب اولدي كانكتبووها فضوووسي ... و كنوقعوها ...وونديرو عليها اجتماع ... وناقشوها ....مكانسيفطوهاش فالواتساب ....مسيفط ليا التقضية ؟؟ ....
لوؤي : ( غادي جهة لباب ) ملي نسيفطها ليك فواتساب كتبها نتا فضوسي .... مساااالي انا ؟؟
عدنان : لا انا لي مساااالي اولدي ااانا ....
لوؤي : ( حل لباب كايضحك وضار كايشوف فيه طانز عليه ) انسيفطهم ليك ففوكال ... ولا ندير ليهم فيديو يهضرو معاك ديييريكت مالنا علي تضياع الوراق والمداد ....
عدنان : ههههه سير سيير الله يعفو عليك سير .. راه ماشي غير القلب لي غانمرض بيه معااك .. مزال غايبان شي مرض اخر مكانعرفوهش ....
لوؤي : ( واقف فلباب كايضحك ) صافى دابا نكتبهوم ليك مستفين ونسيفط ليك معاهم ايموجي داير هاكا ( ضحك ليه تاتسدو عينيه مبين سنانو وقدس كضحك ) ههههه ( شاف لسعتو ) قريبة الربعة دالعشية هادي شرب دواك .... تهلاو
غمز لقدس ملي تحنى عدنان للمجر ومشا وهي كضحك و عدنان كايضور فراسو وجبد دواه شربو باش ماينساه .... وطوا ضوسي وشاف فقدس ....
عدنان : الكتكوتة .... تغديتي ولا مزال !!!!
قدس : تغدييت ولكن نعاااود معاك اعمي مااعنديش مشكل هههه
عدنان : ههههه يالاه و ماتقوليش لباباك باش غديتك ...
قدس : متخاااافش ( غادة جهة الفيست ديالو حيداتها من العلاقة ) والله ماااانقوليه شي حاجة. ... ( تعلات كتلبسها ليه ) الشوا اعمي ؟؟؟؟ ناكلو الشوا ؟؟؟؟؟
عدنان : الكبدة والكفتة .....
قدس : ( خشات يديها فدرعانو فرحاانة ) ووو يدير لييينا الحاااار.... داك لي مفرتت كنرشوه شنو سميتو؟
عدنان : السودانية ( وقف كايشوف فيها ) الى سولاتك خالتك رتاج شنو تغديتو شنو تقولي ليهاا ؟؟
قدس : غاانقول ليها كلينا الخضرة مبخرة و الحوت...
عدنان : لي مااافيهش الدهنيات ....
قدس : صاافي كون هاني ، كليناه مشوي بالزعتر ، عنداك تنسى اعمي و نصدقو كادبين كدبات ماشي بحال بحال وتعيق بينا .... ( غادة شادة فدراعو غادين جهة لباب ) ونتا قول لبابا ماااكلاااااتش كاع عيت فيها .....
عدنان : زيدي ابنتي زيدي .... موت وحدة لي كاينة زيدي ... هادو بغاو يقتلونا بالجوع ....
فالباطو
الساعة 21:30 ...
طالعة قسم فدروج دللباطو ، هازة قبعتها فيديها كلها مسخسخة مع الجمارك د مدينة طريفة لي وصلات ليها هادي ساعة .... تاوصلات للكلوار دالاجنحة .. غادا وكتلوي فعنقها من العيا وهي تلقى صفاء جاية باتجاهها كتعضر فالكيت وقطعات .. شداات عليها لي ضوسي لي جابت من الجمارك باش تعطيهم لاسد يشوفهم ....
صفاء : صافي لي سو كابتن راه وقعو ومشاو ... غايركبو معاك غدا وحدين اخرين ....طبلة دالعشا يالاه هضرت معاهم حيت موسيو اسد ماعلمنيش بكري .. حاولت نسق الموني مع الشيف وخليتو عشاء بحري كايناسب الباطو .....
قسم : ( كتلوي فعنقها من العيا ) رااااسي غادي يتفركع اصفاااء ماحاملة نشوف تاواحد منعرفت منيين خرجو ليا هادو تاني ....
صفاء : ماعندك ماديري هاادي هي الديبلوماسية امادموزيل..... باباك راه وصااا وعاود باش متتهربيش من هاد العشا نتي عارفاه شحال كايركز على هاد الاومور الديبلوماسية مع الشركاء ديالو .... خصك تعلمي من باباك تكوني واجدة لاي حاحة فأي مورال نتي فيه ..... انا غانمشي دابا نفاكسي ليه هاد الوراق تاني ... ونتي غاتقادي راسك ... لي كوستيم ديالكم ربع ساعة و يكونو عندكم ....
قسم : مزال مامتأكداش منو واش يبغي يكون معايا ...ولكن غانحاول .... راه فالبيت ؟
صفاء : اه ماخرجش تقريبا هاد العشية بزاف ....
قسم : داكوغ ...فاش يطلعو هادوك للباطو علميني ...
صفاء : داكوغ مادموزيل ... الماسوز راه كااتسناك والكوافوز غاتجي دابا شوية ....
خلاتها وزادت بعياء ... ومورالها طااايح ليها بقوة العيا كتسنى غي فوقاش توصل للمغرب ترتاح ...
وصلات حدا الجناح ديالو ...وتكات عليه شحال كتحاول ترتاح وتجدد طاقتها حيت باقا كاتسناها ليلة طويلة ... مورالها فالصفر. .. خصوصا انها باقا ماتعداتش مرضو ... العيا دالخدمة والعيا دالليل لي مكتنعسوش مزيااان ... مخنوقة وماحاملة تشوف تاواحد ومع ذالك مكانتها كبكر الاسماعيلي كتلزم عليها تكون ديبلوماسية و تكون ضاحكة فوجه الجميع وتخبي مشاكلها الشخصية ومايبانوش على وجهها... وهادشي باش تجيب طاقتو كايحتاج بزااااف دالقوة لي هي حاليا ماعندهاش ....
خدات نفس ودقاات لباب وقفات كتسناه .. تاحل عليها ... علات عينيها فيه ...عيااانيين وميتة بالنعاس ... وهو تبسم ليها وحل لباب كامل ...دخلات ويدها من ورا عنقها كاتماصي فيه ... وهو شاف عيائها جبدها لعندو وتخشات فصدرو معنقااااه بعياااء وهو زيرها عندو كايماصي على ظهرها بهدوء....
اصيل : هههه اش داااك ابنتي لشي بحر لش داااك ههههه
قسم : راه اناااا صافي ... تقااااضيت ... عيييت
اصيل : ههه ماعليش ماعليش مابقااش بزاااف .. ساعة دالمكانة غدا وهاانتي فالمغرب وسيري رتاحي ....
قسم : اصيل ....( علات راسها فيه ) فكرت فشي حاجات قبيلة ...
اصيل : اهاه !
قسم : شنو كااادير بعدا ( رخات منو كاتشوف مع لبيت ) نكون كنشغلك ولا شي حاجة !!!
اصيل : ههه منيتك ؟ اش غاتشغليني ونا غير كاالس ... ( شار لتلفزة لي كان طالق فيها فيلم ومنقص ضو دلجناح ) كنت كتتفرج نضيع الوقت بينما تجي ( مشا كلس على السرير وهي كلسات حداه كتعوج فعنقها عيانة )
قسم : دابا انا عندي هاد الطراجي هو لي غايعطيوني عليه الشارات ديالي .... صافي ملي غانوصل لباطو بلا حتى مشكل غدا لطنجة-ميد ان شاءالله .. لامارين غاتكمل ليا وراقي وتسيفط ليا الشارات دياولي ( شارت لكتفها ) لي كنديرو هنا ....منبعد كانولي كابتن اوفيسيال ... يعني عندي الحق نرتاح شحال مابغيت عاد نبدا الخدمة باش نبوانتي اول طراجي ديالي ونا كابتن اوفيسيال ، وداك الساااعة غانكون اوفيسيالمون حققت حلم بابا لي شافو فياااا منهار تزاديت ووليت قبطااانة بشارات ديالي بخمسة لي كايعنيو خمس عسكريات ... بابا كان قال ليا مور هاد طراجي لي درت دابا باش ختمت عسكريتي وقرايتي كلها ، يعني صافي درت fin d'études... ناخد كونجي نرتاح عاااد نبدا الخدمة ..... واخا منهار عقلت على راسي عمرني عرفت شنو هو الكونجي ههههه كنقنط فالدار ....
اصيل : اهاه !؟
قسم : فكرت باش نرتاح غير واحد خمسيام ولا ربعيام علاما يقاد ليا بابا فواياج جديد نكون فيه انا الكابتن ...وناخد طراجي من طريفة لمارساي باش نبوانتيه وندير فريبيرطوار ديالي اول فواياج ونا قبطانة ماشي غير سو كابتن سطاجيرة .... وماشي غير امتحان بحال هدا لي درت دابا .... وندخل اول صااالير ديالي نحس بيه دياااالي هههه خدمت فيه ديال بصح ..... عااااد نمشي نرتاح
اصيل : اهاه ؟
قسم : منبعد صافي غادي نپوزي ... ناخد پوووز من لامارين ومنرجعش ... نركز على حوايج اخرى فحياتي ... مهم يكون بالي هاني ونا حققت حلم بابا .. وخديت هاداك لوبجيكتيف ديال لامارين ... مابغيتش نستقل فخطرة خيت ماسخيتش بلامارين ....بغيت نرجع مرة مرة ندير شي فواياج ملي نتوحش البخر مدام الباطو ديالي والشركة ديال باباا ، مغايجري عليا حد من هاد الخطوط البحرية كقبطانة كتخدم مرة فالعام ههههههه .... ولكن بغيت ناخد بوز ....يعني منطلقش فخطرة من هاد الخدمة ..... فنفس الوقت منخدمهاش برسمية ..... يعني غير بالگانة ونركز على خوايج خرين فحياتي ونشوف الخدمة لي نرتاح فيها من غير لامارين ... خيت بصح مامرتاحاش بزاف .....
اصيل : شوفي اقسم لي يريحك انا منقدر نقوليك والو ..... هاديك قراية تعبتي عليها و والعسكرية صعيبة دوزتيها وخدمة صعيبة ... قادر نشوفها غير فهاد سيمانة لي دوزتها معاك هنا .... انا مغانقدر نقوليك والو حيت باباك هو لي خصو يحصد اش زرع فيك ماشي انا .... انا براسي دابا ملي رجعات ختي غااتقرا و غاضرب تمارة وتولي شي نهار طبيبة مغانبغيش يجي شي واحد يقولها خرجي من الخدمة !!! .... مداااام صاااافي ضربتي تمارة ... ادن حصدي مجهودك .... ولكن تاني شوفي رااحتك فين هي .. الى مكتلقايهاش فلامارين نقلبو عليها فحاجة اخرى ....
قسم : صراحة ااصيل ماباغا نقلب على والو دابا .. انا باغا نقلب غا على راسي فين موضرة هاد الساعه .. بغيت نتلاهى شوية مع راسي .. غتجيك عجب ولكن هههه ( شافت فيه ) توووحشتني هههه ... والله .. توحشت نكلس بووحدي ... نقرا كتاب ... نرسم ... نسافر .... نعييش شوووية ... منهار خديت الباك وانا مكنرتاحش ... مكنعرفش شنو هي الراحة ... داكشي باش بغيت ناخد اخر طراجي ونجمع تمارة وحدة ... ومنبعد نوقف كاااع الاعمال لا فالجمعيات لا فلامارين لا مع المجلات ... بغيت نغبر شوية نتلاهى مع حياتي .... ولا نقدرو نقولو ... مع حيااااتنا انا وياااك ...
اصيل : ( شد ليها يديها ) ديري لي يريحك .. فكاع القرارات لي غاتاخدي انا معاااك .... واخا صعيبة عليا تكوني كابيطين كتغبري ديما تلتيام فسيمانة .. ولكن مغانقدش نجي نخرجك من شي حاجة ضربتي عليها تمارة و ضربو والديك تاهوما تمارة معاك .. ماعنديش داك الحق ....
قسم : ولكن انا عندي .... تانا عارفة بلي هادشي صعيب .. داكشي علاش العلاقة خاصها شوية دالتضحيات وشوية دالتنازلات شوية منك شوية مني باش نقدو نعيشو مع بعضياتنا ونكونو فرحانين بجوج ماشي غير واحد فينا .... مدام عارفة خدمتي غاااتبعدنا اذن ماعندير بيها .. مغانموتوش بالجوع عطى الله الخدامي لوخرين ... اما تمارة لي ضربت انا حصدت بها رضا بابا بااااركة عليا .... ( تنهدات ) موهيم ماااعلينا دابا .... نهضرو فهادشي منبعد .....عندي ليك شي حاجة اخرى وعااااارفة مغاتعجبكش ...
اصيل : شنو هي ؟
قسم : ... بابا عيط ... واحد لافامي مغربية كاتعيش فاسبانيا عندها معانا شراكة فهاد الخطوط ... ماشي شييي شراااكة كبيرة .... ولكن عندهم شوية دالاسهم تاهوما عندنا .... كنعرفوهم قدام شوية .. تقريبا ولاو معانا ملي كانت عندي انا واحد وعشرين عام .... ومسافرين دابا للمغرب مجموعين وعارفين بلي هدا اخر طراجي ديالي فالقراية ...بغاو يمشيو معايا فيه للمغرب .. وقالو لبابا بلي بغاوني نتعشى معاهم هاد الليلة باش يباركو ليا ولا منعرفت شنو ... ( اصيل علا حاجبو ) عرفتي راني مسخسخة ومااااحاملاش .. مافيا مانقصر والا نتعشى ولكن ماااعندي مااندير ... بغا بابا يتهرب وقاليهم بلي عندها ضيف ديجا ماتقدرش تخليه ... قالو ليه يجيو بجوج وبابا مالقا مايقول وعيط عليا باش نتعشاو معاهم وانا وياك ...
اصيل : ( علا ححبانو ) انا وياك ؟؟؟ فين كنعرفهم انا باش نتعشى معاهم ؟
قسم : اصيل ( شدات فيديه ) واااعافاااك ... ماتردهاش فوجهي ...حيت مااحملتش راسي نكلس معاهم بوحدي ومااعنديش معاهم بزاااف .. لاكنتي نتا معايا غاتحلا ليا شوية الكلسة ... كاااااارهة هاد العشا والله .. بابا قال ليا خليه على خااطرو على مابغاش ولكن انا بغيييتك تكون معايا .....
اصيل : شوية فعقلك لا ؟؟؟ .... فين كنعرفهم نكلس معاهم !!!! كاطلبي مني شي حوايج مسستحيييلين .... نتي عارفاني ماشي شي واحد اجتماعي وباغا تخشيني وسط قوم مكنعرفهمش ؟
قسم : نتا ضيف ديالي ..... غاتكلس معايا انا هووووما لي حاو يتعشاو معانا ماشي حنا .. هوما لي عرضو راسهم .... عافاك اصيل ماتخلينيش بوحدي معااااهم والله تاااا عكزااانة ...راني محاااملااااش راااسي .... عاافااااك . .
اصيل : قسم هنييينا ! سيري شوفي هاد ضيافك شوية ورجعي فحالك ... ولا مااتمشيش كاع يمشييو يقودو ... راك عيانة سيري تنعسي ترتاحي .... اما باش تقولي ليا نمشي معاك انا .....مغادي عند حد اقسم ....
قسم : ( تنهدات ) فففففف ... والله ماحاملة نمشي ....كااان عندي امل فيك مااتخلينيش بوووحدي ... ساعة نتا ديما رايك قاااسح ... ( وقفات كاتمشي وتجي ) اجاااب مايدوز ليا هاد العشااا تاااني ....
اصيل : شحال بيهم كاع ؟
قسم : قال بابا كاملين .. هادوك ملي كايبغيو يتحركو كايمشيو كاملين .. كاين شريك بابا ومراتو ... ووواحد ولدو ... وبنتو وراجلها .. وختو واقلة وراجلها .. ختو هي المنادجر ديالو
اصيل : وقدااش هاد ولدو !
قسم : ( قلبات شفتها ) ماعرفتش .. يكون قدك هاكا ولا كتر شوية ....
اصيل : ( علا حاجبو ) وماتعرفيش تقولي ليهم راك عيانة غاتمشي تنعسي ! .. كايتسالك شي واحد شي حاجة !
قسم : مكايسالني حد .... ولكن هادي هي خدمتنا ماعندنا مانديرو .. مانبغيش تاني نخسر لبابا معاهم العلاقة وهوما شركة ديالنا .... ضروري من داك البروتوكول تاني ماعندي مااندير .... هوما لي دارو عراضة قالك يباركو ليا منقدرش نرفضها .. دابا ملي قاليهم بابا عندها ضيف .. غايفرعو ليا راسي بفيين هو .... وبشكوون هو ....
اصيل : فففففف ( كايد شعرو لور )
قسم : صااافي بلاش ماقلت ليك والو ... غانزل عندهم ونحاول نتعامل باش ماعطى الله نضحك شوية معاهم ونطلع ....
يلاه غايجاوبها تدقات لباب وحلات قسم ....كانت صفاء هازة فيديها جوج دليكوستيم فليساشي ديالهم
صفاء : مادموزيل ( دخلات لاشومبر حطاتهم على السرير ) لي كوستيم ديالكم صافي هاهوما وصلو .... وتاضيافك امادموزيل راهم للتحت .... بصح يلاه جا موسيو رشيد وولدو كاياخدو لي شومبر .... لبقية مزال على برا فالجمارك ...
قسم : جاو كاااملين تاني !
صفاء : كامليييين امادموزيل
هوما كايهضرو و اصيل كايشووف لداكشي لي على السرير
اصيل : اش هاادشي !
صفاء : لي كوستيم ديالكم اموسيو
قسم : حسابتني غااتبغي تمشي معايا .. داكشي علاش قلت ليهم يوجدو ليك كوستار حتى نتا .....
اصيل : ( شاف فيها ) وعلاش ؟؟؟؟؟ شكوون قالك تجيبي لياااا هاادشي !!!!!
صفاء نزلات راسها واستئدنات منهم لي شافتو بحالا زعف ومشات سدات لباب قسم و ضارت عندو ....
قسم : لا ماشي بحال هاكا .... ولكن عارفاك مادايرش عليها .... انا براسي ماجبتش معايا حوايج رسميين ... داكشي علاش طلبت حوايج جديد يكونو رسميين ليا وليك ... حيت مكناش معولين ونتا مغاتكونش جبتي معاك كوستار !!!!
اصيل : ( جاتو الضحكة بالفقصة ) علاش غاانجيب كوستار ؟ وعلاش غااالبس كوستار ؟ باش نتعشى !!!
قسم : وااراه كااتعرف هادو كيداااايرين يعني نت(قاطعها )
اصيل : كيدااايرين هوووما انا مكااايهمنييش !!! ... وانا مكنشبهش ليهم وعمرني غانشبه ليهم ... و ماتحاوليش تشبهيني ليهم .....الى هوما كايلبسو كوستار .... انا لا ... ( جبّد تيشورت ديالو لي لابس) انا هادو هوما حوايجي .... جيت معاك لهاد لباطو مكاايعنيش صافي اصيل ولد الحومة غايلبس ليك هنا كوستار بحال هداااا ويبدل الجلدة !!!!! انا مكنتبدلش ... انا اصيل الصيااااد لي كااتعرفي .. مكنبدلش حواايجي على قبل شي وااااحد ......
قسم : دابا علاش خديتيها بهاد الحسااااسية كاملة ! .. انا ماقاصداش هادشي ...
اصيل : ( شاف للساشي الطويل ديالها لي كان كايبين شنو فيه معلق من داخل .... وهز طوپ كان بسماااطي كحل كايتلبس تحت الفيست كايشوف فيه هازو من سماطيه ) غااتلبسي هاااادشي نت ؟؟؟؟؟
قسم : وشنو غالبس ؟ راه فوق مننو الفيست ماغالبسوش بوحدو ....
اصيل : وشنو غااتغطي ليك هاد الفيست لاكان الصدر محلول كاع قد هاكا ؟
قسم : ( عيااانة ماقاداش تهضر ونتراتها من يديه ) اصيل مااافيا مانهضر ..... انا ديييما كالبس هاكا ماشي اول مرة ومولفة هادشي .... ( هزات الساشي ديالها ) مابغيتيش تجي معايا مااتجيش ... ولكن مادخلش ليااا فحوايجي مرة اخرى ... كيما نتا مااباغيش تشبهنااا .... حتى انا راه مغااانشبه لحد ... ومغاانلبسش جلابة نمشي نتعشى بها فعشاء رسمي .....
هزات حوايجها وخلاتو ...زادت معصبة حلات الباب وخرجات بزربة لجناحها ... وهو بقى كايضور ويمشي ويجي بعصبية مايحك ورا عنقوو فللخر هز داك الكوستار لي فالكوفر ديالو وزف بيه بعصبية جهة لباااب كااينهج .....
فيلا عدنان ...
مجموعين على طبلة العشا ... عدنان فالرأس ... ورتاج وانس فاليمين ديالو ... وقدس على يسارو كايتعشاو بهدوء وسط الضحك و المعاودة .... بعد ماكانو قطعو مع لامار واسد لي وصلو لاوطيل واستقرو ...
عدنان : قسم ماغادير والو فالتخرج ديالها ؟
قدس : مانضنش اعمي ، شحال هادي قبل ماتمشي للعسكرية قالتها ليها ماما و مابغات تاحاجة .. هي دوك عيد ميلادات دياولها وكاديرهم بزز عاساك حفلة دالتخرج ههه .. مغاتبغي دير والو ...
رتاج : البروتوكل غايطلبها منها ...
قدس : نو .. حيت ديجا ملي سالات القراية لولا هادي تلت سنين قبل ماتبدا اول فواياج ديالها وهي سو كابتن كانت دارت داك مؤتمر وداك الحفيلة الصغيرة صافي راه كافية ديكلاري بيها تخرجها وديبلومها ... مغايطلبو منها والو دابا ....
رتاج : اوا حسن ليها ...كاتجمع غير العين ..
قدس : ديجا اصلا دابا العائلة كلها مشات ، مكايناش الحلاوة بلا بيهم وبلا ولاد عمي يونس ... ماما قالت ليا لبارح تاجدة غاتمشي هاد سيمانة مع عمي وخالتو اريج ...
رتاج : عيييينا فيها .. ماخليت مادرت معاها تكلس معانا غا هاد العام مابغاتش ... هي فيها الهم ديال مروان .. ماحدو مزال ماتزوجش مغاترتاحش ...
عدنان : اوا هاهي مشات عندو كاع اش غادير ليه ؟؟؟ تجيب ليه الميريكانيات يختار !
قدس : واش خالي مروان مشا صافي ؟ ياك كان ففرانسا وقال غايدوز عندنا عاد غايمشي !
رتاج : مشااا .. قاليك الالة بدات ليه الخدمة فلافاك وعيطو ليه ، واخا صراحة بانليا غا كايتهرب ...
قدس : فخبارك اخالتو انا مزال مافاهمة والو .. !! تاحد مكيشرح ليا نيشان مالو معانا مؤخرا ... شنو واقع ؟ كنسمع غاهضرة منهنا وهضرة ملهيه .. مافاهمة والو ...
عدنان : ماعندك ماتعرفي ابنتي... تعشااي و خلي كل واحد راه گاد بشغالو ....
رتاج : داااكشي لي كاين .. دابا مابقى حد يحكم فلاخر ، ماحكمنا تاولادنا ....
انس : ماما ... فوقاش غاتبدلو ليا داك الملعب .... بغيت نمشي لفين كاينة قدس تماك فين كاين معاذ صااحبي
قدس : نهار السبت عندي تدريبات تما ... غاندوز موراك نديك معايا نقيدك انا ( شافت فعدنان ورتاج ) غير خليكم الى مشغولين .. نديه معايا انا
انس : صااافي نمشي معاااك نتي .. عنداااك تنسااي والله مغااانهضر معاااك مزاااال
قدس : ( مدات يدها جبداتليه نيفو ) وااانا نقد على خصااامك ونتا خديتي السمطة الكحلة ماااانقدش عليييك ههههه
انس : هههههه داك نهار كانت عندنا كومبا وجابو معايا واحد الولد غاااا سطت عليه طاااح باااقي ماقستوووش
رتاج : اووووو .. مااااقسيتهش كااع وطاح
انس : والله مااقستو تعكل غااا فطاپي غا بوحدو وطاح بقى كوولشي كايضحك عليه هههههه قااالك يضارب معايا ههه والله تااااانقطعو بحااال الفريييت
رتاج : يلاه زيييدك ... هاواحك المسعور زيدو فالحساب ... مكااينش شي اسماعيلي زعما مساااالم... كايهضرو غابتجنديخ ....
انس : والله ويقرب ليا شي واااحد تااا يرعف .... يخسااابتك بااقي صغييير
قدس : ههههه لا لا صاافي كبرتي ونتا قربتي تفوتني فالطول وصغير ؟؟ ... صافي نهار السبت نديك معايا ونسجلك تافلباسكيط وتزيد تطواااال
رتاج : مع هوما تبارك الله دمهم قصير ... ماااخصو غالباسكيط باش يصيد ليا الحمام بيديه .....
عدنان : غاااااديري خيييير تفكينا منو ... كل نهار كانقول نديه وكنسى .. لوؤي خلاااص .. تبغيه للدوا يفكك ...مكاينش ( شاف فرتاج ) فييين مشى هاد سيمانة مقالش ليك ؟!
رتاج : ههه منيتك ؟ عاارفاه مغايقولش ليا درت خير فراسي وماسولتوش كاع .....
عدنان : ( شاف فقدس ) نتوما صغار قراب فالعقل ، هضري معاه شوفيه فين كايمشي ( قدس كاترمش بعينيها ) جبدي منو شي معلومة .... داك الولد شي نهااار غايسطيني .... كنتفكرو بليل مسافر كايطير عليا النعاس ...
قدس : ( توترات ) ا . علاش ؟ عادي تاحنا جود ديما مسافر و مكنعرفوش فين .. يم .... يمكن كايتسارا مع صحابو وصافي ...
عدنان : لا لا ... لوؤي ماشي بحال جود ..جود فاش كايمشي لشي بلاصة على الاقل كنعرفوه فين هو واش كايدير .. لاصيد غا شي حوتة من الواد كايسيفطها لينا ... كانصونيو كايجاوب ... فينك ... هانا فيين ، لوؤي لا .. كايطفي تيليفون هو كاع وتايقولك كانرتاح .. مناااش كايرتاح مافهمتش ( حط المعلقة ديالو ) شي نهااار غانتسطى ومكنبغيش نزير عليه بزاف ... كنهضر مع اسد تايقول ليا راه كبير بعقلو عارف اش كايدير ... راه واخا يدير خمسين عااام راه ولدي ...راه منحقي نعرف اش كايدير ... لوؤي ماعندوش صحااب ... ماشي شي واحد لي طااايش بزاف .. عارف ماعندوش مع الحياة دالشباب وداكشي لي مامزيانش... ولكن فيييين كايمشي ...؟؟؟ هادشي لي غادي يسطيني شي نهار .....
رتاج : ودابا خلي لبنت تتعشى علاش جبدتي هاد الهم تاني ...
عدنان : بنت خووويا .. وقريبة ليه .. تقدر هي تعرف ... واش خدام شي خدمة اخرى مخبيها عليا ( قدس علات حجبانها ) واش عندو شي دار فشي قنت كايمشي ليها مخبيها عليا ... بزاااف دالحوايج مكايتفهموش ليا فيه .. كون كنت عاارفو غا من نوع لي خاارج الطريق غانقول هدا تابع ليا السهرات وحياة الليل ...ولكن هو لامكانش مع جود وسلطان راه فدارهم ... هاد السفر ديالو لي عاااد بااان مؤخرا ....هو الحاجة الوحيدة لي مابغاتش تفهم ليا انا.....
قدس : انا ماعرفتش اعمي مكايقول ليا والو ... و ... ومكنضنش يكون كايدير شي حاجة خايبة .... نتا غير تيق فيه و ان شاء الله يكون غير الخير ...
رتاج : اميييين ... انا سوقو صافي خرجتو ... خلاها اسد راه بعقلو دابا .. اما الخدمة شوية بشوية غانخشيه فيها غير بالمهل و بالحيلة ... اما بطريقة ديالك نتا مايبغيش .... بلاتي نحلو داك الشركة ....هو لي غايشدها مع عاليا ...
قدس: ( شافت فيها ) عاليا ؟ خت جنان لا ؟؟
رتاج: هي .. اريج غاتوكلها هي تنوب عليها هنا .... وانا وحياة غاينوب علينا لوؤي .... غايشدوها بجوج ....
قدس : ( حسات بحلقها نشف وبحالا ماعجبهاش الحال ولكن مابغاتش تبين ) مم .. مزيان ... الله يوفق .. (نزلات راسها على عشاها ) ...
انس : ( ضار براسو للزاج فاش سمع صوت جيب دلؤي داخلة ) هاااا لوؤي جا ( رجع بالكرسي لور ) قلت ليييكم نتسناوه للعشا راه غااايجي ونتوما مزروووبين هاااهو غايتعشى بووووحدو دابا ..... ( نزل من كرسي ماشي عندو )
عدنان : اااجي كمل عشااااك ... فييين غاادي ....
رتاج : خليه ....راه ماشافوش لبارح فاش جا .. توحشو ...
عدنان : على ماشي هو لي جابو من المدرسة؟
رتاج : جابتو ايمان .. هو تعطل فالمعمل مع الخدامة ديالك وعيط ليها ( ضارت عند المدبرة ديالهم لي واقفة بعيد عليهم) جيبي معاك طبسيل للوؤي عافاك ....
يتبع..
التعليقات
لا توجد تعليقات بعد، كن أول من يعلق.