أشبال الأسود الجزء الثاني

اليوم التالي ...

قصر الاسماعيلي ....

واقفة قسم قدام المرايات الطوال لي دخلو ليها كتاخد قهوتها وكاتشوف فطابليت و المختصين بتلبيسها ضايرين بيها ... كتيقادو الفيست على كتافها ..

كانت بلباس رسمي ديال العمل .. سروال اسود .. وطوب فالاسود و كوستيم شبابي شيك فلبلوسيال .. طلعو ليها كمامو تالمرفق .. مع سويعة رقيقة وبعض الاكسسوارات ...

مع كملات قهوتها مع كملو ليها ووجرو السيغيات ومشاو ... هزات بوشيت ديالها دارت فيها تيليفونها وكاع اش غاتحتاج ... هزات نظارات ديالها وخرجات تمشاات تهبط .. وهي تتفكر خوها ومشات باتجاه الجناح ديالو ... كيف حلاتو كيف بان ليها خاوي !! علات حاجبها حيت دار معاها غايتغداو انسومبل .. جاها عجب انه يكون فاق فهاد الوقت .. دخلات كتعيط وتقلب عليه مالقاتوش .. وهبطات لتحت ...

قسم : خاالتي رجاااء ... صباح نور ( باست راسها )

رجاء : صباح الورد آلغزالة ديالنا ... خديتي فطورك مزيان ؟

قسم : وي .. قولي ليا ماشفتيش جود ؟؟

رجاء : ففف .. اش غانقول ليك ( شافت الى مجي حد وقربات عندها ) قاليا عمر راه خرج بكري ... وهاز الفاليز

قسم : ( شدات على راسها ) ماتقووووليهاش ....

رجاء : اش غانقول دابا لسي اسد الى سول عليه ؟؟؟

قسم : ( كتحك فجبهتها ) فففف .. جووود امتى غادير عقلك امتى ... عرفتي اخالتي .. قولي ليه ماشفتيهش ولا خرج وصافي ... وانا نحاول نتصل بيه الى جاوبني نرد ليه عقلو .. مهم تانجي بليل انا نعرف كيفاش نهضر مع بابااا ...

رجاء : واش زعما باباك غاتسناني حتى نقولها ليه انا ... غايكون وصلو خبارو

قسم : ياااربي دير لي فيها خير ياربي .... مهم خالتو انا معطلة ... الى وقعات شي حاجة ولا تعصب بابا عيطي ليا سيغ پلاص ..

باست راسها وخرجات لطوموبيل .. حلو ليها الباب لور ركبات .. وطول الطريق وهي كتصوني عليه وتيليفونو طافي وخلات ليه لي ميساج فوكال .... فللخر عيطات لسلطان ..

سلطان : ( بصوت ناعس ) قسم ؟؟؟

قسم : سمح ليا مصونيا ليك فهاد الوقت .. قوليا اسلطان .... ماقال ليك جود والو ؟ على شي رايس "سباق" عندو فهاد سيمانة ؟

سلطان : نو !!! غايسافر ؟

قسم : ورااه سااافر ماشي عاد .. ( تنهدات ) وزعما واعدني غانتغداو انوسومبل .... معرفتو منين جايب هاد الاستهتار كامل ....

سلطان : صبري صبري .. لبارح بصدفة راني شفت كايوجدو لشي رالي جديد فموناكو غايكون فيه تالرئيس حاضر ... مشا من بالي كاع الى هو ولد داك المضمار ...

قسم : ففففففف كان عليك تقولها لينا .... امتى غايكون السباق دابا ؟

سلطان : ماعرفتش ... باينة فهاد للايام ... اشنو نلحقو عليه

قسم : داكشي لي غاندير الى مجاوبش ... مهم رجع تكمل نعاسك .. الى كان شي جديد ولا عيط ليك علمني .. غايعيشنا تاني هاد لليام كلها فالرعب .... شحال كنكره وقت هاد السباقات .....

سلطان : وخباااا علييينا ... ماسحيش كاااع بانه كايوجد ليه.... كون مشيت معاه ...

قسم : حيت عارفنا مغانخليوهش تايلقى راسو صابح فالجزيرة كيف دار ليه بابا داك نهار ... لي فراسو فراسو واخا ماعرفت فين تحبسو

سلطان : الى كان شي جديد غانعلمك .. غانيدر لي فجهدي نتصل ولا نعيط ليهم تما ...

قطعات عليه وبقات شادة على راسها كتخمم ليه ... خيفانة تجيهم شي خبار خايبة عليه تاني ... ولا باباها يتعصب ويتاخد شي قرار بخصوصو لي يقلب ليهم كولشي ...

عند اصيل ....

واقف هو وواحد الراجل كانو يلاه نزلو من واحد طموبيل داسيا لوگان .. كانو دارو بيها ضويرة ... ومعاهم راجل آخر سمسار ...

سمسار : لا لا ناااضية .... نحيلة اصاحبي توكل على الله

- اوا يدير معانا .. 3 دالمليون راه بزاف .. مامسلكانيش ... 2 ونص ناخدها ....

اصيل : ( ماعندو دماغ للشطارة ) عندي فيها الخطية ...

- اوا هدا جهدي .. ( كايضرب برجلو فالرويضة ) مانزيدش على هادشي ....

سمسار : ( جر اصيل للجنب ) ثمن راه مزيان اصاحبي .... بيع وفك عليك هاد بيعة وشرية ... وطموبيل راه عارف واكل ليها المطور الدق ... فك عليك

اصيل : والله كون مكانت مزير لابعتها ... ولكن دارتها الظروف .... ( شاف عند الشاري ) الله يربح ...

- هو هدا ... يلاه معاايا للبنكة نعطيك فلوسك ... الله يجيب ليك ماحسن حتى نتا ...

ركبو ومشاو جميع .. خدا الفلوس واتجه لسبيطار خلص لصاحبو ... حيت تقاست ليه المعدة و سوداوها ليه .. مع الدم لي كان خاصو ... حط ليهم تما كاع اش طالبين وشرا ليه ماياكل وسيرفيت جديدة وخلا صريف فجيبو ولي شاط حطو فالبنك ورجع لسبيطار دخل عندو ... كان للشومبر فيها 3 .. واحد مهرس وواحد مضروب فراسو و انور لي الصبح خرجوه من الانعاش .. الفاصمة فكرشو ولابس غير بيل بيض بسماطي وولونو صفرر .. وجر كرسي كلس حداه ودار يدو على جبهتو

اصيل : راها نزلات ليك السخانة .. شوية دابا معندكش الحريق بحال قبيلة ؟؟؟

انور : لا لا .. راني مزيان .. ماسولوش فيا الدار،؟

اصيل : مشيت لعندهم .. قلت ليهم تعطل الباطو وصبحتي ناكس فالمرصى ...

انور : يتوووووب عليك اخوياا لي ولداتو ليا الدنيا ..... مقالوش ليك امتى نخرج منهنا ...

اصيل : غير واحد شوية يدوز طبيب وتخرج ... ( كايشوف مع الحالة ) شكون غادي يبرا وسط هاد الخماااج هدا شكون ... ( كايحك سنانو ) غالينوض يحرق عليهم هاد الخرا كايتفلاو على الشعب ....

انور : هنينا اصاحابي هنينا ... اجي ياكما خلصتي بزااف ؟؟؟؟؟ نموت ومنرجعش دينك وخيرك لي داير فيا

اصيل : واماخلصنا واالو .... شي واحد كليتكلف بهادشي ولا منعرفت ... رجع غير لوالظيك انا مترجع لي منرجع ليك ....

تنهد وجبد ليه عطاه ياكل .... وبقا معاه حتى جا طبيب وسمح ليه يخرج .. لبس ليه اصيل سيغفيت جديدة ... وتاهو كان مشا للدار بكري بدل عليه بلا متشوفو ختو .... وبدا كايعانو ينوض باش يخرجو ...

عند سلمى ..

خارجة من الدرب كتجري هي وصاحبتها خيفانين يرجع اصيل ومايلقاهاش ... هازة ملف فيديها طبعاتو فسيبير فيه كاع معلوماتها وعمرات استمارة المنحة .. شدو طاكسي باتجاه الجمعية ... ونزلو وحدة مخشية فلوخرا ...

سلمى : هنا ياااك ؟؟؟؟

حُسنى : وااا على حساب العنوان .. ( كتقرا فالبانو) راها سميتها .. هناا ...

سلمى : نسولو هادوك ؟؟؟

جراتها ومشاو عند السكيريتي لي فللباب ..

سلمى : سمح ليا نسولك عفاك .. واش هنا داك الجمعية لي غاتعطي المنح الدراسية لكلية الطب هاد العام ؟؟؟

السيكيرتي : ( كايطلع فيها ويهبط ) اه هنا ...

سلمى : وسمحيلي عفاك غاتبسل عليك ... واش غانشوفو قسم الاسماعيلي ؟؟؟ هي لي غاتعطينا المنحة ياك ؟ نقدرو نتلاقاوها هي نيت هنا ياك ؟؟؟؟

السيكريتي : الجمعية ابنتي فليطاج الثاني ... شدي نوبة مع خوتك ... ملي غايساليو الاجتماع غايتكلفو بيك ...

حوسنى : ( بالحس فودنها ) اش هاد سؤال حماقيتي لا .. تلقايه هو وعمرو سلم عليها ....

سلمى : شكراااا بزاف ربي خليك ...

يلاه غاتجر حسنى يطلعو ... هو يبان ليها داك سيكريتي هضر فصونفيل بززربة .. وخرجو جوج خرين من داخل كاجريو طيهة الطموبيل لي وقفات .. ضارو سلمى وحسنى مصغرين عينيهم فالشمش ومرسيديس اخر مكاين كحلة كتلمع ..

حل الكارد الباب و واحد آخر داير مضل صغيرة من الشمش ... وبانت رجل ناازلة بصباط عااالي لامع .. يلاه كايشوفو شكون غاتنزل وهي تدفعهم ضبااابة ديال صحافة تاطاحت سلمى على حوسنى ..

حوسنى : ايييييييه اداااااك الخراااا واش مبنااالكش واقفييين تفوووو على بنااااادم

سلمى : ( رجعات وقفات كتطول عنقها تشوف ) واش قسم هادي ؟؟؟؟؟

حسنى : خلينا نشوفو .. اش عرفني انا ... زيدي راه ماشي غير هووما لي كايعرفو يدفعوو ..

بداو كاتشخاو تاهوما وسط داك الجوقة دصحافة لي تلمات عليها .. والكارد كايبعدهم .. وهي تخرج مديرة اعمالها كتجري هازة طابليط ديالها ...

قسم نزلات من طموبيل ضاحكة للكاميرات ودايرين فوقها المضل ... وكتحاول تجاوب على الماكسيمون دالاسئلة و صفاء مديرة اعمالها كتشوش فودنيها ...

سلمى : ( كاتنقزز ) ناااااااري والله تاااااا هي ... وااااااناري غاانسخخخف شوووفي كيدااايرررررة شوووووفي...

حسنى : سسسكتي شوووهتيناااا ..

سلمى: مستحيييل ... مستحييل جيت تالهنا وماانسلمش عليها ... راه غانحمااق على هاد البنت ....

حسنى : واسكتي واش بغيتي تشوهينا راها غير غااتقمعك ...

علات قسم يديها بكل ررقي ولباقة ... بمعنى ساليت .. وبداو يبعدوهم باش دوز ... وسلمى بلا متحس براسها تلاحت كتعيييط ... من قوة مامتبعة اخبارها فالمجلات ولات كتحسها شي وحدة قريييبة ليها ...

سلمى : قسااااام ... مادموووزيييييييل ( كتلوح بامنلف ديالها وتعيط بججهد ) مادموووزببييييل دقيييقة عفاااااااك ...

حسنى : ويلي ويلي ويلي على شوووووووهة فين غاندير وجهي لاباقي خرجت معاك عكري ليا

جاو الكارد كايبعدوها وهي كااترغب وتطلع وتهبط فيديهم

سلمى : عفااااك اخويا غير دقييقة . غير نسسسلم عليها .. كنحنااااق عليهاا .. عفاااك اخوياا الله يررررررحم باااك ... مادموووزيييييييل

قسم كانت داخلة بعد ما بعدات المضل على راسها .. وكتهضر مع صفاء وهي تسمع تعياط .. وضارت براسها .. بقات كتعوج عنقها تحاول تشوف اش واقع وعلات نضاضرها فوق شعرها

قسم : شنو واقع لهيه

صفاؤ : ( كتشوف تاهي) مااعررفتش ...

سلمى : ( ضحكات تالودنيها ملي شافتها ضارت باتجاههم والكارد شادهم كايبعدهم ) وااطلق ابنااااادم راه مغانكلهاش ... مادموووزيييييييييل .... عفاااك غير دقيييقة ... بعد مني .... كنحمااااق عليييييييك عفااااك غير تصووويييرة عفااااك ...

الكارد بغا يبعدها وهي طيح ليه فالارض وبقات حسنى كتسب ... سلمى تعمرو عينيها بدموع جاتها البكية على الدفعة لي دار ليها ... وقسم علات حاجبها ...

قسم : دخليي ليا داك البنت ... وهداك ياخد حسابو ... هادي جمعية ... كنعاونو الناس ماشي كندفعوهم ....

صفاء : ولكن ووالاجتماع ؟؟

قسم مارداتش عليها وردات نضاضرها ودخلات ... حلو ليها السانسور وطلعات ديريكت للبيرو ديالها .. وصفاء قربات لعندهم كاتشوف فداك الكارد

صفاء : قفريتها معند المادمووزيل .. سير دخل سيير على الله نرغبو عليك.... ( شافت عند سلمى وصاحبتها ) ونتوما اجيو معايا ...

سلمى : ها ؟ ش شوفي اختي .. ا انا غير فان ديالها وكنتابعها فالمجلااات والانسطاا ( صفاء مشات وهوما تابعينها وسلمى كتهضر وتبرر وكايتشماو بزربة موراها يلاه يلحقوها ) هاانتي هدا الملف ديااالي جيت نطلب منحة ... و . وملي شفتها ماتحكمتش فراسي ... عزيزة عليا بزاف وكنحمااق عليها ....

حسنى : ( بالحس ) ششفتي شفتي خفتك اش دارت لينا .. كالسة كاتعيطي ليها بحللا هي بنت خالتك .... فففف علم الله اش غايدرو لينا دابا ...

سلمى : مالي اش درت قتلتها ؟ غير بغيت نسلم عليها ونتصور معاها ...

طلعاتهم صفاء تاوصلو قدام البيرو ديالها وضارت عندهم

صفاء : كىسو لهيه ... بلا صداع ... ( دقات الباب ودخلات)

سلمى : ( كاتشوف مع جنابها )هااادشي مجهاااد اشعيبية .... كاع هادي جمعية ؟

حسنى : جمعية خليناها لتحت .. هادي يمكن غير بلاصة فين كاين البيرو ديالها .....

دخلات صفاء للبيرو كانت قسم حيدات الفيست ديالها وكتعلقها فبلاصتها وكتعلي كمامها

صفاء : جبتهم ليك آمدموزيل ... ماعرفتش علاش كاضيعي وقتك بحال هاكا .. سمعت بحالا بغات منححة نهبطها لجمعية لتحت يتكلفو ليها راه عندك اجتماع وديجا معطلة

قسم ربعات يديها وتكات على الجانب دالبيرو ..

قسم : ساليتي !!

صفاء : وي مادموزيل ...

قسم : ( شافت لسعتها ) يلاه دخليها ليا ...

صفاء : ولكنن !! ( قسم طلعات حاحبها وهي تهبط راسها) واخا امادموزيل ..

تنهدات وخرجات تعيط ليهم وقسم مشات لكرسي ديالها كلسات وحلات لبيسي .. كان المكتب هااادئ وغالب عليه اللون الفضي والازرق ... كله زجاااجي وانييق جدا ... وصورة العائلة على المكتب فإيطار انيق ...

صفاء خرجات لعند البنات وهوما يوقفو متوترات ..

صفاء : المادموزيل بغات تشوفك ....

سلمى : ( جاتها اللضحكة ) حححلفي ؟؟؟؟؟؟؟ واش قسم هي نيييييت ؟؟؟؟

صفاء : سميتها المادموزيل قسم ... ( شافت نع حسنى كطلع وتهبط ) بغاتك غير نتي ...

سلمى : ها ؟ و ....ولكن ( شدات فيد حسنى ) لا انا منقدرش ندخل بوحدي ...

صفاء : ممم .. يلاه دخلو .. وماتعطلوهاش تابعها اجتماع ...

خلاتهم ومشات وسلمى حلات فمها وحسنى مامتيقاش

سلمى : ناري بغااااااات تشوفنا .. وناري قلبي غايسكككت ... مولات شي متواضعة وهادي نافخة علينا ريشها يييييخ محملتهاش ...

حسنى : صبرري صبري ... انا مزال هادشي مادخليش لراسي ... واش بنت الاسماعلين ؟؟؟ اويلي .... الكابيتن بنت الروكان ؟؟؟؟!!!

سلمى : شوفي ... دااابا نقصو من الهضرة وخلينا ندخلو .. تااحنا كنعرفو نهضرو ونكلسو ياك ؟ ( كاتقاد راسها وشعرها ) ياك مقادة ... ياكما ساحت ليا الماسكرا ؟

حسنى : مقاادة آزمر .. ناري شداتني الخلعة والتبوريشة ...

قربو بشوية لباب ودقو دقة خفيفة ... وحلو بشوووية كايطلو ... وهي تهز قسم راسها وابتسماات ليهن تااشدو عينيها ... غير شافوها ابتسمات تاهوما ضضضحكو ... وحلو للباب دخلو .. سلمى غير حالة فمها ..حسنى لي شدات لباب ووقفو غير تما فالباب

سلمى : ا .. س سلام ... س سمحي لينا ليا ر راه غير

قسم : ( ربعات يديها على البيرو مبتسمة ) غاتبقاو تما واقفين ... ( شافت عند الكراسا ) تفضلو ..

سلمى : ( مززيرة على اليد دحسنى بتوتر وكتهضر بالهمس ) نااااري على هضرة عندها شحااال حللوة ... زيدي زيدي ...

جراتها ودخلو حشماااانين وجلسو كايشوفو فيها و عينوهم لامعيييين ..

حسنى : س سمحي لينا عفاك ع على .. على ديرونجمون قبيلة .. ( شافت عند سلمى ) صاحبتي كتابعك ب بزاف ... و .. ونتي عندها عزيييزة .. ( كتخرج الهضرة بسيف بالتوتر وسلمى جاتها البكية ) و و ملي شافتك ... فرحات .. .داكشي علاش ...

قسم : ( شافت عند سلمى بابتسامة ولطافة ) واش بصح ؟؟؟؟ ... شنو سمياااتكم معرفتونيش براسكم ؟؟؟

سلمى : ( عينيها دمعانين مكانتش كضنها متواضعة وضريفة هاكا ) س سميتي سلمى ..

حسنى : وانا حُسنى ..

قسم : ( مدات يديها ) مشرفة بيكم .. انا قسم ..

سلمى : ( سلمات مزيرة على يديها غاطير بالفرحة ) وشكووون مكيعرفكش ...

حسنى : ( تاهي سلمات ) كتبااني حسن بزاف من تصاور ...

سلمى : ح حنا .. م مبلين بزاف نتبعو الاخبار ديال العائلات المرموقة فالمجلات ... ( عينيها غايبكيو ) حنا كاع ل لي معندناش حظ اننا تكون عندنا عائلة كبيرة .. ك كنحاولو نعوضوها فالعائلات الخرين نتبعوهم ونعيشو اخبارهم ونديرهم عائلتنا .. و ونبكيو ومعاهم ونفرحو معاهم .. وو عائلتكم تبارك الله كتحمقني ... شكون مكيعرفش عائلة الاسماعيلين ... ا انا وحسنى ديما كانشريو المجلة لي كتصور معاكم ... ت تقريبا وليت حافضاكم بحال موالين الدار ههه واخا حنا غير جوج ( كتهضر بكل عفوية وتحرك يديها )

قسم : ( اثرات فيها وعجبها الحال ) شرف لينا ... عندك الحق .. ماشي كولشي عندو الزهر فالعائلة ... حتى انا كانعرف واحد السيد كانت حياتو كلها هو بوحدو .. وكان هاكا بحالك كايدمعو عينه الى سمع باسم العائلة .. وملي دارزت عليه السنين ماحسش براسو حتى لقا راسو معيل ديال واحد العاااااائلة كبيرة .. لي ولاو يشوفها فالمجلات دابا و يضربو بيها المثل ... دنيا صغيرة اختي ... ممكن حتى نتي غدا تلقاي راسك وسط عائلة مكنتيش دايرة حسابها ... وغاتولي هي كل مكتملكي ...

سلمى : كلامك كلو حلو .. عرفتي كنحس براسي غانطيير ههه ... مكانش كايحسابت ليا نتي ضريفة هاكا ومتواضعة ( شاف فحسنى كضحك ) كايجيب ليا الله كنحلم .. واش بصح حنا معاها ..

قسم : بون ! سمعت شي وحدة فيكم عنندها ملف ديال شي منحة نو ؟

حسنى : ااه اه بصح .. صاحبتي ..

سلمى : ( حطاتو فوق البيرو ) انا قريت الخبر وجيت ... مكنتش كاع كتتصور غانلقاك تني شخصيا والله فرحت ...لدرجة ليوما غانقدررش ننعس ههه ..

قسم : هه مرحبا ... ( حلات الملف ) ممم،... وعلاش خرجتي من لقرايا اسلمى .. ( كاتقرا فيه وتسول )

سلمى : ( كتفرك يديها فجنب الشوميز ) ا .. ظروف وصافي ... انا بابا مات وانا صغيرة بزاف مكنعقلش عليه بزاف ... وتا ماما مكنعرف عليها والو لي عارفة هو سمحات فينا وحنا صغار بزاااف ... و ورباني غير خويا ... ولكن صعيب شوية خرجني من تاسعة .. وبقيت كنرغب فيه حتى دوزت لباك ليبر ... قبل غير حيت غانحفظ فالدار ... ومابغاش يخليني ندخل لجامعة ...

حسنى : هو اختي كايخاف عليها بزاااف .. .كانو دييما .. كايتبعوها دراري وداكشي ... ومكاانش كايبغي ....

قسم : ( طلعات عينيها فيها ) وتباركالله هاد للزين كامل وهاد العوينات بسيف يخاف عليها ...

سلمى : ( غاطير بالفرحة ) اوييلي حشمتيني ههههه مانكونش بحالك ..

قسم : اهاه ومنبعد ... ( غلقات الملف ) عاودي ليا .. من بعد ماخديتي الباك .. مقدرتيش تقنعيه تحاولي معاه شوية بشوية دخلي للجانعة ؟ وكيفاش قدرتي دابا تقنيعه تاخدي ممنحة دراسية ؟

سلمى : صراحة مانخبعش عليك ... انا جيت مخبية عليه ... مكرهتش ناخد المنحة ونقرا قرايتي بلا بيه هو ملي يكون عندي فلوس باش نقرا .. داك الساعة يبغي ولا مايبغيش ماشي سوقي .... انا الحلم ديالي هو نرجع نقرا .. كل ليلة كنحلم بالمدرسة وكنحلم مشا عليا الحاال للقسم ... هو لي حرمني من القراية .. ( نزلات ليها دمعة ) الى خديت هاد المنحة نقرا بيها بلا مننتظر منو يخلص عليا شي حاجة ..

قسم : علاش كاتبكي دابا ؟ ... انا هااكا منصحكش من الاحسن يكون بخاطرو .. فنفس الوقت ماشي من حقو يحرمك من القرايا .. حنا مراحناش عايشين فالخمسينات ...هدا زمان جديد .. وجيل جديد .. الانسان بلا قراية مكتندار ليه تاشي قيمة فالمجتمع ....

حسنى : ل الا اتحاول تقنعو ... ملي يشوف خرجات ليها المنحة للكلية بحال هاديك ديال الطب ... اكيد غايوافق ...

قسم : ضروفكم المادية كيفاش دايرة ... يعني خوك فاش خدام ؟؟؟

سلمى : ( تحلو عليها المواجيع ) ص صرااحة ... ماعنداش وماخصناش ...واخا حالة ضعيفة ولكن خويا داير لي فجهدو متخصنا حتى شي حاجة .. لي عارفة انه هو بابا كان صياد خدام فالبحر وكبيع حتى الحوت فالمرصى وداكشي .. وملي مات الله يرحمو ... كان خويا صغير .. و وهو لي كمل فبلاصتو مع واحد الرايس كان صتحب بابا عاونو بزاف ... ولكن المدخول قليل شوية راكي عارفة المتطلبات ديال الحياة والمصاريف وانا عندي فقر الدم ديما كايخصني طبيب ودوايات ... مهم دابا راجع واقلة غادي يدر طاكسي خدا طموبيل ... و كيخدم علينا منها ومنهنا .. مهم حمد الله على كل حال ... عمرني تخصيت معاه ولا حسيت بالفقر .... يمكن هو كايتخص ولكن عمرو خلاني انا نتخص ....داكشي علاش باغيا نقرا ونخدم ونرد ليه غير شوية ...

القسم : الخدمة ماشي عيب .. الى كانت بالحللال واخا تدخل غير درهم فالنهار كايكون فيه البركة ... الله يسر ليه ويعانو ... ولكن لي نصحك بيه هو قنعيه .. ديما اي حاجة نيدروها تكون بالرضى دالعائلة ديالنا ..

سلمى : ( مسحات دمعتها ) انا مابغيت والو بغبت غير نقرا .. وكنتمنى يوافق ...حيت الى موافقش متأكدة غانقرا بزز عليه .... ( كتبكي وقسم تاهي دمعو عينها ) المعلمة كانت كتقوليا نتي غادي تولي شي حاجة كبيييييرة فالمستقبل حيت كنت مجتهدة فقرايتي ... كنت ديما كنجي اللولة وكنحسو هو مكيفرحش ليا ... معرفت واش حيت هو مكملش قرايتو ولا مكيبينهاش كايقوليا معندها باش تنفعك ... ماعرفتش علاش عمرو حسسني بلاهمية ديال القراية وديما حارمني منها وتايقول ليا جاينا موراها غير الصداع .. وانا حلمي هو قرايتي .. ملي كتشوف من السرجم البنات لابسين الطابليات وهازين شكاريهم وماشين يقراو كننحسدهم ... قلبي كيبقى كايتقطع على قرايتي ....

قسم ناضت من للبيرو ومشات لعندها تكات على ركابيها وعنقاتها

قسم : دابا تقراي احبيبة ديالي ... وعد مني ... غاتكملي قرايتك وغايبغي خوك ان شاء الله ويكون معاك نهار تخرجك ..

سلمى زيرات عليها تاهي وحسات بحناااان كبييررر فصدرها .. وبقوة مكتابعها بزاف ولا كتحسها قريبة ليها بحال شي ختها ..

سلمى : عمرني غاننسى خيرك حياتي كااااملة امادموزيل.. عمرني ....

قسم : ( تاهي بكاتها مسات دموعها و مسحات ليها دموعها حتى هي ) مسحي دموعك معندك علاش تبكي .. باقا صغيرة والحياة كلها قدامك ... ( وقفات ورجعا لليبيرو ديالها ) غاتقراي ان شاء اله .. وغايشجعك وغايفرح ليك .... كيف قالت صاحبتك يمكن غير من خوفو عليك ... عادي ... حتى انا خويا نااااجح فالموهبة ديالو .. ولكن بابا وماما وحنا كاملين مكنفرحوش لنجحااتو ولا المراتب لي وصل ليهم حيت خايفين عليه من داكشي لي كايديير .... حاسة بشنو حاس من جيهتك ... فنفس الوقت خصو يكون انسان واعي .. ويعرف ان كلاب الزنقة شنو مادار مغايوقفهمش .. واخا يعرف يوصلك بيديه ويجيبك مهم تكملي قرايتك ... وتحققي تحلامك ...ماشي دوك الكلاب مشومرين فالدروبة لا قرايا لا وعاية .... ونتي تمشي ضحية ...لا ...

سلمى : ( مسحات دموها وحاولات تتبسم ) هادي هي للهضرة لي تمنيت نمسعها من عند شي حد ... اول مرة نحس براسي وسط محيط فااهمني ... وعارف بقيمة القرايا ..

قسم : ولكن تواعدني انك غاتقنعيه ؟

سلمى : غاندير جهدي كاااامل ... فرحت بزتاف حيت هضرت معاك ... كنحسبك بحال شي ختي كنعرفها والله

قسم : ( بابتسامة حنونة)_ مرحبا بك .. حسبيني ختك الكبيرة ...

سلمى : ( لامعين عينها ) اكييييد ... من زمان وانا كنتمنى تكون عندي ختي حنينة .. لي تهتم بيا ودير ليا عقلي هه .. وتفكر اعياد ميلادي ... ولكن عطاني ليه غير اخ هههه وصعييب ومعقد عمرو حتى احتفل ليا بشي عيد ميلاد هههه

قسم : هه ماتقوليش هاكاك .. الله يخلين ليك على الاقل لقيتي فجبنك اخ .. كاين لي مالقى حتى حاجة ... ( شافت لساعة ) غاتسمحز ليا حيت معطلة على واحد الاجتماع ... سلمى الملف ديالك هاهو عندي ... وحسبي المنحة بين يديك ... فتحي حساب بنكي فارقب وقت ولا عطيني ديال الاخ ديالك واخا !

سلمى : ل لا لا .. خويا دابا لا .. حتى نقنعو غير بشوية ... .. ه هو معصب بزاف .. و وكنخاف نهضر معاه ويقلب عليا كولشي .. هصني حتى نشد ليه الخاطر

قسم : ههه واخا الالة بشوية عليك السنة الدراسية مزال مغاتبدا ...

حسنى : ( بفرحة) شنو دابا صافي تقبلات ؟؟؟؟

قسم : على هادي فيها الشك .. بنوتة زوينة بجالها مخصهاش تبكي

سلمى : حلفي ؟؟؟؟؟ ففففف مااايمككنش غاانطييير بالفرحة ( شدات على فمها )

قسم : هههه الطموح والاحلام زوينين يتشبت بيه الواحد ... الحياة ماشي ديما خايبة .. راه فيها شي حوايج مكنتبهوش ليهم ... نتي حلمتي .. وانا نحاول نعاونك تحققي ... غاتاخدي المنحة منعندي شخصيا ... ونزيدك حاجة اخرى ... عندي مرات عمي دكتورة وغات ( قاطعتها بحمااس)

سلمى : ااااه مدام رتاج الاسماعيلي عرفتها ...راني متبعة اخباركم كللهاا ..دكتورة القلب والشرايين.. هي لي عندها مصحة الحياة ..

قسم : هه ماعندي مايتسالك .. ايه هي ... انا غانهضر معاها ودوزي سطاجاتك عندها وغاتعاونك بزاف ... وان شاء الله تولي دكتورة كيف كتمناي .. ..

سلمى : يااااا ..... فرررررحت بزاف ....

بعفووية نااضت من البيرو وعنقااتها

سلمى : مكرهتش نخببيك فقلبي هههه والله فرحت بزااااف اختي ...

قسم : ههههه بالعكس .. غير قراااي ووصلي لاش بغيتي ... انا غير جسر صغير ممدود ليك ..

سلمى ( رجعات لبلاصتها ) وااقلة انا كننحححلم ... اوووف قلبي فاايسككت .... شكرا بزاف ربي يخلييييك ويرزقك كاع اش كتمناي بحال طيبة قلبك ...

قسم : اميين .... بون تيليفون ديالك هاهو عندي ...( معلوماتها فالملف) ملي غاتكون شي حاجة غايعيطو ليك واخا ؟ .. غير هو فتحي حساب فاقرب وقت ( عطاتها الكارت فيزيت ) هنا كاينة نمرة ديال السيدة لي دخلاتكم عندي هنا .. ملي تبغي تسولي على شي حاجة تاصلي بيها .. وهي غاتجاوبك على كولشي ... وان شاء الله يكون غير الخير .. نتي غير قنعني خووك ...

سلمى : شكرا اختي بزااف .. اكيد غانقعو ..

قسم : ههه ودابا مسحي داك دموع خلاص وخلي ماتبكي نهار يوافق هههه ..

سلمى : ( كتمسح ) معرفتش علاش كاينزلو.. .فرحت بزاف ملي قلتي ليا غاندوز سطاج عند مادام رتاج حسيت دنيا ضحكات ليا ...

قسم : مرحبا بيك ...

حسنى : شكرا بزاف امادموزيل والله فرحت لصاحبتي بزاف وفرحت حيت تلاقيناك .... منعطولش على للاجتماع ديالك سمحي لينا

قسم : ( وقفات ) ماشي مشكل ..

سلمى : ( وقفان ) مغانساش خيييرررك ... ماعرفش كيفاش غانردو

قسم : ..دنيا صغييرة يقدر شي نهار نتحط مرييضة بين يديك وتردي خيرك ههه

عند اصيل ..

وصلات طاكسي حمرة للدرب قدام واحد الدار بسييطة وعاونو ينزل ..

اصيل : انعاونك تدخل

انور : لا غير خليك .. غايحسو الدار كاينة شي حاجة وانا ماباغيش نبين ليهم

اصيل : واخا ...كول مزيان عوض الدم لي خسرتي ...

جا ماشي هو يعيط ليه وضار عندو

انور : غايجي نهار لي نرد ليك فيه هاد الخييير كامل آلعشييير ...

اصيل مردش عليه ودار القب ديال القبية وخشا يديه فالجيب وزاد فالدرب ... مكيهضر معاه تاشي حد خالق ليه الحدود كولشي عارفو صعيب وخاسر وعزيز عليه التيقار ... مكيزعموش عليه ... داز خلص الكريدي ديال الحانوت ... وكمل الطريق للدار وعقلو مساااافرر ... كايفكر غير فالحالة لي دار فالبنت لي نعسات معاه ... وكيفاش غايقدر يداوي هادشي ... مكيحسش براسو حتى كايلقى البنت تكرفصات ...

وصل لدار حل الباب وطلع ديريكت للبيت ديالو فالسطح ماباغي يدير حتى شي حاجة من غير يحط راسو ينعس ....

سلمى وحسنى حطاتهم الطاكسي ودخلو لددرب وسلمى غاطير بالفرحة

سلمى : قرصيني قرصيني واقلة باقي كنحلم انا ...

حسنى : حتى انا باقي مامتيقاش .. شفتي شحال متواااااضعة ؟؟؟؟؟

سلمى : كاااتحمق .... عمرني نسى خييرها ..

حسنى : دابا سيري قنعي غير خوك ( طلعات عينيها وهي تحل فمها ) وناااااري اصكعة السرجم ديالو محلوووول

سلمى : اويييييلي حللفي ؟؟؟؟؟

حسنى: انا اختي غااانمشي فحاااالي ....

سبقاتها كتجري هربات وسلمى دخلات كترعد حلات الباب بششوية وخيفااانة ... قلبات بعينيها فالدار مكاينش .. وهي كتسنى امتى تسمع الغوتة ديالو ... وطلعات لسطح كان الباب مردود فتحاتو بشووية بانليها مكنش ناااعس بحال وضعية الجنين ... وبقات كترمش !! مالو ؟ ... قربات عندو بشوووية بانليها شاد عينيه بزز وكتحس بيه مضغووووط ... مابغاتش تفيقو ورجعات هبطات كدير الغدا وبالها معاه شنو غايكون شاطنو لدرجة ملاحظش غيابها ؟ ....

عند قسم ...

سلات الاجتماع .. ورجعات للمكتب كتهز وراقها وتلبس الفيست ديالها وهي تلمح الضوسي ديال سلمى باقي محلول وهزاتو ... وعينيها جات مباااشرة على واحد التاريخ ... لي هو تاريخ ازديادها .... صغرات عينيها ..

قسم : عيد ميلادها غدا ؟؟؟؟ ....

سهات كتفكر كلامها "{من زمان وانا كنتمنى تكون عندي ختي حنينة .. لي تهتم بيا ودير ليا عقلي هه .. وتفكر اعياد ميلادي ... ولكن عطاني ليه غير اخ هههه وصعييب ومعقد عمرو حتى احتفل ليا بشي عيد ميلاد هههه }" ... ابتسمات قسم .. ورجعات تنهدات وخرجات .....

∆فقصر الاسماعيلي ....

جالسة لامار على لي فوطوي كتمسح دموعها وكتبكي وقدس حداها معنقاها كتواسيها ... واسد كايمشي ويجي قدامهم متوتر ومعصب...

قدس : بابا ... وصااافي ماديروش فراسكم هاد الحالة ... راه هو عااارف اش كادير

اسد : ( سااعر ) ااش عاااارف .. اش عااااارف هداااك ... هدا مغاايتهنى حتى يطرطق لينا العرووق فالراس ....

لامار : ( بالبكا ) دابا .. دابا نووووض ديني عند ولدي .... غاتوووقع ليه شي حاجة بالي ماامهنينيش ....بغييييت ولدي بغييت نرجعووو بسيييف ...

اسد : كوون كان ولللدك كايفكر ليك .. كاع مايمشي .. بالررررب تعااالى مااانتبعو هاد المررة ... خلييه .. خليه هاد المرة يشوف نتيجة اخطااائو برااسو ...

لامار : ( ناضت عندو ) اسااد .. ايدسد عفااااك ولدك هداك متسمحش فيييه ... عفاااااك يلاه نلحقو علببييه راك عارفو مرييض ... ( غاتسخف بالبكا ) توقع ليه شي حاااجة غااانموووت اسد ...

اسد تنهد وجبدها عندو كايهدنها ... وهو يدخل سلطان ولوؤي ... شافو مع حالتهم عارفين الموضوع ولامار ضارت عنهم بزربة

لامار : هضضرتووو معاه ؟؟؟ جاوبكم ...

لؤوي : لا تيليفونو طافي ... ولكن ماتخافيش راه عيطنا ليهم .. وقالو لينا الرالي نهار الخميس ... راهم فالتدرايب دابا ... متخافوش غانمشيو عندو لموناكو انا وسلطان ...

لامار : ( طاحت كلسات كتبكي ) ووولدي غاانحسرو .. ولدي غايدييوه ليا االطرقاااان ....وووولدي ....

اسد سعراتو وضرب الكرسي برجلو

اسد : سكتيييناا من هاد الهضرررة دالخرا دابا ...

لامار : ( وقفات ساعرة معاه ) رااه انا .. انا لي تقققطططعت عليه تاجبتو لدنيااا

اسد : وانا جاايبو من الززززنقة،؟؟؟

سلطان : ( مشا شدها ) مرات عمي رااكم غير كترونو دابا .... صافي يكون خير راه بعقلو ....

قدس : بابا عفاك تهددنوو ...

اسد خلاهم وطلع ولامار كلسات كتبكي وهوما ضايرين بيها كايهدنوها

سلطان : وصافي عفاك مديريش فراسك هاكا .. غدا غانمشيو لعندو ونعطيوك تهضري معاه .. غايكون طفاه غير باش مايضعافش قدام هضرتكم ويرجع ... هاد السباق مهم ليه بزاف امرات عمي ...

لوؤي : نساي بلي هو مريض .... خليه هاد المرة يحقق شي حاجة كايبغيها... حنا عارفين هاد الرالي راه عالمي .. والى مشا حتى ربحو راه غيكون حقق النص الكبير من الحلم ديالو وسميتو تتشر غير مع المتسابقين الكبار

لامار : ولدي لابقا تابع هادشي سميتو غاتقيد غير فلاليست دالكلينييك ... بغيت ولدي معاايا نشوفو كاالس حدايا .. غاتوقع ليه شي حاجة وانا بعيدة ماباغاش نعاود نفس داك العداب لي عشناه معااااه ..بسبب قلة عقلو هاهو كاعاااني فمرضو ...

قدس : ماما لوؤي عندو الحق .. نساي الى هو مريض .... وان شاء الله ربي معاه و رضاكم معاه ... ( باست على راسها) مهم اماما انا غانمشي ... عندي تداريب وتعطلت بزاف .. عفااك ماتبكيييش وحاولي على راسك

لامار : ( باستها ومسحات دموعها ) سيري ابنتي الله يعااونك ... مديريش فبالك ...

ابتسمات ليها ومشات هزات الكارطابل ديالها كانت لابسة ديجا السبور وخرجات ولوؤي متبعها بعينيه داك تقزيبة لي لابسة ...

غير هي خرجات وقسم دخلات للدار ... لقات ماماها كتبكي ولاحت ملفاتها دغيا قربات عندها كتحسسها

قسم : ماما؟؟؟ اش واقع ماالكم اش كاين خلعتوني ..

لامار،: ( غير مزادت فالبكا ) خووك ...خوك لي غايخرج لي عقلي

قسم : اش وقع ليه ؟؟؟؟؟

لوؤي : مواقع والو راكي كتعرفي ماماك ...

قسم : مزال مجاوبكومش ؟ غير دابا ملي وصلت صونيت عليه باقي تيليفونو طافي...

سلطان : غدا غانمشيو لعندو غير تهدنو

قسم : غانمشي معاكم

لوؤي : مكاين لاش اقسم .. خليك هنا مع ماماك ...( وقف ) يلاه انا خصني نمشي درت مع الوالدة تتغداو بزوج .... مرات عمي وسعي خاطرك عفاك ...

باس فوق راسها وخرج وتا سلطان مشا وقسم جابت ليها مهدئ وطلعاتها للجناح تنعس وخرجات عند باباها لي كان فالبالكون وعنقاتو من لور

قسم : بابا الحبيييب ....

اسد جبدها لعندو عنقها لجنبو

قسم : تخاصمتو ؟؟ ( قاست فوجهو ) مالك ...

اسد : لا غير مسرطيسي شوية ....

قسم : مغايطرا والو ان شاء الله

اسد : ( تكا على الحديدة شاد على راسو ) راسنا طاب ... عينا ابنتي ... عيينا ...

قسم : دخل ترتاح حتى نتا ... يكون خير .... سلطان ولوؤي غدا يجيبو لينا خبارو

اسد : ( تنهد ) راه لاباس ... ( عطاها تيليفون شافتو صوروه رجالو ) وخا هرب عليهم لقاوه

قسم : ( كتشوف فيه كايفطر فواحد الريسطو ) اوا صاااافي الحمد الله لي راه مزيان والكارد معاه .. علاش مقلق ..

اسد : مامقلقش على ود الخطر .. مقلق على ود هاد الهروب لي ولا كايدير وهضرتنا كايضربها عرض لحيط

قسم : نساعفو معاه شوية .. هو شاد الضد ونتوما كدلك مغانوصلو لحتى شي نتيجة ابابا ...

اسد: هاد المرة حتى انا غانخليه يعرف النتيجة هو بيديه ... مغانرجعوش ... ومغانعيطش ليه ... خليه يشوف النتيجة بنفسو ... ماشي كل مرة غانبقى انا كنقلب باش نسكت لامار ....

قسم : خدات دوا وغاترتاح ... متكملش عليها تانتا عفاك ابابا .... وراعي حتى لراسك

اسد،: خوي بالك نتي وديها فخدمتك ... حنا لاباس ... غاتفيق ونخرجو تبدل شوية الجو ...

قسم : ( تبسمات وقربات عندو ) وااااخرجووووني معاكم ... جود كان داير يتغدا معايا وخلاني .. نمشي معاكم،؟؟؟؟

اسد : لا ... ( باس راسها ) ...

قسم : ( هبطات شفايفها ) مسموووووم .. انمشي عندو عمو سفيان .. ها مراااااتك كوولها نتا كااااع ...

ضحكاتو فعز غضبو وعنقها عندو

اسد : باقا مغاتحيديش منك هاد الڤيس دالغيرة

قسم : لااااااء ( باست يدو )الله يخليكم ليا ... غانمشي نبدل حوايجي ...اشنو نوصي ليك على شي بوكيه دالورد ولا تختارو براسك

اسد : علاش ؟؟

قسم : ( ضحكات وجات ماشية ) باااش تححزر على قلبك هههه ... ماما شغلها صعيب ....

خلاتهم وخرجات لبيتها بدلات حوايجها ديال الخدمة ولبسات عادي وعطيات على سفيان ...

قسم : عمووو

سفيان : الحوب دعمو ...

قسم : كولشي سمح فيا اعمو ... بابا غايخرج هو ماما .. جود سافر ... ماتخرجش تغدا مع هاد المسكيينة ؟

سفيان : فين مشا جود ؟؟؟

قسم : ماقاليك والو سلطان ؟؟؟ سافر هاد صباح لرالي فموناكو .. وبلا خبارنا عاوتاني

سفيان : مرييييض هدا

قسم : تقلبات الدار .. بابا بسيف باش قدرت نضحكو شوية وماما خدات غير دوا باش نعسات ...

سفيان : واش مكيجابش ؟؟؟؟؟ فين راه بضبط نمشيو لعندو غاتوقع ليه شي حاجة

قسم : لا متخافش راه مراقبينو الكارد دابا من بعيد وكايصورو كولشي لبابا عاد شفتو فريسطو ....

سفيان : اوا الحمد الله ملي معاه الكارد ...

قسم : واشنو اعمو مغاتخلصش الغدا

سفيان : ههه شتي علاش كانقوليك نوضي تزووجي ... اجي اعمو ديالي عندي اجي

قسم : فييينك

سفيان : فالخدمة .. دوزي عليا ...

قسم : وخالتي حياة فين هي تغدا معانا ..

سفيان : لا متقدرش تجي خدامة ليوما ..

قسم : هي درت فيك خير غانغديييك هههه

سفيان : ودووزي بلا جميييل بلا جمييييل ....

اسد دخل من البالكون عند لامار تكا حداها كايمشط على شعرها .. وباسها فراسها وحل بيسي خدام غير من الدار حتى فاقت .. بسيف باش قنعها يخرجو وهي الخاطر والو حتى وراه ليها فالكاميرا عاد رتاحت ... ولبسو ومشاو لليخت ...

وقسم دوزات غداها مع سفيان وانضم ليهم حتى سلطان ... عاد رجعو لخدمتهم .. داز النهار طااير ..

اصيل نهار كامل ماهضرش مع سلمى وهي مزعماتش تسولو وهو فداك الحالة ... كياكل سااااكت وكايخرج .. الهم جبل فوق ظهرو وغير كتنهد وحدة ورا لوخرا .... وتاهي ارتاحت ملي مامساليش ليها باش يعرفها واش خرجات ايوم ولا لا ...

∆جا يوم جديد فاقت قسم تاني شادة قهوتها فيديها وكدوز فالسيريات دالحوايج والمصصممات ديالها واقفين ...

- ملي قلتي لينا عندك خرجة عادية حاولنا نجيبو هاد الستايل.. شوفي هاد لافيست راه اخر ماخرجات هاد لاماغك .... تاخدي نواغ !!...

قربات ليها وحدة منهم مراية طويلة وبدات كتجرب حتى طاحت فالبسة لي عجباتها ...سامبل بسيطة فنفس الوقت كلاص وراقية ... مشاو وهي حلات مجر كتقلب بيديها فالكونطاكات ديال الطموبيلات وحطات يديها على وحدة فيراري ... وهزات صاحكها ودوزات اتصال ..

- لامار فلاور وي ؟

قسم : واجد داكشي لي طلبت

- مادموزيل قسم ؟؟؟؟ ..صباح نور مادموزيل .. وي كولشي واجد ... نوضعو ليك العطر لي طلبتي فلابواط ديالو و البوكيه واجد ...

قسم : ااه ... نقشتو الاسم لي قلت ليكم فالبارفان ،؟

- وي تكلفو به .. كوني هانية ...

قسم : داكوغ غانجي موراها ... ميغسي ...

قطعات ومشات هابطة فدروج وتبسمات لرجاء لي كتوقف ديما فنهاية الدرج كتسنى نزولهم ..

قسم : صباااااحووو ( باستها )

رجاء : صباح الخير اميرتنا

قسم : بابا وماما مجاوش

رجاء : لا ابنتي .. كنضن باتو برا ...

قسم : مزيان نيت يفوجو شوية .. فطور بارد خفيف عفاك مزروبة شوية ..

رجاء : فالحال ....

مشات لصالون كلسات وجبدات من صاكها الورقة لي فيها معلوماتها وعقلاات على داك العنوان .... ورجعات دوزات اتصال اخر ..لواحد المتجر راقي ديال هدايا و تجهيز المناسبات

- مدموزيل قسسم صباح نور ..

قسم : صباح الخير ... اش طلبت البارح وجد ؟

- كولشي وجدناه كيف طلبتيه ... لي بالون .. لي بواط دشوكولا .. الگاطو ...كاع لي طلبتيه ..

قسم : مزيان غاندوز موراه ( شافت لسويعة لي فيديها ) واحد نص ساعة ....

- مرحبا بيك امادموزيل .... نورتينا ..

طلعو ليها فطورها خداتو بزربة ..وركبات مشات لشركة دماماها جابو ليها داكشي لطموبيل حطاتو قدامها عاد مشات لداك المتجر .... خرجو ليها كولشي تاتعمر الكوفر وطموبيل لور وشدات طريق دايرة الكيت فودنها حيت عطاوها ان تيل دسلطان ولؤي تشعل ...

سلطان : على القرص ... يلاه شعلتو صونيتي

قسم : راني على اعصابي ... شنو وصلتو لعندو ؟؟

سلطان : عطاونا الكارد لوكاليزاسيون ..كنتسناو طموبيل تجي ونمشيو ...

قسم : عنداكم تخرج ليكم معاه بلي الكارد تابعينو .. قولو ليه لقيناك وصافي...

سلطان : اكوني هانية .. غير نوصلو نخبرك ماتخافيش ....

قسم : قولو يصوني عليا ضاااروووري

سلطلن : وصافي .. تلاحي طموبيل جات ...

قطع عليها وهي دارت داك العنوان ف طموبيل وبقات غادية بالاشارة لي كتعطيها تاوصلات لداك الدرب كولشي كايتلفت يشوف لطوموبيل لي داخلة وهي مقربة للفلون وكاتوشف قدامها فين غادية ... بحالا كانت فشي بلاصة ودخلات لشي مغرب آخر ... الارض محفرة والناس فشكل كولشي كايشوف عندها ... كاتحاول تتبسم وتهبط ما امكن الكاسكيط على راسها باش مايعرفها تاواحد ... تادخلات فشارع ضيييق والحوانت على جنبها كولشي كايشوف لعندها ووقفات هبطات الزاج

قسم : عفاااك ...سمحلي نسولك .. بلوك( كاتشوف فاللوحة دالطموبيل ) بلوك 5 .. هنا ؟؟؟؟

مجاوبوهاش غير حالين فمهم فيها وكايرمشو ..

قسم : سلااااام !!!! ؟؟ مال هادو ...

هادوك لا حياة لمن تنادي .. بان ليها واحد آخر دايز وشافت عندو عاودات ليه السؤال وهو هبط راسو لعندها

- وشكون نتي ! بنت لطيفة لي فالامارات لا،؟؟ وعلى سلااااااااامتك ملي مشيتي مجات خبارك هولتينا

قسم : لا لااا .. غالط اسيدي .. بغيت غير نعرف بلوك 5 واش هو هدا ..

- ايهاهاي وااااتلعقتي ابنت لطيفة ... ( تايشوف لطموبيل وغمزها ) شي فيكتيم خليجي يااااك

قسم : اخووويا يهديك الله ... جاوبني

- واشنو زعما غير مشيتي نسيتي على الدرب ... جبتي لينا معاك شي سواك شي مسك شي عود الارك ؟ ولا جايا طويلة ..

قسم تنهدات وزادت بطموبيل كتخلي الهضرة موراها كل واحد شنو كاينعت ... تبان ليها واحد الراجل دايز باين بعقلو ووقفات حداه

قسم : عمي الله يعطيك الستر نسولك ..( هبط راسو لعندها ) بلوك خمسة هنا ....

- لا ابنتي .. غاتزيدي مزال طووول مع هاد الشارع وضوري على ليمن ....

قسم : شكراااا اعمي بزاف ...

- والى بغيتي تسمعي ليا .. خلي طنوبيلتك لهيه فالباركينغ ناس هنا شوية صعيبة ... وبلوك خمسة حضي فيه راسك الى جاية اول مرة لهنا وماكتعرفي حد.. باينة عليك برانية ..حضي راسك

قسم : علااش ؟؟؟؟

- الدرب معروف شوية بالكريساج الله يعفو عليهم .. والى شافو وحدة بحالك هاكا مغايقيلوهاش .. كون غير جبتي معاك شي حد ابنتي .. وطموبيل غير غايكرطوها ليك البعالك...

قسم : لا لا متخافش اعمي ... شكرا بزاف ...

خلاتو وزادت تابعة النعت لي عطاها حتى كيبان ليها درب كفس من هداك لي كانت فيه ... شعبي بامتياااز ... والعيلات فالبيبان مجمعين ...وطريق ضيييييقة ... والهارااج .... وسعااات عينيها ملي شافت ربااااعة ديال الدراري الصغار كايجريو ويضورو ليها بطموبيل ويغوتو .... وهي غير كضحك مفاهمة والو ... حسات بنوع من الاحراج ملي كايطلو عليها وهي معندها والو ما تعطيهم ... وليكادو ديال سلمى مابغاتش تقيسهم .... بقات غير كتبسم وعطاتهم لبواط دالحلوى والمسكة لي عندها فطموبيل وهوما كايغوتو وينقزو والعيلات كايشوفو لعندها ... باركات طموبيل فواحد الجنب حيت مستحيل تدخل فهاد الدرب الضيق .. ونزلات من طموبيل كطلع فسروالها .. وكولشي كايشوف معاها ... الطالون لي لابسة كتوقف به بزز حيت الارض محفرة وبدات تضحك مع داك الوليدات

- تشي درررهم الله يحااااااافضك اتشووشووز

قسم : هه نعاام ؟؟ .. م .. ماعنديش ف فلوس

تحرجات حيت مكتهزش ليسبيس .. فلخر عضات على شفايفها وخرجات من طموبيل لي بالون فرقاتهم عليهم كل واحد هز وحدة ومشاو كايجريو ...وهي شدات طموبيل وهزات صاكها ومتجهة كتقلب فين غاتلقى دار رقم 15 ... والعيلات كايتغامزو ...

-واااا نجية .. وااابنت الهم .. واجري جرررري شدي لباب قبل لايخرج عبقادر نمشي نتلگى لحووسين لاتصدق مطيرة لينا الرجااال ... يا جري يااامتعوسة ليام الرجاااالة مشااااو ...

- شكون هادي آلعيلات ؟

- هادي لي غاتجمع لرجالة ددرب حب وتبن .. ياانوووووضو جمعو مساسطكم ولي عندها شي راجل تربطو فالدار تاتفوت هاد الجاااااايحة ( هزات جلابتها كتجري لدارها )

تمشات قسم كتشوف وطالون كل مرة يعكل بيها ... تابانو ليها دوك العيلات وقربات عندهم مبتسمة ...

قسم : سلاام .. دار سلمى الشريف فين نلقاها،؟ نيميغو 15

كلهم غير كايشوفو وحدة طلعاتها وهبطاتها معبية سيفتها

- انا معاك بالله وبالشرع ..

قسم بقات غير كاتشوف ...وهي تنطق لوخرا

- المكّي بلا متعولي عليه ... يلاه قاضي ليا انا الغراض ...

- وجلولي راه لاويه ليه الزمان ... غير سيري شوفي ليك شي درب اخر ماهادا مايصلاحش ليك .....

قسم : كنضن سولت سؤال واضح !!! دار سلمى شريف فين جات ..

- اشووف شمايجيك مليح ... راه الزنطيط المشروك مايبرد جوف مايعمر زكوك .... حنا باراكا علينا غير الزلط ماعندنا فين نزيدو هم الضرة تاهو ... والله ينعل كاس البلار لي نشربو فيه لمرار... ( كطلعها وتهبطها ) اييييه زييييينة مگلناشاااي نتناوبو عليك انا وياه .. ولاكن راه حلو حلو حلو تانووحلووو.....

قسم : ( جابولها ضحكة ) اش كتخربقو ؟؟

- حنا كندويو الصح اشمن كنخربقو .. راحنا عيلات وعيبنا واحد .. وهبال النعجة مايفهمو غير السراح ...

قسم : اشمن نعجة ولا كاس لبلار ...كنسول على دار البنت عارفينها ايه معارفينهاش نسول واحد آخر ....

-( ناضت مراة كبيرة شوية فالسن ) خليو العتروس يرعى ... لاعنداك ابنتي ارض الله واسعة عزلي وتخيري عندنا الرجال ... غا هو فوتي عليك المزوجين ماتدي دنوب حد ماتعلقي براهش على رقبتك .. شوفي العزارا راه عندنا الزين غا هو مزلووطين ونتي باين عليك الخير ...ديها وصية منعندي ماتهبطي السروال تايقولك بشحاااال راه المخير هنا راسو مالو بيكالة ... والى كنتي باغيا زواج زيري السمطة وخشي الكبوط تحت السروال .. راه لاجا فمك فممو عليا باليميييين مغايجيب مّو .. راه من الضحيكة لتعنيقة لبويسة للهادي بن عييييسى ياااا صكعة ... ضربي القااااعيط هاو بردي الهوااااايش راه رجالاتنا واخا تشوفي عندهم الوگفة دالسلوگي راه فيهم اللهطة ديال الكلاب ....ااه وزيدك هادي ... تهلاي ليه فتلاتة ... مّو .. و ففمو .. و فنمووو ...

قسم بقات كاتشوف حابسة ضحكة فكروها غير بهضرة جداتها ... ومشات خلاتهم كتضور راسها وتضحك وطالون كاتخشى ليها فالحفاري وهوما متبعينها

- ياتوما شفتها عرجة ؟؟؟

- ( كاتشوف ليها مع الترمة ) ياااا وكرّ داك العرجة زاااااايد درجة ....

- وشحااااال مجبدة ....تقول ضاربين ليها المصلوح .. ماشيا دييريكت للفوگ ..

- ياوتااانتي يا نجية داك لاستيك عيا ما يتجبد داروه غالسليباااات

- رجالتنا مشاااو اصكعات مااافييييهاش....

- هضري على راسك .. ديالي مكيوقف غير فيدي يانا ...

- هادي راه المخزن ويوقف عليها بقا غا قشاوش مجيد .. حوجي يانا ... طليناه خضر .. يانوضي يا نجية نوضي تا من حق الشهر مشات ليك ...

- والله يهنيها .. طرمتي باقا ليا .. والله يخليها ليا ..ما تحيض ما تبيض ماتشرب فنيد ماتجوع ليا مجيد

كملات طريقها مخلية وراها غير القيل والقال .. حتى كتقرب طيح وتشد راسها ... كتشوف فديور وتقلب

حتى بانت ليها اونفاص ليها ... طلعات وهبطات كانت سفلية و سطح .. يلاه غاتزيد تقرب ليها هو يدوز مطووررر بزززربة طيير ليها الصاااك !!!!!!!!! ...

بقات واقفة مشووووكية ... ماغوتات ماهضرات .. غير واقفة وكاتشوف .. اول مرة فحياتها تعرض لبحال هاكا .. بقات غير كترمش بعينيها ... وهداك زاد مشااا ....سرطات ريقها وقربات لباب دقات وهي كلها سااااهية وباقا مشووكية ...

سلمى كانت فالكوزينة كتوجد الفطور على انغام الراديو كتمايل .. سمعات لباب قالت غاتكون غيى حسنى .. طفات على الحليب وتاجهات كتمسح يديها فعبايتها لي مطلعاها مع سليب على عادتها .... غير فتحات الباب وهي توووسع عييينيها على قدهم وحطات يديها على فمها مامتيقاااااش ... كايجيب ليها الله كتخاااايل ...

سلمى: ققس .. م مدموزيل ؟؟ ( تفافاااات )

قسم : ( كتنهج ) ماتقولي والو دابا ... عطني غير كااااس دالما ( كاتشوف بعينيها لطريق لي داز منها مول داك الموطور )

سلمى : ها ؟؟ ا ااه .. ب بغيت نقول زعما ...م ماعرررفتش ....و واش جيتي لعندي،؟؟؟ انا ؟؟؟؟

قسم : ( شافت فيها )غاتخليني واقفة هاكا فالباب،؟؟؟ ...

سلمى: لا .. لا تفضلي .. ولكن زعما .. ف غير .. حنا .. غ غير ...

قسم زادت دخلات وسلمى مزال مامستوعباش الامر .. وشدات لباب وضارت عندها كانت باقية واقفة فالدخلة دالباب كتشوف مع الدار مبتسمة واخا باقية فيها الصدمة ديال الكريساج ...

سلمى : ( جاتها البكية ) و واش كنحللم ...

قسم : ياودي مكتحلميش جيبلي غير كاس دالما راه ششحفت باش لقيت الدار ....

سلمى : ( ضحكات تالضراسها وبدات تحنقز فبلاصتها ) ماشي غير كاس دالما لي نجيييبيك .. اويلي والله ماااامتتتتيييقااا .. زيدي دخلي مررحبا بيك .. وقبلي علينا .... ح حنا غير ( قاطعاها )

قسم : ( كاتشوف مع الدار ) داركم زوييينة ... ( ضارت عندها ) فيها واحد للهدوء مريييح ... كنشم رييييحة زوينة .... كطيبي شي حاجة ؟؟

سلمى زادت قدامها بزززربة كتخمل صالون وتتفض طلامط فين غتتكلس وقسم داخلة كاشووف مبتسمة

سلمى: اا اه ااه .. ا كندير الحرشة بززعتر وجبن .. ك كتعجب لخويا ...

قسم: ممممم باينة غاتكون لذيذة غير من هاد الريحة ( كلسات وجبداتها من يديها تكلس ) اش كديري اش ؟؟؟

سلمى: ( محرجة ولات حممرة ) للا غير نقاد غ غير هاد البلاصة و وصافي س سمحيلي كتعرفي الروينة ديال الصباح .. حيت يلاه فقت ....

قسم : كوولشي مقاااد .. كاتقول ليا ديما ماما الدار ولا البيت المرون .. كايوحي بأن فيه الناس وفيه الحياة .. ماشي خااالي ..

سلمى : ( تبسماات وباقا متوترة ومحرجة ) ا اه بصاح ع عندها الحق .. ( وقفات بزربة ) قلتي ليا الماااا .. انجيبو ليك ...

مشات بزربة حتى لكوزينة وضارت عندها ...

سلمى :كتشربي المعدني نخرج نجيبو؟؟؟ ش شنو نوع لي كتشربي

قسم : ديال الروبيني كاين ؟ ....

سلمى: ( ضحكات ) بارد ولا سخون ...

قسم : ياودي غير جيليه كيف مابغا يكون راني شحفاااانة اهاد البنت ....

سلمى: ا اه ( ضحكات ) واخا وااخا هي لولا ....

بزربة جابت ليها الما .. وقسم شرباتو كامل عاد تنفسات ...

سلمى : ( كتفرك فيديها ) م .. م مزال مامتيقااااش .. و واش جيتي لعندي ؟ ز زعما .. ماعرفت مانقول هرب ليا الكلام كامل

قسم : ( تبسمات ) اجي كلسي حدايا اجي....

مشات كلسات وكلها متوترة مثابتاش

قسم : عيد ميلاد سعيد ..... كل عام ونت بالف خيير

سلمى وسعااات عينيها وضورات راسها عندها بزربة

سلمى : و واش عارفة ليوم عيد مييلادي،؟؟؟؟؟

قسم : مم .. مكتوب فالوراق ... وحيت قلتي ماعندكش ختك لي تبارك ليك ... جيت نباركو ليك بنفسي

سلمى : ( عضات على شفايفها وعينيها دمعو وشدات على فظها ) و واش بصااااح ( قسم حركات راسها بالايجاب مع ابتسامة حنيييينة ) مااامتيقاااااااااش

طارت عنقاااتها وقسم تاهي بادلاتها العناق كتسكتها ...

قسم :اوا هالي مابغيناش .. لبارح ماقلنا حتى سكتناك ودابا بديتي تبكي تاني واش دموعك على سبة ....

سلمى : ( كتمسح دموعها ) مامتيقاااااش انا راسي ... لبارح مع طناش دليل عطيتها غي للبكا ... حيت تواحد مافكرني وعرفت راسي غير نككرة تاحد مغايهتم لعيد ميلادي ... ولكن نتي لي على راسك شحال ديال الناااس .. و بعييييدة عليا بمسافااااات ... و بطبقااات .... تفكرتييني ... عمرني ننساهااا ولا غاننساها فحياتي ... هاد النهار غايولي تاريخي بنسبة ليا هاد 21 عام عمرها مغاتنسى ليا ....

قسم : الله يجعل ايامك كلها فرحة ...( تنهدات ) بون .. لي كادو ديالك فطموبيل .. ولكن تسرق ليا الصاك غير دابا شي حد بالموطور هزو ليا ...غانصوني على الكارد يجي يحل ليا طموبيل ....

سلمى : ( شهقات ) اويييييلي على شفرو ليك الصاااااك .... ماوقع ليك وااالو بعدااا ؟؟؟

قسم : لا لا ... داز بالموطور وسرقو ...

سلمى : ويلي ويلي الله يعطييييييه كسيييييدة .... واش عندك الفلوس فصاك ؟؟؟؟

قسم : عندي فيه وراقي وتيليفون .. ماتخافيش دابا نرجع كولشي ... مهم يطيو يحلو ليا طموبيل ... نقدر ناخد تيليفون ديالك نصوني به عليهم ؟

سلمى : ااه ااه الله اودددي ....

ناضت للبيت جابتو ليها ..و قسم دخلات الرقم واتصلات بالكارد

قسم : ( شافت عند سلمى ) لادغيس آسلمى !! نسيت عليها ... ( عطاتها قالتها ليه ) ماتقول والو لبابا ولا لحتى شي واحد ... داكوغ !! يلاه هانا كنتسناك ...

قطعات وعطاتو ليها ..

سلمى،: ناااري سمحي ليا اختي بزااااااف .. بسباابي وقع ليك هااادشي

قسم : لا بالعكس ماتقوليش هاكا ... بقى فيا غير تيليفون حيت كنتسنى اتصال مهم ... مي يخلف الله يقدر يكون هادا لي خداه محتاجو كتر مني .. .. الوراق دابا نرجعوهم بالكوپي .... الوغ ماعلينا ( شافت فيها ) هضرتي مع خوك ؟؟؟

سلمى : لا مقددرتش .. مهضرش هو معايا كاع .. ماعرفتش مالو .. ملبارح غير ساااكت ومكيهضرش .. بغيت حتى نشد شوية بخاطرو ....

قسم : داكوغ .... حاولي تقربي منو .. بالعكس خودي هاد الفترة لصالحك وشوفي مالو .. خليه حتى هو يحس بأخت فجنبو .. ربما هاد الوحدة لي كتحسي بها نتي حتى هو كايحس بها ... كيفما نتي متكرهيش يجي يتقرب منك ويسولك مالك وشنو ضارك كدلك هو ...

سلمى،: خفتو يقمعني ولا مايبغيش نتي راه معارفاش عقليتو كيفاش دايرة شاد على راسو بزاف ومكيشاركش اش كايضور فراسو

قسم : اكيد الرجال مغايكونوش بحالنا حنا لي كنضعافو دغيا ... مغايبغيوش يعاودو ليك ولا يشطنك ولكن لابقيتي مصرة تقدري تعرفي .. حيدي منك هاد الخوف راه خوك واش غايقتلك ؟ بالعكس نتوما لي عند بعضياتكم خصهم تكون بحال الصحاب ...

سلمى : راه نتي ماعارفاش كيداير مكنزعمش عليه .... فشكل .... نااااااري شديتك بالهضرة وماحطيتيش تاكاس دالقهوة ..

قسم : ( شداتها ) لا لا شكرا تانا ديجا فطرت ... مرة اخرى .. خليك كالسة معايا على ما يجي الكارد ....

سلمى : لا اويلي والله حتى تاخدي شي حاجة ... المادموزيل كاملة جات عندي وتمشي هاكاك ..

مشات لكوزينة وقسم بقات كالسة .. كتفكر فتيليفون بقى فيييها ...عطات وعد لجود متفرطش فيه لانه هدية من عندو ...والاهم خافت يتصل ومايلقاهاش وهي كاتسنى اتصالو على احر من الجمر ....

بدات كتحط سلمى الفطور ضاحكة بالفرحة ... وكبات ليها كاسها ....

سلمى : غير قبلي عليااا

قسم : منسمعش منك هاد الكلام .... ( شربات من كاسها ) مممممم لذتها فشكل .. بحال قهوة لي كتصاوب جدة .. بالقرفة ياك ؟؟؟

سلمى،: ااااه هي لي كتعجبني .. اما خويا خصو ضروري نقطرها ليه باش يلاه تگر فيه يحيد تغوبيشة هههههه ...

قسم : هه ... فين هو دابا مكاينش ؟؟

سلمى،: اويلي كون فايق كون ماقديت حتى ندخلك .... غير غايحشمني معاك ... راه ناعس مغايفيقش دابا

قسم : هه داكوغ .. دونك حتى انا خصني نمشي باش ماندير ليك شي إحراج

سلمى،: لا لا عفاك غير خليييييك مزال حتى يجي لكارد .. راه مغاينزلش مخدماش ليوما ... الاحراج انا لي غايدار ليا معاك ماشي نتي لي ديريه اويلي حااااشااا ....( مدات ليها ) خوووودي ماكليتي والو ...

قسم : ( عضات منها ) ممممم لذيذة الله يعطييييك صحة ....

بقاو كالسين تاصونا تيل دسلمى

سلمى،: هادي داك نمرة واقلة جاو ...

قسم : آلو ؟؟ داكوغ خليكم حدا طموبيل انا خارجة ....

عطاتها تيليفون ووقفات ..

قسم : شكرا بزاف على الفطور كان لذييذ ....

سلمى،: اويييلي مرحباااا بك كون عرفتك جاية كون درت كتر من هاكا ... والله مزال لدابا اختي مامتيقاش الى هاديك لي كنفطر وهي حدايا فالمجلة دابا كالسة وكتفطر معايا ديال بصاح ( عنقاتها ) شكرا ليك حيا تفكرتي عيد ميلادي فرحتيني بزاف ... ربي يفرحك حتى نت .. وغانبقى حياتي كلها ممتنة لداك نهار لي تعرفت عليك فالمجلة .. ووليت فان ديالك

قسم : ههه (رونات فشعرها ) .. يلاه خرجي معايا تاخدي لي كادو ديالك ..

سلمى : مكاااانش عليك تعدبي رااسك راه غير مجيتك اكبر كادو

قسم : شي حاجة بسيطة وصافي تفكريني بها ...

خرجو للدرب عند الكارد ... وسلمى بغات طير بالفرحة على لي كادو .... ودعاتها قسم ومشات وسلمى دخلات بزربة لدار باش مايشوفها شي حد وخباتهم فبيتها كتشوف داكشي والقلوبة فعينيها .... خصوصي ملي لقات البارفان من مارك لامار فلاور مابغاتش حتى ترش باش متساليهاش ...يلاه كتشوف مع ليبواط لوخرين اش فيهم وهي تسمع خطواتو وخبات داكشي بزربة فبلاكارها وخرجات مبتسمة لعندو وهو على عادتو كايصبح مغوووبش عاااقدهم ...

سلمى : خ خويا .. صباح الخيير ...

مردش عليها كايشوف لطبلة

اصيل : شكون كان معاك هنا !!

سلمى : ها ؟؟ أء ... ح حسنى .. جات عندي حسنى ...

محكرش ديجا معندوش الخاطر وقرب لطبلة وهي ضربو شي ريحة لنيفو .. وتكى مطلع راسو للفوق

اصيل : من امتى حسنى ولات ترش بحال هاد روايح !! ...

سلمى،: ها !! م .. منعرف ....( كتجمع الكيسان لي شربو فيهم بزبة ) ...

اصيل مصغر عينيه يلاه غايعاود السؤال ديال شكون فطر معاها ... هو يصوني ليه تيل ...

اصيل : واخا انا جاي ...

شربها فجغمة داك القهوة وخرج وسلمى كتسناه غير امتى يخرج تمشي تكمل تقلاب فليكادو ....

دار القب ديال القبية فوق راسو وخشا يدو فجياب على عادتو كايتشمى خاشي راسو فالارش مكيشوف فحتى شي واحد ..ديجا مكايحمل حتى شي واحد فهاد الدرب وحاقد على كولشي ... تاوصل للقهيوة لي كايكلس فيها وجر الكرسي كان تما ديجا انور كالس ...

اصيل :( باقي صوتو مبحبح بالنعاس وكايجبد على لحيتو كايمشطها ) مالك اش كاين ...باقي حتى مابردتي عضامك داخل فشي مشكل تاني ... غانبقى انا كنحل غير فمشاكيلك ولا شنو ....

انور : اودي انا مشاكلي كنديرهم على قدي ... المشكل لكبير هو لي دار الخوادري هاد الصباح ... تفكني غير فهاد اخويااا عمرني لابقيت نصدعك مزال .. عارف معنيش من غيررررك...

اصيل : اش واقع !!

انور : راك عارفو المسخوط منهار خدا ليه عمي داك المطور هو داير عليهم صعصع هنايا .... عيت معاه بالهضرة والا بغا يسمع ...

اصيل : باقي مابغاش ينوض يعري على كتافو ....

انور : اودي عييييت معاه .... المرصى قالك هو متجيش معاه معول غير على رزق عباد الله ..

اصيل : الشماااتة ....

انور: دار لينا مشكل ديال بصح اصاحبي .. سرق شي صيكان صباح و خلا تيليفونات عندو .. شافت الخوادرية واحد تيليفون فيه تصويرة دشي وحدة قالك معرووفة ... باها واااااصل ... والصاك باينة كان عامر بوراقها ديلمو مالقاش فيه الفلوس لاحو .. الى مشاو اصاحبي حتى شدوه مشا فيييها ...

اصيل : زگي ... زگي معايا الله يرحم باك وشرح ليا نقطة نقطة ....

انور : خون اصاحبي صاك دشي وحدة ملعععقة ... الخوادرية كتعرفها قالك باها مجهاااد فالبلااد اصاحبي راه فدقيقة يطلعوه ... برب تايمشي فييييها .... ( لاح تيليفون ) ها تيليفونها ... شافت الخوادرية التصويرة فالشاشة بدات كتحط الويل بالعرارم ....

اصيل : ( بدا كايضور تيليفون فيدو وكيصغر عينيه فالحجر لي مخدوم بيه ) الالماس هدا اصااااحبي ....

انور : وااااايلي !!!!

اصيل شعل الشاشة وهي تبان ليه فليكرون وعندو الكود ... باين غير وجهها ضاربة فيه الشمممس وعينيها لي بحال الغزاااال ... ووجها قال للالماس راك مساوي والو ..

انور : والله ماعرفت اصاااحبي اش غاندير تلفت.. قلت نطفيييه راه مقبيلة هو يصوووني ... و الى طفيتو خفتهم يعرفو دبصح مسرووق .. قلت نمشي نلوحو فشي بلاصة وصافي اش باليك .. راه غايمشي فيها المسخوط ... ( شاف عندو لقاه مكيردش عليه كايشوف فالتيل ) وابناادم ... ( زعزعو ) أصييييل ....

اصيل : ( شاف لعندو ) وي معاك .... ( حطو على طبلة ) ...فين هو صاك

انور: لاحو اصاحبي قاليا لقا فيه غير الوراق ....

اصيل : ماعقلش فين !!

انور : لاحو فالبركاصة .. ملي مشينا نقلبو لقينا هزوها ....

اصيل : راه معندهم منين يطلعوه .. ياك مشافتوش ؟؟؟. فين سرقها هنا فالدرب ؟

انور : غير هنا .. وحدة بحال هادي عندها الذهب ولا منعرف اش قلتي فالتيليفون طاح ليا العجب اش غاتجي دير عندنا ....

اصيل : كون غير تلقاو ليها الصاك رجعوه ليها .. الى كان فيه الوراق ديالها راه حشوما كاع....

انور : واش لقيناه حنا ؟؟ .... دابا عندنا غير تيليفون .. خلاهم فدار حتى يبعيهم وهي طيح فيهم الخوادرية ملي كانت كتخمل ....

اصيل : مرررىيييض حتى هدا مع كرو ...

انور : اشنو نلوحو تيليفون؟؟؟؟ يبان بحالا غير طاح ليها لا؟؟

اصبل : فاطر بالبيض خامج ولا مالك ... السيدة مگريسيها قدام عينيها وغاتفهم طاح ليها ؟؟؟؟ كيدرتي ليها

انور،: ماعرفتش تلفت اصاااحبي ......الى شدوه غايمشي فيييها .... راه باينة واصلييين غايطلعوه غايطلعوه .. وتامن صاك مكاينش .... وعلم الله هاد تيليفون شحال ساوي ....

اصيل : كديرو اصاحبي المصايب قد راسكم ....

انور : واشنو دابا نلوحوه وصافي !! .. حسن مايتشد عندنا ماتعرف شكون گريساها قاليا ماشافتوش كان داير الكاسك ..

اصيل : والموطور

انور : راه قاليه الواليد يديه لدار عمي يخبعو تايفوت هادشي ....

اصيل : تاحييييييوانيت بالله ..... غايبقى يتهز حتى يجيبها فعضامو ...

انور : شوف نتا مغايزعم حتى حد عليك ..عارفينك شاد تيقارك ..خبعو عندك الى بانت شي حاجة ولا عرفوه نترانجاو معاهم ونردو ليهم تيليفون بالتي هي احسن ....

اصيل : واش دابا كتقول الناس واصلين .. غايهمها هي تيليفون ! .. راه الى تشد غايكونو باغين وراقها .. اش غايديرو بهادا ...

انور : تخربقنا بالله ... لاديتو معايا غايدوز معاه يبيعو هداك راه مكيحشم مكيخاف ...خليه عندك نتا ....

اصيل رجع شعلو وهي تبان ليه تاني فشاشة وتنهد .. هو يشوفو شي كرسي تجر وهزو دغيا دارو فجيبو كان واحد ولد حومتهم.. واصيل ضور راسو لججنب مكيحمل حد....

- جاكم الخبااار اش طرا ليوووما فالدرب .. شكون جا عندنا

انور : شكون !!!

- قالك دخلات واحد للفيرااااري مجهداااااا ... جات بنت داك الميليارديير .. راه تتنسالي سمييتوو ...

انور : ( سرط ريقو وشاف عند اصيل ورجع شاف فيه وقرب الكرسي ) ااهاه ... و.. وجات بوحدها

- وااايه بوحدها .. الخرا ديال الضحك قالك العيلات فدرب ماعرفوهاش كل وحدة منين كتهضر معاها ههه ...

انور،: وعلاش اش جابها لهنايا

- وقالولك تشاورت معايا .. پاركيت ليها الحديدة انايا .. انا غيى وصلني الخبار .... فرقات على البعالك دالحومة قالك النفاخات هههه ..وكايعاودو قرطااااااسة آلخوا غا بنت الكاااردشيان وصافي ....مقوووووودة ...

انور : احم .. قوليا .. ب باها شكون ؟ ز زعما واش واصلين .... يدهم طويلة فالمخزن ولا لا

- وصاحبي باها شكون مكيعرفش هداك راه ميلياردير معرووووف ... داك لي عندو الحراسة الملكية .. راه تقيسو تنوض ليك الدولة كاملة آوليدي ...

انور : ( بزق داك الما لي كان كايشرب ) وااااايلي ؟؟؟؟؟؟؟

- وااااايه .. راه فين ماتحرك عندو الكوبطير فوقو من عند الدولة ... كولشي كاايتصور ...

انور قرب يسخخف كايشوف عند اصيل .. واصيل داير فيها مبرد هو ديجا طبعو كالم ..

انور : واش كايدير هاد باها كاع

- اش عرفني انا .. مهم ملياردير كبيييير خااااانز فلوووووس وهاد بنتو لي جات كايعاودو عليها غير صباط لي كتلبس يشري حومتنا بيها بالبرگاگا ديالوها ....

انور،: احم .( تقاد فالگلسة ) .. آخا لمهدي ... د دابا .. لنتفرض حنايا كون جات وگريساها شي واحد ..... اش غايديرو ليه

- وااااايلي واااايلي ... يحسنو ليه *لاويه بلا صابون ... واش عارف شكون هي ولا ماعرفش ..

اصيل : ( ناض ) يلاه انور حتى نتشاوفو ....

انور : ا اصبر .. صبر خليك اصاحبي

- واخليك معانا نشربو غير دكيكة ....

مجاوبهوش ومشا ديريكت عند واحد المحل ديال التيليفونات كان مولاه اخواني ومعرفة ديالو وفهمو اش بغاه يدير ليه ...

- اه دابا بغيتي نلغيو الخدمة د GPS ؟؟ .. ولدن راك عارف خصني نديكوديه وغاياخدلي شوية دالوقت .. تالعشية هاكاك اجي موراه.. يدي دابا فواحد البيسي مروني

اصيل : لا معنديش الوقت .. شوف اش غادير دابا ...

- وايلي ! ... هانتاا كاين حل .. خصني نحل ليه مصارنو ... ولكن قول ليا .. ( كايضورو فيديه ) هاد تيليفون مجهاااد راه اخر ماخرج فالسوق ... واش مغاتقوليش شكون هدا لي طاح فيديه ؟

اصيل : دير غير اش كانقوليك دابا

- كون ماكنتيش صاحبي وكنعرفك داخل سوق راسك ومغادخليش فشي مشكل راه مانخدموش ليك ... راك عارفني معنديش مع هادشي دالحرام ...

بقى واقف عليه حتى فكو كامل وعاود جمعو وشعلو ليه رجع كيف كان ...

- هانا آبا اصيل ...

خداه اصيل وزاد للدار لقى سلمى كتسيق وطلع ديريكت لبيتو ... جبد كارو كايكمي .. وشاعل داك صورة قدامو كايشوف فيها ... بانليه تيليلون غايطفى من الشارج هو يجبد تيليفونو صور داك الصورة ديالها لي فالشاشة ... هو يوصني ليه فيديه بنمرة مسجلة ب My lovely ( محبوبي ) ... قال مع راسو وحدة بحال هادي راه باينة عندها مولاها .... رماه على السرسر كاايصوني ونعس على ظهرو كايكمي جوانو وكايشوف فداك الصورة ... جمالها طبيعي خلاب وعينيها كايبانو فالشمس قصة اخرى فالجمال ... ماعرفش علاش حاس براسو اول مرة كايشوف هاد نوع من الجمال البسيط فنفس الوقت كايحس انها نجمة بعبيييييدة وجوهرة غاااالية وباهضة الثمن ....صالحة غير لمشاهدة من بعيد ....

عند قسم ...

وصلها الكارد هو لي كان صايك .. فتح ليها الباب ونزلات ورجعات ضارت عندو

قسم : بلا منوصيك ... تبقى بيناتنا حتى نقولها ليه انا بطريقتي ...

خلاتو وطلعات لدار دخلات ديريكت لجناحها هزات تيل جديد وركبات نمرة جديدة وبدات تتصل فواحد الرقم حتى جاوبها ...

قسم : شكير ... جي عندي لدار دابا ... لا دابا ...

قطعات عليه و نزلات للتحت كالسة فجردة كتنساه حتى دخل ديجا كان غير تما فالمنطقة .. هو لي مكلف بالامن ديال داك المنطقة ... وكتيق فيه بزافف .. ديجا تزاد عندهم وكبر معاهم و باه هو اليد اليمنى ديال باباها فالقديم ... وملي خدا تقاعد ديالو خلفو ولدو ... قدم التحية وكلس بلباسو الاسود والكيت فودنيه

شكير : وي مادنوزيل قسم آمري

قسم : شكير عارفني شحال كانتيق فيك .. ومعزتك من معزة عمي عادل ... غاتقضي ليا واحد الغراض بالسرية التامة ،..

شكير : ياك لاباس

قسم : مشيت لواحد الحي شعبي وتشفر ليا صاك

شكير : واااات ؟؟؟ بلا متعليمنا .. مشيتي بلا كارد ؟؟ عارفة سي اسد شحال صارم فهاد المسألة

قسم : عارفة ... انا مابغيتوش يعرف بشي طريقة لي يتخلعو بها ويبقى داير عليا الحصار كتر من جود ... عافني كنكره بحال هكاا ...فنفس الوقت مابغيتش يخلعو داك الولد .. الله يحسن العوان يمكن قلة الشي لي خرجاتو لداكشي ... انا مهامنيش هادشي دابا الله يخلف فيه .. بغيت غير تخدم ليا وراقي .. لاكارط ناسيونال .. باسبور .. لي كارط بونكيغ وليكارد كود ديال لبيان ولي كوفخ .. والبيرمي كارط كريس كولشي مشاليا تما ...

شكير : مي مادموزيل قسم راك كطلبي شي حاجة صعيبة .. الادارة ضروري غاتعلمو ... وانا مايمكنش نخبع عليه حاجة بحال هادي غادي ينحرني راكي عارفة لي كاين ...خدمتي هي خدمتي ...نكون ودنيه وعينيه

يلاه كتهضر معاه هي تبانليها طموبيلتو داخلة وعضات على شفتها

قسم : ( كتهضر وعينيها على طموبيل ) عرفتي شنو ... صافي غير سير ... انا غانشوف كيف ندير ... بدا تخدم ليا الوراق وتجمعهم .. ملي تحتاج شي توقيع ولا شي حاجة قولها ليا ... لي كود ديال ليكارط ديالي كااملين تعطيهم ليك صفاء ...

ناض مشا وهي قربات عندهم ضااااااحكة باش متبانش عليها ...كانو عاد نازلين من طموبيل ....

قربات عنقات ماماها بججهد وباستها ....

قسم: الحب دياااالي كييف نووور .. هانا تاااااني ( كضورها) نتي مكانش خاصك جود ... كان خاصك غير خريجة مع بابا ودايرة السبة بجود ....

لامار : ههه ( شافت عند اسد ) يمكن آه ... هو لي نسااااني حتى خلاني نتوحشو ....ونقلب على السبة ههه

اسد : ( قرب عنقها )ياك اشنيولة .... منعرف شكون لي ولد ونسا لاخور ...

قسم : خرّجتي ماما وبايتين كاع على برا .... اوا جا دوري تخرجني حتى انا .. قنطت وديجا عندي الفواياج تالجودي ....

لامار :ونتي لي مابغيتيش تمشي معانا

قسم : ( حلاتت فمها ) انا لي مابغييييتش ؟؟؟؟ياااك ابابا ياااااك

اسد : ههه .. علاش انا لي قلت ليك لا ؟؟؟ ( باسها ) ليوما ديال بنتي فين بغات نديها .... مامشتيش لخدمة ؟؟؟ ...

قسم : احم اا ...( بدات كتشوف تقلب الموضوع ) مالكم صابحين زوينين بحال هاكا .... هانا هااناااا على الگري كيفاش جااااك .. ابابا غير غادي وكتزيان ..( شافت عند لامار ) مكتغيريش عليه ...

اسد صغر عينيه وشاف عند لامار ورجع شاف فيها

اسد : قسووم

قسم : آلحبيييب بابا ....

اسد: شنو درتي آبنتي هم ؟....

قسم : ( وسعات عينيها ) ا اش غانديير ... و والو ..

اسد طلق من لامار وقرب عندها عنقها تحت يدو زايد بها

اسد : دابا ابنتي قلتي بابا وماما توحشو المشاكييل شحااال هادي مشافوهم ودوزو نهار زوين اجي نهجرو ليهم ياك ...( زاد هبط راسو لعندها ) غيير بيني بينيك آلحوب ... ماماك مكتسعمش ... فكل الحلات غانعرف اش واقع .... قولي ليا نت ... حسن منعرف من واحد آخور ....يلاه ابنتي ....

قسم :بابا يهديك الله .. هه و . اش درت . مدرت والو .. جوود اتصل

اسد : جوود اتصل ... وقال بلي قرب يضرب عشرين أپيل مكتجاوبيش عليها حتى ظنيتك فالخدمة ونت غير هنا ....شنو شغلك لدرجة متجاوبيش على ابيل كتسنايها ....

قسم : حللف ؟؟ عييييط ؟؟؟؟؟ ياك هو لاباس ...

اسد : هو لاباس ( شاف عندها ) ونتي لاباس ...

قسم : لاااباس .. و ونتا

اسد : انا لااباااس ( ضار براسو عند لامار لي تابعاهم) ونتي احبيبتي لاااباس ...

لامار : ؟؟؟؟

اسد : ( رجع عند قسم ) تاهي لاباس .. يلاه هضري ابنتي قبل مايولي حتى شي واحد ملاباس ....

قسم : فففف ... بابا .. ماشي شي حاجة مهم حتى ندخلو ونقول ليك ... راه مابغيتش تسمع ماما ...

اسد : ممم داكوغ .... ( وقف تاوصلات عليهم لامار وعنقها )

قسم : هاد نهار ديالي ماااامفاااكاش ... دوزو كامل معايا .... ( جبدات لامار ) وطلقها خلاص ياك نهار كامل وهي معاك ... ماشبعتيهاش

اسد : ( جبدها لجنب لاخور ) رصاااي ..مغاتحيديش منك هاد الغيرة نت ...

لامار : نتي لي مابغيتي ديري لا صحابات بحال ناس لا علاقات .. واش جود غايدوم ليك .. جود غايلقى لي تجيه على الگانة ينساني تانا لي مّو ... قدس هاهي صغر منك وعندها صديقات وعلاقات ونتي والو يابنتي مالك

اسد : بديتي عليها تاني

قسم : غير خليها ابابا راه بدات تشرف و تنسى الى هاد الهضرة كاتقولها مية مرة فنهار ...

لامار : دابا انا شررررررفت .. شرررفت ياااااااك

اسد : ( لاح عليها قسم وزاد قدامهوم ) انا ماقلت والو ...

بدات قسم كتضحك وتهر فيها تادخلو لدار ... طلعات لامار تبدل واسد جر قسم للبيرو ... وجلس على،الحرف ديال الكنابي جلسو المعتادة ... وهي كلسات قدامو كتفرك فيديها بالتوتر منين غاتبدا ليه ...

اسد :يلاه كتسمع ... شنو درتي

قسم : بابا ... مغاتعصبش ياك

اسد : .. دونك هادشي لي درتي كاايعصب

قسم : ففف .. مماشي بزاف .. نتا عارفني ماعنديش مع الكدوب والى كدبت كنتفرش دغيا ... خصوصا معاك ... انا نجيك لصراحة ...

اسد : يلاه

قسم : د د ابا ... نتا عارف كنعطي هاد السيمانة المنح ديال كلية الطب تحت اقتراحك ... و . وجات البارح عندي واحد البنيتة .. وانا لي استقبلتها عندي ... وبقينا كنهضرو وكتعاود ليا سبب انقطاعها عن دالراسة ... ولقيتها ماشي غير مجرد طالبة بغات منحة .. لا هي فااان كبيرة كتبعنا وكتعرفنا كاملين .. قالت ليا بلي فأخبارنا كتغطي داك النص لي عندها فعائلتها وفالحنان والدفئ الاسري .. والديها ميتين على ماقالت ليا يمكن .. وقالت ليا بلي كتمنى تاهي شي عائلة بحالنا .. مهم شفت فيها نتا وماما وعمامي .. وكاع داكشي لي عاودتو ليا شفتو فيها .... بقات فيا بزاف .. خدات المنحة وانا نشوف فوراقها بلي برذاي ديالها اليوم ...

اسد : عرفت خديتي لي كادو .. وخديتي حتى من عندك ماماك .. قلت لشي صديقة عادي نت حرة ... دونك ليها

قسن : ياس .. ليها ... ومشيت باش نديرها ليها سوربرايز ... وو .. ومشيت لكاغتيِّي فين ساكنة،... ه ه و( كتلعب بعينها ) حي شعبي بزااااف ..

اسد : بوحدك ؟

قسم : ( عضات على شفتها ) آه ...

اسد : وانا شنو كانقول على خرجات بحال هادو ؟؟

قسم : ي يمشي معانا الكارد ....

اسد : اوا ؟؟ ديما خصكم ديرو عكس كلامي حتى تجيبوها فراسكم .. وتجيو تبيضو وتولدو عليا انا الهضرة بسييف ياك .. عادي عادي ... راك حتى نت من ولاد الاسماعيلي وهادشي معروف عليكم منذ الازل ... يلاه كملي اش وقع ليك تما ... راني عارف فين ماندوز وقيتة زوينة نهجرها مع ولادي الله يرضي عليهم ...

قسم تنهدات وكملات

قسم،: بابا راه قلت غير خرجة عادية منحتاجهومش ....حشمت نمشي لتما وهوما تابعيني بحالا ماعرفت شكون انا ... ودوك الناس غيرر بسطاء اي حاجة كتخليهم يستغربو ... نتا عارفني ابابا مكنحملش يحس شي واحد بالاستغراب من جيهتي

اسد : دابا كملي .. اش وقع منبعد

قسم : م .. موهيم ... ملي حطيت طموبيل ونزلت نقلب على دارها ... ( كتسرك ريقها ) داز مطور ... و خدا ليا الصااك ... ( وسع عينيه ) م مدار ليا وااااالو انا .. خدا غير الصاك .. والله مآداني ....

اسد : شفتيييه ؟؟؟؟؟

قسم،: نووو .. مي بان ليا غير ولد صغير من ظهرو ....

اسد : متأكدة موقع ليك والو ؟؟؟؟؟؟

قسم : لا ابابا والله بقيت واقفة فبلاصتي .. اول مرة نتعرض بحال هاكاك بقيت غير مستغربة ...مفهمت والو ... حسابتني فلول كايضحك معايا هه

اسد : شنو كان عندك فصاك

قسم : وراقي كاملين د .. ولكن متخافش هضرت مع شكير و و راهم غايخدمهم ليا ...

اسد : ( تنهد كايدوز يدو على وجهو) كاديرو غير المصايب.. عطيني لادغيييس يرجعو ليك صاك عطيني

قسم : بابا صااافي مكاين لاش .. الوراق دغيا غانخدمهم ونديكلاري بلي طاحو ليا .. علاش غاتخلعوه صافي قلة الشي لي خرجاتو ....

اسد : قلة الشي كتخرج بنادم يعري على كتافو .... ماشي يسرق عباد الله

قسم : ( وقفات عندو ) بابا عفااااك .. دير ليا خاطري هادوك الناس بساااط بزاف وباركا غير داكشي لي عايشين والهم يالهم ...نبانو عليهم حتا بنفودنا .. حشومة كاع .... ديورهم حتى البيبان مامسكدينش دارين الامان غير لراسهم .. قلة العقل وباينة صغير ... الوراق غانعوضهم صافي غير خليييه ... عفااااااااك ... ديجا نسيت ولقيت لبنت وخدات لي كادو ديالها فرحااااات بزاف مسكينة .. صافي ورجعت عيطت عطت لكارد وجيت لدار

اسد تنهد ومشا كلس فالبيرو ..

اسد : مهم الحمد الله ماوقع ليك والو نتي بعدا .... المرة الجاية قسما بالله وتحركي بلا الكارد مغاتبقى ليك شي طموبيل ....

قسم : ( مشات عندو ملور عنقاتو وباست على راسو شافتو شعل ) صافي كون هاني ابابااااا ... والله منمشي بلاا بيهم ... غير دير ليا خاطري ونحس بلي حتى انا كلامي عندو قيمة عندك .... ماتدير ليهم والوووو .... وبلا مانخلعو والديه ولا ميمتو ... صافي ابابا ؟؟؟؟

اسد : راه بحال هاد الاشكال ابنتي خصهم بترباو .... باش يعرفو ان هاد الطريق مكتلسكش .... نتي يقدر مشاو ليك غير وراقك واحد آخر غايمشي ليه رزقوووو كااااامل ...

قسم : عاااارفة .. وباركا غير الخلعة لي غاتكون .. ولكن عاود الله يحسن العوان ... متخلعهمش ابابا عفاك

اسد : وانا لي خلعو ليا بنتي ماشي مشكل ؟؟

قسم : متخخلعتش ها انا صاااافا .. وراق غانعاود نخدمهم ...صافي الله يعفو عليهم ويحسن عوانهم ....

اسد : هادو بحال هاكا مكنشفقش عليهم انا ...كايبقاو فينا غير دوك الوالدين ....انا قلة العقل ديال الولاد هاهوما عندي حتى انا ....

قسم : مممممم ( كضحك ترطب ليه الجو ) على ماشي حتى ماماااا جات عندك على ود تطيييرررك نتا كامل ههههههههه

اسد : ياك كنقوليك متعاوديش هاد الهضرة

قسم : هههه صافي منعاودش ههه ... وانووض خرررررجني ... يلاااه وفي بوعدك

اسد : يلاه دخلت ابنتي ... ( شاف لسعتو ) واحد الساعة وانا معاك ... ماتمشي تالشي بلاصة ..

قم : لا غانكون غير فبيتي غانتصل بجود ...( جات ماشية ورجعات ) ااه بابا عفاك هضر معاهم يحولو ليا الرقم ديالي لهاد الكاغط سيم ..

اسد : اش جاب مايفكك من جود دابا ... مكيحملش لي يفرط فليكادو ديالو ... الى مرجعتوش انا غايجي يرجعو هو

قسم : مافرطتش راه ماشي لخاطري .... جود نعرف كيف نقنعو ....

باستو وخرجات لجناحها وخدات رقمو وبدات كتتصل بجود ... وصلات لتلاتة دليزابيل عاد جاوب ...

جود،: ياس ؟؟

قسم : جووووود ... اخيييراااا سمعت صووتك

حود : قسم؟؟؟ اش هاد نامبر ؟؟ فين كنتي عيت نصوني عليك

قسم : راه ف ... .. ضاعليا تيليفون ... خليك منو دابا ... نتا واش مكتححشممشش ..عاطيني وعد نخرجو ومشيتي بلا خباري هادي هي ختك ..

جود : جا على غفلة اقسومي والله .... مكنتش داير بحسابو حتى علموني بليل بلي غايبداو تداريب ... نجي نعوضها ليك ...

قسم : اش قالوليك ماما وبابا ؟؟؟؟؟ خاصمو ؟؟

جود : مممم ... لامار مسمعتهاش بالبكا راكي عارفة كيف دايرة .... والواليد ماعجبنيش هضرتو ... مارتاحيتش لكلامو

قسم : قسح معاك ؟؟؟

جود : ياريت ...( كايشرب قهوة ويهضر ) هضر ببرود ... وقاليا تحمل مسؤوليتك من جيهة لامار ....

قسم : شفتي ؟؟؟ ودابا رد بالك على ود ماما ... راه لاوقعات ليك شي حاجة غاتسطى . دير بناااقص ورجع عفااااك اجوووود

جود : قسم ... راه حلم حيااااااتي هدا ....

قسم : ونتا راك هو حياتنا ....

جود : متخافيش ... راني كنشوف طبيب شاك جوغ ... ومغاندخل لراالي حتى نشوفو ...

قسم : ( دمعو عينيها ) نجي عندك اخويا ؟؟

جود : لا غير خليك ..... هاهوما هنا هاد يأجوج ومأجوج معايا ..... طاحو عليا بحال الرعاد

قسم : ههههه سلم عليهم ...

جود : دارو مزيان ملي جاو كنت قنطان وهاز الهم من جيهتكم ....

قسم : كون تشوف حنا .... الى بغيتني نكون فجنبك غير ميساج منك تلقاني حداك اخويا ...

جود : عارف لي كاين ... غاتفرجي فيا ياك

قسم : غانقنعهم فالدار نتفرجو كاملين عطينا غير فين غاينقلو .. و امتى ....

جود : حتى لاحد ... غاتكوني جيتي من الفواياج ....

قسم : مزياان ... يلاه احبيبي تهلا فراسك بزااااااف ... ومتنساس الطبيب .... رد البال وفكر فينا وفماما الى لقيتي راسك عيان متترككبش يمشي سباق ويجي واحد اخور نتا لي مغاتعوضش ....تواعدني ؟

جود : اكيد .... لافيووو سيسسستا ......

قسم،: حتى انا .....

قطع عليها وهي تنهدات وجبدات بيسي ديالها تلهى فخدمتها حتى عيط عليها اسد ...

اسد خدا دوش ديالو و لامار خرجات دايرين خرجة هي ورتاج و حياة لشوبينغ ...

واسد لبس سبور و داز على بنتو خارجين كاتشد ليه فدراعو بحال لامار وخرجو هو وياها دوزو نهار كامل على برا .... عاد كملوها بسواغي فالريسطو ديال لوطيل ديالهم تجمعو كاملين بيهم خالقين الجو الناشط الضاحك كيف ديما ....

سفيان : حاااجة وحدة بغيت نفهمها ... 6 دسوايع كاملة وسط الشراوط واش مكتملوش

حياة : نو ... ديجا باش تعجبنا لبسة وحدة خصنا ساعة ...

سفيان : وحنا من داك لي صاك كاملين ماخرج لينا والو

حياة : كاااشكوول ...

رتاج : حتى انا خديت ليك واحد الشاپو غزاااال اعدنان ....

عدنان: واقلة راحنا فشهر 7 لا ؟؟؟؟؟

لامار : وي راه اول ماخرجات داك لاماغاك وغاتكون اللول لي غتلبس داك الشابو فالشتاا .. شكون بحالك ...

اسد : وانا مخرجت بوالو ؟؟

لامار : نتا لي جبتها ليك كتعيبها حلفت مانعاود نشري ليك ... دوقك منقدش عليه ...

اسد : ماكتعرفيهش ماشي متقديش ليه ..

لامار ،: نتا كلا عام كدير ليه لميزاجور يلاه كنبدا نحفظ ديال العام لي فات كانلقاك بدلتيييييه

اية : عمي راه داير لي فجهدو يبقى محافظ على الشباب ههههههه ....

رتاج : اجي ماعيطتوش على سارة

سفيان : بلاااااااش .. داك البنت عندها ياسبحاااااان الله مكتبغيش دوز ليا .... سارة وعمران عزاز .. ولكن هي يلاااطييف ...

حياة : نتا شكون كايدوز ليك اصلا ... عادي هاديك شخصيها ياك ماضرتنا فوالو

لامار : راه تانا ماعنديش معاها فواحد الصراحة ههه ولكن سارة كاتعامل قسم وقدس ولادنا كاملين مزيان حشوما نحگرو ليها بنتها ....

قسم : محگرناهاش اماما قلنا غير معندناش معاها .. هي لي مدايرش بلاصتها مكتحكمش حتى فهضرتها

رتاج : بصح مكتعرفش تهضر

لامار : وسبحان الله ثقييييييلة على لقلب معرفت لمن طلعات

عدنان: ( شرب كاسو ) آودي غير لي يطلقكم على النميمة كتعطيوها صليااا ...

سفيان،: ورّكت ليهم غير على البوطونا هوما يشعلو .....

اسد : ماتنوضش تكعدو ؟ ...

اية : عمي .... مغايجيش وسيم هاد الصيف ؟؟؟

اسد : سي غاييجي يسالي غير الامتحانات

رتاج: غايكونو حمقوووو الحاجة مسكينة هه ما حتى بابا مبراااااد من جيهتهم عندو الخاطر .... حتى پيلي غاترجع لكندا ... عندها البرذاي نهار لاثنين ولا التلات واقلة ...

لامار : الاثنين... قيدوها ... عنداااكم تنساوها .. نهار الاحد عيطو ليها ..

اية : الى نسيناها غاتقلب علينا الدنيا ههه ...

رتاج : وايه واش جاب مايرجعها للطريق ...عدنان نوض نمشيو ... فيصل وانس خليناهم بوحدهم...( طلات على اية ) وديجا حتى آية خصها ترتاح دارت الترويض ليوما ...

لامار : اه غانوضو نمشيو تانا عيييت ليوما ....اية حبيبتي حسيتي بشي تحسن ليوما فالحصة ؟

اية : ( هبطات راسها ) مزال مكاين والو امرات عمي

رتاج : دابا يكون احبيبتي كتستجب للعلاج ... طلييت عليهم قبيلة الدكتور شكر بزاف فاالطااقة الايجابية ديالها ...

سفيان :( عنقها ) الحوووب ديالي انا داابااا دير الرجيييلات ومايشدها تاشي وااااحد ( حياة عينيها دمعانين )

عدنان،: راني مواعدها غانلعبو الكورة بجووج ياااك

اية : ان شاء الله عمي شكرا على دعمكم ....

اسد : كايخثك تعاوني بطاقتك ..متستسلميش وديري فبالك كاين العلاج.. (جبد ليها حنكها ) داكوغ لابخانسيس ..

اية : داكووووغ عمو ...

عدنان : يلاه تكككعدو .... ماتقولوش ليونس تجمعنا .. مقادرين على دعاوي ...

سفيان : العكس لي تااابعنا كولو من الدعاوي ديالو ....

اسد : هو لي مابغاش يدخل ...

رتاج : اريج غاتحماق وتجي وهو ماعرفت آش كايتسنى .. حتى ولادو ماباغينش ...

قسم : زياد باغي ... اياد لي معكس ليه كولشي ....

عدنان : ( كايجمع سوارتو ) على شكون لي شيب يونس من غيرو ... راسو حجرة ...

رتاج : بعد ليا من ولد ختي الحنين ديالي هاداااااك نتاااا لي راسك حجرة .. .. ما نتا ولدك عااااد ...كلكم تريكة وحدة كيفكم كيف ولادكم الله يستر .. زيد قدامي زيد ...

كل واحد قصد دارو .... اسد ولامار طلعو لجناحهم وقسم حتى هي .. لبسات بيجامتها ودخلات فسريرها على عادتها حتى كتقرا صفحات من كتابها عاد كتنعس

بعييييدة على السوشيال ميديا والتيكنولوجيا لي ولا الكل مدمن عليها دابا .... . كيعجبها تقىا و تغني رصيدها المعرفي والثقااافي وتضيع وقتها فالمفيد .... شوية لقات ذاكرتها سرحاااات لداك الدرب لي مشاات ليه وتفكرات دوك الوليدات لي تجمعو ليها على طموبيل .. وكيفاش فرحو غير بالبالون!! ... بقات كتفكر شحال ....مكرهاتش تشوف الضحكة على فمهم كاملين ... رغم انها عاشت ذكرى خايبة تماك الى ان ريحة وبساطة داك الحي متنسااتتش ليها ... وهضرة دوك العيلات خلاتها تتبسم .... كيفاش المراة المغربية تخرج نيابها لاشفت الخطر ضاير براجلها ....شي فهماتو وشي لا .. ورحعات تنهدات وشافت للسقف فللخر مدات يديها للفايوز طفاتو وشدات كتابها ونعساااات ....

جا صبااح جديد على امبراطورية الاسماعيلي، لامار صابحة على الهضرة مع جود مفيقاه من النعاس ... كتوصي ووتعاود ... فنفس الوقت كتجمع وراقها فواحد الكاغطابل حتى حسات بقسم عنقاتها وباستها من لور وجلسات كانت لابسة الرسمي وهازة بوشيت فيديها انيقة ...

لامار : صباااح نوورر بنتي .... جود ها ختك غاتوصلني فطريقها ... تهلا فراسك احبيبي .... ورد البااااال عفااااااك اولدي .... شووفي الى ( قاطعها)

جود : وااا هنيييينا ... هضرنا صافي قتليك الى حسيت بالخطر ز لله مغااانكرب فييييها .... وهانا حلف ليك كاع غير خليني ننعس ..سلمي ليا على قسوم .... وباركا ماتعاودي فالوصاية آ لامار

لامار : واش صاحبتك انا ؟؟ كانقوليك عيط ليا مااااما .

جود : واخا الامار ... وااخلييني ننعس ...

لامار : سلم لي على ولوي و سلط(تييت تييت ) قطع عليا المجحوووووم

قسم : عبر علييييييك ...مكتقاضايش

لامار : بلمسخووووط لاخور ... خلاني كنهضر وقطع غابلاتي عليه ....

قسم : زيدي زيدي تكملي فطورك بحال الى جود غايمشي يسلم ليك عليهم ...

لامار : ماعرفت انا لمن خرج ...

قسم : ( كتعض من طوست ) بابا خرج

لامار : مممم .. هو وقدس ...

قسم : علاش لبارح مابغااتش تجي عندنا لرييسطو

لامار.: قالت عيانة ...

قسم : ماما .. تقربي من قدس كتر .... مابقاتش عاجباني هاد اليام .. كنشوفها تبدلات وبحالا ولات كتصرف شي تصرفات بيزاغ وعايشة فعالمها بوحدها ... راكي عارفها انا مكتبغيش تفصح ليا ولكن نتي تقدر تعاود ليك

لامار : قسم .. نتي عارفاني ابنتي مربياكم تاخدو راحتكم فحياتكم ... فنفس الوقت حدودكم راكم عارفينها انا ماندخلش فحياتها او عالمها او استقلاليتها .... حيت تايقة فيكم وتايقة فتربيتي انا واسد ليكم .... عاد راها فسن المراهقة كلنا دازنا من هاد المرحلة كايعجبنا نتعزلو وكايجيب لينا الله تاحد مغايفهمنا لاهضرنا معاه ...

قسم : ممم ... اوا نتمتى....

لامار : نتي لي تقربي منها كيف كسبتي جود تكسبيها .. مالكم دايرين ليا الاحزاب نتي وجود بوحدهم وهي ووسيم بوحدهم راكم خوت لا ...ماولدتكمش انا كروبات

قسم : عرفت .. وسيم لاقية ليه الطريق وتيعاود ليا تاهو كولشي .. لكن هي كل ماقربت منها كتبعد .. ونتي عارفاني مكنبغيش نتعصب معاها .. اما جود راكي عارفاه واخا خويا الصغير واخد ليا مقام بابا فغيابو ...واخا هاكا راه مغانفوتوش بعضياتا راه كيفي كيف جود كيف قدس كيف وسيم ... غر مسألة تباعد فالاعمار وطريقة التفكير لا غير .. وديجا مكنگلسوش مع بعضياتنا بزاف ..و وسيم برا لبلاد وقدس كنتشاوفو اا وياها غير من ليل ليل.....

لامار : والله يخليكم لبعضياتكم ابنتي .....

قسم : يلاه نمشيو وباركا من الماكلة خرجتي على داك الرجيم يلاه .. عندي واحد الحاجة كضور ليا فدماغي بغيت نشاورها معاك فطريق ..

لامار : اهاه واخا .... لينا الشرف اللالة بغيتي تشاورينا حنا ماشي سيهم الروكان

قسم : ههههه وانا كنقول منين جبت الغيرة ديالي ....

هزو صيكانهم ومشاو لطموبيل ... غير ركبو ديمارات قسم ومشاو .. من ديما صوكانها ثقيل ورزين بحالها ... وتالموسيقى كتطلقها صوتها ناقص يلاه مغاتسمع هي ... كدندن ولامار كتقاد فولارها قدام المرايا لي لي فطموبيل ... حتى ضارت قسم

قسم : ماما ... بغيت نهضر معاك فشي حاجة وطلقي خلاص راك زوينة ....

لامر : ممم ..( ردات المراية وشافت عندها ) الله يسمعنا خير

قسم : مهم شي خدمة وشي صدف داوني لبارح لواحد الحي شعبي.. كيشبه للحي لي فيه داركم القديمة ديال جدة ... بحالو تقريبا ...

لامار اهاه؟؟

قسم : مهم ضرت تما شوية وبانليا بزااااف ديال العيالات عاطينها غيى الكلاس فالبيبان ... وكايبانو مزياين فصحتهم .. كنحس عندهم الفراغ وقلة مايدار .... بلاصة داك نميمة فالبيبان قلت علاش متوفرش ليهم شي حاجة يحركو فيها يديهم ..

لامار : كلها فشغالو ابنتي ... تلقايهم بغاو يستراحو غير من شغال الدار حسابتك بحالك .. هادوك راه كايصبنو ويعجنو بيدهم ويطيبو ويسيقو وما خفى اعظم ...

قسم : بحالا شغل الدار داير ليهم شي مصروف؟؟؟ قلت غير شي حاجة يدخلو منها فلوس لراسهم مايبقاوش معولين غير على رجالهم .. هضرو معايا بطريقة شفت بيها بحالا لاخطاهم الراجل غايموتو .. وكيخافو تديه ليهم شي وحدة ... كون كانو بخدمتهم وشخصيتهم مايخافوش عليه هاكاك ... فهمتي قصدي ؟ قلت شي جعية نسوية تما .. ماشي شي حاجة غريبة عليهم .. يعلمو البنات صغار الطبخ بزاف لي مكاعرفش يطيب . الخياطة .. لاكوافيغ ... وحتا لي صال دو سبوغ .. ماعرفتش بزاف دالافكار فراسي ... قلت نشاورك تقدري تكوني كتعرفي عليهم كتر مني .. زعما اشنو كايبغبو واشنو لا ....وشنو يصلاح لهم

لامار : معرفتش اش غانقول ليك .... مي خلي حتى نديرو كلسة مع باباك وناقشو عادشي .... وكتضن جداك تفيدك كتر مني ... راني واخا عشت فيه كنت فصغري معولة غير عليها مكنهز مكنحط .. و مكنداخلش مع جيران بزاف ....

قسم : داكووغ ... هاكدا حسن ...

يتبع....