محتوى القصة
عند جود ...
نازل فالدروج حاني راسو من السقف لقصير ... عريان من فوق لابس غير سروال دجين و سمطة دالبوكسر بيض كتبان وصدرو كامل عريان عامر صباغة و جيهة عنقو تاهي مطلية ... ولابس كاسكيط مرجعها لور باش ميتوسخش ليه شعرو وسروالو عامر صباغة .. تاوصل لعند جوج رجال كانو لتحت كيجمعو ماطيريالهم وكيبدلو حوايجهم ....
جود : اوووودي ماعندي منتسالكم ... يومين هي يوماين ...
الصباغ : لهلا يحاشمنا اسي جود ..
جود بدا يشوف مع الحيوط كانو مصبوغين بطريقة لي بغا ... منهار بدا الاصلاح فهاد الكاراج وهو مباغيش شي اجونص تكلف ليه باغي غير ناس بساط يخدم هو وياهم بلا مايجيب لي يبدا يتفلسف عليه بقرايتو .. قال صباغ عادي نتعاون معاه اما مول الشركة راه واااكل شارب ... وتا موالين الضووو و موالين الما وكولشي جاب غير الناس لي خدامين نهار بنهارو وطالبين معاشهم ....
خلاهم وخرج عند الكارد لبرا لي كان جاب ليه الحوايج وصرف ليه فلوس ايسپيس حيت مكيهزش معاه فلوس مصرفة ... هز عليه الفلوس وحوايجو .... ودخل ليه مد ليهم جوايات ديالهم ...
جود : سمحو لينا على العذاب ...
الصباغ : الله اودي ( حل الجوا وسع عينيه وشاف فصاحبو ورجع شاف فجود ) هادشي كتير اسي جود ...
جود : تا خدمتكم تستاهل بصحة .. حلال ...
صباغ 2 : لا حتاجيتي شي حاجة خراااا نمرتنا هاهي عندك نحضرو معاك فالحييين ... والله تاخدمنا بنيتنا ....
جود : راني عارف لي كاين ..
زاد معاهم لباب وودعهم تامشاو وشيفور وصلهم حيت طريق فين كاين الكاراج خارجة على المدينة .... وهو الكارد قرب عندو هاز فيديه قرعة دالما و جود حيد الكاسكيط ديالو وبدا الكارد كيخوي عليه وكيغسل عنقو من الصباغة ودرعانو ومور ودنيه عاد رجع وقف كيرد فشعرو السارد لوررر وكيمسح تا على وجهو و شعرو كامل كيقطر وضرب بيديه على كتف الكارد بمعنى شكرا ودخل لكاراج بدل حوايجو لبس شورط بيض سبور نايك وتيشورت كحلة ديالو وجلس على واحد كرسي لبس تقاشر وسبادرين .... وكيضور عينو شاف مع الارجاء كانت الارض كلها مفرشة بجورنال .. وباقي صطولا دصباغة تما .. علا عينيه لسسقف وبدا يبلاني بعينيه الديكور لي يقول غذا لصحاب الخشب لي غايجيو .. ورجع هز سوارتو وتيليفونو وخرج ماشي باتجاه طموبيلتو ...والكارد دخل طفا موراه الضو وجمع حوايجو وسد دوك الصطولا دصباغة وسد ليه الكاراج وتبعو ....
مشا ديريكت شاد طريق للدار كيحس فيه الموت ديال جوع .. ومحتاج شي سهرة يقاد فيها دماغو وبدا يصوني على لوؤي .. تاجاوبوو
لوؤي : الميكانيسيان
جود : وافين ... فيها شي حاجة هاد للليلة ولا والو
لوؤي : واقالو لينا غتزوج لا
جود : مال القصاير فيهم غا القحاب ! طالع لجد مي الخرا لراس باغي نشط شوية ...
لوؤي : والله مكرهت .. انا كتر منك .. ولكن راه خووووك واااحل .. لقيتيني مكرررره ..
جود : ياك لاباس
لوؤي : وا تلتيام دالكنازة وحنا حابسين الخدمة جا الواليد خرج لاداط دالافتتاح .. قالك دوزيام جوغ مور الذكرى الاربعينية ديال جدي ..
جود : وااايلي !
لوؤي : وااايه وباااقي بزاف ميدار قلت ليه كون خليتينا تانكملو عاد عطي لاداط قالك هو مامساليش منبعد غاايسافر للاطوغ وتخربيييق ... عرفتي تلفت والله ... واخا نخدم بليل ونهار مغنساليش اصاحبي .. مسحابليش غيزرب قد هاكدا ... حسابتو كنخدمو بالحجر ....
جود : واش نجي نعاونك ؟
لوؤي : مكندير والو دابا غا شاد كرسي وحاضيهم باش يطلقو يديهم الا مشيت غيخدمو على خاطرهم هادو هنا راه ممسوقينش راني غير واقف عليهم باش يزربو مكندير والو
جود : ان شاء الله كووولشي يوجد ... ملي تحتاج شي حاجة عيط .. انا غدا ندوز عندك
لوؤي : مشات ...
قطع على لوؤي وبدا غير كيتنهد مكيحملش يقصر بوحدو وديجا تاسلطان مزال ماجا من اكادير .... كيفكر كيف غيدوز هاد الليلة حيت باغي يدير كولشي الا يدخل لبيتو ويبقى يفكر .. مباغيش يفكر كاع كيحس براسو غيطرطق عليه وكايحرقو .. ماباقي لا يفكر لا يهز الهم خلاها فيد ليام تفكها كيف بغات ... كيشغل راسو باي حاجة .... وصل لللمنطقة باركا ونزل داخل هما يبانو ليه خواتاتو بعيييد جالسين قدام لابيسيين وقسم بدات كتشير ليه بيديها يقرب وهو وزاد عندهم كايضور سوارتو فيديه
قرب لعندهم لقاهم جالسات حاطين قهوة قدامهم ... وتلاح على لفوطوي من التعواج لي كيدير للعنق ديالو عرفوه مدعدع ...
قدس : شوية كنا غنعيطو ليييك
جود : ( حيد ليها القهوة من يديها كيشرب منها ) تووحشتوني ..
قدس : قققهوتي ... طلق ليا قهووتي
جود : رصاااي ( شرب منها وخسر سيفتو ) شششحال تموتو على سسكرر .. حللو هادشي ( مدها ليها )
قدس : ( كتشرب وتجنن فيه بحجبانها ) حيييت قسسستها بيييديااا ...
قسم : واباااااز ... ( شافت فجود وعلات معاه حجبانها بتساؤل ) مالك ! ماعجبتينيش ...
جود : ( علا يديه للخادمة لي واقفة بعيد عليه باش تجيب ليه قهوة وشاف فيها كيحك فشعرو ويتكسل ) والو غير دوزت نهار فالكاراج .. نوعا ما صافا ! فين مكم وراجلها ...
قسم : مكاين تاشي واااحد هاد ساعة .. كاينين غير حنا و وسيم مزال مطلع من البحر ...
جود : فين مشاو
قدس : كولشي رجعو فحالهم ... وبابا وماما مزال مجاو من الخدمة ...
جود : ( تكا مرجع راسو لور ) فاايناااالي ... شوية دالهدوووء ...
قسم : على مغول كيداير ... ( شافت لجنب ) هااا وسيم جا ...
بانت ليها الطموبيل تحطات والشيفور حل ليه الباب لور هو نازل شاد تيليفونو لابس غير شورط عريان من فوق عضلاتو الصغااررر باينين وشعرو الكيرلي باقي فااازك .. ولابس غير صندالة دالنايك ... غير علا عينيه بانو ليه مشى باتجاههم وكلس حدا جود
وسيم : راكم هنا ...
قسم : سورفيتي بالليل مخفتيش ! مواج عاليين دابا ..
وسيم : وراه هاديك هي المتعة
جود : ( شدو من قرفادتو طلع ليه وجهو لعندو ) كمااارتك على شوية غتنسى لياااا
وسيم : ( نتر وجهو ) طططلق .. نتا لي مكنلقاوكش انا راه كاين
قدس : انا بعدا ماشفتكش ...
قسم : تانا ماشفتكش
جود : وااشتي ....
وسيم : وا الدار كانت عاامرة ... مكنتش كنهبط ..
قسم : مكتعرفش بيوتنا فين جاااو ... كنا كنشوفوك ابيل فيديو فاش كنتي فامريكا كثر مكنشوفوك دابا لي راك حدانا ...
وسيم : ( هز تيليفون وكيهضر ) وراه ملي جيت وحنا مشغولييين .. انا براسي مالقيتش وقت نجلس معاكم .. نتوما كاينين بعدا ! ..
جود : ( حيد ليه تيليفون ) وووحط هدا وحنا هنا حداك دابا ....
جات الخادمة ببلاطو فيه قهوة لجود ورجاء موراها .. حطاتها ومشات ورجاء قربات عندهم
رجاء : بووونسواااغ لي مادموزيل ( شافت عند جود ووسيم ) بونسواغ لي موسيو .... تبغيو عشاكم هنا ولا لداخل ...
قسم : بونسواغ رجاء ... علاش فين هوما بابا وماما !
رجاء : موسيو اسد علمنا بلي مغيباتش هنا هو و مدام لامار .. دونك كاينين غير نتوما ...
قدس : هااء ؟؟؟ فييين مشاو ( رجاء غير كتبسم بمعنى راه ماعنديش هاد المعلومة )
جود : رجاء فيااا المووووت ديال الجوع ... بغيت طاجين ...
رجاء : حااااضر موسيو جووود
وسيم : تانا فيا جوع ... بغيت بحالو .. ديال الحوت
رجاء : حااضر بالكخوڤيت كيف كيعجبك .. ونتا اموسيو جود ...
جود : كييفما بغا يكون ... غييير سربيه
قدس : ( جاتها البكية قالبة شفايفها ) ولااا والاااااا ... ماتاكلوووش حداياااا ... ( دبلات فرجاء عينيها ) غييير هاد المرة عافاك !!!!!!
رجاء : نووو .. ديزولي مادموزيل ميمكنش ليا نعطيك بحال هاد الپلا فالعشا ... موجدين ليك لاصوپ ديالك ....
قدس : ( حزنو ملامحها ) فياااا جوع ..
رجاء : راه ميييمكنش امادموزيل
جود : آجيبي لبنت تاكل ...
رجاء : ماشي لخاطري اموسيو .. لاليست ديالهاا لي كتفرض عليا شنو تاكل وديجا راها فالريجيم ...
قدس : ياك ضعاافييييت مؤخرا ... ( شافت فجود ) ياااك ضعافيييت !!!
جود : ( كيشوف فيها ويطلع ويهبط ) انا من نهار عقلت عليك ونت بگرة مكتبدليش !
قسم غير ساكتة وكتشوف فيهم ضاحكة وهي مناكرة مع رجاء تجيب ليها تاهي طاجين
قدس : والله الا حرام عليك ارجاء هوما ياكلو حدايا طواجن وانا تحطي ليا داك لاصوپ فيها جوج معالق ....
وسيم : وحنا اختي كل نهار كنديرو السپور نت ضارباه بركلة سينوغمال يقطعو عليك الما والضو ....
رجاء : نعوضوه ليك الغدا ... ونت امادموزيل راه صفيطات المندجر ديالك لاليست جديدة فيها ليوما غير يوغورت مكاينش عندك العشا ....
قسم : داااكوغ ... عطلوه شوية مزال مافياش جوع ...
ومات ليهم رجاء ومشات وقدس كتشوف فجود وتلعب بعينيها
قدس : تخليوني ناااكل معاكم .. مغيشوفنا تاحد
وسيم : وصاافي الحلوووفة هنينا .. علاش هملتي سبور ؟ واش مابقيتيش كاتمشى للملعب ؟؟؟
قدس : الماتش أجلوه توفى واحد المدرب و اجلوه لينا قلت مانبقى نمشي نضبع لوقت تما .... التداريب نديرهم فالدار ....
قسم : هاء ؟؟؟؟ ياااك كتمووتي على الملعب !!!! العجب !
جود :كايصدعك شي حد تما ولا ؟؟؟؟؟؟
قدس : ( بقات تلعب بعينيها كطلب ااسلامة كيفاش دغيا طلعها ) لاااا .. شكون غايصدعني .. غير داك الكليكة طلعات ليا فراسي .. ملي يعيطو ليا راه دابا نمشي .. الماتش باقي ليه شي شهر و نص موحال يعيطو ليا دابا ....
وسيم : ماتحبسيش لونطخيمون ... غايجي الماتش تلقاي راسك متقلة .... ( ومات ليه بلا و شاف فيهم ) علاش بابا و ماما غيباتو برا ؟ كاين شي مشكل
جود : سي
وسيم : وااايلي!!!! شنو هو المشكل ...؟
جود : ( مد يدو لور طالقاه ورا ظهر وسيم ) هو حنا
قسم :بابا بقى ليه شوية ويتبرا منا هههه ... ندمناه هههههه
وسيم : اجي حقا نتا ( تقلب عند جود وقاد معاه الجلسة ) صيفطات لياا اية بنت عمي سفيان مسج صباح كتقول ليا مبروك على خوك وكدا !!! اش واقع ؟؟؟ امتى نتا قررتي تزوج ؟ قالت ليا غاتزوج ببيلسان راه شوكاتني اصاحبي حشمت نقوليها مفخباريش ! واش خوت حنا ولا شنو ...
جود : انا مزال مافهمت مالكم على هاد روبالة كاملة بحالا راني مجرجر العدول .. يلاه هضرنا ...
قدس : الحمد لله لي نتا لي افتتحتي الجلسة .... جود .. ( ضوراتو لعندها ) كيفاش درتي ليها ؟ انا عارفاك كنا كنذكرو ليك زواج كنتي كتبقى طنز عليييينا ... كيفاش دابا ؟؟؟؟ واش تفكرتي بيلسان ومباغيش تقول لينا !
وسيم : ( ضورو لعندو ) نتا راه مغتجيش وتفكر تتزوج غير هاكاك ! بين ليلة وضحاها ... غاتزوجو ... كيدرتو ليها؟؟؟؟
قدس : ( ضوراتو لعندها ) فوقاش قررتي د بصح ؟
جود : ( شاف عند قسم لي مربعة يديها شادة ضحكتها على هاد الاستنطاق لي دارو ليه ) جمعي عليا خوتك ولا راه غيجيو فداك لابيسين لهيه معاانقين..
قسم : ههههه بينااااتكم .. فك حريرتك مع خوتك باس تعلم تشاور ..
وسيم : دابا غير جاوبني .. امتى قررتو هادشي !
جود : ( تنهد ) ماشي بزاف غير مور كنازة جدي ....
وسيم : يعني عاد كيف ! .. واش طلبتيها لزواج هي فخبارها و وافقات ؟ ( جود حرك ليه راسو باه ) هااااكداك ... واخا ... تسنى واحد شوية ( جبد تيليفونو ودخل لانسطا و جود كيشوف معاه بانليه بلوكاها ورجع لواتساب بلوكاها تاتما وحط تيليفونو وشاف فيه ) اهاه كمل ...
جود : ( جاتو ضحكة ) علاش بلوكيتيها !
قسم : بلوكاهاا !!!
وسيم : ررربع سنيييين وهي فارعة ليا راااسي بجود .... نهار غتزوج بيه مخسراتش على ديلمي حتى ميساج تقوليا فيه راه طلبني لزواج ....
قدس : راه تانا ماقالت ليا والو ....
قسم : آ نعلو الشيطان ...
وسيم : شنو دابا ملي كانت مخاصمة معاه كنا كنبانو ليها .. على راس كل ساعة ملي جيت لمغرب وهي كتصيفط فلي ميساج .. فين هوا .. معامن هو .. اش كيدير ... صورو ليا ... ودابا لي تصالحو ولا ماعرت مال طاسيلة مهم .. ضربات الطم ... كطلع ليا الڤيو !!!! ..... كانت دايراني قنطرة تجيب خباراتو ولا كيفاش
جود : هنيونا من التبرهيش ... مزال مكايناش شي حاجة ثابتة باس تجي تقولها ليكم ...
قدس : واش هي قالتها وسط العائلة كاملة ومكاينة تاحاجة ثابتة !!!
جود : ( كيتنهد ) دابا مالقيتو فاش تضهرو تقاضاو ليكم المواضيع !!!
وسيم : فهمنا بعدا ... واش بصح صافي غتزوجو ؟؟؟؟؟ قررتي ؟؟؟
قدس : جاوبنا نيشان اجود ...
جود علا راسو لفوق كتنهد وقسم قربات عندهم
قسم : حشمو شوية ونتوما تكبيتو عليه ... ايييه قرر ... ملي قالو ليه بابا و ماما بلي راه كان خاطبها قبل ميدير لاكسيدون وبلي كان بيناتهم كولشي رسمي .. هو حشم قدام عمي وانه عطى الكلمة والبنت باقا كتبغيه ... قال يكمل ... وديجا اصلا .. بيلسان كتعجبو وباغيها ... يعني بحالا قلتو خطبة جديدة لنفس البنت ولكن الولد مبدل ... هادشي لي كاين ...
قدس : ( تبعات مع قسم ورجعات شافت فيه ) جووود ( نزل عينو فيها وهي تحزن ملامحها ) مالك مفرحانش ؟؟؟؟
جود : ( قاد جلستو وتبسم ليها) بالعكس فرحان .. راه غير حيت عيان ... علاش مالها مزويناش ؟
قدس : خويا واش بقات فالزين ! راه كولشي زيييين .. بقات واش نتا باغيها ؟؟؟؟
جود : وراه مغنبغيهاش فيومين .. المهم هو عاجباني ... والا كانت شي حاجة عاجباك كتبغيها من بعد ...
قدس : لا .. ماشي ديما .. شحال من حاجة كتعجبنا ومع الوقت كنملوووها .... وكنلوحوها ونقلبو على الجديد ... ولكن لي كنبغيييوها كيف ماكانت ... كتولي تعععجبنا .... واخا يكون مافيها ميتشااف والناس ميدخلوهاش من شتا .. لي كيبغيها رااه كتبانليه زوييينة .... ماتحكمش على اازين من للول ...
جود : ( جبد ليها نيفها ) منين جبتي هادشي اشنيولة ؟ هم ! وليتي تفهمي تانت ....
قدس : كنهضر بصح اجود عارفاك باغي تقلب ليا الهضرة .... راك خويا وكنعرفك .. وجهك ماعجبنيش ....
قسم : ( مصغرة فيه عينيها ) غير لبارح عاد كنتي صافا .. مالك دابا !!!
جود : ( كيدوز يدو على وجهو ) راه قلنا ليكم عيان ..
وسيم : جود ... واش نتا كتعرف بيلي مزيان ؟؟؟؟ ولا شفتي غا البروفيل ؟؟؟؟ راه كنعرفك نتا وكنعرف تا بيلي .. واش عارف فرق العقليات ولا معارفهمش ! ... واش معاشر بيلي ؟؟؟؟؟
جود : ( بدا كيرمش ويتفكرها صباح وهي كتكيف ورجع شاف فيه ) علاش كيف كتبان ليك نتا !
وسيم : شوف ... ( الجدية بانت فملامحو) بيلي راه بنت عمي .. وهاد العام لي مشيت فيه لامريكا تقربنا كتر سكنا اونسومبل وكنمشيو لقراية اونسومبل ونخرجو اونسومبل ....كنعرف عقليتها .... بيلي ضريييفة وحنينة .. كتووقف مع الواحد ... صريحة مكتنافقش ومكتزوقش .. كتجي لبنادم فاص واااضحة .. فيها بزااااف دالحوايج زوينين .. ولكن فنفس الوقت راه متحررة بلا قياس وانا كنعرفك نتا كيداير .. بيلي كيعجبها تلبس تخرج تسارى تسهر عندها صحااااب ولاد .... راه واليديها وخوتها ومقدروش يحكموها .... راها لدارت الحاجة فراسها كتوصل ليها ومكتخاف من حد .... ونتا كنعرفك كيداير وراحنا دم واحد انا براسي فاش نوض نتزوج راه مستحيل نديها بحال هاكا راه يا نقتلها يا تقتلني .... حنا معععقدييين .... منعرف مال ديلمنا كيدايرين مكنعرفوش حنا هاد التحررر الزايد على حدو فالعلاقات .... يعني فكر ... فكرررر مزيان .. وعاشرها عاد قرر ...
جود غير ساكت ماعرف مايقول غير كيضور لسانو على سنانو ... وكيلعب بتيلي فيديه ورجع شاف فيهم
جود : قلبو عليا هاد الموضوع ....
قسم : جود راه معجبتينيش .... ياكما تخاصمتو !
جود : واش باغيني نوض نمشي فحالي !
قدس : ( شداتو ) لا صااافي كككلس ... هاحنا ساكتين .. ولكن راه دبصح اجود معجبتيناش واش حنا ماشي خوتك ؟ قول لينا اش كاين ....
جود : ( عنقها تحت يدو وهي حطات راسها على كتفو ) راه مكاين والووو مزال ... صافي البنت عجباتني غنتوكلو على الله .... ملي نطلبوها من وليديها ومنعاودش الغلطة جوج دمرات داك ساعة نتعرف عليها على خاطري ونشوفو هادشي فين غيخرجنا .. ونهار نتأكد مزيان نخبرو الصحافة والبروتوكول .. دابا غير تهناو ... راني عارف اش كندير ....
وسيم : مهم ماضيعش حياتك بقرار متسرع ..راه الزواج مصير ماشي اللعب ...
جود : ( شاف فيه ) اجي عندي المشعكك اجي .. ( عنقو باليد الاخرى وكيشوف لقسم وهو معنق قدس و وسيم عندو ) شتي البرااههههش كبرووو ..
قدس : راه كبرنا هدا شحال .. غير نتوما لي مباغينش تشوفونا كبارين ....
وسيم : الحگرة اختي الحگرة ....
جود : دديبلوكي نتا البنت حشومة ...
وسيم : لااااا تمشي تخراااا ...
قسم : راه كانت قريبة ليك زعما وكنتو صحاااب
قدس : هدا راه مكايربي الكبدة على حد هههه
وسيم : كانت دايراني طريق ... ملي ولات معاه قلبات عليا .. وتمشي دابا تخرا ...
جود : ( ضربو بروسية خفيفة ) واشتي ... هاحنا غااانخسرووو دابا ....
قدس : هههه كتسب ليه خطيبتو وهو كيسمع هههه
وسيم : ( طلع راسو فيه ) وصراحة تصلاح ليك .. هي لي غتهد راسك القاسح ههههه ... وبربي اخويا تغاتشييبك .... هايا عقل عليها ....
جود : ( كيشوف معاهم مطول وتبسم ليهمبحنية ) عجباتكم تكون بيلسان مرت خوكم ! هم !!!
قدس : انا راه بيلي عندي عزيزة اصلا ... غير مفهمتش كيفاش درتو ليها وصافي ... اسيدي كون غير نتا مقتتنع بها .... حنا كيفما كانت هاد مراتك راه غنبغيوها من معزتك نتا
قسم : اوا هاااانتا شكون بحالك ... ( شافت فيه ) وانا متبغيوش ليا راجلي !
قدس : على هاد الراجل تزاد بعدا ولا مزال ؟؟؟؟
وسيم : ههه نتخيل العالم كامل مزوج ومنتخيلكش نت .... نت غاتبقاي هاكا حتى تكرمي ويحطك عمي عدنان فالمتحف عندو ....مومياء عازبة ....
جود : غاا حگرو فيها غتصدق هي لي سابقانا كاملين ...
قدس : مسسستحيل نتيقها هههه واخا نشوفها بعينيا فوق العمارية كتشير ليا منتيقش هههه
قسم : اويلي لهاد درجة كاااع !!!!! ..
قدس : واختي هدا لي باغاه نت فيه شي معاييير مزال متكتشفوش عند بنو البشر هههه شوفيه عند الجنون لعلى وعسى هههههه يكون سمتو بهقع ...
جود : ( بانو ليه جايبين العشا هو يدفعهم ) نووضو تكعدو علياااا .... ( قرب ليه طبلة والخادمات وصلو ) حطي اختي حطي ....
قسم : غاابشوية عليك ....
بدات تحط حداهم وجود دغيا قرب ليه طاجين حلو ... ووسيم حطو قدامو ديالو وقدس رجعات لور مربعة يديها كتشوف فرجاء لي واقفة عليهم مبتاسمة ... وتاهي مبتاسمة فيها الابتسامة الصفرة كتبين بلي راه ماعينيهاش فداك طواجن لي حدا خوتها ....مشاو الخدامات وجود دخل فداك طاحين طول وعرض بفورشيط ووسيم تاهو ... وقدس كتشوف معاهم وريوكها سالو عكس قسم لي غير مربعة يديها وكتفرج فيهم مبتسمة كيعجبها الحال فاش كتشوف خوتها مجموعين وهادئين .. وقدس شافت فرجاء .....
قدس : خالتو رجاء ... غير سيري جيبيلي داك لاصوپ .... غناكلها دابا ..
رجاء ومات براسها ومشات غير هي غبرات وقدس تلاحت حدا جود كتكحزووو لجنب وحيدات ليه الفورشيط من يدو
قدس : كوول بييييدك .... ( بدات كتاكل )
جود : هههه اري نوكلك انا .. طلقي ...
حيد ليها الفورشيط وهي فمها عامر كتمضع وبدا يدير دغمة عندو دغمة عندها وهي كتقوليه سربي قبل ماتجي رجاء وهو كايدكس فيها وكتنفخ على فمها ومرة مرة تحل فمها لوسيم تاهو يعطيها من طاجينو .. مرة من عندو مرة من عند جود وقسم كتمد ليها الما باش متوحل ليها ....
جود : وااابشوووية راه يدي هادي .. قربات تاكلني ... حسن عوان هدا لي غادي طيحي فيه نت خاصو يتقضى صباح وعشية ....
قدس : ( كتهضر وفمها عامر ) الثلاجة دبابا مكفياني ... ( شافت عند وسيم ) عطيني نتا داك صودا ياك مكتعجبكش ؟
وسيم : ( جر عندو كاسو ) لا باغييييها .....
قدس : مسسسموم .. جود طلب ليهم صودا و نشربها انا ...
قسم بقات غير كضحك تابانت ليهم رجاء جايا وهي تبعد قدس وكتسمح فمها واخا راه باااينة كلات .... ورجاء عاقت ومابيناتش وقدس كتكح وحلات ليها .....
قدس : ( شرباتت لما ) لحساااااسية ... ( كتحك ) غ غير لحسااسية ( قربات لعنق ج كتشم ) بارفانك يمكن دار ليا الحساسية ..
جود : ( كياكل ويعوج فراسو وهي كتشرب وتكح) ممم .. عندها حساسية دالما ....
دوزو عشاهم كولو ضحك ونكير ونبييش بيناتهم تاهزو الخادمات لعشا وجابو ليهم ديسير ... وقسم هزات تيليفون
قسم : ساعة طناش دليل .. بابا و ماما والله ماتسوقووو ليييينا تابأپيل ..
قدس : صوني عليهم ...
قسم : حشووومة ....
جود : ( كيعوج فعنقو ) نوضو تكعدو تنعسو ... ( شاف عد قدس ) طلعي جيبي ليا الپيسي ديالي ...
قدس : بعد مني والله مافيا لي يمشي تالتما ونرجع نزل ... لادخلت لدار مغنرجعش ....
جود : انا مزال مفهمتكش نت لاش لايقة ماتسخخري ماااتنفعي ... كون غا نعلو الشيطان داك اليلة لي جابوك لينا فيها والله ....
قدس : جاابووووني نزززيين حياتكم ... ماا شااااء الله عليااااا .....
وسيم : ( كيتفوه ) تانا غنطلع نعس .... مافيا لي ينزل مانا نجيبو ليك .....
قدس : ( ناض وسيم وهي شدات فيه ) صصبر نطلع معاااك ... تصبحو على خيييرررر ... ( عنقات وسيم ماشيين ديخانين بالنعاس )
جود : جججيبي ليا البيسي يهدييك الله اداك شنيولة ...
قدس : نوووووو .. مااافيااا لي ينزل ....
قسم : مالقيتي غا هاد المعكازة .... ( بقات ساكتة شحال تابانو ليها غبرو وشافت فيه ) مغطلعش تنعس
جود : مافياش .. كنت خارج نقصر ودراري مكاينينش غاتجيني ناقصة .... قلت نقصر مع واحد البروجي جديد على الله نساليه هاد العام ....
قسم : طموبيل !
جود : لا كاميو ...حابس الطموبيلات دابا ... خاصني الكاميوات باش ندخل مع الواليد راه كيتسناني ....كنت لقيت شي هياكل فلافيراي قبل من العيد .... راني كنصمم عليهم
قسم : الله يووووفق مزييااان والله دير خطوة لقدام ومزيان تميلونجي بين اش باغي بابا واش باغي نتا والله الا احسن مادرتي .... غير كنصعبو علينا الامور ماهي الطريق را وااااضحة قدامنا ومسرحها لينا سيدي ربي ...
جود : سي ...
قسم : قول ليا ( شداتو من يدو بحنية ) ماعجبتينيش اجود ....جود لي كان كيهضر على بيلسان البارح ... ماشي هو هذا دابا ...
جود : ( تنهد معمق وشاف فيها ) معرفتش اقسم والله ... معارفش نحدد الموقف ديالي بمرة .... كل مكنقول طريق هاهي واضحة قدامي كترون تاني عليا وتخليني واقف كنشوف منين ندوز ....
قسم : واش تناقشتو ؟ دازت شي حاجة بيناتكم !
جود : معرفتش واش نسميه نقاش .. ولا نسميه كنتعرفو على بعضياتنا ولا نسميه خصام معرفتش كيفاش نسمييه لي عارف هو خاصني نلقى حل لهاد العلاقة باش تزيد لقدام ...
قسم : باغيها تزيد لقدام اجود ؟
جود : قسم .. كلكم مفاهمنيش واحد الحاجة ... انا راه نهار قلتو ليا راه كاينة واحد البنت خاطبها ... راه واخا كون عمرني شفتها واخا يقولو ليا ماعندها لا عينين لا ودنين لا فم لا لسان راه غانديها .... كيفما بغات تكون .. مهم هو ملي نحط راسي على المخدة يكون بالي هاني انه ماشي بسبابي شي وحدة مقهورة .... حنا ايييه عرفنا بنات بزاف ولكن عمرنا واعدنا شي وحدة بزواج ولا طمعناها .. البنت كانت صغيرة .... ربما عليا حلات عينيها .... خطبتها ورسمات معايا حياتها لبعيد وحلمات ..... خاصني نكمل ... خاصها تبقى فرحانة .....
قسم : ونتا !
جود : ميكهمش اقسم .. مع الوقت كولشي ان شاء الله غيتبدل ...
قسم : واش شفتي شي حاجة معجباتكش .. جود متخبعش عليا .. راني كنعرفك كتر مكتعرف راسك
جود : تقدري تقولي بحال هاكاك .. ملي كلست شوية فكرت مع راسي ... قلت نخطبها من واليديها عاد تتعرف عليها باش منعاودش تاني نفس الغلط الاول .. حتى الا بغيت نخرج انا وياها مغتجيش بحالا كنغدر العائلة يعني بخبااااررر واليديها وخوتها .. راني كبرت على نتخبى من شي واحد .... ولكن نهضر مع الواليد باش الصحافة والبروتوكول ميسيقوش الخباااار حتى لمنبعد فترة ....
قسم : يعني باغي تاخد فترة تعرف عليها كتر
جود : بحال هاكاك .. وفترة لي نقدر نأضابطيها معايا ... نعرف نصلح عيوبها ونصلح معاها عيوبي حتى انا .. راه تانا ماشي ملاك .... قلت داك الفترة غنكونو فيها اليز .. ناخد وقت ... باش تاهي فلخر مانصدمهاش بشي شخصية مكتعرفهاش .. باش تولف عقليتي .... راه انا نقدر نستحملها .. ولكن هي واش غتستحمل !
قسم : علاش ديما كتفكر غير فالغير اجود .. فوقاش غتولي تفكر فراسك
جود : انا اقسم واحد السيد لي عايش مشتت فهاد الحياة غير بعرق واحد .... راه كنحاول نبروفيتي منها وصافي ومنقدرش نتعمق فكاااااع الامور راه ماعنديش الراس لي يهز شي هم ولا شي تفكير .. انا راه كنهرب من التفيكر ب اي طريقة غير باش منمرض راسي ونبقى على الاقل غا عايش قدام واليديا ( قسم حمارو عينيها ) شاد ديما الحياة منين خفاااافت .... الا كانت هاد البنت كتبغيني ديال بصح كيف كتقولو كاملين .. راه غتبغي تبدل على قبلي .. ولكن الا فضلات تحرررها راه انا منقدرش نجيب ليا مراة بداك التحرر كامل .....
قسم : وهاكااا عجبتيني ... ( مسحات دمعتها بالهف ) هاكااا اه ... يعني الا لقيتي راسك مقادرش رجع لور .. وملي تلقى راسك كتبغيها ولا باغي تكمل معاها علم داك ساعة الصحافة نديرو ليك خطوبة وااااااعرة يسيق ليها العالم الخبار ههههه
جود : ان شاء الله .. يكون خير .... تاهي راه باقي بنوتة صغيرة شوية دالخاطر وشوية من هنا ومن لهيه وغتقاد ان شاء الله .... غانحاول معاها بجهدي كامل ....
قسم : جود ..قول ليا .... ملي كتسمع سمية بيلسان دابا... كتحس بلي شي حاجة ديالك ياك !
جود : وضروري .... فين كنسمع سميتها ولا نشوف تصاورها كنحسها شي حاجة كتخصني ... بحال شي حاجة خديتها ليا ولكن باقي خاصني نمونطيها وباقي بزااااف دالحوايج نقادهم فيها ... ولكن على الاقل سميتها مميزة بين السميات لوخرين هادشي لي كيخليني نرتاح وانا داير معاها هاد الخطوة ...
قسم : انا متأكدة غير شوية دالوقت فعلاقتكم وغتولي تموت عليها بحال الللول .. حيت راك فاقد غير داكرة القلب باقي فبلاصتو .. مدامك دغيا قدرتي تحسبها ديالك .. راه قلبك القديم باقي خدام عندك هههههه ( بدا كيفيبري ليها تيليفون فجيب ) مهم ... انا غادي نطلع دابا نعس ... زيد شوية وطلع حتى نتا نعس بكري تريگل نعاسك شوف ليسيغن كيفاش بداو يبانو فيك ... تبقى نتا ديما تخبي بنظاظر !...
جود : واش سميتي اميمة تي عيطيني بتيساع ... طلعي طلعي راه غادي يخرج ليك من جيب طلعي ...
قسم : ( وسعات عينيها وشافت لجيبها بانليها الضو دتيل كايبان ) راااه غا لالاغم
جود : امم لالاغم مع طناش دليل كتفيقك ديري قيام الليل ! ...
قسم : ( جاتها الضحكة ) تصبح على خير ....شحال فيك دتحكار تانتا متعرفش درر رايك مافاهمش ... بسلامة ..
جود : ( جرها من يديها ) ااااجي ... علاش كيصوني دابا ؟ هادي وقيتة د الهضرة !
قسم : جووود منيتك ؟؟؟ وقتاش بغيتيه يهضر معايا ؟؟؟؟
جود : طناش دليل هادي ... من الاحترام ميتصلش مور هاد الوقيتة هادي .... حيت الهضرة مور طناش دليل مافيها مايتسمع ..
قسم : يهدييييك الله راه انا لي صونيت ليه قتلو محتاجة نهضر معاه وقال ليا ملي يدخل لدار غيصوني ليا ويلاه دخل
جود : كيقصر !
قسم : واااش سووووقك ياه على بنادم نتا مكتقصصرش ؟؟؟؟؟
جود : وفاش باغا تهضري معاه !
قسم : واناااااري فاش كدخل .... راني مسااافرررة لا ؟؟؟؟
جود : فين مسافرة ؟
قسم : راه عندي العسكرية بعد غدا غنمشي
جود : وااايلي !!!!!! ياك تالشهر عشرة ؟
قسم : داباااا اشمن شهر عشرة .... راه غنكلس شهر ونص خلينا غنقولو ليه بسلااااامة ...
جود : بسلامة دابا ؟ تالغدا وقوليها ليه
قسم : ودابا نتا مالك ماالك
جود : ماعجبتنيش انا هاد الهضرة ديال طناش دليل ....
قسم : علاش زعما انا ملي غنطلع مغتعيطش نتا لبيلي !
جود : لا علاش غنعيط ليها دابا ! ....
قسم : ونتا هاداااك .... بعد مني ...
جود : ( هي ماشية هو كيهضر موراها ) الى قلل عليك احترامو. لا بدا يضسر عليك طفي عليه تيليفييون .. هاد الخرا اصلااا باينة فيه ضااسر مدام مصوني دابا ....
قسم : ( ضارت عندو ) رررراه انا لي غنخسسر معاك دابا ... فين شفتييه ضاسر كتعرفوووو ؟؟؟؟؟
جود : اجي هضري معاه هنا علاش طالعة لفوق !!!
قسم : والله تااعييييقتي ... مكتعرفش شنو هي الخصوصية ...
جود : مااحملتوش انا هاد خيييينا .....
قسم : انا حاااااملااااه ..كااااع لاتحملو. ....
مشات قسم وهو بقى كينتف فواحد المخدة تحت يدو فلخر لاحها على الفوطوي لاخر وطوا رجليه بجوج على طبلة وطوا درعانو تحت راسو وعلا راسو كيشوف فالنجوووم تاسمع شي خطوات صغار جايين باتجاهو و تكعد يشوف بانتليه قدس جايبة ليه بيسي حطاتو قدامو
قدس : شششد .. عزيز عليييك غااتعدبنا ....
جود : ( ضحك ليها ) نت راااااه الحووووب نت .... اجي عطي لخوك بوسة وطلعي ..
قدس : ( تحنات عندو بزربة باستو فخدو ومشات كتجري ) بسلااااامة ....
جود تنهد وناض تكعد هز البييسي ديالو حلو ومشا ديريكت لضوسي ديال البروجي لي بدا فيه .... وانغمس معااااه كيحاول يتلهى فحاجة وحدة باش ميبقاش يفكر بزاف .....
لفوق ...
دخلات قسم لجناحها وسدات الباب كتنهج .... شعلات تيليفون بانو ليه ثلاثة ديال ليزابيل ماجات فين توصل لبيتها تاكانت قطعات لابيل الرابعة .... وبدات كتعاود ليه ....تا جاوبها
قسم : اصيل ....
اصيل : على شوية غبدا نسب ..
قسم : راه كنت لتحت مع خويا ماااطلقني غا بزز ...
اصيل : صافا ؟
قسم : صافا والله بيخييير .... يلاه دخلتي ؟
اصيل : وي ( حيد تيشورت ديالو لاحو وخرج عريان لسطح كيشعل كارو ) يالاه دخلت ... مشيت دزت عند دراري علمتهم مغانخرجش غدا لبحر ...
قسم : صافي دونك الصباح انا معاك ... بابا وماما مكينيش غالبا مغيجيوش فصباح ...
اصيل : ( نفت الدخان ونفضو فطفاية حداه ) قولي ليا .. هاد العسكرية فين بالضبط !!! يعني فين غاتكوني ...الساحل لي قريب لطنجة !
قسم : سي ... هو نورمالمون العسكرية ديالي كاينة ف مونت-ألبانت حدا البرتغال انا خريجة ديال اسكويلا ناڤال ميليتار آرماذا ... ولكن مغانكلسش تما بزاف غير سيمانة وغانخرجو بالباطو .. التدريب كانخرجو ليه من طريفة ... يعني بين طاريفة وطنجة .. علاش ؟
اصيل : حيت شحال من مرة فاش كنخرجو من البحر ديال طنجة كتتلاقاو الباطويات دالعسكرية ... منشوفوكش فالمغرب نشفوك فالحدود .... وراه نقدر ندخل لطريفة .. معاش كتسالي !
قسم : واش كتقدر دخل لطريفة ؟
اصيل : وي حيت ااسيد لي خدامين معاه كنوصلو ليه بعد المرات حتى لطريفة كندخلو على حسابو هو ... انا صراحة مابقيتش معاهم فطنجة نزلت هنا حدايا لكازا .. ولكن ماعليش نرجع نطلع ...
قسم : راه مابغيتش نعدبك على والو حيت صعيييب باش نخرج من العسكرية .. راه بابا ومكيخليوهش يجي عندي ... ملي كنكونو فتدرايب ... راه مكنحيدوش اللبسة وممنوع نخرجو بيها ... راه كنبقى غير بين الباطو ولوطيل لي نازلين فيه والمدرسة فاش كنرجعو .... انا براسي كدوز عليا داك الفترة دالعسكرية كحلة ....
اصيل : اشوفي اداك بنت الاسماعيلي .... ندير معاك الحل لي بغيتي ... غاباش تقولي ليا شهر وعشريام مانشوفكش ... قاسحة شوية ....
قسم : واش انا كرهت ... راه كنت كندوز ثمن شهور والعام التاني ديالي راه دوزت عام دالعسكرية كنت كنتوحش دارنا و منقدرش نشوفهم وتيليفون كايسمحو لينا بجوج دالاتصالات فالنهار .... كنديرو ديپار ل مونت-لبان سيمانة فالمدرسة لداخل النظام صااارم كتر من العسكر ديال البرية .... راه تاحنا دالبحرية عندنا نفس النظام فااصرامة .... غاندوز سيمانة تما عاد غانرجعو لطاريفة راه من خمسة دصباح تالستة دالعشية وحنا غير فالباطو كنوصلو لوطيل مسخسخين باش نعسو ... كون لقيت انه عندي غير نهار واحد دالراحة كنت نقول ليك اجي فيه ....
اصيل : ( غير كاتنهد ) دابا هاد الدورة هادي كانت كتسناني تا نجي انا عاد يعيطو ليك عليها ولا كيفاش .... فين كانو شحال هادي
قسم : راه قلت ليك منحوسين ههههه
اصيل : واشتي دابا غاتخلينا مقطوعين ....
قسم : نتا غادي تلهى بالريسطو ديالك غااتنساني كاع
اصيل : ننساك فريسطو سميتو قسم !
قسم : ان شاء الله دغيا دوز .... غدا نشوفك بكري شوية قبل مايعيط ليا بباابا حيت نهار اللخر غايبغي ندوزو مع العائلة راك عارف .... دونك تسعود نتلاقاو صافي ! ولا تمنية !
اصيل : تمنية اقسم واش عندك فرض فالفيزيك !
قسم : ماعندي ماندير ليك .. تعلم تفيق بكري ....
اصيل : راه هدا اصيييل اقسم ماشي اجتماع ديال مجلس الادارة ...
قسم : اهاه نتسناو تالحداش يكون جا بابا ... اش بانلك !
اصيل : الالة بغيتيني نجي تا دابا راه غانجي ...
قسم : كون مكانش خويا شاد العسا لتحت كون قتليك اه ههههه والله لاخلاني نخرج .... وللاسف مغيقولش ليا سيينوووغمااال هههه
اصيل : هه غتبقاي شاداها عليا .... ( كينفت دخان ) دابا واش هاد شهر وعشر يام مافيهاش تخرشيش !
قسم : واااالو ...
اصيل : كيفاش غندوزو حنا دابا هاد المدة كاملة !
قسم : كيكنتي كدوزها قبل دوزها دابا ....
اصيل : ااه ساااهللة عندك ... سيري تنعسي سيري .... تالغدا ونشوفك ....
قسم : هههه داكوووغ ... جيبلي معاك مسمن
اصيل : وااخا.. شنو بغيتي اخر ...
قسم : وحرشة
اصيل : اهاه
قسم : و جبن ...
اصيل : اهاه
قسم : والعسل .... و .. ونتا ....
اصيل تنهد من اعمااااقو وعلا راسووو لفوووق كايتجنن عليها
اصيل : اااااه اقسم ... ونشد والديك ....
قسم : ههههه سييير تنعس سير .. تالغدا ان شاء الله ( يلاه غتقطع وهي تسمعو )
اصيل : قسم ..
قسم : امم !
اصيل : واش عارفة شحال غنتوحشك ؟
قسم عضات على شفتها وقلبها بدا يزدح تاني ..معدتها حساتها كترررعد ليهااا .. وحاولات تبقى شادة فراسها ونطقات بهمس و بأسف ....
قسم : حتى انا ....
اصيل : ( طفى الكارو وسكت مدة عاد هضر ) عمرني ماظنيت غندير لالاغم باش نفييق مع تمنية نشوف شي وحدة ... ( قسم غير ساكتة ماعىفات ماتقول وعاضة على شفتها ) ...سيري تنعسي ... غدا غاتلقايني تما فوق ماجيتي ....
قسم : ان شاء الله ... تصبح على خير
اصيل تنهد وقطع تيليفون وهي تلاحت على سرير حاطة يدها على قلبها مامولفاهش يعبر بزاف على رغبتو فيها .. اخر تعبير دار كان على شكل قبلة ولكن باش تسمعها وخا غا كلمة غانتوحشك حسات بكرشها كتلواااا ليها بااحماس .. ورجعات عضات المخدددة كضضصصحك ......
جا صبااااح جديد .....
سلطان وصل فيه مع سبعة دصباح لدار غير دخل مشا لبيتو دييريييكت تلاح نعس غير المدبرة ديالهم ولي بنسبة ليه " الدادا " ديالو هو اية لي حيدات ليه سبرديلتو و قاداتو ففراشو مزيان ... ولوؤي بات فالخدمة .. اما بيلسان باتت فايقة كتشوف لتيليفون واش غيصيفط شي مسج ولا يصوني مالقات منو والو وشعلات نتفليكس دايرة فيلم درامي شبععات معاه بكا وطاحت نعسات .... اياد ليلة كاملة كيكمي فجردة كيحس بصدرو تقييييل عليه وراااسو كترر وكيحس بنفس كتقطع ليه مكيعرفش اش واقع ليه بمرة وعلاش نفسو مزيرة قد هاكا ومحاااملش راسو .... ورجع نعل شيطان ودخل مشا ينعس ....
ساعة كانت سبعة ونص .... بدات لالاغم كتصوني عند قسم ....
طفاتها وناضت دغيا مصحصحة كلها حماس تمشي تشوفو .... دخلات لدوش خدات دوش وخرجات كتبروصي سنانها ، تاشوية سمعات تيليفونها كيصوني وخرجات بزربة و البروس ففمها حسابتها اصيل وهي تلقاه باباها .... كمشات حجبانها علاش باباها غيصوني فهاد الوقت يالاه غتجاوبو ... وهي تلقاه قطع ...عوجات شفتها لتحت مفاهماش وجات دايزة على طابل دونوي كتغسل فمها وتعاود وهي تلمح شي حاجة على طابل ... علات حاجبها وهزاتها ... كانت بطاقة بيضة .... ومكتوبة عليها " To my honey " ( الى عزيزتي ) ....
عند قدس ...
جالسة على سريرها حالة عينيها بزز خاسر فيها النعاس بسبب التيل لي صونا وقطع و الكاش زيو معالياها فوق راسها كتحك فيعينيها وكتحل فداك الجوا لي لقاتو حدا التيليفون مكتوبة عليه " to my little " (الى صغيرتي) ... علات حاجبها بايتغراب مافهماش وبدات كتحل الجوا .... وهي تقرا لفوق " دعوة " ...
عند وسيم ...
وسيم : انڤيطاسيون !!!!!!!
كان على سريرو وشعرو مربل وحال داك جوا لي كانت مكتوبة عليه " to my prince " ( الى أميري ) ...بعد ماصونا ليه تيل تاهو وقطع ليه .... وبدا كايقرا طانت دعوة لقضاء يوم بالكامل فاليخت " REQ-34001 " لي هو اليخث الخاص ديال باباه وماماه ولي عمرهم مشاو ليه ....
عند جود ....
كالس على الكرسي القصبي فالجردة لي بات ناعس عليه كايعوج فعنقو ... بعد ماصونا ليه تيل 3 دالمرات باش يلاه يفيق ليه .... مافهمش علاش اسد كايعيط ليه فهاد الوقت ملي حا يجاوب لقا البطاقة محطوطة حداه .... مكتوب عليها " to my cub " ( الى شبلي ) ... قراها ونزل عينيو لتحت باش يلقى فالتوقيع مكتوبة lamar&assad ......
بدا يضور راسو كايضحك وملامحو باقين مبوقين بالنعاس .... ولاح داك البطاقة وتكا راسو غلى داك الكرسي القصبي تا سمع خطوات جايين باتجاهو وعلا عننيه لقاه الشيفور الخاص بأسد ولامار ...
- بونجوغ موسيو جود .. الطموبيل واجدة ...... موسيو أسد ومادام لامار كايتسناوكم .....
08:30.....
وصلات طموبيل ميرسيديس كلاص قدام الممر ديال اليخوت ..... وحل الباب القدامية جود كيجبد فعنقو ومن عينيه الحمرين واضح انه باقي فيه النعاس ... ماطلعش حتى يبدل حوايجو من غير رجاء لي جمعات ليهم حوايجهم فصيكانهم ونزل الشيفور من حداه باتجاه ااكوفر يعطي للمساعد لي جا لاستقبالهم حوايجهم .... وتحلات لباب لور نزلات قدس بالكاجوال سروال دجين مطوي من تحت وعالي من لفوق حتى لسرة وسبادرين بيضة وشوميز بيضة معقودة عند سرة ..... نازلة باقا كتفوه بالنعاس .. ونزل وسيم تاهو طايح بالنعاس كتر منها .. وضرب فيهم نسيم البحر عاد بداو كيتكسلو والمساعد هز الحوايج مشى بيهم ليخت .... وقدس طلات على قسم لي باقا فطموبيل شادة تيليفونها وعاضة على شفتها ...
قدس : وا نزلي
قسم : سبقوني انا جاية نخلي غير ايمايل لصفاء ...
ومات ليها قدس ومشات هي ووسيم تابعين جود .... وهي جبدات تكتب ليه مسج .. ملي لقات البطاقة دجود كانت غاتتصل و دخلات رجاء مخلاتش ليها فرصة فين تعيط ... يلاه قدرات دابا تكتب مسج واعتاذرات ليه مبررة ليه شنو واقع وخدات ليه فوطو من الميناء حداهم باش يتيق انها مكتهربش .... وعاد نزلات من طموبيل ......
كانت تاهي بالكاجوال غير نزلات طير ليها البرد شعرها وبين على ملااامح كئيبين ملي فشل ليها اللقاء بيه ولكن فنفس الوقت فرحانة بهاد الجيست لي دارو واليديها وتمشات فداك الممر باتجاه اليخت ....
اسد ولامار كانو فالباب .. اسد بشورط كحل وتيشورت كحلة وكاسكيط .. ولامار بغوب بيضة طويلة دومي مونش وكيبان فعنقها الخيط الكحل مربوط ديال ليدوبياس لي لابسة ... و صندال كحلة وشابو قصبي كحل ولابسة نضاضر واقفين فباب اليخت هي واسد كيتسناوهم .. تابانو ليهم جود وقدس وسيم لي باينين مضهشرين بنعاس منظرهم جاب ليهم ضحك وطلع وسيم وقدس هوما لولين شاد اسد فيديهم وعنقهم عندو نهار واحد مشافهمش حس براسو توحشهم وطلقهم مشاو عند لامار هو يبان ليه جود واقف لتحت مزال ماطلع ومعلي راسو معاه .....
جود : بغيت غا نعرف اش جاك ..
اسد : ( ماد ليه يدو ) طلع ... راه غاحشمت منصيفطش ليك تانتا ....
جود : كنتي غااديريها واعرة .... ( شد فيدو وطلع سلم عليه بالكتاف سلام رجولي وشاف قدامو لليخت ولامار لي باقا كتعنق فقدس ووسيم بحالا شهر مشافتهم ) هاد الخيييير كامل عندك وخازنو علينا
اسد : اول مرة تشوف ماماك !؟؟؟؟؟
جود : ( شاف فيه بنظرة دمينتك ) را كنهضر على اليخت ... ونتا بنت رقية متلفاااك ....
ضحك ليه وزاد عند لامار و اسد تبعو بعينو وضربو بررركلة وحود بقى غير كاييضحك وهو كايضور راسو على هاد الطناز لي عطاه الله .....
اسد : آفين ختكم ...
قدس : هاهيااا جاياااا .....
يلاه غيجاوبها هو يسمعها وضار شافها لتحت
قسم : بووونجووووغ....( دايرة يديها على عينيها من شمس ومعلية راسها فيهم وعلات البطاقة وراتها ليه ) عندي انفيطاسيون لهاد اليخت .... واش نقدر ندخل !!!!!!
اسد: ( مد ليها يديه تطلع بجنتلمانية ) اوفكووورص ميس قسم الاسماعيلي ...... ويلكوم تو يور پارنتس .... ( اكيد انسة قسم الاسماعيلي .. مرحبا بيك عند واليديك )
قسم : ( بقات غير كضحك وشدات فيه طلعات وبقات كتشوف فاليخت وشاف فيه ) سو بيورفل ... ( زوين بزاف ) ....
شافت عند ماماها لقاتها فاتحة ليها يديها بابتسامة اما جود وقدس ووسيم كانو دخلو لداخل ومشات عنقاتها
قسم : ( كتشم فريحتها ) ممممم ماشفتكش غير نهار وتوحشششتك مااااامي ...
لامار : ( جابتها قدامها كتقاد شعرها على كتافها بيديها ) تانا توووحشتكم ... تاحاجا متكمل ليا بلا بيكم
قسم : اممممم زعما ماتهنيتوش منا شوية
اسد : ( كيحيد الحبال باش ينطالقو ) شششوية ؟؟؟؟؟ هو غير شوية ابنتي ...
قسم : هههههه حرااام عليك ... كاع حنا قباح لها درجة ...
لامار : ههههه شي نهار يتبرا منكم هههه ...
لحق عليهم اسد ضاحك معنقهم عندو بجوج دخلو لطابق الوسطاني لي كان عبارة على مطبخ مفتوح و صالون صغير وجوج بيوت نعاس ديال جوج أسِرة لقاو وسيم تلاح على الكنابي معنق عندو مخدة كيكمل نعاسو وجود قصد اقرب بيت نعاس بان ليه ... وقدس بدات كتديها عينيها واقفة
لانار : شششدي شششدي ختتتك شدي ...
مشات قسم كتجري شداتها وهي تخطفات كتحك شعرها وتفوه
لامار : ههه اويلي نعستي واقفة ؟ سيري ابنتي لبيت ونعسي سسسيري ...
قسم : ههه اجي اجي .. هادو راه غاتعديتو عليهم لي فيقتوهم دابا والله ...
داتها قسم لبيت اخر كان فيه جوح اسرة بكوفرلي ابيض وكل سرير فوقو سرجم دائري كيطل على المقدمة داليخت وبلاكار صغير ودوش ومراية دائرية تحت منها ليزيطاجير وفالارض حطو ليهم صيكانهم هي وقدس لي فيهم غير ملابس اابحر وبرودوياتهم ... عاوناتها تانعسات فوق السرير وحيدات ليها صندالة من رجليها وخرجات عند وسيم لي ناعس تاهو فوق الكنابي
قسم : وسيييم .. وسييم نوض لبيييت .. وسيم ...
اسد : هاداك مغيفيقش ليك بلا متعييي راسك ..
تحنى عندو هزو وقسم سبقاتو حلات الباب كان جود شاد واحد السرير كامل ناعس على كرشو كيف عادتو وحاط مخدة فوق راسو .. واسد حط وسيم على السرير لاخر وخرجو وهو كينفض فيديه
اسد : شحال تقااال .. امتى كبر هاد خينا هدا ...
قسم : ههه كان خاصك تشوف كيفاش كان كيهضر مع جود لبااارح هههه ... ( شافت فماماها ) واش بتو هنا !
لامار : لا يلاه جينا تاحنا .... دخلي ابنتي تنعسي تانتي راه كنشوف عينيك كيف منفوخين .... شبعو نعاسكم وفيقو ...
قسم : ( بدات كتكسل وتعوج فعنقها ) صراحة والله الى باقي فيا النعاس ...
اسد : قصرتو البارح ولا ؟
قسم : ماااشي بزاف .. مينوي كنا طلعنا
اسد : كيوقع ليكم البارح تاحد ماخرج تاحد مامشى يسهر ... الطموبيلات بقاو فبلاصتهم تعشيتو بعقلكم وطلعتو تنعسو ... اما جود قالو ليا بات فجردة .. كيوقع ليكم !!!!
قسم : ههههه بابا يهديك الله واش حسابتك الا مكاينيش نتوما صافي راه غنباتو فالبيران ؟ ( طوات دراعها و تعلات حطاتو على كتفو ) تعقلللنا ابابا تعععقلنااا .....
لامار : والله يكمل عليييكم بعقلكم
قسم : ندخل تانا نعس شوية ... ( جات ماشية ورجعات ضارت ) احقا بابا .. فوقاش نرجعو ؟
اسد : باقي تا متحركنا ....
قسم : غير بغيت نعععرف وصافي .. غنتعطلو تالليل !
اسد : تابعاك شي حاجة ؟؟؟
قسم : ( كتلعب بعينيها ) ااالا .. غ غير زعما .. نهار ديالي اللخر قبل العسكرية .. وو .. وكندوزو ديما مع عمامي ...
اسد : تادابا غادوزيه مع عماماك ابنتي غا تهناي ..
قسم : ( عضات على شفتها وكتحك مور عنقها واسد معوج راسو فيها متبعها ) وو ... وو معاش غنشد طريق لطنجة ...
اسد : متيهمنيش معاش غتشديها كتر مكيهمني انه ستة دصباح خاصك تكوني تما ....
قسم بقات غير كتشوف وتنهدات ودخلات لبيتها تنعس اما لامار كانت فالكوزينة كتشوف اش حطو ليهم تما واسد بقى غير كيضور راسو وتبع لامار لكوزينة ...
لامار : متصوووورش ا حبيبي شششحال فرحاااانة هاد الصباح والله .. واحد الهدوء شحال هادي ماحسيتو نشوف ولادي كاملين حدايا وندوزو نهار اونسومبل .. واخا غنتوحش قسوم ... ( ضارت عندو ) مزيان جابو هاد الفرماج كيعجب وسيم ...
اسد : بلا متوجدي فطور دابا هادو راه مزال مغايفيقو ليك ...
لامار : والله تابقاو فيا مساكن مفيقهم مع سبعة ونص ... كون خليتي تالحداش ... بعدا كون خليتي قسم مسكينة تشبع غا نعاس نهارها لخر فالراحة ....
اسد : قسم ولاو كيتزاحمو معايا عليها الى مجبتهاش لهنا مع سبعة دصباح مغنشدهاش .. اللهم نجيب بنتي حدايا تكمل نعاسها ولا مغنشوفهاش ليوم ....
لامار : اويلي على كيتزاحمو معاك ؟؟؟ شكووون !!
اسد : ( هز فنجالو وخارج ) ملي تفيق سوليها ....
لامار عوجات شفتها لجنب مفاهماش ورجعات كتفيريفي داكشي لي جابو وترتب كل حاجة فتلاجة حيت غير حطو التقضية على الكونطوارات ومشاو .... وهزات تاهي فنجالها دالقهوة ولحقات على اسد لي كان فالكابيني كيبروغرامي اليخت ...
اما قسم حيدات حوايجها ودخلات ففراشها وهزات تيليفونها كتشوف واش شاف المسج قبل مايمشي ليها الريزو ..وهي تلقاه شاف الميساج وكتب ليها " d'accord qassam " ... عضات على شفتها عرفاتو غيكون تقلق هاد الجواب دجوج كلمات ماعرفاتو واش تعصب ولا تقبل الامر ... .... وبدات كتصوني وهي يعطي ليها بلي ريزو تقيل بزاف .. ضارت براسها لشرجم لي موراها بانليها راه بعدو ... ورجعات تنهدات وحطات تيلي وتكمشات ففراشها حابسة البكككية .. خايفة متلقاش الفرصة فين تشوفووو ..... وبرزطها بجوابو .. هي مولفاه بارد فأجوبتو ولكن باش تسمعها من عندو كتعرف النبرة لي تقالت واش معصبة ولا راضية أما مسج جاها صعيب تفهم اجوبتو .... وبصمات عليها بالعشرة انه تقلق ....
اسد ولامار خرجو وطلعو فالدروج لطابق الفوقاني لي فيه بيسين و صال امونجي خشبية ورولاكسات و جليسات فالارض .... حيدات لامار داك الكسوة مستغلة الوقت لي مكاينينش ولادها وبقات غير بدوبياس كحلين وتلاحت فلابيسين و اسد فوق الرولاكس شاد عندو فنجالو وكيتفرج فيها ......
الساعة 13 زوالا ....
فيلا سفيان ...
غرفة سلطان ...
كانو ريدوات نازلين على زاج لي ضاير بالبيت ... كان الهدوء .... كيتسمع غير صوت انفاسو وهو مدفون وسط المخاد والفراش فسرير متوسط الغرفة ... كانت غرفة شبابية بامتياز طاغي عليها اللون الاسود والرمادي ... خزانة كبييرة زجاجية واخدة حيط كامل عامرة ببعض الكتب وميدالياتو وكؤوسو د رجل المباراة ... صورو بالتونيات وبورطريهاتو ...
وطابلة دالبيلياردو فالوسط باب سوداء زجاجية كدخل لدريسينغ وللدوش ولمعرض ديال تونياتو ... تحلات الباب ودخلات المدبرة بسلة دالتصبين شافت لجيهتو بانليها باقي ناعس ودخلات لدريسينغ ديالو قاداتو .. وحيدات الحوايج لي حيد فالدوش .. وبدلات الفوطات .. وخرجات هزات طيليكوموند وبدا تنور البيت وتعلي ريدوات ... كانت امراة فالخمسينات ... لابسة جيب كحلة وشوميز بيضة مخشية فيها .. شعرها مربوط لور بسفنجة مرتبة .... لونو اسود ومتخللو بعض خصلات من الشيب .... عينيها كانو زرقيين بحال البحررر ووجهها واخا علامات الشيخوخة الى انه باقي محافظ على حروووف جدابة كتوحي انها كانت عشرينية فاااتنة .. ونضاضر طبين حاطاهم فوق راسها ....
فريدة. : سلطان ... سلطااااان ... يلاه اولدي راه طناش ديال النهارر .... سلطااااان ...
سلطان كيييسمع صوتها غير مكيزيد يتخشى ففراشو تاتحلات الباب تاني وضارت موراها وهي تلقاها حياة لابسة كوستيم اخضر وذهبي وشال اخضر حريري ولابسة نضاضر طبيين وفيديها صاك كريستيان ديور واضح يالاه داخلة من الخدمة ...
حياة : مزال مافاااق !! سسسلطاااان ....
فريدة : راه دخل معطل داكشي علاش ....
حياة : ( دخلات حطات صاكها فوق كوافوزو ) لا باراكا عليه يفيق راني توحشتو ... ( جللسات حداه وبدات تمشط بيديها على شعرو ) سسلطاااان .. وصافي اولدي فيييق .. ماتوحشتينيييش ..
فريدة : نوجدو فطور ولا غدا .. انا راه تلفتوني هاد سيمانة فماكلتكم ... موسيو سفيان تاهو يالاه فاق وغيخصو يفطر هو وسلطان و نت واية خاصكم تغداو .. شدو بروغرام واحد مالكم ترونتو هاد سييمانة ....من العيد ماشديت ليكم طريق ...
حياة : خليني انا واية نتغداو من بعد .. وجدو لهادو يفطرو .. انا مخداماش فالعشية ... وااااا سلطان غنبقى نبررررح ....وافيييق ...
سلطان : ( هز راسو فيها مخخسررر وعينيه حالهم غير شوية ) ماااالكممم هاد الصباح مالكم ...
حياة : هااادي هي صباااح الخير وتوحشتك اماااما !!!!!
تكعد حط راسو على رجليها وبدات كتمشط ليه فشعرو وهبطات لخدو باستو وهو يهز يدو مسحها
حياة : هههه وراه معنديش العكر ...
سلطان : ( علا راسو كيشوف فيها وتبسم وعطاها بوسة فالهوى ) توحشتك ..
حياة : تالدابا
فريدة : ( كترتب الكوافووز ديالو ) يلاه شافك هههه ... ( ضارت عندو ) يلاه نوض اولدي باش تنزل تفطر ..
سلطان : ( ضور راسو شاف فيها ) تانتي توحشتك ...
فريدة : ( تبسمات ليه بحنية ) يتوحشك الخير اولدي .... كتسافر غير يومين كتخوي علينا الدار
حياة : نووض دغيا .. ( هزات راسو حطاتو فوق المخدة ووقفات ) يلاه بدل حالتك ونزل لحق عليا .....
وما ليها براسو ورجع تكا فوق سرير كيحك فشعرو ويتكسل .... حياة خرجات وفريدة باقا كتمسح ليه كوافوز وكترتب سوايعو ... وهو هز تيليفون كيعوج فعنقو ويشوف اخر الاخبار تاشوية هز عينيه بزربة ملي بانت ليه فريدة داخت وبحالا غادي طيح وناض كيجري من فراشو شدها ...
سلطان : خاالتي ... خالتي فريدة ! نتي لاباااس ؟؟؟؟؟؟
فريدة : ( شدات فراسها بزز وحاولات توقف وكتومي ليه بلا بيديها ) لاابااس اولدي لاباااس غير دخت شوية يمكن درت شي حركة ماشي هي هاديك ...
سلطان : ( كايقيس ليه فجبهتها مخلوع وهي كتومي ليه بمعنى لاباس ) واش متأكدة ؟ نمشيو نشوفو طبيب حسن ؟
فريدة : الا اشمن طبييب راني بيخير .. غير مناعساش مزياااان
سلطان : وجهك تاهو معجبنيش ونقصتي فالپوا بزاف .. واش كتاكلي ولا سامحة فراسك ؟؟ شوفي وجهك كيف صفر ( كيضورو بين يديه ) خلينا نمشيو انا وياك فالعشية نكونسيلطيو باش لاكان عندك نقص فشي فيتامين يتعوض ...
فريدة : والله اولدي تا راااني بخيييير .... الا حسيت بشي حاجة ماهياش انا لي غنقوليك يلاه معاياا .. واش انا نحشم من ولدي .. ( شدات وجهو ) كوون هااني ...
سلطان بقى غير كيشوف وهي تبسمات ليه وهزات السلة ومشات وهو تنهد ودخل لدوش نصل حوايجو ودخل تحت الرشاش ....
لتحت كانت حياة كتقاد طبلة على الخادمة لي هازا البلاطو فيه طباسل وهي كتهز من عندها وتحط ... محيدة شال ديالها مطلوق على كتافها وجامعة شعرها لفوق ومحيدة لكوستيم بقات غير بسروال اخضر و طوپ فالبيج بسميطات .... واية حداها فالكرسي شادة طابليط ديالها كتفرج ...
حياة : سفيياااااان ... سفياااان ... واااادغيا فطووررر غيبرد ..
آية : بابا مخدمطامش ليوما
حياة : بغاو يرتاح ليوم خدمة مرخوفة شوية ... وتانا العشية مخداماش ... باباك بغانا نهبطو للبحر مجموعين ...
اية : بصاااح ؟؟؟؟ گود ايديا .. ( فكرة زوينة ) ...
يلاه كيهضرو هو كيبان سفيان نازل غير بسروال دسيرفيت بيض رابط ليه سيور و تيشورت ... شاف ف اية هو يضحك .. كيطلع ليه المورال ملي كيصبح على وجهها ومشا تحنى لمستواها شد وجهها بيديه كايبوس فيها
سفيان : صباااح هاد الرييييحة لغزالة .... صباح نور لاجججمل بنت فهاد دنيااااا
اسة : هههه ( عنقاتو ) اوفكووورص . . حيتاش بنت اجمل واحد كاين فهاد دنيا ..
حياة : اعمل نفسك ميت .. اعمل نفسك ميييييت ...
سفيان : ههههه مالك المغيارة مايتغزل حد ببنتو ...
حياة : لي كيتغزل ببنتو .. كيتغزل ببنتو وبلي جااابت ليه بنتو ... ونتي الا بغيتي تغزلي بباباك .. باباك راه مجابكش بوحدو .... ودرس التوالد راك قريتيه ......
اية : هههه ماما بااان ليا غادي تخرج فينا وحمها ههههه ...
يلاه كيضحكو عليها وهو يعنقها سلطان .....
سلكان : ببعدو لياااا من الحييييبان ديالي .....
حياة : هاوا جا لي كيعرف يدلعععني .... غابصحتك بباك ...
سفيان : وااافيييين ( وقف )
سلطان : ( طلق من حياة وشاف فيه ) هااانا الواليد .. يالاه جيت صباح ( عنقو بالكتاف ) ...
سفيان : كيف داز داكشي !
سلطان : ( كيهضر وكييبعد وجهو ميشوفش فاية جامع شنايفو وهي مبتسمة فحركاتو الدلوعين وكيفاش كاعلي فراسو بمعنى غضيااان ... ) مااابييهههش ..مزيان
اية : ( كتحاول تحزرو عارفاه مقلق منها ) خووووياااااا
سلطان : ( كيحك فودنيه ) شي تزنزين لا !!!!
حياة : مالك معاها تاني
اية : سسسلطااان ... والله منعااااود
سلطان : ( كيشوف فيها ويعلي راسو لفوق داير فيها غضبان ) بنت من هادي !
اية : ههههه واصافي اسلطان والله منعاود نعس ونتا مسافر ....
سلطان : ( ضار شاف فيها ) تصفطيني انا بلا بوووسة ماحشمتيش ؟؟؟؟ فيناهيا بسلامة اخويا ... وطريق سلامة
اية : والله تا نسسييت واش مسافرررر داكشي باش نعست ...
سلطان : ( ضحك وهبط عنقها ) غااكنضحك مع الفراشة ديالي .. جيت عندك خديت بوسة ونت نااااعسة مغمضة هاد العوييينات .. كنت على شوية نديرك فطرف دالخبز ..صافا حبيبتي ؟
اية : بيخير تبعت واحد السيييري زويييين ... ( قلبات ليه طابليط ) غيعجبك ...
سلطان : دابا نشوفو معاك .. ( وقف وبان ليه سفيان و حياة كيشوفو فيهم مبسمين ) اوا شنو تما !!!
سفيان : راه مكاينش لي كايعرف لهاد الدنيا قدك ... المصايب نتا تاكايساليو عاد تكلس فالطبلة تسمع غا الراپور ديالهم ... ( جر الكرسي جلس ) قهوة احياة ...
حياة : ( مدات ليه فجنالو ) الله ينجينا من المصايب ....
سلطان : دابا باش فاراوها مع داك خينا ...
حياة : باقي فالكلينيك اسفيان ؟؟؟؟؟
سفيان : يمكن خرج هاد صباح ... متقولش نتايا للوؤي ولا لجود راه بات تما راه غينوضو روينة ... مكانوش بغاوه يبقى فالكيلينك ...
سلطان : وراه هادشي لي خاصو يكون من الاساس ! خلينا دار بوه باش نداويوه !
سفيان : عمك مبغاش يكبر الموضوع يقدر يتحلو ليه داك الضربات ولا يتزاد عليه الحال ويكبر الضوسي على لوؤي داكشي باش داواه .. صدق كان كادير الدياليز كنا غنطيحو فكارتة كون مانقدوه دغيا ....
سلطان : دابا علاش تسلخ وكان !
حياة : وحنا عرفنا ! ... واش ضربو بزاف ؟؟؟
سلطان : هلللكو ..
اية : احسن حاجة وقعات هي ماحضرناش انا وماما .... الحمد لله دازت ... كون وقعات ليه شي حاجة لوؤي مسكين كان غيمشي فيها .... مية فالمية دار ليه شي حاااجة لي عصباتو .. لوؤي ماعاصابيش لداك الدرجة كاملة
سلطان : منين دخل هو محاملوش ... وعلاش قلتو مانقولهاش تالجود !.. مال جود تاهو
سفيان : راه هو لي مابغاش يبقى تما فالكلينيك ... مشاو نوضوها حتى تما ... حتى تهضر معاهم نتا وعرف منهم اش واقع ...
سلطان : لقيتيني دابا شوية نخرج عندهم ...
حياة : موحال تلقى جود ... البارح كنت عيطت لامار بليل وقالت ليا بلي اليوم راه غيدوزوه مع بعضياتهم يمكن غيخرجو لليخت .... وخوي الليل حيتاش غنمشيو لعندهم ملي يرجعو ...
سلطان : علااش ؟ يلاه كنا تما ...
حياة : قسم غتمشي لعسكرية ..
سلطان : هاد العسكرية مزال مابغات تسالي ! واخا يكونو كيوجدوها تحارب فافغانستان غاتكون سالات ...
حياة : اوا شنو حسابتك غير اجي وكون كاپيطين !
كيهضرو وفريدة قربات عندهم ببلاطو يلاه غتحطو هو يشدها سلطان من يديها
سلطان : اجي جابك الله ...شوفو معاها راها داخت لفوق فالبيت عندي .....
حياة : اوييييلي ؟؟؟؟ فريدة مالكي !
سفيان : ياك لاباس !
فريدة : ( كتحلف على سلطان وقادات وقفتها ) لا لا غير كيزيد فيه .. غير درت شي حركة ماشي هي هاديك وجاتني دوخة وصافي ....
حياة : لا لا نتي اصلا هاد سيمانة كاملة معجبتينيش حتى البارح جاتك الدوخة .... واش تبغي نشوفو الطبيب ؟
اية : ( شدات يديها ) دادا ؟؟؟ واش كتحسي راسك بيخييير ؟؟؟؟؟
فريدة : بييخير احبيبتي راه غا سلطان زاد فيه ....
سلطان : واكلسي كلسي تفطري .... انا كون تسمعي ليا سيري ديري ليزاناليز نشوفو شنو ناقص .. راه طبيعي والواحد كيكبر فالعمر خاصو يكونسيلطي على صحتو واخا ميكونش مريض ... كلسي دابا تفطري ....
حياة : ( جرات ليها الكرسي ) كلسي معانا كلسي ... الا عيانة خلي عليك داكشي وسيري ترتاااحي راه البنات يكملو ....
فريدة : صافي متخافوش .. الا حسيت براسي ماشي هي هاديك غاانمشي .. اما داباا غير خليوني ملاهية يدي ...
اية : ( مدات ليها فنجالها ) سلطان عندو الحق ادادا .. الفحص ضرووري .. على الجسم كامل ( رجعات شافت فباباها ) احقا ابابا فوقاش الافتتاح دعمي عدنان بالضبط ! ياك مغايجيش فالقراية ؟
سفيان : يمكن يومين مور الدكرى الاربعينية ولا نهار معرفتش بالضبط ولكن مور الربعينية ...
اية : غاتكون مزالا القراية .. انا حسابتني باااقي معطل ....
سفيان : ماقنطتوش .. متبغيوش تسافرو شوية ! ( شاف فيها ) هضرتي مع الدكتورة
حياة : هضرت معاها قاتلي لا ... تاتفوت ربع شهور ... خطر السفر دابا ... دي معاك ولادك والله
.. انا ماعليييش ديجا مزال معطلين فالخدمة هاد العام عطلو علينا العطلة باقين واحلين فالبيداغوجية الجديدة ....
سفيان : انا منسافرش بلا بيك .... نخليوها تالعام الجاي ويمشي معانا الاسماعيلي الثااالث ديالنا ( كيقيس فكرشها ) صباااح الخييير بابا .... ياكما صدعنااااك ...
سلطان : هههه ماانعرف هااااد خيييينا لي جاي يختم لينا سلسلة احفاد الاسماعيلي كيفاش غيكون
اية : وعلاش لي متكون ختنا .. انا بغيتها بنيتة .. حيت عندي خويا ومعنديش ختي ....
فريدة غير مبتسمة كتشوف معاهم ... وفعينيها فرحة كبيرة ليهم و أسف كببيير ليها هي .. وقت ماتجلس معاهم وتشوف الحب الكبير لي غااامر هاد العائلة ... وحياة وسفيان لي دايرين ولادهم بحال صحااابهم ... وكيفاش غامرينهم بالحنان والحب والتفاااهم .. وكيفاش كاتعاملو وكايعملها .... كتبقى غير تتنهد والندامة كتنهش فييها إنش بإنش لي ماعرفاتش تحافظ تاهي على أسرتها بحال هاكا وتحمد الله .........
حتى سهاااااات بيها داكرتها .....
داخل لكوزينة فيديه جوج ميكات ديال الحوت وحطهم فوق الكونطوار ... وهي عاطية بالضهر ... جامعة شعرها الاسود الحريري للفوق مبعثر ... ولابسة بيجامة تحت شوية من ركابي وكتغسل المواعن ....وهو يدوز مر عنقو من العياء دالخدمة متكي على الكونطوار
- كاين شي غدا ... ( غير تنهدات وكتخبط فالمواعن فلافابو ) فريدة ؟؟؟؟؟ مالكي ! ....
فريدة : ( ضارت بعصبية ونفضات واحد الشبكة من يدييها ) انااا رااااه عييييت .. رااااه تقققهرررت بتماارة ..... نتوما كاتعرفوو غير تاااكلو .. مكتعرفوووش شكون كيقيل واقف الكووزينة كيضيع حيااتووو
- ( علا حاجبو ) مالنا دابا على هاد الهضرة افريدة ؟ انا سولت غير على الغدا .. الا كنت كتعدبي باش طيبيه حتى انا راه كنتعدب باش نجيبو ليك لكوزينة طيبيه .... الا كنت كنفيق فالفجوووراا نمشي الخدمة ونبات فايق ... على الاقل نجي لقى الماكلة طايبة وتلاقاني مرتي لباب ضاحكة ...
فريدة : ( بالبكا والغوات ) انا راااه تققهرررت .. راه عيييييت ... ماحيلتي لبنت كتباات فاييقة كتتتبكي مسهراني .. ماااحيلتي لولد نفيقو للمدرسة ونوكلو .... انا راااه عيييت وحياتي وشبابي كيتفنى بين ربعة ديال الحيوووووط .... مكككنخرج فحال لالياااتي .. مكنساافررر فحاا لااالياااتي ... مكنحضر لعرااساااات .. غير الدار والقهههرة والدرررااااري .. ( ضربات ليه داك الميكة دالحوت ) انا راااااه عييييت اعباد الله
- ( بعصبية ) واش بغيتي ؟؟؟؟؟ نطلقك تسيبي فالزناااقي ؟؟؟؟ اش خااصك ؟؟ ياك فين مالقى وقيتة نخرجك .. ياك لي حليتي عليها فمك كتحضضضر ..... كنباااات خدااام ونصبببح خدام باش نديرو المستقبل لولااادنا ونقريوهم ونجاهدو معاهم ... تزوجتك باش نتعاونو على الزمان ماشي باش تعاوني نت وياه عليا .... الى كان شي واحد عيا هنا راه اانا لي عيييت من غواتك لي مكيساليش ومن هاد الغوباشة لي فين ماندخل لقاك رااااسماااها .... انا ماشي هاكا اشريفة باغي نربي ولادي ... ضحكي ليهم شوية ... خلي الولاد يحسو بالحناااان .... خليهم ولو مرة وحدة فعمرهم يتجمعو مع باباهم وماماهم على طبلة وحدة ضااااحكيييين .... علاش كتخلي الشيطان يوسوس ليييك .. دابا لي داير ليك العزززز وكولشي يهضر غيير بييك .. قااهرك ؟؟؟
- اشششمن عز .. اشمن عز داير ليا .. العز هو تحبسنيييي ... هدا ماشي عز .. هدا حسسسسد .. حيييت عارفني صغيييرة عليييك قد بنتك ... وزويييييينة عليييييك ولي يشوفني يحمااااق عليااا ..... مكيتيقوووووش راني والدة جوج ولاد ... حيت باااقي كنبااان بحال البنيتات لي كيقراااو مع ولدي .... داكشي باش كتنوووض فيك الحرااااقية حيت عارفني لاخرجت يتخااااطفو علياا
مجات فين تكملها تاكان جمع معاها بتسرفيقة تاغوتااات شادة على حنكها لي قلبو ليها للجنب وهو كينننهح معصب
- قققطعي ححسك يسمعوك الجييران ... واش حنا مغنتهناوش من هاد الغوات .. واش انا منتهناش فداري ونجلس مع ولااادي ونربييييهم ... واش باغا تعقدي ليا هاد الولاد لي عطاني الله .. البنت منهار ولدتييييها ونت ساامحة فيها ومقابلة ليا المسلسلات والخوا الخاوي ... رراها تررريبية صغيرة جللللسي حداااها قاابليييها ... عطيييها الحناااان .. واش غا نتتتي ماعشتيش الحناان وتكرفصات عليك مرت باك تكرفصي ليا انا على ولادي ؟؟؟؟؟؟
بقى غير ساكت كينهج وينعل الشيطان وهي كتبكي شادة الى حنكها ..تاسمعو موراهم .....
- بابا !
ضارو عندو وهي غير حانية وجهها و غير مازادت فالشهيق
- ماتخاافش اولدي متخااافش .. غ غير .. .( كينهج ) كك .. كانهضرو شوية وصافي
- مال ماما كتبكي ! علاش كتخاصمو ....
- للا لاااا راه غير شي حااجة دخلات فعينيها اجي نشوف ليييك ( جبدها عندو وهي كتنتر وهو حكمها بزز ) ششش .. يمكن كانت كتقطع البصلة ياك اعمارت داري ؟ ... ( باس راسها ) حبيبة ديالي عيات ليوما ... العشية نخرجكم تعشاو برا .... ( بدا الغوات دطفلة صغيرة رضيعة على برا ) سيير اولدي لعب مع ختك سكتها انا غنطيب انا وماماك ونتغداو .. سير حط شكارة ديالك وجلس حدا ختك هاحنا جاااييين اولدي ... الله يرضي عليك ... اجي افريدة غسلي وجهك اجي ...
*******
اية : ( كتحركها ) دااادااا ... داااداااا
فريدة : ( تلفتات دغيا ) ها ؟؟؟ هضرتي معااياااا ابنتي
اية : اويلي فين سهيتي من قبيلة وحنا كنضهرو معاك
حياة : فريدة عندك شي مشكل ؟؟؟؟
سلطان : ( ضور ليها وجهها لعندو ) مالو الزين ديالنا تاني ؟؟؟ شكون مقلقو ..
فريدة كتحاول تضحك وتتحكم فدموعها مينزلوش وقلبها كيتعصر وسط ضلوعها وهي كتشوف فيد سلطان لي فوجهها ولي من نهار لقاتو صغير هو وختو وهي كتشوف فيهم صورة ولادها وباست ليه يدو
فريدة : غيير لقيتووني كنفكر كييغندوز هاد المدة بلا بيكم ونتوما غتسافرو
حياة : يلااه قلناا حداااك مغنسافروش حتال العام الجاي غير نتي منعرف فين سارحة .... وحتى كون كنا غنسافرو راه كنتي غتمشي معانا بحال كلا عام ....
فريدة : غير قلت زعما الولاد دابا راه كبرو مغيحتاجونيش نقابلهم بسلامتهم ...
حياة : على نت كنا كنديوك معانا باش تقابلي دراري راه ولادي قادرة نقابلوهم بووحدي ... ( حطها يدها فوق يد فريدة ) كنديك تونسيينا يالهبيلة راك وليتي وحدة منا ... ونلقى انا تاني معامن نجمع ونشد النميمة هههه ....
فريدة : ههه لهلا يخطيييك اختي حياة .... الله يقدرني تانربي تاهاد الامير لي جاي تاهو ينور الدار .. ( وقفات ) نخليكم تاخدو فطوركم .. غنمشي دابا نقاد الغدا .... نهاركم مبرووووك ....
خلاتهم ومشات وسفيان متبعها بعيينو
سفيان : والو معجبتنيش ...
سلطان : كون غير تشوفي كيديري الوليدة تديها لكلينيك ....
حياة : يدوز هاد النهار ويكون خير ....
سلطان : ( كيقطع لومليط ديالو ورجع شاف فيهم ) اه باش مانسى .. بلا متعولو عليا هاد الشهر انا مكاينش ....
سفيان : وفين غادي !
سلطان : معروووض
حياة : هاء
سلطان : معروض شهر .... للمالديييييف ..
اية : ايهاي ! عارض عليك شي صاحبك ؟
سفيان : واش كاين شي صاحب ابنتي كيعرض للمالديف .... هدا راه صاحبو بتاء مربوطة ...
حياة : ياااربي تععفوو عليك ياربي .. منين هادي تاني ؟؟؟؟؟
سلطان : ( عينيه على كاسو كيكب وكيجاوب ) اكوادور ..
حياة : صافي بقاولك غالاكوادوريات ...
سلطان : تنوع الثقافات الواليدة ...
حياة : ومال المغربيات فاش قصرو معاك ؟ حسن من داك المونيكات لي تتكون معاهم
سلطان : نهار نبغيها مغربية راه غنمشي معاها للعدول ماشي للمالديف ...
حياة : شهر بزااااف !!!
سلطان : سيفطي اية عند مك ومغيبقاش ليك بزاف
حياة : ( ضرباتو بسربيتة ) جججدااالتك .. قوليها جدة ... منعاودش نسمع هاد مك ...
سفيان : ( طل على اية ) اش بالك ابنتي ! تمشي ...
اية : ( قالبة شفايفها ) بابااااااااا
حياة : واش كديي علييه راه غير كيضحك ....
سفيان : ( قرب راسو عند سلطان كيهضر بشوية ويحك مور ودنو وحياة مصغرة فيه عينيها ) وو .. وهاد خيتي .. هادي ... قاتليك اجي غابوحدك ! ززعما ...مما تجيب معاك حد ....
يلاه كيكمل الهضرة تاشافها جبداتو من ودنيه وقرباتو لعندها
حياة : وعلاااااش كاااتسوووول
سفيان : ااااي طلللقي ... غ غير قلت زعما لاكانت غاتجيب تاهي ماماها .. ( زادت زيرات على ودنيه ) باباابااها .. وااا باباها ... نمشيو نتوانسوووو .. مايبقاوش دراري بوحدهم .. شيطان متعرفيش اش غايجيب ....
حياة : والله ييييعطيني وجججهك .... ( قلبات راسها غضبانة )
سفيان : (هز يديها باسها ) دابا واش انا غنخلي عمو ونمشي لاكواذورية شبعانة لحم خضر ... ونت مالقيتي تحملي تالصيف شنو فيها لو خليتيه تالشهر تسعود وهزيه ..
سلطان : ( شاف عند اية ) حنا لي غاانوضوووو نتهزو واقلة ... تهزي نت هادو راه مفيهمش ثقة ... ( وقف ) يلاه نديك نعومك شوية..
هزها فيديه وخرج بيها لابيسين وحياة تبعاتهم
حياة : بلاا متفزك ليها حوايجها نهبطو لبحر حسن ...
سلطان : وطلعي جيبيلنا الحوايج ولحقو علينا ... غانمشي ل لازون c باش نطلعو ديريكت عند عمي اسد .....
حياة : صافي سير تما ( يلاه غاتمشي رجعات ضارت ) واااا ختك راه مامغديااااش ...
اية : ماافياااش جووووع دابا .... تالتما وناكل ...
مشا بجهة طموبيل دار اية حداه وقادها على الكرسي وديمارا وطلق المزيييكا وكسيرا سابقهم للبحر .....
فيلا عدنان
نازلة رتاج فالدروج كتفريفي صاك ديال وراقها واش كولشي هو هاداك كانت لابسة حوايجها وانس موراها تاهو لابس ملابس رياضة وهاز شكارة فظهرو ديال المضرب ... تاوصلات لتحت وحطات صاكها على الفوطوي وتلفتات لصال مونجي كانو كيحطو الغدا ....
انس : ماما والله مافيا جوع .. خليني تانجي من الملعب وناكل ...
رتاج : قالت ليا رحاب مافطرتيش مزيان .. مغتمشيش للملعب هاكا خاوي ...كول شوية وسير ...
انس : وراه غانتعطل وهوما مزال منزلوش وانا مزروب
رتاج : جلس كوول بلا متسناهم يلاه .... رررحااااب ... رحااااب ( جات عندها ) حطي ليه ياكل باش ميتعطل على الملعب ....
ضارت كتصوني فتيليفونها على لوؤي وكيعطيها طافي وكتنهد .. تاسمعات خطوات نازلين فالدروج وصارت لقاتو عدنان لابس سروال كحل وشوميز كري و هاز الكوستيم فيديو وكيقاد صدايف ديال الشوميز على يدو ....
عدنان : مكيجاوبش !
رتاج : ( تنهدات ) طافيه ..
انس : بابا صباح الخير ....
تحنى عندو عدنان باسو ... وقرب عند رتاج
عدنان : ماباتش هنا ياك !
رتاج : ( تلونات مخلوعة ينوضوها تاني ) لاااا .. ب بات هنا .. راه خرج فصباح ....
عدنان : امممممم .... ( مشا لصال مونجي وكلس ورتاج متبعاه بعينيها عرفاتو متاقش ) عندك ماتش
انس : لا غير تداريب ... بابا فوقاش نتحول لسطاد فين كاينة قدس .... ممرتاحش فهادا
عدنان : يدوز الافتتاح ونتلاهى معاك اولدي ... ( شاف فرتاج ) فين فيصل ؟
رتاج : هاهوا نااازل ....
تقلبات لجيهة لوخرا شادة فطرف الفوطوي بيديها وكتشوف لزاج قدامها كتسنى تبان ليها طموبيل لوؤي فنفس الوقت كتحس براسها معععصبة غادي طرطق وكلها مسطريسيا .. والمورال طايح ... عدنان عوج معاها راسو بانت ليه ماشي هي هاديك وشاف فانس لي كياكل ورجع زاد لعندها وقف موراها معنقها من لور وباسها فعنقها ....
عدنان : مال دكتورتي !
رتاج : ( بعدات ليه يديه ) ماماليش اعدنان .. خليني ....
عدنان : ( ضورها عندو كيشوف معاها بخلعة ) اش وااقع ؟؟؟؟
رتاج : ( انفاجرات فوجهو وانس هز راسو دغيا كيشوف فيهم ) عدناااان فخبارك عييييت من هاد العلاقة المتوترة ديالك نتا ولوؤي .. مسطيرسيااااني فحياتي كتر مامسطريسيني مشاكيلي .... بابا يالاه ماااات وباقي قللبي مجروووح علييه ... الخدمة كلها فوق رااااسي ... ( بدات كتبكي ) ونزيييد خاصني نهز ليكم الهم عنداك تقلق منو وتقلبو دنيا تاني .... حححس بيا شوية اعدنان واش هاد الولد باغي ديرليه قنبة فعنقو وتربطو مع رجلييييك ... ديما خاصني نبقى نترعد الى مدخلش لدار .... رررخف شوية على هاد الواد راك قققهرررتيه بالقسوووحية ....راه كبر اعباد الله كككبر
عدنان : ( شد وجهها عندو بهدوء ) شششششش ...... بشوية عليييك .... انا راه ماقلت والو .... غير بشوية .... ( بدات كتنخصص وجرها عنقها عندو بييد كتبكي وهو كيدوز يدو لوخرا على ظهرها ) .... ياك كنقوليك بقاي تعطي الراحة لراسك وخرجي من سوقي انا وياه .... واش انا غانفوت ولدي ؟ واش غانكره اول واحد قاليا بابا ! ... واش عاقلة نهار هزيتو بين يديا وهو يلاه تزاد .... ررراه انا لي كيعصبني فشوشك للولاد ... الولاد مخصهمش الفشوش ارتااج ...
رتاج : ( بعدات منو وشافت فيه مسحات دموعها وانس غير ساكت كيشوف فيهم مخلوع ) الولاااد خاصهم الحناااان ..
عدنان : عرفتي نت اش غاديري .. غادي ديها فخدمتك وفحريقك.. وغتخرجي سوقي انا وياه ..... انا مباغيش ولادي يكبرو مفششين .... الولاااد كيبغيييو الواحد يكون معاهم قاااسح باش يطلعو قاسحين محكووووكين ... ماشي مرعونيين ... ولوؤي راه الى مراقبتووش غيدير ليا شي كاااارتة ..... لاڤونص لي فيييه هو وولد أسد مزال ماشفت بحالها .... فييينهوا دابا وريه ليا .. فين باااايت ؟؟؟علم الله عندمن رااه صااابح واش سكراااان واش دييخان واش خلا دار بو شي حد تااااني ..... الفشووووش الزايد ماعندي مندييييير بيه ....
رتاج : انا ماشي سووووقي ..انا غنفشش ولااادي وطرطق لابغيتي طرطق
عدنان : ديري لي عجبك .. غير متورينيش كيفاش نتعامل مع ولادي انا ... ( جرها من يديها غادي بيها لصال امونجي ) اجي جلسي حدايا فتحي ليا الشهية .... شحال تموتي على دراما ....
رتاج بقات غير كتنننهد وتمسح فدموعها ومشات جرات الكرسي وباست انس
رتاج : متتخلعش احبيبي .... ( شافت عند عدنان بقى غضبانة ) شرررربتي دواك
عدنان : ( هز يديها باسها ) هانا شرربتو ....
رتاج : ( جمعات ضحكتها البلهاء باش ماتشتتش ليها كرامتها ) بببعد ...اللسان مكينش لي يهدك فيه ....
يلاه غتقلب لطبسيلها لي كتحطو رحاب وهي تسمع خطوات فيصل جر الكرسي وكلس لي كان غير بشورط ديال دجين وتيشورت ولابس كاسكيطة مرجعها لور ...
فصيل : بكيتيها تاني .... ( شاف فعدنان ) ماشي عيقتي لينا شوية عليها ...
عدنان : هي لي تتبغي تبكي راسها .... واش انا خاصني كل مرة نعاود نفس السينتة ... الولاااااااد ماخصهمش الفشوش .. الولاد خاص الواحد يكون معاهم قاااااسح .. يكون صاااارم ...
رتاج : اوا كون تا مع هادو صااارم .... حاااكر ليا غير على لوؤي
عدنان : هادو عندي دراوش هداك لي جن ....
فيصل : هاكاك الواليد قول كلمة الحق ... حنا شفتينا سلخنا شي واحد هههه .. فين هو دابا فين ؟
عدنان : ومالك سكتي ... قولي ليه فيناهو
رتاج : ( تنهدات ) يمكن بات عند شي صااحبو .. واصلا نتا مكتر عليه الخدمة مسكين مكيتنفسش غيكون عيا وبغا يرتاح ...
عدنان : يرتاح بليل ؟ ليل فيه الراحة ؟ الليل راه كولو تمااااارة ....
رتاج : ( كتغمز ليه سكت ) سسسكت الدراري كيتغداو ...
فصيل : ( كياكل ويضحك ) هههه ... لا دبصح الواليد كترتي عليه .. كون مكنتش كنوجد لتوفيل ... كنت غنمشي نعاونو
رتاج : نتاا ديييها فقرااايتك ... داك توفيل راه هو كولشي .....
فيصل : انا والله كون تساعفوني خليوني نقرا غير هنا ... والله مافيا لي يبدل البلاد .... مغنعرفش نولف ...
عدنان : كي ولف خوك قبل منك غتولف نتا .. تسالي القراية ورجع .... انا فيا منقريكم هنا ولكن كنصيفطكم لبرا بوحدكم باش تعلمو تعولو على نفسكم شوية .... نعلممووو تااانتوما شنو هو الزمان وشنو هو تقضاو راسكم وطيبو وتخملو وتجمعو حوايجكم ....
فيصل : سبفطنا للعسكر حسن من هاد تمارة .....
عدنان : طنزك خليه عندك .....
فيصل : هههه ...يكون خيير ..
يلاه كيتغداو تاسمعو جيب ديالو داخلة ورتاج علات راسها دغيا ....يلاه جات تنوض هو يشدها عدنان
عدنان : جلسي تغداااااي .... مكيعرفش الطريق !..
رتاج : ( جلسات كتسوط ) ملي ييدخل بعد منو ... خليني مني ليييه .. انا غنعرف فين كااان ... متتهضر ماتكلم .. خليني مني لييييه ماشي غير نتا لي كتعرف تربي .. لوؤي كييمسع غير بالهداوة ماشي بالغوات ...... وكايسمع مني
عدنان : هااهواااا ساااكت .... وريني نشوف ....
نزل لوؤي من الطموبيل لابس سروال عسكري زيتي كولو جيوب وتيشورت كحلة وهاز كويرة فيديه وسروالو وتيشورتو كلهم مغبرييين وشعرو مرووون وعينيه حومر دااابليييين ومدمعييين ... داخل كيشمر بنييفووو هاز فيدو تيليفونو ونظاظرو وشارجورو .. غير دخل زاد تاوصل لوسط الدار فين كاينة الصال امونجي علا راسو فيهم مسخسخ
لوؤي : بصحة ...
رتاج : ( كتشوف معاه ) لووووؤاي !!!!!!
لوؤي : عيان شوية ....غانطلع ننعس ...
خلاهم وزاد من حداهم طلع فالدروج وعدنان غير كيشوف فيها وهي تبكمات متبعاه بعينيها ...
رتاج : م م الو ؟
عدنان : يلاه وسوليه فين كاين .... وريني تربيتك ....
رتاج : و ولكن .... ( مخلوعة ) كيبان عيان
عدنان : ( بالغوات ) لللوووؤااااااي ..... لووووؤااااااي ......
رتاج : بشششوية .. بشششوية اويلي .... مالو قااتل روووح ....
عدنان : قققطعي عليا حححسك ..... لوووؤااااي ...
لوؤي طل عليه من فوووق مسخسخ
لوؤي : نعاااام الواليد نعاااام
عدنلن : نزززل عندي لهنا
لوري : ووووبررربي تاااعييااان .... نفيييق ونهضرو
عدنان : نزززل عندي هي نزل عندي ..... مغنعاودش الهضرة .....
لوؤي تننهد وتم نازل فدروج بشوية وعدنان كيشوف فرتاج بمعنى تعلمي التربية كيدايرة وهي غير مربعة يديها وكتشوف وفيصل وانس غير متبعييين ولفو خصامهم ولوؤي نزل وقف حداه
لوؤي : ( بعيااااء وصوت مغنغن بحالا كيهضر على نيفو وكيشمر وعينيه مدمعين ) هااانا الوااليد ... اش كاين ...
عدنان : ( شاف معاه ) فييين بايت !!!!
لوؤي : فالقصر ديال سليمان القانوني .. حاطين قدامي العيالات و سلة دالعنب ....( عدنان معلي حاجبو) فييين غانكووون .. فالخدمة لي وحلتيني فيييها ..... فرررعات دييييلمي الغبرة .....
عدنان : بتي فالمتتتحف ؟؟؟؟؟؟
رتاج : اويلي على بتي تما ؟؟؟ بتي وسط داك روينة .... ونتا عندك حسااسية واش حماقيتي .... شوف حالتك
لوؤي : ناعس وسط الجماجم كيبغيتني نصبح ...
عدنان : ( شد على راسو ) انا ماعرفتش منين غانجيب الصبر .. يا اما يجلس فخطرة يا اما يخدم بلا فرانات ... ( علا راسو فيه ) نزززل راسك عندي لهنا نشوف ... نزززل
لوؤي : خليني الواليد نطلع نعس الله يرحم باااك ...
عدنان : نززززززل رااااسك ...
لوؤي تنهد موكل امرو للله ونزل ليه راسو وعدنان كان كالس على الكرسي وبدا يقيس ليه فجبهتو هو يوسع عينيه وبدا يتحسس بزربة فنعقو وفيديه ورجع شاف فرتاج
عدنان : الولللد طاااايب ( وقف ولوؤي غير كيتنهد بعياء باغي يتفك ) رررتااااج الولد طااايب
رتاج : وراه عند حساسية دالغبرة والخشب سينوغمال غتطلع ليه سخانة ...
عدنان : ( ضار عند فيصل ) نووض .. نوض نتتا دغيااا جيييب لخوك الدوا دياالو ... ( جر الكرسي ) كككلس ...( شاف فرتاج ) كااالسة نت كتشوفي فيا كنقوليييك الولد طاايب
رتاج : ( ربعات ديها) اعدناااان .. احححبيبي راه فيه غير سخاااانة .... تتتهدن شووووية مالك ديما كيخلعك المرض بحال هاكا ...
عدنان : ( مداهاش فيها وتقلب عندو كيتحسس فيه ) فيييك الحلااااقم ؟؟؟؟
لوؤي : فياا النعاس ...
عدنان : فييك التبوريشة
لوؤي : واافياااا النعاس
عدنان : ( كيقيس ليه فقلبو ) كتحس كيضرب بجهد
لوؤي : والله الواليد تكنحس غير بالنعاس هاد الساعة ( باس ليه يدو لي كانت فجبهتو ) هانا غنطلع نعس غير ساعتين نفيق اونفوورم .. ممكن !!!
عدنان : ( شاف ففيصل ) وااش مسسسمعتينيييش ... نوض جيب دوا
فيصل : منين غنجيب الدوا الواليد راه عندو فبيتو
عدنان : سييير طلع نزلووو ليييه ... ديرو ليه يششربو ....
فيصل : واخليه هو يطلع يشربو تما ويرتاح واش انا غانقلب فحوايجو حشومة .. راه خاصو ينعس .. مسكين راه بايت فايق ....
عدنان كينگر ورتاج مربعة يديها كتشوف جاتها الضحكة على لي عاد كيهضر على الصرامة والفشوش و لوؤي ربع يدييه فوق طبلة وحط عليهم راسو مكمل نعاسو كيشمر بنيفو وكل مرة يكحب .....
رتاج : خلي الولد يطلع ينعس اعدناااان
عدنان : لاا ... ماينعسش والحرارة طالعة ليه هاكا يمشي يتزاد عليه الحال وهو فالنعاس مغايحسش براسو تايدخل فشي كومااا الله يسترررنا
رتاج : اعوووذ بالله من الشيطان الرجيم .. ضربتي لينا سنين ديال الطب كلها عرض الحيييط .... ( شافت فلوؤي ) طلع اولدي ترتاح فبيييتك ... .انا نهضر معاهم يطلعو ليك شي حاجة سخونة كولها .. ودوش ورتاح وشرب دواك دحساسية ...
لوؤي شمر بنيفو ووما ليهم براسو وتم طالع وعدنان متبعو بعينو ... وانس ناض هز شكارتو ... وفيصل تاهو ناض خرج تبعو باش يوصلو .... ورتاج وقفات وبدات كتقاد كوستيمها كتستعد تخرج
عدنان : فيين غادا
رتاج : لكلينيك فين عندي نمشي
عدنان : وغتخلي لوؤي هاكا !
رتاج : واش لوؤي عندو ربع سنين ؟ ياك غا دابا كالس عليا ( غلضات الصوت بحالو ) الصراااامة وخاص الواحد يكوون قااسح وخاااااص االواحد يعرفي يررربي ومايطلعوش الولاد رعوانين ... وماااالك دايا غاطلعات ليه السخانة بديتي كترعد عليا
عدنان : الصرامة ماشي فالمرض .. المرض ممعاهش اللعب
رتاج : نووض نوض تمشي لخدمتك راه الولد ولاو كتافو قد كتافك .. راه غير ملي بات حدا الغبرة وهو عندو الحساسية .. غيشرب غير دوا ديالو وغينعس ... نوض لخدمتك ... ( هزات الشانطة ديال الوراق ديالها وصاكها وتحنات عندو باستو فخدو ) يلااااه احبيبي خليييتك .... ( شدات ليه حنكو ) كنبغيييييييييك انا بلااا قيااااس .. تعيا مادير فيييها قااااسح كتبقى غير واحد قلبوووو خف من الريييش .....( دازت باستتو من فمووو ) متعطلش على خدمتك ... نتلاااقااوووو بليل عند اسد ...
خلاتو ومشات وهو بقى غير كيرمش فلخر ناض يالاه غيهز كوستيمو يلبسو هو ينفضو على الفوطوي ومشا جيهة الدروج طالع تاوقفاتو الخادمة ...
- موسيو عدنان ... اتصال من السوكريتير ديالك كتعلمك بالاجتماع فالفرع الخاص ...
عدنان : ( طالع فالدروج ) قولي ليها تأجل مغنمشيش ليوم ... ولدي مريض ....
فيلا يونس ....
غرفة اياد ....
الريدوات كانو نازلين وهو فسريرو ناعس بهدوووء ...نعاسو ديما مقااااد ومتزن ...مليووحين حداه الكيت ديالو لي باقي كيتسمع منهم القرآن لي بايت فودنيه باش يقدر ينعس ... تاشوية بدات انفاسو كتسراع وزير على عيييينيه كايصدر انييين خافت وكل مرة يضور راسو يمين وشمااال ... وصدرو كايبان كايطلع وينزل .... مدة ديال خمسة دقايق عاد ناض مفجووع كيلهت وجبهتو كلها مععررررقة وكيشوف مع جنااابو فين هو ....وعاد رجع تكا على الكادر دسرير كينهج وكيحاول يرتب انفاسو .....
مد يدو بزرربة لطابل دونوي هز تيليكوموند كيطلع الريدوات يتنور البيت حس بالخنقة فالظلام .. باقي كيسرط فريقو وكيتفكر الكوابيس لي بايت كايشوف والصوت ديال الغوات .... وشي حد تيجيف فيه ... بدا يدوز يديه على وجهو ورتب انفاسو .. مبقاش كيقدر ينعس بمرة بسباب هاد ليكوشماغ ... ولا فين ماتديه عينيه كيحس براسو غادي يموت .... لاح عليه ليزيار وناض دغيا كيعوج فعنقوووو ونصل البيل بيديه لاحها ومشا كيتكسل بعضلات ظهررووو المفتووول .... كانت بنيتو ضخمة رغم انه حابس سبوور مدة اربع سنوات ولكن بسبب التمارين لي كان كيدير قبل ميتهرس ضهرووو خلاو بنيتو مفتووولة ومخدومة مزيان .. بدا كيعوج فعنقوو ودخل لدوش شد فلافابو بجوج يديه محني كيتنفس ورجع علا راسو فالمرايا كيشوف فوجهو .. فوسط عينيه القهويين المررمشييين. .. علاش ولا عندو الليل معدب قد هاكا ... علاش ولا ديما قلبو مقبوط وكييشعر بشعور الغثيان وانفاسو ديما مامرتبينش .... حل الما وبدا كيغسل وجهو وعلا راسو فالمرايا هو يوسع عينيه وضار براسو بزربة لعنقو كتبان ليه طبعة زززرقة ... !! بقى كيشوف فيها مفاهم والو كيقيسها واش كتحرقو بان ليه بلي كتحرق غير شوية ... استغرب مفاهم والو .... فلخررر دخل يدوش ....
لتحت
كالسة اريج كتغدا وحداها رقية و يونس فالمقدمة ديال الطاولة ... واريج غير كتلعب بالفورشيت ديالها ... وعينيها منفوخين
رقية : اوا نهاك الله على هوما ولدوها باش يخليوها ليك .... ولدتي وكبرتي الله يجعل البركة
اريج : ( كتمسح دمعتها لي نزلات تاني ) ديما يخليوني تا نولفها ويخويو عليا ....هاكا كايديرو ليا تا فكندا .... حبيبة ديالي باقا ريحتها فالدار ....
يونس : وهنيييينا .. هاهوما دابا يرجعو ....
اريج : ( كتمسح دموعها وتقادات فالجلسة ) اياد مزال مافاق ؟ ممولفاش ليه ينعس قد هاكا ...
رقية : على هو باقي مافاق كاع ! ! هاويلي راه جوج دنهار هادي ...
يونس : نعس بكري البارح !
اريج : فين شفتو ... بيلي عارفة نعاسها ... اما هو زعما كيفيق بكري منعرف غيكون قصر ....
يلاه كيهضرو تاكيبان ليهم نازل فالدروج ريحة ليبخودوي عاطية منو لابس سروال ديال دجين وشوميز كحلة لاصقة على بنيتو كيطوي ليها كمايمها وساعة فضية فيديه .... سلم على يونس واريج وباس راس رقية وجلس طاوي رجليه فوق كرسي اخر و معلي راسو مرجعو لور يلاه كيصحصح ...
يونس : ( بالانجليزي ) كيوقع ليك صبحتي ناعس ..
اياد : منعستش مزيان لبارح ....
اريج : ياك لاباس ؟ مشوشاك شي حاجة
اياد : نو ... ماعرفتش .. ملي جيت لهنا وانا نعاس مكييبغيش يجيييني وكنعس معدب بزاف ....
اريج : علااااش ! ياكما السرير ماشي هو هاداك ؟
اياد : معرفتش شنوا واقع ....
رقية : اوا لاتخليوناشاي كي عيشة الطرشة ... توما دويو بالداريجة دجدودكم ...تبقاو تلويو عليا فلسانكم ....
اريج : راه غير قالك ملي جا وهو مكينعسش مزيان ...
رقية : العييين .. شفتو العين اش كدير .. ياك كنقول ليكم بخروو ولاادكم .....
اياد : وات !
اريج : متفهمش نتا فهادشي ( كتشوف فرقية ) لي بان ليك ديري ليه .. هانتي ها هوما انا مابقيت قادة عليهم .... على الله تخرجي فيهم نت
رقية : انا ابنتي دااااز مگوازي وتهرس عكاازي ... بزاوزكم مانگد عليهم ...ياكلو ملعيينين ...
اياد : ووير بايان ؟
يونس : بقات شي بيان .. راه يلاه خرجو ...
اياد : مشاو ؟
اريج : مشاااااو .....
اياد : ( رجع تكى براحة ) تانا غاانمشي ...
اريج : يييهديك الله ا اياد واش غنشدك بسلاسل ..نبقى غير كنرغب ... كلس اولدي تاتفوت الربعينية و يفوت افتتاح دعمك ونمشيو كاملييين ... جلس مونسني
اياد : معاك راجلك اش غديري بيا انا .... خليوني نمشي فحالي والله تاااقنطت هنايا ... مككنعسش ومحاسش براسي صافا .. الخدمة واقفة وزياد شحال قدو يقاد كولشي بوحدو .... خليييني نمشي وفالربعينية غااانرجع .... نرجعو كاملين ....
اريح : ( تنهدات ) انا بانليا كون غاجلستي معايا ... وانا اولدي راه كنفرح فاش كيكونو ولادي معااياا هنايا .... كنبقى بوحدي كنحس براسي مغربة دبصح ...
يالاه كايهضو هوما يشوفو بيلي هابطة كانت لابسة غير شورط قصير بيض ديال السبور و سوتيام ديالو بيضين ولابسة من فوق فيست نازلة على كتافها ونازلة منفوق يديها كيبانو غير صبعانها ...وضفيرتها ضافراها مبعثرة بجنب ولابسة كاسكيط .... نازلة باقا كتمشي ديخانة بالنعاس وتتفوه .... باست باباها ملور وماماها واياد ... وجلسات على كرسي وحطات راسها على كتف رقية معنقة عندها يديها كتكمل نعاسها كيف مولفة فحظن رقية .....
بيلي : ( بصوت ناعس وعيان) كووود مورنييينغ ....
اريج : فقتي ( كدوز يديها على كتافها ) نعستي مزيان !!!!
بيلي : امم ..... قققنطت .. والله تاقننننطت اماما
اريج : يلاااه زيييدك مع هادي تاهي ....
اياد : يلاه تمشي معاياا .. تانا مافيا لي يبقى فالدار تما بوحدي ...
اريج : اويلييي وتدي لياااا بنتي عااااد ....
بيلي : ( علات راسها شافت فيه باقا مبوقة بالنعاس ) فين ؟؟؟؟؟
اياد : لكندا ... ماتوحشتيش داركم ...
بيلي بقات غير كترمش ... وخشات يديها فجيب دشورط جبدات تيليفونها شعلاتو بان ليها مكاين لا ميساج لا ابيل وبقات كتشوفف شحال وشافت فيه
بيلي : اااه نمشي ..... نمشي معاك ... ( شافت فماماها ) خليني نمشي تووحشت دااارنا .... توحشت صحاباتي لي تما .... نيت نبدل شوية الجو والله تاااقنطت .. عطلة غادوز كئيبة بحال هاكا ...
رقية : مافهمت منكم غا كندا ... شكون غيمشي لكندا ....
بيلي : انا اجدة .. غنمشي مع اياد ... قنطت هنايا
رقية : ( بتأكيد ) وترجعو فالربعينية !!!
اياد : ياااااس ..
رقية : او غاا سييرو ..... تمشي تونسك هنا ماعندها نيت مادير ...سيري مع خوك ...
اريج : ( جاتها الضحكة ملي شافتها صدراتها دغيا ) وماشي حشومة تخويو عليا بحال هاكا
بيلي : وماشي بزاف اماما ....
يونس : مغتمشي فييين .. هادي قدام عينيا وكطيير .... خليها هنا قدااامي ..
اياد : واش كتخاف عليها معاياا .؟؟؟
يونس : غانخاااف عليييك نتا ليا غادا معاك .. غتنوضو ضاربو تاني ..
بيلي : ابابا نتا باقي عاقل على داك الزمان لي كانت عندي فيه 13 عام يهديييك الله ..( وقفات ) غنطلع نجمع حوايجي ...
اريج : دابا لي فراسكم فراسكم .... نت خلااص رااااكي حجججرة ... كاااطيري يااابنتي ....
رقية : صافي خليييوهم على خاطرهم ..
يونس : الربعييينية تكونوو عندي هنا ... ( طلعات بيلي كتجري فالدروج ) وختك دير معاها عشرببييين عين وعشرين يد ... ماااااتبععدش على عينيك الخدمة ديها معاك عشرة دليييل تكون فالدار ولا غتلقاني عند راسك ...
اياد : اوووكاي اووووكاي ......
رقية : اييه وضروري ترجعو باش لاكان شي رشيييم لبنت تكون كاينة ...
ايتا : رشيم ؟ واتس دات ( شنو هذا )
رقية : ( بصوت مرتفع مقربة لودنو وهو صغر عينيه ) الخطووووبة ....
اياد : ااااي ...را منفاهمش ... ماشي مانسماعش ....
رقية : وهاانتا دابا سمعتيييها وفهمتييييها ..
اياد تنهد ورجع براسو لور فالكرسي داير يديه تحت راسو ومغمض عينيه وطاوي رجليه على الكرسي لاخور ويونس كييتغدا ...
اريج : يرجعو بسيف عليهم ......
يونس : انا نعيط لشكيب لاكانت طيارة داسد ممحركاش هاد الايام سيرو فيها ....
اياد كيومي غير براسو مغمض عينيه مستترخي تاشوية كمش عينيه وحلهم وضار يزربة كيشوف لباباه
اياد : قستي ليا فشعري !
يونس : ( كان كيهضر مع شكيب وقطع تيليفون وشاف ليه ) لا ؟
اياد : ( شاف فرقية ويدو كتومي لشعرو ) د .. درتي . هاكا .. شاااري ....
رقية : لاا اولدي ( ورات ليه تسبيح لي فيها ) شادة تسبيحي .. تا في عار الله
اريج : مالك اياد ...
اياد بقى غير كيرمش وضور راسو لباب جردة موراه محلول ورجع قلب شفتو لجنب ....
اياد : يمكن الريح .... ( تنهد ) مهم غنطلع نجمع حوايجي .. اش قاليك شكيب ؟
يونس : كااينة ... اسد مغيتحركش هاد سيمانة من غير لاكان ليغيجونص .... راه مشا يعيط للبيلوط
اياد : ( شاف لساعتو ) قوليه جوج سوايع نتحرك
اريج : ( حزنات ملامحها ) يلااه مشاا خووووك ... والله تاغتخويوها عليييا .... بييييلي كااتقلب ليا الجو فالدار غتخليها دابا موراها سااااااهتة .....
اياد : ششهر .. شهههر ونرجعو .. صافي ....
خلاهم وطلع فالدروج واريج رجعات لبكا تاني ويونس غير كيتنهد على هاد دموع ديالها لي مكيحبسوش ....
15h30 ...
ناعسة لامار فوق رولاكس لحمها كلها كتلمع بالزيت .. جسمها رغم التقدم فالسن باقي شاد فراسو بسبب الرياضة والرجيم من غير عروق خفاف لي بداو يبانو فيها وبعض الترهلات بساط جهة الخصر ... واسد على رولاكس لاخور شاد عندو طابليط وقلمها فيديه كايكمل خدمتو ويفيرفيي ضواسا ديالو .... شعرو باقي فازك ... وقدامهم صال مونجي كانت وجدات فيها لامار فطورهم ملي يفيقو يلقاوه ....
علا اسد عينيه ملي سمع شي خطوات طالعين فدروج هو يلوح الفوطة على لامار غطاها ... تابان ليه جود كايطبل فجناب اليخت بمعنى واش ندخل .....
اسد : زيييد ....( حط طابليطو فالجنب )
دخل جود لي لابس غير شورط احمر ملفوق عريان وبدا يشوف مع صال مونجي لي كانت مشكلة بجميع اصناف الفواكه لي كايعجبوهم و الاجبان ... مفرشة بالورد وفالوسط بوكيه وعوج شفتو لجنب وشاف فأسد ...
جود : ياكما صدعناكم ولا شي حاجة ...
اسد : رااه ليكم موجدة داكشي... كاع هدا زهر عندي انا ....
جود : لا لا بزااااف هادشي .... ( علا فيه حاجبو ) ماعجبتونيش نتوما بهاد ضرافة بزاف هاد نهار ... ( هز تفاحة كياكل منها وغمزو ) اشنو تما !
اسد : ( قاد جلستو ) دابا اش فيها لاشي نهار بغينا ندوزوه معاكم هانين بلا صداع .. ضروري تكون شي حاجة ....
جود : دابا وحدة من جوج ..يا اما مات شي حمار فشي واد .... يا اما باغي تلوحنا هنا ونمشي ...
اسد : كون ماخلقش لينا الله واحد العضو سميتو الكبد .... والله حتى غانديرها بلا منفكر
حود : عااارفك عااارفك حااااقد على الوضيعة ... هادشي لي عطى الله .. ولادك منحوسين مساكن اش غانيدرو ...
يلاه غايجاوبو وسمع خطوات وضارو براسهم وجود كايمضع فتفاحتو وهي تبان ليهم قدس وقسم طالعين ... تاهوما كانو مبدلين قسم لابسة شورط و ديباردور ديالو كحلين ديال النايك وفوق منهم گاب مشبك طوييييييل فالپينك شاداه غير بخيوطو و كلاكيط وجامعة شعرها كعكة لفوق وهازة شابو ديالها فيديها ونظاظرها ... وقدس بشورط ديال دجين قصير وديباردور بيض ... مكيقدوش يلبسو لي دوبياس حدا باباهم وجود .... و ضافرة شعرها و لابسة صندالة وخلخال فرجلها ليسرية مكيفارقهاش .... وكلسو على طبلة مستغربين ....
قدس : وااااو .... هادشي لينا ... !!!!!
قسم : ( جرات الكرسي وكلسات ) اودي لهلا يخطيكم علينا وخلاص ....
اسد : وسيم مزال مافاق !
جود : فاق ...
اسد : على نتاا تخليه ينعس ... كلس وكول على خاطرك ...
جود تحنا هز كاسو دالقهوة ومشا للجهة الاخرى من اليخت ... وقسم وقدس كايفطرو ....هاضرين مع اسد تابدات لامار كتحل عينيها وناضت مضهشرة بالشمس ..
لامار :فقتو ...
قسم : صبااااح الخيير ...
لامار : صباح نوورر ..( كترد شعرها لور ) ففف دوخاتني الشمس .. عطيني احبيبي كسوتي ...
قدس وقسم قلبو عينيهم كايحشمو يشوفو ماماهم عريانة وباباهم كاين ... وهي لبسات كسوتها ووقفات كتكسل ومشات بجهة طبلة هزات كاس دالما وبدات تهز ليگلاصون بالملقط كدير فالكاس
لامار : فين خوتك مزال مافاقو. ..
قسم : جود را مشا لهيه ووسيم مزال مطلع ... ( باست يديها ) شكرا على الفطور الغزال
قدس : ( كدهن الجبن فالطوست ) ماما هضري مع الدكتورة تزيد ليا الماكلة فداك لاليست والله تاكيقتلني الجوووع ...
لامار : فين باغاا تزيدي نتي ؟ تاميبقاش يدخلك الباب شوفي كيوليتي تباني كبر من عمرك ... سبور لحتيه كاع .... وعاطياها للنعاس غير من العطلة لهنا راكي زدتي ...
قدس : وهانتي ردو ليا الماكلة ونرجع لسبور ... إييييڤري دااااي ...
لامار : ااه مكنعرفكش ...
يلاه داوين هو يجي وسيم طلع تاهو وعلا حجبانو
وسيم : اش هاد الفطور الزوين ...
لامار : ( كلسات على الكرسي ومدات ليه يديها ) اااجي اجي العندي المشعكك ديالي .... تعجبتو بحالا عمرني وجدت ليكم يا ولادي تاكلو وتنكرو .....اجي كلس عندي توحست نوكلك بحال كيف كنت صغير ....
وسيم : فييين غانجي نهرس ليك رجليك ههههه راه لاجيت دابا غانطيحو انا وياك على داك الكرسي ... راه انا لي غانكلسك على رجلي دابا ههههه ( جر كرسي اخر حدااها وعنقها ) هاانا حدااااك .... ..
لامار : فطرووو ونزلو عومو شوية... نص نهار دوزتوه غا نعااااس .. حسيت تقووولبت فيكم فهاد النهار ...
قدس : ونتوما مهرسين فينا نعاس ... يالاه توكضنا ...
جود : ( جاي باتجاههم ) فقتووو اتريكة الروكان .... ( مشا تكا حدا اسد فرولاكس كايشوف فداربو دروكان لي معلق فالفوق ولي فيه اللوغو القديم ديالهم ) شحال فعمر هاد اليخت الواليد .....
اسد : ( كاخدم فطابليط وكايهضر ) كبر منك ...
قسم : ماشي هنا تزاديت ابابا ياك !
اسد : نو
لامار : نتي تزاديتي فباطو صغير ... محركناهش من نهار تزاديتي هداك .....
قدس : وانا
لامار : تا نتي وتا دجود و تا دوسيم .. ماتحركوووش ....
قسم : وعلاش ؟
لامار : باباك قالك نهار تزادتو فيهم مايتحركو تالنهار تزوجو وتمشيو فيهم ليلة عرسكم ...
قدس : ههههه واو ...
لامار : ( شافت فأسد وكتهضر بكل حب وهو هز عينيه فيها وشادة بيديه ستيلو دطابليط ) حيت باباكم كان قال ليا بلي الانسان كايتزاد جوج دالمرات فحياتو .. نهار كتولدو ماماه .. ونهار كايتزوج بلي كايبغيها .... ولا بلي كاتبغيه ... وليلتو الاولى معاها بحالا كايتزاد من جديد فحياة جديدة ... (رجعات شافت فيهم وقسم حاطة يديها على حنكها مبتسمة ) داكشي علاش مابغاهمش يتحركو منهار تزاديتو فيهم .. ومغايتحركو تانهار عرسكم .. راهم باقين مصافين حدا بعضياتهم كايتسناوكم امتى تزوجو خلاص يتحركو ....
قدس : داكشي علاش مكتبغيوناش نمشيو نشوفوهم ...
لامار : اه .. تالداك النهار واكتشفوهم نتوما وهاداك لي غاتزادو معاه من جديد ...
قسم : اوووو ..... سووووو رومااانتيك
جود : ( مد يدو لاسد ) وعطيني سوارت راه انا قربت نحركو ...
يتبع..
التعليقات
لا توجد تعليقات بعد، كن أول من يعلق.