محتوى القصة
بعد ما عم السكوووون فالقصر ... ورتاحو رجال الاسماعيلي شوية .. ناضو تاني يتجمعو فالمكتب حيت عارفين كتنساااهم نوي بلوووونش اخرى ..... مطمنين بعض الشيء على ان ولادهم كاملين فبيوتهم ....وغير كيتسناو اريج تستقر حالتها ...
تجمعو فالمكتب كل واحد حل البيسي ديالو ... والفيكس الرئيسي محيد ليه الكابل كيتسنى اسد الوقت المناسب لي يبرونشيه حيت عارف غينهالو عليه الاتصالات دمدراء الاعمال ديالو ودولادوو ودخوتو لان مامولفينش يغبرو بحال هاكا .....تحلات عليهم الباب ودخل يونس تاهو لي مخلي ولادو ورقية ومروان مع اريج .... ودخل شد كرسي تاهو كينهج وفعينيه باين عياء كبيرر
عدنان : كيبقات !
يونس : صافا .. دخلت عندها نااااعسة .. عطاوها منوم يمكن .. تالغدا عاد تفيق ويحولوها للشومبر راه السكر بدا يتقاد ....
عدنان : الحمد الله ... ها يونس جا ا اسد .. برونشي الخيط ....
اسد بروشنا الخيط فالفيكس وبداو الاتصالات توصل كل مرة شكون يجاوب ... علنو ليهم ان عندهم وفاة وعلمهوم ميخرجش الخبار للصحافة حتى يفوت الفجر .....
عدنان كيهضر مع الممولين لي كيتكلفو بالجنازة وكيوصيهم اش بغاو بضبط ... وكيقاد اومورو واسد كيتكب المقال الرسمي لي باسمو وباسم وولاد الاسماعيلين كلهم ورسلو لمدراء اعمالهم باش يتكلفو بيه ملي يتعلن الخبر يتحط فمواقعهم وفالجرائد .... ويونس حل البيسي كيتكتب الايمايلات ديال الغياب ديالهم عن العمل على المجموعات كاااملييين بسبب الحداد .... وتوقف الفنادق على ممراسة الانشطة الترفيهية ... والجدارية دالعزاء تتعلق فكتع فروعهم الرئيسية .....
وسفيان كل مرة بجاوب اتصال ... كيقادو كولشي مع الطاقم الخاص بيهم باااش مع الفجر يكون كوووولشي واجد .... حمدو الله لي ماعلموش هاد النهار اما كون تتتقجوووو ....
وعدنان حل البيسي تاني كيكتب الايمايل الرسمي لي غيتصيفط للمنظومة الخاصة بالبروتوكول ديالهم فالمانيا ...
ف عائلة الاسماعيلي .. حتى اعلان خبر موت احد افراد كااايستععععدي الكثييييررر من المجهود والتعب .. من صغرهم وهوما كيبينو مشاريع .... وملي هادشي كبر كتر من القياس قجهم .. حتى من سنهم مقادرينش يعيشوووه مرتاحين بسبب البروتوكولات والاتزامات مع الدول .... لي كيشوفهم من بعيد كيقول مرتااااااحيين والناس دالفلووووس مكيهزو الهم لوالو معارفينش ان داك الفلوس الى تزادت على حدها كتسلب منك راحتك كاملة باش تقاااابلهااااا منين كدخل ومين كتخرج ..... وتقابل حتى سمعتك لي خصها ديما تبقى نقية ولي هي النص فهاديك الثروة ...
ساعات وهوما على داك الشكل وكل واحد فين كيطرطق عنقو حتى دارت الساعة الخمسة دالصباح عاد بداو يجمعو الوراق يمشيو يصليييو باااش يييستعدووو للجنازة ... ويونس وصلو ميساج لتيليفونو ......
يونس : اسماعيل وامين وصلو ... هبطو لاموغگ تاهوما ...
سفيان : الله ينزل الصبر ...
مشاو مجموعين بعد ما سالاو كولشي المسائل الخاصة بالاعلان والتجهيز للجنازة .. ومشاو لمسجد القصر صلاو الفجر ... يلاه طلعو لاجنحتهم كيبدلو حوايجهم والكاميوات ديالهم كيدخلوووو لي غيقاااادووو فين غاتم الجناززة والمنصة ... الرجال اصرو على المجهزييين باش تم جنازة الاسماعيلي تقليييدية و بسييييطة كاتليق بتواضع احمد ... بلاش من داك البذخ والبيفيييهات حيت هدا حزن مخيم عليهم ..... طلبو فقط يتقدم الحليب والتمررر مع الاطباق الرئيسة فالعشاء .. ككسس وحريرة .... لان قلوب موالين هاد القصر محرووووقة على فراق جدهم وهوما يقدمو مالذ وطاب ! ... وعارفين ان كاع لي غيجيو للعزاء مامحتاجينش صدقة !!! ....
لان الصدقة قررو انها تخرج للمساكين واليتامى فالمياتم كيفما كان مقرر الحاج و كيقول ديما .. و علمو مدراء الماليين ديالهم بالمبلغ لي غايتبرعو بيه من اجل صدقة جنازاتو ....
بعد ما امين واسماعيل تاهوما ودعوه فلامورغ .. حولوه للغسل والتكفين لان صافي كاع لي خاصو يشوفوه راه شافوه ... امين واسماعيل ومراون بقاو يبززو على ماماهم تمشي ترتاح يوماين ماشافت النعاااس خافووو تسخف ولا توقع ليها شي حاجة لكن بدون فائدة .. مابغاتش ابدا تقتنع ... ولاصقة فكلامها انه ماتخرج حتى يخرج هو .... رغم انها ماهبطاتش عندو ومشفاتوووش ومودعاتوش حتى فالانعاش ولكن كتحس بروحها متصلة بيييه وهي حداه هنا فبلاصة قريية ليه ....
ملي شافو مابغاتش تقتنع باتو معاها تاهوما رغم عياء السفر ... حتى وصلات الستة ديال الصبح عاد مشاو أمين واسماعيل ومروان وزياد واياد لريسطو يفطرو .... ويونس جا بقى تما مع اريج ....
القصر كان مقلوب سفاااه على علاااه بالتجهيييزااات للجنازة .. المنصة دالمديح تنصبات و المضلات البويض ديال الجردة لي كيوقفو الناس تحت منهم من الشمس تاهوما تنصبو ... طبالي طوال وزرابي حومر... كان طيم ساااامپل كيوحو بجنازة ماشي حفل ... فالمقدمة مقابل مع بوابات القصر وبساط الاستقبال ... كانت الحائطية ديال العزاء .. فيها الصورة د أحمد ... وتحت منها ايات قرآنية والدعاء ....
اما فأركان القصر لداخل فين غيكونو النساء كان البخور والمسك تطلق فجميع الاركان .... وعلى كل طبلة من الطبالي الصغاارر محطوط طبق فيه هرم من التمر ....
الصحافة كانت فهاد الاثناء توصلات بالخبر والخبرر شاع بعنوان " جد العائلة الاسماعيلية في ذمة الله " ....
الرجال الاسماعيلي دخلو ليهم الصحافة الرسمية الخاصة بالمنبر لي كاتعامل ليهم عائلة الاسماعيلي للتصريحات وكان منبر اعلامي رسمي ..... ودخلو معاهم للبيرو بداو تصريحاتهم ...
ولافراد لفوق بداو كايفيقو واحد تلو الاخر .... مستعدين للقيام بمراسم الجنااازة .....
الساعة الحادية عشر والنصف ....
كلينيك منطقة الروكان ...
المنطقة كانت كلها مطوقة بالباريات والامن والصحافة .... طموبيييلات كانو صصصف طوويييييل وكولشي راكب مستعد لخروج الاسعاف للروضة ....
وصلات طموبيل جيپ ... وقفات قدام الكلينيك وهوما يتهافتو الصحافة والامن منظمينهم .... تحل الباب لول جيهة الفولون ونزل لوؤي ونزل من حداه جود ونزل من لور اياد و سلطان ....
كانو بربعة بيهم بكوستيمات كوحل ونضاضر كوحل وليبافيت ... كانو منزلين راسهم وغير كيتنهدو .. اشارو فقط براسهم للصحافة ودخلو للكلينيك طلعو فالدروج ساااخطييين على هاد الحالة .. تامن حزنهم مغيحزونهش فخاطرهم وسط هاد الهاراج كااامل ...
كان على برا الاصواااات بجججهد وكولشي كيتهاااافت وكاين لي كيضارب ويدافع باش يصور .... وطموبيلات كانو فقط لي من المقربين د احمد و الموضفين والمعارف لي غيمشيو معاهم للمصلى والروضة .... وصلات تاني طموبيل اخرى رنج روفر سبور كري و عدسات الصحافة كلهم تاني تصلطو وهي تنزل قسم تاهي بكوستيم كحل وشال كحل فوق راسها ونضاضر والبافيت ونزلات من حداها قدس لي تاهي بنفس الكوستيم لي مفروض على الجمييييع انهم يلبسوه فالكنازة حسب برتوكولهم .... حلات قسم لباب لور ونزلاتها بشششوية .... كانت بيلي لي باقااااا كتبكييي ومبغاش تسكت .... تاهي بالكحل والشال مغطي خصلاتها الزعريييين ولابسة نضاضر لان وجهها ملامحو كلهم تمحاااو بالبكاااااا ونيفها حمررر .. عنقاتها عندها قسم وهي تنزل من حداهم جنان تاهي بالكحل ... اشارو للصحافة غير بيديهم ودخلوو ..... كان الحززززن مخيييم على وجججههم والخاطر زييييييرو ....
دخلو للكلينيييك للكولوار لي غيخرج منو جثمان الحاج احمد .... كانت اريج ورتاج تما كييببببكيييو بجهد ... اريج باقي فاصمة دسيروم فيييديييها و لابسة شال كحل فوق راااسسسها وكتتتتموووت بالبكا وتعلا فيدين زيااااد لي كان معاها ... ورتاج تاهي مشا شدها لوؤي .. كيحاولو يصبرو فيهم ولامار جالسة ومشات حداها قسسسم كانت منزلة راسها كتشهق بالبكا .. كتحس بعقلها كيعاود ليها نفس المشهد ... الا كانو هوما اول مرة يموت باباهم .. هي راه المرة التااااانية ... علات رااسها لفوق حسات جوج جروووح تحلووووو .... وهي تشدهااا قسسسم كتببرررد فيها شوية من حرررقتهاااا ورقية منزلة راسها عاااارفة سباب هاد الحرقة كاملة هو ينوضها جود كيحاول يضرب بشوية فوجهها وهي غتسسخف بالبكاااا ... ورجع عنقها عندو .....
حياة تاهي كانت جالسة وشادة فوسييسم كتصبرووو ... وسارة كانت كتشوف ودموع فعييينيييها و عمران تاهو واقف حداها وماجدة بلباسها الاسود .... تاواحد مكان قادرر يصصببرررر على فراقو لان عمر كلمة العيب ماسمعوها منوووو ومادار فيهم غير الخير وكان ليهم نعم الجد والاب ..... تحلو البيييبان ... هو يخرج الجججثمااان على السريير المتحرك ... وعلمو الاسعاف تقرب لباب لاكلينيك .... خرجو معاه اسد و عدنان ويونس و سفيان ومروان واسماعيل وامين لي كانو كلهم بكوووستيمات كوووحل و نضاضر .... السرير كان جارو اسد وعدنان وسفيان ويونس .... غير شافتو اريييج وهي تطييييح للارض كتتتبكي بجهد ورقية ضورات راسها وناضت سبقاتهم خرجات لبرا وقفات فباااب الكلينيك شادة على قلبها مباغاش تشوف بممممرررة وكتشوف عدسات الصحافة تحطووو عليها .... حلفات ماتخرج لكيلينيك تايخرجو هو ....ووفات بوعدها . منهار تزوجاتو وهي رجلها على رجلو ...وهادي المرة االاولى لي غاتخليه يمشي بوحدو وهي تبقى!
اريج تنترات من زياد وتلاحت على السررييرررر وهوما يبعدوها الاطباء .. كان فصندوق خشبي ومنشور عليه ايزار خضرر بآيات قرآنية ..... وتلاحت عليه شادة الصندوق كتبكي بحححرقة معنقة عندها الصندوق بحالا بغاااا دفنو فقلبها ومايمشيش لتحت تراب
بدا كايحاول زياد يشدها واياد شاد فبيلي لي غتسسسسخف ليه فيديه ... اما وسيم كانو عييينيه حووومررر وعاااض فييييدو تاعنقووو عندو جود كيطبطب عليه .... زادو بالسريرر وهوما تابعييينهم باش مايتعطلو على وقيتة الصلاة عليه ...
غير خرجو من البااااب كووولشي بدا يتهاافت يصوورررر والامن شادينهم ولي كانو فطموبيلات حلو البيييبان وقفو كيشوووفوو ... كانت الجووووقة ديال الناس وهادشي غير من المعارف والموضفين ... الكل تستسف فالباب منزلين راسهم كيييييبكييو واحد كيصبر لاخورر و خرجوه حطوه فالاسعاااف لور والرجال بداو كايستعدو يمشيو لطموبيلاااتهم اما العيلاات مغييمشييوش .....
يلاه سدو الاسعااف لقاو رقية موراهم ضار اسد .. شافها هو يقولها تتقدم .... الكل تصدم فيها لان اخيرا دارت در فعل !! تعلات ودخلات للاسعاف فين حطو الصندوق .... وهي تنزل بشششوية للصندووووق وبااستووو مزيييرة على عيييينها ونزلو على داك الازار دمووووع سخان ... دموع الودااااع ... ودموووع الشكررر والامتناااان والعشرة ...... ورجعات علات راسها كدعي معاه وشد فيها اسد بشوية نزلاها من الاسعاف وهوما كلهم واقفين كيشوفو .. وهو تقاد فالوقفة ووما ليهم يسدو البيباااان
رقية : سييير الحاااج فين ترتاح ( ضربات فباب الاسعاف ) سيييسر الحنيييين سييير ..... سيييير انا معااااك على عهد الله ..... سييير الله يوووووسع عليييك ضيقة القبور ( تنغنغ صوتها بشهقة البكا ) سيير الحنيييييين .... ونلحق عليك فالجنة ......
اسد شدها ووما لقسم تجي تشدها عليه ... وقسم مسحات دموعها ونزلات شداتها معنقاها ومشا اسد لطموبيل ديالو و ركب ..... والاسعاف بدات كتزيد بشوية والامن كيبعدهم ....
وهي تسلت منهم اريييج ومشات كتجري تابعة الاسعاف وكتغوت بجهد ورتاااج تبعااتها اما رقية غمضااااات عييييينيها ولامار تاهي تبعاتها تشدها
اريج : بابااااااااااااااا ... باباااااااا ...... متمششيييييييش اباباااااااا رجعووووو لياااا بابااااااا
رتاج شداتها وهي شادة فالاسعااااف بببببجهد وتابعاها كتبكي وتجري ... وطموبيل اسد وقفات بشوية نزل يونس من لور كيجري شدها على الاسعاف وهي طيييح فالارض وكاع لي فطموبيلات قلبببهمم تقبط وتقطع على حالتها .... وهي كتببببببكي بجهد ولامار شداتها نووووضاتها والاسعاااف مشاااات ويونس شادها
يونس : اريييج .. صحتتتك ا اريييج .. بااااك راه ماشي هاكااا كتفرحيبييه !!!!!! ررررجعي لهيه ( شاف عند لامار ) ديييها اختي عافاااك ... ارييييج وااااا كنعرفك قوووية .....
خلاها ومشا لطموبيل بزربة تابعين الاسعاف للمصلى .... والسطررر ديال الطموبيلات تااابعهم تامن طريق حبسوها بقوة الزحاااام ..... ورتاج ولامار شدو فارييج بشوية واخا هما براسهم محتاجييين لي يبردهم وداوها بشششوية لفين واقفين فدروج لكلينيك .... كانت بيلي تاهي كتغوووت بججهد وتعلى وتنزل فيدين سارة لي شاااااداها بهييييستيرية تااااابصح صوتها وماجدة غير كاتشوف واخا مابكاتش حسات براسها قلبها تاهي تتتتكرز عليييها !!!! .... كانو بقاو غير العيالاااات كااايبكيييييو وكوولشي خواو من تما بقاو غير الكارد ديالهم .....
بقاو تما كيبكيو يبردو على قلبهم تابدات رقية كتنوض فيهم تصبر فيهم واخا تاهي قلبها محروق لكن اكثرهم ثبات .... مشات قسم ديمارات طموبيل وركبات ماماها بشوية ورقية لور واريج ورتاج .. وقدس تاهي دمارات طموبيل ماماها وركبات حداها بيلي وماجدة لور وسارة وجنان .... وشدو طريق القصر فين كيتسناو العزايا .........
الرجال وصلو للمصلى لي كانت تاهي الجووووقة دعيباد الله كتسنى تما ..... احمد كيتعتبر شخصية عااامة .. من غيير كنية الاسماعيلي ... حيث بنتو دكتورة مشهورة ووحدة ستيلييست مشهورة زيادة على حفايدو لي مشهورين فمواقع التواصل والمودلينغ .... وتاهو رجل اعمال معروف ..... دخلوه للمصلى ... ودخلو الجميع للمصلى صلاو عليه الظهر والروينة على برا دالصحافة ... والباقي كيتسناو حدا الروضة ....
النساء وصلو للقصر تحلو ليهم البيبان وكاع العزايا لي كانو فالجردة مشاو يتلاقاوووهم .... نزلو من الطموبيللاات وبداو كيستقبلو العزو وهما كلهم وجوههم دااااابلييين وريوسهم ثقااااال .. كلهم علاو ليبافيت ديالهم وكيردو غير براسهم وعينيهم دابليييين اما بيلي باقاااا كتششششهق .. وهي تشدها ماماها عندها كتعنقها كيبردو حررقتهم .... كلهم داخلين بحالا جايين من شي حرب .... دخلو ديريكت للقصر ... كان عااااامرررر بالنساء لي لابسين الكحل اما الرجال كلهم فالمصلى والروضة ..... كيحيو براسهم الجهد لي يردو بيه على العزو ماعندهمش ومشاو جلسووو ... اما بيلي مبغاتش وطلعاتها قسم بشوية لبيييتها تنعس .... والعيالات جلسو معاهم كان القصر ممتلئ حتى لاخره بالنساء لداخل وباقين شي ماشي شي جااااي ... والخادمات كيفرقو التمر والحليب على الجميع والقرآن كان مطلوق فالدار والبخور فكاع الاركان .... اريج غير كتسكت شوية كتنوض تاني تبكي وهوما يتجمعو عليها عماتها وكاع عائلتها لي جات من فاس .... وكيحاولو يييبردو عليها ولكن هاداك التبراد غير مكيزيد يشعل النااررر فقلبها ....
ورقية تسلتات منهم بشوية ومشات كتعكزررر وعينيها كيبغيو يتسدوو بالعياء وشدات فالحديد دالدروج وطلعات ولامار ضورات راسها .... ورجعات استأذنات منهم وطلعات تابعاها شدات فييها مطلعاها .... تاوصلو لبيييتها ... غير حلاتوووو وهي ضربها ريحة الحاج لي باقا تما .....
غمضات عيييينيييهااا مزيرة علييييهم ولامار نزلو دموعها ودخلات بشوية كتشوف للسرير لي باقين عليه حوايجو لي كان لابسهم وباقي جلابتوو ..... عيااات تصبررر وعيات تقسح فقلبها وهي تنهاررر ملي شافت داك الجلابة وطاحت كتبكي شادة عليها ولامار كتحاول تصبرها فنفس الوقت رتاحت لي ماماها بكات وغتخرج داكشي لي كتحس بيييه
طاحت رقية حدا السريييير وفشات قلبها فالبكا .. عيات تقوى ولكن قدام حوايجو وريحتوووو ماقدااااتش .... ولااامار سمعات التيليفون شداتو ومشات للبالكون كتحاول تمسح عينيها من دموع تشوف شكون كيصوني .. ماجات تشوف نمرة تاكان قطع ودخلات عند ماماها لي كانت كتنخصص ...
لامار : ماما ... سعيييد راه من قبيلة هو يصوني بغا يهضر معاك بقيتي غير نت ... بغا يجي مسكين ولكن داك العملية لي دارو لشيماء ماخصهاش تحرك من الكلينيك ... واش قادة تهضري معاه دابا ولا منعبد !!!
رقية مجاوباتش كاع غير اشارت ليها بيديها تالمنبعد وتاهي تفهمات وكتبات ليه مسج .... ورجعات خرجات من البيت باش تخليها تبكي على خاطرها ومتبقاش غير هاكاك ساكتة ... غير سدات لامار باب البيت وهي تبدا تاني رقية كتبكييي وكتنخصص شادة جلاابتو معنقاها عندها كتشم فيهااا ريييييحتو وتبكي .....
الرجال سالاو الصلاة فالمصلى .... وهزوه تاني الاسعاف وكولشي ركبو فطمبيلاات ومشاو فاسطول دالسيارات حتى وصلو للروضة ..... وهي توفف الاسعاف تاني تحت الهتاف والتصوير .... نزلو من الطموبيييلات وتحلات الاسعاف وجابو المحمل ..... حطو الصندوق فوق المحمل هو يتقدمهم جود ولوؤي و اياد وسلطان .... ماخلاوش عمامهم هوما لي يهزو .... جود غير هز المحمل فوق كتفووو وزادو هابطين بيه لروضة بدا يتفكررر اخر مرة هزو بحال هاكا كان نزلو فيديه للجردة يجلس معاهم ... كان هازو وهو كاايرضي عليه وكان باسلو على رااسو ... غمض على عينيهم تانزلو دمووووع سخاااان من تحت النضاااااضضضر .... ولوؤي تاهو كان حداااه هازو كيشمر بنيفووو .. واياااد تاهو لور لي مدوزش معاه قليييييل وسلطان تاهو .... نازلين و من موراه كايرتلو ويسبحوو .... وهوما ماشيين لفين غيدفنوه وكولشي تابعهم بالكاميييررررات تاوصلو لحدا القبررر هما ينزلو المحمل ...
كان القبر محفووور وواجد .. وكولهم وقفو تستفو تما كيشوفو ... كيشوفو الاخرة ديالهم فين غتكون ! يعياو يعيشو يعياو يلبسو يعياو يوصلو فالسلطة .. هااااهي الاخرة ديالهم .. كل واحد فيهم بدا يفكر نهار يتحط فهاد البلاصة كيفاش غيخلي دنيا موراه ! واش فعلا هاد دنيا تستاهل كل هاد القتال !!!!! .....
نزل جود للقبر للتحت ولوؤي حيد عليه الايييزار .... وهزو هو واياد وسلطان نزل تاهو حدا جود وشدوه فيديهم كيحطوه رفضو يقرب شي واحد .. بغاو يدفنوه بيديهم واسد شاد عندو وسيييم لي تيببببكي ..... والكل واقفين وكايصورو .... حطوه فالقبر وطلعو ولوؤي واياد هزو اللحد وبداو يديروه فوق القبر وجود وسلطان هزو البالات بداو يردو عليييه التراااااب والكل هاز يديه كيييدعي ..... كملو مراسم الجنااااازة وردو عليه ترااااب .... وكلسو حدا القبر الناس بداو كيقربو يعزيوهم .... وكيفرقوهم الامن ..... بقاو غير الصحافة ..... و وسيم جلس حدا تراااب كيشوف فيه ويبكييي حادر راسو عليييه ..... قراو ماتيسر كيحاولو يبانو صبااارين وميبانوش دموعهم من تحت نضاضرهم .. من بعد مدة وهوما عند قبرو ..... ناضو وقفو ... خاصهم يمشيو .... خاصهم يمشيو ويخيلوه هنا ! ..... بوحدو ....
عمرهم كانو سمحو فيه ! حتى فاش كان عيان فالبيت رقية مكانتش كتفارقو وديما شكون كيمشي يطل عليه ! دابا هاهوما راجعين ومخليينو فبلاصة مضلاااااامة .. وفبلاصة لي غانكونو فيها كاملين .. مخليينو بوحدو .. غير هو .. واعمالو .....
خلاوه تحت التراب وغاديين للطموبيلات ولكن هااازييينو ودافنينو فقلبهم وفراسهم وفدعائهم ..... ومشاو لسياراتهم وشدو طريق للقصر تاني ..... عارفين هاد النهار طويل وشاق كيتسناهم .....
وصلو الرجالة للقصر تاني وسط استقبال العزايا .. الجردة كانت عامرة على اخرها بالرجال وعيالاتهم لداخل وباقيين ناس كيدخلو غالبيتهم من عائلة احمد جايين من فاس ... والبعض من عائلة عمران وعائلة حياة وعائلة جنان .... والباقي كانو المعارف وموضفين جميع الشركات ديالهم و شركائهم وكاع لي ربطاتهم بيهم شي علاقة بالاضافة للصحافة واعوان البلاد ..... الايمايلات ديالهم والرسائل مكلفين بيهم المدراء ..... وهوما مكلفين غير فالعزو المباشر ....
واقفن مستفين فالدخلة بكوستيماتهم الكوحل وكيسلمو على الجميع ...
اما العيالات لداخل جالسين بوجوه شاحبة وتامن رقية بكات وتنفسات فلخر جمعات حوايجو فبلاكار ولبسات البيض ليگات وتقاشر ... ونزلات، اريج ورتاج غير شافوها بالبيض زادو تاااااني فوتيرة دالبكاااا .... والعيالات كل مرة شكون تجي تواسي ..... خصوصي العائلة ... حياة جالسة حدا ماماها وحاطة راسها عليها كتنهد .... و سارة كتركل فماجدة تحت الطبلة تحط التيليفون ... وبيلي فبيتها بقوة البكا نعسات ودمعة على خدها تا وسيم طلع لبيتو .....
قسم تاهي حسات بالعياء وقوة الهضرة والهاراج وهي تقرب لوذن ماماها
قسم : ماما .... انا غااانطلع لبيتي حاسة براسي عيااااانة ... غنعس غير شوية ....
لامار : سيري ابنتي سيري ...
ومات ليهم براسها وناضت طلعات فالدروج كتهبط الشال على كتافها ... حلات الباب على بيلي طمنات عليها لقاتها ناعسة و مشات لجناحها .. غير حلاتو تلاحت على السرير مغمضة عينيييها بعياء قلبها تاهو كتحسو كينبض بكسل !! بواحد الثقااااااالة .... الرمشات وكتحس براسها كترمشهم تقااااال ... هاهو فرد من الاسماعيلي غاااادر !!!!! وخلا بلاصتو محفووووورة كبببييرة .. كتسول راسها كيفاش غتولي دير ملي تعيط على جداتها متقولش ليها دوزيلي جدي ! ولا كيداير جدي ولا فين جدي ... زادت زيرات على عينيها كتنهد ...كانت كتحس براحة عكس قبيلة ! عاد فهمات علاش كيقولو ملي كينزل التراب كينزل الصبر ! ......
يلاه غتسد عينيها وهي تسمع تيليفونها كيصوني ! علات حاجبها ... شكووون غيصوني فنمرتها الشخصية ! خوالها وعمامها كاملين لتحت .. و اسبرو هضرات معاه !!!!! شكون هذا لي كيصوني !!!!!! وشكون عندو نمرتها .... تلفتات للتيليفون وهزاتو وهي كتشوف فالنمرة وتتسائل ديالمن !!!!!! ... عوجات شفتها لجنب قالت مدام الصونغي فالرقم الشخصي ادن شي حد من معارفها الشخصيين .... وهي تحاوب بثقالة وصوت مبحووووووح بالبكا
قسم : آلو ......
بقات شحال كتسنى عاد سمعات جواب :
- قسم !!!
قسم : ( تكعدات كلها على السرير ووسعات عينيها ) أصييييل !!!!!!
قسم بقات غير موسعة عينيها متوقعاتش ابدا هاد الاتصال !!!
أصيل : ... نت بيخير !
قسم بقات غير كترمش ... عاد تنهدات و جاوبات بمورال طااااايح
قسم : ( نزلات راسها ) بيييخير .. نتا لاباس !
أصيل : الحمد لله ... عاد ... عاد شفنا الخبار ... البركة فراسك آقسم ...
قسم زادت تنهدات مرة اخرى وجاوبات : مامشا معاك باس ... شكرا
اصيل : احم .... م موهيم .. مكنعرفش نهضر بزاف فبحال هاد المواقف ... نتمنى تكوني صافا .. و والله يرحمو ...
قسم : ( غمضات عينييها مدة عاد نطقات ) امين ... شكرا ....
اصيل : آآ ....ها سلمى معاك ....
حيدات ليه سلمى التيليفون وهضرات بصوووت حزييين
سلمى : قسسسم ... البركة فراسكم اختي .. شفت الخبار فسوشيال ميديا حسابتني غير اشاعات فلول .... الله يرحمو ويوسع علييييه و البركة فراسكم والله يرزقكم الصبرررر اختي
قسم : ( تبسمات منكسرة ) شكرا اسلمى ... نت لباس عليك ؟
سلمى : بييييخير اختي والله حتى توووحشتك .... مكنبغيش نعيط نبرزطك .. شفت دابا الخبار طلعت عند خوياا طفجتووو .. عرفتي بقى فيا الحال بزاف نتي عارفاني كنتبببعكم وعااارفة مكانتو عندكم .. نتمنى تكونو لابااااس والله يرزقكم الصبر ففراقو ...
قسم : اامييين اسلمى شكرااا ...
سلمى : يلاه منطولش عليك كتباني ليا عياااانة ... منصدعكش ..
قسم : شكرااا على الاتصال ...
سلمى عطات التيليفون لاصيل لي واقف حداها غير خداه قطع الاتصال لانو عارف مغيعرفش يهضر معاها حدا ختو .... و قسم باقي تيليفون فودنيها ظنات غيرجع يهضر حتى شافتو قطع ! ...
رجعات تنهدات وحطات تيلي وحيدات صباطها وطلعات على سرير و جمعات رجليها عندها معنقاهم وحاطة راسها عليهم ... واصيل طلع لبيتو لفوق و سلمى رجعات لتيليفونها كتشوف لايفات دالجنازة ...
قسم هاد الاتصال المفاجئ خربقها ! هي اصلا المورال زييييرو .. الوفاة ديال جدها باقي الجرح ديالها خضضضر .. زايد على البكا بزاف لي بكاتو لبارح وليوم جبد عليها بزاااااف دالموااااجيع .. جبد عليها كووولشي .. كأنها كتحاول تفرغ كولشي .. الكل كيظن انها غير حرقة موت جدها .... ولكن هي كانت جامعة كاع مكبوتاتها وكاع اش كتماتو ومتقدرش تبكي عليه فالعلن .... والاتصال داصيل .... كان جزء من مكبوتاتها !! جزء من الحوايج لي كيخليوها تتفكر شكون هي قسم ! وشنو بغات قسم !!!!! وعلاش عايشة قسم !!!وشنو فائدة قسم !! وشنو هي سعادة قسم !!!
حطات راسها على الكادر ديال سريرها لفوق ودموع بداو ينزلوووو ..... اما اصيل طلع لبيتو لفوق شاد تيلييفون وكيضور ... ماعارفش كيفاش يتعامل ! صوتها بانليه عيااااان بزاف !!! هو مجرب الموت و عارف داك الحرقة ... عارف ان الانسان فهاديك الوقيتة كيكون باغي شي حاجة ومحتاجها ومعارفهاش شنو هي ! الموت هو واحد الوقت لي كولشي محروق وكولشي مكسور صعيب باش يواسيك الواحد كما ينبغي ...
كتكون نتا لي مجروح وكتقلب شكون تواسي .. ومكتلقاش لي يواسيك ..... هو حس بيها من كلامها و من تنهيداتها ومن صوتها لي محملش يسمعو بداك النبرة .. موالفها مرحة ونشييييطة وضحوكية ...
ورجع دوز الاتصال بعد ما نفرد براسو ....كان بات فايق فالخدمة ودخل فصباح ديريكت مشا ينعس .. تادخلات سلمى بالغوات فيقاتو كتوريه الخبر وان جد قسم مات ... نسى النعاس ونسى كولشي بحال شي واحد قريب ليه ! كانت قسم ..
لي مكتفارقش الذاكرة ديالو ولي صورتها كينعس عليها ويفيق عليها ومقادرش يتخطاها واخا عارف كولشي سالا بيناتهم ... مكانش ابدا قااااادر يتخطاها .. كانت بحال المخدرات .. بحال الادمان .... كانت نشوتها كيحسها غير فاش كيكون كيشوف فالصورة .. وغير يطفي الشاشة كترجع معاه النداااامة على هاد التعلق كامل ! عمرو تعلق بشي حد ونهار تعلق ... تعلق بأميرة فقلعة بعيييييدة عليه !! ...
كان الاتصال بدا يصوني فودنيه .. قسم سمعات صونغي وقلبات عينيها لتيليفون هو يبان ليها كيصوني من جديد !!!! بقات تشوف فتيليفون والدموع تينزلو ... وهي تشهق بالبكا وشدات على فمها ممزززيرة على اابكككية ...... اصيل شاف الى مجاوباتش غير مزادت خلعاتو !!!! يلاه غيردو و يعاود الاتصال تاسمعها !!
قسم : ( بنبرة البكاء ) آلو
أصيل : ( وسع عينيه ملي سمع هاد النبرة ) ا قسم !!!! .... ب بغيت غير نتاأكد واش نت بيخير ؟ ...
قسم عضات على شفتها ومزييييرة كتحبس داك البكيييية وهو كيسمع انفاسها
اصيل : قسم !!! ( قسم مززززيرة البكية كايتسمعو فقط انفاسها المضطربة ) ... الى بغيتي راه نقدر نجي !
قسم غير سمعات داك نقدر نجي تخيلاتو حداها .. اكثر واحد محتااااجاااااه فهاد الحزة وهي تزيد تعض على شفتها كتنخصص ...
اصيل : واش نجي !!! قسم جاوبيني نت بيخير !!! تبغيني نجي عندك !
قسم علات راسها لفوق وكتسرط فريقها بزز وخدات نفس وجاوبات بزز
قسم: ب . بلا منعذبك .. ا انا بيخير ...
اصيل : لا .. صوتك ماعجبنيش ! .. قسم .... ا .. انا عارف .. عارف مزيان حرقة الموت ...وعارف شنو هي تفقد شي واحد عزيز ... (قسم زيرات على عينيها كتبكي واصيل كايحاول يهضر واخا هاد المواقف كيكرههوم ) ديري فبالك ... بلي راه الحياة كتستمر .... قسم .!! كتسمعيني
قسم : أمممم . ( كتحرك راسها باه ) ك كنسمعك
اصيل : واش تبغي نجي عندك !
قسم : ( بحرقة ) بغيييت ...
اصبل : ( مشا بزربة لبلاكارو ) وااااخا .... عطيني ساعة انا معاك ..
قسم : لاااا .. لا اصيل ... لا ....
اصيل وقف فبلاصتو ... مجرد ماسمع بكاها نسى كاع شكون هو وشكون هي وفين هو وفين هي .... نسى كولشي فمرة .... وكون ماوقفاتوش كلمة لا مكانش غيتفكر حتى يلقى راسو فمنطقتهم .....
قسم : اصيل ..... انا بيخير ....
اصيل : ( تنهد كيدوز يدو مور عنقو ) م موهيم ... نت عارفة .... عارفة الدار .. وعارفة بلي مرحب بيك فاي وقت .... ياك !
قسم : ( كتشمر بنيفها وتحرك راسها باه ) عارفة
اصيل : الى حسيتي براسك محتاجة لشي حد .. ( سكت مدة خرجها من اعماقو ) انا كااين آقسم .....
قسم : ( غمضات على عينيها مدة بحححرقة ) اممم .. عارفة ....
اصيل يلاه غينطق .. هو يحس براسو معارفش يهضر ولا يواسي وهو فاشل فهاد الامر اصلا .. وقطع تيليفون وهي لاحتو من يديها كتبكي وتنخصص بحرقة .... وهو بقى غير كيشوف ... بكاها ودموعها هو ماشي غير سمعو هو بان ليه قدام عينيه ... الدموع فدوك العينين لي كيعشق ... مكرهش كون كان كيفاش .... كان غيكون حداها .. مكانش غيخليها تبكي قد هاكا ... حس بكاها ماشي طبيعي ! حرقة مستحيل تكون غير على موت الجد فقط !!! غير الا كان هاد الجد كيعنيليها بزااااف لهاد الدرجة !!! ... او كاينة حاجة اخرى والموت جبداتها !
قسم دفنات راسها بين يديها كتبكي بحرقة ... ماعارفاش تحدد بالضبط هاد البكا علاش ولكن لي متأكدة منو كان رد فعل د تراكماااات كثيييييييرة فلداخل ديالها .. بدات كتبكي تاحسات بالنفس تقطعات فيها وبدات كتحاول تنفس .. علات راسها لفوق وبدات تحاول تاخد نفس كتلقى الرئتين ديالها عاجزين والدوخة بدات كضبب الرؤية قدام عينيها وهي تنوض بشوية كانت غطيييح وكتشد غير فلي جا قدامها .... وكولها كتتتشششهق ... كتحل المجر بيدين كيترعدو و تتلوح الوراق لي فيه تالقات الرابوز لي مخبياه وهي ترشوو ففمها وطاحت على الفوطوي كتحاول تنفس مزياااااان ومعليا راسها لفوق وكتسررط فرييقها وصدرها كيطلع وينزل .....
فالقصر ....
الوقت كان كيدوز غير بين عبارات العزاء والمواساة والدموع .....اريج ورتاج ولامار حتى كيتوقفو شوية على البكا وكيرجعو تاني وكل وحدة واشمن عبارة تدمع عليها عينيها .... اما الرجال على برا حتى هوما كانو نفس الشيء .... دخلو لقاعة مؤتمراتهم دارو الندوة الصحفية ... وخرجو تاني لواجبهم ... كولشي كانو مرهقين وعيانين .. المورال كان نااازل و التعب دالسفر بالنسبة للاشبال جود وسلطان ولوؤي ... اما وسيم مبغاش كاع يخرج من بيتو جالس على كرسي فالبالكون وداير كاسك فودنيه فيه القرآن ومتكي راسو مرجعو لوررر ومغمض عينيه وساااااكت ..
اما بيلي جاتها واحد النعسة طويييييييلة ماعرفاتش شنو سببها ولكن نعسات ومعقلاش على رااااسهاااا بمرة ... وقسم بكات تاشبعات ومالقاتش شي منفذ من غير الدوش ودخلات تحت الدوش كتحاول تهدن اعصابها باش متبانش عليها كريز دالربو قدام عائلتها ...
قدس كانت جالسة حدا ماجدة ومتكية على حياة ... حسات بالغمة فداك الجلسة لي كانت عاااامرة بعائلة احمد وكلها كانت بعبارات المواساة وكيجبدو القديم والماضي ديال الحاج .. لقات راسها غير مكيزيدو يخدشو ليها الجرح وهي تنسحب ومشات خرجات من الباب اللورانية ليكتدي للغابة .... كانت الساعة السبعة ديال العشية والريح بدا يتحرك من جهة البحر لي مور الغابة .. الشال لي كان فوق راسها نزلاتو على كتافها ولواتو على دراعها وزادت بشوية كتمشى وتحاول تشم الهوا . عينيها كانو دااابلييييين بالبكا ولتحت ديالهم زراق .... يلاه غادا وهي تعلي عينينا قدامها بانليها بعييييد قدام واحد النخلة .... كان شاد كارو فيديه وكيضرب برجليه بشوية جيهة الساق ديال النخلة ويتنهد حتى كيتنفخ صدرو ويتفش ...بانليها ساااااهي .... و هي تخطف النظرة لوجهو لي كيبان ليها غير الجنب وشافت عينيه حووووووومر .....
كان لوؤي فهاداك الوقت كيفكر فاللحظة لي كان كيدفع فيها الباب واللحظة لي كان جدو كيتلتخ فوق السريييير وقلبو كيتمززززق علييييه ومزير على فموووو وعينيه حووووومرر حابسهم يدمعو ... حتى كيسمع شي خطوات جايين حداه هو يعلي عينيه بانتليه قدس وقلب الكارو ليد لخرا بعدو عليها ...وعلا دراعو باش يمسح عينيه و شمر بنيفووو .....
لوؤي : قدس ..... كيبقيتي شوية !
قدس : ( كتشوف فيه وفوجهو كيداير ورجعات شافت قدامها ) صافا ... ونتا !
لوؤي : ( رجع تا هو شاف قدامو ) الحمد لله ( لاح الكارو وزطم عليه وقدس كتشوف مع الكارو ) ...
قدس : كيف وقع شاد گارو عادي ! ...
لوؤي : ( بعد مدة عاض على شفتو عاد هضر وهو كيشوف قدامو وداير يديه فجياب السروال ) كان واحد المرة شم فيا ريحة الحشيش .... وخاصم مسكين بزاف ... كان قال ليا كتخرج على صحتك وعلى عقلك وعلى دينك ..... مكانش كيحملو ...
قدس : الله يرحموو..... خلا بلااااصتو ...
لوؤي : بزااااف كاع .... كان كيفرح بزاف فاش كيسمعنا جايين لعندو ... كنت فاش كنقوليه شرفتي .. كان ديما كيقول واخا شرفت راه مانموت حتى نزوجكم ( تبسم بحرقة ) ماوفاش بهضرتو ....
قدس : بالعكس ..... بالنسبة للمرض ديالو ربي كان رحيييم عليه ملي مات بلا ميتعذب بلا والو ..... عاش ديما مرتاح ومزيان ... ومات موتة مزيانة قدام عائلتو كلها .... وكلنا كنا حداه ... كان ناقصنا غير جود وبيلي ....
لوؤي : ( سرط ريقو وشاف فيها ) دخلي راه تحرك الريح ... سيري تنعسي شوية شوفي عينيك كيف ولاو .....
قدس : ( شافت فيه وزادت لوات شالها على دراعها من البرد ) حتى نتا دخل ترتاح .. لابقينا تابعين ناس راه مغيخويوش هاد السيمانة من هنا ..... انا تخنقت .... غنتمشى شوية حدا البحر عاد ندخل .......
لوؤي : ( شافها كتهزهز بالبرد حيت تحرك الريح وقرب قاس فالكوستيم ديالها غير بعدو لجنب بانليه لابسة تحتو غير سوفيطمة بسماطي وهي بعدات عليه ) راك ملابسة والو وتما الريح محرك هاد العشية ..دخلي من الببرد اش غاديري فشي بحر دابا ...
قدس : لا مغنننتعطلش بزاف ... باغا نتتفس ....
خلاتو ومشات قدامو بثقاااالة تاسمعاتو عيط عليها غير ضارت لقاتو حيد الكوستيم ديالو بقا غير بشوميز قرب دارو فوقها ...
لوؤي : متعطليش ..... شووية وطلعي .....
قدس : اء !! ونتا !!! ...
مجاوبهاش ومشا باتجاه الجهة الامامية فين كاينين الناس وهي شدات على الفيست ديالو بيديها ومتبعة الخطوات ديالو حتى غبر على عينيها وتتبسمااااات بششششششوية و زيرات داك الفيست عندها ... استنشقاااااتهاااا بعمق ... كانت عاامرة بعطرو .....
وزادت بشششوية داخلة وسط الغابة دالقصر لي كلها مبعثثرين فيها رجال الامن ... وخرجات للرملة دالشاطئ كتمشى وتتنفس ......
الحال بدا يظلااااام والريح كان عنيف هاد الليلة .. وحتى من الشتا بدات تصب بنقاااااطي خفاااااف ..... واخا الجو كان صيفي واضح هاد الليلة ممطرة ... قدس تمشات حتى عيات وطلعات لبيتها من البيبان الخلفييين وسدات عليها ترتاح قسم دوشاااات وبدلات كوستيم آخر .. وخدات نفس عمييييق حيث ماماها كتصوني عليها تنزل لانها البكر وكولشي كيسول وهي دفن تاني دوك المشاعر لي كتجبدهم غير فالسر ورسمات ملامح الانثى المسؤولة وبكر الاسماعيلي ونزلات فالدروج تستقبل العزاء لي مابغاوش يساليو الناس هاد النهار .. اريج غير شافتها نازلة مشات بثقاااالة عندها ...
اريج : بنتي .. طليتي على بيلسان .. ناعسة !
قسم : ااه نااعسة غير خلييييها .. بكات بزاف غيكون راسها ضرها وهنا قوة الصداعات .. ( عنقاتها ) نت لابااااس !!! شووية ؟؟
اريج : اوا ابنتي نبكيييييو و نبكييييو ونرجعو نسكتو .. قضاء الله راحنا راضيين بييه (دمعو عينيها ثاني ) ماعندنا مانديرو ....
قسم : ونعم بالله اخالتي .. زيدي يلاه نمشيو منعرف شكون هادوك داخلين .....
قسم صغرات عينيها فدوك الجوج نساء لي كانو داخلين .. كانت بنت طويييلة بحال طول قسم بشعر قمحي فااااتح مطلوق مسدول على ضهرها وفوق منو شال كحل حريري .. وعيون خضريييين .... بكوستيم كحل وصاك فيديها ..... وحداها مراة كبيرة فالعمر ديال رتاج بجلابة كحلة و وفولار تاهي فوق راسها كحل ....كانو كيقلبو بعينيهم و قسم بقات كتشوف وهمسات فوذن اريج
قسم : واش كتعرفوهم ! من العائلة هادو !
اريج : لااا .....غيكونو غير من العزايا راه نص لي هنا مكنعرفوهش وهوما كيعرفونا
زادو قسم اوريج عندهم .. وداك البنت غير شافتهم تبسمااااات وشافت بالخصوص عند ارييييج ....
-البررركة فرااااسكم مدام أريج ..... الله يجعل مئواه الجنة .... ويجعل قبرو روضة من رياض الجنة ....
أريج : ( سلمات عليها ) امين ابنتي مامشى معاك باس ....
تقدمات المراة الكبيرة تاهي سلمات عليها
- البركة فراااسكم من جهة الواليد الله يرحمو ويوسع عليه .. صدمنا الخببببر ... جينا بلا عقل من فاس ...
أريج : من فاس ! ( كتحاول تبسم واخا الوجه منكسر ) من العائلة ؟ سمحوليا معرفتكمش
البنت تبمسات وجاوبات وقسم كتشوف : لا .. ولكن تقولي قراب ... حنا عائلة محمد بن جلون ... الصديق د ولدك اياد ..( اريج علات حجبانها ) انا سجى بن جلون .... ختو .. وهادي ( عنقاتها ) ماما .. هدى ....
اريح : اااااه مشرررفة بيكم .. مرحبا ... عرفتو محمد الله اووودي كيهضر ليا عليه اياد بزاف .. هو لي اخر مرة خرج شي كتاب اولا !! ...
هدى : هاااداك وليدي .. خليناه على برا
أريج : مشرفة بيكم .. تفضلو مرحبا ..
سحى : ( شافت عند قسم ومدات ليها يدها ) تشششرفت بيك مادمووووزيل قسم ... فرصة سعيدة والله .. تقدري تقولي عليا من اكبر معجباتك ... واخا ماشي وقت هاد الهضرة ولكن مبغيتش تفوت الفرصة بلا منعبر على اعجابي بيكم وبعائلة الاسماعيلي .....
قسم 🙁 تبسامت بزز ومدات يديها تاهي سلمات عليها ) الشرف ليا .... ( شافت عند هدى وسلمات عليها تاهي ) تفضلو
زادو للصالون فين جالسين لامار ورتاج وتقدمو عزاوهم وسجى سلمات على رتاج .. كتعرفهم واحد واحد وكتعرف كل وحدة تما وشكون ... ولكن هي عينيها كانو على شخص واحد .. كانو على أريج ... متبعاها بعينيها بمجرد مكتخيلها راها هي ام اياد كتبغي دير المستحيل تقرب منها... ملقاتش الفرصة فين تعزي اياد على برا .. وقالت دير واجبها مع اريج ومع العائلة لداخل .... هادي هي الفرصة لي جات باش تعرفها على عائلة الاسماعيلي وتدخل لهاد القصر لي كانت كتحلم امتى تحط فيه رجليها ...... كتشوف بعينيها مع الساريات والاركاااان والدروج المموجين لي فالوسط ومع الخادماااات ومع السقف والفسيفساء وترجع تشوف فالنساء لي قدامها وتتبسم وقسم كانت واقفة فالزاوية كتشوف فيها
... معرفاتش علاش مارتاحتش لنظارتها !!!!!! وكترجع تلعن الشيطان وتقلب عينيها .... وسجى كتحاول تواسي بجميع العبارات لي كتعرف .. عارفة مغتقدرش تشوف اياد دابا بسبب انهم فارقين فهاد العزاء الرجال بوحدهم النساء بوحدهم .. ولكن لاعرفات تدق الوتد مع العائلة غايكون حسن ....
عمة رتاج واريج : قلتي الغازي !!! سامعة ديجا هاد الغازي بن جلون معلقش فين ....
هدى :الغازي بنجلون را لوسي ... وراه مزوج عندكم ببنت الباني .... سميتها سليمة
سجى : الغازي راه عمي ....
العمة : ايييييييه .... الغاااازي عررفتو هاداك عمك ! ( شافت عن رتاج و اريج لي يلاه جلسات ) سليمة بنت عمكم مصطفى .. راه دايا عمها ... صدقات من العائلة البنت
سجى : هههه راني عارفة انا ديجا .... وشرف لياااا ... والعائلة كلها بلغات ليكم العزاااء .....
رتاج : شكريهم بالنيابة علينا ... نخليكم انا غنطلع نشوف ولادي واش نعسو مرحبا بيكم ....
انساحبات طلعات حسات براسها حرقها وعماماتها مكيسكتوش من الهضرة والمهاودة واريج تاهي دايرة رجل على رجل وشادة على راسها .....
سجى فرحتها ماكملاتش ملي شافت خوها كيصوني وكيقوليها فميساج خرجي غنمشيو وشافت فماماها
سجى : اويلي بهاد زربة !
هدى :والواجب درناه ابنتي .... ( وقفات ) خلينا ليكم الراحة ....
لامار : (وقفات معاها ) تشرفنا بيييكم مدام هدى ...
هدى : الله اودي الشرف لينا مدام الاسماعيلي ..... خالص عزاااانئا والله يكون معاكم فهاد الكربة .....
سلمات عليهم وسجى محاملاش يمشيو دابا وهي مزال ماربطات علاقتها معاهم مزيان .... واستأدنو وخرجو وسجى كتقلب بعينيها على الله يكون غير حداها وتعزيه ولكن مبانش ليها وقلبات شفايفها ومشات تابعة خوها للطموبيل ومشاو باتجاه الفندق فين غيباتو ......
الساعة ضربات الجوج ديال الليل ... والناس بداو ينسحبو واحد بواحد والقصر يدا يخواااا ....
شوية بشوية حتى بقاو فقط افراااد القصر ... وام واب حياة ... وام عمران ... حياة ناضت مع ماماها وباباها طلعاتهم لبيت فين غيرتاحو .. وكل واحد بدا يقصد بيتو بالعيااااء لي حاسين بيه .... تامن الولاد ملي دخلو دخلو دريكيت لاجنحتهم بلا ميهضرو مع تاااااحد ..... من غير جود لي نزل للبحر هو وخالو امين ....
الصالون بدا يخوا وكولشي طلع لاجنحتهم يدوشو ويرتاحو ... تامن لامار طلعات عمامات رتاج واريج و العائلة لي غايباتو وراتهم لبيوت فين يدوشو ويرتاحو ... ودازت لجناحها .... بقات غير رتاج و ااريج ورقية لي جالسين كايتسناو رجالهم ديخلو لي باقين كيهضرو على برا ....
قدس دوشات ودخلات ففراشها كتحاول تنعس والساعة الالكترونية حداها كتشير لثلاتة قل قسم دصباح .. وهي تعلي عينيها بشوية كتشوف فالفيست ديالو لي معلقة قدامها .... وتبسمات بشوية وناضت من فراشها هزاتها .. ونشراتها على واحد المخدة وقرباتها قدامها ونعسات عليهااااا كتحاول تغمض عينيها ... حركة ماعرفاتش علاش دارتها .. ولكن دارتها !!! موت جدهم خلا واحد الفراغ فقلبهم كبييير ...خلاهم محتااجييييين لشي حاجة لي تعمر داك الفراغ .. خلاهم محتااجيييين للحنااااان و الموسااااة من شي حد يكووون دااااافئ ..... بلا مايطلبوها منو ....
پيلي فاقت وشافت للساعة لقاتها التلاثة وهي تقلب على ظهرها دايرة يدها على راسها كاتشوف فالسقف .. لقات راسها نعسات بزاااف !!!!!! عمرها نعسات قد هاكا .... وناضت بشوية للدوش غسلات وجهها وكتلتخو بالما بارد كتحاول تتوكض وكتشوف فملامحها فالمرايا .. كانت داااابلة و عينيها الزرقيييين ذبالو كثر ... ملامحها الشهبييين تمحاو بمرة .. خرجات لجناحها هزات ليها كاس دالما وخرجات للبالكون جلسات على الكرسي تتشوف للجردة لتحت .. جناحها كان كيطل على الجردة الامامية وكتشوف عمامها و باباها واقفين كيهضرو .... وعينيها كيمشيو لفين كان كيجلس جدها فالكرسي وترجع تاني تدمع وكتحول لشهقااات وتبدا تبكي ......
واريج بانت ليها رقية عيانة وهي تبزز عليا ينوضو وناضت بشوووية طلعاتها باش تنعس غير وصلاتها لجناحها وخلاتها مبغاتش دخل .. لقات راسها ماقااادش كاع دخل لبلاصة باقا فيها ريحة باباها ومكانو وقلبها مااابقاش قاد وعينيها نشفو ....
ورجعات مشات وعينيها منفوخين وشفارها فازكين .... تاوصلات قدام جناح بيلي .. حلات الباب ودخلات بشووووية لعندها كتقلب عليهااا .. وهي تشوف خيالها فالبالكون وخرجات لعندها ....
اريج : بيلي ! نتي دخلي للبيت البرد محرك تمشي طيح عليك الشتا .... دخلي
بيلي : ( مسحات دموعها ) لا غير خليني اماما .. تخنقت لداخل .....
اريج طولات فيها الشوفة متكية على باب البالكون .... وهي تتنهد و مشات جلسات حداها والسما فوقهم كانت محملة بالغيوم .... واريح فعينيها عتااااب وغغغغضب كبير تجاهها ودايرة جهدها كامل تكبتو لداخل .....
اريج : نعستي !
بيلي شافت للجنب للشجر وحركات راسها باه بثقاالة ورجعات شافت فيها
بيلي : ونت كيبقيتي اماما ! شوية ؟ معاش غترجعي للكونترول غدا
اريح : مغنمشيش مافيا لي يمشي انا بيخير ... ( جلسات ودفعات ظهرها لور ) كنت فاش كنتخيل غيموت ليا بابا .... كتت كنقول غاااانموت و غنتبعو و غااانحمااااق ... ولكن ربي كاااينزل الصبرر .. الحمد الله لي جات غا فالسكر ....
بيلي : حتى السكر متستاهنيش بيه اماما ....
اريج بقات صامتة شحال وشافت فيها ماقاداش تحبس راسها كتحس بالاعصاب كايغليو فيعا من داخل
اريج: علاش مشيتي لاوكرانيا... هم !
بيلي سمعات السؤال هو يدق قلبها بحججهد وبقات تتنفس معرفاتش حتى باش تجاووووبها .... مكانتش متوقعة هاد السؤال فهاد الوقت بالضبط !!!!!! ...
جود كانو طلعو من البحر هو وخالو .. وكل واحد مشا لجناحو ... غير دخل جود هز باكية ديالو دالجوانات وخرج للبالكون .. يلاه وقف كيطل لتحت وهو يسمع الهضرة وقلب عينيه للبالكون لي لاصق عليه .. وصغر عينيه كتبان ليه بيلسان واريج لي جالسين تما .. ورجع شعل الجوان ديالو وشاف قدامو ... كيحاول يقااد دماغو لي كيحسو كولو مشتت وحديث اريج وبيلي واااصل ليه وكيحاول يتفاداه .... حتى سمع كلمة اوكرانيا !!! و هو يركز !
بيلي ضورات عينيها لعند ماماها بانت ليها كتشوف فيها بجدية وهي تتنهد وتقادات فالجلسة
بيلي : ماما ... ماشي وقت هاد الهضرة والله .....
اريج : ( بحدة و بجدية كتر ) لا وقتها .... علاش لحتي التيليفون !!!!
بيلي : ماما عفاك انا ...
باقي ماكملات هضرتها تاوقفات ارييج قدامها بغوتة
اريج : شنووو ماما !! شنوو مامااا .. باقي كتقولي ماما !!!! ماما لي كتلللعبي بيها كيف بغييتي !! على كببببري وعلى الشييييب لي فراسي تجي نت تللللعبي بيا ...
جود قرب للبالكون كيطل عليهم كيشووف مخلوع تامن الكارو لاحو ...وبيلي ناضت شدات ماماها وباقا مزال ماعرفاتش كيفاش ماماها تعصبات دغيا ! هدوئها فاش دخلات ماخلاهاش تبدا تتوقع انها غاتنفاعل بحال هاكا .. اريج لي باقي قلللبها كينننززف من جهة باباها وكتقلب غير فييين تغووت وفييين تخرج دخان لهيبها لي مشتعل فيها لداخل .... و كلها كتررررعد ... ووجها صفررررر وشفايفها بيييضييين وعينيها تحت منهم زززرررق .. باقا حرقة باها متجاوزاتهاش ... و فاش كتفكر بيلي اش دارت كاااايزيد قلبها يتتتحرق وخصوصي ملي كتفكرو فاش كان يطلبها يشوفها ...
پيلي : ماما عافااااااك .....ماديييريش بحال هاكا
اريج : اااامتى غاااديري عقلك نتي !!!! امتى تتتعلمي تتتتحترمي والديييك .... واش حسابتك حنا ديما غاانبقاو نصبرووو لهاد الطيييش ديالك !!!!! اامتتتى تعلمي تحترمي الواااللديييين امتى
بيلي : ماما بلا غواااات عافاك ( كتبكي ) والله تااااااليفينا كااافينا .. والله ماوقت هادشي .... صااافي عفاااااك قلبي محرووووق متزيديش عليه .. باراكا غيير عليا غير مات جدي بلااااا منشووووفو اش من عقااب كتر من هذا
اريج : ومزيااااااان بعدا ملي عارفاها ( كتبكي وجبدتاتها من شعرها وبيلي كتغوت وجود موسع عينو ماعرف يمشي ولا يخليهم !!! ) جججدك الييييهو** ووودية كاااااان كاااايعيط علليييك .. جججدك كان باغي يشووووفك و نتتتتي لحححتي تيلفوووون و مشيتي ... هادا هو جدك !!!! خليييتيييه مريض وعاااارفاه عيااان ولحتي التيلفون ؟؟؟؟ وعطااااتك خاطرك ماقلتيش يمشي يتزاد عليه الحال يعيطووو ليااا
بيلي: ( تنترات منها ) صاااااافي ا مااماااا ... نت ااااخر وحدة تقول هاد الكلااام خليني ساااااكتة الى كنت انا متوادعتش مع جدي ومات بلا منشوفوووو راه حيييت نت السبااااااب ( بالغوات واريج كتشوف فيها والدموع كيهبطو ) حييييييت نت لي قلتي ليا نمشي .. انا مبغبييييتش نمشي .. وهانا كاع كنت فامريكا .. وهانا كااااع جاوبت .. كنت غااالنلحقو !!!!! .. فيييين كنت غاانلحقوووو فيييين ... نت السباااااالب نت لي قلتي ليا نمشي
اريج بلا متحس براسها صرفقاتها تاطااااحت لاارض على الكرسي .... وجود وسع عييينيه ماعرف اش يدير !! عض غير على شفتو بقى كيشوف وبيلي طاحت على الكرسي شادة وجهها وكتبكي بججججهد
اريج : سسسسسسكتي ... سسسسكتي قطعععي ححححسك ... باااقي عندك الوجه لي يهههضر .. انا صيييفطتك لامريكا ماصيفطتكش لاوكرانيا واش ماااافييييك نفس !!! علااااش تابعااااه علاش ....
بيلي : ( بالغوات ) واااااابعدي مني .. خرررررررجي عليااااااا بعدي مني
اريح : هااااهي خاااارجة .. قلتيها بفمك باراكا عليك غاجدك لي مات بلا متشوووفيه .. باش مرة اخرى تتتعلمي تتبرهشي .. سيري فكيها مع خوك ومع باك دابا .....بقااااي كتبرهشي بقاااااي حتى ديري شي موووونتيف لي مايقدر يحلو معاك حتى حد ... غابقاي كتبررهشششي ....
خلاتها وخرجات مععصبببة و بيلي بقات تما كتبكي بجججهد وتنخصص .... واريج مشات للجناح ديالها سدات لباب هو يضور يونس يلاه كان دخل كيقلب عليها هي طيح عليه كتتتبكي بجججهد وشدها عندو كيطبطب عليهااا
اريج : ماااابغاااتش دير عقلللها مااابغاااااتش
يونس : اررريج !!! اش وااااقع
اريج : ضضضضربتها ..... ( شافت فيونس ) سير عندها .. سير شوفها مالها .. راني ضررربتها
يونس : بييلسااان !!!! ... وعلاش ضربتيها !!! وااااش نتي حمقة واش هدا وقت هذا الموضوع دابا ....
اريج : مااااعرفتش ايووونس ماعرفتش .. ( كتبكي ) كوووولشي تجمع عليا .. بابا باقي لدابا صورتو قدامي و هو كيقولي فييين بيلساااان ... انا لي صيفطتها .... انا لي صيفطتها بيييييدي .... انا لي صيفطتها تمشي ومتحضرش لجدها غير باش تبعد ليا من المشاكل و من جود .. كتصدق ماشيااا لعندووو !!!!!!!! كون حساااابتني غاادا لعندو كون رررربطتها حدايا على الاقل تتتحضر لجدها وتودعووو ... لي حاااارقني ولي قااااتلني هو سيييفطتها لامريكا بلا متودع جدها غير باش نهربها من المشااكل صدقااات ماشااا عندهم برررحبيييها ايووونس امتى غااااتعقل هاد البنت اااامتى
يونس : اريييج .. صافي ديري عقلك .. واش هذا وقت هادشي دابا واش تسطييييتو !!!!! ... واااراك غااا كتكملي على راسك وعليها .. هاد الوقت راه ماشي ديال هاد الموضوع كلما عاينين وكلنا مهلوكين ... وموضوع بيلسان وحود خصوووو كلللسة وهضرة طويييلة .. ماشي هاكا كايتحل .....( جرها لدةش ) اجي معايا اجي .. الله ييععععطيني معاااكم غا الصصصبررر ...
جرها بشوية لدوش يغسل ليها وجهها وجود بقى يشوف فبيلي هاكاك كتبكي ماعرف مايدير ! .... حس بصدرو تخنق عليه وهو كيفكر انه السبب فهادشي كامل !! بلا مايحس ولا مايكون داير حتى حاجة !!!! ... حتى كيبغي يضور ويمشي ... كايرجع يتلفت عندها هي لي كتبكي هاكاك على الكرسي .....ورجع تنهد وخرج للشومبر ديالو كيمشي ويجي ويحك فلحيييتو ويشوف للساااعة ديالو .. ساعة بدات ضرب ربعة وربع .... والشتا بدات طييح .. ضار موراه للبالكون بانتليه الشتا كتطيييح بغزارة ورعدة صيفية ضربات ... تنفس معمق وخرج داك النفس وحيد تيشورت ديالو لاحها ومشا لفوطوي جلس معلي راسو لفوووق طالق رجليه وصوت الشتااا ملا ليه الجناااح .... كيرمش بعينيه فالسقف .... كيسول راسو ... واش هاد البنت تستاهل هادشي ! .... حتى لامتى غتبقى هاكاك كتبكي ! ... واش عينيها كيستاهلو دوك الدموع كاملين ؟ ... واش هادشي كامل دارو فبنت عمو ! بلا مايحس بلا حتى مايعقل ! .. واش داك المراهق القديم كاع هادشي دارو وخلاه دابا واحل ! ... ضور راسو بشوية للبالكون كيشوف فالشتا كطيح ... هو ينوض بشوية خرج للبالكووون وضار براسو لجيهتها فين كانت جالسة .. قال مع الشتا غتكون دخلات .. ولكن لقاها باقا جالسة تما !!! كتبكي والشتا كتصصصب عليها وهي كلها كترررعد وتنخصص ...
بلا مايحس كاع براسو خرج بزززربة هز التيشورت ديالو كيلبسها فطريقو للباب ... حلها وخرج باتجاه جناحها ... تاحط يديه فوق البواني هو يتردد ! .. كيسول راسو اش كدير اجود ! ... بدا يدوز يدو على وجهو .. معارفش كاع اش يدير .. كيحمل راسو المسؤولية كاملة .... واخا ماشي وقتو ولكن خاصو يسكت البنت .... ماخصهاش تبقى تبكي بحال هاكاك بسبابو ... دار خطأ فمراهقتو .... يتحمل دابا مسؤوليتو .... داك البنت ماعندهاش ذنب .. باش تكون يلاه كاتبرد حرقة جدها لي متوادعاتش معاه بسبابو .. تضطر تحمل حتى توبيخ الواليدين !! ..
بلا مايزيد يفكر عاد حل البواني ودخل ديريكت للبالكون ديالها .. بقى واقف شحال حدا الباب كيتنفس .... هو يجمع قواه وعلا يديه للكاپ ديالها لي معلق هزو وخرج عندها ....
هي كانت جالسة فوق الكرسي وجامعة رجليها عندها وحاطة راسها عليهم وكتبكي بجججهد وبحرقة والشتاا كاااع سرداااتها ...
حتى كتحس بشي حد غطاها بالكاب ديالها تاتخطفات بزررربة وهي تشوفو فداك الضلااام ..كون ما الضو ديال الجردة مكانش غيبان لييها !! .. حبسات شهقتها وبكاها ووسعات عينيها كتشوف وقلبها كيضرب بجججهد وراسها كيتعلااااا معاه ... وجود غطاها بداك الكاب وتحنى لعندها كيدوز يدو على شعرها السارد كايبعدو على وجهها ..
جود : كتقلبي تمرضي !
بيلسان غير كتشوف فيه موسعة عينيها وكلها كتتهزز !!! بالبرد بالصدمة بالحرقة .... مامتيقاش ! واش كتحلم ؟ ... شافها هاكاك مبلونطيا فيه هو يتحنى وخشا يدو تحتها وهزها عندو وهي شهقااات وشدات على فمممهااا وخرجها من تما حطها على سريرها .... وقف مقابل معاها كيشوف فيها وهي مووووسعة عينييها فبلاصة وحدة ودموع جامدييين فيهم ...
جود : علاش كديري فراسك هادشي ! ... هم !!!! علاش !!
بيلسان كانت كتشوف فمنحى واحد وكتسرط فريقها وكتسمع لكلامو ... وكلها كتنخصص من داااااخل وعينيها دااااابلييين .... وجود كايشوف فيها واقف مقابل معاها .... كيشوف فملامحها كيف دبالو ! وهو كيتفكر اول نهار شافها داخلة للفيلا والمرح لي كان على وجهها ! العضات لي كدير للسانها والغميزات لي كدير بعويناتها و داك الشقاااوة !!!!! تفكرها بالجلابة صباااح العبييد .. داك الانوثة والبراءة لي كانت فملامحها .... فين مشات !!!! فين مشات داك الروح !!! هو عارف ان موت جدها مساهلش ... والاصعب هو متودعاتش معاه وهو عارف داك الاحساس ومجربو معاها ... ولكن هو على الاقل مكان حتى حد السبب فانو ميتوادعش معاه .... وكون كان شي حد سبابو متأكد كان غيمشي يقتلو ....
هاد العلاقة الى بقى هاملها بحال هاكاك هاد البنت غاااتموت هي باقا حية ! هاد العلاقة غتسممها ... غتقتلها .... الى مالقاش ليها حل ......
هادي بنت عمو الصغيرة ... بيلسان لي هزها باباه صغيرة فيديه وهو صغير وعاقل عليييها .... هزها اسد فيديه قدام اريج ويوونس وشم ريحتها .... وبيااااضها وهي يلاه تزااااادت .... وقال غنسميوها بيلساااان .... لداك الرويحة الزوينة لي كانت فيها ولي مزال كيشمها .. بنت عمو لي سماها باباه على وردة ... علاش يذبلها ! .....
ماتستاهلش هادشي ..... بنت احن عم عندو !!
علا راسو لفوق كااايتنفس ويحاول يضبط راسو ويتحمل هاد المسؤولية على اكمل وجه ... وهبط بشوية على ركابيه تاتقابل وجهو مع وجهها وهي ضارت بشوووية شافت فيه وهي ترمش ببطئ ونزلات دمعة طويلة مع الداك الرمشششة بنظرة جاااامدة ...
جود : ( كيشوف فيها) قلتي ليا من قبل ... كتعرفيني مزيان ..... اذن غتكوني عارفة بلي مكنعطيش وعود ومكنوفيش بيها ... كنوفي بكاع الوعود لي كنعطي .. لي عاقل عليهم .... وحتى لي معاقلش عليهم ... (طول فيها الشوفة وهي كترمش فيه والدموع كيسيلوووو بلا هواها مضببين ليها الرؤية .... وهو حاول يتبسم بطرف شفاهو كيحاول يواسييها وعلى الاقل يييحبس شوية من هاد النزيف لي فداخلها ) حنا الاسماعلييين وحدة لي كنكسابو عويناتها زرقين ... نجي انا نبكيهم ! .....
بيلسان زادت وسعات عينيها .. هاء ؟ هدا شكون !!!! قلبها بدا يضرب بجهد وهي تنوض من السرير من حداه كتنفس وكترد شعرها السارد لور و الشتا كطيح خيط من السما ... وكتحاول تهضر وتشد فراسها
بيلسان : ج جو د .... انا مكنبكيش على قبلك غير تهنى .... و ومكاين علاش تحس بشي مسؤولية من جيهتي راني ..
يلاه كتهضر حتى كتوقف على كلامها موسعة عينيها ملي حسات بلمسات حنان كيدوز الفوطة على شعرها كينشفوووو وهي تسرط كلامها ..... وقلبها بدا يضرب بجججهد وريحتو كتشمها قرررريبة منهااااا وهو كينشف ليها شعرها بحححنية ونزل الفوطة لعنقها كينشفو وينشف كتافها لي سردو بالشتا وهي وااااقفة جااااامدة ... سمعاتو كيهضر بالهمس وبهدوووووء ابدا ماعهداتوش فهاد جود الجديد ! ... نبرة جديييدة عليها وشخصية جديدة عليها،!!!!
جود : ممم .. .بصح انا واحد لي مريض ... وكنسى حتى راسي كيف داير ... ولكن كنعرف مزيان نميز الحاجة لي ديالي ... من لي ماشي ديالي ..... ( ضورها لعندو وهي جاااامدة بحال التمثال والبرق كيضرب فوجههم لان الجناح مظلم وهو بدا يدوز الفوطة على دموعها كيمسحهم ) وهاد الدموع ... غير شفتهم عرفتهم ديالي .....
بيلسان صدرها بقى يطلع ويهبط وسرطات ريييقهااا بززز وهو ضار حط الفوطة فوق السرير ورجع كيشوف فيها وخشا يديه فجياب السروال ...
جود : عاد فهمت علاش ملي شفتك اول مرة ... حسيت بشي حاجة فشكل .... هي گولي ليا ... نت ديالي !! ...
بيلسان حسات براسها بحال شي حد صرفقها ! حاسة براسها مقادراش تستوعب .... امور جات وتراكمات من فوقها بفوضوية !! ... حسات بالصور كتبعثر قدام عينيها وهي شادة طريق لاوكرانيا وممعصصبة عليييه لي خلاها كتبكي وهو زاهي مع وحدة اخرى .... وصورتها وهي كتعزيه فجدو لي معارفهاش شكون ! صورتها فلامورگ كتودع جدها ! .. صوووت التصرفيقة ديال ماماها باقي الصدى ديالها فوودنيييها .. وهاهوا جود قدامها كيقول نت ديالي !!!!! .... بحالا كتخيل !! كتحلم !! .... هزات يديها بجوج شدات على راسها لي كتحسو غيطرطق .. امور معارفاش ترتبهم ابدا .. معرافاش فين غاتحط كل حاجة فخانتها المناسبة !.... اش واقع ! واش هذا جود ولا كتحلم !!!! ....
حتى حساتو حيد ليها يديها على وجهها وشافت فيه لقاتو كيشوف لوجهها ولاثار اصابع اريج فوجهها ودوز عليهم صبعو ببطئ حتى غمضات عينيها وهو مكمش ملامحو كيدوز صبعو على دوك الاثار ويتفكر هضرة ارييج وداك الصفعة ...... كوولشي كان بسبابو .....
حيد يديه وخدا تنهييييدة عمييقة كاااااره راسو او بالاحرى كااااره داك المراهق لي حطو فهاد الموقف دابا ..... ورجع ضار لعندها بززربة وشد وجهها عندووو وهو مزير على سنانو وكيقنع فراسو ككتر ما أنو باغي يقنعها هي .... وهي وسعات عينيها كتشوف فيه ...
جود : غااانصلح كولشي هادشي ....نت عاونيني بحاجة وحدة .. ( بيلسان كتشوف فيه ) ملي ننساك .... فكريني بيييك .. ماشي تهزي حوايجك وتمشي .....
بيلسان مع سمعات الجملة الاخيرة غمضات عينيها مزيرة عليهم وهي تبدا تنخصص بالحس فييييديه تاطاحت على السرير كتبببكي ببحررقة وهو خلاها ودخل للدريسينك ديالها .... بدا يقلب تالقا بلاصة ديال لي جاكيت .. هز ليها جاكيييت .. وهز سبادرين وخرج عندها وهي كتبكي بجهد وحطهم على السرير ..
جود: بيلساااان .... ( بيلسان علات فيه عينيها الحومر بالبكا ) كتعرفي ديري شي حاجة اخرى من غير البكا ياك !!!!! ( بيلسان غير كتشوف فيه وتنخصص ) بحال مثلا تنوضي تلبسي وتبعيني ...
بيلسان دوزات يديها على عينيها مسحاتهم ووقفات كتشوف فيه
بيلسان : واش حماقيتي ! ....
جود فقط حرك ليها راسو باه مع ابتسامة ديال فوق الخاطر ...
بيلسان : ( كتمسح دموعها وباقا كتنخصص ) جود .. خرج من هنا عافاك والله مابقيت قادة على شي مشكل اخررر ....
جود : لبسي جاكيطتك ...
بيلسان : راااه غاااايشوفووونا واش نتا حماقيتي ... واش هذا وقت الخروج !
جود : راه غنعرف نلبسها ليك بيدي في حالة ما الى مبغيتيش ! ....
بيلسان ضورات راسها لجنب مدة ورجعات شافت فيه وهي كتستجمع قواها
بيلسان : جود .... انا بيييخير ... ونتا ماشي السبب .... صافي غير سير تنعس عافاك .... آم ريلي آوكاي " انا بصح بيخير"
جود : آي دونت سي يو اوكاي " مكنشوفكش بيخير"
بيلسان : رااااه قتلييييك راني صاافاا ... خررررج من هنااااا ... نتا ااااصلاا ماعندكش الحق تجي لعندددي .... ررججع ( كضربو يمشي للباب ) رررجع لاوكرانيا رجع عند داك خيتي ديالك رررجع عند البناااات ( كضرب فصدرو ) ررررجع للبييران رجع للشرااااب رررجع .. ببببببعد مني
طاحت فالارض كتنخصص وهو نزل معاها بشوية وكايتفكر حرقتها قبيلة فلامورغ .... شدها وعنقها عندو تابدات تنخصص فصدرو بجهد وهي تهزز يديها بششششووية عنقااااتوووو من ضهرو كتبكي بجججهد
بيلي : ( بالبكا ) كنتقققطع اجوووود ... كنتتتتتقطططع
جود : ( كايدوز يدو على شعرها ) .... غير بكي .... خوي كاع اش عندك .... الى بغيتي نبقى معاك هاكا تالصبح راه ماعنديش مشكل .....
پيلي : ( كتنخصص بالبكا ) لهاد الدرجة كتحس بالمسؤولية اجود ! مبغيييتش مشاعر بهاد الطريقة ... مابغيييتش تكووون كتخلص ذنب ... انا ماشي دددددنب .... البنت لي صبرات ربع سنين على قبل كرامتها راه تقدر تزييييد
جود : من بعد ماشفتك .... ( خشا راسو فشعرها ) ومن بعد ماشمييت ريحتك ... انا لي مغانصبرش ......
بيلي ماقدراتش تزيد عاد تهضضضر وبدات تنخصص بالبكاااا وهي ممثيقاش واش راها فحضنو .. واش جود رجع ! علاش كتحسو فقط كيتعامل زوين باش يكفر على دنبو ! علاش مكتحسش بهادشي خارج من قلبو كيفما شحال هادي !! غير حسات بلمساتو على شعررررها نسات كلشي ورتاااحت فصصصدرووو وهو جالس معاها فالارض مخليييها تاخد راحتها وكيشوف لفوق ..... وكيحاول يقنع راسو انه مكيتعاملش هاكا غير على ود الذنب ... هو فعلا كيحس بشي حاجة من جيهتها .... واخا تكون غير اعجاب ... راه الاعجاب كافي انه يكمل حياتو معاها .... اكيد من مور هاد الاعجاب غيبغيها .....
ورجع تاني كيدوز يدو على شعرها تاحسها رتاحت وهمس فوذنيها ..
جود : ودابا نقدرو نخرجووو !!!
بيلسان : شوف انا راني ( قاطعها )
جود : انا لي مخنوق ابيلسان ... انا لي باغي نخرج .... ماشي غير على قبلك .....
بيلسان : غايشوفونااا
جود : مكيهمني حتى حد ... كيفما كان الحال راني خارح انا وبنت عمي الصغيورة ...... ( ضرب لنيفها ) اولا !
بيلسان علات راسها فيه بشوية وقبل ماتهضر كان وقف هز جاكيت ديالها وجلسها على السرير وهي تشوف سبادرين ديالها وشداتو باش تلبسها راسها .... وخلاها على خاطرها ....
جود : غنمشي نجيب الجاكيت ديالي ونجي ..... ( رجع تحنى لعندها كيشوف فيها مبتسم بشوية ) خلينا نمشيو نقنعو هاد القلب .. ونجيو ...
بيلسان : ( بدون فهم علات راسها فيه ) شكون غاتقنع ! .. قلبي !
جود : لا ( بنظرة عميييييقة ) قلبي ......
خلاها وناض مشا حل الباب وخرج .. يلاه خرج شد فالحديدات لي كايطلو على لتحت ... وتنفس معمق وهي باقيا عينيها على لباب منين خررررج ......
وقف مدة كيحك فشعرووو .. وقبل مايبدا تاني يفكر ويترردد مشا بزربة لجناحو يهز جااكيت ديالو .. وهي لبسات سبرديلتها بلا عقل ! معارفاش كاع علاش كتلبس .. واش هو مأثر فيها لهاد الدرجة ولا حيت لقات راسها فعلا محتاجة تخرج !!!!! .... ماماها قالت ليها تمشي لامريكا جيت هو ماتسوقش ليها .... ولكن هو مسوق ! جا لعندها !!! وهاد الكلام !!!!! و بلا استئذان منها .. جا واحد الصوت طرق دماغها كتسمعو فوذنيها وحال ليها جرح لاشتياااق لجدها وعباراتو ...
احمد : ششفتي ابنتي الا كان شي حد مكتاب ليك .. راه مكتاااب واخا تنطابق السما على الارض مكاينش لي يمحيه من كتابك .... والى كان ممكتابش راه واخا تنطابق السما على الارض مكايش لي يكتبو فكتابك ....... داكشي علاش خليها فيد الله ... هو لي عارف يدبر امرك .... لاكان جود فمكتابك ... راه راسو غااايجي حتال عندك ..... ويلاه نوضي غسلي وجهك وباراكا من الببببكا ..
پيلي بمجرد ماتفكرات هضرة جدها ومواساتو ليها وهو الوحيييد لي كان كيحس بيييييها وعارفها شحال متعلقة بيييه وشحال فرحات نهار خطبها .... يلاه كتمسح دموعها تاسمعات الباب تحلات كان هاز جاكيطتو فيديه و على برا باقا الشتاااااا كتصب ....
بيلسان : كون غير بقينا .. ساعة راها قريبة الخمسة دالصباح والشتاااا شوف كيدايرة ... فين غنمشيو فهاد الجو لي كيخلع ....
جود : ( كالبس جاكيت ديالو وكايشوف فيها ) متأكدة خالعك غير الجو ! ....
بيلسان بقات كتشوف فيه وهي تحرك راسها ببطئ بالنفي ...
جود : ( مد يدو ليها ) يالاه ....
بيلسان بقات تشوف ليدو الممدودة مدة ... وطلعات عينيها شافت فيه بذبوووول ... وهي تشد فيه بعياء نفسي كبيييير ... المشاكل متراكمة عليها من كل جهة... ولكن حرقة جدها ككبررررر من كولشي .... هي لي خلاتها عياااااانة لهاد الدرجة .. ومحتااااجة لاقل احساااااس بالحنان والمواساة ... ومكاينش ماااااا حسن من مواساة كتجينا من اكثر انسان كنبغيوه !!!! ...
غير شدات فيدو زاد قدامها وهي هازة جاكيطتها وجرها فالدروج نزلو .... لتحت كانو باقيين الخدم كيجمعو وينضفو باش توجد الدار لليوم التاني
دالعزاء ..... جرها تاخرجو من القصررر وشتا كانت كتتتصب مجهدة .... بيلي نزلات راسها مخبعة وهو يجبدها لعندووو وزادو بزربة لطموبيل من شتا حل ليها الباب طلعات وزاد تاهو طلع ... ورجع مارشاريار وخرج نحو البوابة ... واسد لي كان فالبااالكون شاد على الحديدات وكيشوف مصصصصغر عينيه .... فين غاااديين هادو !!!!! اش كاااايديررر هذا !!!!! .. وهو يحل تيليفون لجيبي ايس دطموبيل جود قدامو متبعهم ..... عارف مابقى نعاس .. وهو اصلا ودع نعاس منهار ولد ..
غير ركبو جود شعل الشوفاج فالطموبيل .... وبيلي قلبات عينيها لسانتير جبداتها ركباتها وجود مراقبها ... ركباتها .. وحطات راسها على الزاج كتفرج فالسويگلاسات لي كيبعدو الشتا على الباربريز ... وعقلها هااااايم حتى سمعات ....
جود : الى بقيت حتى نسيت الفران فين جا .... داك السانتير ماعندها باش تفيدك ....
بيلي ضورات راسها بززززربة لعندو ...
بيلي : علاش !!!! و ... واش كيضرك راسك ....
جود : ( طول فيها الشوفة ورجع شاف للطريق كيهضر مهدن ) علاش ... تخلعتي !
پيلي :جووود .. هادي راااه طمووووبيل ....رااححنا فالطرييييق
جود : وعلاش ركبتي مع واحد مريض .... ونت عارفاه يقدر يقلبها بيك .....
پيلي : ج جوود ... دابا اش هاد الهضرة !!!!!
جود : لا .. السؤال .. خاصو يكون ...( شاف فيها ) علاش تعلقي بواحد مريض وتبغيه من الاساس !!!!! .... الى كتخافي من الخطر .. راك فالخطر منهار بغيتيني ماشي حتى ركبتي فطموبيل ..... ( بغمزة متسائلة ) علاش بغيتيني !
بيلي : (بيلي ضارت قدامها وقلبها كيضرب بجهد وهضرات بالانجليزي متوترة ) جوود .. حبس هاد الطموبيل ماحدنا فالمنطقة نرجع فحالي .. انا اصلا معرفتش راسي علاااااش جيت معاك و علاش خخخرررجت معاك ...
جود كيشوف معاها لداك التوتر كامل ورجع شاف قدامو كيتنهد وكيحاول يجاريها بهدوووء ... واخا ملي سولها علاش تخلعتي كان كيتسناها تكون مخلوعة عليه ماشي على راسها حيت فطموبيل ... واخا هاكاك سرط داك الجواب حيت من حقها تخاف على راسها .. ولي مفاهمش هو علاااش من الاسااااس تتعلق بيه هو لي حياتو كلها خطر فخطر !!!!! .... ورجع تاني جاوبها بالانجليزي بالاكسنت البريطانية ديالو ...
جود : نتي مناش مخلوعة بالضبط ابيلسان ! ...
بيلسان : شكون قااليك انا مخلووووعة !!
جود : ( بالانجليزي ) نيرفيز ؟؟ " متوترة " !
بيلسان : نو آم جاست " لا انا غير " ( قاطعها )
جود : آنگري !! " معصبة "!
بيلسان : ماااامعصبااااش انا (قاطعها تاني بهدوء )
جود : يو آر لوست .. " نت راك موضرة "
بيلسان يلاه غتهضر لقات لسانها ترررربط وهي تسسكت ..... وهو ضور راسووو بحالا سمع الجواب .... ماشي غير هي لي موضرة هو موضر كثر منها ومع دالك كيحاول يجاري الامر باش يبان ليه طريق فين كيخرج ...... هو فعلا محتاااج لهاد الخرجة محتاج ينفرد بيها ... هو محتااااج يبغييييها .... وفنفس الوقت .. محتاج يعرف واش كان كيبغيها !!! .....
عم الصممممت فالطموبيل هي ساكتة شادة على السانتير بيديها كتشوف لقدااااام وعينيها حووووومر ... وهو صايك وكيحك فلحيتو مرة مرة ويقلب عينيه ليها ويرجع يشوف قدامو .. حتى خرج من المنطقة وهوما عاطيين فسحة لبعضياتهم يرصيو افكارهم .... لا هو لا هي .. عندهم قاسم مشترك انه كيتصرفو بتهور ... وحتى كيديرو داك التصرف وينفدوه عااد يجلسو يستوعبوه !!!! ..... كان قبل ما يخرج من المنطقة .. ضور الفولون لجيهة ليمن ودخل ناااازل جيهة البحححر وهي بقوة ماساهية مارداتش البال كاع فين غاديين .. كانت طريق طويلة وعلى الجناب البوطوات دالضو مشعوولين ..كانت الشتا غزيييييرة وهوما غاديين فطريق الغابة الخاصة بالقصر .. ونازلين للبحر الخاص بيهم .... والشتا غير مكتزيد تمجهد داك الليلة ... رغم انها شتاء صيفية الا انها جابت معاها جو بارد ! ..... بيلي ماتوكضات تاسمعاتو حبس الطموبيل وهي تشوف لفين راهم لقات راسها حدا البحر والمواااج كيتعلااااااو ببببعنف ... ورجعات شافت فيه هو لي سكت الطموبيل وحل الزاج شوية منين بانليه دخل الريح مجهد سدو ...
پيلي : اش كنديرو هنا ....
جود : ( شاف فيها ) ضروري خاصنا نكونو غنديرو شي حاجة !!!! ( بيلي رفعات حجبانها وهو شاف لقدامو ) كتعجبني هاد البلاصة .. كنرتاح هنايا .....
پيلي رجعات كتشوف تاهي لقدام كان جرف صغييييير وكيطل على البحر لي يقدر ينزل ليه الواحد غير على رجليه وكان الحجرررر بزااااف كيضربو فيهم الموااااج ومنارة فالوسط مضيئة خاصة بالمنطقة كل مرة كضرب فالطموبيل ضوي وجوههم فداك الضلاااام .... طولات الشوفة فالنواحي والشتا بدات تحبس شوية ولات تصب خفيفة .... فعلا !!! بلاصة كتريح الاعصاااب !!!! ... حسات بالنفس تررررخفاااات فيها وهي كتشوف فدوك المواج العنيفة بسبب هاد الجو ورجعات لور وغمضات عينيها مددددة كتحاول تاهي تسهى فهاد الجو لانها اكثر وحدة محتاجة تسترخى .. تبعاتو وهي ناسية كولشي ناسية ماماها لي تقدر دخل فاي لحظة للبيت ومتلقاهاش .... ناسية كولشي وتبعات فقط فين غيرتاح شوية قلبها لي كتحس بيه كااااايتقطع وسط صدرها ويتمزززق لاشلااااء بطريقة كتتحححرق !!!!! .... باغا غييير ترتاح .... فبلاصة كتريح .... مع شخص كاااايريح !!!!! ....
مدة مغمضة عينيها ومسترخية حتى سمعاتو ...
جود : مكاينش فهاد الدنيا اهم من الواليدين ..... واهم من العائلة ابيلسان .....
بيلسان : ( ضارت شافت فيه ) م .. مافهمتش !
جود : فهاد الدنيا كلها .... واخا تعياي تقلبي على لي يبغي مصلحتك ديال بصح ... غتلقاي ديما واليديك فالصف الاول .....
بيلسان بقات غير كترمش وكتقول ... واش هذا كيقصد ماما !!! واش سمع خصاااامنااا !!!!! ....
جود: فقدت الذاكرة ... ولقيت الواليد صنع ليا وحدة اخرى .... الوقيتة لي انا راني فالانعاش .. هو مافكرش غير فواش غنفيق ... فكر حتى فواحد النهار نقدر نجي نلومو ونگوليه خبيتي عليا اني كنت خاطب ( بيلي وسعات عينيها ) صنع ليا ذاكرة ....... بالصوت والصورة .... والترجمة ملفوق ! .....
بيلسان : ا ا !!!! ك كيفاش
جود : ( شاف فيها ) خلا ليا تسجيلات الكاميرا .... تفرجت فكولشي داكشي لي ناسيه ... كاع اش طرا فالدار ونسيتو ... تفرجت فيه ....
بيلسان : ( وسعات عينيها ) ااا !!!! شنو بالضبط
جود : اي حاجة مهمة فعلاقتي معاك ..... كي كانت .. وحتى كيفاش خاصها تولي .... ( رجع كيتنهد وكيشوف قدامو ) شفت خصامي مع خوك ... شفت كاع اش طرا ( بيلي رجعات كتشوف قدامها وكتفكر داك النهار المشؤوم ) محملتش راسي ... كرررهت راسي .... لداك درجة كنت بلا عقل !!!
بيلسان : هاء !! علاش .. شنو لي جاك تصرفتي فيه بلا عقل ؟؟؟
جود : العلاقة كلها ابيلسان .... مغنكدبش عليك ... كون كنت ديال دابا .. مكنتش حتى نفكر نقرب لبنت عمي بداك الشكل حتى تكون فخبار عائلتها ... هااااديك دمي .... دم الاسماعيلي ...... ماشي ديال علاقة مبرهشة بداك شكل !!!
بيلسان : مبرهشة ؟؟؟؟؟؟ ( نزلات دمعة ) جود .....واش نتا ندمان !
جود : اه .. ندمان .... ( شاف فيها وهي مصدوووومة ) فعلا ندمان والله ! ..... وكون رجع بيا زمان لور مكنتش غااانستغل بنت عمي فداك السن .... ماحملتش رااااسي ......
بيلسان عضات على شفتها وضورات راسها لجنب مدة مزيرة على عينيها كضور راسها بالنفي ورجعات شافت فيه وهو مراقبها
بيلسان : حتى دابا راه مامبزز عليك تاحد ... والله !!!!!
جود : ندمان على شنو درت شحال هادي ..... ( بنصف ابتسامة مرهقة ) ماشي على اش كندير دابا .......
بيلسان : وشنو الفرق .. ياك راك غير كتصلح فداكشي لي درتي شحال هادي
جود : علاش ماشي هادشي لي خاصو يكون !
بيلسان : لااااا .. لاااا اجود ..لاااا .... انا ما طلبت منك والو ومابغيتكش تصلح ليا كون بغيت حب بهاد الطريقة كنت نبقى معاك ماشي نمشي فحااالي ... يااااابغيني ديال بصح ياااااا بلاش .. انا ماشي لصقة كيف هادوك لي كتتعرررف انا ماشي بلا كراااامة ... كنبغييييك اه ... كنحماااااق عليك كاااااع ... ولكن الى مكنتيش غتبادلني نفس الشعور راه ماااعندي مااااندير بيك اووولد عمي .....
جود : بيلسان .. مكنعرفش نافق والله ... ومكنعرفش حتى نكذب ... اه فعلا ... مغنكونش كنبادلك نفس داكشي لي كتحسيه نت ... حيت نت عاقلة عليا وانا لا .... ولكن غنكون معاك واضح ... انا مكنبغي حتى شي وحدة ... وعمرني بغيت شي وحدة .. كنهصر على انا لي من مور داك لاكسيدون .... عمر دخلات لقلبي شي وحدة ... كون كانت عندي شي وحدة مكنتش حتى غنشوف فيك ولا نطول الشوفة .. ايييه .. انا عزيز عليا ننشط والى قلتي نحسب ليك شحال من وحدة دوزت غير فهاد العامين لخرا مغنقدرش نحسبهم .... داكشي باش مكايناش شي حاجة غاتمنعني نكون معاك منغير الى انا مابغيتيش..... وانا باااغي .....
بيلسان ساكتة كتسمع ليه كتشوف قدامها وشادة على جاكيطتها وهو كيوضح معاها الاومور بعقلانية !! عاد شافت جود شحال كبر ! شحال تبدل !!! امتى هذا كان كيهضر بحال هاكا !!
جود : انا هاكا ... حيت قلبي خاوي .. ومافيه تاشي وحدة ومكيجنيش عذاب ضميييير من جيهة حتى شي وحدة .... ولكن نهار يعمر .... مستحيل نشوف فشي وحدة اخرى .... اييه عزيز عليا نعيش ولكن عندي مبادئ ديالي .....
بيلسان ( شافت فيه بعينين دامعين ) يعني !!! يعني مدام انك مشيتي لاوكرانيا عند داك خيتي مور ماعرفتي اننا كنا مخطوبين ... مكنتش فقلبك ؟
جود : ( شاف فيها ) و باقا ماشي فقلبي ابيلسان .. راك باقا غير فعقلي ....
بيلسان : ( سرطات ريقها وشافت قدامها والعصبية فعينيها مخلطة بالحرقة ) اذن اش كنديرو هناااا
جود : جيت باش نزلك من عقلي لقلبي .....
بيلسان ضورات راسها لعندو لقاتو كيشوف فيها
جود : مكنبغيكش .... ( بنصف ابتسامة كيشوف فوجهها ) ولكن باغي نبغيك .....
بيلسان : علااااش !!!! غير حيت كنبغيك انا !!!! واش كتحس بالدنب ؟ هادشي علاش باغي تبغيني
جود : كنحس بالذنب ايه ... ولكن ماشي هذا هو السبب ..
بيلسان : لا راه هو هذا
جود : كون كان هدا هو السبب ... كون راني كنحاول نبغي عشرين وحدة فسيمانة !!! .... بزاف لي كايدوزو معايا وقيتة ويجيو غذا فصباح يطالبو بمشاعر من جيهتي .... وكيبقاو فيا !!! ولكن عمرني فكرت او قررت باش نيغيييهم .... او باش نعطي فرصة .....
بيلسان اهاه !! وشنو كيفرق بيني وبينهم
جود : ( ضار شاف فيها وطول الشوفة ) عاجباني .....
بيلسان : علاش لوخرين معاجبينكش !!! وعلاش ارتبطتي بيهم كون مكانوش عاجبينك
جود : تاهوما كانو عاجبيني ..... ولكن بغيتهم من السمطة لتحت ( بيلسان وسعات عينيها ) ..... نت لي عجبتيني من السمطة لفوق ... وطلعتي هنا ( قاس فراسو ) وتعششتي .....
بيلسان : ( كترمش فيه ) اش نفهم من كلامك !!
جود : وااااضح كلامي ابيلسان ... فهميه كامل مااتخلي والو ... ( تنهد وقاد جلستو مقابل معاها والجدية بانت على ملامحو كتر ) المنظر لي شفتي فاوكرانيا ... حرجني بزاف .... ومغتعاوديش تشوفيه
بيلسان : جود انا راني مولفة داك المنظر ... هادشي لي كتقول دابا هو لي مامولفاهش .... راك كتقول ليا لاكان قلبك عامر متخونش ! كنتي شحال هادي كتقول ليا كنبغيك وكتخون .. كنتي غير كتكذب !!
جود : اناااا مكنعرفش هذا لي كتهضري عليه .. وحتى نت بغيتك تنسايه .... معاك انا دابا ..... حاولي تسيپاري بين هاد الجوج .. هاداك بوحدو ... وانا بوحدي .....
بيلسان : ونتا شكووون !!!!!
جود : انا واحد مريض .... كيفيق كل صباح وكيخصو وقت باش يفكر شكون هو وفين هو وولد من ..... عاااايش بجوج حوايج .... الطموبيلات .. والبنات .... وعايش على حاجة وحدة .... ماي فاميلي .....لي نقدر ندير على قبلها كولشي ... ونت وحدة من هاد الفاميلي ...( رجع كيشوف قدامو تنهد معمق ) كنت كل مكنفيق فالصباح ونلقى حدايا شي وحدة .. كنبقى نسول راسي حتى لامتى !!! ....مغتكونش شي نهار شي وحدة حدايا لي فالحلال ! ولا نفيق شي صباح ونلقى وحدة حدايا لي مغانعيفهاش !! ولكن غير كنتفكر مرضي كنتراجع .... حيت انا مصالحش للزواج .. او الا بغيت نزيد نوضح .... صعيب باش تتزوج وكل مرة تسول مرتك شكون نت !!! وباااش نزييييد نوضح كتر عاااد ... صعيب تلقى لي تصبررر عليك وتفكرك كل صباح شكون هي بلا متمل ولا تعيا !! ... داكشي علاش فكرة الزواج والارتباااط الرسمي كانت ممحية من دماغي بشكل كلي .... كنت كنشوف بنات زوينات .. وغير كنشوفهم ماشي ديال السمطة لتحت ... كنغض البصصر باش منمشيش نطيح فيها ... غنبقى معدب وصافي .... كنشوف ونزيد .... كيفما شفتك نتي نهار جيتي .... عجبتيني مغنكدبش عليك .... ( بيلسان كتشوف قدامها وكتحس براسها كتعرف على واحد اخر جديد ) ولكن كيف ديما .... حاولت منطولش الشوفة باش مانطيحش فيك .... غير باش منتزوجش .... حيت الى بقيت حتى بغيت شي وحدة مكاينش لي يفكها مني ولا لي يفرقها عليا ..... شفتك وعاودت شفت وحنيت عييني ..... حتى كنكتاشف راني خاطبك .... من شحال هادي ... يعني نت كنت عارفة بمرضي القديم و كنت معايا .. وكنت عارفة المرض ديالي بموناكو وكنت معايا .... ربع سنين وباقا كتشوفي فيا بحال شي وحدة يالاه قلت ليها البارح كنبغيك ...... ( بيلسان علات يديها مسحات دموعها ) تفكرت بكاك عند الخيل ( رجع ضور راسو عندها ) كنت سبابو ياك !!!! ( بيلسان حركات راسها باه كتبكي عرفتها ..... حيت منهار جيتي وداك الدموع كنت انا سبابهم كلهم .... من بعد ماعرفت كولشي وشفت المشكل لي وقع مع خوك ... تخرررربقت بزاف .... كون جيتي فضروف اخرى مكنتش كاع نتسنى حتى نعرف راسي خااطبك .... بمجرد مانشوف عندي بنت عمي زوينة بحالك ..... كنت غنهضر مع واليدك حيت واحد فلاج ديالي باغي يستقر ... ولكن جيتي معاياا فهاد الضروف ...... فكرت مزيان ... وقلت نكمل على مابديت .. البنت ديجا عاجباني وانا عارف نزيد معاك سيمانة اخرى ... غااانطيح .... يعني مسألة نبادلك بنفس المشاعر .... منقدش نحسمها ليك دابا وانا يلاه خديت قرار ... ولكن تيقيني ... ( شاف فيها ) غاندير جهدي كامل باش حياتي تكمل معاك ..... ختاريييتك ... وبغيت نبغيك ..... وبغيت يفوت هادشي ونكملو الخطبة .... ولكن حتى نت تكوني موافقة .... ( شاف فيها ) متقوليليش داك كنبغيييك وكنا اونسومبل وداكشي ..... الماااضي المبرهش وداك العلاقة الطايشة لي معندهاش اساس كولوها نسااايها .. اعتبري ولد عمك جديد هدا لي كيخطبك دابا .. واحد ولد عمك لي مريض فراسو وعايش بليكالمون وكيموت على ريحة لاگريس وطموبيلات وناسي راسو وحوايجو ويقدر يوصلك لشي قنت وينساااك ولا توصيه يجيب ليك شي حاجة وينساها ..... ولكن غيواعدك .... حياتك كاملة ... مغتشوفيش من جيهتو الخيانة ..... وفالشدة غيكون معاك هو لول ..( بابتسامة ) يموووت معاك ..... الى قابلة بواحد بحال هدا ..... قوليها ليا .... وغتلقايني جالس مع واليديك ....
بيلسان بقات غير ساكتة كترمش !!! مقادراش كاع تستوعب هادشي لي كيتقال ليها دابا !! علاش فعلا كتحس بلي راها مع واحد اخر !!!!! عمرها ضنات غيكون تبدل لهاد الدرجة !! هو مافقدش غير الذاكرة فقد كووووولشي !!!! موناكو قتل ليها جود بمرة .... ولكن خلق ليها جود جديد !!! بنظرات جداد !! بكلمات جداد !!! قلبات راسها بشوية لعندو وهو كيشوف فيها مبسم ..... حسات بكرررشها حرقاتها من دااااهل وتلوات .. اعجابها بيه عمرووو غايموت .. كاتسطى على تفااصيلو كلها .... كتشوف فملامحو فعينيه ... فداك الشفااارر الكبااارر لي كتحماق عليهم فدوك الشفايف .... وفداك اللحية لي كانت كدير فيها يديها تداعبها ! عينيها استقرو على دااك اللحية ... وهزات يديها بلا متحس بشوية قاست فلحييييتووو وشافت صبعانها غبرو وسطها !!!! كبررررااات !! كانت صغييرة ... وجود مخليها على خاطرها كيشوف فيها ..... وهي تبدا تبسم غير بشووووية وبانكساااررر كبيييير ....
بيلسان : واقلة لي معارفش نتا .... هو راك نتا مريض حتى قبل من موناكو .... هادشي لي كدير دابا راه كنتي كاديرو حتى شحال هادي .. موناكو خلاتك غير تفقد الذاكرة حزئيا وخلاتك فخطر كتر من لول ..... كنتي حبيبي حتى ونتا كتنساني فصبح .... ولكن كنتي كتنساني دقيقة جوج وتتفكرني ..... باش تنساااني ديما .... هي الحاجة لي مخلاااتنيش نصبر اجود .... مخلانيش نصبر الطبيب فاش قال انك فاي لحظة تقدر تعرض لنوبة لي تفقدك تاني فيها الذاكرة كل مرة .... نصبر لدقيقة جوج .... ولكن اعوام .... صعييبة
جود : بيلسان ( بعد وجهو بشوية وشاف فيها بجدية ) نت باقا صغيرة ... ومن غيري انا كاينين بزاف لي غيتمناو غير تهضري معاهم ..... انا مغنخبع عليك والو .. هانتي كتشوفي كولشي ..... الى مكنتيش قادرة على واحد بحالي راه عندك كامل الحرررية .....
بيلسان : واش لي تسنات ربع ينين ... فنظرك غتقد تنساحب دابا !!
جود : علاش !
بيلسان : مغاااتقدش
جود : ( كايشوف لشفايفها ورجع شاف فيها ) باغيهااا ماتقدش ....
بلسان : باغيني نبقى !!
جود : باغيك تبقاي ....
بيلسان شافت فيييه مطووووولة وحسات بقلللبببها ارتااااح !!!!! حسات بحالا اكسيدون دموناكو كلها كانت غير وهم ! وها جود قدامها !!!! جود لي كتسطى علييييه .... وعلى كاع تفاصييلو ولي ربع سنيين وهو جممممرة شاعلة فقلبها ..... وهي تتبسم بشوة وشافت فعمق عينيه وفلحظة ضضعف قالت بصوت حنييييين فيه شهقة بكاء
بيلسان : كنبغييك .......
جود دخلات لمسامعو هاد الكلمة لي كيسمعها ديييييما من عند البناااات ... ولكن هادي كانت فشكل .. حسها صااااادقة !! نقية .. وبريييئة ... هو يتبسم ليها وشد وجهها بيدو ....
جود : باغي نبغيييك .....
داعب خدها وابتسامتها قرا منها الارتياح .. قرا انه قدر ينجح ييريحها شوية ..... وكمل كلامو
جود : نتحركو !
بيلسان : نرجعو للدار !! ..
حيد يدو من وجهها وديمارا طموبيل وحرك ليها راسو بالنفي وهي غير سكتات وشافت قدامها .... وهو زاد فالطريييق تابان ليها خارج المنطقة .... مرة مرة كتخطف ليه الشووووفة ..... واش كتحلم !! واش بصح جود معاها .. واش صافي داكشي سالا ! مغمشيش لامريكا مغتهربش ومغتفرقش عليه مزال !!!! والا نساها !! نفضات راسها كتطلب من عقلها يعيش فقط اللحظة ..... هاد اللحظة لي خلات كرشها تحرقها من داخل بالتوتررر والحماس لي خدم فيها ... خلاها تنسى شوية حرقة جدها وواساها احسن مواساة ....
غمضات عينيها وهي كتعيييش لحظتها وتكتشف حتى هي معاه هاد جود الجديد وهادشي لي بداه جديد !! هضر على الخطبة !!! واش غتولي ديالو ؟ واش فعلا غااايتزوجو ؟؟؟؟ واش صافي داكشي سالا !!!!! طريق كلها وهي كتفكر وهو ساكت صااايك ... الضو دالصباح بدا كيطلع شوية بشششوية والشتا كتصب غير خفيييييفة والطريق فاااازكة من بعد الليلة الممطرة ... حيد جود الجاكيت وفتح السرجم حط عليه دراعو .. حس بالنغمة دالكارو بغا يكمي ولكن معاه فالطموبيل مبغاهاش تشم ريحة الگارو.... واحترم وجودها كأنثى رقيقة مغاتقظش على ريحة الكارو ....
مدة طويلة دالطريق لاحظ فيها سهوتها عارفها كتفكر وخلا ليها الوقت حيت هو خدا وقتو فالتفكيير حتى قرر قرارو ....
وصل لواحد المنعطف ضار منو وهو يوقف قدام واحد جوج بيبان حديدين كباااااار كوحل مشششبكييين فوق منهم لااافتة ..... والابواق فالمساجد بدات كتعلى بأذان الفجر ..... وبيلي ضورات عينيها لعندو
بيلسان : هاء !!! علاش جينا لهنا !!!!!
جود : ( بابتسامة ) نزلي ....
نزبات بيلي ونزل تاهو كيعوج فعنقو ... وبيلي كتشوف مع داك البلاصة ومع اللافتة وهي محيدة جاكيطتها هازاها فيديها كتشوف ..... فجأة !!!! شدااات على فمها ملي تفكرااااات القصة لي متعلقة بهاد البلاصة بالضبط فهاد الوقت بالضبط وشافت فيه ... غير هاد الصدمة لي بانت على عينيها عرفها تفكرات !!!
بيلسان : جوووود !!!!!! و .. واش فخبارك ؟؟؟ ف ... فخبارك قصة هاد البلاصة !!
جود : سطوري لي كتنعسك بيها خالتك ونت صغيرة .. نعساتنا بيها حنا كامليييين فاش كنا صغار ....
بيلسان : اووومايكااااااد !!!!!!
ضحكات بيلسان يلا متحس .. جيييييست عمرها توقعاتووو !!!!!!!! ... من لي كانت صغيرة وهوما كااايطلبو خالتهم رتاج تعاود ليهم قصتها هي وعدنان ... وكانت ديما كتعاود ليهم على واحد اللية خراااافية دوزاتها وداها فيها للبارررك دالاطفال فنصايص الليل ونقزو البيبان ...... وهي تشوف عتد جوددد مصدومة
بيلسلن : كيييييفاش بقيييتي عاقل ...
جود : داكرة الصغر عمرها تمحات ليا .... وباقي كنشوفك فيها داك البنت الصغيرة مولات الكرينات لي تجلس وتربع رجليها وتقول لخالتها كملي ليا القصة ...... ( بيلسان شدات على فمها ) غتكوني بغيتي تعيشي بحالها مدام كنت متحسمة لداك الدرجة .....
بيلسان : هههه منكذبش عليك .. عرفتي من ديما وانا كنحلم نعيش شي قصة بحال ديالهم ..... كانت كتعجبني قصتهم بزاف وديما كنلصقها تعاود ليا واخا كبرررررت ..... انا عارفة عاوداتها لينا ونتا صغير .. استغربت حيت بقيتي عاااقل ..... ( شافت فيه بحماس و يديها فجاكيطتها وعينيها لمعو ) شنووو دابا نقزو لبااااب !!!
جود : لا .... عمي عدنان كانت عزيزة عليها تمارة وانا معككاز .... ( جبد السوارت من جيبو ) شششريت هاد البلاصة ....
بيلسان : ششششششنو !! فوقاش
جود :هادي بببزاااف ... ( زاد قدامها كيفتح البيبان وهي تابعاه ) عمرك جيتي ليها من قبل !
بيلسان : لاااا .. ولكن غير شفت البلاكة شنو مكتوب فيها تفكرت .... واش هادي نفس البلاصة ؟؟؟؟؟
جود : القصة لي عاودات لينا شحال هادي .... بقيت عاقل عليها .. وملي كبرت .. هادي تقريبا واحد تسع شهور ولا تقريبا عام ... ( هو كيهضر ويحل فالبيبان ديالها وهي تابعاه كتشوف مع جنابها دايرة يديها فالجياب ) كنت كنقلب على شي بلاااااصة .... ندير فيها معرض خاص بيا ..... كنت باغي بلاصة يدخل ليها شي واحد يرتااااح .... ولا تفكرو بشي حاجة !! .... أنا كواحد كاينسى وفاقد الداكرة كنسى كولشي ومكنساش البلايص لي كنرتاح فيهم .... كايدوني ليهم رجيليا باا منحس ... كنت كتقلب على بلاصة حتى لي ناسي راسو وناسي البلايص لي كايرتاح فيهم يرتاح فيها .... وتفكرت هاد البلاصة حيت ملي كانت كتهضر عليها كانت واحد الفرحة على وجهها فشكل باقي عاقل عليها ..... قلت ليها تعطيني لادغيس .. وجيت خديتها ... وهاهي باقي كتسناني شي نهار نحل فيها معرض لي بغيت ...
بيلسان : اومايكااااد !!!! عرفتي .... ااااحسسسن بلاصة ختاريتي والله .. ( ضارت كتشوف ) واخا صغيرة شوية
جود : لا كافية .... حيت متيهمش قداش هي .. كيهم شنو كتحسي فيها لداخل ....
بيلسان: ولكن هاد البلاصة راه ديال دراري الصغار ! راه فيها الالعاب ! غتحيدهم ( قاست فواحد الميزان وطلع وهبط )
جود : لا .... مغنحيدهمش .. بالعكس انا بغيتها تكون ديال دراري صغار .... حيت البروجي لي كنفكر فيه ... او التصميم لي لي كنفكر فيه هوما طموبيلات ديال دراري الصغار .. تقدري تقولي بحال لالعاب .. ولكن يقدرو يصوگوهم ويحسوهم الطموبيلات ديال بصح .... فالحجم ديال وليد صغير ويكون مافيهمش الخطررر ... ( تكا على واحد الشجرة كيتنهد ) باش يتقدمو لاي وليد صغير كيحلم يحرك طموبيل فالواقع ومايتضرررربش فالحييط ......
بيلسان : فككككرة زوينة الله ( عوجات راسها معاه ودمعو عينيها ) تفكرتي راسك ونتا صغير !
جود : ( عض على شفتو ) بعض المرات كنتمنى كون فقدت داك الذاكرة كليا .... على الاقل نسى اش وقع ليا وانا صغير ومنبقاش نحلم بيه كل نهار .....
بيلسان : ( قربات عندو بشوية وشدات فوجهو ) سولتيني قبيلة .... واش موافقة على واحد ينساني كل صباح ..... نتا معارفش الى انا غنكتب ليه سميتي فالحييييط ......
جود ابتسم ليها بامتنان ! واخا معرفش راسو علاش حتاج يشكرها ! ولكن على الاقل كيشركها لانها غتقدم ليه داك الحاجة لي ضن عمرو غيوصل ليها .. وهي الحلال مع شي وحدة !!! ..... وقال بنفس الملامح الممتنة
جود : دونك نت مواققة !
بيلسان : ربع سنين هادي باش وافقت نتزوج بولد عمي .... واليوم تاني .. غنوافق .... باش نكون مع جود الاسمااااعيلي .....
جود : مخيفاش !
بيلسان : ياك مغاتخليش ليا مناش نخاف ؟
جود : وشنو لي كتخافي منو
بيلسان : مونااكوو .....
جود تنهد ورجع شاف فيها : قطعت معاهم العقد ...
بيلسان : فخباري ... واخا بعدت ربع سنين راه كنت متبعة خباراتك .....
جود : ( هز يدو دوزها على شعرها ) بغييت نستقر ابيلسان ..... بغيت نفرح الواليدين بولد مستقر ومزوج وباغي يدير ولاد وبخدم كيف كايتمناو ....... بغيت نحقق داكشي لي ممخلينيش المرض نحققو ..... ( شاف فيها ) تعاونيني ؟؟
بيلسان : ( بعينين دامعة ) اناااا معاك اجوووود ......
مخلاتوش فين يهضر كانت عنقااااتوووو بحرااااارة وتاهو تبسم برررضا كيدوز يدو على شعرها وفررررحاااان بيها! فرحان لهاد الحياة الجديدة لي واقلة غيبدا معاها !!!!! ..... وهو يتكلم
جود: انا ديجا طلبتك من واليديك ..... وهاد المرة مغنطبلكش منهم ...
بيلسان : ( بعدات عليه وشافت فيه ) ومن عند من !
جود : من عند اياد ...
بيلسان بقات غير كترمش ..... حتى بدات الشتا كطيح عليهم وهي تعلي راسها لفوق وضضضحكات .. طاااحت ررعدية وغزيييييرة تاسرداتهم هو شدها من يديها وخرجو بزززرربة وهي كاااتصضضضضحك ... فعلااااا مكذبش .... قال غيصلح كولشي ... وهو غييير فلييييلة قدررر ييخلي داك الجرح لي فلداخل يلتئم !! فليلة قدر يضحكها وينسيها كولشي !!!!! تبعاتو كتجري سد البيبان ومشاو للطموبيل ساردين كينههجووو وهي بدات كتشوف فيه .... تابان ليها ديمارا الطموبيل وزادو وهي تعلي حاجبها !! جاتها عجب مباسهاش !!!!! واش لها درجة تعقل ؟؟؟؟؟؟
ورجعات عوجات شفايفها وشدو الطريق وهي ضااااحكة ..... ضار شاف فيها وهي تبسم ليه وشدات دراعو حطات عليه راسسسسهاااا وهو مخليييييها ... هاد النرة دراعو كان واسع كترر !!!!! حاها تبدل بزاف حتى شكلا ... كبر وعراض ....
جود مكانش باغي يرجع للقصر حاس براسو مزال باااغي يتنننتفس وهو يرجع للمنطقة ومشا لداك البلاصة لي كانو واقفين فيها فالبححرررر ... الحال كان بدا يصبح والشتا تاني بدات تححححبس وهو واقف تما ومرة مرة يشوف عند بيلي لي داها النعاس وشادة ذراعو ... كيشوف لملامحها كيفاش فدقيقة تبدلو !!!! كيفاش رجع الحيوية لوجهها !!!!! هو يحيد الشعر بشوية دارو مور ودنيهااا وبدا يتأمل فملامحها النااااعسين ... احساس كان مخخختلف .. احساس ديال بنت غيكمل معاها حياتو !!!!!!! ......
مدة تابدات الشمس تشرق بين الغيوم وضرب فعينو ... وحس بالنعاااس كيقلب فييييه .. هو يكسيري بطمووبيل وزاد للقصر ...... تحلو ليه البوابات ديال القصر واسد كان باقي فالبالكون شاد قهوة مور قهوة حتى كيشوف فيه داخل بالطموبيل ... و باركا وضار عند بيلسان ودوز يدو على وجهها وقرب لوذنيها بهمس كيعيط عليها تافااااقت كتشوف مع جنابها وكتمنى من الله ميكونش هادشي غير حلم .. غير شافتو حداهااا وهي تبسم
جود : وصلنا ....
بيلسان تبسمات وجبدات عنقها بشوية وشافت فيه
بيلسان : شكرا على هاد الخرجة .... كنت محتااااجاها بزاف .... وكانت زويييينة بزاف ...
جود : غيجيو ليالي حسن ... ( ضرب فنيفها ) ...
تبسمات ليه .. تسناتو تاني يبوووسها .. لقات والو وهي تحل طموبييل مستغربة من هاد الشخصية الجديدة ولكن باراكا راه غيير معاها بداك الضحكة لي كتتتتحمقها ودوك العينين وداك النظراااات ..... وهي تنزل فرحانة شادة فجاااااكييييطتها .... غير شافت فجردة وهي تفكر العزاء ورجعات تنهدااااات واقفة كتشوف تاسمعاتو جاي موراها وهي تزييييد وقلبها تقطع تاني ملي تفكرات جدها ..... يلاه داخلين هوما يشوفوها خاااااارجة !!!! ....
اسد كان يالاه غيرجع ينعس تابانت ليه خاااارجة !!!!!
جود : قسسسسم !!!!
قسم : جود ( شافت فبيلي ) فين كنتو
جود : حدا البحر .. ( قرب عندها كيشوف فيييها وجهها كان داااااابل واضح عليها عيانة ) قسسسوم !!!!! ( حرك رتسو بتساؤل) واتس رونگ !!! مالك ؟
قسم : نوووثينغ ... بغيييت غير نخرج نتنفس شوووية !!!!
تبسمات ليهم ومشاااات .. وجود متبعها بعينيه معجباااتوووش !!!! ... داك الذبول مغيكونش غير على الموت ؟؟؟؟؟؟ .... ورجع دخل لدار واسد تاكان ناض .... رجع تاتي كلس كيتنهد وعيط على الخدامة تطلع قهوة اخرى .......
يتبع...
التعليقات
لا توجد تعليقات بعد، كن أول من يعلق.