محتوى القصة
علات قدس عينيها للباب ككتتسناه يدخل ..كانت فرحانة كتتسناه فوقاش يجي ، ولكن هضرة رتاج اللخرة ديرونجاتها شوية وماعجبهاش هاد الخبار .... شي حاجة فيها للداخل ماتقبلاتش هادشي ومارتاحتش ليه وهي عارفة مزيان هاد عاليا كيدايرة و التحرر ديالها.... كاتشوف للباب ودماغها ساهي. . تاتم داخل معنق انس لجنبو لي كايعاود ليه على شنو دار فالملعب ، شاف فيهم وعينيه دغيا مشات عند قدس .. تبسم من قلبو وكانت احسن حاجة كايتمناها هي يدخل للدار ويشوف وجهها قدامو مع اعز الناس عندو ، واليديه ....
لوؤي : ماااتسناو حد نتوما ... هاهو تشكى ليااا ... شنو قاتليك ماماك ؟؟؟.
انس : قاتليا خلييييه ياكل ببراا شكون قاليه مايجيييش فالوقت
لوؤي : ياااك ادكتووورة يااااك ( عنقها من لور باس راسها وهي كضحك وقدس مبتسمة نسات عاليا فاش شافتو ) خلاااني انا راجلك نجي فالوقت ؟ كايخليني هاد الراجل عندك نگلس ؟
رتاج : ههههه عارفاك احبيبي مغاااتعشاش دابا ..ولكن كلس جات لاصلاد زوينة ...
لوؤي : لالا مافياش غا بصحة ( حط ضوسي زرق حدا عدنان ) ها المطالب ديالك ...و فضوووسي كاااع اسيدي ماشي فواتساب ههه غايبقى لينا على خاطرك .. ماطلقوووني تالدابا بناقص كااااع كون حطيتها ليك فلباب ومشيت ..
عدنان : ( مسح يديه وحل ضوسي كايشوف) وصلتي معاهم بعدا لشي حل ؟؟؟
لوؤي : منقدرش نعطي حل ونا معارفش سيولة دالشركة واش تقد توصل ليهم صالير لي كايطلبو ... ولكن حاولت نرجعهم للخدمة بالتي هي احسن .... علما دير اجتماع مع رئيس النقابة ديالهم راه هو لي محيح تما ...
عدنان : وااا كلس مالك واقف ...
لوؤي : ( كايماصي ورا عنقو ) لا عيااان ..... غانطلع ندوش وننعس ( كايلوح شوفة شوية بشوية للقدس ) ....
رتاج : كلس تعشى بعدااا ... تنعس دابا ؟ ( هزات سعتها لي فمعصمها كاتشوف ) يلاه تسعود ونص هادي ...
لوؤي : والنعاااس مكايختارش الوقت ... ( شاف للطبلة وشاف للمدبرة ) بااراكا عليييهم راه سالاو غااا جمعي .... باركا ....
رتاج : اويييلي على غا جمعي ... بااااقين كنتعشاااو سير اخويا لاباغي تنعس حنا مالنا ....انا وقدس مزااااال غانديرو فيلم ...
لوؤي : قدس قالت ليا قبيلة غدا عندها لي شوفمون ( شاف فيها وهي وسعات عينيها فيه ) بكري ... مع ستة دصباح ... ( شاف فيها وهي غاكتشوف ضهشرها ) عندك لي شوفموون ولا لا ؟؟؟
رتاج : بصااح ابنتي ؟
قدس : ( ماعرفات ماتقول غا كترمش) اا . اااه .. اه .. عندي بكري ...
رتاج : اوا لا .. لاكنتي غاتفيقي بكري مانشدكش ....
لوؤي : ( قطف واحد العنبة من ديسير لاحها ففمو طالع ) تصببحوووو على خير ....نعسو بكري تفيييقو اونفووورم .. القصااارة غااكتمرض ( ضار شاف فانس ) نتا براااسك غدا داخل بكري طلع تنعس ...
انس : ( كايمسح فمو ) غاانطلع دابا ...ولكن باقي ليا واحد تمرين ... تخدميه معايا اقدس ؟
لوؤي : جيبو نخدمو معاك انا ودوز تنعس .. غاندوش واجي عندي نخدموه ...
رتاج : يااااااربي وفين ماااات شي حمار لوؤي ديالي غااايخدم تمااارن مع خوووه ....
لوؤي : قليل ماخدمت معاه ؟؟؟؟؟ عليييها تايقولك الواليد راك كتاكلي وكاتنسااااي ... مافيكمش الخييير ...نووضو تنعسو باركا عليييكم
خلاهم وطلع وعدنان ضاير براسو متبعو جاتو عجب ماقصرش معاهم واخا كاينة قدس وبدا يطفى فيه داك الامل لي كان نواه من جيهتو بلي معجب بها ... وزاد تاني ترون كتر ملي كايلقى راسو مكيفهمش عقليتو وشنو ناوي عليه .... واش غايفكر يستقر شي نهار مع شي وحدة ويخدم ولا غايبقى ديما هاكا غامض مصيرو ....
قدس بقات غاكتشوف تاهي باستغراب كيفاش انسحب دغيا بلا مايكلس معاهم شوية وهي من قبيلة وهي تسناه !!! فللخر حطات معلقتها ورجعات لور .... وعدنان كايقطع ديسير لانس و رتاج مسحات يديها وبدات تكتب مسج لكوتش ديال قدس كتسولها واش غدا عندها ليشوفمون بصح !....
كملو عشاهم فهدوء و رتاج طلعات مع قدس لبيتها وانس هز كتوباتو ومشى عند لوؤي ..... اما عدنان دخل لبيت قدس دق وحل لباب طل عليهم ...
عدنان : وااانعسي ابنتي لاكنتي غاتفيقي بكري منشدوكش .... ملي تسالي ليشوفمون اجي عندنا تايجيو خوتك ودوزو كاملين تعشاو معانا
قدس : (بابتسامة ) دااكوغ اعمي واخا منعرف فالعشا مانواعدكش ، حيت قسم كاتجي عيانة ، الى ماجيناش غدا نجيو بعد غدا ....
عدنان : واخا ابنتي ... هاف آكود نايت
مشا وخلاهم وهي كاتشوف فررتاج لي كاتفريفي ليها الفوطات ...
رتاج : صافي بدلوهم ..عند بالي نساوهم ....
قدس : لا لا كولشي هو هاداك ...
رتاج : ( تنهدات وكلسات على السرير ) قدس .... اجي ابنتي كلسي حدايا شوية ... اجي....
شافت قدس فرتاج مخلوعة وقلبها دغيا ضرب بجهد من شنو غاتقول ليها ولي باااااين الموضوع شنو غايكون ... وهي تسرط ريقها ومشاات بشوية وجلسات حداها كتحاول تجمع دغيا الاجوبة لي تعطيها في حالة ماجبدات ليها موضوع لوؤي ... واخا متأكدة هو علاش غاتهضر ليها ... قلبها كايضرب والحشمة تملكاتها....
قدس : ا ... هانا اخالتي ! ياك لاباس ؟ و ولكن ( كتحاول تتهرب ) ف فيا نعاس ... تالغدا ون( قاطعاتها)
رتاج : مغااانطولش ... ( قدس سكتات و نزلات راسها ورتاج تبسمات و قربات عندها كتمشط ليها شعرها بيديها لور ) غير بغيت نهضر شوية انا وياااك .... بنية وخالتها ... ( بابتسامة ) ولا صاحبتها .. ولا ماماها ..... مهم نهضرو شوية قبل ماتنعسي ...
قدس : ( غي ركترمش وخيفانة )ا اهاه .. نهضرو. ...
رتاج : ( قادات جلستها على السرير وتنهدات كاتشوف فيها ومدات يديها كادوزها على وجهها ) غزالة ديالي ... فخبارك ملي كنتي صغيرة كنتي كتعيطي ليا انا ماما ! اول مرة غاتقولي ماما .. قلتييها ليا انا ماااشي لماماك ... مكنبغيش نقولها ليك باش داك المغيارة دماماك مااااتاكلنييييش هههه
قدس : ( علات حجبانها ) بصاااح؟؟؟؟؟ ( جاتها ضحكة ) علاش !
رتاج : ماماك داك الساعة فاش بديتي شوية تگلسي وتهضري داك الهضرة البرطقيزية ديالك ههه مكانتش هنا .. كانو ففرانسا مع جود ... كلستي معاياا شي ست شهور هاكاك... انا كنت شديت كونجي وكلست نربي فيك نتي وفيصل حيت كان يلاه تزاد ليا تاهو .... كنتي باقاااا صغيورة وماماك فطماتك بكري حيت مكانتش كاتقدر تكون معاك ديما ترضعك .... ( قدس كاتشوف فيها ) وانا كنت كنرضع فيصل .. وحيت نتي كنتي باقا مشبعتيش حليب ماماك كنت فوق مانهزك لصدري نبغي نعسك كاتخشاي فيا وكتبغي ترضعي مني ... ( قدس دمعو عينيها ) ولكن واخا هاكاك مكنتش كنبغي ... كان كايجي عندي عدنان كايقول ليا نرضعك ملي كايشوفك مخرجة لسانك وكاترضعي فيديك كاتبقاي فيه .... كانقوليه لااا .. كانقوليه كانخاف فيصل يكبر وتعجبو قدس ونحرمها عليه ههه ( قدس جاتها الضحكة وعينيها لامعين ) هههه انا عمرني آمنت بداك فارق العمر وهو مكااانش صغير عليك بزااف هههه راه بيناتكم غير ربع شهور هههه .... فاش كنتو كاتلعبو بجوج وكبرتي نت وياه .... كنت كانقول هادو باينة كايكونوو قراااب ملي يكبرو .. ولكن ماحدك كاتكبري كتر .... ماحدك كتولي مراهقة كتر .. و ماحدك كاتقربي للوؤي كتر لي مجاش كااااع فباالي .... وماشي فيصل ! .. خصوصا ملي رجع للمغرب ... لاحظتكم شحال تقربتو ....( قدس شافت للارض كتغزز فشفايفها ) ماااما هضري مع داك البنت تجمع راسها .. ماما قووليلها تلبس حوااايجها .... ماما راه غانضرربها .. ماما راه كتتتعصبني .. ماما عيطي لعمي اسد يباتو معانا ، مكنتش كانفهمو فللول ....كنت كانقول هدا يمكن غير حيت هو وجود صحاب ولا حيت قريب لعمو اسد كتر من باباه ... ملي كان كايقول ليا ماما ....كان كااايشاورني ...اما ملي ولا كايقول ليا الوالدة ... مااااابقاش كايشاورني ولا كااايدير شرع يديه .... تالنهار لي كترو الشكوك .... وجاني مللخر .... ( قدس علات عينيها فيها حشمانة ) الوالدة ... انا باغيها ... ( تبسمات رتاج ) عرفتي شحال عجبني الحال ! هي اه بصاح تعصبت حيت خفت عليكم ... نتي باقا صغيرة .... وخفت يكون قرب ليك ولا تبسل عليك ..فنفس الوقت فرحت ... عادي ...كأي ام عندها ولد بدا يكبر .. خصوصا انا لي متعقلة بولادي بزاف .. كنت كنخاف من شكون غاتديه ليا .... واش شي وحدة لي غاتبعدو عليا ... شي وحدة لي مغاتسعدوش .... ولكن ملي شفتو بغا قدس ... بنتي .... بنتي لي قالت ليا ماما قبل ماتقولها لماماها فررررحت بزاف ( قدس حسات بقلبها ضياق ملي الامر بدا كايبان ليها رسمي ) فرحت حتى ملي كانشوفو شحال متشبت بيك وشحال فرحان معاك.... ( تنهدات ) ولكن لي بغيت نعرف دابا .... هو نت ... نت واش باغاه ! واش حتى نتي فرحانة معاه .... بغيت نعرف واش هادشي جامعكم بجوج ولا غير ولدي بوحدو ؟؟؟ ( قدس تلفات بقات غير كاتشوف ) واش نتي باغاه كيفما هو بااغيك ولا مقجر عليك لا شنو ؟ ( شدات ليها يديها ) قدس ...أنا بغيتك ابنتي دابا تهضري معايا بحالا كادوي مع صاحبتك ...ولا ماماك ... ماشي ماماه هو ....باش قلبي يرتاح عليكم ونعرف اش واقع ؟ ( قلبات ليها وجهها لعندها ) واش بيناتكم شي حاجة ابنتي ؟
قدس : ( سرطات ريقها كاتشوف فيها هي لي كاتسنى منها جواب وتنهدات ) ا .. م ماعرفاش اش غانقوليك اخالتي ....و ...ولكن ...( قاطعاتها )
رتاج : جيني حتى نتي مللخر كيفما جاني هو .... بغيت غير نعرف واش آه ولا لا .... واش بيناتكم شي حاجة ....ولا لا !
قدس نزلات عينيها كاتغزز فشفايفها وتفرك بصبعانها فحوايجها متوترة وقلبها كايضرب بجهد تامن ودنيها حسات بيهم سخنو وحماااارو ... وهي كاتشوف بلي العلاقة لي خيفانة منها تولي رسمية غادا فداك طريق بلا متحس ... وهي تحرك راسها بالايحاب غير بشوية ورتاج تبسمات ...
رتاج : ونتي متأكدة من قراراك ؟ ولا باقين كاتعرفو ؟
قدس : ( علات فيها عينيها ) ماعرفتش اخالتو رتاج والله ... ماميكنش نقول ليك كانتعرفو حيت حنا ولاد العم ...و كانعرفو بعضياتنا مزيان ... ولكن انا .... خيفانة بزاف .... خيفانة من المسؤولية ومن الزواج ....انا مابغاش نتزوج دابا ....
رتاج : نتي ابنتي اصلا ماشي ديال الزواج دابا .. نتي باقا خصك تركزي فقرايتك وتبني مستقبلك .... 19 عام ابنتي راك باقا صغييييرة .... ولكن قدر الله ماشاء فعل هادشي جا دابا ومغانكلسش دابا نلوم فيكم حيت لي وقع وقع ... هاد العلاقة خاصها تترسم يين الوالدين ... باش منلقاوش مشكل منبعد ... فاهماني ابنتي ياك !
قدس : ( علات راسها بزربة مخلوعة من هاد الفكرة ) كنضن مكاين لاش اخالتو والله .... لوؤي الى درنا خطبة غير مغايزيد يعقد الحياة عليا كتر .. دابا قااادرة نتحكم فيه حيت باقيا تحت رعاية بابا ... لاخدا عليا شي مسؤوولية والله حتى يكرهني فعيشتي راني كنعرفو .... اصلا انا كنت ضد هادشي كامل ..
رتاج : مافهمتش !
قدس : ( كترد شعرها لور وتتنهد ) والله ماعرفت كيفاش نشرح ليك ... ولا حتى منين نبدا ليك ... ( شافت قدامها فالعدم كتحاول توضح الاومور باش مايتاخدوش شي خطوة فعلاقتهم غالطة) لوؤي كان هو داك ولد عمي لي محرر عليا العيشة .... مراقبني بزاف حاضيني فالداخلة والخارجة وراك عارفة كولشي شحال كان كايبرزطني .. ولكن ...فهاد الصيف للخر ... بديت كنشوفو بطريقة اخرى .... ماعرفتش علاش غير تغيرات نظرتي ليه تغير معاها حتى اش كنحس ... وليت مخربقة غي مع راسي ... مكنعرفش نحدد شنو كنحس من جيهتو ... تالواحد الليلة قسم بحالا حلات ليا شوية عيني بواحد الهضرة مزال لدابا مانسيتهاش .. وهي واش نقدر نشوفو مع وحدة اخرى ! ماااقدتيييش نتخيلها اخالتي ( رتاج تبسمات ) فشكل .. حسيت بقلبي تقبط ... بحالا بغيتي تقولي داك لوؤي لي حاضيني غير انا غايمشي يتلاها عليا مع وحدة اخرى ! غاتبقى حياتي خاوية ومغااانبغيش اصلا نشوفو مع وحدة اخرى حيت بحالا وليت كنحس بيه شي حاجة كتخصني انا .... ( شافت فرتاح لي مبتسمة فيها خيت عارفة مزيان هاد المشاعر اش كايعنيو ) ديالي انا .... واخا حكامو مكنحملوش .... واخا كايعصبني فعقليتو تاهو لي مسدودة كتر من بابا وخويا ....ولكن واحد نهار خليتها فيد الله وقلت نتبع قلبي وتبعتو ... ( شافت فرتاج وعينيها دمعانين ) ولقيت راسي فرحااانة بزاف معاه ....( شدات فيديها مزيراهم ودمعة نزلات ) خالتو رتاج ... نتي عارفة كولشي .. عارفة كيفاش كبرت انا ووسيم ... عارفة بلي مرض خويا بعد واليدينا بزاف علينا فداك المرحلة لي كنا محتاجين الاهتمام .. واخا مكانش لخاطرهم ... واخا عطاونا حناانهم كامل مكانش كافي حيت كنا صافي كبرنا .... ولينا مراهقين ... يعني وحدة فبلاصتي تلقى اهتمام بحال هاداك غايجيها فشكل !!!! .... راه مايمكنش تتخيلي اخالتي داك الاحساس لي كايجيني ! بحالا كايرد ليا طفولتي ....ماعرفاش كيفاش نفهمك والله ....
رتاج : فهمتك احبيبتي فهمتك ...ولكن لي مافهمتش هو مادامك فرحانة معاه ....مناش خيفانة؟
قدس : راه قلت ليك ..العيشة معاه راه صعيبة راه ولدك مغانوريش ليك فيه ... نتي عارفة طبعو كيداير وانا هادشي ملييييتو ...مليتو مع جود ومع بابا .... كانشوف راسي مزال باغا نعيش شوية مزال ... على لاقل تانوصل للعمر لي تزوجتو فيه نتوما ولا ماما .... عاد نفكر فعلاقة رسمية ... دابا لا ...خيفانة نزيد نكبر شوية نتبدلو ليا افكاري ....خيييفانة من علاقة جدية بلااا قيااااس اخالتي .. حيت انا ماشي هي لي غاتبغي تتزوح وففلخر تتطلق خصوصا انه ولد عمي .. علاش انا ندير العداوة فالعائلة لي بابا وعمامي كايجمعو فيها بريق الناشف !!!
رتاج : ( تنهدات ) واخا .. واخا فهمتك واخا هادشي كامل لي كاتقولي مامنوش ... ولاكن انا مغانهضرش على هادشي دابا حيت مشى لحال .... لحاجة الوحيدة لي غانقول هي نتائج هاد العلاقة دابا مدام دخلتو فيها اذن غاتكونو عارفينها نتي وياه وشفتو اش دوز جود وبيلسان ... وعااارفييين مزيان العاقبة دهادشي ... دونك تحملو مسؤووليتو انا ماشي شغلي ... ولكن ... بغيت نوضح شي حاجات باش تعرفيهم حتى نت في حالة ما لابقات هاد العلاقة هاكا فالسر وماراضينش عليها الوالدين .....
قدس : اودي شكون باقي ماعرفش ، اشمن سر بقا ... بابا عارف ...وغالبا غايكون قالها تا لماما .. نت. .. قسم ..شكون بقى ! هه
رتاج : اوا گوليها لراسك ... ولكن ماااعليش .... نتي عااارفاك خيفانة من خطبة رسمية والخاتم وكولشي ييعرف مغاتلقايش داك ساع كيفاش تفارقي عليه لاقجر عليك ولا تبدلات عقيلتك منها للقدام واخا انا متأكدة من هادشي هضرة خاوية ولكن غادية معاك فعقليتك نتي .... ولكن خليني نشرح ليك شي حاجات يمكن نتي وياه معارفينهمش ... ( قدس كاتشوف فيها ) نتي عارفة علاقة عدنان ولوؤي ياك ابنتي ! عارفة المشاكل لي بيناتهم !!!
قدس : اه ..... علاش !
رتاج : عدنان مؤخرا .... فكرة وحدة لي كاضور ليه فدماغو ....هي باغي يزوجو (قدس وسعات عينيها فيها ) كل ليلة كايجبد ليا هاد الموضوع .... وانا حيت عارفة ولدي حاط عينيه عليك .... قلت ليه بلي قدس كاينة بلا مايفكر فبنت اخرى ( قدس شدات على فمها ) بلا ماتشوفي فيا هاكاك .... لي كان راه قلتو ... حسن مايجيب ليا وحدة اخرى لولدي .... الواحد ملي كايتضغط مكايخبيش .....
قدس: اوييييلي شكون بقى !!!! شكييب!! وشنو قال عمي عدنان ؟؟؟ وييييلي قين غانحط وجهي دابا
رتاج : اكييد فرح .... ولكن راه لاحس بشووووية دالشك من جييهتك راه مغايقبلش ليه .... وغايجيب وحدة اخرى ... حيت عدنان دار ابنتي معاه جميع الحلول باش يخليه يستقر فشي خدمة ولكن هو مابغاش وماباغيش حتى يناقش معانا مستقبلو ... منهار كانو كايضاربو على قرايتو فاش خدا لباك وماخلاهش يدير توجيه لي بغا هو وهوما فالمشاكيل وزاد كمل فاش ماخداش الماستر ديالو ومابغا يكمل فحتى حاجة من تما والمشاكيل غير مكايكترو بيناتهم ....ديما مساااافر ( قدس قلبها بدا يضرب ) ديما مكاينش ...وعمك عدنان راك عارفاه ابنتي مكيحملش يخرجو ليه ولادو من يديه ... فكرة الزواج كاضور ليه يزااااف فدماغو بزااااف وكايشوفها هي الحل لي بقى ليه .. عيييت نهضر نحيدها من راسو ... مكايسمعش ليا. .. باغي يزوجو هاد العام قبل من غدا .... يعني لاكنتي ابنتي مابغاش تزوجي هاد العام ولا لعام الجاي .. ولا على لااقل دييري خطبة نسكتوه بيها .... راه مستحيييييل يخليه بلا زواج ..راه غايقوليه بنت عمك ماباغاش تتزوج دابا ... بعد منها
قدس : ااء !! ( خربقاتها ) و ولكن ....ولكن لوؤي راه مغاييبغيش !!!!!
رتاج : انا وياك ابنتي عااااارفين مزياااان نقطة ضعف لوؤي شنو هي ..والى مشا تا استغلها عدنان فهادشي ....راه لوؤي مغايعقل لا على راسو لا عليك
قدس: ( نزلات راسها وتنهدات ) اممم ... مرضو ....
رتاج : هاداك راجلي ونا حافضاه الى مشى تاااااادار ليه شي موتة حماااار وللله حتى غايصبخ عند العدول بلا مايفكر ... ونا مابغاش نوصلو لهادشي .. هو مهووس بلوؤي يستقر غايصدق جايب ليا شي خطية من بنات صحابو ....راااه بات جنان غااكايضور بيه
قدس: ( علات عينيها بزربة ) كيييفاش بات جنان ؟؟؟؟ اويلي !!!!
رتاج : انا كانقول ليك لي كاين باش تحلي عينيك ... انا اصلا مغانقبلش ولكن شحال قدني نرفض !
قدس : مافهمتش اش دخل بات جنان !!
رتاج : باغي يزوج بنتو داك عاليا لواحد من ولادنا قالك وقال ليونس يهضر ليه مع عدنان على ود لوؤي ....
قدس : اوييييلي !!!!! (بنرفزة) اوا يعطييييها للاياااد ... ياك خوه دااي ختها ... اش جابو لؤؤي ؟
رتاج : ( جاتها الضحكة ) هههه .. اوووودي ابنتي راه هو لي خصو يخاف ماشي نت
قدس : وادابا كندوي دبصح اخالتي علاش كضحكي ... اش جابو لعندنا هدا تاني ...
رتاج : ماااعرفتش ... بغاها يمكن تستقر فالمغرب .. اصلا جنان فالعيد قالت لينا ختها غادخل للمغرب تقابل الخدمة لاريج ....
قدس : ( شدات راسها ) وااااحنا مااالنا .. تخدم ولا تكلس اش قربها لينا ... بقى ليها غا لوؤي ؟؟؟؟ زايدووون هاديك ماشي دوق لوؤي .... ( قربات عندها ) لوؤي قلتوها ليه ؟؟؟ اش قال
رتاج : وفنظرك ؟؟؟؟
قدس: ( تنهدات ) دابا شنو دابا شنووو !!!!!
رتاج : اصلا مكايناش غا عاليا ... عطاهم الله .. عاليا مغايبغيهاش لوؤي وتا عدنان مغايبغيهاش وانا لي غاندير عليها موتة حمار .... ولكن تقدر تجي وحدة اخرى لي يلسق لينا فيها عدنان .... راه لاشافو نغادي يستقر مع تاوحدة وماعندو تاااوحدة غااايجيبها ليه ... راه هدا هو الحل لي بقى ليه معاااه ...
قدس : ( علات عينيها فيه دمعانين ونزلات شفايفها كيف شي طفلة غايحيدو ليها حلوتها ) ولكن اخااالتوو زعما هو عارفو باغييييني علااش غايجيب ليه وحدة اخرى مافهمتش !!!
رتاج : واخا باغيك ابنتي ... الى عرف بلي نتي ماباغاش الزواج بيه .ظ. مغايبززش عليك ومغاايخليهش يقجر مزال عليييك ... راه لاهاداك ولدو ...حتى نت راه بنتو ... يعني ابنتي لابغيتو تكملو مع بعضياتكم .... ضروري على الاقل خطبة رسمية .... منغير هاكاك ... عدنان غايضغط عليكم ولوؤي غايبقى بين المطرقة والسندان.... ونا كانقول ليك هادشي حيت تانا بحااالو ... باغاك نتي لي دخلي على عائلتي ولكن عدنان راه مغانزيدوش فوق كلمتو لاقرر شي قرار ...
قدس : ( ضرباتها لكتافها ) ووتاااانت اخالتي شحااال مرخية ... بابا كايقول لينا هضرة فالعشا كايطلع هو وياها ، الصبااح كاينزل مبببدلها و دار هضرتها .... سيري عند ماما توريك كيفاش كاااادير والله مكاااايزيد حداها ....
رتاج : ( بدات كضحك ) ههههههه.... ابنتي كون كان باباك مريض و قلبو خدام غا بالحجرة .. كوراه ماماك تاهي بحالي كتقلب غا على الساهلة معاه .... ( قدس نزلات عينيها ) ضحكتني الله يعطيك شي خير هههه ... اوا احبيبتي ملي باغاه .... مالك عليها ؟ ديرو خطبة وهنيونا حسن مايجيب ليا شي عوجة ....
قدس : ففففف ( كترد فشعرها لور ) نااااري حسيت بصهدة دابا ... درتي فيا الڤيس ... دابا عرفتي فاش حطيتني ! ايييما يضغطني عمي عدنان بوحدة اخرى ... انا يضغطني لوؤي بالخاتم وحكامو لي مغايساليش ولي غانزيدو على حكام بابا وجود ....
رتاج : اوا هادشي لي عطى الله ... نتي لي بغيتيه ...اما كون مشيتي عند شي واحد كوول يخليك تعيشي حياتك ، بعدا وحدة فينا تطلع متحررة شوية ... اجي تزيدي تزمتي كتر منا حنا ...
قدس : اودي هادشي واش كنختارو فيه ( تخشات فصدرها ورتاج عنقاتها ) ولكن دبصح اخالتو .... زعما كون نت ولا ماما و لا كلكم ديتو رجال اخرين من غير عمامي .. وكانو كووول بحال لوخرين لي كنشوفو ... ومكايقولو ليكم والو لا على لباسكم لا فين خرجتو لا فين دخلتو ... مغايجيكمش الملل !!!
رتاج : ههههه وهي صراحة مكنتش غانبغي .. حيت غاتحسي بحالا مكايغيرش عليك ههه ولكن تاني راهم زايدين شوية فيه ... بنادم يكون بين وبين
قدس : سي تانا داكشي لي بغيت ... لواحد يدير الثقة وهادشي زعما لي كنحاول نروضو عليه عااااد نشوف شي حاجة رسمية .... اما لادرنا الخاتم دابا .... صاافي غاانودع حياتي .. خصني لابغيت نمشي غا لكلوب مع صحاباتي يبغي ليا بابا وببغي ليا هو .. عاااد شوف تشوووف ... منقدش تانضحك فخاطري فالزمتة ناااااري غانكره حيااااتي
رتاج : اوا دابا شغانقوليك ...شغلكم هاداك انا لي عندي قلتو ليك ... ونت من حقك تختاري لي بغيتيه ، بغيتي لوؤي هاهو ... بغيتي حياتك ...ودعي لوؤي ساااهلة ...
قدس : ( ضارت عندها براسها ) والله لاااااااكان لشي بنت المراااا
رتاج : ( ضحكاتها وعناقتها كتدغدغ فيها وقدس كضحك ) هااااانا على سليييعفااانة كبراااات هااااانا ..... هاانا على يلاه لباااارح كتطلع على الكرسي تسرق الشكلاط من البيفيه هههههه وهاااكاك كوووني مرااا وشدي فيه قبل ماتلقاي بدك والريح وندبو انا وياك داك ساع لاداتو لينا شي وحدة
قدس : ( قادات الجلسة ) دابا نهضر معاه ونقوليه يبين لباباه بلي غايخدم ويستقر باش مايضطرش بزوجو .. اما باش ندخلو انا وياه فشي علاقة رسمية باقا صعيييية شوية عليا اخالتو ....
رتاج: (تنهدات وناضت ) والموهيم .. نتي تعرفي القرار ، ديالك ابنتي ....يلاااه نعسي دابا رتاحي ....تاتفكري فهضرتي بشوية عليييك ... وغدا فصباح غانديك انا ليشوفمون ونفطرو اونسومبل ( قدس علات عينيها فيها بزربة ) وحتى الى مكانوش عندك ليشووفمون ... ندوزو لسپا .... مهم نوريه بلي الجامع لي قرا فيه ....ماماه لي بناتو ...
قدس : ا .. لا . را غير
رتاج : مادافعيش عليه ... هداك راه كانعرفو ملي كايكدب وكنعرفك تا نتي ملي كتوتري ... ( ماشية بجهة لباب ) تصبحي على خير .... هضرتنا باقا طويلة ولكن عمك غايدخلو الشك علاش كنهضرو انا وياك فهاد الليل .... تالغدا فالفطور ونهضرو كتر ابنتي وقولي ليا شنو قررتي .... (حلات لباب وضارت عندها ) نعسي مزيااان ....
ابتسمات ليها وسدات لباب ومشات ... اما قدس بقات غي كاالسة فبلاصتها كتحاول تستوعب اش قالت ليها دابا !!! وعلاقتهم لاشمن درجة وصلات فالجدية ديالها !!!!! كولشي ساق لخبار !!!! عدنان باغي يزوج لؤي ؟ بات عاليا كايحوم عليه !!! حسات بصدرها ضيااااق ...
ناضت كتمشي وتجي وااسخانة طالعة معاها بالتوتر .... قلبها كايضرب بجهد وهضرة رتاج كتعاود فودنيها ..... كيفاش غادي يزوجوه !!!!! ولوؤي زعما مغاديش يقاوم ! مغاديش يلقا حل !!! مغاديش يعاود ليه على خدمتو ويهني بالو باش مايزوجوش !!!! ....يضحي بيها على قبل خدمتو ؟
الافكار كايدويها من جهة ويحطوها فجهة .... غير كتمشي وتجي فبلاصتها تا من الضو دبيتها طفاتو باش مايبانش من البالكون باقي مشعول ... النعاس طار عليها مقداتش كاع تغمض عينيها تنعس .... غير كاتغزز فضفارها وتفكر فشي حل اخر من غير الزواج والخطبة الرسمية تاولات تفكر تتفارق عليه كاع !!!! ....
يلاه غادا جهة تيليفون تصوني عليه تشوفو وااش نعس يناقشو هادشي .... وهي تسمع لباب تحلات وضارت بزززربة يلاه غاتهضر كان دار صبعو على فمو .....
لوؤي : ششسششش ...
بقات غير كاترمش وهو ضار موراه ورجع دخل لعندها ... هز الفيست ددجين ديالها لي كانت محطوطة ...حطها ليها فوق كتفها وجرها من يديها ....
قدس : ( بالحس ) اش كاااادييير ؟؟؟؟
لوؤي: شششش ... سكتي وتبعيييني
قدس : ( بالحس ) طططلق .... فييين غاااديين !!!!
لوؤي : ( ضار عندها ) تقدري تسسكتي ؟
قدس : ( بالحس ) خالتو رتاج راه عاقت بينا كدبنا على فبلان ليشوفمون ..واش باغي تفضحناا ؟؟؟؟؟؟
لوؤي مكايسمعاش غير جارها من يديها ..كان لابس حوايجو وهاز جاكيتو فييديه ... طل على الكولوار مكان حد هو يخرجها داير ليها يديه على فمها بحال شي مخطوفة ....
بقات غي تابعاه خيفانة تتحشم ...كانت الدار مضلمة غير اضواء خافتين لي شاعلين ... نزلو فالدروج بشوية ومشاو بجهة لبوابة لكبيرة وبدا كايحاول يحلها بشوية ...
قدس : ( بالحس ) راااه تقدر ترجع لبيتي ماتلقانيش
لوؤي : ششششش
حل لباب وجرها وهي تابعاه موكلة امرها الله عاد تنهد ومشى بزربة خارج فجردة جارها موراه تاوصل للجيب ديالو ....حل ليها لباب وهي نترات يديها منو ...
قدس : نتا رااك حمااااقيتي فخبارك ...مغانمشي تالشي بلاصة فهاد اللليل واش تسيطيتي ؟؟؟؟
لوؤي : طلللعي قبل مانفيقهم كاملين وراك عارفاني غانديرها ...... طلعي
قدس : حتى تقول ليا فين غانمشيو !!
لوؤي : لواحد بلاصة نقدر نكلس فيها شوية معاك فخاطري .... يلاه !..
قدس تنهدات ملي لقاتها يمكن تكون فرصة تناقش معاه تالموضوع ... ومشات دايرها فيد الله .... ركبات وتاهو ركب وديمارا راجع مارشاريار يخرج .... تاحلو ليه لبوابة وخرج من الفيلا عاد تنفس فخااااطروووو .....
اما رتاج واقفة فالبالكون كتنهد عليهم .... وجرات كرسي وكلسات دايرة رجل على رجل ومعنقة عندها واحد الشال على كتافها من البرد .... كان اسد لي كايشد العسة فالبالكونات خدا كونجي يرتاح .... وجات هي باش تاخد هاد المهمة تااااااني ......
عوجات راسها للسريير كان عدنان ناعس وهي تتنهد وهزات كتابها تتقراه تلاها فيه على مايجييو عاد يديها النعاس ...وهي غير كاتفكر فين غايكون دايها تاني وكاتمناهم يديرو عقلهم ومايديروش شي حاجة يندمو عليها ..
رتاج : نعس اعدناااان نعس .... نعس نتا لي جات معاك .... خليني غير انا نشوف هاد الجيل اش باغي يدير .....ولكن ..راه بيا ولا بيه .......
فالباطو ....
جالس على الكرسي فالبالكون ....طالق رجليه ومعلي راسو للفوق ... سروال دجين كحل وسمطة جلدية .. صدرو كان عاري و شوميز كحلة محلولة عليه ... طبلة عليها طفاية مطفي فيها كارو ولاخور فيدو بين صبعانو ... علاه بهدوء للفمو سف منو ... ونفت الدخااان مخلي غمامة فوق منو ...راسو كايحس بيه كايزدح واخا يكمي تالصباح مايبردش ... معارفاش كيغادير يبرد قلبو ويبدل من راسو باش يولف حياتها!!! كيغادير يولف هادشي ؟ .... لي واضح مغايكونش المرة الاولى منغير لاقسم انقطعات بالمرة على اعمال باباها....
غمض عينو مزير عليهم وناض تگاد فالكلسة ....سف آخر ماتبقى من الكارو ديالو وطفاه حدا خوه ... وناض بعكز باقي بالحفة ... كيحس براسو الحياة مقسومة ليه على جوج .. جهة فيها كاع الحوايج لي محاملهومش وجهة فيها قسم .... خصو يوازن بيناتهم باي طريقة لابغا تكمل هاد العلاقة .... لي تلاقاو فيها جوج أقطاب بعاااااد على بعضياتهم ...
بلا تفكير بزاف لقا راسو ماعندوش شي حاجة اخرى يديرها من غير يكون معاها فهاد العشا... لقا راسو مستحيل يديه النعاس وهو عارفها بداك اللباس معاهم !! ...مدام مزال مقادرش يبدل ليها ستيلها ولكن قادر يكون حداها في حالة ما حس بشي تحرش !!
وقف قدام المراية وبدا يسد صدايف الشوميز ديالو ... جامع حجبااانوو مخنزرهم مشكلين تجاعيد فجبهتو و وجهو باين فيه شحال ساخط ....سد شوميز و علا ليها كمامها طواهم تالدراعانو معري على معاصمو المعرقين .... وهز ساعتو لبسها و مشى بجهة تيليفونو لقاه تشارجا .. وكلس على جنب السرير كايرد شعرو لور بيديه وكتب ليها مسج ورجع لاحو فوق سرير .....
........
عند قسم ....
واقفة قدام مراية طويلة ....والسيدة باقا كتقاد ليها لي بوكل ديال شعرها من للور .. وهي كتعلي فداك الطوب على صدرها باش متجيش معيقة ...وضارت عند الستيليست لي كانت كااتقاد ليها اليد دكوستيم وصدافها ...
قسم : ماتقديش تعلي شوية سماطي ! جاني بحالا نازل بزاف لا !
الستيليست : اهاه ...ماشي مشكل ...
حيدات قسم لفيست و الستيسليت جبدات الايباري لي عندها معليقين فبونجة فيديها .. بدات كتقادهم ليهاا وعلات الطوپ على صدرها ... عاد لبسات الفيست ... وهوما بداو يجمعو ماتريالهم و صفاء كتمشي وتجي وتهضر فالتيليفوون وتقاد مواعيدها ... غير شافتهم ماااشين وصلات معاهم للباب ومشاو وقسم غيير كااتشوف مع راسها وتاهي وجهها باين شحال طاااافي ومحاملش الوضع وغادا غيير بزز تلبي الواجب ....
صفاء : ( كاتشوف للساعة ) كنضن هدا هو الوقت امادموزيل ... قالو ليا بلي تأنسطالاو وراهم كولهم كايتسناوك ....غايكون من العيب نخليوهم يتسناو مزال. ..
قسم : داكوغ ( ضارت ماشية بجهة تيليفونها ) لقاي ليا شي سبة لي تنوضني من حداهم فربع ساااعة ....
صفاء : ( علات حاجبها ) كيييغاندير ليك انا؟؟؟؟؟؟ اشمن سبة !!! واااش ضرووري ؟؟؟؟
قسم : ( كاتقرا فالمييساج ديالو والابتسامة تشكلات على فمها مبدلة ليها سيفتها كاااملة وهو كايقول ليها باش متنزلش بلا بيه وشافت فصفاء ) ماشي ضروووري ....مااااااشي ضروووري
خدات تنهيدة قوية كأنه جميع مشااااكل حيااااتها تحلو وقادات الوقفة مبتسمة بفرحة .....
صفاء بقات غير كاترمش فيها باستغراب وهي ماشية جهة صباطها كاتلبسو وهي متبعاها مستغربة !! هادي كيفاش دغيا قدرات تضحك تاني!!!! ياك يلاه كانت مغوبشة !! ...
كان اصيل من اكثر الناس لي كايعرف يبدل ليها مزاجها فنفس الدقيقة .... من قبيلة وهي هازة ليهم الهم كيفاش غايصلحو هاد المشكل تاني و كيفاش غاتمشي تتلاقى دوك الناس وهي ماحملاهش وكتفكر فيه علاش معكس معاها قد هاكا ومكيبغيش يتنازل شوية فهاد الموضوع .... تاجا هاداك الميساج منو .... لي ردو فيها الروح !!
لبسات صباطها لي كان دومي طالون ... وهزات تيليفونها ودارت اخر رشة بارفان وخرجات من الجناح وصفاء تابعاها كاتجري .. كانو خطوات قسم كبار و اشبه بخطوات العارضات نظرا لطولها ...
كاتمشى فالكولوار ولابتسامة مرسومة على شفتها مخلية حنوكها يتوردو و عينيها يلمعوو ... تاوصلات حدا جناحو يلاه غاتدق هو يحل ....كان خارج ، تاعلا عينو فيها و تبسمات ليه فرحانة لي غايمشي معاها .... شاف فصفاء ورجع شاف فيها كايطلعها ويهبطها و التخنزيرة باقا على وجهو ..
اصيل : نص ساعة اقسم ... فوق منها مغانزيدش ....
قسم : ( شدات فدراعو فرحانة ) متخااااافش ... غادي نزرب ليهم على العشا ....
علات عينيها كاتشوف معاه اش لابس .. عوجات شفتها لجنب كانت باينة مغايلبسش داك الكوستار ولكن تبسمات حيت حتى هاكا جا حسن .. وجا بشخصيتو هو ماشي شي واحد أخر ... صفاء علماتها قسم اش دير باش يزربو على لعشا ومشات باش توقف عليهم ... واصيل بعد ماشد لباب ضار عندها مخنزر وهي تبسمات ومشاات حداه وخشات يديها فدراعو ....
قسم : ( معلية راسها فيه ) مشييينا !!!
اصيل غير تنهد وزاد وهي فرحانة غير لي بغا يمشي معاها واخا عارفاه صعيب يضحك ليها دابا ولا يعجبو الحال ... ولكن شوية بشوية يمكن يعتاد ويولف !
وصلو لدروج وشدات فيديه طالعين لفين كاين المطعم لي غاتستقبلهم فيه .. كان مطعمهم لVIP ... عبارة على طاولات صغار رباعيين خاوين ... ولكن فالوسط كانو موجدين مأذبة بكراسي كتار وطاولة طويلة بناپ كرونة .....
كانو جالسين عليها ضيوفها كاملين ... على الرأس كان شريك باباها رشيد .. على يمينو ولدو و على شمالو مراتو .. حدا ولدو كانت جالسة بنتو وراجلها لي كان اشقر اسباني ... حدا مراتو كانت جالسة بنت ختو المراهقة و باباها الاسباني تاهو و ختو لي هي مديرة اعمالو فنفس الوقت ... كانو حاطين قدامهم بعض الحلويات للضيافة بينما جات قسم .... وهوما كل مرة يشوفو للباب واش تبان ليهم وكايتحسسو شوية من تعطالها ببعض النظرات فبعضياتهم ...
الشريك : ( شاف لساعتو ) تعطلات !
زوجة : ( كتنش على راسها بنشاشتها ) واش كاتسنى من برانسيس الاسماعيلي !!! تتسناك فلباب !
الابنة : المفروض هادشي لي خصو يكون !!!
الاخت : ششش ( شافت مع صفاء لي قريبة ليهم وتبسمات )
كلهم سكتو كاتنهدو ... كان رشيد رجل ستيني ، بنية جسمية متوسطة وطويييل .. وجهو فيه بعض للتجاعيد ، حليق لحية و شعرو أبيض ، نظارات طبية و كوستار رمادي ... ولدو على يمينو كان بنفس ملامحو .. فبداية الثلاثينية ..عضلي ووجهو حليق وشعرو اسود طويل بعض الشيء حد ورا ودنيه .... بكوستار ازرق .. ممشوط للوراء ومحزوم بلاستيك صغير ، ختو لي كالسة حداه ، فأوائل العشرينية ، كانت واخدة ملامح صهباء بحال ماماها .. نمش فوجهها وشعر برتقالي مطلوق للوراء ، رشيقة البنية شفايف رقاق و عينين كبار بنين و حاجبها طالع وغير كتنش على راسها والغرور فكل حركة من حركاتها .. بشوميز ڤيولي معقودة فالعنق وميني جيب كحل ... فجنبها زوجها لي كان عشريني تاهو ، طويل القامة وشعرو اشقر وعينيه خضرين .. لحية خفيفة ، كوستار بني وحلق فضي فودنو اليسرى ... من جهة الاخرى زوجة كانت فالخمسينات من عمرها ، غوب سوداء حد الصدر لي كان كولو منمش وبعض الترهلات دالسن ديالها ... كوليي ماسي فاخر فعنقها وشعرها الاصهب كان مجموع للوراء بتسريحة مرتبة معرية على اقراطها الماسين ... حمرة فشفايفها فرنسية وعينيها بنيين .... ملامحها كانو قراب لبنتها و حركاتها تاهي تقاااال و فيهم بعض التعالي .... فجنبها بنت مراهقة بلامح شقراء اسبانية ... طوپ بيضة مغطية غير صدرها و سروال دجين ... شعرها مضفور ضفيرات مطلوقين وباينة بحالا جاية بزز .. حداها باباها الاشقر الستيني ...ولي حداه مراتو ... لي كانت تاهي بغوب حمراء قصيرة بسماطي ذهبين ... شعرها اللسود المصبوغ كان تحت ودنيها اقراط باهضين والعقد كذالك.. تجاعيدها كايوحيو لنهاية الخمسينات ... ومكياجها كان كثيير خلا ملامحها مايبانوش خصوصا بالفييلر لي فشفايفها و عداساتها والبرسينغ لي فجنب نيفها ..... كانت عائلة من البعيد كتبان متكاملة .... ولكن لاقربتي وقريتي نظراتهم كاتقدر تقرا بلي تاحد ماحامل تاحد تما !!! ....
.......
وصلات قسم للباب هاداك المطعم وعلات عينيها فاصيل بان ليها مخنزر وغادي غير بزز داير ليها الخاطر وهي تنهد ووقفات وهو رجع خطوة للوراء وشاف فيها ..
قسم : اصيل .... مااابغيتكش تكون بحال هاكا ، صافي الى معاجبكش الحال غير سير ترتاح ... والله ...
اصيل : دابا يلااه منبعد ونهضرو فهادشي ..
قسم : ولكن شوف وجهك كيداير !!! حسيت بحالا مبززة عليك
اصيل : علاش بنت ليك جيت بخاااطري !
قسم : ولكن مابززتش عليك صافي هخليتك على خاطرك ومشيت تانا ملي سيفطتي ليا مسج ا اصيل ...
اصيل : ودابا يلاااه ماشي دابا غانهضرو على هادشي ... ( شد فيديها ) يلاه ....
قسم تنهدات وزادت تابعاه تاوصلو للمطعم وهي تتبسم وشدات فيديه وتاهو زير عليها ... وزادو بجوج بيهم كانو بطلة سوداء اشبه بالنمور السوداء البرية ذكر وانثى ... بنفس الهيبة و النخوة ... طولتهم متجردة وريوسهم عالية و صدرهم مدفوع ... شادة فيديه كايتسمع غير كعبها ، داخلين باتجاههم ....
تسمع صوت كعبها فالارجاء وهوما يهزو عينيهم ببطئ تاتصدمو بهاداك المنظر !!!! شي لي خلا تا رشيد يتلفت موراه يشوف مالهم دارو هاد النظرة !!! هو يعلي حجبانو تاهو !!!!
الكل كان مذهول كايشوفو فيديها لي فيد أصيل ، والصدمة كانت باينة كتر على رشيد ومراتو وولدهم .... شافو بزربة فبعضياتهم كأنهم كايأكدو لبعضياتهم هاد المنظر والابن مصدوم !!! ....
قسم واصيل شافوهم مجموعين على الطبلة و عددهم كان كثير وبدا اصيل غير كايتنهد وصدرو كايضياق ... وقسم حسات بيه وزيرات ليه على يدو كتر ... كان كايحس براسو يحالا خرج من شخصيتو ودخل فشي شخصية اخرى ماشي ديالو ... هو انسان غير اجتماعي ومغايعرفش يلقى راحتو وسط ناس مكيعرفهمش و ناس من طبقة بعيدة علييييه !! .... هو غير ولاد حومتو فالقهوة ومكيجمعش معاهم بقى غير هاد القوم لي مكايجيه مكايشبهلو مكايعرفو !!! ولكن ملمس يديها فيدو هو لي كايخليه يصبر ويتحمل ، مهم يكون فجنبها ومايخليهاش وسطهم بوحدها. ...
وملي شافهم كيف دايرين عرف راسو دار الصواب ملي جا معاها ! ....
كلهم كانو كايتسائلو شكون هدا ؟؟؟؟ كان وجه جظيد عليهم وعمرهم شافوه لا فعائلتها لا فمعارفهم !!!! ...
اما هي كانت مبتسمة فوجههم بديبلوماسيتها المعروفة ، مشاعرها كتجمدهم فهاد اللحظات وكتخرج منها غير الكادر ديال البكر دالاسماعيلي .... اما اصيل مكانش كايعرف لهادوك الابتسامات وجهو كان حاد وتغوبيشتو واضحة عليه شي لي خلا اخت رشيد تعض على شفتها تحتانية بانجدااااب كبير !!!!!! ....
زادو بجوج بيهم تالرأس الطاولة من جهة الاخرى .. وقسم جرات الكرسي حدا بنت شريك باباها ، مخلية الكرسي لي فالرأس لااصيل ، كاان هو الكرسي الفاارغ الوحيد منغير لي كلسات عليه ....
واصيل تنهد وجرو وكلس ، وهي تبسمات ليهم وهوما كايشوفو فاصيل بإستغراب ورشيد معلي حاجبو كاتسائل ، شكون هادا لي خدا بلاصة اسد فداك الكرسي وترأس الطاولة !!!!! تاسمع قسم .....
قسم : ياكما تعطلت عليكم بزاف !!!! ...كنعتذر .... كانو عندي شي اجراءات مع الجمارك .... ( شافت فرشيد ) موسيو رشيد ... مرحبا بيك .... ( شافت فيهم ) مرحبا بلافامي عندنا ....
شافو فبعضياتهم موزعين ابتسامات صفرين بفضول من جهة أصيل و الام كاتشوف فولدها لي تاهو كايشوف مستغرب باغي يفهم ... ورجعات شافت فقسم مبتسمة .....
الزوجة : ترحب بيك الجنة احبيبتي ...
رشيد : ( تنحنح وقاد جلستو عين فيها وعين فاصيل ) .. Congratulations on your first voyage, Captain qassam " مبروك عليك اول طراجي كابتن قسم ..."
الكل بداو كايباركو ليها وهي مبتسمة فيهم ...
قسم : ثانك يو .... ( علات عينيها لعند الناذل عطاتو ايماءة ، وهو فهمها ) ...
تدخل الناذل مبدل ليهم المشروبات لي كانو فالكيسان ، كايهز ويحط فصينية لي هازاها الناذلة لي واقفة حداه ....
وهز على الناذل الاخر المشروب .... كان عبارة على قرعة دالشامبانيا فيديه حلها تاتسمع غازها الفوار وهوما مبتسمين فيه .... كان نوع من الاستقبال ....
و اصيل علا حاجبو كايشوف معاهم فهاد القرعة دالشامبانيا لي تحلات بأمر من قسم .....
حاس براسو قرب يدير ضحكة على هاد الموقف لي محطوط فيه دابا وهاد العبث لي كايعيش ! خواو ليهم فكيسانهم ووصلو لكاس اصيل وهو هز فيه عينيه بمعنى لا ، وهداك الناذل تبسم ومشى اما قسم اكتفوا انهم خواو ليها الما ...
وهي كل مرة تشوف فاصيل وتحط يديها على يديه من تحت طبلة وهوما كولهم كايشوفو فيه مستغربين ..... وهو كايهز عينو غير بشوية فيهم وملي كاتلاقا عيونو معاهم، كايعطيوه ابتسامات صفرة كتوحي بانهم مفاهمنيش وجودو ...
ولي تاهو براسو مفاهموش....هو كتر منهم .. هو براسو معارفش راسو اش كادير تما .. صياد ولد حومة بسيط اش كادير وسط ناس بحال هادو و الشامبانيا كتحل قدامو....
كان راجل بنت رشيد والابن كايشوفو فيه بدون ابتسامات ... عكس بنتو و زوجتو لي مبتسمين فيه ... اما ختو كانت فقط كاتشوف فيه بطريقة كأنها كتتفحصو .... كاتشوف فيدو لي على طاولة ، عروق دراعو ... فصدرو لعريض ... فملامحو .... تا من رقبتو وعنقو كتركز عليهم وتتفحصهم ....
شي لي وترو وخلاه كايلعب غيير بعينيه مفاهمش مالها كاتشوف فيه بهاد طريقة ! .... وزوجة الشريك خدات رشفة من كاسها وتحنحنات كتكلم بثقاااالة مخااطبة قسم ...
الزوجة : فرحنا بزاف فاش عرفنا بلي هاد الرحلة لي غاناخدو للمغرب غدا فصباح غاتكوني نتي مولاتها .... وقلنا فرصة نباركو ليك .... ( شافت فاصيل ) ولكن ماااعرفتيناش بالموسيو ؟ ( شافت فعائلتها ورجعت شافت فقسم ) مفايتش لينا شفناه ؟؟؟؟
رشيد : ( رجع لور على الكرسي براحة كايشوف فاصيل بتعاااالي محاملوش علاش مترأس عليه هاد الطبلة ) كالس وعيت نتذكر واش نكون فايت شايفو ....مي نو .... مكنعرفوش ! قال لينا سي اسد ديجا معاك ضيف ... مي ماتخيلناهش ( كايشوف فيه وشاف فيها ) بهاد القرابة !
قسم : ( تبسمات ليه غابزز ..وشافت فأصيل لي غير كايتنهد ويحاول يبتسم شوية زاخا مابايناش على ملامحو بمرة ) أصيل ..... ( شافت فيهم ) خطيبي ....
كلهم وسعو عينيهم وتعلاو حجبانهم ، كانو ظنوه يكون بوي فراند كااع !! ولكن ملي قالت خطيبها تصدمو !!!وكاع مخططاتهم تضربو فالصفر ....
والابنة شافت فخوها لي باقي مصدوم ولي كان العشاء الغرض ديالو ماشي غير المباركة انما باش يعاودو يقنعوها للمرة الرابعة تتزوج به بعد مارفضاتو هادي عماين ....
كلهم شافو فاصيل لي نزل عينيه كايقلب على شي منفد يهرب ليه ومايبقاش هاكا محط الانظار ...ةكلهم فكرة وحدة لي فبالهم ، هي شنو فهاد الولد خلاه يكون خطيبها من بعد رفضها لشحااااال من واحد !!!!! و الزوجة بدات كضحك بالفقصة والاهانة لي منين رفضات ولدها ماحساتش بيها وقالو يمكن مغادي تزوج بتاحد مدام بزاف لي ترفضو ، ولكن باش تلقى راسها قدام واحد تختار فبلاصة ولدها ، كانت اهااانة ليها ، أما الاخت درشيد كانت غير كاتشوف فييه بدون ماتحرك تاحاجة فملامحها بهاد الخبار ....كأنها ساهية فعاااالم اخر ...كانها عايشة تخيلات اخرى فدماغها !!! كايخليوها تتبسم مرة مرة بزاوية شفتها بإغراء للصور دصدرو العاري لي ترسمو قدام عينيها .....
الزوجة : ( حطات يديها على صدرها ) اومايكاد !!!!!!! I'm shocked " انا مصدووومة "
قسم : ( بابتسامة حيت عارفها علاش دارت هاد رد فعل وباغا تزيد تفقصها ) هههه علاش !!
الزوجة : ( كاتشوف فعائلتها وشافت فيها ) لا غير ماااتخيلتهاش ( شافت فيه ورجعات شافت فيها ) مبروووك عليكم .... ولكن ( رجعات بظهرها لور ) ماسمعناهاااش ! درتو خطوبة خارج نطاق الصحافة !؟ فالعزاء ديال جدك كنضن ماشفناهش ةماشفناش عائلتو عزات !!! ومقال لينا تاحد انه الميس قسم مخطوبة ، مافخبار حتى حد صراحة ان الميس الاسماعيلي تخطبات .... داكشي باش ... ( كاتشوف فولدها لي نزل عينيه معصب ) تشوكيت شوية ....
قسم : نو ... ماعلمتش ... حيت مزال ( شافت فاصيل بابتسامة وحطات يديها فوق يدو لي على الطبلة مبتسمة فيه وهو كااايشوف فيها ) مزال انا واصيل ماقررناش فوقاش غانديرو الخطبة الرسمية... ( شافت فيهم باقة شادة فيدو )ولكن .... قرييييب ....
رشيد : ( تنهد بغيض وحاول يببتسم ) مبرووووك عليكم ... بالبنون والبنات ان شاء الله ... ( شاف فاصيل بحقد ) راك محظوظ ملي خديتي الاميرة البكر دالاسماعييلين ....
اصيل : ( عوج عنقو للجنب ماحماش الطريقة دهضرتو لي جاتو عامرة بالتعالي و شرب من كاس دالما لي حداه ...عاد علا راسو فيه ) شكرااا
قسم جاتها الضحكة لي خلاه كايتسنى شحال عاد جاوبو .... والناذلين بداو كايحطو حداهم المقبلات وهوما حيدو السربيتات على الطبلة بداو كاديروهم على ركابيهم واصيل صدرو كايبان تحت شوميز منفوخ بقوة ما انه مامرتاحش ...
رشيد : ( كايسوس السرفييت بإتيكيت وحطها على ركبتو ) سي اسد لاباس عليه ؟ المادام لامار !!
قسم : كلهم لاباس .... شكراا ...
تحطات فوسط الطبلة مشواة تحتها فحم ، دائرية كبيرة عليها فواكه البحر و بعض انواع السمك كايتشواو .... و الشاف جا باللبسة السوداء ديالو ويديه مطوين موراه .. حياهم ... وبدا كايقدم ليهم ويشرح العشاء شنو فيه ..
واصيل حاس براسو بحالا فشي بلااااصة غرييييبة عليه ... الحاجة الوحيدة لي عارفها هي هاد الحوت لي كايهضرو عليه !!!! كانو مركزين معااه وهو كايقدم ليهم المذاقات لي كاينين فليصوص والمقبلات و مكوناتهم ...
وهوما كايدوقو بفراشطهم وهو كايتفرج فيهم بحالا كايتفرج فشي برنامج ديال الطبخ ، وقسم عينيها عليهم و عليه ... رادة ليه لبال شحال مامرتاحش كاتسنى غير هاد العشا يساااالي .....
اما الابن الصدمة باقي ماتعداها ... كل مرة كايعلي عينيه يشوف فاصيل ويرجع ينزلهم بتساؤل شنو لفأصيل مافيهش هو باش تختارو قسم من بين كااااع الرجال ...
الابنة تاهي كل مرة تشوف فيه وتشوف فراجلها ...
رجل الاخت و راجل الابنة كانو كايشوفو فبعضياتهم كاتشفاو فالابن لي من قبيلة وهو كايقسم ان هاد اللية غاتقبل بيه قسم ....
اما الاخت درشيد عينيها مزال مانزلاتهم عليه كل مرة تشووف فيه بطريقة غريبة وتسررط فريقها وتنش على وجهها رغم الريح البارد لي داخل من الزجاج المطل على الشاطئ الاسباني ! .... الى ان منظرو قدامها خلاها تحس بالحرارة كترتفع !! ....
مشا الشيف والناذلين بعد ما صبو للجميع فطباسلهم ... بداو كايتعشاو فهدوء ...منغير اصيل لي وتروه نزرات الاخت لي كالسة فجنبو من الجهة الاخرى ..... وكايحاول مايردش ليها لبال بزاف حيت عيفاتو بدوك النظرات وهي كتر من مو ! ...
رشيد : ( علا راسو من طبسيلو بعد ما رشف من الما ) سووو .. مييس قاسام .... كاينين مشاريع اخرين منبعد ! من غير هاد الباطو ! بعد ما وليتي كابتن اوفيشل .. مكتفكريش فشي خط مستقل على الخطوط ديال باباك !
قسم : ( سالات دغمتها و مسحات فمها بلباقة بمنذيل وشافت فيه ) سي ...كاينين بزاف دالافكار ومشاريع مستقلة على بابا ...ولكن باقي ماشي وقتها ...
اصيل كايشوف فيها ... حاس براسو بحالا شي وحدة اخرى هادي منغير قسم لي كايعرف ..جلستها .... الطريقة دماكلتها ... الطريقة باش كتمسح فمها ... الطريقة باش كتهضر و باش كتبسم وباش كاتشوف ....كانو مختلفين على قسم ديالو لي كايعرف .... قسم متتاكلش بحال هاكا ! قسم كترون وجهها كامل فاش كابغي تاكل ! .. ومكتهضرش بهاد النبرة الثقييييلة ...كتهضر بزربة وتعبر بملامحها ، مكتهضرش جامدة الملامح بحال هاكا !!!! كايحاول يستوعب كمية التعب لي كادوز منو باش تتقمص شخصية اخرى ماشي ديالها حدا هاد الكراكيز لي كالسين قدامها ....كايشوف شحال كايمتلو على بعضياتهم ... كايتسائل علاش هاد تمارة كاملة وهاد البرتوكول كاااااامل ! علاش مايكونوش على طبيعتهم ...حط فورشيط ديالو و رجع لور كايشرب غير الما...
وهوما كايتسمع منهم تقرقيب فراشطهم وهضرتهم الخافتة مع بعضياتهم لي مرة بالانجليزي ومرة بالاسباني ومرة بالفرنسي ... كان بحالة كاايتفرج فشي مسرحية مامحبوكاش مزيان ! حتى من اللغة ماعندهومش وحدة !!! كولشي متعدد !!! لغتهم ، شخصيتهم ، وجوههم ..... اخلاقهم تاهوما !!
كان زوج بنتو و زوج اختو اسپان غير من الشبه بانو ليه بحاال اب وولدو ... ولكن الزوج مكانش كاايقول للاخت درشيد ماما ! كان كايعيط ليها باسمها لي سمعو قال ليها " نايما " لي قدر دغيا يعرف انه غايكون " نعيمة " على عكس البنية المراهقة لي حداها كاتعيط ليها ماما ! قدر يفهم انه الابن لاخر غير من راجلها .... لي كان كاياكل وكل مرة يبتسم لمراتو بنت رشيد ...ولكن عينيه كاتهز بزاف فناحية واحد الناذلة مثيرة كانت واقفة بعيدة .... و لي مراتو كتبان حسن منها نوعا ما !
ورجع تاني كايشوف فباه تاهو ....كان اشقر بملامح اسبانية اصلية ... ملهي مع ماكلتو وكل مرة يعلي عينيه فزوجة رشيد وتاهي كاتشوف فيه من تحت للتحت ، وغير من الهزات لي كايديرو لهواتفهم قدر يفهم بلي كايتراسلو ! وكايقولو بينااهم شي حاجة لي مقادينش يقولوها بصوت مرتفع !!! ...ورشيد كياكل و كايهضر مع قسم مجايب خبار لا لنسيبو لي كايشوف فالناذلة لا لمرتو لي كاتشوف فبات نسيبو وراجل ختو ... لا لختو لي كتحرش بنظراتها بواحد فعمر ولدها ، لا لبنتها لي يدها كترعد فالفورشيت قدر يفهم بسرعة انها محتاجة لشي مخدر !! وكاتعاطاه ...
كولشي قدر يقرااااه بقوة الملل لي جااااه !!! كووولشي كان وااااضح ليه كواحد دغيا كايقرا بنادم ....
قدر يفهم هاد العائلة لي كالسة تتقمص عليه النخوة والرقي شحال الفسااااد معشش وسطها !!!! وكاتزيد تتأكد ليه النظرة لي واخد على هاد الناس الاصطنااعين ..
كايشوف بتعابير مستهزأة وتيحمد الله على التعاليم و المبادئ لي كبر فيهم فالحومة ..... كولشي قدر يفهمو ويعرفو عليهم غير من هضرتهم مع بعضياتهم ونضراتهم فبعضياتهم ... ولكن حاجة وحدة لي ماتفهماااتش ليه .. هي هاد العجوز لي حداه ولي والدة بنت مراهقة كيفاش عاطيها خاطرها تشوف فيه !!!! واش هاد الناس ماعندهمش حدود !!!
لدرجة غمزهااا مخنزر ملامحو بتساؤل على داك الشوفات كولهم لي دايرة فيه وهي ابتسمات كأنه غيير زااااد غراها بهاديك النظرة ونزلات عينيها لكبسيلها كتاكل بحركات ثقاااال ...
ورجع شاف فقسم لي تبسمات ليه وتاااهو تبسم ولكن ابتسامة كانت كلها استهزاااء بهاد المهزلة لي گلساتو وسطها .... ومجتمعها لي قالت ليه اجي ولفو !!! .... راجع ببلور وكايشرب من كاااسو دالمااا كاتفرج فيهم بابتسامتو المستهزأة !!! ...
الزوجة : حتى مراد ( شافت فولدها ) هاد العام قرر انه يستقل علينا وأسس الشركة ديال أحلامو .... افتتاحها غايكون الشهر المقبل فميلانو ...( شافت فقسم ) غانتسناو حضوركم نت والعائلة ( شافت فاصيل ) وغاتشرفنا حتى نتا موووسيووو ( كاتفكر ) اااه .. اصيل ....موسيو اصيييل ....
اصيل : ( عض على شفتو وقرب للطبلة حط الكاس وشاف فيها ) اهاه ... نجي ( شاف فقسم ) علاش لا ...
قسم : ( شافت فيها مبتسمة بزز واخا فيها البكية عارفة راه تعصب حيت غايكون حس براسو بحالا كايجرفوه لهاد العالم ) ان شاء الله ....
مراد : ( علا عينيه فقسم وتكلم بالانجليزي والفقصة مزال ماتسرطاتش ليه ) اخر مرة كناا دوينا ... كنتي كاتفكري تبقاي كابتن ... ومكتتيش كاتفكري فالاستقلال على باباك ( شاف فاصيل ورجع شاف فيها ) علاش تبدل الميول ديالك دابا ؟
الابنة : ( تدخلات تاهي بالانحليزي ) عااادي اخويا ...دابا راها مخطوبة و غاتبغي تستقر ، ماجاتش تاني، نهار معاه و ستيام فالباطو !!! ( شافت فقسم ) اولا !
قسم : هدا واحد من الاسباااب ( شافت فاصيل ) واخا اصيل تاهو فالمجال البحري ... قادرين نكونو بجوج بينا فباطو واحد ...ولكن ( شافت فيها ) بغينا شي حاجة اخرى مستقلة على خطوط بابا .....
اصيل رجع لور متنهد محاملش تناقش معاهم هادشي ، يلاه كايحاااول يجمع صدرو لي ضياق ، هو يحس بوااحد اليد فوق من رجليه تحت الطبلة ... ونزل عينيه وهي تبان ليه يديها المجعدة وضفارها الحومر الطوال كدوزها لي فخدو .... وضربها ليها بزززربة حيدها عليه عايفها ....مخنزر فيها ، وهي مكتشوفش فيه ملهية مع ماكلتها بحالا ماشي هي لي دابا عاد بكل جرأة قاستو بداك الطريقة .... وبدا ماغير كايرخف الصدافة د الشوميز قبل مايتفركع ....
الزوجة : المجال البحري ؟؟؟؟ اذن كاااابتن حتى هو !!!
اصيل : ( يلااه غاتهضر قسم قاطعها بحدة كايشوف فيها ) صيااااد .....
قسم نزلات راسها من جوابو وطريقة باش قالها ، وهوما كيشوفو فبعضياتهم ، والزوجة شافت فرشيد ورجعات شافت فيه ....
الزوجة: ا .. اه مزيان ... ولاشمن شركة بحرية تابع ! ديالك ولا دعائلتك ؟
اصيل خدا تنهيدة قوية وهي تجاوب قسم بلاصتو بزربة باش متخليش ليهم مجال فين يقدمو ليه شي اهانة ...واصيل علا حاجبو ملي جاوبات بلاصتو ....
قسم : اصيل تابع لراسو ....خدام لحسابو الخاااص ...
رشيد : اممم مزياااان .... تقريبا كاينين ثلاتة دالشركات بحرية هنا فكازا من غير سي أسد طبعا .... وكلهم كنعرفهم ... وكنعرف مواليهم .... اذن نتا ماشي فكازا ؟ حيت كلهم كنعرفوهم ونا مافايتش شفتك فوحدة منهم .....
قسم : ( لتاني مرة غتجاوب بلاصتو وهو شاف فيها ومراد علا حاجبو علاش كتجاوب بلاصتو وعلاش هو خنزر فيها بحال هاكا ) فكازا ، ومغاتعرفش شركتو حيت هو يلااااه بادي مزال مكاينة تاحاجة فالسوق دابا ....
رشيد : ( علا حجبانو بجوج باستغراب وشاف فمراتو ) اذن كااايمارس الصيد غا هواااية !!!!!
قسم : ( شافت فاصيل لي ضور راسو للجنب وتنهدات ) تقريبا .... اصيل ... رجل أعمال حر ...
اصيل قلب راسو بزربة لعندها وهي علات راسها للفوق مفتخرة بيه .... وهوما كيشوفو فبعضياتهم كانو متوقعينها مدام نسيب الروكان مغايكونش ساهل فالبلاد .... وجاهم فضول كبير يتعرفو عليه كتر واخا الغيض باين فملامحهم من جيهتو لي هو وماشي ولدهم ... وقسم كتحاول ما امكن متحطش كاع وراقهم فوق طبلة باش مااايتعرضش لشي اهانة لي تريب ليها كااااع هادشي لي بنات معاه ولي كتحاول تبنيه ...
و فالداخل ديالها كتقول مع راسها انه بصح رجل اعمال بادي مشوارو بريسطو وماكذباتش ... واصيل حس بعروقو تنفخو تحت جلدو بقوة ما كابت عصبيتو وقلب راسو للجنب كااايحاول يتهدن ما امكن ومتبانش شي حاجة فهاد العشا و ميحطهاش فشي صورة خايبة قدام ضيافها .. فضل انه هو يصبر على هاد الاهاااانة كاملة لي وجهاتها هي ليه فأجوبتها لي استفزاتو كتر من اسئلتهم هوما .. على انه يفسد ليها هاد العشا لي واضح مهم بنسبة لديبلوماسيتهم كعائلة فالبزنس عندها شركائها ....وهادا واحد منهم ....
رشيد : هادي حاجة اكيدة ... سي أسد مكيدخل فحتى صفقة مكيربحش فيها ، ( اصيل هز عينو فيه) فمااا بالك زواج !!! ... وبنتو الكبييرة .... البرااانسيس الاسماعيلي ( شاف فأصيل كايفتخر بولدو تاهو ) حتى ولدي من صغرو مولوع بالتجارة وعالم البزنس ، نتوما كاع هاد الجيل الصغير لي طلعتو فمحيط كوميرسيال كتميلو للاعمال الحرة .... مراد ولدي ، الشركة لي غيفتتح فميلانو .. خصصها لقطع الغيار الميكانيكية ...
الزوجة : ( علات حجبانها ) اء ! على ماشي د الرخام !!!
مراد : ( علا حجبانو مخاطب ماماه بالانجليزي محرج ) اشمن رخام !!!!
زوج الابنة : ( بالاسباني ) هاديك باغين انا وبنتك نفتاتحوها ماشي مراد .... يمكن خلطتي بيناتهم ....
الزوجة: اااه هههههه ( كتشوف فاصيل وقسم ) ههه عرفتو راه ديما هاكا ... من قوة ما مشاريعهم كثاااار .. كنساهم هههه ( اصيل هبط راسو كيحركو بالنفي باستهزاء ) اوا ماديوش على ماماكم .. كل مرة راكم باغين ديرو حاجة شحال قدني نعقل على مشاريعكم ههههه ...
رشيد هوما كيهضرو وهو عقلو عامر غير بالفضول تجاه اصيل شكون يكون فالمجتمع .. اما مراد كان كان فقط ملاحظ شحال هو منزعج و شك ان قسم كتألف اجوبة مكايناش ويمكن مباغيهاش .. حيت طريقة باش قال صياد مكانتش كتعني انها غير هواية ....
رشيد : ( مسح فمو بمنديل وحطو وتحنحن ) ..... باقي صغييير بشوية عليك ... البزنس كيحتاج الصبر وكيحتاج الوراثة ... خاصك تكون وارث جوج حوايج على عائلتك، اللول .. هو دماغ للتجارة .... والتاني هو راس المال .. وبما انك رجل اعمال بادي .. اذن غتكون عارف هادشي مدام راك ولد التجارة .... غايكون لينا شرف نتعرفو على عائلتك ... شنو اختصاصكم ؟ فين كتكونو ... اكيد لامكانش شي مشكل .. فقط فإيطار طبلة دالعشا لي كنتعرفو فيها على بزاف دالمعارف الجداد هههه حنا كناس فالبزنس وهادشي غاتكون عارفو حتى نتا.... بقوة ما انه وقتنا كامل عامر كنلقاو وقت غير فطبالي دالعشا نتلاقاو مع الناس ونديرو صداقات جداد ... اذن ... شكون عائلتك ؟ نقدر نكون كنعرفها ....
قسم بقات غير كتمرش وسرطات ريقها محملاتش ابدا هاد السؤال وحسات بالسخانة طلعات معاها حيت عارفاه باش غيكون حس دابا ومكانتش حاطة هادشي فحسابها .... واصيل شرب من كاسو دالما وخدا تحنحينة كيقاد جلستو وشاف فيه ...
اصيل : علاش ولد التجارة كتقال غير على لي والديه فالتجارة ! شحال من واحد باه طبيب ... استاذ ... محامي .. صياد ..... وهو مال للتجارة .... باش يكون عندك دماغ التجارة اسيييي..... ( جاوبو)
رشيد : رشيد
اصيل : اسي رشيد .... ماشي ضروري يكون باك بزنس مان ... يقدر باك يكون غير فاق صباح وعطاك 50 درهم وسيفطك لعند الخضار .... غتقضى داكشي لي خاصك وغيقوليك الخضار جاتك 35 درهم .. غتمد ليه داك 50 درهم لي عطاك باك و الخضار ماعندوش الصرف باش يرد ليك 15 درهم .....عندو غير 20 درهم فداك مجر ... كيقوليك عندك خمسة دراهم ؟ كاااتقوليه آه ....كيقوليك عطيها ليا ونعطيك عشرين درهم .... الى لقيتي راسك مديتيها ليه وخديتي عشرين درهم بلا متحسب بصبعانك وبلا متلف فالحساب وبلا ماتقول اش دااار هدا دابا ؟ ..... راااك ولد التجارة .... انك تكون ولد التجارة .. هي تدخل لشي ريسطو ... ناس كاياكلو و كايقلبو فالموني شنو كاين داك نهار ... ونتا كتحسب الاثمنة وكتتحسب داك الريسطو شحال يكون كايدخل فالنهار .... انك تكون ولد التجارة مجات لا بباك بزنس مان لا بعائلتك فالبزنس ..... جات بالدروس البازيك لي مكايقروهمش ليك فدارة الاعمال .... كايقريهم ليك غير الخضار ديال الحومة .....
الابنة : ( معلية حجابها مفهماتش ) ك .. كيييفاش !!!!! و ولكن ... م .. ( شافت فباها ) مفهمتش ، علاش قاليه يعطيه 5 دراهم !!!!
مراد : ولكن عطيتيه خمسين درهم وزدتي عليها خمسة من الفوق !!!!! علاش !!!!
رشيد : ( رخف كرافاطتو حيت هو فهم وولادو مفهموش وحطوه فاحراج قدام اصيل ) راه رد ليه عشرين امراد ....عشرين ....
مراد : ما ..... م مفهمتش !!!!
اصيل : ( كيشوف فرشيد ) شفتي ... قلت ليك راه مجاتش بباك يكون بزنس مان !!!
قسم حسات بحلقها برررررد وسخانتها طفات وعينيها لمعو ملي جاوبهم بداك طريقة وقلبها بدا يضرب بجهد بالحماس تنوض تعنقووووو لي هبط ليهم غرورهم بطريقتو الخاصة بلا مايقلل الاحترام .... وبلا مايخليهم يحسو بانهم حرجوه بداك السؤال وعرف يقلبو لصالحو ..... ومنبهرة فيه ولكمية التشاااابه ديالو مع باباها !!!! مراد كايحاول يحسب والابنة كتحسب مع راجلها بصبعانها وقسم كاتشوف فيه بافتخااااار ......
رشيد : اهاه عندك الحق .. ربما كتعرف تحسب مزيان ... وكتعرف فقوالب التجارة ولكن ... راه تالعائلة كتلعب دور فأنك تكون رجل اعمال ناجح ....حيت البزنس المان الناجح كيحتاج لراس المال .... والخبرة .... وهادو ميمكنش يكونو عندك الى مكنتيش ولد عائلة فالبزنس وطاااااحو سنانها فالتجارة والبورصة .. خاصك كنية ديال عائلة لي تفتح ليك باب فالسوق اولا ! .....
اصيل : فهمتك اش بغيتي تقول اسي رشيد ... وكنتفق معاك فقضية الكنية ... ماشي غير مجال البزنس لي كيحتاج كنية نقية باش يتفتحو ليك البيبان .... كاع المجالات كاتعاونك فيهم كنية باك الى كانت نقيى وسمعة مزيانة .... وهادشي كيفتح ليك الباب فبزاااف دالحوايج وكايسهل ليك طريق ....ولكن ممتافقش معاك فراس المال ..... حيت هداك .. خاص مولاه .... يكون عندو الراس بعدا ... لي غيقدر يعرف يسييير بيه المال .... شحال من واحد لقى باه موجد ليه بيرو وكرسي دالجلد .... وحيت ماعندوش الراااس ديال داك المال .... بسوء التدبير .... داك الكرسي دالجلد لي بقى ليه باااااعو باش يخلص فلوس الطاكسي يمشي للمحكمة لي حجزات ليه على الاملاك ..... وشحال من واحد خلا ليه باه غير كرسي دالخشب ... خدم ودمر باش شرا الجلد وخيطو هو للكرسي .... قبل متخليو لولادكم راس المال ... خليو ليهم الراس بعدا ....
بقاو تايشوفو فبعضياتهم الابنة حسات بانه كيحشي ليهم الهضرة وخنزرات فراجلها اما مراد كان كيشوف غير فيه وللامثلة لي كيهضر بيهم شحال كيوحيو انه ممكن يكون انسان فقير !!! اما رشيد كان مابقى ليه فين يزيد يتناقش وكيحاول يقلب فدماغو على شي حاجة لي يجابهو بيها .... اما الاخت الكبيرة كانت فقط حالة فمها فيه وفثقتو فنفسو وكيفاش كااايهضر بكاريزما وكتدوز لسانها على شفتها... قسم بلا متحس حطات يديها على يدو مبتسمة فيه اما هو مشافش لجيهتها باقي كيشوف فرشيد ...
رشيد : وخليتيني دابا يزيييييد فضولي نتعرف على عائلتك ههه ... شكون هو باباك ؟ نقدر نعرف سميتو !
اصيل : ( بافتخار ) حسن الشريف ...
رشيد : ( كمش ملامحو كيتذكر وشاف فمراتو لي تاهي حركات راسها بالنفي وشافو فيه ) م ... مفايتش سمعنا بيه صراحة ؟؟؟ واش نتوما من كازا !!!
اصيل : مغتسمعش بيه حيت توفى قبل ماتبدا دير طبالي ديال العشا تتعرف فيهم على معارف جداد .....
قسم شافت رشيد علااا حجبانو وتدخلات بزربة
قسم : توفى شحاااال هادي .... كان اصيل باقي صغييير ...
رشيد : اااه ..... الله يرحمو ..
الزوجة : الله يرحمووو ... سمح لينا مكناش عاارفين ..
رشيد : ولكن واخا هاكاك انا بصح عمرني سمعت هاد الكنية !
قسم : حيت نتا اموسيو رشيد مكاينش فالمجال البحري كون كنت فيه كون عرفتي هاد الكنية ... هو يمكن مغتعرفش بابات اصيل الله يرحمو ...ولكن مايمكنش تكون مكتعرفش جدو ! ( اصيل بدا كيشرب من كاسو يبرد شوية يحلقو ويشد اعصابو كتر ورشيد متبع معاها ) جدو هو لي علم لبابا البحر .... هو عندمن تدرب بابا فالعسكرية ديالو ....
الزوجة علات حجبانها بجوج وشافت فرشيد ورشيد بدا كيتذكر ان اسد دوز عسكريتو فالمغرب وشاف فيها ....
رشيد : امممم ... يعني ، جدو ...جدو كان رايس .... رايس دالصيادة !!!
قسم : تماما ...
رشيد : امممم ... فهمت .... ( شاف فاصيل ) فهمت علاش الموسيو صياد ...
الزوجة بقات غير كترمش وكتقول مع دماغها جدو غيييير راااايس !!!! ومراد علا حجبانو جاتو الضحكة وتحنى على طبسيلو كياكل صدق صياد دبصح !!!
زوجة : ااااه يعني ... الموسيو اسد ختار نسيب بطريقة عااااطفية هاد المرة ماشي بطريقة تجارية ههههه ( اصيل كيشوف فيها وهي ركزات عليه ضااحكة ولكن فالداخل ديالها غتموت بالفقصة علاش تختار هو يدخل لعائلة الاسماعيلي وولدها لا خصوصا ملي جدو غير راااايس دالبحر ) مادام باباك توفى .... اذن ماماك غااااتكون فخووورة بولدها جاب ليها عرووووس بحال قسم .... و ( قاطعاتها قسم )
قسم : انا ماشي انجاااز امدام مريم باش تفتخر بيه ماماه غير حيت غايتزوجني !... وهدا هو السبب لي خلاني نتعطل باش نرتبط .. حيت كاع لي تقدمو ليا هوما ومواتهم شافوني انجاز ( الزوجة نزلات راسها كتشوف فولدها من تحت للتحت ) اصيل لاكانت غتفتاخر بيه ماماه غتفتخر بيه لنجاحو فخدمتو ومستقبلو .... ماشي بيا انا ...... انا غانكون مراتو ماشيي ديبلوم غايعلقو فالحيط !!! ....
الزوجة : غير خديتيها بحساسية امادموزيل قسم .. ماقصدتهاش بحال هاكا .. ولكن قصدت انه تفتاخر حيت ولدها عرف يختار العائلة لي غاايدخل وسطها ...
قسم : وحتى هاكا غنقوليك بلي هو ختارني انا ... مختارش عائلتي .....
الزوجة : ( شافت فاصيل ) اكييييد احبيبة ولكن ديما كنقلبو لولادنا على بنات الاصل .. واكيد ماماه غتفتاخر بيه تا فنجاحاتو وهو صياد باغي يتحول لرجل اعمااال ناجح ...( شافت فيه باستهزاء ) شنو احساسك فاش كتشوف ماماك فخوووورة بيك لهاد الطموووح الكبييير ديالك كامل ، انك من صياد جدو رايس لرجل اعمال داخل لسوق البزنس ومزوج باارانسيس قسم الاسماعيلي!!!
قسم وسعات عينيها وشافت فيه محملاااااااتش راسها ومحملاتش هاد السؤال وداك مراد مصغر عينيه فيهم كيحاول يقرا تفاصيلو اما هو تاحاجة ماتزحزحاااات من ملااامحو ... تاكانت قسم غتدخل بصرامة وتقلب هاد لعشا ، ولكن كان جاوب بكل هدوء....
اصيل : كيفما كااان غيكون هاد الاحساااس لي غاانحس بيه من جيهتها ... مغيكونش بحال احساس واحد ، ماماه ماعارفاش تاااشنو كايدير فخدمتو !!! واش الميكانيك ولا الرخام ....
مريم جمعات ملامحها بزربة وشافت فولدها بمعنى راه وجه لينا الكلام و عايرني حيت معرفتش اشمن مجال افتتح فيه شركتو ورشيد رخف الكرااافااط وحسو براسهم مايقدرو يقولو والو .. واخا يكون صياد جدو راااايس عااادي كايبقى نسييب الروكان وغير هاد السمية كتخليهم يحتارموه بزز عليهم وتلاهاو فمشروباتهم ، الانزعااج واضح عليهم من اخر كلام قال .. عكس اخت رشيد لي مكتسمعش حديثهم كانت غاااارقة فعاااالمها الخااااص وريحتو محاوطاها من كل قنت ... اما مراد مقدرش يسرط الاهانة ... لا الهضرة لي قال .. لا العجرفة ديالو ... لا علاش دا ليه قسم .. لا شنو كاين فاصيل مافيهش هو باش يتختار يكون نسيب الاسماعيلي وهو لا ... حس براسو مقدرش يتحكم فاعصابو ملي شافو شحال مكبر وعاجبو راسو وكيهضر معاهم فوق النييييف و قسم مفتخرة بيه .. وهو اتضح انه غير صياااااد !!!!! .. صيااد جاي كااايهينهم فوق الطبلة وعارف مزيان ان عائلتو متقدرش دوي بسبب الروكان ... ولكن ختار احقر وسيييلة باش يهينو على الطبلة وهي يقيسو بالعرق ديال الحضارة ..... وشاف فيه وتكلم بنبرة حادة وبالانجليزية ....
مراد : معرفتش نجاوبك قبيلة حيت مفهمتش .. ماشي حيت انا ماشي ولد البزنس ولكن حيت حنا فاش كيصيفطونا واليدينا نتقضاو ... كيكونو صيفطونا نتقضاو الاسهم فالبورصة .. مكايسيفطوناش نشريو البطاطا .....
قسم علات حجبانها بجوج وسرطاااات ريقها مزيرة على المنديل لي على رجليها واصيل موعج راسو كيسمع ليه ورشيد شاف فمراتو والابنة شافت فراجلها وهو شاف فباه ... رشيد فهم ولدو علاش هضر بالانجليزي حيت بغا يهينو بمستواه التعليمي مدامو غير صياد بسيط مغايفهمش اش قال ليه بالانجليزية ... و قسم صافي مبقاتش قادرة تصبر وشافت فيه بحدة ....
قسم: can you speak Arabic ! " واش تقدر نهضر بالعربية ؟ "
اصيل : ( شاف فيها باستهزاء ونفس النظرة دارها فيه وجاوب قسم وهو كيشوف فمراد بلغتو الانجليزية و الاكسنت الامريكية ) The weird thing isn't that he didn't speak arabic . the weird thing is that the father was very proud of lineage and family name, while the son doesn't even take pride in his own identity , imagine !! "" لي غريب مااااشي هو ماهضرش بالعربية .. الغريب هو ان الاب من قبيلة هو كيفتخر بالنسب والكنية .... والولد مامفتخرش حتى بهويتو !!!! ( شاف فقسم ) تخيلي !!! " ( شاف فمراد وهاد المرة مكمل كلامو بالعربية بعد ماخلا ليه وجهو حمر وقسم حالة فيه عينيها مصدوووومة ) انا كنهضر بالعربية .... تقدر تاخد راحتك راه كنفهك اش كاتقول ماتحتاجش لشي لغة اخرى ... والى بغيتي نقولها تابالاسبااانية ( قالها بالاسبانية ) No tengo problema amigoo " ماااعندييييش مشكل "
شاف فقسم كيفاش كتشوف فيه مصدومة لي كايهضر بالانجليزي بطلاقة و شاف فيهم كاملين لي حس بلي الجو توتر عندهم .... حس براسو صافي تخنق خصوصا بنظرات قسم لي حسهم بحال شي خنجر فقلبو ... و دفع الكرسي للور برجلو ووقف ....
اصيل: كانت سهرة زوينة وتشرفت بيكم .... Bon appétit
تبسم ليهم بلباقة ومشا مستأذن وقسم كترمش متبعاه بعينيها وهوما كيشوفو فبعضياااتهم والاب مخنزر فولدو علاش قال داك الهضرة لي يقدر يضيع علاقتهم مع اسد و الزوجة شافت فقسم و فبنتها ....
الزوجة : واش تقلق ...
قسم : ( قلبها كيضرب بجهد وتبسمات ليهم ) لا غير عيانين شوية اليوم وراه سيمانة هادي وحنا مسافرين ... ( جرات الكرسي ووقفات ) تصبحو على خير ....
خلاتهم ومشات بزربة تابعااااه وهوما غير كيشوفو فبعضيااااتهم .......
دخل اصيل لجناحو ولتخ الباب موراه ، بدا كيفتح فالصدايف الفواقا دشوميز حاس براسو تخنق بقوة ما بقى كابت الغضب ديالو فصدرو لداخل حتى ضياق عليه فتحها وبدا كيحاول يتنفس ... هو يسمع الباب كدق وضار بعينيه بحجبانو مقرونين عوج شفتو للجنب مدة ولاح تنهيدة من اعماقو ومشا حل ليها لقاها واقفة كتنهج حيت جات بزربة وهو دخل وهي سدات الباب وتبعاتو ..
قسم : اصييييل .. كك كنعتذر فبلاصتهم الى حسيتي بلي قصد( قاطعها ضاير عندها )
اصيل : كتعتذري بلاصتهم ؟؟؟؟ علاش اش دارو ليا !!!
قسم : ششوف .... ( ردات شعرها لور ووجهها سخن ) معرفتش كيفاش نتصرف فهاد الموقف ولكن حاسة بيك بلي تحملتيهم بزاف واخا مكانش عليك وحطيتك فموقف ماكتبغيهش ... وهضرتهم شوية كانت ... مم .. ماعرفت ( قاطعها ثاني )
اصيل : كيفاش كانت ؟؟؟؟
قسم : ش شوية مستفزة يعني ....
اصيل عقد حجبانو وقرب عندها كيهضر مزير على سنانو ..
اصيل : علاش شكون هوما الي غنتعصب على ودهم ؟؟؟؟ شكون هوما لي غاااضرني هضرتهم ؟؟؟ قسسم ... انا واحد بنادم ملي كان صغير وهربات مووووو .... وهو مولف على الاهانات دالمجتمع .. مولف ندير الكييييت طافي فوذني ونتجاااهل .. مولف و مكيحرك فيا المجتمع والو ..... وعاارف مزيان الناس لي بحال هادو كيفاش كيهضرو وكيفاش كيعاملو هاداك لي غيلقاو فيييييه شوية ديال النقص .... سمعو جدي رايس حسابتهم مساكن بلي بنادم لي ملاباسش عليه بحالهم صافي راه ماقاااريش !!! دابا نتوووما تايسحاب ليكم بلي بنادم خاص يكون بااه لاباااس عليه باش يكون قاري !!!!!! ( قسم كترمش فيه ) انا ماضرونيش هوما اقسم .. انا ضرررريتيني نت ..... ( بحرقة كيقرب عندها ) ضررررريتيني نتي اقسم هاااااد المرة .. هوما مادارو واااالو ..... ملي باغاه بزنس مااااان سيري دييييه علااااش جاية عند صيااااد بحاااالي !!!!
قسم : واااااش منيتك ا اصيل ( رفعات صوتها بتوتر ) مالي كدبت ؟؟؟؟؟ كذبت فشي حاجة ؟؟؟؟ علاش نتا ماشي واحد غيولي رجل اعمال !!!! هاداك الريسطو شنو هو ؟؟؟؟ علاش لي غنجلس انا نششششرح ليهم لااا راه كيصلح لا راه خاصو يكمل الخلاص باش يفتتح لا راااااه مزاااال كنختارو الرخاااام دكوزينة .. اش داااااني لهادشي جييييت من لخر وقلت ليهم رجل اعماااال ، علاش نتا مغااتوليش رجل اعمال نهار يتحل داك ريسطوو !!! مغاااديريش التجاااارة ؟؟؟؟؟؟
اصيل : وشكوووون قاليك اصلا عاودي ليهم هادشي شكون دار عليك السيف !!!!!! شكون قاليك برري ليهم خدمتي .. شكوووون هوما تانعاودو ليهم هادشي !!!! كون ماشي نت لي كلستي كتعاودي ليهم وترقعي فداك صياد ... كنت غاااندير الحدود لهضرتهم ومغايعرفو عليا والو .....كون ماااسياااادتكم شفقاااات على هاد الصياد مسكين وقالت اجي نكبر بيه ونعطيه مهنة ماشي ديااالو وكبيرة عليه ..... ياك خدمتي صيااااد ... وااااقوليها .... مراضياش بيهاا !!!!!! صياااااد عادي كلمة فيها ربعة دالحروف جاتك صعيبة !!!!!
قسم : ( سرطات ريقها كلها متوترة ) اصيل .. مغنبقاوش نضورو دابا فنفس الحاجة .. من لول انا واضحة معاك ومن لول قلت ليك مااااعنديش مشكل فخدمتك ومفتخررررة بيها .... ولكن هاااادوك راك قلتيها بفمك الا شدو غير نقص واااااحد كيبغيييو يهينو مولاه انا مااابغيتكش تتعرض لاهاااااانة ( قاطعها)
اصيل : وااااااخليني ( بعصبية كثر وعينيه حمرين وصوتو مجرووح ) خليييييني .. انا مكنتهااااانش ، انا ماعندي تاااااحاجة لي غانتهان علييييها اقسم .... انا هاداك لي غيييير غايفكر انه يهيني كنكووون مرمدت بكرامتو لارض .. الى مكتعرفنيش مزيان على الاقل احتااااارمي وجودي .... تااااحد ماطيح مني فداك طبلة قدك نت اقسم ( عينيه حماااارو كثر وجفونو تنفخو وهي كتشوف فيه ) اهااااانتك هي لي قاصحة اما واحد اخر ماااعندو مايدي مني .... حييت انا كنجيبها حلااااااال و مااااعنديش علاش نحششششم وخدمتي هااازة ليا راس وماااعنديش مشكل فحتى حااجة..... اهااانتك نتي فاش تصدمتي حيت جاوبتووو بلوووونغلي هي لي قااااااصحة اقسم ..... ( قسم كترمش فيه دموع كينزلو وكتغزز سنانها وفمها مسدود ) واش غيررر ولد الحوووومة مغنكونش قااااري !!!!! المونسيون دالباك ديالي راك ماااجبتيهاش حتى نت لي بنت الرووووكان ..... هاااااديك هي الاهانة لي جاتني قاسحة اما هووووما ... ماحسيت معاهم بوالو من غيييير الشفقة .... من غير بقاو فيا وقلت الله يحسن العواااان مساااااااكن على حياة عندهم ..... الضربة القااااسحة جات من عندك نتي اقسسسسسم ..... ( نظف نبرة صوتو وحاول يوقف مزيان ملي كان محني راسو عليها وبدا كيتنهد ) مزياااان .. مزيااااان لي كان هاد العشا ودرتيها مزياااان فاش قلتي ليا نمشي معاك ... دوزت سيمانة وانا كنحاول نتعرف على مجتمعك كيداير .. ماعجبنيش ومتسوقتش ليه ... جيت تالنهار لخر .. وتعررررفت علييييك نتي كيدايرة وسط هاد المجتمع ... وماااعجبتينيش .... ( شاف فيها ) ولكن ميمكنش منتسوووقش ليك .... بالعكس ، ضرررني خاطري بزااااف .... وزاد بان ليا شحال انا وياك طرييييقنا مسدودة اقسم ... شحال انا ويااااااك مستحيييييل نكملو فهادشي
قسم : ( علات حجبانها بجوج كتشوف فيه ) اهااااه !!!!! هادشي !!!!! مستحيل نكملو فهادشي !!!! علاش !!! حيت فلتات ليا معلومة بحال انك كتعرف الانجليزي !!!! يعني نتا تجاااهلتي كووووووولشي اش درت على قبلك ... وغنساليو حييييت انا .. ماااعارفاش واش كتهضر مزياااان بالانجليزي !!!! ....
اصيل : ( مطول فيها الشوفة وهضر بنبرة هااادئة مترجمة بزاف دالخراب فالداخل ديالو ) قسم سيري فحالك .....
قسم : ( كتقرب عندو بالغوات ) فخبااااااارك عييت من هادشي ديالك ..... عيييييت من انك كتشوف غير لجيييهتك نتا ومكتلقى ليا حتى عذر انا !!! .... عييييت ما نكون انا لي كنحاااارب باش نحيد هاد الطبقية !!!! فخبااااااارك عييييييييت من هادشي ( اصيل كيشوف فيها بخيبة كبييييرة ) ددددددددرت جهدي كااااامل ودرت كاع الحلووول ولكن نتا بهاد العقلية المتحجررررة كتشوف لااومور غير من جهتك ..... نتااااااا لي مغتخلينا نوصلو لواااالو فهادشي دياااالنا ..... انا دررررت جهدي كاااااامل ا اصيييييل .. عيييييييييت دابا ..... معياا نحيد فالطبقية نتا دايرها فعقلك ... الى غنبقى انا كل حركة درت نبقى رادة البال معاهااااا عنداك تفكرك بالطبقية لي بيييناتنا بنااااقص .. الى مغتكوونش نتا تاااايق فيااا بلي انا باغاك كيف نتا بناااااااااااقص .....
خلاتو ومشات بزربة حلات البااااب ولتخاتو مشااااات واصيل بقى غير واقف كيشوف كيف شي واحد كاااااع اش فيه طاح للارض وتهرس الى جسدو لي بقا واقف .......
وقفات الجيپ قدام جوج بيبان كبار ديال الخشب وفوق منهم بولة حمرا صغيرة شاعلة ... والبيبان بداو يتحلو بشوية ... لوؤي مركز معاهم وقدس باقا مافاهمة والو و لي منين خرجو للطريق الفرعية ودخلو وسط لاپيست وهي مفاهمة والو اشمن جبل هدا طلعو ليه !!! ... كتهضر معاه مكانش كيقنعها باجوبتو ... تحلو البيبان عاد دخل وتسدو موراه وهي مرة تشوف موراها و مرة من زاج ديالو مرة من زاج ديالها مرة قدامها مفاهمة والو فين هوما ... كانت فيرمة صغيرة محاطة بالاشجار اما البقية مكان كيبان والو بضلام ... ماحدهم كيقربو للدار ماحد الضو كايبان ... وهي مصغرة عينيها كتشوف ...
قدس: لوؤاااي .. واش مغتهضرش .. ديالمن هاد الدار !!!!
كتسنى جواب تاكان ركن الطموبيل جنب الجردة الصغيرة لي كانت كلها شاعلة بالضو ديال الجردة ... اشجار ديال الفواكه الموسميين واللوز والكركاع ... امامهم كانت واجهة ديال منزل متوسط ... ضايرة باعمدة الإضاءة الصفراء وجدرانو مخلطين بين الزاج والخشب والرخام ... غير كتشوف مفاهماش تاسمعاتو حل الباب ونزل .. وهي تبعو بزربة ، كان ماشي فكولوار ضيق بين الشجر محني براسو زكايبعد جذوعهم بيدو باش يدير طريق ... وهي تابعاه كتهضر وتسول تالقااات راااسها قدااام مشواة كبيييرة امامها طبلة حديدية وكراسي ... ومحاطة كلها بالاشجار و اعمدة الاضاءة ... على الطبلة كانو محطوطين بزاف دالبواطات لي عامرين بالمشاوي مشرملين خاصهم غير يتشواو ... والمشروبات ولي بواط دليصالاد ... بدات كتقرب بشششوية مستغربة جاتها الضحكة كتشوف فداك المشواة و فيه هو لي كيحل دوك البواطات يشوف داكشي واش هو هاداك ... خادمات داك المزرعة لي كانو وجدو داكشي وانصرفو ... وهو علا عينو لعندها لي كتشوف فيه باستغراب ولكن ملامح الفرح باينين عليها ...
قدس: هه !!! اش هادشي ؟؟؟ ديالمن هاد الدااار !!!
لوؤي : ( سد داك البواط وقرب لعندها ) دصاحبي ..... ( جبدها من يديها وجابها قدامو عنقها من لور مخليها تزيد تكتشف على خاطرها شنو تما وهو يستنشق عطر نحرها على خاطرو ) فالعاااادة ... شي واحد ملي كيبغي يوجد شي عشا رومنسي لحبيبتو ... خاصو يفكر فالشمع .. فالورد .. فماكلة خفييييفة ... فالتحلية ... فشي بواسون زوين ... ولكن حنا ماشي بحالهم .... انا عروبي حبيبتي بگرة كتموت على الشوا .... ( ضورها لعندو وهي كتشوف فيه وشد وجهها ) هادي هي الرومنسية لي كنعرف ليها معاك .....
قدس : هههه اصلا كون جبتي الورد كنت غير غنتنمر عليك ههههه ( ضارت للطبلة ) انا متأكدة غير اليوووم غانزيد شي عشرة كييييلو .. ( مشات كتقرب لدوك ليبواط كتحلهم ) ناااااري الفييييلي ( كتقرب كتشم ) فيييه الحااار ياااك
لوؤي : ( قرب عض فكتفها تاغوتاااات ) شووووفي عندي انا هو الللول نسمع غير شي حاجة زوينة منك .. غييير شكرااا قولييييها و عاااد سيري للماااااكلة ياهااااد البنت .. غااا شكراااا
قدس : ااااااااي ( كتبرد العضة ) واااش نتا غااناكلك ؟ كاااتنكل ؟ لاااا .. وعلاااش غاانبدا بيك ...
لوؤي غادي جيهة المشواة كيضور فراسو وحل ساشي كبير تما بدا كيهز منو الفاخر لي كان اسود مضور على شكل احجار متوسطين ... وشعل العافية وهي جرات كرسي وبدات كتوجد معاه داكشي ... وهو مرة ينوض للمشواة مرة يوريها كيفاش تستف
لوؤي : ماديريش وحدة فوق وحدة .. فرقيهم شوية
قدس : وراه غيطيبو غاايصغاارو مالك ...
لوؤي : عرفتي ومتاكليش هادشي كامل اش غاااااندير فيك
قدس : والله مغتبقى شي حاجة ... ( علات راسها فيه ويديها صفرين بالعطرية ) وهاد صاحبك شكون معرفتوش
لوؤي : سعد ..
قدس : ااااه .. عاقلة فاش هو خدا الماستر فادارة الاعمال و عرضو علينا عائلتو ودوزها عليك عمي عدنان ههههه .. واش هاد البلاصة ديالو !
لوؤي : ديال الفاميلي ديالو .. كنجيو ليها مرة مرة ملي مكنبغيوش العائلة يعرفونا فين كاينين ...
قدس : نتا ومن ؟
لوؤي : انا وخوك .. وسلطان ....
قدس : اممم ( علا فيها عينيه بنظرة ديال منيتك ورجعات كتكمل ) اصلا نتا كون كنتي كتعرف شوية على الناس على برا من غير حنا كون كاع ما تلقاك معايا ....
لؤي : علاش !
قدس : وحيييت كاينين بزاااف دالبنات حسن مني ... يمكن نتا بقيتي غير وسط عائلتك كتعرفني غير انا ههه
لوؤي : ( علا فيها حاجبو باستغراب ) قدس الاسماااعيلي .. كتقول بلي كاينة شي وحدة حسن منها ! نتي !! نتي كتقولي هاد الهضرة ؟؟؟
قدس : ( معلية راسها بافتخار كضحك ) ماااقصدتش زعما من ناااحية الشكل .. اكيييد جمااالاااا صعيب تلقى شي وحدة بحاااالي ( لوؤي جابت ليه الضحكة ) ولكن طبعي شوية صعيب ( كتسد الشواية ) مزال معرفتش كيف كادير تستحملني ....
لوؤي هز عليها الشواية ومشى حطها فالباربيكيو ، وهي بقات شحال كتسنى يجاوب فلخر هزات عينيها فيه فاش مجاوبهاش وعوجات راسها ويديها باقيين فاللحم كتقاد فيه فشواية اخرى
قدس : شفتك مجاوبتينيش !!! عندي الحق ؟؟؟ ندمان !!!
لوؤي جاتو الضحكة تابانت شوية على زاوية شفتو و قلب هاديك الشواية وضار لعندها وجر الكرسي وقرب براسو لعندها حاط يديه على طبلة كيشوف فيها بكل ثقة وحاط عينيه وسط عينيهاااا بنظرات عاااامرين بالحب ....
لوؤي : نتي راااكي عارفة مزيان بلي نندم على حيااااتي ومندمش عليك نت .. وعااارفة مزيان شحااال راني مكااالي فيك ... ولكن عزيييز عليك تسمعيها وتعلي دوك العوينات للسما وتفششي ... ( هز يديه شد حنكها تايداعبو بابهامو ) تفششي احبيبتي ... خوووودي راااحتك ...
قدس حسات بقلبها كيملي عليها تطبق بزاااف دالتصرفات حمقين .. منهم تحط كولشي وتتلاح على شفايفو .. منهم تبكي ! منهم تعاود ليه شحال هي فرحاااانة بيه ومعاه ... ولكن عقلها مانعها دير هادشي كامل و سمح فقط لحرارتها تطلع .... سرطات ريقها وبعدات وجهها من يدو وبدات تركز مع اش كايدير كتحاول تسرح بالموضوع فزواية اخرى ومايبقاش مركز عليها بعينيه بهاد طريقة لي ضعفاااتها وهو عاايق بكل حركة كادير شنو كتعني ..
قدس : امممم .. وهادشي راه مافيهش سوووسپانس .. الى كنت ثااااااايقة فيك مغتشوف تاواحدة اخرى من غيري راه الملل هدا .. مرة مرة دير لينا شوية دالاكشن ....
لوؤي بدا يضحك وناض للمشواة هز حديدة طويلة تايقلب الفاخر
لوؤي :وجيبيلي شي بگرة حلوة بحالك ... يمكن تعجبني .....
قدس : بحالي !! هه !!!! بحااااالي مكااااينش اولد عمي وعمرها غاتكوووون ... كاينة غا وحدة هي انا ....
لوؤي : اوا عيييشي فالملل وسكتينا ...... هادشي لي عطا الله دابا ....
قدس غير عطى بظهرو بقات كضحك فرحانة ... وعمرات الشواية وناضت عندو عطاتها ليه وغسلات يديها ووقفات حداه ... مرة تشوي معاه مرة تبرزطو .... تابدات توجد فوق طبلة ....
قدس : عنداك صاحبك يمشي يقول لجود شي حاجة .... ولا جيت معاك لهنا ....
لوؤي : عارف غانجيب شي وحدة ولكن مغيعرفش شكون .... ( هز شواية وقرب تايديرها فطبسيل ) ولكن ....ماشي عيقنا شوية بهاد الخوف اقدس !!! وهاد التخبية كاملة
قدس : ( كتقاد لي صالاد وتخلطهم ) كيفاش عيقنا ؟؟؟؟ واش منتيك .. كيفاش غاندير منخافش وانا عارفة الى مشى تااا عرف خوويا غاطيح الروح !
لوؤي : وعلاش لي غنخليوها طيح !!! علاش لي ميعرفش !! ..
قدس : اه واخا .. ( جرات كرسي جلسات ) غدا دابا نمشي عندو ونقوليه سلااام جود ... انا البارح تعشيت انا ولوؤي فالفيرمة ديال عائلة سعد مع طناش ديال الليل ومنعرف فوقاش رجعنا لدار .....
لوؤي : ( تنهد وجر الكرسي تاهو جلس ) ماشي بهاااد طريقة خاصها تگال ، ولكن ماااعلينا ... ( كيحط فطبسيلها حداها ) شفتي لاخليتي شي حاجة تما مكاينش لي غيفكك مني ...
قدس : نااااااري غاانزيد نغلاااض الوؤي
لوؤي : هادشي متيغلضش .. هادشي راه صحي ( حيد ليها الصودا من حداها ) هاااا شنو مامزيانش .. وداك السكريات لي كتاخدي .... والماكلة لي مامنظماش ... اما هادشي ماعندو فاش يضرك بالعكس مناعتك محتاجة ليه.... نتي باقا صغيرة وجسمك باقي محتاج للذهنيات .... بعدي غير من شنو غيمرضك واي حاجة طبيعية كوليها ( كيحط ليها الصالاد تاهي حداها ) غير داوني سپور ديالك مع الماكلة وماعندك مناش تخافي
قدس : تا السبور وليت كنعكز عليه بزااف ( كتاكل وتهضر ) شفتي كيف كنت فالكوليج .. كنت كنوزن غير خمسة وخمسين حيت مكنتش كنخرج من الملعب و ديماااا فالويكاند كنزل مع بابا للاصال كنديرو حتى لتلاتة دسوايع فالنهار... هاد العام اللخر طفى ليا داك العشق لي كان عندي فالتنس .. وليت كنميل للنعاس بزاااف وللعكز معرفتش شنو سبب ولكن بغيت نحيد مني هادشي ....
لوؤي : (مركز مع الموس والفورشيط كايجاوبها ) هاد العام اللخر هلكتي راسك بالتفكير ... لاحظتك دخلتي فاكتئاب ... معرفتش شنو تايقولك راسك ولكن افكارك هوما لي خلاوك تعياي وكتباني بحالا درتي مجهود .... وهادشي سبابو كامل دوك صحاباتك لي سامحين فيهم واليديهم ومخليينهم يديرو لي بغاو .. تاتشوفي حياتهم زويييينة وديالك مخنوقة .. ( قدس غير ساكتة ) بلا متعاودي ليا والو كنعرف اش كيضور ليك فراسك .. خوف العائلة عليك كتشوفيه نتي حبس ... وحتى انا كنتي كتشوفيني واحد بنادم لي خانقك غا حيث خااايف عليك ... وباااقي عندك هاد الفكرة لدرجة الزواج بيا خالعك .... تحرري شوية غير من هاد الافكار ديالك .. وغاتولي بيخير ....
قدس غير ساكتة ... حسات بانه عندو الحق فشي تفاصيل ولكن كتحس بلي تاهي عندها بزااااف ماتقول ، اختاصرات كولشي فتنهيدة مكملة ماكلتها ....
لوؤي : ( كياكل ومراقبها ) مضضضغي مزياااان
قدس : واش غاااتبقى مقااابلني انا بنية صغيرة !
لوؤي : ( مسح ليها تحت فمها مركز معاه مجاوبها ) نتي هي بنتي هاد ساعة حتى تجي بنتنا ...
قدس : ههه ( جاتها الضحكة وعلات عينيها فيه ) لوؤاااي
لوؤي : اممم ( كيمضع )
قدس : نتا من الناس لي كاتبغي الولاد الصغار ولا لا !
لوؤي : ماعنديش مع صداعهم بزاف الصراحة .. مي الا كانت شي بنوتة كتشبه ليك .. ولا شي وليد منك نت .. غنبغيه بزز عليا ....
قدس : بعد مرات فاش كنفكر بلي ممكن شي نهار نكون ام كايجيني الامر بحال شي حاجة غرييييبة ومستبعدة بزاااف باش طرا ... كذلك نتا مكنشوفكش اب هههه كتجيني فشكل
لوؤي : حيت باقين صغار عليهم .. الولاد مسؤولية صعيبة صراحة .. مزياان يكونو عندك من شي مراة كتبغيها ولكن ماشي من اللول ... كنفضل بنادم حتى يدخل فالثلاثينية ديالو عاد يستقر مع شي بنية ولا وليد ..
قدس : والزواج ! مكتشوفش بلي راك باقي صغير عليه ؟ زعما لنفترض انا مكايناش ( ربعات يديها على الطبلة ) وباباك بغا مثلا يزوجك ... غتبغي تزوج !
لوؤي : معنديش مشكل فالزواج حيت قاد عليه الى مكانش غايكون فيه مسؤوليات د الولاد من اللول ... ولكن المشكل غايكون فانه يزوجني شي حد هههه هادي مايمكنش ....
قدس: ونتا تقدر تخسر الخاطر لباباك !
لوؤي : ( مسح فمو وحط المنديل وشاف فيها ) قدس لي كنعرف فاش كتبغي تهضر معايا .. كتهضر فكاع المواضيع الا الزواج ... الى غير تجبد فالهضرة بالغلط كتقلب الموضوع باش مانتفكروش ونهضر ليها عليه .... اش جاك هاد الليلة باش دوي عليه نت !
قدس : عاااادي ..كنهضرو وصااافي .. الحماق ديال ورا طناش دالليل .. بغيت غير نعرف الى قاليك باباك ضروووووري تتزوج .. واش غتخسر ليه الخاطر!!
لوؤي : انا مكنخسرش ليه الخاطر ... فنفس الوقت مكنخسرش الخاطر حتى ليا انا ... ونهار قالي خاصك تقرا المناجمنت وتاخد فيها ماستر قلت ليه آه ... ومشيت ... ولكن قريت اش بغيت ..... كذالك فالزواج ...
قدس : شنو زعما ؟ غتقوليه آه وتدي لي بغيتي !!!! ( لوؤي غير كيشوف فيها موافق كلامها ) هاااادي غير هضرة ... مايمكنش تطبقها .. القراية لي قريتي و خدمتك راك مخبيييهم الوؤي عليه .. اما الزواج صعيييب تخبيه عليه .... وهاد المسألة مافيهاش الضحك ... ( مسحات فمها وبعدات طبسيل بعد ماشبعات وربعات يديها تاهي على طبلة كتشوف فيه ) باباك باااغي يزوجك الوؤي ...
لوؤي : يعني ....
قدس : ( علات حجبانها بجوج ) فخباااارك !!!!
لوؤي : ( تنهد وهز الما شربو وحط الكاس وشاف فيها بجدية ) الواليد كنعرفو فاش كايفكر قبل حتى مايقولها ليا ... الواليدين ديالنا ماعندهمش هموم فهاد الحياة كتر من الاستقرار ديال ولادهم ... ولكن الغلط ديالهم ... هو مكيتيقوش فينا ... انا عارف مزيان الهم ديالو ... وكنفهمو كثر مكيفهمني هو ... عارفو باغي ليا مصلاحتي .. ولكن راه تانا .. ، تانا عااارف مصلااحتي فين ... حيت هو كيشوف مصلاحتي بنظرة دالخوف .. وانا كنشوفها بالثقة .. من نهار عقلت على راسي .. وانا والوليد ديما مكنتفاهموش ... منهار كنت باقي ولد عشر سنين وكيبزز عليا ندخل مع الخياط ياخد القياسات دالكوستار لي نحضر بيه للمؤتمر معاه ... كنت كندخل مع الخياط وكنخليهم يديرو لي بغاو ونهار المؤتمر كنمشي بالحوايج لي بغيت انا ... نهار كان كايبزز عليا نمشي للشركة باش نكبر تما معاه ويخليني نبغي البزنس فعمر صغير ... كنت كاندير ليه خاطرو ونمشي ... ولكن كندوز نهار كولو مع السيكيريتي فالبيرو دالامن .... حال عينيا فالكاميرات وكنشك فاي واحد دخل و اي واحد خرج ... وتا نهار خديت الباك وبزز عليا نقرا المناجمنت .... انا كنت باغي تما ندخل للعسكرية الفرنسية للقوات المسلحة مكنتش غاندير المناجمنت بمرة .. ولكن الايمايل دالاستدعاء لي جاني من فرانسا وقراه .. هو لي فشلني ... ( قدس نزلات راسها كتفكر )
قدس : وكانت جاتو كريييز ... و بسباب هاديك الكريز مشيتي قريتي المناجمنت ورا الباك بزز عليك ....
لوؤي : فهاديك اللحظة ... واحد بلاصتي غايكون تخلى على الحلم ديالو ومابقاااش يعاود يدير عكس كلام باه .. ولكن انا لا .. انا تماك قررت باش عكس كلامو نبقى نديرو ولكن بالسر .. نديرو .. ولكن بلااااا مايشوفو ولا يعرفو ولا يرد خبارو باش مايمرضش ، الموهيم ماااانتخلاااش على حلم حلمت بيه من وانا صغير ... نقدر نجيك اناني .. ومغانكذبش .. انا بصح اناااني .. اناني بزااف فالحوايج لي كنبغيهم ... اناني فأحلاااامي .. كنتقاااااتل معاهم ... كنفضل نكون اناني على نعيش طافي ... طااافي بحال خوك جود دابا ... منقدرش نعيش حياة ماباغيهاش ، ومهنة مباغيهاش ... ونضطر نتزوج بنت مباغيهاش .. وندير تصرفات مباغيهمش غير باش نرضي خوف الواليدين ونعيش حياااااتي كااااملة طافي كنتسنى فوقااااش نولي نبغي احلامي الجداد وخدمتي الجديدة ومراااتي الجديدة !!!! خوف الواليدين عندو فترة وكيمشي .. كيمشي نهار لي نكتسب الثقة ديالهم فشنو كندير وطريقي لي غادي فيها ... وثقة كنكسبوها غير نهار كنجحو وكنبينو ليهم بلي ماااعندهم منااااش يخافو .. كنفضل نبكي الواليد ديالي نهار واحد ... على انني نبكييبه ديما كل ماشاف وجهي شحااال طافي وحياتي بااااردة ... بغيتو يشوف ولدو فرحااان .. فخدمة باغيها واحلام باغيهم ومراة بااااغيها .... وغاانتقااتل على هاد تلاثة دالحوايج تااالآخر نهار فحيااااتي .... انا انااااااني فأحلامي .... اناااااني فالحب ديالي .... داكشي علاش ( خشا يدو فجيبو وجبد بواطة كحلة و حطها فوق طبلة وحلها وقدس وسعات عينيها فاش لمحات الخاتم ) خااااصك تزوجي بيا .......
وسعااات عينيهاا كااتشوف فداك الخاتم مصدومة !!! لي كان خاتم رقيق فضي متوسطاه ماسة مربعة لامعة ... وعلات عينيها فيه هو لي كيشوف فيها وكيتسنى جوابها ....ونطقات تالفة على الحروف....
قدس : ل .. لوؤاي !!!!! ( حسات ريقها نشف ) لوؤي كضحك معايا !!!!!
لوؤي : مضاحكش دابا ...ولكن باغي نضحك هاد الليلة .. ماباغيش شي جواب لي يخليني ماانضحكش ....
قدس : ( تنهدات كترجع شعرها لور حسات بالصهد والخنقة ) لوؤي راك بديتي كتخربق دابا ... بديت كنحس براسي بحالا كتشمتني .. ياك حنااااا هادشي هضرنا عليه ووضحناه شحال من مررررة ! ..
لوؤي : ( مد يدو شد يديها عندو جابدها لجيهتو ) قدس ... قلتي ليا ماباغاش زواج وقلت ليك نتسناااك عمري كااااامل وباااقي عند كلمتي ... ولكن الامور نتي كتشوفيها فين وصلااات مع الواليد ... و مبقيتش قااادر مزال على الخطر معاك وكنخرجك خيفان بحال شي مراهق ، مقادرش حتى نبغيك فخاطري ... مابغيتيش زواج مانتزوجوش .. ولكن خطبة رسمية خااصها دّااار اقدس باش منبقاوش كنتبرهشو هنايا .. نهار قلت ليك نتنسناك مكذبتش عليك وغنتسناك ماعندي تاشي وحدة من غييييرك ... ونتي عاارفة مزيااااان وشرحت ليك بلي مكنديرش شي حاجة بزز عليا .. يا بالحرررب يا بالحيييلة ... الواليد باغي يزوجني وهضر معايا شحال من مرة فالموضوع .. وكنشوف فعينيه شنو لي كيفكر فيه وباغي يخليني نستقر بالزواج وكنشوف بلي يا غذا يابعدو غايبدا يقترح فالبنات .. ومغاااانبغيييش .. ومغاااندي تاشي وحدة ... و غااانطيح معاه فالمشاكيل تاني .. داكشي علاش .. كووني حدايا .. خليني ندير خاااتمك فيدي ... باش مانضيع خاطرو هو مايضيع خاااطري انا ....
قدس : ( سلتات يديها منو ) باباك بااااغي يزوجك غير باش يشوفك مسسستقرر .. حيت عند بالو بلي نتا ماخدااامش وكتسافر غير تضيع الوقت .. الى بغيتي ماضيع لا خاطرو هو لا خاطرك نتا لا خاطري انا .. هي تمشي تصااارحو بخدمتك باااش يتهنى .....
لوؤي : ( جاتو الضحكة بالفقصة ) هههه .. يتهنى !!!! يتهنى على ولدو لي موقف على الخدمة حيت خرج السلاااح من الفيدرالية بلا خبارهم ؟!!!!!!
قدس دفعات الكرسي وناضت كتمشي وتجي بتوتر وشافت فيه ...
قدس : اوا خدم ... خدم فشي حاجة ياك راك موووقف دابا .. سير معاه للشركة .. خليه يشوفك خداام باااش يرتااح ويبعد الفكرة دزواجك من راسو ... اقترح شي مشروع بدا فيه .. دير شي حاااجة....
لوؤي جر الكرسي وناض عندها ..
لوؤي : نمشي للشركة ! دابا نتي .. بلاصة مااتخطبي ليا قدام الناس تفضليني نمشي لبلااصة انا محااملهاش نضيع الوقت !!!!! نطمع الواليد واحد العام بينما رجعوني ونرجع ثاني !! هدا سميتو التبرهييش وانا مكنقدرش نتبرهش فالاومور لي كتخصي حياااتي ومستقبلي ....
قدس: لااااااا الوؤي لااااا ... ماايمكننش يكون غير هاد الحل لي بقى .... راااه دبصح خاصك تستقر فشي حاجة شحال قدك تخبي !!!!!
لوؤي : ( بنفاذ صبر ) وحيييت مباغيش نخبي ، داكشي باس كنقوليك خااص كولشي يعرف ... الى مخبي خدمتي ...راه حيت هاديك كتخصني بوحدي ومتحمل مسؤولية راسي .. ولكن نتي .. لاااا .. مااباغيييش طرا ليك شي حاااجة .. مااباااغيش نغاامر بيك ... ( جات ضور وضورها من ذراعها ) انا بغيييت نعرف حاااجة وحدة ... علاش هاد الخوف كامل ماافهمتش ؟؟ شنو لي مخليك متبغيش العائلة تعرف !!! واش ( كيضرب ليها بصبعو جيهة راسها ) هاد الراس عندك تايقولك بلي هادشي غيسالي بيني وبينك شي نهار وتكون الساحة خاوية لييك تسااليه فوق مابغيتي بلا ماتكوني هازة الهم للعائلة اش غاتقول !!!!
قدس : ااااه ..... اه حييييت انا معارفاش المستقبل شنو فيه ومعاارفاش نتا كيفاش غتكون مع الوقت .. اااه .. هانا شفت اندفاااع البدايات والحماس ديالك .. ومنبعد ؟ الى طفى هادشي .. الى تبدل !!! الى حسيتي براسك شوية صافي ضمنتيني وتبدلتي عليا !!!! ونتا غير البارح قلتي ليا موافق نبقاو فالسر ومكاملاش تاااشهر هانتاااا كتقول ليا نتزوجو !!!!!
يتبع...
التعليقات
لا توجد تعليقات بعد، كن أول من يعلق.