محتوى القصة
دخل بززربة لانعاش كايشوف فجود مخسر ملامحو هاز يدو كايدوزها على داك الشاپو بحالا باغي يعرف شنو تما و كايرمش بعبنيه يحلهم ...
اياد : ( بفرحة فوجهو ) جووود ( قرب حداه و شد ليه يديه كايحدهم من راسو حيت بان ليه بحالا غايخيد الشابو وجود كيحاول يحل عينيه مزيان ) جووود على سلااامة اخويا ... على سلاامتك .... جوود نتا لااباااس .. لاباس ياك ؟؟؟
جود دايخ كيحاول يحل عينو كلو كيتأنن وتيعوج فعنقو عنكشوه الخيوط .. حل عينيه كيشوف قدامو وكيرجع يرمشهم ويحلهم تاني وعلا عينيه فاياد ..
اياد : على سلاااامة .. ( بضحكة ) آلحمد لله ... بشوية عليك ... بشوية ...
جود : ( كيحاول يحرك شفايفو وكيهضر بشوووية مكنش عينيه بحالا كايشوف فالشمس وكايحس بالعافية نايضة فحلقو ) ل .. لما ... لماا
اياد : ( هبط ودنو لفمو يسمع ) نعام ؟؟؟ ششنو بغيتي
جود : ( مكيقدرش يرفع صوتو ) ل .. لما ..
اياد : ( علا راسو ) ااء ؟ لما ! .. م ماييمكنش .. م م منقدرش م نعرف ( كيشوف موراه للباب باقي شاد فيديه وجود مزيير على يدو من الالم لي بدا يحس بيه فراسو واياد شاف فيه كولووو كااايتررعد بالتوتر والعرق كااتصب مع ظهرو بالفرحة والخلعة ) ت تايجيو ... اا انا نعيط ليهم .. واش نتا لاااباااس ؟؟؟؟ ك كتحس بالحريق ؟ عندك الحريق فشي بلاصة ؟؟؟؟ ماللك ؟ ج كتسمعني
جود غير غمض على عينيه وعاود حلهم ومزير سنانو باغي يتكعد واياد كيشدو
اياد : لا .. لا .. لا جلس رتااح بشششوية ... هانتا تنفس غير بشوووية عليك راه مواقع واااالو .. متخافش .. غير بشوووية ...
يلاه غيطلق من يديه وهي تحل الباب دخل اسد بزززربة اياد شاف فيه بفرحة
اياد : فاااق اعمي .. هضر معايا ...
اسد : ( جا بزربة كيشوف ليه ) جووود.. ولدي .. ؟ جود كتسمعني اولدي .. شوف فيا كتسمعني ...
جود : ( حل عينيه وشاف فيه ومد يدو كيحيد جهاز الاوكسيجين واياد كيشد ليه يديه وقال بعصبية ) ل .. لماا
اسد : بشووية اجود .. طلق من داكشي .. انا غنعطيك الما دابا .. واش ديخان اولدي .. كتشوفنا مزيان
جود كيحس بببحلقووو ناااشف مقدرش يهضررر وذاتووو سخونة بحالا شاعلة فييها العااافية وفمو ناشف وقال بنرفزة كتررر مزير على عينيه ماحمالش راسو يفيق يلقى راسو فكلينيك تاني خالعهم
جود : لللماااا
اياد : ا انا غنعييط ليهم ... صببرر اجوود صبر ...
خرج اياد كيجري كيقلب على طبيب ولقا غير الفرملية وهي مشات كتجري تقولها لطاقم ورجع تاني دخل لشومبور لقا اسد كيهدنوو
اسد : مواقع والو اااوولدي .. غيير بشوووية .. هاهوما غيجيو دابا يعطيوك الما .. غير بشوووية ... حل عينيك مزيان شوف فيا الى قدرتي ....
بدا يتنفس جود وحل عينيه فباباه واسد تبسم ليه وباس ليه يدو بضحكة فررررحة وفخخررر
اسد : ووولدي الممحاااارب ... ( شاف فياد بفخر )ولدي لي مكاااينش لي ييهدو ... ( شاف فيه ) المععععكس ديالي .. معكس تا مع المرض ... هاااكداك اولدي هاكداااك عااااندو ....
اياد : جوود ... كتسمعنا ياك ؟ تقدر تهضر ؟ .. ولا عرفتي شنو .. بلاااش ماتعييش راسك .. غير رتاح .. الى متقدررش ...
جود علا عينيه فاياد كيشوف فيييه مطووول ... يلاه استوعب راه اياد هاداك!!!!!! كايرمش فيييه و الفرحة لي فوجهو المخلطة بالتوتر ....تادخل الطاقم بزربة لي عبارة على ثلات دكاترة ودكتورة و مع الفرمليات .. مبتسميين للاسد واياد وخرجووهم بزربة واسد واياد خرجو بقاو كيشوفو من زاج وهوما ضااارو بيه كايفحصو تامبقاش كايبان .. كايبان ليهم غير كايعطيوه يشرب ....
اسد : الححمد لله ... الحمد الله
اياد : كيبان مزيااان ... ز زعما يكون ناسي تاني ؟
اسد : مماعرفتش ... مكانتش شي كريز كبيرة ... يقدر الى نسا غينسى غير يوماين لولا ..
اياد : اووودي مزيان غير لي فاق وعاااش ينسى تا سبع سنين ....
اسد : ( كيشوف من الزاج و باقي كينهج بالتوتر والفرحة ) هبط ... هبط قولها ليهم ..... نزل ...
وما ليه بالايجاب و الفرحة ظاهرة عليه .... نزل فالاسونسور تحل ليه فالكولوار فين كاينة قدس و وسيم وقالها بفرحة وقدس غووتاااات وعنقات وسييييم وطلعو وهو ضار عليهم كااملين ودخل لشومبر فين لامار قالها ليهم تافاااقت ررقية مفجوووعة ... وحياة قالت ليهم غير يطلعو هي تبقى معاها ... وعيط فتيليفون لعمامو وولادهم ..
ماهي خمسة دقاق تاكان كولشي معرم حدا بابا الانعاااش واسد باقي واقف فالزاج والطاقم معاه وبيلسان كتمشي وتجي متوترة وفرحانة وقسم معنقة عندها قددس فرحانين فوقاش يدخلو دغيا يشوفوه فايق ... حسو برااسهم تووحشووه .. واااحد الفرحة كانت غااامراهم و بدلات ملامحهم من عيووون حزيييينة لللفرحة .. كتاب عائلتهم و الحب لي مكتوب فسطورو يقدر يقراه حتى لي ماقاريش ....
رقية : ( هازة يديها ) يااربي يااربي راااني حااامداااك وشااكراااك .. ياربي لاماتشوف من حالو ياااااربي .. ياربي تحفظو لواااايديه ياربي الحبييب ...
رتاج : ( كطل مع اسد من الزاج ) كيطيسطيوه ؟؟؟؟؟
اسد : فااق كيقلب على الما
رتاج : راه الدم ديالو كان تجمد .. سينوغمال يرجع ليه بالسخونة غايحس بجسمو كايتحرق غايحتاج الما بزاف .....
عدنان : ( واقف حداه كيشوف ) واش هضر نييشان
اسد : كان كيقول غير لماااا ...
سفيان : ( كيمشي ويجي ) مزااالييين !!!
زياد : خليييوهم على خاطرهم تايديرو خدمتهم راه مصصلاحتو .... حنا باراكا علينا غير فاق وهضررر ..
سلطان : خالتي لامار مفاقتش ؟
قسم : نو ... راه دكو ليها المنوم .. مزالا مافاقت غير تتخطف وترجع تنعس ....
سلطان : الواليدة معاها !
قسم : اااه ...( شابكة يديها حاطاهم حدا فمها ) ياااربي ياااربي فوقاش يخرجوو دغياااا ...
اريج : ودابا بشوية بشوويية متعرمووش عليه .. يدخل بالوااااحد خليو للولد ايسباس فين يتنفس .. راه باقي مريييض ... شوفو غااا من الزاج ...
سلطان : بارتكا يدخلو غير واليديه وخوتو ... حنا تاايولي صاافااا ...
لوؤي : ( كايطل ) علاش شعلو فيه داك الضو ؟؟؟؟؟ اش دااااكشي ( كايشوف تشعل فالكاسك ضو حمر
رتاج : الليزر ....
لوؤي : فففففف بنادم تايدخل لكلينيك كايرجع غير أباراي كايديرو بيه مابغاو
رتاج : وهاد المهنة لي غاتبقى كضحك عليها راه هي لي كترد بنادم من الموت .....
زياد : وداااباااا يخرجو غايوقلو لينا حالتو نيشان يعطيونا شي بيلون نييشان ....
بقاو كيتسناو على اعصابهم وكل مرة يشوفو لساعة كانت السبعة ونص ديال صبح ...تاتحل الباب خرجو الممرضات وتبعوهم الطاقم مبتاسمين ليهم ...
الدكتور : الحمد لله على سلااامتوو ... بلا منوصيييكم عافاكم .. راه محتاح ضرووووري لراحة ومحتاج ينعس .... .ديجا لقيناه مععصب شووية ومنيرفي وحاولنا نهدنوه ... نفسيتو مزال ممستقراش ونتوما كتعرفو نفسيتو عندنا امر مهم فالشفاء ديالو .... وفتدهور الحال ديالو ايضا ... دااكشي علاش كونو نتوما هنا اطباء بلاصتنا معاه ومتكتروش عليه على الاقل تايخرج للشومبر ... عافاكم ... لمصلحتو ....
يونس : فوقاش غيخرج للشومبر ؟
الدكتور : يزيد شوية نتأكدو بلي راه مزيان ... جود انسان قوي بزاف وغيتخطاها ....
بيلسان : ( دفعاتهم ودخلات وسطهم كتشوف لطبيب) اا . فاق صافا ؟؟؟ ماعندوش شي حاجة خطيرة ؟ مكيحرقو والو ؟؟؟
الدكتور : لا لا صافا كيف قلت غير نفسية لي شوية عندو منيرفية ... ومعصبة ... يرتاح يولي مزيان ...
بيلسان شدات على فمها كتبكيي فنفس الوقت مبتسة بفررحة .... وصوت بكاها ولا مسموووع وشهقاتها وقسم عنقااتها
بيلسان : فااق اقسسسم .. فاق .... راه بييخررر
قسم : ششششش .. بشوية ومندخلوش عليه تاني هاااكاااا .. شش ...
علات عينيها عند اسد بانليها حل لباب دخل عندو ... ورجعو هوما جلسو براحة تايقدرو يتنفسو مزيااان وعدنان فالزاج هو ولوؤي ورتاج ... تبان ليه اسد من داخل كيشوف فيه وكيشير ليه يدخل عندو .. ودخل عدنان كيحاول يتحكم فدموعو ولوؤي ورتاج كيشوفو وجا وسيم حداهم كلهم كيشوفو والابتسامة مرسومة على شفاهم ....
دخلو اسد وعدنان وجود قلب عينو لعندهم من بعد ما كان كيشوف لدوك الاجهزة .. غير .. شافهم حاول بشوية يتبسم واخا العياء واضح عليه ... داك الابتسامة لي مبتسم غير مصطنعة بقوة الفوضى لي عندو فراسو ومباغيش يبينها باش ميخلعهمش ... وفرحان لي ربي عطاه فرصة اخرى يشوف عائلتو .....
عدنان : ( شد ليه يديه وجود حس بيها باااردة لقا فيها راحتو بسبب الصهد لي كايحس بيه ) على سلاااامتك اولدي على سلااامتك ....
اسد : لاباس اولدي ؟ شوية دابا
جود حرك ليه راسو بآه وشاف فعدنان لي تكلم معاه ...
عدنان : متفكر فوالوو اولدي حناا كووولنااا لاباااس وبييخير .. فكر فحاجة وحدة هي صحتك ورتااااح .. ومااتعصب ما والوو... كولشي راهم على برا ( شارو ليه للباب وجود هز عينيو لزاج ولوؤي اشار ليه بيديه بابتسامة ورتاج تبسمات ووسيم تاهوا اشار ليه براسو ) كولشي فرحان ملي فقتي على خير وبيخير .... رتااح ورد صحيحتك ....
جود : ( شاف فاسد باقي تيهضر بشوية ) فين لامار ؟ ...
اسد : لامار ؟ .. تاهيا كاينة اولدي متخافش
جود : ( بعياااء ) لاباس عليها ؟ ماتخلعاتش !
اسد : واشوية ضروري ولكن راها لابااااس دابا ملي فقتي ... تشوفها ؟ ندخلها
جود : ( حرك راسو بلا وكايهضر بعياء كبير وكايسرط فرقو بين كلمة واخرى ) لا ...بغيت نعس ... رد معاها بالك طونسيون ديالها غدار
اسد : متخافش اولدي غير رتاح
عدنان : هاحنا غير هنا فكولوار ... نخليوك تنعس ... . غييير نعس ... شحاال مارتاحيتي راه مزيان ....
جود: ( زير بيه على يدو كايشوف فيه ) نتا لاباس ؟
عدنان : انااااا لااااباس اولدي برا لينا غير نتا ( جود علا عينيه فباباه كايتأكد تامنو واش راه صافا ) شحال ... ( زير مدة على عينيه بالحريق عاد كمل ) الساعة
اسد : السبعة ونص ... فيك الحريق اولدي ؟
جود : شوية شوية ....
عدنان : رتاح غاتولي صافا غايخرجوك من هنا راني عارفك محاملش تجلس هنا ... صبر غير هاد الشوية .....
جود حرك راسو بعياء واسد هبط عندو كتر
اسد : رتااح نعس تالمنبعد تشوفهم كاملين ....
رجع عدنان باس يدو وجود خطفها دغيا باحراج من عمو .... و طبطب ليه على يديه بمعنى راني لاباس وخرجو واسد كل مرة يضور يتأكد تاكان وصل لباب ورجع عندو غطاه وجود جاتو الضحكة وسط المرض كايحمد الله على عائلتو ... عاد خرجو ... وهو علا عينو لزاج وشاف فوسيم و بدا يومي ليه براسو بمعنى دخل لعندي .. وسيم قرب لباب غير شافتو قدس قربات عندو ...
عدنان : خليوه ينعس اولدي فيه النعاس
وسيم : هو لي عيييط ليااا ...
بيلسان : ( شافت فقسم بفرحة ) عرف وسيم ؟ يعني راه عااااقل .. فاق عااقل علييينا ..
قسم : واشتي قلتها ليك غانتي هازة الهم لوالو
بيلسان : ( جمعات يديها حدا فمها بضحكة ) الحححمد الله ...
اسد : دخلي معاهم اقسم ...
مشات قسم لعندهم ودخلو بثلاتة ضااحكين وقدس كتمسح دموعها وقسم عييينيها حماااااارو وتجمعو فيهم الدموع حابساهم بزز قدامو ....و وقفات قدس وقسم من جنب ووسيم من جنب
وسيم : واش المش كيموت ... سبعة دالرواح هههه ... ( ضربليه على يدو ) على سلااامتك ....
قدس : ( نزلات عنقاتو حاطة راسها على صدرو ) كون وقعات ليك شي حاجة كنا غااانتسطااااو
جود : ( تبسم بعينيه ومد يدو حطها على راسها ) بالفرحة ؟
قدس : ( علات راسها فيه كتبكي ) ااااه بالفرررحة .. وبااااااز ياخويا هههه
قسم : ( كحزات قدس وقربات ليه هزات يدو باستها ) خويا الحببيب ... متعاودش تلعب معانا هاد اللعب ....
وسيم : مرة مرة كيبغي يعرف راسو واش عزيز هههه اودي راك عزيز غا متبقاش طيح منا النص
جود: ( بابتسامة حنينة فيهم ) تخلعتو ياك !
قدس : لا لاااا دغيااا عرفناك صافا .. ماتخلعناش بزاف ماديرش فبالك ......
جود بدا يشوف فيهم بعياء ومكافح مع الالم ييخبيه .... وعلا عينيو شاف فالزاج فرتاج ولوؤي لي تزاد معاهم سلطان كايشير ليه بيدو كيضحكو ووما ليهم تاهو غير بعينيه ورجع شاف فخوتو
جود : فيناهي داك الزعرة !
قسم : ههه راها على برااا ... ماتصورش شحال تخلعات عليك ... طارت بالفرحة فاش عرفتي وسيم ههههه قالك هاهو فايق عااقل ههههه .. حسابتها غتقولها شكون نت هههه
جود : ( دار تبسيييمة عيااااااانة ) عيييطي ليها ....
ضارت قدس براسها وبدات كتقول ليهم غير بفمها اسم بيلي وسلطان دغيا فهمها وضار براسو
سلطان : بيلي .. دخلي كيعيطو ليك ...
بيلي وسعات عينيها وناضت بزربة على الكرسي
بيلسان : انااا !!!!
سلطان : سي نت .. دخلي ...
بيلسان ضحكات بالففرررحة والحماس .. ومسحات دموعها ودخلات ومشات اتجاه لبااب واريج مبتسمة ... اما اسد كان هبط لتحت يشوف لامار واش فاقت .... حلات لباب وطلات غير براسها ودموع ثاني بداو كاينزلو ... وهو شاف فيها مكمش ملامحووو وهي علات حجبانها ... وبدات داخلة غير بشوية وبخطوات بطيئة وقدس وقسم ووسيم كيشوفو فبعضياتهم مالو تايدير فيها هاد الشوفات !!! دخلات متخوفة فنفس الوقت مبتسمة وحشمااانة ووسيم خوا ليها طريق ووقفات حداه .. ماعرفات تضحك ولا تلااح تعنقووو ولا تغوت ... وقالت وهي فرحانة
بيلسان : ج ج ود .... ع ... ح ح .. حمد الله .. . على .. سلامتك( كتحبس اابكية تاتقج صوتها )
شافتو مجاوبهاش غير كايشوف فيها اما هو كان ساهي فملامحها الباكييين عليه لي اول مرة يشوف شي بنت من غير خواتاتو كتبكي عليه !!! .... وهزات راسها كتشوف فوسيم وكتسول قسم بعينيها علاش كيشوف فيا بهاد الطريقة وكلها بدات كترعد وقلبها بدا يضرب بجهد .... ورجعات كتشوف فيه تااا من الللون مشااا من وجهها وشفايفها رعشووو .... بقات غير كترمش فيه بخيبة امل و الفرحة كلها تحيدات من وجهها وهي كتشوف نفس داك النظرة لي شافتها هادي ربع سنين
بيلسان : ( بشفايف كيرعشو ) ج ... ج . . جود .. ا ا.. ( علات عينيها فقسم والدمعة هبطات ليها ورجعات شافت فيه ) م . م .. معقلتينيش ؟؟؟؟ ( غير كيشوف فيها وهي تحنات لعندو وشدات يدو بزربة ) اانا بيلسان .. ب .. .بنت عمك ... اااه بنت عمك يونس ... و . ... و اريج ... ااه .... كتعرفني .. يمكن .. كتعرفني .. ولكن .. انا وياك ( مدات يديها لي كان فيها الخاتم ) مخطوبين حيدت الخاتم برا باش ندخل عندك .. كان هنا خاتم والله .... .. تخطبنا البارح .. ب .. باقين عندي تصاور ( بدات تقلب فجيبها ).... ر رارهم فتيليفون برا .. ن نخرج نجيبو نوريك ؟؟؟؟ ( شافت فقسم ) هانتا سوووولهم .... والله الى تخطبنا لبارح
كتهضر بزربة وكلها كترعش ودموع كينزلو وهو كيشوف فيها ووسيم علا حجبانو .. اول مرة غيشوف بيلي هاكا ! وقسم شافت فقدس لي ندمات كاع على داكشي لي قالت ليها حيت باين موضوع انه ينساها شحال هو صعيب بالنسبة ليها كلهم كانو ضاحكين حيت عارفينو مطلعها عليه ولكن رد فعلها هجر ليهم الضحكة ....
بيلسان : كك .. كنا فرحانييين .. وو تانتا كنتي فرحان .. درتي اكسيدون نسييتيني .. وو بعد ربع سنين عاود تعارفنا ... متتفكرتينيش ولكن .. م م معرفتش كيفاش نشرح ليك .. حتى دابا ماشي مشكل تفكرني .. مهم ... تفيق .. ون نعاودو ثاني من جديد .. نعاودو نتخطبو معنديش مشكل .. ماعنديش مشكل نبقى نلبس الخاتم كل نهار من جديد .. غ غير صح وو لي لاباس . وو انا راه غ غانبقى ديما حداك
يلاه قالتها وهز يدو عنقها هبطها لعندو وهي طاحت على صدرو كتششهق وتبكككييي وهو غمض على عينيه ندم كاع علاش ضحك معاها هاكا وخلعها ... تا خوتو كلهم سكتو .. وقسم غمرات لوسيم وقدس بمعنى يالاه نخرجو ... وانسحبوو بشوية غير حلو الباب بانو ليهم سلطان ولوؤي كيحكو فعنقهم مبعدين على الزاج ورتاج تاهي مشات جلسات ومشاو كيعاودو لرقية لي كتشوف فيهم ضاحكة كتسناهم يخبروها واش هضرو معاه واش مكيحرقو والو ..
اما جود غير كيشوف قدامو وبيلسان كتبكي فصدرو وهو معنقها بيدو لي واخا عامرة بالخيوط ولكن قوا منها هي لي منهارة بهاديك الطريقة .... مزير على كتفها ومحاملش راسو كاع لي غيعيشها فهاد العذاب طول حياتها معاه .... دابا اه ضحك .. ولكن تقدر تكون بصح !!! شي نهااار ......
جود : ( كيزير على راسو يهضر وصوت كيخرج عيان ) شششش ... غا ضحكت معاك ... غير سكتي من البكا ... م ..( كيتألم من الحريق لي فراسو ) منسيتكش ....
بيلسان غير سمعات داك منسيتكش رجعات شهقات تاني وبقات كضرب ضربات خفاف فصدرو معاااتباااه كتبكي وهو غمض على عينيه بالالم لي مزال فراسو وكيدوز يدو على شعرها .
جود : ( مخسر ملامحو بالحريق ) صافي منعاااودش ... ( كيطل عليها ) بيلساااان .. وصافي سكتي راه مقادرش نهضر ...
غير سمعات اش قال فلخر وتفكرات فين هو وراه مريض وهي تنوض عليه بزربة وقفات كتقاد شعرها لي تخربق
بيلسان : وو واش ضريتك ؟؟ ها ؟؟ ضرييتك ؟؟ صصافي .. هانا ... ن نسيت كاع ... ولكن غا ( قاطعها )
جود : شششش .... سكتي شوية نهضر !!! ( سكتات فخطرة وكتشوف فيه وتمسح دموعها وتحاول تبتسم ونيييفها ححمرررر وشفايفها مجموعين تابان ليها ترخاو ملامحو وبدا يبتاسم ليها تا هو واخا ابتسامتو عياااانة ) هاكاااك ..( تبسم ليها بزز وبعياااء ومزاال كيتعصر بااالام وصابر ليه ) واشوفي دابا كيف بنتي زوينة ونت ساكتة ...( شاف لجنب ) عطيني داك الكاس ...
شافت بيلسان لقات تما كاس دالما لي واضح كان شرب منو وخوات ليه من كاس كبير اخر عامر وعطاتو ليه وهو حاول يتكعد شاد بديه لي عامرة خيوط وبدا يشرب بحال شي عطشان حيت كيحس بحلقو ناشف ... وهي شادة معاه الكاس ... ورخاه ليها ورجع نزل راسو ينعس كولو كاااينهج ....
بيلسان : و . واقلة نخرج نخليك ترتاح .... واش نعيط لطبيب ها ؟ كتبتن ليا فيك الحريق احبيبي
جود : هه !!! ( تجبدو عينيه ملي سمعها ) صافي .. بريت ...
بيلسان نزلات راسها حمرة عاضة على شفتها فرحانة وهو كايشوف معاها ...
جود : كولشي صافا !
بيلسان : ااه ... اه كلللنا بيييخر متتهزز الهم لوالو نتا غير برااا .. تخخلعنا شوية ولكن الحمد الله كولشي غيبقى تعاويد ..... رد البااال كترر مرة اخرى عافااااك ..
جود غمض على عينيه ويديه تيتزيرو ومباااغيش يفكرررر فداكشي ولكن غصبا عليه كيجيي لداكرتووو
بيلسان : جووود ... خليني نعيط لطبيب معحبتيينييييش .. ( بالخلعة ) واش عندك الحريق
جود : (شاف فيها كيفاش دغيا تخلعات وعينيها تعمرو بدموع ) انا بيخير ..
اشار ليها براسو تهبط لعندو هي تحنات وهو شد وجهها وهي تحس بيديه سخووووونين ....وقرب راسها لفمو .... وباسها بشوية فجبهتها تاغمضات عينيها ودموع كينزلو على صدرو وعاضة على شفتها شادة داك الشهقة كااتحسس يديه لي فوجهها ..
جود : سيري ترتاحي .. قولي ليهم راه صافا .... ومتبقايش تبكي بزاف ..
بيلسان : ( علات عينيها فيه كتبسم وتمسح دموعها ) نتا لي خصك ترتاح ... حنا كلنا بيخير ...
وقفات كتمسح فدموعها هو تبسم ليها وتاهي بادلاتو نفس تبسيمة
بيلسان : ككننبغييييك ...
غمض عينو جود بابتسامة وعاود حلهم فيها وعطاها بوسة فالهوا وهي ضحكات وخرجات فرررحانة وهو تنهد مغمض عينيه ....
غير شافت ماماها حداها نقزات علييها عننقاااتها بالفرررررحة
بيلسان : منساااااااانيش اماما .. منساااانييييييييش
اريج : ههه على سلامتو ابنتي على سلااامتوو ....
رقية : ياك مكيحرقو والو
بيلسان : لا لا ولكن كيبان عيااااان مسكين ...
رتاج : وعاااادي .. نخليوه دابا يرتاح .... تايخرجوه لشومبر وندخلو عندو كاملين ....
اريج : زياااد .. كون غير تمشي احبيبي لدار تشوف بنتك كيبقات وودي معاك جداتك ترتاح الظهر كيحرقها وزادت بالجلسة فالكرسي ليلة كاملة
رقية : لا لا غا خليييوني ... نمشي نهبط عند بنتي لتحت نشوفها تاااوكان تفيق عاد نرتاح راه جوج كبدات عندي هنا كيتشواو احيااااااني ( دمعو عينيها ثاني )
رتاج : وصااافي وحنا دااباا تافقنا مكااين البكا وتالامار تفيق تلقانا فرحانين وولدها فاق وبيخييير غااتصح تاهي ... راه تانا ام وعارفة هادشي لي كتحس بيه راه تسمعي ولدك لي ديما مهدد فالانعاش راه لي مجاتهاش سكتة قلبية راه مزيااان
سفيان : دايا خليونا من هادشي .. الولد هاهو هنا كيرتاح بلا منصدعوووه ولامار راه دابا تصصح ... لي عندو شي خربة يمشي يرتاح فيها على ما يخرجوه ... ماعندكم باش تفيدوه هنايا ... ونتا سير شوف بنتك كيبقات لاطلعات سخانة بزوف ديها لبيدياطخ
زياد : يلاه قطعت مع جنان نزلات السخانة قاجينها غير دوك الحلاقم مسكينة ...
رتاج : الله يشافيها تاهي ... الحاجة ... كون غامشيتي تانت ترتاحي يخرج و ويجيبك ....
رقية : انا عا سيرو ترتاحو انا نبقى مع بينتي
اريج : سيري نت ارتاج ودي عدنان يرتاح انا غنبقى هنا معاهم ...
رتاج : لا اختي انا ماعندي فييين نمشششي تاتفيق لاماررر وعدنان مغايتحركش ليا منهنا اصلا
يونس : هادو مغاايمشيوش ليك غاتهنى ... نزلو جلسو مع لامار نخويو من هنا نكونو كنصدعوه ...
بيلسان : نو مكيتسمعش الصوت ...
رتاج : نزلو لتحت حسن تايخرجوه ...
شدات رتاج فرقية كتوقفها وتبعاتهم اريج ونزلو فالسانسور لشومبر ديال لامار .. وعدنان واسد كانو كيهضرو مع الطبيب لي باقي كيشرح ويعاود ومشاو عندهم سفيان ويونس ...واياد وفيصل تاهو كان معاهم اما لؤوي وسلطان وسيم واقفين فزاج دالانعاش كيشوفو فيه وزياد مشى تاني يطل بنتو لي دوز ليلة كاملة بالو مع جود وبالو معاها ...
اسد : يعني غاتزيد طلع ليه الحرارة ؟
الدكتور : ماشي بزاف هادو غير مضاعفات دالنزيف ومضاعفات ديال التلج لان التجمد ديال الدم كيرجع بالحرارة .. حنا دابا من الاحسن نخليوه يرتاح تما واحد ربعة دسوايع ولا خمسة كاع نخرجوه لشومبر ديالو يرتاح فيها ...
عدنان : وفاش يقدر يخرج ؟ الاومور كلها مزيانة ؟ تحاليل !
الدكتور: كووولشي الحمد لله مزيان .. غير هو ميفروصيش على راسو بزااااف بالاعصاااب .. يحاول يبقى مستقررر .. النوبة كيف قلت ليكم كانت عصبية .. يخرج للشومبر ديالو يزيد معانا هاد النهار باش نتأكدو واش مكاين تا مشكل ونعاودو ليه الاشعة والتحاليل والشبكة ... ويقدر يمشي يرتاح فدارو بشوية عليه ...
سفيان : داكوغ غير هو من الاحسن كون يبقى معاه شي واحد على الاقل يمد ليه الما .....
الدكتور : لي يبقى معاه يحاول مااايهضروووش بزاااف ويخليه يرتاااح .. ومن الاحسن مايخدمش تيليفون فوسط الانعاش .. لاكان فالامكان ...
اياد : وبالنسبة لطريطمون ؟ غيخرج غياخد شي طريطمون ؟
الدكتور : ضروووري بعدا غير لي كالمون ... غير السيمانة لولة ومنبعد يرجع لطريطمون اللول ديالو عادي مع الكونترول ...
فيصل. : والصوكان .. فوقاش يقدر يقيس طموبيل مثلا ؟
الدكتور : غير يحس براسو برا ومبقاتش عينو كتشتت ليه بزاف فالنظر .. يصوك ... يعني يرجع يعيش حياتو عادي كيف اللول هو راه مرضو خاصو يتعايش معاه .. لي نوصيكم عليه .. يبعد غير على الاعصاااااب .. كاااااافية بالنسبة ليه تانوصلوا عاود للعملية الاخرى ملي يدخل فالثلاثينية ان شاء الله ..
ابتسم ليهم الدكتور ومشا وهوما عاد ترخف صدرهم ورجعو لحدا الانعاش واياد مشا عند لوؤي وسلطان ووسيم لي كانو فزاج وقف معاهم كيشوفو فيه ناعس
اياد : نعس !
لوؤي : اممم .. كان فيه الحريق يمكن .... اش قال طبيب ؟
اياد : شي ربعة دسوايع يخرجوه ... ويزيد هاد نهار يمكن غدا يخرج للدار ... قال بلي كولشي مزيان ..
سلطان : الحمد الله ....
وسيم : مغيبغيش يجلس هنايا .... دابا تشوفو .....
اياد : بسسسيف عليه هادشي فيه اللعب ..
لوؤي تنهد وعوج عنقو يمين وشمال بحالا كان كايتسنى غير هاد الخباااار ....ويمشي ....
وسلطان ضور راسو معاه بانليه غادي عرفو فين ماشي ومشا تاهو تبعو واياد وسيم كانو كيشوفو فجود ... واسد مشا بجيهة قسم لي كانت واقفة مع شكيب كتسني ليه الوراق
اسد : دخلي جلسي مع خوك الى بغا شي حاجة انا غنهبط نشوف ماماك .. خلي تيليفون برا مادخليهش
قسم : ماعنديش اصلا منعرف فين لحتهم ... ( سينات اخر ورقة وعطاتو الستيلو وهو مشا وهي شافت فيه ) انا غانمشي عندو ... ( خلاتو وزادت وهو نزل فالاسانسير ... )
مشات باتجاه الانعاش وومات لاياد ووسيم لي فزاج ودخلات لانعاش غير كتشوفو كيتجمعو دموع فعينيها وتبسمات غير لي ولا مزيان وعقل عليهم كاملين ... جرات واحد الكرسي حداه وجلسات ومدات يديها شدات فيدو كتشوف فيه
اما قدس كانت جالسة غير على الكرسي لي حدا باب الانعاش وناضت لزاج كتشوف مع وسيم واياد
قدس : ياربي امتى يسالي هادشي ويخرج جود منهنا
اياد : غااايخرج ... وغيتنسى هادشي كااامل ..
وسيم : انا كتنسنى غير فوقاش يجي داك البرد لي كنتكمشو فيه اما الصيف كيجيو معاه غير الكواريث ....
قدس شافت فيه بمعنى " وايييه " وخلاتهم ونزلات من الدروج .... لداك البلاصة لي كتوقف فيها هي وقسم يلاه غادا ليها وهي تلقى تما بيلسان واقفة كتشوف للتحت .. وهي تضور راجعة فحالها تاسمعاتها
بيلسان : قدس
ضارت قدس عندها لقاتها كتشوف فيها
بيلسان : اجي فين غادا ... واش حنا بيناتنا هاد التقليقة اصاحبتي ...
قدس : ( قربات عندها معصبة ) واش نت مريضة شوية لا ! ملي تكوني طالع ليك الخرااا كتجي تفشيه فيا بلي يتقال ولي ميتقالش وملي يحلهم ليك خويا بجوج كليييمات تجي تبححلسي عليا ....
بيلسان : ( شداتها من دراعها ) وصافي سسسمحيلي راه كنت مسطريسية بزاف والله .... ماعرفت كاع شنو كنت كنقول
قدس : ( دفعات ليها يديها ) بعددي لهيه ... غير نت لي مسطريسية ؟ انا ماسطريسياش ... انا هاداك ماشي خووويا ؟؟؟ شكون لي خصو يواسي لاخور .. ( بعصبية تاتبح صوتها بقوة البكا لي بكاتو على جود ) انا راه خووويا كنت غانضييع فيه ... كنت غانضييع فماما وفباباا وفخووتي كاملين .. عائلتي كانت غتششت لاوقعات ليه شي حاجة هو فداك البلووووك ... ( ضرباتها تاتدفعات لور ) ومع ذالك جااايا نواااسيك نت لي تخطبتو عاد لبارح .... جااياا نواسيك باش فلخر شنو ؟؟؟ .. تعايرييييني بمشاكيلي ... ( زادت دفعاتها وبيلسان مرخية كتشوف فيها باسف) تتتعلمي تتتحسي بوااااحد اخر .. تعلمي تشوفي لاخررر تاهو باااش كاااايحس .... تتعلمي تجبدي الموضوع المناسب فالوقت المنااااسب ...
بيلسان طلعات عينيها شافت فيها بأسف وقدس عينيها تعمرو بدموع وكلها كتررررعد وخرجات فيها داك الخلعة كاملة وهي تنقز عليها عنقاااتها ... حتى انفجراات قدس بالبكاااا وبيلسان معنقاهاااا وكتبكي تاهيا
بيلسان : شششش ... صافي ... كولشي فااات .... كوولشي
قدس : ( كتشهق بالبكا ) كان غيموت ... كانت غتوووقع شي حاجة قبييييحة بزاف ابيلسااااان .. كتررر من هاد تخربيق ديالك .. كككترررررر
بيلسان : ( غمضات عينيها ) عارفة ... عارفة .... ولكن الحمد الله هانتي موقعش ومغيوقعش وعمرو غيوقع .... جود انسان قوي .... وباغي يعييش .. وككيتقاتل ييعييش ... صافي عافاك ....
قدس : ( بعدات منها ودفعاتها ) عطييييني تيييساع .. بعدي من قدامي
بيلسان : ( كضحك شوية وسط دموع بعياء ) وصافي باراكا .. وهانتي غيتقلق عليا لوؤي ...
قدس : ( ضورات راسها كتشوف موراها ورجعات شافت فيها ) واش نتي مرييضة .. سسسسكتي ... طوي هاد الموضوع نسااااايه .. نسااااايه
بيلسان : ( شداتها ) قدس .... سمحيلي عافاااك .. والله ماقصدت شي حاجة خايبة .. نت عارفة معزتك عندي ..... عافاااااك ...
قدس : ( دفعاتها تاني ) صافي ططلقي ... شحال غتغبني .... ولكن هادي لولا ولخرا نعاود ليك شي حاااااجة ..
بيلسان : ( بابتسامة ) على نت زعما عاودتي ليا .. راني فهمت كولشي راسي .. ( شدات يديها تاني ) وغااتوقع شي حاجة وغاااتجي تعاوديها ليا ... حيت مكايناش لي غايدير ليك عقلك من غيييري .... مرات خوك وحدة عندك هي ااااناااا ....
قدس : اممم مزيناتك .. تاتزوجيييه بعدا عاد قولي مرات خويا .. سيري بعدي مني ماعندي خاطر ليك دابا ...
بيلسان : ( تنهدات حيت ضحكاتها واخا غير من شفايف لبرا والقلب باقي عيان ) هاااانا ... هااانا ... نمشي نشوف ماما ....( مسحات ليها دموعها لي باقين كيسيلو ) وصافي طيييبتي هاد العيييينين ... نشوف ماما ونجي
قدس : ( دفعاتها تمشي ) سييري كاااع لاتجيييش مشواقة فيك انا
بيلسان : ( ماشية وكضحك ) حاولي مااااتوحشينيش بزاااف ههه
شافت قدس قدامها لداك البالكونة الصغيرة لي فلخر دالكولوار ومشات ليها بشوية وشدات فدوك الحديييدات كتشوف للتحت ... الجو كاااان صابح مشمش ولكن الريح باردة فيه كتوحي بان نهاية الصييييف على الابواب .... كتشوف مصغرة عينيها فالشعا بسبب مامنفوخين بالبكا وزرقين من تحت بالسهير دهاد الليلة السوداء .....وكتحاول تدخل لراسها فكرة ان جود صافي فاق وتعدا مرحلة الخطر وعقل عليهم كاملين ولكن واخا هاكاك ماحدو فداك الانعاش وماحد فكرة فقدانو ديما كاضور فدماغها ...
لتحت ...
كانت لامار باقا ناعسة بسباب لي دوز لي دكو ليها ولي قالتها ليهم رتاج بالعاني باش ماتفيق تايكون فاااق .... بسبب مرضها لي اكتشفوه مؤخرا وهو طونسيون ديال العينين والعمليات لي قامت بيهم ولاو خايفييين اي كريز ديال الضغط تعميها فخطرة وحدة ودايرين جهدهم يبعدوها على الاعصاب خصوصا فهاد سن اليأس لي صعيب بالنسبة ليها ... كترجع فيه المراة بحال البنيتة الصغيرة كتغير من اي حاجة وكتعصب من اي حاجة ....
رقية باقا على داك الفوتوي مرة تتكى مرة تجلس وحياة باقا على الكرسي شادة ليها فيديها واريج ورتاج كيعاودو ليها وهي متبعة معاهم بعيون فرحانة تاحل عليهم الباب اسد ... وعينو مشات ليها وشاف فيهم
اسد : مفاقتش ؟
حياة : فاقت شوية ملي كنتو لفوق ... حاولت نهضر معاها ولكن كانت بحالا مغيبة ورجعات نعسات
رتاج : من الاحسن غير تنعس يرتاحو عينيها ... تاااتفييييق بشوية عليها ويكون جود فايق تاهووو ويقدر يهضر مزيان ونديوها تشوفو باش ماتجيهاش كريز تاهي الله يستر لافاقت ولقاتو فالانعااااش هاكاك بداك الشاپو ونتوما عارفينها مكتحملش داك الشابو فوق راسو ...
اسد : ( تنهد ودخل وسد موراه لباب وحط يدو على جبهتها ) باقا سخونة
اريج : وراها مساااهلاش .. كون ماقلتي ليها والو تاااتجي ونفهموها بشوية
اسد : ( كيتنهد وكيشوف فيها ندمان ) اودي هادي تهضّر الحجر ....
رقية : ساااعف اوليييدي ساعف .. عاارفة تجمعو عليك من كل قنت ... ولاكن راها متفوووتش وليداتها راه تزعف وضرررب غا هو راه الكبدة صعيبة سال المجرب ... ( اسد غير كيتنهد ) قوليا اولدي .. هي علاش ضاربات معاه ياك لاباس مالقيت خبار
اسد : اغا تخربيق الحاجة ....
رقية جات تهضر وشافت فيها حياة بمعنى راه كيبان عيان وكيجاوب بزز .. مدة هو غير كيشوف فيها وكيشوف فالسيروم ورتاج كتشوف فاريج بحالا حسات بيه شعل غير مع راسو وهو كايشوف فلامار عاكاك وولدو لفوق فالانعاش ....
تاشوية ماحسش براسوو تااانتر داك السيروم من العمود وقطعو بسنانو مجنن عليه ولاحو الاررض وخرج وزدح الباااب عليهم تاتخطفات رقية وحياة شادة على فمها ورتاج واقفة حيت كانت عارفة غايدير داك رد الفعل حافضاه من عدنان .. واريج شادة على قلبها
رقية : ( علات يديها لفوق ) يااااربي لامتهدي النفووووس يااااااربي لاماتهدي النفووووووس
حياة : ( كتشوف فيه مقطع كيسيل فالارض ) رتاج ..صايبي صايبي اختي هادشي ... صايبي
رتاج : ( تحنات كتنهد كاتجمعو ) ياربي دير تاويل دالخيييير .... الله يكون معانا
اريج تاهي بدات تجمع معاها وبداو يصونيو على الفرمليات جاو عاودو ركبوه ليها كايحيدوه من يديها وهي ناعسة مغيبة ..
اما اسد خرج بزربة لبراااا شاد عنقوووو من لور كايماصيه و كيتنفس بزززز ... كيحس براااسو مقادرش يييصبر على هادشي كااااامل لي تجمع من كل قققنت ... وهو يجي عندو شكيب
شكيب : سي اسد .. داك الولد راه شديناه و ..
قاطعو اسد هاز يدو يمعنى منبعد وشكيب وما براسو عرفو راه مغيتكلفش بيه دابا ... ومشا وهو بقا تما كيمشي ويجي تاسمع طموبيلتو وصلات عاد ضار كايشوف فيه ..... هو ينزل لوؤي وكان سلطان جالس حداه بقى فطموبيل وجا باتجاه اسد بتساؤل وخلعة فملامحو حيت صونا عليه يجي .....
لوؤي : عمي ياك لاباس ؟ وقعات شي حاجة لجود ؟
اسد : (شاف عند سلطان لي بقا فطموبيل وشاف فيه ) فين كنتو غادين
لوؤي : للدار .. فين غنمشيو ...نبدلو حوايجنا .....علاما يفيق ونجيو
اسد : ( طول فيه الشوفة ولوؤي كيشوف ) قالو ليا مشيتي كتسول على طموبيل ديال جود .... گالو ليك شي ولد صيفط ليه شي برا ...
لوؤي تنهد وبدا يحك فوق حاجبو ورجع شاف فيه
لوؤي : آآ ! اينا برا ...
اسد : ( بحدة ) لووووؤي
لوؤي ( تنهد وضار شاف فسلطان ورجع شاف فيه ) اه ... قالوها ليا ...
اسد : ونزلتي لباركينغ ....
لوؤي : ( خدا نفس عميق كيتفكر داكشي لي ابشع حاجة بنسبة ليه و جاوبو ) ااه
اسد : لقيتي شي حاجة !! ( لوؤي غير ساكت ) بغييييت نعرف داك البرا الوؤي .... شنو فيها ....لي وصلات ولدي لهاد الحالة ...
لوؤي : ( نزل عينو مدة و رجع شاف فيه ) م .. معرفتش .. معرفتش .. مالقيتش
اسد : ( بجدية ) لووووؤي .... ضحك على كولشي ومضحكش عليا انا ( مد ليه يدو ) عطيني .....
لوؤي تنهد ومد يدو بشوية لجيبو دسروال الخلفي وجبد داك الصورة لي كانت باقا مكمشة سرحها وطواها وحطها فيديه واسد شدها زير عليها فقبضتو حيت عارفها دلامار حيت قالو ليه ان الولد لي حط جوا من الحومة وجود لي طلبو على تصاور ماماه القدام ..... لي معارفش هو شنو فيها بالضبط لي وصلو لهاد الحالة كاملة لي مستحيل يوصلها غير على صورة من ماضيها ..... ويستحيل اصلا يطلب صور ماماه القدام من الحومة هو ماعندوش علاقة بيهم ....
اسد : متعطلوش .... ملي يفيق غيبغي يشوفكم حداه
لوؤي : ( كيحك فعينيه بعياء من الليلة لي منعسوهاش ) لا متخفاش ... غا ساعة نبدلو حوايجنا ونجيو .....
اسد شار ليه براسو ودخل و لوؤي ركب فطموبيل مدة غير ساكت فلخر شاف فسلطان
لوؤي : انا جاي .....( رجع نزل )
اسد داخل لكلينيك يلاه غيحل الورقة هو يشوف قدس جاية كتجري دغيا تاااتتفزع ورد الورقة لجيبو وقلبو مات وحيا فثااااانية
اسد : اااش كااااااين
قدس : بابا .. ماااااما فاااقت وقااالبة الدنيا مبغاااااتش تهدن اجي عاافااااااك .....
دخل اسد كيجري وتابعاه قدس تاوصل لشومبر ديالها هو يوصلو الغوات وتحل الباب ودخل كانت كتنتر فيد رتاج واريج وحياة و رقية كتهدنها وبيلسان
اسد : لااااماااار
لامار هزات عينيها فيه بهستيرية باغا تنوض ودمايات كتسيل من يديها فاش نترات السيروم بحدة وجرحات راسها
لامار : ااااساااااد .. بغييييت نشوووووف وووولدي .. اساااااااااد دييييييني عند ولدي
اسد : ( بعدهم وقرب ليها بزربة شدها حكمها فيديه وهي كتشوف فيه وصدرها كيطلع ويهبط شبه المجنونة ) شششششش تهدني ... تهدني .... جود لاباااااس عليه ... تهدني
بيلسان : والله اخاالتي الى لابااااس هضضضر معانا كاملين كنت معاه ... خليناه غير ينعس ... والله حتى رااااه لاباااس هانا كنننحلف لييييييك
لامار : ( كتشوف لاسد بجنون ) دييييني نشوف ولدي اسد
اسد : غاااتشووووفيه .... غاتشوووفيه .... غير الى تهدنتي شوية .. وتكالميتي حيت مغدخليش عندو هااكا
لامار : ( كتمسح دموعها بهستيرية ) هانا .. هانا بيييخر هانا مزيانة ( كتقاد شعرها وحوايجها ) شششوف انا بيييخير ديني نشوف ولدي ( كتبكي ) قققققققلبي كييتقطع اااسد ...( ضربات فالسرير وغوتات ) خلييييوني نشوف ولدي
اسد : راه قلت ليك حتى تهدني .... نوضي اجي معايا .. بشوية عليك ... غيشوفك هاكا غتخلعيه عليك ... بشششوية ....
بدا كيحاول ينوضها واريج قربات ليها صباطها لبساتو وكلهم واقفين مأسفين كيشوفو وقدس كتبكي وبيلسان عنقاتها كتواسيها ورقية كتشوفيهم وتدعي محسفة مع بنتها وهو جارها بشوية للدوش وسد عليهم
رتاج : يلاه خليوهم بجوج ....
رقية بالها معاها باقا كتشوف جيهة دوش وقلب الام كيتقطع فيها .. لامار كتقطع على ولدها ورقية كتقطع على جوج مرات وزادت تابعاهم وعينيها باقيين كيضورو لجيهة الدوش تاخرجو كاملين لبرا ...
اريج : هو كيعرف ليها ... غيهدنها ويعرف يهضر معاها ... حنا متيقاتناش
حياة : دهشاتنا بالغوات انا را بقيت ندخل ونخرج فالهضرة ...
رقية : ياربي لاماتشوف من حال هاد العائلة ياربي راه مابقينا قاادرييييين .... ( جرات بيلسان ) دوز ابنتي وريني داك جامع لي صليت فيه الفجر فينا هوا نصلي جوج ركعات نبكي ونشكي لسيدي ربي يشوف من حال بنيتي وولدها ... دوزي .... ( داتها بيلسان وهي باقا كتهضر ) انا مابقى فييييدي مااندير لييييها ميمتها ماعليها غير تدعي معاها .. هدا مكيبرد قللللبي ... غا نهز يدييي لللسيدي ربي الحبييييييب .....
جراتها بيلسان كتنهد ورتاج عنقات عندها قدس ..
رتاج : صاف احبيبتي متخلعيش دابا يرجع كولشي لبلاصتو .. مدازش علينا قلييييل ....
اريج : كون غير يطلعها تشوفو ...
اسد : وراه غيطلعها يمكن .... مالها هي غتطلق منو .. يلاه يلاه نزلو لتحت خليوهم بجوج .... نشرب قهوة راسي غيتفركع
حياة : نيت راه الدراري تما ....
زادو نازلين لكافيتيريا وهي ضور رتاج فاش شافت قدس باقا واقفة كتشوف لباب دشومبر كتبكي
رتاج : يلاه اقدس تاكلي شي حاجة راك غاطيحي وااقفة
قدس : لا ... مافياش اخالتو غير خليني .. نشوف ماما كيبقات بعدا ونجي ....
خلاتها رتاج على خاطرها ونزلات وقدس بقات واقفة تما كتسنى ....
لداخل ..
غسل اسد للامار وجهها مزيان وبدا يغسل الجرحة فيديها ودم باقي كينزل وخرجها من الدوش وهي باقا كتمسح وجهها وتنخصص بالبكا وحل المجر ديال طبلة صغيرة حدا السرير جبد الفاصمة كانت مع ليباري لواها ليها على جرحة وشاف فيها كيرد شعرها لي فزك ليها بالما لور
اسد : لامار ... وشوفي فيا ..... ( علات عينيها فيه وشفايفها كيتررعدو بيضين ) هدا ماشي وقت نضعافو .. مرض جود مكيبغيناش نكونو هاكا ... مرض جود كيبغينا نكونو ثااااابتين وكنعرفو اش كنديرو وكيفاش نتعاملو .. باش ملي يفيق يلقى واليديه حداه ... ماشي ماتو بالخلعة قبل منو .... ربي عطانا ابتلاء فجود وحنا حامدين عليه الله .... ومعايشين معاه .... تعصب شوية فطموبيل ... جاتو كريز وحيت حالتو راكي عارفاها دخلوه لانعاش باش مايطرطق ليه داك العرق ملي دازت الامور على خير وفات الكريز خلاوه ينعس يرتاح شوية .. وغيخرجوه للشوووومبر ....وقسم راها معاه لفوق لافاق بغا الما ولا شي حاجة يلقاها قدامو ....هااادا مكان
هو كيهضر معاها بهدوء وهي متبعى معاه مكالمية ودمووووع ساااايلين بحال الشلال على خدودها
لامار : وو . و وباش تعصب .. ع عليا ياك .. حيت ضررربتو .. ( كتنخصص ) اسد ... انا ماعنديش فهاد دنيا غلا من ولادي ... تتتقطعت عليهم ا اسد وانا كنولدهم وانا كنرضعهم وانا كنربيهم وانا كنسسسسهر معاهم .... الى نتا كتهز الهم نفسيا انا هزيتو نفسيا وجسديا .. كنتقلق لا سمعت عليهم شي حاجة خايبة ... نسيت راسي نسيييت ولدي مريض نددددمت على نهار لي حطيت يدي فوقو ( كتبكي بحرقة وهو ضمها لصدرو وهي كلها كتهز ) ولدي كنت غاااانقتلو بيدي كيغندير نشوف انا فوجهوووو كيييييغاندير ا اسد كييغاندييييييير ... الندامة كتاكل فيا ولدي وصلتو للموووووت اشداني نهضر معاه اش داااااني غير يعييييش ليا يدير لي بغاااا انا نصبر وخويا يصبرررر
اسد : لااامار حبسي عليا هادشي واش نت حمقة جود يتقلق على هادشي واش عمركم ضاربتو ... حتى الى ضربتيه راكي ماماه لي والداه ...ماشي بسبابك .. هو كان فطموبيل شي حاجة دارها ماهياش ولا شي حركة تايصح ويقول لينا .... هانا احبيبتي غنطلعك تشوفيه .. ولكن صووووووتك مانسمعووش .. ماشي غادخلي كتبكي ولا شي حاجة .... هو راه نااااعس .. شوفيه من البعيد باش تعرفيه راه بيخير وترتاحي... وملي يخرجوه لشومبر كلي معاه شحال مابغيتي ... دابا نخليو معاه غير قسم دااكوغ !!!!!
لامار : ( كتمسح موعها وتحرك راسها باه ) صافي صافي مغاندويش مغاندير تاحاجة ... طلعني غير نشووفووو ....
اسد : ( شد وجههها وقرب لراسها باسها مطول وجرها شادها باش ماطيح ) اجي معايا ....
خرجو من شومبر هو يشوف فقدس واقفة فلباب كتسناهم والحزن فعينيها
قدس : ماااماا
لامار : ( علات عينيها بعياااء فيها ) انا بيخير احبيبتي ماتخليعيش غانطلعو نشوفو خوك ...
قدس : و .. واخا .. ( قربات هزات يدها باستها ) ماااتضغطيش على راسك اماما ....
تنهدات لامار ومشاو حل السانسور وطلعو وقدس بقات كتنهد ومشات بشوية كلها ساهية تاوصلات قدام الزاج كاطل على جردة لتحت مربعة يديها وكتحك فكتافها وداتها باقا كلها كاترعد عليها من خلعة جود وخلعة ماماها حتى حسات بشي واحد عنقها من لور غير من ريحتو عرفااتو .. غمضات عينيها مزيرة عليهم والدمعة نزلات ... و حسات بقبلة سخونة منو فعنقها من لور وقرب لودنيها ...
لوؤي : كولشي فات ... وكلشي غايفوت .. ...
قدس : ( هزات يديها مسحات دمعتها وشمرات بنيفها ) كان على شوية ... على شوية الوؤي ... مغايبقاش معانا جود .. وماما غاتموت وبابا غايتسطى ....
لوؤي : جود...هادي هي حالتو وهادشي خصنا نتعايشو معاه .... هو قوا من هاكا ...
ضورها عندو وبدا يمسح ليها دموع وهي عين فيه وعين كاتهزها لكلوار كتخاف يجي شي حد ..
لوؤي: غايفيق .. وغايوقف على رجليه ويخرج منهنت ونفوتو هادشي كامل وانا راه توحشتك ... ( بابتسامة عيانة )
قدس : ( بدلاتو ابتسامة عيانة كترر وغير بزز تبعاتها بتنهيدة ) كيفاش هاد توحشتك وحنا لبارح وهاد ليلة كاملين مجموعين
لوؤي : هانتي قلتيها ( كايحيد شعرها من على وجهها وكايشوف فيعينها ) مجموعين .. ملي كنكون مجموعين نت بنت الروكان ... وملي كنكونو بجوج .... ( قرب وجهو تاتحط نيفو على فيفها وقال بهمس كايشوف لشفايفها ) نت ديالي ...
قدس : ( سرطات ريقها وبدات كتعبدو من كتافو ) لوؤي راحنا فلاكينيك دابا يجي شي واحد ...
لوؤي : (بعد شوية وشد غير يديها عندو باسهم وشاف فيها ) غانسافر ...
قدس : ( علات حجبانها باستغراب ) فييين !!!
لوؤي : غير واحد الغراض نقضيه ... مغانتعطلش بزاف ... ديري بالك مع تيليفونك وردي لبال حتى لراسك ... ماتبقاش تبكي بزاف تمشي تمرضي راه المناعة ماعندكش ياهاد البنت ...
قدس : اشمن غراض هدا !
لؤي : هه ! هادشي ماشديتي من هضرتي !
قدس : واااهضر .. فين ماشي ؟؟؟؟
لؤي : والله احبيتي الى غير غاراض بسيط تانجي ونعاودو ليك ...
قدس : كيفاش هاد تانجي ونعاودو ليك ؟؟؟؟ ( علات حاجبها ) اصلا بغيت نعرف انا فين كنت كاتسافر ديما ؟؟؟؟ اشنو عندك على برا ...
لوؤي : راه قلت حتى نجي ... وهادشي خصو هضرة طويلة .. مكاتقالش وحنا واقفين فالكولوار ....
قدس : وفوقاش غاتجي !
لوؤي : ( عوج شفتو كايفكر ) بعد غدا هاكاك ..مغانتعطلش ...
قدس : مغاتكونش مع جود ملي يديوه لشومبر
لوؤي : كوني معاه فبلاصتي .. ( قرب لحنكها وعوج راسو باسها بوسة خفيفة وبعد راسو ) حبييتي تنوب عليا .... يلاه انا مشيت .... شوفي خوك ملي بخرج وسيري ترتاحي .. ولا يلاه نوصلك دابا لدار رتاحي وعاد رجعي شوفيه ....( كايدوز يدو على عينيها المنفوخين ) ....شوفي كيوليتي
. قدس : لا انا بيخير ......غاتسافر دابا ؟؟؟؟؟
لوؤي : اه ...
قعدذ : ( بخوف ) لووووؤي !!!!
لوؤي : مكاين والو راه هضرت معاك .... يلاه نوصلك لدار
قدس : ( تنهدات كاتشوف فيه ) راه قلت لا ....
لؤوي : داكوغ ... مناخدش شي بووسة ديال بسلامة !!!!
قدس : ( كاتشوف لكلوار وتشوف فيه ) غايشوفنا شي حد واش تسطييييتي ... هادا وقتها ؟؟؟؟
لؤوي : ( ضار موراه مالقا حد وشاف فيها ) مكاااااين حد ...
قدس : نتا ره ك كتتقلب على لل......
مجات فين تكملها تاكان جبدها من خصرها تاتضربات فصصدروو وشد راسها بيديه فيكساه معاه محني عليها كايقبل وهي معارفة تستمتع بالقبلة ولا تخاف يجي شي واحد .... كتحاول تبعد راسها وكايزييد يقربها كانه كيدي جررعة تكفيع طيلة السفر .... طلقها من بعد ماخنق فيها النفس بدات غير كاتنهج وهو تبسم وبعد عليها باش مااضرربو ...
لوؤي : هااا علاش كنت كنقلب احبي ... ( مشا راجع بلور ) تهلااااي فراسك وماتقولي لحد راني مسافر .... ( غمزة بعينو ) نموووت عليييييك انا ....
خلاها ومشا وهي ماتبعاه بعينيها وقلبها مامهنيش على هاد السفررر وشنو من موراه فالخر بدات تبسسم شوية بشووية ملي كتغكر حركاااتووو وشقااوتو وبسالتو لي بقد ما هو جدي بقد ماهو طفل ... وغمضات عينيها وهزات يديها حطاتها على قلبها لي كايضرب بجهد كاتسائل واش هاشدي كامل كايديرو فيها لوؤي ! واش لهاد الدرجة قلبها كايبغيييه !!!!! لدرجة نساها فهمها كاااامل غير بدقيقة منو جا عندها فيها ونثر سحرو ....ومشى .....
فالانعاش ....
تحل الاسانسير بلامار و اسد لي باقي شاد فيها خايفها دوخ وطيح وهي كولها باقا كتنخصص بالبكا ووجهها مشات منو الحياة ودبال ... ماشين بجهة الانعاش لي حافضة طريييقو بحال كيف حافضة طريق بيت ولدها .... شادة على فمها حيت اقبح كابوس عندها هو فاش كايدخل ولدها لهاد الانعاش ومزاال مامصدقة انها هي هاد المرة لي وصلاااتو لهنا ...
وصلو قدام الانعاش وحط اسد تيليفونو على برا وحل الباب .... قسم كانت متكية على الكرسي وكاتشوف للسقف ويديها فيدو تابانو ليها داخلين وهي تعلي حجبانها ملي شافت ماماها وناضت بزربة عندها شداتها
قسم ماااما .. نت بيييخير ....
لامار : ( عينيها معلقين على جود وكتجاوب براسها ودموع كايسيلو ) ل . لا باس .. لا ...
ماقداتش تكملها وشهقة دالبكا قطعاتها ليها واسد زير على كتفها وبدات كاتقرب بشوية وخايفة تصدر شي صوت لي يفيقو وهو كايبان ناااعس ... كاتشوف فداك الشابو فوق راسو وصدرها كوولو كايتتهز بالبكا لي كتحاول تبكيه غير فصصدرها ... وهزات يديها كتتررعش وشدات فيدو وعلاتها عندها باااستها مطولة وهو كان قالب وجهو لجنب نااعس ..
لامار : وو ولدي ..... ج جود .... ح حبيب ديالي ...
قسم : ( شداتها من كتافها من لور ) ماما ... ماتعييش راسك عافاك .. جود راه بييخير .... خاصو يفيق يلقاك حتى نت بيخير .. عافاك ...
لامار : ( كتبوس فيديه وتستنشق ريحتو ) حييبي لي مكتبدلش ريحتو منهار كان بيبي صغير ... خوك ابنتي كنت غانقتلو بيييدي
اسد : ( بحدة ) لااامااااار
لامار : ( كتهشق ) غير برا اولدي اليد لي تمد ليك نقطعها ... غير برااا احبيبي ...
قسم : ماما بشوية عليك عافااااك .. راه هو براسو مغايبغيش هادشي لي كديريه فحالتك ... صحتك عندنا اهم من كولشي ...
لامار : خليني ... غير خلييني ابنتي ... خليني ...
اسد ( تنهك وشاف عند قسم ) : مافاقش كاع من قبيلة ؟
قسم : لاا فاق جوج دالمرات كايبغي الما ... وكان فيه شوية دالحريق وجات الممرضة دكات ليه شي شوكة فسيروم ونعس تاني مزال مافاقش ..
اسد : ( كايشوف فيه ) راه باينة على وجهو فيه الحريق ... كحااال كاع ....
قسم : هادشي كامل دابا يفوووت ... ونساليو هادشي ونتجمعو تاني ... مرة أخرى ندرو لبال معاه اكتر وصافي وياربي تكون اخر مرة نشوفو فيها هاد الانعاش ياربي راه مابقيييتش قادرة ...
اسد : ( شاف عند لامار ومشا شدها ) باركا عليه ... صافي يلاه ترتاحي هانتي شفتيه ..
لامار : خليييني مزال
اسد : غاكتمرضي فراسك الامار والله .... يفيق يلقاك هاكا غاتكملي عليه .. يلاه خليييه يرتاح ... ها ختو معاه ... يخرجوه لشومبر وكلسي معاه .. دابا نخليوه يرتاح ..
لامار : ( قريات بشوية تحنات لعندو وباستو فخدو تحت من زاج دشابو ) برا ليا اولدي برا لبا .... الله ييييحفظك والله يكون معاك .....الله يشااافييييك ....
جرها اسد وهي باقا شادة فيديو ماساخياش به وقسم كتمسح دموعها تاخرجو وتنهدات رجعات قدات ليه يدو وغطاتو بالازاير ... ورجعات كلسات فالكرسي ديالها كاتشوف فيه
اسد خرج لامار يلاه كايهز تيليفون وبدات تبكي تاني بانهيار ومشا شدها
اسد : لاااماارررر هاحنا غانكعاااو تاني .. مالنا اش واقع .. الولد راه بيخير شوية تشوفييه قدامك واقف .. صافي هنييينا دايرة كنااااازة
لامار : ( شافت فيه وشفايفها كايرعشو ) نتاا محااسش بييييا .. تخيل يكون بسباك ولدك هنا تخيل
اسد : دابا منين جبتي هاد بسبابك هادي .. لاجينا نلوحو السبة راه تانا مسؤول على هادشي ... تانا عارف ولدي مريض نتبعو ومنخليهش بوحدو .... يلاه ! السبة نلوحوها على كولشي .. نلوحها على مروان نلوحها على الطموبيل نلوحها على رجالي نلوحها عليه.... على قسم علاش ماتخليش شغالها و تكلس معاه نلوحها على قدس نلوحها على وسيم ....
لامار : انا اراااا ضررررببتو اسد ... ضربتووو
اسد :دار علاش .... و ضرباتو ماماه ... ماتعصبش على قبلك غايكون غي شي حاجة اخرى طرات ليه فالطموبيل ..... دابا نفك هاد الحجاية غير بلاتي يخرجوه من تما .. دوزي دابا ترتاحي هنينا .... كون كنت السباب كون جاتو الكريز لفوق ماشي تاينزل .....
لامار : ماتبقاش دير بحال هاكا .. راه نا اول واحد لحتي عليا اللومة ....
اسد : كنت معصب .... مكنتش عارف اش كنت كانقول نت براسك لاقلت لييك دابا واش عارفة اش كنتي كاتقولي غاتقولي ليا ماعرفتيش وماحسيتيش ... داكشي علاش اش قلتيه غانطويه و اش قلت انا غاطويه تا نت .. وولدك ماوصلش لهنا بسباك ..
لامار : ( شافت فيه كترمش ومزال كتنخصص ) وو شششنووو ها ؟ شششنو ..
اسد : دابا نعرفو شنو .. لي كايهم دابا هو الولد بيخير ....
لامار علات عينيها كاتشوف فيه ودموع تايقطرو وهو جبدها عندو باس على راسها وعنقها مزير عليييها تاتهدنات بشوية فصدروو هاد نزلها فالسانسور ومشى بيها للشومبر ديالها لقا الفام دميناج كتخملها ... ابتسمات ليهم وخرجات ....
اسد : دوزي ترتاحي ولا حاولي تنعسي شوية
لامار : لا لا عييييت بالنعاس. .. عييت والله ..
اسد : دوزي غي تكاي وتلاهاي فتيليفونك ولا فشي حاجة تايخرجوه .... وسمعي الهضرة ..
دارها فااسرير بزز و غطاها بالايزار وهي دخل الفرملية كان صونا عليها
اسد : عبري ليها طونسيون ودخلو ليها تاكل ... ( ومات ليه بواخا و مشات تجيب ماطريال وهو هبط راسو عنها ) لامار .... كلسي بعقلك ... وكولي ورتاحي .. هادشي هو الوحيد لي كنطلبو منك ...كوني بيخر باش ولادك كولهم يكونو بيخير ... وتانت .... ( هبط باسها ورجع شاف فيها ) انا غانمسي نقضي شي شغال عندي ونت ديري عقلك
وومات ليه بواخا ودموع باقين فعينيها وخلاها وناض وقف تادخلات فرملية عبرات طونسيون لي كان طالع بلا قياس ..... عاودو ركبو ليها السيروم وجابو ماكلتها و بدات كتنقب بزز حيت واقف عند راسها ...تابانت ليه تاتاكل عاد مشا ... وهي دخلو عندها العيلات مببزين عليها تاكل اما قدس بقات فبلاصتها تاشافها وسيم و جا وقف حداها كايتنهدو على بعضياتهم ....
اما قسم كالسة على الكرسي ومطلعة راسها لفوق شادة فجناب الكرسي وذاكرتها مشات ليها لاخر حاجة عاشتها معاه .... وعلات يديها بشوية كتحسس شفايفها لي تاحد ماقدر يرد ليهم البال بسبب اش وقع .... تفكرات انه يقدر يكون اتصل وبسبب هادشي مشى كاااع من بالها انه غايصوني .. خافت تاني تخلق معاه مشكل حيت لمرة اخرى كاتغبر بلا ماتعطيه سبب واخر مرة متأكدة انه تعصب ومابغاش يبين بزاف . . رغم انه كاع اش دار والحيرة لي خلاها فيها هي بالها غير انه عنداك هو لي يتقلق عليها ...
اما بيلي كالسة شادة تيليفونها على الكرسي حدا المسجد دلاكلينيك وكاتزومي بجوج صبعانها على تصاروو فالخطبة وتضحك ومرة تبكي ... كتزومي على ضحكتو وتحس بيها مزال كاتدي ليها الهقل ... على رزانتو لي ماعهداتهاش فيه وماموالفاهش رزين قد هاكاك ولكن واخا هاكاك عجباتها كتروو وزادت من الكاريزما ديالو ... تاسمعات خطوات جاين وعلات عينيها وهي بان ليها اياد جاي وطفات تيل وقفات عندو
اياد : صافا !
بيلسان : ( بابتسامة )... ملي هو صافا راني صاااافااااا
اياد : ( تنهد ) ماشفتيش لوؤي ولا سلطان ... قلبت الكلينيك مابانوليش ومكيجابوش فالتيليفون
بيلسان : لااااا !!
اياد : فييين كايغبرو هادو
بيلسان : متعرف انا من قبيلة هنا مع جدة كتنساها تسالي باش ماتلفش هنا ..
اياد : ( شافت للمسجد وشاف فيها ) ماهضريتيش شوية مع قسم ولا شي واحد .. ماقالوش ليك شنو وصلو لهاد الحالة ؟
بيلسان : راه قالو تضارب مع ماماه
اياد : تي واش المضاربة مع مامااه اتوصلو لهنا واش تسطيتي ولا مالك ...
بيلسان : ماعرفتش والله ....
اياد : ( تنهد ) وعلاش ضاربو ؟ مارعافاش !
بيلسان : واش كضحك عليا اش عرفني .... انا مصاب غا فااااق ورجع ليا عقلي لراسي ..
اياد بقى معلي حاجبو مفاهمش تاخرجات رقية وجراتها بيلسان طلعو .... واياد كلس فالكرسي فبلاصتها وكايضور عينيه ماتسرطش ليه هادشي ! كريز ماشي عادية هادي... وماشي ديال مضاربة عادية ! الشك بدا تياكل فيه واش الامر يكون كايخص بيلسان ! حيت المضاربة طرات صباح الخطبة ومور ماهضرو هو وياه! رجع تنهد وجبد تيليفون كايعاود يصونني عليهم تا عطاه هاد المرة طافي كاع لا دسلطان لا دلوؤي .. ورجع ناض كايسوط
عند لامار
رتاج : والله الى عيقتي كمليي غير داك شوية ..
لامار : نو رتاج غير هزي عليا هادشي صافي راه كلييت غابزز واش انا عندي منيين يدوز
اريج : هادشي كون قلتيه قبيييلة نقولو من حقها اما داباا عندو اختي الطريق منين يدوز حيت الحمد الله راه بيييخر
لامار : ولدي باقي فالانعاش اا ريج راه غا شوفتو هاكاك معصور بلحريق وقوة الخيوط راه ماشي غير الشهية لي تسد لي
حياة : صافي خليوها عى خاطرها كلات هادشي تبارك الله ...
رتاج : انا غانمش نشوف داك البنت عندك راه ماعرفتها بااااش واااقفة ... الى مكلاتش اجاب مايفكني منها هاد النهار ...
لامار : قدس ؟
رتاج : بجووجات ماكلاوش ... قسم نقولو راها مع خوها ماعندي كيندير ليها ... نمشي نجمع داك جوج بعدا وسيم وقدس ونقلب على فيصل فين ملوح وبيلي نخرجهم لريسطو لهيه ياكلو ونجيو ... لابقينا ملهيين عليهم غايبقاو بجوع تايسخفو ....
لامار : سيري ارتاج اختي الله يييستر علييك قدس كتر راها على سبة هاديييك ... وسيم واخا يتعكس ليييك زييري علييييه يحشم منك ..
رتاج : غاا رتاااحي و الله مانطلق منهم تايااااكلووو ..
يلاه غاتمشي تحلات لباب دخلات بيلسان ورقية
رتاج : جااابك الله تا نت .... نيييت خارجة نقلب علييك دوزي قدااامي تفففطرو ...
بيلسان : ماافياااش غيررر خليييني
اريج : سيري تااااكلي ياهاد البنت راكي من الفطور دلبارح ينوض هو تسخفو نتوما
رتاج : هضرة وحدة راه قلنهاها .. دوزي قداااامي ...
لامار : رتاج .. قسم جيبو ليغعا غير شي حاجة خفيفة تخرج تاكل برا وترجع تدخل عندو ..
رتاج : واااخا ..
ببيلسان : فين لوؤي ؟ اياد تايقلب عليه
رتاج : ونا شفتووو ..
حياة : حتى الصكع ديالي مابانليش غايلاقيو دوك الريوس ويغبرو ...
اريج : ( طلات من الشرجم ) طمبويل د لوؤي مكايناش .. دسلطان راها هنا ...
حياة : ومانعرفت فين راه مخشي ....
رتاج : هااادوك كيالحلالف مايوقع والو .. نجمع غا هاد البخاااخش ... دوزي قدامي ...
خرجات رتاج وبيلسان ومشاو كايقلبو تالقاو وسيم وقدس وجراتهم بزز هو يبان ليها فيصل برا جراتو تاهووو بحالا كتتجررررهم بالسلاح فوق راسهم ياكلو .... ومشاو لريسطو لي قريب لتما دخلو وهوما كل واحد فين تكا على الكرسي كايتنهدو .... وعاد بدا يديهم النعاس لدرجة قدس غا كلسات نعسااات ... و وسيم كايتسدو عينيه وكايحلهم بزز ... وفيصل ملهي مع التيل ... وبيلسان حاطة راسها على رتاج تاهي كايتسدو عينيها .. ماشافوش تاالسيرفور لي واقف عليهم غير رتاج لي طلبات وبقات كتشوف فيهم وتتنهد ....
فللخر عنقات بيلسان عندها لي غفاات وبقات تشوف فيهم كاملين نعسو .. تاا من فيصل حط تيليفون وربع يديه على الطبلة ونعس......
عند لامار ...
حياة كتهضر مع اية فالتيليفون ورقية كالسة كتسبح على الكرسي حدا لامارر ... ولامار شربات الماا ومسحات فمها وشافت فرقية
لامار : ماما ..... ماصوناش مروان ؟
رقية : ( باست تسبيحها وكمشاتو فحجرها وشافت فيها ) على ابنيتي فين انا كان عندي العقل نهز شي مشقوف ... كوراه صونا ....
لامار : ( تنهدات ) تخاصمت انا وياه شوية اماما
رقية : مع مروااان ولا مع ولدك ؟
لامار : بجوووج .... ( قطعات حياة تيل و جات كلسات حدا اريج كايوشفو فيها ) وراه تقلق وهز حوايجو مشا
رقية : يااا حااا !! وعلااااش ؟؟؟؟؟ ياك لابااااس
.لامار : فففففف .... ( علات راسها مدة كاتسوط ورجعات شافت فيها ) هاداك الولد لي كان جا عزانا .. حسام ...
رقية : ( تفكرات اخر ماوقع ) فييي رااااسي فييي رااااااسي الخباااار ضااربو هو وولد رتاج.....
لامار : داك نهار لي كان فالكيلينيك ملي دخلوه اسد وعدنان .. جود ملي سمع تبسل ليه على ختو ... مشا جرا عليه من الكيلينيك ....
رقية : ( متبعة معاها ) ايييييه !!!!!
اريج : ياكما هادشي علاش تقلق مروان ؟
لامار : ودابا لي ماعارفينش حنا ... تما ضاااربو مع مروان كاملين بيهم ... راك عارفة ولادنا شحال كايعرفو يهضرو ... يمكن ردو عليه فقصة حسام ولا منعرفت كيف وقع ليهم تاتزااايدو فالهضرة ....
اريج : اويلي على كاملين ... حتى ووولدي ؟؟؟؟؟؟؟
لامار : ايه تاهو .. ونوضوها تما بيناتهم ...
حياة : اوا سااااعة الشييييطان ...
لامار : داكشي علاش مروان ماجا لا فالخطبة لا فوالو .. بقى فيه الحال ... قالك جراو عليا
رقية : هااااويليييي وححححدي !!!
لامار : وغايكونو كانو معصبين ولا منعرفت انا راه مابقيت فاهمو والو اش ضار بيناتهم ...
اريج : صصصبري صبري ( كتجبد تيليفون ) صصصبري يططلع عندي لهنا صبببري .. اولي على يجيرو عليييه ؟؟؟؟
لامار : اصااافي خليي الولد بلا منكيرو هادشي ... مروان راكم عارفينو يتعصب ويبرد
رقية : ( شدات على راسها ) هاااااربي يااااربي .. هاربي وفين نعطي بالراس
حياه : ياك سلطان مكانش تما بعدا ؟؟؟؟ راه كنعرف هاداك تاهو كايقطر غا العععسل ...
اريج : مكانش ( كاتصوني ) كان ولدي وولد رتاج وجود ... غااااابلاتي عليه .... ااالوو .. اياااد .. فينك ؟؟؟؟ .. طلع طلع اولدي عندي لاشومبر دبلامار .. لا لا واااااالو غاااااطلع .... يلاه دااااابا .......
لامار : ارييييج .. قلت ليك خلي الولد منكبروهاش
اريج : لا اختي نكبروها ... اوولييي على يجيرو عليه. . .. ملي تعصب الولد وهز حوايجو علم الله اش قالو ليه ... توريني فهاد العصابة ولا ..... يتجمعو على الواحد كاياكلوه ... غاااابلاتي يطلع عندي ...
حياة : خليه يجي نعرفو غير اش وقع بيييناتهم تما بعدا
رقية : اوا ومروان شكايقول ... ماهاداك سوييييهل ليهم
لامار : دابا هو جاتو بحالا تحاماو عليه .... قالك قالو ليه داخل بين الدم وممعرفت شنو مهم راه تفركع عليا
اريج : اوييييييلي على قالو ليه داخل وسط الدم اوييييلي ؟؟؟؟ اختي ولدي الى كان هو لي قالها ليه راااه غايتبع ولدك للانعاش ... واش هادو هبلو ....راه خالهم هاداك كبير عليهم يعطيوه التيساع
حياة : وهوما كيدارو تا وصلو لهاد المواصل كاملة ؟
رقية : ( كضور فراسها ) واااش غاتوريييني فولدي .. كو راه جاتو النفس على صاااحبوو ماارضااااش الزغبي ....
لامار : انا اره مافهمت من هضرتو والو .. انا تعصبت غير فاش قال ليا جود ضريطبو ولا منعرف واسد كان كاشوف وماقال والو .... تما تعصبت .... راه خويا هادااااك ... مابقيتش عرفت كاع كيفاش تاطلعت عند جود وضربتو
رقية : ( شهقات ) على نتي ضربتييييه كااااع ؟؟؟؟ الله ااابنيتي الله ... الولد راسو كي البيضة خليييييه منو ليييه يضاربو ولا يتقاتلووو ها المواس ها الجناوااا ها الخلاااا .. اش دااااك ليييييييه
لامار : وراه قتليك ماحسيتش براااااسي
يلاه غاترد عليها هو يحل اياد الباب ضور عينو عليهم مجموعين وهو يدخل وسد الباب وقفات عندو اريج
اريج : اجي نتااااا لهنا .... ضاااربتي مع مروان ؟؟؟؟
لامار : اريييييج
اريج : آدوي .... شنو قلتي للولد ....ضارب هو ولد ختو صفييو القلووووب ماشي تزيدو تشعلو العافية يا العصااااابة
اياد : ( كايشوف فيهم ما فااهم والو وشاف فاريج كاينزل يديه بمعنى كااالم كااالم وجاوب بالانجليزي ) كااالم دااااون ...كالم داااون .... اش كاتروني ؟
اريج : مروااان .. مروااان واش ضاااربتو معاه فالكلينيك
اياد : ( مباشرة ) ياپ ....
اريج : اويييلي ( غايسطيها ) .. واش داك ليييه ؟؟؟؟؟
اياد : و اش وصلكم نتوما لهادشي .. بينا وبينو .. اش دخلكم ؟
اريج : كيفاش اش دخلنا ... جريتو عليه ؟؟؟
اياد : سيرريووزلي موووم ؟؟؟؟؟ ( شاف فلامار ) what's going on ؟؟؟؟ ( اش واقع )
لامار : ( تنهدات ) ماتديش عليها اولدي .. صافي نساو عليا هادشي
اريج : لااا ... خليه يهضر نفهمو .... قوول لينا نتا اش واااقع
اياد : ( ببرود ) علاش ...اش دخلكم ؟
اريج : واااش باااغي تححمقني نتا تاني ....حييييت مروان راه تقلق وهز حوايييجو ومشا .. ولامار راه داكشي علاش ضاربات مع جود تاوصلنا لهاد المواصل كلها .....
اياد علا حاااجبووو فيها ...وتنهد ممعمققق كااايسوط ... وبدا كايضور وكايرد شعرو لوور بالفقققصة على مروان لي طلع برهوش فهادي .... وهي شداتو وضوراتو لعندها
اريج : شنوواقع تاوصلتو لهادشي كامل ... لولد جمع حوايجو من الدار ومشى ... تجريو على الولد من دارو ضسرتو لا؟ ..
اياد : ااش غاانجريو واش نت مريييضة .. راه تشادينا فالهضرة وهو ديما تايخلي كوولشي وتايفهم من الass ( المؤخرة )
اريج : ( ضرباتو لكتافو ) متتتتخسرش الهههضرة ....
اياد : ( شاف فلامار ) واش حنا اول مرة غانضاربو بيناتنا ... ياك انا جود هرست ليه نيفو وهرس ليا ضهري وماوصلتوش بكريز الانعاش !!! .... يوصل على ود التخربيق ؟ راه غا نخربيق داكشي ... سمحيلي ولكن راه خوك تبرهش فيها امرت عمي
اريج : وراااه جرااااو عليه
اياد : انااااا لي قلت لداك الهضرة ماقلها ليه حد ماتجمعيش كولشي
اريج : ( وسعات عينها ) اويييييييلي ( ككضررربو لصدرو وهي بحالا كتنفض الغبرة صدرو بحال الحجر ) وااش باااغييي تححمقني فهاااد الصباااح .. ااااش وووصلك لييييييه ..... شكووون قاااالها ليييك .... اش من حق عندددك
اياد : دابا اش واقع انا فهمووني اش واقع
حياة : ( وقفات عندو كتهضر معاه بالانجليزي ) دابا اولدي ملي نتوما نوضتوها تما .. الولد راه بقا فيه الحال .. وجا قالها للامار وهز حوايحو ومشا .... وهي راه خوها هااااداك راه جداتكم مووو .. واش حماقيييتو راه دارو تاهو ....راه كبر فيها قبل ماتزادو نتوما كاع .. لامار مشات تضاربات مع جود علاش قلل احترامو على خالو وجود جاتو كريز مور المضاربة ديالهم ...
اياد : وااااات ! ( ضار شاف فلامار بززرزبة ) مااانعرف اش قال ليك ولكن راه مكانش غير طرف واحد لي قلل الاحترام تما .. داك نهار اصلا تاحد مكان محتارم شي واحد ... الى قللنا عليه الاحترام ..... حيت هو لي سبق
اريج مووسعة عينها فيه مكرهاتش ضربو بداك السريروم واخا عارفة ولدها صريح ومكيتعداش ومربياه مزيان واكن محملاااتش تتحط فهاد الموقف ... فنفس الوقت باقي كايبان ليها مخخخرج عينيه تايدافع وباينة فيه شعل كتحمد الله لي رقية مكتفهموش غا حالة فيه عينيها ....هي قالت تطلعو باش لاكان دار شي حاجة يعتدر ....ساعة كانت ناسية ولدها سيمتو اياد ...
اياد : الى كان هو خرج من الدار ..... بسبابي حيت انا عارف اش قلت ليه .... ولكن خصك تسمعي من جوج جوايه .... راه مايمكنش يبقى يعاير ليا انا فولاد عمامي فوجهي ونسكت !!!! .... راه دمي هاداك ... بااش نسمعو تايقول عليهم مامربيينش وجراو ليه على صاحبو و ومكيبغبو حتى واحد ومفششين و منفوخين على الخاااوي ومابقات تاحاجة ماقالهاش عليهم .. ملي قال ليا بلي هوما ماتيبغييو تاوااااحد يجي عنندهم شششعل ديييلمي وقلت ليه ملي مكنبغيوش اسيدي ناس يجيو عندنا .... اش مزال كادير هنا ( لامار غي ركتنهد واريج كتتتحلف عليه وتعض فصبعانها ) ررراه استتفففزني واش حنا كنحسبوه واحد من الفاميلة يجي هو يقسمها ليا .. كالس لا نتونا لي فكندا مربين وهادو لا ....فوقاش حنا تقسمنا هاكا ...فوقاش غلطو معاه جود و لوؤي .. فوقاش حنا درنا هاد الفرزيات بيناتنا !!! .... كلنا كانحتارموه وعندنا عزيييز ... بيناتنا مشكل يبقى لبيناتنا .... و غايتحل بييناتنا .... ماتجيبيش ليه الخبار كاع. ... اش داه هو يجي يشكي علييك ؟؟؟؟ كايقرا فالروض .....
اريج : راه جريييتو على السيد ا ا ايااااد.... قال بلي قلتو ليه مدخلش بين الدم ... على هو شكووون ها ؟؟؟؟
اياد : اااسككتي الوالدة اشمن جريتو عيه .. كون عرف راسو اش قال يعرف راه خرجتها بعصبية .... ( شاف لامار ) هو اش داه يجبد شنو كان بيني وبين جود شحال هادي ... فوجهي تايقول ليا دابا عاد يان ليك ولد عمك .. بلاصة مايفرح حيت القلوب صافية وباقي فصف ولد عمي واخا يطرا لي يطرا .... هو باغي يزيد يشعل العافية ... تما قلت ليه باش تعلم مادخلش وسط الدم ... قصدت حنا ولاد العمام بيناتنا .. على حنا ملي تخاصم هو واسماعيل تدخل شي واحد بيناتهم ؟؟؟ ياك تعاملنا بحالا مافخباارناش كاع تاااتصالحو وفرحنا ليهم .... كاملين كنا معصصصبين داك النهار ...و تاهو راه ماسكتش .... مافهمتش انا هاد الحركة لي داااار و جا عندك هاكا كايتشكا ... !!! ...بقى فيه الحال يخلينا نبردو .... ونكلسو نهضرو ونعتدرو .... ججججربيها من راااسك باش كنحسو .... نت بقى فيك الحال حيت جود ضارب ليك مع خوك وعايرو ...وانا مغايبقاش فيا الحال يجي يعاير ليا ولاد عمامي فوجهي يقول عليهم مامربيييينش !!! ( اريج كتعض فيديها يسكت ) راه باحالا جااااا ووقف مع صاحبو ضد ولد الفاميلا .. واخا يكون هاد صاحبي كيبيض ليا الذهب ... الدم هو الدم .... دمي قبل من صاحبي .....مااارضاش عليه ؟ ... هو مكانش خصو يرضا منلول حتى على بنتك يتشهاها ليه صاحبو هاكاااااك ..بغاها يقول نجيب واليديا ونجي نقصد الدار ماشي يتشهى عليه ... ولا كاتجيه النفس غا علامن بغا !!!!!!
حياة : صافي صافي ... صافي ا اياد مرات عمك مريضة دابا
اياد : انا راه نسييييت هاد الخرا كااامل ومكنتش غانعاود نجبدو .... مافهمتش علاش دخل العيلات وسط هادشي...
لامار : ايااااد !! ( اياد شاف فيها ) ااخر مرة غانسمع هادشي .. هاداك خالكم كبيير عليييكم غااتحتارموه .... لا نتا لا ولدي كنهضر عليكم كاملين. .... الاحترااام للكبير خصو يكون وااااجب
اياد : دابا عاد بان ليكم الكبر ؟
اريج : ( مع حياة ) نااااري سكتييييه غانوض نقتلووو
اياد : علاش انا مااكبيرش على جود ... ماااهرسلييييش ضهري ؟؟؟؟؟؟؟ لووؤي مااكبيرش على سلطان .. مافدعوش داك النهار من يدو .. علاش حنا مابيناتناش هاد الشكليات ؟؟؟ تاهو خصو يكون واحد مناااااا .... مكااين لا كبير لا صغيررر احترمني نحترمك .. تقلل حياك نقلل الحيا تانا ...تقاد مع الطريق نتقادو كاملين .... تعواج نعواجو كااااملين ... حنا عاكا داايرين .... الى جيناه غراب ومامربينش ... راه المشكل فيه هو لي مررربي بزاااااااف ( اريج غاتسخف ) .... ميمكنش الجماعة كلها خااايبة غير واحد لي زوين او !!! يحسب راسو بعدا هو منا عاد نشوفو حنااايا .... تبررررررهيش
اريج : ( ضررباتو بالرولو دالكاغييييط ) رررربي مااا خرج عليا ..... بنااااقص كاااع لي يهضر معاك .... خرج عليا ولا نتبعك لجووووود ...
رقية : تي طلقي من الووووولد .. اش قااااال ؟؟ توما جيييبو ترجمااان فهموونا اش قال
اريج : كااايخرررربق اش عندو يقوول
ايااد : نووووو .... ( مشا عند رقية وكلس على ركربتو هبط لمستواها وشد يدييها ) لييسن گرييينما ( سمعي آجدة ) انا ... مايجريش على ماروان .. ماروان يعصب هو ..و ييعصبني انا...
رقية : اييييه ...مروان عصبك ونضتي جرتي عليه آلبالا
اياد : نوووو ... نوووط لايك ذيس ... ماروان ... يعلم مزيااااااان يهترم الپيييپل ... باش الپيييپل يهترم ماروان ....
رقية : ( طولات فيه شوفة حالة فمها و وشافت فاريج ) راه يعطيني السالمة لافهمت شي حااااجة....ولادك ملي يوليو يجيو لمغرب سيفطو معاهم ترجمان ديالهم الله يرضي على بنيتي ...
اياد بقى غا كايشوف فيها بمعنى مالقيت ليك جهد وناض وهي تقرب عندها حياة ....
حياة : هانا هااانا نفهمك اخاالتي ...
رقية : اجي ابنتي اجي ( كادير ليها بلاصة حداها ) .. الله يخليي ليا عا الشهيبة ديالي تعلمات العربية ماهاد القزبور ومعدنوس يعرفو عا يلويو لسانهم ...
حياة : دابا اياد لي قال .... هو ان داك نهاار فاش ضاربو ... راه تا مروان عاير ليه ولاد عماماوو .... قالي عيهم مااامربينش على جود ولؤي زعما ...
رقية : اوا يقلل حياااااااه السلكووووووط ماهو مربي .... تلاتين عاااام ومزاال تابعاه نجري على لبنات من دارو فطناش دالنهار نخملها ونجي ......
حياة : وماشي على دااااكشي اخالتي .... زعما مكيبغيوش البراني ..... واياد قالك بقى فيه الحال وناض تاهو جعر عليه وتشادو فالهضرة ... و زعما قال بيناتهم مكانش خصو يوصلها للامار ... هادشي لي كالس يگوول فييييه كون بقى المشكل بيناتهم مغاتكبرش هاد القضية قد هاكا ....
رقية : اوا عندو الحق .. بييييناتهم ... ( شافت فاياد ) هاا بلاااتي عليه السلكووط ياوالاه تااانفرجك فيه ... دراري بلا عقل يضاربو ليوم ويتصالحو غدا .... مالو تايجي يهجج ختو فدارها ويوصل ليها الولد لبيت لخاطار ....
لامار: ماما...راه تاهو مكانش عارف غايطرا هااادشي ....
رقية : عاارف الولد راسو كي البييييضة دالحجل .. عارفو دايرين معاااه ودن وتسمع ودن تقول ماسمعت .. واش جود حنا نديو علييييه .... علاش يههج ليك نتي الدويرة ديالك مكافية عا مع ولادك ليهودي بلليييهودي
لامار : ( طلعات عينها فياد ) اياااد .. واش جود ضربو ؟
اياد : نووووو .. اشمن ضرب .. غير دفعو وصافي مالو تصطى !!!
لامار : وملي دفعو اسد بصح كان كايشوف ومادار والو ؟؟؟؟
اياد : ( وسع عينيه بانفعال )وااا شتي تخربيق دابا ( شاف فمو ) ششششفتي التبرهييش ؟؟؟؟ ( رجع شاف فلامار) قاال ليك غا لي عجبو .... نوو ... عمي راه ضرب جود مع الحيييييط تاتزدخ رااااسو ( لامار علات حجبانها ) كلنا تخلعناا كون مااحيدناااه من يدو .... ومشا داه تالعند الدكتوررر كونسيلطا ليييه خاف تكون وقعات ليه شي حاجة .... عرفتي على ضربة دار ليه وهو مريض ؟؟؟؟؟ ... هادي مشافهاش هو ؟؟؟؟؟
لامار : ( كتنهد وتحك فحبهتها وراسها كاينفض ) صافي ولدي صافي .. سسسدو عليا هااادشي
اياد : ياكما قال ليك عمي اسد مدافعش عليه ولا ضارب تا هو وياه ؟ .. انا الكدوب راه مكيعجبوونيش .. عمي اسد مقاليه واااالو .... هو راه ملي شاف جود كايغوت راه ضربو مع الحيط .. ماتخلي تاواحد يكدب عليك
لامار : مكدبش غي انا سولتك وصافي .... طوي عليا هادشي
رقية : ( شافت فحياة ) اش قال
حياة : غير سولاتو واش ملي ضارب جود ومروان اسد كان كايشوف قاليها اسد راه ضرب ولدو مع الحيط
رقية : اويلي توما مالكم لي يجا يردخ فهاد الولد ؟؟؟؟؟؟
لامار : ودابا مغااتبدلوش عليا هادشي ....
اياد تنهد ومشا حداها للسرير جلس وشد يديها
اياد : كنتعدر لاقلت شي حاجة فحق خوك ماخصهاش تقال
اريج : وهي غاااا حاجة اوليدي لي قلتي ماخصهاش تقال ؟؟؟؟
اياد : مهم كنعتدر ( شاف فلامار ) .. كنا معصبين ... وهضرتنا حنا ملي نكونو معصبين مخصهاش توصل ليكم نتوما العيالات ... راه كون جينا نعاودو كولشي كون غير حنا ولاد العم بيناتنا واحد مايشوف فواحد الى كبرناها .... انا را مروان عااارف علييييه لي يييغرق ليه وجهو معاكم وسااااااااكت حييت انا ماشي برهوش لداك درجة ديال ندخل العائلة وسط التخربيق وقلة العقل لي غاترجع ليه بالندامة واحد النهار ... ولكن راه لاتعدى الحدود راه مغانعقل على والو .....
لامار : اش عارف ؟؟؟؟؟ ياك لاباس
اياد : مغاانقولش وعمرني غانقول ماحدو داير عقلو ..داك نهار كولشي كان على اعصابو .. المشكل كامل كان عندهم مع حساااام هو لي دخل راسو تااا تفركعو فيه حيت جات شوية ناقصة تشوف ولد الفاميلا جا فصف صاحبو وخلاك نتا.. اولا ! حنا راه ماموافينهاش .. ولد الدم هو اللول .. غااالط ولا عندو الحق انا معاااه ... ونت ملي قال ليك هاكا اش داك لجووود ؟؟ .. انا لي قلت داكشي كامل كون جيتي عندي .... خلي جود مريض اجي عندي نشرح ليك انا .. صوني ليا نجي عندك ....
لامار : ( كتنهد و كتعوج فعنقها بعياء ) اولدي انا كون عرفت هادشي غايطرا نقطع رجلي قبل منوصل عندو .... صافي صافي ... مروان دابا يبرد تاهو .... صفييو النفووووس ...
اريج : نوض خرج عليا .... نوووض عليا منشوووفش وجججهك
اياد : ( ناض ) هاهو ناااايض
حياة : بععععدي من الولد اويلي
اياد : ( شاف فلامار ) ردي البال لصحتك متشوفيش لهاد تخريبق وهو خاصو يكبر عقلو شوية يولي قد لاج ديالو باش مايبقاش الديكالاج ...
حدها ومات ليه براسها وخلاهم وخرج غير سد الباب بدا يمشي ويجي بتووترر مغززف عليه كوون يشدو يييفللللعصووووو ...
لداخل
رقية : ولد الحرام من فعاااييييليو مالقا مايدير اجي نقلب الدار دختي ....
اريج : دابا قلبو علينا هادشي ... نبقاو نشدو حنا فشي حاجة دازت ... ( شافت فلامار ) مسحييها الامار فيا .. راك كتعرفي اياااااد راه واخا كيهضر راه مكيقصدش
لامار : واش غتوريني فولادي ااريج .... راني عارفهم ميقصدوش غير بغيت يوليو يحترمو كثر راهم تعلمو واحد الصراااحة لي ردوها وقاااحة كااااع ....
حياة : واانتي سمعتيه قالك تاهو عاايرهم ( اريج كتنغزها تسسسكت وهي ضربات الطم )
لامار : اودي راهم كاملين بخبيييييزتهم ...
رقية : ( شافت فحياة ) اراي ليا داك تيلييييقون نشوفو فين هو .. اراي ليا
لامار : ماما ماتقولي ليه والو متخلعييهش
رقية : مااااطي ليا قلتيك
حياة شافت فلامار وشافت فيها وعطاتها تيليفونها
رقية : دوزي ليا نمرة ديالو
حياة : ماااعنديييش
رقية : ( شافت فلامار ) فييين تيليفونك نت
لامار : ماما عافاك راه راسي تيحرقني .. واش نقوليها بشي لغة اخرى.... قلبو عليا هادشي حمد الله غير فاق ليا ولدي
رقية : نشوفوو غا فييين هووووو .. اراي ليا
لامار : ( شادة على راسها وكتومي لصاكها لي فوق طابل لي جابوه الكارد ) هااهو هناااا
حلات رقية الصاك هو يبان ليها تيليفون ومداتو لحياة
رقية : تببعينييي ..
خرجات رقية من البيت مخلية لامار كتهضر وتوصي وسدو الباب ورقية بدات تعري ودنها تحت من الفولار
رقية : دوزي ليا نمرة ديالو دوزي
حياة : ( كاتقلب ) هانا كانقلب ...وماشي تخلعيييه تاني
رقية :نت غادوزي ليا وديها فجنب لي ضارك ....
حياة: ( مداتو ليها ) هاهو كيصوني
وقفات حداها ورقية شاداه فودنها وكتمشي وتجي تاجاوبوها
رقية : ( بجهد ) اااااالو .....
مروان : الواليدة .. هادي نت !
رقية : آللييييييه ** ودي ... فيييين نتا
مروان : فلوطيل .... علاش ؟
رقية : فالنووطيييل ؟؟؟ ماعند والديييك ديوووررر بغيييت ليك الساااااالمة ...
مروان : الواليدة اش واقع !!
رقية : اليييي**هودي من فعاايلك ( حياة كتشدها تهدنها ) جييتي اللي** هووودي حررتي العشية فخخختك ومشيييتي هاااا !!!!! جااي تشكى من جود .. جود فالربح ؟؟؟؟ جوود داير كي الغلااااالة تجي تشكى منو .... هانتا اولد الحراااام سيييفطتيييه بييليييكي لبيت لخاطار بغييييييتلك سسسهههههطة تتتسهطططك ( حياة شدات على راسها )
مروان : ( كان متكي على السرير وناض تكعد دغيا ) اش كتقولي .. الواليدة اش كتخربقي....
رقية : كااانخررربق ياااا جحش يا ماخلات كررشي .... نتا شعلتي ختك وهي مشات شعلات على ولدها ضرباتو سسخفاتو صيفطاتو لاانعااااش ليييلة كاملة دوزناها هنااا مايدوزها العدو ياااا العدو .. باااه كان غيحماااق وخوووتو بكاو الدم .. ماقلنا تااااطللللعوه من داك الثثثلج .. راه باقي فبيت لخاطار كولو خيوووووط .. .يغيييتيييييللك لي ماااتعتتقك ياااولدييييي اش دااااك ليييييه اش داااااك لييييييييه ( كاترعد بالاعصاب ) بببببعد منو عطيييه تييييسااااع الولد مرريييض عايش لينا غا بزز عطيه التيييييساع ببببببعدو منوووو...
مروان : ( كيرمش ) الواليدة ؟ واش عارفة اش كتقولي .. شكون حداك ... دوزيلي شي واحد ... كيفاش الانعاش .. اشمن ثللج .... فين هو دابا ؟؟؟؟؟ ...
حياة كتسمعو وشافتها كلها تعصبات وبدات كتسكتها وحيدات ليها تيليفون
حياة : عطيني عطيني نكمل معاه وجلسي .. كلسي تنفسي ( دارت تيليفون فودنها ) الو مروان .. متخلعش متخلعش غا ماماك معصبة شوية
مروان : حياة اش واقع ... مافهمت والو مالو جود ؟؟؟؟؟
حياة : ودابا غا تعصبو شوية هو وماماه وراك عارفو هو على سبة وجاتو كريز .. نزيف داخلي ودار العملية لبارح ودابا راه الحمد الله فااااق شوية وغيخرجوه من الانعاش متخلعش
مروان : ( كيمشي ويجي ويقلب بعينيه كوولوو كيترررعد ) فييين نتوما
حياة: حنا فالكلينيك دالمنطقة ... وشوف بلا مت..
قطع عليها تيلي بلا متكمل كلامها وهي شافت عند رقية
حياة : صافي تهنييييييتي ... وهانتي فججعتيه والله الا حرام عليييك .. كبرتوووها كاع
رقية : خلييها خللليها ... نكبرووها تصغار ليه--ودي اش داه لييييه ... داير عقلو فعقل جود ... اش داه هو للولاد يعاير فيهم .. حنا باش عايشين غاااا من خييييرهم ..
حياة : ولا لا وهادي هضرة تاني ؟؟؟ اشمن خير راه لاسمعوك كتقولي هاكا غيتقلقو ديال بصح ... راه نت عطيتيييه بنتك كاع ... وبنتك عطاتووو ربعة دالوليييدات ... وعطاتو مها كاع زوجاتها لنسيبو ... عطاتو العائلة .. متعاوديش تقولي بحال هاكا يسمعك اسد والله تايبقى فيه الحال .. اخر مرة تقولي هاكا ....
رقية : ماااايقربش للليييهم .. كيجي من صيف لصيف يجلس مع ميمتو .. هااااد الحووسين هدا ولا منعرفت لباباه لي يوصل ليا انا ولدي الحنين ديالي لبيت لخاطاااار بغيت ليه بووووهزاااز يييهزو عليينا ......
حياة : وصافي متعصبيش ماشي نهدنو واحد ينوض واحد
رقية : ( كترعد بالفقصة ) وولد الحرام وابسيييف تاتجيهم نفس على خخختهم اووو .... الولاد كبرو قدام عينييناااا تتربيتنا كاامليييين ... ينوض هو تيقلق ليا من جود .. اويلي وحدي ... نندب ولا اش نديير ....غااايييحمقني .. غالهيه يشيبني بقوة البنااااات نقيل نشطب فيهم كي الكاياس نخرج الزعرة من الباب دخل ليا عزية من الشرجم .... وهنا يجي يضااارب .... كيييغاندير انا مع هادا خووتو كاااع تزوجو دار عقلهم هو خصو تاااايخرج ليا انا عععقلي عاااد يدييرو .....
حياة : وصافي دابا نوضي بشوية يلاه ندخلو .. تانتي فجعتي الولد والله الى حشووومة بقى فيا ... زيدي يالاه ...
دخلات رقية بشوية للشومبر ولامار كانت كتحاول تنعس شوية واريج كتغمض عينيها على الفوطوي ودخلو جلسو ورقية باقي معصبة ومكتبيينش ....
عند رتاج
شافت لساعة لقاتها الحداش وبدات كتنوضهم واحد بواحد
رتاج : اويلي نوووضوو تكعدو .. نوضو فطرو وسيرو لداركم نعسو .... فيييصل ... وانوض اولدي ..( كاتزعزع فيهم ) وسيييم
بداو كيعوجو فعنقهم يتوكضضضو وهي كتفيق فيهم واحد بواحد وهوما عييينيهم زرقين من تحت ومنفوخين
رتاج : بيييلي نوض ابنتي نوضي .. قدس راني جبتكم تفطرو ماشي تنعسو .. نوضووو يلااه ( علات يديها لسيرفور بمعنى جيب الفطور راهم فاقو ) وااانوضو دابا هوما خرجو خوكم نووضوو نشوفوه
بيلي : ( باقا مبوقة بنعاااس كتهضر وتحك فعينيها ) خووووهم ...
رتاج : ااامهضضر عليك حد .. خوهم الالة هوووما ماشي نت غا نووضي
ناض فيصل كيعوج فعنقو كيقلب على الحمامات وتبعو وسيييم وبيلي يلاه غتنوض شداتها رتاج
رتاج : ومغتمشييوش كتااابعو تايجيو و سيرو نتي وقدس غسلو وجهكم ...
بيلي : خلييني اخالتي ... مزيرة والله فيا پيپي ..
رتاج : سيييري سيييري ....
ناضت بيلي مشات ورتاج شافت فقدس لي باقا كتجبد ... كتحل عينيها بزز
رتاج : قدس ... احبيبتي مادواش معاك لؤوي ؟
قدس : ( وسعات عينيها بزربة توكضات والنعاس طار ) ها ؟ ل لا!!
رتاج : ( كتشوف فتيليفونها وشافت فيها ) شوشني .. ساعة ونص هادي وانا نصوني تيليفون طافي .... ماعرفتو فين غبر ....
قدس : اا. . م ما ... ماعرفتش ( كتفكر قاليها غيسافر ) م م معرفتوش ... ت تانا ...هانتي شفتيني معاك ... مشفتوش
رتاج : وبلاتي شوية حاولي تصوني عليه يقدر يجاوبك نتي
قدس : ( ولات حممرة وسرطات ريقها ) اا .. يجاوبك نت ماماه ... ز زعما .. انا علاش .
رتاج : انا ملي كايكون باغي يدير شي موصيبة تاااااكايديرها عاد كايجاوبني .... جربي نت جربي ابنتي بالي راه معاه كامل ... ميخليش هو جود ويمشي ... ماعرفتش فين مشا وباه غيبقى يسول تاني غيقلب ليا راسي ....
قدس غير سكتات تابانو ليها جايين وناضت هي لحمامات وجبدات تيليفون من جيب الفيست كتصوني ووالو عطاها طافي ودخلات كتبات ليه مساج وغسلات وجهها نشفاتو عاد خرجات عندهم لقات الفطور محطوط .. فطرو بلا خاطرر ورتاج واقفة عليهم بزز تاكلاو شوية عاد ناضو مشاو لكلينيك سبقو بلاشوومبر دلامار دخلو عندها ....
قدس : ماما شوية ؟
لامار : شوية احبيبتي .. فطرتو ؟
وسيم : سي ( وقف عند راسها كيدوز يدو على شعرها ) شفتي جود ؟
لامار : ششفتو اولدي شفتو و الله يشااافيييه
فيصل : مزال ماخرجوه ؟
لامار : مزال اولدي ماعندي خبار كون خرجوه كون جات قسم ولا اسد ... جبتو لقسم شي حاجة ؟
قدس : وي طلعات ليها خالتو رتاج ... فين هو بابا ؟
لامار : قال عندو شي غراض يقضيه ويجي ..
تنهدو وجلسو و فيصل ووسيم خرجو غاديين فالكولوار كل واحد خاشي وجهو فتييليفون تاعلا وسيم حاجبو تفكر هو يشوف فيه
وسيم : شفت شي تصاور تايضورو فانسطغرام ... كنت خارج سارد داك الليلة د ليڤينمون ؟؟ ياك لاباس !!! مشا من بالي نسولك بسبب اش طرا ....
فيصل علا عينيه كيشوف قدامو فنقطة منعدمة ... طول فيها الشوفة وقال بغموض كيف ديما
فيصل : مابقيتش عاقل ...
وسيم بقى واقف وهو زاد تمشى ووسيم تبعو بعينيه باستغراب ! واش هدا مزال مغيبدلش هاد الطبع !!!! فلخر بدا يضور راسو وخرج لجردة ...
بعد 3 ساعات ....
قدس متكية على ليفوطوي فشومبر دماماها شادة تيليفونها وبيلسان متكية عليها تا هي شادة تيليفون والفوطوي لاخر جالسة رقية وحياة ورتاج كانت مشات لدار تشوف ولدها و اريج جالسة على الكرسي حدا لامار ....
اريج : وحاولي حاولي تنعسي شوية
لامار : انا را بيخير .... يخرج ليا غير ووولدي من تما ... ( شافت فحياة ) حياااة .. سيري اختي لدار ترتاحي شوية وشوفي بنتك تانت وعاد اجي
حياة : راه معاها فريدة وكنعيط ليها ... انا تايخرجو جود ونشوفوه ونمشي .. وتا داك جن لي عطاني الله يمشي يطل على ختو راها مشوشة تما .. ولا يطفي عليا تيليفون مانعرف فين زاد ...
اريج : هو ولؤي .. لاقاو الريوس طفاو تيليفونات منعرف فين زادو ...
قدس علات عينييها فيهم بعد مكانو فتيليفون وبدات كترمش .. كتسائل علاش مشا هو وسلطان ؟ فيييين !!!!
باقي ماقدرات تلقى جواب تاتحلات الباب وهي دخل قسم ... وبيلسان ناضت بالخطفة وقفات
بيلسان : خررررجوه ؟؟؟؟؟
قسم : ( كتعوج فعنقها بعياء وكولهم كيشوفو فيها كيتنساو شي خبار ) هاد الساعة انا لي خرجوني ...ماااما شوية ؟
لامار : لا باس لاباس ... علاش خرجوك ؟
قسم : ( جلسات حدا ماماها فالسرير كتهضر وتأنن بالالم لي كتحس فضلوعها بالعياء ) فاق قبيلة هضر معايا شوية وشرب تاني الما وجاو حاولو يوقفوه والحمد الله دغيااا وقف تمشى شوية ورجع جلس باقا فيه الدوخة
رقية : وااااالحمدوووو الله .... نححمدو الله ونشكروه لي وقف ليا وليدي
بيلسان : ( بعيون كلها فرحة ) حححلفي
لامار : ( بضحكة ودموع ) ومتيحرقو والوو احبيبتي ياك ؟؟؟؟
قسم : كيضرو شوية راسو وواحد العين .. قاليه طبيب قبيلة عادي .... جراو عليا راهم معاه وغيخرجوه دابا يدوزوه ل ليريم والشبكة ... عاد يديوه للشومبر ديالو ويعلمونا ....
لامار : ( حاطة يديها حدا فمها ودموع نزلو ) ححححمدتك يااااربي وووشكرتك .. حمدتك ياربي ...
قسم : ( شافت فقدس لي فيدها تيليفون كضحك فرحانة ) قدس عندك تيليفون .. صوني لوسيم قولي ليه يمشي يجيب ليه سيرفيت راه بغا يبدل حوايجو ...
قدس : واااخا ( بدات كتصوني تاجاوبها وقسم كتعاود للامار ) وسيييم ...غيخرجو جود ... ا لا ماشي دابا سيير لدار جيب ليه سيرفيييت .. واااااكيييفما كانت ازمر وسبادرين .. جيبليه حوايجو نيشان كلهم راه غايبدل ..
لامار : طررربوش .... خاصو يغطي راسو ..
قدس : وااش هووو يبغي يدييير ليييك طربوش فهاد الصهد اماما يهديك الله
لامار : ونت قوليها ليه وماشي سوقك بسيف عليه راه مريض الراس عندو حساس
قدس : قاتليك ماما جيبليه طربوش ... وماااتعطلش غيخرج غيبغي يبدل حوايجو .... سربي .....
قطعات ورجعات ضارت عند قسم لي باقا كتعاود ليهم كلهم فرحااانييييين .. وقدس بدات تاني كتعيط لاسد علماتو ...
اسد قطع عليها تيليفون وتنهد مطوووول خرج هاد الخلعة كلها على شكل تنهيدة ولاح تيليفون فوق الكوسان وخرج من طموبيل لي دخلها باش يجاوب بنتو .... ولقا سفيان مربع يدو على طموييلتو وعدنان ويونس فيها لداخل كيهضرو ...
سفيان : ياك لاباس
اسد : غيييخرجوه ...
سفيان : ( بفرحة ) واايلي ....
اسد : سسيرو نتووما انا غانجي
سفيان : ( شاف لباب ديبو ورجع شاف فيه ) اسد ... راحنا حاولنا معاه الولد راه مخلوع .... كولشي من راس داك ولد القققحبة .... هاذا طلقو من هنا غيخرا لينا فسروالو ... طلقو يمشي فحالو ...
اسد : ماقلش فين هو لاخور؟؟
سفيان : قالك ماعارقش خلاه غايشد طيارة ....
اسد : ( ربت ليه على كتفو ) سييرو سيرو من هنا .. انا غنشوفو ونجي ...
تنهد وزاد .....وسفيان طلع فطموبيل قاليهم راه غيخرجوه وسبقو اسد لكلينيك ... واسد دخل لديبو ... كان داك ولد الحومة مربوط على الكرسي والكارد واقفين عند راسو ودم كيسييل من نيفو كولو كيلهت غير شاف اسد داخل وبدا يتنتر ليهم من فوق الكرسيي تاحيدو ليه واحد الكرة دالثوب من فمووو وبدا يهضر
- والله مدااااااير شي حااااجة انايا .. والله مداير شي حاجة
اسد مشا جر كرسي دارو قدامو جلس حداه
اسد : ششششش .. بلا غوات باش نقدرو نتفاهمو ...
-( كينهج ) هااانا .. هانا لي بغيتي نقولو ليكم والله مككنذكب وحححق الرب تاداكشي لي كااين قلتو لييييييكم .... سول عليا خالتي فاطمزهرااا وخالتي رقية ... انا راااا كنمشي جججنب الحييييط انا را معنديييش مع المشاكيل انا درت غااا الخيييير
اسد : ( هز ليه راسو كيشوف فيه مغزف ) شنوو قالييييك
- داااكشي لي قلت ليكم راه هو لي( قاطعو بحدة )
اسد : عاااااودو ....
- ( كيترعد ). ق .. قاليا ... ( اسد متبع معاه واش غيقول نفس الهضرة ولا تنسا ليه الى كان كاذب ) جود .. ل لا .لاااا قبل من جود ... ه هو ... جا عزاكم .. و وتلاقا بجود .. م منبعد .. ق قاليه بغا تصاور ماماه القدام ... ك كيجمعهم ... وانا مشيت قلبت بنية حححسنة والله اسيدي تا نية حسنة ... وفاش عطيتهم ليه قاليا هو مزروب وطيارة غتشمي .... و .. وقاليا نديها لمكتب ديالكم وعطاني لادريييسا وقاد ليا داك التصويرة فالجوا ... وحق الرب تاصباح كامل وانا كنقلب تالقيتو ومشيت حطيت عندكم الجوا... وانا مشيت و وق . قا .. قالولي نعطي لاكارط ديالي وعطيتها قايدوها ... ... و حطيت داكشي ومشيت فحالي .... والله تاهادشي لي كاااااين ...واش كون كان فيا الدغل نهطي لاكارط
اسد : ( رجع بحظهرو لور كيشوف فيه وحس بلي هدا هو جهدو ومتيكذبش ورجع قرب عندو ) كان بوحدو ؟
- ها ؟ فف اش تلاقا بيا .. ااه كان بوحدو .. هو ديما كيييجي لحوومة فاش كااايجي لمغرب ... ص صيفط ليا شيفور ديالو .. وانا مشيت كيما العادة كيضور معانا راك عارف الحالة ضعييييفة .... قق قلنا زعما ... كنا جيران .. والسيد مفرطش فينااا لا هو لا ولاد خالتي رقية .... ديما كيجيو ويتهلاو فينا والله اسيدي مانويت ولا شكيييت غايدير شي حاجة ممزياناش .. انا راه معاررفش شنو واقع كاع ..... تالقيت راسي هنا ... والله مادرت انا شي حاجة ....
اسد : مكانش معاه مروان ؟
- م مروان ؟ لا لا .. لا كان بوحدو فطموبيل ... ا انا عارفو هو .. هو وسي مروان صحاااب و وقلت راه ميمكنش زعما تكون شي حاجة خايبة ... والله انا تا مكدم فهادشي بالله .... انا معارفش الى داكشي اسرااار و ممنحقيش نخرج تصاور والله ماقااد على شي حبس راه الميمة غاااتسطى اسيدي طلقوني من هنا .. نبوووس يدييييييك
اسد طول فيه الشوفة وتنهد وناض وشاف للكارد باشارة بمعنى فكوه ... وزاد خرج لبرا تاوصل قدام الطموبيل وشد فمقدمتها بجوج يدييه كيتنهد منزل راسو .... ولد صغير مضروب قدامو .. قد ولدو .... ماييتحملش يشوف جود هاكا وتاهو عندو واليديه ... ولكن مكانتش لخاطرو ..مكيتعداش ولكن ملي الامر كايقيس ولادو مكيقدرش يحن فشي واحد اخر ... ظن بلي هو لي دار يدو فيد حسام ولكن باينة الولد كيقول الحقيقة ... عرفو راه غير گدمو ... ولعب بيه ... ضرو قلبو حس بحالا بقى فيه ... من بعد ما ولا اب ولا تايحن على كاع الولاد لي قد ولادو ... وتايديرهم قدام عينيه ويفكر باش غايحس لاوقع نفس شي ليهم ... الفرحة باقا فقلبو ملي سمع ولدو غيخرجوه لشومبر وضار براسو هو يبان ليه خارج داك الولد كيعرج وفمو كيسيل بدم وملي كان كيهضر معاه لاحظ بلي جوج سناات تهرسو ليه ....كان خارج مضهشر معارفش منين يدوز ... هو يشير ليه اسد يجي عندو ... وقرب عندو مخلوع ... واسد حل الباب الطموبيل جبد دفتر شيكات وكتب مبلغ وهو كيشوف معاه مفاهمش كاع وخشاه ليه فجيبو ....
اسد : باش تصايب سنيناتك ... ( داك الولد غير كيرمش وهو ضرب ليه على وجهو ) جيب سيفي ديالك وغيتكلفو بيك .. خدم بكتافك متبقاش تسنى شي واحد يجي يضور معاك ويگدمك فالمشاكيل ..... راه فهاد الساعة اولدي مكاينش لي كيدير الخير فابور .. واحد النهار غيخصو ياخد ..... عمرك تهز فلوس معرگتيش فيها ...
الولد بقى غير كيرمش فيه وباقي كيتنخصص بالخلعة وبغا يخشي يدو فجيب للشيك هو يشدو اسد
اسد : هداك راه عرگتي فيه ... حلال عليك ... قاري شوية اولدي ؟
غير كيحرك راسو بالايجاب مزال مفاهمش وممستوعبش ...
اسد : ( علا عينو فشكيب ) تكلف بيه .. وصلوه ..
يلاه غيطلع فطموبيل عاد داك الولد بحالا تصصرفق وتلاح عليه والكارد كيشدو
- الله يجااازييييك بالخيييير ... ن ن جيب نجييييب السيييفي .. الله يررحم الواليدين الله يكثر خيرك .. والله ماعرفت باش ندعي
اسد : دعي غير مع ولدي يبرا ....
- الله يشاافيييه الله يشافيه لييييكم واخا ماعارف اش عندو الله يشاااافيه ....
مشا اسد وهو متبعو بعينو وباقي مفاهمش .. نسا كاع داك القتلة ملي سمع غيخدمو ويجيب السيفي ديالو وخشا يدو فجيب جبد الشيك هو يوسع عينيه عضامو بردو عليه تاسمع شكيب من موراه ..
شكيب : هاهوما غيوصلوك منين هزوك .. وغيعطيوك واحد نمرة ملي توجد السيفي تواصل فيها مع المسؤول
هز عينيه فيه فرحان نسا كووولشي ومشا بزربة ركب معاهم وزاد .....
فالكلينيك ...
باقين فالشومبر كيتسناو شي خبااااررر وقسم متكية على كتف ماماها لي كتسنى سيروم يسالي تنوض .... وكولهم كيمشيو ويجييييو .... تااتحلات الباااب ببجهد وكلهم شافو مخلوعين وهو واقف كيلهت شاد فالبواني .. ثانية ضور عينو على الشومبر كيتأكد انها شومبر ختو وهو يتلاح عليها
مروان : لاماار ؟؟؟؟ ( كيدوز يدو على شعرها وكيشوف فسيررروم وقسم وقفات كتشوف فيهم وكلهم كيتفرجو ) خخختي .... ( لامار كتشوف فيه وعينيها دمعو هو يععنقها ) سسسسمحيلي اخخختي ( كيبوس فراسها ) سسسسمحيلي ...
لامار غير بادلاتو العناق وكتطبطب فكتافو كينهج ورجع شاف فيها
مروان : كيييبقى ؟؟؟؟ ختي لاااماررر والله مااابغيت انا هادشي ... كنت معصب معرفتش اش كنت كنقول ( عينيه حمارو ) واش انا نبغي شي حاجة ضرر جووود .... ( كيشوف فيها وشاف فيهم ) واش هو لابااااس ؟ لابااس ياك
قدس : ( مخنزرة فيه ) علاش جاي كتسول عليه دابا
قسم : ( بزعفة ) ققققدس ....
قدس قلبات راسها كتعلي فكتافها وبيلسان كتشوف فيه وتنهدات ومشات بشوية لعندو شدات فكتفو وهو ضار عندها
بيلسان : ( بصوت هادئ حيت شافت شحال مخلوع ) راه لابااااس .... الحمد لله تخطاها ...
مروان : ( شاف فيها ورجع شاف فلامار وشاد فيديها ) والله اااختي مابغيت نوصلو لهادشي ... بنناااقص كاع غااايبرا يجي يييهلكني عصصااااا والله ماااانضهررر .... ( صوتو تغنغن ) ييينعل لي يييهضر ...
قسم : ( قربات عندو ) خالي ... ( طلع راسو شاف فيها ) راه غيبرا وغيوقف على رجليه ولكن حنا مغنتعاملوش معاه بداك الطريقة ديال يدير لي بغا منهضروش .... ضراتك شي حاجة هضر حنا ماقلناش ولكن بينك وبينو وفكو المشكل مادخلش ماما فهادشي .... حنا معارفينش المشكل من اصلو بيناتكم كيداير ... ولكن مغدخلش فيه ماما .... بينكم وبينو ....
مروان : وتااانقسم بالله ماعرفت اش وقع .. ماعرفت كاع كيفاش تاااهضرت معاها ... والله يييحححرقني ماااكنت حاس براسي
لامار : الله ينجيك ...
يلاه غيهضر هو يحس بشي حاجة ضرباتو فراسو وضار
رقية : الله ينععععل تراااابيك اليييييهو -- دي .... كيديررليااا رااااسك فجووووود .... نتا ققققدو نتاا ...
بيلسان : هاء ؟ على مال جود كايقرا فالروض .. لاواه اجدة ..
لامار : سسسسكتو عليا .. صافي ... وانا اماما هضرت معاك علاش خلعتييييه ؟؟؟؟ .....
مروان : ( تنهد وسرط هضرتو ووقف ) واش نقدر نشوفو .. غامنبعيييد .... ؟؟؟
قسم : واحد شوية يخرجوه لشومبر ونشوفوه
مروان : شنو كيقول طبيب ؟ اش وقع ؟؟؟؟؟
قسم : جاتو كريز ...
مروان غطس راسو بين يديه والندامة كتاااكل فيه وهو تيغزز فشفايفو وبيلسان كتشوف فيه ..
اريج : صافي اولدي ماطرا باس ... غا هادي مرة اخرى دير ليكم العقل .... وكنعتذر بلاصة ولدي لاقلل عليكم صوابو ...
مروان : ( علا فيها راسو وشاف فلامار بمعنى علاش وصلتو تالهنا وهو كيحشم منها ورجع شاف فيها ) واش هادي هضرة اخالتي ... راه غير ساعة الشيييطان .... تالامار الله يهديها عارفاه مريض متمشيش عندو ...
رقية : نتااا عمررررتيهااااا تااااتقنتي ليها الجناب .... وكتقول علاش مشات عندو .... نتا آلبببالاااااا نتاااا .. كون وقعات لو شي حاجة ياولدي تاااانشوط ليك داك الفم بالعافية .... حمد الله ... حمد الله ماطرا والو حمد الله ....
مروان بدا غير كيحك عينيه ويماصي جبهتو كيمشي ويجي وكولو باقي كينهج بالخلعة فلخر خلاهم وخرج وبيلسان تبعاتو بعينيها تاتسدات الباب .. وهي تبعو .. خرجات لقاتو فالكولوار وكيمشي ويجي مضارب مع الكارو يشعلو وقفات قدامو وهو واقف كيشوف فيها
بيلسان : ( حيدات ليه الكارو من يدو كمشاتو ولاحتو فالبوبيل حداها ) علاش ماجيتيش للخطبة ؟ ملي مخلوع عليه قد هاكا ومحاقدش على اش دار ليك ... علاش مجيتيش تفرح معاه ؟
مروان : ( مطول فيها الشوفة وهبط بعينيه ليديها لي فيها الخاتم ودار ضحكة مضطربة ورجع شاف فيها كيتنهد ويستجمع نفسو ) كنت باقي مابردتش
بيلسان : ودابا بردتي ؟
مروان غير كيشوف فيها وهي تقرب عندو وعلات راسها فيه وهو كايتشوا من داخل منين كاتقرب ليه .....
بيلسان : ملي بردتي ودرتي عقلك فراسك .... سمع اش غنقوليك ... اااخر مرة تصوني ليا ولا تهضر معايا .. ملي ملقيتكش معايا فخططبتي ... وكنتي سبااااب ديال تعاااود ليا الكوووشماغ دربع سنييين .. ماعندي ماندير بصحبتك الخاوية .. كون كنت كتبغي ليه الخير تشد فمك عندك .... وتجي تحضر معايا .. ( ضرباتو بصبعها لصدرو ) انا .. ونتا ... مكاينش شي حاجة اخرى غتجمعنا ملي ملقيتكش معايا فنهار لي احتاجيتك ....
تقلبات ماشية وهو شد يديها وضارت عندو كتشوف فيه مخنزرة وهو صدرو كيطلع وييينزل باغي يهضر .. باغي يغوووت باعلى صووووت بشحال كيبغيييييها ... كبرات قدااام عينيه تفصيل بتفصيل كيتسطى علييييه ... فلخرر غمض عينو مزير عليهم كيحبس راسو ويزيد يصبر ويفكر بلي هادي دولد ختو دابا واخا هو لي سبقو فحبو ليها ولكن هي هو لي كتبغي .. ربع سنين لي تفارقو رجع ليه الامل وتقرب منها كتر تازاد غرق فييييها وفحبها .... فللخر ملي رجعات ليه تراجع بببلور وكحالت دنيا كلها فعينيه ولاات خاوية حيت لي كانت موالفة تصوني ليه خمسة دمرات فنهار تعاود ليه تفاصيلها نهارها كيداز ولات دابا مكافية تهضر غير مع خطيبها .... تنهد فلخرر طلقها وهي غير كتشوف وضار مشا وهي متبعاه بعينيها فلخرر ضورات راسها ومشات لشوومبررر ....
لقات لامار باقا كتمسح دموعها وجلسات فبلاصتها والخاطر كولوو مشا ليها .... غير كتسوط .... كان اهم شخص فحياتها لي كتقوليه كولشي بلا ماتخببببيع ... بلا ماتفيلتري .... الشخص لي كيكون معاها فنجاحها وفشلها .. الشخص لي ردها للحياة من بعد ماطفاها جود .... وعلات راسها كتقول واش انا مستعدة نتفارق عليه بهاد طريقة ؟ ..... واش يستاهل اش قلت ليه ولا غير معصبة منو؟؟؟
يتبع...
التعليقات
لا توجد تعليقات بعد، كن أول من يعلق.