محتوى القصة
قسم قلبها كايضرب فالتسعين خايفة شي حد يتقاس والعرس عامر دراري صغار ... معارفاش الى هاد السيف مجبود عليها ... العائلات نساو الخصام دالفروج و تقلبو لعندو كايهدنو الطىرح عارفينو مزعزع ....
تورية : ولد حليييمة رجووع الله .. تاشمن فرمااااج ..
المقرقب : ياك اخااالتي توورية يااااك ( كايضرب بالسيف جيهة صدرو وكولشي مبعد راسو باش مايقيسوهمش ) هادو هوما البوطات لي نجيب ليك فوق ضهري تالباب الدار ... تحلبو البگر دهولاندا وماادوقووونيش .. الفرماج فداااارك ومخبعاه عليا
تورية : جيبو ليه دجاااجة .. زززهرة اراي ليه قرعة دكووكا ... الله يرضي على ولدي خبغ داكشي وسير خلي الفرح يكمل
المقرقب : تشاااابربي ماااندووووق الفرماج ( كايقلب بعينو ) فييييناااااهي الفريمييييجة ديالي ... نشدها نغمسها مع زيييت العود ومانشبعش ....
واحد من دراري : ولد حليمة نعل شيطان الله يتوووب عليك يلاه نمشيييو .. خلي عرس الدرية مسكيينة ماضيعوووش ليها
المقرقب ،: دابا انااااا نضيع لعرس لبنت خالتي تووورية ... انا جيييوني عااا لخاطر .. ( ضرب تاني بالسيف فالارض ) وااااجييييييبو ليا الفرماااج ولا طبييييح الرووووح
- ( خت العروس ) تا علااامن داااوي
المقرقب : الفرييييميجة لي دخلات قبااايللااات ... الفرييمييجة دياااالي الگاورية الهولاندية
تورية : ( فودن نجية ) ياكما داوي على مولات تلفازة
نجية : آحااا ...
غافهماتها مشات كاتجري لعندها وخديجة كانت شاداها كاتهدنها ماتخلعش
نجية : واخديجة تي هربي الصكعة منهنا راه عليها علامن محيح
قسم : شنو ؟؟ ماافهمتش ؟!!!
خديجة : الله يخلييييييها سلعة ... حليمة تولد وحنا نتطلاااو .. زيد ابنتي معايا زيدي ... زيدي لااتخافيييييشتي زيدي ....
قسم : صبرو فهموني اش واقع ؟ شكون هدا ... و اش واااقع هنايا انا راه مافاهمة والو ... ( شادة على الضربة فجبتها )
نجية : ودابا عاااا زيدو دغبا قبل مااايشوفها زيييدو ...
بداو كايخرجوها وتورية بالعاني كاتلهيه باش مايشوفهاش خارجة جنب الخزانة تاخرجات لبرا هوا باقي كايعرعر ..
خديجة : عااااا سمحي لينا وماديريهاش منا قلة صواااب .... هدا هو حال هاد الحووومة
قسم : دابا واش عرس هاد البنت مسكينة صافي ضاع ؟ لي فامي لي دابزو ياك !!!
نجية : اهادو يدابزو ليوم يتصالحو غدا لاديريش فبالك ... ما تورية ساهلة ليهم ....
قسم : مهم انا غانمشي ... ( شافت لسعتها ) حتى الغرض لي جيت على ودو مشا عليه لحال ... ( بابتسامة باقي شادة على جبتها وكاسيكط مرجعاها لور فاش كانت كدير تلج ) نشوفكم مرة اخرى فشي ساعة احسن .. عندي معاكم واحد الموضوع نديرو ليه گليسة
نجية : اهاااااه علاش لا .. غدا نيييييت مرحبااااا بيك عندنا ....
قسم : لا عندي فواياج ... غانجي حتى لسامد .. آ آآ .. السبت ... حتى لنهار السبت .... دونك نقدر ندوز للحد....
نجية : اااه اوا الله يديييك ويجيبك على خييير . جبتي بعدا لووطو ... مشا عليك لحال ابنتي والدنيا خااايبة ونت بوحدك
يلاه غاتجاوب تاسمعو صوت داك المقرقب خرج كايحيح على برا وقسم شدات على فمها
خديجة : ولااااااايني موووصصيبة هااادي .. هادا مغايتفرقش على لبنت ...
قسم : اشمن بنت بغااا ؟؟؟؟؟
نجية : ( شافت فخديجة وفيها وقالت ) تِ ..
قسم : ( طرطقات عينيها ) انااا ؟؟؟؟؟؟
خديجة : ايييه ...( جاراها ) زيييدي زييييدي . اش هاد الموصيبة ياسيدي ياااربي ....
يلاه مهربينها هو يقشعهم ...
المقرقب : خدييييجة ... برررربي وماطلقو ليا فرماااجتي تاطيح الرووووح ...
نجية : ونااااااري جججري ججججري اخدييييجة جررري ابنت الهم غايشرملنا .....
جاي كايجري لعندهم وظراري تابعينو .. وهوما يطلقو منها مشاو كايجريو خيفااانين و قسم مااعرفات كيف ديير تتكلف تالگارد خلاتهم بعاد ... بانتليها غير دار سلمى و مشات كاتجري كتدق بجهد مخلوووعة و المقرقب جاي جيهتها .....
المقرقب قرب يوصل لعندها وهي غاتسخف بالخلعة تاتحلات لباب وهي طير على اصيل دخلات لدار تخبعات من موراه .. خارج مفاهم والو كايشوف بعينيه مطلع حاجبو .. خارج غير بالشورط ملابس والو ملفوق و سلمى تاهي خرجات كاتجري شافتها وشهقات مخلوعة خصوصي انها كاتسمع الحيحة على برا ...
المقرقب : ( وقف قدام الدار كايشوف فاصيل لي قسم موراه كترعد ) زريييييقة كاانحتااارمووك .. خررررج ليا الفرماج ...واا دياااالتي هاااااديك ....
اصيل : ( دفعها بيدو للداخل وخرج لعندو ولاخور راجع بلور ) سير قلب فين تلعب ... ( شاف لعند داك دراري لي تابعينو ) خويو عليا منهنا يلااااه ....
المقرقب : والفرماااااج ؟؟؟؟؟؟
اصيل خنزر فيه جا داخل يشد لباب وهو يسمعو قاصدو كايهدد بالسيف وقسم قرباااات تسسسخف اما سلمى عاارفة ولاد هاد الحومة كيدايرين وعارفة مايقدوش يتزعزعو حداه .... واصيل خطوة ديالو فيها جرية ديال المقرقب شدو من يدو حيد ليه داك السيف ودفعو تاكان غايطيح .....
اصيل : هضرنا معااك اصاااحبي .....
المقرقب : وتاااانمووووتش علييييها ... تشوووما جيبووووليا الهولاندية
اصيل : ( عطا داك السيف لواحد من داك دراري وشاف عندو ) رجع لداركم تنعس ، يالاه خوي عليا منهنا ...
المقرقب : ( تايطلعو ويهبطو ملامحو حزان ) والفرمااااج
واحد من دراري : يااالااااه اصاااحبي منهنا حماقيتي ولا مالك ...( شاف عند اصيل لي راجع لدار ) سمح لينا آ اصيييل .. راك عااااارف الحالة ....
وما ليه غير براسو ودواه و قسم عاد بدات تهدن وحمدات الله لي ماوقعاتش شي مضاربة ... كان حسابتها غايضاربو ... وهو مصغر عينو كايطل على جبهتها وسلمى جابت ليها الما ....
سلمى : وااااش هو لي ضررربك ؟؟
قسم : ( شدات عليها مخسرة ملامحها كتحرقها وكتنهج بالخلعة ) نو نووو ... داك لعرس لهيه كنت فيه .. ( كاتشرح ليهم بعفوية ) دابزو لي فامي بجوج يمكن .. ماعرفتش كيفاش حتى جا فيا صباط ؟؟؟؟
سلمى : اوييييلي ؟؟؟؟؟ و .. مافهمتش .. زعما و واش كتعرفي داك ناس باش كنتي فالعرس ديالهم ..
قسم : للا ... زعما اه .. مم ماعرفتش ( شادة على الضربة ) ففففف .. غانمشي راني دخت ... ( بدات كتجبد تيليفونها لي دارتو فجيبها لور ) غانعيط على لگا( شافت فاصيل وسرطات ريقها ورجعات تيليفون لبلاصتو عاد سرات معاها راه قالت ليه خدامة غير فبيزيريا ) على تاااحد .. تاااحد ... غير دخت ...
اصيل : ( لسلمى ) جيبي ليها الثلج ....
قسم : ( باقين واقفين غير فكولوار ) لا لا داروه ليا ... خاصني نمشي
سلمى : تسناي غير تايمشي داك مسخوط الوالدين تخافي يمشي يتلاقى ليك للطريق
قسم خافت عليه ماشي على راسها لاشدوه الگارد غايضيع راسو عارفة عائلتها كيدايرين .. وسرطات ريقها ديخانة معارفة كيف دير تتعامل .. خصوصي انها ولات كاتشوف اصيل كتزيد دوخ وهو قداما عريان كتحاول ما امكن تفادى ماتشوفش فصدرو ..... وسلمى دخلات تجيب الثلج ... ثم وما ليها تدخل و مزادتش معاه لكلام ودخلات كلسات فصالون ... وهو واقف قدامها نهبط راسو لعندها كايشوف ليها للضربة وهي غير كاترمش و كاتحاول تبعد شوية راسها لانها كلها كتوتر ومكتعرفش اش كايوقع ليها ملي كايقرب ليها ...
قسم : ب بييخير ... عادي غير ضربة دابا تبرا ...
اصيل : واش كاتعرفيهم هاد الناس ؟
قسم : نووو .. كنت غير دايزة .. و ودخلوني
اصيل : ( باستغراب ) غير دايزة !!!
قسم بقات تغزز فسنانها وشفايفها وتزير فيديها ماقداش تجاوب وتقول علاش جات ، حيت بهاد القرب مدوخها ... جابت سلمى الثلج وهو داير يدو فجياب الشورط .. وسلمى كادير ليها الثلج وهي شافت معاهم
قسم : سمحو ليت جيت فهاد الوقت .. واقلة كنتو غاتنعسو
سلمى : لا باقين يلاه غانتعشاو ... ماتقوليش هاكاك ... مرررحبا بيييك
قسم غير تبسمات كلها كتوتر ملي كتحس بيه راه كايشوف فيها ... وسلمى كدير ليها الثلج وتسوط ليها على الضربة ... واصيل كايشوف فيها وساهي فحركاتها وهاد التوتر ديالها لي مضحك و كيووت ... كاترمش بعينيها و شفارها كيف شي قطة ... وكايتفكر منظرها وهي هاربة مخلوعة من المقرقب كايضور غيير فراسو على هاد الكيوتنيس كاملة ... و قسم غير كاتمصص فشفايفها ماعارفاش كيف ديير تجبد الحديث .. خصوصي انه بان ليها شحال صارم وماعزيزيش عليه يقوي فالهضرة .... وكيفاش تعامل بعقلانية مع داك الولد .. وهي تحاول تستجمع قواها باش تهضر .... يلاه غاتنطق بدا يصوني ليها تيليفون وجبداتو بانتليها " my Queen " وجاوبات وهي مبسمة ليهم خايفة يكون ساقو لخبار ....
قسم : مااما ....
لامار : قسوم .. باقا معطلة ؟!! كنتسناوك نتعشاو انسومبل ... راه غدا غتتسافري
قسم : ااء .. ل لا .. شوية غانجي ...
لامار : داكوغ ماتعطليش ابنتي .....
قطعات عليهم ووقفات
قسم : اا .. انا خصني نمشي ...اا ... ياك ... ياك هاداك مغاديش يكون على برا ؟؟؟؟؟
اصيل : ( قاطعها وهو كايشوف لزاوية اخرى كايحك بيديه تحت ودنو ) كلسي حتى تعشاي ، انا غانوصلك ....
قسم : ( سرطات كلامها كامل من هاد العراضة لي حسات خرجها بالكشاايف من فمو ويمكن هادي اطول جملة سمعاتها منو لحد الان ) هااا !!!
اصيل : ( كايهضر بززز بحالا كايخرجها من الشوك وكايحك على لحيتو يمشطها للتحت ) الى عندك مايدار مانشدوكش .. نوصلك دابا ؟ .....
سلمى : لااا عافااااك بقاي حتى تعشاااي معاانا ... عاافاااك .....
قسم تبسمات لسلمى باحراج وشافت لاصيل غير كايحك مور عنقو كأنوو مامرتاحش.. وهي توسع ابتسامتها بحنية وشافت فسلمى ...
قسم : مرة اخرى ، فظروف احسن ..
اصيل : ( تحنحن وشاف عند سلمى ) جيبي ليا تيشورت و سوارتي ...
سلمى : ااء ؟ .. وو واخا .. واخا آخويا ...( طلعات فالدروج كتنگر ) زعما شنو فيها كون قالها ليها بطريييقة احسن .. معارض عليها بالجميل بسيييف مغاتبغيش ...دييما محشمني ديييما ....
دخلات لبيتو كتقلب على تيشورت وسوارت الموطور .. وهي تقشع شي تيليفون فالبريز كايتشارجا .. صغرات عينيها بان ليها ماشي تيليفونو ... طلات عليه وشعلاتو وهي تبان ليها صورة قسم وطرطقات عينييها على قدهم ....
لتحت
قسم غير كاضور بعينيييها و تفرك فصبعانها .. معارفة كيف دير تجبد معاه الموضوع .. تشجعات وضارت عندو كتحاول تهضر وتشتت نظرها فالارجاء
قسم : اا انا ... انا الصراحة جييت باش .. باش نهضر معاك ...
اصيل : أنا !! ..
قسم طلعات عينيها فيه وهي تلقاه مهبط راسو لمستواها و وزُرقة عينيه لااامعة بشكل جد جدااااب و فتان .. سرطات ريقها وكلها توترااات حتى الريق جف فحنجرتها و وخز كتحس بيه فمعدتها .. وهو رامقها بنظرات التساؤل .... فنفس الوقت كايشوف مالها توترات بحال هاكا !!!
قسم : ااا .. ا .. ااه .. ب ب بخصوص ... اا ....
الهضرة كلها تلخبطات ليها و شدات على راسها ضارت عطاتو بضهر كتنفس وعضات على شفتها كاتلعن فراااسها على هاد التقفقيفة كاملة لي ماملوفاش ليها .. وعينيه علاش دارو فيها هاد الحالة كاملة ... وهو ملي ضارت بقا كايشوف فشعرها لي مخلط بين البني و خصلات زعرين ... غمض عينو كايستنق ريحتو لي وصلاااتو .. غير حس برااسو سرح فيها تاني من جديد وهو يحاول يتوكض ، يكفيه صورتها لي كايبات يتفرج فيها لدرجة قلب على شارجور يناسب تيليفونها غير باش يبقى ليه مشعول والصورة طالعة .... شمر بنيفو وعيط على سلمى لي كانت باقا لفوق مصدومة فصورة قسم فالتيل.. سمعات تعياطو وتخطفات هبطات كاتجري فالدروج ... وقسم ضارت كتحاول تتبسم واخا هي كلها كترعد من داخل ... لاحت عينيها لجيهتو وهو كايلبس فتيشورت كاتشوف فسمورية صدرو وضخامة درعانو .. حتى لبس ومشا ... وهي شافت عند سلمى
قسم : ( كتأكد بعينيها بلي مشا ) جيت على ود داك الميساج
سلمى : عرفت .. غير شفتك عرفت جابك الميساج ... ( بملاح حزان ) مادموزيل قسم غير بلا متعدبي راسك معايا والله .. خويا راه مكايتراجعش فقراراتو .. قال لا راه هي لا ... ماعندي مانديى ...
قسم : وهادي لي قدلمك مكتستلسمش ... وجدي راسك ( مشطات على شعرها ) عطيتك وعد غاتقراي ... هي غاااتقراي ..
يلاه كايهضرو هوما يسمعو خطواتو وقلبو الموضوع
اصيل : سدي لباب مزيان ..عنداك تحلي لشي حد ... ( شاف عند قسم ) يالاه ....
قسم تبسمات ليها وتبعاتو .. وسلمى غير كاتشوف باقا مصدومة من صورة قسم آش كادير عندو فبيتو !! شوية تفكرات نهار قالت ليها تشفر ليها تيليفون وهي تشهق شادة على فمها .....
تبعاتو قسم لقاتو خرّج الموطور لبرا ... ومد ليها الكاسك مكيشوفش لعندها .. وهي كاتشوف فالكاسك وكاتشوف فالموطور .. رغم انها مولفاه مع جود ولكن جاتها فشكل تركب معاه فهاد القرب كامل ! ... وحاولات تتراجع
قسم : بلا منعدبك .. راني .. راني كنسكن غير قريبة ...
اصيل : دابا خرّجنا الموطور ... غير طلعي ...
زاد قدامها ركب ودار الكاسك و هي كاترمش بعينيها آش هاد الطبع الحاااد كامل !!!! حتى ابتسامة مكتشوفهاش ؟؟؟ ومالو على هاد الغرور !!! ...ميلات شفايفها و ركبات من موراه لبسات الكاسك وهو متبعها من المرايا ....
ديمارا الموطور وهي بقا كاتسگد فشعرها تحت الكاسك ، يلاه كاتفكر كيغادير فهاد الحصلة و فين تقول ليه يحبس بيها .. وهي تلتخ كاااملة فضهرو فاااش زاااد ... يلاه كاانت غاااطيح لجنب وهو يمد يدو شددها و يد فالگيدون ...وكايهضر معاها من المرايا
اصيل : ششدي مزيااان ...
قسم كتنهج بالخلعة وحاولات تشد فتيشورت ديالو وهو متبعها من المرايا وكايحاول مايجريش حيت حاس بيها مشاداش مزيان .. لدىجة شادة غير التوب دالتيشورت محرجة تقييس فيه ....
اصيل : ( خرج من الدرب وخاطبها ) فين كتسكني ؟
قسم : ها !! اا .. ااه . غ غير هنا ... هناا
اصيل : ( كايشوف يمين وشمال ) فين هنا ؟
قسم : .. ن ..نتا غير زيييد زيد وصاااافي ..
اصيل : فين انزيد ... ( فرانا حبس الموطور كايهضر معاها ) فين غانمشي بيك ؟ گوليليا فين كتسكني باش نحطك تما
قسم : اااه .. ف فين كنسكن؟؟ انااا !!!!! ( اصيل كايرمش فيها وهي كتقلب فدماغها معارفة تابلاصة هنا ... وهي تشوف قدامها ) شفتي داك الشاااارع .. هاداك .. ( اصيل كايشوف معاها ) غاتمشي معااه نيييشان .. وضور على لليسر ... منين ضور على لليسر سير نييشان .. ونقوليك ..
اصيل : ( دار واحد ضحكة دخزيت وضار عندها ) واش حومتك معاندهاش سمية تگوليها ليا ؟؟
قسم : ااء .. ل لا عندها ..( كتحاول تضحك ماتبينش التلفة ديالها وهي فلداخل قريب تبكي ) عندها سمية كاينة شي حومة ماعندهاش سمية ؟؟؟ اكيد عندها سمية، غير هي .. س سميتها . اا .. م م ... دابا عرفتي شنووو .....
اصبل : ( ربع يدو مسايرها كايشوف فيها ) مم شنو ؟
قسم : دابا حنا ماكناش ساااكنين فيها فللول ... وعاد كيف رحلنا ليها ..... ب بااقي محفضتش اسمها .. فهمتيني ياك ؟؟؟؟؟
اصيل غير كايشوف فيها وهي كترمش بعويناتها وكايشوف شحال كتولي زوينة وطفولية ملي كاتبدا تكدب كدوبها لي مفروشين .... و تنهد رجع ضار و ديمارا ...
اصبل : واخا الالة ... نديك لهاد الحومة لي عندها سمية ولكن نت معاقلاش عليها ....
قسم : حييت يالاه سكنا
اصيل : ممم ... شدي مزيااان ...
قسم : ها !!
ديماارااا وهي تخخخبط فظظهرو و شدات بزززربة هاد مرة حاوطاااتو بقوة حتى غمض عينيه ...
فيلا عدنان ..
مجموعين على طاولة العشاء ... و مدبرة الفيلا " سهام " كتقول للخادمة لي معاها شنو تصب فالصحون .. وعدنان كياخد دواه ...
لوؤي : ( كب ليه كاس دالما عطاه ليه ) بالشيفا آلواليد
عدنان : اميين ( اشار بيدو لخادمة بمعنى باركا وبدا ياكل ) قريتي الملف مزيان !
لوؤي: الواليد ...غادير خير كبير الى عفيتيني ... اللخر دالشهر والله تا مشغول
عدنان : ( كياكل ويهضر ) شنو غايكون شاغلك ؟
لوؤي : شي أومور خاصة
عدنان : هاد الاومور مزال ماعندنا الحق نعرفوها ؟
لوؤي: مع الوقت ... مع الوقت آلواليد
عدنان : قرا داك البلان مزيااااان .. والى مافهمتيش شي حاجة نزيد نشرحها ليك .... بغيت ملي نرجع من السفر لقا الافتتاح واجد ... ( طلع فيه عينيه ) بغيت نشوف ولدي وااش يتقن شي حاجة فحياتو ...
لوؤي تقلب ليه المزاج و رتاج غير كدعي السلامة مايرونوهاش تاني وحاولات تتدخل
رتاج : اا ... هاد لاصالاد ولات كتعجبني.. ياك افيصل عجباتك اولدي ؟
فيصل : ( عرفها كتملح الجو ) ممممم بنيينة .....
انس : بابا .... فين غاتسافر ؟
عدنان : غانمشي لشي خدمة انا وماماك اولدي ونتوما غاتكلسو عند عمكم اسد حتى نجييو ...
فيصل : غاتطولو ابابا ؟
عدنان : ماعرفتش على حساب الخدمة اولدي ...راه معاكم خوكم دابا كتافو كبر من دياولي ... خصو غير يتعلم يعوض غيابي ...
لوؤي : ( بحدة حط الفورشيط ) وعلاش غانعوض غيابك !! علاش غانكون نسخة عليك !!علاش لي يسااافر عدنان والله يبقى لوؤي ...بشخصية لووؤي ....
عدنان : ( علا فيه عينيه تاهو بنفس الحدة ) نهار نشوف شخصية لوؤي تبنات ... غاااندير بحسابها ....
رتاج : وصااافي الله يعطيكم الستر ماتحرروش فينا هاد العشا تاني ...
لوؤي : علاش نتا حاولتي تكتشف شخصيتي مم ؟؟
عدنان : وعلاش نتا خليييتينا نكتشفوووها !!!
رتاج : ( بالغوات ) عدناان ....كنتعشااااو زعما ... لوووؤي ماااخصنا صداع .... باباك مقال حتى عيب .. هو غايسافر نتا غاتقضي ليه شغالو ... مؤقت يعني ..مقالش ليك دييما .... مالك معكس وعزيز عليكم ضاربو على كولشي .... شوية دالاحترام للطابلة دالماكلة ....
لوؤي جر الكرسي حتى تلتخ وناض سااخط هز فيست ديالو كانت محطوطة على لفوطوي وخرج ..... وعدنان نفض السربيتة ...
عند قسم ....
اصيل: ( وصل بيها لفين قالت ليه ووقف وضار لعندها براسو مسايرها تاهو ) اهاه ... ودابا فين غانمشي ؟؟
قسم : هاا !!! ( كاتشوف مع الارجاء كان ملتقى الطرق ) هانتا ... ش شفتي هاداك الشارع دخل من تما وسييييير نيشان ... فاللخر ديالو كنسكن
اصيل : هاداك ! ... واخا ...
زاد تاني حتى وصل لتما وعلا الزاجة دالكاسك كايشوف مصغر عينيه وضار عندها لي كانت غير كتشوف واضح كتكتشف حتى هي المكان ... شافتو وتبسمات
اصبل : هنا !!
قسم : آآه .... هناا .. ( توسعات الضحكة ملي شافت واحد البناية) تماا كنسكن ..لهييه
اصيل ضار شاف فداك البناية ورجع شاف فيها ... وحيد الكاسك علقو فالگيدون ونزل كايمشط بيديه على شعرو ....
اصيل : ( اشار ليها لتما بيديه ) كتسكني تما !!!
قسم : آآه ... تما ( نزلات تاهي وحطات الكاسك )
اصيل : علاش فين واليديك ؟؟
قسم : ها ؟؟؟؟ ( باستغراب مافاهماش ) فالدار !! علاش ؟؟؟
اصيل : حيت هاديك خيرية ... كتسكتي فخيرية ؟
قسم : هااااا !!!!!
قسم دوخة جات قدام عينيها فرشة عمرها تخيلاتها .... بقات غير كاضور وتسرط فريقها وضارت عندو كتحاول تضحك وهي غير مكتزيد تدوبو بهاد الحركات الطفولية المشاكسة ...
قسم : لا دابا ..... ا انا نفهمك ..( اصيل ربع يدو وعوج فيها راسو ) دابا انا تضربت .. تضربت فراسي ياك !
اصيل : هاه ..
قسم : وحاسة بدوخة ....والنظر عندي مشتت .. ... انا ساااكنة فالشارع لاخور ... ولكن صاافي وصلتيني شكراااا .. حسن بلا مدخل معايا لدرب ديالنا ، ح حيت بابا شوية صعيب ... لاشافك معايا يقدر يفهم غلاط ولا شي حااجة فهمتيني ياك ؟؟؟
اصيل : ( تنهد وقرب عندها كايهضر بهدوء ) واش متأكدة نت ساكنة هنا ! ... الحال تعطل وهاد البلاصة خاوية ....يعني فكري مزيان ، الامر جدي ....
قسم : ( كاتشوف مع جنابها فعلا هاد البلاصة كتخوف ولكن ماعندها مادير ) ل لا ... لا هنا كنسكن ...
اصيل : نتِ تعرفي حسن مني ...
خلاها ماشي للموطور حتى سمعها ...
قسم : ش شووف ... ا ايييه ...
اصيل : ( غمض عينيه مكيحملش لي يعيط ليه ب إييه وضار عندها ) أصيل .... سميتي أصيل .....
قسم : ا آه ...( تبسمات وقالتها ) أصيل .....
اصيل : ( مصص شفايفو كايحاول ماتدوبوش هاد الرنة لي قالت بها سميتو ) بغيتي شي حاجة اخرى ؟
قسم : ا انا .... انا راه بغيت نهضر معاك .. بخصوص المنحة د ( قاطعها )
اصيل : الحداش ديال الليل هادي .... نت معطلة و انا معطل .... تصبحي على خير ...
مشا للموطور ركب وهي قربات لعندو
قسم : خليني نكمل كلااامي ... سمع بعدا شنو بغيت نگول ليك
اصيل : قلت ليك الوقت تعطل .... ( ديمارا ) متأكدة ساكنة هنا !!!!!
قسم : ااء .. ا اااه .. ااه ...
ضارت موراها كترد فشعرها لور وتتنفس ... كاتشوف شحال صعيب تهضر معاه ، عاساك تقنعو ..وكاتشوف راسها اش هاد الحصلة راها فيها .. بعدات على الگارد وكيغادير تخرج منهنا حتى سمعاااتو
اصيل : ايييه ..
قسم : ( ضارت عندو ) قسم ...سميتي قسم ....
اصيل : ( سكت مدة وقال ) قسم ..... ردي معاها لبال
قسم : ش شنو هي ؟؟؟؟
اصيل : ( اشار بيدو لجبهتو ) الضربة
قسم : ( حطات يديها عليها ) آآه ... ( تبسمات بلعنة على هاد الغباء لي طاح عليها ) وااخا ...
خلاها وديمارا مشا وهي متبعاه بعينيها وهو ضار غير منتما وخرج من واحد الشارع موراها ووقف تما مراقبها من بعيد ...ماعطاتوش خاطرو يخليها وهو عارف مكتسكنش هنا وعارف هاد الشارع مافيه ثقة ... اما هي هزات تيليفون وبدات كاتصوني شادة على الضربة ديالها وقريييب تبكي من هاد الوحلة حتى جاوبها الكارد ....
الكارد : مادموزيل قسسم !!!
قسم : ( تنهدات ) جيب ليا طموبيلتي وآجيييو ...(بحسرة ) آجيييو آآآجييو ...
الكارد : فين نت امادموزيل
قسم : ( كتشوف مع جنابها ) واناا عرررفت ... فواحد بلاصة منعرف .... انا اصلااا اش دخلني لهاد لكدوووب كاااملين .... فففف هانا غانسيفط ليك لوكاليزاسيون
بقات قسم كاتمشي وتجي كاتسنى الگارد يجيو ... حتى ضارت و بانت ليها الخيرية وهي ضرب برجليها فالارض ....
قسم : عععععع ... اش هااد الحااالة آقساااام ... يا كدبي مقااااد ياسكتي وكلسي فدااركم ....امتى وليتي تكدبي بحال هاكاااا امتى ( شدات على راسها بصوت البكية ) خييرية آقسم خيييرية ...
أصيل متبعها من بعيد مصغر فيها عينيه .. بلا مايحس براسو لقى ابتسامة خفيييييفة تشققات على فمو وهو كايشوف لحركاتها .... حيد الكاسك على راسو وقاد شعرو وربع يديه كايتفرج فيها ... فالواقع كاتبان أجمل من الصورة ... واخا ملي تعرف عليها وهي تتكدب ولكن كايحسها من الناس الصادقين لانها مكتعرفش تكدب كدوب مقنعين ... كايحسها داك العملة الناذرة فالنقاء و الصفاء ... رغم تحررها فلبسها وواضح الطبقة لي كتنتمي ليها الى انها تحرجات حتى تقيس فيه فالموطور وكان كايشوفها فالمرايا شحال متوترة وهي قريبة منو كرجل غريب عليها ... كتحرج الى حط عينيه فعينيها كاتبدا تلعب بيهم ماتقدرش تشوف فيه مباشرة .. وكايتسائل شكون هاد الوالدين لي غايكونو رباوها على هااد الحشمة والبراءة كاملة ؟ .. ومنين مستمدة هاد الجمال !!!!
كلسات قسم على واحد الدرجة شادة على راسها وكاتشوف للفوق كتعاود مع راسها الاحداث ديال هاد الليلة ... علاش جات و فاش ولات .... حتى شوية سهااااات و تبسمات ملي تفكراتو ((( اصيل : ( سكت مدة وقال ) قسم ..... ردي معاها لبال
قسم : ش شنو هي ؟؟؟؟
اصيل : ( اشار بيدو لجبهتو ) الضربة ))))
تكات راسها على الحيط مبسمة كاتلعب برجليها .. حتى سمعات حس طموبيلات جاين وهي تجمع داك الابتسامة البلهاء و ناضت كتنفض فحوايجها ورجعات للجدية ديالها وملامح قسم لي كايعرفو ....
وقفات الرنج دللكارد ... ووقفات طموبيلتها لي صايكها واحد فيهم ونزلو لعندها كاملين ..
أصيل كمّش ملامحو وهو كايشوفو فالنفوذ ديالها فين واصل .... و رجع للواقع ديالو لي هو يشوف غير من بعيد .... تنهد بقوة ولبس الكاااسك ووزاد كسيرا بسرعة ومشا .....
الكارد : مادموزيل قسم .. نت بيخير؟؟ كيفاش وصلتي لهنا ؟
قسم : بيخير ( كتهبط الكاسكيط والشعر على جبهتها ) بيخير .. عطيني السوارت ( مدات ليه يديها حط ليها سوارتها وشافت عندهم) صافي هضرت معاكم كولشي بيخر ... نزلت لواحد الغراض ماعرفتش الدار حتى لقيت راسي توضرت ....
الكارد اشارو براسهم وخواو ليها الطريق وهي ركبات فالطموبيل وزاادت ....
∆قصر الاسماعيلي
وصلات لامار قدام غرفة قدس ... طرقات لباب بهدوء وعاودات حلاتو ... وهي تبان ليها مكمشة ففراشها شاعلة غير آباجور خفيف ...
دخلات بهدوء وشدات الباب ... ومشات باتجاهها كلسات حداها فالسرير و قدس غمضات عينيها ...
لامار : ( كدوز يديها على شعرها ) قدس ... ماما نعستي ؟ ( طلات عليها وضحكات ) العوينات فاش كاينعسو راه كايتسدو بوحدهم ابنتي ...
قدس حلات عينيها وقالت بغضبة : ماما بغيت نبقى بوحدي
لامار : كتجري عليا من بيتك ياك ؟ .. نوض نمشي فحالي دابا
قدس : ( ضارت عندها ) حاشا ... غير مراشقاش ليا
لامار : ليغيكل قربو ماشيغي ؟
قدس : ممم ...
لامار : غير هوما لي معصبينك هاكا ... قدس نوضي تكاي بغيت نهضر معاك
قدس : مافيااااش اماما والله ... غير خليني نعس
لامار : والعشا ديالنا ؟ ختك غانسافر غدا ومولفين نتعشاو اونسومبل نو ؟ ..
قدس : ( تنهدات وناضت تكات ) واخا ... واااخا
لامار : هاد الاومور العائلية ابنتي متسنايش حتى نفكرك بيها .. كيف ربيناكم عليها غاطلعو عليها ... كنيتك ابنتي الاسماعيلي ... يعني غاتمشي على مبادئ الاسماعيلين .... عمرك تخلي شي حاجة تنسيك فأصلك ومبادئك وشكون نت وبنت من نت ...
قدس : ( شافت فيها ) ماما .. لاكنت بصح انا من الاسماعيليين علاش ماعنديش نفس المعاملة ممم ؟؟
لامار : قدس صافابا ؟ كيفاش ماعندكش نفس المعالمة ؟؟
قدس : واخا انا نعطيك مثال غير حدانا .. علاش قسم مكتبعوهاش فالخارجة والداخلة .. علاش عاطينها داك الحرية كاملة وانا لا ؟ شنو زعما هي مربية وانا خارجة الطريق ؟
لامار : على ابنتي نتي قد قسم ؟ قسم ملي كانت قدك .. مكانش عندها الحق حتى تخرج مع صحاباتها لي كايقراو معاها ييتغداو ... نت لاكان كايجيبيك الشيفور و لؤي و قسم و جود من ليكول ... هي راه كان كايوقف عليها باك بنفسو .. النفس مكانتش كتزعزها فمراهقتها ... حمدي الله .. حمدي الله ابنتي لي باك راخف عليك حيت شاف راسو بداك الزيار لي كان داير لختك عقدها ... ومابغاش يعاود نفس شي ليك نت ووسييم ... وعطاكم فين تنفسو ... الى كانت هي كدخل وتخرج بحرية دابا ، شوفي شحال فعمرها .. مامنحقناش دابا نتبعوها حيت هي وحدة راشدة ... نت ابنتي باقا صغيرة وباقين كانخافو عليييك ...
قدس : بحال بحال اماما .... الفرق لي كاين هو هي كتيقو فيها وانا لا
لامار : وي انا معاك فهادي .. وعارفة علاش ؟ حيت ابنتي قسم .. كتعاود لينا كولشي .. لي دارتو و لي مدارتوش ولي عاد غاديرو .. ورقة شفافة معانا ... نت لا .. بحال مثلا قبيلة ... كدبتي هاكاك فوجه باباك وماماك وختك .. بلا حتى اعتبار ، هادو اومور يخليونا نبنيو فيك الثقة اقدس ؟
قدس : نتوما لي وصلتوني لهاد الحالة .. حيت مكتخليونيش نخرج بوحدي
لامار : بغيتي تخرجي مع صحاباتك قوليها لينا وخرجي ... واش عمرنا منعناك ؟ ولكن باش تخرجي وماتقوليش معامن خارجة ووفين راه ميمكنش ...
قدس غير سكتات مهبطة راسها و ولامار عنقاتها مبسمة
لامار : كولي ليا ... بان شي واحد فحياتك .. هم ؟
قدس : ( علات فيها راسها متوترة ) اء .. لا ... لا اماما
.لامار : مم واشفتي هانتي كاتخبي .... عندو كنتي خارجة قبيلة ياك ؟؟
قدس : غاتقوليها لبابا ؟؟؟
لامار : الى بغيتي مانقولش ، مغاديش نقول
قدس : ( كتفرك فيديها مع المانطة ) ا انا ..انا ماشي عندي علاقة ولا شي حاجة لا ... والله ماعندي ... ولكن مؤخرا جابو لينا واحد المدرب د التنس جديد ... اسباني .. عرضني للغدا بصح لوؤي ضيع علينا كوولشي دييما داخل ليا فحياتي ... و عاود تاني عرض ليا فالعشية وعندو كنت خارجة ....
لامار : اوووو ... هادشي كامل .. تغديتي معاه قبيلة يعني ؟
قدس : ااه ... ماشي شي حاجة غير استاذ وتلميذتو ... بصح لوؤي ماعرفتوش منين خرج ليا ... اساسا ديما كانلقاه تابعني ... هضرو معاه يعطيني تقار .. سي طخو !
لامار : ماتعاوديش تقولي على ولد عمك هاكاك .. الى كايتبعك وحاضيك حيت عندو عزيزة وتايخاف عليك ... لوؤي راه بحال جود ... خليني من لوؤي دابا ... هاد اامردب شحال فعمرو
قدس : معرفتش .. ولكن كبير بعقلو يعني
لامار : اهاه ... وريني صورتو نشوف ....
جبدات قدس تيليفون كتوريها ولامار كتحاول دير لي فجهدها تخليها تعاوود ليها كولشي ...واخا من الداخل تعصبات ولكن مابغاتش تبين باش تجبد منها كاع المعلومات ... حيت لاخلعاتها غاتسكت وتخبي ...
لامارر : ( كاتشوف فيه ) مممم ... مزيان ... ( رادت ليها تليفون وكلسات بجدية ) دابا ابنتي ... هادا شنو الديانة ديالو ؟
قدس : مسيحي يمكن ..
لامار : ااه ونت مسلمة .... ممم .. ونت ابنتي شحال فعمرك ؟
قدس : ماما ... عرفت عقلك فين مشا .. انا مكنهضرش على الزواج راك عارفاني اخر حاجة نفكر فيها دابا هي الزواج ...
لامار : ااهاه .. دونك نحيدو الزواج ، الزواج مايمكنش دابا ، دونك اشنو باقا ؟ غادخلو فعلاقة ياك ؟
قدس : ااء . لا .. م ماشي لداااك الدرجة !!
لامار : وشنو ابنتي ... عراضة لغدا و عراضة تاني فاعشية .. وكادبة على والديك باش تمشي عندو !! يعني فين غاتوصلو منهنا شهر هاكاك على هاد المنوال !! اكيد مغاطيحو فعلاقة مدامو كايعجبك وكاتعجبيه
قدس : ( سكتات مدة وقالت ) .. معرفتش ...
لامار : ماعرفتيش ؟ عرفتي علاش مكملاتش الصورة فبالك دابا ... حيت ابنتي نتِ فواحد السن سميتو المراهقة .... اش كايعني هاد السن ؟ .. لي شفناه يعحبنا .. ولكن غير نوليو تاحنا نعجبوه ودوز سيمانة .. هوپاااااا كايطلع فرااسنا .. كنقلبو على واحد اخر حسن منو ... يااك ؟ ( قدس غير ساكتة ) دابا قدس بنتي عاجبينها شعيوراتها وزينها وعويناتها ... وقالت لي بغيتو غايبغيني.... نلعب بيه شويية ونقلب عليه .. ماعارفاش ابنتي الى شي واحد فيهم حلف فيك ودارك فراسو ؟ معارفاش الى هاد المدرب طولتي معاه واحد سيمانة وقلبتي عليه شنو ممكن يديير ليك ؟؟
قدس : نوو نو اماما راك مشيتي بعيد
لامار : مشيييت لفين غاتمشي منهنا سيمانة ولا شهر معاه .... السن ديالك مامناسب لا زواج لا لعلاقة ... انا ميمكنش نقول ليك ماتبغي تاواحد وماتعجبي بحتى واحد نوو مايمكنش ... ولكن ابنتي ديما شوفي غير من بعيد ... خلي الاسپاس بينك وبينهم .. هاد المدرب لي عرض عليك للغدا .. مكنتيش توافقي على عراضتو ... وحتى الى واقفتي غاتدي معاك صاحبتك .. باش يعرفو انه غدا ديال استاذ وتلميذتو لا غير .. وديما خلي المسااافة والحدود فالكلام ...ماتخليهش يضن راه طيحك فشباكو ... الراجل لي تمشي معاه بالنية ديالك وتعطيه روحك كاملة ويستحق منك الصدق فالمشاعر .. ( قدس غير كاترمش فيها وتسمع ) هو الراجل لي ملي تشوفي فعينيه تشوفي مستقبلك معاه . .. هو الراجل لي ماعندكش على مستقبلك معاه علامة استفهام ... هو الرجل المناسب ليك للزواج من كل النواحي ، لا الدين ولا الأصل و لا المبادئ ... ماشي واحد مسيحي والسن ديالو وااضح غير من صورتو شحال متبعاد عليك .. مدامو غير مدرب وتلميذتو ... علاش خلا كاع بنات وعرضك نت لي ممكن يولد قدك مم؟
قدس : ونا باش غانفرق مابين هاد النواع بجوج اماما ؟ راه ميمكنش نفرق
لامار : يمكن اقدس يمكن ... ( تنهدات ) انا نعاود ليك واحد الحاجة ( تكاتها على صدرها كتمشط فشعرها ) حنا كاع لافامي ديالك تزوجنا كبارات .. الا حيياة ... تزوجات صغيرة وارتابطات بعمك سفيان وهي صغيرة ... كانت كتحماااااق عليه لواحد الدرجة ماتصوريهاش
قدس : خالتو حياة ؟
لامار : اااه ... كانت غاتعواج لينا بالمعقول لانه مكانش كايعطيها حتى شي راس خيط يوحي ليها بلي تاهو كتعحبو ... يعني كانت كتضن بلي كتبغيه غير بوحدها ... اما سفيان من اوول نهار شافها راه باغاها .. و حيت شافها بنت صغيرة وباقا باغا تقرا وعندها طموح ... ختار انو مايعطيها حتى شي أمل فشي علاقة معاه .. ولكن حتتضيها .. تابعها .. كايحميها ... مهتم بأومورها ... دايرها تماما بحال بنتو ... لدرجة هي كانت كضن انه كايحسبها بنت صغيرة بداك المعاملة خصوصا انه كان كايعيط ليها عمو ...
قدس : هههه عمو ؟؟؟ هههه
لامار : اييه ....كانت كاتقول لينا خاانقني .. نهار هضرت انا مع سفيان نوضح علاقتهم ونفهمها .. قال ليا انه كايبغيها ولكن كايتنساها تكبر ... حيت مابغاش يخسر ليها حياتها الدراسية بشي علاقة حب .. لانه عمك شاف فيها الزوااج شاف فيها المستقبل .... ماشي غايلعب بيها ويلوحها كيف البنات لي عرف فحياتو .....
قدس : وااو !!
لامار : يعني ابنتي لي بغيت نوصل ليك .. هو الراجل لي غايبغيك دبصح مغايضيعكش ... مغايضيعش مستقبلك ..غايبقى كايتسناك حتى تنضجي وتصلحي ليه لعلاقة جدية ... مغايخليكش تكدبي على واليديك باش تلاقايه ...
قدس : اومايكاااذ ... قصتهم زوينة ( مهبطة شفايفها ) وانا فين غالقى واحد بحال هذا .. عمي راه منو غير واحد ...
لامار : قلبي مزيان ... قلبي واش كاين فحياتك شي راجل كايعاملك بحال كيف كان كايعامل سفيان حياة ... الى لقيتيه راااه هو هداك لي يستحق تعيطه قيمة وتقبلي عراضتو ، لانه هو غايصونك ويحافظ عليك كتر من نفسك ... والى مالقيتيهش تسنايه حتى يجي .... هدا مغانقوليك
قدس : مم .. ماعرفتش .. ككيفاش غانعرفو
لامار : ( تبسمات ) مممم غايكون تابعك فين مامشيتي ... وغايكون حاضيك .. غايكون خااانقك ... صبري صبري بحالا كنتي كاتشكاي ليا غير دابا من شي واحد خانقك ؟ لا !!
قدس : ( علات راسها ) لؤااااي ؟؟؟؟؟ ( نقزات شدات ليها على فمها ) ماما سكتي ... سكتي عنداك موااال تعاوديها على فمك ... اوييييلي نموووت ومايكونش لوؤي فحياتي ...
لامار : ( حطات يديها غلى فمها ) هانااا ماااقلت وااالو .. اصلاا لوؤي بحال خووك .. يعني غاتكون كاينة شي وحدة فحياااتو ديجا .....
قدس : اء ؟ للا .. لا معندوووش
لامار : ااااه ..ماعندووش ؟؟ اوا دابا تكون ... لوؤي زويييين .. ولد عائلة .. طويل ..كارييزما ... عندو كاع اش كايبغيو البنات .. ييعني من غدا يقدر يرتبط بلي بغا ... ويعيطيك تقااار ..
قدس : ( كترمش ) مم ... مزيااان الله يسهل عليه ... نييت نتهنى منووو .. داير ليا الخنننقة اعباد الله
لامار : ممممم اوا دابا تهناي منو .... ( ناضت ) فكري فهضرتي مزياااان ... لي يخليك تكدبي على واليديك .. ماشي هو الراجل المناسب ليك ... يلاه وجدي راسك نزلو نتعشاو
ابتسمات ليها ومشات حتى لباب وسمعاتها
قدس : ماماااا
لاما، : ابنتي
قدس : رتاحييت بزاف ملي هضرت معاك
لامار : فوق ماحتاجيتيني انا كاينة ..
قدس : كنبغيييييك
لامار ضحكات وعطاتها بوسة فالهوا ومشات ... وقدس ناضت غادية لدوش وهي دوز حدا اامرايا وشافت فيها
قدس : لؤي ؟؟؟؟؟؟ ( نفضات راسها ) لا لاااا لا اعود بالله ..
∆فالاسفل ....
نازلة لامار فالدروج تشوف فين وصل العشا ... كتضهر مع رجاء
رجاء : وي مدام لامار كنتسناوها غير هي تجي .. وجدنا كاع اش كايعجبها كيف العادة ...
لامار : صافي انا غانعيط ليها دابا غير بداو تحطو تعطل الحال ...
خلاتها وجات ماشية تصوني وهو يبان ليها شي واحد داخل ...
لامار : لوؤي ؟
لوؤي : ( داخل عيان هاز الفيست ديالو ) بونسواغ ... كاين عمي ؟
لامار : ااه كاين شوية وينزل ( قربات عندو شدات على وجهو ) لؤي مالك اولدي ؟
لوؤي : ( دار يدو على يدها وتبسم ) لاابااااس متخافيش .. غير بغيت نهضر مع عمي على شي أومور ...
لامار : اااه .. نيت جيتي مع العشا .. كنتسناو غير قسم تجي
لؤي : وي غدا عندها الفواياج ...
يلاه كايهضرو هو يتم نازل اسد كايطلع فكمام السيرفيت .. كان غادي لصالامونجي حتى شافهم واقفين ورجع مشا باتجاههم
اسد : لؤي ؟!!
لوؤي : ( كيحك على جبهتو ) عمي .. واخا نهضرو شوية ...
ايد : ( شاف عند لامار ) عيطي على قسم ترجع تعطل الحال ... ( شاف عندو ) يلاه للبيرو ...
مشا اسد ولؤي تبعو دخلو لبيرو ... وتكا أسد على الطبلة دالبيلاردو مربع يديه
اسد : ياك لاباااس ؟ تخاصمتو تاني
لؤي : ( جلس على الكرسي معلي راسو للفوق كايتنهد ) عيييت اعمي والله تا عيييييت ( شاف عندو ) كنفكر نخرج نسكن بوحدي
اسد : ممممم .. ( مشا كلس تاهو ) اش وااقع !!
لؤي : مليييت من هاد الكاسيطة ديال كل نهار ... ( كايشمر بنيفو ويهضر ) جيت من موناكو الصباااح .. ملي مشيت عندو لشركة عطاني بلان دالمتحف دازرو .... هو غايسافر وبغاني انا نتكلف به !!!!
اسد : اهاه ... وفين هو المشكل
لؤي : المشكل اعمي هو كنحسو تدريجيا باغي يدخلني لهاد المجال صحة ... الافتتاح لي فات كلفني نختار الديزاين .... هذا اللخر كلفني بليزانفيطاسيون ... دابا بغا يكلفني بيه كااااامل لوغگانيزاسيون ديالو كلها ... هدا ماشي المجال ديالي اعمي .. واللخر دالشهر خصني نكون فواشنطن عندنا fip فالدورية .. وانا يالاه بديت معاهم مباغيش نخسر بلاصتي .. وهاد السيمانة كلها مشغول بالملف ديال واحد خينا .. وانا لي مكلفيني بداك الملف بحكم راه فالنغرب وانا مغريبي .. جييت من موناكو غير حيت مايمكنش ليا نسمح فهادشي .. كيف غاندير نركز فهاد الافتتاح .. كيف غاندير منسافرش فللخر ديال هاد الشهر .. ملي رفضت بدا كايوصل ليا انني ماشي قد المسؤولية و مابانيش شخصيتي ورتك عارف الكمالة د الكاسيطة
اسد : نتا عارف ان لي غالط فهاد الموضوعةمن اللول راه نتا ... ياك ؟
لؤي : شفتي الغلاط فين هو ؟ الغلاط كاين فالجذر .. شنو خلاني انا نخبي عليه خدمتي ؟ حيت هو عمرو كلس معايا وانا صغير وناقش معايا مساري الدراسي وانا شنو بغيت ندير وانا شنو مرتاح غيه ... وهادشي راه كانشوفو كايطبقو حتى على فيصل وانس و راني سااكت ، فضلت ندير اش بغيت و نخدم فالسر حسن مايعرفها وتوقع ليه شي حاجة .. راني محطوط اعمي بين الواليد وبين الخدمة لي كنرتاح فيها ... ( شد على راسو ) حااس برااااسي غااادي يطرطق علياااا
اسد : الرأي ديالي فهاد المسألة رك عارفو ... باقي هو هو ماعمرو غايتبدل ...
لؤي : منقدرش نصارحو دابا ... شاد ملف مهم بزاااف اعمي .. الى رفض ولا وقعات ليه شي حاجة والا شي كريز الله يحفظ غانضطرر نخلي كولشي فالنص ونمشي ... انا فكرت نصارحو ولكن على الاقل حتى نسالي هاد الملف ونتبث راسي فالدورية ... وأباغ صا ... خينا لي تابعينو دايرو فراسي من بزاف دالنواحي .... همي هو نكمل هاد الملف ونربحو ...هادي اول مهمة عندي والعميد داير فيا ثقة كبير
اسد : حتى عدنان داير فيك ثقة كبيرة ...( قرب عندو ) نتا آلوؤي راك محطوط فالوسط ديال واحد الميزان ... وخدمتك هي تكيليبري بين الجهات بجوج .. واليديك ... وخدمتك .. عندك جوج حلول ... يا اما تختار واحد فيهم ....يا اما تكيليبري داك الميزان ...
لوؤي : وهاد الكليبراراج صعييييب بزاف اعمي
اسد : نتا لي اختاريتيه .... مزيان الواحد يدير شي حاجة مرتاح فيها.... ولكن معمرو غايرتاح وتكمل فرحتو وهي باقا فالسر ووالديه رافضينها ... كمل الملف ديالك فنفس الوقت اوغگانيزي للافتتاح د باباك ....
لوؤي : صعييب نديرهم بجوج اعمي والله حتى صعيب
اسد : نعاود نقولها نتا لي ختاريتي الطريق الصعيبة .. خود هاد التحدي ... ودير هاد الخدمات بجوج .... منهنا تزيد تثبت لراسك نتا فين مرتاح كتر .. واش فاش يفتخر بيك العميد فالدورية و لا فاش يفتخر بيك عدنان نهار يقطع الشريط دالافتتاح لي اوغگانيزيتي ليه .... ومنها تشوف راسك واش قادر ديرهم بجوج ...تاخد رضا خدمتك وضا واليديك ، كان الجواب آه صارح عدنان وكمل خدمتك بالتوفيق ... كان الجواب لا .. اختار فين ارتاحيتي كتر .... ( وقف ) هذا مايمكن ليا نگوليك اولدي ...
لؤي : ( تنهد ووقف تاهو ) ان شاء الله .. ان شاء الله اعمي ....
اسد : ( جبدو عندو عنقو ) كلكم خرجتو لينا من الجنب ياولدي .. كلكم .. الله يحضر معاكن السلامة وصافي
لوري : ههه ... اووودي والله آعمي حتى نتوما صعاابين مكايتفاهمش معاكم الواحد
اسد : شنو دابا... ركلتي عليه شب كرسي وخرجتي يااك ؟
لؤي : باش كتعجني اعمي .. حااافض اش واقع وخا ماحاضرش
اسد : على نتوما ماشي تربيتي !! ... خليه يبرد شوية وفالصبح سير هضر معاه ... ديما كانقولها وتنعاودها ليك دابا ... اققبح حاجة تقدر طرا ليك فحياتك ... هي تقلق منك واليديك لمدة 24 ساعة يلا ماتراضيهم .... واخا يكونو هوما الغلطانين ....
لوؤي : ( خارجين كايهضرو ) كاتبقى فيا غير الوالدة مسكينة ... ماعرفات لعندمن تجر
اسد : هاديك شي نهار غاتهز الدوا الحمر و المقوصا ديالها ماتعرفو فين زادت .... غا عصبوووها عصبووها ....
لوؤي : هههه اودي الله يسمح لينا ...
شافتهم لامار جاايين معناقين ضاحكين وهي تتبسم فرحانة
لامار : مممممم ( ربعات يديها ) بغيت غير نعرف شنو السر لي فداك البيرو لي كدخلو ليه مهمومين وتخرجو ضاحكين
لوؤي : ( عنق اسد ) الروكان امرات عمي الروكاان ههه
لامار : الله يخليكم ديما ضاحكين ... قسم دخلات للمنطقة اجيو نكلسو ، الطابلة واجدة دابا و هي جات ..
جرو الكراسى كلسو كايهضرو تاسمعو خطوات قدس هابطة شافتو وهي ضور راسها
قدس : بااسم الله الرحمان الرحيييييم ....
لوؤي : ( شاف عند لامار دوز يدو على ذقنو ) كنخلع ولا ؟
لامار : ههه حاشاااا اوليدي .. زيدي اشنيولة زيدي
قدس : ( مخنزرة فيه وهي تبتسم ملي شافت باباها وعنقاتو ملور ) بااابااااا حبيييبي
اسد :ممم ، دابا عاد بابا حبيبي ....
قدس : سمح ليااا .... ( باستو ) منعاااودش
اسد : نتمناااو .. گلسي
جرات كرسي كلسات حتى دخلات قسسم لي شافتهم مجموعين ضحكات بفرحة
قسم : آآآآلله ... اححسن منظررر ممكن نشوفو هو نلقا عائلتي على الطبلة كتسناااني ...
اسد : ( شاف لسعتو شحال ورجع شاف فيها ) تعطلتي شوية لا ؟
قسم : ( جرات كرسي ) ممم .. ( كتنقب من الطبلة ) حيت توضرت ههه
اسد : نعام !!! ؟؟
قيم : فاش مشيت لدار ديك البنية .. توضرت على الشارع جاني كولشي كايتشابه بقيت غير كانضرو تما تعطلت ومشاليا الوقت ..
اسد : مممم ( كايعرف عينها ملي تكون كتكدب و بدا كايطل عليها ) و الكاسكيط ابنتي فالليل ؟
قسم : ( زادت هبطاتها على جبهتها ) اااه ... اا ... غير باش مايعرفني حد وصافي
اسد : ااه ... اوا دابا ابنتي هنا غير ماماك وختك وولد عمك راه كاعرفوك ديجا ... ( بحدة ) حيدي نشوف
قسن : ( كتسرط فريقها وهوما كايشوفو فيها ) لا خلييييها عجباااتني
اسد : ( نترها ليها ولامار طرطقات عينيها ) شهااادشي ؟؟؟
قدس : قسسسم مالكي اوييلي ؟؟؟؟؟
لؤي : ( كايحيد الشعر على حبهتها ) فففففف شهااادشي ؟؟؟
لامار : ( ناضت لعندها مخلوعة ) اويلي شكووون ضرررربك ؟؟؟؟
قسم : وااا تهدنو حمااااقيتو ... شكون غايضربني وانا معايا الكااارد .. تهدنو راه غييير طحت
اسد : ( كايشوف ليها لضربة كايدوز يدو عليها مخسر سيفتو مخلوه ) ماشي طييحة هادي .... ( بجدية و صرامة ) هضري اش وقع ليك ...
قسم : ومااتخلعووش ... ففف صااافي انا غانعاااود ليييكم ..... راه ضربة بسيييطة وديجا دارو ليا الثلج
اسد : داارو لييييك !!!!!!
لوؤي : شكون دار ليك ؟؟؟؟
لامار : اوووف اقسم اوووف .. رجاااء ..،رجاااااء الثلج آرجاااء
اسد : اشمن ثلج غانعيط للطبيب .... غاااتحمقونا نتوما عاد تهناااو ...
قسم : ( حيدات ليه تيلفون ) بابا يهديك الله والله مكتحرقني ... ضربة بسييطة غير زراقت ليا شوية دابا ندير ليها الدوا ... وصاااافي ماااالكم
لوؤي : دابا اش وقع ليك ؟ تعدا عليك شي حد !!!
قسم : لااا راه قلت ليكم كانو الگارد ... صافي هانا غانعاود ليكم صصبرو خلعتووني هاكا
لامار : ( رجعات كلسات ) اهاه .. يلاه هضري
قسم : ( كاتشوف فيهم كلهم مخنزين وقالت ببراءة ) وماضحكوووش عليااا مم ؟؟؟؟
اسد: هضري اقسم
قسم : دابا انا حطيييت الطموبيل بعيدة حيت الدرب فين كاينة دار البنت ضيق ... ودخلت للدرب على رجليا ..( كتهضر وكل مرة تشوف ففواحد وتشرح بيديها ) و ولكن .. لقيت تما عرس ... و حيت انا عارفيني كايعجبني نكتشف شي حاجة جديدة .. دخلت كانشوف .. ونا نلقى تما دوك العيالات لي كنت تلاقيتهم فاش مشيت اول مرة وتعرفت عليهم ودخلوني بزز عرضو عليا نحضر معاهم .. تحرجت وماقدييتش نرفض ... ودخلت .. ( شافت فاسد ) ياك ملي هضرتي معايا سمعتي صوت شي عرس ؟ وراه فيه كنت والله مكنكدب .... دابا دخلت ليه والاومور مزيااااان ... ولكن ناضو دابزو العائلات .... عرفتو علاش دابزو ههه ؟؟؟؟
قدس : علااش ؟
قسم : قالو على فروووج هههه
لوؤي : واات ؟؟
قسم : ( كضحك وباينة فيها فرحانة ) تانا مافههمتش ... واااكان خاصكم تشوفو ... انا مابقيت عرفت نتخلع ولا نضضحك ههه ... العريس حطوه فالوسط هههههه ( كتعاود وتضحك ) ومامات العريس كاتجرو من يد والعروسة كتجرو من يد وهو مسكين غير كايشوف ههههه عرفتووو واااحد
المنظر كون كنتو والله حتى تموتو بالضحك ... ذوية كولشي ناض كايتعاير ويدااابز ...هههههههه
اسد غير كايشوف فلامار وعي كاتشوف فيه ... عمرهم شافو قسسم هاكا كاتهضر وتتضحك بهاد الطريقة ... وواضح شحال فرحانة ... رغم انهم مخلوعين على هاد الضربة .... الا ان النبرة باش كتهضر وضحكتها نساتهم كولشي ولوؤي قدس ضاحكين معاها مضحكاهم هي بالضحك ديالها ..
قسم : اااه نسيييت ... عرفتو الحيلة لي تايدرو باش تايهزو الحلوة بزاف منعند الطخيطوغ ؟؟؟.. تايقول ليه عندنا الولاد بزاااااف هههههه تعلمت منهم بعدا هاد الحيلة غاتنفعمني ههههه ... صافي ملي ناضت المداابزة وتباركا لله كلهم جاتهم النفس على راسهم .. . حريين بواف ومكايرضاااوش ... عرفتو العقيق ديال قفاطنهم كولو تنتف كايطير مع العجاجة ههههه وكولشي تايداابز ويضرب ... والدراري الصغار متخلعوش لا ههه بالعكس كايضحكو ويصفقو ههههه
لوؤي : ههه واخا ... دابا ضربة .. الضربة اقسم مزال ماقلتيش لينا كيفاش تضربتي
قسم : هاناا جايا ليك .... فاش جييت خارجة نمشي فحالي .... جا فيا طااالون ههههههههع معرفتوش مينن جا ولكن راااه جا فيا هههههههههههه ( كضحك بهستيرية )
لوؤي : ( كايخوي كاس دالما شافها تخنقات بالضحك ) شدي شربي ... شدي ...
قسم : ( كاتشرب وتضحك ) عررفتوو !!!! .. عمررني ضحكت بحال ليوم ههه .. واخا تخلعت شوية .. ااااااه نسييييت عرفتو فاللخر جا واحد الولد باقي صغير مسكين .. قاليهم عطيوني الفرماج ههههه انا كايحسابتني بغا الفرماج لي كانعرفو ههه فلخر شفتو شنو هو الفرماج لي بغا ؟؟ هههههههع .. أنا هههههههههههه
اسد : ( شاف فيهم ورجع شاف فيها وحط يدو على جبهتها كايشوف الحرارة ) قسم ... بنتي كتحسي براسك مزيان ؟
قسم : ههه اه ابابا انا مزيااااان ماتخافش هههه ... عرفتووو دوزت احسن ليلة والله هههه طريق كلها كنتفكر ونضحك ههههههههه
لامار : ابنتي هادشي راه مكيضحكش .... كون وقعات ليك شي حاجة ؟؟؟
قسم : لا اماما تيقيني .... دوك الناس فشكل بزاااف تاحاجة متقدر توقع ليا معاهم ... خصوصا انهم خلاو المدابزة وجاو كايديرو ليا الثلج وخيفانين عليا .... والله عمرني شفت بحال هاكا .. عرفتو فيهم واحد النفس زوينة كلها كيدافع على عائلتو ... وااااااو فشششكل بزاااااف ....ضريييفين والله
اسد : نوضي عندي اجي لهنا .. نوضي ...
ناضت عندو كلسها على رجليه كايشوف ليها للضربة
اسد : راك عارفة اقسوم هادشي لي درتي مكايدراش .. ولكن على ود هاد الضحييييكة مغانقول والو ومنخصرهاش عليك... ( تبسم ) ماعرفتش واش نمشي نخاصم حيت ضربو ليا بنتي ، ولا نمشي نشكرهم حيت ضحكوها ليا
لامار : راه عراسات الحي الشعبي هاكاك دايرين اجي سولييني انا ملي كنت باقا صغييرة ... وعندنا واحد الجو فالعراسااات وااعر .. توووحشو صراحة ، مغانكدبش عليك اقسم ولكن انا مقلقة منك ...
قسم : هاااء ... علاااش ؟؟؟؟
لامار : حيت مديتينيش معاك ههههه
قدس : مرة جاية ديوني حتى انا هههه ..شوقتيتي نشوف حتى انا هاد الفرماج ههههه ... اجي باقي مكلتيش لينا .. كيفاش فروج ؟؟؟؟
قسم : ماعرفتش ... دابا مامات العريس كانت كالسة حدايا .. وجا عندها وليد صغير قاليها مبغاوش يعطيوني دجاج فالخبز ههههههه وملي ناض الدباز سمعت العريس كيقول ضييعو ليا ليلتي على فروج ههههههه
لوؤي : اهاه والفرماج ؟
قسم : عههههه الفرمااااج هههه هاداك بوحدو ... ( شافت عند اسد ) بابا واش انا بصح كنشبه للفرماج .. ههههه فخباركم هدا احسن دلع قالو ليا شي واحد
اسد : ( غير كايضور راسو ) دوزي تكلسي دووزي .. زيدي تعشاي ... معاكم ابنتي كولشي غانشوفوه ... جميع انواع الكوارث ....
كلسات على الكرسي ورجاء جابت ليها الثلج وبداو يتعشاو وهي مسكتاتش من الضحك كتعاود ليهم واسد غير متبعها كايشوف فيها .. حتى سمعوه كايهضر فالتيليفون مع الطبيب دالعائلة كايشرح ليه الضربة دقسم .... فنفس الوقت كياكل وساهي فهاد الفرحة والضحيكة لي جات بها .... عمرو شافها ضاحكة لهاد الدرجة وبهاد الفرحة كاملة ...
جا الطبيب كايفحصها وهي باقا مبتسمة .. وهي الفرحة كاملة نصها من أصيل لي مزال مافارقش عينيها .. خرج ليها دوا ودار ليها فاصمة و مشا .... ولوؤي ناض
لوؤي : نخليكم حتى انا غانمشي ...
اسد : انا عارفك غاتمشي لوطيل .. بات هنا حسن
لامار : اويلي ؟؟ تخاصمتو تاني !!
قسم : عمي عدنان قاليك شي حاجة ؟
لوؤي : الهضرة ديال ديما وصافي .. مغانمشيش لوطيل اعمي انرجع لدار غير تهنى ... تصبحو على خير ..( شاف عند قسم ) مايكون عندك باس .. مهم عشتي تجربة زوينة .. مرة اخرى بقاي تردي لباال فهاد الخرجات ... ( هبط باس راسها ) بون فواياج كاپيطين ...
قسم : ثاانكيو لوؤي سلم على عمي و خالتو رتاج
خلاهم ومشا و قدس كتفوه
قدس : تانا غانطلع ننعس ... قسووم الله يوصلك على خير اختي ..
قسم : امين احبيبتي ... نجيبليك معايا شي حاجة ؟؟
قدس :لي جا منك زوين .. تصبحوا على خير ...
باستهم وطلعات ....
لامار : قسوم .... حتى نت ابنتي طلعي دوشي ورتاحي شوية غدا راكي فايقة بكري ....
قسم : واخا تانا عيانة نيييت ( باست يديها ) غدا غانمشي بكري بلا متفيقي ثاني غير خليك ناعسة
لامار : لااااابد نفيق على انا نقدر هههه ... يلاه حبييتي تصبحي على خير
دازت باست حتى اسد وطلعات .... ولامار مربعة يديها متبعاهم طالعين فدروج وشافت عند اسد
لامار : مجاتكش قسم مبدلة ؟؟؟؟
اسد : ( تنهد وشاف فيها ) بزااف .. ( حط الفورشيت ومسح فمو بسربيتة ) ماعرفتش واش نتعصب ولا نفرح ... واخا 28 عام وهي معايا وعارف اصغر تفاصيلها .... ولكن ليوم يمكن عاد اكتشفت شي حاجات جداد فيها .... ملي كبرات وانا كنشوفها كيفاش روتينية وكتبان ليا ديما رمااادية فحياتها كنت كنلوم راسي ... كانقول انا لي غالط منين وفرت ليها كولشي بكترة ...حتى مابقات حتى حاجة كتفرحها ولا كتسعدها ... السعادة مابقات عندها فحتى حاجة .. والله آلامار حتى وليت كنحير فليكادو لي نجيب ليها حيت تاحاجة ماكترسم عليها هاد الضحكة لي شفت ليوم وكولشي جبتو ليها حتى تسالاو ليا الافكار .... لاحظت بنتنا الامار كتميل للبساطة .. هي ماشي يحال قدس ماشي بحال وسيم ولا جود ... قسم تايفرحوها الحوايج البساط .. عرس عادي فرحها بحال هاكا .. فهمتي !! العشا كامل وانا كنسمع ليها وكنكتشف فيها اشنو تايضحكها ... اشنو تايفرحها ..... 28 عام عاد كنتعرف عليها ... واش الحياة ومرض جود ودراسة وسيم وقدس والخدمة شغلوني لهاد الدرجة لي منكونش عارف اش تايضحك بنتي ويفرحها ؟؟؟
لامار : حتى انا فكرت بحال هاكاك .. اسد انا راه كبرت فداك الطبقة وكنعرفها مزياااان ... راه نهار كنمشي غير للدرب فين كنت ساكنة ونتلاقا غير بدوك جيران واخا نصهم مبقاش راه متصورش الفرحة لي كنكون عايشااها ، كنحس بلامار تما على طبيعتها ... لامار البسيييطة ... كنلقى ناس بسااااط الى بغاوك يبغيوك والا مابغاوكش مايقربوش ليك ... انا عارفة دابا هاد الفرحة اللي حاسة بيها قسم ... قسم ليوم .. اكتشفت راسها .. تجردات من لبسة الكاپيطين .... تجردات من المادموزيل الاسماعيلي .... تجردات من كولشي ... كانت تما فقط قسم ... سي بوغ صا فرحات بحال هاكا .. ربما اول مرة غاتشوف شي بلاصة لي تحس فيها انها قسم على طبيعتها ...
اسد :دابا انا ماعرفتش واش نمنعهت على هاد الحومة حيت هدا هو المفروض مدامها كتآدى تما والامر تعاود زوج دالمرات .... ولا نخليها ... خاااايف عليها فنفس الوقت مرتاح ...
لامار : دابا ماتقول ليها والو خليها فرحانة ... هضر مع الكارد وشوف اش وقع بالضبط .... وخليها على راحتها راها كبيرة وبعقلها
اسد : داكشي علاش مكنبغيش ندخل ... مابغيتهاش تحس براسها باقا صغيرة فيعنيا من ديما كنوريها انني كانشوفها مسؤولة وبعقلها باش تصرف على داك الاساس ... أسيدي ملي هاد الضربة ضحكاتها لهاد الدرجة ، الله يساااااامح ....غير المرة الجاية غنهضر مع الكارد مايتفرقوش عليها.. حيت واااااضح مزال غاتمشي ....
لامار : راه قلت ليك بغات دير تما مع داك العيالات شي بروجي ... كنعرفها لادارت شي حاجة فراسها .... اووووه ، نسينا مساولناهاش على مولات المنحة واش خداتها ؟؟
اسد : على داك الضحك لي كانت كضحك خلانا نتفكرو شي حاجة ...
عند قسم ..
خرجات من دوش ببينوارها وكلسات قدام المرايا كتنشف فشعرها وكتبتسم بعينين لامعيييين .. واحد اللحظة سهاااااات وهو كيتعاود صوتو فوذنيها [ " أصيل .. سميتي أصيل " ] ضحكات وهي كتشوف فالمرايا عاضة على شفتها
قسم : أصيلل ههههه ( غمضات عيينها كضحك حشمانة )
عند اصيل ...
متكي على سريرو داير دراعو تحت راسوو ويد اخرى كايشوف بيها الصورة ديالها فالتليفون ... وصوتها تعاود فودنيه [ " قسم ... سميتي قسم " ] .. تبسم لا اراديا وهو تايتفكر تفاصيلها وقال بدون ميحس
اصيل : قسم ........
ليلة السبت ...
كيف جرات العادة كل ليلة سبت قصر الاسماعيلي كايكون عامر بالعائلة الاسماعيلية ... الرجال فصالون مناقشين على الخدمة و العيالات فصالون آخر شادين الهضرة و الحديث .... والاشبال بلاصتهم مفقودة .. سلطان وجود فموناكو .. ولوؤي مشا لطنجة يجيب قسم من الفواياج .. و قدس مزال ماجات من التدريب .... من غير آية و ماجدة لي كاينين فااصالون الصغير ... والاشبال الصغار ولاد عدنان ...
لامار : اويلي واش داوية بصح ؟؟
حياة : متكمليش عليا آلامار .. راه خفت حتى نمشي لطبيب
رتاج : مافهمتش انا هاد خفت .. اويلي مالكي درتيه فالحرام ؟
حياة : احاي سلطان قربت نزوجو ونجيب العروسة عاد نوض انا نولد ... اويلي دعيو معايا تكون غير معطلة لاكان حمل غااانموت ...
لامار : دابا شحال معطلة ؟؟
حياة : هضري بشوية غاتسمعك آية ... مهم على الحساب ديالي .. راه تقريبا عشريام هادي
سارة : وعندك شي اعراض
حياة : فيا شوية ددوخة
سارة : وانوووضي على سلاااامتك ... نوجدو للسبوع ؟
حياة : لا لاا لااا حماقيتو ... ويييييلي على شوووهتي
لامار : واقلة تسطيتي ؟ اناري راكم باقين صغار ...باقين عاد فالربعين لا نت لا هو ...
حياة : واخا آلامار راه ولادنا كبرو .. ولدي سلطان ولا كبر من باه ... عاد نوض انا نولد .. ففففف تمنيت هاد الحمل كون حملاتو ختي شيماء ولا أنا ... كانت فرحتي مغاتقدها لا سما لا ارض
سارة : امضرا مسكينة والو مكاين تا خبار !!!
حياة : وااااالو ياختي .. ماخلاو مادارو .. وسعيد كايزيد يكمل عليها .. مبراااااد مكيبغي يمشي لا لطبيب لا لوالو ... كاتقوليك كنموت غير بوحدي،هو مامسوقش
رتاج : الله يفرحهم باقين صغار .... اسبرو راحنا كاع عارفين طبعو والله لا بين ليك شنو عندو لداخل ... حتى هو مسكين مكرهش يكون أب ... مكيبغيش يضغط عليها وصافي
لامار : بسييف مايملو اختي حياتهم كلها دوا و اطباء .. الله يفرحهم ....
حياة : اميييييين
سارة : شوفي نت .. نهار الاثنين سيري خودي تيست وجربي .. لاكان شي حمل راه جابو الله مغايمنعو حد ... ودرتوه بالحلال راه ولدكم .. وهااانتي والله وتمشي اية و لا سلطان حتى يعرفوها غايطيرو بالفرحة يتزاد عندهم شي بجغوط صغير معاهم ...
رتاج : هههههه وهاااانا ليك على سفيااااان باقي الموطور صحيح هههههه
لامار : شششش سسسكتي آلموصيبة غايسمعووك ينوض يحملك تانتي معاها .....
حياة : ( ضرباتها لكتفها ) خمسة وخمييييس .. واش الكبييير وباااقي موطورو صحيح بقا غير الصغييير ؟؟؟
رتاج : ااختي عدنان ديالي مسكين عيا ههههه
لامار : ممم على داك زروقية لي مخبياها فعنقك بلونتيسيغن حسابتك مشفاناهاش .. سيري ابنتي سيري هههه كتبعدي عليه العين ههههه العود باين غير من تسريجتو ههههه
رتاج : الحمد الله انا وسارة بعدا تهنينا من ليغيكل ... نعسو مرتاااحييين .. ياسلاااام ...
لامار : اوا لعقبة لينا ....
رتاج : تخيلو نقولها ليه انا لعدنان راني حاملة هههه والله تايسكت ليه القلب هههههه هو غا لوؤي كرهو فجد فالولاد هههه غاينوض يقطعو من الجدر هههه
حياة : شوووف ليك دابا كالسة كضحك عليا الامااار ياااك !!!
رتاج : اويلي واش كاتقارني راسك بيا .. نتي راك باقا صغيرة وولادك تاهوما .. زيدي التالت وحبسي .. نيت توحشنا شي بجيغيييط ياختي ...
حياة : عرفتو ماعرفاش حتى كندير نقولها لسفيان
لامار : قولي ليه ، سووووف سوووف ، نوجدو السفووف ؟ هههههه
رتاج : هههههههه اداك السبع .. تايتسناك السااابع ههههههه
سارة : ههه نااري كايشوفو لعندنا سكتو ههههه ...
لامار : ههه شوفي ....نهضرو بصح ، انا والله تا متأكدة غايعجبو الحال .. غير فيك الخوف ... وتا دراري غايفرحو ...
يلاه كايهضرو وهي دخل قدس بلا سلام ولا كلام وطلعات فالدروج مخنزرة ولامار متبعاها بعينيها وماجدة دارت واحد الضحكة وهبطات عينيها على التيل ...
رتاج : مال قدس ؟؟
لامار : ماعرفتش ... انمشي نشوف ...
تبعاتها فدروج حلات عليها لبيت كانت غادخل تدوش وهي تشدها ...
لامار : ااجي لهنااا .... مالكي على هاد الدخلة يااااك لاباس ؟؟؟ بحالا عمامك لتحت لا !!!
قدس : بعدي مني ... درت فيك الثيييقة .. وعاودت ليك كووولشي مشيتي قلتيها لبابا
لامار : صافابا !!!! شنو قلت انا لباباك ؟؟؟؟
قدس : على المدددرب ( بغوات ) خررجوووو لياااا من حياااااتي .. خررررجوووو
لامار : ( شداتها ) مااقلت لباباك انا والو ... على مكتعرفيهش كيف داير ؟؟؟ زعما كتخفى عليه شي حاجة ....
قدس : دابا انا علااااش يححشمني هاكاك علااش .. المدرب هاد النهار حذروووه فالملعب بلي جات اوامر من عند بابا انه ممنوع يخرجني من الملعب او يهضر معايا خارج إطار الرياضة .. والا غايخرجوه من داك الخدمة ... و المدير عطاه انذاار ... قالها ليا حسييت بالاحراااااج .. والبكية وكولشي ... قاليا منقدرش نهضر مع وحدة فالنفوذ ديالكم وباباها كايهددني ... علاااش كاادخلوا فحيااااتي علاااااش.. علاش كاتعتابروني باقا بنت صغيرة ماعندهاش سلطة على راااسها ...
دخلات للدوش كتبكي و زدخات لباب ولامار بقات غير كتنهد ...
لامار بقات غير فبلاصتها كترمش وتنهد على هاد الحالة !! ... وهي تجمع النفس وناضت كيف العادة توقف بالابتسامة قدام العائلة تاينفردو وتكون الهضرة .. خصوصا انه هنا عمران و مكيرضاوش حداه لانه كايبقى براني على الاسماعليين وضيف .. يلاه خارج وهي تلاقا ماجدة جايا تاهي ..
ماجدة : خالتو لامار ؟ مال قدس شفتها داخلة مقلقة ؟ كاين شي مشكل
لامار : ( بملامح عيانين ) لا ابنتي مكاين والو . .. غير مع القرايا ولينوط ...
ماجدة : آه داكوغ .. اندخل نفوج عليها شوية
لامار غير ابتسمات ليها وزادت نازلة فالدروج وقفات مع رجاء كايهضرو على العشا حتى جات عندها رتاج
رتاج : مال قدس
لامار : منبعد ونعاود ليك ، نخليو سواغي دوز ... لاسولاتك سارة قولي غير لي نوط .. تمشي تقول لراجلها شي حاجة اختي مكنتيقوش .. متعرفي يخرّج شي سر وحنا ماخصنا شوهة اخرى وداك الموصيبة باقي مابغا يعطينا التقار
رتاج : كتب شي مقال تاني !!!! ماخديتش جورنال ليوم !!
لامار : نو ...ماخلينا ليه فاش يشد .. راه باقي طالع هابط بالاخبار العادية ... كايعيا يحوم يهز شي معلومة ماخلا ليه أسد فين يشد ... اسرارنا شدينا عليهم باب دارنا ودايرين اوطونسيون مع كولشي ...
رتاج : اوا الله يبعد علينا بلاه ... هاداك غايبقى يحوم حتى يقتلو شي واحد من الولاد عاد يتهنى ....
لامار : يالاه نكلسو باش مايحسو بشي حاجة ...
للفوق
كالسة ماجدة فوق واحد الكرسي هزاز فبيت قدس ... كتهزهز بيه حتى خرجات قدس من الدوش ، شافت ماجدة وتخطاتها بلا خاطر و دازت الفيكس دشومبغ ديالها لي كتهضر فيه مع الخادالخادمات ... وعيطات على " أحلام " المساعدة الخاصة ديالها تطلع عندها .... واتجهات لواحد المجر تختار لي دو پييس حتى وقفات ماجدة وقربات عندها وقفات موراها حيدات ليها الفوطة كتنشف ليها فشعرها و تهضر معاها من المرايا ...
ماجدة : من الدخلة ديالك فهمت البلان ماتحتاجيش تعاودي ليا ...
قدس : داكشي لي قلتي ليا الصباح هو لي طرا ... ماما عاودات ليه كولشي .. ( ضارت عندها) كان عندك الحق ، مكانش عليا نتيق فيها
ماجدة : ياك قلت ليك خليها غير بيناتنا انا مكنخرجش اسرارك ...تاتكون شي حاجة رسمية ويدخل بالورد والشوكولا لقاع الدار ويعرفو داك ساعة داركم ... نت مكتسمعيش
قدس : انا قلت زعما هاديك ماما ... وهي اكتر وحدة غاتفهمني .. ماحسابتنيش غاتقولها لبابا
ماجدة : علاش غاتخبي عليك نتي هي قسم ولا جود ؟؟؟ ماماك راه مايمكنش تبغيك بحالهم
قدس : ( بغضب ) مااااجدة أغييط ... نتي ما كوپين ايه .. عزيزة عليا ايه ... كنعاود ليك كولشي ايه .. كنتيق فيك ايه ...مي باش تبداي تدخلي بيني وبين خوتي هاكا لااا ... تاحد مداير بيناتتا الفرزيات وماما كتبغيني كيف كاتبغيهم غير هني راسك ومنعاودش نسمع منك هاد الهضرة
ماجدة : وصااافي دابا مالكي تقلقتي كتجيبي عليا سبتك ؟ صافي ماقلت والو
قدس : خرجي اماجدة نبدل حوايجي
ماجدة : دااااكوغ .. هاانا غااادة .. تاتبردي ونهضرو ...
خلاتها وعطات بالظهر غير شدات فالبواني حلات لباب .. رجعات ضارت لقاتها كتنشف شعرها وزيرات على سنانها وواضح شحال معصبة وهي تضحك وسدات لباب خرجات كتهضر مع نفسها
ماجدة : قلبي علامن تضحكي ابنتي ...ماشي ماجدة لي حافضااااكم ....
گلسو تايتكلمو عادي كأن شيئا لم يقع .. يلاه لامار غاتعيط على قسم علاش تعطلو وهوما يشوفوها داخلة هي ولوؤي دازت بالضحكة لعند عمامها سلمات عليهم عاد جات لعند النساء .. سلمات كتضحك مع الجميع وواضح راشقة ليها ...
سارة : على سلامة حبيبتي .... تهوولنا عليك
لامار : كيف داز الفواياج ابنتي
قسم : صاافا .. فهاد الفواياج مدرت حتى اتصال مع بابا سيطاديغ بديت نقد ناخد رحلة بحرية كومپليطمون بلا مساعدتو
رتاج : مزيان شوية بشووووية غاتولي لينا محترفة ماي ليتيل كابتن ....
قسم : ( حطات راسها على كتف رتاج ) ان شاء الله .... علاش مفرقين كلسو مجموعين دابا انا واش نهضر معاكم ولا مع بابا وعمامي
لامار : خلينا مهنين فرعو لينا راسنا ... كالسين يتغاانو تما على سياسة والحقوق وماعرفت آش ... ضروونا فراسنا جييناا لهنا
قسم : وفين قدس !!!
لامار : لفوق دابا تنزل ....
رتاج: لامار يتحط العشا .. هدا هو الوقت انا غانوض عند رجاء ....( مشات )
قسم: فين خالتو حياة ؟
لامار : راها لهيه كتهضر مع سلطان ..
قسم : ااه و عيطتو على جود ؟؟
لامار : يلاه قطع معاه باباك ...
قسم : غدا عندو الرالي ... ماعطاكمش سيت لي غاينقلوه فيه ؟؟
لامار : لاااا حتى طلبيه ليه نشوفو ... قال لباباه غايكون تالعشية .... الله يكوووون معاه ... والله يحضر سلامة قلبي مامهنينيش بايتة نحلم شي احلام لا الاه الا الله وصافي
سارة : خلااااص آلاماار .. تفائلي ودعي معاه بالخييير ان شاء الله يربح و مايوقع ليه وااااالو
قسم : انا غانطلع نبدل ونهضر معاه يعطيني كاع لي ديطاي ....
لامار: وسربي راه غانحطو العشاااا
جات رتاج نوضات الجميع للجردة يستعدو للعشاء.. وقسم بدلات عليها وهضرات مع جود ونزلات ... و لوؤي كان بعيد تايكمي عاد التحق كايشوف غياب قدس تانطق أسد ...
اسد : فين قدس !!
لامار : راها لفوق يمكن عيانة ... امتحانات غايبداو عندها نهار الاثنين راها مسطريسية انا نطلع نعيط ليها ...
اسد تبعها بعينو كيفاش هضرات متوترة وهو حافض نبرات صوووتهاا وعينييييها مزياان .... و لوؤي تاهو مدازتش عليه داك الطريقة باش هضرات وتبعها .. اما اسد دار بلي مواقع والو وابتسم ليهم وكلسو على الطبلة ....
لوؤي تبع لامار تال الطلعة د دروج وقفها
لوؤي : مرات عمي كاين شي مشكيل ماعجبتينيش ( قرب عندها كتر ) قدس واقعة ليها شي حاجة
لامار تنهدات بحالا خرجاتها من اعماقها وكلسات على الدرجة تاهبطات داك الدمعة لي حابسة ولوؤي تحنى على ركبتو
لوؤي : مرات عمي خلعتيني اش وااااقع ؟؟؟؟
لامار : انا والله الى حرت حرت كيف غاندير مع هاد البنت .... ( شدات فيه ) قوليا اولدي داك النهار لي كانت كتغدا مع واحد المدرب ديالها قالت ليا جيتي لعندها .. واش شفتي دااك بنادم ؟؟؟؟
لوؤي جمع ملامحو : دارلها شي حااجة ولد ل ( حبسها ) دااااارلها شي حاجة ها ؟؟؟؟ راه بررررربي حتااا غاانخرج روحو
لامار : لاااا !! لاااا .. اشمن روح ولا منعرفت حتى انتا ... هداك خينا ماعرفتش اسد كيفاش جاب خبارو يمكن عرف خرجات تغدات معاه .. وراه صيفط شي انذار للملعب باش لاخرجها مزال غايتطرد وجا قالها ليها داك ولد لحرام ولا منعرف من قبيلة وهي تحيح ....
لوؤي: وايلي !!؟؟
لامار: مكتعرفش نتا عمك لادار شي حاجة فراسو ؟... نتا عارف مؤخرا الصحافة اش دايرا لينا ، راه كون شافوها معاه وتسربات شي تصويرة كون خرجات علينا تاااااني ....
لؤي : ( مغززف ) والله مكااتحشم بالله ....
لامار : شوف لهضرة ماشي دابا .. تالغدا ونهضرو وتعاود ليا هاد المدرب كيف داير مدامك شفتيه بغيت تفااااصيل ... دابا خلينا نمشيو نتعشاو نسترو هاد الليلة باشماكان ....
لوؤي : سيري انتي انا غانهضر معااها .. راك عيانة غاتزايدو فالهضرة وصافي انا غانزلها ونتعشاو
وقفات لامار كتنهد : واااخا .. متعطلووش
لوؤي : ( شد ليها على كتفها ) ماديري فبالك والو امرات عمي ... مكاينش لي غاايقرب ليها غير تهناي ...
خلاها وزاد طلع وهي تبعاتو بعينيها مهنية نوعا ما لي واحد بحاال لوؤي حاااضيها خصوصي هاد الكلام اللخر لي قال .. حساتو نسخة على عمامو ...
لوؤي طلع لبيت قدس دق جوج دقات تاسمع صوتها عاد دخل .. كانت احلام كاتقاد ليها ظفارها وهي شادة تيل شافتو ولاحت تيل
قدس : شيييت !!!!! تااااابعني حتى لبيتي
لوؤي : ( شاف عند احلام ) نزلي ...
احلام : واخا اسي لوؤي
قدس : اجججي لهنا مزال مساليييتي شوووفي باقي داك الظفر
ضارت احلام عندها باغا ترجع هو يشدها لوؤي
لوؤي : قلت ليك نزلي خليها تنطح راسها مع الحيط ...
هبطات راسها ونزلات وقدس مخنزرة فيه وهو معلي فيها حاجبو
لوؤي : مالنا نت ياك لابااااس ؟؟؟؟؟ اش واااقع
قدس : اش واقع نتايا لي جاي داخل عليا
لوؤي : دقيت لباب قلتي دخل ... هاداك العشا لي لتحت وداك العائلة مكتسالي فيهم والو ؟
قدس : ماشي سوقك ...
لوؤي : راه غانهرس لمك داك الفم
قدس : وااااقيسني يلااااه قيسني ...( وقفات عندو ) قييييسني و تشوف
لوؤي : قدس يهديك الله براكا من التبرهيش ... زيدي نزلو .... عندك شي مشكل كايتناقش فالسر.. الراجل براني اللتحت بلا مايدي خبارك راك عارفة اش وااقع لينا مؤخرا ماخصنا فضااايح
قدس : آآآه .. داابا قدددس هي لي كاديير الفضااايح ؟؟؟ علاش اخووويا نتا وجود وسلطان لي تاتقيلو فافران بنت داخلة بنت خااااارجة ..هادو ماشي فضااااايح !!!!!! وداك بيلساااان فامرييييكا حتى من الكارو ولات تكمييييه ... تاتبانليكم غي قدس .. اش درت انا كاع اشددرت ؟؟؟؟ واش لقيتوني فشي قنت مع شي واحد ؟؟ يا غا مدرب ديالي مشيت نتغدا انا وياه فريسطو قدام الخلق اجمعين اش دررت دايرين عليا فحال هاكا !!!!
لؤي : دابا شنو درنا ليك ؟ طلعت عندك قتليك هبطي تعشاي الى منزلتيش غايشكو كاين شي مشكيل ..... كاين نت عندك شي مشكيل؟؟؟؟
قدس : ( بعصبية ) مكااااينش حتى مشكيل انا بييخيير
لوؤي : داكوغ ... دونك يلاه تحركي قدامي ...
يلاه غاتهضر هو يصوني تيليقونها .. وطل عليه ... بانتليه سمية دولد .. هو يهزو دغيا قطع عليه
لوؤي : برااااهش لبرااااااهش .... ماكااااتعيااايش مفهمتش انا شنو كايعجبك فهاد رباعة البراهش مهازينش تااسراولهم
قددس : لوووؤي عطيني تيليفوني ... لوؤي متعصبنيييش
لوؤي : ( هازو للفوق مع هو طويل كاتعلق تشدو ) هدا تيلفيونك ؟؟؟ يلاه اجي تبعيه وإلا غانقلبو كامل شنو فيه
خلاها ونزل وهي تابعاه كاتجري
قدس : تيليفوووني .. لوؤؤؤؤؤي عيطني تيليفون
تابعاه كتجري وهو دايرو مور ضهرو مبينو ليها وغادي قدامها نازل فالدروج بحالا داير ليها الطعم لي تبعو عليه تاوصلو لجردة وكلهم ضارو شافو فيهم وهي توقف قدس ولوؤي دار داك الابتسامة المصطنعة العريييضة على وجهو وضار عندها بكل لباقة
لوؤي : بنت عمي لعزيزة ( كيمدو ليها ) هاكي تيليفونك .. ماتبقايش غير تلوحي فحوايجك ..( ضرب فنيفها بصبعو ) دنيا خاااايبة ...
شداتو عليه بنفخة وشافت فيهم كتحاول تصنع الابتسامة وزادت تسلم عليهم ... وهو تبعها كايضور فراسو ....
تعشاو فجو هادئ الا لامار لي باين فيها شحال شاااردة واسد فاهم الموضوع لانه متوقع هادشي ...كايتسنى غير يسالي هاد العشاء ويمشي يفك هادشي ....الجو كان عائلي بامتياز وسط الضحك و الجماعة ... من العشاء ل قهيوة فالجردة كايذاكرو وأغلب الكلام كان على العطلة المدرسية لي قريبة وشنو مخططاتهم ليها بالنسبة للعطلة ... اما قسم غير شادة فنجالها وسااااهية باقي بالها ماهداش على سلمى وهي الى عطات الوعد خصها توفي بيه ... فنفس الوقت كتحاول تقنع راسها انها غاترجع غدا لداك الحي غير على ود المنحة دسلمى فقط .. ماشي على ود شي حاجة اخرى لي بسبابها كتشقق دابا واحد الابتسامة غاتبان على فمها ولامار من بعيييد حاضياها ... تاحسات براسها جمعاتها ووقفات ..
قسم : تصبحو علي خيييير .. غانطلع نعس كنموت بالعيااا
رتاج : بون نوي ماشيغي ....
حياة : سيري ترتاحي حتى لغدا ....
سفيان : تانا غاااانطلع ( شاف لساعة ) الوحدة ونص هادي تحركو تنعسو ....حياة يلااه ... ( هز آية ) أووووپا لاااموووغ ... نمشيو نعسو
آية : ( تخشات فيه كضحك ) تصببحو على خييير
مشات حياة تهز كرسي ديالها وحيت تقييل وهي تنقز رتاج
رتاج : صصصبري ...متهزييييش ( كولشي ضار،شافها مالها غوتات هاكا ) فيصل هز لمرات عمك لكررسي ....
فيصل : و واخا .. عطيني امرات عمي
هز عليها ومشا و رتاج حاولات تبتسم زعما مكاين والو ثم ناض تا عدنان وبداو كايمشيو متابعيين طلعو لبيوتهم ... بقاو غير لامار واسد لي باقي كايضور ففنجالو .. ضار براسو بان ليه كولشي طلع وشاف عند لامار كايهضر بهدوء بنبرتو الرخمة
اسد : مال قدس ....! عندها شي مشكل
لامار : ( تقادات فالكلسة وشدات يديه شبكات صبعانهم وهو شاف ليديها وشاف فيها ) دابا نتا كااتقول ليا من بعد هاد سنين كاملة وليتي حافضني ياك !!
اسد : مممم....
لامار: وراه حتى انا احبيبي حافضاك .. و نقدر نعرضك كااع
اسد : اهااه !! ( شاف فعينيها ) عرضيني نشوف
لامار : داك الهدوء ديالك وهاد السؤال .. تايقولو بلي نتا عاااارف اش واقع ...ماشي نتا لي غاتسول .. نتا لي خصنك تقوليا اش واقع ( ربعات يديها )
اسد قلب عينيه شاف مدة فالعدم وناض وهي تابعاه بالاسئلة على فين ماشي ... غير شافتو طالع فالدروج قاصد جناح قدس سكتات .. وبدات تدعي سلامة و كتحمد الله مكاينش جود ..
أسد حل لباب على قدس لي كانت كالسة على الكرسي الهزاز ديالها شادة تيلي غير شافتو داخل ناضت وقفات بفزع ... وهو جر كرسي دالمكتب ديالها جلس ولامار شدات لباب وكتشوف بملامح مخلوعين كاتخافو يهضر معاها بعصبية او يضربها ...
قدس : بابا !!!
اسد : كاتعرفي بابا نت ممم !!!!
قدس : ( خلعها بملامحو ) ا ك كيفاش ؟؟
اسد : جبدها من درعاها تاشهقات لامار و قدس غوتات ولكن واخد راحتو لان عارف الاجنحة عازلة للصوت
لامار : اساااااد... اسااد دير عقلك
اسد : بقااااااي بعيدة الامار بيني وبينها ....
شاف فلامار بتحذير ورجعات للور وهو شاف فقدس لي بدات كترعد لان كايعرفوه فاش كيتعصب كيوليو يدعيو السلااامة ... تامحسات قدس بتصرفيقة جات فحنكها ولامار شدات على فمها ومشات كتحيدها ليه وقدس كتغووت
لامار : اساااااد اساد صافي حمااااقيييتي
اسد : ( دفعها بغوات ) خخخخخرجي عليا نننتي ....
لامار قطعات حسسها ورجعات لور كتبكي وقدس كتشهق فيديه
قدس : بابااا طططلق مني .. بابااا مادرررت والو واش انا قد الضرررب طلق مني
اسد : ( جبدها لعندو مزير ليها على دراعها ) عارفاااني علاش ضرربتك ولا معارفاش مممم !!!!!
قدس : ( كتشهق وتمسح دموعها ) ع عل .. على المددرب
اسد :نضضضرب انا بنتي على مدددرب ؟؟؟؟ كاااااع ياخد هاد الاهمية ... ( لاحها على السرير ولامار حاطة يديها على قلبها كتدعي ) ضرررربتك على مامااااك .. وعلى هاد الوووجه لي كككحلتيه ليها فهاد لاسوااااغي ....( قدس شافت فلامار بخبية امل محقدة و لامار مفاهمة والو هو يتحنا لعندها شدها من فكها طلع راسها لعندو ) شوووفي عندي معاك كنهضر .... البنت لي تعلي صوتها على واليديها وتنتر بيديها عليهم و تلتخ عليهم فلبيبان غاااااندبحها ..... فييين باغا توصلي ليا فبييين ؟؟ شكوووون نتي لي تلتخي عليها فلبياااان !!!! ....علاش كاتشوفي فيها دابا !!!! نعطي بالضهررر تقولي ليها علاش قلتيها ليه يااااك !!!!
لامار : م ما قلت .. ماقلت والو
قدس : ( بالبكا و الشهيييق ) ياااااااك اماما يااااااك
يلاه كتكملها هو يجمع معاها بتصرفيقة اخرى تاتعوج حنكها وطاحت كاتبكي وعلاها تاني
اسد : شوووفي فيااا ...
لامار : اسااااد الله يعطييييييك الستتتتر .. اااساااااد صاااافي غدااا نهضرو بالعقل الله يعطيك الستررررر ...
اسد : ( شد لامار ) شكون هادي ها ؟؟؟؟ شكووون هاادي ... ممم !!!! ماشي هادي لي تقطعات عليك تاجابتك لهاد الدنيا ... تااتسمعي لياا للشيييخات وتخلي مك ... هاا !!! ( كايهضر و كامل مععصب وولا حمر ) مك ولات كتخرج اسرااااارك ( شدها تاني ) هههضري مااااتدمعيييش عليا ... دابا انا نتسنى تاااااتجي لامار تقول ليا لي نعرف بنتي اش كااادير فالزنقة ( شاف عند لامار ) ونتي دابا نتفاااهمو لي عارفة الموضوع بداك الحجم وسسسكتي ....دابا نتفااااهو الامار
لامار : ا انا رراه .. م معاارفاش ..
اسد : مامحتاحش حتى تجي لامار تقول ليا كلب ديال الخلااا مخرجك من الملعب فالوقت لي خصك تغداي مع داركم بلااااا خباري تتغداي معاه ... ( بفقصة كتر،) بلا خباااااااري ... ممحتاجش تجي تقول ليا شحال كتغيبي على الحصص و لي نوط المززززفتين ديالك .. مامحتاجش تقول ليا شنو قلتي ليها قبييلة وعلاش طلعتي معصبة ! اشار ليها لواحد الكاميرا غووز صغيرة فالترية عاد قدس حلات فمها مشاات من بالها ) منهار تزاديتي وانا حاضيك حتى وااااش تقلبتي فالفراااش .. حتى واش تعريتي نجي نغطيييك ... حتى واش كحبتي نجي نعطيك دوا . ... نخليك دابا ملي كبرتي والخطر غير مزايد ها !!!!
قدس : (كتشهق ) ولكن ياك نتا قلتي لينا الكاميرات دبيوووتنا مغاااتخدمهمش وحنا كبرنا عليهم وعندنا خصوصيانتا . ( بالبكا والتنخصيص ) ياااك نتا لي قلتيها
اسد : اييييييه ... بخصوصياتكم ومكنحلهمش و مكنشوفش بيوووتكم ونتوما كبار ولكن تطلعي بداك الحالة وانا كنشوف فيك وكنشوف ماماك تابعاااك غاانعرف اش وقع ، غااانحل لكاااميرا ..... غانعرف بنتي شكادير مورا ضهري ....ماانتسناش انا واحد يجي يقول ليا شكادير بنتي .. انا معندددي ماايدار من غييييركم نتوما ... بررربي اقدس بالله تعااااااالى وماتقادي معايا رااااسك تاانذبحك ومانحنش فيك واخا بنتي ... بررررربي مزااااال ونلقاااك رافعا صووووتك على ماماك ولا لتختي عليها شي باب تااانطوييييك ....
قدس : ( كتبكي ) ا ا انا .. انا حسبتني ه هي لي فرشات اسرار داكشي باش ت(قاطعها)
اسد : هي ؟؟؟! شكووووون هي ؟ (شد ليها على فكها) دابا ولات هي
قدس: ( بخلعة ) م ماما .. ماماااا ... ب بغيت نقول ماما والله تابغيت نقول مامااا
اسد : ولاو عندك اسرار دابا نتي ؟؟؟؟ ولاو عندك اسرااار
قدس : ( كتجاوب وخيفانة ) كاع عندنا خصوصيات اباباااا
اسد : خصوصيات الوحيدين لي محترمهم ليكم ماحدكم باقين طايشين .. ( اشار بيدو للحمام ) هوما دااااك الدوش ... شي حاجة اخرى تسنايني نحترمها ليك و نتي باقاااا مدرتيش عقلك غير نساااايها ابنتي .. كرهيني ولا بغيني باك هاكا داير ... حيت نتوما الا متبعكمش الواحد موراكم غايديكم الواااد .. الناس والدين الولاد قافزين انا عندي المنووونخين ؟ (جرها من وذنيها ) كاتسمعي ليا لماجدة هاا !!!! كتسمعي ليا لمااااجدة
قدس: ( كتغووت) مااااسمعتش ليييها بابااا عااافااااك مضضضضربش
اسد : هادا راه ماشي ضرب لي شفتي .. الضرب هو لاعاودتي هادشي مزال ومحتارمتيش ماماك .. الضرررب مزال غاتشوووفيه مزيااان .... عطيتك الحرية فبيتك وداك الكاميرا ماخدمتها ملي كانت عندك عشر سنين .... ليوووما خليتيني نخدمها .... وغاااانبقى نخددمها ....ملي وليتي ليا بهاد الطيش كامل ... الخطوة ديالك فين كاتلوحيها غانعرفها ....
قدس : بايا عفاااك .... ر راه انا عندي حياة خااااصة حرام عليك
اسد : الحياة الخاصة الوحيدة لي عندك فهاد السن هي قراااايتك ومستقبلك وعاائلتك .. تلاتة دالحوايج لي نبغيك تعرفيهم فهاد السن لااا غير ... نهار تولي راشدة نشوف بنتي بعقلها وبمستقبلها العيب والعااااار لاااهضرت معاك ...
لتخها على السرير و وقف كاينههج
اسد : هضرتي راها واضحة ..المدرب راه بدلتو ليك .. نشوف مزاااال شي يهوووودي كايضور بيك غانجمعك نتي وياه هاد المرة .... ياااربي يااربي يزززغبك الله و نشوفك مزال مع شي واحد .. بررربي يا قدس يااا بنتي لي انديرو فييييك مااعمرك حتى فكرتي فيه .....ماعمرو يجيك حتى فلي كووشماااغ ديالك ... وحدة قدك بلااصتها هي مدررستها ....
قدس غير كتبكي
لمار : اسد .. اسد راك مرييييض صاافي رخف عليها .. صاافي تالغدا وهضرو بالعقل عاافاااااك
اسد : مغانعاووودش مزال نحل هاد الموضوع ... داك خينا منشوفكش معاه .. وانا غانبكيك بلا ماتبكيني .. طريق وحدة لقراااايتك وللملعب ولا غانقطعو عليك حتى هو .. نهار تكون عندك خرجة من غير قراية وملعب .. ايما الگارد اما ختك ولا خوك ولا واحد من ولاد عماماك .. وشدييييينا هاد الملف .... غدا غاتفيقي عادي وتكلسي مع عمامااااك تبان عليك شي حاجة غااانتفاهمو ......
خلاها و خرج وهي بقات كتبكي بالجهد لامار بقات غي كاتشوف تفادات تاهيا تهضر معاها هاكا وخرجات تبعااتو ... و قدس بدات تلتخ فالسرير وتبكي .....
تبعات لامار اسد للجناح .... لي غير سدات لباب سمعاتو زف بواحد الفاز للأرض حتى قفزات ودخل لدوش لتخ لباب .... بقات واقفة غير فبلاصتها كتشوف فداك الزاج مهرس وحاطة يد على قلبها . ... مدة غير واقفة كدعي الله يخرج مراهقة قدس على خير .... اول مرة غايتعاملو مع مراهقة لانهم مفاتوش بالتجربة من قبل وقسم دازت مراهقتها غير قرايا و مسؤوليات ...وجود دوزها مريض .. تحنات بشوية تجمع داكشي حتى سمعاتو خارج بفوطة فيديه ...
اسد : حطي داكشي عليك ... ( داز لفيكس يعيط عليهم يطلعو )
لامار: غانبعدو غير لجنب ...
وقفات كاتشوف فيه بانليها كايمسح وجهو وقطرات شعرو المتخلل بخصلاات الشيب كيتقطر بالما .... وخرج لبالكون كاتبعو غير بعينيها كينهج ويتنفس معمق و خلاتو على راحتو ..
دخلو الخادمات جمعو الزاج وخرجو .. وهي لبسات بيجامتها ديال النعاس وخرجات عندو لبالكون بان ليها تهدن نسبيا وقفات حداه حطات يديها فوق يدو على الحديدة دالبالكون ..
لامار : صافا !!
اسد : ( ضار شاف فيها ورجع شاف قدامو ) الولااااد صعااب آلامار ... صعاااب بزاف ، المشروع الوحيد لي كنحس براسي ممسيطرش عليه هوما الولاد ..
لامار : حيت كبرو ... مغايبقاوش ديما صغار آاسد .... ولادنا راه كبرو وكل واحد ولا كايشوف الحياة بالمنظور ديالو ماشي بديالنا
اسد : ( شاف فيها ) نتي عارفة انا اهم حاجة عندي فحياتي هوما ولادي ... راه مغانخلي تاشي ولد ال*حبة يجي يضيع ليا ما ربيت ....
لامار : دابا تهدن ... الاساس لي هو مهم راه زرعناه فيهم .. الحبل لي ربطناه فيهم راه يبعدو حتى يبعدو غايرجعهم ....
اسد : كامبووويا والد انا ... كامبوويا .. كاتيق ليا فالشيخة دبنت ساارة .... هاديك يتيق فيها الواحد هاديك ؟؟؟ تاضحك عليها كيف بغات
لامار : مااجدة !!!
اسد : مممم ... مراعيين وجه مها ووجه باها ..ولكن واقلة كاتقلب عليا .....
لامار : الااا ماتقوولهاش تابضحك عارف سارة شحال حساسة ... تقول شي حاجة عمرك لاشفتي وجهها .. نتا عارفة كلمة جوج كاتقولك انا برانية .... ماتقول تاااكلمة خلينا صابرين ... واش قالت شي حاجة لقدس ؟
اسد : اوووودي المرررض وصافي ... ( كاتنهد ) ولاد الحرااام موجودين ... انا ماباغيش نكون انا لي كنقي ليهم ولاد الحرام من الطريق.. بغيت ولادي هوما لي يكون عااايقين بيهم .. .. شحال قدي انا !!!!
لامار :المدرب دقدس شكون عاود ليك عليه
اسد : واش انا بحالك ! نتسنى تايجيو يعاودو ليا .. ؟؟؟؟ هاد المدرب ماهو الا ورقة لي ورات ليا بنتي شحااااال نية ....هاد مدرب ورااني مراهقة قدس اشمن نوووع هي ...
لامار : قالت ليا تغداو اونسومبل منضنش واش فاتت معاه حدود اخرى ... تاهيا راه كاتخاف
اسد : اسيييدي تديها فقراااايتها ... واش قدس عندها السن ديال هادشي !!! انا راني ماشي ضد بنتي تبغي شي واحد ... ولكن حتى تكون فالرشد ديال تسير علاقة بعقلااااااانية .. ماشي علاقة المراهقين لي نبكيو حنا ويااااها .... هاد للاج ديال تبني مستقبلها .. تبني شخصيتها تبني ذااااتها .
لامار :وداابا غير بشوية .. هاوا غايطلع ليك السكار تاني .. واش نعبر لك
اسد : عرفتي شنو كانشوف فقدس دابا .. كانشوف فيها لازدت طلقت ليها سنتيييم اخر مشاات ... مشاات نييييشان ... انا عندي البنات هبيلات كاتعرفي شنو هي هبيلااات .. ياك قسم لي مامنحقيش نتدخل فيها .. نهار نحسها مع شي واحد راه مغايدينيش نعاس حيت عااااارفها نقية من لدااخل .. نقييييية لواحد درجة لي خصني حتى نتأكد مية فالمية فهاداك لي معاها واش يستاهل داك نقااااوة ولا لا .... واخا كبيرة ولكن من داخل راها صغر من قدس .. قدس بعدا راها صغيرة فيدي دارت شي حاجة غانسلخها ... قسم كيفاش غنتعامل !!
لامار: انا متنخافش على قسم يااااااااربي غير تبغي لينا شي واحد كيفما بغا يكوووون غير نحس بقسم غادي دير دارها نشوف وليداتها ... اما قدس لي باليا من هاد نهار خصني ندير معاهااا ربعة دالعينين
اسد : ربعة ومغايقدوش ... هاديك لابقاااات هاكا راه غانعرف معاها اللازم ... تكون غادة فالطريق مزيان هاحنا مزيانين ... تخرج عليه انا غااندخلها طرييييق آخررر داك ساع ... مكاينش لي يجي يضيع ليا الآمال لي بانيهم فولادي وكنتسنى امتى يحققوهم .....
خلاها وخرج ينعس ولامار بقات غير كتشوف وتنهد ....
جا صباح جديد على قلعة الاسماعيلي لي صابح كوووولشي ناعس .... صباح الاحد لي كيفيقوا فيه حتى لطناش ... من غير قسم لي مبروگراميا على الفياق بكري .. صابحة فورشة الرسم ديالها كتكمل على اللوحة ديالها و تحاول تلقى داك الاللون لازرق بالدرجة لي بغات ولكن والو .. اللون لي كتخلط مكيعجبهاش .. او بالاحرى ماشي هو اللون لي كتقلب عليه .. واللوحة تقريبا كملات باقي خاص غير داك اللون دالعينين .. حطات لاباليط وشافت فاللوحة مطووولة حتى تبسمات ... تمعناتها وناضت كتمسح فيديا وخرجات لبيتها كاتمشي وتجي كتفكر وتعض فشفايفها ....
قسم : دبا هاد البنت مغاتقراش !!دابا هاد البنت فرحتها ضيع !!! ( ضارت شافت فمرايا وعلات حاجبها بتحدي) الوعد عطيتو .. والضد راه شدييييتو .. وغنشوفو شكون لي راسو قسح من لاخر نتا .. ولا الكاپيطييين الاسماعيلي ...
دازت لحوايجها لبسات ملابس عادية كانو جابهم ليها خاصين بنهار الاحد لي كلهم سيرفيتات .... وهزات سوارتها وخرجات نازلة فدروج بزربة حتى تلاقاتها رجاء
رجاء : ااء .. مسحابليش غتفيقي دابا.. نوجدو فطورك ابنتي ؟
قسم : ( باستها فحنكها ) نوووو ماافياش .. حتى نجي ويكونو فاقو ..
خلاتها وخرجات لبرا خدات طومبيل ديالها هوما يتبعوها الگارد خرجات ... شافت للساعة كانت تسعود ديال صبح ... وبدات كاتشوف راسها شنو لابسة ....باينة السيرفيت غاالية .... وهي توقف فجنب طريق دارت سينيال للكارد ونزل عندها .. حلات الزاج وخاطباتو مصغرة عينيها فالشمس
قسم : شي محل كيبيع حوايج يكون قدااام و مهنتكين بحال هاكا يبينو مولاهم ماافحاالوش
الگارد : باغدون !!
قسم : نعاود الشرح !
الگارد: ااء .. حوايج قدام
قسم: اااه حوايج قداام و واكلين الدق
الگارد : ل لبال امادموزيل ....
قسم : اش هذا ؟ اااه دوك الحوايج لي مستعملييين يعني !
الگارد : تمامااا ....
قسم : ااه .. زيد قداااامي وريني فين جاا
الكارد: سوق القريعة لبلاصة شوية شعبية ... معندش مشكل امادموزيل
قسم : ديجا سمعت بيه يمكن .... غير زيييد ...
زادو قدامها وتبعاتهم حتى وصلو .... كان واحد الازدحام خطير واخا باقي يلاه صباح .... باركاو طموبيلات وكلشي لي تما تلفتو .. كاين لي كايشوف وكاين لي كايدير راسو مامسوقش وكاين لي ماشي غير لشغالو ... نزلات والكارد تابعينها بعااااد عليها .. سوق كان باقي خاوي لانه يلاه تسعود ديال صبح ... كتشوف مع الارجاء ضااااحكة تستكشف لاول مرة هاد الاجواء ...كاتشوف مع جنابها كانو الافرشة والاواني المستعملين ولي كيشوف فيها كتبتسم ليه واخا هو كايبقى غير مبحلق فيها ... حتى شافت بلاصة الحوايج وهوما يتحلو عينيهاا على وسعهم ومشات بزربة حتى وقفات عليه والمارد غير كايشوفو فبعضياتهم ومنفدين خدمتهم ... كان مول المحل يالاه كايحل الكوليات ويحط على الطبالي لي قدام المحل ديالو .. كاتشوف مع الحوايج ومع الحوايج لي معلقين .. حتى حسات بنيفها كياكلها بدات غير كتشمر وتحك بيديها من فوق حتى ولا ليها حمممررر ... هو ينتبه ليها مول البال وطلع وهبط فيها وهو يضحك تابانو ضروسو .. وبدا يرحب ويعااااود لان بانتليه هووووتة ...
مول المحل : مرحباااااا ... نتي يدك لوووولا هنا .. مرحبااا الالة المحل محاااالك ... ( كيطلع ويهبطها ) نتي باينة كتلبسي الماركة هانتي شي حويجات هنا (كايجبد ليها ) راهم مااااركة وبتيييكيتة داكشي نيييووو غايعجبك ..
قسم : هانتا ... انا بغيت شومبز ... ( كتحك فنيفها ) و سروال .... و سبادرين ... و ... وشي كاسكيط
مول المحل : الله اودي على راس والعين .... لاعندك حساسية انا نتخير ليك
قسم : وي ... ( كتوريه ) وريني هاااديك
مول المحل : هادي .. لا لا ماتجيش معاك ... مقطعة شوية منهنا من جنب شوفي هادي
قسم : مقطعة ؟ وااااهي لي بغيييييت ....
مول المحل : ( صغر فيهاا عينو ) اجي ... ياكما تكوني شي ممثلة وباغا تباني مكرفصة ... حيت وجهك غا ديال تلفازة ... شفتو فشي قنت وماعقلتش.. واش نتي فنانة
قسم : اا لا ... مهم قول ممثلة وبغا نبان مكرفصة .... عجبتني عندك هاااادي ..
مول المحل : ايييه ... هانتي كاينة هاد بياسة ( وراها واحد شوميز ) ... وو .. ولببسي معاها هدا ( وراها واحد سروال ) وسبرديلة هاديك لي معلقة لهيه تقضي ليك الغراض ( شافت فيها ) .. و زيدي هاد الطربوش ( وراه ليها ) عليا بليميييين لي تفرج فيك يتييييق كاااع لامتكسابي ماتعلااااااامي
قسم : ( بفرحة ) بصاااااح !!!!!
مول المحل : كنضحكوووو هنا ولا ...
قسم : دداكووغ .... ( كطل على المحال لداخل ) نقدر نبدل عندك ؟؟ هاااا !!!!
مول المحل : ( ضار شاف لداخل وشاف فيها ) اا .. و واخا . واخا دخلي .....
شداتهم عليه ضاحكة وجبدلها سبردينة ودخلات هو يشد عليها لباب .... من حسن حظها السوق باقي خاوي خدات راحتها كيف بغات ... غير شد عليها لباب وهي تبدا تعطس وتحك فنييفها .... وفذراعها نصلات سيرفيييت و كتجمع حوايجها ولبسات هادوك وسط العطييييس والحساسية حتى ولاو عينيها حووومر ودمعات .... خرجات عندو هو ضار شاف فيها كايطلع ويهبط ... سروال دجين بحال بويفراند دجين ديالو كاع تنكل ومقطع شوووية ... و شوميز مقطعة تحت الابط وفيها جياب تاهوما مفتوقين وبوطونات شي وحدين كاينين شي وحدين طايرين فالاصفر لي بااااهت ... و سبادرين كولها محرووودة و سيور منتوفين ... و شعرها طلقاتو عادي كيف كان وزادت داك طربوش لي دالرجال صوف ديالو كولو منتوف ... واقفة ضاحكة فنفس الوقت كتعطس وتحك فنيفها وتنش بحالا فيها الرواح ...
قسن : ( ااتشوووووو ) حمد الله
مول المحل : ررحمك الله رحمك الله
قسم: قوليا ... ( اتشووووو) كنباااان مكرفصة ياك .. يعني مكاتبانش عليا لاباس عليا ونقدر نعطي منحة دراسية ؟؟؟
مول المحل: تي راه لامعطاوكش صدقة فالطريق راك بزهرك .. غا هو وجهك بااين من طياااااارة الى بالخير ديالو ...
قسن : ااء ( كاتقيس فوجها ) ك كيفاش !!!! مدايراش مكياج
مول المحل: لا لا داكشي عندكم نتوما يمكن كاتشربوه فالما ولا منعرف ....
يتبع..
التعليقات
لا توجد تعليقات بعد، كن أول من يعلق.