محتوى القصة
ادريان : مشيت لفلوريدا هاد سيمانة تلاقيت مع واحد من الاباء لي هز ولادو ومشا ... كان كيظن بلي لي خطف ليه ولدو عندو حساب معاه وغيرجع مزال ياخد ولادو لوخرين ....خداهم وهربهم لفلوريدا مكانش عارف بلي خطفو بزاف دالولاد اخرين كايهددو بيهم الجمعيات د حقوق الاطفال ... مشيت جلست معاهم .... راهم فواحد الحالة لي صعييييبة وغير كايبكيو ... حاولت نعرف واش كانو كيتلقاو شي تهديدات من قبل ، قالو لا .....
ماريسا : والاباء لوخرين تلاقيتي معاهم ؟
ادريان : اه انا راه حققت مع كوووولشي .. كانو بقاو ليا غير هادو .. لقيتهم مكاينيش وبحثت عليهم تالهاد سيمانة عاد عرفتهم مشاو لفلوريدا ، لقيتهم غير حيت تبعت كارط البنك ...
ماريسا : يعني هادو ماشي غير هاربين ! هادو مخبييين !!!
ادريان : اكيد مخبييين ...راه كيحميو ولادهم لوخرين ..... خسرو ولد مغيخسروش لوخرين
نيكولاس : واخا .. كيحميو ولادهم لوخرين .....ولكن علاش مخبيين معاهم تاهوما تما ؟؟؟ .... انا أب ... ونتا حتى نتا أب ... غتخلي ولدك مخطوف وتمشي تتخبى !!!
ادريان : لا ولكن الاباء كيختالفو ماشي كلنا بحال بحال ( لوؤي كيضور راسو كيلعب بستيلو داير ضحكة مستهزأة ) كاين لي كيفضل يخاطر بواحد باش يربح جوج ...... ماعندوش الجرأة يخاطر بيهم كاملين ......
ماريسا : هاد الكلام ا آجون خليه لااطباء النفسيييين .. ماشي للعملاء والمحققين ... حنا كنخدمو العقل .....وهادشي لي قلتي مكدخلش للعقل
العميد : قضية يتخباو الواليدين بحال هاكا و ولدهم باقي ماجات حتى الجثة ديالو .. شي حاجة غريييييبة !!!!
نيكولاس : والغريب انهم مداروش حتى شكاية بحال الاباء لوخرين !!!!!
ستيف : والشخص الغريب ..... ديما كنخليوه تحت عينينا ا اآدريان .....
ادريان : ( جمع داك الوراق لي حداه تنهد وشاف فالعميد ) غنرجع غدا عندهم ونخلي جوج حدا باب دارهم يراقبوهم ....
لوؤي : ( كيشوف للتحت فالستيلو لي كيضورو فوق طبلة ) مغتلقاهمش
ادريان : مفهمتش !!!
لوؤي : ( هز عينو فيهم ) راه كان عندهم الزهر غاا فالمرة لولا لقاهم محقق مكيفكرش لبعيد بزاف .... ودغيا ( شاف فالعميد ) غلباااااتو عاااطفتووو ملي شاف جوج دمعات واخا القضية مافيهاش عاااائلتو ( شاف فادريان ) حيت العاطفة الى بغا يدخلها العميل كيدخلها وصافي ، ماشي ضروري انه يكون فيها واحد من عائلتو .... كيفما كيبان لينا دابا عند ادريان ....
ادريان : مديرنيش وسيلة باش تبرر اغلاطك
لوؤي : انا كنهضر فقضيتك دابا .. مزال متعيط بسميتي باش نجبدو اغلاطي .... وحيت هادوك عارفينك خدام فالدورية .. وعارفينك خدام مع محققين اخرين غايدخلهم الشك .... راهم اكيد مغيبقاوش تما وغيرجعو لشي بلاصة ثاني يتخباو ويتعلمو من غلطهم للول وتاداك الكارط ماغايخدموهاش .... الحظ كايجي غا مرة وحدة على شكل عميل حنين يتعاطف معاهم ... مكايجيش ديما ......
ادريان : ولكن علاش ؟؟؟؟ علاش لي غااايتخباو ؟؟؟
لوؤي : لي كاااايتخبى شكون !
ادريان : لي دار علاش !
ماريسا : لا ..... ماشي بضرورة يكون داير ( شافت فلوؤي ) لي كايتخبى .... هو لي مخبي شي حااااجة ......
لوؤي : تماما ....
ادريان : وشنو غاايكونو مخبيين مثلا ؟؟؟؟,
لوؤي : ( رجع بظهرو على لكرسي لور ) هاديك خدمتك ماشي خدمتي ..... نتا لي خاصك تعرف علاش تخباو وسمحو فولدهم ....
العميد : عاود رجع لتما .. الا كانت هضرة اولاي على حق وهربو تاني.... خود امر رسمي بالاعتقال ملي تعاودو تلقاوهم .....
ادريان : حاضر ماي بريگدير....
العميد : ( خدا تنهيدة طويلة وهو كيشوف فيه ) أووولاي .....
لوؤي : ( تحنحن وقرب لطبلة قاد جلستو ونيكولاس كيشوف فيه ) قبل مانبدا ... انا مامدخلش العاطفة ديالي ونتوما عارفين مزيااااان بلي مزال مادرت تاشي خطوة فهاد لقضية لي تبين بلي عرقلت البحث على قبل العاطفة !!! اذن منين جبتو ليا هاد العاطفة دابا ؟؟؟
ادريان : درتيها ( لوؤي علا فيه عينيه ) الدورية كاملة اقترحات عليك تهضر مع بنت عمك هي تجيب لينا كاع خباراتو ... طيح ليه دغيا فالشبكة باش نشوفو اش غيدير .. ولكن نتا مبغيتييش
لؤوي : ( لاح الستيلو بجهد والعميد قرب لطبلة وهضر بحدة وصوت مرتفع ) قلتها قبل وغااانعااااااود نقوووولها ..... انا قبل مانكووون عميل ..... انا وووولد عائلة .... والى تقاااصت شعرة من بنت عمي .... غانححححرق دورية بلي فيييييها
ادريان : ( شاف فالعميد ) هااا !!! هادي ماشي عاااطفة داباااا !!!!! هاهي العاطفة باااانت ......
لوؤي : هاادااا سميتو الدم ..... لي مكتكساابووووش نتا ....
العميد : ( ضرب فالبيرو ) اوووووولاي .... ( شاف فادريان ) كلمة اخرى مزال غتخرجووو من هاد القاعة بجوووج بيكم .....
ادريان ضور راسو لجنب ورجع لور ، ولؤي شاف فالعميد ....
لوؤي : كييييفما حميينا راس ايميلي نهار حطو السلاح فوق راااسها باش يهرب .... وعطيتينا الحق نخليوه يهرب ونزلو سلاااحنا باش هي تبقى حية ..... كذلك انا كنحمي بنت عمي وخليت القضية تطواااال باش مايوقع ليها والو ..... مغنحطش بنت عمي فالخطرر باش نتوما تشدو سلفادور واخا نعرف نحيد الشارة من عنقي وندير فيه شرع يدي ..... انا مكندخلش عاطفتي .... كون كنت كنخدم العاطفة كون ضييييعت كولشي فنهار لي شفتو شد فيديها وطلب الزواج .... الا سكت ورجعت لور وتسنيت الفرصة المناسبة راه حيييت خدمت عقلي ماشي عاطفتي .... هاد القضية ديالي عندي بحال حقل الالغام ... غادي وخايف فين كنحط رررجلي .. وغادي ومرعووووود ... حيت فيها بنت عمي .... ومغنخلي تاشي واحد ياخد هاد القضية حيت مغنثيق فحتى شي واحد يحميها بحالي ..... حنا كنهضرو على عصااابة ديال تجارة فالبنات .. كنهضر على عصاابة ديال مووووقع البوورنووو .... كنشوف بنت عمي وحدة من هادوك لي كااايتستهدفووو .... ونتوما عارفين بروتوكول عائلتنا كيداير .. مكنشوفش غير سمعتها لي غاضيع كنشوف فحياتها غاضيييع ، وكتسنى مني نتحرك بزربة !!!!! واش عارف كمية التركيز لي انا خدام بيه باش منديرش خطوة غالطة نضيع ليها حياتها !!!!! .... واش انا استسعصب عليا نهز تيليفونها ندير ليه ميساج يجي عندي لشي بلاصة ونشدو ! صعاابت عليا !!! ولكن لااااا .. مغنستفد والو من غير غنشدو بدلييل ضعيف يتحكم موراها بست شهور ويجي يكمل لي بداه .. انا كنفك فخيوط بومب ضايرة على راس بنت عمي خيط بخيط ... مغنفكش غير خيط واحد ..... خاصني نفك كاع الخيوووط .... يعني نشدهم كاملين بيهم ماشي غير سلفادور بوحدو ....
العميد : يعني نتا باقي عند هضرتك بلي سلفادور مكاينش بوحدو ؟
لوؤي : واش باغيين تحمقوني .. كنهضرو على سييت ديال البورنو .... بالمخرج ديالو بالمنتجييين والمصوريين ، صحاب الماركوتينغ .. كنهضرو على قناااااة ..... وكتقول ليا بنادم واحد لي كاين !!
العميد : حنا عرفنا هادشي ولكن هو لي غيكون الراس الكبيرة ..... لبقية غا تابعين ....
لوؤي : ماشي هو .. الراس لي كبيرة ، كيآمر مكينفذش ....
ادريان : وعلاش هاد خينا هذا ختار بنت عمك زعما من بنات المغرب كلهم !
لوؤي : حيت هي اكتر وحدة كاتخاف على سمعتها ....
العميد : شنو العلاقة ! علاش غيخاف على سمعتها هو ؟
لوؤي : هي لي غتخاف ماشي هو .... هاديك الفلوس كاملة لي حجزنا عليها فنيويورك كتحسابوها غير من مداخيل السيت !!! البنات لي شديناهم كانو رهائن تما اش قالو ! قالو بلي قبل مايوليو ممثلات .... تعرضو للتهديد .. بنت عمي مغيستهدفهاش على اساس ممثلة .. بنت عمي غتعرض للتهديد ، انا هادشي عارفو ومتأكد منو .... بغاو يصورو ليها فيلم وتتهدد بيه وحيت هي بنت عائلة لاباس عليها قادرة تعطيهم شحالما بغاو ..... وملي كنهضرو على عائلة عندها هولدينغ وبروتوكول ملكي .... فحنا مكنهضروش على تهديدات غير بالفلوس ... غيكونو اسهم وسندات ..... يعني راهم ضربتهم فبنت عمي ضربة كبييييرة ، داكشي علاش تاهوما خدامييين بتركيييز و مزربوش دغيا ....
ماريسا : ولكن هادشي لي قلتي مغنقدروش نعرفوه ونتأكدو منو تاتصور بنت عمك داك الفيلم ونشوفو اش غايديرو .....
لوؤي : ( شاف فيها بحدة ) سيري صوريه نتي نيييت و اجي نتأكدو معاك !!!!! .... ( شاف فيهم ) مغنخليهمش حتى يوصلو يصوروه .. هادشي لابغيت نتأكد منو غنتأكد فمكتب التحقيقات ملي غيعترفو بيه بلسانهم ......
العميد : هادشي كامل لي قلتي مزيان .... وكون جات عليا نتا هو اكتر واحد غياخد هاد القضية حيت مهمة ليك من جوج جواه ومغاتكاسلش فيها ... ولكن هادشي ... قبل ماتسيق الخبار الهيأة بلي عائلتك و حياتك الشخصية داخلة فهاد القضية .........
لوؤي : ( كيرمش فيه ) يعني !!
العميد : الاجتماع ديال البارح كان عليك ..... ( لوؤي علا حجبانو ) هضرنا شوية على مكانتك فدورية وخدمتك هنايا ..... ووصلنا لقضيتك ... ( خدا تنهيدة باش يخرجها ليه ) حيدوها ليك آاولاي !
لوؤي : ( بقا كيرمش فيه مدة ونيك شد على راسوو) كيفاش !!!!!!! ( بعدم تصديق ) كيفاش حيدوها مفهمتش !!!!!!!
نيكولاس : ( بحدة ) وشكووون قال ليهم بلي الضحية بنت عمو !!!!
العميد : الى عندكم الوقت فين تقلبو تاعلى شكون قالها ليهم ...... قلبو ....... ولكن كنظن الوقت لي عنكم .... يلاه يكفيكم تحلو القضايا دياااالكم ......
لوؤي مابقاش قاد على الصبررر ..... ووناض بزززربة ونيكولاس وقف دغيا وكاع العملاء وقفو كيشدوه وادرياااان وقف
لوؤي : ( شااااادييينو ستيف ونيكولاس وهو عينيه حمريييين كيشوف فادريان وهضر بين سنانو ) مووووووتك على يدي ......على ييييييدي
نيكولاس : ( شاد فلوؤي كيهضر فوذنيه ) لوؤي ... ديييير عقلللك ... ماااشي وقتو ....
ادريان : ( كيهضر من بعيد كيشوف فيه شادينو ) انا مالي ؟؟؟؟ اش داني انا للهيئة وشكوون انا كاع باش نقدر نهضر معاهم ؟؟؟ واش نتا حماقيتي خاصك غير سبة لي دوز ليا منها ؟؟؟ واش كنباليك غير انا ؟؟؟؟ واش اي موصيبة درتي غتجي تخويها فيا انا ؟؟؟؟
تسمعات ضربة قوية فالطبلة وموراها غووووتة
العميد : جلسووووووو .... ( شاف فلوؤي ) الى باقي زززدتي هضرة وحدة مزااال غتلقى رااااسك برااا هاد الباااااب وممنوع تعتب عليه مزااال فشي اجتمااااااع ....هاااد القااااعة عندها احتراااامهاااا
نيكولاس كيهدن فيه ولوؤي عينيه غير على ادريااااان .... ورجع تنتر منهم وقاد حوايجو بالنترة .... ومشا جيهة الكرسي ديالو وهوما باقين خايفينو يرجع ينوض .... هز الكرسي من الارض لي كان طيحو فاش ناض وقادو جلس عليه عاد هوما زفرو النفس وكل واحد مشا كيشد بلاصتو والعميد كيضور فراسو ورجع للكرسي يجلس تاهو ... ولوؤي كيعوج عنقو يمين وشمال كيتحكم فراسو ولونو زاد سمااار بالعصبية ... شاد فيديه داك ستيلو كيخرج فيه اعصااابو ومحني كيشوف غير فيه ....
العميد : ولات عندنا هنا الثانوية ماشي الدورية !!! اش هادشي ؟؟؟؟ .. خاصكم غير السبة تنوضو تاكلو بعضياتكم !!!
ادريان : راك شفتي كولشي على عينيك ؟ عندو شي دليل باش كيهاجمني !!
العميد : صافي سدو عليا هاد الموضوع ( شاف فلوؤي ) الملف ديال سلفادور حيدوه ليك .... ولكن راك غتاخد ملفات اخرين من بعد .... وهادشي راه مزيان ليك باش تربح دوك الملفات ومتقصاش من الدورية ...شوفها من الجهة لوخرا ... ( لوؤي غير كيشوف فداك الستيلو مامعليش راسو والعصبية باينة فملامحو ) يعني راااه مزيان تخدم على ملفات اخرين ....
ادريان : كنعتذر ماي بريگادير على التدخل ، ولكن بغيييت نفهم !!! ... هو خفتي ليه على بلاصتو هنا فدورية وبدلتي ليه القضية .... وحنا بلاصتنا ؟؟؟ مكنهموكش ؟
العميد : ( شاف فادريان ) فكل اجتماع ا آجون ادريان كتستافزني بهاد العبارات لي كيوحيو بلي انا كندير بيناتكم هنا الفرزيات ... الا قلت غيتبدلو القضايا غيتبدلو ليكم كاملين ( ادريان رخا ملامحو براحة ) ماشي غير ليه هو
ادريان : هاكاااا مزيان .. هاكا اه ... حيت انا صراحة القضية لي عندي .. معنكشااني ومثقلة ليا الخدمة حتى وليت نحس فيها بالملل
نيكولاس : الملل؟؟؟؟ ( عوج راسو فيه ) هاد التلاميذ ليكيختفيو من مدارسهم كل نهار ؟ جابو ليك الملل !!!!
ماريسا : واش عارف راسك اش كتقول ؟؟؟؟؟ باش تكون عميييل آميستر تايلور .... خاصك تكون انسان بعداااا .... خاصك تحس بشنو كيحسو دوك الاباء لي كيمشيو ليهم ولادهم .....
ادريان : ( شاف فالعميد ) هاحنا ضرنا ضرنا .. ورجعنا للعاااطفة ....
العميد : ( تنهد معلي راسو لفوق كيطلب الصبر وشاف فيهم ) قضية الطلبة المختفييين .... غتولي قضية ماااريسا ( ماريسا علات حجبااانها ) ماريسا .. هذا هو الملف جديد ديالك ..
ماريسا : ( باستغراب ) ماعنديش مشكل .. ولكن ... وهو شنو غاايخدم ؟ غتعطيه ملفات جداد ؟
العميد : أدريان غيخدم الملف د نيكولاس .... الكازينوات لي تحرقو ...
ادريان : ( وسع عينيه وشاف فيه ) كيفاش ملف نيكولاس ؟؟؟؟ و ملف سلفادور شكون غايااخدو ؟؟؟؟
العميد : غيخدمو نيكولاس .... ( نيك علا حجبااانو)
ادريان : ( بعصبية ) ولكن اش غنخدم انا فملف نيكولاس !!! ياك كملو اولاي كامل قبيلة ... شنو خلا ليا فيه ؟؟؟؟؟
العميد : اسيدي نتاا خدم غير داكشي لي بقا ولقى الكارديان وحقق معاه .. باراكا عليك .... ساليه باش دوز لملف اخر الى مبغيتيش تكون نتا اللول لي غتقصى ....
ادريان : ( سرط ريقو وشاف فيه ) ولكن انا كنشوف راسي غنخدم حسن فالملف د سلفادور و غان..... ( قاطعو بضربة تاني فالطبلة )
العميد : مكنختاااااروش هنا ا ادرياااااان ... انا لي كنعرف كل قضية شكون يشدها وانا لي كنعطي هنا الملفات .... اجي بلااااصتي نتا حسن كاااع اش باليك؟؟؟
ادريان : ( غمض عينيه مدة مزير على يدو تحت طبلة ونزل راسو ) اوكاي .... اوكاي ماي بريگدير ....
العميد : ( علا عينو فنيكولاس ) نيك .... الملف عندك ... كمل من اخر نقطة بقى فيها اولاي ... ديرو اجتماع نتا وياه وقادو اموركم ..... ( شاف فستيفان ) بنسبة ليك استيف .... بغيتي شهر غنعطيه ليك ولكن الى مدرتي والو .... غيتحيد منك الملف حتى نتا .... ( رجع بظهرو لور ) يلاااه ! تحركو شوية .. خدمو .... متبقاوش غير كتسناااو الوقت المناسب حاولو نتوما تخلقوه ... الى بغيتو تاحد هنا مايتقصى ..... جمعتكم نتوما قسم الجنايات بضبط حيت الهيئة باغا تصيفط عملاء فهاد القسم هذا .... انا خايف عليكم نتوما بخمسة .... داكشي علاش درت هادشي كامل ودرت هاد تغييرات وهاد الاجتماع الطارئ .. تحركووو
ماريسا : غنديرو جهدنا كامل ومنخيبوش ثقتك ماي بريگايدر ....
لوؤي : ( المدة كاملة غير ساكت كيشوف فداك ستيلو ، عاااد علا راسو بشوية وبخيبة كبيرة فملامحو وشاف فالعميد ) اهاه .... وملي كل واحد عرف الملف ديالو لي غيخدم عليه .... فين ديالي ؟
العميد : ( شاف يمين وشمال كيلعب بعينيه ويديه ملهيين كيجمعو دوك الوراق ) مم .. منبعد ونشوف شنو غيخرج جديد ونعلمك فايمايل .....
لوؤي : ( بخيبة اخرى ) ايمايل !
العميد : ( كيشوف الوراق ) امم .. ايمايل ( هزهم فيديه وناض وقف ) نهاركم سعيد ...
خلاهم وخرج وهوما كل واحد كيجمع وراقو حداه .... وماريسا طبطبات على كتف لوؤي بمواساة
ماريسا : كولشي من الخير آ اولاي .. مزيان لي غيتبدل ليك الملف باش متقصاش حيت ملف سالفادور هو اكثر واحد طول فالملفات ديالنا .... ( شافت فنيكولاس ) دير جهدك انيك باش مايتقصى تا واحد فينا ....
خلاتهم ومشات وستيف تاهو اشار ليهم براسو ومشا وتبعهم ادريان اما لؤوي غير جالس فبلاصتو فلخر خدا تنهيدة قوية ووقف ونيكولاس غير كيشوف فيه ماعرف تاكيفاش يجبد معاه الكلام .... تاخرجو من قاعة الاجتماعات وهو يوقف نيكولاس
نيكولاس : لوؤي
لوؤي : ( ضار عندو ) امم !
نيكولاس : راه بحالا الملف عندك .. بحالا راه عندي .. وكنواااعدك غندير جهدي وكتر باش تاحاجة ماتقيص بنت عمك ....
لوؤي : ( ضار كيشوف قدامو ورجع شاف فيه ) انا عارف بلي بحالك بحالي ...داكشي علاش راني مرتاح ( شد ليه فالفيست ديالو ) حيت كون خداها واحد اخر مغنسكتش ( جبد من جيب الفيست ديالو البطاقة الفيديرالية ديال نيكولاس لي فيها اسمو وصورتو ودارها فجيبو وحيد بطاقتو لي فيها اسمو وصورتو هو ودارها فجيب نيكولاس ) ولكن ملي شديتييها نتا ..... تهنيييييت .... ( بابتسامة شيطانية كيشوف فيه ونيكولاس موسع عينيه ) حيت بحاااالك .... بحالي ..
خلاه وزاد ونيكولاس عاد سرات معاه وتبعو كيجري شدو
نيكولاس : اجييي لهنا .. لووؤي وقف ( ضار عندو ) واش باااااغينااا نتشدو قبل منهم ؟؟؟؟ واش تسطيتي لا ؟؟؟ عطييييني الكارط
لوؤي : ماعندك مادير بيها .. من اليوم نتا أجون اولاي .. وانا اجون نيكولاس ...
نيكولاس : ( كان ماشي وشدو تاني ) واااش عندك شي ععععقل ؟؟؟
لوؤي : واش لي خلاااا خدمة عاائلتو كاااملة و جا يحفي كرو ف الاف بي اي كتسنى يكون عندو العقل ؟؟؟؟
نيكولاس : هادشي لي كتقول مااايمكنش .... عطيني لاكااااارط!
لوؤي : ياك فكل الاحوال غنكونو ملتميييين وجهنا مكايبانش .. مغااايشوفوش واش انا ولا نتا هاداك ... وماعنديش مشكل تترقى على ظهري ..... سلفااادور هاديك قضيييتي انا .. وانا لي غاانحلها .. وانا لي غنشدو .. واللخرة ديالو على يدي اناااا .... ( دار يدو فجياب سروال وعلا كتافو ) هاااادي فرصة ليك ترتاح شوية .. سير دي مراااتك لشي جزيييرة جلس نتا وياها هضرو على لامور ديالكم و لا زيدو شي ولد آخر .....
جا ماشي يلاه غيشدو وهي تجي عندهم لاسيسطونط دالعميد
- اجون اولاي ... سيادة العميد كيتسناك فالمكتب ديالو
لوؤي طلق تنهيدة واشار ليها بواخا ومشات وهو ضار عند نيكولاس
نيكولاس : بهادشي لي كدير فيه ، راك غاتشد قبل منو ...
لوؤي : عااارف اش كندير ... سير ترتاح
نيكولاس : ( شدو ) فين انرتاح فييين .. ( مد ليه الكارطة ديالو ) راك غادي عند العميد شد الكارطة ديالك يقدر يطلبها ليك ....
لوؤي : ( جبد من جيبو كارط دنيكولاس عطاها ليه وشد ديالو وجا ماشي هو يضور عندو ) بلااا متفرررح بزاف ... ملي غنحتاجها فالسكانير راه غانديييها ...
نيكولاس خشاها فجيبو دلافيست غير كيضور فراسو و لوؤي حل المصعد ونزل ..... مشا فالكولوارات تاوصل لبيرو دالعميد لي كان زجاجي ...
دق فيه جوج دقات من بعد حل الباب .. كان العميد واقف حدا البيرو ديالو وداير ابتسامة مضطربة ومتوترة ....
لوؤي : قالوليا بغيتيني ؟
العميد : ( بتوتر ) دخل .. دخل آ اولاي ....
لوؤي علا حجبانو باستغراب وسد موراه الباب ودخل كيشوف فيه
لوؤي : ياك لاباس ؟ الى كان على ود الملف ... صافي ماعنديش مشكل دير لي بان ليك صحيح .....
العميد : ( شاف قدامو مباشرة ورجع شاف فلوؤي ) تفضل ا اولاي ..... زيد ....
لوؤي كيشوف فيه ورجع ضار بشوية موراه د يشوف لفين كيشوف العميد .... هو يعلي حجباااانو بجوووج ملي بانت ليه الناطقة باسم الهيئة العليا جالسة على لي فوطوي لي مقابلين مع البيرو د العميد ومعاها جوج رجال الامن ..... غير شافها بقا غير كيرمش وتملكو شوية من الاستغراب والتوتر ! .... وهي ابتسمات ووقفات ... كانت مراة طويلة القامة ، فنهاية الاربعينات ... شعرها اشقر مجموع لور وملامحها زعرين وحاادين وجهها مطلي ببعض بثور النمش ... لابسة كوستيم ازرق رسمي ....ومدات يديها بلباقة .....
السيدة : كنظن سبق لينا تعرفنا نهار التخرج ديالك أجون أولاي ....
سلم عليها و اشارت ليه بعينيها للفوطوي قدامها وهو تنهد ومشا جلس وتاهيا جلسات والعميد جا تاهو جلس ولؤوي كيشوف فيها وفالعميد ....
السيدة : ( دايرة رجل على رجل وهزات فنجالها دالقهوة ) ودابا مستر إسمائيلي ..... باش بغيتينا نبداو ليك ؟؟؟؟ انذاراتك كتااااار ... حرت باش نبدا ليك ....
لوؤي : ( شاف العميد ورجع قاد جلستو وخدا تنهيدة ديال الاستسلام ) بداي بلي عجبك ماعنديش مشكل .... ومكنخافش .... كنوقف ورا مسؤولية اغلاطي الى كنت دايرهم ....
السيدة : ( بضحكة ) إلى كنت دايرهم ؟؟؟ ههههه .... ( جمعات ضحكتها ) أجون .. نتا راااك درتيهم ... وتمااااديتي فيهم .... ( حطات فنجالها استقامت فالجلسة بجدية ) وحيت وقتي ضيق ووقتكم حتى هو ..... مغنضيعوش وانا كنحسب اغلاطك لي درتي فالدورية من نهار التحقتي وعصبيتك لي كتخرجها فجبهة الميدان وشحال من واحد مكانش خاصك تيري فيه وتيريتي فيه .. هادشي كامل مغنهضروش عليه .... خلينا نهضرو على أكبرهم ..... واكبر غلط لي ميمكنش مزال ندوزوه ليك ا اجون أولاي ... ( لوؤي غير كيشوف لتحت وهي رجعات بظهرها لور براحة ) خلينا نهضرو غير على .... استغلال سلطتك فالفيدرالية .... فمصالحك الشخصية ......
لوؤي : ( علا راسو فيها بالزربة ) ماافهمتش ؟؟؟؟
السيدة : مااافهمتييش !!! ( قربات كتر ) غتنكر بلي استغليتي الشارة ديالك وخديتي السلاح من فرع الفيديرالية ففرانسا باش تقضي مصالحك الشخصية ؟؟؟؟؟؟ ( لوؤي غمض على عينيه والعميد كيضور فراسو بقلة حيلة ) غاااتنكر بلي استخدمتي السيرفر ديال الفيديرالية باش تتعقب تحركات الكارط البنكية دواحد ماعندمناش بيه علاقة ؟؟؟؟ غاااتنكر بلي درتي اونكيط بالشارة دالفيديراالية على قضية ماااعندناش بيها لا علم ولا علاقة ؟؟؟؟ غاتنكر هادشي !!!!! ( لوؤي غمض عينيه ) اه .. فهمنا .. واخا متطلقش الرصااص ولكن السلااح راك خرجتيييه من الفيديرالية بلا اذن ديالنا فمصاااالحك الشخصية ...... بلا تا اذن بلا علم بلااا حتى حاااجة بحالا حنا خدامين عند سيادتك
العميد : كاانت فخباااااري
السيدة : ( شافت فيه ) مكانتش فخبارك مستر سميييث .... ومن الاحسن مداافعش عليه باش ميقطعوش عليك تا داك النصيب دالتقااعد... مدااافعش عليييه ...
لوؤي : مكانتش فخبارو ... كولشي درتو بوحدي ومكانت فخبار حتى واحد ....
السيدة : اهاه وشنو كان كيقولك راسك تادرتي غلطة قد هادي ؟ انك تستغل السلطة الفيديرالية وتمشي لمداهمة الملف ديالها ممحطوووطش عندنا
لوؤي : عااادي .... بحال فاش كتكون غادي كطرا قدامك جريمة ضروري مغااااتدخل بلا متفكر واش ملفها كاين ولا لا .. خاصك تدخل ... هاكاك طرا ليا .. كنت غادي لقيت راسي قدام جريمة خاصني نمنعها
السيدة : ( بعصبية ) حط مللللفها فوق طططبلة للعميد ديالك وخود الاذن وخرج السلاح والدعم وداهم داك ساعة ، ولكن باش تخرجهم بلااا علم دياااالنا .. لااااا ... وهادشي الهيئة مغاتساامحش فيه معاك وغت ( قاطعها )
لوؤي : اووكاي ... اوكاي صافي فهمت .. القانون وقاريينو كاملين .. وانا كيف قلت ليك واقف ورا مسؤولية اغلاطي .. اوكي .. انا عارف اش درت ونتي عارفة و الهيئة عارفة بلا منبقاو نديرو الفلاش باك دابا لي وقع وقع .. اشنو المطلوب دابا هم ؟؟؟؟ ( العميد شد على راسو ) شنو عقوووبتي ... باش مانضيع لا وقتك لاوقتي ..... قولي شنو خاص يدار باش نديرو ونوض نمشي فحالي ..
السيدة : ( خدات تنهيييدة ورجعات لور ودارت رجل على رجل وشافت فيه بهدوء ) حط الشارة ديالك .... وحط السلاح .... وحط الكارط .... وسيني داك الوراق لي قدامك .... وسير .....
لوؤي : ( طلع فيها عينيه وحاجبو بعدم تصديق ) كييييفاش ؟؟؟؟؟؟
العميد : ( تدخل بزربة ) غير استبعاااد اولدي .... غير استبعاااد .. غير عااااام .... وغترجع ..... ماشي بمرة
لوؤي : ( شاف فالعميد ) كيفاش غير عاااام ؟؟؟
السيدة : درتيها بيديك .... ماتحاسبناش دابا .. القانون هو هذا .. وخاصك تشكر العميد ديالك .. وتشكر عمك لي دارو جهدهم باش تستبعد غير عام وماشي لديما .. داكشي علاش بلا صداع بلا مشاكيل .... حط اش قلت ليك .. وسير رتاح .. ملي تسالي مدة استبعادك .... غيوصلك ايمايل ورجع فيه تكمل خدمتك ..... هادي هي عقوبتك لي صادقات عليها الهيئة العليا فالاجتماع لي تعقد البارح .....
لوؤي شاف فالعميد لي حاني راسو وحس براسو بحالا طيح ليه راسو بعد ماكان ثايق فيه ... حس بقلبو تقطع عليه بهاد النظرة لي دار فيه .. كانت نظرة مستسلمة كتبين بلي دار مجهود بزاف باش يدافع عليه ولكن الغلطة ديالو كبيرة .... ورجع تنهد وحيد الشارة من عنقو حطها فوق طبلة وبدا كيفسخ فالسمطة ديال السلاح حطها تاهي ... حط ليهم الكارط ديالو وجميع شاراتو لوخرين .... وشاف فالعميد
لوؤي : غاتكون آخر مرة .... ماي بريگاديير ....
العميد فقط نزل راسو كيحسو شحال محاملش هاد الموقف لي تحط فيه وبقى فيه كتر ما تعصب ملي سمعو اش دار .... ورجل الامن دار داكشي فساشي شفافة عليها علامة الفيديرالية وشدو بالكرافوز ووقفو .....
السيدة : امانتك هاهي عندنا فالامان ملي تسالي المدة ديالك غتسلمهم ..... ومنهنا لتما نتمناك تجلس وتعاود تقراا القانون ... وتراجع راسك مزيان .... حيت خسارة عميل ناجح بحاااالك وذكي و سريع البديهة يضيع مسيرتو المهنية ورا التهور و الاندفاع ..... ( شافت فالعميد ) شكرا بريگدير سميث على وقتك ..... نهاركم سعيد ....
خلاتهم ومشات والعميد تبعها بعينو ورجع شاف فلوؤي لي علا راسو لفوق كيتنهد .....
العميد : شتي علاش ديما كنقوليك دير عقلك .. فكر مزيان قبل متهور ... نهار جيتي خدمتي عندي عطيتي القسم باش الخدمة ديالك تبقى بعيدة كل البعد على عائلتك ومصالحك الشخصية ..... انا وعمك درنا جهدنااا كااااامل باش نثبتو بلي الولاد لي كانو معاك غير صحابك ماشي ولاد عمامك .... حتى من الدركي لي وقفك فالطريق وخدا معلوماتك هضرنا معاه باش عطى افادة كاذبة وقال بلي شاف هوياتكم وماعندكمش نفس الكنية ... اما راها كانت غتكون العواقب كبيرة لاعرفوك فضحتي راسك كعميل قدام عائلتك وتعرفتي شكون نتا ولاشمن دورية تابع .... اسبوع والاجتماعات غير عليك باش يوصلو لشي حل وهذا اكتررر حل مررضي وصلنا ليه ... اكثر حل رضانا انا وعمك .... اللهم الاستبعاد ديال عام ولا ديييما .. ( كيطبطب ليه على رجلو ) ومتخافش .. حنا قلنا عام ولكن غتفوت مدة وغاندير تاني جهدي كامل نرد المدة غير شي ست شهوووررر .... مبغييتش نتقااعد ونتا مكاينش ..... وهادشي فصالحك باش متتقصاش ... غاتكون مستبعد وملي ترجع تلقى بلاصتك كيييما هي .....
لوؤي هبط راسو وشاف لجيهتو .. حل عينيه .. كانو حمريييييين وملئلئين بالدموع لي حابس ورجع شاف فاتجاه مشتت
لؤوي : مكنتش باغي نحطك فهاد الموقف لا نتا لا عمي ..... ( كيضور راسو بلا ) مكمنتش باغي ...
العميد : دابا لي وقع وقع .. هادي فرصة تمشي ترتاح شوية وترتب افكارك .... ملف سالفادور متخافش عليه نتا عارف شطارة نيكولاس والدهاء ديالو فحل القضايا .... سير وكون هاني .. بنت عمك غنحميوها لاااخر نفس فينا ...
لوؤي خدا شهيييق طويييل .. ثم زفروو وناض وقف كيشمر بنيفو ويستجمع نفسسسو وهز ستيلو من البيرو دالعميد ووقع ورقة استبعادو وشاف فالعميد بنظرة عااامرة بالاعتذار ....ورجع خرج مزير على عينيه ...وماشي فالكولوار وكاع الي خدامين تما كيشوفو فيه وعارفين بلي الهيئة كانت تما وكتر التوشويش عليه والفضول قاتلهم .. خرج من تما بزربة ونزل فالدروج ماشي بجيهة الجيب ديالو تاجا عندو نيكولاس لي كان كيتسنى ... شدو بزربة والخلعة فوجهو
نيكولاس : علاش كانو الهيئة فالبيرو ؟؟؟؟ اش درتي امسخوط الواليديييييين ؟؟؟؟؟؟؟؟
لوؤي : ( تنهد وتكا على الجيب ديالو معلي راسو لفوق ) ساقو الخبار للسلاح لي خديت ففرانسا
نيكولاس : ( بصدمة ) اش كتقوووووول ؟؟؟ وعلاش ماعيطوش ليا تا انا؟؟؟؟؟
لوؤي : حيت انا نهار خديت السلاح .. درت بحساب غيخرج شي بياع من هنا ... داكشي علاش خليت بصماتي فيهم هوما وفالفولون ديال الطموبيل .... باش مانخليش ليهم فرصة فين يفكرو فشي عميل اخر .... وماطيح فمشكل لا نتا لا فرانك ... غايجيو ديريكت ليا انا ....
نيكولاس : مداروش تحقيق يعرفو شكون عاونك ؟ ميمكنش !
لوؤي : ملي اجتماعات دخل فيهم العميد والوساطة ديال عمي يمكن تخطاو داكشي .....
نيكولاس : نتا الا بقيتي بحال هاكا راه غاتدي راسك للهلاك ... اش دارو معاك دابا ؟؟؟
لوؤي : ( كيشوف فالفراغ ) استبعدوني
نيكولاس : مااايمكنش ؟؟؟؟؟ شحاال ؟؟
لوؤي : ( محاملش راسو ) عام
نيكولاس : ولااباس لي جاتك غا فعاااام ( شاف لجنب تنهد ورجع شاف فيه ) ادريان لي بيع بيك ياك ؟
لوؤي : مكنظنش .. لي بيع اصلا انا راه عارفو شكون .. ولكن حسابو ماشي دابا .. حتى نسالي مشكلة سالفادور ....
نيكولاس : ( وسع عينيه ) تتتسالي ؟؟؟؟؟ واش نتا باقي مباغيش دير عععقلك ؟؟؟؟
لوؤي : نتا ملي كتخرج .. شحال كيكونو دالرجال عندك فالدعم ؟
نيكولاس : كل مرة وشحاال
لوؤي : دورية مكتحاسبش معاك شحال خرجتي من واحد معاك ! مكيحسبوهمش ليك ؟ حيت انا لي عارف كتخرج شحال مابغيتي ومكيحكروش يقلبو الكارطات ديالهم كاملين
نيكولاس : باغي تخرج معايا ؟؟؟؟
لوؤي : لا ... نتا لي غتخرج معايا .... اما انا باقي هو اجووون نيكوولاس ( حل الباب دجيب طلع ونيكولاس موسع عينيه وسدها نزل زاج كيشوف فيه ) سييير ترتاااح ودير بنصيحتي ودي مرتك لشي جزيييرة عبر ليها شحال كتبغييييها ..... نسااا شي حاجة سميتها سالفادور ....
نيكولاس : راك غاتدييينا للغرااااق الوؤي
لوؤي : ملول متصاحبش مع واحد بحالي ...حيت كنعرف جوج حوايج .. يا القمة يا الغراق ... مكنوقفش فالوسط فشي بلاصة مباييناش ..... يااانبااان نيشان .. يا منبقاش نبان فخطرة ..... ( ديمارا جيييب ) تهلاااا آ آجون أوووولاي .....
نيكولاس: فيين غادي دابا فيين ؟؟؟
لؤي: ( هبط الفران ) غادي للمغرب .. الملف لي حيدو ليا ماضايرش غير على سلفادور بوحدو .. فيه حتى بنت عمي .. و إيلا حيدو ليا الحق باش نراقب هاداك ولد القحبة و نتعقبو .. خاصو يولي عندي على بنت عمي .. غا هي ملفها مغايعطيهش ليا العميد .... غايعطيه ليا باها ...
نيكولاس: ( هز حجبانو ) و كيفاش غايولي عندك الحق عليها ؟
لؤي: كيفما سنيت ورقة هنا .. ( شاف فيه و أشار بعنقو للجنب ) غانمشي باش نسني وحدة أخرى لهيه ..
خلاه وزاد ونيكولاس وسع عينيه كيحاول يفهم اش قال !!!!! اشمن ورقة غيسني عليها غتعطيه الحق يتعقب قدس ويراقب خطواتها !!!!!!!!
فالباطو ...
الساعة 20:40
كان الحال يلاه ظلم .... خرج اصيل من جناحو بعد مادوز النهار غير فالبالكون كيختار تصاور دالباركي و الصباغة لي غيدير لريسطو وكيهضر مع لي مكلف ...
طالع فدروج تالقى صفاء ، صفاء شافتو جاي ...خافت يسولها على قسم ومتلقى ما تقوليه ، يلاه ضارت كتستعد تهرب منو وهي ترد البال بلي صاافي راه شافها وهي توقف فبلاصتها بضحكة متوترة ورجعات ضارت تاوصل عندها ...
اصيل : صفاء .... قسم باقي فلاكابين ؟
صفاء : ( كتسرط فريقها حيت عارفاها پوز ) اا .. ااه ... ه هاد نهار ماخداتش پوز ...
اصيل حرك ليها راسو بواخا ومشات بزربة قبل مايسولها وهي مكتعرفش تكذب وهو تبعها غير بعينيه بانت ليه متوترة .... ورجع تاني هبط فدروج باتجاه الكافيتيريا .. يلاه داخل وهي تبان ليه قسم جالسة على واحد من الكراسا شادة فنجال دالقهوة ومهبطة راسها .... علا حااااجبو علاش كدبات عليه صفاء .. وزاد دخل وقسم غير حسات شي واحد واقف عليها علات راسها وهي توسع عينيها تاكانت غاطيح على الكرسي وقادات جلستها
قسم : اا .. ا اصيل ؟
اصيل : ( كيطالع وجهها لي كيبان عيان ) سولت عليك دابا صفاء وقالت لي ماخديتيش پوز .. ( كيشوف لفنجالها ولكونطوار وشاف فيها ) وهذا شنو هو ؟
قسم : ( ناضت بزربة على الكرسي متوترة ) اا . لا لا .. ه هذا ؟ هذا ماشي پوز .... هذا .. بحالا قلتي غييير كنت دايزة .. م موهيم .. غيخصني نمشي نكمل .. بسلامة ....
خلاتو ومشات هربانة بزربة تاخرجات من الكافيتيريا وهو تابعها بعينيه مافاهم والو .... وبدا غير كيضور راسو وجر كرسي جلس ..... جابو ليه قهوتو .. وبقى شاد تيليفون ملهي مع الديكور د ريسطو كيختار ..... ماحسش بالوقت كيفاش داز تاكانو الابواق كيعلنو بلي قربو ليابسة ايطاليا ... وقوات الحركة فالباطو دالناس كاين لي بطموبيلاتهم وكاين لي على رجليهم ......
هز فنجالو وقرب لزاج وقف كيتفرج فالميناء تاني فنفس الوقت كيرشف من قهوتو ... شعرو كيديه الريح من الزاجات لي محلولين ... والقهوة كتهدأ ليه اعصااابو ...... وكيفكر بلي يلاه قطع نص الطريييق .... وباقي تاااابعو نص آخر خاصو يصبر علييييه فهاد الفواياج الممل بنسبة ليه ....
بدا الباطو كيخوا تماما من الناس حيت آخر بوغ هو هذا ... و الناس لي غيرجعو لاسبانيا وفرانسا و المغرب حتى لغدا عاد غيركبو حيت الباطو دابا غيتفرغ للصيانة ....كيبقى فيه غير الكابتن الى مبغاش ينزل ...و لي خدامين فيه ....
حط فنجالو على الطبلة ودخل لجناحو هز جاكيت بعد ما حس بالبرد تحرك وطلع فالدروج باتجاه لاكابين وهي تلاقاه صفاء خارجة كتجري شافتو وهي تحبس ..
صفاء : موسيو غيخصني نزل باش نتبع هاديك البنت .... غتكون باقا فالجمارك
اصيل : عطيتيها باسبورها
صفاء : البارح عطيتو ليها باش متكبرش القضية كيف قلتي
اصيل : مزيان ... قسم لداخل ....
صفاء : ( ضارت موراها ورجعات شافت فيه والكذوب باين فعينيها ) آه .. زعما لا ... نزلات .... ب بغات دزش وتنعس ..... و قالت ليا منصدعهاش حيت عيانة ومنعساتش مزيان البارح
هي كتهضر وتشرح ليه وهو كيشوف فظلها مخبية منو فلاكابين و حرك راسو بالايجاب لصفاء .. هي مشات وهو تنهد ورجع من طريقو مخليها على راحتها ....
طلع فدروج اخرين ثاني تاوصل للسطح .... علا راسو للفوووق براااااحة .. يلاه حس بالاوكسيجين ملي هاد البلاصة خواااات .... عاد قادر يسمع صوت البحر وصوت المواج وصوت الريح ..... دار يديه فجياب الجاكييييط وبدا يتمشي على جناب الباااحة .... تابانو ليه دروج اخرين كاع مكان راد ليهم لبال ... وطلع فيهم بشوية كيستكشف داك البلاصة تاهيا تالقى راسو فبلاصة مرتفعة لفوق من السطح ولكن صغيييرة ... فيها غير مخاد كبااار مبعثرين وشااااشة كبييييرة ..... غير من ديكور قدر يفهم هاد البلاصة على شكل سينييما مفتوحة ولا ديال الماتشات دالكورة ..... بصح الشاشة كانت طافية والبلااصة خاوية من غير عامل النظافة لي فيديه بلاستيكة كبيرة كيجمع الكانيطات لي مليوحين واي حاجة تما مرمية ..... شاف اصيل وتبسم ليه وكمل خدمتو ومشا واصيل بقا شاد غير فالحدايد كيتفرج فالبحر .. هاد البلاصة كتكووون عااامرة بالناااااس .. ولكن ملي الباطو خوا ..... ولات بلاصة هااادئة وزويينة وبعيدة على صداعات الباطو لتحت .....
تنهد ومشا تالعند وحدة من المخاد الكبار ونعس عليها على ظهرو وطوا يديه بجوج تحت راسو وبقى كيشوف فالسمااااا ... كانت صااااافية وعامرة بالنجووووم لي بااااينين بوضوح .....
الريح كان شوية قاسح كيضرب فوجهو وعينيه ولكن كان مهدئ فعال لواحد عاش ليلة بحال ليلة لبارح .....
شي لي خلاه يتفهم هروب قسم دابا ... ولكن معجبوش الحال علاش حشمانة ! مكيشوفهاش دارت شي حاجة خايبة تحشم منها ؟ مبغاهاش تكون داك البنت لي كتحشم تبين مشاعرها ! ولا رغباتها .. كيعجبو البنت الجريئة لي متحشمش من انين نشواتها .....
داكشي لي خلاه يطلع لهنا ..... مغيزيدش يخرج فطريقها خاصها هي تجي عندو ومتحشمش ....
حيت كون مكانش البارح عارفها واخدة لالكول وخاف على مستقبلها وخدمتها وقرايتها وسمعتها .. كان غيكون فرحاااان بشنو اعتارفات ليه بيه وحركاتها ليه ..... واخا كان صعيب عليه يقاومهم و عذاب بنسبة ليه ، لا من ناحية مابغاش يستغل سكرتها ولا من ناحية مرضو ....
بقى غير كيتنهد كيتفرج فالنجوم ويحاول يسترخي شوية ويستغل هاد الليلة لي غيدوز فالباطو خااااوي من الناااس ومن الصدااااع ......
اما قسم دخلات لجناحها سدات لباب وبقات غير كتمشي وتجي ....
فلخر حيدات الشابو ومشات لسرير وجلسات .... كتشوف غير قدامها وكتقول كيفاش غادير دابا تخرج قدامو ؟ وشحال قدها تهرب !!! الباطو خاوي ، الركااب كاملين نزلو ... وكاينة غير هي وياه وعمال الصيانة البقية دالعاملين كولشي مشا ينعس يرتاح .. وكاين لي عندو الفيزا هبط يتسارا ... واش تنعس وتهرب منو ؟ مغتلاقاهش !!! واش ماشي خاصهم يهضرو ؟؟؟؟ وشنو غتقول ليه ؟ دير راسها معاقلاش ....
الافكار كينهالو على دماغها بطريقة عشوائية كتزيد تبعثرها ، وناضت كتحيد فجوايجها وكلللها متوترة ودخلات لدوش على أمل يرخيها ولكن بدون فائدة .. كتلقى راسها كضور فنفس الدائرة ونفس الاسئلة ....
خرجات لابسة بينوارها اما تاشعرها مقاستوش ... وقفات شحال كتنهد وضارت للمرايا كتشوف فوجهها .. غمضات عينيها كتسول راسها حتى لاين ؟ حتى لاين تبقى هاربة منو ؟؟؟؟؟ .....
على الاقل غير تشكرو على مادار معاها .... حيت كون مكانش ، مقادراش تتخيل شنو غيكون وقع ليها ... وتمشي غير تعرف منو تفاصيل وشكون مول هادشي مدام صفاء مابغات تقول والو ...... حاولات تقنع راسها انه كاينين بزاف دالحوايج خاصها تهضر معاه فيهم من غير هبااالها لي جاها وحماقها لي مارسات عليه .... من غير اش قالت و اش دارت .... كاينين بزاف دالحوايج اخرييين خاصهم يتوضحو ......
تنهدات وحلات البلاكار حاسة براسها عندها المود غير ديال شي قبية سخونة و سروال مريح .....
خدات سروال كولون رياضي اديداس لبساتو ولبسات قبية اووووفرسااايز كحلة حيدات لقراصة لشعرها وطلقاتو على راحتو ولبسات سباردين ...
خدات نفس عميق وخرجات من الجناح .... خشات يديها فجياب القبية و تخشات فيها كاملة مسخناها من البرد لي محرك فالباطو .... وخرجات كتقلب على صفاء تسولها فين هو .... مابانتش ليها صفاء ...
طلعات للسطح لفوق كتقلب بعينيها مابانش ليها وهي تقرب عند واحد من لي سيرفور كان كيجمع الكيسان
قسم : مابانش ليك السيد لي معايا ؟
- موسيو اصيل ؟ اه ... راه طلع للفوق ...
قسم حركات راسها ليه بالايجاب وعلات عينيها كتشوف لداك السطح الفوقاني ورجعات عضات على شفتها وجمعات قوتها كاملة ومشات باتجاه دروج .... طلعات غير بشوية وخطاويها الثقال وصزرها كيرجع لور .. حاسة براااسها حشمانة وماعندهاش الوجه تاباش تشوف فيه ... فلخر دارتها فيد الله وكملات طريقها تاوصلات تما وهو يبان ليها ناعس على المخاد ... يديه تحت راسو وتايشوف فالسما .....
بلا متحس تشققات على شفايفها ابتسامة داااافية ..... حسات براسها توحشاتو وتوحشات هاداك الدفئ لي كاين بين يديه .....
خدات تنهيدة وزادت بشوية وهو حل عينيه لجنبو كيسمع لهاد الخطاوي لي جايين فلخر دار ضحكة جانبية خفيفة ورجع كيشوف للسما .... وهي وصلات حداه وتحنات نعسات تاهيا على مخدة اخرى قريبة لييييه .... وعلات راسها كتشوف تاهيا فالسمااااا غير ساكتة وحتى هو ماهضرش ......
ساكتيييين كيتأملو هدوء هاديك السما و روعتها لي خلاتهم ينسااااو الموضوع لي جامعهم .... تاضور اصيل راسو بشوية لعندها وهو يكمش ملامحو ملي شافها كيفاش ساهية فالسما .... واللمعة لي كاينة فعينيها ..... وهنا بالضبط .. اصيل ... لقا انه كاينة شي حاجة حسن من النجوم هاد الليلة !!!!!!!
السما كانت عامرة بالنجوم ، ولكن هو ... كان كيشوف فيها هي ....
تشققات ابتسامة صغيرة على شفاهو وهو كيتأمل لون عينيها كيفاش ولا فاش انعكس عليه لون الظلام !! ....
كيتأمل ملامحها لي مخلطة فيهم الحشمة والتوتر و شوية دالهدوء لي استمداتو من هاد الجو ....
لشعرها لي زغبات منو كيتطايرو مع الريح .... لبشرتها الطفولية و شفارها الكبار ....
فجأة لقى راسو رجع لهاديك الدائرة الكحلة القديمة لي كان حابس راسو فيها قبل مايشري هاداك الريسطو لي زعمو يدخل فعلاقة معاها ... رجع لهاداك السؤال ديال ، كيفاش وحدة بحال قسم .... بهاد الجمال كامل ، وهاديك الشخصية والنفود والثراء .... ياخدها هو !!! لي غير شاب مكافح بسييييط !! راس مالو ختو و كرامتو و سمية وهمية كيلعب بيها الكومبات فالنوار !! ... ومرة مرة كيلوح شبكة فالبحر يطلع شوية دالحوت ..... ونهار كيبغي يعيش نزوة كتكمل فالقبر !! .....
خدا تنهيدة ورجع لنعستو كيف كان كيشوف فالسما ونطق بصوت هاااادئ و لكن فيه شوية من حشرجة صوتو ....
أصيل : نتي كتستاهلي شي واحد لي يكتب هاد النجوم فسميتك .... ماشي واحد بحالي آقسم .....
قسم : (ضورات راسها لعندو وابتاسمات كتشوف فزرقة عينيه لي ولات غامقة بحال لون البحر فالليل ) مبغيتش لي يشريلي النجوم أصيل ..... ( رجعات كتشوف فالسما ) بغيت لي يتكا حدايا ونتفرجو فيهم انا وياه ....
تسناتو يرد عليها ولكن جوابو كان هو الصمت ... لاحظات بلي غايكون رجع لدوك الافكار تاني .....وهي معارفاش بلي كل ماتأملها كااايرجع يفكر انها شي حاجة ثميييينة بزااف و غاالية على واحد بحالو !! ورجعات تنهدات وكملات كلامها ...
قسم : عارف شنو لي ( علات يديها كتشير بصبعها لسما ) كيخلي النجوووم يلعمو بحال هاكا !!!!!
اصيل : ( كيشوف تاهو للفوق ) شنو ؟
قسم : الظلام ..... ( اصيل عوج راسو فيها وتاهي قلبات راسها شافت فيه بابتسامة ) واخا الظلام كااايخلع .. وصعيييب ... ولكن النجوم ماكيلمعو غير فيه .... ( بهدوء وحب فعينيها ) ماخصكش تكون كتخاف من الظلام ا أصيل ...
اصيل : ( سرط ريقو كيشوف فيها ورجع تنهد وشاف للسما ) ممم ... ولكن انا خالعني ظلامك حيت دخلت ليه والضو لي عندي مكافيش ... كيضوي ليا غير فين كنحط رجلي ... شنو كاين بعيد مكنشوف والو .. شنو ضاير بيا مكنشوف والو ... كنشوف غير حاجة وحدة ....
قسم : ( كتشوف فيه ) شنو هي !!
اصيل : هي داك نجمة لي كتلمع فيه ..... ( قلب راسو تاهو لعندها ) هي لي مخلياني لايح خطاويا فالظلام .....
قسم : ( مدات يديها وشدات فدراعو وهو كيشوف فيها ) وهاد النجمة كتواعدك .... حتى غتبقى معاك طريييق كلها ...
اصيل : (طول فيها الشوفة بحب فلخر تفكر ودار ضحكة خفيفة ورجع كيشوف للسما بصوت معاااتب ) امممم .. عليها النهار كامل ونتي هاربة مني ....
قسم : ( عضات على شفتها ورجعات كتشوف لسما بنكران ) انا ؟؟ لا لااااا علاش غانهرب ؟
اصيل تنهد وناض تكعد جلس وهي كتشوف معاه بعينين باغين يبكيو بالحشمة وهو جرها من يديها نوضها تاجلسات مقابلة معاه مربعة رجليها ....
اصيل : نت مناش هاربة هم ؟؟ شنو درتي باش تهربي !!!
قسم : ( شافت لجنب مدة كتغزز فشفايفها ) م ... معرفتش اا اصيل
اصيل : ( قلب ليها وجهها لعندو ) واش عارفة شنو كان غايطرا ليك لبارح !!!! علاش مكترديش البال !... كون مكنتش ؟؟ كون ماقدرتش نصحيك !!!
قسم : ( شدات على راسها بجوج يديها ونزلاتو بين كفوفها ) نااااري اااصيل غير متعاودش تقولها راسي غيتفكرع من قبيلة وانا كنفكر كون مكنتيش شنو كان غيوقع فياااا
اصيل : ( تنهد وجبد تيلي من جيبو وحلو على تصويرة البنت لي خداها ليها وهي شافت فيها ) كتعرفيها !!!
قسم : ( صغرات عينيها كتشوف فيها وشافت فيه ) لااااا .. عمرني شفتها كااع ( حيدات ليه تيليفون كتزومي عليها ) اول مرة كنشوفها .... ( علات عينيها فيه ) هي هادي !!!! هادي لي دارت ليا لالكول فالدرينك !!!
اصيل : ( حيد ليها تيليفون وحطو حداه ) مهم ... انا مبغيتش نكبر الموضوع تانهضر معاك حيت حتى صفاء قالت ليا مكتعرفوهاش ... صورت لاكارط ناسيونال ديالها وباسبور ... وخديت تا الرقم دواحد النمرة هضرات معاها طول هاد المدة لي بدينا فيها هاد الطراجي يعني من المغرب وهاد نمرة كتهضر معاها بزاف ... هادشي لي قدرت نعرف من الريبيرطوار ديال تيليفون حيت حساباتها د واتساب و سوشل ميديا كلهم دايرة ليهم الشيما ....
قسم : ( كترمش فيه ورجعات قادات الجلسة وقادات شعرها لي كيطيرو الريح ) دااابا بشششوية .. بشوية وعاود ليا حيت صفاء مابغات تقول ليا والو قبيلة .... عااااااود ليا من لووول كاع اش عرفتي وكاع اش وقع حيت انا شي عقلت عليه وشي لا وشي تخربييييييق بحال شي حلمة خايبة كنقول عليها الله يستر باش متصدقش بصح ....
اصيل تنهد وقاد جلستو وبدا كيحاول يعاود ليها اش طرا حتى لفين صفاء شافت البنت فالكاميرات وشداتها فالريسطو وعيطات عليه......
قبل ليلة ....
طالع اصيل فدروج متوتر و العصبية واضحة فخطواتو ... بعد ماغطى قسم لي نعسات وسد عليها الباب مزيان .... ماشي بجيهة الريسطو لي خاص بيهم .... كانت صفاء خواتو من كاع العاملين باش ميتسربش شي خبار .....
كانت جالسة هاديك البنت على الكرسي كتفرك صبعانها ولكن عينيها باقين عامرين بالشجاعة و القوة و مباغاش دغيا تستسلم .... و مور صفاء واقفين جوج من رجال الامن دلامارين ...
و اصيل وقف فباب الريسطو كيشوف فهاديك البنت مصغر عينو كيتذكر فين شافها .....حتى بدا يتسلل ليه مشهد البار فاش بدات كتهضر .... وصفاء محنية عليها حممرررة وكتغوت عليها ....
البنت : راااااه قلت لييييك ماعندي مانقوليك .. عطيني وراااقيا
صفاء : كيفاش ماعندك ماتقوليلي و نتي باااينة بحال الشمس دالوحدة دالنهار كتخوي لالكول فقرعة الكابتن !!!! واش عارفة اشريفة لاوصل هادشي ليد البوليس اشنو غتكوني درتي ؟؟؟؟؟ واش حسابتك غادوز على خير !!! قوولي شكون صيفطك ومتاخديش كولشي على ظهرك بوووحدك انا كااانننصحك
البنت : قلت ليك ماصيفطني تاحد .... هي خدات ليا خطييبي و بغيت نعطيها درررس .. زايدون الباطو كان واقف معارفاش انا معاش غتقلع .... ماسوقيش انا فكاريير ديالها انا مااالي
صفاء : سيري ققققلبي علامن ضحكي اشمن خطيب غاتدي ليك المادموزيل واش نتي عارفة راسك اش كتقولي والموقف لي محطوطة فيه ولا معارفاااش !!! واش عارفة شكون نتي وشكون هي؟؟ قاديتي كتافك معاها ولا شنو ؟؟؟؟؟
البنت : ( علات راسها فيها ) اشنو غتبلغو بيا ؟ ولا غتبلغو براسكم لي ساااكتين ومخبيين والكابتن سكرااانة وغاتحرك الباطو بلا ماديكلاري ؟؟؟ شكون غااتفضحو ؟؟؟
اصيل خدا تنهيدة بقلة صبر ومشا نيشان تاوقف عليها وهي علات عينيها وهو مد يدو
اصيل : عطيني تيليفون
البنت : ( كتشوف فيه وبدات ترمش عينيها بخوف) مبغيييتش ... بعدو مني ....
اصيل مد يدو بزربة لجيب كويرتها وهي كتنتر من رجال لي شدوها وهز ليها تيليفون وغمز لصفاء تبعو ومشا بلا مايزيد معاها تاااكلمة ، خيت جاتو مراة و مكايعرفش يتعامل مع العيالات فهاد المواقف ... وهي جات تبعهم وشدوها رجال الامن .. و صفاء تبعات اصيل حتى للممر وضار عندها وهو كيدير تيليفونها فجيبو لور ....
اصيل : كتعرفوها ؟
صفاء : لا اموسيو .. عمرني شفتها كاااع .. وتاقسم راه مستحيل تكون كتعرفها حيت كنعرف معارف المادموزيل كاملين
اصيل : خلي وراقها عندك ... صوريهم وصيفطيهم ليا .... وخلي داك جوج موراها تقدر تمشي دير شي حاجة اخرى، ملي حاطة هادي قسم فراسها راه مغاتبردش .. ومكتبانش شي وحدة لي كتخاف .... ملي نوصلو لايطاليا طلقيها تمشي فحالها وعطيها وراقها ....
صفاء : هاء !! وندوزوها ليها ؟
اصيل : ملي تفيق قسم ... غنشوفها واش كتعرفها وشنو غادير معاها ومن الاحسن تشاور مع باباها قبل مادير تاشي حاجة .. انا ماتقدرش تقرر حيت ماعندي تا مسؤولية على قسم .... نتي شدي غير وراقها وعلمي الجمارك ياخدو بصمتها وحطيها تحت عينيك .... وخليها تمشي .... بلا منكبرو الموضوع حيت لاتفضح هادشي غتمشي فيها حتى قسم .... وحنا مغنريسكيوش بالكاريير ديالها على ود تبرهيش دالبنات ....
صفاء حركات ليه راسها بواخا ومشات وهو تنهد ومشا تالدروج وجلس جبد تيليفون عندو ، حمد الله لي تحل دغيا والكود ديالو غير ربعة دالاصفار ... ولكن غير مشا للواتساب لقا شيمات وكاااع الكونطات لي عندها لقا فيهم شيما ... دخل لميساجات لقا غير ديال الريزو لي مخدمة ... ومشا لريبيرطوار وهي تبان ليه نمرة كتهضر معاها بزاف ودقايق كتااار ..... مقيداها باسم "majdaa"... جبد تيليفونو صور هاديك الشاشة دريبيرطوار وصور النماري لاخرين .... ورجع طلع فدروج تاوصل لداك الريسطو ، كانت صفاء باقا كتجااابه معاااها وتغوت ... غير شافت اصيل ، نشات لعندو عطاها تيليفونها وخدا تيليفونو وصورها من بعيد مزومي عليها وهي كتنتر من دوك رجال دالامن .... ورجع نزل كيضور فراسو منين خرجات ليهم هادي !!! وشكون هاد " majda" !!!!!
عودة
قسم : ( كتزومي على داك نمرة مصغرة عينيها ) بلاتي بلاااتي .... ( ردات ليه تيليفون وجبدات تيليفونها طلعات نمرة لي شكات فيها وهي معلية حجبانها ) ميمكنش !!!!!!
اصيل : عرفتي شكون !!!
قسم : ( علات عينيها فيه باقا مامستوعباش ) عرفت ...
اصيل : باينة غيكون شي حد كتعرفيه .. حيت ميمكنش شي حد مكيعرفكش غايدير ليك هادشي .. وانا غير من هضرتها البارح عرفتها غير مصيفطة .... داكشي باش خديت ريبيرطوار ديالها ....
قسم : ( باقا مصدومة كتشوف فالفراغ ) ولكن علاش غتبغي دير ليا هادشي !!
اصيل : شكون هادي ؟؟
قسم بقات شحال كتشوف للجنب كتستوعب !! وهي تنهد وشافت فيه
قسم : مهم .. صافي نتا هادشي خرج سووقو ..... هادي مسألة عائلية دابا ملي غنرجع للمغرب غااااانتكلف بيها مزيااان
اصيل : مغاديري والو حتى تقوليها لباباك .. ماتخليش القضية بحال هاكا حيت يقدرو يديرو ليك شي حاجة من بعد ومغتعرفيش تشرحي ليه ... كنعرفك واضحة معاه خليك واضحة ديما .. متخبيش عليه هادشي حيت راه مساهلش وماشي ديما غنكون معاك اقسم
قسم : ( كتشوف لجنب ) انا مزال مفهمتش والله !!! علاش !!!!
ناضت كتمشي وتجي كتفكر وهو كيشوف فيها ... ووقفات شحال كترمش وكتفكرها مع جود وكيفاش جود تعامل معاها !!! ورجعات جلسات حدا اصيل كلتشوف فيه
قسم : معرفتش هادشي علاش بضبط .. واش كضرب ليا الكاريير ديالي .. ولا باغا تبيني فشي صورة خايبة قدام العائلة !!!! حيت الكاريير ديالي مغتنفعها بوالو .. .بانليا بحالا باغا ضرب ليا السمعة ديالي ....ولكن علااااااش !!!!!!
اصيل : معرفتش واش خاصني نسولك حيت قلتي مسألة عائلية .. ولكن ... واش ممكن نعرف شكون !!!
قسم : ( تنهدات ) اصلا انا مكانخبي عليك والو ا اصيل من لول انا معاودة ليك كولشي .... هادي بحالا قلتي بنت عمتي .... هاديك عمتي سارة لي كنت عاودت ليك عليها ... كادير الحجاب
اصيل : ( صغر عينيه كيتفكر ) معرفتهاش .... مرات عمك سفيان لا !
قسم : لا لا لا ... هادي لي كنت قلت ليك بنت عم عمي سفيان وعمي يونس ....
اصيل : اااه .. اه عرفتها ....
قسم : هادي بنتها ....
اصيل : وعلاش دارت هادشي ؟ اش بيناتكم ؟
قسم : ( تخربقات ) معرفتش ا اصيل .. مرعفتش .. ( ردات شعرها لور ) لي عارفة هو .. يمكن عندها شي حاجة مع خويا قديييمة ... ولا باغاه ولا منعرف .. وخويا يمكن ملي ماداهاش ودا بنت عمي .... يمكن كتقلب تنتقم من خواتاتو ولا منعرف ...
اصيل : شهاد الحماق !!!
قسم : معرفتش ااصيل والله معرفت حاسة براسي تخربقت دابا ومنقدر نعرف والو تاتوقف قداااامي تشرح ليا هادشي
اصيل : باش متنكرش وتقولك انا معندييش علاقة .. حاولي حتى تجيبي هاد البنت .... عاد واجهيهم بجوج ....
قسم : داكشي غيتكلف بيه بابا .....
اصيل : هاااااكا مزيان ... توصلي قولي لباباك كولشي .. ولكن ماشي تخليه تاني مخلوع علييبك ، عرفي اش كاتقولي .. قوليليه بلي مخديتيش داكشي ومشربتيهش ....
قسم : غنخربق الكذبة ا اصيل مغنعرفش .. ونتا اكثر واحد عارف علاقتي مع الكذوب كيدايرة
اصيل : قولي ليه غير شميت شي ريحة ومشربتش .... اصلا ماعاق بيك تاواحد الى مكانتش غتهضر صفاء
قسم : لا الا قلت ليها سكتي مغاادويش ... مهم ( تنهدات ) من هنا لتما غانعرف كيفاش نهضر معاه واخا اصلا غير كنوقف حداه كنبقى نگر بلا عصاااا ....
اصيل وسط هاداك الهم جابت ليه الضحكة وخداها من يديها لعندو خشاها فصدرو معنقها وتاهي عنقاتو وحطات راسها على صدرو وهو كيمشط فشعرها ...
قسم : مقاداش نتخيييييل بنادم كيفاش كيفكر والله !!!! من لول عارفاها قلبها شوية كحل .. ولكن ماشي لهاد درجة كنبقاو فامييييلا ....
اصيل : بقاي تردي بالك كثر ... تيقي غير فخوتك متفوتيش هاد لازون ..
قسم : حنا كابرين فشكل ا اصيل .... ولاد عمامي عمامي عيالات عمامي كلنا يد وحدة .. عمر شي واحد يبغي شي حاجة خايبة للاخر .... وتا عمتي سارة ضريفة ... غير هي منعرف اش جاها ..... ( علات راسها فيه ) عرفتي انا مخايفاش على راسي ... ولكن خيفانة على ختي لي عندها علاقة معاها وكتخرج هي وياها ....
اصيل : من دابا لفوق ... هضري مع ختك باش تبعد عليها ... وحدة بحال هادي ماعندك ماديري بيها لا نتي لا هي ...
قسم : ( رجعات تخشات فصدرو ) غير غنوصل غنهضر معاهم فهادشي .... بالخصوص .. جود ...
اصيل : راه قتليك .. غير متخلعيهمش باش ميبقاوش هازين همك ...
قسم : ( زيرات عليه فتعنيقة ) الحمد الله لي نتا كاااااين ....
اصيل : ( خشاها عندو تاهو ) وغاانبقى ديييما كااااين احبيبتي .... ( حس بيها معنقاه من اعماقها تاضحك ) ولكن مرة مرة .... غنبقا نضربو انا وياك شي كويسات لاكنتي غاتخرجي ليا قسم ديال البارح .....
قسم : ( علات راسها فيه بزربة ) مكايناش قسم دالبارح ... قسم دالبارح نسااااهاااا ( كتعبر بيديها ) نساها بحالا مكايناش .. محييييها من ذاااكرتك .....
اصيل : ههه .... ( عنقها عندو وحط راسو على راسها ) منقدرررش ... اش دارتو فيا داك الكارثة دالبارح عمرو غااايتنسى ليااا .....
قسم : ( باحراج ) اصييييييل
اصيل : ( علا ليها راسها عندو كيبوس فوجهها بوسات متباعدين وهي كضحك ) اشمن اصييييل اشمن .. خليتي فيها شي اصيييل ... البارح كنت على شوية مغنولي معاك ولد الحراااام بقا فيها شي اصييل معاك نتي ..... ( عضها عضة خفيفة فحنكها تاغوتات ) نموووووت على والديييك ياهاد البنت سكرانة وصااااحية .... ( رجع شاف فيها بصوت بحوح مخلط بملامح المزح ) ولكن سكرانة حسن .....
قسم : ( ضرباتو لصدرو ) راك مكتسوااااش ..
اصيل : ( حيد ليها يديها وجابها قدامو معنقها عندو وهي متكية ظهرها على صدرو وهو تنهد وتقلبات هضرتو للجدية ) فداك اللحظة البارح فاش شميت فيك ريحة لالكول .. برب تاامنيت الموت .... ومنشمهاش فيك ..... ماشي ديالك .... ماشي ديال حلقك داكشي ..... وكون كنتي شربتيه بخاطرك .... ماعمر كنتي تحلمي تشوفي وجهي .... يمكن ماعنديش ليليميت فبزاف دالحوايج ( خشا راسو فعنقها ببوسةصغيرة ) ولكن كنبغي تكون .. المراة مراة .... والراجل راجل ....
قسم : ( مهبطة شفايفها بحزن ) عمرني شربت ا اصيل .. اصلا بابا يدفني حية .... وعمرني نويت نشرب ومنبغيش حتى الراجل لي نديه نشمها فيه .... ولكن دارتها ليا قلة خبرتي فلالكول .. كون كنت كنعرف ريحتو مكنتش غنشرب ... حيت شميت ريحة فشكل وحسابتني غير شي حاجة جديدة زادوها لي شيف فالدرينك ...
اصيل : عارف اقسم .. وداك البنت متخليهاش باش مديريش ليك شي حاجة اخرى ....
قسم : متخاافش .... ( كتحك فدرعانها )
اصيل : ( عوج معاها راسو ) جاك البرد ما گازييل ؟
قسم : امم تحرك البرد ....
اصيل : يلاه نزلو .... غانزيييدو شوية وغااتنعسي باش تفيفي تاني اونفورم ....
شدات فيه وناضت كتنفض فحوايجها هو دارها تحت دراعو نازلين
قسم : لاااااا .. مزال مافياش نعاس ومزال باغا نهضر معاك شوية
نزلو بجوج بيهم تاوصلو لجناح اصيل وحل الباب دخل حيد الكويرة ديالو
قسم : ماجيعانش ؟
اصيل : صراحة لا ....
قسم : تانا .... تالبلاتي ننقول لصفاء تجيب ليا غير شي حاجة خفيفة ( جلسات على ليفوطوي )
مشا اصيل باتجاه البريز يدير تيليفون يتشارجا وهي جالسة على الفوطوي دايرة رجل على رجل وكتشوف للجنب للزاج لي كيبان منو الميناء وكتفكر فكاع داك الاحداث دالبارح لي تفكراتهم فاش كانت فلاكابين .... وشافت عندو....
قسم : اصييييل....
اصيل : ( دار تيلي يتشارجا وضار عندها ماشي جيهتها ) اممم
قسم : كاين شي شوية د اسئلة بقاو من البارح بلا جواب ( اصيل جمع حجبانو وجلس على الفوطوي المقابل معاها كيشوف فيها وهي قربات كتر عندو ) نقدر نعرف جوابهم دابا ؟
اصيل : اينا اسئلة ! معقلتش ...
قسم : اصييل .. راه انا لي كنت سكرانة ماشي نتا
اصيل : ( جاتو الضحكة ) ههه والله الا دبصح اقسم معرفتش .. دازت بزاف دالهضرة البارح معاقلش على كلشي كنت مسطريسي معاك ...
قسم : واخا .... انا نفكرك
اصيل : ( باهتمام ) اهاه ....
قسم : بحال مثلا .... ( رجعات بظهرها لور ) السيكاتريسات لي كاينين فصدرك .. وكرشك ( اصيل علا حجبانو ) منين جاوك ؟؟؟؟
اصيل : ( تنهد وشاف لجنب للزاج ) وراك عارفاني ولد الحومة اقسم متابعينيش الكارد بحالك ... عادي نضارب ونوض ...
قسم : ( كتشوف فيه بشك ) وماشي بزاف دوك السيكاتريسات على المضاربة دالحومة !!!!
اصيل : لا ... ماشي بزاف
قسم : مابغيتيش تقول ليا ؟
اصيل : ( شاف فيها محاملش هاد السؤال ) ماشي كولشي كيتقال اقسم ...
قسم : ولكن علاش انا كنقوليك كولشي
اصيل : حيث ماعندك ماتخبي
قسم : علاش نتا عندك !!!
اصيل : عندي ....
قسم : ( صغرات عينيها فيه وقلبها بدا يضرب بتوتر ) هادشي لي مخبي ، يكون شي حاجة لاعرفتها .. نقدرو نتفارقو ؟
اصيل : ( طول فيها شوفة ورجع شاف لجنب مكرهش يتلاح من البالكون وميجاوبش على هاد الاسئلة ) معرفتش .... على حسابك نتي ... ( شاف فيها ) واش غتقدري تستحملي واحد بحال داك اصيل لي مخبيه عليك ... ولا لا
قسم : وشكون هو هاد اصيل لي مخبي عليا ؟
اصيل : ( شاف فيها ) والى قلت ليك .... ماشي وقتو ! غاطوي الموضوع ؟
قسم : ( رجعات بظهرها لور كتفكر وكتشوف فيه ) اممم .. يعني هاد اصيل هذا .. هو نفسو لي قلتي ليا .... كيقت*ل ؟
اصيل : ( شاف فيها مدة ورجع ناض محاملش راسو كيعوج فعنقو يمين وشمال ) راك غير كدخلي وتخرجي فالهضرة دابا, انا ماقلتش هادشي ... غير تهيئ ليك ملي كنتي سكرانة
قسم : ( وقفات عندو جايا باتجاهو بشوية ) كنت سكرانة اه ...( علات راسها فيه وهو هبط عينو فيها ) ولكن ذاكرتي قوية ..... وعاقلة على بزاف دالحوايج اخرين ..... تاهوما بغيت جوابهم .....
اصيل : ( تنهد وحط يدو على كتفها ) خليهم يجيو فوقتهم حسن ...
قسم : كنتمنى هاد الوقت ميطولش .... حتى نضطر نعرف من شي حد من غيرك ..... ( بجدية كتر ) الى كانت شي حاجة مخبيها ا اصيل .. نبغي نعرفها منك نتا ... باش نصلحوها بجوج ... ( تعلات كتر وعنقاتو وهو نزل عنقو عندها وهضرات فوذنو ) غنخليك دابا ترتاح .... ولكن دير فبااك .... بلي نهار ختاريتك .. عارفاك مزيان شنو كتسوى .... وحتى هاداك اصيل لي راك مخبيه .... انا متأكدة .... بلي معندكش علاقة بيه .... وغايكون صنعو فيك شي واحد .. بشي طريقة لي غتكون تعذبتي فيها بزاف .... وهادشي باين على وجهك كيفاش ولا منين سولتك على هادشي ..... بغيت نتعرف على هاد اصيل لاخر تاهو .. بغيت نسمع شنو عندو ..... ( فصلات العناق وشافت فيه ) باش نداويوه بجوج بينا ......
اصيل : ( تنهد وشد ليها وجهها ) قسم .... واش فخبارك بلي نت ..... احسن حاجة دارها ليا المكتاب فطريقي ......
قسم : عارفة .... وعارفة بلي حتى نتا احسن حاجة دارها ليا المكتاب فطريقي .... كون كنت خايب ا اصيل ... مكنتش غنبغيك ...... انا ثايقة فيك .... وعارفة بلي عندك تبرير لكولشي .... وانا مغنضغطش عليك ... غا هو صبري راه قليل ..... ( تعلات على صبعانها وهضرات فوذنو تاني) حدو غدا بليل ..... وغنعاود نجبد هاد الموضوع .... ( رجعات لور وهو كيشوف فيها ) حيت مغنعطيش فرصة لشي واحد اخر يجي يعاود ليا هادشي من غيرك ولا تتفضح بشي طريقة خايبة لي تفارقنا ..... مغنعطيش فرصة لحتى شي حد يفارقنا واخا تكووون نتا ..... مغنعطيكش هاد الفرصة .....
اصيل غمض عينيه مدة وحلهم وجبدها لعندو غاص وسط شفايفها وهي ضورات يديها على عنقو مجارياه فالتقبيل .... كانت قبلة قصيرة دغيا فصلها بطريقة مفروشة خلاتها تزيد ترمش بعينيها .... ولكن تنهدات ودارت راسها ماحسات بوالو
قسم : تصبح على خير احبيبي ..... نتلاقاو غذا بليل .... غنجي عندك هنا .... حيت غنحتاجو بلاصة هادئة فين نهضرو انا وياك .....
غمزاتو ومشات وهو بقا متبعها بعينيه تاسدات الباب وجلس على السرير كيرد فشعرو لووور حس بيها حاصراتو من كاع جوانبو بكثر ما انها قالت مغضغطش عليه بكثر ماعطاتو غير ربعة وعشرين ساعة !!! ...
اما قسم مشات نيشان لجناحها كتمشي وتجي فلخر حلات البيسي وطلعات فوق سريرها وبدات كتفكررر كيفاش كان جامح فتقبيلو البارح، كيفاش كاتهرب منها بطريقة غريبة ، نهار ضرب البيرو فالريسطو ، عينيه كيفاش كايتقلبو و ملامحو كيفاش كايتبدلو!! ... وحتى كيفاش قال ليها انه كايقتل!!!! ... فلخر حلات كوكل وبدات كطابي ، كطابي هاديك الحاجة لي من ديما كتشك فيها وكتكدبها ، ليوم بحالا رجعات شكات فيها تاني..... كطاپي وصبعانها كاترعدو ، كتابت الجملة وتكات على اونطخي ...
" الرجل السا*** دي " .......
اليوم الموالي ....
الساعة 16:24
گالس اصيل فالكافيتيريا قدامو فنجان دالقهوة و شاد تيليفون ملهي فيه وكارو حداه مطفي فالطفاية .... الباطو كان كايبحر راجع للميناء الفرنسي ... بعد مادوز ليلة فايطاليا تفرج فيها فالنجوم وبات كايشوف فيهم فالبالكون بقوة ما طار عليه النعاس !!! ..
وهو ملي جا لهاد الباطو الحل الوحيد لي كايلقاه باش يدوز الوقت هو النعاس .... ولكن بسبب هضرتها لبارح النعاس مابغاش يجيه .. عينيه منفوخين وعيانين و تالحيتو تعنكشات هاد اليام لي ماقادهاش .. حاس براسو بحالا كايقرب للمحطة الاخيرة فهاد السر لي مخبيه عليها ... ولي مطير عليه النعاس ليلة كاملة هو كيفاش غاتكون ردة فعلها !! كيفاش غاتتقبلو الى هو مولاه ومامتقبلوش ؟ وحتى لامتى غايبقى ساكت ؟... حتى لامتى غايبقى مخبي موضوع بهاد الاهمية ؟ ....
واش ماشي جا وقتو ؟ ماشي جا وقت هادشي يتعرف و يتناقش و يلقاو حل وسط !! .. الا كان الصبر صبر و الا كان الفراق فراق .. خصو يستعد لگاع الاحتمالات ... هو عارف قسم شحال متشبتة بيه وهادشي لي مطمنو ، ولكن الى طلبات الفراق ماغايلومهاش حيت هادشي مساهلش .....
حتى للبارح وهو مامتخيلش راسو واش غايقدر يهضر معاها فهادشي شي نهاار ، ودابا ها هو كايوجد شنو يقول !!! .... كيفاش يشرح ليها وكيفاش يفهمها خطورة الوضع !!! ....
راسو كايحس بيه غادي بتشقق بالتفكيير ..... تاشم ريحتها موراه و حس بيديها الصغار حاوطو بطنو وتبسم ابتسامة عياااانة و جبدها من يديها لعندو وهي حيدات الشاپو حطاتو على الكنطوار دالكافيتيريا لي كالس قدامو اصيل و قربات لصدرو .....
قسم : توحشتك ... ودرت بوز نجي تشوفك .. ( كتلعب فلحيتو وهو معنقها من خصرها كايشوف فيها ) كنت نازلة للتحت تاقالت ليا صفاء راك هنا ....
اصيل: ( هبط على شفتها ببوسة خفيفة ) مزيان لي جيتي ...
قسم : ( مبتسمة من اثر داك القبلة ويديها كاتلعب فلحيتو) بحالا كبرااات شوية بزاااف ... (علات عينيها فيه ) بلييل نقصها ليك شوية .....
اصيل : ( كايمشطها بيديه للتحت ) مكتعجبكش
قسم : لااا .. غير تغوفلات ليك ههه ... واش عاد فقتي ؟
اصيل : ( بصوت عيااان ) على انا كالقى شي حاجة نديرها هنا من غير النعاس !!
قسم : حبيبي علااش مكتخرجش ضوور ... كاديرو حفالات لفوق ... كان قبيلة مطلوق الفيلم د تيتانيك فالسينيما .. طلع تعوم ، خرج شي جيت سكي للحر برا ... عطى الله مايدار راه هدا باطو ترفيهي .. دوز وقيييتة .... ماتبقاش غير ساد عليك غادي تقنط ... نتا مدوز كونجي وسط الترفيه وكدوزو فالنعاس !!
اصيل : ( طول فيها الشوفة حتى جاتو ضحكة وقلب وجهو لجنب ضحكها خفيفة ورجع شاف فيها ) قسم ... الغزالة ديالي ... انا الماكسيموم ديالي فالترفيه ... هو نكلس نشد تيليفون شوية ولا نشوف شي فيلم ... هادشي لي كاتهضري عليه خليتو فالعشرينات ... كون جيت معاك فداك الوقت كنت غالقى مايدار ويعجبني هادشي ، دابا غاااعرفي راسك راك مع واحد الممل كايعرف غا يخدم ويطلع نهارو ..... مكنعرفش ندوز نهاري خاوي كنحس بيه بحالا خسرتو من حياتي بلا فايدة .... كنحس براسي ماعندييش دور و هادشي كايقنطني شوية ..... ( تنهد و هز يدو كيحيد قصيصتها على عينيها ) ولكن ماعليش .. مهم هو كنشوفك نت ....
قسم : ( بعدات راسها والغضب مخلط مع الحزن بان فصوتها ) ولكن علاش انا عمرني قنطت عندك هم ؟ علاش انا كاتعجبني حومتك و العالم ديالك ومكانسخاااش نجي منو واخا ماعندي فيه تا دور .. علاش انا عمرني حسستك بلي قنطانة معاك ؟؟؟ ( اصيل يلاه غايدوي وهي بعدات منو مكملة كلامها ) كان كايحسابتني غاتكون فرحان حيت مدوز معايا سيمانة فبلاصة وحدة انا ويااااك ... ماشي تكون مليتي بحال هاكا وكاتسنى غير فووقاش نرجعو
اصيل : ( وقف كايقرب عندها ) واش انا قلت شي حاجة عليك نت ؟ نت علاش ؟؟ هاد سيمانة لي كتهضري عليها راه كنشوفك فيها غير جوج دقايق مخطوفين وندوزو واحد السويعة بلييل.... فين كنشوفك انا !!
قسم : علاااش مكتجيش عندي للاكابين شكون غايحيد ليك؟؟ شد كرسي وكلس حدااايااا ، علااش ماااتكونش معااايا
اصيل : جييييت ديجا وشفت هادوك لي خدامين معاك شحال ماامرتااحينش ... ميمكنش انا نعرقل الخدمة دشي واحد اقسم ... اه يمكن البااطو ديالك و عندي الحق نمشي فين بغيت ولكن كنعرف لي ليا ولي عليا ... مامنحقيش نجي لاكابين والناس خدااميين وهازين مسؤوولية وكولشي مسطريسي غير مع خدمتو غيير حييييت صاحب الكابيتين !!!! ....
قسم : ( كاتقرب عندو ) كون كنت فبلاصتك ... ونتا هو الكابتن و غانجي معاك للباطو ، غانكون فرحااااانة بزاف غير لي كاينة فبلاصة قريبة ليك .... وغانتمنى ليام يزيدو يطوالو و منرجعوش فحالنا دغياااا ....اما نتا بالعاني كتهرب وتسد عليك باش متعطيييش فرصة لهاد العالم ديالي يعجبك .... مكتعطيهش فرصة يبان ليك عالم عااااادي
اصيل : ( بانت العصبية فصوتو ) دابا اش كاتروووني نت!! علاش كدخلي شي فشي؟؟؟؟ شكاتخربقي ؟؟؟؟ غاانعاودو تاني من الزيييرو !!! زعما هادشي راااه فتناه ... انا من اللول واضح معاك اقسم ... مجتمعك مكيعجبنيش وعمرو غايعجبني .... هانا جيييت وشفتو ومااااعجبنيش حيت ماعندي فيه حتى شي دوور ..( بعصبية كتر وقسم غي كترمش ) الدووور الوحييد لي عندي هنااا هو واحد مصاااحب مع الكاااابتن !!!! لي داز حداه كياحني ليه راسو ويقوليه دوووووز اموسيو اصيل .... علاش كاااايحني راسو ؟؟؟ حيت انا صاااااحبك ......فقط .... هادشي علاش .... وهادشي انا ماااعاجبنييش ... ويلا كنت صابر و كنخرج هاد الخراااا فقهوة و كارو راه غير على ودك نت باش ملي تجي نضحك فوجهك ..... نت الحاجة الوحيييدة اللي صابر عليها هناااا .... انا مجتمعك ماااعاجبنييش ومكانرتاحش فيه وعمررررررني غانرتااااااح ..... كل واحد عندو بلااصتو و بنادم مكايرتااح غير غالبلااصة ديالو .....
قسم : ( قربات عندو والخيبة فملامحها ) يااااك ؟ هاكا كاتجازي هادشي كاع لي كندير على قبل هاد العلاقة باش تكمل ؟
اصيل : علاااش تكمل ؟؟؟ شكوون قاليك اصلا علاقتنا ناقصة باش ديري نت على ودها شي حاجة تكمليها ؟؟؟؟ واش نكدب عليك ؟؟؟ واااش نافقك ؟
قسم : ( بخيبة ) ماااادير والو ... بقى هاكا ...ديما مربع يديك ومااادير والو .....خليني انا نحاول وانا لي نبني وانا لي نريب .. نتا ..... مادييير والو. ....
هزات الشابو وديالها ومشات وهو ضرب ببونية على الكونطوار وهز تيليفون ونزل ....
الساعة 21:50 ...
متكي على الحدايد كايتفرج فميناء مارسيليا الفرنسي لي هادي نص ساعة فاش وصلو ليه ....
كارو ورا كارو وتنهيدة ورا تنهيدة ، معارفش واش ياخد موقف ولا يعاتب راسو لي هضر بطريقة قاسحة .... رغم كلشي كايبقى عالمها هدا .. والى كان هو فبلاصتها وحسها قنطانة معاه غايتقلق بزاف .. وغايحس بالذنب .... ولكن هو فضل يكون صريح معاها الى كانو غايكملو بجوج ....
خدا تنهيدة و طفى الكارو ديالو ونزل فدروج كايقلب بعينيه تابانت ليه صفاء و مشى بجيهتها ، كانت كتهضر فتيليفون شافتو و خبات المايك بيديها باش تهضر معاه وهو واقف داير يد فجيب دالسروال ويد كايماسي بيها قرفادتو ...
اصيل : نزلات قسم !
صفاء : راها فالجمارك اموسيو .. شوية وغاطلع ....
اصيل : عطيني الكارط ديالها ...
صفاء بقات غاكاترمش فلخر خشات يديها فجيبها جبدات الكارطة الثانية دالجناح لي عندها و عطاتها ليه وهو شدها وزاد بجهة الاجنحة ، عارفها غاتجي وتهرب منو تاني ولكن هو خصو يوضح هادشي ... مدام راه فهاد الفراغ فاللهم يصلح كااااع الحوايج هنا ويفاريوها وسط البحر ... لي خصو يتوضح يتوضح ولي خصو يتطوى يتطوى .... ماحد مكاين تاحاجة غتقاطعهم هنا ....
وصل للجناح ديالها حل لباب ودخل .... شعل الضو وهو يبان ليه جناحها ، كان شبه جناحو غير لون الكوفرلي وديزيان دلي فوتوي وديكورات لي مبدلين. ..
بقى كايتمشى ويكتشفو بعينو تاوقف قدام كوافوز كانو محطوطين بعض الاكسيسوارات لي كتشد بيهم شعرها وبارفانها ... تبسم بطرف شفاهو وهز بارفانها رشو فالجو وقرب نيفو لرذاذ ديالو كايتسنشقو مغمض عينيه كانه كايشم عنقها ....
ورجع تبسم وحطو فبلاصتو ومشا حدا الزاج دالبالكون ووقف داير يديه فجيابو كاااياخد نفس .....
تاسمع الباب تحلات ... وضار غير براسو ..
دخلات قسم والعياا باااااين فيها ووجهها طااافي و عينيها منفوخين لي واضح منهم انها بكات شي شوية .... شعرها مطلوق وهازة شابو ديالها فيديها وملف ديال الوراق .. لاحتهم على السرير وجات مااشية لدوش وهي تعلي عينيها ووسعاتهم ملي بان ليها واقف قدامها .. يديه فجيابو كايشوف فيها ... قلبات عينيها للجنب وكملات طريقها بجهة الدوش ...
قسم : بقات ليك غي ليلة غدا ... حاول تصبر باشما كان ومرة اخرى مغانعاودش نطلب منك تبقى معايا فشي بلاصة غي تهنى ....
جات ماشية وهو يشدها من دراعها وضارت عندو براسها ووجها كولو عليه تعبير الخيية والغضب
اصيل : الى كنا مغانكونوش فشي بلاصة بجوج ... يعني شكانخربقو دابا انا وياك ؟
قسم. : ( نترات يديها منو وضارت عندو كاملة ) قولها لراسك !!! انا لي كنتسنى هاد الجواب ماشي نتا
اصيل : واش نت مرييضة فكرك شوية لا ؟ علاش مغانبغيش نبقى معاك ؟ واش انا دويت عليك نتي؟ ( جات تهضر وقاطعها ) شششش ... قسم سكتي .... انا مسؤوول غير على شنو كاانقول .. مامسؤولش على شنو كاتفهميه نت .....
قسم : ( دارت ضحكة دخزيت ) واش نتا شوية لااااباس لا؟؟؟؟ واش قبيلة كالس كاتقوليا قققنطتي والملل ومنعرف شنو .... فوووجهي ا اصيل !!! فوجهي .... اش كتنسى مني .. نصفق ونقول برااافو علييك دغيا مليتي مني !!!
اصيل : واخا ( كايقرب عندها ) وااخا اقسم .... انا نسولك ( شدها من كتافها مهبط راسو فيها ) ونت جاوبيني ... انا مغانقول والو دابا ( قسم كاتشوف فيه) نهار لقيتك حدا المرصى فدلك الحيط القصير فالمدينة القديمة تتبكي ... علاش كنتي كتبكي ؟ هم !!! كنتي كتشكاي ليا من حياتك شحال مازويناش وشحال مملة وشحال مكاتبغيهاش ووشحال باغا تبدليها .... ( قسم كاتشوف فيه وهو نزل راسو عندها ) وانا ؟ لي ماشي حياتي كاع ... وباغاني نبغيها بزز ؟ باغاها تعجبني ؟ الى نت لي تزاديتي فيها مكتعجبكش ... بغيتها تعجبني انا ؟ ( عوج معاها راسو ) علاش جيتي عندي من الاساس ؟ ياك غير باش مانبقاوش فهاد الحياة ونديرو وحدة اخرى لينا انا وياك ... ادن علاش مقلقة حيت ماعجباتنيش وحنا فكل الاحوال مغانعيشوش فيها !!!!! بغيت نفهم ...
قسم : اهاااه .. يعني الى اضطرينا ....مغاديش تعيش معايا فيها ؟ على قبلي !!!
اصيل : ( بغضب ) مغاانعيييش فيها اقسم .. نت عارفاني شنو نقدر ندير على قبلك .... اما نعيش معاك فالعالم ديالك طاوي يدي كانتفرج فالناس كتتحنى ليا ... لاااا .... الى انا مضور بيا الريسك من كل قنت ومريسكي فريسطو معارفش المستقبل ديالو مزااال و لايح خطاويا فالظلام .. غير باش مانعييشش فيها معاك .. وغير باش مااتعيشيش نت فالحومة معايا .... كنريسكي على ود حياة اخرى .... الى مكنتش غانصنعها لينا .... مغانيدييير معاااك والو اقسم .... نفضل نمشي نتجبد بوحدي فالبيت لي عندي فالسطح ونخليك تكملي خدمتك ومستقبلك ، على نجي نعيش معاك هنا ولا نجيبك تعيشي معايا لهيييه ..... واش بغيتي شي وااحد كداب ؟ يقول ليك راه غايدير اش بغيتي وملي يعقد عليك يدير داك ساعة اش بغا ؟؟؟ ماشي انا ... انا من للول واضح وغانبقى ديمااا واضح .. ( كايأكد بيديه بعصبية) حياااتك منقدرررش نعيش فيهاااا .... وحياتي ماتقدريش تعيشي فيها .. علاقتنا انا وياك كانت مستحييلة بسبب هادشي ... ولكن لقينا ليها حل هو نيدرو حياة اخرى ... دابا آقسم ... مغانبقاوش نعاودو من زيييرو .. منبقاوش حتى نزيييدو وكاانرجعو لنفس النقطة ..... صافي حاجة وحدة راه قلناها ..... مغانبقاوش حابسين هنايا خاصنا نزيدو للقدام ولا لا ؟
قسم غير كاتشوف فيه وعينيها عامرين بالدموع فلخر تنترات منو ومشات للدوش و سدات لباب وتكات عليه مغمضة عينيها ... اما هو تنهد كايرد شعرو لور ومشا جلس على الكرسي شاد على راسو ....
اما قسم بقات غير مغمضة عينيها كاتفكر كلامو .. متنكرش انها قبيلة بكااات بزااااف .... شوية من انها حسات بيه مامرتاحش ف بلاصة جامعاهم بجوج وهي لي كانت متحمسة يكون معاها ومالقاتتش دوك المشاعر متبادلة ، .... وشوية من ان علاقتهم معقدة بزاف والفارق الاجتماعي واخا كايحاولو يبينو بلي مكاينش .. هو حاااضر بقوة ... حسات بالذنب وحسات بحالا فاااارضة عليه راسها وهو غير داير ليها لخاطر !!! ...
مشات بجهة لافابو بزربة و حلات الروبيني وبدات كتلتخ وجهها بالماا بارد لي تخلط مع الدموع لي نزلو ، وعلات راسها فالمرايا كاتشوف فراسها .... شفارها كايقطرو بالما وشفايفها تاهوما وشي زغيبات لسقو على جبهتها .... كاتشوف فعينيها باصراار كبير ... و بتحذير لراسها باش ماديرش شي خطوة لي تخسرو فيها .. حيت لاخسراتو كتحس براسها غاتحماق .... وملي كايتعاود ليها صدى هضرتو فودنيها كاتلقى عندو الحق وغلبها ! تامالقاتش باش تجاوب من غير الهروب للدوش ....
وقفات وخدات الفوطة كتسمح وجهها وكاتشوف فراسها ، وكاااتلعن فمشاعرها علاش كايضعافو قدامو بحال هاكا .. وعلاش كتفكر بهاد الطرريقة المبرهشة ....
ورجعات حطات الفوطة وحلات الباب وخرجات من دوش .. وشافت نيشان باتجاهو هو لي گالس على الفوطوي .. مفرق رجليه وحط مرافقو على تكاية دالفوتوب عاض على سبابتو المثنية .... غير شافها واقفة كاتشوف فيه ، حيد يدو من فمو ورخا ملامحو .....
اصيل : شوية دابا ؟
قسم : ( حركات راسها بالايجاب كاتشوف فيه )
اصيل. ( اشار للفوتوي لي حداه ) يلاه اجي كلسي ....
قسم بقات غي كترمش وتنهدات ومشات كلسات حداه وهو غي كايشوف فيها مبتسم
قسم : تعصبت غير حيت حسيت بحالا فاارضة راسي عليك ... ونا مكنحملش نتحط فهاد الموقف ....
اصيل : فرضتي عاالمك عليا ... ماشي نت .... خلي الفرق بين هاد الجوج ... وخلينا نطويو هاد الموضوع .. واخا ؟ ( قسم غير حركات راسها لواخا وتكاتو لور ) ماشي غير واخا هاكا براسك .. بغييت عمرووو يتحبد هادشي مزال بيناتنا وعمرررنااا نرجعو نتناقشو فهاد الموضوع دالخرا .... كوولشي واضح .... انا ويااك من بلايص مختلفين .. انا عندي عالم ديالي ونت عندك ديالك ... واااااضحة.....يعني غانتخطاوو هادشي ونعيشو عادي أليييز حتى نصنعو شي عالم ديالنا انا وياك ونسدو علينا فيه ..... مزيان هاكا ؟ مفاهمين ؟ ( قسم غير كتحرك راسها بآه عيانة ) وعلاش هاااد آه عندك كتبااان لياااا واكلة الدق ؟ ( بحنية) عيتي احبييبتي ؟؟؟ ( حركات راسها تاني بآه وهو تبسم وحل يديه ) نوضي اجي عندي اجي ....
قسم تنهدات وناضت بشوية وهو جبدها من يديها كلسها على جنبو ....حطات راسها على كتفو وغمضات عينيها وهو معنقها..
اصيل : غير نوصلو لمغرب رتاااحي ... ماديري تاحاجة اخرى ...
قسم : ( هزات يديها عنقاتو وزيرات عليه ) تمنيت كون هاد الطراجي مكنتش انا لي صايگاه .....
اصيل : علاش !!!
قسم : كنت غانكون دوزتو معاك ..... دابا واخا انا وياك فبلاصة وحدة .. ولكن كنتلاقاو بحال فاش كنا فالمغرب .... ساعة ساعة.. ويمكن عاد فالمغرب كنكلس معاك كتر ..... دابا بقات غير ليلة غدا .... واخا بنسبة ليك الوقت داز ثقيييل .. ولكن انا عندي طار ...
اصيل : النهار هو لي كايدوز عندي ثقيييل ، بلليل كايدوز طاير تامكنعرفش فوقاش سالا ..... حيت كتكوني معايا فيه نتي ....
قسم : ( هزات راسها من على كتفو وشافت فيه ) حبيي بغيت ناخد واحد الدوش محتاجاه .... ونبدل حوايجي ... ونخرج نتعشى انا وياك صافي ؟
اصيل : ( كايرد شعرها للور ) ولكن الى تبدلي عليا هاد المود ، راك جبتي ليا الكآبة دابا .....
قسم : ( ابتسمات بزز ) بدلوو لياااا نتااا
اصيل : لابغيت نبدلو ليك انا خصني ندخل معاك لداك الدوش ههه وهادشي راه مايمكنش ....
قسم : ( كترمش فيه وكتفكر المقالات لي قرات لبارح وسولات بلا ماترد لبال لشنو قالت ) وعلاش لي مايمكنش ؟
اصيل : ( مصغر فيها عينيه بابتسامة مستغربة ) اشنو شاربة تاني !!!
قسم : هههه ( ناضت عليه ) غي كنضحك .... تسناني غير فبيتك ... مافيا لي يخرج للبرا ... غانقول لصفاء يجيبو لينا العشا للداااخل ( كتحل فصدايف لبستها ) مششهي شي حاجة نقوليهم يوجدوها ليك ؟؟
اصيل : ( وقف ) لا .... ديري على ذوقك وصافي ...
قسم : داكوغ ... واحد نص ساعة ونجي عندك ....
اصيل : ( عنقها منلور وباسها فعنقها ) كنتسناااك ....
خلاها وخرج وهي غمضات عينيها مزال واقف عندها الوقت فيه محني عليها .. ومزال كتستشعر فهاديك البوسة لي طبع جنب عنقها ...
ورجعات حلاتهم كاتشوف فالمرايا .... وبدات كضور عينيها وهي كاتفكر كاع دوك المقالات لي قرات .... فللخر نفضات راسها منهم ودخلات للدوش ....
خدات قسم دوشها وخرجات مضورة عليها فوطة بيضة و شعرها تاهو جامعاه ففوطة ...كاتهضر مع صفاء فتيل شنو توجد ليهم للعشا ، قطعات عليها و لاحت تيليفون موراها ..
باقي كتقلب فالحوايج وهي تفكر شنو قرات فالمقال ..... ان من علامات الرجال السا... دي ، انه كايميل بزاف اللون الاحمر ، والى شافو كايكون بصرو مشتت بزاف و هربان من داك اللون باش مايتفرشش قدامو ..... وهي طيح يديها على شوميز حمرة طويلة حد ركابي جبداتها لاحتها موراها فالسرير .. وبدات تجبد فملابسها داخلية ... وجدات كولشي عاد نشفات شعرها و جمعاتو للفوق كعكة منفوشة ، و لبسات ملابس داخلية سوداء ايلاستيك من كالفين كلاين ... و بيل كحلة جامعة صدرها كتر عاد لبسات داك لاشوميز لي كان ثوبها حريري لامع حمراء و صدايفها كحلين ، اوفر سايز وواحد الكتف نااازل كتبان غير سمطة د الپيل .. و صدايف لاشوميز محلولين حد الصدر ...
كلسات على الكرسي لبسات صبادرين كحلة و طوات كمام داك لاشوميز تالفوق ، لبسات غير ساعتها الالكترونية حيت غاتخلي تيل بتشارجا .... يلااه تحنات ترش بارفانها وهي تاني تتفكر انه فداك المقال قراات بلي الرجل السا ...دي كايآتيريه الدم ، الى شاف الدم فشي وضعية فيها بعض الاغراء كاتكون نقطة ظعفو ....
ورجعات مشات ليتيلفون كااتصوني لصفاء تاجاوباتها .....
قسم: صفاء ، ماتسوليني لا علاش لا كيفاش ..... بغيت واحد من الكيسان يكون مشقوق من الفوق ......
قطعات على صفاء ومشات رشات بارفانها ووضعات ملمع شفاه وخرجات من الجناح تاوصلات لعندو ... ودقات ...
هو كان فالبالكون غير سمع دقة طفى الگارو ومشى بجهة الباب حلها ليها وهو يلقاها متكية على جنب الباب .... بقى تايطلع فيها وينزل .... لاشوميز جااتو معرية بزااااف ورجليها مكشوووفيين بالكامل ... ديرونجاتو كتر ماعجباتو ... بقى غير كايرمش بعينيه ولكن مابغاش يضغط حيت جاية غير لعندو للبيت ومغايخرجوش ....
قسم : ( كاتقرا فملامحو ملي شاف لبستها) غاتخليني واقفة هنا ؟؟ ....
اصيل اشار ليها براسو وزاد دخل وهي تبعاتو و سدات لباب ....
قسم : قلت لصفاء ديرلينا الحوت ... وطاكو صالاد ....
اصيل : مزيااان ... ( خارج جهة البالكون ) كنت كنفكر فواحد الحاجة ....
قسم : ( تابعاه ) شنو هي ..
اصيل : ( جرها من يديها وجابها قدامو شادة فالحديدات وهو موراها معنقها ) الى هاداك ريسطو تحرك مزيان .. غايطلع فالثمن .... نقدر نبيعو مرة اخرى بثمن كتر من لي خديت بيه .. ودوك الفلوس نستثمرو بيهم برا المغرب ... بعييييد على هنا وبعيد على الكاميرات لي كايعرفوك ....
قسم : ( مكمشة ملامحها ) وعلاش !!!
اصيل : حيت واخا تانبغيو نديرو عالم ديالنا بوحدنا .. كنضن سميتك صعييب نخليو ناس مايعرفوهاش .....
قسم : ( ضارت عندو براسها ) واش نتا باغيني ننكر أصلي ؟
اصيل : هههه ماش بحال هاكاااك ... غير مغايعجبنيش نبقى نختار فين نخرج معاك ... ضروري خصنا نمشيو لبلاصة مكيعرفك فيها حد .... بغيت نعيشو بحرية كتر ....
قسم : ( تنهدات ) يعني رجعنا لنفس الموضوع واخا قلتي ليا نسدووه ....
اصيل : لا مرجعتش ليه ... انا كنهضر على حاجة اخرى جديدة جات فبالي .... وبغيت نشوف واش لايقة ليك نفكر فيها منهنا للقدام ولا نحبس .....
قسم : العيشة برا المغرب؟
اصيل : اممم
قسم : ماعرفتش ااصيل .... صعيبة عليا .... ماغانعرفش نعيش بعيد على عائلتي والله ..... خصوووصا بعيد على بابا .... منقدش ...
اصيل : مكنضنش عائلتك من الناس اللي غاتجيهم صعيية يجيو عندك فين نت مرة مرة !
قسم : واخا هاكاك غير فكرة راني بعيدة عليهم ببحورا وجبال ... فشكل !!! ولكن منعرف ... خلي دابا يخدم داك ريسطو ونستقرو ... ويبان لينا اش غانيدرو .. دابا ماغانعرفوش نقررو ...
اصيل : داكوغ ...
زاد عنقها كتر ساكتين .... وهوما يسمعو دقة فلباب
قسم : هادي باينة صفاء ... انحل ليها ...
تسلتات منو وخرجات من البالكون كتنش على راسها .. ديما ملي كايكون قريب ليها بداك الشكل كتحس بالحرارة كطلع ليها ... جمعات راسها ومشات باتجاه لباب حلاتها وهوما يدخلو لي سيرفور جارين طبلة عليها لعشا .... وصفاء موراهم ...
صفاء : كيفما طلبتي ... حتى الكاس لي ( قاطعاتها )
قسم : ششش ( ضارت موراها شافت فاصيل باقي فالبالكون ماسمعش ) صااافي شكرا ....
صفاء : ( باستغراب ) اا .. صافي... واخااا .... مهم لاحتاجيتيني انا غا هنا حداك ....
قسم حركات راسها بآه وخرجو لي سيرفور ، وهي مشات باتجاه طبلة فين حطو العشا طلات عليه... كانو حوج ديال لي سالاد طاكو .. وجوج ديال لي پلا .. فيلي دالحوت بصوص كامبا وكافيار غوج.... مع مستخلص عصير تفاح و عصير مستخلص الفراولة ... وكريم كراميل فالديسير ....
بانليها داكشي برفيكت ورجعات غطاات على لي بلا بغطاء فضي محوط تما ... ورحعات عندو لبالكون كان كايشوف لتيل وعنقاتو من اللور
قسم : شنوو كاتشوووف
اصيل : رخام ( كايوريها ) دياال الكوزينة ....
قسم : داك الكحل حسن ..
اصيل : هو لي سيفطت ليهم ....
دار تيل فجيبو لور ... وضار عندها كاشوف فيها وهي بقات كاترمش فيه علاش كايشوف فلاشوميز ديالها بهاد طريقة ؟؟؟ ياكما لي كتب المقال عندو الحق!!!!!!
اصيل : كتلبسي ديما هاكااا ؟؟؟
قسم : الحمر ؟
اصيل : لا ...الستايل ...
قسم : ( كاتشوف مع راسها وشافت فيه ) علاش مازوينش ؟
اصيل : منهار عرفتك ونت لباسك ريزونابل بعقلو .... اما هاكا لا...
قسم : منقدرش نخرج بهاد اللون على برا ممنوع فالبروتوكول ... ومنقدرش نخرج بشي حاجة فوق ركبة على برا .... ولكن فالباطو راني واااخدة راحتي ....
اصيل : يعني كون مكانش البروتوكول لي ماانعك، كنتي تلبسي عادي !!
قسم : ( كاتشوف مع راسها وكاتشوف فيه ) عاادي !!! مالها .. ( كاتشوف فيه بتحدي ) حسيتي بشي حاجة ملي شفتي هاد اللبسة مثلا !
اصيل : ( كايشوف معاها ومع صدرها لي باين من الفوق ) وغير لاكنت ثلجة مانحس بوالو !!!! .... اما رجل عاادي راه ضرووري يحس ....
قسم : اممممم .... (جراتو من يدو وزادت دخلااات ) يلااه العشاا غادي يبررررد .....
تنهد ماعاجبوش الحال لي ماعطاتش اهمية لهضرتو ، ولكن مابغاش يحكر باش دوز ليلتهم بلا صداع ... ومشى كلس على الفوطوي وتاهي كلسات قداامو وكبات ليه عصير تفاح .... وهو بدا كاينقب من صالاد ....
قسم : غااتعجبك لاصالاد فيها واحد لاماغيناااد واعرة ... الشيف لي هنا كايصرعها ... ( اصيل غي كياكل وهي كاتشوف فيه )
اصيل : ( علا عينيه فيها ) تعشااي .... ( ابتسمات ليه وبدات كتاكل وهو كايلعب بالفورشيت متكي مرافقو على طبلة و لي واضح ماعجباتوش الماكلة بزاف ومامولفهاش ... تايمضغ بالثقاالة وباقي مديرونجي على لباسهاا .. وعلا عينيه من طبقو لعندها ) مانشوفش بحال هاد اللباس على برا اقسم .. واخا فالباطو .... ماقلت والو حيت جيتي لعندي .. ولكن ضوري بيه بحال هاكا ... ماشي ديالك ....
قسم : ( دارت رجل على رجل ) علاش مثلا ؟؟؟؟ حيت حمر !!
اصيل : لا اللون لا الفصالة لا تاحاجة فيه ماكتعجب ....
قسم : ملي ماعجبكش .... علاش قلتي بلي أتيراك ؟
اصيل : حيت أتيراني ... داكشي علاش ماعجبنيش
قسم : امم ( مضغات دغمتها وصرطاتها ) واش كتخبي عليا رغباتك ولا جاب ليا الله !!! علاش ماعجبكش ملي اتيراك ..؟ مابغيش تأتيرا قدامي ؟؟؟؟؟
اصيل : ( عوج فيها راسو ) واش نت مزال ماتايقاش فراسك بلي غا ضحتك كتأتيريني !!! علاش غانخبي ؟؟ ...
قسم : ماعرفت ( شربات من كاسها كاتشوف فيه بشك ) انا غيييير سولت ....
اصيل : ماعنديش مشكل تلبسبها ملي نكون انا .... ماعمديش مشكل نتأتيرا انا ... المشكل هو ماتلبسيهاش على برا ... ومتأتيريش الناس الخرين ......
قسم بقات غي كاترمش .. كيفاش ماعلقش على اللون ومدارش كيف قرات فالمقال !!!! كايشوف فيه عااادي وبصرو مكايتشتتش !!! ....
اما اصيل كاينقب من العشا وهي كااتشوف فيه و والشك كياكل فيها ...
تعشاو فهدوء تاوصلو لديسير وهي تشوف فداك الكاس لي مشقوق و مكنتشربش من تما ، كانت مخلياه تاايسالي العشاااا ... عاد تحاول تزعم على هاد الحركة ....
كان منزل راسو ساهي مع طبق الكريم كراميل كياكل فيه بعكز كواحد ماعندوش بزاف مع الحلاوة .. وهي خدات نفس ... وهزات داك الكاس لعندها من الجهة لي مشقوق فيها ودوزاتها بعنف على شفايفها بلعاني تااجرحااهم ... تأننات بألم وهو طلع راسو بزززربة وهي حطات الكاس وشدات على فمها
قسم : اااااييي ....
اصيل : قسم !!!!! ( مد يدو كايحيد ليها يديها على فمها يشوف ) مالكي ؟؟؟؟ جرحتي راسك !! ... حيدي نشووف ...
قسم : ( نااضت وقفات ومشات بزربة للمرايا وهو تبعها وهي كتأنن بصوت دلوع ) نااااري اااش دررررت .... ( كان شوية دالدم فشفايفها وبلعاني مابغاتش تمسحو، كدوز عليه ابهامها غير بشوووية بطريقة مغرية وهو هز ليها راسها لعندو كايشوف فالجرحة ....
اصيبل : ماشي بزااااف مااشي بزاف ( كايمسح ليها وهي كاتشووف فيه وتحاول تقراه!) ردي لبااال ... ( هبط فموو باسها بوسة طوييلة ) هادو غير ذنوبي كايخرجو فيك ههه ....
قسم : ( كاترمش فيه وباقي كدوز ابهامها ) وااااش باقي الدم !!
اصبل : ( كايشوف لابهامو لي مسح ليها بيه ) لااا مسحتو ... راه غي شوية ... اجي نغسل ليك ...
جرها من يديها وهي غيير كترمش وحل لما فلافابو وغسل ليها شفتها وغسل يدو تاهو ...وهي واقفة كترمش بعينيها وتحاول تفهم !!!!! علاش مادار تاردة فعل ؟؟؟ وعلاش لاشوميز علق عليها غا حيت معرية .!! ....
بدات كاتشقق ابتسامة بلهاء على شفايفها تاولات ضحكة ، ضااحكة على راسها كيفاش فكرات بهاد طريقة وهو ضار عندها مستغرب كايمسح يديه ففوطة .....
اصيل : قسم !!!! ( جابت ليه الضحكة) مالكي ؟!!!
قسم : ههههه ماعرفتش كيفاش غانقولهالك ههههه لاقلت ليك غاضحك عليا ههه ....
اصيل : ( كايشوف باستغراب وباقين ملامحو ضاحكين على ضحكتها ) ماافهمتش هه!!
قسم : لبارح .... ملي جييت عندك سولتك وماعطيتنيش جواب .... وملي قلتي ليا داك الليلة كاتقتل ولا منعرف ... مع دوك السيكاطريسات لي فيك .. مع كيفاش كتهرب من الكيسيز ديالنا ... وكيفاش الفيلينغ ديالك هااااارد بزااااف ..... ششكيت .... ااااي( ضربات فراسها ) كيييفاش غانقولهااليك .... فففففف غااضحك عليا ، (شدات على حناكحها لي حمارو وسخنو بالحشمة ) نااااري حشمت دابا ...... والله تاحشمت من راسي لي شكيت فيك بحال هاكا
اصيل : ( بنبرة استفهاام ) بحالاش !
قسم : ( كتهضر بزز كاتفرك صبعانها ) تكون .... تكون زعما ... ( كتعض فشفايفها من هاد الغباء لي طاح عليها ) فيك .... لاساديك سيكسيال ..... ( اصيل علا حجباانو وهي كملات ظغيا ) شششوف عارفة راسي كنخررربق وولكن راه ماخليتي ليا تاشي حاجة اخرى نشك فيها من غير هااادي ، قلت مدامك مغاتقولش ليا تفصيل بهاد هذا نحاول نتحقق منو راسي .. ( كتمشي وتجي حداه كتشرح ليه وهو رجع بلور تاتكا على لافابو كايشوف فيها وملامحو مجموعين بجدية) لبارح .... لبارح قلبت شوية فالانتررنيت على هادشي .... ولقيت بلي لي مريض بلاساديك سيكسيال .... كايتأتيرا للون الحمر .... وللدم ..... داكشي علاش لبست هادشي ، بغيت نشوف واش غادير شي رد فعل كيما قالو فالمقال لي يأكد ليا الشك ديالي .... اييييييي ( غمضات عينيهاا ) غانبااان قداامك حممقة داابا ...ولكن هااادشي عكى الله .... عارفني مكنخبي واااالو ..... ( شافت فيه باسف ) سسسمح ليا .....
اصيل بقى غي كايرمش فيها وربع يديه .....وتنهد مجاوبها ....
اصيل : وهاد المقال لي قريتيه ..... كاتبين فيه بلي لي مريض بلاساديك سكسيال .... كايتأتيرا للون الحمر والدم .... ملي كايكون صااحي ....ولا ملي كايكون فوسط الكريز !!! ...
قسم : ( علات عنييها فيه ) ها ؟؟؟ مافهمتش !!!
اصيل : حيت كاين فرق اقسم ...... بين واحد طبيعي صاحي قدامك .... وبين واحد آخر وسط الكريز ....
قسم بقات غير كترمش فيه وملامح الخوف بداو كايتجمعو فوجهها وهو تنهد و لتخ الفوطة وخرج .... وهي ضورات راسها معاه ببطئ متبعااه كتستوعب !!!!!!
خرج اصيل للجناح وكلس على ليفوتوي .... شد على راسو كايتنهد .... كاان مستسلم للمصير ديالو بالكاااامل ....كان فأتم الاستعداد يحط وراقيه على الطبلة ... ويكتشف واش هو رابح ولا خاسر ...
هاد الموضوع شحال ماطول ، خصو يتفضح واحد النهار ، اما بطريقة زوينة بحال يكلس معاها وسط البحر فباطو ويناقشوه فهدوء و فليلة طويلة ، اما يتفضح بطريقة لي خايبة ولي غاتكون نهايتها على شكل ندم كبير .....
الخيار اللول كان انسب خيار يقدر يتخدو واحد بحال اصيل ... لي الوضوح كايجري ليه فدمو .. مكيعرفش يعيش فالمنعطفات ... كايبغي يمشي فطريق مستقيمية ومسرحة قدامو ..... باش يعيش مرتاح ..
مرضو هو الوحيد لي عارف خطورتو قداش .... وهي كوحدة غاتشارك معاه حياتو .. من حقها انها تعرف ...
الى كانو هضرو على المستقبل كااااامل وخططو ليه ... تاهاد الموضوع حزء من المستقبل ... بل جزء كبيييير منو ... والجزء الاهم منو .... والى ماوضحوهش ... بحالا كاع اش كايخططو ليه ، كايخططوه فوق الهوا .. حيت الساس لي غايتبنى فوقو كولشي ... هو هاد الموضوع بالضبط .....
هو عارف راسو انه كايتعالج .... وانه بدا طريطمون وبدا تالحصص مع الطبيب النفسي ... ولكن لي عارفو تاني ، هو الامر كياااخد الوقت ... والشفاء كايكون تدريجي .. يعني شحال ماخبى .. خصو يقول ليها واحد النهار ...
وعلاش لي مايكونش داك النهار ، هو اليوم ... هو دابا ... دابا نيت .....
خرحات من الدوش ، وباقين ملامحها مبعثرين!! بحالا لقات شي حاجة ومزال ماتأكداتش واش هي علاش كانت كتقلب !!! بحالا عطاها طريق و ماقالش ليها فين كايدي!!! ...
علا راسو فيها و عينيه فيهم خووووف كبير ... خوف من انها تقدر تكون هاد الليلة نهايتهم !!! .....
اما هي ، فيهم غير الشك ... الشك ... والتوتر ..
زادت بشوية تاكلسات فالفوطوي قدامو كاتشوف فيه .... وهو من كلستو وملامحو لي تحولو للجدية ، واضح انه فأتم الاستعداد .... لاي حاجة ....
قسم : كي ... كيفاش !! ... مافهمتش اش قلتي بالضبط!!!! ( يلاه غاينطق قاطعاتو ) لااا .... بلاتي .... ماشي هذا هو السؤال ... السؤال هو علاااااش قلتي هادشي بالضبط !!!!
اصيل : ( خدا تنهيدة قوية ورجع راسو لور معليه كايشوف فالسقف وصوتو ضعيف ) قسم ....
قسم : ( بخوف ) ن .. نعام !
اصيل : شنو لي خلاك تقولي عليا .. واحد مريض . . بلاساديك سكسيال؟
قسم : ( عوجات شفتها لجنب ) مم .. ماعرفتش .. و ولكن ... الكيسيز ديالك غرااااب ... ديما عنيييفين ... كنحس بيك بحالا كتغيب على الوعي فيهم .... زائد انك كتهرب مني بطريقة لي غريبة تاااهي .... وهادشي كامل دخل ليا الشك ...
اصيل : ( كايشوف فالسقف ) وملي دخل ليك الشك ...علاش ماهربتيش ... ماخفتيش على راسك؟
قسم : ( كترمش وقلبها كايضرب بجهد باش مايكونش هادشي بصح ، وقالت بخوف ) علاش غانخاف ؟؟؟؟
اصيل خدا تنهيدة قوية و قاد جلستو ، حاط مرافقو على ركابيه ومقرب عندها ...وملامحو مخلطين بين الجدية و الضعف ....
اصيل : شنو كتعرفي على لاساديك اقسم ؟؟
قسم : ( بزربة ) تاحااجة !! .... تاحااجة .. وعمرني قلبت عليها .... حتى للبارح ....قريت شي حوايج دايرين بحال الخيال ، ماتيقتهمش بزاف ... ولكن بلاتي ( قربات تاهي كتر ) نتا علاش كتهضر ليا دابا على هادشي ... واش عاارف شي حااجة على الموضوع باغي تبارطاجيها معايا ؟؟؟ باغي غير تصحح ليا اشنو قلت ليك قبيلة ونتا ماعندكش علاقة بهادشي ؟ ياك هادشي لي كااين ؟؟؟ ..... ونتا ماعندكش علاقـ..( قاطعها )
اصيل : عندي. ....
قسم يلاه غاتكمل هضرتها وهي تحبس ... رجعات براسها اللور !!!! كاتشوووف فيه .... مامصدقاش شنو سمعات ... سرطات ريقها حتى تسمع صوت حلقها فودنيها .... وقالت بشفايف مرتجفين ...
قسم : ش .. شن .. شنو عندك ؟
يتبع...
التعليقات
لا توجد تعليقات بعد، كن أول من يعلق.