قصة الجوهر الحر الجزء الأول

وعليا قالو وماخلاو مادارو...

ضحكو فوجهي ونممو مور ضهري وهوما ماعارفين عليا والو...

قالو راها بدارها وراجلها ومشافو غير لي بغاو...

ناسي وحبابي شافو الضحكة فوجهي وقالو هادي مابيها والو...

تمنيت لي يطبطب لي على ضهري ويقول لي متخافي من والو...

شحال من واحد ضاحك وناشط قدام الناس وغير يولي وحدو يتحسر على همومو...

حكايتي حكاية ألف مرا هرسها الزمان وناسو...

طاحت وناضت وعمرها ماهبطات راسها لشي واحد من ظلامو...

حيت هاد الدنيا باغا الواحد يكون ذيب عمرو يهبط راسو...

دنيا قراتني وخلاتني نعرف بحق الزمان ودوايرو...

وعمرك تيق فشي حد حيت هاد الزمان كثرو فيه الغدارة وشمايتو...

وبلي شحال ماصبرتي ربي مغايخيبكش وكلشي بوقتو زوين وبحلاوتو...

وعليا قالو وماخلاو مادارو...

الجوهر الحر

الكاتبة:رحمة Rah Ma

* * *

القصة مستوحاة من الواقع، ممزوجة بالخيال.

* * *

"ليس كل ما يلمع ذهبا، وليست الحقيقة كما نراها دوما...

فحتما توجد كواليس خلف كل رواية، وخلف كل قصة تروى خبايا...

فقد يتعمد الكاتب إظهار ما يريد للقارئ، لذا ركز بين السطور...

فربما يكون الحل بين يديك وأمام ناظريك، فلا تحاول تصعيب الأمور..."

✦

وبين ظلام دامس رأيت بصيصاً من النور...حاولت الاقتراب منه لكنه تلاشى كالسرابْ... أغمضت عيناي وفي داخلي كان هناك أملْ... أنني سأتجاوز كل العقباتْ وأعود حرة من جديدْ... لكن دلك الأمل تلاشى وأصبح من عداد المفقودينْ...حاولت مراراً وتكرارًا النهوضْ والبحث عنه.... لكنني فشلت ...حقا قد فشلتُ واستسلمتُ للظلام الذي استحوذني وجعلني أسيرتَهْ...

رحمة

****

فمدينة الداخلة وبالتحديد فواحد الحي كانو الديور فيه يالاه كيتبناو...فواحد الدار من دوك الديور لي كانت يالاه مبنية بلياجور والسيمة... ومافيهااش السقف يالاه مضورين لحيوط... كانت جالسة على الضس وشادة كرشها لي كانت باينة منفوخة...تتعصر عينيهاا وتعض فشفايفهاا تاولاو حمرين...وجهها كان مسقوط منو الدم وصوت تنهيداتها كيبينو كمية الالم لي كانت تتحس بيه... سندات راسها مع الحيط وفالداخل ديالها كتناجي لي خالقها يفكها من هاد الوحلة... الدموع نشفو من عينيهاا بقوة مبكااات والوجع لي كتحس بيه هلك روحهاا...الحس كان مقطوع شي لي خلاهاا تقاتل مع نفسهاا باش توقف...جلابتها لكحلة كولهاا توسخات بالتراب...غادة وكتسند بالحيوط باش تشد توازنهاا...رجليها حاسة بيهوم كيلعبو بقوة العياا والوجع...ومع دلك زطمات على نفسها وبقات مكملة طريقهاا تاوصلات لحداا الباب لي مكانش مركب...تنهداات وهي تتشم داك الهوا والظلام خلاها تحس بالخوف...ولكن خوفها تلاشى ملي تفكرات شنو وقع معاهاا وشنو لي غايوقع الامهرباتش من هنا...غادة وسط الحي لي كان خاوي وحس بنادم مافيهش من غير الكلاب لي كينبحو ولي كيخليوها تقفز حيت تتخاف منهوم...الوجع لي فكرشها مبغااش يهداا وكل ماتحركات كلما كان تيزيد يجهاااد عليهاا...السخفة دالجوع والعياا هلكاتهاا والضبابة بدات تتبان ليهاا...

وقفاات فوسط الزنقة تتنهج مهبطة راسهاا وقلبها كيضرب بسباب داك الجهد لي دارت...بغات غير جغمة دلماا لي ترطب بيها حلقهاا لي نشف عليها وفمها لي بدا كيلصق بقوة ماشحفانة... عينيها كانو كيضورو فالزنقة تبانت ليهاا ديك البلاصة فين كيخليو لخدامة السلعة... واحد البلاصة عامرة بلياجور والسيمة والكرويلات ومستلزمات لبني...قربات جهتهاا ملي قشعات واحد لقرعة دخمسة يطرو تماا... بلاماتخمم مشات حلاتهاا وهزاتها تتشرب منهاا بشراهة تالماا خنقها وخلاها تشهقهوم وتبقا تكحب تاتجيفات... بقات مدة جالسة تتسترجع أنفاسها تاولاو منتاضمين عاد ناضت تكمل طريقهاا... مسافة كبيرة ضرباتها على رجليها وكل مرة ترتااح... كتمنى غير يبان ليها شي حد طلبو يعطيها تعيط لبوليس ولايديوها لكوميسارية المهم تفك راسها من هاد الحفرة لي طاحت فيهاا بلامادير بحسابها... غادة ويديهاا مسندين على ضهرهاا كتخفف داك الألم لي حسات بيه ضارب سنسولهاا ولوجع لي مرة مرة كيضربها فكرشهاا... سمعات صوت طوموبيل وهي ضور بالزربة وعينيها برقو ببصيص من الأمل ولكن غير قشعاتها وهي تخرج عينيها مصدومة ومخلوعة... غوتااات بالجهد وضااارت تتجري ناسية راسها راها حاملة وناسية كاع داااك تماااارة لي دوزات ولعيااا لي كتحس بيه... وحاجة وحدة فبالها هي تهرب ولكن مول الطوموبيل كان سرع منها وحبس عليهااا الطريق ونزل وعينيه عليهاا غياكلوهااا بدات تترجع بلور وتغوت تاصوتها تبح وتجرح:عتقوووووووووني اعبااااااد الله عتقوووووووني اااااااااع

ضارت باش تهرب وهي تحس بيديه شداتها من شعرها لي مغطي بالشاال... مقربها لعندو ونطق بصوت هامس كفحيح الأفعى وريحة لكارو عاطية منو:باغا تهربي الغزالة هااا...باغااا تهربي من عمو...

نبرة صوتو الهامس دب الرعب فأوصالهاا... وريحتو لي عيفاتها خلات قلبهاا يطلع... كمشات على عينيهاا وهي تتحرك راسها بهسترية ودموعهاا نازلين كيسرسبو على حناكهاا ونطقات بغوات:طلق مني ااااعدو الله طلاااااااق

لف يديه فوق من كرشها لمنفوخة ونطق بصوت مليئ بالسخرية:البعااد عليك هو لي عمرو يكون اعمو..

جرها معاه بحال الاجااار شي حاولي... متسوقش لا لكرشها ولاغواتهااا...حل طوموبيلتو ولاحها فلكراسى لورانيين وكيحاول يضبط أعصابو... جبد قنبة فلكوفر ورجع لعندهاا باش يربط ليها يديها وهي كدابز معاااه تاعطاااها كروشي لفمهاا خلط ليها النيف مع الفم تارعفات وتهداات عاد قدر يربط ليها يديهاا...سد عليها لباب وركب فبلاصتو سايگ منير فالطريق غادي بيها لبلاصة خرا من غير ديك الخربة لي كانت فيها... كان مرة مرة كيطلع عينو فالمرايا كيشوف فيها ويرجع يشوف فالطريق مركز... الدقة لي عطاها خلاتها تهد وزاد كمل عليها الجوع والعيااا والحمااالة...

كان سالك الطريق ديال الغابة والحس مقطوع تم غير الخلا والقيفار شي لي خلا خوفها يضاااعف ودموعهاا ينزلو...طلعات عينيهاا كتشوف انعكاسو فالمرايااا... كان باين فيه مركز مع الطريق غير من ديك التكميشة دلحجبان لي داير وعينيه الكحلين لي كينافسو الليل فسوادهوم...

كتشوفو ساهي ومعلابالوش شي لي خلاها تستاغل الفرصة و تقرب جهة الكرسي لي جالس فيه وفغفلة مكانش متوقعهاا لوات عليه يديها تاخنقاتو وحكماتو ممخليااا ليه فين يتحرك...مزيرة على يديها تاحبسات فيه النفس ودغياا حمار وعينيه خرجو من بلاصتهوم..طلق من لڤولون وبقااا كيحاول يفك يديها...الطوموبيل كانت تتزگزاگي فالطريق وهو ماحيلتو ليديها لي ملوين على عنقو ماحيلتو لطوموبيل لي مبقاااش محكم فيهاا... زير على سنيه وعينيه زادو حمارو بالعصبية... شد يديها وزير عليها تاقطع فيهوم الدم ونثرهااا بالجهد تاحسات بيهاا وجعاتهااا... كان كيتنفس بالجهد وصدرو كيطلع ويهبط بالأعصاااب وقبل مايفطن براسو لقا الطوموبيل خرجات لاپيست...مد يديه باش يعتق لي باقي مايتعتق ساعة كان فات لفوت والطوموبيل دخلات فواحد الشجرة بكل جهدهاا... تاتشخشات من لقدام ودخاخنها خارجين...اما هوما فكانو بزوج بيهوم مغيبين....

فلاش باك

البداية

"صلى وسلاااام على رسول الله الاجاااه الاجاه سيدناا محمد الله معاااا جاااه العلي يويويويوويوي"

نطالقو الزغاريت موراهوم صوت الشيخات لي كانو واقفات بقفاطنهوم الخضرين الاوحدة فيهوم لابسة قفان شيبي وصابغة شعرها بالزعر المشعشع باين فيها هي لمعلمة ديالهوم...شادة بين يديهاا طعريجة وصوتها غليض ومبحبح متحتاجش بوق غير بدات تغني وهو يتسمع صوتها بالجهد خلا گاع لي فالصالة متبعهاا بعينيه من غناايتهاا:

🎵واديرو يديكوم.. 🎵

شافت فالبنات لي معاها وبدات تتغني وهوما كيردو عليهاا:

🎵والعيالات الله يزازيكوم واديرو يديكوم🎵

🎵وأنا فارحة بيكوم واديرو يديكوم🎵

🎵يالبنيات الله يزازيكوم واديرو يديكوم🎵

🎵هاد الليلة فاارحين بيكوم واديرو يديكوم🎵

هزات يديهاا حابسة لبنات وشافت فالعيالات ونطقات وهي مهبطة لميزان دلغنااية

🎵كان لهيث وكان لغراام🎵

گاع لعيالات لي جالسات فالصالة ردو عليهاا

🎵كان لهيث وكان لغرااام🎵

بتسمات وبدات تضرب فطعريجتهاا تتكمل:

🎵كانو غمازة الظلام🎵

تتحبس ولبنات لي معاها كيردو عليهاا بصواتهوم

🎵 كانو قرقبات السطل🎵

🎵 كانو خسارات لكلام🎵

🎵 واسيري اغدااار صاحبو مادار فيا اللولة واييه وايييه🎵🎵 والحااافض الستار 🎵

🎵التانية وايييه وايييه🎵🎵 واااستااار حافيض 🎵

🎵الثالتة وايييه وايييه🎵 وااارضات الوالدين 🎵

طلعات لميزان ولبنات كيطبلو

والعيالات ناضو كيشطحو حيت حماو الطرح ولي عندها شي سالف طالقااه ولي عندها شي قاع راه حازماه...شوية بانت ليهوم بنت داخلة لابسة قفطان جوهرة فالبلونكاسي جاهاا فن ومواتي فورمتهاا.... كتبان قصيرة واخا لابسة الطالون.. مكحلة عويناتها لخضرين تبانو كيلمعو بحال شي قطة ومقادة وجهها بمكياج خفيف مبين جماليتو وحروفها الشهبين جات كتفتن...كاين لي عارفها من بين لعيالات خصوصا العائلة المقربة وكاين لي ممسوقش ليهاا وكاين لي حاضيهاا مستفرب وكيتسائل شكون هاد لبنت وبنت من هي؟!

كل خطوة كانت تتخطيها وهي هازة راسها لسماا وبكل تقة فالنفس جاياا تحضر واخا عارفة راسهاا ممعروضاش ولكن يستحيل تفلت عليها هاد النهاار..دورات عينيها على العيالات تبانت ليها مراا كبيرة واقفة حدا باب الصالة وجهها حمر تابغا يطرطق لابسة قفطان موبرة ودايرة فولار مبين شعرهاا لكحل لي فيه زغيبات بويض ونضاضر دالشوف...ضحكات ضحيكة خفيفة وقلبات وجهها مكملة طريقهاا تاوصلات عند الشيخات وشافت فوحدة كانت واقفة فوق القعدة..تحنات عندهاا وشوشات ليها فودنيها وديك الشيخة ضحكات معاهاا وتسوخرات لور...أما هي حيدات فولارهاا ومدات يديها محيدة القراصة لي كانت حابسة بيهاا خصلاتها الحريرية فالقهوي بااارد فحال لون لعسل...تحل شعرهاا تاضرب قاعهاا كثيف وكيسلب لعين من الشوفة مخلي لعيالات لي تم بحال الا مسحورات... ودابا كملات الصورة لديك الفاثنة الغريبة لي خلات جميع لعيون يتبعوهاا..خدات فولارها وربطاتو على قاعهاا تاطلع شوية لقفطان وبانو رجيلاتها لبيضين نقيين وضفرانهاا مبرودين ولكن ممصبوغينش.. بدات الشيخة كتغني ولبنات كيترادو معاهاا..الريتم كان هابط شوية وماحدهوم كيطلعو فيه ماحدها هي تتحرك جسمها باحترافية وتتشطح وكما تيقولو لحال مايشاور وزيد عليها ديك لحرقة لي فداخلها خلاتهاا طرجمها بهاد الطريقة...بدات كتحير بشعرها تاجات ديك الشيخة شادة فيها باش ماطيحش وهي منزلة راسها وشعرها كيلعب مع كل هزة دارت تاختمو الطرح عاد هزات راسها تتنهج وصدرها كيطلع وينزل...وشعرها لصق على عنقها حيت عرقات بقوة الجهد ليدارت...يدات تتجمع شعرهاا وخدات فولارها مضوراه على راسها تاقداتو وهي ضور عند دوك الشيخات جبدات من صدرها واحد مية درهم عطاتها ليهوم بابتسامة حاولات ترسمهاا على فمهاا باش ماتبين لحد شنو فالداخل ديالهاا...غير سالات عطاتهوم بالضهر وخرجات من الصالة بكل هدوء كما حضرات...غادة نازلة تحسات بشي يد جراتهاا بكل جهدهااا غادة بيهاا لجهة لكوزينة...كانت عارفااهاا هي ضحكات ونثرات يديها وقالت بهدوء:خالتي ياك لباس

خرجات فيها لمراا عينيها محيدة دوك النضاضر دالشوف ونطقات بصوت باين فيه معصب:اش هااد الشوهة عملتي لي لداخل هاا ولاصااافي بينتي أصلك وملاين جايااا

ربعات يديهاا ونطقات ببرود عكس العافية لي شاخضة فالداخل ديالها:علاش واش عيب الاشطحت وفرحت وجيت نشارك معاكوم فرحتكوم

خرجات فيها لمرا عينيها:الالة عطيييناا بالتيسااع سمعتي منبقااشي نشوفك هنااياا

تنهدات لبنت وكملات كلامها بهدوء:هاأنا غادة واخا من الصواب تكبرو بالضيف ساعة ماعليش الله يجعل كلشي مبارك ومسعود اخاالتي...

عطاتها بالضهر وحاولات ماامكن تجمع شتات نفسها وكرامتهاا وتكمل طريقها لبرا قبل ماتضعاف وتبين ليهوم الضعف ديالهاا وتخليهوم يتشفاو فيهاا والعديان يشمتو...غادة كضور عينيها وكتشوف فالدار لي كانت تتنغل بالناس شي جاي شي غادي وريحة الطياب عاطية من السطح فين دايرين لخزانة حيت الليل غايتقام فيه العرس... نازلة من الدروج ورجليهاا مهزينهااش حيت بقد مابينات ليهوم أنها قوية الاأنهاا فالداخل ديالها هشة بحال قطعة الإسفنج..كتسرط طعم الصدا لي تكون فحلقها وتتحاول تكابر على ماتخرج من هاد الدار وديك الساعة دير لي بغات ديرو...ولكن القدر كان عندو كلمة خراا ملي خلااهاا تواجه الشخص لي كان سبب داك الحزن لي حاسة بيه وديك لغبينة لي فقلبها فهاد الوقت الغير مناسب على قولتها...رجليها جمدو وهي كتشوفو واقف بجابادور رجالية بينات جسمو الرجولي وكتافو لعراض بحال شي عارض أزياء...لحية مطراسية ومخففها كيف كيبغيهاا وشعرو ضارب ليه تحسينة عادية حيت ماعندوش مع داك لهيث...ملامحو مبشورة وباين فيه من الشوفة راه مرتاح وفرحان وعلاش لا وليوم عرسو..زادت زيرات على يديها تاغرسات ضفارها فراحة يديها ومحساتش براسهاا

مكانش منتابه ليهاا ومكانش گاع كيشوف لجهتهاا حيت كان كيدوي مع ولد خالو ومخشعين فهضرتهوم تاهز راسو بالصدفة وغير قشعها وديك الابتسامة لي كان داير بدات كاتمسح شوية بشوية حيت أخر شخص متوقع يشوفو فهاد اليوم وفدارهوم هي...مكانش داير فبالو هاد البلان نهائيا ولكن هاهو وقع وطرا... وهاهي واقفة قدامو بشحمها ولحمها عينيه كانو كيصكانيوهاا من ديك صندالة لي لابسة فرجليها ديال الطالون تال لفولار لي دايرة فوق من راسهاا...أول مرة يشوفها بالبلدي جات زوينة ومختالفة على كما مولف يشوفها...فلحضة توقف الزمن فيهاا بالنسبة ليهوم بزوج وسمحات للعيون يتكلمو بلغتهوم الخاصة.. بين ألم وخدلان واشتياق وهجران..

رسمات على شفتها ابتسامة خلاتهاا تبان زوينة وبريئة وهي تتقرب جهتو بخطوات تقال تاوصلات قدامو ونطقات بهدوء:برفاه والبنين الله يواتيكوم بالخير

قالت كلامهاا وتخطاتو..ومجرد ماعطاتو بالضهر عينيها لاإراديا نزلو دوك الدموع لي كانت خازنة..دمعة ورا دمعة وقلبها حساتو كيتشوا بالمهل...مشاعر لي بالرغم ماحاولات أنهاا تخفيهوم الاأنهم كانو قوى منها وكانت هي قدامهم ضعيفة كضعفها فهاد اللحظة وهي قدامو...

غادة وسط الطريق تايهة وضايعة بحال شي بنت صفيرة تالفة على مها..قلبها كان تيدق بالجهد شوية ويسكت...ليوم تلقات ضربة قوية من طرف شخص كانت تتعزو...إنسان عطاتو كل مافقلبها باش فاللخر يغدرها ويخليها فوسط الطريق...كانت تتحس برجليهاا كيخواو بيها وهي غادة لدارهوم...ملي وصلاتها خبارو مقدراتش تيق وحاولات تكدب الأمر... وكون عرفات راسها غاتحط فهاد الموقف وغاتحس بهاد الألم عمرهاا تعطيه فرصة باش يقتاحم حياتهاا...داك الشعور لي كانت تتحس بيه داخل ديالها صعيب توصفو بحال شي واحد غارق فشي بير عامر بالماا كيحاول يعوم ولكن تيلقى راسها نازل الأعماق وكلماا حاول يعلى باش يطلع كيلقى يد كتبرك ليه على راسو وتتغرقو تاكيحس براسو تخنق وقريب يتقطع فيه النفس

الطريق مابين دارهوم ودارها كانت طويلة بزاف بالنسبة ليها واخا كانو فنفس السيكتور..معرفاتش روحها كيفاش تاوصلات لحومتها حيت عقلها كان مرفوع تيدكر دكرياتهوم بزوج وكلامو لي كان تيقول ليها ولوعود لي كان تيعطيهاا..مدات يديها لي كانت تترعش كدق فلباب وهي حاسة بالقوة ديالها غادة وكتلاشى..مجرد ماتفتح لباب ندفعات لداخل تتجر فرجليها بخيبة أمل تاوصلات لسطوان ديال الدار وهي طيح على ركابيهاا تاتسمع صوت الطيح مصحوبة بشهقة عالية..واخا كتكون قوي كايجي واحد النهار لي ديك لقوة ديالك كتولي ضعف..كتنهاار ومكتبقااش قادر تحمل فوق من طاقتك تتعياا..تتهرس..وكيولي لداخل ديالك عبارة على حطاام ..محنية راسها لقدام ودموعها كيسرسبو على وجهها ملي حسات بحظن دافي محتويهاا...

نطقات بين دموعها:قااال لياا عمري نخليك غانبقا معاك تانهار لي مول الأمانة يدي أمانتو..قال لي نتي لي غاتكوني ممات ولادي هء هء قال لي كنبغيك(مدات يديها تتحك فصدرها)كنحس بشي حاجة محبوسة ليا هناا اجيداء كتخنقني ومكتخليش نفسي يطلع شهقااات بالجهد بحال الاكتلقف وكل مرة تحك صدرها بحال الاكتمسح ديك الغصة لي فقلبها

غمضات جيداء عيونهاا ودموعها طاحو بهدوء من كلام صاحبتهاا ورفيقة دربهاا لي منضرها وهي منهارة خلاها تنهار معاها تاهي...النبرة لي فصوتهاا كانت كافية تخليك تعرف بلي راها مدمرة..

جيداء:(بصوت باكي)ميستااهلكش الحمااار ومايستاهلش دموعك عليه

هزات راسهاا وشافت فيها وعيونها لخضرين ولاو دابلين وحمرين بحال شي جمرة شاعلة فيها لعافية ونطقات بهدوء:قال لي عمري نسمح فيك (ضحكات بسخرية) ولكن هو سمح فياا...

ابتسمات بسخرية وهي كتشوف فجيداء وشوية بشوية ديك الابتسامة بدات كتعلى تارجعو ضحكات عالية تسمع الصدى ديالهوم فالدار كااااملة..

شافت فصاحبتهاا وكملات كلامها بضحك:خلاني هههه ضحك علياا ومشاا تزوج بغيري هههه مبعد مخلااني نبغيه ودخلتو لقلبي لي كنت سديت ههههه قولبني اجيداء هههه صاحبتك تقولبااااات هههههه

كانت تضحك بهسترية وشكلها كان تيخلع لدرجة جيداء تخلعات عليها وخافت لتكون حمااقت ليها بقوة الصدمة..

شدات فيديهاا مزيرة عليهاا ونطقات بجدية:رحييييل شوووفي فياااا

رحيل:(بتسمات ليهاا ونطقات)هههه مشيت وشطحت فعرسو هههه فوجت ونشطت وباااركت ليه ههههه ومو گاعما عجبها الحال هههه ولكن ماسوقيش أنا ههه المهم فوجت ونشطت وينعل بووو لعااالم (شافت فجيداء)نووضي طلقي ليناا لموسيقى نفوجو هههه ونشطو أناا راه خصني نفرح ليه نووووضي يالاااه نشطحو

جيداء:(شداها فوجهها وغوتات)رحيييل شوفي فياااا هو مايستااهلش هاادشي لي دايرة على قبلو مايستاااهلكش

رحيل:(شافت فيها وبهدوء)خصناا نشطحو ونشطو راه ليوم عرسو

خوف جيداء ضاعف وهي كتشوف حالة صاحبتها لي مكانتش تتبشر بالخير..كانت عارفة بلي الصدمة هي لي أثرات فيها وخلاتها دخل وتخرج فالهضرة..عدراتها حيت ماشي ساهل تعطي قلبك لشي واحد باش فاللخر يهرسو ليك ويلعب بيه...شحال من بنت حماقت بسباب شي دري وشحال من دري حماق بسباب شي بنت...وجيداء كان خوفها ان صاحبتها يكون مصيرها بحال دوك لبنات...حركات راسها بلا كأنها كتسوس ديك لفكرة لي تكونات فدماغهاا ومحساتش براسها غير وهي هازة يديهاا تااال السماا عطياهاا طرشة باش توگضهاا..طرشة لي تفيقها من صدمتهاا...جراتها عندهاا معنقاهاا بالجهد ونطقات بصوت باااكي:صاااحبتي قوية وعمرهاا غاتضعاف على قبل واحد كلب مكيسواااش هوو لي خاسر تيقيني هوو لي غايندم حيت ضيع عليه الجُوهر الحُر لي كان بين يديه

بدلاتها رحيل لعناااق كتبكي بصمت وهي تتحس براسها تهدات..مبقا عندها جهد فين تزيد ولباتري ديالها ولا فيبل..الغدر لي تلقاتو ليوم عمرها غاتقدر تنساه حيت دقات بحال هادو كيبقاو مرافقينا حياتنا كلهاا..

فدار لعرس وبالتحديد فبيت النعاس لعريس لي ملي دخل وهو حابس راسو تم.. شوفتها فهاد النهار خلاتو يتخربق ويحس بالخنقة.. مقدرش يمحي صورة عينيها لي كانو بالنسبة ليه كتاب مفتوح قرا محتواه.. وقدر يعرف أنه جرحهاا بهادشي لي دار... وعقلو ديريكت مشى لداك النهار لي باقي محفور فداكرتو..

🔙🔙

واقف قدام لبحر وعيونو كانو كيشوفو فنقطة بعيدة وباين فيه ساهي كيخمم..محسش بالوقت ومحسش بيها هي لي واقفة موراه من مدة..تامدات يديهاا وقاستو فدراعو عاد وعى وحس بحضورهاا..شاف فيها وفديك الابتسامة لي كانت على وجهها..كما عادتها بسيطة وأنيقة فمضهرها المحترم...كانت لابسة سروال واسع فالكحل كلاس مع شوميز بيضاا وڤيست فلبلوغويال فيها صديفات ذهبين كتبان كلاص.. وبحجابهاا لي مقاداه بطريقة عصرية زغبة مكتبانش..مك اب خفيف فوجهها زاد برز عيونها لخضرين وبشرتها لحنطية لمناسبة لشهوبيتهاا...عيونو كانو كيتساراو على وجهها بنظرات غريبة لي مفهماتش شنو المغزى ديالهوم..

رحيل:(طلعات فيه حاجبها )اوا اسي ياسين شنو هاد لموضوع لمهم لي خلاك تخرجني من لخدمة وتجيبني لهناا

ياسين:(بهدوء)احم رحيل أنا

رحيل:(حبساتو بيديها)بلاتي قبل ماتهضر فين كنتي غابر هاد ليوماين

ياسين:(تنهد وبصوت واضح فيه لعيا)خليني نكمل هضرتي وغاتعرفي كلشي

رحيل:كانسمع

ياسين:(سكت مدة وهو مهبط راسو تانطق بهدوء)رحيل أنا غانتزوج

رحيل:(بقات تتشوف فيه تاطلقاتها بضحكة وضرباتو فكتفو)ههههه اش هاد الضحك لباسل

ياسين:(شاف فيها مدة وقال بهمس)مكنضحكش

منضرو وديك الجدية لي مرسومة على ملامحو خلاتهاا تجمع الضحكة وتجمد عينيها على وجهو وبصوت هادئ:مافهمتش؟!

ياسين:(زفر النفس وقال)غبرت هاد ليوماين حيت مشيت لتازة باش نخطب (ضور وجهو وتقابل مع البحر مكمل كلامو) أنا غانتزوج لوست ختي...حددنا النهار ومور شهر غانديرو لعقد (زير على يديه ولوجه باش يشوف فيها معندوش) نتمنى ليك تانتي تلقاي شي ولد الناس كما أناا لقيت بنت الناس لي باغي

رحيل:(كلامو نزل عليها بحال شي صاعقة لدرجة لسانها تشل عليها.. وبصعوبة باش نطقات)وأنا؟! ياك نتا قلتي ليا كتبغيني وبلي غاتجي لدارناا وبلي عندكوم مشاكيل فعائلتكوم عليهاا أجلتي لموضوع (قربات جهتو شادة فكتفو)هضر اياسين قول شي حاجة

ياسين:(شاف فيه وببرود)لي عندي قلتو أنا غانتزوج ونتي ابنت الناس الله يسهل عليك مع شي حد من غيري

رحيل:(حابسة دموعها بزز منها وحالتها ربي وحدو لي عالم بيها) ولكن علااش؟!

ياسين:(حيد يديها لي شاده بيها وقال)نسايني ارحيل وكملي حياتك كماا أنا غانكملها مع غيرك

بلامايتسنى جوابها عطاها بالضهر ومشا مخليها واقفة بجمود وعينيها فقط لي كانو كايتحركو ومتبعينو تاركب فطوموبيلتو ومشاا..صوتو كان كيتردد فمساعها وهو كينطق بدوك لكلمات لي شقو قلبهاا لمية شقفة...بحال الاكبيتي عليها شي سطل دلماا متلج خلا لحمهاا يتشوك عليهاا...أطرافها باردة ولكن لداخل ديالها كانت شاعلة فيه لعافية لي صعيب تطفى...

ناض بزربة بحال الاعضاتو شي لفعة...كيضور فالبيت بحال شي أسد جريح...طول هاد الشهر كيتفادى شوفتها ولاتجبد سيرتها ولكن غير شافها ليوم كلشي رجع تاني ليه بحال الاغير لبارح طرا داكشي لي طرا...مكيسواش...حيوان...غدار...شمااتة...عارف بلي هاد الألقاب كلهاا كتناسيو مبعد شي لي دار معاها مغاينكرش حيت بينو وبين نفسو معتارف بيهاا..رحيل مكانتش أي شخص عادي..

هي كانت إنسانة مختالفة..إنسانة لي عاش معاها حوايج عمرو عاشهوم مع غيرهاا...احترامها لنفسهاا خلاتو يتعلق بيها..

وقف فوسط لبيت حاط يديه على راسو لي قهرو بالتفكير فيهاا تاتحل لباب عليه ودخلات مو لي غير شافت حالتو وعرفات شنو سبابها..قربات جهتو حاطة يديها على كتفو ونطقات بجدية:العروسة نتاعك قربات تجي من لكوافور بدل حويجاتك باش تمشي تجيبها

شاف فيها ياسين مدة ونطق ببرود:شفتيها

عائشة:اييه شفتهاا ومن بعد شبغيتيني نعمل

ياسين:(هز راسو وضحك بهدوء)والو ماديري والو امي

عائشة:(كمشات عينيها)حيدها من بالك ومتنساشي راسك راك مزوج

ياسين:أنا كنبغي رحيل امي ونتي عارفة هادشي

عائشة:(خرجات فيه عينيها)تبغيك لفعة قول آمين..مانسمعشي سميتها على فموك نتيناا خصك تبغي مرتك فاطمة الزهراء وديك خيتي نساهاا ونحيها من بالك

ياسين:(نطق ببرود وهو غادي لجهة لبلاكار باش يجبد كوستومو)اجي نحيها ليا من قلبي...

----

جالسة فكرسي قدامها ويديها كيمشطو شعرهاا بهدوء وعينيها على ملامح وجهها لي باين فيهوم أثار لبكاا..بقات فيهاا وكون كان تقدر تهز معاهاا داك الحزن كون شركاتو معاهاا ولكن الغالب الله...بصعوبة باش قدرات تنعس مبعد ديك النوبة لي جاتها ولبكا لي بكاتو ولي خلاها تهد وتعياا..حسات بالشمتة من داكشي لي دار ياسين مع صاحبتها وكل دقيقة تدعي فيه عالله وعسى تبرد...تنهدات بتعب وناضت مخلياهاا ترتاح واخا عارفة بلي الراحة غاتهاجرها مبعد شي لي طرا معاهاا...وبلي صعيب ترجع رحيل لي كانت تتعرف..

"وَكأنكَ أنتَ والعالم اِتّفقْتمْ على كَسْرِي"

باارد وسخون ياهوى...بارد وسخون..تاحميتو فيا بزوج نتااا وسمااار اللون نتاا وسماار اللون..هوى ياهوى هاد النااار قوي مجهدة هاد النااار قوية مجهدة لاتبتر بيااا وبلاتي نولفك بعدااا وبلاتي نولفك بعداا...باااارد وسخون ياهوى ياااهوى..

على نغمات الأغنية لي كانت مطلوق من الراديو ولي كان تيتسمع فالگاراج ديال الطوموبيلات..كان واقف راجل فبداية الخمسينات بكومبين فالزرق كاشفة بالتصبين وفيها لاگريس وفجيب لوراني داير مشوار لي كيمسح بيه يديه...قدامو طوموبيل كيا فالرمادي والكابو ديالها محلول والرويضة لقدامية مزولة ليهاا....حاني راسو وداير نضاضر دالشوف فعينيه لي فجنباهوم تجاعيد ولي كل تجعيدة عندها حكايتها...مد يديه لجيب خدا منو لمشوار ومسح بيه وطلع راسو فجهة لولد لي كان واقف قدامو تاهو بكومبين زرقة كبر منو....حيد نضاضرو وشاف فيه بعيوناتو لكحلين ولي كينافسو ليل بسوادهوم ونطق بصوتو التقيل:واحد لبياسة هي لي عيات وخصها تبدل ملي يجي مولاها قول ليه من هنا يوماين عاد نجيبهاا

عمر:(حرك ليه راسو ونطق)واخا المعلم

بعد عليه وقرب جهة الراديو لي كانت مطلوق منو الأغنية وطفاه وقال ليه:حمد خلص داكشي لي بقاا ليه

عمر:اه المعلم وراه كتبتو فداك لكناش لي لهيه

مشا هز داك الكناش وبقا كيشوف فيه عاد مشا لجهة لبيرو الصغير لي تم وجلس فيه وجبد سوارتو وحل لمجر وبقا تيحسب فالفلوس لي كاينين فيه ويدير حسابو تالقاا واحد خمسين درهم ناقصة طلع فيه راسو وكمش عينيه:ناقصة واحد لخمسين درهم فين هي؟

ضور عمر عينيه كي موكة وقال تيحك راسو:الواليدة المعلم كانت محتاجة الدوا وخديتهاا ونسيت نگولها ليك

ادريس:(بقا تيحك لحيتو لي متخللينها شعيرات فالبيض وعينو عليه مدة عاد قال)المرة جايا جي علمني وماتبقاش تهز لحاجة بلاشواري

عمر:واخا المعلم سمحلي

ناض ادريس من بلاصتو ومشا لواحد لبيت تم حيد عليه ديك لكومبين لي لابس ولبس عليه قاميجة فالكحل مطلع ليها كمامها تابانو يديه السومر وداك الزغب لي فيهوم وخدا واحد كلينيكس حطو على واحد الضربة عندو فيديه تايعقمها...

خرج من تم وشاف فعمر:انا غادي لدار شوية ونرجع سيق نتا لمحال (هز صبعو فوجهو وقال بجدية) السوااارت نلقاا كل وحدة فبلاصتهاا تعاود تخربقهوم بحال لمرة لي فاتت نعلق والديك من زنطيطك

عمر:كون هاني المعلم..

طبطب على كتفو وخرج غادي فالحومة عاقد يديه مور ضهرو ولي داز من حداه يلقي عليه السلام..معروف فالحومة بلي داخل سوق راسو وعاطي تقارو لغيرو...عليها مالين الحوانت لي حداه والناس لي كيعرفوه كيحتارموه حيت فارض حترامو بنفسو...

داخل لدار بخطواتو الهاديين وعينيه لمحو جيداء لي كانت جالسة فالسطوان وباين فيها ساهية ومهمومة لدرجة مرداتش ليه لبال تاتنحنح ونطق بصوتو الهادئ:السلام اوعليكوم

جيداء:(هزات راسها وتلبكات من وجودو)عمي ادريس لباس عليك

ادريس:ولله الحمد مكاينش حد هنا؟!

جيداء:كاينة رحيل (تتفرك صباع يديها بتوثر)عيانة شوية راسها كيضرها او وجعاتها الضرسة بزز باش نعسات قبيلة

ادريس:(حرك راسة بهدوء ونطق وهو غادي لبيتو)عمري ليا واحد لبراد دأتاي بالشيبة

خلاها ومشاا لبيتو وهي ناضت لكوزينة تعمر ليه أتاي...

وصل لطاج الثاني فين كاينين لبيوت ديالهوم وقبل مايدخل لبيتو عينيه مشات ديريكت لبيت بنتو رحيل لي كان بابها مقابل مع باب بيتو..بخطوات بطيئة قلب طريقو فاتجاه بيتها تاوصل وبقا واقف مدة كيشوف فالباب ولبواني ديالو وبين صراع القلب والعقل انتاصر قلبو لي خلاه يمد يدو لجهة لبواني ويحلو بهدوء...كان الظلام حيت الشرجم مسدود ولكن غير تحل لباب الضو ديال برا خلاه يلمح جسدها لي كان فوق من السرير..قرب جهتها مدايرش لحس تاوصل حداهاا وبقاا كيشوف فوجهها.. كان باين فيهاا بلي بكات غير من نيفها لي ولاحمر ومن عينيها لي منفوخين واخا سداهوم...مد يديه بشوية تقاس حنكها كان سخون بزربة رجع حيد يدو...وبلا مايطول فيها الشوفة قلب الضورة خارج من لبيت غادي لبيتو باش يعقم الجرحة ديدو قبل مايرجع لگاراج تاني...

----

فوسط الربيع والخضورية لي كاتسلب لعقل كانت واقفة بلبسة بيضاا طويلة وفيها لفرافر مع فولار بيض.. مبتاسمة وحالة يديهاا وهي كتستنشق لهواء لي خلاها تحس بالراحة والفرحة لي بانت غير من خلال ضحيكتها لي خلات تستيفت سنانها يبانو...وعينيها كانو كيلمعو بواحد لبريق خاص... بدات تتمشى وعينيها كيشوفو فداك لعوينة لي كان نازل منها الماا بحال شي شلال...ضحكات ومشات بحماس باغا دوق لماا ديالو..نزلات تتشرب من داك لماا لكاان بارد وبنين مكتسخااش منو.. واخاا كرشها حساتها عمرات بالما الاان جوفها باقي محتاج ليهوم..هزات راسهاا كتشوف فداك الشلال كضحك تابدات ديك الضحيكة تتمحى من على وجهها ملي بان ليها واحد الذيب كحل وعينيه كيلمعو بالحمر جااي لجهتهاا...كيخطي خطوات تقيلة وعينيه فعينيهاا...قلبها تهز ورجليها بلاماتحس بيهوم بداو كيرجعو بلور شوية بشوية باش تهرب...تشهقات فاش بان ليها ذيب أخر تيقرب منهاا...غوتات بالجهد وضارت تتجري وقلبها غايخرج من بلاصتو..كتغوت باش شي حد يعتقها ساعة مكان تاحد حيت لبلاصة كانت بحال الامهجورة...تتجري وتقول ماجريت ومرة مرة ضور لور تتلقاهوم باقي تابعينهاا...وهي كاتجري تعترات فواحد لحجرة تجات على فمهاا...تقصحات ويديها ضراتهاا ومع لهزة لي غاتهز راسهاا بانت ليهاا واحد لفعة طويلة قدها قداااش مخرجة لسانها وعينيها كيخلعو ومع بغات تهجم عليها مع حلات عينيها وهي تتنهج بالجهد وصوت أذان الصبح كيتسمع من أبواق الجامع لي حداهوم فالحومة....

كانت كلها عرقانة لدرجة شعرها لصق ليها فعنقها وجبهتهاا...صوت دقات قلبها كانو كيتسمعو بالجهد بحال الاكانت تتجري بصح...يديها كترعد عليها بالخلعة من ديك الحلمة لي شافت ولي عاشتها وكأنهاا واقع...غمضات عينيهاا تتحاول تضبط أنفاسها مدة عاد ناضت بخطوات تقيلة وهي حاسة براسها فاشلة وعضامها كيضروها بحال الاداز عليها شي تراكتور...خرجات فداك الظلام كتحسس الطريق تاوصلات لحمام دخلات توضات عاد رجعات لبيتها لبسات إسدالها وصلات الفجر وموراه صلات زوج ركعات وبقات جالسة فوق من الصلايااا تدعي الله يجبر خاطرها ويرمم داك الكسر لي فقلبها ويعطيها القوة باش تكمل...غير سالات جمعات صلايتهاا وشافت فالسماا لي بدات تتلون بخيوط بيضاا لاستقبال يوم جديد...بقات واقفة تتشم فداك لهوا وعينيها على الزنقة لي كانت شبه خاوية عاد تنهدات ومشات سدات الشرجم ورجعات تخشات بلاصتها نعسات وهاد المرة حسات بالراحة "الابذكره تطمئن القلوب" عكس لمرة لي فاتت...

----

فمكان أخر وبالتحديد فأوطيل "Le DIWAN" المتواجد فمدينة الرباط...فين كانو العرسان مدوزين ليلتهوم الأولى...كان ياسين يالاه سالا تاهو صلاتو وضار جهة فاطمة الزهراء لي كانت ناعسة عريانة ومغطية غير بإزار خفيف ونصو طايح ومخلي جسمها يبان وشعرها القهوي مطلوق...قرب جهتها مكمش حجبانو وبدا كيغطيهاا عاد بعد عليها ومشى جهة لكوافوزة فين كان تلفونو محطوط هزو ومشا لقنت دلبيت وجلس فالأرض...عينيه على الشاشة دالتلفون وبضبط على تصويرة رحيل لي كان داير فالخلفية بقا كيشوف فيهاا مدة عاد دخل لگالوري ومشا لضوسي مسميه R❤️ دخل ليه وطلعو ليه تصاورها لقلالين عندو...بقا كيتفرج فيهوم وحدة مور وحدة وكل دقيقة كيتنهد ويتحسر على الإنسانة لضيع بيدو...هز عينيه ففاطمة الزهراء لي كانت باقا على وضعيتها وسرط ريقو...كان متمني تكون هي بلاصتها داباا وتكون مراتو وحلالو بين يديه وتاحد ميفرقهوم...تمنى كون رجع الزمن لور ورفض طلب مو وبقا متشبت برأيو...تمنى ولكن كيبقاا التمني شيء والواقع شيء آخر...بتاسم ملي شاف صورة ليها كانت مصوراها فإفران مبتاسمة فيها لشخص لي لتاقط الصورة...بقا كيدقق فيهاا ويزوميها مدة عاد نطق بهمس:غاتبقاي ديما فقلبي ابنت قلبي...

فقهوة متواجدة فأكدال... قهوة ديال الناس لكلاس جالسين فيها مجموعة من لبنات ولولاد باين فيهوم من الطبقة لي عندهوم لفلوس غير من لباسهوم ولي مارك دالسيكان لي عند لبنات.. وتاهي مكانتش قل منهوم بسروال دجين طاي هوط مع شوميز نواغ بلاكمام وسبرديلة بيضا كتشقشق... طالقة شعرهاا القهوي لمسرح مور ضهرهاا ومخلياا لافخونش طايحة على عويناتها لمكحلين بكحول مبين لون عينيها القهوين...عضات على شفتها فاش حسات بيديه طالعة مع ضهرها وبتسمات وهي تتشوف فيه جالس مفطح حداها بتيشورت فالرمادي وسروال دجين غامق وشعرو الكحل مخربق بطريقة محببة...هاز فيدو الشيشة الإلكترونية كيكميهاا..بخ دخانها عليها تاكحبات وكمشات حجبانهاا:آداااااام

آدم:(ضحك بالتقالة وعض على شفتو بنابو)رووووح آدااام

رجعات شعرها مور ودنيها وتحنات جهتو:متبقاااش تبخ عليا هاد الخراا

آدم:(هز حاجبو)ياك تتكميهاا شنو المشكيل

هزات كتافها وطيراتها ليه وبخات منهاا باحترافية عاد شافت فيه:المشكيل هو ديك لحركة لي تادير متتعجبنيش

_أسماااااء..

ضارت أسماء جهة لبنت لي عيطات ليها وغمزاتها:شنو؟

هاجر:تافقنا أنا ولبنات نمشيو لكازا غدا ندوزو نهار تماا ونتبحرو لينا شنو بان ليك

أسماء:(لعبات بالخاتم لي فيديها وقالت) غدا عندي مايدار ومغانقدرش نمشي معاكوم

آدم:(تحنى عندها ونطق بهمس بينو وبينها) نسيتي بلان غدا

أسماء:(شافت فيه وهزات حاجبها)ونتا نسيتي كلامك لياا

آدم:(باس كتفهاا)صيفطي ليا السيڤي ديالك ونعسي على جنب الراحة

أسماء:همم غانشوفو

آدم:(همس ليهاا تاني)شنو بان ليك نتحركو من هناا

أسماء:(همسات ليه بدلع)غايخصني نمشي دابا احياتي عندي مايدار

غمزاتو وهزات صاكها وخرجات من الكافي وهو بقا متبع ليهاا الشوفة وفدماغو شلا بلانات...

"لاشيء أسوء من خيبة أمل تجسدت على هيئة شخص كانت له مكانة في قلبك"

جالسة فالسطح هي وصاحبتها جيداء...وجهها كان ذابل وتحت عينيها منفوخ وحمر...باقي مقدرات تنسى داكشي لي وقع ليها لبارح ويمكن عمرها تقدر تنساه...ياسين مكانش شخص عابر فحياتها إنما كان شخص لي عطاتو تقتهاا ومشات معاه بنيتهاا..بغاتو ومغاتنكرش هادشي وفاللخر هو شنو دار عطاها بالضهر بدون مايعطي تاشي مبرر لي يخليهاا تعرف علاش خلاهاا... تنهدات وحكات جبهتهاا بتعب تاسمعات صوت جيداء لي نطقات: باقي تتفكري فداك الشماتة؟!

رحيل:(هزات فيها راسها وبصوت باح)الشمتة اجيداء صعيب تنسى

جيداء:مخصكش تفكري فيه هو نساك وعاش حياتو مع غيرك باعك بالرخيص فالوقت لي نتي شريتة بالغالي

رحيل:(ضورات وجهها وعينيها لمعو بالدموع)بقاا فياا راسي اجيداء

جيداء:(قربات جهتهاا وعنقاتهاا)لي دازت على الراس تتنفع نتي مشيتي معاه بنيتك وربي مغايخيبكش تيقي بياا غايجي النهار لي يندم عليك وديك الساعة ندامتو مغاتفيدو بوالو (شدات وجهها ونطقات بضحك)صحيبتي لي كنعرف قوية وماشي كلب لي يخليهاا تهرس (هزات كفوفها ونطقات)يااربي فيما يبغي يح*ي بغيتو ينعس ليه بحال القط المجراب

رحيل:(ضحكات وهي تتمسح دموعها)ههه هبيلة والله

جيداء:(نطقات بحماس)مشتيش لبارح ملي نعستي دخل عمي ادريس وقال ليا نصاوب ليه براد دأتاااي اااح اصاااحيبة واقيلا اخرتي نكون مرت باااك

رحيل:(ضحكات من نيتها على هبال صاحبتها)ههههه وتسمعك كلثوم تريشك ههه

جيداء:داك تيتيز كولو باك صراحة الله كنشك حيت مكتشابهوش ياختي هو حروفو كحلين ونتي شهبة كيف درتو ليهاا ولكن بلاكدوب باك راه طياااح السااطة

رحيل:ناري ويسمعك عمرك مزال تعتبي باب دارنااا هههه

جيداء:(وقفات تتعوج وتتلعب بشعرها لقهوي الطويل)هاد الزين كولو وميبغيهش بااك امبوستحيل

رحيل:(شادة ليها لخاطر)اوا ديري شي خطوة اصاحبتي

جيداء:ياتكون كلثوم ساحرة ليه يايكون باك كيبغيني وغير حشماااان

ضحكات رحيل بالجهد ضحكة طالعة من أعمااق قلبهاا على هضرة جيداء لي فكل مرة تتبقا تجبدهاا ليها وتغزل ليها فباهاا..أما جيداء ضحكات فاش شافت بلي هضرتها خلاتها تنسى شوية شي لي طرا معاها وهي هادشي لي بغات

جيداء:شبان ليك نخرجو نشمو شوية دلهواء

رحيل:(ناضت تتكسل)نيت تخنقت من الدار

جيداء:مهم غانمشي لدار نوجد راسي ولي سالات بكري دوز عند لخراا اوكي حوووبي..

هزات رحيل راسها باه ودخلات لبيتها توجد راسهاا باش تخرج تفوج شوية وتحاول تنسى داكشي لي وقع ليها واخا صعيب يتنسى...

نزلها الطاكسي وخلصاتو وكملات طريقهاا لحومتهاا وهي هازة راسها لسماا بغرور...كتفكر وجه آدم كيف غايكون مور ماخلاتو بوحدو وهو لي كان داير فبالو يفوج معاه شوية ساعة دوماج...وقبل ماتكمل طريقها حسات بيد جراتهاا ومع هزات راسها بان ليها الشمكار ديال الدرب لي مزعوط فيها زعطة دلكلاب...نثرات يديها بين يديه وهزات حاجبها بعصبية:وااش هبلتي فمخك ولامالك

طلع فيهاا عينو ونطق بصوتو المشرمل:تشي مااالك از*ي هازة عليناا خنافرك لسما ممعبراناااش

أسماء:(طلعاتو ونزلاتو بنظرة عنوانها الإحتقار ونطقات)نعبرك (أشارت ليه بصبعها)نتا هههه افيقي احنيني راك سكرتي ومجبتي خبار لراااسك واحد بحااالك راه الشوفة هي لخرة ميستاهلهاااش مني عاد نعبّرو ونزيدك أخر مرة توقفني بهاد الطريقة والاسخن عليك ك*ك وعاوتيهااا صحاب لحااال "لبووليس" يبردوه ليك ميكروب كيداااير

خلاتو ومشات تتنگر وحاسة براسها كيغلي من هاد التصرفات لي كايدير معاها هاد الشمكار على قولتهاا لي غير الشوفة فيه تخلعك حيت وجهو كولو سيكاتريس بسباب لمدابزات لي كيدابز ولوشام لي معمر وجهو ويديه وماشي وشام دلبروفيسيونيل غير داك لعداوي لي كيديروه أغلبية دالشماكرية لي كيبغيو ييانو بيه ومعارفينش روحهوم بلي داكشي غير مرض وصافي...وصلات لدار وحلات لباب بالساروت ودخلات وهي كاعية..داك لمورال لي كان طالع عندهاا دغيا نزل بشوفة وجه النحس لي مبغاش يتفرق معاهاا وكل مرة يوقفهاا تاكرهات الحومة بسبابو...هزات راسها ملي سمعات لحس وهي تبان ليها رحيل نازلة من الدروج بلباسهاا البسيط والمحتشم كما عادتها..نطقات بصوتها الهادئ:عاد جيتي

أسماء:(هزات فيها حاجبها وقالت ببرود)ماشي سوقك نجي ولانبقاا ديها فراسك وفرقيني عليك

رحيل:(حركات راسها بلاحول)عمرك غاتبدلي اأسماء غاتبقاي ديما هاكا قليلة الأداب

أسماء:(ناضت هازة صاكها وببرود)عجبني راسي هاكاا وبصحتتتتي...

فواحد من لموبلات لي جاو فحي راقي فمدينة الرباط وبالتحديد فأحد لبرطمات كان جالس آدم بشورط قصير وشعرو لقهوي سارد بالماا... وحداه واحد لبنت شعرها زعر ومن لونو كيبان راه صبغاه وماشي لونو الطبيعي...لابسة تيشورت ديالو مبينة سيقانها وترمتها لمنفوخة بالسيلكون وشادة بين يديها گارو تتكمي فيه وتبخ وقدامهوم طابلة فيها قراعي ديال الشراب والشيشة وباكية دلگارو...وطبيسيل صغير فيه لگرگاع ولبيسطاش ولوز..تحنات جهتو تبانت لفرقة دصدرها المتفوخ ونطقات بصوت غليض بسبب الگارو:مال سي آدم طالع ليه الدم..

آدم:(محني كيلعب بتلفونو لي بين يديه وقال)عمري كولو وأنا كنطيح الحجلات بضربة وحدة تال هاد لمرة صدقت أنا لي طايح

ابتهال:(ضحكات ضحكة ديال الشيخات مقح*بنة وشطحات صدرها بدلع) هاكيني على حوبي طااح ففخ الصيادة وبلاصة مايولي صياد صدق لفريسة

آدم:(شاف فيها بجنب عينيه)على أخير يااامي يشمتو فيا لقح*اب

ابتهال:(دارت رجل فوق رجل ببرودة نثرات من الگارو) قح*بة وقاضية ليك الغراض احوبي وسير نكر هادي

آدم:(طير ليها لگارو وقال بسخرية)معلوم راه خدمتك هادي خصك تكوني بروفيسيونيل فيها

ابتهال:(تحنات عليه وقالت بهمس)من نهار نعست معاك عمري مالقيت لي ينغمني بحالك فلفراااش (باستو فشفتو بوسة سطحية وبعدات)

آدم:وعمرك غاتلقاااي

ابتهال:(قلبات لهضرة)ماقلتيش ليااا شكون هاد لحجلة لي مطاحتش ليك فلمصيدة وطيحاتك هي

آدم:(طلعها وهبطهاا بشوفة قاصحة)ونتي لاش باغا تعرفي

ابتهال:لربما عاونتك وخليتها طيح ليك

آدم:(تقاد فجلستو ونطق يجدية)كيفاش!

ابتهال:(عضات على شفتها)كل حاجة بتمانهاا احوبي

آدم:جاتك غير طلقينااا خلاص

ابتهال:(غمزاتو وقالت)كل بنت همها هي الجلدة لي بين فخادها ونهار تمشي لها بزز تيتهرس جناحهاا والفاهم يفهم

آدم:(غمزها) والقاري يتهجى

واقفة حدا باب الدار بقميصهاا دلموبرا وفولارها دلحرير هازة فيديها بلاطو فيه زوج كيسان دلحليب وطبيسيل دالتمر معمر بالگرگاع... وحداهاا كانو واقفات خوتاتها وبناتها وشي عيالات من عائلة لعروسة فاستقبال لعرسان لي جااو من لوطيل مبعد مادوز تماا ليلتهوم لولة...نزل من طوموبيلتو بجبادور ديالو وبليغة صفرا وضور عينيه لعروستو لي كانت نازلة يجلابة فالبلونكاسي دلعريسات وشعرها لقهوي كان مطلوق عادي ولكحول فعينيهاا وغير الشوفة فيهاا تعرفيها عروسة جديدة حيت السر طايح عليها...تسناها تاجات لعندو بخطوات بطيئة ومد ليهاا يديه تاشدات فيه بيديها لي كانت منقشة بالحناا وفيها خاتم دلمارياج وهو مبتاسم ليها بهدوء... تحت أصوات الزغاريت دلعيالات لي مرحبين بلعرسان فصباحهوم...كانت مشيتها معدبة وباين لعمى يالاه صبحاات...وقفو قدام مو وهز كاس دلحليب شربها وعطاها تمرة وهي دارت معاه نفس الشي...عاد بداو لعيالات كيسلمو عليهاا ويباركو ليهاا صبحيتهاا وهو واقف بعيد عليهوم شوية...ضور وجهو وهي تبان ليه مولات دعوتو جاياا مع جيداء...لهاد الدرجة لقدر خبيث تارجع لقاه بيهاا فصبحيتو...عينيه كانو كيسكانيوها بدون مايحس ولايفطن براسو...تدازت حداه بلاماطلع فيه عينيهاا ولاتشوف فيه الشوفة بحال الامكاينش...

فقط عطرها الخفيف ذو النسمة الآسرة هو لي وصل لجيوبو الأنفية ملي دازت حداه... ما شعرش بروحو وهو متبعهاا بعينيه تانغزاتو مو ونطقات بهمس كتنهض فيه:اويلي على الزغبي واش نتينا بغيتي تفضحني جمااع عينيك قبل ماتشوفك مراتك ولايماااهاا استغفرت الله العضيم..

ياسين:(شاف فمو ونطق ببرود)كون ماسخطك كانت هي لغاتكون بلاصتهاا

تخطاهاا ودخل لداخل ممسوقش باقي لالمرتو ولا لمو ولاتاشي قمقوم...فقط بغاا يعزل راسو ويبقا بوحدو ويفكر فحياتو لي تقلباات وفراحتو لي مشات من نهار خطاتو لهالكاااه...

كون خشى فيهاا موس فقلبها كان غايكون حسن من أنها تشوفو فداك المنضر لي زاد هرسها كثر ماهي مهرسة...ابتسامتو لي كانت مرسومة فوجهو لامرأة آخرى غيرهاا فتحات ليها مواجع لي حاولات تخطاهوم وتنساهوم...معرفاتش ملين جاتها ديك لقوة تدازت من حداه بداك لبرود ولي كتستاحق عليه جائزة الأوسكار..

يمكن داك المنضر على قد ماقصحها وضرها وگضها وخلاهاا تفيق وتعيق..

جيداء:(بهدوء) رحيل نتي بخير؟!

رحيل:(شافت فيها وبابتسامة ماوصلاش لعينيها)بخير ماتخافيش علياا

جيداء:(بهمس)وقلبك؟!

رحيل:(حطات يديها عليه)غايولف بزز منو خصو يولف...

فالتيرانات لي تصاوبو فطريق باب مريسة فالرباط وبالتحديد فواحد من دوك التيرانات كانت مجموعة من دراري كتراوح أعمارهم مابين 19/25 عام كيلعبو ماتش دلكورة...كان صوت لغوات هو لي كيتسمع من دوك الدراري لي متفرجين فالماتش....

كان واحد من الدراري كيجري وهو غادي بالكورة وعينيه على المرمى ديال الفريق الثاني...من الشوفة باين عليه مركز وفالدقيقة التسعين جاا واحد الدري من الفريق الثاني طير ليه الكورة لي بين رجليه مخليه واقف مضهشر على ديك الخطفة لي دار ليه...أما هو كمل طريقو وابتسامة خفيفة ترسمات على شفتو وعينيه لخضرين بحال لون الربيع مركزين على الهدف...هز عينيه وبان ليه صاحبو وهو يغمزو بخفة وصاحبو فهم المعنى ديال ديك الغمزة...رمى ليه لكرة وفدقيقتها صاحبو رجعها ليه بضربة عالية تاتهز من بلاصتو ضاربها براسو جهة الشبكة وموراها تسمع صوت الدراري لي نطقو ب "گوووووووول"

مراد:ومفعااااايلش هاااادو اصااااحبي والله مفعااااايل

ضحك تبانت تستيفت سنانو وحك لحيتو لخفيفة ناااطق:هادا هو اللعب اعشيري

هشام:اشمن لعب ونتاا غافلنا ديك لغفلة دلكلاب

توجه جهة شكارتو وخدا قرعة دلماا وحلهاا جغم منها شوية وماتبقى كبو فوق شعرو القهوي وهز راسو كيحركو وقال:ههه وبقاو تردو لبال ومغانغفلكومش

مراد:بالرجولة امحمد طه الماتش كان مقووووود وهادي گاعما كنا عوالين عليه وطلع هاكا

محمد طه:(حط يديه على كتف مراد)الحاجة دالغفلة ديما تتكون بحلاوتهاا

كمال:خليونا نلعبو ماتش تاني

محمد طه:(هز شكارتو وشاف فيهوم بهدوء)الشباب انا غانمشي تبعاني لخدمة فلعشية نتقاشعو مرة خرا فماااتش أخر تهلاووو

هز شكارتو او ودعهوم وخرج غادي لجهة الطوبيسات ركب ومحتاجش بزاف دلوقت تاوصل لمحطة فين غاينزل وهبط وهو محاملش راسو بريحة العرق...غير وصل لحومة وبقا يسلم على دراري لي تم عاد كمل طريقو لجهة الدار حل لباب ولقا السكات أصلا مو مسافرة وباه كيكون فالگاراج فهاد الساعة...طلع لبيتو وخدا مسائلو دلحمام وحوايجو ودخل ضربها بتحمحيمة دلغدايد عاد خرج مخلي ريحة الباندوش والشومبوان موراه...لبس عليه سرواب دجين غامق مع شوميز كارويات فالبلوماغي والطابة ومشط شعرو القهوي مفيكسيه ولبس تقيشراتو وسبرديلتو عاد هز تلفونو وسوارتو وبزطامو نازل لتحت وهي تبان ليه أسماء مكسلة فالصالون تتشرب فالعصير دخل لعندهاا ونطق بهدوء:كاين مايتكال ؟!

أسماء:(جوباتو ببرود وهي تتلعب فالتلفون)شوف فالكوزينة

محمد طه:(لعب بلسانو ففمو ناطق بجدية)نوضي حطي لياا الغداا

أسماء:(خنزرات فيها)مااالي خداامتك تت

محمد طه:(نهض فيه بعصبية)اتنوضي تحركي ولانعاود لختي لافيشور (غوت)تحررررركي..

تفعفعات فبلاصتها وناضت بلهلا يطريه ليها...من طبعها كدفع السنطيحة ولكن غير تتشوف المعقول تاتولي طالبة السلاكة...مع العلم هي كبر من محمد طه بتلت سنين الاأنه فارض راسو مع خوتاتو وأصلا هو ممضسرهاش حيت هي ماشي من النوع لي يستاهل ضسرو...ناضت تتبرگم ومكرهاتش تسب ساعة خافت لاتجيبها فضلوعها وفضلات تسكت وتسبو بينها وبين نفسها...أما هو بقا جالس كيبقشش فتلفونو على ماتجيب ليه الغدا...محتاجتش وقت بزاف تاحطات ليه طبسيل ديال الدجاج بالبطاطا والزيتون...هز حاجبو وهو كيشوف فديك لبطاطا لي غارقة فداك لبلول وهو ينطق بسخرية:مال لبطاطا تتغرق؟!

أسماء:شبغيتيني ندير ليهااا

محمد طه:رجعي هادشي تايشرب لمااا وعادي جيبيه ليا

أسماء:(هزات الطبسيل بشتفة وقالت)اووووف

مشات تاني كتسخن على وعدها وسعدها تاتشربات لمرقة لماا عاد حطاتها ومشات لصالون...سمى الله وبدا تياكل تاسالا عاد تاض جمع الطبلة وغسل يديه وسنانو وخرج من الدار بلاميحاشيها ليها وتاهي متسوقاتش ليه...

----

فحي المعارف المتواجد فمدينة الدار البيضاء... حي راقي وكالم فيه غير لموبلات لهاي كلاس ولپتي ڤيلات...فوحدة من دوك لبرطمة لي ديكورها كان كلااس وزوين لامن ديزاين ديالها ولافراشهاا لي باين فيه ساوي التمان... ولي ختارو دواق وكيعشق فالتاويل...كان صوت بنية صغير تتلعب وتلاغي كيتسمع فالدار... وفواحد من لبيوت كانت واقفة مرا فمنتصف العشرينات لابسة بيجامة أنيقة بتوبها لحريري فاللون لباج وبنوار فوق منهاا...طالقة شعرهاا الزعر بأريحية مور ضهرها... هزات واحد ريحة كانت محطوطة فالطابل دونوي رشاتها تحت ودنيها وفمعصم يديها ورجعاتها بلاصتها عاد هزات تلغونهاا وخرجات فاتجاه الصالون فين كانت بنتهاا تتلعب... جلسات فوق السداري وعينيها على التلفون لي بين يديها تاحسات بيدين صغار تحطو فوق من ركابيهاا وبصوت طفولي باقي ممفرزش حيت يالاه عندها عام ونص نطقات لبنيتة:ماما ااايييو دوو

شافت فيها بعويناتها الخضرين وفريوگها لي كانو سايلين مع نيفها حيت ضاربها لبرد وهي تخسر سيفتها ونطقات بنرفزة:هادشي لي كان ناقصني تفووو

خدات سغڤيت وبدات كتسمح ليها نفيها ونثرات ليها السكاتة وبدات تتمسح فمهاا وهي قالبة وجهها معيفة ونطقات: هاد السكاتة خصني نحيدهاا ليك مناقصني مشاكيل بفففف

ناضت كتمختر لكوزينة لاحت لابوبيل ورجعات لصالون جلساات تتلعب فشعرهاا وتلفونها فيديهاا گاعما مسوقة لبنتها لي كانت تتهضر معاها وتلاغي...

تاتسمع حس لباب وهي تقلب ليليان الدورة غادة تتمشى بديك لمشية ديالها لعجيبة وتكوز فترمتهاا لي باين فيها ليكوش من ديك لكومبين لي لابسة فالغوز وشعرها لقهوي مجموع گرينااات جااات كيوت غار ديال لبوساااان والماكلة...مع تحل لباب مع مشات تتزرب فخطاويهاا وتصدر صوت باين فيه لفرحة...سد لباب وجلس على ركابيه حال يديه تاجات تلاحت عليه وهو يعنقهاا وباسها كيشم فريحتها ويتنهد...هزهاا بين يديه غادي بيهاا لداخل... وعينيه مشات لمرتو لي كانت باقي على جلستها ومهزاتش راسهاا من فوق التلفون ولامعبرهاا... حط سوارتو فوق الطبلة وقرب جهتهاا تاوصل حداهاا وتحنى باسهاا فوق راسها ونطق بحب:شيغي صافا ؟!

هزات راسها وجوبات ببرود:مم وي ونتا

جلس وجلّس بنتو فوق من ركابيه كيلعبهاا وعينيه الكحلين متبعينهاا بحب وحنان:وي حمدلله (هز عينو وشاف فيها) صونات عليك ماما اميس ونتي مجوبتيهاااش...

ميس:(ببرود)ماشفتش التلفون اإسلام

إسلام:(تنهد وقال)ياك شاداه فيديك ضروري مغاتلقاي أبيل ديالها..

ميس:(هزات فيه حاجبهاا وقالت بعصبية)وااش باغي ندابزو فهاد الليل على قبل حاجة تااافهة؟!

إسلام:(بقا مطول فيها الشوفة مدة تاتنهد وقال) ماوقع باااس غير كانت بغات تعرض عليك لسبوع إلهام

ميس (لوات فمها):امم صافي مزيان

قالت كلامها وناضت غادة لكوزينة توجد لعشا مخلياااه كيتنهد لمرة الألف يمكن؟! ولعياا باين فملامح وجهو لبشوشة ولي دغيا كدخل لخاطر والشوفة فيه كتريح حك لحيتو لخفيفة...باس ليليان فراسها وناض حاطها فبلاصتها فين كانت تتلعب ومشا لبيتهوم لي فأخر لكولوار شعل الضوو ودخل مغمض عينيه وهو كيشم ريحتها لي مخليااها فالبيت..وقف قدام لبلاكار وهو كيحل صدايف قاميجتو تازولهاا وحطها فوق كتفو وخدا تيشورت مع سروال بيجامة وكالسو وفوطة نقية ودخل لحمام ياخدد دوش يرخي فيه عضيماتو ويزول ستريس دالنهاار وكلام مو لي باقي كيضور فدماااغو...

دخلات لكوزينة وهي معصبة وعلى سبة...دارت لماا يسخن ومشات لجهة لبلاكار حلاتو وخدات غراف دلباط ورجعات سدات لبلاكار بالجهد تاتسمع صوتو...تتوجد فالعشاا وصوت المواعن كيتقرقبو تقولي غير شي حرب نايضة ساعة هي معصبة وعصبيتها تتخرجهاا بهاد الطريقة...خرج من لحمام تيحك شعرو بالفوطة الصغيرة وهو مكمش حجبانو فاش سمع الصوت لمواعن ودخل لعندها لقاهاا تطحن فالعصير تنهد وقرب جهتها باسهاا فحنكهاا تشافت فيه وقال:مالكي معصبة؟!

ميس:(قلبات عينيها)مماليييش

إسلام:(قلب لهضرة )نعاونك؟!

ميس:(تتجاوبو بنفخة)بلااااش

حرك راسو ليها وخرج غادي لعند بنتو لي غير شافتو بدات تتصفق بيديهاا فرحانة...أما ميس غير خرج وهي تمسح وجهها وبالتحديد لبلاصة فين باسها ورجعات تتكمل شغالها...بعد مدة كانو جالسين فالصالة مونجي بزوج وليليان تاهي مجلسينها فالكرسي ديالهاا وحاطين ليها طبيسيل الخاص بيها فيه لباط وهي تتاكل بيديها وتتبقا تخربق وتهضر غير مع راسهاا تشافت فيهااا ميس وهي تكمش حجبانهاا ونطقات بعصبية:ليليااان أغيييييط

قفزات ليليان بلاصتها فاش غوتات عليها مها ودلات شنيفاتها بحال الاغاتبكي أما ميس كملات كلامهاا بعصبية وصوت عالي:هااااادشي لي ناااقصني أنااا هاااد النهااااار تفووووو

إسلام:(نطق بهدوء)ششش علاش تتغوتي عليهاا

ميس:(شافت فيه)واااش ماشفتيش شنوو دارت تتوسخ راسها وتوسخ الدنيااا

إسلام:باقا بنت صغيرة اميس وطبيعي فهاد لاج تولي حركية وتستكشف وتوسخ

ميس:(ضربات يديها فوق الطبلة ونطقات)وأنااا ماااشي خدااامة بااااش نبقااا تبعاااهاا ونقيهااا كل مرة وسخات راسهااا فيهاا سمعتي

إسلام:(هز فيها حاجبو)واقيلااا راها بنتك ومن لواجب عليك كأم ديري گاع هادشي لي قلتي وزايدون راه لخدامة تتجي فالنهار تتعاونك فالروينة وكلشي تامن لماكلة بعض لمرات تتوجدها ليك

دفعات ميس لكرسي بعصبية ومشات جهة بيتهاا مخلياا ليليان تتنخصص ببكية سكوتية خلات قلب إسلام يتقطع طراف على منضرهاا...تنهد وناض جهتهاا هزهاا هاكا بوسخهاا وعنقهاا لعندو كيبوس راسهاا وهي طلقها ببكية مسموعة...أما هو بقا كيسكت فيهاا وحجبانو ملاقين وباين فيه كاعي من صوت بكااهاا وتصرف ميس وعصبيتها مع بنتهوم لي ماشي أول مرة ديرو...

قلبو ضارو على بنتو وعلى معاملة مها الجافة معاهاا...عمرها حسساتها بالحب والحنان ولاهتمات ييها كلشي كيديرو هو ولاالخدامة...وهادشي كيزيد يخليه يحزن على ليليان لي هاد المعاملة كتأثر على نفسيتها...مبعد ماسكتها مسح ليها وعطاها لخاطر تاكلات عاد هزها لبيتها لي ملاصقة مع بيتهوم بدل ليها حوايجها وليكوش ملبس ليهاا بيجامة خفيفة دالنعاااس..وبقا معاها مدة تاغفات بين يديه عاد حطها بلاصتهاا وطمن عليها عاد مشا لبيتو...دخل لقا ميس ناعسة گاعما مسوقة شي لي عصبو وفهاد اللحظة مقدرش يتحكم فراسو...وقف قدام راسها حاط يديه على نصو كيشوف فيهاا شوفة قاااصحة عاد نطق بصوت باين فيه معصب:مرتاااحة بحال الامخاااصك تاخير

ميس:(حلات عينيها فيه وببرود)مالك تاني

إسلام:(غوت فوجهها)شوفي نتي ماااالي واااش درية صغيرة مغوتة عليهااا ومبكياهاا وفلخر جايا ناعسة يااابرودة دمك اختي

ميس:(لاحت لغطا وناضت تاهي معصبة)شنو بغيتيني ندير ليهاا مثلا

إسلام:ماتغوتيش عليهااا وديري دورك راكي مهااا

ميس:(ربعات يديهاا ونطقات ببرود)ههه شنو زعمة دابا انا بوحدي لي غااالطة ياك حيت كنربيهااا غلطت ولاحيت نتا مفششها بلاااقياااس

إسلام:مفششها وبصحتي الالة هاااديك راااه بنتي وبنتك متنساااايش هادشي وكون كنتي نتي تاديري دورك كأم مغاتلقاااينيش كاندوي معاك ونبدا نبه فيك

ميس:(خرجات فيه عينيها)شنووو داباا الغلط دياالي يااك حيت تنربيهااا

إسلام:(عقد حجبانو ونطق بجدية)التربية عمرهاا كانت بالغوااات اميس وخصوصا لبنية فعمرها عام ونص والانتي باغاا تربيهاا ربيهاا كما خص تربى ماشي كل مرة تغوتي عليها وتبكيهااا (قرب جهتهاا عاض على شفتو وغوت تاتهزات من بلاصتها)أقسم بالله ولي خالقني وخالقك الاعاوتيهااا اميس حسابك معايااا ايكون مقوووود سمعتي كلشي نسمح ليك فيه الااااليليااان راهاا خط حمر بالنسبة ليااااا...

مشاا لبلاصتو خدا مخدتو وخرج من لبيت ساد لباب بالجهد تاتهزات وقلبها بدا كيضرب بالخلعة...غواتو عليهاا وهضرتو لي قااال خلاتها تقفقف بلاصتهاا حيت عمرو ماتعصب عليهاا ولاغوت هو إنسان مسالم وبالعكس مفششها بلاااقياااس وموفر ليها لي بغات ولي حلات عليها فمها راه تحضر ليهاا..ولكن دابا القضية ولات فيها بنتو وبنتهاا ليلياان...يمكن يسمح فمشاكيلو معاها وينسى ويدير لماا ملين يدوز ولكن توصل لبنتو هناا وحبس...صبر وصبر وزاد صبر ولكن لصبر حدود...وتصرفها ليوم هو النقطة لي فيضات لكاااس بالنسبة لإسلام لي كان ديما كيلاحظ ويشوف ويحاول يهضر معاهاا بالتي هي أحسن ساعة هي غير مزادت فيه...تكمشات بلاصتها كضور عينيها فالبيت وباقي لخلعة دغواتو شادة فيهاا...

----

جالسة فبيتهاا والتلفون فيديها كتشوف تصاورها هي وياسين تاتفكرات المنضر لي شافت ليوم ولي خلا الجرح يزيد يغمق داخلهاا...تنهدات وبدات تتمسح دوك التصاور وحدة بوحدة تاحيدات كلشي من عندهاا ومشات مسحات نمرتو من التلفون وحيداتو كاع من لغيزو سوسيو "وسائل تواصل"...ناضت بخطوات تقيلة جهة لبلاكار ديالها وجبدات واحد الصنيديقة ورجعات جلسات فوق النموسية وحلاتها كانو فيها بواطات دلزاكسيسوار ديالهاا هزات واحد لبواطة فالزرق ملكي حلاتها لقات فيها سنيسلة ديال ذهب مع حويلقاتها وخاتم زوينين وسامپل تأكدت من الروسي واش فيها ورجعات جبدات واحد لگرميط تاهو وحطاتو حدا ديك لبواطة ورجعات الصنيديقة لبلاصتها ومشات خدات لخرين حطاتهوم فصاكهاا

طفات الضو ومشات جهة الشرجم كطل...لحومة كانت شبه خاوية حيت الطناش دليل...قليل فين كيدوز شي حد من غير ولاد لحومة لي مقصرين كيف عادتهوم فراس الدرب... طلعات عويناتهاا كتشوف فالسماا لي كانت صافية ومزينة بنجومهاا فمنضر شاعري...وابتسامة صغيرة ترسمات على شفايفها فاش تفكرات راسها ملي كانت صغيرة وكانت تتحسب النجوم...ابتسامتها بدات كتلاشى شوية بشوية وهي كتفكر بقية طفولتها لي أحيانا تتحاول تنساهاا ولكن الدكريات كيطوفو لمخيلتها بين لفينة والأخرى ..غارقة فتفكيرها تاسمعات صوت تلفونها ومشااات تشوف شكون لقاتها نمرة ممقيداش عندها...جات تجاوب وهو يقطع وقبل ماترجع التلفون لبلاصتو رجع صونى وبصوت هادئ جوبات:ألو

تسمع صوت أنفاسو... او وصلها صوتو الهامس لي نطق:بنت قلبي....

صمت رهيب طغى عليهوم فهاد اللحظة من غير صوت أنفااسو الغير منتضمة وأنفاسهاا الهادئة...آخر واحد توقعاتو يصوني عليها فهاد اللحظة هو "ياسين" داك الشخص لي خلاهاا وعطاها بالضهر فوسط طريقهوم أو بالآحرى ديك الطريق لي هي رسماتها فبالهاا وضناتو غايكون رفيق دربها فمشوارها ساعة كان العكس...مغاتنكرش وتقول ماحناتش لصوتو ولمعاملتو وليه ككل ولكن مجرد مكتفكر أنه راجل مزوج بوحدة غيرها كتزيد تكره دوك الأحاسيس الغبية لي كتحسهوم تجاهو...غمضات عينيهاا ودمعة يتيمة طاحت على خدهاا فاش كمل كلامو..

ياسين:(بصوت هامس باين فيه لعياا)أنا عارف بلي نتي دابا كرهاني ومن حقك أنا كلب مكنسواش حيت خليتك وسمحت فيك (سكت مدة وكمل بنبرة صوت متحشرج) أنا ممرتاحش ارحيل ممرتاحش فيما كنحط راسي على لمخدة تنشوف صورتك (كمل بهمس) أنا كنبغيك ابنت قلبي

رحيل:(حلات عينيهاا وحاولات ماأمكن ضبط نبرة صوتها ومتبينش ليه ضعفهاا ونطقات بصوت قااصح)هاد لكلمة مرتك لي تستاحقهاا ماشي أنا هادي أخر مرة تعيط لياا ولاتسمعني صوتك وحتى كمااارتك غبرهاا عليااا والاشتيني دااايزة من شي طريق قلبهااا سمعتي ونسى عليك شي وحدة سميتهاا رحيل

ومجرد ماقطعات لخط سمحات لدوك الدموع لي كانت حابسة ينزلو...طلقات سراحهوم وخلاتهوم يرويو خدودهاا...مغاتقدرش تنسى بين ليلة ونهار ولكن مع الوقت أكيد غاتنسى وغتحاااول....أكيد غتحااول..

---

غمض عينيه وكلامها ونبرة صوتهاا كينهشو قلبو بدون رحمة ولاشفقة...هادي ماشي هي حبييتو ولبنت لي بغا وبغاتو...هادي إنسانة لي تجرحات وهو لي جرحهاا إنسانة لي حطمهاا بيديه وبتصرفو...هي صافي كرهااتو وعمرو باااقي يفكر أنهاا تسمح ليه وترجع معاه...عارف بلي عندها كرامة ونفسهاا فوق كلشي...واخا تكون تتبغيه غاتعفط على قلبها مقابل كرامتهااا...حافضها وعارف كل تفصيل صغير من شخصيتها وعلاش لا وهوما مع بعض عماين...عماين لي مكانتش قليلة وكان ناوي يتزوجهاا حيت بصح باغيهاا ليه تكون مرتو وممات ولادو ولكن مو وقفات ليه فطريقهوم ولاحت ليه لعصاا فالرويضة...حلفات عليه بلي رحيل هي لي مادخلش لدارها ولاتكون عروستهاا...ونسات بلي ولدها باغيهاا...وبلي عندهاا بنات لي يمكن تاهوما يتحطو فمكانهاا وفكرات بأنانية...طلع راسو تيشوف فالسمااا مخلي دوك الدموع ينزلو..محبسهومش كما حبس مشاعرو...كيشوف فالسماا لي شهدات على معاناة قلبان فرقاتهم أنانية أم...وقلب بريئ كان فرحان بكسب محبوبو ولكن فرحتو مدامتش...قلب فاطمة الزهراء...

شرقات شميشة ساطعة فسماااهاا... وفدار سي ادريس لي كان الكل فايق ومجموعين على طبيلة دلفطور...مبعد ماكلى ادريس ناض تيقلب فجيابو كيتأكد من تلفونو وسوارتو قبل مايمشي لگاراج...هز عينيه وشاف فيهوم بهدوءو لمعتاد

ادريس:هانا مشيت بلاماتسناوني فالغدا..غانتغدا تم باش نسد بكري ونمشي لقامرة نجيب كلثوم

محمد طه:(حط كاس دأتاي ونطق)الاحتاجيتيني فالگاراج عيط لياا الواليد

ادريس:(حرك ليه راسو ومد ليه شي فلوس)الاخصات شي حاجة فالدار جيبها ليهوم

محمد طه:بلاش عندي

حط ليه لفلوس فوق الطبلة وشاف بنص عين فرحيل لي كانت ساهية عاد خرج غادي لخدمتو...ضار محمد طه وشاف فأسماء لي عين فتلفون وعين فمقلة دلبيض كتاكل وطلع راسو شاف فرحيل لي هازة كاس دأتاي بين يديهاا كتشوف فيه ساهية...حرك راسو وتكى على لمخدة لي مور ضهرو وقال:شنو غاطيبو لينا لغداا

أسماء:(شافت فيه وميقاتو)نطييو ليك لگلب

محمد طه:(بسخرية)على نتي عندك الگلب بعدا؟!

أسماء:(عوجات وجهها فيه)لا لاعندي لمصرانة الزايدة بغيتيهااا

محمد طه :(ميقها وشاف فرحيل وبتاسم ليها بحنان) ها عوينات الجلبانة هي لي غاتهلا فخوهاا ودير ليه شي غديوة زوينة

رحيل:(بتسمات ليه وتحنات جهتو مجبدة ليه لحنيكاات) نطيب لحبيبي شنو باغي على شحاال من محمد طه عندي؟!

محمد طه:(هز صبعو وكمش عينيه بصفولية) وحيد هو أنا هههه

أسماء:(ميقات فيهوم بزوج وقالت وهي غايرة منهوم ومعجبها حال) يييع شحال حاامضين..

محمد طه ورحيل :(بدقة وحدة) ديري ليناا السكااار هههههه

تراشقو بيديهوم وهو كيموتو بالضحك أما أسمااء ناضت هازة صينية دلمواعن غادة بيهاا دلكوزينة ونطقات بصوت مجهد:الله يسترررر

محمد طه:(شاف فرحيل)ههه غاتلقايهاا مفقوصة داباا

رحيل:(حكات راسها) واهيااا لي مكتحملنااش وديماا شادة معانا الضد

محمد طه:(غمزها) خليك منها شنو غاطيبي باش نمشي نتقدا ليك

رحيل:نصيفط ليك فالواتساب شنو باغا باش متنساش

محمد طه:(ناض كيسوس فالشورط لي لابس وتكسل)مهم أنا غادي تاتصيفطي داكشي

رحيل:(ناضت تابعاه)سبق لياا ورقة دلبسطيلة هي لولة باش ندير لبسطيلة لعشاا ولغداا شنو باغي نطيب ليك

محمد طه:(ضرب كرشو بيديه وبقا تيحكها ونطق عاض على شفتو)تشهيت شي غرتان دلبطاطا ولكتفة الله يحفضك

رحيل:واخاا جيب معاك الكفتة بلا عطرية ومتعطلش

محمد طه:(نطق بالجهد وهو غادي) واخا اعوينات الجلبااانة...

خارج من الدار بكلاكيط وشورط حد الركبة مع تيشورت وعويناتو لخضرين باقي منفوخين بالنعاس...كل مرة يتفوه ومكرهش يرجع يكمل نعاسو ساعة الرجاا فالله...سمع تلفونو صونى وجبدو لقاها رحيل مصيفطة ليه التقدية لي غايجيب...كان محني على تلفونو تيكتب ليها تاحس براسو دخل فشي حد...هز عينيه ولقاها جيداء لي كانت خارجة تاهي تسخر بجلاية مهاا والشعر مجموع شفنجة مخربقة...ضحك على شكلها وقال:هههه افين مدرمة ياكماا مسخرة لقايد ههه

جيداء:(تعوجات فوقفتها )مسخرة لخالتك حنان هاد الساعة مكاين لااا لقاايد لا لبااشااا

محمد طه:(درعها بيديه جارها معاه)زيدي معاياا نمشيو نتسخرو لرحيل

جيداء:(هزات راسهاا فيه)ليوم غاتجي مووك

محمد طه:ييه

جيداء:هي نجي نتعشااا عندكوم

محمد طه:الدار دارك وأصلا أناا شاك بلي لواليد غايكون زادك فالحالة المدنية هههه

جيداء:(فرفرات بعويناتهاا وبدلع)يزيدني باااش نكون مرتو

محمد طه:(هز فيهاا حاجبو)الله يمسخك كتحرشي بلواليد وأنا حاااضر

جيداء:(رققات صوتها)هاداك راه الزين ياخوياا اااح على الأسمراني تاااعي

محمد طه:(قرصهااا فدراعهاا تانقزات)كوني تحشمي اعضم الطيو

جيداء:(دفعاتو وهي تتحك فالدقة)يعطيك التوااام زرقتيها لي تت وزيدون زين حبو مولاناا

محمد طه:تادعي ليا بالتواام مالك غاتكوني مهوم

جيداء:الله ينجيني تف تف تف مهم غانمشي نحط السخرة لحنونة وندوز نعاون الحب ديالي ومنها نيت نشوف الأسمراني دقلبي

قالت هضرتها وهزات جلايلهاا ومشات تتجري مخلياا محمد طه مبتاسم من كلامها وتصرفاتهاا الصبيانية لي لا علاقة لها بسنها الناضج...

----

مور ماجمعات الدار وسالات شغالهاا هزات تلفونها وطلعات ديريكت لبيتهاا صونات على آدم ولكن مجوبهاش وعرفاتو غايكون باقي مافاق حيت لويكاند مكاين مايدار...صيفطات ليه السيڤي ديالها فالجمايل ومشات لواتس صيفطات ليه أوديو بصوت خافت تتحلون عليه:حبيبي صباح الخير صونيت عليك مي جوبونص باقي ناعس مهم السيڤي لي قلتي ليا عليه راه صيفطو ليك عنداك تنسى احوبي داكوغ بون جوغني بب

صيفطاتو وهي عاضة على شفتها ومتحمسة لديك لخدمة لي بالنسبة ليها كانت حلم...حلم لي يمكن قريب يتحقق ليهاا ويمكن لا...

تحجبات الشمس وسط سماهاا وخلاتها تنور بقمرها ونجومهاا...فجو مبرد وكيفتح النفس فدار سي ادريس لي ريحة العود والبخور عاطية منهااا حيت عارفين كلثوم كتعجبهاا ريحتو...فالكوزينة كانت واقفة رحيل كدير أخر لمساتها على لعشا وحداها صاحبتها ورفيقة دربها جيداء معوناهاا وكل مرة لايحة ليها نويطة تكتخليهاا ضحك وتبكي بالدموع...

جيداء:(حطات يديها على خصرها وقالت بحسرة مصطنعاها) جات تاني الكافرة بالله لي غاتلهي لي الأسمراني دقلبي

رحيل:(ضحكات وبهدوء)ماعليك غار بالصبر وصافي ومتنسايش راكي نتي لي فالقليب اعشيرتي

جيداء:(فرفرات عويناتها)هادشي باش مصبرة راسي

ضحكات رحيل على هبال هاد المخلوقة وضارت ملي سمعات صوت محمد طه كيعيط ليهاا...خرجو عندو لقاوه واقف بشورط دجين وتيشورت وكلاكيط وشعرو باقي سارد بالماا...

محمد طه(مخنزر):عيط ليا الواليد راهوم جايين وراه جات معاهوم تاجدة

جيداء:(خرجات عينيهاا وشافت فرحيل)خازينو النار تاهي جات اناا لله اودا حماد

محمد طه:(تنهد وشاف فختو)غير الله يحضر السلامة وصافي ميمكنش تجي شي نهار بلامايوقعو مشاكيل

رحيل:(حكات راسها)تت وهالخرا المخرنن تاااني صباحتو الله

أسماء:(كانت جايا جهتهوم وهي عاقدة حجبانهاا)واش داكشي لي سمعت بصح

محمد طه:(شاف فأسماء) وي جايا مع مّي

أسماء:(بعصبية) ولاش جاياا معاها تت تفو على بلان

سكتو كاملين وكل واحد فيهوم فاش كيخمم والنقطة المشتركة كانت هي "جداهوم" لي ملقبينها ب"خازينو النار" بسباب فعايلهاا دليهووود وبسباب قلبها لكحل معاهوم كاملين سوى لبراني سوى ولادها وحفايدها لدرجة كلشي نافرهاا ومحملهاش...

قدام باب الدار وقفات طوموبيل ادريس ونزل منها هو لول وغير من ديك الجمعة دلحجبان لي داير باين فيه كاعي...تحل لباب لي حداه ونزلات منو مرا فأواخر الأربعينات لابسة جلابة فالبلوسيال مناسبة بياض جسمهاا ومبينة طايتها لي محافضة عليهاا رغم سنها...طالقة شعرها الليموني ودايرة كحول مبين عويناتهاا الكحلين صغار كثر ماهوما صغارين...ضارت موراها وحلات لباب ونزلات منو مرا أخرى بجلابة فالقهوي مع فولار فالكحل قصيرة بزاف ومقوصة من جهة ضهرهاا...وجهها كان عامر كولو تجاعيد او واحد لعين عندها بحال الاعوجة وخارجة شوية دايرة وشاام بين حجبانهاا وفدقنهاا فين كاينة واحد تولالة فيها الزغب...هازة عكازهاا ومقربة جهة بنتها تتشوف فيها شوفة قاااصحة ومن ملامح وجهها كتبان بلي إنسانة لي واخا الزمان هلكهاا باقاا صحيحة وصارمة والأهم خبيثة...

كانو كاملين واقفين حدا باب الدار بزز منهوم باش يستاقبلو مهوم وجداهوم لي واخا محاملينها الاأنه ميقدروش يبينو هادشي قدام كلثوم لي بالنسبة ليها مها خط حمر...

قربات كلثوم جهة محمد طه معنقاه بالجهد وتاهو بادلها نفس العناق... بعد عليها وقال بحب:خليتي بلاصتك اميمتي

كلثوم:(ربتات على كتافو ونطقات بصوت مبحوح)توحشتك المرضي ديالي

أسماء:(حطات يديها على خصرها وهي معجبها حال)امم توحشتيه غير هو زعمة

ضحكات ليها كلثوم وجراتهاا تاهي معنقاهاا لعندها:من ديما مغيارة ياربي السلامة

أسماء:اوا ضروري

رحيل:(قربات جهتها وبتسمات بهدوء)على سلامتك

كلثوم:(جمعات ضحكتها وطلعاتها ونزلاتها بعينيها وبصوت بارد قالت)اممم الله يسلمك

إيطو:(لوات فمها فيهوم)الله يغصبكوم افلالس درهم حد فيكوم ماسلم ولاتكلم اممم

محمد طه:(بضحيكة صفرا)موحشين ميمتنا اجدة (باس راسها)هانتي الالة بقاي لينا على خاطرك

إيطو:(ضرباتو بعكازو ونطقات)يعطيك الواباا ساير دير ليا الخاطر مالي هبلت

محمد طه:(بهمس)كون غار هبلتي نتهناو من صداعك (ضحك بزز)ههه حاشا اجدة الله ياودي راه نتي هي كلشي

إيطو:(شافت فأسماء)ونتي اديك مسمار الكيف مغاتحبيش "مغاتبوسيش" ليا راسيوو

أسماء:(قلبات عينيها)هاني اجدة (باست راسها)مرحبا بيك

إيطو:ترحبيشااي بيااا دار بنتي هادي مانيشاااي برانية (سكتات وقلبات الشوفة فرحيل لي كانت واقفة حدا جيداء بزوجات ساكتات وهي تلوي فمها) ونتي اديك الصفريطة مغاتسلميش

رحيل:(تنهدات والخاطر ماعندهااش وببرود بتسمات فوجهها)الله ياودي غير قلت تسالي (سلمات عليها) على سلامتك

إيطو: امم الله يسلمك

(شافت فادريس ورجعات شافت فرحيل وبمكر نطقات) واحد مك لباس عليها؟!

السكات...كان هو لي كيتسمع مور منطقات إيطو كلامهاا لي كانت عارفة تأثيرو على رحيل لي بقات واقفة جامدة وهي كتشوف فيهاا...ولكن سرعان ما بتسمات ابتسامة باردة حاولات تغطي بيها داك الإحساس لي حساتو تاني كلما كيتجبد هاد الموضوع ..

رحيل: لباس عليها وراه كتسلم عليكوم

تسمع صوت ادريس لي نطق بعصبية:تحركووو واش غانبقاو واقفين قدام لبااااب

بلامايزيدو لكلام فوق من كلامو دخلو لداخل ورحيل توجهات ديريكت لكوزينة وهي حاسة براسها ماهواااش... فالداخل ديالها واحد الخنقة ربي لي عالم بيها ولكن متقدرش تبين حيت ممولفااش تبين لتاشي واحد شنو فالداخل ديالها من غير "جيداء" لي حفضاهاا...حسات بيد تحطات على ضهرهاا وصوت محمد طه لي كان حنين كعادتو:واش صافا؟!

رحيل:(شافت فيه وبتسمات)وااه غير جيت نشعل لبسطيلة باش تسخن

محمد طه:(بتاسم ليها بحنان أخوي)ماديهاش فهضرتها راكي عرفاها كيدايرة

رحيل:(هزات كتافها بلامبالاة مصطنعة)عاادي مولفاهاا فيهاا

محمد طه:مهم نعاونك ؟!

رحيل:لا بلاش غير سير شوية ونجي تاأنا

باسها فراسها وغير مشا وهي تنهد بالجهد وساطت النفس كتحاول تحبس ديك البكية تاسمعات تلفونها ڤيبرا وهي تلقا مساج من عند جيداء "رحولتي جاتني لغيگل ومشيت لدار سموحات حيت خليتك بوحدك"

رحيل "الله يشافيك خودي الدوا والاحتاجيتي شي حاجة عيطي لي "

حطات تلفونها وخرجات لصالة فين كانو جالسين كاملين من غير ادريس...كانت أسماء جالسة معاهوم قالباا ولكن قلبا كان مع آدم لي صيفط ليها مساج وخبرها بلي عطا لباه سيڤي وبلي غدا فالصباح تمشي لشركة ديال باه باش دوز أونطخوتياان...الضحكة غاتنقز ليها من عينيهاا ممتيقاش شنو كتقراا وفيساع ناضت تدوز ليه أبيل تجاوبها ونطقات بحماس:وااش بصح داكشي لي قريت

آدم:(بصوت مبحوح)همم غدا سيري مع التسعود

أسماء:واخاا شكراا ليك احياتي

آدم:(عض على شفتو بنابو)هاد شكراا باغيها إسبيس الحجلة

أسماء:(عاضة على شفتهاا وبصوت محلون)هممم نشوفك ونعطيك خلاصك احبيبي مهم نخليك دابا عندنا الضياف نكملو من بعد

قطعات معاه ومع الضورة باش ترجع لصالة قشعات ادريس لي كان واقف بفوقية ديال الدار كيشوف فيهاا وهو عاقد حجبانو مخنزر...

الرعدة شداتها من ديك التخنزيرة لدار فيها وحاجة وحدة طاحت فبالهاا هو غايكون سمع حوارها مع آدم... سرطات ريقهاا بزز وعينيها كيضورو فبلاصتهوم... حاولات تبسم ليه ولكن ديك تبسيمة كانت تتخرج مرعدة غير من فكهاا لي باين كيترعد... بخطوات بطيئة قرب عندهاا تاوقف قدامها ونطق بصوت بارد كالصقيع:مع من كنتي تتهضري فهاد الوقت ؟!

أسماء:(بصوت مرعود جوباتو)ص صاحبتي علماتني بلي غ غدا غانمشيو لواحد الشركة كنا ديجا دفعنا ليها سيڤيات وعيطو ليناا

ادريس:(هز فيها حاجبو)مع العشرة دالليل؟!

أسماء:لا هو دابا كيشتي ابابا (سرطات ريقها)ص صيفطو لينا فالإيميل وصاحبتي عيطات تتسول واش تاأنا قبلوني فحالها والله

ادريس:(حك لحيتو وشاف فيهاا شوفة ممفهوماش) امم مزيان

غير مشا وهي تنفس بالراحة ملي مسمعش لابيل ديالها مع آدم...طفات تلفونها باش ميعاودش يصيفط ليهاا ولايصوني ورجعات عندهوم دايرة ضحكة صفرا باش ميعيقوش بيهااا...

---

كل مرة كيصوني عليها كيلقى الخط مشغول عرفها بلوكاتو ...كان جالس فبيتو كيزعزع رجليه بعصبية تاتحل لباب عليه ودخلات فاطمة الزهراء بقميص جوهرة وشعرها مجموع بسبنية... قربات جهتو ونطقات بهدوء:مغاتعشاش؟!

ياسين:(مشافش فيها)مبغيتوش غير تعشاو نتوما

فاطمة الزهراء:(حدرات راسها ونطقات بهمس)واش كتبغيها تال هاد الدرجة؟!

غير سمع كلامها وهو يهز راسو بزربة وكمش فيها دوك لحجبان:شكون قالها ليك؟!

فاطمة الزهراء:(ضحكات بسخرية)سمعتك ونتا تتهضر معاها (نزلو دموعها)علاش تزوجتي بيا ونتا كتبغيها

ياسين:(منرفز)فاطمة الزهراء قلبي الموضوع

فاطمة الزهراء:مغانقلبوش باغا نعرف لاش جيتي لدارنا وخطبتيني ملي نتا باغي غيري؟!

ياسين:(حمر فيها الشوفة)ماشغلكش سمعتي واخر مرة نسمعك تادوي على هادشي

فاطمة الزهراء:غاندوي حيت من حقي نعرف شكون هادي لي مافيهاا نفس كتهضر مع راجل مزوج و..

قبل ماتكمل كلامها نزل عليها بواحد الطرشة قلبات ليها وجهها وخلاتها تشهق بقوة الصدمة والدموع تجمعو فعينيها...

كانت تتبكي وتشهق ولحد الساعة مقدراتش تيق أنه صرفقهاا وهوما باقي مكملو سيمانة فالزواج

عگوزتها حداهاا تتسكت فيها وفنفس الوقت تتحلف على ياسين لي ملي ضربها خرج من الدار ومعرفوش فين زاد مخلي عروستو تتبكي...

عائشة:ويلي ستغفيرة الله على ليهووودي شني عمل فيك الحبيبة دقلبي

فاطمة الزهراء:(تتشهق)شتيه اخالتي صرفقني هء هء واخا غالط فحقي ولقيتو تيهضر مع وحدة خرا ويقول ليها هء هء كنبغيك

عائشة:(خرجات فيها عينيها)ويلي حاااي امتى الزغبي عملهاا؟!

فاطمة الزهراء:البارح (تتمسح دموعها وناضت غادة تجمع بگاجها)انا مغانقبلش نبقا مع واحد ضاربني اخالتي صافي انا غانمشي لدارناا

عائشة:(جراتها وبدات تتسايس معاها)دير عقلك ابنتي الله يرضي عليك ومتعصبيشاااي وتحزني راسك ونتي باقاا عروسة

فاطمة الزهراء:ولدك راه ضربني

عائشة:أنا غانخليه يطلب منك السمااحة ويبوس ليك راسك غير متقلقيشااي

فاطمة الزهراء:(شافت فيها)مغانقدرش نبقا مع واحد مكيبغينيش اخالتي

عائشة:(ضحكات ليها)ولدي كيبغيك نتي وتزوج بيك نتي أما هاديك اللفعة راه هي لي كاضور بيه ولكن حسابها معاياا أناا نتي متشطنيشاااي راسك (شافت فيها)وسيري زولي عليك هاد الخنشة لي لابسة ولبسي شي حاجة خرا راه متحتاجيشاااي نوريك شني تعمل..

حركات ليها فاطمة الزهراء راسها وعائشة بتسمات ليها وخرجات من لبيت جابدة تلفونها تتعيط ليه وهو گاعما ممسوق...حيت فهاد الساعة كان واقف حدا باب دار رحيل وبالتحديد تحت الشرجم دبيتهاا... واقف متكي على لحيط كيتسناهاا غير تبان ليه واخا غار بالصدفة ساعة والو...تلفونو كيڤيبري فجيبو وعارف شكون كيصوني ولكن فهاد الساعة ماعندو خاطر لتاشي حد ومباغي يهضر ولايشوف حد من غيرها هي..رحيل...

"أحمق من يظن أن الليل هادئ كلما في الأمر أنه ينصت جيدا لأوجاعنا"

أصبحنا وأصبح الملك لله...وقفات الطاكسي قدام الشركة ديال ببات آدم ونزلات منها أسماء لي عينيها توجهو لداك لوغو لي كان بالكحل مكتوب عليه بالذهبي "Organ Sefrioui" ضبطات تنفسهاا وتمشات جهة الباب فين كان سكوريتي ودخلات تتشوف دزاين ديال الشركة لي كان أنيق وفخم وباين بلي لي مصممو إنسان فنان..الطبقة لولة فيهاا لغيسيبسيون فالوسط داير بحال شي حلقة ضاير وفالجنب ليسر كاين لاسونسوغ وفجنبو الدروج..اما الجانب الاخر كاينين البيروات...قربات عند لبنت لي فالاستقبال ونطقات بهدوء وبنبرة فيها شوية دلغرور:جيت باش نشوف موسيو الصفريوي عندي معاه غونديڤو

لبنت بابتسامة عملية:الإسم ديالك؟

أسماء:أسماء عاليات

بقات تتقلب فالبيسي تاهزات راسها وقالت:ديزولي مادموزيل مي سميتك معندناش فليست دليغونديڤو؟؟

أسماء:(هزات حاجبهاا)كيفااش!! عاودي تأكدي اختي

لبنت:فاش تانطاپي لnom ديالك مكيطلعش ليااا

حركات ليها أسماء راسها وبعدات عليها شوية جابدة تلفونها مدوزة النمرة دآدم لي بقا تلفونو تيصوني مدة تكايتقطع لخط...رجعات تتصوني مرة خرا ونفس الشي...ستغربااات علاش مكيجاوبش وفلخر قطع گاع عليهااا وطفى تلفونو فخطرة...زيرات على يديهاا فاش عاقت بالقالب لي دار ليها وحساتو شمتهاا شمتة دلكلاب...

هزات راسها كتحاول تكونطرولي تصرفاتهاا ورسمات ابتسامة على شفتهاا راجعة لعند لبنت وقالت ليهاا بهدوء:هه وقع غلاط جوبونص فالحقيقة كنت دافعة سيڤي ديالي ليكوم وعيطو لياا باش نجي ليوم ندوز لونطخوتيان

لبنت:سپا گغااف بإمكانك تعطيني ڤوطغ سڤي مرة خرا

أسماء:(جبدات لملف لي هازة ومن زهرها جابتو معاها فيه السيڤي ديالها مداتو ليها) هاهو

بقات محافضة على ديك الابتسامة الصفراا لي راسمة على شفايفها واخا لداخل ديالها كيغلي بحال شي بركان لي على وشك الإنفجار...

لبنت:صافي دابا حنا نعيطو ليك ان شاء الله

أسماء:(بتسمات بزز ليها)ميغسي بوكو اختي بون جوغني

خرجات أسماء من تماا وحر ديك الشمتة باقا فيهااا..كيفاش دارها بيها وستغباهااا محملاتش القضية وفالبلاصة جبدات تلفونهااا وكتبات ليه مساااج "بنت ليك لعبة باااااش ضورني وضحك عليااا من لول قول لياااا ماعندك كيف دير باش نخدم تم وغانفهم ماااااشي تخليني نجي ونتيق وفلخر نلقااا بلي معاطيش لبااااك سيڤي دياااالي مي أنااا لي حماااااارة تقت فيك من ليووووم نسى عليك سميتي ونمرتي"

صيفطات ليه لمساااااج وهي كتلهث وتنهج وباقي مقدراتش تيق بلي دارها بيها... وكما تيقولو الطماع كيقضي عليه الكداب وهادي هي حالة أسماء مع آدم...

---

بداية الأسبوع تتكون شاغجي فالخدمة وهادي هي حالة رحيل لي ملي وصلات لسورونس وهي خدامة ومهزاتش راسها گاع من غير وقت لغداا لي خدات واحد ساعة ومشات تغدات برا وعودات رجعات تكمل خدمتهااا...وغير وصلات لوقيتة دخروجهاا هزات صاكها وريگلات أمورها وخرجات من تما وهي تتصوني لجيداء

رحيل:كيبقيتي شوية؟!

جيداء:(بصوت عيان)غار سكتي كون غير كنا تنولدو بعدا نستافدو من داك الوجع ساعة الغالب الله

رحيل:(ضحكات)ههه لادابا راه تأكدت راكي بخير

جيداء:فخبارك عيط ليا قصي هاد سيمانة غايدخل لمغرب

رحيل:اوا على سلامتو وعلى سلامتك هي نوجد قفطاني

جيداء:وايييه اصاحيبة غار وجدي من داباا مبقا والو ويجي لدار

رحيل:الله يكمل عليك بالخير احوبي

جيداء:آمين ارحولتي الاخرجتي دوزي عندي لدار

رحيل:نبدل وناكل بعدا عاد نجي ولاعرفتي شنو قولي لخالتي حنان توجد لياا شي مسيمنات راه توحشتهوم

جيداء:واخا هي لولة

قطعات معاهاا ومع الهزة دالراس بانت ليها طوموبيلة دياسين وهو ومتكي عليها كيتسناها..

يتبع...