محتوى القصة
ملي تململات حداه حل عينو وحس بيها ومع ناضت سمع صوت تلفونها لي صونى وماجا فين يدور تاسمعها سكتاتو وخرجات بلاحس خلاتو ينوض من بلاصتو مكمش حجبانو فعز الظلام.. شعل لفيوز وضار كيشوف فبلاصتها باستغراب.. رجع تكى بلاصتو كيتسناها ترجع ساعة السيدة طولات.. ناض من بلاصتو ولبس فرجليه وخرج غادي لحمام حيت تما فين قال مشات.. دق لباب وفاش ماسمعش لحس حلو ولقاه خاوي جاه عجب فين غاتكون مشات...نزل لتحت يشوف ومع وصل لطبقة الثانية سمع توشويش وبان ليه ضو شاعل فالصالة.. قرب جهة الصالة ومغايجي غير فلحظة لي قالت ليه "نتا عارف معزتك عندي مكانبغيش نشوفك مقلق" طل من لباب بشوية عند بالو غاتكون تاتهضر مع شي حد فتلفون وهو يقشع ديكور فاش حطات يديها على ركبتو... وبان ليه ريان تاهو درعهاا..حس براسو تعصب وكان غايدخل ليهوم ساعة نعل الشيطان وقلب الطريق طالع لفووق كيتسناهاا تجي..
أما غزلان كانت واقفة تاتشوف فيه وعلامات الاستفهام مرسومين على ملامح وجهها...هي فهمات هضرتو ولكن عقلها مبغااش يتقبلها بداك لمفهوم لي فهماتو..وهادشي طرجماتو فاش قااالت ليه:مافهمتش؟؟
محمد طه:(باقي مخنزر وبنبرة شك قال) شنزلك لتحت كنتي ناعسة تاصونى تلفونك ونزلتي
غزلان:(قالت بعدم تصديق) واش نتا عارف اش تاتقول؟؟
محمد طه:(جرها من يديها وقال بعصبية مفرطة) سولتك جااوبي بلا بهلااان
غزلان:(نثرات يديها بالجهد ونطقات وهي مجننة) وااااش نتا مريض فدماااغك ولاشنوو واااش كاتشك فياااا أنا وخوووك
محمد طه:(نطق بانفعال) ماتهزيش علياا صوتك
غزلان:(قطعاتو بعصبية)غانهزووو وشنو غادير غاضربني مثلااا (خرجات فيه عينيها) خووووك راه فمقااام خوياا وأصلا عييب وعاار عليك تشك فخوووك لي من دمك حيت اخر واحد يبغي يأديك هو رياان ونزيدك هوو راه بحال خوياا وعمررري عمرررري غانشوف فيه شي شوفة ناقصة واخا يبقاا بوحدو فهاد الدنيااا (هزات لقرعة دلماا قدام عينيها وقالت تاتنهج)نضت نعمر لقرعة ولقيت خووك جالس وحيت عزيز علياا وفمقاام خويا سولتو ياك مامحتاج شي حاجة حيت نيتي صااافية وتاهو نيتو صااافية ماشي بحااالك نتاا لي مريض وكاتشك فكلشي
ضربات بديك القرعة بالجهد وخرجات من لبيت وهي شادة لبكية لي حلفات ماتنزلها قدامو... أما هو راه كيف خلاتو بقا معارفش راسو كيفاش تاخرج ديك لهضرة من فموو وشك فخووه لي يستحيل يغدرو وشك فيها تاهي...معااارفش كيفاش تاسمح لعقلو يفكر بهاد الطريقة...تغدد على راسو وفهاد اللحظة ماحملش رااسو...
دازت مدة كيتسناها ترجع ساعة طولات وخرج يشوف فين مشات...نزل لتحت لقى الضو مطفي ومع دلك قلب عليها ومالقاهاش وطلع لسطح يشوف واش كاينة تما ساعة غير بان ليه الزكرون فلباب وهو يرجع فحالو عرفها غاتكون فبيت رنيم لي كانت بيتها تاهي قبل..وقف ودق لباب وبصوت خافت قال:غزلاان
كانت تاطيحهوم حجر وهضرتو قصحاتها بزاف تمنات كون ضربها ولاقال ديك لهضرة لي قاست شرفها...ضو طافي وجالسة فالظلام سادة فمها باش ماتسمعش رنيم بكاها وتفيق... كانت تاتشوف ظلو من تحت لباب باقي واقف تاشوية انساحب ومشى وهي حدرات راسها وغمضات عينيها وماتجي فدماغها غير لهضرة لي سمعات بالصدفة "بصح تزوج بغزلان ولكن فالداخل ديالو باقي مانسااااش جيداااء والدليل نهار الصدقة ماحضرش نهار كولو وهو غااابر حيت مقصح من جهتهاا باااقي مشاعرو جهة جيدااء كاينة ومغايقدرش ينساهوم حيت فيما كاتجبد سميتها كايتغير خااطرو"
ديك لهضرة لي سمعات بالصدفة كانت بالنسبة ليها بحال شي تصرفيقة جاتها على غفلة خلاتهاا تصدم...كانت غير دايزة من حدا بيت رياان تاسمعات صوتو وهو كيهضر بالجهد وماقصداتش تصنط ولكن سمية محمد طه خلاتها بلاماتحس توقف تسمع لهضرة لي كانت فحال لخنااجر لقلبهاا...اخر حاجة كانت تاتوقعها هي تعرفو كان تيبغي شي وحدة... ويكونو مشاعرو باقي حيين جهتها...سمعات كلشي هضرتو وهضرة رحيل ولغصة فحلقهاا وبزربة رجعات لبيتهاا وسدات لباب متكية عليه...صدرها كيطلع وينزل وعينيها تضببو بالدموع...بلاماتشعر تفكرااات ديك كلمة تانبغيك لي خرجات من فمو وهو سكرااان وهنااك فهمااات وعرفات بلي ديك لكلمة مكانتش ليهاا كاااانت لجيداء...وشحاال كانت قاصحة عليها تعرف هادشي لي خلاها تسترجع شحال من حاجة وتبدا تعيق وتفهم كلشي... زيرات عينيها مابغاتش تبكي ولكن بلاماتشعر نزلو دموعها وهي تاتفكر بلي ديك الليلة هو أصلا مكانش حاس بيها واش هي لي معاه...ساطت النفس وبدات تاتمسح وجهها وتتفكر هضرتو لي قال نهار تزوجوو بلي باغي زواج يكون حقيقي وهاديك لهضرة هي لي كانت بصيص أمل بالنسبة ليهاا وفنفسها قالت ماعليش هاداك ماضيه مانقدرش نلومو عليه...ولكن أنا حاضرو وأكيد غاينسى...هاد لهضرة بدات تاترددها تاحسات براسها شوية عاد نزلات لتحت...
غير تفكرات هادشي دموعها رجعو تجددو ونزلو ومع كلامو دابا كملات...شبعات بكى وقلبها ضرها وبهدوء تسطحات فبلاصتهاا كاتنخصص تاداهات عينيها...
ليلة دازت طويلة على محمد طه لي ليل كولو وهو كيتقلب فبلاصتو وبالو معاهاا...حس بتأنيب الضمير من جهة خوه وكيفااش فكر فيه بديك الطريقة لي ماخصش أصلا يفكر بيها...خوه لي فاش غايعرف بهادشي غياخد منو موقف وغايتقلق منو ومن حقوو...ومن جهة غزلان لي جرحها فاش قاسها فشرافها بطريقة مباشرة...مكانش عليه يخرج ديك لهضرة ففمو وهو لي نهار لول قال ليها زواجنا حقيقي وقال ليها بالحرف كل واحد غايدير فيه واجباتو وغياخد حقوقو وهو راه خلف بهاد لهضرة...مانعسش الليل كامل وباغي غير يصبح الصبااح باش يدوي معاها ويعتاادر على غلطو... كانت الساعة كادوز بلمهل...زول لغطا وناض لحمام غسل وجهو وخرج وعينو تاتشوف فالباب دبيت رنيم...ماكرهش يحلو ويدخل ساعة لخرى كاينة وجات ناقصة...تحل لباب لي وراه ودار تايشوف فرحيل لي كانت تتبان عيانة شادة فمهاا وغادة لحمام...وقف تيشوف فيها وفنفس الوقت كيسمع ليها وهي تاترد.. قرب جهتها مع خلات لباب محلول وشاف فيها بهدوء:نعاونك؟
رحيل:(ناضت تاتعكز وبتعب)تت بلاش
شللات فمها وخرجات تاني وغير قربات جهتو وهو يدرعها معاونها تادخلات لبيت فين ناعسة سيدرا منشورة فالنموسية... قادها فبلاصتها عاد تسطحات رحيل لي تنهدات....تاهي مانعساتش الليل وغير تاضور فبلاصتهاا...
محمد طه:شوية دابا؟؟
رحيل:اه مالك فايق فهاد لوقت؟
محمد طه:غير مجانيش نعااس وصاف مهم رجعي نعسي وارتاحي
تبسم ليها وخرج وهي هزات تلفونهاا وبدات تاتخربق فيه حيت النعااس مفيهااش... كانت اختارت شنو غتاخد لزين العابدين فكادوه وخصها غير لوقت تمشي تشري داكشي حيت السيت لابغات دوموندي غايخصها وقت باش يوصلها والسيد عيد ميلادو الإثنين... دخلات لواتساب ومع كانت دارت سطوري طلات عليه تاتشوف شكون شافو...كانت دايرة يديها وهي جالسة فالطوموبيل...طلعات ليها سميتوو مقلزة تم شافها هو لول كمشاات حجبانها ومع لبراميطر دلواتس فيه لكونطاكط هوما لي تيشوفو السطوري والبروفيل وبلاعگز عليها مشات لكونطاكط ومسحات نمرتوو باش ماتبقا طلع ليه تاحاجة...
حلات رنيم عينيها تاتكسل فبلاصتها ومع ضارت بانت ليها غزلان ناعسة جنبها وهي تهز حجبانها وبهدوء قربات تاتهز فيها تاناضت لخرا ونطقات رنيم مالكي ناعسة هنا
غزلان:(بصوت مبحوح) غير داتني عيني وصاف
عرفات رنيم بلي شي بلان تم وغاتكون هي ومحمد طه مخاصمين داكشي علاش ضربات الطم وسكتات...ناضو دارو روتينهوم وغزلان ماعندهاش لخااطر...مبغاش تفكر فداكشي دلبارح حيت غتعاود تبكي داكشي علاش نزلات توجد لفطور وتشغل بالها بشي حاجة... كلشي فاق باش يتجمعو على لفطور وتارحيل وسيدرا لي شبعات نعاس وفايقة ناشطة حيت غاتمشي لريااض تجيب إيڤانا وقطيطات لي ولدات...وحيت غاتشوف تاباها...
نزل محمد طه ودخل لصالة تيقلب عليها بعينيه ساعة مبانتش ليه شاف فريان لي كان مكسل تما وداك تأنيب الضمير رجع تااني ليه...قرب جهتو وجرو عندو بايسو فراسو
ريان:(ضاحك) الله يرضي على ولدي بقا ديما ديرهاا ههههه
محمد طه:(تبسم ليه)السموحاات
ريان:عليااش؟
محمد طه:هاكاك
ماقدرش يقول ليه علاش حيت حشمااان منو ومن راسو لي فكر فيه هاكاك أما ريان مادى ماجاب حيت مولفها مع خوه...دخلات غزلان جايبة صينية وغير شافها محمد وهو يتبعها بعينو لي غياكلوهاا..بانت ليه بنفس البيجامة وفوقها بنواار... جلسات جنب رحيل ومشافتش فيه نهائيا وهو راه شوية وعينو غايخرجو فيهاا بقوة محاضيها...
بداو يفطرو وضحك والنشاط تانطقات رحيل:ليوم نخرجو بغيت نشري لكادو لزين العابدين
أسماء:ايييه اش اتاخدي ليه؟
رحيل:مفاجأة
تانيرت:تاحنا خصنا ناخدو ليه كادو اإدريس
إدريس:ضروري سيري مع لبنات وشوفو شنو بغيتوو وأنا نعطيك لفلوس
ريان:(بطنز)أنا غاادي مع ختي رحيل
رحيل:(ضحكات)ههههه وناري شحااال مكتسواااش
ريان:(غمزها)خوك أنااا
رحيل:بقيتي فياا ولكن هاا خلص عليا حوايجي ونديك معايا
ريان:هاااء وصدقتي مادية حقيرة
رحيل:هههه بصحتي
إدريس:(بحنية)أنا نعطيك ابنتي ونيت شري تال سيدرا
رحيل:(باست يدو) لا ابابا عندي غير ضاحكة معااه
إدريس:واخا عندك نعطيك ابنتي ماعليش
حطات راسها على كتفو وهو كيطبطب عليهاا وبنشاط كملو داك لفطور من غير واحد زوج لي كانو طافين وكل واحد فين كيخمم...
قررو لبنات يتغداو برا ومنها نيت يفوحو ويتقداو وتامن إدريس مامشاش لگاراج وخرجو كاملين وعيطات أسماء لإسلام لي جا تلاقى معاهوم...
سبقو الحوايج تقداو لي بغااو ورحيل كيلات نيت وديك لكارت بونكير لي عندها خدماتها واخا باها عطاها فلوس ولكن مبغاتش تعيق عليه وخداو بيها كادو لي غايديو لزين...وتاأسماء خداو كادو حيت معروضين مجاتش يمشيو بيديهوم خاويين... سالاو الضوران ومشاااو يتغداو ورحيل وحمها مايجي غير فطنجية ريوگها سالاو عليها وهوما دارو ليها لخاطر وداوها تاكلهاا حيدات فيها شهوتهاا ساعة قال ليها الرداان اجي نتفاهمو وگاع لي كلات حطاتو تاااني...
تانيرت:خودي شي شلاظة خفيفة على الأقل ابنتي
رحيل:مافيااش اماما والله
أسماء:صافي اماما تانيرت خليها دابا تال شوية وتاكل شي حاجة
إدريس:نرجعو لدارر ابنتي
رحيل:(باغا تمشي ولكن مبغاتش تخسر عليهوم لخرجة) لاغير خلييك ابابا
صونى تلفونو إدريس وغير شاف سمية ولد لحاج وهو ينوض جاوبو وسيدرا كاضور عينيها وكاتسنى وقتااش تمشي عند نوح... رجع إدريس وجر سيدرا وبدا تايهضر معاهاا بشوية وهي دغيا قلبات شنافتها وغصبات...كانت رحيل حاضياهوم وبتساؤل قالت:مالكي تاني
إدريس:(باس راسها وهزها جلسها على ركبتو)والو غير خليها ابنتي
سكتات رحيل وعينيها على سيدرا لي مبقاتش باغا تكمل غداهاا...
دوزو داك النهار ناشطين وشبعو ضوران ولماكلة فبرا وتامن لعشاا داوه طاايب ومشى معاهوم تاإسلام لي رغباتو أسماء يباتو معاهوم...
كانت رحيل تاتشمط شعرها مور مادوشات وبزز باش جمعاتو وكتافها طايحين عليها لاحت عليها فولار ولبسات بنوار باش تنزل لتحت وهو يتحل لباب ودخلات سيدرا لي قربات جهتها تاتجري ونطقات:مامي
رحيل:شنو امامي؟؟
سيدرا:(مشات لبلاكار حلاتو وجبدات ديك الصنديقة لي تاتخبي فيها لفلوس مع خلاتها هنا وداتها ليها وقالت)حليها لياا
رحيل:(هزاتها من عندها) علاش غاتحليها ويالاه شريتها ليك جديدة تاني
سيدرا:بغيت فليسات؟؟
رحيل:لاش بغيتهوم؟؟
سيدرا:(شاداها من لبنوار وبدات تاتغبن) وحليها ليا مامي عفااااك
رحيل:(تنهدات ) جيبي موس
مشات سيدرا وهي جلسات تاتشوف ديك الصندوقة لي شحال هادي مالاحت فيها فلوس...جابت ليها موس وحلاتها ليها ولقاتها لايحة فيها فلوس وراق وشي صرف...
رحيل:(تاتحسب) عندك هنا 300 درهم اش بغيتيهوم
سيدرا:(بدات تاتسبل عوينات الببوشة وقالت ببرائة)بغيت نشري كادو لزينبيدين...
سيدرا من طبعها حنينة وملي ضربها زين العابدين بقا فيها لحال وتعصبات منو ولكن راها ردات دقتهاا فيه.. وهادي صفة خرى من صفاتها أنها مكاتسمحش فحقهاا.. وفاش اعتادر منها وتاهي اعتدرات صافي تسد لموضوع ونسات ورجعو المياه لمجاريها.. وفاش عرفاتو عندو عيد ميلاد بغات تشري ليه كادو حيت عزيز عليها بحال ريان ومحمد طه.. وفيما تاتخبي فليساتهاا تاتجي تصرفهوم على هادشي ياتشري لمها كادو يالجدها يالجداها المهم هادشي علياش تاتخسر دوك لفلوس لي تاتجمع فصنديقة.. رحيل علماتها كيفاش ماتسرفش بزاف لفلوس واخا يكونو عندها وتعرف كيفااش تصرف..
تبسمات ليها رحيل وجراتها عندها تاتبوس ليها دوك لحنيكات وقالت بحنية:يخلي لياا لحنينة ديااالي بغات تاخد لكادو تاهي
سيدرا:(تبسمات بحماس) نمشيو مامي ناخدو ليه كادو غدا
رحيل:نمشيو اش بغيتي تاخدي ليه؟؟
سيدرا:ماعرفتش مامي
رحيل:تانفكرو فشي حاجة يالاه نجمعو لفلوس ونخبيهوم هناا تال غدا ونخرجو باش نشريو كادوو..
جمعات ليها رحيل دوك لفلوس ونزلو لتحت باش يتعشااو..ومع لعياا دالخرجة ماسهروش گاع وكل واحد طلع لبيتو ينعس..
كان محمد طه تايلبس تشورت ديالو وكل مرة يهز عينو فالساعة كايتسنااهاا دخل... نهار كامل ماقدرش يستفرد بيها باش يهضر معاهاا حيت كانت مع لبنات وتاهو مكانش باغي يخلي شي حد يعيق بشنو كاين... عيى مايتسنى والنعااس جاه خصوصا مانعسش لبارح بليل...ناض من بلاصتو وخرج يشوفها فين غطساات ليه... مع نزل فالدروج بانت ليه طالعة وهازة معاها فيديها قرعة دلماا.. هزات راسهاا فيه ورمقاتو بشوفة باااردة وتخطاتو مكملة طريقها لفوق مخلياه كيتغدد من هاد التصرف لي عارف راسو كيستاهلو...تبعها فالبلاصة وبانت ليه السيدة غادة لبيت رنيم ومع مدات يديها تحل لباب جرهاا لعندو من دراعها تاضرباات فصدروو وقاال بصووت معصب:شفتك ولفتيهاا
غزلان:(عضات على سنيها وقالت) طلق من يدي
محمد طه:زيدي قدامي
جرها وهي تاترطى بين يديه تادخلها لبيت وطلقها وسد لباب بالساروت وهي تعصبات منو ونطقات بنرفزة: حل لبااااب
محمد طه:مغانحلوووش بلاصتك هنااا ماشي لهيه
غزلان:(هزات حجبانها) وأنا ماحاملاش لبلااصة لي فيهااا نتااا
محمد طه:(قرب جهتها وقال بصوت كالم مباغيش يتعصب) غزلااان تركني ندويو
غزلان:مباغااش ندوي معاك ولانسمع ليك فرقني عليك هاد الساعة
بغات تخطاه باش تخرج ساعة شدها من دراعها جارها ليه تاضربات فيه وقال وهو كيزفر النفس بحال شي ثور: ماتخلينيش نتعصب عليك وخلينا ندويو بحال الناس
غزلان:(بسخرية)شكون تاايهضر نسيتي راسك لباارح ولانفكرك
محمد طه:(نطق بتوثر)ماكنتش قاصد
غزلان:بصاااح هههه واش تاضحك عليا ولاعلى راسك (نثرات يديها وقالت بحرقة) مكنتيش قاصد تجرحني فشرافي وتاهمني بحااجة بحال هاديك ياك مكنتيش قااصد تقول لياا بلي أنا عيني فخوك وكانخونك معاه
محمد طه:(سرط ريقو وقرب جهتها وهمس)غزلاان
غزلان:(قطعااتو وهي هازة يديها فوجهو) مكاين لااش تهضر حيت تبريراتك كلها معندهاا فايدة والهضرة لاخرجاات من لفم راها بحال الدفلة.. كون هاد لهضرة قالها شي واحد خر والله لانسوقت ليه ولكن كانت منك كنتي تانقول رااه غانبدااو من لول اغزلان واخا غلطناا راه غانصححو الغلطة وغانساو ونبداو صفحة جديدة ونتااا بفمك قلتيهااا ماابززت عليك تاحاجة ولكن دابا نتا تادير عكس هضرتك
كان تيسمع لصوتها وديك لحرقة لي فيه خلاتو مايحملش راسو حيت هضرتها كلها كانت على صواب.. والمشكيل هو تاطريقتو باش يعتادر ماشي فمحلهاا وهادشي غير مكيزيد يرونها عليه...
مسحات غزلان ديك الدمعة لي نزلاات ليها بلاماتحس.. تايجيها بارد وداك لبرود ديالو تايحرقهاا... واخا زواجهوم عادي دبصح ولكن فيه واحد لبروود لي هي حاسة بيه.. بعض لمراات تاتحسو بحال لاغير مجبور يبقا معاها.. مكاينش شي حاجة مميزة فزواجهوم من غير الصداع ملي تزوجو وهو يتعصب عليها والمشكيل تايتعصب وبعد دقائق تايرجع كأن شي لم يكن...هي راه مباغاش تبقا حياتها كلها تمرض راسها معاه..ولي زاد تيخليهاا تألم من لداخل فاش عرفات بحبو لجيدااء لي واخا ماتت باقي أثارها عليه.. وهادي لغصة لي صعيب تزول وخصوصا هي عارفة علاش تزوج بيهاا..
مسح محمد طه على وجهو وقرب جهتها ماخلاش ليها فين تفهم راسها كان خاشيها فصدروو ومزير عليهاا وهي ماقدرااتش تبادلو تعنيقة مجروحة منو والعنااق راه ماشي هو الحل.. يديها كانت مطلوق حداهاا ومغمضة عينيها مباغااش تزيد تبكي قداموو..أماا هو طبع قبلة على راسهاا ونطق بصوت باين فين نادم: سمحيليا
غزلان:(بصوت بارد نطقات وهي مبعدة على حظنو) السمااحة ماعندها باش تفيد داباا
حدرات راسها ومشات جهة لباب حلاتو وخرجاات غادة تنعس عند رنيم..وهو راه فهم من كلامها وتصرفها
بلي السمااحة مغااديش تنفع حيت بصح غلط فهضرتو معاهاا..وقبل مايقول شي كلام خصو يعرف معناه ماشي غير يجي ويهضر ويجرح وفلخر يطلب السمااحة بحال لامداار والو..شد راسو لي ضرو تاني بسباب الأعصاب لي ممنوعين عليه بسباب لوبغاسيون لي دار..
ليوم بداية الأسبوع ولي عندو شي خدمة راه مشى ليها ومنهون أسماء لي مشات مكرهة حيت عارفة راسها غاتلقااه تماا.. وكيف توقعات مع الدخلة شافتو واقف بحال لاكيتسناهاا جنب السونسور.. رماتو بشوفة باردة وتخطاتو طالعة فالدروج ودايرة بالناقص لشي أسونسور..أما هو زفر النفس وتبعهاا بكل بجااحة طالع وراها وعينيه عليها وهي حساات بيه وتعصبات من حقارتو..وقفات وضارت شافت فيه وقالت ببرود:تفضل طلع؟؟
وليد: les Femmes d'abord
أسماء: ماشي فكلشي غير تفضل
طلع فالدرجة تاولى مقاد معاهاا وضار شاف فيهاا عن قرب ونطق بصوت هامس: ماعليش ابونبونايتي
خلاها وطلع وهي راه ماكرهاتش تزول دااك الطالون وتعطيه لراس.. طلعات بنرفزة وشدات بوسطهاا وصبرها بدا ينقص.. قالت غاتصبر وتكمل ساعة لابقات القضية هاكا غايكون حسن تخرج وتقلب على خدمة فقنت اخر.. تاتخدم بجدية مامضسراش عليها لكمامر بزاف.. سالات خدمتها وحيت لعشية غاتمشي لعراضة لي دايرين فعيد لميلاد بغات تخرج بكري..بان ليها لغسبونسابل لقديم حيت باقي مامشااش تايوري وليد لخدمة والسيستيم لي ماشين بيه.. ناضت عندو وقالت بهدوء:موسيو عفاك نقدر نخرج دابا ساليت خدمتي وفلحقيقة عندي واحد لغراض خصني نقضيه
لغسبونسابل:واخا لاساليتي لخدمة تقدري تمشي
أسماء:(تبسمات ليه)شكرا
رجعات لبلاصتها وطفات البيسي وناضت هازة صاكها وتلفونها ومع بغات تمشي جات السكرتيرة ديال الغسبونسابل جايبا ليها واحد زوج ضواسى وقاالت: أسماء هاكي خدمي هادو
أسماء:غانخرج دابا
س:موسيو وليد سيفط ليك هادو تخدميهوم وبغاهوم ليوم أوغجوون
أسماء:(عرفات بلي لهضرة وصلاتو وقالت ببرود) خديت لوطوغيزاسيون من عند لغسبونساابل لي كانعرف وممساليااش لابغاهوم عطيهوم لغيري يخدمهوم ولامكانش زربان بيهوم غدا نخدمهوم
خلاتها ومشات وهي عارفاه بلعاني دارها باش ماتخرجش بكري وتاهي لقاها مطورة وحافضة صواريهاا ماشي شي وحدة غشيمة لي تخاف وتسمع لهضرة...نزلات لتحت وقفات قدام الشانطي باش تشد الطاكسي.. تاوقفات ليها وحدة ومع حلات لباب باش طلع هزات راسها وشافتو حاضيها من الشرجم وبلاماتسوق ركبات ومشات مخلياه مغدد عليها..عارف غاتمشي لعند راجلها وهو مباغيش يتقبل هادشي..فاش شافها معاه حس بالعافية شاعلة فيه وماحملش أنها تكون لغيررو..
----
فدار إدريس كانو لبنات تايوجدو راسهوم باش يمشيو ورحيل منهوم لي دخلات لبيتها وجبداات واحد الكسوة سخوونة فدم لغزااال..لبسااتها جاتها على طايتها ومع مجموعة من لكرش بينات ديك التنفيخة ديال كروشتها.. جلسات باش دير لمك اب وفضلات دير داكشي خفيف حيت عراضة عائلية.. فغابوبيغ زينات بيه جفونهاا وشهوتها فلكحول وخدات قلام كحلات بيه وعاد مزاد بان لونهوم لخضر تايلمع بحال لقطة.. وختماتها بعكر غوز غامق جاها خطير مطراسي على شفايفها...بلاشر حمرات لحنيكات باش ماتباانش صفراا... لبسات فولارهاا ورشات ريحتها لخفيفة لي كادير ممجهدااش ونسمتهاا تاتبقى فنيف زوينة.. هزات جاكيط نواغ ولبساتها فوق لكسوة وبوط طالع ميني طالون.. هزات صاكها ولكادو ديالها ونزلات لتحت لقات باها كيف العادة هو لي سبق ولبس كيتسناهوم...
رحيل:سيدرا لبساتها ماما؟
إدريس:خليتها تاتلبسهاا
رحيل:تعطلوو راه تمنية ونص هادي
محمد طه:هاني واجد
ريحة برفانو لمجهدة خلاتها تسد نيفها تاتشوف فيه بديك لبسة لي جاتو زوينة.. سروال دجين نواغ مع شوميز كحلة وجيلي دالصوف گرونة وكويرة..
رحيل:دوشتي بالريحة
محمد طه:راه هي مجهدة
نزلو لبقية وكل واحد مفركس ولابس حطة جديدة وريان ضارب عليهوم واحد التريكو كول مونطي نواغ مع جاكيط داان جااتو ناضية.. صونى إسلام على إدريس علمو بلي جاا وناضو خرجو كاملين ورحيل شادة يد سيدرا لي تاهي لابسة كسيوة صوفية سخونة وجاكيط وهازة كادوها لي شراتو هي ومها من اختيارها ومتشوقة لردة فعل زينبيدين ملي تعطيه ليه...
تلاقاو بأسماء لي تاهي لابسة جلاية سخونة وشعورات مطلوقين وضاربة مك اب نااضي تقولي حضاارة لشي عرس...ركبو لبنات عند إسلام ولبقية مع إدريس وشدو الطريق لرياض لي كانت الصالة ديالو مزوقة بأجواء العيد ميلاد... زوج طبالي مقادهوم تريتور بديكور شيك وأنيق والبوفي فيه لمملاحات والحلويات وفالحيط ملصقين حروف "Happy Birthday Zine El Abidine"
كانت بيسان واقفة على شغالها وتاحاجة مناقصة.. قربات جهتها سناء لي تاهي ضاربة حطة بلدية ونطقات بخفوت: الله يخرج هادشي على خير
بيسان:(بتوثر)عفااك ماتزيديش تخلعيني باركة الخلعة لي شداني
سناء:اش غانقول ليك توقعي كلشي
عضات بيسان على شفايفها وتفكرات الزبلة لي زبلاتهاا فاش عيطاات لناس وعرضات عليهوم قبل گاعماا تقولها لخوها والطامة الكبرى أنها لحد الساعة ماعلماتش حيت كان مسافر هو وزين العابدين هاد ليوماين على قبل لكومبا لي عندو فلندن..كلما بغات تقولها ليه تايتربط لسانها وتاتسكت ودابا تاتفكر فكيفاش غاتفكهاا معاه ومن زهرها هوما راجعين ليوم وراه دابا فلمطاار تايديرو اخر إجراءات...
سمعات صوت الهضرة الكثيرة وخرجات هي وسناء لقاو رحيل وعائلتها وصلو وأصلا هوما لوحيدين لي عرضات عليهوم واليازيد فقط أما تاطامو راه رجعات لفاس هي وراجلها...عينيها جات على ريان لي بدورو شاف فيها وقلب وجهو فالبلاصة شي لي خلاها تزير...قربات جهتهوم مبتاسمة وبدات تاتسلم على رحيل ولبنات وتانيرت وباست يد إدريس ولبقية غير حركات ليه راسهاا
استقبلاتهوم هي وسنااء عااد جات رحمة لعندهوم عاطياهوم صوابهوم.. ضايفوهوم وبيسان بحال لاجالسة على الجمر.. سمعات صوت الدقان فلباب لكبيرة وناضت بزربة لقات السعدية حلات لباب وكان نوح هو لي داخل بوحدو..شاف فيها وهو هاز حاجبو حيت صوت لموسيقى مطلوقة واخا مامجهداش..
بيسان:خويا على سلامتك فين هو زين؟
نوح:مشى مع لكوتش ديالو
بيسان:مغايجيش
نوح:لا شوية ويجي(شاف فيها بنظرة تاقبة) مالك؟
بيسان:خويا شوف كنت باغا نقولها ليك ولكن مكانتش لفرصة مع التسافيرة ديالك وزيد تشطنتي مع لكومبا دزين
نوح:(قاطعها بجدية)اش تم؟
بيسان:ليوم عيد ميلاد زين العابدين وأنا درت ليه حفلة وعرضت على رحيل ودارهوم وهوما هناا
سكتات وعينيها على نوح لي كان تيشوف فيها بواحد الشوفة خلات ركابيها يخواو عليها..
نوح:(قرب جهتها وقال بصوت قاصح) واش عارفة راسك اش درتي؟
بيسان:خويا تيق بيا والله تاكنت باغا نقولها ليك وزيد بغيت نفرح بيه لامتى غايبقا هاكا فيما يوصل عيد ميلادو نميكو عليه
نوح:(بنرفزة وبصوت غاضب قال)ميكي عليه الالة ماشغلكش نتي عارفة السبب بلاتمرضين ابيسان(عضات على شفتهاا وسكتات وهو كمل)ملي يادلي باغا ديريها علميني على الأقل
بيسان:مالقيتش لفرصة
نوح:(نطق بنبرة ساخرة) لوقت تعلميني مالقيتيهش وتعلمي الناس لقيتيه ياك الشريفة
عض على شفتو بنابو مغدد وتخطاها وهي بقات تاتلوم فراسها..دخل لصالة وباين فيه منيرڤي غير شافتو سيدرا وهي تنوض عندو وقالت بحمااس:بابانووو
رحيل لي كانت تادوي مع لبنات شمات ريحتو مع الدخلة روعاتها تاني ولكن لي صدمها كثر هو لكلمة لي خرجات بنتها من شفتهاا.. تبسم نوح بزز عليه فوجه سيدرا وتحدر هزها وهي عنقاتو ونطقات بحماس:فين زينبيدين بابانو يجي يطفي شميعات
نوح:(باسها فحنكها وقال بهدوء)هاهو جااي ابابا
ناض عندو إدريس وسلم عليه ونوح ماكان عندو كيف يدير ختو حطاتو فموقف يحسد عليه ولمشكيل ماشي هنا لمشكيل فولدو لي غايجي..
إدريس:على سلامتك اولد لحاج
نوح:الله يسلمك اسي إدريس مرحباا بيكوم الرياض نور بمجيتكوم
إدريس:الله يكبر بيك اولدي
ضور عينو تايقلب عليها وبانت ليه جالسة جنب جداه وسادة نيفها وقالبة وجهها عليه.. داك لون لي لابسة أثيرهاا وخلى داك لبركان لي خامد فداخل ديالو يفيق.. مكرهش يهزها يهرب بيهاا واخا عارفها محاملاهش دابا ولكن عقلو هادشي لي كيطلب منو.. عض على خدو من لداخل تيكب فيه جنون عصبيتو من ناحية رحيل ومن ناحية بيسان لي زبلاتهاا وخلاتو هو يفكهاا.. دخل جلس معاهوم واخا عياان وكان باغي يمشي يدوش ويرتاح ساعة مجاتش يخلي ناسو واخا جدو كاين.. أما رحيل راه صافي شوية وطج ريحتو خنقااتها ومن دون الروايح ديالتو بوحدها لي تاتشمها.. قلبات عليه وجهها ومحاملاش تشوف فيه ونطقات بعصبية:هاادا لاش جااي
تانيرت:(حشمات من رحمة وزاينة) أويلي ابنتي راه هادي دارو حشومة
رحيل:(هزات كتافها) ومن بعد مايجيش اووف ياربي على ريحة لخنز بحال لحوت المعفون
جبدات رحيل برفان ديالها وبدات تاتشمها والو باغا طج.. أما هو مضارش باقي عندها حيت عارف راسو غايتهور وزيد دابا دماغو خدام مع ولدو..صونى تلفونو وكان هو علمو بلي راه قرب يوصل وبيسان شافت فنوح بمعنى شنو ندير..
سيدرا:بيسو هزي حليوة وديري فيها شميعات باش يجي يطفيها
نوح:(ببرود)جابو لحلوة؟
بيسان:اه راه فالثلاجة نجيبها؟
حرك راسو ليها وسكت أما هي ناضت جابتها وقادو فيها الشماع.. ومع سمعو الدقان كلشي ناض باش يستاقبلوه ونوح طلق تنهيدة طويلة تيتساعد لشي لي غايوقع..
دخل زين العابدين لي كان ضارب الكحل من غير سبرديلتو لي بيضا كاتشقشق.. دخل لصالون فين قالت ليه السعدية راه جالسين ومع دخل تسمعو دوك طرطرقات فوق راسو وتسمع صوت الكل قالو دقة وحدة:عيد ميلاد سعيد..
كان تيشوف فالكل بنظرة باردة وعينو جاات فنوح لي بادلو الشوفة وهو عارف شوفة ولدو شنو معنيتهاا.. جات سيدرا شدات يديه ونطقات بصوت حماسي:زينبيدين اجي طفي الشمااع
جراتو وبكل انصياع تبعهاا تاوقفاتو قدام الكيكة لي مكتوب فيها عيد ميلاد سعيد زين العابدين 18.. الكل كان تايتسنى يطفي الشماع من غير المقربين لي قلبهوم كيضرب.. أما هو زير على يديه وملامح وجهو بان فيها لغضب وفغفلة من الكل هز ديك الكيكة وضرب بيهاا بالجهد تاجات مشتتة فوق الزربية وخرج.. تبعو نوح كيعيط ليه ساعة ماوقفش ليه ومشى بزربة كيجري..خرج إدريس تابع نوح لي بقا واقف تايحك محاجر عينيه بتعب عميق..
إدريس:ولد لحاج ياك لباس مال زين علاش مباغيش يحتافل؟
نوح:(شاف فيه وقال بنبرة باردة)حيت فبحال هاد النهار لي ولداتو سمحات فيه ومشات..
"ذلك الشرخ لازال حياً داخلي"
بعض المرات كانديرو شي تصرف بحسن نية ولكن تايتقلب لعكس.. بيسان كانت باغا تخليه يحتافل معرفاتش بلي راه داك المشكيل لي عندو بخصوص هاد التاريخ غايبقا ديما مرافقو مدى لحياة.. واقفة فلوسط عاضة على شفايفها وعينيها على لباب لي خرج منو زين العابدين وخوهاا.. زيرات على يديها وخرجات تاهي من الصالة ومباشرة خرجات وراها رحمة لي كان باين فيها معصبة.. هادشي علاش مبغاتهاش دير لعيد ميلاد حيت عارفة اش غايطرا وكانت باغا تأنوليه ولكن بنتها سبقات وعرضات على الناس قبل ماتاخد رأي خوها وتشاور معاه.. كانت بيسان ناوية طلع وهي تشدها رحمة من دراعها وداتها جهة لكولوار فين كاين بيرو نوح أو وقفاتها تماا
رحمة:(بانفعال) صافي ارتاحيتي هادشي لي كنتي باغااا
بيسان:كنت باغا غير نحتافل بيه
رحمة:تحتاافلي ونتي عارفاااه اش واقع ليه ياك قلت ليك تشاوري مع خوووك وماديريهاش من عقلك ابنتي صافي هادشي لي بقا جبتي النااس ووتشوهنا معاهوم شنو غايقولو داباا؟؟
بيسان:ماما واش عند بالك أنا غانبغي نقلق خويا
رحمة:(قطعاتها) بيسان نتي غلطتي وتبريراتك مغايفيدونيش داباا نهار لول كنتي تفكري فيها قبل ماتمشي ديري حاجة زعمة رااك كبيرة وبعقلك ماتحتااجيش نبقا نوووريك هاد لغلط لي درتي مغاندوزوش ليك وهضرتنا مسالاتش هنااا
خلاتها رحمة حابسة دوك الدموع لي فعينيها مباغاش تنزلهوم ولكن بلاشعور منها نزلو.. من حقهوم يلوموهاا حيت دارت غلط وكون غير مكانتش عارفة يقدرو نميكو ولكن هي عارفة ومع دلك دارت داك لغلط لي خلى واحد الجرح يعاااود يتحل.. شبعات بكاا فداك لكولوار غير بوحدهاا تاسمعات لحس وضارت عند بالها مها لي رجعات ساعة تفاجأت فاش شافت ريان ضارت بالجنب ومسحات دموعها وبهدوء تخطاتو غادة لبيتها حيت بصح فهاد لحظة ماعندهاش لخاطر لاتهضر معاه ولاتفكر مشكيلها معاه لي أصلاً ماشي وقتو.. أما هو كان باغي يمشي لحمام تاكيسمع صوت لبكا ومع قشعها استغرب وجاه فضول وكان غايسولهاا ساعة ماعطاتوش مجاال حيت خلاتو ومشااات وهو بقا مشطون عليه...
واقفين فالصالة شي يشوف فشي وحد ماهضر ولاسول..رحيل كان قلبها كايزدح بالخلعة بسباب ديك ردة فعل زين العابدين الغير متوقعة.. داك السكاات المزعج كسرو صوت سيدرا لي شدات فيد رحيل ونطقات ببرائة:مامي علاش زينبيدين لاح حليوة واش ماعجباتوش؟؟
رحيل:(تبسمات ليها) غير امامي هو مقلق وصااف
جات السعدية كاتجمع ديك الروينة ولحلوة لي تشتتات فالزربية ورحمة تاتبسم لتانيرت وقالت بصوت هادئ كاتبرر ليهوم: غايكون عندو شي مشكيل هادشي علاش تصرف هاكا
تانيرت:(بفهم) ماعليش هادو هوما لولاد حال وحوااال
تفهمات تانيرت شنو كاين ومابغاتش أصلا تحكر حيت داكشي مكيهمهااش.. تاحد ماسول باقي وجلسو تايهضرو على حمل رحيل متلفين بيه قضية لعيد لميلاد...
**
"مو سمحات فيه ومشات" مكانتش نهائيا ساهلة تقال هاد لجملة حيت قاصحة بزاف.. إدريس لي كان واقف مع سمعها حل عينو متفاجأ ممتوقعش نهائيا يسمع هاد لهضرة.. لسانو تربط وباش يزيد يسول ماقدرش وبقا غير تيشوف فنوح لي طلق تنهيدة طالعة من أعماقو.. جبد تلفونو ودوز لخط لزين العابدين لي كان عارفو مغايجاوبوش وغير تقطعات لابيل وهو يدوزها لنمرة خرى.. زوح رنات وتسمع صوت رجولي قائل:ولد لحاج
نوح:(حك جبهتو وقال بصوت متهدج) زين العابدين غايجي لتم سير سبقو وحل ليه لباب وخليه بوحدو
لكوتش:واش واقعة ليه شي حاجة ؟
نوح:(زفر النفس ونطق بصوت خشن)لمهم نتا غير دير لي قلت ليك الله يسهل عليك ورد ليه لباال من بعيد ولاوصل عندك صوني علياا
لكوتش:واخاا كون هاني
قطع معاه وبقا تايزفر النفس وهادشي لي مكانش باغي يطرا ولي كان خايف منو.. أما إدريس كان تيشوف فيه ومغاينكرش بلي حس بيه حيت تاهو أب وتاهو فواحد لوقيتة وقعو مشاكيل لولادو لي أثرو فيه هو وعاش فترة عانى فيها معاهوم... أي حاجة ضراتهوم كانت تاضرو هو لول أي بكية بكاوها كانت تاتحرقو هو وتتأزمو.. بصح لولاد تيتقصحو ولكن لواليدين لي كياكلو الدق... قرب جهتو وحط يديه على كتفو بدون مايدخل معاه فتفاصيل لموضوع لي بالنسبة ليه شخصي ومتعلق بيه هو أو ولدو..
إدريس:عطيه لوقت فين يبقا بوحدو وماتخممش بزاف مولاها ربي
نوح:(حرك راسو ونطق بهدوء) يدير ربي تاويل
إدريس:خلينا ندخلو لدخل لبرد هنا
نوح:نتا غير سير اسي إدريس أنا جاي
تفهم بلي بغا يبقا بوحدو وماحكرش عليه خلاه ودخل ونوح تمشى بخطوات تقال جهة طوموبيلتو لي موقفها قدام لباب دالرياض..حلها ودخل جلس وعقلو واهلي فاش تيخمم.. حل لبواط وجبد منها باكية دلگارو وشعلو يكميه وعقلو راه مشغول بولدو..ماحدو ماعيطش ليه لكوتش وقال ليه راه وصل لصاال مغايرتااحش وعقلو غايبقا يمشي ويجي بالأفكار لي مغاترحموش... هو عارف زين العابدين فاش تيتعصب تايبغي يبقا بوحدو وتاهو مكيحكرش عليه وتايخليه براحتو.. عاطيه مجال يتنفس فيه بلامايبقا تابعو حيت عارف كراكتير ولدو كيشبه ليه فبعض لحوايج منهوم قضية الغضب بزوج بيهوم فاش تايتعصبو كيفضلو ينساحبو ويبقاو بوحدهوم..
نقيطات الشتا تاينقطو فالأرض كيعلنو على ليلة ممطرة.. كيجري وصوت أنفاسو مسموعين.. الشتا بدات تجهد تاتسرد فيه وهو مامسوقش ليها.. حيت غضبو هو لي طاغي على أي شعور ممكن يحس بيه فهاد اللحظة.. وقف فوسط الشانطى كيلهث وصدرو يطلع وينزل.. الدنيا كانت خاوية تاتصفر ولي عندو شي دار رااه مخشي فيهاا ولي ماعندوش راه مدرق عليه جنب شي محال.. شمر على نيفو وعيونو القهوين تايشوفو فالشارع بنظرة باااردة عكس الغضب لي حاس بيه.. تحرك بخطوات تقيلة من تم والبرد كايلسع فوجهو ودخان دلبرد كايخرج بين شفايفو ونيفو مع كل نفس طلعو وخرجو.. طريق طويلة تمشاها على رجليه تاوقف قدام لاصال لي كيتريني فيه قرب جهة لباب وبقا واقف تاسمع صوت لكوتش ديالو لي كان جااي وخاشي يديه فلمونطو شاف فحالتو وبدون ماينطق جبد سوارت وحل ليه لباب لكبيرة دلصال وتازين العابدين ماهضرش حدو دخل والضواو بداو يشعلو دلصاال.. سد لكوتش ديالو لباب وقبل مايدخل جبد تلفونو ودوز لخط لنوح لي جاوبو في ساااع:جااا؟؟
لكوتش:اه راه لداخل كولو سارد بالشتاا باين غدا غايصبح مريض
نوح:(بقلب مهموم) غانعدبك معايا بقا معااه تم ورد ليه لبال من بعيد
لكوتش:ماتقولش هاكا اولد لحاج زين العابدين راه فمقام ولدي كون هاني
كمل لكوتش طريقو لداخل مخلي زين واقف فوسط لصال.. نصل لقبية وتبعها تيشورت لي لابس تابقاا بصدرو لعرياان لي مخدوم بالسبور.. لزابدو مستفين وقاصحين وكتاافو لعروق منفوخين فيهوم كيباانو مطراسين.. قرب نيشان جهة الكيس دلبوكس وبدون مايدير ليگون دلبوكس بدا كيضرب فيه بكامل جهدو تايكيتسمع صوت السنسلة لي معلق فيها تاتمشي وتجي وتصدر صوت مزعج..كل ضربة ضربها كان تيتفكر فيه حدث طرا معااه.. عيد ميلادو من بين التواريخ لي مبقااش حاملهوم وداك النهار هو كيعتابرو مكياينش فالكالوندغي نهائيا.. ضارب عليه بحال لامكاينش.. حيت هاد التاااريخ بالدات كيفكرو فهاديك لي ولداتو ولي مباغيش نهائيا يفكر فيهاا.. صدرو كيطلع وينزل بقوة الإيفور لي كيدير ولكوتش حاضيه من بعيد راد ليه لباال.. أصلا هاد الأيام تهلك بلونطريما بسباب الكومباا لي دوز فلندن ولي كيف عادتو ربحهاا.. وعارف بلي هاد الجهد لي كيدير غايخرج بيه على صحتو ولكن مايقدرش يدخل حيت عارف بلي زين العابدين هاكا تيفرغ طاقتو السلبية.. ملي كان صغير وهو كيتريني عندو كلما جااا لمغرب.. بصح عندو كوتش اخر ولكن هادا قريب ليه بزااف واخا بعض المرات تايتعدى عليه بلونطريماا ولكن من بين دراري لي تايترينيو عندو وعزازين عليه هو زين العابدين.. كيعقل نهار لول جاا عندو كان باقي صغير ولكن نفسو حارة مغاينساش نهار بدا يتريني بيه بوحدو كيفاش كان واقف قدامو بكل تقة وحجبانو معقودين مجايينش گاع مع عمرو الصغير.. جاه على گانتو ولقاه كيسمع لهضرة لي تايقول ليه راسو خفيف..
تنهد لكوتش وجلس مراقبو من بعيد في حين هو كان منعازل على لعالم والمحيط لخااارجي ومنغامس فتدريباتو لقاسية لي تايفرغ فيهوم دوك لمكنونات الداخلية لي هاز واخا عارف راسو يستحيل يفرغهوم حيت تحفرو فالداخل مخلين ليه بلاصة كحلة.. دم خرج ليه من يديه لي تجرحو ولي كلاو الدق بلبوكسات لي تايضرب ومع دلك ماحبس تاحس بالكيس دلملاكة تشد عقد حجباانو وشاف بنظرات غاضبة فالشخص لي حبسو.. كان نفسو لكوتش ديالو لي قال بهدوء:ارتاااح شوية وتنفس وقبل ماتعاود تريني لبس لگوانتي ديالك
تخطااه زين العابدين مامسوقش لهضرتو وتمشى جهة الأتقال لي مستفين تما وبدا يهز ويتريني بيهوم.. ساعات دوزهوم فلاصاال وكلما حبسو لكوتش من شي حاجة تايمشي ليه لحاجة خرى.. وهو باغيه غير يرتاح حيت لازاد جهد راسو راه يقدر لاقدر الله تجيه سكتة قلبية... لاح لكوتش داااك التقل فالأرض لي هز وقرب جهتو بلامايهضر معاه عطاه بوكس لوجه وزين العابدين راه بحال لاشعلتيه... هز يديه على شكل بوكس باغي يضربو ساااعة حبسها فالسماا وعينو كانو تيشوفو فلكوتش بنظرات غااضبة... مايقدرش يضربو ولايمد عليه يديه وااخا يدير ليه لي دااار حيت زين العابدين كيحتارموو بزاااف... ضار جهة لحيط وضرب داك لبوكس تاجرح يديه مامسوقش ولكوتش تنهد وقرب جهتو شدو من دراعو وقااال بجدية: شوف فيااا (قلبو عندو وقاال بهدوء) باغي تريني مغانمنعكش وعمري أصلا منعتك وفيما جيتي لهنا تاتلقى باب الصال محلول فوجهك ولكن هاد لمرة غانحبسك ومغانخليكش تكمل شنوو كادير ( كمش حجبانو )نتا راه غاتهلك صحتك لابقيتتي هااكاا وهادشي لي مانخليكش ديرو.. معصب وي خرج عصبيتك ولكن ماشي بطريقة سلبية لي غاتأتر عليك وتخرج عليك.. مغاتهز مزال تاحاجة ومغاتقرب لوالو غاتمشي تريح لهيه نمشي نجيب باش نداوي ليك دوك ليدين لي شوية وتهرسهوووم
مشى وزين العابدين بقا واقف تايسترجع أنفاسو وببرود هز يديه وشاف فيهوم مجروحين جهة لعضومة وهادشي لي ضرب بيها لحيط خلاااص واكلة الدق ماهتمش بيهوم... قرب جهة القبية وتيشورت لي لاح لبسهوم واخا فازگين ولاح عليه لقب وببرود توجه جهة لباب حلو وخرج..
ملي طمنو لكوتش عليه قلبو ارتاح شوية حيت على الأقل عارفو فين كاااين... واخا راه مغايرتاح تيبان ليه راجع ولكن خلاه على راحتو...كمى لگارو التالت وغير سالاه نزل من طوموبيل ولبرد كيضرب فوجهو مع الشتا لي باقا تاتصب.. دخل لرياض وسمع صوت الهضرة جايا من الصالة ومادخلش كمل طريقو تاوصل لفوق وقبل مايدخل لجناحو بانت ليه سيدرا جايا وهازة لقطية الصغيرة لي ولدات إيڤانا خاشياهاا فيهاا..
سيدرا:(قربات جهتو ونطقات بصوت حماسي) بابانو شووف قطيطة فاقت
نوح:(مسح على شعرها وقال بهدوء)بشوية عليها راه باقي صغيرة خليها عند ماماها
سيدرا:غانديها لعند مامي باش تشوفهاا
نوح:سيري يالاه وعنداك الدروج
دخل لجناحو وسيدرا كملات طريق لتحت رادة لبال لديك لقطة لي تاتمخشش فيها وتايتسمع صوتها الصغير فحظنها..
قربات جهة رحيل لي كانت متكية وهازة طبسيل دلمملاحات تتاكل فيه...
سيدرا:مامي هاهي قطيطة
رحيل:(تبسمات وتقدات فجلسات) ياختي على لفنكوشة صغيرة
كانت لقطيطة بيضاا وفيهاا ديطاش فالرماادي وعويناتها بحال لون لبحر فزرقاا ديالو..
تانيرت:بعديها ابنتي على ماماك
سيدرا:علاش هي زوينة متديرش بيتيز
تانيرت:حيت ماماك عندها مومويات فكريشة وكاين لي تاتكون عندها حساسية ابنتي من لقطوط
رحيل:(شافت فمها)واش بصح؟
تانيرت:اه ابنتي ردي لبال ومن الأحسن بعدي عليهوم
رحيل:(تبسمات لسيدرا) اش غاتسميها؟؟
سيدرا: (بعيون براقة) نوسيد مامي
رحيل:(كمشات حجبانها) نوسيد اش هاد السمية تاني مختارعة امامي؟؟
سيدرا: هادي سميتي أنا وبابانو نوح وسيدرا نوسيد
تبسمو لي جالسين فالصالة جميع ماعداها هي لي فرفرات بدوك عينين لمونيكة وقالت ببرود: على زيناااتو
رنيم:سمي شي وحدة عليناا حنا
نطقاتها وهي تاضحك مع لبنات ورؤوف جالس قدامها وحاضيها من صباح ربي وهي ولاهناا گاعما عاقت بيه وماضارتش شافت فيه بمرة.. عكسو هو لي معارفش راسو علاش تايحضيها أو ولات تاتثير انتباهو بشكل غير طبيعي.. قلب وجهو لجهة لخرى تايحك لحيتو أو واحد لعيون كانو حاضينوو باستغراب ونظرات شك...
أما رحيل فعيات بلجلاس وحسات بضهرها تقسم ومع دابا بدات تاتقل فمكاتبقاش مرتاحة فبلاصة وحدة.. ناضت من بلاصتها وشاف فتانيرت وبهدوء قالت:غانطلع لسطح نشم شوية دلهواا عيت هنا بلجلاس
تانيرت:لبرد ابنتي عليك
رحيل:ماعليش انلبس جاكيط
هزاتو وخرجات بشوية عليها حاطة يديها على كرشها وغادة لسطح لي عمرها طلعات ليه من النهار جات لهاد الرياض..حلات لباب ومعاها عيونها تحلو وهي كاتشوف السطاح لي كان يجري فيه لخيل كبير..جهة كانو مدوزين عليها ومغطينهاا ومسدودة ببيبان لي كانو تايبينو لداخل مضبب..تمشات جهتها بفضول وكحزات لباب لي كان تيتحل على جنب وهي تلقى تما جليسة تفتح النفس لامن الزربية لامن الألوان لامن ديكور ديالها لي كانت بين العصري والتقليدي.. زولات دوك لبوط لي لابسة وتمشات على الزربية الرطبة كاتزيد تكتاشف لمكان عاد خرجات لبرا وهي مخشية فديك الجاكيط.. بان ليها باب مسدود تم ماعرفاتوش ديالاش.. ردات لباب وتمشات جهة لبلاصة لمعرية منها لسماا ومن زهرها الشتااا حبساات وقفات فوق واحد الدرجة كاطل على الزنقة وتاتعمر ريتها بريحة التراب لمبلول بلماا دالشتاا..
دوش ولبس عليه حوايج دافية وخرج من لجناح وريحة الشومبوان ممزوج مع ريحة العطر الرجولي لي داير عاطيين ملونج خطير...نزل لتحت ومع دخل مالقاهاش نطق بهدوء:فين رحيل؟
تانيرت:طلعات لسطح
كمش حجبانو واستغرب من الطلعة ديالها لسطح فهاد لجوو ولبرد لي تايكز لعضاام.. قلب طريقو غادي عندهاا ومع طلع بانت ليه عاطياه بالضهر مستكينة وهازة راسها فالسماا كاتحس دوك النجمات لي تيبانو ليها.. هز حاجبو وتبسم بلخف وقرب جهتها باشتياق عارم.. أما هي فعقلها ومقال ليها تحبس النجوم لي تيبانو رغم الضبابة لي مغطية بعضهوم.. جيوبها الأنفية استنشقو ريحة خانزة خلاتها تكمش حجبانو وتسد نيفها وقبل ماضور حسات بأنفاسو الساخنة ويديه لي تلوات على خصرها وتحطات فوق كرشها مباشرة كايحركها بحنية.. كلشي داز بزربة شي لي خلاها ماتستوعبش.. ولكن سرعانة مادارت ردة فعل فاش حطات يديها فوق يديه وقالت بنبرة غاضبة: حيييييد يديك عليااا
كان منتاشي بريحة برفانها لي بدلاتوو...حرارة جسمهاا مع جسمو خلات مشاعر خامدة تفيق.. زاد زير عليها وخشى راسو فعنقو وهي بدات تاتحرك بين يديه بانزعااج خلاتو ينطق بصوت مبحوح بلگارو: ريحي
رحيل:(قالبة وجهها ومكمشة حجبانو وبانفعال نطقات) واطلق مني ابناادم
غرسات ضفارها فيديه باش يطلقها وهو حلف لاحرر جسمها من سجن جسمو.. كيحس براسو بحال شي واحد كان فالصحراا عطشااان وغير بان ليه ينبوع دلما مشى ليه تيجري كيشرب منو بجنون..
حررات راسها ومع ضارت شافت فيه قشع لكحول دعينيها شي لي خلاه يكمش حجبانو..
رحيل:اخر مرة تحط يديك عليا
نوح:(شدها من وجهها بيديه بزوج وقال بهمس ساخن) لسانك طوال بلاقياس
مجات فين تجاوبو تاكان مسكتها بقبلة عنيفة استوطن فيها رحيق شفايفهاا بحال شي غريق..
ملي قرب منها ماقدرش يزيد يحبس راسو وهو مشتاق ليها..ليالي هوما دوزهوم بلابيها كانو تقالين عليه وطوال..عيى من داك الجفا لي حاس بيه من جهتها وعارف بلي ماشي بخاطرهاا حيت تصرفاتها كلهوم تبدلو وماشي تصرفات رحيل لي كيعرف.. وزيد هي ففترة حساسة لحمالة ولوحم تايلعبو دور فنفسيتها هادشي علاش عادرهاا.. يديه كانت مزيرة على وجهها وشفايفو كانو فصراع مع شفايفها فحرب الألسنة... منتاشي بريحتها لي بدلاتهاا ولي خلاتو يضرب بصبرو عرض الحائط... أما هي فكانت باغا تجن من داك لقرب ديالو ويديه لي شادين وجهها وريحتو لي خنقاتهاا وهو ككل ماحملاهش يقرب منها ويقيسهاا..حطات يديها على صدرو تادفع فيه بكل قوتهاا ولكن هو ماحررهااش تاشبع ولو جزء بسيط من اشتيااقو ليهاا..مع بعد عليها مع تحنات الأرض كاتقياا گاع لي كلااات.. وهو فاش شافها فديك لحالة قرب جهتها شادها لاطيح وهي راه تادفع فيه حيت مباغاش يقيسها ويقرب وريحتو تاتزيد تخلي كرشها تقلب عليها وتقياا.. هزات راسها وبدات تاتنفس ويديها على جنبها تاتحاول تستنشق الهواا..
نوح:(باهتمام) شوية دابا؟
رحيل:(شافت فيه مكمشة حجبانها) ماحدك لاصق فيا مغانكونش مزيااان (عطات يديها على نيفها) عاار ربي واش ماعندكش لماا فداركووم
نوح:(كمش حجبانو) يالاه مدوش
رحيل: مدوش وفيك ريحة لخنز بحال دجاج مزفررر
نوح:(مسح على لحيتو ونطق بهدوء) أنا غانبدل الريحة لي كاندير بقاي ليا على خاطرك
رحيل:(ميقاتو) واخا ترقد راسك فجافيل وسانيكروا والله لاحيداات وزايدون أناا مباغاااكش نتاااا كلك تاتعصبني تاطلع ليا السكااار والطونسيون
نوح:(هز حاجبو وقال بصوت خشن) بلاهباال وكترة لغى سيري جلسي لهيه نمشي نجيب ليك لماا
رحيل:(تخطاتو وقالت ببرود) جيب ليا حامضة
نوح:(كمش حجبانو) لاش بغيتيهااا؟؟
رحيل:ماشغلكش جيبها وربي كبير
مشات لجليسة وهو نزل لتحت هز لماا وحامضة تاهي جابها ليهاا وطلع عندها لقاهاا مزولة فولارها وتاتنش بيه..قرب جهتهاا مور مازول صباطو وحط ليها داكشي لي جااب وجلس قدامهاا.. هزات لقرعة شربات هو لول باش تحيد لمرار ديال الرداان لي رداتو وغير سالات هزات ديك لحامضة وعضاات فيهاا...
نوح:(تقاد فجلستو وقال) اش كاديري تتاكلي لحامض
رحيل:(تاتعض فيه بحال لاتتعض فالتفااح وبلاماتشوف فيه قالت) أنا بغيت ناكلو عندك شي مشكيل؟
نوح:غايضرك الشريفة واش هبلتي
رحيل:لحااامض يالاه يحيد ديك الزفورية ددجاج لي فيييك ولي لصقتيها ليا هناا فنيفي
نوح:لاحول ولاقوة الا بالله
رحيل:(شافت فيديه وقاالت بنرفزة) هبط كماااام يديك
هز نوح حاجبو وشاف فيديه مع كان لابس تريكو ومطلع كمامها تابانو شوية من يديه لمنفوخة بلعروق وزغب لي فيهوم.. هبط كمامو بلامايزيد يجااحد عاطيها لخااطر أما هي ضربات ديك لحاامضة كلها تابقات فيها غير شاشية ديالها لقاصحة وناضت تتقاد زيفها بلاماتزيد تهضر معاه نزلات لتحت مخلياه جالس كيخمم ليهاا ولهاد لوحم لي مابغااش يسالي... معارفش واش غاتبقا الأوضاع هاكا تاتولد وهاد لبعد واش تاهو غايبقاا حيت بصح مبقاش قادر يصبرر وهو باغي مرتو تكون جنبو يحط عليها راسو وقت العياا... ملي يكون خدام ويجي عياان يلقاها تاتسنااه.. من نهار تزوجو ولفاتو تكون ديما حاضرة معااه ودابا فاش مشات جاه صعيب يتأقلم مع الوضع.. دايرة بحال شي بلية فاش تاتولفاه وتاتقطعهاا تايجيك صعيب تكمل حياتك بلابيهاا... تنهد وناض نزل لتحت لقاهوم مجمعين ودغيا نساو لبلان لي طرا وبيسان ملي طلعات ماعاود نزلات خلات ريان يشك بلي بيها شي حاجة خصوصا فاش شافها تاتبكي.. تسربى لعشاا وداكشي كان متول حيت بيسان دوموندات كلشي من عند تريتور...تعشاو ورحيل طاحت عمية فلبسطيلة ديال الدجااج لي حمقاتهاا ومع شاطت طلبات من السعدية تجمعها ليهاا.. ناضو باش يمشيو حيت كلشي خدام غدا ونوح رافقهوم تال لباب وكلشي ركب بلاصتو من غير إدريس لي بقا اخر واحد سلم عليه وقبل مايمشي نطق ليه بهدوء وبوقاار: الله يدير شي تاويل دلخير اولد لحاج
نوح:آمين اسي إدريس طريق السلامة
مشاو طوموبيلات وهو دخل لقى مو كاتسناه غير شافها عرف عليااش غاتهضر وقبل ماتحل فمهاا هز يدو ونطق بهدوء ونبرة باين فيها التعب:ماشي دابا ايمّا ماشي دابا
رحمة:(تنهدات)واخا اولدي المهم تصبح على خير
حرك راسو بهدوء ودخل لصالة جلس وسط الظلام كيتسنى ولدو.. قلبو مغارتاح تايبان ليه داخل من لباب ديال الرياض.. كل مرة يشوف الساعة عندو فالتلفون ويتنهد.. ومع وصلات التلاتة تسمع صوت لباب دالرياض تحل وهو ناض بزربة خارج من الصالة وبان ليه زين العابدين داخل بخطوات تقيلة داير لقب عليه وباين فيه كالم ومبرد.. قرب نوح جهتو بلامايهضر عنقوو بالجهد وخشى ليه راسو فصدرو وبدا كيطبطب عليه وزين العابدين مدار تاشي رد فعل ومابادلوش لعناق.. يديه لي كانت مطلوقة كان مزير عليها على شكل بوكس تالعروق بانو مطراسين..أما نوح هاد الساعة أهم حاجة عندو هو ولدو رجع بخير وعلى خير..واخا عارفو داخليا راه ماشي بخير مي حسن من بلاش..
شحال صعيب لواحد لي تيبقا يخبي فالداخل ديالو أي حاجة قصحاتو وضراتو ومكيخرجهاش لعلن.. تايبقا محتافض فيها بينو وبين نفسو.. وكيخلي وضعو يتأزم ونفسيتو تزيد تضرر.. بعد عليه كيتفقد بنظراتو الحنونة ولخايفة ملامح وجهو لباردة كبرودة شهر ديسمبر.. ماكرهش يهز داكشي لي كيضرو بلاصتو يتقصح هو لمهم ولدو يكون بخير.. طبع قبلة مطولة على جبهتوو عاد قال بهدوء: غايكون فيك لبرد سير دوش وأنا غانجيب ليك لعشاا ابابا
زين العابدين:(بهدوء) مابغيتوش غانعس
زول نوح يديه وخلاه على راحتو.. بقا متبع ليه لعين وهو طالع فالدروج تاغبر وتنهد عاد طلع تاهو لجناحوو..
دخل وسط الظلام حافض طريق فجناحو.. ماحتاجش يشعل ضو مشى نيشان لحمام دخل عاد شعل ضو خافت ونصل عليه قبيتو ولحوايج لي لابس اوقف تحت الرشاش مخلي لماا بارد كينزل على داتو السخوونة.. لحمو تشووك وزغب يديه وقف ببرودية الماا لي لسع جسموو.. تكى بجبهتو على لحيط مخلي لماا نازل على راسو وداتو مدة عاد خدا شومبوان وغسل شعرو ودوز باندوش على لحمو وخرج ملوي فوطة غادي لدريسينغ.. بعدم اهتمام هز حوايحو لبسهوم وخرج لبيت شاعل ضوو خفيف وخافت.. فالجنب دلبيت فوق الطبيلة كانو محطوطين لكادويات لي جابو ليه ماتسوقش ليهوم وقرب جهة النموسية باش يزول لغطاا ومع حيدو باانت ليه واحد الساشي محطوطة تم.. جلس وهزها تايشوف فيها وببرود حلها بانت ليه ورقة مطوية فيهاا هز ديك لورقة ومع حلها عرف شكون حطها ليه.. كانت ورقة متوسطة مقطعة من أجوندا ملصقة كلها بلصقات ديال ربونزل وفلوسط مكتوب بستيلو غوز دلبريون زينبيدين بخطها الطفولي لي كان شوية مامضبوطش ولتحت مكتوبة بستيلو كحل عيد ميلاد سعيد.. بقا تايشوف فيها مدة قبل مايكمشها بين يديه وعينو على ديك لبواطة لكحلة.. شاف فيها ببرود قبل مايهزها ويحل لمجر ويحطها تم هي أو وديك لورقة.. تسطح فبلاصتو مغمض عينيه ولكن شي ريحة تايشم ليها معارفش ملين جاياا.. شمر بنيفو لي حس بيه كيسيل ومع حط يديه على نيفو الريحة جهداات وتما عاد عرف بلي ديك الريحة فيديه.. جلس فبلاصتو كيشم يديه وكيتأكد عاد ضار حل داك لمجر فاش فهم بلي الريحة جايا من ديك لورقة وبلفعل فاش قربها استنشق ريحتها الطفولية لخفيفة.. كمش حجبانو وعينو مشات تاني لداك البواطة لي حاط تم.. مد يديه هزها وحلهاا تايشوف فداك لبراسلي الرجالي لي كان بالحجر الأسود ولوسط فيه واحد الشكل بيضوي بالنقرة بحال بلاكة محفور فيهاا بالفرنسية "Zinbidin" هز داك لبراسلي من البواط كيشوف فداك لحجيرات لكحلين لي كانو تايعكسو ظلام حيااتوو.. بقا مدة كيشوف فيه تاتقلبات ديك البلاكة لي محفورة فيه سميتو وبانت ليه محفورة تاسمية "Sizin".. تكى راسو على لكادر ديال النموسية وبين يديه داك لبراسلي تايشوف فيه بهدوء..
**
فجناح نوح لي كان تاهو مخشي فبلاصتو وتلفونو فيديه كايشوف فتصاور زين العابدين فاش كان صغير.. مكيضحكش گاع فالتصاور غير كيخنزر فيهوم من صغرو هاكا.. طلق واحد لفيديو ديالو فاش كان فلاصال كايدربو لكوتش فاش كان فعمرو تسع سنين..تايوجه ليه ضربات ولكوتش تاهو.. تبسم بخفة فاش بان ليه زين العابدين غفل لكوتش ديالو بواحد الضربة قاصحة فجنبو ولكوتش وقف تايشوف فيه وگاع دراري لي تم كيصفقو ليه.. السنين دازو بسرعة البرق ودغيا ولدو كبر ولى راجل تباركالله.. تمنطاش لعام ماشي عمر سااهل واخا هاد ليوم عندو دكرى خايبة عليه ولكن مغاينساش بلي بحال هاد النهار هو دخل لحيااتو أو ونسهاا.. بحال هاد النهار هزو بين يديه وهو لحيمة.. الاكان زين العابدين محيد هاد التاريخ من لاجوندا ديالو بمرة فنوح كاان مسطر عليه بستيلو ديال الدهب باش ماينساااهش بمرة..
🔙🔙
كان صعيب عليه يكمل حياتو مبعد مافقد أهم شخص فيهاا.. خوه.. صاحبو.. لي فمثابة بااه..كاان نااصر بالنسبة ليه هو كلشي.. الكتف لي كيحط عليها راسو ملي كيعيى.. ولودن لي كاتسمع ليه فاش تايكون عندو مشكيل.. صعيب تفقد شخص كان تينصحك وتيخاف عليك.. شخص تايسبقك على راسو وتايعطيك كل ماعندو لمهم يشوف لفرحة ديالك.. والأقسى من دلك تفقد هاد الشخص ونتا ماحضرتيش لجنازتوو.. ماتوادعتيش معاه لوداع اللخر..كان فعاالمو الخااص فواحد لعزلة عايشهاا من نهار فاق من لكومة.. لحياة مابقااش عندها طعم ولات رمادية فعينيه.. عايش فقط حيت خصو يعيش وصااف ماشي حيت باغي.. كان غارق فتفكيرو ودكرياتو مع خووه وألبوام تصاورهوم بزوج محطوط قدام عينيه وكل تصويرة كايتفكر دكرى ديالها ونهار خداوها.. صمت قاتل كان كيحيط بيه وهو بوحدو فلاباخطمون.. تقاطعو صوت السرسار مفيقو من الوحدة لي كان غارق فيها..استغرب شكون غايجي عندو فهاد لوقت.. ناض بخطوات بطيئة جهة لباب ومع حلو بانت ليه واقفة قدامو بملامحها الدابلين.. مدة مشافهاش عليها استغرب حيت مشات من بالو ولي استغربو كثر هو كرشها لي كانت منفوخة وباينة من ديك لكسوة لي لابسة كمش حجبانو ورجع شاف فيها بعدم تصديق..
مافيقو من ديك الدكرى غير صوت لباب دالجناح لي دق خلااه يقاطع أفكارو وسهوتو ويكمش حجبانو معارفش شكون فايق فهاد لوقت.. زول عليه لغطا ولبس فرجليه وناض بخطوات بطيئة غادي يشوف شكون..مع حل لباب بانت ليه بيسان لي كانت واقفة ببيجامتها وعينيها الزرقين حمررين ومنفوخين باين فيها شبعات بكاا.. كمش حجبانو وقبل مايهضر سمع صوتها وهي كاتقول بخفوت:خويا واخا نهضر معاك؟
نوح:(بعد من لباب ونطق بهدوء) دخلي
دخلات وهي تاتحك فيديها وتاتهبط كمام لبيجامة لي لابسة.. جلسات فلكنابي لي فالصالة لي عندو فجناحو وهي مهبطة راسها..كانت بحال شي بنيتة صغيرة دارت شي كارثة وكتسنى من باها يعاقبهاا.. هاكا هو شافهاا..قرب جهتها وجلس قدامها جامع يديه ماهضرش كايتسناهاا هي تهضر وتقول اش عندها واخا هو راه عارف الموضوع علياااش باغا دوووي..
بيسان:(حنحنات وبهدوء قالت) خويا أنا عارفة غاتكون مقلق مني دابا حيت درت غلط كبير واخا مكنتش قصداه.. أنا مكانتش نيتي نهائيا نفتح جرووح زين العابدين نيتي كاانت نفرحوو ونخليه يحتافل بنهار لي تزاد فيه حيت ماشي دنبو أن هاديك خلاتو ومشات.. هي لي خسراتو ماشي هو حيت لقاك معااه واقف فجنبو ومساندو وداكشي لي غاتعطيه هاديك نتا قدمتيه ليه..أنا غلطت حيت كان عليا نقولها ليك نتا بعدا ولكن تيق بياا مالقيتش لفرصة نهائيا وماكنتش متوقعة غايدير هاد رد الفعل (شافت فيه بعويناتها لمدمعين وقاالت بصوت خافت) سمحليا اخوياا وماتقلقش مني
نوح:(تنهد ونطق بهدوء مناسب لجو لي هوما فيه) هاد لغلط ابيساان كنتي تفكري فيه قبل ماديريه نتي ماااشي صغيرة باش نوعيوك ونوريوك شنوو الزوين وشنو لخاااييب.. نتي عمتو وعارفة بلي هاد النهاار هو محاملوش وأنا على هادشي مكانجيب ليه تاكادو باش مانفكرووش وباش مانجرحووش.. تانخلي لكادو تال شي نهار ونعطيه لمهم داك التاريخ كانميك عليه على قبلووو هو أما أناا عندي راه هاداك النهار لكبير حيت دخل فيه لحيااتي..نتي غلطتي وغانقولهاا ليك نيشااان كون كان شي حد معارفش كنت غانتفهم ولكن نتي ابيسااان
بيسان:(عضات على شفايفهاا وقالت بحزن) والله ماقصدت
نوح:(تنهد ومسح على وجهو) دابا لي عطا الله عطااه وداك لباب لي كناا سدينااه حليتيه تاااني أناا من عندي هانياا هادشي مولفو مااشي جديد علياا ولكن هوو لااا (نطق بحدة مخنزر فيها) ولددددي مانبغي تاااشي حاجة تقيصو كيفما مانبغيش نتوماا تقااصو تمنطااش لعاام وأنا نكبر فيه وندير لي فجهدي معااه باش ماتنقصو تاحااجة باااش ولدي يعيش كيفوو كيف لولاد لي فلاااج ديااالو أي شوكة كااانت فطريقووو كانحيهاا ليه بااش ماتجرحووش ونتي اعمتو راه رميتي برميل دالشوووك عليه سيلتي دمو..
كان معصب وفجوفو كلام كثير ولكن رغم دلك ماباغيش يقصح معااها حيت عارف ماقصداااتش ولكن هادشي مكيبررش بلي هي ماغلطاااتش.. سكاات ولدو راه ماشي حيت بخير لا راااه حيت كيجمع فالداخل ديالو وحيت عمرو ماهضر وماقال اش مقصحوو.. ولد لي يالاه فعمر الزهور ويالاه دار تمنطااش لعااام هاااز هم كبر منوو لي كيأثر ليه على نفسيتو.. وهو مباغيش هاادشي حيت عارف اش معنية تكوون هااز فوق طااقتك.. حيت تاهو هاز فوق جهدو وصاابر ولكن بعض لمراات صبرو كايحس بيه كيتقادا وتيعيى فمابالك زين العابدين.. كان باغي يبين ليها غلطهاا ويخليها تعرف اش دارت.. ماشي صغيرة وكبيرة واعية وعارفة تفرق لغلط من الصح.. لاكانت هي غلطات هاد لغلط لفادح اش خلات لبراااني.. مقصح معاها لهضرة بااش تعلم قبل متاخد قرار تفكر فيه باااغي يعلمهاا بلي لقرارات مكناخدوهومش بعشوائية.. خصنا نفكرو فيهوم بااش ماندمووش فلخر.. بيسان هادا هو لغلط ديالهاا تاتسرع وتاتهضر بدون ماتفكر وتشوف كلامها لي تاتقول وأبعادو وهادشي لي مخلي علاقتها مع ريان تفشل مع العلم كاانو فواحد الريتم ولمفاهمة ولكن بسباب تسرعها وبسباب كلامها لي نطقات بيه جرحاتو.. واخا هي ماقصداتش بحال دابا نيت ولكن النتيجة مكانتش لصالحها نهائيا... وهي لي دات لعيب... الناس لي كيتسرعو بزااف ضروري مكيجي النهار لي تايندمو على تسرعهوم فأي حاجة سوى قرار سوى كلام سورى تصرف.. هادشي علاش خص لواحد يفكر ويعطي الخاطر بااش مايحسش بالندامة ويبكي على ماضيع بيديه.. كلام نوح بقد مكان قاصح عليها بقد ماخلاها تزيد تفهم ااش دارت وتزيد تستوعب وبلاماتشعر جاا فتفكيرها رياان ولكلام لي قال ليها تاهو وكيفااش هي ويااه تفارقو.. شمرات على نيفها ونوح حاضيها كيسوط النفس بالجهد.. مكيبغيش يقلقهاا حيت مكيعتابرهااش ختو كيعتابرها بنتو.. مقامها عندو عااالي وعزيزة عليه ولكن فاش كاتغلط راه مكيرحمهاااش لاهي لارؤوف لي بعد معانااة طويلة معااه ربي هدااه ورجعو لطريق.. ولى دابا مسؤول ومبقااش هاز ليه لهم حيت عارفو دابا قاد على شغالاتو.. هو هادشي لي باغي فخوتو كل واحد يكون كبابل ويكون هاز راسو حيت هو مدايمش ليهوم كيف تاهو مدام ليه لاخوه لكبير لاباااه.. خلاوه فالطريق وهو لي كمل بوحدوو وهادشي لي باغي من خوتو أو ولادو مستقبلا..
سبحان لي يبيتها فشان ويصبحها فشاان.. على نسيم القهوة لمعطرة حلات رحيل عينيها وهي تاتكسل.. ضارت لجنبها بانت ليها بلاصة سيدرا خاوية عرفات مها جات فيقاتها ولبساتها وسيفطاتها لمدرسة.. ملي حملات ولى نعاسها تقيل بزااف ودغيا كيجيها النعااس.. ولكن ليوم كانت فايقة أونفورم وفيها واحد الطاقة إيجابية.. دارت روتينها الصباحي وصلات عاد لبسات عليها لبيسة سخونة مع مونطوو وفولار.. اكتفت غير بچلوس كيبري فقط.. نزلات لتحت وريحة لقهوة شهاتهاا لقات مها واقفة بوحدها فلكوزينة تاتغسل مواعن لفطوور.. قربات جهتها وعنقاتها تاقفزات تانيرت وقالت بضحك: هههه تزميتي "خلعتيني"
رحيل:(فهماتها) السموحاات صباح الخير
تانيرت:صباح النور اماما كاتباان ليا مرتاحة الله يزيد فراحتك
رحيل:آمين وي ليوم حاسة براسي مزيان عليها قلت نمشي لمحاال لي هملت بزااف
تانيرت:اييه ابنتي ولكن فطري قبل
رحيل:ضروري بغيتي الرعدة دجووع تشدني كبي ليا قهوة تشهيتهاا
تانيرت:لااا ممنوع نسيتي راك حاملة
رحيل:غير ندوقهااا
تانيرت:تت ملي تولدي نجيب بيك طيلموووس
ضحكات رحيل وحطات ليها تانيرت لفطور وجلسات هي وياهاا مجمعين تاسالات وعاوناتها عاد تيسرات لمحال مخليا مها بوحدها فالدار.. وصلات بعد مسافة الطريق لقاات المحاال مرووج تبسمات لبنات لي خدامين تم وطلعات لفوق.. كانت أميمة هي لي شادة بلاصة غزلان فاش مكاتكونش هي تاتولي نائبة عليها حيت هادوك الزوجات لي رحيل تاتيق فيهوم.. وتاأميمة الله يعمر ليها الداار بنت الناس باغا تخدم بدراعهاا..
رحيل:(سمعات الدقان فلباب)دخل
أميمة:صبااحو شرفتيناا فالمحال
رحيل:هههه اوا شتي جيت نشر تاني زين ديالي عليكوم ههه
أميمة:ماشاء الله جا معاك لحمل
رحيل:عويناتك اوا كيف غادي لبيع والشراا
أميمة:الحمدلله كلشي هو هداك راه السلعة دخلات وستفناها ولي شاط راه مشى الگاراج.. وراه لبيسي لتحت مقيد فيه كلشي داخل والخاارج تاڤرفي داكشي أوكي..
رحيل:(باستغراب) السلعة اشمن سلعة؟؟
أميمة:جاا داك السيد عثماان على ماأظن هو لي جابها مع واحد مول لكروصة خدينا لي خص ستفناه وحطينا شي حاجة عندنا هنااا باش لاسالات ولي بقا داوه لگاراج
رحيل:صافي واخا أميمة شكرا
أميمة:أنا غانمشي داابا ياكما محتاجة شي حاجة؟؟
رحيل:لا لا شكراا
بقات رحيل تاتفكر فهاد لقضية وهي أصلا راه ماطلباتش السلعة.. وغير تفكرات السمية لي قالت ليهاا أميمة فهمات اش كااين وعرفات شكون مولاهاا.. شعلات لبيسي وناضت جهة الوراق لي عندها فواحد المجر حلاتو وجبداتهوم ناوية ترسم تاني شي شكيلات طاحو فبالهاا... وداكشي لي كاان رسمات شي حاجة تاحسات بضهرها ضرها وناضت نزلات لتحت تشوف الخدمة بعينيها..
كانو واقفات حدا السلعة كيستفوهاا هزات وحدة فيهوم عينيها وشافت فرحيل لي نازلة بشوية عليهاا ونطقات بهمس:هاد خيتي حاسة براسهااا
ضارت لبنت لخرى وقالت تاهي بشوية:معلوم تحس وهي مولات الشي
لبنت1:اشمن مولات الشي راااه مول الشي هو ولد لحاج أما هي غير دافعة الجبهة مكاتجي تاكيقولها ليها مخهااا
لبنت2: اوا بصحتها كرهتي تكوني بلاصتهاا تمشي تخدمي وقتما قالها ليك عقلك
لبنت1:الله يجيب ليا بحال ولد لحاج ولاهو نيت بااش يكون عندي هادشي
لبنت2:وبااار اختي زعمة راه السيد بمرتوو أو ولادو كوني تحشمي
لبنت1: مالي قلت شي حاجة عييب وزايدون ربي حلل التعدد والشرع عطاا ربعة ومستاعدة نكون ضرة لمهم نتزووج بيه ياختي على نتي كرهتيه تكووني مرتو السيد عندو كلشي الزين والرجولة وحنين وقاصح وزيد عندو لفلووس
لبنت2: اختي انا مكانهزش راسي لفووق باش مايتهرسش ليا عنقي وكانشوف غير قدامي وصاااف
لبنت1:عليها طفرتيه هانتي خدامة بياعة وشراية
لبنت2:نتي زعمة حسن مني سكتي شوفي حالتك كل مرة مصاحبة مع واحد تاتبروفيطي فيهوم باش تجيبي لفلوس
لبنت1:(كمشات حجبانها وقالت) شباغا تقصدي بكلامك؟؟
لبنت2:كلامي واااضح نتي كاطمعي وتاتشوفي بعيد ومكاتحمديش الله على داكشي لي عاطيك الله باغا طيري ودابا تجيبيهااا فرااسك
لبنت1:وليتي تعايريني يااك سري معاودة ليك حياااتي
لبنت2:مكانعايركش مي نتي سبقتي اش معنيتها عمرك طفريه؟؟
لبنت1: ومالي كدبت نتي هازة جيش من خوتك أو واليديك وگاعما تايشيط ليك فلوس لرااسك عقلتي شحال من مرة سلفتك وعمرك رديتيهوم
لبنت2:حمدلله كانصرف على واليديا لي ولدوني وخوتي لي من مي وبااا ماصرفتش على لبرااني وجبتهوم بعرق كتافي كيتك نتي لي يعلم الله تاتعطيه على قبل لبسة ولاخرجة
لبنت1:(بصوت مرتافع جدب انتباه لكليان ورحيل لي واقفة تاتههضر مع أميمة) عاااودي اش قلتي بزااااف عليك القح*بة أناا حسن منك ولالك ونتي غايرة مني
لبنت2:(تاهي شعلات) واااانتي لي قح*بة كاااتعطيه فااابور أما أنااا لحمي عزيز علياا مانوسخووش على قبل مية درهم
لبنت1: يااااك لقح*بة واجي نوريك
جراتها من شعرها ولخرى تاهي شداتها من شعرها وناض الغوات والروينة لكليااان شي خرج مشى شي جلس يتفرج ورحيل تضهشرات بشنو طراا وشافت فأميمة:عيطي لسكوريتي بزربة
مشات أميمة كاطير ورحيل قربات جهتهوم ونطقات بعصبية وانفعااال:حبسي نتي وياااااااهااا حبسووووو
شكون سمع ليك وهوما لصقو فبعضياتهوم تيترايشو وكل وحدة حلفات لاخلات من جهدهاا ورحيل بغات تسخف.. تدافعو جهة لبلاصة لي معلقين فيها لكسااوي وبالجهد تحيد داك لكروشي لي هازهوم وطاحو الأرض وطاحو فوق منهوم دوك زوجااات لي إلى شفتي الوجه تقولي مايهزوش لبيضة على دجاجها وهوما راه ياكلوك بحوايجك... جا السكوريتي تيفرق ومن حسن حظ رحيل تانوح جا باش يطل فلمحاال حبت مكانش عارفها جااات والسكوريتي نسى يعلموو.. مع دخل سمع صوت غوات رحيل وقرب بزربة تايلقى الروينة وعينو مشات ليها هي لي باغا تهبااال بلغواات وكاتشوف فيهوم مرمدو ليها السلعة...
قرب جهتها وقاال بصوت متسائل:رحيل
رحيل:(قالت بصوت عالي) فكهووووم أويييلي
نوح:(ضار شاف فيهوم شوفة وحدة وقلب وجهو وناطق بصوت عالي) حببببسي نتي وويااااااهااا
مع قالهاا مع كل وحدة بعدات على لخرى تايوقفو ويهبطو فتيشورتاتهوم ويقادو دوك الشعورات لي طالعين مراضينش أما هو شاف فأميمة وقال بهدوء:لكليان ليهنا ديري ليهوم رووميز فشنو خداو
أميمة:واخا اولد لحااج
مشات دير اش قال ليها وهو شاف فرحيل قال بهدوء:نتي مزيااان؟؟
رحيل:(عضات على شفتها) همم غانمشي لطوااليط
تبع ليها لعين تاغبرات وضار شاف فدوك زوجات ونطق بجدية: تبعوني
طلع لفوق وغير دخل لبيروها وهو يبدا يكشكش عليهوم:ااااش هاد الروينة دايرين ليااا هنا جاااين تخدمو ولاجااايين ترايشووو حناا فحمااام هااا (خرج فيهوم عينيه) نتي وياااه نهار جبناكوم تخدمو هنا قلنا تخدمو وتهزو راسكوم ساااعة نتوما ماشي ديال لخدمة.. من ليوم مانعاودش نشوف كمامركوم هناا غاتخلصو على ليامات لي خدمتو وفلوسكووم غايوصلوكوم مع عثماان ودابا نتي ويااها غبرو من قدااامي
حدرو الراس ومشاو وكل وحدة تاتدعي فلخر حيت هي سبابها تاخرجات من خدمة مخيرة بصالير زوين ومريحة ساعة لي عينو كبيرة غايجي شي نهار وتعمى ليه...
أما نوح مسح وجهو وجلس فبيرو رحيل تايشوف وراقيهاا لي رسماات وكيشوف لخدمة تابانت ليه طالعة مكمشة حجبانها وقالت: اش كادير هناا؟
نوح:ريحي نهضروو
رحيل:(سدات نيفها وقالت ببرود) مابيناتنا تاهضرررة هاد الساااعة (شافت فيه مكمشة حجبانها) بدلتي ريحتك؟؟
نوح:(تكى على ضهررو ونطق بخشونة) عجبااتك ؟؟
رحيل:(خنزرات فيه) خنززز من لخرى ييع
نوح:(ببرود) هادشي لي رسمتي مزيااان؟؟
رحيل:(جرات وراقها) بااقي
نوح:(ناض وقال بهدوء) ملي تساليهوم نجي نديهوم باااش نعطيهوم لسيدرا يبدا فيهوم أنا مشييت
خلاهاا جالسة تاتسوط قدامها وتاتنش بيديها على ريحتو لي خلى ليهاا...
---
خرج ليوم بكري من لخدمة وقرر يمشي لعندها لفاك يجيبها ومنها يخرجو يبدلو لجو عالله وعسى تسمع ليه وتعطيه فرصة فين يهضرو ويصلح الغلط لي دار.. كيتسناها وهو عارف بلي هاد لوقيتة لي غاتخرج.. وبالفعل بانت ليه هي أو وداد خارجات بزوج مشادات وهي مكبطة ولايحة كاب على عنقهاا.. شافت فيه ودغيا ضحكتها تمحاات وعينيها عليها هو لي ماقربش ليها حيت معاها وداد.. أما صاحبتها غير شافتو وهي تبسم وقالت بهدوء:يالاه نخليك ازين تانتشاوفو
غزلان:بسلامة
قربات جهتو تاوقفات قدامو وهو قال بهدوء:صافا
غزلان:وي
محمد طه:اش بان ليك نمشيو لشي بلاصة نريحو فيهاا
غزلان:مكاين لاش خلينا نمشيو لدار
محمد طه: غزلان خلينا نتحركوو من هنا ويكون خير
شد فيديهاا وتحركو من تم وهي ساكتة وباقي مابغات تنسى ليها هضرتو لي قال.. أما محمد طه سكاتها وعدم اهتمامها ليه خلاه يتعصب وماعجبوش لحاال.. شدو طاكسي ومع قال ليه عنوان كافي وهي تنطق بسرعة:بغيت نمشي لدار عيااانة
قلب مول الطاكسي طريقو وهي سكتات وتاهو التازم السكاات حيت ماعندو مايقول دابا وزيد باغي يكون بوحدهوم.. وصلو ومن زهر محمد كانت الدار خاوية وتانيرت خرجاات تجيب سيدرا ودوز عند إدريس يخرحو بتلاتة.. مشات هي لبيت نيشان وهو مشى لكوزينة باش يشرب.. ونيت يفكر كيفااش غايبدا كلامو معاها.. نزلات مبدلة حوايجها لقاتو باقي فبلاصتو غير سمع حسها وهو يضور عندها وقال: نهضرو داباا؟؟
غزلان:مكاين فاش نهضرو
محمد طه(خنزر) لا كااين هاد ليامات كلها ونتي ممخلياانيش ندوي فيما نجي نهضر تنوضي ومابقيتيش تباااتي فبيتك
غزلان:تاتهضر عادي بحال لامعارفش نتاا اش قلتي وشنو خرجتي من فمك
محمد طه:هضرة قلناها ونسينااه مكنااش قاصدين
غزلان:هههه يااك اسيدي هي كل مرة تقول شي كلام يجرح وتگول ماقصدتش هااا
محمد طه:غزلاان هضرتي لي قلت جات فلحظة غضب وغلطت واعتادرت ونتي مباغاااش تقبلي اعتدااري علااش ؟؟
غزلان:حيت ديك لهضرة من لول مكانش عليك تقولهااا واااش عرفتي معنيتها ولاغير دااوي هاكا نتاا راه شكيتي فخووك وفياا شكيتي فشرااافي واااش عرفتي شناهي هاد لكلمة وبااش حسيت ملي سمعتهاا منك وااش تبغي ندوي عليك بشي طريقة خايبة ونقول ليك شي هضرة تجرح تااانتا (بتبسيمة مريرة) ولاندوي على جيداء حبيبة لقلب بلخاايب...
فكافي راقية جالسة رحيل هي وأسمااء لي كانت تتعاود ليها على تصرفات وليد معاها فهاد الأيام حيت لغسبونسابل لقديم راه تحول لرباط ودابا أوفيسيااالمو شد وليد بلاصتو.. تاتهضر وباين فيها معصبة..
أسماء:مايمكنش كيفااش مكيفهمش راسو تخيلي معايا تايبقا يعطيني خدمة ماشي فلطاش دياالي باش يقرب مني كثر ويزيد يخليني نبقاا فالخدمة وقت كتر
رحيل:وشنو درتي معاه دابا؟
أسماء:اش غاندير تانخدم لي عندي فطاش ديالي ولي ماشي خدمتي تانخليها ليه وكنحاول ندير دليميت بناتناا باش مايضسرش
رحيل:هادا مابلانش اأسماء راه هاكا نتي لي غاتدركي من الأفضل ليك تحطي ديميسيون ديالك وتشوفي شي خدمة فبلاصة خرى راه إسلام لاجاب الله عرف غاتصدقي فمشكيل كبير ونتي عارفة حساسيتو فهاد الموضوع
أسماء:عند بالك لادرت ديميسيون مغايشكش راه ديك لمرة قال ليا حبسي بمرة وجلسي فدارك ولابغيتي لفلوس نحط ليك صالير مي مابغيتش والادرتها دابا غايصدق شااك وغايبغي يعرف..
رحيل:اوا شنو تبقاي هاكا باش تزيدي ضسريه وتزيدي تخليه يطغى ويدير مابغا شوفي غير دابا عارفك مزوجة وماحشمش على عراضو هاداك النووع راه لصقة اصاحبتي
أسماء:(شدات راسها بيديها وقالت بتعب) اووف والله تاوحلت بزااف ماعرفتش اش غاندير
رحيل:(شربات من كاسها دلعصير وقالت بهدوء) لي عندي راه قلتو ليك باش ماتجيبيش المشكيل لرااسك حطي ديميسيون دياالك وهني مخك ولاسولك قولي ليه عييت بغييت نرتاح وشدي شي يامات عاد قلبي على خدمة خرى بااش يتيق ومايشكش
أسماء:اخرتي غانديرها حيت بصح طلع ليااا فكر* بهاد لفعااايل مافيه نفس مكفاانيش ديك لقح*بة لي رجعات زادني تاداك لمريض تاهو..
رحيل:هاديك مافهمتش اش باغا مزال دايراها قد راسها وبسبابهاا السيد مرض فعقلوو وصحتو وراجعة ليه تااني بلاحشمة بلاحياا
أسماء:ديك لمرة كانت غايقتلهاا عرفتي لاعااود شافهاا غايطيح روحهاا باينة
رحيل:مشاااكيل والله الله يدير شي تاويل دلخير وصااف أما هي راه مافيديهااش زعمة تقولي دير شي حاجة ولكن غير شوفتها راه تاتخليه معصب ومكيبقاش عارف اش كايدير بحال شي واحد مسكون شاف شي جن..
رحيل:وراه بالسيف حيت مساهلاش اش دارت فيه والشمتة لي دارت ليه
أسماء:اوا هو لي خلاها طغى عليه تاضسرت..ودابا راه داكشي لي كان طالق ليها ولعب لي كانت تلعبو أنا مزيرني فيه هي دير وأنا نخلص..
رحيل:الصبر وصاااف
أسماء:(شافت فساعتها) غايخصني نوض نمشي باقي تابعني لعشا نوجدو هههه
رحيل:عشنا وشفنا أسماء هازة لهم لعشاا ههه
أسماء:اوا اختي بزز مني والله أنا وياه راه مكانتجمعوش على لغدا ولعشا هو لوحيد لي تانقدرو نعوضو فيه
رحيل:(جبدات تخلص وبمزاح قالت) اوا نمشي نتعشى معاكوم اش غاديري لينا
أسماء:(حلات عينيها) حلفي والله مانتفرق معااك تاتمشي معايا وتباتي معاياا وندير ليك أحسن عشيوة نتي قولي اش مشهية
رحيل:(بضحك)ههه غير تانضحك معاك
أسماء:لااحبيبة دويتي وغاتمشي مكااينش لااا (جبدات تلفونها ورحيل تاتشوف فيها تاسمعاتها قالت) ألو إسلام خرجتي؟
إسلام:معطل شوية علاش؟
أسماء:رحيل غاتبات معانا ليوم عرضت عليها
إسلام:راه دار دارها مامحتاجااش نعرضهاا
أسماء:مهم غانسبق نتقدا شي حاجة خصاني ماتعطلش أوكي
إسلام:واخا تهلاي
قطعات معاها وضارت جهة رحيل لي بقات تاتشوف فيها مبهوضة من الزربة لي زرباتها عليهاا..
رحيل: أويلي اختي أنا غير ضحكت معاك نضتي قلتيها ليه
أسماء:مافييييش هزاار هههه نوضي يالاه ليوم غاتباتي معايا ونيت مغانخدمش غدا تونسيني
رحيل:وبنتي نبات بلابيهااا
أسماء:تي كتبااتي بلارااجلك حرتي غير فبنتك باااز
رحيل:سكتينااا دكرنااا السمن ولعسل
خرجات رحيل سابقاها وأسماء تاضحك عليها وركبو بزوجات فطوموبيل رحيل غاديين يجيبو سيدرا من دار وطوموبيل دوليد وراهوم تابعاهوم فكل خطوة..
---
كانت ساكتة هاد لمدة كلهاا ومقاالت والو ولابينات لشي حد شي حاجة من نهار سمعات هضرة ريان ورحيل.. خباتها فالداخل ديالها واخا كانت تاتحرقها وصبراات.. ولكن لصبر حدود وهي وصلات لحد.. لي بقا فيها هو أنه واخا كيعتادر إلا أنه اعتداار ماشي كيف خصو يكووون مقارنة بهضرتو لي قاااال ليها ولي خرج من فموو.. بحال لاغير قال شي كلام تافه وصاف ماشي جرح كرامتها وكبريائهاا..لكانت تتجاهلو هاد لياماات غير حيتاش مباغاش تاهي تقول شي هضرة تمرضو وتندم عليها ولكن هو بقا تيحك على الضبرة وهاهي دابا خرجات كلام مباغاش تقولو مباغااهش يعرف بلي هي عارفة على حبو لجيداء لي كان من طرف واااحد ولكن بيما أن الموضوع تجبد فغاادي يديرو ليه لحد باااش مايعاودش يتكرر...
أما محمد طه فمجرد ماسمع سمية جيداء خرجات من فم غزلان متبوعة بديك حبيبة لقلب راه بحال لاكبيتي عليه سطل دلمااا بارد.. حل عينيه على جهدهوم وبانت فيه تصدم ومكانش متوقع شنو سمع.. وهي مخفااوش عليها ملامح وجهو.. قرب جهتها بخطوات بطيئة ونطق بصوووت كالم بحال لاكيزيد يتأكد واش نيت سمع بصااح داك لهضرة ولاودنيه غلطو..
محمد:(بصوت بارد نطق) عاودي شنو قلتي؟؟
ماعرفاتش واش كيستهبل عليها ولاشنو ولكن تاهي مشات معاه فالخط وبكل هدوء نطقات وعينيها فقلب عينيه: كيف سمعتي كون كنت أنا لي جرحتك بكلامي كنتي غاتريب عليا هاد الدااار
محمد طه:(خنزر فيها) شكون گالهااا ليك؟؟
غزلان:(ضحكات بمرارة وهي تاتشوف فيه كيف تعصب مجرد ماجبدات سيمتها وكيفاش ماهتمش لكلامهاا أصلا.. وبهدوء قالت) هادشي لي كيهمك هضرتناا كلها لي تقاالت هادشي لي همك فيهااا
محمد طه:(خرج فيها عينيه) غزلااان سولتك جاوبينيي شكووون گالها ليك؟؟
غزلان:مقالها حد غير تهنااا
محمد طه:(شدها من دراعها وقال بانفعال)واش كاضحكي علياا كيفاش مقالهااش ليك حد نزلاات عليك من السماا مثلاا ولاحلمتي بيهااا
غزلان:(تاتجر دراعها) طلق مني (خنزرات فيه) هادشي لي ضرك فخاطرك يااك حيت قلت لحق
محمد طه:(غوت فوجهها)نتي أصلا شنوو عارفة بااش تهضري هااا
غزلان:(غوتات تاهي)عاارفة بلي نتاا كاتبغيهاا وبلي هي لااا عااارفة بلي نتااا هزيتي فداخل ديااالك مشاعر ليهاا وهي أصلااا كتعتااابرك غير خوهااا
محمد طه:(زير على يديه ورجع كرر سؤال لتالت مرة) شكووون گالهاا ليك از*ي
غزلان:(نطقات بحرقة) سمعتهاا بالصدفة ربي بغاااني نعرف شنو كاااين وتاحد مقالها لياا حيت تاواحد مغايبغي يجرحني بحال كيف تااادير نتااا من نهااار جيت لهاد الداار ونتاا ديماا تجرح فيااا ومع دلك عمري دويت ماخليتي مادرتي معاياا ونهااار حصلتي فلوووس فصاكي جريتي عليااا فنصاص ليل بسباااابك نتااا كنت غاندمر درتي غللط فحقي وتاباااش تعتااادر كيف ناااس معتادرتيش ومع دلك سمحت ليك وقلت ماشي مشكيل لغلط تايوقع ولكن نتااا كنتي غير مازااايد فيه
محمد طه:(بصوت عالي) نتي كاااتشوفي غير أغللااط غيرك وغلطك مكتشوفيهش شكووون سبابنا تاوصلنا لهنااا هاااا شكووون لي جااا عندي وأنااا سكرااان معارفش ك*ي اااش كاندير دوووي
غزلان:(زيرات على يديها وقلبها حسات بيه تهرس على زوووج مور هضرتو واتهامو لمبااشر ليهاا)عندك الحق ومغااانكرش ااااه أنا السباب لي عطيت راااسي ليك ونتااا سكرااان وهااااني دابا كانخلص على هادشي بهضرتك لي كيف السم عندك لحق أنا لي حمااارة حيت خااطري ضرني عليك وحيت كنت هاازة ليك لهم وأي حاجة كنت تانعرفها كاضرك كاانت تاضرني قبل منك الله يكثر من خييييرك اسيدي (بعصبية غوتات) أنااا لي مني لغلط وأنااا لي نستاااهل حيت من نهااار لول مكااانش علياا نسكت كااان علياا تاأناا ندير ليك مدااارت هي مانتسوقش ليك ومانربيش لكبدة عليك يااااك هادشي علاش بغيتيهاا حيت عمرهااا شافت فيك الشوفة وكااانت كتعتابرك خوهاا وااخا هادشي كولو مافقتيش وبقيتي باغيهااا
محمد طه:(قرب جهتها وقال بصوت معصب وعروق جبهتو تنفخو) ماااتجبديهاااش على فمك نتي معااارفة وااالو ماتبقاااش تقولي كلاام ماحضرتيش لييه ومعرفاااهش
غزلان:داكشي لي سمعت كاااافي يوريني ااااش كاااين مانحتاااجش نحضر ومغاااانهضرش على السيدة حيت هي ماضراااتني بوااالو ولكن نتااا عند بااالك مغااالطش ولااايح گااع أغلاطك علياا ديك الليلة أنااا لي هزيت غلطهااا حيت كنتي سكراان ولكن فعااايلك لي تادير ونتاااا صاااحي نسيتيهوووم هااا لاكنتي باغي تلومني لوووم راسك هووو لول سمعتي ماااتجيش وتهضر معايااا على حاجة كنتي تانتااا غالط فيهااا وسبابهاا
محمد طه:(ضحك بسخرية) اااااه لوميني نستاااااهل زيدي عطي لمي لوجهي حيت كنت معاااك رااااجل وماسمحتش فيك كوون كان شي شمااااتة والله لاحاشاهاا ليك وغايقول ليك نتي درتيها براااسك وأنا ماعندي ماااندير ليك نتي جيتي لبيتي وشوووفي شكوون يفكهاا ليك ولكن أناا هزيت لمسؤولية حيييت كتهميني وحيت مباغيكش ضرري فكرت فمصلااااحتك حيت عااااطيك قيمة ونتي مكتشوفيش هااادشي كاااتشوفي غير لقديم
غزلان:(بسخرية) قيمة هه وشكووون قااال لياا بفمو بلي خليتو ناعس وهبطت عند خوووه هاااا شكون لاحها ليا فوجهي فنظااارك هادي قيمة هممم لاكاانت هادي بالنسبة ليك قيمة فرااه خصك دير إعادة النظرر الشريف حيت نتا شاد كلشي بلعكس (ضحكات بفقصة ومرارة) شكرااا حيت تزوجتي بيااا وسترتيني وماخليتينيش نتفضح
محمد طه: ماتبقايش تشدي هضرتي وتفسريها كيف بغييتي اغزلان
غزلان:هضرتك هي لي كاتفسر راسها براسهاا نتا مكتعرفش شنو تاتقول تاتبقااا تهضر ومكاتفكرش فقيمة لي قداامك شنوو غايحس هااا عرفتي نتاا أنااني امحمد طه حيت نتا مكيهمكش اناا باش كانحس من نهاار عرفتك ونتاا تجرج فيااا عقلتي شنو قلتي ليااا فالخطبة هضرتك لي هرستيني بيهاا ففرحتي ديك الساااعة أناا لي واخا تانتجرح منك عمري فكرة نقصحك واخا سمعت ديك لهضرة على جيداء بقيت ساكتة وماقلت والو
محمد طه:(خرج فيها عينو)ماعندكش الحق أصلاا تدوي على موضوعها وتجبدي سميتهاا حيت داكشي مكيهمكش
غزلان:(غوتات)كيهمني حيت نتا باقي متعلق بيهاا واخا هي مكاينااش وهادشي لي تاتعيشو دابا بسبابها هي وبسباب حبك لمريض ليها
مع قالتها مع حسات بتصرفقيتو لي نزلات على حنكها تاخلات وجهها يتقلب لجهة لخرى
ديك التصرفيقة ماتطبعاتش غير على وجهها بل تاقبلها لي حسات بيه فديك اللحظة تهرس تهريسة لي وجعاتها.. كلامو ليها كان قاصح وقاصح بزاف قبل مايدمي لعين راه دمى القلب.. وهي فديك اللحظة ربي لي عالم بيها باش كاتحس.. ديك التصرفيقة ماشي غير هوما بزوج لي شهدو عليها كانت تارحيل وأسماء لي جايين باش يجيبو سيدرا حيت رحيل مكانتش عارفة مها مكايناش.. طلعات أسماء بزربة وخنزرات فمحمد طه وبعصبية قالت:وااش هبلتي نتااا شنو درتي
شافت فغزلان لي كان وجهها باقي ضاير لجهة لخرى متمدقة دم دشفايفها لي تجرحو حيت عضاتهوم بسنانهاا..ضورات وجهها وشافت فيه بواحد الشوفة كافية تخليه يعرف بلي هرسها وعفس عليها بتصرفو وبكلامو لي خرج من شفايفو.. خرجات من لكوزينة بدون ماتنطق بتاشي حرف مخليا وراها محمد طه لي كان تيستوعب اش داار وبلي هو هز يدو عليهاا شاف فيديه لي كانت ممدودة قدامو وهو محاملش راسو ومع هز راسو حس بتصرفيقة نزلات عليه لحنكو خلاتو يغمض عينيه بالغفلة لي تغفل.
كانت كلها تاترعد بالأعصاب والمنظر لي شافت ولكلام لي سمعات خلاهاا تعصب خصوصا هي لوحيدة لي عارفة لقصة دزواجهوم وشنو طرا ولكن كلامهوم دابا لي قالو سمعاتو هي وأسماء لي كانت مصدومة ومعصبة تاهي.
حل عينيه وشاف رحيل قدامو لي كانت تاتشوف فيه وهي منرڤية خنزرات فيه وقاالت بعصبية: اتباااركالله على خويااا لحنين القلب لكبير هااادشي لي كنت نتسنى منك هادا هو لمضوون فيك
محمد طه:(عض على شفتو وقال بخفوت) رحيل
رحيل:(غوتات) سكتت حسك مانسمعوووش لانصدق مريبة عليك الدااار داابا غاتسكت وغاااتسمع السي (دفعاتو من كتفو ونطقات مكشكشة) تاتشك فخووك هااا خوووك لي من دمك كيفااش قدرتي تاتخلي عقلك يفكر فيها هاااا هادااااااك لي نتا شاااك فيه راااه يفديك بحياااااتو بقاا ليه غير مرتك باااش يشوف فيهاا راه يعمي عينيه ومايشوفش فيها شوفة نااقصة يحتارمها بحال ختووو وهااااديك السيدة لي نتاا مزوج بيهااا واش جبتيهاا باش تكرفصهاا بكلامك لي كيف السم وتمرضهاا فصحتها وخاطرها بسباب مررض بقيتي شااد فيه (قصحات معاها لكلام) جيداااء ماتت فيييق اسي من داك الحب لمرريض لي مخليك غادي فلهلااك ديك السيدة أصلااا كون بقات عايشة عمرهاا تشوف فيك بشوفة خرى من غير خوهااا جيدااااء عمرها تبغيك.. وكون كاانت غاتفكر فيك راااه كانت غاديرها شحال هادي.. ونتا مباغيش تفيق مباغااايش تعيق وتعرف بلي هي ممكتاباااش ليك مرضتي راااسك وصحتك ومرضتي معاااك بنت الناااس شنو دنبهاا هي هااا ( دفعاتو مرة خرى) سولتك شنو دنبهاا هي فهادشي كااامل باااش تجرحها بديك لهضرة لي كيف السم همم جاااوب مالك سكتي وسرطتي لسااانك هاا ولاكشكشتي على السيدة ومبقاا عندك مايتقااال رديتي عليهاا تاحسيتي براسك خويتي لي فداخل ديااالك ودابا بردتي ومبقا عندك مايتقااال
أسماء:(قربات جهتها فاش شافتها معصبة ومع هي أصلا فيها الأعصاب ولحمل خافت عليها وبهدوء قالت) رحييل تهدني ماتعصبيش وتجيبيها فصحتك
رحيل:(شافت فيها وقالت بانزعاج) كيفااش مانتعصبش واش شفتي شنوو شفت وسمعني شنو سمعت وااش عجبك لحاال هااا بغيتي نسكت بااش هو يزيد فيه ويطغى
أسماء:(خنزرات فمحمد طه وقالت) على قبل صحتك أو ولاك مااشي على قبلو هوو يستاهل ماكثر
رحيل:(شافت فيه وقالت بهدوء) هادا لي قدامي ماشي هو محمد طه لي كانعرف محمد طه لي مكيحملش الظلم ومكيحملش لواحد يجرح غيرو ويحگر على شي حد عقلتي فااش كنا صغاار شنو كنتي تادير فاش تاتشوف شي حد ظلمني ولاحگر علياا (هزات حجبانها وقالت) عقلتي نهاار عرفنا بلي داك الشماتة لي كان خاطب جيداء مزوج اش درتي فيه جرحهاا وكدب عليها وبكاهااا.. محمد طه لي كان حنين ومكيقبلش يشوف غيرو مقلق قلبو كبير فين هووو ( أشارت ليه وبنظرات حسرة شافت فيه ونطقات) ماشي هو لي واقف قدامي دابا هاداك محمد طه لي كان خويا وحنيني ومول لقلب لكبير مبقااش مشى ولى دابا واحد قلبو حجرة واحد لي يجرح غيرو بلامايخمم فشنو غايحس لي قدامو واحد أناااااني مرتاااح دابا حيت خرجتي لي فقلبك هااا صاافي بردتي داباا جاااوب (حركات راسها بحزن وقالت) مغاتهضرش وماعندك ماتقول حيت عارف راسك غلطتي وزبلتيها تقدر ديك التصرفيقة تبرا الاثر ديالها ولكن هضرتك والجرح لي دارت عمرو غايبراا حيت لهضرة بحال الدفلة لاخرجات من فم مكاترجعش ونتاا راه خرجتي لخناااجر ولمواااس يااااخساارة فيك عمري كنت نتوقعها منك نتا صدمتيني فيك وخليتيني نحشم حيت نتااا خويا (حركات راسها بالإيجااب) أناا حشماانة حيت نتا خوياا أو ولد إدريس التجاااني وحشمانة من لغلط لي نتااا درتيه مع بنت الناس ياخسااارة فيك
رمقاتو بنظرة مشمئزة وخرجات وهي محاملاش تشوف وجهو واخا خوهاا إلا أن تصرفو وكلامو يستحيل تقبلو هي مراا وديك لكلام لي سمعاات جرحهاا هي لي ماشي معنية بالأمر فمابالك هاديك لي تقالت ليها ديك لهضرة كيف غاتكون حالتها..أما أسماء فماهضراتش حيت رحيل كفات أو وفات بهضرتها وقالت لي خصو يتقال
لكلام لي تايجرح صعيب يتنسى كايبقا يحفر فيك ومايخليكش تنساه واخا نتا تبغي.. لطالما كان تايجرحها بهضرتو من نهار حطات رجليها وسطهوم.. عمرها تفكرات شي جيست دارو معاهاا زوين فاش تاتبغي تفكر تاتلقى غير لخااايب وصااف.. كيجرح بلهضرة وعند بالو راه هي غاتنسى بكلمة سمحيليا.. هي راه ماشي روبو هي راه من لحم ودم إنسان تايحس ولاغير تجرح فصبعو كيتألم فمابالك لاتجرح فقلبو كيف غايكون.. جالسة فبيت رنيم كاتشوف أونفاص منهاا وهي مقادرة تاتبكي حيت عيات من لبكا.. وحيت لبكا ورا لميت خسارة.. مغاتلوموش حيت هي لي عندها يد فشي لي هي دابا تاتعانيه وتاتحس بيه.. هي لي خلاتو يجرحها بكلامها حيت عطاتو الساروت.. نهار سلمات ليه راسها ونعسات معااه بلازواااج عطاتو شرفها على طبق من دهب.. كيفاش بغاتو يحتارمهاا؟؟ بزاف دلبنات بحال غزلان تايغلطو بحال هاد الأغلاط.. تايتبعو قلبهوم تاكيخرج عليهوم.. شحال من وحدة مصاحبة مع شي واحد تاتبغيه وهو راه نيتو باينة باغي حاجتو منها وحيت عينيها كيتعماو تاتعطيه راسها باسم الحب وتاتيق فيه.. كاتعصي لي خلقها وتاتكسر تقة واليديهاا فيهاا على قبل دكر حيت كلمة راجل مايستهلهااش والراجل هو لي يجي يدق لباب ولي كيحافظ عليك وعلى شرافك تاكيديك بالشان ولمرشان.. ولكن فحالة غزلان هي ويااه مكانوش على علاقة من قبل وكانت مجرد زلة لي خلاتهوم يخلصوها بالغاااالي.. هو معطاهاش وعود ورسم ليها الحياة لوردية ولكن هي تعلقات بيه وقلبها بغاه هو واخا داكشي لي كان يدير فيها بغاتو.. لو كان بيديها مكانتش غاتبغيه ولكن القلب مكيشاورش.. نهار غفلات أو وقع لغلط ندمات عليه تاراسها شاب ولكن كان فات لفوت ومكاان عند لميت مايدير قدام غسالو.. بكات وضربات راسها وسباتو ولي عطا الله عطااه.. لغلط وقع ومكان عليها غير تصححو.. وفلخر هالنتيجة كاتشوفها قدام عينيها.. هاهو عايرهاا بشنو دارت وهو جرحها بداكشي لي هي عارفة راسها غلطات فيه.. ولكن تستاهل بااش المرة الجاايا ماتبعش قلبها لي يخرج عليهاا..تفكر بعقلها وتعرف شنو كادير تفكر فعلاقتها بينها وبين لي خلقهاا وعمرها تنسى بلي أي علاقة بين زوج كاتبدا بيما لايرضي الله عمرهاا غاتكمل وضروري مايوقعو فيها مشاكيل وأغلاط بحال حالتها هي وياااه..
الدقان فالباب وصوت رحيل لي كاتعيط بسميتها فيقها من سهوتها.. ناضت ببطء قاتل حلات ليها لباب ورحيل غير شافتها قلبها تزير عليهاا وبقات فيها بالجهد.. هي مكاتحملش الظلم وعارفة خوها ظلم معااه غزلان بزااف.. عنقاتها فصمت وغزلان بحال لالقات السبة باش تبكي وتخرج لي ضارهااا.. كاتبكي بحال لاميت ليها شي حد وقلبها حاسة بيه مدمر.. تاتبكي لدرجة رحيل بكات معاهاا مع أصلا على سبة..
مدة وهي تبكي تافشات خاطرها عاد بعدات عليها ودخلو لبيت ورحيل أقل حاجة ديريها هي توقف معااهاا وماتخليهاش بوحدهاا حيت عارفة بلي هي ماعندها حد من غيرهوم.. لاأب يأمن ليها الأمان ولاأم تعطيها لحناان.. بوحدها يتيمة بحال لامقطوعة من شجرة لاعائلة مسگدة لاأخ يواسيها ولاراجل يعوضهاا..
رحيل:(بحزن) ماعرفتش كيفاش تاعرفتي بموضوع جيدااء ولكن لي عارفة هو كلامك كولو لي قلتيه ليه على حق.. خويا ماشي هو هاداك لي كانعرفو ولي كبرت معاه.. داك خويا حاسة بيه مات من نهار ماتت هي تقولي هزيتي واحد وحطيتي واحد اخر.. جيداء الله يرحمها عمرها عطاتو شي أمل هو لي بقاا باغيهاا واخا عرف راها عمرها تشوف فيه ولاتبادلو مشاعرو.. بقاا مخبي لحب ديالها فقلبوو كيمرض فيه.. وملي ماتت هو تصدم حيت موتها مكانش ساهل ومكانش يطيح فلباال.. هي ماتت مدبوحة ومشات ضحية ديال واحد لحيوان مريض دمرني ودمر عائلتي كلهاا.. تاحد مكان متوقع غاطرا هاد لكارثة كلنا تصدمناا وأنااا عقلي كان غايخرج من بلاصتو فديك لفترة لدرجة كنت تاندير تصرفاات لي يستحيل لعقل يتقبلهوم كنت غانحمااق ولكن ربي لطف وقدرت نرجع كيف كنت من لول وبديت نتعالح عند طبيبة نفسية تخيلي معايا سنين وأنا كنحاول نتعالح من أثر ديك الصدمة لي عشت فزواجي لي حاشا واش يكون زواج وفمووت صاحبتي لي بقوة صدمتي مامشيت لقبرها نزورها تادازت سنين على موتها.. ولكن محمد طه ماخرجش شنو هاز وبقا ساد عليه تامرضو فصحتوو.. تاخلااه كيقول هضرة ماشي ديالو ويجرح فغيروو ومايحنش.. مغاندافعش عليه وعمري غنداافع حيت هوو غلط وغلط بزااف.. ولكن لي باغاك تعرفيه هوو أناا غانكوون ديما معااك ومساندك فأي تصرف درتيه معاااه..
كانت تاتسمع لكلامها وهي ساكتة مقالت تاكلمة ومدارت تاشي رد فعل.. وتارحيل احترمات سكاتهاا وخلاتهاا بوحدها تجلس مع راسهاا.. نزلات لتحت ولقات أسماء بوحدها شافت فيها ببرود:فين هو؟؟
أسماء:ماعرفتش فين مشى (تنهدات) واش داكشي لي سمعت بصح واااش هوما غلطو قبل الزواج
رحيل:(حركات راسها باه)
أسماء:كنتي عارفة؟
رحيل:اه
أسماء:ماعرفت مانقول والله معصبة من تصرف محمد طه لي مافهمتش كيفاش ولى هاكا بزاف گااع ماتت السيدة وهو باقي مريض فدماغو بسباب داك لحب لي مكاينش..
كان جالس بوحدو فواحد الجردة ومع الظلام بدا يطيح قليل فين تاتشوف شي حد دايز من تم.. لبرد كان تايدخل مع عظامو كيف السم وهو محاسش بيه گااع.. كيتفكر هضرتو لي قال ليها وديك التصرفيقة وتايتزير عليه قلبو.. كان يالاه كايسترجع اااش دار وبااش نطق.. معرفش كيفااش تاوصل لهاد لموااصل لي خلاوه يحس براسو ماشي هو محمد طه لي كيعرف.. اااه لأول مرة مور يعيق ويحس براسو تبدل بزاف على شخصيتو لي كانت قبل تمن سنين.. تمن سنين تقريبا مايجمعها غير لفم.. مكانش تايبغي يعتارف لراسو ولكن هو دابا راه عتااارف وهاد لخصام لي وقع بينو وبين غزلان بحال لاحل ليه عينيه على حوايج كان سادهوم فيهوم.. هو ماشي خايب ولكن هو واحد مريض فخااطرو وهااز حاجة لي مقادرش يخرجها تامرضاتو فنفسيتو.. ولغلط لي دار هو بقا هااز ومدارش خطوة يخرج لي ضارو تااتفاقم الامر.. بحال شي بصلة تاتحليها وتاتلقاي لداخل ديالها مثلا فيه شي ضربة صغيرة تاتحيديها وتاتخدمي بيها ولكن لاميكتي على ديك الضربة وماتسوقتيش ليها وخليتيها فاش غاترجعي ليها مور مدة غاتلقايها خماااجت وعطات الريحة هاكاك كان هو فالدار دياالو داك لجرح لي عندو معالجووش فوقتو وخلاه لابس قناع لبرود وعدم الاهتمام وهو راه لداخل ديالو كيخماااج وملي عطا الريحة هاهو تفرگع وعور ليها لعين.. مشاعرو جهة جيداء ماشي حب حيت كون كان حب قلبو مغايميلش لغزلان ويبدا الإعجاب.. مغاديش يحس بالغيرة فاش عرفها غاطير من بين يديه.. ومغايحسش بالغيرة فااش يشوفها مع غيرو.. حبو لجيداء كان بحال واحد لحاجز وهمي راسمو فدماغو وفالحقيقة هو راه مكاينش.. شحال وهو جالس وحد مكاين تم غير هو ولقطوط لي كيضورو فالزنقة.. تلفونو كيصوني ومع جبدو ولقاه ريان قلبو ضرو وتفكر كيفااش تاخووه غلط فحقو.. زير على التلفون ديالو ومقدرش يجاوبو واخا راه ريان معارفش بلبلان مي هو مقادرش ينساه.. سيفط ليه مساج باش يطمنو وبقا جالس بوحدو تم وبين عينيه شوفة غزلان لي دارت فيه فاش صرفقها.. هاكا دوز دوك السوايع جالس بوحدو تاحس بلي مشى لحال وناض غادي لدار.. دخل لقى كلشي ناعس وطلع نيشان وكيف توقع لقاها مكيناش فبيتو وأصلا اش كايتسنى منهاا وهو غالط فحقهاا.. بدل عليها ونعس بلاصتو مداهش النعاس غير مخشي تايضور هنا ولهيه تاسمع الادان وهو ينوض باش يصلي عليه يخفف داكشي لي هاز فداخل ديالو.. توضى وصلى وجلس تيقرا القرآن تاطلع الصباح وناض باش يمشي لخدمتو بدون مايشوفها.. وهاكا دازو الأيام وبالضبط سيمانة دازت ومحمد طه فهاد المدة كلها مشافهاش نهائيا حيت بقات معتازلة فبيتها وماتخرج تكيكون هو مشى.. كلشي فالدار عاقو بلي مخاصمين حيت راه باين لعمى ولكن حد مادخل حيت عند بالهوم راه مجرد خصام عادي بين أي زوجيين ومعارفينش لمشكيل من غير رحيل وأسماء لي ضربو الطم وماقالو لحد تاشي حاجة.. وكيف الأيام الأخيرة فاق محمد طه بكري باش يشدها قبل مانخرج وعيط لسعيد علمو بلي مغايجيش لخدمة حيت عندو شغل مهم.. جالس فالصالة كيتسناها تهبط ساعة وتقول واش بانت.. فهاد السيمانة كاان باغي غير يلمح طيفها بالصدفة ساعة هي ماخلاتش ليه لفرصة.. بانت ليه رحيل نازلة وغير شافت فيه شوفة وحدة ونخلاتو وهو تنهد حيت تاهي من داك النهار وهي مكتهضروش.. تبعها لكوزينة لقاها تاتوجد عصير..
محمد طه:(حك لحيتو بهدوء قال) رحيل واخا نهضرو بزوج
رحيل:ماعندي فاش نهضر معاك
محمد طه: لاكاين (ضورها جهتو وقال) غاتبقاي مقلقة مني
رحيل:وهادشي كيهمك؟؟ أصلا ماشي أنا لي خص تهز ليها لهم هزو لديك السيدة لي ماخليتي مانسيتي فيها وتاباش دير جهد وتصلح الغلط مادرتيهش وماتسوقتيش گاع ليهاا
محمد طه:(تنهد وقال بهدوء) على هي خلاتني نشوفها هاأنا ليوم جالس باش نهضر معاهاا ونصلح الغلط ديالي ونطلب السماحة
رحيل:واش عند بالك هضرتك وشي لي درتي غايدوز هاكا نتا مكادير تاشي إفور باش تصلح راسك هو لول واش عمرك جلستي مع مخك وقلتي أنا خصني نعالج راسي ونفسيتي؟؟ لا حيت كون درتيها مكنتيش غاتوصل لهاد لمواصل علاش كاتمرض راااسك؟؟ علاش كاتوهم راسك بحاجة لي مكانتش وعمرها غاتكوون؟؟
محمد طه:(الصمت)
رحيل:هانتا ساكت عوتاني هه وبقا حياتك كلها ساكت اخوياا (قربات جهتو وقالت بمرارة) أناا لي كليت دق لي مايطيحش على بالك ودوزت حوايح لي نتا لي راجل غايقصحووك وهاني قداامك وقفت تاني على رجلي وبديت حياااتي ونتاا بقا راجع لور لوور بقاا ساكت تايجي النهار لي تصرفقك فيه الدنيا وتخسر لي بين يديك.. النهار لي ماينفعك لابكاا لانوااح النهار لي غاتندم فيه على مادرتي..
خرجات من الكوزينة وبعد دقائق قليلة رجعات هازة معاها ملف شافت فيه وقالت بمرارة:مكنتش باغا هادشي ولكن ماعندي ماندير
محمد طه:(شاف فالملف وقال)مافهمتش (أشار لملف)شنو هادشي لي فيديك؟
رحيل:(بجدية)هادو وراق الطلاق (شافت شوفاتو لي كان مصدومين وقالت) غزلان رفعات عليك دعوة الطلاق امحمد طه..
يتبع...
التعليقات
لا توجد تعليقات بعد، كن أول من يعلق.