محتوى القصة
قلبها ضرب بالجهد وهي كتفكر هاد لبوجو لي كانت تابعاها داك النهار.. عقلها فلحين حضر ليها شكون غايكون مولاها وبلي هو لي غايكون تابعهاا كيف خيالها.. ترعدات بلاصتها مجرد ماتفكرات نهار شافتو وداك لخوف لي حسات بيه وبزربة دخلات لباب ساداه بالجهد مطرقاه وقلبها كيضرب.. هزات راسها ملي سمعات صوت لخطاوي وشافت هنية لي جاية وهي مكمشة فيها دوك لحجبان لمطرسين:مالكي اخويتي ياك لباس؟
رحيل:(تبسمات تبسيمة صفرا) غير الريح هو لي دفعو ليا
هنية:اهااا اوا دخلي لداخل شربي ليك كويس دأتااي
رحيل:واخا
خلاتها رحيل وهينة بدات تميق ونطقات وهي غادة لكوزينة:داكشي لي بقا ليا الضياف اااوف
دخلات رحيل لصالة لقات محمد طه هاز داك لملف تيقرا فيه ومركز فيه وأسماء متكية على كتف مها لي كانت تتلعب ليها بشعرها.. هزات فيها كلثوم عينيها ونطقات وهي مبسمة ليها بحنية:اجي ابنتي
هزات رحيل حجبانها ومشات عندها جلسات جنبها وكلثوم مدات يديها تتقيس وجهها: فرحت ملي جيتي معاهوم ابنتي
رحيل: كان ضروري ماخصني نجي نشوفك واخا يوقع لي يوقع تتبقاي ممات خوتي ولمرا لي كبراتني
كلثوم:(قالت بحسرة) كون غير يرجع بيا الزمان لور نصلح شحال من حاجة درتها فحقك وفحق مك وباك لي أديتهوم
أسماء:(هزات راسها من حضنها)صافي اماما عفاك بلابكاا راه كتهلكي صحتك
كلثوم:(مسحات دموعها وقالت بتبسيمة) نمشي نوجد ليكوم لعشا بيدي غاتكونو توحشتو طيابي
ناضت غادة لكوزينة وأسماء غير متبعة ليها لعين تتنهد ملي عرفات بلخبار تقصحات وملي زادت شافت مها فديك لحالة وكلامها وندمها لي بان فوجهها زادت تهرسات..
رحيل:(شدات يديها)صافا؟
أسماء:وي (شافت فمحمد طه) قشبلتي شي حاجة تم؟
محمد طه:(هز راسو)خط الأطبة هو هادا شي فهمناه وشي لا ولكن ملي نمشيو لمراكش غانشوفو شي طبيب ونعرفو حالتها فين وصلات ولعملية واش فيها شي خطورة على صحتها ولا لا
أسماء:(كمشات حجبانها)خت ولد لحاج ياك طبيبة نسولوها على شي طبيب لي تنصحنا بيه
تنهيدة عميقة تسمعات من رحيل ملي تدكرات سميتو وخلات جروها يتفتحو تاني مبعد مكانت تتحاول تنساهوم.. هبطات راسها تتلعب بديك لگرميط لي لابسة وسهات تاني كيف عادتها..
فلكوزينة كانت واقفة هنية دايرة يد على جنبها تاطلعات ديك لبيجامة الطويلة لي لابسة ومبين داك الطرف لي عندها ونطقات وهي معاجبها حال: علاش گلتي ليهوم يجلسو ويباتو اش غانطيبو والنص دالتقدية مكينااش اش غانحطو ليهوم
كلثوم:(خنزرات فيها) وديك التقدية لي جاب عبد الصمد ولبارح فين مشات دغيا سالات وزايدون هادوك ولادي وبغيتهوم يبقاو يباتو هوما ماشي برانين وهادي دار جداهوم..
عطاتها بالضهر وحلات الفريگو جبدات دجاجة كونجلي حطاتها تطلق وجبدات السلة دلخضرا لقات نصها مكاينش كمشات كلثوم حجبانها ونطقات بسخرية:نص التقدية مكينااش گولي عاطياهاا لداركوم تاني بالتخبية ومخليانا حنا بلاش
هنية:(ضورات عينيها) ماتجبديش تاني عائلتي وخليهوم فالتقااار ونتي مبقا بينك وبين لموت غير شعرة..
سكتات هنية ملي سمعات لباب ديال برا تحل ودغيا ضارت جهة لاڤابو فين كاينين شي كيسان تاتغسلهوم.. تاتسمع صوت رجولي قاصح نطق:السلام أوعليكوم
هنية:(ضارت تبسمات ونطقات تتحلون)سيدي عبد الصمد على السلامة
حط عبد الصمد ديك لخنيشة لي جايب وشاف فيهوم بزوجات قبل مايركز فكلثوم وينطق: صحيحة لباس ليوم؟
كلثوم:اللهم لك لحمد ملي شفت ولادي حسيت بروحي رجعات ليا ونسيت لمرض وتمارة ديالو
عبد الص:(حط يديه على موسطاشو) وفين هوما؟
كلثوم:فالصالة
خلاهوم وغادي تايتعنكز بديك لقلدة ولكرش خارجة تتبان القميجة لي لابس شوية وطرطق وقف حدا لعتبة دلباب وهو تيزول سبرديلتو:وامرحباااو مرحباااو زارتنا لبرااكة اولاد خويتي
وقف محمد طه لي كيحاول يعقل اشمن خال من خوالو هادا لي قدامو بحكم شحال هادي ماشافهوم.. عنقو خالو وبدا يضرب ليه فضهرو تاكتسمع زدااف
عبد الصمد:تامحمد طه هاداااو
محمد طه:اه أنا اخالي
عبد الصمد:واتباركالله كبرتي ايااو كنتي قد النملة ملي شفتك اخر مرة
تبسم ليه محمد طه كمجاملة وضار جهة لبنات وبدا كيشوف فيهوم بزوجات ونطق:وشكون هاد الطفلات؟
محمد طه:أسماء ورحيل
مد يديه لأسماء زعمة باش تبوسها ساعة هي سلمات عليه سلام عادي ونفس الشي دارت رحيل عاد جلسو فبلايصهوم..
عبد الصمد:(حاط يد على لمخدة والتانية على كرشو) وانهار كبير هادا يلي جيتو تشوفونا فيه اولاد خويتي
محمد طه:الله يكبر بيك اخالي غير مع الخدمة وصاف
عبد الصمد:واتا فين خدام؟
محمد طه:ميزون (حبس كلامو حيت عارف مغايفهمهاش عليها عرب معاه) لبلاصة فين كيبيعو الطوموبيلات
عبد الصمد:(تلمس موسطاشو)ااييه وتي اأسماء؟
أسماء:فواحد الشركة
كانت تادوي بزز دايرة الصواب وهي أصلا معندهاش معاهوم تاسمعو صوت لهضرة وكلهوم هزو عينيهوم جهة لباب تيشوفو فداك الدري لي كان داخل تقريبا غايكون فعمر محمد طه ضارب حسانة عادية وسمر بقوة الشمس وباين فيه من شفايفو الزرگين كمااي.. أما هو فاضور عينو عليهوم تاجات على رحيل وبدا يطلعها وينزلها بشوفاتو منحارفين..
تقاد عبد الصمد فبلاصتو فاش بان ليه ولدو لكبير واقف وعينو على رحيل تايشوف فيها بدوك الشوفات لي ماشي خوت تاقلب عينيه جيهة أسماء تاهي كيشوف فيها ويعبرها من الشوفة تاهزات فيه لعين وهي تهز لحاجب بمعنى "ياك لباس" قلب وجهو فلبلاصة وزول لكلاكيطة لي لابس ودخل وعبد الصمد نطق وهو تيعرفهوم عليه:هادا ولدي عادل هو لكبير فخوتو عندو محال ديال تاخضارة هو وصاحبو شركاا (شاف فولدو)وهادو ولاد عمتك كلثوم أسماء ومحمد طه وهاديك رحيل بنت راجلها
عادل:(ناض جهة محمد طه لي مارتاحش ليه وسلم عليه ونطق بنبرة صوتو المشرملة) مرحبا بولد لعمة
محمد طه:الله يحفظك
داز لعند رحيل مد يديه ليها وهو كيحنزز فيها وهي هزات فيه لعين وتبسمات تبسيمة صفرا:سلااام
ممداتش ليه يديها حيت من الشوفة حسات بيه فيه الدغل ومحملاتوش وخلاص شوفاتو ليها عصبوها ومكرهاتش تنوض ليه..هز حجبانو وضار جهة أسماء لي مدات يديها وغير قاست يديه وهي تجمعها وهو مشى جلس جنب باه لي تيشوف فيه بافتخار.. جالس ومفرش رجليه وتيلعب بالسنسلة المدهبة لي لابس فعنقو وعينو مرة على رحيل مرة على أسماء عبرهوم غير بالشوفات ومحمد طه عااق بيه داكشي علاش ناض من بلاصتو وجلس وسطهوم بزوجات وجرهوم عندو كيف مولف مدرعهوم ونيت مخلي لاخر يفهم روحو ويجمع عينيه.. دخلات عندهوم كلثوم مور مانصبات لعشا وجلسات جنب أسماء ونطقات بتبسيمة: ياك ماعيتو (شافت فالتلفازة لي كانت طافية) علاش ماشعلتوش التلفازة ؟
ناضت شعلاتها وعبد الصمد ناض غادي لبيت يبدل وتبعاتو هنية لي دور دور وتميق وتحنزز.. بقا معاهوم عادل لي تسطح فوق السداري داير يد تحت راسو وجبد داك التلفون لي واكل الدق ولافيشور كلها مهرسة وبدا خدام بيه
أسماء:(تحنات جهة مها ونطقات بهمس)واش عبد الصمد ديما عايش معاكوم
كلثوم:لا عندو دارو ومرة مرة كيجي لهنا وغير حيت مي مشات تبات عند خويا ومبغاوش يخليوني وحدي علاش ابنيتي تتسولي
أسماء:والو غير سولت وصاف
جبدات رحيل تلفونها ودخلات لواتس لقات ريان أون لاين وبدات تدوي معاه تاوصلها أوديو وهي تجبد ليزياتها وطلقاتو وهو يتسمع ليها صوت سيدرا لي نطقات وباين فيها مقلقة: مامي واش مغاتنينيش حدايا ليوما علاش مديتينيش معاك امامي مخاصمة معاك أنا نتي ومودي وسومة يالاه
تبسمات وطلقات لوديو التاني دريان:ههه ملي قال لينا لواليد مغاتجيوش غضبات عليكوم وقالت ليك متبقاوش تهضرو معاها
رحيل:(تنهدات حيت مكانتش باغا تبات ولكن بزز عليها.. كتبات ليه)📩 مكرهتش نجيبها ولكن عارف اش كاين مهم معليش غدا نجي ونصالحها
ريان 📩 دابا تبرد بلاماتشطني معاها..
هزات رحيل عينيها بالصدفة ومجات غير فعادل لي كان متكي جنب وداير يد تحت راسو وكان كيشوف فيها.. عطاتو تخنزيرة ورجعات حدرات عينيها على تلفونها تتشوف التصويرة لي سيفط ليها ريان كانت سيلفي ليه وسيدرا وهوما مخرجين لسانهوم بزوج وحاطين الراس على بعض.. تبسمات أو وراتها لمحمد طه لي تبسم تاهو وكملات معاه لهضرة تاوصلات وقيتة دلعشا وتحط طاجين دجاج ولفريت وتجمعو كاملين عليه وغير تعشاو جمعو الطبلة وناضت كلثوم جابت ليهوم لكواش وشافت فلبنات: سيرو لبيتي بدلو حويجاتكوم راه حطيت ليكوم بيجامات تم
مشات رحيل وأسماء ومعاهوم كلثوم لي نعتات ليهوم لبيت ودخلو لبنات كيشوفز فحالتو لي كانت يرثى لها ولميديتي لي فيها لحاصول واكلة الدق.. تنهدات رحيل وزولات فولارها ونطقات وهي تتمسد راسها:ناااري راااسي ضرني مع الزمت دلفولار
أسماء:ملي نعسو وحيديه
رحيل:عرفتي داك ولدهوم مارتاحيتش ليه ودوك الشوفات لي كايدير ياربي السلامة
أسماء:واييه تاأنا محملتوش باين فيه حشاايشي غير من فمو الزرگ وسنانو الصفرين يييع
بدلو حوايجهوم ونطقات أسماء:هزي لفلوس لي عندك ديريهوم فالسوتيان
رحيل:علاش
أسماء:(بهمس)ماتعرف داك خونا يشفرنا راه فيگورتو مكتبشرش بلخير
داكشي لي دارو خباو لفلوس فسوتيان وخرجو هازين حوايجهوم وصكانهوم لقاو كلثوم جالسة مع محمد طه لي بقا بحوايجو جابت ليهوم قرعة دلما وخلاتهوم ينعسو باش يرتاحو ومشات لبيتها تاهي تشرب دواها وتنعس.. فرشو لبنات فالأرض حدا بعضياتهوم وخلاو محمد طه هو لي ينعس جهة لباب ورحيل لوسط.. تخشاو فبلايصهوم والضو مطفي تاسمعو أسماء لي نطقات بخفوت:تفكرت ملي كنا صغار كنا كنعسو بحال هاد النعسة
محمد طه:حمدلله ماجيتيش حدايا إيما كنتي غاتشبعيني ركيل هه
رحيل:ههه أنا لي غاناكلهاا هاد ليلة
أسماء:واباااز (ضارت عاطياهوم بالجنب) تصبحو على خير اجي محمد طه عمرتي لغڤي؟
محمد طه:اه مع السبعة غانوضو نلبسو حوايجنا ونتحركو
رحيل:اوكي بونوي
كل واحد غمض عينو ونعسو دغيا بسباب لعيا ديال الطريق.. وفمنتصف الليل حلات رحيل عينيها وهي مزيرة باغا تمشي لطواليط.. هزات تلفونها لي كان تحت لمخدة باش ضوي بيه وناضت لايحة على راسها فولارها وخرجات من الصالة غادة لطواليط لي كانت جنب لكوزينة.. قضات حاجتها وخرجات سادة لباب راجعة لصالة تاسمعات لحس وراها وضارت لقاتو عادل واقف تيشوف فيها بشوفات مكيبشروش بلخير..
فاش سمعات لحس وضارت شافت فعادل لي كان جاي جهتها وعينيه عليها بشوفات مكيبشرورش بلخير خلاوها تسرط ريقها وبزربة ضارت تمشي وهو يمد يديه شدها ونطق وصوتو باين فيه سكران:الزين مالكي خايفة
نثرات رحيل يديها من بين يديه ولخلعة شداها ونطقات بصوت مرتافع:واااش حماقيتي طلق مني البشااار
عادل:(قرب جهتها)مال الزين معصب
تشعل الضو ديال السطوان ديك الساع وتسمع صوت محمد طه لي نطق وراها بنبرة قوية: رحيييل
ضارت رحيل جهة محمد طه وغير شافتو قلبها تفاجى ومشات تتزرب جهتو وهو ضارب تخنزيرة فعادل لي كان لابس بيل سماطي وشورط وعينيه كيبانو مبوقين حالتو حالة باين فيه سكران.. تالقاتو تخطاها غادي جهة عادل وشنق عليه ولاخر تايدفع ليه فيدو ونطق بصوت قاصح: جمع راااسك از*ي لانصدق مقودها معاك ميسحابش ليك راني معايقش بشوفاتك لموسخين لخوتااااتي بالرب وتعاود تقرب لشي وحدة منهوم ياتانخلي دااار عشتك الق*ااااد
دفعو ولاخر بدا يشد فلحيط باش مايطيحش ومحمد طه رجع عند رحيل لي ضمات نفسها وكتافها تايهبطو ويطلعو باقي لخلعة شداها.. درعها وتمشاو لصالة رادين بابها ورجعو لبلايصهوم جنب أسماء لي سارحة عجول.. شد محمد طه وجه رحيل ونطق بصوت غاضب:واش قاسك؟ دار ليك شي حاجة؟
رحيل:(حركات راسها بلا وهي باقا مخلوعة) لا غير خلعني فاااش شفتو قدامي تيشوف فيا دوك الشوفات
محمد طه:علاش مافيقتينيش نمشي معاك؟
رحيل:ماضنيتش غايوقع هادشي داكشي علاش قلت بلامانصدعك
محمد طه:لاصدعيني نتي لمهم نرد ليك لبال نتي وأسماء راكوم أمانة عندي.. هاد خونا ملي شفتو عرفتو ماشي تال تم وريحة الحشيش كانت عاطية منو ملي سلم عليا بلادوك الشوفات لي كان تيديرهوم فيكوم
رحيل:(تنهدات) صافي دابا دازت على خير وأصلا كون كان دار شي حاجة كنت غانغوت ونضربو نوووريه الضسارة بشحال كتقااام
محمد طه:(تبسم ليها)هاكا نبغيك ههه
قفزات رحيل من شخير أسماء وشافت فمحمد طه بضحك:ههه ناري خلعاتني ههه
محمد طه:يحسن عوان راجلها
رحيل:ههه واييه ولمشكيل بعض لمرات تشخر بعض لمرات لا ههه تناقض
محمد طه:خلينا وكان نعسو راه مشى لحال
حركات رحيل راسها وتخشات بلاصتها مزولة فولارها وتسطح تامحمد طه على ضهرو مغمض عينيه تاحس بيها حطات راسها على كتفو ونعسات..
مع السبعة بيلا كانت لغڤي تتصونى فتلفون محمد طه لي حل عينيه بتعب وشاف فرحيل لي عاطياه بالضهر ومخشية فأسماء لي ناعسة على ضهرها ولغطا محيد عليها والبيجامة طالعة تبان الشورط.. حرك راسو وناض تيحك عينيه وخرج من الصالة غادي لطواليط وهو يسمع لحس فلكوزينة وفاش دخل لقاها كلثوم واقفة تاتقلي السفنج والمقراج تيغلي فوق لبوطة..
محمد طه:لواليدة صباح لخير
ضارت جهتو كلثوم وتبسمات ليه:صباح لخير اولدي رتاحيتي فالنعسة؟
محمد طه:اه رتاحيت (شاف فالسفنج لي تتصاوب ونطق) علاش معدبة راسك؟
كلثوم:اشمن عداب اولدي وزايدون مانخليكومش تمشيو بالجوع فطرو عاد تيسرو
محمد طه:(باس راسها ونطق بتبسيمة)الله يحفظك الواليدة
كلثوم:هاك لمقراج وسير تغسل وجهك اولدي
مشى محمد طه لطواليط قضى حاجتو وغسل وجهو وشلل فمو عاد توضى ومشى لصالة لقى لبنات كيف خلاهوم تحنى جهتهوم ونطق وهو كيحرك رحيل:رحيييل وارررحيل فيقي يالاه (حرك أسماء)واااأسماء يالاه فيقو راه مشى لحال
رحيل:(غطات راسها بلوسادة ونطقات بصوت نعسان)هنن شوية
محمد طه:غير نصلي لفجر وهاني معاكوم
مشى عند مو باش توريه فين لقبلة وجات معاه وفرشات ليه الصالة جهة لقبلة وخلاتو تيصلي وغير سالى رجع عند لبنات وماهضرش هاد لمرة زول عليهوم لكواااش وحيد ليهوم لمخاد تاحلات أسماء عينيها مخسرة سيفتها ونطقات بصوت مبحوح:حشومة عليك
محمد طه:سبعة ونص اشمن حشومة راه تابعنا الطريق الشريفة
ناضت رحيل تاتجمع شعرها الطويل وتتفوه ونطقات بصوت نعسان:فيا النعاس
محمد طه:نوصلوو لدار ارا ماتنعسي نتي وياها نوضو لبسو حوايجكوم
ناضت أسماء هي لولة مشات لطواليط ورحيل ومحمد طه بداو يجمعو فلكواش وحطوهوم فوق السداري وغير رجعات أسماء مشات رحيل تاهي توضات ورجعات صلات هو لول عاد مشاو بيت كلثوم باش يلبسو حوايجهوم ويقادو حالتهوم..
أسماء:(تتجمع شعرها كوت شوڤال) جبتي ريسيل؟
رحيل:(قلبات صاكها وعطاتو ليها)هو لوحيد لي هزيت مع لغوج أليڤغ هه
أسماء: أنا نسيتو مجبتوش
كملو توجادهوم تاسالاو ورجعو لصالة لقاو كلثوم حاطة لفطور.. فطرو بربعة بيهوم تاسالاو وناض محمد طه مد لمو شي فلوس عطاهوم ليها ونطق بهدوء:غانعاود نرجع عندك نتي ردي لبال لصحتك واخا بناتنا التلفون
كلثوم:(بصوت خافت)واخا اولدي
سلمات معاها تاأسماء لي عطاتها فلوس ونطقات:ملي غانشوفو الطبيب اش غايقول لينا غانعيطو ليك نعلموك تهلاي فصحتك
حركات ليها كلثوم راسها باه وضارت جهة رحيل لي تاهي عطاتها شي براكة وعنقاتها كلثوم ونطقات بصوت هادئ: فرحت بزاف لمجيتك عندي ابنتي نتمنى خاطرك يصفا من جهتي
رحيل:صافي غير كوني هانية تهلاي فراسك
كلثوم:تانتي ابنتي وطلبي من مك تسمح ليا على مادرت فيها..
وصلات معاهوم تال لباب ورجعات عنقاتهوم مرة خرا مساخياش بيهوم.. خلاوها واقفة فلباب ومد محمد طه الساروت دالطوموبيل لأسماء ورحيل قبل ماتحل لباب تركب ضارت جهة الشانطي وبالضبط لبلاصة فين كانت ديك لبوجو لبارح ولقاتها خاوية مكينااااش.. زفرات النفس بالراحة وركبات منزلة الزاج تادير باي باي لكلثوم لي واقفة تاهي كاتشير ليهوم والطوموبيل تحركات مخليا كلثوم واقفة فبلاصتها تاغبرات عليها شادة الطريق.. تنهد محمد طه ومسح على وجهو وباين فيه مهموم وهاز حمل تقيل.. مدات أسماء يديها لراديو شعلاتو باش تكسر بيه الصمت لي فالطوموبيل ونطقات بهدوء: داك خونا ومرتو تقول واش فيهوم الصواب مقدوش يطلو علينا ؟
رحيل:(تبسمات بسخرية) على تريكة مك كاين شي حد فيه الصواب اأسماء لبارح حسيت بديك هنية شوية وتنوض تجري عليناا
أسماء:(ضحكات وهي مركزة مع الطريق)هههه وماشتيش نتي عينيها لي حلفات لازولاتها على لبراسلي لي فيديك هههه
رحيل: شوية وتگريسيني ههه(تقادات فالجلسة كاطل براسها بين لكراسى موجهة هضرتها لمحمد طه)مالك ساكت؟
محمد طه:(زفر النفس)غير عيااان وصاف
أسماء:(شافت فيهوم) شفتو عبد الصمد ملي دخل داك ولدو كيف كان تيتبسم ويعرفنا عليه زعمة شوفو تاأنا ولدي عندو خدمتووو ههه أويلي الناس كيكونو عندهوم ولاد لخوال تيتيزين وأناا عندي الشماكريية الله ياااااربي الله
محمد طه:(شاف فيها عاقد حجبانو)ماشتيش نتي فالليل ملي سكر أو وقف على رحيل تايتبسل عليها
أسماء:(خرجات عينيها) وقتااااااش؟
رحيل:نضت نمشي لطواليط وملي رجعت لقيتو قدامي عرفتي قفزني وهو كيحنزز فياا وعينيه منيمين باين فيه سكران (بدات تعاود ليها الفيلم تاختماتها) ونتي مجايبة لدنيا خبار
أسماء:ناااري علااش مفيقتونييش (ضربات يديها مع الڤولون ونطقات مغددة)والله يابووه نوريه الضسااارة الز*مل لي حطو
محمد طه:(خنزر فيها)واش نتي داك لفم عندك ماعندوش لجام
أسماء:راني تعصبت ودمي دابا كيغلي على ماعاودتو ليا أصلا بن لك'لب لي حطو كااانو عينيه علينا بزوووجاات ولكن زهرو جات فيه رحيل إيما كون جيت فيه أنا والله تانسيفطو يغرزز بالرب
رحيل:(ضحكاتها أسماء فاش شافتها كيفاش تعصبات وتتنهج غير بوحدها )هههه ربي شاف من جهتو وصااف ياك امودي
محمد طه:(تبسم جنب ونطق بسخرية)كانت غاتسيفطو يغرز هههه
تكرشخو بزوج وهو مراشقين يديهوم مع بعض و أسماء تاتشوف فيهوم وهي مكمشة عينيها ونطقات:تاضحكو عليا عند بالكوم مغانديرهاااش وغايخلعني مثلا (عوجات راسها ونطقات بغرور) واش أناا لي صرفقت إسلاااام قدام الناس فالزنقة مانقدرش نضرب داك السلوگي لي غير تقيسو يطيح
شهقات رحيل مخرجة عينيها ومحمد طه شاف جهتها وهو هاز حاجبها ونطق بصوت رجولي:عاودي اش قلتي؟
أسماء:(صوتو هو لي خلاها تعيق براسها وتعرف اش خرجات من فمها.. نطقات بكدب وعينيها على الطريق) أنا كنت غير كانضحك
محمد طه:(جهد صوتو تاخلعها) واش بنت ليك أنا ولد صغييير تاطنزي عليااا وقتااااااش طرا هادشي؟
أسماء:(ببرود) بلاماتحمق راسك هادشي داز ولي عطا الله عطاااه
رحيل:(شافت فمحمد طه) بلاماتمرض راسك فدوك الزوج أصلا هي وياه مكيتحاملووش (ضارت جهة أسماء موجهة كلامها ليها) ونتي تكالمااي شوية ونقصي من مشاكيلك معاه
قالت كلامها وسكتات وتامحمد طه وأسماء سكتو وتاحد مارجع نطق بشي كلمة تاني.. تاوصلو واحد لمحطة استارحو ودارو لمازوط وخداو شي حاجة ياكلوها فالطريق عاد كملو طريقهوم ومحمد طه هو لي ساگ وكمل تاااوصلو لدار..ولقاوهوم كيتسناوهوم لغدا واخا تعطلو على وقيتو.. دخلات رحيل لصالة فين كانت تانيرت ونزلات باستها فحنكها:ماما صافا
تانيرت: حمدالله ونتوما كيف كانت التسافيرة ديالكوم
أسماء:(سلمات عليها) مزيان واخا الصهد هلكنااااا غانمشي ندوش بالخف على مايوجد لغدا
رحيل:فين سيدرا؟؟
تانيرت:مشات مع باك لگاراج شافها مقلقة ودار ليها خاطرها
رحيل:مكنتش باغا نخليها ولكن جابتها الضرووف (ناضت رحيل وجلسات جنب مها ونطقات بهدوء) باغا ندوي معاك على كلثوم ولهضرة لي قالت لياا نوصلها ليك
تانيرت:ياكما قالت ليك تاني شي كلام ماشي تال لهيه؟
رحيل:لا هي بغاتك تسمحي ليها على داكشي لي دارت فحقك وفحق بابا هي عرفات راسها ندمات على داكشي لي دارت وصراحة ملي شفتها لبارح كيف كانت تاتهضر وطلب السماحة خلاني نسمح ليهاا ونسى مافات هي بصح غلطات ولكن المسامح كريم
تانيرت:(تنهدات ونطقات بهدوء)نهار عرفت بمرضها بقات فيا بزاف واخا داكشي لي دارت فحقي ماتمنيتش ليها هادشي وعمري نتمناه ابنتي والاكانت هي عرفات غلاطها فهادشي مزيان الإنسان يغلط ويتوب لي خالقو يعرف بلي الدنيا فايتة وحنا غير دايزين منها وسعداتك افاعل الخير (تبسمات بخفوت)هي طلبات السماحة مني وأنا مسامحة ليها دنيا وأخيرة..
كان واقف قدام باب الصالة مور مابدل حوايجو ولكلام گاع لي تقال بين رحيل ومها داز على ودنيه خلاه يهبط راسو ويطلق تنهيدة عميقة..
هاد لخمس السنين لي عاشهوم مع تانيرت لاحظ فيهوم طيبة قلبها وكيفاش عمرها فرقات بينو وبين ريان ولارحيل وكيف تتعاملو هو وأسماء تتعامل لخرين عمرها قالت هادو ولاد كلثوم لي خرجات ليا على حياتي بلعكس كانت معاهوم بحال شي أم ماشي فقط زوجة أب وهادشي خلاها تكبر فعينيه بزاف ويكن ليها احترام وعرف علاش باه طاح فغرامها وكانت هي لمرا لي سلبات قلبو وخلاتو سنين هايم فيها رغم لفراق لي تفرقوه الإأنه عمرو شاف غيرها والدليل أنه واخا كان مزوج بكلثوم عمرو بغاهاا.. واقف ساهي وحادر راسو مخلي غزلان لي خارجة من لكوزينة وجايا جهتو تكمش حجبانها وتستغرب هو علاش واقف هنا.. قربات جهتو تاوقفات وراه ومدات يديها قاست ضهرو تاخرج من سهوتو وضار شاف فيها وهي تنطق:واش كاين شي مشكيل؟
محمد طه:(بقا كيشوف فيها مدة تانطق بهدوء)لا علاش؟
غزلان:غير حيت شفتك واقف هنا وكتبان ساهي
محمد طه:(دوز يديه على لحيتو ونطق مغير كلامو)شنو دايرين لغدا؟
غزلان:دجاج بلبطاطا والزيتون مع شلاظة دميطشة
محمد طه:كاين زيتون حااار؟
غزلان:اه
محمد طه:حطيه تاهو فطبسيل
حركات غزلان راسها باه ورجعات لكوزينة وهو دخل لصالة عندهوم وتبسم لتانيرت لي تاهي تبسمات ليه تاجا جلس حداها وباسها فراسها بلاماينطق.. دازت لوقيتة وجا إدريس هو وسيدرا لي مع شافت رحيل زادت كمشات حجبانها ورحيل نطقات بتبسيمة:مغاتبوسينيش
سيدرا:(قربات باستها ونطقات مكمشة حجبانها)واخا بستك أنا مخاصمة معاك
ضحكات رحيل وعنقاتها بالجهد تتبوس فيها بالجهد وتعنق فيهاا..نهار واحد مشافتها وتوحشاتها وروحها مارتاحت تاشافتها..جلساتها فوق ركابيها تتوكلها لغدا وتهضر معاها وتصالحها..تاسالاو وناضت رحيل لبيت تنعس حيت عيات وتبعاتها سيدرا لي حلات لباب عليها لقاتها واقفة قدام لبلاكار تتجبد حوايجها باش دوش.. قربات سيدرا لي نطقات:مامي شنو جبتي ليا معاك
رحيل:(تبسمات ليها) جبت ليك واحد لحاجة زوينة امامي
سيدرل:(بحماس)نشوفها؟
جبدات ليها بواطة من البلاكار وقربات جهتها وجلسات على ركابيها وسيدرا متبعاها بعينيها متحمسة لشنو غاتعطيها.. حلات رحيل بلواطة لي فيها ديبوكل زوينين ديال الذهب فيهوم حجيرة كبيرة.. حلات سيدرا عينيها ونكقات فرحانة:هادو ديالي مامي؟
رحيل:اه امامي اجي نديرهوم ليك
زولات ليها الزواگ لي كانت دايراهوم ولبساتها هادوك لي جاوها زوينين وعجبوهاا ومشات فرحانة توريهوم لتانيرت ولبقية ورحيل تبسمات ومشات لحمام تاخد ليها دوش..
---
رشات ريحتها كلمسة أخيرة وشافت فمرايتها وفداك الكسوة الصيفية لي كانت لابسة فالبيض فيها وريدات خضرين.. قادات فولارها لخضر وهزات صاكها خارجة من لبيت بشوية باش ماتفيقش سيدرا.. نزلات لتحت لقات محمد طه كيتسناهاا ومع تعطلو مشاو بلافطور.. وصلو لخدمتهوم ومع دخلو لباب محمد طه ودع رحيل غادي لبيروه حيت تعطل وهي زفرات النفس وكملات طريقها وبالها كيخمم فنوح.. معرفاش كيفاش غاتقدر تعامل معاه مور ماعرفاتو خطب وكيفاش تاهو غايعاملها؟ تبسمات بسخرية ملي وصلات لهاد السؤال لي خلاها تعرف جوابو بنفسها.. الجواب لي خلاها تحس بخاطرها تغيير مرة خرا.. دخلات لبيرو لقات رجاء وياسر جالسين وتبسمات ليهوم:صباح الخير
رجاء:(هزات فيها راسها)رحيل جيتي على سلامتك الصراحة لبيرو بلا بيك خاوي
رحيل:الله يسلمك الزين
ياسر:على سلامتك اختي رحيل كيف بقيتي شوية؟
جلسات رحيل بلاصتها وتبسمات ليهوم:حمدلله بقا غير لگبص لي غانحيدو غدا
رجاء:وعلاش جيتي كون بقيتي تازولتيه باش ماتكرفصيش؟
رحيل:سالا ليا لكونجي وزيد مليت فالدار داكشي علاش قلت نبدا ليوم(شافت فخدمتها) كاينة شي خدمة؟
ياسر:موجودة (ناض ليها واحد الضوسي) تاتخدميه معاك
رحيل:واخا مرحبا
تحنات على لملف تاتقراه تاسالات عاد شعلات بيسي ديالها باش تبدا تخدم فيه وترفعات مع لخدمة وقدرات تنسى شوية لموضوع لي شاغل ليها بالهااا... وهاكا دوزات نهارها بلاماتشوفوو وفاش وصلات وقيتة دلخروج لقات محمد طه فانتظارهاا وهوما راجعين من الدار حاولات رحيل أنها تجبد منو لهضرة وتسولو عليه بلاماتفرط روحها وتخليه يعيق.. ومعرفاش بلي غير جبدات سميتو محمد طه فهم ومع ذلك مشى معاهاا فالخط.. وخبرها بلي أصلا شي يوماين هادي مجاش شي لي خلى رحيل تستغرب وتفكر شنو السبب لي خلاه يغبر على خدمتو.. فلوقيتة لي كانت هي تتفكر فيه كان هو جالس فالجيپ ديالو وهاز واحد لگوبلي صغير دلقهوة لي كانت تتفور.. واليد الثانية هاز بيها گارو تيكمي.. مكمش حجبانو القهويين وشوفتو مكانتش تتبين هو باش كيفكر وشنو كايضور ليه فراسو.. ساكت كيكمي لگارو تاسالاه ولاحو وساط الدخان لجنب عاد جغم من ديك الكافي المرة.. ضور وجهو جهة التلفون لي حاط فالكرسي لي حداه وهزو كيشوف فالنمرة قبل مايجاوب بصوتو الرجولي الخشن: غاتلقاني كانتسناك قدام الباب
قطع لابيل وبقا تايضور تلفونو فيديه بشوفاتو القاصحين مدة تابانت ليه الطوموبيل لي تخطاتو اوقفات قدامو وغير من الشوفة عرفها..طلع الزاج ديال الطوموبيل وحط لگوبلي تم عاد مد يديه لباب حلو ونزل وهو كيقاد سروالو التوب لي لابس جهة السمطة قبل مايهز عينو فالباب دلكوميسارية..
جالس بين ربعة دلحيوط متكي يديه على ركابيه وكيشوف قدامو وهو ساهي.. تحت عينيه كان زرق وجنب فمو تاهو لي يبس فيه الدم.. عقلو مكانش حاضر معاه إنما كان كيفكر فشي لي وقع معاه من نهار شد حقو فلورث.. لحق لي كان كيتسناه حياتو كلها ولي بسبابو خلاه يعادي خوه.. كيتفكر مزيان نهار عيط ليه لمحامي وخبرو بلي لورث تفرق وداكشي لي جاه فحقو غايوصلو وخصو يجي يدير الإجراءات القا'نونية باش غدا وبعدو مايجيش ويقول معطاوني والو وبالفعل شد فلوسو وكان فرحان وعاجبو لحال حيت وأخيراً قدر أنه يبعد من تحت يدين خوه ويستاقل لراسو ويبدا الحياة لي كان باغي يعيشها كيف خطط ليها هو ويدخل مع صاحبو شريك فلبروجي لي كانو كيخططو ليه من زمان وكان خصهوم غير راس لمال باش يبداووه.. بروجي لي كان عبارة على نايت كلوب.. كانو مخططين لكلشي هو وصاحبو وبداو يقلبو على الأرض لي فيها غايتبنى لبروجي تالقاااوهااا وشراوها هو.. وكلشي كان ماشي كيف باغي تانهااار لي غايطلع معاااه لقالب ويعرف بلي صاااحبو غدرو وبلي ديك الأرض فيها لمشاكيل أصلا وبلي لبياع لي شراها من عندو مخلوض وبلي فلوسو مشات هاكا شي لي خلاه يتصدم صدمة عمرو وتما حس بالشمتة وبلامايفكر مشى عند صاحبو لاباخطمون ديالو وقرقب عليه ولاخر بحال الاكان تيتسناه شمت فيه مزيااان وماخلى ماقال ليه لهضرة لي كانت بحال شي وقيد شعلات رؤوف لي ماعقلش على راسو تايضرب فيه والجيران دليموبل تيفكو فيهوم تاجاو لبولييس وداوهوم ومع الشهود كاينين كلشي تبت بلي رؤوف هو لي جا تهجم عليه فقلب دارو وطبعا القانون لايحمي المغفلين.. تشد رؤوف فلكوميسارية وصاحبو رفع عليه شكاية وهاهو دابا بين هاد ربعة دلحيطان كيتسنى يشوف كمالت هادشي باش غاتسالي..
فبرا كان واقف نوح مع رفيق المحامي ديالو كيعاود ليه كلام صابر لي قال ليه بلحرف والمحامي مركز معاه تاسالى نوح وهو ينطق بصوت الرجولي لخشن وحجبانو معقودين: نبغيك تشوف ليه شي حل يخرج منها بلاصداع وبلاتعقااد
رفيق: بخصوص الشكاية لي ترفعات عليه نقدرو نلقاو لحل إلا دوينا مع صاحبو باش يسحابها أما بخصوص الأرض وفلوسو لي مشاو فهادي غاتبغي وقت باش نرجعو حقو ونبينو بلي تنصب عليه
نوح:(لعب بلسانو ففمو وحاجبو مهزوز لسماا باين فيه كاعي) فك بعدا غير هاد لمشكيل ونشوفو داك الزمر كيفاش نحلوه
رفيق:واخا أنا غاندخل دابا نشوف غير تهنى اولد لحاج
نوح:الله يحفظك
دخل رفيق لكوميسارية ونوح بقا واقف حدا طوموبيلتو مكروازي رجليه ومربع يديه وحجبانو باقي عاقدهوم وعينو على الطريق بنظرات وتقول واش تعرف اش تحت منهوم.. داير بحال شي بير غارق ماتعرفش اش فيه كلامو قليل حيت من طبعو مكيحملش الهضرة لي ماعندها فايدة.. بقا واقف تاسمع صوت صابر لي عيط من وراه:ولد لحاج باقي مامشيتي؟؟
شاف فيه نوح ورجع قلب عينيه على الطريق بلامايدوي..
صابر:(حط يديه على كتفو ونطق بهدوء) خليت لمحامي غادي لعندو يدوي معاه صراحة مافهمتش كيفاش هاد التخلويض ماعاقش بيه خوك
نوح:(بصوت خشن) بقا يطير تاجابها فعضامو
صابر: يكون خير إن شاء الله أنا سالات وقيتة ديالي شحال هادي وغير تسنيت تانشوف لمحامي ودابا غايخصني نمشي
نوح:(حرك راسو)الله يعاون
صابر:بناتنا التلفون اولد لحاج
مشى صابر فحالو وبقا نوح على وقفتو ماتحركش من تم مدة تارجع عندو رفيق عاد تقاد فالوقفة وقال بجدية: أمدرا؟
رفيق:خديت لادريس ديال صاحبو
نوح:(حك لحيتو ونطق صوت خاتر) نتا عارف اش دير
رفيق:ماتخممش ونعس على جنب الراحة اولد لحاج
نوح:(سلم عليه) علمني باشما كان
رفيق:ضروري قبل مانسى خوك بغا يشوفك
نوح:(تقاد فوقفتو ونطق بنبرتو الخشنة)حسن هاد الساعة مانشوف كمارتو
رفيق:(حرك راسو متفهم اش كاين) واخا الله يعاون
تحرك نوح جهة طوموبيلتو حلها وركب وشد الطريق راجع لرياض لي هادي يوماين ممشاش ليه.. والطريق كانت طويلة شوية.. مد يديه لجهة الراديو ومع شعلو تطلقات أغنية "محني الزين العمر" زاد شوية فلڤولوم ونزل الزاح ديال الطوموبيل مخلي الريح يحرك شعرو لقهوي لي طول ليه ومرجعو اللور.. مسافة الطريق كان واصل لحومة هز يديه لمحجوب لي جالس تم وكمل تاوصل قدام لباب ديال الرياض وسكت الطوموبيل وطلع الزاح عاد حل لباب ونزل ساد وراه الطوموبيل.. لباب كيف عادتو ديما مردود دفعو ودخل بخطوات تقيلة غادي ديريكت جهة الدروج تاسمع صوت ماماه لي نطقات من وراه:ولدي نوح جيتي
نوح:(ضار جهتها وتمشى لعندها تاوقف قدامها وتحنى باسها فراسها ونطق بصوت تقيل)يمّا اش خبارك؟
رحمة:(نطقات بصوت باين فيه مهموم)أنا بخير الحبيب ديالي نتا لي اش خبارك وفين كنتي هاد ليوماين تشنطت عليك وزيد تاخوك طافي تلفونو وماعرفت اشمن جايحة هو فيها خلى قلبي يتهول عليه
نوح:(لعب بلسانو ففمو ونطق بلهداوة)دابا يجاوبك بلاماتشطني بالك وتمرضي خاطرك ايمّا (وبجدية)ردي لبال لصحتك تفاهمنا؟
تبسمات ليه رحمة وخاطرها مهول على رؤوف لي من نهار دفنوه مزاروه نسى واش عندو عائلة واش عندو أم لي خايفة عليه.. عمرو سول فيها وهي لي ديما تتعيط ليه وهاد ليوماين ملي لقات تلفونو طافي خلاص كملات وجميع الأفكار الخايبة طاحو فبالها ولكن مجرد ماسمعات كلام نوح رتاحت شوية واخا لخاطر غايبقا مشطون عليه.. خلاها وطلع لجناحو وهي رجعات لصالة فين كانت جالسة مع سناء لي كانت هازة تلفونها تاتمساجى هي وشيماء.. طلعات راسها وشافت فرحمة لي جلسات وباين فيها ساهية ومقلقة ونطقات:مالكي معجبانيش حالتك
رحمة:بالي مشطون مع رؤوف
سناء:(ناضت جهتها وجلسات جنبها شادة يديها) نتي عارفة داك لولد عندك كيف داير عليها مكاين لاش تشغلي بالك بيه هو ماشي دري صغير ارحمة
رحمة:بلعكس هو راه بحال الدري الصغير خصك غير تحضيه وتردي ليه لبال
سناء:هادشي باش خرجتي عليه فششتيه وفلخر هاهو ضسر وگاعما عاطيك قيمة ارحمة (تنهدات فاش شافت الغبينة لي بانت فوجه ختها وتبسمات بهدوء)عرفتي شكون جاي عندناا هاد ليامات؟
رحمة:شكون؟
سناء:شيماء عندها شي خدمة هناا
رحمة:مرحبا بيها
سناء:وعلاش كتقوليها ونتي معاجبك حال وبحال الامباغاش تجي
رحمة:(هزات فيها حاجبها)واش معررفاش علاش ولادايرة راسك مكلخة ناسية بلي هي كانت مخطوبة لنوح وبلي هو لغى لخطبة وضرب عليها بمرة ودابا هي غاتجي لهنا تبقا معانا شي يامات واش مفكرتيش فيها؟؟
سناء:بلعكس فكرت ولقيتها فرصة باش نصالحوهوم ونرجعو علاقتهوم كيف كانت شيماء باقا تتبغيه والاحنا عاوناهاا أكيد غادي ترجع لأمور كيف كانت قبل
رحمة:(ضحكات من نيتها) واش ضاربك حمار الليل ناسية بلي لي كادوي عليه نوح وبلي هو فاش كيخرج شي حد من حياتو عمرو مكيرجع ليه واخا يغمسوه ليه فأملو ناسية بلي فسخ كلشي منو لراسو وماعطى حد تبرير ولحد الساعة فاش كنسولو كيقطع لكلام فجوفي وشتيه كيف لعين مكيهزهاش فيهاا ولهضرة هي لخرة مكيهضرهاش وكتقولي ترجع الأمور كيف كانت لواه النبگ
سناء:الراجل كيفما بغا يكون فاش كيشوف الاهتمام من لبنت لي كاتبغيه راه كيلين وكيولي زبدة
رحمة:شتي نوح واخا ديري لي درتي معاه إلا قال لا هي لا وإلا ضرب على لواحد والله لاعاود شاف جهتو ولدي طبعو صعيب أنا لي عارفاااه راه إلا كان لحاج الله يرحمو قاصح ولدو قال ليه مكتعرف فلقصوحية تاحاجة وهادي لي غاتولي مرتو خصها الصبر فوق صبرها
سناء:(تنهدات) وشنو لحل دابا؟
رحمة:قولي لشيماء بلاماتحلم بزاف وتبقاي تشجعي فلبنت صافي خصها ترضى بلي هو مباغيهاش وبلي كلشي سالا واخا معرفاش السبب ولكن أنا عارفة ولدي مغايجيشش ويسالي لحاجة إلا الاكان شاف شي حاجة خلاتو ينفر ويرجع باللور..
سناء:(تنهدات) صراحة باغاهوم مع بعضياتهوم
رحمة:أنا هاد الساعة باغا راحة ولدي اسناء هي أهم من كلشي بالنسبة ليا
سكتات سناء مبعد مالقات راسها ماعندها ماتقول.. هي عارفة طبع نوح ولكن عند بالها راه دغيا يلين داكشي علاش باغا تجمعو تاني مع شيماء ساعة رحمة سدات عليها لباب ولكن واخا هاكا غاتحاول وتعاونها حيت هي لوحيدة لي عارفة شيماء قداش تتبغيه..
رحمة:(ضارت عندها فاش بانت ليها سكتات)اجي نتي اش درتي باقي فموضوعك دويتي مع بابا
سناء:(قلبات عينيها) قال ليك الالة هو مموافقش واخا تنطابق السماا مع الأرض
رحمة:ونتي زعمة حلفتي لاحشمتي على عراضك وزولتي لفكرة دالزواج من بالك؟
سناء:واش الزوااااج حرااام؟؟ أويلي كلكوم باغين تاكلوني غير عرفتو بلي باغا نتزوووج واش مامنحقيش وزيد السيد باين فيه ولد الناس وجا لدار واخا عارف بابا مموافقش قال ليا نخطبك من عند شي حد اخر كبير فلعائلة باش يعرفوني باااغيك ماشي كانضحك عليك ونيت قبيلة عيط ليا وقال ليا نمشيو بزوج لفاس عند بابا نهضرو معاه غير مابغيتش حيت عارفة بابا غايصدق قايل ليه شي كلام كيف السم وماباغاش نتحاشم معاه
رحمة: ماقلناش الزواج حرااام بلعكس الواحد يدير لحلااال حسن من لحر'ام ولكن لي حراااام فلموضوع هو نتي لي باغا تزوجي جكارة فطليقك ماشي حيت بغيتي هادشي علاش تاحد مموافقش على لهبال ديالك ونوح اش قال ليك مزال
سناء:مقال والو
رحمة:أنا ختك لكبيرة وغانعطيك نصيحة لوجه الله الاكنتي نتي ممقتانعاش بزواجك من بدر الدين حسن ليك تحبسي ماحدكوم ماحطيتو فالطاجين مايتحرق راه الزواج ماشي لعب ولا يوماين وترجعي لا راه هو الدوام ونتي واش كتشوفي راسك تقدري تبداي مع راجل خر الاكنتي بصح باغاه غاتساليني غير ندعي معاك ربي يسر ليك أما لاكنتي باغا تجاكري بيه ليازيد غاندعي معاك ربي يرد بيك ترجعي عقلك لداك الراس..
فالصباح مشات رحيل مع إدريس لسبيطار على قبل الگبص لي خصها تزولو ومشات معاهوم تاأسماء لي كانت باغا تسول على مرض مها وتعرف اش كاين.. غير وصلو لسبيطار ودعاتهوم أسماء ومشات تقلب على شي طبيب لي يفيدها فالموضوع تابانت ليها بيسان جايا جهتها ببلوزتها لبيضا مع سروال توب بيض تاهو وشعرها جامعاه كوت شوڤال ونضيضرات الشوف حاجبين عويناتها الزرقين.. تبسمات أسماء وقربات عندها ومع وقفات قدامها هزات بيسان راسها وتبسمات تاهي:أهلا ماشيغي
أسماء:بيسان لباس عليك
بيسان:صافا بب (كمشات حجبانها) ياك مكاين باس ؟
أسماء:فالحقيقة محتاجاك تعاونيني الاكان ممكن
بيسان:وي مرحبا شنو المشكيل؟
أسماء:دابا ماما كلثوم كتشفات مأخرا بلي عندها كونسير فالوالدة وأنا صورت وراق ديالها وبغيت شي طبيب لي يشرح ليا حالتها مزيان
بيسان:اجي معايا لبيرو نقدرو ندويو براحتنا
تمشاو لبيرو بيسان ودخلات أسماء وعينيها كيضورو على لبيرو لي كان منظم وزوين.. جلسات فالكرسي وشافت فيها بيسان بتبسيمة:تشربي شي حاجة؟
أسماء:نو الزين شكرا المهم هانتي التلفون فيه گاع لوراق لي فالملف الطبي ديالها
شدات بيسان التلفون تتقرا داكشي لي فيه مركزة وأسماء جالسة على نار باغا تعرف اش كاين.. دازت مدة لي الصمت كان هو سيد الموقف تانطقات بيسان وهي هازة راسها:بون نشرح ليك لوراق اش فيهوم حيت الدومين ماشي ديالي مهم هنا كيتبين بلي هي فيها كونسير والبلاصة فين بان هي لوالدة لي انتاشر فيها والحل لي كاين هو دير أوبغاسيون ضروري باش يستأصلو ليها لوالدة لي مضررة ومور لوبغاسيون غايكون دزناليز لي غادي يخليو لاطباء يعرفو واش لكونسير تحد مع لوالدة ولاانتاشر فأماكن خرى
أسماء:وباش تقدري تفيديني؟
بيسان:ماتعطلوش على لوبغاسيون حيت كل نهار داز غايخلي نسبة الانتشار طلع أنا غانكتب ليك لادريس دلكابيني دواحد دكتوغ مختص فهاد الأمراض ونمرتو تاهي ملي تدوي مع لاسوكخيتيغ ديالو قولي ليها أنا من طرف دكتوغ بيسان السليماني وهي غاتعطيك غونديڤو قريب
مدات ليها لورقة فيها لادريس ونمرة التلفون ديال داك الطبيب وأسماء تبسمات ليهاا: شكرا ليك بزاف وسمحيليا درونجيتك على الصباح
بيسان:الله ياودي مرحبا أنا فالخيدمة والاحتاجيتي أي حاجة تقدري تعيطي ليا فأي وقت (خدات لكارت ڤيزيت وكتبات ليها فيها لور نمرتها بخسونيل وتبسمات) هادي نمرتي بخسونيل
أسماء:شكرا
خرجات من عندها أسماء وهي تتسيفط مساج لمحمد طه ورحيل تتعلمهوم بشنو كاين هاد الأخيرة لي كانت خارجة من عند الطبيب مور مازول ليها لگبص ودار ليها ترويض ليديها باش تقدر تحركها لقات إدريس فانتضارها وهو مبتاسم:على سلامتك ابنتي
رحيل:الله يسلمك اوف وأخيرا (حركات يديها بشوية) تهنيت منو (شافت فتلفونها لقات مساج أسماء جوباتها ورجعات شافت فباها) أسماء مشات لخدمة قالت ليا بلي هضرات مع بيسان وشرحات ليها وضع كلثوم
حرك إدريس راسو بهدوء وركب فبلاصتو ورحيل نطقات:تعطلت على لخدمة
يالاه بغا يجاوبها إدريس وهو يسمع تلفونو لي صونى دوز لخط ونطق بهدوء:ولد لحاج اش خبارك
غير سمعات سميتو بلاماتحس لقات حواسها كلهوم متبعين مع باباها لابيل..قلبها بلاماتحس لقاتو مرة خرا كينبض بجنون لمجرد سماع اسمو..
سالى إدريس لابيل ديالو وضار جهتها لقاها ساكتة وباين فيها ساهية وهو ينطق بهدوء: تمشي معايا نشوفو الدار الجديدة؟
رحيل:(مكمشة حجبانها)اشمن دار ؟
إدريس:أنا وماماك قررنا نشوفو شي دار خرى لي تكون كبيرة على هادي حيت كيف تتشوفي عائلتنا كبرات وديك الدار صغيرة شوية
رحيل: وهاد الدار فين كاينة زعمة واش قريبة من لبلاصة لي حنا ساكنين فيها؟؟
إدريس:شوية بعيدة فبلاصة زوينة نمشيو نشوفوهاا ونجيب تاماماك وخوتك وإلا عجباتكوم ديك الساع نتافقو مع البياع
رحيل:صافي واخا لي بان ليك واخا غانتعطل على لخدمة؟
إدريس:علمي لبنت لي خدامة معاك بلي مغاتجيش ليوم مافيها باس نهار واحد تمنكيه
حركات راسها باه وسيفطات مساج لرجاء لي جوباتها بلي أصلا ليوم مكيناش لخدمة وماشي مشكيل.. شد إدريس الطريق ورحيل جنبو متحمسة تشوف هاد الدار لي الاكتاب غاتولي دارهوم.. بعد مدة وصل إدريس لبلاصة لي نعث ليه نوح.. الشاريع كان كبير ونقيقي دخل إدريس مع واحد الدخلة وبلاصا طوموبيلتو ونزل كيشوف فالبلاصة والشارع ورحيل تاهي مكانتش قل منو.. درعها عندو وتمشاو متبع إدريس النعت تاوصل لقدام واحد لباب دلحديد وهو يصوني فلانترفون ورحيل هزات عينيها تتشوف الدار لي كانت طغوا دإيطاج وكاتبان مفينية وجايا شادة القنت وجنبها مكاين تاشي دار.. تحل لباب من طرف واحد الراجل كبير فلعمر لي تبسم ونطق:سي إدريس ياك؟
إدريس:هو هادا اسي منصور
منصور:مرحبا اسيدي تفضل
خوا ليهوم الطريق ودخل إدريس وموراه رحيل لي عينيها تحلو بانبهار فالدار لي كانت تتهبل من لداخل.. طلعو فدوك ربعة دريجات وضارو على يديهوم ليمن وبانت السيجور عاد الصالة لي كانت محلولة وكبيرة يجري فيها لخيل.. وقفات رحيل تاتفرج على الدار تاسمعات صوت لخطوات وراها وصوتو الرجوولي لي نطق بنبرتو الخشنة ولي خلات قلبها يرجف وسط ضلوعها..
لحظة مرات كالدهر بالنسبة ليها وريحتو الرجولية تسللات لجيوبها الأنفية مخلياها تحس بالحنين ليه.. شافت فباها لي تخطاهاا وقرب عندو كيسلم عليه وصوتو الرجولي الخشن وصل لمسامعها مخليها تحس براسها متوثرة زفرات النفس قبل ماضور بخطوات بطيئة جهتو وبان ليها واقف بسروال توب كحل مع شوميز فنفس اللون ومطلع ليها لكمام تابانو درعانو لمنفوخين بالعروق مزينين بشعيرات خفافين.. وساعة روليكس فيديه ليسرية.. شعرو طوال شوية ومرجعو لور ولحيتو مقادهاا.. تفاصيل لي كانو بساطين ولكن بالنسبة ليهاا هي كانو أشياء مهمين عندها.. هزات فيه عينيها فنفس اللحظة لي هو هز عينو الزرقين الغامقين جهتها.. قل من دقيقة وكان مهبط عينينه عليها مخليها واقفة فبلاصتها وشوفتو خلات تأتير قوي عليها.. كان منغامس فكلامو مع إدريس بكل جدية باينة غير من تكميشة حجبانو وتركيزو لي عاطي لباها.. ضورات رحيل وجهها جنب تتحاول تكالمي مشاعرها لي ديما كيفضحوها فحضورو.. وسرعان ما تفكرات أمر خطبتو شي لي خلى مزاجها يتغير فجزء من ثانية.. وتفكيرها مشى لشكون غاتكون هادي لي قرر أنه يكمل معاها حياتو.. كمشات حجبانها وهي حاسة بحال إلا شاعلة فيها شي عافية..
إدريس:(قرب جهتها وبانت ليه مكمشة حجبانها وساهية..حط يديه على كتفها تاضارت عندو ونطق بهدوء)سيري شوفي الدار ابنتي واش عجباتك
رحيل:واخا
تخطاتهوم ومعاوداتش هزات عينيها جهتو غادة كاتشوف فدوك الصالونات لي كان واحد كبير ومحلول على السيجور وفيه الساريات والثاني كان تيتسد بلباب وتاهو كبير.. وفجهة بعيدة شوية كاين طواليط فيها حمام تاهي.. خرجات من تم غادية لجهة الدروج لي كاينين فالجنب.. طالعة تاوصلات لطبقة الثانية لي كانت فصالتها عكس لتحت فيها صالون ماكبيرش بزاف وجنبو كوزينة كبيرة مفينية وفيها لطاجير بالخشب وفيها بالكون.. كانت تتحل وتقلب فلبلاكارات تاسالت عاد خرجات غادة لباب لي كان مسدود ولي كان ديال بيت النعاس فيها بالكون وحمام ودريسينغ فالبيت.. غير شافتها رحيل قالت فدماغها هادي بيت ماما وبابا.. وكانت تاني بيت خرا صغيرة شوية جنب لبيت لكبيرة.. ملي سالات فديك الطبقة طلعات لفوقانية ولي كانت تاهي فصالة خرا وفيها غير لبيوت دالنعاس وزوج حمامات وفيهوم فنفس الوقت طواليط.. الدار كانت مفوهة وكلها شراجم وبالكونات عجبات رحيل زائد فصالتها كانت بين الرومي والبلدي.. دخلات رحيل لواحد لبيت كان فيها بالكون حلاتو وخرجات تتشوف فالشارع مع الدار محلولة على زوج جوايه.. مكمشة عينيها بسباب الشمش لي ضربات فوجهها.. وعينيها كيشوفو فالشارع والسيركولاسيون ديالو ولمحالات لي كيبانو.. ولي زاد جدبها هي واحد الجريدة كلها خضراا كتبان زوينة..
فلتحت كانو واقفين نوح هو وإدريس مع منصور مول الدار كيهضرو بناتهوم تانطق إدريس: تباركالله دار زوينة ومشمشة ونقية كيف بغيتها ولكن ضروري مخص نجيب الدراري يشوفوهاا
منصور: هانتا جيبهوم وشوفوها على خاطرك أنا نهار جا عندي ولد لحاج قال ليا بلي واحد السيد من العائلة باغي دار لبيع قلت ليه مرحبا يجي ويشوفها
نوح:(حط يديه على كتف منصور ونطق بخشونة) الله يكبر بيك الحاج
إدريس:(تبسم)اوا نعيط لدراري يجيو يشوفها دابا نيت ولاعرفتي شنوو نمشي نجيبهوم بلامايتسخسخو فالطرونسبور
نوح:(حرك راسو بهدوء)مزيان إلا كانو مسالين يجيو حسن ونتفاهمو على الثمان ياك الحاج
منصور:توكلنا على الله
خرج إدريس وجبد تلفونو دوز لخط لتانيرت وغير جوباتو نطق بسرعة:لبسي حوايجك نتي وسيدرا وغزلان لقاكوم واجدين
تانيرت:ياك لباس؟؟
إدريس:ديري لي قلت ليك نجي وتعرفي تانيرت إينو
وصل لفوق وبدا كيقلب على رحيل لي كانت باقي واقفة فمكانها وتنحنح باش مايقفزهاش وهي غير سمعات تنحنيحتو ضارت شافت فيه وتبسمات:وي بابا شنو درتو مزال
إدريس:غانمشي نجيب ماماك تشوف الدار باش إلا عجباتها نتافقو على التمان ابنتي
رحيل:اه نمشيو
إدريس:لا نتي غير بقاي هنا أنا مغانتعطلش
رحيل:(نطقات بسرعة)بوحدي؟
إدريس:لاراه ولد لحاج كاين لتحت هو ومول الدار غير تهناي مغانتعطلش صافي ابابا
مخلاش ليها فين تجاوب حيت كان مشى باش مايتعطلش ومخلي رحيل واقفة تتبلق عويناتها ممتيقاش بلي غاتبقا هي وياه فبلاصة وحدة..
زفرات النفس وجبدات تلفونها تلف بيه لوقت ونيت ماتبقاش تشغل تفكيرها فمول دعوتها.. دازت وقت ورحيل باقي فالبالكون تاحسات بخطوات وراهاا وريحتو سابقاه وهي تسرط ريقها وضارت بلخف لعندو لقاتو جايب كرسي حطو ليها ونطق بصوتو لخشن: الاعيتي هالكرسي فين تجلسي
تصرفو كان بسيط خلاها تزيد تفرح وتحس بيه مهتم بيها.. تبسمات بخفوت ونطقات بهدوء:شكرا ليك
نوح:(تقاد فوقفتو ونطق مكمش حجبانها) الاحتاجيتي شي حاجة أنا لتحت
ضار باش يمشي وهي تفكر أمر خطوبتو وبلاماتشعر نطقات بسرعة:مبروك
بالعرض البطيئ ضار جهتها نوح وهو هاز داك لحاجب لسما ناطق بخشونة:علياش؟
شوفتو وتراتها بدات تتحك يديها مع بعض وتشتت نضرها وماتجي عينيها غير على يديه لي نوغمالو كيتلبس فيه لخاتم وبان ليها صبعو خاوي شي لي خلاها تكمش حجبانها.. وتساؤلات عديدة طاحو فبالها أولهوم واش هو من النوع لي مكيلبسش لخواتم ولكن بلاتي راه هو لابس خاتم فصباعو يعني يكون نسى مالبسوش ولاشنو.. هاد الأسئلة كلها طاحو على دماغها خلاوها تسكت تاحسات بيه باقي واقف قدامها عاد وعات..
رحيل:(بدات تتبسم ليه ونطقات بهدوء) على البروجي الجديد
مكانتش باغا تبان ليه بلي تقرصات داكشي علاش قررات تبدل كلامها وتبارك ليه على لبروجي لي بالصدفة عرفاتة من محمد طه لي قال ليها بلي هو شرا واحد لمحال فالسونطر وراه كيوجدوه لخدامة.. ومن زهرها جا لبروجي فوقتو
نوح:(حرك راسو بالخف ونطق بهدوء) شكرا
خلاها ومشى وهي بقات متبعة ليه لعين تاغبر وجلسات فداك لكرسي..حركات راسها كتنفض تفكيرها لي حسات بيه سيطر عليهاا وزفرات النفس ونطقات بصوت معصب:صافي نسااااي ارحيل نساااي اوووف
جبدات تلفونها كاتخربق فيه وتتحاول تشغل بالها حيت حاسة براسها الابقات تتفكر فهادشي غاتحماااق...
وقفات الطوموبيل دإدريس وتحل لباب لي جنبو نازلة منو تانيرت بجلابتها لمخزانية لكحلة شادة كرشها لي باينة وضارت جهة لباب لوراني لي تحل ونزلات سيدرا بكسيوة صيفية وموراها غزلان.. تبسمات تانيرت وهي كاتشوف فالحومة ونطقات: الحومة نقيقة وزوينة
إدريس:تالدار غاتعجبك
شد فيديها وموراهوم سيدرا لي شادة فيد غزلان ودخلو لدار لي كان بابها مردود ومع وصلو لطاج لول بان ليهوم منصور ونوح جالسين على لكراسى.. خرجات سيدرا عينيها وطلقات من يد غزلان ومشات تتجري جهتو ناطقة بصوتها الحماسي:ماي بلو آيز
حل يديه وتحنى شوية لقدام تاجات تلاحت عليه وهزها مجلسها فوق ركبتو وهي معنقاه ونطقات بصوت عالي:توحشتك أنا
نوح:(تبسم ليها بحنية)بزاف ولاشوية؟
سيدرا:قد السمااا والأرض ماي بلو آيز ونتا توحشتيني
نوح:(باس جبهتها ونطق بنفس الحنية) بزاف تاأنا
هز نوح عينيه جهة تانيرت وحرك ليها راسها وناض من بلاصتو هاز سيدرا مخلي ليها لكرسي تجلس وترتاح فيه..
تانيرت:(شافت فإدريس)رحيل فين؟
إدريس:لفوق (شاف فسيدرا) نخشيشتي سيري طلعي لفوق عند مك
حطها نوح وهي مشات تتجري مخليا تانيرت لي شدات فغزلان غاديين كيشوفو الدار.. وصلات سيدرا عند رحيل لقاتها دايرة ليزيات وقالبة لكرسي جهة الشارع كاتمنظر تاحسات بيدين صغار سدو عينيها وهي تبسم وحيدات ليزيات وسمعات صوت سيدرا لي قالت:شكون أنا؟
رحيل: لبخانسيس ديالي
جراتها رحيل باستها فحنكها وسيدرا تعلقات فيها: مامي ماي بلو آيز لتحت
رحيل:جات جداك؟
سيدرا:همم هي وغيزو لتحت
هزاتها رحيل وناضت غادة عندهوم لتحت وتلاقاتهوم نيت فالدروج طالعين تبسمات رحيل لمها:غايهلكوك الدروج
تانيرت:اوا ماعليا غير بالصبر هه
كملو دورانهوم فالدار لي كانت بالفعل زوينة وعجباتهوم وتاسيدرا لي تتجري غادة جايا مرة تهبط عند إدريس ونوح مرة ترجع عند رحيل وتانيرت لي جلسو لفوق فرحانة ومقاداها فرحة..
لتحت كان جالس إدريس مع منصور كيتافقو على الثمان لي مور ماعطاتو تانيرت لأوكي قررو يشريوها.. عاطي إدريس الثمان لي فجهدو ومنصور تاهو عاطي لي مسلكو وكل واحد يحلف ونوح واقف مربع يديه مادخلش تاشوية شاف فإدريس ونطق بجدية:سي إدريس واحد الدقيقة؟؟
سبقو لصالة الثانية وإدريس مشى وراه لقاه واقف تيتسناه.. قرب نوح ونطق بنفس الجدية:شحال فجهدك نتا؟؟
إدريس:واصراحة جهدي هو لي قلت ليه عندي شي براكة وزيد عليها ثمان الدار الاتباعت تاهي
نوح:(حك لحيتو وكمش فيه حجبانو) صافي نتا تافق معاه على الثمان لي قال وتكاتبو ولي خصات نزيدها
إدريس:(بامتناع) لااولد لحاج باركة ضبرتي لينا على هاد السكنة
نوح:(حط يديه على كتقو وقال بخشونة)عتابرني سلفتك ملي يكونو عندك رجعهوم ليا (شافو باغي يدوي وهو ينطق بنبرة لانقاش فيها)صلي على النبي وتوكل اسي إدريس
تنهد إدريس وحرك ليه راسو باه ورجعو بزوج عند منصور يكملو كلامهوم..
---
خارجة من الرياض بڤيست نواغ مع سروال توب تاهو نواغ وشعرها مطلوق بأريحية.. هازة راسها لسما وكل خطوة كديرها بلحساب وصوت طالونها كيتسمع بحال شي سمفونية.. وصلات لباركينغ ومع جات تحل لباب حبساتها يد رجولية خلاتها تهز حاجبها وضور جهة الشخص وهي مخنزرة لكن غير شافتو ملامحها تحولو لصدمة وبصوت تقيل ممتيقاش نطقات: ليازيد
عيونها كانو كيتفحصو ملامحو الرجولية بنظرات مصدومة.. حاسة براسها كاتحلم وممتيقاش بلي هادا لي واقف قدامها هو نفسو الشخص لي جرحها جرح عميق لي باقي لحد دابا كينزف واخا دازو عليه سنين طويلة.. كاتأمل ملامحو الرجولية لي لطالما عشقاتها عينيه القهوين لي كيشوفو فيها بشوفاتو لحنانين.. نفس النظرات ممزوجين مع نظرات الشوق والحزن.. لحيتو لي كبرات وشعرو لقهوي لي كان داير ليه تحسينة عادية وجنابو باينين فيه زغيبات بويض.. تكميشات لي جنب عينيه ولحيتو تاهي لي مخلطة مع الشيب..ومع دلك باقي زوين كيف كان قبل.. وفالطرف الاخر كان واقف تاهو كيتأملها بنظرات عنوانهوم الشووق.. عينيه كيغليو على ملامحها البيبي فيس عينيها لمكحلين لي باين فيهوم الصدمة ينظرة لي خلات قلبو يتشق.. لعيون كان عندهوم حديث ولقلب ربي عالم على مابيه.. كانت غاطيح كون ماشدهاش بيديه ونطق بسميتها بين شفايفو بنفس النبرة لي مولف يعيط بيها: سناء واش نتي بخير؟
مجرد ماسمعات صوتو دكرياتها فكرووها فنهار لي حياتها تدمرات فيها وتلقات فيها الصدمة لي عمرها كانت توقعها ولي جاتها من أقرب الناس لقلبها.. دفعات يديه لي شادينها وشافت فيه بنظرات شرسة وبصوت قوي نطقات:اش كادير هنا؟ علاش جيتي؟
ليازيد:(مكمش حجبانو فاش تفكر سبب مجيتو ونطق بصوت رجولي)جيت نحبس الحماااق لي كاديري فيه
سناء:(ضحكات مفقوصة)حماااق ههه نتا أصلا اش دخلك فحياتي ندير فيها مابغيتي شكوووون نتاااا لي دخل فيها هااا
ليازيد:(قرب خطوة جهتها ونطق بصوت هامس)أنا ليازيد
سناء:(هزات فيه راسها بكبرياء تتحاول تحارب داك الصراع لي فداخلها) وحيت نتا ليازيد خصك تبعد مني وماتقربش سمعتي
ليازيد:(ضرب بيديه الطوموبيل ونطق بصوت معصب)عند بااالك غانخليك تزوجي بداك ميخي ونخليك ديري مابغيتي الاكنت طالق ليك اللعب شحال هادي وعارف خبارك وساااكت فتأكدي بلي دابا اسنااء مغانبقاش ساكت وغاندير كلما فجهدي نحبس هاد لخرااا
سناء:(تبسمات بسخرية) طالق ليا اللعب ههه واش من نيتك هههه افيق اسي راه أنا وياااك طلقنا سمعتي ونتا ماعندكش حق عليا وهادي حياتي نتزوج لي بغيت ونمشي فيما بغيت نتا ماسوقكش سير عند لقح*بة ديالك وفرقني عليك سمعتي
دفعاتو وحلات لباب ويديها كيترعدو حسات بيه كيحل لباب ساعة طوموبيل مسدودة أوطوماتيك وبزربة دمارات راجعة مااخشاغيغ وعينيها على لمرايا بان ليها واقف فبلاصتو كيشوف فيها وغير بعدات ومبقاتش صورتو تتبان ليها طلقات لعنان لدموعها لي كانت حابسة ينزلو وشهقاتها كيتسمعو مجهدين فالطوموبيل.. شوفتو مكانتش دايرة ليها حساب.. خربقاتها وخلات البقايا المتبقية من صمودها يتلاشى.. شوفتو فتحات عليها لمواجع والأيام الكحلة لي شافت مور ماكتشفات خيانتو لي كانت بالنسبة ليها بحال شي موس هزو وغرسو فقلبها وقتلوو.. بدات تتبكي وتشهق ويديها تترعد عليها وبدات تاضرب فالڤولون وتغوت بجنون:علاااش رجعتي علاااش هء هء الله ياخد فيك الحق الله ياخد فيك الحق علااااش دمرتيني اليازيد علاااااش
بلاصات طوموبيلتها جنب الطريق وحلات الشراجم تتحاول تنفس ودموعها باقي كينزلو بحال الشتاا.. حاطة راسها على الكرسي وبصوت هامس نطقات: مكفاكش قتلتيني وأنا حية ودمرتي فياا گاع داكشي الزويييين هء هء
حطات وجهها بين يديها تتبكي وتلفونها كان تيصوني والخاطر لي يجاوب ماعندهاش.. يادوب شافت سمية ولقاتها "بدر الدين" فلبلاصة قطعات عليه وطفات تلفونها وزفات بيه وغوتات:بقيتي لياااا غير نتاااا ااااااع
---
وصلات لخبار لبقية لي عرفو بلي باهوم شرا دار وبلي غايتحولو ليها فهاد ليامات باش يبيعيو هاد الدار لي ساكنين فيها.. كانو مجمعين على لگوتي وأسماء شافت فباها ونطقات:واش الدار قريبة من هنا؟
إدريس:بعيدة شوية
رحيل:عرفتي الدار واعرة وكبيرة يجري فيها لخيل هاد الفراش مغايبانش فيها هههههه
سيدرا:اااه سومة وتابيتي أنا ومامي زوييين فيها هادك (شافت فرحيل) سميتو مامي
رحيل:بالكو مامي
أسماء:علاه نتوما ختاريتو لبيوت من دابا هه
رحيل:سيدرا ختارت بيتي أنا وياها هه
ريان:اوا هادا ماشي عدل الخوووت خصنا نديرو لقرعة
رحيل:لبيوت لي لفوق كلهوم قد قد غير كاين لي فيهوم بالكوم كاين لي شرجم
كانو مجمعين بناتهوم تاسمعو الدقان لي كااان مجهد بحال دلبو'ليس خلاهم يقفزو وشي يشوف فشي.. ناض إدريس تابعينو ريان ومحمد طه ومع حل لباب بانو ليه زوج رجال واحد فيهوم كان قصير وغليض كرشو خارجة وداير لحية كتيفة هابطة ليه مع لعنق باين فيه من النوع المزغب.. ولاخر طويل ورقيوق لكالكاس دوجهو كيبان وسنانو مصفرين.. كمش فيهوم إدريس حجبانو وشاف فيهوم شوفة قاصحة:ياك لباس الشريف اش هاد الدقان
ناضو لبنات تاهوم واقفين قدام لباب كيشوفو اش كاين تاهضر الراجل لغليض بصوت مدعدع:غزلان كاينة هنا
عند هاد الأخيرة لي غير سمعات الصوت وجهها صفار والدم مشى منو.. خرجات عينيها جامدة وحد مقدر يشوفها حيت كلشي منتابه مع دوك الزوج
محمد طه:(خنزر فيه)شكون نتوما
نطق الراجل الغليض:أنا خوها (شير جهة لاخر) وهادا راجلها..
لكدوب حبلو قصير واخا تعيى ماتكدب غايجي واحد النهار لي كدوبك غايتفرش وغاتحط بوجهك.. داكشي علاش لواحد يختار الصراحة ديما ويهني راسو ونيت مايخليش غيرو يشوف فيه بشوفة ناقصة وياخدو عليه ديما ديك النظرة ديال كداب.. ولكن هادشي مكيعنيش عوتاني بلي لحياة مافيهاش لكدوب وبلي تاواحد مكيكدبش.. كاينين كدبات بيضين لي كيقدر الإنسان يدوزهوم بجغمة الما كيف كنقولو.. كدبة لي عارف راسك مغاديش تأدي بيها غيرك وفنفس لوقت تقدر تسلك بيها راسك وتهنى من الصداع.. تماما كحالة غزلان لي كانت واقفة تتسمع كلام خوها وعينيها كيتسقطرو بالدموع.. حاسة بأنفاسها مخنوقين بحال لاشي يد تتقج فيها.. النفس مكتقدرش طلعو وهي تتفكر شنو جاي مور مجية خوهااا.. أما عند لبقية فلكلام لي تقال خلى كلشي حال فمو مصدوم وشي كيشوف فشي ممتيقينش لهضرة لي تقالت.. كيشوفو فداك الراجل لغليض لي واقف مخرج ديك لكرش تيشوف فيهوم بعينين الديب ولاخر واقف حداه وعينيه كيضورو بلاصتهوم.. السكات طغى عليهوم لمدة كيحاولو يسرطو ديك الصدمة.. رجع شاف فيهوم إدريس ونطق بجدية باينة فوجهو: وشنو غايتبت بلي كلامكوم هو الصح
الراجل:عيط ليها هي وغاتعرفنااا
حطات غزلان يديها على فمها حابسة شهقاتها وتتحرك راسها بلا مباغاش تخرج عندهوم ويشوفوهاا حيت عارفاه غايديها معاه وهي هادشي لي مباغااش.. بدات كاترجع بلور وتحرك راسها بهسترية وخرجات صوتها لي كان خافت:مابغيتش نمشي معاه هء هء مابغيتش
انتابهات ليها رحيل لي كانت واقفة جنبهاا وضارت شافت فيها ولقات حالتها حالة.. كلها تترعد وتتبكي وتحرك راسها بلا تامشات تتجري جهة الدروج وهي تبعهاا خافتها لادير شي حاجة فراسها.. ومن زهرها لقاتها يالاه بغات تسد باب لبيت دأسماء وحبساتها بيديها وغزلان شافتها وهي تشهق ونطقات بصوت باكي:مابغيتش نمشي معاااااه مابغيتش مااابغيتش
رحيل:(لهضرة تلفات ليها وبزز باش خرجات دوك لكلمات بصوت خافت) يعني هاداك بصح خوك وراجلك
غزلان:(تتشهق وتحرك راسها بلا) ماشي رااااجلي ماااشي راجلي هء هء
رحيل:(قربات جهتها شدات فيها ونطقات بهدوء) صافي تهدني وعاااودي ليااا كولشي وبلااكدوب وأنا غانعاونك تيقي بياا
كان كلامها صادق حيت لحالة لي شافت فيها غزلان وانهيارها ولخوف لي فعينيها خلاها تفكر راسها ياماتها تاهي.. تفكرات داك لخوف والرعب لي عاشت وكيفاش حسات وهي بوحدها وعائلتها بعيدة عليهاا.. يمكن الاختلاف لي كاين هو غزلان هاربة من خوها وهي كانت هاربة منو هو..
غزلان:(شدات يديها متشبتة بيها بحال شي واحد كيغرق فشي بحر وفاش تيلقى شي قارب دالنجاة كيتشبت بيه بكل قوتو.. هاكا كانت وهي تتهضر بصوت سريع) غانقول ليك كولشي والله مغانكدب
تحل لباب عليهوم ودخلات أسماء ورنيم وقبل ماتحل أسماء فمها وتنطق خرجات فيها رحيل عينيها بمعنى سكتي ورجعات شافت فغزلان ونطقات بصوت حنين:كانسمعك
غزلان:(جلسات جنب النموسية وباقا شادة فرحيل لي جلسات جنبها ونطقات بصوت خافت ودموعها نازلين)خويا عباس كبر مني بخمسة وعشرين عام كان هو الدكر لول فلعائلة وغير ولداتو ماما الله يرحمها وهي تمرض وبقات مدة مكتولدش تادازت خمسة وعشرين عام وحملات بيا كانت كبرات فلعمر هي وبابا.. وكتاب ملي ولداتني تموت (عضات على شفتها لي كترعد ومجرد ماتفكرات واليديها حسات براسها توحشاتهوم وقلبها ضرها) مكنتش تنعرفها وعمري سمعت صوتها حدي شايفاها فواحد التصويرة قديمة كانت عند جدة كانت زوينة بزاف.. (تتعاود وعينيها ساهين وباين فيها متأثرة) ملي عقلت على راسي وأنا عايشة مع جدة وبابا هوما لي كبروني وخويا كان ساكن معانا ولكن عمري حسيت معاه بلحنانة دلخوت كان بحال شي واحد غريب عليا قاصح وأناني وكيبغي غير راسو.. تانهار تزوج وجاب مرتو تسكن معانا حيت الدار دجدة وهو مباغيش يمشي يكري دار ويزيد على راسو لمصاريف.. كان بابا هو مسكين لي كيخدم كل مرة فين مرة بناي مرة يهز لناس السلعة مرة يمشي لموقف ديال الطاكسيات يبقا تما تال لعشية ويجي مسكين محروق بالشموشات ورجليه يتنفخو بالوقوف.. لمهم ميبقاش جالس ويجيب باش يقريني (حدرات راسها تتبكي ولغصة واقفة فحلقها) وخويا وتگول واش ضرباتو النفس عليه بلعكس ممسوقش لاهو لامرتو أصلا السكنة لي مهمة راه كاينة ولماكلة راه تياكلو معانا لي قسم الله.. تانهار لي ضهري تهرس ملي مشى بّا لحنين لي كيحن فياا وبقيت أنا وجداتي حاطين الراس على بعضياتنا كل وحدة تشكي همها لخري.. كانت مسكينة واكلة همي نهار تاهي تموت وتخليني لاحنين لارحيم.. تكرفيص لي تكرفصو بّا الله يرحمو تكرفصاتو جداتي تاهي باش نكمل قرايتي كانت مسكينة تاتصاوب لحلوى لناس وتمشي تشقى ليهوم غير باش تجيب فلوس لكتوبة وتمشي لعند لي كتعرف عندو شي ولد نجح فشي قسم باش يخلي ليا المطابيع.. تمحنات تاهي تاقراتني ونهار عرفت راسي نجحت فلباك جيت فرحانة باش نفرحهاا ساعة لقيتها مشات.. مشات قبل ماتفرح ليا..
حدرات راسها تتبكي وكتافها يتهزو خلات رحيل تاهي دموعها ينزلو وأسماء بنفسها ضورات وجهها جنب باش ماتبينش دموعها ورنيم حدرات راسها متأثرة..
هزات فيهوم راسها وعينيها حمرين ومنفوخين بالدموع أما قلبها فكان كينزف من تأثير هاد الدكريات لي تحطو قدامها بحال شي صور كيدوزو.. مدات يديها مسحات دموعها لي نزلو من أول وجديد ونطقات بصوت ضعيف: بقيت عايشة مع خويا ومرتو لي رداتني خدامتها الطياب والشقا عليا التصبين وتربية الدراري تاهوما كلشي تكلف بيه غزلان وهي تحط الرجل على ختها وتأمر فيا وهو (ضحكات بسخرية) لي قالت ليه يديرها وتامن لقراية جلسني منها ومخلانيش نكمل ورى لبااك.. حسيت براسي تهرست وبلي تمارة لي ضرب عليا بّا وجدة باش نكمل قرايتي تضربات فزيرو.. ماعرفت ماندير ديك الساع ضياقت عليا وتاصاحبتي لي كانت جارتي فأكادير مبقاتش حيت جات لهنا لمراكش تاهي ضبر على راسها.. يوم ورا يوم وأنا فنفس الروتين من صباح ربي وأنا واققة على رجليا بحال شي خدامة وهوما جالسين مبرعين..
أسماء: وكيفاش قدرتي تجي لهنا واش هربتي منو؟
غزلان:(حركات راسها بلا) صاحبتي لي كنت قلت ليك أميمة قبل ماتمشي خلات ليا نمرتها دالتلفون ومن زهري جداتي الله يرحمها كان عندها تلفون عظم عطاتو ليا كنت تانتسلف عند لبقال باش ندير خمسة دراهم روشارج واحد نهار صونيت ليها وهي عيطات وهضرة تجيب هضرة تاقالت ليا نجي عندها ونخلي خويا ومرتي نضبر على راسي نخدم ونقرا ومانخليهش يتحكم فيا كلامها بقيت تنفكر فيه شحال ولقيت بلي هي عندها لحق وأنا حياتي كضيع معاهوم.. بالفعل وقفت فوجهو وقلت ليه باغا نكمل قرايتي وبلي أنا مسؤولة على راسي وغانصرف على راسي ممحتاجاه لاهو لامرتو.. فلول مابغاش وتعكس ولكن مرتو لقاتها من الجنة والناس ونيت نخوي ليهوم الدار وبسبابها وافق وقال ليا بلي ماعندو فلوس باش يعاوني ونضبر راسي.. ديك الساعة مافكرتش زوج دلمرات قبل مانجمع بگاحي وداكشي ديالي وبعت سنسلتي لي كانت عطاتني جدة بتخبية باش نقدر نشري لورقة دلكار درهم هي اللخرة معطاهاش لياا وعارفني ماخدامة ماوالو..
رحيل:(كمشات حجبانها) رقية ملين كاتعرفيها تاسيفطاتك عندنا؟؟
غزلان:جارتنا فأگادير مرا الله يعمر ليها الدار ملي شفتها رتاحيت ليها ولقيت راسي معاودة ليها كلشي ونهار كنت غانجي لمراكش هي عطاتني نمرتها باش نبقا نسول فيها وتسول فيا وملي جيت لهنا سكنت مع أميمة وباش نتعاونو على لمصروف خدمة فواحد المخبازة على مايتحل التقياد فلفاك بقيت خدامة فيها مدة وفلوسها شريت بيهوم تلفون وتانخلص بيها لكرا ولمعيشة وخويا عمرو سول فيا واش أنا بخير كانت مسكينة خالتي رقية هي لي كاتسول فيا (تنهدات ونطقات بحسرة)لبراني خاف عليا وخويا لي من لحمي ودمي ماتسوقش بحال الا أنا حمل تقيل تهنى منو.. ملي بدا التقياد فلفاك مشيت دفعت وتقبلت وكنت مضطرة نخدم ونقرا واخا مول الشي مبقاش عاجبو لحال حيت تانتعطل وبعض لمرات تايخصني نكون 6 دالصباح فالخدمة والثمنية فلفاك صبر تاعيى وجرا عليا.. عيت مانقلب على خدمة خرى لي تكون نص نهار تالقيتها فواحد لمحال دلحوايج خدمت تاهوما معاهوم ومعجبهومش لحال عطاوني خلصتي وزدت مع الطريق بقيت هاكاك تانهار هضرت مع خالتي رقية وهضرة تجيب هضرة تاقالت ليا بلي كاينين شي ناس تتعرفهوم مزيانين باغين شي بنت لي تعاونهوم فشقا الدار فلول خفت ولكن كلامها طمني وقالت ليا بلي هاد الناس عائلتها وبلي ماعندي مناش نخاف فكرت مزيان وقلت نجرب ونشوف وقبل طلبت منها ماتقول ليكوم والو على خويا حيت كنت خايفة لاعرفتو بلي عندي خويا ماتبغيوش تخدموني وتخافو من لمشاكيل خصوصا خويا جلاخة وهي عارفة اش كيسوى عليها فضلت نخبي عليكوم وتاهي حترمات قراري وطلبات مني مانديرش شي حاجة لي تجبد ليكوم الصداع وأنا واعدتها بهادشي
رحيل:(تنهدات) وعلاش خوك قال بلي هاداك راجلك؟
غزلان:(حركات راسها بلا ودموعها عاوتاني نازلين تتبكي ونطقات بخفوت) نهار جيت عندكوم أول مرة خويا عييط ليا فلول تخلعت وخفت بزاف خصوصا أنه من نهار خرجت من الدار وهو مسولش فيا وملي خرجت من عندكوم عاود عيط ليا كيسول فيا واش أنا بخير وياكما خصاني شي حاجة ديك الساعة جاتني عجب ولي زاد شككني هو كيفاش ولى كيعيط ليا كل مرة يسول فيا واش محتاجة فلوس تما حسيت بلي شي حاجة كاينة ومع دلك ماهضرتش تانهار جاني نيشان وقال ليا بلي جاني عريس وضروري ماخصني نرجع لأكادير باش نتزوج.. تصدمت وخفت ورفضت قلت ليه مباغاش نتزوج أنا باغا نكمل قرايتي ونخدم مبغيتش تمارة لي ضرب عليا بّا وجدة تمشي ولكن هو ماتفاكش كل مرة يعيط ويقول ليا الامجيتيش نجي وأنا كنجر فيه غير على مالقيت شي تخريجة خفت حيت عرفتو مغايزوجنيش لشي واحد مزيان وباينة غايكون غير شي صاحبو وبلفعل ملي سولتو قال ليا بلي هاداك صاحبو وبلي هو باغي يدخل معاه شريك حيت لاخر عندو محال وباش يقبل طلب منو يزوجني ليه وخويا غير سمع الطلب قبل وطمع مافكرش فيا أو قبل يلوحني بين يدين هاداك ويخرج ليا على حياتي هء هء وأنا مابغيتش مابغيتش ارحيل..
فلوقت لي كانت غزلان تتعاود لبنات قصتها كان إدريس واقف فبرا الدار وحنبو محمد طه وريان كيهضرو مع خوها لي طالق عليهوم كدوبو.. كان تيدوي ويهز فيديه بحال الاغايدابز ويهضر بصوت لغليض مخلي أنضار الناس والجيران عليهوم ولاخر لي جا معاه واقف ساكت عينيه غير تيضورو ويقلبو على غزلان..
إدريس:(بصوت صارم جدي)سمع الشريف هاد لهضرة لي قلتي ماسوقيش فيها سمعتي لبنت أمانة عندي ومغانخليكش تديها تاتگول هي اه
عباس:(تيزيد يهز صوتو ويخرج فعينيه)اسي ختي هاااادييك ونتاا مالك واعباااد الله عطيني ختي لانصدق مقووودها معاك
اندافع محمد طه لي كان شاد راسو بزز وهو كيشوفو تيتهز على باه وشنق عليه من كول ديك القميجة لي لوسخ كيبان فيها مكمش فيه حجبانو ومخسر فيه سيقتو ونطق بصوت قوي رجولي: لي فجهدك ديروو سمعتي وأخر مرة تهز على سياااادك
إدريس:(حط يديه على كتف ولدو ونطق بهدوء وحكمة) ماتوسخش يديك فيه اولدي بحاال هاد النوع عارفو وعاشرتو تازغب راسي شااب
نفض محمد طه يديه وضار جهة لاخر خنزر فيه ولاخر غير شاف التخنزيرة وهو يتفافا وبعد خاف على راسو..
ريان:(ربع يديه ونطق بجدية) الاماتحركتيش من هناا دابا غانعيطو لبو'ليس ونقولو ليهوم بلي تهجمتي علينا وديك الساعة شوف باش تفكهاا (وبسخرية) ابو كرشة
عباس:(حس لبوليس خلاه يخاف ولكن دفع الجبهة ونطق)عيط ليهوم الاماغيزت ليكوم الضواسى راني ولد لقح*بة
عض محمد طه على سنيه غادي ليه عاود وإدريس شد يديه جرو وحل لباب داخل وسدو فوجههوم مخليهوم كيشوفو فبعضياتهوم تانطق داك الضعيف:شغانديرو دابا اعباس قلتي ليا غانجيبوها ونتزوج بيها اش دانا لشي بو'ليس ولاخرا
عباس:(كمش فيه عينيه)عطيناك لكلمة العربي لبنت غاتزوج بيك وتانتا كون عند كلمتك
العربي:هاحنا غانشوفو..
---
دخل إدريس لصالة لقى غير تانيرت جالسة وجنبها سيدرا هازة إيڤانا كاضور عينيها وساكتة فاش شافت ملامح وجه جدها وريان ومحمد عرفات بلي شي حاجة كاينة تكوتات.. أما تانيرت كانت تتهضر فالتلفون وغير شافت إدريس وهي تهز يديها بمعنى بلاتي ونطقات بهدوء:كون قلتيها ارقية كنا غانعرفو دابا لي عطا الله عطاه من بعد ونعاود نعيط ليك
ريان:ياك رقية هي لي مسيفطة غزلان علاش مقالتش ليك لبنت مزوجة وهاربة لراجلها
تانيرت:غزلان مامزوجاااش وهاداك بصح خوها ولكن لاخر ماشي راجلها
محمد طه:يعني هي كادبة علينا لواليد اش غانديرو
إدريس:(نطق بهدوء) فين لبنات
تانيرت:لفوق معاها
خرج إدريس من الصالة غادي لفوق تابعينو الدراري وتانيرت شافت فسيدرا ونطقات:خليك هنا وديري الرسوم والاسمعتي الدقان فلباب ماتحليش واخاا
سيدرا:(حركات راسها)واخا تانيرت إينو
تبسمات ليها وطلعات تاهي لفوق لقاو غزلان باقي على حالتها ورحيل تتسكت فيها..
محمد طه:(كمش حجبانو ونطق بغضب) علاش كدبتي علينا نهار سولناك وماقلتيش عندك خوك
ريان:(بجدية)خبيتي علينا ومافكرتيش بلي غايجي النهار وتفضحي
رحيل:محمد طه ريان بلاماتسبقو لعيب لبنت عاودات لينا كلشي (شافت فباها) بابا أنا غانعاود ليك
بدات رحيل تتعاود ليه كلام غزلان بالحرف وتانيرت ساكتة وتتقارن بين كلام رقية وغزلان لقاتو بلي نفس لكلام يعني هي مكدباتش عليهوم وهادشي دارتو غير من خوفها وتانيرت تفهماتها فصراحة واخا لمشكيل لي وقع إلا أنه عطاتها عدر كيفها كيف لبنات لي تاهوما قبل مايسبقو أحكامهوم ويعاودو نفس السيناريو لي طرا معاها نهار تاهموها بلي شفرات الفلوس عطاوها تهضر وتبرر ولقاو بلي تاهي قصتها قصة ودوزاتها مسكينة وتكرفصات ورغم هادشي بقات محافضة على راسها.. ملي بدات رحيل تتعاود دموع غزلان عاودو نزلو من جديد مهبطة راسها حشمانة تشوف فوجه تانيرت وإدريس لي حلو ليها باب دارهوم واستقبلوها وعاملوها بحال بنتهوم وهي جابت ليهوم مشكيل فوق من مشاكيلهوم.. مسح إدريس وجهو بيديه وبقا ساكت مدواش حدو مشى جهة الشرجم طل لقاهوم باقي عاسين دوك الزوح حلفو لامشاو..
إدريس:(بجدية)غزلان اجي معايا
هزات راسها بخوف وبؤبؤ عينيها كيرعش فاش فكرات بلي هو غايعطيها ليهوم وخوها غايزوجها لداك صاحبو لي غايتكرفص عليها.. حركات راسها ونطقات بصوت باكي:لا مابغيتش عفااااك اعمي
تتحرك راسها بلا وهي شادة فيد رحيل بالجهد متشبتة بيها وإدريس كمش حجبانو ورجع نطق بجدية:اجي معايا
إصرارو خلاها تستنتج بلي هو غايخليها تمشي وأصلا شكون غايبغي لراسو لمشاكيل من حقو.. طلقات من يد رحيل وتلاحت حدا رجليه شاداها تتبكي وتشهق بغات تهبال وتتغوت بصوت مجروح:عفاااك اعمي مابغيتوووش يديني مابغيتش هء هء مابغيتش نتزوووج بيه عفااااك ماتخليهومش يديوني نبووووس ليك يديك ورجليك
تحنات باغا تبوس رجليه تابعد إدريس بزربة مضهشر وشدها فكتافها تاشافت فيه وشافت فعينيه بواحد الشوفة فكراتو فنهار شاف رحيل فالداخلة مور مالقاها...ديك الشوفة لي خلات دوك الدكريات يزورو دماغو وديك تمارة لي دوزات بنتو ولي عاشتها.. يمكن وضع غزلان مختالف كليا على وضع رحيل ولكن الرابط لي كان بناتهوم بزوجات كانو ضعفات ومحتاجين يد لي تشد فيهوم وتقويهوم..
نوضها من بلاصتها تاوقفات قدامو حادرة راسها هز عينو فتانيرت لي فهماتو من الشوفة وخرج من لبيت وهي قربات جهة غزلان شدات فيديها وخرجاتها معاهاا وتابعينها لخرين باغين يعرفو اش غايوقع.. نزلو لتحت وإدريس شاف فسيدرا:طلعي لبيتك اسيدرا
هزات سيدرا قطتها وطلعات وفطريقها تلقاتهوم وشدات فرحيل لي تبسمات ليها ونطقات بحنية:سيري امامي لفوق واخا
مشى إدريس ديريكت جهة لباب حلو وشاف فدوك الزوج ونطق بنبرة جادة:دخلو
عباس حل عينيه والتبسيمة بانت على وجهو وشفايفو يادوب تيبانو وسط ديك اللحية لي عندو كثيفة.. شاف فالعربي غامزو ودخل هو لول وموراه لاخر تاهو كيفرنس.. سد إدريس لباب وتبعهوم لقاهوم درمو ودخلو لصالة فين كانت غزلان جالسة جنب تانيرت لي شادة فيديها وغير شافت خوها وهي تقفز وتخبات فتانيرت ومهزاتش عينيها لافيه لافلاخر لي كلاها بعينيه وريوگو نزلو عليهاا.. من ديما كان تيشوفها فأگادير قبل ماتجي لهنا تتعجبو بزينها وديك الساع مكانش عندو كيف يدير حيت مزوج ومرتو كانت قويصحة وغليوضة وصوتها غير تهضر تقفز من بلاصتك وكان تيخاف منها ولكن غير طلقو السيد عينيه تحلو على غزلان وملقاش كيف يدير يخطبها من خوها تاربي جاب ليه لوجيبة وخوها بغا يدخل معاه شريك وستاغل الفرصة..
عباس:(جالس مفطح ونطق مرتاح)عاجبك لحال دابا خليتينا نتحاشمو مع الناس يالاه نوضي تحركي جيبي بگاجك يالاه نشدو الطريق ونوصلو فلوقت
إدريس:(تنحنح تاشاف فيه عباس ولعربي ونطق بجدية وصرامة باينة فوجهو)دخلتك لهنا نتا وياه باش نگول ليكوم زوج كلمات لبنت هنا غاتبقا ولانتا ولاهو غاتديوها
عباس:(تنفض من بلاصتو)تا اش كتخرمز شوية لبااس هادي راه ختي
إدريس:(هز فيه حاجبو ونطق بصوت قوي رجولي) هبط صوتك وحتارم راسك الشريف باقي لدابا شاد لخاطر معاكوم ومخرجتش لعيب ولكن لابغيتوه مرحبا ماعنديش مشكيل نفوتوه لهيه (أشار لغزلان)لبنت قالت لينا كلشي وهي براسها قالت مباغاش تزوج ومباغاش تمشي معاك وهاهي بفمها غاتگولها ليكوم
شاف إدريس فغزلان لي سرطات ريقها وشافت فخوها لي مخرج فيها عينيها مركب فيها الرعب بدوك الشوفات ونطقات وهي كتستامد لقوة من تانيرت لي شادة يديها: أنا مغانمشيش معاك ومباغاش نتزوج أنا باغا نكمل قرايتي ونخدم مبغيتش نولي جفاااف تحت رجلين لي يسوى ولي ميسواش
عباس:(ناض قافز ونطق بغوات)ياك ابنت لحرام وليتي تخرجي فلعينين وتجابهي ادوووي لقيتي السيبة ومكاين لي يجمعك ويگابلك هااا وليتي تعطيه فااابور بحاااال لقح*بات
ناض إدريس مخنزر فيه تخنزيرة قاااصحة وقرب ليه تاوقف قدامو وهز صبعو ونطق بصوت قاصح: حتاااارم لبلاصة لي نتا فيها ولي جالسين معاك والاكنتي مولف الزبل فاحنا بزاااف عليك سمعتي لكلمة لي بغيتي تسمعها هاهي وصلاتك لانتا ولاهاد ميخي لي جاايب ودابا غاتهزو عليا من هنااا وتخوي عليا الدار قبل مانعيط لبو'ليس يديوكوم صحة لبنت راه بااالغة وماشي شي قاصر لي تستاغلها وتا لقاانون مكيحميش لمغفالين لي بحالك ودابا تهز علياا وأخر مرة توريني كمارتك نتا وياه تحااااارااااك
خرج فيه عينيه تالعربي تخلع وخرج سابقو وبقا عباس لي تيشوف فيه وفغزلان ويتحلف فيها قبل مايمشي تاهو فحالو وريان تبعهوم سد لباب.. تاحد ماهضر وكلشي ضرب الطم حيت عارفين بلي باهوم ماشي من النوع لي كيغوتو وزيد غير من وجهو باين فيه معصب عليها فضلو يسكتو تاتبرد لقضية وديك الساعة يحن مولانا..
---
كان مكسل محمد طه فبيتو مور ماتعشاو وخدا دوش هاز تلفونو كيهضر مع كلثوم ويسول فيها تانطق بهدوء:أسماء سولات واحد الطبيبة وراه لقينا ليك طبيب زوين غايخصك دوزي عندو باش هو يعطيك الرونديڤو على قبل لفتيح
كلثوم:(بصوت خافت) كون غير ساعفتوني اولادي وبلا ماندير لعملية ماعنديش فلوسها كاملين وزيد نتا وختك مبغيتش نشطنكوم ونهولكوم اوليداتي
محمد طه:(نطق بزعاف)واش غانعاود نفس الهضرة قلت ليك أنا نتكلف نتي ماتخمميش دابا ديها فصحتك واخا نخليك تال غدا ونعاود نعيط ليك
قطع معاها وجلس كيخمم ويبلاني وفلخر ناض خارج من بيتو غادي جهة لبيت دباباه وبقا واقف قدام لباب تيفكر مدة.. لمشكيل لي طرا ليوم دغزلان شوشهوم ولكن هو مايقدرش يزيد يأجل كلامو لباه حيت هادشي كيتعلق بصحة مو عليها قرر ودق لباب وشوية تحل وبان ليه باه بفوقية نص كم شاف فيه ونطق:ياك لباس مالك؟
محمد طه:نقدر نهضر معاك الواليد ضروري
إدريس:(كمش حجبانو)ياك لباس؟
محمد طه:(تنهد)على قبل مرض لواليدة غاتكون أسماء قالت ليك الطبيبة شنو قالت هي خصها عملية ضروري قبل ماينتاشر لكونسير فيها وأنا فكرت وقررت
سكت محمد طه كيشوف فإدريس لي حرك راسو:كمل
محمد طه:قررت نجيبها لهنا ونكري شي دار فين تسكن و(تنحنح) ونسكنو معاها أنا وأسماء
مدة وهو كيفكر فالموضوع لي كان شاغل بالو من نهار عرف بمرض مو ملي مشى شافها وشاف حالتها وعرف اش كادوز تما زاد أصر على قرارو وكان تيتسنى غير يشوف الطبيب ويعرف اش قال باش يعلم باه.. كان عارف بلي ميمكنش يجيب مو لهنا بحكم لحساسية بينها وبين تانيرت وزيد فعايل مو معاهاا عليها شاف بلي الحل المناسب يكري شي دار على قد لحال ويجيبوها تسكن معاهوم هو وأسماء ويقابلوها.. كان واقف مربع يديه قدام باه بحال شي وليد صغير دار شي غلط وكيتسنى من باه يعاقبو.. وفالمقابل كان إدريس كايشوف فيه بنظرات هادية ساكت تاسمع محمد طه لي كمل كلامو: عارف بلي يقدر مغايعجبكش لحال ولكن الواليد لقيت هادا هو لحل لي غايناسبنا هي مريضة وأنا مغانقدرش نمشي تال تازة على قبل لخدمة عليها قلت نجيبها لهنا ودوز لعملية ونگابلوها أنا وأسماء وملي تصح وتولي بخير راه غاترجع لتازة
سكت محمد طه مرة خرا كيتسنى باه يقول شي حاجة ومغاينكرش بلي سكاتو وثرو عليها كمل:قلت نعلمك هو لول قبل مانتاخد شي قرار نتا هو الري والشوار فهاد الدار الواليد وتاحد فينا مايقدر يدير شي حاجة بلا ماياخد رأي ديالك
إدريس:(تنهد ونطق بهدوء)سير تنعس دابا تالغدا وعندنا كلام
محمد طه:(حرك راسو)واخا الواليد تصبح على خير
دخل إدريس لبيت ساد لباب وقرب بخطوات تقيلة مدايرش لحس باش مايفيقش تانيرت لي كانت غارقة فنعاسها.. جلس جنبها وتنهد وهو كيفكر فهاد لقرار لي خرج ليه بيه ولدو تاني.. النعاس لي كان فيه طار من عينيه بقا غير متكي وسط البيت لمظلم لي منور بلگمرة وعقلو خدام تيخمم ويفصل.. الليل كولو مغمضاتش عينيه وغير أدن مشى توضى وصلى ورجع لبلاصتو جالس وعينيه على الشرجم ومن شوفتو باين فيه مهموم وهاكا بقا تاطلع الصباح وبانت ليه تانيرت تاتحرك فبلاصتها تاحلات عينيها وهي تتنهج وشافت فيه:إدريس
بدات تاتقاد وتمسح عينيها وتفوه وهو عاونها تاتكات على لكادر دالنموسية وشافت فيه:مالك فايق بكري
إدريس:(تبسم ليها) مجانيش النعاس وصاف
تانيرت:(بخوف)ياكما كضرك شي حاجة؟
إدريس:تت انا بخير اتانيرت إينو بلاماتخممي وتشغلي بالك
تانيرت:(تبسمات ليه) ليوم عندنا كونطرول عند الطبيبة
إدريس:(حط يديه على كرشها)اييه عاارف
تانيرت:غانمشي ندوووش (بدات تتجمع شعرها وتتفوه)الصهد ليوووم
إدريس:هادي هي وقيتو
حركات ليه راسها ومشات هزات بينوارها وخرجات لحمام وهو بقا جالس بلاصتو تيستغفر مولاه.. فضل أنه مايعلمهاش بقرار محمد طه باش ماتشطنش تاهي وتهز لهم باركة غير لحمل لي كيعيها ومشكيل رحيل داكشي علاش فضل السكاات ونيت يزيد يخمم قبل مايعطي قرارو بخصوص الموضوع.. شاف فساعتو لقاا وقيتة دلخدمة وصلات وناض يوجد راسو باش يتوكل لخدمتو..
---
ملي جا لخدمة وعقلو غايب وهادي أول مرة تجرى معاه.. باين فيه مهموم وكل مرة يطلق تنهيدة ويخمم فموقف باه وشنو غايقرر وبلا مو ومرضها لحاصول لمطارق تجمعو على راس محمد طه كيضربو فيه مخلينو حاس بالخنقة.. حك لحيتو ولاح الستيلو فوق لبيرو مخلي صوتو يجدب انتباه سعيد لي كان جالس قدامو فبيروه كمش حجبانو وقال:مالك؟
محمد طه:والو
سعيد:ملي جيتي ونتا تشوف فالوراق لي قدامك ياك لباس
محمد طه:(واخا سعيد كيتعامل معاه مزيان إلا أنه باقي منساش ليه فعايلو.. جاوبو ببرود)راسي كيضرني وصاف غانمشي نجيب قهوة
ناض خارج من لبيرو غادي جهة لماشين دلقهوة لاح فيها فلوس واختار لي بغا وبقا واقف مربع يديه كيتسنى تالاحت ليه لگوبلي وهزو كيخلطو بداك لعود وضار كيشوف قدامو وهي تبان ليه رحيل نازلة من الدروج غير شافتو وهي تبسم وقربات جهتو:مودي حبيبي
محمد طه:(تبسم تاهو) عوينات الجلبانة
رحيل:(شافت فالكافي وضحكات)ههه أنا وياك شي حاجة مشروكة بناتنا بزوج جينا ناخدو لقهوة ههه
محمد طه:حاس براسي غايتشق
رحيل:(باهتمام)ياكما المشكيل لي كان عندك هو السباب؟
محمد طه:لا لا غير مناعسش مزيان وصاف
رحيل:وارد لبال احبيبي واخا
محمد طه:واخا غانخليك نمشي نشوف داك لعرام دلوراق لي تابعيني
رحيل:الله معاك
خلاها وهي مشات خدات قهوتها ومع وقيتة دلغدا ولخدمة مكيناش بزاف قررات تسارى فلاميزون حيت عمرها صراحة تسارات حدها دخل من لباب تمشي جهة الدروج ولاتنزل لتحت جهة بيرو سعيد ومحمد طه ولاتمشي تاخد كوفي أما جهة الطوموبيلات عمرها قربات ليها.. تمشات بخطوات هادية كاتجغم فكاسها دلقهوة وعينيها كيشوفو فداك الطوموبيلات دلفريع وحدة تنسيك فلخرى وألوانهوم تتبري.. غادة تاوصلات جهة واحد الطوموبيل من نوع " "volkswagen tiguan" فدم لغزال عالية تتحمق..عينيها خرجو منهوم لقلوبة بلاماتحس لقات رجليها غادين بيها لجهتها تاوقفات قدامها تاتشوف فيها كانو كراسيها من لداخل جلد فالطابة ومغلفين ببلاستيكة.. حطات يديها عليها وبقات تاتشوف فيها وعينيها باين فيهوم لمعة الإعجاب... بقات كاضور عليها وتتشوف فيها ومكرهاتش كون كانو عندها فلوس تشريها مكانتش غاتردد.. وقفات قدامها تاتشرب قهوتها وتشوف فيها بسهو تاسمعات صوت من وراه نطق:عجباتك؟
هزات حاجبها وضارت جهة زكرياء لي كان واقف وراها مبسم.. من الصباح وهو حاضيها وفاش شافها وقفات مدة قدام هاد الطوموبيل تاتشوف وضور عليها قرر يجي يدخلها شي دخلة عاود لي تخليه يدوي معاهاا حيت من نهار عتارف ليها بمشاعرو وقمعاتو وهو كيشوفها تتجاهلو.. زفرات النفس ونطقات ببرود:عادي مجرد فضول وصاف
زكرياء:(حك شعرو) كيبان ليا باقا شادة فخاطرك على شنو طرا
رحيل:(ربعات يديها تادوي معاه بلبارد)علاش غانشد فخاطري هضرتي وأنا جاوبتك وقلت ليك بلي دوك التصرفات مكيعحبونيش سيتو
زكرياء:(سرط لقمعة)المهم مابغيتكش تقلقي مني وصاف بيما أننا خدامين فنفس لبلاصة مايكونش بناتنا حساسية
رحيل:الا لواحد عرف بلاصتو ومتجاوزهاش مغاتكون تاشي حساسية
ختمات كلامها بتبسيمة صفرا وتخطاتو غادة لبيروها.. من نهار شافتو وشافت تصرفاتو وزعامتو معاها دارت بينها وبينو حدود ونيت هي جايا تخدم ماشي تعارف وخلاص نهار قال ليها كتعجبو تما ضربات عليه وقررات تعطيه التيساع حسن ليها حيت داك النوع ديال زكرياء باين فيه لصقة والاموقفتيهش لمرة لولة غايزيد يضسر.. وصلات لبيرو وشدات بلاصتها تكمل خدمتها تاوصلها مساج من عند أسماء علماتها بلي غادوز عندها لخدمة باش يمشيو يشريو شي حوايج خاصينها.. جوباتها بأوكي ورجعات تاتكمل خدمتها تاوصل لوقت وهزات صاكها وخرجات هي ورجاء بزوجات غادين مجمعين تانزلو لتحت فين كانت أسماء تتسناهوم.. تبسمات ليهوم وقربات وهي تاطقطق بطالونها لابسة فيست بلوغوا وشعر مصاوب مبوكلي ولمك اب كيف عادتها.. وكلشي تستوهن فيه إلا مظهرها.. أسماء:(تبسمات ليهوم)هيلوو الزيونات صافا
رحيل: اهلين
رجاء:أسماء صافا حبيبة
أسماء:اييه حمدلله ونتي
رجاء:ساماغش (شافت فساعتها) نخليكوم دابا حيت تعطلت تال مرة خرا ونديرو كافي أونصومبل داكوغ
أسماء:إن شاء الله
غير مشات رجاء وأسماء جرات رحيل لعندها قفزاتها ونطقات ليها بهمس وهي تبحلق عينيها فلاميزون:واتباركالله صدقات حسن ملي تخيلتها وكبيرة ياختي دابا هاد لخير كولو وفرطتي فيه
رحيل:(خنزرات فيها ودوات بشوية) واش نتي هبلتي عوتاني وبديتي ديسك ديالك لحافي
أسماء:(تاضور عينيها كي موكة وتهضر بشوية) شوفي اختي الطوموبيلات وحدة تنسيك فلخرى والديزاين ديال الميزون ياختي يهبل شتي غير طوموبيل وحدة الاتباعت غايكون فيها صالير گاع هادو لي خدامين هنا غير قبيلة كنت واقفة تانسمع واحد لبنت تتهضر مع واحد لكليون ياختي مكاين غير لملاين تتشااااير
رحيل:(زفرات النفس)مابقيتيش باغا تشري لحوايج؟
أسماء:غانتسناو محمد طه عندو شوية لخدمة كثيرة اجي نجلسو لهيه على مايسالي
سبقاتها وهي تتمشى بكل عنفوان هازة راسها لسما ورحيل تابعاها وتتحرك راسها بلاحول.. جلسات أسماء فالكرسي وجلسات جنبها رحيل لي ربعات يديها كاتشوف قدامها وهي تسمع أسماء لي نطقات بتساؤل:الاختاريت دابا شي طوموبيل من هادو لي هنا ولا لي فلكاطالوغ وهضرت مع ولد لحاج وقلت ليه نبقا نخلص ليك كل شهر شي باركة زعمة يبغي؟؟
رحيل:(تبسمات ونطقات بسخرية)واخا تقيلي تخلصي فيها حياتك كلها والله لاكملتيها واقيلا سهلتي التمان راه غير قبيلة كانضور هنا وبانت ليا واحد لڤولزڤاگن هبلاتني عرفتي شحال ساوية *** مليون غير شفت الثمان وأنا نرجع لور
أسماء:(هزات فيها لحاجب)شفتي كون قبلتي تزوجي بيه كون سگتي أقوووود طوموبيل كاينة هنا وحنا نيت غايكون عندنا الزهر نشريو طوموبيل لي باغييين أودي الزهر لمن عطااااه الله الناس تحمد الله على النعمة ونتي ترفسي فيها
رحيل:(ضارت خنزرات)بديتي عاااود صافي سمعيها ليهوم باش لي معارفش يعرف دابا
أسماء:ومالي كدبت جاتك النقرة لي تغبر نحاسك ونتي تغبريها وهاهي طارت من بين يديك ودابا تجي لي تعرف ليه غابلاتي ملي يعقد عليها وتم داخلة ليكوم من لباب وتقول ليك (نطقات وهي تتعوج)هاااي أنا مرات ولد لحاج مول الشي وتأمر فيكوم ونتي غاتبقاااي مقابلاه وأخرتك غاتولي كيف لبرتقالة المرة ضوري فالزناقي وتبقاي تغني وردة على وردة قالو مادا جرى قلت أنا لميمة قلبي مجروووح
رحيل:(زفرات النفس ومجوباتش)
أسماء:(كملات هضرتها) سكتي حيت لقيتي عندي الصح ولقيتي بلي فات لفوت والسيد مشى من بين يديك ياك اوا شدي فلبولة تسعين
رحيل:(بهدوء)نتي عارفة اشنو كاين
أسماء:(تقلبات عندها وقالت بجدية)ولكن هو معارفش ارحيل نتي اش وقع معاك ياك هو سولك علاش رفضتيه ديك الساع كان عليك تقوليها ليه وماتبقايش ساكتة ماشي عيب داكشي لي دوزتي بلعكس هاداك مكتوبك وربي كتب عليك تعيشيه على الأقل كون عرف اش طرا غايتفهم أما هو دابا عند بالو مابغيتيهش ونتي هنتيه صافي نفر وقلب طريقو ومن حقو كيفما تاأنا كون طرات ليا مع شي حد غانتصرف نفس التصرف
رحيل:(شافت فيها ونطقات ولمعة دلحزن بانت فعينيها) كرامتي ماتسمحش ليا اأسماء فهميني مانقدرش حيت داكشي لي عشت مكيتقبلوش لعقل ومساهلش نعاود ندوي فيه باغا نساه يتحيد من دماغي بعض لمرات تنتمنى يجيني الزهايمر ويتحيد داكشي من بالي
أسماء:مغايتحيدش وعمرو غايتحيد الامواجهتيهش رحيل الانتي مادرتيش لحل لراسك تيقيني عمرك غاتلقاي لي يديرو ليك نتي مباغاش تعالجي مباغش تزيدي خطوة لقدام باقا مخليا داك لماضي يمرديك ويخليك تخسري مستقبالك وهادا هو أكبر غلط كديريه..
كانت ساكتة تتسمع لهضرتها لي كانت صحيحة.. الماضي عمرها غاتقدر تنساه الابقات عايشة فيه.. ورحيل هادا هو الغلط لي دارت مكديرش محاولات ومباغاش تزيد ديك لخطوة لقدام.. لداخل ديالها باقي مريض وتتخبي مرضها بداك لقناع دلقوة الزائفة.. وماحدها هي ماعونات راسها براسها راه تاحد مغايعاونها تامن طبيبتها لي متبعاها سنين وهادشي لي تتحاول أسماء تبينو ليها وتحيد ليها داك الضبابة على عينيها.. مور ماعرفات أسماء قصتها زاد إصرارها أنه تعاونها بكل استطاعتهاا حيت أسماء عارفة رحيل وطبعها كيفما رحيل عارفة أسماء..
رحيل:(تنهدات)كانحاول تيقيني كانحاول نديرها ولكن كل مرة تاتمنعني شي حاجة وكل مرة تانلقى هاداك خارج تاني فطريقي ومخليني نرجع لنقطة دلبداية
أسماء:(شدات يديها) عارفة ارحيل ولكن نتي خصك تحداي راسك وتخرجي داكشي لي مخبية ومخلياه فداخل ديالك تيقيني غاترتاحي فاش غاتواجهي
رحيل:(الصمت)
أسماء: واجهي على قبل نفسك هو لول ارحيل (تبسمات ليها) أنا عارفاااك غاتقدري وزيدي نتي ماضعيفاش ونسيتي ياماتك شنو كنت تاندير أنا وياك وملي كنا كاندابزو ونتناتفو عمرك سمحتي فحقك كنتي لبؤة ودابا نيت راك لبؤة غير خصك شوية دلوقت والشجاااعة والإصرار باش ترجعي رحيل لقديمة (كملات بندالة) ونيت عندي شي خبار ايفرحوك ويخليوك تشجعي كثر ولكن قبل خصك تعطيني شي حاجة حيت لخبار يستاهلو؟
رحيل:اشمن خبار؟
أسماء:تشري ليا شي بياسة زوينة ونقول
حركات رحيل راسها دليل على موافقتها وأسماء كحزات تالجهتها ونطقات بهمس:ولد لحاج ماخطب ماتاوزة ههه
حلات رحيل فمها وبقات تاتبلق فيها عينيها وأسماء تتحرك راسها وحجبانها فرحانة.. تارجعات قالت رحيل بعدم فهم:كيفاش ماخاطبش شكون قالها ليك؟
أسماء:ختو كنت تاندوي معاهاا فلواتس على موضوع ماما اوا قلت اجي نبارك لسيدة مادار خوها وملي قلتها ليها وهي تقول بلي مكاين والو
رحيل:(باقي ممستوعباش)ولكن بابا
أسماء:(طلقاتها بضحكة دالشيخات)هههه بااك احنينتي شم ريحتك وعاااق بيك وفاش شافك تيتي نيني لعب عليك هههههه والله تامطور بابا بالله فكرة ماطيحش فبال إبليس ههههه
رحيل:(خرجات عينيها وحطات فمها على يديها ممتيقاش ونطقات بصوت خافت)اويلي مايمكنش
أسماء:(تاضحك)اوا هادا هو التفسير لوحيد لي لقيت من لبارح وأنا نخمم ونفصل ملي قالتها وكنت غانقولها ليك فالصباح ساعة قلت بلاتي نخليها تشوى كثر عالله تعيق ولكن بقيتي فيا القو*حبة فاش شفتك مقلقة ونيت قلت يكون عندك سبب لي يخليك ديري النفس
رحيل:عليها مكانش داير لخاتم وفاش قلت ليه مبروك قالي علياش اويلي كنت غانخورهاا كون ماقلبتش لهضرة اويلي اويلي
أسماء:اوا نوضي تشللي احنينتي ولاتفرحيشااي بزاف يقدر هادي كدبة ولكن ماتعرف يصدق دايرها بصح
غمزاتها أسماء وسدات السوجي فاش شافت محمد طه جاي عندهوم تبسمات ليه وناضو خارجين ورحيل غير ساكتة تتخمم فلهضرة ولخبر لي قالت أسماء ولي صدمها وفنفس لوقت فرحها.. مشاو لمول باش تشري أسماء اش خصها وتارحيل خدات شي حوايح ليها ولسيدرا ورجعو لدار.. مدوزين نهارهوم مجموعين كيف ديما كل واحد كيعاود على نهارو.. وهاكا دازت ديك ليلة تابعينها ليالي لي مكانش تاجديد فيهوم من غير أنهم قررو يبيعو الدار ويتحولو لجديدة وبلفعل كانو لبنات كل نهار كيجمعو الرحيل وداو لفوج لول مور ماسيقو الدار وخلاوها تتشعل وكملو لي بقا لغد ليه وخواو الدار لولة لي حطوها فلبيع.. وبدات عاود تمارة ديال التستاف وتمارة لي ضربوها لبنات والدراري مع الدروج والجهد هوما لي هازينو أما تانيرت مع لحمل مقدات دير تاشي حاجة ونيت هوما ممخلينهااش دير والو.. ورحيل من نهار هضرات هي وأسماء وعرفات بلي نوح ماخطبش وبلي باها عايق بيها وهي حشمانة منو واخا هو مقال والو ومابين والو.. وهاد الأيام كلها مشافتوش فيهوم ومكانش كيجي لميزون وكل مرة تسول عليه محمد طه بطريقة مبيناش وحدو عارف بلي مشغول مع لبروجي الجديد ولخدمة لي عندو هوما سباب غبورو عليها..
كانت واقفة رحيل فوق السلوم تتركب الخوامي لبالكو وسيدرا واقفة فوق النموسية تتگيدها تقداتها ونطقات سيدرا:صافي مامي باركة
نزلات رحيل من السلووم وهي تتكسل وشافت فالخوامي لاخر مرة قبل ماتخرج هي وسيدرا من لبيت نازلين لطبقة الوسطانية حيت هي لي مفرشين فيها الصالة ومشات عند غزلان تعاونها فالشقا شادين لحديث تادخلات سيدرا تتجري ونطقات بحماس:مامي مودي جاااا؟
مشات تتجري خارجة من لبيت وتبعاتها رحيل ولبنات لي لقاو تانيرت وإدريس واقفين قدام الباب ديال الطبقة وجنبهوم لبنات وسيدرا صوتها كيتسمع من لتحت.. طلع محمد طه هو لول هاز ڤاليز فيد وسيدرا فيد وقف قدام لباب وحط لڤاليز وضار وراه ونطق بهدوء:زيدي الواليدة
طلعات كلثوم لي كانت لابسة جلابة فلقهوي وجامعة شعرها الليموني لي تهلك وجهها شاحب ولمرض بان فيها كثر شد فيديها تاوقفات حداه وهزات عينيها فتانيرت وإدريس ونطقات بصوت خافت وعينيها عامرين دموع:حياني الله تاوقفات قدامكوم باش نطلب منكوم السماحة..
يتبع...
التعليقات
لا توجد تعليقات بعد، كن أول من يعلق.