محتوى القصة
دقات قلبها كااانو كيضربووو بالجهد مجرد ماسمعات داك الصوووت لي خلاهاا تحس بنفس المشااعر لي كانت حساتهوم ديك الليلة وهي فلغااابة.. وهادشي بان فوجهها لي من حسن حظها كان مغطي بالنقاب.. سمعات صوت لخطوات كيقربوو جهتهوم ولكن مقدراتش تهز عينيها وتشوف شكون هاداك.. أما هو تقدم بخطوات تقيلة وعينيه كيشوفو فسعيد لي من وجهو كيبان فيه راه متوثر وعينيه كيضورو هنا ولهيه مقدرش يحطهوم عليه عكسو هو لي تبت فيه الشوفة وبصوت هادئ لكن تتحس بيه صارم فنفس لوقت:مكنبغيش نعاود هضرتي؟
سعيد:(بتوثر) احم موسيو فالحقيقة الآنسة كانت جايا كتقلب على خدمة وفاش قلت ليها راه لِبوسط لي عندنا عامرين معجبهاش لحال وظنات بلي مباغيش نخدموها
شافت فيه رحيل وعينيها محلولين بصدمة من كدوبو لي كان عاين باين وهي تقول بتبرير:أناا سمعتك قلتي مغانخدموش وحدة مغطية كلها كيبانو فيها غير لعينين باش تخلع لينا لكليان
سعيد:(شاف فيها وقال بصوت حاول ماأمكن يبينو عادي) مادموزيل كنظن فهمتيني غالاط أنا مقلتش هاد لهضرة بتاتا
مهزش عينيه على سعيد نهائيا واخا سمع صوتها لي كان رقيق واخا معصبة..مضارش جهتها ومشافش فيها تاشوفة وحدة من غير أنه مد يديه وقال ببرود:سڤي ديالك؟
رحيل:(سرطات ريقها وجبدات السڤي من لملف مداتو ليه وهي بدورها مهزاتش فيه لعين) تفضل
جبد نضاضر دلبروطيكسيون من جيب الجاكيط لدخلاني ولبسهوم وماعدبش راسو يشوف سميتها وكنيتها حيت لي مهم عندو هو لكومبتونس ديالها بقا ساكت مدة تاقال بصوت هادئ: ملي شديتي دبلوم ديالك فلكونكابليطي خدمتي فلاسوغونس عماين فالرباط وموراها بربع سنين خدمتي فالسوسيتي **** علاش هاد لفرق ديال لعوام؟
رحيل:(زيرات على كسوتها وسرطات ريقهاا وسؤالو خلاها تفكر ديك المعاناة لي دوزات فدوك السنين وبصوت حاولات يكون هادئ نطقات)كانو عندي دِبغوبليم بخسونيل
حرك راسو بهدوء ورجع كيشوف فالسڤي تاهز راسو ومدو لسعيد لي شدو وقال بصوت هادئ: دوز ليها لونطخوتيااان... بونجوغني
عطاهوم بالضهر وتحرك غادي ورحيل هضرتو خلات قلبها يفرح وبالخفة هزات عينيها وهي تقشع غير ضهرو وكتافو لعراض لي كانو تيتحركو وشعرو لقهووي لي رادو لووور تاغبر قدامها مخليهاا باقا تتشوف فلبلاصة لي كاين فيها تاسمعات صوت سعيد لي قال ببرود محاملش راسو: تفضلي معايا
سبقها لواحد لبيرو كاين فالجنب صغير وجلس وهي جلسات قدامو وبدا كيسولها وهي تتجاوبو بعقل خفيف وتالفرونسي تتهضر بيها مزيان وتتقدر تحاور بيها حيت قراتها فسونطر.. بقا مدة طويلة وهو كيدوز ليها لونطخوتيااان تاسالا ونطق ببرود:غدا مع تسعود تكوني هناا وماتعطليش..
رحيل:واخا شكرا
خرجات من لبيرو وهي فرحانة بلخدمة الجديدة.. فلول فاش بدات تتقلب وشافت التعامل تشأمات ولكن دابا رجع ليها داك الأمل مرة خراا وزيد ل"maison de voiture" لي غاتخدم فيهاا كبيرة وزوينة وأكيد تجربة بحال هادي غاتنفعهاا فحياتها لعملية..
أما سعيد غير خرجات وهو يقلب وجهو محاملش شنو طراا ويالاه بغا ينوض وهو يسمع لفيكس صونى جاوب بصوت هادئ:واخا موسيو
زفر النفس وخرج من تما طالع فالدروح وقلبو كيضرب حيت عارف اش كيتسناه.. وصل قدام لباب لي كان بلخشب ولبواني ديالو نحاسي ودق تاسمع الأوكي عاد حل لباب ودخل لبيرو لي كان لونو الرئيسي الرمادي ولكحل فلوسط كاين لبيرو بخشب لعرعار وقدامو فوطويات من نفس نوعية الخشب ومغلفين بتوب جلد كحل.. وفلحيط لي مور الكرسي معلقة آية قرآنية مكتوبة بالذهب وليها دكرى خاصة عند مولاها.. وريحة لبخور لي مطلوق من لمبيخرة ممزوجة مع ريحتو الرجولية لفريدة من نوعها.. هز سعيد عينو فيه ولقاه جالس فالكرسي متكي براحة وحاط لكود ديديه على التكاية دالكرسي وكيمشط لحيتو بيديه... سكت سعيد ومجاوبوش تاسمع صوتو فاش نطق بنبرة باردة وهو كيشوف فيه: شرح ليا اش ديك الروينة درتي؟
كان عارفو مغايدوزهاش ليه وهادشي لي ماباغيش.. سؤالو على قد مكان بسيط على قد ماخلى سعيد يتمنى يتسرط ومايبااانش قدامو.. برودو كااان كيخليه يزيد يتوثر كثر.. حك يديه مع بعض وقال بتوثر: هي فهمات هضرتي غلط وبسبب سوء تفاهم طرا لي طرا
نوح:(حرك راسو باه وتقاد فجلستو وعينو على سعيد وقال بسخرية) سوء تفاهم اممم مزياان
سعيد:(بتبرير) أنا مكنتش باغي ينوض الصداااع و
ضرب نوح يديه على لبيرو تاقفز سعيد وناض نوضة وحدة وهو مخرج فيه عينيه وقااال بصوت معصب: وااااش كتمرضن عليااا
سعيد:(هبط راسو) حاشا
نوح:(خنزر فيه) كيفاش لِبوسط عامرين وحنا أصلاا محتاجين لي يخدم معانا هااا ديما كنقول ليك بقا تشد سڤيات وشوفهوم عاد ديك الساعة حكم ونتا لي فراسك كاديروو داك النهار جبتي لياا واحد لاشفتيه تقوول وزيير وفاااش دوزت ليه لأونطخوتيااان لبخزونطاااسيون هي لخرررة مكيعرفش ليهااا وهانتا رجعتي درتي نفس لغللللط مرة خراااا جاااات عندك تتقلب على خدمة هززز السيڤي ديالهااا شوفوووو بان ليك هو هاداك زيد سوووول وشوف واش راسها عاااامر واااش غادي تناسب داك لبوسط لي بااااغين ولا لا (مسح على وجهو ورجع نطق بصوت صارم) هاد لمرة غاندوزوها بحال خوتها ولكن لبخوشين فواا يتعاود هاد لبخوبليم مانتا فخييير.. وداااك الصداااع لي نااض ولكليان كاااين راااه غاتحاااسب عليه
سعيد:(تزير) واخا اموسيو
نوح:(جلس فبلاصتو وقال بهدوء) كيف داز لونطخوتيااان؟
سعيد:مزيان وراه غدا مع التسعود غاتبدا معانا
نوح:دير ليها فل contrat mois de stage payer وبدا معاها بصالير 5000 + les primes وقاد ليها وراقها كيف درتي مع لي قبل منهاا..
سعيد:واخا غانمشي نوجد لكونطرا
حرك ليه نوح راسو وسعيد هابط مع الدروج مكمش حجبانو وديك التبهديلة لي خدا عمرو ينساهاا.. نازل تاتلاقى مع عثمان طالع تاهو بسروال توب وشوميز وشعرو لقهوي رادو لور..
عثمان:نوح لفوق؟
سعيد: وي
تخطاه عثمان وكمل طريقو تاوصل قدام لبيرو وحل لباب بلامايدق ونطق بصوت عالي:ولد لحاااج توحشنااك
نوح:(هز حاجبو) يالاه شفتيني لبارح لحقتي توحشني
عثمان:(بتاسم ليه بخفة) وانتا معايا وكانتوحشك هههه
نوح:(حرك راسو بلاحول وقال) اش درتي؟
عثمان:تبااعت راه خليتو بايتكاتب معاهوم لتحت اجي داك الصداع لي ناااض ديالاش ؟
نوح:(كيطابي فلبيسي وجاوبو بهدوء) مشكيل وتحل
عثمان:(شاف فساعتو وقال) نمشييي نشوف خبار ديك الطنجية واش طابت مول لفرناتشي دار معايا فادلوقت
نوح:سير عالله ادا عثمان
عثمان:(بالسوسية) اكيهنا ربي أيِوس لحاج " الله يعاون اولد لحاج"
نوح:أنْداغ أُورتماطلتْ زوند غااسْلِّي "ماتعطلش تاني بحال داك النهار"
عثمان:كون هاااني
رجع كيكمل خدمتو تاصونى تلفونو وهزو من فوق لبيرو وغير شاف السمية وهو يتبسم وتكى على الكرسي ونطق بصوت حنين: تاسانو " كبيدة ديالي"
صوت الضحيكة لي وصلو خلاه يزيد يتبسم كثر وهو كيلعب بداك الستيلو لي بين يديه تاسمع صووتها لحنين وهي ناطقة بالسوسية: ايْهَايّانك القرّان " هايهاي المسخوط"
نوح:(عض على شفتو بنابو وقال بمزاح) مدَامَ داغ سكْراغ ازين إينوو " اش درت ليك تاني الزين ديالي"
... أرسْرك تقلغ أدْدَاري تاشْكتْ مِيشْ أوردْسُول تخْطّرت " كانتسناك تجي عندي ساعة مبقيتش جيتي"
قالتها بصوت مغبون خلاتو يتنهد تنهيدة طالعة من لقلب:أورْكُرهَاغْ مَاشْ تْسنْت لخدمة لِيّ يضْفاارن غيييد "ماكرهتش وراكي عارفة لخدمة لي تبعاني هنا"
نطقات بحنان: إيهْنّا لحاال أيوي سْنَاااغ مَايلاّان إيسْيِكَا يَاغْ أومَارْگ نْك أوكان ريغ أكزْرَاااغ غَياان كَاا "هانيا أولدي عارفة لي كاين غير توحشتك وبغيت نشوفك داكشي علاش"
نوح:(تقاد فجلستو) أُولا نِيك أزاينة نوو "حتى أنا"
زاينة: هانْ لبُورْطابْلاَد أوُسمَاتْياغْن أرْكاا يتشْعال "هاد التلفون ماعرفت مالو غير كيشعل"
نوح:مدَام يُوتن نمرانو "شكون ضرب ليك نمرتي"
زاينة: إيجاا ماشْ أوُرسينغْ مانِيس تْدّاا "إيجا ولكن ماعرفتش فين مشات" (بعدات التلفون على ودنيها وبدات تتعيط بصوتها الحنين) واااايجاا وااااااايجا مانيغْندَااااغْ تضْرت اتاااا " فين غبرتي عاود" (بانت ليها جايا تتقاد فزيفها لحمر لي لابسة وقالت) نعام اجداا
زاينة:(مدات ليها تلفون) هانْ أمخْلاَو نّاا أركَايتشعال واحدُوتْ "راه داك لهبيل كيشعل غير بوحدو"
إيجا:(شداتو وشافت فيه وهي ضحك بصوت خفيف وقالت) وهَااانْ اجداا إيسَااغْدسْرمْ إيصُونويْ كْرَاا "وراه أجدة كيعيط عليك شي حد"
زاينة:هاااايِّ أرنيتْ گيس ساوَالغ سنوح إينوو "راني نيت كنهضر فيه مع نوح"
إيجا:واخا سْرس تسَاوالتْ اجدا مهم هاام هانْ إيلاّ سُول غالخط "واخا تتهضري معاه اجدا مهم هاكي راه باقي فالخط"
زاينة:(شدات التلفون ومحطاتوش على ودنيها بعداتو شوية ونطقات) نووح إينوو إيسَاغْيِ تسْفلِيتْ "واش تتسمعني"
نوح:(متكي بيديه على لبيرو مبتاسم وقال بصوتو لحنين)
اتاسانو
زاينة:نيغَاااك هااانْ تيمَاااك إينْوّاا أنٍياااشكْ سمراكش "قلت ليك راه جدك ناوي يجي لمراكش"
نوح:واااه هي رادْدِيدْس تَاشكت "هي غاتجي معاه"
زاينة:أُورتْفلاَاغ أنْيااشْك واحدُوت تسنْت نيتْ إيلاّ گيسْ السكاار أورِيگاا إيِّغاراسْن واحدوت "ماغاديش نخليه بوحدو راك عارفو فيه السكار ومغايقدرش يجي بوحدو فالطرقان"
نوح:(نطق بجدية) علْمِي مانَاگْ أرادْتاشْكِيم أدَاونسِيفْدغ ماكونْديتاوِين أدُورتعدْبم غُوغَاراس واخا " علميني وقتاش غاتجيو باش نسيفط ليكوم لي غايجيبكوم باش ماتعدبوش فالطريق واااخاا
زاينة:واخا يالاه أكُورسْماطْلَغ فلخدمت نك سلم فلاسن " مغاديش نعطلك على خدمتك سلم عليهوم"
نوح:أكميهناا ربي اجدا "الله يهنيك"
قطع لابيل وهو مبسم وحاس براحة عجيبة مجرد ماسمع صوت جداتو زاينة وكلامهاا لي من ديما كيخليه يرتاااح وفرحان حيت غايجيو لمراكش ويشوفهوم خصوصا أنه مدة ممشاش عندهوم.
---
رجعات رحيل لدار وهي هازة معاها خنيشة فيها السقااطة لبنتها.. تمشات جهة لكوزينة فين سمعات صوت مها هي وسيدرا مجمعين.. اوقفات فلباب وبانت ليها سيدرا جالسة وقدامها الجلبانة تتنقيها كيف وراتها تانيرت ونصهاا كلاتوو ههه.. ضحكات رحيل ونطقات بهدوء: متاكليهااش وهي ممغسولاش؟
سيدرا:(ضارت جهة صوت مها وغير شافتها اش لابسة ونقابها وهي تنوض جهتها مكمشة حجبانها ونطقات ببرائة) مامي نتي علاش لابسة هادا فوجهك؟
رحيل:(هزات النقاب وتحنات جهتها باستها وبدات تتشرح ليها بطريقة تفهمها سيدرا) حيت أمامي رتاحيت فيه وبغيت نلبسو
سيدرا:(مكمشة حجبانها) تلبسي خامية؟
ضحكات رحيل وتانيرت من هضرتها وقالت رحيل: ماشي خامية سميتو النقاب كيلبسوه النساا
سيدار:(شافت فتانيرت) وعلاش تانيرت إينو مكتلبسوش؟
تانيرت:(حركات راسها) اش جاا ماسكتها دابا
من طبع سيدرا أنها تطرح أسئلة كثيرة فاش متتفهمش لحاجة وماتتهنى تاكتعرف كلشي.. وفاش شافت مها بداك لباس لي أول مرة تشوفو جاتها غريبة.. خصوصا رحيل بوحدها لي لابساه من بين تانيرت وأيماء ورنيم فطبيعي تسول وتبغي ترضي فضولها البريء
رحيل:(شدات كتيفاتها) هادا لي كيلبسو خصو يكون مقتانع بيه امامي مثلا نتي فاش تتبغي تخرجي ونقول ليك سيدرا لبسي هاد لكسوة ونتي تتقولي ليا نو بغيت نلبس سروال وبودي واخا كنعطيك كساوي زوينين متتبغيهومش علاش حيت نتي مقتانعة تلبسي غير سروال ولبودي فهمتي
سيدرا:(سكتات مدة تتستوعب لهضرة لي قالت ليها رحيل وشافت فتانيرت بعيونها السود) يعني نتي ممقتنعاش بيه ياك اتانيرت إينو؟
شرحات رحيل لسيدرا كثر وحاولات تبسط ليهاا على حسب عقلها وكيفاش غايتقبل لفكرة واخا صغيرة الا أنها ذكية ماشاء الله وتتغهمها طااايرة.. مشات رحيل بدلات حوايجها والشوفة فوجهها كيبان منور خصوصا مور مالقات الخدمة رتاحت واخا لمشكيل لي وقع ليها قبل.. نزلات عند تانيرت لي كانت تتوجد شلاظة ونطقات: قولي ليا مبرووك؟
تانيرت:(شافت فيها بفرحة) لقيتي خدمة اماما؟
رحيل:اه فواحد ل maison de voiture شهوة منها كاينة فنفس لونطوغااج فين خدام ريان
تانيرت:اوا مبروك اماما نيت توانسي نتي وياه ويبقا يوصلك بلموطور لي غايشري
رحيل:(حركات راسها) غايخصني غدا نمشي تاني عند الطبيبة كنت كنأجلها فاش كنت مضروبة فوجهي مي قبيلة عيطات ليا secrétaire ديالها
تانيرت:(شافت فيها ونطقات بحنية) ياك مرتاحة اماما ديالي مع الطبيبة
رحيل:(تنهدات) وي حسن من لول
سكتات تاتيرت مبغاتش تعمق معاها فالموضوع ورحيل جلسات جنب سيدرا معاوناها فتقشار الجلبانة.. بقاو مجمعين تاجاا إدريس وتجمعو بربعة على لغداا..
سيدرا:(تتاكل شلاظة بالفورشيط) بّا ديدي نمشي معاك
إدريس:(بتاسم ليها) واخا
سيدرا:(حطات لفورشيط وقالت بسرعة) نمشي لبس حويجاتي
رحيل:(بجدية) اجي كملي غداك هو لول يالاه
سيدرا:(حركات ليها راسها) صافي مامي شبعت أناا
رحيل:(شافت فيهاا بجدية) الابغيتي تمشي مع بابا تكملي غداك مكملتيهش مكاينش خروج
رجعات سيدرا جلسات تتاكل شلاظة بزز وإدريس ماهضرش حيت من عادتهوم فاش شي حد كيهضر معاهاا وينصحها لاخر مكيدخلش.. اييه مفششينهاا وعاطينها لخاطر مي أيضا مربينها تربية زووويينة وخصوصا إدريس لي زرع فيها گاع داكشي لي زوووين فيه.. كملات ماكلتها وشافت فرحيل:مامي ساليت
رحيل:(ناضت ومدات ليها يديها وقالت بحب) زيدي نلبسك حويجاتك باش مانتعطلوش على بابا
شدات فيديها وداتها لحمام عطاتها تغسل سنيناتها أو وجهها عاد مشات لبيت لقات رحيل وجدات ليهاا سروال كحل جلد مع بودي سخون فلموڤ لبساتها. حوايجها ومشطات ليها رحيل شعرها وفرقاتو ليها من لوسط مخلياه ليها على راحتو ورشات ليها ريحتهاا عاد هزات جاكيط كحلة ديالهاا عطاتها ليهاا..
سيدرا:(باست رحيل ففمها) مامي نلبس بوط ديالي كحل مابغيتش سبندينة
رحيل:(ضحكاات بالجهد وقالت) شنو سميتها؟
سيدرا:سبندينة مامي
رحيل:(باستها بالجهد فحنكهاا) امامي الغزاااالة يالاه لبسي لگاط
سالات سيدرا وخرجات تتجري نازلة من الدروج وموراها رحيل هازة ليها الجاكيط لقات إدريس جالس كيتسناهاا.. ابتاسم ليها بحب وشد الجاكيط من عند رحيل لبسو ليها عاد نطق: يالاه الله يعاون
تانيرت:(بابتسامة) بسلامة وفاش ترجعو جيبو لينا حليوات
سيدرا:واخا اتانيرت إينو باااي
خرجو بزوج غاديين على رجليهوم لگاراج والجو كان زوين مكانش لبرد بزااف حيت الحال بدا يسخن..
سيدرا:(شافت فإدريس) بّا ديدي كون غير جبنا إيڤانا معانا
إدريس:باقي صغيرة تاتكبر شوية ونخرجوها
سيدرا:نشريو ليها شكارتها فين نديروها بّا ديدي
إدريس:نشريوها اباابا نشريوها
الطريق كانت طويلة شوية وإدريس كان مفضل يتمشاو على رجليهوم ونيت سيدرا تحرك شوية.. وصلو لگاراج فين كان سفيان ورشيد الدري الثاني خدامين وباين فيهوم ولاد الناااس.. طلقات سيدرا من يدين إدريس ومشات تتجري جهة سفيان ونطقات: سفياني أناا جيت
شاف فيها سفيان لي كان ولد فبداية لعشرينات حروفو قهووين وكيدخل لخااطر.. تحنى جهتها وباسها فحنكها: أهلا بلالة لبنات لگاراج نوور
سيدرا:(شافت فرشيد وشيرات): شاااشيد
شير ليها تاهو مبسم حيت مولفين كيجيبها إدريس ملي كانت صغيرة.. مشى إدريس لبس لكومبين ديالو فالزرق غامق وجاا جهتهوم وقال لسفيان: مول الرونو مجااش؟
سفيان:لا باقي ولكن جاا مول الداسيا كحلة وراه لفلوس حطيتهوم فبلاصتهوم
إدريس:مزيان
مشى إدريس جهة واحد الطوموبيل تما مرسيديس فالرمادي واكلة الدق ودار نضاضرو دالشووف باش يشوف مشكيلتهاا.. أما سيدرا زولات جاكيطها وبدات غادة جاياا كادور جهتهوم ومرة مرة تمشي تسول إدريس شنو هادي..علاش درتي هادي هنا.. مالها هاكا.. وتاهو كيجاوبها بلخاطر ويعلمها ويوريها وفاش تتسالي من عندو تتمشي عند سفيان تاهو تسول فيه وتكملها برشيد الحاصول دايرة ليها الحركة تمااا وتاهوما غاديين معاها فالخط..
وقفات سيدرا قدام باب الگاراج تتراقب بعيونها لمبطنة السود الطريق وتتشوف الحركة لي كانت تماا تبان ليها واحد مول لكروسة كيبيع لغلالة داايز وعينيها تبعاتو تاوقف فالجهة الثانية وبداو الناس كيتجمعو عليه وهي تكمش حجبانها وضارت جهة إدريس لي كان مركز فخدمتو ورجعات شافت فداك مول لكروسة بفضووول.. بعد مدة هز إدريس راسو فاش ماسمعش حس سيدرا وبقا كيقلب عليها بعينيه ومبانتش ليه.. قلبو مشى وجاا فبلاصتو ونطق بلهفة:سيدراااا سيدرااا
كان غير هو وسفيان فلگاراج حيت رشيد مشى يوصل لموطور لي تصاوب وكل واحد كان مشغول ومردوش ليها لبااال.. خرج سفيان لبرا كيقلب عليها وإدريس حس بلفشلة وهو واقف فلباب دلگاراج تايقلب عليها بعينيه وهي تقول تشقات الأرض وبلعاتها..
مقدرش إدريس يتحرك من بلاصتو ولخلعة شدااتو تامبقى عارف فين يمشي ولافين يقلب.. عينيه كيضورو على الشارع ومبانتش ليه وسفيان مسكين مشى تيقلب عليها فالنواحي وعند مالين لحوانت لاتكون مشات تشري شي حاجة.. سمع تلفونو كيصوني وهو يجبدو من جيبو ولقاها رحيل.. يديه ترعدات عليه مقدرش أنه يجاوبها حيت بكل بساطة غتبان فصوتو بلي بيه شي حاجة وأخر حاجة باغيها هي رحيل تسيق لخبار.. بقا واقف تايشوف فالتلفون تاسمع صوتها لي نطق وراه: بّا ديدي
ضار إدريس بالجهد جهتها وهو كيشوف فيها جايا جهتوو مكمشة حجبانهاا وباين فيها مقلقة.. جرهاا بالجهد وعنقهاا وهو كيتنفس بالراحة عاد بعدها وقال بصوت باين فيه معصب وخايف:فين كنتي؟؟
سيدرا:(مدات يديها وحلاتها قدامو وهوما يبانو ليه لزبغااي ديالها وهي تنطق بصوت حزين) سالاو ليا بّا ديدي
بقا إدريس كيشوف فدوك لزبغااي مطولا عاد رجع هز فيهاا الشوفة وهو يلقاها مدلية شنيفاتهاا مقلقة.. باسها فحنكها وعنقها بلا مايقول تاكلمة.. عيط لسفيان علمو بلي راه لقاهاا غير فلگاراج مع مشات تشرب لداخل ومشافوهاش وفاش خسرات ليها لبغااي مسمعاتهومش فاش كانو تيعيطو عليها وتاهوما ماقلبوش لداخل حدهوم خرجو لبراا يشوفوها فين كاينة.. جلسات سيدرا فوق الكرسي وتكات على لبيرو تتلعب بتلفون إدريس لي عطاهاا وهي ساكتة كيف عادتها فاش تتسالي ليها لاباغااي.. متتبقاش تهضر مع شي حد وداك لحماس لي فيها كيطفى تتبقا غير ساكتة ولاكتمشي تنعس وإدريس كان عارف هاد النقطة عليهاا خلاها على خاطرها تايعاود يدير ليها لحجرة جداد لابغااي لي سالات ليها.. رجع إدريس كمل خدمتو لي كانت عندو بزربة ورجعو تا الدراري تاهوما وكل واحد مشى يكمل خدمتو تاوصلات لوقيتة وبدل إدريس حوايجو وجا جهة سيدرا لي كانت حاطة راسها على لبيرو ومغمضة عينيها ناعسة.. هزها بشوية وغطاها بالجاكيط وشاف فالدراري: سدو معاكوم لباب مزيان وتأكدو من لبوطة وااش طافية يالاه بسلامة..
خرج من تما وشد طاكسي صغير لدار وسيدرا ناعسة فحظنوو محساااش بشنو ضاير بيها..
حلات الفران تتشوف فداك لگراتان دلبطاطا ولكفتة لي كان تيطيب ورجعات شافت فأسماء لي كانت تتقلي لبريوات لمالحين..
رحيل: قربتي تسالي؟
أسماء:وي بقاو ليا غير هادو (شافت فالساعة لي كانت معلقة فلكوزينة وقالت) شفت بابا تعطل
رحيل:(تنهدات) غاتكون عندو لخدمة كثيرة داكشي علاش
سمعو لباب تحل ومشات رحيل تتجري بان ليها إدريس داخل وهاز سيدرا لي كانت ناعسة وكمشات حجبانها:واش نعسات؟
إدريس:اه غانمشي نحطها فلبيت ونرجع
رحيل:(باستغراب) واخا
داها إدريس لبيت رحيل حطها ومشى جاب ليها بيجامة بدلها ليهاا باش تنعس مرتاحة وغطاهاا عاد طبع قبلة فجبينهاا كيف لعاادة وخرج من لبيت غادي يبدل تاهو حوايجوو.. بعد مدة كانو مجموعين على طبلة لعشاا ورحيل تتحط لكل واحد فطبسيلو ورجعات جلسات بلاصتها وقالت بهدوء: درت لگراتان على قبل سيدرا ساعة نعسات قبل متاكلو
أسماء:(عضات فلبريوات وقالت بضحك) درنا ليها أصلا لعشا لي كتبغي گراتان وبريوات
إدريس:خليو ليها حقها تال غدا وتاكلو
تانيرت:خليت ليها شي بريوات مطيبينش ولگراتان غدا نعاود نصاوبو ليها
ريان:(هز عينيه فمحمد طه لي مكانش مشارك معاهوم لحديث وقال) افين سااارح
محمد طه:هاني معاكوم
ريان:(شاف فرحيل وقال بضحك) ياحليلي غانبقاو نتوانسو أنا وعوينات الجلبانة فالطريق ههه
رحيل:(حركات راسها بضحك وقالت) واييه طخااااجي ديالنا واحد
أسماء:تاأنا معاكوم غير نتوما تتكملو وأنا كنوصل قبل منكوم
ريان:عقبال محمد طه يبدل ديك لخدمة تاهو ويشد جهتناا ههه
محمد طه:(كياكل) واشكون عرف وفاش غاتشري أسماء الطوموبيل تبقا توصلنا جملة
ريان:(ضحك) ههه أنا باقي باغي نعييش اخاااي ونتزوج وندير وليدااات و
محمد طه:(نغزو وقال تحت سنانو) افراني الفيراري
ريان:(سرط ريقو وشاف فإدريس لي كان ساكت وهو يضحك فوجهو وقال) لبريوات بحال لاناقصهوم ملحة ياك الواليد؟
إدريس:(حرك راسو بهدوء) غير كيبان ليك
تانيرت:(ضحكات وشافت فريان) نقلب ليك على لعرووسة اولدي؟
ريان:(شير لراسو وقال) أناا الااا غيررر ضااحك وزايدووون خصكوم تزووجوو لكبااار هوما لولين عاااد الصغااار
قالها وهو كيحرك حجبانو لأسماء لي شافت فيه وقاااالت ببرود: لي معنى عليا يمعني على راسو
ريان:(حط يدو على صدرو وقال) هااا شهدتو ماسميتهاش هي لي تتنقز وحدها..
رحيل:كووول وسير تنعس راه غدا فايقين بكري ونتا اش جا مافيقك لينا عاود
سكتو كاملين مكملين عشاهوم ومن بعد ناضو الدراري لبيتهوم ينعسو ولبنات تعاونو مع تانيرت تاجمعات لمواعن وغسلوهوم عاد كل وحدة مشات لبيتهاا.. شافت رحيل فسيدرا لي كانت ناعسة وتنهدات بحزن على حالهاا.. باستها فحنكها وضماتهاا ونعسات..
فالصباح كانت رحيل واقفة قدام ل maison de voiture بكسيوة كحلة فيها زوج طبقاات لولة توب عادي والثانية عبارة على شبكة زوينة وتتجي جهة اليدين مجموعة.. لبسات معاها سبرديلة بيضاا ونقابها لباااج وصااك كلااس كحل.. حلات لباب ودخلات لقات لخدامين بداو كيجيو حيت التسعود تاتحل لميزوون.. عينيها بداو كيقلبو على سعيد تبان ليها هابط من الطبقة الثانية وهي تقرب جهتو ونطقات بصوت هادئ:صباح لخير
سعيد:(شاف فيها ببرود) تفضلي معايا
تخطاها وهي بقات تتشوف فيه ومطلعة حاجبهاا لسماا غير النقاب لي كان مغطيها.. قالت مع راسها نبداو عادي بيما أنه غانخدم هنا وغادي يكون احتكاك بيني وبينو فضروري ماخصني نتعامل عادي ساعة بان ليها هو ماناويش على هادشي.. تبعاتو ولقاتو مشى لنفس لبيرو فين دوز ليها لونطخوتيان.. جالس وقدامو لكونطرا لي غاتسني عليها..
سعيد:(نطق وهو كيشير ليها جهة لكونطرا) هادي هي لكونطرا لي غاتسني عليها قرايهاا
هزاتها رحيل وبقات تتقراها ورقة بورقة بكل تركيز وهو جالس بزز صاابر ومحاملش راسو ومحملهااش.. مدة وهي تتقراها تاسلاتها وهي تنطق بهدوء: ستيلو عفاك
مدو ليها وهي سنات فبلاصتها وعطاتها ليه عاد ناض وقال: تبعيني نوريك لبوسط فين اتخدمي ونزيد نشرح ليك كثر
هاد لمرة طلعو لفوق وتمشى معاها تالجهة واحد لبيرو كبير فيه لِبوسط مفرقين.. داها لجهة لبيرو لي خاوي فيه لبيسي ولامبغيمونط صغيرة وقال بهدوء: هنا فين غاتخدمي وهادو لي معاك راه نفس الضومين ديالك فالبيسي غاتلقاااي السيستيم لي حنا خدامين بيه (هز فيها حاجبو) طالقة يديك بعداا فلبيسي
رحيل:وي كانعرف نخدم بيه
سعيد:مزيان
بدا كيوريهاا الخدمة ويشرح ليها وهي تتسمع ليه وتنوطي فدماغها واخا زرب عليهااا بلعاني.. سالا كلامو ومشى خلاها تبدااا طبق شنو قااال ليهاا..
نزل من طوموبيلتو وهو مكمش حجبانو من الشمس لي ضربات فعويناتو تبانت ديك الزروقية ديالهوم تتلمع وخلى السكوريتي يبلاصيها ليه وهو دخل لداخل وعينيه كيف لعادة كيسكانيو لخدامة بلامايهضر مع شي حد.. طلع ديريكت فالدروج ومشى لبيروه وكيف كل صباح ضروري مايبداه بالقهوة.. مشى لماشين لي عندو فلبيرو شعلها ودار فيها لكافي لمعطرة وخلاها تتعصر ومشى كيزول فالجاكيط لي لابس تابقاا بشوميز بلوسيال وبدا كيطوي ليه كمامو وطلق لبخور فالبيرو عاد شعل لبيسي ديالو.. سمع الدقان فلباب ونطق بصوت هادئ: دخل
تحل لباب ودخل سعيد: صباح لخير اموسيو
نوح:صباح لخير (هز فيه عينو) لبنت دلبارح بدات لخدمة؟
سعيد: اه سنينا معاها لكونطرا وديتها لبوسطها وشرحتو ليهااا
نوح:مزيان وصل لكاطالوغ؟
سعيد:(مدو ليه وقال) هاهو كيفما طلبتيه
نوح:(خداه وحطو فوق لبيرو وقال) صافي سير كمل خدمتك
سعيد:واخا اموسيو
خرج سعيد وهو ناض هز ديك لقهوة لي تعصرات ورجع لبيروه يكمل خدمتوو..
نهاار لول دلخدمة داز عندها زوووين تعلماات دغياا وطلقات يديها وفوقيتة دلغداا خرجات لواحد السناااك تما خدات لغدا ورجعات لبيرو فين مكان حد طلعات نيقابهاا وعطات بضهرها لباب وبدات تتاكل وهي ساهية تاسمعات صوت رجولي نطق بهدوء: السلام أوعليكوم
عينيها تحلو على جهدهوم فاش سمعات داك الصوت والدغمة لي كانت تتاكل وحلات ليها تاشهقات وبدات تتكحب بالجهد... وجهها رجع كولو حمر وعينيها تاهوماا دمعو ليهاا ولماا كانت حاطاها فوق لبيرو.. بدات كتحب وتتمد يديها وهي باقي على جلستها تتقلب على لقرعة تاحسات بشي يد كحزاتها ليهاا عاد هزاتها وبدات تتشرب وتتسترجع أنفاسها وصدرها يطلع وينزل بالزربة.. أما هو فكان مكمش حجبانو كيشوف فكتافها لي كانو كيطلعو وينزلو ورجع نطق بهدوء: صافا شوية؟
رحيل:(تتحس بحلقها تجرح بدات تتكحب بشوية وقالت) كحم اه احم شكرا
نوح: الله ياودي (هز عينو وشاف فالحيط لي قبالتو وقال بصوتو التقيل) الامافهمتيش شي حاجة فلخدمة تقدري تسولي عليها
رحيل:(ضورات عينيها فبلاصتهوم وقالت بصوت متوثر) اه واخا شكرا
نوح:نهارك مبروك
سمعات صوت خطاويه وهوما كيبعدو تامشى عاد تنفسات بالرااحة وحطات يديها على صدرهاا لي كان تينهج.. ماشي من ديك لكحبة لي كحبات لامن داك الصوووت لي بحال الاسمعاه فشي بلاصة.. وقلبها لي كان تيضرب فشكاااال.. تنهدات وحركات راسها يمين وشمال وبدات تتجمع فداك السوندويش ونطقات بهمس:أصلا مزوينش
جمعات لغدا لي بقا ليها فخنشة وحطاتو جنب بيروها وجبدات ريحتها رشاتها باش ماتبقاش ريحة لماكلة وبدات جالسة تتلعب بضفارها فوق لبيرو بملل حيت باقي مسالات وقيتة دلغدا تاحسات براسها موحشة لقهوة.. ناضت هازة بزطامها وخرجات تشوف شي بلاصة فين تشريها.. نزلات لتحت ولقات لحركة قليلة شوية تما.. كملات طريقها لبرا ومع حلات لباب وهي تحس براسها دخلات فشي حد.. رجعات لور مكمشة حجبانها وسمعات صوتو لفض لي نطق: واش عورة مكتشوفيش؟؟
هزات رحيل راسها وهي تتشوف فداك الشخص لي واقف قدامها بسروال دجين بيض مع تيشورت نفس اللون وجاكيط وداير كاشكول قهوي مهرس بيه داك اللون لبيض..شعرو لقهوي كان مخربق عاطيه لوك زوين وعينيه كانو زرقين.. رحيل فيكسات عينيها فعينيه ولونهوم ولكن سرعان ما رجعات نزلاتهوم ونطقات ببرود:نتا كنتي داخل وأنا خارجة عليها تساطحنا
رؤوف:(طلعها ونزلها وقال بنفس لبرود) همم غالطة وزيداها بالتفلسيف
رحيل:(ربعات يديها وقالت بهدوء) ماشي تفلسيف والاكنت أنا غالطة راه تانتا غالط الشريف
مجاوبهاش رؤوف حدو تخطاها وخلاها واقفة تتشوف فيه ونطقات بهمس:قليل الأداب
خرجات تجيب لكافي وهو طلع لفوق كيتمختر تاوصل لبيرو دنوح وهو يدخل بلامايدق لقاه جالس فبيروه مغمض عينيه وفوق لبيرو كاان لپلا ديال لغدا ديالو لي كلى منو غير شوية.. حل عينو وشاف فيه وقال بصوت تقيل: عاد طفات عليك الشمعة
رؤوف:(وقف وربع يديه) فاياش بغيتيني
نوح:(أشار ليه بعينيه لفوطوي وقال) ريّح
جلس رؤوف وهو كينفخ النفس من نيفو وماهضرش أما نووح بقا كيشوف فيه تاقال ببرود: بنتي لياا هاد ليام ولفتي فيهوم الراحة
رؤوف:(قلب وجهو محاملش الهضرة فين غادة) هادي حياتي أنا وأنا عارف اش كاندير
نوح:(جمع شفايفو بسخرية وقال) حياتك همم ولفلوس لي كتصرف منهوم نسيتي ملين جااو ؟
رؤوف:(شاف فيه وقال بغضب) هادوووك فلووووسي وحقي تاأنااا وماشي حيت نتاااا لكبير تبغي تحكم فيااا وففلووووسي والاكنتي جايبني على قبل هاد لهضرة فبلاااش منها حيت طلعات ليا فصحتي وهادا لي قدامك ماشي هو داك لبرهوش دشحال هادي
مخلاش ليه فين يجاوبو حيت خرج من لبيرو مخلي نووح ساااكت كيشوووف فلبلاصة فين كان خوووه وتنهد تنهيدة طالعة من لقلب ومسح وجهو بيديه وقال بصوت هامس: واخا كبرتي راك باقي برهووش فعيني
ناض تاهو من بيروه وهز داك لپلا وخدا جاكيطو وخرج من البيرو غادي بحالو...
ليام كانت كدوز فنفس الروتين وليوم كان الأحد نهار لي غايمشيو فيه يقيدو سيدرا فلفيرمة على قبل حصص ركوب لخيل.. كانت الشميشة مخليا لجوو زوين وسخووون.. وسيدرا لفرحة كااانت واضحة على وجهها وهوما جالسين فالطوموبيل دإدريس شاديين الطريق.. كلهوم مشااو وداروها حجة وزيارة يقيدوها ويبدلو نيت لجوو وروتين لخدمة... كانت سيدرا جالسة فوق ركاب محمد طه.. جمعات ليه حناااكو تاخرجو شفايفو وهي تبوس فيهوم وقالت بحب:مودي حبيبي
محمد طه:(مرجع راسو لور وقال بضحك) اروح مودي
سيدرا:نحماق عليك أناا
ضحك محمد طه تابدات تتهز سيدرا فوق ركابيه ورحيل لي كانت جالسة حداه بدات تتبتاسم تحت خماارها لكحل لي لابسة.. نقز ريان لي كان حدااه من جهة لخرا وقال مكمش حجبانو: كيفاش هاد نحماق عليك وأنا نسيتيني
سيدرا:(قاست شعر ريان وقالت) تانتي رياني
ريان:تتسكتيني بيها زعمة (ضار عند أسماء) سمعتيها ونوضي على سلامتك
أسماء:اوا هانتا تتشوف نكراتني أنا وياك وبقا غير موودي هو لي تتحماق عليه
تانيرت:(كانت جالسة قدام حدا إدريس) خليو عليكوم شميشتي ونتوما شديتو فيها تاني ومابغيتو طلقوها
سيدرا:(طلات بين لكراسى ونطقات بصوت حزين) بّا ديدي رياني وسومة تايضحكو علياا
إدريس:(نطق وهو كيشوف فلمرايا) خليهوم ابابا هادوك أصلا باسلين
رجعات سيدرا تكات على صدر محمد طه وبدات تتحرك حجبانها بنذالة لريان وأسمااء لي كانو حابسين الضحك.. مسافة وكان إدريس واقف قدام ديك لبوابة لي كااانت بلحديد كحلة وكبيرة وكانت محلول أو واقف قدامها واحد باين فيه خدام هنا.. خرج إدريس يديه من طوموبيل وقال:سلام أوعليكوم فين غانبلاصي ؟
السيد: وعليكوم السلام دخل وسير ديريكت اتلقاا تماا بلاصة دطوموبيلات
شكرو إدريس وكمل الطريق تاوصل لبلاصة لي كانت بحال شي تيرا فيها طوموبيلات حط طوموبيلتو فبلاصة خاوية ومزلو كاملين وعينيهوم كيشوفو فلبلاصة.. كانت لبلاصة زوينة وفيها لخضورية وصوت الرواج دالناس لي جااايين ولي كيتدربو... كملو طريقهوم ورحيل تتشوف فديك الساحة لكبيرة لي كانو مدوزين عليها لگريااج او واحد لبنت كبيرة راكبة فوق لخيل ومعاها لمدرب لي شادو لجامو ..عينين رحيل كيشوفو فداك لخيل بيض لي كان كيشعل وباين فيه النقاا والاهتمام.. كملات طريقها متكية على داك لگرياج تتفرج فيه وإدريس كمل طريقو هو وتانيرت وسيدرا عند داك الراجل لي كان لابس سروال وبوط دلميكة وقاميجة طاويها وداير شابو دلقصب على راسو.. وقف قدامو إدريس وقال:سلام أوعليكوم اسيدي
بّا سالم:وعليكوم السلام ورحمة الله تعالى وبركااته
إدريس: بّا سالم؟
بّا سالم:اييه هو أنا اش حب لخاطر الشريف
إدريس:جيت نقيد حفيدتي هنا راه سيفطني ولد لحاج
بّا سالم:(بتاسم حيت ديجا وصاه نوح وقال بترحاب) مرحبا مرحبا ايييه قالها لياا زيدو معاياا (سبقهوم وهوما وراه ونطق تيشوف فسيدرا) هادي هي حفيدتك الله يصلح اشنو سميتك ابنتي
سيدرا:سيدرا التجاني
ابتاسم إدريس وتانيرت حيت من طبعها فاش كيسولها شي حد تتقول ليه السمية ولكنية.. وصلهوم لبيرو لي كان لداخل وفيه واحد زوج رجال وقال: هادو من معارف ولد لحاج تهلا فيهوم
خلاهوم وخرج يوقف على شغلو وهوما بداو معاها التقيااد وفاش وصلو لخلاص نطق الدري:مكاين لاش ولد لحاج موصينا على لبنية..
كمش إدريس حجبانو ومانطقش تاسالاو وعيطو على لمدربة لي غادربها ولي كانت فأواخر لعشرينات وتيبان فيها مسرارة من الشوفة.. قربات عندهوم وتعارفو معاها ونزلات عند سيدرا تتحاور معاها وهي تتجاوبهاا فأي سؤال تاخرجات وداتها جهة الإسطبل فين كاينين الأحصنة ديال التدريب وتانيرت مشات معاها أما إدريس فدوز لخط لنوح لي جاوبو:سي إدريس كيف لحال؟
إدريس:لحمدلله اولد لحاج الله ينورك ونتا العائلة
نوح:(سايگ وطالق السبيكر) الحمدلله أمدرا وصلتوو ؟
إدريس:اييه وصلنا وراه قيدناها كنت باغي غير نسول على لخلاص و
نوح:(قاطعو بصوت هادئ) الله ياودي اسي إدريس هادشي مبناتناااش لمهم لبنية تكوون مرتاحة وعاجبهاا لحال
إدريس:اييه ولكن ضروري نعرف
نوح:غير سمحليا هاد لمرة مغانديرش بخاطرك
إدريس:(تنهد وقال بهدوء) الله يكبر بيك اولد لحاج
نوح:بصحتكوم الاحتاجيتو شي حاجة غير قولها لبّا سالم يالاه فأمان الله
قطع معاه لابيل وبقا واقف كيخمم تاشاف الرباعي جاااي جهتو وقالت رحيل:فين سيدرا وماما؟
إدريس:مشاو يشوفو لخيل
ريان:زيدو تاحنا نشوفوه ربما عجبنا لحال ونتقيدو تاحنا
رحيل:بشحال تقيدات غايكون غالي ياك
إدريس:(درعها وقال) مخلانيش ولد لحاج نخلص
رحيل:(كمشات حجبانها وقالت) ولد لحاج واش هو نيت لي وصلك داك النهار ؟؟ علااااش فين شفتيه؟؟
نوح:هو مول هاد لخير كولو الله يبارك
رحيل:(حلات عينيها وقاالت) صراحة الجو زوين هنا بزااااف
إدريس:غانبقاو نجيوو لهنا كل سيمانة
كملو الطريق تاوصلو لعند سيدرا لي كانت واقفة فوق واحد لخشبة قدام حصان رمادي شعروو مسرسب وهي تتلمس على جبهتو او واقفة حداها المدربة تتهضر معاها وتشرح ليها كيفاش تقيسو بحنية باااش ماديرش شي حركة تجعرووو بيهاا... وسيدرا تباركالله عليها زعيمية ومكتخافش بلعكس تتقيسو وتتهضر معاه وهو حاني راااسو ليها.. ضحكات رحيل وبقات واقفة بعيد خايفة منوو وقالت: ياكما غايضربهاا؟
إدريس:لا غير زيدي قربي
ريان:(ضحك) أودي ياودي صدقتي خوااافة وشوفي نص ميترو دبنتك زعاااايمية
رحيل:سكت نتاا
قربات لعندها وتعرفات مع مدربتها لي كاانت سميتها "سعاد"
سيدرا:(شدات يد ماماه ونطقات) مامي قيسيه ماتخافيش
رحيل:(كمشات حجبانها) بلاش
سعاد:(ضحكات بهدوء) غير قيسيه ماتخافيش
رحيل دوزات يدييها بشوية فوق جبهتو وفاش شافتو مادارش شي حركة ابتسمات وبقات تادوز عليه يديها ومدة وهوما كيهضرو تاقربات سيدرا وباستو فجبهتو وهمسات ليه: غانجي نهار الأحد ونركب عليك واخا باااي
نزلات من تما ومشات عند إدريس هزها وتحركو مور ماسولو سعاد على سيستيم دالتدريب... ركبوو فالطوموبيل وتمو راجعين تاوصلو لواحد لكافي دارو فيه كاسكروط مجموعين عاد تحركو لدار وهوما مرتاحين وناشطين...
جالس فالطوموبيل وعينو على باب الدار لي كان مسدود.. كان ساكت ومتتعرفش اش تحت راسو ومرة يهز عينيه جهة شراجم الطبقة الثانية لي كانو شاعلين بقاا مدة هاكاك تاسمع علي لي نطق: نمشيو؟
بدر الدين: (ببرود) قلتها ليك
علي:(حرك راسو بلا) غير قلت مشى لحال
بدر الدين: صوتك مانسمعوووش از*ي
سكت علي ومعاودش نطق وبدر بقا على حالتوو.. ليل وتاحد مكان فالزنقة من غير لقطوط وتاطوموبيلتو طفى ضو ديالها باش مايعيقوش بيه.. بقا على حالتو تبان ليه لباب تحل وخرج محمد طه هاز لبوبيل باش يلوحو فلبركاسة لي كاينة بعية عليهوم شوية.. يالاه بغا يسد لباب تاخرجات سيدرا ببجامة كومبين وبانطوفتها وشعرها لقهوي مطلوووق شدات ليه فلقبية وتمشات معاه تتجر رجليها وبدر الدين تقااااد فبلاصتو وعينو عليهااا... هبط الزااج باش يقدر يشوفها مزيااان وعلي تاهو متبعها بالشوفة.. لاح محمد طه لبوبيل وجبد كلينيكس مسح يديه وسيدرا بقات تتعلق فيه تاتحنى وهي تعلقات فضهرو وهزها راجعين وبدر محيدش عينووو عليهاا بتاتا وابتسامة خفيفة بدات تتكوّن على شفتو وبصوت بارد كالصقيع نطق: مكنتش باغيك تزادي حيت كنتي غاتبعديني على ماماك ولكن دابا نتي لي غاتكوووني طريقي تانوصل ليها اعمووو..
لابسة سكراب طبي فلخضر مع بلوز بيضا تتشعل وشعرها لقهوي مجموع شفينجة لفوق.. مك اب خفيف مزين وجهها لي ملامحوو كيبانو كيوووت.. هازة تلفونها فيديها غادة لبيروها وفنفس لوقت تتمساجى مع صاحبتها "نهى" تاسمعات صوت الممرضة لي قالت:دكتوغ بيسان بغيت نفكرك بلوبغاسيون لي عندك مع الدكتوغ الزايدي مع 12:00
بيسان:(حركات راسها وقالت) اوكي
كملات طريقها لبيروها ودخلات تراجع ملف لمريضة لي عندها مشكيل فصممات القلب لي مبقاوش كيأديو وضيفتهوم بشكل طبيعي وغايضظرو يديرو ليها زراعة صممات اخرى..بقات تما توصلات لوقيتة لي غاتنزل لبلوك وخرجات من لبيرو ديالها غادة جهة لسونسور ركباتو ونزلات لطاج فين كاين لبلوك.. لقات التحية على الطبيب لي غايكون مرافقها فلعملية أو لبسات فراسها بوني دلبلاستيك طبي وتافرجليها... وغسلات يديها مزيااان عاد دخلات من واحد لباب كيتحل دزاج أوطوماتيك لقات لفرملية تتسناهاا بلباس الطبي لخاص بلعملية.. عوناتها تالبساتو ولبسات گوانتي طبيين ودارت ليها لپافيط عاد كملات طريقها جهة لبلوك فين كانت المريضة ناعسة فوق لبياص ولبناج حداها
بيسان:تأكدتو من مستوى السكر فدمها ياكما طالع هو وطونسيون؟
لفرملية: تأكدنا دكتوغ بلي هوما فلمستوى الطبيعي
ط.الزايدي:بونكوغاج دكتوغ
بيسان: بونكوغاج
مبعد ماتأكدو بلي لبنج سرى فسائر جسمها بدات لجراحة لي كانت دقيقة والتركيز ديال بيسان وطبيب كولو على ديك لمريضة لي قدامهوم.. الأمور كانت تحت السيطرة فالساعات الأولى دلعملية شي لي خلاهوم يكملو العملية بنفس لهدوء تانطقات لفرملية بصوت عالي: دقات قلبهاا منخافضين على طبيعي دكتوغ
هزات بيسان عينيها تتشوف فديك الشاشة لي كانت تتبين ليها انخفاض دقات لقلب ومكان عليهوم غير يدخلو باش يرجعو الوضع كيف كاان ولكن وقع لعكس والقلب فجأة توقف شي لي خلاهوم يديرو ليه الإنعاش والروينة ناااضت فلبلوووك.. لابيسان ولاطبيب لي معاهاا مخلاوش من جهدهوم باش ينعشو لقلب ولكن تدخلاتهوم
باءت بالفشل وهادشي خلى بيسان تحس بلغصة فصدرها.. كلما دخلات لشي أوبغاسيون كادير زوج احتمالات ياتفشل ياتنجح وطبعا الاحتمال الثاني هو لي كان كيغلب ولكن هاد لمرة وقع لعكس ولمريضة فقدوهاا..
ط.الزايدي:(بأسف)ساعة لوفات 15:00
خرجات بيسان هي لولة وموراها الطبيب لي قال: غايخصنا نخبرو عائلتهاا
بيسان:أنا غانتكلف ادكتوغ
حرك ليها راسو وخلاها واقفة تتنهد.. أخيب حاجة هي توقف قدام لعائلة وتزف ليهوم بحال داك لخبر الصادم.. جمعات قوتها وشجاعتها وتمشات جهة لسونسور طالعة لعند لعائلة لي كانت تتسناهوم فغرفة الانتظار.. ومجرد ماتحل لباب وشافوها تجمعو عليها كاملين وهي بقات تتشوف فيهوم بأسف تانطق ولدها: أمدرا ادكتور مي كيف بقات؟
بيسان:(شافت فيه ونطقات بصوت متأسف) البركة فراسكوم المريضة توقف قلبها وسط لعملية حاولنا نعشوه ولكن مع الأسف مقدرناش..
غير سالات هضرتها وهي تسمع غوات دوك لعيالات ولبنات والرجااال لي تماا..ولبكااهون وحالتهوم فديك اللحظة غي ماخلاتهاا تزيد تأزم وتحس بقلبها تقبض عليها مبغاش تفكر لحدث لي عاشتو قبل .. بقاو الرجال كيشدو ولدها لي باغي يحمااق وغواتو كيتسمع تماا تافلحظة معرفات بيسان كيف وقعات هجم عليها وجرها من شعرها مهبط ليها راسها لتحت وهي تتغوت وبدا كيضرب فيها ولعائلة تتفك والناس تجمعات تماا والسكوريتي لي يجي يعتق باقي مجاش والروينة ناااضت وغوات بيسان كيتسمع ولاخر كيضرب فيها ويسب معصب:لقتااااالة نتوماااا قتلتوووو ليااااا مي الله يحرق الز*مل بووووكوووم كااااملين ليووووووم نفرگع عليكووووم هاد لخرا يااااا ولاد لق*اااااب
كيضرب فيهاا ويغوت وعينو ظلاموو تامبقا يقشع اش كيدير..تاحس بشي حد جروو بالجهد من يديه تابعد ودخل فيه بالرااس مرجعو لور..وبيسان كانت محنية ودمها نازل من نيفها على زليج تايتسقطر قربو منها لغرمليات عاونوهاا تاخرجوها من داك الزحام لي كان تم والسكوريتي يالاه طفات عليه الشمعة أو وصل كيفك ديك لمدابزة.. او ولد ديك السيدة باقي كيسب فيهوم تاحس بكروشي جااه لوجهو سكتوو وزادو الثاني تاجرو السكوريتي الشخص لي خنزر فيه تخنزيرة قاااصحة وعطاه بالضهر غادي بحااالو..
غير وصلوه لخبااار معرفش كيفااااش دار تاكااان وصل لسبيطااار وهو مكيقشعش قداموو.. حجبانو لقهووين معقووودين وعينيه الزرقين كيبااان لونهوووم غااامق وشعيرات الدموية بداو يتكونو فلبياض ديالهوم ومن الشوفة فيه كيبان معصب.. دخل لسبيطاار كيقلب على شومبر فين كاينة تاالقاااها ومع حل لباب ديك لعاافية لي كيحس بيها فالداخل ديالو غير مزادت شعلااات وزندات وهو كيشوف ختو جالسة ونيفها تنفخ وحمار ودايرين ليها سبرادرا أو حناكهاا حمرين أما شعرها واخا جمعاتو الاأنه كيبان مشنتف وتحت عينيهاا زرق.. قرب جهتها وهي غير شافتو ناضت عندو وبدات تتبكي بحال شي بنت صغيرة شافت باها وبدات تشكي عليه.. عنقهاا بالجهد مخليها تتبكي وهو عاض على سنيه ومغمض عينيه كيسمع لبكااها لي غير مكان تيزيد يجعروو.. هو لي خوها عمرو مد يديه عليها يجي واحد مكيسواش يدير فيها هاد لحالة؟؟
نوح:(بعد عليها ونطق بصوت تقيل) شكون هاد؟
بيسان:(تتعاود ليه وهي تتبكي) ولد واحد لمريضة هء هء كانت عندها أوبغاسيون ليوم ولكن ماتت لينا وسط لعملية هء هء هء وفااش علمتهوم هو ضربني هء هء
نوح:(لعب بلسانو ففمو وقال) سمية لمريضة
بيسان:سعيدة لوهبي
نوح:(حرك راسو بااه ونطق) خلينا نمشيو
بيسان:(تتشهق) واخا
خرجها من تما ولي خدامين معاها كلهوم بقاو كيشوفو فيها بقات فيهوم.. ركبها فلجيپ ديالو وهو رجع دخل لداخل سول على لكاميرات واش خدامين.. وملي تأكد بلي خدامين وموثقين اللحظة رجع ركب بلاصتو وشد طريق لرياااض وهو مكمش حجبانو ضارب الطم.. مسافة طويلة وكانت لجيپ واقفة قدام باب الرياض.. نزل ومشى جهتها عاونها تانزلات ودخلها لداخل..
كانت رحمة جالسة فالجليسة دلقصب وتلفونها فيديها تتشوف الخياطة لي باغا دير لجلابتها وغير سمعات صوت السعدية وهي تهز عينيها لي خرجو من بلاصتهوم وشهقاات بالجهد فاش شافت بنتها فديك لحالة وهي مخشية فخوها.. ناضت جهتها وصوت صندالتها تايتسمع وقالت بخوف ولهفة: أويلي وحدي شكووون ضربك ؟
بيسان:(عنقاتها وبدات تتبكي) هء هء هء ماما
هزات رحمة عينيها فنوح باغا تسولو ساعة سبقها فاش نطق بهدوء:طلعيها لبيتها
قال ليها ديك لهضرة وخرج لبرا ركب طوموبيلتو بلامايدماريها جبد تلفونو ودوز لخط لواحد النمرة وبعد رنات قليلة تحل لخط وتسمع صوت رجولي نطق بمزاح: ولد لحاج كيف طرا تاتفكرتينا
نوح:(نطق بهدوء وعينيه كيشوفو فالطريق) باغيك فواحد لبلان
لاخر غي سمع صوتو وديك النبرة باش دوا معاه وهو يقول بجدية:كنسمعك
بدا نوح كيعاود ليه اش وقع والشخص كيسمع ليه تاسالا وقال بصوت بارد: سمية مو سعيدة لوهبي والسبيطار راه فيه لكاميرات خدامين وموتقين لعنف لي تعرضات ليه نبغيك دير خدمتك وباشما كان تعلمني واخا اصابر
صابر:كون هاني اولد لحاج ليلة يبات عندناا نوريوه الضسااارة
نوح:(مسح على لحيتو وبرك على هضرتو) كرموووه لياا مزياااان اصابر
صابر:ماتخممش يالاه خليت ليك الراحة
قطع معاه ولاح التلفون فالكرسي لي جنبوو وقلب وجهوو منيرڤي.. أعدى حاجة عندو هو لي كيستقوي على لعيالاااات ويضربهووم.. وعند هاد الفكرة بالضبط عقلو سااافر بيه لديك ليلة المظلمة ولي كان مزينها غير لقمر فسماه وصوت أنفاسها الخائفة وبكاهاا.. ضور راسو وعينيه جات فيدو ليسرية لي دوك الاثار لي كانو فيها تمحاو ومبقاااوش ولكن هوو كاان حاس بيهوم تحفروو لداااخل دجلدتوو.. قلب وجهوو كيشوف فالحومة وناسها وعقلو رجع يسهى تاااني فيهاا.. فهاديك لي عتق ومعرف تاسميتها وشكون هي وعلاش كااانت تم.. ولمشكيل لكبير هو تفكيرو الزاااايد فيها لي مالقى ليه تاشي سبب ياك عتقهاا وداهاا لوبيطااال بيديه إذا علاااش عقلوو كيفكر فيهاا؟؟ باقي عاقل كيفاش كانت سخفانة بين يديه أو وجهها لي كان مضروووب كولو لدرجة ملامحها مبقاتش تتبان.. هز عينو فلمرايا دالطوموييل كيشوف فالكراسى لورانين فين كانت ناعسة ديك ليلة وبصوت هامس نطق: خرجي من عقلي..
بجلستها لمعتادة فهاداك البيرو وفنفس لمكان وقدام ديك الساعة الرملية لي كانت محطوطة فوق الطبيلة مقلوبة والرملة لي فيها تتكب بشوية لجهة لخرا وعينيها لخضرين مابعينها بصمت.. تحنات الطبيبة وطلقات التسجيل كيف عادتها ونطقات بهدوء:مدة مجيتيش لهنا؟
رحيل:(باقي على نفس وضعيتها وبصوتها الهادئ قالت) مقدرتش
الطبيبة:علاش؟
رحيل:(فركات يديها بتوثر وقالت)هو خرج؟
الطبيبة:(بنفس لهدوء وعينيها على جسمها وردود فعلها لي كانو كيبينو أنها متوثرة وخايفة)شكون؟
رحيل:(حطات يديها على لفوطوي وعصراتهووم وقالت بصوت يادوب كايتسمع) بدر
الطبيبة:(تقدات فجلستها) نتي فين شفتيه
رحيل:(عينيها عمرو بالدموع) هو رجع لقاني مرة خراا واخا هربت منووو هو قدر يلقااني
الطبيبة:تهدني ارحيل وعاودي لياا هو كيفاش لقااك؟
بدات رحيل تتعاود ليها على ديك الليلة لي شافت فيها بدر وشنو دار فيها ودموعها كينزلو وباين فيهااا باقا متأثرة مجرد مارجعات تفكرات اش طرا..
الطبيبة:شربي لماا وتنفسي شوية
هزات لقرعة لي قدامها ويديها كيترعدو عليهاا وحلاتهاا وجغمات منهااا وبدات تتنفس كيف طلبات منها الطبيبة.. هاد ردة لفعل لي دارت دابا كانت طبيعية بيما أنه رجع وشافتو مور مكانت تتحاول تنساه وتنسى اش دوز عليها هو أولد خوه ودوك الشهووور لي تبصمووو بلكحل فحياتهاا.. كانت تتحاول تعيش بشكل طبيعي وترجع تمارس حياتها لعادية ولكن رجوع بدر خربق ليهاا مشاعرها مرة خراا ورجع زرع ليهاا لخوف فداخلها لي كان كينهش روحها فصمت..
خلاتها الطبيبة تابكاااات وفشات خاطرها عاد شافت فيهاا: هو عمروو ماغايخليني فراحتي وأناا خايفة يرجع يديني معااااه لديك لبلاصة مرة خراااا
غمضات عينيها وعضاااات على شفايفها والطبيبة تتشوف فحالتها كيفاااش ولات تاااني.. تنهدات الطبيبة ونطقات بهدوء: نتي قدرتي تعتقي راسك منو فلمرة لولة وتافهاد لمرة ماتنسايش هادشي
رحيل:(هضرتها لي قالت فكراتهاا فالغريب لي عتقها وبصوت هادئ قالت) هو لي عتقني منو
الطبيبة:(بتساؤل) شكون؟
رحيل:(شمرات بنيفها وقالت بنفس لهدوء تتشوف فيديها وهي ساهية) قال ليا ماتخافيش أنا معاك وشد ليا فيدي وداني معااه وضربهوم باش يعتقني خاطر بحياتو على قبلي واخا مكيعرفنيش
الطبيبة:ونتي واش معرفتيهش؟
رحيل:(عقلها غاب وبين عينيه ديك لقطة لي شافت قبل ماتغيب) كاان الظلام ماشفتوش مزيان ولكن شفت عينيه لونهوم بحااال لبحر فزروقيتوو وشوفتو كانت قاصحة ولكن حسيت بيها حنينة
الطبيية:وشنو وقع من بعد؟
رحيل:(شافت فيها) سخفت وفاش فقت لقيت راسي فالسبيطااار وهو مكانش (حطات يديها على راسها وقالت بهدوء) بغيت نمشي عيييت
الطبيبة:واخا نحبسو هناا تال لبخوشين سيونس اوكي؟
رحيل:اوكي
ودعاااتها رحيل وقدات خمارهاا عاد خرجات من لبيرو بهدوء نازلة فالدروج وكيف كل حصة تتخرج وتتحس براسها شوية مزيان حييت داكشي لي مخبية فداخل ديالها قدرات تخرجو ولو جزء منو.. لقات إدريس كيف عادتو فكل حصة كيتسناهاا براا بنفس الابتسامة لحنونة..
🔙🔙
كانت قليلة لكلام وديما ساهية وهادشي لاحظو إدريس لي مكانش كيهضر غير كينوطي فدماغو.. حياتها توقفات من داك النهار وكانت لحاجة لوحيدة لي تديرها هي ترد لبال لبنتهاا لي كانت بدات تتكبر وبداو ليها لحصص ديالها عند لمختصين على قبل حالتها وكان إدريس هو لي واقف على الشغل بيديه.. أماا رحيل فكانت كل ليلة تفيق على شي كوشماار يخلي غواتهاا يفيقهوم كاملين.. وإدريس عياا مايسكت ولكن فاش شاف بنتو غادية فطريق ماليهش رجووع قرر يتصرف ويقلب على طبيبة نفسية لي تعالجهاا.. عارف بلي رحيل صعيب تقبل هاد لخطوة كيف دارت قبل ولكن هو غادير لي فجهدو باش الامور تمشي مزيان.. وبعد بحث طويل لقى طبيبة لي حاليا تتعالج عندها ومور ماشرح ليها إدريس حالتها قررات تشوفهاا.. فالحصص الأولى رحيل مكانتش تتهضر وغير ساكتة تاشوية بشوية رتاحت ليها وبدات تتقبل لعلاج تادازز عليه عماين ونص وهي كتعالج من مخلفاااات الماااضي لي خلى داخلها يولي عبارة عن حطاام...
🔜🔜
دخلات لبيتها وسدات عليهاا لباب وتكات عليه وعينيها كيضورو فبلاصتهوم.. تتحاول ما أمكن تشغل راسها بشي حاجة لي تخليهاا تنسى رجوع بدر ولكن عقلهاا أوطوماتيكمو تايفكرهاا بديك الليلة.. مشات لبلاكارها حلاتو وجبدات ديك الرسمة وتنهدات بتعب.. تتشوف فيها وتتحاول تحيد أي حاجة خايبة فدماغهاا وتخلي تفكيرها مشغول بالشخص لي عتقهاا.. بقات تتشوف فالرسمة تاسمعات الدقان فلباب وصوت سيدرا لي تتعيط ليها:ماااامي وااامااامي
تنهدات رحيل وخبات الرسمة عاد مشات حلات لباب وتبسمات ليها بحب وسيدرا مدات ليها يديها تاهزاتها وباستها بوسة قوية وقالت:مامي توحشتيني همم
سيدرا:(بحب) اه امامي توحشتك بزاااف فين كنتي نتي وبّا ديدي؟
رحيل:(تبسمات ليها ودخلو لبيت مور ماسدات لباب) كانت عندي خدمة ونتي اش درتي بلابيا؟
جلسات سيدرا على النموسية وقالت بحماس: علماتني تانيرت إينو نهضر بالشلحة مامي
رحيل:(تتزول نقابها) بصح اش تعلمتي؟
سيدرا:(وقفات فوق النموسية وقالت بالسوسية) أركمتيريغ مامي "كنبغيك"
رحيل:(فهماتها) تاأنا كنبغيك اروح مامي
سيدرا: وعلماتني تا تسانو "كبيدة" تيمنسيوين "تصبح على خير" أغروم "خبز" (سكتات تتفكر داكشي لاخر ورحيل مرقباها وهي تتزول كسوتها.. رجعات نطقات سيدرا بتدكر) أزول "أهلا"
رحيل:برافو مامي وبقاي عاقلة عليهوم واخا
سيدر:واخا مامي
زولات رحيل كسوتها وبقات بكولون مع بودي ديالو لاصقين عليهاا ومبينين فورمتها لي غلااظت على كيف كااانت خصوصا من جهة لهونش والترمة ولكرش مكانتش عندها معيقة حيت هي من نوع لي مكتخرجش ليها واخا ولدااات.. يادوب عندها ديك النفيخة صغيرة وفورمتها مكانتش تتبان حيت تتلبس لواسع ولمستور أما شعرها كان طواااال على كيف كااان تاولى فايت ترمتها مع مكتقطعوش يادوب تتقاد لبوانت ديالوو
سيدرا:(قربات جهتها وقاست شعرها وقالت بإعجاب) مامي تتشبهي ربونزل
رحيل:(تتجبد بجامتها وحوايج لداخل ونطقات بضحك) شكون هادي؟
سيدرا:واحد الأميرة عندها شعرها تاهي طووويل مامي بحاااالك
رحيل:(حدرات لعندها وباستها فشفتها) عرفاني شحال كنبغيك
سيدرا:(حلات يديها) قد السمااا مامي
رحيل:(عنقاتها رحيل وخشاتها فيها وسيدرا تتقيس شعرها وقالت بهمس) عمري مغانسمح فيك امامي
بقات معنقاهاا مدة مساخياش بيها وسيدرا بقات تاهي معنقاهاا وماهضراتش تابعدات عليهاا وباستها فجبهتهاا ومشات لعند إدريس ورحيل جبدات حوايجهاا وخرجاات لحمام لي حداها دووش.. مخداتش وقت بزاف وخرجات ملوية فبنوار ورجعات لبيتهاا وجبدات لكريمات دلجسم والروايح وبدات تدهن.. وشعرها تاهو دارت ليه سيروم ودارت ليه لباتشا وجمعاتو بزيف حياتي وناضت لبسات دوبياس فلون لموڤ ولبسات كولون دلبيجامة لاصق عليها عاد لفوقاني سخووون شوية وكيجي فايت لمؤخرة بشوية.. رجعات رشات ريحتهاا لخفيفة ولمسكرة عاد نزلات عندهوم لتحت فين كانو مجموعين كلهوم على لگوتي.. وسيدرا جالسة فالمكان لمفضل عندها فوق رجلين إدريس وبدات تتفشش عليه..
سيدرا:(شيرات لكيكة دالشكلاط ونطقات) بّا ديدي ميمها ليا
إدريس:(خدا طبسيل دار ليها طرف وعطاها بلملعقة حيت فيها الشكلاط من لفوق) هاكي ابابا
تانيرت:(قلبات راسها ونطقات وهي تتشوف فرحيل) شفتي الضرررة ديالي
رحيل:(بتسمات بهدوء) اوا ماعندي ماندير ليك اماما
تانيرت:(نغزات سيدرا)بعدي ليا من راجلي
سيدرا:(كمشات حجبانها وخشات راسهاا فعنق إدريس وقالت بهمس) بّا ديدي دياااالي أنا
إدريس:(شاف فتانيرت وقال) زعمة نتي مولات لعقل
تانيرت:(حركات كتافها وقالت بعناد تتجاكر سيدرا) لعقل خليتو ليك اهياااتااا بعدي منووو يالاه حيدي
سيدرا:(شافت فيها ورجعات شافت فإدريس) بّا ديدي تانيرت إينو تادير لبيتيز دير ليها لبينيسيون " عقوبة"
إدريس:(شاف فتانيرت بشوووفة فهماتها وقال بصووت تقيل بارك على هضرتووو) نديررررو ليهاا بينيسيون
قلبات تانيرت وجهها وحناكها دغياا تلونوو بلون لحمر فااش فهمات مقصودو والدراري كل واحد جمع الضحكة مباغينش يفرطو راسهوم عكس سيدرا لي نطقات ببرائة: ولكن بشوية عليها ابّا ديدي واخاا..
نطقات سيدرا هضرتهاا ببرائة وقصدات أنه ميعقبهاااش شي عقااب قاااصح ولكن جات لاصقة نيشان داكشي لي فهموه الدراري وهنا ريااان مقدرش يحبس ومع كااان تيشرب أتاااي غير سمعها اش قالت وهو يشهههق وأتاي خرج ليه من نيفووو تابدا يكحب ومحمد طه قلب وجهو تايضحك بالسكوووتي أما أسماااء هاديك قالت لريان ماتتعرف لواالو بدات تضحك تادمعووو عينيها مقدراتش تحبس ورحيل حماااااارت مع كانت مقابلة مع باهاا حدرات راسها وسكتات.. وتانيرت ماعرفاااش فين تخشي راسها بهاد لحشمة لي حشمهااا إدريس لي كان ساااكت مبرررد كيوكل سيدرا ومرة مرة يلوح عينو على تانيرت لي كيف حدرات راسها معاوداتش طلعااااتو...
بدا ريان كيمسح نيفووو وديك الشوهة لي دااار وصوتو تخنق مع وحلات ليه تاتجرح ليه لحلق... عطاه محمد طه لما وقااال بهمس:ضروري من لفرشة
ريان:(ضحك بالسكوتي وقال تاهو بهمس) قالت ليه تكايس عليهاا هههههه
محمد طه:(حرك ليه راسو بلاحول) داك لعقل عندك تايفكر غي فالمسخ
ريان:(برگم تحت سنيه) واكون غير جربناه بعدااا
محمد طه:(كمش حجبانو وقال) كيفاش؟
ريان:(شاف فجنابو ورجع قرب عند محمد طه ونطق ليه بهمس وهوو حاس براسو تزير) يعني لي على بالي وبالك اصاحبي
محمد طه:(مافهمش) شرح لياا ازمر ونتا تتهضر بالالغاز
ريان:(زفر النفس وقال بهمس باش مايسمعهوش) اش مافهمتيش فهضرتي الق*اوي
محمد طه:كلها
ريان:(حك عنقو وبدا كيضور فعينيه السود كي موكة ونطق بهمس) زعمة أنا عمري ماا..
محمد طه:مااا شنو؟؟
ريان:(شاف فيه وضغط على كلمتو) ماااا.. تت
محمد طه:(تكلخ فهاد اللحظة) وانطق از*ي مااا اااش؟
ريان:(رجع شاف فيهوم ولقى كل واحد كياكل مامسوقينش ليهوم) يعني عمري مااا
محمد طه:(قاطعو بعصبية وهو كيهمس ليه) وطلقناااا
ريان:(نطق بهمس معصب ) ماحو*تش
محمد طه عينو تفيكساااو على ريااان وهضرتووو لي قاااال.. تبلوكاا وريان رجع كولو حمررر ماحملش ديك الشوفة لي دااار فيه خوووه لي مجرد مااا سرط الصدمة رجع رااااسو لور وطلق واحد الضحكة خلى كلشي يشوف فيه وهو كتااافو يتهزو ويتحطوووو ورجع كيف شي مطيشة تايضحك ويضحك ورياااان تيسب فيه فنفسوو.. ومع رجع محمد طه لور طاااح بيه لكرسي تاجااا مخبووووط فالأرض وكمل ضحكتووو وهوما نااااضو جهتوو تيعاونوه ويشوفو ياكماا تقصح والسيد حلف لاسكت وغير تايشوف فريااااان تايزيد يخرررى عليه بالضحك تاحس بكرشو ضراااااتو وقف وهو شاد جنبوووو
تانيرت:مالكوووم ؟ ياك اولدي ماتقصحتي؟
محمد طه:(حرك يديه وقال بضحك) هههههه أنا بخير ههههههه
تمشى لبيتو وهو باقي كيضحك خلاهوم غي كيشوفو مفاهمين تازفتة من غير رياااااان لي ناااض تبعووو وهو معصب.. حل عليه لباب ومحمد يالاه كان تيسكت ولكن مجرد مطاحت عينو عليه رجعات ليه نوبة الضحك مرة خرااا..
ريان:(سد لباب ونطق بعصبية) لق*اوي گايل ليك نكتة
محمد طه:(نطق بين ضحكتو) هههه وراه هادي نيت نكتة هههههه (كمش حجبانو وقال) اجي بعداااا وااااش مخثن ؟
ريان:(بتساؤل) اشناهي هادي عاااود؟
محمد طه:(عينيه خرجو من بلاصتهوم وقرب جهتو وقال) ماتگولهااااش از*ي
ريان: شنو ؟
محمد طه:(كيشرح ليه) لولاد الصغار ذكورة فاش كيتزادو عندنا فالإسلام كيخثنوهوم يعني واحد الجلدة تتكون عندك فراس دلعضوو ديالك كيزولوهااا وكتسمى ديك لعملية خثانى
ريان:(هبط راسو جهة لعضو ديالو ورجع شاف فمحمد طه) وأناا باش انعرف ك*ي راني مخثن
محمد طه:خالتي تانيرت غاتكون عارفة ؟
ريان ماتسناهش يكمل لهضرة خرج من لبيت ومحمد طه تابعو ومعارفش واش يضحك ولاااا يتصدم تمشااااو جهة لكوزينة فين كانت تانيرت او وقف عليها ريان وقال بلامقدمات غير جيب يافم وگول:لواليدة واش خنثوني؟
تانيرت:(كمشات حجبانها)هااء خنثناااك؟؟
ريان:(حرك راسو ورجع نطقها) اه خنثووووني
محمد طه:(ضرب على جبهتو وقال تحت سنانو ) خثناااك المصيبة خثناااااك
ريان:(شاف فيه ورجع شاف فمو) هاديك لي قاااال محمد طه واش درتوها ليا فاش كنت صغيرر
تانيرت:(هزات حاجبها فيه وشافت فمحمد طه لي مرگ أما ريان هاداك لحشمة فجيه وهو فجيه وقالت) اه خثناااك ولكن نتا علااااش تتسول؟
ريان:(ضحك وباس حنكها) ههه نساااي الواليدة
خرج من لكوزينة وجر معاه محمد طه وهي بقات واقفة تتشوف فييهوم ومفاهمة والو.. أما ريان شاف فمحمد طه وقال بضحك: لمطريال هو هاداك خصنا دابا غير فين نتستيوه..
جرو محمد طه من تيشورت ورجعو لبيت وسد لباب وريان غادي متكي فالنموسية ماخصو خير ومحمد طه قرب حهتو وكمش حجبانو: واش مريض فك*ك غادي تسولها
ريان:(ببرود) اش فيها الواحد هو لي يتأكد من حاجتو واش كلشي فيها هو هاداك؟
محمد طه:(جلس فالكرسي قدامو وقال بضحك) ههه اوا شنو بلانك فقضية لكواا وزعمة راه كبرتي فبرااا
ريان:(تقاد فلجلسة وقال) كبرت فبراا وتصاحبت ولكن مكنتش تنوصل معاهوم لطاب ديال النعااس حدي بوش ابوش وصاف
محمد طه:(حرك راسو ) وابعدا تتعرف تبوس
ريان:(هز حاجبو) وتنعرف تانح*ي غير مكاينش مع من تت
محمد طه:(قلب راسو وقال) وتزوج وتلقى مع من
ريان:(ضحك) ههه نتزوج مالي هبيل باقي باغي نعيش حياتي ونتصاااحب
محمد طه: ولاش فارع لينا كر*ا بزوجوني زوجوني
ريان:خلينا مني ونتا قول ليااا عمرك نعستي مع شي وحدة؟
محمد طه:(ربع يديه) اه فاش كان عمري 17 لعام
ريان:(بفضول) كيفاش كانت التجربة ؟
محمد طه:باش نفهمك مزيان راه لكواا فيه وفيه يعني حنا الرجاااال أغلبية ديالنا كيح*وي غير بااش يرضي غريزتو الشهوانية لي تتكون مسيطرة عليناا فديك الساعة وكنبغيو نفرغووها ولأغلبية كيمشي عند لق*بات ينعس معاهوم وموراها يخلصها وينوض مهني ولكن فااش تتكون داخل فعلاقة مع شي بنت وديك لعلاقة فيها المشاعر النقية يعني تتبغيها ديك الساعة تيختااالف لوضع حيت فاش كاتنعس معاها مشاعرك تاهوم كيتحركو مع الشهوة ديالك واخا تتغلب ولكن لمشاعر تتكون حاضرة وتيكون أوبليجي عليك ترد لباال ونتا ناعس معاهاا وتخاف عليها..
ريان:(حرك راسو) هدا عليا مامجربش لانح*ي ق*بة ولانح*ي لي كنبغي فاااش نحرب ونرد عليك
محمد طه: أنا غير قلت شنووو كاااين وننااا ضبر راسك ودابااا قوووود عليا من بيتي باااغي نتكى
ناض ريان خااارج ومحمد طه تكى فغراشو وعينيه فالسقف ساااهي.. أما ريان نزل لتحت فين كااانت أسماء جالسة وشادة تلفونها تتخربق فيه وجلس حداهاا وقال:افين الحشايشية
أسماء:(ماهزاتش عينيها على تلفونها) فين كنتي السالوبار
ريان:كنت لفوق مع طه (طل عليها ولقاهاا تتهضر فواتساب مع شي حد وقال) ڤيكتيم جديد
أسماء:(هزات حاجبهاا فيه) سيررر تقوووود
ريان:(عطاها دقة لفخدها تاشهقات وقال)تخسار لهضرة لاش الحشايشية
أسماء:(رجعات ليه الدقة) كلببب تفووو نوووض من حدايا
ريان:(ضحك وضحكتو غير مكاتزيد تجننها) هههههه جالس فصالتنا
بعدات عليه وهي تتخنزر فيه وهو مامسوقش جر سيدرا لعندو تايهضر معاهاا وهي تتفشش عليه.. تاسمع صوت إسلام لي كان جاي لعندهوم وهو يهز راسو ولقاه واقف تيسلم على إدريس وهاز زوج خناشي كبااار فيديه.. جرات عندو سيدراا وهزهاا كيبوس فيها ونطق: توحشتيني
سيدرا:بزاف اإسلااامي
دخل لصالة وهو هازها وحط دوك لخناشي فوق السداري ومد يديه سلم على ريان وداز جهة أسماء لي سلمات معاه سلام بارد كيف عادتها عاد جلس بلاصتوو ومجلس سيدرا فوق ركابيه.. نزلات رحيل بسروال مفضفض وقبية واسعة ولابسة فولارها حيت علماتها مها بلي جاا عليها مشات بدلات بجامتها.. دخلات عندهوم وتمشات لجهتو وسلمات عليه وقالت: أهلا صافا
إسلام:الله يحفظك ونتي اش خبارك
رحيل:حمدلله بخير
تجمعو جميع فالصالة وتامحمد طه نزل عندهوم كيهضرووو مع بعضياتهووم وناشطين كيف ديما فاش كيجي إسلام لي ولى واحد منهوم وبينو وبين رحيل تكونات واحد لعلاقة زوووينة ونقييية وبزوج بيهون مرتاحيين لبعضياتهوم.. كانو جالسين تاسمعو الدقاان فلباب وناض ريان باش يحل ولكن مالقى تاشي حد خرج راسو وشاف هنا ولهيه بانت ليه الدنيا بدات تخوووى مع جاا يرجع قشع واحد الجواا محطوط فالأرض هزوو وكمش حجبانو كيشوف فيه ويقلبو مكان فيه تاشي حاجة مكتوبة.. سد لباب ودخل لداخل والجوا بين يديه وغير وقف قدامهوم نطق إدريس:شكون جاا؟
ريان:(كمش حجبانو) ماعرفتش حليت لباب ومالقيت حد ولكن لقيت هادا محطوط قدام لباب..
مدو لإدريس لي شاف فيه شوفة متسائلة وكلهوم شافو فداك الجووا... حلو إدريس ولقاا فيه كلي USB صغير هز راسو شاف فيهوم ومحمد طه قال: ديالمن هاد لكلي ؟
إسلام:(شاف فريان وقال) شكون غايكون حطوو ؟
ريان: ماعرفتش (خداه من عند باه) بلاتي نشوفو اش فيه..
محمد طه:عنداك يكون فيه شي ڤيروووس ولاشي تخربيق
إسلام:برونشيه مع التلفااازة بعدا هي حسن من لبيسي لي كيكونو فيه الضواسى
حرك ليه ريان راسو ومشى برونشاه مع التلفازة وخدا تلكوموند خدموو... فلول الشاشة كانت كحلة تاتشعل لفيديو وبان وجه رحيل وهي ناعسة وشعرها مطلوق فوق المخدة.. وشوية تقلبات لكاميرا لجنب وبانت الصورة واضحة لرحيل لي كانت ناعسة فوق النموسية عريانة ومغطية غير بكوڤرلي مبين كتافها ونص فصدرهاا وبان عاصم لي كان لابس غير شورط وصدرو عريان جاا فوق منها ومكالي بيد وحدة والثانية بدا كيدوزها على عنقها ويتلمس فكتافها وجهة صدرها عاد قلب وجهو جهة لكاميرا وتبسم تبسيمة خفيفة وبصوت هامس كالفحيح نطق: زيني...
الصدمة كانت باينة على وجههوم كاملين بدون استثناء والمنظر لي كيشوفو قدامهوم خلى إسلام يبعد عينيه بدعقة وداك شوية دلعقل لي بقا عندو خلاه يعيق بلي سيدرا تاهي كتشوف معاهوم داك المنظر شي لي خلاه يمد يديه ويغطي ليها عينيهااا... أما إدريس زير على يديه قاااالب وجهو وملامحو كانت تتبين كمية عصبيتو وصدمتووو وذهولوو.. غير شوية لي شاااااف خلاه يجعر ويحس بالنار شاعلة فيه نار لي متأكد كون خرجات غاتحرق الاخضر ولياااابس... أما ريان لي كان واقف حدى التلفازة فغير شاف لقطة وهو يتبلوكااا وعينيه خارجيين فلفيديو وعاصم لي كان دافن راسو فعنق رحيل لي مكانتش واعية على شنو طااااري ليهاا.. تبلوكاا وتاباااش يطفي التلفازة حيت التلكوموند عندو ماقدرش... وصدمتو مكانتش قل من محمد طه لي هبط رااااسو والدنيا بدات تاضووور بيه.. أما تانيرت وأسماء هادووك حكااية خرااا دموعهوووم نزلووو وخصوصا تانيرت لي كاتشوف فيديو دبنتهاااا وهي تتغتاااااصب كان رصاصة لصابتها فمقتل... هادشي كولو لي حسو بيه مكيتقارنش بواحد فلمية من داكشي لي تتحس بيه هي لي كااااانت بحاااال شي تمثااال جالسة فبلاصتهااا وعينيهااا محلولين على الجهد ومراقبين شاشة دالتلفازة... حساااات بنفسها بدا كيضياااق عليهااا ومعدتهااا تزيرات عليها وتروعاااات وقلبها كان يضرب يضررررب كأنها كاااانت فشي سباق لمرطوووون.. لفيديو خلاها ترجع بداكرتها لنهاااار فاقت ولقات عاصم مغتاااصبها بلاماتكون وااااعية.. نهار لي فقدات فيه شرفهاا ديك ليلة لي مشكّلة ليها عقدة ليومنا هادا.. كانت كارها راسها ولحمها لي قاااااسو ليها بزز منها وكانت تتمنى تزول ديك الجلدة وتحيدهااا.. عافت راسها وكرهااااتو وكون مكانش الإنتحار حرااام كون دارتها ديك ليلة حسن ليها من أنها تعيش هاد الشي لي تتعيشو داباااا.. بدات تتحرك راسها بلا وصدرها بدا يطلع وينزلو شوفتو وديك النبرة دصوتو خلاتهااا تحس براسها على شفى الانهيااار.. دموعها بداو يتكونو فعينيهااا تابدات الرؤيا مضببة عليهاااا وبزربة ضورات راسها جهة الكوان فين كان واحد ديكووور وبلاماتفكر ولو لثانية هزااااتو وشيراااات عليهاا تاضررررب التلفااازة وقسمهااا من لووووسط وطفااااات.. وعند ديك النقطة بالدات كلهوم توگضو وضارو جهتهااا وهي غوتاااااات غوتة طاااااالعة من قلبهااا وهييي تتبعد عنق لقبية عليهااا بغات تجن..
رحيل:اااااااااااااااع اااااااااااااااع
مع ديك لغوتة تكمشات سيدرا فوق رجلين إسلام ونطقات بصوت باكي وعينيها باقي مغمضهوم ليها: علااااش مامي تتغوت مااااامي
دفعات رحيل ديك الطبلة لي كانت لوسط ومع فيها روااايض مشات ديريكت جهة ريان تاضرباتو فركبتووو وبدات تتجبد فالمخااااد وضرب بيهوم وإدريس ناض عندهاا هو ومحمد طه يشدوها ساااعة مخلاتهومش تتنثر منهوم بغات تسطى بغاااات تموووووت فهاد الساااااعة.. إسلام ناااض هز سيدرااا وخرج بيهاا ديريكت وموراه أسماااء وتانيرت شادة فمهااا تتبكي وتشهق وقلبها يتقطع على كبدتهاا لي واخا دازو السنين الاأنها مزااال تتعاني من جراح المااااضي.. قرب ليهوم تاريااااان ومع كانو شادينها بزووووج فيديها وهي تضرب براسها تاتحل ليهاااا فولارها ونزل شعرهاا وكولو تخبل ليهاااا تمبقاش وجهها كيبان... قرب جهتهاا وعنقهااا بالجهد وهي باقااا تاترطى وهو مزير عليهاااا وقرب جهة ودنيها وبقااا كايهمس بصووووت حنين: شوووووو صاااافي ماوقع وااالو كلشي سالاااا وحناااا معاااااك تهدني...شوووو
بقا كيهمس ليهااا بهضرتووو وهي بدات تتهدى يشوية عليها وصوت بكاها وشهقاتهاا كانو كيتسمعوو شهقااات بحال الاكتلقف ولموووت شاداااهااا.. هدااات حركتها شي لي خلى محمد طه وإدريس يطلقوووهااا وريااان باقي معنقهااا تابدات تتنزل الأرض وهو نازل معاهااا تاطاحت على ركابيها بالجهد وبكاها تحول لآنين خاااااافت كيقطع فلقلب وصدرها باقي كيطلع وينزل تااااحس براسهاا لي كان على كتفوووو تقااااال حيت غيباااات.. بعدها عليه كيضرب فوجهها لي رجع حمرر وتانيرت غوتات مخلوعة عليهاا: رحيلل بننننتي هء هء رحييييييل
قرب جهتها إدريس تاهو ومحمد طه كيفيقوهااا ورياااان مصبرش هزها بين يديه وقاااال لإدريس: حل ليااا لباااب ابابا
مشى إدريس كيجري هز سوارت طوموبيل كيحطهوم فواحد التعليقة حدا لباب وحلو خارج لبرا فين حاط طوموبيل حلها وطلعات تانيرت هي لولة وحط ريان رحيل وراسها جا فوق ركااااب تانيرت وطلع جلس تاهو حداها ومحمد طه سد لباب وركب حدا باه غاديين بيهاا لسبيطاااار..
إسلام فاش شاف بداية انهيار رحيل خرج من الدار مع سيدرا لي مسكتاتش تتسول على مها وأسماء موراهوم ركبو فطوموبيل وسيدرا بعدات على أسماء لي كانت جالسة حداهاا أو وقفات بين لكراسى تطل على إسلام لي كان سايگ وقالت بصوت طفولي كيرعش: علاااااش مامي غوتاااات هاكاك مالهااا
إسلام:(نطق بصوت حاول ماأمكن يخليه كالم باش مايخلعهاش كثر)غير مريضة شوية وصااافي (شاف فأسماء) ياكي اأسماء
أسماء:(بعقل مرفووع) اه اجي عندي اسيدرا
سيدرا:(شافت فيها ودلات شنيفاتها وقالت) شكون هاداك لي كان فالتلفازة مع مامي؟
سؤال سيدرا خلى أسماء تهز عينيها وتشوف فإسلام لي كان تاهو مراقبهوم من لمرايا وباين فوجهو بلي محاملش راسو.. تنهدات أسماء وقالت بهدوء: شوفي فياا (جلسات سيدرا على ركابيها وقالت) داكشي لي شفتي غير تخربيق بحال هادوك لفيديوات لي كاتشوفي عند السالوبار ديال الضحك
أسماء فديك لحظة معرفات باش تحاوب تلفات حيت سؤالها كان اخر حاجة ممكن يجاوبوها عليه ويقولو ليها هاداك هو باباك ولي كان سباب لمصايب لي دازو علينا ولي باقي كيدوزو.. أول كدبة طاحت فبالها قالتهاا واخا عارفة سيدرا مغاتيقهاااش وغاتنبش باش تعرف حيت من طبعها تتبغي تكتاشف وترضي فضولهااا.. أما إسلام معرفش واش يتصدم من شي لي وقع ولايتعصب ولا اش يدير تلف واحد تلفة خلاتو غير يبقااا ساكت..
سيدرا:(كمشات حجبانها وقالت) ولكن مامي كانت ناااعسة وعريانة وممغطياش شعرها بحال لي تتغطيه فاش كايجي عندنا إسلامي ولاتتخرج زنقة
أسماء:(زادت توثرات من هضرتها ولكن نطقات بجدية) الاقلتي هاد لهضرة قدام بابا غايتقلق منك وغادي يتخاصم معاك واش تبغي تخاصمي معاه؟؟
سيدرا:(كمشات حجبانها) لا بّا ديدي دياااالي مانبغيش نتخاصم معاه
أسماء:اوا ماتبقااش تقولي هاد لهضرة باش مايسمعهااش منك واخاا
سيدرا:(دلات شنايفها بحزن) واخاا
جراتها أسماء وعنقاتهاا وهي محملاش راسها حيت هضرات معاها بديك الطريقة وجبدات ليها نقطة الضعف ديالها لي هو جدهاا.. عارفة سيدرا متعلقة بيه بزاااااف حيت فاش بدات تكبر لقاتو جنبها وهو عوضها مكان الأب وأغلب أوقاتها تتلقايها معاه هووو تاولات تتحماااق عليه ومكتحملش يتفرق عليهاا.. بدات أسماء تتلعب ليها فشعرها وعينيها على الزنقة لي كانت خاوية.. هي أنثى وداكشي لي شافت جرح كرامتها واخا ماشي هي لمعنية بالأمر الاأنها مرضاتش ومحملاتش اش وقع عساااك رحيل لي شافت راسها فديك لحالة.. غمضات عينيها وهي معصبة مكرهاااتش تسب وتغوووت غير سيدرا لي كااانت مسكتاها حيت عارفااهاا غاتشد شي كلمة وغاتصدق مبغاش طلق منهاا وهي مباغااش هادشي.. وقف إسلام الطوموبيل قدام باب ليموبل فين ساكن ونزل غادي جهة أسماء حل عليها لباب وطل على سيدرا لي نعسااات فحظنهاا.. قرب منها وهزهاا عليهاا وهي نزلات ببجامة سروال ولفوق قصير وصندالة كل وحدة فلون.. سد الطوموبيل وطلعوو لفوق وهوما ساكتين وكل واحد كيخمم فاشنو طرا تاوصل ليموبل وهي دخل جهة الصالون أما هو كمل طريقو لبيتو وحط سيدرا فوق النموسية وغطاهااا وباسها على حنكهاااا وبقا كيشوف فيهاا بعيووون دابلة وحزينة.. تنهد وخرج من لبيت غادي لصالة فين كانت أسماء جالسة وحاطة راسها بين يديها ونطق بصوت هادئ: تشربي شي حاجة
أسماء:(على نفس وضعيتها) كاس دلماااا
دخل إسلام لاكوزين لي كانت رومية فالبيض ولكحل وهز كاس دلمااا حطو فبلاطو وحط زوج كيسان خاويين وجبد من التلاجة بريق لعصير ورجع لعندها حط لبلاطو فوق الطبيلة لي كانت لوسط ومد ليها كاس دلمااا لي شداتو وجغمات منووو وهوو حيد جاكيط تابقا غير بتيشورت وبانت يديه لي كانت موشومة من لمرفق تالمعصم ديالها.. وبحروف لاثينية كاتب سمية بنتو "ليليان" جلس جنبهاا وجبد تلفونو مدوز لخط لإدريس لي مكانش كيجاوب.. موراهاا دوز لخط لريان نفس الشي وهناا حس بلي شي حاجة ماهياااش وقعااات.. دوز خط محمد طه وبعد مدة جاوبو ونطق إسلام:شنو وقع فينكوم
محمد طه:(مسح وجهو وقال بصوت مضيوم) فالسبيطار
إسلام:(تقاد فجلستو وقال باهتمام) شنو طرا؟
محمد طه:بقات تتغوت كيف كل مرة تاطاحت لينا ودابا راها لداخل باقي مقالو لينا والو
إسلام:مهم باشما كان طمني واخا
محمد طه:واخ
قطع لخط ولاح تلفونو فوق الطبلة بإهمال وقاال:راهوم فسبيطار
أسماء:(حطات لكاس بانفعال وناضت من بلاصتها وهي معصبة) بسيييف ماااطيح لينااا عاود بالاعصاااب وهي شايفة داك الزبل الاكنت أنااا وراني نترعد بوحدي عسااااك هي ماعرفتش أنااا داااك لخرااا اش باغي منااااا وااااه واش مراضين لهاااد الدرجة بيناا ولاكيفاااش ياك داك لحيوااان مااات
إسلام:(حرك راسو وقال بهدوء) هو مات ولكن عمو باقي عايش
أسماء:(نطقات بكره) بغيت ليه لعمى داك الز*مل لي حااااط عينو على وحدة محرمة عليه تفوووووو على بشاااار
إسلام:(الصمت)
أسماء:(هزات حاجبها) باقا لدابا مقدراتش دخل ليا لراسي كيفاااش نتا مكنتيش عارف هادشي كولووو ونتا ياحسرة نسيبهوم
إسلام:(كمش حجبانو وبانت على وجهو ملامح لعصبية) اش باغا تقصدي
أسماء:(هزات حاجبها) لمعنى باااين أو واضح زعمة مزوج بنتهوم وكانت عندك معاها بنت الله يرحمها ومعرفتيش بلي خوها بزناز وبلي عمها بسيكوباااط
إسلام:(ناض غادي جهتها وقال بعصبية) كووووون كنت عارف ااااش تحت راسهوم وشنو كيسواو كون گاعما كنت مزوووووج بهااااديك عند بالك عاااارف وساكت
أسماء:(هزات كتافها) أنا غي هضرت وقلت لي كاين حيت بيزاع واحد مناسب مع عائلة ومعارفش اش طاري فيها
إسلام:(قرب جهتها كثر وقاال) كيما ضحكوو عليكوووم وقدرو يمثلووو بلي راهوم ناااس مزياااان ضحكوو عليااا تاأنااا وكووون كااان داك الز*مل باقي عااايش كون قتلت لقح*بة مووو وتهنيت منوو على فعاااايل الز* لي فيه ولمرة الجايا وزني كلامك وعرفي اش تتخرجي من فمك قبل مااانوريك شي حواااايج مغايعجبوكش..
أسماء:(ضحكات بسخرية) حوايج مكيعجبونيش بحالاش مثلا هممم أتيني بمااا عندك الشريف
إسلام:(تخطاها وتمشى جهة ديك لاڤيتخين لي وراها فيها قراعي دالشراب وقال ببرود) من الأحسن بلاااش حيت غير غاتندمي على نهااار عرفتيني فيه
جبد قرعة دالشراب وحلهاا ورجع لبلاصتو هز كاس كب ليه شوية وشربو دقة وحدة وأسماء تتشوف فيه ببرود.. ماشي أول مرة تجلس مع شي راجل بوحدهوم وهو كيشرب سبق جربات الجلسة مع آدم لي بعض لمرات تيجيب لكاااو گاااع وجرباااات تمشي لبوااااط وتشوف تما أشكال وأنواع من لبشر وهادشي بالنسبة ليها شي حاجة عادية جدا.. جلسات فبلاصتهاا وقلبات وجهها عليه وهي الجلسة محملاهاااش وكون مااجابتهاش لوقت كوووون عمروو يحلم بيها..
---
نفس المشهد كيتكرر مرة خراا.. ونفس الأحاسيس كيعيشوها فكل مرة... وجوه خائفة ومتوثرة وقلوب كتتسنى لفرج من عند مولاناا.. كل مرة جاهاا الانهيار كانت ليلتها تختم فالسبيطار معلقين ليها السيروم وهي ناعسة بوجه شاااااحب وملامح محفورين بلحزن... جالسة جنبها تانيرت لي كانت دموعهاا كينزلو فصمت وقلبهاا مكوي وربي لي عالم باش تتحس وهي تتشوف بنتها لي فكل مرة كيقولو هاهي غاضيع بين يدينا تترجع مرة خراا وبفضل الله سبحانه وتعالى.. وحداها واقف إدريس كيشوف فيها تاهو وحالتو مكانتش قل من تانيرت بل كثر.. حاااس براسو مربوط بسناسل ممخلينوش يعرف اش يدير ليهاا جميع لحلول جربهوم معاهااا وكل مرة تيقول صافي هاهي نسات ورجعات كيف كاااانت تاتجي حاجة لي ترجعهوم لنقطة الصفر.. كل حصة تادوزها عند طبيبتها كانت تتخبرو بشنو طرا فيها وبحالتهاا وعارف بلي رجوع بدر قلب موازين حياتهاا وخلاهاا ترجع كيف كانت.. واخا رفع عليه شكاااية الاأن صهدوو كيوصلهااا وهادشي خلاه يزيد يحس بأعصابو كيفورو وصبرو بدا يقلال... أما ريان ومحمد طه فكانوا برا غاديين جااايين وباين فيهوم معصبين بلاقياااس.. هوما ماهمهومش شنو شافو كثر ماهمهوم هي شنو وقع ليهااا.. ريان كان تيلعب بالسنسلة لي فعنقوو وعقلوو ساهي فاش كيخمم تاحد معاااارف أما محمد طه فكان ضابط أعصابو بزز مجرد مشاف وجه عاصم رجع نزف داك لجرح دموت جيداء لي باقي مقدرش يتخطاااه.. تنهدو بزوج دقة وحدة وحد ماهضر مع الثاني حيت بصح لهضرة فهاد الساعة كانت هي اخر حاجة باغينهاا بزوج...
حلات عويناتهاا على أشعة الشمس لقوية لي دخلات من الشرجم لي أونفاص معاهاا..كانت تتحس بداتها تقيلة عليها بحال الاكانت تتحااارب وراسها كيضرهاا.. ضارت جهة لخرا لقات تانيرت غفات على كتف إدريس لي تاهو ساد عينو وجالسين فلكراسى حداها.. عينيها شافو فداك سيروم لي فيديه وبقات ساكتة.. كل مرة تاطيح فيها وتغيب كانت تتفيق على نفس لمشهد مها وباهاا جنبهاا وممخلينهاااش ومتأكدة بلي تاريان ومحمد طه غايكون براا تاهووماا.. قلبات وجهها جهة الشرجم تتشوف فالسماا الصافية وهي ساهية وكتسائل واش حياتها كلها غاتبقا تعاني؟ واش كل مرة غاتوقع شي حاجة تخليها طيح بكريز ويجيبوها لسبيطار؟ واش مغاتقدرش ترجع حياتها كيف قبل ؟ توحشات دوك الأيام لمملة على قولتها ديال زمان يامات تتجي من لاسورونس وهي معصبة من لخدمة وهمها لوحيد كيف تفك منهوم.. توحشات داك لهدوء لي كانت محتاجاااه فحياتها لي تقلبات رأسا على عقب.. حياتها لي ولات بحال شي بركااااان مرة يخمد ومرة يشعل ويفيضووو لحمم دياااالو ويدوبو أي حاجة قاسوهااا.. بقات هاكاك ساكتة وحاسة براسها مرخية تاحسات بلمسة حنينة على راسها وعرفاتها مهاا.. ضارت شافت فيها وتانيرت بتسمات ليها وقالت بصوت حنين: كلشي غايفوووت وربي كبير ابنتي
مجوباتهاش حيت لسانها تقل عليها وهاكا تتكون فكل مرة تفيق فيهاا.. عاونوها تاجلسات وجات لفرملية زولات ليها السيروم ومحمد طه جاب ليها هو وريان فولار باش تستر راسها وصابو وخرجو من تماا ساكتين وبالهوم معاهاا غير هي وحالتهاا..
أما أسماء بعد داك لحوار لي وقع بينها وبين إسلام تاحد باقي معاود هضر وغير طمنات على رحيل مشات لبيت عند سيدرا وبقات تم تاداتها عينيها ونعسااات وإسلام تاهو غفى فالصالة.. فاقت سيدرا هي لولة وغير شافت فين ناعسة وأسماء وهي تبدا تحرك فيها تاحلات عينيها وقالت:سيدرا صباح الخير؟
سيدرا:(كمشات حجبانها وقالت) نوضي ديني عند مامي
أسماء:(حركات ليها راسها وقالت) نغسلو وجهنا هو لول ونفطرو عاد نمشيو
سيدرا:بغيت نفطر مع مامي
نزلات من النموسية وخرجات لحمام بحكم سبق ليها جات لاباخطمون ديالو فكانت عرفاهاا.. غسلات وجهها وخرجات عند إسلام لي كان فايق وموجد لفطور وغير شافها وهو يتبسم ليها وقال:صباح النور خنفوستي شوفي شنو وجدت ليك
وراها الطبيلة لي كان فيهاا كيك بشكلاط لي تيعجبها شراه خصيصا ليها وحليب بالشكلاط ولكريب.. على الصباح مشى لمخبزة وجاب ليها گاع داكشي لي تتاكل.. شافت سيدرا فالطبلة ونطقات بصوت هامس:بغيت مامي
سرط إسلام ريقو وقلبو ضروو عليهاا وعلى زهرهاا لي خلاها تشوف مهاا فديك لحالة لي غاتبقا ديما فبالهاا.. هزها وباسها فحنكها وقال بهمس: نفطرو ونمشيو واخا
هزات راسها باه وجلس فالكرسي مجلسها عليه وبدا يوكلهاا وهي كانت طافية عكس حماسهاا فاش تتشوف شي لي بغااات ولي تيعجبها تاكلو.. انظمات ليهوم أسماء وهي ساكتة ويادوب شربات لماا وبقات تتسنى تاتفطر سيدرا عاد يتحركو.. وغير كملات ناض إسلام هازهاا غادي خارج وموراه أسماء تاهي لي باغا غير توصل وطمن على رحيل بعينيها.. ركبوو أو كلهوم ساكتين تااوصلو وأسماء شافت فطوموبيل باها وعرفاتهوم جاااو.. نزلات وهزات سيدرا لي مكانتش لابسة فرجليها ومشات دقات لباب وحل ليها ريان لي كان وجهو مغوبش عكس ضحكتو لي كانت ديما مرسومة على شفتو.. دخلو لصالة لقاو تانيرت قاداتها والتلفازة حيدوهاا من لحيط وحاطينها جنب.. نزلات أسماء سيدرا لي مشات تتجري فالدروج غادة عند مها...
أسماء:(تنهدات) شنو وقع
ريان:(بهدوء) كيف ديما ملي فاقت وهي ساكتة
إسلام:هاد لحال مبقاش كيعجب واش كل مرة غايوقع نفس لمشكيل وطيح وتمرض بزااااااف عليها (كان تيهضر وهو مكمش حجبانو وبدا كيتعصب)
تانيرت:الله ياخد الحق فلي كان السباب
أسماء:ياك داك لحيوااان مااات كيفااش هاد لفيديو وصل عندنا
ريان:(ضحك بسخرية) راه بااااين داك لكلب هو مولاهااا شمااااايت ينعل ديلمهوووووم
إسلام: فين سي إدريس ومحمد طه
تانيرت:مشاو يدفعو شهادة طبية لخدمة رحيل راك عارف يالاه بداتها وبزز باش لقاتها ومجاتش تجلس منها وهي باقي مكملى تاسيمانة
إسلام:(شاف فريان) ماخدامش؟
ريان:قلت ليهوم عندنا جنازة فلعائلة مانقدرش نجي
أسماء: غايكونو عيطو ليا تاأنا من لخدمة نمشي لبيتي نقول ليهوم مجياش فيا لوجع
خلاتهوم ومشات وتانيرت خرجات لكوزينة توجد لفطور واخا مكاين ملين يدوز ولكن على الأقل يعتقو روحهوم وهوما من لبارح فلعشية مواكلينش
إسلام:خايف داك لقوووواد ينشر داك لفيديو باش يشوهها
ريان:(حرك راسو) ماشي هادي هي نيتو حيت كون كانت كون دارها زماااااان
إسلام:توقع كلشي منووو داك الز*مل مريض فك*و
ريان:(وجهوو حمااار ولعرق كيضرب فجبهتو تسيف تسيفة وحدة) بربي وتوقع يتااااااندوز على ز*مل لي حطوووو بمووووووس ونتهنى منوووو الافكر يقرب بااااقي لختي بربي لاتعااااتقتك مع لقح*بة موووووو
---
وصلو ل maison de voiture وبلاصا محمد طه طوموبيل حيت هو لي صاگ فاش شاف باه مقدرش يسوگ.. نطق بهدوء:وصلنا
إدريس:(فاق من سهوتو) خليك هنا ندفعها ونجي
محمد طه:واخا
نزل إدريس ودخل لداخل وعينو كيضورو فلبلاصة وبسباب لمشكيل لي طراا مردش لبااال لسمية لي مكتوبة فلوگو.. قرب جهة واحد لبنت واقفة حدا واحد الطوموبيل ومعاها لكليان تتشرح ليه وهو ينطق بهدوء: عفاك سمحيليا ابنتي نسولك
لبنت:وي سيدي تفضل
إدريس:باغي ندفع واحد شهادة مرضية لبنتي خدامة هنا معاكوم فين ندفعهاا
لبنت:(وراتو بيرو سعيد وقالت) هناااك اسيدي
إدريس:شكرا ابنتي
مع خطى لخطوة لول باااش يمشي عند سعيد سمع صووووت مألوف ليه نطق:سي إدريس
ضار إدريس وبان ليه نوح لي كان تاهو يالاه جاااي بسروال توب فالرمادي مع شوميز كحلة طاوي كمامها وجاكيط هازو فيديه.. كمش إدريس حجبانو ونوح تبسم تبسيمة خفيفة وقاااال: مرحبااا بنااااس لخير
إدريس:(سلم عليه سلام رجولي وقال) الله يكبر بيك (عاد تفكر بلي سبق لنوح علمو بلي عندو maison de voiture ولكن عمرو مكتاب يجي عندو) نتا مول الشي؟
نوح:(بمزاح) والاجات على خاطرك هه (أشار ليه لجهة الدروح وقال) زيد مرحبا
تبعو إدريس ولخاطر باش يشوف لبلاصة فين خدامة بنتو ماعندوش حيت بصح كيحس بطاقتو كلها تبخرااات خصوصا ماناعسش مزيان.. وصلو لبيرو نوووح لي حلو وأشار لإدريس يدخل.. هنا إدريس هز راسو كيشوف فبيروه وديكورو لي كان تقليدي بتوش عصرية وتناسق الألوااان الجميل.. شعل نوح مكينة القهوة مور مقادها وتمشى جهة لمبيخرة طلق ريحة لعووود كيف لعادة وقال بصوت جوهري: تفضل اسي إدريس ماتحشمش
إدريس: يحفظك اولد الحاج
نوح:(جلس فلفوطوي قدامو بجلسة رجولية وقال بصوت هادئ) كنت ديما نتسنى زيارتك وهاهي كتابت
إدريس:جابتها الظروف احم
نوح:(كمش حجبانو) لمعنى؟
إدريس:كنت جاي باااش ندفع شهادة طبية دبنتي حيت مريضة وماتقدرش تجي وبقوة التلفة مارديتش لبال لسمية لمحال تااشفتك
نوح:(تقاد فجلستو ومال لقدام وحط يديه فوق ركابيه وقال باهتمام) بنتك خدامة هنا؟
إدريس:اه يالاه خدمات مكملاش سيمانة (جبد سرتيفيكا ومدها ليه وقال) هادي شهادة طبية هي مريضة شوية وغاتغيب واحد الربعيام على ماتصح
نوح:(مشافش فالسرتيفيكا بل كمش حجبانو وقااال بجدية) سعيد هو لي كيكون مكلف بالموظفين داكشي علاش ماعرفتش و (سكت نوح وتفكر ديك لبنت لمنقبة هي لي توظقات مأخرا ورجع قال بتساؤل) بنتك كادير النقاب؟
إدريس:اه هي هاديك بنتي رحيل
نوح:(بلامايحس على روحو لقى راسو ناطق سميتهاا بصوت تقيل وخاثر بحال الاكيتمدق لحرووف) رحييل
ماشعرش على راسو وهو كيكرر سميتها بديك الطريق وبداك لهدوء.. كيتفكر النهار جات باش تقلب على خدمة هو مردش لبال لسميتها حيت مشافش فيهاا.. ابتاسم بهدوء وهز عينو فإدريس وقال بصوت هادئ: مكنتش عارفها بنتك
إدريس:(حرك ليه راسو وقال بهدوء) تتوقع المهم نخليك دابا
نوح:(باعتراض) خليك تشرب قهوة أول مرة تزورنا ولابد مانضيفوك
إدريس:ولدي لتحت كيتسناني خليها مرة خرا
نوح:(ناض جهة لاماشين دلقهوة وقال بصوت جوهري) عيط ليه يطلع عندنااا ونفطروو هناا نيت أنا باقي بلافطور
استسلم إدريس لكلامو وجبد تلفونو عيط لمحمد طه وقال ليه يطلع لعندو.. ونوح رجع جيهة لفيكس هزو ودوز لخط لسعيد باش يجي عندو.. ثواني وسمعو الدقان فلباب ونطق نوح بصوت كالم:دخل
تحل لباب ودخل سعيد هو لول وموراه محمد طه.. قرب نوح جهة محمد طه ومد ليه يديه وقال بابتسامة خفيفة:مرحبا تفضل
محمد طه:الله يكبر بيك
نوح:(شاف فسعيد وقال بهدوء) جيب لينا فطور بلدي (ضار جهة إدريس وقاال باهتمام) تبغيو شي حاجة خرا؟
إدريس:لا داكشي لي طلبتي باركة
نوح:(رجع شاف فسعيد) راك عارف لفطور لي مولف
سعيد: واخا اموسيو ولكن قبل باغي نعلمك لبنت الجديدة لي توضفات باقي مجاتش وفاش عيطنا ليها تلفونها طافي و
نوح:(حرك ليه راسو وقال بجدية) عااارف وهاد ليام مغاتقدرش تجي ودابا سير دير لي قلت ليك عليه
كمش سعيد حجبانو من هضرتو وخرج وهو معارفش كيفاش ولد لحاج عرف أنها مجاتش.. أما نوح رجع بلاصتو وجلس قدام إدريس ومحمد طه لي عيونو كانو تيضورو على لبيرو لي حمقووو ستيلو الرجوووولي.. وفنفس لوقت بالو مع الشخص لي جالس قدامو ولي واضح أنه كيعرف باه غير من طريقة هضرتو معاه
نوح:(حرك راسو بهدوء) نهار كبير هادا
إدريس:(حط يدو على صدرو) الله يكبر بيك اولد الدار لكبيرة (حط يديه على كتف محمد طه لي شاف فباه وقال) هادا ولدي محمد طه وهوو الصغير فخوتو
نوح:(بتاسم لمحمد طه وقال) الله يخليهوم ليك ويخليك ليهوم
إدريس: آمين دراري هوما هادو دغيا كيكبروو
نوح:(ابتسامتو توسعات وحرك راسو) وايييه وحنا كنشرفو ههه
محمد طه:(كان كيحس براسو حشماان وبصوت هادئ قال) لوقت دغيا كيدوز
نوح:(شاف فإدريس ونطق باهتمام) بنتك بعدا بخير عليها ياكما عندها شي حاجة گغاڤ
إدريس:(تنهد تنهيدة طوييلة وعقلوو رجع تاني كيفكر فرحيل وحالتها ونطق) حمدلله حسن من قبل خصها غير راحة لبال
نوح:الله يفرجها عليهااا
إدريس: آمين (نطق وهو مغير سياق لموضوع) كاين شي رواج بعدا؟
نوح:ولله الحمد كل نهار برزقو
محمد طه كان ساكت وغير كيضور فعينيه بناتهووم ومرة مرة عينيه تركز فنوح وجلستوو الرجوولية وكيف تيهضر ويعبر بعض لمرات بيديه وتكميشة لحجبااان لي كايدير مرة مرة ولايمد يديه يمسح على دقنووو.. معرفش علاش ولكن حس بواحد لهيبة فيه فشكل فااارض وجودو فالمكاااان واخاا يكون ساااكت كيبان فيه مرزن وشاارب عقلو وبيما أن بااه مرتاااح ليه وكيهضر معاه بديك الطلاقة الا وأنه عرف الجوهر دياااالو كيف داااير... قطع تأملو دقان فلباب وموراها تحل ودخل سعيد ومعاه زوج دراري جايبين لفطووور.. حط سعيد طاجين لوسط فديك الطبيلة وموراهاا حط الدري لول صينيه فيها الزيت لبلدية ولعسل لحر والزبدة لبلدية ولفرماج والزيتون كحل مشرمل ولملوي سخوون باقي تايفوور ولخبر دلگمح والدري لاخر كان هاز صينية فيها براد دأتاي منعنع ولكيسان.. حطو داكشي فوق الطبلة وسعيد قال:تبغي شي حاجة خرا أموسيو؟
نوح:(حرك ليه راسو بهدوء) لا دوز تفطر
سعيد:(حرك ليه رااسو) فطرت قبيلة بالصحة والراحة
خرج هو والدراري ونوح عرى على طااجين لي فيه لبيض بلخليع ودخاخن طالعين منو وريحتووو تتشهي..
نوح:(شاف فيهوم وقال) بسم الله دووق ورد عليا لخبار اسي إدريس
إدريس:(داق دغمة لولة وعجبو وقال) الله يعطي الصحة لي مصاوبو
نوح:(كب ليهوم أتاااي وقال بضحك) هه هاد الطاجين من يدين خالتي مبيريكة مرااات سي لمحجوب لي عندهوم هنا محلابة كلشي طبيعي وديال الدااار ونقي
إدريس:(كياكل منغم) بااين غير من الريحة كتفتح النفس
نوح:(شاف فمحمد طه وبتاسم ليه) ياك محشمتي هه
محمد طه:(حرك ليه راسو بلا) كناااكل الله يحفظك
نوح:بصحتكوم
تجمعو على داك الطاجين كياكلوه وكيف قال إدريس الريحة تجدب فمبالك لمداق.. كلاو تاعمرو كرشهوم مزيان عاد رجعو الدراري جمعو داكشي ونوح نااض خلصهوم بالزايد وكيف ديما عطاهوم التضويرة وقال لواحد فيهوم:سلم على ينّاك "مك" وقول ليها فلعشية غاندوز كيف ديما
دري:واخا اولد لحاج
مشاو ونوح جاب لقهوة لي عصر كبها فلفناجين وحطها ليهوم وقال ليه إدريس: عطلناك على خدمتك
نوح:(حرك راسو ببرود ونطق) ليوم مكيناش خدمة بزاف عندي
إدريس:(كمش حجبانو وقال) لفيرمة فاش مشيت ليها الله يبارك زوينة ولجو ديالها كيريح
نوح:(تنهد وقاال بهدوء) مكاين ماحسن من الطبيعة لي تم كتريح لباااال وتفاجي على لوااحد (نطق بتدكر) حفيدتك كيف راها مع الحصص التدريبية؟
إدريس:(بتاسم ليه وقال بمزاح) ولفات وراها سماات لخيل گاع ههه
نوح:(تبسمو عينيه وقال) واه اش سماتو
إدريس:(حرك راسو وقال) سِيديلْ
طالعة فالدروج تتجري وعيونها كلها لهفة باش تشوف مهااا.. وصلات لقدام لباب ومدات يديها حطاتها على لبواني وحلاتو وعيونها لمبطنة كانو تيضورو على مهاا تبان ليها جسدها لي ممدود فوق السرير وعاطية بالضهر لباب.. بقات واقفة مدة تتشوف فيها قبل مادخل بخطوات صغيرة وعينيها السود باقيين على جسم رحيل تاوقفات جنبها ولقاتها فايقة وحالة عينيها تتشوف فالحيط قبالتها وباينة ليهااا ساهية ومحساش بوجود بنتها معاهاا.. بقات تتشوف فيها سيدرا تانطقات بصوت هامس: مامي
عيونها لخضراء لي كانو كيشوفو فلعدم لتافتوو جهة مصدر صوت بنتها لي كانت واقفة وباين فيهاا من الشوفة راه خااايفة.. ديك الشووفة لي دارت فيها بعيونها السود خلااااو غصة تكون فحلقهااا.. بقات تتشوف فيها مدة قبل ماتحل ليها يديها بمعنى اجي عندي وسيدرا لبات طلبها بقلب ملهوووف.. تسطحات جنب مها لي خداتها فحظنهاا وغطاتها ويديها كيلمسو شعرها لي كان مطلوووق وسيدرا خاشية راسها فصدر رحيل ومانطقاااتش بتاشي حرف.. تحنات رحيل وطبعات قبلة على راسها وقالت بصوت يادوب كيتسمع: أنا بخير امامي
زيرات عليها سيدرا بيديداتها الصغااار بلاماتهضر تاحسات رحيل بشي حاجة فازگة فوق صدرها.. بلاماتحتاج تفكر عرفات بلي هادوك دمووع بنتهااا وشهقات صغارين تيتسمعو منهااا.. سيدرا ممولفاش تتبكي بزااااف الافحالات قليلة وبكاها دابا بسبب خوفها على مهااا.. قلبها الصغير مكانش متحمل داكشي لي شافت فديك الشوية وهادشي عرفاتو رحيل لي تاهي عينيها لمعو بالدموع ولكن مانزلاتهومش باش ماتزيدش تخلعهااا كثرر وخلاتهاا تبكي حيت عارفة واااخا تقول لي قالت مغاتسكتهاااش.. زادت زيرات عليهاا فتعنيقتهاا بحال الابغااات تخشيهاا فوسطها وغمضات عينيهاا بكل هدوووء..
----
فالداخلة وفديك الدار لي كانت عااامرة من ديماا بماليها ليوم كااانت خاااوية ومافيها تاشي واحد من غيرووو هووو لي كان جالس فبيروه وقدامو كانو دوبياس رحيل لي كاااان خدااا ليها نهار لحمام.. باقي محتافض بيهوم ليومنا هادا واخا دازو عليهاا السنين.. وفجنبهوم كان لبيسي مشعول على تصاورها لي كان خدا ليهاا من تلفونها لي كان عند عاااصم... كانت الصورة لي محبوسة فالشاشة كيشوف فيها صورة ليها بفراشة وشعرها مطلوووق على راحتو ودايرة مك اب خفيف وتتبان صغيرة فالتصويرة.. مبتاسمة وعينيها لخضرين كيلمعووو.. كان على دراية بشنو طاااري عندهاا تماااك حيت علي كان تيوصل ليه الصغيرة ولكبيرة بحكم هو مايقدرش حاليا يكون فمراكش لسببين لول هو الخدمة لي تعرمات عليه من يامات خروجو من لحببس والثاني بسبب الشكاية لي رفع إدريس ضددو حيت بعد الشي لي وقع لبااارح متأكد بلي إدريس غايدير تاني شي إجراء قانوني ضددو.. كان عارف بلي لكلي وصلها وشافتوو وبسبابو باتت فالسبيطااار وهادشي لي دار كان باغي يبين ليها بيه أنه قدر يوصل ليها وراهو عارف فين كاينة واخا تخبى عليه وتمشي لاخر الدنيا غايلقاااهاا.. فأول نهار شافها هازة داك لبلاطو دلحليب وشاف خوفهاا لي كان واضح فعينيهاا وشاف تحديهاا بلامايشعر لقى راسو طاايح فيهااا تاولى مريض بيهاا ومهوووس لدرجة مستاااعد يدير أي حاجة باااش تكون قداموو وليه.. نهار طاح على تلفون عاصم وشاف لفيديو ديك السااااعة هرس أي حاجة كااانت قدامو مجرد مشاف عاااصم كيغاااش انتاااهك جسدهااا وهي مفيبة وكيفاااش خدااا حاجة لي ماااشي ليه... ونسى راه هاداك راجلهااا وبلي حقوو واخااا تعاااصم مكيسواش وتاهوو مكانش عليه يسجل فيديو لديك ليلة ولكن كيبقى راجلهاا.. بدر الدين كان عارف نيت عاصم وبلي لفيديو كان باغي يستعملو وسيلة يهدد بيها رحيل الامبغاااتش تنفد هضرتووو بلي غاينشرووو عااااارف عقل عاااصم وكيفاااش كيفكر ولكن لفيديو خلى بدر يجن وعينيه ظلامووو والنتيجة دياااال هادشي كااانت موت عاصم لي هو كااان وراااه.. سيفط إلياااس خلص واحد من دوك لي معاه فالشومبر باش يقتلووو وبلفعل الشخص استاغل بلي عااصم كان فلحمام كيغسل ودخل عليه غفلو وضربووو فكرشو ومجااا عاصم فين يحبسوو تابدا لاخر كيضرب فيه ويطعنوووو وكيف وصااااه بدر طعنووو خمسين طعنة وروحو مشات عند لي خلقوو. بطريقة بشعة ودنوب دوك النااااس لي قتل خرجووو فيه وهاداك لي كان كينفد هضرتو ولي بسبابو دخل لحبببس هو نفسو لي تهنى منووو بدم بااارد.. أصلا واحد قاتل خوه لي من لحمو ودموو ولي كبروو مغاتجيهش صعيبة يقتل تاولد خووووه.. مد يديه ولمس ديك الشاشة لي فيها صورتهااا وعينيه حمررررين بسباب الجوااانات لي كمى ورجع شاااف فدوك دوبياااس وهزهوووم كيشمهوم بجنووووون وكيتخيلها قدااااامو باغي يدير فيها مابغى تكوووون ليه وعمرهاا تخرج من جناااحو.. حل عينو وسرط ريقوو ونطق بصوت هامس كالفحيح: قررررريب نتلاقاااو أعمووو قررررريب..
يتبع...
التعليقات
لا توجد تعليقات بعد، كن أول من يعلق.