محتوى القصة
جالسين فالصالة مونجي والطبلة دلفطور قدامهوم..عيط إدريس لتانيرت وعلمها بلي غايتعطلوو وبلي بلامايتسناوهوم على لفطور.. كل واحد وفين ساااهي ومرة مرة تتسمع تنهيدة تانيرت لي لخاطر ماعندهااش.. دوزات شلى حوايج فحياتها وتعدبات ومبغاتش بنتها تاهي تعدب بحالها ولكن هادا هو مكتوبها وزهرها طلع كفس من ديال مهاا.. أما ريان فكان معصب تاهوو كلما تفكر لفيديو وكيفاش داك لحمااار تعدى على ختووو وهي مغيبة كايبغي يجن هووما عارفين بلي دوزات لعداب معاهوووم ولكن مكانوش عارفين لدطااااي كيف هي حيت مقدراتش تقولها ليهوووم.. مقدراتش توقف قدامهوم وتقول ليهوم راه هو اغتاااصبني واخا أنا مرتووو ماتقدرش تقول ليهوم راه بدر الدين دخل علياا لحمام وشااااف لمفاتين ديالي وكان بااااغي يتعدى عليا غير ضربتوو مقدراااااتش تخرج هادشي ليهوم ولكن قدرات تقولو لطبيبة ديالها حيت هي لي كتعالجهاا.. بصح ريان من النوووع الضحوكي ولي مولف التقشاااب ولكن فااااش كيتسيف كيولي تايخلع وهاد الصفة لي فيه نفسها لي فمحمد طه لحنين ومول لقلب لكبير ولكن ياويلك منهوم فااااش تيوليو معصبين والاجينا نشوفو لمن شابهين فهاد النقطة كانو شابهين باهوم نفسهوووم فنيفهوووم والافكرتي تقيسهوم فعائلتهوم كيتسيفوووو تسيفة مقوووودة.. تنهدات أسماء وعينيها على كاس لقهوة لي قدامها وفبالهااا شلا مطااارق.. سبق ليها وعاشت محاولة الاغتصاااااب تاهي ولكن هي عتقات راسهاا من آدم وضرباااتو ومغاتنساش ديك ليلة كيف دوزاتهااا وهي خااايفة ودوك لمشاعر لي حسات بيهوووم فديك الليلة وداك لخوووف رحيل كانت تتحس بأضعافو فديك لفترة كلهاا ومشاعر خرى لي مايقد حد يعرفهوم ولايحس بيهوم من غيرها.. هزات عينيها وشافت فريان لي كان تيلعب بسنسلتو ساهي ورجعات شافت فتانيرت لي تاهي ساهية.. وضربات بيديها فوق الطبلة تاكلهوم شافو فيهاا وهي كمشات حجبانها معصبة:داباا حنا غانبقاو هاكا وداك لحمااار غايكون وصل لاش باغي
تانيرت:وشنو بغيتي نديرو ابنتي
أسماء:(ناضت بالجهد تطاح الكرسي وقالت بانفعال) هووو هادشي لي بغااا أصلا يخليناا معصبين وكنتحرقوو على رحيل باغيهاا عمرهااا تنساااه وحنا كانديرو كنفدو ليه مابغى
ريان:(كمش حجبانو وقال تاهو بانفعال) واااااش نتي مخورة فدماااغك بغيتينااا نشوفو داك الزمرر لي سيفط ومانتعصبو ماوااالو بحال لامسيفط لينا سيري ديال الضحك
أسماء:(خنزرات فيه) وشنو بغيتي نديرو نبقاو نبكي ونحطو يد على خدناا وحنا مهمومين مكتلاحظوووش بلي فكل مرة كنعاودو نرجعوو لنقطة لبداااية أنا عارفة بلي داك لفيديو صعيب نساااوه ولكن راه الابقينا حنا متأثرين بيه راه تارحيل نفسيتها غاتزيد تدمر وتاسيدراااا واااش عرفتي لبااارح هي سولاتني شكووون هاداك لي كااان مع مهاا واش عرفتوو اش كيعني هااادشي
سكتوو كاملين كيسمعو لهضرتها لي كاانت على حق الاهوما كااانو متأثرين ومهرسين بشنوو شافو فكيفااش غايقدرو يعاونو رحيل بااش تخطى داكشي لي وقع..
إسلام:(ربع يديه وقال بهدوء) أسماء عندها لحق رحيل دابا فواحد لمرحلة لي خصنا كلنا نكونو واقفين فيهاا معاهاا تلقانا جنبهاا وتسند عليناا عارف بلي شي لي وقع مساهل على تاشي واحد ينساه ولكن انحاولو نديروها على قبلها هي وعلى قبل سيدرا.. (زير على يديه وكمل) مخصناش نخليو داك لحيوووان يفرح حيت رجع دمر نفسية السيدة
تانيرت:(مسحات على وجهها وقالت) عندكوم لحق فهضرتكوم ولكن راه ماشي لخاطرناا
أسماء:(قربات جهتها ودرعاتها وقالت) عارفة عليها خصنا نديرو جهدنا نسيوها اش بان ليك نصاوبو لماكلة لي تتعجبها
تانيرت:واخا
ناضو بزوجات كيجمعو الطابلة تاسمعو لباب تحل ودخل إدريس هو ومحمد طه وتانيرت غير شافتهوم مشات عندو وقالت بلهفة:علاش تعطلتو فين كننتو ملي قلتي ليا متسناوناااش لفطوور وأناا بالي مشطون اش واقع؟
إدريس:(شد كتافها وقال بهدوء) ماوقع والو اتانيرت إينوو مشينا دفعنا ليها السرتيفيكا وتلاقيت تما بولد لحاج هو لي كان مول الشي
تانيرت:(بهدوء) هااء يعني رحيل خدامة فل maison de voiture ديالو؟
إدريس:اه والله يكثر من خيرو قال ليا وقتما ولات بخير تجي مكاين تاشي مشكيل
تانيرت:(تبسمات بشوية) باقيين ولاد الناس
إدريس:الله يعمر ليه الدااار داك السيد عاشرت بزاف دالناس ولكن عمري شفت واحد بحالو الحاصول مشينا لكوميسارية باش نرفعو الشكاية وقالو لينا بلي داك لكلي ماشي دليل كافي بلي هو لي سيفطوو ليناا..فين هي رحيل؟
تاتيرت:(حركات راسها بهدوء) باقا فبيتها ومعاها سيدرا لحبيبة ديالي غير جاات مشات تتجري عند مهاا
إدريس:غانمشي نطل على رحيل هو لول عاد نمشي ندوش
تخطاهاا ومشى لفوق مخليهوم مجموعين فالصالة كاملين.. وصل قدام بيت رحيل ودق لباب بشوية عاد حل لباب وطل براسو بانت ليه رحيل عطياه بضهرها.. تمشى جهتها بشوية عليه وعينو عليهوم كيفاش ناعسات ومعانقاات وسيدرا مخشية فمهاا.. تبسم ليهوم بحنية وهز لغطاا قادو عليهووم وقاس شعر رحيل بشوية باش ماتفيقش وباسهاا فراسها عاد نزل جهة سيدرا تاهي باس جبهتها وبعد عليهوم خارج بنفس لهدوء وكيف ديما مكيرتاح خاطرو تاكيشوف ولادو قدامو وتحت جناحو..
ليوم الأحد وقررات رحيل تمشي لفيرمة مع سيدرا تبدل شوية لجو. فطرو مجموعين وموراها الدراري شدو طريق لفيرمة .. كانت ساهية كيف عادتها فالطريق وحاسة بخاطرها بدا يتفاجى مجرد ماوصلات لباب لكبير دلفيرمة.. بلاصاو طوموبيل ونزلات رحيل غادة هي وسيدرا عند لمدربة ديالها.. وكيف ديما دوزات حصتها فسعادة وحمااس طفولي ورحيل مرقباها تسالات ومشات سيدرا مع محمد طه وريان وأسماء يضورو ورحيل بقات تما.. عيونها الخضرااء تعلقو فالباب ديال الإسطبل لي كانت خارجة منو المدربة وهي جااارة وراها حصااان عربي أصيل.. عيونها تفيكسااات على دااك الحصااان لي كاان لونو قهوووي ومابين عينيه واحد لعلامة بيضاا بحال توحيمة.. البنية ديااالو قوووية تبارك الله ومن الشوفة سلب عقلهااا وخلاهاا ساهية فيه ومكرهاااااتش تقرب عندو وتمد يديها وتقيسووو.. مولفة ديما تتجي لفيرمة مع سيدرا وعمرها فكرات أنها تجرب الركبة على لحصان تاهي.. قربات بخطوات هادئة جهة المدربة لي غير شافتها ابتسمااات وبصوت بشوش قالت:امرحباا بعوينات الجلبانة
ضحكاااات رحيل ضحكة أنثوية ونطقات وعينيها على الحصان لي واقف وقفة شاامخة وقالت: بغيت نجرب الركبة فيه؟!
المدربة:مايمكنش هاد لحصاان راه دمول الشي وأنطغدي شي حد يركب عليه وأنا غير خرجتوو باش نروضوه شوية..
رحيل:(عينيها على لحصاان وبصوت هادئ) عفاااك غير خمسة الدقاااايق ونزل
بقات تتشوف فيها المدربة شحااال عاد تنهدات ونزلات عينيها لباسها وقالت: مكنظنش غاتقدري تركبي عليه ونتي لابسة كسوة
حركات راسها بلهفة وقااالت:نقدر ماتخمميش أصلا لابسة كولون تحتها
اللهفة لي كانت فعينيها والحماس لي لمسات فصوتها خلاهاا تبتاسم وتنطق بجدية:قربي هنا
قربات رحيل جهتها أو وقفات حداهاا تتسمع لتوصياتها بكل تركيييز..
المدربة: هانتي أول حاجة خصك تكوني حنينة معاه باش هو مايتصرفش بعدوانية راااه كيحسو والاحس بيك حنينة عليه غايرتاح ليك وتاني حاجة غاتحطي رجليك ليمنية هنااا ويدك تشد فالسرج ديالو تاطلعي وبقااي شادة فالسرج هنااا.. أنا غانبقا شادة لجااام وغانضور بيك هناا صافي وها ويااك ضربي رجليك جهة كرشوو لايصدق قالبك من فوقو تفاهمنا
حركات ليها راسها باه ونفدات هضرتها بالحرف.. الحماس لي كانت تتحس بيه خلى نسبة الأدرينالين طلع فدمهاا وهي متشوقة لهاد التجربة بالخصوص هاد لحصاان غير شافتوو تشهااات تقرب منوو وتلمسوو وتجرب الركبة فيه.. كانت فعلا الركبة عليه زوينة واخا باقي گاعمااا تحرك شداات فالسرج وبدات المدربة كاتمشى بيهاا والحصان تيتحرك بثأني وتبات.. من الشوفة باين فيه ماااشي ديال التدريب حيت الفخامة ديالو كانت واضحة لعين.. مدات يديها تتقيس شعروو لقهوي بحنية ولحصان حرك راسو متجاوب مع ديك لمسة الحنينة.. شافت فيها المدربة وقالت بابتسامة:باش كتحسي
رحيل:(حلات يديها وهزات راسهاا فالسماا ونطقات بصوت هادئ مشع بالراحة) الحرررية
كااان واقف وقفة روجووولية بسروال توب فالكحل مع شوميز فالبلوسيل خاشيها فالسروال وصباط كلاس فالكحل.. داير نضاضر دالشمش على عينيه لي كانو كيجووولو على لمكااان وكيشوف الرواااج لي كاين هاد النهااار حيت الأحد.. وفنفس الوقت كيسمع لصوت بّا سالم لي نطق بابتسامة:زارتنا الباركة أولد لحاااج الفيرمة نورات بحضور ماليها
شاف فيه وابتاسم ليه بحنية وقرب جهتو بايس راسو وبصوت رجوولي خاثر نطق: منورة بيك ابّاا (درعو بيديه وبان بّا سالم گليول عليه ونطق بصوت هادئ تتحس بالخثورية فيه) اوا كيف الأجواء هناا والعلف لي وصيت عليه على قبل الخيول وااااش جابوه؟!
قبل ماينطق بّا سالم كلمة سمعوو غوتة أنثوية خلات الكل ينتااابه لمولاتها وتاهو لي كمش حجبااانو من تحت النضااضر وعينوو تعلقوو على هاديك لي كانت راكبة فوق الحصاااان لي كااان غادي كيجري بيهااا وهي فوق منوو تاتبومبااا والمدربة موراهاا تتجري.. الحمااس باش كانت تتحس تحول لخوف بسبب هيجان لحصان لي معرفاتش سبابو.. حاسة براسها غاتموت وهي تتشوفو غادي كيجري بيها بسرعة وفجأة وقف الحصاااان وصهل بصوت عالي وهو هاز رجليه لقدااامين تابقااا واقف غار بلوراانين وجسمها تاهي تهز ورجع باللور تامبقاتش محكمة فداك اللجام لي سمحات فيه وطلقاتو مغمضة عينيها تتسنى راسها طيح فالأرض.. تاحسااات بأيادي قوية شداتهاا بالجهد قبل مااطيح وريحة رجووولية سبق ليهاا وشمااتها تغلغلات لجيوبها الأنفية وإحساس الدفء لي كان منباعث من جسموو خلاها بلاشعور منهاا تمد يديها وتشد فقااميجتو مزيرة عليهاا لثواااني وهي تتنفس بالجهد قبل ماتحرك جفونهاا وتحل عيونهاا الخضرااااء بروية كتشوف فالشخص لي عتقها ولي كان هازها بين يديه.. عينيها لخضرين الصااافين تاهو فبحر عينيه لي كااان كيشوف فيها بنظرة هادئة وبلاهوااه طول الشوفة فعينيها تافقهات على راسهاا وبدات كتململ بين يديه وهو بكل هدوء حطها فالأرض تاوقفات على رجليها وبدات تتقاد فنقابها وبصوت خافت حشمااان نطقات:شكرااا
عطاتو بالضهر غادة تتزرب فمشيتها مخلياااه متبعهاا بعينيه تاغبر طيفها من قدام ناضريه مخلياا ريحتها المُسكرة.. قلب عينيه لقدام وحك لحيتوو وبصوتو الهامس تقيل نطق بالسوسية بلامايشعر: تيوالين "لعوينات"..
كانت غادة بمشية سريعة تاوصلات واحد لبلاصة مافيها حد وهي تهز نقابها على وجهها وبدات تتنفس بزربة وجهها رجع حمررر قلبها بدا يضرب بلخعة ولحشمة وعينيها بغاو يدمعو كلما تفكرات راسها وحالتها كيف كانت وهي فوق لحصااان لي كااان تيجري بيهاا ونقابها لي تاهو كان كييطير معاهاا بسباب الريح حشمات ومرگااات من الشوهة لي تشوهات قدام الناااس.. وفلحظة كمشات حجبانها باستيعات وعينيها خرجو من بلاصتهوم ملي رجعات السينتة لور وتفكرات ديك الطيحة والشخص لي عاونهاااا.. عينيه كاااانو هوما نفس لعينين ديال ديك الليلة وديك النظرة كانت نفس النظرة الرجوولية الهادئة ونفس لونهوم الزرق.. متأكدة بلي هوما حيت حفطاتهوم من ديك الليلة لدرجة رسماتهوم گاااع وكل نهار كااانت تتشوف ديك الرسمة قبل ماتنعس.. وزيد ريحتوو لي باقا عاقلة عليها ريحة رجولية قوية وفيها واحد لملووونج فشكل..بسبب لخلعة لي شداتهاا وتحشيمة لي تحشمات مرداتش ليه لبااال تال داباا.. مدات يديها وقدات نيقابهاا ورجعات لنفس لبلاصة فين خلاتووو واقف سااعة مجبراتووش ضورات راسها فدوك النواحي بحال شي حمقة تتقلب عليه ولكن مبانش ليهاا بحال الاتشقات الأرض وسرطاااتو.. حطات يديها فوق صدرهاا وبدات غادة وهي تتشوف فلوجوه لي قدامهاا عالله وعسى يبان ليهاا.. وللحظة ظنات راسها بلي كتوهم بقوة مابغات تشوف هاد الشخص بقوة ماولات تتخايلو فوجوه النااس.. حركات راسها يمين وشمال وهي متأكدة بلي ماشي خياااال وبلي هو بصح كان هناا وعتقهااا ولكن فين مشى؟؟
كان واااقف داير يديه على سمطة دالسروووال وعينو على سعاد لي كانت واقفة قدامو حادرة راسها متوثرة.. كمش حجبانو وقاااال بصوت هادئ: ممكن تفسري ليا اشنو طرا برا؟
سعاد:(حكات يديها بزوح وقالت متوثرة) انا كنت باغا نروض لخيل ديالك وهي فاش شافتو عجبها وطلباتني باش نخليها تركب فيه وكانت متحمسة وأنا بحسن نية خليتها ركبات وماعرفتش كيفاش وقع تالحصان هااج ولجامو طلق من يدي ومشى
نوح:(لعب بلسانو ففمو وقال بصرامة واضحة فملامح وجهو) هاداك لحصااااان ماشي ديااال التدريب امدام ونتي عارفااا بلي هو مكيبغيش لي جااا يركب عليه كيفااااش دتي غلاااط بحال هادا؟
سعاد:(رجعات قالت بتبرير) فاش شفتو رتاح ليهاا وخلاها تقيسو قلت راه مغايوقع والو
نوح:(مسح وجهو بيديه وقال بسخرية) مغايوقع وااالو هه وهاهو وقع كون جات السيدة طايحة الأرض ولاعفس عليها وهو هايج فين غانوليوووو هاا
سعاد: سمح لياا اسيدي
نوح:(هز حاجبو وخرج فيها عينيه) حطي فبالك امدام داااك لخيل ماشي لي جاااا يركب عليه هاداااك عندووو مولااااه وهو أناااا وعمرررر شي حدد ركب عليه من غيررري (مسح على وجهو ورجع نطق بجدية) لمرة الجايا يوقع غلاااط بحال هاكا بلاماتسناي مني نسمح ليك واش كلامي مفهووووم (حركات راسها ورجع قال بهدوء) رجعي لخدمتك
مشات سعاد ونوح ضار شاف فبّا سالم لي كان واقف جنبو وقال بحنية:ساعف اولدي ساااعف
نوح:(جر لكرسي وجلس) هاحنا ساعفنا ابّااا وشفتي اش وقع
بّا سالم:والحمدلله ماوقع لسيدة والو
نوح:(ربع يديه وهز فيه حاجبو) نتسناوه تايوقع ابّا
بّا سالم:(قرب جهتو وقال) ماقلنشاااي ولكن نتا اولدي عااارف بحال هاد لحوايج تايوقعو والإنسان راه مامعصومش من لغلط
نوح:(غمض ليه عينيه وقال) عارف وهادشي علاش ماقطعت رزق حد ولكن راه ضروري ماانهضر حيت هاد لمرة دازت وربي لطف وأصلا راه أنطغدي هداك لخيل يركب فيه لي كااان وماشي ديال التدريب وهادشي خصها ديرو فدماغهاا (تنهد) لمهم غانمشي نشوف "أيور" (لحصان)
خرج هو وبّا سالم لي كمل طريقو لبرا أما نوح فمشى ديريكت لإسطبل.. تمشى لاخر بيت فين كان 'أيور' واقف ومعوج راسو لجنب.. خرج يديه من جياب السروال وحطهوم على جبهتو وبدا كيحركهوم بشوية ولحصاان غير حس بدوك لحركات وهو يصهل ونوح ابتاسم تبسيمة خفيفة وقال ليه: عرفتيني يااك (تيقيسو بحركات مخلين أيور تيحرك راسو معاهوم) مالك كنتي غاتقتل لينا السيدة همم (باسو فجبهتو وقال) زيد نخرجوووك شوية تساراا
حل ليه لباب الصغير وخرجو معاه و 'أيور' كان غادي جنبو بنفس خطواتو تاوصل لبلاصة لي فيه السرج وهو يديريو ليه وشد لجامو وخرج بيه من الجهة لورانية.. كان كايتمشى بيه تافجأة رجليه حبسو فمكانهوم وكمش حجبانوو وعينيه كاانو كيشوفو فيهاا واقفة قباااالتو وكسوتها كان كيطيرها الريح وتاخمارها لي كانت شاداه بيديها.. عينيها جمدو عليه وهي تاتشوفو واقف قبالتهاا وعينيها على وجهو وملامحوو وصورتو عاد قدرات تكمل فعينيها داباا بكل تفاصيلهاا.. شعرو لقهوي لي كان مرجعو لور ولحيتو لي مكبرها جهة الدقن كيف ديما.. قلبها كان تيضرب بالجهد وريقها نشف فحلقهاا وتوثر رهيييب حسااات بيه فهاد الساعة وهي واااقفة قداااامو.. أما هو فكان مستغرب لوجودها هنايا فهاد لبلاصة لي مكيوصل ليها حد وحدو شاف فيها الشوووفة لولة وهو يقلب راسو مزول عينيه وماطولش فيهاا الشوفة احتراماا ليها.. تاسمع صوتها فاش نطقات بهدوء:شكراا
كمش نوح حجبااانو فاش سمع لكلمة لي قااالت ليه وصوتها لي كااان كااالم وحنين... معرفش هي علاش شكراتو تاني ياك فاش كانت غاطيح وشدها قالت ليه شكرا إذا علاش رجعات شكراااتو؟؟ أما رحيل شكرها مكانش على قبل شنو وقع قبيلة إنما كااان على قبل ديك ليلة لي عتقها من بين يدين بدر الدين..ملي ملقاتوووش لهيه قالت مع راسها يمكن نكون تنتخيلوو هادشي علااااش يمكن هوو مكينش هناا وقنعات راسها بهاد لفكرة وكملات طريقها.. طريقها لي جااابها تال عندووو باش تأكد أنه بصح كاااين وماشي خياااال.. مجرد مقالت كلمتها هبطات راسها وتمشات غادة بحالها.. هز عينوو فيها وبانت ليها غادة بكل هدوء..مفاهم والو ومحاولش يشغل بالو بالتفكير الزاااايد تنهد ومد يديه قاس "أيور" لي كان واقف حداه وبحركة سريعة ركب فوق منو وشد لجاامو وتحرك بيه غادي من تم..
ابتسامة خفيفة كانت على شفايفهاا لي مغطين بالنقااب من داك النهار وهي كتمنى تشوفو وهاأمنيتها تحققات وقدرات تشكرووو.. توسعات تبسيمتها كثر فاش باانت ليها سيدرا جايا جهتها تتجري وشدات فيديها وقالت بحماس:مامي عرفتي كاينة لهيه واحد لبلاااصة زوووووينة فيهاا لمااا
ريان:فين كنتي؟
رحيل:(شافت فيه وتبسمات تاتغمضو عينيها وقالت) غير هناا
محمد طه:(شاف فساعتو وقال) نتحركوو
أسماء:بلااااااتي صورني لهيه
محمد طه:(كمش عينو معصب) من قبيلة ونتي تصوري معيتيش؟؟
أسماء:وماااالك تتغوت علياا
محمد طه:قلبي على لي يصورك
تخطاها غادي يتفرج على لخيل وهي شافت جهة ريان وسبلات ليه عويناتها تانطق: زيدي وكلت عليك الله
جراتو وتمشاو لجهة واحد لجليسة بلخشب دايرينهاا كاستراحة لناااس زوووينة وكلها مغطية وضاير بيها الشجررر والربيع تتحمق.. جلسات أسماء تتبوزا وريان تيصور تاطلع ليه الزمر فالراااس وحط ليها تلفونهااا وزاد..
سيدرا:(جرات رحيل من كسوتها وقالت) مامي علاش ماتركبيش تانتي فلخيل شوفي سِيديلْ گاعما فيه لبيتيز وزوين
رحيل:(تنهدات فاش تفكرات الشوهة لي طرات وشافت فيها) وهاد سِيديلْ الالة ولا ديالك
سيدرا:(جمعات شنايفها وقالت ببرائة) اه مامي هاداك ديالي بوحديتي
هزاتها رحيل وتمشات بيها جهة محمد طه لي درع رحيل وهي تكات راسها عليه.. لي شافهوم فالدقة لولة يقول غير راجل ومرتوو حيت تباركالله محمد طه طووويل وعااامر وكيبان كبر من عمروو وتارحيل من نوع لقصييير عليها مكيبانش لعمر عليها.. عنقاتها سيدرا وعينيهوم على واحد لخيل فلبيض راكب عليه واحد وتيتدرب.. انظم ليهوم ريان وأسماء وموراها تحركو مجموعين غاديين لبراا.. ركبو فالطوموبيل وشدو الطريق وهاد لمرة كانت رحيل تتجاوب معاهوم ومن الشوفة باااين بلي هاد لخرجة ريحاااتهاا وهادشي شافوه وفرحوو ليه.. دازو على واحد لمخبزة وشراو لمملاحات وكملو طريقهوم..كانت تانيرت بوحدها لي كاينة وخدامة كيف ديما من لبيسي وتلفون بحكم خدمتها بعيدة.. تبسمات ليهوم وقالت: هاي هاي شنو جبتو ليا
سيدرا:(قربات جهتها وقالت بابتسامة) تانيرت إينو جبت ليك لحولات بزاف
تانيرت:(ضحكات تتسدو عينيها وقالت) لحلوى ماشي لحولات هههه
ريان:(تحنى باس مو فحنكها وبعز حنك سيدرا تاغوتات وقال) حلوة لديلمك
سيدرا:(حطات يديها على حنكها لي حمار وقالت مغوبشة) ماتبوسنيش
ريان:(حرك راسو) متأكدة؟؟
سيدرا:همم
كمش حجبانو وسيدرا تبسمات وهربات ليه وهي تاضحك وتغوووت وريان ورااها باغي يشدهاا وهي نقزات فوق السدادر روناتهووووم ولمخاد طيحاتهوم وصوت ضحكاتها تيتسمعوو وإيڤانا تبعاها تاهي تتنقز وبدات تكبر.. تبسمات رحيل ومحمد طه حرك راسو بلاحول وتانيرت حاطة يديها على راسها وغوتات: عااااد قاديت الصااااالة ونتوما تترونوهااا
شد ريان سيدرا وهي تتهرب وتتخرى بالضحك وهو تحنى كيبعز فيها ويبوسها لعبهوم هاكا دااااير وديمااا هو وياها هاكااا.. مطلقهااش تاولات كلها تتنهج وشعرها لصق ليها مع لعرق وقربات جهة محمد طه وصدرها كيطلع وينزل وقالت: مودي طيشني فوق
محمد طه:هي لولة اروح مودي
ناض وهزها وهوووب لاحها فالسماا وهي تاضحك وعاود شدهااا ورماهااا ورحيل شدات على قلبهااا وقالت: غاطيحهاااا ليااا اويلي نزلهاااا
تانيرت:(بدات تتجمع فوق الطبلة وقالت) طيحي نتي وماطيحش هي
سيدرا كلماا هزها ولاحها كلما ضحكتهااا تتزيد تسمع تيعجبهاا تلعب معاهوم بهاد الطريقة وملي كانت صغيرة وهو كيدير ليها هاكا تاكبراااات.. نزلها وقال بتعب:براكة عييييت
سيدرا:(باستو فشفايفو) حبيبي
ريان:(هز حاجبو) وانا شكون؟
سيدرا:(بخبث طفولي) بوعووو هههههه
طلعات تتجري فاش شافتو غايتبعهاا وريان حرك راسو وهو مبسم ورجع تيقاد لبلاصة لي رونوهاا.. مشات رحيل لبيتها باش تبدل وسمعات تلفونها كيصوني.. جبداتو من الصاك ولقاتو إسلام..
عضات على شفتها وهي حشمااانة منو خصوصا بعد داك لفيديو لي شاف ولي محشمهاااش غير مع إسلام إنما مع مالين دار كولهوم.. ورغم دلك جوبات بهدوء: إسلام صافا
إسلام:(بابتسامة هادئة) حمدلله ونتوما بخير واحد لخنفوشة لباس عليها
رحيل: حمدالله هاهي تتكبر
إسلام:رجعتو من لفيرمة كيف دوزات حصتها
رحيل:كيف ديما بلحمااس وي حنا فالدار
إسلام: واخا أنا نيت قريب ليكوووم
رحيل:متحتاجش عراضة
إسلام:الله يكبر بيك اجي سيدرا واش محتاجة لشي حاجة نجيبها ليها؟
رحيل:لا كلشي عندها بلاماتشقي راااسك
إسلام:مهم تانجي ونتشاوفو خليت ليك الراحة
قطعات معاه ومشات تبدل حوايجها ببجامة مستورة قبل متنزل لتحت باش تعلمهوم بلي غايجي واحا أصلا ولفوه كيجي عندهوووم ديما..
---
وقف إسلام طوموبيلتو جنب الطريق ونزل داخل لسوبر مارشي لي تماا هز شاريو وبدا كياخد فالسقاطة كيف ديما لسيدرا.. عمر ليها الشاريو بالشكلاط جميع الأنواع والشيبسات والمكسرات ولعواصر لگلاص أي حاجة تتحماق عليها خداها ليها.. هز داكشي ومشى لاكيس يخلصو وهو يتلاقى برنيم كانت تاهي تتقدا ابتسمات ليه وسلمات عليه:أهلا صافاا عليك
إسلام:حمدلله ونتي مزيان
رنيم:صافاا هاحناا (شافت فشنو خدا وقالت بضحك) غادي عند سيدرا؟
إسلام:اه توحشتها
رنيم:تاأنا من نهار طليت على رحيل نشوفها كيف بقااات معاودش مشيت عندهوم تشغلت بلخدمة وليوم لي عندي خاوي مشيت فيه لحمام وقضيت شغلاااتي ودابا كنتقداا اشنو خاصني فالدار..
إسلام: الابغيتي يالاه معايا دابا
رنيم:واخا ندي هادو لدار ونلحق عليكوم
جبد إسلام كارت گيشي ومدها لبنت لي فلاكيس وقال: قطعي تاتقضية دلبنت
رنيم:(شافت فيه) إسلام
إسلام:(قاطعها) شوووو تحركي
هز تقضيتو وعاونها تاهي فداكشي لي خدات وخرجو لبرا فين كانت طوموبيلتو حط داكشي فلكوفر وركبو بزوج غاادين لدار رنيم..
إسلام:باقي معاك لبنت لي كارية نتي وياها؟
رنيم:اه مي مشات لبارح وغاتبقا تما سيمانة وأنا نيت غانمشي لعند عمي إدريس كيف ديما
إسلام:حسن ليك متبقايش بوحدك
رنيم:اه احم إسلام
إسلام:(شاف فيها ورجع شاف فالطريق وقال) شنو؟
رنيم:(عضات على شفتها وقالت بتوثر) عيطااات ليا
إسلام:(كمش حجبانو) شكون؟!
رنيم:(نطقات بين شفايفها) ميس
شهقات رنيم من داك لفراااان الصيك لي جاااا على غفلة وخلعهااا وشافت فإسلام لي كان مزير على لڤولون وبانو لعروق لي فيديه منفوخين.. وجهوو رجع حمررر وعينوو ظلامووو مجرد مارجع سمع سمية هاديك الإنسانة لي قلبات ليه حياتو سفاها على علاهاا ولي خدات منو أعزز مكيملك بنتووو..
رنيم:إسلام
قربات يديها باغا تقيسو وهو يضور بالجهد تاخلعهااا وغووووت تالدفاااال ترش من فمووو وقال:ماااانعوووودش نسمعك جبدتي سمية ديك لقح*بة واااااااش كتسمعي
رنيم:(حركات راسها وهي مخلوعة)
إسلام:(هز صبعو فوجهها وقااال ) ديك لقح*بة خرجتهااا من حياااااتي والاااااجاااب الله سخن عليك ك*رك وعاودتي جبتيهااا غنكعى عليك مزيان ارنيم
رجعات حركات راسها باه وسكتات وهي مخلوعة من تسيفتوو.. هي عارفاه من النوووع لحنين ولكن من نهار ماتت ليليان تقولي هزيت إسلام وحطيتي واحد اخر بلاصتووو.. تقادات فبلاصتها وتنهدااات من حقوو يتعامل هاكا وكثر هي مدارتش لقليل فحقوو... أما هو تنهد وديمارا الطوموبيل مكمل طريقو فسكااات.. كيتسمع غير صوت أنفاسو لي كانو كيبينو مدى عصبيتوو.. وقف قدام باب دارها ونزل معاونها تاهبطات تقديتها وحطها ليها قدام لباب ونطق ببرود:كنتسناك
رجع لطوموبيلتو وجلس فيها وهي تنهدات وجبدات سوارتها من الصاك وحلات لباب وبدات تهز فلخناشي وتحطهوم حدا لباب عاد سداتو وكملات طريقها لداخل ولكن مجرد ماوصلات لصالة وقفاات بجمووود وعينيها خرجوو من بلاصتهوم والخناشي لي كانت هازة فيديهاا طاااحو..
عينيها خارجين فديك الصالة لي كانت مقلوبة سفاها على علاها تقولي لحرب دااازت فيهاا.. تاحاجة مبقات بلاصتهاا وتامن التلفازة الصغيرة لي كانو مركبين فالحيط تقلعات والسلوكا بقاو مدلين.. أما السدادر كلهوم مقطعين وديك لعمارة ديالهوم خارجة ولمخاد تاهوما.. واحد لحالة خلاتها تشوكاا ومبقاتش عارفة اش دير واش تزيد لداخل ولاتخرج على برا.. بدات كلها تترعد ورجليها غادين بيها لبيتها لي تاهي كانت حالتها كلشي تهرس لي برودويات ديالها ولمك اب كلشي مشى ليهااا تامبقااات فيه تاحاجة لي تجمع لحواايج مرونين وشي مقطع.. قلبها بدا يدق مشات تتجري لبيت لبنت ومدات يديها وحلات لباب وهي توقف تتشوف فالبيت لي كانت مقادة عكس بيتهاا.. بقات غير تتشوف مفاهمة وااالو رجعات سدات لباب أو وقفات حاطة يديها على راسها فاش حلات لباب مكانت تاشي حاجة تتبين أنه تفرع يعني لي دخل غايكون دخل بالساروت تانيا لبنت لي معاهاا مكيناش ومشات لتطوان حيت تما فين تتسكن.. سكتات رنيم وبدات تتجمع ديك الروينة ونسات بلي إسلام كيتسناها بقوة الدعقة والصدمة لي تلقاتها فاش شافت ديك لحالة.. بدات تتجمع لي غايتجمع تبانت ليها وراق محطوطة فبيتها فوق الطبلة.. هزاتها وحلاتها لقات فيها زوج كلمات "عيني عليك" كمشات حجبانها وقلبها بدا يدق بلخوووف شكون هادا ؟ زعمة يكووون بدر الدين عمهااا؟ هادا أول شخص طاح فبالهااا ولكن علاش عاد دابا تفكرها وهادي خمسنين وهي بعيدة عليه ومشافتوش وهو نفس الشي حدها كاتشوف علي لي ديما لاصق فيهاا... مشات تتجري جمعات حوايجهااا لي بقاو صحاحين وگاع داكشي لي ديالهااا وخرجات من تما لقات إسلام باقي كااااين كيتسناها.. حلات لباب لوراني حطات فيه صاكها ورجعات لقدام جلسات حداه وهي تستقبلها ريحة لگارو لي كانت مخلطة مع ريحة برفاااانو.. مشافش فيها حدو قلع وكون أصلا شاف فيها غيبان ليه وجهها لي صفااار بالخلعة وعينيها لي بياااضو.. ساكتين تاوصلو لقدام باب الدار ديال إدريس وتلاقاااو نيت معاه تاهو يالاه رجع من الگاراج..
إدريس:(سلم مع إسلام ونطق بهدوء) مرحبا بيكوووم (شاف فرنيم لي لخلعة باقا شاداها وكمش حجبانو وقال) بنتي رنيم نتي بخير؟؟
ضار إسلام شاف فيهاا وفوجهها وعند بااالو ظن أنها باقي متأثرة من غواتو وهضرتو لي قال ليها قبيلة عليهااا ماحكرش ولكن هي بيها حاجة خرااا..
رنيم:(حركات راسها باه) اه احم غير غايكون ضربني لبرد وصافي
إدريس:ردي لبال لراسك ابنتي (حل ليهوم لباب ونطق) دخلووو
دخل إسلام هو لول وفجنبو إدريس وموراه دخلات رنيم لي كاضور عينيها وتتقلب عليهاا تشافتها واقفة مع سيدرا ببيجامة كولون ولفوقاني ديالو قصير وشعرها جمعاه شفينجة مخربقة أو وجهها مافيه تانقطة من لمك.. شافت فيهوم أسماء وغير جات عينيها فإسلام وهي تأفأف.. ماعندهااش معاااه ومكيتسرطش ليهاا وباااقي تتحس بلي مخبي تحت راسو شلا حوووايج وقضية أنه معارفش تريكة عاصم اش تتسوى مبغاتش تسرط ليهاا نهائيا... مد إسلام يديه باش يسلم عليها وهي تبسم وتخطاااتو فحركة مفروووطة وعاقت بيها رحيل وتانيرت.. أما هي قربات لعند رنيم عنقاتها وهمسات بينها وبين رنيم:افين القح*بة غبرتي
رنيم:(بهمس)بغيت ندوي معاك بلافرطة
أسماء:شواقع؟
رنيم:بلاتي نسلم
مشات تسلم عليهوم وشدات سيدرا لي كانت تاطل فالخناشي لي جاب ليها إسلام باستهاا ورجعات شافت فأسماء وقالت بهدوء:أسماء ديني لبيتك نمشي نبدل علياا
أسماء:واخا زيدي
طلعات معاها أسماء وغير دخلو لبيت وطرقوها وهي تنطق:اش واااقع ليك؟
رنيم:(مدات ليها لورقة لي كانت مكمشة وماهضراتش)
أسماء:(قراتها) عيني عليك شكوووون كتبها ليك
بدات رنيم تتعاود اش طرا ليهاا وأسماء تتسمع ليها وعينيها محلولين على الجهد ممتيقاااش تسالات ونطقات بخوف:بدر هو مول لفعلة باااين
أسماء:(بعصبية) هاد لقلا*ي مغااااديش يجمع كر* معاااانااا أو بزاااااف ونتي علاش مقلتيهااش لاخر وتمشيو ديكلاريوووو
رنيم:عند بالك هو غايخلي دليل وراه هااا باقي متتعرفيهش عليهااا تتهضري راه رحيل لي عشراتو تقول ليك خبارو هاداك راه أكبر مريض شفتووو فحياااتي واش غير جات رحيل وخافت منووو ودار ليها عقدة وخرج ليها على نفسيتهااا واحد قاتل خووه ااعباد الله خوووه راه يقدر يدير كلشي هاداك توريني فيه..
أسماء:(عنقاتها فاش شافتها تتبكي وقالت بهدوء) شووو صافي سكني معانا وهني راسك ياك بابا قالها ليك نهار لول بابنا مفتوح ليك
رنيم:(بصوت باكي)كنت باغا نعول على راسي ساعة مغايخليونيش عليهوم هء هء
كان جالس فطوموبيلتو بعيد على دار إدريس عينو كااانو على لباب وكان ساكت.. عارفها غاتكون خايفة وأصلا هي راه كابرة قدام عينيه وعارفها واخا تدفع الجبهة الاأنها خوافة.. حرك علي راسو ونطق بهدوء: عيني غايبقاو ديما عليك ارنيم..
ليوم نهار زوين عند نوووح وعلاش لا وليوم جداتو وجدو غااايجيو من لبلاااد.. مدة مشافهووومش وتوحشهوم بزاااف.. نازل من الدروج بسروال دجين كحل مع تيشورت كحلة وجاكيط فنفس اللون وشعرو لقهوي مرجعوو لور ولحيتو نقصها شوية على كيف كانت.. مگانة رجالية تتبري فمعصم يديه وخاتمو دالنقرة لي فيه جوهارة كحلة فصباعوو.. ريحة برفانو تخلطات مع ريحة لباندوش والشومبواان.. قربات جهتو رحمة لي كانت كيف لعادة لابسة لبلدي.. قفطان ديال الدار فلون لكحل مخدوم بالراندة وصندالة عالية وشعرها لكحل مطلوق ولايحة عليه شااال.. تبسمات ليه أو وقفات جنبو تادرعها وباسها فجبهتها ونطق: يمّا كلشي واجد؟
رحمة:بيت لحاجة ولحاج واجد وتالماكلة لي كتعجبهوم وجدتها وعلى حساب جدك لي مكياكلش السكااار غير تهنى أيوينو "اولدي"
نوح:(شاف فساعتو وقال) تعطلو قبيلة قال ليا منير راه دخلو لمراكش
رحمة:راك عارفة الزحااام لي كاين فمرااكش وخصوصا بدا يظلام لحال ومع لوقت بدا يسخان الناااس تتخرج تفوج على راسها
نوح:(حرك راسو وقال بجدية) داك ولدك علمتيه ولاكيف لعادة خااارج سهران
رحمة:علمتو فالصباح غير تهنى
سمعو صوت لخطاوي وطالون وضارو جهة بيسان لي كانت جايا جهتهوم ولابسة كسوة طويلة تتجي محزومة جهة الصدر وسباط طالون كيف مولفة واخا راه فالدار تتلبسو.. شعرها لقهوي طالقاااه ومكتافية بغوووج أليڤغ فالحمر وريسيل فقط.. بتسمات ليهوم وقالت:باقي موصلوش
نوح:(درعها بليد لخرا وباس راسها وقال) مزيان دابا
بيسان: مزيان احبيبي
جات السعدية تتجري ونطقات بحماس:هاهوما جاااو اولد لحاج
بعد عليهوم نوووح وتمشى بخطواات سريعة جهة لباب تبانت ليه جدااه داخلة مرا كبيرة وقصيرة ولونها بيض كيف الثلج وعينيها زرقيييين وكيبريو كيف لجووووهر وحروفهاا شهبييين.. واخا وجهها كان عامر تجاااعيد وتكماااش الاأن الزين بااقي باااين فيهوم وباينة بلي فصغرها كانت آية فلجمااااال.. لابسة جلابة مليفة ودايرة فوقهاا لكاب ودرة ديراهاا عادي.. شافت فيه وتبسمات وعويناتهاا تغمضوو وتكميشات لي جنبهوم زااادو برزووو.. قرب لعندها نوح وتحنى معنقهااا تمبقاااتش تتباااان.. كيبوس على راسها ويعاااود وهي تاضرب على ضهرووو بحنية.. بعدها عليه وباس جهتها وتحنى باس يديها بزوج وقال بالسوسية: تاساااانو ياغي أومارغ نم "كبيدة توحشتك"
زاينة:(بدات تضرب على كتافو ونطقات بصوتها لحنين) أورتزريت نكين "مشفتيش أناا" (شدات وجهو وقالت بحنية) ايهيااانك تضاعفت ايونيو " ضعافيتي اولدي"
نوح:(رجع باس راسها) ايسيكاا تكيت منشك وصافي "غير شحال هادي مشفتيني وصاف"
تسمع صوت رجوولي من ورااه لي نطق: تبيناااك غار جداك أمّا تيماااك تتوت "بانت ليك غير جداتك اما جدك نسيتيه"
هز نوح عينيه وشاف فجدو لي كان واقف على بعد أمثار قليلة لابس جلابة دالصوووف فالرمادي فوق من الفوقية الطويلة لي فلبيض وداير على راسو شابو ديال لفرنسيس وملامحوو كتبااان صارمة ولون بشرتو بحال لون نوووح تماما.. تبسم ليه نوح وقرب لعندو بااااس ليه راسو وكتفو وقااال بضحك: سناااغ ايساكداغ توشكا لغيرة اتيما "عرفت جاتك تاني لغيرة اجدي"
لحسن:(ضربو على كتفو ونطق بابتسامة) أوا هااان اداغور تباسلات " اوا عنداك دير لبسالة "
نوح:(هز حاجبو ونطق بمزاح) تسانوو أياااد " كبيدة ديالي هادي"
مشى درع زاينة لي حناكها غير مزادو حمااارو من هضرتهووم وخصوصا نوح لي ديما كيحشمها قدام الناااس ويبدا يتغزل فيها تاكيخلي جدوو يغير عليها.. قربات رحمة عندهوم سلمات عليهوم تاهي بترحااب وتابيسان نفس الشي وتخشات فجدها تتفشش عليه.. دخلو لصااالة لي كااانت مفرشة بطلامط جداد فالأخضر ملكي ولخياطة ديالهوم أخر مكاااين.. ثلاتة دالتريات مدلين من السقف وفيها تلاتة ديال الطوابل دلعرعاااار ولسوندغي ديالهوووم والتلفازة قدها قداااش شادة لحيييط.. كانت صالة كبيرة يجري فيه لخيل.. جلسو كاملين ونطقات زاينة بالسوسية بحكم متتعرفش تهضر بزاف بلعربية وتتفضل تهضر لغتها لي مولفة من نهار حلات عينيها فالدنيا
زاينة:واااسعدية وااااسعدية اشكيد اتااا "اجي"
سعدية:(وقفات قدامها وقالت تاهي بالسوسية) نعام اجدة؟
زاينة:هاااان شاكوش لي يگان أسگااان ايلااا گيس أبوقااال أوملوو دتقرعاااي ن أرگان دتامنت تاحوريت أولا زبدة تبلديت هاااان أتندااااغ أورترزيمت أحبونو أغتندگيغ باااش أدور فيّن " راه داك الصاك لكحل فيه غراف دأملو وقراعي دأرگان ولعسل لحر وحتى الزبدة بلدية عنداك تهرسوهوم راه طريق كولو وأنا ديراهوم فحجري باش مايتكبوش"
سعدية:صافي واخا
زاينة: لمهم رار لعاقل "ردي لبال"
مشات السعدية ونوح جر جداتو وباس راسها وقال بابتسامة خفيفة: زاينة نوو تهليد داغ گيتي "تهليتي تاني فيا"
رحمة:(بتسمات) ماستعدبت أگيونم اخالتي "علاش عدبتي راسك"
زاينة:إيميك نيروووان دلبوروك نتمازيرت كياااان ابنتي "شوية ديال البوروك دلبلاد هادوك ابنتي" (ضورات راسها يمين وشمال وقالت) مانيغ إيلا بوگايو لينم "فين هو داك بوراس ديالك"
مسح نوح وجهو بيديه وشاف فمووو بشوفة دياااال ها لي مبغيناااش تااااني ورجع قلب وجهوو ورحمة سرطات ريقهاا ويالاه بغات تهضر وهو يدخل رؤوف لصالة وداير يديه فجيب لقبية لي لابس فالكحل وشعرو لقهوي مرجعو لووور..
رؤوف:هايِّ أوشكيغد اجدة "هانا جيت اجدة"
تحنى جهتهاا باس راسهاا وعنقاتو تاهي تاتفرغ وحشهاا ليه عاد مشى سلم مع جدو تاهووو وجلس جنبو وقال:على سلامة نون "على سلامتكوم"
زاينة:(جمعات صبعها السبابة ولوسطى وبدات تتحركهوم جهتو وتتحلف عليه) ايهايااانك ابوگاااايو أوراغتسقسااات غجداك دتيماك " احياني عليك ابوراس مكتسولش فجداتك وجدك"
رؤوف:تيوياااغ لوقت اوصافي لمسامحة "غير مع لوقت وصافي الله يسامح " (ناض باس ليها راسها ورجع جلس بلاصتو وشاف فجدو) مانيك انتگيت شوية "كيف بقيتي شوية"
لحسن:هاياااغ الحمدلله "هاحنا"
بيسان: ياك أوراك داغ إيغلي السكار اتيمانو " ياك مطالعش ليك تاني السكار اجدي"
لحسن:(حرك راسو) أوهوي ايلي ساعتاد الشكرو لله "لا ابنتي هاد الساعة نشكرو الله "
بيسان:صباح راديك مونغ سنسبيطار بااش اتسكرت تحاليل "غدا غانمشي معاك لسبيطار دير التحاليل"
لحسن:واخا ايلي "ابنتي"
جات السعدية هازة معاها صينية فيها طباسل ديال الزيت لبلدية ولعسل لحر والزبدة بلدية وأملو مخلط بأرگان وأرگان بوحدو زيت وزيتون كحل مشرمل تاهو حطات الطباسل ومشات جات لبغرير والملاوي ولحرشة دلفران ولكيك دالشكلاط ولمخامر والرغايف معمرين وجابت لبريوات ولحلوى لبلدية ولخبز دلگمح وحلوى بلكريم طبقات.. عمروو ديك الطبلة تمبقا ليها فين تحط وجابت صينية دلقهوة وليطاس ديالها وصينية دأتاي ونطقات بهدوء: هاد لبراد مافيهش السكار والنعنااع صييك اجدي
لحسن:الله يرضي عليك ابنتي كبي واحد لكاس..
كبات ليه كاسو وسولات لخرين اش بغااو وغير سالات وهو ينطق نوح: عيطي لخالتي يامنة واجيو تاكلو
سعدية:واخا
مشات لعند مها عيطات ليها وجات لعندهوم سلمات عليهوم بخجل وجلسااات.. نوح كيعتابرهوم من العائلة وديما فلماكلة تياكلو معاهووم وتارحمة تتعامل معاهوم مزيااان.. تجمعو على داك لكسكروط ونوح تياكل فلخير لي جابت ليه جداه ويتبنن فداك لخير ديال بلادهوووم..
على نفس الطاولة فدار الأسمراني كانو مجموعين تاهوما على لكاسروط فأجواء عائلية زوينة وطبعااا مع سيدرا لي ديما منوضة ليهوم الطرررح وكيف عادتها كانت جالسة عند جدهاا لي تيوكلهاا.. رنيم حاولات تنسى شنو طرا معاها ومجبداتش لموضوع قدام حد خصوصا رحيل حيت مبغاتش نفسيتها تدهور يكفي أسماء لي قالتها ليهاا ولي نصحاتها بأنها تبقى معاهوم حيت بما أنه وصلات بيه يدخل لدار فاكيد يقدر يدير كلشي وهي بوحدهااا..
سيدرا:(شافت فإسلام) عرفتي إسلامي سيديل ليوم بستو فجبهتو وهو يهبط لياا راسو باش نزيد نبوسو
إسلام:(ضحك) ههه يااك هي ولا كيعرفك؟
سيدرا:(ضارت جهة إدريس وكلات ديك الدغمة لي صاوب ليها ورجعات شافت فإسلام) ااااه حيت هو ديالي
إسلام:علاش سميتيه هاد السمية ملين طاحت عليك؟
سيدرا:هااء وساهلة (بدات تتعبر بيديها وتتشرح ليه) سِيديلْ سِيد من سيدرا سميتي و يلٍ من رحيل سمية مامي والاجمعتيهوم غاتعطي سِيديلْ
تبسمات رحيل بحب وعينيها لمعووو لبنتها وبلاماتحس واحد الدمعة طاحت ليها ومسحاتها بالزربة فاش تفكرات نهار كانت باغا تهنى منها ولاحتها فلبركاسة.. حدرات راسها وديك لغصة تكونات فحلقها واخا تعياا ماتعوضها مغاتقدرش تنسى اش درات فحقها وهي بريئة.. عينين إدريس مانزلوش عليهاا وعارفهاا هي فاش تتفكر ولكن ماهضرش حدو بقاا مراقبهاا بعينيه وبس..
تانيرت:(شافت فأسماء وقالت) كبي لإسلام لقهوة راه خوى كاااسو
تأففات أسماء وناضت هزات التلمووس لي كااانو حاطين فوق لطابل الصغيرة ورجعات جهتو أو وقفات بينو وبين رياااان وحلات التلمووس وبدات تتكب ليه ومع التلموس حلاتها بزاف بدات القهوة تتهرق وماتجي غير على فخد إسلام ومع كاانت سخونة كحز بزربة وأسماء بالدعقة دفعات لكاس لي كبات ليها وجابتو ليه حدا لمسائل.. ناااض بالزربة كيبعد السروووال بيديه و غادي جهة لحمام..
ريان:(ضحك وهمس لمحمد طه) ههه سلقات ليه بيضاتو ههههه
محمد طه:(جاب ليه الضحكة) هه اناري شحال قاصحة الدقة
ريان (حط يديه على مسائلو وقال) اااح اااح حسيت بيها بحال الاكباتها عليا أنا
أسماء:(شافت فريان) نكب ليك قهوة
ريان:(خرج عينيه وقال بدعقة) لااااا مبغيتتتتش اختي شكرا الله يحفظك السلام عليكوم ورحمة الله تعالى وبركاته إنا لله وإنا إليه راجعون
محمد طه جاتو تاني لافوبي ديال الضحك من هضرة ريان لي تدعق وخلط الزمر كولو أما إدريس ضور راسو وتبسم بلخف حيت فاهم ولدوو اش كيدور تحت راااسو وشاف فتانيرت لي حركات راسها وقالت:لخلعة ومادير تت (شافت فأسماء) صافي غير خلي لي بغا يكبها لراسو
محمد طه:غانمشي نشوف إسلام
ناض غادي عندو لقاه خارج من لحمام ودجين لي لابس مطبع بلماا بحال الا باال شاف فيه محمد طه وقال:صافا؟
إسلام:(بسخرية) كانت غاترزيني فمول الشي..
زاد ضحك محمد طه تاولى وجهوو حمر حيت بصح لموقف ضحكوو وزيد هضرة إسلام لي قاااال.. وقف تيكحب وينش بيدو على وجهووو تابرد وهو يقول: تيوقع لغلط
إسلام:(حرك راسو وقال) ختك ياإيما حولة ياإيما محلفاها فياااا تت
محمد طه:زيد نعطيك شي سروال توني حسن من ديك الشوهة ههه
إسلام:(نزل عينو جهة السروال وقال بهدوء) عطينا نستروو ماستر الله
داه لبيت وعطاااه سروال توني كحل مع قبيتو وخلاه يبدل تاسالا ونزل لتحت لقاهوم باقي جالسين شاااف فيهاا بواحد التخنزيرة حيت عند بالو دارتها بلعاني خصوصا هضرتها داك النهار بينات ليه انها مكتحملوش وتتشك فيه وزيد لفرطة دالسلاام.. أما أسماء فبصح مكانتش قاااصدة ولكن نيت جاتها من الجنة والناااس.. كلاو لكاسكروووط وناضو لبنات يجمعو لمواعن والرجال مشاو لصالة جلسو مجمعين مع بعض.. مشات سيدرا لكوزينة لقات رحيل تترد لي بقا لتلاجة ورنيم تتغسل لمواعن وأسماء واقفة قدام الثلاجة تتمد لرحيل.. قربات جهة تانيرت ومدات يديها تاهزات وقالت ليها:تانيرت إينو اش غاديري لينا لعشا
تانيرت:ماعرفتش احبيبة ديالي
سيدرا:ديري ليناا هاديك الشعرية لي تاديريها فهاداك (أشارت ليها لكسكاس)
تانيرت:السفة؟
سيدرا:همم وديري ليها دجيجات تانيرت إينو
تانيرت:(جلساتها فوق لبوطاجي ومشات تشوف فالمآونة واش بقات السفة لقات كاين غير شوية وقالت) غايخص لي يمشي يجيبهاا
سيدرا:(شدات فيها وقالت) نمشي نقولها لبّا ديدي يجيبهاا (نزلات تتجري ومشات لصالة جهة إدريس وقالت) بّا ديدي نمشيو أنا وياك نجيبو الشفة لتانيرت إينو
إسلام:(ناض شد ليها فيديها وقال) زيدي نجيبوها
إدريس:غير خليك اولدي أنا غادي
إسلام:(حط يديه على كتفو وقال) أنا غانمشي غير رتااح
شد يد سيدرا وداتو جهة لكوزينة ونطق إسلام بهدوء:شنو خاااص نجيبو؟
تاتيرت:(تبسمات ليه) جابتك نتا تسخر هه
إسلام:(هز سيدرا لي تعلقات فيه وقال بابتسامة) ههه خلي عمي إدريس يرتااح غايكون عيااا اش خاص نجيبو؟
تانيرت:جيب معاك السفة زوج كيلو وجيب الزبيب واحد الرابعة امم بلاتي نشوف (بدات تتقلب اش كاين واش خاص عاد شافت فيه) وجيب معااك لقرفة تاهي مكينااش
إسلام:صافي هادشي لي خاااص؟
تانيرت:اه
حرك راسو ليها ومشى هو وسيدرا لي كااانت معلقة فيه تتبوسو وتهضر معاه وهو داير ليها لخاطر وغادي معاها فلخط وداك إسلام لحنين ولقديم تيحضر غير معااااه فقط.. خداو السخرة وجاب معاه التقاوت تاهوما وداز جاب الديسير وعطى لسيدرا تهز معاه ورجعوو لدار.. مولف كيجيب ليهوم ويتسخر ومعتابر راسو واحد منهوم كيما هوما معتابرينو منهوم.. حط السخرة لتانيرت لي بدات تطيب لمرقة ديالها وخرج لصالة فين كانو جالسين وإدريس متكي.. مجمعين بناتهوم فلكوزينة وريحة لمرقة عاااطية وتانيرت بدات تتفور فالسفة..
رحيل:(شافت فأسماء وقال) كنتي غاترزي السيد فداكشي لي يكساب
أسماء:مدرتهاش بلعاني راه التلموس لي منها لمشكيل
رحيل:(ضحكات) هههه رجع حمررر عرفتي حسيتو باغي يسب ومالقاش جهد
رنيم:(تتاكل فالكيك) وااااش بصح هاديك هي نقطة ضعفهوم
أسماء:(كمشات حجبانها) كيفاااش؟
رنيم:(تتعبر) زعمة داكشي ديالو
تانيرت:(ضرباتها بغلاقة دلبلاستيك وقالت) شووو لبرهوووشة مبقاتش تحشم
رنيم:ههه واشنو اخالتي باغا نعرف
أسماء:معلووم كيفما تاحنا عند نقطة ضعفناا تاهوما عندهوم
رنيم:اااااه
رحيل: نقصي شوية من داك لفضول لي ولى فيك
رنيم:هانا ساكتة
جات سيدرا عندهوم وخداااات بواطااات صغاار ورجعات تاني لصالة أما تانيرت ردات لعشاا ولبنات جمعو الدنيا وخرجو لبرا فين كانت سيدرا حاطة دوك لبواطات فوق الطبلة وكل وحدة واشنو فيها هاللوز هالگرگاع ها الأكاجو هالبيسطااش زريعة بيضا كاوكاو مهم تقاوت كلهوم جابتهوم وتاشيبس.. كانو كينقبو تادراري معاها وهي كانت تتهز بيسطاشة تتنقيهاا وتتمشي عند إدريس تتحطها ليه ففمو تاكياكلها عاد تتجي تنقي ليه شي حاجة وترجع عندو وهو كل مرة يتبسم ليهاا.. هزات گرگاااعة وحطاتها ليه ففمو وباستو فيه ونطقات بحب: الأسمراني تاااع قلبي..
مجرد مقالت سيدرا ديك لجملة هز محمد طه راسو هو ورحيل دقة وحدة وشافووو فبعضياااتهوم بنظرة دات معنى وتفكيرهوووم بزوج مشى ديريكت لمولات هااد لجملة... جيداء
"الأسمراني تاع قلبي"
الجملة لي لطالما سمعوها من عند جيداء لي كانت ديما تتغزل بيها على إدريس وكانو هوما كيضحكوو عليها.. ديك لجملة لي قالت سيدرا رجعاتهوم بزوج لدوك ليامات لي دازو..ليااامااات لي كااانو فيها عايشين فرحانين مخصهوم تاخير وماعندهومش مشاكيل من غير دلخدمة.. عكس دابا لي ولات حياتهوم عبارة على مشاكيل فمشااااكيل.. غصة تكونااات فقلبهوم بزوووج فاش تفكروو جيداء لي أصلا عمرها غابت على بالهوم ولي كااانت ولازالت حاضرة معاهوم فبالهوم وفقلبهوووم.. تنهدات رحيل وقلبات وجهها من على وجه محمد طه وهي عاضة على شفايفها حابسة بكيتهاا لي حاسة بيهااا كلما تفكرااات أنهاا السبب الرئيسي فموت صاحبتهاا أماا محمد طه فقلبو رجع نزف من أول وجديد.. كل واحد عاايش فدكرياتو لي دوز معاهاا وريان كان حاضيهوم بزوووج حيت تاهو سبق ليه وقالتها قداموو.. حرك راسو بهدوء وشاف فسيدرا وقال: ملين جبتي هاد لجملة عوتاني؟؟
سيدرا:(كمشات حجبانها) شناهي؟
ريان:لي قلتي لبابا؟
سيدرا:الأسمراني تاع قلبي؟؟ هااء واجبتها من دمااغي رياااني زوينة ياااك (تتشوف فيه بعيون براقة)
ريان:اه زوينة
ختم ريان كلامو ورجع هز تلفونو كيلعب بيه وكل واحد خدا تلفون باش يتلاهى وزوج دلقلوووبة كانو جالسين بناتهوووم كااان عقلهوم مرفوووع فديك الساعة وغااايب..
تانيرت:(شافت فرحيل) غدا غاتمشي لخدمة ايلي "ابنتي" ياك؟
رحيل:(شافت فمها بعدما فاقت من سهوتها وحركات راسها) اه الربعيام سالات
إدريس:(شاف فيها وقال بحنية) الاكنتي باااقاا ماقداش تمشي علميني نعيط ليه ونقولها ليه
رحيل:(كمشات حجبانها) تعيط لمن؟
إدريس:ولد لحاج راه هو مول داك لبلاصة لي نتي خدامة فيهاا
رحيل:(كمشات حجبانها وقالت باهتمام) واش هو نيت هاداك لي وصلك لهنااا ديك النهاريات؟
إدريس:ايييه هووو ابنتي
رحيل:مافخباريش أنا أصلا عمري شفتو كانتعامل غير مع واحد تما
إدريس: تاهو مكانش عارفك خدامة عندو تم وقالها لياا
رحيل:(حركات راسها ونطقات بهدوء) مزيااان..
تجمعو على السفة لمدفونة لي وجدات ليهوم تانيرت و سيدرا تتاكل فطبسيلها حيت طبسيل لكبير بعيد عليها وعينيها كيتسدو.. عيااات ليوم بلعب وزيد التدريب تاهو وبزز باش بقات فايقة تال هاد لوقت.. بدات تتمدغ وهي سادة عينيها وإدريس خدا معلقتها وبدا يوكلهاا ومرة تشوف فيه مرة تغمض عينيها تااانعسات ليهوم فوق لكرسي.. ناضت رحيل هزاتها وشافت فيهوم بهدوء: تصبحو على خير
تانيرت:هااء ماكليتي والو ايلي "ابنتي"
رحيل:(حركات راسها وسيدرا بين يديها) الله يجعل لبراكة بصحتكوووم
طلعات بهدوء لبيتهاا وحطات سيدرا فبلاصتها ومشات جبدات ليها بيجامة دالنعاااس بدلاتها ليها وقداتها فبلاصتها عااد مشات لحمام غسلات سنانهاا ومع كانت راجعة لبيت تلقات بمحمد طه لي نطق بهدوء:صافا؟
رحيل:(حركات راسها فاش فهمات سؤالو وقالت) وي ونتا؟
محمد طه:حمدلله تصبحي على خير
باسها فحنكها ومشى لبيتو وهي دخلات لبيتهاا وبدلات حوايجها ببيجامة أريح وطلقات شعرها باش يتنفس وتكات فبلاصتها وعقلها كيسترجع احداث ليوم ولقاءهاا لغير متوقع مع الشخص لي عتقها تبسمات بشوية بلاماتحس فاش تفكرات صورتو وهو واقف قدامها وشاد لجام دلحصان ونطقات بصوت هامس:كتاب لينا نتلاقاو مزال ونشكرك..
---
الإضاءة كانت خفيفة وصادرة من الأباجور لي كانت فوق لكومودينوو.. الستائر لي ضايرة على النموسية مطلوقين براااحة فلبيض والريح لي داخل من الشرجم كيحركهوم شوية.. فوسط سريرو كان مخشي ومغطي نصو لتحتاني ولفوق لابس غير تيشورت نواااغ.. هاز بين يديه كتاااب ونضاضر دلبروطيكسيون فعينيه.. كان باين فيه مندااامج ومنعااازل على لواااقع وتركيزو كولو كاااان على داك لكتاااب لي بين يديه.. وفجأة كمش حجبااانو فاش طاااحت فبااالو صورتهاا وهي فوق لحصااان وهو كتبومباا بيهاا وغواتها لي كاااان عالي وباين فيهاا خايفة ومرعووووبة ابتسامة خفيفة ترسمات على شفايفووو فاااش تفكر داك لمنظر لي تحفر ليه فدماااغو ونهار كولو وهوو كيزورو بحال شي طييف واخا تشغل بمجية جدو وجداه.. رجع تيشوف فالصفحة لي كانت قدامو وكيحاول يركز معاهاا ولكن ماقدرش حيت فديك الساعة مكانش كيشوف السطووور لمكتوووبة بل كاان كيشوف عيونها الخضرااء لي كاانو كيشوفو فيه بنظرة خائفة ومتوثرة.. هز عينووو على لكتاااب وبقاا كيشوف قدااامو بنظرة ساااهية وبصوت هاامس رجوولي مبحوح قاال :
عَيْنَاهَا فِثٍننةٌ وَالفِثننةُ أشَدُّ مِن القَتْتتل
على صوت زقزقت العصافير وأشعة الشمس لي داخلة من لبالكون حلات رحيل عينيها وهي تتكسل بتعب.. ومدات يديها طفات لغڤيي وجلسات فبلاصتها وعينيها على سيدرا لي كانت ناعسة جنبهاا وكل يد فجيه.. تبسمات ليها بحب وقداتها فبلاصتها عاد ناضت هي تتلبس فبانطوفتها وبينوارها ودارت لقب في حالة ماتلقات مع إسلام وخرجات لحمام قضات روتينها الصبااحي.. رجعات لبيتها وحلات بلاكارها تتشوف فشنو غاتلبس جيپ طوويلة فلكحل مع واحد تريكوو خفيف تاهوو كحل وكاااب طويل داير بحال لعباية غير هو كيجي محلول فلبااج وهزات نقابها فلكحل وجبدات أنصومبل ديال لداخل فالكحل تاهو كولون وبودي لبساتهووم عاد لبسات حوايجهاا أو وقفات قدام لمرايا دارت كريم إيدغاطون لوجهها وخدات مسكارا غير مشطات بيها رموشهاا ودارت قلم قهوي رسمات بيه أيلاينر يادوب كيبان فاش تتقرب ليها.. دارت عكر واخا مغايبانش ولكن هي كملات مك اب ديالها ولبسات نقابهاا مقاداه جهة عينيها ودارت رشة خفيفة من واحد الريحة عندها مكتشمش تاكتقربي عندها.. قدات صاكها لباج وجلسات تتلبس فتقاشرها وغير سالات ناضت باست سيدار وخرجات نازلة لتحت لقات مها كيف ديما موجدة لفطور تجمعو عليه بحضور إسلام وموراها ناضو غادين لخدمة وإسلام هو لي وصلهوم بطوموبيل.. سبقو بمحمد طه هو لول عاد رنيم وأسمااء وبقاو غير رحيل ورياان.. كانت تتشوف فساعتها وصلات التسعود وربع تعطلات بزاااااف ليوم وزيدي عليها ديجا كانت جالسة... وقفات طوموبيل إسلام حدا لباب ونطقات رحيل بزربة:شكرا اإسلام وتهلاا تانتشاوفو (خربقات شعر ريان مع كانت جالسة لور) بيناتنا تلفون
نزلات بخطوات سريعة داخلة لباب وهوما غير شافوها دخلات تحركو مكملين طريقهوم.. كااان واقف بطوموبيلتو ل BMW بعيد شوية على maison de voiture ونضاضر دالشوف فعينيه..كااان متبع ليهاا الشوفة ملي نزلات من الطوموبيل بنظرة هادئة ممزوجة بالإستغرااب.. تحل باب طوموبيل ودخل عثمان لي نطق بالسوسية: ياغي اومارگ نك ايوس لحااج "توحشتك اولد لحاج"
نوح:(شاف فيه وقال ببرود) ماسول تسكرت غايلي ساكنيغ؟ " اشنو درتي مزال فداكشي لي قلت ليك"
عثمان:(قلبها بالدارجة) راه وصلات السلعة وداوها لديبوو لي حدا لبزااار والدراري خليتهوم كيستفوها عندهوم تمااا مطرطق اصاااحبي
نوح:داكشي كما وصيت عليه؟
عثمان:(جبد تلفون كيوريه) هانتاا كلشي هو هدااك ملي تسالي دوز لبزار وشوف بعينيك
نوح:(بالسوسية) عْفَاااكْ "برافو"
حل لباب ونزل وقاد سمطة دالسروال ودار يدو فجيب سروال توب لكحل لي كان لابس وتمشى بخطوات تقيلة وفجنبو عثمان.. دخل وعينو كيضورو فلبلاصة كيشوف الخدمة كيف غادة تبان ليه سعيد جاي جهتو ونطق:موسيو صباح لخير
نوح:(حرك راسو) صباح لخير
سعيد:لبنت الجديدة رحيل راه جات ليوم
نوح:(كمش حجبانو) قول ليها تجي عندي (شاف فعثمان) نتا غير سير لبزار وتكلف ليا بيه وباشما كان عيط ليا
عثمان:هي لولة اولد لحاج
طبطب نوح على كتفو وكمل طريقو لفوق وعثماان مشى فحالو.. وصل لبيروه وكيف ديما خدم لماشين دلقهوة وقاد البخوور فلمبيخرة لي كاينة فالجنب تاطلق ريحة لعوووود.. زول لاڤيست ديالو وعلقها فلعلاقة لي عندو تم فجنب لبيرو وبدا كيحل صدايف لاشوميز ديديه ويطلعهوم لفووق مبين دراااعو وزغيبات يديه.. جلس فكرسيه وشعل لبيسي باش يبدا خدمتو..
كانت جالسة بهدوء بادية خدمتهاا تاسمعاات صوت سعيد لي عيط بسميتها:رحيل
رحيل:(هزات عينيها فيه ونطقات بصوت هادئ) وي؟
سعيد: تفضلي معايا؟
خرج مخليها تتشوف فيه بتساؤل معرفااش هو اش باغيها وتاهو مقااالهاش ليها إكسبخي.. ناضت تبعااه وقالت بتساؤل: وي موسيو سعيد كاينة شي حاجة؟
شاف فيها سعيد وكمل طريقو مخليها غير تتشوف فيه مفاهمة تازفتة دارت أمرها فيد مولاها وتبعاتو تاوقف قدام بيرو نوح دق لباب وغير سمع الإذن ديالو وهو يحل لباب أو شاف فيها:تفضلي
رحيل بدات تتحس بالتوثر وعينيها كيشوف فسعيد وفداك لباب لي كان محلول.. سرطات ريقها فاش فهمات بلي ولد لحاج هو لي طلبهاا... تقدمات بخطوات تقيلة تادخلات لداخل بلاماتهز عينيها فيه في حين سعيد مجرد مادخلات سد لباب عليهوم وهنا قلبها بدا يضرب بلخلعة وبمشاعر آخرى معرفااش شناهي.. ريحة لبخور مع لقهوة خلاتها تهز عينيها جهة هاداك لي كان جالس مقااابل معاها كيشوف فيها وعكس لمرة لي فاتت مهبطش عينيه عليهاا.. أما هي غير شافتو بلاماتحس شهقات ورجعات خطوة لور وقالت بصوت سريع بسباب الدعقة: نتا عوتاني؟؟
مجرد ماسمع ديك لجملة لي قالت فلحظة دهول وعدم تصديق هز فيها حاجبو بواحد الطريقة خلاتها تسرط ريقها وتزيد توثر فاش عرفات راسها اش خرجات من فمهاا.. وجهها رجع حمرر وغير داك النقاب هو لي سترهاا.. عينيه وشوفتووو لي دار فيها خلاتها تنزل شوفتها عليه وبدات تتحك فيديها وتعض على شفايفهااا.. حرك نوح راسو بهدوء وتاهو ممتيقش أن هادي لي قدامو هي نفسها هاديك لبنت دلبارح.. فاش شافها نزلات من طوموبيل جاه لعجب ولكن دغيا عرفها هي نيت رحيل بنت إدريس حيت هي لوحيدة لي منقبة هنا..
نوح:(نطق بصوت هادئ وعينو باقي عليها) تفضلي امدموزيل
تحركات بخطوات تقيلة جهتو تاوقفات قدام لكراسى لي حدى بيروه وبقات ساكتة..
نوح:(بصوت جدي) جلسي
جلسات رحيل وفهاد اللحظة حسات براسها تزيزنات ولهضرة هربات ليهاا.. مكفهااش الشوهة دلبارح زادتها بهضرتها لي خرجات من فمهاا بلافرانات..
نوح:(متكي على لكرسي بأريحية كيلعب بستيلوه فيديه وبصوت هادئ نطق) كيف بقيتي دابا مزيان؟
رحيل:(تنحنحات وهزات عينيها شافت فيه وقالت بنفس لهدوء) حمدلله شكرا
نوح:(حرك راسو) سي إدريس لباس عليها
رحيل: حمدالله
نوح:(تقاد فجلستو وشبك يديه فوق لبيرو وقال بجدية) غاتكوني دابا ولفتي شوية لخدمة وسيستيم ديالنا هناا.. الخدمة تتكون من الإثنين لجمعة تنبداو مع التسعود تال ربعة ونص والسبت كنخدمو نص نهار عندك وقيتة دلغدا فيها ساعة ونص بغيتي تمشي لدار بغيتي تغداي هنا سي بوسيبل لتحت غاتلقااي قااعة فيهاا بلاصة لي كيتغداو فيها أغلبية لموظفين هنا وفيها لماشين دلقهوة تاهي (شاف فيها وكمل بهدوء) ولكن الابغيتي ممكن تغداي فبيرووك ومنها نيت تاخدي راحتك حسن..
كانت تتسنط لهضرتوو ونبرتو الجدية خلاتها تنتابه ليه بكل حواسهاا وبلا شعور منها كان دماغها كيفكرها فديك ليلة وهضرتو ليهاا وكيفااش حسات معاه بالراحة.. ديك الراحة لي حاسة بيها دابا نيت ولكنها كانت ممزوجة بتوثر.. وعند اخر هضرتو لي قال شافت فيه وتبسمااات تبسيمة واااسعة فاش شافت كيفاش فكر فيهاا وفراحتهاا وعند هاد لجيست زاد كبر فعينيها كثرر..
رحيل:واخا
نوح:(حرك راسو ليها وتبسم تبسيمة خفيفة وقال) تقدري ترجعي لخدمتك دابا والاحتاجيتي أي حاجة أنا هنا
رحيل:(تبسمات ليه وشافت فعيونو مباشرة) شكرا ليك بزاف
نوح:(حرك راسو وعينو فعينيها وبصوت خاثر نطق) الله ياودي مرحباا
ناضت رحيل من مكانها بخطوات تابتة وديك لخلعة لي كانت فيها فلول تبخراات مجرد ماهضر معاها بداك لهدوء وكلامو لي حسسها بالراااحة كثر.. وغير تسد لباب تنهد نووح تنهيدة قوية وناض جهة لماشين دلقهوة خدا ليه طااس ورجع يكمل خدمتو.. بقية النهار داز زوين عند رحيل تاوصلات وقيتة دلخروج ولقات ريان مسيفط ليها مساج بلي غايتعطل.. جمعات مسائلها وهبطات لتحت لقات لخدامة بداو يتحركو تاهوما.. خرجات من لباب غادة جهة الطاكسيات وباش توصل خصها ضرب واحد الطريق تيكون شوية خاوية.. غادة بهدوء تاشوية سمعات حس خطوات وراهاا قلبها ضرب بخوف سرطات ريقها وضارت بزربة مالقاات حد.. بقات تاضور عينيها تارجعات تاني تتمشى ودوك لخطوات رجعو كيتسمعو ليها ولي خلاو الذعر يذب فأوصالها..
يديها بداو كيترعدو عليها وفمها بياض بلخلعة وعينيها خارجين من بلاصتهوم.. غادة تتمشى بزربة وتتحاول تخرج من ديك لبلاصة باااش توصل لبلاصة لعامرة ودموع بلاماتحس عمرو عينيها ونزلو على حناكها.. هي عارفة بدر الدين حط عليها لعين وعارف خطواتها والدليل هو نهار سيفط ليها لكلي تال باب الدار.. وهادشي لي زاد خلاها تخاااف ولكن فجاة سمعات صوتو لي قال: عييييييو
وقفات رحيل مكانهاا بجمود وضارت بلعرض البطيء وبان ليها ريان واقف كيشوف فيها مبتاسم.. أما هي صاف تبلوكااات وعينيها غير عليه هو لي تيتبسم.. كان باغي يفاجأها ساعة هو لي تفاجأ فاش شافها تتبكي وتشهق.. تدعق ومعرفش مالهاا أما هي فديك لخلعة رجعات ليها بلكباااء.. ماتسوقاتش لزنقة وماتسوقات لتاحاجة حيت بصح خلعهااا.. قرب جهتها ريان ونطق بصوت متوثر:مالكي علاش تتبكي
رحيل:(هزات صاكها وضرباتو بيه وغوتات فوجهو) وااااااش هادا ضحك عندك هاااا كنت غاااانموت بلخلعة سحاب ليا واش هاداك لمريض هو لي تابعني هء هء هء
ندم علاش ضحك معاها قرب جهتها جارهاا بالجهد تاتضرب جسمها فصدرو وباااس راسها ونطق بأسف:سمحيليا مقصدتش نخلعك
رحيل:(زيرات عليه بالتعنيقة وقالت بصوت خافث) خفت بزاااااف
ريان:(طبطب على ضهرها وقال بندم) والله ماقصدت غير قلت نضحك معاااك سمحيليا
هضرتو وداك الندم لي لمسات فصوتو خلاها تهز راسها تشوف فيه.. وجهو كاان كيبين بلي بصح هو ندماااان وعرفاه مغايكونش قاصدها... حاولات تبسم ليه باش ماتخليهش يتخلع تاهو عليها وقالت:غاتخلص لحق
ريان:(حرك راسو) نخلصووو زيدي طلبي لي بغيتي وانا نديرها ليك
جبدات رحيل كلينيكس ودخلات يديها تحت النقاب تتمسح حناكهاا وعينيها وقالت: شري لياا واحد لبسة شغتها عجباتني
ريان:زيدي يالاه
شد فيديها مكملين طريقهوم ورحيل قالت بتدكر:قلتي ليا غاتعطل
ريان:غير شديت فيك وصاف
رحيل:هممم
ماشدوش طاكسي إنما مشاو على رجليهوم ورحيل غادة بيه لمحال لي شافت فيه واحد لبسة حمقاتهاا ومن زهرها كانت باقا محطوطة فلمانكان.. كانت كسوة طووويلة فالبااااج وفيها وريدات خضرين.. يديها عبارة على زوج طبقات من تواب لول ملس مكيبينش والتاني شبكة وعندها سميطة ديالهاا.. طلبات رحيل قياسهاا ومشات تجربهاا جاتها هي هاديك.. خرجات لعندو وقالت بابتسامة:دوز تخلص
ريان:زيدي تاخدي حاجة خراا؟
رحيل:ماعرفتش (ضورات عينيها فلبلاصة وبانت ليهاا واحد لجيپ موطااارد زوينة وتمشات لجهتها وقالت) تاهادي عجباتني غانقيسها
دخلات تاني تقيس وريان كيتسنى ويضور فعينو على لبنات لي خدامين تم.. شافت فيه وحدة وهو يغمزهاا وفلبلاصة هي قلبات وجهها ضحك ريان ورجع كيتسنى رحيل تاخرجات وقالت ليه: صافي باركة
شدات فدراعو غادين جهة لاكيس ولبنت لي غمزها شافت فيهوم وضارت عند صاحبتها وقالت:شفتي داك خونا لي غادي مع ديك لمنقبة؟
لبنت2: اه مالو؟
لبنت 1:غمزني قبيلة فاش دخلات هي لبلاصة لسيااج
لبنت2:ياختي هاد الرجااال عينيهوم كيضورو
لبنت1: واديري نتي تيقة فشي كحل الراس وهو لاعب لعشرة ورا ضهرك
لبنت2:ايتبقي السترر تانتي عطاهوم الله
لبنت1:ولكن صراحة زوينة وزينو فشكل وتاستيلو واعر
لبنت2:(شافت فريان لي كان لابس سروال توب كيجي مجموع شوية فالرجلين مع شوميز فواغ وجيلي بليدين فلگرونة جاتو لبسة زوينة) واييه باين فيه خدام فشي بوسط وملعق
جمع ليه الدري لي فلاكيس داكشي لي شراو ونطق بابتسامة:1500 درهم
ريان:(حل عينو وشاف فرحيل ورجع شاف فيه) بغيتي تقول ثلاتين ألف ريال؟
الدري:اه وهادو راه عليهوم بروموسيو
ريان:(عوج شفايفو وقال) بروموسيو وبثلاتين ايما بلابروموسيو شحال
الدري:2100 درهم
ريان:(كيجبد فلكارط بونكير وبصوت هامس قال) بنتي ليا احنيني غير تتشير فالارقاام ومعارفش لمعنى ديالهوم..
خلص بلكارط حيت مهازش داك الثمان وخرج ورحيل هازة ساشيتها لي كانت شيك وفيها سمية لمحال ولوگو ديالهوم داكشي دولوكس... شافت فه وقالت:بغيت نزيد
ريان:(قاطعها) عليا بلمين تاتزيدي قدامي لدااار لبسالات..
حط طوموبيلتو فالباركينغ وخرج بخطوااات تقيلة ومع قرب جهة لمحااال كلشي بدا يسلم عليه وكتسمع غير "ولد لحاج" طريقو كلها وهو كيوقف يسلم مع مالين لحواانت لي تم مع مدة مجاااش توحشوووه.. كمل طريقو تاوصل لبزار لي كان عبارة على محال كبييير فيه زووج بيبااان واحد خاص بالدخول أو واحد خاص بلخروووج.. الزاج لي كيبان على لواجهة كان تيبين دوك الرولويات دلموكيط لي كااانو مستفين على حسب الطول ولون وكل حاجة دايرين عليها تمانهاا.. دخل مع لباب وعينو كيضورو فلمحااال الزليج بيض كيشعل ومع الضووو لي كان تاهوو بيض عطي واحد الإضاءة خطييرة لمحااااال لي كاااان خاص بالفراااش... فجهة دايرين لموكيطااات غير دلفريع كاين البلدين والرومين ولطابي تاهوو أي حاجة حليتي عليها فمك تتلقايها.. وفجهة دايرين طلامط ورولويات ديالهوووم تاهوم فنفس الشكل وفجهة مفرشين واحد السداري صغير ومفرشينو بطلامط أخر مكاين فالسوق ولمخاد باش الناااس يشوفو الشونتيو كيف داير وفالحيط معلقين الطلامط بواحد الطريقة زوينة تتجبد لكليان.. وفمكااان لاخر دايرين الترياااات تاهوووما وحدة تنسيك فلخرى وديكووور دلمحااااال كان كيجدب والسلعة تاااهي تتبان فيها حاجة مزيانة وجديدة.. لحاصول لمحااال ماتقدرش تخرج منو الامخديتيش شي حاجة.. كان كيشوف فالتستااف والنظام لي تم وفلقنت بان ليه عثمان واقف مع الدري كيوريهوم السلعة لي بقات فين يديروهاا.. وقف عليهوم نوح ونطق بهدوء:السلام أوعليكم
عثمان:(شاف فيه وتبسم) ولد لحاج جيتي
مصطفى:(نطق بلمراكشية) ولد لحاج على سلامة
نوح:(سلم عليه) الله يسلمك الأمور مزيانة؟؟
عثمان:اه راه السلعة قديناهاا فبلايصهاا ولي بقات راها فالديبو لتحت تاتخرج هادي ونستفوها عاود
نوح:(أشار لطلامط لي فواحد الجيه) ديرو عليهوم الصولد
عثمان:لقيتيني تنفكر فيهوم حيت لموديل داز عليه وقت
نوح:(حك لحيتوو) لبونات عندك؟
عثمان:اه نعطيهوم ليك بااش تڤريفي داااكشي وتقاد حسابك
نوح:زيد (شاف فمصطفى وقال) داك الدري لي كااان كان خدام فالصاكة لي لتحت عرفتيه؟؟
مصطفي:أيوب؟
نوح:اييه هو الاعندك نمرتو قول ليه يدوز عندي محتاجو
مصطفى:كون هاني اولد لحاج تودسويت ويكون عندك
نوح:وجيب ليناا الشفنج وبرااد دأتاااي طلعو عندي لسدة وجيب ليكوم تانتوما لي بيتو
درع عثمان ومشى معاه جهة واحد الدخيلة تم مغطينها برولويات دالطلامط تاطلع لفوق فين كاين واحد لمكتب صغير دنوح.. جلس على لكرسي وعثمان جبد ليه لبونات وعطاهوم ليه ونطق:هانتاا الثمااان لي درتي معاهوم وهاااثمااان ديال الجملة والثمااان ديال طرونسبور كلشي هنااا حتى الدراري لي دخلو السلعة هاشحاال تخلصووو مهم كلشي تم..
جبد نوح نضاضرو دلبروطيكسيون لبسهوم وشد لبونات تايشوف فيهووم ويدير حسباتو... مدة وهوما جالسين كيهضروو ويحسبوو تاطلع عندهوم مصطفى وجاب معاه أيوب لي كان دري فبداية لعشرينات حوايجو عادين باين من فمو الزرگ بلي تيكمي..
أيوب:ولد لحاج بغتيني فشي حاجة؟
نوح: فين شادها هاد ليامات
أيوب:(لهجتو كانت كزاوية) وتانبريكولي وصااف تشاا عارف خرجت من عند باا صالح ومبقيتش تم
نوح: وباك كيف بقا دوز لعملية؟
أيوب:(حادر راسو) لواليد راه على حالو قال ليك الاكملتووش لفلوس مغاندوزوش ليه لعملية وزيد تاهو ماعندوووش وراقيه وغير طالب معاااشو وصاااف
نوح:اخر مرة دوز وقتاش
أيوب:قبل سيمانة قالو ليه رااه البروستات عندك طالع وضروري تفتح ولكن راك عاارف يالاه جمعنا شي حصيصة وباقي تنقلبو عندمن نسلفو لي بقا
نوح:(تنهد وشاااف فيه مطولا وقال بهدوء وجدية) حل ودنيك مزيااان معاياا اأيوب من ليوم نتا غاتخدم هنااا فلمحاااال بحالك بحال الدراري لي لتحت غاتبيع للكلياان وتستف السلعة راه مانحتاجش نوريك فلبيع والشرااا ونتا ديجا مجرب.. السلعة فيها الثمان يعني مغاتصعابش عليك القضية وراه مصطفى غايزيد يفهمك ويعاونك.. لي نبغي منك هو تشد معايا الطريق نيشااان.. خلاصك راه غاتشدو كل شهر بحالك بحال الدراري وعندك نهار فالسيمانة ديالك اتافق مع الدراري والنهار لي جاك علمني بيه سمعتيني
أيوب:(قرب جهتو باغي يبوس ليه يديه ساعة زولها نوح بزربة.. وأيوب نطق بصوت متأثر) الله ينورك اولد لحااج والله يزيدك من عندووو ويبعد عليك ولاد لحرام
نوح:(ناض جهتو وطبطب على كتفو) آمين لمهم فاش غانسدو تسناااني ماتمشيش ودابا نزل لتحت عند مصطفى هو يزيد يشرح ليك لخدمة
أيوب حرك راسو ونزل وعثمان شاف فنوح وقال: هادا هو ولد لحاح لي كنعرف حنين ويبغي لخير لغيرووو
نوح:(حرك ليه راسو ونطق بهدوء ) لهلا يحشمنااا..
شرقات شميشة كتعلن بداية يوم جديد.. حل محمد طه عينيه منفوخين وحمرين وتانيفووو حمر.. حيد عليه لغط بزز والتبوريشة طالعة معاااه.. وباين فيه من الشوفة راه مريض.. تفوه وشاف فالساعة كانت سبعة ونص مافيه لي ينوض ولايمشي يخدم ولكن بزز منو.. ناض وهو كيترعد بلبرد ويشمر على نيفوو غادي لحمام قضى حاجتو وغسل وجهو وسنانو ورجع لبيتو يلبس حوايجوو.. لجوو كاان سخووون ولكن هو كان كيحس بلبرد.. لبس سروال توني فلكحل مجموع من لتحت وقبيتو وفوقها جاكيط.. دار طربووش دالصوف وخرج من لبيت وهو كيكحب وصدرو كيتخرشش.. نزل لتحت لقى رحيل لي تتوجد لفطور هاد نهار حيت تانيرت باقا ناعسة.. جر لكرسي ونطق بصوت مبحوح:صباح لخير
ضارت رحيل شافت فيه وفوجهوو وهي تكمش حجبانها وقربات جهتو حطات يديها على جبهتو لقاتو كيفوور بالسخاااانة..
رحيل:احيييه طالعة لك السخانة
محمد طه:(حرك راسو وقال بتعب واضح عليه) ضربني لبرد لبارح
رحيل:(كمشات حجبانها) وعلاش لابس حوايجك ياكما قال ليك عقلك غاتمشي لخدمة؟
محمد طه:(كحب) كح كح كح احم اه علاش
رحيل:واش هبلتي تمشي ونتا هاكا
محمد طه:(تنهد) أنا بخير بلاماتخافي عليا
جا عندهوم إدريس لي كان يالاه فايق هو وتانيرت ونطقو بزوج:صباح لخير
تانيرت:غفلاتني لمگانة مصوناتش ليا فلوقت
رحيل:ماشي مشكيل اماما راه وجدت لفطور
تانيرت:(شافت فمحمد طه وقالت بخوف أمومي) ولدي مااالك واش مريض (قاست جبهتو تاهي وشهقات) فيك السخااانة
إدريس:(قرب عندو تاهو وشد وجهو بين يديه وقال بحنان) واش كضرك شي حاجة؟
محمد طه: أنا بخير بلا ماتخافو علياا غير ضربني لبرد واقيلا وهو لي دار فيا هاد لحالة خديت دواا وراه غانكون بخير
رحيل:(هزات حاجبها) من امتى ولا دوا عزيز عليك وتتشربو
محمد طه:(قلبو وجهو فاش عرفها عاقت بيه وقال) لا راه شربتو
انظمو ليهوم أسماء وريان وتجمعو على لفطور ومحمد طه ماحط تاعضة ففمو واخا بقات معاه رحيل ياكل مبغاش.. غير حاط راسو على كتفها تاسالاو وناض كل واحد مشى فحالو ومحمد طه مشات معاه أسماء تاوصلاتو لمگازان فين خدام عاد تحركات لخدمتها... مشى لبلاصة فين كيبدلو حوايجهوم حيد الجاكيط ولبس جيلي فيها لوگو دلمگازان وحيد الطربوش تاهو وخرج وهو حاس براسو فشلان وكون مكانوش عندو مشاكيل فلخدمة وشادين معاه الضد كون گاعما حا.. مشى يستف السلعة ولخاطر مكاينش..كل مرة يكح ولايعطس وباكية دكلينيكس لول سالاها كولها فساعتهاا.. جا عندو لجيغون وشاف فيه ببرود: ديك السلعة لي لهيه مغاتستفهااش واش لكليان يجي ويلقى هنا الروينة؟؟
محمد طه:(بصوت مبحوح) كنستف هناا شوف لي مكلف بديك لبلاصة يستفها
لجيغون:(خنزر فيه) دابا ننا بيتي توريني شغلي ياااك
محمد طه:(مقاد على صداع باركة غير مرضو لي فشلو) ماقلت تاشي عييب السلعة لي فلبلاصة لي أنا مكلف بيها هاني تنقاد فيها كح كح لهيه شوف لي مكلف يقادها كح كح
لجيغون:(شد معاه ضد) هاديك لبلاصة ننا لي غتصاوبهاا والامصاوبتيهاش غاتنقص فالصالير ديالك
خلاه ومشى تينگر ومحمد طه زير على يديه كيسب فداخلوو.. مباغيش يخرج لعيب واخا هوما لعيب براسو هاد لجيغون وشي وحدين خدامين معاه راه لاإله إلا الله وصاف تيندموك على ديك الجدريال لي كيعيطوك فلخر دالشهر.. صبر وكمل تستاف السلعة ومشى لديك لبلاصة وبدا يستف وفنفس لوقت فيما يجي عندو شي كليااان يبيع ليه.. نهار كولو وهو واقف وخدام مفاطرش ومواكل تاشي حاجة وزيد المرض لي حس بيه هلكووو والتبوريشة لي خلات سنانو يتقرقبووو.. فيما كيبغي يغفل يمشي يرتاح تايجي لجيغون ويعطيه شي حاجة يديرهاا.. يادوب كيقدر يجاوب فالتلفون خوتو لي تيسولو فيه كيبقا وتاإدريس وتانيرت.. وصلات الستة دلعشية وقت خروجوو مشى لبيت بدل عليه ولبس جاكيطو وديك الطاگية.. ومع تحرك من بلاصتو حس بالدنيا بدات تاضووور بيه.. وقلبوو حاس بيه غايخرج من بلاصتووو وكيضرررب بالزربة..وكولو تيترعد تكى على لحيط وراه كيرتاح.. وشفايفو ولاو بيضين أو وجهوو صفر.. بقا واقف واحد لمدة تارتاح عاد كمل طريقو جهة لباب حلو وديك الدوخة رجعات تاني ليه وقلبو هاد لمرة تزير عليه.. مد يدو وحطها مباشرة عليه وحل فمو كيتنفس بالجهد تابدا ينهج والظلام بدا كيبان ليه وماحس براسو غير وهو طايح على طولتو مغييييب وراسو تضرب مع لعتبة دلباب...
فالرياض كانت العائلة مجموعة على قبل الجد والجدة لي جاو من لبلاااد وطبعاا ولادهوم جااااو يشوفوهوم وكيف معروف فكل مناسبة ضروري ماتكون العائلة حاضرة وهادي هي حال عائلة السليماااني.. لي كاانت معروفة فمدينة مراكش بحكم هوما تجااار ومن الجد لكبير الله يرحموو ولي خلى ولادو يشدوو الشنعة عليه.. وهاكا كاانت لعائلة تدير بلاصتهاا تاولاو من أكبر التجااار لي معروفين فمراكش.. لجد لحسن كاان مربي ولادو على التجمع العائلي وكان ديما كيقولها ليهوم كل عيد ولاكل مناسبة خصهوم يتجمعوو كاملين من كبيرهوم لصغيرهوم.. واخا لبعض منهوم ساكنين برا لمغرب.. عندو زوج ولاد لكبير فيهوم هو إسماعيل بات نوح وسليمان عموو وعندو تلاتة دلبنات لكبيرة هي انتصار مقيمة فالعيون ونزهة لي ساكنة فأكادير ولباتول اخر لعنقود وهي لي مقيمة فلخااارج وبالتحديد فإسبانياا... فالصالة لخاصة بالرجال كانو كلهوم مجمعين بحضور لجد لحسن لي كان جالس قدام الطبلة لي حاطين فيه بوطة صغيرة وصينية فيهاا لكيسااان وصنديقات خاصين بأتاي حبوب والسكر والنعناااع كيعمر ليهوم أتااااي كيف مولفين فكل مجمع.. وطبااسل الطاوس فين كاين لحلوى لبلدية بالشكال والنواع عااد الفاكية لي دايرين فبواطات خاصين بيهوم.. كان سليمان جالس حدا باااه ولي واخد ملامح موو خصوصا لعينين الزرقين ولي أغلبية عائلة السليمااااني معروفة بيهوووم.. راجل كبير فلعمر وبشوش وباين فيه نية.. نطق وهو كيشوف فنوح لي كان جالس حدا لكوااان كيشوف فالتلفووون ومركز فيه..
سليمان:(نطق بالسوسية) امانيغ نداغ إيضر بنادم ايوس نگمى " افين ساهي تاني اولد خويا"
نوح:(هز راسو فيه وتبسم) هه والو ايساغكا زراغ كران تغاوسى نلخدمت "والو غير كنت تانشوف شي حاجة دلخدمة"
لحسن:شووور اولدي لراااسك راه لخدمة مغاتهربش
سليمان: مشيت لمحااال قبل مانجي تبارك الله قاديتيه علي لي كاان فيامات لمرحووم
نوح:ضروري راه لكلياان داكشي لي كيجدبهوم
عادل:(ولد سليمان) ولفيرمة سمعت بلي درتي فيهاا بلاصة لتدريب لخيووول
قالهاا بواحد النبرة باااين بلي معاجبو حال وهادشي عاق بيه نوووح حيت لطالما عادل كيبين ليه غيرتووو منو خصوصا انهوم فنفس لعمر تقريبااا..
نوح:(نطق بهدوء) لواحد هو لي يستاغل لحاجة لي عندو ويعرف كيف يمشيهاا
عادل:(هز حاجبو وقال بصوت ساخر) هي دابا مابقينااش اناخدو راحتنا فيهااا الابغينا نمشيو ليهاا
نوح:(قال ببرود) لي وصلك لخبار نسى يقول ليك راه بلاصة التدريب معزولة على لفيرمة اولد لعميم
لحسن:(شاف فعادل) ديك لفيرمة نهار قلت ليكوم شريوها راه زوينة تاحد فيكوم مبغاها (شاف فنوح وتبسم ليه) ولكن يِوي "ولدي" هو لي فهم هضرتي او وزنهاا مزياان وشراها وهاهي دابا خرجات حسن من لي كنت داير فدماغي
نوح:(تبسم تبسيمة خفيفة وقال وعينو فعين عادل) التجارة تتبغي تكون زعايمي وتغامر فيها وكيف تتحط لخسارة بين أولوياتك حط معاه تاربح وديما خلي لكفة مايلة لربح الابغيتي طفروو وهاد لهضرة ماشي غير على التجارة وصاف حياتك كلها سير على هاد لمنوال فيها
سليمان:تغزااانت ايوي "عندك لحق اولدي" لواحد هو لي يكون زعايمي
عمر:(ولد انتصار) واحد لمحال فالرباط قال ليا عليه واحد صاحبي باغيين يبيعووه وراه تافقت معاه نمشيو نشوفوه اش بااان ليك تمشي معايا انوح وتعطيني رأيك فيه واش غايكوت شي ولاغير لفرشي ههه
نوح:اييه مرحبا غير قولي نهار باااش نخويه ليك ونمشيو
عمر:واخااا اخوياا هي لي متعاود
فالعائلة ضروري متتلقى واحد النوووع مكيبغيش ليك لخير وحاسدك على داكشي لي عندك مع لعلم تاهو مامخصوصش ولكن فاش تيشوفك تازدت عندك شي حاجة واخا غير لبسة تيحسدك عليهاا ومعارفينش نتا كيفاااش تادرتي وجبتي ديك لبسة ومناااش دزتي بحال نوووح لي كاان تفكيررو ماشي بحالهووم وكان ديما كيشووووف بعيد وكيحط داكشي لي باغي يوصل ليه قدام عينيه بااااش ينفدووو.. نهار خلى ليه بااااه لمگازان هو خدم عليهاا وعادو ليها لإصلااااح من لول وزاد فيها حوايج خرين لعب على ديكوغاسيون وبزاف دلحواااايج تاولات مدخلة ليه كثر من داكشي لي خسر عليهاااا... ونفس الشي نهار جمعهوم جدهوم باش يقول ليهوم على لفيرمة لي كااان باغي يبيعها صاحبووو.. باش مايديرش لفرزيات بين حفايدووو أو ولادوو قالها ليهوم مجموعين وهوما فاش شافو تصاورهاا وشافوها بلي خصها لحبة مزيان تاحد مازعم عليهااا وكلهوم رجعو لور من غير نوح لي جلس هو وجدو وداك صاحبو اطابل ومشاو شافو ديك لفيرمة لي كانت حالتها ولكن كيف عادتوو هو زعم وهاهي دابااا ولات فيرمة من أحسن لفيرمااااات ولي شافها يحل فيها فمهااا وشحال من رجال جاو عندو باش يشريوهاا وهو مبغاااش وطوور فيهاا وهاهي دابا تدخل ليه مصاريف وماشي غير شراها وخلاهاا ديكووور.. وهادشي لي مبغاااهش عادل لي ديما كيتحسس من نووح وكيبين ليه هااادشي عين باااين وطلاقاا مع نوح لي من نوووع لي ممسوقش ويعطيك خووو جوااابك وكيفما عاملتيه يعاملك.. حنين وقلبو كبير وگاع لي عاااشرو عارف لمعدن ديالو ولكن لي كيخرج معاه لعيب راه متيعقلش عليه وكيضرب عليه بكروة حمراااا...
صوت لومبيلونص كان كيتسمع فداك الشاارع فين كاينة لمگازان والناس كلشي واقف كيشوف اش وااااقع هنااااك.. الروينة نايضة عندهوم لداااخل وقف إدريس طوموبيلتو ونزل هو وريان ورحيل وغير شافو لمنظر قلبهوم قفز وسط صدرهوووم وبالهوم مشى مع محمد طه لي مكانش تيجاوبهووووم فالتلفلوون ولي تعطل على وقيتة دخولو.. هو مولف يتعطل ولكن كيعلم وزيد هو ليوم كان مريض هادشي علاش تشطنو عليه.. داخلين وسط الزحاااام باغيين يشوفو اش واقع تبانو ليهوم مخرجينو فوق لبيااااص ودايرين ليه بانضة فعنقووو وشادين ليه داتو بسمااااطي ونيفو كيسيل بالدم مع داك لمنظر دفع إدريس واحد الراجل ومشى كيجري جهتوووو ويغووت: ولددددي محمد طه
تابعووو وعقلوو باغي يخرج من بلااااصتو تاطلعووووه فلومبيلونص وقادوه وطلع حداااه.. قرب جهتو ريان وقال بسرعة:عطيني سوارت طوموبيل
مدهوم ليه إدريس بعقل مرفوووع وعينوو غير على محمد طه لي مغيب مكيتحركش.. يالاه كااااان بخير فالصباااح وغير تروووح شنو طرااا ليه تاااغييب ونيفووو كيسيل بالدم.. تحركات لومبيلونص غادة والناس بدات تادير ليها طريق أما ريان رجع لعند رحيل وقال بسرعة:طلعي يالاااااه
رحيل مدارت تاشي رد بل بقات واقفة وعينيها على لومبيلونص لي تحركات ومشات تغابت على عينيهاا.. وريان قرب جهتها وشدها من كتافها وزعزهاا تاشافت فيه وقااااال بسرعة:زيدي رااااه خصنا نتبعوهوم
رحيل:(بصوت خافت) محمد طه
ريان:(خااايف تاهو وقلبو كايضرب ولكن رغم هادشي كولو بقا شاد فرااااسو وقااال بصوت معصب) بخير هووو بخير غييير زيدي
جرها تالجهة طوموبيل وركبو وفنفس لوقت دوز لخط لأسماااء وغير تحل قااال بسرعة: تبعووونااا لسبيطااار **** راه داوه لتم
أسماء:(مفهمااات تاحاجة وبصوت عالي قالت) اش واااقع شنووو طراااا علاش السبيطار
ريان:(غوووت تاصوتو تبح) والقلا*ي رااااااه محمد طه داوه فلومبيلوووونص ماعرفنااا مالو تبعووووونا
قطع وزاد فالسرعة وعقلو غايخرج بلاصتو أما رحيل يديها بدات ترعد عليها ومعرفااات اشنو طااااري معاه وعلاش غيييب قلبهاا ضرها وعينيها تجمعو بالدموع تابدات تتشهق وتتبكي وريان غير مزاد توتر ملي سمع بكاها تاهو مخلوع ولكن شاد على رااااسو ومبااااغيش ينهااار تاهو.. وقف طوموبيل ونزل لقاوه يالاه نزلوووه وإدريس تاابعو بعقل مرفوووع.. هو أب وأي أدى كيصيب ولادو تايخليه هو لي يتقصح.. دخلوه يفحصوه وهوما بقاو برااا ورحيل تتبكي وجالسة فدوك لكراسى وهي تترعد.. أجواء السبيطار ولاو متعايشين معاهوم فيما كانت تاطيح رحيل يجيبوهاا وبلامانساااو يامات لكومة لي دوزات تانيرت.. وهاد الاجواء كان حاس بيهوم إدريس كيخنقوووووه لدرجة لموووت.. جااات أسماء هي وتانيرت ومعاهوم إسلاااام وعينين تانيرت عامرين دموووع قربات جهة إدريس وقالت بصوت باكي:مالو اش وقع ليه؟
إدريس:(بصوت ضعيف) ماعرفتش
سكتات تانيرت وحطات راسها على صدرو تتبكي كأنها مو لحقيقية ماشي غير مرااات باااه.. مخلوووعة عليه بحالو بحال ولادها وعمرهاا مافرقات بيناتهوم وفهاد لخمسنين علاقتهوم راه توطدااات كثر.. لقاو معاهاا الحنااان وبقلبها لكبير خلاتهوووم يبغيوهاا وتاهي تبغيهوم والاسولتيها شكون ولادك اتقول ليك محمد طه ريان رحيل وأسماااء.. جلسو لبنات فلكراسى وأسماء شادة يد رحيل وتاهي قلبها كيضرب معرفاااش مااالو وشنو طرا تجابوه.. مدة وهوما بحال لحنش لي مقطوع ليه الراس وكيف دخلوووه معاودو شافو تااااحد لي يطمنهوم عليه.. إسلام واقف ومتكي على لحيط وعينو على رحيل وأسماء لي بزوجات حاطين الراااس حدا بعضياتهوم.. صونى تلفونو ولقى رنيم لي خلاو فالدار مع سيدرا تتصوني عليه.. جاوبها فلبلاصة ونطق بهدوء:وي
رنيم:امدرا مال محمد طه؟؟
إسلام:باقي مقالو لينا والو
رنيم:(بصوت خائف) واش شي حد ضربووو ولاكيفاااش؟؟
إسلام:ماعرفناااش ارنيم حدهوووم مشااو ولقاوه مخرجينو بلبياااص مغيب ونيفو كيسيل بالدم هادشي لي عارفين
رنيم:عفاااك الا عرفتو شي خبار علمني واااخا
إسلام:واخا غير نتي متبينيش لسيدرا عرفاااه بلي دكية وغاتعيق
رنيم:لا خليتها تتلعب مع إيڤانا
إسلام:نهضرو من بعد
قطع لخط ورجع تكى راسو وهاد لمرة عينو شافو فريان لي تاهو حاط راسو على لحيط وباين فيه سااااهي..
فغرفة لفحص فين كانو واقفين زوج أطباء ومعاهوم فرملي كيشوفو فالراديو ديال الراااس لي دارو ليه فلبيسي وباين فيهوم تركيييز.. كمش الطبيب حجباااانو ونزل نضاضرو شوية على نيفووو وقال:هنااااا شفتي؟
الطبيب2:(نطق وعينو على لبيسي كيزومي وقال) وي
شافو فبعضياتهوم ينظرات جدية وبقاو مدة كيقراو الراديو وتيتأكدو منو قبل مايخرجو بزووج جهة إدريس ولبقية لي غير شافوهوم وكولشي تجمع عندهووم وقال إدريس: ولدي بخير ياك ادكتور؟؟
الطبيب1: طاح ليه الطونسيون وهو السبب فالإغماء وحيت فاش طاح ضرب براسو حنا باش نطمنو عليه درنا ليه راديوو ولقينا بلي لمريض عندو ورم دموي...
"ورم دموووي.... ورم دموي" هاد لجملة هي لي كانت تتردد فمساامعهوم كاملين ومعالم الصدمة كانت باينة على وجاههوم.. إدريس مد يديه حاطهااا على قلبو لي حس بيه تعصرررر وسط صدرووو ورجع خطووة لور تكان غايطيح كوووون ماشدووش إسلام وسندو عليه..
تانيرت:(وجهها صفار بلخلعة) إدررررريس
حرك ليها راسو بمعنى أناا بخير وشاف فالطبيب لي قال ليه لخبر وبصوت ضعيف نطق:مافهمتش كيفاش ورم دموي؟؟
الطبيب: قبل مانشرح ليكوم لحالة نبغيكوم تجاوبوني على شي أسئلة بسيطة واخا.. احم لمريض سبق ليه تعرض لشي حادث وتضرب براسو
ريان:(يديه تترعد عليه) ااااه دار كسيدة ولكن داز عليها مدة كبيرة
الطبيب:شحال تقريبا؟
إدريس:تقرييا شي ست سنين هاكاك سبع سنين
الطبيب: ممكن تشرح ليال حالتو كيف كانت واش دخل لكومة ولا جاه ارتجاج دماغي ؟؟
إدريس:لا الضربة مكانتش صعيبة وفاش دارو ليه الراديو تبين بلي ماعندو تاشي مشكيل
الطبيب:وهو فاش خرج من السبيطار واش دار كونطرووول موراها
إدريس:لا
الطبيب: دابا عاد نقدر نشرح ليكوم لحالة دلمريض.. الورم الدموي هو تمزق الأوعية الدموية وتتبدا تكتل فواحد لمكاان وكتشكل ورم وحيت لمريض سبق ليه دار لاكسيدون فهادا هو سبب لورم حيت بعض لمرات مكيبانش فنفس لوقت لي تيوقع لحادث وكيستغرق أحيانا أيام أو شهووور باش يبااان الورم وحيت قلتي عمرو مدار كونطرول فهادشي سبب باش انكوم ماتعرفوش المشكيل فين كاااين وأيضا عندو أعراض هي الدوخة ألم الرأس القيء وبعض لمرات تينزف من نيفو ولا وذنيه واش عمركوووم لاحظتو عليه هاد الأعراض
إدريس:لا
الطبيب:لي غانقول ليك دابا هو حنا ضروري ماخصنااا نديرو ليه عملية مستعجلة حيت الوقت ماشي لصالحناااا
إدريس:(حرك ليه راسو ونطق بصوت مرعوودد) واش لعملية خطيرة؟؟
الطبيب: اه عمليتو حساسة بزاااف ولكن لي خصك تعرف أننا غانديرو كلما فجهدنا باش نعتقوه ودابا تفضل معايا باش نكملو الإجراءات
مشى الطبيب وتبعو إدريس وإسلام لي مخلاهش وحدو والبقية كل واحد فين ساهي.. الخلعة شداتهوووم ممزوجة مع تأنيب الضمير لي حس بيها ريااان فهاد الساااعة.. ملي تفكر أنه هو السبب فشي لي طاري داباا.. بسبب طيشو فديك لوقيتة واستهتارو خوه دابا كيعاني من هاد لورم لي كان نتيجة ديال ديك لاكسيدون لي طرات.. رجع ريان بخطوات لور وهو مقدرش يشوف فوجه خوتو وفوجه باااه بلخصوص.. بقا غادي تاخرج من داك لكولوار غادين ومعارفش فين المهم يخرج من داك لجووو لي حاس بيه بدا كيخنقو..
حلاات رحيل لباب ودخلات بخطوات بطيئة وعينيها على جسد محمد طه لي كان ناعس فالبيت فين فحصوه دايرين ليه سيرووم.. هزات نقابها وقربات جهتو وعينيها مدمعين ولهضرة لي قال ليها الطبيب فشلاتهوم كاملين.. شدات فيديه وبصوت خافت نطقات: مغايوقع ليك والو وإن شاء الله غاترجع لينا بخير وعلى خير احبيبي
تحنات باستو فجبهتوو وخرجاات بهدوء كيف دخلات لقات أسماء تاهي كاتسناها باش دخل عندو.. حطات رحيل يديها على كتف أسماء لي دخلات بدورها لعندو.. قربات جهتو وتحنات على ركابها شادة يدو وحطات جبهتها عليهوم وقالت بصوت باكي: نتا غاتولي بخير اخوياا (هزات راسها ومدات يديها تتلمس وجهو وبصوت حنين قالت) غاتبراا وغاترجع لينا كيف لول غااااترجع..
باست يديه ورجعات قاست حنكوو عاد ناضت من بلاصتها وخرجات لبرااا.. الطبيب شرح لإدريس بلي لعملية فيها خطورة وبلي خصهوم يديرو جميع الاحتمالات فبالهوووم.. وهادشي غير مزااد خلى لخوووف يكبر فداخلوو.. الكل دخل يشوفو وبقا إدريس هو اخر واحد.. دخل بخطوات تقيلة لقاه موجدينو باش ينزلوه لبلوووك.. غير شافو فداك لمنظر داتو تبورشاااات عليه.. وقلبو رجع ينبض بسرعة بسباب الخوف... تحنى جهتو وشد وجه محمد طه بين يديه لي كان ناااعس بهدوء.. نطق إدريس بصوت خافت باين فيه مقصح: الحنين ديااالي عارفك صبااار بحاال بااك وعارفك قوووي بزاااف وكيفما مولف تخطى لمشااااكيل لي تاطيح فيهوم وتنقزهووم متأكد بلي غاتنقز تاهاااادي أولدي حنا دوزنا ماصعب منها.. خليك قووي وماتشوينيش فيك أنا على قبلك نتا وخوتك نلوح راسي فلعااافية المهم هو نتوما تكونو ليا مرتاااحين.. فرحتي وراحتي كاتكمل فاش كانشوفكوم نتوما بخير ومناقصكوم تاخير.. فاش كانشوف ضحكتكووم وفااش كانتأكد بلي كلكوم تحت جناحي هاديك هي الدنيا ومافيها عندي (غمض عينو وديك الدمعة لي كااانت محبوسة فعينيه طااحت.. رجع حل عينيه شاف فيه) خوتك وخالتك وباك كلشي غاااايدعي معاااك باااش نتا ترجع لينا بخير وعلى خيرر.. (باااس جبهتوو وطول فلبوووسة عاد بعد وقال بصوت هامس) أستودعك الله الذي لا تضيع ودائعه..
خرجو محمد طه لي كان ناعس على لبياص بلبسة دالسبيطار غاديين بيه جهة لاسونسور باش ينزلوه لبلووك.. كلشي كان غادي تابعوو وعينهووم مدمعين وقلبهووم ربي لي عالم بيه فهاد السااعة.. إدريس عينو منزلاتش عليه تاادخلوه لاسونسور الخاص بالمرضى فين كينزلوهوم وكلشي واقف كيشوف فيه تابدااا الباب دلسونسور كيتسد ومعااااه غااابت صورة محمد طه أمام ناضرهوووم.. ضارت رحيل لعند أسماء عنقاتها وهي تفرگع بلبكااا وأسمااء مكانتش قل منها تاهي تبكي وتشهق... أماا إدريس فقرب جهة الحيط وتكى عليه وهو حاااس براسو فاشل... نقطة ضعفوو هي تانيرت أو ولادو فيما كيوقع لشي واحد فيهوم شي حاجة تايحس براسو تهد.. قربات جهتو تانيرت وعنقااااتو بالجهد وهي حاااسة بيه وحاااسة بشنووو هاااز فالداااخل ديالو.. هو صباااار بزاااف وهي عارفاااه أي واحد دوز داكشي لدوز إدريس فصغروو وفشبابو وفكبرووو راه غايحس بالعيااا وغاطلع ليه الدنياا فراااسو ولكن هووو لا بقاا عااااض فالصبببر.. هزات يديها وحطاتها على حنكوو كتخلل لحيتو وقااالت بصوت حنين فيه نبرة باكية: واش نتا بخير؟
إدريس:(شاف فيه ونطق بهمس) مغانكونش بخير تانشوف ولدي خاارج من لعملية وهو بخير..
تانيرت:غايخرج بخير إن شاء الله (ضورات راسها جهة لبنات لي كانو جالسين فالكراسى ورحيل حاطة راسها على كتف أسماء لي بدورها حاطة راسها على راس رحيل ورجعات شافت فإسلام لي واقف حداهوم وعاد ردات لبااال بلي ريان مكاينش هنااا.. كمشات حجبانها ورجعات شافت فإدريس) فين ريان؟
إدريس:(هز راسو تيقلب عليه وقال) ماعرفتش
إسلام:أنا غانشوف فين هووو
تحرك إسلام من تم وهو كيصوني عليه وفنفس لوقت كيقلب عليه تما.. مبانش ليه ومشى لجهة لخرا فين كانوو واقفين تاهي مالقاهش فيهاا عااد خرج لبرااا وعينو تيضورو فبرا السبيطااار ولبرد محرك فديك الليلة.. تقطع لخط ومع جا يصوني تاني ليه لقى رنيم تتصوني جاوبها:وي رنيم؟
رنيم:نزلوه لبلوك؟
إسلام:اه يالاه شوية نزلوه
رنيم:(بصوت باكي) واش حالتو خطيرة بزاااف
إسلام:(تنهد) اه عليها دارو ليه عملية مستعجلة
رنيم:لبنات وخالتي تانيرت وعمي لباس عليهوم واش خصاكوم شي حاجة؟
إسلام:شوية وصاف راك عرفاهوم مهولين عليه لمهم نتي ردي لبااال وماتحلي لحد لباب واخااا ويستحسن فاش تنعسو تسدو لبيت عليكووم ماتعرف داك الزا*مل يكون حاضيكوم ويستاغل لفرصة حيت تاواحد مكاين تم
رنيم:لادوزت الساقطات بزوج وسديت لباب بساروت من لداخل مهم أنا غانبقا نتسنى تعلمني بأي جديد واخاا
إسلام:واخاا تصبحي على خير
قطع معاهوم فااش لمح ريان جااالس فوق الطروطوار فالجهة لمقااابلة وباين فيه سااااهي.. تمشى جهتو تاوقف قدامو وريان هز فيه عينيه وشاف فيه بنظرة حزينة قبل ماااينزل عينو عليه.. جلس حداه إسلام ونطق بهدوء:علاش جالس هناااا؟
ريان:(الصمت)
إسلام:تتلوم راسك حيت لاكسيدون لي وقعات بسبابك تتقول مع راسك كون ماضربتوووش كون گاعماا وصل لهاد لبلاصة وطرا هاد لمشكيل ياااك؟
شاف فيه إسلام وريان هز عينوو وقال بصوت ضعيف: أصلا أنا السباب
إسلام:(تنهد) راك غاالط نتا ماشي السبب خصك تعرف اريان هاد الدنياا غدارة تفرحك نهار وتبكيك عااام.. وخصك تعرف بلي أي حاجة تاندوزو فحياتنا ربي مكتبها لينااا ماتلومش راسك حيت ماشي نتا السباب ودابا نوووض تحرك لداخل راه باااك كيقلب عليك ماتخليهش يتشطن عليك باركة غير بالو لي مشغول مع محمد طه..
ريان:واخا غير سبقني أنا جاي
إسلام:ماتعطلش
خلاه إسلام وريان بقا جالس كيتفكر هضرتوو لي قااال ليه.. تنهد وناض كيسوس سروالو غادي بخطوات تقيلة قاطع الشانطي تاادازت طوموبيل جيپ حدااااه مبلاصياا فلباركينغ عاد تحل لباب لي حدا الشيفور ونزلات بيسان بسروال مفضفض كحل مع بودي مجموع جهة ليدين وتايجي ميني فونطخ وهازة جاكيط فيديهاا.. شعرها لقهوي جامعاااه شفنجة ومك اب خفيف فوجهها.. بقات واقفة تتسنى نوح لي نزل تاهو بسروال توب مع شوميز كحلة وجاكيط.. سدها بالسنسلة وشاف فبيسان مكمش حجبانو: لبسي الجاكيط راه لبرد غايفرعك تاني
بيسان:(قربات جهتو) هاد لبرد لي كاين هناا فلمغرب ماشي بحاال فسويسرا
نوح:(درعها ونطق بابتسامة) نتي دايرة بحال داك بورااس تاهوو
بيسان:هههه زيد ليوم نعرض عليك لكافي فلبيرو ديالي ونيت تشوف الطبيب لي قلت ليك عليه باش يزيد يشرح ليك حالة بات داك لولد لي خدام عندك
دخلو لداخل فنفس لوقيتة لي دخل تاريان غير هوما شدو الجهة ليمينية حيت تما فين كاين بيروو بيسان وريان مشى جهة لخرا فين كاينين بقية العائلة.. دخلات بيسان لبيروها وقالت بابتسامة تاتسدو عويناتها: هانتا احبيبي مرحبا بيك عندي ههه واخا راه ديجا جيتي
نوح:(تبسم) جيبي ليا لحليب والتمر هه
حطات بيسان جاكيطة ديالها ولبسات لبلوز ديالها وخدات لفيكس عيطات لفرملية لي تتخدم معاها طلبات منها تجيب ليها زوج كيسان دلقهوة نواغ وحدة بلاسكار لنوح والثانية ليها هي.. عيون نوح كانو مراقبينهاا بشوفات فخووورة وديك لبلووز لي لابسة كتبين ليه أنه داك تمارة لي ضرب على قبلها ممشات غير هاكا وهانتيجتها كيشوفها قدام عينيه..
جالسة رنيم فالصالة بوحدها وكاس لقهوة فيديهاا تتجغم منها مرة مرة.. طافية الضو من غير دلكولوار حيت جالسة فلتحت.. السكاات فالدار من غير صوت أنفاسها لي كيتسمعوو مرفوقين بتنهيداااتهاا.. بالها مشطون مع محمد طه ولخبار لي وصلوهاا.. ورم دموي فالراس راه غير سميتو تتخلعك فمابالك الاعرفتي شي حد كيجيك مصاب بيه.. هادشي غير مزاد خلعها وكون مكانتش غاترد لبال لسيدرا كووون راها معاهوم تم.. ناضت بشوية عليها غادة جهة الشرجم وهزات الخوامي تتشوف فالشااارع وبانت ليها طوموبيل علي براا قلبها ضرب بالخلعة.. كان جالس فالداخل وطافي ضو ولكن هي عرفات طوموبيلتو حيت عمرو بدلهاا.. من نهار خرجات من الداخلة وهو حاضيها بحال ظلها ولمشكيل أنه فاش كانت عايشة تم عمرهاا ماتحكااات معاه وقليل فين تتشوفوو ماشي بحال إلياااس والدراري لخرين لي كانو ديما مع بدر.. زفرات النفس ورجعات لبلاصتها جالسة تتنهد تاسمعات لحس وهي تهز عينيها جهة سيدرا لي جايا جهتها ببجامة كومبين وشعرهاا مطلوق ومخربق.. عينيها لمبطنين كانو منفوخييين بالنعاااس.. شافت فرنيم وقااالت بصوت نعسان:واش باقي مجاوش؟
رنيم:(هزاتها وحطاتها فوق ركابيها وباستهاا) باقي احبيبة ديالي
سيدرا:(بدات تترجع شعرها لور وقالت بطفولية) وعلاش تعطلوو بزااف راه شميشة مشااات تنيني
رنيم:(تتشرح ليها بلهداوة) محمد طه مريض شوية عليها هوما تما معاه احبيبة ديالي
سيدرا:(كمشات حجبانهاا وشافت فيها) وعلاش مداونيش معاااهوم تاأنا بغيت نبقا مع مودي حبيبي
رنيم:تال غداا ونمشيو أنا وياك نشوفوه
سيدرا:رانو بغيت نهضر مع بّا ديدي
رنيم:(خدات تلفونها دوزات لخط لإدريس وعطاتو لسيدرا) ماطوليش معاه باش ترجعي تنعسي
سيدرا:(حاطة تلفون فوق ودنيهاا تيصوني تاسمعات صوت إدريس لي باين فيه لعيا) ألوو رنيم (نطقات بصوت سريع) بّا ديدي
إدريس:باقي مانعستيش ابابا
سيدرا:لا نينيت وفقت بّا ديدي أنا تووحشتك بزاف
إدريس:(مسح وجهوو وقال) تاأنا ابابا ولكن نتي خصك تنعسي حيت لوليدات الصغار لي زوينين بحالك ماتيسهرووش ابابا يالاه سيري تنعسي داباا تال غداا ونجي عندك
سيدرا:(همسات ليه بخفوت) ومودي واش باقي مريض بزاف
إدريس:(نطق تاهو بخفوت) اه مريض عليها خصنا نبقاو معاه هناا ابابا تايبرا
سيدرا: وأنا بّا ديدي نجي نشوفو
إدريس:تال غدا ابابا واجي نتي ورنيم واخاا يالاه سيري تنعسي داباا ابنتي
قطعات سيدرا لخط وشافت فرنيم ونطقات بصوت حزين:مسكين مودي حبيبي..
----
فالسبيطاار وبالتحديد فبيرو بيسان لي كانت جالسة هي ونووح ومعاهوم تاالطبيب لي كانت بيسان شرحات ليه على حالة ببات أيوب.. قدامهوم لطاس دلقهوة وضوسي ديااال لمريض..
د.أحمد: مهم كيف قلت ليك يجي لعندنا لمريض ندوزو ليه كونطرووول جنيغااال ونيت نشوفو حالتو بالضبط حيت هاد التحاليل لي دار اخر مرة دازو عليها شهراين
نوح:(مسح لحيتو بيديه وقال بهدوء) صاف غدا غانجيب معايا سي حمد وكيف قلت من قبل كولشي على حسابي
د.أحمد:واخا كون هاااني اسي السليماني (ناض كيجمع الضوسي وقال بجدية) غدا نتسنااك مع التسعووود راه نمرتي عندك واخا
نوح:(سلم عليه) صافي واخا شكرا ليك
خرج أحمد وشافت بيسان فنوح: ياكما غاتمشي دابا؟
نوح:(ناض تيقاد جاكيط لي لابس ونطق بهدوء) وي خصني نتحرك راه مشى لحااال
بيسان:(كمشات حجبانها ودلات شنايفها بحال شي بنوتة صغيرو وقالت بترجي) خليك معايا مزااال عفاااك ماسخيتش بيك
نوح:(حك لحيتو ونطق) مرة خرا ليوم عييت وخصني نمشي نعس شوية راك عارفة
بيسان:(ناضت جهتو وقالت) واخا احبيبي أصلاا راه باين فيك عياان
نوح:(درعها بيدو) من الخمسة دالصباح وأنا فاايق
بيسان:وتالرياض عاامر بالعائلة اتلقاهوم باقي مانعسوش
نوح:يمكن
خرجو من لبيرو غادين فلكولوار تاوقفات لفرملية بيسان طلباتهاا لغرفة الفحص.. ودعات نوح ومشات مع لفرملية وهو كمل طريقو بخطوات تقيلة تاهز عينو بلخطفة قدامو وهي تباان ليه رحيل جااايا بشوية عليها وباين فيهااا ساهية ومكيناااش هناا.. فلول شك بلي هي ولكن غير ركز الشوفة فيها عرفهااا.. كمش حجبااانو مستغرب وجودها فالسبيطار وفهاد لوقت.. تمشى تاهو جهتها ويديه فجياب سروال التوب لي لابس.. خطوة من جهتو مقابل خطوة من جهتهاا هي لي كانت غادة لحمام باغا تغسل وجهها.. كان بناتهوم خطوات بسيطة بااش يقربو لبعضهوم وفديك اللحظة هي هزات راسها أو وقفاات بلاصتهاا تتشوف فيه.. عكسو هو لي قرب جهتها تاوقف قدامها وكمش حجبانو وبصوت هادئ فيه نوع من التساؤل:رحيل نتي اش كاديري هنا؟
رحيل:(حكات يديها مع بعض ونطقات بصووت هامس) خويا فلبلوك
نوح:(نطق بنيرة باين فيهاا الاهتمام)شكون واش محمد طه؟؟
رحيل:(بصوت مخنوق) اه هو
نوح:مالو؟
رحيل:ليوم صبح مريض بالرواح ومشى لخدمتو وفاش قربات وقيتة دلخروج ديالو تعطل عيطنا ليه ساعة مجاوبش وفاش مشينا نشوفوه لقينا بلي سخف فلخدمة وعيطو لومبيلونص جابتو لهنا وفاش فحصوه لقاو بلي عندو ورم دموي فالراس هء هء هء هء
حدرات راسها تتبكي وتشهق وفهاد الساعة مقدراتش تكونطرولي راسها.. كمش حجبانو وقرب جهتها وغير حط يديه على كتفها بلاماتفكر عنقااتو ودفنات راسها فصدرووو وهي تتبكي...
يتبع..
التعليقات
لا توجد تعليقات بعد، كن أول من يعلق.