الجوهر الحر الجزء 59

فنفس اللحظة وفمكان اخر وبالضبط قدام لگاراج دإدريس كانت واقفة غزلان بتردد وكل مرة طلق تنهيدات مهمومين وفالأخير رمات الخطوة ودخلات لداخل.. كانت عارفة بلي غاتلقاه هناا فهاد لوقيتة عليها جات عندو وبالغعل بان ليها جنب واحد طوموبيل محني تيصاوب فيها وهي قربات جهتو ونحنحات بصوت عالي:احممم عمي إدريس

ضار جهتها وشاف فيها بتفاجأ مستغرب من تواجدها هنا وبهدوء قال:بنتي غزلان ياك لباس؟

غزلان:(تاتحك يديها مع بعض وبهدوء قالت)أنا جيت باش نهضر معاك فواحد الموضوع مهم لاكان ممكن؟

إدريس:خبار الخير ابنتي اجي معايا (بصوت عالي) رشيييد اجي كمل هاد الطوموبيل راه مولاها غايجي فلعشية (شاف فغزلان) زيدي ابنتي اجي معايا

سبقها غسل يديه هو لول عاد جر الكرسي وجلسو جنب البيرو لي عندو تم.. كانت تاتحس بقلبها كيضرب بزاف وتاتفكر فردة فعلو ملي غاتقول ليه سبب مجيتها عندو لهناا..قاطعها من شرودها صوتو لي قال بنبرة حنينة ولفاتها منو..

إدريس:كانسمعك ابنتي مالك؟؟

غزلان:(بصوت هادئ كاتلمس منو لحزن) أنا ماعرفتش شنو الحاجة الزوينة لي درت فحياتي تاربي لقاني بيكووم نتوما.. دخلتوني وسطكوم وحنيتو فياا عتابرتوني بنتكووم وأي حاجة احتاجيتها كنتو تعطيوها ليا بلاماتبخلو علياا نهار وقعت فمشكيل مع خويا وقفتي فوجهوو ودافعتي علياا بحال االا أنا وحدة من بنااتك ماشي غير بنت برانية جات تخدم عندكوم..حسستيني بلي عندي راجل فحياتي لي يدافع علي أب لي يحن فبنتو وعمرو يخلي شي حاجة خايبة توقع ليها.. (تنهدات وهي شادة لبكية وشافت فيه) عشت معاكوم يام زوينة وربي شاهد بلي بلاصتكوم فقلبي عمرها تبدل وبلي معتابرااكوم عائلتي لي محنااتش فيا نهار واليديا توفااو

إدريس:(تحدر جهتها وشد يديها وطبطب عليها بحنية ووقار وقال) وتانتي راك بحال بنتي ومانبغي تاحاجة خايبة ضرك

غزلان:(تبسمات ليه) عارفة هادشي علاش جيت لعندك هناا باش نقول ليك بلي(زيرات على يديها) أنا رفعت دعوة طلاق على محمد طه

إدريس:(ملامحو بان فيهوم الدهول والتفاجأ وبنبرة كاتلمس فيها عدم تصديق قال) دعوة الطلاق ولكن علاش؟؟

غزلان: أنا ويااه مابقينااش مفاهمين وهاكا حسن كل واحد يمشي فطريقو حيت أنا ويااه طريقناا مختالفة اعمي وعمرهاا غاتجمع

إدريس:(كمش حجبانو وقال بنبرة تساؤل) واش محمد طه دار معااك شي حاجة خايبة ؟؟

غزلان:(ماكرهاتش تقول وتخوي لي فقلبها ولكن ماتقدرش حيت ديك الهضرة صعيب تقال والسكات خير.. حركات راسها بهدوء) أنا ويااه صافي مبقيناش تانتفاهموو اعمي والطلاق هو لحل لينا بزوج

تايشوف فملامح وجهها وكيحاول يفهم شي حاجة منو.. هو عارف هاد الأيام ولدو وهي مخاصمين حيت باينة ولكن قال عادي خصام تايوقع بين لمزوجين وبين أي زوج وزيد هو مباغيش يدخل فولادو وفحياتهوم حيت هوما كباار وبعقلهوم راه لمخير فيهوم عندو تلاتين عاام يعني عارفين كيفااش يجيريو حياتهوم بلابيه.. وهو وقتاش غايدخل لاشافهوم فواحد لوضع لي خصو تدخل بحال دابا فاش قالت ليه على الطلاق راه ماستوعبش حيت ماشي بزاف باش تزوجو هي وياه وباغي يعرف واش كاين حل بااش يديرو ولكن إصرار غزلان على عدم البوح بلي كاين خلاه يحتاارم قرارهاا.. هي بحالها بحال رحيل وأسماء ورنيم لاشي وحدة فيهوم ضراتها شي حاجة غايوقف معاهاا ولاكان عارف بلي ولدو مول لغلط غايعاقبو ومغايجيش من صفو حيت هو رجل حقاااني من صغرو غادي بلحق لي كبر بيه وكبّرْ بيه ولادو..

إدريس:(تنهد وقال بتساؤل)الطلاق ابنتي مساهلش والاقررتيه خصك تفكري مزياان فيه ماعرفتش شنو لمشكيل لي بينك وبينو ولكن لاكنتي تقدري تلقااي حل خر من غير الطلاق ماتردديش

غزلان:تيق بياا أعمي فكرت بزاف فهادشي وماخديتش هاد لقرار تاكنت متأكدة منوو هادشي علاش أعمي جيت عندك باش نعلمك بيه وتعرفو مني مانبغيش تسمعو من شي حد خر حيت غايبقا فياا لحاال وكيف نتوما حسبتوني منكوم تاأنا حسباكوم مني (شمرات نيفها وكملات) أنا غانرجع نسكن مع صاحبتي أميمة لي كنت ساكنة معاها ولي خدامة عند رحيل

إدريس:واش نفس الدار فين كانت؟؟

غزلان:لا لا هي كرات دار خرا فبلاصة زوينة ونقية تانخلي ليك لعنوان وتالابغيتي تمشي معايا تشوفها دابا ماعنديش مشكيل أنا وياها بزوجات خدامات دابا فالمحال درحيل ولحمدلله الصالير زوين وكافينا باش نعيشو بيه ونتعاونو على الزماان

إدريس:(تنهد وقال بعدم رضى) نتي عرفاني مانبغيش ليكوم لفراق ولكن لاكانت راحتك فيه ابنتي الله يسهل عليك وديري فبالك بلي أنا ديما واقف معاك ولاحتاجيني شي حاجة اجي عندي وقوليها لياا بلاصتك وسطنا عمرها غاتزعزع وغاتبقا كيف كانت واخا غاطلقوو

غزلان:(تبسمات ليه بحزن) عارفة اعمي شكرا ليك نتا وخالتي تانيرت ماقصرتوش من جهتي

ناضت من بلاصتها وتاهو ناض كيشوف فيه بقلب مهوم.. قربات جهتو وعنقاتو وهو طبطب عليه بحنية عاد بعدات: نخليك دابا تالمرة خرى اعمي

إدريس:تسنااي (مشى جهة المجر دلبيرو حلو وهز شي فلوس ورجع جهتها حطهوم ليها فقلب يديها وقال) خليهوم عندك ابنتي دابا تحتاجيهوم..

زير ليها على يديها لي دار فيها لفلوس وهي شافت فيه وحركات راسها بلا وقالت: عندي اعمي غير خليهوم

إدريس:لاكنتي بصح كتعتابريني بحال باك غااتشديهوم راه ماشي شي حاجة كثيرة

غزلان:الله يكثر من خيرك (باست ليه يديه وقالت) غانمشي دابا بسلامة

خرجات من لمحال ولبكية واحلة ليها فحلقها شدات الطاكسي وعينيها مضببين بالدموع لي نزلو ليها فاش ركباات.. دوك دموع لي خبات عليه ولي طلقات ليهوم لعنان دابا.. حطات راسها على زاج تاتنخصص وعقلهاا كيخمم فهاد الحل لي مكانش ساهل بالنسية ليها ولكن كان هو الصح..

🔙🔙

جالسة قدام المحامي وعينيها على وراق الطلاق وسمياتهوم لي كانو باينين بالخط العريض.. حاسة بقلبها مخنوق عليها ولكن ولابدما خصها دير هاد لخطوة لي جلسات شحاااال وفكرات فيهااا ولقات بلي هي الحل الأنسب والوحيد لعلاقتهوم لمسمومة ولي طريقها مسدود.. تتبغيه وباغاه ولكن الحب ماشي كافي باااش تبقا معااه وتعيش مع واحد معاطيهاش احترام وهز يدو عليها.. هزات شوفتها فرحيل لي كانو عينيها باين فيهوم لحزن ولكن ماعندها مادير.. كانت تتقول محمد طه دابا يدير عقلو ويعطيها فرصة ويبغيها وفاش شافت علاقتهوم فرحات حيت كان باين فيهوم مفاهمين ولكن فاش شافتو كيفاش عاملها اخر مرة ولكلام لي قال ليها وضربو ليها تما قالت سطووب هي اكثر وحدة مغاتبغيش شي مرا تعرض لضرب وعدم الاحترام حيت عاشتو واثر عليها ومباغاش تاغزلان تكون بحالها... أما غيزو هزات الستيلو وسنات لوراق ودمعة طاحت من عينيها مقدراتش تحبسهاا.. مداتهوم لمحامي لي نطق:دابا غانسيفطوهوم لراجلك مع المفوض القضائي

رحيل:مكاين لاش أنا غانعطيهوم ليه

هزاتهوم وناضت هي وغزلان مور ماشكرو المحامي عاد خرجوو وغزلان ساكتة مدواتش ركبو فطوموبيل رحيل فسكااات وتاوحدة ماهضرات مع لخرى وكلها وفين تاتفكر..

🔜🔜

فالجانب لاخر عند رحيل ومحمد طه لي مانطق ماتكلم مور مالاحت ليه رحيل ديك لهضرة فوجهو صادماه بيهاا.. عينو كيشوفو فيها كيتسناها تهضر وتقول ليه غير ضاحكة معاك ساعة شوفتها وجديتها خلاتو يعرف بلي مكضحكش.. جر الملف من يديها ومع حلو مع كيضرب على سميتهاا وكنيتها وتحت منهوم سينياتور ديالهاا.. مخرج عينو فالورااق بحال لاكايتسنى يشوف شي حاجة خرى.. أما رحيل مكانتش باغا تحط فهاد لموقف ولكن فضلات تجيبهوم ليه هي بيديها... كاتشوف فصدمتو وقلبها ضارها عليهوم ولكن هو السبب تاوصلو لهاد النتيجة..

محمد طه:(شاف فيها بعدم فهم وقال) كيفااش طلاق اااش هادشي؟؟

كيهضر ويشير بداك لملف لي فيديه وهي مسحات على وجهها ونطقات بهدوء وعينيها فقلب عينيه:داكشي لي خصو يكوون السيدة مبقاتش باغا تكمل معااك ورفعات دعوة الطلاق

محمد طه:(ضحك بفقصة) طلااق هه فين هي علااش مسيفطااك نتي ؟؟

رحيل:هي مباغاش لاتشوفك ولاتهضر معاك وحمد الله حيت جبتهوم ليك أنا وماخليتش المفوض القضائي يجيبهوم

محمد طه:وعند بالك نتي وياهاا غانوافق على هاد الق*وي

رحيل:(حمرات فيه الشوفة) ماتخسرش لهضرة قدااامي وبزز منك غاتواافق حيت نتاا درتيها بيديك اوا فكهاا نهار سمعتيها كلام السم وصرفقتيها نسيتيهاا هاا وعند بالك غادوز عادي بحال لامدااير والو وتابااااش تعتادر ودير لحل مادرتيهش بقيتي واقف بلاصتك تاتسنى ينزل عليك الحل من السمااا.. دابا ماعندك مادير من غير تسني وتعطي لسيدة طلاقهاا حيت عيشتها معااك حرارت

محمد طه:(عض علة شفتو منيرڤي) مغاانسنيش ولي فجهدهاا ديرو مسيفطاااك نتي بااش دوي وهي فين مشاااات ؟؟

رحيل:شوف امحمد طه بلاقصوحية لرااس وداك لعنااد لخااوي أناا عارفة ونتا عارف سباب زواجكووم كلشي من لول بدا غااالط ولكن أنا قلت يقدر فيها خير معارفينش ربي اش مخبي ليناا وتافااش تزوجتو ورجعتو من السفر قلت مزيان السيد والسيدة مفاهمين هادشي لي بغييت ولكن داكشي لي درتيه داك لمرة ولهضرة لي قلتي وكيفااااش عايرتيهااا وصرفقتيهاا راه مغايدوزش ليك هاااكااك عند بااالك هي غاتنسى وتميك مدلولة هي ماعندهاا نفس باش دوزها ليك ونتااا ضسر وطغى وتعاودهااا كل مرة تكون معصب يااااك

محمد طه:رحييل هادشي بيني وبين مرتي مادخليش

رحيل:(بصوت قااصح وجدي) غاندخللل سمعتي وبزز منك اخوياا لاكنتي كاظن غانبقا مربعة يدي ونسكت راك غااالط ااه نتا خويا وعزيز عليااا وربي شاهد ولكن التصرف ديااالك غااالط ومغانقبلش بيه حيت أنا مرا كيفي كيفهاا ولاكنت بلاصتها كنت ندير بحاااالها اااش غاندير بزواااج الدل هااا راجل لي يبقاا يجبد ليااا الأغلاط دياالي بحال لاهووو مكيغلطش ماعندي ماندير بيه.. نتااا قبل ماتشوف غلااطهاا سير شوووف راسك فلمرااياا وسير عااالج رااسك وعتااارف بلي نفسيتك مريضة امحمد طه (قربات جهتو) راه واخا تقصح رااسك السيدة صااافي مبقاااتش باغااك ورااه بنفسها رفعات الدعوووة حيت عيااات وبغاات تسالي هادشي لي بناتكوم من الأحسن تسني بلاصدااع وبلاقصوحية الرااس

محمد طه:(غوت بالجهد تاعروق جبهتو تنفخو وقال بعناد) ومغانسنييش ومغاانطلقهااش..

مقادرش يستوعب الشي لي دارت غزلان وكيفاش رفعات عليه دعوة الطلاق.. عقلو حبس ومبقاش باغي يخدم عند بالو راه لي دار ساهل يتنسى ومعارفش بلي داكشي لي دار معاها كان هو النقطة لي فيضات كاسها وخلاتها تاخد داك لقرار... كلام رحيل عارفو على حق ولكن مباغيش يتقبلو ومباغيش يقبل بلي هو وياها صافي غايطلقو... ضرب فرحيل وزاد غادي لبيتو ومع دخل حل لبلاكار وعينو على حوايجها لي مستفين تم هز جاكيط لبسها ولبس عليه فرجليه ونزل كايدردب فالدروج غادي عندهاا.. كان عارف بلي مغاتكونش فلفااك حيت ليوم مكتقراش عليها شد طريق لمحال رحيل.. كل مرة يشوف فساعتو ويقول لمول الطاكسي يزرب.. نايضة فيه لحريگة باغي يشوفها وربي كبير مع وصل قدام لمحال جبد خمسين درهم لاحها لمول الطاكسي وماتسنااش باش يرد ليه الصرف كان نزل ودخل لمحال كيقلب عليها بعينيه.. مبانتش ليه فلتحت وطلع لطبقة لفوقانية نفس الشي.. رجع نزل وغير قشع أميمة مشى لجهتها تاوقف عليها وبدون مقدمات قاال:فين غزلان؟؟

شافت فيه بتفاجأ وقالت:مجاتش ليووم وماعرفتش فين هي؟

محمد طه:(هز حجبانو وقال بقلة صبر) بلاتمرضين ابناادم سولتك فين غزلااان؟؟

أميمة:هااء وأنا بااش غانعرف ياك نتا راجلهاا نتا لي غاتعرف فين هي ماشي أناا

شاف فيها مخنزر وجبد تلفونو صونى عليها ولكن مجاوباتش لمرة لولة والتانية والتالتة طفات عليه تلفون.. رجع شاف فأميمة وخرج بحالو معصب وهي غير شافتو مشى جبدات تلفونها وصونات عليها لقات تلفون طافي صونات على نمرة خرى وغير تحل لخط وهي تنطق بسرعة:راجلك كان هنا تايقلب عليك قلت ليه ماعرفتكش فين باااين فيه معصب وو

قبل ماتكمل حسات بالتلفون طار من بين يديها وضارت شافت فيه لقاتو هو لي رجع كيفاش اوقتاش؟؟ ماعرفااتش مع كانت عاطية بضهرها لباب... حط تلفون على ودنيه وسمع صوتها لي نطق بهدوء:ماقلتيش ليه فين أنا يااكي؟؟

محمد طه:فييينك؟؟

غزلان:(الصمت)

محمد طه:(تايحاول يبرد ومايتعصبش)غزلاان باغي نشوفك ونهضر معاك قولي لياا فينك نتي؟؟

غزلان:(بتعب)مابقاات بيناتنا تاشي حاجة تقال

محمد طه:(بانفعال) كاااين مايتقاااال نتي فينك؟؟

غزلان:أنا ف****

محمد طه:أنا جااي

لاح تلفون لأميمة وخرج وهي شافت فيه ونطقات بهمس:اااه ياربي على هاد المصعورر

أما محمد طه شد تاني طاكسي ومشى لعندها لعنوان لي عطاتو ديال واحد الجردة قريبة لدار أميمة لي كراات... وصل وغير خرج وبدا كيقلب عليها بعينيه تبانت ليه جالسة فالكرسي دالجردة تاتشوف قدامها وكانو بعض النااس قلالين جالسين تاهوما تم.. تمشى جهتهاا تاوقف قدامها وهي هزات شوفتها فيه..

محمد طه:(أشار بيديه لي هاز بيها لملف وقال بصوت حاول ماأمكن يكون هادئ: شنو هادشي درتي؟؟

غزلان:(ببرود بدون ماتشوف فيه) لي خصو يداار

محمد طه:(عض على حنكو من لداخل كيكب فيه أعصابو وقال) الطلاق عند بااالك انا قابل بيه

هزات فيه عينيها وشافت فوجهو بنظرات هادئة وبصوت ساخر قالت:سمحليا حيت متشاورتش معاك وماخديتش الإدن ديالك ارااجلي

محمد طه:(بصوت حاد) غزلاااان

غزلان:(ناضت من بلاصتها وغوتاات بعصبية مامسوقة لالزنقة لي هوما فيها ولالشوهة لي غاتنوض) غزلااان غزلاااان الله يعطي العداب لهاد غزلان لي لاحت راسها فهاد المشكيل لي هي سبابو.. ياااك بفمك قلتيهاا أناااا (تاضرب فصدرها بضربات قاصحين وغواتها واصل لفين لدرجة لي تم كيشوفو فيهوم) أناا لي درتها لراااسي ودليت رااسي معاااك كان علياا من لول مانقبلش بزواج الدل نهااار سمعتيني ديك لهضرة فلخطبة كان علياا نحبس داااك الزواااج ولكن نستااااهل أنااا لي حماااارة وقابلة بيه وبالدل معاااك وفكل مرة تهضر وتغوووت نقول ماعليش صببري ولكن صبرري هناا وصل حدووو صاافي باركة (خرجات عينيها فيه) مغااانزيدش نضرب معاك الضربة مزااال خللليك مع مرضك ومع لبغوو ديالك لوحدة ميتة خليك مع راااسك وخليني عليك صاااافي مابقيت نزيد معاااك تانهااار عفتك اولد الناااس ومابقيتش باغااااك (نطقات بمرارة وبصوت مدمر) وشفتي هااااد لقلب لي بغااااك ولي خلاااني نتدل نحيدووو من وسط صدري ونلووحوو لكلاااااب ومانخليهش يعاااود يضرب لييييك...

فالكافي داليازيد كان جالس هو وسناء لي باين طالع ليها الدم ومعصبة.. شاد فيديها وهي قالبة وجهها لجهة الزاج مباغاش تشوف فيه..

اليازيد:(حك راسو وقال بتنهيدة مسموعة) سناء شوفي فياا (مد يديه وضور ليها وجهها تاشافت فيه وكمل هضرتو)راك شايفة الواليدة هزات بكاجها ورجعات لفاس وفاش تانصوني ليها باش نهضر معاهاا مكاتجاوبنيش الالة شنو بغيتي ندير

سناء:دير جهد وسير عندها وهضر معاهاا واش حنا غانبقاو هاكا اليازييييد

اليازيد:نهضر معاهاا بحال لانتي معرفاهااش كي دايرة وبلي مقاطعة هضرتي حيت باغييك وباغي نرجعك

سناء:مك عاااشت حياتهاا مع الراجل لي بغات ودارت وليداتهاا علاش غاتحرمها عليناا (بانفعال) اليازيد راااه عمرنا كيطير دغياا واش غانبقاااو هاكا تاواحد فيناا يمشي لعند لي خلقو راه الوقت والزمان هادا ولواحد باغي يدير وليدااتو

اليازيد:وأنا مباغيهومش فنظاارك عند بااالك عجباني حالتي هاكا اسنااء بكلامك راه تاتحسسيني بلي أنا مامسوقش ليك ولعلاقتنا لي رجعاات مور سنين دازو

سناء:(بجدية)بغيتي الحقيقة أنا حاسة بيك ماااداير تاإفوور وممسوقش حيت كون كنتي مسوق كون راه حنا دابا فدااار وحدة

اليازيد:(شاف فيها بتفاجأ) هادشي لي كيبااان ليك داباا الالة؟

سناء:اااه هادشي لي كيباان ليا شووف شحال وحنا مصالحين وكل مرة خارج ليا بحجة حگا مي قطعات لهضرة حگا مابغاش تجاوبني حگا هزات قشهاا ومشات لفاااس لابقيتي تاابع مك وداير ليها لخاطر راه مغانوصلو فييين اليازيد

اليازيد:(خنزر فيها) هاديك راااه مي الالة وااش نحط عليها سيف باااش دير لي بغيت بزز رااه الرجافالله لي فجهدي درتو ونتي مكاتشوفيش هاادشي گاااع

سناء:(تقادات فجلستهاا وقالت بوضوح) أنا ماشي عمية بااش مانشوفش أنا هضرت وقلت لي كااين كون كنت أنا بلاصتك وبّا مثلا مقصح راسو ومبغاش غاندير لي يطيح فباالك باااش نقنعوو مغانعيااش واخا نعرف كل نهار نخطب عليه بالديسك دياالي تايقتانع المهم نحس براسي درت جهد مااشي نبقا مربعة يدي وكانتسنااه يرضي عليا وأنا عارفاااه مغايديرهااش

اليازيد:(معاجبوش الحال وبانزعاج واضح نطق) نتي هادشي لي كاتقولي غير هضرة خاوية حيت كوون تحطيتي فنفس السيتوياسيون غاتعرفي اش كاااين

سناء:(بسخرية) ااه نتا لي عارف كلشي ونتا بوحدك لي مهلوووك بقيتي فيا

اليازيد:سنااء يهديك الله واش نتي باغا تعصبيني غير هاكاك

سناء: وراه نتا لي معصبني ومطلع لياا السكااار ببرودة دمك دابا نهااار بغيتي تخطب ديك خيتي ماتعطلتيش بيه فيه وكون كنتي تصيب كوون راه ديتي لعدول وكتبتي عليهاا وتامك ديك الساعة مبقاااش فيها العگز وضهرها كيضرهاا ولارجليهاا تاهوماا كون صاابت دردگ ديرهااا وداباا فاش بغيتي تخطبني هاهي تعكساات وطاحت مريضة زعمة معرفااش بلي ضد فياا دارتهااا

اليازيد:(خنزر فيها) سنااء من حقك تعصبي ولكن مي ماتهضريش عليها بلخااايب

سناء:ماهضرتش بالخايب قلت لي كاااين ولي نتا عاارفو ومراضيش تقولوو مك فيها الدغل بالعربية تاعرابت فيها تحرامياات

اليازيد:(ضرب يديها على طبلة تاقفزات وكلشي ضار تيشوف فيه وهو قال بانفعال) صااافي زدتي فيه تانتي راه مغانسمحش ليك تدوي فيهاا بالخاااايب احتارميها شوية

سناء:(ناضت تاهي معصبة) مالي قاااتلة رووح قلت ليك كااااين علاااش تاتغوت علياا داباا واااش أنا لي غااالطة حيت قلت كلمة لحق فاااش كانت مك تاتسمعهوم ليااا وتبقا تحشي فلهضرة مكنتيش نتا وماشفتي والو وعند بااالك غير كانكدب عليك

اليازيد:(وقف قدامها وقاال بجدية) قلت ليك ماتجبديش سميتهاا على فمك وماتهضريش عليها بالخااايب حيت هي مي وأنا مغانرضااش على مي تگال عليها هاد لهضرة وداكشي لي واقع بناتناا أنا وياها نتي مادخليش فيه

سنااء:علااش ماندخلش وأنا عارفة رااسي بلي عندي يد فلموضوع الشريف واااش ناسي بلي هي مباغاانيش نرجع معااك هي تادير هادشي كولو حيت مكتحملنيش وداباا نبصم ليك عليهاا كون مشيتي وقلتي ليها باغي تزوح شي وحدة كيفما كانت غاتقول ليك مرحباا اولدي وتهز جلابتها وتمشي تخطبهاا لك علاااش هادشي كامل اش درت ليهاا فملك الله قتتلتت ليهاا روح ولاسرقت ليهاا راجلها ولاشنوو راه أنااا لي خصني ناااخد منها مووقف على لقلبة لي قلباات علياا ولهضرة لي حشااات لياا هاد السنين كلهااا ومع دلك بقيت محترماهاا وعمري قللت احترامي ليهاا واخاا كان بإمكاني نعطيها زوح كلمااات نخليهوم كيطلعو وينزلو فيهاا ولكن مادرتهااش حيت أنا عارفة بلي هي مك وحيت محترماهاا ولكن هي ممحترمانيش وهي مباغااانيش ليك نتا مكاتشوفش هااادشي كاتشوفني غير شنو قلت عليهاا وصافي وهي شنو دارت وشنو قالت تعميتي عليه

اليازيد:(مسح على وجهو منرڤي) ماتعميتش راه شاايف كلشي وعاارف لي كااين ولكن واخاا هاكاك ماعندي كيف ندير تاتبقاا مي لي ولدااتني واااش نعصي ربي على قبلك رااه مايمكنش

سناء:(شافت فيه وببرود هزات صاكها وقالت)خليك امرضي ميمتو مادير تاحاجة وتاأنا راه هادشي طلع ليا فراسي بغيتيني راك عارف دارناا وهادي اخر هضرة عندي..

كانت تاتحس براسها عياات من كلشي وباغا غير ترتااح.. هاد الموضوع كاتحس بيه استنزف طاقتها ومبقاا عندها فين تزيد تصبر.. مجاتش وخدات خطوة بحال هادي تاكاانت متأكدة منهاا وباغاهاا.. قلبها صافي برد من جهتو ومبقاتش باغاه حيت هو ماخلى ليها تاشي دكرى صغيرة وزوينة تفكرهاا.. فاش تاتجي تشوف دكرياتهاا تاتلقى غير لبرود فيهوم والشك والأعصااب... كاتبغيه اه ولكن الحب مكافيش بالنسبة ليها باغا الاحترام لي مكاينش.. عارفة لاسكتات على هاد لموضوع وميكاات غايزيد يتمادى وهي مباغاش هادشي.. عطات فرص بززاف وهو مبغاش يستاغلهوم إذا يتحمل النتيجة... ولي مخليها تزيد تعصب وتحس بخيبة أمل هو لبرود ديالو معاهاا ولي كيزيد يأكد ليها بلي قرارها صحيح.. وطلاق هو لحل ليهوم بزوج فعلاقة ساامة كاتمرض فيها وكاتهلك فيها نفسيتهاا.. مكانتش باغا تعتارف ليه بمشاعرهاا وكانت محتافضة بيهوم ولكن خواات لمزيودة وگاع داكشي لي حسات بيه ضرهاا خوااتو فوجهوو بدون اهتمام باااقي.. أما هو فمرارة صوتهاا واعترافها خلاوه للحظة يجمد وعينو عليها كيفاش تاتهضر بلحرقة.. حس بطعم الصدا فحلقو وريقو بزز باش دوزو.. ملي بانت ليه قالبة وجهها تاتبكي حسساتو بالدنب قرب جهتها كتر ومد يديه باش يمسح دموعها ساعة ماخلاتووش.. دفعات يديه وشافت فيه ببرود: مكاين لاش تمسحهوم ونتا أصلا سبابهوم تانزلوو

محمد طه:(زير على يديه) أنا ماقصدتش ديك لهضرة اغزلان عارف بلي غلطت فحقك وعارف بلي جرحتك

غزلان:(قطعاتو) ماشي جديدة عليك من نهار عرفتك ونتا تجرح بلاماتسوق لتاشي وااحد كاتفكر غير فراااسك امحمد كنتي ديما أناني ومع دلك عمري دويت وبقيت ساااكتة ولكن أناا مغانبقااش ساكتة داباا وغانهضر وكيفما نتا كنتي أناني تاأنا غانكون أنانية وغانفكر غير فمصلاااحتي زواجي معاك عمري شفت فيه نهار زوين واخا كنت كانحاول وندير لي فجهدي بااش نولف ونصبر ولكن صبري تقادا ااشنو عطيتيني من نهار تزوجتيني (بدات تاتحسب ليه) لفقصة والأعصاب والدل وقلة الاحترام والضرررب هادشي كولو هو لي شفت معاااك واخاا نتا بفمك قلتي راه غانبداو صفحة جديدة وغانساو ساعة فأول مشكيل عايرتيني بداكشي لي فااات ولحتيه فوجهي بلاماتحن فياااا.. أناا بناادم عندي قلب كايتجرح وكاانحس لاكنتي نتااا مدمر فنفسيتك مادمرنيش معاااك أناا سييير خليك عاايش كيف كنتي وديرني بحال لاعمررك عرفتيني ولاشفتيني وهااادي غاتجيك ساهلة خليك عاايش فواحد لقوقعة خاصة بيك وخليني نعيش حياااتي

محمد طه:(حرك راسو ونطق بانفعال وبصوت جدي) مغااانطلقكش سمعتي اغزلان هاااد لورااق ماشي هوما لي غيساااليو زوااجنااا

غزلان:(بسخرية) هه على اشمن زواج كادوي ؟؟ زواج الدل والقهرة فنظارك زواااج وااش كاتفلى علياا ولاعلى راااسك

محمد طه:(قرب جهتها وقال بصوت خافت مجروح) خليناا نبداو من لول أنا ونتي اغزلااان شدي فيدي وماتخلينيش

غزلان:(بصوت مجروح قالت) شديت فيهاا مرة بكل جهدي ولكن هي سمحاات فياا وجرحااتني (أشارت ليه ليديه) هاد ليد لي شديت فيها هي نفسها ليد لي تهزااات علياا

محمد طه:(شد وجهها بين يديه وقاال بهدوء) ماتعااودش نواعدك عمري نعاودهاا والله يعطيني لهررس فيها لاعاودت هزيتهاا عليك

غزلان:(حركات راسها بلاا) مانقدرش نتيق ومانقدرش نزيد نكرفض راسي معااك امحمد طه حيت عييت والله تاعييت أناا مابقيت باغا منك والو من غير تسني دوك لوراق وتخلي كل واحد فينا يمشي فحال سبيلوو صااافي هاد جهدي معاااك

محمد طه:(زير على وجهها وقال بعنااد وصوت قااصح) مغانسنيش ومغانطلقكش اغزلااان وهاد لوراااق (هزهوم قدامهاا وقالت بعصبية) مغايبقاااوش

قدام عينيها شرگهوم وهي تاتشوف فيه بهدوء.. واخا هادشي كولو إلا أنها مصرة فقرارهاا ومباغاااش تنازل عليه.. الأنثى فااش كايتجرح كبريائها وقلبها كاتولي قااصحة وتايكون صعيب عليها تنسى وتساامح.. هي وصلات لواحد لحد لي مبقااتش قادرة تزيد تحمل وهمهاا لوحيد هوو راحتهااا.. الأنثى فاش تاتجرح من قبل شريك حياتها ومن قِبل الشخص لي عطاتو قلبوو تاتولي أنانية ومكاتبقااش تفكر فيه كيف قبل.. كاتولي تسبق راسها عليه هوو حيت سبق ودارتهاا وهانتيجة قدام عينيهاا.. هي غلطات ودابا غاتصحح لغلط فمرة وبهاكا لاهي غاتعدب ولاهو غايمرضهاا وغاتعطيه حرية بااش يعيش فعالمو ودكريات لماضي لي باقي دايرين ليه حاجز فمستقباالو..

غزلان:عند بالك لاقطعتيهوم رااه غانسحب الدعوة (حركات راسها بلا) راك غااالط حيت لي فبالي غانديرو واخا تقطع ميات ورقة عاادي كيف خرجو هاد لوراق وتصاوبو غانصاوب وحدين خرين واخا تقطعهوم تاني غانعاودهاا ومغانعيااااش عرفتي علااااش حيت أناا باغا غير نتفك من داك لحبل لي رابطني بيك ولي دااير ليها سريفة فعنقي كيخنقني ونتحرر منووو

محمد طه:(قاس وجهها وقال بنبرة خافتة) عمرك غاتحرري مني اغزلان حيت أنا غانبقاا كيف ظلك وكيف لهوا لي كاتنفسيه وعمري نخليك

غزلان:ماتكونش تايق بزاف حيت مباغااكش تصدم فلخرر

محمد طه:(حط جبهتو على جبهتهاا)ماتقدريش ديريها

"ماتقدريش ديريها" هاد لكلمة استفزاتها وحسساتها بلي بحال الا كيستهين بكلامها.. دفعاتو من عليها وشافت فيه وهي مخنزرة.. ولف فيها دير لي بغاا ولكن دابا غاتقلب الدعوة وغاتولي دير لي بغات هي..

غزلان:واخاا داباا نشوفو اسي طه شكون لي غايدير بهضرتو (شيرات لدوك لوراق لي شرگ)الاعند باالك غانهبط الرااس وغانسى رااك غالط شرگتيهوم بصحتك ولكن هادشي مغايخلينيش نحيد لفكرة فبااالي سمعتي جيت لعندك باش نهضر معاك كأيها الناااس عند باالي غاتفهم بالكلام ساعة راني غالطة (بعنااد وكبرياء) لقان.ون بيناتناا

لاحت هضرتها فوجهو ومشات وهي معصبة منوو ومن داك لعناد لخااوي لي تايدير معاهاا أما هو بقا واقف بلاصتو كولو كايغلي معصب ومنيرڤي من قصوحية رااسهاا.. باغا طلق وهو مغايطلقهااش وغايشوف شكون فيهوم لي غايعيى فلخر.. جمع دوك لوراق لي شتت ورجع لداار فهدوء تاام تلاقى مع رحيل لي عطاتو شوفة باردة وكملات طريقهاا مخلياه كيتنهد بحسرة..

دازت ديك الليلة وغزلان مارجعاتش لدار وهو كان عارف فين هي ومكانش باغي يتجاحت معاهاا ويزيد يكبر لخصام عليها عطااه مجال تجلس فيه بوحدها وتفكر عالله تحيد لفكرة من دماغااه وترجع ليه.. ولكن كان غالط حيت هي كانت مصرة والدليل هوما وراق الطلاق لي عاودات سيفطاتهوم ليه مع العون القضائي هاد لمرة.. فلول خلات رحيل تكلف مي هاد لمرة خلات الأمور تمشي بطريقة قاانونية.. كلشي ساق خبار لموضوع الطلاق وكلشي تصدم مفاهمش علاش وهوما يالاه مزوجين باقي ماكملو لعاام مع بعضياتهوم.. تانيرت غير علمها إدريس وهي تمشي عندها لدار أميمة باش تهضر معاهاا بوحدهاا وتعرف شنو السبب حيت إدريس قال ليها بلي مبغاتش تقول ليه وهي ظنات بلي الموضوع غايكون شوية حساس ويمكن حشمات منو عليها مشات عندها ساعة نتيجة كانت نفسهاا واخا عياات تانيرت معاها ولكن بدون جدوي ومالقات ليها جهد..أما رحيل فمادخلاتش باقي وخرجات من لموضوع مخلياهوم بزوج يتفاهمو.. هي وقفات مع غزلان وعوناتها تالقات لمحامي ولباقي خلاتها هي تكلف بيه..مبغاتش هادشي لي تايوقع ولكن ماعندها ماديرر ومادخلاتش باقي واخا قلبها ضرها على خوها وعلى غزلان ولكن مابيناتش ليه..كلهوم حاولو يهضرو مع غزلان وتامن ريان مشى عندها وحاول يخليها تراجع حيت عارف خوهاا لامشى تاطلق حالتو غاتكفس ولكن هي لي فبالها راه فبالهاا.. دازو أيام أو وصل يوم الجلسة وغزلان من صباح وهي فايقة مهمومة وباين فيها مقلقة..قدام مرايتها واقفة تاتشوف فراسها وفداك الكوستوم النسائي لي لابسة وشعرها مخلياه مطلوق عادي.. مك اب خفيف مخبية بيه تورم عينيها لي تنفخو بسباب بكاها فالليل..هزات مسائلها ومع حلات لباب ديال دار بانت ليها طوموبيل درحيل

قربات جهتها وطلعات وبتسيمة مخبية بيها الألم لي فداخل ديالها قالت:صبااح الخير

رحيل:(بصوت مبحوح)صباح النور (تنهدات)غزلان نتي متأكدة من هاد لخطوة لي باغا ديري؟

غزلان:(بهدوء)متأكدة طريقي أنا وياه مسدودة وهاكا حسن كل واحد يبدا من جديد

رحيل:نتي عرفاني ساندتك حيت مباغاش داكشي لي دار معاك ولكن فنفس الوقت مباغاكومش طلقو نتي وياه

غزلان:(شافت فيه بحزن)تاأنا مكنتش باغا هادشي ولكن خوك ماخلى ليا تاشي حل..خلينا نمشيو باش مانتعطلوش

دمارات رحيل فصمت قاتل وعقلها مع خوها لي مشافتوش من لبارح قلبها ضرهاا عليه ولكن ماعندها مادير الطريق كولها وهوما ساكتات..وصلو قدام المحكمة وهنا قلبها بدا يزدح

رحيل:(بهدوء)أنا غانتسناك هناا الله يدير ليكوم تاويل دلخير

حركات غزلان راسها وتبسمات ليها ونزلات ورحيل مسحات دمعتها لي هبطات من عينيها..دخلات غزلان وفالشوفة كاتبان هادية ولكن داخلها نايضة حر.ب.. لقات لمحامي كيتسناها سلمات عليه وبدا كيهضر معاها بعملية وهي عقلها خايب وكل مرة تشوف فجهة لباب.. قربات وقت الجلسة ديالهوم وهو باقي مبان.. كاتحرك رجليها بتوثر وقلبها تاتحس ييه كيضرب ففمها.. وصلات لوقيتة وعيطو ليهوم شافت فساعتها ومع هزات راسها بان ليها داخل بخطوات هادية.. مشافتوش من اخر كلام ضار بناتهوم ومجيتو خلات قليها يتكمش وسط صدرها.. شافو فبعضياتهوم بنظرة لخصات مجلد طويل دلكلام.. دخلو بزوج وغزلان ماقدراتش تشوف فيه مزال حيت عارفة راسها غاتبكي وهي مباغاش تبين ضعفهاا..هي لي خدات هاد لقرار إذا خصها تحملو.. بدات الجلسة وهي نص سمعاتو ونص هرب ليهاا وعقلها تايفكرها غير فدكرياتهوم لي مكانتش فيها شي حاجة تفرح.. سولهوم لقاضي واش موافقين على الطلاق ونطقات باه شافت فمحمد طه لي قال ببرود:اه

عضات على شفتها وقلبها فديك اللحظة حسات بيه تهرس خصوصا فاش نطق لقاضي بحكم طلاقهوم.. وهاديك كانت هي نهاية علاقتهوم لي بدات بغلطة ولي خلصو عليها بالغالي وكانت النتيجة مؤلمة لطرفين بزوج..

غادة وهي حابسة دموعها مباغهومش ينزلو ومقدراش تاضور وتشوف فيه.. خرجات لبرا وهي حاسة براسها مخنوقة وداك الصداع لي كان فالمحكمة مكانتش تاتسمع ليه حيت ودنيها كان تيتعاود فيهوم كلام لقاضي وهو كيصدر حكم طلاقها معاه..

مكانتش كاظنو غايوافق بهاد السهولة واخا المحامي خبرها بلي هو سنى على لوراق وراه هضر مع لمحامي ديالو وقال ليه بلي هو موافق ومع دلك كان عندها أمل بسيط أنه نهار الجلسة يرفض ويقول لا.. يتشبت بيها كيف قال اخر مرة هضر معاهاا ولكن هي كانت غالطة وكانت بانية أمل وهمي بلي هو باغيهاا وبلي مغايسمحش فيها.. نزلو دموعها بلاماتردد تخبيهوم وماكرهاتش تغووت عالله ديك لغصة لي فحلقها تزول..كملات طريقها لعند رحيل لي كاتسناها فالطوموبيل وعينيها مضببين.. ورحيل غير شافتها عرفات بلي الطلاق تم حيت الأطراف بزوح متافقين عليه.. تاهي كانت باغا خوها يبقا متشبت بقرارو ولكن هو دار لعكس.. حلات غزلان لباب وغير طلعات قالت بصوت باكي:خلينا نمشيو من هنا عفااااك

لباات ليها رحيل طلبهاا ودمارات طوموبيل غادة تحت أنظارو هو لي كان واقف تيشوف فيها بنظرات ساهية.. قلب وجهو لجهة لخرى فين كان واقف باه وبخطوات تقيلة قرب جهتوو تاوقف قدامو..

محمد طه:(بصوت بهدوء نطق) بقيتي على خاطرك الواليد؟؟ هاأنا درت داكشي لي بغيتي غير تهنى ونعس على جنب الراحة دابا (ضار غايمشي ونطق ببرود) باغي نبقا بوحدي..

دار يديه فجيب الجاكيط ومشى مخلي إدريس متبع ليه العين بنظرات مهمومة وحزينة على لحالة لي وصل ليه ولدو.. أما محمد طه فديك الساعة كان باغي يبقا بوحدو ومحاملش يرجع لدار ولايشوف شي حد فهاد اللحظة باغي ينفارد براسو.. غادي فطريق معارفش فين غايمشي بالضبط المهم عندو غير يبعد من ديك البلاصة لي شهدات على نهاية علاقتو بيهاا.. مسافة طويلة ضربها على رجليه تاحس براسو عيى وخدا طاكسي غادي لقامرة.. مع وصل لقى الدنيا عامرة شي خارج شي داخل شي كيتسنى لكار لي غايركب فيه المهم الرواج كاين.. قرب جهة الگيشي ومن زهرو كان خاوي ونطق: تيكي لربااط

قطع ليه مول لگيشي ورقة وعلمو بلي لكار ساعة ويدخل لمحطة... خلصو ومشى لبلاصة فين نعت ليه كيتسناه.. واقف مكالمي وساكت وعينو على الكيران والشتا كاتنزل تاتسقي الأرض.. فالداخل ديالو حااس بواحد المرار وقلبو حس بيه كيضروو.. خرج يديه من جيبو تيشوف فالخاتم دزواج بسهو وكايتفكر نهار لبساتو ليه.. من داك نهار هو فيديه مكيحيدوش من غير لدوش لدرجة مخلي ليه لاطراس فصبعوو... فيقو من تفكيرو الكار لي كان داخل وبهدوء قرب سول السيد لي تم وتأكد بلي نفسو الكار لي قطع فيه.. طلع تايشوف فالتيكي لي فيها رقم لبلاصة وغير بان ليه رقمو وهو يجلس وكان من جهة الزااج.. تكى على الزاج والكار كان باقي ماتحرك ويالاه كيعمر الناس.. أما هو عينو كانت على الناس لي برا ولكن عقلو كاان ساهي وبالضبط لهضرتو لي ضارت بينو وبين بااه..

🔙🔙

لاكانت باغا غير الطلاق هو لي مغاتشوفوش من عندو.. وهضرتو لي قال ليها آخر مرة هي لي غادي ينفد بالحرف.. مغاديش يخليها وغايكون بحال ظلهاا ومغايرتاح تايرجعها لدار ويمسح فكرة الطلاق من دماغهاا.. واخا وصلوه لوراق مع المفوض القضائي إلاأنه ماهتمش حيت لي فدماغو هو لي غايدير.. كيف العادة كان جالس فبيتو مور ماصلى وتلفون فيديه كايفكر فيهاا.. فهاد ليامات لقلال لي دازو توحشها فيهوم.. حسم قرارو وهز تلفونو باش يصوني عليها ساعة الدقان فلباب خلاه يحبس وبهدوء نطق:دخل

تحل لباب ودخل إدريس لي كان هاد لمدة كلها ميك عليه ومخليه فراحتو.. جر إدريس الكرسي وجلس قدامو ومحمد طه كان عارف مجية بااه شنو وراهاا حيت واخا سكت هاد لمدة كلها إلاأنه ولابدما غايجي نهار ويدوي معاه..

إدريس:(بهدوء وبرزانة نطق)هاد لمدة كلها وأنا ساكت ومادويتش معاك ومادخلتش حيت عارفك واعي وكبير مابقيتيش داك لولد الصغير لي خصني نبقا تابعو فأي حاجة دارها ولافيما مشى.. عندك لعقل تفكر بيه وتعرف بيه الصحيح من الغالط.. (شاف فيه بجدية) عقلتي نهار جيتي وطلبتي يد غزلان لزواج شنو قلت ليك؟؟ (حرك محمد طه راسو باه واسترسل كلامو) كيفما نتا ولدي من لحمي ودمي تاديك بنت الناس راه فمقام بنتي وأمانة عندي وقبل گاعما تنويها لزواج أنا حنيت فيها وحليت ليها باب داري حيت شفت فيها وحدة من بناااتي نهار خوهاا رجع باش يديها وفاش عاودات لينا تمارة لي دوزها عليها تما خديت قرار بلي ديك لبنت غاتبقا على مسؤوليتي تايجيب ليها ربي راجل لي يصونها ولي نأمنو عليها يديرها فمقاام عالي وميكرفصهااش يسبق راحتها على راحتو.. ماشي مهم يكون عندو لفلوس ولكن لي مهم هو يكون راجل معاهاا ويكون معيشها فالرااحة.. نهار جيتي عندي واخا نتا راك ولدي من دمي وعارف المعدن ديالك إلا أنني وصيتك عليها وماقبلت بزواجكوم تاسولتهاا وشفت ريها هو لول ماشي غير ولدي خصني نوافق تت (كمل بحكمة) الزواج مساهلش وفيه مسؤوليات لي خصك تكون قدهوم راه الزواج ماشي هو الليل وصاف الزواج راه هو الحيااة كاملة ملي كتختار شريك حيااتك لي غايكمل معاك ديك الحياة راه كاتعيشوها بحلاوتها ومروريتهاا..راه ملي كاتزوج كاتولي مسؤول على راسك وعلى مرتك وعلى ولادك (بحكمة)قال رسول الله صلى الله عليه وسلم: "كلكم رَاعٍ، وكلكم مسؤول عن رَعِيَّتِهِ"..

إدريس:هاد لكلام لي كانقول ليك باش نوضح ليك شحال من حاجة لي نتا غافل عليها اولدي.. حوايج لي نتا معارفهومش وكيف تيقولو ناس زمان سال لمجرب ولاتسال الطبيب.. لمجرب كاتكون عندو خبرة ولاسولتيه مكيبخلش عليك بيهاا وحيت نتا ولدي جيت بااش نهضر معاك وباش نوضح ليك بزاف دلحوايج.. معارفش شنو مشكيل لي وقع بينك وبينها وعلاش هي بغات الطلاق وماشي من حقي نعرف حيت هادشي مكيخصنيش بقد مكيخصك نتاا ولكن لي كيهمني دابا هو راحتك وراحتها ولاكانت هي لقاات راحتها فالطلاق فنتا غايخصك توافق عليه بلاقصوحية الرااس اولدي..

محمد طه:(مسح على وجهو وضحك بفقصة) واش الواليد نتا كاتقول ليا نوافق نطلق مرتي ونخرب زواحي بيدي

إدريس:كون مكانش هاد الزواج مخروب مكانتش ديك بنت الناس غاتبغي تساليه

محمد طه:غزلان معصبة مني وصاافي شوية تبرد وغايفوتها لحااال وغايرجع كلشي كيف كاان غير كون هاااني

إدريس:(شاف فيه بجدية) غزلان هضرات معايا ليوم وطلبات مني ندوي معاك ونقنعك توافق على الطلاق هي قاالت بلي كلشي سالى ومغاترجعش باقي معااك

محمد طه:(ناض من بلاصتو وقال بعصبية) هي معارفة والو غير معصبة مني وصااف

إدريس:(هز حاجبو) راه نتا لي معصب ومقصح راااسك السيدة كون كانت باغا ترجع ليك مغاطلبش مني نقنعك وتزاوگني باش ندخل شحاااال وأنا ساكت واخا عرفتها رفعات عليك دعوة الطلاق ماهضرتش حيت نتوما بزوج كباار وعارفين اش كاديرو ولكن ملي جاات عندي وطلباتني مانقدرش نسكت راها بحال بنااتي ماتكونش أنااني وتغكر غير فراسك ولاكنتي بصح كاتهمك ديك بنت الناااس غاتفكر فراحتهاا هي لولة

محمد طه:راحتها معاياا

إدريس:كون كانت هي حاسة بلي راحتها معاك مكانتش غاتبغي طلق ومكانتش غاتكون مُصرة عليه لهاد الدرجة لوكانت غير معصبة غاتجلس يامات وغاتبرد وغاترجع ولكن هي مارجعاااتش وهادشي وحدو غايبين ليك بلي السيدة مبقاتش باغا هاد الزوااج وبلي لمشكيل لي طرا بيناتكوم كاان هو السباب تاخلاهاا تبغي طلق وطج من بين يديك (ناض تقابل معاه) ماتهزش دنب بنت الناس فرقبتك بسباب عناادك فكر بدماااغك وديك لعصبية لي فيك حيدهاا كون محمد طه لي كانعرف ولدي لي كيبغي لخير لغيرو ولي كيفكر فمصلاحة الطرف الاخر قبل من مصلاحتووو (تنهد) أنا جيت ودرت لي علياا ولباقي عليك نتااا..

مشى وخلاه فواحد دوامة التفكير وكلامو لي نطق بيه كولو كايتكرر فودنيه بالحرف الواحد.. لهضرة لي قال باه صحيحة وهو عارفهاا ولكن كبريائو مراضيش يعتارف بيها.. هو عارف الجرح لي سببو لغزلان غير من كلامها ومن هاد الطلاق لي قرراتو ولي انفداتو بدون متشاور معاااه.. جلس فبلاصتو كيرجع السينتة لور وكيفكر فأول مرة جاات وشافهاا.. شوية بشوية بداو اللقطات كيدوزو بين عينيه ولقاا راسو بلي عمرو معاملها شي معاملة مزياانة بلعكس كان ديما يسمعها هضرة كيف السم بحال لاقاااتلة ليه روح مع العلم عمرها أدااتو.. شحاال من غلط دار فحقهاا وختمها بأقبح غلط لي كان النقطة لي توضعات فنهاية السطر.. هو غلط فحقها بزااف وهي راه صبرات ليه ومتأكد كون كانت شي وحدة خرى مغاتصبرش ولكن هي صبررات وهو صبرهاا حسبوو ضعف منهاا وزاد تغر فكل مرة يجرحها ويقول هانيا غاتنسى كيف عادتها ولكن هاد لمرة منساتش كيف ديما ودارت سطووب.. مغاينسااش اعترافهاا ليه بلي كاتبغيه كيفاش نطقات بداك لكلام وهي مجروحة ومألمة.. مافرحش قدما حس براسو مكيسواش وكره روحوو حيت ضرهاا.. هضرة بااه خلاتو يشوف الأمر من منظور آخر للحظة زول ديك لعصبية ولعنااد ولأول مرة بعد سنين يفكر فالأمر بعقلانية وتغلبو ديك الحنية لي فيه.. ديك الحنية لي مكانش تايبينهاا لغزلان من نهار عرفهاا.. الحنية لي گاع الناس لقرابين ليه شافوهاا من غيرها هي.. سكت وبدا كيسول راسو..

أنا شنو عطيتهاا من نهار عرفتهاا؟؟ عمري عاملتها مزياان وعمري ماعطيتها داكشي لي كاتستااهل؟؟ جرحتهاا وقصحت معاهاا وهنتهاا بكلامي ؟؟

كايطرح على راسو هاد الأسئلة ومع كل جواب كان تيحس بخيبة أمل من راااسو..

🔜🔜

مكانش ساهل عليه يقبل يطلقها ولكن فاش جلس مع راسو وفكر مزيان قدر ياخد قرار لي كاان قاصح عليه وداخليا مكانش راضي عليه.. ولكن دار بهضرة بااه وشاف مصلاحتهاا وسبقهاا.. سنى على لوراق ودار تاهو محامي باش يتم الأمر كيف بغات هي.. يريحهاا ويخليهاا تنسى مدار فيهاا.. الاكانت بهاد الطلاق غاتلقى راحتهاا فهاهو انفدو ليها وحررهااا من علاقة زواج سامة تضررو فيها بزوج ولكن أكثر متضرر كانت هي.

طريق مكانتش بالنسبة ليه طويلة حيت عقلو ماهداش من التفكير تاوصل ونزل شاد طاكسي لوجهتو المعروفة.. المقبرة..لي مدة مجااش ليها ولكن ليوم بالضبط حس براسو محتاج يجي لهنا..داخل لمقبرة وتبوريشة طلعات معاه كلما قرب جهة قبرها لي باقي عاقل عليه وعارفو.. وصل لجهتو ومد يديه كيقرا الفاتحة وغير سالى جلس قفازي وشاف فالشاهد لي مكتوبة عليه سميتهاا وقال بهدوء:أنا مابقيتش كيفما كنت شحال هادي اجيداء أنا وليت واحد اخر خااايب مكانسوااش أناني هرس قلب وحدة بغاتو..

🌸لاشيء يبقى على حاله كم من حبيب أصبح غريب وكم من صديق أصبح عدو لايمكن لنا أن نختار من نحب لأن القلوب هي التي تعشق.. دات مرة أحدهم أخبرني أن أبتعد عن كل مايؤديني ووجدت أنك أنت هو داك الداء الذي ليس له دواء.. حاولت مرارا أن ابتعد عنك وأن أعيش ماتبقى لي في سلام لكنني كل مرة أجد نفسي أعود إليك بدون مجهود منك.. فالقلب هو من يتحكم بوجودك وكأنك تلَوْتَ عليّ أحد تعويداتك لأصبح أسيرة لك.. كسباح ماااهر يجيد السباحة أنا وعندما أتت موجة من لعدم أغرقتني في بحر عشقك.. حاولت أن أرسووو سفينة بعدك في مكانٍ أمن بعيد عنك ولكنني لم أستطع فكلما ابتعدت عنك أحسستُ بالاختناق...فقربك يكبلني والابتعاد عنك يقتلني..🌸

غير وصلات لدار وهي دخل نيشان لبيتها وسدات لبااب عليهاا وتما عراات على گاع داكشي لي ضارهاا.. بدات تاتبكي تاحسااات بقلبها غايخرح من بلاصتووو.. غوتات وصوتهاا كان معزوفة من الألم ولمعاناة.. شحاال قاصح لحب لي تيكون من طرف واحد.. تاتحرقي بوحدك وتاحد مكيحس بيك.. حاسة بقلبها تايضرهاا ومزير عليهاا ونفس حسات بيها تاتقطع.. مكانتش باغا نهاية تكون هاكا ولكن ماشي دائما أي حاجة تانبغيوها هي لي تتكون.. فعسى أن تكرهو شيئاً وهو خير لكم.. ماتعرف ربي شنو مخبي ليهاا ويقدر هادشي لي كادوز منو امتحان من عند الله.. باش يختابر بيه صبرهاا وأيضاً هادشي لي طاري معاهاا كان ولابد ماغايطرا فيوم من ليام حيت من لول هوما بداو هاد لعلاقة بمعصية بين لي خلقهوم وأكيد النتيجة مغاتكونش مرضية ليهوم.. العلاقة الصحيحة هي لي كاتبنى على ساس متين وهوما ساسهوم كان راشي هادشي علاش فأول مشكيل رااب الساس..

تكات فوق نموسيتها ودموعها دايرين خط فوق حنكها.. باغا تنسااه وتكمل حياتها بحال الاعمرو مادخل ليها حيت بصح هو مكيستاهلش تبكي عليه ولاتبغيه.. باركة غير داكشي لي بكاتو بسبابو تال هنا وحبس.. هي غادير لي فجهدها باش تنسااه وماتبقاش تبغيه وكيف قالت ليه هاد لقلب لي كاينبض بحبو غاتزولو من صدرها وماتخليهش يعاود يضرب ليه.. هي عطاتو فرصة وهو فلتهاا وبالنسبة ليها مكاينش فرصة تانية...

**

السكات لي كان فالمقبرة خلاه يرتااح ماعرفش وااش هو حمق حيت ارتاح وسط الموتى ولاحيت فهاد البلاصة كاينة واحد الروح عزيزة عليه وعندها بلاصة مهمة عندو.. الظلام لي كان بدا يطيح خلاه يزيد يرتااح كثر.. مخاافش حيت هو بوحدو لي جاالس وسط لقبوور قدما ارتااح حيت هاد لبلاصة هي لوحيدة لي يقدر يفضفض فيهاا ويخوي فيهااا داكشي لي هاز فلداخل ديالو.. داكشي لي بقاا محتافض بيه وكاتموو ليوم غايخرجوو قداامها هي.. حيت عارف هي لوحيدة لي غاتسمع ليه ومغاتجاوبوش غاتخليه يهضر بلاماتقااطعو... كان تيشوف بعيد بحال لاكيتفكر شي حاجة قبل مايضور يشوف فقبرها ويكمل كلامو: صورتها باقي بين عيني نهار ضربتهاا وشوفتها ماقادرش نساها اجيدااء.. أنا خاايب يااك عارف بلي دابا غاتكوني مقلقة مني على مادرت فيهاا من حقك تقلقي وتااهي من حقهاا تعصب مني وتكرهني.. ضريتهاا بزااف وعمري غانسمح لرااسي على دوك الدموع لي نزلاتهوم بسباابي.. فخبارك مكنتش باغي نطلقهاا ولكن هضرة الواليد معايا فيقااتني وخلاتني نشوف داكشي لي كنت معمي عليه.. فاااش شفتها فلمحكمة كنت باااغي نعنقهاا ولكن ماقدرتش حيت لقيت راسي بلي ماعنديش لحق نقرب ليها مور داكشي لي درت.. ماقدرت تاانطلب منها السمااحة حيت أناا مريض فدمااغي وحيت مانقدرش نطلبهاا هه أنا ماقدرتش حتى نعتاارف ليها بلي جرحتهاا (شاف فيها وهو مكمش حجبانو وعينو حمرين) قلبي تيضرني اجيداء حااس بلي شي حاجة فلدااخل دياالي كاضرني هنااا (حط يديه على صدروو وقااال بألم) هنااا كيضرني بزاااف ماكرهتش نحلوو ونحيد داكشي لي كيوجعني فيه (رجع سهى قدامو لثواني عاد كمل) حااس براسي مامرتااحش زعمة هي غاااتكون مرتاحة حيت طلقتهاا وعطيتها حريتها؟؟ ( زير على يديه وكمش حجبانو) متأكد بلي هي غاتقدر تكمل حياتها بلابياا وغاتنسااني بحال لاعمري كنت فحياتهاا (حس بلمرار فحلقو وبزز باش قدر يسرطو)ولكن أنا لامغانقدرش اجيداء مغانقدرش نساهاا حيت هي دارت بلاصتها عندي ولفتهاا بزاف كل صبااح نفيق ونلقاهاا ناعسة حدايااا ريحتهاا باقي بين نيفي كانشمهاا عمري نقدر نساهااا فاش كانغمض عيني كانشوف صورتهاا هاد لياام كلهاا حسيت بلي شي حاجة نقصااني فاش مشفتهااش وغاتنقصني ديما حيت مغانبقااش نشوفهااا.. هي دخلات لحياتي بحال شي نسمة ودغيا طاارت خلاتني ولفتهاا ومشاات (شاف فقبرها بعتااب) كيف درتي تانتي مشيتي بمرة وعمري نقدر نشوفك مزاال نتي فلول ودااباا هي (عض حنكو من لداخل وقال بمرارة وصوت بااح) يمكن هادشي لي مكتااب علياا نبقا حياااتي كلهاا بوحدي وقلبي ولف يتهرس ولف يكون بوحدو مااشي جديد عليه هو غايولف وغاينسى واخاا غايكون صعيب عليه ولكن بزز منو خصو ينسى (طبطب على صدرو كأنو كيواسيه وبهمس كرر) كيفماا هو نساااك غاينسااهاا تاااهي أكيد غاينساهااا...

طالعة فالدروج وهي تاتنهج بدات تاتقل وتاتعيى دغيا... غادة تشوف سيدرا واش سالات حفاظتها باش تنزلها تعشى وتنعس حيت غدا فايقة تاني بكري.. لقاتها تاتكتب دروسهاا تبسمات ليها بحنية وقربات جهتها جارة الكرسي وجلسات تاتنهج ولكريشة باينة من البيجاامة لي لابسة..

رحيل: ساليتي امامي حفاظتك؟؟

سيدرا:(هزات عويناتها المبطنين وقالت ببرائتها) اه مامي ساليتها كلها شوفي

مدات ليها دفتارهاا تاتشوف داكشي لي كتبات ولي ديجا خدماتو معاها رحيل قبل...

رحيل:مزيان امامي يالاه دابا جمعي لكاخطابل ديالك ويالاه نزلو ناكلو باش تنعسي

سيدرا:(نزلات من لكرسي وقالت وعينيها على مها) مامي غدا غانمشي عند بابانو ياكي؟؟

رحيل:(زفرات النفس ونطقات بهدوء)جمعي كتوبااتك يالاه وسربي نزلو

كمشات سيدرا عينيها غضبانة وبدات تاتجمع كتوباتها عاد نزلات تاهي لتحت غادة نيشان عند جدهاا.. كيف عادتها تخشات فيه كيف القطة فحظنو ونطقات بهمس:بّاديدي مامي مبغاتش تخليني نمشي عند بابانو

إدريس:(تايمشط شعرها وقال بحنية) غاتمشي عندو انخشيشتي

سيدرا:(شافت فيه وقالت بتساؤل) وعلاش مامي مقلقة من بابانو؟ (حطات راسها على صدرو وكملات بحزن)أنا بغيت نمشي لعندو حيت توحشتو ومابقيتش تانشوفو ومكيجيش عندنا

إدريس:(تنهد) مامقلقاش انخشيشتي

سكت فاش شاف رحيل داخلة وهازة معاها صينية فيها الجبانيات وموراها تانيرت لي هازة كوكوط ديال لحريرة حمراا ريحتها تاتشهي.. جااو البقية ورنيم جابت لمكملات ديال لعشا.. وتجمعو عليه وناقصهوم محمد طه لي عرفوه غايكون باغي ينفارد براسو وغزلان طبعا لي مبقاتش ساكنة معاهوم ولي خلات بلاصتها خاوية وسطهوم... تعشاو فسكات ورحيل غير سالات نوضات سيدرا باش تنعس والبقية راه مجمعين تايهضرو وحديثهوم على طلاق محمد طه وغزلان..

رنيم:(تنهدات) ولفتهااا دابا حاسة بشي حاجة نقصانة

ريان:(شاف فيها) مقالتش ليك هي علاش بغات طلق؟؟

رنيم:لا راه قلتها ليك ديجا

تانيرت:(تنهدات) لي وقع دابا وقع هادشي مكتاب عليهوم...

*****

دازت ديك الليلة عند لبعض دمووع وعند لبعض حسرة وعند لبعض كانت ليلة هادية بحال الليالي لي قبل منهاا...

قدام ليكول ديال سيدرا كان موقف نوح طوموبيلتوو.. شاف فساعتو وعرف بلي هادي هي لوقيتة لي تخرج فيهاا.. حل لباب ونزل بخطوات هادية غادي لجهة الباب دلمدرسة... وقف بهدوء كايتسناها تابان ليه تحل لباب وبداو يخرجو دراري ولي طرونسبور واقفين حدا لباب كيركبو فيهوم دراري...بانت ليه سيدرا نازلة مكبطة ودايرة گرينااات ولابسة واحد لجيب مع ليبى وبووط...نزلات هي ولي تيقراو معاها ومع هزات عينيها بان ليها نوح وهي تمشي تاتجري عندو...

سيدرا:(بصوت عالي)باباااانو

تحدر نوح حال يديه وهي تلاحت عليه وعنقاتو باشتيااق واضح تاهزها بين يديه وباسهاا فحنيكاتها لحميمرين...

سيدرا:(شافت فيه وقالت بعوينات كيبريو) توحشتك بابانو بلو آيز

نوح:(جرها من نيفخها بخفة وقاال ببحة صوت) شوية ولابزاف

سيدرا:(حلات يديها تاتكركر) بزااااااف ههههه

نوح:يالاه زيدي نمشيو ندوز نجيبو زين العابدين تاهو عاد نمشيو ناكلو فيك الجوع؟؟

سيدرا:اه فيا جويعااات واخا كليت غداتي لي طيبات ليا تانيرت إينو

قبل مايمشي نوح علمهوم بلي غايديها معاه ومغاتمشيش فطرونسبور عاد تحرك من تما غادي بيها لطوموبيل..ركبها لور هي وشكارتها ورجع ركب بلاصتو وقبل مايتحرك شاف فيها فلمرايا:فين تبغي نمشيو نتغداو؟؟

سيدرا:(حاطة صبعها على ناضرها تاتفكر وبعد مدة قالت) ناكلو هامبرگل وفريتات بزاف

تبسم ليها وتحرك من تم شاد طريق لمدرسة زين العابدين لي تاهو خارج فهاد لوقيتة..قرر يديهوم يتغداو ويدوز معاهوم النهار بحكم ليوم الجمعة وغدا مكيناش قرايا مغايكونش عندهوم حفاظة وغايساريهوم نيت...

وصل قدام المدرسة ولقاهوم تايخرجو هز تلفونو باش يعيط ليه ويعلمو بلي هو براا ساعة حبسو صوت سيدرا لي قااالت بحمااس وهي تاتشير جهة الزااج:هااا زينبيدين بااابااانو

طلع راسو وبان ليه ولدو كيف عادتو خارج بوحدو مداير تاشي صديق عكس دراري لي فعمرو تايبانو ليك كول زوج ولاكليكة مجموعين تايضحكوو ويبسلو على لبنات زيغة ومادير...أما هو كيف ديما لابس سروال توني وقبية نواغ مع جاكيط نوااع... قشع طوموبيلت باه وكان غادي لجهتها تاسمع صوت إلهام لي عيطات ليه:زين العابدين زين العااابدين

ضار عندها تايشوف فيها ببرود بينما هي تبسمات وقالت وهي تتعوح عليه تم:واخا تخلي عندي دفتارك صراحة ماكتبتش ديك لبراغراف لخرة lundi نجيبو ليك

زين العابدين:(ببرود نطق)لا

عطاها بالضهر ومشى مخليها مكوانسية تاتشوف فيه ممتيقااش بلي قمعهاا تاسمعات ضحكة وجدان لي بدات تكركر بصوت عالي وقالت:وناري على قمعة تموتي ومتنسايهااش ههههه

إلهام:(مرضاتش)لحلاقم هنينا يييخ شحااال حاس براسو (عضات على شفتها مغددة) ولكن غابلاتي تفرجي وشوفي اش غاندير لامانزلتش زنافرو لأرض راني قح*بة

أما زين فمكانش مسوق أصلا ليها ومكانش معتابرها أصلا واش كاين فالخريطة.. حل لباب لقدامي وجلس وقبل ماينطق سمع صوت لبخوشة لي طلات عليه بين لكراسى وهي حاطة يديها على نصها تاتعوج وقالت وهي مكمشة حجبانهاا وجامعة شنوفتها:شكوون هاديك زينبيدين (كملات ببرائة)واش تاتلعب معاها فالسييراحة...

مكانش عارف بلي هي كاينة معاهوم حيت الزاج ديال الطوموبيل مكيبينش...ضار جهتها وبانت ليه كادير فيه دوك الشوفة وبلامايعطيها اهتمام ضار قدامو بينما سيدرا زادت تعصبات ومحملاتش فاش نخلهاا.. قربات كثر تاوقفات جنب لكراسى وشافت فنوح وقالت وهي كاتفشش عليه: بابانو شفتي زينبيدين گاعما تايهضر معاياا

كان زين العابدين ضاير تايشوف جهة الزاج وغير سمع ديك لكلمة لولة لي نطقات بيها ضار جهة بااه كيشوف فيه وهو مكمش حجبانو...أما نوح فحرك راسو بهدوء وقال:غايكون غير عيى ياااك اولدي

زين العابدين:(بالإنجليزية) هي علاش قالت ليك بابا؟؟

نوح:(جاوبو تاهو بالإنجليزية وببحة صوت) حيت أنا بابابهاا

زين العابدين:(هز حاجبو) هي ماااشي بنتك ومامنحقهاااش تقولها ليك

نوح:(بجدية) زيييين

زين العابدين :(قلب وجهو قال وهو عاض على شفتو مغدد) لاكنتي تاظن الواليد بلي أنا غانتقبلها فراك غااالط هي مكتعني لياا والو وعمرها غاتعنيه

قال هضرتو وجبد ليزياتو وبرونشاهوم مع تلفون ودارهوم وبقا ضاير بوجهو جهة الزاج مخلي نوح تايشوف فيه ويتنهد... لاكان ممتقبلش سيدرا فحياتو فأكيد مغايتقبلش التوينز وهادا راه مشكيل كبير...مسح على وجهو وشاف فسيدرا لي كانت تاضور عينيها بيناتهوم معرفاش اش تايگولو مسكينة غير ساكتة...

نوح:(بحنية) رجعي ابابا لبلاصتك يالاه

معاوداتش هضرات مشات تركنات بلاصتهاا ونوح تحرك من تما وشلى مطارق فبااالو...

-----

خارجة من لبلوك والتعب باين على تقاسيم وجهها ولسيغن لي بداو تيبانو تحت عينيها... غادة جهة لسونسور باش طلع لبيروها ترتاح وهي تسمع صوت رجولي عيط بسيمتها:دكتووغ بيسان

ضارت جهتو وهي تاتشوف فيه جاي جهتها...رجل فأواخر التلاتينات لابس سكراب طبي مع بلوز بيضا... ملامحو بشوشة وفنفس لوقت حادة...وقف قدامها وقال بهدوء: هادي أول أوبخاسيون تجمعنا بزوج ليا الشرف حيت خدمت معاك

بيسان:(تبسمات بعملية) شكرا ليك تاأنا فرحت حيت دكتوغ بحالك شرفنا هنا فلوبيطال

عمر:وأنا فرحان كتر ادكتوغ

بيسان:نخليك دابا عندي مايدار

عمر:خودي راحتك

مشات هي وهو بقا متبعها بعينيها كيشوف فيها مبسم قبل مايتحرك تاهو لبيروه...

وصلات بيسان لبيرو ودخلات نيشان لفوطوي تكات عليه وهي تاتنهد... ماكرهاتش تنعس وترتاااح هاد الأيام كلها وهي ملهية راسها فالخدمة وتتحاول ماأمكن ليها دوز وقت كتر فلوبيطاال حسن ماتبقا فالرياض...دق لباب ودخلات السكرتيرة جايبة معاها واحد الضوسي وقالت:دكتوغ السليماني لكونجي لي كنتي دفعتيه شحال هادي تسنى ليك

بيسان:(شافت فيها وتقادات فجلستها شادة الضوسي) على سلامتي نسيت گاع بلي راني دافعة كونجي

السكرتيرة:تبغي مني شي حاجة خرا ادكتوغ

بيسان:وي هاكي هاد لضوسي (عطاتها شي ضواسى) عطيهوم لدكتوغ لي غايشد بلاصتي حيت غانخرج دابا ونيت لكونجي غايبدا ليا من غدا

سكرتيرة:داكوغ دكتوغ

ناضت بيسان تاتجمع مسائلها وداك لكونجي جاها بحال درهم دلحلال... كانت محتاجة ترتاح وتبعد شوية على هناا... تجلس مع راسها وتفكر فشحال من حاجة طرات معاها فهاد الآونة الأخيرة...

بدات تتجمع أغراضها المهمة وقبل تأكدات بلي گاع لضوسي ديال لمرضى لي متبعين عندها عطاتهوم لسكرتيرة باش تعطيهوم لي غايشد بلاصتها حيت كونجيها فيه سانك جوغ...

بدلات حوايجها وهزات مسائلها وخرجات من بيروها دازت عند لبنات لي فلغسيبسيون ودعاتهوم عاد خرجات لبرا ركبات طوموبيلتها وتحركات لرياض وفنفس لوقت دوزات لخط لنمرة نوح لي جاوبها بهدوءو لمعتاد:وي بيسان؟

بيسان: خويا كنت غير باغا نعلمك بلي تسنى ليا لكونجي لي كنت دفعت ديك لمرا عقلتي وليوم بديت فيه ودابا أنا غانمشي لدار نجمع حوايجي وغنمشي نبدل لجو شوية ونيت نبدل لاغوتين ديال لخدمة

نوح:فين غاتمشي؟؟

بيسان:ماعرفتش صراحة مي غالبا انطلع لإيفران وموراها غاندوز لنواحي مهم نتساراو شوية

نوح:صافي واخا ولكن ماتمشي تانجي لدار

بيسان:داكوغ

قطعات معاه وطلقات لموسيقى مونسى بيها الطريق تاوصلات لدار ودخلات فسكات غادة لبيتها دوش وتنعس بعدا عاد تشوف بلان تسافيرة...

دخلات ضرباتها بتحمحيمة نييت وغير خرجات لقات مها جالسة فوق نموسيتها تاتسنى فيه..

رحمة:(شافت فيها وقالت بهدوء وحنية) باقي مقلقة مني بسباب هضرتي لي قلت ليك ديك لمرة..

كانت رحمة عارفة بلي بيساان مقلقة منها على ديك لهضرة لي قالت ليها نهار عيد ميلاد زين العابدين...هي بصح كانت معصبة على اللامبالاة ديالها وكيفاش دارت داك الغلط...قصحات معاها حيت ماتقبلاتش داكشي لي دارت وطبيعي دير هاكا ولكن بيسان هزات فخاطرها من جهة مهاا لي ماتفهماتهاش وكيفاش قالت ليها داك لكلام لي جرحها وبقا فياها لحال...

بيسان:(تنهدات وقالت بهدوء) علاش غانتقلق؟؟

رحمة:من داك النهار ونتي مكاتعمريش الرياض وأغلبية وقتك كادوزيه فالخدمة

بيسان:حيت عندي لخدمة بزاف داكشي علاش مكانجلسش هنا بزاف

رحمة:(ناضت جهتها وقالت بهدوء) نتي عرفاني لاقصحت معاك ولاقلت شي هضرة معجباتكش فأكيد على قبل مصلاحتك

بيسان:(حركات راسها باه بلاماتجاوبها)

رحمة:بيساان شوفي فياا واش غاتقلقي من ماماك بسباب داك لهضرة

بيسان:(شافت فيها بنظرات حزينة) شنو بغيتي ندير اماما نفرح مثلا واش نسيتي هضرتك لي قلتي لياا نتي ماشي مسؤولة ابيسان ونتي وحدة مكتخدمش عقلها وكاتسرع (حركات راسها باه وكملات) لي قدك راه عارفين كيف يتعاملو مع الأمور ونتي باقي خصني نتبعك ونوريك بغيتي نزيد ولانكمل

بيسان مانساتش هاد لهضرة لي قالت ليها مها وخصوصا كان أول غلط ليها ومها مارحماتهاش فيه...عطاتها كلام لي منساتوش واخا دازت عليه مدة.. مانساتش نهار جات عندها لبيتها بالضبط ليلة دلعيد الميلاد وكيفاش كملات عليها ديك الليلة تانزلات دموعهاا..

بيسان:(كملات بحسرة) كان أول غلط ليا درتو بدون قصد ونتي ماحنيتيش فيا بهضرتك عقلتي رؤوف شحال من مرة غلط عمرك هضرتي معاه فاش خويا نوح كاان تايدوي كنتي ديما دافعي عليه وتجي فصفو علاااش شنو السباب ياك بزوجنا ولادك (هبطات ليها دمعة) علاش هو كنتي تدافعي عليه واخا يدير زبااايل وأنا لا

مكانتش تاظن رحمة الأمر غايوصل لهاد لمواصل وبلي بيسان غاتفهم الموضوع بواحد طريقة هي مكانتش گاع قصداه...

رحمة:(بتأنيب)واش عارفة اش تتخرجي من فمك أنا فين عمري فرقت بيناتكوم نتوما بتلاتة ولادي وكلكوم معزتكوم عندي بحااال بحاال ابيسان هاد ليام كلها فيما كانبغي نهضر معاك تانلقاك فخدمتك.. ماعرفتيش هاد ليامات كيفاش دوزتهوم وأنا عارفاك مقلقة مني

عنقاتها رحمة وبيسان فديك اللحظة دموعها نزلو تاتبكي...حسات براسها باغا تبكي وصاف معارفااش علاش..

رحمة:عمرررك تشكي فمحبتك عندي وعمرك تخرجي هاد لهضرة من فمك تاااني سمعتي نتي وخوتك كلكوم عندي بحااال بحااال...

مبعد داك لبكا لي بكاوه بزوجات جلسات بيسان معاها وعلماتها بلكونجي وبلي هي غادي تسافر وتارحمة خلاتها وعارفاهاا غاتكون محتاجة لهاد التسافيرة وزيد راه السيدة كبيرة ومن حقها تسافر فيما بغات... مشات رحمة وخلات بيسان ترتاح..

**

أما عند نوح فداهوم ياكل ودار لخاطر لسيدرا وداها شرى ليها حويجات وتازين العابدين لي كان غادي معاهوم غير بزز وصااف... دوزو ديك لعشية مع بعض واخا الحساسية لي بين زين وسيدرا ولكن كانت زوينة وختموهاا بواحد السلفي جامعهوم بتلاتة...

رجعو لرياض محملين وسيدرا

مشات لبيتها تبدل ونوح حط دوك لساشي مخلي السعدية طلعهوم معاهاا وجلس تايحك عنقو ويماصيه...

رحمة:(تبسمات ليه بحنية وناضت تادير ليه مساج فعنقو)تاتعيى راسك بزاف اولدي ارتااح راه لخدمة مغاتهربش

نوح:(مغمض عينيه مكونسونطري مع صبيعات مو لي كيماصيو ليه عنقو وببحة صوت قال) لاماوقفت على شغالي شكون يقضيهوم لي ايمّا

رحمة:هاخوك كااين وعتمان تاهو

نوح:(بهدوء) كل واحد مكلف بخدمتو اايمّا وزايدون نتي عرفاني خدمتي كانبقا نتكلف بيها بنفسي

رحمة:اوا نتا تعرف لمهم غير ماتهلكش راسك بزااف وصاف راه الصحة هي كلشي ونتا راه مابقيتيش كاتديها فصحتك وماكلتك تاهي

نوح:(حط راسو فوق ركابيها وقال بهدوء) كوني هانيا الالة رحمة وماتهزيش همي

رحمة:لاماهزيتش همك هم من غانهز نتوما عويناتي باش كانشوف لانتا ولاخوتك ولاشي حد فيكوم وقعات معاه شي حاجة لاقدر الله غانبغي نحمق سبق وتشويت فكبدتي مانبغيش نعاود نتشوى

نوح:(تنهد ونطق بهدوء) الشهر الجاي غانديرو صدقة كيف مولفين كل عام

رحمة:(سرطات ريقها وعينها تغرغرو)لوقت دغياا كيدوز

نوح:الله يرحمهوم (هز يديها باسها ونطق بحنية) دعي معاهوم بالرحمة ايمّاا

رحمة:الله يرحمهوم..

----

سطعات أشعة الشمس وجاا صباح جديد حامل فطياتو أحدات كتيرة... كان زين هو لول فلكلاس جالس فبلاصتو كيف ديما كايشرب عصير شوية تهرق عليه جهة العنق كمش حجبانو ساخط وناض غادي لحمامات باش ينقي حالتو...ماتعطلش بزاف ورجع لبلاصتو لقى لي تايقراو معاه بداو يدخلو جلس وجبد دفتارو ومع هز عينو بانو ليه دوك الزوج ليدابز معاهوم داخلين.. خنزرو فيه وهو ماهتمش ليهوم وجلسو بادين لحصة ديالهوم عادي تاتم داخل لمدير عندهوم هو ولي فلحراسة لعامة..

لمدير:حطو شكايركوم فوق الطبلة

لبروف:سي لمدير ياك لباس

لمدير:قالو ليك شي دراري كانو كيكميو الحشيش فالطواليطات

بداو كيفتشوهوم تاوصلات نوبة زين العابدين لي مد شكارتو عادي وبداو تيقلبو فيها تالقاو واحد طرف دلحشيش مخبي فالجيب الدخلاني... هزو داك لحارس وضار جهة لمدير تيوريه داك الطرف دلحشيش لي ملوي فميكة تحت نظرات زين العابدين لمستغربة....

ملي تجبد الحشيش من شكارتو گاع هادوك لي تايقراو معاه بداو يشوفو فيه بشوفات ناقصة...ولبروف لي تايقريه تاهو مكانش متيق حيت زين العابدين من بين لميوغ لي تايقراو عندو...المدير شاف فيه وقال:السليماني جمع أدواتك واجي معايا

ناض زين العابدين بهدوء بلاميعاند ولايبين تاحاجة...جمع مسائلو وقبل مايخرج لمح دوك الزوج كيشوفو فيه بنظرات التشفي وبلامايزيد يخمم فهم بلي هوما مالين لبلان...

ضارت إلهام عند وجدان ونطقات بصدمة:شفتيه صدق حشايشي وگاعما باينة فيه

وجدان:يقدر ماشي ديالو

إلهام:(ميقات فيها)اممم شكون عرف لمهم حصل حصلة خايبة وباينة غايضربوه برابور هادي الامدازش فمجلس تأديبي

قدام لمدير واقف بهدوء وهو كيشوف فيه هاز لفيكس تايصوني لباه...ماهضرش ومابرر تاحاجة حيت لمدير أصلا ماهضروش...ضور وجهو جهة لخرى هاد لوقفا قدام لمدير ولفهاا وماشي شي حاجة جديدة...حيت فمسارو الدراسي لي دوز كان كولو عبارة عن رابورات مايمكنش يدوز عاام بلارابور بقوة مكاان تايدابز وكل مرة تايعطب شي واحد.. ولكن لحاجة لي كانت تاتوقف معاه هو قرااي ودكي وگاع لبروف تايجيو فصفو...

تحل لباب وبان ليه باه داخل وشاف فيه شوفة كاملة تايطمن عليه هو لول حيت عند بالو غايكون دابز تاني...

نوح:(بصوت خشن قال)سلام اوعليكوم

المدير:وعليكوم السلام سي السليماني تفضل

جلس نوح وقبل ماينطق سبقو لمدير لي قال:شي دراري كانو تيكميو الحشيش فالطواليطات وفاش درنا تفتيش لأقساام لقينا عند ولدك لحشيش فشكارتو

نوح:(هز حاجبو وقال بهدوء)ولمعنى؟؟

المدير:سي السليماني المعنى بااين ولدك اش كايديرو عند لحشيش فشكارتو واش جااي يقرا ولاجااي يكمي؟

نوح:(تحدر جهتو وقال بصوت قاصح) ياك ماحصلتيه كيبرم فيه؟؟ عندو فشكارتو مكيعنيش بلي هو مولاه ولدي أناا مربيه بيدي وعارفو اش كيسوى مايجيش شي واحد يوريني فيه

المدير:سي السليماني عارف بلي مغاتقبلش كلامي ولكن هادشي لي كاين علاش هو من دون النااس لقيناه عندو؟؟ درنا تفتيش باش مانظلمو حد

نوح:(لعب بلسانو ففمو ونطق ببرود)وتاأنا عارف ولدي مايديرهاش مغاتجيش وتقنعني بحااجة أنا عارفهاا راه لابااغي يكمي غايكمي قدامي مغايجيش تالمدرسة ويكمي

المدير:عارف بلي هادشي مغاتقبلوش ولكن راه مكنظلمو حد

نوح:(بخشونة) ظلمتووه ونتا بصفتك مدير مؤسسة تعليمية فخصك دير خدمتك وتعرف شكون تايدخل لحشيش ويكميه وماتجيش ظلم لياا ولدي بحاجة هو يستحيل يديرهااا..

المدير:سي السليماني خدمتي راه كانديرها على أكمل وجه وكون ماكنتش مسؤول مكانتش هاد لمؤسسة توصل فين وصلات دابا وكون لقيتي السيبة فيها

نوح:(قلب وجهو ونطق بسخرية)لاباااين

قاطع كلامهوم دقان لي فالباب ودخلات وجدان لي كانت تاضور عينيها بين نوح ولمدير وزين العابدين لي واقف ساكت..

المدير:اش باغا ابنتي؟؟

وجدان:(بتوثر)موسيو أنا جيت نهضر معاك على قبل موضوع لحشيش لي لقيتوه فشكارة زين العابدين

شافو فيها كاملين وهي زاد توترات ولكن بشجاعة كملات:أنا ملي جيت لكلاس بان ليا صفوان واقف حدا شكارة زين العابدين وهو مكانش وغير شافني بحال لاتخلع وخرج دغياا فلول ماديت ماجبت ولكن من بعد فهمت لبلان

نوح:(بتساؤل) شكون صفوان؟

وجدان:هادوك لي كانو دابزو معاه شحال هادي

المدير:واش متأكدة ابنتي؟؟

وجدان:اه مكان تاحد فلكلاس من غيرو تازين العابدين مكاانش

المدير:(شاف فزين العابدين)فين كنتي نتا؟

زين العابدين:(شاف فيه ببرود) كنت فالطواليط تهرق عليا لعصير

نوح:كلشي واضح وباين غير لامبغيتيش تفهم بلي داك دري هو مول لفعل حيت سبق ليه وتشاد مع ولدي وباغي يرد ليه الصرف

المدير:واخا سيري ابنتي

حركات راسها باه وخرجات وهي مصفية ضميرها..فاش شافت لبلان فلول قالت عادي مي فاش وقع لي وقع فهمات لي كاين وأصلا عارفة صفوان وعشيرو تيكميو لحشيش داكشي علاش عرفاتو هو مول لفعلة

تلاقات مع إلهام لي كانت جايا لعندها وقالت:فين كنتي غير سالينا لحصة ونتي طيري من حداياا

وجدان:(عاودات ليها لي كااين) هادشي علاش خليتك ومشيت

إلهاام:(خرجات فيها عينيها)وعلاش ماقلتيهااش لياا هو لول؟

وجدان:واشنو غانستافد لاقلتها ليك نتي لولة؟؟

إلهام:غاتستافدي بزااف كون قلتيها ليا كنت غاانمشي أنا عند لمدير ونقولها ليه وبهاكا غانكسب تقة زين العابدين وغانقدر نطيحو فالشبكة (خنزرات فيها) ولكن نتي خسرتي ليا كلشي بطيرانك

مخشية وسط الكاشة ديالها وباكية دكلينيكس جنبهاا.. عينيها منفوخين بلبكا وبالرواح لي ضربها ولي خلاها طريحة الفراش..عنيها على تلفونها لي كاتشوف فيهوم التصاور ديالها معاه...تزير عليها قلبها كلما تفكرات بلي زواجها بيه مبقا منو غير دوك التصاور..تنهدات فاش سمعات صوت أميمة لي نطقات بهدوء:ملي تاتبغيه يادلي علااش رفعتي دعوة الطلاق

غزلان:(بصوت مبحوح) مبقيتش كانبغيه

أميمة:لابااين ودليل هو دوك التصاور لي من نهار طلقتي ونتي تفرجي فيهوم وزيدي لبكا لي بكيتيه من داك النهار واش تاضحكي على راسك؟؟؟

غزلان:أميمة نتي معارفة والو

أميمة:داكشي لي تانشوف كافي يخليني نعرف بلي نتي باقا تاتبغيه اغزلان

غزلان:(نطقات بحرقة) لحب مكايكونش كافي تيقيني

أميمة:وتالبكاا راه ماشي حل غاتبكي نهار يوماين وغاتنوضي تجمعي راسك وتكملي حيااتك راه هاد لحالة لي تادير فراسك ماشي حل

غزلان:صافي خليني دابا عفاك بوحدي

خلاتها أميمة بوحدها كاتشوف فدوك التصاور تاني وعينيها مغرغرين بالدموع...مكاتبكيش حيت توحشاتو ولاحيت ندمات على الطلاق بلعكس كون تكرر الأمر مرة خرا غادير نفس التصرف ومغاتندمش عليه حيت بالنسبة ليها الطلاق كان هو لحل لوحيد ومكاينش حل اخر... علاقتهوم مسمومة وكلها شوك لي جرحها وسيل دمهاا تامبقا عندها فين تزيد... صبرات وصبرات ولكن صبرها تقاضى ...لانزلات دموعها دابا فحيت بقا فيها راسها وقلبها لي عطاتو ليه وهو تكرفص عليه...جرحو بدون مايعير ليه اهتمام... تاتبكي حيت هي حاسة براسها ظلماات نفسها وتكرفصات عليها فاش قبلات بتصرفاتو معاها... مسحات دموعها وشافت فتصويرتو لي كان مخنزر فيهاا كيف ديماا... تكميشة لحجبان ودااك الشوفات لي داير ولي كيبينو بلي هو معاجبو حال كيفما شافتو نهار لول أو ولفاتو...

غزلان:(تمتماات بصوت حزين وعينيها على صورتو) غاندير كلما فجهدي بااش نسااك وغانكمل حياااتي بلابيك

**

حل لباب ديال الدار ودخل بتعب واضح على معالم وجهوو... كان طالع فالدروج تاصادف سيدرا لي كانت نازلة وغير شافتو وهي تلاح عليه تاهزهاا ونطقات معنقاه:مووودي حبيبي فين كنتي؟؟

محمد طه:رووح مودي توحشتك

سيدرا:(باستو فحنكو)تاأناا

محمد طه:بوحدك فالدار ؟

سيدرا:لا مامي لفوق ناعسة حيت مومويات تايديرو ليها بيتيز مكيخليوهااش امودي تنيني

محمد طه:(طالع بيها فالدروج) فيهوم لبسالة هاد مومويات

سيدرا:(كمشات حجبانها) اممم بزااف غانقول لبابانو يدير ليهوم بينيسيون

طلعها لفوق وحطها فالأرض ومشى لبيتو دخل وهي تابعاااه تاتجري وقالت:مودي فين غيزو؟

حبس فبلاصتو وهو عاطيها بالضهر وطلق تنهيدة طالعة من قلبو عاد ضار هبط عينو وشاف فيها هي لي واقفة حدا رجليه وبصوت هادئ قال:هي مغاتجيش مزال

سيدرا:(مدلية حجبانها) وعلاش

محمد طه:(عض على شفتو ونزل قفازي شاد فكتيفاتها) حيت هي مبقاتش غاتسكن معانا هي صافي مشاات اسيدرا

سيدرا:(ببرائة)مغاتبقااش تنيني حدااك(حرك راسو بلا وهي عنقاتو وقالت بحزن) غانتوحش غيزوو

محمد طه:(بادلها تعنيقة وقال بحزن تاهو)تاأناا

خرجات من عندو سيدرا غادة تمشي تفرج وهو بدل حوايجو وصلى عاد خرج من بيتو غادي لبيت رحيل...دق لباب وغير سمع صوتها وهو يدخل لقاها ناعسة على جنبها ودايرة مخدة بين رجليها وباين فيها معدبة فالنعسة... قرب لعندها ونطق بهدوء:صافا؟؟؟

رحيل:امم شوية وصااف فين كنتي؟؟

محمد طه:(جلس جنبها)كنت فالرباااط

شافت فيه رحيل وفهمات بلي كان فلمقبرة عند جيداء...تقادات فجلستها متكية على لمخاد لي ورى ظهرها وقالت بهدوء:عارفة بلي صعيب علينا نتخطاو شنو داز علينا وبلي صعيب نساو جيداء حيت مكانتش شي واحد لي يتنسى بسهولة...دوزنا معاها نص من عمرنا وعشنا حوايج معاها لي صعيب يتنساو وبلاصتها عمر شي حد غادي يعمرهاا..أنا لي جالسة قدامك دابا باقي لحد الآن تانلوم راسي حيت كنت سبابها تاماتت واخا كانقول بلي مكتابها هداك ولكن مغانكرش بلي أنا سباب... أنا ماقلتش ليك نساها ولكن ماتخليهااش تكون عائق فحياتك...نتا باقي لدابا متعلق بحوايج لي مكاينينش من الأساس داك لحب لي كاتحس بيه من جهتها راه رجع مرض حيت خرج ليك على حياتك...بقيتي موهم راسك بلي باغيها ونسيتي بلي هي مبقاتش فحياتك وكون كاانت أصلا فكون على يقين هي مكانتش غاتبادلك نفس الشعور...مغانلومكش دابا على داكشي لي طرا بينك وبين غزلان حيت مابقات عندو فايدة ونتا وياهاا تفارقتو دابا ولكن غانلومك حيت هملتي راسك ونفسيتك وخليتيها تامرضاات... غانلومك حيت مواجهتيش داكشي لي تاتحس بيه فداخل دياالك وخليتيه يتراكم تامرضك وخرج ليك على حياتك... نتا وغزلان بصح طلقتو ولكن كون على يقين لانتا وياها كنتو مكتابين لبعضياتكوم فواخا تبعدو سنين غاترجعو تاني...ولكن قبل خصك تلقى حل لرااسك تعالج راسك كيف أنا درت...شوفني قدامك واش أنا هي رحيل دشحال هادي رحيل لي كانت بحال لحمقة ولي هزات كبدتها بيديها وحطاتها حدا لبركااسة همم.. بغيت تاأنا نشوف محمد طه لي الضحكة كانت ديما منورة وجهو ماشي هادا لي ديما معصب وكيجرح الناس لي ضايرين بيه ولي كيبغيوه..

محمد طه:(حط راس على كتفها وبصوت خافت نطق)تاأنا توحشت داك محمد طه اختي....

طبعات قبلة فوق راسو وبقات تاطبطب عليه بحنية وهو بقوة لعياا غمض عينيه ونعس وهو متكي على كتفهاا.. واخا قصحات معاها فلول وقطعات كلامها معاه واحد لمدة الاأنه مغاتنكرش بلي كانت هازة ليه لهم حيت عرفااه ماحدو مااواجهش داكشي لي تيحس فداخل ديالو وباح بيه لعلن فأكيد عمرو مغادي يتحسن حيت تاهي طرات ليها نفس الحاجة ..ملي بقات ساكت راه خرجات غير على راسها ونفسيتها ولكن فاش تبعات مع طبيبة نفسية ودارت معاها حصص لقات راحتهاا فاش وجهات وحيدات واحد لحمل فوق كتافهاا...قاداتو فبلاصتو وناضت غطاتو وخرجات من بيتها مخلياه ينعس...نزلات لتحت وهي تاتحك كرشهاا وجنبها حاسة بيه كيضرهاا...دخلات لصالة لقات سيدرا تاهي نعسات قدام التلفازة لي مطلوقين فيها الرسوم...قداتهاا فنعستهاا ومع كانت تما واحد لكاشة خفيفة غطاتها بيهاا عاد مشات لكوزينة توجد شي حاجة حلوة تاكلها حيت تشهات لحلو...قادات ليها لبان كيك بصوص شوكولا ومع وقيتة دلكاسكروط وجداتو وبدات تحط فالصالة تابان ليها ريان داخل عاقدهوم تاهو... تنهدات من حالة خوتها ونطقات بهدوء:مالك؟

ريان:(جر كرسي وجلس مغوبش) والو

رحيل:(جلسات وقالت بسخرية)نتا وخوك غاتشيبوني مالكوم غير عاقدين تغوبيشة ياك لباس؟؟

ريان:(تايحرك فرجليه وبانفعال نطق) بيسان سافرات؟؟

رحيل:اااه مشات لإيفران علاااش تاتسول؟؟

ريان:(بغيرة واضحة)مع من؟؟

رحيل:(هزات حاجبها) ياك قلتي ليا ساليتي نتا وياها وبلي هي مصلحااش ليك مالك تاتسول عليهاا؟؟

ريان:(قلب وجهو مراضيش)سولت وصااف

رحيل:همم اوا ماعرفتش صراحة مع من مشات (كمشات حجبانها) باش عرفتيها سافرات؟؟

ريان:غير شفت سطوري ديالها وصافي

رحيل:(في ساع جبدات تلفونها داخلة لواتساب ولقات بيسان دايرة سطوري ومع دخلات بانت ليها تصويرة ديالها وهي شادة طريق سايگة وشي حد هو لي صورهاا وفيديو اخر ديال الطريق عاد تصاور لي خدات فإفراان وحدة كانت واقفة مصورة سيلفي وجنبها كيبان دراع شي حد..شافت فيه)بصحتهاا تفوج صراحة تاأنا ماكرهتش نمشي لإفران شهاتني فيه

ريان:سيري شكون شدك

رحيل:انخليه تال السبت باش ندي سيدرا ونمشي تمشي معايا

ريان:واخا لي بغيتي غانوض نبدل علياا (كان غادي تاتم راجع وقال بتساؤل)دويتي مع محمد ؟

رحيل:راه رجع كاين فبيتي نااعس

حرك ليها ريان راسو باه ومشى تاهو طالع لفوق وكلما تفكر تصاور دسطوريات لي شاف تايزيد يخنزر ويفكر فشكون غايكون مشى معاهاا... بلامايشعر جاتو واحد لغيرة خطيرة خصوصا تصويرة لي بان فيها دراع شي حد راه شعلات فيه لعافية ..بصح هو لي سالى ديك لغولاصيون ولكن مغاينكرش بلي هو باقي تايحس بشي حاجة من جهتهاا وهاديك كانت بالنسبة ليه شي حاجة خاصة بيه فمغايقدرش يتخيل راسو بلي هي ممكون تكون على علاقة مع شي حد اخر...أما رحيل فغير مشى ريان وهي تبسم وتكات تتاكل فداك لبان كيك وهي تتخيل وجه ريان فاش كان داخل كيف كان...هي عارفة شكون مشى مع بيسان حيت قالتها ليها وكان قتارحات عليها تمشي تاهي مي رحيل مبغاتش حيت كانت عيانة عليها مشات غير بيسان وسناء...كان بإمكان رحيل تقولها ليه وترضي فضولو ولكن خلاتو يتقلى باش يعرف راسو باغيها وغير كيعاند..

رحيل:(بهمس)ايييه أولاد الأسمراني طحتو طيحة خاايبة

***

خرج نوح من لمدرسة مع زين العابدين وكان باين فيه بلي معصب.. مشكيل كبير نااض بسباب واحد زوج براهش سخن عليهوم راسهوم وبغاو يكبرو قبل لوقت... كون جات عليه هو كون ملخ مهوم عصى ورباهوم من جديد حيت هاديك ماتربية ماوالو... قرر لمدير يفرقهوم فلقسم ويحولهوم لقسم خر وزين بقا فنفس القسم وزيد غايدوز دوك زوج فمجلس تأديبي...

نوح:(شاف فولدو وقال بهدوء) عندك لاصال ليوم

زين العابدين:لا

نوح:(شاف فساعتو)غانوصلك حدا طاكسي ركب وسير لدار أنا ضروري ندوز لمحالات

زين العابدين:أوكي

وصلو لحدا طاكسيات وعطاه باش يركب واخا راه عندو فلوسو وتحرك نوح بينما زين العابدين بقا واقف تاشاف طوموبيلة باه غبرات وهو يرجع لمدرسة على رجليه وبقا واقف بعيد تابانو ليه دوك زوج خرجو مع واليديهوم وبقا مراقبهوم بنظرات هاادية وباردة....

لگمرة نورات سماهاا هي والنجوم لي مشاركين معاه حلاوة الجلسة... فگاراج إدريس لي كان بوحدو كيدير شي حسابات ومع لخر دالشهر ضروري مايشوف المصاريف ويحسب داكشي باش يخلص دراري ونيت لاخصات شي حاجة يجيبها تاني...هز راسو فاش سمع لحس وغير بان ليه نوح وهو يتبسم ليه ونطق وهو كيزول نضاضرو دالشوف:كون عرفتك جاي كون ستقبلتك بلحليب والتمر اولد لحاج

نوح:(بابتسامة خفيفة) باقي لحاال صاوب لينا شي دكة ديال أتاي نجمعو عليها بحال ديماا

إدريس:(ناض عنقو وقال بابتسامة) هي لولة نيت شحال هادي مجمعناا على براد دأتاي دايزو لكلام

مشى إدريس يعمر أتاي لي كاين قوامو عندو تم ونوح جالس كيتنهد والعيا باين فملامح وجهو.. بقا كيدلك مدع عينيه تاسمع صوت التلفون لي كسر هدوء المكان...

كان إدريس عاطيه بالضهر كيوجد لقامة دأتاي ولمقراج راه تيغلي...مع هز داك لمقراح باش يكب لما فلبراد وهو يسمع صوت زدحة لي كانت قوية ضار بزربة وراه وبان ليه نوح طاايح فالأرض هو وكرسيه مغيب....

عيونها الزرقين كانو متابعين التلج لي كان تيطيح مغطي الأرضية لي رجعات بيضاا...الجو ريحها وخلاها تصفي دهنهاا وترتاح... هزات كويس دأتاي منعنع طالع منوو البخار وبدات تادفي يديها بيه تابانت ليها سناء جاايا ضاربة واحد سروال توني فالرمادي مع بوط بانطوفة وقبية فوقهاا كبوط سخون ولايحة على شعرها كاشكول..تبسمات ليها بيسان ونطقات بضحك:امالكي جاية مغلفة ههه

سناء:(جلسات ونطقات وهي خاشية يديها فجياب لكبوط) اختي دوشت خفت يسمقلني البرد عليهاا

بيسان:بصحة تشربي أتااي؟

سناء:كبي كبي اااح الجوو شحال زوين هنا فالليل

بيسان:بزاف گاع ماكرهتش نخرج نلعب بالتلج

سناء:لعبي بيه اختي شكون شدك

بيسان:( مدات ليها كاسها) تلعبي معايا

سناء:حيدي علياا باركة غير لوقت لي لاعبة بيااا

بيسان:(تنهدات) شنو غااديري دابا؟

سناء:مغاندير والو غانتفرج ونشوف هو اش غايدير نكدب عليك هادشي طلع لياا فصحتي

بيسان:تاأنا مافهمتش هاد إيطو تاهي مالهاا ماترحم ماتخلي رحمة سيدي ربي تنزل

سناء:هاديك لعاقيسة أنا لي عرفااهاا واحد تس تس من داكشي وتاهو ولد موو

بيسان:ههه وصراحة مباينااش فيهاا

سناء:حيت كاضرب من لتحت لتحت عليها مبيناش مكاتجيش فاص لبنادم ولكن سوليني أنا عليهاا شفتي من نهار تفارقت مع ولدها وهي هازة شوكتها علياا وفيما نمشي لفااس تبقا عليا بلمعااني وحشيان لهضرة وأنا على قبل هادشي مكنتش تانطول تم وكنت تانجي لمراكش

بيسان:تامن عيالات خوالي تاهوما منافقاات

سناء:سوليني أناا لي عشت معاهوم واحد لفترة شفتي بنادم حسن ليك تعطيه التيقار والله حيت لادويتي نتي لي غاتسماي خايبة.. واخا راه نتي لي عندك لحق ولكن هادشي مكيشوفوهش هوماا تامن خووتي لي هوما خواالك والله لاجاو من جهتي من نهار تزوجو وهوما مبدليين بحاال لادارو ليهوم طلاميس لي قالت ليهوم لمرا يقولو اااه وهوما حالين فامهوم.. راه كنت نسمع كلام منهوم هوما نيت والله لاصبرتي عليه واش عند بالك غير جييت وبقيت عايشة مع رحمة راه لاكنتي عاقلة فاش طلقت كيف كانت حالتي حد ماحس بيا من غيرها هي او ولد لحاج عليها جيت معاهوم وخليت لمدينة لي تولدت وكبرت وتزوجت فيهاا.. خليت خدمتي وسمحت فيها حيت فديك الساعة راسي كرهتو ولكن شكون يحس بيك وشكون يفهمك هوما غير يسمعو لمرا طلقات يقولو منها لعيب هي لي بغات وهي لي فعلات وتركاات واش دخلنا عليك بالله كاينة مراا لي تبغي تخرب دارها وتخرج عليها؟؟ واش كاينة لي بعقلهاا طلب طلاق؟ ولكن شكوون يشوف ويفهم هادشي ولي كيزيد يصدمك هي لاجات شي مرا وقالت ليك وكون غير صبرتي اش فيها الراجل يشوف براا تايعيى فلخر يرجع لمرتو ولدارو أو ولادو.. ولاتقول ليك اوا كون كنتي لالة ومولاتي كوون گاعما خليتيه يشوف على برا دخلنا عليك بالله واش هاد لكلام يتگاال ومن مرا لي بحالك بحالها ولي خصها هي لولة تحس بيك وتفهمك ولكن عندهوم لحق لي گالو راه عدو لمرا هو لمرا نييت

بيسان:(تنهدات) بصح عندك لحق تاحد مكيفهمك ومكيحس بيك غير لي داز فنفس الموقف لي نتي مريتي بيه

سناء:عرفتي ابيسان بعض لمرات تانقول هادشي لي طرا ليا درس باش نشوف شحال من حاجة ونغهم داكشي لي مكنتش عارفاه مغاديش نكدب لاقلت مكنتش سباب لمشكيل لي طرا مع ليازيد شحال هادي ولكن فنفس لوقت عرفت لي معايا ولي ضدي وكينافقني وزدت شفت حوايج كنت معمية عليهوم

بيسان:وداابا شنو غاديري معاها؟

سناء: أنا جيتو من لخر لاكان باغينا نرجعو يدير حل مع مو حيت أنا عييت نكدب عليك راني داخلة فالربعينات وباغا ندير ولادي وهو راه راجل مغاديش يلقى مشكيل من هاد الناحية..

بيسان: يكون خير متأكدة ليازيد كيبغيك وغايدير حل وتزوجو وتولدو لينا شي خنيفيش ولاخنيفيشة يتوانسو مع لتوينز

سناء:(تبسمات باشتياق) آمين (هزات حاجبها) ونتي اش بلانك؟

بيسان:(ضيم طاح عليها) حريرتي حريرة (بحزن نطقات) أنا وريان تفارقنا

سناء:وشنو السباب؟؟

بيسان:(بصراحة)أنا السباب غلطت فحقو وجرحتو (بدات تعاود ليها على شنو طاري معاها بدون زيادة ولاتقصان) جرحتو بزااف وخليتو يتقلق مني وأنا مكنتش قاصدة

سناء:الله على بنت ختي صدقتي مبلوزة كثر مني تانتي

بيسان:مكنتش ناوية نجرحو وعمري نوييت ولكن هو ماخلانيش نفهمو وفاش مشيت عندو قال ليا بلي أنا ماشي من مقامو (عينيها تغرغرو)ديك لكلمة كون تعرفي اسناء وشحال قصحاتني وماقدرتش نساها

سناء: هو كان ناوي يجي لداركوم؟

بيسان:اه وشحال من مرة فتح معايا لموضوع قال ليا باغي علاقتنا ماتكونش بالتخبية وتكون عندها سمية وتكون رسمية.. قال ليا بلي هو مباغيش نبقاو نتلاقاو بتخبية بحال لاكانشفرو

سناء:ونتي علاش مابغيتيش؟؟

بيسان:قلت ليك راه كنت تالفة وخايفة أول تجربة اسناء تخيلي معايا حياتي كولها وأنا عمري ماتصاحبت ولاعطيت فرصة لشي ولد لمرا كنت تانسمع غير لبنات وهوما كيعاودو ليا علاقاتهوم كنت خايفة يوقع ليا بحالهوم ولابحالك نتي شفت علاقتك مع ليازيد وكيفاش كاانت وخفت نطيحو فنفس المشكيل هادشي علاش كنت مترددة

سناء:ونتي تاتبغيه؟

بيسان:(بحزن)بزااف

سناء:شوفي مغانكدبش عليك فاش شفتكوم داك المرة صراحة شكيت يكون باغي غير يتفلى حيت الصراحة مباينش فيه ناوي لمعقول وماعرفاش كيبان ليا زهواني بحال داك لموصيبة لي بلاني بيها الله مي هضرتك دابا خلات صورتو لي كنت راسمة فبالي تبدل كومبليطمو وبينات ليا بلي ماخصناش نديو على الشكل حيت هو خداع صراحة.. هضرتو بينات تربيتو وبلي هو رااجل ومغانافقكش ولكن من حقو يتقلق ويحبس حيت مادرتي فيها مايصلاح وباين فيه نفسو هنا (أشارت لنيفها) وهاد نوع صعيب وباين فيه بلي فاش كيتقلب تايولي واحد اخر

بيسان:عندك الصح تاأنا والله ماعرفتو تسيف عليا تسيفة خايبة

سناء:صافي دابا نسااي لي عليك درتيه مشيتي باش تشرحي ليه وهو ماخلاكش دونك ماعندك ماديري يقدر يبرد من بعد يجي هو بنفسو يسمع ليك

بيسان:(قلبات وجهها جهة الزاج وقالت بمرارة) ويقدر عمرو مايجي

-----

مجمعين جميع فالصالة ناقصهوم غير إدريس لي باقي ماجا ولي كان ديجاا عيط لتانيرت وعلمها بلي عندو شي شغال فالگاراج وبلي غايتعطل.. متكية رحيل فوق السداري تاتسنط لكلامهوم تاحسات بواحد النغزة فقلبهاا خلاتها تشد صدرها وتقاد فجلستهاا تاضارو جهتهاا كاملين..

تانيرت:(بتساؤل) بنتي يااك لبااس

رحيل:(كمشات حجبانها) ماعرفتش شي حاجة ضراتني هناا اااح

تانيرت:قراي شوية دلقرآن ابنتي

بقات تاتمسد صدرها وتاتقرا لقرآن..بقات هاكا تاحسات بدوك النغازي مبقاوش وهي تكى تاني وسكتات.. جات لعندها سيدرا ونعسات جنبها ورحيل بقات تاتمسح على شعرها وكل مرة تزفر النفس وطلقوو.. معرفاش مالها كانت صحة سلام تاحسات بخاطرها تزير عليها منااش معرفاتش..

**

ملي تسمعات ديك الزدحة ضار إدريس بزربة وعينو جات على نوح لي كان طايح هو وكرسيه مغيب.. خرج عينو بالجهد ولاح داك لمقراج من يديه مامسوقش ليه غادي تايجري جهتو..جلس حداه وهز ليه راسو كيضرب حناكو بخفة ويعيط ليه:ولد لحااج ولد لحااج

مكانش تايتحرك وهادشي لي خلى إدريس يتخلع وينوض بزربة جهة لباب دلگاراج وبدا كيعيط لگرديان لي تايكون تم وشي دراري واقفين تايكميو: عتقووووني

جاو كيجريو ودخلو وهو تايهضر بزربة:عاونوني الله يستر عليكوم نركبو فطوموبيل

تحماو عليه بخمسة هازينو وإدريس تفكر بلي طوموبيلتو مجابهااش ولكن من زهرو كاينة طوموبيل دنوح.. وصلوه جهتها وقلب إدريس جيبو جبد لكونطاكط وحل طوموبيل وركبوه لداخل وإدريس راه مابقااش تسوق لگاراج حدو ضار جهة الگادرياان لي تيعرفو وقال بسرعة:الله يسهل عليك سد معااك الگاراج

الگرديان:كوون هاااني اسي إدريس لگاراج فالأمان

إدريس:الله يرحم الوالدين

ركب غادي بيه لسبيطار ومرة مرة يشوف واش فاق ماعرفش كيفااش تاطاح كان صحة سلام.. شد بيه طريق لكلينيك والخلعة راه باينة على وجهو ومع طريق كانت خاوية فالليل ماخداش وقت بزاف وكان وصل قدام لباب ونزل تايعيط لسكوريتي لي تما ولي دخل عيط على لفرملين لي جابو بيااص.. خرجوه من طوموبيل وأنسطالاوه فلبياص عاد دخلو بيه لداخل أو واحد فيهوم كايسول على حالتو

إدريس:ماعرفتش كاان جالس تااطاح مغييب

خلاو إدريس يعمر لوراق وغير سالى وهو يجبد تلفونو باش يعيط لشي حد وتفكر بلي عندو غير نمرة جدو ولاقالها ليه يقدر يوقع ليه شي حاجة وسيد راه مريض وكبير فلعمر...مسح على راسو ودوز نمرة ريان لي كان فدوك الأثناء طالع لفوق باش يجيب دوا درحيل لي كاتشرب..

ريان:ألو الواليد فينك؟

إدريس:عندك نمرة رؤوف؟؟

ريان:اييه عندي علاش تاتسول ياك لباس؟؟

إدريس:سيفطها لياا داباا اريااان وسمع ماتقول لحد صونيت عليك

قطع عليه وريان بقا غير تايشوف مفاهم والو.. سيفط ليه النمرة وإدريس غير وصلاتو عيط ليه فلبلاصة..

رؤوف:ألو شكون معايا؟؟

إدريس:رؤوف معاك إدريس

رؤوف:اه سي إدريس لبااس الأمور مزياانة؟

إدريس: لا اولدي عيط ليك باش نعلمك بلي ولد لحاج راهو فلكلينيك

رؤوف:(قاطعو بسرعة) مالو اش واقع ليه؟؟

إدريس:كان معايا فلگاراج جاالس تاطاح مغيب ماعرفتش اش طاري ليه

رؤوف:إينا كلينيك هو كااين؟

إدريس:ف***

رؤوف:أنا جاااي

خرج رؤوف من البار فين كان جالس مقصر ومبدل روتين لخدمة بلاعقل..معارفش خوه اش طاري معااه تاوصل لكلينيك..أما إدريس رجع صونى لريان وعلمو بشنو طاري وطلب منو هاد لهضرة ماتوصلش لرحييل..

تانيرت غير سمعات لخبار تاهي تخلعات وبالها مع ولد لحاج وفنفس الوقت مع بنتها لي خافت عليها وعلى صحتها وصحة لي فكرشها.. حاولو ماأمكن مايبينوش ليها واخا راه الخلعة شداهوم وريان ماقدرش يصبر بدل عليه ومشى لعند باباه مخلي غير محمد طه معاهوم..

واقفة تانيرت مع محمد فلكوزينة وبالهوم مشطون مع لخبار لي سمعو..

محمد طه: مقالش لواليد شنو سباب؟

تانيرت:لا اولدي راك سمعتي ريان اش قال السيد طاح غييب وداه لكلينيك

محمد طه: اووف لمشاكيل مكيتقادوش

تانيرت:الله يدير تاويل دلخير ياربي المهم نتا حاول ماتبين والو قدامها حيت ماخصش تعرف تاحاجة الله يرضي عليك

رحيل:(بتساؤل نطقات) شكون لي ماخصها تعرف تاحاجة (بجدية) شواااقع اماما؟؟

ضارو بزوج جهة رحيل لي كانت واقفة حدا باب الكوزينة شادة كرشها وتاتشوف فيهوم شوفاات استغراب وتساؤل.. تانيرت صفاارت ومحمد طه حك حاجبو وقال بهدوء:والو ماواقع والو ارحيل

رحيل:كيفاش مواقع والو ونتوما غير شفتوني صفاريتوو (قربات جهتهوم) وزايدون فين هو بابا تعطل بزاف وماشي من عوايدو وتارياان فين مشى فنصاصات ليل (خرجات عينيها وقالت بصوت خافت) ياكما واقعات لبابا شي حاجة ونتوما مخبين علياااا

السيدة دغيا صفاارت وفمها بيااض شدات على كرشها لي حسات بيها ضراتها وخاطرها غير مزاد تزير.. قرب محمد طه وشدها من خصرها ونطق بسرعة:ماواقع ليه والو هو بخير

رحيل:(شافت فيه وهي كلها تاترعد) كداب فين هوو وعلاش قلتو ماخصش تعررف

تانيرت:(قربات عندها طمنها)كون ابنتي باباك لاقدر الله وقعات ليه شي حاجة كوون لقيتيني واقفة هاكا الله يهديك راهو بخير

رحيل:(بإصرار) عيطوو ليه داباا نشوف

هزات تانيرت تلفونها ودوزات ليه لخط وغير سمعات صوتو وهي تنطق:ألو إدريس هاك هضر مع رحيل راه تشطنات عليك حيت تعطلتي

رحيل:بابا

إدريس:(بصوت حنين نطق) ابنتي أناا راني بخير ماتهزيش ليا لهم

رحيل:وفينك علاش تعطلتي؟؟

إدريس:(تنهد) راه غير واحد السيد كانعرفو كايجي يصاوب عندي الطوموبيل واقع ليه واحد لمشكيل وجيت نوقف معااه هادا ماكاان

رحيل:(واخا كلامو هي مرتاحتش وباقي خاطرها مزير) وفينك نتا واش غاتعطل؟؟

إدريس:غانتعطل شوية نتي نعسي وارتاحي ابابا يالاه كون تسمعي لهضرة

رحيل:رد لبال لراسك

مدات تلفون لتانيرت لي قالت:بيناتنا التلفون اإدريس

قطعات وشافت فيها:صافي ارتاحيتي هاباك بخير مطاري ليه والو غير ابنتي باغا تخلعي على والو

رحيل:(حطات يديها على صدرها وقالت) من قبيلة وحاسة براسي ممرتاحااش وفاش سمعتكوم تاتهضرو وشفتو تعطل تخلعت اوووف ماعرفت مالي

تانيرت:اجي ابنتي تعشااي وكولي دوواك وسيري ترتااحي

رحيل:كرشي تاضرني فيا لحريق

تانيرت:خصك تاااكلي باش تشربي دوا لحريق لي خرجات ليك طبيبة سمعتيها قالت ليك لاحسيتي بشي حريق خودي حبة منوو

رحيل:صافي واخا

بقات معاها تاتعشات وشربات دواهاا وماخلاتها تاشافتها تخشات بلاصتها...

تانيرت:(باستها فجبهتها)يالاه نعسي اماما وارتاحي بااش يرتاحو وريقات لحنا دجداهوم

رحيل:تصبحي على خير

خرجات تانيرت من عندها وخلاتها حالة عينيها فالظلام... تاتمسد كرشهاا وتاتنهد ونعاس مجاهاش طاار وعمرها وقعات ليها هاد لحالة.. خدات تلفونها وطلقات منو سورة البقرة وحطاتو فوق الطبلة كاتردد معاه وفنفس الوقت تاتمسد كرشها عالله وعسى ترتاح وتنعس...

****

عند ريان لي وصل لكلينيك ودخل لعند بااه تايقلب عليه تالقاه فين نعث ليه... قرب جهتو وقال بتساؤل:لواليد امضرا؟؟

إدريس:باقي اولدي ماخرج حد يطمني

ريان:علمتي رؤوف؟؟

إدريس:اييه راه عيط ليه وهو جاااي

سكت ريان وعقلو مشى لعند بيسان لي مسافرة.. ماعرفش واش غايكونو قالوها ليهاا ولا لا ولاعرفات كيفاش غاتكون حالتهاا...كمش حجبانو تايخمم فيهاا تاهز تلفونو وشاف السطوري ديالها لي كان ديجا شافو قبل ومعاودات حطات تاشي واحد وراه.. أما عند بيسان فكانت مكملة ليلتها هي وسناء كل وحدة تشكي على لخرى وعلاقتهوم بحال صحبات ماشي غير بنت أخت مع خالتهاا.. توادعو وكل وحدة مشات لبيتها ويالاه كانت تتوجد بيسان باش تنعس وهو يصوني تلفونها بنمرة رؤوف.. استغربات حيت مامولفش يعيط ليها فهاد لوقت..

بيسان:ماتقولش ليا توحشتيني

رؤوف:(عينو على رحمة لي تاتبكي وترعد وهي جالسة جنبو فالطوموبيل) بيسان خصك ترجعي لمراكش

بيسان:(بخوف) شواقع بلاااتي شكوون لي كيبكي حداك؟

رؤوف:(سرط ريقو وقال) خويا نوح فلكلينيك ماعرفتش شنو واقع ليه

بيسان:(غوتات) كيفااااش ماالو شنو طاااري ليه

رؤوف:ماعرفتش أنا براسي بحاالك يالاه غادي مشيت لرياض وجبت لواليدة هي وجدي وجدة ودابا راه غاديين عندو سي إدريس هو لي علمني حيت خويا كان عندو

بيسان:(دموعها نازلين وكلها تترعد)أناا جااايااا داباا

خرجات من شومبر ديالها حفيانة غادة لعند سناء وبدات تخبط عليها لباب تاحلات سناء وهي مخرجة عينيها بخوف:ماالكي اش طاري؟؟

بيسان:(تادخل وتخرج فلهضرة)فلكلينيك خوياا نووح راه فلكلينيك

سناء:أويلي ماالو

**

وصل رؤوف لكلينيك برفقة رحمة لي كانو دموعهاا نازلين وفولار لي دايرة فوق شعرها تايزهق عليهاا.. ومعاهوم تالحاج لحسن وزاينة لي شاديين فيد بعض ولخوف باين على وجههوم لي كان مسقوط من الدم..

كانو عينيها تايقلبو على شي حد يطمنها على ولدها تاقشعو إدريس واقف هو وريان وكل مرة يشوف فساعتو تايتسنى شي خبار يطمنوه على ولد لحاج لي فاش دخلوه معاودوش خرجو.. قربو جهتوهوم بزربة ونطق رؤوف بلهفة:فين خوياا؟

إدريس:دخلوه لداخل وباقي ماجا حد يقول ليا اش كاين

مع نطقها بان ليه طبيب خارج وجاي جهتهوم هاز واحد ضوسي ورحمة غير شافتو وهي تنطق ببكاء:ولدي ماالو؟؟

ط:(بعملية) لفوحوصات كاتبين لينا بلي المريض مصاب بالسكري من النوع التاني شي لي خلاه يتعرض ل Coma diabétiques...

يتبع...