محتوى القصة
غادة فلكولوار وعينيها الزرقين منفوخين بلبكا لي بكااتو.. وصلات عندهوم ولقاتهوم باقيين على جلستهوم.. تنهدات ونطقات بصوت هامس مبحوح: لوبغاسيون سالات
كلهوم هزو راسهوم فيها وإدريس ناض عندها وقال بجدية: كيف بقااا ؟
بيسان: لوبغاسيون دازت شوية معقدة وضطرو يستأصلو ليه الطحال حاليا هو فالإنعاش غايبقا تما 48 ساعة تايشوفو حالتو كيف بقات..
إدريس:لحمدلله
رحمة:(ناضت جهتها وهي صفراا ورجليها تيلعبو تحت منهاا.. قرب عندها رؤوف عاونها وهي نطقات ببكاء) بغيت نشوف ولدي هء هء نشووووف لمرضي ديالي
بيسان:(شدات يديها وقالت بهدوء) غاتشوفيه ولكن غير من الزاج حيت ماتقدريش دخلي عندوو دابا على قبل حالتو
حركات رحمة راسها بلهفة وبيسان شافت فإدريس وتبسمات ليه بتعب: شكرا بزاااف على وقفتكووم معاناا
إدريس:ولد لحاج معزتو كبيرة عندي مكاين لاش تشكرينا ابنتي
بيسان: تقدرو تمشيو دابا وترتااحوو بلاماتبقاو معدبين هناا
إدريس:(حرك راسو) غانمشيو ولكن غانرجع من بعد واخاا
بيسان:واخااا
مشات بيسان هي ورؤوف لي مسندين رحمة لي حالتها حالة وإدريس قرب عند رحيل لي كانت تاتسمع لهضرتهوم وقلبهاا حساتو كايتعصر وسط ضلوعهااا بالخوف عليه وبمشااعر خرى ماقدرااتش هي بنفسهاا تلقى ليهوم سمية.. ناضوو خارجين من السبيطار والصباح بدا يطلع ركبو فطوموبيل إسلام ورجعو لدار أما إسلام مشى لاباخطمون ديالو يرتااح.. دخلات رحيل لبيتهاا وغير استفردات بنفسهاا وهي تسمح لدموعها ينزلوو ويديها حطاتهوم على شفتها حابسة صوت بكيتهاا.. معرفااتش علاش ولكن حسات براسها بلي محتاجة تبكي عالله ديك العقدة لي فصدرهاا تحل.. تتبكي تاحسات براسهاا بردات ومشات جهة لحمام توضاات ورجعات فرشات صلايتها ولبسات إسدالها وتوجهات لخالقها تشكي عليه.. وفاش كاضياق عليناا كايكوون الملجأ لينا هوو الله عز وجل.. بسم الله الرحمان الرحيم {وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ } [سورة البقرة:186]
بقات مدة فوق صلايتها تاتخمم فشي لي طرا معاها تاحسات بواحد الراحة نزلات عليها وحسات براسها ولات خفيفة.. مشات جهة النموسية جبدات تلفونهاا عمرات لغڤي وغير حطات راسهاا وهي تنعس..
---
حسات بيديدات صغار على وجهها تايلمسوهاا ويبوسوهاا بوسات متفرقة فوجهها وففمها.. حلات عينيها لخضرين لمنفوخين وشافت فوجه سيدرا لي كانت محنية عليها ومبسمة.. تبسمات رحيل وجراتهاا عندهاا منعساهاا حداهاا ونطقات بصوت مبحوح بالنعاس: مامي فاقت بكري ليووم
سيدرا:(تتلمس شعر مها) شبعت نعوسات مامي
رحيل:(هزات تلفونها لقاتها التسعوود تنهدات حيت تعطلات على لخدمة ولكن ماتسوقاتش واخا عارفة غاتسمع هضرة من عند سعيد تاني.. باست سيدرا وناضت تتجمع شعرها) ماما فاقت
سيدرا:(هازة نونوسها ونطقات بحماس) تانيرت إينوو فاقت هي وبّا ديدي وصيبات ليا كريب أوشوكولا مامي وجيت نفيقك باش نفطروو أنا وياك مامي
رحيل:(تحنااات تتبوسها فحنكها بالجهد وتتهرها فكرشهاا) ناااكلك أناا بلاصة لكريييب اشكلااطة دمامي
سيدرا تاضحك وتلوى فبلاصتهاا وشعرها تايتحرك معااه ونطقات بصوت عالي:ماااامي غاندير حزيقة ههههه
مع قالتها مع تسمعات صوت حزقة وهي تكمش رحيل حجبانها وقالت بضحك:ايف ايف الحزااقة
سيدرا:(ضحكات وتعلقات فرحيل) حزيقتي ريحتها زوينة مامي ههه
رحيل:ههه سيري نزلي أنا نغسل وجهي ونلبس حوايجي ونجي
سيدرا:(نزلات من بلاصتها وهزات إيڤانا لي كانت ناعسة فبلاصتها ونطقات بصوت عالي) ماتعطليش امامي
تبسمات رحيل وناضت تاتكسل وهزات لبنوار ديالها لي كان فوق النموسية وهو يطيح لخاتم دنوح لي كان فالجيب ورحيل غير شافتوو وهي تنهد وهزاتوو تتشوف فيه بهدوء وبصوت هامس: ياربي تحفظوو وترجعو لعائلتو بخير وعلى خيرر
حطاتو فوق الطابل دونوي ومشات لحمام دارت روتينها الصبااحي أو وقفات قدام بلاكارها ومحتاجتش وقت بزاف واختارت اش غاتلبس وبعد مدة نزلات لتحت فين كانو مجموعين على لفطور من غير رنيم وأسماء لي مشاو لخدمتهوم حيت تعطلو أما ريان فعيط ليهوم وقال ليهوم عندو شي غرااض غايتعطل.. غير شافوهاا وهي تكمش تانيرت حجبانهاا ونطقات: بنتي رحيل واش حيدتي نقااابك؟..
كانت تتشوف فيهوم وفنظرات التساؤل لي على وجههوم وهي ساكتة وعارفة بلي أكيد شي طبيعي يطرحو عليها هاد سؤال.. قربات جهتهووم بسروال توني بااج وقبية طوويلة دلمحجبات وفوق منها كبووط بحال جيلي فالخزي وشال كحل وفوق منو كاسكيط.. حطات صاكها وجلسات فلكرسي ونطقات بهدوء: نهار شفت النقاب على لمانكان أثارني وحقيقةً كنت باغا نديروو عليها شريتوو وفاش لبستو حسيت بالراحة فيه وعجبني شكلوو عليا داكشي علاش بقيت دايراه (سكتات رحيل وكأنها تدكرات شي حاجة.. عاد رجعات كملات) بقيت تانلبسو وغفلت على شحال من حاجة متعلقة بيه ولي كنت تانظنهاا عادية وصراحة مكنتش عطياهاا واحد الأهمية تاجا واحد الشخص ونبهني عليهاا زائد لبارح فاش وقع لي وقع وخرجت من الدار بلابيه ونسيتو حسيت بواحد تأنيب الضمير حيت غلطت بحال هاداك لغلط.. ولبارح فاش جلست مع راسي لقيت بلي أغلاطي ماعندهاا تاشي مبرر وبلاصة مانبقا مكملة عليهوم فضلت أنني نزول النقاب ونرجع نلبس لحجاب ديالي كيف قبل تانهار لي نشوف راسي مستاعدة استعداد كُلي أنني نلبس النقاب ونتبع شروطوو كيف هي أكيد مغانتردد ولو لثانية أنني نلبسو..
تبسم ليها إدريس وجرها عندو باس راسها.. من طبعو مكيفرضش على ولادو لحاجة بل كيخليهوم على راحتهوم حيت بالنسبة ليه هوما كبارر أو عارفين الصح من الغلط.. نهار تحجبات رحيل فرح وحس بالفخر وكان تيتمنى تاأسماء تحجب ولكن هي مكانتش مقتانعة بيه لدلك مابززش عليها وخلى ليها لحرية الكاملة.. حيت الحاجة دلخاطر كدوم على ديال بزز وشحال من بنات كيكونوو واليديهوم فارضين عليهوم لحجاب وهوما مباغينووش وكيظطرو يديروه قدام واليديهوم وغير تايخرجوو ويبقاو وحدهوم كيزولوه.. حنا بنادم لحم ودم وأكيد كانغلطو فشحال من حاجة.. داكشي علاش الإنسان فاش تيعرف لغلط ديالو لازم عليه يصححو وميبقااش مكمل عليه بحال رحيل لي ملي فكراات لقات راسهاا غلطات بزاف وكانت معتارفة بلغلط ديالهاا بينها وبين نفسهاا وعليها قررات تصلح غلطهاا..كملو فطورهوم وناض ريان كيف لعادة هو ورحيل غادين لخداميهوم وريان فيه لموت دالنعااس وطريق كولها وهو ساد عينيه تاوصلو لميزون دوڤواتيغ وهي تنغزو رحيل ونطقات قبل ماتنزل:توگض وشرب كافي نوااغ
ريان:(عينوو نص محلولين) هممم
ضحكات عليه ومشات جهة الباب دخلات وگاع عينين لموضفين عليهاا أو واحد قرب جهتها ونطق بابتسامة عملية:وي مدموزيل فاش نقدر نعاونك
رحيل:(جاتها الضحكة)احم أنا خدامة هنا معاكووم
الدري:(بتفاجأ)هااء عمري شفتك هناا (مد يديه) أنا زكرياء
رحيل:(شافت فيديه وحركات راسها) رحيل
تخطاتو ومشات طالعة لفوق تاسمعات صوت سعيد لي نطق وراها:فين غادة امدمووزيل؟؟
ضارت رحيل شافت فيه وهو قرب جهتهاا ونطق: داك لطاج خاص غير بلموضفين شكون نتي؟
رحيل:(تنهدات) أنا رحيل
سعيد:(هز حجبانو وعينو تفيكساو عليها لمدة قليلة قبل مايقول) زولتي النقاب؟
رحيل:(شافت فيه شوفة باردة) كنظن هادشي كيخصني؟؟
سعيد:(سرط لقمعة ونطق ببرود) تعطلتي
رحيل:كان عندي مانقضي
سعيد:مزيان تقدري تمشي لخدمتك
مشات رحيل وسعيد متبع ليها لعين تاغبرات وتمتم بهمس: طلعات تيتيزة
---
ليوم مر بسلام ورحيل مكانتش عندها خدمة بزاف داكشي علاش خرجات بكري وعيطات لإدريس لي خلى خدمتو وجاا يديهاا.. مكانتش رحيل راضية على هاد لوضع ولكن كانت مجبرة خصوصا لبارح ملي رجعات شافت بدر الدين رجع لخووف يسيطر عليها من أول وجديد وماحدو ماتشدش وماتهناتش منو غايبقا لخطر مرافقهاا ومرافق المقرابين ليها حياتها كلهاا.. وصل إدريس وشدو طريق لسبيطار باش يطمن على نوح.. مسافة الطريق تاكانو تم وتوجهو لغسيبسيون سولو على لإنعاش فين.. وصلو لطاج لخاص بالإنعاش لي كان خاوي وشافوه غير من الزااج حيت ممنوع يدخلو عندوو.. تعلقو عيونها لخضراء على جسدو لممدد فوق السرير الطبي والسلوكة لي عامرين صدرو.. تحسر إدريس على حالتو وتمنى ليه الشفااء أما رحيل عينيها دمعوو وبصعوبة سيطرات على نفسها قدام باهاا.. خرجوو من تما وشدو الطريق لدار فسكات.. وغير وصلو لدار وهي تسلت رحيل لبيتهاا ومشات بدلات حوايجها وصلات صلاتها وغير سالات سمعات الدقان فلباب وكان إدريس لي دخل وغير شافتو رحيل تبسمات ليه.. أما إدريس شاف فيهاا شوفات فشكل ونطق بصوتو الهادئ: اش كايدير عندك خاتم ولد لحاج؟
عيونها تفيكساو على لخاتم لي كان هاز باها بين يديه.. خاتم نوح لي بغباءها نساتو فوق الطابل دونوي.. سؤالو كان بحال شي سطل دلماا مثلج تكب عليها وخلى التبوريشة طلع معاها من صبعها الصغير... رجعات هزات عينيها فباها لي كان باقي كيشوف فيها بدوك الشوفااات لي زادو وثروهااا..
رحيل:(تنهدات) هو لفرملية فاش عطاتني الساشية وجبدت منو التلفون باش نجاوب على لابيل الخاتم طاح وأنا هزيتوو وحطيتو عندي وقلت نعطيه لختو ساعة نسيتوو
تتهضر وتقلب عينيها مقدراش تشوف فيه وهي عارفة روحها تاتكدب.. أما إدريس عينوو عليها كيشوف فحركاتهاا تانطق بنفس لهدوء: سيدرا لقاتو فوق الطبلة وجابتو لياا (سكت تارجع نطق) غانخليه عندي تانعطيه لختو..
رحيل:(باندفااع) غير خليه أنا نعطيه ليها
إدريس:(زاد كمش حجبانو لغلاض) رحيل نتي ممخبياش علياا شي حاجة؟؟
سرطات ريقها من نبرتو الجدية لي كانت فصوتو وهو كيسولهااا وماعرفااااش باش غاتجاوبو وشنو غاتقووووول ليه وكيفاش غاتشرح ليه لي كاين..
رحيل:لا
حرك راسو ومد ليها لخاتم ونطق قبل مايمشي: نزلي ديري لكاسكرووط
رحيل:واخاا
مع تسد لباب تنهدات رحيل ومشات ديريكت لبالكو حلاتو وخرجات تنفس وهضرت باهاا وشوفاتو وتروهاا هي عارفة بلي إدريس مكتخفاش عليه لحااجة وأكيد غايكون عرفهاا تتكدب عليه.. دابا شنو غايقول عليها فبالو وتاهي واش تكلخات تاخلات خاتموو وهي عارفة لبيت مكتسدش وأي واحد كيدخل ليها.. سندات يديها على سطارة تتشوف فالشارع والناس لي غادة جاايااا وعينيها لاإراديا مشاو لبلاصة فين كان طايح نوح بقات تتشوف فيها شوفات ساهين قبل ماتنهد ودخل بحالهاا وحطات الخاتم فصاكها وحيدات إسدالهاا وبقات غير ببجامة خفيفة حيت الدار سخووونة وطلقات شعرها يتنفس..نزلات لتحت وبانت ليها سيدرا خارجة من لكوزينة وهازة طبسيل البنيه تبسمات ليها رحيل: لحادگة دمامي
سيدرا:(بحماس) أنا لي عاونت تانيرت إينو مامي وصاوبت كيكة
تانيرت:(خارجة من لكوزينة هازة طبسيل فيه كيك شكلاط وفوق منها گنااش الشكلاط ودانون ومزوقة باللوز إيفيلي) اييه عليها كليتي ليا الشكلاط كااامل
رحيل:(ضحكات من نيتها) ههههه صافي لحناش غايلقااو فين يسكنوو
سيدرا:(كمشات حجبانها فتانيرت ونطقات بجدية ممناسباش عمرها) ولاتانيرت إينووو أناا غير دقت واش شوكولا زوووين نتي لي كليتيه
تانيرت:(قلبات عينيها) تاأنا غير دقتوو
رحيل:(عرفات مهاا تتوحم وتبسمات) ياكما تشهيتي نصاوب ليك شي حاجة ؟
تانيرت:(غادة لصالة) ماعرفتش دابا مبغيت والو صراحة
دخلات رحيل لكوزينة تكمل حطان الكاسكروط وسيدرا مشات عند إدريس تعلقات فيه بحال شي قريدة وقالت بدلع: الأسمراني تاع قلبي ولحبيب ديالي
إدريس:(ضحك تاتغمضو عينيه) اش كاين تاني انخشيشة جدها
سيدرا:(ضورات يديها على عنقو وحطات راسهاا حدا ودنيه مع معنقاه من ضهرو) بغيت بيتزا
إدريس:قولي لرحيل تصاوبها ليك
سيدرا:(كمشات حجبانها) لابغيت ديال الزنقة
هز إدريس عينوو فريان لي كان شعرو باقي سارد حيت يالاه دووش وعينوو حمرين بالصابون والنعاس لي باقي مدوخو النهار كامل.. نطق بهدوء: ريان سير جيب لسيدرا بيتزا
ريان:(كمش حجبانو) اه واخا (شاف فسيدرا) ديالاش باغاا؟؟
تانيرت غير سمعات حس لبيتزا ريوگهاا سالااوو ومداقها جاها ففمهاا قربات عند ريان ونطقات بسرعة:دلكفتة
شاف فيها ريان وإدريس وسيدرا كمشات حجبانها وقالت:بيت أنا ديال دجيجات
إدريس:شوف كل واحد شنو باغي وسير جيبهوم وهز لفلوس راهوم فلمجر لي لهيه
ريان:صافي عندي (وجه هضرتو لرحيل) اش باغا نتي
رحيل:هممم جيب ديال ڤخوي دميغ
ريان؛ونتا الواليد؟؟
إدريس:ماديرش بحسابي
بقا ريان يسول فيهوم وكل واحد يتشهى عليه اشمن بيتزا بغاا تاخرج لواحد الصنااك قريب ليهوم كيصاوب بيتزا ومشى دومونداهوم وجلس كيتسنى.. بقا تيلعب فتلفونوو تالقا نور تتعيط ليه قلب وجهوو وتنهد قبل مايدوز لخط: وي
نور:(تادوي منفخة) مقلقة منك بزاف اريان
ريان:(ببرود) ياك لباس
نور:من نهار لمشكيل لي وقع فلبار ونتا قالب وجهك عليا بحال الاأنا لي كنت سباب لمشكيل
ريان:(زير على يديه) متتفرعيش ليااا كررري تانتي بفشوشك لخااوين راه ماعنديش لخاااطر ليك
نور:(شهقات) ياااك دابا أناا وليت كانتفشش واخا اسيدي شكراا بزاف أنا لمكلخة لي كنعيط ليك واخا نتا ممعبرنيش ولكن بااين شكون شاطن بالك
ريان: اش تتخوري؟؟
نور:(بفقصة) شكون من غيرها ديك خيتي جبادت الصداع ولي خليتيني داك نهار على قبلهاا هي عليها هاد الأيام كلها ونتا متتحاشيهاش لياا يااك
ريان:(لعب بلسانو ففمو وببرود) ممساليش ليك دابا
قطع عليها وناض هز لكوموند راجع لدارر لقاهوم باقيين تيتسناو فيه عطا لكل واحد بواطة ديالو وسيدرا حلاتها وشافت فتانيرت لي تتاكل فيها بلهفة ونطقات وهي مكمشة حجبانها:بشوية عليك تانيرت إينوو (شافت فإدريس )ماقالتش بسم الله بّا ديدي
ضحك إدريس وعينو على تانيرت لي تتخشي فوجهها وتبنن.. بزز باش صبرات تاجابها ريان وغير حل لباب وهي تشم ريحتهاا.. ضرباتها كلها وزادت رحيل عطاتهاا حقها تاهي حيت عارفة بزاف اشناهو لوحم وكيفااش كتكوون لمرا فهاد لمرحلة..
دارو كاسكرووط وجلسو مع بعض مجمعين حيت هاد لوقيتة فين كايكونو كاملين حاضرين.. تانطقات أسماء موجهة هضرتها لتانيرت: باقي مالقيتي شي وحدة لي تجي تعاونك فشغال الدار؟؟
تانيرت:لا والو مالقيت تاشي وحدة
ريان:(حاط راسو على رركاب مو وقال) جيبو رقية لي كانت معانا فالرباط
تانيرت:مشات لأكادير مع راجلها عيط ليها وقالت غاتشوف شي مرا لي تكون تقة تسيفطها ليا
أسماء:نشوفوو دوك لعيالات لي كيجيو عند خالتي زوبيدة كينقيو ليها الدار
تانيرت:وفين خالتك زوبيدة راه مشات عند ولدها لطاليان وباقي مجات
سيدرا:(تتهضر وتعبر بيديها)توحشت طاتي زوبيدة لي تتعطيني لماندلين فشجيرة لي عندها فالدار
رحيل: مكانتش تتبقا هاد لمدة بزاف برا مراكش
تانيرت:دابا تلقايهاا راجعة تاني عرفاهاا مكتحملش تبعد على دار ومراكش غير بزز منها تمشي وتشوف ولادها لي مكيقدر حد يجي عندها
رحيل:مافهمتش أنا دوك لولاد لي مكيقدو يجيو عند مهوم
تانيرت:الله يهدي الجميع
رنيم:مابقا والو لرمضاان
أسماء: ماتفكريناااش عفاااك اناري لخدمة ورمضاان لعدااب خصوصا فمراكش راه لموت دالصهد مكايوصل وقت لمغرب تاكتبغي روحك تخرج
رحيل:(ضحكات بسخرية) نتي بعدا كظلي تحسبي السوايع وتتسناي وقتاش يأدن هه
ريان:(ضحك تاهو) هادي فرمضاان تاتولي بحال لكمااااية غير بعدي منها
أسماء:(كمشات فيه حجبانها) شكوون كيهضر نسيتي روحك السالوبار
رنيم:(ضحكات بلخف) الشبكة تتعيب لغربال وتتقول ليها عينك كبار هي ديالكووم نتي وياااه بزوووج كيف كيف
سيدرا:(بحماس) أنا توحشت رمضان باش ناكل شهيوات مامي ونشرب حررريررة ياك امودي
محمد طه:(جرها عندو) اه اروح مودي وتانتي غاتصومي بحالنا ياك
قلبات سيدرا عينيها وقالت بمكر طفولي: باقي صغيرة أنااا ياك ابّا ديدي
إدريس: باقي ولكن فاش تكبري راه غاتصومي
سيدرا:واخا بّا ديدي
ناض إدريس مخليهوم وتبعاتو تاتانيرت.. تكسل ريان وخدا راحتوو كثر فاش مكاينش باه ومو: دابا رمضان شحال بقا ليه
رحيل:شي شهر تقريبا
ريان:على هاد لقبال خصني نجمع راسي راه رمضان مامعاهش لعب
أسماء: اوا جمع راسك ونتا ديك النهار مشيتي لبااار ويعلم الله اش درتي فيه
ريان:مشيت دابزت ورجعت هاشنو درت فلبار
رحيل:أنا غانوض نوجد لعشاا ونتوما (أسماء ورنيم) اجيو عاونوني
----
جالسة فلكراسى بهدوء مور ماخلات رؤوف يوصل مها لرياض حيت حالتها حالة وبقات هي جالسة تاتسنى شي خبار يطمنو قلبها.. هي بصح طبيبة وعارفة بلي فهاد الحالات الاتتظار هو لحل لوحيد ولكن راه مغايحس بداكشي لي تتحس بيه غير لي مجرب.. قرب جهتها رؤوف لي جاب معاه لماكلة ليها ونطق ببرود: شدي
بيسان:(شافت فيه) كيف بقات ماما
رؤوف:خليتها ناعسة ترتاح (حك حاجبو) عيط ليا جدي وراه جايين
بيسان:(خرجات عينيها فيه وقالت بعصبية) واش قلتيها ليه؟؟
رؤوف:وشنو بغيتي ندير عيط وسول عليه وقلت اش كاين
بيسان:(ناضت وهي مخنزرة فيه) واش مخور فدماغك اش داك تقولها ليه وهو مريض بالسكااار وعارف صحتو على قد لحااال واش بغيتي تقتلووو
رؤوف:(ناض تاهو مخيخ) مالي غانكدب زعمة مغايعرفووش اش طاري ليه
بيسان:(شافت فيه بجدية) اش غانتسنى منك أصلا ارؤوف عنداك غير تمشي تعيط لزين العابدين وتقولها ليه باركة غير لعام لي ضيع بسباب لمشكيل لي طرا ليه مايزيدش تاهاد لعااام
رؤوف:(قلب وجهو وقال بسخرية) أي مشكل تيطرا دابا رؤوف هو سبابو يااااك (غوت فوجهها) رؤوف لي مكيصلااااح لواااالو وهو غي برهوووش كيدير ليكوووم فلمشاااكيل
بيسان:ماقصدتش بهضرتي هااادشي لي نتا فهمتيه ارؤوف بلا ماتبقااا تقوول شي حاجة مكيناااش
رؤوف:(حط عينو فعينيها) خليك غير مشطوووونة على خوووك نوح ورؤوف لهلااا يقلب جد باباااااه
بيسان:(قربات تال عندو وشدات فكتافوو وقالت بهدوء) نتاا خوياا بحاالك بحاال نوح وعزيز علياا بحالو ماتبقاااش تعمر راسك بهاد لهضرة لخاااوية ارؤوف
رؤوف:(نثر يديه وقال وهو غادي) الدفلة فاش تتخرج من لفم مكترجعش
مشى رؤوف وبيسان بقات متبعة عينيها ليه وهي مقلقة ومعجبهاااش نتيجة لحوار لي ضار بينها وبينوو.. علاقتها برؤوف كانت شوية مفشكلة حيت هو مبعد عليهوم بزاااف وفيما هي كاتبغي تقرب منوو كتلقاااه بعد عليهاا.. تنهدات وشافت فلفرملية لي جات جهتها ونطقات بابتسامة:لمريض فاااق..
غادة بزربة تابعة الفرملية لي قالت ليها لخبار لي فرحوها وحسسوها بالراحة وغير وصلات الإنعاش وهي توقف قدام الزاج مبتاسمة وهي تتشوف فنوح لي كان حال عينيه والطبيب واقف جنبو كيهضر معااه.. جبدات تلفونهاا وصونات لمهاا علماتها وعيطات تالجدهاا لي كان شاد الطريق هوو ومرتو طمنات قلوبهوم..
لخباار وصلو لعائلة لي مكانوش عارفين بشي لي وقع معاااه حيت بيسان مكانتش باغاا تشطن حد وتخلعهووم.. بقات معاه تاخرج الطبيب لي طمنها أنه بخير ولكن خصو الرااحة ويبقا هناا ويرد لبال لصحتوو داباا كثر من قبل.. نقلووه لشومبر عادية وغير خرجو من عندو لفرملين تحل لباب ودخلات بيسان تتجري وعينيها مدمعين.. بان ليها متكي ومغمض عينوو وجهو صفر باين فيه لمرض
بيسان:حبيبي
حل نوح عينوو وشاف فيه وهو يتبسم ومد يديه لي فيها السيروم بشوية تاجات شداتهاا ونطقات:خلعتيناا عليك بزاااف
نوح:(بلل حلقو) غي بغيت نشوف لمعزة ديالي عندكوم
بيسان:(تبسمات) عارفة بلاصتك مايعمرها حد
نوح:(كمش حجبانو)بيت نشرب
ناضت لقرعة لي تما حلاتها وجات عوناتو تاتعلى شوية وشرب منها تاروى حلقوو عاد رجع تكى وحط يديه على لبلاصة لي مضرووب فيهاا مكمش حجبانو..
بيسان:حاس بلحريق؟
نوح:(باقي على حالو)همم
بيسان: أنا نعيط ليهوم باش يعطيوك كالمون
بركات على لبوطون وجات لفرملية لي طلبات منها بيسان تجيب كالمون وبعد مدة كاان نوح مغمض عينو وبيسان جالسة حداه تاتحل لباب ودخلات رحمة مع السعدية لي جاات معاه.. عينيها باقا منفوخة وحالتها حالة قربات جهتو تتلمس وجهوو وهو حل عينو مع مكانش ناعس وغير شافها تبسم ليهاا وهي بقات تبكي وتعنق فيه بشوية رادة لبال لضربتو.. مدازتش مدة قليلة تكانت الشومبر عامرة عند نوح لي جاااو گاع عائلتو لي ساكنين فمرااكش يزوروووه ورحمة ماخلاتووش دقيقة.. فيما يمشي واحد يجي التاني وتالي خدامين عندوو جاااو وگاع لمعااارف ديااالو وهو غير كيتبسم ليهوم واخاا صراحة حاس براسو باقي فاشل الاأنه فرح فااش جااو عندو وزارووه وطبعا الإنسان كيحصد غير لي زرع ونوح من الناس لي مخلي بلاصتو نقية فأي بلاااصة وأي واحد كيعرفوو عمرو مشاف فيه شي عيب شاد تقااارو وعندو نيشاااان والاشاف فشي حد شي حاجة ماهياش تايضرب عليه.. مشاو الزوار والأغلبية دعائلتو مشات لرياض يباتو تم خصوصا فاش عرفو الجد والجدة جايين بقاو باش يشوفوهوم وتارحمة رجعات معاهوم وبقات غي بيسان لي باتت معاه.. ولخبار وصلات تالإدريس لي مجرد مافاق لغد ليه جاا عندوو.. دق لباب وغير سمع صوتو وهو يحلو بان ليه متكي وحال عينيه.. قرب إدريس جهتو وحط يديه على كتفو ونطق بصوت مبشوش: خلعتينا عليك اولد لحاج
نوح:(غمض عينو ورجع حلهوم) سموحات اسي إدريس
إدريس:كيبقيتي داباا شوية؟؟
نوح:ولله الحمد
إدريس:الدراري كانو باغين يجيو ساعة خدامين
نوح:(تبسم ليه)ماعليش الاجيتي نتا بحال الاجاو هوما
إدريس:(ناض) زيارة المريض تتكون خفيفة نخليك دابا ترتاح
نوح:(حط يديه على صدرو) الله يعشر خطواتك
إدريس:آمين
حل إدريس لباب وهو يلقى بيسان تبسم ليها وسولها على الأحوال عاد مشى وهي دخلات عندو..
نوح:(مكمش حجبانو)تلفوني ومسائلي عندك
بيسان:اه هاهوما عندي
حلات صاكها ومدات ليه لبلاستيكا كيف هي خداها وحلها وشاف تلفونو لي كان طافي عطاها تشارجيه ليه وبدا تيقلب على خاتموو لي مالقاهش وهو يكمش حجبانو وشاف فيها:لخاتم ديالي فين!
بيسان:ماعرفتش داكشي لي عطاوني راه تم
نوح:(بدا كيطلع ليه الزعاف) مكينش سيري سولي فين داروه
نفدات بيسان هضرتو وهو بقا جالس مكمش حجبانو تارجعات عندو وقالت بهدوء: قالو ليا گاع داكشي لي كنتي هاز معاك تم
نوح:(خنزر فيها) مكاينش تت
سكت فاش حس بالضربة ضراتو وتاهي سكتات تتشوف فيه وعارفة مكانة الخاتم عندو..
---
ملي عرفاتو فااق كانت باغا تمشي مع باها ولكن خافت يعيق بيها وخصوصا مور هضرتهوم على لخاتم.. عيطات لأسماء وتافقات معاها تجي عندها لخدمة وغير سالات خرجات لقاتها تتسناها مكمشة حجبانها فيها وقالت: ملي باغا تمشي عندو كنتي مشيتي مع بابا
رحيل:(زفرات بعصبية) وراه قلت ليك اش كاين ازمرة
أسماء:(كمشات حجبانها فيها) نتي أصلا علاش هزيتي لخاتم هممم
رحيل:(قلبات عينيها) غير نسيتو عندي وصاف زيدي نمشيو باش مانتعطلووش
شدو طاكسي بزوجات لسبيطار تاوصلو سولو على الشومبر فين كاين ومشاو ليهاا.. مكان حد فلكولوار وهادشي ريح رحيل حيت مباغا تلاقى بحد ويبقاو يسولو شكون نتي وفين تتعرفيه.. خلات أسماء برا ومشات دقات لباب فاش ماسمعاتش لهضرة حلاتو ودخلات وعينيها لخضرين ضربو على جسمو لي مدد فوق السرير الطبي ولابس لبسة دالسبيطار ومرجع راسو لور مغمض عينيه وحال فموو شوية باين فيه ناعس.. قربات رحيل بخطوات تقيلة مدايراش لحس وعينيها مانزلوش عليه.. حسات بالراحة فاش شافتو بخير.. تبسمات بهدوء ونزلات عينيها ليديه لي كانت مددة فيها السيروم وشافت أثار دلخاتم لي فصبعوو مع مكيحيدووش تاخلى لمارة حلات الصاك جبدات لخاتم وحطاتو حدا يديه بشوية باش ماتفيقوش ورجعات شافت فيه شوفة لخرة.. ضارت باش تمشي وهي تخرج عينيها فاش حسات بيديه شداهاا من معصم يديهاا ومزير عليه فالشدة..
تلومني الدنيا إذا أحببته كأني أنا خلقت الحب واخترعته.. كأنني على خدود الورد قد رسمته..كأنني أنا التي للطير في السماء قد علمته..وفي حقول القمح قد زرعته.. وفي مياه البحر قد ذوبته.. كأنني أنا التي كالقمر الجميل في السماء قد علقته.. تلومني الدنيا إذا سميت من أحب.. أو ذكرته كأنني أنا الهوى وأمه.. وأخته من حيث ما انتظرته مختلف عن كل ما عرفته مختلف عن كل ما قرأته وكل ما سمعته لو كنت أدري أنه نوع من الإدمان ما أدمنته..لو كنت أدري أنه باب كثير الريح ما فتحته.. لو كنت أدري أنه عود من الكبريت ما أشعلته.. هذا الهوى أعنف حب عشته فليتني حين أتاني فاتحا يديه لي .. رددته وليتني من قبل أن يقتلني قتلته هذا الهوى الذي أراه في الليل أراه.. في ثوبي وفي عطري.. وفي أساوري أراه.. مرسوما على وجه يدي أراه.. منقوشا على مشاعري لو أخبروني أنه طفل كثير اللهو والضوضاء ما أدخلته وأنه سيكسر الزجاج في قلبي لما تركته لو أخبروني أنه سيضرم النيران في دقائق ويقلب الأشياء في دقائق ويصبغ الجدران بالأحمر والأزرق في دقائق لكنت قد طردته يا أيها الغالي الذي أرضيت عني الله .. إذ أحببته أروع حب عشته فليتني حين أتاني زائرا بالورد قد طوقته وليتني حين أتاني باكيا فتحت أبوابي له.. {نزار قباني}
ضارت باش تمشي وهي تخرج عينيها فاش حسات بيديه شداهاا من معصم يديهاا ومزير عليه فالشدة.. حسات بداتها تنملات وسرب من النمل طالع معاهاا... قلبها كيدق وسط صدرها بحال شي مضخة مخلي صوت دقااتو يتسمع الصدى ديالهوم فودنيهاا.. أنفاسها كانت تتخرج بشكل متقطع وعينيها كانو كيضور يمين وشمااال.. عضات على شفايفهاا وضورات راسها بالعرض البطييء لجهتوو هو لي كان متكي كيشوف فيهاا.. وغير تلاقااو عينيهوم تكميشة لي كانت فحجبانو طلقات وعينوو تفيكسااو على ملامح وجهها السوسية الجميلة.. أما رحيل قدرات تشوف نظرات الإستغراب والتساؤل فعينيه وأيضاا نضرة خرى لي هي مقدراتش تفهمهاا..
رحيل:(صوتها كاان هامس) أنا
نوح:(قاطعها) رحييل
كانت مستغربة كيفاش هوو عرفهاا خصوصاً أنها كانت تادير النقاب وگاع هادوك لي خدامين معاهاا معرفووهااش ونسات بلي هو قدر يعرفها غير من ريحتهاا فاش دخلااات عندوو.. ريحة مسكرة وخفيفة ومميزة وعيونها العربية الخضراااء الآسرررة..
رحيل:(تبسمات بهدوء باغا تكسر جو النظرات المكهرب) مكنتش باغا نفيقك جيت باش نقول ليك على سلامتك
نوح:(بهدوء) الله يسلمك
رحيل:(نزلات عينيها ليديه لي باقا شادة يديها وقالت) خصني نمشي
طلق من يديها وهي رجعات خطوات لور مبسمة ليه بتوثر وغير ضارت زربات فالخطاوي باش تمشي تاسمعاتو قال بصوتو الهادئ:النقااب كان حسن
ضارت رحيل تتشوف فيه وهي مكمشة حجبانها:مافهمتش؟
نوح:(رجع راسو لور وعمض عينيه) تعطلتي على الدار
جوابو كان نهاية الحوار بناتهم وهادشي فهماتو رحيل لي خرجات وسدات لباب وراهاا أماا نوح رجع حل عينيه كيشوف فالبلاصة فين كانت واقفة بشوفات فشكل تامد يديه وحس بشي حاجة محطوطة وغير شاف شنو داكشي ولقاه لخاتم ديالو.. تقاد فالجلسة تاوعتاتو الضربة وعض على شفتو وهز الخاتم كيشوف فيه.. كمش حجبانو وقربو جهة نيفوو وهو يشم فيه نفس ريحة لي تادير حرك راسو بهدوء ولبسوو ورجع تكى ونطق بصوت هامس فاش تفكر ملامح وجهها: الفثنننة
تبعاهاا أسماء بحال شي هبيلة وهي فاش خرجات كسيرات تقولي تابعينها الجنون ماوقفات تاوصلات لباب دبراا..وقفات عليها أسمااء لي خنزرات فيها وقالت بعصبية:مالك الخرااا من الصباااح وأنا نعيط ياااك لباس خرجتي عندوو ونتي صفراا تقولي شااايفة جن
رحيل:(حطات يديها على وجهها ونطقات بهمس) تشوهت تاااني معاااه
أسماء:اش درتي؟
بدا تاتسرسب ليها رحيل وتخوي لمزيودة وأسماء تاتبسم تاهزات حاجبها وقالت: هالي قلنا السيد عرفااااك بلاماتقوليهاا ليه حيت راد معاااك لبال وحافظ عينيك لي كيبانو تحت من النقااااب
رحيل:(تعصبات عليها) واش من نيتك
أسماء:وشنوو الخطرات لي شفتو عمرو هز فياا عينيه ونحلف ليك عليها الاوقفت حداه وقلتو ليه شكون هادي يقول مانعرف
رحيل:غير تتخوووري راه عادي يعرفني
أسماء:ولي خدامين معاك عرفووك؟؟
جوباتها بنذالة وهي تتشوف فوجه رحيل لي حمااار ونطقات بعصبية:أصلا هو مزووووج
هزات أسماء حاجبها تتسمع ليها ومركزة مع عصبيتها لي كانت باين ونطقات بهدوء: وهاد مراتو فين هي؟؟ ياك السيد تضرب وفالسبيطار مالها مجات عندو وموقفات معاه؟؟
رحيل:(ربعات يديها) ماعرفتش يمكن جات وحنا مشفناهاااش
أسماء: ودابا من داكشي لي عاوتي ليا راه السيد ميمكنش يكون مزوج ويتعامل معاك بديك الطريقة حيت باين فيه شارب عقلووو ومرزن
رحيل:(حكات جبهتها وقالت بهدوء) ماشي ضروري يكووون ناوي شي حاجة ويمكن هو كيتصرف مع أي حد بنفس الطريقة
أسماء:(شدات فيها وجراااتها غادة معاهاا لجهة الشانطي باش تشد الطريق) وامااانعرف أنااا عطيتك وجهة نظري غير من لهضرة لي قلتي نتي عليه أما هو راه ماشتش تعاااملوو مع حد خررر
رحيل:خليناا نتمشيو والاسولونا نقولو ليهوم مشيت معاك باش تشري شي حاجة
أسماء:(ضحكات بالجهد ضحكة ديال الشيخااات) هههههه على آخر ياماااك وليتي تكددددبي بسباب ولد لحاااااج هههههه
رحيل:سكتي الزمرة شوهتيني (شيرات لطاكسي تاوقف وركبات هي لولة) ل****
أسماء:(تحنات عندها ونطقات بهمس) شبان ليك نمشيو لسنطر ناخدو شي لعيبات
رحيل: اش غاتاخدي
أسماء: محتاجة نشري مك اب وشي سليبات وسوتيامااات وشي كولونااات راك عارفة
رحيل:(شافت فمول الطاكسي) عفاك سير ل***
م.الطاكسي:(نطق بزعاف) وقوليها لينا اختي من الصباح
رحيل:(هزات حاجبهاا ونطقات بجدية) اوا هادشي لي عطا الله اخويا
م.الطاكسي: وايخصني نضررررب الضووورة دابااا باش نوصلكوم لتماا
أسماء:(تقادات فجلستها) واقيلااا هااادي خدمتك الشررريف توصل الناااس لبلايصهااا
م.الطاكسي: ماخدااامش عندك ااااختي وزااايدووون أنااا مغااانديكوووومش (بلاصاا فجنب الطريق وربع يديه)نزلوووو
أسماء:(كشرات على ملامحهاا ونطقات بصوت عالي) بزاااااف عليك تبقااا تهز علياااا هناااا مررررض كيداااااير راه لگريمة دياااالك عارفاااااهااا بناااادم مرررريض ييخ
نزلاااات أسماء ورحيل لي ضربات بلباب تابدا يسب وهو غادي شافو فبعضياتهوووم كل وحدة عاقدة حجبانهااا تاتفرشخو بالضحك وتموو جارين الطريق تاوقفو طاكسي وركبوو.. حطهوم فالسونطر ومشاو لمحالات تيتقداو لي خاصهوووم وتارحيل خدات شي شوميزات مع دايرين فيهوم الصووولد وشي دجيناااات وحوايج لداااخل وخدات بيجامات لسيدرا وسليبااات وضونيااات مهم خداو لي خاصهووم عاد رجعو لدار ورحيل لقات تانيرت متكية فالصالون تتاكل اللوز وسيدار مخشية فيها تتاكل معاهاا كانو غير هوما بزوجات تبسمات ليهوم رحيل ونطقات بهدوء:زوينااات ديالي اش كاديرووو
تانيرت:(تبسمات) جالسات تانتسناااوكووم هه اش جبتو
رحيل:تقدينا لي خاص فين لبقية؟؟
تانيرت:باك فلگاراج عندو لخدمة ومشى معاه محمد طه يبدل لجووو وريان راه نااااعس ورنيم خرجات تجيب لياا شي تقدية تشهيت ناكل الحمص بلكرعين ومشات تجيبهوم ليا
أسماء:ولكن راه لكرعين كيبغيو تجيبيهوم فالصباح
تانيرت:اوا يالاه تشهيتهوم وخليتها تمشي تجيبهوم
رحيل:عالله تلقاهوووم بعداا
سيدرا:مامي شنو جبتي لياا؟
رحيل:(جبدات تتجبد البيجامات وشي لي خدات ليها) هانتي امامي تانخرجوو نشري ليك حويجات براا (جبدات واحد لبواطة ومداتها لتانيرت) نتمنى يعجبوووك
شافت فيها تانيرت وحلات لبواطة لقات فيها سبيبطات دراري صغااار فالبيض غزيولين.. تبسمات تانيرت ليهاا وجراتهاا معنقاهاا وسيدرا مخشية بناتهوم تاتبرگگ فلكادو وغير شافت سبابط وهي تكمش حجبانها:هاااء وفين ديالي أنا
رحيل:هادو ديال مومو امامي
سيدرا:(كمشات حجبانها) تاأناا باقي موموو
رحيل:(جراتهاا تاجلساتها فوق ركابيها باستها) المغياااارة بدينا من داباا تغيري وملي يجي مومو يعلم الله اش غاديري
أسماء:(ضحكات) غاتهزووو وتلوح فالشرجم ههههه
سيدرا:(هزات صباعهاا بتهديد وتتشوف فعينين رحيل بجدية) ماينينيش حداا بّا ديدي وتانيرت إينووو ومايبغيهش مودي ورياني وسومة ونتي كثر مني (ردات شعرها بغرور) خصني نبقا ديما أناا هي صغيييرررة مامي
ضحكووو جميع عليهاا وعارفييينها تتغير من لبيبي حيت بطبيعة لحال هي لمفشة ولي كابرة على لخناث وكلهووم كيديرو ليها لخاااطر داكشي علاااش مبغاتش شي حد ياخد بلاصتهاا.. ناضو لبنات يبدلو حوايجهوووم باش يوجدو لگوووطي..
---
رجليهاا طااابو بلمشي وهي تتقلب على لكرعين تالقاتهووم عند واحد لگزااار خداتهوم وتقدات تاشنوو بغااات تانيرت وتمات راجعة تاارداات لبال لطوموبيل لي كانت تاتسينيالي ليهااا كمشات حجبانها ومع نزل الزاج قشعااات علي لي كان تابعهاا.. زربات فخطاويهاا غادة تاحسات بيه جرهاا من يديها وهي تنثر منو ونطقات بعصبية:اش باغي؟
علي:(ببرود) غبرت عليك ونتي ضسرررري
رنيم:(ضحكات بسخرية) ضسرررت هههههه ههههه بنتي ليااا تيقتي رااااسك
علي:(قرب جهتها) طلعي عندي معاك كلام
رنيم:بعد مني وماتبقاااش تقرب جهتي قبل ماندعييييك
علي:(بهمس كالفحيح) بان ليا توحشتي يامااات الداخلة..
شداتها الفقصة والعصبية من هضرتو لي كان باين فيها تهديد.. هبطاتو وطلعاتو بشوفاتهاا المخنزرين وعطاتو بالضهر غادة فحالهاا.. وديك لحركة لي داااااارت عصباااتو واستفزاتو زير على يديه وخطى زووووج خطوات كان لحق عليهاا وشدها من يدوو جارهاا معاهاا.. رنيم بدات تاضرب فيه باغا تفك وفاش شافتوو قصح معاهاا وهي تغووووت بصوت عالي:عتقوووووووووني اعبااااد الله باااااغي يديني معاااااه بزز واعتقووووو الروووووح
ضاار علي عندها صاعر وهز يدو تال سمااا عطاهاا صلية لوجه تاتقلب وجهها والناس تجمعو عليهوم والرجااال لكبااار مدخلين بناتهوووم كيفكووو وعلي غوت فوجههوم: مراااااااتي مادخلووووش
رنيم:(غوتات عليه وفمهاا نزف فجنب) مكنعرفووووش كيكدب أقسم بالله تاااكداااااب باغي يديني معاااه بزز
بداو الرجال تيشدو فيه وهو فاش شاف لقضية حماااات طلق منهوم ومشى جهة طوموبيلتووو وقبل مايدخل غوووت بالجهد: برررررب تاغاااندمك ابنت لقح*بة عقللللي عليهااا
ركب ومشى طاير والرجال كيسولو رنيم وكاين لي باغي يوصلها باش مايتعرضش ليهاا وهي مسكينة تتشهق وتحنات هزااات لميكة لي طاحت ليها ومشات مع واحد الراجل كبيرررر يوصلهاا وحالتهاا شعرها تخربق وحنكهااا حمااار دغياا بلادم لي يبس ليهاا فجنب فمهاا.. وصلهاا لنواحي ديال الدار وخلاهاا وهي كملات ومع هزات عينيها بان ليها محمد طه مع إدريس راجعين غير شافوها فديك لحالة وعينيها مدمعين وهي تقرب جهتهوم تاتجري وعنقااات إدريس تتبكي وهو تشطن عليهاا ماعرف مالهاا وتامحمد طه كمش حجبانو ونطق:مالكي اش واقع
رنيم:(تتشهق) تعرض ليااا داك لمريض دعلي وكان باغي يديني معاه وفاش مابغيتش وجمعت عليه الناس ضربني
إدريس:زيدي نديكلاريووو بيه
رنيم: (بخوف) لا لا غايتحلفهاا فيااا
محمد طه:وشنوو تخليه داير لي باغي
رنيم:(شافت فإدريس) بلاش اعمي عفاااك مباغاش الصداااع
تنهد إدريس ودرعها بيديه غادي ومحمد طه زير على يديه حاقد..وصلو لدار وهي مادخلتش لعندهم حدها حطات البلاستيكة ومشات لبيت أسماء.. وإدريس ومحمد طه ماجبدوووش لهضرة على قبل رحيل لي عارفين الاسمعات تاني بسيرة بدر الدين غادي تأزم ويصدق نايض تاني مشكيل خر عليها فضلوو يسكتو ونيت رنيم مبغاااش ديكلاري.. دازت ديك الليلة طووويلة عليهوم كاملين ورحيل مداهاااش النعاااس وتفكيرهاا كااامل على شي لي وقع فالسبيطار وديك لهضرة لي قاااال ليهاا نوح على النقاب لي مافهمااانش قصدوووو..
صبح الصباااح وكان نهار السبت والدراري كيف عادتهووم مشاو لخدمة وليوم عندهوم غير نص نهاااار.. واقف فالبيت تيلبس حوايجوو تاتحل لباب ودخلات سيدرا لي شافت فيه وقالت بحماس: بّا ديدي نمشي معاك ؟
إدريس:ليوم عندي لخدمة بزاااف انخشيشة جدها
سيدرا:(شدات فسروالو وقالت بحزن) عفاااك بّا ديدي
إدريس:(تنهد ونطق بهدوء) واخا سيري لبسي حوايجك
سيدرا:(نقزات بفرحة) واخااا بّا ديدي
مشات تاطير لبيتهاا تتجبد حويجاتها وهي فرحااانة حيت اتبدل تاني لجوو ديال الدار.. لبسات سروال دجين مع بودي نوواغ وسبرديلة وهزات جاكيط وشعرها كيف عادتها خلاتووو مطلوووق حيت متتحملش تجمعووو بزاف.. لقات إدريس كيتسناها ومشاو مع بعض لگاراج وكيف عادتها غير وصلات مشات تتسلم على سفيان ورشيد لي كانو غارقين فالخدمة.. مشى لبس لكومبين ديالو وبدا فخدمتو وسيدرا تتلعب فتلغونوو ومرة تخربق فالوراق وتكتب مرة تبقا غير جالسة تااااوصلات وقيتة دلغدااا ومشى سفيان يجيب لغدا ليهوم وإدريس كان خصو يوصل الطوموبيل لوااحد الكليااان داكشي علاش مشى هو بنفسووو.. شاف فسيدرا وقرب جهتهاا ونطق بجدية:بقاااي هناا وماتخرجيش على برااا نمشي نقضي شي شغل ونجي واخاا راه رشيد وسفيان يردو ليك لباااال
سيدرا:واخا بّا ديدي
باسها وناض غادي يوصل الطوموبيل وسيدرا بقات تتلعب بلوراق حيت دا ليها التلفوون وناضت من بلاصتها تاوصلات باب لگاراج وهو ينطق رشيد:فين غادة
سيدرا:(أشارت ليه جهة لباب) انوقف غير هنا شاشيييد
حرك راسو وبقا خدام ومرة يهز عينوو فيها حيت هي أمانة عندو.. متكية تتشوف فالشارع وعيون بدر الدين مرقباهاا بهدووء من طوموبيلوو.. حل لباب ونزل وشاف فعلي:خليك هنا
خشى يديه فجياااب الجاكيط غادي بخطوات تقال جهتها وعينوو مزاحهومش عليهاا تاوقف جنبها وسيدرا هزات عينيها فيه تترمش ومع طوويل حسات بعنقها عواااج.. تبسم ليها بدر الدين ابتسامتو لمريضة وجلس قفازي جهتها تابعدات سيدرا شوية ونطق بهدوء:سيدرا لباااس
سيدرا:(كمشات حجبانهاا) هااء نتا فين تتعرفني
بدر الدين:(مد يدو لمس شعرها ونطق بحنان مزيف) أنا كنعرفك نتي وكنعرف ماماك رحيل وجدك ومحمد طه وريان كانعرفكوووم كاملين
سيدرا:(مارتاحتش ليه وبصوت خافت نطقات بريء) شكون نتا؟
بدر الدين:(تبسم ليهاا بهوس) باباك
كلمة خلات سيدرا تحل عينيها السود وتشوف فوجه بدر الدين لي كان باقي كيشوف فيها بدوك الشوفاات المرااضين وديك الإبتسامة لمهووسة على شفاهوو.. هز يدو باغي يقيس وجهها وهي ترجع خطوة لور مكمشة حجبانهاا وهنا بدر الدين تبسم من حركتها لي فكرااتو فحركة رحيل كلما كان كيحاول يقرب منهاا.. يمكن سيدرا مكتشبهشش لرحيل فملامح وجهها ولكن كاتشبه ليها فتصرفاتها..
بدر الدين:(بصوت هامس) ماماك رحيل مقلقة مني داكشي علاش هي خباتك عليا باش مانعرفكش وداتك لبلاصة بعيدددة وأنا كنت تانقلب عليكوم ديما تالقيتك ليوووم.. عارف بلي مغاتيقينش ابنتي ولكن تقدري تسولي ماماك على بدر الدين..
وقف بدر الدين وشاف فيهاا مرة خرا مبتاسم قبل مايعطيها بالضهر ويمشي فحااالو وعيون سيدرا السود متبعينووو تاركب فالطوموبيل وقلع مشى.. بقات واقفة على حالتهااا تااسمعات صووت سفيان لي نطق بتساؤل:سيدرا مالك واقفة هناا
ضارت عندو سيدرا تتشوف فيه أو وجهها صفار والخلعة باينة فعنينهاا.. قرب جهتها وشدها من يديها مدخلها لداخل وجبد السوندويش لي كيعجبها بالكفتة مع لفريت ولمايونيز ونطق بحنان:يالاه كوليه كامل وها بومس لي عزيزة عليك جبتها معاياا
مشى يعطي لرشيد حقو وسيدرا بقات غير جالسة تتشوف فداك السوندويش ومقرباتش ليه.. أما سفيان رجع عندها وشافها ماكلاتوش جاه عجب قرب جهتها وسولها:واش نجيب ليك حاجة خراا؟؟
مجاوباتوش حدها كحزات الماكلة بعيدة وربعات يديها فوق لبيرو وحطات راسها عليه بهدوء مريييب.. بقا سفيان غير كيشوف فيها وقلب عينو جهة رشيد لي تاهو كان متبع الشوفة لديكوور وطاح ليهوم لعجب ومعرفوش ماالهاا حيت دغياا تقلبات ويالاه كانت صحة سلام تتهضر وتحرك دابا تركناات وتالماكلة مبغاتهاش.. خلاوها على حالتها تارجع إدريس لي مع دخل من لباب عينوو مشات لسيدرا لي كانت على جلستهاا ولماكلة جمعها سفيان جنبهاا .. قرب جهتو سفيان لي بدا تيعاود ليه على شنو طرا وكيفاش البنت دغياا تقلبات وإدريس بقا غير تيسمع وهو مكمش حجبانو فيه ومشى عندها قاس راسهاا ونطق بحنيتو لمعتادة:نخشيشة جدهاا شكون قلقها لياا
حركات كتافهاا ومهزاتش راسهاا باش تشوف فيه أما إدريس رجع نطق: واش مقلقة مني؟
هزات سيدرا راسها ونطقات بخفوت:بغيت نمشي لدار
إدريس:واخا ابابا اجي
هزهاا وهز غداهاا وعلم الدراري بلي مغايرجعش مزال ويكملو هوما لخدمة ومشى لدار.. أما سيدرا كيف حطات راسها وسط عنقو معاوداتش هزاتو تاوصل لباب ودق باش يحلو ليه وهي تهز غير عينيها ولمحات طوموبيل بدر الدين لي كانت فالجهة الثانية مهبط الزاج كيشوف فيها تاهوو.. جسمها الصغير رعش وسط يدين إدريس ورجعات دفنات راسهاا فعنقوو..
بدر الدين:تحرك
علي:(كمش حجبانو) واش غانمشيو لدار هنا؟
بدر الدين:(ببرود) غاتشد الطريق لداخلة
علي:(شاف فيه من لمرايا) علاااش غانمشيو ياك قلتي غاتبقا هنا هاد لمدة
بدر الدين:(بملامح قاتمة) ماشي نتا لي غاتوريني شنو غاندير ودابا تحرك من هنا
علي:(حرك راسو) واخا (سكت مدة تانطق) غانرجع من بعد ياك؟
بدر الدين:(قرب من جهة الكرسي لي جالس فيه علي وقال بهمس كالفحيح) عندك يسحاب ليك راني ناعس على ودني ومعارفش اش كطبخ ورى ضهري مع ديك لقح*بة
علي:(سرط ريقو) مافهمتش
بدر الدين:(رجع بلاصتو وقال ببرود) ايلا حسيت بلي غادي توقف ليا فطريقي باش نوصل لرحيل مغانتردد تادقيقة ونتبعهاا لخوها وباهاا
---
حطها إدريس فوق النموسية وسيدرا تخشات فبلاصتها بحوايجهاا وتغطات كلهاا ناعسة.. وهاد التصرفات زادو خلاو إدريس يشك بلي فيها شي حاجة ولكن معارفش اش هي؟؟ خلاها على راحتها وخرج من لبيت غادي عند تانيرت حيت هي بوحدها لي كانت فالصالة أما البقية خرجوو مع ليوم السبت مشاو يضورو وتامحمد طه نيت حس برااسوو تخنق من الدار عليها خرجووه معاهووم.. جلس حدا تانيرت لي قالت بتساؤل:مالهاا واش مريضة؟
إدريس:(بحيرة) ماعرفتش (مسح على وجهو وبدا تيعاود ليها شنو طرا)
تانيرت:زعمة يكون شي حد قلقهاا؟؟
إدريس:سفيان ورشيد عرفاهوم عزيزة عليهوم ومكيخصروش ليها لخاطر
تانيرت:لا ماشي هوما شي حد مثلا اخر
إدريس:(حرك راسو بهدوء) ماعرفتش
داز لوقت ورجعات رحيل والبقية مبعد مابدلو لجوو وتساراو شوية لقاو إدريس جالس فالصالة وباقي بحوايج لخروج وباين فيه ماشي هو هداك.. سلمو عليه ورحيل قالت بهدوء:فين سيدرا ؟
تانيرت:فالبيت ناعسة
رحيل:(كمشات حجبانها) فهاد لوقت ياكما مريضة؟
إدريس:مبغات تقول لينا والو
بال رحيل تشطن وقلبهاا مهناهااش ناضت مخلياهوم ومشات لبيت طمن على كبدتها.. بانت ليها باقا ناعسة ومغطية راسها بالكاشة.. قربات ليها وجلسات فجنب النموسية وزولات لغطا عليها لقاتها فايقة ومناعساش حطات يديها على جبهتها تشوف ياكما طالعة ليها السخانة لقاتها عادي.. جلساتها قدامها وسيدرا حادرة راسها تاسمعات صوت مها لي قالت بحنية: مامي واش نتي مريضة كضرك شي حاجة؟
بقات سيدرا ساكتة وعينيها باقي حدراهووم ورحيل تتشوف فيها وفلول شكات ياكماا لپاراي سالاو ليهاا ويالاه بغات تمد يديها باش تهز ليها راسها وهي تسمع صوت سيدرا لي نطق بصوت خافت: قال ليا هاداك بلي هو بابا؟
رحيل:(بخوف)شكون؟
سيدرا:بدر الدين..
بحال الاخشيتي شي يد وسط صدرها وزيرات على قلبها لي حسات بيه ضرهاا... وجهها صفااار عليهاا وعينيها خرجوو من بلاصتهووم وهي تتسمع لهضرة سيدرا لي قالت ولي كانت بحال شي رصاصة أصابتهاا فمقتل.. أما سيدرا هزات عينيها فمها ونطقات بصوتها البريء: هو علاش قال ليا هاكاك ياك بابا مشى عند الله؟
شهقات رحيل ودموعها بداو ينزلو بلاماترمش.. أسئلة سيدرا بحال شي تصرفيقات تاتعطيها فلوجه وقبل ماضور تتزيد تصرفيقة خرا.. ماعرفاتش هي فين سمعات هاد لهضرة والأهم فين جابت سمية بدر الدين لي عمرهوم جبدوووها فالداااار.. حركات رحيل راسها بلا ولسانها تقال عليها باش تجاوبهاا أما سيدرا فشدات يد رحيل لي تترعش وقالت بتساؤل: واش هاداك لي كان معاك فلفيديو مامي هو شكون بابا؟؟
أسئلة سيدرا لي كانت تاطرح كانو شي طبيعي بالنسبة لبنت صغيرة فعمرهاا.. نهار شافت ديك لقطة من لفيديو بقا فبالها واخا أسماء نهضات فيها الاأنهوم بقاو فبالها وفاش جا بدر الدين وقال ليها داك لهضرة وخصوصا أنه بين ليها بلي كيعرفهوم كاملين خلى الشك يتزرع فقلبها الصغييير.. فاش توكضات رحيل من هضرة سيدرا قربات جهتها وشدات كتافها وقالت بعصبية:شكوووون قااال ليك هاااد لهضرة؟؟؟
سيدرا:(بؤبؤ عينيها بدا كيلمع بخوووف وبدات تتعاود ليها كلشي) شفتو مامي وقال ليا أنا باباك بدر الدين
صدرها تيطلع وينزل بعصبية وقلبهااا شووووية ويسكت فكرة أنه شاف بنتها وهضر معاااها وقال ليها هاد لهضرة جنناتهاا وخلاتهاا تعصب وتولي فواحد لحالة هسترية وبصراااااخ قالت وهي باقي تاتهز فجسد سيدرا لي كانت تترجف ودموعها بداو ينزلو: هوووووو ماااااشي بابااااك تااااااتسمعي ماااااشي بااااباااك مااااتبقاااايش تقووووولي هااااد لكلمة تااااااني
تتزير على يديها لي شادة بيهوم كتاف سيدرا وهي تتهزهاا بعنف وشعر سيدرا ترووون ولصق فوجهها مع دموع لي تتنزل وشهقاتها لي طالعين وهي تترعد مخلوووعة من حالة رحييييل لي مكااانتش فكامل قواااها العقلية وبالسيف وهي عارفة بنتها شافت هاداك لمررييييض لي خرج على حياتها هو أو ولد خووووه.. وعلى غواتهوم تحل لباب ودخل محمد طه هو لول لي سمع الصداع ولغوات حيت كان فبيتووو ومع ضرب على الديكور درحيل لي جنات على سيدراا كمش حجبااانووو وقرب زوج خطواااات دفع يدين رحيل وهز سيدرا لي تخشات فيه وتشبتات بيه وبدات تتبكي.. محمد طه:(غوووت بالجهد) رحيييييل وااااش حماااقيتي
لبقية جااو ودخل إدريس لي شاف فمحمد طه لي هاز سيدرا لي تتبكي ورجع شاف فرحيل لي مكانتش على برجهاا وكانت صفراا كلهاا تترعد غوتات فوووجه محمد طه ومبقااااتش عااارفة اش تتخرررج من فمها:
غااااانقتلوووو أناااا غااااانقتلووووو بيدي مغاااااديييش نخليه عااااايش مزااااااال
خرجات من بيتها كيف شي مجنونة وباها تابعها وتانيرت شادة قلبهااا وكرشها لتحت حسات بيها ضراتهاا.. مد محمد طه سيدرا ليها وسد لباب ونزل تاهوو لتحت.. كانت فالكوزينة تتقلب فمجر لموااااااس تالقااات لمووس لكبير وهي تهزوو وشاااافت فإدريس وعينيها لخضرررين حمااارو ونطقات بعصبية: غااااانمشي نقتلووو ونوريه كيفااااش يقرررب لياا لبنتي الاااااااابنتي هييي خط حمرررررر والافكرررر يقرب ليهااا نقتلووووو ونشرب من دموووو وماااااندمشش
كانت غادة باغاا تخرج من الكوزينة وهو يحبسهاا إدريس فلباب ونطق بهدوء:رحيل اراااي ابنتي داكشي لي فيديك
رحيل:(مزيرة على لموووس لي تايعراق بين يديهاا وقالت وصوتهاا بداا تايتزير بلبكاا) لااااا أنااا غانمشي نهنننني الدنيااا منووو وندمووو على مداااار فيااا هو ودااااك لحمااااااار (بدات تتبكي وتشهق) هووووو قرب ليااا لبنتي باااااغي يمرضها كيف مرضووووني فصحتي (حركات راسها يمين وشمال وفولارها زهق ليها تبان شعرهاا) أنااا درتهااا قبل وهو مامااااتش ولكن هاااد لمرة غانجيبهااا فقلبوووو باش نتهنى منوووو
قرب جهتها إدريس بشوية جار ليهااا لموووس من يديهاا وهي تترعد وجرها عنقها بلامايهضر حيت عارف حالتها ماشي دلهضرة أماا رحيل صدرها تايتهز ويتحط تابدات تتبكي وهي منهاارة فصدر باهاا لي معنقهااا ودابا فهم اش وقع لسيدرا وعلاش لبنت مباغااش تهضررر.. خلى رحيل تفرغ عصبيتهاا فبكاااهاا تااااحسات براسهاا رتاحت عاد جرها لصالة باغي يفهم اش وقع وهي بدات تتعاود ليه اش قالت ليها سيدرا بلسااان ملوووي وعيااان.. زير إدريس على يديه وناض غادي يشوف سيدرا ورحيل بقاو معاهاا خوتهاا كيف عادتهوووم يساندوهاا ولبنات عونوها تامشات لبيتهاا بدلات حوايجهاا وتوضات وبدات تتصلي..
جالس قدام سيدرا لي عينيها تنفخوو بلبكاء واخا سكتات دابا الاأنها باقا تتشهق مرة مرة.. حط يدو على حنكها لمحمر ونطق بحنية:ياك قلت ليك ماتبقايش توقفي مع الناس لي مكتعرفيش همم
سيدرا:(هزات فيه عويناتها كيف شي قطة)هو قال ليا تايعرف رياني ومودي ومامي بّا ديدي
إدريس:(بجدية) واخا يقول ليك تايعرف ماماك ماتوقفيش ليه وكون داك دابا معاه فين غانوليو همم هاداك واحد خايب وممزيانش وكدااب وديك لهضرة كلها لي قال ليك كدوووب
سيدرا:(بدات تتلعب فصباع يديها ونطقات) وهو فين كيعرف مامي بّا ديدي
من نهار وعات سيدرا على راسها وحلات عينيها فهاد الدنيا وهي كااتشوف فإدريس لي كان معاها فكل خطوووة.. عطاها الحنية ديالو ومخلاهااش تحس بفرااغ من جهة باهاا وفاش كانت بدات تتعلم الهضرة كانت تتعيط ليه بابا..وفاش كبرات شوية وبدات تتفهم ومع هي قافزة من الصغر سولااات إدريس علاش رحيل تتعيط ليه تاهي بابا وتما ضطر يشرح ليها بهدوء أنه باهاا مشى عند الله وهو جدها فضل أنه يخلي صورة باها نقية فعينيها واخا هو مكيستاهلش أصلا ديك لكلمة تقاااال ليه داكشي علاااش مادخلش معاهاا فتفاصيل حيت هي بنت صغيرة ومغاديش يقول ليها لحقيقة ويعقدها من صغر وليوم فاش شافت بدر الدين وقال ليهاا ديك لهضرة خربقهاا وطبيعي أنهاا تسوول دوك الأسئلة حيت باغا تعرف.. أما إدريس زير على يديه وتنهد.. جرها لعندو وجلسها ركابيه وبدا تيشرح ليها بشرح لي غاتقدر تفهموو وفنفس لوقت مغاديش يخليها تزعزع ويأثر الموضوع على نفسيتها وهي باقا صغيرة..
إدريس:(حرك راسو ونطق بهدوء) فهاد الدنيا كاين بنادم مزيان وكاين لخايب بحال الرسوم لي تتفرجي فيهوم كاين الشرير وكاين الملاك.. وهاداك واحد ممزيانش خايب وهو كدب عليك باش نتي تقلقي ماماك وتعصبيهاا كيف طرا ليهاا قبيلة
سيدرا:(ببرائة) وعلاش؟
إدريس:(لعب بلسانو ففمو) حيت كيف قلت ليك هو ممزيانش ونتي مخصكش تيقي أي هضرة تقالت ليك وخصك تسمعي غير كلام ماماك وأناا والناااس لي كيبغيوووك بحاال ريان محمد طه أسماء وإسلام
سيدرا:(مسحات وجهها بيديها وشافت فيه) وتا ماي بلو آيز
إدريس:(جابها قدامو وقال بحب وابتسامة) واش عزيز عليك ولد لحاج
سيدرا:(حركات راسها ونطقات بحب) اه بّا ديدي عزيز عليا بزاااف حيت هو ضريف وتايدير ليا لي بغيت وجاب ليا سنسلة زوووينة
إدريس:(باسها فراسها) يالاه دابا غاتمشي طلبي من ماماك السماااحة ولمرة جاياا ماتعاوديش توقفي مع لي مكتعرفيهش
نزلات سيدرا ومشات تتجري غادة عند رحيل وإدريس بقا جالس تيتنهد ويتفكر كلامو مع سيدرا.. كيفكر فبدر الدين لي لاح ليها لوسواس وخلاهاا تخربق.. لعبها دكي حيت عارف بلي الاطرات شي حاجة لرحيل غايكووون هو المشتبه لول بسباب الشكاية لي دار عليه داكشي باش دخل هاد الدخلة وقرر يلعب بنفسية البنت والأم ويستاغل لبنت لصالحوو..دخلات سيدرا لبيت وبانت ليها رحيل باقا تتصلي حيت لقات راحتها فالصلاااة.. بقات جالسة سيدرا فوق النموسية وجات عندها إيڤانا لي كانت تتلعب حدا رحيل هزاتها وبدات تتعنق فيها تابانت ليها رحيل سالات وناضت تتجمع صلايتها وهي ضور جهتهاا وبقات تتشوف فيها وسيدار ناضت عندها عنقاتها من رجليها ونطقات بصوتها البريء:
سمحيليا مامي مغانبقاش نعاود نقلقك ونبكيك
رحيل:(نزلات عندها عنقاتها وقالت بحب) تانتي امامي سمحيليا حيت غوت عليك (بداا تتقيس وجهها وقالت بجدية مكمشة حجبانها) واخر مرة توقفي مع شي واحد مكتعرفيهش وتسمعي لهضرتوو وتيقيه واخاا
سيدرا:(حركات براسها بالإيجاب) أصلا امامي هاداك خلعني مازوينش بحال ماي بلو آيز
رحيل:(بخوف) واش دار ليك شي حاجة؟؟
سيدرا:لا مااامي مادار ليا والو (قربات عندها وشدات وجهها) مامي فيا جويعاات بزاف
رحيل:شنو بغيتي تاكلي
سيدرا:(بدات تتفكر) هممم بغيت ناكل گرتاان بطاطا وكفيتة مامي
رحيل:يالاه اجي تبدلي حوايجك هو لول
سيدرا:واخااا مامي
جبدات ليها بيجامتها وبدلات ليهاا ونزلو لتحت ورحيل مشات توجد ليها لگرتان لي بغااات.. كانت تتفكر وعقلها ساهي فشنو طرا ومعرفاش كيفاش غاتهنى من بدر لي باقي لحد الآن تابعهاا ومباغيش يعطيها بالتساع.. وجدات لگرتان وعطاتها تاكل وجا تاريان ومحمد طه لي كيموتو على شي حاجة سميتها گرتان تياكلو معاهاا.. خلاتهوم وهزات حق مها داتو ليها لبيت وعاد مشات لبيتها تهز تلفونها لي حطات فوق طابل دونوي ومع هزاتو شعل بلابيل وكانت نمرة بريفي كمشات حجبانها وجاوبات بهدوء:ألو
...عموو
بدر الدين: عمو ماتوحشتينيش
اخر حاجة كانت باغاها هي تسمع صوتوو لي كيجيب ليها الإشمئزاز وكيخلي مشاعر الحقد والكره يتوغلو داخلها ممزوجين مع الخووف لي حاولات ماأمكن أنها تخبيه فصوتهاا وهي مزيرة على يديهاا ومخرجة عينيها بعصبية: شنوووو باغي مني مزااااااال
بدر الدين:(ببرود) باغيك نتي
رحيل:(عضات على سنيها وقالت بحقد) هادشي هو لي عمرووو يكوووون سمعتي والاعاودتي قربتي من بنتي نقتتتتلك بيدي الاااابنتي هي لي مغانخليكش تمرضهااااا وتخرج ليها على حيااااتهاا
بدر الدين:(كيدوي بهدوء ممسوقش لكلامها) تتشبه ليك دكية بزاااف وراسهاا قااااصح نسخة مصغرة منك (مغمض عينيه) كاتبغي تعرررف كلشي وتسووول مكتشبهش گاع لباهاا عاصم ههه
رحيل:(صدرها يطلع وينزل وبعصبية) هااااديك بنتي أنااا سمعتي بنتي وغاااانحميهاا منك ومن أي واااحد باغي يأديهااا لياااا نقتلووووو بيدي ومغاااندمش
بدر الدين:(بهمس) هادشي علاش باغيك حيت مكتخافيش وحيت نتي مختالفة عليهووووم اعمووو..
قطعات عليه رحيل وهي مبقاتش حاااملة تسمع صوتتووو وهضرتووو.. صافي عيااااات من هاد لمرريض ومنوو هوو لي باااقي واقف ليها كيف الشوووكة فلحلق مامخليهااش ترتاااح حيت عارفة ماحدو هووو باااقي عااايش مغاتهناش منو ولحاجة لوحيدة لي غااااادي تهنيها منو هي يمووووت حيت لالحبس ولاتاشي حاجة غاتقدر تهنيهوووم منوو من غير لمووووت.. هزات عينيها لحمرررين تتشوف فانعاكسها فلمرايااا ونطقات بصوت بااارد:من ليوووم مغانبقاااش خايفة منك وغااانوقف فطريقك ومانخليكش تعاااود تأدي ليا النااااس لي كيهمووووني ومغانخليكش تخرج ليا على بنتي لي هاد السنين كلها وأنا مبعداهاا على المشاكيل باش تكبرر بنفسية مستاااقرة وفلخر تجي نتااا تمرضهاا ليااا مغاااانخليكش
تمتمات بكلاماتها بجدية وخرجات من لبيت غادة لحمام غسلات وجهها بلمااا بااارد ورجعات بكل برود هزات تلفونهااا ونزلات لتحت فين كاااان ريان ومحمد طه وأسماء ورنيم مجمعين على واحد السيري جلسات جنبهوم بهدوء تاسمعات صوت سيدرا لي نطقات:مامي فين كنتي؟؟
رحيل:(هزاتها عندها ونطقات بحب) كنت فلبيت امامي كليتي لگرتان؟؟
سيدرا:اه ميميتو كولو ولكن رياني ومودي كلاوه لياا
رحيل:(تبسمات وشافت فريان ومحمد وقالت بمزاح) كليتووو لبنتي گراتان ديالهااا ادووك لبااااسلين؟؟
ريان:(ضحك) غيررررر دقناااه وصاف ياك الخوو
سيدرا:لا مامي ميماااوه ليااا ماشي داااقوه
محمد طه:(شاد فسيدرا) ياك نتي قلتي لينا اجيو تاكلو معايااا
سيدرا:(هزات حجبانها)لاااا نتاا جيتي بوووحديتك ماقلتهاااش ليك أناااياا مودي
محمد طه:واخااا عليك اروووح مودي تاتجي عندي وتقولي لياا نعطيك التلفون باش تلعبي بيه
سيدرا:(ضورات عويناتها وقالت وهي تتلعب برموشها) هاااء وغير تانضحك معاك موووودي حبيبي
ضحكات رحيل وريان هز راسو:احيااااني عليك ماترياليست من الصغرررر عندك هاد لبنت
سيدرا:(فرفرات عويناتهاا بدلع طفولي) بصحتتتتتي ريااااني
ريان:وناااري تتشبهي غير لديك لحشايشية لي لهيه تااااهي بحاااالك
أسماء:(هزات حاجبها) وااااش نتااا فيماا يحفى ليك الديسك ترجع عندي
ريان:(كيهز فحجبانو) قلت الصح مالي كدبت
أسماء:هي شابهة خالتهاااا ماااشي شي حد براااااني
جرات أسماء سيدرا لي عنقاتها ونطقات:ديري لياا مكيااااززز
أسماء:سيري لبيتي جيبي لياا صاك دلمكيااج واجي نديرو ليك
مشات سيدرا تتجري فرحانة وأصلا هادشي عليااش تتحمااق لمكيااج وتصاوب الشعر وتصبغ الضفااار من صغرهاا تتموت على هااادشي واخا هاكاك رحيل مكتخليهاااش ديروو بزاف غي مرة مرة باش ماتقلقهااش ونيت إدريس تاهووو فاش كيشوفها دايراه تايغوووت عليها حيت مباغيش تعلم هادشي من الصغر.. جابت الصويك لي تتجمع فيه لمك اب ومشطة تاهي وفلايل وجلسات قدام أسماء لي جبدات غير فغاپوپيغ دارتو ليها خفيف ودارت ليهاا فغاجو لحنيكات ولغوج أليڤغ فقط وبدات تتمشط ليها شعرها وقسماتو ليهاا على نص وجمعاتو ليها گريناات عاد لواتوو ليها تويست ودارت ليها لفلايل ورشات ليها ريحتها وسيدرا تتفرفر بعويناتهااا فرحااانة..
ريان:اجي بوسيني
سيدرا:(عوجات فمهاا) ايمشي ليا لعكاار
ضحك ريان حيت عارفها غاتجاوبو بهاد لهضووور فيما كادير لغوج أليفغ وتيقول ليها شي واحد اجي بوسيني تتقول ليها لا..
رحيل: وأنا ماتبوسينيش
سيدرا قربات عندها وتحنات رحيل تباستها ففمها عاد مشات تتلعب وتتهز حجبانها لريان تتفقص فيه وهو غير تيحرك راسو يمين وشمااال تيضحك على تصرفاتهاا..
صونى تلغون محمد طه وكانت كلثوم شاف فريان غمزو وناض غادي لبيتو باش يجاوبها براحتوو.. دوز لابيل وقال بهدوء: لواليدة لاباس
كلثوم:(بهدوء)الا ماسولت فيك اولد كرشي ماتسولش فيا
محمد طه:(غمض عينو وماعندو خاطر) غير كنت مشغول شوية وصاف
كلثوم:همم مشغول ولا الشلحة هي السباب
محمد طه:(بانفعال) واش فيما نهضر معاك ضروري تجبديهاا فلهضرة هي گاااعماا مسالية ليك باااركة عليهاا غير لحمالة لي قهراتهااا..
حبس محمد طه هضرتوو فاش عرف راسو اش خرج من فمووو.. زير على عينيه تيسب راسوو فنفسووو حيت خرمزهاا وهو عارف موو على نقشة تتشعل فما بالك دابا فاش عرفات تانيرت حااملة.. عض على شنافتو بنابو ونطق بهدوء: ألوو الواليدة.. كاتسمعيني
كان كيتسمع غير صوت أنفاسها المتساارعين شوية قطعات عليه لابيل ومحمد طه كمش حجبانوو وجلس فوق النموسية ونطق بعصبية: هاااادشي لي كااان نقص تت
فالطرف الثاني مور ماسمعات هضرة ولدها لي كانت بحال شي عااافية لحتيها على ليسونس باش تزندهاا.. مبقاتش سمعات كلاموو أو وذنيها لقطو غير ديك الحمالة.. كانت حالة عينيها تتنفس بزربة وإيطو حداهاا تتسول فيهااا ومدات عكازهاا نغزاتهاا وهي تنوووض كلثووووم وغوتاااات غوووتة قفزات بيها إيطوو
كلثوم:(بعصبية) اااااااااااااااع اااااااااع بنت لكلب بغيت ليهاااا لموووووت بغيتهااا تعدب بغييييييييت نشووووفهااا تتبكي الدم بغيييييتهاا عمرهاااا ترتااااح فحياااااتهااا خرباااات ليا على حياتي وهدماااات ليااا دااااري سراااقة الرجااااال
إيطو:(مكمشة حجبانها) تي اش سااايرة ترووووني تم اش وااقع؟
كلثوم:(خرجات عينيها فمهاا حمرررين كيخلعوو) هااااهي ربطااااتو تااااني بلولااااد كيف داااارت قبلل الشلحة حاااملة
إيطو:(مكمشة دوك لعينين ولكحل سايح ليهاا ولوشام بين حجبانها باقي جديد ونطقات ببرود) همم وأنا نگول هادي شساير ليها گولي السباب هو الشلحة ياك هي مرتووو وتي اش مشى ليك
كلثوم:(كلها تتغزل وعارفة مها مغاتسكتش تاني وغاتبغي تسممها بهضرتها كيف عادتهاا من نهار طلقات هي وإدريس ورجعات لدار عندهووم) وااااش أناااا كانشكي ليك بلعگر ونتي تتتقولي ليااا اش خباااار الدراري هااااااء مكفااااااكش باااش تنحس ولعاااافية لي شاااعلة لياااا هنااا (ضربات صدرها بالجهد) أنااا لي مززوجة بيه كثر من عشرررين عاااااام يالاه ولدت ليه ولد واااحد وديك الشلحة والدة ليه زوووج وحااااملة بالتااالت
خلات مها فالصالة تتحرك راسهاا ببرود ممسوقااش ليها أصلاا.. دخلات لبيت لي تتنعس فيه يالاااه فيه طلوووق أو واحد لماريووو گاعماا فيه لباب ولحيوووط ديال ديك لبيت عاااامرين بلغمووولية ولميديتي.. بقات غادة جاياا فديك لبيت بحال شي مسطية عقلها غايخرج من بلاصتووو وهاد لخباار كانت اخر حاجة توقعها مبعد هاد لعوااام كلهاا حسدها جهة تانيرت وغيرتهاا غادة وتتزيد تاولى قلبهاا كحل من جهتهاا ومن جهة ولادهاا.. بدات تاضرب ففخادهاا بلاماتشعر وتحرك راسها يمين وشماااال ونطقات تتحلف: ماحد باااقي فياا النفس عمرررك تفكررري تهناااي فحياتك الشلللحة عمرررك..
----
ليوم لحد ورحيل قررات تدي سيدرا لغيرمة حيت شحال ممشات ليها داكشي علاش فيقاتهاا بكررري ومع لجوو كان سخوون دخلاتهاا لدوووش باش دووش ليهاا.. مجلساهاا فوق الكريسي الصغير ولابسة غي كيلوووط والحمام عااامر بالدخااان..
سيدرا:(ضارت جهة رحيل لي كانت بضوني وشورط وشعرها جامعاه شفينجة وقالت بهدوء) مامي واش فيا وسيخات بزاااف؟
رحيل:(هازة لكيس تتحك ليهاا وقالت بضحك) هههه فيك وسيخااات شووفيهوم
سيدرا: حيدي ليا وسيخات باش نكووون زوينة عوتاني
رحيل:واخا يالاه ضوري
فركاتها مزيان تاخرجاتها تتشعل وغسلات ليها شعرها بشومبووان ودارت ليها باندوووش عاااد خدات ليها لبنوار ديالها لي مطرزة فيه سميتها "Sidra" لبساتو ليها ودارت ليها لفوطة على شعرهاا وحلات لباب خرجاتها باش تدووش هي.. ماتعطلاتش بزاف فالحماام تاهي حدهاا دارت باندوش وغسلات شعرهاا وتوضات وخرجات لبيت لبسات حوايجهاا لي كانت موجداهوم ولوات على شعرها فولار صلات هو لول عاد مشات تقاد وجهها ودارت أيلاينر وريسيل مع غوج أليڤغ نيوود عاد قدات فولارها وشافت فكسوتها لي كانت واسعة وطويلة فالبيض وفيها وريدات فالخضر تتجي منفوشة جهة ليدين.. رشات ريحتها ونزلات لتحت لقات الكل مجموع على الطبلة وسيدرا لابسة سروال دجين مع بودي وجاكيط وشعرها نشفاتو ليها أسمااء وجمعاتو ليهاا شفينجة.. فطرو مجموعين ومشات غي هي وإدريس وسيدرا لفيرمة.. وغير وصلو سيدرا مشات تتجري جهة البلاصة فين تيوجدوهاا وهي فرحاانة ورحيل وإدريس واقفين متفرجين فيها وهي خارجة فوق لعود "سيديل" والمدربة ديالها شادة لخيل وغادة بيها بشوية.. هزات سيدرا عينيها وشيرات لرحيل وإدريس باي باي وبقات مكملة تدريبها..
إدريس:(مبسم بحنية)عيد ميلادها مبقا ليه والو
رحيل:(حركات راسها) اه من دابا خصني نفكر فين نديرو ليهاا..
دوزات سيدرا لحصة ورجعات عندهوم فرحاانة وشدات فيد إدريس ويد رحيل غادة وسطهوم تاوصلو لطوموبيل
وهي تحل ليها رحيل لباب لوراني وقداتها وجلسات هي لقدام راجعين لدار.. كانت مكونكطية مع أسماء لي علماتها بلي غاتجي عندهوم السيدة لي غاتعاونهوم فشغال الدار يشوفوهاا.. مسااافة الطريق وكان إدريس وصل لدار وبلاصا طوموبيل ونطق بهدوء:غير دخلو نتوما أنا غانمشي نشوف ولد لحاج
سيدرا:نمشي معااك بّا ديدي
إدريس:يالاه
رحيل:(حكات حاجبها ونطقات بهدوء) واخا أنا غانهبط بسلامة
حلات لباب ونزلات وإدريس تبعها بعينيه وماتحرك تاشافها دخلات..
دخلات لدار لقاتهوم جالسين فالصالة كايتسناو السيدة لي غاتجي عندهوم باش يشوفوها.. حطات رحيل صاكها فوق الطبلة وجلسات حداهوم وهي تتزول فالفولار ونطقات: اوووف ليوووم الصهد
أسماء: صيف على الأبواب
ريان:وقتاااش يسخن لحال كثر باش نسافرو ونمشيو نتبحروو
تانيرت: اوا تاالعطلة ونمشيو جميع نبدلو لجووو
سمعو الدقان فلباب وناض ريان مع هو لي كان جالس قريب لباب ومع حل لباب عينوو تحلوو فهاديك لي كانت واقف قداموو.. نزل عينوو وطلعها من السبرديلة لبيضا لي تتبان تتشعل لسروال الدجين لي كان مزير ومبين فخضاتها لعامرين لواحد شوميز قصيرة شوية وفوق منها جاكيط دجين طويلة.. شعرها لقهووي مطلوق على راحتو ومكتفية بآيلاينر مجبدة بيه عيونها البنية.. نزلها وطلعها بشوفاتو وحجبانو طالعين لسماا تاسمع صوتها لي نطقات بنبرة رقيقة: واش هادي هي دار مدام تانيرت؟؟
ريان:(هز حجبانو ونطق ببلاهة) هاااء (حرك راسو فاش عاق بروحو) اه دخلي
دخلات وتمشات زوج خطوات وبقات واقفة تاتسناه يسبقها وتاهو فهم وتخطاها غادي لداخل وغير وصل وهو يغمزهوم.. دخلات لبنت لي غير شافوهاا تانيرت ولبنات وهوما يتصدمو وبانت على وجههوم حيت هوما عوالين تجي مرا كبيرة ماشي هادي لي قدامهووم..
تانيرت:(تبسمات ليها) جلسي ابنتي
جلسات لبنت قدامهوم وهي تتضور عينيها القهوين على لوجوه لي كانو قدامهاا.. تبسمات ليهوم بتوثر ونطقات بصوت رقيق حشمان: أنا جيت من طرف خالتي رقية هي لي سيفطاتني
تانيرت:رقية مقالتش ليا بلي نتي باقا صغيرة؟
رحيل:شنو سميتك؟؟
تبسمات ليها لبنت: غزلان
تانيرت:مرحبا بيك ابنتي غزلان شحال فعمرك؟؟
غزلان: 21 عام
أسماء:ماشي نتي باقا صغيرة على هاد لخدمة واش مكتقرااايش ؟
غزلان:(تبسمات ليها بتوثر) فالحقيقة أنا كانقرا فلفاك لعام لول وكارية هنا فمراكش وحيت لقرايا مبقا ليها والو تسالي قلت نخدم باش مانبقاش غير جالسة
أسماء:(ربعات يديها ونبرة الجدية باينة فصوتها) كان يمكن ليك تشوفي شي خدمة خراا عطااا الله فين ماشي لخدمة فالديور
رحيل:(شافت فيها وخرجات عينيها) أسماء
أسماء:(حركات راسها ممسوقاش) شنووو مالي كدبت بنت بحالها باقا صغيرة غادة تخدم فالديوووور واش مخايفاش على رااااسك مثلااا نقولوو حنااا عارفين روحنا اش كانسواو ولكن الناس لخرين لا ونتي تبارك الله عاطية لعييين ووبنااادم غايطمع فيك
غزلان:(هزات راسها) أصلا أنا عمري خدمت فشي دااار وهادي أول مرة وفاش خالتي رقية هضرات معاياا وقالت ليا عليكووم جيت داكشي علاش
تانيرت:شكاتجيك رقية؟
غزلان:هي جارتنا فأگادير وتنقول ليها خالتي
تانيرت:شوفي ابنتي باش نشرح ليك اش كاين أنا حاليا حاملة داكشي علاش باغا لي تعاوني فشغالات ونتي عارفة رمضان قرب وتيبغي الجهد وصحتي مغاتسمحش لياا نتحرك بزاف عليها بغيت لي تعاوني فشقا الدار وطياب تاهوو مكاينش بزااف دتمااارة فالدار وتابناتي كاينين غير هوما خدامات كلهوم ومكيجيوش تال لعشية داكشي علاش نتي غاتبقاي معايا تال لوقيتة لي غايجيو وتقدري تمشي
أسماء:(تتهضر معااها وهي هازة راسها لسماا) عطيني نشوف لاكارط ناسيونال ديالك؟؟
جبداتها غزلان من الصاااك ومداتها ليهاا وهي هزاتها تتشوف سميتها وكنيتهاا وتاريخ الميلاد وفين تزادت وصوراتهاا لضرورة ورجعات عطاتها ليها وقالت:قلتي كارية مع شي بنات؟؟
غزلان:اه
أسماء:علاش مابقيتيش فأگادير وجيتي تقراي هناا؟
غزلان:حيت
رحيل:(قطعاتها) مكاينش لاش نعرفو السبب الأهم عندنا هو تكوني معقولة وبنت النااس حناا غانأمنووك على دارناا وعلى نفسنا نتمناااو منك لمعقووول
غزلان:لهلا يحشمنااا
أسماء:خالتي رحيل اجيو معاياا؟؟
ناضو بتلاتة غادين لكوزينة ورضات أسماء لباب وقالت:ياك رقية قالت ليك غاتسيفط ليك مراا كيفاش بلان هاد لبنت
تانيرت:ماحدداتش بالضبط قالت ليا غانسيفط ليك لي تعاونك وراه على ضمانتي غير حنا قلنا غاتكون كبيرة
رحيل:عادي شنو فيها لبنت باينة باغا غير تخدم سمعتيها راه تتقرا وكارية مع لبنات يعني السيدة تتقاتل
أسماء:(هزات حاجبها) عطا الله فين تخدم هااا لغيطسوات هالمكتبات هالمحالات دلحوايج ماشي الديووور
تانيرت:سمعتيها قالت أول مرة وحيت سيفطاتها رقية زعماااات..
أما فالصالة بقات غير رنيم وريان لي مزولش عينو عليهاا وشوفاتو حسات بيهوم غزلان لي غير تتبسم بتوثر ومكاتشوفش فيه عكسو هو.. بقات جالسة تاسمعات تلفونها كيصوني وغير شافت النمرة ولون تخطف من وجهها وحبسات ليه الصوت بلاماتبين..
هازة بوكي دلورد كبر منهاا وحاجب عليها الطريق وغير إدريس لي كان حاط يديه على كتفها مگيديهاا تاوصلو باب الشومبر وهو يدق قبل مايحل لباب.. تقدمات سيدرا لداخل وهي معوجة راسها كاطل على نوح لي كان مراقبها بابتسامة خفيفة تاوصلات حدا السرير الطبي وهي تنطق بسرعة: بّا ديدي هزني
قرب إدريس وهزها هي ولبوكي وجلسها جنب نوح لي بعد شوية داير ليها بلاصة ونطق إدريس بجدية:ردي لبال
سيدرا:(مدات لورد لنوح ونطقات بصوتها الطفولي) أنا جبت ليك وريدات عجبوك ياكا؟؟
نوح:(هز لبوكي تيشوف فيه كانو ورود بيضاا وسطهوم وردة حمرا مخليا شكل البوكي زوين رجع شاف فسيدرا وتبسم ليها بحنية ونطق بصوت هادئ) زوينين بزااف بحالك اتاتبيرتينو
سيدرا:(عينيها لمعو) أنا لي عزلت وريدات (كملات بجدية) ولكن بّا ديدي هو لي خلص فليسات حيت أنا ماعنديش
تبسم نوح بحنان ليها وتحنى طبع بوسة على راسها مطول فيهاا وجرها عندو تاحطات راسها على كتفو ونطقات بخفوت:واش فيك وجيعات فكريشة؟
نوح:(جاوبها بنفس الخفوت) كانو فيا ولكن مشاو دابا
سيدرا: تاأنا فاش تناكل حولات بزاف تايجيوني وجيعات واش كليتي حولات تانتا
نوح:(ضحك بشوية) لا
إدريس:(كان مربع يديه ومتبع الديكور وتبسم تاهو) شفتي سيدرا ونتا تنسانى اولد لحاج ههه
نوح:(شاف فيه ونطق بمزاح) اوا شفتي حفيدتك نساتني فيك اسي إدريس
إدريس:(حرك راسو وجاوبو بتبسيمة) ماعليش إلا غير حفيدتي مغانتقلقش كوون هاني هه امدرا كيف بقيتي شوية
نوح:ولله الحمد ونتا لعائلة كلشي مزيان
إدريس: اوا نحمدو الله ونشكروه
سيدرا:(عوجات راسها باش ينتابه ليها نوح حيت كان قالب وجهو جهة إدريس) عرفتي أنا ليوم شفت سيديل ولعبت معاه
نوح:(كمش حجبانو) مشيتي لفيرمة
سيدرا:اه مشيت أنا وبّا ديدي ومامي ولكن مامي مشات لدااار
إدريس:كاين الرواج فلفيرمة هاد النهار
نوح:بدا لحال كيسخان داكشي علاش
تحل لباب ودخلات بيسان هي وجداها وجدها ورحمة.. ناض إدريس من الكرسي لي كان جنب السرير فين ناعس نوح مبعد شوية ومخليهوم ياخدو راحتهوم.. قرب لحسن عندو وسلم عليه بحكم تيعرفو وديجا شافو فالصدقة لي دار إدريس أما زاينة ورحمة اكتفو غير يسلمو من بعيد عكس بيسان لي مدات يديها وسلمات عليه.. قربات زاينة جهة نوح وعينيها على سيدرا لي كانت تاضور عينيها السود عليهوم وهي مخشية تحت باط نووح..
زاينة:(قاستو وجهو وقالت بحنان) مانيك أنتگيت أيوينو "كيف بقيتي اولدي"
نوح:(باس راحة يديها ونطق بهدوء) لحمدلله ازاينة نو
زاينة:(شافت فسيدرا لي كانت تاتشوف فيها بدوك لعوينات كيف لبابوشة) ماتگا تحشميتاااد ايفولكين "شكون هاد لبنت الزوينة"
نوح:(ضار جهة سيدرا درعها وقال بابتسامة) تفولكي يام "زوينة ياك؟"
زاينة:(تبسمات ليها) استيحفظ ربي ياجت إيلواليداينس "الله يحفظها ويخليها لواليديها"
نوح:آمين
سيدرا:(وشوشات ليه بصوت منخافض) شكون هادي؟
نوح:(شاف فيها)هادي جداتي
سيدرا:(حلات عينيها ونطقات بتساؤل) ماميت ماماتك ولاماميت بابيتك؟
نوح:(هضورها تيحمقوه نطق بهدوء تيشرح ليها) مامات بابا
سيدرا:(جمعات شفايفها ونطقات مكمشة حجبانها) وهاداك لي واقف مع بّا ديدي؟؟
نوح:هاداك جدي
سيدرا:بّا ديديك نتااا ؟؟
نوح:اه
سيدرا:أنا عندي بّا ديدي وتانيرت إينوو
نوح:(مبسم) ماشي جداك
سيدرا:(حركات راسها ونطقات بضحك)حيت هي تانيرت إينو أنا وبّا ديدي
قرب إدريس عند نوح ونطق بهدوء:ولد لحاج نخليوك ترتاح دابا
نوح:باقي لحال اسي إدريس
إدريس:خصنا نمشيوو ونيت غايكونو كيتسناوناا
سيدرا: نبقاو شوية بّا ديدي
إدريس:مابقيتيش باغا تمشي
عنقات سيدرا نوح وبلغلاط قاستو فالجرحة وهو يكمش حجبانو ورحمة قربات جهتو بلهفة وبصوت عالي: ولدي واش نتا بخيررر يهديك الله انووووح واش نتا مجلس حداك لبنت وجهة الضربة (شافت فسيدرا)نزلي من تماا
كمشات سيدرا حجبانها وإدريس تبدلو ملامحو ونطق بجدية:سيدرا يالاه نمشي
حركات سيدرا راسها باه ومدات يديها باش يهزهاا ومع تحنى جهتها إدريس شدها نووح من يديها ونطق بهدوء: غير خليهاا وزايدووون أنا مرتاح هاكا ايمّاااا
برك على ديك يمّا وعينو فقلب عين مووو لي كمشات حجبانها ورجعات لور ضاربة الطم.. أما إدريس مبغاش يكون سبب شي مشكيل عليها نطق بهدوء:ماعليش اولد لحاج نيت غانمشيو
نوح:مغاتمشيو تاتشرب واحد لكويس دلقهووة (شاف فبيسان) سيري لكافي جيبي لقهوة (تحنى جهة سيدرا ونطق بحنية) شنوو باغا نجيبو ليك
سيدرا:(شافت بنص عين فرحمة لي تتشوف فيها وهي مكمشة حجبانها وقالت بهدوء) مابغيتش
نوح:(جرها جهتو وتحنى هضر معاهاا بهمس) تبغي عصير ولاموناضة
سيدرا:(كمشات حجبانها)شكون هاديك لي غوتات عليا؟؟
نوح:هاديك يمّا (شاف فبيسان) شوفي اش باغين يشربو وجيبي عصير الفريز لسيدرا (شاف فسيدرا) كيعجبك الفريز ياك
سيدرا:اه تيعجبني وتامامي تيعجبها
مسات بيسان وهوما كملو هضرتهوم تاتحل لباب بالجهد وتم داخل زين العابدين كيف عادتو بحوايج سبور ونضاضرو فعينيه دالشوف وشعرها مرون كيف لعادة.. قرب جهة نوح وعنقو بالجهد وتانووح بادلو تعنيقة وسمع صوت زين العابدين لي نطق بالإنجليزية:واش نتا بخيررر ؟
نوح:(جاوبو بهدوء) أناا بخيرر واش يالاه رجعتي
زين العابدين:من لمطار لهناا
بقات سيدرا تتشوف فيه وعرفاتو ونطقات بصوت عالي: هااء شكون هاد لعزافة؟؟
نازل من الدروج وهو كيتفوووه وعينو مبوقين بالنعااس..وخدو فيه الطراساج دلمخدة غادي كيحك فعينه ويضورهوم على لبلاصة وماسمعش حسهوم جاتو عجب.. تمشى لصالة ومع وصل لباب عينيه لخضررين لمبوقين لمحوو بنت جالسة وحانية راسهاا الأرض تاشعرها لقهوووي غطى ملامح وجهها.. طلعها ونزلهاا وشاف جهة ريان وغمزوو بمعنى شكون هادي وتاريان جاوبو بلغمزززة زعمة من بعد عوج شفايفو بعدم اهتمام ومشى لكوزينة يشرب.. مع حل لباب بانو ليه تانيرت ورحيل وأسماء واقفات تايوشوشو..
محمد طه:(نطق بصوت مبحوح بالنعاس) مالكوم مجمعين هنا وشكون هاديك لي برا؟؟
أسماء:(ربعات يديها ببرود) هاديك اسيدي هي لي غاتعاونا فشغال الدار
محمد طه:(هز حواجبو متفاااجئ) ياك قلتو مرا كبيرة ؟؟
رحيل: هادي هي لي سيغطات لينا رقية حيت تتعرفها
أسماء:هممم هادشي لي قالت
تانيرت:(تنهدات) من هادشي كامل حنا غانجربوهاا وعجبتتنا هو هداك معجباتناش الله يعاون وكون كان فيها الدغل ماتعطيكش لاكارط ناسيونال تصوريها
رحيل:خليونا نخرجو لبرااا ونكملو لهضرة معاهاا
خرجو بتلاتة ومحمد طه مشى جبد كاس عمرو بلماا وشرب عاد خرج عندهووم وهو تيتفوه.. دخل وعاد بانت ليه لبنت لي كانت بصح باقا صغييرة وعاطية لعين.. هز حاجبو وجلس فالكوان دالصالة مربع يديه كيسمع هضرتهوم بملل.. أما ريان فيما تجي عينين غزلان عليه يتبسم ليها تبسيمة واسعة تالبنت مرگات وقلبات وجهها وهو حلف لافهم راسو.. أما رنيم فكانت غير ساكتة تتراقب بعويناتهاا ومدخلاتش..
رحيل:كيف قالت ليك ماما حنا بغينا لي تعاوناا غير نص نهار وغاتخدمي ست يام ولحد كونجي ديالك وبالنسبة لقرايتك كيف غاديري ليها؟؟
غزلان:(صوتها رقيق كيف شي مونيكة) ماشي مشكيل غانمشي غير فيامات لمتحانات
رحيل:الاهاكا مزيان نهار مغاتجيش علميناا وبالنسبة لخلصة غانبداو مع ب
أسماء:(قاطعاتهاا) بألف درهم
رحيل:(قلبات وجهها جهة أسماء ونطقات تحت سنانها) مريضة نتي
أسماء:(ماتسوقاتش لهضرة رحيل بل كملات ببرودها لمعتاد) نتي غاتخدمي غير نص نهار وكانظن ألف درهم مزيانة ليك وغاتغداي معانا وتفطري كدلك يعني مغاضيعيش فلوووس فلماكلة وبالنسبة لتوقيت عندك من ثمنية ونص دالصباح تال الستة دلعشية
غزلان:(تبسمات ليها بتوثر) واخا مزيانة
أسماء:غايخصك تجيبي فوطوكوبي دلكارت ديالك إگاليزي فلمقاطعة وفيها نمرتك داكووووغ
غزلان:واخاا
أسماء:(حطات رجل فوق رجل) تقدري تمشي داباا وديري فبالك الامعجباتناااش خدمتك مغاتكمليش معاناا
ناضت غزلان هازة صاكها حركات راسها بهدوء وقالت: غانمشي تال غدا ونرجع الله يعاون
أسماء:رنيم سيري معاهاا
مشات غزلان ورنيم وصلاتها وغير رجعات رنيم وهي تنوض رحيل مخيخة على أسماء:وااااش نتي مريضة اش ديك لافااااسووون باش تتهضري مع لبنت واش داك التماااااان لي دايرة
أسماء:(خرجات عينيها) وشحال بغيتي نعطيوها راه غير نص نهار يعني ماشي نهار كامل
رحيل:(حطات يديها على خصرها) من الثمنية ونص دالصباح تال الستة شحال من سااااااعة هادي هااااء وزايدووون نتي لي تتخدمي نص نهار شحال تتخلصي ياك تتشدي 3500 درهم وتاظلي دعي فيهوم حيت الصالير جاااك ناااقص
أسماء:كاين فرق أنا خدامة بدبلووومي يعني من حقي نتشرط
رحيل:بحاالك بحالها كولكوم خدامات بعرق كتافكوووم والاجينا نقارنو راه هي غاضرب تمارة عليك نتي لي تظلي جالسة فالبيروووو
ريان:(حرك راسو) رحيل عندها صح شفتيها مادواتش ونتي زدتي تاتشرطي وتكبري ابشوية الحشايشية
أسماء:دابا أنا وليت غالطة ياااكو بلاصة ماتشكروني
رحيل:(تنهدات وقربات جهة أسماء وهي تحط يديها على كتافهاا) ماقصدتش اش فهمتي ولكن لي معجبنيش هي طريقة الهضرة ديالك والتكبر لي بان فصووتك نتي هضرتي بلمعقول ولكن ماتعيقيش بزاف على لبنت حنا معارفينش ضروفها لي خلاوها تجي تخدم فالديوور هادشي لي قصدت؟؟
تانيرت:ماعليش البنات ماتعصبوش دابا وبخصوص التمان غانزيدوهاا شي حاجة تانتشاور مع باكوووم ودابا سيرو وجدو لينا مناكلو راه جاتني السخفة دالجووع
رحيل:تشهيتي شي حاجة؟؟
تانيرت: بغيت الشفنج دزنقة ولكن باين غايكونوو سالاو ماليه
ريان:(ناض وجر رنيم) غانمشيو نجيبووه ونرجعوو
خرجوو بزوج وريان غير سد لباب نطق بهدوء:مالكي ساكتة؟؟
رنيم:(ربعات يديها) ماشفتيش ديك خيتي فاش صونى تلفونها كيفاش تخلعات وبانت فوجهها؟؟
ريان:تت ماشفتش
رنيم:ماعرفتش علاش مارتاحيتش ليها..
هضرة سيدرا كانت مرتافعة خلااات كلشي يشوف فيها ومن ظمنهوم زين العابدين لي ضرب فيها واحد تخنزيرة فاش شافها وتاهو عرفها واستفرب اش كادير هناا وبالضبط علاش جالسة حدا باه..ضار نوح جهتها ونطق بهدوء:واش تتعرفيه؟؟
سيدرا:(شافت فنوح ورجعات شافت فإدريس لي كان مراقب سيدرا لي قالت بهدوء) هو غوت عليا داك النهار
نوح:(كمش حجبانو)اينا نهار؟
سيدرا: نهار بّا ديدي عرض على رجال بزاف
سكت نوح وقلب شوفاتو جهة ولدو لي واقف مربع يديه كايخنزر فيها ونطق بالإنجليزية:شنو درتي ليهاا؟
زين العابدين:(ببرود) مادرت والو؟
سيدرا:(نغزات نوح لي ضار شاف فيها) علاااش هو كيهضر هاكاك
نوح:(تبسم) كيفاش هاكاك؟
سيدرا:ماتيهضرش بلعربية واااش هوو ماتيعرفش ليهاا
سيدرا بطبيعتها كثيرة الأسئلة وتتبغي تعرف كلشي والابديتي معاهاا شي هضرة عول غاطبخ راسك بقوة الأسئلة ولكن نووح كان تيجاوبها بهدوء وبالخااطر وبلعكس هو عجبوو لقفوزية لي فيهاا وكيفااش تاتبغي تعرف وتسول.. جات بيسان جايبة لمشروبات وعطات لكل واحد شنو بغاا وزين العابدين عاد مشى يسلم مع البقية وجلس جنب رحمة لي تتقيس على ضهرو بحنية وقالت بهدوء: كيدوزتي امتحاناتك الحبيب ديالي؟
زين العابدين:مزيان
دوزو جليسة زوينة خصوصا سيدرا لي شبعات هضور مع نووح تاقرر إدريس يمشيو عاد تعلات باستو فحنكوو ونطقات بهدوء:بسلامة ماي بلو آيز
نوح:بسلامة اتاتبيرتينو
هزها إدريس أو ودعهوم عاد خرج وهي تنطق رحمة بهدوء:شكون هادو وفين تتعرفهوووم؟ شفت ديك لبنت مولفاااك بزاف؟؟
نوح:(بهدوء)سي إدريس معرفة ديالي وكنعتابرو واحد من العائلة وهاديك حفيدتوو
رحمة:(قلبات عينيها) ديك لبنت جاتني باسلة وممأدباااش
نوح:(كمش حجبانو) لبنت باقي صغيرة وتتبغي تسول وتعرف ماشي باسلة وممأدبااش راه كاين فرق بيناتهوم ايمّاا
زاينة:(فهمات لهضرة لي ضايرة ولكن تتجيها صعيبة تجاوب بالعربية داكشي علاش جوبات كيف العادة بالسوسية) مايااغن تاحشميت تفوولكي تباركالله نس تشااطر "مال لبنت زوينة تبارالله عليها دكية"
رحمة:(هزات حاجبها) نكين ايسكاا ساولغ نيغ ايلي يباين "أنا غير دويت وقلت لي بان ليا"
نوح:(بجدية) ماحدك ممعاشراش لواحد ماتحكميش عليه وداك لبلان دقبيلة مبغيتووش يتعاااود ايمّا
ختم هضرتوو ورجع راسو لور وغمض عينيه ورحمة سكتات وتاحد مانطق.. جلسو معاه شوية قبل ماينوضو يودعوه ويرجعو لرياض وبقات غير بيسان لي سونات ليه الضربة عاد مشات تاهي وبقا هو بوحدوو..
---
متكية تانيرت على كتف إدريس تتعاود ليه على غزلان وداكشي لي قالوو ليها وهو كيسمع ليها بهدوء تاسالات وهو ينطق: التمان لي درتو معاها قليل شوية
تانيرت:داكشي لي قالت رحيل لأسماء وتاأنا كنت ناوية نزيدها
إدريس:ماباغينش ناكلو عرق كتاف حد
تانيرت:داكشي لي كاين مهم غدا غاتبدا ونشوفوو نيت خدمتهاا (تفوهات) غااانعس عييت ليوم
تقدات فبلاصتها وغطاها ونعسات وهو بقا كيخمم تال أيتها وقت عاد نعس تاهوو..
مع الثمنية ونص دالصباح كانت غزلان واقفة قدام لباب لي تحل من طرف رحيل لي تبسمات ليها وقالت:صباح الخير دخلي
غزلان:صباح الخير الالة
رحيل: قولي ليا غير رحيل بلاش من لالة
غزلان:واخا
وصلات لصالة وغزلان حطات الصاك لي جابت فيه بيجامة لي غاتلبس وقالت بهدوء:فين غانبدل حيت مغانقدرش نخدم بحوايج لخرووج
رحيل:هالحمام لهيه
أشارت لجهتو وغزلان مشات تبدل ببجامة سروال طويلة شوية أو واسعة دارت زيف حياتي على راسها جمعات بيه شعرها وخرجات لعند رحيل لكوزينة وعوناتها فالفطور وفنفس لوقت تتوريها بلايص دلمأونة وغزلان رادة لبال معاها تتعقل.. حطو الطبيلة دلفطور وناضو لبقية من غير تانيرت ومحمد طه وسيدرا تجمعو على لفطور وإدريس حدو سلم عليها وجلس فطر وخرج وريان كانت راشقة ليه هاد الصباح.. مشاو كاملين لخدمة ورحيل قبل ماتمشي شافت فغزلان: قبل مانسى وجدي معاك دشيشة لماما حيت كاتبغي تفطر بيها..
غزلان:واخا
مشات رحيل وغزلان سدات لباب ومشات ديريكت لكوزينة غسلات لمواعن لموسخين ونقات الدنيا تم وخلات لفطور فوق للطبلة مغطياه بزيف ومشات تتوجد الدشيشة لي قالت ليها رحيل.. خلاتها طيب ومشات لصالة تاتسوسها وحلات الشراجم باش تهوى وجابت السبيراتور نقات الزربية ومسحات لغبرة كادير لخدمة بنيتهاا وباين فيهاا حارة فشغلاات الدار.. وصلات لعشرة ونص وفاقت تانيرت لي نزلات لتحت تتشم ريحة جاڤيل وسانيكروا ولقات غزلان تاتغسل لحمام لتحتاني وغير شافتها تبسمات ليها وقالت:صباح الخير الالة راه لفطور واجد
تانيرت:صباح لخير ابنتي مكاينش لاش من ديك لالة عيطي ليا غير خالتي
غزلان:واخا اخالتي
مشات حطات ليها لفطور
تانيرت:غير سيري طلعي لفوق جمعي لبيوت وفيقي معاك سيدرا راه بيتها هي لي فلخر دلكوار على يديك ليسر
مشات غزلان متبعة النعت وفنفس الوقت تتشوف الطبقة الثانية.. وصلات لباب دلبيت بلامادق حلاتو وعينيها مجااااو غير على محمد طه لي كاااان يالاه مدوووش غير دااتو مع راسو أنطيغدي يغسلووو.. عريان ولابس غير كالسوو فالبيض مطراسي ليه على مسائلو..
ومع الدعقة بزوج بيهوم بقاو واقفين جامدين تيشوفو فبعض بصدمة..
غزلان من ديما عندها مشكيل فالاتجاهات تتخربق فيهوم ومن زهرها المكفس ماتجي غير فداك لمنظر لي خلاها تولي بحال شي مطيشة وعينيها غرغرو بالحشمة أما محمد طه فاش عاق براسو خدا الفوطة لواها على نصو ساااتر راسو وحجبانو عقاااادو وضرب فيها تخنزيرة قاااصحة وقال بصوت معصب: ااااش دخلك لبيتي واااااش مكتعرفيش دقي القلا*وي
غزلان:(بدات تاتفتف) أنا سمحليا اسيدي والله مكنتش قصداهاا أناا
محمد طه:(شير ليها لبراا) غبرررري من قودامي (غوووت) قوووووودي
تهزات وتحطات فبلاصتها من لغوتة ديالو وسدات لباب ودموعها نازلين مرضاتش اش وقع هي غلطات ومكانتش قصداهاا.. بقات تاضور راسها وتمسح وجهها وعاد تمشات لباب لي أونفاص باب محمد طه دقاتو وحلاتو غي بشوية وطلات هو لول غير بانت ليها سيدرا ناعسة وهي تكمش حجبانها حيت عند بالها راه بنت كبيرة بحال رحيل وأسماء ماشي صغيرة.. حكات راسها ومشات جهتها تتشوف فيها ناااعسة وشعرها مغطي وجهها تبسمات وتحنات تاتفيقهااا.. تململات سيدرا فبلاصتها وحلات عويناتها لمبطنين المعمشين فوجه غزلان لي تبسمات ليهاا وسيدرا بقات مكمشة حجبانهاا تاتشوف فيهاا ورجعات تقادات فبلاصتها تتجمع شعرها وتتردو ورا ودنيهاا وغزلان متبعة حركاتها تاسمعاتها قالت بصوت مبحوح بالنعاس:شكون نتياا؟؟
غزلان:(تبسمات ليهاا) سميتي غزلان سيفطاتني لالة تانيرت باش نفيقك
نزلات سيدرا من فراشها تتلبس بانطوفتها ورجعات شافت فغزلان عاد خرجات ولخرا تبعاهاا شافتها مشات جهة لحمام وهي تنطق:نعاونك؟
سيدرا:(داخلة لحمام وشادة لباب بيديهاا شافت فغزلان وكمشات حجبانها ونطقات بجدية) لا
سدات عليها لباب دلحمام بالجهد تاكمشات غزلان حجبانهاا ونطقات بهمس:هادوو مالهوم كلهوم معصبين تت
نزلات لتحت ولقات محمد طه جالس بسروال توني وتيشورت وداير طاغية لراسو.. مهزش راسو فيها وتاهي تجنباتو وباركة غير الشوهة لي تشوهات معاه.. رجعات لكوزينة تادير شغلها تاسمعات صوت سيدرا لي قال بحب:تانيرت إينو صباح لخير
باستها فخدها ومشات باست محمد طه عاد جلسات جنبو وبقات تاضور عينيها على الطبلة وهي تكمش حجبانها وقالت:فين لكريب ديالي؟؟
تانيرت:مصاوبناهش ليوم كولي هادشي لي كاين
سيدرا:(دلات شنايفها وشافت فتانيرت) أنا بغيت كريب تانيرت إينوو مابغيتش هادشي
تعصبات وناضت بلافطور غادة لصالة وتانيرت تتعيط ليها:اجي لهنا فطري راه ماشي ضروري لكريب واسيدرااااا سيدرااا
مجوباتهاش سيدرا مشات تكسلات فوق السداري وهزات تلكوموند دايرة الرسووم.. هي حال وحوال مرة تعكس وتبغي تفطر غير بلكريب مرة تفطر بلي كان وليوم تعكسااات تاني وعارفة تانيرت بلي مغاتهبطش الراس وتجي تاكل تايكونو لكريب..
تانيرت:(ناضت عند غزلان لكوزينة لقاتها تتخلط لمقادير ديال لكريب وتبسمات) ديري ليها الشكلاط فيهم واخا
غزلان:واخا الالة
تانيرت:ياك قلت ليك قولي ليا خالتي وبلاش من لالة
غزلان:(تبسمات ليها) نسيت هه
تانيرت: مهم لغدا ديري شلاظة مع طاجين دالدجاج واخا
خرجات تانيرت من لكوزينة ومشات جابت لبيسي ديالها وجلسات فالصالة باش تخدم وسيدرا حداها مكسلة أما محمد طه حدو كلى ورجع لبيتو يبدل حوايجو حيت عندو كونطرول عند الطبيب.. وغزلان بدات تاطيب فلكريب تاسالاتهوم ودارت ليهوم الشكلاط كيف قالت ليها تانيرت وفيضات حليب سخون دارت ليه تاهو شوكولا وهزات الصينية حطاتها فوق الطبيلة وشافت فسيدرا بتبسيمة: هالكريب ديالك واجد اجي تفطري
ناضت سيدرا تتشوف الطبسيل لي فيها ربعة دلكريبات فيهوم شوكولا وبانان مقطع وفريز داكشي متول ويشهي تبسمات سيدرا وجلسات وتانيرت هزات راسها وغير شافت الطبسيل ريوگها نزلو وقالت بهدوء:جيبي ليا تاأناا بحالها ابنتي
غزلان:واخاا
مشات صوبات تاني طبسيل خر وجابتو لتانيرت لي طاحت فيه عمية.. تبسمات ليهوم غزلان ومشات تتجمع الطبلة وغسلات لمواعن عاد بدات تصاوب فالغدا.. هزات سيدرا إيڤانا لي نزلات تاتلعب بديلها وتمختر وناضت جهة لكوزينة باش تجبد ليها ماكلتها ساعة إيڤانا نقزات من بين يديهااا ومشات جهة غزلان تتحاك معاها كيف مولفة وغزلان غير نزلات عينيها وضربات على شي حاجة فلگري مزغبة وهي طلقهاا بواحد لغوتة ودااااك الطباسل لي كانت هازة تتستف فيهوم طلقاتهوم تاطااحو الأرض وتسمع صوت تهراااس الزاااج وإيڤانا نقزات وسيدرا مكمشة حجبانها وحاطة يديها على ودنيهاا.. ناضت تانيرت بزربة وبانت ليها غزلان واقفة لوسط تتشوف فدوك الطباسل لي مهرسين بالدعقة والخلعة وسيدرا تاهي تتشوف فيهاا..
تانيرت:(حركات راسها) ماعليش ابنتي ماعليش غير جمعي الزاج وردي لبال لاتجرحي
غزلان:(شافت فيها بخجل) سمحيليا اخالتي أنا مادرتهاش بلعاني حسيت بشي حاجة قاصتني فرجلي ولقيتها قطة
سيدرا:(قطعاتها بجدية مخنزرة فيها) ماسميتهاااش قطة سميتهااا إيڤاناا
سكتات غزلان ونزلات تتجمع الزاج حادرة راسها وتانيرت رجعات لخدمتها أما سيدرا بقات تتشوف فيها تاوقف جنبها محمد طه بسروال دجين وشوميز فوقها جاكيط خفيفة وطاگية فوق الراس وروايح كيتشمو من بعيد.. هز حاجبو وهو كيشوف فالطباسل لمهرسين ونطق بجدية: لمرة الجايا ردي لبااال مانبقاااوش حنا نشريو بااااش نتي تهرسي لينا فيهوم..
بقات غير حادرة راسها تتجمع الزاج وسيدرا بقات تتشوف فيها تبان ليها الدم كيتسقطر وهي تكمش حجبانها وقربات جهتها ونطقات: عندك أي فيديك؟؟
حركات غزلان راسها ونطقات بهمس:لا سيري من هنا باش ماتجرحيش بالزاااج
شافت فيها سيدرا وخرجات وغزلان هزات الشطابة شطبات تم وجمعات الزاج عاد حلات الروبيني وبانت الجرحة لي عندها فراحة يديها.. غسلاتها ولوات عليها واحد الزيف ومشات تتكمل شغالاتهاا..
سد محمد طه لباب وضور راسو بانت ليه طوموبيل إدريس واقفة بعيد شوية على الدار.. قرب جهتو وحل لباب ونطق بهدوء:السلام أوعليكوم
إدريس:(رجع تلفونو لجيبو وجاوبو) واعليكوم السلام
محمد طه:(حط يديه على راسو ونطق بهدوء) واش ليوم غايحيدو ليا هاد لكاسك؟؟
إدريس:نشوفو الطبيب اش غايقول
حرك الطوموبيل لسبيطار لي دار فيه محمد طه لوبغاسيون ولقى البروفيسور كيتسناه وبعد سلام وكلام مشى يدوز ليه الكونطروول لي عندو.. سعتاين وهوما سير واجي ومحمد طه صافي مل وعياا وأخيرا جاااه الفرج وزولو ليه لكاسك لي كانو دايرينو ليه فرااسو وبقااات غير لفاصمة لي دايرينها ليه بلاصة الجرحة لي فتح ولي حيدو ليه الشعر من ديك الجيهة كلهاا.. كان واقف كيقاد شعروو لي طوال ورجعو لور عاد دار ديك الطاگية وخرج لعند إدريس لي نطق بتبسيمة حنينة:على سلامتك خلينا نمشيو دابا
محمد طه:الله يسلمك واخا
رجعوو لدار ومع دخل محمد طه بان ليه ريان جالس فالصالة وسيدرا معلقة فيه وتتلعب معاه.. كمش حجبانو:مخدامش نتا؟؟
ريان:جيت غير نتغدا
محمد طه:(هاز حجبانو وشاف فيه شوفة فهمها ريان) فين عمرك جيتي تغدا
ريان:(تبسم ليه) اوا قلنا نبدلو ماكلة الزنقة ونجربو ماكلة ديال الدار
لهضرة لي قال ريان تتبان عادية ولكن محمد طه فهمها قرب جهتوو وتحنى تاوصل لودنيه ونطق بهمس: جمع كر*ك شووووية مناقصنا مشاكيل
ريان:(بنفس لهمس) مادرت والو
محمد طه:مهم هضرت معاك
سمعو تانيرت تتعيط عليهوم وناضو جهة الطبلة لي كان فيها الشلاظة فطباسل ولوسط طاجين الدجاج وزيتون.. تجمعو كاملين على لغدا ومعاهوم تاغزلان لي مكلاتش بخاطرها وهي حاسة بعيون ريان مراقبينها وفيما تهز راسها جهتو يتبسم ليه..
----
ف "Zeitoun cafe" لمتواجدة فمراكش فواحد الطبيلة بعيدة شوية جات فالقنت جالسين ثلات دراري والدخان دلگارو فوق منهوم بحال شي سحابة.. كان رؤوف متكي على لكرسي وهاز كاس دلقهوة كيجغم منو وبالو ساهي.. نغزو واحد من الدراري لي معاه ونطق بضحك:افين ساهي ابا رؤوف
رؤوف:(شاف فيه ونطق ببرود) ساعة الله
شرف:مابيتيش تمشي معانا لحفلة لداير زوهير ليلة؟
رؤوف:(شاف فيهوم) نتوما غاديين؟؟
قادر:اييه أنا بعدا غادي نزهى شوية ونخضر عويناتي بالزين
شرف: تاأنا يمكن نمشي الاماخرج ليا شي بلان
قادر:اجي تا (شاف فرؤوف) اش درتي مزال فلهضرة ديال ديك النهار؟؟
رؤوف:(زفر بعصبية وتحنى لقدام مطير لشرف الگارو لبين صبعانو سف منوو جبدا وساط الدخاان عاد نطق مغدد) مادويتش معاه مزال
قادر:(هز فيه حاجبو) وقتاش ناوي دوي بالسلامة؟؟
شرف:(شاف فيهوم ونطق بتساؤل) علياش تتهضرو
قادر:(شاف فرؤوف ونطق بجدية) سمعني الخاوة راه من حقك تدوي معاه ماتخليهش يهرف ليكوم على كلشي غير حيت هو لكبير
شرف:(عاد فهم) اااااه واش كاتهضر على ولد لحاج
قادر:(كمل هضرتو) دوك لفلوس راه حقك نتا وياه وختك ماشي غير هوو أنا كون كنت بلاصتك اندوي على حقي سمحلي واش فلوووس باك هادوك ولافلوووسووو هوو
شرف:(حرك راسو يمين وشمال) قادر عندو لحق سير عندو وقول ليه بغيت حقي فلورث
قادر:(مسح على لحيتو ونطق بمكر) فاش تشد حقك فلورث نديرو لمشروووع لي كنا قلناا عليه بزوج بينااا اصاحبي أنا لحصيصة ديالي راه غير حاطها فلبانكة بقيتي غير نتا
رؤوف:(كيكمي) وعند بالك هو غايبغي يتفرق لورث
قادر:وراه حقك از*بي هاداك ماشي غير حيت خوك لكبير يبغي يدير ليكوم ميسة اصااااحبي هاهو حال ميزون دوڤواتيغ قدها قد لخلى وتايصور لملاين وزيد لفيرمة لي مشيت ليها ديك النهااار راه تاطيح زبابل دلفلووووووس ويعلم الله اشنو عندو باااقي
شرف:نسيتي لمگازان
قادر:وراه كاندوي غير على بروجياتو هوو أما لمگازان راه دلحااج الله يرحموو يعني حقك تانتا ارؤوف
كان غير تيسمع لهضرتهوم لي غير مكتزيد تحقدو على خوووه.. كمى داك الگارو وناض هاز مسائلو وخرج شاد الطريق لسبيطار.. مسافة لابأس بيها وكان مبلاصي طوموبيل فالباركينغ ونزل بخطوات سريعة غادي لبيت نوح.. ومع وصل حل لباب وبان ليه نوح جالس بسروال توني وقبية وبيسان تتربط ليه سيور السبرديلة.. تقدم جهتو رؤوف وبدون مقدمات قال:بغيت حقي فلورث..
يتبع..
التعليقات
لا توجد تعليقات بعد، كن أول من يعلق.