الجوهر الحر الجزء 68

الغيرة هو شعور فطري فينا ومكاينش شي واحد لي مكيغيرش... رحيل من طبعها مكاتخبيش مشاعرهاا وغيرتها فاش حسات بيها بيناتها ليه نيشان بديك الدخلة لي دخلاتو... ملي سولها نوح داك سؤال تبسمات بعيون لامعة وبصوت خافت قالت وعينيها فقلب عينيه: مامنحقيش نغير عليك

نوح:(بهدوء)من حقك الفتنة ديالي

رحيل:(رمشات بدلع وقالت بضحك) لي عندها هاد زين كولو راه خصها تسد عليه وماتخليهش يخرج

ضحك نوح برجولية تاتهزو كتافو ورحيل مشركاه الضحكة تادخلات لبخوشة دسيدرا لي قالت:علاش تضحكو

ضارو شافو فيها هي لي قربات جهتهوم تاوقفات جنب نوح وشدات فسروالو:هزني بابانو

هزها وهي لوات يديها على عنقو وليد التانية على عنق مها ونطقات:مامي عرفتي بابانو گال لينا انا وزينبيدين غانمشيو لإفران ونلعبو بتليجااات

رحيل:اييه امامي عارفة

نوح:(شاف فسيدرا بجدية)دابا شنو خصنا نديرو؟؟

سيدرا:نبدل حويجاتي ونغسل سنيناتي باش نيني

نوح:(باسها فحنكها) يالاه ابابا سيري سبقيني أنا جااي

سيدرا:(باست رحيل ففمها وقالت) تباتي فراحة الله مامي

رحيل:تباتي فراحة الله اروح مامي

نزلها وهي مشات تاتجري ورحيل تبسمات وشافت فنوح لي قرصها فنيفها وقال:تبغي نتعشاو هنا ولالتحت

رحيل:لا غانزلو لتحت ونيت باش نگولو ليهوم بسلامة

نوح:يالاه لبسي عليك أنا غانمشي عند سيدرا

غير خرج مشات بلاعگز حلات ديك لڤاليز وجبدات ليها واحد الكسيوة زوينة تاتجي مجموعة من جهة لكرش والصدر ومنفوشة من جهة اليدين لبساتها مع فولارها ودارت شوية دلمك اب وريحة لي صاوب ليها نوح ولبسات سباط وخرجات غادة لبيت فين ناعسة سيدرا لقات نوح مخشي معاها تايطبطب ليها على شعرها وهي تاتقرا القرآن... سورة الفاتحة كيف مولف معاها كل ليلة تايخليها تقرا السور لي هي عرفاهوم تاكاتنعس...بقات رحيل مرقباهوم تاشافتها نعسات وهو قادها وناض قرب جهة رحيل غمزها وخرجو بهدوء باش مايفيقوهاش...نزلو لتحت وكيف لعادة هو مشى لصالة لي فيها الرجال وهي دخلات لعند العيالات هازة راسها لسماا وعينيها ماتجي غير فشيماء لي جالسة كيف عادتها شعر طووويل مطلوق ولمك اب كيلو فلوجه تگولي حضارة فعرس ولابسة كسوة حد الركبة مطراسيااهاا...شافت فيها شيماء بسخرية ونظرات كره واضحة وبدلاتها رحيل نظرات الاحتقاار... جلسات گدامها جنب عفاف وشيماء عينيها تتصكانيهاا وهي باغا تموت بالفقصة...تاتشوف السيدة زيانت وغلاظت مع الحمل لي وتاهاا وباينة فيها مرتاحة... تاتشوف راسها ضيعات الخير لي كانت غاتعيش فيه وضيعات الراجل لي كانت باغاه ولكن هادي هي نهاية الطمع لي كانت حاسة بيه... ربي عطاها على قد نيتهاا... طلقات ودنيها فاش سمعات عفاف قالت:هي صافي سخيتو بيناا ماجلستوش بزاف؟

رحيل:الله يجعل لبراكة اخالتي مرة خرا إن شاء الله نتوما لي خصكوم تجيو عندنا تاني

عفاف:إن شاء الله أصلا كنت ناوية نجي ولكن نخليها تاتقربي تولدي إن شاء الله الله يقومك على خير ويفرحك بالصورة المكمولة..

رحيل:آمين اخالتي وتانتي الله يطول فعمرك مغاديش نسخى بيك

عفاف:(جراتها عنقاتها) الحبيبة سعداتك ارحمة ربي عاطيك عروسة كيف لجوهر ماتسخاايش بلگلسة معاهاا

رحمة:(بابتساامة صفرا) اييه عندك لحق

عفاف:نتي غادة غدا ولاغاتبقاي مزال؟

رحمة:لا غانبقا شي يامات أنا ونور الهدى تايرجع لينا نوح تاني

عفاف:اه اوا مزيااان

تحط لعشا وعفاف كل مرة تحط لرحيل وتحضيها كولي هاكي ورحيل راه مسخاتش بيها دبصح بقوة لحلاوة لي فعفاف خلات رحيل تعلق بيهاا..

عفاف: سيدرا فين هي عاد رديت لبال؟

رحيل:نعسات تعشاو برا ومشات تنعس حيت غدا فايقين بكري

كملو لعشا وكيف لعادة أتاي ضروري مور لعشاا وتجمعو شوية تاسمعات رحيل تلفونها صونى بمساج من نوح فيه ✉️ كانتسناك

رحيل:(تبسمات ليهوم)نخليكوم غانطلع نعس تصبحو على خير

خرجات وشيماء تاتميق فيها تامشات رحيل وهي تنوض غادة لبيتهاا... دخلات وهي تتغلي مباغاش ديك لفرحة لي شافت فوجه رحيل ومارضااتش على لبلان لي دار ليها نوح... ملي عرفاتو كاين هنا بلاماتخمم جات تشوفو ساعة هو معبرهاااش گاااع وخلاهاا بحال لحمقة واقفة تاتشوف فيه بغضب... عضات على شفايفهاا تاتفكر بلي غدا غاديين وهي مباغااش هادشي... جلسات فوق النموسية تاتعض شفايفها وتخمم فشنو دير بينما فبيت رحيل ونوح كانو عايشين ليلة حميمية بكل مالها من معنى... داك لوحش لي كان بناتهوم ترجم وهوما فوق سرير وصوت آهات رحيل مسموعين مع همساتو ليهاا بصوتو الخشن... عطاها الخاطر ومع تقل دغيا عياات وهزات الرايا وتاهو خلاهاا ترتااح... جرها وهي حاطة راسها على كتفو كيستارحو من المشاعر الجياشة لي عاشوها قبل شوية...

مع داك لهدوء لي كان تسمعات صرخة عاالية خلات رحيل تقفز بين يديه ونوح كمش حجبانو وناض من بلاصتو كيلبس عليه وشاف فرحيل بجدية:خليك بلاصتك

خرج وبانو ليه تالي تم خارجين تابعين الصوت دلغوتة تاوصلو لكولوار التاني وبانت شيماء واقفة وبيجامتها محلولة ومقطعة من جنب الكتاااف وشعرها مخربق وعنقها بحال لامعضوض كلها تترعد وتتبكي وبصراخ هستري وهي كاتشير ناحية زين العابدين لي واقف قبالتهاا لابس غير شورط قصير ومن لفوق عرياان أو وفجهة صدرو واحد لقمشة هابطة:هوو كاان باغي يتعدى علياا..

كلشي نعس فالرياض الاهي عينيها مبغاوش يتسدو فيما تتفكر بلي غدا غايمشي تاتبغي تفقص...باغا دير شي حاجة لي تخليه حداهاا ولكن ماعرفاتش شنو هي...بدلات عليها حوايجها ببيجامة دالنعاس وبقات غادة جايا فالبيت بحال لافيها لوجع دلولادة... هو دابا غايكون ناعس مع مرتو وهي هنا تتاكلها لفقصة والحسد... حلات لباب وخرجات بشوية قاطعة لحس غادة تاتشوف فبيبان لبيوت تاوصلات لبيت لي عطاوهوم وهي تكمش حجبانها وخنزرات كملات طريقها تاوصلات لخر دلكولوار وقربات جهة السطارة تاطل وهي يبان ليها زين العابدين كايدير طراكس فلتحت... بقات واقفة تاتشوف فيه وتبسيمة خبيثة ترسمات على شفاهاا من ديك الخطة لي طاحت فبالها...رجعات تتجري لبيتها وقفات قدام لمرايا وقرصات عنقها قريصة صغيرة ومع هي حساسة وبشرتها على سبة دغيا حمارت ليها ومدات يديها باش تقطع البيجامة جهة الكتاف ساعة مبغاتش ليها واضطرات تبدا تقطعها بلمقص وخرجات تاني بزربة رجعات لبلاصتها وبقات مراقباه وهي تترعد فرجليها وتتمنى الخطة تكمااال...مدة ديال لوقت وهي على وقفتها تاشافتو هز قرعة دلماا وشرب وبدا كيطرطرق فعنقو قبل مايكمل طريقو طالع لفوق وهي غير شافتو سبقاتو ومع بيتها قريب لبيتو...بقات واقفة تاشافتو جااي وهو غير هز فيها عينو وعطاهاا نظرة بااردة وبغا يكمل طريقو وهي توقف قدامو وتبسمات ليه:نقدر نهضر معاك

زين العابدين:(ببرود) لا

شيماء:شوف عارفااك محاملنيش ولكن نتا راه عزيز علياا بزااف

كانت باغا تخليه واقف قدامها ساعة مع من جات هو ممسوقش ليها وبغا يتخطاها وهي تهجم عليه بزربة وهبطات ليه قمشة جهة صدرو وهو دفعها عليه وفديك اللحظة بدات تتغوت بالجهد وفنفس الوقت كاتنتف راسها وحلات بيجامتها تابان ليها ضواو شعلو وزين العابدين ماتحركش من بلاصتو بقاا واقف تايشوف فيها اش غاتصنع...تجمعو عليهوم لي كانو تما ومن ظمنهوم مها وباها ومها غير شافتها قربات جهتها معنقاهاا وشيماء تقنات الدور وبقاات تاترعد وتبكي وتخشى فمهاا ومع قالت ديك الكلمة كلشي بدا كيشوفو وهوما مصدومين...عمر هادي طرات فشي تجمع وكلشي ضرباتهوم اللقوة وسكات بدا يتسمع من غير صوت بكاا شيماء...قرب نوح جهة زين العابدين ونطق بخشونة بدون مايشوف فشيمااء: هادشي لي تتگولي مامنووش ولدي مايديرش هاد لفعلة

باها:(خنزر فيه وقال باندفااع) كيفااش اولد لحاج زعمة بنتي تاتكدب

نوح:(شاف فيه ببرود)شكون عرف

مها:(نطقات وهي معاجبها حال) علاش بنتي غاتكدب وتلوح عليه لباااطل شوف ولدك لي قليل الآداب وحاط عينيه على بنتي وزعمة ياحسرة راه كبيرة عليه

نوح:(خنزر فيها) الحاجة عرفي اش تتخرجي من فمك واياااك تغلطي على ولدي بكلمة

رحمة:لواااه اش هاد لهضرة مخرجة من فمك وليتي تعايري فحفيدي عااين باااين

مها:گلت لحق مال بنتي غاتجي غير هاكا وتلوح لباطل شوفي حالتها كلها ترعد وسط يدي وحالتها حالة (خنزرات فزين العابدين)وشوفي غير بعينيك حالة حفيدك..

فبيت رحيل ونوح كانت الأخيرة جالسة بلاصتها وعقلها مشطون اش واقع وشنو سباب الغوات...ناضت من بلاصتها عريانة تاتقلب على حوايجها تالبسات وتسترات ولاحت فولار على شعرها وخرجات...ماقدراتش تصبر واخا راه نوح علمها ماتخرجش ولكن لي فيها مامهنيها...لقات التجمع فوسط لكولوار وعينيها لمحات شيماء وهي تاتبكي ومها معنقاهاا تاتهضر وفلمقابل نوح واقف جنب ولدو..لقطات ودنيها لهضرة لي قالت مت شيماء لخرة شي لي خلى التشاش يتكون عندها... نطق بات شيماء بصوت عالي عاقد لحجبان: وافقلب داااار بّا وطرا لبنتي هادشي وبغيتوني نسكت ونميك ولدك اولد لحااج راه تمادى اش هادشي لاباغي يزهى يخرج لزنقة ويبعد من بنات الناااس وزايدون وااش هو گد بنتي

نوح:(كان تيسوط بحال شي ثور معصب من لكلام لي تگال ضار جهة خالو وخرج فيه طول وعرض) ولدي أناا مربيه وعاااارف اش مربي عينو مكيهزهااش فالنسا بقاات ليه غير بنتك وزايدون اش مخرجها فهاد ليل هنااا وكلشي مخشي فبيتو؟؟

شيماء:(نقزات تتبكي فاش خافت راسها تحصل) كنت غادة نشرب وتلاقيتو ومن نيتي سولتو علاش بقا فايق وهو مجاوبنيش وبقا تيشوف فياا شوفات فشكل مافهمتش مالو تاشوية قرب مني وكااان (بدات تبكي وتشهق وتخشات فمهاا)

كان واقف زين العابدين مبرررد تگولي ماشي هو لي طايح عليه باطل گدو گد السخط عينو غير على شيماء والتمتيلية لي دايرة ولي خلاتو يبقا واقف كيتفرج ببرود كالجليد...

كانت رحيل واقفة تاتسمع ولهضرة لي قالوها خلاتها تفهم اش كااين...خنزرات فشيماء وهي متأكدة بلي هادي كدبة منهاا حيت نوعها باين واش وحدة ماحناتش فبنت صغيرة وسمعاتها داك لكلام لقااصح غاتجيها صعيبة تلوح بااطل بحال هادا وزيد هي عارفة زين العابدين مامدخلش مع لبشااار وبعيد كل لبعد على لعائلة بقات ليه غير يحط عينو عليها هي لي كبر منو بسنين...كدبات كدبة وتيقاتهاا ولي شافها يحلف بلي بصح طاري ليها داك لبلان

رحيل:(تدخلات بهدوء) وعندك شي دليل بلي هو قرب ليك؟

ضارو كاملين جهتها ومنهوم نوح لي شاف فيها وهو عاقد حجبانو وهي قربات من الجهة لخرا تاوقفات جنب العيالات ونطقات مت شيماء: واش كادودي بنيتك اشمن دليل شوفي غير كيف ولات راه حالتها دليل

رحيل:(بسخرية وعينيها على شيماء) واخا نگولو هادشي بصح زين العابدين علاش غايقرب ليها هي بالدات وهو عمرو شاف فيها تاشوفة ؟

شيماء:(شهقات ولفقصة شداها من مجية رحيل) ماعرفتش راه براسي مافهمتش مالو

مها:(شافت شوفة ناقصة فرحيل) وزعمة راك مرا وغايخصك توگفي معااها وتجي من صفهاا وتحسي بيها

رحيل:نحس بيها لاكانت بصح طارية ليها أما لاكانت غير كدبة فغانجي من الحق زين العابدين مستحيل يدير هادشي أنا عارفااه اش كيسوى ولحاجة لامشفناهاش بعينينا مانحكموش عليها

مها:(نهضات فرحيل) اوا نعلة الله واعليك واليديك مارباو فيك والو

حلات رحيل عينيها بالجهد وهنا نوح مبقاش تيقشع قدامو وماتسوقش لالخالو ولاتاشي حد... نطق بصوت عالي خشن وعينو خارجين فمرات خالو: هاد لهضرة گوليها لبنتك لي ماعرفتي ماتربي فيهاا أما مرتي مربية ومحتارمة وبزاف عليها (شاف فخالو وخنزر) باقي دابر باعتبار الدم والصلة لي جمعانا ولكن كل واحد يعرف لي ليه ولي عليه ومرتك خليها تعرف اش تتخرج من فمها مامنحقهاااش دوي لياا على مرتي وتنقص منهااا..

قرب جدو فاش شاف لقضية حمات وقال تيبرد الطرح:استغفرو مولاكوم وبلاهاد لكلام

نوح:(بصوت خشن) هاد لكلام گولو لمرت ولدك لي مكاتعرفش توزن هضرتهاا

مجاوباتش رحيل واخا راه فيها مايهضر وتسكتها مي فظلات ضرب الطم وزيد عجبها كيفاش نوح دافع عليها وخرج عينيه فيهوم كاملين... شافت فشيماء وعينيها لمحو كتفهاا لي مقطع فبيجامتها شي لي خلاها تقرب ليها كتر وشيماء بدات تاضور عينيها فاش شافتها قاصداهاا... حطات رحيل يديها على كتف شيماء وقالت وهي هازة حاجبها:شكون قطع ليك بيجامتك؟

شيماء:(بخفوت) ملي كنت باغا نهرب ليه شدني ومع تجريت تقطعات

رحيل:(تبسمات جنب) بصح حيت هاد التقطيعة تتبان دلمقص ماشي ديال الجراان

شيماء:(حسات بالعرق نازل ليها والشحفة) اشمن مقص واش من نيتك

رحيل:(شافت فعفاف)خالتي اجي واحد دقيقة وتأكدي حيت واقيلا مابقيتش تانشوف مزيان

بالفعل قربات عفاف وشيماء هنا حسات براسها وحلات وتكلخاات حيت خلات ليهوم فين يشدوهاا...

عفاف:(خنزرات فيها)رحيل عندها لحق توب مقطع بلمقص

مها:(شافت تاهي ونطقات) اش هادشي اشيماء

رحيل:فين بيتك

عفاف: داك لباب لهيه

رحيل:اجي معايا اخالتي عفاف

جراتها ومشاو لبيت وشيماء راه باغا تحفر الأرض وتخشى فيه..لقاو المقص فوق طابل دونوي هزاتو رحيل وخرجات هي وعفاف لي كانو عينيها قرطاس على شيماء ورحيل هزات لمقص وگالت:هادا اش كيدير فبيتك؟؟

تيقولو حبل الكدوب قصير واخا تكدب غايجي نهار تفرش وهادي حال شيماء لي الحماس دلخطة مخلاهاش تفكر بكل تدقيق فشنو بغات دير...عقلها رسم ليها لخطة وگالت اجي نطبقهاا ونسات بلي الكدبة ديالها غاتفرش غاتفرش سوا ليوم سوا غداا...المقص لي كانت هازة رحيل دليل كافي ودكاء من رحيل أنها مشات لبيتها وداات معاهاا عفاف باش تشهد وتلقى لي يگول لحق... كان كلشي تيشوف تامن مها لي بعداتها عليها وسكتات...أما نوح بقا مربع يديه ماهضرش مزال وعينو على رحيل لي وقفات قدام شيماء وقالت ببرود:لمقص لقيناه فبيتك ولبيجامة تقطيعتها بلمقص ولكن نتي قلتي تقطعات فاش جرك زين العابدين ونوغمالمو لاجرك هو فغاتباان يعني نتي كدبتي

عفاف:هادي هي تربيتنا فيك اش هادشي اشيمااء

رحمة:نتي لايحة بااطل على حفيدي هو اش دار ليك

شيماء:(تاتحرك راسها بلا)كدوووب هو راه بغا يتعدى علياا شوووفي (تاتوريهاا عنقهاا) هو لي دار ليا هادشي سيرو سولوه هو

رحيل:(شافت فزين العابدين لي كان واقف بهدوء وقالت)عاود لينا شنو وقع؟

زين العابدين:(شاف فرحيل وقال ببرود)كنت كاندير طراكس (قرب جهة لقرعة لي كانت طايحة فالأرض وهزها) وهاديك وقفات قدامي بغات تهضر ملي بغيت نمشي بدات تاضرب فراسها وتغوت

رحيل:(شافت فشيماء) ها يعني الحقيقة بانت ونتي درتي هادشي كولو باش تلوحي لباطل وعلاش ماعرفتش صراحة

مها:(خنزرات فشيماء) اش هادشي اشيماااء دووي

رحمة:ياخسااارة تربية خوياا فيك كنت معتابرااك بنتي واخا فعايلك تيكفرو وغلطتي شحال من مرة فحقنا ولكن ميكناا (شافت فمت شيماء) بنتك اخر مرة كانت عندنا فالرياض دارت غلطة فحق بنت صغيرة وضرباتهاا ومع دلك ماهضرناش وماگلنا ليكوم والو ولكن تال هنا وبرااكة الاحفيدي اشيمااااء

باها:(قرب جهة شيماء مخرج عينيه) علاش درتي هادشي ادووي

شيماء:بابا أنا مادرت والو

جدها:(خنزر فيها) نتي راه خاااص نعاود لبوك التراابي على هاد الضسارة لي فيك

شيماء:(غوتات بانفعااال وهي تتشير لرحيل) أنااا مادرت والو سمعتوو مادرت والو هي السباااب هي لاحت عليا باطل

رحيل:نتي لي لحتيه على لولد وهادشي لي طاري نتيجة ديال كدووبك حفيد الحااج مربي وبااه عارف اش ربى

نوح:(شاف فخالو وقال ببرود وخشونة) ولدي عمري نشك فيه واخا نشوفو بعيني حيت عاارف راسي اش مربي وهاد الفعلة لي دارت بنتك خص تحاسب عليها وتربى باش ماتعاودش تفكر تغلط مع لي كبر منهاا (شاف فشيماء بنظرة قاتلة ونطق بصوت عالي) كانت غلطة نهار نوات يمّا دير ليك قيمة لي نتي متستاهليهااش ولاكنت ميكت حيت درت بوجه بااك لي هو خالي (شاف فرحيل ومو) جمعو حوايجكوم غانمشيو

جدو:(شد فيه)والله ماتحركو فهاد الليل اولد لحاج

نوح:(شاف فيه بجدية)لحاااج

جدو:(جرو لعندو باغي يبوس ليه راسو) ماتخسرش لخاطر لجدك

نوح:(كحز راسو) استغفر الله

بات شيماء:مسحها فيا اولد لحاج وسمحلياا

بقاو تيدويو معاه وتيحاولو يقنعوه وهو باغي يمشي ولكن إلحاحهوم خلاها يصبر تال صباح وشيماء مارضااتش على شوفات العائلة ليها وشافت فرحيل بحقد ومشات لبيتها...تفرق لمجمع وكل واحد دخل لبيتو ورحيل زولات درتها وشافت فنوح:هاد خيتي مغاترتاح تانعاود نضربها ليها بنتفة اويلي حاااي على تكلاخ فيهاا

نوح:(شد يديها وباسها) ششش تهدني وماتعمريش راسك بداكشي

رحيل:باغا غير نعرف اش كانت باغا وشنو هي نيتهاا؟؟

نوح:(دوز يديه على لحيتو وقال ببرود) نيتها باينة ولكن عمرها توصل ليها

رحيل:(هزات حجبانها وقالت بانفعال) ندوز عليها بموووس حاافي لافكرات فيهااا

نوح:(حرك راسو وجرها جهة لحمام) خلينا ندوشو ونتكاو شوية غدا تبعانا الطريق

**

محاملاش راسها وزاد حقدها كبر من جهة رحيل لي تاتشوفها هي سباب كلشي فلول خدات ليها نوح ومن بعد خلات سناء تقلب عليها وتارحمة وتحرمات من لمشية لمراكش وزيد السلخة لي باقي مانساتهااش ليها ودابا كملاتها بهادشي لي دارت وكيفاش حطاتها بوجهها قدام كلشي ونظرات باها ومها ليهاا وتالعائلة اش غايگولو عليهاا...لايحة باطل على ولد هي كبر منو بربعطاش لعاام حشومة گاع وخايبة لمعاودة... بدات تاتنتف فراسها وتاتخرج حر لفقصة تابردان ومشات بدلات حوايجهاا ودازت تنعس... فعز نعاسها حسات بصوت أنفاس سخونة كاضرب فوجهها وشي حاجة باردة محطوطة على حنكهاا...حلات عينيها وماتجي غير فعينيه لقهويين لي كانو تايرمقوها بنظرات باردة كالجليد ومع الظلاام قفزات فبلاصتها ولكن داك لمو.س لي محطوط فوق حنكها خلاها تجمد وخرجات عينيها فيه هو لي نطق بصوت خافت كالفحيح: شنو باان ليك نديرها ليك بصح (هز حجبانو وكمل ببرود) ونتعدى عليك..

كانت تتحس بلحاشية دلموس كاتسارا ببطء قاتل على حنكها وعنقهاا وبقات غير حالة عينيها مصدوومة وتاباش تغوت ماقدراتش حيت لسانها فشل وهي كلها فشلات ولات غير تترعد... صوتو لي نطق بيه ديك الهضرة زاد خلاها تخلع من داك لبرود القاتل باش كيهضر... ولات طالبة السلاك معاه أما زين العابدين كان كيشوف رعشة الخوف لي فعينيها ببرود وعينو على وجهها وفكها لي تيترعد حبس لموس فحنكها ونطق بصوت مبحوح خافت:دوماج لقيتي ز*بي غالي عليا مغانبغيش نوسخو فيك

شيماء:(تترعد وشهقة طالعة ليها) شوف أنا

برك زين العابدين على حاشية لموس فوق حنكها ونطق ببرود:شششش صوتك مانسمعوش

ضربات شيماء الطم وهو كمل لمسارية ديالو بلموس وداك لخوف لي تيشوف من عينيها ورعشة جسمها خلاه يتنعش... هي قلبات عليه ولاحت عليه بااطل قد السخط وهو غايرجع ليها صرفها بالتاني ولمتني ويخليها فيما تشوفو تقلب الطريق... هو بعيد على لبشار ومبعد من كلشي ولكن لي قلب عليه وجبدو راه مغايحنش فيه... دقتو خصو يردهاا وهادي قاعدة فيه... دار ليها التعدييب النفسي فدوك الدقائق لقليلة وهي معرفاش اش ناوي يدير وهادشي لي باغي هو يلعب على نفسيتها ويمرضها..شد يديها وحط لموس على راحة يديها وشاف فيها ببرود: ماتلعبيش معايا حيت لعبي مقوووود

جمع ليها يديها على داك لمووس وهي تاتشوف فيه وتسرط ريقها تاخرجات عينيها فاش حسات بيه جر المووس تافلح ليهاا يديها من لداخل ودمهااا ناازل كيقطر على ليزار دالنموسية... حلات شيماء فمهاا والغوتة ماخرجاتش ليهاا بقوة الحر لي حاسة بيه أما هو ناض ببرود هاز داك لموس لي فيه شوية دياال الد.م وخرج مخليها شادة يديها ودموعها نازلين ودياان..كانت تتحس بيديها بحال إلا مخدرة عليها وبزز باش شعلات الضو ومع شافت كمية الد.م لي كان نازل من يديها موسخ ليها ليزار شداتها السخفة وعضات على شفتها باغا تموت...

كان غادي فوسط داك الظلام وهو تيلعب بداك لموس تاوقف وعينو على سيدرا لي كانت تاضور عينيها وراسها وسط داك الظلام لي كاسرو الضو لي خارج من بيتها... وهي مع قشعاتو قربات لعندو تاتجري شي لي خلاه يرجع يديه لي فيها لمووس ورى ضهرو...شداتو فرجليه وهزات وجهها وعينيها لمبطنين منفوخين بالنعاس وبصوت نعسان قالت:زينبيدين أنا درت بيبي فحويجاتي

نزل شوفاتو لسروال بيجامتها لي لابسة وقشع داك الطبعة لي فيه ورجع شاف فيها ببرود:سير عند ماماك

سيدرا:(خشات راسها بين رجليه وقالت وهي مكمشة شنافتها) مامي ناعسة عاوني زينبيدين

هز راسو لسماا وساط النفس وهي لصقات فيه كمش حجبانو وقال:حيد

مبغاتش تحيد ليه وعارفها مغاتحيدش داكشي علاش لاش مد يديه وهزها من لكول دلبيجامة تاخنقهاا وتمشى بيها لبيتها وحطها وكان ناوي يخرج يمشي لكوزينة يرجع لمووس ساعة شدات فيه حيت عند بالها غايخليها ونطقات:عفاك زينبيدين

زين العابدين:(تايفك يديها لي شادين ليه السروال شوية وتحيدو ليه)طلق

شدات فيه كتر جرااه مباغاش تفك معاه شادة رجليه ومضورة يديها عليه وهو مالقى حل من غير يكمل طريقو لكوزينة وهي ملوية عليه بحال لقطة...تايجر رجليه وهي راه تگول لاصقة بكولة سبيسيال...نزل من الدروج بستة وستين تكشيفة ودخل لكوزينة غسل لموس من الدم ورجعوو عاد هبط جهة سيدرا وكيف ديما هزها من لبيجامة كيف لخنشة ورجع لبيتها وهي مدلية شعرها وراسها مادواتش...وصل لبيتها وحطها وهي بدات ترجع شعرها بيديداتها وشافت فيه بعيون لببوشة وقالت:بغيت نغسل

من طبعها مكتحملش لوسخ وهادشي كيقنطها ودابا نيت حسات بلقنطة أما هو حك حاجبو وخدا نفس طووويل قبل مايتخطاها ومشى جهة لڤاليز ديالها هزها وحلها وشاف فيها:اجي لهنا

قربات جهتو وهو أشار ليها ببرود لحوايج:هزي داكشي لي غاتلبسي

بالفعل هزات سليب وسروال بيجامة مع ديباردور ولفاني دلبيجامة وفوطة وشافت فيه هو لي تمشى جهة لباب وقال:تبعيني

خرجات تتجري تبعاه فداك الظلام تاوصل لبيت فين كاينعس مع فيها حمام عكس بيتها هي ودخل لحمام كب ليها لما دافي فالسطل لي كان تم وحط ليها باش تكب لما وهز برودوياتو حطهوم ليها وهادشي كولو تايديرو بزز منو ومن لداخل ديالو مكرهش يطوعها من شي شرجم..خرج شاف فيها واقفة معنقة حويجاتها وقال ببرود:دخلي دوشي

سيدرا:(حركات راسها)متنعرفش ندوش بوحديتي

زين العابدين:(بالنثرة جرها من لبيجامة تكانت غاتعكل ودخلها وحط لحوايج فوق الرخامة وقال بحدة)دووشي ولاقوودي علياا..

خرج مخليها تاضور فعويناتها معارفة مادير مولفة تايدوشو ليها... ملي كانت صغيرة فيما توسخ راسها فالدار ومكاتلقاش مها مكاتسناهاش تاتمشي عند أي واحد ياريان يامحمد طه ياجدها ودابا فاش كانت ناعسة مع شافت واحد لكوشمار طلقاتها بلاماتشعر وملي فاقت كانت باغا تمشي عند مها ساعة لقات زين العابدين فوجهها ولتجأت ليه كيف مولفة دير مع ريان ومودي...سبقات أول حاجة وحيدات لزباغاي هوما لولين كيف مولفة تايديرو معاها فكل تدويشة عاد بدات تنصل حويجاتها وحدة مور وحدة ومشات جهة لما هزات سطيلة وكباتها تحتها تاتنقيه ومع عندها برودوياتها خاصين بيها وعند رحيل فلفاليز نساتهوم وخدات شامبوان كبات فيه شوية ودارتو غير بين فخادها بلاماتقيس بيه تحتهاا شللات وشعرها تايعنكشهاا... هزات سطيلة وكباتها على راسها وهزات تاني شامبوان ودارتو فشعرها وبدات تاتقاتل معاه ومع شعرها طويل تكرفيص وهي معرفااش وكملات الباهية فاش دخل ليها شومبوان لعينين حارقهاا...نطقات بصوت عالي:زينبيدين زينبيدين

كان متكي فبلاصتو ومغمض عينيه ونعاس بدا يجيه تاسمعها تاتعيط عليه وهو يزير على فكو تاتطراسى وناض بشوية عليه غادي عندها على أساس اتكون سالات دق وهي ماسمعاتوش حيت محيدة لباراي...

سيدرا:(بدات تتبكي) زينبيدين دخل ليا صابون عيني تايضروني

وهادي هي لي كانت ناقصاه حل لباب وبانت ليه واقفة عريانة تاتحك عويناتها وشعرها عامرة برغوة دشومبوان والما مكبوب.. قرب جهتها ولقى سطل خوى من لماا...هز رشاشة شعلها وطلقها عليها وهي بدات تاتحك عينيها بالجهاالة ضروهاا...شلل ليها شعرها مزياان تامبقاش الشومبوان وهي حلات عينيها حمرين ونطقات بصوت عالي:تايضروني عويناتي

مجاوبهاش هز لباندوش وليفة كبو فيها ومدو ليها باش دوزو على جسمها وداكشي لي دارت دوزاتو وهو واقف عليها تاسالات وعوتاني شلل ليها عاد ضار باش يهز لفوطة يعطيها ليها وهو يقشع لزباغاي تحدر هزهوم وبقا تيشوف فيهوم عاد ضار جهتها لاح عليها لفوطة وخرج راجع لبلاصتو وسيدرا تقاتلات مع حوايجها تالبساتهوم وخرجات مخليا لحمام هاكاك لقاتو ناعس ومشات تاتجري عندو وطلعات جنبو وقالت ببرائة: زينبيدين فين وديناتي؟

ضار شاف فيها بهدوء وجلس بلاصتو وخدا سغڤيت وقرب لودنيها مسحهوم من لما وركبهوم ليها وشاف فشعرها لي كان سارد مكمش حجبانو قبل مايعطيها بالضهر وينعس وتاهي تخشات جنبو وحطات راسها على نفس مخدتو وغمضات عويناتها...كان لكالم والنعاس بدا يديه تاشوية تسمع طزززز وكمش حجبانو وضار جهتها مع كانت عاطياه تاهي بالضهر وملاصقة ضهرو مع ضهرها تبسمات بشقاوة وقالت وهي تاتكركر:درت حزيقة زينبيدين هههههه

زفر النفس وعض على شفايفو تايكب فيه حر لفقصة لي فقصاتو ودرونجمو لي مدرونجيااه وهي كاتكركر بالضحك وبالسيف شابعة نعاسها ومدوشة يالاه جاهاا تسهر كيتو هو لي وصلات لخمسة ونص دالصباح وعينيه باقي مشافو نعاااس... زول تيشورت وخشى راسو وسط لمخدة مور ماطفى الضو وقطع لحس و سيدرا بدات تاضور عينيها فلبيت وضارت جهتو تاتشوفو شاد نص النموسية وهي قد البقة...تخشات فيه وتاهي غمضات عيوناتها ونعسااات... وغير هبط نعاسها وهي تبدا تاني فداك التكواندو ديالها كل مرة تنزل عليه بدقة مع كيكون ناعس تاكاتنزل عليه كيف السخط...عيى مايگادها ويبعدها عليه وهي راه تگولي تتحارب فنعاسها تاتحرك بزاف وهو درونجى ضار شاف فيها مبوق بالنعاس وعينيه حمرين كاااعي وهي تاتشخر...دفعها تاضارت على جنبها ولاح رجلو مكالى رجليها ويدو مكالي بيها يديها ومع شعرها باقي سارد ومحلول تفرش فوق المخدة وريحة شومبوان ديالو عاطي وبالسيف والبخوشة كابة ليه نص لقرعة.. بدا كيبعد شعرها بيديه تازولو وغمض عينو وهو مكبل ليها يديها ورجليها ماخلات ليه تاحل من غير هادا باش ينعس فراحتو....

ملي فاقت رحيل بدلات حوايجها بحوايح لخروج وجمعات مسائلها وحوايجها عاد خرجات لبيت سيدرا وهي تلقى ناموسيتها خاوية قربات جهتهاا ولقاتها مخربقة وكمشات حجبانها... خرجات تقلب عليها وتلاقات فطريقها نوح غادي لبيت زين العابدين يفيقو...

نوح:(كمش حجبانو)فين سيدرا؟

رحيل:مكيناش فبيتها (بخوف واضح) فين غاتكون مشات؟؟

نوح:غاتكون غير هناا مكاين لاش تخاافي ؟ غانمشي نشوف زين العابدين يقدر تكون عندو

خلاها وكمل طريقو لبيت زين العابدين حلو ودخل بانو ليه ناعسين بزوج وسيدرا حاطة راسها على ضهرو مع كان ناعس على كرشو وخاشي وجهو فالمخدة كيف ديما...تبسم على داك الديكور وقرب جهة لخوامي حلهوم تادخل ضو دسيدي ربي وقال بخشونة:يالاااه فيقو باركة من النعاس الكسالى

تحرك زين العابدين هو لول وحس بتقل فوق ضهرو ونوح قرب جر سيدرا لي حلات عوييناتها معمشين باقي باغا تنعس باسها فحنكها وقال بحنية:يالاه اتاتبيرت إينو نوضي باش نمشيو ياك باغا تلعبي بالتلج (مد يديه وخربق شعر زين أو وجه ليه كلامو) يالاه السبع ديالي توگض معايا

سيدرا:(تخشات فنوح كيف البقة) بابانو فيا نعوسات

نوح:(هزها وتمشى بيها جهة لباب) نغسلو وجهنا وغايمشي نعاس ابابا زين ماتعطلش ربع ساعة ونلقاك واجد باش نتحركو

داها لبيت عند رحيل لي كانت تتسناها وهي مشطونة وغير شافتها ارتاحت...داها لحمام وعطاها شيتة باش تغسل سنيناتها وتبعاتهوم رحيل:واش كانت عند زين العابدين ؟

نوح:وي

غسلات سيدرا سنيناتها وغير شللات وهي ضور عند مها وقالت: مامي لبارح درت بيبي فحويجاتي

رحيل:(كمشات حجبانها) علاش؟

سيدرا:(هزات كتيفاتها) حيت شفت واحد لحاجة خايبة فنعوسات مامي خلعاتني

نوح:(دوز يديه على شعرها) علاش ماجيتيش عندنا؟

سيدرا:كنت غانجي بابانو ولكن شفت زينبيدين ومشيت عندو وغسل ليا مامي

تبسم نوح بلخف على داك التقدم لي دار ولدو مع سيدرا ورحيل قربات جهتها تتعنق فيها وتبوس وداتها باش تبدل حوايجها... لبسو حوايجهوم وكلشي كان واجد نزلو لتحت وجدو حلف عليه مايتحركو تايفطرو وتاهو مابغاش يخسر ليه خاطرو...

فبيت شيماء دخلات عليها مها وهي مكمشة حجبانها واخدة منها موقف على الشوهة لي شوهاتهوم لبارح...مع وصلات جهتها وضربات على يديها لي فيها لفاصمة وقلبها تزعزع بخوف أمومي:مالك فيديك؟؟

شيماء:(هزات فيها عينيها ببرود) تضربت

سكتات ومازادتش دوات ولاقالت لي كاين حيت عارفة مغايتيقوهاش خصوصا مبعد شي لي طرا لبارح غايظنو بلي هادي خطة منها تاني... عضات على شفايفها وداكشي لي طرا معاها لبارح مبغاش يتنسى ليها الرعب لي عاشتو راه كافي يخلي ديك الدكرى ترسخ فدماغهاا...ملي مشى وشافت الدقة بزز باش ناضت ملوية عليها فوطة وخرجات فداك الليل بلاماتعلم حد غادة لوغجونس...طلبات من لگرديان دلحومة يشد ليها الطاكسي ومشات وهي حاسة بالسخفة... مقداش تشوف باقي فالجرحة والفوطة راه ولات حمرا بالدم لي سايل...سعفوها ومن زهرها لوغجونس كان خاوي...غرزو ليها راحة يديها ودارو ليها عشرين غرزة عاد تمات راجعة لرياض وحد مساق ليها خبار...هزات عينيها فمها لي تاتسول فيها كيف تجرحات وهي ناضت بلاماتجاوبها ونزلات لتحت...بان ليها نوح واقف تيسلم مع جدو وخالو لي طلب منو السماحة على ماطرا...وقفات شيماء وغير جات عينيها فزين العابدين وهي تردها بزربة وتبوريشة حسات بيها طالعة معاها... داك السكات ديالو كان حسن بألف مرة من الشي لي شافت لبارح داك لجانب لي مكان غير نقطة فبحر شخصيتو لغير مفهومة...

ضار نوح ولمحها واقفة وعينو مشات ليديها لي دايرة ليها فصمة شادة تال صباعها ورجع عينو شاف فزين العابدين لي كان تيرمقها ببرود قبل مايقلب عينو جهة باه لي شاف فيه بنظرات فهمهوم زين فلبلاصة...

جدو:(شاف فشيماء وفيديها وقال مكمش حجبانو) اشمن موصيبة درتي تاني فداك ليد؟

شيماء:(رجعات يديها ورى ضهرها وبتوتر قالت تاضور عينيها لي مرة مرة يهربو جهة زين) غير تجرحت

سكتو جميع وحد ماتسوق ليها أما هي قربات جهة نوح تاوقفات قدامو وهو مشافش فيها قلب عينو جهة رحيل لي كانت تتخنزر فيها تاسمعاتها قالت:بغيت نطلب منك السماحة انوح على داكشي لي طرا لبارح

نوح:(ببرود) السماحة طلبيها من هاداك لي لحتي عليه لبااطل

شيماء:(سرطات ريقها وبلاماتشوف فزين قالت) سمحليا ازين العابدين

عطاتهوم بالضهر ومشات بزربة لبيتها وهو ودعوهوم وشدو بلاصتهوم بربعة فطوموبيل ونوح علم رحمة بلي ملي يرجعو غايدوزو عليهوم ومشاو...

كان زين العابدين فعالم خاص بيه داير ليزياتو مخلي الريح يطير شعرو الكورلي لمخربق شوية ضار وعينو جات فلمرايا لقدامية لقى باه حاضيه...تبادلو الشوفات فصمت وحوار طويل دايز بناتهوم... وهو متأكد بلي ولدو هو مول لفعلة..

بعد مسافة طويلة ديال الطريق لي استارحو فيها وتغداو وصلو وأخيرا لإفران لي كان جوها زوين والتلج كان طااايح واخا ماشي بحال فيامات لبرد مي حسن من بلاش...خداو زوج بيوت فالأوطيل وسيدرا غاتبقا مع رحيل حيت مغاتهناش عليها...ارتاحو من لعياا دالسفر وفالليل خرجو يتساراو وسيدرا كل مرة منقزة فشي بلاصة باغا تصور... كانت واقفة سيدرا بكبوط بلوغوا وشعرها مطلوق وحنات هزات التلج وضربات بيه زين العابدين لي كان عاطيها بالضهر مع ضار شافها تاتكركر وتنقز ونطقات بحماس:أناا ضربتك أنا ضربتك ههه

شاف فيه شوفة قاصحة ومع خطى لخطوة جهتها غوتات وهربات جهة نوح تاتعيط ليه:بابااانو باباانو

ضار نوح لي كان واقف مع رحيل وهي تخشات حدا رجليه وقالت تاتكركر:أنا ضربت زينبيدين بالتلج

رحيل:(ضحكات)عليها مخشية فباك باش يدافع عليك ههه

سيدرا:(تاضور عوينات لببوشة) هااء بابانو عزيز عليا

نوح:(غمز رحيل) الحاجة لي ماتشبه مولاها حرام

قلبوها ضحك وخداو تصاور وتساراو ورحيل عجبها لحال حيت بدلات لجوو وديك التلتيام لي دوزو تم ماسخاتش بيها تسالي... كانت باغا طول الجلسة مي خصهوم يرجع حيت لعطلة سالات وغاتبدا تاني لقرايا...

كانت تتجمع بگاجهاا وهي تاتنهد مافيها لي يمشي ودغيا دازت تلتيام ماحساتش بيها... حسات بيديه تلواو على خصرها شادينها من كرشهاا وباسها فعنقها تاكمشاتو وقال بخفوت خشن:مال لفتنة ديالي مقلقة؟

رحيل:ماكرهتش نبقاو مزال

نوح:(تايمسد ليها كرشها ونيفو كيتسارا بين ثنايا نحرها وقال بهمس) ماعليش نجيو مرة خرا ونكونو غير أنا وياك اش بان ليك

رحيل:(حطات راسها على كتفو وتكات عليه)واخا إن شاء الله انوحينو

باسها فعنقهاا وبقات واقفة مستحلية يديه لي على كرشها تاخرجات ليهوم سيدرا من الجنب تاهي مسخاتش ترجع ومعاحبها حال...جمعو حوايجهوم وشدو طريق تاني لفاس فين كانت رحمة ونور الهدى كايتسناو وغير وصل نوح خرجو لعندو حيت مكانش باغي يدخل وكملو طريق لمراكش...وصلو مع الليل غير دخلو مشاو نيشان لبيوت ديالهوم وكل واحد تسهط ولعياا دالطريق خلاهوم يطيحو فلبلاصة...

صبح نهار جديد والشميشة نورات سماهاا ولي عندو شي خدمة راه فاق وتيسر ليها...ومع ليوم رجوع لمدرسة فبدات لمعاناة ديال أي أم مور العطلة...واقفة رحيل تتوجد حوايج سيدرا لي مكرهاتش تبقا ناعسة وبزز باش فيقاتهاا مع يالاه رجعو من السفر عياات...لبساتها حوايجها وهزات لكاخطابل ديالها وخرجات وسيدرا تسوليها مالك تبكي مباغاش تمشي... دخلات لجناح باغا تهز تلفونها وهو يبان ليها نوح فايق وباقي مكسل فبلاصتو وشاد التلفون...

رحيل: صباح لخير

نوح:(ببحة صباحية)صباح النور (شاف فسيدرا) علاش فيقتيها؟

رحيل:راه عندها ليكول ليوم نسيتي؟

نوح:(أشار لسيدرا بيديه وهي مشات عندو تاهزها وزول ليها سبرديلة وخشاها حداه وقال بهدوء) عندها ولكن مغاتمشيش تال غدا

رحيل:(حلات عينيها)هااء ولكن علاش راه مبغيتهاش تولف لغيااب؟

نوح:نهار مدا مجاب وزايدون راه عيطت لإدارة وعلمتهوم لاهي لازين العابدين مغايمشيوش يرتاحو ليوم وغدا يتيسرو

رحيل:(حطات لكاخطابل ونطقات وهي معاحبها حال) علمني بعدا وأنا فايقة على نبوري ومافياا لي يفيق

نوح:(تبسم وجرها من حنكهاا وقال بخشونة) ماعليش الفتنة رجعي كملي نعااسك (تحدر شاف فسيدرا لقاها نعسات) هاتانبيرت إينو تاهي نعسات

رحيل:(تبسمات وهي تتزول بنوار وزيفها تابقات بيجامة خفيفة وقصيرة) نعاسة هاديك كتر مني

تقدات فبلاصتها وتحدر نوح باسها فشفتها ورجعو نعسو وهو غير تكى واحد الساعة وناض دوش ولبس عليه حوايجو وخرج مخليهوم يرتاحو من لعياا دالطريق...أما هو كان مولف يشد الطرقان واخا راه فيها تمارة مي لخدمة تنادي... طل على لمحالات وتلاقى بعتمان لي سولو على لبلان لي طلب منو وعلمو نوح بلي فهاد الأيام غايطرقو ليه...شاف السلعة والداخل والخارج وكيف ديما طالع على البونات عاد مشى لميزون دڤواتيغ تاهي ومع دخل لبيروه جاا عندو سعيد هاز واحد لونڤلوب ومدو ليه بتبسيمة:سي السيلماني هاد لونڤلوب ديالك

نوح:(شدو كيشوف فيه وهو مكمش حجبانو كان مكتوب فيه عنوان ديال لميزون دڤواتيغ وسميتو وكنيتو)شكون جابو ؟

سعيد:جابوه من لبوسطة

خلاه سعيد ونوح مشى خدم لماشين دلقهوة ورجع جلس وهز داك لونڤلوب لي كان خفيف باين فيه شي وراق مع حلو هز حجباانو لسماا وعينو تيشوفو فدوك تصاور درحيل لي كانو متنوعين وحدة وهي خارجة من طوموبيلتها حدا واحد لعمارة... والصورة التانية وهي كاتشوف جهة الطريق وتالتة وهي داخلة لعمارة ورابعة واقفة قدام باب لاباخطمون والخامسة فاش تحل لباب وبان إسلام...كان تيقلب فيهوم بملامح ممحية وهز تاني داك لونڤلوب وبانت ليه ورقة جبدها ولقاها مكتوب فيها زوج كلمات بخط اليد عبارة عن "مراتك كاتخونك"

كاتعض فضفارها وتتحرك رجليها مستريسية وعينيها كل مرة يضورو هنا ولهيه... وصاحبتها جالسة قدامها تاتشوف فيها بسكات... عارفة اش بيها داكشي علاش ضربات طم وسكتات شوية بانت ليها ناضت بزربة بحال لاعضاتها لفعة وبقات غادة جايا تاترجع شعرها وتعض فشفايفها معرفاش واش غايكون لونڤلوب وصلو وخايفة الخطة ديالها تفشل ومايشوفوش..

ص: درتي ليا دوخة جلسي اصاحبتي

ميس:(بانفعال) مانقدرش مانقدرش خصني نعرف وااش وصلو وشافهوم ولاضربنااا تمارة على لخوا

ص:ياك سيفطناهوم فلبوسطة وغايكونو وصلو غير هنينا

ميس:وايلا ماوصلوش ولامثلا تلف لونڤلوب؟؟

ص:غايتلف وداك لعنوان لي كتبنااا فيه قد السخط لفايدة ديالو اش؟؟

ميس:(جلسات حداها وقالت بتساؤل)زعمة غايكونو وصلو؟

ص:غايكونو غيرر تهنااي دابا ورخفي النفس ونتي شوية وتموتي

ميس:(بحقد)مغانرخفش هاد النفس ونرتااح تانشوف ديك القح*بة لي خرجات ليا على حياتي وحرماتني من عائلة تاتعدب وعايشة فالجحيييم

ص:كون غير سعفتيني ونسيتي هاادشي لي باغا ديريه وهنيتي مخك

ميس:(شافت فيها بغضب) واش من نيتك ؟ داك تكرفيص لي شفت فلحببس أو وجهي لي مشاا لياا وتشووه ولعداااب لي شفت فاش خرجت ساهل نسااه يااك ؟؟ عمري نسى ماجراا لياا وعمري نسى بلي مي وخويا ماااتو بسباب ديك خيتي لي كملات حياتها وتزوجات عااادي

ص:وهادشي لي باغا ديريه فنظارك غايصدق راجلها زعمة لاشاف دوك تصاور غايتيق بلي بصح تاتخونو ومع واحد كيعرفووه من لعائلة؟؟

ميس: أي راجل كيفما بغا يكون لاشاف مرتو مع شي واحد اخر غايشك ومتأكد بلي راجلها لاشاف التصااور غاادي يدخلو الشك

ص:ماعرفتش بان ليا هادشي محااال يصدق وأنا غير تابعااك وصاف

ميس:نتي ديري لي قلت ليك وحلاوتك غتاخديها غير تهنااي

ص:تت ومبقااتش فالحلاوة وبقاات فراجلها الا دار شي صدااع راه غير داكشي لي عرفت فاس سولت عليه وقلبت عليه كااافي يخليني نعرف بلي السيد بخيروو ومعرووف

ميس:(كاطمع)هانتي گلتيهاا سيد بخيرو علاش لي ماتلعبيش على زوج جواايه وديري واحد لبلان ناااضي ومنها نيت تستاافدي

ص:اش باغا تقصدي؟

ميس: أنا حالفة بحلوفي بلي مغانتهناا تاانخلي ديك لقح*بة طلق وغاندير لي فجهدي ونتي عارفة اش كانقصد وراجل راه واخا يكون يموت عليك راه فالخيااانة يقتلك ومايحنش فيك ولاجاب الله تهنينا منها ديك الساعة خدمي دمااغك وضوري بالسيد ماربما صدق ليك وتزوج بيه

ص:(طلقاتها بضحكة دلقحا*ب تاعينيها دمعو وضرباتها فكتفها) ههههه الله يمسخك ضحكتيني ههه گالت ليك يتزوج بياا واش نسيتي السجل العدلي لي موووسخ وأصلا الزواااج ضربت عليه وهنيت كررري منوو بقاا ليا غير هوو

ميس:هادي هي مشكيلتك مكاتفكريش لقدام وهادشي علاش باقا فبلاصتك

ص: أودي غير خليني فبلاصتي حاضية معاك هااد الروينة لي غاديري نشوفو اخرتها

ميس:متخافيش اخرتها غاتكوون كيف بغيت وكيفما تحرمت من حياتي غانحرمها تاهي من حياتها وغانوريهاا بلي عائلة الجوهري مكتنسااش وكترجع حقها

ص:اهاا وختك؟

ميس:(بفقصة)تاهي گلبوها عليا ومع لقاوها صغيرة كلاو ليها دماغها تاكرهاااتني وكرهات كلشي ولكن مرجوعها لياا وماتنسااايش الدم كيحن

ص:اوا هاحنا غانشوفو

سكتات ميس وعينيها كيشوفو فالحيط قبالتها ساكتة تاتفكر فهاد المعمعة لي باغا دير ولعاافية لي باغا تشعل من جديد فحياة رحيل لي تاتعتايرها غصة فالحلق بااقي لدابا مقدرااش تقبل بلي هادشي لي هي فيه بسبابها هي ماشي رحيل ولاغيرهاا...هي لي غرها الشيطاان وخانت راجلها مع صااحبو وهي لي مكانتش مقدرة النعمة لي كانت بين يديها ورفساتهاا.. فاش تاتفكر أياام زمان تاتحسر على راسهاا وعمرها مغاتنسى كيفاش كاانت عايشة وهي مرات إسلام.. الخير لي كان مغرقهاا فيه والتعاامل لي كلشي كان يحسدها عليه.. داير ليها كي الماا لقليل ولي بغاتها هي لي تكوون.. مكيستخسرش عليها لحاجة وهي منفخة عليه ودافعة عليه كبير... غرها الشيطان وعجبهاا راسها وعند بالها راه واخا دير لي دارت السيد غايبقاا ديما ليهاا...نسات بلي راه لواحد اخا يكون زوين معاك تايعيى غايجي نهاار لي يتقلب فيه عليك وهادشي لي هي مبغاتش تفهمو وتقبلوو.. وزيد مباغاش تشوف أغلاطهاا لي دارت ابتداء من بنتها لي من لحمها ودمها وماحناتش فيهاا ومعطاتهاش حنانتهاا وكانت مخليااها تكبر مع لخدامة بحال الا راها يتيمة ونيت راه كانت يتيمة الأم حيت مها واخا كانت حية مكان عندها فايدة... بسبب نزوتهاا قتلاااتها بدم باارد وماحناااتش فيهاا.. عمرها جلسات مع راسها وحسات بالندامة على مدارت بلعكس باقي زايدة فيه وباقي هازة حقد لإنسانة لي مدارت ليها والو وعمرها قربات ليها بلعكس تاهي راه تضررات من خوها وعمها ومها وهي أكتر واحد لي داااق العدااب ولي من حقها تحقد وتبغي تنتااقم حيت هي لي ضااعت فبزاف دلحواايج... هادشي ميس مبغاتش تقبلو حيت هي إنسانة مريضة بالحقد والكره ولوسط لي كبرات فيه كان عندو دور وهي من نوع دالناس لي قلبهوم كحل وديك لكحولية رااه كاترجع ليهوم هوما وكيأديو بيها نفسهوم هوما لولين وهادشي لي معرفاهش هي..

السكاات كان طاغي فالمكتب من غير صوت أنفااسو لي كانو كيتسمعوو.. كان باقي على جلستو فالكرسي ديالو الطاس دلقهوة لي محطوط جنبو برد دليل على أن بزاف دلوقت داز.. كانو محطوطين قدامو دوك التصاور فوق الطبلة وبين يديه ديك الورقة لي مكتوب فيها ديك الجملة لي خلاتو كيشوف فيها بنظراات ممحية وبملامح ماتعرفي اش مخبيين وراهوم... رجع حول نظراتو لدوك التصاور ومد يديه هز التصويرة لي كانت فيها رحيل هي وإسلام... بقا تيشوف فيها مدة قبل مايهزهوم ببرود وجمعهوم وردهوم لونڤلوب وكحز جنب تبانت ليه الكوفر فور وتحدر حلها بلكود وخشى فيها داك لونڤلوب ورجع سدو وبهدوء كحز لكرسي وشعل البيسي وبدا خدمتو... مدة وهو غارق وسط دوك الضواسى خدام تاسمع الباب دق وهو ينطق ببرود:دخل

تحل الباب وبلامايهز راسو بقا مكمل على خدمتو تاسمع صوت اليازيد لي نطق:السلام أوعليكوم

نوح:(شاف فيه بهدوء)وعليكوم السلام

اليازيد:(جلس فالكرسي وشاف فيه بتبسيمة) الصحيحة لباااس ياك ماجيت فشي وقيتة ونتا مشغول

نوح:(بسخرية)تتبان لياا نااشط وراشقة ليك واقيلا جا معاك الزواج

اليازيد:(ضحك من نيتو) هههه وماكدبتيش الزواج وتاني ولكن مفرحاني حاجة خرا؟

نوح:أما هي؟

اليازيد:لواليدة عيطات لياا وگالت بلي غاتجي فهاد ليامات هي ولواليد بااش نخطبو سنااء وگالت بلي لعرس غانديروه ففااس

نوح:اوا على سلامتك

اليازيد:الله يسلمك واصراحة مغانسااش ليك اولد لحاج هاد لخير عارف بلي الواليدة مايگد عليها حد من غيرك وغير رجعتي من فااس وهي تعيط ليا

نوح:مزيان هادشي لي بغينا

اليازيد:لمهم راه قبل مانجي عندك وصلت سناء لرياض باش تبقاا تم على مانجيو ونخطبوهاا

نوح:(حك لحيتو ونطق بخشونة) مرحباا دار داركووم

اليازيد:الله يكبر بيك المهم نخليك دابا بيناتنا التلفون اولد لحااج

نوح:الله يعاون

مشى ليازيد ورجع نوح تيكمل خدمتو تاوصلات وقيتة دلغدا وهو يجمع مسائلو حيت مغايرجعش مزال وخرج من لميزون دڤواتيغ مور ماوصى محمد طه على لخدمة... ركب فطوموبيلتو وتحرك نيشان لمحال درحيل يمشي يشوف الأوضاع تم وداكشي لي كان غير وصل نزل وعينيه كيتفقدو المحاال لي كاان عامر بلكلياان طلع نيشان لبيرو درحيل لي مسدود وحلو بساروت حيت عندو الدوبل...سمع تلفونو كيصوني ومع جبدو لقاها هي نيت لي تتصوني عليه..أكسبتا الخط وهو يتسمع ليه صوتها لي نطقات بهدوء وحنية:نوحينوو لبااس؟

نوح:(كمش حجبانو وجلس فالكرسي وبتقالة قال) الحمدالله

رحيل:مغاتجيش تغدا؟؟

نوح:تت غانتغدا غير فالزنقة ماتسناونيش

رحيل:أنا غانمشي لعند ماما نطل عليها شحاال هادشي ماشفتهومش وتوحشتهوم

نوح:صافي سيري وسلمي عليهوم

رحيل:مهم مغانديش طوموبيلتي غانمشي غير فطاكسي مبقيتش قادرة نسوگ

نوح:(بخشونة)واخا ردي البال لراسك الفتنة

رحيل:بسلامة

قطع وحط تلفونو فوق بيروها وحل داك الكلاسور لي كان فوق البيرو فيه بزاف دلوراق بويض لبعض منهوم فيه أشكاال ديال شي كسيواات وجاكيطاات... بقا تيشوف فيهوم وتيقلبهوم ولي بانو ليه مزيانين ومكملين حطهوم جنب باش يعطيهوم تاني لسيد لي غايتكلف بلخيااطة... بقا تيقلب تما بين لوراق تاابانت ليه واحد الورقة مرسومة فيه صورتو هو بقلم رصاص... بقا تيشوف فيها وتدقيق باش مرسومة ولتاني مرة كانت رسمااه... حك لحيتو وهز ديك لورقة حطها بوحدهاا وكمل شنو كان تيدير تاسالى وقاد دوك لوراق فواحد لملف وموراها بدا تيڤيريفي لبونات لي كانو محطوطين تم.... قاد ليها الأمور وخرج هازاك لملف لي فيه الوراق ونزل لتحت وقبل مايخرج لاح عينو جهة لاكيس عاد كمل طريقو لبراا ولعقل فيه ميات ألف مطرقة...

أما عند رحيل فلبسات حوايجها ولبسات لسيدرا تاهي لي فاقت شابعة نعااسة وناشطة حيت غاتمشي عند جدهاا وجداها...شدات طاكسي لي وصلهوم تال لباب خلصاتو ونزلات وهي تاتنهج... لقات سيدرا سبقاها تادق بالجهد ومحيداتش يديها من على لباب تااتحل من طرف أسماء لي ضحكات ونطقات:والبوليس ومداااروش هاد الدقاان

سيدرا:(عنقاتها من رجليها)سومة توحشتك أناا

أسماء:عليها كاتسولي فياا البخوشة

رحيل:خليونا ندخلو بلامانبقاو واقفين فلباب

أسماء:على هاد لبخوشة خلاتنا نعقلو على شي حاجة ههه

دخلو مبعد ماتسالمو ويالاه جات أسماء تسد لباب وهي تبان ليها طوموبيل إسلام وقفات قدام الدار...

تبسيمة لي كانت على وجه أسماء تمحات وهي تاتشوفو نازل من طوموبيلتو بسروال دجين كحل مع قميجة نفس اللون وجاكيط خفيفة تاهي كحلة...بقات تاتشوف فيه بهدوء وهو جاي جهتها تايطلعها وينزلها بنظراتو لي بان فيهوم الاشتياق... وصل قدامها ونطق بهدوء:صافا

أسماء:حمدلله ونتا؟

إسلام:صافا صافا

خوات ليه الطريق وهو دخل... زفرات النفس وسدات الباب تابعاه لقات رحيل جالسة مجمعة مع مها وضاحكة غير شافتو وهي تجمع الضحكة وقلبات عينيها بنظرة مفرووطة وشافها إسلام وفهم اش كااين... سلم مع تانيرت ورحيل غير من بعيد گال ليها السلام وهي بزز باش ردات ديك وعليكوم السلام...باقي مانسات لكلام لي خرج من فمو وداك الاتهام لي تااهم بيه ختهاا...

سيدرا:إسلامي (عنقاتو) فين كنتي؟

إسلام:(مجلسها فوق ركبتو ونطق بحنية)كنت فلخدمة اخنفوستي

كان مبسم وعينو باينة فيهوم لحنية ديك الحنية لي كانت صفة من صفات إسلام دشحال هادي...يمكن الشخص لوحيد لي تايبين ليه ديك الحنية هي سيدرا... شاف فأسماء:نقدو ندويو؟

حركات راسها باه وناضت وتاهو ناض تبعها طالعين لفوق وعيون كل من رحيل وتانيرت تابعينهوم تاغبرو وهي تنطق تانيرت بتنهيدة:عالله يصفاو لخواطر ويرجعو كيف كانو

رحيل:نتمناو غانمشي لطواليط ونجي

مشات رحيل وسيدرا جات عند تانيرت وجلسات فوق ركابيها ونطقات ببرائة:عرفتي تانيرت إينو داك نهاريات أنا درت بيبي فحويجاتي وزينبيدين دوش ليا

كمشات تانيرت حجبانها فاش سمعات اش گالت وسولاتها:على فين كانت ماماك؟

سيدرا:مامي كانت ناعسة

بدات تتعاود ليها كلشي وتانيرت باين من ملامح وجهها معاحبها حال... وغير شافت رحيل رجعات وهي تصدر سيدرا وضارت عند رحيل ونطقات بجدية:لهضرة لي گالت سيدرا صحيحة ؟

رحيل:اش گالت؟

تانيرت:گالت ليا دوش لياا زين العابدين ؟

رحيل:اه داك النهار ففاس بالت فحوايجها ودوش ليها

تانيرت:(حمرات فيها الشوفة) وفينك نتيا وعلاش تخليه يدوش ليها ارحيل واش ابنتي عندك لعقل

رحيل:علاش اماما اش فيها

تانيرت:اش فيها فيها بزاااف بنتك تبارك الله بدات تكبر مابقاتش صغيرة وزايدون كانت مولفة ندوشو ليها حنا خوالها بزوج وباك وهادشي عادي ولكن لبراني يدوش لا ابنتي سمعي ارحيل عارفة بلي نتي ماقصدتي والو ولكن خصك تعرفي بلي لوقت خياابت والتقة راه مبقاتش ماهضرتش على زين العابدين راه باين ولد من ولكن تاندوي على لبراااني ابنتي وتالي قريب ليك راه خصك تخافي منو حيت هاد الزمان ولى يخلع شوفي غير تلفونات وشنو تاتلقاي فيهوم ولاد صغاار كيغتاااصبوهووم كاين لي من عائلتهوم وكاين لبراني... سيدرا دابا راه مبقاتش صغيرة وماخصش تبقا تحاااك مع لي كاان خصك تعلميها هادشي يمكن غلطنا حيت فاش كانت صغيرة فششناها وماعلمناهااش هادشي تاولات تاتعتابرو عادي ولكن خصنا من ليوم ندويو معاها ونفهموهاا بلي حشومة تولي تعراا عند شي حد ولاشي واحد يشوفها عريانة نوعيوها من الصغر باش تعرف لي كاااين ونيت ابنتي راه لا زين العابدين ولاغيرو مامنحقوش يشوفها عرياانة حيت مكتجيه والو

رحيل:(بصدق) أنا عارفة هادشي وفاش گالتها ليا مادققتش فالموضوع حيت عارف زين اش كيسوى داكشي علاش وأصلا دري مكيعطيهاش گاع وقت

تانيرت: عارفة ابنتي نتي مافكرتيش فهادشي ولكن خصك تفكري فيه دابا البنت بدات تتكبر حلي عين وسدي عين اتلقايها مشاء الله بلغات وغايوليو مفاتينهااا يباانو وخص تسترهوووم على لبراني وحتى على لي من محارمهاا راه السترة زوينة وهادشي لي خصنا نعلموهاا باش مانلقاوش معاها مشكيل ونيت تاهي تعرف اش كاااين مع تباركالله هي اجتماعية ودغيا كادير بلاصتها فخصك تخافي عليهاا وهاد الهضرة ماشي غير على سيدرا لي بنت ولالبنات بصفة عامة تادراري راه لوقت خيااابت ولواحد ياخد احتيطاتو باش مايندمش فلخر

سكتات تانيرت ورحيل بدات تاتفكر فكلام مها لي على صواب هي مافكراتش بهاد لمنظور حيت ملي كانت سيدرا صغيرة وهي مولفة يدوشو ليها ريان ومحمد ولكن دابا راه لبنت بدات تكبر وكيف قالت ليها تانيرت خص تولي تعرف حدود لكل حاجة واخا هادشي تايخص الأم تزرعو فولادها من الصغر حيت لحاجة لي كيكبرو عليها لوليدات تايبقاو واخدينها فحياتهوم قاعدة ولولاد فاش كيتزادو راه تيكونو صفحة بيضاا والأم والأب هوما لي كيرسمو ويتفننو فديك الصفحة عليها دائما خص الواليدين مايتهاونوش فهاد الموضوع ويديروه بناقص ويگولو وادابا يكبر ويعرف لا من صغر علمو لحاجة الخايبة من الصحيحة حيت كلما علمتيه فالصغر كلما شد بزربة ومغاتلقاش معاه مشكيل... زائد لوليدات الصغار خص نفقهوهوم ونوريوهوم بلي كاين بعض لحوايج لي خاصين بيهوم وماخص تاواحد يقرب ليهوم بحال المناطق الحساسة باش يتعلمو ويكونو على دراية بكلشي...بقات رحيل جالسة تاتخمم وكلام مها خلاها تشوف شحاال من حوايج كانت غافلة عليهوم...

طاح الظلام وعمرات تاني دار سي إدريس لي كان هاد التجمع تيفرحو وينغمو فاش كيشوفو ولادو مجموعين عندو.... وقفات طوموبيل نوح برا الدار ونزل منهاا بحوايج سبور وكاسكيط ومن شعرو لي تيبان تحت لكاسكيط باين يالاه مدوش وعينيه كانو حمرين حيت يالاه فايق من النعاس ومع عيط لرحيل وعرفها باقي هنا جاي باش يديها...دق لباب وبقا داير يديه فجياب الجاكيط كيتسنى الباب يتحل وماهي إلا دقائق وتحل لباب من طرف إسلام...

تبسم إسلام ومد يديه باش يسلم مع نوح لي بدورو تبسم ليه وسلم معاه بهدوء وكحز جنب باش يدخل...

إسلام:اش خبار العائلة اولد لحاج

نوح:حمدلله ونتا كلشي مزيان

إسلام:هاد الساعة نحمدو الله ونشكروه

دخلو لصالة فين كانو مجموعين كاملين وعينو أول شخص لمحات هي رحيل لي كانت متكية فسداري بعيد ومغطية بكاشة خفيفة وسادة عينيها...النعسة كانت معدبة حيت كانت جالسة ماشي ناعسة على ضهرها...لقى السلام وهي ماحلاتش عينيها شي لي خلاه يعرف راها نعسات...ناض إدريس سلم على نوح بالتعانق وتبسيمة على شفايفو تيرحب بيه... كان مدة مشافوش مع كل واحد فيهوم تشغل بلخدمة ومشاغل الحيااة... جلس نوح جنب إدريس ونطق بتبسيمة حفيفة:اوا اسي إدريس صحيحة بخير

إدريس:حمدلله اولد لحاج على سلامتكوم كيف خليتو مالين فاس

نوح:بخير ناسها راه تاهوما كل واحد فين غارق

إدريس:اوا بعدا بدلتي الجو شوية هاد هو لمهم

نوح:(ربت على ركبتو ونطق بهدوء) شي نهار إن شاء الله ونديرو شي تسافيرة مجموعين شبان ليك؟

إدريس:الله ياودي مرحباا

نوح:(بجدية) نطلعو لعيد لكبير لتارودانت اش بان ليك ونعيدو تماا؟؟

إدريس:ههه واهدا عليا نشوفو بعدا الدراري واش غايكون مسالين

نوح:(شاف جهة رحيل وقال بهدوء) غاتكون رحييل باقي ماولدات نمشيو شي سيمانة ولاخمسطاش ليوم

إسلام:(نطق مشاركهوم لحديت) اييه الصراحة بلان ناضي اعمي إدريس ونيت نمشيو نزورو البلاد ديال خالتي تانيرت

تانيرت:(بعشق) لبلااد زوينة وفيها لخضورية وراحة لباال ماشي بحاال هنا الامشيتو وزرتوهاا غاتعجبكوم بزاف وماتسخاوش تجيو منهاا

كان ريان مكسل وساكت مباغيش يدوي وهو أكتر واحد كان فرحان بالاقتراح لي اقتارحوو حيت مسلكو ونيت غايكون قريب من بيساان وهادشي لي باغيه هو... كان عندو فضول يسول ولد لحاج على الموضوع لي متعلق بيه ولكن فضل يخلي الأمور كيف هي غادة بااش مايصدقش مزبلها بينو وبين نسيبو لمستقبلي...

أما رحيل فكانت ميتة ماشي غير ناعسة داك لهضرة لي ضايرة بناتهوم مافيقاتهاش وبلاصتها ماتحركاتش منهاا تگولي منعساتش عاام... كان كل مرة نوح يهز عينو يشوف فيها ويرجع يكمل هضرتو معاهوم...

فالكوزينة كانت تانيرت مشمرة على يديها توجد لعشا دنسابها بزوج لي غايتعشاو عندهوم ورنيم معاوناها أما أسماء فكانو عاطينها غير داكشي لي خفيف وجلسات بعقل مرفووع تاتفكر فحديتها مع إسلام...

🔙🔙

طلعات هي وياه لفوق ونيشان لسطح فين كانو دايرين جليسة خفيفة زوينة تاتشرح القلب... جلسات فالكرسي وهو مقابل معاها فهدوء تاكسرو إسلام لي قال:غدا عندك كونطرول مع طبيبة؟

أسماء:(هزات حجبانها) عارفة وأصلا كنت غانمشي

إسلام:(كمش حجبانو معاجبو حال)بلابياا؟

أسماء:(تنهدات من القلب وقالت بكل اختصار) إسلام مغنافقكش وغانقول ليك من لخر بلي هاد لحال طلع ليا فراسي فلول كنت تانقول ماعليش اأسماء هادشي لي واقع دغيا غايفوت كنت كانعطيك عدر حيت عارفة راسي غلطت ولكن ماشفتيش بلي نتااا زدتي فيه بزااف؟ مكاتشوفش بلي قلبك قصح من لحجر؟ نهار جيتي عندي وگلتي لياا نرجع عقلتي على كلامك؟؟ خصني وقت باش نسى واش نتا عمرك حاولتي تنسى؟؟ واش عمرك درتي مجهود؟ لا حيت الموضوع مكيهمكش وأنا مكنهمكش عليها نتا باقي هاز خناافرك لسماا علاش بالسلامة اش درت واااش شتيني معاااه فوسط لفراااش

إسلام:(ضرب الطبلة ونطق مغدد) أسماااء زمي فمك

أسماء:(بسخرية)علااش غانزمو واش حيت تانقول لحق؟ كنت ساكتة وميكت حيت كنت عارفة بلي ردة فعلك طبيعية ولكن گلت مع لوقت السيد غاينسى وغايبرد غايجي ونجلسو أطابل وبلفعل جيتي وقلتي ديك الهضرة لي خلاتني نفكر فيها ونگول ااه واخا من حقو لوقت زوين لينا بزوج باش نساو الهضرة لي جرحنا بيها بعضياتناا ولكن فلخر لقيت بلي نتا مادرتي تامجهوود قد هاكا (جمعات سبابتها مع لوسطى وقالت بحرقة) بلعكس ماتسوقتيش وهادشي وراني قيمتي عندك ماشي دنبي أنك عشتي تجربة فاشلة وخلات ليك واحد الاتر فحياتك لي وليت نخلصوو وتتقارني مع وحدة ماتسواااش صببع رجلي (كملات بحدة) راه لاكنت باغا نديرهاا مكنت گاع نتزووح بيك وكنت غانعيش حياااتي مبرعة مع مخي مكاااين لي يحبسني عاايشة لاڤي لي عمري خبيتها عليك ياااك شفتيني كيف كنت عايشة واش عمري حشمت منك؟ لا حيت أنا ماشي كدابة ولغدر والخيانة مكيمشيوش فدمي بحااال ديك خيتي (ركزات فكيفاش كان جامع قبضة يديه طالعة ليه) تعصبتي هادشي لي بغيت تعصب وتمشي تشوف راسك وتراجعو وتصالح مع داتك وتقبل أغلاطك حيت أنا عارفة راسي حمدلله ومتقبلاهوم وعمري نكرت ولاكدبت...

زفرات أسماء النفس ونطقات بهدوء مبعد ماخرجات داكشي لي كانت كبتااه:نتا قلتي بغيتي وقت وعطيتو ليك ودابا أنا لي غانقول ليك بلي بغيت وقتي أنا مباغاش نعصب راسي ونضيع أحلى أيام فعمري باغا نحس بكل لحظة دلحمل ونعيشها بفرحة ماشي تنكدها عليا وهادشي غانعيشو وأنا فدار بّا وراحتي كاينة هناا ماعرفتش شحاال دلوقت غناخد ولكن لي عارفااه بلي هاد لقرار ماخديتو عن عبط وفكرت فيه مزياان...

أيام لي دوزاتهوم هنا فدار باه كانو بالنسبة ليها بحال جلسة استرخاء خلاتها تهدن وتشوف الأمور بمنظور اخر... الراحة هي لي كاتقلب عليها أسماء ولقاتها فدار باها وهادشي علاش قررات أنها تبقى هناا ودوز فترة حملهاا تمتع بلحظاتها كيف قالت ليه...مبغاش دوز حملها فالغبينة هي عارفة راسها ماغلطاتش إدا مغاتمرضش راسها... هو لي فيه ديفو وهو لي خصو يعالج راسو عاد ديك الساعة تكون هضرة خرى أما دابا غايبقاو فنفس النقطة ومغايزيدوش القدام وغايمرضو راسهوم وهادشي هي مبغااتوش... ملي طلقات ليه لي ففمها بقا غير تيشوف فيها وهو حاس بالعصبية والصدمة من كلامهاا...معصب حيت جبدات ليه داك الضوسي الكحل لي باغي ينساه ومصدوم حيت هي خدات قرار لبعااد لمدة وماسولات تااعلى رأيو...جات صرفقاتو بكلامها وبقات تاتشوف فيه بهدوء تاقال: أسماء عطيتك وقت ترتااحي مكتشوفيش راسك زدتي فيه

أسماء:زدت فيه ومن حقي حيت نهار عطيتك وقت وقبلت بهضرتك شفت حوايج لي خلاوني دابا ناخد قرار وانا عارفة راسي مغاندمش عليه...بغيتي تقبلو مرحبا مابغيتيش نتاااحر مغانفرضش رأي عليك لي عندي قلتو

ناضت مخلياه أمام الأمر الواقع مكاينش لاهاا ولاهاا جاتو من لخر قبل ماقبلش تيبقا شغلو... بقا جالس ساهي معجبوش كلامها وقرارها وفنفس لوقت تيفكر فهضرة مو لي قالت ليه وعقلو مباغيش يدير هدنة...

🔜🔜

كان كل واحد فالصالة نايض يقضي شي شغل تابقا غير نوح لي نااض مقرب ليها ولقاها معوجة راسها وحالة فمها وشعرها كيبان من جناب الزيف لي بدا يزهق ليها شوية... مد إبهامو ولامس ليه حنكهاا لي كانو سخوون وسمح لإبهامو يتسارا على وجهها تابدات تاتنزاعج وجفونها بداو يتحركو وشوية حلاتهوم وضارت شافت فيه وهي مبوقة بالنعاس نطقات بصوت خافت مبحوح:نووح

نوح:(بهمس خشن) لفتناه علاش ناعسة هنا؟

رحيل:(تاتجبد يديها لي حسات بيهوم تشنجو وحنكها لي تكات بيه على لمخدة طببع ليها) كنت متفرجة تاعيني داتني

نوح:نمشيو؟

رحيل:(حطات راسها على كتفو وقالت بخفوت) تت ماما دايرة بحسابنا فلعشاا وزيد بابا مغاديش يخلينا نمشيو دابا

بقا تايلعب بصبعو فحنكهاا وديك السخونية والرطوبية عجباتو.. نزل باسهاا فيه وبدا تينزل ببوسات تاوصل دقنهاا وقال منيم فيها عينو: كاتخرجينا على طوعنا الفتنة

تخشات فيه ومكرهاتش تكمل داك النعسة وريحتو لي مخلطة مع لبندوش نغماتهاا.. دخلات أسماء لي غير ضربات على ديكور وهي تمرگ وقلبات الضورة... ولكن مغاتنكرش بلي عجبوهاا بزوج وكتبان بناتهوم واحد لكيمياا متناغمة...

رجعات الصالة عمرات وكل واحد تيدوي مع شي حد تاتحط لعشاا وتجمعو عليه موراها مشات رحيل ونوح حيت سيدرا غاتقراا...

الأيام كادوز ومعاها عمرنا تايطير... سيمانة دازت فروتين عاادي ولاجديد فيه من غير الخطبة ديال سنااء لي غاتكون ليوم بشكل رسمي... مبعد ماطلعات طامو خنافرها لسماا هاهي فلخر هبطاتهوم وجات من فاس باش تخطبهاا... فاش جلسات مع راسها لقات بلي هي لخاسرة وبلي اليازيد داتو لمرا ومكان عندها تاحل وتاهضرة نوح قرصاتهاا...

الرياض كان كيف عادتو عامر بالتريتور لي جا ينضي كلشي من a تال z ورحمة غير تتوريهوم اش يديرو وصاف... وبحكم أنهم ديجا مزوجين فقررو يديرو خطبة فيها لعائلة لمقربة هنا فمراكش والعرس لكبير غايكون مور سيمانة ففاس ولي تكلفات بيه طامو وراجلهاا...

كاتقاد لمسات لمك اب لراسها وغير سالات لبسات قفطانها لي كان فالصومو وقدات شعرها لي بوكلاتو واكتفت بلوك بسيط باش فلعرس تقل... كانت حاسة بالنشوة دالانتصار حيت طامو هبطات خنافرها لسماا بلاماترغبها كيف كانت باغا طامو... هزات جلايلها وخرجات عند بيساان لي كانت تاهي فبيتها تتوجد راسها غير شافتها وهي ضحك:لعروسة جايا عندي بنفسها

سناء:ههه واشفتي تواضع ديالي معاك

بيسان:اوا الالة ماعليكش ههه هاكا نبغيك

سناء:نمشي نشوف فين وصلو فتوجاد ونتي سربي راه قربو يجيو

خرجات ونزلات لتحت تفقد الأمور ولقات كلشي هو هداك وفالصالة لي غايجلسو فيها النسا كانت رحمة تاتوري لبنت شنو دير تاوقفات عليها سناء وقالت:باقي مساليتو

رحمة:اش منزلك نتي لهنا

سناء:جيت نشوف فين وصلتو (ضارت تاتشوف نور لهدى جايا وقالت بخفوت) درتي مزال لي فرااسك مزال..

ميقات فيها رحمة فاش فهمات مقصودها وقلبات وجهها جهة نور مبسمة ليها وتالخرا بدلاتها تبسيمة حشمانة...كانت ناوية تمشي فديك السيمانة ولكن رحمة اصرت تبقا تادوز الخطبة حيت مجاتش ماتعرضهااش وهي صراحة مقصدات والو حيت من اخر هضرة ضارت بينها وبين نوح جمعات وطوات داكشي لي كانت ناوية ديرو والشيطان كان تيغرهاا ولكن دابا هزات يديها ومبقات باغا تخسر ولدها لي باقي لدابا داير بوجهها ومحتارمهاا وهي عارفااه لامشى تاكعى بربي لاعاود شافت كمارتو...

وصلو الضياف ومنهوم عائلة رحيل لي استقبلهوم نوح لي كان متميز بلبلدي فوقية خليجية مع صندالة دالجلد تاهي من الستيل لي كيلبسو الخليجين والروايح دلعود كيتشمو من بعيد... تحلفي عليه شي خليجي..رافق الرجال والنسا راه كملو طريقهوم لصالة التانية.... كانت رحيل نازلة وهي لابسة قفطان فالكحل مع فولار مناسب لون سفيفة ولعقاايد.. كانت مكحلة لعوينات تاابانو يلمعو ودايرة عكر نيود فقط... عارفة راسها تعطلات بزااف وبلي كلشي غايكون جااا... تامن نوح مع لبس نزل ومعاودش شافتو ومقلباتش عليه حيت عرفاه مع الرجال...دخلات لصالة وبدات تتسلم وتبوس تاسخفت وعياات عاد جاها لفرج وجلسات ترتاح...

كانت طامو جاايا وهي مهدنة تاتشوف فسناء بنص عين ولخرى تگول واش عبراتهاا بلعكس ضاحكة وناشطة لمهم لي بغاتو راه وصلاتو... كلشي تقريبا جاا من عائلة رحمة من غير شيمااء لي ماخلاهاش جدهاا تجي من لفعلة لي دارت حلف عليها لاعتباتهاا معاهوم وأصلا هي مكانتش غاتاحاول تجي حيت حلف نوح لاعاود حطات رجليها هناا وهي عارفااه مع لفعلة لي دارت غايجبد ليها لقديم والجديد وزيد كانت خايفة من زين العابدين والاحتكاك بيه من الفعلة لي دار ولي لدابا كلما شافت فيديها تتفكر ديك الخلعة لي دوزات والرعب لي عاشت فديك الليلة... كانو جايبين حوايج الصداق والدهب وأي حاجة تبغيها تلقايها تم...كبر بيها وهادشي عجبها خصوصا أنه مقالهاش ليها وجاب ليها على دوقو لي ديما كيعجبهاا... صندوقة دهب فيها خاتم دزواج اخر من غير هاداك لي لبسهاا... ناضت طامو مور ماصونى عليها اليازيد هضرات معاه شوية برا عاد رجعات وقربات جهة داك الصندوق هزاتو وجابتو جهة سناء لي خواو ليها النسا بلاصة تاجلست حداها وقالت ولحروف تايخرجو من لفم بزز منها: ولدي اليازيد مايقدرش يدخل لعند النسا باش يلبسك الخاتم عليها أنا غانلبسو ليك

هزاتو وسناء عطاتها يديها تالبساتو ليها ولبساتها تاداك لگرميط لي جايبة وداكشي لاخر خلاتو فبلاصتو وسناء تتشوف فالخاتم حمقها... طلقو النسا الزغارت وشعلو لبااف وناضو يشطحو ويتحيرو ورحيل جالسة وسط مها أسماء ورنيم وعينيها على ديك لي تاتشطح ماكرهاتش تنوض ساعة دارها التقل... بدات غير تتحرك فبلاصتهاا تاشافت سيدرا جايا تاتجري وقالت ليها بحماس:مامي اجي شطحي معايا؟

رحيل:مانقدش امامي موموبات غايمرضو

سيدرا:بغيت نشطح

رحيل:شطحي هنا يالاه امامي

بدات تتلوز لبخوشة وتقلد فالنسا وضرب شعرها وگاع لي تعلماتو من مها وداكشي لي تاتشوف طبقاتو...شادة ليها رحيل يديها ومع لهيت بدات تحرك راسها ورحيل تاتموت بالضحك...

سيدرا:(شافت فرحيل تاضحك ونطقات تاتقلد داكشي لي تتسمع فالأغنية) امامي شي شطيحة الله يعطيك الصحيحة حركي لينا ديك الزكيكة هههه

بدات تكركر وتنقز وتگول واش عيات ورحيل

شوية وتولد فبلاصتها بقوة الضحك لي ضحكاتو...أما الرجال كانو مهنينين وعايشين فعالم خاص بيهوم وجو اخر عندهوم وريحة لبخور مع صواني دأتاي لي تيتفرقو ولحلوى وضحكهوم كيتسمع ملين وملين مع صوتهوم حرش ومدعدع مكاين غير الله يعطيك الصحيحة...

زهاو النسا وفوجوو وبردو لغدايد وجلسو يشربو فأتاي وياكلو لحلوى ورحيل ناضت غادة لطواليط حيت تزيرات طلعات لجناحها قضات حاجتها وطرفات حالتها ومع خرجات تصدفات مع نوح محني على المجر تايقلب على الشارجور هز عينو فاش سمع لحس وبانت ليه واقفة تتشوف فيه بدوك لعوينات لي تايفتنوه... كانو مكحلين وزادوه فتنة على فتنة...تقاد فوقفتو وقرب جهتها تايناضرها بعيون النسر تاوقف قدامها وحط يدو على حنكها وقال بخشونة:ناوية تخليني واقيلا نقلب جد بوها هاد الخطبة ؟

رحيل:(فهمات اش قصد وقالت بخفوت تادلع عليه) وراه غير نساا انوح وزايدون كلشي داير لكحول؟

نوح:(قرب وجهو جهتها ونطق بصوت قاصح وتقيل)نتي لي تتهميني ومانبغي تاعيين تفتن بيك مسحيهوم الله يرضي عليك

رحيل:(مبغاتش تشد لغنان)واخا

مشات تتمسحهوم واخا هاكا باقي لاطراس باين دلكحول حيت مكيمشيش...ضارت شافت فيه وقالت بصوت محلون:مزيان دابا انوحينوو

شدها من حناكها وعينو مفيكسين على عيونها بصوت خشن دو بحة رجولية قال:تاهت عُيونِي في بُحُور عُيونِها وأختار قلبي أن يغوص فيغرق... أوَّاهُ من رمشٍ أحاط بعينها سهم توغَّلَ في الوريد فمزَّقَ..

عينيها كانو تيلمعو وهي تاتسمع لداك الغزل لي كاان تيروي روحهاا وتيخليها تنتااعش... قلبها تيقفز من بلاصتو باغي يحتاضنو بقوة... سبق ليها وقرات هاد الشعر مراات عديدة ولكن فاش سمعااتو من فمو بصوتو لي كاان ذو بحة خشنة رجولية كان ليه طعم آخر... تبسمات من أعمااق قلبها وبكل جرئة تهزات وحطات شفايفها على دياولو وتاهو ماعطلهاش فلبلاصة شدها تيبوس فشفايفهاا باشتيااق باش يختم قبلتهاا بعضة دلغدايد... بعد عليها وخيط الريق دايز بناتهوم... طبع قبلة على جبهتها وشاف فيها بهدوء:ماتبقاايش طلعي بزاف فالدروج

رحيل:غير جيت لطواليط وصاف

نوح:عطاا الله طواليطات لتحت سيري لبيرو ديالي راه فيه طواليط (مد سوارتو لي كاينين فالجيب وخدا منهوم ساروت ديال البيرو وعطاه ليها) هاكي خليه عندك

شداتها وتبسمات ليه ونطقات:أناا غانمشي دابا

سبقاتو وهي مبسمة تاوصلات لتحت وبقات جالسة مع النسا... المناسبة دازت زوينة بزااف وسنااء عجبها الحال حيت فرحات براسهاا... سيفط ليها ليازيد مساج باغي يشوفهاا وهي ناضت هازة جلايلهاا وخرجات تاتقلب عليه وهو غير شافها عينو لمعوو قلوبة وعض على شفتو وهو حاضيها تاقربات جهتو ونطق بغزل:واتيتي لقفطان مابيل

سناء:عارفة

اليازيد:(شد يديها وباسهاا وماكرهش يتعمق فشفايفها ساعة المكان ممساعفوش) كون تعرفي شحال توحشتك خليتي عليا الدار خاوية

سناء:هادشي لي باغاا باش توحشني نيت

اليازيد:عجبك الخاتم

سناء:حليلو وتاداكشي لي جبتي لياا عجبني

اليازيد:(باسها تاني فحنكها) تستاهلي ماكتر مابيل

***

دازت الخطبة زوينة وتوداعو العائلات بزوج وتافقو يتلاقاو فالعرس مور سيمانة ففاس...كلشي دخل لبيتو يرتاح ونوح توجه نيشان لبيت رحمة دق لباب تاسمع صوتها عاد دخل لقاها مخشية فبلاصتها على استعداد تنعس... تبسمات ليه وهو قرب جهتهاا وجلس جنبهاا درعها وقال بهدوء:خديتي دواك ايمّا

رحمة:خديتو ولقيتيني غانعس داباا

نوح:بغيت ندوي معاك فواحد لموضوع قبل ماتنعسي

رحمة:خبار الخيرر اولدي

نوح:لموضوع عندو علاقة ببيسان

رحمة:(كمشات حجبانها)بيسان شنو مالها؟

نوح:جاوها لخطااب

رحمة:(بتفاجأ)بصح؟؟ شكوون واش شي حد كانعرفوه؟

نوح:(حرك راسو) اه تانعرفوه ومن عائلتناا لقريبة؟

رحمة:شكون؟

نوح: ولد سي إدريس ريان

رحمة:(هزات حجبانها ونطقات بصوت باين فيه عدم تصديق) هااء وااش باغي تقصد خو رحيل؟؟

نوح:اااه هو جا عندي لبيرو وطلبها مبدأيا وباقي لدابا ماعلمتش بيسان

رحمة:(كمشات لحجبان) هي محااال واش اتقبل

نوح:(هز حاجبو فيها) علااش؟

رحمة:(تداركات لموضوع وقالت) زعمة حيت تيبانو مختالفين على بعضياتهوم وصاف وزيد شوف واااش غايتفاهمو؟

نوح:(مسح على لحيتو) السيد جاا قصدني وطلبها من عندي وأنا مغانرضوش ايمّا حيت باين فيه ولد النااس وماشي شي حد براني لي تخافي منو وترفضيه

رحمة:ماعرفتش غير تانگول هاد لهضرة وصاف اولدي

نوح:لكلام راه واضح ايمّا الزواج ماشي لعب يادلي وحنا راه عارفين نفرقو بين ولاد الناس أو ولاد لحرام راه كون شفت فيه قد هاكا معجباتنيش راه من لول غانرفضو من الدقة لولة ومغانجيش ونجلس دابا حداك ونگول ليك لي كااين

رحمة:نتا تعرف اولدي لاكنتي تاتشوفو منااسب مرحبا بيه

نوح:لمهم غانمشي نعلم بيسان تصبحي على خير ايمّا

باس راسها وخرج وهي دغياا تحدرات وهزات تلفونها فوق الكووان ودوزات لخط لسناء وغير قالت ألو وهي تجاوبها رحمة:اجي عندي

قطعات وفي ساع جاات عندها سناء وهي مخلوعة وغير شافتها بصحيحتهاا ومابيها والو وهي تقول:خلعتيني اش باغا

رحمة:(نطقات وهي معاجبها حال) عتيقي نوح قبيلة جاا عندي وقال ليا راه ريان طلب يد بيسان لزواج

سناء:(بعفوية) هااء واش لمسخوط دارهاا مزال

رحمة:(خنزرات فيها وقالت معصبة) واااش نتي كنتي عااارفة؟؟؟

سرطات سناء لسانها وندمات لاش دوات خصوصا هي عارفة ختها متعصبة فموضوع رحيل وزادها دابا خوهاا كملات لباهية... قربات سناء وجلسات حداا ختها فالجنب وشافت فيها بهدوء:دابا مالك معصبة ؟

رحمة:ماتلفيش لياا لهضرة وگولي ليا واش نتي كنتي عارفة؟؟

سناء: اييه كنت عارفة حيت أصلا بنتك كانت تادوي معاه

جاتها سناء نيشان وهي عارفة بلي ختها مغاترتااح تااتسمع لي كاين وتاهي ماعطلاتهاش ليهاا..

رحمة:(بصدمة ) بلاتي بلاتي ماتگوليش ليهاا هو نفسو دااك الشمكاار لي كنت گلت ليك راه صونى عليها وبدا يخسر فلهضرة

سناء:همم

رحمة:(لاحت لغطا وناضت مغددة) لا لا بااين لعربون السيد گالس يسب تگولي عايش فزريبة

سناء:(ميقاا)تانتي زعمة رجلاتنا مكيسبوش راه تاهوما فمهوم خاسر

رحمة: ماتكوليش هاد لهضرة وتعطيه فعدر سمعي اسناء أنا معاجبنيش هااد الشي وزيد هو ممناسبش لبنتي

سناء:وعلاش شنو مشكيلتو؟

رحمة:(بنرفزة) هاكاك معاجبنيش واااش بزز نبغيه

سناء:بنتي ليا غير تتخربقي نعسي وارتااحي وديك السااعة يكون خير بونوي

مشات سناء وهي عارفة بلي ختهاا غاتبقا تعاود فنفس الموضوع وتشد فيه ولي زاد خلاها تنفرو هو داك لابيل فاش سمعات تخسار لهضرة وطريقة باش تيدوي... رجعات تخشات فبلاصتها وهي مكمشة حجبانها وتتسنى غير يصبح الصباح وتشد بنتها وتعطيها زوج هضرات باااش تعرف اش كااين...

***

فبيت بيسان لي كانت ليوم كونجي تاتستارح من تمارة ديال السيمانة لي شدات لاكارد بالليل... تاتخربق فتلفونها تاسمعات صوت نوح لي حل لباب وعييط ليهاا وهي ضورات وجهها جهتو وقاالت بتبسيمة:أنا هنااا

دخل عندها غامزها وقال:مناعسااش

بيسان:تت راك عارف ولفت السهير هاد السيمانة هههه

نوح:(تخشى جهتها وحل يديه تانعسات على دراعو وقال بهدوء) كيغادى مع الخدمة؟

بيسان:صافا حمدلله نفس الروتين راك عارف

نوح:ماعليش قريب وتمشي لكابيني ديالك ونيت تبدلي الروتين

بيسان:صراحة متشوقة (شتفت فيه بتبسيمة) نهار لول لياا غانفتاتحوو بيك نتا

نوح:(كمش حجبانو بمزاح)بيا اش بيتي عندي؟

بيسان:ندوز ليك (ضحكات)ههه ندير ليك كونطرول

نوح:اوا الله يكتر خيرك نيت جات فوقتها

بيسان:(شافت فيه وبخفوت قالت) عمري غانسى اخوياا وقفتك معايا من صغري ونتااا ديما فجنبي وعمرك طلقتي من يدي وكنتي سبب تاقريت تخصص لي كنت باغاا عرفتي ملي كان بابا الله يرحمو كيمرض كنت ديما تانقول فاش نكبر أنا غانقرا الطب باش نداوي بابا ساااعة ربي بغاه وداه عندو واخا هاكاك كملت حلمي (تبسمات بعيون لامعة)عرفتي كلما دوزت شي أوبغاسيون شي حد كانفرح بزاف وكانتخيل بابا كون كان باقي عايش كيفااش غايكوون إحساسو بيااا

نوح:(باسها فجبهتها ونطق بحنية) لحاج غايكوون فرحان ومفتااخر بيك حيت وصلتي لمرتبة لي هو باغيهاا

بيسان:وهادشي لي بغيييت

نوح:أنا نهار قريتك أو وقفت معااك حيت نتي بنتي وغاتبقااي ديما بنتي كبرتي قدام عيني وعمري غانخطييك ماحدي على قيد الحيااة... عاطيك تقتي وعارف قدها وعمرك غاتخيبي ضني فيك ياااكي

سرطات ريقها وحسات بتأنيب الضمير وقلبها تايضرب وهي تتفكر علاقتها مع ريان... حركات راسها بأه وهي تبسم ليه ونوح استرسل كلامو بهدوء:هادي مدة قليلة جا عندي واحد السيد وطلب مني يدك لزوااج

بيسان:(سرطات ريقها ونطقات بتلعثم) شكوون

نوح:واحد سيد من معارفي الله يعمر ليه الدار هضر معايا وگال ليا لي كاين وأنا مكنتش باغي نعطيه تاكلمة قلت ندوي معاك هو لول ونشوف رأيك

بيسان:(ناضت من بلاصتها وجلسات تاتشوف فيه بتوثر وقلبها حسات بيه تزمت عليها) هاااء ولكن اخويا أنا دابا مكنفكرش فالزواج

نوح:(كمش حجبانو) أو وقتاش غاتفكري فيه؟

بيسان:(تتحاول ترفض بطريقة عادية وبلاماتبين ليه والو) نتا عارف يالاه عاد غانبدا لخدمة فلكابيني ومابغيتش نتدرك وأنا يالاه بادية

نوح:هادا ماشي عدر حيت مغاتبقايش حياتك كلها ونتي تاتفكري بهاد الطريقة؟

بيسان:ماشي هاكاك أنا غير بغيت نوضح ليك وصااف

نوح:نتي شوفي السيد ودوي معاه يقدر يكون بيناتكوم لقبول وديك الساعة يكون خير لمهم راه تاحاجة مغاتكون بزز عليك

بيسان:مابغيتش اخويا حيت خايفة لامانتفاهموش وكيف گلتي السيد معرفة ديالك مباغاش نتحاشمو معاه من الأحسن تقول ليه لاامن لول

نوح:(ناض وقال بهدوء وبرود)صافي لي باان ليك تاحاجة مكاتكون بزز أنا غاندوي مع ريان ونفهمو بطريقتي بلي مكاينش الرزق بيناتكوم...

بحال لاكبيتي عليها سطل دلما بارد جمدها بلاصتها فاش سمعات هضرة خوها لي نطق بيها بكل برود... كانت تتسول راسها واش بصح سمعات سمية ريان ولاغير جاب ليها الله... شافت فنوح لي ضار جهتها ونطقات بصوت حاولات ماأمكن يكون عادي:شكون ريان؟

نوح:(شاف فيها بنظرة عندها معنى وقال بهدوء)خو رحييل

قلبها حسات بيه كيضرب بالجهد ولسانها تقال عليها وماقدراتش تجاوبو ونوح كانو عينيه حاضينها كيفاش كانت مكمشة حجبانها وباين فيها ممتيقااش... شافت فيه بعيون حايرة ندمات لاش سبقات داك لهضرة قبل ماتعرف شكون هو العريس باغا تهضر ولكن خافت خوها يعيق حيت مايمكنش كيفاااش قبل دقائق وهي رافضة فكرة الزواااج ودابا غاتقبل أكيد غايشك... شافت فيه ونطقات بهدوء: واش سي إدريس هو لي هضر معاك؟

نوح:لا ولدو (خربق ليها شعرها) نتي ماتخمميش بزاف أنا نحل لموضوع (ناض مور ماطبع قبل على جبينها) خليت ليك الراحة

خرج من عندها مخليها والبكية شداهاا باغاا تگول ليه رجع راني قابلة ولكن خافت لايعيق بيها مع راه واضحة وباين بلي كاينة شي حاجة بناتهوم... بدات تتعض شفايفها وهاد لخبر راه صدمها بحال لاشي حد صرفقهاا... متوقعاتوش حيت هي وياه أصلا كانو مفارقين وهي فجيه وهو فجيه سااعة السيد خطبها بلاحتى مايگولها ليهااا..عجبها الحال وفنفس لوقت ندمات لاش سبقات لا... ودابا محال واش غادي يديها النعاس مور هاد الزبلة لي زبلاتهااا... دازت ديك الليلة لي بيسان مانعساتش فيها نهائيا وفاقت وخاطرها مغير والندامة حاسة بيهاا... نزلات لتحت تفطر ولقات مها بوحدها لي كانت فايقة بكري أما لباقية باقي مفاقو... رحمة غير شافتها وهي تفكر لكلام لي قال ليها نوح ولي على قبلو كانت فاقت فهاد لوقت باش تدوي معاهاا..

بيسان:صباح لخير

رحمة:صباح لخير

جلسات بيسان حاطة كاس دلقهوة قدامها ولخاطر تفطر مكاينش..

رحمة:هضر مع خوك؟

بيسان: همم

رحمة:(لاحتها ليها فوجهها) هاداك هو لي كان عييط ليك داك النهار

بيسان:(خرجات عينيها فمها) لاااا

رحمة:(هزات فيها حجبانها) كاتكدبي عليااا عيني عينك من امتى ولى فيك لكدوووب هااا (وبسخرية) ولابااين شكوون السبب

بيسان:مامااا

رحمة:سناء عاودات ليااا كلشي مكاين لاش تكدبي (خنزرات فيها) هادشي لي كان ناقص تمشي تصاحبي وتدوي مع واحد نيڤوه باااين غير من هضرتو

بيسان:ماما ماتبقاش تسبقي لعيب ونتي معارفة والو

رحمة:لانتي لي عارفة غاتجي توريني فحاجة أنا عارفاهاا وفاهمة فيها قبل منك من الشوفة كانعرف بناادم وهاداك راه بااااين مافيديهش

بيسان:ماقصدتش هادشي اماما انا قلت ماتحكميش على حاجة معرفاهاش وصافي

رحمة:سمعي نگول ليك هاداك هو لي مانخليكش تزوجي بيه سمعتي أنا باغا ليك واحد يكون فنفس نيڤوك ماشي واحد نيڤوه طااايح واش أنا قريتك تاوليتي طبيبة وبكابيني ديالك وفلخر تجيبي ليا واحد بحال هاداك

بيسان:(تبسمات بسخرية) واش عارفة بعدا نيڤوه كي داير وشنو قاااري راه حياتو كبرها فكنداا وتما فين قراا وشد ديبلومو

رحمة:لا باااينة هضرة وحدة قلتهاا ابيسان ونتي غاديري بيهاا غاترفضيه وسالينااا

ناضت من بلاصتها ومشات مخليا بيسان باغا طج من هضرة مها لي زادت حطماتها وفشلاتهاا... علاش هي حكمات عليه وهي معرفاااهش مزيااان وماتعشراتش معااه باش تعرفو كيف داير ولكن هي حكمات وخدات قرار لي مافكراتش فبنتها كيف غاتكون ولااهتمات بيها... جاتها لبكية ناضت وهي معصبة وفنفس لوقت مقلقة من هضرة رحمة... خرجات من الرياض وركبات فطوموبيلتهاا والخاطر زيرو وزادتها ديك الشتا لي صبات واخا مكانش لبرد بزاف ولكن لجو كان شبه مغيم وهاد لجو كايطيح عليها الضيم وزاد على مابيها... وصلات لوبيطال ونزلات تاتقاد حوايجهاا ودخلات بزربة باش ماتفزگش وغير قربات جهة لغيسيبسون وهي تشوف دوك زوج بنات لي كانو فيه تايشوفو فيه شوفات فشكل وغير دازت من جهتهوم وبقاو يوشوشو وهي ماتسوقاتش غادة لبيروها تاوصلات جهة لبيرو وحسات بشي حاجة ماشي هي هاديك فشوفات لفرمليات وتوشويش لي درونجااها وخلاها تكمش حجبانها ماعرفاش اش كاين...

دخلات لبيروها وحاولات ماتعمرش راسها بزاف حيت كافي داكشي لي طاري معاها...لبسات لابلوز ديالها ويالاه نوات تجلس وهو يتحل لباب ودخلات عليها صاحبتها... كانت مولفاها دخل بضحيكة وتقشاااب ولكن دابا باين فيها شي حاجة شطناها...قربات جهة بيسان وقالت بهدوء:يالاه جيتي؟؟

بيسان:همم

ص:مالكي تتباني لياا مغيرة؟

بيسان:كون تعرفي اش طاري(تنهدات) حاسة براسي تالفة ومعارفة شنو ندير

ص:شنو كاااين عاودي ليااا؟

بيسان:(شدات يديها وقالت بفقصة) أنا حمارة ومكلخة ومكنسواااااش فمي خرج علياا وماعرفتش شنو ندير

بدات تتعااود ليها شنو كاين وماحساتش تالقات دموعها نزلو وصاحبتها كاتسكت فيهاا تاابردات وهي تكمل بصوت مبحوح:ماعرفتش شنو ندير

ص:شوو صافي نتي مادرتي تاشي خطأ حيت مكنتيش عارفة بلي هو لي غايخطبك ونتي قلتي لااا وشي عاادي

بيسان:ماعرفتش تاماما علاش قالت ديك الهضرة وعلاش مبغاتوش

ص:عادي من حقها حيت هي فاش سمعات ديك لهضرة خدات عليه نظرة فشكل ولكن لاتعاشرات معاه غاتعرف بلي هي خدات نظرة غلطة ماتنساايش بلي لعشرة هي لي تتخلينيا نعرفو معدن النااس والجوهر الحر ديالهوم

بيسان:أنا عارفة ماما لاقالت لا هي لا وخصوصا فاش سمعات هضرتو صعيب تنساهاا

ص:(تاتشوف فيها بنظرات فشكل ونطقات) باغا نقول ليك شي حاجة مي ماعرفتش هو ماشي وقتها وفنفس لوقت خصك تعرفيه حيت مكيتسكتش عليه

بيسان:شنو طاري عاوتاني؟

ص:فاش كنت جايا ليوم سمعت شي هضرة ماشي تال لهيه ولي خلاتني نجي ونعلمك بيها باش تكون فخبارك

ص:اش هاد سوسباانس دايرة ليا اصاحبتي هضرري وگولي لي كااين

ص:جات عندي إكرام لانفغميغ وگالت ليا بلي سمعات لبناات لي كانو معاها تيگولو بلي نتي وعمر كانت بيناتكوم شي حاجة وشي هضرة خرااا لي صعيب تگال

بيسان:(هزات حجبانها) كيفاش أنا وعمر بناتنا شي حاجة؟؟؟؟

ص:هادشي لي گالت لياا وراه سولتهاا شنو سمعات وشكون گالها مي مبغاتش تعلمني

بيسان:هاء راه بااين شكون گالها (ناضت معصبة) هو لي گال هاد لهضرة وأنا غانتفاهم معاااه

خرجات من لبيرو منرڤية لاهضرتيها غاضور فيك...موراها صاحبتها لي كانت تتعيط ليها ولكن شكون سمع ليهاا...فيما دازت وشافت فلفرمليات وشوفاتهوم لي كايديرو فيها تتزيد تعصب وتفقص... وصلات بيروه ودخلات نيشان حالة لباب بالجهد بلامادق لقاتو جالس خدام غير شافها وهو يتبسم تبسيمة خفيفة وهي قربات جهتو ونطقات بصوت مرتاافع مخنزرة فيه:اش ديك لكدبة لي كدبتيها مع مخك وتيقتيهاا؟؟

عمر:اشمن كدبة بيسان مالك معصبة ؟

بيسان:واااااش من نيتك كيفاش أناا وياك بناتنا شي حاجة اش بناتنااا اخويااا

عمر:جلسي وارتااحي وهضري بلخاطر الأعصاب مكيفيدوش وغير غاتمرضي وزعمة راك طبيبة وعارفة لي كاين

بيسان:(ضربات فوق لبيرو ونطقات بشراسة)سمع هضرتي مزيااان واحد بحالك عمري غانشوف فيه الشوفة ولانتسووق ليه ولاعطيتك شوية دلوقت ماتيقش رااسك وتگول راه تتسوى عندي شي حاجة حيت لي بحالك مكايهمونيش

عمر:(خنزر فيها وناض تقابل معاهاا وقال ببرود) دابا كلشي عارفك معايا هنا فلوبيطال وعارفين بلي حنا بزوج أونغولاسيون (دار يديه بزوج فلابلوز وقاال بسخرية وهو تيقرب جهتهاا) ونتي عارفة لغولاسيون شنو كايكون فيهوم يعني أي واحد دابا غايشوفك هنا غايشوف فيك شوفة نااقصة وهادشي لي بغيييت

بيسان:(خنزرات فيها) اشمن نوع دلبشاار نتااا

عمر:نتي حاسبة روحك شي حاجة من نهار لول ونتي بادية فتصرفاتك وتكبرك وكيفاش دافعة كبير وكاتنقصي من الناااس... حاولت معااك حيت بصح عجبتيني وجيتيني سبيشل على لبنات لخرين مي نتي كنتي هازة راسك فالسماا ومابغيتيش تهبطيه... تجاهلتيني ونقصتي مني وأنا رديت ليك التصرف بلمثل وخليت گاع لي فلكلينيك يبدلو شوفاتهوم لي كانو كيشوفوك بيها... دكتوغ بيسان السليمااني لي داخلة سوق راسها وجدية ومحتارمة طلعات مصاحبة وماشي غير هادشي خليتهوم تايعرفو بلي نتي ديجا نعستي معاياا (قرب ونطق بصوت مستفز ماكر)

ومع الأسف مالقيتكش ڤيغج وهادشي لي خلاني نهي علاقتي بيك حيت مجاااتش نبقاا مع وحدة لي ضيعات شرفها ونتزووج بيهاا (غمزهاا بندالة وشر) كيف جاااتك لكدبة نااضية يااك بالسيف أصلا كللشي تيقهاا وراه عربونها باااين خرجي غير تشوفي الشوفات دهادوك لي خدامين معاك وغاتعرفي ادكتوغ السليماني...

الشر.ف...هو حاجة مهمة عند لبنت لي كتحافظ عليه حياتها كلها... والشرف راه مفهومو مكيتجلاش غير فغشاء البكرة كيف الأغلبية كيعتااقدو... شحال من وحدة تادير حوايج خايبين وتصاحب وتنعس مع صاحبهاا سطحي وأهم حاجة عندها هي ماتفقدش بكرتها بااش ماتفضحش ولكن راه لواقع أسوء بكتير وبنادم مكيشوفش هادشي ومكيفهموش... والسمعة دلبنت هي مرايتهاا كلما حفظات عليها كلماا ارتاحت فحياتها وكلماا وسخاتها كلما عانات ولقات صعوبات مع لمجتمع... كان عارف كيفاش غايضربها ضربة لي تهرس ليها كبرياءهاا ولغرور لي تيشوفو فيهاا... معارفش بلي تصرفاتها معاه هو سبابهاا... وهي عملاتو بالطريقة لي يستاهلهاا وهادشي خلاه مايرضااش ويحس بكرامتو تمرمدااات ويبغي يرجع ليها الدقة ولتاجأ لهاد الخطة لموسخة ولي زادت بينات ليهاا أنه بصح هو إنسان مكيسوااش.. والصورة الخارجية مكاتعكسش الداخل ديالو حيت هو تيعرف يخبي ويلعب بمكر ويزين صورتو ليك ويخليك تيق بلي راه ولد النااس ولكن هو عكس هادشي... نهار تحلف عليهاا مكانش عبث ولاهضرة دايزة فساعة عضب بلعكس كان قاصدها وفاش فكر لقى أنسب انتقام هو يضربها فشرفها ويوسخ ليها صورتها قدام كاع لي خدامين هنااا وهادشي لي كااين وشوشات الفرمليات ونظراتهوم الناقصة كانت اقوى انتقاام لبيسان لي صدمة خلاتها تجمد وعينيها عليه هو لي كيناظرها فرحان حيت رد دقتوو...دقيقة تابدات تستوعب شوية بشوية هضرتو وشنو طااري ولغضب متمكن منهاا مع شعور الاشمئزاز لي حاساااه من جهتوو وفلحظة غفلاتو وعطاتو تصرفيقة تسمع الصدى ديالها فالبيرو خلاتو يزير على يديه صاااعر...

بيسان:(غوتات فوجهو بشراسة وكره) حيواااان مكتسووواش عند بالك لاقلتي هاد لكلام راه غايتيقوووك شفتي نتا مريض وخصك تمشي تعااالج حراام واحد بحالك يكون طبيب

دفعها بالجهد جهة لحيط تاوعتها وزير على يديها بزوج حاكمها وحابس ليها لحركة وهي باغا تجنن فاش قرب جهتهاا ونطق بحقد:هاد لحيواان غايندمك على هادشي لي كاديري فيه وهضرتك كلها غاتخلصيهاا سمعتي

بيسان:(كاتنتر معصبة ونطقات بعصبية) طلق مني ازمررر ماتقيسنيييش بيديك لموسخين

عمر:(زاد لصق معاهاا تاقلبات وجهها وقرب جهة ودنيهاا ونطق بهمس كفحيح الافعى) غانقيسك كيف بغييت سمعتي (خشى وجهو فعنقهاا ونطق) نتي لي خليتيني ندير هاد التصرف كون ماقصحتيش راااسك وكبرتيه كوون گاعما طراا هادشي

بيسان:(هزات رجليها وضربات بين فخاظو تابعد وتحنى ونطقات وهي باغا طير عليه) عمرك تحلم تقيسني سمعتي أنا بزاف عليك المريض وهادشي لي درتيه غاندمك عليه اقسم بالله تاغاندمك

خرجات من عندو وجهها حمر وعينيها كيبينو كمية كرهها وعصبيتهاا فديك اللحظة وكون صابت تقتلووو بيديها كون دارتها دخلات لبيروها وجمعات مسائلها وخرجات وهي ممسوقة لحد ومشافت تاحد ركبات فطوموبيلتهاا وبدات تتنهج تاتتفرگعات بلبكاا وبدات تشهق وتنخصص وهضرتو لي قال وشوفات لفرمليات ولي خدامين معاهاا زادو خلاو دموعها ينزلوو...حاسة براسها مخنووقة بزاف وحقارة عمر معاها صدماتهاا ومتوقعاتهاش منو حيت مكيبانش مشرار ساعة ماحدك معاشرتيش لواحد مزيان عمرك تحكم عليه حيت أي واحد غايقدر يبين الصورة لي باغي ليك ويلعب عليك كيف بغاا وعليها تيگولو لعشرة الطويلة كاتبين لمعدن ولجوهر دلواحد... بدات تتمسح دموعهاا بحال درية صغيرة وخدمات طوموبيلتها وهي كاتنخصص راجعة لريااض ولخاطر دلخدمة مبقاااش...وصلات لرياض ونيشان لبيتها تحت نظرات رحيل لي كانت جالسة فالجليسة دالخصة واستغربات كيفاش بيسان ماشافتش فيها وكيفاش ماسلماتش عليها والأهم شافت عينيها مدمعين...ناضت من بلاصتها بزز منها وطلعات تبعاها لبيتها تشوف مالهاا.. دقات وماسمعات صوت وهي دخل ومع قربات شومبر سمعات بكا بيسان لي خلاها تزيد تستغرب وتقرب جهتها ناطقة:بيسان مالك علاش تتبكي؟؟

شافت فيها وناضت معنقااهاا وزادت فوتيرة بكاهاا تاخلعات رحيل لي معارفة مالهاا وشنو طاري ليها... بعداتها عليها وشافت فيها بخوف وتساؤل:مالكي شنو واقع ليك؟

عضات بيسان على شفتهاا بدات تتعاود ليها اش سمعات ورحيل مخرجة عينيها فيهاا وهي مصدوومة وقااالت بصوت غاضب:وااش هاد لحيوان عند بالو الدنيا سايبة

بيسان:ماعرفتش اشمن هضرة قال بالضبط ولكن شوفات لي خدامين معايا لخصات كلشي ارحيل هو شوهني وأنا مدايرة والو

رحيل:هادا راه خصو لحب س على هاد لفعلة

بيسان:خوياا لاسااق لخباار مغايرحمووش رحيل ماتگوليهااش ليه عفااك أنا عارفة خويا فاش تيتعصب مكيعقلش على شنو تيدير وخايفة يدير ليه شي حاجة يصدق خارج فيها على راسو عفااك واعديني ارحيل ماتگوليهاش ليه...

بيسان عارفة بلي لاساق نوح لخباار فأكيد هادشي مغايدوزش مرور الكرام وأكيد غايدير شي حاجة لي تخليها تندم حيت علماتو...الخلعة على خوها خلاتها تصبر قحقها وتنسى شنو واقع ليها ولمشكيل لي هي فيه وتفكر فخوها فالمركز الأول... بقات معاها رحيل لي كانت مشطونة معاها وتاتاحاول تفكر ليها فشي حل وبيسان كان باين فيها مأترة بشنو واقع معاها ومن حقها حيت مساهلش شنو طاري ليها ولهضرة لي سمعات...دخلات بيسان لدوش تحمم ونيت ترتاح وترخف أعاصابها مخلياا رحيل جالسة مكمشة حجبانها وبالها تيخمم فشي حل... صونى تلفونها قاطع سهوتها وشافت فالمتصل لقاتو ريان...

رحيل:اهلا لباس

ريان:صافا حمدلله ونتي

رحيل:مزياان شفت مساجك قبيلة وصونيت عليك ساعة ماكنتيش كتجاوب

ريان:حيت كنت فالمطاار وماشفتوش

رحيل:(كمشات لحجبان بتساؤل)لمطاار ياك لبااس علاش مشيتي؟؟

ريان:قطعت لبيي حيت غانمشي لكندا

رحيل:علاش ياك لباس؟

ريان:عييط لمحامي لواليدة قال ليها بلي كاين شي مشاكيل فداك لبروجي دلمرحوم وخص ضروري يحضر مول الشي

رحيل:اااه واش ماما مغاتمشيش؟؟

ريان:لا غانمشي غير أناا وزيدي نتي عارفة لواليد مغايبغيش يخليهاا تمشي لديك لبلاصة وراه أنا وبزز غادي

رحيل:تت اوا شحال غاتبقا تماا؟

ريان:ماعرفتش نشوف لمشكيل ونحلو ونجي أصلا نكدب عليك محاملش نمشي ولكن ماعندي ماندير هاداك رزقي ومجاتش نسمح فيه يمشي هكاك واخا راه حمدلله مخاصني والو ولكن رزقي ضروري نحافظ عليه

رحيل:وراه حقك هاداك شنو تخليه يديوه باطل لمهم نتاا رد لبال لراسك اجي وقتاش عندك لبيي؟

ريان:غدا فالصبااح مع التمنية

رحيل:هي مغانشوفكش گاع تاترجع لمهم رد لبااال لراسك بزااف سمعتي ورد لبال لتلفونك باش لاصونيت تجاوبني واخاا

ريان:واخا الالة حاجة خرا؟

رحيل:(بصوت هادئ)غانتووحشك

خرجات بيسان من الحمام ملوية فبيتوار وشعرها مقاستوش شافت فرحيل لي كملات هضرتها بهدوء:واخاا يالاه تهلا وسلم عليهوم كاملين

قطعات وبيسان قربات جهتها وتحشات فبلاصتها وقالت بهدوء:شكون عيط ليك؟

رحيل:ريان غايسافر لكندا غدا فالصبااح وعيط ليا باش يعلمني

بيسان:(بتفاجأ وخوف)علاش واش غايبقا مستااقر تماا؟

رحيل:لاا غادي غير على قبل بروجي لي عندو تم وصاااف

زفرات بيسان النفس من جواب رحيل لي ريحها وخلاهاا تنفس وترتاح.. ملي سمعاتو غايسافر تخلعات وعند بالها هو غايرجع لفين كان عايش ملي عرفها رفضااتو...عقلها وماصور ليها فديك اللحظة... خلاتها رحيل ومشات لبيتها تكى شوية حيت ولات تتعيى مأخرا ماحدها كاتقل...

طاح الظلام وفبيت سيدرا كانت رحيل جالسة تتحفظ فيها وهي منتابها ليها بكل تركيز...

رحيل:يالاه كتبي شنو قلت ليك باش نشوف

سيدرا:واخا امامي

هزات دفتارها وستيلواتها لملونين وبدات تاتكتب بشوية وتفنن فكتابتها بحال لاكاترسم ورحيل حاطة عينيها عليها تاسالات وهي تعطيها تشوف..

رحيل:مزياان امامي يالاه جمعي لكاخطابل ديالك وماتخلي تاحاجة هنااا

سيدرا:واخا امامي ناضت نازلة لتحت حيت هادي هي لوقيتة لي غايجي فيها نوح وفطريقها تلاقات بنور الهدى لي كانت جارة ڤاليز ديالها ولابسة كيف عادتها لاباسها الطويل لمحتشم ذو ألوان داكنة... قربات رحيل جهتها وشافت فيها بتساؤل قائلة:هااء فين غادة فهاد لوقت؟

نور الهدى:(تبسمات ليه بطيبة) غانمشي نرجع لتطوان

رحيل:ولكن علاش غادة دابا خليك مزال معانا

نور الهدى:مانقدرش حيت عيطو عليا من دور التحفيظ وعلموني أني خصني نرجع

غدا ضروري

رحيل:تقدري تبقاي على الأقل تال غدا حيت ليل راه صعيب تسافري فيه وحدك ضروري ماخصك لي يمشي معاك

نور الهدى:ماعليش نقدر نمشي وأصلا مكاين مناش نخااف

مبغاتش تزيد رحيل تحرجها وفضلات تسكت وكملو طريق بزوجات لتحت لقات رحيل رحمة جالسة بوحدها...قربات نور الهدى تتودع فيهاا ورحمة باين فيها مبغاتش تخليها تمشي وباقي مسخاتش بيها...نزلات تابيسان وسناء فاش عرفوهاا غاتمشي وتوادعو معااها ورحيل لقات نوح مسيفط ليها مساج علمها باش توجد راسها باش يديو معاهوم نور الهدى لقامرة حيت مجاتش تركب معاه بوحدو ولاتمشي فالطاكسيات... طلبات من السعدية تجيب ليها عباية لاحتها عليهاا ومع جاو يخرجو تحل لباب ودخل زين العابدين لي كان خاشي يديه فجيب القبية وداير ليزيات شاف فيهوم شوفة وحدة ورجع نزلها مكمل طريقو مامسوق لتاوحدة فيهوم ومع داز جهة نور الهدى مدات يديها وشداتو من دراعو تاوقف وضار شاف فيها ببرود وهي قربات عنقااتو فغفلة منو وبقاات مزيرة عليه بزاااف ودموع فعينيها ونطقات بصوت خافت:تهلا فراسك اولدي

يتبع...