محتوى القصة
الدوخة شدات رحمة فاش سمعات هضرة الطبيب وكون مارؤوف لي كان مسندها كون جات طايحة...أما هو فكانو عينيه خارجين وديك لكلمة ديال coma تاتعاود فودنيه.. كلشي تصدم ومكانش متوقع هادشي والحاج لحسن شد على قلبو لي حس بيه ضروو..حفيدو مريض بالسكر بحالو وهو أكثر واحد عارف هاد لمرض كيف داير...
رؤوف:(مبعد ماتبت راسو نطق) ولكن كيفاش ادكتور هو مريض بالسكر وخويا أصلا مامريضش بيه ؟؟
طبيب:(بتفهم) أولا قبل مانشرح ليك حالة المريض خصك تعرف بلي كاينن deux type ديال le type 1... diabète لعادية لي الجسم مكايبقاش ينتج مادة الأنسولين نهايئا حيت بكل بساطة خلايا بيتا لي متواجدة فلبانكرياس ولي هي مسؤولة على إنتاج مادة الأنسولين كادمر كلياا وفهاد الحالة فالمريض لي تيعاني من هاد le type ديال diabète كيكون أوبليجي عليه يستعمل الأنسولين.. أما بالنسبة le diabète type 2 est une condition médicale où le corps ne peut pas utiliser l'insuline de manière efficace ou ne produit pas suffisamment d'insuline pour maintenir des niveaux de glucose sanguin normaux يعني الجسم مكيقدرش يستخدم الأنسولين بشكل فعال ولا مكيقدرش ينتج واحد الكمية كافية باش يحافظ على لمستويات الطبيعية دلجلوكوز لي فدم... وغالبا ماهاد le type كيكون مرتابط بالعامل الوراثي أي شي واحد من لافامي لقريبة تيكون تاهو مصاب بيه
رؤوف:وي جدي وعمي تاهوما مراض بالسكر
طبيب:ڤوالا ومن غير هادا كيقدر يكون بسبب النظام الغدائي الغير صحي وتالعمر كيلعب دور مهم
رؤوف: هو مولف كيهتم بصحتو وتيدير السبور ولكن فالآونة الأخيرة همل صحتو بزاف
طبيب: بحال هاد الحوايج ماخصش الإنسان يهمل فيهوم صحتو وضروري مايدير كل فترة كونطرول يخليه يطمن على صحتو.. بالخصوص le diabète type 2 الأعراض ديالو يقدر ماتبانش فاللول ويقدر تكون خفيفة بحال تايحس بالعيا والإرهاق ولاكيجيه العطش بزاف على الحالة العادية والتبول المتكرر وكاين فقدان الوزن واخا راه تاتكون الشهية فالماكلة وكتاكل مي جسمك مكيستافدش من داك لماكلة.. والأغلبية ديال هاد الأعراض كاتكون خفيفة خصوصا فالمراحل الأولى ولواحد مكيردش لهادشي لبال تاكيفوت لفوت.. حنا فاش درنا ليه لزناليز باش نعرفو سبب لي خلاه يتعرض coma diabétiques لقينا بلي عندو واحد لهبوط حاد فمستوى السكر فالدم وكانسميوه الهبوط السكري ومن حسن الحظ أنه تسعف فلوقت لمناسب وقدرنا نديرو تدخلات الطبية
رؤوف:ودابا خويا غايفيق ياك
طبيب: coma diabétiques ماعندهاش وقت محدد كاين لي تايطيح coma لأيام كاين لشهور وكاين لساعات وهادشي على حساب استجابة دلجسم لعلاج.. حنا دابا نقلنا لمريض ل Réanimation "الإنعاش" غايبقا تم تحت المراقبة هاد 24h (تبسم ليهوم بعملية) الله يجيب الشفاا
خلاهوم واقفين شي يشوف فشي ورحمة عنقها رؤوف وهي تاتبكي وتشهق.. مولفة فنوح يكون هو داك الساس لي عمرو تزعزع شادهوم كاملين وماعمرو شكى ولاقاال لشي حد راه ضراتني شي حاجة تاطااح طيحة وحدة.. وهادي هي أصعب حاجة... جلسو فلكراسى وإدريس بعد هاز تلفون معيط لتانيرت باش يعلمها بشنو كاااين وريان بقا واقف حداهوم...
رحمة:(شافت فرؤوف وقالت بصوت باكي) واش علمتي بيساان غاتجي؟؟
ريان لي كان واقف متكي غير سمع سميتها وهو يتقاد فلوقفة منتابه لكلامهوم..
رؤوف:فاش كنا فالطوموبيل علمتها راه غاتكون شدات الطريق دابا هي وسناء
رحمة:(شدات راسها بيديها وقالت ببكاء) قول ليها ترد لباال فالطريق
رؤوف:ماتخمميش الواليدة غير تهدني دابا
رحمة:(شافت فيها بنظرة حزينة) بغيت نشوفوو سير قول ليهوم نشوفو واخا غير دقيقة عفااك اولدي
رؤوف:(عارف بلي صعيب يشوفوه خصوصا راه فالانعاش مي دار ليها خاطرها) واخا (شاف فريان وقال بترجي) رد ليها لباال عفاااك
ناض رؤوف مخلي ريان واقف جنب رحمة لي كانت تاتشهق وتبكي.. رجع إدريس لي علم تانيرت وبقا واقف حدا لحاج لحسن تايطمن عليه حيت تاهو السكر على سبة غير يتقلق ولايتعصب كيطلع ولاينزل ليه...
**
ربعة دلمرات وهي تاتعاود سورة البقرة وتقول واش غمضات ليها لعيين بلعكس غير مكاتزيد تحس براسها تزيرات وكرشها ضراتها.. زولات عليها لغطا وهي تاتنهج ولبسات بانطوفتهاا ولاحت البينوار عليها عاد خرجات من لبيت.. كان الظلام فالطبقة وقالت راه كلشي نعس.. نزلات لطبقة التانية وبان ليها الضو شاعل فالكوزينة.. قربات لباب ولقات تانيرت جالسة بوحدها فالكرسي وعاطية بضهرها لباب وباين فيها ساهية..
رحيل:واش تانتي اماما مجاكش النعاس؟؟
تانيرت:(ضارت شافت فيها وقالت بتساؤل)مانعستيش؟؟
رحيل:تت (جرات الكرسي وجلسات تاتنهج بتعب) ماعرفت مالي هاد الليلة خاطري مزير عليا وتاكرشي ضراني واخا شربت داك لكينة مدارت ليا والو
تانيرت: ياكما فيك الجووع؟؟
رحيل:لا (تنهدات) بابا واش باقي معطل؟
تانيرت:عاد دابا عيط لياا باقي مع السيد
رحيل:علاش شنو واقع لهاد السيد؟؟
تانيرت:(شافت فيها بحزن)طاح كومة دالسكار
تنهدات رحيل وخاطرها غير مزاد تزير عليهاا.. بينما تانيرت قلبها وعقلها مشطونين بالخبار لي قال ليها إدريس.. مكرهاتش تمشي توقف معاهوم ولكن ماعندها كيف دير حيت رحيل غاتعيق وهي مباغاش تسيق لخباار خصوصا فهاد الحالة وهي هازة زوج رواح فكرشهاا.. خايفين تعرف وطرا ليها شي حاجة ويصدقو ماحيلتهوم لولد لحاج ماحيلتهوم لرحيل..
رحيل:(بصوت خافت) الله يشافيه ياربي
تانيرت:آمين ياااربي (تبسمات ليها بخفوت)ندير ليك لويزة؟؟
رحيل:تت مافيااش خاطري مرووع علياا بزاف ماعرفت (خسرات سيفتها فاش تگرعات ديك لحموضة ونطقات) غانوض نرد يقدر نرتاح
مشات لحمام وتانيرت تبعاتها رادة ليها لبال لاتسخف ولاطيح تم.. ماتهنات عليها تاشافتها رجعات لبيتها وغمضات عينيها..
**
بعد ماطلب رؤوف الطبيب سمح ليه أنه يشوفو ولكن غير من الزااج ناضت رحمة بلهفة غادة تشوف كبدتهاا.. مع بان ليها من زاج بدات تبكي وتنخصص وشحال قاصح تشوفي شي حد كيعني ليك فديك البلاصة.. ناعس مكيتحركش والسلوكة ضايرين بيه فديك اللحظة تمنات تكون هي بلاصتو ولاتشوفو فهاد لبلاصة.. سبق ليها وتشوات فكبدتها وماقدراش تخيل راسها غاتزيد تفقد واحد من ولادها.. بقات تاتقيس فالزاج بحال لاتاتقيسو هو ورؤوف تايشوف فخوه وعينيه باين فيهوم الحزن.. معاشش معاه الخاوة كيف هي حيت الدنيا غراتو.. ودابا فاش رجع لطريق ودار عقلو تيحاول ماأمكن أنه يعوض دوك السنين.. شد يد رحمة وتحركو راجعين لفين كاينين لخرين كايتسناو.. جلسات رحمة جنب زاينة وبدات تتعاود ليها وتطمنها تاهي...
داعت لخبار عند لعائلات بزوج وأول واحد جا هو ليازيد لي كان وجهو مخطوف... قرب جهتهوم وشاف فرؤوف: اش طاري مال ولد لحااج؟؟
رؤوف:جاتو كوما دالسكر
ليازيد:ولكن هو مافيهش السكاار
بدا تايشرح ليه رؤوف هضرة الطبيب لي قال ليهوم بلحرف.. تنهد ليازيد أونطق بهدوء:فين سنااء؟
رؤوف:سافرات هي وبيسان لإفران ولكن راه شاديين الطريق دابا
ليازيد:لواليد وعمي راه تاهوما جايين
رؤوف:أودي تلفوني مسكتش من لزابيل غانعيط لعتمان يتكلف بلخدمة ويدوز تالميزون دڤواتيغ يشوف لبلان تم
ليازيد: لاحتاجيتي شي حاجة أنا هناا..
ماعرفاتش كيفاش تاوصلو قدام لكلينيك لي قال ليهوم رؤوف.. غير وقفات طوموبيل وهي تنزل بيسان تاتجري مخليا سناء هي تبلاصي جاايين طايرين فالطريق غير ربي حفظ ومداروش كسيدة..دخلات تاتقلب عليهوم وفمها بيض بالخلعة وشعرها مخربق.. لابسة غير بيجامة فوقها مونطو وبوط بانطوفة.. غير قشعاتهوم وهي تمشي تاتجري لعند مهاا
بيسان:مامااا
هزات رحمة راسها وحلات يديها تاجات بيسان معنقااهاا تاتبكي:فين خوياااا شنو وقع ليه؟؟
رحمة:خوك ابنتي فالانعاش
بيسان:(ديجا علمها رؤوف) فين الطبيب لي مكلف بحالتو؟؟
رؤوف:(خربق ليها شعرها) دكتوغ الصامدي راه فبيروه
بيسان: صافي اجي معاياا
شدات فيديه ومشات لعند طبيب وريان راه عينيه مانزلاتش عليهاا.. دخلات سناء تاهي كاتنهج بزز باش لقات بلاصة باش تبلاصي.. بلاماتهضر مشات عنقات ختهاا كاتصبر فيها ورحمة مخشية فختهاا تاتبكي وهادشي لوحيد لي تقدر ديرو هو تبكي ودعي الله يحفظ ليها ولدهاا..
نفس الكلام لي شرحو الطبيب ليهوم هو لي شرحو لبيسان وقربها من الصورة كتر.. خرجات من عندو وهي حاسة بلعياا رجعات لعندهوم وعاد ردات لباال لريان حيت فلول مشافتوش..جلسات فلكراسى وجات أونفااص معاه.. وفديك اللحظة صونى تلفونو بنمرة محمد طه وبعد باش يجاوبو وهي بقات حاضيااه..
ريان:مشيتي لخدمة؟
محمد طه:أنا تم امدرا كاين شي جديد؟؟
ريان:باقي كانتسناو شي خباار اجي ياكما رحيل عرفات؟
محمد طه:لا ولكن بحال لاحسات بلي شي حاجة تم ولبارح بليل ماقدراتش تنعس وليوم راه مشات مع خالتي تانيرت لعند طبيبة ديالها
ريان:تت مشاااكيل تخاف تعرف وطرا ليها شي حاجة وتخااف طرا تاني شي لاقدر الله ويتنادم معانا لحال حيت خبينا عليهاا
محمد طه:سكت از*ي واااش هاد لهضرة تاتقااال تانتا مغايوقع والو وإن شاء الله ولد لحاج دابا يفيق
ريان:نتمناو يكون خييير
محمد طه:يالاه نخليك دابا إلا كان شي جديد علمني اه مامشيتيش لخدمة؟
ريان:تت عيط ليهوم وقلت ليهوم راه عندي ظرف عائلي مانقدرش نجي
محمد طه:اوا مزيان مهم بحال والو نجي فوقيتة دلغدا
ريان:يالله سير عالله
رجع ريان لبلاصتو ومالقااش بيسان وبلاشعور بدا كيقلب عليها حيت كلشي كان تم من غيرها هي لي كانت فديك الأثناء واقفة قدام لباب دلكلينيك تاتهضر مع صاحبتها جيهاان..
بيسان:يالاه ازين نعيط ليك من بعد وشكرا بزاف
جيهان:تهلاي فراسك
حكات جبهتهاا وقبل مادخل لداخل ضونى تاني تلفونهاا بنمرة مداخلاش عندها.. مكانتش غاتجاوب فاللول مي قالت يقدر شي حد كاتعرفو..
بيسان:ألو ؟
...دكتوغ بيسان صافا؟
بيسان:صافا حمدالله شكون معايا؟
عمر:معاك دكتوغ عمر
فلداخل كان كلشي ساكت وكل واحد فين تايخمم وكلهوم كانو كيتسناو غير شي خبار طمنهوم على نوح هزات سناء عينيها وبدات تاتشوف فيهوم واحد بواحد قبل ماضور جهة رحمة وتنطق بتساؤل:فين هو زين العابدين..
بحال الا يالاه عاقو بلي زين العابدين مكاينش فاش عرفو الخبار تخربقو ولعقل لي يفكرو بيه مكانش حاضر.. كمش رؤوف حجباانو وجبد تلفونو يعيط ليه وسناء شافت فرحمة:واش ماقلتوهااش ليه؟؟
رحمة:ماعرفتش (حطات يديها على راسها) فاش سمعت لخبار تلفت وعقلي مبقاش فبلاصتو كنت باغا غير نجي نشوف ولدي
اليازيد:لاكان فالرياض فأكيد غايكون ساق لخباار
سناء:كون كان ساق لخبار كون راه لقيتيه هنااا
رحمة:(شافت فيها بخوف) ياكما تكون تاهو وقعات ليه شي حاجة؟؟
داخل زين العابدين من باب دالكلينيك تايجري وموراه كاان صابر لي من وجهو كايبان مزير.. وقفو قدام لغيسيبسيون ونطق وهو كينهج ونواضرو باين لعرق تايضرب فيهوم:نوح السليماني فين كاين؟؟
..هو دابا فلRéanimation
زين العابدين:(نطق بصوت خافت) بغيت نشوفو؟
... خصك تاخد لوطوغيزاسيون من عند الدكتوغ لمكلف بحالتو
زين العابدين:وفين هو؟؟
..دكتوغ الصامدي لبيرو ديالو فالطاج التالت
قبل ماتكملها لقاتو طاار من حداها غادي كيجري وبلامايخدم لسونسور طلع فالدروج وموراه صابر لي كان تينهج.. وصل لطاج التالت ومع بدا يقلب على طبيب قشعهوم جالسين تايهضروو.. قرب جهتهوم ورحمة غير شافتو عاد تهنات وقدرات تنفس مزيان.. قرب جهتهوم ومع وقف قدامها نطق بسرعة:شنو وقع لواليد؟؟
رحمة:(ناضت جهتو وعنقاتو) فين كنتي أولدي؟؟
رؤوف:(قرب جهتو) كانصوني عليك وتلفونك طااافي
زين العابدين:(زول يدين رحمة وشاف فيهوم بعصبية) سولت شنو وقع لواااااليد
رؤوف:طاح كوما دالسكاار
مسح زين العابدين على شعرو ومشى وجاا فداك لكولوار وبعنف ضاار جهة صااابر وخنزر فيه وبصوت قااصح نطق وهو مقرب جهتو: لاوقعااات ليه شي حاجة مغانتعاتقش مع داك لقواااااد
مكانوش رادين لبال لصابر تاقرب جهتو زين العابدين عاد ردو ليه لبااال وكلهوم طاح عليهوم لعجب اش كيدير تماا وباين عليه بلي جاي هو وزين العابدين لي خنزر فيه وخلاهوم غادي عند طبيب.. قرب رؤوف جهة صابر لي كان واقف كيتنهد ونطق بتساؤل:اش وااقع وعلاش جيتي نتا وزين فين شفتيه؟؟
صابر:(زفر النفس) أودي خلي داااك الجمل راگد ابا رؤوف
**
فالإنعاش فين كان لكاالم كيتسمع غير صوت الالات الطبيبة لي ضايرين بيه.. جفونو بداو كيتحركو بلمهل دليل على استيقاظو.. وبالفعل حل عينيه ورجع سدهوم فلبلاصة بسباب الإضاءة وشوية بشوية بدا كيحلهوم تاني تاولف الضو..كان تيحس بواحد الضعف فجسمو وفمو حاس بيه نااشف عليه... دخلات الفرملية لي مجرد مشافتو فاق مشات باش تعيط لطبيب لي جاا بسرعة باش يفحصو وطرح عليه بعض الأسئلة باش يشوف حالتو الصحية مور لغيبوية لي تعرض ليها...وقت كثير خداوه فالتحاليل قبل مااينقلوه لشومبر عادية ويعلمو العائلة لي فرحات بداك لخبر لي سمعوو..
غير نقلوه لشومبر العادي أول واحد دخل عندو هو زين العابدين لي غير شافو نوح وهو يحس بالروح رجعات فيه... قرب جهتو زين العابدين عنقو بالجهد ونوح تاهو لي زير عليه بحال لاخايفو يطير بين يديه.. بعدو عليه وبدا تيقلب فيه بلهفة تاشاافو بخير وعلى خير ورجع عنقو تاااني كيطبطب على ضهرو.. دخلو لبقية لي كانو تاهوما ملهوفين بشوفتو ورحمة كانت مبتاسمة وفنفس الوقت تتبكي.. غير ملي فاق ليها وشافتو حال عينيه وجالس راه هاداك هو الفضل عندها.. بعد زين العابدين عليه وبقا واقف جنب وهي قربات جهتو كاتبوس فراسو وتعنق فيه وتسول على حالتو وهو غير تيحرك فمو ويقول ليها لحمدلله
إدريس:على سلامتك اولد لحاج كيف بقيتي شوية؟؟
نوح:(حرك راسو بتعب واضح على ملامح وجهو) لحمدلله اسي إدريس
رؤوف:(عنقوو ونطق بصدق) خلعتيني عليك بزااف اخويا
بيسان:حيد نشوفو (دفعات رؤوف وقالت بحب) حبيبي على سلامتك
نوح:(عنقها ونطق بهدوء)رجعتي دغيا
بيسان: نتا أهم عندي من التسافيرة احبيبي
البيت ولات عامرة عندو وهو عينو غير على زين العابدين لي بدورو كان ساكت وكيشوف فيه...
نوح:(شاف فصابر ونطق بهدوء) شنو واقع؟؟
صابر: سوء تفاهم اولد لحااج
نوح:(شاف فزين العابدين ونطق بجدية) أجي نتا لهناا(قرب زين العابدين لي وقف حداه وهو ساكت) شنو طرا؟ وشنو داكشي لي سمعت ؟
هز زين العابدين عينو فصابر رامقو بنظرة غضب ورجع شاف باه وقال بهدوء:ماشي أنا هاداك لق (سكت فاش شاف تخنزيرة دنوح وكمل ببرود) لحيوان هو لي تضرب
نوح:(تقاد فجلستو وقاال بانفعال) ونتا اش كنتي تادير تم واااش أنا مخليك فالدار تالقيتهوم معيطين عليا تيعلموني بلي ولدي تضرب وهزوه أوغجونس
🔙
فاش ظلام لحال خرج من الرياض غادي لحومة فين ساكن صفوان حيت سبق وتبعو هو وباه وعرف لحومة ودار فين ساكن...بقا حاضي تم تبان ليه خرج وعاود تبعو تاوصلو حدا واحد لمحال وهو يبسبس عليه زين العابدين تاضار لاخر وغير شافو وهو يضحك بسخرية:شباغي از*ي
زين العابدين:(بنظرة باردة)نح*يك
ضحك صفوان بسخرية وماجا فين يدوي كان زين العابدين ضاربو لكروشي لوجه..مرضاش صفوان وبغا يرد ليه الدقة ساعة جا مع زين لي كان مخيخ عليه ومحلفها فيه..ملخو عصا ولاخر فغفلة من زين دفعو برجلو تاطاح زين فالأرض ومع ضار بان ليه شي واحد جااي من مور صفوان هاز حجرو كبيرة ضربو لراااس نيشان تاطاح لاخر غيب ودم كيتشرشر من راسو ولي ضربو هرب مخلي زين العابدين كيشوف فيه بدهول..
وقف فبلاصتو وضار تيشوف فهاداك لي ضربو غادي كيجري وهاز معاه ديك لحجرة باااش ضربو.. رجع شاف فصفوان لي غيب والدم كيشرشر ليه من راسو قرب جهتو بشوية تاجلس جنبو ومد يديه تايشوف واش باقي كيتنفس ومع ديك اللقطة فاش قرب ليه كان واحد السيد دايز من تم غير شاف الديكور وهو يجبد تلفونو كيعيط لبوليس ولومبلونص.. الحومة لي كانت صاقلة ومافيهااش حس لبشار دغياا عمرات والنااس من جميع لبلايص جااين يشوفو اش واقع ومع صوت لومبلونص والصطافيط دلبوليس جدبات الانتبااه... عمرات لبلاصة بالبوليس وبحكم أن زين العابدين لي كان تم فهو المشتبه الأول نوضوه دوك لبوليسين بعنف وهو خنزر فيهوم ونطق بعصبية:مااشي أناا
لبوليسي:تهز من تم گالك ماشي أناا شكنتي تادير معااه
زين العابدين:(عطااه شوفة قاصحة ونطق بعنف) ماضربتوش لي ضربو هرب
لبوليس:(دفعو جهة الصطافيط مخرج عينيه) سير البرهووش طلع ياربي السلامة هاد لجيل كيطير مع الطيووور
طلعوه فالصطافيط وهو كاعي ومكملينها فاش ركبو ليه المنوط وداوه لكوميساريا مخلي وراه الجوقة وصفوان لي بداو كيأنسطاليوه فوق داك لبياص باش يسعفووه حيت من الشوفة كاتبان حالتو خطيرة والدم راه سقى الأرض مخلي علامة.. ضار داك لبوليسي فاش لمح تلفون طايح فالبلاصة فين كاان صفوان ومع هزو عرفو ديالو.. حلو ومن زهرو لقاه بلاكود.. مشى لغبغطوااغ وأول رقم طلع ليه هو "لواليد" دوز ليه لخط وفديك الأثناء كان نوح جالس فالگاراح وملامح التعب بانت على وجهو بقا كيدلك مدمع عينيه تاصونى تلفونو لي كسر هدوء المكان.. هزو وشاف فالشاشة سمية ولدو "زين العابدين" جاوب في ساع بصوتو الخشن: ألو
لبوليسي:سلام أوعليكوم اسيدي معاك البوليس مول هاد التلفون راه لقيناه مضروب فراسو وهزيناه أوغجوون لسبيطار ****
كان كيسمع تصفار فودنيه وديك تصرب وهزيناه أغجون كتعاود وفكل مرة كانت تاتسمع تقيلة على لمرة لي قبل.. الضبابة بانت ليه تاولى كيشوف الظلام وطااح هو وكرسيه...
أما عند لبوليسي فغير سمع لابيل تقطعات وهو يكمش حجبانو وهز معاه داك التلفون وتحرك غادي لكوميساريا مور ماخلى البوليس يديرو خدمتهوم...
وصلات الصطافيط قدام باب الكوميسارية ونزلوه أو واحد لبوليسي دفعو باش يتحرك وهو مخنزر تايشوف قدامو ومزير على يديه تالعروق باانو مطراسين.. نزلوه لسيلون وزولو ليه لمينوط مخلينو تم تايجي الشاف لي غاياخد الأقوال ديالو وقبل قلبوه وخداو ليه داكشي لي كان هاز معاه من غير التلفون لي مالقاوهش عندوو.. كان غادي جايا فديك البنيقة وريحة لبوول والوسخ عاطية منهاا.. ماجلسش حيت معياف وماتايحملش شي وسخ يقيس حوايجو لاعساك لحمو.. تايمسح على وجهو ويتفكر شكون مول لفعل وشنو بينو وبين صفوان تاضربو وهرب ونيت واش كان قاصد صفوان ولاكاينة شي حاجة تم؟؟
فلفوق دخل لبوليسي لي كان هضر مع نوح ولي رجع صونى ليه ولقى تلفونو طافي وقلب على نوامر اخرين ساعة مالقااش من غير هاديك لي مدخلهاا ونمرة خرى مدخلها ب"كحلووش" أما ماتبقى نوامر مامقيدينش عندوو.. كان باغي يصوني لنمرة لخرى ساعة عيطو ليه وخلى التلفون تم ومشى يقضي شغالووو..
دخل صابر لكوميساريا ولبوليس كيضربو ليه التحية.. مشى نيشان لبيروه جلس وشاف فداك الدري:جيب ليا واحد دكة نعصرو عليها هاد الليلة
..واخا الشاف
خرج لاخر وفطريقو تلاقى بداك البوليسي لي جاا عندو عطاه التحية ونطق بهدوء:الشااف يالاه واحد دابا شوية وقعات واحد لحادث ف**** بين زوح دراري واحد فيهوم تضرب فراسو وراه داوه لسبيطار والتاني راه فلتحت
صابر:(زفر النفس) سير طلعو نشوفو هاد لحريرة تاني
بعد لحظات تحل لباب ودخل لبوليسي معاه زين العابدين لي غير شافو صابر وهو يكمش حجبانو.. جاه مألوف بحاال لاشايفو فشي قنت..
صابر:رييح هنا (جلس زين العابدين وصابر نطق بجدية) سميتك وكنيتك
زين العابدين:زين العابدين السليماني
صابر:(كمش حجبانو) السليماااني واش كايجيك نوح السليماني شي حاجة؟؟
زين العابدين:(شاف فيه) الواليد
صابر:(بتفاجأ)هاااء حفيد لحاااج اش كادير هناا وباك عارفك هناا؟
زين العابدين:(بمضض) لا
صابر:(جبد تلفونو دوز لخط لنوح ولقاه طافي) تت باك تلفونو طافي (ربع يديه وقال بجدية) اش بلانك؟؟
بدا زين العابدين كيعاود ليه شنو طرا وبلي ماشي هو لي ضرب صفوان إنما واحد اخر وصابر كيسمع ليه بتركيز وتاداك لبوليسي لي جالس معاه كيكتب فالأقوال ديالو..
صابر:فين كاتعرفو؟؟
زين العابدين:تايقرا معايا
صابر:(شاف فداك لبوليسي)علمتو عائلة دري المضروب؟؟
لبوليسي:واه صونيت على باه مي تطفى تلفون ومبقا تحل
صابر:(شاف فزين العابدين) نتا عارف بلي كلشي ضدك حيت نتا كنتي معاه يعني بصراحة نتا هو المشتبه بيه داباا
زين العابدين:(خنزر فيه) ديك لحجرة بااش ضربو لاخر داها معاهاا
صابر:وهادي هي لمشكيل كون بقات أداة الجر.يمة كون شفنا لبصمات لي عليهاا ولكن مكيناش الأداة دابا (رجع صونى على نوح ولقاه طافي وزفر) تت تاولد لحاج مكيجااوبش (شاف فداك لبوليسي وقال بجدية) عيط لدراري لي كاينين فالسبيطار وسولهوم على لحالة ديال دري وتأكد واش واليديه كاينين تم (شاف فزين العابدين وقال بتنهيدة) ونتا غاتبقا معانا هاد الليلة هناا اولدي على مانشوفو حل لهاد المشكيلة...
ماهبطوهش باقي لسيلون وخلاوه فلبيرو حيت راه حفيد الحاج وكيف تايقولو على قبل السكة تايدوز التراان أو ولد لحاج راه معروف تم وخصوصاً عند صابر لي تايعرفو معرفة شخصية.. أما صفوان راه واليديه ساقو لخبار حيت تلفونو كان عندو فاش تعطل عيط ليه باه وجاوبوه فالسبيطار وعلموهوم.. كانت حالتو حرجة حيت ضربة لي خدا فراسو سببات ليه نزيف داخلي..
بدا الصباح كيطلع وزين العابدين جالس فالبيرو بوحدو ساكت وقالب وجهو لجهة لخرى كيفكر فحالة باه لاساق لخبار ومغاينكرش بلي تشطن حيت مامرة مازوج صوناو عليه وتلفونو طافي وهادي عمرها كانت ديالو.. كان صابر باغي يعيط لرؤوف مي زين العابدين ماخلاهش..
واقف صابر فالبلاصة لي طرات فيها لافير وعينو على دم لي يبس فالأرض.. برجليه مشى يشوف البلاصة لاتكون فلتات ليهوم شي حاجة وحيت الموضوع فيه حفيد الحاج فغايدير لي فجهدو باش يحل ليه لمشكيل..طالق عينيه تم ومع غايهز راسو غايقشع لكاميرات لي كاينين فلمحال لي أونفاص مع لبلاصة فين طرات لافير يعني غاتكون شدات كلشي.. ومع يالاه صباح بكري باقي ناس سادين.. بقاو كايتسناو تاجا مول لمحال لي تضهشر فاش لقى لبوليس كيتسناوه وخاف لايكون دار شي زبلة..
صابر:سلام أوعليكوم بغيت نسولك لكاميرات لي داير برا خدامين؟؟
م:(بخفوت)ايييه اشاف خداامين
صابر:مزياان يعني غايكونو سجلو داكشي لي طرا لباارح؟؟
م:على الشاف شنو طرا؟؟
صابر:(بجدية)خلينا نشوف التسجيلات
طلقها ليهوم مول لحانوت بالضبط ديايك الساعة تابان ليهوم صفوان وزين العابدين ولمدابزة لي جرات بناتهوم شوية تدفع زين وطاح الأرض وجا واحد من الجهة لخرى هاز حجر ضرب بيها صفوان لي طاح ولاخر هرب.. تماما كيفما عاود ليهوم زين العابدين بان فالفيديو لي خداوه حيت هاداك هو دليل ديال برائة زين العابدين وزيد منو غادي يقلبو على مول لفعلة باش يتشد...
رجعو لكوميسارياا وصابر علم زين العابدين بلي غايقدر يخرج حيت مبقا عندو مايدير تم وكلشي بااان... سنى على خروجو وشاف فصابر:تلفوني؟؟؟
صابر:عطيو لدري مسائلو
جابو ليه داكشي لي خداو من عندو وتلفون مكانش..كمش زين العابدين حجبانو وقال بجدية:تلفوني فين هو؟؟
صابر:(شاف فلبوليسي)فين تلفون الدري
لبوليسي:مكانش عندو الشاااف
صابر:ياكما نسيتيه فشي بلاصة؟؟
زين العابدين:كان عندي لبارح فاش مشيت لعند لاخر
صابر:غايكون طاح ليك واقيلا فالبلاصة لي طرات فيها لافير
لبوليسي:لقينا تلفون واحد تما ديال دري لي تضرب
زين العابدين:نشوف (جبدو ليه وزين غير شافو وهو يطيرو ليه من يدو وخنزر فداك لبوليسي)هادا تلفوني (بغا يشعلو لقاه طفى)
لبوليسي:(حل عينيه) وايلي عند بالي ديال دري لاخر لقيتو بلاكود وفاش حليتو عيط فيه لنمرة لي مدخل بالواليد وقلت ليه بلي مول تلفون راه تضرب وهزوه لسبيطار أوغجوونس
زين العابدين:(قرب جهتو قارن حجبانو وقال بانفعال) عاااود از*ي
لبوليسي:(خنزر فيه) حتارم راسك قبل مانهبطك فين تبرد البرهووش
كاان باغي يشنق عليه زين العابدين غير صابر لي كحزو وخنزر فداك لبوليسي وقال: ديما كانگول ليك ماتبقاش تخربق اش هاد الغلط درتي
لبوليسي:(هبط راسو)سمحليا اشااف
صابر:(شاف فزين العابدين لي تايتحلف بعينيه لداك لبوليسي وقال)زيد نوصلك لدار ومنها نشوف ولد لحاج ونشرح ليه...
خرجو من لكوميساريا وركبو فطوموبيل صابر غاديين لرياض مسافة الطريق وكاانو وصلو..نزل زين العابدين ببال مشطوون على داكشي لي قال لبوليسي وحس بلي شي حاجة طارية وبلي تلفون باه لي طافي ماجااش عن عبث إنما غاتكون واقعة شي حاجة.. وبالفعل غير دخل لقى السعدية ومع سولها سرسبات ليه كلشي وهو عض على شفتو تادمااها وشاف فصابر مخنزر...
صابر:زيد نمشيو لتم
خرجو من الرياض مخليين السعدية لي ماكرهاتش تمشي معاهوم وطمن تاهي على ولد لحاج..
🔜🔜
ليلة وحدة وشوف شنو طرا فيهاا كلشي كان ساكت تايسمعو لصابر لي كان تيعاود لنوح لي عاقد حجبانو ومخنزر فزين العابدين لي مكانش حاامل هاد لموضوع يتحل قدامهوم ولكن ماعندو مايدير وهو عارف باه باغي يطمن عليه..
صابر:سوء تفاهم وقع فاش لقى داك لبوليسي تلفون عند بالو راه ديال الدري لي تضرب ساعة راه ديال زين العابدين وتاأنا فاش كنت تانعيط ليك ولقيت تلفونك طافي جاني عجب ومكانش عندي تلفون شي حد فيكوم تامن رؤوف نمرتو مشات ليا..
نوح:(شاف فيه بهدوء) والأمور دابا مزيانة؟ داك الدري كيف بقا؟؟
صابر:باقي فالسبيطار حالتو شوية صعيبة لمهم هو ولدك دابا راه ماعندو تاشي دخل حيت كاين دليل غير هو هاد لمرة عندو الزهر وكانو لكاميرات فلبلاصة لي دابزو فيها ولكن لمرة جايا راه ماظمنش رااسك..
نوح:شكرا ابا صابر
صابر:الله ياودي اولد الحاج الله يجيب الشفاا هانا مشيت تانعاود نرجع
حرك ليه راسو باه ومشى صابر ونوح تنهد وضار شاف فإدريس وقال بهدوء:رحييل مافخبارها والو؟؟
إدريس:راك عارف خفنا نگولوها ليها وطرى ليها شي حاجة لاهي ولا لي فكرشها
نوح:(غمض عينيو ورجع راسو لور وقال بخشونة)مزيان بلامااتگولو ليها والو وتصدقو خالعينها لياا...
خرجات من لكابيني هي وتانيرت لي كانت شادة فيها وباين على وجهها لعياا بحكم ليلة دلبارح مانعساتش مزياان.. ركبات فالطوموبيل وشافت فتانيرت بهدوء:نمشيو نشوفو غزلان ؟ هاد ليامات گاعما مشات لخدمة قالتها ليا أميمة
تانيرت:نمشيو ولكن نتي واش باقي كرشك تاضرك ابنتي؟
رحيل:(لمسات كرشها بحنية)شوية وصااف كيف ديما
تانيرت:اوا صافي ابنتي خلينا نمشيو عندها وقبل ندوزو نديو معانا شي حاجة فيدينا
رحيل:صافي واخا (شافت فساعتها) ماخصناش نتعطلو عندها على قبل سيدرا لاتصدق جايا وملاقية حد فالدار
تانيرت:نشوف باك واش رجع لدار لاكان فيها هو يتكلف
رحيل:(شافت فيها ونطقات باهتمام)وداك السيد كيف بقاا ؟
تانيرت:(تبسمات)لحمدلله فااق من لكومة وراه بخير
رحيل:اوا لحمدلله ملي ولى بخير ويرجع لدارو ولوليداتو
تبسمات ليها مها وكملو طريقهوم وقبل دازو لواحد لباتيسري خداو منها لمملاحات ولحلاوي ديال لكريم بنواع عاد كملو طريق لدار عند غزلان..
كانو ساكنين فواحد لعمارة زوينة ونقية وتالسيكتور لي فيه كالم عكس الدار لولة لي كانت فبلاصة شعبية.. طلعات رحيل فداك الدريجات مع مكاينش عندهوم لاسونسور ومن زهرها كانو غير فالطاج التاني... صونات تانيرت فالسرسار وضارت تاتشوف فرحيل لي جلسات تاتنهج فديك الدرجة..
كانت واقفة فلكوزينة تاتوجد ليها متاكل وعينيها منفوخين بالرواح لي هلكهاا.. سمعات السرسار وكمشت حجبانها تاتشوف فالساعة لي فالكوزينة مستغربة شكون جاا حيت عارفة أميمة مكاتجي من لمحال تال ليل... طفات على داكشي لي دايرة ومشات بخطوات سريعة جهة لباب ومع طلات بان ليها ضهر شي وحدة..حلات لباب وتانيرت ضارت مبسمة لعندها وتاغزلان تبسمات وقالت بترحيب:خالتي تاانيرت
تانيرت:(بضحك)طالبين ضيافين الله
غزلان: مرحباا دخلو سمحو ليا مروحة مانقدرش نسلم عليكوم (شافت فرحيل لي ناضت وتبسمات) شكون جا عندنا ههه دخلي
رحيل:(بمزاح) شفتي جيت أنا أو ولادي صافا كيف بقيتي؟؟
غزلان:هاحنا مقاتلين مع الرواح ونتي عارفة لجو كيف عامل هاد ليامات
رحيل:واييه الله يشافي
غزلان:دخلو لصالة دار داركووم (مدات ليها تانيرت شنو جابو وقالت بهدوء)علاش عدبتو راسكوم
رحيل:اشمن عداب تانتي (بدات تاتشمشم) دايرة شي حاجة ريحتها زوينة
غزلان:(ضحكات)هههه درت الروز بلمرقة عارفة الرواح حلاقمي ضروني وداكشي هو لي تانقدر ناكل لمهم نمشي نشعل عليه باش يطيب ونجيبو تاكليه
رحيل:الله توحشت طيابك
غزلان:الله ياودي نتي غير اجي وأنا نطيب ليك گاع داكشي لي تشهيتيه
رحيل:صراحة تشهيت الرفيسة
تانيرت:نطيبها ليك اماما ومانديرش فيها لمساخن وگاع داكشي لي غايضرك
رحيل:صافي تاطيبيها وتجي غزلان تاهي تاكلها معانا
مشات غزلان لكوزينة تاتحط داكشي لي جابو فطباسل وهزات لفريز لي كان تم فالشبكة غسلاتو وخدات الطحانة باش تصاوب لعصير.. أما فالصالة راه رحيل مفطحة واخدة راحتها ومحيدة زيفهاا ومونطوهاا.. واخا لبرد الاأنها هي كاتصهد دغياا.. جات غزلان جايبة الضيافة وجلسات معاهوم
غزلان:كنت ناوية نمشي ليوم لمحال مي ماقديتش فيا تبوريشة
رحيل:لمحال مغايهربش كاينة أميمة تم وكلشي هو هداك نتي غير برااي داباا ويكون خير
غزلان:(حشمات من تعاملهوم معاهاا وتبسمات ليها) ونتي كيف غادة مع لحمالة (شافت فكرشها لي كانت باينة) تباركالله ماشاء الله كبرات لكريشة
رحيل:(تبسمات) ماحد لكريشة تاتكبر ماحدي كانتقل هههه
غزلان:شحال عندك دابا؟
رحيل:دخلت فالرابع
تانيرت:وابااقي ابنتي قدامك الطريق ههه
غزلان:دغيا غايدوز لوقت الله يعطيك وقفة ساهلة
رحيل:آميييين
صونى تلفون رحيل وغير شافت السمية بلاشعور هزات عينيها فغزلان لي كانت مجمعة مع تانيرت.. جاوبات رحيل بهدوء:ألو
محمد طه:خرجتي من عند الطبيبة امدرا اش قالت ليك؟؟
رحيل:عادي كيف ديما وعطاتني تادواا وشي ڤيتامينات ناخدهوم..
غزلان:(نطقات بسرعة) ويلي ويلي نسيييت الروووز
ناضت تاتجري ورحيل سكتات فاش سمعات صوت محمد طه لي نطق بهدوء:نتي مع غزلان؟
رحيل:امم حنا فدار عندها
محمد طه:(بقاا ساكت مدة تانطق بتردد) هي وااش بخير؟؟
رحيل:(تنهدات)اه بخير هي غير مريضة شوية وصاف
محمد طه:(باهتمام واضح فصوتو) مالهااا؟؟ باااش مريضة؟؟
رحيل:رواح وصاف لمهم خرجتي من لخدمة؟؟
محمد طه:لا غير غادي نقضي شي غراض وغانرجع تاااني لخدمة
رحيل:تغديتي؟
محمد طه:اه تغديت لمهم نخليك تال من بعد
كان حاس براسو مزير واخا كيبين راه بخير ولكن مكانش حاس بهادشي.. مسح على وجهو وهز عينو قدام ديك لكابيني ديال الطبيبة النفسية لي كانت نفسها طبيبة درحيل.. مكانش هاد القرار بالنسبة ليه ساهل وخدا منو مجهود نفسي كبير.. كان عارف بلي هاد لخطوة تعطل باش يديرها ولكن كان ولابد عليه يديرهاا لابغا يكمل حياتو بشكل عادي وطبيعي بدون عُقد وأمراض لي تخرج على صحتو وعلى نفسيتو تامبقاش عارف راسو.. وبسباب هادشي هو ظلم معاه بنت الناس وجرحهاا جُرح صعيب يبرى ويتنسى..زير على يديه ورمى لخطوة تادخل وعينو كيشوفو فالناس لقليلة لي كانت تما.. رجال ونسا تاهوما عندهوم مشاكيل نفسية وجاايين باش يعالجوهاا.. قرب جهة السكرتيرة لي كانت تما مبتاسمة ليه:وي موسيو
محمد طه:سبق ليا وعيطت عليكوم وخديت رونديڤو
س:دكرني بسميتك عفاك؟
محمد طه:محمد طه التجاني..
شد بلاصتو فلاصال داطونط مور ماكونفيرما مع لسكرتير لغونديڤو لي عندو.. كان تايشوف قدامو ساهي وكايتفكر يامات كان تايجي مع رحيل يوصلها لهناا.. وهاهو ضاار بيه الزمان أو ولى هو لي جااي باش يتعالج بااش يخوي داك الضغوطات لي مخبي ويحااول يكمل حياتو بشكل طبيعي.. نهار هضر مع رحيل ولكلام لي قالت ليه كان بالنسبة ليه دافع قوي بااش يدير هاد لخطوة.. عيى مايبقا هااز فلداخل ديالو وفلخر لقى راسو تايجرح فلي قريب ليه وكيمرض راسو هو نيت وهو مباغيش هادشي.. باغي يرحع كيف كان واخا صعيب ولكن على الأقل يواجه داكشي لي مخبيه ويبوح بيه... وصلات نوبتو ودخل لمكتب فين كانت الطبيبة فانتظارو.. مبسمة ليه بهدوء وعملية وهو جلس قدامها مستاعد يبدا فالجلسة الأولى دلعلاج ديالو...
**
من طبعو مكيحملش السبيطارات وغير حس براسو مزيان طلب من طبيب يعطيه لوطوغيزاسيون باش يخرج وحيت دابا ولات حالتو مزيانة ومعدل السكر استقر ومبقا كاين تاشي خطر قرر يسني ليه لورقة دلخروج..
طبيب:سي السليماني قبل مانعطيك الأوكي باش تخرج خصك تعرف بلي الحالة ديالك واخا مستقرة دابا الإأنه خصك ترد لبال بزااف سبق وقلت الأخت ديالك هاد النصائح مي مافيها باس نعاودوهوم.. نتا عارف le diabète مساهلش وفالحالة ديالك نتا لي كاتعاني من le diabète type 2 فخص ترد لبال لنظام الغدائي ديالك والريجيم ماخصكش تهملو وزيد السبور تاهي مهمة.. وكل مرة خصك دير كونطرول باش تراقب مستوى السكر فالدم باش مانطيحوش تاني فشي مشكيل بحال لي وقع معاك.. بالنسبة لدوا فانتا مامحتاجاش تستعمل لانسولين حاليا خرجت ليك دوا لي غاتبقا تشربو وفاش ماينفعش داك الدوا عاد غاندوزو لانسولين.. وحاول تبعد على الستريس والعصبية والله يجيب الشفاا
نوح:شكرا
خرج الطبيب وبيسان قربات جهتو عاطياه حوايجو لي غايلبس ونطقات بهدوء:أنا كانتسناك برا
خرجات جلسات فدوك لكراسى لي تم وباش تلف لوقت جبدات تلفونها لقات عمر مسيفط ليها مساج فالواتساب...
عمر📩 كوكو بيسان صافا كيف بقا خوك ؟؟
بيسان📩 حمدلله يسول فيك لخير غايخرج من لكلينيك
عمر:(فلبلاصة جاوبها) 📩 على سلامتو كنت ناوي نجي نزورو مي مساليتش
بيسان 📩 ماعليش الخدمة هي هادي مهم نخليك دابا بسلامة
طفات لكونكسيون وتنهدات بعيااء.. حاسة بيه تقيل على لقلب وباغي يدخلها صحة وهي ماعندهاش مع داك النوع واخا بينات ليه وتعاملات معاه ببرود إلاأنه مفهمش راسو.. زفرات بحزن وتفكرات ياماتها مع ريان مكانتش تتسخى بيه ديما شادين لحتيت تافاش كاتكون فلخدمة وهادا زوج دقايق ماكملاتهاش معااه وحسات براسها طجات.. تحل لباب وخرج نوح لابس عليه توني دافي وفوقو جاكيط..تبسمات ليه وعنقاتو بحب:الرياض عامر بالعائلة كانت باغا ماما تبقا معاك ساعة جدي جااا
نوح:(بهدوء)ماعليش تانتي فيك الكفاية
بيسان:نتا غايخصك ترتاح وهوما جايين هاجمييين اه عرفنا باغيين يطمنو عليك ولكن بزاااف عرفتي سناء قالت ليا الرياض مطرطق وسير تاني واحد السيمانة عاد غايتحركو ويمشيو
نوح:(شاف فيها بديك لهزة دلحاجب) نجريو عليهوم؟
بيسان:ماقصدتش هاكا مي غير دويت وصاف
حل لباب دطوموبيلتو لي خلى ليه إدريس تم وشدات بلاصتها جنبو غاديين لرياض فين كانت العائلة مجموعة من الصغير لكبير...
دنيا كاتنغل تم ولي مامريضش بهاد الصداع غايركبو الطونسيون كاين لي جاي ونيتو يطمن على نوح وكااين لي جاي يدي لخبار وكاين لي دايرها حجة وزيارة جاي يفوج..
داخلة طامو وهي كاتجر فداك لقميص ديال الدار ويديها عامرين بدبالح كيف ديما عينيها على سناء لي قلبات وجهها تاتزفر النفس بزز ولخرى تاتميق وطلع فيها...
طامو:(جلسات طالقة خيرها فوق داك السداري) اييه ولد لحاج واش خرج؟؟
رحمة:اه راه جايين هو وبيسان
طامو:والله ابنتي رحمة مانكدبشاي عليك فاش سقنا لخبار أنا وعمك بلاعقل خرجنا من الدار وعيط لباك تاهو وجييناا وجبنا معانا عماد (ولد بنتها) هو لي ساگ
ناضت سناء من حداهوم وخرجات لبرا لقات فوجهها ليازيد قلبات عينيها ونخلاتو ساعة مع من هي.. تبعها تاحاصرها فالقنت ديال الدروج ونطق بهدوء:مالنااا على لفعايل اسناء؟؟
سناء:اينا فعايل واقيلا نسيتي هضرتي لخرة لي قلت
ليازيد:واش عند بالك أنا باغي هادشي وراضي بيه يهديك الله راه معرفااش الحرب لي منوض مع لواليدة على قبلك
سناء:(بسخرية) لاباااينة حيد اليازيد مرشقاش ليا دابا
ليازيد:(بهمس)توحشتك
سناء:(تبسمات ليه)كون توحشتيني كون درتي لحل باش نتجمعو فدار وحدة ماشي غير تبقا داااوي خااوي
دفعاتو وطلعات مخلياه غايتفقص من عنادهاا ومن زهر لي عندو ولي فيما تگاد ليه من جيه تعواح من جيه...
حبس الطوموبيل قدام باب الرياض وقبل ماينزلو شاف فبيسان ونطق بهدوء:سيري جيبي لياا سيدرا
بيسان:صافي واخا ندي طوموبيلك؟؟
حرك راسو باه ونزل دخل لداخل وهي شدات بلاصتو ودمارات غادة لدار.. مسافة الطريق وصلات وبلاصات طوموبيل بعيد شوية على باب الدار ونزلات صونات فالباب وبقات تاتسنى يحلو ليهاا..
كان ريان فالبيت تايلبس عليه مور ماخدا دوش شعرو باقي سارد مخربق.. سمع الصونيط ونزل بشوية عليه حيت عند بالو راه غايكون غير مالين دار لي مداوش السوارت...ومع حل لباب عينوه تحلو فاش قشع بيسان واقفة قدامو وتاهي باين فيه ماتوقعاتش تشوفو هاد الساعة....
قلبها حسات بيه دار بووم وسط صدرها فاش تحل لباب وشافتو واقف قدامهاا.. توحشاتو وماكرهاتش كون تعنقوو وتقولها ليه ولكن شي حاجة مخلياهاا تحبس ودير سطوب... أما هو مكانش قل منها فاش شافها واقفة قدامو بوجهها البريء ودوك لعوينات الزرقين لي كيلمعو ولي باين تحت منهوم ليسيغن دلعياا... كاتبان ليه دابلة عكس بيسان لي مولف.. كان باغي يسولها مالك؟ ساعة فاش تفكر شنو طرا وكلامها لي جرحو عقد حجبانو..
بيسان:(بصوت متوتر) احم خويا قال ليا نجيب ليه سيدرا باغي يشوفها
ريان:(ببرود) باقي ماجات من لمدرسة
بيسان:واش غاتعطل؟؟
ريان:واحد شوية وتجي
بيسان:صافي واخا انا غانتسناها هنا
وقفات جنب الباب وهو كان غايدخل يخليها ساعة خاطرو ماسمحاتش ليه وزيد كاينين شي دراري تم مبغااش يخليها واقفة وهوما يتفرجو فيهاا نطق بصوت بارد مراضيش:دخلي لداخل
بيسان:لاصافي غير خليني هناا
ريان:(نطق بصوت قاصح وهو هاز فيها حاجبو) واقيلا هضرت دخلي لاكنتي غادخلي
كمشات حجبانها معاجبها حال ودخلات وهو سد لباب وتبعها... مكان تاشي حد فالدار من غيرو.. جلسات فالصالون ونطق بتساؤل:تشربي شي حاجة؟
بيسان:لاشكرا
معاودش سولها خلاها وطلع لفوق وهي بقات جالسة على أعصابهاا.. عقل تيقول ليها سيري عاودي دوي معاه وعقل تيقول ليها ريحي لاتصدقي سامعة شي حاجة ماتعجبكش..بين الرد والأخد قررات تمشي وتهضر ودير لي عليهاا باش تصفي دمتهاا ولقرار يرجع ليه هو...طلعات لفوق وسمعات تقرقيب فلكوزينة..مع دخلات بان ليها تايكب لعصير فلكيسان واخا قالت ليه لا ضروري مايضيفها وهو راه ولد الأسمراني مول لقلب لكبير...
ضار شاف فيهاا وهي تلبكات ولكن شجعات راسها ونطقات بهدوء:ريان نقدرو نهضرو
ريان:مكاين فاش نهضرو
بيسان:علاش مباغيش تعطيني فرصة فين نهضر ونشرح ليك علااش سديتي لبيبان فوجهي
ريان:(زدح لكاس بانفعال وقال بصوت قاصح) شكوون لي سد لباب لمرة لولة هااا ماشي نتي لي قصحتي راسك واخا عييت معااك ونتي بقيتي شادة فكلمتك
بيسان:(بتبرير) راه قلت ليك شنو كاين أنا خفت
ريان:بوعو أنااا تخاافي مني هادا ماشي سبب ابيساان حيت كاااانت عندك فرصة فين تهضري وتقولي اش ضااارك ولكن نتي مادرتيهااش (قرب جهتها مخرج فيها عينيه دغيا تسيف تاخلعها ورجعات لور لاصقة مع لحيط) ملي يادلي بنت ليك باغي نتفلى وبرهوووش علاش علقتيني فيك وخليتيني طااامع فيك هااا علاش ماجيتيش وقلتي ليا لي كاااين بااش نعرف ومانبقااش كيف دمدومة
بيسان:(دموعها على سبة هزات يديها وحطاتها على دراعو وقالت بصدق) عمر نيتي كاانت نديرك دمدومة ونضحك عليك ربي شااهد بلي أنا نيتي مكانتش هااكا
ريان:(نطق بهدوء وعينو فقلب عينيها) تاأناا ربي شاهد بنيتي معاك ابنت الناس وبلي عاطيك بلاصة عمري عطيتها لشي بنت لمراا
بيسان:(قربات جهتو وقالت بخفوت) ريان
ريان:(بعد عليها عاض على شفتو منيرڤي) مابقاا لكلام يفيد حيت ضيعتي كلشي بيديك وخاطري نفر من جهتك
مبقاش زاد لكلام معاها ونزل لتحت وهي شهقات بألم من هضرتو وللمرة التانية كيجرحها بهضرتو.. باقي مانساتش ديك لكلمة لي نطق بيها ديك لمرة "ماشي من مقامي" وهاهو زادها دابا فاش قال ليها بلي خاطرو نفر منهاا... نزلات راسها مباغاش تبكي وتنزلهوم مزال قدامو... أما هو جلس فالصالة لتحتانية وخاطرو مزير عليه.. مقادرش ينسى شنو سمع من فمهاا وديك لهضرة لي هانتو كانت قاصحة عليه ينساها ويكمل بحال الامواقع والو...
****
فالرياض فين كانو لعيالات جالسين ومجمعين على صواني دأتاي ولحلوى... ضارت مرات خو رحمة ونطقات بتساؤل:ماشفتش ارحمة عروستك واااش باقي غضبانة فدار واليديها ؟
رحمة:شكون قال ليك غضبانة السيدة كاتوحم ومشات لدار واليديها ملي يفوتها لوحم ترجع لدار راجلهاا
م.أ:(ميقات) اوا اختي ماشي هاد لهضرة لي سمعت
رحمة:(هزات فيها حاجبها) وشنو سمعتي؟؟
م.أ:اوا سمعت بلي السيدة تخاصمات مع راجلهاا وهزات رحيلهاا عند واليديهاا وسمعت بلي هي وياه واقفين على الطلاق
سناء:(بسخرية) اتباركالله ولي وصل ليك لهضرة عرف يزيد فيخراات
قالتها وعينيها على طامو لي خنزرات فيها وقالت:اوا السيدة قالت داكشي لي سمعات وزايدون فاين هي مجات تشوف راجلها وتكون فجنبو والسيد يالاه خرج من سبيطاار
رحمة:(معاجبهااش لموضوع يتجبد وبجدية قالت) السيدة واحلة فروحها وتاحد ماعلمها بلي جاري مع ولدي وهو براسو مبغهاش تعرف
م.أ:(تادوي وتميق) اييه هاد لجيل ارحمة والله مافيه المحنة السيدة لي ماتوقف مع راجلها فمرضو راه ماشي مرا زعمة راه كلناا حملنا وتوحمنا وتكرفصناا وكبرنا لولاد وعمرنا درنا هاد الحالة ولكن ديك السيدة باين فيها ماشي تال تم وفنيانة كون غير يادلي تزوج ببنت خالو شيماء مالها من زيناتهاا ومن دمناا وهي بعدا مغاتسمحش فراجلهاا فمرضو بحال لخرى وظير السبة بلحمالة
مع كملات كلامها سمعو صوت نووح لي نطق بصوت قاصح خشن وهو واقف جنب لباب بلامايدخل: يمّاااا
ماقدراتش تنزل وتشوف فيه مزال حيت هضرتو هاد لمرة جرحاتهاا وبزاف.. هي مكانتش ناوية تجرحو ولكن لي بان ليها بلي السيد مجروح واخد منها موقف أو بصحيح العبارة السيد مبقاش باغي يعطيها فرصة ضرب عليهاا وخرجها من حياتو بحال الاعمرها كانت.. صعيبة عليها تقبلها حيت ولات تاتبغيه وفاش خسراتو عرفات قيمتو وعرفات مشاعرها من جهتو وتأكدات منهوم داكشي علاش فاش شافتو قررات تعاود طلب منو السماحة وتشرح ليه لعلى وعسى السيد يسمع ليها ساعة مع من جاات السيد من نوع لي يعطيك كلشي ولكن نهار يتقلب راه كايولي شخص آخر لي نتا مكتعرفوش... تقليقتو صعيبة داكشي علاش تيحاول مايهزش فخاطرو حيت عارف روحو كيف داير وبيسان جبدات عيبو وهي تحمل النتيجة...
باقي جالس فالصالون وباين فيه معصب معاودش طلع عندها وخلاهاا بوحدها حيت فهاد الساعة مباغيش يزيد يخرج شي كلام لي مغايعجبوش... سمع صوت لكلاكصون عرفو لباص دلمدرسة دسيدرا وناض يحل لباب وبالفعل بانت ليه نازلة ناشطة تاضحك وغير شافتو قربات جهتو وقالت بحماس:رياني حبيبي عرفتي لامطخيز ديالي قالت ليا بغاڤو سيدرا
ريان:(تبسم ليها) دكية بحاال خالك
دخلها لداخل وبانت ليه بيسان نازلة وماحطاتش فيه لعين مزال وكل انتباهها خداتو سيدرا لي شافتها وقربات عندها كاضحك:بيسوو جيتي
بيسان:(تبسمات ليها بهدوء)اه جيت باش نديك تمشي لعند باباك قال ليا جيبيها ليا
سيدرا:(نقزات تاتكركر)ياااي نمشي عند بابانو ريااني
ريان:(لعب بشعرها ونطق بجدية)سيري بدلي حوايجك هو لول عاد نزلي يالاااه
طلعات تاتنقز والشكارة كبر منها فرحانة وبيسان مزادتش هضرات معاه تخطاتو وخرجات لبرا تسناهاا وتاهو مقال ليها لاجلسي لاسيري.. واقفة وخاشية جيابها فيد الكبوط وعينيها على الزنقة وباقي كلامو مقدراش تنساه وداير ليها غصة غير تسوليها مالكي تفرگع عليك بلبكااا... قلبات وجهها فاش بانت ليها رنيم جايا تاهي خاشية يديها فجيب جاكيط ودايرة طاكية على شعرها لي طالقاه براحتو... تبسمات ليها رنيم وغير وقفات جنبها مدات حنكها تاتسلم عليها:زارتنا البراكة صافا
بيسان:حمدلله ونتي بخير
رنيم:(بتبسيمة)حمدلله هاحناا معديين مع الخدمة مالك واقفة هنا علاش مادخلتيش لداخل؟؟
بيسان:كانتسنى سيدرا تنزل باش نديهاا لعند نوح
رنيم:(جراتها)زيدي دخلي راه لبرد برا (ضارت جهتها وحيدات بوطها لابسة بانطوفة)على سلامتو بعدا كيف بقا كنت باغا نجي لعندكوم ساعة عرفتو خرج من لكلينيك
بيسان:حمدلله دابا راهو بخير عارفة le diabète وكيف داير
رنيم:(بأسف) مرض قاصح ولكن ماعندك مادير الحمدلله ملي فاق من لكوما عرفتي لبارح رحيل مسكينة تاهي حسات براسها مخنوقة وتقول واش نعسات حسات بيه مسكينة
بيسان:تاهي غاتكون بدات تاتقل مادويتش معاها شي يوماين هادي
طل ريان فاش سمع لهضرة ورنيم تبسمات وقالت بمزاح:سالوبار نتا هنا مخلي لينا السيدة واقفة فلباب ولبرد ماشي حشومة عليك
ريان:(مشافش جهة بيسان لي تاهي قالبة وجهها عليه)جيتي انص كيلو؟
رنيم:(ضرباتو فكتفو)جييت عرفتي ليوم لخدمة كانت قاصحة وعضامي ضاريني (نطقات بمزاح وهي تاتحرك حجبانها) هزني وصلني لفوق راه مابقاوش عندي الركابي باش نطلع
زيرات بيسان على يديها بلاماتشعر وحسات بلعافية شاعلة فيهاا من كلام رنيم لي سمعاتو ولي زاد عصبهاا هو جوابو فاش نطق: زيدي انص كيلو
هزها بجنب وتاهي شدات فكتفو تاضحك مولفين لمزاح بناتهوم حيت علاقتهوم بزوج بحال لخوت وكل واحد محتارم راسو وعارف حدودو... تاحد فيهوم ماعندو نية ناقصة جهة لاخر... رنيم عمرها شافت شوفة ناقصة فيه ولافكرات بشي حاجة من جهتو بلعكس كاتعاملو بحال خوها وخصوصا ريان عاطيها لخاطر وداك الفراغ لي كان عندها من جهة خوهاا عمرو ليها هو...
جات سيدرا لابسة حويجاتها مفركسة وضاربة واحد لميني جيپ مع تريكو صوف وجاكيط.. من صغرها عندها الدوق ويستحيل تلبس لي كان وبعض لمرات تاتبقا شادة لغنان مع مها على لبس تاكاتلبس لي بغاات..
سيدرا:( وقفات جنب بيسان)صافي ساليت أناا يالاه عند بابانو
ريان:مافيكش الجوع ؟
سيدرا:(شافت فيه وهزات صبعها الصغير تاتهضر بحماس) فيا بزاف دجويعات ولكن بغيت نمشي عند بابانو داباا يالاه ابيسو يالاه
رنيم: هههه واكولي باباك مغايهربش ياك ونيت نضيفو بيسان
بيسان:ماعليش خصني نمشي
رنيم:(بإصرار)والله مغاتمشي تاتشربي معانا أتاي عرفتي ريان كيصرعوو ههه (شافت فريان ونطقات بضحك) بحال لماا وزغاريت ههه
دخلات رنيم باش توجد أتاي وبيسان تحرجات وماقدراتش تقول ليها لا واخا هي باغا تمشي.. جلسات فالصالة وريان طلع لفوق عند رنيم مخلي بيسان جالسة على الشوك... لبوطونة دالغيرة شعلات وشكون لي غايطفيها وعقلها تيوسوس ليها شي حوايج اش جاا ماحيدهوم ليها من دماغهاا.. ضارت متلفة راسها مع سيدرا تاتسول فيها ولخرى تاتجوابها فرحانة تاجاات رنيم هازة صينية دأتاي وريان وراها جايب معاه الضيافة..بقاو دوك الزوح يضحكو وبيسان كانت تاتغدد ومع مدات ليها لكاس دأتاي جات باش تشدو وهو يتهرق ليها على يديها..
جرات بيسان يديها وهي مكمشة حجبانهاا مع أتاي كان سخوون.. ناض ريان بزربة وبلامايشعر جهتها جار ليها يديها تايسوط عليها وقال بصوت سريع:اجي معاايا
جرها جهة لحمام ورنيم وراهوم تاتسول فيها ياك مامقصحة..
شعل الروييني وخشى يديها تحت منهاا باش لماا يتكب عليها ويبرد عليها شوية الحريق لي حاسة بيه تايجر ليها عروق بزولتهاا ...
ريان:(تايشوف فيديها لي حمارت وقال بصوت جدي مخنزر) واش مكاترديش لبااال تت كاضرك بزاف؟
بيسان:(شافت فيه بهدوء) اه
ريان:ضروري ماخص نديرو ليها شي حاجة (هز عينو وجر السينيال وطلسو ليها على ديك الحرقة عاد كمل) خصك تمشي لسبيطار باش يشوفو ليك الحرقة
رنيم:ريان عندو لحق خصك تمشي بااش تشوفي الطبيب حيت أتاي كان سخون
بيسان:ماعليش تانمشي لدار (تبسمات لرنيم) مهم نخليكوم دابا
رنيم:تقدري تسوگي ؟
بيسان:اه غانسوگ سيدرا يالاه نمشيو
جات سيدرا هازة صاكادو ديالهاا وشدات فيها بيسان بليد لي مكاضرهاش وتحركات لجهة لباب معاها رنيم وريان لي بقا واقف متبع ليها لعين تامشات..
رنيم:(شافت فيه) مسكينة لحرقة قاصحة اتكون دابا عاطياها لحريق
ريان:(خنزر) ماعرفت فين دايرة عقلهاا تت لمهم أنا خارج
حل لباب وخرج مخليها غادة تمشي تجمع الروينة لي فالصالة...
----
مع نطق يمّا لعيالات ضربو الطم وديك خيتي لي من الصباح تنمم فأعراض النااس وتاكل جلدهوم خرجات عينيها.. البشار غير يسمع عليك شي حاجة يبقا يشد فيها ويدير ليها الرجلين وليدين ويقولو لي كاين ولي مكاينش... السيدة مدوزة وحامهااا فدار واليديها وهوما ردوهوم واقفين على الطلاق.. رحمة ناضت بزربة ولخرى بقات تاضور عينيها وتشوف هنا ولهيه وسناء حطات الرجل على ختهاا وبقات تاتشوف فيها بشماتة وهي عارفة نوح مغايرحمهااش بلهضرة وغايعيطها علاش تقلب...
خرجات عندو رحمة لقاتو واقف مخسر سيفتو وباين فيه منيرڤي.. هاز قرعة دلمرة لي بقوة مازير عليها تبغجاات بين يديه.. كان نازل باش يدي قرعة دلماا على قبل دواه تاسمع لهضرة لي خرجاتو على طوعوو..
رحمة:ولدي واش محتاج شي حاجة؟
نوح:(قرب جهتها ونطق بصوت قاصح مسمعو لعيالات لي لداخل) اااخر مرة نسمع بحااال داك لكلاااام عندي فدااار تاااحد مامنحقوووش يدوي على مرتي فقلب داااري وأنااا باقي عاااايش ولفم لي يتحل عليهااا بلخااايب نهرسو ومانحنش فيه ( خرج عينيه فموو وقال بجدية) هااااد لمرة دويت بلخاااطر لمرة الجاااياا راه مغانشوف لافدمي ولافلفاميلا ومغانبقاا نحتااارم حد كلى يعرف بلاصتوو وحدودو وتاااحد مايفوت داك لحدود.. ومررتي بيني وبينهاا مايدخل تاااحد فينااا كل واحد يديهاا فرااااسو صبااحتو الله..
خلاهاا واقفة ساكتة ومغاتنكرش بلي كانت تاهي باغاه يسمع لكلام ويهضر باش يسد لفاام.. واخا مكانتش باغاه يتعصب مي الله غالب شي نوع دالناس مكايجيش معااهوم الخااطر وخصك تخرج فيهوم عينيك وماتبقاش تحتارم حيت الواحد فاش كاتحتارمو وكاتسكت ليه تايبغي يركب فوق ضهرك.. أما ديك خيتي راه مرضاتش ولات كلهاا حمرا وندمات على كلامها لي خرجات خصوصا أنها عمرها جبدات لعيب مع ولد لحاج وتاحد مكيقدر يجبد عيبو ومحتارمينو ولكن فمها خرج عليهاا بصح ماعرفش شكون هادي لي دوات ولكن راه عطاهاا علاش تاتقلب.. دخلات رحمة وهي كاتشوف فيهوم هوما لي ضريو الطم تاوحدة ماقدراات تحل باقي فمهاا..
سنااء:(رجعات شعرها مور ضهرها وقالت بضحك) اوا بصحتك هانتي سمعتي لي مايعجبكش شفتو علاش تانقول ليكوم دخلو سوق راسكوم اوا شدي فلبولة تسعين دابا
رحمة:(شافت فمرات خوها وقالت بجدية) راه سمعتي كلامو بودنيك هاد لموضوع مانعاودش نسمعكوم تادوي فيه مزال..
وصلات بيسان لرياض وسيدرا غير نزلات مشات تاتجري لعند نوح.. ماسلمات على حد وماتسوقات لحد طلعات لفوق أو وقفات قدام الباب دجناح ودقات لباب كيف سبق وعلمها.. عاد حلات لباب ودخلات وهي تاتعيط ليه وتاتقلب براسها بحال لفارة:بابانو
سمعات صوتو جاي من لبيت:اجي اسيدرا
مشات لعندو وهي فرحانة لقاتو جالس فوق الفوطوي.. تبسم ليها وحل يديه وهي مشات تاتجري عندو تاهزها وجلسها فوق حجرو..
نوح:(باسها فجبهتها)تاتبيرت إينو قريتي ليوم؟
سيدرا:(تاتفشش عليه ودلع)اه قريت ولاميطخيز قالت ليا بغاڤو سيدرا حيت جاوبت مزيان
نوح:(تبسم ليها بحنية) برافو ابابا
سيدرا:(ضورات راسها ونطقات ببرائة)فين زينبيدين بابانو؟
نوح:غايكوه فبيتو
سيدرا:(تكات على صدرو) عرفتي بابانو مامي مسكينة لبارح ضراتها كريشة
نوح:(كمش حجبانو ونطق بجدية) علاش مالها؟
سيدرا:(شافت فيه وهزات كتيفاتها) حيت مومويات تاديرو بيتيز
بالو تشطن معاهاا ومايمكنش لسيدرا تهضر لامكانش بصح هادشي كاين.. هز تلفونو دوز لخط لإدريس لي جاوبو دغيا..
إدريس:ولد لحاج ياك لباس؟
نوح:(بصوت خشن)سي إدريس واش رحييل مريضة؟
إدريس: غير كانت عيانة شوية ولكن دابا راه مزيان ومشات لعند الطبيبة ديالها
نوح:(كمش حجبانو) ولكن ماشي ليوم عندها كونطرول نوغمالمو عندها نهار 15
كان عاقل على la date ديال لكونطرول ديالها واخا مكانش تايمشي معاها نظرا لحالة ديالهوم مي راه متبع معاهاا.. وفاش عرفها مشات دوزات حس بلي شي حاجة ماهيااش وبالو تشطن معاهاا.. وهادشي حس بيه إدريس لي رحمو ونطق بصوت جدي:هي بخير أولد لحاج ماتشطنش باالك راها دابا مع مهاا والطبيبة قالت ليها بلي كلشي هو هداك وراه خرجات ليها شي دوا وشي ڤيتامينات وصاف يعني مكاينش شي حاجة لي تخليك تشطن عليهاا وتخلع...
نوح:(نطق بهدوء) واخا اسي إدريس السموحات شطنتك معايا هاد النهاار
إدريس:ماتقولش هاكا راه حنا عائلة وماتنسااش معزتك عندي
نوح:الله يكبر بيك اسي إدريس يالاه نخليك دابا
سيدرا:عطيني نهضر مع بّا ديدي (مد ليها تلفونو وهي قالت بحماس) بّاديدي توحشتك
إدريس:نخشيشة هربتي تااني لعند بااك
سيدرا:(كركرات) هههه اه انيني حداه ليوم
إدريس:واتهلاي فيه وردي ليه لبال
سيدرا:(ببرائة) اه بّاديدي واخا
ردات ليه تلفون فاش قطع إدريس لي شاف فداك الإيكو لي سيفطات ليه تانيرت ديال الأجنة لي كانو باينين شوية.. وسيفطها فلبلاصة لنوح باش تاهو يشوف ولادو ويطمن عليهوم وبحال هاد اللحظات مكاتكررش..
حط تلفونو وداز يكمل خدمتو وديك التصويرة وصلات لمولاهاا لي حلهاا وبلامايحس تبسم بحنية وعينو على لعسيلات ديالو.. كايكبر فالتصويرة تايشوف فيهوم كيف باينين باقي صغار ولكن مكونين بحكم دخلات فالشهر الرابع.. عض على شفتو وسيدرا خشات راسها تاتشوف ديك التصويرة وماعرفااتش شنو داكشي..
سيدرا:(كاتشير بصبعها) شنو هادشي بابانو؟؟
نوح:(شاف فيها ونطق بحنية) هادو مومويات لي فكرش ماماك..
سيدرا:(حلات فمها وعينيها تايشوفو فديك التصويرة لي كانت بالنسبة ليها جديدة عليها ونطقات بحماس)علاش هوما هاكا
تاتوريهوم ليها وتاهو كايشرح ليها بلخاااطر وعينو راه كيغليو على ديك التصويرة..
داز لوقت وسيدرا مشات تلعب مع لوليدات وهو ارتاح ليه شوية وعاد هبط لتحت فين كاان جدو لحاج لحسن وجدو ببات رحمة وخوه جلس معاهوم فالصالة وشاف فجدو: كنت ناوي ندير الصدقة الشهر الجاي كيف كل عام ساعة ماحد لعائلة جاات نديروها بعد غدا اش بان ليك الحاج
ح.لحسن:لي بان ليك اولدي شوف نتا شنو مسلكك ولاكنتي حاس براسك بخير نديروهاا ماحد كلشي هناا
رؤوف:شوف بعدا راحتك وصحتك هي لولة
نوح:(حرك وجهو وشاف فرؤوف) تكلف عيط لتريتور لي مولفينو دابا وصيه كيف ديما
رؤوف:(جبد تلفونو ونطق) هي لولة عطيني النمرة
عطاها ليه ورؤوف مشى يعيط ليه ونوح رجع تكى على لمخدة وشاف فجدو لي قال:غايكون ولد عمك اولدي يااك؟؟
نوح:(ببرود) داكشي لي داز ميكت عليه ولكن لاعاود سخن عليه راسو ودار شي حاجة ماهيااش مغانحنش فيه الحاج وراك عارفني مكاندويش غير هاكاك
ح.لحسن:هاد لمرة لادراها أنا نتولاه الله يرضي عليك اولدي أنا عارفاك مول لقلب لكبير ولمرزن
دخل رؤوف لي رصى الأمور مع التريتور لي مولف يخدم ليهوم سنين هادو وعمرهوم بدلوه حيت خدمتو متقونة.. جلسو تايهضرو على الصدقة لي ناويين يديرو وجات تارحمة لي علموهاا وماحد العائلة جات يحضرو وديك الساعة كل واحد يتحرك لدارو... مشات رحمة تعلم عيالات خوتها لي بايتين عندهوم بحكم كلهوم ساكنين ففاس أما لي من هنا راه مشى لدارو..
جابو لعشا وطبعا نوح عشاه كاان بوحدو بحكم الريجيم كلى معاهوم شوية وناض خلاوه غادي لبيتو يرتااح..
كانت سيدرا فبيتها مور ماتعشات وبدلات حويجاتها ببيجامة هزات نونوس ومشات لعند نوح باش تنعس عندو.. دخلات تاتسلت وتاتقلب عليه فاش مبانش ليها جلسات فوق النموسية.. تاضور راسها يمين وشمال تابان ليها فوق لكوافوز بواطات ديال دواا.. تحل باب الحمام وخرج نوح تايمسح شعرو بفوطة لابس عليه شورط حد الركبة مع تيشورت..
نوح:(شاف فيها وتبسم) كليتي عشااك؟؟
سيدرا:اه كليت وغسلت سنينات ها (تاتوريهوم ليه)
نوح:صافي مزيان يالاه شدي بلاصتك أنا جاي
بدات تاتحبو فوق النموسية تاوصلات لبلاصة وزولات لكوڤرلي وتخشات تامبقا كيبان غير وجهها لي مغطي بشعرها القهوي الطوويل.. دقائق ورجع نوح لي جلس شرب دواه هو لول وهي حاضيااه تاشافتو تكى حداها وهي تنطق بتساؤل:بابانو واش نتا مريض ؟؟
نوح:(جرها عندو تاتكات فوق صدرو وقال) اه ابابا
سيدرا:(قاست حنكو كيف مولفة كيدير معاها إدريس ولامها) مافيكش فوفو هنا
نوح:(ضحك وجر ليها نيفها) اش هاد فوفو تاني
سيدرا:(كمشات عوينات لببوشة)مامي تاتقولها لياا فاش تانكون مريضة تاتقيسني هنا وتتقول ليا مافيكش فوفو اسيدرا وتاتبوسني هاكا (باستو فحنكو) باش مانبقاش مريضة تاتجي مامي ونقول ليها تبوسك
تنهد نوح من سيرتها وبقا ساكت تايسمع ليهاا.. عيى من هاد الجفى لي بناتهوم.. سمع الدقان فلباب وشوية بان ليه زين العابدين لي كان جاي باش يطمن عليه وغير شاف سيدرا وهو يكشر ملامحو..
زين العابدين:جيت باش نشوفك واش محتاج شي حاجة
نوح:(ضرب على لبلاصة حداه وقال بخشونة)هاد ساعة محتاج ولادي معايا اجي
تخشى جنبو من الجهة لخرى ونوح جرحوهوم بزوج وحط راسهوم على صدرو وغمض عينيه ونعس أو ولادو ضايرين بيه..
دازت ديك ليلة وتبعاتها ليلة خرى لي الأمور كانت روتينية فيهاا.. وصلهوم خبار بلي نوح غايدير صدقة وطبعا عائلة إدريس هي لولة لي غاتحضر...كانت رحيل تادوش والضبابة ديال لبخار ضايرة بيها...كانت باغا تمشي لحمام مي مقدراش عليه وفضلات الدار حسن...تاتغسل شعرها ويديها طايحين عليها عصبهاا ومبقاتش تاتقدر تستحملو حيت طوال بلاقيااس ضورات عينيها جهة لمقص لي بان ليها تم وهزاتو وفرقات شعرها على نص ودوزات عليه لمقص فالجهة لولة وضارت لتانية دارت نفس الشي... عينيها على شعرها لي كان هاكا طويل ودابا ولى تقريبا جاي فوق صدرهاا.. قطعاتو ومحناتش فيه واخا راه شعرها تموت وماتقطعوش ولكن عياات ولات حاسة بنفسيتها مريضة وخاطرها مبقاش عندها مع لهرمونات لمخربقين وزيد لوحم ولحمالة والتقل ومبان ليها غير شعرهاا تقطعو.. كملات تدواش وناضت لابسة بنوار ونقات الدنيا وهزات شعرها تاتشوف فيه بهدوء تنهدات ومشات لبيتها لبسات عليها حوايجها باش مايضربهاش لبرد ونشفات شعرها وخلاتو على راحتو...نزلات لتحت وتانيرت غير شافتها وهي تشهق جاتهاا صدمة واخا هو جااهاا الشعر زوين وتقطيعة بينات ضورة دوجهها ولكن راه داك الشعر تاحد مايسمح فيه...
تانيرت:قطعتي شعرك
رحيل:(جلسات بتعب) عياني ولى طويل بزاف مبقيتش تانقدر نمشطو ولانغسلو
تانيرت:نغسلو ليك اماما لمهم ماتقطعيهش ااحييه من زيناتو سخيتي بيه
رحيل:(بملل) دابا يخلف اماما
---
ظلامت الدنيا وفالرياض السليماني كان تريتور مكلف بكلشي والصالونات بزوج راه مقادين وفيهوم الطبالي بقوامهوم وريحة البخور دلعود عاطين منهوم وصوت الطلبة لي كيجودو القرآن مسموع على الجهد... بجلابة سوسدية فالكحل واقف نوح كيستقبل الرجال لي بداو يجيو من العائلة وأيضا من معارفو... لعيالات راه فالصالة لدخلانية مكيبانوش تم...دخل إدريس مع رحيل لي كانت شادة فيه ولابسة جلابة كحلة سخونة مع فولار فالرمادي وبوط... عينو تعلقات عليها وعلى كريشتها لي باينة من الجلابة ولي قدر يقشعهاا... القلوب عند بعضها وبزوج لابسين لكحل واخا تاواحد معارف على لاخر...هي غير شافتو قلبات وجهها عليه وزولات يديها من دراع باه...
سلم عليهوم وضار سلم على تانيرت تاهي غير من بعيد ولبنات لي معاهاا ونطق بهدوء:النسا راهوم لداخل
تانيرت:واخا
جات دخل رحيل وهو يشدها نوح من دراعها ونطق:بلاتي خليك
مشات تانيرت مع لبنات وإدريس راه دخل لصالة مع ولادو وإسلام... أما رحيل نثرات يديها وقالت ببرود:اش باغي
نوح:اجي معايا
حيدها من تم حيت مباغي حد يشوفها ليه داها تالحدا دروج فين مكان حد وشاف فيها بهدوء:صافا شوية
رحيل:(نطقات بعصبية)دابا واش جايبني لهنا باش تسولني واش صافا اسيدي كنت صافا مي غير شفتك مابقيتش
نوح:(هز حاجبو)بدينا تاني الفتنة
رحيل:(هازة يديها تاتهضر منيرڤية) لامابغيتيش نبداو فرقني عليك
نوح:(جر يدها وشاف فيها مشربن)فين خاتمك دزواج؟؟
رحيل:(نثرات يديها وقالت ببرود) ماعندي ماندير بيه ومباغاش نلبسو
نوح:(مسح على لحيتو لمغوفلة ونطق بخشونة وهو مقرب جهتها معصب) باغا تعصبي جد مي فهاد الليل لاش محيداه؟
رحيل:(خنزرات فيه) ماعندي ماندير بيه لاهو ولامولاه
نوح:(قرب جهتها ونطق بصوت كالفحيح) باقي لدابا داير بوجه لي فكرشك وداك لسان عندك اخرتو نقطعو ليك تحركي لصالة وتركني تم ومانلقاكش كاضوري ليا هناا تحرركي
خنزرات فيه ولبكية جاتها مكرهاتش طير عليه ضربو وتهبط ليه عنقو بلقميش نطقات بصوت منيرڤي:اااع كانكررهك
خلاتو وهي تاترعد وهو شوية ويعصي لي خالقو فيها غير حشم وبقا مصبر راسو لايصدق داير فيها شي كارثة... استغفر مولاه ومشى لصالة عند الرجال يدير معاهوم لواجب...أما رحيل راه دخلات لصالة وكلشي كيشوف فيها ويطلعوها وينزلوهاا مع الحمالة غلاظت وزيانت السيدة ولاقية راحتها... سلمات عليهوم وجلسات أونفاص مع مرات عادل ولد عم نوح.. لكلام ضاير بناتهوم وكل كليكة تسمعهوم داوين فشي موضوع..
زولات رحيل فولارها ولاحتو على عنقها ولافخونش مطلوقة على وجهها وبقات تاتجمع مع رحمة لي جالسة جنبهاا...
كان نوح جالس جنب ولد عمو عادل لي جاي بزز منو محاملش يشوف نوح بعد اخر بلان طرا بناتهوم ولي لعائلة جات من صف ولد لحاج كيف العادة...سمع تلفونو صونى ولقى مرتو مسيفطة ليه شي حاجة فلواتس دخل وبدا كيشوف فالتصاور شي مضبب شي مزعزع تابانت ليه صورة دشي مرا كاتشوف جهة لكاميرا وضحك ..بلامايحس بدا كيكبر فالتصويرة بفضول وعينيو على ديك لمرا لي معارفش شكون هي...
جالس كيتسنط لهضرة دجدو مع إدريس وضور وجهو بلخطفة لجهة لخرا وماتجي عينو غير على تلفون عادل فلول مادا مجاب وقلب عينو ولكن سرعان ما رجعها تاني فاش قشع تصويرة رحيل لي كانت بلافولار وشعرها باين واخا تصويرة مضببة الاأنها باينة ضاحكة...طير لعادل التلفون على غفلة باغي يتأكد واش نيت هي ولاعينو مزاگلين...
عادل:(نطق بصوت عالي)واش شوية لابس علاش خاطف ليا التلفون من بين يدي ماقلتي هادا كيشوف فشي حاجة خاصة بيه ارا تلفون ابنادم واش هبلتي
مجرد ماتأكد لعروق دراسو تنفخو وعينيه ظلامو وهضرتو زادت شعلاتو تادفع الطبلة برجليه تاتشتت داكشي لي كان فوق منها فالأرض وناض نوضة وحدة مخرج فيه عينيه لي حمارو وشنق عليه وبنبرة تاتخلع:هاديك القوواد شرافي وشرااافي نقتتتل على ودوو...
تتاكل من دوك لقراشل لي فوق الطبلة واخدة راحتها وطالقة ودنيها مع رحمة لي تاتهضر مع لعيالات لي فجنبها تاضارت جهتها وتبسمات ليها: عندك يضروك دلحار لاكترتي منهوم
رحيل:(تبسمات ليها) لا مباينش فيهوم گاع زوينين بزاف عجبوني
رحمة:بصحتك وراحتك كااين لابغيتي نجيب ليك مزال
رحيل:آمين (ضورات عينيها على النسا ونطقات بخفوت) شي عيالات يالاه نشوفهوم هناا شكون هوما
رحمة:شكون فيهوم؟
رحيل:(شافت جهة مرات عادل لي عمرها شافتها وقالت) لي لابسة جلابة فالگرونة
شافت رحمة فشكون بنظرة عادية ورجعات شافت فرحيل:هاديك حكيمة مرات عادل ولد عم نوح
حركات ليها راسها باه وسكتات بينما رحمة شافت جهة لخرى مكملة حديتها مع النسا لخرين... بينما حكيمة كانت فيما ضور تشوف فرحيل تعطيها تبسيمة صفرا وترجع تهضر مع هاديك لي فجنبها تانغزها ولدها ونطق بتدمر:طفى ليك التلفون
حكيمة:(خنزرات فيه وخداتو ليه)صافي رتاح دابا كون ماطفاش مغاتحطوش
س:شحال من مرة تانقول ليك ماتبقايش تعطيه التلفون خلي الولد يلعب راه اتخرجي عليه
حكيمة: مالو لخاطري راه تانعيى ماناخدو ليه ونخبيه وهو كيمشي ياخدو وباه مضسرو يدخل يعطيه تلفون تاشيبني
هضرتهوم تسمعات لعند البقية ومنهوم رحيل لي بقات تاتشوف فيهوم ومنتابهة مع كلامهوم..
رحمة:شوفي غير عينيه تايبقا يحكمهوم ويكمشهوم
حكيمة:والله اخالتي تاعييت معاه وتقول وراه نيت نهار الإثنين غانديه لعند طبيب دلعنين فلمدرسة ديالو قالو لياا راه مبقاش تيشوف مزيان وكيكتب غير الأغلاط
تانيرت:تلفون مامزيانش فهاد لعمر حيت تايكلخ وتايدير التوحد وزيدي الشوف لي تينقص ولوليد باقي صغير راه صعيبة عليه
س:وهادشي لي تانقولو لهاد لجيل اختي غير لي ولدات شي برهوش ولابرهوشة تمد ليه تلفون باش يجلس وهي تهضر براحتها وتشقى ومعارفينش راه تايخرجو على ولادهوم (شافت فحكيمة) شفتي ولد ولد لحاج لعربي ملي تزاد ومو طلق ليه دوك الألعاب فتلفازة وتلفون وفاش تايبغي ياكل تاتعطيه التلفون مكياكلش بلابيه تاولى دري مريض بالتوحد مبقاش عقلو كيستقبل والو وهاهي ضيعاتو
رحمة:(بهدوء)تربية ديال هاد لجيل ولى طاغي عليها تلفون وطابليط عند بالهوم راه هوما متقفين شوفي زين العابدين عمري عقلت على ولدي نوح عاطيه تلفونو فاش كان صغير وماولى عندو تلفون تاكبر ودار عقلو
س:وهاديك هي التربية هانتي شوفيه غير خوى تلفون فالشارج وهو ينوض يلعب
حكيمة: راه ملي دخلنا وأنا عاطياه ليه يبقشش فيه
دخلات سيدرا هازة لقطيطة الصغيرة لي سماتها نوسيد حضناها وقربات جهة رحيل لي غير تاتخشي فوجهها وتسمع ليه..
سيدرا:(بهمس)مامي
رحيل:نعام امامي
سيدرا:(بدات تاتشكي ليها) داك لولد لي لهيه تايبقا يهز نوسيد وتايلوحها لهيه
رحيل:(قاست ديك لقطيطة الصغيرة لي كانت تاتحمق ونطقات بهدوء) طلعيهوم لفوق هي وخوتها
سيدرا:(كمشات حجبانها)همم تاسيزين تايضربهوم واخا هو باباتهوم
رحيل:حطيهوم فلبيت باش مايضربهوم حد
خرجات سيدرا وكيف قالت ليها مها دارت حطات لقطة فبيتها هي وخوتاتها وصوتهوم الصغير مسموع تم وإيڤانا تاهي حطاتها حداها وغطاتهوم بغطا ونزلات لتحت غادة لعند باهاا.. كانت تاتجري بديك لغوب تاوصلات لجهة الصالة وهي تكمش حجبانها فاش سمعات صوت الصدااع...
قبل دقائق عند الرجاال لي كانو جالسين صحة سلام وصوت لفقهة مسموع كيجودو لقرآن تاكلشي سكت وحل عينيه بصدمة فاش دفع نوح الطبلة وناض نوضة وحدة لعاادل وهو مشربن مكيقشعش قداموو.. دمو كيفوور وكيغلي وهو كيتفكر كيفاش كان تايشوف فديك التصويرة ويدقق فيهاا.. والطامة لكبري السيدة كانت بلادرة يعني هو شاف واحد لحاجة لي متعلقة بيها هو فقط حاجتو لي يقت.ل على ودها ويطيح الروووح.. شانق عليه وغير نطق بديك لهضرة عادل سرط لسانو بحال لافهم حيت هو براسو معارفش شكون ديك لمرا لي فالتصويرة حدو فاش دخل وقشعها فضولو خلاه يبقا يدقق ويحظي بعينيه ولانقول داك لڤيس لي فيه ماهنااهش...
ناضو الرجال كاملين ولفقهة حبسو وسكتو كيشوفو وإدريس وسليمان وجدو قربو جهتو وعادل دفع الجبهة ونطق بصوت عالي: طلق الخرا واش مريض اش داني ليك ولالشرافك
زير عليه نوح وعينيه خارجين فيه حمرين كيف جغمة ديال الدم وبصوت قااااصح غوت: شكووون نتااا اولد لقح*بة لي تشوف ليااا فمرتي وتفرج فتصويرررتهاا
عطاه بالراس نيشان تاطاح عادل فوق السداري والرجال جروو نوح تايهدنو فيه وگاع لي فالصالة ناضو يدخلو واخا هضرة نوح كانت كافية تخليهوم يعرفو علياش نايض لمشكيل... وأي راجل لي تايغير على شرافو ولي دمو حامي ضروري مغايتصرف كيف تصرف هوو.. مايمكنش تشوف واحد اخر تايشوف تصويرة مرتك لي من نهار تزوجتيها ونتاا مخبيها على عينين رجال لعائلة بسباب غيرتك ويجي واحد لي نتا أصلا عندك معاه مشكيل وزيد هو مكيحملكش يشوفهاا بلافولار وبشعرها لي كيفتنو.. نزل عندو شانق عليه من كول الجلابة وجرو تايشوف فملامح وجهو بنظرة كاتخلع وقال بصوت قوي: لعين لي تحط عليها نعميهاا
تحدرو جهتو باش يزولوه عليه حيت عارفين لامادخلوش الروح الطيح خصوصا جدو وعمو لي ديجا حضرو لمشيكل لول وديك المدابزة وباين هاد لمرة مغاتسلمش الجرة كيف لي قبل منهاا.. زولو ليه يديه وعادل ولى طالب السلة بلاعنب.. جرب المرة لولة قصوحية نوح وعارف لامانااضش وخرج غايجيبها فعظامو.. لاكان ديك لمرة جبد ليه ولدو بلكلام لخايب فهاد لمرة راه هو تقب لورقة ودار حاجة لي هي خط حمر عندهاا.. جروه من عليه ونوح كايتنتر باغي يشرب من دمو باغي يتقب ليه عينيه لي شافو ليه فمراتو هادشي لي مفيكسي فعقلو ولخرين مبغاوش يوقع شي حاجة لي يندمو عليها كاملين..
إدريس:(كايهدن فيه فاش شافو تعصب حيت خاف لايعاود يطلع ولاينزل ليه السكار) الله يهديك اولد لحاج تهدن ونعل الشيطان
نوح:(لأول مرة يهز صوتو عليه ويخرج فيه عينيه ويخسر لهضرة مداير لابحساب لعائلة لابحساب تاحاجة) واااابربي ليوووم يابيا ولابيه نوووري لزا*مل يشوف ليا فتصووويرة مرتي وهااااديك (ضرب صدرو تاتسمعات زدااف) شرااااافي
ضار نوح تايقلب بلاعقل على تلفون عادل لي طلقو فاش ناض ليه ولعرق تايضرب فجهة نواضروو كولو حمر بحال شي فاخرة زاااندة.. لقاه مليوح فالأرض وهزوو ويديه تاترعد بالأعصاااب حلو لقاه خصو يدخل لكوود وغير دارها فيد الله كتب سمية ولد عادل وبالفعل كان هاداك هو لكود وغير تحل التلفون بانت ديك التصويرة درحيل وإدريس تحدر كيشوف معاه مكمش عينيه وتاهو تعصب.. عين نوح مشات لشكون سيفطها ليه ولقاهاا مرتو..
أما عند عادل لي مجموعين عليه الرجال تايهضرو معاه ويسولو فيه وهو غير شاف نوح بعد وتشغل نااض باش يهرب بجلدو حيت عارف راسو غاالط ناض حادر راسو ودفع جدو لي كان شوية يطيح كون ماشدوهش وهو تقول واش تسوق ليه لاهو لاباه..
سليمان:(بصوت عالي) فييين غااادي؟
هز نوح راسو مع ديك لكلمة وغير قشعو غايمشي وهو يلوح تلفون لإدريس لي شقمو وتبعو وعادل شافو وهو يطلق رجليه تايجري.. شدو نوح من لقب دالجلابة وضور جهتو كيعطيه فالكروشييات ويضرب فيه بهسترية.. محلف ليه ديااال داك لمرة لي جبد فيها ولدوو وقال عليه ولد لحرام وزاد تاهادي لي كانت النقطة لي فيضات لكاااس..
كانت سيدرا تاتشوف فالحدث بنظرات مصدومة عمرها شافت بحال داكشي وحد مارد ليها لباال وهي واقفة بلاصتها جامدة..
عند لعيالات الصداع ولغوات كايتسمع عندهوم ومعارفينش اش طاري تاتسمع صوت السعدية على برا وهي تاتغوت: عتقوووو عتقووو ليوم الروووح طيييح
دخلات عندهوم وهي تاتنهج وعينيها خارجين ورجعات غوتااات: لالة عتقي ولد لحااااج ليوم غايطيح روحووو
غير سمعات رحمة وبيسان لهضرة وهوما يطيرو وگاع لعيالات لاحو زيوفهوم ومنهوم رحيل لي مشات تشوف اش كاااين وفمهاا صفررر.. الروينة نااضت فالريااض والصدقة تقلبااات.. تيبانو ليهوم الرجال مجموعين تايغوتو ويدخلو باش يفكوو ورحمة غادة بلاعقل تادفع فيهوم باااش تشوف تابان ليها ولدهاا طايح بالضرب على عادل لي وجهو مبقاااش تيباان بالدم لي سال من نيفو أو وجهوو.. خربق ليه لمعالم ديال وجهوو نوضو عليه نوح كايتركل ويغوووت بصوت قااصح باقي مابرداات ليه وعينو على لي شادينوو: واااااطلقووووو أولاد لقح*اب واااابربي لاتفكيت معاااه طللللللق
شهقات رحيل وعينيها على عادل لي بان ليها فديك لحالة ومرتو غادة تاتغوت هي ومو وخوتو تايجريو يفيقوه ورجعات شافت فنوح لي كان تيبان ليها بحال شي وحش فهاد اللحظة... وبالفعل راه كان بحال شي أسد سادين عليه فشي قفص حارمينو من حوريتو كيفماا حرموه من أنه يدير لي فبااالو...
كلشي ترون وفداك الرياض مابقا كيتسمع غير صوت غواات نوح مع بكاا وغوات لعيالات والوليدات الصغاار لي تم ولي كيشوفو داك لمنظر لبشع.. قربات رنيم جهة دوك لبراهش جمعاتهوم كاملين وعينيها تاتقلب على سيدرا لي مبانتش ليهاا وطلعاتهوم لفوق مع السعدية وخلاتها معاهوم ورجعات نزلات وهي كاتشوف ديك الروينة بخوف...
تحل باب الرياض ودخل زين العابدين لي كاان فلاصال يالاه جااي وعينو على باه وداك الصداع راه وصل لبراا.. قرب جهتو لايح الصاك بعدم اهتمام وشاف فبااه لي كان فحالة فاتت الأعصاب...باقي كايتنتر من بين يدين لي شادينو واخا طلاهوم وماخلى باش عايرهوم إلا أنهم ماطلقهوش..
زين العابدين:(بخوف وتساؤل) لواليد مااالك؟؟
حكيمة:(هزات عينيها فنوح وغوتات بقلة احترام)الله ياخد فيك الحق بااغي ترزيني فرااجلي وتخلي ولادي يتيتموو لمرة لولة دوزناهاا ونعلنا الشيطاان ولكن نتاا مباغيش تنعللوو (تاتنوض فيه هي ومو) نوض اعااادل نوووض
رحمة:(غوتات عليها) ولدي عمروو جبد لعيب مع شي حد احكيمة وهاا لعائلة كلها تشهد ليك عليه
حكيمة:(خنزرات فيها ونطقات تاتغوت) ولدك رااااه مريض فراااسو مكيحملش رااجلي من ديماا وحاسدوو وهاهوو باغي يقتلووو وااش حنا جينااا عندكووم بااش تقتلوووه ليااا
أعدى حاجة عندها هو شي حد يهضر بلعيب على ولدها وهي عارفة تربيتهاا كيف دايرة.. ماشي جات من صفو ولكن عارفة مغاينوضش هاد الصداع إلا لكان عادل غلط معاه..
ماشي غير حكيمة لي بيناات سمهاا فديك اللحظة إنما تامت عادل لي أصلا ماتسرطاتش ليها قضية نوح لي ضربو داك لمرة وماخلاوهش يديكلاري... تاهي عراات على وجهها ومقالوش حشومة وعيب الرجال كيسمعو فيناا بل خرجو لي فقلبهوم لكحل وتفرگعوو كاملين..
رحمة:حتااارمي راسك احكيمة وعرفي اش تاتخرجي من فمك
م.عادل:(بعصبية) وماالهااا گالت لعيييب هضرتها كلها صحيحة ولدك الالة باغي يرزيني فولدي مالها كاااينة السيبة فلبلاااد فيما يضور يخسر ليه وجهوو مكاينش لي يحكموو
سليمان:(غوتات بامفعال)زهرة هنيناااا وسكتي
زهرة:(ضارت فراجلهاا) ماااالي علاااش غانسكت وااش هادا لي مضروب ماشي ولدك ولايهوودي ديك لمرة سكتي ليه وخليتيه يضمس القضية ومايدعيهش لانتااا لابااااك تگول ولدي مقطووع من شجرة ماعندو عائلة توقف معاااه بلاصة مااتبقاا وااقف مع ولدك مشيتي وقفتي مع ولد خوووك لي عمرو حاشاهاا ليك فااش كان عاايش (تفشاات وگاع لي كانت جامعاه سنين فقلبها راه خرجاتو وتقياتو فوجههوم كاملين) خووك لي ديما تابعوو كيف لكلب وهو دايرك بحال شي خدااام عندو سنين ونتا دمر معاااه فداك لمحاااال وماخلى فين سيفطك تجيب ليه السلعة يسخررر فيك بحااال لخدااام ونتااا مهبط ليه راااسك واش عمروو فكرر فيك ياااك نهااار ماااات خلاه لولدو هو لي شاادو ونتااا ضمسك ولاحك بحااال شي شرويطة قضى بيها الغراااض
رحمة:(زيرات على يديها وعينيها تغرغرو بدموع فاش سمعاتها دوات على راجلها بلعيب..غوتات فوجهها وقالت بانفعال) حتاااااارمي رااسك اشمن نوووع دلبشر نتي واااش السيد فقبروو ماحتااارمتيه هاااداا هو وجهك لي كنتي مخبياااه علينااا راااجلي بزااااف عليك ولاكنتي نتي قلبك مشراار وهازة هاد السم فماشي گاع الناااس بحاااالك إسمااااعيل الله يرحمو عمروو فحياتو ظلم شي حد كاان حقااني من نهاار عرفتو تال آخر نهار فحياتو (دموعها نزلو بلاماتحس) هاهو خووه يكدبني عمروو فكر بأنااانية وكاان ديما كيفكر فمصلاحة خوووه وعمرو حسدوو ولاقلل منوو وسولي أي واحد عليه غايقولو ليك اش كااين ولكن نتي مشايفااش هادشي عرفتي علاااش حيت لحسد ولغيرة ولحقد لي فيك عماااو ليك لعينين ازهرة خلاوووك لفعة كاضرب من لتحت لتحت شحاال وأنا حالة ليك بااب دااري وعمري ماقللت احترامي عليك حيت نتي مرات لوسي لي فمقاام خويا ولكن ليووم نتي بفمك خليتي داك الإحترام لي هازاه من جهتك يتبخر بحال لاعمروو كااان..
زهرة:(خرجات فيها عينيها وقاالت) هضرة دصح تاتقصح ارحمة ياااك ولكن بالسيف مادافعي عليه راجلك هاداك أو ولدك تاهو واخا يدير ليدار راه على حق بالسيف هادا ولد لحاج ولكن تال هنااا وبراكة لكااان سليمان سكت هاد السنين كلهاا على لحگرة لي حگرتوناا والظلم لي ظلمتو ولدي أنا مغانسكتش عليه حيت أناا مغانخلي حد فيكوم يقيص لياا ولدي مزيااان تباااركالله
ح.لحسن:(شاف فولدو وقال بحدة) سكت مرتك اسليمااان
سليمان:(نوضها من حدا عادل محمر فيها الشوفة ومرضااش على الشوهة لي شوهااتو قدام لعبااد ونطق بعصبية)والله وتزيدي مزال شي كلمة ازهرة لابقيت ليك راجل ولابقيتي لياا مرا
جرها بعيد وهي تاتخنزر وسكتات حيت خافت لايديرها بصح وعلى أخر يامهاا تولي مطلقة والسيدة بحفايدهاا.. قربات بيسان جهة مها وعنقاتها ومعاها تاسناء لي شدات لسانها بزز قدام الرجاال إيما كانت ناوية طلي زهرة.. أما حكيمة فكاانت تاتعاون فعادل لي توگض والهضرة كلها دازت على ودنيه وكيف لعادة باه جااا من جهتو مرة خرى وهادشي غير مزاد عمى ليه قلبو وخلاه يكحاال بحال قلب لي والدااه... ناض مسند بمرتو مسح دمو بكمام جلابة وشاف فنوح لي كان تينهج وعينو قرطااس بحال شي ثور فاش كايشوف لون لحمر وتيهيج هاكا كاان وكون يطلقوه عليه كون مشى كفتة..
عادل:(لي فيه مامهنيهش وحالف تايحرمها عليه) اتبقااو حياتكوم كلها ونتوماا تاتسكتو على لحق وكاتجيو من جهتو (شاف فباه) راه أناا لي ولدك ماشي هوو أنا لي كرامتي تمسحاات بيها الأرض بسباب ولد خووك لي جيتي من صفو لانتا لاجدي من ديما دايرينو بحاال لوااالي مخص حد يخصر ليه خاطرو علاااش هو وحنا لا راه حفااادك كاملين حاضرين هناا من لكبير لصغيررر واش عمرك عاملتي شي واحد فينا بحااالو ولى حيت هو حفيدك لعزيز راه صافي مكاين حد بحاالو فالدنيا مكبرين ليه الشااان يغلط هو هانيا حنا نغلطو الله يحرق بونااا
ح.لحسن:(بنظرات خيبة أمل) كلكوم عندي بحال بحال وتاحد فيكوم ماجا لعندي ورديتو شي نهاار ولكن نتا اولد ولدي قلبك كحل ومكيشوفش هادشي تعميتي وغراتك الدنيا تاوليتي تاتخربق (خنزر فيه) تاتقول ضربك وحگرك نسيتي رااسك اش داير ليه ولهضرة لي گلتي داك النهار تامد يدو عليك وليوم بلاحشمة بلاحيا تاتشوف ليه فتصويرة مرتوو ياليهوودي اش قربك ليهاا وملين جايب تصويرتها؟
رحيل لي كانت واقفة مع سمعات اخر هضرة قال خرجات عينيها لاهي ولاالنسا ومن ظمنهوم حكيمة لي قالت:اش هااد لبااطل لايحين ليا على راجلي
نوح:(زمجر بفحيح)مسيفطاها ليه وباغا تنكري؟
جاها من لخر خلاها تاتشوف فيه وهي حالة عينيهاا على الباطل لب تحط عليهاا.. وشكون فينا لي غاتسيغط تصويرة مرا خرا لراجلهاا أكيد مكاينااش لي تقدر ديرها من غير لي مريضة فدماغها ولايهووودية..
من ديما هو مكيتحاكش مع النساا ومكيهزش فيهوم لعين.. ولكن فهاد لمرة حط عينو فقلب عينيها وهو كيشوف فيها شوفات قاصحين فشلوهاا.. فمهاا بيااض وعقلها مشى غير لولدها لي عطاتو تلفون وعقلها تايقول واش غايكون هو دارهاا وبطبيعة لحاال مغاتقول ااه وعندك لحق خرجات السيدة الجبهة ونطقات:اش هاد لبااطل مطيحين علياا واش كاين لي بعقلها تسيفط تصويرة مرا خرا لراجلهاا
نوح:(قشر شفتو بنابو وشاف فلي شادينو وقال بهدوء مزيف)غير طلقووني مغاندير والو هاأناا مبرد داباا غير طلقوو
بالفعل طلقوه حيت شافوه تكالمى ومعارفينش بلي داك الهدوء هو هدوء ماقبل العاصفة...
إدريس:(جبد داك تلفون لي هاز ونطق) ولد لحاج عندو الصح نتي سيفطتي ليه التصويرة وبعيني شايفهاا
عادل:(مرضااش ونطق بصوت ساخر) وعلاش ماتقولش مرتك هي لي مسيفطااهااا لياا
عند هاد لكلمة بالضبط ديك العاصفة هااجت وعادل بلاصة مايحشم ويسكت زاد زند العافية لي غاتحرقو هو ولول.. مع قالها مع طار عليه نوح بواحد الزربة جرو من دراعو وضرب ليه راسو مع ديك السارية تادوخوو وماحنش فيه رجع تاني شاربو ولاخر عينيه بداو يتسدو.. ناض لغوات تاااني والصدااع وهو تقول واش حن فيه ماهضرش مازااال ومانطق بتاشي كلمة وضربو ليه كاان جواب كاافي ليه.. فهاد لحظة راه ماقدوش عليه ديال بصح وبقوة مابقاو يجروه تقطعات ليه الجلابة.. هز رجلو جابها ليه فكرشو ورجع شد زدح ليه راسو مع لحيط ولغوااات غير مزاد فديك اللحظة.. طاح عادل مغيب ودم مغطي وجهو وهو راه ماتفكش نزل تايضرب فيه ويركل واخا جروه الرجاال وتحماو عليه الإأنه بقاا تيركل فيه تافرقوووه عليه ولاخر معاودش تحرك كيف طاح بقااا ومو ومرتو تايغوتو وطايحين حداااه ومحمد طه وريان واليازيد ورؤوف وإدريس وإسلام شدو نووح لي باقي كيتركل ليهوم وديك لهضرة مبغاتش تسرط ليه كيفااش حل فمو عليها وديك لهضرة عليها واتهمها بداك الإتهااام... باش يحكموه مردو عليه فالأرض وهو رجع حمر ولعروق واقفين ليه فعنقوو وعينيه راه حمررين بحال لاكبيتي عليهوم السودانية..
كان تيحس بدمو كيفوور ونفسو تايقلال وضبابة جاااتو فديك اللحظة ومعاق بيه غير إدريس لي غوووت عليهوم وسط الصداع لي ناايض:جيبووو كوكاااا
طار زين العابدين لكوزينة هز قرعة كبيرة وجا تايجري طلقوه وشربوها ليه حيت عارفين بلي غايكون السكر سباب مع تعصب بزاف..
قوة الصداع والهضرة لكثيرة خلاتها تحس بالدوخة ورجليها مبقاوش هازينها وهي تاتفكر غير لمنظر لي شافت وداك الدم لي خلى معدتها تطلع... مشات تاتجري لحمام مخليا تانيرت تابعاهاا بخوف...بدات ترد گاع داكشي لي كلات تاحسات بكرشها ضراتها.. حطات يديها عليهاا تاتمسدها أو وجهها مسقووط منو الدم.. وشفايفها نشفوو وكلها تترعد
تانيرت:اجي جلسي نجيب ليك لما دالسكاار
جلساتها وهي كلها تاترعد وفيما تاتغمض عينيها كيترسم داك المنظر المفجع قدامها تايزيد يخلي قلبها يتزير عليها والخوف بان فملامح وجهها المفجوعة.. جابت ليها تانيرت لما دالسكار وشرباتهوم ليهاا ورحيل نزلو دموعهااا وبدات تاتشهق وقالت وهي كادخل وتخرج فلهضرة:واااش شفتيه هو مكاااانش تايتحرك هووو مكيتحركش غايكووون مات ياااك (ضربات على فخااادها وقااالت بصوت باااكي) هووو قتلووو قتلوووو..
دخلات فواحد لحاالة هسترية وبدات تاتبكي بالجهد وتغوت وداك لمنظر يستحيل تنساه..كرشها حسات بيها كاضرهاا وعاطياها لحريق من لداخل... ناضت بزز باش تمشي لطواليط وعاوناتهاا تانيرت وهي تاتبكي وتشهق.. عاوناتها تاهزات الجلابة وهبطات ليها لكولون وجلساتها فوق لاشاس وخلاتها تقضي حاجتها..
كانت واقفة تانيرت حدا لباب لمردود وباقي الصداع كايتسمع والغوات تابانت ليها رحيل خارجة وهي كلها تاترعد..
رحيل:(هزات كلينيكس لي مسحات بيه وكان فيه دم وبصوت مرعود وجه شاحب نطقات)نزل مني د م..
كان وجهها صفر بسباب الخلعة ديال الد م لي شافت فاش مسحات بكلينيكس... ماعرفاتش باشمن جهد هزات سروالها ولبساتو وهي أصلا كولها تاترعد...خرجات عند مها بزز وغير وراتها تاهي داك كلينيكس وهي تخلع واخا الد م مكانش كثير بزاف...بحال فاش يالاه كاتنزل عليك لغيگل تاتكون غير شوية وصاف ولكن بحكم أنها حاملة فمخصش يكوون د م ولانزل منها فهادشي كيعني شي مشكيل واقع ليها ولا لأجنة لي فكرشهاا.. وتانيرت تاهي غير شافت داك الد م وهي تخلع شداتها من يديها وهي دايخة... جلساتها فواحد الكرسي كان تم ونطقات بصوت هادئ كاتحاول ماتخليهااش مخلوعة:خليك هنا أناا جااياا واخا
مشات تانيرت مخلية رحيل حاطة راسها على لحيط وهي سخفانة ومهلوكة وكرشها عاطيها الحريق من لتحت..
أما تانيرت فتوجهات جهة إدريس لي كان جالس قفازي حدا نوح لي استرجع أنفاسو مبعد ماشرب ديك كوكا... باقي معصب وباقي مابردات ليه لهضرة ديال عادل لي ماهماتوش حالتو وماتسوقش ليه واخا يجيه خبارو بلي مات مغايندمش حيت هو سبابو... أما عادل راه هزوه وداوه لسبيطار فاش شافوه غيب ومبقاش تيتحرك ولكن كان كايتنفس..
تانيرت:(بوحه مخلوع)إدريس
هز فيها راسو وناض فاش شافها مخلوعة وقال: مالكي اش واقع؟؟
تانيرت:رحيل
قبل ماتكملها ناض نوح نوضة وحدة وقف عليها تاخلعهاا وقال بصوت خشن:مااال رحييل؟
تانيرت: لهيه حدا لحمام ضراها كرشهاا
ماقدراتش تقول ليه راه نزل منها الد م حيت حشماات وكانت باغا تستفرد بإدريس وتقولها ليه ساعة مع من هو غير سمع سميتها وتجبدات سيرتها السيد تخلع ودم جمد فعروقوو خلاهوم ومشى بزربة لفين قالت ليه كاينة لقاهاا سادة عينيها وفديك اللحظة كانت بين الوعي واللاوعي.. حسات بيديه لخشنة فوق خدها لباارد وصوتو لي همس ليهاا:رحييل كاتسمعيني؟
رحيل:(بصوت باكي) ولادي
تحدر كتر ومد يديه تحت ركابيها ويد ورى ضهرها وهزهاا لعندو مخلي راسها محطوط على صدروو... وتحرك بيها من تم ولبقية غير شافهاا تخلعو تاهوما وكلشي كايسول مالهاا اش واقع ليها وهو ماجاوب حد... خرج بيها من تم وتانيرت وإدريس تابعينهوم...حل ليه إدريس طوموبيلتو بحكم دنوح راه مبلاصيها فالگاراج دلحومة.. ركبها لور وركب حداها حااط ليها راسها على كتفو وهي صافي غيباات بالخلعة ديال شنو شافت.. ركب إدريس وتانيرت لقدام وديمارا بزربة مخلين لخرين راسهوم غايخرج من بلاصتو بهاد لكوارت لي طراو ليهوم فنهار واحد...
تانيرت:(ضارت شافت فيه وقالت بخوف)واش سخفااات؟؟
نوح:(بلل شنايفو لي حس بيهوم نشفو ونطق ويديه على وجه رحيل كايطبطب عليها) اااه
هبط عينيه جهة يديها لي كان فيها كلينيكس وحلها ليها تاخداه وشاف تاهو داك د م وهو ينطق بصوت خشن: هاد د م ملين جااا؟؟
تانيرت:(بخوف وبقلة حيلة)منها
نوح:(هز عينو وشاف فإدريس لي تاهو كايشوف فيه من لمرايا) زيد فالسرعة اسي إدريس
حدر وجهو تايشوف فملامحها لي باين فيهوم لعيا وصفرين وبدا كيقيس حنكهاا بحنية...مخلوع عليها وعلى ولادو وطريق كولها وهو معنقها تاوصلو وحلو ليه لباب نزل ونزلها بين يديه مدخلها لداخل وهوما غير شافوها سخفانة جابو ليه بياص نعسها فيه ومشى معاها مخلين تانيرت وإدريس واقفين بقلب خايف كيرجف... غمضات تانيرت عينيها ومايجي فبالها غير نهار ماتت ليها بنتها تاهي فكرشهاا... إحساس صعيب لشي أم تعيشو وتجربو...عنقها إدريس وهي بدات تبكي وبصوت خافت قالت:يااربي تحفظها لينا هي وحفااايدي لي فكرشها ياربي
إدريس:آميييين
فالرياض كلشي عقلو مقادرش يستوعب اش طرى... ريان ومحمد طه راه عقلهوم مع ختهوم كايصونيو لباهوم ولكن مكيجاوبش وهادشي غير مزاد خلعهوم...
أسماء:(جايا جهتهوم تاتجري) أمضرا واش عيطتو ليهوم؟
محمد طه:مكيجاوبوش
أسماء:كون غير مشينا معاهوم
إسلام:ماعندنا باش نفيدوهوم لامشيناا
أسماء:الله ياخد الحق فلي كان السباب
ريان:(مسح على وجهو وقال بعصبية)زا*مل دايرها قد راسو وباقي تايكدب
إسلام:كيفاش بلان مرتو مسيفطة ليه تصويرة وااش من نيتهاا؟؟
أسماء:(بحقد) وباقي كاتجاابه وهي دايراها لراسها لكلبة غير شديت راسي إيما كنت غانطير عليهاا نفرسهاا
هز ريان راسو وبانت ليه بيسان جايا جهتهوم تاوقفات قدامهوم وشافت فأسماء:واش هضرتو معاهوم خويا نسى تلفونو هنا
محمد طه:مكايجاوبش لواليد غانعاود نصوني عليه (جربها وهاد لمرة بلفعل جاوبو)ألو لواليد أمضرا؟؟
إدريس:باقي اولدي ماسمعنا تاخبار راه دخلوها ومعاها ولد لحاج
محمد طه:فينكوم باش نجيو عندكوم؟
إدريس:مكاين لاش نتوما خليوكوم تم باشما كان غانعلمكوم
قطع لابيل وعلمهوم محمد بشنو قال ليه باه وكلهوم خايفين على رحيل وعلى لي فكرشها لايكون طاري ليها شي حاجة گغاڤ...
ملي دخلوها لداخل عبرو ليها طونسيو والسكاار هو لول عاد ركبو ليها سيروم...كان طونسيو هو لي نازل ليها جات الطبيبة لي علمها نوح بشنو كاين وبلي نزل منها د م وهي قلباتها ودارت ليها تلفازة تاطمنو على صحة توينز لي كانو بخير... نوح ماخرج النفس وارتاح تقالت ليه طبيبة بلي الأم والتوينز بخير وبلي بسبب الخلعة والضغط طرا ليها هادشي وهي حالياا خصها تبقاا هاد ليلة عندهوم وفاش غاتخرج غايخصها الراحة فهاد لفترة وماتحركش بزاف على قبل صحتهاا...باش يتفاداو لمشاكيل
ناعسة فشومبر ماحساش بلي ضاير بيهاا وهو جالس جنبها وشاد ليها فيديها كيشوف فوجهها بهدوء... عرفها تخلعات من شنو شافت داكشي علاش وقع ليها هادشي... تحل لباب ودخل إدريس وتانيرت لي تاهوما ارتاحو فاش طمنو عليها وطمنو تالخرين لي خلاو فالرياض...
إدريس:لحمدلله دازت بخير وعلى خير
تانيرت:مقالتش طبيبة وقتاش غاتفيق
نوح:(بهدوء) فاش كنا لداخل كانت فايقة واخا باقا دايخة
تانيرت:اتكون عياات لحبيبة ديااالي
باستها تانيرت فراسهاا وبدات تاتحرك يديها على راسها ونوح ناض خرج مخليها معااها وتبعو إدريس...
غادي فلكولوار بديك الجلابة لي تشرگات لي فجهة الكتف ممسوقش ليها... راسو حاس بيه عاطيه لحريق وغايتشق داكشي علاش خرج باش يكمي...خدا قهوة كحلة بلاسكاار وخرج لبراا وفجنبو إدريس...حل نوح بكية دلگارو لي خدا وحلها وهز واحد ومد لبكية لإدريس لي هز تاهو واحد..
إدريس:(تايشعل فلگارو وعاضو بسنانو) شنو غادير مع هاداك لادعااك
نوح:(ساط دخان وببرود نطق) لابقا عايش يحمد الله ليل ونهار
إدريس:(تنهد) هو لادعاك مثلا عندك دليل علاش تهجمتي عليه تلفونو باقي عندي
نوح:(زير على سنانو محاملش يتفكر البلان) شحال من مرة ميكت عليه ودوزتها ليه ولكن هادي بالرب لادوزتهاا
إدريس:(شاف فيه وقال بجدية) حسن اولد لحاج تبعد عليه وماتنساش بلي راه عندك عائلة تخاف عليك أو ولادك محتاجينك هوما ومراتك عارف بلي من حقك داكشي لي درتيه فيه حيت أي راجل لاتحط فنفس الموقف غايدير نفس ردة الفعل هو خدا لي يستاهل ونتا صافي حاول تنسى الله يرضي عليك
نوح:(لاح داك الگارو وجبد واحد خر شعلو وببحة قال) هاد ساعة مغاندير والو غير ارتااح
بقاو بزوج تاكماو عاد رجعو لداخل ونوح شد بلاصتو حداهاا وتانيرت وإدريس انساحبو مخلينهوم بزوج هي ناعسة وهو كيتأمل ملامح وجهها لي كيآسروه ويفتنوه...
----
كون مادخلش باه كون هو غايدير فيه يديه حيت مكيحملووش وبصفة عامة ماعندوش مع لعائلة أي تجمع كيحاول ماأمكن مايحضرش باش يبعد على هاد الاحتكاكات.. كان غادي جهة الصالة تالمحها واقفة حدا باب الصالة ومغطية وجهها بيديداتها بزوج وصوت بكاهاا مسموع... قرب جهتها تاوقف قدامها كايشوف شعرها لمطلوق لي كان مليوح على كتيفاتها لي كيتهزوو... دخل لصالة لي كانت الطبلة مقلوبة فيها هي وكراساها ولي كان فوق منهاا وضور عينو على لبلاصة لي تم تالقى تلفون لحاج لحسن محطوط فوق لكوان... هزو باش يديه ليه حيت باغي يعيط منو لولدو سليمان باش يسولو على السبيطار لي داو ليه عادل باش يلحق عليهوم... خرج باش يديه ليه ولقاها باقا فبلاصتهاا ماتحركاتش غير تاتبكي...كان غادي وهو يرجع وقف تاني قدامها وقال ببرود:حيدي من هنا
زولات يديداتها من على وجهها وشافت بعوينها السود لبريئة لي كانو عامرين دموع ورميشاتها تاهوما فازگين بحال حنيكهااتها ونيفها لي ساايل... تخلعات مسكينة من داكشي لي شافت وداك الصداع لي عمرها فحياتها حضرات ليه والغوات لي سمعات وترجمات خوفها ببكاءهاا...
رجعات حطات يديها على وجهها مكملة بكيتها وهو هز راسو لفوق ومغمض عينيه بقلة صبر..هادشي لي بقاا ليه ضار باش يمشي ولكن مامشاش فاش بانو ليه السربايا جايين يجمعو ديك الروينة... هوما دخلو لداخل وهو نزل جلس قفازي وجرها من خصلة لقدامية من شعرها تااحدر ليها راسها وهي زولات يديها ونطق ببرودو لمعتاد:سيري من هناا يالاه
مع قالها مع عنقااتو مضورة يديها على عنقو وخاشية راسها فيه تاتبكي...ملامح وجهو مبان عليهوم تاشي تغيير مد يديه حطها على جنبها وبدا كيدفعها بشوية باش تبعد عليه وهي والو شدات فيه وزيرات عليه وزادت فبكيتهاا..ساط النفس وهز راسو ونطق بعصبية:ارب العاالي (شد يديها لي مضورة على عنقو وقال)حيدي
ضور راسو تايقلب على شي حد من عائلتهاا ساعة كلشي كان فالجيهة لخرى ومكاين هنا غير السربايا...فاش شافهاا شدات فيه هاكاك بكل قوة ضور يد على ضهرها معنقهاا وناااض بيها وهي دغيا لوات رجيلاتها على خصرو وتشبتات بيه بحال شي قميلة...
يتبع...
التعليقات
لا توجد تعليقات بعد، كن أول من يعلق.