محتوى القصة
مضور يديه على خصرها معنقها وهي فالمقابل ضورات يديها على عنقو مبادلاه تعنيقة واخا مفاهمة والو... كاطبطب على ضهرو ساكتة وهو بدورو خشى وجهو فعنقهاا وأنفاسو السخونة كاضرب فعنقهاا.. كان محتاج هاد العنااق وكان محتاجهاا هي بالضبط..
غزلان:واش نتا بخير؟
بعد عليها محمد طه كيحك فشعرو وبصوت هادئ نطق:جبدي ليا حوايجي غاندخل ندوش
خلاها ومشى الحمام وهي بقات تاتشوف فالبلاصة لي كان واقف فيها بهدوء جاهاا فشكل وحسات بلي بيه شي حاجة ماعارفاش اشنو هي.. جبدات ليه حوايجو وحطاتهوم فوق النموسية ومشات لحمام دقات عليه لباب تاسمعات صوتو:وي؟
غزلان:هالحوايج فوق النموسية أنا غانزل لتحت
محمد طه:تسنااي تاتعطيني لفوطة ونزلي
غزلان:واخا
مشات جابت لفوطة ولبنوار وبقات واقفة حدا لباب تاسمعاتو عيط ليها وهي تمدهوم ليه قالبة وجها وحشمانة تشوفو بداك لمنظر.. لوى عليه لفوطة عاد لبس البنوار وخرج لقاهاا نزلات لتحت.. لبس الحوايج لي حطات ليه ورش ريحتو ونزل لصالة لتحت فين كاينين لقى السلام عليهوم وجلس جنب ريان لي كان مربع يديه ساكت...
ريان:(شاف فخوه) فين كنتي؟
محمد طه:كنت غير هناا
ريان:نسى الابغيتي تكمل حياتك بخير
محمد طه:(بصوت هادئ) مانقدرش
ريان:(شاف فيه وبجدية نطق) راك دابا مزوج ماتنساش هادشي
محمد طه:نتا مغاتفهمش أنا باش كانحس (تنهد) جيدااء مكانتش وحدة عادية دازت فحياتي...كبرت معاهاا ودوزنا وقاات وحوايج لي صعاب يتنساو ارياان
ريان:(بتفهم) عارف ولكن ضروري ماخصك تحاول وتعطي فرصة لغزلان تيقني ديك بنت الناس تستاهل كل خير ماتفلتهااش من يديك أنا حاس بيك وعشت معاك كلشي داكشي علاش كانصحك
محمد طه:عارف ماتخممش
ريان:مزيان هادشي لي باغي تاأناا...جيداء كانت فحياتنا وربي بغاها وأكيد حنا مغانساوهاش حيت بالنسبة لينا هي كانت من العائلة وقريبة لينا وفراقها كان صعيب علينا كاملين ولكن تاحد مايقدر يعتارض على قدر الله
سكت محمد طه وهو فاهم ريان اش باغي يقصد بهضرتو...وفالسداري لي مقابل معاهوم كان جالس إدريس وعينو على ولادو وبالخصوص محمد طه لي كان عارف مشاعرو جهة جيداء وشاف حالتو كيف كانت ملي ماتت وعارفو بلي باقي متأثر بموتهاا ولكن رغم هادشي كولو هو عارف بلي ولدو كيحاول أنه يبدا حياة جديدة والدليل هو زواجوو بغزلان...
كانت سيدار جالسة مع لعيالات وعينيها كيضورو هنا ولهيه جاها لملل وباغا تلعب ولكن مكاين مع من تلعب... خرجات من الصالة نازلة لتحت عند الرجال..ومع دخلات بقات واقفة تاتشوف فدوك لوجوه لكثار دالرجال لي كانو وعينيها كيقلبو على نوح... فاش مبانش ليها مشات عند إدريس لي جلسها فوق حجرو وهي قربات جهة ودنو وقالت بصوت خافت:بّاديدي فين ماي بلو آيز؟
إدريس:(بنفس الخفوت كيجاوبها) مجاش انخشيشتي
سيدرا:وعلاش؟
إدريس:عندو واحد الخدمة داكشي علاش مجااش
سيدرا:(بانزعاج) وعلاش مجاش بّاديدي ياك هو قال ليا غايديني معاه ليوم
إدريس:تايسالي وغايجي يديك
سيدرا:(ضورات وجهها على الحضور وقشعاات زين العابدين ورجعات شافت فإدريس ونطقات بخفوت)ها زينبيدين جاا تاهو ولكن ماي بلو آيز مجاش أنا مخاصمة معاااه يالاه
نزلات من عندو مقلقة وماعاجبهاا حال مخليا إدريس متبعها بعينيه تامشات وهي غضبانة...طلعات لفوق وفطريقها تلاقات برحيل لي شافت فيها:فين كنتي؟
سيدرا:كنت عند بّاديدي (هزات فيها عينين البابوشة وقالت بزعل) أنا مقلقة مامي حيت ماي بلو آيز مجااش ومدانيش معاااه
رحيل:(مسحات على وجهها وقالت بانزعاج) اجي تعشااي باش تنعسي غدا فايقة بكري
شدات ليها يديها ودخلاتها لكوزينة حطات ليها الدجاج باش تاكل والعصير وهي مشات تسخن داكشي حيت العشا غايتحط واحد الشوية...
سيدرا:مامي علاش مبقيناش تانينيو عند ماي بلو آيز؟
كانت عاطياها رحيل بالضهر وغير سمعات سؤالها وهي تكمش حجبانهاا وساطت النفس بعصبية..ضارت شافت فيها وقالت بجدية:سربي تعشااي وسيري غسلي سنانك ونعسي باش تفيقي غدا بكري
سيدرا:(بتدمر)وعلاش مجاوبتينيش امامي
رحيل:سيدرا مغانعاودش لهضرة تعشاااي يالاه
سيدرا:(بعناد وتمرد) مابغيتش يالاااه
خرجات من لكوزينة وهي منفخة عليهوم كاملين ومشات لبيت جدها وجداها... أما رحيل بقات تاتسوط وتمسح على وجهها منرفزة من سيرتو لي تجبدات على لسان بنتهاا لي عارفاها مغاتفاكش وغاتبقا تجبدو ليها فكل مرة... هي هادشي لي ماحاملاش...
تانيرت:(دخلات لقاتها عاقدة حجباانها) شعلتي لعشا يسخن؟
رحيل:اه راه الدجاج كيتعمر وغير يتفور كسكسو ونسگيو لناااس
تانيرت:مالكي بنتي ليا مقلقة؟
رحيل:مماليش اماما (شافت فتانيرت) ماما قولي لبابا هاد لمرة لاجاا هاداك باش يدي سيدرا مايعطيهاش ليه
تانيرت:(كمشات حجبانها)شكون هاداك؟؟
رحيل:(بانزعااج)شكون من غيررو داك ولد لحاج تت
عارفة تانيرت لوحم كيدير العجب فلمرا وكل وحدة وكيفاش كيجيها وحامها ومن زهر بنتها جاها وحم كرهها فراجلها وسميتو وتاسيرتو لاتجبدات مكتتحملهااش... سكتات وخلاتها على خاطرها وعارفة غير يفوتها لوحم وغاترجع كيف كانت .. تحماو على لعشا ملي سخن ودارو گصاعي دكسكو بالدجااج والحمص والريحة كاتشهي.. كلاو النااس الصدقة لي كانت بنينة ومشيطو منها تاحبة.. وداكشي لي بقا راه خرجاتو رحيل وصدقاتو...
ملي تعشاو عمرو تاني أتاي ولحلوى والفاكية وحطوها تاني..
كانت بيسان باغا شي سبة لي تنوض باش تشوف ريان... كانت عارفااه غايكون تقلق من داكشي لي سمع وهي كانت باغا توضح ليه وتشرح ليه باش مايفهمهااش غلاط...حطات صاكها فبلاصتها ومع ناضت نطقات رحمة لي كانت جالسة جنبها:فين غادة؟
بيسان: لحمام
خرجات من الصالة وتلاقات مع رحيل لي تبسمات ليها وقالت:محتاجة شي حاجة؟
بيسان:بغيت نمشي لحمام
رحيل:طلعي لفوق حيت هادا لي هنا عامر
بيسان جاتها من الجنة والنااس وداكشي لي كانت باغا طلع لفوق... وصلات لطبقة لي فيها لبيوت وجبدات تلفونها من جيبهاا سيفطات ليه مساج "بغيت نهضر معاك ضروري أنا فالطبقة لي فيها لبيوت"
بقات غادة جايا كاتسناه يجي وفنفس الوقت خايفة يجي شي حد اخر ويشوفها هنا... عند ريان لي قرا لمساج وببرود حط تلفونو جنبو ورجع ربع يديو ساكت... مكانش باغي لايشوفها ولايهضر معاهاا حيت لي سمع من فمها كان كااافي يخليه يدير سطوب ويحبس... هاد لمدة كلها كان تيتفاداها واخا تتصوني عليه وتسيفط ليه لمسجات ولكن مكانش كيجاوبها... ماشي باش يعاقبها ويعاتبها ولكن تايشوف بلي لهضرة مبقاتش تاتفيد وبلي صافي كلشي سالى بنسبة ليه...
عياات ماتسناه وتصوني ولكن والو عضات على شفتها فاش فهمات بلي مجاش حيت هو مباغيش يشوفها... نزلات لتحت وغير دخلات هزات صاكها وشافت فرحمة:أنا غانمشي غدا عندي مايدار وخصني نمشي نرتاح
رحمة:خليك مزال شوية ونمشيو مجموعين
بيسان:تت أناا غانمشي هارؤوف هناا يجيبكوم يالاه باي
سلمات على البقية ونزلات لتحت راكبة فطوموبيلتها غادة لرياض...
دازت الصدقة كيف بغات رحيل ودعاو على روح لمرحومة وموراها كلشي بدا ينساحب... واخر وحدين مشاو هوما عائلة نوح... زولات رحيل فولارها ولعيا كان باين على وجهها..شاف فيها إدريس وقرب باس جبهتها:سيري ابنتي ترتاحي من الصباح ونتي واقفة غاتكوني عيتي
رحيل:واخاا
تانيرت:راه سيدرا غاتنعس معانا ليوم وبلاماتعمري المگانة أنا غانفيقهاا
رحيل:صافي واخا تصبحو على خير
خلاتهونم غادة لبيت وهي حاسة بلوجع فكرشهاا ومع دلك بقات صابرة ليه...دارت روتينها قبل ماتنعس وتخشات فبلاصتها كاتريح عضامهاا.. ويديها على كرشها كاتحركها بحركات دائرية حنينة بحال لاكتمسدها...عارفة بلي فورصات على راسها ليوم ولكن كان ولابد ماخصها دير هاد الصدقة على قبل روح لمرحومة لي كانت إنسانة عزيزة وغالية على قلبها... غمضات عينيها ونعسات باش تحيد داك لعياا لي فيهاا...
فوسط الليل ضرباتها لفيقة على ريحة القرنفل والعود مالية البيت... حلات عينيها وهي مكمشة حجبانها وكاتشم ديك الريحة لي كانت مجهدة... ناضت بلاعكز لاحت عليها بنوار ونزلات لتحت وديك الريحة باقي بين نيفها كاتشمهاا... دقات لبيت على مها وبقات تاتسنى مدة تاحلات ليها تانيرت نيت وعينيها مسدودين بالنعاااس
تانيرت:رحيل مالك ابنتي ياكما كاضرك شي حاجة
رحيل:واش مطالقينش ريحة البخور كانشم ريحة مجهدة وخصوصا فالبيت عندي
تانيرت:مكاين تاريحة
رحيل:اجي تشميهاا
طلعو لبيت رحيل لي مع دخلات ضرباتها تاني ديك الريحة لي كانت مجهدة... شافت فمها وقالت:هانتي شميتيها؟؟
تانيرت:لا ماشميتهااش
رحيل:مايمكنش راه ريحة مجهدة اماما
مشات رحيل فيقات رنيم من نعاسها تاهي جابتها تشم ديك الريحة فلبيت والو تاوحدة مشماتهاا وتارحيل معگزاتش مشات فيقات گاع مالين دار ولي جابتو لبيتها تاتقول ليه شم ريحة لعود ولقرنفل تايقول ليها مكاين والو...جاتهوم عجب وتارحيل لي مافهماات والو الريحة كاتشمها غير هي وهوما لا مايمكنش؟؟
إدريس:غاتكوني ابنتي غير شميتها فشي بلاصة وصاف ماديريش فباالك
رحيل:تت تانقول ليكوم ريحة عاطية هنا وتاتقولي شميتها فشي بلاصة ابابا
تانيرت:قلتي تاتشميها غير نتي ياكما على هاد الصدقة لي درتي
رحيل:زعمة بصااح
تانيرت:وهادشي لي قلت ومانعرف تاني
إدريس:صافي ماتخمميش فهادشي ابنتي وكملي نعاسك ويالاه تاحنا نعسو راه مشى لحال
كلشي مشى لبيتو وبقات رحيل ناعسة فالبيت وديك الريحة دلعود والقرنفل ليل كولو وهي كاتشمهاا...
صباح جديد مغيم والشتاا نازلة تاتسقي الأرض... فاقت رحيل بتعب وهي حاسة بعضامها كيضروهااا.. ناضت دارت روتينها الصباحي ونزلات لتحت باش تفطر وجهها كان منفوخ وباين فيها لعياا...
رحيل:صباح الخير
تانيرت:صباح الخير رتاحيتي شوية ابنتي؟
رحيل:همم ارتاحييت واخا عضامي كيضروني
تانيرت:بالسيف لبارح ماجلستيش
رحيل:ماعليش المهم كلشي داز كيف بغيت هاداك هو لفضل عندي
تانيرت:نجيب ليك لفطور مشهية شي حاجة
رحيل:مشهية لحريرة الحمرا
تانيرت:نمشي نطيبها ليك
رحيل:تت كتاخد لوقت خلي نسيفط محمد طه يجيبها ليا واجدة تشهيت دزنقة
وداكشي لي كان مشى محمد طه جاب ليهاا كاسرونة دلحريرة حمرا ريحتها تاتشهي... سخناتها ليها تانيرت وجلسات تاتفطر بيها على الريق..شربات زوج زلافات وكلات تميرات معاها وجلسات تستارح...
رحيل:بعد غدا عندي كونطرول عند الطبيبة
تانيرت:اييه وقتاش غاتمشي فالصباح؟
رحيل:ماعرفتش تمشي معايا؟
تانيرت:واخا
رحيل:مااما بغيت نطلع الربااط
تانيرت:علاش ياك لباس
رحيل:بغيت نزور قبر جيداء ونطل على خالتي حنان
تانيرت:اوا اش غانقول ليك ابنتي شوفي مع باك
خلاتها تانيرت منها لإدريس حيت عارفة لاقالت ليها تشوف مع نوح غاتعصب تاني وهي تفادات هاد المشكيل...
رحيل:ماما بغيت نمشي لحمام تمشي معاياا
تانيرت:صافي نمشيو دابا نيت قبل لغدا
رحيل:كنت باغا ندي سيدرا مي قارية المهم نوض نجمع حوايجي باش نمشيو
ناضو جمعو السطولة والحوايج وركبو فالطوموبيل غاديين لحمام يسخنو عضيماتهوم... دخلو لسخون ولقاوه معامرش بزاف حيت وسط السيمانة كايكون شوية خاوي على الويكاند.. شدو بلايصهوم وتكلفات تانيرت تعمر السطولة ورحيل جلسات تاتجبد البرودويات ديالها ودمهاا... غسلات شعرها لي كانت دايرة ليه الخلطة دسيدر لي مولفاهاا كاتقوي الشعر ومكاتخليهش يطيح...غسلاتو وجمعاتو وعطات لتانيرت تحك ليها وكسلاتها نيت...دوشو وسخنو عضيماتهوم وخرجو لبسو عليهوم حوايج سخاان ودجاكيطات ورحيل لحنيكاات شوية ويطرطقو بالحمورية...ركبو فالطوموبيل ودازو على واحد لمحللة خداو رايبي عاد كملو طريقهوم وداو معاهوم بيتزات للغدا مع مكاين حد وغزلان راه قارية وإدريس راه أغلبية كايتغدا فالمحال... دخلو لدار لقاو محمد طه مكسل فالصالة تاهو يالاه دوش داير طربوش سخون ولابس توني دافية..
محمد طه:بصحة وراحة
رحيل:(جلسات تاتنهج) الله يعطيك الصحة اوووف عييت
محمد طه:ههههه من دابا عيتي لاكبرات لكريشة اش غاديري اتسخفي
رحيل:ههههه واشكون عرف
تانيرت:جبنا معانا غير لبيتزاا نتغداو بيهاا ياك مابغيتي اولدي نطيب ليك شي حاجة
محمد طه:لا اخالتي راه دايرة واحد التخربيقة كاطيب
رحيل:وايلي اش مطيب
محمد طه:شي عجب ملي يتحط وشوفيه
ناض لكوزينة وهوما تكسلو تما تاجاب لغدا كان داير گرتان دلبطاطا وشيفلور بلكفتة...حطو داكشي ورحيل طاحت عمية فلگرتاان تقريبا ضرباتو بوحدهاا...
محمد طه:گولي تاني محمد طه محادگش
رحيل:يعطيك الصحة والله تابنين هههه فيما نتشهاه تبقا طيبو ليااا
محمد طه:(قاسها فكرشها) نطيبو لحبابي
رحيل:يخليك ليا احبيبي (خسرات سيفتها) وماتبقاش دير هاد الريحة راه خانزة
----
فلبوز دلغدا خرج زين العابدين لبرا تغدا وبقا جالس تاوصلات لوقيتة عاد دخل لقسم نيشان لقا البروف باقي مجاا...شد بلاصتو مزك تادخلو دوك الدراري وغير شافوه تغامزو بناتهوم وجلسو بلايصهوم.. تحدر واحد عند صاحبو وقال بهدوء:هاد لبرهوش عاجبو كر*
أشرف:شفتي إلهام من نهار جاا وهي تقلبات عليا
صفوان:ديك لمرة شفتها واقفة معاااه فالستراحة
أشرف:وقتاااش
صفوان:غير داك النهار
أشرف:وعلاش ماقلتيهاش ليا اولد لق*بة
صفوان:وانسيت ابناادم
بداو كيدخلو الدراري ولبنات ومنهوم إلهام او وجدان...شاف أشرف فيها لقاها تاتحنزز فزين العابدين وهو يزيد يتعصب... حيت أصلا كاتعجبو إلهام وفبداية لعام كان تايتقرب منها وهي كتعاملو عادي وغير جا زين العابدين مبقاتش حشاتها ليه...
جمع يدو على شكل بوكس وعينو على زين لي مامعبروش نهائيا بحال الامكاينش... دوز الحصة لي كانت عندو وناض خرج نازل من دروج تاحس بدوك الزوج دازو حداه ولاح ليه صفوان الهضرة:المعقدين كثرووو هنااا
أشرف:لي معقد نقااادو ز*مل بوووه هههه
سبقوه وهو بقا متبعهوم بنظرات لباردة.. نزل بشوية عليه ومع خرج لباب بانو ليه واقفين مع شي دراري خرين مكيقراوش هناا أو واحد فيهوم عندو مطوور...
أشرف شافو ولاح لهضرة:
بالجهد:بحال هاد النوع كيبغي يباان على لبنات وتلقى مووو باقي كااادوش ليه
بقااو تيضحكو دوك الدراري وهوما كيشوفو فيه...أما هو بقا تايرمقهوم بنظرات لاتبشر بالخير... كمل خطواتو غادي جهتهوم وأشرف بدا كيشوف فيه ويضحك تاقرب زين العابدين جهتو بدون مايعطيه فرصة كان شنق عليه وعطاه بالروسية لنيف تارعفو ولبنات لي تم بداو يغوتو منهوم إلهام أو وجدان ...أما أشرف شد نيفو وشاف فزين العابدين:ولد لق*بة ضبرتي عليهاا
لاح زين العابدين شكارتو بلامايتسوق وقال بنبرة حادة:وريني ماعندك از*ي
قرب أشرف باغي يضربو وهو يخوي ليه وعطاه دقة فكرشو زواه وكوانساه وصحابو غير شافو القضية حماضت وهوما يضورو زين العابدين أو واحد فيهوم جاب لهراوة قاصدو...
عيى مايميك ومايتسوقش ليهوم ويديها غير فقرايتو ولكن هوما ماخلاوهش... كل مرة يلوحو ليه فالهضرة باش يجبدوه وهو كان ساكت على قبل باه حيت مباغيش يدير لمشاكيل فالمدرسة الجديدة... ولكن هوما مكيفهموش هادشي وعند بالهوم هو ساكت حيتاش خايف ولكن معارفينش بلي هو ساكت حيت عارف راسو لامشى تانااض ليهوم مغايرحمهومش...ضوروه كاملين مخلينوو فالوسط أو واحد فيهوم جاب هراوة وجا قاصدو... هادشي ماشي جديد عليه ولحمو ولف الدق تاقصااح ومبقاات تاحاجة ضرو... قرب لاخر هاز لهراوة باغي يضربو بيها ساعة زين العابدين تجنب ليه وهز رجليه ركلو بيها تاطاح لقدام...وهنا بداو يتكبو عليه الدراري لي محامين وهو راه دقتو خايبة ويديه قاصحة مكيرحمش... أشرف وصفوان فيهوم غير لفم ولاد لفشوش لي تايجيهوم كلشي تال بين يديهوم.. مداخلاش ليهوم القراية لراس باغين غير يتفلاو واخا واليديهوم كيخسرو عليهوم الفلوس باش يقراو وهوما ممسوقينش... شد زين العابدين أشرف وگاع داكشي لي جامع ليه خرجو فيه عطاه واحد الدقة فجنب عينو تالاخر غوت بالحر وزادو دقة خرى فجنبو تاطاح وضار جهة صاحبو لي كان تايضور راسو باغي شي حاجة لي يهزها ويضربو بيهاا ومبان ليه غير واحد لحجرة هزهاا ولاحها عليه وهو تجنب تاجات فواحد طوموبيل هرسو ليها زاجهاا وغوات لبنات راه مخلي الجوقة تزيد تجمع عليهوم...فغفلة من زين العابدين جاا داك خونا مول لهراوة عطاه دقة فكتفو تااحس بضوو ضربو وضار لعندو بداك لحر لي فيه شنق عليه وبقا تيعطيه فلبوكسات هادي ضر وهادي تنفع...الخلاصة ناضت الروينة قدام المدرسة ولعساس فاش شاف القضية حمات مشى عيط لمدير المؤسسة لي جا خاارج هو وبعض ديال لأساتدة تيشوفو ديك لحالة لي ناضت وشي طايح يتوجع ودمايات نازلين من وجه أشرف وصفوان ومول لمطور غير شاف لقضية حمات وهو يركب فيه وعلق وتاصاحبو مبقاش تسنى مشى كيجري ويعرج خافو يجيو لبووليس وهو أصلا راه روشيرشي...
كان واقف زين العابدين كينهج وعينو على دوك التلاتة لي كل واحد فين منشور تيتوجعوو... وجهو حمر وكولو عرقان وجنب فكو فيه واحد لاطراس ديال واحد البوكس عطاه ليه داك خونا لي هرب...ويديه راه دوك لعضيمات مجروحين وفيهوم دم...جمعهوم المدير هو ودوك التلاتة باش يدخلهوم لإدارة...ضار زين العابدين كيقلب على شكارتو تابانت ليه إلهام جايا لعندو وهزاهاا...
إلهام:هاك خليت عندي الشكارة باش مياخدوش ليك شي حاجة منهاا
جر شكارتو بلامايهضرها ودخل لداخل غادي لبيرو دلمدير لي كان تايغوت عليهوم وهاز الفيكس باش يعيط الأولياء الأمور دكل واحد فيهوم...
أشرف وصفوان كل واحد يشوف فالتاني مباغينش واليديهوم يجيو حيت غايكبتوهاا أما زين العابدين مكانش مسوق كان واقف تايقاد قبيتو وكايتسنى هاد السكوندال يسالي باش يمشي لصاال باش يتريني...
المدير:اتباااركالله على جيل المستقبل دايرين ليا هناا الحلقة هااا اش هاد التصرف واش جايين تقراااو ولاجااين دابزو ونتا (الدري التالت) مكتقراااش هنا اشمن مدرسة كاتقرا فيهاا واااش جااي دير ليا لهنااا
دري:أنا صاحب أشرف وصفوان تانقرا فلفااك
المدير:دايرين لينا عصاااابة هنااا غير بلااااتي نتفاهم معاكووم ويجيو واليديكوووم وديك الساعة هضر خراا...
بقا كيغوت ويسمعهوم فالهضرة وحد ماهضر...وصل بات أشرف أول واحد غير شاف ولدو فديك الحالة وهو يبدا يسول ويقلب فيه... وموراه جا بات صفوان ونوح لي شد طريق من لفيرمة مجرد ماعيط ليه المدير خرج بزربة وجاكيطير..دخل وعينو جات فزين العابدين لي كان واقف مبرد ولي بغا يربح لعام طويل...شاف فدراري لخرين وغير قشع الضرابي والحالة عرف اش طاري...
جلسو الأباء بتلاتة والمدير بداو كيعاود ليهوم الروينة لي دارو ليه قدام باب المؤسسة ونوح تايشوف فزين العابدين ويرجع يشوف فدوك الدراري...
المدير:دايريين ليا عصااابة وجااين تادراري مكيقراوش هنا تاهوما محاميين ليا هناا
ب.أشرف:أنا عارف ولدي مكيجبدش الصداع وهوما لي غايكونو جبدوه
المدير:راه الدراري لي جاااو صحابو وهاواحد منهوم جاي من لفاااك
ب.أشرف:ولدي عارفو مربي شوف اش دارو ليه حگرو عليه
ب صفوان:تاولدي أنا عارفو مضاسرش وراه هاد لعام التالت وهو كيقرا هناا فالمؤسسة عمرو جبد شي صدااع شوف شكون السباب دهاد الصدااع شوف غير وجاههوم وغاتعرف شكون جبد الصداع
نوح:(كان ساكت كيسمع ليهوم ومع كمل لاخر هضرتو نطق ببرود وصوت تقيل وعينو فبات صفوان) الشريف اش باغي تقصد بهاد الهضرة؟
من الصباح وكل واحد كيدافع على ولدو وهو ساكت كيسمع ليهوم وتيشوف اخرة هادشي...هو عارف زين العابدين مغايمدش يديه ويدابز تيكونو قالو ليه شي حاجة لي جعراتو...ملي لاح لاخر لهضرة ومعنى على زين العابدين جاه نوح من لخر حيت هو من طبعو مكيحملش لي يبقا يضور فلهضرة وعزيز عليه لي يجيه نيشان...
طرح سؤالو وهو كيشوف فلاخر هاز حاجبو وكايتسناه يكمل اش باغي يقول...باش ديك الساعة يعرف اش يدير...
ب.صفوان:راه لهضرة باينة ضور شوف شكون واكل الدق وغاتعرف شكون سباب المشكيل
نوح:(تقاد فجلستو وشاف فيه مخنزر وقال بصوت حاد وصارم)نتاااا شوية لبااس ولدي أنا عاارفو مايمدش يديه لاماجبدو شي حد ولاكنتي باغي تدوي جي نيشان وداك الضوران فلهضرة ماعنديش معاااه الشرييف محتااارمك احتااارمني ولاكنا غاندويو على الترااابي كل واحد يشوف راااسو بعداا ولدي أناااا مربيه وعارفو اش كيسوووى..
المدير:(كيرطب فالهضرة فاش شاف القضية غاتنوض بناتهوم) موسيو السليماني تكالمى عفااك أصلا كاينين كاميرات وغانشوفوهوم وبيهوم غانعرفو شكون بدا بهاد الروينة
نوح:(بنرفزة طالع ليه لخز فالرااس) جبد لمرض نشوفووه
شاف أشرف فصفوان وعينيهوم قريب يخرجو بالخلعة حيت نساو بلان الكاميرات...وتالمدير دارها ليهوم على قد فمهوم جبد التسجيلات وبدا يتفرج بصوت وصورة وسمع كلشي وشاف كلشي وتالاباء شافو... وبان بلي أشرف وصفوان هوما لي جبدوه وجابو دراري صحابهوم باش يتحاماو عليه...
لخرين ضربو طم وكل واحد يتحلف فولدو أما لمدير قرر يضرب بيهوم تقرير حيت تصرفهوم غير مقبول وبالفعل دار تقرير بيهوم بزوج من غير زين العابدين...خرجو من عند المدرسة ونوح ساكت وعاقد غوباشتو..كون زادو معاه شوية كون صدق تاهو منوضها تم هو أصلا طالعة ليه القردة فالراس... ولاخر تايتهز عليه تم غير نعل الشيطاان إيما كان ناوي على خزيت... ركب فبلاصتو وسد الباب بالجهد وتحرك من تم فالسكات... ماهضرش وتازين العابدين كان ساكت وأصلا هو قليل لكلام...
وصلو لرياض ومع دخلو نطق نوح بجدية:تبعني
سبقو لبيروه لي عندو فالرياض وزين العابدين وراه مهدن...وقف نوح وشاف فيه بهدوء:سمع أولدي نتا عارف بلي هاد لعام عندك لبااك يعني هاد دوك المشاكيل لي كنتي تادير فاش كنتي تاتقرا فبرا مانبغيهومش يتعاودو... وكل مرة نبقا تابعك من مدرسة لمدرسة أنا عاارف بلي هوما لي جبدوك ونتا خديتي حقك ومغانلومكش حيت هادشي علاش ربيتك حقك ماتسكتش عليه ولكن ماخصكش تكون ظالم ونتا عارف اش قصدت فكلامي...
حرك زين العابدين راسو فاش فهم بلي قصد ليه على لبلان دسيدرا..
نوح:(تنهد) هاد السيمانة غاتضغط شوية مع لونتريما على قبل لكومباا داكشي علاش زير راسك واخا ابابا
قرب جهتو وطبطب على كتفو وزين العابدين كمش حجبانو مقصح...
نوح:(بجدية)مالك
زين العابدين:والو
قرب نوح جهتو كثر وبدا يزول ليه لقبية تابقا بتيشورت سماطي وضورو تاعطاه بالضهر وقدر يلمح ديك الدقة لي كانت حمرا وبدات تزراق جهة كتفو..
نوح:(نطق بتساؤل وخوف) واش هادشي بسباب المدابزة؟؟
زين العابدين:(بهدوء) اه
نوح:(رجع كليبسو قبيتو وقال بهدوء وحنية)لبس بااش نمشيو نشوفو الطبيب على قبل ديك الدقة..
زين العابدين:(باعتراض)مكاين لاش أنا بخير
نوح:(هز فيه حاجبو وقال بصرامة)مكانتشاورش معاك دير لي قلت ليك وزيد قدامي وباركة من قصوحية الراااس (كمل بخفوت) تموتو فقصوحية الراااس...
نهار كولو وهي تتفكر فتصرف ريان معاها ليلة دلبارح وكيفااش ماعبرهااش...بقا فيها لحال ومغاتنكرش هادشيي حيت ممولفاش منو هاد التعاامل والجفاء...معرفاتش كيفااش كملات خدمتها وعقلها أصلا مرفووع مكايناش هنا...ملي لقات راسها سالات خدمتها ومبقا تابعها تاحاجة هزات مسائلها وخرجات غادة تمشي لكابيني ديالهاا...الحاجة لوحيدة لي مخلياهاا تنسى مشكيلها مع ريان هو لكابيني لي عطاها خوهاا كادو... متشوقة وقتااش تكمل بالمطريااال لي موصية عليه وتبدا فيها خدمتهاا...لحلم هاهو بدا يتحقق وعن قريب غاتولي عندها عياادة خاصة بيهاا وصلات ليموبل لي فيها لكابيني وطلعات لاباخطمون ومع وصلات جهة الباب وهي تبسم فاش شافت سميتها لي كانت مكتوبة فواحد الطابلو صغير جنب الباب الدكتورة "بيسان السليماني" أخصائية القلب والشرايين...قاست ديك الطابلو بيديها وهي فرحاانة...حلات لباب ودخلات لقات الخدامة كيوجدو داكشي لي خاص يتقاد...كانت الدنيا مرونة ولكن عارفة بلي مجرد مغايساليو وغايجيبو لمطريال غاتبان النتيجة لي كاتسناها على أحر من الجمر...دارت طليلة تماا وخرجات حيت عارفة بلي لاساق نوح الخبار جات غايصبنها... قبل ماديماري طوموبيلتهاا بقات واقفة تاتفكر فالخطوة لي فالبها واش ديرها ولا لا... واحد لحاجة فداخل ديالها كاتلح عليها باش تنفدها وبلاماتزيد تفكر دارتها فيد الله وشدات الطريق لعند ريان... وهاد لمرة عكس لي فاتت دخلات لعندو فلخدمة ومع بوز دلغداء مكان تاحد من غير السكوريتي سولاات عليه لقاتو فبيروه خدام بوحدو...دقات الباب ومع هز راسو وقشعها وهو يتصدم ماتوقعش غاتجي عندو مور داكشي لي طرا...
بيسان:(تقدمات عندو مور ماسدات لباب وقالت بهدوء) سلام
ريان:اش كاديري هنا
بيسان:جيت نهضر معاك ماخليتي ليا تاحل من غير هادا
ريان:(خنزر فيها) مكاين فاش نهضرو سيري ابيسان الله يحفظك
بيسان:لا غانهضرو ريان أنا عارفة بلي نتا مقلق ومعصب مني على قبل لهضرة لي سمعتي عفااك خلينا نهضرو ونشرح ليك اش قصدت مابغيتش تفهمني غالاط
ريان:لي غانفهمو فهمتوو ولكلام مبقا يفيد دابا
بيسان:لا مافهمتيش نتا سمعتي ديك لهضرة ولكن معارفش أنا اش قصدت بيهاا (تنهدات) أنا حياتي كلها عمري درت غولاصيون مع شي وحد كنت ديماا داياهاا فقرايتي ومستقبالي وتصاحيب ولخروج مع دراري ماكنتش تنسالي ليه... نتا أول شخص عرفتو فحياتي وقررت نعطيه فرصة باش يدخل ليها... مغانكرش بلي لقيت معاك راحتي وحسيت بحوااايج زوينة معاك وأهمهوم الاحتراام.. ملي قلتي ليا باغي تجي لدارنا خفت ماشي حيت متيقااش فيك ولكن أنا قلت نتعارفو هو لول نعرفك وتعرفني هادشي لي قصدت ماشي حاجة خرى... وزيد سبق ليا شفت علاقة خالتي سناء براجلها اليازيد لي واخا ولاد لعمام وكيعرفو بعضياتهوم نهار وقع لمشكيل وقفو على الطلاق والعائلات بزووج تزعزعات العلاقة بناتهوم وأنا مغانكدبش عليك خفت يوقع لينا بحالها هادشي علاش ترددت...
ريان:(بسخرية) اااه (قرب جهتها ونطق ببرود)وشكون قال "أنا باغا نزيد نطول ونعرفو كثر قبل مانزعم عليه وندم خايفة نتغر ونلقاه باقي صغير فعقلو واخاا فاش دويت معاه كيبان واعي ولكن خايفة مشكيل لاج يدير لينا عائق فعلاقتناا"
عاود ليها هضرتها كيف نطقاتها بالحرف...منساهاش وأصلا كيفاش غاينساهاا وهو من نهار سمعها وهي تاتزنزن فدماغو فكل مرة مخلياه يتنرفز من راسو ومنها...
بيسان: راه قلت ليك كنت تالفة وهضرتي ماقصدتش نجرحك بيها رياان نتا معارفش قيمتك عندي وبلي فهاد الأيام لي تفارقنا فيهوم حسيت بشي حاجة نقصاني (قربات جهتو وشدات فيديه) فهمني عفااك وحط راسك بلاصتي
ريان:(جر يديه وقال ببرود) هاد لهضرة كنتي تقوليها ابيسان ماشي نسمعك گايلاها لبرااني نتي تقبتي معايا لورقة وهاد لهضرة مبقاتش عندها فايدة...(بعصبية كمل) يقدر نكون عيني زايغة ومولف تصاحيب ولكن من نهار شفتك حيدت عليا كلشي وضربت على لخرا كاامل على قبلك حيت باغيك دبصح وقاصد لمعقول معاك ماشي غير حيت من العائلة ولكن حيت بااغيك ولكن نتي مكتستاهليش ابيسان..شفتي كون جيتي وقلتي ليا ديك الهضرة كنت غانتفهمك ونعطيك وقت ولكن نتي هضرتي عليا قدام لبراني وهادي لي مانساهاش ليك وتاداابا راه مزيان كيفما بدينا هادشي بلاصداع نكملوه بلاصدااع ونتي (بسخرية) سيري شوفي شي واحد لي فلاج ديالك ميكوونش صغير فعقلو
خلاها فالبيرو وخرج معصب وهي كلامو لي قال خلاها تحس بقلبها كيضرها...غادة تاتجري وراه وهو منير مكيقشعش قدامو..شداتو من يديه وقفات قدامو ونطقات بترجي:عفاك سمعني أنا والله ماقصدت نقلقك مني عفاك اريان شوف فيا وخليني نشرح ليك
ريان:(عطاها شوفة باردة وقال) كلامك وصلني وخلاني نحل عيني ونعرف بلي نتي ماشي من مقامي....
الهضرة لي قال قبل ماتقصحها هي جرحاتو حيت مكانش باغي يوصلو لهاد لمواصل...كانت نيتو من نهار شافها وعجباتو واضحة وعمرو كدب على راسو ولاعليها...يمكن الطريقة باش بدا معاها كانت غالطة ولكن بالنسبة ليه هو كانت هي الحل الحالي باش يقرب منها... بغاها ولكن الحب مكانش كافي بالنسبة ليهوم...كان واخد قرارو من نهار سمعها تاتهضر عليه بديك الطريقة لي جرحات كرامتو ورجولتو.. كان تيتمنى تجي عندو وتقول ليه باش تاتحس من جهتو باش هو يعرف ويقدر أنه يصلح ليها الفكرة لي واخداها فبالها عليه...شحاال من واحد كياخد فكرة غالطة على شي حد غير من خلال بعض الطباعات وتتبقا ديك الفكرة مرسخة فبالو واخا الشخص الأخر راه عكس كما نتا تاتشوفو..وهادشي لي طرا مع بيسان لي خدات فكرة مسبقة على ريان غير حيتاش عينو زايغة ومولف تصاحيب عند بالها هو غايبقا ديما هاكا...وحيت هو مولف لمزاح وكيبان ضارب الدنيا بركلة عند بالها هو هاكاك مكيتسوقش ساعة راه كل واحد تاتكون عندو شخصية عكس ديك الشخصية لي نتا كاتشوفهاا وريان ملي كيبغي كيكون جدي وكيكون ستريكت شاد الطريق...
يديها لي كانت شادة يديه بدات تاتهبط شوية بشوية تابعدات عليه وعينيها عليه وهي مصدومة ومامتوقعااش الأمور توصل لهاد الدرجة...أما ريان معاودش شاف فيها وكمل طريقو فين غادي ماعرفش المهم مايبقاش حداها وهو معصب حيت غايصدق قايل ليها شي كلام هو مغايعجبوش...
بقات واقفة متبعة بعويناتها الزورق ظلو تاغبر وعينيها بلاماتشعر عمرو بالدموع وغصة واقفة ليها فحلقهاا... هي تفكيرها وداكشي لي قصداتو من كلامها ماشي هو لي فهمو..يمكن بصح هي غلطات فاش هضرات عليه مع صاحبتها ولكن هي كانت باغا لي ينصحها وصاف ماقصدات تاحاجة خرى وزيد تجربتها المنعدمة فالعلاقات خلاتها تلف وتخاف وشي طبيعي يطرا خصوصا هي عمرها عطات فرصة لشي راجل يهضر معاها ولايدخل لحياتها...كانت سادة عليها تانهار جا ريان وحل لباب لي كانت سداه واقتاحم أساور قلبها وروحها بلاماتشعر كانت تاتحس بشي حاجة من جهتو..فلول قاالت راه ولف ولكن من بعد لقات راسها فاتت لولف أو ولات تاتحس معاه بحوايج أول مرة تحسهوم وتعيشهوم...هي عمرها كانت باغا تجرحو وأصلا هي من طبعها وشخصيتها مكاتبغيش تجرح لغير وفاش تاتحس براسها قلقات شي حد تايبقا خاطرها يضرها بزاف ومكاترتاح تاكاطلب السماحة...هاكا تربات بنت الحاج وهاكا هي غاتبقا حياتها كلها...هبطات راسها والغصة لي واقفة فحلقها خلاتها تشهق بلاماتشعر ومن زهرها مكان تاحد ولكولوار خاوي مع وقت لغدا... زيرات على صاكها وخرجات من تم وقلبها حاسة بيه كيضرها بزاف وكلما تفكرات هضرتو لخرة تاتخلي دموعها يزيدو يتكونو فعويناتهاا... " نتي ماشي من مقامي " جملة بدات تاتعاود فعقلها مخليا خاطرها يتزير عليهاا.. ركبات فطوموبيلتهاا وشدات طريقها معرفاش فين باغا تمشي المهم هو تبقا بوحدها...
أما ريان فخاطرو تاهو تغير ومبقااش حامل يبقا فالخدمة...غير تأكد أنها مشات رجع لبيرو ديالو وجمع بگاجوو ونزل لعند لغيسبونسابل علمو بلي خارج وتالاخر خلاه يمشي حيت مكاينش خدمة بزاف..خرج لمطور ديالو وركب مقلع راجع لدر...
مسافة طريق وكان وصل وغير وقف مطورو وهو يضور جهة محمد طه لي عيط ليه...
محمد طه:مالك جاي بكري؟
ريان:(مكمش حجبانو)عيان شوية وصاف
محمد طه:حالتك معجبانيش (حط يديه على كتفو)مالك اصاحبي اش واقع ؟
ريان:راه قلت ليك عياان وصاف اندخل لمطور لگاراج ونتبعك
محمد طه:سير انا نتسناك
حل لگاراج فين كاينة طوموبيلة رحيل ودخل حداها المطور عاد سدو ودخلو لدار وريان نيشان طلع لبيتو ماهضر مع تاواحد تامن سلام مقالوش شي لي خلى محمد طه يشك بلي خوه بيه شي حاجة حيت جااه طافي علي كيف مولف ديما...
نزلات رحيل لتحت مور ماتكات ليها شوية وبدلات حوايجها بواحد البيجامة دافية شوية.. لكريشة باينة شوية منفوخة باستحياء...شعرها كانت طالقاه مصاوب تايلعب ورى ضهرها.. لقات محمد طه جالس بوحدو ساكت تيخمم وهي تقرب جهتو وقالت بهدوء:محمد مالك؟
محمد طه:ريان معجباتنيش حالتو ماعرفت مالو كيبان ليا ماشي تال لهيه
رحيل:واش جا؟؟
محمد طه:عاد دابا شوية ماعرفت اش واقع معاه
رحيل:(حكات حاجبها) دابا نطلع نشوفو
محمد طه:مغايبغيش يقول ليك غير اجي
رحيل:(ضحكات) ههه نسيتي يامات لولة فاش يالاه عرفتو مكانش تيخرج لكلمة وماتفاكيتش معاه تاهضرتو بزز وهادشي لي غاندير دابا..
طلعات رحيل لفوق ودقات لباب عاد دخلات لبيت ولقات ريان واقف قدام الشرجم كيبان فيه ساهي...قربات جهتو تاوقفات حداه وحطات يديها على كتفو شي لي خلاه يضور عندها
ريان:وقتاش دخلتي
رحيل:لهاد الدرجة كنتي ساهي وماعقتيش
ريان:غير عيااان وصاف
رحيل:(شافت فيه بجدية) جيني من لخر وقول ليا اش واقع معاك؟
ريان:والو (تبسم وقرصها فنيفها) حملتي ونتي تزياااني
رحيل:ماشي موضوعنا هذا ارياان سولتك جاوبني مااالك (بتساؤل) واش واقع شي مشكيل بينك وبين بيسان؟؟
ريان:(ببرود) حنا سالينا
رحيل:(كمشات حجبانها)كيفااش ساليناا مافهمتش وضح ليا؟
ريان:كيف تاتسمعي انا وديك بنت الناس سالينا وكل واحد شد طريقو والله يسهل عليها
رحيل:كيفاش ساليتو ياك قلتي باغي تخطبها وتزوجوو علاش ساليتو؟؟
ريان:(هز كتافو ببرود) متفاهمناش وصااف وهي تستاهل ماحسن
رحيل:رياااان ماتبقاش تنقط عليا بالهضرة اش طراا بينك وبينهاا وبلاداك الديسك الحاافي حيت مغانتيقووش
ريان:(تنهد) انا وياها مختالفين هي تفكيرها ماشي بحال تفكيري متفاهمنااش وحبسناا اش غانزيد نشرح ليك ارحييل الله يهديك
رحيل:(باستغراب) مافهمتش كيفاش ساليتو ونتوما يالاه بادين تتعارفو على كراكطير بعضياتكوم.. مادوزتوش بزاف باش تعرفو بعض ارياان
ريان:ماشي ضروري نكونو يالاه بادين فاش لواحد مكايكونش مرتاح مع شي حد راه كيسالي معاه
رحيل:ونتا مارتاحيتيش معاهاا؟؟ هه كاضحك عليا ولاعلى راسك وااش نسيتي نهار عرفتي بلي سخفات اش درتي ولانسيتي نهار بغيتي تاخد نمرتها وكيفاش خاطرتي ودويتي معاهاا ريان ماضحكش على راسك وتقول متفاهمتوش ولامامرتاااحش دابا نيت تانشوفك بلي مامرتاحش حيت تفارقتي معاهاا من حقك ماتقولش ليا سبب المشكيل ولكن ماضحكش على راسك بشي هضرة مكاينااش وتبقا تعطي أسباب فارغة
ريان:(تخطاها وقال بانفعال) مصالحينش لبعض فهميهااا
رحيل:واش حيت هي كبيرة عليك هادشي علاش؟؟
ريان:(كايدوي وهو منرفز) ااااه حيت هي كبيرة عليا وحيت أنت مباغيش نعاااود نفس لقصة دمحمد طه وقبل مانزيد نغرق كنفضل نحبس فبداية الطريييق ونهني كررررري
رحيل:(خنزرات فيه)فرق بينك وبينووو ماتقارنش راسك بيه هو راه عمرو صارحهاا وهي بقااات معتابراه خوهاا وديجا قالتهااا ماشي بحالك لي تصاحبتي معاااهاا
ريان:(تفرگع عليها) شنوو لفرق هوو خبى باش كيحس وبقا معدب حياتو كلهاا نهار كانت غاتخطب ونهار وقع مشكيل مع خطيبهاا شنو طرا ليه ولانهااار مااتت شفتيه كيف كاااان واااش هداا لي لتحت هو محمد طه دسبع سنين لااا ماشي هووو هدا واحد خررر مكنعرفووش عايش بحال لاميت اااه بصح تزوج بغزلان ولكن فالداخل ديالو باقي مانسااااش جيداااء والدليل نهار الصدقة ماحضرش نهار كولو وهو غااابر حيت مقصح من جهتهاا باااقي مشاعرو جهة جيدااء كاينة ومغايقدرش يخليهوم حيت فيما كاتجبد سميتها كايتغير خااطرو..علاااش غانخلي راااسي تاانولي بحالو هااا تانتعلق بيها وفلخر نخليهاا باش نمرض فصحتي حسن ليااا نحبس لمرض من لول على الأقل دااباا غانقدر نساهاا وغانبني حياااتي ونشوف لي منسباااني وعقليتها بحااالي لي فعمري ماشي وحدة كبيرة عليااا مغاانبغيش نعاااود نفس السيناريو دمحمد طه مع جيداء... مانبغيش نبقااا باغيها غير أنا وهي لاااا شفت خويا مناااش داز ومغانعااودش نفس الغلط ارحيل
رحيل:(بهدوء قالت عكس عصبيتو) بيسان ماشي هي جيداء ونتا ماشي هو طه...بيسان دخلات معاك فعلاقة وهي عارفااك صغير عليهاا ولكن جيداء من لول كانت مزولة لفكرة وماعمرهاا بينات لمحمد بلي كاتبغيه وكان حبوو ليها من طرف واااحد كاين اختلاف بنااااتكوم عمرك تقارن راسك بيهوم... المشكيل لي طرا بينك وبين بيساان ماعرفتووش ولكن لالقيتي راسك مرتااح فلفراق وعارف بلي هاد لخطوة لي درتي مزيان فمغانقول ليك والو ولكن لااااحسيتي غير بشوية ديال التردد فعرف راسك بلي غاتلقى مشكيل كبيررر من بعد نتا خويا وأهم حاجة عندي هي راحتك ومصلاحتك وتابيسان عزيزة عليا وعارفااهاا بنت الناس وكون مكانتش تستاهل مكنتش غانعطيك نمرتها وكنت غانوقف ليكوم فطريقكوم بزوج ولكن عاونتك حيت عرفاكوم بزوج كيف دايرين (تنهدات) وماتنساش لاكنتو مكتابين لبعضياتكوم فربي غايجمعكووم سوى قريب سوى بعيد...
كانت بوحدها فلكابيني تاتمسح لمطريال وتنقي لي خصو يتنقا وتعقمو... بحكم أن الطبيب فاش كيسالي تايخليها هي تنقي داكشي...سالات شغلاتها ومشات بدلات عليهاا حوايجها وطفات الضو وغير تأكدت بلي كلشي هو هداك وهي تخرج من الكابيني سداها ونزلات لتحت تاتقلب فتلفونها كان الظلام بدا يطيح وهازة هم لطريق لي غاضرب باش تشد طاكسي... صونى تلفونها لقات أسماء هي لي تاتعيط ليها..
رنيم:أهلا صافا
أسماء:حمدلله ونتي فين شداها؟
رنيم:يالاه خرجت غانمشي نشد طاكسي
أسماء:تعطلتي اصاحبتي نوغمالو الخمسة تاتسدو؟
رنيم:بقيت تاقاديت لمطريال باش غدا لبنت تجي تلقا كلشي هو هداك ونيت نخرج كونجي وأنا مرتاحة
أسماء: شحال عندك فلكونجي؟
رنيم:كانز جووغ "خمسطاش ليوم"
أسماء:سعداتك أنا الإثنين غانبدا الخدمة
رنيم:هههه سالى شهر العسل
أسماء:هاد الساعة شفت قريص النحل ماشي شهر العسل
رنيم:هانيا هانيا تامحمد طه غايبدا الإثنين ههه واخا ولد لحاج عاطيه وقت مي قال ليك مكاين مايدار وغايبدا حيت غيزو تاتقرا تاهي وخدامة فكيجيه لملال
أسماء:صراحة ولفت النعاس ومع البرد غانعگزو تاااني مي حسن بااش نحيدو الغمولية لي فينا ههه
رنيم:وي أنا نيت جلست حيت عييت مع البنت معايا يالاه غاترجع وشادة كلشي بوحدي راه بزاف
أسماء:ماعليش رتاحي ولابغيتي سافري وفوجي شوية
رنيم:نشوف رحيل لابغات نسافرو لشي قنت أنا وياها
أسماء: مزيان تبدل ناهي لجو (بصوت عااالي) نعاااااام ...راهاا فلبلاكاااار قلب عليهااا (وجهات كلامها لرنيم) نخليك نمشي نعطيه اش بغاا تال من بعد ونكملو
قطعات معاها ورنيم كملات طريقهاا مونسة بليزيات تابدات تاتسمع لكلاكصون ومع الطريق لي كادوز منها تاتكون خاوية فهاد لوقت...ماتسوقاتش ولكلاصون جهد وهي زربات خطاويها تااحسات بالطوموبيل غادة معاها فنفس الخط... أو واحد بدا كيبسبس عليهاا ويدوي:الزييين طلعي نووصلك ماتعدبيش رجيلاتك
مكانتش تاضور جهتو ومحشاتهااش ليه گاع وهو معياااش بقاا تابعهاا ويدوي:مااالك منفخة عليناا شوفي فيااا القطيطة جاااك لغوز زووووين
وقفات رنيم وشافت فالشارع باش تقطع لفااص لاخر وهو حبس قاطع عليها طريق ونزل بكل وقاحة تايتبندر عليها... ريحة الشيشة عطية منو وهي كمشات حجبانها ومع بغات دوز حبسها بيديه وقال وعينو عليها:مالك منفخة عليناا طلعي نوصلك ازين
رنيم:(مخنزرة فيه) واش نتا مريض بعد مني
دري:واقبيحة مع رساااتك طلعي نووصلك حشومة زين يتمشى وحدو هنا فليل
رنيم:اتبعد مني ولانجمع عليك بنااادم تبرهيش
هي باغا دوز وهو كيقطع عليها طريق عصبهاا مفهمش راسو عيااات ماتسب فيه وتخنزر وهو لصقة سبيسيااال... سمعات رنيم صوت الفراان وباب تحل ديال الطوموبيل وعاود تسد وحيت لاخر ساد عليها الطريق ماقدراتس تشوف شكون...تاسمعات صوت ماغريبش عليهاا نطق من ورى داك خوناا:صاحبي كاااين مانقضيووو؟؟
ضار الدري وهي طلات تاتشوف شكون وإذا بيها كاتفاجأ برؤوف لي كان واقف بستيلو المعتااد وبلونو المفضل ولي كيجيه مميز...لبيض... هو غير قشع رنيم وهز حجبانو ولاخر قاال: بيني وبين درية ديالي اعشيري
رنيم:(بعصبية) فين تانعرفك البشاار ونتا من صبااح لاصقني وتاتبسل (شافت فرؤوف) مكانعرفووش
رؤوف:(قرب جهتو تاوقف قدامو وجر رنيم من يديها وقال بجدية) طلعي لطوموبيل
مشات معاوداتش الهضرة طلعات ولاخر غير شاف لبلان وهو ينطق بسخرية:دايرة عليناا بنت دارهوووم ونتي غير قح*بة تااااتهزيييه
مع قالها شنق عليه رؤوف ونطق بصوت قاصح مخنزر فيه:جمع كررر*ك ابنااادم وهادي لي كاادوي عليهاا راااه عندها ماليهاا
دري:وااسير از*ي بعد مني ولق*اب راه باينين زعمة حيت نتا عندك حديدة دلفريع طمعااات تجي لعندي ونشوفو شكون يبرعهااا
هز رؤوف يديه وعطاه نيشان لفم تارجع لاخر لور وشبكوها بناتهوم ورنيم مع جالسة فطوموبيل مكانتش تاتسمع لهضرة ولكن شايفة كلشي قدامها...فاش شافتهوم مشادين تخلعات وماعرفات مادير واش تهبط تفك ولاتبقا بلاصتها... كانت تاترعد فبلاصتها ودوك زوج راه باقي مشادين دقة فيا دقة فيك... تاعطاه رؤوف ركلة طيحو فالأرض وخلاه غادي لطوموبيل ولاخر تيسب ويخسر فلهضرة... ركب رؤوف وقلع وعلى بونت كان غايدوز برويضة على يديه غير لاخر هربهاا بزربة...كانت ساكت تاتسمع لصوت أنفاسو دليل على عصبيتو...
رنيم:(بخفوت)شكرا
رؤوف:(ببرود) اش موقفك معاه؟؟
رنيم:كنت غادة نشد طاكسي وهو حبس عليا الطريق وبقا لاصقني بفف ميكرووب كيداير
رؤوف:(رمقها بجنب عينيه) ونتي اش مخرجك فهاد لوقت ودايزة من هناا لي خاوي؟؟
رنيم:يالاه ساليت خدمتي وهادي هي طريقي ديما غير ليوم ماعرفت اش طرا تالقيت داك بنادم
رؤوف:لكابينيات تايسدو مع ربعة ونص ولاعيقو لخمسة ماشي سبعة
رنيم:اش باغي تقصد بهضرتك؟؟
رؤوف:لكلام واضح وباين
رنيم:(بعصبية) وقققف وقففف ابنااادم ماشي غير عاونتيني عندك لحق تحل فمك عليااا بزاااف عليك لانتا لاغيرك ووووووقف الخرااااا
ضرب فران الصيك تامشات وجات فبلاصتها وهي خنزرات فيه وحلات لباب نازلة معصبة من كلامو لي معنى بيه.. كملات طريقها تاوصلات لطاكسيات وركبات وهو بلامايشعر بقا تابعهاا تاااشافها وصلات لدار ودخلات عاد قلب طريق غادي لرياض وهي محتلة تفكيرو...
صوت القرآن مطلوق فالراديو ديال الطوموبيل...الشتاا كاتنقط فوق الباربريز والجوو كان مغيم وبارد... سايگة فسكات وعينيها على الطريق وفجنبها كان جالس ريان لي تاهو ساكت وباين فيه ماشي على برجو...سيمانة دازت على آخر حوار ضار بينو وبين بيسان ومن داك النهار وهو مهدن على غير لعادة وقليل الكلام...كانت رحيل عارفة بلي المشكيل لي نايض بناتهوم كبير...عمرها شافت ريان وهو مقلق هاكا وساكت... كان تيبان طافي وديك لحيوية لي تاتكون فيه مبقاتش... عينيها على ديك لبلاكة لي مكتوب فيه الرباط وقلبها حسات بيه تزير عليهاا... السبب لي مخليهاا ماتجيش تزور صاحبتها هو داك شعور بالدنب لي باقي تاتحس بيه من جهتها... ماتكدبش على راسها وتقول راه نسات حيت عمرها تنسى بلي صاحبتها مشات ضحية بسبابها وهاد الدنب غايبقا مرافقها حياتها كلهااا...دخلات لرباط وعيونها على الشوارع لي توحشاتهوم والجو لي تم ومع البحر كاين البرد...نيشان شدات طريق لمقبرة الشهداء فين كاين قبر رفيقة دربها... حبسات طوموبيل قدام لباب وقلبها كان تيضرب بزربة وكرشها حسات بيها ضراتها.. حطات يديها عليها وبدات تاتمسدها وريان كيشوف فيها وهو ساكت... نزلو بزوج ورحيل تتقاد فجلابتها السخونة لي لابسة وفوق منها لكااب... لابسة نضاضر دالشمس او وجهها كيبان صفر...دخلو وهاد لمرة عكس لمرة لولة رجليها قادوها لقبر جيداء لي تزادو حداه قبور خرين.. مع وصلات لعندو ولغصة حسات بيها واقفة فحلقها...جلسات معدبة جنبها ويديها على الشاهد تاتلمسو بحنية وبصوت هامس قالت:سلام أوعليكوم هاني جيت احبيبة ديالي توحشتك بزاف خليتي بلاصتك وحد ماقدر يعمرهاا (بحسرة) عارفة راسي غلطت فحقك ملي ماجيتش نزورك ولكن نتي عارفة بلي عمري نسيتك وغاتبقااي ديما فقلبي وربي شاهد على هضرتي.. توحشتك وتوحشت ياماتنا أنا ويااك ...عرفتي علاش ماكانجيش لهناا حيت كل بلاصة تاتفكرني فيك مانقدرش ندوز من شي قنت ومانتفكركش... (دموعها نزلو وبصوت مخنوق) وحشك هلكني تمنيت كوون بقيتي معاياا وتشوفي بنتي سيدرا اجيداء عرفتي كاتشبه ليك فيها لفعايل ديالك وهضورها بحالك هههه فخبارك جااات لي تاخد بلاصتك وتعيط لبابا بالأسمراني هههه طيراتو ليك (شمرات على نيفها) كنت تنتمنى تشوفيها وتعرفيها كنتو غاتفاهمو ومتأكدة كانت غاتعطي ليك بجيدائي هههه حيت گاع لي عزيز عليها تاتعيط ليه بهكاك بحال محمد طه تاتقول ليه مودي وريان رياني (بغصة قالت) وليت أم أصاحبتي ونتي ممعياااش (حطات يديها على كرشها تلمساتها) أنا حاملة وعندي توينز تعقلي كنتي ديما تتقولي ليا ولادك غانسيمهوم ونتي سمي ولادي تمنيت كون كنتي حااضرة معايا باش تسميهوم ونشوفك تانتي عروسة ونفرح ليك ونزغرت فعرسك (حدرات راسها) سمحيليا عفااااك اجيداااء سمحيليااا حيت كنت سباب تاتحرمتي من الحياااة عارفة بلي هادشي كولو مكتاااب ولكن أنا السباب وعمري غانسى
بعض الناس كايدوزو فحياتنا وكيخليو بصمة فيها وجيداء خلات بصمة فحياة أي واحد عرفهاا ماقدرش ينساهاا وينسى ديك البنت لفرفوشة لي تتبان هبيلة وقلبها كبير...نهار مشات خلات لقلوب تحزن ولعيون تدمع لفراقها...ولكن لمكتاب مامنو هروب وهادا هو القدر... سقات ليها قبرها ونقاتو واختماتها بالقرآن والدعاء على روحهاا عاد خرجات من لمقبرة بقلب مهموم وحزين وهاد لمرة ريان هو لي صاگ...شد بيها طريق نيشان لأوطيل ديوان فين غايباتو حيت مغايرجعوش ليلة وغاتبقا تاتشوف حنان... وصلو ليه ودخلو ورحيل عيانة نفسيا وجسديا خداو زوج شومبرات وهي مشات لشومبر ديالها ترتاح مور ماطمن عليها ريان...دخلات وبتعب زولات فولارها وجلسات فوق النموسية بعيااء...حسات بردة وناضت تقيات داكشي لي كلات كولو وخرجات وهي دايخة وراسها كيزدح...تكات بحوايجها مغمضة عينيها وماحسات براسها تاكانت غفاااات..
تسمع صوت الباب تحل بشوية وعاود تسد وموراها خطوات رجولية تقيلة...ظلام فلبيت من غير واحد لفيوز مضوي فالجنب مخلي صورتها تبان ليه بوضوح وهي ناعسة فوق النموسية بحوايجها دلخروج...بنظرة اشتياق شاف فيهاا وبلهفة قرب منهاا تاجلس جنبهاا على النموسية ومد يديه لخشنة تايقيس وجهها...كانت ناعسة وغارقة فنعاسها محساش بشنو ضاير بيهاا... بلل شفايفو وعينو على ملامحها لي كاتبان باكية... وبهدوء نااض من بلاصتو تايشوف فأرجاء لغرفة تبان ليه صاك دلحوايح صغير حلو وجبد منو بيجامة مريحة ورجع جهتها... بلطف وحنية بدا كيزول ليها الجلابة بحال شي بنينة صغيرة تاعراها وبقات بكولون ودباردور...عينو على كرشها لي بانت بنظرة حنينة ومتلهفة...هز ليها دباردور وتحدر باسها فكرشها تاحس بيها تحركات...قطع لحس تابانت ليه مبقاتش تاتحرك وزول ليها لكولون تابقات بسليب وعينو كاتغلي عليهاا...موحشها وحش ربي عالم بيه وماكرهش يشدها يفدي فيها وحشو ولكن الغالب الله باسها بوسات خفيفة ففخادها قبل مايلبسها السروال دلبيجامة...ولبسها لفوقاني عاد تكى جنبها وجرها بهدوء عندو راد لبال لاتفيق...عارفها نعاسها تقيل ومع لعيا ولحمل زاد تقال وتاهو مدارش لحس...يديه محطوطة على كرشها تاتمسدها وشفايفو كايطبعو قبلات على شفايفهاا السخان...
نوح:(بهمس ساخن) وليتي تمشي ليا مع دمى الفتنة..
حلات عينيها وهي حاسة بالعيا فجميع أنحاء جسمها.. كان الظلام فالبيت ومع الكالم معارفاش هي شحال نعسات ولاشحال فالساعة.. جلسات وهي تاتحك عينيها ومدات يديها شعلات لفيوز باش تضوي البيت..ناضت بتعب وحاسة بعضامها كيضروها وفيها الجوووع.. دخلات لحمام ومع شعلات الضو وشافت انعكاسها فالمراياا وهي تعقد حجبانهاا.. قربات جهة لمرايا تاتقيس البيجامة لي لابسة باستغراب..هي فاش نعسات نعسات بجلابتها مابدلاتهاش كيفاش دابا لابسة بيجامة؟؟ بقات تاتقيس البيجامة بيديها وميات سؤال كيطيح فبالها.. هي عاقلة مزيان بلي مابدلاتهاش إذا كيفاش لبلان زعمة تكون فاقت فوسط نعاسهاا.. لامايمكنش شي حاجة تم غريبة ومامفهوماااش...طاح عليها العجب وعقلها قريب يتسوطى...حلات الروبيني وبدات تاتغسل وجهها تاحسات بوجع خفيف جهة لحوض ديالها وهي تجلس فوق لاشاس تاتمسد ديك لبلاصة لي تاتوجعهاا...صوت الدقان فالباب دبرا خلاها تنوض بلعگز شادة كرشها غادة تحل ودقان مجهد خلاها تكمش حجبانهاا...وقبل ماتوصل لباب تفكرات شعرها لعريان وعاودات رجعات جهة النموسية فين كان فولارها لاحتو عليها عاد رجعات لجهة لباب ومع حلاتو حسات بيدين ضارو على رجليهاا وصوت سيدرا لي نطقات بحماااس:ماااامي توحشتك أناا
هبطات رحيل راسها تاتشوف فسيدرا لي معنقها باستغراب ورجعات شافت فريان لي كان متكي على لباب مبسم:صباح الخير النعااسة (شاف فوجهها لمنفوخ وقال بضحك) خمررررتي
رحيل:(شافت فيه ورجعات شافت فسيدرا) شكوون جاابك لهناا
سيدرا:(نقزاات بفرحة وعينيها على ريان) ماي بّااااديدي
مشافتش رحيل ريان لي كان مخرج عينيه فسيدرا فاش نطقاات بديك مااي وعلى بونت كان غايتضرب ليه كلشي فزيرو وهو لي جالس يوصي فيها باش ماتجبدش سميتوو لاسولاتها رحيل...ساط النفس وتبسم فاش شافت فيه رحيل لي قالت باستغراب وتساؤل:واش بابا جااا لهناا فين هوو؟
ريان:(دخل وسد الباب) رجع لمراكش
رحيل:بلاتي هو علاش جا ومشى ياك حنا أصلا راجعين غداا؟؟
ريان: حيت لخنفوسة توحشااتك وقال يجيبها كاان ناوي يبقا تانمشيو مجموعين ساعة عيطو ليه من لگاراج وكان ضروري يرجع
رحيل:(شافت فسيدرا)ياك غدا قارية ؟
سيدرا:( شافت فريان لي حرك ليها راسو عاد قالت) بّاديدي قال لاميطغيز ديالي غدا مانجيش وقالت ليه واخا
رحيل:( جلسات فالنموسية وجراتها معنقاااه بالجهد) خليتي جدك مسكين يضرب الطريق فهاد البرد البخوووشة
ريان:(نطق بهمس بدون ماتسمعو) راه نتي لي مخليا ولد لحاج يضرب الطريق على ودك (تنحنح) يالاه بدلي حوايجك باش نخرجو نضربو ضورة فمارينا ونتعشاو بلحوت اش بان ليك؟
رحيل:(خسرات سيفتها) ناااري سكت روعتيني
ريان:ههه بدينا تاني يالاه نخليك تلبسي وماتعطليش (شاف فسيدرا)اجي يالاه نتسناو ماماك براا
رحيل:غير خليها معايا
ريان:تت غاتعطلك غير خليها معاياا
خرج ريان ودى معاه سيدرا لي قاالت بتساؤل وهوما غاديين جهة لاسونسور: رياني علاش ماخلتينيش نقول لمامي بلي ماي بلو آيز جا
ريان:(برك على رقم لطاج ونطق بهدوء)ياك قلت ليك حنا تانلعبو دابا واحد اللعبة وماخصش ماماك تعرف بلي ماي بلو آيز جاا
سيدرا:(شافت فريان وقالت بدكاء) واش مامي مخاصمة مع ماي بلو آيز؟
ريان:(تبسم ليهاا ولعب فشعرها) ماماك وماي بلو آيز ديالك مامخاصمينش
خرجو من لاسونسور وجلسو فلفوطوي لي تم كيتسناو رحيل لي فهاد الأثنااء كانت تادير شوية دلمك اب باش تغطي بيه الصفورية لي فوجهها وعينيها لي باقي منفوخين بالنعاس.. كل مرة تفكر بلان لبيجامة عقلها كيتنوى وزيد تاسيدرا لي جاابها باها ومشى مابغاش يدخل ليها لدماغهاا... قدات زيفهاا وخرجات لبيت هزات مونطوها لبساتو فوق ديك لكسيوة لكحلة لي لابسة وجلسات تاتلبس بوط ديالها وغير سالات هزات صاكهاا وخرجات من لبيت نازلة لعندهوم لتحت.. لقاتهوم كيتسناوهاا وغير جات خرجو لبرا وركبو فوطوموبيل...
فنفس الأوطيل كاان نوح يالاه خارج من لحماام تايمسح شعرو بفوطة صغيرة وعينيه حمرين بلعياا والشومبوان لي دخل ليه فيهوم...تفوه بتعب ولاح لفوطة فوق الفوطوي وهز تلفونو لقى ريان مسيفط ليه مساج عالمو بلي خرجو وبلي غايمشيو لمارينا يتعشاو تم..ساط النفس ومشى لبس عليه حوايجو وتفكيرو فيها هي وفالحالة لي وصلو ليها.. نهار علمو إدريس بلي هي باغا تزور قبر صاحبتهاا مكانش باغي تجي بوحدها وكان باغي يكون معاها ويوقف جنبها خصوصا أنه عارف موضوع صاحبتها حساس بالنسبة ليهاا.. ولكن حيت الوضع دابا مكيسمحش ليه فجا ريان معاها أو واخا جاات مع خوهاا إلا أنه تبعهاا وجاا تاهو وجاب سيدرا لي كانت باغا تبقاا معاه...هز مسائلو وخرج من لوطيل غادي لبلاصة لي سيفط ليه ريان لوكاليزاسيون ديالها...مسافة طريق وكان وصل تماا بلاصا طوموبيل ونزل تايشوف فلغيسطو لي كان تيطل على البحر والجوو كان زوين واخا البرد ولكن دوك الأضواء والسما الصافية والبحر لي منعاكسة فيه صورة السماا لي مزينة بالنجوم والگمرة خلات لمنظر يولي ساحر كيسلب العقول..
💫وكانتْ هي تلك النّجمة التي أضاءت عتمة السماء💫
دخل وعينيه كيسكانيو البلاصة تاقشعها جالسة أونفااص ليه مبسمة وباين فيها منساجمة مع هضور ريان لي عاطيه بالضهر وسيدرا جالسة جنبهاا.. شد طبلة بعيدة عليهاا شوية وفنفس الوقت جات قدام طبلتها باش يقدر يحضيهاا... عمرو فحياتو تخيل راسو غايدير بحال هاد التصرفات..يحضيها من بعيد ويدخل عندها خلسة باش يقدر يشوفها ويزول ولو جزء بسيط من داك لوحش لي حاس بيه من جهتها... معارفش شحال غايبقاو على هاد الوضع ولكن لي عارفو بلي داك الصبر لي صااابر راه فوق طااقتو...
أما عند رحيل فكانت شادة كرشها لي ضراتها بالضحك مع ريان لي عندو شي نويطات تشدي كرشك وضحكي.. رجعات لور وهي تاتنفس بالجهد ونطقات بصوت ضاحك:صااافي حبس والله تاكرشي ضراتني ههههه
ريان:هههه غايكونو السنافير تاهوما ضاحكين
رحيل:بزااف عليك هادو راه عسيلات قالك سنافر تت
ريان:دابا وقتاش غاتعرفي السكس ديالهوم بااش نوجدو لكادو هههه
رحيل:قالت ليا الطبيبة بلي قفلت شهراين وأنا بادية فالشهر التالت (قاست كرشها لمنفوخة) هاهي بدات تاتنفخ لكريشة
سيدرا: مامي كلات زوح مومويااات ياكي امامي
ريان:(نطق بمكر) لهلا يوريك ابنتي اش تم
رحيل:(ضرباتو بسرڤيتة) سكتنااا اداك الماااسخ
سيدرا:(شافت فريان) ماتبقاش تقول لحشومة غانقولها لبّاديدي
رحيل:يدير ليه بينيسيون
سيدرا:(شافت فرحيل وقالت بفرحة) مامي عرفتي إيڤانا ولدات قطيطااااات
رحيل:(بتفاجأ) وااايلي ولدااات؟
سيدرا:ااااه ولداات قطيطاات تلاتة مامي زوينااات (بحمااس وعيونها تاتبري)عرفتي وحدة عويناتها بحال ديال ماي بلو آيز
رحيل:(مسحات على شعرها وقالت بهدوء) سميتيهوم؟؟
سيدرا:تت باقي مامي (شافت فيها وسبلات عويناتها) مامي ياك أنا لي غانسمي مومويااات
رحيل:(ضحكات) من دابا باغا تسمي تايجيو وسميهوم امامي
سيدرا:(بدات تاتصفق وقالت وهي تاتنقز فبلاصتها) يااااي أنا غانسمي مومويااات وغانبقا نلعب بيهوم
ريان:تلعبي بيهوم صافي مشااو فيهاا ههههه
شبعو ضحك وعيون نوح عليهوم وبالخصوص عليها هي لي بانت ليه مرتاحة وهادشي لي باغيه هو..تساراو شوية موراها شدو طريق لأوطيل ورحيل عينيها كايتسدو بالنعااس.. غير دخلات لبيت وهي تبدل عليهاا وبدلات لسيدرا وكل وحدة شدات بلاصتها وسيدرا تخشات فمها عاد نعسات..
فالصباح كانت رحيل تاتلبس حوايجها وسيدرا جالسة مركنة فوق النموسية مور مالبساتها مها حوايجها..
رحيل:(رشات ريحتها لي كانت خفيفة مع الروايح لمجهدين كيروعوهاا) هزي اسيدرا صاكادو ديالك امامي باش نزلو
سيدرا:مامي واش انرجعو لدار؟
رحيل:غانمشيو عند خالتك حنان عاد غانرجعو لدار
سيدرا:وماي بلو آيز؟
رحيل:(هزات فيها حاجبها) مالو؟
سيدرا:(بدات تاضور فدوك لعوينات دلبابوشة ونطقات بزربة) مامي فيا جويعات يالاه
مشات تاتجر فداك الصاكادو مخلية رحيل تاتشوف فيها بهدوء وزفرات النفس بانزعااج وحسات بجوها خسر ملي تجبدات سيرتو.. جمعات كلشي وتأكدات بلي ماخلات تاحاجة عاد نزلو لتحت خلصو ومشاو فطرو هو لول عاد شدو طريق لحومة لقديمة ولجيپ دنوح وراهوم...
مجرد ماوصلات لحومة لقديمة رجعو ليها مشاعر الحزن والاشتياق والحنين لدكريات الماضي.. نزلات رحيل من طوموبيل وحلات لكوفر وبدات تاتنزل فالتقدية لي جابت هي وريان لي هز عليها داكشي التقيل وخلى ليها غير لخفيف وتاسيدرا عطاتها ماتهز.. مع دخلو لحومة ورحيل بلاماتشعر تبسمات وهي تاتفكر أيامهاا فهاد الحومة لي كبرات فيهاا.. باقي هي هي ماتزادت فيها ومانقصات فيها تاحاجة من غير بعض الجيران الجداد وصاف أما لالحيوط ولالبقالة ولاناسها باقي هوما...كانت سيدرا غادة جنب رحيل وعينيها كيكتاشفو لمكان وتاتشوف فلبراهش لي تايلعبو لكورة تما وشافت فمها: مامي شنو هي هاد لبلاصة
رحيل:(تبسمات) هاد لبلاصة هي فين كنا ساكنين فيها شحال هادي أمامي هانتي (أشارت ليها لبقال) كنت ديما كانتسخر عندو فاش كنت قدك فالعمر تانشري من عندو لحلوى دجدرياال كانت بنينة
سيدرا:(بحماس) نمشي نشريها مامي
رحيل:سيري شريها
مشات سيدرا لعند لبقاال ومع لكونطوار عالي عليها بدات تاتجبد ورحيل تاتشوف فيها ومراقباها بتبسيمة تاضارت عند ريان لي كان جنبها باغا تقول ليه يمشي يهزها ساعة جاا واحد الراجل كان عاطيها بالضهر هز سيدرا لي ضارت شافت فيه وهو نطق بهدوء:يالاه قولي ليه اش بغيتي الغزالة
سيدرا:عمي لبقاال عطيني حليواات لي كنتي تاتعطي لمامي
ضحك الشخص وعينو عليها ونطق:عطيها لحلوى لي مولف تاتعطيها لعيسى
بدا البقال تايجمع ليها فالخنيشة تامدها ليها ومع بغات تخلصو سيدرا من فلوسها كان سبقها الشخص لي نزلها ولعب فشعرهاا بحنية وقال:بصحة الزوينة يالاه سيري عند ماماك
سيدرا:(ببرائة)شكرا مامي لهيهاا
أشارت سيدرا لرحيل لي كانت متبعة البلان وحاضية بنتهاا تاضار عندها الشخص لي خلاه تهز حجبانها ممتوقعاش تشوفو بعد هاد السنين.. بحالو هو لي كان ضاحك وغير شافها تبسيمتو تمحات وملامح وجهو بانت فيهوم الصدمة..
رحيل:(بصوت خافت) ياسين..
ياسين...كان هو أول خيبة أمل تعرضات ليها رحيل فحياتها... واقفين قدام بعض وملامح ياسين بانت فيهوم الصدمة..اخر شخص توقع يشوفو هو رحيل بنت قلبو كيف كان يقول ليها.. عمرو غاينسى بلي هرسهاا وبلي مكانش راجل معاهاا.. تايشوف فيها واقفة كيف عادتها زوينة وأنيقة بملابسها المحتشمة وفولارها لي عاطيها جمالية... زادت زيانت وغلاظة وهادشي ماخفااش عليه... حس بسيدرا دازت تاتجري من حداه غادة لعندها وعاد وعى بلي قالت ليه هاديك ماما.. فرح ليها حيت ولات أم كيفما هو ولى أب لولد زوين سماه عيسى... تايشوف فسيدرا لي كانت تاتوريها لحلوى بحماس ورحيل مبسمة ليها بحنية.. عينو انتاقلو لريان لي واقف فجنب رحيل وتيتسائل واش هادا هو راجلها؟؟
أما رحيل معاوداتش هزات عينيها فيه حيت بالنسبة ليه هو شخص غريب...يمكن فيوم من الأيام كانو على علاقة ولكن كلشي سالى وكل واحد بدا مع شخص اخر... سمعات صوت دري جاي كيعيط بابا وهزات عينيها تاتشوف فلوليد لي كان شوية شهب وغليوض وعندو لحنيكات حمرين... قرب جهة ياسين لي ضار شاف فيه وتما عرفاتو بلي هاداك ولدو فرحات ليه وسمحات ليه من القلب...
ياسين:(قاس شعر ولدو وقال بحنية) نعام اولدي
عيسى:قالت ليك ماما جيب معاك الحليب
ياسين:واخاا سير نتا لدار أنا جاااي
رجع الدري كيجري وينهج وياسين شاف فرحيل لي تبسمات ليه بهدوء قبل ماتكمل طريقها مخلياه كيشوف فيها ومغاينكرش بلي فرح حيت شافها بخير وعلى خير...
قربات رحيل لدار حنان ودقات وكيف لعادة استقبلاتها حنان بضحك وفرحة كاترحب بيهوم..دخلو حطو داكشي لي جابو ومشاو لصالة لي باقا كيف هي جالس فيها بات جيداء لي كان تاهو فرحان بمجيتهوم... كانت رحيل حاسة براسها فدارها واخدة راحتها وكل مرة تعنقها حنان وتبوسهاا فرحاات بمجيتها وفرحات بحمالتهاا وفاش عرفات شحال بكاات بالفرحة...كانو أوقاات زوينة دوزوهاا رحيل ماسخاتش بيهوم...مور لغدا ناضت حنان تعمر أتاي ورحيل انساحبات غادة لبيت صاحبتها لي ماحركات فيه حنان تاحاجة كيف هو بقاا بحوايجو بكلشي حدها تاتخملو على قبل لغبرة وصاف... مسحات رحيل دموعهاا وتسطحات فوق نموسيتها كاتسترجع دكرياتها معاها فهاد البيت...
حلات سيدرا لباب وبقات واقفة حداه تاتشوف فدوك الأجواء ودراري لي تيلعبو ونزلات بشوية غادة عند لبنات وقفات عليهوم وقالت بحماس:نلعب معاكووم؟
جاوباتها لبنت:غانلعبو افتاحي ياوردة تاتعرفي ليها
سيدرا:لا
لبنت2: هانتي غانديرو ضوارة وغاتشدي يدي وتشدي يد هاجر هاكا ونبقا نقولو افتاحي ياوردة ونبعدو واغلقي ياوردة ونقربو صافي
شرحو ليها لعبة وهي تحمسات... بحكم طفولتها ومشكلة السمع لي عندها مكانتش تاتلقى صحابات باش تلعب معاهوم وغير شافتهوم قبلوها بلامايسولوها على شنو دايرة فودنيك وهي تفرح...بدات تاتلعب معاهوم كيف وراوها وتاتسمع ديك افتاحي ياوردة اغلاقي ياوردة ودايرين ضواارة... ملي ملو من لعبة مشات سيدرا جابت ديك لخنشة دلحلوى فرقاتها عليهوم ودوقاتهوم..
سيدرا:(رجعات شعرها ورى ودنيها وقالت)أنا سميتي سيدرا التجاني ونتوما؟
بقاو تايقولو سمياتهوم عاد مشاو يلعبو وسيدرا كانت واقفة وماحسات غير بشي حاجة ضرباتها فراسها بالجهد تارجعات لور وطاااحت... حطات يديها على ودنيها لي وجعاتهاا ولباراي بقوة الجهد طاحت ليها وحدة هزات عينيها ولقات نفس الدري لي كان مع داك الراجل "عيسى" مع مجموعة ديال الدراري فعمرو وبعض منهوم كبار... جا هز لكورة وشاف فيها بدوك حناك الطبل وقال باعتدار: سمحيليا
سيدرا:(واحد لودن مكاتسمعش ليها وكاتحرقها) قصحتيني فودينة ديالي
جا صاحبو وقال:صافي البرهوشة تانتي مشفناااكش
ناضت سيدرا مخنزرة فيه ومشات دفعات هاداك الدري وقالت ليه بعصبية: نتااا باااسل غانقول لمامي تجي ضربك
رجع دفعها لبرهوش فكتفها ونطق:سيري جيبي داركوم كلها
سيدرا:(عينيها تغرغرو بدموع لحگرة ومع دلك مانزلاتهومش) حماااار تفوو عليك
عيسى: حنا ماشفناكش وقلت لك سمحيليا مابغيتيش گاعلى
سيدرا:(خنزرات فيه) سير اطبووزي
جمع عيسى شفايفو وماحملش تعايرو ومد يديه دفعها تاطاحت الأرض ودوك لبراهش لخرين كيضحكو عليها ولبنات لي تايلعبو معاها راه خافو
بقات سيدرا كاتشوف فيهوم وشنافتها تاترعد بلبكاا ولحگرة لي حگروها:غانقولهاا لمامي
دري لاخر:سيري قوليها تال باك
عويناتها دمعو وطلعات ليها شهقة وحدرات راسها تاتبكي تاسمعات صوت عيط ليها بسميتها:سيدرا؟
هزات راسها وبان ليها نوح لي كان عند مول الصاكا خدا باكية دلگارو تابان ليه شي دراري مجموعين على شي حد.. وهو يقرب تاقشعها طايحة فالأرض وصوت بكاها خلاه يزرب فمشيتو تاجلس قفازي وشدها من دراعها تاوقفها وقال بتساؤل: سيدرا شكوون بكااك ابابا
سيدرا:(شافت فيه وقالت بتنخصيصة وهي تاتشير ليهوم)هادوك ضربوني وغوتو عليا
شاف فيهوم نوح مخنزر وهوما تخلعو ومشاو كيجريو مخلين سيدرا تاتشهق فحظنو
سيدرا:(تاتنخصص)قال ليا جيبي باباك
نوح:(زاد خشاها فيه ونطق بصوت حنين)أنا هنا ابنتي
سيدرا:(بادلاتو لعنااق وقالت بصوت باكي) بابانو
الأب دورو مهم فحياة ولادو وخصوصا البنت لي تتكون قريبة ليه بزاف..تيكون هو أول حب ليهاا..أول راجل حلات عينيها عليه فالدنيا..وخصوصا بعض الأباء كيكونو حنانين على ولادهوم..قرابين ليهوم وكيكونو بصح كيستاهلو ديك الكلمة تقاال ليهوم.. ماشي بحال لبعض لي حاشا واش يستاهل يكون أب.. سيدرا فاش وعات على راسها أول راجل شافتو قدامها كيعطيها لحب ولحنان كان هو إدريس لي قالت ليه بابا ولكن مور ماعرفاتو جدهاا ماشي باها بقا داك لخصاص من ناحية الأب...واخا إدريس عاطيها گاع لمشاعر الزوينة ولحب ولحنان وداير مافجهدو ولكن تيبقى جدهااا ماشي باهاا...
من نهار شافت نوح وعرفاتو وهي حاسة بانجداب غريب جهتو... شخصيتو الحنية والخاطر لي كيعطيه ليها مخليها تعلق بيه بلاماتحس...هي واخا اجتماعية ولكن ماشي مع كلشي ومكتزعمش على بنادم من غير لي شافتو يستاهل... ولكن نوح من أول لقااء هي ارتاحت ليه أو دار بلاصة كبيرة عندها... وملي كانت تاتشوفو مع زين العابدين وتيبقا يدوي معاه ويعطيه لخاطر كانت بلاماتحس تاتجيها لغيرة منوو... كل مرة كانت تاتقلق وتاتمشي لعندو كان تايسمع ليها ويعطيها لخاطر... ولوليدات الصغاار تايحسو بالناس لي قلبهوم بيض وكيرتاحو ليه...نفس الشي وقع لسيدرا مع نوح...
بابانو...ديك لكلمة لي خرجات من فمهاا قاست نوح فالصميم... صوتهاا الباكي ولي فيه شهقات دلحگرة خلاتو يزير عليهاا فتعنيقتو وهي بدورها ضورات يديها على عنقو وخشات راسها فيه تاتشهق... تاهي باغا يكون عندها باباها بحال لوليدات الصغار... تباها بيه قدام الناس وتقول ليهوم هاداك بابا...أما باها من زهرها أنها ماعرفاتوش فحياتها...حيت مكستاهلش يكون فيهاا...
نوح:(دوز يديه على ضهرها ونطق بحنية) أنا معاك ابابا
سيدرا:(باقا تاطلع ليها الشهقات دلبكية وقالت بصوت خافت) تبقا ديما معايا
نوح:(بصوت خشن وهادئ) غانبقا ديما معاك
تحل لباب ديال دار حنان وخرج منو ريان لي كان جا يشوف سيدرا ومع شاف نوح معنقها وسمع صوتها تاتشهق وهو يتخلع عليها وقرب جهتهوم بزربة
ريان:سيدرا مالك؟؟
نوح:(شاف فيه وغمض عينو بمعنى من بعد وقال بهدوء) هاهي معايا
نااض هزها وهي زادت تخشات فيه وتحركو من تما مخلين ريان واقف تايشوف فسيدرا وبالو مشطون معاهاا.. هو عارف سيدرا مكاتبكيش بزاف اه تاتغضب وتقلق ولكن باش تبكي فخص يكون سبب نيييت.. ضار باش يمشي وقشع لباراي ديالها لي طاحت ليهاا وهزهاا تايشوف فيها وهو مكمش حجبانو وأول حاجة طاحت فبالو هي سالات ليه ومع فاش كاتسالي ليها تاتولي مقلقة ولخاطر ماعندهااش...هادشي لي قال مع راسو وهو داخل لدار... أما نوح فكمل طريقو وهي بين يديه وراسها مخشي فعنقو تاشوية بدات طل بعويناتهاا..
نوح:(وقف وحط يديه على ضهرها) شوفي فياا
خرجات راسها ورميشات عينيها باقي فازگين وخناينها سايلين... كمش حجبانو ومد يديه تايمسح ليها وجهها ونيفها بلامايعيف..
نوح:(كمش حجبانو)تاتبيرت إينو نمشيو ناكلو لاگلاص؟
سيدرا:(تاتمسح عينيها وقالت بهدوء) بغيتو بشكلاط
نوح:ناخدو ليك شكلااط (انتابه لاباراي لي طايحة ليه أو ودنيها لي حمرا وكمش حجبانو ناطق بجدية)فين هي لباراي ديالك
سيدرا:(هبطات عويناتها بأسف قاالت) طاحت لياا فاش ضربني هاداك بكورة
نوح:كاضرك ودنيك؟
سيدرا:شوية (هزات عينيها وشيرات بصبعها قدامها وقالت بصوت طفولي غاضب)هاهو داك طبوزي لي ضربني بكورة
ضار لفين شيرات ليه وعينيه لمحو عيسى لي كان واقف مع ياسين لي كان باين تايسمعو لهضرة حيت لاخر حادر راسو وساكت...عينين نوح توجهو مباشرة لياسين كيرمقو بنظراتو القاصحة خصوصا فاش تفكر شوفاتو لرحيل فاش عاون سيدرا..داز قدامو لبلان وعلى شوية كاان غايجي يخلي دار بوه غير نعل الشيطاان...بحكم هو معارفش العلاقة لي كانت بين رحيل وسبب دوك النظرات لي دار فيها... وتاياسين مايجي يهز راسو غير فديك اللقطة لي كان نوح تايشوف فيه بشوفات كيف لقرطااس عاقد حجبانو ومخنزر فيه..أما ياسين فمخفاتش عليه شوفات نوح ومع شاف معاه سيدرا أوطوماتيكمو عرفو غايكون هو راجل رحيل..
نعل نوح الشيطاان قبل مايفوت فيه شي دقة على دوك الشوفات وكمل طريقو مع سيدرا لي كانت تاهي تاتخنزر فعيسي..داهاا كلات لاگلاص بالشكلاط وهي دغياا نسااات البكية لي بكاتها..شرى ليهاا لحلويات أو وصلها قدام لباب وقبل ماتمشي ضارت جهتو ونطقات بصوت مقلق:واش نتا ومامي مخاصمين؟
نوح:(جلس قفازي وبهدوء قال) شكون گالها ليك؟
سيدرا:حيت أنا ومامي مبقيناش تانينيو عندك ولبارح رياني قال ليا مانقولش لمامي بلي نتا هنا
نوح:(تنهد وشد وجهها الصغير بين يديه وقال بحنية) بنتي تاتسمع لهضرة ياك (حركات راسها باه وهو كمل) أنا وماماك مامخاصمينش وقريب غاترجعي نتي وياها لرياض مع مومويات(بجدية) ماتقولي لماماك والو وهادشي يبقا بناتنا واخا
سيدرا:(عنقاتو بحب) واخا بابانو
باسها فراسها عاد وقف وهي مشات دخلات حيت لباب كان مردود..سداتو وغير ضارت بانت ليها رحيل لي خارجة من لبيت يالاه فاقت..
رحيل:(باستغراب)فين كنتي ؟
بقات سيدرا تاضور عويناتها ورحيل قربات جهتها أو وجهها منفوخ بالنعااس...مكمشة حجبانها وغير قربات جهة سيدرا وهي تنطق بجدية:علاش خرجتي لبرا؟
سيدرا:(بخفوت)كنت تانلعب امامي برا
رحيل:(شافت فالساشية لي هازة وقالت)شنو داكشي لي هازة فيديك
سيدرا:حليوااات مامي
قالتها وسلتات قبل ماتسولها تاني ورحيل حركات راسها ودخلات لحمام غسلات وجهها وقادات زيفها عاد خرجات لقاتهوم تايديرو لگوتي كلات شوية وموراها ناضو يتحركو باش يشدو طريق لمراكش حيت ريان خدام غدا... تودعات هي وحنان بلبكاا ماسخاوش ببعضياتهوم... تحدرات حنان تاتبوس فسيدرا ورحيل فديك الأثناء حلات صاكها وجبدات شي فلوس دارتهوم فيديها ورجعات عند حنان بحال الاغاتعاود تسلم عليها وعطاتها لفلوس وحنان شافت فيها وبغات ترجع يديها ساعة رحيل زيرات عليها وقالت بجدية:لاكنتي تاتحسبيني بحال بنتك شدي اخالتي
حنان:ولواه ابنتي مابناتناااش باركة جيتو محملين
رحيل:هادي داري التانية اخالتي والتقليد عليك لاحتاجيتي شي حاجة وماجيتيش قلتيها لياا
حنان:الله يسهل عليك ابنتي ويوقف معاك وقفة ساهلة ويفرحك من عندوو ويخلي ليك راجلك وبنتك وماعز عندك
رحيل:(ميكات على ديك راجلك وقالت)آمين تهلاو فراسكوم ولاكان عمي ماخدامش طلعو لعندنا دوزو شي يامات
حنان:نشاعلاه ابنتي تهلااو وطريق السلامة
مسخاتش رحيل بيهوم مي الله غالب...وصلو لبلاصة فين خلاو الطوموبيل وركب ريان فبلاصتو ورحيل عاونات سيدرا تاتأنسطلات وعاد شافت ودنها لي كانت باقا حمراا..
رحيل:مالك فودنيك واش عضاتك شي حاجة؟
سيدرا:لا مامي ضربني داك طبوزي بكورة
رحيل:(كمشات حجبانها) شكووون هدااا؟
ريان:(شاف فيها وبهدوء قال) واحد لبرهوش غير اجي جلسي تفاهمنا معاه
رحيل:(بانفعال) علااش غايضربها واش عور مكيشوفش زوينة هااادي يضربها لياا مال بنتي شااايطة عليااا
ريان:وصافي هنينا راه براهش مالكي اتمشي ضربيه
رحيل:(طلعات تاتنگر) ونتاا علاش مخليها تلعب براا بوحدها علاش ماحضيتيهااش
ريان:رحيييل تمري لغلط وقع وسديناا واااه يالطيف بوطة وتفرگعات
رحيل:(خنزرات فيه)بزاف عليك
ريان:ومالي كدبت الحمالة خلاتك تولي عصبية ملاحظيتهااش وتكايسي على راسك دابا تولدي ليناا شي عصبين بحااالك ونوحلو معاكوم بتلاتة ههههه
رحيل:(ضحكهاا) ههههه نيت باش يفقصوك وينتاقمو لياا
ريان:(شاف فلمرايا ونطق بضحك) سيدرا اتخلي مومويات يفقصو ليك رياني ديالك
سيدرا:(حركات راسها بلا) لاحبيبي ريااني عزيز عليا
ريان:اوا شتي هالي غايدافع علياا
ضحكات رحيل وتكات راسها على الزاج وماحسات براسها تاكانت ناعسة وبقا غير ريان وسيدرا لي مونساه.. الطريق دوزاتها رحيل غير نعااس ويادوب فاقت فاش تعشاو أما ماتبقى راه نعساتو... وصلو وأخيراً لمراكش وشدو نيشان الطريق لدار وريان حاس بالنعاس مع كلشي ناعس الاهو.. بعد مسافة وصل لحومة وبلاصا طوموبيل وصونى لباه لي كان أصلا كيتسناهوم... خرج هز سيدرا لي ناعسة ورحيل هزات صاكها مسائلها ودخلات مخلية ريان تيدخل طوموبيل لگاراج...
----
شادة تلفون بين يديها وعينيها على داك السطوري لي دااير ديال الطريق...لاحو شي ربعة دالسوايع هادي وموراه لاح سطوري فيه لكافي فين تعشاو.. بدات تاتزومي على ديك التصويرة تاتشوف زوج دطباسل وفدماغها تاتسول شكون كان معاه؟؟ جاها لفضول وفنفس الوقت خوف لاتكون شي وحدة دخلات لحياتو فهاد لوقت لقصير... عضات على شفتها تاتفكر ياماتها..هاد السيمانة كيفاش دوزاتها كلها تخمام..قلبها واكلها من جهتو وماكرهاتش يعطيها فرصة غير تجلس معاه اطابل وتزيد توضح ليه قصدها وبلي هي عمرها ماقصدات تقلل منو.. ولكن ديك الهضرة لي قال ليها وديك الجملة بالضبط "نتي ماشي من مقامي" خلاتها تجمع رجليها عندهاا.. ديك لكلمة قصحاتها بزاف وصعيب تنساهاا.. حاسة براسها باغا تهضر مع شي حد ولكن مكاين مع من.. رحيل لي مولفاها راه فدارهوم وزيد لموضوع متعلق بخوهاا وجيهان راه تاهي مع راجلهاا وممسالياش ليها هي.. لاحت لغطا بملل وناضت تاتجر فبانطوفتها خارجة من جناحها غادة لتحت لكوزينة تشوف ليها متاكل حيت مجاهاش النعاس...وصلات ومشات نيشان لتلاجة وبقات واقفة قدامها تاتاشوف فيها تافلخر جبدات توست وفرماج وداند فومي ولخص وجبن وبدات تتصاوبو.. غارقة فشنو تادير تاسمعات صوت لباب تحل وتسد وهي تقفز مع مشى لحال.. مشات تاتجري خرجات تشوف شكون بان ليها نوح لي داخل هاز صاك دالجلد كحل صغير وخاشي يد فجيب لمونطو..
بيسان:(بتفاجأ)خوياا فين كنتي؟؟
نوح:(شاف فيها بتعب) كنت فالربااط يالاه جيت
بيسان:هااء سحاب ليا راك فلفيرمة فاش هضرت معاك وقلتي شاد الطريق (بتساؤل) شنو كنتي تادير فالرباط واش مشيتي على قبل لخدمة
نوح:تت (مسد مابين عينيه بتعب وقال بهدوء) ملي تسالي جيبي ليا معاك لقرعة دلماا لفوق
بيسان:(شدات فدراعو) واش نتااا بخير احبيبي؟؟
نوح:(حرك راسو) بخير ماتهزيش لهم
بقات تاتشوف فيه بقلب مهموم وحالتو معجباتهاش باين فيه لعياا وبحال لامريض...
ليلة دازت عند لبعض كلها هموم وعند البعض كانت كلها حب وحميمية...مخشية فيه وشعرها القهوي مليوح فوق المخدة ومغطين أجسامهوم بكوفرلي.. كانت مغمضة عينيها تاتسمع لدقات قلبو وهو كيلعب فشعرهاا تانطق بصوت خافت:نعستي؟؟
أسماء:(بعيون معسلة) همم غدا فايقة بكري
إسلام:ماتمشيش لخدمة وجلسي ارتاحي
أسماء:(بسخرية) اه حيت با هو لمدير واش من نيتك اإسلام
إسلام:وشنو مابغيتكش تعياااي
أسماء:مكنعيااش عاجبني الحاال هاكا حسن ليا من لچلاس
إسلام:جلسي وأنا نبقا نعطيك الالة صالير كل شهر
أسماء: والصالير غاتعطيه ولكن لجلاس لاااا
إسلام:تحرميات باغا تبروفيطي فياا
أسماء:(زادت تخشات فيه وقالت بخفوت)نعس وخليني نعس تاأنااا..
غمضات عينيها ونعسات وتاهو نعس حيت بزوج خدامين غدا...
مع الستة دالصباح صونات لغفي فتلفون أسماء لي حلات عينيها بزز طفاتها وبدات تاتفوه ماكرهااتش ترجع تنعس مع سخونية لكوفرلي ماسخاااتش تنوض.. مدات يديها ولبسات بينوار وخرجات وهي تاتكزكز بلبرد مع لابساه على لحم.. سخنات دوش ورجعات فيقات إسلام بااش يدوشو بزوج.. وغير دخل لدوش شدها تما ومعاودش طلقهاا..
أسماء:(تاضحك) واخليني ندوش راه غانتعطلو
إسلام:(عاض على سنيه)اجي نديرو ولادنا اش بغينا بشي خدمة
تحدر تايبوسهاا فشفايفهاا وهي ضورات يديها على عنقو تاهزها ويديه راه تاتسارا فجسمهاا لي كان تيحس بيه سخوون بين يديه...بداو جولة حب صباحية خرا خلاتو أونفورم وتاهي طاح عليها السر.. خرجات مزنگة ومشات نيشان تلبس قبل مايشدها تاني مع حال وحوال..تبعها إسلام وغير شافها تانلبس وهو يضحك وقال بمكر: اجي نقول ليك واحد لحاجة
أسماء:بعد مني واش مكتعياااش أوو ليل كولو شااديني والصباح تاهوو
إسلام:أنا راه مكرهتش نبقا نح**ك حياتي كلهاا
أسماء:(ضرباتو بفوطة) الله يمسخك سير لبس حوايجك أو وجد لينا لفطور
جلسات قدام لمرايا وبدات تاتقاد وجهها بمكيااح صباحي خفيف.. عاطية لخاطر تقولي متابعها والو وهي راه معطلة أصلا.. سالات وجهها ودازت تتصاوب شعرها وتنگر ندمات ملي مدوشاتش فالليل باش تسهال عليها لقضية
أسماء:(بخفوت) تاهو غير هاز علااامو ياربي السلامة
سالات شعرها وجمعاتو مخلية زغيبات طايحين على وجهها عاد بدات تادير لاكسيسوار ورشات ريحتها وناضت شافت فديك لكومبين لي لابسة جاتها أنيقة.. هزات لمونطو وصاك ولبسات صباط طالون وخرجات لكوزينة فين كان إسلام جالس ومقاد لفطور.. شاف فيها بنظرة إعجااب وعض على شفتو
إسلام:فطري اغزالي بااش نربي الصحة راااه تتعياااي دغياا
أسماء:راه نتا لي خدام بالضو
إسلام:دابا تعينيني وتصدقي واحلة
ضحكات وكملو فطور فجو زوين ومرة مرة يخطف ليها شي بوسة عاد ناضو جمعو لمواعن لي توسخو ولي غايخسر ردوه لتلاجة وهزو مسائلهوم وخرجو.. البرد برا خلى أسماء تخشى فمونطوها...
أسماء:ليوم غانبات فدارنا
إسلام:علااش؟
أسماء:غدا السبت مخداماش وتوحشت لبنات بغيت نجمع معاهوم
إسلام:وأنا
أسماء:بات معاياا ياك تاديرها قبل مانتزوجو
إسلام:باش يجري علينا بااك
أسماء:باا مكيجريش غير تهنى
إسلام:تاتجلسي تال دقيقة تسعين عاد تتبلاني
أسماء:ماتبداش عاااود اإسلام توحشت دارنا وعاادي
سكت وتاهي ضربات الطم حيت عارفة لازاد حكر ولاقال شي كلمة غاتعطيه ختهاا ويصدقو مخاصمين تاني.. وصلها وهي قبل ماتنزل ضارت باستو فشفتو وقالت بهدوء:بيناتنا تلفوني
خرجات مخلياه كيتنهد ماكرهش يديها لشي بلاصة يكونوا فيها غير بزوج... حرك طوموبيل ومشى وهي طلعات لخدمتها وعارفة راسها تعطلات بزااف.. من زهرها لقات لغسبونساابل مشغول محاضرش شدات بلاصتها ومع شعلات لبيسي وقفات عليها لبنت لي خدامة معاها وقالت:فخبارك اخر الأخبار
أسماء:لا ياك لباس
لبنت:جاا واحد خونا جديد بلاصة لغسبونساابل لي كاين
أسماء:وايلي علاش واش غايديميسيوني؟؟
لبنت:الا سيفطووه لشركة لي كاينة فالرباط وهادا لي جابو بلاصتو جا من تم دارو شونجموو
أسماء:وعلاااش؟؟
لبنت:ماعرفتش راه واحد شوية غايجمعونا فصال دلغيونيو باش نتعرفو عليه
مشات ديك لبنت وأسماء بدات تاتفكر فهاد لغسبونسابل كيف غايكون.. تادعي يكون شي واحد طالق لعب بحال هادا وتيميك باش ماتزيرش فخدمتها..داز لوقت وعيطو ليهوم كاملين لصال دلغيونيو لي كانت كبيرة..شدات بلاصتها مع لبنات تايهضرو تاتحل لباب ودخل لغسبونسابل لحالي وموراه كان لغسبونسابل الجديد لي غير شافتو أسماء وهي تحل عينيها بصدمة وفالمقاابل هو كان تيشوف بعيون جدية فوجه ديال الناس لي خدامين تالمحها جالسة بأناقة فداك لكرسي كيف مولف فيها... عيونوو لمعوو وقلبو خفق بشوفتها لي مكانتش طيح على لباال... وقف بلاصتو وجمد وعينو على اتصال بعينيها لي كانو تيشوفو فيه بصدمة وعدم تصديق وفباالها تاتقول ياربي نكون غير تانحلم بينماا هو كانو ملامح الجدية لي فوجهو شوية بشوية تايتمحاو وجات بلاصتهوم تبسيمة رجولية بينات ملامحو لمبشورين.. حرك شفايفو وهمس بكلمة قدرات أسمااء تعرفهاا وتفرزهاا واخا ماسمعاتهاا..
وليد:بونبونايتي
مكانتش تاتوقع أسماء أنها غاتعاود تشوف وليد مبعد آخر مرة تناقشات فيه معاه هو وخوه.. مغاتنسااش الشمتة لي شمتوها وكيفاش كانو تايلعبو بيها بحال شي مونيكة... داروها رهاان ومافكروش فمشاعرهاا وكيفاش هي غاتكون.. فكرو بأنانية وبحقاارة بزوج وهرسوهاا وخصوصا هو.. لي حسات معاه بمشاعر جديدة وكانت غادة بنيتها معاه وفلخر صدق كادب عليها وتايضحك عليهاا... كانت حاسة براسها تاتحلم وهي كاتشوفو داخل من لباب وغير مزاد عمار وربى لكتاف على كيف كان... واقف تايشوف فيها بعدم تصديق ومكرهش يمشي عندها يعنقها غير مكونطرولي راسو بزز... مبقاش لاقي راحتو مع مرتو لي أصلا مكيبغيهااش.. كره العيشة معاهاا وكره باه لي كان سبابو تاتزوجهاا...حقد على كلشي وكان غايطلق مرتو ساعة من زهرها حملات وماقدرش يضيع داكشي لي فكرشها وصبر على قبلو وفنفس لوقت كان تايتمنى يتجمع هو وياها ساعة هي مشات وغبرات من حياتو بحال شي فص دلمح وداب... وزاد كمل عليه موت آدم لي قصحو واخا الخلافات لي بناتهوم ولكن كان صعيب عليه..
جلس أونفاص معاها والهضرة دلغسبونسابل مكان تايسمع ليها لاهو ولاهي لي قلبات وجهها عليه وكانت بحال لاجالسة على الشوك مدى بيها وقتاش تنوض وتمشي فحالها.. داز لغيونيو بزز على دوك الزوج أو وليد قدم ليهوم راسو وعينيه غير على أسماء تقول هي بوحدها لي كاينة تم... سالى لغيونيو وناض لكل خارج ومن ضمنهوم أسماء لي تعاملات بحال لامكتعرفووش ساعة هو ماخلاهاش وغير وصلات حداه شداها من دراعها على غفلة منهاا ونطق بصوت جدي حيت لبعض كانو تيشوفو فيهوم:مادموزيل واحد الدقيقة
هزات فيه أسماء حاجبها وبان فيها تنرفزاات وبنثرة زولات دراعها من يديه وبقات واقفة تاضرب بطالونها فالأرض تاخوى تم وهي تنطق بصوت حاد: وي موسيو شنو بغيتي؟؟
وليد:(قرب جهتها وعيونو كلها شوق وبصوت لين قاال) بونبونايتي توحشتك
أسماء:(بانفعال قالت) موسيو حتارم رااااسك
وليد:(تنهد) أسماء أنا عارفك مقلقة مني على ماطرا ولكن خصك تسمعي لياا باش نفهمك
أسماء:(خرجات فيه عينيها) شنو بيني وبينك باش تفهمني ؟؟
وليد:(قرب جهتها باش يقيسها وهي ترجع بلور مخنزرة فيه..تنهد وقال) من حقك تقلقي وتعاملي معايا بالجفاا أنا غلطت فحقك ولكن خصك تعرفي السبب (زير على يديه) من ديما وأنا تانحس براسي هاز مسؤوليه كبر مني أنا كنت ديما ففم المدفع أو صابر على الدق وهو كاان المفشش حيت صغير.. كلشي موفر ليه وأنا كنت عكسو هو يدير لي بغا وانا خصني نتبع كلامهوم حيت أنا لكبير تامن زواج هوما لي حددو ليا لمراا وأنا بزز مني قبلت حيت مولف تانصبر على حقي..تانهار شفتك معااه فالشركة تما حسيت بلغيرة منو وكانت نيتي نحيدك ليه فلول كان غراضي واضح ولكن من بعد طحت فيك ونسيت كلشي وأي حاجة درت معاك حيت كنت باغي ن..
أسماء:(قطعات هضرتو لي مبقات عندها معنى وقالت ببرود) هادشي كولو مبقااش تيهمني سمعتي داكشي داااز وتدفن ونتا بالنسبة ليا واحد غريب تزوجتي طلقتي متي مبقااااش تيهمني حيت نتا أصلا مكااتهمنيش
وليد:(كمش حجبانو وقال بصوت ندماان) نتي مقصحة عليها تاتقولي هاد لهضرة اأسمااء
أسماء:( بعصبية) وااش اعباد الله تانقول ليك مابقيتيش تاتهمني ونتا تاتقول لياا مقصحة لاوااه لخراا سمعني غانقول ليك هضرة وحدة أقسم بالله تعاود دير بحال داك لبلان قدام لي خدامة معاهوم يتانشوهك ومانخلي غير لي نسيت فيك أناا راه نسيتك ومبقيتش مسوقة ليك واش كاين فالخريطة وتجي تقول ليا نشرح ليك عاار ربي ماشد تقاااارك وخليني عليك مهنية فحياااتي وزواجي
وليد:(شاف فيها بصدمة) زواجك؟؟
أسماء:(هزات يديها لي فيها لخاتم دالزواج ونطقات ببرود وتحدي)اه تزوجت بالراجل لي كانبغيه وعايشة معاه بخير وماناوياااش نخليه ولانتفرق عليه بسبابك ولابسباب شي حد خر
سالات هضرتها ومشات مخلياه واقف مصدوم كايستوعب هضرتها وداك لخاتم لي شاف فيديهاا ولي هرسوو كثر من هضرتها...شد راسو وبقا غادي جاااي فبلاصتو وماحس تادفع الكرسي لي كان قبالتو بالجهد...
أما أسماء كانت كلها تاتغلي بالعصبية وهضرتو استفزاتها...واش دازو سنين ومنين وهو يالاه طفات عليه الشمعة عند بالو غاتبقا تسناه وتبقا فنفس النقطة مغاتكمل حياتها مغاتزوج مغادير لولاد.. فقصهاا وبزز باش دوزات ديك الساعات دلخدمة وكاتسنى غير تمشي وغير وصلات وقتها وهي تهز صاكها وخرجات معاودش تلفتات وراها ومن زهرها مشافتوش... خرجات ولقات إسلام كيتسناهاا تبسمات بزز باش مايعيقش بيهاا وقربات جهتو سلمات عليه بلابيز: خرجتي بكري ليوم
إسلام:ساليت خدمتي وجيت ندي لمدام تفوج شوية قبل ماتمشي لدار باها
أسماء:(حركات راسها) مغاتمشيش معايا؟؟
إسلام:ماعرفتش جات ناقصة نبات
أسماء:هااء وفاش كنتي تاتبات فياماتك مكانتش ناقصة
إسلام:ديك الساعة كنت زوفري ولكن دابا راني بداري ومدامتي
أسماء:(ضحكات بخفوت)بااز زعمة كلشي عندك مشقلب
بينما هي كانت واقفة مع إسلام تاتهض معاه وتبسم ليه كانت عيون وليد مراقباها من الشرجم لي فبيروه ونار لغيرة تاتگدي فيه..
جالسة فالأرض قدام لاشاااس تاترد داكشي لي كلات تاولات صفراا وحالتها حالة.. حلقها ضرها بالردااان وبغات غير شي حاجة باردة تشربهاا.. ناضت بزز تاتعكز وخوات لماا موراها غسلات وجهها وشللات فمهاا عاد خرجات لبيتها تاتجر رجليهااا.. ريحة كسكو بالسمن واصلة لعندها خلاتهاا تسد نيفهاا حيت روعاتها تاني الريحة..دخلات لبيتها وسدات لباب ومشات لكرسي لي حاطة فلبالكو وجلسات تاتبرد وتشم لهواا المنعش...كان واحد لكاب تماا لواتو عليها وشعلات لبيسي لي فوق الطبلة باش تخدم...مقادراش تمشي لمحال مي على الأقل خصها توقف على شغلهاا وهي أصلا معرفااش بلي ولد لحاج راه مكلف بلمحال والداخل ولخارج تايوصل ليه ومرة مرة كيسيفط عثماان يحضر على قبل لي خدامين تم بااش مايسيحوش فاش مكينااش مولات الشي.. كانت تاتشوف شكيلات دكسيوات دالشتاا توبهوم سخوون وزوينين بزااف عجبوهاا وقررات تجيب بحالهوم لمحال ديالهاا وتجيب سلعة جديدة لشتاا ومعرفااش تاني بلي نوح راه موصي على السلعة دخل... بدات تاضور فليسيت ولي عجباتها تدومونديها لراسها هو لول.. دخلات لحوايح لبيبي وعينيها لمعو وهي كاتشوف حويجات دلبنات والدراري صغااار ولبيسات يحمقو.. حطات يديها على كرشهاا وتبسماات ومكرهاتش دوموندي كلشي ولكن ماعرفاش سكس دلبيبيات وزيد باقي لحال على هادشي.. بقات تاتقيص كرشهاا لمنفوخة شوية وعينيها تايشوف لبيسات لي عجبوها وكاتحتافض بيهوم باش ترجع تاخدهوم.. صونى تلفونها ولقاتها بيسان..
رحيل:خصني نزغرت
بيسان:ههه زغرتي الالة
رحيل:(دارتها ليها على قد فمها وزغرتات) اوا فين غبرتي مابقيتيش تاتجي عندي
بيسان: غير مع لخدمة وصاف
رحيل:عارفة بلي بسباب ريان ( تنهدات) صراحة ماعرفت مانقول ليك
بيسان:(بحزن) خوك فهمني غالاط ومبقاش باغي يسمع مني غير نشرح ليه
رحيل:شوفي ابيسان ريان ضحوكي ونشاايطي وعزيز عليه لمزاااح بزاف ومكيتقلقش بزربة ولكن نهار لي يتقلق وياخد منك موقف صعيب يعاود يسمع ليك ولايعطيك فرصة تقليقتو خايبة
بيسان:(نبرة صوتها باين فيها مقلقة وباغا تبكي)عارفة وجربتها أنا مكنتش باغا نوصلو لهادشي مي لأرزاق يمكن أنا وياه ممكتبينش لبعضياتنا الله يسهل عليه
صوتها تخنق فديك الكلمة لخرى ورحيل حسات بيها وبقات فيها.. مباغاش هادشي مي الله غالب مباغاش دخل حيت أصلا ماشي حقها وبناتهوم...
بيسان:نسيت علياش عيط ليك مهم كنت باغا نعلمك بلي عيد ميلاد زين العابدين نهار الإثنين وفكرت ندير ليه عيد ميلاد نحتافلو بيه
رحيل:بصح مكنتش عارفة
بيسان:مهم غاتكون حفلة عائلية فيها غير نتوما وحنا وصاف
رحيل:إن شاء الله المهم مزيان فاش علمتيني باش نشوف ليه شي كادو صراحة معرفااش اش كيعجبو
بيسان: دوقو صعييييب بزاااف ههه أنا لي عمتو ومعرفااهش مي نصحك بشي حاجة سبور تايموت على السبور راك شايفاه
رحيل:داكوغ لاحتاجيت مساعدتك انعلمك اجي ياك مامحتاجة مساعدة؟
بيسان:نو بب أصلا مغاديش نديرو داكشي كثير
رحيل:واخا يالاه تهلاي ازين بناتنا تلفون وسلمي عليهوم
قطعات رحيل معاها وعقلها كيفكر فشنو غتاخد ليه.. ماعندهاش علاقة قوية معاه ومعرفاش اش يبغي وتالي يعاونها مكاينش.. هزات لبيسي وقررات تشوف لبس دراري بدات تاتشوف داكشي زوين واخا طالع تماان مي نااضي وستيلات واحد ينسيك فلاخر... ومع هي أصلا أنيقة ولباسة تاتمشي عينيها غير فداكشي الزوين.. خلات احتمالات بزاف فبالها باش تقرر شنو تختار فلخر...
---
عند بيسان لي مكانتش ليوم خدامة..نزلات من بيتها مور ماكملات لابيل لقات مها وسناء جالسين تايتحدتو وزاينة جنبهوم متكية.. جلسات بيسان جنب مها وقالت بهدوء:رحيل تاتسلم عليكوم
سناء:هضرتي معاهاا؟؟
بيسان:وي سولت فيهاا
رحمة:هضرت معاها قبيلة هلكها لوحم
سناء:صراحة الله يكون فالعون مساهلش تكوني أم
رحمة:واييه عرفتي تماارة كادوز عليك فحمالة لامن لوحم لامن الشعر لامن النفسية ونعاسك مكاتنعسيهش مقااد وبلامانهضر على التقل فاش تاتكبر لكرش
سناء:اول الله يسمح لينا من لواليدين
رحمة:آمين مي هادشي كولو تاتنسايه ملي تاتهزي ولدك ولابنتك فيديك غير شوفتو وهو لحيمة تاتنسيك مادوزتي بسبابو
بيسان:ورحيل غايجيوها توينز يااي غايعمرو علينا الرياض
رحمة:(تبسمات) غايجيو لحفااد يونسوني
سناء:نسيتي زين العابدين
رحمة:( تنهدات) على أنا كانشوفو أغلبية لوقت فلاصال ولابيتو بزز باش كياكل معاناا وكون مانوح لي رجعو كون بقا فالغربة
سناء:هو هاكا راك عارفااه ماكيجمعش بزاف
رحمة:وي عرفتي كيشبه بزاف لجدو الله يرحمو
بيسان:فخباركوم الإثنين عيد ميلادو وفكرت ندير ليه حفلة وراني دومونديت على لكيكة وعيط لرحيل علمتهاا باش تگولها لدارهوم
رحمة:(هزات فيه حاجبها) ومع من تشاورتي ؟؟
بيسان:مع راسي ويلي ولد خويا مانحتافلش بيه
رحمة:(بجدية) نوح مفخباااروش؟
بيسان:باقي ماقلتهاا ليه
رحمة:(بعصبية) وتاديري غير لي قالها ليك راسك زعمة نتي خصك لعصاا فكيها داباا مع نوح ملي يجي (شافت فسنااء)وزعمة دغيا علماات السيدة وجدااات تباركالله عليك ابنت كرشي..
على گصعية لكسكسو بالتفاية تجمعات تانيرت مع أسماء وغزلان ورنيم تايتغداااو ورحيل جالسة بعيدة عليهوم هازة زلافة سيكوك.. عيات معاها تانيرت تجي غير دوقو وتحيد شهوتها ساعة والو تروعات من ريحتو فاش كان تيطيب..
أسماء:(تنهدات بالراجة وقاالت بتبسيمة) الله توحشت كسكسو الله يعطيك الصحة اخالتي طلع مزيون
رنيم:على قبلك أجلنا لغدا تاجيتي واش كاين لي تيتغدا مع الخمسة ونص اعباد الله
أسماء:اوا الالة بصحتي وزيد اش كاديري الحلوفة الاماتسنيتينيش
رحيل:خلي عليك لبنت
رنيم:هااا رحيل دافعي علياا راه ختك تاتحگرني
أسماء:باااز والله تحاميتو علياا غير بلاتي اجي شفت سيدرا حسها مقطوع
رحيل:ناااعسة
أسماء:شرى ليها إسلام شي لبيسات واعرين نسيت نجيبهوم
رحيل:ههه سعداتها تاتكسى كثر مني
تانيرت:اوا هي حبيبة كلشي وزهرها هاداك
رحيل:اييه فكرتوني خصني نتقدا ليا شي حوابج حيت هادوك لي عندي مبقاوش صالحين لياا
أسماء:تانديرو شوبينغ أنا وياك
كملو لغدا ديالهوم وناضو جمعو لمواعن ولي غايتغسل تغسل وجات أسماء مور مابدلات حوايجها جلسات جنب رحيل وبدات تعاود ليها اش طرا معاها ورجوع وليد لي صدمها..كانت تتعاود معصبة..
رحيل:من نيتو واش ضاربينو بمقلة ولهيلا عند بالو غاتبقاي تسناي فيه
أسماء:عصبني الزمر كنت غانضربو
رحيل:دابا راه مشاكيل بيما أنه لغسبونسابل الجديد غاتبقااي تشوفيه ديما وهادشي غايدير مشاكيل ليك وخصوصا مع إسلام
أسماء:فركت فيها والله قلت نديميسيوني مي مابغيتش نضيع خدمتي بسبابو
رحيل:هانتي شوفي كملي فخدمتك وبعدي عليه ومتحاوليش تجاوبيه واخاا يعصبك سكتي ودوزيهاا يااك وهو غايفهم راسو
أسماء: هاداك مغايفهمووش واش تانقول ليك صبنتو وهو باقي تيقول ليا نشرح ليك
رحيل:وي عرفت أصلا تريكة الصفريوي مافيها خير
أسماء:غاندير لي قلتي ولاشفتو عيق غانخرج من لخدمة صراحة مباغاش مشاكيل مع إسلام
رحيل:واييه هادشي لي بغيت نقول ليك..
أسماء:صافي نسااي علياا واجي وريني لكادو لي غتاخدي لربيبك
بدات تاتوريهاا ويختارو ونظمات ليهوم غزلان مع رنيم كل وحدة عطياهاا لوشوا لي تاخد وهي حاارت وماعرفاتش شنو تاخد... دازت ديك لعشية غير جموع بناتهوم وأسماء نسات راسها مزوجة تاكيعيط ليها إسلام يسول فيها عااد تاتفكروو... كانت باغاه يجي ساعة عيان وبغا يبقا فدار وتاهي ماحكراتش خلاتو المهم هي راه فدارهوم... جاو لبقية من خداميهوم وإدريس جالس مرتاح وهو كيشوف ولادو جنبو معمرين عليه الداار... تنهد فاش تفكر مشكيلة رحيل مع نوح لي كان تيوصل ليه خبارهاا يوميا واخا تيكون بعيد كيعرف عليها كلشي... جات سيدرا جلسات فحجرو وتكات على صدرو وقالت بخفوت:بّا ديدي واش مغايجيش بابانو؟؟
كمش إدريس حجبانو بتفاحأ وقال بهدوء:شكوون؟
سيدرا:هااء بابانو ماي بلو آيز
سكت إدريس وهو فرحان من داك اللقب لي عيطات بيه لنوح لي كان عارفو كيستاهلو.. فرح لحفيدتو حيت ربي عطاها أب بحالو هو عارف أهمية الأب بحكم عاش محروم منو فأهم فترة فحياتو وحفيدتو راه معاشتش گاع معاه حيت هاداك الشماتة مكيستاهلش بنت بحال سيدرا... لمس شعرها ونطق بحنية:باباك عندو خدمة بزاف انخشيشتي
سيدرا:(مغبونة)توحشتو
إدريس:(مد ليها تلفونو ونطق بهدوء) هاكي هضري معاه
شدات تلفون بفرحة حلاتو وجبد ليها نمرتو وقال:طلعي لفوق هضري معاه
مزادتش الهضرة ومشات تاتحري مخليا إدريس مبسم بحنية ورحيل تاتشوف فيها باستغراب...
دازت ديك الليلة زوينة فاش تجمعو لبنات وشبعو ضحك تاعياااو عاد كل وحدة طلعات تنعس..
فاقت غزلان وهي عطشانة ساعة لقات لقرعة خوات.. بلاحس زولات لغطا تاتسلت باش ماتفيقوش.. صونى تلفونها بنغمة رسالة وبزربة طفاتو وخرجات من لبيت سادة لباب بشوية وراها.. الضلام فالدار وهي كانت حافضة الطريق.. عمرات لقرعة ومع خرجات من لكوزينة بان ليها ضو خفيف جاي من الصالة.. مشات بشوية وهي تاترعد ومع دخلات شعلات ضو لقات ريان تايخربق فالتلفون فعز الظلام..
غزلان:خلعتيني ههه اش مفيقك فهاد لوقت؟
ريان:مجانيش النعاس
غزلان:ياك مباغي شي حاجة فلكوزينة ولافيك الجوع؟
ريان:تت غير طار على النعاس
كان تيهضر بواحد لهدوء غريب على ريان لي تاتعرف حسات بلي بيه شي حاجة قربات جهتو وجلسات حداه وقالت بتساؤل:واش نتا بخير حالتك معاجبانيش
ريان:(تبسم ليها يهدوء) ماتخمميش غير عيان شوية
غزلان:ولفتك ناشط وديما ضاحك صراحة مجاتش معاك التقليقة
ريان:ههه ساعتو الله
غزلان:(حطات يديها على ركبتو وطبطبات عليه وقالت بهدوء وهي مبتاسمة ليه) نتا عارف معزتك عندي مانبغيش نشوفك مقلق
ريان:(درعها بيديه فحركة أخوية)عاارف لي كاااين الله يحفظك غيزو
غزلان:يالاه نخليك تصبح على خير وماتسهرش بزااف وسير رتاح
ريان:واخا هي لولة الالة غيزو
خلاتو وطلعات لبيتها ومع حلات لباب بان ليها محمد طه واقف تيتسناهاا وباين فيه معصب ومخنزر فيها
غزلان:مالك فايق؟
محمد طه:(قرب جهتهاا وهو مخنزر فيها وبصوت بارد نطق)مخليا راجلك نااعس ونازلة لتحت عند خوه شنو معنياهاا؟؟
يتبع...
التعليقات
لا توجد تعليقات بعد، كن أول من يعلق.