محتوى القصة
معرفاش شحال دلوقت وهي ناعسة فوق القبر تتلمسوو وساكتة وبين عينيها صورة جيداء وهي مبسمة.. شوفت قبرها استنزفات طاقتهاا كلهاا وداك لجدار لي كانت بانياه تهد وراااب.. الشميشة بدات تتغيب وهي على حالهااا مباغاش تنوض وتخليهاا.. قرب جهتها ريان وتحنى عندها مد يدو وحطهوم على كتافها ونطق بحنية:رحيل خلينا نمشيووو
رحيل:(بصوت بااكي مبحوح) مقدرااش نخليهاا وحدهاا هنااا
ريان:(جاتو لبكية وبزز باش حابسها) گلاسك هنا مغايفيدش ارحيل خلينا نمشيو أو وقتما بغيتي نجيبك لهنااا
هزها من كتافها وهي فاشلة كلها تراااب والجلابة لكحلة توسخات وفولارها تاهوو ولكن ماتسوقاتش لهادشي عاونها تاناضت وبدا يسوس ليها حوايجها وهي غير تتشوف فلقبببر.. قبر الغالية على قلبهاا.. جرها ريان من يديها وهو عارف الامتحركش غاتبقاا هناا وماتبغيش تزعزع ليه وهادشي ماشي فصالحهاا.. شاد يديها وغادي بيها وهي مضورة راسها تتشوف فالقبر لي بداا كيبعد عليها كلما تمشاات وتتبعد معاااه صورة جيدااء لي بين عينيها.. حل ليها لباب وسدو ورجع بلاصتو وغير ركب وهو يسمع صوتهاا لي نطق ببرود: ديني لحومتنا لقديمة
تنهد ريان وجبد تلفونو سيفط لباه مساج وعاد شد الطريق لحووومة لي خرجات منها رحيل قبل خمسنين.. لحومة لي عاشت فيهاا طفولتها ومراهقتها وشبابهاا.. كانو عينيها لحمررين كيراقبو الطريق لي توحشاتهاا وياما دازت منهاا.. مدة تاوقف ريان طوموبيل ورحيل حلات لباب بهدوء مرريب ونزلات وعينيها كيشوفو فالحومة لي كيف خلاوهاا بقات.. دراري مجمعين فراس الدرب وعينيهوم على لي دازت باش يصيدوهاا.. تمشات رحيل وعينيها كيشوفو فلحانوت لي مولفة تقدا منوو هي وصاحبتهاا باقي كيف خلاتوو.. حانوت صغير وفبرا معلق الكراطن ديال الشيبس والبطاطا وفوق لكونطوار غرارف دلحلوى دلبانان والشكلاط والفانيد وجنب داير لخبز مغطيه بميكة.. بقات واقفة تتشوف فيه بسهوو تاسمعااات صوووت طفوولي نطق "وااارحيييل تسناااااي" ضارت جهة الصوت لقاتها جيداء وهي صغيرة فعمرهاا سبع سنين بشعرها لقهوي وبواحد سروال كبر منها وتيشورت تابعة بنت فعمر الأربع سنين بشعرها القهووي لفاااتح كيف لعسل ورطيطب وبكسوة طويلة وصندالة كبر منهاا تتجري كانت ديك لبنت هي فصغرها.. وقفات رحيل الصغيرة قدام مول لحانوت وأشارت بصبعها جهة الغراف لي فيه حلوى دلبانان ونطقات بصوت طفولي: بعيت هااديك هيه
جيداء:(ردات شعرها وجبدات من جيبها الصرف لي عندها وقالت بطفولية) غانشري ليك زوج بربعة دريال وزوج ليا حيت عندي غير زوج ربعة دريالات واحد جدريال
رحيل حركات ليها راسها وتعلات جيداء جهة مول لحانوت ونطقات:عموو عطيني ربعة ديال طوفطات دلبنان
البقال:(تحنى جهتها) أراي لفلوس بعدا
مدات ليه جيداء لفلوس عاد عطاهاا لحلوى وهي هزاتها وقربات جهة رحيل عطاتها زوج وهزات زوج ونطقات بحنية:نمشيو دابا باش ماتغوتش عليك كلثووم
شدات يديها وبقاو غادين وعيوووون رحيل متبعاهوم ومبسمة لديك الذكرى لي شافت.. كملات طريقهاا وريان غير تابعها وخايف عليها بالجهد.. سكاتهاا خلعوو وتبسيماتها تتبان بحال شي وحدة عقلها طاير.. أما هي فكاانت تتشوف دكرياتها هي وجيداء فكل بلاصة دازت منهاا فلحووومة.. وصلات قدام باب دارهوم لقديمة ولي رجعات بحال رياض كيستقبلو فيه السياااح بقات تتشوف فالعتبة دلباب وعقلها حضر ليها ثاني واحد من دكريات طفولتهاا.. كانت فعمر السبع سنوات جالسة ببجامة خفيفة وجامعة شعرها ضفيرة ولكن منتوفة حادرة راسها وتتبكي تاجات جهتها جيداء لي فعمرها عشر سنين جلسات قفازي قدامها وشافت فيها وقالت بصوت اندفاعي:شكووون ضربك واش هاديك الشريرة دكلثوم
حركات رحيل راسهاا بلا ونطقات بصوت باكي:إلهااام هي لي ضرباتني
جيداء:(كمشات حجبانها وباين فيها تعصبات) وعلاااش ضرباتك لحمااارة
رحيل:(شافت فيه بعويناتها لخضرين البريئيين لي عامرين دموع) كنت تانلعب معاها لاستيك هي ومروي وفاش وصلات نوبتها تلعب طلقت لستيك من يدي وضربها وهي ضرباااتني هء هء
شدات ليها جيداء يديها ونوضات وهي مخنزرة ومشات لدار لبنت لي كانت حداهوم وعلى بعد خطوات قليلة لقاتها واقفة هي ومروى كيلعبو.. تعصبات جيداء وطلقات من رحيل وعقلها الصغير ومقال ليهاا مشات جهتها وجراتها من شعرها مع كانت دايرة گريناات وهي قصيرة شوية عكس جيداء كانت طويلة عليهاا
جيداء:(شاداها وتتغوت) علاش الحمااارة البغلة ضربتي رحيل هااا ماتبقااايش ضربيه الكلبة تفووو
جاو شي رجال فكوهوم وإلهام بدات تبكي تاخرجات مها وناضت الروينة وجيداء تادافع على رحيل وتشكي لمات لخررى اش دارت فيها وجابت رحيل وراتها شعرها لي نتفاتو ليها وبعد مدة دخلات ممات إلهام بنتها وحلفات عليها لاعاودات خلاتها تلعب معاهوم وجيداء جرات رحيل وغير بعدو وهي تحط يديها على كتفها وقالت بضحك:شتيها تاهي بكات لحمااارة باش نوريها تحگر عليك..
تكات على لحيط مربعة يديها وعينيها كيشوفو قبالتها وكأنهوم حقيقة وحاضرين معاااه وماشي دكريات دازت عليها سنين.. تتشوفهوم تيلعبو ويضحكو ابتسامة بريئة طالعة من القلب.. نزلات عينيها وطاحت واحد الدمعة على يديهاا فاش شافتهوم.. كانوو باقي فيهوم بقايا التراب ولي خلاهاا ترجع لواقع الأليم.. مسحات دموعها ومشات بخطوات بطيئة جهة الباب ديال دار جيداء وهزات يديها لي كانت ترجف ودقات زوج دقات وتسمع ليها صوت حناان لي نطقات:ااصباااار
تحل لباب وهزات رحيل عينيها لي كانوو متشربين لحمورية بحال لاحكيتي فيهوم السودانية وجلابتها لي باقي مغبرة وحالتها كانت تقطع فالقلب..
رحيل:(بصوت مألم خافت) واش باب دارك باقي مفتوح ليا؟
محسات رحيل غير بيدين حنان جارينهاا بالجهد ومعنقاهااا وهناا رحيل سمحات راسها تبكي هازة يديها معنقة حنااان ومزيرة عليهاا ودافنة راسهاا فصدرهاا تتبكي بكااا مجهد مخلي لي كايدوز حدا باب الدار يبقاا يشوف ويسول اش واقع.. جراتها حنان ودخلات لداخل ومع جات تسد لباب بان ليها ريان تبسمات ليه وهو دخل سد لباب وتبع حنان لي جرات رحيل لي شدات فيهاا تتبكي وتشهق... كانت باغا تشم فيهاا ريحة صاحبتهاا وتحس بلي معنقاااهاا هي أما حنان فحالة رحيل قطعات ليها فقلبها بزاااف مغاتنكرش أنه فلول تعصبات عليها فاش عرفات السباب وعقلهاا لي طاار وخلاهاا تروون ولكن مع مرور الأياام والسنين رضات بالمكتااااب
حنان:(تتبوس راس رحيل لي باقا تتبكي ونطقات تاهي والدمعة فعينيها) لاتبكيشاي ابنتي وتمرضي صحتك هادااك هو مكتابهااا ابنيتي
رحيل:(صوتها مبقااش تيتسمع بقوة لبكاا تجرح) أنا سبابهاا هي مشااات بسبابي ياناا اااخاااالتي
حنان:(كمشات حجبانها ونطقات بحدة) ستغقري مولاك ابنتي (وكملات بصوت باين فيه متأثر) بنيتي مكتاب ليها تموووت وهي عزبة وحنااا خصنا ندعيو معاهاا بالرحمة لبكااا مغااديش ينفعنا ومغايرجعهااش لينااا
رحيل:(هزات راسها كانت شاحبة وتحت عينيها حمار وحالتها تتخلع ونطقات بصوت هامس) كون معيطتش ليها مكانتش غاتخرج ومكانش غايوصل ليها ويقتلهااا أنا اخالتي السباب (شدات لحنان يديها وقالت وكملات بنفس لبروود) أنا لي حرمتك من بنتك اخالتي أناااا
ريان:(قرب جهتها وهو مرعود عليها) رحييييل
رحيل:(شافت فيه وكملات بحال الاترفعات) علاااش أناا مامتش فالكسيييدة علااااش بقيت عااايشة أنااا منحوووووسة أنااااا السبااااااب اعبااااااد الله (بدات تتغوت وضرب فخاضهااا وتادخل وتخرج فالهضرة) أناااا لي دخلتوووو لحيااااااتي أناااا لي خصني نموووووووت ياااااربي نمووووت ونرتااااح أنااا مااااشي بخير قللللبي كيضررررني أنااااا خصني نموووووت أناااا نحس أناااااااا السبااااااب أناااا
تتعاود فكلامهاا وريان شدهااا وبدا يحرك فيهاا وهي تشهق وتبكي هزاااات بزاااف تامبقااا عندها فين تزيد بحال شي نفاااخة ملي كاتبقااا تنفخ فيهاا وهي تاتزيد تكبرررر وتكبررر ولكن ملي تتوصل لحد تتفرگع هاكاك كانت هي... وطرجمااات شي لي فقلبهااا بغوتة طاااالعة من لقلب صمكاتهووووم وخلات حنان تبكي على حالة هاد لبنت لي بحال بنتهاا وعرفات أنها هازة فوق حملهاا والإنساااان ضعيف من لحم ودم..
محنية وهي تتغووووت وريان دموعو نزلوووو سبق ليه حاضر لإنهياراتهاا ولكن هاد الإنهيااار كان قووووى.. مشى صوتهاا وهي تتغوت وتبح وطاحت الأرض تتبكي يمكن الابكات ترتاح.. بكاو معاها ريان وحنان وتابات جيداء لي جى وشاف منظر صاحبة بنتووو وبقات فيه.. صوتها بدا يمشي تاسكتات فخطرة ملي غيباااات.. هزها ريان بالخف حطها فوق لحاف ونطق بسرعة:غانمشي ندخل الطوموبيل لهنااا
مشى تيجري وحنان ناضت تتعكز تجيب ليها لما تفيقها وبات جيداء كيشمشم ليها مسكين الريحة.. مدازش بزاف تادخل ريان هزها ومشاو معاه تاهوما.. سايگ بيد ويد كيصوني لباه وغير جاوبو نطق بصوت خاايف:لواليد رحيل طاااحت وغيبات وأناا غانديها لسبيطاااار داباا
إدريس:(نطق بلهفة) علااش اش وقع وفينكوم دابا
ريان:كانت تتبكي وتغوت تاطاحت أنا غانمشي بيها لكلينيك العاصمة
إدريس:هاني جاااي
قطع معاه وريااان عين فالمرايا تيشوف فرحيل لي راسها طايح فحظن حنان لي تتمسح على وجهها وشد طريق لكلينيك العاصمة وغير نزل بدا يغوت تجابو ليه لبياص وحطها ومشاو بيها لداخل وريان كيتسنى وبالو مهموم على ختو..دازت مدة خرجات عندو الطبيبة ونطقات بعملية:جاها انهيار عصبي حاد هو سبب الإغماء وفلفحوصات تبين بلي المريضة عندها ديجا الأعصاب فالمعدة غاتبقا هاد الليلة عندنا على سلامتها
جبد تلفونو وطمن باه لي كان شاد الطريق من مراكش لرباط وقلبو ملهف وقتاش غي يوصل ويشوفهاا.. شاف ريان فحنان وراجلها ونطق بهدوء:سمحولينا عدبناكوم
حنان:(تتمسح دموعها بزيفها ونطقات بحزن) الله على بنتي واش هازة فقلبها ياااربي ماخفف عليهاا وهونها عليها ياربي وشوف من حالهاا..
تمتم وراها ريان بآمين وناضو خارجين باش يوصلهوم لدار حيت مكاين لاش يبقاو هنا وهي ناعسة..
صوت الأدان دلفجر مسموع فأبواق الجاامع.. كانت بين الوعي واللاوعي فاش حسات بيد حنينة لمسات راسهاا وقبلة دافية تطبعات فوق جبهتها وأنفاس سخونة حدا ودنيهاا مرفوقة بصوت همس ليها بحنية: أستودعك الله الذي لاتضيع ودائعه..
بعد ليلة طويلة استنزفات فيها كل طاقتهاا شرقات شميشة حاملة معاها أمل جديد... حلات عينيها وكيف لعادة حسات بداتها كولوها تاضرها قلبات راسها جهة الشرجم لي كان مغطي بالخوامي تتشوف فيه وهي ساهية.. الخطوة لي دارت لبارح هداتهاا وحسات براسها فشلات وگاع داك القوة لي كانت تتضاهر بيها تبخرات مجرد مشافت قبر صاحبتها.. نزلات دمعة جنب عينيها ومدات يديها لي كانت فيها السيروم مسحاتها.. وهو يتحل لباب ودخل إدريس هو وريان مبسمين فوجهها وتاهي غير شافتهوم رسمات تبسيمة خفيفة باش ماتشغلش بالهوم.. تنهد إدريس على حالتها وهو كيشوف فيهاا كيف صفرااا ونقطة الدم مافيهااش وعينيها لمنفوخين وحمرررين وشفايفهاا المشققين كيبينو مدى تعبها فهاد اللحظة... جلس جنبها إدريس ومد يدو كيتلمس حناكها ونطق بحنية:فرحتي لولة كيف بقيتي؟
رحيل:(صوتها تبح ويادوب كايتسمع) أنا بخيررر
ريان:(باس حنكها) عييييو
تبسمات ليه رحيل بهدوء وقال إدريس: الطبيبة قالت بلي تقدري تخرجي داباا
رحيل:(ناضت وجلسات فبلاصتها وشمرات بيديها على نيفها) بغييت نمشي لدار
إدريس:(حرك راسو) نمشيو نفطرو بعدا عاد نمشيو لداار واخاا (شاف فريان) جبتي الدوا؟؟
ريان:اه خديتو راه فطوموبيل (مد لرحيل بلاستيكة وقال بتبسيمة) حوايجك توسخوو لبسي هادوو (وكمل بمزاح غامزهااا) راه أنا لي ختاريتهوم باش تعرفي دوقي زين
رحيل:(بتعب) دابا نشوف
خرجو وفلبلاصة دخلات لفرملية لي غاتعاونها باش تلبس حيت باقا حاسة بالفشلة.. زولات فولارها وجلابتها ولبسات كسيوة فالنواغ كاتجي مجموعة من ليدين وفيها زوج طبقات ديال التوب وتحت الصدر تاهي مجموعة ولسانتوغ ديالها تاتسد لور ولتحت مطلوقة مع فولار زرق سماوي.. قادات بنفسها لفولار ونطقات بخفوت: شكراً
لفرملية:(تبسمات ليها تتنصحها) هادا واجب اختي ردي لبال لراسك راه الأعصاب خايبين وكيخرجو على صحة لواحد..
رحيل:(تنهدات وحدرات راسها) غانحاول
لفرملية: حاولي على قبل صحتك وعلى قبل الناس لي كيبغيوك راجلك مسكين ليل كولو وهو جالس قدام الشووومبر ماغمضش عينيه
رحيل:(شافت فيها مكمشة حجبانها) هادااك بابا ماشي راجلي
لفرملية:(كمشات حجبانها بفضول)وااايلي كيبان صغيييير على شحال فعمرك؟؟
قاطع هضرتهوم ريان لي دق ودخل فاش شافها تعطلات وقال:نمشيوو
حركات رحيل راسها وناضت ولفرملية مدات لريان الساشي لي فيه لحوايج لي زولات شدهوم وشكرهاا ورجع شد فرحيل ونطق بتبسيمة:كنعرف نختااار لكسيوة جات على فصالتك
رحيل:(وقفات قدام لباب وشدات وجهوو ونطقات بتعب وحزن) سمحليا عدبتك معاياا
ريان:(تحنى جهتها مكمش حجبانو وحط جبهتو على جبهتها وقال بجدية) عمرك طلبي مني السماااحة نتي راك ختي سمعتي وهادا واجب علياا أنني نكووون معاك ونوقف جنبك وتانتي فاش نطيح نلقااك معاياا هادي هي لخاااوة ماشي غير بالسمية
حطات يديها على حنكو وباستو ورجعو كملوو طريقهوم تال برا فين كان إدريس واقف حدا الطوموبيل كيهضر فالتلفون وغير شافهوووم وهو يقطع وقرب جهتهوم شد رحيل من ليد لخرى غاديين بيهاا جهة طوموبيل جلسوها لور وريان جلس جنب باه لي شد الطريق لواحد لكافي لي فلاكوووط يفطرو فيها ونيت رحيل تبدل لجوو شوية وتخرج من داك الحزن لي تتحسو كيشع منها غير فالشووفة.. بعد مدة وصلو لكافي وحط طوموبيل فلبارك عاد كملو طريقهوم ورحيل عينيها على لبحر لي كيبان ليها وكتشوف لمرسى وهادوك الدراري لي خدامين تيقادو الشبااكي دالصيد وشي براهش تيعووومو أجوااء توحشاتها حيت مدة مانزلاتش لهناا.. كانت ديما تتجي هي وجيداء ويقطعو فلبااطو لجنب الثاني ويتقهواو فشي كافي تم.. جلسو فواحد لكافي وختارو طبلة فبرا..
إدريس:(بحنية) اش بغيتي تااكلي ابنتي
رحيل:(مبغاتش ترجعها ليه فوجهو ونطقات ببحة) لي كان؟
ريان:يالاه استاااغلي لفرصة ماحدي أناا لي غانخلص عليكووم ياك ابابا
إدريس:(تبسم ليه ومشى معاه فالخط) هيا غاتبرعناا
ريان:(غمز باه) معلوم واش عوينات الجلبانة معاااناا ومنبرعوهااش حشووومة ههههه
إدريس:(شاف فرحيل) وهانتي لبرهوووش غايخلص عليناا هي ناخدو لي بغيناا
رحيل:(تبسمات بهدوء) واخا هه
خداو فطور لي بغاو وكيف قال ريان هو لي خلص وغفل إدريس وسبقو حيت عارفو مغايبغيش.. جلسو تما شوية وناضو تمشاو تم ورحيل نزلات لدوك لحجر وبقات واقفة عليهوم مربعة يديهاا تتحاول تستنشق الهواا وريح كيدي ليها الكسوى لي لابسة.. أما ريان وإدريس جلسو فالكراسى قدامها كيشوفو فيهاا ومخلينهاا وحدهاا ترتاح..
ريان: عالله تكووون هادي آخررر مرة طيح ليناا
إدريس:(حرك راسو وقال بهدوء) هاد لخطوة كان خصها ديرها من زمااان كنت هاز ليها لهم ديال هاد النهار
ريان:(تنهد)عارفها واخاا هادشي كولو غاتبقاا تلوم راسها على موت جيداء
إدريس:(حقد الشوفة وقال بصوت تقيل) الله ياخد الحق فلي كان السباب
ريان:(شاف فباه وكمش حجبانو) هاداك بعدا مات وتهنينا منو لمشكيل فداك لمريض لي باااقي عاايش ويعلم الله علياش باقي ساكت لدابا..
شدو الطريق لمراكش فسكات ممزوج مع صوت الراديو لي مطلوق منو صورة البقرة لأحمد علي العجمي مخليها تحس بالراحة.. مربعة يديها وعينيها فالشرجم لي محلول ولهوا لي داخل منوو.. عقلهاا خلاهاا تفكر نهار كانت جالسة فبيرو نووح فاش تسد عليها لباب وكان تاهو طالق ليها القرآن ولصدفة كان نفس القارئ لي كاتسمع ليه دابا.. آخر مرة شافتو هي نهار سولها على رفضها وجاوبت داك السؤال ومن تما مشافتووش.. معرفااش اش غايكون تصرفو معاهاا من هنا لقدام واش غاتبقا ديك لحساسية ولا غايتصرف عااادي بحال الامكاااين والو.. وعلى هاد التساؤلات غمضات عينيها ونعسااات..
----
كان جالس فبيتو فالرياض والمرض باين على وجهوو ونيفو لي رجع حمر.. عطس بالجهد وهز كلينيكس مسح بيه وعينو دمعوو.. ضربو البرد وقتاش وكيفاش معرفش؟؟ سمع الدقان ونطق بصوت مبحوح:دخل
دخلات رحمة هازة كويس فيه لويزة وجاية جهتو مبتاسمة بحنية:شوية دابا
حرك نوح راسو ونطق وصوتو مدعدع: شوية وصاف اش داكشي
شير ليها بعينيه لكاس ومداتو ليه ونطقات: شرب ليك لويزة انوووح تسخن ليك صدرك
يالاه جا يجاوبها وهو تشدو الكحة تاتخنق وصوتو كيتسمع مدعدع وصدروو كيتخرشش.. حطات رحمة لكاس ومدات ليه القرعة دلماا شرب منهاا وهي هزات فوطة وقربات جهتو ونطقات بصوتها الحنين: واش اولدي ضاربك لبرد وزايدها خارج من الدوش بلاماتنشف شعرك وطالق لاكليم بسيف مايفرعك لبببرد
بدات تتمسح ليه شعروو وهو يرجع راسو وشد يديها مكمش حجبانو:يمّاا
رحمة:(كمشات حجبانها فيه) مااالك؟
نوح:(حيد ليها لفوطة ونطق ببحة) ماشي دري صغير أناا الله يهديك تت
رحمة:(عرفاه طبعيتو كيف دايرة وزيد فاش كيمرض لخاطر عندو مكيبقاش) وهاك شرب لويزة
ناض نوح غادي جهة الدريسينغ لي عندو تم ونطق ببرود:قولي لسعدية تصاوب ليا لقهوة
رد لباب لي كان من برا مراياا ومن لداخل مكيبينش.. وجبد ليه سروال توب بلوماغين مع شوميز نواغ.. حيد عليه سروال توني ولبس السروال توب ورش ديدوغون على صدرو وتحت باطو ولبس الشوميز أو وقف قدام لمرايا الطويلة تيسد الصدايف وهو مكمش حجبانو وكل مرة يكح ولايعطس.. جبد السمطة ودارها لسروال قادهاا وهز جاكيط خفيف لبسو ومشط شعروو هاكاك سارد ورجعو لور.. لبس مگانتوو وقرب جهة الطابل فين كانو روايح ديالو وهز ريحة صغيرة حلها وشمها ساعة نيفو مخنوووق مكيشم والو.. كمش حجبانو وهز بارفان خر رش زوج رشات فعنقو أو وحدة فيدو ومسحهوم بزوج عاد دوز يدو على لحيتوو مشطهاا.. جر الكرسي لي كاين فلوسط ولبس تقاشروو وصباطوو وخرج لبيت لقى مو مشاات.. هز تلفونو وشاف فمساج صابر لي علمو فيه بلي غايدوز عندو لميزون دوڤواتيغ.. تنهد وتفكر قبل يوماين فاش جاا عندو وعلمو بلي غزلان مرفعاتش شكاية على خوه.. جلس فوق النموسية وهو ساهي كيفكر فمشاكيل خوووه لي مكيتقاداوش هاد لمرة دااازت طريفة ولكن ماشي ديماا.. كون غزلان رفعات شكاية مغايدخلش وغايخليه يتربى حيت عييق بزااف من نهار شد لورث وهو غابر مكيسول لافموو لاجدو لاجداتو وديما جدوو مسكين كيصوني عليه ويسول فيه هووو حشومة گاااع.. وجداتو لي مسكينة تتسول فيه ديما وا رمضان مبقا ليه غير شي يامات والعائلة كلها مجموعة عندهوم إلا هوو.. ويعلم الله فين غارق واينا مصيبة تاني كيوجد.. حل لباب باش يخرج وهو يتلاقى فطريقو السعدية لي تبسمات ليه وقالت:ولد لحاج جبت ليك لقهوة وكيف تبغيها معصرة بلعشووب
هز الطاس جغم منوو واخا لمداق مبقااش ولكن حسن من بلاش.. مسح ليها على شعرها بحنية ونطق: وقتاش غايطلعو لغيزولتا دلبااك ؟
السعدية:(بصوت خايف) مااعرفتش يمكن مور رمضان يمكن فهاد ليامات
نوح:(شاف فيها بجدية) عقلتي اش قلت ليك الاجبتي لباك بمونسيون عندي ليك كادوو
السعدية:(كمشات شفايفها) أنا حفظت اولد الحاج وگاع داكشي لي كنعرف حطيتو وديما كنت تانقرا فالتلفون راك عارف لباك حر صعيب شوية
نوح:(جغم تاني من طاس دلقهوة وتنحنح) ماصعيب والو الاكنتي حاطة شي حاجة فرااسك غاتوصلي ليها خصك تحطيهاا قدامك باااش تبقاي ديماا تشوفي فيها لمهم هو نتي ديري لي عليك ولكماال عالله
السعدية:(حركات راسها باه) واخا اولد لحاج تبغي نجيب ليك لماكلة لهناا
نوح:(حط ليها الطاس فوق الطبلة ونطق بهدوء) لا أنا خارج
خرج من بيتو غادي فلكولوار وموراه السعدية لي تتفكر فهضرتو لي قال ليها وتدعي فبالها تنجح وتجيب لباك لي بسبب الظروف مانجاحتش فيه فلعام الدراسي ديالها وخرجات من القرايا ولكن بفضل نوح لي زيرها رجعات دارت باك ليبر بعد عماين من انفصالها عن الدراسة.. نازل من الدروج كيقاد لكول دلاشوميز تبانت ليه شيماء جالسة فالجليسة دلقصب بواحد جابادور وطالون وشعرها لكحل مطلوووق قصير كانت شيك ونخوة باش معروفين ناس فااس.. داز جنبها بلامايعبرها عكسها هي لي كلاتو بعينيها تاضار على لخصة وغبر وهي تنهد ورجعات تتهضر فالتلفون.. أما نوح ركب فالجيپ ديالو حيت لBMW طيرها ليه زين العابدين لي سافر مع صاحبو لأگاادير غاديين يتبحروو مع لجوو بدا يسخااان.. قبل مايحرك الطوموبيل دوز لخط وبقا كيتسنى مدة تاتحل لخط ونطق بهدوء:ألو امدرا (كيسمع لطرف الثاني) صافي واخا أنا غانتحرك دابا لميزون دوڤواتيغ عندي شي غراض عاد نزل لمگازان تما فين غانكون ليوم (حك حاجبو) إن شاء الله مع السلامة..
وصلو لدار لقاو تانيرت ورنيم وسيدرا تاهي لي توحشات ماماهاا فانتظارهوووم.. أما أسماء ومحمد طه كانو خدامين .. دخلو لصالة وجلسو مجموعين وتاحد ماجبد ليها سيرة التسافيرة وشنو طرا بلعكس كانو كيهضرو معاهاا فمواضيع مختالفة.. جالسة سيدرا فحظن مها وحاطة راسها على صدرهاا تاشوية هزات راسها ومدات يديها تتلمس وجه رحيل الشاحب ونطقات بصوتها الطفولي لحنين:مامي واش نتي مرييضة؟
رحيل:(تبسمات ليها باش ماتخلعهاش) اها امامي مريضة شوية
سيدرا:(كمشات حجبانها) شنوو كيضرك
رحيل:راسي امامي
تانيرت:سيري تنعسي ابنتي ورتاحي
رحيل: خاصني ندوش ونصلي
حطات سيدرا فالأرض وناضت غادة لبيت خدات حوايجها ومشات دوش باااش ترتااح ونيت تصلي صلاتها باركة غير لبارح لي مصلاتش.. دخلات سيدرا وفاش مالقاتش مها هزات الصنيديقة فين تتخبي فليساتها وداتها لبيت ريان لي كان تاهو ناوي يبدل ويتكى شوية حيت لبارح نعس غير شوية فالطوموبيل.. شاف فيهاا وهو كيتفوه ونطق بتعب:اش باغاا تاني
سيدرا:(حطاتها ليه فوق النموسية وقالت بنبرة آمرة) حلها ليا
ريان:(كمش حجبانو) خدام عندك أنااا
سيدرا:(طلعات فوق النموسية وقربات جهتو مع كان واقف فالفاص الثاني ودارت يديها على خصرها وقالت وهي تتعوح شفايفها) غاتحلها ليا داباا حيت أنا سيدرا حبيبة دياااالتك
ريان:(بنفس النبرة باغي يفقصها) اوشكون قال ليك نتي حبيبتي هااا
سيدرا:(كمشات حجبانها وضربات رجليها مع النموسية) بوحديتي هي حبيبتك أناا سيدرااا
ريان:(تحنى بجغ ليها حنكها وقال بحب) اش بغيتي بلفلوس لي فيها؟؟
سيدرا:حلها ليا ونقول ليك من بعد
ريان:(حرك راسو وقال)جيبي ليا موس
مشات تتجري وشعرها لقهوي طويل كيطير وراهاا جابت ليه موس ورجعات وهي تتنهج وعطاتو ليه ومع هاديك الصنديقة دلقزدير غير وسعها شوية وقلبها وهو يخرج ليه واحد الطرف خضر فاش جرو كانت خمسين درهم.. بقا تياخد ليها لفلوس مع كاتلوح فيها غير الصحاح
ريان:شحال بغيتي؟
سيدرا:فليسات بزاف
ريان:( جبد ليها 250 درهم وقال)اش غاديري بيهوم
سيدرا:يالاه معاياا براا ونقول ليك
تنهد حيت عارف مغاتفرقش عليه وناض لاح عليه قبية وهزها هي ولفلووس وخرجو لبراا.. أما رحيل سالات صلاتها وجلسات تتقرا القرآن شوية وحسات براسها خفافت ونفسيتها شوية تحسنات على قبل.. بقات فالبيت مدة تاتحل لباب ودخلات سيدرا وهي تتشوف فرحيل بعويناتها لمبطنين ورحيل سدات القرآن وحطاتو فوق الطبيلة وتبسمات ليها: فين كنتي؟
سيدرا:(وقفات قدامها وقالت) سدي عويناتك مامي
سدات عينيها وسيدرا جبدات لبواطة لي كانت مخبية ورى ضهرها مغلفة بپاپي كادو وحطاتها ليها فوق النموسية وقالت بحماس:فتحيهوم
حلات رحيل عينيها وهزات حجبانها وهي تتشوف فديك لبواطة ورجعات شافت فسيدرا لي قالت:حليها مامي
هزاتها وحيدات ليها لپاپي وحلاتها لقات فيها صندالة ديال الصيف بطالون وفيها لخيوط فالبيض والطالون ديالها شفايف زوين وستيل.. شافت رحيل فسيدرا لي قالت وهي تتنقز حداها:عجبك مامي لكادوو شريتو ليك أناا باش تبرااي لياا
تبسمات رحيل وعينيها دمعو على لجيست لي دارت سيدرا وجراتهاا معنقاهاا تتبوس فيهاا وتاسيدرا تتحماق عليها وفاش شافتها مريضة قالت تجيب ليها كادو..
رحيل:غير يسخن لحال غانلبسهووم
سيدرا:زوينين مامي ياك أناا لي ختاريتهوم
رحيل:(شافت فيها بمكر) شنوو ندير فيك أنا دابا ناااكلك هممم
بدات تتهر فيهاا وسيدرا تتموت بالضحك وصواتهوم عالين ومسموعين لبراا وبالضبط لإدريس لي كان جاي يطمن عليها وغير سمع ضحكاتها هي وسيدرا وهو يتبسم..
---
كانو مجموعين مور مادخل محمد طه لي كان حاس بالملل فالخدمة حيت رحيل يوماين وهي جالسة وزيد الحاساسية ديالو مع سعيد لي فكل مرة يلوح ليه كلمة وتامحمد طه مكيعطلووش.. حاطة رحيل راسها على كتف محمد طه وسيدرا مخشية فيهوم بزووح ولايحة رجليها على ريان لي كان كان جنبهوم..كمش حجبانو وقال كيتأفأف: جمعي كراوعك اهاد لبرهووشة
زادت سيدرا طلعات رجليهاا جهة وجه ريان تتعصبو وهو شدهوم ليها وبدا تيهرها وهي تتغوت من طبعها تاتهر دغياا ولات حمرا ورحيل تاضرب فريان وضحك:غاتقتلهااا ليااا
ريان:هاااا لي يعااود يلووح كراااوعوو (تيهرها)
سيدرا:(تتغوت وضحك) هههههههه رياني غاندير پيپي ههههههههههههه
قطع ضحكاتهوم تلفون إدريس لي صوني دوز لخط ونطق بصوت هادئ وهو مبسم: السلام أوعليكووم لباااس
تبسيمة لي كانت على شفتوو تمحات فاش سمع هضرة الطرف الثاني وكمش حجبانو ونطق بصوت متأثر:إنا لله وإنا إليه راجعووون
كلهوم سكتوو فاش سمعو ديك إنا لله وإنا إليه راجعون وعينيهوم على إدريس كيتسناو يسالي باش يعرفو شكووون مات.. وغير سد التلفون نقزات تانيرت بلهفة:شكون مات؟؟
إدريس:(تنهد ومسح على وجهو) بات إسلام
شهقات تانيرت ولكل ردد الله يرحمو وباين فيهوم متأثرين.. كمشات سيدرا حجبانهاا وسكتات تتشوف فيهوم.. أما إدريس ناض وشاف فتانيرت:اجي جمعي لياا شي حوايج حيت غانمشي
تانيرت:تاأنا غانمشي معاااك
رحيل:(شافت فباهاا) وتاأنا إسلام واحد من العائلة ومجاتش مانكونوش واقفين معاهاا فهاد النهااار
محمد طه:(كمش حجبانو) وأنا مانقدرش خدام مي غدا السبت عندي غير نص نهار يعني غانجي فلعشية
ريان: أنا ديجا حلست يوماين يعني غانجي مع محمد طه وتاأسمااء ياكي
حركات راسها ورنيم ناضت باش تجمع حوايجها باش تمشي معاهوم ونفس الشي داروه لخرين لي غايمشيو.. لخبر قلبهوم فجأة وداك الضحك هجرووه فاش ساقو خبار موت بات إسلام وكلهوم فكرو فحالتو كيف غاتكوون وعائلتوو.. جمعات رحيل حوايجها هي وسيدرا حيت مغاتخليهاش ولبساتها حوايجهاا ومشطات ليها شعرها جمعاتو ليهاا شفينجة ونزلات لتحت.. مدازش بزاف تانزلات تانيرت بجلابة مخزانية فالقهوي ودايرة فولار على شعرها.. ومعاها إدريس لي مشى يسخن الطوموبيل تبانت ليهوم رحيل نازلة بعباية كحلة بانت بحال شي خليجية مع صندالة بلاا وفولار غير شداتو تحت عنقها ولاحتو على كتفاها وصاك فيديها.. دخل إدريس مكمش حجبانو ونطق:الطوموبيل حابسة مبغاتش تخدم
تانيرت:علاش؟
إدريس: ماعرفتش ريان شوف التران واش كاين فهاد لوقت ولانمشيو فلكار
ريان:واخا
رجع صونى تلفون إدريس وخرج براا ومطولش بزاف تارجع وشاف فريان:صافي بلا ماتشوف مزال
تانيرت:وفين غانمشيو؟
إدريس:(كمش حجبانو وشاف فرحيل) ولد لحاج غايجي يدينا
هزات رحيل عينيها بالزربة تتشوف فباهاا لي رجع جلس كيتسنى نووح.. سرطات ريقها ورجعات تتقاد لسيدرا جاكيط لي لبساتها تاسمعاتها قالت: مامي بغيت نميمي
إدريس:اجي انخشيشتي (مشات عندو وهو هزها) فاش نخرجو نشري ليك شي حاجة برا واخا
سيدرا:(بحماس) بيتزا
إدريس:واخااا
ناضت سيدرا غادة عند محمد طه تتهضر معاها ولخرين متلفين لوقت تاسمعو صوت لكلاكسون وتلفون إدريس عرفوه جاا.. ناضوو جميع وإدريس قبل مايخرج شاف فريان ومحمد طه وأسماء: بناتنا التلفون ردوو لبال لراسكووم وسدو لبوطة قبل ماتجيووو
محمد طه:واخاا طريق السلامة
خرج إدريس هاز سيدرا لقى نوح نزل وهو كيكح وعينيه حمرين ولابس جاكيط سخوونة مع سروال دجين وگااط وداير كاسكيط.. سلم عليه وباس سيدرا لي نطقات بحنية:واش تانتا مريض ماي بلو آيز؟
نوح:(صوتو غادي ويتبح) اه اتاتبيرت إينو
سيدرا:تامامي مريضة
هز نوح عينو جهة رحيل لي كانت تاتشوف فيهوم ودغيا قلب الشوفة عليهاا ببرود وسلم مع تانيرت وطلعو لبنات لور ومعاهوم سيدرا لي جالسة فوق ركيبات رحيل وإدريس لقدام.. تأنسطالاو جميع وتحرك نوح ومحمد طه وريان وأسماء دخلو لدار.. كان طالق لكليم فالطوموبيل ومركز فالطريق تاسمع صوت إدريس لي نطق:عدبناك معانا اولد لحاج ونتا مريض
نوح:(حرك ليه راسو وتبسم ليه) الله ياودي أصلا يالاه جيت من لمگازان
إدريس:لخدمة متتعرفش المرض
نوح:واييه
كانو عينين رحيل تيشوفو فيه ومركزة مع صوتو لمبحوح وحالتو.. كانت جالسة سيدرا فحظنها وغير تحركات الطوموبيل نعسات وكلشي سكت ونوح طلق الراديو ودار القرآن وشد طريق مركز.. كانت تتحس رحيل بشي حاجة فيه مبدلة مولف تيعطيها شوفات مرة مرة ولكن دابا لا عينو مهزهاش فيهاا وتاسلام مسلمووش معااها زعمة يكوون على قبل رفضها ليه.. تنهدات ورجعات راسها لور مغمضة عينينهاا وتتحاول ماتشغلش راسها بهاد الأفكاار.. أما تانيرت ولبنات نعسوو ومحسوش بالطريق تاسمعو صوت إدريس كيفيقهوم ولقاو راسهوم واقفين حدا باب الدار دواليدين إسلام فكازا وكان لوقت قريب لفجر.. نزلو جميع ورحيل مدات لباها سيدرا لي ناعسة هزها وهي حاطة راسها على كتفو وحالة فمها تتنفس منو.. قادات فولارها ونزلات لقات نوح واقف جنب إسلام لي كانت حالتو وباين فيه تأثر ولجنازة فتحات ليه جرووح لماضي ونهار موت السكرة ديالو.. قربات جهتو اوقفات قدامو ونطقات بحنية:البراكة فراسك اإسلام الله يرحمو ويوسع عليه والله يصبركووم
إسلام:(حرك راسو وبحركة عفوية درعها بيديه ونطق بحزن) ممشى معاك باس ارحيل شكراا
رحيل تنحنحات وبلاماتحس قلبات عينيها جهة نوح لقاتو محني راسو كيشوف فالتلفون.. دخلات لداخل والرجال بقاو براا معااه والدار مطرطقة بالعائلة تتعزي.. جلسات فالصالة تتشوف فحالة بناتو وبكاهوم وشي طايح مغيب ولغواااات ومرتو لي جالسة وحالة عينيها مرفوووعة ولابسة لبيض.. لحاصول أجواء الجنازة خلاو دموع رحيل ينزلو وتحدر راسهاا تتبكي وحاسة براسها تخنقات ناضت من الصالة ونزلات لتحت تتقلب على باهاا مالقاتووش وبان ليها غير إسلام.. وقفات جنب الدار تتنفس تاعينيها لمحوو خيال مرا تتقرب جهة إسلام لي عاطيها بالضهر وبصوت هادئ نطقات:إسلام
ضار إسلام جهة الصوت وغير شافها وهو يحل عينوو ولحزن ديالو تبخر فدقيقتو وحل مكانو لعصبية وهو كيشوف فوجهها واخا كانت مغطياه بفولار ولكن عرفهااا وبصوت معصب وفنفس لوقت مصدوم قال: ميس
واقفة قدامو ومن حالتها وحوايجها كتباان واكلة الدق ومكرفصة.. واخا كانت مغطيية وجهها بفولااار ومخلية غير عينيها يبانو هوو عرفهاا وكيفاش مغايعرفهااش وهادي لي قداموو هي الإنسانة لي هرساااتو وخدات منو فرحتوو وبنتوو بلارحمة.. عدباااتو وخلاتوو مريض فعقلوو وفصحتووو وهاهي دابا واقفة قداموو بكل جرأة.. عصبيتوو بانت فيديه لي كان مزير عليهوم وفعينيه لي رجعوو حمرريين كيخلعوو.. دغياا تبدلات سيفتوو بحال الاشاف شي جن قدامو قرب جهتهاا ونطق بعصبية: نتي اااااش كاديري هنااا وكيفاااش خرجتي من لحبببببس
ميس:(كانت تتشوف فيه وعينيها مدمعين خايفة من شوفاااتو ولكن زعمااات راسها وقالت) إسلام أناااا
غير سمع صوتها وهو يكعى وغوووووت بالجهد تاخرجووو الرجال من لخزانة لي دايرين تم والناس كيطلوو من الشرجم من داك لغوات لي سمعوه.. خرجات رنيم عينيها وتاهي عرفااتهاا ونزلات تادردب فالدروج تاخرجات لبراا
إسلام:(مبقاااش كيقشع)لاااااااش جايااااا ابنت لقح*بة لاااااااااش وااااااش باغاااااني نقتتتل الزااااااا*مل بووووك وندفنك فأررضك هاااا
قرب جهتها ناااوي يفرسهااا وهي رجعات لور وغوتات خايفة... أما إسلام مبقاش يقشع قداموو وهو كيتفكر شنوو دوز بسبابهااا ولعداااب لي عاااش.. قرب ناااوي يقتللللهااا ومحس براسو غير وهو مشدود و
ضااار بعصبية لقااه سعد راجل ختوو وخووه هوما لي شادينووو.. بدا كايتنفض من يديهوم ونطق بغوات مخرج عينوو ودفاااالو كيترشوو وبداا يسب فيها: مكفاااكش اااش درتي هاااا المووووسخة قتلللتيهااا وهي مدااارت ليك والوو قتلللتي بنتك بيديك القح**بة مشيييت معاااك بنيتي ونتي غدرررتيني مع صاااحبي ودابااا جاااياااا توريني كمااارتك لي وليت نكرهها وليت كااااره النهاااار شفتك فيه بغيييت رببببي ياااخدك ويهنيني مننننك طلللاق الخراااا طلاااق
كان جاعر معصب ومكانش عارف اش تيخرج من فموو ونسى بلي هوما فجنااازة بااااه.. نسى كلشي ولحاجة لي بقا مفكرها هي بنتوو لي مشااات ضحية.. قربات رنيم جهة ميس وغوتات فوجهها معصبة: اش باغاا هااا واش مكفاااكش اش درتي فيه مكفاااكش خياانتك ليه وجررريمتك لي درتي فحق بنتك هاااا علاااش راجعة داباا اش باغاا مزااال
كانت تتشوف فيهاا ميس وهي مصدوومة من تواجدها فنفس لمكااان مع إسلااام وبقات تتحرك راسها ولهضرة تلفاات ليهاا شوية لمحاتهاا واقفة تتشوف فيهاا من بعييد كاااانت هي.. رحيل مرات خوهااا.. بقات تاتشوف فيها ميس وتساؤلاتها جهة رحيل زادت كبرااات هي معرفااش المستجدات بحكم أنهاا كانت بعيدة عليهوم.. بدات تتشوف فيهوم واحد بواحد وخصوصا إسلام لي باقي شادينوو وخاايفين يدير شي حاجة ليها ويصدق خارج على راااسو.. مسحات دموعها وعطاتهوم بالضهر غادة وقبل ماتبعد هزات عينيها فرحيل لي كانت تتشوف فيها تاهي مكمشة حجبانها عطاتها ميس شوفة قاااصحة عاد كملات طريقهاا ومشااات.. أما إسلام تنثر من يديهووم وحاس بلعافية شاعلة فيه ومبان ليه غير واحد لكرسي هزوو لسماا وردخوو.. قربات رحيل جهتوو ونطقات بهدوء:إسلااام تهدن
إسلام:(شاف فيها وغوت) ااااش غانتهدن واااش ماشتيهاااش خرجااااات من لحبس وجاااااياا بلاحشمة واااقفة قدااامي
ضورات رحيل عينيها على العائلة والناس لي واقفين تيشوفو فيه كمشات حجبانها ومدات يديها شدات دراعو وجراتوو معااهاا لبعييد وهو غادي معاهاا سااكت تيحاول يكونطروولي رااسو.. وقفات رحيل بعيييد على الدار وعلى الجووق لي خارج كيتفرج ونطقات بهدوء: واش نتا بخييير؟
إسلام:(رجليه فشلو عليه جلس فعتبة دلباب دالجيران ونطق بصوت مألم) كيف غااانكووون وأناا شااايف هاااديك لي قتلااات ليا بنتي خاااارجة مكملة حيااااتهااا طبيعي هاااا كيفاااش غانكووون ارحيل
رحيل:(ربعات يديها وحالتو قطعات قلبها وبصوت هامس نطقات) عارفة باش تتحس تيقني تاأنا كنت بحالك فااش شفت داك لحيوان خرج من لحبس ومكمل حياااتو حسيت بلعافية شاعلة فيا ولكن تيق بيا لعصبية ولغوات ماشي حل..
إسلام:(عينيه لمعوو بالدموع وبصوت مزير نطق)بهاد ليدين هزيتها وهي لحيمة وبيهوم كنت تنهزها ونخرجهاا وبهاد ليدين كنت تانبدل ليها حوايجها ونمشط ليها شعرهاا ونعسهاا وبهاد ليدين أنا هزيت كسدتهاا وهي ميتة ومكفنة وبيدي هاادو حطيتهاا فقبرهااا وردمت الترااب عليهاا (هز عينوو فرحيل وكمل بصوت مجروح) علاش هي قتلاااتهاا الامكاانتش هي تتبغيهاا أناا كنت تانمووت عليهاا كانت تخليهاا لياا أناا نربيهاا وأناا نتكلف بيهاا الامكانتش باغاااني طلب الطلاق وكنت انطلقها وتمشي فيماا بغااات المهم غير تخليهاا ليا الامكانتش باغاها أناا (بدا يضرب صدروو وكمل بحرقة) أناا بااغيهاا حرقاااتني فقلبي اارحيل حرقااااتني وهرسااااتني..
دموعها بداو ينزلوو وهي تتسمع صوتو ولحرقة لي كانت فيه.. حرقة أب باقي مانساااش موت بنتوو لي مااتت وهي طفلة صغيييرة كانت ضحية أم مهملة.. هي لي شافت ليليان فمرات قليلة ولي دخلات لقلبهاا وخلاتها تبغيها ببرائتهاا لاعسااك باهاا لي كبرها بيدوو وعاش معاهاا.. هو لي خدا دور الأم والأب بزووج كان ديما عاطي لميس فرص وأعداار لي هي كانت تستاغلهوم على قبل نفسهاا.. مسحات عينيها وشافت فإسلام لي حادر راسو وحالتوو تقطع فالقلب..
رحيل:(بهدوء وهي ساهية)فخبارك تاأنا كنلووم راسي على مووووت صاحبتي لي رزاوني فيهاا بمسبتي وتاهي كانت ضحية طاحت فيدين داك لمريض لي قتلهااا لياااا (صوتهااا تخنق بلبكااا) خمسنين كلهاا ومقدرتش نزور قبرهاا.. حرقتهاا باقي فقلبي هناا وعمرني غانساهاا أنااا فاهماااك اإسلااام وعارفة بااش تتحس حيت أناا ويااك دزنااا من تجربة واخا مختااالفة الاأنها خدات منااا زوج دالناااس عزازين على قلبناا وعمرنا نقدروو نساوهووم.. (مسحات دموعهاا ونطقات بجدية)فخبارك نهار واجهة المشكيل حسيت براااسي خفافيت شوووية وقدرت نتقبل مووتهاا..
إسلام:(هز فيها راسو ونطق بصوت مزير) واجهة ارحيل ولكن مقدرتش نتقبل مقدررررتش (ناض إسلام ومسح وجهو ونطق بهدوء) خلينا ندخلو لداخل
حركات راسها باه وسبقات تاوصلات لحدا لباب وهي تهز راسها جهة لخزانة بان ليهاا إدريس جالس مع شي رجااال كيهضروو.. عينيها كانوو بلاماتحس تيقلبوو عليه وفاش مبانش ليهاا تنهدات ودخلات لداخل وإسلام دخل عند الرجال.. جلسات جنب تانيرت لي كانت تتهضر مع شي عيالات وجنبها سيدرا لي حاطة ليها راسها على رجليها.. هزاتهاا رحيل وعنقاتها عندها مخلياهاا تكمل نعاسهاا وتاهي غمضات عينيها وتكات راسها على لحيييط..
طلع الصباح ولعيالات تيحطو لفطووور وريحة لقهوى كحلة خلات رحيل تحل عينيها وتحس بداتها تكوانسااات.. تقادات فبلاصتها وبدات تفيق فسيدرا لي حلات عينيها لمبطنين منفوخين بالنعاااس مگلوبة غير تتشوف فالعيالات وهي ساكتة.. نوضاتها رحيل وشافت فتانيرت: أنا جاياا (وجهات هضرتها لرنيم) تقدري تنزلي لتحت تجيبي لياا الصااك لي فيه حوايج سيدرا باش نبدل ليهاا..
رنيم:واخاا
مشات رنيم ورحيل داتها لحمام أو شعلات روبيني تاتكب ليها لماا سخوون من الشوڤوو.. سمعات الدقان فالباب ولقاتها رنيم جايبة ليها الصاك هزات لي غاتحتاااج منوو ونطقات بهدوء:صافي غير رجعيه لطوموييل
رنيم:راه گاعما شفت عمي نزلت لتحت مبانش لياا
رحيل:وشكون عطاااك الصاك
رنيم:ولد لحاج لقيتوو ناعس فالطوموبيل حالتوو بالرواااح وصوتوو گاعما كيتسمع
رحيل:(كمشات حجبانها ونطقات باهتمام) ماشربش شي دواا
رنيم:ماعرفتش ماسولتوووش صافي نرجع الصاك؟؟
رحيل:اه غير رجعيه
سدات رحيل لباب وبدات تتبدل لسيدرا وتنقيهاا تاسالات وهي تخرجها ونطقات:سيري عند جداك أنا جاياا
رجعات لحمام نقات تاهي حالتها وتوضااات وبدلات عبايتهااا وفولارها وخرجات وهي جامعة دوك لحوايج فبلاستيكة ونزلات لتحت تلقات بإسلام وتبسمات ليه:صباح الخير
إسلام:(بخفوت)صباح لخير
رحيل:بابا كاين براا
إسلام:خليتو نااعس فالبيت لتحتانية علاش محتاجة شي حاجة؟
رحيل:لا
خلاتو وخرجات لبرا تتقلب بعينيها على طوموبيلة نووح وبانت ليها مبلاصية بعيد.. عضات على شفتها وتفكرات هضرة رنيم وبلاماتحس لقات راسها غادة لعندوو.. وصلات وبان ليها جالس فبلاصتو مرجع لكرسي لور ومغطي بالجاكيط ومغمض عينيه.. دقات على زاج طوموبيل وهو يحل عينيه وقلب وجهو جهتهاا منزل الزاج لي من جهتها هي..
رحيل:(بخفوت) صباح الخير (حرك راسو ومجاوبهااش وهي كملات هضرتها) بغيت نحط حوايجي فالصاك
نوح:(بصوت مبحوح يادوب كيتسمع) راه لكوفر محلول
مشات رحيل جهة الكوفر وخدات صاكهاا حلاتو وحطات فيه ديك لبلاستيكة..ونزلات لكوفر ورجعات جهتو لقاتوو على جلستو..
رحيل:(باهتمام) شربتي شي دوااا؟
شاف فيهاا نووح مدة وهو ساكت ورحيل مرگات وبقات غير تاضور فعينيها تاسمعاتو نطق:لا
بغات تجاوبو وهي تسمع صوت إسلام لي عيط ليهاا وكان جاي جهتهوم تاوقف حداهاا وقال:طلعي تفطررري
رحيل:(حركات راسها باه) واخاا
إسلام:(شاف فنوح) شوية دابا اولد الحاج
نوح:(تقاد فبلاصتو وصوتو غادي وكيقلال) الحمدلله
إسلام:دخل تفطر وأنا نشوف ليك مالين الدار الاعندهوم شي دواا
رحيل:(نطقات بهدوء) أنا عندي فصاكي خنيشة درواح دوليگريپ
نزل نوح ولبس جاكيط ديالوو وسد السنسلة تال لفوق وقاد لكاسكيط مغطية ليه نص وجهو وتمشى جهتهوم وهو خاشي يديه فجيب الجاكيط وقال بصوت مبحبح:لبرد ليوم
إسلام:لا لجوو مزيان غير نتا واقيلا فيك التبوريشة (جر رحيل لي كانت باقا واقفة) زيدي نتي..
حركات راسها باه وهزات عينيها فنوح لقاتو كيشوف فيها بشوفات قاااصحين..
الدار بدات تعمااار ولي مجاش لبارح راه ليوم وصل.. سيدرا كانت ساكتة وجالسة جنب رحيل وعينيها كيكتاشفو الأجوااء لي أول مرة تحضر ليهوم.. قربات جهة رحيل وجراتها من دراعها تاتحنات عندها ونطقات بهمس:مامي علاش هادوك تيبكيوو وعلاش جينا هناا؟
رحيل:(بنفس لهمس)جينا لجنازة حيت بابات إسلام مشى عند الله داكشي علاش كيبكيو
سيدرا:(سكتات سيدرا شوية قبل ماتعاود تنطق) فين بّا ديدي؟
رحيل:لتحت عند الرجال
سيدرا:نمشي عندوو مامي
رحيل:لا خليك هناا راه شوية غايمشيو الرجاال
سيدرا:(ناضت وقفات قدامها شادة يديها وقالت بصوت مسموع) عفاك مامي نمشي عندوو
تانيرت:(ضارت عندها) مالها
رحيل:بغات تنزل عند بابا
تانيرت:واخليها تمشي عندو
رحيل:راه شوية غايمشيو لمقبرة على قبل الدفينة غير خليها هناا
سيدرا:(ضربات رجليها مع الأرض ونطقات بتمرد) غانمشي عندوو أنا
خرجات من الصالة تتجري ورحيل بلاعكز ناضت تابعاهاا معصبة منهاا ومن قصوحية راااسها.. نزلات سيدرا لتحت ومع بغات تخرج من لباب شداتها رحيل وخرجات عينيها فيهاا: اش قلت ليك أنااا لفوووق
سيدرا:(كمشات حجبانها) بغيت نمشي عند بّا ديدي
رحيل:(بجدية) طلعي ماتخلينيش نغووت عليك قدام الناااس يالاه لفوووق
سيدرا:(دلات شنايفها ونزلات راسها تتبكي)
رحيل:(مسحات على وجهها وقالت) يالاه طلعي اسيدرا
هزات سيدرا عينيها جهة لباب وغير قشعاتو وهي تمشي تتجري عندو خلات رحيل حالة عينيهاا فيهاا.. أما سيدرا مشات تتجري عند نووح لي كان واقف مع شي رجال كيهضر معاهوم وكان مبدل حوايجوو بسروال تووني كحل مع قبية نفس اللون وجااكيط مع العلم لحال سخااان..
سيدرا:(بصوت مرتافع تتعيط ليه) مااي بلو آيز
بانت ليه جايا عندو تتبكي تحنى هزهاا وهي شدات فيه ونطقات تدلع عليه:مبيتس نبقا لفوق أناا
نوح:(كيمسح ليها دموعها بيديه وقال بهدوء) شكون بكااك
سيدرا:(مكمشة حجبانها) مامي عوتات علياا
هز نوح عينو فرحيل لي كانت باقا فبلاصتها مكمشة حجبانها فسيدرا وخنزر فيها وهو مقرب جهتهاا.. أما سيدرا غير شافتو غادي تم قالت راه غايرجعها لصقات فيه وضورات يديها على عنقوو وهو قرب جهة رحيل لي بقات تتشوف فيه ومع وقف قدامها معطاهااش فرصة فين تهضر ونطق بصوت مبحوح جدي وهو مكمش فيها دوك لحجبان: مكاين لاش كل مرة تبقاي تنزلي راه هنا كاين الرجااال طلعي لفوق وهاهي معايا..
قلب وجهو عليهاا ومشى راجع عند دوك الرجال لي كان واقف معاهوم..أما هي طلعات لفوق مفاهماااش تصرفاتو لي كيديرهوم معاهاا.. لبارح معبرهااش نهائيااا بحال الامكينااش وتاليوم فالصباح هضر معاها ببرود وداباا نهض فيهاا.. تكمشات حدا تانيرت وحاولات ماتشغلش بالها فيه ولكن بلاماتحس تتلقى راسها رجعات سهااات فيه وفتصرفاتوو..سيارة نقل الموتى جات وكان فيها بات إسلام لي نزلو بناتو وخوتاتو عندوو يتوادعو معاهاا ولبكاا مهرس الدنياا.. كانت سيدرا جالسة مع إدريس فالخزانة مباغيهاش تشووف دوك الأجواء وتبقا تسول داكشي علاش خلاهاا معاه فلداخل.. توداعو معاه وخرجو الرجال لي غايمشيو معاه يدفنووه تابعين سيارة نقل لموتى وإدريس عيط لرحيل لي نزلات دات سيدرا لفوق ورافقهوم هو ونووح لمقبرة لي مكانتش بعيدة على الدار.. الموكب الجنائزي كان مخلي النااس يوقفو احتراما للميت وشي وحدين انظمو ليهوم باش يصليو عليه.. ولادو كان باين فيهوم الحزن واخاا صابرين ولكن لفرااق صعييب فمابالك الاكان فراق لواليدين... وصلو لجامع صلاو صلاة الضهر عاد صلاة الجنازة وبعدها خرجو لمقبرة باش يدفنوووه.. إسلام غير شاف القبر والأجواء وهو يتفكر جنازة بنتوو وحس براسو تزير.. ودموعوو نزلو وهو كيشوف الكسدة دباه لمكفنة والتراب تيتكب عليهاا.. كملو الدفين ودعاو معاه ورجعو الرجال من المقبرة لدار فين كانو لعيالات.. والدار جيران كانو عاطينها ليهوم لطيااب وتايستقبلو فيها الناس حيت العائلة كثيرة.. ناضت رحيل عند لعيالات لي كيسربيو عرضات عليهوم المساعدة باش ماتبقاش جالسة
تبسمات ليها مرات خو إسلام لكبير هاجر وقالت:شكرا الحبيبة كاينين هنا لبنات بلاماتعدبي راسك
رحيل: العفوو اختي
واحد من دوك النساا نطقات: عمري شفتك هناا اش تتجي لعائلة إسلام؟
رحيل:كانعرف إسلام وماما هي لي تتعرف عائلتو
لمرا:واش ديك لبنيتة بنتك ؟
رحيل:اه بنتي سيدرا
هاجر:الله يصلح
رحيل:آمين
فبلاصة بعيدة شوية على الدار كانت واقفة ميس وعينيها على باب دار إسلام.. كانت باقا بحوايج لبارح وفولار مغطية بيه وجهها وبلخصوص ديك السكتريس لي فيه.. كانو عينيها كيقلبو عليه بلهفة تبان ليها خارج من الدار هاز سيدرا بين يديه.. كمشات حجبانهاا وبقات متبعة فيه الشوفة تاجلس فالكرسي حدا باب الدار مجلس سيدرا فحظنو وهي تاتلعب معاه وهو مبسم ليهاا تبسيمة باينة طالعة من لقلب.. بقات حاضيااااه بعيون خايفة من داكشي لي طاح فبالها تاسمعات صووووت وراهاا قفزها من بلاصتها فاش قال بنبرة ساخرة: شفتي بنت خوووك شحال عزيزة على طلييقك تقوولي غير بنتووو..
ضارت جهة الصوت ولقاتو علي لي كان واقف تيشوف فيها بسخرية أما هي كمشات حجبانهاا من شوفتوو.. وعرفاتو واخا مكانش تيبان بزاف فالداخلة ولكن باقا عاقلة عليه.. رجعات تتشوف قدامها وبالضبط إسلام لي باقي مندامج مع سيدرا لي تعلقات فيه وباستو ففمو وبقات تاضحك وتاهو كيضحك معاااهاا.. عاد رجعات معاهاا هضرة علي لي قااال ونطقات بصوت ممتيقش:واش هاديك بنت عاااصم؟
علي:(ببرود وسخرية) اه بنت لمرحووم دخووك
حلات ميس عينيها على كلامو وشافت فيه ونطقات بصوت خافت:مرحووم؟
علي:(قلب عينيه) اوهووووو نتي رااه فلتااات ليك اخر الاخبار ولكن ماعليش ندير فيك خييير ههه خوك عاصم مات فلحبس غير فهاد الآونة ومك تاهي مااااتت هادي شي خمسنين
ميس:(دموعها كينزلو وحركات راسها يمين وشمال) ماما ميمكنش ورنيم علاااش هي هناا؟
علي:(فجأة ملامح وجهو تبدلو مجرد ماتدكرات سميتها ونطقات بجدية) ختك ولات عايشة مع رحيل وعائلتهاا وضربات على عائلة لجوهري فخطرة
ميس:(بصوت مرعود) وبدر الدين؟
علي:(ضحك بسخرية) بلاماتحاولي تباني ليه حيت مغايعقلش عليك بدر الدين الاكان قبل تايخلع داباا راه مبقاااش تيرحم والاطحتي فيديه غايعفس عليك ومغايتسوووقش
ميس: أنا بنت خوه هو مغايسمحش فيااا
علي:(طلعها ونزلها باشمئزاز) كنتي بنت خوووه أما دابا مبقيتي تتعني ليه والو حيت لي دااات تفكيروو وتلفااااتو على لقبلة هي هاديك
ضارت ميس تتشوف فجهة لنيش عليها علي وبانت ليها رحيل لي خارجة مبعدة شوية على الدار تتهضر فالتلفووون.. زيرات ميس على يديها من ديما مكانتش تتحمل رحيل من أول مرة شافتهاا وداباا زادت حقدات عليهاا وكرهاتهاا فااش شافتها فبلاصة لي ماخصهاش تكووون فيها وزيد هضرة علي لقاااال هي عارفة عمها بدر فاش تيحط شي حاجة فراسو مكيتهنى تاكيخليها تولي ليه.. بقات تتشوف فرحيل لي قطعات التلفون ورجعات جهة الدار وبان ليها إسلام نايض عندها هاز سيدرا وبقا واقف تيهضر معاهاا كيبانو بحال شي عائلة من بعيد وعند هاد لفكرة حسااات بدمها كيغلي وضارت عند علي لي كان تاهو متبع لمنظر ومربع يديه..
ميس:شنو بناتهووووم؟
علي:(باغي يستافزها) جاو مواتين صراااحة
ميس:عللللللي
صوتها كان معصب أما هو شاف فيها ونطق بجدية: وياااك يسخن عليك راسك وتفكري ديري شي حاجة حيت تيقيني نتي لي غاتخسرررري
جبد من جيبو كمشة دلفلوس وخدا يديها حطهوم ليهاا ورجع بخطوات بسيطة لفين كان حاط الطوموبيل ركب ودمارا غااادي وميس بقات تتشوف فلفووس بشوفاات معصبين كون مكانتش محتاجة لفلوووس گاعما غانشدهوم وغاتلوحهووم فوجهوو ولكن مع الأسف هي دابا باغااا فلوووس حيت مبقاا عندهاا والو ملي خرجات من لحبس وهي كتصوڤي راسها هي او واحد خيتي كانت معاااهاا فلحبببس خرجوو بزوجات بلعفووو الملكي ولخرة من زهرها عندها دويرة ديالها فين ساكنة هي وميس دابااا.. حطات الفلووس فجيبها ورجعات تتشوف فالدار لقات رحيل دخلات وتاإسلام مكاينش.. كمشات حجبانها ومشات فحالهاا وبالها كيفكرر فشحال من حاجة..
أما لداخل رجعات رحيل لصالة جنب مهاا وتحنات عندها ونطقات: أسماء وريان ومحمد طه جايين فالطريق
تانيرت:واش جايين فلكااار؟
رحيل:لا محمد طه كرى واحد الطوموبيل
تانيرت:(كمشات حجبانها وتسائلات باهتمام) وشكون سايگ ياكما محمد ؟
رحيل:لا ريان نتي عارفة محمد طه باقي مزاعمينش عليه يسوگ اماما (تفوهات ونطقات بتعب) بغيييت نعس عيييت
تانيرت:شوفي شي بيت وسيري تكاااي
رحيل:ونتي مغاترتاحيش شوية
حطات تانيرت يديها على كرشها لمنفوخة شوية ونطقات:راه فليل نعست شوية وتاباباك تكى لتحت
رحيل:اه قالها ليا إسلام (جبدات رحيل تلفونها وسيفطات مساج لإسلام) كوكو بيتك خاوية بغيت نتكى فيهاا شوية حيت راسي ضارني
وصلها الرد فالحين منو " ااه أنا جااي نحلها ليك"
هزات رحيل صاكها وشافت فمها لي حركات ليها راسها ونزلات لطبقة التانية فين كاين بيتو لقاتو واقف حداهاا حلها ليهاا وهي تبسمات ليه:شكراا
إسلام:لعفو هاكي الساروت ملي تخرجي سديها واخاا
رحيل: واخاا (جا يمشي وهي تعيط ليه) إسلام هاااكا (مدات ليه خنيشة ديال دوليگريب وقالت بهدوء) عطيها لولد لحاج
شدها ونزل لتحت لخزانة ودخل غادي لطبلة فين كان جالس إدريس هو ونوح وجنبو سيدرا لي تتفرح فتلفون نووح ومتكية عليه.. مد ليه لخنيشة ديال الدوا ونطق بهدوء: هادي سيفطاتها ليك رحيل
نوح:(هز عينو فيه وشد ديك لخنيشة ونطق وهو مكمش حجبانو بصوت لمبحوح) الله يحفظك
إسلام:تسنى نجيب ليك كاااس فين تشربهاا
نوح:(جبد قريعة صغيرة كيشرب منها وبقا فيها شوية ونطق) ماعليش
كبها فالقرعة وحركهاا عاد شربها كولهاا وهو مكمش حجبانوو وهز عينوو فإدريس لي سد ليه عينيه بمعنى "صافا شوية" ونوح تبسم ليه وحرك راسو "شوية وصاف"
سيدرا:(هزات عينيها فنوح ونطقات بصوت خافت) تامامي فاش تتكون مريضة تاتشربها وتتشرب تاواحد الدواا عندها فواحد لبواااطة بيضااا عرفتي ماي بلو آيز مامي عندها بزاف ديال دواا فمجرهااا تاتشربوو (وكملات بحزن) مسكينة مامي تتمرض بزااف هي..
وقف ريان طوموبيل متبع النعث لي عطاه إسلام تاوصل.. نزلو بتلاتة وأسماء بدات تتقاد فشعرهاا ومكانت دايرة والو لوجهها من غير چلوووس لامع.. نفخااات بملل فاش شافت داك الكم الهائل ديال طوموبيلات والأجواء ونطقات:اوووف ماعنديش مع هاااد الأجواااء
ريان:وابلاتي نقول ليهووم يبدلو ليك لجووو
محمد طه:هنيوناا وزيدو قدامي
كان محمد طه بعقلوو بيناتهوم مع العلم هو الصغير فيهوم الاأنه فأوقات الجد تيكووون جدي بلاقياااس.. سلم على إسلام معنقوو عناق رجوولي وعزااه ونفس الشي دار رياان عاد وصلات نوبة أسماء لي قربات جهتو ومدات يديهاا ونطقات بهدوء:لبراكة فراسك من جهة باباك الله يرحموو ويصبركووم
إسلام:(زير على يديها ونطق تاهو بهدوء) ممشى معاك باس شكراا
دخلات أسماء لدار والدراري مشاو لخزانة وريان غير شاف شحال ديال الرجااال وهو يجر محمد طه من الشوميز لي لابس ونطق بهمس: ماتقولش ليا غانسلموو على هاااد لبشااار كااامل
محمد طه:(تيهضر تاهو بشوية) وشنو ندخلو مدرمين
ريان:هز يديك وقول السلام اويلي اصاااحبي مسااالي قبي
وكيف قال ريان داروو هزو يديهوم سلمو من بعيد عليهوم وقربو لطبلة باهوم وتحناو باسو ليه يديه وراسو وسلمو مع هادوك لي فالطبلة حيت مجاتش ينقزوهوم وجلسو جنب نووح لي هز سيدرا وجلسها فوق ركابيه مخلي بلاصة لريان ومحمد طه مشى جر كرسي وتخشى جنبهوم.. كان صوت القرآن والطلبة هو لي كيتسمع وريان كان داير عقلوو متبت
سيدرا:(جرات ريان وحطات حنكها على حنكو ونطقات بحب) ريااااني توحشتك أنااا
ريان:(خشاهاا فيه وهزها عندو) سليعفاااانتي خليتي بلاصتك لبارح فالدار
سيدرا:نينيت أنا هنااا
محمد طه:(تحنى جهتها تباسها فحنكها) روح مووودي فين ماماك
سيدرا:مامي فوق مع تانيرت إينو ورانووو (ضورات عينيها وقالت) فين سومة
ريان:طلعات لفوووق
سيدرا:(شافتو كيمدغ لمسكة مرة مرة وقالت) فين مكستي أناا
ريان:(جاتو الضحكة) شنو سميتها
سيدرا:(مدلية شنايفها) مكسة
ريان:(قلب وجهو عند محمد طه وقال بضحك) سمعتيهاا ههه
محمد طه:سميتها مسكة ماشي مكسة
سيدرا:عطيها لياا
جبد ريان من جيبو باكية وخدات وحدة حلاتها ولاحت لكاغيط ديالها فوق الطبلة وكلاتها..
ريان:عنداك تبلعيهاا
فلفوق كانت رحيل فاقت مبعد ماتكات ليها واحد شوية ولقات أسماء كاينة جلسو جنب بعض ونطقات أسماء بهمس:هااا اشنو لجديد؟
رحيل:(بنفس لهمس) فلتات ليك لبارح بليل
أسماء:اش وقع؟
رحيل:ميس طليقة إسلام جات لبارح
أسماء:(شهقات) هاويلي على هي خرجات من لحبس
رحيل:(حمرات فيها الشوفة) هاويلي هنيناا ازمر اييه خرجات ماعرفتش كيدارت ليها مهم إسلام غير شافها وهو يصعر ويلي كون مشدوهش كانت غاطيح الروووح (بدات تعاود ليها وأسماء تتسمع مركزة) غير ربي لطف والله
أسماء:وهاد لقح*بة لاش جاياا مبعد اش دارت والشوهة لي شوهات راسها واش من نيتهاا
رحيل:هانتي تشوفي (بحزن) بقا فيا إسلام والله كون تشوفي حالتو لبارح تقطع فلقلب باقي حرقتوو مابراتش من جهة بنتوو الله يرحمها
أسماء:(كمشات حجبانها) أنا بقات فيا غير لبنت لي مشات ضحية اوا الله يرحمها (بدات تاضور عينيها) احي فين رنيم مبانتش ليا
رحيل:مشات لعند لعيالات تعاونهوم
أسماء:شنو دارت فاش شافت ختها؟
رحيل:غوتات عليها وتعصبات اش غاديري
أسماء:اوا تاهي زهرها عوج على تريكة عندهاا تت تتبقى فيا
رحيل:اوا الصبر وصااف تاحد مالقاها كيف بغاهاا.. شفتي سيدرا لتحت؟
أسماء:لا مبانتش ليا اتكون لداخل عند بابا حيت مشفتش جهة لخزانة سلمت مع إسلام وطلعت نيشان
ضارت أسماء جهة لعيالات لقات شي يهضر مع شي..
ونفس الشي كان عند الرجال لي مجمعين لتحت ونوح لي بدا يترخى مع الدواا لي خداا كيرخي وينعس.. كان مربع يديه كيسمع لهضرة الرجال لي جنب إدريس تاجاا واحد الراجل كبير فلعمر كيسلم عليهووم.. سلم عليه نوح وداز جهة ريان مد ليه يدو وقال الراجل لكبير: لبراكة فراسك اولدي
ريان:(كمش حجبانو حيت جاتو عجب هو بوحدوو لي عزاه) الله يبارك فيك
خرج محمد طه عينيه فيه وضربوو بلكووود جهة دراعو ونوح جمع الضحكة مع كان جالس فجنبوو سمعووو وبااش ريان يزيد يرقعهاا نطق بصوت سريع:عقبالك الحاج
هناا محمد طه قلب وجهوو تيضحك سيلونس وكتافو يتهزو وإدريس كمش حجبانو فولدو لي ديما كيزبلهاا يهضورو وماعتقهوم غير إسلام لي جاا جهتهوم ومع داك الراجل مسكين كبير فلعمر وداير نضاضر قعان دلكيسان مكيشوفش مزيان وظنو إسلام مع فاش سول عليه قالو ليه راه هو فالداخل.. أما ريان شاف جهة محمد طه لي باقي قالب وجهوو ونطق بصوت هامس معصب:تهجرووو
ريان من طبعو مكيحضرش لجنااايز بزاااف وقليل فين تيمشي يعزي وهو أصلا من ديما كيزبلها بهضورو لي كيخرج من فموو بلامايخمم ليه.. سكت محمد طه وشرب لمااا وبدا يتنفس وريان كمش حجبانو ومعاودش ضار جهة باه حيت عارفو غايكوون مخنزر فيه داكشي لاش قلب وجهو..
سيدرا:(شافت فمحمد طه )علاش تاضحك مودي
محمد طه:(باقي حاس براسو باغي يضحك وغير حابسها بزز) ههه والو
رجع قلب وجهو تيضحك وريان تاهو جاتو الضحكة.. بقاو هاكاك واحد قالب وجهو على لاخر حيت عارفين غير يشوفو فبعضياتهوم غايصدقو مكرشخيين.. جاتهوم واحد لفوغيغ راه مايمكنش ناض محمد طه خارج لبرا يتنفس وريان شاف فإدريس بنص عين لقاه كيهضر مع الرجااال وشاف فنوح لي كان مهبط الكاسكيط مغمض عينيه..
سيدرا:(مشات جهة إدريس) بّا ديدي انمشي
إدريس:(شير ليها بيديه) اجي هناا فين غاادة؟
سيدرا:(شادة فيدوو) انطلع عند مامي
إدريس:(بجدية)راه الاطلعتي لفوق مغاتنزليش هنا مزال
سيدرا:(مكمشة حجبانها) وعلاااش؟
إدريس:هاكاك مغاتبقايش غير سير واجي
هبطات راسها ومشات راجعة عند نوح لي حل عينو وهزها جلسها فحظنوو وهي تكمشات معاوداتش هضرااات.. أما إدريس هو عارف بحال هاد الاجواء غير يغفل عليها تقدر طير وخصوصا فحالتهوم هوما وبدر الدين لي باينة غايكووون حاضيهوم داكشي علااش فضل يقصح معاها على أنه يخليهاا على خاطرها وتوقع شي حاجة لاقدر الله..
سيدرا:(ضارت جهة نوح ونطقات بتساؤل وهي تتشير جهة لكاسكيط) علاش لابس هادي؟؟
نوح:(تبسم ليها)سميتها كاسكيطة
سيدرا:تامامي عندها وتاأنا عندي تانلبسها فاش تتكون شميشة ولكن دابا مكيناش شميشة
نوح:(قلب وجهو لجنب تيكح وعاود رجع شاف فيها) مسخنة ليا راسي حيت كاين لبرد
سيدرا:(حطات يديها على حنكو تاتلمسو ونطقات بصوت حنين) فيك فوفاا هنااا بحال لي تتكون فياا ولكن مامي تاتعومني ومتتبقاش باقي (وكملات ببرائة) نقول لمامي تعوومك تانتا
نوح:(جاتو الضحكة وحبسها بزز) لا
سيدرا:(تكات على صدرو ونطقات بصوت بخفوت) فيا جويعاات
نوح:(تيمسح على شعرها) مافطرتيش؟
سيدرا:كليت غير خبيزة فيها زبيدة وزيتونة صااافي
نوح:(تحنى عندها) شنو تبغي تاكلي؟
سيدرا:(عينيها لمعو وشافت فيه بحماس)بيتزا بدجيجات
نوح:(نوضها وقال بجدية) جلسي هنا تانجيبها ليك
سيدرا:(لصقات فيه) نمشي معاك
نوح:(قرب عند إدريس وقال بهدوء) هاهي معايا
إدريس:واخاا
خرج برا لقى محمد طه جالس حدا باب الدار مكونيكطي.. هز راسو وتبسم ليه ورجع مكمل هضرتو مع رحيل لي كانت تتسول على سيدرا..
رحيل 📩 سيدرا جالسة مع بابا؟؟
محمد طه 📩 لا مشات مع ولد لحاج
رحيل 📩 فين 😶
محمد طه 📩 ماعرفتش حدي هزيت راسي ولقيتها غادة معاه
رحيل 📩 واخااا ملي ترجع قول ليها طلع عندي
محمد طه 📩 أوكي اش درنا مزال فالخرجة
رحيل 📩 ماعرفتش واش غانمشيو غير لمروكو مول ؟
محمد طه 📩 فيما بغيتو نمشيوو راه الصدقة غاتكون ليل وقلت نبدلو لجوو ماحد جينا
رحيل 📩 صاافي واخا نتغداو ويحن الله
بقا مجمع محمد طه مع رحيل تبانت ليه سيدرا راجعة هي ونوح وهازة معاهاا كارطونة دلبيتزا كبيرة.. مشات جهة محمد طه وقالت بحماس:جبت بيتزا مودي بغيتيها؟
محمد طه:(باسها فحنكها) لا مودي سيري طلعي عند ماماك راه تتسول عليك
سيدرا:(شافت فنوح) باااي ماي بلو آيز
طلعات لفوق وهي رادة لبال مع لبيتزا لي بين يديها تاوصلات لصالة لقات رحيل جالسة تتهضر هي وأسماء ورنيم تاجات عندها ونطقات بهمس:مامي شوفي ماي بلو آيز شراا ليا بيتزا
رحيل:(هزاتها جلساتها حداها وقالت بهدوء)قلتي ليه شكرا؟
سيدرا: اه وبستو تاهي
تكونات سيدرا جنب تانيرت تتاكل معاها وغير سالات داتها غسلات ليها يديها ورجعات جلساتها جنبها وسيدرا حاطة راسها على كرش تانيرت تادوي معاهاا أما لبنات فكانو جنب بعض كيدويو تاوصلات وقيتة دلغدا وحطو كسكسو وتجمعو عليه من غير سيدرا لي مكتاكلووش.. تغداو وناضو لبنات باش يخرجوو كيف تافقو مع ريان ومحمد طه وسيدرا خلاوها مع تانيرت حيت نعسات.. نزلو لبنات لتحت ورحيل عينيها مرة مرة يهربو لداخل تتقلب على نوح ساعة مبانش ليهاا..
كانت جالسة تانيرت مع لعيالات تاتقربات جهتها واحد لمرا وتبسمات ليها وجلسات جنبهاا ونطقات بهدوء:واخا نسولك
تانيرت:مرحباا
داز لوقت ورجعو البنات وتحط لعشا ولبعض من الناس ناضو يمشيو ومنهوم تاإدريس لي عيط لتانيرت وعلمها.. كانت الزنقة عامرة بلبشار نزلو لبنات ومهوم وتمشاو ديريكت لعند إدريس لي كان واقف مع نوح وريان ومحمد طه سلمو على إسلام ونوح طلع ديريكت لطوموبيل مخلي رحيل غير تتشوف فيه وهي مكمشة حجبانها ونطقات بهدوء:غانركب مع ريان
مشات عندهوم وركبات غير تانيرت وإدريس مع نوح لي حرك طوموبيل وتبعو ريان.. كان السكاات فالطوموبيل تانطقات تانيرت كلامها بعفوية ناسية راسها فين كاينة ومع من: نسيت ماقلت ليك اإدريس
إدريس:(ضار عندها وقال بتساؤل) ياك لباس؟
تانيرت:بنتك جاو فيها لخطاب
إدريس:(مكمش حجبانو ونطق بترقب) شكون؟
تانيرت:(بعفوية) رحيييل
قالت هضرتها بعفوية ونسات راسها شكون كاين معاها.. خوات المزيودة وماطلع معاها القالب تاسمعات لكحة دنوح عاد خرجات عينيها فالبلاصة ومرگات بالجهد.. إدريس مرجعش جاوبها حدو ضور وجهو جهة الشرجم كيطل منو أما تانيرت رجعات تكات فبلاصتها حاطة يديها على فمها ومقدراتش باقي تنطق بشي كلمة حدها ضورات عينيها جهة لمرايا لي فالطوموبيل بان ليها سايگ أو وجهو مكيبانش من غير شفايفو حيت مغطي بلكاسكيط ومرة مرة يقلب وجهو جهة المرايات كيشوف منها الطريق.. رجع مرة خرا السكات فالطوموبيل وكل واحد عقلو فين تيخمم.. مد نوح يديه حل الراديووو ودار القرآن وهبط الزاج لي جنبو وخرج يديه وعينو مركزين غير فالطريق..
فالطوموبيل الثانية كان لجووو عكسهوم تماما دايرين موسيقى والنشاط والهضرة ضايرة بناتهوم.. كان ريان هو لي سايگ وفجنبو محمد طه ولور لبنات ومعاهوم سيدرا لي كانت واقفة بين لكراسى ورحيل شداها ونطقات بصوت حماسي:دير ليا رياني هاديك الأغنية لي تاديير تانيرت إينو فتلفون
محمد طه:(جبد تلفونو مع هو لي طالق لبلوتوت مع الطوموبيل وقلب فغوغل على لموسيقى لي باغا تاتطلقات وضار عندها باسها فحنكها)يالاه سيري جلسي حدا ماماك
سيدرا:(جلسات جنبها وبدات تحرك راسها مع لموسيقى تاتفكرات شي حاجة وهي تشوف فرحيل) عرفتي مامي ماي بلو آيز عندو واحد لعبة فتلفون زوينة
رحيل:(تبسمات ليها) لعبتي بيها؟
سيدرا:(بحماس) اااه داالرياضيات مامي تتبقاي تجمعي الأرقام باش تربحي
أسماء:هاد بنتك لاحظت بلي تتموت على لماط
سيدرا:(ضارت عند أسماء)حيت زوين سومة تيعجبني
أسماء:مالقيتي مايعجبك غير لماااط
رحيل:(ضحكات عليها)عدوووك لي متتحمليهش ههههه
قلبات أسماء وجهها ماعندهاش مع شي حاجة سميتها لماااط تتكرهو داكشي علاش هي قرات أدبي وشدات باك آداب عكس رحيل لي كانت إكونومي.. ضحك ريان على وجهها لي تقلب ونطق بسخرية:أسماء 3×5 شحال
أسماء:(خنزرات فيه) بعدددد مني نتااا
سيدرا:(بحماس) 15 رياني
ريان:(هز حجبانو ونطق بتشجيع) برافووو سليعفانتي (شاف فأسماء ) شفتي النااااس المجتهدة
محمد طه:(ضار جهة سيدرا ونطق)روح مودي شحال هي 6×8 ؟؟
سيدرا:(هزات صباعها ودوزات الإبهام عليهوم بزربة ونطقات) 48 مودي
هز محمد طه عينو فرحيل لي تاهي تاتسمع ليه مبسمة ورجع سولهاا: 9×7
سيدرا:(كررات نفس لعملية لي دارت بيديها ونطقات)63 (شافت فرحيل مبسمة) ياك مامي
رحيل:(بعزات ليها حنكها ونطقات) اه امامي براااڤووو
ريان:واتباركالله عليهاا الاكانت حافضة جدول الضرب من داباا
سيدرا:تانعرف تاندير زائد ونااقص أناا
محمد طه:(شاف فرحيل) نفعها داك المعهد لي كانت تتعلم فيه
حركات رحيل راسها ويديها على شعر سيدرا وهي مبسمة.. باش ماتلقاش سيدرا مشكيل فالتأقلم مع دراري لي فسنها دخلوها لواحد المعهد متخصص لحالات بحالهاا وكانوو عندها أساتدة خاااصين وتارحيل كانت تتحضر وتيوريوها كيفاش تعامل معاهاا وتهضر معاهاا بلغة الإشارة وحتى أنه علموهاا تعرف قراءة الشفايف تاهوما ولي كاتنفعها فاش تتكون سالات ليها لپارااي ولافاش كاتحيدهوم ليها ملي كدوش ليهاا وباش تواصل معاها تاتبقا تقرا شفايف وتتعرف اش تقال.. ومن طبع سيدرا أن راسها خفيف بزاااف لحاجة تتعلم ليها دغيا خصك تعطيها غير لخاطر وماتقجرهاش حيت هي عدوها لي يبقا يقجر معاهاا ويشد معاها الضد.. وباش سيدرا ماتحسش باختلاف بينها وبين الوليدات لي فسنها إدريس كررررس نفسوو وعطاا كل ماعندوو باش ماتحسش بالتمييز وتعيش سنها كأي طفل طبيعي رغم فقدها حاسة السمع.. قلب ريان عينو جهة لمرايا لي جنب الطريق وبانت ليه واحد الطوموبيل باغا ضوبليه مع أنه أنطغدي ولكن طوموبيل ممفاكاش ... كمش حجبانو ونطق بصوت جدي:مال هاد لخرااا؟
محمد طه:(شاف تاهو وراه ورجع شاف فريان) ماتسوقش ليه اتلقاه شي برهوش يالاه تيتعلم
رحيل:(ضارت وراها وقالت بهدوء) نتا غير خليك شاد نفس الطريق وصاااف
بقاا ريان غادي بنفس لوثييرة متبع طوموبيلة نوح لي قداموو تامعرفش كيف طرا وطوموبيل ضوبلاتوو بواحد السرعة متهورة مخلياه مخرج عينوو..
أما فطوموبيل نوح كانت تانيرت متكية وإدريس تاهوو ساد عينو وماحسوو غير بطوموبيل مشاااات بيهوم لجنب دعقااتهوم ومع داك لفرااان السيك لي ضرب خلى قلب تانيرت يتزير.. أما نووح فكان غادي صحة سلام تشاف طوموييل خارج من لعدم وكرد فعل بعد حيت شوية ودخل فيه ولي زاد عصبو هو فاش وقفات ليه فالطريق.. سكت الطوموبيل وهو مكمش حجبانو وحل لباب ونزل وهو مشربن مكيقشعش قداموو.. ضرب نووح لكوفر ديال الطوموبيل بيديه بمعنى نزل نتفااهموو وريان ومحمد طه شافو لبلاان لي داز قدامهوم ونزلو بزوج مخلين لبنات سادين عليهوم ورحيل قلبها كيضرب ولمشكيل مكتشوف والو حيت طوموبيل نوح مغطية عليهوم عكس تانيرت لي عينيها خارجين بلخلعة لي تخلعاات.. يالاه بغا يقرب نوح ويتفاهم مع لي سايگ وهو يقلع لاخر وكون مارجعش إدريس نوح كون دخل فيه مع رجع مارشاغيغ عاد قلع غاادي
إدريس:ياكما قاصك؟
حرك ليه نوح راسو بلا ودفل فالأرض وهو مكمش حجبانو كاعي ورجعو لطوموبيلات ورحيل عينيها تعلقات على نوح لي حل لباب ودخل ردخ بيه لدرجة صوت الردخة وصلات عندها هي لي فالطوموبيل ريان...
الطريق فالليل ديما كيكون غيسكي خصوصا الطرقان لي تايدوز غير فلخلا ولقفااار.. كون ماتجنبش ليه بديك الطريقة كان غايدخل فيه والله يحفظ كانت اتوقع كارثة غير هو كان رد لبال وتصرف فدقيقتوو.. ضار جهة تانيرت لي كانت باقا صفرة بلخلعة وشادة كرشها ونطق بصوتو لمبحوح:واش نتي بخير؟
إدريس:(شاف فيها وتخلع من وجهها وحالتها ونطق بخوف) تانيرت واش كاضرك شي حاجة؟؟
تانيرت:(حاطة يديها على قلبها) شنوو وقع؟
إدريس:غير واحد لحمااار يالاه تيتعلم السوگااان ياكما ضراتك شي حاجة
تانيرت:(حسات بلوجع فكرشها بقوة لخلعة ديال الدقة) كرشي اإدريس كاضرني
هنا إدريس قلبو خرج من صدرو نزل من بلاصتو وطلع لجهتهاا والدراري كانو واقفين تايتسناو نوح يتحرك ساعة تعطل وفاش زادو شافو إدريس هبط وطلع لور تماا عرفو شي حاجة ماهياااش..
رحيل:(شافت فأسماء) نزلي اأسماء خليني نمشي نشوف اش واقع
نزلات أسماء ونزلات تارحيل لي شافت فسيدرا:بقاي مع رنيم
مشاو لبنات بزوج مع ريان ومحمد طه بقا جالس مع رنيم وعقلو مشغول باغي يعرف اش واقع.. حلات رحيل لباب ونطقات بصوت خايف:ماما ماااالك
بانت ليها تانيرت صفرااا ومتكية على كتف إدريس لي تاهو معارفش اش طرا معاهاا واش تضربات فاش فراناا ولاشنو طرا ليهاا.. مد ليه نوح قرعة دلماا باقي مسدودة ونطق بنفس لبحة:عطيها تشرب (جبد من جيبو واحد الشكلاطة ومدها ليه) عطيها تاكل شكلاط يمكن السكر طاح ليها
وبلفعل عطاوها لما وديك الشكلاطة وبقاو معاهاا شوية تابدات توگض حيت بلخلعة طاح ليها السكاار.. بقاو لبنات واقفين تاشافوهاا بخير عاد رجع ريان وأسمااء لطوموبيل ورحيل قررات تركب معاهوم.. كانت تانيرت باقا متكية على كتف إدريس لي شاف فرحيل ونطق بجدية: طلعي ابنتي لقدام خلينا نتحركوو راه لوقوف هنا خايب
حركات راسها و حلات لباب لي حدا نوح وطلعات وهي مكتشوفش جهتوو.. سدات لباب ودارت لاسانتووغ وقربات جهة الكراسى طلات على مها ونطقات:باقي فيك الدوخة؟؟
تانيرت:(مغمضة عينيها) شوية وصاااف
إدريس:غير سير عالله اولد لحاج
حرك ليه نوح راسو ورجع دمارا وشد الطريق وموراه ريان.. كانت رحيل جالسة قدامها ماتحركااتش من بلاصتهاا ومعاوداتش ضارت وراهاا حدها تتشوف فالمرايا لي تتبين ليها مها لي باقي متكية على باها.. لجلسة فالطوموبيل زوينة خصوصاً أنها عالية مع كان جايب لجيپ ديالو والكراسى ديالها بالجلد فاالقهوي.. ربعات يديها وهي تتشوف قدامها فالطريق تاشوية شافت بنص عينيها جهتو وبانت ليها يديه لي حاط على لڤيتيس وغير مجاهاا تبرگگ فيهاا.. كانت ليد لي مولف تيلبس فيها لخاتم وكان لابس واحد لگرميط رجااالية نقرة ولعروق لي فيدو منفوخين ومزينين بزغب خفيف فوق يديه.. ضفارو مقطعين ومبروضين.. بقات ساهية فيديه تابان ليهاا هزها وعاد وعات ورجعات تتشوف قدامها وهو خدم تاني الراديو منقص الصوت شوية وهز عينو جهة إدريس وبانت ليه تانيرت نعسااات.. رجع كيشوف قدامو .. مسافة طويلة ضربوها تاوصلو لواحد الإستراحة ونزلو لبنات لحمام وتاتانيرت أما نوح خدا ليه قهوة كحلة دكة باش يتوگض حيت تلتيام هادي ماناعس مسگد.. كانو تادراري جالسين معاه وكل واحد وشنو خدا تبانت ليهوم سيدرا جايا مع رنيم وقربات عند إدريس: بّا ديدي بعيت عصييير فليييز
قربات جهتو تادلع وعليه وهو هزها وجلسها فالكرسي حداه وخدا ليها عصير لفريز لي بغات ونظمو ليهوم تالبنات وتانيرت لي خداو تاهوما داكشي لي غايشربو ارتاحو شوية عاد كملو الطريق وهاد لمرة رحيل جلسات جنب تانيرت ومعاها تاسيدرا..
مع السبعة دالصباح كانو طوموبيلات بزوج واقفين قدام دار إدريس لي شاف فنوح وتبسم ليه: عدبناك معانا اولد لحاج غير سمحلينا وصاف
نوح:(تبسم ليه بلهداوة) الله ياودي مرحبا اسي إدريس
إدريس:نزل معانا ترتاح شوية
نوح:(حط يديه على صدرو وغمض عينيه) مرة خرا اسي إدريس تهلا فراسك تانتشاوفو وعواشر مبروكة
إدريس:(ضرب على كتف نوح ونطق بتبسيمة) علينا وعليك اولد لحاج الله يعاونك
نزل إدريس ونزلات تانيرت لي تبسمات لنوح ونطقات:شكرا وسمحلينا
نوح:(شاف فيها مبسم) مرحبا الالة اتانيرت
رحيل:(بهدوء) الله يعاون
حرك راسو ليهاا وهي نزلات وغير سدات لباب تحرك نوح غادي ومخلي عينين رحيل متبعينوو وكتسائل هو علاش تيتعامل معاها بهاد الأسلوب الجديد.. تنهدات ودخلات لدار وهي تتحاول ماتشطنش بالها فتفكير فيه من حقو هو طلبها لزواج على سنة الله ورسوله وهي رفضاتو ونهار سولها على سباب مصارحاتوش وفضلات أنها تهرب وتخلي الصورة لي فبالو ولي واخد عليها هي لي تبقى.. عنقات سيدرا لي كانت ناعسة جنبها وتنهدات وبقات تتقيس فشعرها ونطقات بخفوت: زعمة غايكون عارفني أنا هي هاديك لي عتق داك النهار فالغابة؟؟ (ضحكات بسخرية تتهضر مع راسها) اش غايعرف ارحيل يهديك الله تلقاايه نسى شنو طرا فديك الليلة مزاال وأصلا كيفاش غايعرفني وحالتي كانت حالة (كمشات حجبانها ونطقات بتساؤل) ولكن هو شنو كان تيدير تما فديك لوقيتة؟؟
ليوم كان أول يوم فشهر رمضان.. شهر المغفرة والغفران وشهر العبادة.. الأجواء كانت زوينة وعندها نكهة خااصة فهاد الشهر الفضيل.. فلميزون دوڤواتيغ كانت رحيل جالسة بعباية خليجية فالرمادي مع فولار مناسب ليهاا أو وجهها خالي من لمك اب تتبان منورة.. خدامة فسكات تاسمعات رجاء نطقات بتعب:ناري الصهد فيااا الشحفة
رحيل:(ضحكات) ههه بلعكس لجو زوين والحمدلله مكاين لاجوع لاعطش
رجاء:سعداتك اوووف انا صهدت
رحيل:راه لاكليم خدامة
سمعو الدقان فلباب لي تحل ودخل محمد طه جايب معاه واحد الضوسي ونطق بتبسيمة: صافا
رحيل:وي ونتا؟
محمد طه:وي هاكي هاد الضوسي تاتخدمو لبيلووون دشهر لي فات باش نعطيوه لموسيو السليماني
رحيل:(شافت فرجاء) ماخدمتيش لبيلوون دالشهر لي فات؟
رجاء:لا راك عارفة ياسر خرج كونجي وخدمت خدمتو داكشي علاش نسيتو وقلت اتكوني خدمتيه
رحيل:(هزات لملف وشافت فمحمد) واخا أنا نخدموو
محمد طه:داكوغ أنا مشيت
خرج محمد طه ورحيل أجلات لخدمة لي تتخدم دابا ومشات تخدم لبيلون دالشهر لي فات.. وهاكا داز لوقت تاوصلات ربعة وناضت رحيل تتجمع مسائلها وناضت معاها تارجاء لي نطقات: تانخمم لرمضان الجاي لي غانكون فيه بوحدي فداري كيفاش غانزطط راسي مع لخدمة
رحيل:صافي حددتو نهار لعرس
رجاء:(تبسمات ليها) مور لعيد الصغير مابقا والو ههه ونيت يكون ياسر رجع من لكونجي باش أنا نخرج
رحيل:الله يكمل عليك بلخير
رجاء:آمين ياربي عقبالك تانتي المهم راك معروضة نتي ومحمد طه قبل مانسى
رحيل:إن شاء الله
نزلو لتحت ورحيل مشات عند محمد طه لقاتو باقي مسالى خدمتو حيت صافي دابا شد البوسط وسعيد رجع لبوسط فين كان ومبقاش داك الاحتكاك بناتهوم واخا سعيد باقي مانسى الشمتة لي تشمت ولكن حاول يكونطرولي راسو وباقي عندو أمل أنه يرجع لبوسط ديالو يوم من الأيام.. جلسات معاه رحيل ونطقات بهدوء: موسيو السليماني مشى
محمد طه:(حادر راسو فلوراق لي قدامو) مجاش ليوم
رحيل:(كمشات حجبانها وبلاماتحس نطقات باهتمام) علاش؟
محمد طه:عيااان شوية من نهار رجعنا من كازا وهو مريض (شاف فيها) على مافخباركش؟
رحيل:لا احم الله يشافيه
محمد طه:آمين لاگريب دالصيف قاصحة على دلبرد (بدا كيستف فالوراق فالضوسي ونطق) ساليت خلينا نتحركو
رحيل:غاندوزو لمرشي ناخد ورقة البسطيلة وزيتون وشي حوايج خاصين
محمد طه:(عنقها ونطق بتبسيمة) اش غاتصاوبي لينا لفطور
رحيل: تانوصلو ونشوف يالاه زيد
لميزون دوڤواتيغ كانت خاوية وكلشي مشى فحالو..تأكد محمد طه بلي كلشي هو هاداك وجبد الساروت هبط الريدو ديال الضووو عاد رجع سد البواطة لي فلحيط بالساروت وسلمو على السكوريتي لي كان تما كيتسناهوم ومشاو جهة طوموبيل إدريس ركبو فيها وتحركو لمرشي باش تاخد رحيل اش خاصها.. كانت الدنيا مطرطقة والبياعة كيترزقو والناس خارجة تقضى والزحام عند مالين الشباكيات ومالين الورقة.. شدات رحيل الصف تاوصلات نوبتها وخدات داكشي لي غاتحتاج عاد مشاو يكملو التقدية ورجعو لدار فين كان الكل من غير إدريس لي باقي مارجع من لگاراج.. كانت سيدرا بشورط وديباردور مصيفة وشعرها مجموع شفينجة.. جرات جهة رحيل ونطقات بتبسيمة:مامي علاش تعطلتي بزاف
رحيل:(تتزول فولارها وتتجاوبها) كنت تانتقضى مامي باش نصاوبو لفطور
سيدرا:مامي ليوم صهودات ياكا
رحيل:دوشتي
سيدرا:اه دوش ليا رياني حيت تاهو دوووش
رحيل:فين ريان
سيدرا:نيني فبيتو مامي
محمد طه:(جلس كيستارح) مقطوووع تاني ههه
رحيل:هو واسماء مسگين بمغرفة وحدة
أسماء:(خارجة من لكوزينة لابسة بجامة قصيرة وجامعة شعرها نطقات وهي هاز حاجبها) مال أسماء؟؟
رحيل:تتقطعي فرمضان بحال لكماااية ههه
رنيم: راه حداگت وصاوبات لحريرة لحمراا ههههه
رحيل:مكنشمش الريحة ههههه
أسماء:نيوفك مسدودين
محمد طه:ولاواقيلة حريرتك حريرة هههه
تكرشخو بالضحك وأسماء غير تتشوف فيهوم ومجاوباتهومش رجعات لكوزينة ورحيل مشات بدلات حوايجها ومشات طلات على تانيرت لي متكية مع صايمة واخا الطبيبة قالت ليها ماتصوميش الاأنها دارت لي فبالها.. نزلات رحيل لتحت وجبدات التقدية ولقات أسماء كتصاوب لكريپ مالحين ونطقات:غانصاوب محينشة
أسماء:الله اجي غاتمشي لجامع؟؟
رحيل:ضروري ونتي
أسماء:ماعرفتش واقيلة انصلي غير هنا
رحيل:بلاعگز زيدي لجامع تصلي التراويح تشوفي جو رمضان
بقاو لبنات فلكوزينة تيوجدو لفطور وانظمت ليهوم تارنيم لي عاوناتهوم وسيدرا تاهي عطاوها تستف الطبلة وتقادهاا.. تاتجمعو جميع على طبيلة لفطور كيتسناو الأدان.. كانت سيدرا تاهي متحمسة واخا مصايمااش ولكن الأجواء حمسوها.. فطرو جميع وصلاو لمغرب عاد جلسو تيكملو فطورهوم وتانيرت ناضت لطواليط باش توضى ومع زولات سروالها بانو ليها نقيطة الدم فسليبها خلاو قلبها يقفز بلخوف..
الخلعة شداتها فاش شافت الدم لي كان فسليبهاا رجعات طلعات السروال وخرجات من لحمام وهي تلاقى رحيل لي كانت خارجة من لبيت شافت وجهها الصفر وقربات عندها وهي مكمشة حجبانها:ماما واش نتي بخير
تانيرت:(وجهها صفر وتخلعات) مشيت نتوضى ولقيت شوية دم نازل مني
رحيل:(شدات فيديها) تهدني ماتخلعيييش وزيدي لبيت لبسي شي حاجة انا غانمشي نعيط لبابا
خرجات رحيل من بيت مها ومشات تتجري لتحت لقاتهوم مجمعين ولبنات تيجمعو لمواعن دلحريرة مخلين غير لكاسكروط ونطقات رحيل بصوت حاولات يكون هادئ باش مانخلعش باها:بابا تكلم لماما بغاتك
إدريس:(كمش حجبانو)فين هي؟
رحيل:فلبيت احم
طلع إدريس لبيت لقى تانيرت لبسات عليها جلابة ودارت أولويز على قبل الدم لي نازل منهاا.. شافها وزاد استغرب ونطق:اش كاين فين غادة؟
تانيرت:(حاولات تهضر عادي باش ماتخلعوش واخا هي مخلوعة وتترعد) فاش مشيت نتوضى لقيت شي دم نزل مني
إدريس:(خرج عينو وقرب جهتها بالجهد) واش كاضرك كرشك نتي بخييير جاوبي؟؟
تانيرت:اه بخير غير خلينا نمشيو لطبيبة احم نشوفو اش كاين
إدريس:طبيبة ديالك مغاتكونش فلعيادة دابا نمشيو لسبيطار ونشوفو شي طبيب تماا
حركات ليه راسها ونزلو بزوج وغير شافوهوم لخرين قالو عند بالهوم غادين لجامع.. نطق إدريس وعينو فرحيل: ردو لبال
خرج هو وتانيرت مخلين محمد طه وريان وأسماء ورنيم مفاهمين والو من غير رحيل لي بالها تشطن مع مها وخافت لايكون واقع شي حاجة لبيبي..
أسماء:فين مشاو ومال خالتي وجها صفر؟؟
رحيل:مشاو عند الطبيب ماما حسات براسها ماشي هي هاديك عليها
سكتات رحيل وعينيها فأسماء بمعنى من بعد ونشرح ليك اش واقع .. تنهدات رحيل وجلسات جنب لخرين وبالهوم مشطون مع تانيرت لي كانت شادة الطريق هي وإدريس لسبيطار ومع ليوم رمضان ماعرفش واش غايلقى شي طبيب ودارها فيد الله مشى لسبيطار فين خدامة بيسااان وغير وصل نزل وعاونها تانزلات ودخلو لداخل ومن زهرهوم كانت بيسان تاهي يالاه جاياا حيت عندها ليوم لگارد فليل.. شافتهوم من بعيد وبقااات تادقق وتأكد واش نيت هوما ولاغير كيشبهو ليهوم.. ولكن غير قربات وشافت إدريس تأكدات ونطقات بتبسيمة:سلام أوعليكوم سي إدريس لباس؟
إدريس:(شاف فيها وتبسم بزز) حمدلله ابنتي ونتي بخير؟
بيسان:صافا شنو كاديرو هناا واش جيتو عند شي حد؟
قالتها وهي كاضور عينيها على إدريس وتانيرت لي بانت ليها عياانة ونطقات بتساؤل:واش نتي بخير تتباني ليا صفراا؟
إدريس:(شرح ليها اش كاين) بغيت نشوف ياك مكاين شي مشكيل
بيسان:اه اجيو معايا جوبونص دكتور لعزامي كاين يدوز ليك التلفازة باش تأكدي
داتهوم عند الطبيب لي كان فبيروه وشرحات ليه لحالة وعلماتو بلي هوما من طرفهاا ومن لعائلة وناض ديك الساع غادي بيها لغرفة لفحص نعسات فوق لبياص وعرات على كرشها وهو دار ليها واحد لجيل وجر التلفازة وهز واحد لعيبة دارها ليها على كرشها وبقا مركز شوفاااتو فالتلفااازة قداموو وإدريس مكمش حجبانو مانطقش.. مدة تاشاف فيها وقال بعملية: لبيبي كيبان ليا بخير مابيه والو (بقا كيشوف فالشاشة تاطفى التلفازة وشاف فيها) نتي متبعة شي طبيبة؟؟
تانيرت:وي متبعة دكتور لودادي عندها كابيني ف***
طبيب: وي وي كانعرفهاا بون امدام كنظن دكتوغ غاتكون قالت ليك بلي لحمل فهاد لاج تايكون شوي غيسكي وخص الأم ترد لبااال لصحتهاا ولأي حركة تادير
تانيرت:(بندم) هي قالت ليا مانصومش ولكن أنا صمت ليوم قلت غير جالسة فالدار
طبيب:(تيهضر معاها بالخاطر) وعلاش تصومي راه كون مكااانش غيسكي عليكوم بزوج مغاتقولش ليك ماتصوميش المهم نتمنى ماتعاوديهاش وتبعي هضرة طبيبة بلحرف وتبقاي تتنعسي على ضهرك وبعدي من الستريس والتقل والطلوع فالدروج بزاااف وماتجهديش راسك غانكتب ليك دي ڤيتامين تاخديهوم..
بقات تانيرت تاتهضر معاه وإدريس غير واقف تيسمع لهضرة ومادخلش سالا وشكروه وخرجو وهو ماعاودش نطق.. ضور عينو على بيسان تيقلب عليها باش يشكرها ساعة مبانتش ليه.. خرجو ديريكت لبرا وركبو فصمت حد ماهضر مع لاخر دازو لفرماسي خداو الدوا لي خرج ليها وكملو طريق لدار.. غير دخلو وهي تقرب جهتهوم رحيل لي بالها كان مشطوون:أمدرا اش قال ليكوم طبيب؟؟
تانيرت:(تبسمات ليها) بخير ابنتي بلاماتشغلي بالك
رحيل:اوووف تخلعت بالي بقا معاكووم
كملو طريقهوم لبيتهوم مبعد ماطمنو عليهوم الدراري.. عاونها تانعسات فوق النموسية مور مابدلات حوايجها وقالت:إدريس مالك؟؟
إدريس:(ربع يدو ونطق وهو معصب) رتاحيتي داباا ياك قلت ليك ماتصوميش ونتي درتي لي فبااالك (جات تهضر وهو يحبسها) علاش ماتتسمعيش لياا وعلاش تتقصحي راااسك باغي غي نفهم واش نتي حسن من الطبيبة هاااا قالت ليك هضرررة ديريها ماتبقاااايش ديري غي لي قال ليك مخك
تانيرت:(هبطات راسها ونطقات بخفوت) مكنتش اإدريس قاصدة أنا شفت راسي غي فالدار متكية ومرتاحة قلت نصوم اش فيها نهار مغايدي ومغايجيب مكنتش كنظن غايطرا هادشي
إدريس:(تنهد ودوا بلخاطر) طبيبة مجاتش من مخها وقالت ليك ماتصوميش نفس لهضرة قالها الطبيب ليوم هي لهضرة لي قالت ليك بلحررف هاد لمرة ربي لطف ودازت ولكن ردي لبال راه صحتك وصحة لي فكرشك ماشي لعب والانتي متتفكريش فراسك أنا كنفكر فيه..
سالى هضرتو وخرج من لبيت وداز لحمام توضى وصلى لعشاا مع أذن فاش كانو فالسبيطار عاد نزل لتحت وباين فيه خاطرو تغييير.. جلس فالقنت ومشات عندو سيدرا طلعات جنبو وشدات وجهو ونطقات بخفوت:بّا ديدي مالك؟؟
إدريس:(تبسم ليها فاش شاف الإهتمام فعينيها) راسي كيضرني شوية
سيدرا:(باست جبهتو ونطقات بحنان) ندير ليك ميساج
إدريس:(ضحك بالجهد وهي تتشوف فيه مبسمة) سميتو مساج أما ميساج هو لي كانسيفطو فالتلفون
سيدرا: صافي نبوسها ليك باش تمشي
باستو تاني وهو جرها تانعسات فوق كرشو وتكى وهي بدات تاتتجمع معاااه وفدقيقة نساتو لمشكيل وعصبيتو جهة تانيرت.. جات رحيل جايبة لمحينشة لي من الشوفة تتشهي وحطاتها فوق الطبلة وستفات أسماء الطباسل وشافو جهة إدريس لي كان مغمض عينو وسيدرا باقي تادوي معاه..
رحيل:بابا
إدريس:(حل عينو وشاف فيها) نعااام ابنتي؟
رحيل:دوز تاكل غايكون فيك الجوووع من لحريرة لي شربتي
ناض هز سيدرا وقرب جهة الطبلة ونطق:ديك لمك حقهاا
رحيل:واخاا
قطعات ليها حقها ودارتو فطبسيل وهزات كاس دلعصير دارتو فبلاطو وداتو ليها لقاتها متكية وهضرة إدريس تاضور فدماغهاا هي عارفة راسها غلطات ولكن مكانتش قاصدة.. تبسمات ليها رحيل ونطقات بهدوء: جبت ليك لعشاا
تانيرت:باباك لتحت؟
رحيل:اه شنو قالت ليكوم طبيبة؟
تانيرت:(عاودات ليها هضرة طبيب) هادا ماكااان
رحيل:(تنهدات) دابا خصك تردي لبال لراسك اماما وديري بهضرة الطبيب على مادوز هاد الشهورة ويتزاد لبخووشة ولالبخووش ههه غانولي ختيتو عاااود هههه
قالتها وهي تتقيس كرش مها لمنفوخة شوية وتانيرت تاهي تبسمات: سعداتو ولاسعداتها غايكون عندو خوالو وخوالاتو فنين
رحيل:ههههه وايييه ونسيتي سيدرا ولغيرة لي غاتبدا عاااود
تانيرت:(ضحكات) خصوصا باااك تمووووت عليه والاشافتو هاز شي وليد تبغي تسطى ههه
رحيل: بسيف وهو مكبرها وعاطيها لخاااطر هههه يالاه اماما كولي هادشي كامل مانلقاكش شيطتي شي حاجة أنا غانزل نتعشى الاحتاجيتي شي حاجة صوني عليا واخا
تانيرت:واخا ابنتي
نزلات رحيل لتحت لقاتهوم كايتسناوها وغير جات بداو يتعشاااو والتلفازة مشعولة على واحد من برامج رمضان..
----
فالدار لي ساكنة فيها غزلان كانت واقفة فالكوزينة ببجامة صيفية تتقطع فالخص تاسمعات لحس وهي ضور عند لبنت لي كانت ساكنة معاها وهي نفسها لي استقبلات تانيرت وإدريس نهار كانو تيقلبو عليها..
أميمة:بديتي من دابا تتوجدي الصحووور
غزلان:قلت نصاوب شلاظة ونخليها تبرد ويبقا لينا غير الدجاج نقليوه
أميمة:مزيان واحد هاجر هي لي سعداتها مشات تدوز رمضان مع دارهوم كيتنا حنا
غزلان:(تنهدات بحزن) ندوزوه أنا وياك
أميمة:اجي نسيت نسولك اش درتي مزال مع دوك الناس لي كنتي خدامة عندهوم واش مغاترجعيش؟
غزلان:(حركات راسها لا) تت مراجعاااش صافي عطاوني خلاصي دليامات لي خدمت والله يعاون
أميمة:علاش اختي كون كنت منك كون راني نسيت ورجعت عندهوم الناس بعدا لي شفت داك النهار الله يعمر ليهوم الدار ولمرا غي سمعات بلي مبتيش فالدار كانت غاطيح وتاراجل مسكين عطاني شي براكة يعني مباينش فيهوم قبااح
غزلان:هاديك لالة تانيرت وسي إدريس ضريفين بزاااف ومغانساش خيرهوووم ولكن..
أميمة:الاكنتي غاتهضري على هاديك لي لاحت عليك لباطل وهاداك لي جرى عليك راه تاهوما قالو ليك سمحيلينا داك النهار جاو عندك ونتي گلتيها بفمك اخيتي (تنهدات) شوفي اغزلان أنا منك والله مانخمم وغانرجع عندهوم حيت لوقت صعاابت وبلاالظروف لقاصحة لي عارفينها أنا وياك.. شوفي غيري يانا نضرب لكرفي ونزيد نسيفط لدارنا مكيبقا ليا والو وكون غير لقيت لي يخدمني عندو فالدار ونسكن عندو والله مانرفض هوما عارفينك تتقراي يعني مغايزيروكش بحالي أنا لي ماحيلتي لقرايتي لي كانكمل ماحيلتي لخدمة لي خصني نكون فيها فلوقت
غزلان:نتي ماشفتيش داك الخلعة والرعب لي عشت ديك ليلة لي جراو علياا ربي وحدو لي عارف اش دوزت كون كنتي بلاصتي تنساااي وتسمحي؟؟
أميمة:(بحكمة) إن الله غفور رحيم إلا كان ربي سبحانه وتعالى كيسامح عبادو ملي يطلبو منو الغفران شكون حنا لي منسامحوووش حنا عبد ضعيف ولعبد كيغلط وهوما فاش غلطو وعرفو غلاطهوم جاو اعتادرو منك ونتي خلي قلبك كبير ونسااااي
غزلان:(تنهدات بحيرة) أناا راه ماشي كرهت ولاحقدت اأميمة أنااا راه بقا فيا لحااال لحگرة والظلم لي عشت ولي من صغري كنعيشهااا مقدرتش عليهاا
أميمة:شوفي جلسي مع راسك وفكري ونتي گاع صلي صلاة الإستخارة وشوفي ليك باش غاتحسي والارتاحيتي رجعي خدمي عندهوم مارتاحيتيش الله يعاون ضبري على خدمة فبلاصة خرااا أنا غير نصحتك حيت عارفة ضرووفك واخا كنختالفو أنا وياك ولكن كنتشابهو فبزاف دلحواااايج ماتنساييش
خرجات أميمة وبقات غزلان واقفة وبالها ساارح لبعيد.. هي عارفة أميمة اش قصدات وزيد عارفة بلي كلام صاحبتها صح ولكن هي مقدراتش تنسى الظلم ولكلام لي تقال ليها ديك الليلة والمعاملة لي عاملوها بيهاا واخا جات تاأسماء وعتادرات ليها هي ولبقية وطلبو منها ترجع ولكن صممات على قرارها.. مسحات يديها فداك لمشوار وهزات تلفونها لي كانت حاطاه فوق لبوطاجي ودخلات لزابيل تتشوف فيه بسهووو وتنهد ودغيااا تقلب مزاجها فدقيقة..
أجواء رمضان كانو زوينين والجو تاهو مساعد والناس دغيا ولفوو رمضاان وماحسوش بلخمس عشر الاوائل ديالوو لي دازو فسرعة لبرق.. تانيرت من نهار لول والمشكيل لي طرا ليها معاوداتش صامت ورجعات عند طبيبتها لي سمعاتها لهضرة وتاإدريس كان باقي مقلق عليها واخا كان تيهضر معاهاا ويقابلها إلا أنه كان باين فيه هاز من جهتها وهي عارفة علاااش.. ورحيل لي من نهار لجنازة مشافتش نوح حيت مكانش تيجي لميزون دوڤواتيغ شي لي خلاهاا تشطن عليه من نهار عرفات بمرضو من عند محمد طه لي كان هاز درك لخدمة وداير واجب على أحسن وجه وكان مع تواصل بنوح كيعلموو بالأمور كيف غادة فغيابوو.. أما إسلام فرجع من كازا مبعد ماطمن على مو وبلي خوه غايبقا ساكن معاها واخا كان باغي يجيبها لمراكش تسكن معاه ساعة مبغاتش تخلي دارها لي جمعاتها هي وراجلهاا.. ولبقية أيامهوم كانت عادية ولاجديد يدكر فيهاا...
حالة عينيها فالبلاصة فين كان إدريس واقف قبل دقائق فاش خبرها بلي ولد لحاج غايجي يفطر عندهوم هاد النهار.. صدمتها تحولات لتبسيمة خفيفة بلاماتحس فاش عرفااات بلي غايجي ليوم وتشوفوو حطات يديها على قلبها وحاولات تلف راسها ومشاعرهاا فهاد اللحظة وتوجد لفطوور.. شمرات على دراعها وجبدات مقادير لحريرة لحمراا ديرها بالطريقة المراكشية.. دخلات عندها رنيم لي كانت هازة التقدية لي جاب إدريس ونطقات:فاش غانعاونك؟
رحيل:قطعي ليا لبصلة بالزايد غاندير بسطيلة
رنيم:واخا وشنو غاديري مزال؟
رحيل:امم غاندير بيتزات صغار وسيگار ديجا كاين وبسطيلة ولكريب وغاندير بطبوط وندير شي كيكة دالشكلاط والديسير
رنيم: شبان ليك بلاصة كيكة ديري تشيز كيك
رحيل:(شافت فساعتها) واخصني نبدا بيه هو لول باش يبرد وأصلا واش كاين لمقادير ديالو ؟؟
رنيم: أنا نشوف لامكانش نمشي نشريهوم
سمعو لبنات الدقان فلباب وكمشات رحيل حجبانها ونطقات:شكون جاا؟؟
رنيم:غانمشي نشوف
مشات رنيم جهة لباب حلاتو وبقات واقفة تتشوف فغزلان لي كانت تاهي كاتشوف فيهاا.. كانت رنيم حاسة بلحشمة ومقدراتش طول فيها الشوفة ونطقات: أهلا دخلي
غزلان:واش لالة تانيرت هنا
رنيم:هي لفوق متكية ولكن كاينة رحيل
دخلات غزلان ورنيم طارت لكوزينة علمات رحيل لي خرجات وهي مستغربة.. تبسمات فوجه غزلان وسلمات عليها:مرحبا كيبقيتي شوية
غزلان: حمدالله احم (بدات تتلعب فكمام الجلابة لي لابسة ونطقات بصوت خافت)واش باقي محتاجين شي بنت تعاونكوم؟
رحيل:(تبسماات) باقي محتاجين كي شتي مجبنا تاوحدة وماما غاتفرح بزاف (ضارت جهة رنيم لي كانت واقفة ساكت وجراتها) عارفاك غاتكوني باقا هازة من جهتناا وخصوصا رنيم ولكن تيقيني هي قلبها كبير وبيض ومتأكدة غاتفاهمو نتي وياها حيت مبيناتكومش بزاف دلفرق فلعمر..
حركو لبنات راسهوم ورحيل نطقات بسرعة:غانمشي نكمل لحريرة رنيم اجي تسخري ونتي اغزلان ممحتاجة نقول ليك شنو ديري هه
حركات غزلان راسها ومشات لحمام بدلات جلابتها ببجامة طويلة مستورة وجمعات شعرها بدرة حياتي ودخلات لكوزينة لقات رحيل ببجامة شورط وتيشورط وشعرها تاهي جامعاه بدرت حياتي.. قربات عندها غزلان ورحيل نطقات:غايجيو عندنا الضياف تقدري تعجني لبطبوط
بقات رحيل تتقول ليها اشنو غايطيبو وغزلان شمرات على دراعها وبدات تشقى.. ولوقت طار عليهوم بتلاتة فلكوزينة بلاأسماء لي ليوم جاوها لغيگل.. دخلو الدراري لي خرجو مع سيدرا لي فرعات ليهوم راسهوم باغا تخرج ودارو ليها لخاطر.. فاش شافو غزلان كلهوم استفربو حيت عرفوها مغاترجعش ولكن مبينوش وريان قرب جهتها وقال:مرحبا زارتنا لبراكة
غزلان:شكرا
جاوباتو ورجعات لخدمتها وريان شاف فمحمد طه وغمزو ولاخر خنزر فيه ونطق بهمس:راك صااايم زعمة
ريان:اللهم إني صائم نمشي نقرا القرآن
سيدرا:(قربات جهة رحيل وهي لابسة جليليبة فلموڤ وطالقة شعرها جات كيوت غير دلماكلة) مامي واش غيزو غاتبقا ديما معاناا؟؟
رحيل:(تحنات باستها وتبسمات ليها) اه غاتبقى امامي سلمتي عليها
سيدرا:(تبسمات لغزلان ومشات باستها) ماتمشيش مزال واخاا
غزلان:(باستها بحنية) واخاا القطيطية ديالي
مشات سيدرا تتجري غادة عند ريان ورحيل وغيزو رجعو يكملو لفطووور... وبعد ساعات كاان كلشي تقريبا واجد.. خرجات رحيل وهي هازة صينية فيها زلايف مع الطباسل ديالهوم وبدات تستف فالطبلة ودارت زوج طبالي وحدة لعيالات وحدة لرجال باش ياخدو راحتهوم.. كانت تتقاد وتفنن وسيدار باقي بجلابة غادة جاااية تاشدها محمد طه بعز ليها حناكهااا وهي تاترجع راسها لور وضحك..
محمد طه:سيري جيبي نجمع ليك شعرك
سيدرا:لابيتو مطلووق أنا
محمد طه:نجمعو ليك لفوووق غايجيك زوين
سيدرا:وايلا جا خايب
محمد طه:سيري جيبي مشطة واجي تشوفي
معطلاتوش غير حطها مشات تجري جابت لمشطة وبواطة فين تتحط لفلايل وهو وقفها قدامو تيمشط ليهاا وجمعو ليها كوت شوفال ومن لقدام منفخوو ليها جاااهاا زوين وشعرها تباركالله رطب وكيتبوكلى.. أما رحيل غير ستفات الطبلة طلعات لبيت تبدل عليها حيت قريب يجيو..عيطات لغزلان وعطاتها واحد لگندورة تلبسها بلاصة لبيجامة وهي جبدات واحد عباية كلااس فالگرونة مع فولارها بدات تتقاد فيه تادخلات سيدرا لي نطقات بسرعة:مامي جا إسلامي هو وماي بلو آيز ومعاهوم راس لكباااالة..
كمشات رحيل حجبانهاا ملي سمعات هضرتها وسيدرا قربات جهة رحيل شاداها من عبايتها تتشوف فيها مبسمة.. أما رحيل نطقات بهدوء:شكون راس الكبالة؟؟
سيدرا:(حركات كتيفاتها ببرائة) داك لعزافة مااامي لي متيعرفش يهضر بلعلبية
رحيل:(كمشات حجبانها مفهماتش علياش تادوي) صافي نزلي وردي لبال لاتوسخي جلابتك قدام الناااس
سيدرا:لامامي مغانوسهااش أنا شوفي
بدات تتوريهاا ورحيل هزات ريحة سيدرا رشاتها ليها وسيدرا نزلات لتحت فرحانة بجلابتهاا والريحة.. أما رحيل قادات فولارها وصاوباتو مزيااان عاد نزلات لتحت وهي لابسة صندالة كتبان خليجية بديك لعباية لي طاحت عليهوم رحيل فواحد السيت وجرباتهوم وعجبوهاا فاللبسة ومشات كيلات منهوم.. كانت نازلة وقلبها كيضرب فاش سمعات لهضرة بزاف فالصالة.. دخلات لكوزينة لقات غزلان تتكمل لبيتزا لي ديجا موجدة ليها رحيل العمارة ودارت وحدين ديال الدجاج وحدين بلكفتة.. سمعو لحس وبانت ليهوم أسماء لي نزلات ببجامة كحلة طويلة وباين فيها مريضة..
رحيل:شوية ؟
أسماء:(بتعب)هلكني هاد لمرة (عاد ردات لبال لغزلان ونطقات بتفاجئ) غزلان نتي رجعتي؟؟
غزلان:اه
أسماء:مرحبا بيك معانا مرة خرا
غزلان:شكرا
أسماء:شكون جااا حدي عارفة ولد لحاج واش جاب شي حد؟
غزلان:جا هو واحد لولد
رحيل:ولد زعمة يكون ولدو؟
أسماء:باينة غانمشي ندخل عندهوم شفتيهوم نتي ؟
رحيل:(ضورات وجهها تتستف فالسيگار لي طاب فالفران) باقي غانكمل هادو ونجيبهوم
أسماء:راه مكيعضش
قالت ليها لهضرة ومشات مخلية رحيل طالعة ليها لحرارة فحناكها.. ستفات الطباسل لي كانت مفرشة ليه لخص وهزاتو ويديها كيترعدو.. معرفاش علاش حاسة بقلبها كيخفق بالزربة زفرات النفس ومشات جهة الصالة وماحدها تتقرب ماحد صوتو كيتسمع ليهاا.. دخلات لصالة ومهزاتش راسها فيهوم حيت عارفة الاشافت فيه غاتصدق مزبلاها عليها مشات حطات كل طبسيل فطبلة عاد هزات العين فيهوم وماتجي غير فيه هو لي جالس جنب لكوان بفوقية فالكحل ساد ليها الكول جاتو خطيرة ولحية كان مكبرها شوية وشعرو لقهوي مرجعو لور.. أول مرة تشوفو بالبلدي جاه فشكل.. حركات راسها ونطقات بهدوء:السلام أوعليكوم
كلهوم ردو السلام عليهاا ورحيل رجعات شوفتها جهة زين العابدين لي كان جالس جنب باه بسروال توني وقبية وشعرو كان مبوكلي مربع يديه وساكت.. كانت رحيل تتشوف فيه ومغاتنكرش بلي عليه واحد الهالة مجرد مكتشوفو تاتحس بلي هاد لولد فارض وجودو.. جلسات جنب مهاا لي تبسمات ونطقات بهدوء: رمضان مسكين قرب يسالي ويالاه ولفناه
إسلام:واييه غير تايفوتو العشر الأوائل كيطير دغيا
إدريس:راه لعمر لي كيطير وحنا لي تانكبرو
نوح:(مربع يديه) الله يكبرنا فطاعة الله
إدريس:آمين نسيت مانسولك كيف كان التسافيرة وخصوصا فرمضان غاتكون قاصحة؟
نوح:بلعكس محسيناش بيها حيت الطيارة كانت مريحة
إسلام:فين مشيتي؟
نوح:أستراليا جبت الضوسي دزين العابدين فلكول ديالو حيت هاد لعام إن شاء الله غايقراه هناا
كانت رحيل ساكتة تتسمع لهضرة ودابا عاد فهمات فين كان غابر وعلاش مكانش تيجي لخدمة..
إسلام:غاتجيه قاصحة شوية حيت سيستيم برا ماشي بحال هنا
نوح:(حط يديه على فخد زين العابدين وتبسم) هي ماشي غير قاصحة خصوصا من صغرو وهو تيقرا برا وزيد عليه ماعندوش العربية مطلوقة ولكن عارفو راسو خفيف غايتوالف دغيا ياااك السبع ديالي
تبسم ليه زين العابدين تبسيمة خفيفة يادوب بانت على شفتو وسيدرا كمشات حجبانها وبقات كداحس تاوصلات عند نوح ونطقات بدلع: هو سبع وانا سبعة ديالك ياكا
تكرشخوو عليها بالضحك وخصوصا إدريس لي عارفها غارت أما نوح هزها وهو تايضحك ونطق:نتي راك تاتبيرت إينوو ههه
سيدرا:(كمشات حجبانها مقلقة) ماتبقاش تقولها ليه ماي بلو آيز (وخشات راسها فصدرو)
رحيل:(حمرات فيها الشوفة) سيدرااا حشوووومة
سيدرا:(مدلية شنايفها) أنا بوحديتي لي خصني نكون عزيزة عليك
حركات رحيل راسها وناضت تجيب لحريرة لي بقات ولكل تجمع على الطبلة وصوت الأدان كيتسمع.. كلى نوح تمرة وناض غادي لجامع هو وإدريس ولبقية وبقاو غير لبنات لي صلاو فالدار.. عاد رجعو كملو فطورهوم وناضو لبنات يجمعو المواعن دلحريرة مخلين غير لكاسكروط.. كانت رحيل واقفة قدام الفران مقابلة لبسيطلة الثانية لي كانت تاطيب.. زوقات لولانية بالكروفيت ولفرماج وطوماط سوغيز وهزاتها لعند الرجال وحطاتها ليهوم مع الطباسل وإسلام تبسم ونطق:وااارحيل باركة علينا بالشهيواتك راه مكنقدروش نقولو ليهوم لا ههه
رحيل:(تبسمات ليه) ههه بصحتكووم
رجعات رحيل لكوزينة بوحدها تاديكوري البسطيلة الثانية تاسمعات لحس وهي ضور بان ليها نوح واقف قدام باب الكوزينة كيشوف فيها شوفات فشكاال..
يتبع...
التعليقات
لا توجد تعليقات بعد، كن أول من يعلق.