الجوهر الحر الجزء 39

جالسة فالطوموبيل جنب إدريس وحاسة بالخلعة وقلبها كيضرب فالتسعين.. ليوم فالصباح ملي فاقت علمها إدريس بلي محتاجها فشي حاجة لي مقالش اشنو هي؟ ولي زاد خلعها هو فاش طلب منها ماتعلم حد ودير راسها غادة لخدمتهاا وهادشي لي دارت خرجت كيف عادتها وغير وصلات حدا الطاكسيات بانت ليها طوموبيل إدريس وركبات فيها بالسكات.. مقدراتش تسولو فين غاديين وتاهو مقال تاشي كلمة.. طريق طويلة قطعوها تاوصلو لفيرمة وعيون رنيم كيضورو هنا ولهيه وتسائل هوما اش كيديرو هناا... سكت إدريس طوموبيلتو ونطق بهدوء ويديه على لباب لي فجنبو:نزلي ابنتي

دارت بهضرتو ونزلات تابعاه وهي باقي كاضور عينيها ولخلعة وتقول واش طلقات منها تاحسات بلادياااغي وكرشها ضراهاا.. دخلو لفيرمة لداخل لي كانت عبارة عن رياض بلدي كولو مزلج زليج تقليدي وعينيها كيشوفو فداك الإبداع وداك لهدوء لي كاين فديك لبلاصة حسساتها شوية بالرااحة.. غاديية مور إدريس تابان ليها وقف وهي توقف وطلات مور ضهرو وهو يبان ليها نوح لي كان وقف قدام إدريس.. كان بدجين غامق مع تيشورت كحلة وجاكيط خفيفة.. شاد فيد إدريس وكيدوي معاه بهدوء وهي غير شافتو زادت تخلعاات معرفاتش علاش إدريس جابها عندوو.. ضار جهتها إدريس ونطق بهدوء:اجي معانا

تبعاتهوم بحال الأطرش فالزفة تابانو ليها دخلو مع واحد الدخيلة جنب الدروج وحل نوح لباب ودخل هو لول لبيرو لي عندو تم جلس فالكرسي... وجلس إدريس فالكرسي لي جنبو ورنيم بقات واقفة.. هز فيها نوح عينو وشاف لخوف فنظرة عينيها ليه.. شفايفها بياااضو أو وجهها صفااار.. هز حاجبو ونطق بنبرة هادية:جلسي

تكى نوح على لكرسي وهز تلفونو وبدا يكتب فيه شي حاجة تاتسمع الدقان فالباب ودخلات مرات بّا سالم جايبة الضيافة.. حطاتها فالطبيلة لي بين لكراسى وخرجات مخلياهوم جالسين بتلاتة وتاواحد مكيدوي مع لاخر.. مدة عاد نزل نوح تلفونو جنبو وشبك يديه فوق الطابل دلبيرو وشاف فإدريس ونطق بخشونة:سي إدريس بسم الله

هز إدريس البراد وكب ليهوم تلاتة دلكيسان ورنيم شادة كاسها بين يديها تاتسخن يديها لي بردو عليهاا.. بصح هي مدايرة والو ولكن الخلعة مبغاتش تخليها وخصوصا فاش تتشوف جهة نوح وتتلقاه كيشوف فيها بدوك الشوفااات لي مكتفهمي فيهوم والو تايخليها تخاااف مع العلم هو شوفاتو هاكاك..

نوح:(مسح لحيتو ونطق بجدية) رنيم

رنيم:(قفزات من بلاصتها ونطقات بصوت كيرجف) نعاام

نوح:(تبسم ليها بهدوء) واش عرفتي علااش سي إدريس جابك لهنا؟

رنيم:لا

تتجاوب وصوتها غادي ويتبح باغا تبكي وخافت تكون دارت شي غلط معرفاهش فحق إدريس لي هازها ومعتابرها بحال بنتو.. أما نوح حرك راسو ونطق بجدية:حلي معايا وديناااتك ابنتي حيت لكلام لي غانقولو ليك كيبغي التركيز (حركات راسها باه وكمل نوح كلامو بنبرة خشنة) باغي نسولك على بدر الدين الجوهري

خرجات رنيم عينيها ملي سمعات كلامو وضارت جهة إدريس بالزربة ولقاتو كيشوف فيها وحرك ليها راسو بمعنى راه عاارف أما هي حطات الكااس حيت حسات راسها مقدراش تهز شي حااجة ومجرد ماسمعات سمية هااداك لي هو عمهاا ولي خرج ليها على حياتهاا حسات بالخوف..

نوح:(حك حاجبو)نتي عشتي معااه حياتك وغاتكوني تتعرفي عليه شحال من حوااايج لي تاحد مكيعرفهوم

داكشي علاش غانسولك ونتي غاتجاوبي واخا

شافت فيه وحركات راسها باه وهو شاف فإدريس هاز حاجبو ورجع شاف فيها وتكى بضهرو على الكرسي ونطق بصوت بارد: الدار لي كنتو ساكنين فيها فالداخلة ديالمن؟

رنيم:(نحنحات وبدات تتعاود ولغصة فحلقها) ديالو هو بابا الله يرحمو مكانش عندو فلوس وكان خدام عادي وهو لي ربى بدر الدين وتكفل بيه فصغرو.. تال واحد نهار لي قرر بدر يمشى يتبع طريق لحر'ام وبابا مكانش عاجبو لحااال..ماتسوقش ودار لي فراسو تارجع لباس عليه وبسباب الطمع عاصم تاهو قرر يمشي يخدم نفس خدمتو وبابا فاش شاف ولدو غايضيع منو قرر يبيع بيهوم ولكن بدر قتلووو قبل مايوصل لبوليس

حدرات رنيم راسها تتبكي وتشهق وباقي لدبا مقدراش تخطى هادشي لي عرفااات ولي خلى قلبها يتعصر فالداخل ديالها باها لي مكانتش فاللول عارفة شكون ورى موتو وعند بالها راه دار كسيدة عادية تانهار لي ربي بغاها تعرف بصدفة وهادشي صدمها ومقدرش قلبها يتقبلو وخصوصا أن خوها ومها عارفين.. حقدات عليهوم وعلى بدر الدين وقلبها برد من جهتهوم ومع دلك مقدراش دوي حيت هي ضعيفة قدامهوم وقدام بدر وعارفة بلي كيف هو سمح فخوه لي من دمو ولي ربااه غايسمح فيها هي بسهولة..

إدريس كان حال عينيه مشوكي من لكلام لي سمع ومتيقش أنه غاتوصل بيه لحقارة يق'تل خوه.. هز عينو فنوح لي كانو ملامح وجهو مافيهوم تاشي تعبير..

رنيم:(بدات تتمسح عينيها) من لي عقلت عليه وهو خدام فالتبزيز فالداخلة وعندو معارف صحاح ولفلوس وتيدخلها صحيحة ودار بيهوم محالات باش ميجيبش لعين عليه والناس لي بعادين ميعرفوش حقيقتو.. وتامن لح'بس مولف يدخل ليه وكيضرب غير شي شهور ويخرج مضور القضية وكيعرف إسلك راسو.. (تنهدات) نهار جا عاصم وعلمنا بلي غايخطب كان موصينا مانقولو والو وأنا كنت تنخاف منو عليها بقيت ساكتة.. وملي تزوجو وجابها لدار فالداخلة عرى على وجهو وعاود ليها كلشي ومي الله يرحمها تاهي كانت مكرفسة عليها ودايراها بحال لخدمة.. كنت تانشوفها وقلبي كيضرني عليها حيت هي ماشي من سهمهووم وحدين بحالهوم مكيستاهلوش وحدة بحال رحيل.. كنت ديما فاش تانشوفو كيضربها لاهو لامي نعاونها ولكن هوما كيغلبووووني (دموعها عمرو عينيها) فيما كانت تادير شي غلط كان تيسد عليها فالگاراج فالظلام ويخليها بلاماكلة ليامات.. شبعااات تكرفيص ولكن مكانتش تتهبط ليه الراس (شافت فإدريس لي تزير وباين فيه محاملش راسو ونطقات بخفوت) لدرجة أنها دارت ليه سم لفيران فالمااكلة ولكن مقضاااش فيه ورجع تاني يعدب فيها وأنا كنت باغا نعاونها وهي عطاتني نمرة محمد طه ولكن هو بلوكاني.. فاش عرفات رحيل عطاتني نمرة ريان وفاش كنت باغي ندوي معاه حصلني بدر وغوت عليا وخدا ليا التلفون.. (رجعات تتبكي وهي مهبطة راسها) مكنتش باغا داكشي لي كانشوفو تيجرى ليها ولكن مكااانش بيدي أناا كانو يديا مربوطين واخا نبغي نعاونها مانقدرش حيت تاأنا صعيفة قدامهوووم..

كانت رنيم هي لوحيدة لي شافت معاناة رحيل فديك لبلاصة وعاشتها معاااهاا.. كانت تتعرف حوايج لي تاحد معارفهوم.. ملي تفتح الموضوع قررات تقول كلشي ولي شجعها هو وجود إدريس..

رنيم:(زفرات النفس ونطقات بصوت مرتاجف كلام لي محملاش تقولو ولكن مكانت باغاا تخبي تاشي حاجة) كان بدر حاط عينو عليهاا واحد لمرة ماعرفتش اش وقع بناتهوم تاسمعنا غوات رحييل ولقيناهاا تاضرب وتهرس فديكورات الصااالة وهو واقف تخلعنا ولي زاد خلعني هو لكلام لي نطق بيه وكيفاش ولى حاطها فبالو.. (نطقات بخفوت وهي تتستعقل داك النهار) اه حطها فبالو وشراه من خوياا لي باعها ليه.. داها وأنا حاولت نوقف فطريقو ونحبسو ولكن مسمعوش لياا داها لعندو ومبقيت عرفت اش طرا حيت سدو عليا فبيتي ولكن ملي حلو ليا عرفت بلي رحيل ضربات بدر بموس وداوها لسبيطار وهي حبسوها تاني فلگاراج باش يعاقبوهاا.. خرجتها وديتها لبيتي وهي كانت بحال شي ميتة.. كنت عارفة بدر مغايتهنااش وغايبقا حاطها فراسو وداكشي لي كان فاش رجع بدا يبلاني هو وعاصم على شي بلان باش مايخليو تاشي حد يشك من عائلتها.. (حطات راسهاا بين يديها ونطقات بحزن) نفدو داكشي لي بغااو وفديك لفترة رحيل عرفات راسها حاملة ومقدراتش تقبل داكشي لي فكرشها وأنا خفت لابدر يعرف ويطيحو ليها ساعة هو كان مشغول تادازت ربع شهور وساق لخبار.. تعصب وحماااق وضربهاا باش يطيح منها البيبي ساعة ربي حمااه وهو فكرشهاا وتما زاد تجن كثر.. بقيت رادة ليها لباال الشهراين لي دازو تاجا واحد النهار لي شفت بدر غادي جاار وراه رحيل ماعرفت فين باغي يديها او وقفت ليه فطريقو باش مانخليهش ياخدها ساعة هو ماتسوقش دفعني تاطحت من الطبقة الثانية تال لتحت وهو كمل طريقو خارج بيها ومن تما معاودش شفتو..

ختمات كلامهاا لي نزل على إدريس كيف الصاعقة.. لجزء المخفي من لحكاية لي عاودات ليه بنتو.. داك لجزء لي مقدراتش رحيل تقولو ليه وهي تتشوف فعينيه.. ماشي ساهل عليها تقولو لتاشي واحد ولكن رنيم قدرات تقولو وماتخلي تاحاجة فجوفهاا.. قالت كلشي بالتدقيق وحوايج خلاو إدريس تشعل فيه لعااافية وناض من بلاصتو غادي جااي كيف شي ثوور بصوت قوي نطق:غاااانقتلوو بربي تاااغانقتلووو واخرتو على يدي الشماااااتة..من زهر لكلب لاخر مااااات وتهنينااا منوو

محسش على راسو تاكان ضرب بلكرسي لي كان جالس فيه تاقفز رنيم لي بدات تتبكي أما نوح كان جالس فبلاصتو متكي يديه على لبيرو كيحك جبهتو ومغمض عينيه.. وتيرعد رجليه مخرج فيها الأعصاب لي حاس بيهوم.. الأعصاب لي مكالمي عليهوم ومباغيش يخرجهوم حيت عارف راسو فاش كيتعصب راه مكيقشعش قدامو وهاد هو عيبوو.. مدة وهوما ساكتين ومرة مرة تسمع بكية رنيم..

نوح:(لعب بلسانو ففمو ونطق بخشونة) هاد عمك غايكونو عندو كلابو لي مشْيّين ليه الشغل كلاب كيتيق فيهوم؟؟

رنيم:(حركات راسها بخوف)اه إلياس هو يديه ليمنية من نهار عقلتو وهو معاه فكلشي وعارف كلشي عليه وهو لي كيعاونو

نوح:(خنزر فيها) وهاد إلياس ماعندوش لعائلة؟

رنيم:لا هو يتيم ماعندو حد (بدات تاضور عينيها ونطقات بخفوت) وكاين تاعلي هاد زوج كيتيق فيهوم تقة عمية وعلي هو لي حاضي رحيل فكل خطواتها وكيوصل ليه خبارهاا وهو لي عاوني ملي طحت وداني لسبيطار وبقا معايا..

شاف نوح فإدريس لي حرك ليه راسو باه ورجع شاااف فرنيم بتدقيق ونطق بصوت بارد لاحها فوجهها: وهاد علي شنو بينك وبينو شي حاجة؟

من طبع نوح مكيفلت تاشي حاجة وعندو دقة الملاحظة ومجرد مانطقات رنيم بسمية علي هو عاق بلي شي حاجة كاينة وخصوصا كلامها أنه هو لي عاونها ورد ليها لبال.. الاكان بدر بنفسو طيح بنت خوه وماتسوقش ليها وهاد علي عاونها شي حاجة مكدخلش لبال وزيد توثر رنيم خلاه يزيد يتأكد من شكو.. وهي بقات مخرجة عينيها وتاتشوف فيه هو وإدريس لي واقف مربع يديه وعينو عليها.. تاهو عاق ولكن مادخلش لموضوع لدماغو وماسولهااش..

رنيم:(بزربة) مابيني وبينو والو والله لقسااام هو لي تابعني وديمااا حاضيني وفاش تانكون وحدي كيجي عندي عيييت مانبعد منو ساعة هو لاصقني وقال ليا بلي هو باغيني ولكن أنا مباغااااهش مكنحملوووش هء هء أنا والله ماادرت شي حاااجة

الخلعة خلاتها تسرسب كلشي كتبرر ليهوم وتبكي وتشهق.. مد ليها إدريس لما ونوح قلب وجهو كيزفر النفس تاخلاها تكالمات ورجع شاف فيها ونطق بهدوء: سيري تشمي لهوا

خرجات رنيم وسدات لباب وراها ونوح ناض داير يديه فجياب الجاكيط وغادي جهة الشرجم وبقا واقف مدة تابانت ليه رنيم جالسة فالربيع.. نطق إدريس وهو مكمش حجبانو: هادشي علاش گلتي ليا نجيبها

نوح:(باقي على وقفتو وبصوت هادئ قال) تاحد مغايكون عارفو قدها هي وبوحدها لي تقدر تعاونا اسي إدريس

إدريس:(قرب جهتو وربع يديه ونطق بنفس الهدوء) شنو فبالك وباش غاتقدر رنيم تعاونا؟؟

نوح:(مسح على لحيتو ونطق بجدية) واحد بحالو مكيديرش لخطوة تاكيفكر فيها مزيان باش ميخليش وراه شي حاجة لي تفضحو.. تيخدم عقلو وگاع لفعايل لي دار قبل سلك راسو منهوم حيت لقى لي يهز عليه (شاف فإدريس) عاصم الجوهري لي كان هو لحولي لي ضحى بيه بلامايتسوق ليه.. واحد بحالو تتهمو غير نفسو وكيعرف كيفاااش يخلي لي قدامو ضعيف.. كيشد لواحد من لپوان فيبل ديالو غادي على مبدأ واااحد راسي يارااسي (ضحك بسخرية) زوج رجال داير فيهم التقة (هز صبعو السبابة والوسطى وحركهوم) إليااس وعلي واحد دايرو يديه تايقضي بيه شغالو والتاني دايرو عينيه هناا وعرفتي حنا اش غانديرو اسي إدريس

إدريس:(كمش حجبانو)اش ؟

نوح:(نطق بخشونة) غانعميو ليه عينو وغانقتلو لفعة بسمهاا.. (حط لحيتوو) دويت مع صابر وهو غايعاونا وتاشي معارف عندي من لداخل غايعونوناا وهاد بدر الدين الجوهري غاتهنى منو عائلتك اسي إدريس وغايخلص گاع داكشي لي دار فحق الناااس وفحق رحيييل

كان إدريس تيشوف فنوح بشوفة فشكاال وكلامو خلاه يزيد يكبر فيعينيه.. ماندمش ملي عاود ليه وهاهو دابا غايعاونو باش يتهناو من داك الشيطان لي مرضهوم فحياتهوم.. هو عارف ولد لحااج عندو معااارف فيما مشى وداير علاقات طيبة مع بزاف دالناااس ونهار تايوقف على دوك لمعارف كيلقاااهوم واقفين معاااه.. قرب إدريس وعنق نوح عناااق رجولي كشكر على وقفتو معااه وبدورو نوح طبطب على ضهروو ونطق إدريس بهدوء: عمري غانسى هاد لخير لي غاديرو فياا

نوح:(تبسم بلخف) نسيتي راك نسيبي هه

نوح:(ضرب على كتفو) ونعم النسيب الله يرحم لحااج لي رباااك راااجل أو ولد رااااجل

نوح:آمين (كمل بجدية) ودابا ندوزو لمعقول صوني على لبنت ترجع باغي نسولها شي حوايج

دوز إدريس لخط لرنيم لي جات بزربة لقاتهوم واقفين تيتسناوها ونطقات بخفوت:نعااام

نوح:(شاف لخوف فعينيه ونطق بنبرة مطمئنة) عارف بلي رحيل عزيزة عليك داكشي علاش باغيك تعاونيني بااش نقدرو نفكوها من داك عمك لمريض واخا

رنيم:اه واخا

نوح:(ربع يديه وتكى على لحيط ونطق بهدوء) هاد علي ماعندوش شي حد تاهو

رنيم:صراحة معرفتش حيت مكنتش تنشوفو مع بدر ونهار شفتو كان ملي عاوني لسبيطار ومن تما وهو ديما تابعني كيف قلت

إدريس:باين مغايكونش عندو عائلة وتا لاكانت اتلقى داك لمريض تهنى منها

نوح:(دوز يدو على لحيتو) ممكن.. المهم تصرفاتو معاك كيف دايرة ؟

بدات رنيم تتعاود على علي من نهار عتقها وتصرفاتو معاها لي بعض لمرات تتلمس فيهوم لحنية وبعض لمرات لجنوون.. تتعاود گاع داكشي لي تتعرف على علي ونوح كينوطي تاسالات ونطق بهدوء:عندك نمرتو؟

رنيم:(بخوف)اه ولكن بلوكيتها

نوح:(قرب جهتها وتكى على لكرسي ونطق بجدية) دبلوكيها (نفدات كلامو وهو واقف على راسها ونطق بهدوء) جاوبيه على لمساج لي مخلي ليك فلواتساب

كانت تادير لي قال ليها وهو حاضي بعينيه تاشافو جاوبها وكلام يجيب كلام ونوح تيقرا وتيحلل شخصيتو غير من مسجاتو قدر يستنتج بلي بصح علي طايح فيها.. وزاد تأكد فااش قرا مساح علي لخر "عمرك تفرقي عليا ارنيم نتي عارفاني كانبغيك ومانخلي حد ياخدك ليااا" شافت فيه رنيم وهو حرك ليها راسو بهدوء ورجع لبلاصتو هز تلفونو وشاف فلمساح لي جاااه ورد عليه قبل ماينطق بهدوء: وصلات وقيتة دلغدا خليونا نتغداو

خرجو لصالة ولقاو مرات بّا سالم مطيبة ليهوم طاجين اللحم بالبرقوق كيشهي.. تغداو جميع وتابّا سالم ومرتو تغداو معاهوم ورنيم مكانتش عندها الشهية بزز باش كلات.. كلاو لغدا وشربو كويس دأتاي مع تقيوتاتو قبل ماينوض إدريس يسلم مع نوح وينطق بهدوء:بناتنا التلفون

نوح:(شاف فرنيم ونطق بجدية وصرامة) كلامنا يبقا هنااا واخا

حركات رنيم راسها باه ومشى إدريس هو وياها ونوح حرك راسو بهدوء.. بقات فيه دغيا تتخلع وتاهو بلعاني قصح معاهاا باش مايزغبهاش الله وتبرول لشي حد.. طلع نوح لبيتوو خدا دوش وتوضى وصلى صلاتو عاد مشى يتكى شوية حيت ليل كولو وهو سهراان... نعس على ضهرو حاط دراعو فوق عينيه مفمضهوم كيتفكر لبارح فوقيتة دلغداا ملي بانت ليه رحيل خارجة فضولو خلاه يتبعهاا بلاماتحس تالقاهاا دخلات لكابيني ديال طبيبة نفسية.. زفر النفس وهو كيستعقل كلام إدريس دلبارح وكلام رنيم ليوم ورجع دماغو تاني كيخمم.. زفر النفس وطفى لفيوز لي شاعل جنب راسو ونعس..

----

جالس علي كيف عادتو فالطوموبيل قدام باب دار إدريس مراقب رحيل وفنفس الوقت رنيم.. كان حاس بالملل حيت النهار كولو ومكان تاشي جديد يدكر.. تفكر كلام رنيم معاه ولمساجات لي سيفط وهو يتبسم.. وسط ديك الروينة كلها وداك لحر'ام لي عايش فيه كانت هي لحاجة الزوينة فيهاا.. نهار شافها خلات قلبو ينبض ليها بغاهاا واخا عارف بلي مستحيل تكون ليه ولكن ماستسلمش.. متكي راسو على لكرسي لور والظلام طايح وحس البشار مكيستمعش.. مكونسونطري مع راسو وماحس غير بلباب لي جنبو تحل ودخل شي حد جلس جنبو ورجع سد لباب.. ريحة برفان رجولية استولت على طوموبيل وعينو تعلقو على داك الشخص لي جالس بلباس سپور وداير كاسكيط.. فلول ماعرفوش ولكن غير ضار جهتو وهو يحل عينيه ونطق:شكون نتا؟

نوح:(هز حاجبو ونطق بسخرية) وايلي حاضي سي إدريس وعائلتو فالدخلة ولخرجة ومعارفنيش شكوون؟

علي:(حس بتوثر ولكن قدر يغطيه بهدوء) ماعرفتكش علاش كادوي وزايدون باشمن حق داخل لطوموبيلتي ومهجم عليا

نوح:(حاجبو باقي مهزوز بخشونة قال) هاد الساعة غير جالس باقي ماتهجمت اعلي

علي:(توثرو زاد فاش عرف سميتو ومع دلك نطق ببرود) شنو باغي مني اولد لحاج ؟

نوح:(شاف فيه بشوفة باردة) كل خيير باغيك تعاوني فواحد التويشية وصاف (قاد نوح لكاسكيط مهبطها على وجهو ونطق بجدية) باغيك دير يدك فيدي باش نتهناو من بدر الدين الجوهري

علي:(ضحك ضحكة مجهدة ونطق بسخرية)ههههه من نيتك جااي عندي هههه هو خيبتي ظني فيك اولد لحاج ماشي هادشي لي عاودو ليا عليك

نوح:(لعب بلسانو ففمو وتبسم ليه بسخرية) دوماج (ترسمو ملامح الجدية على وجهو وهو عاقد حجبانو) كانو تيقولو عليك دكي ساعة لقيتك مكلخ اولدي ولكن عاجبني داك لولاء لي عاطي لهاداك الشماتة لي مخدمك

علي: وأنا صدمتيني ومكنتش متوقع تجي توقف قدامي وطلب مني هاد الطلب بلاماتخاف نوصلو لبدر

نوح:(حرك راسو ببرود) عادي وصلو ليه دابا نيت اش كاتسنى.. عند بالك غاتخلعني (ضحك ضحكة رجولية) مكيخلعوناش الشمايت بحالكووم

علي:(زير على يديه وماهضرش)

نوح:(نطق بنبرة مستفزة) هاد بدر لي مباغيش تبيعو فأول فرصة غاتجيه غايبيعك نتاا عند بالك هو مسوق ليك تت نهار لي طلع ليه فالراس غايشدك من ليد لي كاتوجعك كيف مولف يدير مع كلشي كيستاغل نقط ضعفهوم وتانتا غايستاغل نقطة ضعفك (همس بصوت خشن) رنيم

كان علي جالس بلاصتو جامد كيسمع كلام نوح لي على حق هو عارف بدر اش كيسوى وشاف كيفااش مكيهمو حد من غير راسو.. قت'ل خوه بدم بارد وتبع ليه ولدو عاااصم لي من لحموو ماحنش فيه لاعسااك هوو لي غير خدام عندو.. وأصلا سبق ليه هددو برنيم بطريقة مبااشرة وهادشي هو عارفو..

نوح(حط واحد لورقة فطابلو دطوموبيل ونطق بهدوء) فكر فمصلاحتك وفمصلاحة هاديك لي تتبغي والاكانت تتهمك راه غاتعرف اش تختار

خرج من الطوموبيل وهو خاشي جياب يديه فالجاكيط غادي جهة طوموبيلو.. هز عينو جهة لبوجو لي واقفة بعيد شوية وهبط زاجها وبانو زوح رجال بوليس سيفيل حاطهوم باش يردو لبال لرحيل.. ضربو ليه السلام وهو حرك راسو بالخف وكمل طريقو لطوموبيلتو.. أما علي فعينو كانو على ديك الورقة لي فيها نمرة دالتلفون لي خلى ليه ولد لحاج وهو ساكت.. ديك التقة باش جا عندو ودوى معاه خلاتو يتصدم منو وكلامو لي قال تاهو.. قلب وجهو وتيزفر بعصبية.. وهاكاك دوز الليل كولو وهو كيفكر فالموضوع.. داز داك النهار وهو باقي داير خدمتو لي عاطيه بدر وفنفس الوقت تيخمم فكلام نوح.. تاتحل لباب ديال الدار وخرجات رنيم غادة تسخر.. عينو تعلقات فيها ورجع تاني تفكر كلام بدر ليه وتهديدو.. حك جبهتو وحس براسو واحل واش يبيع لعشرة لي جمعاتو مع بدر هاد السنين كولها ويختار مصلاحتو ولايضرب على مصلاحتو على قبل العشرة.. وفالأخير الإختيار كان واضح وعلي هاد المرة فكر فمصلاحتو وفمصلاحة رنيم لي مايقدرش يتخيل بلي واقعة ليها شي حاجة.. هز النمرة ودوز لخط وبعد عدة رنات تفتح لخط ونطق علي بصوت جدي: أنا موافق

كان متأكد نوح بلي غايوافق حيت فداك النهار فاش عاودات ليه رنيم وقرا لمساجات لي سيفط ليها قدر يعرف طبعو.. وبيما أن إلياس ماعندو مايخسر وعلى داكشي لي عرف من رنيم قرر يمشي لعلي واستاغل حبو لرنيم باش يجرو لجهتو.. هز نوح عينيه فإدريس لي جالس قدامو والتلفون فوق الطبلة داير ليها أوت باغلوغ..

نوح:(بجدية) مزيان ملي ختاريتي مصلاحتك

علي:عندي شرط رنيم مانبغيهاش تقااس حيت الاوقعات ليها شي حاجة اتفاقنا غايتلغى

نوح:(بخشونة) كون غير قد كلمتك

قطع معاه نوح ورجع ضهرو لور متكيه براحة فداك الفوطوي وهز عينو فإدريس لي كان تيحك على لحيتو ويخمم قبل مايشوف فيه وينطق بجدية: وباش غانعرفوه مغايقولبنااش اولد لحاج؟

نوح:(بهدوء) حنا أصلا مغانديروش فيه التقة وغانديرو لحتياط ديالنا أصلا الأمور مشية كيف باغين حنا وعلي غايكون غير غايجيب لينا خبار داك المريض باش نعرفوه علاش ناااوي ونتغداو بيه قبل مايتعشى بيناا

إدريس:خفتو يكون متافق معااه

نوح:(حرك راسو بهدوء) ماتنساااش بلي رنيم داخلة فالخط وعلي باين فيه باغيها نيت غير من داكشي لي عاودات لينا تعاملو معااها ولكلام لي قريت عرفتو ياغيهاا(كمش حجبانو) خوي دماغك اسي إدريس من هاد الأفكار

إدريس:أنا مادى بيا وقتااش نتهنى منوو ونرتاح

نوح:قريب إن شاء الله قبل مانسى راه خليت واحد زوج رجال دلبوليس سيفيل يبقاو قدام باب الدار ويحضيوو رحيييل غايكونو بحال ضلها وسيدرا تاهي حاولو ماتخرجوهاش وردو ليها لبااال حيت الامقدرش يوصل لمها غايديرها طريق كيف طرا داك النهار فالصدقة

إدريس:أصلا هي مكتخرجش من غير لاكنا حناا ولاإسلام

قطع كلامو صوت تلفونو لي صونى بنمرة ريان.. كمش حجبانو وجابو بهدوء:ألو ريان

ريان:( نطق بصوت خاايف) لواليد رحيل طاااحت وغيبات وأناا غانديها لسبيطاااار داباا

إدريس:(نطق بلهفة) علااش اش وقع وفينكوم دابا

ريان:كانت تتبكي وتغوت تاطاحت أنا غانمشي بيها لكلينيك العاصمة

إدريس:هاني جاااي

ناض إدريس وهو تالف من لخبار لي سمع وناض نوح مكمش حجبانو ونطق بخشونة:أش واقع اسي إدريس

إدريس:بنتي خصني نهبط الرباط على قبل رحيل سخفات غاتكون جاتها شي كريز تاني

نوح:(هز سوارتو فوق الطبلة مع تلفوناتو بزوج ونطق بجدية) خلينا نمشيو

خرجو من لفيرمة شاديين الطريق لرباط وإدريس قلبو غايخرج وسط ضلوعو.. ملي قالت ليه باغا تزور قبر صاحبتها فرح حيت دار هاد لخطوة لي كانو كايتسناوها ديرها وفنفس لوقت خاف عليها حيت عارف الأمر مغايدوزش بالساهل وهاهي طاحت تاني وغيباات.. غمض عينو كيدعي فخاطرو ماتوقع ليها تاشي حاجة ونوح جنبو مكمش حجبااانو وعينو على الطريق.. ساعات وهوما شاديين الطريق تاوصلو لربااط وشد نوح طريق لكلينيك العاصمة وهو متبع لوكاليزاسيون.. وقف طوموبيل برا وخرجو بزوج وإدريس سابقو سول على الشومبر ومشى بلهقة تابان ليه ريان جالس كيتسنى وهو ينطق بصوت ملهوف:فين رحيل اش وقع ليها

ناض ريان من بلاصتو وعينو على باه ونوح لي واقف جنبو ونطق بهدوء:مشينا لمقبرة وفاش شافت قبر جيداء بقات غير تتبكي وتدوي معاهاا وتلوم فراسها ..طلبات مني نديها لحومة عند ممات جيداء وفاش مشينا عندها حلات لينا ورحيل غير شافتها وهي تنهار وبدات تادوي وتخرج فالهضرة وتغوووت تاطااحت وجبناهاا

جرو إدريس معنقو فاش حس بخوفو على ختو وضار جهة نوح لي بدا تيدوز يديه على وجهو عدة مرات قبل مايعطيه بالضهر ويمشي.. دخل إدريس عندها ولقاها مغيبة طمن عليها وخرج لعند ريان داه ياكل شي حاجة حيت باين فيه مواكلش غير من لفشلة لي شداتو..

بخطوات بطيئة كيخطيهوم فالكولوار لي كان خاوي مافيه حد.. يد فجيب السروال وتانية حاطها فوق البواني دالشومبر ديالها.. بقا واقف مدة قبل مايحل لباب دالشومبر ويدخل بهدوء وعينو طيح عليها وهي ناعسة بوجه شاحب وتحت عينيها لي كحال وشفايفها لي مشققين والسيروم فيديها.. قرب بضع خطوات تاوقف جنبها كيشوف فيها بشوفة حنينة متناقضة مع تكميشة حجبانو.. صوت أدان الفجر مسموع فأبواق الجامع.. مد يديه ودوزها بحركة حنينة قاس بيها راسها وتحنى طبع قبلة فوق جبهتها.. بانت ليه تحركات شي لي خلاه ينزل جهة ودنيها مخلي أنفاسو الساخنة يضربو فوجهها وهمس ليها بصوت حنين: أستودعك الله الذي لاتضيع ودائعة..

تقاد فوقفتو وشاف فيها شوفة اللخرة قبل مايخرج من لبيت بهدوء مخليها غارقة فنومها مرة خرا..

ليل كولو وهو جالس فالكرسي جنب الشومبر ديالها هو وإدريس أما ريان مشى ينعس فالطوموبيل دباه.. تاحد مادوى مع لاخر وكل واحد يخمم ويفكر تاطلع الصباح وشاف نوح فساعتو ونطق بهدوء: سي إدريس أنا غايخصني نمشي دابا قبل ماتفيق

إدريس:واخا سمحليا عدبتك معايا

نوح:(مكمش حجبانو)ماتقولش هاكا نتشاوفو من بعد..

مشى نوح وإدريس بقا تافاقت رحيل وطمنو عليها ومشاو شدو الطريق لمراكش.. ليام كانت كادوز وعلي كان على تواصل بنوح كيعلمو بالأخبار لي تيوصلوه ولي تيعرف ونوح كان داير منو احتياطو ومتايقش فيه بزاف.. فالخرجة دمراكش لبلاصة فين تيتلاقى علي بنوح بعيد على لعيون باش ياخدو راحتهوم..كانو واقفين قبالت بعضياتهوم..

نوح:(مكمش حجبانو) كانسمعك اش كاين؟

علي:(بهدوء)ليوم عرفت واحد لحاجة مهمة غاتفيدك

نوح:(هز حاحبو) شنو هي؟

علي: بدر الدين عندو شي واحد كيعرفو فلميزون دلڤواتيغ ديالك كيجيب ليه خبار رحيل (كمش نوح حجبانو بنظرات ممفهوماش وعلي كمل كلامو بنفس الهدوء) زكريااء..

راكب فطوموبيلتو وحاط يد على الشرجم والثانية سايگ بيها.. كان داير نضاضر دالشمس على عينيه كيتفكر كلام علي ليه.. وبلي زكرياء كيوصل لخبار لبدر وهاد لخبار خلاتو يتفكر تصرفاات زكرياء جهة رحيل.. تيخمم تاوصل لميزون دڤواتيغ ونزل بهدوء داخل لداخل وعينو ماتجي غير على زكرياء لي كان واقف مع واحد لكليان.. حك لحيتو وكمل طريقو تاوصل لبيروه ودخل ساد وراه لباب وتمشى بلهداوة جهة الكرسي وجلس.. شعل لبيسي بورطابل ديالو لي مأنسطالي معاه الكاميرات دلميزون وشعل لكبير حالو على ديك لاليست دلخدامة عندو.. مشى ديريكت لسمية زكرياء تيشوف فيهاا وفنهار بدا معاهوم.. كان مور يوماين من بداية رحيل بالضبط.. حك لحيتوو وبقا تيشوف فالشاشة بسهو وكيخمم عاد رجع شاف فالكاميرات وبالتحديد لكام لي مخدمة جهة لبلاصة فين كان زكرياء.. حاضيه بهدوء وكيفكر فكلام علي..

* علي:زكرياء (حك حاجبو)هو ولد الداخلة ساكن مع واليديه ولحالة ضعيفة خلى الداخلة وجا لمراكش باش يقلب على شي خدمة لي يهز بيها راسو وعائلتو وخدم فواحد السوسيطي على قد لحال ومرة مرة يسيفط لواليديه لي كتب الله تانهار عيط ليه بدر وتلقى هو وياه وإلياس وقال ليه يخدم عندك ويجيب خبار رحيل وكيف لعادة بدر الدين شدوو من يديه لي كتوعتو وهوما واليديه وزاد استاغل حالتهوم أو ورك ليه على لپوان ڤيبل وهو وافق.. (ربع يديه) هاد لبلان يالاه عرفتو من بدر الدين لي كان تيدوي معاه فالتلفون

نوح:(نطق بهدوء) وبدر فين هو دابا؟

علي:وصلتو لمطار كاين شي سلعة عوتاني غايخص ولابد مايكون حاضر ليها لمهم لي كاين قلتو هاد الأيام نحاولو مانتلاقاوش ولاكان شي جديد نعيط ليك فنمرة الثانية.. *

من تم وزكرياء كان تحت أنضار نوح بدون مايخليه يحس بتاشي حاجة وطبعا إدريس تاهو على دراية بالأمر.. وحيت نوح عارف بلي بعض لمرات متيكونش فلميزون غايخص شي حد يرد لبااال وكان هاد لحد هو سعيد..

نوح:(كان واقف قدام الشرجم تاسمع الدقان فلباب وهو ينطق بهدوء)دخل

تحل لباب ودخل سعيد لي نطق:موسيو السليماني محتاجني

نوح:(شاف فيه بجدية)دخل اسعيد وسد لباب وراك

نفد سعيد طلبو وقرب جهتو وهو كيشوف فيه

نوح:(تقاد فوقفتو ونطق بخشونة)نهار غلطتي أنا عطيتك فرصة وحدة باش تبت ليا بلي نتا بصح درتي عقلك.. نتا عارف هاد ليامات متنكونش هنا عليها غانبغيك تكون عيني وتبقا حاضي ليا زكرياء فالدخلة ولخرجة بلامايحس بتاشي حاجة

سعيد:(حرك راسو بجدية) واخا موسيو السليماني

نوح:(هز فيه حاجبو بصرامة) من ليوم غاترجع لبوسط لولاني وغاتخدم نتا ومحمد طه ومانبغيش دوك لفعايل دقبل يتعاودو تاني سمعتي وبخصوص زكرياء مانبغي حد يعرف بلخباار تفاهمنااا

سعيد:(تبسم) كون هاني موسيو السيلماني

نوح:سير دابا كمل خدمتك

مشى سعيد والفرحة باينة على وجهو ممتيقش بلي رجع لبوسط لي دمر عليه فرح وفرحتو بانت من ملامح وجهو.. وأكيد غاينفد كلام نوح بالحرف باش مايخسرش بوسطو ويخسر لخدمة لي سنين وهو يكافح فيها..ونوح كان عارف سعيد أهم حاجة عندو هي خدمتو عليهاا استاغل هاد النقطة باش مايفكرش يلعب بذيلو معاااه..

----

خارج من خدمتو غادي لبلاكة دطوبيس باش يركب وبقا شاد الصف كيتسنى الطوبيس تجي تابانت ليه طوموبيلة علي ولي فيها بدر الدين لي بان ليه جالس فالكراسى لورانين.. دار ليه إشارة بصبعو ولاخر مشى عندو وركب جنبو وعلي كمل طريقو سايگ ولايح ودنيه معاهوم..

بدر الدين:(ببرود شاعل لگارو تايكميه)شنو لجديد؟؟

زكرياء:(حرك راسو) مكاين تاشي جديد هاد الساعة ابدر لبنت خدامة خدمتها أو موسيو السليماني مكيجيش لميزون دفواتيغ هاد الأيام

بدر الدين:(شاف فيه) ماخليتي حد يشك فيك؟

زكرياء:لا تانتعامل معاهاا عااادي تانحاول نجبد معاهاا لهضرة باش نزيد نتقرب منهاا

بدر الدين:(مال جهتو فغفلة منو تاقفز زكرياء راجع لور ونطق بنبرة باردة كالصقيع) تتقرب منها؟

زكرياء:(نطق بزربة كيضور فعينيه) باااش ماتشكش فياا ونجيب خبااارهاا والله ماقصدت لي على بالك نتا والله

بدر الدين:(كمل بهدوء)قول لداك ولد لقح*بة ددماغك الازغبو الله ودار داكشي لي كيغكر فيه نهارو مغاطلع فيه شمس سمعتي

زكرياء:واخاا

كان قلبو تيدق بخوف هو عارف بدر علياش قاد باركة غير تهديدووو المباشر فحق عائلتو.. مباغيش هاد لعبة لي دخل راسو فيها ولكن الرجافالله وعلى قبل واليديه غايدير لي تقال ليه من بدر وغايبقا يجيب خبار رحيل لبنت لي ماحس بنفسو تالقى راسو معجب بيها إعجاب مقدرش يخفيه.. سرط ريقو وهو كيتخيل بدر لاساق لخبار كيفاااش غاتكون عاقبة الأمور.. وقفات طوموبيل قدام لحومة فين ساكن زكرياء لي ملي شاف بدر ساكت معاودش دوى عرف بلي سالات لهضرة نزل مكمل طريقو على رجليه وطوموبيل بدر تحركااات بهدووء تاتسمع صوت بدر الدين لي نطق:هاد ولد لقح*بة مخبي شي حاجة

علي:(ببرود)باينة خصك ترد معاه لبال لايصدق فاضحك

بدر الدين:(غمض عينو ببرود)نقضي غراضي بيه وديك الساعة نتبعو لخوتو..

كان بدر مرة فمراكش مرة فالداخلة فاش مكيكونش عندو خدمة ضرورية يحضر فيها تايخلي إلياس يتكلف ليه.. الأمور كانت ماشية عادي وعلي مبقاش تيتلاقى مع نوح ومكتافي غير بالتلفون لي كيسيفط ليه مساجات من النمرة الجديدة لي خداا.. كيعلمو بتحركات بدر الدين لي كيعرف حيت ماشي كلشي كيكون على دراية بيه خصوصا هو مكلفو بدر غير باش يحضي ليه رحيل فقط أما لأمور لخرى كان تيكلف إليااااس..

وهاد الأيام إلياس تاهو جا لمراكش شي لي خلى علي يشك بلي شي حاجة ماهياش كيطبخوها بزوووج.. ماسولش حيت مباغيش بدر يشك ويحط عليه لعين ولكن علم نوح باش يرد لبااال منوو..

كان واقف قدام لمراياا كيرش ريحتو عاقد حجبانو كيغكر فهاد لخطبة لي خرجات ليه سناااء فهاد لوقت.. خرج من جناحو هو لول غادي لعند سنااء باش يسولهاا ويستفسر منها شكون هاد لعريس لي جابتو ليهوم.. حل لباب دبيتها مور مادق ولقاها جالسة مقادة حالتها بقفيطين جوهرة ومأنتكة.. تبسمات ليه سناء وضارت جهتو: ولد لحاج كيف جيتك؟

نوح:(حك لحيتو ونطق بجدية)كيف ديما (خشى يديه فجياب سروالو ونطق بخشونة) مجابتهاش لوقت نسولك على هاد السيد لي غايجي يخطبك؟؟

سناء:(فرفرات عينيها) زوين ولد الناس وأهم حاجة عينو مزايغاش وزهواني

نوح:(هز فيها حاجبو ونطق بصرامة) سناااء هنينااا

سناء: مهم سميتو بدر الدين الجوهري عندو دار لعائلة فالداخلة ولكن عندو دار تاهنا وناوي يدير مشروعو هنا والاكتاب غانستاقرو فمراكش

كان نوح كيشوف فيها بملامح ممفهومينش وسمية بدر الدين الجوهري تتعاود فودنيه مرة وزووج.. حك لحيتو ونطق بهدوء: مزيان تانشوفوه وديك الساعة يحن مولانا (ضار باغي يمشي ورجع جهتهاا ناطق بصرامة) مور مادوز هاد الروينة غايكون ليناا جلسة نتفاااهمو فيهاا..

خرج من عندها وهو ضارب تخنزيرة قاااصحة ودابا عاد فهم السيد لاش بقا ساكت إذا هادي هي لخطة ديالو باغي يدخل عائلتو عن طريق خالتو..

نوح:(تمتم بخشونة)ماعليش نتنازلو ونمشيو معاك فهبااالك..

دقائق وكان نازل نوح كيف لعادة بسروال توب كحل وشوميز نواغ ولايح عليه جابادوز نواغ بحال جيلي وشعرو رادو لور وروايح كيتشمشو من بعيد.. سمعو الدقان ومشات السعدية حلات لباب وهوما خرجو باش يستاقبلوهوم.. كان داخل بخطوات واتقة وهو هاز البوكي دلورد لابس سروال توب كحل مع شوميز كحلة وڤيست فنفس اللون وملامحو كانو قاصحين وفجنبو كان إلياس هاز لكادويات لي جايبين.. قرب بخطوات واتقة وعينو على نوح لي كان خاشي يديه فجياب السروال تيشوف فيهوم وجنبو رحمة لي مبسمة بزز مع بقية العائلة..

رحمة:(تبسمات ليهوم بزز)مرحباا بيكووم

نطق بصوت مدعدع: شكرا

قلب عينو السود لجهة نوح لي كان واقف قدامو نيشان ونطق بلهداوة وملامح هادية:مرحبا بيكوم عندنا معاك نوح السليماني

مد ليه نوح يديه وتاهو مد يدو ونطق بصوت واتق وعينو السود فقلب عينين نوح: بدر الدين الجوهري

نطق سميتو وعينو السود فقلب عينين نوح لي كان تيشوف فيه بشوفة هادية وتبسيمة خفيفة على شفتو.. كانو واقفين قدام بعضياتهوم ويديهوم فيد بعض مدة قبل مايهز نوح حاجبو فيه فاش بان ليه طول معاه السلام وبدر الدين حرك راسو ليه وزول يديه مرجعها لجيب السروال.. فديك الدقائق القليلة لي وقف فيهوم قدامو قدر أنه يشوف المكر ولخبث فعينيه لي واخا حاول بدر أنه يتصرف عادي إلاأنه مجرد ماشاف قدامو نوح مقدرش يتحكم فيهوم.. لجلسة كلها كان نوح حاط عينو عليه وكيتصرف معاه بطريقة عادية كأنه واحد شخص عادي مبين تاشي حاجة ليه.. هو مكانش عندو مشكيل مع زواج سناء حيت هي إنسانة وأكيد أتبغي تكمل حياتها مع واحد الشخص لي تبغيه واخا جدو مموافقش كان ايدخل هو ويدوي معاه ولكن مجرد ماعرف الشخص شكون قرر يوقف هاد لحمااق دخالتو ويقلعو من الجدر.. خلاها دوك الأيام على هواهاا نيت وفنفس الوقت حط واحد من لبوليس بااش يرد ليها لبال بلاخبارها وخبار بدر حيت معارفش علاش ناوي وأكيد حماية عائلتو غاتكون على مسؤوليتووو وبيما أنه تجرأ وجا وقف قدامو فأكيد هو ناوي على ماكبرر.. ماشي غير سناء لي كانت تحت لحماية إنما تاعائلتو لقريبة ليه واخد احتياطو بالكااامل وسابق بدر الدين بخطووواات.. جالس فالبيرو فالرياض تايضرب صبعانو فوق البيرو تاسمع الدقان وعرفها سناء حيت هو لي علمها تجي عندو.. دخلات بلكلاس كيف ديما والطالون واخاا غير فالرياض مكتحيدوش.. جلسات قدامو ونطقات بهدوء:فاش بغيتيني

نوح:(حك لحيتو ونطق بجدية) كيف غادة أمورك مع بدر الدين

سناء:مزيان هو باغي يمشي عند بابا يدوي معاه ونتا عارفو مغايبغيش يستقبلو عندو

نوح:(لعب بلسانو ففمو وشاف فيها بهدوء) ونتي هاد السي كاتعرفيه مزيان لدرجة باغا تزوجي بيه

سناء:(حركات كتافها ببرود)مور الزواج غانتعارفو كثر أنا وياه هو أصلا باين فيه ولد الناس وراجل لي نعول عليه وخدام خدمة شريفة

نوح:(قلب وجهو جنب ونطق باستفزاز) خدمة شريفة لي هي التبزنيز ؟؟

خرجات عينيها من الكلمة لي سمعات وشافت فيه وهي مصدومة.. تاتحاول تقرا ملامح وجهو الباردين لي مايخليوك تعرف واش تيدوي بصح ولاتايضحك.. سرطات ريقهاا وقلبها يضرب وبصوت بزز باش تسمع: كيفاااش تبزنيز؟؟

نوح:(تقاد فجلستو مخنزر فيها ونطق بجدية) تادوي معاه وجايباه لدار وناوية تزوجي بيه ومعرفاااش بلي السيد لي جايبة بزناااز ومولف بلحباسات وبلامانجبد ليك الشي لاخر لي يخليك تندمي على نهار شفتيه

سناء:(عينيها عمرو دموع) تاتقول هاكا بلعاني على قبل ليازيد ياااك

نوح:(ضرب فالبيرو تاقفزات وغوت معصب) براااااهش حنااا بااااش نديرو هاد لفعاااايل هاااا واش مريضة فدمااااغك عند بالك الناس كلها بحااالك عزيز عليها الضد السيد كون كاااان يستاهل كون كنت أنا أول واحد واقف معاااك فهاد الزواااج لي مقابلو ونتي براااسك مباغاااهش عند بااالك معارفش بلي هاد الزمرر دايراااه جكااارة فليازيد.. (ناض من بلاصتو مقرب ليها وهو باقي عاقد حجبانو تايشوف فيها كاعي وهي قفزات مخلوعة تتبكي) السيد سولت عليه وراه طابخها فالداخلة وعاااايش غير فلحرااام (مسح على وجهو ونطق كيتمتم) استغفر الله العلي العظيم (شاف فيها ونطق بجدية) سمعي اسنااء هاداك السيد هو لي مغاتزوجيش بيه ومغانخليكش دخليه لعائلتناا حيت عارفو مكيستاهلكش وماشي من مقامناا هاداك السيد نتي معارفاااهش اش كيسوى عليها من الأحسن تخوي دماااغك منوو

سناء:(تتمسح دموعها) أنا غانعيط ليه ونحبس هاد المرض كولو غير تهنى

نوح:(هز فيها حاجبو) ماغاتحبسيهش داباا (كمشات حجبانها وهو كمل ببرود) بقاااي شادة معاه لخط على أساس كتحاولي تقنعي باك وماتبيني ليه تاحاااجة فهاد الساااعة تايوصل النهار لي نعلمك بيه أنا باش تسالي هاااد الزمرر تافقناا

سناء:(بعدم فهم) ولكن علاش؟

نوح:(قرب جهتها وشد كتافها ونطق بجدية) ديري لي قلت ليك بلاقصوحية الراااس اسناااء (طبطب على كتفها ونطق بصوت حنين) نتي غير كوني تتسمعي لهضرة ويكون خير

سناء:(عنقاتو والبكية شداهاا) واخااا

بادلها لعناااق وهو كيمسح على شعرهاا ويتنهد.. هي خالتو ولكن حيت مقاربين فلعمر دايرين بحال لخوووت وسناء كتحتارموو حيت فارض وجودوو بين الناااس ومخلي لكبيرو والصغير يحتارمووه.. مشات لبيتها بلامادوي مع حد وهي ممتيقاش اش سمعات من نوح.. دخلات لبيتها ولقات تلفونها كيصوني وكان هو... قلبها نقز ملي تفكرات كلام نوح والحقيقة المخبية لي عرفات ولي صدماتها من بدر ومكانتش متوقعة بصح يكون السيد بزناااز... وهادشي غير نوح مقالش ليها الحقيقة لي غاتخليهاا تندم نهار عرفاااتو.. مباغيهااش تخلع وتفرط راسهاا وتخليه يشك عليها قال ليها غير على لخدمة وصاف.. وهي غادير بكلامو وغادي تبقاا تجرجر فيه كييف طلب منها..

🔜🔜

تنهد إدريس تنهيدة طالعة من القلب وهو كيشوف فنوح لي جالس قدامو وتبسم ليه:هاد لخباار كيبردو لقلب (شاف فساعتو) وقيتة دلغدا هادي نمشيو نجيبو مناكلوو اش تبغي اولد لحااج

نوح:(حك لحيتو) غير جلس غانخلي شي واحد من الدراري لي كنعرف يجيبو لينا شي طنجية دايزها لكلام

خدا تلفونو وعلم الدري بشنو بغا وعطاه لعنوان وجلسو مجمعين مع بعض تاوصلات الطنجية وتجمعو عليها بزوح تغداو وغير سالاو ناض نوح هاز تلفونو وسوارتو ونطق بهدوء:مهم التلفون بناتنا اسي إدريس سلم على مالين الدار

إدريس:مرحبا بسلامك

مشى نوح لخدمتو وإدريس رجع يكمل شغالو تارجعو الدراري وكل واحد تيقضي خدمتو.. تاوصل الليل وعيط إدريس على سفيان ورشيد عطاهوم خلاصهوم بالزيادة شكروه ومشاو لديورهوم وهو سد لگاراج ومشى لدارو..ومع حل لباب نقزات عليه سيدرا ونطقات بحماس:بّا ديدي توحشتك بزاف أنا

هزها تاتعلقات فيه وهو يبوسها فحنكها وهي نزلات تتبوس فيه وتم داخل لدار تابانو ليه جالسين فالصالة الوسطانية مع الكوزينة تماا وقريبة ليهوم.. لقى السلام وجلس وسيدرا معلقة فيه موحشاه حيت ليوم مجاش يتغدا معاهوم..

صونى تلفون كلثوم بنمرة بدر وغير شافت لابيل وهي تسرط ريقها ونطقات بهدوء:هادي مي غانمشي نعيط ليها

مشات كلثوم لفوق طالعة لسطح باش ترتاح بخاطرها ونطقات بهمس:شنو بغيتي؟؟

بدر الدين:(ببرود)ديري فبالك بلي لبلان لي دوينا عليه قريب يتنفد

كلثوم:(بلهمس عاطية بضهرها لباب)اوا على السلامة ملي تحركتي قبل مايتزوجو وتصدق مقولب فلخر

بدر الدين:ماشي نتي لي غاتوريني اش ندير ودابا تقووودي

قطعات لابيل وتبسمات بمكر ومع ضااارت شهقااات بالجهد وهي تتشوف إدريس واقف قدامها داير يديه فجياب سروالو كيشوف فيها ببرود...

كانت تتشوف فيه وهي مخرجة عينيها وقلبها تايضرب بخوف من أنه يكون سمعهاا.. حاطة التلفون فوق صدرهاا وبقات جامدة فبلاصتها تاتشوف غير فإدريس لي واقف قبالتها داير يديه فجياب السروال وتيشوف فيها ببرود خلعهاا.. بدات تاضور عينيها يمين وشمال تاسمعاتو نطق بهدوء: لعشا تحط هبطي لتحت

بقات تترمش كلثوم بعينيها ممتيقاش اش تتسمع.. أما إدريس تخطاهاا ومشى لواحد البلاصة فلقنت فيها واحد الطاجيرة جبد منها باكية دلگارو وبقا واقف عاطيها بالضهر تيكمي.. الهدوء ديالو خلاها تنفس بالراحة حيت مسمعهاااش هي عارفة كون سمع لابيل ديالها كون راه حيح عليها وماخلى فيها غير لي نسى... تبسمات براحة ونطقات بهدوء:مغاتعشاش

إدريس:تت

حركات راسها باه وتمشات هابطة لتحت وغير غبرات وهو يضور إدريس عاقد حجبااانو ومزير على يديه وكلامها لي قالت تيتيردد فمسامعو " اوا على السلامة ملي تحركتي قبل مايتزوجو وتصدق مقولب فلخر" بزز باش كونطرولى راسو قداامها وماهزش يدو عليها بااش ماتشكش فيه.. رجع قلب وجهو كيشوف فالشارع وهو كيكمي الگارو وكيكب فيه دوك الأعصاب باش حس وعقلو مرجعوو لنهاار عرف بنيتهااا..

🔙🔙

ملي علمو محمد طه بمرض مو وبلي غايجيبها ويسكنها فمراكش ويسكن معاها هو وأسماء نيتو الحسنة خلاتو يفكر لولادو ولمصلاحتهوم داكشي علاش فاتح لموضوع مع تانيرت لي اقترحات عليه اقتراح يجيبها لدار وتبقا معاهوم تادوز لعملية وتبرا وديك الساعة الله يعاون.. وبالفعل هادشي لي قرر وعلم محمد طه على لخباار وداك النهار نيت صونى عليه ولد لحاج وكيف لعادة كان فلگاراج جالس مقابل خدمتو..

إدريس:ولد لحاج لباس

نوح:(بهدوء)الحمدلله اسي إدريس ونتا الصحيحة لباس؟

إدريس:ولله الحمد هاد ساعة نشكرو الله ونحمدوه

نوح:(بجدية)كنت باغي ندوي معاك لاكنتي مسالي فينك دابا؟

إدريس:فلگاراج علاش ياك لباس؟

نوح:(بنبرتو الخشنة) الموضوع متعلق بممات محمد طه

إدريس:(ناض من بلاصتو خارج لبرا ونطق بجدية) كلثوم؟

نوح:(نطق بنبرتو الجدية)وي علمني علي بلي كلثوم متافقة هي وبدر الدين وبلي دايرين شي خطة باش هي دخل لداركوم

إدريس:(بعدم فهم)ولكن كيفااش متافقة معاه وهي فين تتعرفو أصلا هي عمرها شافتو وكيفاش تاوصل ليها؟؟

نوح:(بهدوء) فالصراحة ماعرفتش فين كيعرفو بعضياتهوم.. لقيت علي مسيفط ليا مساج عالمني بلي بدر مشى تال تازة هو وإلياس قلبو عليهاا تالقاوها وعرضو عليها تعاونهوم وهي وافقات وهاد لكلام سمعو بالصدفة نهار إلياااس كان تيسول بدر عليهاا وملي سولهوم علي قالو ليه اش كاين

إدريس:(مسح وجهو بيديه) ولكن هي مريضة فيها لكونسير فلوالدة (سكت مدة قبل ماينطق بخفوت) لمرض غير كدبة دارتها باش تخلي محمد طه يحن فيهاا؟؟ عليها عيطات ليه حيت عارفاه مغايسمحش فيها ودارت راسها ندمات باش تبتهوم

نوح:(نطق بجدية) المهم نتا رد بالك منهاا أنا باقي غايخصني نشوف علي ونعرف منو اش كاين بالتفصيل

إدريس:واخا اولد لحاج واخا

قطع إدريس معاه وهو حال عينيه وكيشوف قدامو ممتيقش اش عرف.. عارف كلثوم خبيثة ولفعة ولكن ماشي لدرجة دير راسها مريضة بكونسير وتستاغل ولادهاا باش ددخل وسطهوم عاود ودير يديها فيد داك الشيطاان..نهار كولو دوزو إدريس وهو تالف كيخمم فهادشي لي عرف.. فلويكاند محمد طه غايمشي يجيبها لهنا زفر النفس ورجع يقابل خدمتو واخا لخاطر مكاينش.. وبالو غير مع الكارثة الجديدة لي خرجات ليه من الجنب...

🔜🔜

ساط الدخان وبقا متبعو بعينيه تاتلاشى وعقلو كيخمم فهاد لمصيبة لي دخل لدارو ولي كون مكانش مضطر عمرو يخليها تعتبهاا.. مشى معاهاا فهبالها وماخلى حد يسيق خبارها من غير رنيم لي كانت عارفة بنصف الخطة وفاش مكيكونش هو فالدار كانت هي تتحظيهاا بلاماتعيق.. ونهار صدقة بنتو كانت سمعاتها وهي تادوي معااه وعلماتو بلي كايين.. وفاش نوح استفسر من علي عرف بلي هي مريضة بصح وبلي بدر الدين استاغل كرهها لرحيل لي عرفو من عاصم داكشي علاش هي وافقات باش تشتت ليهوم الشمل وماتخليش الشلحة على قولتها تفرح.. هاد لمدة كلها وهو صابر لشوفتها قدامو وحابس راسو عليها غير باش بدر الدين مايسيقش لخبار ويصدق ضارب ليهوم بلانهوم فزيروو ودابا نيت واخا سمعها إلا أنه تصرف عادي باش ماتشكش وكيف لعبات عليهوم وتمسكنات تاتمكنات تاهو غاييلعب معاها نفس لعبتهاا ولكن نهار غايسالي هاد لمرض غايحطها بوجهها قدام ولادو لي عارفهوم غايتقصحو وغايتهرسو ولكن ضروري باش يعرفو خبث مهوم وباااش يعرفو استغلالها ليهوم وديك الساعة غايخرجها من حياتو بمرة وعمرها تحلم ترجع لحياة ولادو حيت مغايخليهااش..

إدريس:(تمتم بخفوت) سبق اكلثوم وقلت ليك نهار ضوري بساحتي وساحة ولادي غانقتلللك بيدي ونتي مشيتي درتي يديك فيد لعدو ونهار غاتخلصي مغانرحمكش..

كل واحد كان مخشي فبيتو ناعس من غيرها هي لي النعاس جفى عينيهاا.. شادة التلفون فيديها تاتخربق فيه تابانت ليها واحد النوتيفيكاسيون دلمساج جاتها.. دخلات ليها وبان ليها مساج من عند علي فيه 📩"نعستي؟" تنهدات بتعب وضارت شافت فغزلان لي ناعسة جنبها وعاطياها بالضهر وناضت بالخف لايحة عليها لغطا وغادة بلحفى جهة الشرجم.. وقفات فالجنب وبقات تتنهد وتتفكر هاد ليام لي ولات تتواصل فيهوم مع علي.. من نهار طلب منها ولد بحاج تدوي معاه وهي على تواصل معاه دايرة ليه لخاطر وتاتزيد تبتو حيت عارفااه باغيها داكشي علاش تنازلات وعطاتو هااد لفرصة.. باغا تعاون إدريس أو ولد لحاج باش يتهناو من بدر ويعيشو فراحتهوم.. تتفكر فرحيل كيفاش غاتكون ردة فعلها نهار تعرفها عاودات ليهوم داكشي لي عاشتو بالتفاصيل.. غاتعصب؟ غاتقلق؟ غاتخاصم معاها؟ احتمالات حطاتهوم رنيم فبالها ومتوقعاهوم من رحيل ولكن ماعندها مادير هي عارفة عمها شيطان وتاحد مايقدر عليه والاماتحركوش غايبقا يلعب بحياتهوم بحال شي كراكيز وقتما يسالي من شي حد يصفيها ليه كيف عادتو.. تال إمتى هوما غايبقاو ساكتين فلول مشات جيداء صاحبة رحيل ضحية لي باااقي لحد الآن مقدروش يتخطاااو موتها رحيل ومحمد طه لي تتشوف الحزن فعينيه.. أول نهار شافتو فيه عجبهاا وفديك الساعة كانت باغا تجرب التصاحيب حيت عمرها جرباتو ولكن فاش صدها ومتسوقش ليها بقا فيها لحال ومع دلك بقا فدماغها فديك لوقيتة أما داباا فهي كتعتابرو بحال خوهاا وحشمانة من تصرفها معاه قبل.. لاهو ولاريان لقات فيهوم الأخ لي مالقاتوش فعاصم.. الأخ لحنين لي يسولك مالك فاش يشوفك مقلقة الأخ لي تادوي معاه وتعاودي ليه باش تتحسي.. الأخ لي مدايرش حواجز بينك وبينو لي مرة تنوضوهاا بناتكوم مرة تكونو سمنة على عسل.. ديك الأخوة لي معاشتهاش لامع ميس ولاعاصم.. عمر شي حد فيهوم حسسها بلي هوما خوتها لكبااار بلعكس كل واحد تابع غير مصلاحتوو ونساوهاا هي كبرات وفداخلها فراغ من جهة خوتها وتامها لي كانت تتشوفها قريبة ليها وفنفس لوقت بعيدة كل لبعد عليهاا.. ملي كانت تاتجي عندهوم عُليا كانت تاتشوف تصرف مها معاها وكيفاش تاتهتم بيه ورنيم كان لحقد جهة عُليا كيكبر كيفاش هي بنت ختها وتتبغيها وأنا لي بنتها مكاتعاملنيش هاكا..كانو موفرين ليها كل حاجة تبغيها لقراياا لحوايج التلفون آخر مكاااين لي حلات فمها عليه كان تيحضر ولكن هادشي كولو ماعوضهااش على حنان العائلة والراحة لي باغاا.. ديك الراحة والدفئ لي تتحس بيه وهي وسط هاد لعائلة لي رغم أديت عاصم وبدر ليهوم ولبنتهوم إلاأنه ماسمحوش فيها وحظنوهاا عاملوها بحال وحدة منهووم وعاشت معاهوم حوايج فقداتهوم فزمااان.. دوك لحوايج لي مبغاتش تفقدهوم تاني بسباب عمها لمريض.. عليها غادير لي فجهدها بااش تعاون إدريس أو ولد لحااج وأي حاجة طلبوها منها غاديرهاا على قبل مصلاحة عائلتهااا... اه عائلتهاا لي كيف هوما حظنوها ليهوم هي غادير لي فجهدها باش تحميهوم.. مكيهمش كيفااش المهم غادير لي تقال ليها بالضبط.. غاتراقب كلثوم لي عرفاتها مع بدر تتوصل لي لخبار وغاتحطهاا فعينيها وماتخليهااش ضيع منهاا وغاتعرف هوما علياش ناويين.. وتاعلي غاتمشي معاه فالخط واخا هي مباغااااش ولكن غادير هادشي كولو على قبلهاا.. على قبل رحيل

رنيم:(زفرات النفس وجوباتو بهدوء) 📩 "مجانيش النعاس"

كان متكي راسو فالكرسي ديال الطوموبيل ومغمض عينيه مكونسونطري مع داك السكات تاسمع رنة لمساج لي خلاتو يتقاد فجلستو باش يجاوبها والتبسيمة على شفتووو..

علي 📩 "علاش مانعستيش واش مريضة؟"

رنيم:(كانت متكية تاتشوف فمساجو لي باين فيه لخوف والاهتمام سرطات ريقها وجوباتو)📩 " لا غير نعست فلعشية داكشي علاش"

علي 📩 "صافي نونسك تايجيك النعاس"

رنيم 📩 "ونتا مغاتنعسش؟"

علي 📩 "نتي عرفاني مانقدرش نغمض عيني وأنا فهاد لحالة"

رنيم 📩 "واش بدر فالداخلة؟"

علي (كمش حجبانو) 📩 "علاش تتسولي؟"

رنيم 📩 "غير باغا نعرف وصاف واش عمرو شاف ميس مور ماخرجات من لحبس؟"

علي 📩 "لا مشافهااش أصلا ممسوقش ليها وبالنسبة ليه غير بروسي مغاينفعووش"

رنيم 📩" هي لي دارتها لراسها المهم غانمشي نعس دابا غدا خدامة وخصني نفيق بكري"

علي 📩" واخا تصبحي على خير"

رجعات رنيم لبلاصتها وهي تاتنهد تخشات جنب غزلان وحطات تلفونها فوق الطبيلة وغمضات عينيها باغاا تنعس واخا النعااس مكاينش حيت لعقل خدام كيخمم.. أما عند علي فهاد الشوية لي هضر معاها فالمساجات خلاتو يتبسم ويحس بالراحة فاش شافها بدات تتقبلو فحياتها.. هو أصلا على قبلها وافق يعض اليد دبدر ويخونو غير باش يحميهاا.. شاف مصلاحتو ومصلاحتهاا هي واختارهاا حيت عارف بدر كيف داير وعارف بلي واخا يكون وفي ليه حياتو كلها نهار يقضي منو لغرااض غايتهنى منو ويسوسو كيف ناوي يدير مع زكرياء..

واقفة قدام المرايا تتقاد فولاارها تاسالات ورشات ريحتهاا كلمسة أخيرة عاد هزات صاكها تادير فيه شنو غاتحتاج وخرجات من لبيت مور ماباست سيدرا نازلة لتحت.. وعلى غير لعادة ليوم لقات كلشي فااايق ومجموعين على طبلة لفطور واخا باقي لحاال.. جلسات فبلاصتها ونطقات بصوت مبحوح:صباح الخير

الكل رد عليها ورجعو تيفطرو تاشاف محمد طه فساعتو ورجع شاف فكلثوم لي حادرة راسها تتاكل ونطق بهدوء:لواليدة خلينا نمشيو

كلثوم:(بدات تتشوف فيه ونطقات بصوت خافت) غير خليها اولدي تاال مرة خرا

محمد طه:(كمش حجبانو معصب) تال إينا وقت أجلت العملية ولكن داباا لا غانمشيو ناخدو رونديڤو لي غايعطيونا ونسولو على ثمان العملية باااش ديريهاا نوووضي يالاه

كان إدريس هاز كاس دأتاي بين يديه كيسمع لكلام بلامايدخل.. هز عينو جهة ولدو وغير شاف ملامحو لمعصبين وهو يحس بواحد لغصة واحلة ليه فجوفوو.. كيشوفو معصب وهاز لهم لمو لي كاتستاغل فيه.. مكرهش يقول ليهوم اش كاين ويحطها بوجهها ولكن مايقدرش دابا... تيخمم لنهار يعرفو حقيقتها كيفااش غاتكون حالتهوم.. ناضت كلثوم تلبس جلابتها ومحمد طه خدا ساروت طوموبيل باه باش يتحرك بيها على راحتو.. خرجو من الدار ومعاهوم تاأسماء ورنيم وريان لي غادين لخدمة وبقات رحيل تتكمل فطورهاا تاسالات وهي تهز صاكها وشافت فإدريس:بابا تقدر توصلني بطوموبيلتي لخدمة ؟

إدريس:(نطق بهدوء)من ليوم مكاين لاش تمشي لخدمة

رحيل:(شافت فمها وفغزلان عاد رجعات شاف فباها ونطقات بعدم فهم) مافهمتش؟؟

إدريس:(شاف فيها بجدية) دويت مع ولد لحاج وقلت ليه غاتشدي هاد الأيام باش توجدي فيهوم لعرسك ابنتي

جلسات رحيل وقلبها تيضرب فالتسعين مجرد ماسمعات ديك كلمة لعرس.. سرطات ريقها ونطقات بخفوت:ولكن باقي ماحددناه

إدريس: باقي ماجلستش مع ولد لحاج باش نهضرو فهاد الأمور حيت عندو شي مشاكيل فالخدمة داكشي علاش نتي غاتبقاي فالدار وتوجدي على خاطرك ابنتي وماماك ولبنات غايعاونوك

رحيل:(حكات جبهتهاا ونطقات بخفوت)واخا

ناضت من بلاصتها راجعة لبيتها وهي حاسة بقلبها مزير عليها.. نهار جا لدار هو وعائلتو وقصد لحلال بقوة الفرحة والستريس نسات اش تابعها مور هاد لخطوة هادي...زولات حوايجها ورجعات لبسات بيجامتها وجلسات فالفوطوي كاتفكر فيه هو.. وفحياتها معاه كيف غاتكوون.. حاسة بالخوف والخلعة من ديك الحياة لي تتبان ليهاا مبهمة قدام عينيها.. هزات تلفونهاا داخلة لغبغطواغ تاتشوف فنمرتو لي عيط ليها مرة وحدة نهار سولها على الكادو واش وصلها.. من تما معاودش عيط ومشافتووش گاع.. سرطات ريقها وهي تاتشوف فديك "راحة روحي️" لي مدخلة بيها السمية ولي كاتحسهاا كاتنطاابق.. دخلات لواتساب من باب الفضول ولقاتو باقي حاط نفس الفوطو دزين وفاش دخلات لاديسكوسيون لقاتو مكيطلعش وقتاش كان اخر مرة.. بقات تتشوف فديك لاديسكوسيون الخاوية لي مافيها تاحرف بسهو قبل ماتخرج من عندو غادة تشونجي لفوطو دبروفيل ديالها لي كانت دايرة فيها واحد الرسمة دخلات لگالوري وبقات طالعة نازلة تاتقلب على شي فوطو ديرهاا.. تاطاحت على تصويرة كانت صوراتها فعرس رجاء.. مصورة فيها يديها وهي محنْية والضفاار كانو طوالين ومصبوغين بالگرونة ودايرة خويتمات فصبعانها وكرميط الدهب ومع هي بيضاا ديك الصباغة زادت بيضات يديها وجات مع الحناا.. دارتها فوطو دبروفيل وخرجات من لواتس وهزات عينيها جهة سيدرا لي بدات تاتكسل ونطقات بصوت مبحوح بالنعاس: مامي

رحيل:(حطات تلفونها وناضت جهتها هازاها تتبوس فيها وسيدرا تاتكسل باقي فيها النعاس) صباح لخير امامي اجي ناخدو دووش يالاه

داتها لحمام حطاتها تم ومشات جابت ليها بنوارها ولبرودويات ديالها ورجعات عندها زولات ليها لباراي باش دوش ليها وسيدرا باقي مشابعاش النعاس.. سالات ليها وخرجات من لحمام غادة بيها لبيت جبدات ليها حويجاتها وخلاتها تلبسهوم ومشات تنقي لحمام وغير سالات سيدرا رشات ريحتها تاهي ونزلات لتحت باش تفطر... كانت رحيل تتحس بالملل فالدار ولكن ماعندها مادير ماتقدرش تنزل كلمة باها الأرض تعاونو هي وغزلان وجدو لغدا حيت محمد طه وباها غايجيو يتغداو وسيقو الدار من لفوق تال زنقة وخلاوها تتشعل.. وتانيرت معاوناهوم فلحوايح لي تقدر عليهوم مع لفتيح باقي مبراش ليها كليا واخا هاكا تتحرك شوية... سالاو لبنات شغالهوم ومشات رحيل لبيتها خدات حوايجها وبرودوياتها ومشات تاخد دوش ليها تحيد بيه ريحة الطياب والشقا وخرجات تاتشعل والروايح كيتشمشو من بعيد.. نشفات شعرها ودارت ليه سيروم وجمعاتو شفينجة ينشف على خاطرو..هزات تلفونها باش تنزل لتحت ومع بركات عليه بانت ليها نوتيفيكاسيون دلواتساب كمشات حجبانها وغير حلات التلفون قلبها رجع يشطح الرگادة وعينيها تبلوكااو على السمية ديالو لي طالعة فالشاشة "راحة روحي" مسيفط ليها مساج فلواتس.. بركات عليه وغير دخلات لديسكوسيون وهي تبان ليها كلمة وحدة مكتوبة بالعربية..عينيها تفيكساو عليهاا وهي تتقراها بصوت عالي: حيديها..

لثواني بقات واقفة تاتشوف فديك الكلمة بعدم فهم.. تتقراها وتعاودها ومعرفاش هو اش قصد بيهاا.. تمشات جهة النموسية وهي تجلس ورجعات شافت فديك لكلمة ونطقات بصوت خافت: علياش كيهضر؟؟

عضات على شفايفها وبدات تاتكتب ليه مساج باش تسولو تاحبسات وهي مكمشة حجبانهاا تتشوف فالتوقيت دلمساج وعاد فهمات اش قصد.. وبلا عناد منها مشات لبروفيل وبدلات التصويرة لي كانت دايرة بوحدة خراا دسيدرا وهي باقي صغيرة هازة واحد نونوس ومبسمة لكاميرا ويالاه عندها السنينات القدامين.. رجعات لاديسكوسيون تتشوف فيها وبلاماتشعر تبسمات من ديك لكلمة لي حسساتها بواحد النشو'ة غريبة... تخيلاتو واقف قدامها وعاقد فيها حجبانوو وناطق ديك لكلمة بصوتو الجوهري الخشن لي كيخلي الفراشات يلعبو فكرشها.. تلاحت على ضهرها فوق النموسية وهي باقا مبسمة وديك لغيرة لي حسات بيها من ديك الكلمة وشحال رضاات غرورها الأنثوي وخلاتها تحس براسها غااالية عندو... عضات شفايفها بشقاوة وهي تاتكتب ليه مسااج باش تجاوبو على كلمتو

رحيل 📩حيدتها

طلعو ليها زوج شراطي بمعنى راه أون لاين وبقات تاتسنى بقلب ملهوف تشوف جوابو وباش ماتبااانش بلي ملهوفة قدامو خرجات من لاديسكوسيون طالعة نازلة فداك لعدد القليل دالناس لي عندها فلواتس تاطلع ليها مساج تاني من عندو وهي تنووض بزربة وقلبها رجع تايدق بعنف.. صبعها مشى ديريكت لاديسكوسيون وكليكات عليها وهي تبسم فاش قرات جوابوو

نوح 📩الله يرضي عليك الفثنة

ديك الجملة على قد ماكانت بسيطة على قد ماحركات فيها حوايج صعاب يطفاو.. مشاعرها وأحاسيسها لي تيحياو فوجدو هو فقط.. كاتولي تعيش مشاعر عمرها فحياتها داقتهوم.. رجعات شافت فديك الجملة وباش ماتخليش ليه ڤو سيفطات ليه إيموجي 📩 "😊" وخرجات من لواتسااب..غادة لتحت وهي راسمة تبسيمة خفيفة على شفايفهاا وعينيها كيلمعو لمعاان خااص...

***

حيت إلتقيتك عاد قلبي نابضاً

وجرى هواك بداخلي مجرى دمي

وشعرت حظنك دافئاً ورأيتني

رغم الحياء أذوب فيه وأرتمي

قلي أيا رجلاً لأي قبيلةٍ

ولأي عصرٍ أو لجنسٍ تنتمي

ولمن تعود أصول عينيك التي

أضحت قنادل الضياء بعالمي

***

خارج من لحمام كيمسح وجهو بلفوطة ويديه لي مضروب فيها عاطيه لحريق.. تمشى جهة الدريسينغ وجر لمجر خاص فين كاين الفوصمون والدوايات وجلس فالكرسي وبدا يفك فديك الفاصمة لي ملوية على يديه تازولها ولاحها فلبوبيل وشاف فراحة يديه لي كانت مغرزة كلها.. سمع لحس وضار بانت ليه بيسان لي نطقات بتبسيمة:كنت تاندق مي ماسمعتينيش

نوح:(نطق بهدوء)جابك الله اجي ديري خدمتك

قربات جهتو وهي مكمشة حجبانها تتشوف فديك الدقة لي كانت كبيرة وبدات تاداويها ليه تاسالات ودارت ليها فاصمة مقاداها مزيان على يديه كلهاا ونطقات بهدوء: غايخصها وقت باش تبرا حيت الدقة بانت ليها غارقة

نوح:(جرها عندو باسها فحنكها ونطق بحنان) غادة لخدمة؟

بيسان:اه جيت باش ندوي معاك فواحد الموضوع

نوح:(شاف فيها بجدية)لي هو؟

بيسان:(رجعات شعرها ورا ودنيها)مأخرا لاحظت بلي كاين واحد طوموبيل كاتبعني فيما مشيت فلول قلت يمكن غير كانتخيل مي مأخرا وليت تانشوفها فيما مشيت وقلت نجي نعلمك

نوح:(مكمش حجبانو وقال بجدية) اينا نوع دطوموبيل؟

بيسان: فيااط فالرمادي

نوح:(جرها درعها ونطق بهدوء) مكاين لاش تخافي هادوك من لمعارف ديالي

بيسان:(شافت فيه ونطقات بتساؤل)ولكن علاش تابعيني؟

نوح:(بجدية) ماتشطنيش راسك فهادشي ابيسان وديها فخدمتك تفاهمنا

بيسان:واخا حبيبي

نوح:(باسها فراسها وقال بحنان) ردي لبال لرااسك بيسان: واخا حبيبي بسلامة

باستو فحنكو ومشات لخدمتها حيت عندها لگارد فالليل ليوم.. أما نوح خرج من الدريسينغ غادي جهة تلفونو حلو وبانت ليه رحيل مخلية ليه إيموجي.. تبسم تبسيمة خفيفة يادوب بانت على شفايفو وجلس فالفوطوي وهو هاز تلفونو كيشوف فديك التصويرة لي كانت دايرة ديديهاا.. بقا كيزوميها وهو مكمش حجبانو كيدقق فيها وفضفيراتها لي كانو طوالين ومصبوغين والحناا لي بانت حمرا عاكسة بيوضية يديهاا.. خرج من ديك لافوطو ومشى لتصاور لي كانت سيفطات ليه بيسان نهار مشاو عندهوم لدار.. كانو زوج تصاور درحيل برك على لولة لي كانت جالسة جنب إدريس شادة فيديه وحادرة راسهاا.. والثانية كانت فاش كانو تيتعشاااو جالسة وعاطية بوجهها جنب شوية مبسمة تاتغمضو عويناتها شوية ولحنيكاات بااانو.. بقا تيزومي على ديك التصويرة وكيدقق فيهاا بسهو قبل ماينوض يبدل حوايجو..

راجعة من الخدمة على رجليها ومن وجهها باين فيها بلي ماشي على مودها.. وقفات عند البقال وخدات قرعة دلماا عاد كملات طريقها ومع وصلات لحومة سمعات صوت لكلاكسون وضارت بانت ليها طوموبيل علي.. تنهدات بتعب وهي محاملاش شوفتو فهاد اللحظة حيت عارفة هو اش باغي.. بركات على أعصابها ومشات جهتو حلات الباب ودخلات جلسات ونطقات بهدوء:شنو باغي؟

علي:(قلب وجهو جهتها ونطق بنبرة قاصحة)علاش مكتجاوبينيش؟؟

رنيم:(ببرود)ماشفتووش

علي:(ضحك ببرود)على من تاضحكي هممم ربعين أبيل ومشفتي تاوحدة منهوووم هااا (خرج عينو فيها) علاش مبغيتيش تجاااوبي ارنيم

رنيم:(نطقات بانفعال)حيت مابغيتش فهمتيهاا

علي:(ضرب يديه على لڤولون ونطق بصوت معصب)علاش همممم اشنوو طرا تامبقيتيش باغا تجاوبيني

رنيم:(شدات راسها بيديها وفنفسها تتقول)حيت مباغااكش ومباااغااش نسمع صووتك (وبصوت مرتافع نطقات) بغيت نرتاح واش عندك شي مشكيل

علي:(قرب وجهو لوجهها تابعدات ولصقات فالباب ونطق بنبرة باردة خلعاتها) ترتااحي مني ارنيم هممم (رجع ضرب يديه فلڤولون وغوت) ترتاااااحي مني أناااااا ازب*ي

رنيم:(شدات صاكها ونطقات بخوف)لهضرة ماتفيدش ونتا معصب

مدات يديها تحل لباب وهو يشدها من معصم يديها بحال لقااط بارك عليهاا تاحسات بيهاا غاتهرس ونطق بنبرة قااصحة:مغاتمشي فين وحنا باقي مسالينا

سد الطوموبيل أوطوماتيكمو ودمارى مقلع مخليهاا تغرق فبلاصتها وقلبها تيضرب خااايفة منو وهي عارفاه علاش قاااد.. عارفة بلي هو ماشي نوغمال وملي شااف تجاهلهاا جعر.. غادي فالطريق وهي شادة فالكرسي وعينيها على ديك السرعة لي غادي بيه ولي خالعها معارفااش فين غاادي بيها وشنو غايدير فيهاا.. مسافة طويلة تاوصل لواحد لبلاصة خاوية حس لبشار مافيهااش.. حبس الطوموبيل ورنيم خرجات عينيها ونطقات بخوف:فين جايبني؟؟

خرج من الطوموبيل وتمشى جهتها حل لباب وشد يديها مخرجها بزز منها وغوت فوجهها مخيخ: علياااش تتقلللبي هااا ااش هاد لفعاااايل دلقح*ااب وليتي تاديريهوم

رنيم:(قلبها كيضرب ونطقات بكدب) واش غير حيت مجاااوبت وليت تاندير فعايل واش نتااا مريض فدماااغك باغي تلقااا ليا غير السبة

علي:(شدها من يديها ونطق مخنزر فيها) نتي لي علياااااش ناااوية ارنيم هممم نتي عارفاااني غدرت بدر ودرت يدي فعدوووه غير على قبلك

رنيم:(نثرات يديها ونطقات بغوت) هادشي ديرو على قبل رااااسك بعدااا ونقي راااسك من لوسخ لي كنتي عاااايش فيه والنااااس لي خرجتي ليهوم على حياااتهوم

علي:(حرك راسو بهسترية)ااااااه أناا موسخ وحيااااتي عشتهاا غير فلوووسخ وهاكا أنااا دااااير ونتي عارفة كلشي مكااااين لاش تهبااالي وتنسااااي بلي تاااانتي جيتي من داااك لوووسخ وبلي عائلتك كلهااا غارقة فيه عمك خوووك مك ووختك كلكووووم بحاااال بحااال وتااانتي منهوووم

رنيم:(غوتات) لا مااااشي منهوووم أنااا عمري كنت بحاااالكوووم نتوماا لي كنتوو غااارقين فالوووسخ عدبتوو شحاااال من واااحد وقتلتووو شحااال من رووح عااايشين فالحرااام وغارقين فيه وأناا عمري كنت باغاا ديك لعيشة حيت ماااشي من سهمي عمررري كنت باغاا نبقاا تحت جناااح داك لمريض دبدر ولاعااااصم وتاااانتااا لي بحالك بحالهوووم مريض فمخك وقلبك كحل

غير ختمات كلمتها وهي تحس بوجهها تقلب فااش صرفقهاا.. مباغيش يسمع منها داك لكلاام لي حااس بيه كيزيد يمرضوو.. هو كبر فداك لوسط وعاااش فيه وخدم فيه ودار شحااال من حاجة خايبة وباقي كيديرهاا لحد الآن وفاش سمع هاد لحقيقة منهاا تعصب وجن.. شدها من شعرها لور مخلي وجهها يجي فاص من وجهو وعنقهاا حسات بيه شوية ويتهرس من ديك الشدة لي داير ليها.. قرب جهتها ونطق معصب: وحيت قلبي كحل نتي مخصكش تلعبي معاياا حيت مغايعجبكش اش غاندير فيك ارنيم سمعتي

رنيم:(دموعها نازلين وحنكها تايوزوز وبصوت باكي نطقات)اش غادير غاتقتتتلني مثلااا كيف مولف دير

علي:(تبسم بسخرية) القت'يلة غاتكووون رحم من داكشي لي غاندير (دوز يديه على حنكها) ماتنساااايش بلي بدر لاعرف الخطة لي نااااوين عليهاا مغايرحم تاوااحد فيكوووم وكنظن نتي عارفاااه علياش قاادر عليها الزوينة ديري عقلك ومتلعبيش معايا واخااا (همس ليها بنبرة باردة) ودابا ختاااري ياتكوني معايااا بزز منك ياااا بدر الدين غايعرف گاع داكشي لي ناوين ديروه..

طلق منها بلامايشوف فيها مشى جهة طوموبيل ركب وتحرك من تم مخليهاا واقفة تتبكي وتشهق.. تاطاحت على ركابيها وهي مخلوعة من كلامو.. شافت جهة صاكها لي طايح فالارض وجبدات تلفونها دوزات الخط تاتسمع صوت الطرف الثاني وهي تنطق ببكاء: عمي إدريس..

بدا الظلام تيطيح ورنيم باقي واقفة وحاضنة صاكها وعينيها كيضورو هنا ولهيه بخوف.. ملي مشى مارجعش خلاها بحال لاكيعاقبها على تصرفها لي دارت فحقو.. قلبها غايخرج من بلاصتو وهي غادة فالشانطي كاتسنى إدريس يجي تابانت ليها طوموبيل تاتسينيالي جهتها وغير شافتها قلبها قفز وخصوصا فاش وقفات الطوموبيل جنبها وتحل بابها.. بدات تترجع بلور وهي حاضنة على صاكها بالجهد تابان ليها رؤوف هو لي خارج من الطوموبيل وكيف لعادة لابس لبيض.. طلعها ونزلها وهو غادي جهتها كيشوف فشعرها لمشنتف وفوجهها لي الخلعة باينة فيه من عينيها لغارقين وشفايفها الصفرين ولي جنبهوم كاين الدم.. وقف قدامها ونطق بهدوء: طلعي

رنيم:(حركات راسها بلا) غايجي عندي عمي إدريس و

رؤوف:(قاطعها بملل)هو لي سيفطني طلعي

سبقها وهي بقات تاتشوف فيه من ضهرو تاضار جهتها ونطق بسخرية:عجباتك الوقفة هنا طلقيناا الأخت

قربات تاتزرب لجهتو تاوصلات لجهة الكراسى لورانين ومع حلاتو نطق رؤوف هاز فيها حاجبو: شيفور باااك أنا جلسي لقدام

خنزرات فيه وسدات لباب لوراني وجات لقدامي جلسات وهي ساكتة أما رؤوف رجع خدم الموسيقى ديالو لغربية مرجع الطوموبيل بحال شي ديسكو وغادي مزك ورنيم مكمشة حجبانها وصداع لموسيقى ضرها فراسها لي أصلا كيضرها بقات ساكتة مدة قبل ماتنطق بشوية:واخا تنقص عفاك الموسيقى شوية

ماسمعهاش حيت كان مركز فالطريق وهي دوات غير بشوية.. زفرات النفس ورجعات شافت فيه ونطقات بالجهد:واخا تنقص الموسيقى ضراتني فراسي

رؤوف:(ببرود) لاضرك راسك خودي دوليبران

رنيم:(خنزرات فيه) قليل الآداب

رؤوف:(ممسوقش) خلينا ليك الآداب (وبسخرية) وتالعلوم الفيزيائية

سكتات رنيم وهو كمل الطريق مدة بلاماينقص ديك لموسيقى لي حساتها طبخات راسهاا أو وذنيها لي كيطنطنو.. ماوصلها تاغفر ليها ربي الدنوب.. نزلات من الطوموبيل بلاماتحاشيها ليه ولاتخسر عليه شكرا.. خنزر رؤوف وجبد واحد الريحة عندو صغيرة تما رشها وغمض عينيه شمشها ونطق بخفوت: نضفوو لجوو لملوث

جبد تلفونو ودوز لخط لنوح وغير جاوبو وهو ينطق بهدوء جدي:راني وصلتها اخوياا محتاج مني حاجة خرى

نوح:(بجدية) لا رجع لمكازان ورد بالك

رؤوف:هي لولة اخوياا

---

دخلات رنيم ديريكت لبيتها بلامادوي مع حد واخا رحيل حاولات تسولها فين تعطلات ولحالة لي جات ليها معجباتهااش.. بدلات حوايجهاا وجلسات فالنموسية تتشوف فمساج علي لي سيفط ليها 📩 "القرار بين يديك"

رنيم:(بخفوت) الله ياخد فيك الحق (كتبات ليه مساج ودموعها فعينيها) 📩 "غانبقا معاك"

لاحت التلفون وبدات تتبكي تاتحل لباب عليها ودخلات رحيل لي غير شافتها تخلعات عليها.. قربات جهتها عنقاتها وبدات تاتسكت فيها تاحبسات دموعها وقالت رحيل بحنية وهي تتقيس وجهها:مالكي فين كنتي تعطلتي وتلفونك طافي

رنيم:(بكدب باش ماتخلعهاش)تعطلت حيت وقفو عليا شي شفارة وكانو باغين يگريسيوني وغير عاوني واحد الراجل

رحيل:(بخوف) دارو ليك شي حاجة؟

رنيم:لا داك الراجل عاوني قبل ماياخدو لي عندي داكشي علاش تعطلت

رحيل:حبيبة غاتكوني مخلوعة دابا اجي تاكلي شي حاجة وماتبقايش جالسة وحدك

رنيم:واخاا غير سبقيني

مشات رحيل ورنيم بقات جالسة مدة عاد ناضت خارجة من بيتها..

كانت جالسة كلثوم معاهوم وعينيها على تلفونها وداك لمساج لي وصلها من بدر الدين فيه 📩 "وجدي راسك من هنا يوماين خطتنا غاتنفد وغدا غاتوصلك الأمانة ديالك"

عينيها تبسمو وناضت بالخف غادة لبيت أسماء دخلات وكيف لعادة طرقات لباب ودوزات لخط لبدر لي جاوبها ببرود: شبغيتي؟

كلثوم:(تبسيمة خارجة من عينيها)واش صافي وصل لوقت لي غانديرو لخطة ديالنا ابدر الدين

بدر الدين:(بهمس كالفحيح) واياااك تغلطي فشي حاجة اكلثوم وتخليهوم يعيقو بيك سمعتي

كلثوم:(تادوي وعينيها على لباب) متخافش تاحد معايق بيا وزايدون مزيان فاش حددتي نهار قبل ماندير العملية وماتلقى لي يعاونك فشنو باغي

بدر الدين:(ضحك بسخرية) ملي تنفدي لي بغيت عومي فبحرك

كلثوم:(بطمع) وفلوسي لي تافقنا عليهوم نتا عارف بلي هادشي لي كاندير فيه كيكلف كثر ملي تافقناا عليه ابدر الدين

بدر الدين:(ضحك بالجهد ونطق بهدوء) اش غانتسنى من وحدة غدرات ولادها ههه فلوسك غايوصلوك مع الأمانة لي غاتشدي غدا

كلثوم:(تبسمات بشر) واهاكا مزيان نتاا تستافد وتولي رحيل ليك وأنا نحرق قلب الشلحة ونرد دقتي ليها

بدر الدين:مكيهمنيش نتي اشنو باغا ديري لي مهم عندي هي عمو ديالي تكووون معاياا ولبااقي يقووود

كلثوم:ايوا صافي تفاهمناا دابا شكون غايجيب ليا الأمانة وكيف غاندير نخرج باش نجيبهاا؟؟

بدر الدين:(ببرود) ضبري كر*ك وحدة بحالك مغاديش تجيها صعيبة تلقى كدبة صغيرة بحال هااديك

قطعات معاه وكيف لعادة مسحات لزابيل ولمساجات.. أما عند بدر كان مرجع راسو لور تاسمع إلياس نطق: هاد كلثوم طيحات راسها فبير غارق

بدر الدين:(نطق بسخرية) مكلخة عند بالها داك الدوا لي غايوصلها غير منوم وهي معرفاااهش بلي راه هو سم كيق*تل

دخلات كلثوم لبيت أسماء وكيف لعادة طرقات الباب عليها وتمشات ديريكت جهة النموسية وهزاتها تابانت ليها واحد لخنيشة وخداتها عاد نزلات النموسية وجلسات فوقها وهي تحل ديك الخنيشة وجبدات منها زوج قريعات ديال الدواا فيهوم سائل فلداخل.. وحدة كانت صغير ولخرا كبر منها بشوية.. بدات تتشوف فيهوم بهدوء عاد هزات تلفونها ودوزات لخط ثاني لبدر الدين وبقات تتسنى مدة تاجاوبهاا ببرودو المعتاااد: شنو باغا؟

كلثوم:(بهمس) الأمانة وصلاتني ولكن مافهمتش علاش زوج قريعات ؟

بدر الدين:(بجدية)حلي دمااغك معاياا لقرعة لي صغيرة غاتحطي فيها لعمو ديالي بوحدهاا ولقرعة لكبيرة غاتحطي فيها لمالين الدار كاملين (كمل بصوت قاصح) واياااك اكلثوم تغلطي فشي حاجة وتصدقي ضاااربة ليا لبلان فالزيرو

كلثوم:(جلسات فوق النموسية) ولكن علاش فرقتيهوم ياك بزوجهوم فيهوم منووم

بدر الدين:(زير على يديها عصباتو وببرود جاوبها) لقرعة الصغيرة مفعولها قوي والاشرباتو عمو مغاتفيقش تاتكون وصلات عندي..مغاديش تفيف فالطريق ويوقعو لينا مشاكيل ودابا بلاقوة لفهمااات الخاويين وديري لي تقال ليك بلحرف وبلاماتفكري ديري شي حاجة من راسك لانصدق مقووودها معاااك

كلثوم:(بخوف من كلامو)واخا صافي كون هاني

بدر الدين: هاد ليلة غاتنفد الخطة والبقية غانعلمك بيه من بعد

كلثوم:صافي واخا

قطعات معاه وهي تاتشوف فدوك القريعات.. هزاتهوم وخباتهوم فصدرها باش يكونو قراب ليها وبقات جالسة تتفكر كيفاش غادير بش تعطيهوم هاد لمنوم ليوم وبالليل..هزات كتافها ونطقات ببرود:يعطاا الله كيف ندير لي كيهم دابا هو الخطة تكمل وبدر الدين يدي رحيل ويحرق قلب الشلحة كيف قلبي تحرق..يوماين وأنا كنتسنة يجي هاد النهار وهو وصل داك النهار فين نشوف فيه الشلحة تتخلص اش دارت فحقي..

ناضت خارجة من بيت راسمة ملامح عادية مخبية بيها ديك لفرحة ولخبث لي فداخل ديالهاا كلما تفكرات بلي الليلة كلشي غايتقلب.. عينيها على رحيل لي كانت جالسة جنب تانيرت مبسمة تاتمشط ليها على شعرها بيديها وهي مبسمة بلخف وفنفسها نطقات:غير ودعي بنتك الشلحة حيت هاد النهار غايكون اخر نهااار تشوفيها فيه حياتك كلها..

أسدل الليل ستاره الجو كان مبرد هاد الليلة والسماا كانت صافية..مجموعين فالصالة لوسطانية ومعاهوم تاإسلام كيتعشااو والضحك وتقشاااب بناتهوم وسيدرا ضور ضور وتوريهوم شعرها لي قطعاتو ليها ليوم غزلان تال فوق كتيفاتها مخلياها تفرح بيه ويتفوه عنقها وتارحيل خلاتها تفرح بلاكوب الجديدة

سيدرا:(همسات لرحيل)مامي علاش ماقطعتيش شعرك تانتي

رحيل:(بجدية)ماشي دابا امامي تال من بعد ونقطعو

سيدرا:اتقطعيه بحالي ياك

رحيل:هه ماشي نتي راه كرجتيه هه

عنقاتها سيدرا ورحيل تبسمات ليها ورجعات تاتعشيها تاسالاو وناضو لبنات يجمعو الطبلة..

ريان:(مكسل فوق السداري) الله ليوم السبت وغداا غانشبعو النعاااس

رنيم:اش بان ليكوم نسهرو ليووم؟؟

أسماء:واييه توحشت صراحة السهير نديرو شي سيري ونتفرجو فيه كاملين ياك ابابا

إدريس:(تبسم ليهوم) ديرو لي عجبكوم ابنتي

رنيم:غانوض نصاوب ليكوم لكلية وشي عصييير نبردو بيه

كانت كلثوم ساهية تتفكر فكيفااش غاتنفد خطتها هاد ليلة تالقطو ودنيها كلام رنيم والتبسيمة بانت على شفتهاا ونطقات بهدوء:نتي وجدي لگلية وأنا نوجد لعصير باش مانتعطلوش

محمد طه:فين غادة الواليدة خليك رتاحي هالبنات يوجدو لي خاص ماتصدعيش راسك

كلثوم:(تبسمات ليه بهدوء) النهار كامل وأنا جالسة مكنحرك المعلقة من بلاصتها مافيها باس لاصاوبت ليكوم لعصير

محمد طه:واخا ديري لي بغيتي

مشات كلثوم لكوزينة لقات رنيم تاطيب الگلية تبسمات ليها ومشات تتجبد الديسير باش دير بيه لعصير.. جبدات لي غاتحتاج وبدات تقشر ودير فمولينيكس ورنيم طيبات لگلية وحطاتها فواحد زوج طباسل كبار ودارت تالشيبس حطاتو وهزات صينية وشافت فكلثوم:نعاونك؟

كلثوم:لاابنتي أصلا بقا ليا غير نطحنو وصاف

رنيم:واخا

خرجات رنيم وكلثوم زربات طحنات العصير وكبات كااس كبير لرحيل وحطاتو فوق البوطاجي وضارت تاتشوف جهة لباب وقلبها تيضرب بالخلعة وهي تاتجبد فصدرها دوك لقراعي.. خدات الصغيرة لي قال ليها بدر وكبات فيها شوية فلكاس درحيل وهي رادة لبال لايجي شي حد وغير سالات خشاتها تاني فصدرها وحركات الكاس بالمعلقة وكملات تاطحن العصير لاخر وزادت فيه بوعويد بلعاني حيت عارفة رحيل مكيعجبهاش لبوعيد فالعصير ومكتشربوش فيه.. مشات بشوية تاطل من لباب مبان ليها حد ورجعات تاتجري جابدة لقرعة لكبيرة وكباتها فداك العصير لي بقا ورجعاتها بلاصتها وحركاتو عاد زفرات النفس وهزات لكيسان وبدات تتكب فيهوم لعصير ودايرة تابحسابها باش مايشكوش فيها.. هزات الصينية وزفرات النفس قبل ماتخرج من الكوزينة غادة لصالة لقاتهوم جالسين ودايرين لفيلم لي غايتفرجو فيه وحبسوه تاتجي.. حطات الصينية فالطبلة وهزات كاس رحيل ونطقات بهدوء: درت فيه بوعويد وعرفاه مكيعجبكش فالعصير

رحيل:(شدات لكاس وتبسمات) شكرا ليك

فرقات لكيسان لخرين على لبقية وهزات كاسها ومع جلسات سمعات صوت إدريس لي نطق ببرود: وصلات بيك اكلثوم تحطي لينا السم فلعصير..

شهقات كلثوم وخرجات عينيها فإدريس لي كان باقي هاز لكاس بين يديه كيشوف فيها ببرود بينما البقية كانو كاملين تيشوفو وعلى وجههوم علامة استفهاام..

إدريس:غزلان دي سيدرا لبيت

حطات غزلان كاسها وناضت شادة لسيدرا يديها لي نطقات:بغيت عصير

غزلان:دابا نصاوبو ليك اجي معايا

مشات غزلان مع سيدرا وإدريس كان مفيكسي شوفاتو غير فكلثوم لي وجهها صفار بالخلعة وقلبها كيضرب بالجهد.. كلامو لي نطق بيه زعزعها ونطقات بهدوء: مافهمتش اش تتقصد اإدريس

داك لهدوء لي نطقات بيه كانت مخبية وراه توثرها لي باين فعينيها ويديها لي كيترعدو.. ولبقية تاحد ماهضر حيت مفاهمينش اش كاين؟

إدريس:(خنزر فيها وهز لكاس لي بين يديه زف بيه فالارض تاتهرس فوق الزربية وتشتت الزاج ونطق بعصبية) عند بالك معارفش اش كطبخي من ورايا نتي وداك لحيوان دبدر الدين الجوهري

مجرد ماتسمع سمية بدر الدين لعيون كلها تحلات بصدمة ورحيل كانت جالسة وحاسة بجسمها كولو منمل عليهاا وقلبها تزير عليها مخلي غصة تكون فحلقهاا.. وحالة عينيها وتتنفس بالجهد..

ناض محمد طه من بلاصتو ونطق وهو مكمش حجبانو:لواليد نتا اش كاتقول

إدريس:(شاف فمحمد طه ونطق بهدوء) لي سمعتيه مك دارت يديها فيد داك الشيطااان ودخلات لعندناا باش تعاونوو

محمد طه:(حرك راسو بلا ونطق بعدم فهم) ولكن هي كيفاش غاتعرفو وأصلا هي مريضة و

سكت محمد طه وعينو على كلثوم لي كانت جامدة بلاصتهاا وممتيقاش بلي خطتها فشلات وبلي إدريس عااق بيها.. قرب جهتها محمد طه وجلس قفازي شاد يديها ونطق بهدوء: الواليدة علاش ساكتة نتي مادرتيش هادشي ياااك؟

مسح إدريس على وجهو وهو معصب محاملش يشوف ولادو فهاد لحالة وهو عارف بلي غاتجيهوم الدقة صعيبة بزااف.. ضار شاف فأسماء لي كانت جالسة بلاصتها وعينيها على مها تاهي تاتسناها تنكر وتقول بلي هادشي ممنوش وبلي هي مظلومة.. رجع شاف فرحيل لي كانت كلها تترعد أو وجهها مسقوط منو الدم وزادت عصبيتو بانت فملامح وجهوو.. وشي لي كان تيخمم فيه هو نهار توصل هاد اللحظة ويتعرى فيه وجه كلثوم قدام ولادها كيفاش غايكونو مشاعرهوم..

إدريس:رنيم

حركات رنيم راسها وفهمات اش قصد ومشات تتجري لكوزينة وبعد مدة رجعات جايبة تلفونها ومداتو ليه على لفيديو لي كان مسجل.. شعلو وبانت ليه رنيم واقفة تتقاد التلفون بين ديكورات لي محطوطنين فوق البوطاجي مخبياه مزيان وبدات تاتصاوب لگلية تادخلات كلثوم وبداو يهضرو شوية خرجات رنيم وتما بانت ليه كلثوم فاش طحنات لعصير وعزلات درحيل وخدات شي حاجة من صدرها كباتو فيه ورجعاتو وكملات لعصير لي بقا وتاهو دارت فيه شي حاجة..كان الفيديو مسجل كلشي وإدريس غير شافو كمش حجبانو وقرب جهة كلثوم لي ماتحركاتش من بلاصتها وتاعينيها مارمشاتهومش.. ضور ليها التلفون وشعل تاني لفيديو وهي هزات عينيها تاتشوف فيه بهدوء وهي حاسة بجدران تباتها بداو كيريبو شوية بشوية.. بينما محمد طه كان تيشوف بعيون محلولة بصدمة ودهول.. سالى لفيديو ومحمد طه شاف فكلثوم ونطق بصوت تقيل: لواليدة

مد إدريس التلفون لرنيم لي جبدات التسجيل لي مسجلاه ليها ليلة لي عيط ليها بدر الدين طلقو قدامهوم تاتسمع صوت كلثوم فقط..

⏪كلثوم:(تبسيمة خارجة من عينيها)واش صافي وصل لوقت لي غانديرو لخطة ديالنا ابدر الدين (الصمت) متخافش تاحد معايق بيا وزايدون مزيان فاش حددتي نهار قبل ماندير العملية وماتلقى لي يعاونك فشنو باغي(الصمت) وفلوسي لي تافقنا عليهوم نتا عارف بلي هادشي لي كاندير فيه كيكلف كثر ملي تافقناا عليه ابدر الدين (الصمت) واهاكا مزيان نتاا تستافد وتولي رحيل ليك وأنا نحرق قلب الشلحة ونرد دقتي ليها (الصمت) ايوا صافي تفاهمناا دابا شكون غايجيب ليا الأمانة وكيف غاندير نخرج باش نجيبها؟⏪

مجرد ماتحبس التسجيل كل لعيون تعلقو فكلثوم بصدمة وتانيرت كانت تاتشوف فيها بنظرة غاضبة وحاقدة.. ليوم فاش صارحها إدريس وعاود ليها كلشي وهي مقدراتش تيق بلي كلثوم وصلات بيها لدرجة تستاغل مرضها أو ولادها باش تنتاقم منهوم.. بزز باش شدات راسها هاد النهار ومبيناتش ليها غير حيت إدريس طلب منهاا.. أما رنيم فكانت جالسة وعقلها سرح بعيد..

🔙🔙

ملي خرجات رحيل من عندها بقات جالسة شوية فبيتها قبل ماتنزل لتحت ومع حلات لباب عينيها تفيكساو فبيت أسماء لي كاتنعس فيها كلثوم.. عضات على شفتها وتمشات بشوية حلات لباب ودخلات وهي تاضور هنا ولهيه.. جبدات تلفونها دارتو سيلونس باش مايصونيش وبدات تتقلب فين تحطو تاختارت تحت البلاكار.. خشاتو مور ماطلقات لونغجيستخومو وتأكدات بلي مغايبانش وبدات تادوي بشوية وتتجرب واش غايتسمع التسجيل.. جبداتو وسمعات التسجيل لي كان واضح واخا الصوت ناقص مي حسن من بلاش.. رجعات حطاتو مور مقاداتو وخرجات من لبيت نازلة لتحت وهي كادعي لخطة ديالها تنفع وتصدق.

🔜🔜

إدريس:(واقف قدام كلثوم وبصوت بارد نطق)نهار دخلتي فيه لهاد الدار كنت عارف كلشي ومخليك تلعبي على خاطرك اكلثوم..

قدما خبيتي غايجي النهار لي غاتفضح فيه سوى ليوم سوى غدا.. كلثوم مافكراتش فنهار غاتحط بوجهها قدام ولادها حيت حقدهاا كان طاغي عليها وعمى عينيها وأهم حاجة عندها هي ترد دقتها وتنتاقم من تانيرت وتخرج ليها على حياتهاا.. فاش شافت راسها فشلات لمرة لولة قررات دير يديها مع بدر الدين لي طمعها بكلامو وفاش عرفات نيتو جهة رحيل وافقات وبهاكا غااتمرض تانيرت فحياتها وغاضربها ببنتها.. دارت كلشي باش تخليهوم يتيقوها ونهار دخلات لهنا فرحات حيت لي خططو ليه وقع وكانو قرايبين من تنفيد لخطة لي فشلات فالدقيقة التسعين.. زيرات على يديها حادرة راسها ومانطقااتش وسكاتها هادا خلى محمد طه وأسماء يتعصبوو.. ناضت جهتها أسماء وغوتات بعصبية:هضررري علاش ساكتة قووولي شي حاجة هضري برري ليناا نكررري اشنو تقااال عليك ماتبقاااايش ساكتة دوووي (جلسات على ركابيها شادة يديها ونطقات وعينيها مدمعين وصوتها مبحوح) قولي بلي نتي مادايرااش يديك فيد داك لحيوااان لي خرج على حياتنا قولي بلي بابا فاهم لموضوع غااالاااط (شافت فإدريس وهي تتبكي)نتاا غالط ابابا ياااك هي ماتقدرش ديريهاا وتستااغلناا حنااا(تتشير على راسها وعلى محمد طه بهسترية)حناااا ولادهاا بصح هي غلطاات قبل ولكن هي ندمااات وطلبات السماحة منا ومن خالتي تاانيرت ياااكي (تتحركها فكتافها بالجهد وتغوت) هضرري ماتبقاااايش ساااكتة امامااا هضرررري

بعدات عليها أسماء وسكتات وهي تتبكي وتشهق ممتيقاش بلي مها توصل بيها لهاد الدرجة اه عارفة كاتكره تانيرت وسبق أداتها ولكن فاش شافت الندامة فعينيها وعرفات مرضها قالت أكيد هي تبدلات ساعة عمر الشطاح ماينسى هزة الكتاف.. ناض ريان غادي جهة أسماء لي طايحة فوق الزربية تتبكي ومغطية وجهها بيديها ونوضها غادي بيها لسداري تاجلسات وعنقها مخليها تبكي فصدرو.. زير إدريس على يديه وبكا بنتو وصدمة محمد طه ورحيل لي بقاو ساكتين خلاتو يجعر على كلثوم..

إدريس:(غوت عليها صاعر) صافي هادشي لي كنتي باغا تشوفي ولادك تيبكيو ويمرضو فصحتهوم بسبااابك

تانيرت:(قربات جهتو ونطقات وهي شادة فكتفو)إدريس تهدن عفااك ورد بال لصحتك(خنزرات فكلثوم ونطقات بحقد) وحدة بحاالها مغاديش تفيد لهضرة معاهاا سبق وغلطات فحقنا وحنا سمحنا ليها ودرنا بوجه ولادها وهي استاغلااتهوم باش تنتاقم منااا

كانت كلثوم ساكتة وتتسمع ليهوم ومجرد ماسمعات كلام تانيرت والسيدة ولات بحال شي وحدة مسكونة.. ناضت من بلاصتها وغوتات فوجه تانيرت وهي مخرجة فيها عينيها:اااه استاااغليتهووم بااش ندمك على مادرتي فياا وباااش نوريك بلي عمري غاانسى ليك

كيفااش فرقتيني على الرااجل لي كانبغي نتي السباااب فهادشي لي وقع الشلحة (حركات راسها بهسترية ولي فقلبها بخاتو فوجههوم كاملين) ملي تولدتي ونتي عندك كلشي عمرك ضربتي لكرفي ولاتعدبتي عايشة حياتك ولي باغااه تيوصل لعندك بنت لعز وكلثوم وجه تماارة ضربت لكرفي من صغري تكرفصت وتزوجت بواحد مكنبغيهش وماعندو والو وجه الزززلط مكرهني فعيشتي معااه ولدت بنت وهو ماات ترملت فصغري ودباليت وأنا كيف لوردة خلى ليا بنت لي أناا ضربت عليها تماارة باش نكسيهاا ونتي عندك كلشي ومخصك تاخير وزايدااهاا براجل لأي وحدة تمناااه زوين وباااغيك وضارب على قبلك تماارة بااش يفرحك وماسمحش فيك.. الرااجل لي خصوو يكوون ديالي أنا ويبغيني درت كلشي باش نخليه يكون ليا وخديتو ليك وعشت معااه لحيااة لي بغيت تارجعتي تاااني وخرجتي علياا وبسبااابك طلقني ورجعت لداك التكرفيص لي كنت فيه كنت باغا تانسحر ليك ولكن زهرك وقف معاااك كلشي كاان عندك وتامن لولاد حملتي تاااني وأناا جااني كونصيير فلوااالدة حقددت عليييك اتاااانيرت وكرهتك بزاااف وتمنيت نشوفك تتتموتي قدااام عيني ونشمت فيك(تادوي وعينيها خارجين وشعيرات دموية متكونين فيهوم ترفعاات بحال شي وحدة مسكونة) داكشي علاش درت يدي فيد بدر الدين نهاار جاا عندي وقاال لياا هو باغي ياخد بنتك.. استاغليت مرضي بااش ندخل لداركوم وحيت عااارفة ولادي مغايسمحووش فياا فاش يعرفو مهوم مريضة عليهاا درت راسي ندمت واستااغليت تابنتك لهبيلة بحااالك تيقاااتني هههه هبطت شوية ددموع ودرت راسي نادمة وهانتوما دخلتوني لدااركووم أو وخليتوني نكوون وسطكووم وأناا (تاضرب صدرها بيديها تاكيتسمع صوت) أناا كنت كل مرة تانوصل لبدر ااش كاااين كلشي وصلتوو ليه وتاالخطبة درحيييل كااان عااارف عليكووم كلشي وشنو تاديرو فالدار.. (قربات جهة تانيرت وهي تاتشوف فيها بشوفات حاقدين) كولشي كان ماشي كيف خططنا ليه وكون مكنتوووش عارفين كوون دابااا كنتو ناااعسين بسباب داك الدواا لي درت ليكوم فالعصير وكاان بدر غاايجي ويدي رحيل معاااه وغايحرق قلبكوم وعمركوم كنتو غاتلقاااوهاا

بخات سمهاا ونطقات بگاع داكشي لي هازة فداخلها مخليا لعيون منعلقين بيها بصدمة.. قربات جهتها تااانيرت وهزااات يديهاا تال سما وعطاتها تصرفيقة قلبات فيها وجهها وخلاتها طيح فالسداري لي وراها..

كانت كلها تتنهج والأعصاب حسات بيهوم من كلام كلثوم وداك لحقد لي ماعندو تاشي سبب مقنع.. هي لي خربات دارهاا وفرقاتها على راجلها ماشي لعكس ولاكانت شي وحدة غاتحقد فهي تانيرت ماشي كلثوم..

تانيرت:(غوتات بعصبية) واش نتي مريضة فدماغك هاد السم كولو لي فيك وهاد لحقد خلاك تعماااي وضري ولاادك (قربات جهتها وشداتها من شعرها تاتغوت معصبة) ولادك لي تعدبتي عليهوم وحملتي بيهوم ولاددك لي واخا عرفو اش درتي فياا أنا وباهوم ماحقدوش عليك وديما كيسولو فيك ونهاار لي عرفوك مريضة مرضو فخااطرهوم وبقااو تيخممو فيك وفصحتك ولادك لي جاو يشوفووك ومعاهوم بنتي لي تتكرهي ولي واخا درتي لي درتي فمها وفيهاا إلا أنها سمحااات ليك حيت قلبهااا بيض ونسات اش درتي.. ولادك لي ماتهنى بالهوم تاجابوك جنبهوم وبقاو تيفكرو ليك وفصحتك وماخلاو طبيب سولو فيه باش يداويوك.. (هزات ليها راسها وضوراتو جهة محمد طه وغوتات تانيرت معصبة) ولدك لي يقيل يقلب على فين يجيب لفلووس لي غايدير ليك بيهوم لعملية.. هز لهم ومباغيش يحسسك بهاادشي ونتي اش درتي اكلثوم اش طعنتيهوم وهرستيهوم فقلبهوم على قبل حااجة مكينااش فالدنياا (طلقات منها ونطقات بعصبية وكره) إدريس من لول كاان تيبغيني أن كيف تانبغيه عمروو بغاك باش تقولي خديتو ليك نتي لي حطيتي عليه لعين ودرت لي درتي وفرقتيني على بنتي وهي لحيمة وبسبابك ولدي تربى مع راجل اخر قاسيت لعداااب ومع دلك ماعمري فكرت نتااقم منك وخليت لربي سبحانه وتعالى ياخد حقي ونهار عرفتك مرضيتي بقيتي فيا وربي شاهد عليا وخليت إدريس يوافق باش نتي تبقاي معانا وجنب ولادك ونتي فلخر كنتي باغا تبعدي بنتي وترجعي تمرضينا وتخلينا نرجعو ونعيشو دوك ليام لكوحل

سكتات تانيرت وهي معصبة من نيتها لي عطاتها لكلثوم.. كيفاش نسات اش دارت فيها زمان.. ضارت تانيرت شافت فرحيل لي حاطة يديها على قلبها مصدومة ومجرد دكر سمية بدر حسات براسها تخنقات ورجعو دوك ليام تيدوزو قدام عينيها..بعدابهوم وببكاءها وبلحگرة لي عاشت كلشي شافتو قدامها.. مشات تانيرت عندها معنقاهاا ورحيل تخشات فيها وهي تترعد.. أما رنيم وإسلام فكانوا غير كيشوفو فكلثوم مصدومين فيها ومكانوش متوقعين كاين نوع من الناس بحالهاا.. نوع قلبو كحل وماعزيزش عليه يشوف غيرو ضاحك وناشط.. طلع إسلام عينو فأسماء لي كانت باقاا مخشية فصدر ريان تاتبكي وكتافها يتهزو وكمش حجبانو برأفة.. بكا أسماء هو لي كان تيتسمع فداك السكات وغزلان رجعات مور مانعسات سيدرا وبقات واقفة جنب الباب تاتشوف فيهوم وهي معرفاش اش واقع..

كان محمد طه جالس فوق السداري مهبط راسو لقدام وجامع يديه فقبضة كايسمع لكلام مو لي كان بحال لمواس كيضربو ففلبو ويدميوه.. هز راسو وعينو تحطات على مو كيشوف فيها ونطق بصوت غارق فيه بحة مخنوقة: نهار عيطتي ليا وقلتي راك مريضة الدنيا ضارت بيا حسيت بقلبي ضرني ونسيت گاع داكشي لي درتي شحال هادشي فكرت غير فيك نتي وفصحتك.. ليالي وأنا مكنعسش كانفكر شنو ندير وملين نجيب لفلوس دلعملية ديالك.. مكنتش باغي نشطن لواليد لي عارفو الاوقفت عليه غايحيدها من لحمو ويعطيني.. نهار مشيت وقفت قدامو وعلمتو بلي باغي نسكنك فدار ونعيشو معاك أنا وأسماء فكر فينا وعلى قبلنا خلاك تجي وتسكني معانا باش مانتفرقوش عليه..(شاف جهة ريان وأشار ليه بصبعو) شفتي هاداك لي جالس لهيه نهار عرف بلي محتاج لفلوس عرفتي اش دار جاا عندي وقال ليا نعطيك لي بغيتي ماتخممش (صوتو تخنق وعينيه تغرغرو ومع دلك كمل) واخا نتي درتي لي مايدراش فحقو هو وموو إلا أنه عاوني على قبلك نتي (ناض محمد طه بخطوات تقيلة تاوقف قدامها وهو يجلس على ركابيه ونطق بصوت هادئ) تعقلي رحيل لي كنتي تتعدبي فيها فالصغر وكنتي ديما ضرباها فاش الواليد مايكونش وكنتي تخدميها وأنا نجي وندافع عليها.. رحيل ديك لبنت لي مكتحمليهاش بسباب مها نهار عرفاتنا جايين عندك مشات معانا وغير طلبتي منها السماحة نسات اش درتي وجات عند مهاا وقالت ليهاا بلي نتي ندمتي (حرك راسو)سمعتهوم بودني كيفااش بقيتي فيهوم وتمناو ليك الشيفاا دوك زوجات لي نتي مكتحمليهوومش.. (سكت محمد طه وهو مكمش حجبانو وديك لغصة لي فقلبو غير مكتزيد تكبر كلما جات عينو فعين موو ونطق بصوت هامس) علاش نتي مكتبغينااش؟

كلثوم:(قربات جهتو ومدات يديها باش تقيس وجهو ونطقات ببكاء) محمد طه

بعد محمد طه وجهو وناض وهو مخنزر دغيا سيفتو تقلبات وبصراخ نطق:ماتنطقيش سميتي على فمك واياك ديريهاا وكلامك مبقا عندو تامعنى داباا صاافي مبقاا عندك فين تزيدي تكدبي وتزيدي تنكري اكلثوم حيت ليوم نتي قلتي شحاال من حاجة كاان عليا نسمعهاا أناا وأسماء بااش نعرفوو وجه هاااديك لي ولداتنا (تايضرب على صدرو ويدوي وعينيو مغرغين) هاديك لي استاغلاتنا غير باااش دير يديها فعدوو الله لي مرضناا فصحتنا من نهاار عرفناه.. استاغلاتنا ومفكراتش فينا..فكرتي فراسك وصاف زير على يديه وهز راسو حابس دوك الدموع لي مبغاهومش ينزلو ونطق بنبرة باردة كالصقيع: ولكن تال هنا وباركة اكلثوم دابا واخا نشوفك تتموتي قدامي والله لابقيت حنية فيك..

هزات كلثوم عينيها فيه مصدومة من كلمتو لخرة لي قاال ولي حسات بيهاا تخشاات ديريكت فقلبهاا أما هو فبقاا واقف بصمود مزيف قدامها كيشوف فيها وعيونو عامرين بدموع لي مانزلهومش.. كيشوف فيها شوفة باردة ماشي ديك الشوفة لحنينة لي مولفة تشوفها من عينيه.. ديك الشوفة كانت شوفة شخص لي تهرس تهريسة عمرو ينساهاا فحياتو كلهاا..ناضت كلثوم وهي كلها تترعد باغا تشد فيديه وهو رجع خطوة لور ناثر يديه ومكمش حجبانو عايفهاا.. عايف مو تقيسو..

كلثوم:(حركات راسها بهسترية ونطقات بصوت هامس)ولدي سمع أنااا هادشي درتو على قبلكووم نتا وختك بااش نرجع شمل عائلتي أناا

محمد طه:(غوت فوجهها وخرج فيها عينو)صاافي بااركة وبااركة بااركة (هز ديك الصينية بكيسانها زف بيها تاجات فلحيط وتهرسو لكيسان وتكب لعصير فوق السداري ونطق بجنون) اشمن شمل غااااتجمعي على هو عمرو كان مجموع هاا عمرري ماحسيت براسي عايش وسط لعائلة هاد السنين كلها.. كنا ديما مفرقين وعمرنااا تجمعناا تااعشنااا مع لواليد وتااانيرت عاد حسينا بجو لعائلة لي مكنااش حاااسين بيه زمااان.. شتي نتي مرريضة فدماااغك وبسباب لكحولية لي فقلبك وتلاقيتي مع مريض كثااار منك خرج على حياااة ختي وقت'ل لبنت لي كاانبغي.. فكرتي فراسك وفمصلاحتك نتي ومفكرتيش فيناا ولكن أناا حماار أنا نستاااهل هادشي حيت حنيت عاااود فيك وقلت نتي مي مانفرطش فيك كاان علياا ندير بحال أسماااء ولكن ديك لحنااانة لي فيااا هي سبااابي ونتي عرفتي تستاغليها (نطق بصوت مخنوق)داايرة لينااا السم لهاد الدرجة بغيتي تقتلينا كااملين غير بااش توصلي لي بغيتي هاا (قرب جهتها وأشار لراسو ولأسماء) يمكن داك السم مقتلناااش ولكن نتي قتلتيناا بهاادشي لي درتي فينااا ليوووم نتي قتلتي ولااادك بزووج ودفنتيهووم بيديك اكلثوم ليووم أناا قدام كلشي كانتبراااك من ليووم مانتي مي مااأنااا ولدك صاااافي ليووم دفنتك هنا ومبقيتش باااغي نشوف وجهك ولانسمع صووتك..

بعد محمد طه وهو كينهج وكلثوم حالة عينيها فالفراغ وكلامو تيتعاود فودنيهاا تابانت ليها أسماء لي وقفات قدامها وعينيها منفوخين ونطقات بصوت مخنوق:من هاااد النهاار تاأنا غانعتاابرك متي ودفنااك أناا وخوياا كيف نتي مادرتيش بحسابنااا تاحنا مغاانديروش بحساابك وحنااا من ليوم يتاامى وماعندناااش منّاا حناا عندنااا غير باباا وصاافي ونتي مبقينااش باغين نشووفوك ولانعرفوك مزااال..

رجعات أسماء تتبكي معنقة ريان لي فتح ليها حظنو تايطبطب عليها وإدريس كان ساكت مخلي ولادو يخوي لي فقلبهوم..

طاحت كلثوم فالأرض وهي تتغوت وضرب فراسها بحال لحمقة وتتغوت وتمرمد فالأرض وتاحد ماقرب جهتهاا ولاتهزات شعرة فيهوم من منظرهاا.. كلام ولادهاا خلاهاا تجن وكيفاش تبراوهاا كانت بحااال شي تصرفيقة تعطات ليها فوقت معطل.. عمرها ظنات غايديروها وقالت مع راسها غايتقلقو شوية وغانرجع نكسبهوم.. ضحكات على راسها ونسات بلي لقلوب دولادها ماشي لعب وراهوم من لحم ودم.. مفكراتش فيهوم وهاهوما دابا مافكرووش فيهاا وبسبابها تبراوها واعتابروها ميتة وهي باقا فالحياااة... لغوات ديالهاا كان مهرس الصالة وغزلان طلعات طل على سيدرا ياكما فاقت ولقاتها ناعسة ومشات زولات ليها لباراي باش ماتسمعش داك لغوات وتخلع..

قرب إدريس جهة كلثوم وجلس قفازي وهي باقي تاتركل ونطق بصوت قوي قاصح: هادي هي اخرتك اكثوم لعبتي واستاغليتي كبدتك وهانتي خسرتيهوم داباا.. الطمع ولحقد عماو عينيك ونسيتي بلي كاين رب لعبااد لي مكيبغيش الظلم والتعدوو.. نيتك كانت باغاا ترزيني أنا وتانيرت فبنتي وتخلينا نتشواو فيها وفلخر صدقتي نتي لي ترزيتي وتشويتي.. كنت ساكت ماشي على قبلك إنما على قبلهوم وعلى قبل داك لكلب لي عند بالو غانخليه يرجع يعاود يعيشنا فداك الرعب ساعة نتوما غلطتوو بزاااف ربي عطاااك فرصة تووبي بمرضك ونتي غير مازدتي فيه وهاهو وقت لحسااااب جااا وگاع لي أداوني وقربو لولادي غايخلصو بدوبل اكلثوم وهاد لمرة تاحد مغاايحن فيك وغاتعومي فشر عماالك...

ناض غادي جهة محمد طه لي عاطيه بالضهر مزير على يديه وجرو معنقو عندوو ولاخر متشبتت بيه بحال شي ولد صغير.. وبالغعل راه هو ولد صغير تخدع وتطعن من أقرب الناس ليه.. من مووو..

لبكا ورى لميت خسارة وكلثوم واخا نزلاتهوم دم تاحد ماحن فيها حيت هي ماحناتش فراسها وفيهوم.. نسات بلي واخا بنادم يطغى ربي فوق مناا ومكيبغيش الظلم وأنه يمهل ولايهمل..

تسمع صوت تلفون إدريس لي بعد على محمد طه وشاف فنمرة نوح وجاوبو بهدوء: كانسمعك

نوح:(بنبرة باردة)بدر الدين الجوهري مات..

🥀وبين كل تلك القلوب كنت أنت دلك القلب الذي مالي قلبي سواه🥀

يتبع...