محتوى القصة
🔙🔙
من طبع إدريس أنه كيفكر فولادو وفمصلاحتهوم وفالحاجة لي كاتريحهوم قبل من راسو.. وكيحاول ماأمكن يعطيهوم داكشي لي هو فقدو فصغرو.. ملي كانقولو فاقد الشي لايعطيه فكانكونو كانكدبو على راسنا حيت فاقد الشي بلعكس كيعطي وكثر والمثال هو إدريس لي معاشش مع واليديه وتيتم وهو فعز شبابو ومكانش عندو السند والضهر لي يتكى عليه داكشي علاش كيحاول ماأمكن يكون لولادو داك الضهر لي يتكاو عليه ومايعيشوش داكشي لي عاشو هو بلا واليديه ويحرم ولادو من الشي لي هو تحرم منو.. عليها كان ديما كيسبق راحتهوم قبل من راحتو.. نهار محمد طه جا عندو وقال ليه قرارو بقا داك النهار كولو وهو كيفكر تاظلام الليل.. كان جالس كيف لعادة فبيتو وهي تجي عندو تانيرت لي لاحظات بلي بيه شي حاجة غير من الشوفة.. جلسات جنبو ونطقات بهدوء:إدريس مالك النهار كولو ونتا ماشي على برجك اش طاري؟
إدريس:(تنهد)محمد طه قال ليا غايجيب مو لهنا وغايكريو شي دار فين يسكنو هو وأسماء معاها ويبقاو مقابلينها تاتبرا
تانيرت:من حقهوم هاديك مهوم واخا دير لي دارت مايقدروش يسمحو فيها وهي محتجاهوم
إدريس:(كمش حجبانو)ماقلتش لا اتانيرت كيق قلتي هاديك مهوم وأنا عارف ولادي مغايسمحوش فيها راه تربيتي هادوك
تانيرت:(شدات فيديه)نتا مباغيش يسكنو بعيد عليك ياك؟؟
إدريس:(بجدية)هاد لخمس سنين لي دازت درت فيها كثر من جهدي باش يبقا شمل ولادي مجموع وفهاد لخمس سنين فين حسينا بلي حنا بصح عائلة دوزنا لي صعيب وكنا ديما مجموعين مباغيش عائلتي تشتت ولادي كل واحد فجيه وزيدي مشكيل داك لحيوان لي باقي لدابا معارفينش اش تحت راسو وعلياااش ناااوي ويقدر كيتسنى غير لفرصة لي نغفلو فيها باش يلوي دراعناا وداك النهار جا برجليه تال عند رحيل باش يورينا بلي تاحد مغايقدر يردعو ولمشكيل لي كبر هو تاحد فينا معارف كمارتو نقدرو نتلاقاوه دابا نيت ومانعرفوهش اتانيرت
سكت إدريس وباين فيه معصب غير من تكميشة لحجبان لي داير.. زيرات تانيرت على يديه تاهز فيها عينيه ونطقات بهدوء: كلامك صحيح اإدريس باقي لدابا معارفينش داك عدو الله اش تحت راسو واحد بحالو قادر يدير كلشي بلامايتردد وماشي غير رحيل وسيدرا لي خصنا نردو لبال ليهوم
إدريس:(بهدوء)على هادشي كنحاول ندير جهدي باش نرد ليهوم لبااال وفاش كيكونو تحت جناحي كنرتاح وأنا عارف بلي كل واحد فيهوم بخير بصح هوما كبرو ولاو رجال وبناتنا تاهوما ولكن أنا كنشوفهوم باقيين صغار وماحدي عايش والنفس كطلع وتنزل فيا غاندير كلما فجهدي بااش نرد ليهوم لبااال ومانخلي تاحاجة خاصاهوم واخا نعرف نحيدها من لحمي ونعطيهوم لمهم هوما يكونو فرحانين
تانيرت:(حطات على راسها على كتفو وعينيها تغرغرو بالدموع) الله يطول فعمرك ويخليك لينا نتا كلشي فحياتنا اإدريس وتاحد مغايقدر يدير شي حاجة بلابيك
تنهد إدريس وضمها لعندو وهي زادت تشبتات بحظنو وخلات دموعها ينزلو وكلامو خلاها تخاااف.. تخاف نهار ميبقاش معاهوم حياتهوم كيفاش غاتولي.. بعدات عليه تانيرت ونطقات وهي تتمسح دموعها: إلا كان هاكا علاش ماتجيش هي وتسكن معاناا ياك قلتي ملي تبرا غاترجع إو نخليوها معانا وهاكا محمد طه وأسماء مغيبعدوش عليك وغاتبقا عائلتنا مجموعة
إدريس:(نطق بتساؤل) ونتي تبغي كلثوم تعاود دخل لحياتناا؟
تانيرت:رحيل نهار مشات عندها قالت ليا بلي كلثوم تبدلات مبقاتش كيف كانت وندمات على داكشي لي دارت معاها ومعانا وحتى راه طلبات السماحة منها وطلبات منها تخليني تاأنا نسمح ليها عارفة كلثوم مادارتش فينا لمزيان وبلي هي السباب تاتفرقنا وشفنا لويل بسبابها ولكن كنظن هاد المرض خلاها تعرف غلطها وتندم
إدريس:(مسح على لحيتو وجمع النفس قبل مايطلقها) المهم عندي أنا هو نتوما تكونو بخير والاجاب الله شفت شي حاجة ماهياش راه مغاتبقاش دقيقة اتانيرت
تانيرت:صافي واخا غدا رد لخبار لمحمد طه باش يدير بحسابو
إدريس:إن شاء الله
🔜🔜
الكل تفاجأ بالقرار نهار عرفو بيه وأكثرهوم محمد طه لي مكانش متوقع باه غايقول ليه يجيب كلثوم وتعيش معاهوم.. حيت هو بنفسو زول لفكرة من بالو حيت عارف مو اش دوزات عليهوم.. داكشي علاش جاتو غريبة ومن ناحية مغايكدبش أنه فرح حيت مكانش راضي مية فالمية على أنه يعيش هو وأسماء بعيد على باهوم.. ولفو لعيشة معاه ويكونو تحت جناحو وفاش كيمشيو لشي بلاصة بلابيه كيحسو براسهوم بحال وليدات صغار تالفين على باهوم واخا كبرو وبشلاغمهوم إلا أنهوم بلا باهوم راه مكيسواو والو.. ملي وصل السبت علم محمد طه سعيد بلي مغايجيش وشد الطريق فالصباح بكري لتازة باش يجيب مو..
كانت واقفة كلثوم قدام تانيرت وإدريس ونطقات بصوت خافت وعينيها عامرين دموع:حياني الله تاوقفات قدامكوم باش نطلب منكوم السماحة.. خفت ربي يدي أمانتو قبل مانشوفكوم ونقول لهضرة لي فقلبي ليكوم.. درت شحال من حاجة خايبة فحقكوم وفحق ولادي تاهوما الشيطان عمى ليا عيني وخلاني نغلط بزاف (هبطات راسها ودموعها كيتسقطرو) وهاأنا دابا كانخلص
تانيرت:(قربات جهتها وحطات يديها على كتفها ونطقات بهدوء) نتي غلطتي شحال هادي ودابا ندمتي وعرفتي غلاطك وطلبتي السماحة وحنا سمحنا ليك اكلثوم
هزات راسها وشافت فيها بعينيها لي كانو حمرين كيف الحمر.. سرطات لبكية ونطقات بصوت خافت:نتي بنت الناس اتانيرت وقلبك حنين واخا داكشي لي درت فيك سمحتي ليا (شافت فإدريس لي كان واقف ساكت ونطقات بحزن)نتمنى تانتا اإدريس تسمحليا وتنسى داكشي لي درت معاك
إدريس:(بهدوء)الله يسامح
تبسمات ليه كلثوم ورجعات شافت فتانيرت ونطقات بهدوء:واخا نعنقك
حركات ليها راسها باه وعنقاتها وهي تتبكي وتانيرت تاطبطب على ضهرها.. ملي عاودات ليها رحيل مغاتنكرش أنها متاقتش بزاف فكلثوم ولكن دابا فاش شافتها قدامها كيفاش تتبكي ونادمة خلاتها تبقى فيها وتسمح ليها... بعدات عليها وقربات أسماء جهة مها عنقاتها وتارحيل سلمات عليها عاد شافت جهة لبنات وقالت:هادي غزلان تاهي من العائلة (شافت فغيزو) وهادي خالتي كلثوم ممات أسماء ومحمد طه
غزلان:(تبسمات ليها وقربات جهتها)سلام أوعليكوم اخالتي
كلثوم:واعليكوم السلام ابنتي
رحيل:وهادي رنيم غاتكوني عارفاها
كلثوم:(وجهات كلامها لرنيم)اش خبارك ابنتي لباس؟
رنيم:حمدلله ونتي
كلثوم:نحمدو الله ونشكروه
تانيرت:مانبقاوش واقفين هنا دخلو
محمد طه:غانطلع لڤاليز لبيت أسماء وندوش ونجي واخا
طلع لفوق ولبقية دخلو لصالة وكلثوم جالسة مركنة شادة فأسماء لي تتسول فيها على صحتها وتتجاوبها بشوية... لبنات مشاو يحطو لغدا وسيدرا كانت تتشوف فكلثوم مكمشة عويناتها لمبطنين وقربات جهة إدريس تعلقات فيه تاهزها عندو ونطقات بخفوت:بّا ديدي شكون هادي؟
إدريس:(تايشرح ليها بلخاطر)هادي ممات محمد طه وأسماء
سيدرا:(تخشات فيه ونطقات تتفشش)تانيرت إينو زوينة عليها
ضحك إدريس بالخف وتحنى باسها على جبهتها ونطق بهدوء:ماتوحشتيش سيديل؟
سيدرا:توحشتو بّا ديدي نمشيو غدااا
إدريس:نمشيو انخشيشتي
فالكوزينة كانو لبنات تيوجدو لغدا تاسمعو الصونيط فلباب وهي تنطق رحيل:غانشوف شكون
هزات فولارها لاحتو على راسها ومشات لشرجم لي فالصالة لتحت طلات بان ليها إسلام عاد مشات حلات ليه لباب وهو يتبسم ليها ونطق:رحيل صافا
رحيل:(سلمات عليه بليد)حمدالله ونتا دخل
إسلام:صافا حمدلله (طلع فالدريجات وضار جهتها)وليتو دابا قرابين ليا بزاف على دار لهيه
رحيل:ههه وي بيناتنا غير شي شوية
إسلام:سيدرا كاينة ولانعسات
رحيل:(تبسمات) لافااايقة بسلامتك مكتنعسش تانعسو حنا وتتفيق بكري هههه
تبسم إسلام وكمل طريقو لصالون ورحيل رجعات لعند لبنات.. مع دخل هز عينو وشاف فكلثوم وهو مستغرب وسيدرا غير شافتو وهي تنقز عندو:إسلاااامي
إسلام:(هزها ونطق مبسم) خنفوستي توحشتك
سيدرا:تاأنا (شافت فديك لبلاستيكة لي كان هاز ونطقات)شنو جبتي ليا
إسلام:(سلم عليهوم وجلس جنب إدريس)جبت ليك لپازل لي بغيتي
سيدرا:يااااي نشووووفها
عطاها لبلاستيكة وسيدرا حلاتها تتشوف فلكرطونة دلپازل وعينيها كيلمعو.. دخل محمد طه لي كان يالاه مدوش وشعرو باقي سارد سلم عليه وجلسو مجمعين تاجابو لبنات لغدا وتجمعو عليه جميع وغير تغداو وهي تدي أسماء كلثوم لبيتها باش ترتاح حيت دوا لي تتشرب كيرخيها.. أما سيدرا حلات ديك لپازل لي جاب ليها إسلام وتكوّن حداها ريان ورنيم تايعاونها تجمعها ورحيل طلعات لبيتها وغير وصلات زولات فولارها ومشات جهة البلاكار حلاتو وهزات ديك لكاخطابل لي عندها دالرسم وخرجات لبالكون لي كاين فيه جليسة بزوج كراسى وطبيلة.. جرات الطبيلة وحلات ديك الكاخطابل جابدة دفتر الرسم وستفات الملونات لي عندها مع قلم الرسم وزفرات النفس قبل ماتبدا تخطط فداك لكتاب بكل تركييز.. خوات راسها من همومها وانعزلات على لعالم لخارجي وهي تتمارس لهواية لي تتخليها ترتاح..
---
كان مكسل محمد طه فبيتو كيخربق فالتلفون تاسمع دقان فلباب ونطق:دخل
تحل لباب ودخلات غزلان لي كانت هازة سلة دلحوايح ونطقات بهدوء وهي باقا واقفة فلباب:خصني نستف ليك حوايجك
محمد طه:(مشافش فيها)دخلي
دخلات وهي مخلية لباب محلول ومشات جهة لبلاكار ديالو حطات السلة فالجنب وجلسات مربعة تاطويهوم وهو باقي كيبقشش فتلفونو ماهضرش وماهضراتش تاهي كل واحد ساكت تاسالات وناضت حلات لبلاكار وبدات تستف ليه حوايجو ولقوامج تتعلقهوم فالعلاقة تاوصلات جهة لتيشورت وهوما يبانو ليها مخربقين.. بدات تتقاد فيهوم وجرات واحد التيشورت ومكانتش رادة لبال لداك الديكور لي كان على شكل كورة فوق من واحد لعمود ولتحت مكتوبة محمد طه كان محطوط جنب لبلاكار ودفعاتو بيديها تاطاح الأرض وتهرس وهي تقفز بلاصتها مخرجة عينيها وهو غير سمع لصوت التهراس قلب وجهو بزربة جهتها وغير شاف شنو تهرس عينيه خرجو من بلاصتهوم وقفز من فوق النموسية ضارب واحد تخنزيرة قاصحة وهو جاي جهتها وهي تتسرط ريقها ويالاه بغات دوي وهو يغوت بصوت رجولي معصب:وااااش نتي مكتشوفيش از*ي..
كان وجهو حمر ومعصب لدرجة أن لعرق لي فجبهتو مطراسي وكييان كيزدح وعينيه بداو كيتكونو فيهوم شعيرات دموية.. تحنى جهة داك الديكور تيشوف فلكورة لي تحيدات من ديك لعصية ديالها وعروق راسو كيزدحوو.. مكانش ديكور عادي عندو إنما كانت هدية غالية من جيداء لي كانت عطاتها ليه فواحد من أعياد ميلادو مع عرفاه يموت على لكرة ومن داك لوقت وهو محتافض عليه تاجات غزلان هرساتو ليه..هز فيها عينيه وناض من بلاصتو وهي غير تاضور عينيها بلاوالو تتحس بيه مكيحملهااش ودابا خلاص كملات ملي هرسات ليه هاد ديكور بدون قصد..
غزلان:(بصوت متوثر خايف)سمحلي أنا مدرتهاش بلعاني هو
محمد طه:(شدها من دراعها جارها جهتو وبرك على سنيه وضرب فيها تخنزيرة قاصحة)اااش داااك تقيصيه القلا*ي حااااجة ماديالكش ماتمديش عليهاا يديك
غزلان:(مكمشة حجبانها والشدة قصحاتها) ماقصتوش هو كان محطوط حدا لي تيشورت ودفعتو بلغلاااط أنا مقصدتش
محمد طه:(زاد ورك عليها تاهزات فيه عينيها ونطق بصوت هادر)غاتقووودي تخرجي من بيتي قبل ماندير فالز*امل لي حطك شي حااااجة
غزلان:(خنزرات فيه) مانسمحش ليك تعايرني صلح فمك وعرف اش تتخرج منو وماتعايرش ليا واليديا سمعتي هوما بزاف عليك ماهرستوش بلعاني والابغيتي نخلصو ليك
نثرات يديها بالجهد وخرجات من لبيت بلاماتسناه يجاوب..مشات ديريكت لبيت لي تتشاركها هي ورنيم ودخلات ليه وهي حاسة بدموعها علاين ينزلو وكلامو ومعيورو كيطلع وينزل فيهاا وخصوصاً أنه عاير ليها واليديها وهادو هوما نقطة ضعفهاا.. أما هو فبقا كيشوف فداك الديكور وعصبيتو تبخرات فلحظة وعينو بانت فيهوم لمعة لحزن.. حط يديه على سميتو لي كانت محفورة ومنقوشة على داك الديكور لي كيفكرو فهاديك لي خلات كية فقلبو.. قلب وجهو مانع ديك الدمعة تنزل وقلبو حاس بيه مجرووح كينزف..
---
خارجة من لحمام وهي حاطة يديها على كرشها ولوجع بدا كيجهاد عليها..رجعات لبيتها ولقات سيدرا تتلبس حويجاتها وهي تبسم ليها بخفوت ومشات جهة النموسية حلات بلاكار لي جنبها وخدات منو واحد كينة دلوجع شرباتها عاد رجعات شافت فسيدرا لي نطقات بهدوء:مامي سربي لبسي حويجاتك راه تعطلنا
رحيل:غاتمشي غير نتي وجدك امامي أنا مريضة ومانقدرش نمشي معاك
سيدرا:(قربات عندها وشدات وجهها بيديداتها الصغارين)مامي مالك؟
رحيل:(بخفوت)فيا وجيعات فكريشة امامي جيبي لمشطة ديالك باش نقاد ليك شعرك
مشات سيدرا جابت لمشطة ديالها ورحيل بزز باش كاتمشط ليها تاسالات وجمعات ليها شعرها كوت شوڤال عاد تخشات فبلاصتها وسيدرا لبسات تقيشرات طالعين تال الركبة جاوها زوينين مع الشورط لي لابسة وباست رحيل:مامي أنا مشيت باي
رحيل:ردي لبال لراسك مامي
مشات سيدرا ورحيل ناضت بزز سدات لبالكون وظلمات لبيت ورجعات بلاصتها تاتسنط لوجع لي بدا كيجهاد.. أما عند سيدرا فمشات غير هي وإدريس لفيرمة والطريق كلها وهي مونسة إدريس بكلامها وأسئلتها لي تتسول وهو عاطيها لخاطر يجاوبها ولي استفسرات عليه كيشرحو ليها.. ملي وصلو مشات ديريكت توجد راسها وإدريس بقا واقف راد ليها لبال تاخرجات وهي راكبة فوق لحصان وشافت فإدريس وبدات تادير ليه باي باي وهي مبسمة.. صونى تلفونو غير شاف النمرة وهو يجاوب مبسم: ولد لحاج اش خبارك
نوح:(بصوت خاتر)الحمدلله اسي إدريس ونتا؟
إدريس:(بهدوء) ولله الحمد
نوح:وصلتي لفيرمة؟
إدريس:اييه يالاه واحد الشوية باش وصلنا أنا وسيدرا
نوح:واحد لعشرة الدقايق ونكون عندكوم
قطع معاه ورجع إدريس متبع سيدرا لي كل مرة دير ليه باي باي وغير توصل جهتو وتعيط ليه تاحس بيد تحطات على كتفو وضار لقاه نوح لي كان بالسپور لابس تيشورت نواغ لاصقة على درعانو لمنفوخين وسروال توني تاهو نواغ وداير كاسكيط مهبطها على عينيه تتبان غير لحيتو لي بدات تتكبر وزغيبات بيضين بداو كيتخللوها.. تبسم ليه إدريس وتسالمو سلام رجولي ونطق نوح بصوت خشن:عاش من شافك اسي إدريس
إدريس:(تبسم بالتقالة)ههه راه نتا لي غبرتي اولد لحاج
نوح:(حط دراعو على داك لگرياج وبدا تيقاد لكاسكيط وبصوت هادئ قال) راك عارف الخدمة مكتساليش
إدريس:واهيا كاينة الله يكون فالعون
نوح:آمين
بقاو واقفين تاسالات سيدرا وجات عندهوم وهي فرحانة ولفرحة تاتنقط ليها من عينيها وخلاص ملي شافت نوح راه مقداتها فرحة وهي تتجري جهتو تاهزها بيد وحدة ونطقات:ماي بلو آيز
نوح:(جرها من نيفها بخفة ونطق بحنية)تاتبيرت إينو
إدريس:(كيشوف فيهوم مبسم) ملي تتعرف راه جايين لهنا تيولي فيها شي حماس غريب ههه
سيدرا:(تاتشرح وهي تاتعبر بيديها)حيت هنا زوين فيه سيديل وبزاف دلحصانات والربيع وفيه التوت وميمونات بزاف (سبلات فيه عويناتها)ماي بلو آيز فين كادوياا لي قلتي ليا ديك النهاريات
إدريس:مكتنسايش ههه
نوح:(تبسم بحنية) اجي نوريه ليك
تقدم وهو هازها وتبعهوم إدريس غادين جهة الإسطبل وداخلين من لباب لاخر وسيدرا تاضور عينيها متحمسة تشوف لكادو.. وصلو لواحد لبيت فين كايحطو الأحصنة ونزلها نوح وتمشى جهة باب ديك لبيت حلها وسيدرا بدات تاطل وتعوح راسها تبان ليها واحد لخيل صغير فالرمادي منقط بلكحل وشعرو كتيف ورطيطب..
نوح:(ضار حهة سيدرا وتبسم بحنية) ها كادوك
حلات سيدرا عينيها وهي تتشوف فداك لخيل لي كان تيضور فبلاصتو ويتحرك.. هزات عينيها فنوح لي قرب جهتها وجلس قفازي جرها من نيفها كيف مولف معاها ونطق بحنية:عجبك لكادو اتاتبيرت إينو؟
سيدرا:(سولاتو وهي تتحرك راسها)واش هادا ديالي بوحديتي؟
نوح:اه
جمعات شفايفها وتغرغرو عينيها ومحس نوح تاكانت تلاحت عليه معنقاه تتبكي.. كمش حجبانو وهز عينيه فإدريس لي كان واقف متبع الديكور من لبدية ومبسم تبسيمة خفيفة ناطق بهدوء:هادوك غير دموع لفرحة
كمشها عندو نوح تامبقاتش تبان وسط صدرو ونطق بصوت حنين:مابغيتيش دخلي عندو وتلعبي معاه
سيدرا:(بعدات على حظنو وبدات تتمسح عويناتها ونطقات بصوت باكي)بغيت
نوح:(مسح ليها دموعها وجرها باسها فجبهتها ونطق بهدوء) يالاه دخلي عندو
مشات سيدرا داخلة جهة داك لحصان مخيفاش منو وبدات تاتجبد وتقيس فيه بحنية وتبوسو.. ضارت جهتهوم وهي معنقها ونطقات بحماس:بّا ديدي نديه معايا لدار؟
إدريس:(تبسم)فين غانحطوها انخشيشتي
سيدرا:فبيتي أنا ومامي وينيني حدا إيڤانا
إدريس:هو خصو يبقا هنا باش يردو ليه لبال ونتي غاتبقاي تجي تشوفيه كل مرة واخا
حركات راسها باه ورجعات ملهية معاه وإدريس حط يديه على كتف نوح لي ضار جهتو ونطق بهدوء:الله يكبر بيك اولد لحاج
نوح:(حك لحيتو ونطق بتبسيمة خفيفة) آمين اسي إدريس (شاف فساعتو وهز عينو فسيدرا) يالاه اتاتبيرت إينو نمشيو لفيرمة نتغداو
سيدرا:(باست داك لحصان وخرجات عندهوم)فيا جويعات بزاف ماي بلو آيز
تبسم ليها وشد فيديها وهوما خارجين من الإسطبل غادين لفيرمة يتغداو.. ونهار كولو مدوزاه سيدرا مع نوح لي ماسخاتش بيه وفيما تيقول ليها إدريس يالاه نمشيو تاتقول ليه بلاتي شوية.. ومع خرجو لجنان فين كاين الشجاري ديال الديسير تما خلاص هي سرحااات تقطف من هنا وتاخد من هنا وإدريس تابعها داير الرياضة معاهاا وهي حلفات لاعيااات تاطاح الظلام..
كان واقف إدريس مع نوح قدام لباب تسالمو مع بعضياتهوم وهبط نوح جهة سيدرا لي كانت هازة خنيشة عامرة بلخير دلفيرمة ونطق بحنية:تباتي فراحة الله اتاتبيرت إينو
سيدرا:(باستو فحنكو) بسلامة ماي بلو آيز
ركبات بلاصتها وقلعات طوموبيل وسيدرا تادير ليه باي باي تاغبرات من قدامو مخلياه واقف حاط يديه فجياب السروال التوني لي لابس ومبسم تبسيمة يادوب تتبان على شفتو.. دخل لداخل وتمشى بخطوات تقيلة غادي لبيتو وهو كيتفوه.. زول لكاسكيط وتبعها التيشورت وهزها فيديه تاوصل لحمام لاحها فديك السلة وتبعها السروال تابقا بكالصون ومشى وقف تحت الرشاشة مخلي لما ينزل عليه وبدا تيرجع شعرو بيديه لور ومكملاتش عشرة الدقايق وكان واقف قدام لمرايا ملوي على نصو التحتاني فوطة وهاز مكينة دلحسانة وبدا كينقص من لحيتو شوية.. تاسالى وحطها بلاصتها وغسل وجهو مزيان وخدا فوطة كانت محطوطة فلبلاكار بدا كيمسح بيها وخرج من لحمام غادي لدريسينغ لبس عليه شورط فالكحل دلقطن مبرد وبيل سماطي وخرج وهو تيتكسل ويطرطق فعنقو.. طفى الضو دلبيت مخلي غير لزاباجور مشعولين وتخشى بلاصتو وهز لكتاب لي كان محطوط فلكومودينو ودار نضاضر دلبروطيكسيون وحلو فالصفحة لي وقف فيها مكمل قرايتو فجو كالم كيريح النفس..
---
النهار كولو وهي ناعسة فالبيت ماخرجاتش منها وتالماكلة مطاحتش فكرشها.. كل شهر وكل مرة تتجيها ضروري ماتشوف العداب واخا كتاخد ليه الدوا الإأنه كيضرب حقو عاد يخف.. حلات عينيها والظلام فلبيت معرفاتش واش باقي فالصباح ولاطاح الظلام.. تفوهات وزولات عليها ديك لكاشة وهي مكمشة حجبانها والعرق تيتسقطر منها بحال الادوشات.. هزات تليفونها وشافت فالساعة كانت الحداش أونص.. ناضت لابسة بانطوفتها ومشات بخطوات بطيئة جهة بلاكارها جبدات حوايج باش تبدل وأولويز جديدة ومشات لحمام طرفات حالتها عاد نزلات لتحت تشوف شي حاجة تاكلها حيت فيها الموت دالجوع.. كانو دايرين لمرقة غير شافتها قلبها طلع زفرات النفس مافيها مايطيب عليها اختارت أسهل أكلة وهي إندومي.. دارت زوج بكيات طيباتهوم عادي وغرفاتهوم فزلافة وجلسات تتاكل فالكوزينة تاسمعات صوت لباب تحل وتسد.. كمشات حجبانها تتسائل شكون باقي خارح.. شوية تسمع ليها صوت باها تايدوي مع سيدرا بشوية.. وبعد دقائق بانو ليها واقفين بزوج قدام لباب تبسمات ليهوم:ماتقولوش ليا يالاه جيتو
إدريس:(قرب جهتها قاس جبهتها)يالاه جينا قالت ليا ماماك عيانة كيبقيتي ابنتي
رحيل:حمدلله ابابا
إدريس:(باسها فجبهتها)يالاه تصبحي على خير ابنتي
باس سيدرا ومشى لبيتو ورحيل شافت فيها وفلميكة لي هازة وتبسمات:شنو داكشي هازة؟
سيدرا:(قربات جهتها)مامي أنا جبت توتات وجبت بزاف دلحاجات تاهوما
وراتها ديك لبلاستيكة لي عامرة ديسير ورجعات هزات سيدرا راسها ونطقات: قلت لماي بلو آيز فيك وجيعات وعطاني بزاف التوتات باش نجيبهوم ليك..
كانت مهبطة راسها ورادة لبال لداكشي لي تتوريها وغير سمعات اش قالت وهي تهز فيها لعين ولكلام ضاع من بين شفايفهاا.. قلبها رجع يدق بسرعة مرة خرا مخليهاا ضايعة تاني فمشاعرها لي تيتلخبطو بمجرد دكر سيرتو.. هبطات راسها مرة خرا ورجعات تتشوف فداك التوت ساهية.. أما سيدرا فملي كانت تتقطف التوت ومع عارفة رحيل عزيز عليها بلاماتقصد دكراتها بكلامها البريء قدام نوح وطلبات منو يعطيها بزاف باش تديهوم لمها حيت مريضة وهو لبى طلبها.. موقف جد عااادي ولكن بكلام سيدرا وكيفاش وصلاتو ليها زائد حالة رحيل كان عندو أهمية وقيمة كبيرة عندها.. كملات ديك الإندومي وهزات داك الديسير حطاتو فالشبيكة ولي خصو يدار فالتلاجة راه دارتو ومع جات تحط التوت وهي تبسم وهزات حبها كلاتها لقاتو حلو كيف السكر.. تنهدات وحطات البواطة فتلاجة وخرجات من الكوزينة غادة لبيتها باش تنعس..
---
فلوقت لي الناس كلها ناعسة كانت هي باقا فايقة والنوم جفى عيونها.. جالسة فالبالكون بشوميز دونوي فلغوز بارد مع بنوار ديالو ستان شعرها مطلوق او وجها مافيه تانقطة دلمكياح كانت تتبان حزينة ومهمومة.. وكل مرة تطلق تنهيدة من شفايفها.. من نهار شافتو وهي على حالتها حابسة راسها فبيتها مباغاش تشوف حد ولاتهضر مع تاشي واحد.. دوك زوح دقايق لي شافتو فيهوم قلبات ليها عاود حياتها وداك الحيط لي كانت تتبنيه دلقوة والنسيان راب فساعتو.. شوفتو خلات جرح لماضي يتفتح ويتفتحو معاه أيامو لمُرّة.. قلبها لي واخا تخان وكلى الدق الإ انه باقي كيدق لمولاه.. مولاه لي بيديه عطاه دقة عمرو ينساهاا.. جرح الخيانة لي كيجي من أقرب الناس ليك كيكون قااصح بأضعاف.. الخدلان ولغدر لي تيخليك تهرس وكيكون صعيب عليك تجمع وترجع كيف كنتي حيت لابدما غاتلقى تشوهات لي غايفكروك بديك التهريسة لي تهرستي.. مسحات دموعها لي نزلو وناضت داخلة لبيت باش تنعس عالله تقدر تحبس مخها وترتاح من التفكير لي هلكها.. حيدات لغطا وبان ليها تلفونها لي كانت لايحاه تم وناسياه ومع شعلاتو لقات لزابيل من ليازيد ومن بدر الدين هاد الأخير لي مشى من بالها نهائيا.. لقاتو مخلي ليها مساج " حبيبة صافا كانعيط ليك مكتجاوبيش ياكما واقع ليك شي مشكيل؟ "
تنهدات وجوباتو "عيانة شوية داكشي علاش سمحلي"
مكان عندها لخاطر لحد وخصوصا ليه هو ولكن مباغاش تعيق وجوباتو حيت من نهار شافت ليازيد وهي قاطعة عليه... يالاه جات ترد تلفونها وهو يصوتي بين يديها بنمرة بدر الدين زفرات النفس وجوبات بخفوت:ألو
بدر الدين:(بضوت هادئ) حبيبة صافا كيف بقيتي؟
سناء: حمدالله دابا حسن
بدر الدين:ملي مبقيتيش تتجاوبيني تشطنت عليك
سناء:(باغا تصدرو)همم غير مكنتش قادة ندوي مع حد وصاف مهم نخليك غانمشي نعس تصبح علي خير
بدر الدين: أوكي ديري حسابك غدا باغي نشوفك عندي شي كلام باغي نقولو ليك
سناء:(كمشات حجبانها)واخا بسلامة
قطعات ولاحت تلفونها بإهمال وهي تتفكر فشنو هو لموضوع لي باغي يدوي فيه معاها.. أما عند بدر فملي تقطع لخط وهو ساكت كيشوف فالشاشة بهدوء مرييب وعلي جالس قدامو تيتعشى تاسمعو نطق بهدوء: داكشي لي قلت ليك درتيه؟
علي:(مسح يديه بالسغفيت)همم خليت لي يحط عليه لعين ويبقا حاضيه بلافرطة
بدر الدين:(هز فيه عينيه بشوفات عندهوم معنى) ورحييل
علي:مكاين تاشي جديد عندها من لخدمة لدار من الدار لخدمة
بدر الدين:(رجع راسو لور وكاس دالشراب بين يديه) عموو ديالي عايشة فالملل خصني ندير ليها عاود شوية دلومبيونص
علي:(ضحك)هههه ناوي تبيتها تاني فالسبيطار
بدر الدين:(شرب لكاس دقة وحدة وكب وحد اخر تبعو ليه عاد نطق بتبسيمة مريضة) تت هي هشيشة عمو ديالي مبغاتش تربي الصحة
علي:(تبسم جنب) كلما مرة منوض فيها الرعب وباغيها تصحاح هههه ملي ماحماقتش حمد الله
غمض عينيه والسكرة بدات تطلع معاه وفمخيلتو غير منظرها نهار شافها فلحمام عرياانة شي لي خلى حرارتو تشعل ويحس بواحد النشووة غريبة.. عض على شفتو بانحراف ومكرهش كون كانت دابا بين يديه وشنو كان غايدير فيهاا.. حل عينيه وناض هاز كاسو وغادي لبيت النعاس ونطق ببرود:عيط ليها تجي..
فهم كلامو وهز تلفونو دوز لخط لواحد من الدراري لي خدامين مع بدر وطلب منو يجيب ليه لبنت لي مولفة تتلبي حاجياتو ومدازش وقت كثير تكانت وصلات وجايا بكسوة نص توب كلشي معري والفرقة دالصدر تتبان ومن الشوفة ياين فيه غير منفوخ بالسيليكون أما واحد الطرف مع كل حركة تايتهز.. دخلات ديريكت لبيت النعاس وعلي خرج مخلي ليهوم الدار.. مع دخلات لقاتو مكسل فوق النموسية بالكالصون مزير على لمسائل وهاز القرعة تيشرب منها.. سدات لباب ومشات بخطوات مغرية جهتو هزات دوك لدوبياس درحيل لي خدا وبدات تتزول حوايجها وهو حاضيها تابقات كيف تخلقات ولبساتهوم وهزات عدسات خوضر بحال لون عينين رحيل ركباتهوم وشعرها كان فنفس اللون.. الفرق هو لمواصفات دلوجه والجسم طبعا.. هز صباعو بزوج بمعنى "اجي" وهي تبسمات ليه ونطقات بصوت مقح*بن: أنا عبدة بين يديك
بدات تتحبو جهتو تاوصلات وجلسات فوق منو وهو شدها من وجهها كيشوف فيها وفعينيها ونطق بنبرة مريضة:نتي ديالي اعمو
جرها هاجم على شفايفها وهي غادة معاه فلخط وتتحك فوق منو تتزيد تزندو ومع هو أصلا طالعة ليه النشوووة.. ساد عينيه وفباطن عقلو تايتخيلها هي لي بين يديه.. هوسو برحيل خلاه يجيب وحدة ويدير ليها كيف مواصفات رحيل شعرها عينيها وتادوبياس ديالها ..كان عقلو طااير ولخرة تحت منو وبزوج بيهوم غايبين على لعالم وكيتسمع غير صوت لخرا لي تاتزيد تشعلو ويديها لي تايتلمسو جسمو وبالخصوص نقط ضعفو دايرة خدمتها ومبرعة راسها ومبرعاه.. مدوزين ليلتهوم المحر'مة بكل معنى الكلمة...
---
غابت لگمرة وجات بلاصتها شميشة منورة سماها.. لحرارة كانت عالية عكس الأيام لي فاتت.. كانت جالسة أسماء فبيروها بكسيوة قصيرة وصندالة طالون.. غارقة فخدمتها تاصونى تلفونها وبدات تتقلب بلهفة بين الوراق تالقاتو ومع كانت تتسنى لابيل دمحمد طه لي مشى مع كلثوم عند الطبيب وغير شافت نمرة كريم..لي ولى كيسيفط ليها هاد الأواخر وهي ديما منخلاه ساعة مبغاش يفهم راسو رجعات تاني تتكمل خدمتها تاصونى مرة خرا وهي طفي تلفونها..ورجعات لخدمتها وباين فيها معصبة من بلان كريم.. مع وصلات وقيتة دلخروج يالاه حطات رجليها على برا بان ليها مقلز حدا طوموبيلتو كيتسناهاا.. قلبات عينيها ونطقات تتسب:تفووو على مكرووب
كملات طريقها جهة طوموبيل باها لي من زهرها ليوم داتها معاها وهو غير شافها مشى جهتها كيجري ويعيط ليها بسميتها تاضارت خنزرات فيه على الشوهة لي مشوهها قدام الخدمة ونطقات باركة على سنيها:اش باغي ياك لباس واش مكتعياااش قلنا ليك اسيدي سالينا وأنا بديت حياتي نتا اش باغي مزال مني؟
كريم:(تيطلعها وينزلها)توحشتك اأسماء نتي عارفة بلي أنا كنت ناوي لمعقول معاك
أسماء:اسيدي تنوي لمعقول ولاتنوي التخلويض أنا مشغليش مبقاااش هامني فهمهاا وقلب عليا ولا والله نصدق مقوداهااا معاك
كملات طريقها وركبات فطوموبيل وهي تتسب وتسوط وكون عرفات نهار لول تعرفات عليه غايصدق لصقة كون گاعما حاشاتها ليه.. هزات عينيها فلمرايا لقاتو تابعهاا بطوموبيل وهي ضحك بفقصة: هاااالفعاايل دال*ب
شدات الطريق تتخمم كيفاش غاتفك منو حيت يستحيل تمشي لدار وتخليه يعرفها ويصدق مشوهها مع باهاا.. بقات تاضور بين الطرقان وتلف الوقت ونيت باش يعيى ويفهم راسو ساعة وتگول.. بقات تاطرطق صباعهاا وتكمش عينيها تخمم تاطاحت فبالها فكرة لي متهورة ولي متعلقة بواحد الشخص هي وياه مكيتفاهموش ولكن هو لحل لوحيد وخصوصا أنه عندو علاقة بلكدبة لي كدباتها على كريم ونيت باش يزيد يتيق ويفهم راسو.. قلبات طريقها وكتمنى لخطة لي فبالها تنجح.. غير وصلات وبدات تاضور عينيها وتشوف فلمرايا لقات طوموبيل كريم موقفها بعيد شوية.. بلاصات طوموبيلاتها تحت من ليموبل فين ساكن إسلام وزفرات النفس قبل ماتحل لباب وتخرج.. ضورات راسها فالبلاصة ومع جات ترمي لخطوة سمعات لكلاكصون وضارت بانت ليها طوموبيل إسلام جايا وهي توقف بلاصتها تاضور فعينيها كي موكة.. زعمة لهاد الدرجة عندها الزهر بدات تترد شعرها وقلبات عينيها بلاماتعيق باش تشوف لاخر واش مشى لقاتو باقي كاين.. لاحت شعرها ونطقات بهمس:لضرورة أحكام
قربات جهة إسلام لي خرج من الطوموبيل كيشوف فيها مكمش حجبانو ونطق بصوت متسائل:شنو كاديري هنا؟
أسماء:(تبسمات)كنت دايزة من هنا وقلت نجي نشوفك؟
إسلام:(داير يديه فجياب السورال)تشوفيني (نطق بسخرية)جيني من اللخر اش تم؟
أسماء:(تتسب كريم فخاطرها لي حطها فهاد لموقف البايخ)والو واش فيها شي حاجة الاجيت عندك؟
إسلام:(قرب جهتها مكمش فيها عينيه ونطق بهدوء) واخا نبغي نتيق عينك لي كيضورو فاضحينك
أسماء:(قلبات عينيها وفنفس لوقت شافت جهة طوموبيل كريم) مغاتعرضش عليا لشي كويس دأتااي؟
تبسمات ليه وإسلام بدورو تبسم ببرود: أنا ماعنديش مع الصواب ومكيعحبونيش ضياف لغفلة
عطاها بالضهر باغي يمشي وهي تخرج عينيها وشداتو من دراعو تاضار تيشوف فيها اش بااغا تصنع والشك دخلو حيت هو عارفها مكتحملوش كيفاش السيدة دغيا تقلبات أما هي فكانت تاضور عينيها تاطاحت فبالها واحد لفكرة وبدون تردد قربات جهتو خطوة خرى تاولات قريبة ليه وتعلات جهتو حاطة شفايفها فوق شفايفو..
كلشي وقع بزربة لدرجة إسلام بقا واقف جامد ومخرج عينيه.. أما هي فكانت مضورة يديها على عنقو وحاطة شفايفها على دياولو بلاماتحركهوم.. مغمضة عينيها وقلبها كان كيضرب ومن زهرها البلاصة كانت خاوية حيت ليموبل جات فبلاصة كالم مافيهاش قوة لهرااج.. مدامتش لقبلة زوج دقايق وبعدات أسماء وهي تتشوف فإسلام لي ماتحركش وممستوعبش شي لي طرا.. سرطات ريقها وستاغلات صدمتو وعطاتو بالضهر غادة تتزرب فخطاويهاا تاوصلات لطوموبيل وقبل ماتركب شافت فلبلاصة فين كان كريم مبلاصي ومبانتش ليها طوموبيلتو.. ركبات وحكات الروايض مع الأرض وهي راجعة ماغشاغيغ ومخليا إسلام واقف فبلاصتو جامد بحال الادايرين ليه پوز.. كانت فكرة مجنونة لي نفداتها أسماء بلاماتفكر فعواقبها ولي همها ديك الساع أن كريم يشوف ويبعد عليهاا.. ولمشكيل لي كان كبر هو الشخص لي باستو مكانش شي حد عادي إنما كان أكره شخص فحياتهاا.. سايگة بيد وليد لخرى بدات تتمسح بيها فمهاا وتنثر كلينكس من لباكي تتمسح بيه تاطيرات لعكر ورجع فمها حمر ونطقات وهي مخسرة سيفتها:تفو تفوووو سيررر اكريم بغيت ربي يلگيها ليك ليوم قبل غدا القواااااد الله يعطيك موصيبة ااااع
تتغوت وتسب جامعة الزمر كولو.. وفيما تفكر الشوهة لي دارت تتبغي تاكل ريتها بالفقصة.. بلاصات الطوموبيل تحت الدار تايدخلها باها لگاراج لي عندهوم ملاصق مع الدار ونزلات وهي مخنزرة وغير تدوي معاها غاتفرگع عليك.. دخلات لدار وديريكت غادة لبيتها تاسمعات سيدرا تاتعيط ليهاا:سووومة سووومة وااسومة
شداتها من لكسوة تاضارت أسماء ونهضات فيها:اش باغاا تانتي؟
سيدرا:(كمشات فيها حجبانها) هااء وعلاش تتغوتي عليا
أسماء:فرقيني عليك اسيدرا
مشات تتزرب فخطواتها تاوصلات لبيت ومن زهرها لقات مها مكيناش فيه.. لاحت الصاك فوق النموسية وبقات غادة جايا تتفكر فشنو دارت ملي كانت واحلة بان ليها هاداك هو لمخرج لوحيد ولكن دابا الصهدة بدات تطلع معاها حيت عارفاه مغايسكتش ومغايدوزهاااش ليها ويعلم الله اش كيضور فبالو دابا... تحل عليها لباب فغفلة تانقزات وضارت لقاتها رحيل لي هزات حاجبها ونطقات بتساؤل:سيدرا قالت ليا غوتي عليها اش واقع ليك عاود؟
أسماء:(تخطاتها سدات لباب بالساروت وقربات جهتها) قودتهااا
رحيل:(باهتمام)مالكي؟
أسماء:بستو
رحيل:(مخرجة عينيها)شكون؟
أسماء:(بفقصة)الزا*مل دإسلام
رحيل:(لهضرة تلفات ليها)هاااا
أسماء:(تاترجع شعرها لور باغا تجن) كلشي بسباب داك ولد لقح*بة دياااال كريم بغيت ليه لموووووت هو لي حطني فهاد لموقف بقا لاصقني مبغاااش يتفك واخا صدرتو وقلت ليه راني تخطبت ماتيقنيش ورجع تاني تيصوني ويسيفط وليوم جا لعندي لخدمة قال لك ناوي لمعقول معايا وملي ضرت فيه تبعني بطوموبيلتو وماعرفت فين نمشي حيت عارفة الاجيت لهنا غانصدق جابدة النحل على راسي والابابا ساق لخبار مغايعجبوش لحااال عليها طاحت فبالي فكرة نمشي عند إسلام ومنها نيت يزيد لاخر يتيق بلي تخطبت أنا وياه.. شفتو وكنت باغا نطلعو لاباخطمون باش كريم يفهم كر*و ساعة داك الزا*مل تاهو مقروووص وماعرفت ماندير قلت اجي نبوسو ونتبت لاخررر ودرتهاا
قالت كلمتها لخرة وهي تتشوف فرحيل وتترمش بعينيها فالمقابل رحيل تاتسمع وعينيها خارجين وغير سالات أسماء وهي طلقهاا ليها بواحد الضحكة خلات لفقصة تشد أسماااء وتغوت:وااااش قايلة ليك نكتة الخرياااااا
رحيل:(شادة كرشها)هههههه ميمكنش أويلي لاااا ههههه نتي بستي إسلاااام ههههههههه كنتو كيف لقط ولفار اش جرى
أسماء:وراه قلت ليك شنو طرا
رحيل:(خنزرات فيها)واش عارفة راسك اش درتي المكلخة نتي أصلا مكتحمليهش وديما مسمماه بكلامك وديك النهار صرفقك ودابزتو ودابا بستيه عاااادي واش عارفة هو اش غايقول مع مخووو السيدة أصلاااا معجبة بيا عليها ديما تاتبقا تغاوت معايا باش تجدب الانتباه ديالي
ربعات رحيل يديها هازة حاجبها فيها بمعنى هانتي ضبرتي عليها وأسماء مغاتنكرش بلي لفكرة زارت بالها ولكن قالت ميمكنش مي كلام رحيل خلاها تنوى وبخطوات بطيئة جلسات فوق النموسية ونطقات بهدوء:اااشمن إعجااب واكمارتو تتجيب ليا لفقصة وتتقولي إعجاااب (خنزرات)تعجب بيه جنية نشاعلاه
رحيل:(جلسات حداها)نتي عارفة سبب تصرفك ولكن هو لا وزيدي تانتي مالقيتي ماديري جيتي شلقمتي السيد هههه لا وقالت ليك مكنحملش كمارتو اوا بعدا بستيه فشفايفوو (غمزاتها)
أسماء:(بدات تتمسح شفايفها) نغسلهوم بما لقاطع ومنبردش
رحيل:(ربعات يديها) أودي على السيدة لي تتنصحني رحيل ماديريش هادي رحيل واجهي رحيل ماتفلتيش ولد لحاج صدقتي مخوووراهاا كثاااار مني هههه بعدا أنا جات معاياا على ماطرا فيا ولكن نتي سمحيليا تكلختي ههههه
أسماء:(تبسمات ببرود) رحيل شحال داز على اخر مرة نتفتك؟
رحيل:(هزات حاجبها)وتحطي يديك على شعري وتشوفي اش ندير فيك (ناضت)بدلي حوايجك ونزلي راه كلشي تيسول عليك وهااا وجدي راسك طلبي السماحة من سيدرا راه قلقتيها ونتي عارفة تقليقتهاا
أسماء:(تنهدات) نتقبل االشوهة لي درت ومانتقبلش لبخانسيس ديالي تقلق مني..
بخطوات تقيلة كان خارج رؤوف من لكوميسارية داير يديه فجيب الجاكيط لخفيف لي كان لابس.. شعرو تغوفل ولحيتو تاهي وباين فيه التكرفيس غير من الشوفة.. نازل من الدريجات بشوية وغير وصل لاخر درجة وهو يهز عينيه فالسمااا وكانت وقيتة دلغروب.. غمض عينيها وجمع النفس قبل مايطلقها ويخلي صدرو يستنشق ريحة الحرية.. الحرية لي معرفش قيمتها غير ملي خسرها.. سمع صوت رفيق لي نطق:سي رؤوف على سلامتك نتمنى تكون هادي لمرة لخرة لي دخل فيها لهاد لبلاصة
رؤوف:(بهدوء)شكرا اأستاد
رفيق:ولو هادي خدمتي المهم حاول ماطيحش راسك فشي مشكيل خر حيت بصح هاد لمرة طلع ليك الجوكير وتفكات قضيتك بسهولة ولكن لمرة الجايا مانظمنش ليك (مد ليه يديه سلم معاه)تهلا فراسك وبلغ سلمي لولد لحاج
بقا ساكت كيشوف فيه تاركب طوموبيلتو ومشى.. تنهد وتحرك من تم غادي فالزنقة ومهبط راسو كيفكر فليام لي دوز فالسيلون كيفاااش عاشهوم وكيفااش كان بحال شي طير مولف يحلق فالسماا وفجأة صيدوه وحطوه فقفص حابسين عليه حُوريتو.. كان حاس بواحد الشعور غريب فداخل ديالو معارفش اش هو؟ هز راسو كيشوف فالناس والطوموبيلات والطرقان وابسط لحوايج كانو كيجدبو انتباهو.. طريق طويلة ضربها تاوصل لحومة ودخل كيشوف البراهش كيلعبو وبقا واقف كيشوف فيهوم ساهي.. كمل طريقو تاوصل لباب ودفعو ودخل وعينيه كيضورو على الرياض لي مدة مجاش ليه.. تاسمع صوت السعدية لي نطقات:سي رؤوف جيتي؟
رؤوف:(ضار شاف فيها ونطق بصوت خافت) خويا كاين؟
السعدية:(مستغربة من سؤالو على نوح)ااه فبيروه
حرك راسو وخلاها غادي جهة لبيرو وقبل مايوصل عيطات ليه رحمة لي كانت جايا جهتو بخطوات مزروبين وباين فعينيها لهفة عنقاااتو تتبكي:ولدي فين كنتي خالعني عليك ومخليني بحال لحنش لمقطوع ليه الراااس (بعدات وشدات وجهو بين يديها تاتلمس فيه وتشوف فيه بلهفة وحنان الأم)مالك اولدي ضغافيتي ومكرفص قول ليا اش وقع ليك دوووي طمني عليك
سرط رؤوف ريقو فاش شاف كمية لخوف لي باين فوجهه مو ونطق بهدوء:أنا بخير ماتخافيش عليا
رحمة:فين كنتي اولدي ؟
رؤوف:(شد يديها وباسها)نمشي نشوف نوح ونجي عندك واخا
حركات راسها باه وهو كمل طريقو تاوصل قدام لباب وبقا واقف كيشوف فيه ساهي.. جمع قبضة يديه ودق قبل مايحل لباب ويدخل وهو كيشوف فنوح لي كان جالس فكرسيه داير نضاضر دلبروطيكسيون تيقرا شي حاجة فلبيسي.. بقا رؤوف واقف مدة كيتأمل خوه قبل مايقرب جهتو بخطوات بطيئة تاوقف قدامو ونطق وباين فيه متوثر: باغي ندوي معاك
هز فيه نوح عينيه بشوفة ماتعرفش شنو قاصد بيها ومد يديه سد لبيسي وزول النضاضر حاطهوم فوق منو وتكى بضهرو على الكرسي بلاماينطق ورؤوف فهم بلي هو عطاه الاوكي..
رؤوف:(حك شعرو وسرط ريقو) أنا عارف بلي مكنتش مزيان مع مالين الدار ومعاك نتا بالخصوص كنت أناني كانفكر غير فرااسي وفشنو باغي أنا وعمري فكرت فيكوم نتوما..قول عليا برهوش قول أناني مغانلومكش حيت هادشي كولو فياا.. ملي مات لواليد الله يرحمو وشديتي نتا بلاصتو وشفت كيفاش كلشي عاطيك قيمة وداير بحسابك حقدت عليك وحسيت بلغيرة وقلت مع راسي علاش هو اه وأنا لا وملي كنت كنعيش حياتي وكانشوفك تادخل فيها تما زدت كرهتك وكرهت دوك التداخلات ديالك كنت كانشوف الدراري لي فسني عايشين لحياة ويديرو مابغاو وأنا خصني الابغيت ندير لحاجة نجي نتشاور معاك.. ولابغيت تالمصروف نجي ناخدو من عندك.. وملي بديت كنكبر وليت تانحس بتحكماتك ليا خانقيني بزاااف وكانشوف كيفاش لواليدة تاهي كلما مشيت نشكي ليها تاتوقف فصفك تانحس براسي بحال الاماعندي قيمة.. عليها تمردت وخرجت من الجنب ومبقيت نتسوق لالكلامك ولا لعائلة ولاتاشي حاجة وتامن قرايتي مكنتش تنتسوق ليها ولي هامني نتبرع ونعيش كيف بغيت.. تعاشرت مع وحدين لي تاهوما كثر مني كانو ديما كيحرضوني عليك باش نطلب حقي فلورث ويقولو ليا راه خوك غايضمسكوم وحقكوم غاياخدو وأنا كيف لهبيل كنت تانسمع ليهوم وكلامهوم كايزيدي يخليني نتعمى وبصح تعميت نهار طلبت بحقي فلورث.. فكرت غير فراسي بكل أنانية وغير شديت فلوسي ضربت عليكوم.. عند بالي راه واخيرا غانعيش كيف بغيت ساعة كنت غير كانكدب على راسي.. (عينيه تغرغرو بالدموع) كنت كاره نبقا تحت جناحك عليها خرجت وديك الساعة شفت الدنيا على حقيقتها.. وبلي داكشي لي كنت تانشوف قبل كان غير كدوب أنا عشت فيهوم.. ضبابة كانت على عيني ممخليانيش نشوف الصح ولغلاط.. ملي مبقاش داك الجناح حسيت بمرارة الدنيا وحسيت بالدق لي كان هاز علياا.. ولمشكيلة لي وقعات ليا خلاتني نعرف لفرق بين لي كااان باغيني وباغي مصلاحتي دبصح وبين لي كان باغي غير حاجتو فيا.. هرست داك الجناااح وخليت دمو يسيل وعطيتو بالضهر بلامانفكر بلي داك الجناح هو لي كان مغطين فالشتا ومدفين فلبرد.. الجناح لي واخا نضور الدنيا ونقلب عمري نلقاه.. الجناح لي بغيتو يرجع يعاود يغطيني مور ماتعريت (دمعة طاحت من عينيه وتمشى جهة الكرسي فين كان جالس نوح تاوقف قدامو وجلس على ركابيه ونطق ببحة صوت مخنوقة وعينيه حمرررين ودموعو نازلين) غوت عليا ضربني دير لي بغيتي مغانقول تاكلمة ولكن اخويا ماتسمحش فياا عفااااك
ملي تحبس رؤوف ودوز دوك ليام فالسيلون عرف لمعنى ديال داكشي لي كان عايش فيه لعز لي كان فيه والدق لي كان مهزوز عليه..وشاف شحال من حوايج كانو عينيه معمين عليهوم.. وزيد هضرة صاحبو نهار عرف وجهو الحقيقي.. وهاديك كانت هي الدقة لي وگضاااتو وخلات الندامة طلع معاه.. وأول حاجة قرر يديرها هي يجي يطلب السماحة من خوه على مادار فيه ومقال ليه.. محني راسو تاحس بيد نوح جراه من قرفادتو تاوقف على ركابيه وشد ليه وجهو ونطق بصوت الرجولي لخشن ونبرتو صارمة:رجال السليماني مكيهبطوش الراس
رؤوف:(بنبرة مكسورة) ماتخلينيش اخويااا
نوح:(جرو معنقو ونطق بجدية) عمري غانخليك البرهووش
تشبت فيه رؤوف وهو كيبكي ويفرغ داكشي لي هاز فقلبو.. متشبت فيه بحال شي وليد صغير خايف ونوح معنقو وساكت.. واخا كلامو وتصرفاتو معاه عمرو غايقدر يحقد عليه حيت هاداك خوه الصغير وبصفتو خوهوم لكبير فهو هاز مسؤوليتهوم وداير واجباتوو معاهوم حيت هوما أمانة فرقبتو وخص يرد لبال لديك الأمانة.. ملي كاتكون نتا هو الأخ لكبير كيكون كلشي منك وتتكون هاز مسؤولية كبيرررة عليك وحمل تقيل وخصك ديما تكون على لقرص وتكون راد لبال لصغيرة قبل الكبيرة وماتخلي تاحاجة تفلت ليك وتتكون نتا لي منك كلشي.. بعد عليه رؤوف تيمسح عينيه ونوح نطق بهدوء:سير لبيتك خود دوش ورتااح (شاف فيه بجدية ممزوجة بصرامة) دير فبالك بلي باقي تابعانا جلسة نقادو فيها الضواسى
فهم رؤوف كلامو وحرك ليه راسو بالإيجاب وخرج من لبيرو بروح جديدة وحاس براسو رتاح ملي دار هاد لخطوووة..أما نوح تنهد ومسح وجهو بيديه وشاف جهة واحد التصويرة عندو فوق لبيرو وبنبرة تقيلة نطق:لهلا يحشمنا الحاج...
----
فالكافي كانت جالسة سناء بفيست بيج طويلة بسميطة وبانضة فلعنق عاطياه ستيل خاص بيها... قدامها طاس دلكافي تتجغم منو مرة مرة تاهزات عينيها فلخياال لي كان واقف قدامها دبدر الدين لي كان لابس سروال توب نواغ مع شوميز فالأوغونج حال ليها صديف مبين صدرو لمزغب ولي فيه تاتو فجنب.. زول النضاضر دالشمس حطهوم فوق الطبيلة ونطق بنبرة حنينة:حبيبة صافا؟
سناء:حمدلله ونتا؟
بدر الدين:(تبسم ليها)بشوفتك حبيبة
سناء:(رجعات شعرها ورى ودنيها ونطقات بخفوت) تعطلتي؟
بدر الدين:كان عندي غراض على قبل لخدمة
سناء:مزيان
مكانش عندها لونڤي لي تدي وتجيب معاه فالهضرة وغير حيت طلب منها تشوفو ومع شحال هادي ماهضرو مبغاتش تعيق عليه لدلك دارت ليه لخاطر.. أما هو فكان كيشوف فيها وفحالتها لي عارف سبابها وشكون مولاها.. ومع دلك مشى معاها فالخط ودار راسو معارف تاشي حاجة وهو راه رجالو مشتتين هنا..
سناء:قلتي ليا غانهضرو فشي موضوع اش بغيتي؟؟
بدر الدين:ناخدو شي كافي بعداا
عيط لسرباي باش ياخد شنو باغي وغير مشى شاف فيها وهو جامع يديه على الطبيلة ونطق بهدوء:شنو درتي مزال مع باباك؟
سناء:اخر مرة هضرت معاه مبغاش وقال ليا مستحيل يوافق
بدر الدين:(عض لسانو من لداخل) وشنو غاديري غاتمشي لفاس
سناء:(تاتلعب بليد ديال الطاس ونطقات بهدوء) حاليا مغانمشي فين حيت عارفاه راافض لفكرة واخا تبغي نقنعو ولمشكيل تاحد مواقف معايا
بدر الدين:أو ولد لحاج؟؟
سناء:خلاني مني لبابا مادخلش
بدر الدين: نقدر نعاود نعضر معاه الابغيتي؟
سناء:مع نوح(حرك راسو باه وكملات كلامها) نوو واخا تهضر معاه مكنظنش غادي يعاونا باراكة غير لوقفة لي وقف معايا
بدر الدين:(ربع يديه) وشنو لحل دابا واش هادشي على قبل طليقك حيت من لعائلة؟
سناء:(سرطات ريقها) نتا عارف اش كاااين ابدر وأنا راه كنحاول ماأمكن ندير لي فجهدي باش يوافقو
بدر الدين:نمشيو بزوج لفاس ونهضر مع باك يقدر الاشافني ناوي لمعقول يقبل ويبدل قرارو؟
سناء:(نطقات بنبرة متوثرة) واخا تمشي غير غايزيد يقصح راسو نتا معارفش بابا كيفاش كيشد الضدد وخصوصا معايا أنا هه أصلا دابا كانعيط ليه ومكيجاوبنيش وتيقطع علياا باش نفهم راسي ونحبس هادشي
بدر الدين:(تقاد لفلجلسة وشد يديها ونطق بهدوء) كاين حل يخليهوم يوافقو بزز منهوم
سناء:(باستفسار)شنو هو؟؟
بدر الدين:(بنظرة دات معنى)نتزوجو بلاخبار حد ونحطوهوم أمام الأمر الواقع..
مع نطق كلامو بدون شعور منها نثرات يديها وسط من يديه وتكات على لكرسي وهي تتسرط ريقها وتتحاول تهضم داك لكلام لي قااال ليهااا أما هو فكان كيشوف فردة فعلها بدون ماينطق.. عارف هي تتوخر الزواح وخدات رفض باها حجة باش تزيد تعطل وتماطل الزوااج وخصوصا مع رجوع ليازيد وتخربق ليه شي لي كان حاط فدمااغو.. حطات يديها على جبهتها وهي تتحكها ونطقات:مايمكنش ليااا نديرهااا ابدر هادي اخر حاجة نفكر نديرها
بدر الدين:وعاجبك حالتنا دابا؟
سناء:ماعجبانيش ولكن كل حاجة عندها حل وزيد الزواح بلاموافقة العائلة راه مبقاش زواج ولى سخط ابدر
بدر الدين:(قلب وجهو) بان ليا نتي لي مباغاش ودايرة السبة اسناء
نبرة صوتو خلاتها تسرط ريقهااا وتقلب عينيها عليه باش ماتفرطش راسها ويعيق بيها واخا تحركاتها باينين.. أما هو رجع شاف فيها ونطق بجدية: نهار لول قلتي شنو كاين وتاأنا قلت ليك لي عندي بغيتك وجيت نطلب يديك واخا باك مبغاااش وهاني فكرامتي فاش مبغاش يفتح باب دارو ليا ومع دلك مانطقتش حيت عارفك نتي باغاني كيف باغيك ولكن دابا كانشوف قدامي سناء خرا لي رافضة الزوااااج
سناء:(كلامو عارفاه صحيح عليها نطقات بهدوء)بدر أنا باغااك ولكن صبر ندوي مع بابا وغانقنعو تيق بيااا عفااك
بدر الدين:واخا
ناض وقف وهي تتشوف فيه..جبد من جيبو لفلوس خلص وخرج بلامايدوي مخليها تتشوف فيه ساكتة.. أما هو غير خرج توجه لطوموبيلتو وركب لور وسد لباب ونطق بنبرة صوت قوية: بان ليا خصني نزيد لادووووز
علي:(شاف فيه من لمرايا) اش واقع؟
بدر الدين:(عوح راسو ونطق بنبرة مريضة) أي واحد غايوقف فطريقي باش نوصل لعمو غاتكون نهايتو الموووووت (حل الشرجم ونطق بنبرة آمرة) تحرك لمطااار
علي:مشات
---
فبيت رحيل كانت جالسة بوحدها وتفكيرهاا مشغول كيف الآونة الأخيرة من نهار هضرات مع أسمااء وقالت ليها على خبار لكدبة دلخطبة وكلامها لي قالت وهي على حالها.. تنهدات وناضت بخطوات تقيلة جيهة مرايتها أوقفات قدامهاا تتشوف فانعكاسهاا.. كانت ببيجامة خفيفة مصيفة وشعرها مجموع شفينجة.. ركزات عينيها على وجهها لي كايبان شاحب ومدات يديها تتلمسو بحركات خفافين وهي ساارحة فانعكاسهاا.. تتبان إنسانة دابلة من برا ومن لداخل شمعتها طفات.. إنسانة لي هي مكتعرفهاااش مختالفة على رحيل لي كانت عليه.. الضحكة فلوجه ولقلب ربي عالم اش فيه واش مخبي.. تتشوفها مبسمة ولكن لداخل ديالها راه كينزف وتتبكي الدم.. تتحاول تجمع شتات نفسها فكل مرة كاتهرس فيه تتنوص وتحاول أنها تكمل فين حبسات واخا الدق لي تتاكلوو الاأنها مكتستلمش ولكن واش هادشي كااافي؟؟ واش هي عايشة مرتاحة دابا؟ عاجبها لوضع لي هي فيه؟ واش هاكا هي كانت باغا تعيش حياتها وتكملهاا؟ أكيددد لا تعيى ماتكدب على راسها هي مبقاتش حاملة حالتها وشي لي تتعيشوو.. مدات يديها وطلقات شعرها لي نزل على كتافها كيف شلال لعسل وبقات تتشوف فراسهاا وتفكرات جملة أسماء "الانتي مادرتيش لحل لراسك تيقيني عمرك غاتلقاي لي يديرو ليك نتي مباغاش تعالجي مباغش تزيدي خطوة لقدام باقا مخليا داك لماضي يمرديك ويخليك تخسري مستقبالك وهادا هو أكبر غلط كديريه.."
ديك لجملة تتعاود فدماغهاا بحال شي موسيقى صامتة بدون لحن.. سرطات ريقهااا ورجعات شافت فراسها ونطقات بنبرة صوت خافت وهي تتكرر ديك لجملة :
"الانتي مادرتيش لحل لراسك تيقيني عمرك غاتلقاي لي يديرو ليك نتي مباغاش تعالجي مباغش تزيدي خطوة لقدام باقا مخليا داك لماضي يمرديك ويخليك تخسري مستقبالك وهادا هو أكبر غلط كديريه.."
تنهدات ونطقات بصوت قوي وهي تتشوف فانعكاسها وتتوجه لكلام لراسهاا: نتي قوية وغاتقدري تواجهي ارحيل غاتقدري..
نفس لكلام كااانت تتقولو فنفسها وهي واقفة دابا قدام لباب دبيرو نووح.. ملي عرفات أنه جا لخدمة مباشرة تفكرات حوارها مع نفسها الليلة الماضية.. القوة لي كانت كاتسقي بيها روحها ليلة لي فااااتت باااش تقدر أنها تخطي أول خطوة فبحررر ماضيها وتواجهو.. الماضي لي كايعرقل ليها لحاااضرر.. جمعات النفس وزفراتهااا ونطقات بخفوت: غاتقدري تواجهي ارحيل
دقات لباب وتسمع ليها صوتو الرجولي وهو كيعطي الأوكي باش دخل.. حلات لباب وهزات عينيها فهاداك القابع فكرسيه جالس بجلسة رجولية ولبيسي فوق ركابيه خدام بيه.. هز عينو فيهاا وجات ديريكت فعويناتها لخضرين وعلى غير عادتو الأخيرة ماهبطش عينو بل بقا مفيكسيها على ملامح وجهها ونطق بنبرتو الرجولية الهادئة:وي؟
سدات رحيل لباب وتمشات بخطوات بطيئة جهتو تاوقفات قدامو ونطقات:نقدر ناخد من وقتك شوية؟؟
حرك ليها راسها باه وأشار ليها تجلس فالفوطوي لي قدامو وهي نفدات مطلبو.. حط لبيسي فوق البيرو وجمع يديه ونطق بجدية:كانسمع
كانت جامعة يديهاا وتتحكهوم بتوثر مشتتى بصرها فلبيرو كولو باش ماتشوفش فيه وديك لقوة ترجع ضُعف.. دام السكون لدقائق قبل ماتزفر النفس وتنطق بنبرة هادية:كنتي سولتيني على السبب لي خلاني نرفض الزواج (سكتات تتسنى جوابو وفاش ماسمعاتش صوتو هزات عينيها فيه لقاتو كيشوف فيها شوفات ماعرفاتش اش تحتهوم..رجعات حكات يديها مع بعض بتوثر قبل ماتنطق وعينيها فقلب عينيه) وأنا ليوم غانقول ليك السبب؟؟
ملي اتخدات هاد لقرار وهي مصممة أنها ماتراجعش عليه.. الوضع لي هي فيه مبقاش عاجبها وهي حاسة بنفسيتها لي فيما تقول استقرات ترجع تاني من جديد دهور.. نهار رجعات لحظن واليديها وعائلتها ضربات على شي حاجة سميتو الزواج ولحب.. حيت داكشي لي عاشت كان كافي يخليها تنفر وترجع لور.. بسباب لمعاناة لي شافت ولي بفضل الله قدرات تخلص منها واخا لدابا أثارها باقي باين.. ولكن القدر كان ليه كلام آخر وقلبها بلاماتحس بيه ماال لجهتو واختارو هو من دون النااس.. نهار لول لي كانت فيه فلغابة هاربة من بدر وخايفة صوتو الرجولي لي سمعات كيطمنها بكلامو خلاوها تحس بالأمان.. حسات براسها بحال الاكانت فشي بلاصة مظلمة وتتقلب على شي طريق باش تخرج من داك الظلام ولكن فكل مرة كانت تتفشل تاجا هو وكان بحال الشمعة لي ضوات مورياه الطريق لخروج.. كان بحال شي لصقة كاديريها لجروحك باش يبراو.. معرفاتش راسها وقتاش قدر يخليها تنجادب ليه واش شخصيتو ولكاريزما لي فارضهاا غير فوجودو ولارزانتو والتقالة ديالو ولايمكن مواقفو الرجولية معاهااا.. ولكن قبل ماتجي وتجلس قدامو دابا بكل كبرياء وشموخ أنثى طلب منها جهد كبير وهاد لخطوة قبل ماديرها ليه دارتها على قبل نفسها لي حسات بيها ماتت.. نفسها لي بغات تحيها من جديد عل قبل راسها.. بغات ترجع رحيل لي كانت عليها ولي فقداتها بسبب ماضيهاا.. مكانتش باغا تراجع داكشي علاش قررات ليوم تفصح على جزء من داكشي لي وقع معاها وتخليه فالصورة ويعرف السبب الحقيقي للرفض باش مايلومهااش..وفالمقابل كان هو باقي جالس بنفس جلستو الرجولية وعينو الزرقين كيجوبو ملامحها المتوثرة ولممزوجة بالجدية.. مانطق بتاشي كلمة ومقطعهااش وهادشي زاد خلاها تشجع فاش شافتو كيتسناها تقول لي عندها.. نثرات من الباكي دكلينيكس لي فالطبيلة لي قدامها وبدات تتمسح يديها لعرقانين عاد رجعات كوراتو فيديها وزفرات النفس قبل ماطلقهاا..
رحيل:(عينيها كانو موجهين ليديها لي حاطة فوق ركابيها وبصوت هادئ ممزوج بالألم نطقات) بحالي بحال گاع لبنات باغين غير شخص لي يقدرنا ويبغينا ولي نلقاوه ديما معانا.. راجل لي نعولو عليه فوقت الشدة ولي يصونا ويتاقى فينا الله.. هادشي لي كان كيضور فبالي ديك الساع..تالقاتني بيه الصدفة (ابتسامة ساخرة ترسمات على شفتها ملي تفكرات الدخلة لي دخلها عاصم النهار لول)ولانقولو خلاها تكون صدفة باش أنا نتيق.. شفتو راجل وقف معايا وفكل مرة كنت تانطيح فمشكيل كنت بلامانحس تانلقاه فجنبي.. ارتاحيت ليه ومغانكرش هادشي كولشي فيه كان مزيان ومكانش كيبان ليا فيه تاشي عيييب.. لمرات لي شفتو فيهوم كانو معدودين على رؤوس الأصابع.. تانهار عرفت من بابا بلي هو طلب يدي لزواج متيقتش خصوصا هو عمرو لمح ليا محتارمني وعمرو ماقلل لعفة عليا..داكشي علاش استغربت وفنفس لوقت عجبني كيفاش حتارمني وجا قاصد لمعقول.. فكرت وقررت نوافق حيت بالنسبة ليا مكانش شي سبب يخليني نرفض والسيد ناوي لمعقول.. جا لدار وطلب يدي وتخطبنا وفديك لفترة عمري شفت شي حاجة خايبة فيه لي تخليني نتراجع على قراري.. (سكتات مدة وهي تاطلع النفس وتهبطو عاد كملات ) وصل نهار لعرس وفرحت فيه وبالتكبيرة لي كبر بيا تزوجنا ومشيت معاه هو وعائلتو (زيرات على يديها بلاماتحس وصوتها تخنق) خليت عائلتي ومشيت مع عائلة خرا لي حسبتهوم فمقام عائلتي.. ومكنتش عارفة ديك الساعة بلي أنا طيحت راسي فواحد الحفرة لي صعيب نطلع منهاا.. مشيت لمدينة خرا بلامانعرف فقت ولقيت راسي فيها.. فبلاصة خرا غير لبلاصة لي كنت دايرة فبالي.. تعجبت وقلت يمكن فهمت غالاط ماتعطيش أحكام ارحيل وتسبقي لعيييب ولكن (سدات عينيها كاتحاول تمنع دموعها ينزلو ويديها كانت تترجف مجرد ماتفكرات تفاصيل لي عاشت.. نحنحات باش تنضف حلقها من لخنقة لي شاداها) تما تلقيت صدمة حياتي فاش عرفت حقيقة هاداك لي أنا مزوجة بيه وديك لعائلة لي لحت فيها راسي.. كنت عايشة فوسط عائلتي تالقيت راسي عايشة وسط ناس قاطعين يديهوم من رحمة الله.. قلوبهوم كحلة وخبيثة.. ناس لي عندهوم ميات وجه يغروك بيه.. ناس لي كلشي عندهوم مباح.. ناس لي عمري كنت نظن كاينين معانا فنفس الدنيا ومشاركين معانا الأوكسيجين.. والراجل لي كنت قلت غايكون معايا وغايتاقي فيا الله ويحتارمني كان ديب وهو أول واحد غرس نيابو فلحمي وطمع فيا.. (عضات شفايفها باش تحبس رجفتهوم ومحساتش براسها بلي دماتهوم.. حيت فهاد اللحظة هي كانت تتعاود تعيش دوك التفاصيل فداكرتها.. حضنات راسها بيديها وكملات بخفوت) بعدني على دارنا وعلى مدينتي وعلى عائلتي حرمني منهوم.. لوى ليا دراعي بيهوم حيت عارف قيمتهوم عندي وأنا مقدرتش ندير تاشي حاجة.. عيت مانحاول ولكن كل مرة كنت تانفشل.. عائلتي معارفينش لي بيا حيت مقدراش نشكي ليهوم وأنا خايفة عليهوم.. استاغل خوفي هو وعائلتو باش يديرو مابغااو.. كل نهار كنت تانعيشو وسطهوم كنت تانتمنى ربي ياخد من عمري باش نرتاح.. لعيشة دلحر'ام كانت صعيبة علياا والنااس لي عايشة معاهوم كانو غارقين فيه.. شفت تما بزاف دلحوايح لي متقبلهومش عقلي وعشت شي حوايج لي تاحد مايقدر يصبر عليهوم..
فديك الساعة وهي تاتعاود عقلها رجعها لشنو عاشت.. سهات وبقات تتشوف فالفراغ ومحساتش بيديها لي كانو كيفرتتو فداك كلينيكس وهي مكملة كلامها بصوت مخنوق بلبكا: كنت طايحة فبير غارق كلما حاولت نطلع منو كاتمد يد وتجرني تال قاعو مغرقاني وموسخاني بوسخهووم..
تمنيت نكون عايشة فحلمة ونفيق نلقى راسي ناعسة فبيتي الصغير نفيق ونلقى بابا حدايا.. ولكن داكشي لي تمنيت مكانش هو داكشي لي عشت.. (زيرات على يديها ورجفة حسات بيها سرات معاها) كون كنت عارفة بلي داك الشخص غايعيشني هادشي كولو كون مكنتش قبلت بمرة ولكن زهري طيحني بين يديه.. باش هو يعطيني لماكفس منو (لهدوء لي كانت تتحاول تبقا متشبتة بيه قدامو تبخر ملي تفكرات سيرة بدر الدين.. بؤبؤ عينيها لي كان تيضور فبلاصتو وتشتت شوفتها فالبيرو ويديها لي باقي كاترجف ومرة مرة تمدها وتحك عنقها كيدلو على توثرها وخوفها..نطقات بخفوت) بسبابهوم خسرت أقرب الناس لقلبي وخسرت راسي ورحيل لي كنت كنعرفها..(أو وسط حزنها ابتسامة زينات شفايفها) ولكن ربحت بنتي.. بنتي لي هي كلشي فحياتي
تنحنحات وهي هازة راسها تتشوف فيه وعينيها الخضرين كانو شعيرات دموية بداو يتكونو فيهوم ولمعة الدموع كانت واضحة ولكن رغم هادشي كولو منزلاتهومش وبقات مقوية راسها قدامو واخا هي فلداخل راه كلها مشتتة والصراع لي عايشة فيه تاحد ميقدر يصبر عليه.. الصراع لي عاشتو هاد السنين كولها لدرجة أنها ولفاتو أو ولات متعودة عليه.. وفالمقابل كان نوح باقي على جلستو وعينو عليهاا بشوفاتو لي هي معرفاتش شنو تحتهوم.. تتحاول تقرا ملامح وجهو ولكن فشلات حيت هاد الشخص لي جالس قدامها شخص لي صعيب تعرف اش تحت راسو وفاش كيفكر.. هو هاكا داير من ديما وهو بحال شي بير غارق لي ماتقدرش تعرف اش فيه.. السكات ديالو خلى رحيل تحس بتوثر كثر وتقرر تنهي الجلسة حيت داك القوة المصطنعة بدات تتحس بيها كتلاشى أمام نظراتو ليهاا..
رحيل:(حكات جبهتها)عارفة بلي هاد الكلام كان خصو يتقال داك النهار لي نتا سولتيني فيه وأنا بقيت ساكتة.. حيت أنا كنت ديما كنتهرب من هاد الموضوع حيت مكنتش تنبغي ندوي فيه (تبسمات ليه بخفوت) سمحليا حيت خديت من وقتك موسيو السليماني وعطلتك على خدمتك وشكرا حيت سمعتي لياا..
ناضت بلاماتسنى جوابو غادة جهة لباب وحلاتو وخرجات ومجرد ماسدات لباب وهي تنفس بالجهد ودمعة لي كانت حابسة خلاتها تنزل.. حاسة بلي هم كبير كانت هازاه فوق كتافها ومتقل عليها وملي عاودات ليه داك التقل تلاشى وخفافت.. وبخطوات تقيلة مشات جهة الدروج وبدات تتنزل خطوة بخطوة.. حدرات راسها ومشات ديريكت لحمام وسدات لباب عليها وتوجهات لجهة لاڤابو طلقات لما وبدات تتغسل وجهها.. ليوم هي دارت لخطوة لي كانت مهمة فحياتها.. قررات تعاود ليه ولو جزء من داكشي لي عاشت وشافت.. حاولات أنها مادخلش فالتفاصيل ديال داكشي لي عاشتو ومتعاودوش ليه بحذافيرو حيت كرامتها ماتسمحش ليها أنها تقول كلشي وكيفاش راجلها باعها لعمو ولحقارة ديال عمو معاها.. الشي لي هي بقات ساكتة عليه ومعاوداتو لحد من غير الطبيية ونهار انهيارها قدام أسماء.. الشي لي كاتحس بيه خاص بيها هي ماتقدرش أنها تبوح بيه لأي كاااان.. خدات السغڤيت وبدات تتمسح وجهها ولاحتو فلبوبيل وشافت مرة خرا فانعكاسها قبل ماتخرج من لحمام باش ترجع لبيرو وتكمل خدمتها.. كانت غادة تابان ليها محمد طه داخل وهي تمشي جهتو وتبسمات ليه بخفوت:جيتي ؟
محمد طه:اه غير ساليت مع مي وجيت فين كنتي (شاف فعينيها لحمرين وهو يكمش حجبانو) واش كنتي تتبكي؟
رحيل:(ضحكات باش ماتخليهش يعيق)ههه نو غير ضروني عيني وصاف امدرا اش قال ليكوم الطبيب فالتحاليل لي درتو؟
محمد طه:لقيتو عامر وعطيتهوم لسكريتيرة ديالو هي غاتعطيهوم ليه ومور مايشوفهوم غايتحدد نهار دلعملية
رحيل:ولعملية ماعرفتيش بشحال غاتقام؟
محمد طه:لا باقي ولكن ملي غايعطيونا الرونديڤو غانعرفو
حيل:مهم احبيبي عندي شي فلوس فلكونط ديالي تانخرجهوم ليك واخا
محمد طه:(شدها من وجهها وباس جبهتها)مكاين لاش اعوينات الجلبانة أنا غانتكلف والاحتاجيت شي حاجة غانطلب ولد لحاج يعطيني ويقطعها من لخلصة ديالي
رحيل:(تنهدات) ماتقولش هاكا نتا خويا والاموقفناش مع بعضياتنا فوقت الحزة وعاونتك وعاونتيني هي والو مهم خلي هاد السوجي ندويو فيه فالدار أنا غانطلع نكمل خدمتي باي..
فنفس اللحظة وقفات الطوموبيل دبدر الدين قدام لباب دلميزون دلڤواتيغ ونزل منها بكل عنفوان وعينو على المبنى بنظرات خبيثة.. ضار جهة علي ونطق:تسناني لهيه
كمل طريقو ودخل مع لباب وعينو كيجوبو فالمكان بنفس الابتسامة المريضة لي مرسومة على شفايفو.. تبان ليه محمد طه خارج من لبيرو هاز شي وراق وهو يعوج راسو وتبسيمتو زادت توسعات فنفس الوقيتة لي هز محمد طه عينو فيه وتلقاو نظراتهوم..
تتنزل من الدروج بخطوات تقيلة ويديها على كرشها... وكل نهار كاتزيد تحس براسها تقلات ورجليها تنفخوو ليها وهي كلها تنفخاات.. دخلات لطبقة الثانية وهي تتنهج وتسوط قاتلها الصهد واخا لابسة بيجامة خفيفة حد الركبة غير مع سليب وتاسوتيان مدايراهش ومع دلك ميتة بالصهد.. دخلات لكوزينة وخاطرها مشهي شي حاجة باردة وتاغزلان لي تصاوب ليها شي شهيوات مكيناش مشات لفاك تسول على شي حاجة.. خدات قرعة دلما باردة وجرات الكرسي جالسة وحلاتها تتشرب منهاا تاسمعات صوت كلثوم لي نطقات بهدوء:البارد بزاف غايضرك؟
شافت فيها تانيرت بهدوء وكلثوم دخلات لكوزينة وهي مبتاسمة ليها وجرات الكرسي لي قدامها جلسات: ماخصكش تشربي لبارد بزاف
تانيرت:فيا الصهد
كلثوم:(حركات راسها باه) اه مراكش سخونة بزاف ولكن الدار تبارك الله مبردة وكبيرة ولحمالة هي لي خلاتك تولي تتحسي بالصهد دغيا وخاطرك يضياق..
تانيرت:يمكن
واخا تانيرت قبلات بكلثوم تعيش معاهوم وسمحات ليها إلا أنها باقي عندها حساسية منها على داكشي لي دارتو كلثوم.. وباقي مقدراش تعامل معاها عادي واخا هي بينات الندم ديالها ليهوم وطلبات السماحة.. وتاكلثوم لاحظات هادشي عليها قررات تفتح معاها الموضوع ماحدهوم بوحدهوم فالدار
كلثوم:(شدات يدين تانيرت لي هزات فيها عينيها ونطقات بصوت هادئ) عارفة بلي نتي باقا واخدة موقف مني اتانيرت على مادرت ومن حقك مغانلومكش حيت أنا درت حوايج خايبة فحقكوم شتت ليك شملك مع راجلك وخرجت ليك على حياتك وهاني دابا تانحاول نصلح مادرت معاكوم مور ماعطيتوني فرصة..
تانيرت:(تنهدات) الانتي اكلثوم حاسة براسك ندمتي بصح وبغيتي تبداي حياة جديدة فغايخصك تصبري حيت مساهلش نساو نتي اش درتي ولكن هادشي مكيعنيش أننا حاقدين عليك وكيف نتي طلبتي السماحة حنا سمحنا ليك ومحاقدينش عليك حيت نتي تتبقاي ممات محمد طه وأسماء أو ولادنا خووت
كلثوم:(تبسمات ليها) وأنا غانصبر تيقي بيا أهم حاجة عندي هي نبداو صفحة جديدة وكيف قلتي ولادنا خوت وحنا خصنا نفكرو فيهوم وفمصلاحتهوم..
تبسمات ليها تانيرت ومع بغات تنطق سمعات صوت سيدرا وهي تتعيط ليها تاوصلات عندها وكانت لابسة شورط وتيشورت ديالو وطالقة شعرها المشنتف.. قربات عندها وحطات راسها على كرشها معنقاها:تانيرت إينو فيا جويعات
تانيرت:(معنقاها وتتمسح على شعرها)شنو بغيتي نصاوب ليك؟
سيدرا:(تادوي وعينيها على كلثوم لي مبسمة ليها) بغيت دلاح وتوتات لي عطاني ماي بلو آيز
تانيرت:هادا هو الجوع لي فيك تعمري كرشك بلخوا الخاوي
سيدرا:(شافت فيها مكمشة حجبانها) وراه كاينين صهودات تانيرت إينو بزاف
تانيرت:بالسيف ونتي طالقة شعرك اجي نجمعو ليك
ضارت سيدرا عندها وتانيرت بدات تتجمع ليها شعرها شفنجة لفوق ونطقات وهي مكمشة حجبانها:شعرك مخبل خصو يتمشط
سيدرا:غير جمعيه تانيرت إينو
تانيرت:اراي داك لاستيك لي فيديك
جمعاتو ليها وكلثوم بقات جالسة حاضياهوم وهي مبسمة تانطقات بهدوء موجهة حديثها لسيدرا:تبغي نصاوب ليك شلاظة دلفروي اسيدرا
سيدرا:(شافت فيها وجمعات فمها) شنو غاديري فيها
كلثوم:لي بغيتي ابنتي
سيدرا:(شافت فتانيرت لي غمضات ليها عينيها وعاد شافت فكلثوم) صافي واخا ولكن ماديرش ليا كيوي متيعجبنيش
كلثوم: هي لولة
ناضت غادة لثلاجة جبدات الديسير لي تم عاد مشات جهة الرخامة وجبدات لقطاعة وحطات الديسير لي غاتصاوب ليها وتانيرت حاضياها بدون ماتحس لقات راسها منتابهة ليها وحاطة عينيها عليها وكلثوم تتقطع فالبنان والديسير لي عندها تاسالات وخلطاتهوم فطبسيل ومدات لسيدرا حقها وحطات لتانيرت تاهي عاد هزات طبسيلها وجلسات فبلاصتها وبداو كياكلو.. وسيدرا مشات تتجري لبيتها جابت إيڤانا عاد رجعات تاكل وعينيها مرة مرة يشوفو فكلثوم لي كانت تتبسم ليها كلما جات عينيها عليها..
----
كان حاس بواحد النشوة غريبة وهو كيشوف فمحمد طه لي كان بدورو حاط عينو عليه تايشوف فيه وهو معارفوش.. قرب جهتو تاوقف قدامو ونطق محمد طه بلباقة:تفضل اسيدي باش نقدر نعاونك
بدر الدين:(غمض عينيه ونطق بهدوء) باغي نشوف ولد لحاج
محمد طه:عندك رونديڤو معاه؟
بدر الدين:(بتبسيمة خفيفة) لا
محمد طه:غايخصك تسنى تانعلمو حيت هو مشغول دابا
عوج فيه بدر الدين راسو وقبل ماينطق تسمع صوت سعيد لي كان جاي هاز معاه واحد لملف ومدو لمحمد طه:نسيتي تاخد الملف لي قلت ليك (شاف فبدر الدين ورجع شاف فمحمد طه) نتا سير كمل خدمتك وأنا غانتكلف مع لموسيو
حرك محمد طه راسو باه وتبسم لبدر ومشى مخلي بدر الدين يتبعو بعينيه تاغبر عاد ضار جهة سعيد لي نطق:وي موسيو؟
بدر الدين:باغي نشوف ولد لحاج قول ليه بدر الدين الجوهري
سعيد:واخا تقدر تسنى هنا بيما علمتو
مشى سعيد لبيروه وبدر الدين دار يديه فجيابو ونطق بتبسيمة خفيفة:محمد طه التجاني ههه
رجع سعيد عندو لي نطق بلباقة:تفضل معايا
سبقو جهة الدروج وبدر الدين تابعو وعينيه كيضورو هنا ولهيه تاوصل قدام لبيرو وهو يقلب عينيه لكولوار وحك لحيتو هامس بنبرة خافتة:عموو ديالي
تحل لباب ودخل سعيد لي دار الطريق لبدر الدين لي تقدم وعينيه على نوح لي كان جالس بلاصتو وحاط يديه على دقنو.. وقف قدامو بدر الدين ومد يديه سلم عليه ونوح نطق بنبرتو الرجولية:سي الجوهري مرحبا تفضل
جلس بدر الدين فالكرسي لي جنب البيرو ونطق بهدوء:شكرا اولد لحاج سمحليا حيت جيت عندك بلاموعد
نوح:(تحنى لقدام وشبك يديه بزوج مع بعضياتهوم ونطق بهدوء)مرحبا شنو تبغي تشرب؟
بدر الدين:مغانتعطلش بزاف جيت غير ندوي معاك فواحد لموضوع ونمشي
نوح:(شاف فسعيد لي سد لباب ومشى ورجع شاف فبدر الدين ونطق بجدية) كنسمعك
بدر الدين:الموضوع هو زواجي بخالتك باغيك تعاوني باش نلقى شي حل لي يخلي باها يوافق بزواجنا عارف بلي نتا لي غاتقدر تقنعو حيت سناء سبق وقالت ليا بلي مكانتك عند العائلة كبيرة وكلمتك مسموعة هادشي علاش جيت قاصدك
نوح:(لعب بلسانو ففمو ونطق بلهداوة) المشكيل كاين فالحاج كيف تتعرف طليق سناء ولد عمها داكشي علاش هو مباغيهاش تزوج واحد خر وكيشوف بلي ولد خوه هو المناسب ليها
بدر الدين:(تبسم ليه بهدوء) ولد خوه كون كان مناسب ليها مكانوش غايتفارقو وكل واحد يمشي فطريق.. كان غايبقا متشبت بيها واخا يوقع لي يوقع (تقاد فالجلسة) أنا سناء باغيها وباغي معاها المعقول عليها كانحاول نلقى شي حل
نوح:(حك لحيتو وحرك راسو بهدوء)كيف قلت ليك النهار لول الكلمة فيد الحاج ولكن غانحاول نشوف كيف ندير ندوي معاه
بدر الدين:(تبسم ليه وهو نايض ومد يدو سلم عليه) شكرا اولد لحاج وسمحليا حيت خديت من وقتك
نوح:(ناض من بلاصتو وسلم عليه) مرحبا اسي الجوهري
عطاه بدر الدين بضهرو وخرج من لبيرو غادي وهو مبسم بلهداوة وغادي ديريكت جهة الباب وفنفس الوقيتة لي كان خارج فيها من لباب كان اليازيد داخل تاهو وتخالفو بزوج بيهوم وبلخطفة هز فيه ليازيد عينيه قبل مايكمل طريقو لداخل وبدر الدين غير خرج وهو يوسع التبسيمة ديالو المريضة وتمشى جهة الطوموييل فين كان جالس علي بعيد شوية وهو يحل لباب لقدامي وجلس وهو باقي مبسم وشاف فعلي لي نطق بهدوء: باقي لدابا مافهمتش علاش جيتي لهنا واش مخفتيش تشوفك وتفضحك وكلشي يعرف شكون نتا؟
بدر الدين:(عوح راسو) بعض لمرات تايخصك تغامر لابغيتي دير لي فراسك
علي: غامر ولكن رد لبال ابدر وماتنساش عائلتها الاعرفوك قريب ليها غايصدقو تاني دايرين بيك شكاية
بدر الدين:لعب بالعافية زوووين وخصوصا لاكنتي نتا مولاهاا
علي:شنو دابا غانوصلك لمطار ولاغادير ليا بحال داك المرة تاوصلتك لباب لمطار ونتا تقلب ريك ورجعناا
بدر الدين:(شاف فساعتو) سير لاباخطمون هو لول ناخد شي حاجة عاد نمشي (ضار شاف فيه وهز حاجبو) ملي غاترجع من لمطار غاتمشي دير خدمتك ودراري لي هنا رد معاهوم لبال سمعتي مانبغي تاحاجة تفلت ليكووم نسالي شغلي فالداخلة وغانرجع لهنا وديك الساعة كلام خر
علي:كون هاني كلشي ماشي كيف نتا باغيه
----
وصل اليازيد لفوق وبلامايدق الباب حلو ودخل مدرم كيف مولف.. هز نوح راسو فيه ونطق بصوت بارد:داخل لدار باك الشريف
اليازيد:(تبسم وقرب جهتو) وايلي ماتقولش ليا خصني ندق نتا عارفني ماعنديش مع لبروطوكول الخاوي
نوح:(كيطابي فالبيسي وجاوبو ببرودة دم) قول ماعندكش مع الصواب
اليازيد:(ضحك وجلس فالكرسي فين كان جالس بدر الدين) صوابي عارفو اولد لحاج
نوح:(زول النضاضر وغمزو بلخف)اش جابك عندي؟
اليازيد:(بمزاج) جابني لهوا (تنهد) يالاه رجعت من فاس وجيت ديريكت عندك باش ندوي معاك على بلان خالتك
جغم نوح من الطاس دلقهوة ومانطقش شي لي خلى اليازيد يكمل كلامو:دويت مع عمي وقلت ليه لي كاين وبلي أنا باقي باغي سناء وباغي نجمع الشمل معاهاا وهو قبل ولكن المشكيل كاين فخالتك لي باقي مقصحة راسها ومباغاش تعطيني تافرصة وندوي معاهاا لا وزوينة باقي باغا تكمل فزواجها بداك الزا*مل لي جايبة ليا
نوح:(تبسم بالخف) عرفتي شكون كان عندي هنا ؟
اليازيد:شكون سناء؟
نوح:(جاوبو بنبرة باردة)تت الضرو ديالك
حل اليازيد عينو فنوح لي جالس تيشوف فيه بشوفاتو الباردة بينما اليازيد كان تيتحرق فالداخل ديالو بنار الغيرة.. ضرب البيرو بيديه وناض وهو حاس براسو غاينفاجر ونطق بعصبية: وداك الزا*مل اش بغا تاجا عندك باينة غايكووون على قبلهاا ياااك باغيك تعاونوو
نوح:(هز فيه حاجبو ونطق بجدية) متنساش راسك بلي نتا سباب المشكيل وهادشي لي وصلتي ليه بيدك درتيه..
اليازيد:(وقف كينهج) غلطة وندمت عليها وزايدون ماشي بوحدي لي كنت السباب
نوح:(هز فيه حاجبو وناض من بلاصتو غادي جهتو ويديه فجياب السروال تاوقف قدامو ونطق بنفس الجدية الممزوجة الصرامة) هاد لكلام ماعندو باش يفيدك معايا اليازيد وهادشي ماشي مبرر يخليك تمشي تخونها.. الاكنتي نتا صاحبي هي راه خت مي وأنا لي شفت كيفاش كانت حالتها بسباب الفعلة لي درتي فيهاا
اليازيد:(حرك راسو ونطق وهو نادم) ديك الساعة تعماو ليا لعينين عليها غلطت وهاأنا دابا كنخلص اش درت
نوح:(تخطاه أو وقف قدام الشرجم ونطق بنبرة ساخرة) ونتا مبان ليك غير صاحبتها باش تخونها معاها..
العلاقة الزوجية ضروري مايكونو فيها مشاكيل وخصومات لي تايعطيوهاا طعم اخر ولي كيزيدو يخليو العلاقة يااتفشل يااتقوى وهادشي كيكون على حسب الزوج لي مشاركين هاد لحياة.. داز عام على زواج سناء باليازيد عام كان بحال شي حلمة زوينة لسناء وليه تاهو لي كان لاقي راحتو وعايش حياة زوجية مستاقرة.. من نهار خطبها قرر يحيد عليه داك تازهوانيت ديالو ويجمع راسو.. كانت صعيبة عليه فلول ولكن من بعد ولف وتعايش مع حياتو الجديدة لي عجباتو وعحبو سيستيمها.. كان هو وسناء سمنة على عسل عايشين فأباخطمون دليازيد الخاصة لي كاينة ففاس مبعدين على لعائلة حيت بغاو يعيشو حياتهوم بحرية واخا كاين رياض العائلة الاأن ليازيد مكيعحبوش دوك التجمعات بزاف ويعيش مع العائلة حيت مغاياخدش خاطرو مع مرتو.. وتاسناء باغا الخصوصية ليها وتاخد راحتها.. من طبعها هي ديما مهتمة براسهاا ماشي على قبل اليازيد إينما على قبل نفسها مكيعجبهاش تشوف شي حاجة ماهياش فراسهاا وزيد خدمتها كتحتم عليها تكووون فمظهر أنيق بحكم هي خدامة صحفية.. الخدمة لي كانت من صغرها تحلم بيها وفاش كبرات حققات حلمها.. ولكن كان مشكيل بسيط وهو بعض لمرات تاضطر أنها دبلاصا وهادشي مكانش تيعجب ليازيد بلاتوقيت لخدمة تاهو.. وسبق ليه فتح معاها لموضوع وهي بكل صراحة علماتو بلي هاديك خدمتها ومغاتقدرش تسمح فيها.. واليازيد مكان عليه غير يوافق حيت هو عارف مدى حبها وشغفها لديك الخدمة.. صبر واخا معجبوش لحال ولكن ماعندو مايدير حيت النهار لول حطات ليه كلشي سوغ طابل وقالت ليه خدمتي هي لي مانسمحش فيها وهو وافق عليها.. دازو يامات الله وفيوم من الأيام قرر اليازيد يفاتحها فالموضوع لي ديما كان تيفكر فيه وغير مكانش تايلقى ليه لوقيتة..
كان واقف فالصالة مونجي كيشوف فداك الطابلة لي كان عليها گاع الأكلات لي هي تتبغي ولي دومونداهوم خصيصا على قبلها من الغيسطو لي تيعجبها.. مزينها بالشموع والورد لحمر المنثور مخلي لجو يكون رومانسي وشاعري.. شاف فساعتو ولقى بلي هادي هي وقيتها مع ديجا عيط ليها وعلماتو وقتاش غاتخرج.. مشى بزربة لبيت هز ريحتو ورجع رشها مرة خرا وشاف فمظهرو الأخير وخرج من لبيت هاز لبوكي دلورد لي جاب ليها وبقا جالس فوق الفوطوي كيتسناها تجي.. مدازش وقت بزاف تاكان سمع الباب تحل وهو ينوض مبسم وعينو عليها هي لي جايا جهتو بفيست فلكحل وشعرها مجموع كوت شوڤال ودايرة مك اب خفيف.. كانت مبسمة ليه تاهي وغير قربات جهتو وهو يضور يديه على نصها جارها عندو ونزل تال شفايفهاا طاابع عليهوم قبلة تقيلة مخليها تغمض عينيها وتمشي معاه فالخط.. لاحت صاكها وماتسوقاتش ليه وضورات يديها على عنقو مقرباه كثر ليهاا.. بعد عليها وتبسم ليها بالخف:حبيبة ديالي تعطلتي عليا ليوم
سناء:كانت عندي خدمة بزاف (عضات على شفايفها فاش شافت الورد ونطقات بهمس أنثوي) همم هادو ليا
اليازيد:(عطاها لورد وجرها جهة الطبلة)عجبوك احبيبة
سناء:(تتشوف فالطبلة وهي فرحانة)همم سعداتي أنا بحبيبي موجد ليا هاد السوربرااايز
تهزات باستو فشفتو بوسة خفيفة وهو تبسم وجر ليها الكرسي تاجلسات وجلس تاهو قدامها.. مولفة فيه كل مرة يفاجأها بشي عشاا ولاشي مفاجأة لي تتخليها تفرح وتزيد تعلق بيه كثر ماهي متعلقة.. تبسمات فاش شافت فالأطباق لي كاينين فوق الطبلة ولي كانو الأصناف لي تتبغي تاكل.. بدا كيغرف ليها فالطبسيل وحطو ليها قدامها وهي تتاكل وكل مرة يهز شي حاجة ويوكلهاا.. كانو خالقين بيناتهوم واحد الجو زوين ورومانسي.. شرب من كاس لماا وشاف فيها هي لي كانت هازة كاس لعصير ونطقات: مكرهتش نشطحو علي شي أغنية أنا وياك بيبي
اليازيد:(طلق من التفون أغنية غربية هي تتحماق عليها ومع بدات لمعزوفة الأولى قرب جهتها مد يديه ونطق بهمس رجولي) تقبلي تشطحي معايا مَابْلُونَدا
تبسمات ليه بإغراء وشدات فيديه وهو جرها لعندو ملاصق جسمو مع جسمها وبدا كيتحرك فإيقاع الموسيقى.. كانت حرارة أجسامهوم عالية وهي تتحاك معاه بطريقة مغرية مخلياه منيم فيها عينيه.. حطات يديها ورا عنقو وشبكاتهوم وبدات تتشوف فوجهو بنظرات عاشقة وماحسات براسها تكانت داخلة معاه فقبلة اخرى مخلياها ترفع.. كانت تتحس غير بيديه لي كيجوبو على جسمها فحركاتو الجريئة.. غارقة معاه ومحساتش وقتاش هزها ومشى بيها لبيت النعاس.. كان ديما كيعرف كيفاش يخليها تنسى راسها وهي معاه تماما بحال هاد اللحظة لي كان هو معتاليها بجسمو كيطبع قُبل على سائر جسمها وهي تتبادلو مشاعرها الجياشة.. بحكم أنه مدوز تجارب عديدة مع بنات بزاف إلا أنه كيوصل تال عندها وكيحس براسو جاهل.. كل مرة تيقيصها فيها كيزيد يغرق فيها ويبغيها كثر.. وماطلق منها تاخلاه سخفانة وفشلانة تاتنهج.. سترات جسمها بليزار وهو جرها عندو وحط ليها راسها على صدرو كيلعب بشعرها.. تانطق بهمس خافت: ماكرهتش شي بيبي صغير يكون منك مابلوندا
سناء:(هزات راسها فيه ونطقات بهدوء) باقي مكنفكرش فالولاد اليازيد
شاف فيها وهو مكمش حجبانو وتقاد فجلستو تاهزات راسها وجارة ليزار كثر مدوراه على داتها وهي تترجع شعرها لي لاصق فعنقها لور..
اليازيد:(باقي مكمش حجبانو)كيفاش باقي مكتفكريش فلولاد مافهمتش هضرتك
سناء:(تنهدات)هضرتي واضحة اليازيد أناا حاليا مكنفكرش نحمل ولانولد
اليازيد:(قلب وجهو جنب ورجع شاف فيها هاز حجبانو) وعلاش ؟
سناء:(بجدية)حيت خدمتي مكتسمحش ليا حاليا أنني نحمل ونولد
اليازيد:(بانفعال قاطعها) ونتي مزوجة بيا ولابالخدمة؟
سناء: خدمتي حساسة وخصوصا فهاد الفنرة هادي لي أنا خصني نبين كفاءاتي بااش نزيد لقدام ونحقق طموحي ونتا تتقول ليا نحمل وزايدون أنا وياك يالاه عام هادي باش تزوجنا باقي فبداية زواجنا وباااقي لعمر طويل قدامنا باش نديرو وليداتنا
اليازيد:(حس براسو تعصب ناض لايح ليزار ولبس كالصوه عاد ضار جهتها تيدوي بانفعال) علاش باقي لحااال أنا باغي لولاد شنوو فيها لاحملتي بزاف دلعيالات تايخدمو وهوما حاملات عمرني شت شي وحدة مسبقة خدمتها على حياتها الشخصية من غيرك نتي
سناء:(كمشات حجبانها وعلات صوتها) حيت أناا ماشي بحال لعيالات لي تتعرف أنا درت جهدي باااش نقرا ونوصل لبلاصة لي أنا فيها دابا نكوووون صحفية لي سميتها معروفة وزايدون لولاد عمرك قلتي باغيهوم اش طرا دابا تاجبدتي هاد لموضوع عاود
اليازيد:(قرب جهتها مخرج فيها عينيه)حيت ألالة باغي نكووون بابا ونهز ولدي ولابنتي بين يدياا نستمتع معاهوم ماحدي قااادر راه الأعمار بيد الله شكون قال ليا غانبقااا عايش لوقيتة لي نتي تتفكري ديري فيها لولاد هاااا
سناء:(ناضت تتلبس بانطوفتها) عام ولاعماين خرا مغاتدي مغاتجيب غير نتا لي زربان ماعرفت علاش
اليازيد:(شدها من يديها موقفها قدامو) كيفاش عام ولاعماين واش باغا تحمقيني اسناء
سناء:نتا لي باغي تحمق رااااسك اليازيد ملي جبدتي ليا هاد لموضوع لي ماعندو فايدة دابا
اليازيد: لولاد بالنسبة ليك موضوع ماعندو فايدة؟
سناء:(شداتو فيديه ونطقات بهدوء) حبيبي نتا عارف حاليا لمشكيل لي عندي فلخدمة وخصني حاليا نفرغ وقتي وحياتي ليها باش نقدر نزيد فيها لقدام.. ماشي بعد هاد تمارة لي ضربت نسمح فلبوسط لي أنا باقي مافرحت بيه بااش نحمل
اليازيد:(حرك راسو ونثر يديها ونطق بهدوء) واخا ماقلتي عيب
تحنى كيهز حوايحو ويلبسهوم بالنثرة تالبس وهو يخرج من لبيت ساد لباب بالجهد تاقفزات وخرج من الدار مخليها تتسوط ومعصبة غير وحدها.. وهو شد طريق مجهولة وهو معصب لأقصى درجة.. من نهار تزوجو وشاف عندها حبوب منع الحمل فلول ماخداش موقف ولكن ملي داز عام على زواجهوم وهي باقي لدابا تتاخدهوم تما قرر يفتح معاها لموضوع دلولاد ومكانش متوقع جوابهاا وأنها سبقات خدمتها على لولاد.. اييه من حقها تفكر فخدمتها ولكن ماشي لدرجة أنها تكون أنانية وماتفكرش فيه هو تختار لراسها بلاماتحطو معاها فالصورة.. ومن داك النهار ولعلاقة بناتهوم شدات منحى أخر.. كان اليازيد واخد منها موقف واخا هي اعتدرات ليه وحاولات تصلح لعلاقة ديالهوم الاأنه فيما كيتحبد موضوع لولاد تايصدقو مناقشين وتينتهي بيهوم التقاش لواحد فيهوم خارج من الدار وطبعا هو اليازيد.. دازو خمس شهور خرى لي فيها طراو شحال من حاجة وأولهوم تعطال ليازيد فالزنقة تال نصاصات الليل ورجوعوو لقصاير لي مولفهوم مع صحابو.. لقصاير لي بعد عليهوم ديك لفترة كلها ولكن دابا رجع تاني يتلف بيهوم المشاكيل لي فحياتو.. أما سناء فكانت ملاحظة تغير ديالو وعرفات السباب شنو هو ولكن حبها لخدمتها خلاها تعمى وتفكر بأنانية لي هي ملاحظاتهااش نهائياا..
فواحد النهار كان كيف عادتو مقصر مع صحابو أو واحد زوج بنات وطبيلة عامرة بالتقاوت وقراعي دالشر'اب والشيشة تاهي.. منوضين الجو بناتهوم ناسين همومهوم.. كان جالس وسطهوم كيكمي لگارو تاسالى وهو ينوض غادي جهة لحمام تاسمع شي حد كيعيط ليه بسميتو وضار جهة البنت لي كانت جايا عندو لابسة كسيوة كحلة وشعرها زعيعر.. كمش حجبانو وكمارتها ماغريباش عليه سبق شافها فشي قنت مي مبقاش عاقل.. أما هي وقفات قدامو ومدات يديها ونطقات بابتسامة: جوبونص ماعرفتينيش أنا نورا صاحبة سناء
هز حجبانو وعاد عقل عليها بلي كانت فعرسهوم سلم معاها عادي ونطق بهدوء:متشرفين
نورا:بنتي ليا بوحدك مجاتش معاك سناء؟
البازيد:(بجدية)لا مجاتش
نورا:اه اوا سلم عليها بزاف ڤغيمو صافي لونطو ماشفتهاش ودرنا خريجة أونصونبل مشغولة تاهي مع الخدمة
غير سمع سيرة لخدمة وجهو تبدل وهادشي لاحظاتو نورا وبلامايشوف فيها مزال عطاها بالضهر مكمل طريقو مخليها واقفة تتشوف فيه تاسمعات صوت صاحبتها لي وقفات حداها:شكون هاداك؟
نورا:هاداك اليازيد راجل سناء
ص:اووه صدق زوين على تصااور
نورا:(عضات على شفايفها بانحراف) زوين وسكتي تيحمق وعاااجبني بزاف
ص:اويلي راه السيد مزوج
نورا:(حركات كتافها بدون مبالاة) ومن بعد أصلا كان عاجبني وحطيت عليه عيني قبل مايتزوج بيهاا ازين
رجع اليازيد لدار وكيف لعادة مادخل تال نصاصات الليل.. لقا السكات فالدار ولحس مقطوع.. تمشى بخطوات تقيلة مدايرش لحس وهو كيزول فلاشوميز لي لابس تادخل لشومبر وهي تبان ليه ناعسة وعاطياه بالضهر.. بقا واقف مدة كيشوف فيها قبل مايمشي لحمام يدوش وهي غير سمعات لحس دلباب تسد حلات عينيها وضارت تتشوف فالباب وتنهد.. معجباهاش هاد الحالة لي هوما فيها ولخصام لي ملات منو ولكن فنفس الوقت هي مقدراش دير داكشي لي باغي دابا ماحدها مزال ماستقرات فالبوسط دخدمتهاا.. عارفة لحمل غايخليها تنازل على بزاف دلحوايج فلخدمة وهادشي لي مباغاش هي.. بقات على حالتها تاسمعات صوت الباب ورجعات دارت راسها نعسات وهو خرج لابس شورط وشعرو سارد بلما.. تخشى بلاصتو وبدا كيخربق بالتلفون داخل لفايس تاوصلاتو أنڤيطاسيون ومع دخل يشوف لقاها من نورا.. برك على سميتها داخل لبروفيل كيشوف تصاورها لي كتلوح عاد رجع قبلها وسد التلفون حاطو فوق الكومودينو ونعس عاطيها بالضهر.. ملي هو قبلها هي فرحات وعجبها لحال.. وقررات تجرب زهرها وتشوف واش غايجاوبها الاسيفطات ليه مساج.. وبالفعل بعد مدة جاوبها ومن تما وهي تتزعم كثر وخصوصا فاش شافتو فتح لمجال ليها..ومن الفايس دازو الواتساب كيهضرو وفالوقيتة لي هو واخد راحتو مع نورا كان كيزيد يبعد على سناء وتتزيد علاقتهوم تبرد وخصوصا هي مكاتكونش مسالية بزاف هادشي خلاه يزيد يتمادى.. ولى كيتلاقى هو ونورا كل مرة فين وتالقصاير لي كيديرو صحابو تاتمشي ليهوم معاه.. وقف طوموبيلتو حدا باب الدار وسكتها ونزل مع نورا لي كانت الفرحة تاتشع ليها فعينيها.. وقف قدام باب الدار وهي ضارت شافت فيه مبسمة:شكرا ليك اليازيد على توصيلة ڤغيمو كون ماكنتيش نتا كنت غانبقا حاصلة تانقلب على طاكسي
اليازيد:(حرك راسو) هانيا المهم تهلاي فراسك
نورا:(قربات بخطوة جريئة باستو ففمو وبعدات وهي تتشوف فيه وبصوت هامس)بونوي
دخلات لدار وهو بقا واقف مدة قبل مايركب ويرجع بحالو لدار.. مولف فهاد لوقت كيجي يلقاها نعسات ولكن هاد لمرة كانت جالسة تتسناه فالصالة بشوميز دونوي فالكحل دستان.. شاف فيها ونطق بهدوء:علاش باقا فايقة؟
سناء:(تنهدات) حيت باغا ندوي معاك
اليازيد:كانسمع
سناء:عاجباك حالتنا اليازيد؟ عاجبك هادشي لي حنا كنعيشوه وهاد لبعد والجفا لي بناتنا
اليازيد:شكون سباب هادشي كولو ؟ (قرب جهتها مكمش حجبانو) ماشي أنا لي ختاريت خدمتي وسبقتها على زواجي وحياتي معاك اسناء
سناء:(شدات يديو ونطقات بهدوء)علاش مباغيش تفهمني وتصبر معايا اليازيد
اليازيد:(نطق بصوت معصب)ونتي علاش مباغاش تنازلي وتسبقيني أنا وحياتنا قبل من خدمتك اسناء من نهار تزوجتك وأنا كاندير لي فجهدي باش نخلي زواجنا ينجح بعدت على لحوايج لي عارفهوم غادي يسببو لينا مشاكيل غير على قبلك نتي حيت كانبغيك اسناء
تنهدات سناء ويالاه بغات تجاوبو وهي تسمع تلفونها رن برنة مساج.. بعدات عليه ومشات جهة التلفون شعلاتو ولقات نورا مسيفطة ليها سي تصاور.. كمشات حجبانها ومع دخلات تكميشة لحجبان بدات تاترخف وملامح وجهها بانت فيهوم الصدمة وهي تتشوف التصاور لي كانو دليازيد ونورا كيبانو قرابين بناتهوم بزاف.. كل مرة فين جالسين مرة مقصرين وهي محنية عليه وهو مبسم ليها.. مرة فالطوموبيل شادين يدين بعض..مرة موصلها لباب الدار وهو تيودعها بابتسامة.. والتصويرة الأخيرة كانت دليوم وبضبط دالبوسة.. كانت حاسة براسها بحال الاكتحلم وهي تتشوف دوك التصاور ودخل ليهوم تزومي وترجع تخرج.. فديك اللحظة حسات بقلبها تهرس لميات شقفة لدرجة سمعات انكسارو فأدانها.. ملي شاف سكاتها وسكونها استغرب وقرب جهتها ناطق بهدوء:سناء مالك؟
ضارت جهتو بملامح خالية من أي تعبير شاف فيها وزاد حس بلي شي حاجة ماشي تال لهيه.. ومع جا يسولها مرة خرا كانت هي جوباتو بالتصاور لي بدات تادوزهوم ليه قدام وجهو وحدة مور وحدة مخلياه كيشوف بنظرات مصدومة تاهو..
سناء:(نطقات بصوت هادئ) علاش؟
اليازيد:(حك شعرو ونطق بتبرير)سناء سمعي أناا
سناء:(قطعاتو بصوت مرتافع وهي تتغوت) علااااش علاااااااااااااااش درتي فياااا هادشي اليااااازيد علااااش
لاحت تلفونها بزعاف وبدات تضرب فيه بهسترية وتاتردد كلمة علاش وهو كيحاول يحبسها ويهدنها ويشرح ليها بلي ماطراتش شي حاجة بناتهوم ولكن التصاور كانو باينين بلي هوما بزوج على علاقة حيت كيفاش هي قريبة ليه فالتصاور أو واخدة راحتها موضح كلشي.. انهارت سناء وقوتهاا تلاشات قدام الدقة لي خدات من اليازيد ومن نورا لي واخا ماشي صاحبتها الأنثيم ولكن هي تتعرفها وعارفة بلي هاداك راجلها.. بدات تاضرب فيه وهو كيحاول يشدها ساعة هي صعرات عليه بلمزيان..
سناء:(تتغوت بجنون تاصوتها بدا يمشي)علاااااااش درتي فياا هادشي علااااش خنتيني مع ديك القح*بة أنااا شنو درت ليك تااطعنتيني هاد الطعنة
اليازيد:(جرها بالجهد معنقها وهي تاضرب فيه ونطق بصوت ندمان) سمحيليااا مابلوندا أنا غلطت سمحيليا
سناء:(شهقات بحال الاروحها غاتخرج من جسمها)عمررري غانسمح ليك على هاد لكسرة لي كسرتيني
مع نطقات كلامها غيبات بين يديه مخلياه تيغوت بسميتها بجنوون وخوف.. هزها بين يديه خارج بيها لكلينيك وقلبو غايخرج من بلاصتو.. مكانش حاط فبالو بلي هادشي غايطرا بسبابو وبسباب النزوة لي دار فلحظة لي علاقتهوم بردات.. الوقت لي كان خصو يحاول يصلح علاقتو ويلقاو حل يرضيهوم بزوج هوما بعدو هي غرقات فالخدمة وهو قرر ينسى لمشكيل بقصايرو والزهو لي مولفو فياماتو.. وهالنتيجة كيشوفها قدام عينيه.. جالس فالكرسي كيحرك رجليه بتوثر وباين فوجهو الندامة لي حس بيها تتاكل فيه من لداخل.. مدة تاخرج الطبيب عالمو بلي جاها انهيار عصبي وبلي خصها ترد لبال لراسها وتبعد على الضغط والستريس عاد رجعات فيه الرووح.. كان باغي يشوفها ساعة هي رفضات تشوف وجهوو وطلبات من الفرملية تعطيها تعيط وأول شخص طاح فبالها كانت ختها "رحمة".. ومن هنا كلشي ساق خبارهوم وخصوصا مور ماطلبات هي الطلاق واخا كان رافض وتاباهاا رفض الطلاق ولكن هي كانت مُصرة عليه وحطاتو بوجهو قدام كلشي وقالت ليهوم على خيانتو ليها ورغم هادشي باها موافقش على الطلاق ولكن سناء من طبعها راسها قاصح وبلاماتسنى موافقة حد مشات دفعات الطلاق وحطاتهوم أمام الأمر الواقع واليازيد حاول يشرح ويعبر على ندامتو ليها ساعة سدات عليه البيبان فوجهو وماخلات ليه فين يشرح واخا لعائلة عرفو المشكيل حيت عاود ليهوم باش يدخلو ويخليوها تسمع ليه ولكن هي صافي خدات القرار ونفداتو بدون ماتخلي حد يدخل فيها... وغير تم الطلاق حطات لاديميسيون ديالها فالخدمة لي كرهاتها وبغات غير تبعد من تم صافي مبقات حاملة لافاس لاخدمتها لاتاشي حاجة.. هزات باليزتها ومشات مع ختها لمراكش مخليا وراها كلشي باغا غير تنسى شنو طرا والضربة لي خدات من عند اليازيد..
🔜🔜
كلام نوح خلاه يجلس بانكسار وهو مهبط راسو وحاط يديه عليه.. حاس بلي حياتو ضاعت من نهار خلاتو سناء.. غلط وهاهو كيخلص لغلاط واخا دازت عليه ست سنين كلها.. تنهد تنهيدة طالعة من القلب ونطق بصوت هامس: عند بالكوم هاد الست سنين كلها راني عايشها بخير بسبابها تغربت فاليونان ومبقيت حامل لافاس لاتاشي بلاصة وهي مكيناش فيها.. تامن لاباخطمون لي جمعاتني معاهاا مبقيت دخلت ليها.. عارف روحي غلطت فحقها ولكن نتوما محاسينش بيا ملي وقع لمشكيل وتخاصمنا تعصبت والشيطان عمى ليا عينيا
نوح:(باقي عاطيه بالضهر وبصوت جدي نطق)الشيطان هو بنادم اليازيد (ضار لعندو وهز حاجبو فيه بشوفة قاصحة) وقعو مشاكيل بناتكوم جلسو ناقشوها بزوج تاتلقاو حل هي هازة خنافرها لسماا ونتا عينك زاغت وفلخر هاشنو طرا..
اليازيد:(شاف فيه ونطق بعصبية)هي بغات تزوووج غير ضد فياا أنا كنعرفهاا معكسة ودابا يالاه غاتزيد تقصح راسها باش تزوج (كمل بانفعال)وهادي هي لي عمرها تكووون انووح واخا نعررررف نقت'ل داك الزا*مل لي كيضووور بيهاا وندخل على مووو لح'بس وماتكوووونش ليه سمعتي
سمعو الدقان فالباب لي تحل ودخلات سناء لي كانت مبسمة ولكن غير شافت اليازيد لي كان واقف كيشوف فيها تاهو وهي تسرط ديك التبسيمة ويديها جمدات فالبواني دلباب لي بقات شاداه.. سرطات ريقها وقلبات شوفتها جهة نوح ونطقات بهدوء:كنت جايا ندوي معاك مي جوبونص ممساليش دابا نخليك تال من بعد
نوح:(نطق وهو راجع لبيروه) دخلي اسناء اليازيد أصلا كان غايمشي
اليازيد:(شاف جهة نوح وديك الشوفة لي دار فيه خلاتو ينطق بهدوء)نتشاوفو من بعد
قرب بخطوات تقيلة جهة لباب وهي غير شافتو بعدات دايرة ليه طريق.. وصل قدامها وبقا كيشوف فيها مدة بلامايدوي وهي قالبة وجهها عليه عاد كمل طريقو ساد لباب وراه مخليهاا شادة دموعها غير بزز قدام نوح لي كان حاضيهوم بشوفاتو الهاديين.. تنحنحات وتبسمات وهي غادة جهتو: كنت جيت على قبل لڤواتوغ ديالي فالحقيقة مبقاتش كيف لول وبغيت نبيعها وناخد من عندك شي وحدة حسن..
----
مبعد دوش ريحات فيه عضيماتها خرجات أسماء وهي تتنشف شعرها بفوطة وخدات سيروم دارتو ليه وخلاتو هاكاك مطلوق...نزلات لتحت ومع دخلات لصالة رجليها جمدو وعينيها تفيكساو فإسلام لي كان جالس وجنبو سيدرا كيف لعادة.. هز فيها عينيه وشاف فيها بشوفات فشكل هي فهماتهوم.. سرطات ريقها ومن بعيد سلمات عليه ودخلات جلسات بلاماتفرط راسها.. بدات تادوي مع كلثوم لي جنبها وفيما تجي عينيها على إسلام تلقاه حاضيها.. حسات براسها معصبة فاش تفكرات الشوهة لي دارت معاه وكيفاش دابا كيشوف فيها تنرفزات.. ناضت دايرة سبة بتلفونها وغير خرجات وهو ينوض إسلام تاهو غادي بلخف جهة الدروج ومع وصل لفوق بانت ليه دخلات لبيت.. ضور راسو يمين وشمال قبل مايتقدم ويحل لباب عليها فغفلة تاقفزات وشافت فيه وهي مخرجة عينيها ونطقات بعصبية:واش حماقيتي نتا اش كادير هنا (زادت خرجات عينيها فاش شافتو طرق لباب)علاش سورتي الباب
قرب إسلام جهتها تاوقف قدامها ونطق وعينو فقلب عينيها:بناتنا حساب خصنا نفكوه
قبل ماتجاوب كان جارها جهتو تاتضرب صدرها مع صدرو وشدها من قرفادتها وهي مخرجة عينيها فاش حسات بشفايفو كيمصو شفايفها بطريقة عنيفة خلاتها تصدم.. ختم البوسة بواحد العضة تاتأوهات وبعد عليها مخلي أثار لقبلة على شفايفها وهو ناطق بصوت هامس:هاكا كيبوسو الناس..
كانت حاسة بداتها كلها تتغلي وبالأعصاب ديال الدنيا والدين راكبينهاا... التصرف الجريء لي دار وكلامو لي نطق بيه خلاها تبغي تااكل راسها بالفقصة.. هي السباب تالسيد تحل وضسر معاهاا.. ولكن مكانتش متوقعة غايردها ليها كانت تاظن غايسممها بكلامو كيف مولفين بناتهوم ماشي غايبوسها فقلب بيتهاا بكل جرئة.. كان صدرها كيطلع وينزل وعينيها مخنزرين فيه وهي تتشوف فيه واقف قدامها وكيشوف فيها ببرود بحال ماداير والو.. هزات يديها تال السما ناوية تنزل عليه بتصرفيقة ساعة كلاها ليها فالدقيقة التسعين وجرها لجهتو ونطق وعينو مخنزرين فيهاا:درتيها مرة ومغانخليكش تعاوديهااا
أسماء:(تاتجر يديها ونطقات بصوت منخافض معصب) طلق من يدي الزا*مل شكووون عطاك الحق تبوووسني القلا*ي
إسلام:(هز فيها حاجبو ونطق بنبرة ساخرة) واقيلا نسيتي بلي نتي لي بديتي وأنا غير رديت ليك البوسة (قرب وجهو جهة وجهها تاقرب نيفو يلاصق نيفها ونطق كيستافزها) ملي يادلي باغا تبوسيني كنتي غير تقوليها ليا وأنا مغانردهاش فوجهك
أسماء:(باغا تشتف عليه وتحيح غير مانعاها العائلة لي لتحت.. ضحكات بسخرية)ههه ونتااا تيقتي راااسك هههه عند باااالك راني معشووووقة فيك عليها بستك ههه نبغي نحطم ليك توقعاتك ونقول بلي كنت دايراااك غير طريق باااش نفك رااااسي من داك كريم لي تابعني وصراحة مالقيت ماحسن منك نتا (وباستفزاز) اخطيبي
ملي سمعات كلامو لي نطق بيه ديريكتمون تفكرات كلام رحيل لي نطقات بيه ولقات بلي كان عندها لحق وبلي السيد عند بالو باغاه عليها بايساه داكشي علاش كانت باغا توضح ليه باش مايمشيش غالط ونيت ترد ليه الصرف ديال كلامو وتخليه يعرف بلي هو مكيسوى عندها والو.. وبالفعل كلامها لي نطقات بيه بان تأثيرو فوجه إسلام لي ملامح الإستفزاز لي كانو مرسومين على وجهو تمحاو ودغيا تقتمات شوفة عينوو.. يديه لي كان شاد بيها يد أسمااء بدا يورك عليها تاحسات هي بالضوو ضاربها وكمشات حجبانهااا.. دفعها جهة الحيط تاحسات بضهرها تقسم بسباب الدفعة لي كانت على غفلة وقرب جهتها تاوقف قدامها وقيد حركتهاا بيديه التانية لي شدات يديها لخرى وخلاهوم مهزوزين وخنزر فيها تخنزيرة قااااصحة خلعاتها ولكن بقات دافعة الجبهة واخا عينيها كان باين فيهوم لخوف على التسيفة لي تسيف.
إسلام:(قرب جهة وجهها ونطق بصوت هامس) عمرررك تفكري تعااااودي ديريهاا حيت لمرة الجايااا غاندير معاااك تصرف مغايعجبكش والاكنت شاااد راسي عليك غير على وجه باااك لي مقامو عالي عندي.. (خنزر فيهاا) ويااااك اأسماااء تفكري تلعبي معايااا
أسماء:(هزات فيه راسها ونطقات ببرود) ماتخاااافش أصلا قضيت الغراااض ومبقيتيش نافعني
طلق من يديها بالجهد ومحسات غير بتصرفيقة قلبات ليها وجهها تاشهقااات وبقات مصدوومة.. أما هو كلامها استافزو وخصوصا هو عندو حساسية بسباب داكشي لي عاش قبل وهي حكات على الضبرة بكلامهااا... هزات فيه راسها وهي مخرجة عينيها من الزربة لي زرب عليهاا فاش شدها من شعرها ومقرب وجهها لوجهو ناطق بصوت قاصح:مخليك هانية مع كر*ك وعمري جبدتك ولكن نتي الطيران لي فيك طيحك مع وااحد مريييض فعقلوو ومايسحابش ليك دخول الحمام بحاااال خرووجوو حيت نتي لي دخلتي راسك ولخروووج عمرررك تحلمي بيه..
دفعها عليه وهي باقا تاتحاول تسرط الصدمات لي نزلو عليها... معاودش ضار جهتها كمل طريقو حل لباب وخرج ممسوقش يشوفو شي حد مخليهاا تاترمش بعينيها وكلامو يالاه بدا كيطلع معاهاا.. مشات تتجري سدات لباب عليها لايعاود يدخل وتكات عليه وهي تتنهج.. بقات هاكا لمدة طويلة قبل ماتمشي جهة المرايا وتشهق من المنظر لي شافت.. شعرها لي نتفها فيه تشنتف وحنكها بدا يحمار ليها أما شفايفها فكانو حكاية خرااا.. منفوخين وجنابهوم حمر باين لعمى بلي راه تباست.. نثرات لي لانجيت لي عندها وبدات تتحمسهوم معصبة تاضروها ونطقات بصوت معصب: ولد لقح*بة
سمعات الدقان فالباب وهي تقفز عند بالها رجع ساعة غير غزلان لي علماتها بلي لكاسكروط واجد باش تنزل.. زفرات النفس وهزات لمشطة مشطات شعرها وجمعاتو شفينجة وخدات فوندوتان دارت شوية باش تغطي لحمورية لي فحنكهاا وقاداتو مزيان وباش ماتبينش دارت شوية دالريسيل لشفارها وخدات عكر قهوي نيوود دارتو لشفايفها لي تنفخو شوية مغطية بيهوم ديك الشوهة.. شافت فراسها للمرة الأخيرة قبل ماتحل لباب وتنزل وهي تادعي الله مايعيقوش بيها خصوصا إدريس لي مكتخفى عليه تاحاجة.. دخلات لصالة لقاتهوم مجموعين على الطبلة وعينيها بلاماتشعر هربات لعندو لقاتو جالس ومكونسونطري مع سيدرا كيصاوب ليها لخبز.. قربات باش تجلس فالجهة لخرى وهي تسمع صوت تانيرت لي نطقات:هابلاصة ابنتي حدا إسلام سيري جلسي فيها
سرطات ريقها ومشات جلسات جنبو وهي محملاش راسها ولكن بزز منها باش مايعيقوش بيها.. حطات يديها فوق السداري وشافت فغزلان:كبي ليا قهوة
كانت تادوي مع غزلان ومحسات غير بيديه لي حطها فوق من يديها مزير عليها مخليها تسرط ريقها..
يتبع...
التعليقات
لا توجد تعليقات بعد، كن أول من يعلق.