الجوهر الحر الجزء 45

الهدوء لي فصوتو متناقض مع كلامو لي قاال ولي خلاها تستغرب منو... هي عمرها شافت إسلام تجاوز معاها الحد وعمرها شافتو منو شي حاجة خايبة.. حيت كون كان ممزيانش هي لولة لي غادير حواجز بينها هي وياه.. ولكن بالنسبة لنوح لي شاف معاملة إسلام معااهاا فدوك المرات القلال ماعجبووش كيفاش هو واخد راحتو معاها وهادشي مخصووش يبقااا وهي دابا مرتوو وشرافو... رجع طبع بوسة قوية على راحة يديها وشاف فيها بهدوء ويديه على حنكها..

نوح:(بخشونة) مانبغيش نعاود ندوي على هاد لقضية الفثنة تافقنا

رحيل:(حركات راسها) واخاا

جرها من قرفادتها تاطاحت عليه وخدا شفايفها فقبلة فرنسية رفعاتها ونساتها كلشي.. يديه كانت طالعة مع فخادها تاوصل لبلاصة لغليضة وقرصها منها وهي تلوى بين يديه حيت قصحها.. مهداش وكل مرة يديه تقيس مفاثنها بلهداوة تاكيبورشها وكيخليها تهز من فوقو.. زول ليها ضوني والشورط تابقات قدامو بدوبيااس وأرااك لمساات ولهمسات لي تيهمس ليها بصوتو الخشن.. طلعات يديها لعنقو وقرصاتو فاااش حسات براسها تخنقاات وهو عاد وعى وبعد وعينيه معسلين عليها.. دوز لسانو على شفايفو وحط يديه على حنكهاا ونطق بهمس:الشهدة

هزها بين يديه غادي بيها لنموسية وهي تعلقات فيه وخشات راسها فعنقو.. كانت مشتاقة لمسات يديه على جسمها لي كينصاااع ليه.. الهدوء لي كان فالبيت كسرو صوت آهاتها وهمساتو الخشنة ليهاا.. غرقهاا بكلام لغزل وهو كيعاشر فيها بكل حنية وهي سايحة ليه بحال الزيدة..

صدرها كيطلعو وينزل وعينيها مغمضاهوم كاتستارح من جولات الحب والغرام لي عاشتهوم معاه.. كان دافن راسو فصدرهاا ويديه على خصرها لعرياان.. طلع وجهوو وشاف فيها بعويناتو الزرقين لي كانو معسلين ونطق بهمس: يالاه ندوشو

رحيل:(مقدراش تنوض غمضات عينيها)تت بغيت نعس

نوح:(كيقيس شعرها ويحرك نيفو مع نيفها) مغاتعشايش؟؟

رحيل:(تتفوه) تت مبغيتش

بقا تيلعب بشعرها تانعسات عاد ناض دوش وخرج لبس عليه سروال ديال بيجامة فالرمادي مع تيشورت كحلة وشاف فيها هي لي كانت ناعسة فالوسط ودافنة راسها فالمخدة.. غطى كتيفاتها باش مايضربهاش لبرد وخرج من الجناح غادي لبيت سيدرا.. حل لباب وكان تيسمع غير السكاات شي لي خلاه يكمش حجبانو ويكمل طريقو تابانت ليه سيدرا ناعسة فالأرض وسط لكادويات لي نصهوم حلاتهوم ونص لاخر باقي.. مشى هزها من بلاصتها ونعسها فوق النموسية ومشى جاب ليها بيجامة وبدل ليها حويجاتهاا بالخاطر بلامايفيقهاا وقادها فنموسيتها عاد نزل لتحت وهو هاز لقطة لي كانت تاتمخشش فيه.. حطها جنب الخصة ومشى جاب ليها ماكلتها وجلس قفازي حاطها ليها وبدا كيمشط على ضهرها تاسمع صوت الباب لي تحل وضار بان ليه زين العابدين لي كان داخل وهاز معاه صاك كحل دالجلد.. شعرو باقي سارد بالماا ولابس سروال توني وتيشورت وتحت عينيه داير ليها فاصمة.. عرفو كان فلاصاال..

نوح:(قرب جهتو وحط يديه على كتافو) صافا كيدوزتي نهارك

زين العابدين:(حرك راسو باه ونطق بالإنجليزية) مزيان دوزتو فلاصال وفالسونطر

نوح:بقا ليكوم شهر وتبداو لقرايا

زين العابدين:(عينو على لقطة لي عرفها ديالمن وكمش حجبانو)غانمشي لبيت

نوح:غانتعشااو دابا ماتعطلش

حرك ليه راسو وتخطاه غادي لجناحو لي كان جنب بيت سيدرا.. ونوح خلى لقطة تم ودخل لصالة فين كانو جالسين وشيماء معاهوم.. جلس بعيد عليهوم جنب رؤوف تيسولو على لمحال لي شاد ويهضرو بناتهوم وشيماء حاضياااه وهي مكمشة حجبانها..

شيماء:(شافت فسناء ونطقات بهمس) فين هي مرتوو بان ليا نزل بوحدو

سناء:(هزات عينيها من التلفون وشافت فيها ببرود) ونتي مااالك؟

شيماء:(ميقات فيها) لبارح مانزلوش لعشاا وليوم مانزلاتش تاهي زعمة مراضيااش بيناا

كان لكلام تيتسمع تا لرحمة لي جالسة جنبهوم وباين فيها بلي معجبهااش لحااال.. ليوم النهار كولو وهي برا مافطرات معاهوم ماتغدات وتالعشا مانزلااتش ليه وهاد التصرف حسات بيه رحمة بحال لاكتنقص منها.. ساطت معاجبها حال وشيماء تبسمات حيت كلامها كاانت قاصدة تسمعو عمتها وهاهي سمعاتو غير من وجهها لي بان ليها تبدل فيه لون.. تعشااو جميع وجلسو مجمعين بيناتهوم تااسمعو صوت سيدرا لي تاتعيط..

سيدرا:مااااامي ماااي بلو آيز

ناض نوح خرج من الصالة وبانت ليه واقفة حدا الغصة ببيجامتها وشعرها المشنتف تتحك عينيها.. مدوخة بالنعااس ولكن الجوع فيقهاا.. قرب جهتها نوح وهزها وهي حطات راسها على كتفو ونطقات بخفوت:ماي بلو آيز فيا جويعات

نوح:(تايدوز يديه على ضهرها ونطق بحنية) دابا نقول ليهوم يجيبو ليك تاكلي (شاف فالسعدية) سخني ليها عشاها وجيبيه ليا

دخلها لصالة وهي مخشية فيه ومع مكتعرف حد تما ومها مكيناش عليها تشبتات بيه.. جلسها فوق ركابيه وشيماء تاتشوف فيها وتميق ونطقات بهمس:هاد الصمكة لي بقات لينا فلحساب

سناء:(عضات على سنيها) زمي فمك المررض

شيماء:مالي كدبت هي صمكة مكتسمعش

سكتات شيماء تاتلوي فشفايفها وعينيها على نوح لي جابت ليه السعدية لعشا وبدا تايوكل سيدرا تاقشعات ديك لعلانة لي فعنقو...

الغيرة شعلات فيهاا وديك العلامة عرفات مناااش جاياا.. مزيرة على يديها وعينيها كلاووه هو لي ممسوقش ليها نهائيا... حادر راسو لسيدرا تايدوي معاها وتيوكلها وهي تاتحك عينيها باقي باغا تنعس... وكلهاا تاشبعات كريشتها وهزها وهي لوات يديها على عنقو وحطات راسها على كتفو مغمضة عينيها..

نوح:تصبحو على خير

خرج من الصالة غادي بسيدرا لبيتها وزين العابدين تاهو ناض تابعو.. تخطى باه فالدروح وسبقو ونوح تنهد فااش عاق بولدو وعرف اش بيه.. دخل سيدرا لحمام عطاها تغسل سنانها وقضات حاجتها عاد خرجات عندو وتكاات فنموسيتها وهو جنبهاا هاز واحد لقصة من القصص لي حاطهوم ليها فالمكتبة لي عندها تم.. حاطة يديها على حنكها وعينيها عليه وهو كيقرا ليها لقصة تانعسات.. قادها نوح بلاصتها وناض مخلي ليها ضو لفيوز بااش لابغات تفيق ليل ماتخلعش خصوصا أن لبلاصة مبدلة عليها.. دخل لجناحو وسد الباب دبيت النعاس بساروت ومشى لحمام غسل سنانو ورجع عند رحيل لي ناعسة تكى جنبها وجرها ليه ونعس..

----

دازت سيمانة تقيلة على البعض وعلى البعض خفيفة.. فهاد السيمانة كان محمد طه كيمشي لخدمة بلاعقل ديما ساهي وكيغلط بزاف فالخدمة وغير سعيد لي كيطاكي عليه حيت بان ليه ماشي على عادتو.. كلشي لاحظ بلي شي حاجة مغيرة فيه وعيى ريان مايسول فيه ساعة مكيعطيهش راااس الخيط.. وماشي بعيد عليه تاغزلان كانت حالتها فهاد السيماانة.. تأنيب الضمير والندامة هلكات روحهاا.. كل ليلة مبعد مكايكون كلشي ناعس تاطلع لسطح وتشبع بكااا بوحدهاا وطلب الله يغفر ليها على لغلطة لي دااارت.. وتاهي بانت فيها بلي واقعة معاها شي حاجة ولبنات سولوهاا ولكن عطات الحجة بلي لغيگل السباب وهرموناتها تخربقوو.. واخا هوما شكو بلي كاينة شي حاجة بينها وبين محمد طه ولكن ممأكدينش.. ورحيل كانت تادوز نهارها كولو فدار باها هي وسيدرا وفالليل كيجي نوح يديها.. ليوم غايرجع إدريس وتانيرت لدار وكلشي فرحان وأكثرهم سيدرا لي كل مرة تجي تجر رحيل من سروال بيجامتها وتسولها وقتاش غايجي بّاديدي وتانيرت إينو؟؟ تعطلو ماامي؟ وتمشي توقف فالشرجم مقابلة لحومة وتاتسنى جدها وجداتها يجيوو..

فالكوزينة كانو لبنات مجموعين تايوجدو لعشاا وطبعا رحيل هي لي مكلفة بالطياب ولبنات تيعاونوها.. وغزلان واقفة جسد بدون روح عقلها غايب كيف عادتها مأخراً.. وجدات رحيل زوج بسطيلات بفخوي دميغ وحطاتهوم تايوصل لوقت وطيبهوم.. شلاظة تاتبرد فالثلاجة والعصير واجد وريان ومحمد طه جالسين فالصالة معاهوم إسلام ونوح وزين العابدين لي جرو نوح بزز معاه باغيه يتعود على الجماااعة بحكم حياتو كلها وهو متغرب..

كانت سيدرا باقي واقفة فبلاصتها فوق الكرسي وحاطة يديها على حنكها بملل.. وغير بانت ليها طوموبيل إدريس داخلة لحومة وهي تنقز من الكرسي وغوتاااات بحماااس:بّااااديدي جاااا بّاااديدي جااااا

مشات تاتجري ورحيل نازلة من الدروج بعباية رمادية طويلة تاتجرجر وفولار ساترة بيه شعرها وبصوت عالي قالت:سيدراا عندك الدروووج

شكون يسمع ليهاا وهي غير شافت طوموبيل جدها نسات كلشي.. حلات لباب دبرا وطوموبيل باقي تايبلاصيها إدريس وهي تاتنقز عليه وتعيط ليه تابانت ليها تانيرت نازلة هي لولة ومشات لعندها عنقاتها وتانيرت تاتبوس فيها موحشاهاا وموحشة صداعهاا

تانيرت:الضرررة توحشتيني

سيدرا:(معنقاهاا من رجليها)بزااف تانيرت إينووو

خرجات رحيل لعندهوم ومشات جهة مها عنقاتها بالجهد وتانيرت بدلاتها تعنيقة..

رحيل:دااار كانت خاوية بلابيكوووم والله

تانيرت:هاحنا حيناا نوروهاا تاني هههه

نزل إدريس مور مابلاصاا الطوموبيل وسيدرا مشات تاتجري تلاحت عليه تاهزهاا عندو وهي تخشات فيه معنقاااه وتاتبوس حناكوو وعنقوو.. زيرها ليه وقرب جهة رحيل عنقها بيد وحدة وباس جبهتها:فرحتي اللولة لباس عليك

رحيل:حمدلله ابابا على سلامتكووم

إدريس:الله يسلمك

طلعو لفوق وسيدرا حلفات لاتفرقات مع جدها.. لقاو البقية كيتسناوهوم وتسالمو معاااهوم ونوح حرك راسو من بعيد لتانيرت وقرب جهة إدريس سلم عليه

نوح:على سلامتكوم اسي إدريس

إدريس:الله يسلمك اولد لحاج

رحيل:سيدرا نزلي خلي جدك يرتاااح

سيدرا:(زادت زيرات عليه وقالت بعنااد)نااااح توحشت بّاديدي

إدريس:غير خليها ابنتي

مشات رحيل لكوزينة جابت العصير والحلوى وأسماء معاوناهاا.. حطو كلشي فوق الطبيلة وجلسات رحيل جنب مها لي عنقاتها هي وأسمااء تاتسول فيهوم وتاغزلان جالسة معاهوم وبزز باش تاضحك باش مايعيقووش بيها واخا لوجه لي يشوف فتانيرت وإدريس مابقاش عندها..

الواحد مكيرتاح غير بين ولادو وحفادو وحبابو.. وهادي هي حالة إدريس وتانيرت لي واخا بدلو لجوو إلا أن بالهوم بقا مع ولادهوم وراحتهوم مالقاوهاش تاتجمعو كاملين.. كان نوح جالس جنب إدريس كيسولو على المشكيل دالأرض وباش فكووه وسيدرا مكمشة فيه.. طلع ريان ومحمد طه شوانط حطوهوم فبيت باهوم عاد انظمو ليهوم..

إدريس:غاتسمحو ليا غانمشي نصلي لعشاا

نوح:الله يتقباال

إدريس:نخشيشتي جلسي هنا تانصلي ونجي

سيدرا:(حركات راسها)ماتعطلش بّاديدي

إدريس:لا نصلي ونجي

نزلها ومشات عند نوح جلسات فوق ركابيه تاتفشش عليه وتوريه بصبعها لحلوى لي باغا وهو يمد ليها عاطيها خاطر بحال جدها وهي غادة وتتعلق بيه.. هز عينو فرحيل لي متكية راسها على كتف تانيرت لي مجمعة مع لبنات تاتعاود ليهوم.. خدا تلفونو وسيفط ليها مساج لي قراتو فساعتو حيت تلفونها كانت هازاه فيديها..

📩"صليتي لعشا؟"

عضات على شفايفهاا فاش تفكرات بلي مصلاتوش وسيفطات ليه مساح فيه 📩"لا"

كمش حجبانو وجاوبها 📩"اش كاتسنااااي؟؟"

رحيل 📩"غانوض دابا"

هزات فيه عينيها تاتمسكن وهو حرك ليها راسو بمعنى دابا نوضي صلي.. خرجات من الصالة وتبعها محمد طه لي طلع لعند باه فالبيت دق تاسمع صوتو وهو يدخل لقاه تيجمع الصلايا.. حك محمد طه ودنيه ونطق بهدوء: الواليد واخا ندوي معاك؟

إدريس: اش كاين

واقف وهو حشماان يشوف فباه وكاره راسو كلما تفكر الدنب لي دار والتقة دباه لي هرس.. قرب جهتو تاوقف قدامو وجر الكرسي جلس وإدريس عينو مانزلااش على وجهو.. هو حافظ ولادو وغير شاف فوجه محمد طه بان ليه بلي بيه شي حاجة وحيت كان كلشي مجموع مبغاش يسولو وخلاه تايكون بوحدو وبيما أنه دابا جاا عندو باغي يهضر معاه فباين الموضوع مهم..

محمد طه:(لداخل ديالو مرون معارفش كيفاااش غايبداا الكلام مع باه وزيد خصو يتحكم فراسو حيت عارف باه غايقلعو فالبلاصة.. شاف فيه وقال بهدوء) الواليد أنا باغي نتزوج

إدريس:(حل عينو متفاجأ وبرزاتة جاوبو) خصك تعرف اولدي قبل بلي الزواج راه ماشي دنهار ولايوماين راه الزواج مدى لحياة والاكنتي غادخل ليه فخصك تكون قد المسؤولية.. ماشي تجيب بنت الناس وتكرفصها معااك وفأول مشكيل ليك معاها طج وتبعد.. فلول غاتهز مسؤولية مرتك أي حاجة طلباتها خصك تجيبها ليها وتحضرها ليها ماتخليها مخصوصة من تاشي حاجة موراه كتجي مسؤولية لولاد لي غايخصك تكون قدها هاد لكلام لي كانگول ماشي باش نخلعك ولانخليك تبدل رأيك اولدي أنا كانگول هاد لهضرة بااش تعرف اش كاين وتعرف اش تابعك نتا وهاد بنت النااس... راه هاد الزواج بزوج بيكوم غايخصكوم تهزوو مسؤوليتو واخا الجهد تيهزو طرف واحد كثر من الثاني..

محمد طه:(كان مركز مع باه وكل كلمة قالها دخلها لعقلو وخلاها فيه حرك راسو وقال بجدية) عارف وأنا قادر نهز المسؤولية داكشي علاش جيت باش نفاتحك فالموضوع هو لول

إدريس: كاينة شي بنت النااس فبالك؟

محمد طه:(حرك راسو باه وشاف فباه)اه احمم غزلان

إدريس:(كمش حجبانو) نتا عارف بلي غزلان جاوها الخطاااب وهوما دابا كيتسناونا نردو عليهوم جوابها؟؟

محمد طه:(حس براسو تزير)اه عارف (دوز يديه على شعرو) أنا باغي ديك بنت النااس الواليد

إدريس:(تنهد ونطق بهدوء) قبل خصني نسول لبنت هي اش باغا وكيف تتعرف السيد كيتسنانا نردو عليه الجواب خصني نشوف بعدا هي اش قررات حيت لافتحناها فموضوعك تقدر توافق وهي مبززة باش ماتحرجناااش وأنا مباغيش هادشي..

محمد طه:(كمش حجبانو وخوفو من قبولها الزواج باليازيد بان من ملامح وجهو) ولكن الواليد أنا باغيها

إدريس:(بجدية)لاكانت مكتابة ليك راه غاتجمع نتا وياه اولدي..

حرك محمد طه راسو وخرج من عند باه مزير.. هو عارف باه حقااني وكلامو مافيه تاعييب ومنطقي.. السيد سبق وخطبها وخص يعرفو جوابها هو لول ماشي يجيو يفتحو ليها موضوع محمد طه وهي باش ماتحاشمش معاهوم تقبل عليه.. كلشي ممكن ولكن خوف طه مخلاهش يفكر فالأمر هاكدا وخصوصا هضرتها لي حلف لانساهاا وهاد السيمانة كلها فيما يشوفها يتفكرهاا.. هو باغي يتزوح بيهاا ماشي غير باااش يصحح الغلط إنما حيت باغيهاا ليه ومباغيش شي راجل خر يطيرها من بين يديه.. سبق وعاااش هاد التجربة مع جيداء لي كانت بحال السم على قلبو وهلكااتو مباعيش يعاود يعيشهاا.. دخل لبيتو وجبد تلفونوو باغي يسيفط ليها مساج وفنفس الوقت مباغيش يفرض راسو عليها مسيفط ليها باقي والو...

واقفة غزلان فالكوزينة رادة لبال لبسطيلة لي كاطيب.. خدات المقلة ديال الزيت حطاتها تسخن باش تقلي لبريوات لي غايكونو مرافقين لبسطيلة.. خلات زيت تاحمااات وبدات تاتقلي وسيدرا جايا عندها باغا دوق لبريوات.. كاضور بجنايها وغزلان عاطياها بالضهر رادة لبال لبسطيلة.. طلعات سيدرا فوق الكرسي متكية على لبوطاجي ومدات يديها ليد لمقلة لي مكانتش محطوطة مقادة وغير قاستها تقلبات ديك المقلة على يديها وطلقاتها بواحد لغوتة مجهدة..

الغوتة لي طلقات خلات غزلان ضور وهي مفجوووعة ومخرجة عينيها فاش شافت فسيدرا لي كانت شادة يديها تاتغوت والمقلة دزيت تكبات على العافية وشعلات وعطا الله سيدرا كانت مبعدة إيما كون تحرقات فوجهها.. طفات على لبوووطة وقربات جهة سيدرا لي غواتها مسموع أو وصل رحيل لي كانت جالسة فالصالة لتحت تاتهضر مع مهاا.. قلبها قفز من بلاصتو وبلاعقل هزات عبايتها تاتجري بلحفى وموراها نوح وإدريس والبقية لي تاهوما تخلعو من ديك الغوتة لي سمعو.. دخل نوح وإدريس هوما لولين وإدريس هز سيدرا لي تاتلوى بالحريق ويديها حمااارت ودموعها نازلين تاتشهق.. وقفات رحيل حدا لباب وجهها صفاار ومع ضربات على يديها الدوخة شدااتهاا..

نوح:(كمش حجبانو ونطق بجدية)خصنا نديوها لكلينيك ضروري

حرك إدريس راسو بااه تالف ونوح مع هز عينو بانت ليه رحيل شوية وطيح.. قرب جهتها شاد فيهاا وهي كلها تاترعد وعقلها غير مع بنتهاا..

نوح:(تايضور وجهها لعندو مكمش حجبانو) رحييل شوفي فيااا رحيييل

رحيل:(حاطة يديها على قلبها) بنتي نووح بنتي

هزها نوح بين يديه فاش باانت ليه ترخات وسخفاات... ماحيلتهوم يتخلعو على سيدرا لي تحرقات ولارحيل لي سخفااات.. نزلوهوم بزوجات لطوموبيل نوح لي ركب رحيل لور وعطا لكونطاكط لمحمد طه حيت إدريس هاز سيدرا وشاد ليها يديها لي تحرقات ليها.. وهو سند رحيل عليه مقدرش يخليهاا وهي مغيبة أو وجهها صفر.. تخشى زين العابدين جنب نوح وشد محمد طه الطريق لكلينيك مخليين لخرين الخلعة شداهوم وخايفين عليهوم.. أما غزلان مقدراتش تنزل ودموعها نزلو وحاسة بلي هي السباب فلي طاري لسيدرا حيت كون مترفعاتش وردات ليها لبال مكانش غايطرا هادشي.. دارت ليهوم منااحة فالدار ولبنات يسكتو فيها وتانيرت تاهي وتقول واااش بغات تسكت.. كلشي تجمع عليهاا ديك اللحظة وترجماتو بدموعهاا..

وقفات الطوموبيل دنوح قدام لكلينيك ونزل إدريس هاز سيدرا لي غاتسطى بلبكااا مدخلها لوغجونس وموراه نوح هااز رحيل لي باقي مغيبة.. تفارقو وزين العابدين بقاا مع نوح ومحمد طه مع إدريس... غير شافو حالة سيدرا داوها أوغجوون باش يعالجو ليها لحرقة.. عطاوها كالمون عاد بداو كينضفو لحرقة وطبيب عاطيها لخااطر وهي عويناتها حمرين ومنفوخين ومخشية فإدريس لي مكمش عينو فيديها لي حمراا وطبيب كيدير ليها دواا ويصوانيها.. مدة عااد لواو عليها فاصمة طبية خاااصة دلحريق مكتلصق فالجلدة ونيت كاتحمي الحرقة باش ماتعفنش.. كتبو ليها الدوا وطمنهوم الطبيب بلي مع الدوا وطريطمون الحرقة غاتبرا ومغاتخليش الأثر وتالحريق عطاوها دوا باش يكالميه ليهاا.. خرج إدريس هاز سيدرا لي تهدات وشاف فمحمد طه لي كان تيتسناه ونطق بهدوء:فين ولد لحاج ورحيل؟

محمد طه: لفوق (مسح على شعر سيدرا) روح مودي اجي عندي

هزات راسها ومدات يديها تاهزها على باه وتمشاو لفوق فين كانت رحيل فالشومبر معلقين ليها السيروم.. كانت باقا دايخة حيت طونسيو طاح ليها بقوة الخلعة.. ونوح جالس جنبها شاد يديها ومكمش حجبانو وعقلو مع سيدرا.. تحل لباب ودخل إدريس هو لول جهة رحيل وباسها فجبهتها..

نوح:(ناض وشاف فسيدرا لي متكية بين يدين محمد طه) أمدرا؟

إدريس: عطاوها كالمون دلحريق وصوناو ليها الحرقة وقال ليك خصها تبقا تصوانيهاا مزيان ومع دوا وتريتمو غاتبرا ليها ومغايبقااش الاثر ديال الحرقة

نوح:(باس حنك سيدرا ونطق بحنية) تاتبيرت إينو

سيدرا:(شافت فيه بعويناتها المتورمين ونطقات بصوت مبحوح)ماي بلو آيز

نوح:(هزهاا لعندو تاتكمشات فيه ونطق تايدوز يديه على ضهرها) صافي ابابا

هز زين العابدين عينو فبااه فاش سمع ديك الكلمة لي خرج نوح من فموو وزير على يديه تابياضت وفالبلاصة ناااض خارح من البيت مخليهوم غير كيشوفو ونوح طلع النفس وخرجها بلمهل وهو مكمش حجباانو وعارف اش طااري.. بقاو مع رحيل تافاقت وتوگضات وغير شافت سيدرا وهي تنطق بلهفة: مامي اجي عندي

عطاوها ليها وهي هزاتها وبدات تاتبوس فيهاا ورادة لبال مع يديها باش ماتوعتهااش وسيدرا نعسات فحظن مهاا مبعد ماتكالمى لحريق...

نوح:(شاف فرحيل)أنا جاي

خرج نوح لبرا ولقى زين العابدين وااقف جنب طوموبيلت باه مربع يديه وحادر راسو لأرض.. قشع ديك التكميشة دلحجباان وقرب جهتو ناطق بجدية:مالك؟

زين العابدين:والو

نوح:(نطق بصرامة)شوف فيا

زين العابدين:(هز عينو وشاف فيه بنظرة هادية بلامايدوي)

نوح:(نطق بنبرة هادية)واش كل مرة غانبقا نعاود هضرتي؟

زين العابدين:(حرك راسو بلا)

نوح:(حط يديه على كتفو وزير عليه)سمعني صوتك احفيد الحاج حناا اش قلنا ديك المرة ؟ قلت ليك نتا البكر ديالي وبلاصتك عمر شي حد غايهزهاا

زين العابدين:عارف

نوح:(حط جبهتو على جبهة ولدو وقال بهدوء ويديه كاطبطب على كتافو) دخلهاا لدماااغك وعمرك تنساها احفيد الحااج

بااسو فجبهتو وجرو عندو معنقو ويديه كاطبطب على ضهرو وزين العابدين سااكت وحاط راسو على كتفو.. نوح مباغيش هاد الحساسية تبقا بين زين العابدين وسيدرا وكيحاول ماأمكن يخليه يتقبلها ويعتابرها ختو..

دخلو لداخل ونوح مشى خلص هو لول عاد رجعو لبيت عند رحيل لي سالى ليها السيروم ولي كانت باقا فبلاصتها وسيدرا ناعسة فحجرها.. قرب جهتها وحط يديه على حنكها كيدوزها بحنية واهتمام وبصوت هامس نطق: كيف بقيتي؟

رحيل:حمدلله

نوح:يالاه خلينا نمشيو

جا إدريس هز ليها سيدرا من حظنها وهي مساخياش بيهاا.. تحدر نوح كيحل سيور صبااطو لي لابس وزولو من رجليه ولبسو ليها وهي تدهشرات من تصرفو لي خلاه يكير فعينيها.. ناض شاف فيها وشدها من يديها تاوقفات والصباط جاوها كباار ورجليها تاتلعب فيهوم

رحيل:(شافت فرجليه لحفيانين كان لابس تقاشر بيضين ونطقات بهدوء)ونتا؟

نوح:(درعها عندو ونطق بتبسيمة خفيفة) ماعليش المهم عندي هو نتي

جملة بسيطة قالها ولكن أثرها عند رحيل كاان كبير بزااف.. كاتزيد تغرق فيه وتبغيه بهاد التصرفات وباهتمامو ليها فأدق تفاصيلها.. تصرفاتو معاهاا على قد ماهوما بساطين على قد ماقيمتهوم كبيرة عندها.. ركب محمد طه وزين العابدين لور ومع بغا يطلع إدريس نطقات رحيل بسرعة: غير خليك ابابا أنا نركب حداهوم عطيني سيدرا نهزها..

جلسات لور ومد ليها سيدرا لي غرقات فالنعاس وعاد ركب جنب نوح لي حرك طوموبيل وشد طريق لدار.. ضور إدريس عينيه بعفوية وشاف فرجليه لي حاط فوق لفران ولكسيراتور ونطق بهدوء:فين سباطك اولد لحاج

نوح:(حك لحيتو ونطق بمزاح) طيراتو لينا بنتك اسي إدريس

تزنگات رحيل وخشات وجهها فشعر سيدرا وإدريس ضحك فاش فهم كلامو ونطق مبسم: حنا راه طيرو لينا لعقل گاع ماشي غير السباط هههه

نوح:(شاف فيه) الله معانا أوكان اسي إدريس

دازو على واحد لفرمسيان دايرة لگارد خداو دوا دسيدرا وكملو طريق لدار فين كانت تانيرت ولبنات وإسلام وريان كايتسناوهوم.. غير وصلو وكلشي بدا يسول واخا إدريس طمنهوم ولكن الله غالب.. طلعات رحيل سيدرا لبيت ونعساتها تماا وضارت شافت فرجليها وتبسمات بحنية لتصرفو لي تحفر فدماغها.. مشات لبيت ريان خدات ليه تقشيرة جديدة عاد نزلات لتحت وعينيها كيقلبو عليه..

رحيل:فين نوح؟

محمد طه:فلحمام

قلبات طريقها عندو وبقات واقفة تاتسنى تابان ليها خارج طاوي سروال توب ولابس صندالة دلميكة ورجليه فازگين.. هز عينو فيهاا وهي قربات جهتو: غايكونو تقاشرك توسخو هاك لبس هادو

نوح:(نطق بهدوء) شي كلينيكس نشف رجلي

مشات رحيل جابت ليه باكية ولقاتو جالس فالكرسي وتحدرات بعفوية باش تنشفهوم ليه وهو يكمش حجبانو وهرب رجليه ناطق بجدية:اش كاديري؟

رحيل:(شافت فيه)نشفهوم ليك

نوح:(بخشونة)مكاين لاش أنا نشفهوم نوضي نتي

رحيل:(باستغراب) هااء علاش شنو فيهاا ؟

نوح:(هز فيها حاحبو) يدي مامهرسينش باش تنشفيهوم ليا نتي يالاه تهزي من تم

وقفات ومدات لبه كلينيكس وهو مسح رجليه هو لول عاد لبس دوك التقاشر ورحيل كانت تاتشوف فيه ومكمشة حجبانهاا من ردة فعلو لي دار.. هز عينو فيها وشافها سهاات.. جرها من يديها تاجات جالسة فوق ركبتو ونطق بهدوء:فاش تتفكري؟

رحيل:(شافت فيه وقالت بصراحة) علاش ماخليتينيش نشف ليك رجليك ؟ تانشوف بزاف دلعيالات تيغسلو رجلين رجلاتهوم

نوح:(تيهضر بالتقالة) وهاد الرجال ماعندهومش يديهوم؟؟ علاش ايخلي مرتو تغسل ليه رجليه ؟

رحيل:عادي ممكن يكون هو عيااان مثلا؟

نوح:(كمش حجبانو) لاكان عياان يرتاح عاد يغسلهوم راك مزوح مراا ماشي خدامة عندك تغسل ليك فرحليك نتافق معاك فحالة وحدة لاكان الرحال مثلا تهرس فييديه ومقادرش يغسلهوم ااه مافيها باس أما لما كان فيه تاشي حاجة فيغسلهوم لراسو

رحيل:(عجباتها هضرتو ونطقات بهمس) وأنا تغسلهوم لياا ؟

نوح:(جرها باسها ففمها بوسة سطحية ونطق بخشونة) حنا بسناهوم گاع الفثنة ماشي غير غسلناهوم..

حنيكاتهاا تزنگو فاش فهمات اش قصد وعينيها بداو يضورو فبلاصتهوم وبدات تاترمش بعويناتها وهو حاضيهاا مبسم بلخف.. ناضت من فوقو وجابت ليه صندالة نقية لبسها عاد نزلو لتحت فين كانو جالسين وإدريس كيعاود اش وقع.. دخلات رحيل ومشات لعند غزلان لي بانت ليها قهرات عينيها بلبكا.. عنقاتها ونطقات بهدوء:علاش تتبكي راه ماوقع والو

أسماء:عيينا مانقولوها ليها وتگوول واش بغات تسكت

رنيم:ملي خرجتو وهي تتبكي

رحيل:داكشي لي وقع مكتب ليها وزايدون هي لي مشات جهة البوطة وزيت واخا عييت ماندوي معاها ونگول ليها ماتبقاش تحاديهوم ساعة شكون يسمع ليك راسها قصح من لحجر

إسلام:دراري الصغار هوما هادو ارحيل

رحيل:(شافت فيه) هي بزااف اإسلام تتقول ليها لحاجة ماتقربيش ليها هي تاتمشي تقرب (حطات يديها على حنك غزلان) بلااماتلومي راسك واخا

حركات غزلان راسها باه ومشات تغسل وجهها ولبنات مشاو يحطو لعشا حيت مشى لحاال.. أما رحيل فكانت متكية على كتف ريان تاتمسد راسها لي ضرهاا.. انساحب محمد طه من الصالة وطلع لفوق عندها.. كانت فالحمام تاتغسل وجهها هزات لفوطة ومسحات بيها وجهها وخرجات ومع هزات عينيها بان ليها واقف وباين كيتسناهاا.. هبطات عينيها بزربة مقدراش طول فيه الشوفة مور لغلطة لي دارو بزووج.. حشمانة منو وفنفس الوقت مقدراش تشوف فعينيه شي شوفة ماشي تال لهيه.. أما هو فكانو عينيه مفيكسين على وجهها وعينيها لي حدراتهوم وديك اللقطة ماخفاتش عليه.. قرب جهتها وقاال بهدوء:شوية دابا؟؟

غزلان:(هزات شوفتها فيه وهدوءو خلاها تستغرب) اه

محمد طه:مكاين لاش تلومي راسك لي وقع لسيدرا مكتاب

غزلان:(زيرات على لفوطة ونطقات بصوت مرعود بلبكا) ولكن داكشي لي طرا بيني وبينك بسبابي

نزلو دموعهاا وهو قلب عينيه معصب ولي زاد عصبوو هوو كمالت هضرتها..

غزلان:أنا غاندوي مع اليازيد وغانقول ليه لي كاين ومغانجبدش سميتك والاهو بغا غانتزوجو وعمرك تشوف وجهي

محمد طه:(قرب جهتها عاقدهوم ونطق بصوت معصب)عاودي اش قلتي ؟

غزلان:(شافت فيه وقالت ببكاء) أنا السباب فلي جراا مكاين لاش تحمل لمسؤولية حيت نتا مادرتي والو كنتي سكراان ومعاقل على والو ولكن أنا كنت واعية ومحبستكش أناا السباااب

محمد طه:(خنزر فيها ومكرهش يطير عليها بشي دقة تسكتها) دويت مع الواليد وخطبتك من عندو ملي يجيو يسولوك وافقي غلطنا بزوح إذا غانتحملو لمسؤولية بزووج..

تخطاها نزل لتحت بزربة بحال لاتابعينو الجنون مخليها واقفة تاتبكي.. ملي قال ليها كانبغيك مافكرات فتاحاجة وتبعات مشاعرها تاخرجو عليها ولكن فاش جلسات مع راسهاا فهاد المدة عينيها تحلو ولقات بلي فديك الساعة هو كان سكران يعني تقدر ديك الكلمة كانت عفوية ومقصدش بلي كيبغيها بصح واخا بين غيرتو ولكن تصرفاتو متناقضة مع ديك الكلمة.. والإنسان تاكيفوت لفوت عاد كيبدا يرجع السينتا لور وهي هادشي لي طرا معاهاا.. أو واخا يكون كيبغيها مثلا هي عمرها فكرات أنها تزوج بهاد الطريقة.. تخربقاات وعقلها مبقاش كيرزوني.. دخلات لبيتها سدات لباب وفهاد اللحظة باغا غير تنعس عالله وعسى تنسى مشاكيلهاا وترتااح.. طلعات رنيم عندها باش تعيط ليها لقاتها نعسات.. تعشاو مجموعين وشاف نوح فساعتو كان مشى لحال عينو مشات لرحيل لي تقدات فجلستها وسمعات صوتو لي نطق بهدوء:سي إدريس خلينا ليكوم الراحة

إدريس:باتو عندنا هاد الليلة اولد لحاج

نوح: مرة خرا إن شاء الله

ناضت رحيل تجيب صاكها وسيدرا وزين العابدين ناض لبس سبرديلتو تاجات رحيل ومدات ليه سيدرا مع كان واقف حدا باب الصالة

رحيل:(حشمانة منوو)عفاك واخا تهزها تانسلم

هزها من عندها وحط ليها راسها على كتفو وهي تاتشخر وحالة فمها.. دخلات رحيل سلمات عليهوم ونوح لبس سباطو او وقف جنب زين العابدين وماهزش عليه سيدرا باغيه يولفها عليها خلاه.. وهو غير من تكميشة حجبانو باين فيه مباغيش.. بغات رحيل تهزها ساعة درعها نوح ونطق بخشونة:خليه هو يتكلف

نزلو لتحت وزين العابدين باغي يطج.. جلسات رحيل فلقدام حدا نوح لي شاف فزين العابدين ونطق بهدوء:جلسها عندك

جلسها عندو وهي ناعسة فحظنو وراسها مايل.. دار ليزياتو وقلب وجهو كيشوف فالطريق ورحيل متكية راسها على لكرسي.. شدو الطريق لرياض فجو كالم وبعد مدة وصلو لرياض ونزلو جميع ونوح مدرع رحيل وسابقين وزين العابدين وراهوم هاز سيدرا.. عارف باه بلعاني خلاه يهزها باش يولفها وتاهو مقال والو قدامو.. وصلو قدام باب الجناح وهزها عليه نوح ورحيل نطقات بتبسيمة:شكراا

زين العابدين:العفو بونوي

خلاهوم ومشى دخل لجناحو وديريكت لحمام وهو حاس بشي حاجة فكتفو ساردة.. مد يديه ولقى تيشورت سارد بريوگها.. كمش حجبانو ساااخط وقلع تيشورت لايحها الأرض:فاااااك

فالجناح كانت رحيل منعسة سيدرا فنموسية تاتبدل ليها ببيجامتها لي جاب ليها نوح من بيتها بشوية باش ماتوعتهاش فيديها.. قداتها فلوسط عاد ناضت تاتزول الفولار ودخلات لدريسينغ بدلات عليها غير تم لبسات بيجامة بسروال وخرجات لقات نوح خرج من لحمام لابس شورط وتيشورت.. مشات لحمام دارت روتينها الليلي عاد رجعات لعندهوم لقاتو متكي جنب سيدرا تايقيس شعرها.. تكات فالجنب لاخر ونطقات بخفوت:شبعات بكا تاعياات

نوح:(هز عينو ونطق بهدوء)ومها بلخلعة سخفاات

رحيل:(تنهدات)قلبي حسيت بيه غايخرج فاش شفتها هاكاك

نوح:(طول يديه تاقاس حنكها ونطق بخشونة) تاتهلكي صحتك الفثنة

رحيل:(عينيها على سيدرا) من صغرها وهي مكتهدااش حركية بزااف وعزيز عليها تنبش وتكتاشف.. (تبسمات عينيها لمعو من الدكريات لي طاحو فبالها) واحد لمرة كانت فعمرها عاام كانت تاتحبو ولقاات واحد العقيق طايح فالأرض هزاتو وخشاتو فنيفهاا تاوحل ليها وتنفخ نيفها وبابا هو لي زولو ليهاا شد نيفها وعصرو بالجهد تاطااح ودارت لينا مناحة داك النهار

كانت تادوي بهدوء وعقلها مسافر لطفولة سيدرا لي دوزاتها وتبسيمة خفيفة على شفايفها وهو كيشوف فيها بهدوء ومركز معاها...

رحيل:واحد لمرة عااود طلقها ريان تاتحبو ومردش ليها لبال تاوصلات لدروج فدار لقديمة وهي تكربع منهوم ومن زهرها محمد طه كان لتحت شدها بين يديه ومطاحتش فالأرض وغير تبوقلات ههه هاد لبخوشة مكتزگاااش وباقي لدابا تادير لكوارث

نوح:(نطق بهدوء) زين العابدين كان عكسها مكالمي بزااف

رحيل:(ضحكات)ههه لي خاص زين العابدين داز عند هادي ههه

نوح:(تبسم ليها وقرصها فحنكها بلطف) غاتكون شابهة ليك فاش كنتي صغيرة

رحيل:(حركات راسها) لا لا أناا كنت درويشة بلعكس حقي كنت تانسمح فيه ومسالمة بزااف كان محمد طه هو لي كيدافع عليا واخا صغير علياا ههه

نوح:(تبسم ونطق وهو متكي راسو على لكادر دالنموسية ) كانو كيحگرو عليك الفثنة؟

مباغاش تفكر ذكرياتها مع كلثوم وشنو دوزات عليها فصغرها والشقى لي تاتخليها تشقيه وهي صغيرة وضربها ليهاا فاش مكيكونش إدريس.. وملي كادوش ليها ديما ضرباهاا ومغوتة عليها وبعض المرات تاتخليها بلا ماكلة زعمة تتعاقبهاا.. دكريات رحيل مباغاش يعكرو مزاجها وجو ديك الجلسة لي كانت كاالم.. ولكن مغاتنكرش بلي كاين دكريات زوينة فطفولتهاا لي دوزاتهوم وهوما لي باغا تعاااود ليه..

رحيل:(تبسمات) لا غير هو أنا مكنتش باااسلة ههه كنت تانلعب مع لبنات فالزنقة شريطة ولحبل تاهو ولي عندها شي مونيكة تاتجيبهاا ونبقاو نلعبو ونديرو راسنا صحابات وبلي كل وحدة عندهاا مومو ونتجمعو زعمة عند شي وحدة هههههه من صغرنا وحنا تانقلبو على تمااارة هههه

الطفولة ودكرياتها من أروع اللحظات لي كيعيشها الإنسان خصوصا لكانت طفولة ديال شحال هادي قبل مايكونو التلفونات لي مخلين الدراري يتبلاو من صغرهوم.. تانلقاي ولد ولابنت قد لكمشة هاز تلفونو تايدخل لبلايص عمرك نتا لي بعقلك دخلتي ليهوم.. ديك الطفولة لي أقصى مشاكلنا كااانت هي صاحبتي مباغاش تلعب معاياا ولافلانة ضرباتني.. الطفولة لي فااش شي حد كيضور معاااك ويعطيك غير ربعة دريال نتاا تتفرح وتاتمشي عند لبقااال تشري لحلوة دلبناان ودلمگانة بحال لاشريتي كنزز.. وشي بيمويات كاانو زمااان فيهوم لبنة وياسلام على ديك لياام لي تستاهل تقول عليها ياليتها تعووود.. تبسيمة رحيل بانت وهي كاتفكر وتعاود ليه هو لي حاضيها وساكت.. الضو دلفيوز هو لي كان مشعوول فقط وصوتهوم خافت حيت سيدرا ناعسة مباغينش يفيقوها.. كل حدث داز فطفولتهاا تاتعاودو بحمااس بحال الاتاتعيشو وعينيها كيلمعو مع كل حدث..

رحيل:(شافت فيه وقالت بهدوء) واحد لمرة كنت تانلعب مع لبنات مع انا تقريبا صغيرة فيهوم وقع مشكيل أو وحدة نتفاااتني ويلي شحاال بقا فيا لحااال وبلاصة مانرد حقي مشيت لحدا باب الدار وبديت تانبكي ونهرنن تمااا (ملامح لحزن بانت على وجهها ونبرة صوتها) تاجاات وقفات عليا وهي مكمشة حجبانها وقالت ليا رحيل مااالك ؟ أنا غير شفتهاا بديت نشكي ليها وهي مقدراتش تسكت ومشات تنتفات مع ديك لبنت وجابت لياا حقي كيف ديماا.. فيما تاتشوف شي حد حگر عليا تادافع عليا وتادابز وشحال من مرة تبراو منها لعيالات ومع دلك ماتسوقااتش (حدرات عينيها ونطقات بخفوت) كانت تاتقول ليا عمري نخلي شي حد يحگرك وأنا كاينة

نوح:(كان عارف على من كاتهضر.. نطق بصوت خافت) شكون؟

رحيل:(تبسمات وشافت فيه وعينيها كيلمعو بدموع) صاحبتي وختي (نطقات سيمتها بخفوت) جيداء

نوح:فين هي؟

رحيل:(تزيرات وبصوت مرعود نطقات) ماتت..

كان عارف على من تادوي بحكم إدريس سبق وعاود ليه على شنو طرا لجيداء وموتها لي خلى رحيل تنهار وتكتائب.. ملي بدات تتعاود على طفولتها خلاها على خاطرها ومقطعهااش بلعكس بقاا تايسمع .. عجبو لحال فاش شافها تطلقات معاه وتادوي بعفوية ومبقاتش مزيرة كيف قبل.. تتعاود طفولنها وهذا بالنسبة ليه تقدم زوين والحواجز بدات تاتزول شوية بشوية.. ديك النبرة دلحزن قلعهاا وحس بيها ورغم هادا مقاال والو خلاها تخوي لي فقلبها بلامايحبسها.. أما رحيل فطفولتها ومراهقتها وشبابها دكرياتهوم كلهوم متعلقين بجيداء.. مايمكنش تفكر شي بلان فطفولتها بلاماتفكرها ولاشي زبلة دارتها فمراهقتها بلاماتدكر جيداء.. كانو بزوجااات صحباات وخوتاات ومع الاسف وحدة مشات عند لي خالقها والثانية بقااات ولكن قلبها وعقلهاا ديماا مع صاحبتها ل خلات فراغ فحياتهاا..

رحيل:(عطاتو بالضهر ونطقات بصوت هامس) تصبح على خير

طفات لفيوز لي جنبها وغير حطات راسها على لمخدة سمحات لدموعها ينزلو عاضة على يديها باش تحبس شهقاتها مايسمعهومش وهو حاس بيهاا.. غير من كتافها لي كيتهزوو.. زول لغطاا وتمشى جهتها وهي غير حسات بيه سدات عينيها مباغاش يشوفها وهي تتبكي.. كيف ولفاات تتبكي بينها وبين نفسها ومكتوري لحد اش هاز قلبهاا.. قرب جهتهاا وجلس قفازي حاط يديه على راسها ونطق بهمس: لكان البكاا غايريحك بكي

غير قال كلامو وهي تخشي راسها فالمخدة وبدات تاتبكي وهو تايقيس شعرها مكمش حجبانو.. هو أكثر واحد يقدر يحس بيها ويعرف شعورها فهاد اللحظة.. هزها من بلاصتها وجلس مسند راسو على لكادر ومجلسها عليه خاشي ليها راسها فصدرو وهي تاتبكي وهو كيقيس شعرها وتيقرا عليها لقراان.. كاتهز بين صدرو وتشهق مدة تاابدات تكالمى ونعسات وهو ماغمض عينيه تاشافها نعساات عاد سد عينيه وتكى راسو مع الكادر دالنموسية...

----

تاتحرك وسط لفرااش بخمول ويديها تايتلمسو لفراش لي كان خاوي وبارد.. حلات عينيها وهي مكمشاهوم تاتشوف راسها ناعسة بوحدها فالبيت.. تفكرات لبارح وكلامو لي قاال وكيفاش بكات قدامو.. أول مرة تبين شنو بيها لشي حد.. وهاد الحد مكانش شخص عادي إنما كان راجلها.. رتاحت فاش بكاات ومغاتنكرش ولبارح شافت جيداء فحلمتها ومكرهاتش دير ليهاا صدقة ولكن فاللول خصها تشاور مع نوح هو لول واخا قال ليها دار دارك خودي راحتك مي ضروري تشاور.. ناضت تاتكسل وقادات النموسية ومشات لحمام قضات حاحبتها وتوضات وخرجات صلات هو لول عاد بدلات حوايحها بواحد الگندورة ديال الدار واسعة ومبردة ولاحت فولارها وخرجات تاتقلب عليه هو وسيدرا.. كان الجو مبرد داك الصباح وحيت الأحد هو مكانش خدام.. لقات رحمة جالسة مع سناء وقربات جهتهوم ناطقة بهدوء:صباح الخير

ردو عليها الصباح وهي جلسات جنبهوم حشمانة مع باقي مامطلوقااش عليهوم..

رحمة: السعدييية السعدية

السعدية:(جايا تتجري)نعام الالة

رحمة:جيبي لفطور لرحيل

السعدية:اه واخا الالة

رحيل:(شافت فرحمة)شكرا

رحمة:العفو نتي دابا راه وليتي مرات ولدي مكاين لاش تحشمي دار دارك خودي راحتك فيها

سناء:(لي فيها مامهنيهاش) ليوم مغاتمشيش لداركوم طلي عليهوم حيت هاد السيمانة كلها ونتي تتمشي

رحيل:(نطقات بلباقة) كانمشي حيت بابا وماما كانو مسافرين كنطل على دار ونشوف خوتي ياكما خصاهوم شي حاجة حيت مع الخدمة الواحد كيعيا ولكن دابا ماما جات وهي غانكلف

سناء:(كانت تاتسنى تجاوبها بشي كلام ناقص ساعة زمطاتها)على سلامتهوم

رحيا:(بتبسيمة)الله يسلمك

جابو ليها لفطور وناضت تاتفطر بهدوء وسناء حضياها.. تاسالات وناضت تاتجمع لمواعن لراسها مخلية رحمة وسناء يستغربو من تصرفهاا..

فصال دسپور لي كاينة فالرياض كانت جالسة سيدرا فوق الكرسي ببجامتها البنوتية وشعرها مجموع كوتشوفال.. حاطة يديها لي فيها لفاصمة فحجرها وعينيها على زين العابدين ونوح لي كاانو كايترينو فحلبة الملاكمة.. ملي فاقت فالصباح فاق معاها نوح لي مولف لفياق بكري ومشى غسل ليها وبدل ليها حوايجها ومشط ليها شعرهاا واهتم بيها بلامايفيق رحيل مخليها ترتاح.. داز عند زين العابدين لي كان ناعس فيقو تاهو وعلمو بلي غايترينيو بزوج.. نزل لتحت لقى بيسان هي بوحدها لي فايقة مع خدامة ليوم.. فطرو بتلاتة أما زين العابدين غير شرب العصير مع مكيفطرش هو فاش يالاه كيفيق... وغير سالاو داهوم لصال دسپور لي غير شافتها سيدرا وهي تحل فمها وعينيها كايضورو وكتشوف فدوك الآلات دسپور لي تم وديزاين ديالو ولمرايات لي فالحيط كيبينو انعكاسهاا.. لعبها نوح شوية على طابي غولون وعجبها لحااال وشحال فرحاات وحماقت عليها وغير دارو تسخينات هو وزين جلسها فالكرسي ومشى يلعب معاه شي كومية كيف مولف...

كانت ساكتة ومكمشة فبعضها تاشافت فنوح لي غفل زين العابدين وجاب ليه الضربة فحنكو جنب الضربة لي ديجا عندو ولي داير عليها فاصمة.. ناضت من بلاصتها وقربات جهتهوم ونطقات ببرائة:ماي بلو آيز علاش تاضرب زينبيدين؟

نوح:(كان صدرو تايطلع وينزل زول ليگون بسنانو وجلس تايستارح نطق مبسم) كانتريني بيه وهو ترخف بزاف اتاتبيرت إينو

سيدرا:(طلعات عندو وهو معاونها وجلسات فوق حجرو وقالت ببرائة) ماضربوش ماي بلو آيز هو مغايبقاش يدير بيتيز (شافت فزين العابدين)ياكاا؟

ضحك نوح تاتهزو كتافو وتهزات سيدرا لي كانت جالسة فحجرو وهي تاضور عينيها... هي عند بالها كيضربو معرفاش بلي راه غير كيترينيو.. برائتها خلات نوح يتبسم ويجرها لعندو باايسها فحنكهاا بحنية كيمشط شعرها وكيدوي معاها بالخاطر: مكنضربوش أنا كانلعب معاه الرياضة فاش تبراا ليك يديك نلعبها معاك تانتي

سيدرا:(كمشات حجبانها ونطقات مدلية شنايفها) تاضرني يدي ماي بلو آيز

نوح:(شد يديها لي محروقة ونطق بجدية)شتي علاش دراري صغار كانگولو ليهوم ماخصهومش يقربو لعافية ولاشي حاجة لي تقدر تأديهوم

سيدرا:(تاضور عينيها)كان فيا جويعات وبغيت ناكل بريوات

نوح:(عاطيها لخاطر وفنفس الوقت تايفهمها غلطها) فيك جوع اجي عند ماماك ولاأنا وگوليها لينا وحنا غانجيبو ليك متاكلي ماشي تمشي تقربي لعافية وزيت سخونة وهاهي دابا حرقاتك ويديك غاتبقا ضرك بسباب الحرقة ومغاتقدريش تحركيها ولاتلعبي بخااطرك وحتى فاش غاتبغي دوشي غاتوجعك وغايخصك وقت باش تبراا ليك يديك..

سيدرا:(دلات شنايفها ونطقات ببرائة)صافي ماي بلو آيز مغانبقاش نعاودها والله

نوح:(باسها فحنكها) صافي تافقنا دابا

حركات راسها باه وهو طبطب عليها وهز عينو فزين العابدين لي جاالس قدامهوم وحاضيهوم..

نوح:نوض تكمل

---

باقا رحمة على جلستها تاتشوف فالمجلة وتعزل فالبلدي كيف ديما.. وقدامها سناء لي هازة تلفونها تاتهضر مع مرات خوها.. عينيها خرجو فاش سمعات الأوديو لي سيفطات ليها مرات خوها ولي تطلق بجهد "سمعت بلي اليازيد ناوي يتزوج وليوم جا عند عمي وهضر معاه"

هزات رحمة عينيها تاتشوف فسناء لي كانت مصدومة وعينيها خارحين فالشاشة.. حاسة بالعافية شاعلة فيها ومتوقعااتهاش نهائيا منو

سناء:(شافت فختها)كنتي عارفة؟

رحمة:لا ماعرفتش

سناء:(ضحكات بسخرية وغير من عينيها باينة معصبة) هو داير هادشي يااش يعصبني ويخليني نغيير حيت مبغيتش نسمح ليه

رحمة:(كمشات حجبانها) واش عند بالك هو غايبقا حياتو كلها تابعك السيد باينة ناوي يتزوج بصح

سناء:(تجننات وغوتات بالجهد)رحمة

رحمة:(بجدية مخرجة فيها عينيها) ماالي كدبت بان ليا نسيتي نهار جبتي لينا داك خونا وقلتي باغا تزوجي بيه ياااك كنتي مُصرة عليه ومنوو نخلاااق فينوو داباا شتك قلبتي عليه لڤيست ومبقيت سمعت تاخبار عليه كيف شحااال هادي كنتي ديما خارجة فيما نسولك فين غادة تقولي مشيت نشوف بدر الدين فين هو دابا هاد بدر الدين الجوهري ديااالك شتو غبر..

ضارو بزوجات فاش سمعو صوت التهرااس وبانت ليهوم رحيل لي كانت واقفة مخرجة عينيها بصدمة..

كانت حاسة راسها بحال الاكتحلم واخر حاجة كانت تتوقعها هي تسمع سميتو وفهاد البلاصة بالضبط.. سميتو لي لطالما كانت تاتشكل ليها رعب وفوبيا.. واخا هو دابا ميت ولكن بااش تدكر سميتو هنا وعلى لسااان ممات نوح فهادشي شكل عندها خوووف ورعب من أنهم يكونو عرفو كلشي... يديها كانت تترجف وعينيها كانو باقي مفيكسين على رحمة لي قربات جهتها وهي مكمشة حجبانها ونطقات بهدوء:واش نتي بخير؟؟

صوتها فيقها من ديك الدومة دالأفكار لي كانت غايصة فيهوم.. حركات راسها بزربة وتحدرات جهة ديك الصينية لي طاحت ليها ولكيسان دلقهوة لي تهرسو مع البريق تاهو.. وبدات تاتجمع الزااج وهي كلها تترجف ورحمة قالت بجدية:غير خليها السعدية غاتجمعهاا

رحيل:(بصوت حاولات ماأمكن يكون طبيعي) ماعليش أنا غانجمعهاا

يديها كانو تيترعدو عليها وهي تاتجمع الزااج ومخبية وجهها لي تبدل منو اللون... وبقوة ترعيدة لي شداتها وعقلها لي كان غايب ماحساتش بالزاج لي ضربها فراحة يديها تانزل دمها سخون ورحمة غير شافتها وهي تنطق بسرعة:يديك تجرحات نووضي خلي السعدية تكمل (رفعات صوتها) السعدددية السعددددية اجي جمعي هاد الروينة

عاوناتها تاناضت وشافت فيديها ونطقات بتساؤل:كاضرك بزاااف نشوف ياكما الجرحة غارقة

رحيل:(حركات راسها)لا لا عادي غانمشي نداويها شكرا

خلاتها وطلعات لفوق وهي بزز باش قادرة ضبط راسها وماتخليهومش يشكو فيهاا.. أما سناء فهاديك عقلها أصلا كااان غاايب وتفكيرها غير فلخبار لي سمعاتهوم ولي خلاو عقلها يترفع والغيرة تحضر.. أخر حاجة كاانت طيح فبالها هي اليازيد يقرر يتزوج.. مقدراش تقبلها حيت من نهار اعتارف ليها بحبها وتزوجها وهي كاتشوفو مخلص ليهاا وتافطلاقهوم عمرو فكر يتزوح وبقا سنين طويلة وهو كيحاول يصالحها وماخلى مداار.. العائلة كلها دخلات من صغيرها لكييرهاا.. باش ترجع ليه دار لي مايدااارش باااش غير تقبل تشوفو وتهضر معاه وهي حلفااات لاشافتو.. جات لمراكش وتبعهاا وفديك الفترة كانت نفسيتهاا مدمرة بشي لي عرفاات وحتى باش يشرح ليها شنو طااري معطاتوش لمجااال.. كلشي خلاها على راحتها وتاهو لدرجة أنه خوى لمغرب ومشى ليونان حيت مقادرش يبقا فنفس البلاصة وهي بعيدة عليه.. بغااهاا لدرجة أن تاوحدة ماحلالت فعينيه.. دمر موراهاا وحد معاارف حالتو كيف كانت من غير نوح لي سافر عندو أو وقف معاه واخا هو لول كان معارضو على الغلطة لي دار وسمع ليه كلام خلاه يزيد يندم.. قصح معااه وندمو وخلاه نيت يعرف حجم غلطو.. نوح هو الوحيد لي كان عارف القصة كيف هي بحكم اليازيد عاود ليه.. دوز اليازيد دوك السنين كلهوم فعداب مدمر فنفسيتو وباغيها غير تنسى ويصلح الغلط... اه غلط ملي خلى الشيطان يغرو ولكن راه ندم وبين ندامتو وهي حلفات لاهبطات الرااس ليه وماحدها كاتشوفو تابعها وتايحاول يرجعها ماحد تقتها أنه عمرو غايخليها كاتزيد... وأنانيتها خلاتها ماتفكرش بلي ممكن السيد يمل راه واخا لواحد يبغيك ويدير على قبلك المستحيل غايجي النهار يمل خصوصا لامكانش التبادل بين الطرفين.. الحياة بين زوج فيها تبادل المشاعر والاحترام والحب.. يعني عطيني نعطيك بااش تقدر نتا تكمل مع داك الطرف الآخر... أما لكنتي نتا تتعطي بزاف ومكتلقااش مقابل كون على يقين بلي غايجي وقت لي مغاتبقاش تعطي وغاتنساحب كيف اليازيد نساحب وقرر أنه يعيش لي بقا فحياتو مع إنسانة خراا... سدات باب الجناح ديالهاا تاتسمع صوتو ومشات بزربة جهة البيت خدات مخدة ودفناااات فيهاا وجهها وغوتااات واحد الغوتة طالعة من أعماقها... حاسة بروحها شوية وتخرج من جسمهاا بقوة الألم لي حاسة بيه فقلبهاا لي كاان تينزف الدم.. جالسة فالأرض وهي تاتبكي مقدراااش تيق بلي هو غايتزووج... حاسة براسها مخنووقة وعقلهاا شوية ويخرج من بلاصتووو.. هزات تلفونها بزربة ودخلات لواتسااب كااتشوف فلمساجااات لي كان تيسيفط ليهاا هاد لمدة كلهاا... كانت تتقراهوم وعمرها جاوباتو بحرف... ومع دلك كان تيسيفط ليها باركة عليه غير تقراهوم واخا مكتحاوبوش... كانت ساهية تاتقرا كل كلمة كاتبها ليها وكل تصويرة سيفط ليها على لحب ولغرام والندام... كاتقرا وهي تاتبكي وتشهق تاوصلات لآخر مساج لي كان قبل عرس ولد لحاج من تما معاودش سيفط ليهاا.. طلع ليه بلي هو أونلاين ويديها كانو باغيين يسيفطو ليه مسااج ولكن مبغااتش تدل راسها حيت مولفة أنه هو لي يتبعهاا... تفكرات نهار العراضة وتصرفو لي داار ومع كلام مرات خوها تما تأكدت بلي هو بصح عيى وقرر أنه يبدا حياة جديدة مع غيرهاا وهي مقادرااش أنها تقبلهاا...

واقفة رحيل فالحمام وحاطة يديها تحت الروبيني ولما مطلوق مخلي دمها يتخلط مع لما.. كانت مرفوعة وعقلها غايب عليها وهي تاتفكر كلاام رحمة... عقلها كان بحاال شي حلبة الملاكمة بقوة مالأفكار تاضرب فيه مخلينهاا دخل فدوامة التفكيرر لي تاتهلكهاا... هو كان خاطب خالتو يعني هو ونوح تشاوفو وهاد الفكرة بالدات خلات لقشعريرة تسرى معااهاا.. هي عارفة بدر مغايكونش خطب خالتو حبا فيها إنما كان ناوي شي نية خرى ويعلم الله شنو هي... هي عارفة حقارتو وعارفة بلي داك الإنسان مريض ويقدر يدير أي حاجة المهم يرضي راسو ويوصل لشنو بغاا... مدات يديها وسدات الماا وتمشات بخطوات تقيلة جالسة فوق لشااس وعقلهاا سارح كيربط الأحداااث.. نهار جا نوح طلبها لزواج ملي تعطل وجااا ويديه مضروبة زعمة يكون هو مورها.. ديك الفترة كانت عندهوم كلثوم لي كانت تاتعطيه خبارهوم بالتدقيق.. بدات تتحرك راسهاا يمين وشمااال حاسة براسها غاتحمااق تخنقات بزااف وراحتها هربات... والوساويس خلاوها تخاف يكون نوح عارف شي حاجة... تحل لباب دلحمام عليها بغفلة تاقفزات من بلاصتها وشهقاات.. عينيها عليه وهو داخل بشورط وتقيشرات بويض كلو عرقاان.. كمش حجبانو وقرب جهتهاا وعينيه لمحات يديها لي حطااهاا على حجرها ودم باقي فيها ماتحبسش.. قرب جهتها بزربة وجلس قفازي شاد يديها ومكمش حجبانو ونطق بجدية:ماااالك؟

رحيل:(نطقات بصوت مرتاجف) والو غير تجرحت

نوح:(بخشونة)باش تجرحتي؟؟

رحيل:زاج

نوح:كايوعتك بزاف؟

حركات راسها بلا وهو ناض من بلاصتو غادي لبلاكار لي جنب لمرايا حلو وجبد واحد لبواطة فيها لقطن ولانكول ودوا لحمر والفاصمة.. حلها ورجع عندها حطها فالارض وخدا لقطن دار فيه دوا لحمر وشد يديها وبدا تايديرو ليها وهي ساكت وساهية فيه.. بدا كيصوانيه ليها ودار عليه لفاصمة وقادها فيديه وهي على حالها.. باااس راحة يديها فوق الفاصمة بشوية وشاف فيهاا بهدوء:ردي لباال لراسك مرة خرا

رحيل:(سرطات ريقها)واخا

ناض رجع ديك لبواطة بلاصتها وشاف فحوايجها لي لتحت موسخين بالقهوة لي تكبات عليهاا.. خرج جاب ليها بيجامة خرا وجا جهتها عاونها زولها ليها بلخاطر ولبسها لخرا عاد نطق وهو حاط يديه على راسها: مزيان دابا؟

رحيل:(ناضت ونطقات بسرعة) غانمشي نشوف سيدرا

خرجات بزربة مخلياه هاز حااجبو وشاك بلي بيها شي حاجة.. لعب بلسانو ففمو وحل سيور الشورط غادي لجهة الرشاش باش يدوش... أما رحيل فدخلات بيت سيدرا لي كانت جالسة متفرجة فالرسووم.. غير شافت رحيل وهي تنووض عندها ونطقات بحب:ماااامي

رحيل:(هزات وباستهاا بحب) حبيبة ديالي (جلسات فوق نموسيتها مجلساها عليها ونطقات بهدوء) يديك كاضرك بزاف امامي

سيدرا:(نطقات بحزن)اه مامي تاضرني

رحيل:(نطقات بصرامة) شحال من مرة قلت ليك ماتبقاايش تقربي لعافية والسخوون ولمووااس وگاع لحوايج لخايبين علااش مكتسمعيش لكلامي هاا

سيدرا:(خشات راسها فصدر مها) تاماي بلو آيز گالها ليا مامي

رحيل:(تنهدات) كاطيري ابنتي كاطيري بزاااف

سيدرا:(شافت فيد مها)مامي تانتي عندك ديدي هناا بحالي

رحيل:اه فطرتي امامي؟؟

سيدرا:(تتعاود ليها بحماس)اه فطرت مع ماي بلو آيز وبيسو وزينبيدين وعرفتي مامي ماي بلو آيز داني أنا وزينبيدين نديرو ريااضة فواحد لبلاصة زووينة فيها مراياات بزاااف وبزاف دلحاجات كباارين مامي ولعبت فهاديك تاتمشى بياا وزينبيدين وماي بلو آيز بداو تيلعبو فواحد لبلاصة عالية وتيضربو هاكا (جمعات قبضة يديها لي مضرهاش وضربات رحيل بلطف فكرشها تاتشرح ليها) وفاش سالاو مشى زينبيدين خدا لحبل بدا تيلعب بيه وماي بلو آيز هز شي حاجات فيديه مااامي

عطاتها التقرير كولو ديال داكشي لي شافت ورحيل كاتسمع ليها ومن كلامها استنتجات أنه لعبو سپور وبلي هو وزين العابدين لعبو كومبة بحكم هي عارفة زين تايلعب لكيك بوكسينغ.. وديك لبلاصة لي شرحات ليها عرفاتها غاتكون صال دسپور واخا مشافتهاش مي غير من كلام سيدرا فهمات لي كااين.. مشطات على شعرها ونطقات بحنية:عجبك لحال امامي؟؟

سيدرا:(بدات تاتكركر)اااه مامي گال ليا ماي بلو آيز ملي تبرا ليا ديدي فيديدا ديالي غايلعبني معاه بحال زينبيدين

رحيل:وشكون بدل ليك حويجاتك فالصباح؟

سيدرا:ماي بلو آيز كنتي امامي نيني وهو فاق داني لطواليط درت پيپي وغسل ليا سنيناتي وجهي ولبسني بيجامة ومشط ليا شعري (ضارت تاتوريها لكوتشوفال) شوفي مامي زوينة يااكاا

رحيل:اه امامي زوينة

فرحات رحيل لحماس وفرحة بنتهاا.. وعجبها كيفاش نوح اهتم بيها ملي كانت هي ناااعسة.. مفيقهااش بلعكس دار واجبو على أكمل وجه وخلاهاا تفرح من تصرفاتو مع سيدرا... نهار قال ليها نتي وسيدرا غاتوليو مسؤوليتي كان قاصدها بالحرف.. عنقات سيدرا لي تخشات فيه وتنهدات تنهيدة طالعة من لقلب..

بقات مع سيدرا تاتلعب معاهاا وهي سارحة وكل مرة تنغزها سيدرا وتفيقها من سرحانها.. كانت لبيت عامرة بالألعاب... جالسين فالأرض على دوك لمخيدات الصغار الرطبين وقدامهوم طبيلة صغيرة فيها ألعاب دلكوزينة.. بريق ديال لقهوة وطويسات وسيدرا تاتكب لرحيل لقهوة زعمة ومجلسة دوك لمونيكات تاهوما معاهوم..

رحيل:(عاطياها لخاطر) اممم تاتعرفي تصاوبي لقهوة جات بنينة

سيدرا:(تبسمات) أنا بصح مامي

رجعات تاتكب زعمة لدوك لمونيكات ورحيل مبسمة ليها وعاطيها لخاطر.. دق لباب ودخل نوح لي جااي بسروال توني مع تيشورت وريحة لباندوش وشومبوان ممزوجة مع عطرو رجولي مالية لبيت مجرد مادخل عندهوم عينو تبسمو كيشوفو فديك الجليسة لي دايرين.. جلس قفازي وحط يديه على راس سيدرا ونطق بحنية:اش كادير تاتبيرت إينو؟

سيدرا:تانشربو قهوة أنا ومامي ومونيكاتي نكب ليك ماي بلو آيز؟

نوح:(جر لمخدة وجلس عليها ونطق بتبسيمة) كبي ندوقو

هزات داك لبريق دلميكة لي مزوق مع طويساتو وكبات ليه وحطات ليه سوطاااس وعطاتو معلقة زعمة يحرك السكاار.. ورحيل حاطة يديها على خدها مبهورة من تصرفو وكيفاااش غادي مع سيدرا فالخط.. كادقق فملامحو حيت كان قريب ليها وشافت فلحيتو وداك الشيب لي بدا ينوض ليه فيها وفشعرو تااهو فالجنااب ومع شعرو قهوي مكيباانش الشيب بزاف تاكدقق فيه.. عينيها على تكميشات لي جنب عينيه فااش تايضحك وتايتسدو عينيه.. نزلات عينيها لعنقو وشافت ديك لخالة لي عندو فوق العرق النابض لي هادي ماشي أول مرة تلمحهاا.. ضار جهتها وحصلها وهي تاتحنزز فيه وساااهية السيدة بشوفاتهاا فيه ومعاقت على راسها تاحسات بلحيتو تكاتهاا فحنكهاا فاش بااسها عاد توگضاات وشافت فيه هو لي قرب جهتها هامس ليه بخشونة: فين سهيتي؟

رحيل:(سرطات ريقها وبدات تاضور عينيها فبلاصتهوم) والو

عاق بيها ومبغااش يحكر عليهاا وضار جهة سيدرا لي تاتهضر مع مونيكاتها وشاف فساعتو كانت وقيتة دلغداا..

نوح:(ناض من بلاصتو ونطق بهدوء)خليونا نزلو لتحت هادي وقيت دلغدا

رحيل:(ناضت تاهي ونطقات بتهرب) احم أنا مافيااش غير تغداو نتوما

نوح:(هز فيها حاجبو)علاش؟ كاضرك شي حاجة؟

رحيل:(بكدب) راااسي كيضرني غانمشي نشرب شي دوليبران ونتكي شوييية

نوح:(مبغاش يحكر عليها)واخاا سيدرا يالاه

هزها نوح وهي تعلقات فيه تاتفشش عليه وتتهضر معاه وهو خارج من لبيت ورحيل تابعاهوم تبان ليها نزل لتحت وهي تقلب طريقها لجنااح.. دخلات ومشات بدلات بيجامتها بوحدة قصيرة ومبردة وطلقات شعرها ومشات ديريكت لنموسية تسطحات فوق منها وعينيها محلولين فالسقف.. مجرد مابقات بوحدها رجع تفكيرها فلموضوع لي حاولات تنساه فهاد السوايع لقلال يشغل بالها.. يااك هو مات وصافي تهنات منو إذا علاش خايفة وحاسة براسها مخنوووقة؟؟ واش حيت هو دخل لهنا وتلاقى بنووح ولاحيت كاينة شي حاجة خرى؟؟ هاكا تتكون كلما تدكرات سيرتوو تاتخنق ومكيبقااش عندها لخااطر وخصوصاً دابا فاش عرفاات بلي هو غايكون تلاقى بنووح مجرد مكتخيل الفكرة تاتحس بعقلها غايهرب من بلاصتوو... وهي معرفااش اش طرا وداك لحيوااان شنو كانت نيتوو... لبارح قدرات تهضر على صاحبتها ولكن بااش تهضر على شنو دوزات فزواجها لولاني فهي مغاتقدرش حيت بكل بسااطة هي مباغاااش تفكر بااقي تاشي حاجة عندها علاقة بزواجها لولاني وبشنو عاااشت فديك الفترة.. واخا نوح عمرو جبد ليها لموضوع ونهار مشات هضرات معااه عاودات ليه فقط لحوايج لي هي باغا وحاولات تلخص كلامها وتوصل ليه شنو دوزات فديك الفترة... ساطت وهي شادة راسها بين يديها تاتهضر بهمس:نساااااااي نسااااي

كضرب راسها على الله تقدر تحبس تفكيرها.. سمعات صوت برا وبزربة تسطحات فبلاصتها مغطية وسادة عينيها... تاسمعات لباب تحل وعرفاتو هو لي دخل.. سادة عينيها أو ودنيها كيلقطو لحس ديالو لي بان ليها تقطع.. حلات عينيها بشوية وبدات تاتشوف من تحت شفارها تابان ليها خارج بشورط قصير وتقيشرات ورجعات سداتهوم بزربة... كايتحرك فالبيت وهي على نعستها تاسمعات تلفونو كيصوني وصوتو لي وصل مسامعها وهو كيهضر بجدية: وي عثماان... وصلات شتيهاا؟... ياك كلشي هو هداااك؟... لامجاايش ليوووم تال غداا؟ صافي ديها لديبوو تال غداا وفرقوها على لمحالات بزووج؟... الله يهنيك...

قطع لابيل وعينو مفيكسين فالمرايا ديال طايل دونوي فين تيبان انعكاسها وقلعهاا بلي مناعساش من عينيها لي حالاهوم بشوية... حط تلفون وضار جهتها مقرب عندها وعينو على وجهها ورموشها لي كانو تايتحركو بزربة.. تخشى جنبهاا وعنقها فكرشهاا جارها عندو وباسها فكتفها لعريان ناطق بهمس: مالكي؟

حلات عينيها على صوتو ونطقات وهي تاتهرب منو:والو غير راسي كيضرني وصااف

نوح:(ضورها عندو ونطق بجدية) شي حد قال ليك شي حااجة حالتك معجبانيش

رحيل؛(مبغااتش يعرف مالها عليها تاتهرب منو) لا

نوح:(هاز فيها حاجبها)متأكدة؟

رحيل:(حيدات يديه وناضت من بلاصتها ونطقات بانفعال) اووووف قلت ليك مااابيا والو واااه

تقريبا داز زوج سيمانة على طلب اليازيد لزواج وجا لوقت لي إدريس يرد عليه... عطاو لغزلان وقت كافي تفكر فيه فأكيد غاتكون قررات.. ولحد الآن باقي ماتجبد ليها حس محمد طه بلي طلبها تاهو واخا هي عارفة حيت قالها ليها ولكن تانيرت ماجبدات ليها لموضوع شي لي خلاها تشك وتقول مع راسها يمكن تراجع يمكن مبقاش باغي يتزوح بيا و و.. عطات بزاف دالإحتمالات لي معرفاش شكون فيهوم لي صحيح.. كانت كيف عادتها فبيتها وأسماء ورنيم خرجو يضورو شوية يبدلو روتين لخدمة والدار وحاولو معاهاا تخرج تاهي ساعة مبغاتش أصلا نفسيتها مباغا والو باغا غير تنعس وصاف.. مخشية فبلاصتها ومغمضة عينيها وشي نعااس مجاهاا تاسمعات الدقان فالباب وصوت تانيرت لي نطقات وهي داخلة عندها: بنتي غزلان

ضارت غزلان جهتها وتقدات فجلستها:خالتي دخلي

تانيرت:ياك مافيقتك

غزلان:لا كنت غير متكية وصاااف واش محتاجة شي حاجة؟

تانيرت:(حركات راسها ونطقااات بهدوء) جيت باش نسمع جوابك ابنتي

سكتات غزلان وهي تتسرط ريقها فاش فهمات لي كااين وتانيرت كملات كلامها:نتي عارفة ابنتي بلي السيد عطانا وقت لي نتي تفكري فيه وتاخدي وقتك قبل ماتعطينا جوابك قبل مانسولك نبغيك تعرفي بلي حنا باغيين مصلاحتك والانتي حسيتي براسك مباغاش وممرتاحااش عادي قوليها وماتخبيش الزواج ابنتي راه عمرو مكان بزز.. نتي بحالك بحال رحيل وأسماء ورنيم ومصلاحتكوم عندي أنا وإدريس أهم من كلشي.. نهار ابنتي دخلنااك لدارنا رتاحينا ليك حيت لقينااك بنت النااس وعمرنا شفنا عييبك.. درتي بلاصتك وسطنا وربي شاهد بلي كانعتابروك منا وفيناا..

حادرة راسها وعاضة على شفتها حابسة البكية لي خنقاتها وكلام تانيرت لمس قلبها لي كان تينزف وخلى لجرح يطرى.. هوما اش غايكون تصرفهوم ملي يعرفو لغلطة لي دارت فحق نفسها وفحقهوم.. رجع إحساس الدنب كينهش فيها..

تانيرت:(تبسمات ليها بحنية)سمعيني صوتك ابنتي وقرارك حيت خصنا نردو على الناااس

هزات غزلان عينيها ولسانها تقاال عليهاا وبزز باش قدرات تخرج الكلمة وقرارها لي جاا بعد تفكير طووويل وسهراات ليالي.. خرجات من عندها تانيرت غادة تعلم إدريس وهي رجعات جلسااات وسهات وتاتسول راااسها واش القرار لي خدات فمحلو ولازربااات...

فلتحت كان مكسل محمد فوق السداري وعينو لايحها فالتلفازة ولكن عقلو غايب وممعاهش.. لبارح ملي هضر معاها وقالت ليه ديك لهضرة حس بكبرايااءو تجرح وكرهها وكره راسو ومشاعرو لي انجارفو ليهااا.. داير لي فجهدو وكثر وهي ممقدراااش هادشي.. عارف بلي نفسيتهاا غاتكون مدمرة كيف تاهو تدمرات نفسيتو ولكن على الأقل تقدر هادشي وماتجرحووش بكلامهاا كيف جرحااتو لبااارح ملي علماتو بلي غاتهضر مع اليازيد وتشرح ليه لوضع بلاماتجبد سميتوو.. هنا حس براسو بحال لبرهووش وبلي هو ماشي قد المسؤولية واخا راه قال ليها نيتو دااك الصبااح وقرارو لي مكانش عندو رجوع فيه إلا أنهاا مبغاتش تفهم.. مبقاش غايجبد معاها الموضوع مزاال ومبقااش غايدل راااسو.. هوو دار لي عليه وطلبها من باه وهضر معاها وقالها ليها وهي أو وجهها.. لاوافقات على اليازيد فغاتكوون سنااات على دمار مستقبلهاا.. حيت مستحيل شي راجل يقبل يتزوج شي وحدة وهي ماشي بنت وسبق دارت علاقة وبرضااهاا.. مجتمعنا دكوري واخا يكون متفتح كايجي تال موضوع العدرية وكيولي مجتمع أمِّي بتفكير عقيم.. شوف غير لاكانت شي وحدة مغتاصبة كيفاش كيشوفو فيها ناقص بالرغم أنهاا مغتتصبة يعني ماشي لخاطرها إلاأنهم كيشوفو فيها شوفة ناقصة لعسااك وحدة مشات برضاهاا وغلطااات.. أولا درت غلط فحق لي خالقهاا وتانيا غلط فحق نفسهاا.. تنهد على صوت الأداان لي تسمع فأبواق الجامع وقطع تفكيرو فالموضوع.. ناض بهدوء طالع لفوق وأول حاجة دارها هي توضى وخرج وهو كيقطر مشى لبيت رحيل هز صلايتها ورجع لبيتو فرشها فاتجاه القبلة.. ومجرد ماوقف وكبر حس بالتبوريشة طااالعة معااه من صبع رجليه الصغير تال زغب راسو.. عينو تزيررات وبدات دمع وقلبو لي كان بحال لامزيرة عليه شي يد وكتورك عليه فجأة ديك اليد مشاات وتبخراات.. حط راسو على السجاادة وهنا ماقدرش يحبس دموعو وخلاهوم ينزلو وهو ساجد.. حس براسو بعد بزااف على لي خالقو وغلط فحق نفسو.. وبعد على صلاتو لي مكانش مواضبهاا.. كيصلي ويقطعها مدة ويرجع يصلي ويقطع تاااني.. تانساهاا وبعد والشيطاان قدر يحكمو ويوسوس ليه ويخليه يطيح فغلطة عمرو.. عند بالو لاشرب ديك لوقيتة وسكر غاينسى همومو وغايرتااح ولكن هو غير مزاد هم فوق همو.. بلاصة مايشرب كان عليه يمشي يتوضى ويصلي ويدعي الله هو لي غاينورو لطريق الصحيح هو لي غاينزل الرحمة والسكينة وگااع دعاواتو غاتستجااب.. كمل صلاتو ودموعو سقاو وجهوو وفديك اللحظة هو عاد حس بالراحة النفسية لي كانت هاجراه.. ناض بهدوء جهة نموسيتو وتكى عليها وماحس براسو وقتاش نعس بقوة مكان مرتااح..

التقرب من الله عز وجل كيخليك ترتاح نفسياً وگاع الضغوطات ديالك ومشاكيلك كيتحلو فااش كادير تقاك وإيمانك فلي خلقك والصبر مفتااح الفرج.. عمرك تقنط من الرحمة دالله وعمرك تقول علاش لاخر عندو وأنا ماعنديش.. المقارنة ماشي حل حيت كل إنسان برزقو والأرزاق ربي لي كيفرقهوم..

ديك النعسة لي نعس والراحة لي حس بيها كان زمان ماحس بيها.. ماحسش بالوقت ومااافااق غير على صووت الكلاام لي جاي من برا.. حك عينيه وناض كيتفوه وتيطرطق عضامو ويتنهد بالراحة.. هز تلفونو وشاف فساعتو عاد خرج لبرا وبانو ليه لبنات واقفين باين يالاه رجعو محملين ببلاستيكات ومعاهوم تاغزلان لي غير شافتو سكتات.. ماشافش فيها حدو مشى جهة لحمام غسل وجهو وحيت المغرب أدن توضى ورجع صلى هو اللول عاد نزل لتحت لقاهوم باقي حاطين الكاسكروط... كب ليه كاس دلقهوة وجلس تاياكل تاودنيه لقطو هضرة أسماء لي وجهات ليه كلامها بتبسيمة: اوا اسي العريس زعمة مبغيتيناش نضربوووك بالعين عليهاا خبيتي عليناا

محمد طه:(كمش حجبانو) اش كاين؟

رنيم:(شافت فأسماء تاتميق) همم السيد زعمة داير راسو معاارف وااالو

ريان:(عض على لسانو وشاف فيه مغدد) أنا لي خوه ومقالهاااش ليااا (هز رجليه مع جالس حداه وضربو ففخدو ونطق مخنزر) مقديتي تگولها لياا خايف نطيرهاا ليك

أسماء:(نطقات بضحك)هههه صافي غير سكتوناا السيد مبغااش يقولها تااايعرف العروسة واش موافقة ولا لا اوااا اغزلان شكون بحالها جاوها زوج دلخطاااب دقة وحدة.. دومااج العريس لول ترفض كوون غير عطاتو لياا حسن مانبقا باااايرة هههههههههه

لكلام بدا يتوضح ليه وفهم بلي غزلان رفضات اليازيد وبلي فتحو ليها موضوعو هو.. مبان عليه تاشي تأثير ورجع تيكمل لكاسكروط ديالو بكل هدوء...

رنيم:(شافت فيه) مودي كيف طرا تاخطبتي غزلان حيت عمرك بينتي بلي كاتعجبك وديما مغوت عليه ههه

ريان:السيد راه كان تيغوت عليها حيت تتعجبو كي شتي الأخ عندو إعاقة فالمشاعر وكلشي عندو عكسي داكشي علاااش

أسماء:ومايعيقش عوتاني راه حنا لبنات كانبغيو لي يعطينا لخااطر ماشي لي يبقاا يتغاوت معااناا ويكرهنا فعيشتنا

رنيم:متافقة معااك شتي واخا نكون تانموت على شي ولد لمرا نشوفو عييق وخنقني فحياتي نطج ونضرب على والديه

ريان:سمعتي (ركلو تاني) حل ودنيك وقيييد كيفية التعامل مع الجنس اللطيف مع نتاا ماعندكش تجاارب وزرگ فهاد الأمور شد النصائح من عند خوتاتك

محمد طه:(نطق ببرود)غاتعاود تركلني غانوض نقلب على طواسلك هاد الطبلة

أسماء:(تحمساات) دابا غزلان ففترة مشاورة والاوافقات غايكون عندنا تاني عرس هناا اياااااي الفرحة خلات قلبي يرفرف غانشطو تاني ونحيحو كيف حيحنا فعرس عوينات الجلباااانة

رنيم:اجي عيطتي على رحول وعلمتيها

أسماء:صونيت عليها مكاتجاوبش وسيفطت ليها مساح علمتها بأخر الأخبار (شافت فمحمد) سمع نتا بعدا فاش غاتوافق لبنت غايخصك تبدل ديكور بيتك وتزيد فيه توش أنثوية وتانموسية غايخصها تبدل وكلشي يكون جديد وديرو تلفازة فالبيت لابغيتو تفرجو نتا وياها طيط اطيط المهم من ليوم مغاتبقااش ديال راسك وغاتولي عندك مسؤولية ومراا ومن هنا لقدام غايكونو وليدااات

أسماء تاتهضر وتشرح وهو عقلو ساارح.. باقي مغايرتاح ويتهنى تايسمع لموافقة ديالها.. كملو حديثهوم وهوما شاديين فيه وكل وحدة تعطيه نصيحة وريان تاهو حال ودنيه ومرة مرة يعطيه شي نصحية تاهو مع السيد خبرة فالتعامل مع الجنس اللطيف ماشي بحال محمد طه لي عمرو تصااحب فحيااتو ولبنت لوحيدة لي بغا راه مقدرش يصارحها حيت هي مكتبادلوش نفس الشعور..

ريان:(ركلو ونطق يضحك) ارجوع الله الشريف حضر دماغك معانا

خنزر فيه محمد طه وبلامايهضر ناض ليه تاهو كان على سبة.. تشابكو بناتهوم غير بالضحك ومحمد طه تايعطيه بوسكات فرجليه وريان تايرجعها ليه فالبلاصة تاادخلات غزلان لي ملات من الجلاس فالبيت بوحدها وحسات براسها قريب تحماااق من قوة التفكير.. بقات واقفة تاتشوف فيهوم ومحمد طه غير شافها بعد من ريان لي بقا تايضحك وتالبنات بداو يتغامزو.. رجع لبلاصتو تايجغم من كاس دلقهوة لي بردات وغزلان مشات جلسات جنب لبنات.. تانطق ريان بضحك وعينو على محمد طه:نعااام اسيدي نعام الله يعز لحكااام ههههه

لسانها حسات بيه تربط وعاد وعاات على هضرتها وانفعالها لي مكان عندو تاشي سبب ملي عينيها تعلقو فملامح وجهو لي داك الهدوء لي كان مرسوم عليهوم تبخر فلحظة ورجعات شوفتو قاااصحة تاتخلع... سرطات ريقها وهي تاتشوف فيه ناايض من فراشو وبخطوات تقالين مقرب جهتها وهي فديك اللحظة تمنات الأرض تشق وتخشى فيهاا... تعصبات من راسها ومن لهضرة لي قالت ليه... بؤبؤ عينيها رجف مع كل خطوة دارها جهتها تاوقف قدامها بطولو الفارع حاجب عليها الضوو... مقدراتش تشوف فيه نيشاان ولكن حسات بشوفاتو شوية ويختارقوهاا.. مد يديه وشدها من دقنها مطلع ليها راسها تاهزات عينيها وشافت فيه وياريت مشافتش حيت ديك النظرة لي دار فيها خلاتها تندم على مقااالت.. تحدر جهتهاا كثر وبصوت خشن صارم نطق: ويااك تعاوديها

طلق من وجهها مور ماعطااه واحد تخنزيرة خلات قلبها يقفز وسط ضلوعها وتخطاها غادي جهة الدريسينغ بلامايزيد تاشي كلمة خرا.. وهي بقات جامدة فبلاصتها مقدراش تحرك.. تاتسمع لصوت الحس فالدريسينغ وباش تمشي عندو وتعتادر مقدراتش.. ضورات عينيها فاش بان ليها خارج لابس سروال توب وشوميز نواغ خاشيها فالسروال.. تمشى جهة الطابل دونوي وهي فديك اللحظة وعات على غلطها وعرفات حجمو عليها قربات جهتو ونطقات بصوت خافت:نووح

مضاارش جهتها بحال الاماسمعهااش هز ريحتو رشها ومسح لحيتو بيديه وهز تلفونو وسوارتو وخرج بلامايهز فيها عينيه ولاينطق بشي كلمة متجاهلها تماماً.. وغير سمعات الباب تسد سمحات لدموعها ينزلو وبدات تتبكي.. كرهات راسها على تصرفهاا لي دارت فحقو وكيفاش هزات صوتها عليه وتأفافت.. هو غير سولها مالهاا علاش هي دارت ديك ردة فعل لي ماليها تاشي سبب مقنع.. وأصلا علاش هي معصبة وباغا تهلك راسها غير حيت سمعات سمية داك لحيواان... ياك هو مات وتهناات منو إذا علاش باقي تاتمرض راسها.. صافي هو مبقاااش فهاد الدنيا وخدا لعقاااب دياالو وهي رتاحت منو وبدات حياة جديدة مع الشخص لي اختارو قلبهاا.. هاد لمدة كلها وهي عايشة معااه واحد لعيشة عمرها كانت تحلم بيهاا.. كيفاش كيهتم بيها وكيفااش راد ليها لباال لأدق تفاصيلها لاهي ولابنتهاا.. ماحملاتش راسها فهاد اللحظة حيت قلقاتو وحيت سببات فمشكيل فبداية زواجهوم لي باقي مدازتش عليه زوج سيمانة كاملين وهاهي بداتها بالخصومة.. مسحات دموعها ومشات جهة تلفونها هزاتو ولقات لزابيل من أسمااء ومساج علماتها فيه بلي غزلان رفضات اليازيد وبلي محمد طه خطبها.. عطاتها الأخبار لي هي ديجا كانت متوقعاهوم ومهتماتش ليهوم حيت همها دابا هي تدوي معاه وتعتادر منو.. دوزات ليه لخط وبدا كيصوني مدة تاقطع ورجعات تاني تاتصوني بدون ملل.. هي طبيعتها هاكا فاش تاتعرف راسها غلطات فحق شي حد كطلب منو السماحة.. وهاد الحد ماشي شي واحد عادي إنما "راحة روحها" لي ماتقدرش على تخاصيمتو ولاعلى تقليقتو.. فيما تقطع لابيل تاترجع تصوني عليه من جديد وهي غادة جاياا فوسط لبيت.. تاافقدات ليااس ملي طفى تلفونو وعرفات بلي هو مباغيش يهضر معاااهاا.. جلسات بحزن وهي عاضة على شفايفها حابسة بكيتها.. ولكن دموعها تمردات ونزلات على حناكها وهي بدات تاتبكي وتشهق بحال لاميت ليها شي حد.. وبعد ديك نوبة البكاا لي جاتهاا ناضت غسلات وجهها وتوضات وخرجات لبيت الصلاة لي عندها فالجناح وصلات ودعات تاحسات براسها تفشات عاد ناضت تاتزول إسدالها وحطاتو فبلاصتو وخرجات من لبيت وهي تسمع صوت سيدرا لي كانت تتعيط ليها:ماامي ماااامي

مشات رحيل حلات ليها باب الجناح لقاتها واقفة تاضور عويناتها المبطنين وغير شافت مها تلاحت عليها وهي هزاتها مدخلاها لبيت..

رحيل:(تاتشوف فعينيها المبطنين منفوخين)كنتي ناعسة امامي

سيدرا:همم مامي

رحيل:فيك الجوع؟

سيدرا:(شافت فرحيل)بغيت گلية مامي

حركات ليها راسها ومشات جهة لفيكس عيطات لسعدية وطلبات منها تجيب ليها عصير ولگلية ورجعات عند سيدرا لي كانت شاعلة تلفازة تاتفرج فالرسوم.. عقلها غايب وكل مرة طلق تنهيدة طالعة من لقلب.. تاسمعات صوت الدقان ومشات حلات لسعدية عطاتها الصينية فيها الگلية والعصير وتقاوت ورجعات عند سيدرا عطاتها كاس دلعصير وطبسيل دلگلية.. كانت كل مرة تشوف فتلفونها وهي عندها أمل بسيط يوصوني عليها ساعة والو.. دازو ساعات أو وصل وقت لعشا ورحيل بزز باش نزلات مباغاش تعيق حيت سبق وماتغداتش معاهوم ودابا تاني الاماتعشاتش غاتفرط راسها.. نزلات هي وسيدرا مور مالبسات عليها عباية طويلة وفولارها.. لقات كلشي حاضر من غيرو هو وسناء.. جلسات معاهوم وبزز كاتبسم باش مايعيقوش بيهاا.. تعشاو مع بعض وجلسات معاهوم شوية تايهضرو وفنفس لوقت كاتسناه يجي تابانت ليها سيدرا ناعسة فحجرها وهي تنوض هازاها وغادة بيها لبيتها نعساتها وخرجات راجعة لجناحها بدلات عليها ودارت روتينها وتخشات بلاصتها كاتسنااه.. دازت ساعة.. سعتاين ..تلاتة دالسوايع وهو غابر ليه الأثر وتلفونو باقي طافي مخليها تشطن عليه والنعاس يطير من عينيها..

ليل طويل والنعاس جفى عينيها وبالها مشطوون معااه.. فين غايكون مشى وعلاش طفى تلفونو.. ناضت من بلاصتها وهزات بنوارها لبساتو وتمشات بشوية عليها جهة البالكو.. حلات بابو وخرجات وهي مكمشة فبنوارها والريح تيطير شعرها لمطلوق براحة فوق كتيفاتها.. مكانتش كظن الأمور غاتوصل لهاد الدرجة وهي أصلا مكانتش نيتها تقلقو.. كاتفكر كلامها وتصرفها لي دارت باش تهرب من أسئلتو وباش ماتخليهش يشك فيها حيت عارفاه مغايرتااح تايعرف مالها وهي مباغاش ديك السيرة تجبد مرة خرى.. بغات تدفنها وتردم عليها التراب وتمحيها من دماغها ومن حياتهاا.. دوزات مافيه الكفاية من عداب نفسي وجسدي وجاا لوقت دالراحة والهدوء وتعيش حياتها كأيها الناس والماضي يبقى مااضي وماتجبدوش فحاضرها ومستقبلها لابغاات تعيش مرتاحة.. بقات واقفة مدة وهي كاطل تاحسات بالنعاس بدا كيجيهاا وهي تسد الباب دلبالكون ودوزات الخوامي ورجعات لنموسيتها شافت فتلفونها لقات بلي لفجر قرب يأدن.. قالت نتسنى نصليه هو لول تكات على لمخدة ومحساتش براسها وقتاش غمضات عينيها ونعسات...

---

صوت التلفون لي تيصوني فيقها من نعاسها وخلاها تحل عينيها بكسل وهي تاتفوه.. شافت فلغڤي لي كانت معمراها باش تفيق بكري وماتنعسش تال أيتها وقت بحال لبارح.. طفاتو ومع ضارت وراها بان ليها نوح نااعس على ضهرو وحاط دراعو على عينيه.. كمشات حجبانها ومعرفاتش وقتااش رجع وكيفاش مشافتووش؟ سرطات ريقها وكحزات جهتو بشوية باش ماتفيقوش وبقات تاتشوف فلحيتو وشفايفو.. وغير مقال ليها راسها مدات يديها وحطاتها على حنكو تاتمشط لحيتو بشوية.. مكانتش عارفة بلي لغضبة ديالو قاصحة لهاد الدرجة واخاا سبق ليها وجرباتها نهار قالت ليه ديك الكلمة وكيفاش صعر عليها وضرب يديه ومن وراها مبقاش معبرها وتجاهلها بحاال لامكاينااش.. يمكن ديك الساعة مكانت بناتهوم تاحاجة عكس دابا هي مرااتو ومغاتنكرش أنها ولفاتو بزااف فحياتهاا.. كيفاش كيهتم بأدق تفاصيلها وكيفاش تيتعامل معاها بحنية.. نزلات عينيها تاتشوف فصدرو لي ولفات تحط عليه الرااس قبل ماتنعس .. تبسمات فاش تفكرات نهار لفيرمة ملي قالت ليه راه غاتفششني وبصح فششها فهاد الأيام وخلاها تولف حظنو تاامبقااش تايحلى ليها النعاس الاماحطاتش راسها على صدرو وحسات بيديه مزيراها ليه بحال الاخايفاها تهرب.. تنهدات وعاقت بيديها لي سرحات فلحيتو وبزربة زولاتها وناضت من بلاصتها غادة لحمام خدات ليها دوش خفيف وخرجات وهي حاسة بكرشها كاضرها.. هزات تلفونها شافت لكالوندري لقات بلي لغيگل تعطلات ليها شي سيمانة هادي.. زفرات النفس وعارفة بلي فاش غاتهبط غاتندمها مع هي أصلا كاتجيها بالوجع وبلاوالو دابا معطلة ليها.. مشات لبسات عليها گندورة طويلة وفولار عاد خرجات من الدريسينغ وشافت فيه لقاتو باقي ناعس هزات تلفونها وخرجات من الجناح غادة عند سيدرا هو لول فيقاتها وبدلات ليها ومشطات ليها شعرها ونزلاتها لتحت وهي هازة لقطيطة ديالها..

رحيل:(جلساتها فالجليسة لي جنب لخصة ونطقات بحب) هانتي امامي جلسي هنا وعندك تمشي لشي بلاصة خرى

سيدرا:(جمعات شفايفها ونطقات بهمس)مامي فيا جويعات

رحيل:(باستها ففمها)دابا نجيب لفطور امامي

مشات رحيل لكوزينة فين كانت السعدية او واحد لمرا كبيرة وبنت خرى يالاه رحيل شافتها.. غير شافوها وبداو يسولو ياك الالة مخصاك شي حاجة؟

رحيل:(بإحراج)مكاين لاش تقولو ليا لالة عيطو ليا غير رحيل وصاف (شافت فالسعدية)تقدري تعاونيني باغا نصاوب لكريب ومعارفاش بلاصة ديال المآونة

مشات السعدية تاتوريها وتاتجبد ليها لي محتاجة وتاتسولها ياك مغاتعاونها ورحيل تبسمات ليها بهدوء:ماعليش أنا نتكلف

انغامسات كتصاوب لبنتها لفطور لي تاتبغي ولخرين كل وحدة وشنو تادير حيت وقيتة دلفطور خص كلشي يكون موجود فوق الطبلة قبل مايفيقو.. عاوناتهوم رحيل وهوما جاتهوم فشكل وخصوصا باقي عروسة وباين فيها ماشي من داك النوع لي مفشش ومتكبر.. كانت تاتحط طبيلة وسيدرا جالسة وعينيها على لكريب بالشكلاط ومقرباتش ليه كيف ولفها إدريس من الصغر ماتقيصش لحاجة تايعطيوها الإذن وهي كبرات على هاد لقاعدة.. نزلات رحمة كيف العادة بأناقة وهي لابسة سروال توب واسع مع شوميز ستان طويلة وتاهي واسعة وشعرها مطلوق.. شافت فسيدرا لي تبسمات ليها ديك التبسيمة البريئة لي خلات رحمة بلاماتشعر تردها ليها فلبلاصة.. جلسات فبلاصتها وبانت ليها رحيل جايا وهازة طبيسيل فيه لحرشة حطاتو فبلاصتو وشافت فرحمة ونطقات بهدوء:صباح الخير

رحمة:صباح النور (نطقات بنبرة مستغربة)واش نتي لي وجدتي لفطور؟

رحيل:(جلسات جنب سيدرا ونطقات بتبسيمة خفيفة)أنا غير عاونت لبنات وصافي

تبسمات ليها رحمة ومغاتنكرش بلي جاتها فشكل أنها داخلة لكوزينة بنفسها وهي باقا عروسة جديدة.. خصوصا أنها من أول نهار جات هنا ماكلاتش وماجلساتش معاهوم فمعجبهاش لحال وحسات بيها نقصات منهوم ومدايراش ليهوم اعتباار ومع دابا هوما باقي كيتعارفو عليها فأي تصرف صدر منها خص تكون رادة ليه لبال حيت هوما كيحللو كلشي وغير تصرف بسيط منها وهي مقصداهش هوما غايفهموه عوج..

هزات رحيل عينيها وبان ليها نوح نازل بسروال توب وشوميز كيسد صدايف يديها وهو مكمش حجبانو بان فيه ماشي على برجو.. غير شافتو سيدرا وهي تنوض من بلاصتها ومشات تاتجري عندو تاتحدر وهزها وهي تعلقات فيه ونطقات بتبسيمة:ماي بلو آيز توحشتك

حطات راسها على كتفو وهو تبسم ليها وقرب جهتهوم جر الكرسي لي جنب رحيل لي مانزلاتش عينيها عليه تاسمعاتو نطق بصوت خشن: صباح الخير

رحمة:(تبسمات ليه بحنية) صباح النور اولدي

جلس سيدرا فوق ركبتو ورحيل قربات جهتو ونطقات بهدوء:سيدرا اجي جلسي بلاصتك

نوح:(نطق بهدوء)غير خليها

سكتات وجمعات يديها عندها وتمنات كون كانو بوحدهوم باش تهضر معاه وتعتادر منو.. حاولات ماأمكن ماتبينش بلي كاين شي حاجة بناتهوم قدام عائلتو.. هزات بريق دالقهوة وشافت فيه: نكب ليك لقهوة انوح

شاف فيها وحرك راسو باه ورجع تيقطع لسيدرا الكريب باش تقدر تاكلو.. كلشي كان حاضر لفطور ماعدى زين العابدين لي أصلا مكيفطرش.. حطات ليه الطاس دلقهوة مور مدارت ليه معلقة دالسكاار مع كيشربها شوية قاصحة.. رجعات تاتفطر بلاشهية وكرشها ضراتها بلوجع لي فيها وليغگل لي حلفات لانزلات..

بيسان:(شافت فسيدرا) خص نبدل ليها لفاصمة

نوح:(شاف فختو)تاتفطر وبدليها ليهاا

سيدرا:(شافت فبيسان ونطقات مدلية شنيفاتها)مغاتقصحينيش ياكا؟

بيسان:(تبسمات ليها)لا مغاتقصحيش احبيبة ديالي

تبسمات ليها رحيل ورجعات تاتشوف فنوح لي منزل راسو تايهضر مع سيدرا ويمسح ليها فمهاا لي فيه الشكلاط ويشربها لعصير... ضورات عينيها وماتجي غير على شيماء لي كانت تاهي حاضياه بعينيها وغير شافت رحيل وهي تبسم ليها ببرود وتارحيل ردات ليها تبسيمة فوق قلبها.. معرفاتش علاش ولكن مارتاحتش ليها نهائيا وتقول واش بغات تسرط ليها ودوك التبسيمات لي كادير ليها شيماء تاتقلعهوم رحيل فالسماا بلي غير نفاااق..

سناء:(شافت فنوح وبدون مقدمات نطقات) كنتي عارف اولد لحاج بلي اليازيد خطب؟

نوح:(شاف فيها ونطق ببرود)اه

سناء:(حسات بالفقصة والغيرة لي قتلاتها.. شافت فرحيل بشوفة ناقصة ورجعات شافت فنوح ونطقات بانفعال) سمعت بلي لعرووسة من عائلة مرررتك ياكما نتا لي قتارحتيها عليه؟

گاع لي فالطبلة خرجو عينيهوم من كلامهاا لي قالت وكيفاش تجاوزات الحدود معااه وهي عارفااه كيف داير..

نوح:(باس سيدرا فراسها ونطق بحنية) تاتبيرت إينو سيري فيقي زين العابدين

حركات سيدرا راسها ونزلات من عندو ومشات تاتجري باش تفيقو أما هو غير شافها مشات ضار عند سناااء هاااز حاحبو لسماا وخنزر فيها تاسرطات ريقها وبدات ضور فعينيها وهو نطق يصوت قااصح: مشاكيلكوم ماعندي مانگجدر بيها ومناقصنيش فريع الراااس والسيد ماشي ولد صغير بااش نزوجو ونطلقو عارف اش كايدير ولاكان باغي يتزوح فالله يسهل عليه هو مغايبقااش حياتو كلها تابعك ونتي هازة عليه خنافرك لسماا (حمر فيها الشوفة ونطق بجدية) وماتنسااايش بلي فهاد الدار كاينة بنت صغيرة ومانبغيش هاد التصرفات يدارو قدامها مرة خرى

ناض من بلاصتو مكحز لكرسي وباين فيه معصب وتاحد مانطق بشي كلمة وكلشي ساكت وشي كيشوف فشي.. ناضت رحيل تابعاه وهي تاتسرط ريقها وقبل مايوصل لباب نطقات بهدوء:نووح (ضار شاف فيها وهو هاز حاجبو وهي تشجعات وكملات كلامها) غاتجي لغدا؟

نوح:(شاف فيها مدة قبل مايجاوبها ببرود) لا

مشى وهي تنهدات ورجعات لفين كانو كلهوم جالسين من غير سناء لي مكانتش..

بيسان:(ربعات يديها وشافت فمها)مافهمتش أنا علاش هي معصبة ياااك تاهي كانت غاتخطب مالها دابا تعصبات وگالت ديك لهضرة لي ماعندها معنى

رحمة:(تنهدات) هي غير تتكابر وهاد السنين كلها وهي مباغاش تعتارف وتگول لي فقلبها

بيسان:زعمة اماما بصح اليازيد غايتزوج (شافت فرحيل) سناء قالت من عائلتك واش شي وحدة كانعرفوهاا؟

رحيل:(شافت كلشي كيشوف فيها ونطقات بتبسيمة خفيفة )اه غزلان

بيسان:اووووه غيزو صراحة زوينة ومواتية هي وياااه هههه ناري وتسمعني سناااء غاتقجني ههه

رؤوف:(ناض وشاف فرحمة) الواليدة أنا مشيت الله يعاون

شيماء:(ناضت هازة صاكها ونطقات بزربة) بلاااتي وصلني معاك راه طوموبيلتي باقي ماجبتها عند لمكانيسيان

رؤوف:(شاف فيها وببرود نطق) شيفور باك باش نوصلك شدي طااكسي وهني الشعب..

طلقات بيسان الضحكة فوجه شيماء لي مارضااتش خصوصاً قدام رحيل لي أصلا عندها حساسية معاهاا.. أما رؤوف تقول واش تسوق قال هضرتو وخرج مخلي رحمة تاتحرك راسهاا وتسوط وتخنزر فبيسان لي تقول واش حشمات..جمعات شيماء كرامتها وخرجات تاهي..

رحمة:(خنزرات فبيسان)حشووومة اش هاد التصرف درتي نتي وياه؟

بيسان:وأنا مالي اماما هضري معاه هو

رحمة:(حركات راسها وناضت من بلاصتها) غانمشي نشوف سنااء حسن ليا

حلات باب الجناح لي لأول مرة دخل ليه وعينيها كانو تايضورو فبلاصتهوم.. غادة وهي تاتقلب عليه باش تفيقو كيف طلب منها نوح.. دخلات لبيت النعاس وعينيها لمحوه وهو ناعس فوق النموسية مغطي غير بإزار.. قربات جهتو مدايراش لحس وضارت على النموسية تاوقفات قدامو وبان ليها نص وجهو مخشي فالمخدة وشعرو كيف لعادة مخربق على وجهو ومغطي ملامحو.. قربات وجهها جهتو تاتشوف ففمو لي حالو نص حلة كيتنفس منو وقربات صبعها وقاستو فنيفو وهو مافاقش..

سيدرا:(تاتقيسو فكتفو وتاتعيط ليه بشوية) زينبيدين فييق زينبيدين فييق زينبيدين

صوتها درونجااه وخلاه يحك راسو مع المخدة قبل مايحل عينيه ويشوف فيها وهي واقفة فوق راسو.. كمش حجبانو وهي تاتشوف فيه وتبسم ليه

سيدرا:ماي بلو آيز قال ليا نجي نفيقك باش تفطر معانا عرفتي ماامي صاوبات ليا لكريب بشكلاط بنين اجي تاكلو تانتا معاياا

كان تيحك عينيه وراسو مع يالاه فايق كيحاول يستوعب أصلا فين هو.. وهي تقول سارطة كاسيطة خنزر فيها ونطق بصوت مبحوح بالنعاس:خرج

سيدرا:(كمشات حجبانها) وافييق يالاه نهبطو تحت عند ماي بلو آيز

حيد لغطاا ونزل حفيان وكان لابس غير سورط قصير.. طلعات سيدرا راسها فيه فاش وقف ومع طويل راه كاتبان كيف شي قملة قدامو.. عينيها نزلو لعضلات كرشو لي كانو مرسومين مع السپور

سيدرا:(ببرائة) علاش نتا عندك هادوو وأنا ماعنديش (هزات بوديها تاتوريها كريشتها لمنفوخة شوية) هاا شوف

ماتسوقش ليها كيف عادتو مشى جهة لحمام وهي تابعاه تادخل وهو يسد عليها لباب فوجهها.. بقات واقفة تاتسنااه شي جهد عشرة دقايق تاتحل لباب وخرج وشعرو سارد بالماا ملوي عليه غير فوطة..

سيدرا:(كمشات حجبانها)علاش نتا عريااان

مشى لدريسينغ سد لباب وبدل عليه بشورط وتيشورت وخرج جار كلاكيطتو هز تلفونو وسيفط مساح لأمين وتمشى خارج من لبيت وهي تابعااه تاتجري ونطقات بصوت عالي: زينبيدين هزززني

ضار شاف فيها وهز حاجبو وهي مدات يديها ليه وبدات تاتسبل فعينيها كيف البابوشة.. تحدر جهتها زين العابدين وجر ليها خصلة من شعرها تاهبطات راسها ونطق بصوت بارد: عندك رجليك تمشى بيهوم

خلاها ونزل وهي تقلقات منو وبقا فيها لحاال.. مولفة لاقالت لشي واحد يهزها تايهزها وينفد ليها طلبهاا ولكن زين العابدين دار لعكس وتجاهلها وهي هادشي لي مكتبغيش.. نزلات لتحت عند رحيل لي وكلاتهاا فطورهاا وهي تاتسول على نوح لي مالقاتوش.. أما زين العابدين خدا غير كاس دلعصير.. سالات سيدرا فطورها ومشات بيسان جابت شانطة ديالها وجلساتها فديك لجليسة لي جنب الخصة وبدات تاتبدل ليها لفاصمة ديديها ورحيل جالسة جنبها مكمشة حجبانها وقلبها ضرها على ديك لحرقة لي كاتبان ليها شادة يديها وغير من شوفتها راه كاتوجع.. كانت عاطياها الخاطر ومع هي بنت الدومين ماوجعاتهااش نهائيا.. صوناتها ليها وبدلات ليها لفاصمة بوحدة جديدة..

بيسان:هاحنا سالينا

سيدرا:(شاافن فبيسان بتبسيمة) گاعما ضريتيني

بيسان:(باستها فحنكها وعطات ليها شكلاطة)هاد شوكولا كادو حيت مبكيتيش

شداتها سيدرا وشكراتها وضارت عطاتها لرحيل:مامي حليها لياا

حلاتها ليها وكلاتها ليها وسيدرا ناضت غادة تقلب على لقطة ديالها باش تلعب معاهاا.. كانت جالسة رحيل مجمعة مع بيسان لي مخداماش ليووم تاحسات بشي حاجة هبطات ليها وعرفات بلي غاتكون جاتها لغيگل اعتادرات منها وناضت لجناحها وهي شادة كرشها تاتسوط.. هزات حوايجها ودخلات لحمام بدلات عليها ودارت أولويز وخرجات غادة تاتقلب على دواها ولقات بلي مجابتوش معاهاا أصلا ونسات تشريه.. لقات غير دوليبران ومشات عيطات لسعدية فلفيكس جابت ليها كاس دلماا كشكشاتها فيه وشرباتهاا عاد نزلات لتحت وهي مكابرة على راسها.. لقات بيسان باقي فبلاصتها تاتهضر هي وسيدرا لي تاتسول فيها ولخرى تاتجاوبها بالخاطر..

بيسان:أمدرا؟

رحيل:خديت دوليبران عالله تكالميني

بيسان: تاأنا كانستعمل غير دوليبران حيت أصلا مكيجينيش لوجع بزاااف

رحيل:سعداتك أنا راه تاتهلكني غير دابا جالسة وصابرة ليها

بيسان:نتي من نوع لي تاتجيك بالوجع يااك

رحيل:غير وجع وسكتي ههه السخفة والردان حاشاك راه فاش كاتجيني گاااع مالين الدار كيسيقو خباااري خصوصا مور لولادة تمجهدات عليا

ييسان: اوا ماعليك غير بالصبر جربي شربي الزعتر

رحيل:(حطات يديها على نيفها ومعدتها تقلبات عليها) لا لا داكشي مامسلكنيش بلعكس غير تايروعني

بيسان:اوا الله يشافيك الزين ديالي سيري ترتاحي وماتهزيش لهم لسيدرا راه غانرد ليهاا لباال بلاماتخممي

رحيل:(تبسمات ليها ونيت جاتها من الجنة والناس نطقات بامتنان)شكراا ليك

بيسان:مابيناتناااش أزين

ناضت رحيل ومع بغات تمشي باان ليها رؤوف لي داااخل كيجري وطلع بزربة لفوق وجهو مغيير.. شافت فبيسان ونطقات بتساؤل:مالو خووك؟

بيسان:(بخوف)ماعرفتش

نزل تاااني وكان غادي زرباان تاوقفاتو بيسان فاش شدات يديه ونطقات:رؤوف مااالك حالتك معجبانيش شواقع؟

رؤوف:(نطق بزربة وهو تايفك يديها)لفيرمة شعلات فيها لعافية..

لهضرة لي قال ليهوم خلاتهوم بزوجات يشهقو بصدمة... الخلعة شدات رحيل لي أول حاجة طاحت فبالها هي نوح.. ماتسناتش تسمع مزال كلام رؤوف وطلعات لفوق فين كانت مخلية تلفونها.. هزاتو ويديها تاترعد عليها وعقلها غايخرج من بلاصتو وهي تاتصوني لنوح لي كان تلفونو خدام ولكن مكيجااوبش.. وهنا الخوف تسلل لقلبها لاتكون واقعة ليه شي حاجة.. جلسات فوق النموسية وهي حاسة بالوجع غير مكيزيد يتمجهد عليها... عضات على شفايفهاا وحدرات راسها تاتنفس بالجهد تاسمعات الدقاان فالباب دالجناح وهي تنوض بزز وحلات لباب لقات بيسان لي كان وجهها صفر..

رحيل:(بخوف)شنوو واقع واش قال ليك رؤوف شي حاجة خرى كيفاش شعلات العافية؟

بيسان:(تاترجع شعرها لور بتوثر)لا مقاال وااالو حيت مشى دغياا وخلاني مفاهمة تاحاجة وفاش تانصوني لخويا نوح مكيجاوبش تازين العابدين فاش سمع لي كاين مشى

رحيل:(حكات جبهتها) شنو نديرو دابا نمشيو تاحنا لفيرمة؟؟

بيسان:لا لا خويا مغايبغيش نمشيو غايتعصب علينا وحنا مناقصنا صدااع المهم أنا الاعرفت شي حاجة غانقولها ليك وتانتي لاجاوبك علميني واخا سيري رتاحي باينة فيك عيااانة بزااف وماتهزيش لهم سيدرا راه تاتلعب لتحت

حركات رحيل راسها باه ودخلات لداخل وهي تاتزول فولارها وتاتسووط.. ماحيلتهاا لوجع ماحيلتها لخوفها عليه وعلى لفيرمة.. وتارؤوف حدو لاح ديك لهضرة ومزاد عليها والو.. جلسات فوق النموسية حاطة المخدة قدامها ومتكية عليها وهزات تلفون تاتجربو مرة خرى عالله يجاوب ساعة والو.. لاحتو بعصبية فوق النموسية وحدرات راسها تاتبكي وتوجع والخلعة شداهاا..

فلتحت كانت جالسة رحمة وجنبها سناء وبيسان لي كانت تاتعبر ليها السكار وهي مرجعة راسها لور ومغمضة عينيها..

بيسان:(حطات يديها على راس مها) السكار عندك طاايح

رحمة:(حلات عينيها ونطقات بصوت ضعيف) واش باقي مكيجاوبوش

سناء:ماتشغليش بااالك وديها فصحتك

رحمة:كيفاش غانديها فصحتي اولدي كاين تم اسناء (حطات يديها على راسها) راه العافية شعلات فالفيرمة ونووح فيهاا ودابا تااحد مكيجااوب لاهو لارؤوف وتازين العابدين باااينة ولدي واقعة ليه شي حاجة

غمضات عينيها تاتبكي وسناء معنقاهاا تاتسكت فيها وبيسان عينيها تغرغرو.. دايرين بحال لحنش لمقطوع ليه الرااس تاحد معاطيهوم خبار لي يقدر يطفي النار لي شاعلة فيهوم لداخل وخوفهوم لي واضح من وجوههوم.. كانت سيدرا جالسة فجنب حاضنة القطيطة ديالها وعينيها تايضورو عليهوم..

بيسان:(كمشات حجبانها)واحد لعقل تيگول ليا نهز طوموبيلتي ونمشي لعندهوم نشوف اش واقع بعيني

سناء:ولد لحاج مغايبغيش حسن ليك شدي الأرض

بيسان:ونبقاو هاكا معارفين تاخباار

حطات بيسان راسها بين يديها وسناء بدات تاطبطب على رحمة لي باقي على حالتها.. تاسمعو صوت الطالون وبانت ليهوم شيماء لي كانت داخلة مبسمة وغير شافتهوم وهي تكمش حجبانها وقالت بتساؤل:مالكوووم؟ عميتو رحمة علاش تتبكي اش واقع؟

جلسات جنبهوم وسناء بدات تتعاود ليها وهي حلات عينيها على جهدهوم وقالت بصوت سريع:عنداك تكون واقعة شي حاجة لنوح بيما أنه كاين تم

سناء:وشكون عرف تادوك الزووج كانعيطو ليهوم مكيجاوبوناااش مخلينا هنااياا على أعصابنا

شيماء:(ضورات عينيها فالصالة ورجعات شافت فيهوم) شفت ست الحسن مكيناااش هنااا فين مشات؟ عوااض ماخصها توقف معانا وتبقا جنب عميتو غبرااات (ضحكات بسخرية وكملات كلامها بحقد)هادي هي لعرووسة لي فرعتو لينا بيها مخنا هاهي فأول مشكلة باان غبرااات شفتي اعميتو

كانت سيدرا طول لوقت ساكتة فاش شافت حالة رحمة ودنيها تايلقطو لكلام وعقلها الصغير تايترجم الكلام ويحللو.. سمعات هضرة شيماء وعرفاتها قصدات بيها مها بحكم أن مها لي عروسة.. ناضت من بلاصتها مقربة جهة شيماء وكمشات فيها عينيها ونطقات وهي تاتخنزر فيها وكدافع على مها:مامي مريضة مسكينة فيها وجيعات فكريشة

بيسان:(جرات سيدرا وباستها وشافت فشيماء) باركة من لكلام لي ماعندو فايدة لي فينا كافيناا سكتيناا

ميقات فيهوم شيماء وضربات الطم وسيدرا انساحبات من عندهوم غادة عند مها تشكي ليها.. وصلات باب الجناح وحلاتو داخلة وهي تاتقلب عليها بعويناتها تاوصلات لشومبر وبانت ليها جالسة فوق النموسية وحاطة راسها لقدام مقوصة ضهرها.. ماشي أول مرة تشوف مها فهاد الحالة قربات جهتها تاوقفات قدامها ونطقات بخفوت:مامي

كانت رحيل تاتسنط لوجع لي كيزدح فيها وعقلها تايفكر فنوح وفالمشكيل لي طاري.. هزات راسها مجرد ماسمعات كلام سيدرا وعينيها حمرين مع كانت تاتبكي.. مدات ليها يديها تاشدات فيها سيدرا وجراتها عندها معنقاهاا مباغاش تخلعها..

سيدرا:(مدلية شنايفها وبصوت هامس قالت)مامي عرفتي هاديك بدات تاتهضر عليك خاايب

رحيل:(بصوت مبحوح)شكوون؟

سيدرا:(تاتشرح ليها) هاديك لمرا مامي لي شعرها طوويل

معرفاتش رحيل شكون قصدات بحكم سيدرا معرفاش سميتها.. جراتها عندها معنقاهاا وتاسيدرا مخشية فيهاا.. مخلاتهاش تنزل باقي لتحت وعطاتها تلكوموند باش تفرج فالرسوم وداكشي لي دارت سيدرا تكونات بلاصتها تاتفرج ومرة مرة تلوح عينيها جهة مها لي رجعات نعسات على نفس الوضعية لي لقاتها بيها..

الانتظار كايقتل وخصوصا لاكنتي تاتسنى تسمع شي خبار لي تروي روحك وتبردو.. الحالة فالصالة باقي كيف هي رحمة حاطة الراس على الحيط ومفمضة عينيها تاتبكي وبيسان وسناء كل مرة وحدة فيهوم تعيط لشي واحد وشيماء تاهي غير تاتسوط وعقلها مع نوح فقط.. ولفوق رحيل كانت على حالهاا رجلين باش تنوض تنزل لتحت ماعندهاش وسيدرا بقات معاها شوية ومشات لبيتها تلعب.. كان بدا يظلام الحاال ولوجع كايمشي ويجي وبيسان مرة مرة طل عليهاا.. شداتها واحد التبوريشة غريبة وأطرافها حسات بيهوم جمدو بلبرد..كانت حاسة بالتروويعة وباش تنووض مقدراااتش ولكن بزز منهاا حيت خصها تاتبدل عليها.. حاطة يديها على كرشها وغادة بشوية عليها تاوصلات لحمام وقضات حاجتها وبدلات عاد بدات تاترض غير لمرار مع من الصباح مطاحت فمعدتها تاشي حاجة.. ردات غير الصغورية وبزز باش مشات شللات فمها وغسلات يديها ومع جات تخرج حسات بالدوخة.. مقداتش تحرك من بلاصتها وجلسات فالأرض والزليج بااارد.. كانت تاتنفس بالجهد وكاتنين بحال لافيها لموووت.. وتاباش تعيط لشي حد مغايسمعوهاش حيت الجناح مكيخرجش الصووت.. ومالقات تاحل من غير تچلس فداك البرد وتنعس فيه وهي حاسة بقلبها شوية ويسكت.. حاطة يديها على كرشهاا تاتغمض عينيها تاتحل عليها لباب دلحماام وسمعااات صوتوو لي كاان غااارق بحال الاطايحة فشي بير.. تحدر جهتها وهز ليها راسها تايشوف فوجهها الصفر لي مافيه تانقطة الدم وشفايفها بياضو تقولي لموت شداهاا.. هزها بين يديه بزربة مخرجها لبيت وحطها فوق النموسية وهي تاتحرك راسها وتنهد.. قاس وجهها لقاه بارد تحدر جهتهاا تيقيس حنكها وبصوتو الخشن همس ليها:رحيييل رحيييل

باش تحل عينيها مقدراتش وتاهو غير شافها هاكاك ناض غطاهاا بكاشة وخرج من الجناح مخليها تاتعض على شفايفها.. مولفة فاش تاتجيها تاتشرب دواا واخا تياخد وقت باش يشد فيها ولكن تايعطي مفعول ماشي بحال دابا نهار كولو وهي تاتوجع وشربات غير دوليبران لي مدارت ليها والو.. غاب تقريباً ربع ساعة ورجع لقاها ناعسة ديك النعسة تاني وضهرها مقووص.. جبد من الساشي دلفرماسي باكية ديال دواا وخدا حبة وحل لقرعة دلماا لي كان جاب معاه وقرب جهتها ومع جلس جنبها وهي تنين بالجهد حيت حركها.. هز ليها راسها وعطاها لحبة تاكلاتها وشربها لما ورجعات لوضعها.. قاد عليها لغطاا ونزل يديه قاس رجليها لقاهوم كيف الثلج.. مشى لدريسينغ جاب ليها تقاشر لبسهوم ليها بشوية باش مايحركهااش بالجهد عاد جلس جنبها كيشوف فيها وفحالتها مدة قليلة وكانت الكينة كادير مفعولها وبدات تكالميها وهي صافي غمضات عينيها ونعسات على وضعها وتاهو مقدهاش خلاها كيف مرتاحة وبقا غير تيشوف فيها.. تفكر نهار لبيرو فااش تقياات عليه وحالتها كيف كانت داك النهار ومن تما عرف بلي تاتجيها مجهدة وبالوجع.. تنهد وناض غادي جهة لحمام كيطرطق فعنقوو.. زول لاشوميز وضاار عاطي لمرايا بضهرو كيشوف فكتفو وديك لاطاااش لي قدها قدااش بدات تاتزراق ليه.. حط يديه عليها وكمش حجبانو عاض على سنيه.. ماتسوقش ليها ودخل تحت الرشاش مبعد مازول حوايجو مخلي لماا تاينزل على سائر جسمو وهو مهبط راسو ومرة مرة يرجع شعرو لور.. دوش وتوضى وخرج ملوي عليه فوطة ومشى لدريسينغ لبس عليه فوقية وخرج صلى هو لول عاد رجع بدل حوايجو بسروال توني وقبية.. قرب جهتها وطل عليها لقاها غارقة فالنعااس.. طبع بوسة فوق راسها وخرج من البيت مخليهاا ترتاح.. نزل لتحت ولقى كلشي مجموع وتاجدو وجداتو جااو..جلس جنب جدو لي نطق بصوت وقور: رتاحيتي شوية اولدي؟

نوح:(رجع راسو لور ونطق مغمض عينيه) شوية وصاف الحاج

رحمة:(باقي لخلعة شداها) الحمدلله ملي ماوقع ليك والو أولدي تخلعت عليك بزااف

حل عينيه وناض جهتها جلس جنبهاا وجرها عندو تاحطات راسها على صدرو تاتبكي ونطق بهدوء:يمّا ماوقع والو بلاماتمرضي راسك

سناء: ملي ساقت لخبار وهي على هاد لحال تاطاح ليها السكاار

نوح:(باس راسها)شوية دابا؟

رحمة:بشوفتك أولدي وليت بخير

زاينة:(نطقات بسوسية) مانيك أنتگاا تمغارت نك أيوي "كيف بقات مراتك اولدي؟"

نوح:(ضار لعندها وباس يديها وجاوبها بهدوء) شوية وصاف ازاينة نو

رحمة:علاش خليتي زين العابدين تم بوحدو؟

نوح:(كمش حجبانو) مباغيش يخلي حصاانو وهو فديك الحالة

بيسان:أنا لحد الساعة باقي مافهمت كيف طرا هادشي

رؤوف:راه قلنا ليك واحد من لخدامة مشى كيكمي فالإسطبل وفاش سالى لاح ديك لبوينتة دلگارو جنب العلف وهي كانت باقا شاعلة وشدات فيه ومع خرج مشافش اش دار وشعلات لعافية

بيسان:(شافت فنوح) واش غير لخيل ديال زين العابدين هو لي قاستو العافية وتحرق؟؟

نوح:(نطق بهدوء) هو لي كان قريب لعافية(هز عينو فاش شاف سيدرا جايا مع كانت ناعسة حل ليها يديه تاجات عندو وتخشات فيه وباسها فوق راسها ونطق بحنية) شبعتي نعااس اتاتبيرت إينو؟

سيدرا:(باقي مبوقة بالنعاس تاتحك عينيها)هممم (شافت فيه ونطقات بهمس)ماي بلو آيز مامي فيها وجيعات فكريشة مسكينة..

يتبع...