محتوى القصة
🥀🥀
لم أكن أنويك قرباً وحباً
فقد وقعت في حبك سهواً
فكيف الهروب منك وأنت
ملئت القلب والروح عشقاً
(الشاعر:بلال الحسن)
🥀🥀
قبل ساعة كانت رحيل فبيتها مور مادوشات لسيدرا ونعساتها هزات تلفونها ودخلات لگالوري تاتشوف تصاورها لي صورات بلكريشة وتبسم مع كل صورة من لبداية فاش كانت كرشها باقا مباينااش بزاف فلحوايج عكس دابا لي باانت كبيرة.. تحسساتها بيديها وهي كادوز تصاور تادازت لتصويرة ديالها هي ونوح.. وعلى عكس لمرات لي فااتو مقلباتش التصويرة بل بقات تادقق فيها وتزوميهاا.. كانت تصويرة من عرس لبنات بتكشيطتها البلوغوا وهو بكوستومو لبلومارين... كانت واقفة قدامو وهو واقف وراها وحاط يديه على خصرها بتملك وعينو كانو كيشوفو فيها عكسها هي لي تاتشوف فتلفون وضحك.. ماشعراتش على راسها تابدات تاتزومي فيها وخصوصا هو.. كاتشوف فوجهو وداك النفور لي كانت تاتحس بيه مبقااش نهائيا... بلعكس كانت تاتشوف فيه بعيون باين فيهوم الاشتياق... تنهدات ودوزات لتصويرة وحدة خرى كانت السيلفي ديالهوم بزوج نيت فلعرس وهو هاز سيدرا لي كاضحك بفرحة... كاتشوف فيه وقلبها كيضرب بالجهد وبزربة خرجات من تصاور ودخلات لغبيغطواغ باش تعيط ليه وهي تفكر بلي مسحات نمرتو... تنهدات وكتباتهاا حيت كانت حافضاها عن ظهر قلب... دوزات لخط وحطاتو فوق ودنيها كاتسناه يصوني ساعة تلقات خيبة أمل فاش عرفاتو طافي ومع دلك رجعات كررات الاتصال ليه مرة وزوج ونفس النتيجة كاتعطيهاا... دخلات النمرة ديالو براحة روحي ❤️ كيف شحال هادي... مشات لواتساب وبدات تاتقلب عليه باش تسيفط ليه مساج مي طلع ليها بلي ديك النمرة مبقاش فيها واتسااب.. كمشات حجبانها بعدم فهم وعقلها تبلوكاا وقلبها رجع يضرب من جديد بخوف وبمشاعر خرى ماليهوم عنوان...حكات شعرها تالفة ورجعات تاتصوني ليه ساعة نفس لجواب هو لي لقات تلفون طافي... تنهدات وعقلها كيفكرها فالشي لي وقع فهاد الفترة والخلاف لي كان بناتهوم وخاطرها ضرها...تنهدات وناضت غادة لعند باها باش تدوي معاه وتسولو عليه...نازلة بخطوات بطيئة غادة لجهة لبيت دباها ومها ومع لباب كان مردود وصل لمسامعها حوارهوم بالكاامل ولكن أقسى حاجة سمعات هو لكلام لخر دبااه لي قاال... رجليها مابقاوش هازينها وماحسات براسها تاطاحت الأرض شادة كرشهاا وفديك الأثناء خرجو باها ومها عندهاا وهوما مصدومين ولي صدمهوم كتر هو سؤالهاا عليه...من نهار توحمات عليه عمرها ماجبدات سميتو ومكتحملش تسمعها ولاكان شي حد كيدوي عليه تخلي لبلاصة وتنوض لمهم ماتسمع عليه والو ولكن داباا هي نطقات سميتو ودموعهاا ورجفة صوتها دليل كافي لتانيرت تعرف بلي لوحم لي كان فبنتها مابقااش.. وبحكم تجاربها وكبر سنها ومعرفتها فالموضوع قلعات لبلان من الدقة لولة...
شدها إدريس فيديها ونوضها وهي بدورها شدات فيه وكلام باها كايتكرر فودنيها... دخلوها لصالة وجلسوها وتانيرت جلسات جنبها ونطقات بخفوت:بنتي واش نتي بخير؟؟
رحيل:(تجاهلات سؤالها وشافت فباها وشفايفها كيرجفو وبصوت باكي قالت) فين مشى نوووح؟؟
إدريس:(تنهد من لقلب ونطق بهدوء) بنتي ماتخلعيش (شاف فتانيرت لي كانت بدورها تاتشوف فيه وتغمز ليه بمعنى ماتقولش لي كاين باش ماتخلعهاش) هو عندو شي خدمة وسافر هادا ماكان
رحيل:(حركات راسها بلا ودموعها نازلين وبصوت مرتاجف قالت) كدووب أنا سمعتكووم بودني قلتي ليهاا غبرر (بدات تاترعد وشافت فيه بخوف وعدم فهم) علااش قلتي ليها طاح كوومة دالسكر وهو مافيهش الس؟؟
إدريس:(شد يديها ونطق برزانة) ماتخافيش هو ديك لمرة عيى وطاح وفاش ديناه لسبيطار عرفنا بلي السباب هو السكر لي مرض بيه دابا
رحيل:(فمها ولى صفر شافت فيه وقالت) علاش ماقلتوهاش لياا هوو (وضارت عند مها) هوو هاداك لي كنتي قلتي لياا عليه السيد لي كيعرف بااابا يااااك قصدتي نوووح؟؟ علاش حد مقالهااش ليا (غوتات بانفعال) علاش خبيتو عليا بلي راجلي طاح كوومة وكون ماسمعتهاا دابا كون گاعماا عرفت
تانيرت:مبغيناش نخلعوك ابنتي ونتي واحلة فروحك
إدريس:ولد لحاج براسو وصاني مانعلمكش داكشي علاش مقلنا ليك والو
رحيل:(حطات يديها على وجهها وبقات تتبكي وبصوت مخنوق قالت) من حقي نعرف وااش راجلي كاان كومة وأنا معارفااش حسيت بيه ديك ليلة حسيت بيه وخاطري تزير عليااا (ناضت بزربة ونطقات بصوت غير قابل لنقاش) خصني نشوفوو بغيت نشوفوو داباا
إدريس:(وقف تاهو وقرب جهتها) الله يهديك ابنتي فين غاتمشي ولد لحاج مكاينش هنا راه سافر
رحيل:(شافت فيه) فين مشى؟؟
إدريس:(بتوثر) برا لبلاد هو عندو شي غراض تم
رحيل:تاتقول ليا هاكا باش تسكتني نتا قلتي غبر ودابا مابغيتيش تقوول ليا والو حيت نتوماا معارفينو فين مشى (كملات ببكاء) أنااا بغيت نوووح...بغيت رااجلي...
كأنها كانت فغيبوبة ويالاه فاقت أو وعات على لعالم لخاارجي... وهادا هو حال لوحم تيخلي لمرا تغير وهرموناتها يتخربقوو كل وحدة وحالتها وكل وحدة وكيف دوزات وحمها ورحيل من زهرها جاها وحم على نوح وكرهاتوو وكلما كان هو كيقرب منها كاانت هي كاتبعد وكاتزيد تنفرو وكلما قرب خطوة هي بعدات بخطوات عليه... لدرجة أنها نساتو ومبقاتش باغا تسمع بسيرتو ولاتشوف وجهو وكملات هاد الشهور تاربي عفى عليها ومشى لوحم بحال الاعمرو مكاان وبحال الاغير كاتكدب..لي ماعمرو صادف فحيااتو الواقعية بحال هاد لحالة غايقول السيدة زادت فيه وعيقاات ولكن فاش كاتزيد تعمق فقصص النسا لي دوزو لوحم بأغرب أنواعو كاتقول سبحاان الله والله يسمح لينا من الواليدين حيت ديك لفترة الشي لي كادوز منو المرا مايقدر يصبر عليه حد ولكن هي كاتصبر... واخا تاتستنزف طاقتها الإأن مجرد مكاتحسس كرشها وتحس بحركة جنينها كاتنسى وجعهاا بلكامل حيت ربي زرع فيها الصبر وقوة التحمل... هادشي علاش كيقولو الجنة تحت قدام الأمهات..
قرارها تمشي عندو مكانش قرار من فراغ بل كان هضرة دبصح وإصرارها خلى إدريس يحط سلاحو... ماعندو مايدير وهو عارفها عنيدة وراسها قاصح... خلاتهوم وطلعات لفوق تبدل عليها وهو تنهد وشاف فتانيرت بهدوء:شنو غانديرو دابا ؟
تانيرت:ساعف اإدريس ودير ليها خاطرها راه داكشي لي تاتحس بيه دابا صعيب
إدريس:الله يدير تاويل دلخير
بانت ليه رجعات وهي لابسة مونطو طويل فوق لبيجامة وبانطوفة ولايحة درتها وهزات تلفونها وشي سوارت فيديها.. لاح عليه جاكيط وخرجو وهو معارفش فين غاتمشي تقلب عليه والسيد غااابر..
رحيل:مكاينش فالريااض؟؟
إدريس:لا
رحيل:(بتفكير) غايكون زعمة فلفيرمة؟؟
إدريس:(تفكر بلي رؤوف سبق ومشى لتم وسول عليه بّا سالم لي خبرو بلي مجااش ليها نهائيا) موحاال
رحيل:(بسرعة)نمشيو ليها يقدر يكون تم
حرك راسو باه وشدو طريق لفيرمة فنصاصات ليل وهي كل مرة تجرب نمرتو وتقول واش كاين شي جديد... بعد مدة وصلو ولقاو لباب لكبيرة مسدودة وخص لي يحلها.. تنهد إدريس كايفكر فشنو يدير تبانت ليه السيدة نزلات غادة لجهة لباب حلاتو بساروت لي عندها ولي ديجا عطاهوم ليها نوح... حلاتو تادخل باها بطوموبيل وعاود سداتو وركبات جنبو...مكملين طريق لداخل ومع وصلو لبوابة التانية دارت نفس الشي وحلاتها وهاديك خلاوها محلولة... غير وصلو قدام باب الفيرمة وهي تنزل بزربة حلاتها ودخلات تاتقلب عليه...وباها وراها وعارف مغاتلقى والو حيت السيد أصلا مجاش لهناا... لفيرمة كانت كبيرة بدات تتقلب فلبيوت وغير وصلات لجناحهوم وهي تحس بلحنين ليه مجرد ماطاحو عينها على النموسية لي مطلوقين ليها لخوامي لي فالجناب شفافين... وقفات تاتشوف فيها وعينيها كيدكروها بليلتهوم لولة لي جمعاتهوم بزوج وهي تحت جنااحو...ليلة لي عطى لروحهاا حياة ونبتها بحال شي شجرة وسط الجنان كانت دابلة... ومعاه حياات وزادت غرسات جدورها فالأرض وكبرو غصونهاا لي مخرجين وريقات ملونين...ماشي دابلين كيف كانت قبل.. دخلات لدريسينغ تاتشوف حوايجو وحوايجها معلقين كيف خلاوهوم... قربات جهة روايحو وهي تاخد وحدة رشاتها فالسماا وغمضات عينيه مخلياا نيوفها يستنشقو ريحتو الرجولية لي توحشاتهاا.. تخيلات راسها وهي مخشية فوسط صدرو مدفية بيه ومخبية من لعالم فيه... عضات على شفتها فاش فاقت على لواقع لمر ورجعات تاتشوف فالدريسينغ قبل ماتخرج لبرا... لقات باها لتحت كيتسناها وهي نطقات بتساؤل:واش قلبتي لبيوت لتحت؟؟
إدريس:اه مكاينش
رحيل:غانشوف جنب لفيرمة يقدر يكون تم
خرجات وهي باغا تقلب كل بلاصة واخا راه باين لعمى السيد مكاينش تم وشحال هادي مجا لهنا ولكن هي دارت لي فراسها.. قلبات لفيرمة كلها وتقول واش عيااات وإدريس تابعهاا وراد لبها لباال وعقلو خدام مع بنتو لي كيشوفها بحال لاماتقبلاتش هضرتوو وبلي نوح مشى... قلبات الإسطبل وتامن البلاصة لي بنى على قبل الخرفان والبگر لي غايجيب والدجاج لبلدي مشاات ليها وقلباتها... عياات ومع دلك ماستسلماتش وبقات تاتقلب تاوصلات قدام باب كان مسدود وجااي بعيد على لفيرمة لداخل..مدات يديها باش تحلو لقاتو مسورت...كمشات حجبانهاا وبقات مدابزة معاه وتقول واش تحل...جبدات سوارت لي عندها بدات تجرب وتاوحدة مجاااات ديالهاا... استغربات حيت أول مرة ترد ليه لبال والأهم أنه مسدود فجاها فضول تعرف شنو فيه... سمعو لحس وضارو جميع جهة بّا سالم لي فاق مع الحس لي كان فلفيرمة وجا يطمن بنفسو بحكم هو الشخص لي مخلي ليه نوح لفيرمة على مسؤوليتو..
بّاسالم:(تبسم فاش شافها ونطق) ااه مرات ولد لحاج مرحبا وألف مرحبا فاش سمعت لحس قلت ياكما شي حد لي دخل وجيت نشوف
إدريس:سمح لينا اسي سالم على الصداع لي درنا ليكووم
بّاسالم:الله ياودي راه داركوم هاادي
رحيل:واش نوح مجااش لهنا؟
بّاسالم:لاابنتي شحال هادي مجااش وغير صونى عليا من تلفون شحال هادي وقال ليا نرد لبال لفيرمة
إدريس:اااه اوا صاف شكرا اسي سالم
رحيل:(بتساؤل)داك لباب لي لهيه مبغاش يتحل ليااا شنو فيه لداخل؟؟
بّاسالم:واهاديك لبيت ابنتي دولد لحاج مكيدخل ليها حد من غيرو وفاش مكيكونش هنا كيسورتها وساروت واحد لي عندو راه كيديه معاااه...
عيون رحيل تعلقو فداك لباب مجرد ماكمل بّاسالم هضرتو وعقلها خدام كيسول ويستفسر...اشنو كاين فداك لبيت؟؟ وعلاش هو سادو ومامخلي حد يدخل ليه؟؟ هو عمرو هضر ليا عليه وديك لمرة ماوراهش ليا گااع واخا وراني لفيرمة كلها ولكن مادخلنيش لهاد لبيت؟؟ سؤال مور سؤال وعقلها حسات بيه غاينفااجر ولكن هادشي كولو مكانش مهم بالمقارنة لعدم تواجدو هناا...عقلها تشطن تاني ومعارفة شنو دير...
إدريس:صافي اسي سالم احنا غانرجعو دابا تهلا فراسك وسمحلينا حيت جينا فهاد الوقت
بّاسالم:(بطيبة) الله ياودي اسي لحاج داركوم هادي ومرات ولد لحاج راه فمقام بنتي وبحالها بحال معزة ولد لحاج عندي..
إدريس:خلينا ليك الرااحة الله يهنيك
قرب جهة رحيل لي بقات ساكتة وساهية ونطق بخفوت:نمشيو؟
شدات فيد باها لممدودة ليها وخرجات هي وياه وموراهوم بّاسالم لي غايتكلف بسدان لبيبان وغير ركبو وهي تحط راسها على الزااج ومانطقات بتاشي كلمة مزاال... عينيها على الطريق لي كانت خاوية تاتصفر هوما بوحدهوم لي غادين فيها... قلبها كاتحس بيه مزير عليهاا وباغا تبكي.. عضات على شفتها وشدات عينيها كاتمنع دموعهاا ينزلو وبالفعل قدرات تسيطر عليهوم الطريق كولو ماتكلماتش وإدريس احتارم سكاتها وماهضرش... وصلو قدام باب الدار ومع نزلات تسمع صوت أدان صلاة الفجر فأبواق الجامع لي جنبهوم... دخلات هي لدار وإدريس مشى لجامع يصلي وفطريقها تلاقات محمد طه لي كان نازل تاهو يمشي يصلي غير شافهاا وهو يقرب جهتها ونطق بتساؤل:رحيل فين كنتي واااش نتي بخير؟؟
مجاوباتوش تخطاتو وهو بقا واقف تيشوف فيها مفاهم والو... تنهد وكمل طريق يمشي يصلي بينما هي طلعات لبيتها لفوق... حلات لباب بهدوء ومجرد ماسدات لباب وهي تكى عليه وحررات دموعها من سجنهوم... سادة فمهاا باش ماديرش الصوت وتفيق سيدرا لي غارقة فنعاسهاا... كانت حاسة براسها مخنوقة بحال شي يد كاتجيفهاا تاولات حمراا وبزربة مشات حلات لبالكو وخرجات ليه مور ماردات لباب على قبل سيدرا باش مايضربهاش لبرد... حطات يديها على السطارة وبقات تاتبكي وتشهق تقولي ميت ليها شي حد... إحساس صعيب حاسة بيه وهي مدايراش هادشي بخاطرهاا..كلما تفكرات هضرتها ليها قبل وتعاملهاا معاه وكيفاش كانت تاتقصح ورغم دلك هو كان تيرطب معاها وداير ليهاا خاطر فوق خااطرو تاتزيد تلووم راسها وتكرهو... هضرة باها لي سمعات زادت ألماتها ومرضاتها.. كيفاش مرض وهي مكانتش جنبو ديك لغصة بالضبط ديال داك لمرض مغاتنسااش ليها واخا يدوزو عليها لعواام... هي مكانتش معاه فأصعب أياامو عكسو هو لي كان تيوقف معاهاا ومساندهاا ومفششهاا جرئتو معااه ولي ديما كاتحشمهاا..
تبسمات وسط دموعها فاش تفكرات هضرتو لي كان قال ليهاا ليلة لولة دزواجهوم..
🔙 🔙
ضحك نوح بالخف ومد يديه هزها من خصرها ونزلهاا لتحت ونطق وهو مكمش حجبانو: شحال كتوزني؟
رحيل:(تاضور عينيها) 60 كيلو
رجع هزهاا من خصرها وهي لاإراديا حطات يديها على كتافو ونطق بهدوء: خفيفة بزاف؟
رحيل:جيتك خفيفة غير حيت نتا كبير
نوح:(حطها فالأرض وتحدر جهتها هامس ليها) كاااين ماكبر الفتنة هه
شبك صباعو مع صبعانها وجرها وراه وهي تاتستوعب اش قصد بكلاموو تااافهمات وحلات عينيها ورجعات كلهاا حمرة..
🔙🔙
الحنين لي جاها ليه فاق التوقعات كلها باغاه ومشتاقة ليه ولكن هو مكاينش داباا... حاسة براسها وحيدة واخا راها وسط حبابها وعائلتها ولكن هو مكايينش.. كحات وشمرات على نيفها فاش حسات بلبرد دخلات لبيت وزولات لمونطو ولفولار ومشات توضات وصلات عاد تخشات فبلاصتها وشي نعااس مجاهاا...
***
ملي فاقت الصباح وهي عازمة تنفد شنو لي فبالها.. لبسات عليها حوايجهاا وقادات حالتها وهزات الصاك وونزلات لتحت لقات تانيرت بوحدها كيف لعادة نطقات بهدوء:هااء فين غادة ابنتي؟
رحيل:غانمشي لريااض
تانيرت:تبغي نمشي معاك؟
رحيل:لا غير خليك أنا غادة بوحدي
تانيرت:مغاتفطريش؟؟
رحيل:مافياش
كملات طريقها لبرا ركبات طوموبيلتها وتحركات لرياض.. مسافة وكانت وصلات نزلات وكيف ديما لباب مردود دخلات وعينيها كيضورو فالبلاصة.. لقات سناء جالسة شادة مجلة وساهية فيها..
رحيل:السلام أوعليكوم؟؟
سناء:(شافت فيها بتفاجأ) واعليكوم السلام رحيل صافا؟
رحيل:حمدلله ونتي؟
سناء:صافا كيف غادة مع لحمل؟؟
رحيل:مزيان (تحسسات كرشها) هاهوما كيكبرو
سناء:الله يعطيك وقفة ساهلة
رحيل:آمين خالتي رحمة كاينة
سناء:اه فبيتها
رحيل:غانمشي نشوفها
خلاتها وطلعات لجناح رحمة دقات ومسمعات جواب وهي تحل لباب ودخلات والسكات كان تم... كملات طريقها تالقاتها جالسة شادة لالبوم كاتفرج فيه وغير حسات بشي حد وهي تهز راسها ومع شافت رحيل وهي تكمش حجبانها ونطقات بانزعاح:نتي شنو كاااديري هناا؟؟
ملي خلاتها رحيل رجعات لجلستها شادة ديك لمجلة وتاتفكر فحالها هي واليازيد واخر كلام ضار بناتهوم...تاهي بحالو ماكرهاتش تزوجو ولهلا يقلب العالم ولكن مباغاش تنقص من قيمتها قدام لعائلة وهي حياتها كلها عاطية لراسها قيمة عالية... وزيد باغا تهبط خنافر طامو لأرض وبغاتها كيفما كبرات بمريم ودات ليها داك الدهااز ولعائلة كلها حضرات تاهي دير ليها نفس الشي.. ولكن اليازيد ممتفهمش هادشي وكيشوف بلي هي قصحات معاه وبلي مدارتش بقيمتو وهي راه ماشي هادشي لي نوات وقصدات...دابا تقطع بناتهوم لكلام لاهي هبطات ليه الراس ولاهو صونى مزال ومعرفاش شنو نيتو واش غايكمل هادشي ويصبر ولايطج ويعيى... قاطع أفكارها صوت بيسان لي نطقات بتعب:هاااي
سناء:على سلامة ولينا نشوفوك مرة فشحال بحال لهلال
بيسان:بحال سحت ليل وكاان أوووف عييت
سناء:سيري رتاحي (بتدكير) اه فخبارك شكون جاا؟؟
بيسان:(بفرحة) خويااا نوح رجع؟؟؟
سناء:ياااريت تت مرتو راه لفوق عند ماماك
بيسان:(بتفاجأ) رحيل هنااا؟؟
سناء:كنت جالسة تاتمات داخلة سولاتني على ماماك وطلعات عندهاا
فلفوق عند رحيل لي مجرد ماسمعات ديك لهضرة من عند رحمة وهي تفاجأ وخصوصا شوفة رحمة لي بان فيها الانزعاج ماخفاتش عليهاا..
رحيل:(بخفوت قالت) أنا جيت باش نشوفك وحيت خصني نرجع لداري
رحمة:(سدات داك الألبوم أو وقفات قبالتهاا وقالت ببرود) دااارك؟؟ واقيلا لانسيتي نفكرك بلي هاد الدااار نتي خليتيها بخاطرك
رحيل:(حسات براسها تزيرات من هضرة رحمة وبتبرير قالت) مكانتش بخاطري ونتي عارفة هادشي لحمالة ولوحم خلاوني ندير تصرفات خارجين على الإرادة ديالي
رحمة:(ضحكات بفقصة) هههه لوحم ولالفشوش لي ولفتيهوم من عند ولدي هوما لي خلاوك ضسري وديري مابغيتي
رحيل:(تصدمات من هضرتها) كانظن نتي أم وأكيد عارفة حالتي بحال هاد الأمور لواحد مكيتفشش فيهوم وبدليل نهااار فاتني لوحم ومشى بغيت نرجع لداري ولعند راجلي
رحمة:(خنزرات فيها) راااجلك راجلك لي طججتيه ولي بسبابك غبر وماعرفتو فين مشى
رحيل:(عضات على شفتها ونطقات بصوت مرعود) مكنتش قاصدة
رحمة:(ضحكات بسخرية) ايييه مكنتيش قاصدة هه غير هو بسبابك ولدي هز بگاجوو ومشى بلامايعلم حد ياااك وهو عمرو دا ها فحياااتو تانهار عرفك (غوتات بعصبية) بسبااابك نااض لمشكيل بينو وبين عااادل وكان غاياخد روحووو ويمشي لحبببس غير ربي لطف وصااااف والعائلة تروناااات ديك النهااار غير بمسبتك نتياااا
اتهماتها ليهاا كانو بحال شي خناجر كيضربوو فقلبها ويدميوه...تصدمات من القلبة لي تقلبات عليهاا بين ليلة ونهار... بصح كانت عارفة بلي رحمة مكاتبغيهااش وممتقبلاهاش ولكن فاش تعاشرات معاها حاولات دير كل جهدها بااش تقرب منها وبالفعل نجحات وحسات بتقدم فعلاقتهوم ولكن دابا وبهاد لهضرة لي خرجات من فمها حسات بلي گاع داكشي لي بنات رااب...
رحيل:(عينيها تغرغرو بالدموع ولكن مانزلاتهومش) نتي كتلوميني على حاجة مادرتهااش واااش أنا لي سيفطت ليه تصويرة ونوضت لمشكيل علااش دابا كاتقولي هاد لكلام وبلاصة ماتلومي فلي كااان السباب تتلوميني أنااا
رحمة:ايييه ماعندي مانتساالك خريج الجبهة تاتعطيه عشرة لضس (قصحات شوفتها فيها) نقولو نهااار لمشكيل مكنتيش السباب الالة ونهاااار ولدي طاااح كومة دالسكاار فين كنتي الالة هاااا ملي ولدي كاااان بين لحياا ولمووت واش كنتي معااااه
رحيل:(نزلو ونطقات بألم) تاحد مقالها لياا كلهوم خباو علياا وتانووح طلب من بابا مايقولهااش لياا و..
رحمة:(قطعاتها) شفتي ولدي كيفكر فيك وداااير ليك قيمة وهاز ليك لهم ولكن نتي عمرك فكرتي فيه وعمرك هزيتي ليه لهم.. ولدي علاش طاح كومة دالسكار وهو عمرو مرض بيه هادشي كولو بسباب مشاكيلك نتي لي من نهار تزوج بيك وهو من مشكيل لخوووه عمرو شاف نهار زين فحياااتو
كانت بيسان واقفة جنب لباب كاتسمع لحوارهوم وهي مصدومة مع جات تشوفهوم وهي تسمع لهاد لهضرة لي خرجات من فم مها ولي عمرها ظناات غاتخرج منهاا...دخلات لجهتهوم ولقات مها تاتشوف فرحيل مخنزرة ومعصبة بينما رحيل كانو عينيها عامرين دموع..
بيسان:ماما واش نتي عارفة اش تتقولي
رحمة:(ضارت فيها) مادخليش ابيسااان
بيسان:غاندخل نتي دابا معصبة وتاتخرجي كلام من فمك معرفااش معنيتوو وقاصح اماما
رحمة:ولى كلام لحق تيقصح يااك (شافت فرحيل) هضرتي مغاتعجبكش ولكن هي الصح نتي عمرك حسيتي بولدي وعمرك فكرتي فيه وفراحتو ودابا عاااد جاياا تتسولي عليه فااش مشى عاد طفات عليك الشمعة وتفكرتي رااجلك...الراجل لي نعس فالسبيطار وگاع النااس زارتو وبقات معاه تاصح من غير مرتوو لي مساقت ليه گاااع لخبااار وماتسوقاتش ليه گاااع حيت عندها زايد ناقص....
طلقات سمها فيها وماخلات فيها غير لي نساات... لدرجة لسانها تربط ومابقاتش عارفة ماتقول حيت بالنسبة ليها هضرة رحمة بصح...هو كان مريض فالسبيطار وهي مكانتش معااه عكسو هو فاش كاتكون طارية ليها شي حاجة ديما كيكون جنبها وعمرو يخليهاا... هبطات راسها ودموعها نزلو وماقدراتش باقي تحبسهوم ورحمة وتقول واش حنات فيهاا... أصلا هضرتها هادي جات بسباب خوفها على ولدهاا وعقلها لي تشطن هاد لمدة كلهاا وهي معارفة فين أراضيه واش حي ولامييييت... علاش مشى وماعطى لحد راس لخيط وهو مولف تيعلم تيسول مي هاد لمرة مدارهااش وهي ردات لوم لرحيل... أما بيسان كانت واقفة وسطهوم من جيه ماحملاتش هضرة مهاا نهائيا وكيفااش لامت رحيل على حاجة مدارتهاش بلخاطر ومن جيه بقات فيها رحيل..
بيسان:ماما يهديك الله تارحيل راه بالها مشطون على خوياا
رحمة:(شافت فيها)كون كان بالها مشطون معاه بصح مكانتش تسمح فيه وهو محتاج ليهاا كانت توقف معااه وماتخليهش تهز معاه همومو ومشاكيلو وتشاركهوم معاه ماشي تخلي ولدي يمرض فخااطرو ويبقا يهزز تايجيبها فصحتوو
رحيل:(شافت فيها وعينيها حمرين ونطقات بصوت مألم)عمري نبغي لنوح ضرر
رحمة:(تبسمات بسخرية)ولكن ضريتيه بنفسك وخليتيه يمشي... ولدي هو الحيط لي كانتكى عليه وهو لي هاازني وهاز خوتو ساس هاد الرياااض لي من نهار مشى وهو يظلام ورااب... ونتي عاد رااجعة دابا لدارك وهو مكاينش فيها
بيسان:(قربات جهة مها ونطقات بهمس) ماما صافي عفاك
رحمة:(خنزرات فيها) حيدي من قدامي سمعي نتي (وجهات هضرتها لرحيل وكملات هضرتها لي كيف السم) نهار ولدي جااا وعلمني بزواجو بيك مادخلتش فيه حيت ولدي كان واخد قرارو واختااارك واخا ندوي غايدير لي قالها ليه راسو وهادي عادة فيه عليها سكت وسرطتها بجغمة دلماا ومن نهار شفتك وأنا خاطري هاارب منك ومع دلك مقلت والو حيت شفت ولدي باغيك ومتشبت بيك عليها سكت ولكن من ليوم مغانسكتش مزال... سبق وخسرت كبدتي ومانعاوودش نسمح لواحد من ولادي يضر وغانوقف فوجه أي وااحد باغي يضرهوم لياا ونتي ضريتي ولدي عليها غاتلقاايني ديما واقفة فوجهك وهاد الدار لاكاان عندك النفس مغاتعاوديش تحطي فيها رجليك يااك نتي خرجتي منها بخاطرك وطججتي منها ولدي اوا ماترجعيش ليهاا وسيري فحالللك من هنااا...
هنا رحيل مبقاتش قادة تسمع هضرتها وبلاماتجاوبها هزات راسها ومشات وهي تاتبكي مخلية بيسان تاتنهض فمهاا بانفعال:واش اماما حماقيتي اش ديك لهضرة تتقولي لسيدة وهي واحلة فروحها
رحمة:بعدي مني تانتي (بدات تبكي) تاواحد محاااس بيااا رااه ولدي هااداك لي معااارفاهش فين صد وكيف حالتو واش واكل ولاشااارب مريض ولابخير تاااحد مغاايحس بياا تاحد (جلسات وهي تاتشهق) ترزيت فولدي ناااصر ودفنتوو وهو بااقي صغير ومانقدرش نترزى فولدي نووح تاهووو...
نزلات رحيل فالدروج بزربة مبقاتش حاملة تبقا هنا ولاتشوف فشي حد... غادة كاتمشى بزربة وهي حادرة راسها تاتدفعات مع شي حد وهي تهز راسهاا وشافت فزين العابدين لي كان تيشوف فيها ببرود... فديك الساعة هي شافتو ومايجي فبالها غير نوح... عندهوم نفس الشوفة الباردة وماشعراتش براسها تاحطات راسها على صدرو وضورات يديها على ضهرو وبدات تتبكي مخلياااه واقف مفاهم والو...بينما هي زيرات عليه فالتعنيقة وكملات بكيتها بحرقة...هضرة رحمة كانت قاصحة بزاااف كون ضرباتهاا مكانتش غاتوجع بحال دااابااا حيت داك لكلام يحرق النفس ويكسر لخاطر...وهي صعيب عليها تنسااه... هي عمرها تمنى لنوح الضرر بلعكس فاش تاتعرف بلي بيه شي حاجة تاتحس بقلبها غايسكت وكيفاش غاتبغيه يضر هو راحة روحها... ليلة كولها منعساتهااش وعقلها غير تيفصل وخيط فين غايكوون مشى ملي عرفاات شنو كاين وهي حاسة براسها مخنوقة وباغا غير تبكي...تاتحس بنفسيتها زيرو وعلى سبة وتامن الشهية تسدات ليها مبقات باغا والو ولات باغااه غير هو يجي وتشوفو وترتاح بين يديه لي ديما كيحسوها بطمأنينة والرااحة... محساتش براسها وهي باقا معنقة زين العابدين لي ماتحركش بلاصتو بحال شي صخرة تامن يديه لي فجيبو ماحيدهومش باش يبادلها لعنااق ولاكلف نفسو يسولها مالكي....فقط بالو هاد الساعة كان كيطرح سؤال واحد...طلعات البنت شابهة مهاا تاهي عزيز عليها تبكي وهي معنقاااه...
ليوم كانت مقررة تمشي لدار طل وتهويها شوية وتجمع شي حوايج خاصينهاا وترجع تاني لدار باهاا..كملات شغلاتها ودخلات ضرباتها بتدويشة وخرجات لقات إسلام كيصوني جوباتو وبقاو بلحديث تايعاود ليها مرض مو وحالتها لي خلعاتو خصوصا أنها طاحت طيحة وحدة وخلعاتو وهي تتواسي فيه...متكية فالنموسية وتلفون فودنيه تاسمعات صوت السرسار وهي تنطق بهدوء:إسلام خليك معايا واحد دقيقة
إسلام:فين غادة؟
أسماء:نجي ونقول ليك
خلات تلفون ومشات تشوف شكون ومع طلات من لعين السحرية وهو يبان ليهاا صاحب دعوتهاا وليد... خرجات عينيها مامتيقااش اش كاتشوف ورجعات لور حابسة صوت وهو يديه ماتت فالسرسار...مشات على طراف صبيعاتها راجعة لبيت وسدات لباب ونطقات بصوت حاولات ماأمكن يكون هادئ:احم نتا باقي هنا؟؟
إسلام:فين مشيتي؟؟
أسماء:(بكدب) طواليط
إسلام:اه صافي كيف قلت ليك لكاين شي جديد غانعلمك بيه
أسماء:صافي واخا نخليك دابا باي
قطعات معاه وهي تاترعد وصوت سرسار كيتسمع مزال ومعارفة مادير... اللصقة لي لاصقها مرضاتها ولمشكيل مفهمش راسو وعياات ماتدوي معاه ساعة والو بلانفس...رجعات تاتسلت على صبيعات رجليها وطلات تاني لقاتو. فبلاصتو معيااش وهي معارفة شنو دير وأكيد مغاديش تحل ليه لباب حيت غاتجبد على راسها النحل...رجعات لبيتها وجلساات مدة تاسمعات صوت الهدوء ومبقاش لاسرسار ولادقاان...تنهدات ومشات جهة الشرجم دلبيت تاطل بتخبية وهو يبان ليها نزل غادي جهة الطوموبيل لي مخلي تم ركب ولكن مادماراش بقا جاالس فيه كيتسنى... وهي هنا فين وحلات مع كانت باغا تمشي لدار باها ساعة بهاد العسة لي داير ليها بقات تم.. غادة جايا تتخمم تالقات لحل وبلاماتردد مشات جهة تلفونها وصونات لريان لي جاوبها بهدوء:لحشايشية توحشتيني؟؟
أسماء:نتا فينك
ريان:فدار فين غانكون يالاه دخلت نتي لي فين؟؟
أسماء:جيت ندي شي حوايج وغانرجع واخا تجي باش تديني؟؟
ريان:(بضحك) ههههه فين عمرك طلبتي مني نديك
أسماء:واااعفااك اجي راع عندي تقل وجيب طوموبيل بابا ولارحيل
ريان:وناري الحشايشية شحاال مكتسواييش باغاني على قبل حاجتك؟؟؟
أسماء:وغاتجي ولانعيط لمحمد طه؟؟
ريان:انا جااي وجدي راسك ونلقااك لتحت راه مغانطلعش
أسماء:واخا واخا سير الله يخليك ليا السالوبار
قطعات معاه وهي مرتاحة ومشات تلبس حوايجها وتوجد راسها ومكملاتش نص ساعة كان مصوني عليها باش تهبط...نزلات وعينيها مجرد ماخرجات من ليموبل جات على طوموبيل وليد لي كان ناوي يحل لباب وينزل ساعة فاش شاف ريان نزل من طوموبيلتو وقرب جهتها وهو يبقا بلاصتو وعقد حجبانو كيتسائل شكون هادا بحكم عمرو شافوو وهو كيعرف غير محمد طه...
طلعات جنب ريان لي جاب طوموبيل باه وهي تشوف فلمرايا لي جنبها وبانت ليها طوموبيل وليد وباش تأكد ضارت وبلفعل لقاتو تابعها وهنا فين بقات.. واش هادا مناويش يتفرق عليهاا ولاعرف فين كاين باها مشات فيها يقدر يدير ليها شي شوهة تم وباها لاعرف مشاكيل... بدات تاتحك فيديها وتسوط وترجع ضور تشوف لور وتلقاه باقي تابعهاا..توترها لاحظو ريان لي بقا تيشوف فيها ومع كانت تاضور وجهاا نطق بتساؤل:مالك اش كاين؟
أسماء:(شافت فيه وقالت بتلفة) هااا والو
ريان:(هز حاجبو وبجدية نطق) وايلي من صباح ونتي ضوري رااسك اش كاين بلاتفلية ااأسمااء
جديتو خلاتها تسرط ريقها وعقلها تيقول ليها قولي ليه كلشي وهني راسك يقدر يلقى ليك حل وفنفس لوقت خايفة يوقع شي مشكيل جديد... حارت وتلفات وتارياان سكت وبقا حاضيها وممشاش لدار وتاهي جاتها من الجنة والنااس... رجعات شافت وراها ولقاتو باقي تابعهوم وشافت فريان:كاينة واحد لحاجة اريان
ريان:(صوتها خلاه ينتابه بكل حواسو ونطق بهدوء) دوي
أسماء:(عضات على شفتها) واحد خونا كنت تانعرفو شحال هادي كنت معاه أونغولاصيون ولكن تفارقنا ودابا رجعت شفتو هنا وهو مبغاش يفرقني عليه واخا عرفني مزوجة
ريان:(كمش حجبانو وقال بصوت جدي قاصح)هو لي فالطوموبيل لي تبعانة من الصباح
أسماء تفاجأت حيت قشع لبلان وحركات راسها باه وهو شاف فطريق وحبس طوموبيل بلاكلمة بلازوج شاف فالمرايا بان ليه تاوليد حبس وهو يحيد لاسانتوغ ونزل ساد لباب بالجهد غادي جهة طوموبيل وليد وهو عاااقد حجبانو وباين بلي ناوي على خزيت...
ملي كانو غاديين فالطريق وهو راد لبال لديك طوموبيل لي تبعاهوم وفلول مادا ماجاب حيت الطريق عامر طوموبيلات فشي طبيعي ولكن تصرفات أسماء وكيفاش كانت كل مرة ضور وتشوف وراها وتعاود تجلس وضور كل شوية دارت ليه الشك وتاهو بقا حاضيها بلامايهضر باغي يشوف واش غاتدوي ولاتسكت ولكن فاش هضرات وعاودات ليه المختصر المفيد تعصب وقرر ينزل يتفاهم معااه... هو عارف أسماء فياماتها دوزات تاهي ومغايلومهاش حيت كل واحد فينا عندو ماضي لي متعلق بيه ولي دوز فيه حوايج ياخايبة يازوينة... لي مهم دابا هي دارت عقلها وبدات صفحة جديدة بعيدة على شخصية أسماء لي كانو يعرفو ولي شاف أول مرة...
وصل لعند وليد لي فاش بان ليه قاصدو مفهمش اش كاين تادق عليه ريان من زااج وهو ينزلو ونطق بهدوء:وي
ريان:(ببرود) نزل
وليد:(هز فيه حاجبو) وشكون نتا لي طلب من نزل
ريان:(بسخرية)لي غايخلي دار بوك ويحش ليك الركابي باش تابع السيدة
وليد:(ضحك سخرية وقال) ونتا شكوون فملك الله لي دخل بيني وبينها
ريان:(خنزر فيه وحل عليه لباب وشنق عليه) أنا هو لي غايحيد العياقة لي فيك اولد لق*حبة
دفع ليه وليد يديه ونزل تاهو ناوي يندمو على تطفلو فالموضوع...وأسماء كانت مراقباهوم بخوف وعينيها خرجت فاش شافتهوم شبكوها بناتهوم وهادشي لي ماباغاش ينوض صداع بسبابها.. زولات لكونطاكط دطوموبيل وحلات لباب ونزلات بزربة سداتها ومشات تتجري جهتهوم...وريان حلف فيه تايندمو عطاه كروشي لوجه تاتدفع مع طوموبيل وقربات جهتو أسماء ونطقات بصراخ:ريان
ريان:(نهض فيها بعصبية) لاش جايااا
وليد:(مسح دم من شفايفو وشاف فأسماء قبل ماينقل شوفتو لريان وقال ببرود) لاعند بالك هاد الرجلة لي داير ليا دابا غاندوزها ليك راك غالط باقي نتلاقاو ونقادو لحساب
ريان:(هز فيها حاجبو بسخرية) شكون لي تايدوي على الرجلة زا*مل بحالك تابع مرا مزوجة ومباغيش يفرقها سمع نقول ليك زوج كلمات (قرب جهتو تاوقف قدامو ونطق بحدة)لاعاود سخن عليك ك*رك وفكرتي تبعها مزال ولاتوقف فطريقها وتبان غاتلقااني واقف فوجهك وحابس عليك الطريق.. (نغزو فصدرو بصبعو ونطق ببرود) جمع ك*رك معايا وبلادوك لفعايل دلقح*اب حيت مغانصلاحش ليك..
شد ريان يد أسماء لي مانطقاتش وبقات غير واقفة وديك الشرارة لي كانت عاطية بناتهوم وصلاتها وخلاتها تلف...طلعو لطوموبيل وتحركو تحت نظرات وليد لي ماحملش راسو ولحد الان معرفش هادا لي تطفل عليه شكون هو.. ركب فطوموبيلتو وسد لباب بالصعرة وقلب لمرايا تايشوف فكو لي بدا يزراق بلاصة دقة لي عطاه وكرز على سنيه كيتحلف فيه...
أما ريان فكان غادي وهو ساكت وأسماء كانت جنبو كاتشوف فيه وتنهد شوية قربات جهتو وحطات راسها على دراعو وعنقاتو بحب ونطقات: الله يخليك ليا السالوبار
ريان:(شاف فيها بجنب عينيه وقال) اممم كولورادو
أسماء:(ضحكات)ههه الله يمسخك
ريان:(بجدية)راجبك مفخباروش هاد لبلان
أسماء:(تنهدات وتقدات فبلاصتها) لا باقي ماقلتها ليه
ريان:خصك تقوليها ليه حيت هاد خوناا بان ليا مغايحبسش هنا واخا عطينا الزا*مل بوه هاد العصا لمهم نتي علميه
أسماء:داكشي لي قالت ليا رحيل تاهي
ريان:رحيل واش تاهي عارفة؟؟
أسماء:اه هي أصلا كاتعرفو ودابا عاودت ليها على فعايلو
ريان:تانتي تاطيحي غير فولاد لق*حاب
أسماء:والله ماكدبتي
كملو طريقهوم تاوصلو لدار ونزلات أسماء وعينيها كيشوفو وراها مبانتش ليها طوموبيل وليد وعرفاتو مبقاش تابعهوم.. دخلات لداخل وريان دخل طوموبيل لگاراج وتبعها تاهو... لقاو سيدرا كاينة تم هي وتانيرت ورنيم كيديرو كاسكروط..
تانيرت:جابكوم الله اجيو تاكلو
ريان:رحيل باقي مارجعات؟
تانيرت:(تنهدات ونطقات بقلب مهموم) سيفطات ليا مساج قالت ليا باغا تبقا بوحدها
أسماء:(غمزاتها فاش شافت سيدرا لي كانت تتاكل وطالقة ودنيها وقالت) اه غاتكون عياات مع لحمالة ياكا اماما تانيرت
تانيرت:اه اه عندك لحق
كلاو وغير سالاو وهي تنوض سيدرا طالعة لفوق وهوما بقاو جالسين مجمعين تايهضرو مدة تاسمعو صوت الباب تحل وشوية بانت ليهوم رحيل لي كانت طالعة بخطوات بطيئة وعينيها باقيين مصبغين بالحمرة ديال الدموع لي بكاتهوم بحال نيفها لي حمار تاهو...
تانيرت:(ناضت جهتها ونطقات بتساؤل) بنتي رحيل مالك واش كنتي تتبكي؟
رحيل:(شمرات نيفها وتبسمات ليها بتعب باش ماتخلعهااش وقالت) لا غير ضربني لبرد داكشي علاش غانطلع لفوق ناخد دوش ونرتاح شوية
تانيرت:كليتي بعدا شي حاجة؟؟
تفكرات بلي كلاات غير شي حاجة خفيفة عتقات بيها روحها وصاف ونطقات بهدوء:اه كليت دابا باغا غير نعس
خلاتها وطلعات لفوق وهي حاسة براسها مهدودة وهازة جبل فوق كتافها وكل ماتفكرات هضرة رحمة كلما حسات بلغصة واحلة ليها فحلقها...
شادة تلفون فيديها كاتصوني لرحيل ولكن مكانتش تتجاوبهاا وهادشي غير مزاد شطنها وخلاها تهز لهم لهاد المشكيل لي ناض بين مها ورحيل... سمعات كلشي ومغاتنكرش بلي مها قسات عليها بزااف وقالت كلام لي ماخصوش يخرج من فمهاا وماعجبهااش كيفاش جرات عليها عين باين...اه فلول عطات لمها عدر بلي هادشي قالتو خوف على ولدها ولكن رحيل ماعندها تاشي دنب وماشي هي سباب لمشاكيل لي طرات لخوهاا.. خرجات من بيتها تاتقرقب طالونها ومشات نيشان عند سناء لي كانت فالصالة تتاكل لبسبوسة لي دارت السعدية وتبنن فيها تاوقفات عليها وهي توحلها ليهاا وبدات تاتكح..
سناء:(حسات براسها تجيفات) ديري لحس المصيبة ونتي واقفة علياا كي الجن
بيسان:ماعرفتيش شنو طرا قبيلة؟؟
سناء:اش طرا كنت جالسة فبيتي مالك؟؟
بيسان:ماما (بدات تعاود ليها تاسالات) ماخلات لسيدة فين تهضر وزادتها من لفوق مجرية عليها
سناء:اويلي واش بصح؟
بيسان:مالي كانتفلى عليك عرفتي وتشوفي وجه رحيل كيف كانت تتبكي بقات فيااا
سناء:(حركات راسها) واهي رحمة من حقها تهضر حيت خافت على ولدها مي ماتجريش عليها عاود
بيسان:فاش هضرت مع ماما مابغاتش تسمع ليا وقالت ليك حگا ولواد تستاهل وبلي هي كيهمها ولدها وصاااف وديك السيدة لي واحلة فروحها وغبناتها مافكراتش فيها وهي حاملة بحفااادهاا لي هوما ولاد ولدها
سناء:ماماك أصلا من نهار مشى نوح وهي مبقاتش عارفة شنو دير غير مخشية فجناحها بحال لميتة (تنهدات) هادشي فكرني غير فموت ناصر ولحالة لي كانت فيها
بيسان:(بانفعال) علاااش كلكوم تتجبدو خويا ناصر وتقارنو الحالة لي كنا فيها بدابا خويااا نوح ماواقعة ليه والو علاااش كاتفكرو بهاد التشاؤم
سناء:تهدني حنا غير دويناا وصاف ماقصدنا والو
بيسان:كلكوم هادشي لي تتقولو (خنزرات فيها)
سناء:سيري لبيتك بنتي ليا تانتي شاعلة على والو
بيسان:(ناضت وقالت بعصبية) أنا لي هبيلة جايا ندوي معااك من نيتي ولكن نستاااهل
خرجات من الصالة مخليا سناء هازة حاجب ومنزلة خوه تاتشوف فهادي مالها تعصبات هي ماقصدات والو...زفرات بتعب وقالت:شي عين ضربااتنا وصااف الله يخرج هاد لمشكيل على خير
أما بيسان مشات لبيتها هزات صاكها ونزلات خارجة سامحة ليهوم فالرياض لي ولات الدخلة ليه كاتخنقها وهي فين عمرها تخنقات من لبلاصة لي كبرات فيها... ولكن هادشي لي هي حاسة بيه جااي من المحيط لي ضاير بيها مها لي مبقاتش مسوقة ومبقاوش يشوفها على طبلة لماكلة وخوها لي أغلبية لوقت فالخدمة كيجي ليل يدوز ينعس حدها تاتشوف سناء فقط اما تاجداها وجدها راه رجعو لبلاد حيت عندهوم شي غراض...شادة طريق فالليل معارفة فين تمشي مهم باغا تبعد من تما وصاف... صونى تلفونها وهزاتو بزربة باش تشوف شكون وهي كلها أمل تكون رحيل ساعة كاان عمر... مكانش عندها لخاطر تجاوبو ومع جات تحط تلفون بلغلاط أكسبتات لابيل تاسمعات صوتو لي قال بهدوء: بيسان
بيسان:(زيرات على يديها مغددة وقالت بصوت حاولات ماأمكن يكون هادئ) أهلا عمر صافا؟؟
بيسان:حمدلله ونتي
بيسان:صافا
عمر:(سمع صوت لكلاكصون ونطق) نتي خارجة فهاد لوقت؟؟
بيسان:وي بغيت نشم لهواء
عمر:شنو بان ليك نعرض عليك لواحد لبلاصة غاتعجبك؟؟
بيسان:فين؟؟
عمر:عطيني نتي فين كاينة نجي عندك؟؟
بيسان:أنا دابا ف*****
عمر:صافي خليك تم شوية ونكون عندك
قطع وهي بلاصات جنب طريق وجلسات تاتفكر فهاد البلاصة لي قال ليهاا شنو هي... من جيه مافيها لي يشوفو ومن جيه باغا تبدل داك لجو لي عايشة فيه...مدة وكان وصل عندها وبلاصا قدامها ونزل بجنثلمانية كيتمشى وهي تاتشوف فيه ورسمات على شفايفها ضحكة صفرا..حل لباب ونطق بضحك:هاأنا حصلتك الهرابة ههه
بيسان:عندك زهر
عمر:نزلي خلينا نمشيو
نزلات مور ماهزات مسائلها وطلعات زاج طوموبيل وسداتها عاد تمشات معاه جهة طوموبيل وحل ليها لباب بلباقة وهي تبسمات ليه وطلعات...وهو طلع جنبها ونطق:نمشيو بعدا نتعشاو هو لول اش بان ليك
بيسان:واخا
هي فهاد الساعة مباغا والو وغير غادة معاه وصاف قالت ربما هاد لخرجة نفعاتني وبدلات ليا المود نديرها فيد الله ونشوف اخرتها معاه فين...وصلها لواحد لغيسطو راقي ونزلو داخلين لداخل وشدو بلايصهوم وهي تاضور عينيها على لبلاصة...
عمر:شنو تبغي تاكلي؟
بيسان:نشوف لموني
هزاتو ونزلات راسها وهو جالس تيشوف فيها مراقبها بنظرات إعجاب... ملي شافها أول مرة فالسبيطار وهو مراقبها خلسة كاتبان ليه داخلة سوق راسها ومهدنة لاماهضرتيهاش ماتهضرش وهو هادشي لي كيعجبو فالمرا...هزات راسها ولقاتو حاضيها وهي تبسم بتوثر وهو تقول واش فهم راسو ونزل عينو بلعكس بقا تيحنزز فيها تانطق بصوت خافت:عينيك زوينين بزاف نتي كلك زوينة ابيسان
بيسان:(تبسمات بمجاملة) شكرا
عمر:مكاين لاش تشكريني حيت قلت لي كاين
بيسان:أنا غناخد ستيك دلحم
تلفات ليه لهضرة وهو مشى معاها فالخط وفهم لبلان... خداو لعشا وتعشاو فجو عادي مرة مرة يلوح ليها نويطة ويتغزل عين باين وهي تتجاملو.. من طبعها مكاتبغيش تقمع بنادم وحيت جامعاهوم لخدمة فمجاتش دير حساسية من والو وتتقول ساعة ودوز وترجع فحالها لمهم دوز وقتها بخير وتبدل لجو... ستأدنات وناضت لحمام وفاش رجعات لقاتو جالس وشاد كاس تيشرب منو كمشات حجبانها وجلسات قدامو وقالت بتساؤل:واش هاداك شراااب؟؟
هي ماشي شي وحدة غشيمة وغير شافت لكاس عرفات اش فيه ومع دلك قالت تسولو وتشووف اش غايقول وبحكم أنها عاشت مدة برا لبلاد فراه عارفة الشراب كيف دااير... هز عمر كاسو وحرك الشراب لي كان لونو أحمر قاني وقال:اه تبغي كااس؟
هزات فيه حاجبها وقالت ببرود:مكانشربش
عمر:حسن بنت زوينة بحالك مايصلاحش ليها هادشي
مجاوباتوش ومن الأساس معجبهاش الحال كيفاش محتارمهاش وجالس تيشرب عادي.. لاوبكل وقاحة سولها واش تشرب تاهي... سالى كاسو وخلص وناض شاف فيها:خلينا نمشيو لبلاصة زوينة لي قلت ليك
بيسان:(تبسمات ببرود وقالت)ماكرهتش مي تعطلت وخصني نرجع مرة خرى
عمر:(شاف فساعتو وقال بهدوء) باقي. لحال
بيسان:لا تعطلت وغدا عندي فين نمشي الاكان ممكن توصلني لفين خليت طوموبيلتي
عمر واخا تفضلي
ركبو بزوج وهي كانت باغا غير وقتاش تنزل وبالفعل غير وصلات شكراتو ونزلات غادة لطوموبيلتها وركبات وهو كمش حجبانو وبقا متبع بعينيه طوموبيلها لي مشات ونطق بهدوء:زوينة ولكن باقي الطريق قدامي طويلة
***
جالسة فالبالكون ممسوقاش البرد لي كيضرب فيها ويحرك شعرها السارد بلماا.. ضامة يديها بزوج وعينيها ساهين فالسما لي صافية... ملي دوشات وصلات وهي جالسة فبلاصتها وكل مرة تقلب بجلستها فاش تتحس براسها عياات.. مرة مرة تقيس كرشها وتنهد وداك الاتهمات لي تهماتها رحمة خلاوها دخل فواحد لحوار طويل بينها وبين نفسهاا وتتقول واش بصح أنا سباب تاهو مشى؟؟ بصح أنا عمري حسيت بيه كيف هو كيحس بيا؟؟ واش بصح أنا ضريتو بلامانقصد هادشي علاش مل مني ومشى؟؟ وكاترجع تاني تجاوب على دوك الاسئلة لي طرحات من قبل... اه أنا ضريتو بزاف وتانهار مرض أنا ماكنتش معااه وخليتو بوحدو كلشي كان معاه من غيري أنا هو عمرو خلاني ولكن أنا خليتو...سدات عينيها باغا تمنع دوك الدموع لي ضببو عليها الرؤية ساعة غدروها وتحررو نازلين جنب عينيها مسابقين... حلات عينيها ويديها لمسو ديك السنسلة لي جاب ليها نهار لول دزواجهوم ولبسها ليه وهي باقا تتبكي...داكشي لي عرفاات من باهاا وغبور نوح لي معارفة أراضيه فين وكلام رحمة كلشي تجمع عليها فديك اللحظة ومالقات باش ترجم داكشي لي كاتحس بيه من غير البكا... مدة وهي فبلاصتها تاحسات بضهرها ضرها وهي تنوض داخلة لبيتها ومرة مرة كاتكح... جلسات جنب النموسية وشافت فواحد لاجوندا كانت شراتها لسيدرا تنقل فيها شنو باغا ساعة ماستعملاتهاش.. هزاتها وهزات ستيلو وحلات أول صفحة وكتبات فيها تاريخ ليوم وموراها خطاات أول كلماتها " وكان هو دلك الروح التي تركت في القلب بصمة لايمحيها الزمان..."
فديك اللحظة حسات بلي الكتابة هي الحل لوحيد هاد الساعة لي يخليها تخرج داكشي لي تتحس بيه... بحكم أنها مباغا تعلم حد بشنو طرا حيت مباغاش تجبد مشاكيل خرى عليها فضلات تهز داكشي فخاطرها كيف عادتها تمرض روحها وتهلكو... عمرات ديك لورقة ودموعها زينوهاا وكانو شاهدين على ماكتبات.. سدات لاجوندا مجرد ماتحل لباب ودخلات تانيرت جايبة ليها لعشا.. شافت دموع لي باقي فحناكها وماسولاتهاش حيت عارفة شنو كاين وبلي بنتها توحشات راجلها..
تانيرت:كولي مزيان ابنتي واخا مايكونش فيك الجوع
رحيل:(بصوت مبحوح) واخا
حدرات راسها ومرة تطلع ليها تنخصيصة بلاماتشعر وتانيرت تنهد على حالها تاسالات وهزات ليها لبلاطو وقاستها فحنكها لقاتها سخونة وقالت بخوف: طالعة ليك سخانة ابنتي
رحيل:(تسطحات فبلاصتها وقالت بتعب واضح على وجهها وصوتها) غايكون ضربني لبرد نعس وغايفوتني لحال
تانيرت:تادوا ماتقدريش تشربيه ونتي حاملة ندير ليك لعسل ولحامض؟؟
رحيل:(خسرات سيفتها وقالت) لا لا غير نعس ونرتاح ونولي بخير
طفات الضو وسدات لباب وخلاتها حالة عينيها وسط الظلام وسخانة كاتخرج من لحمها لي حاسة بيه كيفور.. غمضات عينيها ونعسات بتعب وهي حاسة بعضامها ضارينها وتبوريشة فيهاا.. كانت مرة مرة تاضربها لفيقة فليل وترجع تنعس شوية حسات بالحس ولكن ماقدراتش تحل عينيها حيت السخانة كاتهلك فيها تاتحطات يد خشنة باردة على جبهتهاا وصوت همس ليها جنب ودنيهاا: الفتنة ديالي...
كانت البرودة ديال ديك ليد متناقضة مع السخونية لي خارجة من داتها وجبهتها... مغمضة عينيها وتاتحرك راسها يمين وشمال وطلق تنهيدات كل مرة... داتها مرخية عليها والسخانة خلاتها دخل فواحد اللاوعي محساش بلي ضاير بيها وكانت منعازلة على لواقع ديك الساع...لدرجة بدات تاتهلوس وكتخايل حوايج مكاينيش... طلقات تنهيدة وبصوت هامس قالت:نوووح
كان إدريس واقف على راسها تيقيس جبهتها تاسمعها اشتو قالت وهو يضور عند تانيرت وبقا تيشوف فيها وتاهي شافت فيه بحزن..
إدريس:طالعة ليها السخانة بزاف
تانيرت:نمشي نجيب ميزان لحرارة دسيدرا ونجيب شي فوطات وما بارد نديرهوم ليها
إدريس:نديوها لسبيطار
تانيرت:لامانزلاتش ليها الحرارة ديك الساعة نديوها
مشات لبيتها فين كانت منعسة سيدرا وهزات ميزان الحرارة ومشات لكوزينة خدات بانيو وفوطات وجبدات من لفريگو تلج كباتو مع لماا بارد وطلعات لبيت فين كان إدريس جالس جنب رحيل تايمسح ليها وجهها وكيشوف فيها بنظرات مهمومة... ناض فاش جات تانيرت وخلاها تجلس بلاصتو باش دير ليها لكمادات...خشات ليها الميزان تحت باطها وبقات شاداه تاسمعات صوتو وهو تلقى الحرارة طالعة ليها وبدات تادير ليها لكمادات فجبهتها عنقها ورجليهاا.. وزولو عليها لغطا وفيما يسخن لماا يعاودو يبردوه...وهاكا دوزو معاها ليلة كلها وكيراقبو لحرارة لي مرة طلع مرة تهبط ورحيل مكيناش فهاد لعالم.. بعض لمرات تهمس بسمية نووح ودموعها نازلين جناب عينيها مفزگين ليها مخدتها...
طلع الصباح ومجرد ماتأكد إدريس بلي راه الحرارة نزلات ليها رتاح ونزل لتحت باش يفيق سيدرا ويوجدها وتانيرت بقات مع رحيل ماغمضوش عينيهوم گاع... ملي حسات بيها نزلات ليها لحرارة خلات ليها لكمادة فوق جبهتها وتكات حداها...
فلتحت كانت سيدرا تتاكل فلخبيز لي صاوب ليها جدها بالشكلاط ومرة مرة تجغم من داك لكاس دلحيب الدافئ.. وهو كان واقف تيوجد ليها غداها لي ديجا صاوبات فيه تانيرت نص وخص غير يسخن داكشي...
سيدرا:(حطات الخبيز لي كانت واكلة منو غير شوية وربعات يديها وهي متكية على لكرسي) بّا ديدي
ضار جهتها إدريس لي شاف ففطورها لي ماكلات فيه والو ونطق بهدوء:علاش ماكليتيش فطورك انخشيشتي
سيدرا:(شافت فيه بعويناتها السود ونطقات بخفوت)بّاديدي مابغيتش نمشي لمدرسة
إدريس:(باستغراب قرب جهتها وقال)وعلاش؟؟
سيدرا:(هزات كتيفاتها ونطقات بخفوت)مابغيتش نمشي بّاديدي
كمش حجبانو وهضرتها دخلات ليه التناوي عمرها طلبات منو ماتمشيش لمدرستها..جرها وجلسها فوق ركابيه ومسح على شعرها بحنية:علاش مابغيتيش تمشي واش لمعلمة غوتات عليك ولاتخاصمتي مع شي وحدة من لبنات لي تتقراي معاهوم؟
سيدرا:(خشات راسها فصدرو) لا بّاديدي
سكت تايتنهد ويفكر فهادشي لي جاه فشكل وفالاخير قرر يدير ليها خاطرها ومايخليهاش تمشي..
إدريس:صافي مغاتمشيش ولكن اخر مرة واخا (حركات ليه راسها باه وكمل) يالاه سيري لبيت تنعسي
طلعات سيدرا وهو طفى على داكشي وغطاه وجلس فالكرسي كيتنهد..كيحس بواحد طاقة سلبية ضايرة بيهوم ومأترة عليهوم كاملين وتاسيدرا لي صغير أترات فيها وبطبيعة الحال وهي ولفات واحد الجو أو ولفات لعيشة وسط أب وأم وبسباب لمشاكيل كلشي تقلب... الاكان هو لي كبير وعيى وحاس براسو تالف ويديه مربوطين... تنهد وناض فاش سمع صوت الكلاكصون دطرونسبور سيدرا ومشى علمهوم بلي مغاتمشيش حيت مريضة عاد طلع لفوق عندهاا لقاها ناعسة مخشية فيها لقطة نوسيد...نعس جنبها وهي غير حسات بيه ضارت جهتو وتخشات فيه...
**
بدات تتحل عينيها وهي حاسة بحلقها ناشف وداتها مهدودة عليها... حسات بشي حاجة فوق جبهتها بورشاتها ومدات يديها زولاتها وضارت بشوية بانت ليها مها ناعسة جنبها وعرفات بلي كانت طالعة ليها السخانة فليل وسهرات عليها... زولات لغطا بشوية وناضت شادة كرشها وتبوريشة باقي فيها...بزز باش مشات لطواليط قضات حاجتها ورجعات لبلاصتها تكات ومافيها مايتحرك...الرواح مع الحمالة كيكون أصعب بكثير خصوصا مقدراش تاخد شي دواا وبلانفسيتها لمدمرة ولمزفتة فهاد الساعة... ناعسة على ضهرها ويديها على كرشها تاتلمسها بحنية محتاجة تستامد منها القوة لي ماعندهاش فهاد اللحظة...حاسة براسها تالفة ومعارفة مادير قلبها متلهف يشوفو وعقلها خدام كيفكر فين ممكن يكون فهاد اللحظة... الفيرمة هي لبلاصة لي عارفاه كيرتاح فيها ولكن مكاينش فيها وممشاش ليها گاع إذا فين غايكون...فخضم تفكيرها وتساؤلات لي تاطرح على راسها جات فبالها بلاصة لي ممشاتش ليها تقلب عليه ومعرفاتش كيفاش مطاحتش على بالها ومافكراتش فيها...
جالسة فالكافي ديال السبيطار هي وصاحبتها جيهان وكيسان دلقهوة محطوطين قدام كل وحدة فيهوم طالع منها البخاار.. هزات طاس ديالها بصبيعاتها الرقاق وضفار مقطعين ومبرودين وجغمات منها وعينيها على جهيان كاتسنى شي رد فعل منها على لكلام لي قالت ليها ولخرى هازة حاجبها ونطقات بصوت هامس باش مايسمعوهاش لي ضايرين بيها:واش قلتي الشراب ولاودني مبقاوش قاضين لغراض ومكيسمعوش مزيان
بيسان:لا راه ودنيك سامعين مزيان اش قلت
جيهان:(هزات حاجبها) السيد گاعما باينة فيه سكااايري هههه والله تاصدمني
بيسان:كون تشوفي أنا لي تحطيت فلموقف السيد عندو عادي لاوكملها قال ليا نشرب معاه
جيهان:(تقداات فجلستها ونطق بهدوء) لا السيد باان ليا أوبن بزياادة صراحة مانقدرش نحكم على شخصيتو وأنا مكنعرفوش مزيان ولكن من هاد لخرجة لي خرج معاك وداك تصرف راه باين لعربون
بيسان:(ببرود) السيد خدام معايا فنفس البلاصة وباين فيه جونتي وقلت ماعليش نجرب ونشوف ساعة مبان لياا فيه تاضوو
جيهان:(بسخرية) ههه ليوم عرض عليك لشراااب وغدا لدار هاد نوع باين اش تيعجبو بلامانصحك تغامري معاه
بيسان:كيف شفتي أنا راه غانعطيه فرصة واش من نيتك أصلا ممسوقاااش ليه وغير بقاا حاط عليا وقلت نشوف اش فيها وصاف بان لعربون والله يعاون
جيهان:غير هو نصيحة ديري دليميت بناتكوم باين ليا داك النوع مغايحبسش هنا خصوصا خرجتو دابا غايسحاب ليه بلي عطيتيه فرصة واخا راه نتي عطيتيها ليه..
بيسان:اشمن فرصة من نيتك صافي خرجنا نتعشاو راه عطيتو فرصة حيدي عليا تانتي
جيهان:وشنو هانتي دابا تلاحظي وتشوفي تصرفاتو معاك كيف غايوليو سمعي ابيسان راه هضرتي من تجربة الرجال فاش تاتعطيهوم وقت وتحلي ليهوم لمجال كيضسرو طبعا كاين استثنااءات ولكن هاداك منهوم
بيسان:غلطة وماتعاودش اخر مرة نعطيه فرصة مزال
جيهان:مزيان (تنحنحات قبل ماتكمل) وشنو درتي مزال مع ريان؟
بيسان:(تنهدات بقلب مهموم وملامح وجهها دغيا بان فيهوم الزعل) كلشي سالى
جيهان:(بتفهم) ياك اعتادرتي منو بعدا؟؟
بيسان:وي اعتادرت مي مبغاش يتقبل اعتداري وتاأنا نساحبت
جيهان:ماعليش مايبقاش فيك لحال وتيقي بيا لاكنتو مكتابين ترجعو لبعضياتكوم راه واخا تفارقو أعوام أخيرتها غاترجعو
بيسان:(تبسمات بحزن) كانتمنى واخا الأمل لي كان عندي تلاشى بسباب هضرتو لخرة (شافت فساعتها وقالت بهدوء) غايخصني نطلع نكمل خدمتي من بعدا ونتشاوفو اوكي بب
فضلات أنها تنساحب حيت مباغاش تهضر فهاد لموضوع مزال وكلما تفتح كاتحس بجروحها رجعو تفتحو معاه ..أول مرة تبغي من قلبها ونهار بغات جرحات لي كاتبغيه بسبب تصرف مقصداتوش... كانت غادة فلكولوار لتحتاني لي جهة المستعجلات تبان ليها عمر دايز وهاز ضوسي كيشوف فيه وحادر راسو عليه وهي غير شافتو كحلات بلعمى وبدات تاضور راسها بزربة يمين وشمال تبان ليها باب ديال واحد شومبر محلول وهي دخل ليها بزربة مباغاش تشوفو ولاتهضر معاه وفضلات تبعد وتجاهلو باش يفهم راسو... بقات واقفة تم وكاطل براسها بشوية باش تشوفو لاداز تخرج وهي تسمع صوت ماغريبش عليها قال بهدوء:حاس بلحريق فيدي
كمشات بيسان حجبانها وحسات بقلبها كيضرب بالجهد وجمدات بلاصة وبالعرض البطيء ضارت وبدات تتمشى بخطوات تقال تاوصلات لشومبر لي كانت دلفحص وعينيها تحلو على جهدهوم فاش بان ليها ناعس فوق داك لبياص داك تريكو الباج لي لابس فيه الد'م وجبهتو فيها فاصمة أو واقفة حداه فرملية شادة ليه يديه ليسرية تاتفحصها... بيسان غير شافتو فهاد المنظر قلبها تهز من بلاصتو وبصوت خافت نطقات:ريان...
مكانش راد ليها لبال حيت لفرملية مغطياهاا ومكتبانش ليه وزيد عقلو كان مكونسونطري مع يديه لي حاس بيها عاطياه حريق فضيع... غمض عينيه فاش قاستو الفرملية فلبلاصة لي تاضرو وطاق واحد تنهيدة ديال الألم لي خلات بيسان تجي كاتجري جهتو ونطقات بلاماتشعر:بشوية عليه (شدات يديه وعينيها كيضورو على ملامح وجهو وعلى حالتو وبصوت خافت قالت) شنو وقع ليك
حل عينيه كيشوف فيها مضهشر من ناحية يديه لي كاتوعتو ومن ناحية شوفتها فهاد اللحظة لي مكانش عوال عليها صدماتو...
لفرملية:دار أكسيدون بلمطور أنا غرزت ليه جبهتو فين مضروب ويديه منفوخة وكاتوعتو غالبا مغاتكون تهرسات ليه؟؟
بيسان:خصو يدوز لغاديو ليهاا سيري وجديه
لفرملية:داكوغ دكتوغ
مشات لفرملية وبيسان رجعات شافت فيه هو لي كان ساكت كيشوف فيها بهدوء ..ماهضرش عكسها هي لي نطقات بتساؤل:شنو وقع معاك؟
ريان:(غمض عينيه ونطق ببرود) راه لفرملية قالت ليك درت كسيدة بلموطور
بيسان:(معجبهاش جوابو وبجدية نطقات) كانسولوك باش نعرف لحالة ديالك ونسعفوك
ريان:(زفر بتعب) كانت غاضربني واحد طوموبيل جايا من سونس أنطغدي وباش نتجنب ليها زلق بيا لموطور وضربت جبهتي الأرض ويدي كاليت بيها باش مايطيحش عليا لموطور
بيسان:غايخصك أوبليجي دوز سكانيغ جينغال باش نشوفو ياكما كاينة شي بلاصة خرى مضرورى
مجاوبهاش سكت وتاهي سكتات واخا راه خاطرها مزير عليها من حالتو وخوفها باين من عينيها لي غير كيضورو عليه ويديرو ليه السكاانير... جات لفرملية علماتها بلي الراديو واجد باش يدوزو وعوناتو تانااض وغير جلس وهو يبعد عليها وتاهي خلاتو براحتو تاناض بشوية كيتوجع ويغمض عينيه باين فيه مقصح وجايبها فعضامو نيت... مشى لبلاصة فين كاين الراديو وفين كان الطبيب المختص باش يدوز ليه وتابيسان كانت وماخلاتوش بوحدو باغا طمن على صحتو عاد ترتاح... دوزو ليه السكانير ومع الأسف لقاوه مهرس من يديه وغايخص ضروري يرجع لعضم لبلاصتو ودارو ليه لگبص وهو غير ساكت وكيتألم فصمت... دوز بزاف دلزاناليز لي بيسان كانت مشرفة عليهوم وغير غادة جايا وهو خلاوه فشومبر يرتاح على مايشوفو لزناليز اش فيهوم...
متكي فبلاصتو ويديه مطلوقة حداه فيها لگبص وسيروم فيديه لخرى... ماعلم تاحد من مالين دار وفيما كيتفكر اللقطة دلكسيدة تايحمد الله ويشكرو حيت تكتب ليه عمر جديد...مدة تادخلات عندو بيسان دايرة نضيضرات وشادة دوك تحاليل كاتقرا فيهوم وهو كيشوف فيها بهدوء...مكانش تيتوقع غايكون لقاءهوم بهاد الشكل... كيشوف فشعرها لي كانت صابغااه بلون من غير لي كانت دايرة ليه فلول عجبو وجاها زوين مواتي ملامحها... كان ديما كيعيط ليها بمون دكتوغ وهاهو ليوم صدق مريض وهي طبيبتو... أما هي فكانت مركزة مع خدمتهاا مباغا تفلت والو وتأكد من كلشي بنفسها باش يالاه ترتاح... الحمدلله الضربة جاتو غير فيديه وفجبهتو لي غرز أما ماتبقى غير مدة وغايزول مع الطيحة داتو حاس بيها كاضرو.. كلشي عندو هو هدااك وغير سالات هزات عينيها فيه لقاتو كيشوف فيهاا وغير حصلاتو وهو يغوبش ونطق:نقدر نمشي
بيسان:(بعملية) غاتقدر تخرج ملي يسالي ليك السيروم لي معلقين ليك
ريان:(همهم وغمض عينيه) هممم
بيسان:واش علمتي شي حد من لافامي بااش يجي؟؟
ريان:(حل عينيها وشاف فيها) لا مكاين لاش ياكما علمتيهوم نتي؟؟
بيسان:نو مي ضروري تعلمهوم باش يكونو معاك ملي تخرج حيت يقدر تجيك الدوخة وطيح
ريان:قاااد براسي ماتهزيش همي
بيسان:بلاعناد اريان هادشي راه لمصلاحتك وقبل مانسى راه طبيب لي تكلف بيك غايعطيك شهادة طبيبة باش ترتاح وماتمشيش لخدمة حاليا وملي تزول لگبص غايخصك دير ترويض ضروري ليديك
حرك راسو بلامايجاوبها وتاهي سكتات وعم الهدوء على الشومبر كل واحد فيهوم باغي يدوي ولكن مجروح من التاني على مادار فيه... هو مقدرش ينسى لكلام لي سمع منها عليه ولي هانو فكرامتو ورجولتو وهي مقدراش تقبل تصرفو معاها والجفاا لي ولى كيعاملها بيه... مجرد ماسالى ليه السيروم زولاتو ليه وكانت باغا تعاونو باش يجلس ساعة ماعطاهاش مجال وجلس لنفسو تيقاد بيد وحدة حوايجو عاد ناض خرج وهي وراه تلقات بلفرملية لي جابت ليه شهادة طبيبة لي طلبات من الطبيب يكتبها ليه وعطاتها لريان لي شدها بنفخة... كان غايمشي تاسمع عمر كيعيط لبيسان لي فاش شافتو جاي جهتها عضات شفتها ودعات عليه فخاطرهاا أما ريان فعينيو كانو كيتفحصو داك الشخص لي جاي لابس بلوز بيضا مع شوميز نواغ وسروال توب رمادي وعينو على بيسان ضاحك بحال لاكيدير إشهار لدونتيفريست هادشي لي قال ريان مع راسو وغير شافو سبحان الله محملوش وماتسرطش ليه ولي زاد نرفزو وعصبو وخلاه باغي يدخل فيه بروسية هو فاش شافو قرب جهة بيسان وتحنى سلم عليها بلابيز وحط يديه ورى ضهرها...
وقفات طاكسي قدام "sizin shop" ونزلات منها رنيم لي كانت ضاربة حطة جديدة وطالقة شعرها ومك اب خفيف مزين وجهها... دخلات لمحال تاتقلب على غزلان لي متافقة معاها تجي عندها باش يخرجو بزوجات يتمشاو ويبدلو روتين لخدمة لي طلع ليهوم فالرااس كانو باغين تمشي معاهوم رحيل ساعة مريضة وأسماء مبغاتش تخرج حيت خايفة وليد يتعرض ليها وينوض شي صداع وماحد إسلام باقي مارجع ومقالتهاش ليه فضلات تبقا شادة تقارهاا...
بانت ليها أميمة واقفة فلاكيس تاتسربي لكليان وقربات جهتها مبتاسمة:هاااي أميمة صافا
أميمة:أهلين زين صافا ونتي
رنيم:حمدلله كبيدة فين غيزو؟
أميمة:اتلقايها لفوق تاتستف شي سلعة (تبسمات بمجاملة) بالصحة والراحة الالة وإن شاء الله السيمانة الجايا غاتجي سلعة جديدة
...واخا شكرا
مشات لكليانة وأميمة سربات لي بقاو تسالات وهي ضور عند رنيم لي كانت تاتشوف فلي فولار لي كانو مستفين تم غير الشكاال والنواع ولوانهوم زوينين كيفتحو الشهية وتستيفتهوم عاطية لعين...
رنيم:فاش كانشوف هاد لفولار كانتشهى نلبس شي واحد
أميمة:هي ناوية تحجبي اختي هههه
رنيم:واهو فالصراحة باقي مافكرتش فيه حاليا مي علاش لا يقدر من هنا لقدام نديرهاا
أميمة:لحجاب زوين صراحة وتالباسيه غزالين مي خص الواحد يديرو عن اقتناع ماشي غير ستيل وصاف شوفي رحيل ماشاء الله كاتلبس الطويل والمحتارم وفنفس الوقت داكشي شيك
رنيم:رحيل من ديما دوقها زوين
بانت ليهوم غزلان نازلة وشعرها مشنتف تقولي كانت تترايش ضحكاتهوم...
أميمة:امالكي منتوفة هههه
غزلان:كنت مدابزة مع دوك لحوايج نستفهوم
رنيم:سيري قادي حالتك ويالاه نتحركو راه تعطلنا والظلام تيطيح بزربة..
غزلان:اه واخا أنا جايا أميمة خلي هاد البياسة تايجي عتمان وقولي ليه راه خصنا نجيبو بحالهوم كيتباعو وقبيلة سولوني عليها شي نسا
رنيم:يالاه معانا اأميمة
أميمة:نمشي ولمحال لمن يبقا هههه لجنون
رنيم:اوا ماكرهناش نديوك
أميمة:غير سيرو ازيونات تال مرة خرى ونخرجو إن شاء الله
مشات غزلان لحمام وجدات راسها وقادات شعرها ودارت عكر وحيدات جيلي دلخدمة ولبسات عليها جاكيط ديالهاا وبقات تتشوف فراسها قبل ماتخرج وهي كاتسد صاكها... تبسمات لرنيم وقالت بهدوء:مشيناا
رنيم:يالاه أميمة باااي
غزلان:نتشاوفو فدار وراه لعشا غانديه معايا واخا
أميمة:اوكي بااي فوجو مزيان
تشادو لبنات وخرجو وعينين محمد طه لي واقف فبلاصتو لمعتادة فهاد الأواخر مراقبهوم بهدوء وغير شافها تحركات وهو يتحرك تابعها بلخف... أما لبنات فكانو عاطينها الهضرة والضحك وماخلاو تامحاال مادخلو ليه يشوفو ويقيسو وغزلان لاعجباتها شي حاجة تشريهاا... مشاو لواحد لكافي يرتاحو ونيت ياكلو شي حاجة خفيفة....شبعو سلفياات وضحك وضوران تارجليهوم طااابو وغير وصلات لوقيتة وهوما يتفارقو وغزلان شدات طاكسي باش تمشي لدار وطبعا تبعها محمد طه مامخليهاش بوحدها وهي معايقااش بيه ورنيم ضرباتها على رجليهاا حيت كانت قريبة...غادة بخطوات تقيلة تاوصلات لحومة وهي تكمش عينيها فاش قشعات طوموبيل رؤوف واقفة حدا الدخلة دلحوومة وهو واقف حداها ومتكي عليهاا لابس عليه سروال كحل وتريكو كول مونطي بيضاا مع جاكيط نوااغ... همسات بين شفايفها بخفوت هازة حاجبها:هادا شنو جاي كيدير هنااا...
حبسات فبلاصتها كاتشوف فيه وهي هازة حجبانها وتتقول مع راسها هادا شنو كايدير هناا واش جااا يشوف رحيل ولاشنو؟؟ قربات بهدوء وهي ممبيناش ليه استغرابها وتاهو غير شافها تقاد فلوقف...شحال وهو كيتسنى فيهاا مشى لخدمة وسول عليها لقاها خرجات شوية بكري وجا لهناا عاس عليها تاجاه لفرج فاش بانت ليه جااياا.. تبسمات ليه تبسيمة صفرا ونطقات بهدوء:السلام أوعليكوم
رؤوف:واعليكوم السلام لباس
رنيم: حمدالله ونتا ومالين دار بخير؟
رؤوف:يسول فيك لخير (حك حاجبو وحس براسو متوثر علاش ماعرفش) نقدر ناخد من وقتك شوية؟
رنيم:(بتفاجأ) ياك لباس؟؟
رؤوف:لا بلاماتخلعي غير باغي ندوي معاك فواحد لموضوع
رنيم:(جاوباتو على مضض) اه واخا
رؤوف:مايصلاحش نوقفو هنا خلينا تمشيو لشي كافي قريبة من هنا وندويو براحتناا
حركات ليه راسها ومغااتنكرش بلي دماغها ضرها هو شنو باغي منهاا وهي وياه عمر وقع بناتهوم شي احتكاك من غير ديك المرة فاش عاونهاا.. ركبات جنبو بزز وهو حرك طوموبيل غادي لأقرب كافي كاين فداك النواحي.. دخلو بزوج وشدو بلاصتهوم وطلبو شنو غايشربو ورنيم كاتسناه غير يدوي وتعرف هو اش باغي منها.. أما رؤوف فكان جامع يديه فوق الطبلة وتيفكر ملين يبدا ليهاا.. هادي أول مرة توقع ليه ويتزير قدام شي بنت هو لي مولف يهضر مع لبنات براحتو جا تال قدام رنيم تسرط ليه لساان..
رنيم:(قطعات داك السكوت) وي كانسمعك علياش بغيتي ندويو؟؟
رؤوف:(بجدية)قبل مانبدا لكلام لي جاي على قبلو خصك تعرفي بلي هادي مدة جلست مع راسي كانفكر فيه (هاد لبداية غير مزادت وترات رنيم وخلات كرشها تزير عليها بلخلعة لي معرفاتش علاش جاتها.. وهو كمل كلامو) حياتي لي دوزت شحال هادي صراحة مكانتش حياة لي أنا باغي ولكن بقيت مستامر فيها ممسوقش تانهار لي فقت ولقيت راسي غادي فطريق الغلاط.. حمدلله عرفت غلاطي وراني تانصح فيه دابا (لقاها تاتشوف بعدم فهم ونطق بوضوح) عارفك بلي تاتقولي دابا فعقلك هادا علاش تيقول ليا هاد لهضرة ولكن فاش غانكمل ليك غاتفهمي.. (جغم من قهوتو قبل مايكمل) هاد لمدة لي تعارفو فيها العائلة مع بعض خلاني نرد ليك لبال ماعرفتش كيفاش غانوصل ليك هضرتي ولكن نتي كاتعجبيني ارنيم
حلات عينيها بزوج على جهدهوم من ديك لكلمة لي قال وكيف لاحها ليها فوجهها.. سرطات ريقها وبدات تاضور عينيها وحسات براسها تزيرات بزاف.. ملي بدا ديك الدخلة وهي حاسة بشنو باغي يقول ولكن ملي نطق بيها كانت حاجة خرى.. عضات على شفتهاا وبدات تتحك فيديها معرفااش باش غاتجاوبو هي أصلا محساش من جهتو بشي حاجة.. دوك لمرات لقلال لي صدف لقاتهوم خلاوها تعامل معاه كشخص عادي عمرها شغلات بالها بيه ولكن هو مكاانش بحالها حيت دوك الصدف غير مزاد بينو ليه مشاعرو وخصوصا نهار بسل عليها داك خوناا تما فهم كثر وعرف اش كاتعني ليه..
رؤوف:عارف بلي صدمتك بهضرتي ولكن مقدرتش باقي نخبي باش كانحس سمعي ارنيم أنا مناويش نضحك عليك وماحدي جالس هنا قدامك كانقول ليك هاد لهضرة إلا وأنا عارف معنيتها وقااد بيهاا.. يقدر نتي مكتحسي من جهتي بوالو ومغانلومكش ولكن علاش ماتعطيني فرصة ارنيم
رنيم:(بصراحة) ماعرفتش أنا صراحة معارفة شنو نقول كلامك تلفني
رؤوف:هانتي باش ماتلفيش اش بان ليك نتعاملو عادي بحال لامي باش نتي ماتحسيش براسك مزيرة وتعاملي براحتك ومنها تعرفيني ونعرفك كتر
مغاتنكرش بلي مقال عييب وهضرتو معقولة وهي حاليا مامصاحبة مامخطوبة مامزوجة يعني علاش ماتعطيهش فرصة وكيف قال يتعاملو بحال لامي بيناتهوم باش مايتزيروش بزووج وديك الساعة راه لييام كاتوريك شنو دير...
رنيم:خصني نفكر
رؤوف:ااه واخا من حقك مغانبززش عليك
تبسمات ليه كجواب وهو شاف فساعتو قبل مايخلص لكونسوماسيون.. خلى لمحاال خاوي مدة طويلة وخصو ضروري يرجع ولكن قبل خصو يوصلها.. وقف قدام الحومة ومادخلش لداخل باش مايجبدش ليها شي صداع وضار شاف فيها مبسم:عطيني نمرتك
رنيم:واخا 06*******
رؤوف:(صونى عليها) تاتقيديها عندك ماكرهتش نكملو كلامنا مي خصني نرجع لمحاال حيت عندي لخدمة
رنيم: الله يعاونك
نزلات وشيرات ليه وهو غادي أما هي تنهدات كاتفكر فهضرتو ولحد دابا ماتيقاتش غاتخرج منو هو حيت كيبان ليها فشكل حاس براسو.. دارت يديها فجييب الجاكيط مكملة طريقها تاسمعات لكلاكصون وهي ضور مكمشة حجبانها ناوية تسب عند بالها شي حد كيضسر ولكن غير شافت شكون سايگ وهي تنطق بعدم تصديق:ميس...
لوقت كولو وهي كانت تابعها ملي كانت هي وغزلان خارجين.. مراقباها وكاتسنى لفرصة لي تكون فيها بوحدها وغير تفرقات مع غزلان وكانت نوات تهضر معاهاا وهي تبان ليها واقفة مع واحد مكاتعرفوش ومشات معاه لقهوة.. داك لوقت لقصير لي جلسوه مع بعض هي كانت جالسة فطوموبيل كاتسناهوم يساليو.. ودابا فاش بانت ليها أكيد مغاتفلتهااش... كانت كيف عادتها دايرة شال على نص وجهها مغطية بيه ديك الضربة لي شادة حنكها ومخلي سكاتريس بااااين.. جالسة فبلاصتها وبعينين موكة مراقبة الطريق لايشوفها شي حد من دار إدريس أما رنيم تصدمات من شوفتها وقربات جهتها مخنزرة ونطقات:اش كاديري نتي هناا
ميس:طلعي بغيت ندوي معاك
رنيم:مكاين فاش ندويو سيري من هناا وهنيناا
ميس:(بركات على سنيها) رنيم طلعي خلينا نهضرو شوية وديك الساعة سيري فيما بغيتي
رنيم:واش مباغاش تفهمي رااسك أنا مبقيتش باغا نشوفك ولاندوي معاك عطيني بالتساع وسيري
ميس:(نزلات تاوقفات قدامها وقالت) لهاد الدرجة بدلوك دوك الناس نسيتي أصلك وعائلتك وضربتي على كلشي
رنيم:أصلي هه من نيتك اشمن أصل لي يخليني نرضى نهضر عليه نتوما لي درتوها بيديكوم وخليتوني نسى أصلي ونضرب عليه حيت مكيشرفنيش نقول لنااس بلي هادوك لي هوما عائلتي نااس مراض مافقلبهوم رحمة عايشين فلحرررام من كبيرهوم لصغيرهوم
ميس:داك لحرام لي نتي تاتهضري عليه هز لي كبرك وقرااك نسيتي هادشي
رنيم:ياريت كون قدرت نساه والله كنت على الأقل غانرتاح ولكن باركة كنيتكوم لي باقا لاصقة فيا
ميس:(قربات جهتها ونطقات ببرود)خصك تفتاخري حيت كنيتك الجوهري وتفتاخري حيت عمك هو بدر الدين وبلي خوك هو عاصم وأنا ختك
رنيم:نفتاخر من نيتك اش فيكوم باش نفتاخر بيكوم واحد طمع فمرات ولد خوه وماخلى مدار ليها أو واحد باع مراتو لعمو ولا بوحدة قتلااات بنتها وخانت راجلهاا مع شماااتة
ميس:(زيرات على يديها بجنون) رنيم بلعي لسانك
رنيم:لحقيقة وجعاتك ياك (قربات وجهها جهتها ونطقات ببرود) خصك طلبي ربي يغفر ليك ودوزي لي بقا ليك فحياتك ونتي كاطلبيه حيت لي درتي مكيتغفرش
ميس:برافو ديك خيتي دارت خدمتها وفورمطاتك تاوليتي دوي بحالها مي اش غانتسنى منك الريح لي جاا يديك بعتي عائلتك على قبل ديك لعائلة لي من نهار عرفنااها وحنا لور ولي بسبابها خسرت خويا ومي وعمي وخسرت كلشي..
رنيم:ماتلوميش شي حد على أغلاط عائلتك ونتي أصلا مامنحقكش تهضري عليهوم حيت هوما بزاف عليك اميس ومن الأحسن تمشي وماتعاوديش تباني قدامي حيت تصرفي معاك لمرة الجايا مغايعجبكش..
عطاتها بالضهر وهي تنطق ميس ببرود:نتي راه خصك ديري يدك فيدي باش ناخدو حق عائلتنا منهوم ماشي تعطيني بالضهر ارنيم...
*****
بزز عليها خرجات من جناحها وماعندهاش لخاطر ولكن جات عندها عمة نوح لي جات من السفر مع مرات ولدها... نزلات لعندهوم راسمة الضحكة بزز ومع دخلات وسعات تبسيمتها ومشات تاتسلم عليهوم وكاتعطيهوم صوابهوم كيف مولفة... وصواني ديال الضيافة محطوطين فوق الطبلة ومشكلين بلي حبات خاطرك...
لعمة:اوا قلت نجي نطل عليكوم وندوز هنا شي وقيت على مانرجع
رحمة:مرحبا بيك الدار دارك
لعمة:ترحب بيك الجنة جيت غير أنا وجنات جريتها معايا تونسني
رحمة:(شافت فجنات لي جالسة بالنخوة لابسة الرومي وطالقة شعرها على راحتو وضفاار مصبوغين ومقاديين) لمن خليتي بنتك؟
جنات:(نطقات بأدب والهضر بالتاويل) لباباهاا هي أصلا مكتفرقش عليه
رحمة:(تبسمات) مزيان تاهو يربي شوية ويشد نوبتو
لعمة: لاهو كيدير حقو وأغلبية الوقت هو لي كيتكلف بلبنت
رحمة:اوا مزياان مافيها بااش يتعاونو مع بعض وماشي غير لمرا لي تهز لحمل ديال الدراري لي صعيب كيخص تكون المساعدة بناتهوم
جنات: معلوم وخصوصا مع الخدمة راه صعيب بزاف
لعمة:اوا ارحمة فين هي عروستك مبانتش ليا هنا گاع ملي دخلنا
رحمة:(تزيرات ولكن مابيناتش) هي مكيناش هنا هي فدار واليديها مع لحمل مشات لتما ترتاح شوية وتبدل لجو
لعمة:(شافت فيها بنظرة تشكيك ونطقات) مع لحمل ولاحيت كاينة حاجة خرا؟
رحمة:(كمشات حجبانها وقالت بتساؤل) حاجة خرا بحالاش اش كاتقصدي؟؟
لعمة:(حطات كاس داتاي فوق الطبلة وشافت فيها) نتي عرفااني ماعنديش مع الضوران ولي كاين تنقولو نيشااان وهادشي لي قلتيه ماشي هو لي سمعت
رحمة:اش كاتقصدي بهضرتك وضحي لياا وبلاألغااز
لعمة:سمعت بلي مرات ولدك غضباانة فدار واليديهاا وبلي ناضو مشاكيل بناتهوم عليهاا ولد لحاااج (سكتات وبدات تاضور عينيها يمين وشمال قبل ماتنطق وهي مزيرة) ولد لحاااج مشى تزوج بالتانية عليها غببببر وناااس شافوه معاااها...
لاحت لعمة كلامها لي قالت فوجه رحمة وبقات ساكتة تاتشوف فيها بهدوء...أما رحمة فمكانتش متيقة داكشي لي سمعات وبقات تاتشوف فلعمة مدة طويلة وضارت شافت فجنات لي كانت ساكتة وعاود رجعات شافت فلعمة وقالت بعدم تصديق:اش هاد لهضرة تتقولي؟؟
لعمة:لي سمعتي ارحمة النااس شافوه معااها وهوما لي قالوها ليا
رحمة:مايمكنش ولدي نووح يديرهاا
لعمة:تاأنا كنت بحالك فاش سمعت الهضرة تصدمت وقلت واه كيفاش ولد لحااج يديرها ولكن هادشي لي عطاا الله
رحمة:ولدي نوح لكان باغي يتزوج راه كاان غايجي ويقولها ماااشي يخبيهاا لا لا هادشي غير هضرة خااوية ولدي مايديرهااش
لعمة:(كمشات حجبانها) وعلاش مايديرهاااش يااك راجل بخيررو وخميرو وعارف بينو وبين الله وزايدون هاداك حقوو الشرعي ارحمة
رحمة:(شافت فيها وهي مكمشة حجبانها) اييه عرفناا هادشي ولكن باش يتزوج بتخبية ماشي ديالتو
لعمة:وشكون لي قال ليك مايديرهااش يااك هو ومرتو واقعين لمشاكيل بناتهوم وهي حااملة يقدر السيد مبغااش يقولها باش هي ماتسيقش لخبااار
سكتات رحمة كاتشوف فيها وهي كملات هضرتها:هو راه راجل ارحمة وراه هادا حقوو لاكان السيد مزوج ومرتو عايشة فدار واليديهاا شحاال وهي غضبانة تم وكلشي سااق ليهوم لخبااار..
رحمة:(بتبرير)هي كاتوحم عليه وكرهاتو وهادشي علاااش هي مشات لدار واليديها
لعمة:(حركات راسها بلا ونطقات) بين الرااجل والمرا مكيعرفو غير لي خالقو نتي معرفااش شنو طرا بناتهوم
رحمة:(شافت فيها) شكون قال ليك هاد لهضرة وفين سمعتيها؟؟
لعمة:كلشي سااايق لخبار ونتي لي باقا فدار غفلون لعائلة كلها تادوي على هاد لهضرة
رحمة:(بانفعال) كيفاش كلشي سايق لخبار اش هاد تخربيق تتقولي وشكون شافوو معاااهاا أصلاا ولدي ماعرفت فين مشى هاد لمدة كلها وهو طافي تلفونو ومعاطي لتاواحد راس لخيط فين غايكون
لعمة:وهو عمرو دارها (حركات رحمة راسها بلا وكملات) اوا هانتي شتي السيد عمرو دارهاا وجيتي تال الزوااج وقلتي لا مايمكنش اايه كلنا عارفين ولد لحاااج ولكن راه الرجااال عيبهوم واحد وماتكدبش عليك ماعرفتش شكون لي شافهوم
تلفات رحمة وداخت بشنو سمعات عقلها مباغيش يستوعب ديك لهضرة وفنفس لوقت تاتشوف بلي كلام لعمة يقدر يكون على حق ولي زاد شككها هو نوح ماخلى لحد لبلاصة فين غايكون وهادي جديدة عليه...تسائلات بينها وبين نفسهاا زعمة بصح يكون تزوج مرة خرااا؟؟ اه هو قال رحيل تتوحم عليه ولكن يقدر يكون بيناتهوم مشكيل اااخر ويكون هو خباااه ومقالوش كيف عادتو؟؟ الشك خدم عند رحمة والعمة جات وقالت لهضرة لي سمعات من عند لعائلة ولي ولات حدييت الساعة عندهوم... ولد لحاج ومرتو بيناتهوم مشاكيل وهو تزوج التانية وغبر...ملي سولات شكون شاف قالو ليها والناس شافوووه ومعطاوهاش شكون بالضبط شافو وهي غير سمعات هادشي جات باش تقولو لرحمة وتحطها فالصورة تاهي..
لعمة:(شدات يديها ونطقات بهدوء) مقلتش ليك هادشي بااش تصدمي ارحمة أنا ملي سمعت لهضرة جييت نيشاان وقلتها ليك باش تعرفي لي كاين وحيت كلشي عارف مجاتش تكوني فدار غفلون
رحمة:هاد لهضرة صعيب دخل لدمااغي مقدراش نتيقها
لعمة:اش غانقول ليك لي كاين راه قلتو (كمشات حجبانها) لمهم ماتقولوهاش لمرتو وهي واحلة فروحها لاتوقع ليها شي حاجة
رحمة:(بانزعاح) هي أصلا فدار واليديها اش غانقولو ليها
لعمة:نيت مزياان لاتوقع ليها شي حاجة الله يستر بحال هاد لخباار راه تيكونو قاصحين وصعاب (شافت فساعتها) يالاه خليت ليك الراحة غانمشيو تانرجعو تاني
رحمة:خليكوم معاناا
لعمة:لا غايخص نمشي راه جنات مخلية لبنت مع باهاا وضروري تمشي لمهم ماتهزيش فباالك بزاف ولهضرة ديري راسك ماسمعتيهااش گاع
رحمة:(وقفات سلمات عليها) الله يلاقينا فساعة لخير عنداك تمشي قبل ماتعلميني
لعمة:لاكوني هانية راني مطولة هاد لمرة
جنات:بسلامة اخالتي
خرجات معاهوم تال حدا لباب دايرة صوابها وهو ركبو فطوموبيل ودمارات جنات وشافت فلعمة لي ساكتة تاتخمم وقالت:كون غير اخالتي ماقلتيهاش ليهاا
لعمة:(تنهدات) وشنو نخلي لهضرة دايزة عليوم ونبقا ساكتة
جنات:خايفة غير نوض الصداع ويقولو نتي سبابو حيت قلتيها ليهاا
لعمة:واش عند بالك هادوك خباو حيت خايفين عليها تت راه هادوك سكتو باش يشمتو بالسيف عمر ولد لحاج خلى شي حد يدوي عليه بلخايب ودابا هاهوما لقااو فين يهضرو عليه..
أما عند رحمة فبقات ساكتة تاتخمم وراسها حاسة بيه غايطرطق تاتشرب كاس دلقهوة وبوحدها فالصالة تابانت ليها بيسان داخلة مخنزرة ومعاجبها حال وغير شافت مها فالصالة وهي تستغرب ولكن فرحات حيت وأخيرا خلات مها لجناح من نهار مشى خوها وهي فيه...
بيسان:ماما علاش جالسة هنا بوحدك
رحمة:عمتك كانت هنا هي وجنات
بيسان:بصااح علاش مبقااتش ومشات
رحمة:عرفتي شنو قالت ليا؟
بيسان:شنو؟؟
جلسات قدامها وهي حاسة بلي شي حاجة كاينة تم...
رحمة:قالت ليا بلي خوك نوح تزوج مرا خرا وبلي الناس شافوها معاه
بيسان:(هزات حاجبها بسخرية وقالت)ههه من نيتهوم واش تيقتي هاد لهضرة (سكات مها خلاها تنطق باندفاع) لا لا ماتقوليش تيقتيها اماما واش خويا غايتزوج بلاخبار حد وبالتخبية وأصلا علاش غايتزوج وهو مزوج برحيل وهاهي حاملة ليه بتواام
رحمة:نسيتي لمشاكيل لي ناضو بناتهوم والسكنة ديالها هاد الشهور فدار واليديها
بيسان:حيت السيدة تتوحم نوغمالمو تبقا تايفوت لوحم وهي غير فاتها جات لهناا تتقلب على خويا مي نتي جريتي عليها
رحمة:(خنزرات فيها) بنت ليك غير ملي جرييت عليها هي ملي هلكاات خوك فصحتو ماشفتيهااش من نهار دخلات لحياتنا وحنا تانعيشو فلمشاااكيل قدامها قدااام النحس عليناا وعلى خوك هاهي طججاتو من الريااض ويعلم الله فااشمن بلاصة مشى ليهاا وتتقولي مايديرهااش راه لدارها من حقوو بالسيف السيد يقلب على لمرا التانية ومرتوو لي يحط عليها الرااس ممسوقااش ليه ودايراه زايد ناقص فحياتهاا...
بيسان:(كمشات حجبانها وقالت)علاش كاتقولي عليها هاكا وهي عمرها أداتك خويا نهار تزوج بيها وهو عايش بخير بلامانكروو اماما لاناضو مشاكيل بناتهوم عادي أي زوج راه ضروري ماتكون بناتهوم مشاكيل ماشي ضروري هي قدام نحس كيف تتقولي السيدة براسها جات تتقلب عليه ونتي ماخليتي ماقلتي ليها فنظاارك نهار غايرجع خويا نوح ويسيق خباار لشنو قلتي ليها غايعجبو لحاال فنظارك غايدوزها ليك مكنظنش فمن الأحسن اماما ماتقوليش هضرة تندمي عليها
رحمة:تاواحد مغايفهمني ويفهم باش كانحس دابا ولدي معارفة عليه والو وقبيلة سامعة بلي هو تزوج وناس شافوه معاهاا شنو بغيتي ندير مثلا هااا
بيسان:فكري بعقلك اماما لهضرة دالنااس راه مكاتفيد تاواحد شكون أصلا قالها وشااافو باش نعرفوو واش نتيقو ولا لا
رحمة:لهضرة راه گاع العائلة ساقو ليها لخبار وشكون شافو عمتك براسها ماعرفاتش شكون شافهوم
بيسان:اوا يعلم الله شكون كدب الكدبة وتيقها أنا بعدا مانتيقش تانشوف بعيني ونسمعها بودني من فم خويا أما ماتبقى غير تخربيق اماما
****
دخل ريان لدار عاقد ربعة فلعشرة محاملش راسو وتهضري معاه فهاد الساعة يضور فيك... غير شافتو تانيرت بلگبص فيديه ولفاصمة فجبهتو وتريكو فيها الدم وهي تخرج عينيها وجات تاتجري تاتقلب فيه وتسولو وهو بزز باش كيجاوبها...تجمعات هي وأسماء فوق راسو ورنيم تاهي كل وحدة فين تسول وباش كملات لباهية فاش دخل باه ومحمد طه وهو كيعاود ليهوم لكسيدة لي طرات معاه..
تانيرت:(شدات قلبها ونطقات بخوف) قلتها ليك داك لمطووووور ماتبقاش تهزو ونتا مباغيش تسمع لياا
إدريس:علاش ماعيطتيش ليا وعلمتيني؟؟
ريان:تلفوني تهرس ومشى وزيد مابغيتش نشطنكوم
إدريس:(ضاار فيه بصرامة)اسيدي شطني نتا شغلك اااخر مرة اريان توقع ليك بحال هاد لقضية وتخبيها علياا وماشي غير نتاا كلكوم لاوقعات ليكوم شي حاجة علموني راااني باااكوم واجبي نكوون معااكوم وقت الشدة
ريان:(باس راسو ونطق بأسف)مكنتش قااصد نعصبك الواليد سمحلياا
إدريس:طلع لبيت وسير بدل عليك حالتك محمد طه سير عاون خوك
سيدرا:(شدات فيديه ونطقات)نعاونو أنا بّاديدي
شد فيها ريان مبسم وطلع هو وياها وموراهوم محمد طه...وصلوه لبيت محمد طه جبد ليه مايلبس وعاونو تاحيد التريكو لي...لبسو تيشورت واسعة من ليدين ولاح عليه قبية لبسها من يد ويد لا وبدل ليه تاسروال وسيدرا مشات لحمام جابت سطيلة فيها ما وفوطة وحد مقالها ليها..جات لعندو ولقات محمد عاونو تالبس وهي تهز لفوطة غطساتها فلماا وبدات تمسح ليه وجهو بحنية وهو تيشوف فيها ويتبسم كان طالع ليه لخز لراس ولكن بتصرفها خلاتو ينسى ويتبسم وغير سالات جرهاا عضها من حنكها وهي تاتكركر ليه بالضحك..خلاوه يرتاح وهو تكى وسرح بخيالو فشنو وقع معااه قبل لحظااات...
🔙🔙
حاس بلعافية شعلات ليه فصدرو وهو كيشوفو حاط يديه على ضهرها ومسلم عليها بلابير هي لي تضهشرات ورجعات لور مخرجة فيه عينيه..
عمر:زين صاافا
بيسان:(ضارت شاف جهة ريان لي كان هاز حاجبو ومخنزر ورجعات شافت فعمر وقالت بصوت غاضب) عمر واخا نقدرو نهضرو من بعد
عمر:شنو بان ليك نمشيو نتعشاو فشي بلاصة بحال لبااارح
بيسان:(حسات براسها باغا تفرگع ونطقات ببرود) ممساليااش دابا
ضارت جهة ريان لي عطاها شوفة قاصحة وخنزر فيها قبل مايضور ويتحرك بحالو مخليها تاتشوف فيه وهي عاضة على شفتهاا..
🔜🔜
حاس بلمرارة ومقدرش يتقبل شنو شاف واخا راه بفمو قاليها سالينا ولكن باش يشوف واحد اخر معاها كانت قاصحة عليه حيت باقي تايبغيهاا.. نعس على جنبو وحط يديه لي مگبصة فوق النموسية طالقهاا وعقلو كيخمم فيهاا هي...كيفما تاهي كاانت كاتفكر فيه وهي جالسة قدام مرايتها تاتمسح لمك اب.. لاحت لكوتونديسك بنثرة وتكات على لكرسي وهي مكمشة حجبانهاا تاتفكر شوفات ريان الأخيرة قبل مايمشي.. ماحملاتش راسها وكرهات عمر لدرجة ضارت فيه فديك اللحظة..
🔙🔙
مجرد ماغبر ريان ضارت جهة عمر وهي مخرجة عينيها فيه ونطقات بصوت معصب:اش داك التصرف درتي وشنو بيني وبينك بااااش تجي تسلم عليا بلوجه
عمر:(هز حجبانو مبهوض ونطق) بيسان نتي اش كاتقولي
بيسان:سمعني مزيااان اعمر ماشي حيت خرجت معاك لبارح وتعشيت معااك راه صافي ضسر وتجي تسلم بلوجه وتبوووس حتااارم راسك ولزم حدودك سمعتي أنا راه ماشي من دوك لبنات لي تاتعرف اخر مرة دير بحااال هادشي معايا
عمر:(زير على يديه وقال بغيض) بنتي ليا معصبة نهضرو من بعد ونيت تكوني بردتي
بيسان:لي عندي قلتو داباا تقبلو ولاماتقبلوش شغلك هاداك
🔜🔜
هضرتها مع عمر كانت واضحة فلول كانت باغا تجاهلو باش يفهم راسو ساعة جاها فواحد لوقت لي كانت معصبة وزيد تصرفو لجريء معاهاا خلاها تگرع عليه وتقول لي خصو يتقاال... ماشغلهااش فيه دابا وباش غايفكر فيهاا لمهم عندها تحط حدود معااه باش مايتجاوزهومش...ناضت بخطوات تقالين هزات تلفونها كاتشوف فنمرتو باغا طمن عليه ولكن عرفاه مغايجاوبهااش باركة غير تصرفو معاهاا ليوم وبرودو جهتها..
بيسان:(همسات لراسها)صافي ابيسان نساايه هو قال ليك كلشي سالى إذا كلشي سااالى..
---
دازو يوماين لي صحات فيهوم رحيل وناضت من لفرااش واخا باقي الروااح فيها ولكن حسن من نهار لول... كانت تتجمع شعرها وتتكح بألم وكرشها حاسة بيها تاتبومبا مع كل كحة.. حطات يديها على كرشها وهمسات بحنية وبصوت مبحوح:عسيلاتي تعدبتو معايا هاد ليومااين
ناضت لحمام توضات وجات صلات هو لول عاد مشات لبسات عليها كسوة طويلة مع مونطو لفوق ودارت فولارها واكتفت غير بجلوس...هزات صاكها وسوارتها وخرجات من الدار بدون ماتعلم تانيرت...ركبات فطوموبيلتها وقلعات شادة الطريق... هاد لبلاصة كانت غاتمشي ليها هادي يوماين ولكن نظرا لحالتها أجلاتها حيت مكانتش تقدر تخرج وتسوگ وهي فديك الحالة... صونى تلفونها وكانت مها باينة مالقاتهاش فبيتها عليها صونات..
رحيل:ألو ماما
تانيرت:فينك وفين مشيتي؟
رحيل: عندي واحد لغراض ملي نرجع ونعاود ليك
تانيرت:كون غير قلتيها ليا نمشي معاك باقي مريضة ابنتي والصوگان قاصح عليك
رحيل:أنا بخير ماتهزيش همي نخليك دابا تانجي
قطعات معاها وكملات طريقها تاوصلات لمقصدها...نزلات وهي تاتشوف فدارهوم وعقلها فكرها فنهار جات هي وياه باش يوريها ليها..قربات جهة لباب وجبدات الساروت وحلاتها وقلبها ضرب مجرد ماخطات لخطوة لولى.. كملات طريقها وعينيها كيشوفو فالفراش لي مفرشة بيه الدار... كان نفسو لفراش لي ختارتو أو وراتو ليه...وقفات قدام الصالة والبكية جاتها وهي تاتشوفها مفرشة كيف بغات وبلوان لي ختارت كلشي كان على دوقها من طلامط لخوامي تامن الخشب دسدادر على دوقها... قلبات طريقها وكل بلاصة دخلات ليها تتبقا واقفة مدة وتاتشوف فيها بسهو وتمشي لبلاصة خرى تاوصلات لكوزينة وهي تبسم وعينيها كيدمعو.. تفكرات فاش هزها فوق كتافو باش تشوف لبلاكارات لي كانو عالين عليها...تادابا بغات تشوفهوم ولكن هو مكاينش باش يهزهاا.. مسحات دموعها وكملات طريقها لشومبر دنعاس ومجرد ماحلات لباب جمدات فبلاصتها وريحتو الرجولية تغلغلاات لجيوبها الأنفية مخليا دمها كيغلي وقلبها باغي يخرج من بلاصتو...قربات بخطوات بطيئة تاتشوف فالبيت لي كانت مفرشة على حقها وطريقها..نموسية مضورة جايا فلوسط مفرشة بكوفرلي كحل... مع جميع مستلزماتهاا وبلاصة دريسينغ تاهي فيها القليل من حوايجو وحوايجها لي معرفاتش وقتاش جابهوم... دخلات بخطوات تقيلة وعينيها لمحات شوميز نواغ محطوطة فالسلة دلحوايج موسخين لي محطوطة فالدريسينغ تحنات وهزاتها ومجرد ماحطات نيفها عليها غمضات عينيها مخلية ريتها تستنشق كمية معقولة من عطرو الرجولي لفخم... حلات عينيها وبدات تاضور راسها يمين وشمال تاتقلب على شي حاجة لي توصلها ليه...بقات تاتقلب فدوك لمجورة كاملين تالقات واحد الأجوندا حلاتها ولقاتها خاوية من غير ورقة وحدة مكتوب فيها واحد التاريخ بخطو.. كمشات حجبانها وهي كاتشوف فداك التاريخ لي داز هادي سيمانة وبصوت خافت نطقات:هو كاان هنااا
شي سعتاين وهي شادة ديك لاجوندا تاتشوف فداك التاريخ وتقول واش فهماات اش قصد بيه...خصوصا أنه داز سيمانة عليه... ساطت النفس وناضت من فوق الكرسي لي كاين فالدريسينغ وبدات تاني تتقلب للمرة العاشرة يمكن عالله تلقى شي حاجة لي تخليها تعرف فين كاين... ملي مالقات والو خرجات لبيت تاتشوف فيها وبدات تاتقلب فيها عاود مالقات والو تاحاجة من غير ديك لاجوندا لي حسات بيها بحال شي قطعة دلبازل وهي خصها تقلب على لقطع لخرى باش تكمل ليها الصورة كما هي...زفرات بعصبية وتنرفزات زولات شالها ولاحتو وخرجات من تم وتلفونها صونى...لقاتها تانيرت عاود جاوباتها بسرعة وصوتها باين فيه الانفعال:بلاماتسنايني اماما مراجعااش دابا وباقي مطولة ملي نسالي نعيط ليك بسلامة
ماخلاتهاش گاااع تنطق بتاشي حرف وقطعات عليهاا حاطة التلفون فوق طبيلة وخرجات لكوزينة تاتقلب فيهاا وأول حاجة دارت حلات تلاجة لقاتها خاوية ولكن خدامة.. وهادا دليل تاني على أنه كان هنا...مشات تاتقلب جهة لمواعن لي كانو قلال وهي تقشع واحد طاس دلقهوة كحل محطوط بعيد على لكيسان لقلال لي كاينين ومقلوب بلعكس...هزاتو وهي تكمش حجبانهاا وهاد الطاس عرفااتو ديالو حيت سبق ليها وشافت عندو واحد بحالو فلفيرمة وفالريااض ونهار سولاتو قال ليها بلي كيشرب فيهوم لقهوة...تبسمات بسخرية وحسات بلعجز فهاد الساعة...خرجات من تم وبقات تتقلب فالدار كلها فلاتهاا وشي بيوت كانو باقي ممفرشيشن دخلات لول وضورات عينيها مع بغات تخرج بانت ليها ورقة صغيرة لاصقة فلحيط هادوك لوراق لي تيكتبو فيهوم الناس الملاحظات قربات جهتها بخطوات تتجري تقريبا شادة كرشهاا ومع وصلات ليها قرات السمية لي مكتوبة فيهاا بالخط العربي "سيدرا" كمشات ججباانها مافهمااااتش شنو قصد بيهاا ومدة وهي تاتخمم قبل ماتخرج من داك لبيت مخلية ديك لورقة فبلاصتها مازولاتهااش ودخلات لبيت لي كان جنب هاداك تاهو خاااوي ونفس الشي لقات فيه ورقة ملصقة ومع قربات لقاات مكتوبة فيها "زين العابدين" وهي عاااد فهماات بلي هادو لبيوت دسيدرا وزين وهو فرق ليهوم لبيوت... تبسمات بحزن وخرجات بخيبة أمل واضحة على وجهها كان باقي بيت واحد مشافتووش حلات بابو وكان تاهو خااوي وفيه تاهو ورقة قربات وقبل ماتوصل تقراهاا عرفات هاد لبيت دمن وبالفعل مع شافت لورقة تبسمات وشوية تفرگعات بالدموع تاتبكي وتشهق...حطات جبهتها على لحيط وبقات تاتنخصص ورجعات هزات عينيها على لورقة لي مكتوب فيها "لعسيلات"... بكتاف طايحين خرجات من لبيت ورجعات لشومبر ديالها هي وياه جلسات فوق النموسية وهي تاتشوف فيها بسهوو...كلام رحمة رجع كيزنزن فودنيهاا مخلي قلبها يتزير عليهاا...هو كيفكر ليها وكيفكر فولادو وهاهو كل واحد داير ليه بيتو بوحدو ومفرقهوم ليهوم تايفرشهوم... فرش الدار كيف بغااات واخا باقي مكملش الكوزينة واحد الصالة بقات خاوية ولكن كلشي كان على دوقهاا مانقص مازاااد أكيد هو فرشها وكان باغي يجيو يسكنو ولكن هي...هي السباب ومرضاتو وهلكاتو بمشاكيلهاا تاعيى ومشى...شحال قدو يصبر ليهاا الإنسان راه كيجي النهار وكيعيى...من نهار عرفاتو وهو كيفكر ليها شنو باغا وشنو مباغااش لمحااال لي وقف عليه وقاادو بنفسو كيف طلبات منو ولدابا رااه لمحاال مروج واخا هي مكتمشيش ليه حيت هوو موصي لي يتكلف بيه... تفكرات نهار علمها زكرياء بلي هو لي هناها من بدر الدين وبلاصة ماتشكروو هي غوتات عليه وتعصبااات حيت كبريااءها اللعين مكاانش راضي فااش عرفاتو كان عاارف... مابغااتوش يعرف وكانت ناوية تخبي عليه ااه من حقها حيت ماضيها هاداك ولكن فااش عاونها عاونها باش تهنى وترتاااح باش ترجع رحيل حرة طليقة بدون خووف وبدون مرض تعيش بنفسية مرتاااحة... مرة خرى فكر فيها هي ومافكرش فراسو لي خاطر بيه مع واحد بحال بدر الدين لي هي عااارفة مزيان اش كيسوى... من نهار تزوجات بيه مغاتنكرش بلي هو عيشها فلعز لي بغاتها ديالهاا عمرو بخل عليها بشي حاجة تامن لفيرمة لي قدها قد السخط كتبها ليهاا فالصدااق أو ولات ديالهااا...هاد لمدة كلهاا وهو مريحهاا ولكن هي معدباااه فهاد اللحظة هي كرهات راسها بزاااف وعرفات راسها كاانت خايبة معاااه...هي مكاتستاهلووش واحد بحاالو قلبو حنين وحاجتو ماشي ديالو رااااجل بمعنى لكلمة عمرو خسر ليها لخاطر ولكن هي هرساات خاطرو... تكورات فوق النموسية ويديها على كرشها لي حسات بوجع خفيف فيهاا وهمسات بخفوت كاتهضر معاهوم: توحشت باباكوم بزاااف هو لي كان مفششني ودابا فاش خطااني حسيت براسي بوحدي واخاا معايا گاع عائلتي ولكن بلاصتو عمر شي حد يقدر يعمرها...
يتبع...
التعليقات
لا توجد تعليقات بعد، كن أول من يعلق.