الجوهر الحر الجزء 40

" لمْ أقع في حبك بل وقع العالم من عيني حين أحببتك..فلقد تمكنت مني لدرجة أنني أصبحت أتجاهل الجميع حينما تكون معي..فقد امتلكت القلب والروح ليصبحو ملكاً لك..كنتَ أنت كنجمة أضاءت عتمة سمائي.. لتحول ظلامها إلى نور أضااء قلبي وكياني.. وأسقى روحي الميتة وأحيااهاا من جديد..فقط لأنك أنت"

مجموعة من الركاب خارجين من لمطار.. ومن ظمنهوم كان نوح لي خارج بخطوات سريعة داير يد فجيب السروال توب لي لابس.. وليد لخرا هاز بيها صويك صغير دالجلد فالكحل.. عاقد حجبانو القهوين وملامحو كانت مرسومة عليهوم الجدية.. مجرد ماحط رجليه برا لمطار عينيه الزرقين لمحو صابر لي كان واقف حدا الطروطوار جنب طوموبيلتو.. متكي ومربع يديه كيشوف فالغادي والجااي.. قرب جهتو نوح تاانتابه ليه صابر لي نطق بنبرة هادية:على السلامة اولد لحاج

نوح:(حل لباب ديال الطوموبيل لوراني حط فيه الصاك ونطق بنبرتو الخشنة المبحوحة) الله يسلمك

ركبو فالطوموبيل وشد صابر الطريق ونوح مضور وجهو جهة شوارع مدينة الداخلة لي كانو خاوين بحكم الليل.. الجو كان مبرد شوية هاد الليلة.. الطريق كانت طويلة وتاحد فيهوم ماهضر مع لاخر.. مدة طويلة وكانت الطوموبيل واقفة قدام باب السبيطار.. نزل نوح وعينو لمحو يونس البوليسي لي كان مكلف بالبحث عن اختفاء رحيل فالرباط مع وجوه جديدة أول مرة يشوفهوم.. قرب جهتهوم هو وصابر وسلم عليهوم..

نوح:(بجدية) فين هو؟

يونس:لداخل اجي معايا

دخلو هو وياه وصابر والبقية بقاو برا.. سابق يونس وموراه نوح وصابر تاوقفو قدام باب لاموغ وهو يضور يونس ونطق بهدوء:دخل اولد لحاج

🔙🔙

ليوم كان مهم بالنسبة ليه النهار لي كان تيتسناه من زمان وصل وكيف عادتو كان واقف فالبيرو ديالو بلباسو لكحل.. بين صبعانو سيگار كيكميه ويبخ دخانو فالسما تاتكونات سحابة فوق منو.. كان تيتسنى أبيل من كلثوم باش تعلمو بلي الخطة تنفدات.. ديك لخطة لي كان هاد لمدة كلها وهو كيفكر فيها ويقادها فدماغو باش مايخلي وراه تاشي دليل كيف عادتو.. تحل لباب عليه ودخل منو إليااس لي نطق بهدوء: دراري راه فالديبو

بدر الدين:(ضار شاف فيه ونطق ببرود) كيعمرو السلعة؟

إلياس:اه

هز بدر الدين تلفونو ودوز لخط لعلي وبعد زوج رنات تحل لخط ونطق بجدية: شنو الجديد تم؟

علي:لحد الساعة باقي مكاين والو

بدر الدين:(مسح على وجهو ونطق ببرود) نتا خليك تم وملي تعيط ليك ديك لقح*بة دكلثوم عارف اش غادير

علي:كون هاني ابدر

بدر الدين:غانتسنى لابيل ديالك

قطع عليه بدر الدين وتمشى جهة لكوفر فور لي عندو فالبيرو جبد منو الفلوس لي مستفين غير لبريكات الزرقين وحدة فوق ختها.. حط النص ديالهوم فوق البيرو وسد لكوفر وشاف فإلياس ببرود:هادا خلاص الدراري ملي يشارجيو السلعة عطيهوم خلاصهوم

إلياس:واخا ودابا اش غانديرو زعمة هاد كلثوم غاتقدر دير هادشي بلاماتفضح ولايشك فيها شي حد؟

بدر الدين:(نطق بهمس كالفحيح) ديك لقح*بة بزز منها خصها تكمل خدمتها كيف طلبت منها والاوقع شي غلط بسبابها مغانرحمهاااش (صونى تلفونو فديك اللحظة بنمرة علي وجاوبو بزربة) شنو كاين؟

علي: كلشي هو هاداك وهي معايا دابا

بدر الدين:(تبسم تبسيمتو لمريضة) رد لباال فالطريق اعلي

علي:كون هاني

هز بدر الدين راسو فإلياس لي كان واقف قدامو وتبسم تبسيمة شيطانية: جيب واحد القرعة واجي نحتافلو

تبسم ليه إلياس ومشى يجيب القرعة دالشراب لي طلب منو مخلي بدر الدين جالس متكي وحاس بنشوة الانتصار مجرد ماعرف بلي رحيل غاترجع تاني ليه.. غمض عينو وهو مشتاق لوقتااش يوصل لوقت لي تكون فيه بين يديه.. ملي خرج من لحبس وهو كيخطط كيفاش يجيبها ليه.. فلول كان ناوي ياخدها بزز ولكن الشكاية لي تدارت ضدو خلاتو يرجع باللور ويفكر فشي حيلة لي تخليه ياخدها بلامايشك فيه شي حد وبلامايخلي وراه شي حاجة.. تسنى وتسنى تاجات لوقيتة لمناسبة وداك السم لي عطاه لكلثوم باش ديرو ليهوم غايهنيه من إدريس لي واقف ليه فطريقو.. وتامن خوتها وبهاكا تاحد مغايشك فيه وأصابع الاتهام غاتمشي لكثوم حيت هي لوحيدة لي مشرباتش داك السم.. عند بالها خدماتها صح ومعرفاش بلي الشيطان لي تافقات معاه نيتو كانت غيررر وبلي هو استعملها كبيدق وصااف.. من هنا لغدا غاتكون رحيل قطعااات لبحوور ومشات لبلاصة خرا لي تاحد مغايلقاها فيها.. وأصلا مغايكون تاشي حد لي يسول فيها بحكم عائلتها كلها ماتت...ضحك ضحكة مسموعة وهو كيتفكر فالخطة لي رسمهاا ولي منفدهاش تاتأكد بلي مكاين تاشي واحد لي غايعرقل ليه هاد لخطة.. دخل إلياس هز زوج كيسان مع قرعة دالشراب حلها وكب ليه كاس مدو لبدر لي شدو وجغم منو جغمة ملذذ بديك الحروقية دلمداق مع كان السيك.. كب تاإلياس كاس ليه وجلس فالكرسي قدامو وبدر الدين نطق بهدوء: ملي غانمشي من هنا نتا لي غاتكلف بكلشي هاد الدار غاتولي ديالك والخدمة مكاين لاش نوصيك عليها ونتا راك ديب فيها

إلياس:مغاترجعش باقي لهنا

بدر الدين:(رجع راسو لور كيشرب من كاسو) هادي اخر ليلة غاندوزها فالداخلة

إلياس: وقتاش غاتحرك من هنا؟

بدر الدين:ملي يوصل علي لطنجة وملي نتأكد بلي السلعة وصلات لماليها نتا عارف بلي هاد السلعة مهمة بزاف وناسها مهمين عندي..

طلع بدر الدين داك لكاس جغمو دقة وحدة وكمش حجبانو من ديك لمرورية وتحنى هاز لقرعة وكب تاني ليه كاس ورجع تكى كيشرب منو..

إلياس:(كيلعب فكاسو ونطق بهدوء) من امتى أبدر وأنا خدام معاااك؟

بدر الدين:(هز فيه حاجبو ونطق ببرود) علاش از*بي كاتسول ونتا عارف

إلياس:(هز فيه عينو) غير بغيت نتأكد منك يمكن نكون غلطت فلحساب

بدر الدين:(جبد الگارو شعلو وساط دخانو عاد شرب تاني من كاسو) ملي بديت ونتا معايا ربيتك على يدي وهزيتك من الزنقة لي كنتي تاتسكن وتنعس فيها وعلمتك تاوليتي ديب فالسوق بحالي داكشي علاش كنتيق فيك حيت عارفك معمرك غاتعض اليد لي تمدات ليك وعاوناتك تاوليتي فهاد البلاصة لي نتا فيها

إلياس:(نطق بهدوء ساهي فكاسو) وتاأنا عمري غانسى نهار حنيتي فيا وهزيتيني من الزنقة.. كنتِ نتا عائلتي لي مكانعرفهاش.. خيرك عمري نسيتو ابدر وعمري غانساه حياتي كلهااا داكشي علاش لاطلبتي نموت معاك نديرهاا

تبسم بدر الدين ببرود من كلام إلياس وكمل كااسو وعينو عليه تاكمش حجبانو فاش حس بشي وجع شدو فكرشو.. دفع كاسو وحط يديه على كرشو مكمش حجبانو لكحلين تاهز عينو فإلياس بزربة فاش سمعو نطق ببرود: خيرك مانسيتوش عليها ختاريت السم باش مانحسش بعداب الموت (شاف فيه)غايكون السم بدا يدير خدنتو ياك؟

بدر الدين:(لوجع غادي وكيجهااد وبصوت تقيل نطق) اش كاتقول از*بي واش حماااقيتي

إلياس:(هز لكاس ديالو لي كان باقي كيف هو ماشرب منو تاقطرة ونطق بضحك) السم والشراب ملونج مقوود المعلم

حط بدر يد على البيرو والثانية شاد بيها كرشو لي حس بمصارنو كيتقطعوو وجهو السمر بدا كيحمااار وعينو بداو كيتكونو منهوم شعيرات دموية مغطي ديك البيوضية دعينيه.. أما إلياس رجع ضهرو لور متكي ببرود وعينو على منظر بدر الدين وهو كيتوجع بديك الطريقة رضات غرورو وخلاتو يحس بنش'وة الانتقام..

إلياس:من نهار دخلتيني لدارك وأنا كاندير لي قلتي ليا علمتيني على يديك قوالب لخدمة تاتقصح قلبي ورجع كيف شي حجرة ماكتحركش.. كنت يديك ليمنية أنا وعاصم (ضحك ببرود) عقلتي عليه ولد خوك لي كان تاهو الكلب ديالك لي كنتي تتحركو كيف بغيتي.. ولد لقح*بة كان طماااع فيما تبان ليه شي هوتة يديرها ويدخل راسو فيهاا.. كان باغي يوريك بلي هو حسن مني حيت مكيعجبوش لحال فاش تايشوفك عاطيني شي خدمة وهو لا.. تامن مراتو باعها ليك على قبل الفلوس.. ولكن واخا هاكا شويطين غير هو كيتسرع بزاااف ومكيفكرش بحالي ياااك ابدر؟

مقدرش يجاوبو حيت فديك الساعة كان تيحس بواحد الألم فالأحشاء ديالو فضييع.. وتاباش ينوض ويوقف مقدرش وهو حاس بداتو بحال لامخدرة عليه.. ناض إلياس وبقا غادي جااي فالبيرو وكيهضر بنبرة باردة: ولد لقح*بة كان تيدير المشاكيل وكان إليااس هو لي كيفكهوم ليه مامرة مازوج وفكل مرة كنت أناا نهنيه ونعاونوو دار مشاكيل بزاف وفلخر نتا تهنيتي منوو بلاماتسوق ليه.. (ربع يديه وشاف فيه بكره) وكنتِ ناوي ديرها معايا تاأناا يااك ابدر (قرب جهتو وضرب يديه على لبيرو ونطق بنبرة غاضبة) أناا لي تانلوح راسي لعافية على قبلك ولي عمرت يدي بد'م الناااس قت'لت زورت خطفت درت لي مايطيحش فلباااال وكلشي على قبلك اولد لقح*بة وعمري قلت ليك لا وديمااا كاندير ليك لي بغيتي ونتا كنت ناااوي تگدمني وتلوحني فلعافية وتخليني نخلص گاااع لي درتي باااش لبولللليس مايشدوووكش.. (ضحك بجنون) هههههه كان يسحاب ليك بلي أنااا هو داك لمنونخ دعاااصم ونسيتي بلي أنااا إلياااااس لي تاحاااجة مكتخفى عليه (عوج فيه راسو ونطق بسخرية) كنت راسم لخطة لي غادير باش تهرب رحيل وتهرب معاها تانتا وبلا ماتخلي وراااك تاشي دليل خليتيني نشد بلاصتك وعطيتيني هاد الدار باش طمعني وباش تبتني.. كنتي بااغي تنقي كلشي باش تمشي مرتاح وتخليني أناا نوحل حيت أنا يديك ليمنية يااك (هز فيه حاجبو) هادشي كولو عرفتو وخليتك ضحك عليا بخاااطر خاااطرك وعند بالك راك مطووور وتاحد مبحالكش ونسيتي بلي راك ربيتيني على يدك وكلشي كيوصلني

كان بدر كولو تينهج هز راسو فيه وعينو حمرين وحالتو حالة.. مد يديه الثانية حطها فوق البيرو باغي يتكى باش ينووض ليه ولكن داتو فشلات ورغم دلك قاااوم ونطق بصوت ضعيف: وليتي كاضرب فالضهر اولد لقح*بة

إلياس:هاد الضريب فالضهر تعلمتو منك نتا وهادشي لي درت باش نوريك بلي ماشي إليااس لي تيتقولب ههه (كمش فيه حجبانو وتحنى جهة وجهو) بصح ابدر عقلك ناضي وراك ديب ولكن هاد لمرة دارت بيك (زاد قرب لجهتو ونطق بهمس كالفحيح) فخبااارك ولد لحاج عارف عليك كلشي؟

حل بدر الدين عينو من اخر كلمة قال ومع كان إلياس قريب ليه شنق عليه بدر بقوتو الضعيفة ولي غادة وكتختاافي بسباب السم لي بدا كينتاشر فجسمو بالكاامل.. ضحك إلياس ببرود ودفع ليه يديه تطاح بدر الدين بفشلة فوق البيرو متكي بيديه ونطق بنبرة ضعيفة: اش درتي از*بي

إلياس:(ببرود) كيف سمعتي اسي بدر ولد لحاج عارف عليك كلشي عرفتي شكون لي خلاه يعرف (برك على الحروف) أنا.. سيفطت ليه دوك الضواسى كلهوم لي فيهوم لخنز ديالك والتخت ديال فعايلك كلهوم طاحو بين يدين ولد لحاج وأناا لي عطيتهوم ليه..

هنا بدر الدين مبقاش قادر يتحمل لامن ناحية السم لي شد فيه وهلكو بلوجع ولامن لكلام لي سمع من إلياس وديك الحقيقة لي كانت بحال شي قنب'ولة تفرگعات فوجهوو.. ممتيقش بلي هاداك لي داير فيه التقة طعنو بواحد الطعنة عمرو ينساهاا.. مابين رجالو لي كيتيق فيهوم هو إلياس فالمرتبة لولة وعلي لي كان عارف كيفاش يخليه يولي وفي ليه.. كان مهبط راسو كينهج وشاد كرشو بخطوات تقال تيتمشى جهة إلياس لي عينو عليه ببرود مسمتع بشنو كيشوف وداكشي لي وصل ليه بدر الدين وكيفاش كيبااان ضعيف.. غادي بخطوات مترنحة تاوقف قدامو ومع قرب جهتو بغا يشد فيه إلياس رجع لور تاطاااح بدر الدين على ركابيه فشلااان.. ضحك إلياس ونطق بسخرية: الحر دالشمتة لي درتي فياا خلاتني نفكر فشي طريقة لي نخليك تهرس بيهاا ونخليك تعدب.. فكرت مزياان ولقيت بلي أحسن حاجة هي نسيفط لولد لحاج دوك الضواسى لي غايخليوه يعرف وجهك الحقيقي ويعرف بلي هاداك لي مشى يخطب خالتو اش كيسوى والروينة لي داير فحياتو.. كنت غادي معاك فالخط ومعاونك فالخطة ديالك وفنفس الوقت كنت تانتسنى لوقيتة لي يتحرك فيها ولد لحاج حيت دوك الضواسى راه غايسيفطوك نيشااان لمقبااارة.. ولكن ماعرفتش صراحة علاش باقي ساكت وماتحركش (تحدر إلياااس لجهتو ونطق بنبرة قاصحة) كون مفكرتيش تخدعني وتقولبني مكانش غايطرا هادشي ابدر ولكن تستاهل باش تحس بمعنى الضربة فالضهر.. كنت بااااغي نشوفك تاتموت قداااام عيني وندمك على شنو درتي واخا سيفطت دوك لوراااق لولد لحاج ولي غايجيبو آخرتك لكن ديك لحرقة ديال الغدر باقاا شاعلة ومبغااااتش تمحى وأنا عارفها مغاتمحى تانشوفك مودع.. داكشي علاش درت ليك السم فالقرعة دالشراااب وهاهو دايرة خدمتووو ههه

تحنى بدر الدين لقدام وهو كيكحب الدم لي نازل من فمو تاشوية طاح على ضهرو كينهج وداك الألم لي حاس بيه خلاه يتهلك.. فمو كولو مجلخ بالدم وعينو حمرين وكولو عرقااان تينهج.. تمشى إلياس لبرا دقائق ورجع هاز زوج قراعي دلسونس بين يديه.. حل وحدة وكمش حجبانو وشاااف فبدر الدين لي كان مراقبو فقط بنظراتو المصدومة.. باغي يتحرك وينوض يقتلو على لكلام لي سمع منو وديك الخيانة لي قولبو وطعنو بيها.. باغي يجن حيت مغايقدرش يكون مع رحيل وداكشي لي دار على ودها تضرب فالزيروو.. باغي ينوض ولكن السم دار خدمتوو وتسارى فجسمو كولو وبانو عوارضوو لي خلاو جسمو يتهد.. قرب إلياااس جهتو وبدا كيكب عليه ديك القرعة لولة دلسونس من رجليه وهو طالع تالفوق غير سالاهاا وهو يلوحها بعيد فالأرض وحل الثانية تاهي وبدا كيكبها عليه وضار تيكبها فالبيرو تاسالى وتبعها لختهاا وتمشى جهة الباب حلو وبدر الدين حل عينيه فاش فهم اشنو باغي يدير.. مد يديه بااش ينوض حيت غريزة البقاااء هي لي خدمات فديك الساعة وإلياس تبسم فاش شاف حالتو وضعفو لي عمروو ماشافو بيه.. مولف عليه يكون ديما قوي وياجبل مايهزو ريح.. يقت'ل الناااس ويتلذذ فعدابهووم.. غادي بمبدأ أنا وبعدي الطوفاان والناس لهلا يقلب جد بوهوم.. مولف يستاغل النااس لمصالحو الشخصية وأي واحد مغاينفعوووش كيتخلص منو بحال الاهو شي حاجة بالية مكتسوى والو.. رواح النااس عندو لعبة وشحاال من روح طييح ومشااات بسبابو هوو.. ليوم هاهو كيعيش نفس المعاناة ونفس الضعف لي كيعيشوه ضحاياااه.. منهوم ناس بريئين ومنهوم ناس يستاهلو.. ولكن هادشي مكيعنيش بلي راه من حقو يطغى ويدير هادشي.. كان متكي على يديه وهو كولو سارد بلسونس وبدا كيزحف شوية بشوية وإليااس مخليه يدير لي بغى وعاطيه ديك الفرصة بحال لاكيشمت فيه وكيقول ليه غير بلاماتحااول حيت اخرتك باينة.. جبد من جيبو بريكة وحلها وبدر الدين حرك راسو بلا ونطق بصوت تقيل: إليااس واياااك

مع نطقها لاح إلياااس البريكة ورجع لور وعينو كيشوفو فالعافية لي بدات تتشد فالبيرو وفجسد بدر الدين الملقى فالأرض.. كان صوت صرااخو مالي البيرو وكاسر داك السكون لي كان فالدار مع صوت العافية لي كانت تتاكل فالريدوات والبيرو وفجسد بدر الدين بجووع.. لهيبها انعاكس فعيون إلياس لي كان تيراقب المنظر بقلب بااارد وبعيون قاتمة.. ماشي أول مرة يطيح رووح ويكون سباب فموووت شي حد هادشي ولفو وبالنسبة ليه هاد المنظر عادي ولكن مغاينكرش بلي هاد لمرة حس بشي حاجة فلداخل ديالوو تحركات واش هي فرحة الانتقام ولاحسرة الخداااع لي تلقاااه من بدر الدين.. هو خانو وهانتيجة لخياااانة كيشوفها بين عينيه.. ضار عاطي البيرو بالضهر وصوت بدر الدين غادي وكيقلال تامبقاش كيتسمع نازل ببرود تاوصل لباب دالدار ومع حلو هجمو عليه لبوووليس ومنهوم صابر وبونس.. كان مستسلم ليهوم ومادار تاشي رد فعل بحال الاكان تيتسناهوم.. دارو ليه لمينوط وخرجووه من تم والصطافيطات دالبوليس واقفين فالدرب والناس واقفة تاتفرج وگاع الدراري دبدر جمعوهوم جملة مطلعينهوم فالصطافيط.. العافية بدا لهيبها كيخرج من الشرجم والدخان كحل طاير فالسما والناس كاتولولو والبوليس معيطين لبومبياا باش يجيو والبعض منهوم كيحاول يطفي ديك العافية قبل ماتشد كثر وكثر..

كان كلشي واقف فالدرب كيطل ويسول اش واقع وكيفاش هادشي طاري عندهوم هنا فهاد السيكتور.. لي حاكمو بدر الدين ولي ناسو تقريبا عارفينو اش كيسوى.. جات لبومبيا وبدات تاطفي فالعافية لي شعلات والحيحة دلبوليس والناس تماا شي كيصور شي كيسول كيفااش وقع هادشي.. وفالسطافيط لي فيها إلياس.. كان جالس وعينو على الزاج المشبك دالسطافيط كيشوف فديك لحيحة لي داار.. بدر الدين هو لي سبق وفكر يخونو وهو رد ليه الضربة بالثاني والمثني.. نسى بدر الدين بلي هاداك لي كان ناوي يخدعو مربيه على يدو وبلي كلما كبر كيزيد يقصاااح.. نسى بلي إليااس تلميذو واخد منو صفاتو كاملين.. الخبث والذكاااء والقوة والعقل.. هادشي لي كان تيخلي بدر يعول عليه وفيما يسافر ولاتوقع شي حاجة لي تخليه يغيب على لخدمة كان إلياااس كيتكلف.. كان هو ديك التكاااااية علامن تيتكى بدر ولي بسباب خبثو وأنانيتو وشرو هرسها وهاهي فأخر المطاف خوات بيه..

قدرو لبومبيا يطفيو العافية ودخلو لداخل لبيرو لي كان عبارة عن حطااام كلشي تحرق والعافية كلات كلشي.. كان البيرو عبارة عن خربة وتامن الجثة كانت كلها محروقة هزوهاا وداروها فكيس بلاستيكي فلكحل ونزلو هازينها فالبياااص تاركبوها فلومبلونص وركب صابر فلقدام وتحركات لومبلونص تابعاها البومبيا والصطافيطات مخلين لعيون دالناس متبعينهوم وكلهوم كيسولو اش وقع وشنو طراا؟؟

وصلو لسبيطار ونزلو ديريكت الجثة دبدر الدين مدخلينها لداخل.. والصطافيطات دلبوليس مشاو لكوميسارية.. كان صابر معيط لنوح وعلمو اش طاري شي لي خلاه بدون تفكير ينزل لداخلة باش يتأكد بنفسو حيت هو عارف واحد بحال بدر الدين فيه لقوالب وتقدر تكون هادي خطة منو..

🔜🔜

تحل لباب ودخل نوح بخطوات تقيلة La morgue "مستودع الأموات" لي كان بارد.. تبعو الراجل المكلف بتم غادي لثلاجة يجبد ليه الجثة دبدر الدين.. جر البياص وحيد لغطا لبيض على الكسدة وبعد مخلي نوح واقف كيشوف فجسد بدر الدين المحرووق ولي كان منظرو كيخلي التبوريشة طلع معااك.. ملامح وجهو تمحااو ومبقااازش مفروزين وداتو كلهاا مشوطة وكون ماتحليل لي دارو ليه باش يتأكدو من الهوية كون گاعما عرفووه.. كان تيشوف فيه بنظرات باردة كالصقيع وعاقد فيه حجبانو القهوين.. المنظر ماحرك فيه تاشي شعرة وفنفس الوقت ماشمتش فيه..بقا واقف مدة تاهز عينو فداك الراجل لي مكلف بتم ولي مكانش عارف قصة بدر ولي نطق بهدوء: الله يرحمو

نوح:(نزل عينو كيشوف فبدر الدين بنطرات باردين ونطق بصوتو الخشن) لهلا يرحم فيه شي عظم..

قال كلامو وعطى بالضهر لديك لكسدة دبدر المشوهة خارح من تم مخلي داك السيد حال عينيه من لكلام لي سمع منو..

كان إدريس واقف فالسطح وبين يديه التلفون ساهي فالكلام لي قااال ليه نوح فلابيل قبل شوية.. مقادرش يتيق بلي بدر الدين الجوهري مات وتهناااو منو فخطرة.. داك السمية لي عيشاتهوم فواحد لعداب ربي بوحدو لي عارفو ماات وبديك الموتة لي مغاينكرش أنه يستاهلهاا.. ساهي وكيفكر غير فردة فعل بنتو كيف غاتكون ملي تعرف بهاد الخبر.. تنهد وزفر النفس وهبط لتحت فين كانو البقية باقي جالسين كيف خلاهوم.. الصالة ولات حالتهاا الزربية توسخات والسداري مشتت فوقو الزاج والعصير مكبوب وفقنت الصالة جالس محمد طه مهبط راسو وساكت وفجنبو إسلام لي مرة مرة عينو تمشي لأسماء لي دفنات وجهها فصدر ريان ومبقاتش خرجات.. تاتسمع منها غير ديك التخصيصة لي تتخرج بين شفايفها مرة مرة وكتافها لي تيتهزو بلبكاا.. وفالمقابل ديالهوم كانت جالسة تانيرت وتاهي معنقة رحيل لي مانطقات بتاشي كلمة وساكتة.. ورنيم وغزلان كل وحدة حاطة الراس على لخرى.. وحدة مفاهمااش اش واقع وكاتسنى شي حد يشرح ليها والثانية قلبها ضارها على المصايب لي كاتعيش هاد العائلة بسبب عمها.. رجع شوفتو لكلثوم لي كانت باقي طايحة فالأرض تاهي تتبكي وتنخصص وباقي لدابا مقدراش تيق لكلمة لي خرج محمد طه من فمو ولي خلاتها تشوى من لداخل.. جلس إدريس فالسداري مربع يديه وعينو على كلثوم ونطق بصوت بارد:صافي تحدو ليك دابا اكلثوم هانتي طرتي تاعيتي فاللخر هاشنو ربحتي..

هزات كلثوم عينيها لحمرين تاتشوف فيه وهي ساكتة وبدورو سكت وقلب وجهو عليها عايف الشوفة فيها..كلما تفكر اشنو كانت باغا دير فحقهوم تايزيد يحقد عليها..صونى تلفونو وغير شاف النمرة خرج من الصالة مخليهوم على نفس الهدوء والسكوون.. نزل لتحت وحل لباب ولقى زوج بوليسين بلامايدوي معاهوم حرك راسو بمعنى اجيو معايا وطلع سابقهوم وهوما موراه.. وقف قدام الصالة ونطق ببرود:هاهي

هزو كاملين راسهوم وبانو ليهوم البوليس لي كانو غادين جهة كلثوم لي غير شافت واحد فيهوم جبد لمينوط وهي تنقز من بلاصتها ونطقات بلغوات:لا لا إدريس عفااك ماديرهاااش اإدريس

إدريس:(مكمش حجبانو فيها)نتي ماخليتي لينا تاحل اكلثوم وبيديك حفرتي قبرك.. نهار درتي يدك مع داك الشيطان كنتي تعولي بلي هادي هي اخرتك.. وداباا غاتمشي لبلاصة لي تستاهلي وغاتعاقبي على داكشي لي درتي فحق ولادك (أشار لمحمد طه وأسماء) ولادك لي كنتي ناوية تقتليهوم بداك السم بلاماتفكري فيهوم

كلثوم:(غوتات بهسترية) أناااا عمري فكرت نأديهوم ومكنتش عااارفة بلي سم أصلاا هاداك منووم ماشي سم هانتاا شوووف (جبداتو من صدرها وحلات ديك القرعة ناوية تشربهاا) أناا غانبين ليكوم بلي راااه منوووم هاداا ماشي سم

خطى إدريس خطوة بزربة هو ولبوليس لي شدوهاا وإدريس خطف القرعة بزربة قبل ماتصدق شرباهاا.. كانو شادينهاا لبوليس وهي تترطى بين يديهوم وتزيد تغوووت وعينيها على محمد طه لي واقف بلااحرااك.. كيشوف فيها وفنظرة عينيه خيبة أمل واضحة..

كلثوم:(نطقات بهسترية)محمد سمعني اولدي يااااك أنا ميمتك وعزيزة عليك يااااك فيماا كنتي تاتجي عندي وطلب مني لحاجة نديرها ليك بعيني مغمضين.. ملي كنتي صغييير عمري خسرت ليك خاااطرك وكنتي عزيز علياا كثر من ختك.. ياااك ماتبغيش تشوف مك فالحبس ونتااا عارفني مادرت واااالو اولدي (كانت تادخل وتخرج فالهضرة مبقات عرفات ماتقول) عااااار ربي لاماقول ليهوم يخليوني ااولدي ااااع طلقو مني إدريس أنااا كانبغيك ماديرش فياا هادشي وماتنسااااش خيري وبلي كون مكنتش أناا مكنتيش غاتربي بنتك أنااا لي رديت ليهاا لبااال ونتا عمرك سولتي فيهاا حيت حقدتي على مهااا أنااا لي ربيتهااا ليك أنااا (صدرها كايتهز ويتحط) قول ليهوم ماادرت والو اإدريس وخليووني بعدووو مني عطيوني بالتيساااع

دارو ليها البوليس المينوط وجروها خارجين بيها من الصالة وهي غادة وتاترطى وضور وتشوف غير فمحمد طه فقط وتغوت:لحنين ديااالي مغاااتسمحش فمك عارفاك حنين وااخا تقصح قلبك ماتبغيش تشووف مك مدوزة اخر ياماتها فالحبس محمد ولدي ماتبعدونيش على ولدي محمدددد وفكووني بعدو مني مادرت والو مكنعرفش أنااا بدر الدين عمري شفتوو ااااع طلقووو مني (شافت فتانيرت وهي تخنزر ودفلات) تفووو عليك القح*بة نتي السبااااب الله ياخد فيك الحق الشلحة الله يعدبك كيف تعدبت الله يعطيك المووووت الله يعطيك الكوووونسير الشلحة بغيت ليك لعداااب فالدنياا قبل الأخرة..

جر إدريس تانيرت معنقهاا وهو مخنزر فكلثوم وكون صاب يقتلهاا مور هاد لكلام والبوليسي عصباتو هز يديه وصلاهاا معااها فضهرها تاتكونسات ونزلوها لتحت وهي باقي مابغات تسكت تاتغوت ودخل وتخرج فالهضرة وبسباب غواتها الجيران خرجو دلحومة كيشوفو فطوموبيلة البوليس وكلثوم لي شادها لوليسي دايرين ليها لمينوط وهي تترطي وتحط وتهبط مرة تعيط لمحمد طه وترغب فيه مرة تعااير فتانيرت ورحيل مرة تبكي وتنخصص وتقول ليهوم مادرت والو.. حط لبولييسي يديه على راسها وركبها فالطوموبيل وركب جنبهاا والثاني شاف فإدريس ونطق بهدوء:تادوز لكوميسارية اسي إدريس

حرك ليه إدريس راسو وعينو على ديك الطوموبيل دلبوليس لي تحركات خارجة من لحومة شاعلة ضواو الأخضر والأحمر والناس تتفرج وشي يطل من الشراجم كيسولو اش طاري.. خنزر إدريس ونطق بصوت قوي:دخلو لداخل

كلشي دخل وبقاو هو لخر سد لباب على الجيران لي التبرگيگ قتلهوم باغين يعرفو اش طاري... طلعو كاملين لصالة وأسماء بوحدها لي مانزلاتش معاهوم وكانت جالسة وغوات مها واصل عندها ونحيبها على محمد طه ولكلام لي قالت عليه شق قلبهاا وخلاهاا تحطم لطالما كانت تتشوف الفرق دلمعاملة لي تادير مها بينها وبين محمد طه لي كاتخليها تحس بلحزن وشحال هادي كانت حاقدة على لوضع.. ولكن داباا شافت الحقيقة وسمعاتها وعرفات بلي مها مكتبغيهااش وبلي ولدها لوحيد هو محمد طه حيت هو ولد إدريس ماشي بحالها هي..سرطات ريقها وناضت باغا تخرج من الصالة وتختالي براسها باغا تبقاا بوحدها وتبكي وتخرج داكشي لي مجموع عندها لداخل.. ناضت باش تخرج ساعة حبساتها يد إدريس لي جرها عندو معنقها وهي غير ترمات فحظنو وحسات بداك الحظن الدافئ لحنين بدات تبكي بالجهد وهي شادة فيه.. كانت محتاجة لديك التعنيقة ولداك لحظن لي يحسسها بلي هي ماشي بوحدها وبلي عندها لي يبغيهاا.. وإدريس كان عارف بالضبط بنتو باش كاتحس.. واخا هي ماشي بنتو الحقيقة وهو ماشي باها لبيولوجي ولكن هو كيحس بيها وعارف تفكيرها وغير الشوفة فيها تايعرف واش هي مقلقة ولافرحانة.. رباها فاش كانت عندها ثلت سنين وتعلق بقلبها لبيض لي باقي هازاه فداخلها واخا الحياة قسحاتها واخا هي فليفلة كيف تيقول عليها ريان.. واخا هي هبيلة وباغا تعيش لحياة وعزيز عليها المظاهر هادشي كولو مغاديش يخلي إدريس ينكر بلي هاد لبنت قلبها بيض وحنينة.. بعدات أسماء عليه وهي تتمسح وجهها ونطقات بصوت مبحوح بلبكا: غانمشي لبيتي

إدريس:خليك بلاتي كاين واحد لحاجة خصني نگولها ليكوم؟

شاف فيهوم بجدية لي انتابهو ليها كاملين وكل واحد شد بلاصتو كايتسنى يسمع اش غايقول إدريس من غير رنيم لي عرفات الموضوع علياااش.. جلس إدريس فالسداري مقابل معاهوم وعينو مشات لرحيل لي هاز ليها لهم ولردة فعلهاا ملي غاتعرف الخبر كيف غاتكووون..

محمد طه:(مسح على وجهو ونطق بصوت ضعيف) لواليد نتا كيفاش عرفتي بلي (سرط ريقو مباغيش يقول سميتها) هي كانت متافقة مع داك لكلب؟؟

إدريس:(مسح على وجهو ونطق بهدوء) لقصة طويلة سكت إدريس والكل كان كيتسناه يهضر ويقول اش كاين..

إدريس:(بعد مدة نطق بهدوء) نهار الصدقة ديال ختكوم الله يرحمها رنيم سمعات كلثوم بالصدفة وهي تادوي مع داك لكلب وجات علماتني بلي كاين..

العيون كلها شافت فرنيم لي هبطات راسها وسكتات وإدريس كمل كلامو: من داك النهار وأنا مخلي رنيم تحط عليها لعين فاش مانكونش.. وحيت داك لكلب هو لي مسيفطها فأكيد غايكون ناوي على شي حاجة عليها بقيت ساكت نشوف اخرتها معاهوم..

محمد طه:(نطق بعصبية وبصوت مقهور) وهاد الشماااتة واش مغانتهناوش منو كل مرة غانعاودو نفس الديسك الواليد واااش البووليس مقدرووش يشدوه واخا گاع داكشي لي دااااار

إدريس:(شاف فيه ورجع شاف فرحيل لي كانت ساكتة ونطق بهدوء) حنا تهنينا منو وهاد لمرة فخطرة حيت هو مااات

كلشي حل عينو مصدوم من لخبر لي سمعو من إدريس ولي كان صادم ليهوم.. شي كيشوف فشي وكلهم كيسولو هو كيفااش ماات ؟ واش نيت بصح تهناو منو ولاهادي تاني شي لعبة دايرها عاود؟ أسئلة كثيرة كاضور فعقل كل واحد وأول شخص تكلم كانت رنيم لي نطقات بذهول:كيفاااش مااات وشكون قالها ليك اعمي؟

إدريس: قت'لو إلياس يديه ليمنية ولبوليس هوما لي علموني

تعمد إدريس مايدكرش سمية نوح ولايعاود ليهوم على الاتفاق لي كانو دايرين باش يطيحوه فالمصيدة.. ماتعمقش حيت نوح طلب منو هادشي وبغا الأمر يبقا بيناتهوم بزووج.. مباغيش رحيل تعرف بلي هو عارف ماضيها بحذافيرو وإدريس احتارم الرغبة ديالو..

إسلام:وهو كيفاش مات وعلاش قتلو

إدريس:على ماقالو لبولييس هو كان ناوي يغدر بيه ولاخر عرف وتحلفها فيه وبغا ينتاقم منو عليها عطاه السم وحر'قو وهو عايش..

تانيرت:يستاهل اش طرا ليه ودابا عاد غانقدرو نرتاحو حيت تهنينا منو ومن المشاكيل لي عيشنا فيهووم ربي خدا حقنا منهوم وهاهوما كيخلصو واحد بواحد..

عيون إدريس ماتحيدوش من على وجه رحيل وسكونها لي خلاه يحس بلخوف من جهتها.. كانت ساكتة ومانطقات بتاشي كلمة ومدارت تاشي ردة فعل.. وماشي غير هو لي رد ليها لبال إنما گاع لي كاين تما انتابهو ليهاا فاش ناضت من بلاصتها وتانيرت شدات فيديها ونطقات بصوت خايف:فين غادة ابنتي؟

رحيل:(بخفوت)بغيت نبقا بوحدي

زولات يديها من يد مها وكملات طريقها طالعة لفوق ومخلياهوم مشطونين عليها من داك السكات..

حلات باب بيتها ودخلات ومن زهرها سيدرا مكانتش ناعسة فلبيت حيت غزلان داتها لبيتها هي ورنيم.. طرقات لباب دلبيت وتمشات بخطوات تقيلة جهة نموسيتها وجلسات فيها بهدوء.. حالة عينيها ومكترمشش بيهوم فديك اللحظة ترفعات مور الكلمة اللخرة لي قاااال ليها باها ولي بدات تتعاود فدماغاهاا "بدر الدين مات" بحال شي ناقوس.. واحد لحجرة كاااانت محطووطة على قلبها مجرد ماسمعات لخبر انزاحت بحال الاعمرها مكااانت.. عقلها خلاها تفكر نهار لول شافتو ولخوف لي عاشتو بسبابو وكيفاش فكل مرة كان ملازمها ومركب فيها الرعب.. كيفاش تحرش بيها وكان غايغتاااضبهاا كون ماهي عتقات راسهاا منو أو وسخات يديها بدمو.. كيفاش هو بغاها تكوون ليه بزز وكل مرة تتبعد كان هو تيقرب منهاا.. كيفاش كان السباب فموت صاحبتهاا لي عمر حرقتها تقدر طفى فقلبها.. كيفاش فكل مرة كانت تاتقول أنا غانكمل حياتي وغانبدا من جديد وتايرجع تاني يبان ويعيشها فرعب لي عمرها تقدر تنساه..جميع دوك الدكريات الخاااايبة كانو تيدوزو قدام عينيها حدث بحدث.. كانت بحال شي وحدة جالسة فصالة السينما وقدامها شاشة كبيرة لي كيدوز منها العرض السينمائي وهي مع كل حدث قلبها كيتزير معاه وعينيها تايعمرو بالدمووع.. أحداااث درامية قاااسية هي ملخص العرررض لي مجرد ممات بدر طلعاات لكتاابة فديك الشاشة السوداء وتكتبات النهاية بحرووف دموية.. وطفى الضوو فديك القاعة باش ترجع لوااقع لي هي فيه.. شهقة طلعاات من أعماقهاا وهي حادرة عينيها ودموعها عمروو عينيها وفجأة طلعاات راسهاا وبدات تاضحك ضحكاات مجهدين.. الدموع فعينيها وضحكة واسعة مرسومة على شفايفهاا.. مدات يديها وهزات لمخدة ودفنات فيها وجهها وطلقااات واحد لغوتة مكتوومة.. لاحت ديك المخدة وناضت بزربة تتحرك راسهاا يمين وشمااال بحال لاتتقلب على شي حاجة لي معرفاش اشنو هي... جرات الكوڤرلي مزولاه بالجهالة من فوق ديك النموسية تاطاحو المخاد فالأرض بعشوائية.. مشات جهة الطابل دونوي وشتتات بيديها داكشي لي كان فوق منها تاتهرسو نص دلبرودوياات.. هزات قرعة دالريحة وشيرات بيها على ديك لمرايا تاتهرسات.. صوت الدقان فالباب مسموع ممزوج مع صوت إدريس والبقية لي كيعيطو بسميتها.. أما هي فكانت بحال شي وحدة مسكونة فديك اللحظة.. شعرها نتفاتو كولو أو وجهها رجع حمر.. وأي حاجة بانت ليها فديك لبيت تاضرب بيهاا وترونها تاتفرع لباب ودخل إدريس غادي جهتها باش يشدها وهي كاضرب فيه وتغوووت فقدات سيطرتها ونطقات بين شفايفها بصراخ: علااااش ماااااات دابااا علااااش تااااال دابااا عااااد مااات تاخرج ليا على حياااااتي ومرضني فصحتي وفخااااطري عاااد ماااات علااااش مماتش قبل مااانعرفووو علاااش مخصووووش يموووت داباا خصوو يتعدب كيف عدبني أنااا خصووو يمرررض كيف مرضني أنااا

كايشد فيها إدريس ومحمد طه وريان وهي تقول واش ولاو فيها عشرة.. إسلام مادخلش حدو واقف فلباب كيسمع لغواتها وقلبو ضرو عليهاا.. تمشى لبيت فين كاينة سيدرا ودخل ومن زهرها غزلان زولات ليها لباراي ومسمعاتش هاد الغوات والروينة دمها.. تسطح جنبها وجرها معنقهاا وهي ناعسة محساش بداكشي لي ضاير بيهاا..

بدا صدرها كيطلع وينزل وقوتها بدات تتلاشى ككل مرة كيجيها إنهيار تتكون هاكا حالتها ولكن هاد لمرة كانت غير.. هاد لمرة كااان انهيار من نوع اخر انهيار لي خرجات فيه رحيل گاع داكشي لي عاشتو بسباب بدر هاد السنين كلها.. انهيااار لي ختماات بيه معاناااتهاا وصحتها لي تهدات ونفسيتها لي مرضااات.. طاحت بين يدين إدريس وهي تاتشهق بضعف ونطقااات بصوت ضعيف: خرج لياا على حياااتي مرضني فصحتي الله ياخد فيه لحق.. مات مور ماعدبني ومرضني عاااد مااات صااافي تهنيت منوو ابااابااا صااافي تحررت أناا الله ياخد فيه الحق الله..

بدات تاتمتم بصوت غادي وكيقلال وهي حاطة راسها على صدر إدريس تاتنخصص تاحس إدريس براسها تقااال وعرفها غيبات تاااني.. هزها بين يديه ونعسها فوق النموسية وخاطرو مزير على حالة بنتووو..

---

سبحان لي يبيتها فشان ويصبحها فشان.. الدنيا حال وحوال ماشي ديما كانعيشو الفرح وماشي ديما كانعيشو فيه القرح.. الإنسان كل مرة كيعيش تجارب جديدة لي كاتخليه يتعلم ويربي المناعة.. عمر شي واحد عاش حياتو كيف باغيها ضروري مكايدوز من العقبات لي تيخليوه يعيى بعض لمرات وكيبغي يستسلم والإنسان طاقتو محدودة وهو غير من لحم ودم.. ولكن الإيمان ديالنا فالله عز وجل وتقتنا فيه كبيرة وعارفين بلي مهما قاسينا ومهما تعدبنا غايجي النهار وغايتحلو لبيبان دلخير فوجهناا عمرك تيأس من الرحمة ديال سيدي ربي..

حلات عينيها بتعب وكيف كل مرة حاسة بعضامها تقالين عليها وداتها كاضرها.. ضورات وجهها لجهة لخرا وبانت ليها تانيرت ناعسة جنبها وإدريس متكي فالفوطوي.. سرطات ريقها وناضت بشوية مبغاتش دير لحس.. زولات عليها الغطا وناضت تاتشوف فالبيت لي كانت حالتها بالروينة وبخطوات تقال مشات جهة البلاكار جبدات بنوار وحوايجها وقبل ماتخرج لاحت على راسها شال عاد خرجات غادة لحمام تاخد دووش تريح بيه داتها ونيت توضى باش تصلي صلاتها..

حل إدريس عينيه وحس براسو تعنكز بديك النعسة دلفوطوي.. لاح عينو جهة رحيل وبانت ليه بلاصتها خاوية وبزربة قفز وناض باش يقلب عليها تاتحل لباب ودخلات ببيجامة جديدة ولايحة بنوار عليها وفولارها.. زفر النفس وقرب جهتها ونطق بحنية: كيف بقيتي ابنتي؟

رحيل:(بصوت مبحوح)الحمدلله

باسها إدريس فجبهتها ونطق بهدوء وهو كيشوف فملامح وجهها الدابلين: ماتخمميش باقي فهادشي ونسايه ابنتي كلشي سالى وگاع الناس لي أداوك راه كيخلصو فعايلهوم واحد بواحد

حطات راسها على كتفو وهو عنقها لعندو كيطبطب عليها تاحلات تانيرت عينيها وتقادات بلاصتها ونطقات بهدوء:صباح الخير

ضارو جهتها بزوج وإدريس تبسم ليه:صباح الخير

تانيرت:(قربات جهتهوم وشدات فيد رحيل) شوية اماما دابا

رحيل:(تبسمات ليها بخفوت)اه ماتخافيش عليا

إدريس:غانمشي ندوش تانيرت اجي معايا

باست تانيرت رحيل فجبهتها وخرجات تابعة إدريس بينما رحيل تمشات ديريكت جهة صلايتها لي فوق لفوطوي وفرشاتها فاتجاه القبلة.. ولبسات إسدالها عاد بدات فصلاتها بكل خشوع..كل ركعة ركعاتها وكل سجدة سجداتها كانت تتحس بقلبها تفاجى وديك لغمة بدات تتزول وتمحى.. كل مرة تاتحس براسها تخنقات تتلجأ لصلاتها وتتشكي لي خالقهاا على شنو فقلبها.. ناضت تتجمع صلايتها تاتحل لباب ودخلات سيدرا بشعرها القصير لمنتوف وعويناتها لمعمشين باينة يالاه فاقت.. كانت جامعة شنافتها وباين فيها مقلقة..

سيدرا:(نطقات بصوت مرتافع)مامي مالقيتش لباراي ديالي

انتابهات رحيل لودنيها لي مافيهومش لباراي وعرفات بلي شي حد حيدهوم ليها لبارح.. جراتها باستها وسيدرا خاطرها مغير ورحيل عارفة حالتها كيف تتكون فاش تتسالي ليها لباراي وكيفاش تتولي..

رحيل:(شافت فوجهها ونطقات بصوت تقيل) ناخدو دوش ونبدلو حويجاتنا ونجيو نديرو لباراي واخا مامي

حركات ليها سيدرا راسها لي كانت تتقرا شفايف مها تتقراهوم.. هزاتها رحيل ومشات بيها لحمام دوشات ليها ونقاتهاا تاخرجات تتشعل ورجعاتها لبيت دارت ليها لباراي هوما لولين عاد بدات تاتلبسها حوايجها تااردات سيدرا لبال لديك الروينة ونطقات بتساؤل:مامي علاش هادوك مهرسين لهيه؟

شافت رحيل فديك الروينة وتنهدات ونطقات بهدوء: تهرسو بوحديتهوم امامي

سيدرا:(كمشات شنيفاتها)هااء واش طاحو مامي

رحيل:(باستها ففمها ونطقات بتبسيمة) اه طاحو اروح مامي

سيدرا:(عنقات رحيل ونطقات بتبسيمة)مامي نخرجو ليوم نمشيو لجردة

رحيل:واخا..

---

فلتحت كانت غزلان ورنيم تيجمعو ديك الروينة لي فالصالون وكل وحدة ساكتة وتتخمم.. جمعو داك الزاج لي مشتت عاد بداو كيحيدو فالطلامط باش يتغسلو.. هزات غزلان عينيها فمحمد طه لي غير من الشوفة باين فيه راه مانعسش وكان سهران..ماهضر ومقال تاشي كلمة حدو خدا تلفونو ورجع خرج بحاالو.. تنهدات وخاطرها زيرها عليه ومعرفاااش علاش بقا فيهاا وهزات ليه لهم.. خلات داكشي لي فيديها وتبعاتو بان ليها نازل لتحت غايخرج كمشات حجبانها ليوم الأحد ومكيناش خدمة فين غايمشي؟

غزلان:(نطقات بسرعة) محمد طه

كان نازل فالدروج وغير سمعها وهو يضور جهتها وشاف فيها بمعنى شنو..

غزلان:(تلبكاات وبقات تاضور فعينيها تانطقات بهدوء) ماغاتفطرش؟

محمد طه:(بصوت هادئ)مافياش الجوع

ضار باش يمشي وهي توقفو تاني بكلامها..

غزلان:ولكن ماخصكش تخرج ونتا مواكلش لفطور واجد طلع كول

محمد طه:(زفر النفس ونطق بصوت عياان) مبغيتوووش

غزلان:(نزلات فالدروج تاوقفات قدامو ونطقات بصوت حنين) واش نتا بخير؟

تنهد محمد طه وهو كيشوف فيها بهدوء.. سؤالها جااب ليه التماام وجوابو كان باين أو واضح بلي هو ماشي بخير.. ليلة دلبارح كانت قاصحة عليه وشي لي عرف كان صعيب على عقلو يتقبلو.. حدر راسو وبدا كيحك جبهتو بيديه وهي واقفة تاتشوف فيه بحزن على حالتو...

محمد طه:(شاف فيها ونطق بهدوء) اه

غزلان: متأكد؟

محمد طه:(ساط النفس ونطق بعصبية) غزلاااان قلبي عليا هاد الساااعة الله يرحم بااااك

كمل طريقوو لتحت وهي بقات واقفة تاتشوف فيه تاختفى قدام عينيها وسمعات صوت لباب تسد وهي تنهد بحزن وبقلب مهموم رجعات لداخل وبالها مشطون معاه كلما تفكرات حالتو كيف كانت لبارح ولكلام لي خرج من فمو ولحرقة باش كان تيدوي ولي باين فيه مقصح من لداخل واخا مباغيش يعتارف ولكن هي حاسة بيه.. وخلاص فاش عاودات ليها رنيم خلاصة الموضوع وفهمااتو زادت تشطنات معاه ومع رحيل لي انهيارها خلاهاا تشفق عليها وعلى مادوزات فحياتهاا.. رجعات تاتكمل شغالها وعقلها مرفووع..

حاطة راسها على لكادر ديال النموسية وعينيها منفوخين بلبكاا لي بكاتو ليل كولو.. داك لكلام لي قالتو مها باقي كيحفر فيهاا شوية بشوية.. كلام كلثوم عمرو يقدر يتمحى من بالها وتنساه.. هاد ليام كلها وهي تتنعس جنبها وتمشط ليها على شعرها وتدوي معاها بحنية واهتمااام.. كلشي كان كدوب ودارتو غير باش تخليهوم يتيقو فيها وتبتهوم.. مقدراتش تيق بلي مها وصلات بيها أنها تستاغلهوم غير باش تنتاقم من حاجة مكينااااش.. حاجة لي كبراتها كلثوم فعقلها وتيقاتهاا وعند بالها هي الصح.. لكلام دلبارح وداكشي كولو لي طرا خلى قلب أسماء يحقد على مها.. اه حقدات عليهاا وكرهاتهاا.. عمرها كانت تاظن غايجي النهار لي تعتارف فيه بينها وبين نفسها بلي هي مبقاتش تتحمل مها وبلي كاتكرهها.. قبل فاش غلطات كلثوم معاهوم تقلقات منها وتصدمات فيهاا أو واخا بدات تتجاهلها إلاأنه مرة مرة قلبها يحن ليها ولكن دابا داك لقلب كحااال من جهتهاا ولكلام لي قالتو ليها لبارح تتعنيه بلحرف.. هي صافي تبراتها ومن ليوم هي عندها غير باااه وبس ومها ماتت الله يرحمها.. وعمرها غاتجبد سميتها وتاسيرتهاا فحياتها كلها والاكتاب وعندها ولاد صغار سولوها على جداهوم غاتقول بكل بساطة هي ماتت ملي كنت صغيرة... مدات يديها تتمسج دموعها لي نزلو من جديد تاسمعات الدقان فالباب لي تحل ودخلات تانيرت لي تبسمات ليها بحنية وغير شافت وجهها قلبها تزير عليهاا.. قربات جهتها وجلسات جنبها ونطقات بهدوء:كيف صبحتي ابنتي؟

أسماء:(نطقات بصوت ميحوح) ماشي بخير حاسة براسي مخنوقة وباقي لدابا مقدراش نتيق شنو طرا لبارح وكيفاش ديك لمرا كانت غاتقتلناا كولناا بسباب الحسد لي فيها من جهتك بلا ماتفكر فولادهاا

تانيرت:(شدات يديها ونطقات بهدوء) عارفة داكشي لي عشنا لبارح صعيب عليك نتي ومحمد طه.. ملي باباكوم لبارح قالها لي تيقي بيا مافكرتش فيا ولافتاشي حد قد مافكرت فرحيل وفيك وفمحمد.. رحيل لي عارفة سمية بدر فيما تتجبد قدامها تاتنهار كيف وقع ليها لبارح.. ونتي ومحمد طه لي فكرت فشنو غايطرا ملي تعرفو هي اش دارت.. هزيت ليكوم لهم حيت عارفة هاد لمرة الدقة غاتكون قاصحة عليكوم بزاف..

أسماء:(عينيها تغرغرو بالدموع) هاد لمرة الدقة هرساتنااا وصعيب نقدرو نساوهاا

تانيرت:(مسحات ليها دموعها ونطقات بحنية وبتبسيمة خفيفة على وجهها) باركة من الدموع ابنتي لي وقع وقع وغير تتهلكي صحتك هاكا.. وتيقيني هي لي خسراات ماشي نتوما.. خسرات ولاد لي أي واحد يتمنى يكونو عندوو.. ونتوما راه ماشي بوحدكوم دابا معاكوم باكوم ومعاكوم خوتكوم ومعاكوم تاأناا بصح أنا ماشي مكووم لي ولداتكوم ولكن ربي شاهد بلي بحالكوم بحال ريان ورحيل ومعزتكوم فقلبي بحالهوم..

أسماء:(قربات جهتها وعنقاتها وهي تتبكي) تمنيت كوون كنت بنتك من لحمك ودمك.. كون كانو الولاد كيختارو واليديهوم كون ختاريتك نتي تكوني ماما وماشي هي

تانيرت:(عنقاتها بحنية كاتمسح على شعرها) ودابا نيت باقي لحااال لابغيتي نكون ماماك غانفرح بزاااف ابنتي

أسماء:(زيرات عليها تتبكي) بغيت

دموع تانيرت نزلو وقلبها ضرها على أسماء.. ماشي غير هي لي سمعات لكلام لي نطقات بيه كلثوم لبارح وكيفاش بينات بلي هي تتبغي محمد طه كثر منهاا.. صعيب بزاف تسمح من مك داك لكلام لي تيجرح ولي تيخليك تشوف قيمتك عندها وبلي مكتسوى والو.. بقات معاها تانيرت تابردات عاد بعداتها على حظنها ونطقات بتبسيمة خفيفة:سيري خودي ليك دوش ونزلي باش تفطري واخا ابنتي

حركات أسماء راسها تتمسح دموعها وتانيرت خرجات من عندها وهي تاتنهد على الحالة لي واصلين ليها ولادهاا.. نزلات لتحت لقات ريان وإسلام جالسين قدام الطبلة وتاحد ماكلى شي حاجة.. كل واحد فين ساهي كيخمم.. قربات تانيرت جهة ريان وقاست شعرو تاشاف فيها وتبسمات ليه بحنية وهو قرب حط راسو على كرشها معنقها وهي بدورها عنقااتو..

ريان:(تنهد) كيف بقات رحيل

تانيرت: كيف ديما كاطيح وتعاود تنوض

هزات تانيرت عينيها فاش سمعات صوت سيدرا.. كل واحد فيهوم رسم تبسيمة على وجهو باش مايخليوهاش تعيق بلي كاينة شي حاجة.. مع هي قويفرة والامشات تالقطات شي حاجة غاتبقا تسول وتسول وماترتاح تاتعرف اش كااين.. قربات جهة ريان لي هزها وجلسها فوق ركابيه وهي نطقات بتبسيمة:رياني أنا ومامي غانخرجو

ريان:(شاف فرحيل لي شدات بلاصتها بهدوء ونطق)فين غاتمشيو؟

سيدرا:جريدة انمشي نلعب فزعلولة رياني

ريان:صافي نمشي معاك تاأنا نلعب ونديو تاإسلام يااك

إسلام:(قرصها فحنكها بخفة)نمشيو نلعبو تاحنا

سيدرا:(ضورات وجهها ونطقات بخفوت)فين مودي

غزلان:(جايبة صينية دأتاي ولقهوة) خرج فالصباح

سيدرا:وبّا ديدي

إدريس: هاني انخشيشتي

نزلات من عند ريان ومشات عندو تتجري تاهزها وبدات تتعنق فيه وتبووس وهو تيضحك معاها.. شدو بلايصهوم على طبلة لفطور تاجات أسماء تاهي وباين فيها طافية عكس داك لحماس لي تيكون فيها.. جلسات جنب رحيل بلاماتهز الراس فتاشي حد ولاتدوي مع شي حد..

بزز باش فطرو وكل واحد ساكت مكيدويش مع لاخر من غير صوت سيدرا لي كيتسمع وإدريس لي شاد ليها لخاطر كيجاوبهاا.. كان كل مرة يهز عينو ويشوف فبناتو لي كل وحدة فين ساهية.. سالى فطورو وناض خرج غادي لكوميسارية وغزلان ورنيم ناضو جمعو ديك الطبلة ومشاو باش يكملو ديك الروينة لي فالصالة..

سيدرا:(جرات رحيل ونطقات بتذمر) مامي يالاه لبسي حوايجك باش نمشيو لجردة

رحيل:(تنهدات)سيري مع ريان وإسلام

سيدرا:(حركات راسها تاشعرها لقصير مشى وجى ونطقات مكمشة حجبانها)لاا يالاه معايا تانتي مامي

رحيل:(شدات يديها ونكقات بهدوء)راسي كيضرني امامي سيري مع ريان تال مرة خرا ونمشيو أنا وياك

سيدرا:(حطات راسها على كتف رحيل)صافي مغانمشيش أنا تاتبراي ليا

ناضت رحيل هازة سيدرا وتاريان ناض وبقات غير أسماء وإسلام بوحدهوم لي جالسين.. هي حادرة راسها كاتلعب بتفرتيت دلخبز وهو حاضيهاا.. تحنى شوية لقدام حاط يديه على طبلة مربعهوم ونطق بصوت هادئ..

إسلام:شوية دابا

هزات عينيها تاتشوف فيه بلاماتنطق بتاشي كلمة.. وتاهو ركز شوفتو فعينيها القهوين الذابلين ولمطفين.. ماشي هاكا مولف يشوفها وحالتها خلاتو تبقا فيه على ماطرا لبارح.. وعارف بلي صعيب عليها لحال حيت هاديك مها ماشي شي وحدة غريبة.. مد يديه وشد يديها لي محطوطة فوق الطبلة ونطق بصوت هامس: التقليقة مكتجيش معاك اغزالي..

حدرات أسماء عينيها لجهة يديه لكبيرة لي كانت محطوطة فوق من يديهاا ومزير عليهاا ورجعات شافت فيه ونطقات بهدوء: شنو بغيتيني ندير مثلا وأنا عارفة بلي ديك لمرا دارت يديها فيد واحد لمريض وكانت غاتقتلنااا كاملين بلاماتخمم فينا ولادير بحسابناا.. استاغلات مرضها غير باش تخلينا نحنو فيها ونشفقو عليها.. شنو بغيتي نتصرف وأنا كانسمعها بودني وهي تاتقول بلي محمد طه هو ولدها لعزيز وبلي تتبغيه كثر مني..

كانت تادوي بواحد لهدوء لي كافي يخليه يعرف بلي لي طرا معاها هرسها.. تاهو سبق ليه وتطعن من أقرب الناس ليه وعارف المرار باش تتحس.. غير هو لفرق دقتها صعيبة حيت هاديك مهاا..

إسلام:(نطق بنفس لهدوء) عارف بلي داكشي لي سمعتي لبارح وعرفتيه صعيب عليك نتي ومحمد طه..

أسماء:(قطعاتو ببرود) داكشي مبقاش كيهم دابا وديك لمرا مانبغيش سميتها وسيرتها تعاود تجبد قدامي وكيف هي ماهتماتش بينا تاحنا مغانهتمووش بيها.. وهاديك لمرا أنا دفنتها (نثرات يديها وضربات بيهوم بزوج ونطقات وهي هازة كتافها بلامبالاة)صااافي بااح

دفعات لكرسي وناضت باش تمشي لبيتها وهو يحبسها إسلام فااش شدها من دراعها جارها عندو بلامايدوي.. معنقهاا ومخليهاا تخشى وسط صدرو وهي بقات تابتة ماتحركاااتش تادموعها مانزلاتهومش بحال الادوك الدموع مخزونهوم سالى عندها.. وتاهو معرفش علاش عنقها فقط تبع إحساسو وعقلو لي قالها ليه ونفد الطلب بكل سرور.. كيدوز يدو على شعرها تاحس بيها دفعاتو ومشات لبيتها بلاماتشوف فيه مخلياه واقف كيزفر النفس تاطلع لبيت ريان فين كان مخلي تلفونو وسوارتو هزهوم.. ونزل لتحت بلامايدوي مع تاشي حد خرج لبرا فين مبلاصي طوموبيلتو ركب وهو تيركب السمطة وعقلو كيرجع يفكرو فحالة أسمااء.. عقد حجبانو بعصبية ودمارى طوموبيل حاك الروايض مع الأرض غادي منير..

خرجات رنيم من لحمام تتنشف شعرها وتمشات لبيتها هي وغزلان دخلات وجبدات السيشوار وبدات تنشف شعرها كولو تاهزات عينيها فالمرايا وشافت تلفونها لي كان شاعل.. كمشات حجبانها وتمشات جهتو ومع هزاتو شافت لابيل ديال علي تاقطع عاد حلات تلفونها وبدات تتقرا ببرود فمساجاتو لي كلهوم تهديدد وسبان.. جات تحط تلفونها وهو يرجع صونى عليها وهاد المرة جوباتو بصوت بارد:شباغي؟

علي:(غوت صاعر) اش هاد التقحب*ين لي تاديري معايا ابنت لقح*بة ياك تافقنا لاتهنينا من هاد لقلا*وي غانهربو أنااا وياك

رنيم:(ضحكات بسخرية) اشمن هروب واش من نيتك؟

علي:(مسح على وجهو ونطق معصب) سمعي ارنيم هاد لفعايل نتي عرفاهوم مكيعجبونيش بلاماتمرضي زاا*مل بوياا وفالليل وجدي راسك نتلاقااو ف *** باش نتحركو من هنا كيف تافقنااا

رنيم:(بهدوء)هادشي قلتو ليك باش نتبتك وصاااف ولكن بنتي ليا تيقتي كلامي اوا سمع (كملات بكره) أنا عمري غانشوف فيك سمعتي واخا تبقا اخر واحد فالدنيا كانكرهك اعلي لانتاا ولابدر ولاإليااس كلكوم كرهتكوم وكرهت عائلتي تامن كنيتي كرهتهاا ومبقيتش حاملاها

علي:(ضحك مغدد ونكق تيتحلف عليها) عند بااالك ابنت لقح*بة غانخليك وغاتهناااي مني برب لاتهنيتي وكلامك كولو غاتخلصييه ونوريك علي اش كيسووى..

رنيم:لي فجهدك ديرو مبقيتيش تتهمني سمعتي ساعتك سالااات وتانتااا غاتخلص بحال بدر وإلياس غير وجد راسك

علي:(غووت بجنون) برب لابقااات فيك عقلي عليهااا

باقي تيسب ويغوت وهي طفات عليه التلفون وهي خايفة من كلامو وداك التحلاف لي كيتحلف عليها.. بدات غادة جايا معارفة اش دير وتتسول كيفاش باقي ماشدوهش.. خرجات من لبيت وعقلها مشطون بهاد المشكيل عاود.. مقالتها لتاشي واحد حيت لي فيهوم كافيهوم عليها بقات ساكتة..

كانو جالسين مجموعين فالصالة وإدريس كيعاود ليهوم على داكشي لي طرا معاه فالكوميسارية..

إدريس: ليد ليمنية ديال بدر عتارف بكلشي

ريان:(كمش حجبانو) غايكون عتارف بلي كلثوم تافقات مع بدر؟

إدريس:اه وتاداك التسجيل دالصوت ولفيديو راه دليل فحقها وزيد السم لي كانت هازاه معاهاا راه دليل كافي يزيد يتبتها

تانيرت:وشنو دابا غايوقع؟

إدريس:(بهدوء) غايدوزوها قدام وكيل الملك

سكتو جميع وناض إدريس هو وتانيرت غادي لبيتو وبقا غير محمد طه وريان مع لبنات لي جالسين ساكتين تانطق محمد طه ببرود:دابا غانقدرو نرتاحو حيت تهنينا من تريكة الجوهري وقطعنا ليها الجدر من الساس ملي مات داك لكلب

أسماء:هادشي كان خصو يوقع من شحال هادي دابا عاد غانقدرو نتنفسو براحتنا ورجعو نعيشو حياتنا كيف كنا عايشينها قبل بلامرض تريكة الجوهري وبلالحسد ديال ديك لمراا

تنهدات رنيم تنهيدة مسموعة وعقلها مرفوع تيفكر غير فبلان علي.. واحد لعقل قال ليها تنوض تمشي عند إدريس وتدوي معااه ومتسكتش.. ساهية تاسمعات صوت محمد طه لي كان موجه ليها كلامو: غايكون بقا فيك لحال حيت عمك ماات ياك؟

رنيم:(شافت فيه)مافهمتش

محمد طه:(ببرود)من الصباح ونتي ساهية وباين فيك مقلقة غاتكوني مقلقة عليه حيت فلول وفلخر كيبقى عمك واخا تكرهيه تاتعيااي قلبك ولابدما يحن

رحيل:محمد طه (شافت فيه بجدية)

محمد طه:شنوو قلت غير لي كااين ارحيل ماشي هاداك عمها وبالسيف مغايبقا فيها لحال حيت مااات

أسماء:محمد طه سير تنعس

محمد طه:(ضحك بسخرية) اه حسن ليا نقوود بحالي هاد الساعة

ناض خرج من لبيت ورحيل شافت فرنيم لي تزيرات ونطقات بهدوء:ماتديش عليه نتي عارفة الحساسية ديالو فهاد الموضوع ارنيم عفااك ماتهزيهش فقلبك من جهتوو

حركات راسها باه ولكن من لداخل كانت هازة حيت ماشي أول مرة يديرها ويلوح ليها هاد لهضرة.. سبق دارها وسكتات وقالت ماعليش ارنيم صبري ومتنسايش بلي عندو لحق وعائلتك دمراتهوم ولكن ماشي كل مرة غادوزها وتسكت حيت فيما غايوقع لمشكيل غايجي عندها ويعاود يسمعها هاد لكلام.. راه ماشي غير هوما لي ضررو من بدر وفعايلو راه تاهي بلعكس لاجات تقول ليهوم اش عاشت ومناش تحرمات غاتبقا فيهوم.. كان كلشي ناعس وهي مخشية فبلاصتها ونعاس مداهاش تلفونها كل مرة يصوني بمساج من علي فيه غير السبان والتحلاف.. دموعها نزلو وحسات براسها مخنوقة.. ناضت من بلاصتها وخرحات من لبيت تاضور وجهها فداك الظلام وبهدوء تمشات لفوق طالعة لسطح.. غير حسات براسها بوحدها وهي تفرگع بلبكاا حاسة بكلشي ضددها.. لاأم تحن فيها ولأب يطبطب عليها ولاخوت يحسو بيها.. هي بوحدها تاحد مامعاهااش.. بكات وفشاات قلبها تاحسات براسها ضرها.. وفديك اللحظة فكرة وحدة طاحت فبالها أنها توضع حد لحياتها يمكن هاكا غاتهنى من هادشي لي هي فيه.. وغاتهنى تامن علي لي عرفاتو مغايخليهاش.. قربات جهة واحد السلوم قصير حاطينو تماا وجراتو حاطاه حدا لحيط وطلعات فدوك الدريجات ديالو تابدات تتبان ليها الزنقة لتحت والريح كيضرب فوجهها ويطير شعرها.. عارفة هادشي لي غاديرو خايب ومخصوش يكون ولكن هي صافي عياات وملات.. حطات يديها على السطارة دالسطح وغمضات عينيها ناوية تنفد لي فبالها بدون تردد..

كيقولو لصبر حدود وصبرها هي فات حدو.. عيات ماتصبر وتكمل حياتها فين وقفاتها وتعيش ديك لحياة لي هي كانت باغا.. واخا من صغرها كان كلشي متوفر عندها ولي بغاتو تتلقاه ولكن مكانتش عندو لحلااوة عندها.. حيت النقص العائلي كان طاغي ومخليها تبرد من جهة دوك لحوايج لي متوفرين ليها.. كانت ضح'ية تاهي لديك العائلة لي من لحمها ودمها تاهي عانات بسبابهوم وباقي لدابا تتعاني بسباب ديك لكنية لي من جيه تتكرهها ولي من جيه تتعتابر الدكرى لوحيدة من باهاا.. عياات وملات وقررات توضع حد لحياتهاا بالانت'حار كيف ولينا كنشوفو أغلبية دالناااس لي فيما كاتكحال الدنيا فعينيهوم وكيوقعو ليهوم شي مشاكيل تايكون لحل لي عندهوم هوما يمشيو لفوق شي سطح دلعمارة ولى شي بلاصة عالية ويلوحو منها راسهوم بلامايفكرو فشنو مخلين وراهوم.. ممفكرينش فحالة عائلاتهوم والناس لي ضايرين بيهوم والأهم مفكروش فلي خالقهوم.. بسم الله الرحمن الرحيم { يَا أَيُّهَا الَّذِينَ آمَنُوا لَا تَأْكُلُوا أَمْوَالَكُم بَيْنَكُم بِالْبَاطِلِ إِلَّا أَن تَكُونَ تِجَارَةً عَن تَرَاضٍ مِّنكُمْ ۚ وَلَا تَقْتُلُوا أَنفُسَكُمْ ۚ إِنَّ اللَّهَ كَانَ بِكُمْ رَحِيمًا (سورة النساء الآية 29)}..

كانت مُصرة على تنفيد قرارها.. حاطة يديها بزوج على السطارة دالسطح وطلعات فدرجة لخرة دالسلوم وقلبها حاسة بيه كيضرب.. غمضات عينيها ناوية طيح تاحسات بيدين قوية شدوهاا من خصرها جارينهاا بالجهد تاطاح داك السلوم وطاحت تاهي مكمشة حجبانها بسباب الطيحة لي قصحاتهاا.. كانت كلها تترجف حلات عينيها وضارت وراها بان ليها ريان لي كان طايح شاد جنبو مقصح منو.. حل عينيه الفحمية وشاف فيها وهو مخنزر وملامح وجهو كانت الجدية مرسومة عليهوم..عمرها شافت ريان بديك الجدية.. تقاد فجلستو ونطق بصوت معصب وهو مخنزر فيها: اش كنتي ناوية ديري المرررض

رنيم:(هبطات راسها تتبكي ونطقات بصوت مبحوح) صافي عييت بزاااف مبقيتش قادة نصبببر ارياان

ريان:(قرب جهتها وشد كتافها تاشافت فيه ونطق بجدية) واش نتي عااارفة راسك الغلط لي كنتي ناوية ديره اش هووو

رنيم:(غوتات) اه عاااارفة كنت غانتهنااا من هاد لعداب ولحگرة لي عيشاااهاا فمرررة (خفضات صوتها) عييت كل مرة يطرا مشكيل وتجيو عندي تلوموني عليه وأنا مادررت لابيدي ولابرجلي اشنوو دنبي هااا واش غير حيت هاداااك عمي خصني نهز فرقبتي الغلط لي داااار

ريان:(ببرود) ومالقيتي ماديري قلتي اجي نلوح راسي من السطح وهاكا غانتهنى ياااك؟ وعند بالك هادا هو لحل (غوت بعصبية)مافكرتيش فالناس لي غاتخلي وراك اش غايطرا ليهوم هااا مافكرتيش فرحيل رحييييل لي أكثر وحدة تقصحااات بينااا وكلات الدق ومع دلك بقاااات صابرة وصامدة ونتي كنتي شاهدة على داكشي لي دوزات بالتفاااصيل ولعداب لي عاااشتو واش عمرهاا فكرااات تنتاااحر هاااا واش عمرك لقيتيها واقفة فديك لبلاصة ناااوية تلوووح راسهااا لاااا عمرهاا دارتها وعمرهاا غاديرها عرفتي علااااش حيت هي ماضعيفااااش بحاااالك وعارفة بلي هاديك المحنة لي هي فيهاا ولابد ماغايجي النهار لي غادي تسالي.. كل مرة كانت تاطيح فيها كااانت تاتلجأ لي خالقها وتتخوي لي فقلبها وتشكي ليه.. مكانتش تتخلي داك الضعف يبقااا مسيطر عليهااا وتخلي الشيطان يوسوس ليهااا بحااالك نتي.. مكانتش شخصيتها ضعيفة كيفك نتي واخااا لي طرا بقاااات واقفة.. واخا الدق لي كانت تتاكلو كانت تاطيح وتنوووض باش تبقاا عايشة وكانت تتفكر فعائلتها وفبنتها ونتي علاش مافكرتيش فيهوم..بسباب محمد طه وكلامو ضربتي علينا حنا نسيتي لواليد لي حل ليك باب دارو ودارك بحال بنتو كون كان حاس بيك بحاااال تريكتك عمرك كنتي غاتعتبيهاا عندووو نسيتي مّي ونسيتي رحيل وأسماء وسيدراا نسيتي كلشي وبقيتي شادة فكلام محمد طه لي أصلا مريض فمخووو وعارفااه اش دوز وبلي لكلام لي تيقول مخارجش من قلبو وبلي داكشي لي نطق بيه بسباب الحرقة لي باقا شاعلة فيه من جهة جيدااااء ومن جهة كلثوووم وشي لي دارت.. مكاندافعش عليه ولكن كانوضح ليك الحاجة لي خصك تعرفيهاا أناا لي عارف محمد طه وشفت كيف كااان قبل وشايف كيف ولى دابا (هز ليها راسها وشاف فيها بجدية) نتي ماشي بحال عائلتك ارنيم نتي حسن منهوم ماتخليش كلام بحال هاكا يهرسك.. خصك تكوني قوية تانتي وتكون عندك شخصية قوية ماشي ضعيفة الريح لي جاا يديك

رنيم:(شهقات) أنا بغيت غير نرتاح ارياان بغيت نعيش حياتي كيف لبنات لي فعمري.. نعيش داكشي لي ماعشتوش مع عائلتي

ريان:(عنقاها ونطق بهدوء) غاتعيشي ارنيم غاتعيشي باقي لحياة قداامك نتي غير عرفي كيف تستاغليها وتعيشيها بحلاوتهاا..

بقا كيطبطب عليها مخليها تبكي تافشات قلبها عاد بعدات ونطقات وهي مهبطة راسهاا حشمانة منو:سمحلياا ارياان

ريان:(تبسم ليها)ماتقوليش هاكا البرهوشة

تبسمات ليه وناضت نازلة لتحت مخلياه جالسة فبلاصتو كيتنهد وكيتفكر اللقطة لي كانت واقفة فيها فالسلوم وكانت ناوية طيح..

كان نازل غادي لبيتو وعينو لمحات الضو لي شاعل فبيت محمد طه.. كمش حجبانو وقرب جهة الباب دبيتو ناوي يدوي معااه تاهو.. حل لباب بلامايدق ولقاه مخشي فبلاصتو فالنموسية لابس غير شورط وحاط لبسي فوق ركابيه وداير ليزيات.. هز عينو فيه وكمش حجبانو ناطق بهدوء: مالك؟

ريان:(قرب جهتو ونثر ليه ليزيات وسد البيسي ونطق بهدوء)خصنا ندويو

محمد طه:(قلب عينو ونطق ببرود)ومجاتكش لهضرة غير فز*ك الليل اصاحبي

ريان:(واقف عليه مربع يديه ونطق تاهو ببرود) نيت باش تاحد مايسمع كلامنا وناخدو راحتنااا

تكى محمد طه راسو على لكادر ديال النموسية كيشوف فيه وكيتسناه يبدا كلامو واخا عارف هو علياش غايدوي..

ريان:عاجبك هادشي لي كادير فراسك؟

محمد طه:(ببرود)اش كاندير

ريان:(عصبو بالبرود ديالو)والو غير ساد على راسك وعايش فالأحلااام ديالك لي بانيهوم فدماااغك ومباغيش تفيق منهوم از*بي

محمد طه:(ساط بعصبية)ريااااااان

ريان:(خنزر فيه)غاندوي ونتا غاتحل ودنيك وتسمعني مزياااان تال إمتى غاتبقا هاكااا مرض روحك ومخلي النااس هازين همك همم واااش مكتفكرش فينا حناا وفحالتنا فاش كانشوفوك هاكا

محمد طه:(قلب وجهو ونطق بصوت رجولي)علاه مالي أناا راني بخير ومناقصني تااااحاجة

ريان:(هز حاجبو)متأكد؟؟

جر ريان لبيسي ومحمد طه خنزر فيه ولاح لغطا باش ينوض ياخدو ليه ساعة سبقووو ريان وحلو وبانت ليه تصويرة دجيداء مالية الشاشة.. ضور ليه لبيسي ونطق بعصبية:وااااش باقي معيتيش هااا ست سنين وباقي مباغي تقبل بلي هي صااافي مااتت ومبقاااتش كاينة فهاد الدنيا مشااات وعمرها غاترجع...

محمد طه:(جر ليه لبيسي ساعة ريان بقا شاد فيه ونطق بعصبية) ماشي شغلك سمعتي دخل سوووق راسك

ريان:(جر لبيسي بالجهد غفلو ولاحو فالأرض تاتقسم على زوج ونطق ببرود)لاسوووقي ومتنساااش راني خوك لكبير ومن واجبي نصحك ونبهك وأناا شايفك غااادي فطريق مظلمة ماليهااا رجووع

عينو على لبيسي لي تهرس ومزير على يديه.. لبيسي كان فيه گااع تصاورها ولفيديوات لي كانو تايديرو مع بعضياتهوم بتلاتة.. هز عينو فريان وقرب جهتو عاطيه بوكس لوجه مع مكانش عوال عليه رجع لور تاكالاه لحيط ومحمد طه نطق بعصبية: وادخل سوووووق كر*ك وفرقني عليك

ريان:(مسح على لبلاصة لي تضرب فيها ونطق باستفزاز)صافي هادا هو جهدك الخوو

محمد طه تعصب ومبقاش كيقشع قرب جهتو ناوي يشنق عليه ساعة ريان سبقو هاد لمرة وعطاه تاهو بوكس ونطق مخيخ: عايش فكدبة ومتيقهاا بوحدك كدبة لي خرجات على حياااتك وخلاتك تبدل وماتبقاااش محمد طه لي كانعرف ولي شفت نهار لول.. (شدو من دراعو مزير عليه) هاداك لي الضحكة فوجهو ولي قبل مايخرج الكلام من فمو يوزنوو باش مايجرحش غيرو.. خويا لي ملي كنت تانبعد عليه هو كان تيقرب ليا تاكسبني.. فين مشى داك محمد طه هااا واش على قبلها هي..هي لي عمرها بغاااااتك وكانت معتابراااك خوها وصديق ليهااا.. عمرها شي نهار شافت فيك بشي شووووفة خرااا وااااش عمرها قالت ليك كانبغيك امحمد طه؟؟ وااااش عمرهااا بيناااات ليك بلي نتااا تتعجبهاا؟؟ لا عمرها قالتها ولابيناتها نتااا بوحدك لي حاس بدوك المشاعر جهتهاا وكبرتيهوم بوحددك وخليتي داك لحب يولي مررررض ااااااه مرض غاااادي يخرج عليك شوية بشوووية.. بسبابو وليتي غير تتخور وتتجرح فالناااس بلاماتسوق ليهوم.. شنوووو دنب ديك لبنت لي كل مرة تاتلومهااا على داكشي لي دار داااك الزا*مل دعمهااا؟ راه تااااهي بحالنا تضررات منوو ولكن نتا مكتشوفش هااادشي ومخلي عينيك يتعمااااو عليه وااااش عرفتي اااشنو كااان غايطرا قبل شوووية هااا واش عرفتي بلي رنيم كااانت غاتنتااااحر كون ماكنتش وعتقتهااا.. كانت غاتلوح راسها من السطح بسباب كلامك لي قلتي ليها..

حل محمد طه عينيه من كلامو لي نطق بيه وهو كيشوف فيه ممتيقش.. أما ريان حرك راسوو وكمل كلامو بنفس الجدية والغضب لي باين فصوتو: ماشي غير رنيم لي كاتجرح بكلامك تاغزلان سبق وغلطتي فحقها نهار جريتي عليها فداك الليل واش تفكرتي اش طراا ليها وشنو المشكيل لي طاحت فيه.. ديك الساعة ندمتي حيت زربتي وغلطتي فحقها وماسمعتيش ليها مور ماعرفتيها مظلومة.. نفس الشي درتي فرنيم لي كل مرة تجبد ليها حس عائلتها وتلومها وتاهي مظلومة بحالنااا تاتخليها تهززز فوق رقبتها دنب حاجة مدارتهااش اصااااحبي.. (جرو وكمل بهدوء) راه ماجيت عندك دابا وماقررتش ندوي معاك فهاد لموضوع تاشفت بلي خصني ندخل ونفيقك من شي لي عااايش فيه اصاحبي.. خصك تنسى ااااش وقع وتكمل حياااتك كيف قبل ماتبقاااش مرض راااسك وتمرض لي ضايرين بيك.. بغيتك ترجع محمد طه لي كنت تنعرف الحنين لي عمروو غلط فحق شي واحد (جرو معنقو ونطق بضعف)توووحشت خويا..

تشبت بيه محمد طه وحط راسو على كتفو مغمض عينيه بضعف وصدمة وتأنيب ضمير لي هلكو جهة رنيم ولكلام لي قال ليه ريااان.. حس براسوو غلط فحقهاا بزااف وبلي ظلمهاا.. عصبيتو وكرهو جهة ديك التريكة خلاتو يجمع الزمر كولو دقة وحدة.. لامن ناحية شي لي طرا لرحيل ولي عاشتو ولامن ناحية موووت جيداء لي جاب ليه التمام وهلكو وخلى لحرقة فقلبو تشعل فيه هاد السنين كولهاا.. داك لحب لي كان من طرف واحد ولي دمرو كلياا وخلاه يولي شخص اخر.. تاهو توحش نفسو لقديمة ولي حس بيها ماتت.. توحش محمد طه لقديم ولي كان عايش نهار بنهارو.. ولي همو يكمل قرايتو ويحقق مستقباالو ويخدم شي خدمة تكون فالمستوى.. محمد طه لي كااان كل مرة يتلاقى صحابو ويطلعو لتيران يلعبو شي مااااتش وكيف لعادة يكون هو والتيم ديالو لي رابحين.. كان معروف بين صحابو بلي كوايري وخطير فاللعب.. توحش نفسو لقديمة وبغاااهاا ترجع.. زير على ريان لي بدورو عانقو عناااق رجولي أخوي.. منساش ريان يامات الإدمان ديالو تاهو فاش كمل علاجو ورجع لدار كان محمد طه واقف جنبو واخا كان باقي مقصح.. بصح معاشوش مدة طويلة مع بعض ملي تزادو ولكن قدرو يقويو علاقتهووم فدوك السنين لي فاتت وكل واحد كمل لاخر..

جلسو فوق النموسية وكل واحد ساكت وساهي... الفك دريان بدا يزراق من الضربة لي كلى وتحت عين محمد تاهو نفس الشي.. كان ساكت مهبط راسو بتعب وريان ضار جهتو وتنهد: ماتلومش راسك امحمد طه راني مقلتش ليك داك لهضرة باش تهز لومة إنما قلتها ليك بااش تحل عينيك وتعرف بلي ديك لبنت تاهي من لحم ودم.. تصحح الغلط وطلب منها السمااحة تعيش حياااتك بخير وتنسى لي فااات اطه صاااافي باركة ست سنين وحنا عايشين فالزمر والمرض جاا لوقت لي نفرحوو ونكملو حياتنا كيف الناس الطبيعية.. صافي خصناا نساااو كلشي ونفرحوو حيت داك لكلب مااات وحيت كلشي تقاااد دابااا..

----

نازلة من الدروج بشورط قصير بونطاكور وتيشورت وجامعة شعرها الطويل شفينجة مخربقة.. واخا مبقاتش خدامة ولكن ولفات لفياق بكري وخصوصاً فهاد الوقيتة.. وقفات حدا إدريس لي كان جالس تيفطر وجات عنقااتو من لور حاطة راسها جنب راسو ونطقات بتبسيمة:صباح لخيررر ابابا

إدريس:(تبسم بالراحة ونطق بحنية)صباح الخير ابنتي شبعتي نعاااس مزيان؟

رحيل:(جلسات جنبو وباست مها فحنكها)همم بزااف

تانيرت:(تبسمات ليها) نكب ليك أتاي؟

رحيل:بغيت قهوة... واش لبنات مشاو لخدمة؟

تانيرت: أسماء وريان مشاو رنيم باقي

رحيل:ومحمد طه

محمد طه:سمعت سميتي

ضارو عندو ورحيل غير شافت ديك الزروقية وهي تشهق ونطقات بخوف:أويلي مااالك

محمد طه:(حك الضربة ونطق بتبسيمة) ماتهزيش فبااالك اعوينات الجلبانة

إدريس:(حرك راسو بهدوء) دوز تفطر

نفد محمد طه طلبو وجلس وإدريس ساكت وعارف الضربة ملين جات حيت شاف ريان تاهو مضروب وعرفهوم دابزو مع بعضياتهوم داكشي علاش مقال والو وماباغيش ادخل ولادو كبار وماشي صغار وعارفين اش كيديرو...

بقا محمد طه كيفطر ورحيل هزات عينيها فيه ونطقات بهدوء: ماتعطلتيش ليوم على خدمتك؟

محمد طه:(غمزها ونطق بضحك) مول الشي عاطيني لفو ڤيغ ماتخمميش

رحيل:(تبسمات وحنيكاتها حمارو فاش تدكرات سيرتو) امم اوا ماضسرش تاني هه

محمد طه:(شاف فيها) كوني هانياا

دخلات رنيم وهي مدابزة مع شعرها تتجمعو كوت شوڤال ونطقات بزربة:صباح الخير

جلسات جنب محمد طه تاتفطر بزربة حيت تعطلات.. هزات راسها ومدات يديها باش تاخد زيتونة وهي تلاقى يديها مع يديه.. تبسم ليه بهدوء وتاهي رجعات ليه تبسيمة وحدرات راسها تتفكر كلامو ليها قبل قليل..

🔙🔙

دق لباب دبيتها وسمع صوتها عاد دخل لقاهاا مقاتلة تتوجد صاكها وغير شافتو وهي توقف وبدات تاضور عينيها أما هو قرب جهتها تاوقف قدامها ونطق:صباح الخير

رنيم:صباح الخير

محمد طه:(تنهد ونطق بهدوء) جيت باش نطلب السماحة على كلامي لي قلتو ليك لبارح أنا كنت معصب فديك اللحظة وبديت تانخربق فلهضرة.. ماقصدتش نجرحك ارنيم عارف بلي نتي ماشي بحالهوم ومختالفة عليهوم داكشي علاش بغيتك تسمحيليا

رنيم:(رمشات بعينيها ونطقات بهدوء تاهي) الله يسامح

محمد طه: تانتمنى ماتبقااايش هازة فخاطرك من جهتي

رنيم:مهزاش غير تهنى

تبسم ليها وخرج بهدوء وهو حاس براسو رتاح فاش طلب السمااحة.. ليل كولو وهو كيخمم فكلام خوه وكيفاش كانت غاتنتاحر بسبااب كلامو وحس بتأنيب ضمير من جهتها داكشي علاش قرر يطلب السماحة منها ويحاول أنه مايعاودش يغلط فحقها كيف قبل..

🔜🔜

ناضت هازة صاكها أو ودعاتهوم باش تمشي لخدمتها وهي تسمع صوت إدريس لي نطق بسميتها وناض غادي جهتها درعها ونزل معاها لتحت تاوقفو قدام باب ديال الدار ونطق إدريس بهدوء: كنت باغي ندوي معاك على علي

رنيم:(مجرد ماتدكرات سميتو حسات بالخوف ونطقات)مالو؟ واش هو دار شي حاجة أصلا لبارح بدا كيسيفيط ليا مساجات وو

إدريس:(كمش حجبانو) وعلاش ماعلمتينيش؟

رنيم:مكنتش باغا نشطنك اعمي

إدريس:(نطق بهدوء) هو كان ناوي يهرب لشي بلاصة خرا ساعة حصلوه وشدوه لبوليس..

كانت حالة عينيها تاتسمع لكلامو والراحة حسات بيها من هضرتو والخبر لي قااال.. صافي دابا غاترتاح منو ومغايبقااش مهددها ويخليها تخاف من جنابها لايكون تابعهاا.. أما إدريس مجرد ماوصلو لخبر ليوم فالصباح قرر يقولها ليها حيت عارف علي حاط عليها لعين ويمكن يأديها بشي حاجة عليها بغا يطمنها بلي تاهو غايتعاقب على گااع داكشي لي دار..

إدريس:(شاف فيها بجدية) مرة الجايا لاكااان شي مشكيل بحال هاكا اجي علميني وعمرك تخبي سمعتي هاد لمرة دوزتها حيت عارف نيتك ولكن لمرة الجايا مغادوزش ارنيم

رنيم:(تبسمات)واخا اعمي وشكرا بزااااف

إدريس:(تبسم ليها بحنية) مكاين لاش ابنتي تشكريني ومتنسااايش بلي نتي دابا وليتي وحدة من عائلتي كيفك كيف رحيل وأسماء وغزلان تاهي وليت مسؤول عليكووم داكشي علاش مانبغي تاوحدة فيكوم تخبي شي حاجة بحال هادي عليا والاكان شي مشكيل نفكوه قبل مايكبر واخاا

رنيم:واخا اعمي

إدريس:(طبطب على كتفها ونكق بحنية) محتاجة شي حاجة؟

رنيم:لا اعمي مهم غانمشي تعطلت دابا

إدريس:ردي لبال لراسك ابنتي

مشات رنيم وهي مبسمة وحاسة بالراحة.. واخا حاسة بالندامة على داكشي لي كانت غادير فحق راسها وفحق الناس لي عايشة معاهوم لبارح ولكن تتحمد الله حيت ريان تحط فطريقها وعتقها وحل ليها عينيها على حوايج هي مشافتهومش.. ودابا زادت حسات بالراحة فاش عرفات بلي علي تشد وبلي مغايبقاش خالعهاا..

---

ملي فطرات رحيل عاونات غزلان جمعو الطبلة ونقاو الدار ومشات لبيتها باش تلبس حوايجها.. ختارت واحد دجين بارد كيجي مجموع مع شوميز طويلة تال لتحت واسعة ومستورة.. لبسات دجينها على لحم ومع جات تسدو مبغاش يتسد ليها.. زفرات بعصبية وتقاتلات معاه تاسدات الصدفة ولبسات ديك الشوميز لي غطات مفاتنها ودارت فولارها واكتفت غير بچلووس ومسكارا وصاف.. هزات صاكها ونزلات لتحت مخليا سيدرا باقي ناعسة.. لقات إدريس باقي ممشاش لخدمة تبسمات ليه ونطقات بهدوء:عندي غونديفو مع الطبيبة

إدريس:واخا ابنتي ردي لبال لراسك فالطريق وسوگي بشوية

نزل معاها لگاراج فين كاينة طوموبيلتها لي عمرها ركبات فيها وكيف جاتها حطاتها تماا.. حلاتها وركبات بلاصتها وهي مبسمة.. نزلات الزاج دطوموبيل ودارت باي باي لباها وتحركات خارجة من لگاراج مخليا إدريس حاضيها ومبسم بالراحة..

دايرة نضاضرها دالشمس وحالة الزاج لي جنبها مخليا لهواء خفيف يطير زيفهاا.. وأخيراً هي تحررات من داك الخوف لي كانت عايش فيه هاد السنين كلهاا.. تحررات أولات قادرة تخرج بوحدها بلاماتخاف يكون تابعهاا.. تمشي فيما بغات بوحدها بلامايكون معاها شي واحد من خوتها وباهاا.. خارجة ومخيفااش تلقاه فشي بلاصة كيتسنااها حيت صافي هوو مااات.. مات وتهناات منوو وگاع لعداب لي عاشتو غايتمحى معاااه.. غاتكمل حياتها فين وقفات وغاتعيش نهار بنهارررو وغاتستاغل كل يوم فحياتهاا باش تحس بحلاوة هاد الدنيا لي ولات تتبياااض وتسگد فوجهها.. مبعد سنين طويلة دلمعانااات جااا لفرج لي واخا كاان بعيد الإ أنه فالأخير جااا.. مدات يديها لراديو طالقاه مونسة طريقها وتبسيمة على شفايفها فرحانة بطوموبيلتهاا لي يالاه كتاب ليها تركب فيها.. طوموبيلتها الخااصة ولي جاات كادو من عند راحة روحهاا.. طلقات الراديو وماتجي غير فأغنية وكأنها مساج ليها..

***

عايشة سني وبغني وبحب الحياة

قلبي عايش سنينو وحياتو بهواه

بعمل الابحبو وبحسو أكيد

ثانية ثانية يادنيا هاعيشك أنا

***

هاد ليوماين دازت عندو مشارجية لدرجة النعااس مانعسوش.. كان واقف على الأمور بنفسو ولي سهل الأمور هو الإعتراف دإلياس لي ماحتاجوش نهائيا يتعدبو معاه ودغيا سرسب ليهوم گاع لي كاين والحوايج لي دار من نهار عرف فيه بدر وبدا خدمتو هو وياه.. اعتاارف بگاع لجرا'ئم لي نفدو وتحلو الضواسى قدام.. وتاعلي لي قصح راسو وكان ناوي يهرب شدوه لبوليس وتاهو غايتعااقب على داكشي لي دار.. ونوح مجرد ماتأكد بلي كلشي هو هداك شد الطيارة راجع لمراكش.. وقف الجيپ ديالو قدام باب الرياض حيت كان مخليها فالگاراج دلمطار.. ونزل بخطوات تقالين هاز صاكو ودخل لرياض.. تلاقى بالسعدية لي تبسمات ليه ونطقات بهدوء:على سلامتك اولد لحاج

نوح:(بصوت مبحوح)الله يسلمك يمّا مكيناش؟

السعدية:خرجات وتالالة سناء مكيناش رجعات لفاس وختي بيسان وخويا رؤوف راهوم فخداميهوم وزين العابدين مشى لاصال مع صاحبو

نوح:(حرك راسو ونطق بخشونة) جيبي ليا قهوتي

طلع لجناحو ودخل كيف عادتو كانو الشراجم محلولين والبيت معطر.. بقا واقف مدة قبل مايكمل خطاويه لبيت النعاس باش ياخد دوش.. ماتعطلش بزاف وخرج وهو مدوش ولابس سروال توني مع تيشورت.. لقى السعدية جابت ليه قهوتو جلس فوق الفوطوي تيشربها وهز تلفونو مدوز لخط لإدريس لي تسمع صوتو وهو قايل بهدوء:ولد لحاج على السلامة كيف وصلتي

نوح:(بهدوء)الحمدلله اسي إدريس ونتا صحيحة مزيان ومالين دار كلشي هو هداك

إدريس:الحمدلله كلشي بخير هاد الساعة

نوح:(جغم من قهوتو ونطق بصوت جدي)ورحييل

إدريس:راه بخير الخبار لي سمعات مكانوش ساهلين عليها ولكن الحمدلله

نوح:(نطق بهدوء وعينو على الطاس دلقهوة) المهم عندي هو راحتهاا..

كانت جالسة فالصال داطوند كاتسنى نوبتهاا وعيونها على دوك الناس لي تاهوما جاو باش يشوفو الطبيبة.. تنهدات تتفكر نهار لول لي جات كيف كانت ودابا كيف ولات.. واحد التقدم كان واضح بزااف على وجهها وتانفسيتهاا.. كانت تاتلقى راحتها كلما دوزات شي حصة من الحصص وتتخوي داكشي لي كاتكون جامعاه فلداخل ديالهاا.. جبدات تلفونها وخدات تصويرة ليها وبينات فيها غير رجليها وديك لاشوميز لي لابسة وسبادري وحطاتها سطوري فلواتس مرفوقة بقلب بيض.. كانت غاتخرج تاتفكرات نوح لي هاد ليوماين كلها ماسمعاتش خبارو حيت تشطنو بسباب المشكيل لخر لي طرا معاهوم.. دارت طليلة فالواتس وكيف لعادة مبيناش ليها لعيبة ديال اخر ضهور.. مبغاتش تشطن راسها وقالت بلي غايكون مشطون مع لخدمة داكشي علاش.. بقات تاطلع وتنزل فالفايس وتقرا لبوسط دلبنات تاطاحت على واحد لبوسط ديال شي وحدة تتعاود على مشاكيلهاا الشخصية مع راجلهاا بالتفصيل.. كمشات رحيل حجبانهاا ومحسات براسها تادخلات وجوباتها فكومونطير "بلي هاد الامور تتبقا شخصية وماخصكش تخرجي أسرارك لنااس ولاعندك مشكيل حاولي تفكيه بلعقل ماشي ديري بيه إشهار"

هي من طبعها مكتجاوبش فلبوسط بزاف وعمرها لاحت شي بوسط كادخل لگروبات ولكن غير تاتقرا وصاف وفاش كاتشوف شي موضوع مثلا بحال هادا مكتقدرش ماتكومونطيش وهي أعدى حاجة عندها هو إفشاء الأسرار الزوجية وكاتشوف بلي لمرا لي تتجي تعاود على راجلها داكشي الشخصي لي كيكون بيناتهوم ماعندها عقل.. اه كاين مشاكيل لي تيبغيو يتقالو مي ماشي كلشي عاااود.. مدازتش دقايق تكانو يطلعو ليها لنوتيفيكاسيو على داك لكومونت دخلات تشوف ولقات شي بنات كيقولو ليها عندك لحق وشي وحدين تايقولو ليها مالكي شغلك حياتها هاديك وكلام السوشيل مييديا هو هادا كاتلقاي شي متافق وشي لا وشي تيديخل غير يسبك ويتهنى.. جاوبات لبنات لي هضرو بأداب أما لخرين ماتسوقاتش ليهوم حيت آخر همها تعاطى فلكومونطير عليها خرجات من لفايس ومشات ليوتوب تاتفرج فيه تاوصلات نوبتها وطفات لكونكسيون ودخلات عند طبيبتها لي كانت مبسمة ليهاا.. سلمات عليها وجلسات رحيل فالكرسي قدامها ونطقات الطبيبة بهدوء:رحيل صافا

رحيل:حمدلله ادكتورة

الطبيبة:مدة ماجيتيش ليسيونس ديالك كلشي مزيان بعدا

رحيل:وي صافاا

الطبيبة:تفضلي معايا

ناضت لمكانها لمعتادة ورحيل شدات بلاصتها والطبيبة جالسة فالكرسي قدامها ونطقات الطبيبة بهدوء:كانسمعك

كيف لعادة خدمات التسجيل ورحيل تبسمات بهدوء ونطقات بصوت مرتااح: هو ماات وأنا تهنيت منو

الطبيبة:(تعمدات تدكر سميتو) بدر الدين

رحيل:(ببرود)اه هو مبقاش كاين فهاد الدنيا مشى ومبقاش غايرجع رتاحيت منو ومن لعداب لي عيشني فيه حياتي كلهاا.. مابقيتش غانخاف على راسي ونقدر نخرج بوحدي ونمشي فيما بفيت ومغاديش نخاف على عائلتي لايأديها ليا ويلوي ليا يدي.. صافي مابقيت غانخاااف من تاشي حاجة حيت هو مبقااش

الطبيبة:باش تتحسي دابا

رحيل:بالراحة حاسة راسي بحال شي واحد كان غارق فشي بير مقادرش يطلع منو ويتنفس بحريتو تانهار جاه الفرج وقدر يطلع ويتنفس.. هاداك النفس لول لي خداه ولي عمر بيه ريتو هو نفس شعوري لي حسيت بيه نهار قالو لياا مااات.. حسيت بحال لاشي حجرة كانت محطوطة هناا تحيداات ومبقاااتش.. بصح كنت نتمنى ليه يتعدب كثر ويقاسي كيف قاسيت بسبابو.. ولكن فالأخير لي كيهمني هو أنه مااات أو ولى ماااضي لي دفنتو بيدي ومبقيتش غانتفكرو.. باغا نستمتع بحياتي (تبسمات رحيل وعينيها لمعو ببريق خاص) ونكملها مع الشخص لي ختار قلبي ولي خلاني نميل ليه.. الشخص لي مابين الناس كولهوم هو لي قدر يحسسني بالراحة والأمانة.. كنت سادة على فكرة الزواج مرة خرا ومحيتها من بالي بسباب زواجي لول وشي لي طرا ولكن هو غير ليا فكرتي..

الطبيبة:(تبسمات ليها)شكون

رحيل:(بصوت مرتاح وعينيها كيلمعو) راحة روحي..

----

ملي شافها بنقابها وشاف تصرفاتها وحشمتها بلامايحس لقى راسو مهتم بيها وراد ليها لبااال من بعيد.. ونهار عرفها بنت سي إدريس مافكرش زوج دلمرات ومشى عندو وطلب يديها لزواج.. صافي دخلها لدماغو وبغاها تكون حلالو.. مكانش تيهمو يعرف سبب طلاقها حيت داكشي متعلق بيها هي.. عجباتو واخا مشافش وجهها ولكن عينيها فثنوه نهار لول.. صبر باش يعرف جوابها ولكن نهار عرفها رفضات وفاش سولهاا نيشان ومبغاتش تجاوبو وتعطيه راس لخيط عرف بلي واخا يعيى معاها مغاتقولش حيت راسها قاصح غير من لمواقف لي جمعاتهوم قبل.. داكشي علاش لجأ لإدريس لي ماخباش عليه وقال لي كيعرف وهنا زادت كبرات فعينيه وزاد احتارمها.. كيفاش باقا واقفة صامدة وكيفااش مكملة حياتها ورادة لبال لبنتهاا ومحققة طموحها والأهم محتارمة راسها وعمرو شاف فيها شي حاجة لي ماشي تال لهيه.. كانت فالخدمة عاطية لحدود لكلشي ومامضسرة عليها تاشي واحد وهادشي لي زاد مخليه يزيد يتشبت بيهاا وهو من طبعوو لحاجة لادخلات ليه لدماغو مكيزولهااش مزااال وهاكا طرا معااه هي.. دخلات لدماغو وبقات حاصلة تم.. مكانش عندو نهائيا مشكيل يبين لإدريس اهتمامو بيها وبتفاصيلها حيت صافي هي ولات ديالو وبالنسبة ليه هادي أقل حاحة يديرها..

قطع لابيل مبعد ماكمل كلامو مع إدريس وناض بخطوات تقيلة تيطرطق عنقوو تاكيتسمع الصوت.. تمشى جهة نموسيتو وجلس فالجنب تايماصي عنقوو مدة عاد هز تلفونو ودخل لواتس لقى زين العابدين مسيفط ليه شي أوديوات سمعهوم وجاوبو وعلمو بلي راه رجع لمرااكش.. دخل لسطوري دولدو لقاه حاط تدريباتو فلاصااال.. وغير سالى سطوري ويالاه كان غايخرج من لواتس وهي طلع ليه سميتهاا والسطوري ديالها دخل شاف التصويرة وكيف لعادة تيزوميها.. ويدقق فيها وهو مكمش حجبانو عاد خرج من لواتس وطفى لكونكسيون ونزل الريدوات مظلم لبيت وتخشى باش ينعس ويرتااح من لعياا لي دوز هاد ليوماين.. ويجدد طاقتو حيت باقي تابعو واحد لبلان أجلو مدة هادي وجات وقتو دابا..

---

ملي خرج إسلام من لخدمة فوقيتة دلغدا طاحت فبالو أسماء وحالتها لي مافارقاتوش عليها قرر يمشي يشوفها... ركب طوموبيلتو وشد الطريق لخدمتها لي كان عارف فين جات بحكم سبق وشافها تم.. كانت وقيتة دلغدا وأغلبية لي خدامين خارجين يتغداو.. مانزلش من الطوموبيل وبقا جالس وعينيه على لباب كيتسناها تخرج.. مدة طويلة تبانت ليه خارجة بكوستوم نسائي فالكحل مع شوميز بيضا وصباط طالون كحل.. كانت أنيقة كيف ديما.. غادة بهدوء بوحدهاا تاوصلات لطروطوار أو وقفات باش تقطع الشانطي وهو يتحرك جهتها تاوقف جنبها وهبط الزاج وهي تشوف فيه مطلعة حاجبها..

إسلام:(نطق بهدوء) طلعي

ضارت تتشوف لي خدامين معاها ولي لبعض منهوم منتابه ليها وهي طلع ببرود وهو غير شافها سدات لباب قلع من تم..

أسماء:(شافت فيه بهدوء) شنو باغي؟

إسلام:وقيتة دلغدا هادي نمشي نتغداو أونصومبل

أسماء:(هزات فيه حجبانها)وعلاش غانتغداو أونصومبل شبيني وبينك اسي؟؟

إسلام:(شاف فيها) نسيتي اغزالي

أسماء:(تعصبات)سمع الله يرحم بااك اخر مرة تبقا تعيط ليا بهاد غزاااالي ودابا نزلني عفااك

كانت باقا تادوي بلهداوة وأصلا ماعندهاش لونڤي ليه ولاشي قمقوم آخر.. أما هو ماتسوقاش ليها وكمل طريقو بحال لاماهضراتش معاه شي لي خلاهاا تعصب وضرب لباب دطوموبيل وتنطق بعصبية:رااااني داوية معااااك الخرااا وقف

إسلام:(نطق ببرود)باقي ماهاداك الله تصلحي لسااانك وتعرفي كيف دوي مع الناااس اغزالي

أسماء:ماشي نتا لي غاتقول ليا كيفاش ندوي كل واحد يديها فرااسو هاد الساعة وحبس هاد الزمر بغيت نزل

إسلام:(حبس الطوموبيل جنب الطريق وسدها أوطوماتيك من لداخل وزول لاسانتوغ وتقلب جهتها ونطق باستفزاز) نتي ماشي وجه لغدا ولاشي حد يحن فيك اغزااالي

أسماء:(ضحكات باستهزاء)وشكون قالك حن فياا ولاتسوق ليا گااااع الشريف واقيلا تيقتي راسك فاش عطيناااك وجه ودوينا معاااك عليها ضسرتي شوية

تاتعصبو بكلامهاا وتاتستافزو وهو أصلا ولى إنسان سريع الغضب ودغيا تايتفرگع.. بدا كيحل صدايف لاشوميز ديديه وكيطلع لكمام وأسماء تاتشوف فيديه لي واشم وهي مخسرة سيفتها.. ماعندهاش مع الراجل لي كيدير طاتو وخصوصا إسلام راه يديه كولها واشمها تال لفوق.. قلبات عينيها بقرف ونطقات بسخرية: وليتي بحال دفتر الوسخ بداك لخرا لي داير فيديك

إسلام:(ببرود)ماعجبكش؟

أسماء:(شافت فيه مخسرة سيفتها)نتا كلك مكتعجبنيش بقا غير لوشاام الله يجعلك توشم داتك كلها جمونفو فيك

إسلام:(قرب جهتها ومد يديه شد خصلة من شعرها ونطق بهدوء)ولكن نتي كتعجبيني

أسماء:(بعدات عليه وضربات يديه وقالت بعصبية) تعجبك عيشة قنديشة قول آمين اش هاد الضسارة ولات فيك ابنااادم واش تيقتي راااسك ولاشنوو راه لاشتيني ساكتة وماقلتش لبابا هادشي غير على قبل صورتك قدااامو أما والله تانحطك بوجهك ليه وديك الساعة فكها معاااه

إسلام:(مد يديه جرها من شعرها تاقربها ليه ونطق بصوت معصب)سيري قوليها ليه اش تتسناي وعاودي ليه على التقح*بين لي فييك والزلالة ديااالك لي دايرة من ورى ضهروو باش يعرف بنتو اش كاتسوى (زاد جرها كثر ونطق ببرود) عند بالك اتخلعيني بكلامك اغزالي

أسماء:(شادة يديه ومدخلة دفارها فيها)الله يعطيك الهرس طلق من شعري واخر مرة تمد يديك علياا سمعتي راني مشيطاااش باش تجي تحط يديك لموسخين علياا الشماااتة وهادي حيااتي ندير فيها مابغيت ماشغلكش ولابقااا فيك لحال سير قولها ليه اش تتسنى (ورجعات ليه نفس جملتو بسخرية واضحة) عند بالك غاتخلعني بكلااامك

إسلام:(جرها ليه وقرب حهة ودنيها ونطق مغدد) نتي نهار لول لعبتي لعبة كبيرة عليك وهانتي داباا تاتشوفي النتيجة قدام عينيك كنت عاطيك التساااع ونتي تتجبديني وداباا تستاهلي كلما غايطراا ليك قلت ليك رااكي فبااالي وديك الزكارة دياالك ولكلام لي تتخرجي من فمك غير مكيزيد يخليك تقلي حسااابك معايااا اغزااالي

طلقها وهي بدات ترجع شعرها معصبة باغا ضربو وتبرد فيه حر شعرها لي نتف ليهاا ساعة شدات فمها وسكتات.. حرك طوموبيل راجع لبلاصة فين هزها بلامايدوي معاها مزال وغير وصلات وهي تحل طوموبيل ونزلات وقبل ماتسد لباب تبسمات ليه بندالة وضربات بلباب تاتسمعات السدة بالحهد ومشات تتزرب فخطاويها مخلياه جالس تيحس تال عشرة قبل مايخرج يخلطها قدام الناس..

كانت هاديك الحصة الأخيرة مع طبيبة ديالهاا لي فرحات بالنتيجة لي وصلات ليها والفرق لي لاحظاتو بين نهار لول واخر نهار.. تودعات معاها وطبعا طبيبة خبراتها بلي لاحتاجت تجي شي نهار ودوي معاهاا فهي فرهن الخدمة والإستمتاع ليهاا.. خرجات من تما تتشوف فساعتها وقررات تمشي دير شوبينغ وتقدى داكشي لي خاصها... ركبات طوموبيلتها وركبات لبلوتوت مع تلفونها وطلقات لمزيكة غادة تاتموسقى وتفني.. وقبل قررات تمشي تغدى هو لول حيت وصلات لوقيتة دلغدا.. خلات مساج لمها علماتها بلي غاتغدى برا وشدات طريقها لميزون دڤواتيغ بااش دوز عند محمد طه هو لول وريان باش تمشي تغدى معاهوم.. وقفات بعيد شوية ودوزات لخط لمحمد طه لي علمها بلي تسناه واحد خمسة الدقايق وبالفعل خمسة دقايق وكان خارج جاي جهتها مبسم.. ركب جنبها وباسها فحنكها ونطق بتبسيمة:ناااس وطوموبيل

رحيل:(كمشات فمها بدلع) مالي كيف جيتك؟

محمد طه:(قرصها فحنكها بمزاح)عوينات الجلبانة وصاف ههه

رحيل:(تحركات من تما شادة طريق عند ريان لي علماتو تاهو) ههه ليوم غانغديكوم على حسابي نتا وداك لفقير لاخر هههه

محمد طه:الله يكثر من مثالك امرات ولد لحاج

غمزها تيضحك وهي بقات تاضور عينيها وقلبها تايخفق بسرعة من داك اللقب لي قاال.. حسات بكرشها ضراتها بالخلعة فاش تخيلات اش تابعها وحاولات ماتخليش عقلهاا يتعمق فدوك التخيلات عليها نفضات دوك الأفكار وتبسمات لريان لي كان واقف تيتسناهاا.. ركب فاللور ونطق وهو مريح واخد راحتو:فين غانتغداو

رحيل:واحد لغيسطو هنا زوين عندهوم ليبلا واعرين

ريان:سبق ليك كليتي فيه؟

رحيل:وي واحد لمرة أنا ورجااء

وصلات لغيسطو وسطاسيونات طوموبيلتها ونزلات هازة صاكها وناضاضر فوق راسها.. ضارت جهة ريان وعاد شافت الضربة ديالو تاهو ونطقات باهتمام:مالك تانتاا مزرق (شافت فيهوم بزوج)ماتقولوش ليا مدابزين بزووج

محمد طه:(درعها)ههه غير كنا تانتمازحو ياك السالوبار

ريان:(تبسم بالخف) كنت غير تنجرب قصوحية وجهو داكشي علاش ماتخمميش ازين

حركات راسها ودخلو لداخل شدو بلايصهوم وطلبو داكشي لي غاياكلو ودغيا جابو ليهوم اش طلبو وبداو غداهوم فالضحك والنشاط وكيف لعادة رحيل صورات لبلا وبرطجاتو فالسطوري فالواتس عاد بدات تتاكل وضحك وباين بلي ضحكتها هاد لمرة طالعة من لقلب ماشي ضحكة صفراا كيف متعودة.. كلاو وجات تخلص رحيل ساعة مخلاوهاش وخلص ريان ورجعاتهوم لخداميهوم حيت وقت لغدا داز عاد شدات طريقها لمول باش تاخد ليها لي خااص فالحوايج دالخروج.. لي شافتو وعجبها خداتو ومانساتش مالين الدار طبعا وسيدرا خدات ليها حويجات ومونيكة زوينة شراتها ليها وشدات طريقها لدار وهي محملة بالبلاستيكات.. وغير حلات لباب وهي تجي عندها سيدرا تاتجري تاوقفات قدامها وشدات فيها ونطقات بنبرة طفولية:علاش خرجتي مامي ومديتينيش معاك

رحيل:(تحنات باستها ونطقات بتبسيمة)كنتي ناعسة ومبغيتش نفيقك امامي

سيدرا:(تاتشوف فالبلاستيكة ونطقات بتبسيمة) شنو جبتي ليا؟

رحيل:حويجات فين جداك

سيدرا:فالسطاح مامي

مشات رحيل لبيتها حطات دوك لبلاستيكات وبدلات حوايجها هوما لولين عاد طلعات عند تانيرت لسطح لي كانت جالسة فالضليلة هي وغزلان ودايرين قدامهوم طبيلة فيها عصير ودلاح.. جرات رحيل كرسي وجلسات ونطقات مبسمة:جليسة زوينة ههه

تانيرت:(تبسمات ليها)اوا قلنا مكاين مايدار اجي نديرو شي جليسة نتلفو وقتنا

جرات رحيل سيدرا جلسات فوق ركابيها تاتعنق فيها وتبوس عاد طلقات منها ومشات تتلعب..

رحيل:شريت شي حوايج تانزلو ونوريهوم ليكوم

غزلان:بالصحة نكب ليك عصير

رحيل:اه وديري فيه الثلج عرفتو الحرارة ليوووم

تانيرت:مراكش سخوونة أصلا

رحيل:(تكسلات)ماكرهتش نمشي لبحر (تقاد فبلاصتها)اش بان ليكوم نطلعو لسيتي فاضمة فهاد لويكاااند

تانيرت:مكرهناش نشوفو باك واش مسالي

رحيل:اييه نمشيو نتبردو شوية ونخضرو عويناتنا فالطبيعة

غزلان:عمري مشيت ليها

رحيل:فنة والله لابغيتي ترتاحي سيري ليهاا إن شاء الله نمشيو ليها هاد لويكاند نيت مبعيداش بزاااف

تانيرت:خصكوم تمشيو لتارودانت تاهي (شافت فغزلان) فخبارك عمرهوم مشاو لبلاد مهوم؟

غزلان:علاش؟

رحيل:حيت لاعنداك مكايكونش عندنا وقت ولابغينا نمشيو ليها خصنا ناخدو كونجي ونتي عارفة الكونجيات تيكونو عندنا مختالفين

تانيرت:اييه ودكااالة علاش مكتمشيوش ليها؟

رحيل:(رفرفات برموشها)حيت تريكة بابا مكنعرفوهاش باش نمشيو لتم

غزلان:واش عمي إدريس دكالي؟؟

تانيرت:اه الأصل ديالو ولكن كبر فكازا

جات سيدرا تاتجري وشعرها تايتحرك معاهاا وفيديها تلفون رحيل نطقااات بصوت عالي وهي واقفة تتنهج:مامي تلفونك كان تيصوني تتعيط عليك شي حاجة سميتها راحة روحي (كملات كلامها بتساؤل)مامي شكون هادي؟

هزات رحيل تلفونها وعينيها على ديك لابيل لي تتبان مزينة الشاشة بسميتو.. قلبها رجع كيضرب بالجهد والفراشات بداو تاني يلعبو فمعدتها.. هزات عينيها فتانيرت لي تبسمات ليها وناضت نازلة لبيتها.. سدات لباب وبقات تتشوف فلابيل لي صونى مرة وحدة.. بقات تاضور عينيها ولفضول قاتلهاا وعقل تيقول ليها صوني وعقل تايقول ليها خليه تايعاود لابيل.. وقبل ماتحدد اش غادير صونى تاني تلفونها بنمرتو..حنحنات ودوزات لخط وبصوت هادئ نطقات:ألو

نوح:(بهدوء)السلام أوعليكوم رحييل

رحيل:(تبسمات فاش سمعات سميتها لي قليل فين كيعيط ليها بيه) وعليكوم السلام لباس؟

نوح:الحمدلله ونتي؟

رحيل:لحمدلله

سكتات تاتسناه يدوي وتاضور عينيها وتمشات جهة البالكون وبدات تتلعب بالخامية تاسمعات صوتو لي رجع نطق بجدية: ديري حسابك غدا إن شاء الله مع لوحدة ونص غاندوز عندك

رحيل:(كمشات حجبانها ونطقات بتساؤل) خصني نقولها لبابا

نوح:(تبسم بالخف من هضرتها لي زادت خلاتها تكبر فعينيه ونطق بصوت حنين) سي إدريس فخبارو الفثنة

رحيل:(تبسمات ونطقات بخفوت) واخا

نوح:(نطق بجدية) تهلاي ليا فراسك

تقطعات لابيل ورحيل بقات واقفة فبلاصتها مبسمة.. داك الاهتمام لي كاتلمسو فكلامو ليها تايخليها تزيد تغرق فيه ويزيد يستولي تفكيرها.. واخا كلامو قليل وماعندوش مع لهضرة بزاف ولكن دوك الدقايق القليلة لي كايهضر معاها فيهوم كايكونو كافين ليها.. ويالاه طلعات معاها بلي غدا غاتشوفوو وغاتخرج معاه.. تخربقات ديك لعشية كلها وهي مستريسية وتالبنات خلاتهوم يتخربقو معاها..والليل مانعساتوش وهي تتفكر فاش غايكون باغي يدوي معاها وبزاف دلحوايج طاحو فبالها وتفكير مارحمهاش زائد الخلعة لي كانت شاداهاا وماغمضات ليها لعين تاصلات لفجر عاد نعسات وفالصباح فاش فاقت خدات دووش نعشات بيه روحها وتهلات فراسها بلكريمات وتطليسات عاد بدات تتقاد وجهها كيف لعادة بمك اب بسيط ركزات غير على رسمة الآيلاينر فيه وعكر نيود.. لبسات واحد لكسوة فالبلوسيل طويلة توبها ستان سامبل وعندها لفوقاني ديالها بحال شي عباية تاهو بلوسيل مزوق بوريدات فالكحل.. دارت فولار كحل ورشات ريحتها لخفيفة عاد جلسات تتلبس صندالتها.. غير وجدات خرجات من بيتها.. كانت غير تانيرت وغزلان وسيدرا كيف ديما وإدريس كان فالگاراج حيت عندو لخدمة كثيرة..

تانيرت:(تبسمات ليها بحنية) شكوون والد هاد الزين كولو

سيدرا:(نطقات بحماس)تانيرت إينو

ضحكو عليهاا وعلى شطارتها ورحيل باستها أو ودعاتهوم قبل ماتنزل لتحت..كانت لوحدة ونص بالضبط فاش صونى عليها وعلمها بلي كيتسناهاا قدام باب الدار.. قبل ماتحل باب الدار جمعات النفس وطلقاتها تتحاول تكونطرولي دوك لمشاعر لي حاسة بيهوم فحضورو.. حلات لباب وخرجات وعينيها لمحات الجيپ ديالو مسطاسيونا جنب الدار.. تمشات بشوية جهتو تابان ليها لباب تحل ونزل منو بسروال توب بلوماغين مع شوميز بلوسيل ويامحاسن الصدف لابسين نفس اللون.. كان مطلع كمايم لاشوميز ولحية مكبرها شوية هي والشعر لي مرجعو لور..طلعها بعينيه من رجيلاتها تال وجهها واخد راحتو تاقربات جهتو ونطقات بخفوت:السلام أو عليكوم

نوح:(بهدوء)واعليكوم السلام

حل ليها لباب لي جنبو تاركبات عاد سد الباب ومشى شد بلاصتو وركب لسانتوغ عاد حرك طوموبيل خارج من لحومة وهي جالسة جنبو ساكتة وعينيها بوحدهوم لي كايضورو هنا ولهيه.. صونى تلفونو أو هي وذنيها طلقاتهوم معاه تاتسمع ليه كيدوي بجدية مع شي حد وباينة غاتكون على لخدمة.. طول فلابيل عاد قطع وحط تلفونو وضار جهتها شاف فيها بهدوء وعينيه على يديها لي حاطة فوق الصاك مزيناهوم بخويتمات وگرميط..انتابه لرجليها لي تترعدها بلاماتحس وتبسم بلخف قبل ماينطق بصوتو الخشن كاسر داك السكات: مرتاحة؟

رحيل:(كانت سارحة فالطريق تاسمعات صوتو وضارت شافت فيه ونطقات بهدوء)هااء ااه

نوح:(حرك راسو وعينو على الطريق)هادشي لي بغيت

رحيل:(حكات يديها مع بعض ونطقات بخفوت) سيدرا كاتسلم عليك وقالت ليك توحشاتك

نوح:(ضار شاف فيها وتبسم بحنية ونطق بصوت تقيل خاتر)ومها

رحيل:(سرطات ريقها ونطقات بعدم فهم) مالها؟

نوح:(حك لحيتو ونطق بهدوء) فين تبغي تمشي؟

فهمات رحيل من سؤالو بلي قلب الهضرة وتاهي ماحكراتش ونيت جاتها من الجنة والناس حيت عارفة تقدر تبلزها معاه تاني كيف مولفة..

رحيل:(بهدوء) ماعنديش إشكال

حرك راسو ورجع السكات فالطوموبيل وهي مفيكسيا عينيها على يديه وعاد انتابهات لفاصمة لي مدور على راحة يديه ليسرية لي شاد بيها لڤولون وتفكرات الضربة لي تضرب ونطقات بهدوء:يديك كيف بقات؟

نوح:(شاف فيها وتبسم بلخف)مزيان

رجعات سكتات حيت ماعندها ماتقول وحاسة بالارتباك.. أما نوح كان كل مرة يقلب وجهو جهتها وياخد راحتو فشوفتهاا..

نوح:(حك لحيتو ونطق بخشونة) وجدتي راسك؟

رحيل:(ضارت شافت فيه ونطقات بهدوء فاش فهمات قصدو)باقي لحال؟

نوح:(ضار شاف فيها ونطق بهدوء وجدية) قلت لسي إدريس بلي مغاتكونش خطبة وغايكون لعقد نيشان مكاين لاش نضيعو لوقت مزال الفثنة..

يتبع...