الجوهر الحر الجزء 41

الكلام لي سمعاتو من عندو خلاها تحل عينيها مصدومة لسانها تربط ومبقات عارفة ماتقول..هي كانت عوالة على الخطبة باش تزيد تاخد وقتهاا وتستاعد نفسيا لهاد الزواج.. ولكن هو كان ليه رأي خر ولاح ليها كلامو بحال شي قنبولة تلفاتهاا على لقبلة.. قلبات وجهها جهة الزاج وسكتات معاوداتش نطقاات وعقلها سرح بيها ثاني لبعيد ومغاتنكرش بلي الخلعة والخوف شدوها فديك اللحظة وهادشي أمر طبيعي بالنسبة ليها هي لي مرات من ديك التجربة القاصحة.. أما نوح فغير شافها سكتات تاهو سكت وعارف هي فاش كاتفكر دابا وفضل أنه يحبس الموضوع تايوصلو لشي بلاصة فين يدوي فيها.. كمل طريقو لواحد لغيسطو كيبان شيك من براا غير من الديزاين ديالو لبراني.. بلاصى طوموبيلتو ونزل هاز لاڤيست لي حط لور لبسهاا عاد شاف فيها هي لي نزلات تاتمشى جهتو.. أشار ليها بيديه بااش تسبقو وداكشي لي دارت تمشات جهة لباب وهو فجنبهاا.. دخلو لداخل لي كان كالم وطالقين موسيقى غربية.. شدو بلاصتهوم فواحد الجيهة بعيدة شوية ورحيل الكلام لي قال ليها قبل شوية خلاها تشطن وماتردش لباال گاع لبلاصة لي أول مرة تجي ليها.. جلسات دايرة رجل على رجل وهزات لموني حلاتو وحدرات راسها تتشوف فلِپلا ونفس الشي دار تاهوو..

نوح:(شاف فيها بعد مدة ونطق بهدوء)شنو تبغي تاخدي؟؟

رحيل:(تلبكات وتلفات وكلشي تجمع عليها)ماعرفتش

نوح:(حك لحيتو ونطق بتساؤل هاز فيها حاجبو)تبغي لحوث؟

رحيل:(شافت فيه ونطقات بهدوء) ماعرفتش واش غايكون عندهوم بنين

نوح:(شاف فلموني ونطق بهدوء)ديجا جربتو لحوث عندهوم كيكون فريش (شاف فيها ونطق بحنية)شوفي نتي شنو حبااات خااطرك

رحيل:(تبسمات ليه بخفوت)واخا

نزلات راسها تاني لداك لموني لي مكتوب بلفرونسي وقدام كل پلا فيه تصويرة.. خدات وقتها تاتشوف فأصناف لحوث ونوح دغيا جمع لموني وتقاد فالجلسة كيشوف فيها وهي حادرة عينيها ومرة مرة تفرفر بدوك الرموووش.. سهى فيها وهي تاتقراا وتعوج فمها بعفوية ناسية راسها تاقررات شنو غاتاخد وهي تهز راسها وغير شافت شوفاتو ليها وديك التكميشة دلحجبان وهي تسرط ريقها وقلبات عينيها كي شي مونيكة ونطقات بخفوت: ناخد پلا دلحوت مشكل

نوح:واخا

عيط لسرباي لي جاا وقف حداهوم وقال ليه نوح شنو يجيب ورحيل عاد ضورات وجهها تاتشوف فداك لغيسطو والناس لي فيه وعينيها تاتبرگگ على دزاين ديالو تاسمعاتو نطق بهدوء:رحييل

رحيل:(شافت فيه وبنفس لهدوء نطقات) وي

نوح:(تقاد فجلستو ونطق بصوت جدي) نتي باغا لعرس؟؟

سرطات رحيل ريقهاا وعقلها سهى بيها لحوايج هي مباغاااش تفكرهوم فديك اللحظة.. شي لقطاات بغات تنساهووم.. تزيرات وبدات تاتحك يديها وتاتحاول ضبط تنفسهاا وتنسى شي لي فاات..

رحيل:(ببرود) لا

مكانتش باغا لعرس نهائيا ورافضااه وكون جاااها نوح فشي وقت اخر كون قالت اه بالفرحات عليها ولكن هي صافي نفرااات شي حاجة سميتها لعررس..

نوح:(باقي صوتو جدي) هاد الأمور بغيت ندوي فيهوم معاك فاص افاص باش نعرف نتي اش باغاا..

رحيل:(نطقات بهدوء) أنا مباغااش لعرس

نوح:(حرك راسو )أنا نيت مباغيهش ولكن لاكنتي نتي باغاه نقدرو نديروه ليك وأنا مانحضرش فيه (وبنبرة قوية كمل) ويكوون لعرس فيه غير لعيااالات وحس راااجل مايضورش فيه دوزي ليلتك تفرحي فيها مع حبابك وناااسك

ماشي أول مرة تلاحظ بلي ماعندوش مع الإختلاط وسبق لاحظاتها فاش كان تيجي عندهوم مكانوش كيتجمعو فطبلة وحدة وديما مفرقين وتافلعيد ملي مشاو عندهوم كانو الرجال بوحدهوم ولعيالات بوحدهوم وتامن السربايا لي سرباوهوم كانو عياااالات.. وهادي نقطة عرفاتها فيه..

رحيل:(كمشات حجبانها ونطقات بتساؤل) نقدر نسولك؟

نوح:مرحبا الفثنة

رحيل: علاش نهار عرس رجاء نتا كنتي حاضر لعرس ودابا قلتي مباغيش تحضر لعرس الادرناااه ويكونو فيه غير لعيالات؟

نوح:(تبسم ليها ونطق بنبرة دات معنى) داك النهار كنت حاضر باش نحضي رزقي

غمزها بالخف تاحسات بالصهدة طلعات معاها فاش فهماتو قصدهاا بكلامو.. رمشات عينيها وهو بقا جالس براحة كيشوف فيها ومبسم بالخف..

نوح:(صونى تلفونو لي حاط فوق الطبلة شاف شكون وبعدم اهتمام رجع قلبو على وجهو وحبس ليه الصوت وشاف فيها بهدوء) على هاد لحساب نهار العقد غانديرو عراضة يكونو فيها العائلات بزوج بيما أنكي مباغاش نديرو عرس كبيرر

رحيل:(نطقات بهدوء)تاتشوف مع بابا

نوح:(حط يديه فوق الطبلة ونطق بجدية)نشوفو معااك نتي اللولة لي مولات الري والشواار وسي إدريس على حساابي رحيييل (هزات فيه عينيها فاش سمعاتو عيط ليها بسميتها وكمل كلامو) هاد لجلسة دارت باااش نتافقو على شنو تبغي وشنو ماتبغيش ونفس الشي عندي داكشي علاش أي حاجة عندك لداخل باغا تقوليها أنا هنا كنسمعك

حركات راسها باه وحبسو كلامهوم فاش جابو ليهوم لپلا لي ختارو وحطو قدام كل واحد لپلا ديالو وعمرو ديك الطبيلة بأنواع وأصناف كثيرة دلحوت لرحيل وهو ختار ليه ستيك دلحم مع لخضرة..

نوح:(شاف فيها ونطق بحنية) نأجلو كلامنا بعد لغدا لابغيتي تاخدي شي حاجة خرا قوليها وماتحشميش..

اهتمامو لي بينو ليها بكلامو وبتصرفاتو خلاوه تفرح وتزيد ترتااح معاه كثرر وكثر.. بداو غداهوم فالسكات وكل واحد كياكل من لپلا ديالو ورحيل فديك الساعة راه الماكلة هي آخر همهاا وماعندها ملين دوووز.. فيها واحد لخلعة بحال لاغادوز شي متحاان ومعدتها بدات تتحك عليها.. كان لپلا ديالها يحل الشهية ولكن هي شهيتها مسدودة ديك الساع.. بدات تتاكل غير بشوية وماهزاتش راسها تاني وشافت فيه.. نقبات غير شوية قبل ماترجع لور وتهز كاس دلما تتشرب منو..

نوح:(شاف فلپلا ديالها ونطق وهو هاز حاجبو)ماعجبكش لحوث؟

رحيل:نو بلعكس زوين

نوح:(بتساؤل)وعلاش ماكليتيهش؟

رحيل:كليت لي قديت عليه ولحمدلله شبعت

نوح:(هز فيها حاجبو) تبغي تاخدي حاجة خراا

رحيلة:لا لا مكاين لاش (هزات صاكها وتبسمات)سمحلي

ناضت غادة جهة الحمامات تقاد حالتها وتجلس شوية مع راسها باش تقاد تفكيرها لي مارحمهاش.. قادات لغوج أليڤغ ديالها وجبدات تليفونها تتجاوب لبنات لي مسيفطين ليها مساج باش يسولوها على لخرجة كيف دازت.. جوباتهوم ورجعات تليفونها لصاكها وبقات واقفة تتجمع النفس وطلقهاا.. الجوع قتلها ولكن ديك لخلعة والستريس دارو ليها لوجع وضراتها معدتها داكشي علاش ماكلاتش.. بقات تم تاحسات براسها مزيان عاد رجعات لطبيلة فين كان جالس.. كان مربع يديه فوق الطبلة مور ماجمعو الغدا.. جلسات بلاصتها وتبسمات بخفوت فاش سمعات صوتو نطق بهدوء:شنو تبغي تشربي؟

رحيل:كافي كريم

خدا ليها لي بغات وتاهو خدا قهيوة كحلة.. محكرش عليها مزال فالماكلة حيت عرفها غاتكون متوثرة داكشي علاش خلاها على راحتها..

نوح:(حك لحيتو) شنو رأيك فالكلام لي قلت ليك قبيلة؟

رحيل:(ربعات يديها وشافت فيه بجدية) كيف قلت ليك أنا مباغااش عرس بالنسبة ليا هادا هو آخر همي.. وتاديك لعراضة مكاينش لاش منهاا..

لعرس هو اخر همها كيف قالت ليه هي لي باغا دابا هو كلشي يدوز بخير ومايتعاودش لفيلم لي عاشتو قبل واخا راه فرق شاسع بين عاصم ونوح ولكن ضروري ماداك التخوف يكون عندها وتحس بيه..

نوح:(حرك راسو بهدوء ونطق بجدية) ولابد ماخص يكون إشهار لزواج..

وصلات لكونسوماسيون ديالهوم وحبسو لكلام تامشى السرباي عاد رجع نوح كمل كلامو...

نوح:(استأنف كلامو بجدية) نتي عارفة أنا المسؤول على العائلة من نهار الحاج الله يرحمو توفى.. كنحاول أنني ندير لي فجهدي باش لعائلة ماتشتتش وتبقا مجموعة كيف كانت قبل.. عليها حنا غانسكنو فالرياض دار العائلة (شاف فيها بهدوء) وراه عندي دار هنا فمراكش باقي مكملو الإصلاحات فيها وملي يكملوها نتي تكلفي وفرشيها على دوقك حيت تاهي غانبقاو نمشيو ليها مرة مرة..

رحيل:(جغمات من كاسها ونطقات بهدوء) واخا لي بان ليك

نوح:(نطق بهدوء)شنو بان ليك نتي ارحيييل ؟

رحيل: أنا لمهم عندي هو الراحة سوى سكنا فالرياض ولافدارك

نوح:(قلب وجهو كيحك لحيتو ونطق بجدية) دارناااا (شاف فيها هاز حاحبو) هاديك غاتكون دارك تانتي المهم غاندوي مع سي إدريس باش يجمع ليك لوراق ونتي وجدي راسك هاد السيماانة نديرو فيها لعقد (نطق بجدية) غانڤيرسي ليك شي حاجة فلكونط ديالك باش تقداي لي خاااصك

رحيل:(صدمها تانسات راسها ونطقات بصوت عالي شوية)سيماانة (تداركات الوضع فاش شافت لهزة دلحاجب لي داير فيها) ولكن مغاتقدنيش وو

نوح:(تايدوي بلخاطر) سيمانة ارا ماديري فيها تكلفي غير بشنو غايخصك نتي وشي لاخر خليه علياا أناا ماتهزيش ليه لهم تفاهمنا

رحيل: ماشي من الأفضل نزيدو نأجلوووه

نوح:(هز فيها حاجبو ونطق بخشونة)اش غانأجلو مكفاكش هاد لوقت كولو الله يجعل البراكة خير البر عااجله والصبر لي بقا عندي راه تسالى..

كمل كلامو بجدية واضحة وضارب فيها تخنزيرة تاسكتات تاضور عينيها.. من حقو يتعصب شحال وهو داوي مع إدريس وطلبها منو ودازت مدة كبيرة عاد فاتحها فالموضوع وهي خدات وقتها تتفكر وفاللخر رفضااتو ومع دلك حاول تاني وطلبها من أول وجديد وبيما أنها وافقات فصافي مكاين لاش يبقاو يطولو.. تسد السوجي وطلب نوح لحساب خلص وناضو خارجين بزوج ورحيل تتفكر غير فديك السيمانة لي غادوز طايرة.. حطات راسها على الزااج تاتشوف وعينيها على الطريق ساهية تاصونى تلفونها وكان ريان..

رحيل:وي ريان

ريان: عوينات الجلبانة امدرا كيف دازت لخريجة مع حبيب القلب هههه

رحيل:(عضات على شفايفها وشافت فنوح بطرف عينيها) تانشوفك فدار ونكملو

ريان:(بمزاح)اهاا يعني نتي باقا معاه اوا سلمي لينا على النسيب

رحيل:(بركات على سميتو) ريان سير كمل خدمتك تاتسالي ونكمل أوكي باي

قطعات معاه وهي تتحلف فيه تاسمعات صوت نوح لي نطق بهدوء: مرحبا بسلامو

ضارت شافت فيه وهي مخرجة عينيها ونطقات بعفوية: اويلي ملين سمعتيه وأنا ماقلتهاش ليك

نوح:(ضار شاف فيها وتبسم) لڤولوم دتلفونك مجهد وكيسمع الفثنة

رحيل:(غمضات عينيها) مادريتش لبال

نوح:ماعليش (شاف فيها ونطق بجدية) ملي تكوني معايا نبغيك تاخدي راحتك..

وصلها قدام باب الدار عاد تنهدات وزولات لسانتوغ وقبل ماتنزل شافت فيه ونطقات بهدوء: الله يعاون

نوح:(غمض عينو بالخف) تهلاي ليا فراسك وسلمي على مالين الدار

رحيل:مرحبا بسلامك

نزلات رحيل وتمشات بشوية جهة لباب جبدات من صاكها ساروت وقبل مادخل شافت فيه وهزات يديها دارت ليه باي عاد سدات لباب وهو تحرك من تما غادي يقضي شغالو..

وصلات لفوق ولقات مها وغزلان وأسماء لي معرفاتش اش تادير تم وباقي لحال على خروجها.. غير شافوهاا وهي تجرها أسماء ونطقات بحماس:قولي ليا كيف دازت لخرجة

رحيل:اش تاديري هنا

أسماء:خرجت بكري قلت ليهوم فيا لوجع ودابا نطقي عاودي لينا

تانيرت:ههه راه من الصباح وهي تتسناك

رحيل:فين سيدرا

تانيرت:داها باك لگاراج

أسماء:ولخرااا دوي ماتعصبينيش

رحيل:(ببرود)نتغدى هو لول عاد ندويو

أسماء:اشمن غدا يااك تغديتو براا؟

رحيل:(قلبات عينيها) الشهية كانت مسدودة ولماكلة مكانتش باغا تنزل ليا

أسماء:(حركات راسها بلا حول) أويلي باين هاد لخرجة زبلتيها عوتاني

رحيل:غيزو عفاك سيري حطي ليا ماناكل راه فيا لموت دجوع

مشات غزلان سخنات ليها لغدا وجابتو ليها ورحيل مانطقات تاكلات وشبعات كرشها عاد هزات كاس لعصير وبدات تتعاود ليهوم وكلهوم ساكتين تاتانيرت باغا تعرف اش وقع..

رحيل:قال ليا مغاتكونش لخطبة غايكون لعقد نيشان

أسماء:(غمزاتها)السيد مبقاااش عندو الصبر باغي يعقد ديريكت ههه

رحيل:من هنا لسيمانة غانديرو لعقد

شهقات أسماء مخرجة عينيها وتانيرت نطقات بتساؤل:سيمانة ولكن ابنتي مغاتقدناااش لانتي توجدي ولاحنا نوجدو لي خاص

رحيل:مغايكونش عرس غير تهناو لاأنا باغاه لاهو باغي عرس قال ليا لاكنت باغا نديرو نديرو ولكن مغايحضرش فيه ويكون فيه غير لعيالات مي نتوما عارفين لعرس هو اخر حاجة نفكر فيهاا

أسماء:سيمانة اصاحبتي دغيا غادوز؟

رحيل:(حركات راسها ونطقات بتوثر)عارفة هو قال ليا نتكلف غير بلي خاصني ولباقي عليه مانهزش ليه لهم وراه غايدوي مع بابا

تانيرت:صافي مزيان ملي يجي باك ونشوفو معاه

أسماء:(ناضت)نوضي تحركي دابا

رحيل:فين؟؟

أسماء:لجايحة لكحلة تنوضي تبداي تشري لي خاصك راه دهازك كولو خصك تشريه فسيمانة ونتي جالسة ليا مفطحة تحركي

تانيرت:أسماء عندها لحق لاكانت سيمانة راه يالاه تبداي ابنتي تاخدي لي خاصك

غزلان:نوض نلبس حوايجي ونمشي معاكوم

رحيل:(حكات جبهتها) باقي لحااال

أسماء:إيخان لي باااقي انمشي نبدل حوايجي باش ناخد راحتي وتانتي ماتلبسيش طالون وحنا تابعانا تمارة ديال التسخاار

كل وحدة من لبنات مشات تلبس تاسالاو ونزلو عند تانيرت لي مدات واحد الجوا لبنتها ونطقات بتبسيمة:هاكي هادو باش ضباني بيهوم اماما

رحيل:عندي اماما بلاماتشطني بالك

تانيرت:شدي دهازك راه على حساابنا وسيري خودي لي بغيتي واخا

رحيل:واخا (عنقاتها)يخليك لياا يالاه معانا

تانيرت: غير سيري نتي وغزلان وأسماء أنا غانبقا هنا نوجد لكاسطروط لباك ودراري ملي يرجعو ردو بالكوم فطريق واخا

رحيل:واخا بسلامة

هزات رحيل طوموبيلتها وركبو لبنات معاها وشدات الطريق غادة تسخر شنو خاصها..كانت ساكتة تتفكر فهاد الزربة لي زرب عليها ولوقت لي ماعندهاش مزال وشحال من حاجة خصها تاخدها.. عقلها تبلوكا غير كيفكر والأهم تتفكر بلي من هنا سيمانة غاتكون مرتو وغايتجمعو تحت سقف واحد.. هاد لفكرة بدات راه مشكلة ليها رعب غريب.. وأسماء جالسة جنبها هازة مدكرتها الصغيرة تاتكتب اش خاااص تقولي هي لي غاتزوج.. گاع لحوايج لي طاحو فبالها حطاتهوم تماا..

أسماء:خلينا نسبقو شي بوتيك دحوايج لداخل هوما لولين

حركات ليها رحيل راسها باه وشدات طريق لمول فين كاينين لبوتيك دلحوايج.. بلاصات طوموبيلتها ونزلو بتلاتة مسبقين محال لحوايج دلداخل.. كان لمحال كبير وفيه جميع أنواع لبيجامات ولشوميز دونوي وأي حاجة حبات خاطرك..

رحيل:باغا ناخد لبيجامات لي كيكون لفوقاني ديالو بالصدايف وتوبهوم ستان

أسماء:بحال هادوم لي معلقين فداك لمانكا؟

رحيل:اييه اجيو

مشات رحيل شافت التوب هو لول فاش عجبهاا عاد بدات تتقلب على الالوان لي فيها.. جات لبنت لي خدامة تما ونطقات بتبسيمة:وي لالة شحب لخاطر

رحيل:لوانات لي فهاد لبيجامات ولطاي لي كاينين؟

لبنت:كاين لوانات كاملين وتالطاي اشمن طاي باغا

رحيل:لارج وعطيني نشوف الألوان

وراتها لبنت لوانات ورحيل عزلات لي بغات منهوم تاجرات أسماء لون لكحل ونطقات بسخرية: لعريسات كيديو ألوان فاتحة اشريفة

رحيل:عجبني لكحل اراي

أسماء:لكحل لا زگاي

خدات لي بغات فاش شافت لاطاي جاتها هي هاديك عاد جراتها أسماء جهة لشوميز دونوي ورحيل قلبات عينيها فاش شافت داك لعجب وداك لمسخ ونطقات ببرود:هادشي مغاناخدوش

أسماء:(حركات راسها مسيراها) هممم

مشات أسماء وغزلان تيشوفو ليها لموديلات ورحيل واقفة تاتسوط تاسمعات تلفونها صونى بنغمة مساج وحلاتو تتقراه كان من لبنكة.. خرجات عينيها تتشوف فديك لاصوم لي مكتوبة وهي ممتيقاش واش مكتوبة 30000 درهم ولاغير كتخايل...

تحل لباب ديال الدار ودخل إدريس مع سيدرا لي صوتها كيتسمع وهي فرحااانة بداك الساعات لي دوزاتها معاه.. طلعو لطبقة الثانية فين كانت تانيرت واقفة فالكوزيتة تتوجد لكاسكروط.. تبسمات فاش سمعات صوت إدريس لي نطق ليها بحنية:تانيرت إينو اش كاديري؟

تانيرت:كانوجد ليكوم كاسكروط درت لكيكة دالشكلاط لي تتعجب ديك القنية ولكريب

سيدرا:(تخشات بيناتهوم ونطقات بحماااس) ديري ليا لبناان تانيرت إينو

تانيرت:واخا الالة حاجة خراا

حركات سيدرا راسها وحلات يديها تاتحنات عندها تانيرت عنقااتها وباستها ونطقات بحنية: سيري بدلي حوايجك واجي تعاونيني؟

سيدرا:فين مامي؟

تانيرت:ماماك خرجات هي وغزلان وأسماء

سيدرا:(كمشات حجبانها) علاش ماتسناتنيش؟؟

تانيرت:حيت مشيتي مع جدك وهي خصها تمشي تقضى اش خصها

سيدرا:(ضربات برجليها فالأرض ونطقات بتدمر طفولي) أنا مخاصمة معاهاا يالااااه

مشات لبيتها تاتنگر مخليا إدريس مبسم عليها وتانيرت تاتحرك راسها بلاحول.. جر الكرسي وجلس وتانيرت طفات على داكشي لي تادير وجرات الكرسي لي قدامو ونطقات بهدوء:غايكون فخبارك آخر لأخبار؟

إدريس:اييه عييط ليا ولد لحاج وعلمني (مسح على وجهو) خصني نجمع وراق رحيل باش نعطيهوم ليه

تانيرت:ماشي اإدريس زربو سيمانة راه مغاتقدناااش نوجدو گاع لي خاصنا ونتا عارفني باااغااا ندير لبنتي فرحهااا ماشي بحال لمرة لولة بغيت هاد لمرة كلشي يكون بأصولو

إدريس:(بجدية)السيد راه عندو الحق واش نسيتي من امتى طلب يديها لزواج من الصدقة لي درنا لمحمد طه وشحال دلوقت خديت باش يالاه نگولها ليها وبلامانساو لوقت لي خدات وفلخر رفضاااتو وهادشي ماخلاهاش يرجع لور بلعكس رجع طلبها لمرة الثاااانية وهادشي كيبين بلي السيد شاااريهااا ومن حقو يبغي يعقد عليها فالقريب..

تانيرت:ماقلتش لا ولكن غير لوقت مغايقدناااش باااش نوجدوو راسناا وتاهي توجد لي بغااات وهاد لمرة راه غاندير ليها ليلة لحنااا بوحدها ومغاديش نشركها مع لعقد وزيد لعرس لي مبغاتوش ماعرفتش صراحة كنت باغاهاا ديرو

إدريس:لعرس غير شكليات اتانيرت ونتي عارفة هادشي وزايدون راه نهار لعقد غانديرو ليها عرااااضة كبيرة مال بنتي رخيصة عندي وتاولد لحاااج راه شاورها وسولها واش بغات دير لعرس هي قالت ليه لا

تانيرت:اه قالتها ليا وتاهو مكانش أصلا غايحضر فيه كون دارتو

إدريس: فخباري من حقو ولاجيتي تشوفي كون كنت بلاصتو كون درت نفس الشي

تانيرت:دابا غانشوفو نهار لعقد وقتاااش باش نهار قبل منو نديرو ليها ليلة لحناااا

إدريس:أصلا علمني ولد لحاج بلي غايدير تاهو عراضة لرجاال لمعارف ديالو ولي من العائلة ديك النهار نتوما ديرو ليلة لحنااا بناتكوم وبالخصوص ديال الماكلة راه غانتافقو مع التريتور هو لي غادي يتكلف لينا فليوماين بزوووج نتوما ماتهزوش لهم لماكلة ولداك الصداااع تكلفو لياا غير بشنو غاتلبسو وداك التخربيق ديالكووم ورحيل اشنو غايخصهااا (شاف فيها بجدية) غدا غانعطيك لفلوس باش تقدى بيهوم لي خاصها

تانيرت:عطيتها ليوم شي حاجة كانت عندي

إدريس:(شد يديها باسها ونطق بحب) يخليك ليا تانيرت إينو

تانيرت:(تبسمات ليه)تاسااانو عرفتي فرحانة بزاااف فيما كانشوف الراحة فوجه رحيل وعينيها لي كيبانو بلي راه فرحااانة تاتكون هاديك هي الدنيا ومافيهااا عندي

إدريس:لحمدلله دابا الدنيا بدات تاضحك فوجه ولادناا وگاع لي كانو سباب عدابنا راه تهنينا منهووم

تانيرت:واييه هادا هو الأهم نوووض نكمل لكاسكروط ونتا سير دوش وبدل عليك بيما يجيو الدراري ونحط لكاسكروط إيما لبنااات راني عااارفاهوم صعيب يرجعو دابااا

إدريس:واخاا

ناض خارج من لكوزينة وفطريقو تلاقى بسيدرا لي نازلة هازة إيڤانا لابسة بيجامة شورط ودباردور وجامعة شفايفها مقلقة زعمة تبسم ليهاا وكمل طريقو لفوق وهي نزلات غادة جهة تانيرت ونطقات:تانيرت إينو فين ماكلة إيڤانا

تانيرت:لهيه ملي تعطيها غسلي يديك بالصابون واجي تعاونيني

نفدات سيدرا كلامها بهدوء ورجعات جهتها تتعاونهاا فشنو كادير..

---

بين يديها تلفون وعينيها على داك الرقم تتأكد واش قراتو كيف هو ولاعينيها تزاگلو ليهاا.. قربات جهة أسماء وجراتها تاضارت جهتها ونطقات بتساؤل:قراي ليا شحال هاد الرقم؟

أسماء:(مكمشة حجبانها وغير ضربات تاهي على الرقم وخرجات عينيها بصدمة) 3 دلمليون

صونى تلفون رحيل لي بين يديها بنمرتو وغير شافتها وهي تعطيهوم بالضهر خارجة من لمحل لي فيه الصداع عاد جاوبات بهدوء:ألو

نوح:(بنفس الهدوء)وصلاتك الأمانة الفثنة

رحيل:(حكات جبهتهاا)وي وصلني لمسااج عاد داباا

نوح:(تنهد ونطق بخشونة) قضي بداكشي لي سيفطت ليك دابا وخودي لي حبات خاطرك ولاخصاتك شي حاجة خرا علميني

رحيل:(جاب ليها التمام بهاد الاهتمام ديالو بلاماتشعر نطقات بخفوت) ولكن راه سيفطتي ليا بزاف دلفلوس مكااانش عليك تعدب راسك

نوح:(بهمس) عدابك راحة الفثنة

رحيل:(بقات تاضور عينيها ونطقات) لاصوم لي سيفطتي ليا راه بزاف

نوح:(نطق بجدية) تاحاجة ماتغلى عليك الفثنة ديريها فبالك..

سكتها بكلامو لي قال وخلاه تضرب الطم أما نوح تنهد بصوت مسموع ورجع نطق بصوت هادئ حنين: كيف قلت ليك لاخصاتك شي حاجة علميني تفاهمنا

رحيل:شكرا

نوح:(نطق بخشونة) نخليك دابا الله يعاون

قطع لابيل ورحيل تبسمات بخفوت وهي راجعة عند لبنات وأسماء غير شافتها جراتها تاتخلعات ونطقات بصوت مصدوم:العاااار ماتقوليش ليا هو لي سيفطهاا ليك

رحيل:(زادت وسعات تبسيمتها ونطقات بضحك)والله تاهو

أسماء:شكوون بحالك اختي 3 دلمليون كلها دقة وحدة

غزلان:(بضحك) دابا ضربيها بلعين

أسماء:عيني باردة غير تهناااي (شافت فرحيل ونطقات بندالة) السيد مسيفط ليك 3 دلمليون وتيقول ليك بطريقة غير مباااشرة تهلااي فياا بهيشتيك بيشتيك هههههههه

طلقاتها بضحكة دالشيخات وسط لمحاال مامسوقاش ورحيل تاضور عينيها على الناس لي تيشوفو وقربات جهتها قرصاتها ونطقات بعصبية: الجهل سكتينا الموصيبة

أسماء:شوفي اش ختارينا ليك اأنا وغزلان

هزات رحيل حجبانها تاتشوف فدوك لشوميز لي عزلات ليها كلهوم معريين وكل واحد وشكل ديالو بالسترينگاات ديالهوم وشي عجب رحيل أول مرة تشوفو..

رحيل:عند بالك غانشري هاد لعجب ونلبسو

أسماء:بزز منك تشريه وتلبسيه احوبي

رحيل:(أشارت رحيل لواحد شوميز دونوي ونطقات)غاناخد بحال هادوك

ضارت أسماء ببرود جهة لبلاصة لي شيرات ليها تتشوف فالشكل ديالو كان سامبل وطويل والأهم عند رحيل مستور ضحكات أسماء بسخرية ونطقات:شوميز دجدة واش من نيتك الرجااال كيبغيو لعرااا فهمتي يشوف مرتو لابسة ليه غير لمسخ لي تتقولي ليه ماشي هاد شوميزات دجدة لي باغااا

غزلان:متافقة معاك أي راجل كيفما بغا يكون كيبغي يشوف مرتو لابسة ليه ومزيزة ليه وهاد الشكيلات لي ختارينا ليك راه اخر مكااااين ولحلاوة كون كنت مزوجة كون لبستهوم ليه ههههه

تراشقو بزوح تيضحكو ورحيل تاتشوف فيهوم ساكتة... راه مبقاتش فكستيون دلحوايج بقات فالشخص لي هي مجرد مكتوقف قدامو تتحس براسها تلفات على لقبلة.. تاتحس بواحد الإحساس فشكل تيخربقهاا وتيخلي مشاعرها يولي بحال لاضربهوم شي إعصاار.. غير لخرجة ليوم تلفاتها وهادي غير جلسو طيط اطيط مكملاش سعتاين دلمگانة لاعساك لاتجمعات معاه فدار وحدة وفبيت وحدة راه مجرد مكاتوصل لديك الفكرة تاتحس لبكية شدااها وهي أصلا عندها دكريات كحلة مكتبغيش تخليهاا تسيطر عليهاا..

رحيل:غانمشي نجيب قرعة دلماا

خلاتهوم ومشات بزربة وهي حاسة براسها شحفات ونيت باغا تكونسونطرا تاني وضبط أفكارهاا أما أسماء كانت عارفاها باش تتحس شافت فغزلان ونطقات بهدوء:لاخليناها تختار لبيجامات كوني على يقين گاع لمستور هنا غتاخدو

غزلان:ناخدو حنا على دوقنا تاتجي وتشوف اش بان ليك فدوك لسوتيان فنين

ضارت أسماء جهتهوم تاتشوف فيهوم هوما سوتياان تايجيو من تحت الصدر تالفوق لبوط شبيكة تتبين لحم ولجزء لي مغطي هو صدر فقط.. ستيلهوم عجب أسماء وهزات دوك لشوميز دايراهوم فالسلة ومشات جهتهوم جبدات وحدة تاتشوفها حمقهاا خصوصا لكيلوط ديالو كيجي بحال بوكسور تاهو شبكة وتيجي مغطي غير الأنوثة ديالك فاش تتلبسيه.. هزات منو البيض والباج والغوز بارد وگاع لوان لي نغموها وطربوها وبدات تشوف فلاطااي وحطاتهوم فالسلة تاتجي رحيل تجربهوم.. كانت هي وغزلان فيما يبان ليهوم شي حاجة يمشيو ليهاا يكيلو منها زوح سلات كبااار مكيلينهوم تارجعات رحيل تاتجر فصندالتها وبديك لعباية لي تتجرجر مع فولار سامبل لايحاه فوق كتافها ودايرة نضاضر فوق الراس.. تشوفها تحلف عليها خليجية بداك الستيل لي تادير.. مدات ليهوم قراعي دلما لي جابت ونزلات عينيها تاتشوف فدوك زوج سلات وشهقات:هاويلي اش هادشي كامل

أسماء:(شربات تابللات جوفها ونطقات)شوفي لطااي واش غايجيوك وهادشي رااه كيف والو ازين باقي خصك حوايح خريين

رحيل:(تحنات تتشوف فشنو ختارو وشافت ليطاي تاهوما ونطقات) قربتي تدي لمحااال كولو وتتقولي خاصيني حوايح خرين

أسماء:داكشي هو هاداك

رحيل:خصني نجرب لطااي

مشات رحيل لبلاصة تقياس جربات لسوتيان فوق حوايجها حيت هوما لي تتلقاى فيهوم مشكيل خصوصا مور لولادة صدرها كبر والدورة دياال السوتيان صغيرة أما السليبات فعينيها ميزانها.. استسلمات لشي لي خدات أسماء ومشاو يخلصو حيت مبقاش شي حاجة خرا تم.. واقفة فلاكيس ولبنات تايجمعو ليها فالبلاستيكات شنو خدات تاسالات وهزات كارط گيشي خلصات بيهاا حيت مهزاش داكشي كامل وخرجو محملين من تم.. حطو داكشي فالطوموبيل عاد كملو تاني طريقهوم لمحال اخر وأسماء مكتقاداش وعندها صبر لي ماعندش رحيل لي معنية بالأمر.. عزلات ليها بحال الاتتعزل لراسها ورحيل طاح حبها على واحد بيجامة كيكونو شويريط قصير ودباردور ديالو حمقهوم ستيلهوم وخدات منهوم تاهوما والمحال لي يدخلو ليه مايخرجو منو تايكونو كيلوو منو.. لحقات عليهوم رنيم تاهي لي خرجات من خدمتها وقررو يساليو من لحوايج دلداخل هوما لولين حيت غاتشري كلشي من لول واخا عندها مي حوايح لعروسة ودهازها كيبغي يكون جديد.. والألوان الطاغية كانت البيض ولباج ولغوز بارد.. طاح الظلام وهوما باقيين كيدورو تاعيااو عاد رجعو لدار محملين بالبلاستيكات ولعيااا بااااين عليهوم خصوصا رحييل..

فالرياض السليماني فين كانت العائلة مجموعة كلها والحاج لحسن وزاينة لي رجعو من عند ولدهوم لي كانو عندو هاد ليامات.. جات السعدية هازة الصينية دأتاي وحطاتها فوق الميدة وتبعاتها البنت لي كانت جديدة يالاه جابوها باش تخدم هازة صينية ديال الحلوى البلدية والفاكية.. هز نوح البراد وبدا يكب فلكيسان وهز عينو فرؤوف لي ناض يعطي لكل واحد كاسو..

رحمة:(شافت فنوح ونطقات بتبسيمة) قلتي باغي تهضر معانا خبار لخير أولدي؟

نوح:(بهدوء) ديرو بحسابكوم فهاد السيمانة غاندير لعقد

كانت رحمة تتاكل الغريبة ومع سمعاتو اش قال وهي توحل ليها وبدات تتكحب تاتجيفات ولات حمراا وعينيها كيدمعو.. ناضو جهتها ونوح مد ليها كاس دلماا وبدا يضرب شوية فضهرها ورؤوف شاد يديها وبيسان تاتسولها كيف بقات وهي صافي شافت لموت.. بقات هاكاك تاحسات براسها ولات بخير وحلقها تجرح بقوة الكحبة

نوح:(كمش حجبانو) شوية دابا؟

رحمة:امم (كحبات) اه اولدي

بيسان:ردي لباال اماما مرة خراا

رجعو لبلايصهوم ونطقات زاينة بالسوسية كيف عادتها: يام لبااس بعدا أيلي "ياك لباس بعدا ابنتي"

رحمة:لباس اخالتي لبااس

بيسان:(شافت فنوح ونطقات بفرحة) مبروووك عليك احبيبي (ناضت عنقاتو وهو تبسم ليها بحنية وخشاها تحت باطو وهي كملات كلامها بحماس) دابا غايخصنااا من داباا نشوفو اش غانلبسوو فلعرس وغايخص من دابا نشوفو القاعة فين يتقام لعرس

نوح:(نطق بهدوء) مغانديروهش فقاعة حيت مغايكونش عرس غانديرو غير عراضة نهار لعقد والله يجعل لبراكة

رحمة:(كانت ساكتة تتسرط الصدمة دلعقد لي غايدار فسيمانة ودابا زادها بصدمة دلعرس لي مغايكونش كمشات حجبانها ونطقات بتساؤل) كيفاش مغايكونش العرس؟ وزايدون سيمانة راه قليلة مغاااديش تكفيناا وغايخصني نعيط لخوالاتك وخواااالك وزيد عماتك وعمامك أو ولادهوم ونتا عاااارف العائلة عندنا كثيرررة انوح

نوح:(بجدية) هاد التخربيق كولو غير زايد ناقص عندي وزايدون غاندير نهار درجااال لعائلة والمعارف بوحدهوم هنا فالرياااض

رحمة: اييه وشنو غانقول لعائلة لا لا هادشي أنا معاجبنيش أبدااا سيمااانة مافيهاا تافين نخيط اش غانلبس وزيد العرس لي مغايكووونش

نوح:(قلب وجهو ولعب بلسانو ففمو ونطق بصوتو الخشن) لكان على لباااس راه عطا الله لي كيبيعو كلشي طااالع ولعرس دوينااا فيه ايمّااا

نطق بكلمتو لخرا بصوت قاااصح وهو مطلع فيها حاجبو بمعنى راه لكلام تقااال ومغانعاودوش..

لحسن:اييه اولدي لي بان ليك ديرو المهم هو ريك نتا وبنت الناس

نوح:(حرك ليه راسو ونطق بحدية) دويت معاهاا الحاج وهي مبغاتش لعرس

رحمة:(هزات حاحبها بفقصة ونطقات بانفعال) صافي حيت هي مباغاااهش ماديرووش وحنااا مافكرتيش فينااا؟

نوح:(كمش حجبانو ونطق مخنزر) حيت هي لمعنية بالأمر ايمّا والكلام تقااال مانبقاااوش نعاودوه سيمانة غايدار فيها لعقد وغايحضرو ليه لعائلات بزوح ولعرااضة غاتكون فدار سي إدريس (ناض وشاف فمو هاز حاحبو) ونعلمك من داباا نهار لعقد غايمشيو ليه غير رجال لكبار مانبغيش نلقى شي واحد من ولاد خوووتك حااضر

رحمة:(خرجات عينيها)وشنو نقول ليهوم ماتحضروووش أويلي حشومة

نوح:(نطق ببرود) غايحضرو مع الرجااال والله يجعل البراااكة

لحسن:(كيسايس حيت عارف ولد ولدو كيف داير ومتشدد فهاد القضية ديال التخلااط حيت شابه لبااه ماشي بحااال خوالو وعائلة رحمة شي شوية متفتحة) صافي تاهادا حل أولدي نهار دير العراضة هنا كلشي يحضر ليها ولعقد ديالك يمشيو غير لكباار والنساا والله يجعل لبراكة

نوح:(تحنى بااس راسو ونطق بهدوء)الله يطول فعمرك الحاج

بيسان:(تبسمات بتوثر) أكيد لعرااضة غاتكون على حقها وطريقهاا وغانشطو فيها اماما هاد هو الأهم

نوح:(حك لحيتو وشاف فمو) تكلفي نتي وبيسااان بداكشي لي غايخصناا نديوه معااناا مانبغي تاحاجة تكون ناقصة ايمّا بلامانوصيك

قال كلامو وخرج من الصالة مخلي كلشي ساكت وزين العابدين هو أول واحد نساحب وراه طالع لجناحو ساكت ورحمة حطات لكاس بزعاف وناضت تاضرب بديك الصندالة ديال الطالون تاخرجات من الصالة وبقات بيسان ولحاج لحسن وزاينة ورؤوف شي يشوف فشي.. دخلات رحمة لجناحهاا وهي معصبة من الكلام دولدها لي عارفااه مغايبدلووش وغير يقول لحاجة راه خصها دار..كانت تتقول راجلها قاصح ولكن نوح قال ليه متتعرف والو فالقصوحية... هي كاتفكر فالعائلة وبالنسبة ليها مجاتش مايديرش ولدها لعرس وداكشي يكون على حقو وطريقو كيف مولفة.. خدات تليفونها ودوزات لخط لسناء لي كانت ففاس..

رحمة:(غير تحل لخط وهي تنطق بصوت معصب) سناء غدا نبغيك تكوني عندي هنااا

سناء:(مكمشة حجبانها)ياك لبااس مالك

رحمة:نوح (نطقات بصوت خافت) يالاه شوية علمنا بلي غايدير لعقد من هنا سيمااانة وقالك الالة مباغيش يكووون لعرس

سناء:(خرجات عينيها)هاويلي على سيمااانة اش هاد الزربة اصاااحبتي زربها ولد لحاج

رحمة:(جلسات وهي تتسوط) غير سكتي ملي قالها ليا وأنا مفقوصة ومعصبة..

من طبع رحمة أنها عزيز عليها لحاجة تكون بأصولها وبالنسبة ليها زواج ولدها خصو يتقام كما يجب.. من جيه باغا تفرح بيه ومن جيه على قبل العائلة لي عارفاها مغاتسكتش ملي تعرف بلقرار وكل واحد غايبقا ينگ عليهاا حيت هوما طبيعتهوم هاكاك كيبغيو يدخلو فلقررات ديال ولاد خوتهوم ويفرضو رأيهوم.. جالسة فوق نموسيتها وتلفون فيديها تاتهضر مع سنااء لي تاهي لخبار لي سمعات جاوها فشكل.. جات السعدية لي جابت معاها كاس دلماا لي شداتو رحمة وشرباتو منو تاتبرد الفقصة لي شداهاا..

سناء: عاودي ليا من لول اش كاين؟

رحمة:(تتعاود ولفقصة شداها) قال لينا مور لعشا غاندوي معاكوم فشي حاجة نبغي كلشي يحضر اوا تعشيناا وجلسنا ماعلينا مابينا تالاحها لينا فلوجه قال ليك سيمانة وغايدير لعقد وملي سولناه على لعرس قال ليك حگا ماحگا هي مبغاااتوش وهو مغايديروووش

سناء:(ضخكات بسخرية) هالي قلناا من دابا السيدة بدات تحكم وتخليه يدير لي بغااات شفتي اختي اش كنت نقول ليك ونتي جالسة عليا لي كيهمني راحة ولدي ويتزوج بلبنت لي بغاا هانتي دابا باقي گاعما حطات رجليهاا فالرياااض بدات تحكم

رحمة:(تاتسوط معصبة) نتي أصلا عرفاااني واخا ندوي ونقول ليه مبغيتهااش مغايسمعش ليا وبيما أنه اختاره فصافي مبقا كلااام

سناء:(ببرود)نتي موو من حقك ترفضي ليه لبنت الامعجباااتكش ارحمة

رحمة:لبنت زوينة ومغانكرش هادشي ملي شفتهاا

سناء:(قطعاتها) الزين ماشي كلشي اختي وهانتي تتشوفي بعينيك اش طرى دابا غير لعرس أو وقع فيه هاد لمشكيل ويعلم الله ملي يتزوجوو اش غايطراا مزااال ( نطقات ببرود) داك النوع دلبنات راه باين سهمهوم كايبقاو يتمسكنو تايتمكنو وديك الساعة كيبينو وجههوم الثاااني أنا من لول قلت معجبااتنيش ومرتاحيتش ليهااا اختي

حكات رحمة جبهتهاا وهي تتزفر معصبة.. هي ممتقبلاش رحيل تقبل كلي بصح سكتات ومشات مع نوح وطلبوها ولكن هادشي مكيعنيش بلي هي بغاتها ليه من قلبها..

سناء:(فاش شافت ختها سكتات كملات كلامها) دابا شنو غاديري؟

رحمة:(ضحكات بفقصة)اش غاندير اسنااء فنظااارك غانعيط لعائلة نعلمهوم لايقولو خبات عليناا وخلاتناا تالاخر عاد علماتنااا

سناء:(ببرود)غدا غانشد الطريق ونجي نتي عيطي لبابا وعلميه هو لول وختي عفاف راه تاهي هناا عيطي ليهاا نشوفك غدا

قطعات معاها رحمة وهي تاتحرك راسها بعصبية وباقا مبغاتش تبرد من لكلام لي سمعاتو وكيفاش حطها أمام الأمر الواقع وهادي ماشي جديدة عليه.. هزات تلفونها باش تعيط لباها وتعلمو وتعيط تالخوتاتها وخوتها وتتفكر كيفاش تسلكها معاهوم..

---

كان إسلام مكسل فالصالة ديال دارهوم فكازا بسروال بيجامة وتيشورت.. عينو على ولاد خوتو وخوتاتو ساهي كيشوف فيهوم وتفكيرو مشى بيه لبنتو.. كون كانت تاهي عايشة كون كانت قدهوم وتاهي تتلعب هنا معاهووم.. طلع النفس وطلقها وسرط ديك لغصة تابانت ليه مو داخلة تاتعرج.. تقاد فالجلسة تاجات جلسات جنبو وحطات يديها على فخدو ونطقات بحنية: أولدي لعزيز تاتغبر تاكنتوحشك

إسلام:(باس يديها) الخدمة امي قلت ليك يالاه معايا لمراكش نتي مبغيتيش

مو:اوا نتا عارف مانقدرش نخلي دار لي جمعاتني بلمرحوم ونسكن فقنت اخر ها خوك تاهو بغاني نمشي عندو ولكن مبغيتش

إسلام:وشنو تبقاي بوحدك هناا

مو:راه خوتاتك تيجيو يطلو علياا وتاخوك ومرتو مساكن جااو يسكنو هناا ومكرهتش تانتا أولدي تجي وتبقا هنا

إسلام:(حرك راسو بالسلب) نتي عرفااني مبقيتش حامل لعيشة فهاد گازا ومرتاح فمراااكش

مو:اوا اوليدي واش اتبقاا عايش وحدك زوفري هاا

إسلام:عجباني تزوفريت امي

مو:(حطات يديها على فخدو وقالت بحنية) شوف ليك اولدي شي بنت الناااس وتزوووج واش غاتبقا حياتك كلها ونتا بوحدك راه خصك تنسى لي صرا ليك زمااان اولدي ومتبقاش حابس راسك فلي فات

إسلام:(ضحك بسخرية)هه زواج هو اخر حاجة باغيها وكنفكر فيها دابا مناقصني صدااع امي وزايدون بنات الناس مبقاااوش فهاد الزمااان كاينين غير بنات الق (سرط لكلمة قدام مو)

مو:(حركات راسها تتنهد) ماشي كلشي كيف كيف راه ناس طوب وحجرة والاهاديك ماصدقاتش بنت النااس وخرج منها لعجب هادشي اولدي مكيعنيش بلي بنات الناس كلهوم بحال بحاال (شدات يديه ونطقات بتبسيمة) هانتا شنو بان ليك اولدي فرحيل من زيناتهاا بنت داخلة سوق راسها وراه تتعرف واليديهاا وزيد كلمة لعيب متتخرج من فمها

إسلام:(تبسم) رحيل امي تخطبات وقريب تزوح ههه

مو:(كمشات فمها)خسااارة والله ديك لبنت كي لبلارة طارت من يديك الله يكمل عليها بلخير وسعدات لي داهاا

إسلام:(تنهد) رحيل بنت الناااس وعزيزة بزااف امي عندي

مو:اييه وزعمة مكيناااش شي بنت الناااس خرى

إسلام:(باس راسها ونطق بجدية) هاد الساعة مكاينش امي غير خوي دماااغك جربت الزواج وتجربة لي عشت كافية تخليني نقنع ونقول لحمدلله مارانيش هبيل باش نعاودها تااااني..

هز ريحتو رشها وشاف راسو فالمرايا بداك الدجين لي لابس بارد مع تيشورت نواغ وسنيسلة طويلة فعنقوو.. مد يديه تيصاوب شعروو وغمز راسو فلمرايا قبل مايهز تلفونو وسوارت المطور ديالو ويخرج من بيتو مبسم.. بانت ليه غزلان هازة صويك خارجة تاهي ومأنتكة بسروال توب باج مع شومز بيضاا خاشياهاا فيه.. وشعر مبوكلي قصير وبمك اب خفيف على وجهها.. صغر ريااان ونطق وهو شاد يديها كايدورها

ريان:اش هاد الزييين اش هاد لفنووون اغيزو

غزلان:(تبسمات ليه) عويناتك

ريان:(غمزها وكيف عادتو كيقشب معاها) زعمة ماتشوفيش معاناا راني ولد الناااس ونعجبك

غزلان:(قلبات وجهها) سمحلياا ممسالياااش هههه

ضحكو بزوج وريان درعها وهوما نازلين من الدروج كيبانو مفاهمين.. وبالسيف وريان راه تيدير بلاصتوو ودغيا كسبها وخلاهاا ترتاح ليه وتطلق معاه وتعاملو بحاال خوهاا لكبير وتاهو تيعاملها بحال تعاملو مع أسمااء ورحيل ورنيم..

ريان:زين فين غادي

غزلان:غانتلاقى بلبنات نمشيو نكملو تاني الشوبينغ

ريان:عوينات الجلبانة خرجات؟

غزلان:اه سبقات هي وسيدرا وخالتي وأنا غانلحق عليهوم

ريان:نوصلك بلمطور

غزلان:بلا مانصدعك

ريان:تت ماتقوليش هاكاك اغيزو (غمزها) نقول ليك واحد النكتة؟

غزلان:زيد سمعنا

ريان:(يالاه جا ينطق وهو يبان ليه محمد طه جاي كيف لعادة داير ليزيات ونطق بضحك) لخوو مبكر ليوم

زول محمد طه ليزيات وعينو ضارت على ريان لي كيبان مفركس وعلى غزلان بديك لبيسة وطلعهاا من دوك سبيبطات موكاسان لي لابسة مع سروال توب باج طالع مبين شوية من رجيلاتها لبيضين لديك شوميز وكتبان تاهي مزيزة.. هز حجبانو ونطق ببرود:فين غاديين؟

ريان:(تايضحك) غاندي زين نخرجهاا شوية ياك اغيزو

غزلان:(ضحكات تاهي) ونتا خليني نمشي راه تعطلت

محمد طه:(بلامايحس نطق بجدية)فين غادة؟؟

غزلان:(شافت فيه وسرطات ريقها من ديك التخنزيرة لي داير فيها) غادة نتلاقى مع لبنات

ريان:(ضور عينو بناتهوم وهز حاجبو ونطق بجدية تقول ماشي هو لي كان تيدوي قبل شوية) غانوصلهاا لعند لبنات

محمد طه:(فاش شاف شوفات ريان قلب عينو ونطق ببرود) همم الله يعاون

كمل طريقو لجهة لباب وجبد ساروتو وقبل مايدخل ضار جهتهوم بان ليه ريان تيخدم لمطور وهي واقفة تاتلبس لكاسك.. عينو طلعاتها تاني من لور وضرب على ديك مسعودة لي مزيرة فالسروال تووب وعض على شفتو قبل مايدخل لدار وهو مخنزر ومعصب من راسو أماا غزلان ركبات وريان قلع بيها لبلاصة فين كاينين لبنات تيتسناوهاا نزلات وشكراتو عاد كمل طريقو غادي لوجهة ديالو.. مسافة طويلة وكان موقف موطورو قدام السبيطار فين خدامة بيسان.. سدو ونزل تيتمشى بخطوات بسيطة تاوصل لغيسيبسيون ونطق بهدوء:دكتور بيسان السليماني كاينة؟

البنت:وي عندها أوبغاسيون دابا تقدر تسناهاا اسيدي

حرك راسو وتبسم على الزهر لي عندو.. كان دايرها فيد الله ومكانش عارف واش غايلقاهاا داكشي علاش فرح ومشى كيتسناها تاوكان تسالي..

ريان:(رجع سول لبنت)بيروها فين عفاك؟

نعتات ليه فين كاين ومشى لجهتو وبقا تيتسناهاا تماا.. وعندها هي كاانت خارجة من لوبغاسيون لي كانت اخر وحدة غادوزها ليوم ولعياا هلكها باغا غير وقتاش تدخل لداخل وتمشي تنعس.. غادة فلكولوار بلباس لوبغاسيون فالخضر وصابو ميديكال فرجليهاا وبوني ميديكال تاهو باقي فوق راسها.. مع وصلات بان ليها ريان واقف قدام باب بيروها كمشات حجبانها وكملات طريقها تاهز فيها لعين وتبسم: مون دكتوغ صافا

بيسان:(هزات حاجبها)نتا شنو كادير هنا

قرب جهتها وشدها من دراعها وحل لباب دلبيرو ودخل لداخل ساد وراه لباب.. رمشات بعويناتها الزورق وهي مبهوضة بديك الزربة لي زرب عليهاا وغير عاقت بشنو طرا وهي تنطق بصوتها الرقيوق: واش نتا هبيل اش هاد التصرف درتي وباشمن حق دخل لبيرو ديالي بلامانعطيك الإذن

ريان:(قلب عينيه ونطق ببرود) نسيتي امون دكتووغ بلي أنا مكناخدش الإذن وكاندير لي قااال ليا دماااغي

بيسان:(نثرات داك لبوني سامحة لشعرها لقهوي يتحل ونطقات بعصبية) هاد التصرفات مكيعجبونيش

ريان: وأنا كانموت عليهوم (تبسم) نسيتي بلي دابا غانوليو عائلة يعني ديك الحساسية الخاوية بلاش منهاا

بيسان:(هزات حاجبهاا)ومن بعد هادشي مكيعطيكش لحق تصرف على هوااك وبهاد الطريقة

ريان:(كمش حجبانو) نسيتي نهار لباار مون دكتوغ

بلعاني كيفكرها فداك النهار لي كان بالنسبة ليها أسوء نهار فحياتهاا شي لي طرا فيه عمرها تنساهاا ومن داك النهار حرمات تمشي ليه.. وكل ماحاولات تنساه كيجي هو يفكرها فيه وهي بلاوالو خايفة لايسيق نوح لخبااار حيت لحد الساعة مافراسوش.. سرطات ريقها وشافت فيه بدوك لعوينات وهو تبسم من ديك الشوفة لي فهمها طايرة الشي لي زاد خلاه ينطق ببرود: هاد الشوفة كاتعني بلي ولد لحاج مافخباروش ياك

بيسان:(كمشات حجبانها ونطقات تاني بصوتها عالي رقيوق) ونتا اش مشى ليك وزايدون داكشي بيني وبين خوياا مادخلش فيه

كل خطوة دارها جهتها هي رجعاتها باللور تاجا ضهرها على لباب وهو قرب منها تاولى وجهها مقابل مع وجهو كيشوف فوجهها لي كيبان طفولي وملامحها الشهبة.. تبسم ومد يديه محاصرهاا من جيه وبيسان غير تاتشوف فيه وفتصرفاتو الجريئين معاهاا..

بيسان:بعد لهيه ونتا بقا ليك شوية تلصق فيا

ريان:(زاد قرب تالصق نيت معاها ونطق بهدوء)بحال هاكا

بدات بيسان تاضور عينيها وريان نزل شوفاتو لشفايفها مسلوب وحنى وجهو بشوية تااحط شفايفو جنب شفايفهاا.. مغمض عينو بلامايحركهوم وهي حلات عينيها مصدومة من تصرفو لي داااار ولي خلاها لوهلة تصدم ومادير تاشي حركة.. أما ريان ريحتها وملمس شفايفها وداك لقرب خلاه يطبع قبلة قوية جنب شفايفهاا وهي غير توكضات ومدات يديها باش دفعو ساعة شد يديها بزربة كبلهاا ونطق مكمش حجبانو:خليناا نبوسو فراحتنا

بيسان:(تاتغوت بداك الصوت عندها رقيق) نتا باسل ممربيش بعد

دارت ليه الشقيقة بصوتها وكلامها دخل من ودن وخرج من ودن.. أما هي ديك اللامبالاة ديالو استغزاتهاا ومع جات تحل فمهاا وتسب تاني فيه وهو يهجم على شفايفها ببوسة دلمعقول.. فلول كاانت بوسة سطحية جنب شفايفها تدوق فيها شفايفهاا لي جاوه حلووويين ونغموه أما هي راه تعصبات حيت هو تجاوز حدو وهاديك كانت أول مرة تباس فيها فحياتهاا وكان هو أول واحد خدا عدرية شفايفهاا.. واخا عاشت نص حياتها فلغربة فاش كانت تتقرا إلا أنها عمرها فكرات تخون تقة خوها لي عاطيهاا ولادير شي حاجة ورى ضهرو وتخلي ديك التقة تهرس.. هاكا تربات وتربيتهاا ماخلاتهااش تنسى راسها فالغربة.. ضرباات على صدرو مفيقاه من ديك لحلاوة لي غرق فيهاا تاحس براسو وعااق وبعد عليها وشاف فيها وجهها حمر وعينيها مدمعين..

بيسان:(نطقات بصوت باكي) نتا باشمن حق تبوووسني شكووون عطااك لحق الحماااار هادشي لي درتي مغاندوزوش ليك نتااا

ريان:(خنزر فيها ونطق بصوت جدي) راه غير بسنااااك ماشي حوي*ناك باش ديري لينا هاد السكوندال الخاااوي

بيسان:(خنزرات) ممربيش نتااا

ريان:(للمرة تانية تايقاطعها بصوت جدي) باقي لدابا تاندوي معاك بلخاطر مون دكتوغ ونتي غير مزايدة فيه

(بعد عليها ورجع جلس فالبيرو ونطق بهدوء وبصراحة) نتي كتعجبيني داكشي علاش جيت ندوي معاك ونديرو أنا وياك حل زوين

بيسان:شنو هو؟

ريان: غاناخدو وقت نتعارفو فيه على بعضياتنا تعرفيني ونعرفك

بيسان:(هزات حاجبها) بغيتي تقول نكونو أونكوبل

ريان:(تبسم ليها) هانتي تتفهمي مون دكتووغ

بيسان:اوا سمع نقول ليك أنا مباغاا لانعرفك ولانشوفك ولاندوي معاك عليها لزم حدك وحتارم لقرابة لي بناتناا

ريان:اااارب العااالي هاهي غاتصعر ديلمي عااود (شاف فتلفونو لي كيصوني وناض شاف فيها) ردي لبال لتلفونك ملي نعيط ليك وعنداك متجاوبيش حيت ديك الساعة غايكون لياا هضرة خرا معاااك مون دكتوغ

خرج من عندها مخليها غاتموت بالفقصة من كلامو وديك التقة لي تايدوي بيهاا.. أما هو نهار وقع لمشكيل فلبار وتحااك معااها لقى راسو منجادب ليها لدرجة أنه تفرق على نور وحبس معاها ديك لعلاقة لي كانت فيها مصلاحة ليهوم بزووج.. هو بغى مع من يزهى وهي بغات مع من دوز لوقت وراه علمهاا قبل باش ماتحطش أملها وطمع فشي حاجة عمرها غاتكون بناتهوم..

عطى تركيزو واهتمامو لبيسان لي خلاتو يجرب معاهاا جميع لحلول ومامرة مازوج لمح ليها وهي والو.. ودابا خلاص ملي ولات بناتهوم قرابة زاد إصرارو تضاعف وطبعااا مافنيتوش أنه يضحك عليهاا حيت هادشي ماشي من شيم ديالو.. وهادشي لي دار مع بيسان جاهاا نيشان وقال ليها نيتوو شنو هي فلموضوع..

فالكافي كانو لبنات جالسين وتانيرت معاهوم.. قدام كل وحدة لكونسوماسيون لي طلبات وسيدرا تتاكل فلگلاص لي طلبات ليها رحيل.. لي كانت جالسة ساهية تتفكر فكلام باها ومها معاها ليلة دلبارح..

🔙🔙

فالقنت دلبيت حاطة لبلاستيكات لي فيهوم لحوايج لي شرات مبغاتش تخلطهوم مع حوايجها تاتشري لڤاليز فين تستغهوم.. كانت مهبطة بلاكارها وگاع لي مبقات غاتستعملو حطاتو جنب تاتخرجو.. تسمع الدقان فلباب لي تحل ودخلات منو تانيرت وإدريس.. هي غير شافتهوم عرفات بلي غايدويو معاها فموضوع الزواج.. ناضت من الأرض ونطقات بضحك: ماعلمتونيش نجيب صينية دأتاي ولحلوى ههه

إدريس:(جلس فوق النموسية)هههه اجي افرحتي اللولة اجي

جلسات وسطهوم وهي مبتاسمة وإدريس دوز يديه على شعرها ونطق بحنية:فرحانة ابنتي؟؟

رحيل:(حركات راسها باه وقلبها تيضرب بالجهد)

تانيرت: هادشي لي بغيناا

إدريس:ندويو دابا فالموضوع لمهم ابنتي.. بخصوص العرس لي نتي مباغاهش حنا مغانبززوش عليك حيت حنا باغين غير راحتك ولكن هادشي مكيعنيش بلي غانسيفطوك لدار راجلك بلا مانديرو ليك فرحك

كلمة راجلك خلاتها تخربق وتحس بمشاعرها متلخبطين والخلعة والفرحة تخلطات عليهاا..

إدريس:داكشي علاش نهار لي غاديرو فيه لعقد غانديرو ليك نهارك يحضرو فيه لحباااب وينشطوو معااك ويفرحوو ليك

تانيرت:ونهار قبل غادي نديرو ليك ليلة لحناا ديالك غايكونو فيها غير لعيالات تاهي غاتكون على حقها وطريقهاا وغانعيطو لعائلة راجلك تاهي تشرك معانا الفرح.. دوينا مع التريتوور وعلمناه باش يدير بحسابو وليوماين ديال لعراضات غايكون هو مكلف بلماكلة وكلشي غانمشيو عندو ونختارو الماكلة وشنو غااايكون فليوماين بزوووج ونتي غاتختاري لي بغيتي وماضربي حساب لفلوووس حيت هادشي اخر همناا لي كيهم هو نفرحووك ويدوز كلشي بخير وعلى خير

رحيل:(عينيها مدمعين ونطقات بصوت خافت)الله يخليكوم لياا

عنقها إدريس وباس راسهاا ونطق بحنية: مانبغيش نشوف دموعك مزاااال ابنتي صااافي باغيك تفرحي وتستاغلي هاد ليااام ولي تشهيتي تاخديها ماضربيش حسابها

🔜🔜

لهلا يحرم شي واحد من واليديه.. لواليدين لي كيكونو سندنا فالحياة.. الضهر لي تانتكاو عليه فوقت لعياا.. كلامهوم معاها لبارح خلاها تحمد الله وتشكرو حيت هوما معاهاا وحيت عمرهوم ماخلاوها بوحدها.. هاد السنين لي دوزات كانو ديما معاها وديما كادعي الله يطول فعمرهوم..

أسماء:(شافت فساعتها)يالاه نكملو اش خص دابا راه ظلام لحال تاني

رحيل:واخا

خلصو لكونسوماسيون وخرجو غاديين يكملو تاني تسخيرتهوم.. وتانيرت أي حاجة عجبات رحيل تتاخدها ليها وتخلصها هي من فلوسها.. فزواجها لول ماخداتش راحتها بزااف داكشي علاش دابا هي واقفة على شغالاها بيديها وتتشري مع بنتها دهازها..

رجعو لدار محملين تاني ومسخسين وهاد لمرة خدات رحيل لڤاليز أونصومبل من لكبيرة لصغيرة فين تستف دهازها..

---

حل محمد طه عينو ومع بوحدو لي كان فالدار وحس بالملل داكشي علاش غير كلى مشى لبيتو ونعس.. كان طاح الظلام شاف فساعتو لقاها العشرة ونص.. ناض تيتكسل وعينو مبوقين بالنعاس وطراساج دلمخدة مصور فخدو.. ناض تيتكسل غادي جهة البلاكار جبد فوطة وخرج لحمام باش يغسل وجهو.. كايجر لكلاكيط وعينو باقي شبه مسدودين.. حط يديه على لبواني دلحمام ومع حل لباب تحلو عينيه على الجهد وهو كيشوف فغزلان لي كانت عاطياه بالضهر ملوية عليها فوطة مقزبة ولي جاب ليه التمام هي ديك التكويزة لي دايرة مخليا مؤخرتها تبان فمنظر شعل فيه لعوافي..

عينيه تحلو على جهدهوم من المنظر لي كان تيشوف قدامو.. جمد فبلاصتو ويديه على لبواني ديال الباب وعينيه عليها هي لي محنية وعاطية بضهرها.. شاف فيها بنظرة تاقبة وعينو شوية ويتقبو لحمهاا أما هي مدات مجابت ملاهية تاتغسل رجليهاا وتنقيهوم.. خرج عينيه ملي وعى على راسو وسد لباب بالجهد تاقفزات وضارت تاضور عينيها مخلوعة.. أما محمد طه كيف لبرق داز جنب رنيم ومشافش فيها غادي لبيتو دخل وسد لباب مخليها تاتشوف فيها وهي هازة حاجبها.. أما هو فديك اللحظة حس بشي حاجة تحركات فيه من داك لمنظر لي خلى أحاسيسو الرجولية يتحركوو.. هز ديك لفوطة وبدا ينش بيهاا وهو كولو حمر.. فيما كيبغي يسد عينه تاتجي تصويرتها كيف هي قدامو وبداك المنظر المغري..

لبسات غزلان حوايجها بزربة والخلعة شداتها ماعرفاتش شكون حل عليها لباب ومع الساقطة ديالو خاسرة ماالقات كيف دير باش تسدو من لداخل.. خرجات بزربة لبيت ودخلات بانت ليها رنيم جالسة مكونكطية.. تبسمات ليها ونطقات:بصحة

غزلان:(جوباتها بعقل مرفوع)الله يعطيك الصحة

رنيم:مالك تتباني ليا ماشي على برجك

غزلان:(ساطت)غير سكتي ماعرفتش شكون حل عليا الباب فاش كنت تاندوش

هزات رنيم حاجبها ملي سمعات كلامها وأوطوماتيكمو تفكرات منظر محمد طه لي بان ليها فشكل وهي تخرج عينيها ونطقات بصراخ:هااااويلي ماتقوليش لياا محمد طه قبيلة شفتوو دايز قدامي كي البرق

غزلان:(خرجات عينيها)ماتقوليهاااش ويلي ويلي شوهتي شووووهة

جلسات غزلان كتولول وعقلها غايخرج أصلا هي معجبة بيه وأخيب حاجة توقع هي طيحي فشي موقف مع الشخص لي كيعجبك راه قمة الإحراج وهو راه شافها زبطة تقريبا واخا ديك لفوطة لي لوات ولكن راه مساترة والو.. أما رنيم طلقاتها بالضحك وهي تاتخيل لموقف ومع وجه محمد طه لي شافت باااين لعربووون..

---

كانت رحيل واقفة قدام دوك لڤاليز لي محلولين تاتستف حوايجها لي شرات.. كلشي بالتيكي وجديد.. كاتسنف معاها تانيرت وأسماء لي تكلفات بحوايح لداخل ستفاتهوم ليها.. تنهدات رحيل وجلسات ساهية تاتشوف بلي مبقا ليها والو وأيامها شبه معدودة فهاد الدار وفهاد البيت.. حكات جبهتهاا وشافت فتانيرت لي نطقات بتبسيمة: هانتي اماما هاد لڤاليز فيها غير السباط وصيكان (شافت فأسماء)غايخصنا ناخدو تاني لڤاليز حيت هادشي مكافيش

أسماء:المهم اماما تانيرت نستفو هاد لحوايج ولي بقا نخليوه تانجيبو لڤاليز

تسمع الدقان فلباب ودخل ريان لي نطق بهدوء: عوينات الجلبانة واحد الدقيقة

رحيل:(ناضت عندو وهي مكمشة حجبانها)مالك؟

جرها مخرجها من لبيت وشد فيديها غادي بيها لبيتو ورحيل غير ساكتة ماعرفاتش اش باغي.. سد لباب وشاف فيها مبسم بلخف:باغيك فواحد لبلان؟

رحيل:الله يسمعنا خير اش؟

ريان:باغيك تعطيني نمرة بيسان

رحيل:(هزات فيه حاجبها)لاش باغيها (قبل مايجاوب نطقات بجدية)شوف اريان لاكنتي باغي تفلى شوف ليك شي وحدة خرا وبعد على لبنت أنا راه مقادني صدااع وو

ريان:(حط يديه على فمها ونطق بجدية) شكون قالك غانتفلى عليها أنا لبنت عجباتني ارحيل نهار شفتها دخلات لدماغي وبغيت نتعرف عليها داكشي علاش جيت عندك باش تعطيني نمرتها

رحيل:(حركات راسها)مهم أنا قلت ليك لي كاين عارفاااك واحد زهواني مامنكش زووج وخايفة تمل وتبغي تبدل

ريان:(تبسم وغمزها)دابا راه دخلات لدماغي ونهار دخل لقلبي مغايفرقني عليها غير لموووت اعوينات الجلبانة

رحيل:(ضرباتو فكتفو)باااسل ههه ولهيلا نتا وبيسان راه ميمكنش واحد فالشرق والثاني فالغرب(تفكرات واحد لحاجة مهمة) على فكرة راه لبنت كبر منك بعمااين

ريان:ومن بعد لعمر غير مجرد رقم وصاااف

رحيل:(تنهدات وبصوت خافت نطقات) مباغااش يتعاود معاك نفس السيناريو لي طرا لمحمد طه اريان نتا راه شايف كلشي على عينيك

ريان:ماتنسايش بلي فرق كبير بيني وبين محمد هو بغاها ومقال ليها والو وخبى داكشي لي فقلبو ليه وأنا أكيد عمري نديرهاا ولي فقلبي غانحطو ليها داكشي علاش ماتشغليش بااالك واخاا

رحيل:واخا أنا غانسيفط ليك نمرتها فلواتس

قرب جهتها وبعز ليها وجهها تاخرجو حنيكاتها وباسها بالجهد ونطق بتبسيمة:يرضي عليك اعوينات الجلبانة..

فلتحت كان كلشي مجموع على لعشا وغزلان يالاه نزلات بزز بسبب إصرار رحيل ليها أما هي من الشوهة لي تشوهات مقدراتش تحط عينيها فعينو.. دخلات لصالة حادرة راسها وجلسات جنب سيدرا ومع غاتهز الراس غايجيو عينيها فيه هو لي كان جالس مربع يديه كيشوف فيها بواحد الشوفات خلاوها تبغي تشق الأرض وتسرطهاا..

بزز باش دوزات غزلان ديك الساعة دلعشاا وهي حاسة بعيون محمد طه عليها..فيما تهز عينيها تلقاه حاضيها بواحد الشوفات فشكل.. غير تسالى لعشا ناضت لكوزينة مخلياه سارح فلبلاصة فين كانت جالسة وعقلو ساهي تاني فداك المنظر لي تحفر فدماغو وحلف لازاال منو..

دازت ليلة ودازو معاها دوك ليام لي بقاو فالسيمانة طايرين بالنسبة لرحيل لي فيما تفيق الصباح تخرج هي وتانيرت وأسماء لي شدات كونجي يقيلو فالزنقة يتقداو لي خاصها.. أي حاجة خداتها ومبخلاتش على راسها ولفلوس لي سيفط ليها نوح يالاه قاست منهوم شي حاجة حيت مها وباها مكيخليوهاش تخلص.. جالسة فبيتها وعينيها ساهين فدوك لڤاليز لي مستفين فلكوان ديال البيت.. سبعة دلڤاليز ثلاتة كبار ولخرين مويان والصغيرة.. كلهوم عامرين بدهازها لي شرات فدوك ليام.. ساهية وعقلها سارح فشنو تابعهاا.. ليوم ليلة لحنا ديالها وهادي غاتكون آخر ليلة ليها فدار واليديهاا حيت غدا غادير لعقد هي ونوح.. قلبها حسات بيه نفاجر وسط ضلوعها مجرد ماتفكرات بلي غدا غايولي راجلها.. كانت حاسة بمشاعر كثيرة فديك اللحظة الخوف والفرحة والخلعة ومشاعر بزاف ماتقدرش توصفهوم.. هاد اللحظات لي تتعيش دابا عمرها عاشتهوم قبل حيت مشاعرها هاد لمرة كانو حقيقين ونابعين من لقلب ماشي بحال المرة لولة..لي كانو مشاعرها باردين جهة عاصم.. لاوجه للمقارنة بين نوح وبين داك الشماتة.. تنهدات وهزات راسها لفوق تتنفض أفكارها ومباغاش تخسر نهارها بسبابهوم.. هاديك صفحة فكتاب لي هي سداااتو وعاودات حلات كتاب آخر جديد ونقي.. قاطع أفكارها الدقان فلباب لي تحل ودخلات تانيرت مبسمة:لالة لعروسة صباح لخير

رحيل:(تبسمات ليها)صباح النور اماما

تانيرت:(باستها فحنكها ونطقات بحنية) غانخلي غزلان تجيب ليك لفطور فطري مزيان وملي تسالي وجدي راسك باش نمشيو لحمام واخا

رحيل: واخا سيدرا فطرات؟

تانيرت:هه فطرات وراها مع بااك مجلساتش فيما مشى تابعاه ههه

رحيل:(تبسمات بخفوت)ههه بنت جدها

خرجات تانيرت ورحيل ناضت تأكد تاني من حوايج لحمام ولبرودويات لي جمعات واش كلشي هو هداك تاجات غزلان جايبة بلاطو فيه لفطور..حطاتو ليها فوق النموسية ونطقات بضحك:دوزي العروسة تفطري هه

رحيل:ههه ناري دابا غاتبقاو عليا بلعروسة تانربي الريش ههه

غزلان:من حقك تربيه اختي وتفرحي براسك يالاه فطري نمشي نكمل داكشي لي تابعني

رحيل:شكون كاين لتحت

غزلان:تريتور جاو رجالو تيقادو الكراسى والطبالي لي ختاريتي مهم فطري مزيان

مشات غزلان ورحيل جلسات تاتفطر وتلفون فيديها تاتخربق فيه تاسالات وخرجات لحمام غسلات فمها ورجعات لبيت تلبس جلابتها باش يمشيو لحمام..

فلتحت كانت الدنيا عامرة ولباب ديال الدار محلول وهونضة واقفة قدام الباب فيها لمتريال ديال التريتور دليلة لحنا حيت رحيل ختارت المواعن والطبالي دليلة لحنا بوحدهوم ودلعقد بوحدو.. شي داخل وشي خارج وريان ومحمد طه وإسلام تاهوما قايمين بلواجب تاواحد فيهوم ممشى لخدمة وكل واحد وشنو تاتلقاه مقابل.. أما أسماء كانت مكلفة بلمك اب ارتست والنقاشة تاتعيط ليهوم وتأكد عليهوم لوقت باش ماتعطل تاوحدة.. لبسو لبنات جلالبهوم وخرجو من الدار مخلين الرجال مكلفين بخدمتهوم وهزات رحيل طوموبيلتها غادية لحمام وطبعا دات معاها سيدرا.. متبعة النعت لي عاطياها أسماء تاوقفو قدام لحمام لي كانت ريزيرڤاتو أسماء لهاد النهار.. مجرد مانزلو تسمع صوت الدقايقية وصوت التعاشق على النبي خلاو رحيل تحل عينيها متفاجأة..

🎵هااااهو ليك البنية الله يهديك.. بيتي طوبيس نجيبو ليك ماتمشيش على رجليك.. هااااهو ليك البنية الله يهديك..🎵

كانت رحيل مدهشرة مكانتش متوقعة غايجيبو الدقايقية..و أسماء تتفيلمي وگاع الناس لي دايزين واقفين تايشوفو تارجع تسمع صوت التعاشق من عند الطيابات..

صلى وسلاااام على رسول الله الاجاااااه الاجاا سيدنااا محمد الله معاااااا الجاااه العلي يويويويويويوي

دقايقية دايرين خدمتهوم ومنشطينهوم ورحيل مبسمة وعينيها مدمعين تاعنقاتها تانيرت تاضحك وتهضر معاهاا.. لعبو الدقايقية شوية ووعاد دخلو لبنات لداخل والطيابات تاهو قايمين بالواجب وزغاريت مخلينا رحيل غير تحرك راسها وتبسم ليهوم.. دخلوها لحمام ودارو ليها العادات ديال لعروسة.. والتبريمات لي موجداهوم تانيرت بيديها.. فششوها لبنات ودارو ليها حمام العروس كيف هوو وخداو وقتهوم تاسالاو وخرجوها تتشعل والسر طايح عليها ولحنيكات مزنگين ومافوجهاا تانقطة دلمك اب وعينيها كيلمعو بالفرحة والراحة.. لبسوها حويجاتها دلداخل فلبيض مع جليليبة مخزانية بلونكاسي شراتها طالعة مع مكانش عندها لوقت فين تخيط مزال.. خرجو من لحمام مور ماخلصو الطيابات وركبو فالطوموبيل راجعين وأسماء لي كانت سايگة هاد لمرة.. وصلو لدار لي بابها باقي محلول كيف أي دار فاش تيكون فيها لفرح.. بلاصاو طوموبيل ونزلات رحيل تاتنش بيديها وتسوط جاها الصهد دخلات هي لولة لداخل ومع حطات رجليها فالطبقة الثانية عينيها تحلو على جهدهوم والدمعة محبوسة فعينيها وهي تتشوف قدامها ممات جيداء وباها واقفين ومبسمين ليهاا..

تمشات بخطوات مزروبين وبصوت باكي نطقات:خالتي حناااان..

ترمات فحضنها وخلات دموعها يترجمو مشاعرهاا وحنان مكانتش قل منها وهي معنقة صاحبة بنتها ودكرى لي بقات ليها من كبدتهاا.. صوت لبكاا مسموع وتاحد مقدر يحبس دموعو فديك اللحظة.. كانت رحيل متشبتة بحنان تتبكي وتشهق وحنان تاتسكت فيهاا.. واخا كانت رحيل فرحانة ولكن مغاتنكرش بلي فرحتها ماتقدرش تكمل وهي حاسة بنقص كبير جهة صاحبتها لي خلات بلاصتهاا وبانت فهاد النهار.. كان محمد طه تاهو واقف وعينيه حمرين حابس الدمعة لي خانتو ونزلات على حنكو مخلياه يقلب وجهو مكمش حجبانو.. بعدات رحيل على حنان ومشات تعنق بات جيداء لي ضمها لصدرو بحنية تايبارك ليهاا ويسول على أخبارها وهي غير تتحرك راسها باه... كانت مفاجأة زوينة خلاتها تفرح حيت عائلتها كملات وغاتحضر معاها لأهم نهار فحياتهاا..

حنان:(تتمسح ليها دموعها ونطقات بصوت مبسم) غاطيبي دوك لعوينات ابنتي بلبكاا

رحيل:(عينيها حمرين)فرحت حيت جيتوو تحضرو معايا

حنان:على يانا نخليك ابنيتي راااك ماشي صاحبة لمرحومة رااكي ختهاا وبنتي الثانية لابدما نحضر أنا وعمك

رحيل:(شافت فإدريس مبسمة)شكرا ابابا

تبسم ليها وسكت حيت الفكرة مكانتش ديالو إنما كانت فكرة نوح وهو لي سيفط ليهوم شيفور لي يجيبهوم يحضرو معاهاا هاد النهار..

تانيرت: مرحبا بيكوم معانا الدار داركوم ومانحتاجش نقولها ليك الالة حناان

حنان:(تبسمات ليها)الله يكبر بيك ويجعل كلشي مبارك ومسعوود

طلقاتها حنان بتزغريت وبدات تتصلي على النبي ولبنات معاونينها وهوما غاديين برحيل لبيتها مخلين لبقية كل واحد يرجع لشغلاتو لي كان مقابل..

---

فالرياض السليماني كانت فيه نفس الأجواء بحكم أن ليوم العراضة الخاصة بالرجال دلعائلة ومعارف نوح.. الرياض كان عامر كينغل بالبراهش وعائلة رحمة لي حضرات كلهاا والأغلبية دلعيالات كانو متشوقين يشوفو لعروسة شكون هي وبنت من وكيف دايرة لحاصول الفضول قاتلهوم أما رجال فمكانوش معمرين راسهوم بداك التخربيق الخااوي كيف لعيالات..

كانت بيسان واقفة فجناحها مع خولة خت نوح بالرضاعة وبنات خالتها الكبيرة عفاف.. نور وملك وبزوح بيهوم مزوجاات.. كانو محطوطين فوق النموسية لقفاطن لي غاتلبس كل وحدة والطابل دونوي فوق منها المك اب والصنادل مشيرين فجيه لجناح كان عبارة عن فوضى لي ضروري ماتكون فبيت كل بنت فاش تتوجد راسها لشي عرس.. كانت بيسان تاضور ببيجامة شورط ودباردو وشعرها دايرة ليه ديبوكل أما وجهها فكان مقاد بمك اب خفيف برزات فيه دوك لعنين الزورق بخط أيلاينر فرنسي جاها خطير مع غوح أليڤغ حمر..

بيسان:فين هو حزااامي

خولة:هاهو حدا لقفطان شوري شوية ونتي كل مرة تسولي على شي حاجة

بيسان:(شافت فساعتها ونطقات بتوثر) لخمسة خصنا نكونو تما وهادي راه تلاتة ونص الشريفة

نور:اغييط ازين وبردي راه لمك اب لي تياخد لوقت هاحنا تنگادوه وزايدون فين هوما عماتك وعيالات عمامك تعطلو

بيسان:راه غانتلاقو بيهوم فالطريق مغايجيوش تال لهناا

ملاك: اجي عمتك لباتول مغاتحضرش؟

بيسان:(نطقات بحزن)لا ماتقدرش تجي حيت ماعندهاش كونجي دابا باش تهبط المغرب

خولة:اوا لواحد كيدير لي مسلوك وهي راه فالغربة

بيسان:وي مكرهاتش تجي مي الله غالب عيطات لنوح وبركات ليه وسيفطات ليها كادو لعرس ههه حبيبة طاتي باتول توحشتها

نور: عمتك انتصار ونزهة غايحضرو؟

بيسان:اه عرفتو (نطقات بحماس)عميتو انتصار جابت ليا ملحفة دلعيوون صوراتها ليا حمقاتني

خولة:واتتكون عندك فورمة الملحفة ونتي مسلونة نسوطو عليك طيري هههههه

بيسان:(قلبات عينيها) اش تتعرفو فلاطاي

تحل باب الجناح وتمات داخلة لعندهوم عفاف الأخت لكبيرة لعائلة الوزاني.. إنسانة حقانية وماعزيزش عليها لعب راجلها ميت هادي كثر من عشرين عام ومع دلك عمرها فكرات تزوج وواخا جاوها رجاال طلبو يديها الاأنها رفضاتهوم..

عفاف:(بعباية فلگرونة مع شالها او وجهها مافيه تانقطة دلمكياج كيف ديما نطقات) اوا عولنا عليكوم بكري الناس دارو معانا لخمسة وهادي ربعة ابنياتي

بيسان:(عنقاتها تاتفشش عليها)خالتو بناتك تعداو عليا

عفاف:(كمشات عينيها)شكون فيهم غير شيري عليها ورجعي لور نتفاهم معاهوم (كملات بجدية)يالاه طلقونا سربيو راه كلشي وجد بقيتو غير نتوما

خولة:واخا اعمتي هاحنا قربنا

مشات عفاف مخلياهوم كيزربو حيت مشى لحاال.. لبسات بيسان قفطانها فالكحل جاها زوين وحزماتو بمضمتو ولبسات طالون وحلات شعرها لي دارتو بوكل عاد بدات تتعاون لبنات فلباس دلقفاطن..

فجناح رحمة كانت تاهي متأنقة بإطلالتها البلدية وبقفطانها الأزرق الغامق ولي كان كولو منبت بالحوهر كيلمع.. شعرها كحل طلقاتو كايلعب ورى ضهرها وكانت دايرة كحول لعسليتها ومك اب مناسب عمرها.. لبسات مجوهراتها وهزات بوشيطتها وخرجات من لجناح كاطقطق بطالونها.. هازة الراس وتتمشى بنخوة لي متوارثة عندهوم فالعائلة.. خرجات لقات كلشي وجد وتاسناء لي كانت لابسة قفطان فالحمر وتاهي مقادة لحالة ومزيزة..

بيسان:صافي بيما أننا واجدات نتحركو باش نتلاقاو مع طاتي انتصار ونزهة لي جايين فالطريق مع لبقية

سناء:بلاتي باقي شيمااء ماوجدات

بيسان:وهاد شيماء واش مفخبارهاش بلي تعطلنا

سكتو فاش سمعو صوت الطالون وهزات بيسان عينيها فيها وخرجاتهوم فاش شافتها جايا بقفطان فالخضر بحال ديال لعريسات ودايرة التاج صغير على راسها ومك اب تقيل تقولي هي لعروسة..

كانت عارفة بيسان سكات شيماء وراه شي حاجة وهاهي دابا عرفات اش تحت راسها.. أما شيماء فكانت هازة راسها تقول هي لعروسة وبلفعل بحوايجها ولمشيطة لي دارت راه ماخلات لعروسة ماتقول..

بيسان:(خرجات فيها عينيها)واش نتي حمقة اش هاد لحالة دايرة فراسك

شيماء:(ببرود)مالها حالتي؟

بيسان:داك لون لي لابسة راه تاتلبسو غير لعروسة فليلة لحناا وداك التااج تاهوو لي دايرة

سناء:(شافت فيها ببرود تاهي) ومن بعد لبنت عجبها لقفطان ولون ولبساتو باركة من هاد السكوندال الخاوي

جات بيسان تجاوبها وهي تسمع صوت عفاف لي نطقات بتبات ورزانة: بيسان عندها لحق (شافت فشيماء بجدية) سيري بدلي داكشي وحيدي داك التاااج تحررركي..

مور كلام عفاف تاحد مارجع تكلم وشيماء لبكية واقفة ليها فحلقها وبشوفات قتالين خنزرات فبيسان لي حركات ليها حجبانها بمعنى حوو فيك وعطاتهوم بالضهر غادة تبدل.. إكسبخي ختارت هاد لون ودارت التاج باش تاخد الأضواء على رحيل وتغيرها فنهارها ساعة تقلبات عليها لگفة..

سناء:(شافت فعفاف ونطقات بهدوء) زدتو فيه لبنت عجبها لون لبساتو

عفاف:(حمرات فيها الشوفة) نتي بالأخص تسكتي وماتسمعينيش صوتك ويحساب ليك غاندوزها ليك

سكتو كاملين وسناء ضربات الطم.. كلشي تيحتارم عفاف بحكم سنها لكبير وبحكم هي الأخت لكبيرة ومكانتها لي دايرة وفرضاها وسط خوتها وعائلتها.. بقاو تيتسناو شيماء تارجعات هاد لمرة بقفطان جوهرة فالزرق بارد وشعرها طلقاتو ومدارت لاتاج لاوالو.. شافت فيهوم عفاف ونطقات بهدوء:خليونا نمشيو

---

فدار لعروسة كان صوت الموسيقي لي مكلفة بيه ديدجي مرا كيتسمع فدار كلها وفبرا دزنقة.. الصالون لكبير مفرش على حقو وطريقو ومستفين فيه لطابل ولكراسى..الديكور كان مواتي لچليسة دلعروسة لخضرا لي مقادينها فالصالة ودايرين قدامها طبيلة فيها الحنا وقوالب السكار والشمع والبيض والسواك والورد ومراشات الزهر.. كانت حنان هي وتانيرت جالسين مجمعين فالصالة.. تانيرت لابسة فراشة فالغوز بارد وشعرها طالقاه ومع شحال هادي مقطعاتو طوال ليها.. دايرة غير الكحول وعكر خفيف وصاف.. أما حنان فكانت لابسة قفطان موبرة فالگرونة وشالها.. دخلات لعندهوم أسماء لي كانت لابسة قفطان فلموڤ سامبل محزماه وشعرها جامعاه كوت شوڤال وشادة يد سيدرا لي تاهي ملبساهاا قفطان جوهارة مناسب عمرها وشعرها جمعات ليها فجناب بلفلايل وخلات ليها لگصيصة..

أسماء:رنيم وغزلان وجدو؟

تانيرت:والله ماعرفت ابنتي أنا غير ساليت نزلت لهنا

أسماء:صافي غانمشي نشوفهوم ونطل تاعلى رحيل واش قربات

حنان:(جرات سيدرا وباستها)صلى عن النبي وهاد لبنية غير دلماكلة

سيدرا:(ضحكات ليها ونطقات) تانتي زوينة

حنان:(جراتها وعنقاتها) أنا شرفت ابنيتي هههه

سيدرا:تانيرت إينو فين بّا ديدي؟

تانيرت:لفوق فالصالة

مع قالتها مشات سيدرا تاطير هازة قفطانها وتانيرت تاتخاصم عليها.. طلعات لصالة لوسطانية فين كان إدريس جالس مع ببات جيداء ودراري والصينية دأتاي ولحلوى فوق الطبلة.. دخلات عليهوم سيدرا ونطقات بحماس:بّا ديدي شوف كيف جيت

ضارت تاتوريها قفطانها وإدريس مبسم ليها بحنية.. قربها عندو وباسها ونطق بحب:نخشيشتي

إسلام:اجي عندي نبوووسك الخنفوسة

مشات سيدرا عندو وهو هزها باسها وجبد من جيبو مية الدرهم عطاها ليها تيحماق عليها وتاهي عزيز عليها بزاف.. ضارت على مودي وريان ومارتاحت تاخدات منهوم تاهوما فلوس.. وقربات عند إدريس تاتوريه وهو يجبد ببات جيداء تاهو خمسين درهم ومدها ليها وهي تحرك سيدرا راسها ونطقات بطفولية: لاحشوومة

ببات جيداء:علاش ابنتي ؟

سيدرا:حيت نتا كبير ماخصنيش نشد عندك فليسات

ضحكو على كلامها وببات جيداء حط ليها لفلوس فيديها ونطق:غير هاد لمرة وصاف

سيدرا:(باست يدو ونطقات)صافي غير هاد لمرة

عيون إدريس كيشوف فيها بنظرات مفتاخرة.. رباها وزرع فيها المبادئ ديالو والحنية ديالو.. خارجة فوطوكوبي عليه لواحد الدرجة ميمكنش.. تنهد فاش تفكر ردة فعلها كيفاش غاتكون ملي يشرح ليها بلي هي ومها غايولي مستاقرين فالرياض ماشي هنا.. هاز لهم حيت عارفها متعلقة بيه وصعيب تقبل تسكن بعيد عليه..

فلبيت عند لبنات كانت واقفة أسماء تتقاد لمك اب لغزلان ورنيم غادة جايا تاتقلب على فردة ديال صباطها.. زفرات أسماء بعصبية ونطقات: والخرا مرضتيني فك*ري بديك سير واجي

رنيم:وافين سباطي

غزلان:هاهي لهيه راه نتي لي مكتشوفيش

كملات أسماء لغزلان وجهها ودارت ليها مك اب خفيف ركزات فيه غير على لعكر گرونة.. عوناتها ودارت ليها لحزام ديال لقفطان الشيبي لي لابسة عاد مشات تعاون رنيم.. غير سالاو خرجو من لبيت مخلينها هاكاك مرونة وأسماء مشات طل على رحيل وغزلان مشات تجيب تلفونها من الصالة حيت تما فين خلاتو.. دخلات لصالة بلاماتهز راسها فيهوم غادة نيشان جهة تلفونها وهي تسمع صوت سيدرا لي نطقات:غيزو اجي تصوري معايا

هزات غزلان عينيها فسيدرا لي كانت واقفة حدا ريان لي تبسم ليها وغمزها تيضحك.. بادلاتو تبسيمة وعينيها بلاماتحس هربات جهة محمد طه لي كان تاهو بدورو كيشوف فيها..

من داك لبلان لي طرا معاها وهي تتفادى تشوف فيه ولاتجلس معاها فنفس البلاصة.. عكسو هو لي فيما يشوفها عقلو يسرح فيها ويبقا يشوف فيها شي شوفاات تيخليها تبغي تغرق فحوايجهاا.. حيت ماشي أول مرة تحط فموقف محرج معاه.. سبق وطرا ليها نهار دخلات لبيتو ولقاتو لابس كالصو.. وهاهي عوتاني طاحت فموقف كباار من لولاني.. هزات تلفونها وخرجات من تم وهي تتسوط مخليا محمد طه تيحك فلحيتو بلغدايد..

وصلو طوموبيلات لحومة وحدة مور ختها وغير لحديد دلفريع.. كانت بيسان هي لولة بحكم عارفة الطريق نزلات تتقاد فقفطانها ونزلات عفاف ورحمة وزاينة لي كانت تاهي راكبة معاهوم تيقادو فجلايلهوم.. فلداخل كانو لبنات كلهوم حاضرين وتانيرت هي لولة واقفة باش تستقبلهوم بتبسيمة واسعة.. سبقات رحمة هي لولة بمشيتها لي كيف ديما هازة راسها لفوق وراسمة تبسيمة خفيفة على شفايفها.. سلمات مع تانيرت لي عرفاتها على حنان شكون هي ورحمة بدورها بدات تتعرفها على النسا لي معاهاا.. وبعد السلام والترحاب دخلو لصالة لي كانت مقادة وعينين رحمة تايشوفو فالديكور ساكتة.. كل وحدة شدات بلاصتها وبيسان ورباعتها شدو بلاصة خاصة ليهوم..

شيماء:(تحنات جهة سناء ونطقات بصوت حاقد)حاسة بالخنقة

سناء:تبتي وبلاماديري شي بلان ماهواااش

سكتات شيماء وهي باغا تنفااجر أما سناء شافت فعفاف لي حركات ليها راسها وتبسمات ليها تبسيمة صفرا بمعنى كلشي هو هداك..

---

فلفوق عند رحيل لي كانت واقفة قدام مرايتها الطويلة والمك اب ارتيست تتقاد ليها شعرها لي خلاتو مطلوق ومع تقطيعة لي قطعاتو جاهاا واقف فوق دوك لحفيرات لي كيكونو فالضهر فوق المؤخرة.. ومع دارتو بوكل من لتحت جا شوية طالع.. النكافة تتقاد ليها التكشيطة لبيضاا لي لابسة ولي كانت مزينة بالطرز فالخضر فوق الكتاف وفمعصم يديها لواسعين وفالجناب لتحت فيها فتحة طويلة مبينة سيقانها البيضين وصندالة طالون لي لابسة..كان لكول ديالها واسع شوية مبين بسخاء رقبتها لمزينة بكولي فيه جوهارة خضرا جاي أونصومبل مع لحزام وداك خيط الريح لي دايرة فجبهتها وفيه تاهو جوهارة خضرا.. شعرها من لقدام كانت مفرقة لگصيصة ومخليها ضورة وجهها تبان..كانت دايرة مك اب ترابي خفيف برز حريفاتها الشهبين ودوك لعينين لخوضر.. واقفة وهي كلها تترعد شاداها واحد لخلعة مايمكنش توصفهاا.. معدتها تقلبات عليها ويديها عراقو ليهاا..

...تباركالله عليك جيتي زوينة الله يجعل كلشي مبارك ومسعود

رحيل:(بصوت مرعود)شكرا

دخلات أسماء لي قربات جهتها مبسمة ونطقات بفرحة:جيتي فنة ماشاء الله (رفعات صوتها) صلى وسلاااام على رسول الله الاجاااااه الاجااه سيدنااا محمد الله مع الجااه العلي يويويويويويو

النگافة:غاتنزل دابا

أسماء:اه كلشي كاين خصها تنزل باش تبدا حنتها

رحيل:(شدات يديين أسماء ونطقات وهي تاتسوط)اوووف مخلوعة

أسماء:قرااي لقرآن وماتخلعي ماوالو ارحيل

بقات رحيل تاتقرا القرآن فنفسها تاسمعو الدقان ومشات حلات البنت لقات إدريس واقف ونطق بهدوء:نقدر ندخل

وسعات لباب وهو غير طاحو عينيه على رحيل ترسمات تبسيمة حنينة على شفتو وعينيه لمعو أما رحيل مكانتش قل منوو.. قرب جهتها وشد وجهها باسها فراسها ونطق بحنية:الله يحجبك ويحفظك ابنتي ويكمل عليك بالخير

رحيل:(عينيها لمعو بالدموع)آمين

إدريس:(كمش حجبانو)ماتبكيش ابنتي نتي خصك تفرحي

رجع باسهاا فراسها وشاف فأسماء:جيبي ليا شي كاس دلماا باش نرقيها

حركات راسها ومشات تتجري جابت ليه لقرعة لي حلها وبدا تيقرا عليها لقرآن تاسالى ومدها لرحيل شربات منهاا مزيان ومد لقرعة لأسماء لي سداتها وهزاتها معاهاا.. رجع باسها فراسها وخرج من لبيت.. طلعات تانيرت تاهي مبسمة شدات فيد بنتها وعينيها عامرين دموع وبزز باش شداتهوم باش ماتبكيش قدامها.. مخرجينها من لبيت وصوت النگافة لي تتصلي على نبي مسموع مع المصورة لي كانت تتفيلمي لحدث كما هو.. أما أسماء طرقات بيت لعروسة بالساروت وهزاتو معاها نازلة تاهي تابعاهوم.. كانت سيدرا هازاها غزلان وعينيها على مها تاتشوفها بداك لباس وهي معرفاش اش كاين حيت حدها تانيرت قالت ليها ليوم غانديرو حنينة وصاف.. ومع دخلات لطبقة لتحتانية العيالات كلهوم وقفو تيصليو على النبي وكلشي مركز على لعروسة لي كانت تتفتن وهادوك لي ديجا شافوها بلفولار جاتهوم مختالفة بالشعر.. كانت سناء تاطلعها وتنزلها وهي داخلة ويديها فيد مها بخطوات رزينة وعينيها على المصورة مبسمة تبسيمة تتبان مرعودة وقلبها كيشطح الرگادة.. غادين بيها جهة الچلسة اوقفوها والنكافة تتقاد ليها التكشيطة باش تصورها وشيماء عينيها عليها تاطلعها وتنزلها بشوفات محسادين... جلسوها فبلاصتها وتطلقات الموسيقى ورحيل ضورات عينيها جهة رحمة وتبسمات ليها وتارحمة رجعات ليها تبسيمة تاسمعات صوت عفاف لي نطقات بهدوء وعينيها على رحيل: تباركالله ماشاء الله ولد لحاج عرف يختار..

لكلام لي قالت عفاف وصل لمسامع سناء وشيماء لي كانو جالسين فنفس الطبلة معاهوم.. وفديك الساعة حسات شيماء بواحد لحرقة تتاكل فيها من لداخل ديالها وعينيها رجعو تفيكساو على رحيل لي جالسة فجلستها بحال شي أميرة.. لعيون كلهوم عليها والمصورة تاتاخد ليها التصاور قبل ماتبدا النقاشة خدمتها.. تترجع تقارن بينها وبين رحيل وتتقول علاش هي اه وأنا لا.. بغات تمووت ديك الساعة وبان على وجهها السم ولحقد لي هازة من جهة رحيل وشوفاتها ليها كيف لقرطااس..

ناضت رحمة هي وعفاف غادين لعند رحيل وجلسات رحمة جنبها سلمات عليها بلوجه ونطقات بتبسيمة عادية:الله يجعل كلشي مبارك ومسعود

رحيل:(تبسمات ليها بتوثر) آمين شكرا

رحمة:هادي ختي لكبيرة عفاف

هزات رحيل عينيها فعفاف لي تقدمات جهتها وتحنات سلمات عليها وحطات ليها فحجرها واحد الساشية دلموبرا ونطقات بتبسيمتها وبصوت وقور:مبروك عليكوم ومرحبا بيك وسطنا

رحيل:ربي يخليك شكرا

كانت رحيل فموقف لاتحسد عليه.. نظرات لي كانو عليها خلاوها توثر وتزيد تخلع وقلبها راه شوية ويسكت بقوة ضرباتو لعالين.. حطات ليها رحمة تاهي واحد الساشية وناضت راجعة لبلاصتها وموراها بداو ينوضو عيالات لعائلة باش يسلمو عليها ويباركو ليها.. كانت بيسان تتعرفهوم ليها ورحيل غير تتحرك راسها وتبسيمة مرسومة على شفتها.. كلشي عطاها كادو فاش باركو ليها من غير سناء وشيماء لي تاوحدة مناضت عندهاا وتاهي مدات مجابت.. جات أسماء هزات دوك لكادويات هي وغزلان ومشات لبيت باش تحطهوم ليها تم.. أما بيسان جلسات جنب رحيل وجبدات تلفونها ونطقات بتبسيمة:واخا ناخدو سيلفي أنا وياك ومتخمميش مغانوري تصويرتك لحد

حركات ليها رحيل راسها باه وتبسمات لكاميرا وبيسان بدات تتشوف فلافوطو ونطقات بتبسيمة:جيتيني مبدلة بزاااف على كيف مولفة نشوفك ههه

رحيل:(تبسمات ليها)حيت لفولار

بيسان:وي جيتي زوينة ماشاء الله خووويا واخد الزين

عمزاتها بيسان ورحيل غرقات فحوايجها واش هي متوثرة وربي عالم باش تتحس دابا وزادتها بيسان بكلامها لي غير مزاد خلى وجع كرشها يضاعف.. ناضت بيسان راجعة لبلاصتها ورحيل غير تتسرط ريقها وضور عينيها وتبسم.. جات النقاشة باش تبدا ليها بالحنا والشكل لي عزلات قبل.. طلعات ليها التكشيطة تابانو رجليها وسيقانها كثر والضفيرات مبروضين ومصبوغين بلون بارد.. جلسات النقاشة وبدات تاتنقش ليها ورحيل عينيها كيقلبو على سيدرا مبانتش ليها.. شافت فرنيم لي واقفة تادوي مع تانيرت وحركات ليها راسها باجي

رنيم:(تحنات جهتها)وي محتاجة شي حاجة؟

رحيل:فين سيدرا

رنيم:ماعرفتش كانت مع غزلان

رحيل:سيري شوفي فين هي وجيبها ليا عفاك

مشات رنيم تشوف سيدرا فين ورحيل رجعاات شوفاتها لنقاشة ومرة مرة طلع عينيها وتبسم لعيالات.. فالطبلة فين جالسة بيسان مع بنات عفاف وخولة وعيالات ولاد عمامها.. ديك الطبقة لي تتفاهم معاها بيسان وعقليتهوم بحال بحال.. مجمعين على رحيل لي لبعض منهوم شافها نهار لعيد ولبعض أول مرة يشوفهاا..

خولة:ماشاء الله جات فنة فخبارك والله ماعرفتها بلافولار

نور: أنا أول مرة نشوفها منقدرش نفيدك

هاجر:(مرات ولد لعم) أنا شفتها وي جات مختالفة

بيسان:(نطقات بمزاح) اهياويناا شتكووم غاتاكلو مرات خويا بعويناتكوم قولو ماشاء الله

ملاك: حمااارة راه قلناهاا وزايدون غير عجباتنا

بيسان:(نطقات وهي تاتعوح) بزز منها تعجبكووم راه مرات ولد لحاج الله يخليك

خولة: ولد لحاج غايتبرع بالزين ههههه

بيسان:(عضات على شفايفها)فخباركوم واحد لحاجة (شافو فيها بمعنى شنو) غدا عيد ميلاد نوح

خولة:وايلي هههه سبحان الله نهار عيد ميلادو غايدير لاكط

بيسان:مكانش عارف گااع ملي قال لينا النهار عاد فكرتو وقلتها ليه وكيف العادة ماتسوقش

نور:واش من نيتك يتسوق راه السيد شارب عقلو شحال دابا غايكون فعمرو؟

بيسان:39 وإن شاء الله لعمر كولو لحبيبي

ملاك:غانوض نشطح شكون تنوض

بيسان: أنا

ناضت ملاك واخدة الشال وحزمات ومشات لجنب الديدجيا لي طالقة الشعبي وبدات تاتحرك وبيسان مع ماتتعرفش تشطح بقات غير تتعوج وصاف..

🎵ياوهادي ليلة مباركة مسعودة لحباب حاضرين ومع حميد ناشطين أوسيدي ولي بغا ينوض يحيح ولي بغا يزيد يحيح ولي بغا ينوض يدردگ ولي بغا يزيد يدردگ ولي بغى ينوض يشطح ليلة هادي.. مع العائلة.. وانشطو معانا وهاليل طووويل اااااهاا الحال مايشاور🎵

دخلات أسماء وغير بانت ليها ملاك تتشطح ومشات جهتها تاهي جامعة جلايلها وبدات تاتشطح معاه ومكاين غير الله يعطيك صحيحتك.. ناضو تالبنات لخرين حامينها بالنشاط والشطيح تاجات غزلان شادة يد سيدرا لي كانت جامعة شنافتها.. تمشات بيها جهة رحيل لي مع شافتها كمشات حجبانها وعقلها مهول عليهاا.. جلساتها رنيم جنبها ورحيل تحنات جهتها ونطقات بحنية تاتلمس على شعرها:مال مامي مقلقة؟

سيدرا:(هزات فيها عينيها) تاأنا بغيت ندير حنينا

رحيل:نديروها لمامي غير تسالي ليا ودير ليك حنينا

جراتها رحيل تتبوس فيهاا وتعنقهاا وسيدرا مخشية فيها.. قلبات سناء عينيها لي كانت حاضية رحيل من الصباح ونطقات تتعوج فمها بهمس: هادشي لي بقاا..

كاين واحد النوع دالناس تتلقاه محاملكش وفاش تتسولو على السبب مكيعرفووش.. هادي حالة سناء لي محملاتش رحيل من نهار عرفات ولد لحاج حاط عينو عليها وباغيها لحلال.. أما رحمة فكانت ساكتة ومرة مرة عينيها تتمشي لرحيل وسيدرا...هزات لفرفارة دليد وبدات تتنش بيها وبزز باش تترسم الضحكة على شفايفها باش ماتفرطش راسها..أما لبنات والبقية فكانو زاهييات مع رساتهوم وشابعين شطيح وسيلفيات بناتهوم كل وحدة تتصور راسها.. أما رحيل مجلسة جنبها سيدرا وعينيها على لبنات تتبسم بهدوء.. جات غزلان ورنيم وكمل طرح وتجمعو الشيخااات كل وحدة تحنت لخرى.. والشعورات طايرين فالسما واخدين راحتهوم حيت حس راجل مكيضورش والرجال راه لفوق جالسين تاتوصل وقيتة دلعراضة دالرجال باش يتحركو..

----

واقف تحت الرشاشة ومخلي لماا هابط على راسو وكتافو لي كانو تيتهزو مع كل نفس طلع.. غسل بالخف مزول ريحة لعرق ولعياا دالنهار لي دوز فالخدمة كيرصي أمورو باش يتهنى من هاد الجهة.. سالى دوشو بالخف وتوضى عاد لوى الفوطة على نصو وبخطوات تقيلة خرج من لحمام غادي لدريسينغ.. مسح داتو وهز ديدوغون رشها تحت باطو وفصدرو لمزغب بزغيبات خفافين.. لبس كالصو وتمشى جهة العلاقة فين معلق لكوستار لي غايلبس.. سروال توب كحل مع شوميز وڤيست فنفس اللون.. وقف قدام لمرايا وفيكسى شعرو لور وهز ريحتو رشها ومسح بيديه على لحيتو ولبس مگانتو عاد جلس يلبس تقاشرو وصباطو لكحل لكلاص.. هز تلفونو وبزطامو وسوارتو حاطهوم فجيبو وخرح من جناحو طافي الضو وراه... قبل ماينزل لتحت مشى لجهة جناح زين العابدين ودق لباب عاد دخل وعينو كيقلبو عليه تابان ليه جالس فوق النموسية محنيي كيسد سيور سبرديلتو.. تبسم نوح فاش بان ليه لابس سروال توب كحل وشوميز كحلة تاهو وسبرديلة.. ضروري ماخصو يدير توش سپور فحوايحو.. قرب جهتو وعنكش ليه شعرو ونطق بالإنجليزية بصوت حنين: كيدوزتي نهارك ؟

زين العابدين:(هز فيه راسو ونطق بهدوء) مزيان

نوح:وسونطر تتمشي ليه؟

زين العابدين:ضروري

نوح:مبقا والو وتبدا القرايا خصك تكون شاد لعربية

وقف زين العابدين قدامو ونوح شد ليه فكتافوو مزير عليهوم وشاف فيه بنظرة جدية وبصوت أجش: عمرك تنسى بلي نتا البكر ديااالي وعمررر شي حد غاياخد بلاصتك عندي سمعتي

داك لكلام لي نطق بيه هو لي كان باغي زين العابدين يسمعو وحيت نوح عارف حسسيتو فالموضوع فهو مبخلش على ولدو بكلامو.. جرو باسو فجبهتوو ودرعو خارجين من الجناح نازلين لتحت فين كاينين جدودو بزوج جالسين الحاج لحسن والحاج الوزاني لي كان جالس بفوقيتو وكرشو سابقاااه صلع ولحيتو بيضااا.. شاف نوح فساعتو وهز عينو جهة باب الرياض لي تحل ودخلو منو خوالو وشي رجال معارف ديالو.. استقبلهوم نوح بتبسيمة خفيفة وكلشي كيبارك ليه وهو مبسم ومرتاح.. كلشي تقريباا جاا ضايفهوم فالصالة لكبيرة تاتحل لباب ودخل إدريس مع ببات جيداء وإسلام وريان ومحمد طه..

إدريس:(سلم معاه سلام رجولي ونطق بتبسيمة) مولاي السلطان اش خبارك؟

نوح:(تبسم ليه بالخف) بخير اسي إدريس ونتا

ببات جيداء:(سلم عليه بتبسيمة)الله يجعل كلشي مبارك ومسعود اولدي

نوح:(حط يدو على صدرو) آمين الله يكبر بيك الحاج

إسلام:مبروك اولد لحاج

نوح:الله يحفظك

تسالمو معاه ريان ومحمد طه وتاهوما باركو ليه عاد دخلو لداخل عند الرجاال لي مجمعين وبدا نوح كيعرفهوم على إدريس..شدو بلايصهوم وجاو السربايا بالصواني دأتاي والحلوى البلدية والفاكية.. كانو تاطلبة جابهوم نوح لي جالس جنب إدريس مجمع هو وياااه وضحيكة خفيفة على شفايفو..

كان ريان هاز تلفونو ودخل سيفط لبيسان مساج لي قراتو ومجاوباتوش وهو يمكش حجبانو ورجع كتب ليها " علاش مكتحاوبيش؟"

بيسان:(بعد مدة) ممسالياااش ابنادم

ريان:سيفطي ليا نشوف اش لابسة؟

بيسان:لابسة هيضورة السبع اش غانلبس فنظارك؟

ريان:بلا ماتعصبيني القلا*وي سيفطي وهنينا

بيسان:ماتخسرش لهضرة ابنادم

بانت ليه خرجات وسدات لكونكسيون وهو يتفقص.. هاكا تادير ليه فهاد ليام لي هضر معاها بزز باش تتجاوبو.. سد الكونكسيون وبقا جالس تيتحلف فيها..

كان نوح مجمع تاحس بيد جدو تحطات على فخدو وتحنى جهتو ناطق: خالك عبد الباقي مغايجيش

نوح:(بهدوء) اوا راه علمناه الحاج

لحاج الوزاني:(حرك راسو ونطق بهمس) راه عيط ليا وقال لك مقلق منك حيت ماعرضتيش على الدراري لعقد وعزلتيهوم

نوح:(طلع حاجبو ونطق بخشونة) باغين يحضرو لعراضة مرحبا (وبنبرة قاصحة متملكة كمل) ومرررتي مغانديرش بيها إشهار باش بنادم يكون ليا على خاطرو..

كان كلامو واضح لجدو لي معاودش هضر ولاقال ليه شي كلمة خرا.. أما نوح دوز يدو على وجهو كيستغفر مولاه من هاد لبلان دخالو لي تقلق غير حيت ماعرضش على ولادو لعقد وعرض عليه غير هو.. كمش حجبانو مباغيش يخسر نهارو.. أما لحاج ففمو كلام باغي يقولو ولكن تايرجع يسد فمو تاني حيت عارف ولد بنتو كيف داير.. يدخل فحفادو كاملين سوى لمزوحين سوى لي باقي ولكن تيوصل لنوح تيحط سلاحو ويهبط كواريه حيت نوح مامخلي حد يتحكم فيه وفااارض شخصيتوو أو وجدوو قدام العائلة كلهااا عليها كيديرو حساب ليه وكيحتااارموه سوى عائلة مو ولاعائلة باااه..

---

عند العيالات كانو الأجواء زوينة والنشاااط وصوت الموسيقى كيتسمع مجهد كاسر الدنيا ولحيحة كلشي نايض يشطح.. الشعبي ومايدير فالنااس.. سالات النقاشة الرجلين لرحيل لي ختارت زواقة موديرن ودازت تتحني ليها يديها وعينيها على سيدرا لي بدلات ليها أسماء لقفطان صهدها ولبسات غير كسيوة خفيفة تاتشطح تاهي وتبوز وتعوج فقزيبتها تتقلدهوم.. جابو لسواغي مع لعصير وكل وحدة شدات بلاصتها ترتاح وتتبرد عاد يكملو.. جلسات تانيرت وحنان فطبلة لي جالسة فيها رحمة دايرة معاهوم الواجب.. غير كملات رحيل نقيشها وهي تمشي سيدرا تتجري باش تنقش تاهي لحنة

رحيل:(شافت فالنقاشة) ديري ليها خفيف عفاك

مدات سيدرا يديها فرحانة تتحماق على لحنة.. دارت ليها النقاشة زواقة حفيفة وناضت باش تنقش لي باغي.. لبنات غير سمعو النقيش وناضو تاهوما يديرو لعادة مع لعروسة.. بقات سيدرا جالسة تاشافت فرحيل ونطقات بخفوت:مامي فيا پيپي

رحيل: سيري عند أسماء تديك لطواليط

ناضت سيدرا رادة لبال لحنتها ومع دازت جهة شيماء لي كانت قالبة الكرسي ومخرجاه لبرا شوية.. تعكلات سيدرا وجات حاطة يديها المنقوشين فوق حجر شيماء لي خرجات عينيها مصدومة وهي تتشوف قفطانها مجلخ ونطقات بصوت معصب: ميييغد

كمشات رحيل عينيها لي كانت رادة لباال وكلهوم انتابهو لشنو طرا تاجات أسماء شادة سيدرا لي مكمشة فمها حيت خسر ليها لحناا ونطقات لشيماء: ماوقع باس اجي معايا لحمام باش تغسلي حالتك

شيماء:(بنرفزة) اش غانغسل وكلشي توسخ

أسماء:(هزات حجبانها ونطقات ببرود) لابغيتي نقدر نعطيك باش تبدلي

شيماء:(يالاه بغات تكسيري تعاير وهي تشوف فيها عفاف بواحد الشوفة خلاتها تسرط لي فجوفهاا وتقلب عينيها) بلاش شكرا

هزات أسماء سيدرا ومشات تنقي ليها حالتها وشيماء تبعاتها باش تمشي لحمام تاهي تنقي ديك التجليخة

سناء:(تاتنگر)لي والد شي برهوش يرد ليه لبااال

مكانتش تانيرت جالسة معاهوم حيت ناضت وبقات غير حنان لي ساكتة تاتشوف..

عفاف:(تحنات جهتها ونطقات ببرود)أقسم بالله ابنت مي وبا وتزيدي شي كلمة ولاديري شي حاجة ماشي تال لهيه ياتانعاود ليك التراابي گدامهوم عندااك يحساب ليك راه كبرتي على لعصاااا

سناء:شنو درت عاود

عفاف:هاني كنقيدهوم ليك نتي وياااها بلاتي تانكونو بوحدنا ونگول ليك اش درتي

دازت ديك اللحظة ورجع كلشي ينشط ويفرح ورحيل تبسيمتها كانت صفراا وعقلها غير مع لبلان لي طراا ومارتاحت تارجعات شافت وجه سيدرا ضاحك وتاتحنقز وتلعب عاد تبسمات تبسيمة طالعة من القلب.. كملو ضحكهوم ونشاطهوم ولحيحة لي ميمكنش ماتكونش فشي تجمع نسائي وكل وحدة دارت حقها فلحناا وتافالشطيح.. وشيماء وسناء من كلام عفاف ضربو الطم ومعاودوش دواو.. جابت أسماء بابي جينيك وليبا وجلسات تاتقاد لرحيل رجليها تالبساتهوم ليها وعوناتها تانضت وبداو تاني فالتعاشق والنگافة تابعاها وهي خارجة من الصالة تتبسم ليهوم بهدوء غادة لبيتها..وصلات وقيتة دلعشا وكل وحدة شدات بلاصتها.. تحطات لبسطيلة فخوي دميغ مزوقة بالفرماح وطوماط سوغيز ولاداند فومي.. وموراها لحم بالبرقوق والمشماش عاد السفة بريستيج والديسير.. كلاو وغير سالاو كملو تاني سهرتهوم.. تاجابو أتاي والحلوى.. وصلات لبيتها ودخلوها النگافة وأسماء لي مفرقاتهاش.. عاونوها تالبسوها ليگات عاد بدات تتزول ليها النگافة لزاكسيسوار والتكشيطة ولبساتها قميص جوهارة فالبلونكاسي.. جمعات النگافة مسائلها وخرجات معاها أسماء عطاتها خلاصها دليوم وتافقات معاها على غدا باش ماتعطلش.. ناضت رحيل جهة مرايتها وجمعات شعرها حيت صهدها بقراصة تادخلات أسماء ونطقات بضحك:بصحتك لكادويات

رحيل:شفتيهوم؟

أسماء:لا ماحليتهومش مي من لبواط باين غايكون الذهب

هزات رحيل ساشية ديال رحمة وحلاتها كانت فيها بواطة حمرا مربعة..حلاتها لقات فبها مضمة باينة ديال الذهب.. حلات أسماء عينيها ونطقات:عگوزتك دواقة هه

تبسمات رحيل وبدات تتحل لكادويات لي كانو كلهوم أكسيسوارت ديال الذهب..

سالات ليلة لحنا لي دازت زوينة وكيف بغاتها رحيل.. مشاو لعيالات ولبنات بدلو قفاطنهوم ببيجامات وعراو على كتافهوم تايعاونو السربايات يجمعو داكشي باش يديوه.. فبيت رحيل لي وطلاحت عليها فولار ونزلات لتحت..تبسمات ليها تانيرت ونطقات بهدوء: كنت غانطلع ليك لعشا ابنتي

رحيل:واخا نجمعو الروينة ونتعشى

تانيرت:اش غاتجمعي طلعي لبيتك راكي عرووسة ماخصك ديري والو اماما يالاه

رحيل:(تبسمات ليها ونطقات بخفوت) هادي ليلتي لخرة هناا معاكوم خليني نعاونكوم (عينيها دمعو) راه غانتوحش هاد الاجواء

مسحات تانيرت عينيها من دموع وجرات رحيل معنقاها تتبكي تاهي.. زواح لبنت ديما كيكون صعيب حيت لبنت تاتخلي دار واليديها لي كبرات فيها وتاتمشي لبلاصة خراا ودار خراا.. كاتخلي بلاصتها فدار واليديها وتانيرت لي كانت مصبرة راسها نهار كولو غير سمعات كلامها تفرگعات بالدموع.. جاو لبنات كيسولهوم علاش تيبكيو وغير عرفو السبب تاهوما انظمو ليهوم فالبكاا.. بزز باش بردو ورجعو يكملو شغالهوم ورحيل دارو ليها خاطرها وخلاوها تجمع الصالة هي وغزلان تارجعو الرجاال من العراضة.. دخل إدريس هو لول وغير شاف رحيل تاتشقى وهو يكمش حجبانو ونطق بهدوء:بنتي اش كديري؟

رحيل:(تبسمات ليه)كانجمع الروينة ههه

إدريس:طلعي ابنتي لبيتك ترتاحي راه غدا تابعك نهار طويل فيه بزاف دتمارة

رحيل:(عنقاتو) أنا مرتاحة ابابا هاكا بلاماتخمم

تبسمات ليه رحيل وشافت وراه ونطقات مكمشة حجبانها:فين إسلام؟

محمد طه:مشى لاباخطمون ديالو يبات تم غدا ويجي بكري

أسماء:(بخفوت)الله على راحة

طلعو الدراري بدلو حوايجهوم ولبنات نقاو تما عاد تجمعو على لعشا ورحيل تاتعشى وتعشي تاسيدرا لي مغمضة عينيها وتتاكل.. غير سالات ماكلتها وهزاتها بين يديها ماحدها فايقة تغسل سنانها.. ملي سالات قداتها ففراشها وباستها ومشات بدلات عليها ولبسات غير شوط ودباردور حيت الصهد وتخشات جنب سيدرا معنقاها وبالها سارح بيها بعيد.. النعاس طار من عينيها تتفكر فشنو تابعها غدا.. بقات ليها ليلة وحدة فدار واليديها.. ومن غدا غاتجمع هي وياه تحت سقف واحد.. عند هاد الفكرة قلبها رجف وتعلاو دقاتو.. شافت فساعتها لقات بلي الفجر مبقا ليه والو ويأدن داكشي علاش لاحت عليها لغطا وناضت غادة جهة لكوافوزة جلسات فالكرسي وزولات ليگات وداك كلينيكس وبان ليها لحنا تفرتت.. تبسمات من لونو وبدات تاتزولو تاحيدات يديها عاد نزلات دارت نفس الشي مع رجليها وخدات الما دالصباغة زولاتها فضفارها عاد لاحت عليها بنوار وخرجات باش توضى..

----

كانت تانيرت واقفة فالكوزينة تاتوجد لفطور تاسمعات صوت السرسار ومشات تشوف شكون.. طلات من الشرجم بان ليها إسلام نزلاات حلات ليه لباب وتبسمات:صباح الخير

إسلام:صباح النور كيف صبحتو؟

تانيرت:هاحنا اولدي

طلعو لفوق وإسلام حط دوك البلاستيكات دلمخبازة لي جاب فوق الطبلة وهز عينو فتانيرت لي نطقات:علاش صدعتي راسك راه إدريس تاهو مشى يجيب لفطور

إسلام:وايلي باش مصدعو واش تاحد مفاق؟

تانيرت:باقي قلت نوجد لفطور هو لول عاد نفيقهوم

سمعو صوت الهضرة وضار إسلام جهة أسماء لي كانت جايا بشورط وتيشورت مبوقة بالنعاس هي وغزلان لي تتجمع شعرها وتفوه.. صبحو عليهوم وأسماء جلسات فالكرسي ونطقات: بابا فاق

تانيرت:اه نشى يجيب لفطور

أسماء:(شافت فدوك لبلاستيكات وكمشات حجبانها)وشكون جاب هادا

إسلام:أنا

ميقاتو وناضت جهة البلاكار تتجبد منو الطباسل باش تستف داكشي وإسلام حاضيهاا تابانت ليه خارجة وهو يتبعها.. بانت ليه حطات طباسل فوق الطبلة ومع جات تخرج شدها من يديها وشاف فالحنا لي دايرة غير فوق يديها ونطق:معزيزش عليك الحنا اغزالي

أسماء: هاد الساعة نتا لي معزيزش عليا

إسلام:(ضحك)هادشي لي بغيت

أسماء:(نثرات يديها ونطقات بعصبية)مبقاش تقيصني الزمر جمع يديك شوية

خرجات وهي تتنگر مخلياه مفطح فوق السداري تاجا إدريس جايب لفطور وفاقو كاملين من غير رحيل أما تاسيدرا فاقت بكري ناشطة..

أسماء:لبخوشة فايقة ناااشطة ليوم

سيدرا:(حطات لبتيبان لي تتاكل ونطقات بحماس)حيت ليوم غاايجي عندنا ماي بلو آيز حبيبي توحشتو

ريان:(ضحك)دابا تسمعك مك وتجيها لغيرة ههه

كملو فطورهوم وموراه كل واحد ناض باااش يمشي يقضي شغالو حيت لوقت دغيا كيطير..

على صوت الصداع لي تيتسمع برا حلات رحيل عينيها تتفوه.. ضارت جهة سيدرا لقات بلاصتها خاوية.. ناضت من بلاصتها وطلقات تنهيدة طالعة من القلب.. هزات يديها تاتشوف فلحنا لي غير مغادة وكطلع ليهاا فلحمورية تاولات مايلة لگرونة غامق.. زفرات النفس وضارت جهة تلفونها شعلات لكونكسيون ودخلات لواتساب لقات بيسان حاطة سطوري.. دخلات ليه كانو تصاورها دلبارح مع لبنات وبوحدها وفيديوات عاد دازت لسطوريات ديال محمد طه وريان تاهوما ولبنات كلشي حط السطوري.. رجعات تاتشوف فالمساج لي كانت سيفطات لرجاء لي خدامة معاها وتنهدات فاش تفكرات الكلام لي قالت ولقلبة لي تقلبات عليها عند بالها راه خبات عليها زواجها وخلاتها تال دقيقة تسعين.. تنهدات رحيل من دام التصرف لي مكانتش متوقعاه منها وحركات رحيل راسها بلاحول مبغاتش تعمر راسها بلخوى لخاوي فهاد النهار باركة عليها غير أحاسيسها ومشاعرها لي لاعبين كومباا فداخلها..

ريحة لبخور مطلوقين مع صوت الطرب الأندلسي لي طالقة الديدجيا.. الصالة التحتانية كانت مقادة بدكور اخر عكس ديال لبارح وتامن الطلامط والخوامي بدلوهوم

ومقادين تالجلسة دلعرسان.. كان إدريس واقف بسروال طويل مع شوميز خاشيها فالسروال.. كان تايتأكد من الأمور واش كلشي هو هاداك حيت مبقا والو لولد الحاج وعائلتو يجيو.. نزلات تانيرت بتكشيطة فالأزرق سماوي هماوية ودايرة فولار على شعرها جاها زوين مع مك اب مناسب عمرها.. تبسم ليها إدريس وباس يديها ونطق بحب:تانيرت إينو

تانيرت:تاسانو

باسها فحنكها ومكرهش يخشيها فيه وتانيرت تبسمات ونطقات بهدوء:وقتاش غايكونو هنا

إدريس:مع ديك الستة

حركات راسها ومشات تجلس بحالها بحال لمعروضة كلشي مكلف بيه التريتور وإدريس راه قايم بالواجب..شوية ونزلات حنان وراجلها تاهوما بالبلدي.. جلسات حنان جنب تانيرت وبات جيداء راه واقف مع إدريس..

---

كانت سيدرا جالسة فوق النموسية لابسة كسيوة مبردة حيت الصهد عليها وشعرها مطلوق قصير دايرة بانضة ليه.. عويناتها الفحمية كانو تايراقبو فرحيل لي كانت جالسة فكرسيها بتكشيطة دلعريسات فالبلونكاسي كلها منبتة بالجوهر كيبري.. تتقاد ليها النگافة الفولار لي دارتو فلون لعقيق لي فالتكشيطة.. قادوه ليها وعاد هزات التاج وتبتاتو ليها فوق راسها وركبات ليها تالفواال.. ناضت سيدرا جهة رحيل ونطقات بإعجاب:مامي جيتي بحال لبخانسيس

كانت عايشة رحيل فواحد الدوامة وملي سمعات صوت بنتها ترسمات تبسيمة على شفايفها وجراتها معنقها وتاسيدرا بدلاتها التعنيقة.. كانت رحيل بديك التعنيقة تاتستامد القوة ديالها.. هاد لمدة كلها كانت عايشة فستريس وخوف وخلعة لي تتكون طبيعية عند أي عروسة ولكن رحيل بسباب تجربتها لولة فكان خوفها مضاعف.. وهاد الخوف لاإدرادياا حاسة بيه وماتقدرش تنفيه وتلغيه.. بعدات عليها سيدرا وجات أسماء جهتها كانت تاهي متأنقة بتكشيطة فالكحل تتبري جاتها زوينة وشعرها طلقاتو ومك اب تقيل فعينيها وفلعكر لي دارتو نيود.. شدات فيد رحيل لي كانت كلها تترجف وغمضات ليها عينيها بمعنى كلشي غايدوز مزيااان..

سمعو الدقان فلباب وناضت غزلان لي كانت متأنقة بتكشيطة حمرا والتحتية ديالها خضر جات مع فصالتها وشعرها تاهي طلقاتو بوكل وتفننات ليها لبنت فلمك اب لي برز ملامحهاا.. حلات لباب وبان ليها محمد طه لي كان واقف فالكلاص مع جات عينو فيها سيد ضهشر وفيسكى شوفاتو عليها وهي كدلك.. تاحد ماهضر وبقاو مكتافين غير بالشوفات تاسمعو صوت أسماء لي نطقات:شكون اغيزو؟

وعات غزلان على راسها وحلات لباب لمحمد طه لي باقي واقف فبلاصتو وعينو متبعينها تاعاق بروحو عاد دخل وهو كيحك جبهتو ونطق بهدوء:واش ساليتو ؟

أسماء:وي سالينا

محمد طه:راه ولد لحااج عيط لواليد راهوم جاايين..

كانت رحيل جالسة فكرسيها وعاطياه بالضهر وغير سمعات اش قال وهي تسد عينيها بالجهد مزيرة على كلينيكس لي فيديها ومع يديها عراقو تفرتت كلينيكس وهي محساش بيه.. قرب جهتها محمد طه تاوقف قدامها وشاف فيها بتسيمة وحنية:عوينات الحلبانة مبرووك عليك

باسها فراسهاا بشوية مباغيش يخسر ليها حالتها ورحيل شافت فيه وعينيها لمعو دموع.. جلس قفازي وشد يديها ونطق:لبكاا بلاش منو فهاد النهار الله يرضي عليك مسحي دموعك وخلي الضحيكة على شفايفك ماتزولش

حركات ليه راسها وهو باس يديها وناض خارج ومع داز جنب غزلان هز فيها عينو وطلعها مزيان عاد كمل طريقو لتحت مخليهاا تاتقلب فعينيها بتوثر..

أسماء:لبنات صافي نتوما نزلو باش لاجاو تكونو حاضرات أنا غانبقا مع رحيل

هزات أسمااء جوا من بزطامها وخلصات لبنت لي صاوبات ليهوم لمك اب حيت غاتمشي.. خوات لبيت وبقو غير النگافات بزوج ورحيل لي جالسة فبلاصتها وعينيها على انعكاسها فالمراياا تاتشوف فيها بسهو.. وأسماء لي كانت غادة جايا تتجمع الروينة لي فالبيت عندهاا مع تما فين لبسو وفين وجدات رحيل.. طرفات كلشي وجات لعند رحيل جلسات معاها شادة ليها فيديها ومع شافتها مخلوعة

أسماء: ياكما جاك الجوع؟

رحيل:(بخفوت)قلبي حاسة بيه غايسكت اأسماء

أسماء: الله ينجيك وغير تهدني كلشي غايدوز بخير

رحيل:(تاطلع النفس وتهبطها) خايفة خااايفة بزااف

أسماء:(تبسمات بمزاح) غير غاتشوفي راحة روحك وخوفك كولو غايمشي ههه

رحيل:(قرصاتهاا فدراعها)بااسلة

أسماء:(خرجات عينيها)خريااا قرصتيني يعني غانتبعك تفووو علاش تقرصيني علاااش

رحيل:(فعز خوفها وتوثرها جابت ليها الضحك ونطقات) باش تبعيني راك غملتي ابنتي

أسماء:(هزات كتافها ببرود) عاجباني حالتي هااكاا

سكتو لبنات فااش سمعو صوت الدقايقية وأسماء خرجات عينيها ومشات تاطير لجهة الشرجم زولات لخوامي ونطقات بصوت عالي:هاااهوما جااااو..

يتبع...