الجوهر الحر الجزء 52

عضات على شغتها وتزنگات فاش قرات لمساج لي سيفط ليها وفهمات علياش تيلمح بان ليها باقي تايكتب وتاهي تكات على لوسادة تاتسناه يكمل هضرتو..

نوح:(جاوبها على التصويرة) � مكفاكش الصوت لي سمعتو زدتيني بالتصويرة تاهي تيوالين إينو

رحيل:(ضحكات بخفوت) � باقي عندي بزاف ديال التصاور

نوح:� سيفطيهوم

تاهي ماشي من لعاگزين دخلات تاتكوشي عليهوم لي فيها بوحدها طبعا ولاهي وسيدرا وسيفطاتهوم ليه وفلبلاصة شافهوم..

رحيل:� لقيتك مصوني عليا أبيل فيديو فلعشية؟

كان داخل تيشوف فتصاورها لي سيفطات ليه ويدقق فيهوم عاطي لخاطر ولي بغا يربح لعام طويل عندو.. تايدقق ويعمر عينيه بزينها السوسي عاد مشى يشوف مساجها وغير قراه تفكر أوطوماتيكمو لابيل وشنو شاف وهو يعقد لحجبان دغيا تسيف وكتب ليها �من بعد..

سد وفضل يحبس السوجي هنا تايكونو بوحدهوم وديك الساعة يهضر براحتو.. أما هي مكانتش عارفة اش كاين حيت تاسيدرا مقالتهاش ليها..رجعات تاهي تاتهضر مع لبنات ويتلفو لوقت تاوصلات وقيتة دلعشا وتحط لعشا وموراه ناضو باش يمشيو حيت مشى لحال.. عنقوها لبناات بزوجاات دقة وحدة تابعزوها وخلاوها تاضحك وقالت:قتلوووني نتوما وتهناو هههه

غزلان:مانسخااوش بيك هه

أسماء:(شدات يديها وقالت) مانبغيكش تقولي لا ليلة قبل لعرس غاتباتي معاناا سمعتي

رحيل:(عارفة بلي صعيب نوح يخليها ولكن نطقات بهدوء)إن شاء الله يكون خير

سلمات مع رنيم تاهي لي سبقاتهوم مع تانيرت وخرجات لبرا لقات إدريس واقف مع نوح ورؤوف لي غير شافتو وهي تبسم بلخف فاش تفكرات بلانو ديال الطبيب لي مستحيل تنساه ليه.. ركبات فطوموبيل إدريس لور وحدرات راسها تاتجبد تلفونها وليزيات باش تونس فالطريق ومع طلعات راسها لقاتو واقف تيشوف جهتها مع كانت مهبطة الزاج.. معارتوش اهتمام وبدات تبرونشي تلفونها مع ليزيات وطلقات الأغاني مرجعة راسها لور ومغمضة عينيها.. في حين رؤوف كان حاضيها ومزولش عينو عليها تاتحركات طوموبيل ومشاو عاد دخل لداخل وهو مستفرب من هادشي لي تيوقع ليه..

---

واقف على السربايا تاجمعو لمطريال ديالهوم وخلصهوم وغير مشاو عاد طلع لفوق داز عند زين العابدين طمن عليه مرة خرى عاد مشى لجناحو دخل وعينو تيقلبو عليها بانت ليه جالسة فوق النموسية وباقي بقفطانها وشادة تلفونها.. هزات عينيها فيه وقالت بهدوء: عييت بزااف ليوم ولكن واخا هاكا كلشي داز زوين كيف بغيت ونشطناا ااه عيطتي ليا أبيل فديك لوقت ماشفتهااش حيت كنت مشغولة

نوح:(حك لحيتو وقال بخشونة)مشغولة فالشطيح الفتنة

رحيل:هااء

نوح:(تحدر جهتها وقال بجدية)شنو قلت على تلفون ارحييل

رحيل:(فهمات هضرتو)تاحد ماصور انوح راه قلتها ليهوم

نوح:(هز حاجبو)اييه وتلفون لي مخلياه فيد سيدرا اش غانقولو عليه (بغات تجاوبو وهو يحبسها بجدية)ديك لابيل لي عيط ليك عرفتي شكون جاوب سيدرا وشفتك بعيني ونتي عطياها لزديح فوق القعدة(خرج فيها عينيها وبان فيه تعصب) كوون كااان شي حد اخر لي دار معاها لابيل من غيري اش كان غايطرا ولاكون سجلات شي فيديو وبلغلط لاحتو فشي قرينة اش كااان غايوقع سيدرا باااقااا صغيرة هي معارفة والو ونتي امولات لعقل عطياها التلفون ومقلتيش مع راسك راه يقدر الخرا يتسجل ويتلاح فشي قرينة..

سكتات رحيل وهي مكانتش متوقعة بلي سيدرا أكسبتات لابيل وفنفس الوقت هضرتو لي قال على حق تماما سيدرا باقي صغيرة ومغاتلومهاش هي لي منها لفوط عطياها تلفونها...

رحيل:أنا مكنتش عارفة عطيتها تلفون باش تصور راسها

نوح:(تيحاول يهدن راسو ويشرح ليها بشوية بلامايتعصب) سيدرا بنت دكية هادشي علاش خصك تردي لبال معاهاا ارحييل وماتبقايش تخلي ليها تلفون راه اتخرجي عليها من دابا تولفو اش خليتي ليها لاكبراات عندها طابليط تلعب فيها ساعة فنهار وماتبقا عمريه ليها بحوايج يفيدوها لقرايا مبقا ليها والو سيمانة وغايدخلو يقراو وديك الساعة أنا نتكلف ونشوف بنتي واش باغا دخل تعلم شي حاجة وندخلوها تعلم تااللغة لي بغات باش عقلها يعمر بلي ينفعهاا ماشي تخربيق لخااوي (هز حاجبو)بحال هاد لأغلاط مغانتساهلش معاهوم لمرة الجايا ارحييل ونتي لي غاتكوني مسؤولة كلامي وااضح

هزات راسها باه وعارفة عندو الصح وكلامو لي قال على حق.. بحال هاد لبلان كان ممكن يوقع مع شي حد اخر من غيرو وسيدرا معرفاش هادشي وهي خصها تنبهها وتشرح ليها باش متعاودهاش..

زول الجاكيط ولاحها فوق النموسية وقال وهو كيطوي كمام لاشوميز: دابا ندويو على الشطيح (هزات عينيها فيه وهو غمزها بالخف) صدقات مرتي عندها مع الشطيح وأنا اخر من يعلم وكون ماشفناك صدفة كون گاعما عرفناها

رحيل:(بدات تاتكحب ومرگات) عادي ماشي شي شطيح

نوح:(هز حجبانو ونطق بسخرية)وايلي هي غير كنتي طالعة فوق القعدة هاكاك (عض على شفتو وحاجبو باقي مهزوز) عندي شيخة فدار ومافخباريش

دخل لدريسينغ وهي بقات تاتولول بوحدها تبان ليها خرج وهاز فيديه داك لموزون لي نساتو أميمة حيت ديالها وقرب جهتها حطو ليها فحجرها ونطق بهمس كالفحيح:يالاه حزميها وأراي ماعندك الفتنة..

ضهشرها وخلاها غير تاضور عينيها وتفرفر بدوك الرموش كي مونيكة.. هالحصلة لي مبغاتهااش وعارفة راسها مغايتفاك معاها تاتشطح والسيد أصلا شافها فلابيل فيديو وأكيد غايبغي يشوفها فاص ليه..

رحيل:(تاضت وشافت فيه) مانقدرش

نوح:(شاف فيها ببرود) وعلاش؟

رحيل:(تاتعبر بيديها)حيت غانحشم

نوح:(هز حاجبو) وايلي تحشمي مني أنا لي راجلك ولعيالات لي شطحتي قدامهوم وحركتي سالفك ماحشمتيش منهوم؟؟

رحيل:(عضات على شفتها)احم ماقصدتش هاكاك

نوح:(قاطعها وهو هاز تلكوموند ونطق بهدوء) ليلة ليلتك الفتنة غير عولي

تنهدات وماعندها كيف دير من غير تزعم راسها وتشطح ليه.. ربطات داك موزون على نصها مقداه ومطلعة داك القفطان باش ماتعكلش بيه وشافت فيه هو لي واقف حاط يديه على جنبو تايقلب فاليوتوب على شي أغنية يطلقها ليها..

نوح:(ضار شاف فيها ومد ليها تلكوموند)هاكي قلبي نتي

شدات تلكوموند وبقات تاتشوف فدوك الفيديوات دالشعبي وتاتقلب على شي وحدة لي تكون قصيرة وفنفس الوقت فيها الحركة.. عياانة وباغا غير تنعس وهو حكم عليها بالشطيح ولكن تستاهل باش لمرة الجايا تجمع تلفونها عندهاا.. لقات وحدة زوينة ديجا كاتسنط ليها وكاتشطح عليها بركات عليها وحطات تلكوموند فبلاصتها وضارت لقاتو جالس فوق النموسية بجلسة رجولية مفرق رجليه ومسند يديه على ركابيه كايشوف فيها وكيتسناها تبدا.. زادت حسات بالتوثر كثر فاش شافت شوفاتو ليها وعطاتو بالضهر تتقاد سالفها لمطلوق وغير تطلقات الأغنية وهي تبدا بريتم هابط تاتحرك قاعها يمين وشمال وداك لموزون كيزيد يبرز ليه الشطحة.. عينو تفيكسو على خصرها لي كان تيتحرك مع ريتم الموسيقى.. فلول جاتها الضحكة وحشمات ولكن فقرارت نفسها تاتقول عادي هدا راجلي وهادشي من حقو..بدات تاتحرك باحترافية وكتلوي جسمها على حساب ريتم الأغنية.. دخلات فلمود مجرد مالأغنية بدات تشخااض وهي صاف بحال لاشعلتيها ضارت جهتو ضاربة بسالفها ولگدام ممحطوطينش فالأرض واقفة غير على صبيعات رجليها وتغني مع الأغنية.. مخلية هاداك لي جالس يتتفرج فيها ياكلها بعينيه وعاض على شفتو مغدد عليها.. وتاهي غير ولفات بدات تاتجي تال جهتو ودلع عليه وتزيد تشعلو وترجع لور والضحكة على شفتهاا.. كيمسح لحيتو بيديه وكيقول ليها براسو واخا غير زيدي وتقلي لحساب تاتخلصيه جملة.. تصدم فيها ومكانش عارف بلي هادشي كولو كان عندو ومافخبااروش السيدة طلعات بروفيسيونيل تحلفي كانت خدامة فتاشياخت.. الشعبي مطلوق على الجهد والسيدة تقولي دايرين ليها بريز ديال الضو.. دردگات وشطحاات وتحيرات ليه

وهو فاش شافها حدرات راسها تاضرب بشعرها بحركات دائرية لاشفتيها تجيب ليك الدوخة وهو براسو خاف لاتجيها الدوخة ساعة هي تقول واش حسات وغير سالات الأغنية أوطوماتيكمون دازت الأغنية خرى دلهيت وهنا شعلات نيت ومبقاتش عيانة باغا تنعس..

رحيل:(تاتغني وتشطح) 🎵اهاااهاا باغا نشطح على كيتو اهاهاا خليو زينات يهيتو🎵(قربات جهتو تاضحك) 🎵الصيادة نوضو تصيدو اهاااهااا لاشفتو العسة حيدو🎵

مع قربات جهتو تاتحرك فطرفها وهو يهز يديه على غفلة منها عطاهاا لطرف تابعدات تاضحك وتحك بلاصة الدقة.. وغير شافت ديك الشوفة لي دار فيها وهي تعرف راسها بلي ليلة ليلتهاا ومغايتفاكش معاهاا.. لبات ليه الطلب وشطحات ليه وغير سالات لأغنية هز التلكوموند وطفى التلفازة حيت عارف لادازت تاني شي أغينة خرى غاتشطحهاا وأكيد غاتكون عيااات واخا هو راه ماسخااش تبقا تشطح ليه الليل كولو ولكن عياات ليه.. وقفات تاطلع النفس بالجهد وتهبطو وكلها ولات حمرة بحال شي مطيشة وعرقااانة.. رجليها بداو يضروهاا ويالاه بدا تيرجع معاها لعياا وجنبها ضرها تاني... وقفات تاترد النفس ومشات هزات من لباكي دكلينيكس وبدات تاتمسح وضارت شافت فيه تاتبسم.. مد ليها يدو وهي شدات فيها تاجرها جهتو وجلسها فوق ركبتو وصدرها باقي تايطلع وينزل... بدا كيرجع ليها شعرها مور ودنيها ويمسح ليها بيديه عنقها لي كان مزين بسنسلتو لي عطاها أول ليلة ليهوم مور الزواج.. تحدر بشوية جهة عنقها مخليها تاتسرط ريقهاا تاحسات بيه طبع بوسة فنحرها الأبيض بواحد لهدوء قاتل بالنسبة ليها.. هز راسو فيها تايشوف فوجهها عن قرب وحنيكاتها لي شوية ويطرطقو بالدم لي تحقن فيهوم.. قاسهاا بضهر يديه لخشنة عكس حناكها الرطبين ونطق ببحة وعيونو على شفايفها لمبلولين بريقها لي فكل مرة تلعقهوم:فين كنتي مخبية عليا هادشي تيوالين إينو

رحيل:(عضات على شفتها ونطقات بخفوت) مجابتهاش لوقت وصاف

نوح:(قرصها فحنكها وتبسم ليها)سيدرا دارت فيا خير كبير على هاد لقبااال

ضحكات رحيل وهو قرصها من جنبها تاتلوات بين يديه وقلبها باقي تايضرب بالجهد بسبب داك لفور لي دارت وقالت وهي تتفوه بتعب:عييت

نوح:(شادها من قرفادتها ونطق بهمس خشن) باقي لحال على هاد الكلمة (باسها جنب فمهاا بشوية عاد بعد مخليها تاترمش بعويناتهاا فيه ونطق بهمس خلى قلبها يرفرف)تباركالله على الشيخة ديالي...

لورد كلما سقيتيه واهتميتي بيه راه غايبقا ديما كيزهر أما لاهملتيه ومبقيتيش كتديها فيه فكون على يقين غايجي نهار وغايدبال ويموت.. وهاكا دايرين النسا فاش كاتعطيهوم اهتمام وكتبينو ليهوم فهي كاتعطي كلما عندها ومكتبخلش بمشاعرها لطرف الثاني أما لاماتسوقتيش ليها فعرف بلي تاهي غايجي لوقت لي مغاتبقاش تعطي حيت الزواج فيه الأخد والرد كلما عطيتي كلما خديتي.. ورحيل كانت وردة يالاه كايتحلو وريقاتها لي كانو دبالو ورجعات زهرات من جديد.. باهتمام نوح ليها ومن كلامو معاهاا لي تيخليها كل مرة تعلق بيه وتزيد تبغيه فاش كاتشوفو كيفااش أبسط الحوايج لي متعلقين بيها راد ليهوم لباال.. ديك لحشمة لي كانت فبداية الزواج شوية بشوية بدات تاتحيد تاولات تاتقدر تهضر وتاخد راحتها على قبل بصح باقي تاتحشم مشي ماشي بحال لول لي لكلمة بزز باش كطلعهاا.. بجرئتو وبتعاملو خلاها تلين ليه وتحيد دوك لحواجز لي باقي بعضهوم مزالوش..

رحيل:(ضحكات رحيل نطقات بهمس وهي تاتشوف فيه)اوا فين هي غرامتي؟

نوح:(عض على شفتو وعصرها عندو بخشونة) لغرامة كاينة الفتنة (شافت فيه بتفاجأ وهو كينوضها من فوق ركبتو ونطق غامزها) أنا راجع ليك

تمشى جهة الدريسينغ وهي بقات واقفة متحمسة لغرامة وشنو غايجيب وتتقول مع راسها زعمة يعطيني فلوس؟؟ تاتخمم وتفكر غير بينها وبين راسها نوع الغرامة لي قال تابان ليها راجع ومهاز والو فيديه كمشات حجبانها وهو رجع جلسها وجلسها تاني فبلاصتها المفضلة.. فوق ركابيه

رحيل:(تاتقلب بعويناتها)فين غرامتي؟؟

مد يديه الثانية وخرج واحد لبواطة دلمليفة مربعة فالأزرق ملكي وهي مجرد مانتبهات ليها عينيها تفيكساو فيها وهي تاتقرا سمية ديال محل مجوهرات معروف.. حلها بيد وحدة واكتملت ليها الصورة لداك لخاتم لي كان تيبري وجوهارتو مربعة وفالأزرق ملكي ومضور عليها جوهارات بيضين صغار تيبريو.. عجبها لخاتم وكان ستيلها لي تاتلبس

نوح:(زولو من البواطة ونطق بهدوء) عجبك؟

رحيل:(تبسمات)بزااف (مدات يديها لي مافيهاش خاتم الزواج وقالت بمزاح) لبس ليا خاتمي ههه

نوح:(لبسو ليها وباسها فيديها من برا ولداخل) بصحتك تيوالين إينو

رحيل:(تاتشوف فلخاتم لي عجبها وقالت بضحك)على هاد لحساب غانبقا نشطح ليك ديما باش تبقا تعطيني لغرامات بحال هادو ههههههه

نوح:(تبسم وقرصها فجنبها تاتلوات وقال بخشونة) عولي على راسك..

رجعات شافت فالخاتم ولون جوهارتو وهي ضور جهتو وشافت فيه:لاحظت بلي بزاف دلحوايج تاتجيبهوم ليا لونهوم زرق ملكي

نوح:(حط دقنو غلى كتفها كيتحسس جنابها وقال بهدوء) هاد لون كيعجبني ونهار دلعيد فاش جيتي عندنا لرياض وشفتك لابسة جلابة فداك لون زاد عجبني كثر

تبسمات فاش تفكرات نهار لي قصد وشداتها الضحكة وقالت بصوت ضاحك: نهار شفتيني بلافولار هههه ناري حشمت منك

نوح:(هز حاجبو فيها) وأنا داك النهار شفت فيه الجوهر الحر ديالي

مجاوباتوش بالقول إنما بالفعل فاش قربات منو وباستو فحنكوو وقبل ماتبعد كان جارها من قرفادتها وغطس فرحيق شفايفها بقبلة جامعة كتعبر على مشاعر الطرفين لي لكلام مغايوصلهومش فهاد اللحظة..

كلشي كان فبيتو ناعس من غير غزلان لي مجاهاش النعاس وباش ماديرونجيش رنيم لي ناعسة حيت خدامة غدا خرجات من بيتها ونزلات لتحت دخلات لكوزينة شعلات الضو وضارت تاتقلب على متاكل فيها الجوع.. لقات إندومي لي مولفة تايطيبوها لسيدرا مرة مرة وقالت تعدي بيها.. دارت لما وجلسات تاتشوف فتصاورها لي صوروها لبنات بداك لقفيطين أو واحد لفيديو صفير فاش كانت تشطح.. نغمسات مع التلفون ومرداتش لبال لمحمد طه لي كان نازل باش يشرب وغير شافها استغرب.. قرب جهتها ومع عطياه بالضهر كان التلفون أونفاص ليه نيشان قادر يشوف التلفون ولقاها تاتفرج فتصاورها.. وقف وراها ومدارش لحس وبقا تايتفرج معاها السيد ويشوف وهي تادوز تالقات وحدة بغات تحطها فلواتس وهي تسمع صوتو لي قفزهاا: تحطيها نحش لمك الركابي

قفزات كلها وضارت جهتو وهي مخرجة عينيها فيه وتتقول هذا وقتاش جاا وماحسيتش بيه.. لقاتو تايشوف فيها منيرڤي ومربع يديه وهي تقول بهدوء: بقا دير لحس خلعتيني

محمد طه:(قال بتجاهل)ديك التصويرة نلقاك حطاهاا مغايعجبك حاال

غزلان:تصويرتي ونحطها فيما بغيت نتا اش دخلك؟

محمد طه:(تحدر جهتها على غفلة وقال ببرود)اش دخلني واقيلا راك ناسية بلي أنا حاليا خطيبك وبعد غدا غانكون راجلك وهادشي من حقي

غزلان:(تنهدات)واش على تصويرة غادير ليا محاضرة

محمد طه:(هز صبعو فوجهها)على تصويرة غانهرس ليك رجليك ماشي غير غاندير محاضرة

غزلان:(هزات حاجبها) وتانتا ماتبقاش تحط تصاورك ماشي غير أنا

محمد طه:(غادي جهة التلاجة وقال) نحطها ولامانحطهاش ماشغلكش

غزلان:(ناضت تاهي تمشي طيب إندومي وقالت بسخرية)اااه أنا ماشغليش فيك ونتا دخل ليااا فالدخاخش دياال حياتي

محمد طه:(تايشرب ويهضر مبرد) ندخل معاك أنا گاع لعضاام وبصحتي

غزلان:(عطاتو شوفة مبردة تاهي مباغاش تحرق دمها معاه)اوا دابا نشوفو اراجلي لعزيز اوبس نسيت خطيبي

كملات شنو كادير وهو بقا واقف حاضيها علاش ماعرفش لمهم يحضيها وربي كبير ولى تيبغي يشوفها واخا كاتشد معاه الضد ومكديرش لي بغا وتتعصبو ولكن مغاينساش ليها نهار موت كلثوم كيفاش وقفات معاه وماخلاتوش.. ربع يديه ساكت وهي تاطيب تاسالات وكباتها فالزلافة وضارت شافت فيه ونطقات بالصواب:بغيتي؟

محمد طه:(هز فرشيطة وجلس) ندوقو هاد لعجب

حطات الزلاقة فلوسط وتشاركوها بزوج وهي عند بالها راه غايدوق وينوض ساعة هو كمل تاسالاوهاا وشاف فيها بهدوء:ماعرفتش اش تتاكلو فيها

غزلان:(ضحكات بالجهد)هههه ضربتي معايا الزلافة ويالاه جاك تنتااقد ونااري شحال عكسي قول الله يخلف مالك هاكا مالك

محمد طه:(ناض هاز لقرعة وقال بهدوء) غير ولفيني حيت غانبقا ديما هاكا

خلاها تاتشوف فيه وهي تاتنهد عاد مشات تاتغسل داكشي لي وسخات وطلعات لبيتها تنعس بهدوء وراحة..

----

أضواء خافتة ورياح خفيفة داخلة من الشرجم لي كان نصف محلول.. فالشومبر كان تايتسمع غير صوت أنفاسهوم الخافتة همسو الرجولي ليها وأهاتها وهي بين يديه دايبة معاه.. مغطيها بجسمو الضخم وحاجب عليها الرؤيا وهي تتبان بين يديه كيف لقملة.. تحدر تايبوس عنقهاا وهي سادة عينيها تاتنفس بالجهد وصدرها كيطلع وينزل بفعل لمشاعر لي تاتعيشهوم فديك اللحظة.. كانت منغامسة مع حركاتو ولمساتو ليها تارجعت حسات بنفس لوجع لي جاها فلحوض ديالها خلاها تكمش حجبانها بانزعااج وعضات على شفتها تاتقول دابا يمشي لوجع لي عمرو جاها فوقت الممارسة حيت كيعطيها الخاطر وعمرو قصح معاهاا واخا بعض لمرات تاينسى راسو ولكن تايتكايس عليها ماأمكن.. حطات يديها على كتفوو مباغاش تحبسو ولكن مقدراتش تستحمل داك لوجع كمشات حجبانها ناطقة بصوت مألم:اااااي

هز راسو لي دافنو فنحرها وشاف فيها بعيون نايمة وبصوتو لمبحوح قال:واش قصحتك؟

رحيل:(عضات على شفتها وقالت بألم وعيونها مدمعين) ماعرفتش كانحس بشي وجع عندي هنااا (قالتها وهي كتشير ليه لجهة لحوض ديالهاا)

داك لوجع لي جاها كان جديد عليها وعمرها حسات بيه تال ليوم فلعشية ومطولش دغيا مشى ودابا تاني رجع ليها وسط لممارسة.. هو غير شاف وجهها لي باين فيه راه مقصحة وهو يحبس وبزربة هز كالصوه لبسو وتقاد فجلستو ويديه على وجهها كيشوف فيها باهتمام واضح لامن شوفتو ولامن صوتو لي نطق وهو تيسولها بخشونة:ماالك واش كيضرك بزاف

رحيل:(حطات يديها على ديك لبلاصة تاتمسدها)شوية وصااف

نوح:(نطق بجدية)نوضي نديك لكلينيك نشوفو مالك وعلاش هاد لوجع جااك

حس السبيطارات كرهاتو بقوة مكانت تاتطيح وتمشي ليه تاولات تاتكرهو وتكره ريحتو.. حركات راسها بلا وقالت بهدوء:مكاين لاش دابا يفوتني مد ليا مخدة عفاك

مدها ليها كانت طايحة فالأرض وقاد ليها راسها وجر كوڤرلي غطاها باش ماتبردش..

نوح:(هاز حاجبو) سبق وحسيتي بيه من قبل ولا أول مرة؟؟

رحيل:غير ليوم فلعشية حسيت بيه (شافتو خنزر فيها وهي تكمل بسرعة)دغيا فاتني ومقلتهاش ليك باش متشطنش علياا وصاف

نوح:(نهض فيها) الالة ماسوقكش فيا نتشطن ولا لا أي حاجة واقعة معاك نبغي نعرفها ماشي تخبي علياا تت (مسح على وجهو وتمتم) استغفر الله

رحيل:(شدات يديها وقالت بصوت حنين) ماتعصبش عفاك انوح راه مقصدت والو غير وجع جاني وفاتني عليها مقلتهااش وصاااف

نوح:(بهدوء)يالاه نوضي نديك دابا دوزي غايكون فاتك لحااال شوية؟

رحيل:(كمشات ملامحها بحال شي بنت صغيرة ونطقات بتدمر)ومابغيتش السبيطار مكنحملوش وزايدون أنا بخير والله غير واقيلا حيت درت إفور بزاف هاد ليامات ومكنجلسش داكشي علاش يمكن

نوح:(تحدر جهتها مخنزر)مالنا على هاد قصوحية الرااس

رحيل:(شدات وجهو بين يديها مع كان قريب ليها وطبعات بوسة فشفايفو ونطقات بدلع)ودير ليا خاطري عفااك لاضرني لمرة الجايا والله تانقولها ليك ونمشي معاك

نوح:(كتسالي معاه بهاد التصرفات لي كادير مرة مرة ونطق بجدية وعينو فقلب عينيها) ونعرفك خبيتي عليا تاني شي حاجة بحال هادي غاندمك ارحييل (كمل بحدة وصرامة)بحال هاد لحوايج لواحد مكيسكتش عليهوم وكيخبيهووم وهاني دويت داباا نسيق لخبار تشوفي لي عمرك شفتيه معاياا

حركات راسها باه تاضور عينيها وكلامو خلاها تمر وتسكت حيت ماعندها ماتقول مزال..

نوح:(تايقيس شعرها بهدوء) دابا شوية ولاباقي فيك؟

رحيل:لا لا دغيا مشى (تفوهات)بغيت غير نعس عييت والله عيني كيتسدو

كان باين فيها لعياا من وجهها لي دابل وعينيها لي تايتسدو بالنعاس..

نوح:(باسها فجبهتهاا) نعسي وارتاحي ليا

تبسمات ليه وغمضات عينيها تنعس وهو ناض لدريسينغ هز ليها دوبياس جداد ورجع لجهتها زول لغطاا عليها وهي تحل عينيها تاتشوف فيه وهو ينطق بهدوء:غير رجعي نعسي

لبسهوم ليها وهي سادة عينيها والجهد لي يهضر ويحل لعين مكاينش..تمارة ديال هاد ليام ولفياق بكري وزيد لعراضة لي وقفات عليها من لول لخر و الشطيح لي شطحات خلاهاا طفى.. لبسهوم ليها بحال لاكيلبس لشي بنوتة صغيرة عاطيها لخااطر وملي سالى ختمها ببوسة فديك التوحيمة لي عندها فجهة لبوط وغطاها ومشى يدوش باش تاهو ينعس..

ليلة دازت وجا صباح جديد مشتي والأرض تسقات بالشتا لي كانت خيط من السماا وريحة التراب عاطية.. لغڤي كتصوني وبزز باش حل نوح عينيه ومد يديه طفاه ورجع تسطح على ضهرو تايحك عينيه.. ليوم عندو عامر بلخدمة خصو يطلع لفيرمة وزيد خصو يدوز على لميزون دڤواتيغ ولمحالات بزوج بلامحال رحيل لي سالاوه وبقا ليه غير يعمر بالسلعة.. ضار جهتها وشاف فيها كانت ناعسة وعاطياه بوجهها ويديها تحت خدها وحالة فمهاا مكينااش هنا.. قاس حنكهاا بإبهامو ونزل باسها فحنكها ومع عندو لحية تكها بيها تافاقت ليه وهي تاتحل وتسد عينيها ونطقات بخفوت:طلع الصباح

نوح:(تبسم وببحة صباحية قال)الصباح طلع ولي عندو شي خدمة راه تيسر ليها والفتنة باقي خامرة ليا هنا

رحيل:(كحزات تاتخشات فيه وحطات راسها فعنقو) فيا النعاس بزااف

نوح:(تايطلع يدو وينزلها على ضهرها لي كان سخون ونطق بهمس) نعسي تاوكان تشبعي نعاسك وفيقي (حدر عينو وقال بتساؤل)باقي تاتحسي بداك لوجع؟

(حركات راسها بلا وكمل هضرتو) المهم قبل مانسى ليوم مكاين خروج من هاد البيت سمعتي فطورك وغداك غايوصلوك هناا ارتاحي ليوم وماتجهديش راسك بزااف والاجاك تاني لوجع صوني علياا داكوغ

رحيل:(تاتهضر وعينيها مسدودين) خاصني نمشي لعند لبنات

نوح:(بنبرة مافيهاش النقاش)ليوم لا غدا وسيري ارتاحي

عرفاتو مغاديش يخليها تمشي عليها مقالت والو وأصلا لبنات راه كلشي شراوه والصالون راه مشاو ليه لبارح دارو لي خصو يدار..

رحيل:بغيت نحني؟

نوح:حني شكون منعك

رحيل:غايخصني نمشي لدار غدا حيت ماما غاتجيب حنايا (هزات راسها من عنقو وقالت) احم نقدر نبات عندهوم غدا؟؟

نوح:(هز حاجبو)تباتي گااع وراجلك؟

رحيل:ونتا عارف غدا هو لخر ولبنات غايتزوجو ومكرهتش ندوز معاهوم غدا انوح عفاااك غير غدا ونيت نحني ونشوفو واش خص شي حاجة نكملوها قبل لعرس

نوح:(نطق بخفوت)وتسخااي بيا

رحيل:(تبسمات فخاطرها من كلامو داير بحال وليد صغير تايدير تأنيب الضمير لمو حطات يديها على حنكو وقالت بصوت خافت) تت نهار ونرجع ليك

نوح:(شاف فيها بجدية)نهاار راه مغاتفوتيهش باش نعلمك وراني غانخليك تمشي وبزز مني

رحيل:علاش بزز دارنا هاديك

نوح:مانكرنااش داركووم ولكن الالة أنا باغي فرااشي يسخن ومرتي تنعس حدايا نعنقهاا ونبوسهاا (نطق بسخرية)شنو غدا نبوس المخدة بلاصتك

تفرشخات بالضحك من كلامو لخر وهو تبسم وعض على شفتو مغدد عليها باغي يطير عليها وبالفعل محسات تاجابها تحتو وهي حبسات ونطق بصوت ماكر:كنت ناعل الشيطان ساعة نتي قلبتي عليا الفتنة

تحدر باسهاا ومحسوش براسهوم تكانو بزوج بيهوم فعلاقة صباحية لي خلات هرموون الراحة والفرحة عند نوح يرتافع.. تكايس عليها وعاشرها بحنية كيف ديما ومناااض من بلاصتو تاخلاهاا تاتسد عينيهاا عاد مشى يدوش وهو نااشط وغير مبسم.. أما رحيل فلاحت عليها بنوار وناضت جهة لحمام دخلات لقاتو كيدوش تحت الرشاشة ومرجع الزاج المضبب لي كيبين غير انعكاسو.. قضات حاجتها بزربة ودارت روتينها الصباحي وخرجات لبيت لي كانت حالتو الحوايج فجيه لمخاد فجيه لسفڤيت تاهوما بدات تاتجمع تابان ليها خارج غمزها وعطاها واحد تبسيمة خلاتها غير تاضحك.. مشى لبس عليه وهز مونطو رجالي سخون طويل لبسو فوق لاشوميز وقرب جهتها معطر وريحة لبرفان عاطية منو خلاتها تكمش حجبانها:واش بدلتي برفانك

نوح:(باستغراب)لا علاش؟

رحيل:جاتني فشكل على لي مولفة

نوح:(باسها فشفتها)أنا مشيت وكلامي بلامانعاودو معااك صافي ارحييل إينو

رحيل:(حركات راسها وقالت وهي تاتنش على راسها)همم صاافي واخا

رجع باسها ومشى وهي مشات هوات البيت وريحتو خنقاتهاا وخلاتهاا مخسرة سيفتهاا..

جمعات رحيل لبيت كولو ومشات دوشات واهتمت براسها وخرجات ريحتها عاطية وحسات براسها خفيفة.. لقات السعدية جايبة ليها لفطور حيت وصاهوم نوح.. حطاتو ليها فالصالون لي عندها فالجناح ومع بغات تجلس تفطر دق الباب ولقات رحمة هي لي جات تشوفها حيت السي السيد علمها بلي راه عيانة..

رحمة:ولدي نوح قال ليا راكي مريضة شوية كيف بقيتي دابا؟

رحيل:(بخجل)حمدلله احم دخلي تفطري معايا

رحمة:بصحتك فطرت قبيلة جيت غير نطمن عليك كيف بقيتي ولاحتاجيتي شي حاجة صوني على السعدية فلفيكس باش تعلمني

رحيل:واخا اخالتي شكرا

مشات رحمة ورحيل جلسات تاتفطر وهي تاضحك وتبسم عجبها لحال حيت رحمة جات باش طمن عليها..فطرات وجالسات مجمعة مع أسماء وغزلان وعلماتهوم بشنو طرا معاها وبلي جاها وجع وتاهوما قالو ليها ترتاح تال غدا وتجي عندهوم.. سمعات الدقان تاني وناضت جهة الباب وهاد المرة كانت سيدرا لي جات عندها مجرد مافاقت وقضات حاجتها وغسلات وجهها وسنيناتها.. تحدرات رحيل باستها فوجهها ودخلاتها مع كان باقي لفطور محطوط عطاتها تفطر وجلسات تاتكمل مع لبنات تاسالات وهي تفكر بلان لابيل ولهضرة لي قال نوح ليها وقررات تفتح موضوع مع سيدرا..

رحيل:(بجدية تادوي وقصحات معاها) ملي عطيتك تلفون قلتي تصوري علاش جاوبتي على لابيل ياك بغيتي تصاور اش وصلك ليها

سيدرا:(تادوي وهي جامعة شنافتها)حيت امامي فاش تيعيط ليا مودي ولارياني وبّاديدي تانجاوب

رحيل:متجاوبيش تاتجي عندي وتسوليني آخر مرة

اسيدرا ديريها حيت غانتقلق منك سمعتي(حركات سيدرا راسها باه ورحيل كملات) صافي دابا مزيان وتاداك الطابليط غاتنقصي منها ساعة فنهار باركة عليك وقريب امامي دخلي لكول وتبداي (تبسمات ليها)متحمسة امامي

سيدرا:(نقزات تاتصفق)اه مامي بزااف غايكون عندي بزااف ديال صحباتي نلعب معاهوم

ضحكات ليها رحيل ومعاها دوزات النهار كولو تاوصل ليل وجا نوح وتعشاو مع بعضياتهوم كاملين.. ولغد ليه راه كانت رحيل غادة لدار باها موصلها نوح لي مسخاش بيهاا ولفها فدارو وفبيتو وففراشو ولات ماشية ليه مع الدم..

نوح:(وقف طوموبيل ونطق بجدية كيوصي فيها)تلفون نصوني جاوبي واخاا وقبل مانسى داك الزوواق لي تاديرو وقوة التطلاس مانبغيهش ارحييل سمعتي راه انلقاك دايرة شي عجب نرجعك لدار ونديرو بناقص من شي عرس ولباس مغاندويش عليه حيت سبق وهاد لكاسيط هضرنا فيها وعاودناهاا

رحيل:(تاضحك) كون هاني عارفة اش غاندير

نوح:هاانا غانسكت غدا ونتفاهموو

رحيل:(قربات جهتو ونطقات بهمس) راه وجدت ليك لكوستوم لي غاتلبس غدا غاتلقاها معلقة فجيه بوحدها هي ولمونطو تاهو وداكشي لاخر كلشي وجدتو ليك واخا اه وقبل مانسى نقص شوية لحيتك راه كبرات وأصلا تاتعجبني فااش تاتكون منقصهاا ونيت مكتكنيش فوجهي ههه

نوح:(عض على شفتو بنابو) بان ليا ندير بناقص ونحرك طوموبيل ونمشي بيك لشي قرينة نكونو فيها بوحدنا على هاد لحساب

رحيل:(عرفاتو غايديرها وقالت بضحك)ههههه ولعرس بغيتي خوتي يتقلقو عليا ويغضبو

نوح:(جرها من قرفادتها وباسها فشفتهاا بخفة) الله يسمح ليك اتخليني ليوم بلانعااس

مسخاش بيها وتاهي نفس الشي نزلات بعد توصيات عديدة منو عاد دخلات لدار تسالمات مع البنات ومها.. وهاكا داز نهار عندهوم مشارجي مع لحنايا وتوجاد الشي لي خاص يوجد قبل لعرس.. لعريسات خلاو لحنا تال لقاعة ولبقية لي داروه.. كان تلفون رحيل كل مرة يصوني بنمرة نوح لي تيطمن عليها وفالليل شد معاها لابيل فيديو ماخلاها تانعس عاد مشات تسهر مع لبنات وكملو ليلتهوم بالضحك والنشاط..

وصل نهار لعرس ومع الصباح كلشي فاق ولي مكلف بشي شغل راه تيقضيه.. لعريسات كانو باقي ناعسات يرتاحو ورحيل شدات طريق هي وريان يجيبو تكاشط لي غايلبسو هوما..

**

فالقاعة لي كانت تاتنغل بالسربايا لي تيقادو الديكور والطبالي لي ختاروهوم مربعين مع كراسيهوم والطباسل والكيسان وحاطين لڤاز دلور فلوسط.. ديكور كان قمة الرقي وكلشي كان متناسق وفالمركز ديال القاعة دايرين زوج برزات.. كانت رحيل غادة جايا واقفة على الشغاال وتاتشوف ياكما غفلو على شي حاجة وتلفون فيديها كيف سونطر دأبيل كل مرة يعيط شي حد..

رحيل:(تاتهضر بالجهد)انووح واش قربتي تجي

نوح: يالاه راجع من لفيرمة

رحيل:(شافت ساعتها)مايقدكش الوقت راه شوية والناس غاتجي (بانت ليها ممات إسلام وخوتو جاايين لابسين ومقاديين وقالت بسرعة) نخليك انوح شوية ونعيط ليك واخا

نوح:سير

قربات جهتهوم تاتسلم عليهوم وترحب ونطقات وهي ضاحكة:القاعة ديالكوم هههه خودو راحتكوم

م.إسلام:ربي يخليك ابنتي مك فين هي؟

رحيل:طلعات تلبس شوية وتنزل باش نطلع أنا ههه باقي لدابا بعباايتي

شدات معاهوم لهضرة تاجات تانيرت لابسة التكشيطة فالگرونة جاتها فنة وبانت صغيرة بديك الباتشة لي دارت وشوية دلمكياج لي مكانش باين.. خلاتها معاهوم وطلعات تلبس فبيت أسماء لي كانت سالات ولبساات تكشيطتها البلونكاسي لي غادخل بيها هماوية ودلعريسات تاتباان من بعيد تاتبري وشعرها دارتو پاتشة مرخوفة وتاج فوق راسها بانت فنة خلات رحيل تاتصلي على النبي وتزغرت.. جاتها لبكية وبزز باش حبساتها باش ماتبكيهاش وتخسر ليها لمكياج

رحيل:ماشاء الله جيتي فنة

أسماء:عويناتك ههه عرفتي مخلوعة بزاااف

رحيل:دابا تفوتك الخلعة المهم استمتعي باللحظة

...اجي اختي نصاوب ليك باش ماتعطليش

رحيل:داكوغ مهم عارفة شنو ديري

...أصلا ملامح وجهك زوينين بحالك بحال لعروسة ماشاء الله محتاجيتوش مك اب بزاف

بدات تاتخدم ليها وجهها وداكشي خفيف مكتراتوش ليها وركبات ليها الرموش سمطة خفيفة يادوب تاتبان وخدمتها نقية.. متعطلاتش بزاف وكانت سالات ليهاا وناضت رحيل تلبس تكشيطتها لي كانت فالأزرق ملكي كلها منبتة عاوناتها البنت وحزماتها ليها ودارت فولار بطريقة جديدة مع خيط الريح فيه جوهارة فلون تكشيطة ورشات ريحتها ودارت خاتم زواجها ولي جاب ليها نوح ولزاكسيسوار ولبسات صندالة مافيها طالون باش تمشى أليز.. هزات تلفونها وسيفطات لأسماء بوسة ومشات عند غزلان تشوفهاا.. كانت تاهي لاتقل جمال على أسماء وملامحهاا برزو بلمكاب لي قليل فين تاديرو.. كان شعرها القهوي طويل مخلياه على راحتو وغير دارت ليه بابليز فلتحت وشداتو من جناب فقط ومتبتاه بالتاج.. تاهي كانت لابسة تكشيطة بلونكاسي ولكن كانت فشكل أخر.. تبسمات رحيل وقربات عندها لقاتها جالسة مع رنيم لي كانت متأنقة بلون الأسود لي جاها غزال خلاتهوم ورحيل قربات جهة غزلان وتبسمات ليه:خصنا نرقيوكوم حيت ماشاء الله وحدة تنسيك فلخرى

غزلان:(تبسمات ليها بتوثر)تانتي جاتك التكشيطة فنة والله

رحيل:مغانجيش قدامكوم هههه (نطقات بهدوء) شوفي اغزلان ليوم نبغيك تنساي كلشي وتعيشي نهارك ماتفكري فتاحاجة لي تخليك تقلقي

غزلان:غانحاول ارحيل تيقي بيا أنا باغا غير نرتاح فحياتي

رحيل:أنا عارفة راحتك غاتكون مع محمد طه واخا هو تيبان قبيح ولكن والله تاأحن منو ماتلقايهش غير الضروف خلاتو يقصاح ولكن متأكدة نتي غاتعرفي ليه غير خصك تخدمي دماغك هههه

غزلان:(تنهدات) خوك أصلا مهم عندي بزاف ومكرهتش كون بدينا فظروف خرى و

رحيل:(قطعاتها) ربي ماتعرفي شنو مخبي ليك تاأنا بحالك كنت تانقول هاد لكلام وتعدبت وغاتكوني شتي اش دوزت ولكن من بعد عرفت بلي ربي كان مخبي ليا الفرحة وهاني دابا كانعيشها

غزلان:الله يدومها عليك

رحيل:آمين ويخليه ليا هههه يالاه نخليك نزل نشوف الضياف ونتي قراي القرآن واخاا شوية ونرجع..

القاعة عمرات والضياف بداو يجيو والأوركيسترا راه دايرة خدمتها.. فباب لقاعة واقف إدريس بالبلدي هو وتانيرت ومعاهوم ممات إسلام وخوها تيستقبلو الضياف.. وقفات لجيپ دنوح لي نزل منها بكستوم فالبلومارين مع شوميز بيضا كاتشعل وگراڤاط ولابس من لفوق مونطو طويل رجالي ولحية منقصها كيف تاتبغيها الفتناه.. نزلات رحمة تاهي بلبدي ولايحة فورور على كتيفاتها ومعاه بقية العائلة لي جاو بدون استثناء..

إدريس:راك مول الدار ماتحتاجش العراضة اولد لحاج

نوح:الله يكبر بيك النسيب

دخل وعينو تاتقلب عليها وتقول واش لقاها.. طلع فالدروج تايقلب عليها لفوق حيت سول عليها.. مع طلع مع تحل لباب وخرجات لفتناه بديك الإطلالة لي خلاتو يحماق عليها.. قرب جهتها وغير وقف قدامها وهو ينطق مكمش عينو فيها وتحدر جهتها ونطق بهدوء:اش داكشي دايرة فعينيك؟؟

صدمها حيت قشع دوك الرموش لي دارتهوم سمطة خفيفة يادوب تيبانو وهو كيدار ليها تاقشعهوم ماعرفاتش والسيدة نسات بلي هو حافضها عن ضهر قلب وأي حاجة فيها تايعرفها وغير لازادت شي حاجة بسيطة يقشعهاا.. لقاتو باقي كيخنزر فيهاا وهي تبسم ليه بخفوت:دايرة أيلاينر اش غاندير ههه

نوح:(هز حاجبو) تاضحكي عليا الفتنة (رجع نزل راسو تاولى وجهو قدام وجهها وقال)اش هاد لمرض دايرة فرموشك

رحيل:وراه قلت ليك اش كاين واه انوح هانتاا شووف أيلاينر

ماتيقهاش وعارفها زادت شي حاجة وخصوصا رموشها ولكن مكيفهمش فداك التخربيق وتاهي خرجات الجبهة.. سلك ليها لبلان مباغيش يقجر عليها ويقلقها فعرس خوتها.. بعد كيشوف فتكشيطتها لي مكان فيها تاشي عيب طويلة واسعة والأهم جاتها قتالة

نوح:(لمس حنكها وقال بهمس خشن)صافي عرفتيني تانحماق على لبلوغوا ونتي تلبسيه ليا

رحيل:(ضحكات)ههه فخبارك هادي كريتها قبل ماتقولها ليا

نوح:بصحتك تيوالين إينو (بجدية)فين سيدرا

رحيل:مع ريان لتحت يالاه نزلو

شدات فيه ونزلو لتحت ولكاميرا مان تيسجل فيديو ومع القاعة فيها بلازمات كبار كيبينو ونوح كمش حجبانو وقال بخفوت كاعي:هادشي لي بقاا كلشي يتفرح فيك ويحط عينو عليك

رحيل:(قربات جهة ودنيه ونطقات بهمس أنثوي) وأنا عيني عليك هه

سكتاتو بهضرتها وخلاتو تايشوف فيها عاجبو لحال كيفاش ولات تاتجاوب معاه براحتهاا ولحشمة مشات.. تفارقو هي وياه ومشى لعند النسيب يوقف معاه وهي مشات تاترحب بالضياف وتسلم..

كانت سيدرا بحال شي عروسة صغيرة تاهي لابسة تكشيطة مناسبة عمرها فلبوغوا تاهي.. خداتها ليها رحيل إكسبخي باش تواتة معاهاا.. كانت طالقة شعرها تاتبان بحال شي فراشة تاضور من هنا ولهيه ومعاها بنات خوت إسلام تايلعبو.. قشعات من بعيد زين العابدين لي يالاه داخل لقاعة مع أمين ضارب حطة فلكحل وكيف لعادة ضروري مايخلي واحد التوش ديالو.. مشات تتجري عندو وشعرها تيلعب مور ضهرها..

سيدرا:زينبيدين زينبيدين

ضار هو وأمين تايشوفو فيها وضحك أمين ليها:اش هاد الزين راني خايف نعشقك

سيدرا:(تادور بتكشيطتها)جيت زوينة بحال مامي

أمين:(تايعجبو يهضر معاها تحدر باسها فجبهتها) نتي راك قرطاسة واش راك تقول اعشيري

زين العابدين:(جابو بالإنجليزية) باركة من تقح*بين وزيد نجلسو ابنادم

سيدرا:علاش ماتتهضرش عربية

أمين:(جاوبها بلاصتو) راهو ميعرفش ليها بزاف

حرك زين العابدين راسو وساط وببرود كان غادي تاشدات فيه سيدرا من سروال وقالت وهي مكمشة حجبانها:صورني لهيهاا

تاتشير ليه بلاصة لبرزات لي واقفين فيها زوج عيالات ممخلينش لبراهش يقربو..

زين العابدين:(تمتم ببرود)ارب العالي

ضحك أمين وكان باغي يدير ليها لخاطر ساعة شكون خلاه..جرو زين العابدين وخلاو سيدرا واقفة مقلقة وبقا فيها لحال.. هبطات راسها ومشات ديريكت عند نوح لي بان ليها بحال درهم دلحلال مشات تاتجري عندو وهو غير شافها تبسم ليها بحنية وحل يديه تاجات عندو وهزها مجلسها فوق ركابيه وباسها فحنكها:تاتبيرت إينو

سيدرا:(نطقات بصوت مغبون)ماي بلو آيز زينبيدين مبغاش يصورني هيهاا

نوح:(تايمشط ليها شعرها وهضر بلخاطر)لهيها مكيجلسوش فيه لوليدات الصغار ابابا

سيدرا:وعلاش؟

نوح:حيت هاديك لبلاصة دلكباار هوما لي كيجلسو فيها

سيدرا:(نطقات ببرائة) تاأنا فاش نكبر غانجلس فيها ياك ماي بلو آيز

نوح:(تبسم بحنية ليها) إن شاء الله

جلسات عندو تاتوريه لحنة وهو تيجاوبها ومرة يقلب على رحيل تاكتبان ليه فشي قنت وسط لعيالات عاد تيرجع يهضر مع الرجااال وفيما تحرك يحضيها..

برا كانت واقفة طوموبيل إسلام لي كان نازل وهو لابس الكوستوم فلكحل وكراڤاط ومحسن لحيتو وشعرو وروايح يتشمو من بعيد.. كان معاه تامحمد طه لي تاهو لابس البلوماغين مستغني على الكراڤاط مباغيش تحنقو وشعرو لقهوي مفيكسيه ولحية محسنة وبزوج بيهوم طاح عليهوم سر العرسان.. كان باب اخر لقاعة منو غايدخلو نيشان ويطلعو لفوق باش ينزلو مع عريساتهوم.. كان إسلام شاد تلفون كيهضر مع صحابو لي خدام معاهوم وكيباركو ليه وهو كيجاوب مبسم وباين فيه فرحاان وماخصو تاخير وهادشي شاافتو هي لي كانت جالسة فطوموبيل جنب لقاعة ومخبية وجهها بشال وعينيها دايرة ليهوم نضاضر كحلين.. كانت تاتحس بنار شاعلة فيها وهي تاتشوفو فرحان بلابيهاا.. زيرات على لڤولون ونطقات بتوعد وعينيها عليه: ماتفرحش بزااف اإسلام كلكوم ماتفرحوش حيت مغانخليكومش..

فواحد من لغرف لمتواجدة فالقاعة كانو مزينينها بديكورات بسيطة وراقية وحاطين فيها كراسى وطبيلة مربعة كبيرة مضورين عليها تاهي كراسى.. كان جالس فيها إدريس برفقة العدول لي كان جاي باش يكتب كتاب لعرسان ومعاه خال إسلام .. كانو المقربين هوما لي حاضرين فقط لعقد وغايبداو بإسلام وأسماء هوما لولين لي كانت فهاد الأثناء تاترعد بالخلعة لي عاد سرات معاهاا فاش وصل وقت المعقول.. يديها كلها تاترعد وكانت معاها رحيل لي ماخلاتهاش واقفة جنبها تاتهمس ليها بكلمات باش تريحهاا وماتستريساش بزاف..

أسماء:(تاتهضر بخفوت)عاد دابا فهمتك نهار كنتي غاتزوجي وحسيت بداكشي لي حسيتيه

رحيل:(ضحكات)هههه اوا شتي كنتي ضحكي عليا هانتي دابا حسيت داكشي لي حسيت بيه (درعاتها) عادي لخلعة ولابد منها حيت نتي دابا غاتعيشي واحد التجربة جديدة عليك ولكن ماتخليش الخلعة تسيطر عليك وحاولي تفوجي وتستمتعي بعرسك (بمكر همسات ليها)وزايدون هذا غير إسلام راك تتعرفيه وشحال ونتي وياه تغاوتو ودابزتو ههههههه

أسماء:الله يمسخك

قدات ليها رحيل لفوال مع إسلام جاي باش يديها.. بعدات رحيل فاش بان ليها السيد داخل مأنق وضاحك باين فيه فرحان.. وقف تايشوفها وهي بديك التكشيطة لي كانت كلها تتلمع ولفوال لي نازل على وجهها مخبي ملامحو لي متشوق يشوفهوم ويروي عطشو فيهوم.. قرب جهتها بخطوات تابتة تاوقف قدامها وهي مدات يديها لي شدها وشبكها مع يديها وجرها لعندو ناطق بهمس:جيتي غزالة اغزالي

أسماء:(بنفس لهمس)على نتا شتيني باش تعرفني كيف جيت؟

إسلام:إحساسي قال ليا جيتي زوينة هه

رحيل:(تاضور عينيها)احم احم نحن هناا (شاف فيها إسلام وضحكات)زيدو راه كيتسناوكوم ونتا اسي إسلام خلي لغزل ديالك تال من بعد ههههه

ضحك معاها إسلام وغمزها عاد تحرك هو وأسماء وموراهوم رحيل ونگافات بزوج تيصليو على النبي.. المصور مكان تيفلت تالقطة وريان تاهو كيصور بتلفونو ومعاه رنيم وخوتات إسلام..دخلو لبيت فين كان لعدول جالس ومعاه المقربين لي وقفو فاش وصلو لعرسان.. عينين نوح كانو تيقلبو عليها ومع هي بوحدها لي لابسة داك لون قشعها وغير شاف كلشي تيصور وهو يمشي نيشان جهتها جرهاا من يديه تاشافت فيه حيت غفلهاا ونطق بصوت هامس:اجي وقفي لهيه

درعها بيديه تاوصلها لجهة لكراسى وهو يجلسها تم وكلشي شد بلاصتو ونوح واقف فوق راسها وحاط يديه على كرسيها.. جلسو لعرسان ولعدول بدا كلامو المعتاد وكلشي يتسنط ويفيلمي.. ومنهوم رحيل لي تاهي باغا تخلي عندها لسوڤونيغ دزواح ختها.. وصل وقت العدول يسول وغير عطاو لموافقة وتاإدريس عطاها وهو يمد ليهوم لكناش يسنيو وأسماء هي لولة سنات بزربة ويديها تاترعد وموراها إسلام والنگافات طلقو لحلوق تاني تيزغرتو ويصليو على النبي.. رحيل عينيها تغرغرات بدموع وبدات تاتمسحهوم بصبيعاتها تاتحدر عندها نوح لي قاس حنكهاا ونيفو حدا نيفها مامسوق لالبشار ولالكاميرا...

نوح:(بصوتو الخشن) علاش تتبكي؟

رحيل:غير حيت فرحانة بزاف لأسماء

نوح:(حرك راسو وهمس)لاحول ولاقوة إلا بالله

تقاد فوقفتو وهي بدات تمسح دموعها.. وعند لعرسان لي مجرد ماسيناو ضار إسلام جهتها وطلع ليها لفوال مخلي عينيه تجوب فملامحها لي كانو مبسمين.. مك اب ديالها برز جمالها العربي لي خلاه مسحور وبدا يقرب بشوية وعينو على شفايفها باغي يبوسها وهي غير شافتو ونطقات تحت سنانها بهمس:فجبهتي الحمااار ماشي فمي

هضرتها هي لي وگضاتو وخلاتو بزربة يعيق براسو وبلفضيحة لي كان غايدير.. باسها فجبهتها وتحدر جهة ودنيها وهمس ليها:دابا نوريك الحمار اش غايدير فيك

سكتات مجاوباتش وتاهو بعد وناض يسلم مع خوتاتو وخوتو لي كانو حاضرين تيباركو ليه وأسماء تاهي تاتعنق فباها وتانيرت وخوتهاا..

رحيل:(همسات ليها) ههه كان غايبوسك ففمك ههه

أسماء:(شافت فيها مخلوعة)ماتقوليش ليا عقتي ناري غايكون تابابا أو ولد لحاج عاقو

رحيل:ههه غاتكون تشدات فالفيديوات هههه

أسماء:الزا*مل فيه الدودة ياربي مكيهداش

رحيل:هههه (ضربات فكتفها) غير وجدي ليلة ليلتك هههه

قرب جهتهوم إسلام وبركات ليه رحيل وكحزات جهة نوح لي كان حاضيها تيشوف فيها غير بعينيه قال ليها اجي وتاهي مشات عندو وضورات يديها على كرشو معنقهاا وحاطة وجهها على صدرو وهو بدورو درعها وزاد خاشيها فيه..

فالبيت لي جالسة فيه غزلان لي كانت كل مرة تشوف فالساعة وترجع تشوف جهة الباب كاتسنى نوبتها مع قبل ماتمشي رحيل عند أسماء دازت عندها وعلماتها بلي كاين.. كانت تاتفرك يديها مع بعض وساهية فلعدم.. هي بصح فرحانة ولكن تاتحس بفرحتها مكملاش حيت الواليدين لي تيكملو فرحتك مكينينش معاهاا.. الأم لي تبقا مع بنتها وتحضيها وترد ليها لبال فنهارها راه تحت التراب والاب لي تيكون الضهر والسند تاهو تحت التراب.. بصح إدريس وتانيرت والكل واقفين معاها وكيشوفو اش خصها ومناسينهاش ولكن بلاصة الواليدين راه مغايعمرها تاشي مخلوق.. حسات بدموعها فطرف عينيها وبزز باش حبساتهوم..

النكافة:(تبسمات ليها)طلعي نفس وخرجيه بزاف دلمرات ابنتي

بدات تاديرها غزلان مدة طويلة تاحسات براسها شوية وهو يتحل عليها لباب وجات عندها رحيل.. مفرقاتش بينها وبين أسماء وكيفما وقفات مع أسماء قبل ماتعقد غاتوقف مع غزلان تاهي حيت تاتعتابرها بحال ختها قبل ماتكون مرات خوها..

رحيل:واجدة العروسة ديالناا؟؟

غزلان:(بصوت خافت)واش صافي سالات أسماء؟

رحيل:اه صافي عقدات وتربطات دابا جات نوبتك ههههه

غزلان:(تاتسرط ريقها)محمد طه فين هو؟

رحيل:(جاتها الضحكة)هههه هاهو تيبدل حوايجو كان جاي بكوستوم وسيد فاش كان باغي يشرب هرق عليه لقرعة دلما وتكبات ليه على فخادو ومشى يبدل ههههه ماشي غير بوحدك لي متوثرة تاهو بحالك

معرفات غزلان واش تفرح ولاتحزن من هضرتها لي عقلها فسرها بطريقة خرى.. مع هي عارفة محمد طه غايتزوجها فقط باش يصلح الغلط لي دارو بزوج.. وعند بالها دابا راه غايكون مباغيش ويمكن يكون تنادم معاه لحال وگاع الأفكار الخايبة طاحو عليها كيف الشتاا مخلينها ماتسمعش باقي لكلام رحيل لي كانت تاتعاود ليها على العقد دأسماء وإسلام وكيف داز..

فلبيت دأسماء لي كان فيها محمد طه مع ريان كيعاونو يبدل مور ماهرق على راسو الماا.. كان تايلبس جبادور فالبيض فيها سفيفة فالصفر جاتو غزالة ومع طويل وعندو لكتاف عامرين بان فيها قتاال.. مشط شعرو وريان واقف قدامو تيقاد ليه الجبادور جهة لكتاف ونطق بصوت ضاحك:ههه تبت شوية الخو راه شوهتي بينا حنا الرجال ههه

محمد طه:(خنزر فيه) سير تقووود وفرقني عليك

ريان:(تفرشخ بالضحك)هههه لابنتي ليا شاعل ليوم زعمة راه ليلة لعمر خص تكون ناااشط ونتا عارف بلي تابعك الليلة لجهاد في سبيل الله هههههه

هز محمد طه يديه باغي يضربو وريان هرب ليه تايضحك هو عارف محمد طه متوثر عليها شاد فيه باش يخليه يحيد داك الستريس.. رش محمد طه ريحتو وشاف فساعتو ونطق بهدوء:تحرك نخرجو راه تعطلنا

ريان:(بندالة)زربان دابا تعقد عليها وتولي تشوفها ربعة وعشرين ساعة ههههه

محمد طه:ينعل حسك سكتنا تت اش هاد لوزير عاطيني

ريان:عمرك غاتلقى بحاالو (غمزو)

خرجو بزوج لقاو إدريس لي شاف فمحمد طه وقرب جهتو باسو فجبهتو وطبطب على كتافو بحنية: سير جيب عروستك وأجي اولدي

محمد طه:واخا

ريان:نمشي معاك

إدريس:(درع ولدو ريان ونطق مكمش فيه حجبان)زيد نتا قدامي

ريان:(بضحك)غاتزوجني الواليد

إدريس:(حرك راسو)غاندي غير دنوبها

ضحك ريان وإدريس تبسم ليه وخلاو محمد طه غادي لعند غزلان وطوفان من لمشاعر تيحس بيهوم فالداخل ديالو.. كلما قرب جهة البيت كيحس براسو متوثر كثر وكثر.. دق لباب ودخل وعينو تايقلبو عليها بلهفة تابانت ليه جالسة ورحيل واقفة جنبها.. كان غادي جهتها وعينو عليها هي فقط لي كانت حادرة راسها ولفوال على وجهها وعينيها تايشوفو فرجليه وديك لبليغة الصفرا لي لابس.. تاتسرط ريقها تاوقف جنبها وشمات ريحتو وصوتو لي قال بهدوء:خلينا نمشيو

رحيل:صافي يالاه غزلان

ناضت بهدوء وهي تتقاد جلايلها ومع خطات لخطوة لولة تعكلات بتكشيطة لي كانت كبيرة وكانت غاتجي على فمها كون مايديه لي سبقات وشداتها كون جات منشورة قدامو

رحيل:بسم الله عليك

النگافة:(قربات جهتها)ماعليش اجي نقاد ليك التكشيطة ولفوال غايكونو خسرو

تقدات وهي حشمانة وتتعض على شفايفها ونطقات بهمس:الشوهة

قادوها عاد مد محمد طه دراعو وشدات فيه ومشاو جهة لباب وغزلان تاتسمع صوت التعاشق ومع لفلاش دلمصور زادت تدهشرات كثر... كانو أسماء وإسلام جالسين فالكراسى باغين يحضرو لعقدهوم وغير دخلو وهي تنوض أسماء وبدات تاتزغرت وتصلي على النبي وتصفق تحلف عليها ماعروسة..

إسلام:(جرها)ريحي وتبتي مالك تاطيري

أسماء:بعد مني راني فرحانة لخويا

إسلام:كلشي كيشوف فيك

أسماء:ماشغليش تت

دارت لي فراسها وتاهو خلاها عارفها كيدايرة.. جلسو لعرسان وكيف داز عقد قران أسماء مع إسلام فجو هادئ مر تاعقد محمد طه وغزلان لي مجرد مسناو بداو الزغارت كيتسمعو.. جاو جهتو خوتو وتجمعو عليه وتاأسماء كيعنقو فيه وتانيرت مشات لعند غزلان هي وإدريس تيباركو ليها وهي باقا بلفوال ديالها.. كان كلشي فرحان ولفرحة ترسمات على وجوه الكل لي باركو لعرسان الثانين ومحمد طه عاد ضار جهة غزلان وقرب عندها هز ليها لفوال تابان وجهها قدامو.. سرط ريقو وقرب باسها فجبهتهاا وبعد مخليها كلها تاترعد بتوثر

محمد طه:(بهمس حنين)مبروك علينا

فالقاعة لتحت كان الشعبي مطلوق وكلشي محيح.. نزلات رحيل والبقية مخلين لعرسان يوجدو راسهوم باش تاهوما ينزلو.. مشات رحيل لطبلة فين جالسين صحبات غزلان وبيسان مع خوتات إسلام لي عقليتهوم أوبن وتيعجبهوم الضحك جلسات معاهوم

أميمة:(وجهات هضرتها لرحيل)نسيت عندك لموزون ديالي داك النهار

رحيل:(تبسمات فاش تفكرات ديك الليلة)اه راهو باقي عندي شي نهار نجيبو ليك

أميمة:غير خليه ليك نتي مزوجة وعندك ماديري بيه كيتي أنا ههههههه

ضحكو كاملين ورحيل تاهي تبسمات وضارت جهة سيدرا لي جات عندها كلها عرقانة كانت تاتلعب وتنقز من هنا ومن لهيه..

سيدرا:(حطات راسها على صدر مها ونطقات بصوت خافت)مامي بغيت شريبة

رحيل:(مسحات ليها وجهها وعنقها) ماتبقايش تحنقزي بزااف راه اتعياااي امامي

عطاتها لما وغير شربات مشات تاتجري وخلات رحيل تاتنهد وتحرك راسها.. تاسمعات صوت التعاشق والأوركيسترا حبسو وهي تعرف بلي غاينزلو لعرسان.. هاد لمرة غزلان ومحمد طه لي نزلو هوما لولين بحكم كل واحد باغي دخلة ديالو بوحدو.. كانو واقفين وعينين الكل عليهوم وهوما بديك الإطلالة والسر طايح عليهوم.. النگافات وراهوم دايرين صف تايصليو على النبي وزوج رجال واقفين من الجيهات بزوج هازين واحد لمبيخرات.. نازلين بشوية ومحمد طه عاطي لخاطر ليها حيت جلايلها تقال.. نزلو لتحت ومحمد طه مرة مرة يحرك راسو لضياف ولمعارف ديالو لي تايعرف.. تمشاو بيهوم لجهة العمارية وضارو الرجال عليها تاجلسوها وخداو ليها تصاور مع عريسها عاد طلعوها تايضور بيها تحت أغاني الأوركيسترا.. غزلان طلقات لبشارة وعجباتها لجلسة تم وكلشي واقف تايصفق ولبنات واقفين فلقدام رحيل حدا رنيم وبيسان تايغنيو ويصور كلشي تگجگج عليهوم..كان جالس تايشوف من البلازما تابانت ليه وموراها ولاد عائلة إسلام ماعجبوش لبلان وهو ينوض غادي لعندها.. مايقدرش يقول ليها جلسي وماديريش حيت عرس خوتها وغايجي أناني لادارها.. دخل وسط داك الزحام من جهة الدراري وهو يلقا واحد زوج واقفين وراهاا هي ورنيم وبيسان.. حط يدو على كتف واحد فيهوم تاضار وهو ينطق عاقد حجبانو وبصوت خشن:كحز شوية أولدي

هز فيه داك الدري حاجبو ورحيل غير سمعات صوتو ضارت.. بعدو دوك الدراري وجا هو وراها وهي نطقات:مكنتش عرفاك اتبغي تنوض

نوح:(همس) بزز مني نوض

مسمعاتوش وضارت تاتشطح وتحرك وتصور وهو بانت ليه سيدرا واقفة حداها مرة مرة يدفعوها بقات فيه.. هزها وهي عنقاتو بالجهد وباستو فحنكو:ماي بلو آيز شفتي هادوك كانو تايدفعوني

نوح:(تايدوز يديه على شعرها ونطق بحنية) باسلين هادوك تايدفعو ليا بنتي

حطات حنكها على حنكو وبقات معنقاه هاكاك وتاهو خلاها.. ضارت رحيل شافت فيهوم وتبسمات عجبها ديكورهوم بزوج وخدات تلفون بعدات شوية..

صوراتهوم وخدات معاهوم سيلفي وضارت لعندو:فين زين العابدين قول ليه يجي عندنا ومايبقاش بوحدو

جبد نوح تلفونو وصونى عليه وضار تايشوف فيه ومع زين حاط تلفونو فوق الطبلة شاف لابيل وضار تاهو شاف جهة باه لي شير ليه وناض عندو.. مكيحملش هاد لأجواء وماعندوش مع هاد الخوى الخاوي على قولتو.. تبعو أمين لي كان أوبن عليه وشخصياتهوم عكس بعض ولكن علاقتهوم قوية بزاف وبيناتهوم واحد الرابط لي متين او وقفو حدا نوح.. ضربو ضورة بالعروسة لي كانت منورة فوق ديك لعمارية لي كانت تاتبري كلها جوهر.. ومحمد طه راه جالس فالبرزة كيشوف فيها وحداه ريان لي مامخليهش بوحدو مونسو ومرة مرة يخليه يرسم تبسيمة على شفتو.. نزلوها من العمارية وتمشات جهة محمد طه لي وقف كيتسناها تاجات عندو وشد فيديها وبداو تيصورو فيهوم ونيت لي باغي يمشي يصور معاهوم..

فالطبلة خرى فين كانو جالسين فيه شي عيالات من عائلة ممات إسلام أو واحد مرات خو إسلام وخوالاتو مجمعين بيناتهوم وهضرتهوم كانت على رحيل.. بحكم أن مامات إسلام شحال هادي وقبل ماتخطب رحيل وتزوج كانت باغاها لإسلام وسبق وقالتها لخوتاتها.. وهاديك كانت غير هضرة قالتها مو مرة وحدة وهوما بقاو شاديين فيهاا ليومنا هذا..

خالتو1:(عينيها على رحيل)توما يالاه جيت قولو ليا فين هو راجل رحيل

مرات خوه:(لاحت عينيها على جهة الرجال وهو يبان ليها جالس مع إدريس وسيدرا واقفة حداه)هانتي ضوري وراك غاتلقايه جالس مع بات رحيل وسيدرا معاهوم

ضارت لخرى وعينيها كيحنزو فالرجال وتقول واش حشمات واخا كبيرة فلعمر وعندها تاهي عريساتها وحفادها.. قشعاتو وبقات تاتسكانيه وضارت عندهوم:اييه ماشي كبير عليهاا

خالتو2:(باقا صغيرة) ماشفيتهومش ملي كانو نازلين بزوج كيحمقو مع بعضياتهوم اختي

مرات خوه:اييه وكون تشوفيه اخالتي السيد خانز فلوس واحد لمرة سمعت إسلام كيعاود عليه فاش جا لعندنا لگازا (بدات كاتسرسب ليهوم وحطات كلشي وماخلات تاحرف يزهق ليها) عندو فيرمة داير فيها داكشي دلخيول شهوة منها وزوج محالات قد لخلى وعندو ميزون دڤواتيغ لي كيبيعو فيها الطوموبيلات وباقي لخير شايط

خالتو1:اييه وهي ملين طاحت عليه وعرفاتو (ميقات) اوا زعمة هي مطلقة وببنت وداتو مزيناتو عزري وبفلوسو

مرات خوه:اشمن عزري يهديك الله راه عندو ولدو كبير غير مكنعرفوش نوريه ليك

خالتو1:اوا الراجل واخا يكون عندو ميات ولد مكيتعابش بحال لمرا..

كاين بعض النوع دالبشار بلاماتقرب ليه ولاتحاشيها ليه كيبقى يدوي عليك وينبش فدخاخش دحياتك ويبغي يدخل ليك مع عضامك.. مت إسلام نهار دوات ليهوم وجبدات رحيل وقالت باغاها لإسلام حيت تاتعرف رحيل وشافتها وعجباتها ونهار قالتها لإسلام راه عطاها جوابو وعرفات راه تخطبات صافي نسات وهوما مبغاوش ينساو وتامرات خوه واحد البرگاگة منها مكان خارجة ليهوم من الجنب لعريسات كلهوم داخلين سوق راسهوم الاهي لي عزيز عليها تهضر فأعراض الناس وتوصل لكلام.. شدو النميمة برحيل ونوح لي ممسوقش ليهوم أصلا وعاطي بضهرو لعيالات وداك الهراج وتيهضر مع إدريس ورجال لكبار لي بعقلهوم وهضرتهوم موزونة وتيهضرو فالصح وداكشي لي تينفع ماشي بحال لعيالات لي فكل جماعة ضروري ماينممو على شي حد ويديو دنوب.. أما رحيل راه كانت تاهي مقابلة شغالها تشوف هنا وتمشي عند خوها تسولو هو وغزلان وترجع ترحب بالضياف هي ومها وتانيرت.. ومرة تمشي عند لبنات يجمعو ويضحكو

رحيل:اجيو وداد مجاتش؟

أميمة:اتكون تعطلات غير فالطريق حيت قلت ليك كانت مسافرة عند ختها لي ولدات

رحيل:عيطي ليها وشوفي فين هي ونوضو راه أسماء وإسلام اينزلو دابا

ناضو لبنات باش يستقبلو لعرسان الثانين لي تاهوما نزلو واليد فاليد والضحكة مرسومة على شفايف أسماء وإسلام لي ضاحك مع حبابو.. جابو ليها عمارية خرى بديكور آخر وطلعات فيها ولعريس راه مشى البرزة.. كانت أسماء تاتشير عليهوم وضحك معاهوم والخلعة مشات مبقاتش تقولي كانت غير تاتكدب.. شبعات نشااط ومانزلوها تاخرجات هويشها.. ورفقوها النگافات لبرزة تاوصلوها لعريسها وقادو ليها تكشيطتها وهي ضارت لبرزة دخوها وغزلان وشيرات ليهوم تاضحك..

إسلام:(همس ليها)فكريني شحال من لبسة كاينة

أسماء:ربعة ديال اللبسة علاش؟

إسلام:دابا نتسناو تادوزي ربعة ماشي بزاااف

أسماء:مغانخرج من هنا تايطلع الصبااح اراجلي لعزيز غير كون هاني

إسلام:(غمزها) ماعليش صبرنا هاد ليام نزيدو نصبرو واحد السويعات وديك الساعة نهزك نهرب بيك

أسماء:(حبسات الضحكة)فين غاتهرب بيا

إسلام:(قرب جهتها)لبيت النعاس هههههه

أسماء:(ضحكات)هههه الله يمسخك أنا مغانمشيش معاك انرجع لدارنا

إسلام:نبگ اغزالي

فالبرزة الثانية دمحمد طه وغزلان لي كانو ساكتين وغير شاد يديها وكيشوفو فالضياف لي مرة يجيو يصورو معاهوم..

ضار شاف فيها ولقاها ساكتة تاتشوف قدامها ودايرة ضحيكة خفيفة.. سهى فضحكتها مدة تاحسات بيه وضارت شافت فيه وغير تلاقاو لعيون وكل واحد سهى فالثاني ونطق محمد كاسر داك الهدوء: ديري حساب بلي غانسافرو ورى لعرس نيشان

غزلان:(حلات عينيها بتفاجأ)غانسافرو فين؟؟

محمد طه:(حك شعرو وقال بهدوء) ملي غانشدو طريق غاتعرفي ومغانتعطلوش بزاف سيمانة ونرجعو حيت غاتبداي لقرايا فلفاك

غزلان:(داخليا فرحانة وباغا طير من لفرحة حيت فكر فالسفاار ونطقات بتبسيمة) اه ماعليش سيمانة كافية شكرا ليك

محمد طه:(باستغراب)علاش تاتشكريني؟؟

غزلان:حيت غانسافرو صراحة عمري سافرت لشي بلاصة من غير لمرة لي جيت من أكادير لهنا وصااف ونتا

محمد طه:(حرك راسو) أنا سبق وسافرت برا لمغرب گاع شي تلاتة دلمرات

غزلان:(شافت فيه بتفاجأ)بصح عمري عرفت واش بوحدك

محمد طه:(حرك راسو)لا مع رحيل وأسماء وريان مشينا لكندا حيت هو كبر تم واحد لمرة مشينا لباريس ومشينا لألمانيا..

كانت متفاجأة حيت عمرها عرفات هادشي لي داز عليه سنين وكان فالفترة لي كانت رحيل مأزمة مور الشي لي طرا معاها فزواجها وكانو كيسافرو باش تنفس وتبدل الجو والنفسية تغير وتاهوما كانو يمشيو معاهاا وزارو هاد تلاتة دلبلايص لي مبقاوش فيها مدة طويلة من غير كندا حيت ريان عندو معارف تم..

وقفات طوموبيل زكرياء فباب القاعة ونزل هو وداد لي كانت لابسة تكشيطة فلغوز بارد.. تعطلو حيت يالاه جات من السفر ومكانش عندها لوقت ويالاه سالات.. شدات فدراعو ونطقات بهدوء:غايكونو دخلو لعرسان تت

زكرياء:نتي تعطلتي فالصالون

دخلو بزوج وزكرياء لي كان جاي معاها لعرس صاحبتها.. ضور عينيه جهة البرزة وماتجي غير فمحمد طه لي مجرد مشافو زكرياء برد فيه الدم وزاد سرط ريقو فاش شاف رحيل لي كانت واقفة هي وباها تايهضرو.. كملات صدمتو لي خلاتو يقلب وجهو دغيا مقاد على مشاكيل ولون تبدل فوجهو مكانش عارف راه صاحبتها غاتزوج بخو رحيل.. جا عندو إدريس ورحيل لي قربات تستقبلها عادي ومسلماتش عليه حدها هزات راسها وهو حدرو بزربة ورحيل جرات وداد جهة البنات وهو مشى مع إدريس لعند الرجال ومع وصل عندهوم هز راسو وهو يقشع نوح لي كان جالس متكي على لكرسي وحاط رجلو على لخرى بطريقة رجولية كيشوف فيه بنظرة كان زكرياء عارف المعنى ديالها مزيان...

هادشي لي كان تيتفاداه زكرياء من نهار خدا قتلة دلعصا من عند نوح لي يموت ومينساهااش.. غير شافو حس بعضامو ضروه وبلسانو تيحرقو سرط ريقو وقرب تيسلم مع رجال لي فطبلة تاوصل لجهتو ومد يديه ليه وفالمقابل نوح سلم عليه وزير ليه على يديه شي لي خلى زكرياء يفهم المساج لي وصل ليه غير من سلام والشوفة.. كانت طبلة عامرة ومافيهاش كرسي زايد عليها مشى زكرياء جلس فالطبلة لي جنبهوم ونيت تفادى يجلس مع نوح فطبلة وحدة.. مكانش باقي مرتاح وكان باغي غير وقتاش يوصل لوقت ويسالي لعرس لي يالاه بدا..كون عرف صاحبتها غاتزوج بمحمد طه كون وصلها لقاعة ورجع لدار تاوكان تسالي ويجي تاني يجيبها.. أما نوح فنهار عطاه ديك القتلة عطاه تنبيه أنه مايعاودش يطوف جهتها حيت ديك الساعة غايتصرف معاه تصرف آخر يمكن لحاجة لوحيدة لي خلاتو يشفع ليه هو حيت عارف بلي ديك لوقيتة كان مُجبر وتحت التهديد بعائلتو ولكن مغاديش يميك وينسى بلي زكرياء كانت عينو فيها قبل گاعما يخطبهاا وشحال من مرة شافو واقف معاها فلميزون دڤواتيغ.. مجرد ماتفكر هادشي حس براسو تنيرڤى وتعصب هز تلفونو وغمز جدو عاد تمشى جهة لباب دلقاعة..

**

لعرسان راه واخدين راحتهوم كيتصورو مع لفاميلة وياخدو لسوڤونيغ لي غايبقى معاهوم مدى الحياة.. غزلان ومحمد طه كانو هاد لمرة جالسين وباين فيهوم لإنسجام.. كل مرة يضور يهضر معاها وتاهي تجاوبو على قد هضرتو المهم مايبقاوش ساكتين حيت لعينين عليهوم وعارفين بنادم حضااي وغايعيقو بيهوم وهادشي مباغيش محمد طه يطرى.. ماباغي حد يحس بحقيقة لي كاين ويخلي الناس يهضرو عليهوم..

أما أسماء وإسلام هادوك حالة خاصة الضحك لي ضحكوه تحلفي راهوم ماشي عرسان نساو راسهوم وكل مرة تكومونطي أسماء على شي حد من لحضور.. أما إسلام يضور ويلوح ليها شي كلمة دلغزل تيخليها تاتفرنس مع تاهي محيدة لبلاكة دلحشمة تلاقاو..

فطبلة دلبنات فين جالسة بيسان لي دغيا انسجمات معاهوم وعاطينها لضحك وتصاور منوضين طرح غير بناتهوم.. عينين بيسان مرة مرة تهرب جهة ريان لي كان لابس كوستوم فالرمادي مع شوميز بيضا وكراڤاط وداير واحد لوريدة فجيب لاڤيست لفوقاني وشعرو مرجعو لور وديك الضربة دلحاجب لي ضاربها عاطيها ستيل آخر.. جاها زوين وعمرها شافتو فالكلاس حيت مولف تايلبس لكاجوال.. كان قايم تاهو بلواجب واخا شاد فخوه وغير يضور يلوح ليه شي نويطة ولكن فيما حطيتيه يقضي ليك الشغل.. بان ليها غادي جهة البرزة دأسماء وإسلام وجلس جنب أسماء وهي بقات متبعة ليه لعين تقول واش هبطات عينيها وماعرفاتش اشمن عقل قال ليها صوريه وبلفعل جبدات تلفونها وبلاماتعيق صوراتو.. في حين هو مكان عايق بيها وشاد لحديث مع ختو وراجلها..

إسلام:(شاف فيه)دايرين عرس دايرينو اش بان ليك نزوجوك شي وحدة هانتا لقاعة عامرة غير شوف لي بغيتي

أسماء:(هزات حاجبها فيه)يعطيك لعمى أنا جالسة حداك ونتا عينيك يضورو هنا ولهيه

ريان:(ضحك)ههه هانتا عصبتي لينا لحشايشية ديالنا

إسلام:(غمزها) عرفاني غزالي مكنتسوق لحد من غيرها ياكي

أسماء:لا لا غير شوف باش لعدول لي جمعنا يفرقنا

إسلام:هههه دخول لحمام بحال خروجو بان ليا تاتحلمي اغزالي

ريان:(حرك راسو وساط)لكان الزواج هاكا بلاش منو دايرين بحال ضريرات لمزلوط

أسماء:(شافت فيه بتفاجأ)اجي ملي سمعتي هاد المثلة وقلتيها مقادة؟

ريان:ههه واحد النهار قالتها ليا الواليدة

أسماء:خصني نزغرت حيت بقيتي عاقل عليها ههه

ريان:تاتحگريني واباااز الحشايشية

إسلام:كانبغي ديما نسولك علاش تاتقول ليها الحشايشية

سرطات أسماء ريقها وشافت فجهة ريان لي تاهو حك حاجبو وتفكر نهار حصلها تاتكمي الشيشة ونطق بضحك باغي يتلفو:حيت بعد المرات تاتقطع بحال لحشايشية ههه ياك الزين

أسماء:(ضحكات وباستو فحنكو)ههه هي هاديك السالوبار

ريان:مهم أنا نايض نشوف شغالي لاحتاجيتوني تلفون عندكوم

ناض تيقاد لكوستوم ديالو ونزل غادي فلبلاصة لي فيها لبنات تيشطحوو ويدردگو على الشعبي طلعهوم ونزلهوم وهو دايز ونطق بهمس:شلى ترامي أمولاي التهامي

ضور عينيه وماتجي غير فبيسان لي مربعة يديها وهازة حاجبهاا.. يالاه انتابه ليها مع قوة الدرك لي عليه وفاش جا هو وخوه ماخلاهش عليها مشافهااش.. كانت لابسة قفطان فالموڤ وشعرها جمعاه كوت شوڤال وبوكلاتو فلتحت ولمك اب كان بارز عينيها الزرقين جات قتالة فنظرو.. حط يديه على قلبو وغمزهاا وهي قلبات عينيها عليه معصبة منو حيت شافتو فاش داز حدا لبنات حنزز وهي معجبهاش لبلان.. أما ريان كمش حجبانو وحركتها دخلات ليه الشك وخلاتو يجبد تلفونو ويسيفط ليها مساج 📩 مال مون دكتوغ مقلقة؟

قراتو وجاوباتو 📩 تاشبعتي شوفان فلبنات عاد تفكرتيني

ريان:(ضحك فاش قرا مساجها لي لمس منو لغيرة وجاوبها) 📩 ماشي حشومة عليك ازين ظلميني

بيسان 📩 ماظلمتكش شفتك بعينيا ونتا دايز من جهة لبنات وبقيتي تاتشوف فيهوم لاعجبوك سير عندهوم وفرقني عليك

معاوداتش جوباتو واخا سيفط ليها مساج آخر.. ضحكاتو ورجع سيفط ليها مساج مرة خرى وهز راسو كيشوف فيها هي لي بدات تقراه والضحكة جاتها ولكن حبساتها شافت فيه هو لي حط يديه على قلبو غامزهاا ونزلات عينيها بزربة جهة مساج تاتقراه مرة خرى

ريان 📩 الله يعطي لمي لعمى إلا عيني شافت فوحدة خرى من غيرك..

فبرا كان واقف نوح قدام باب القاعة كيكمي لگارو وعينو ساهين فاش تاحد معارف.. وقفات طوموبيل ليازيد لي جاي معطل ونزل منها تايلبس لاڤيست وغير شاف نوح وهو يضحك وقرب جهتو:ولد لحاج جيتي تستقبلني

شاف فيه نوح ببرود ورجع كيشوف قدامو مجاوبوش واليازيد عارف بلي شي حاجة تم ومحكرش عليه..

اليازيد:أنا سابقك تادخل

خلاه على خاطرو ودخل لداخل خدا تميرة فالباب ولحليب عاد كمل طريقو وعينو يضورو هنا ولهيه تايقلب على فين جالسين عائلة نوح حيت هوما لي كيعرف هنا.. قرب جهتو إدريس لي شافو وسلم عليه واليازيد نطق بتبسيمة:الله يجعل كلشي مبارك ومسعود

إدريس:آمين مرحبا بيك راه الرجال جالسين لهيه

اليازيد:اه واخاا

كان غايمشي جهة الرجال ساعة قلب الضور جهة لعرسان يبارك ليهوم..كان محمد طه جالس مبسم وغير شافو بحال لاشاف جن جمع لحجبان وخنزر تقولي عدووه.. زير على يد غزلان لي كانت واقفة عليها النگافة باغيين يطلعوها لفوق باش تبدل هي وأسماء ويلبسو لبسة الثانية دلحناا.. كمشات حجبانها وشافت فيه لقات السيد تغيير جاتها عجب هذا مالو عاد كان صحة سلام.. ماهضراتش خلاتو على راحتو حيت عارفة كيف داير وبلي فاش تايتعصب مكيشعرش تاكينطق بشي كلمة ولاكيدير شي بلان وهي مباغاش الشوهة عليها سكتات..

مشى ليازيد جهة البرزة لخرى ومد يديه سلم مع إسلام ونطق بهدوء:الله يكمل عليكوم بلخير

إسلام:آمين شكرا ليك

سلم تاعلى أسماء وبارك ليها عاد داز جهة لبرزة الثانية وهنا محمد طه ماقدرش يسكت ونطق بهمس كارز على سنيه:هاد لخرى لاش جاااي

سمعاتو غزلان وهزات شوفتها فاليازيد لي تاهو شاف فيها شوفة عادية مقصد فيها والو.. بصح كان باغي يتزوج بيها وعجباتو ولكن السيدة راه مزوجة دابا وهو ماشي شماتة لي يشوف فمرات الراجل.. مكتابش بناتهوم الله يسهل عليها وعليه.. غزلان فهمات دابا مالو حيت عارفة الحساسية ديالو جهة اليازيد وضربات الطم واليازيد وقف عليهوم وكيف بارك لعرسان لولين دار نفس الشي مع محمد طه لي سلم عليه بزز باش جاوبو وهو منفخ ومع ضار باغي يسلم مع غزلان وتاهي باغا تمد يديها باش ماتفرطوش وهو يشدو محمد طه قال ليه بتبسيمة باردة:لمدام ديالي مكتسلمش

حرك اليازيد راسو وقال:السموحات الله يكمل عليكوم بالخير

شاف فغزلان تبسم ليها ونزل ومحمد طه باغي يتفقص وضار عندها فلبلاصة خنزر: علاش ضحك معاااك اش بينك وبينو باش يضحك معاااك

غزلان:(تاتشوف فعينين الضياف لي تايشوفو فيهوم وقالت بضحكة صفرا) كايشوفو فينا النااس خلي تانكونو بوحدنا امحمد

سكت حيت بصح عندها الصح وتبسم بزز وناضو يطلعو والنگافات تاهوما يصليو على النبي.. كانت تاطلع بشوية عليها والنگافات معاونينيها تاوصلو لبيتهوم وهو يوقف محمد طه فلباب وقال ببرود:خليوكوم هنا

سد على النگافات وشاف فيها هي كانت عارفة داك لموال لي غايتحل ولي غايطربها بيه عاود

محمد طه:(منيرڤي)علاش مد يدو يسلم عليك وتيضحك معاك اش بيناتكوم؟

غزلان:من نيتك؟ السيد جا بارك لينا ونفس الشي دار مع إسلام وأسماء مالك منويها فشكل

محمد طه:(تيحك لحيتو مفقوص)هه لا غير ضحك ليك نتي وبدا كيشوف فيك وااااش نسيتي بلي كان باغي يتزوج بيك

غزلان:(هزات جلايلها وقالت بعصبية)واش نتا ضروري توحلها لياا ضحكة دقيقة هجرتيه ليااا دابا اااو بزاااف لاكنتي شاك وعقلك مصور ليك شي حاجة مكيناش فشغلك هذاك أناا مانويت تاحاجة فيهاا

هضرتها خلاتو يطمر ويغضل يدير لما ملين يدوز حيت بصح هاد لكلام وهاد النقاش ماشي وقتو.. بعد لهيه وبقا واقف مربع يديه وهي جلسات تاتبرد على راسها لفقصة لي فقصها.. شوية وبان ليها حل لباب وخرج ودخلو النگافات باش يلبسوها لبسة لحنا ونفس الشي عند أسماء لي فبيتها تايلبسوهاا...

لاح البوينتة الرابعة لي كمى وعفس عليه وهز عينو جهة الطوموبيل لي كانت مبلاصيا فالشانطي قداك لقاعة من الصباح وهي تم ماتحركاتش.. نوغمالمو الطوموبيلات كلهوم مستفين حدا لقاعة لي جات فبلاصة شوية خاوية ولكن هادي لبلاصة فين مبلاصيا دخلات ليه التناوي.. سمع صوت رحيل لي كانت تاتعيط ليه وضار جهتها شافها هازة جلايلها وتبسمات ليه:من الصباح وأنا كنقلب عليك علاش واقف هنا؟

نوح:(حك حاجبو وقال بهدوء) غير لجو لداخل مموافقنيش وصاف

رحيل:(تفهماتو حيت عارفاه مكيعجبوش الإختلاط وقربات جهتو حاطة راسها على صدرو)علاش كميتي؟

نوح:(عنقها)كنت محتاجو وصاف

رحيل:(شافت فيه ونطقات بضحك)عقلتي نهار عرس ديك السيدة لي خدامة عندك ملي كنت باغا نهرب منك ههههه فاش سلختي داك خونا

نوح:(هز حاجبو)بغيت نعرف دماغك اش كان تيقول ليك ديك الساعة

رحيل:(مدرعها ودخلو لداخل)ههه فاش شفتك معصب تخلعت

حرك راسو بلاحول وهي شدات فيه ومع دخلو عيطات لمصور باش يصورهوم بزوج وبالغعل خدا ليهوم صور عديدة وعاد رجع بلاصتو وهي راه مشات توجد لدفوع لي غايدخلو لعريسات.. ومرة توقف مع رنيم توصيها على شي حاجة مرة سيدرا تجي عندها وتعطيها تشرب ولاتمسح ليها لعرق ولامرة تهضر مع واليديها وداك لمصور حبو طاح على رحيل فيما يضور يزومي عليها ويركز عليها ويفيلمي ومع لبلازمات كيبينو لي تايتعرض قشعها نوح لي كمش حجبانو وبقا تيشوف بلي مركز عليها ومع كانت تاضحك ولحنيكات موردين ولعين عليها صعر وناض بزربة بحال لاعضاتو شي حاجة عاقد حجبانو ونطق كارز على سنيه:هاد لمرض تيقلب عليا نخلي دار بووه عاد يبرد ويبعد ليا منها..

من الصباح وهو ميك عليه ولاخر بانت ليه غير رحيل فديك القاعة لي أصلا ممسوقاش ليه بعض لمرات راه تايغفلها.. قرب جهتو مناويش على خير وغير وصل لعندو حط ليه يديه على كتفو تاضار عندو داك الدري وتحدر نوح جهة ودنيه عاقد غوباشتو ونطق بهمس خشن: مولات لبلوغوا نعاود نشوفك مركز عليها مغايعجبك حال

مصور:(مستغرب)سمحليا ولكن أنا كاندير غير خدمتي اسيدي

نوح:(لعب بلسانو ففمو وقال بسخرية) خدمتك هي تصور الضيااف ماشي تبقا تابع ليا مرتي فيما مشات تصورها (هز فيه حاجبو ونطق بنبرة لانقاش فيها)نعاود نشوفها فلبلازمات نخشي ليك وجهك فيهوم

المصور تدهشر وبقا ساكت فاش سمع كلامو وراه من حقو أما نوح قلب طريقو تايقلب عليها مبانتش ليه جبد تلفونو سيفط ليها مساج 📩فينك؟

رحيل:(جوباتو بسرعة) 📩 أنا فالبيت التحتاني لي تحت الدروج اجي عندي راني محتاجاك

مشى عندها لقاهوم واقفين تايقادو الطيافر لي غايدخلو دلعرساان وممات إسلام وهو واقفين على داك الدهاز.. قرب جهتها وهي شدات يديه وجراتو لجنب ونطقات بهمس: دابا غايدخلو الدهاز دأسماء وموراه دغزلان وهي ماعندهاش واليديها وغايخص شي حد لي يوقف معاهاا بحكم ماما وبابا غايجيو مع محمد طه واخا نوقفو أنا وياك معاها؟؟

نوح:(هضرتهاا خلاتو يتبسم ليها بهدوء على ديك الحنية لي حس بيها وباسها فجبهتها)ماعليش

رحيل:يخليك ليا

تانيرت:بنتي رحيل

رحيل:اماما شنو

تانيرت:اجي شوفي هادشي واش هو هداك

مشاو تايراقبو داكشي وماخص تاحاجة تنقص ونوح خلاهوم وخرج وتالخرين خرجو وبقا غير إسلام ومو ولبعص من عائلتو لمقربين لي غايدخلو معاه الدهاز.. نزلو أسماء بلبيسة دلحنا لي اختارت مع أكسيسواراتها والضحكة على شغتها كانت بوحدها وضايرين بيها النگافات لي نزلو جهة لبرزة فين كان قوام لحنا محطوط مغربي مية فلمية.. جلسات وجات النگافة باش دير ليها لعادة قبل مايدخل لعريس.. اختارت ليها نقشة خفيفة يادوب تتبان وبدات ليها والأوركيسترا داير أغاني دلحنا والناس تنوض تصور معاهاا.. غير سالات ليها الحنى وجات عندها سيدرا تاتنقز جلسات جنبها وأسماء تبسمات ليها:الشويطينة فين كنتي؟

سيدرا:لهيه تانلعب (شافت فيها ببرائة)حتى نتي عروسة بحال مامي؟

أسماء:هه اه جيت زوينة؟

سيدرا:اه نتي وغيزو عروسات وإسلامي ومدي تاهوما عروسات؟

ضحكات أسماء تادمعو عينيها وقالت:عرسان ماشي عروسات حنا لي عروسات

سيدرا:(هزات كتيفاتها وقالت ببرائة)تاأنا فاش نكبر نكون عروسة

أسماء:(نطقات بحنية)معلوم غاتكوني أجمل عروسة ولكن غايخصك لعريس ضروري

سيدرا:(ضحكات بشيطانية وبغرور طفولي قالت) عندي

أسماء:(هزات حاجبها) اه بصح شكون

سيدرا:(بطفولية)زينبيدين ههه

بدات تاتكركر وعقلها صغير ومقال ليها وتاأسماء مداتش على عقلها حيت عارفاها هي باقا مفاهماش هادشي لي كايطرا.. ونساتها وغير وصل وقت الدفوع وهو يتسمع صوت التعاشق وبان إسلام داخل بجابادور خضرا وجنبو مو وخالو وخوتو كاملين وعريساتهوم جايين معاه وفالمقابل كان إدريس ورحيل وتانيرت وريان ورنيم ومعاهوم تانوح واقفين يستاقبلوهوم.. كانو لعينين عليهوم وكلشي تايشوف داك الدهاز لي جابو لعروسة ولي كان غزال تيجدب لعين.. مكبرين بيها ونص من داكشي لي جابو ليها اختاروه على دوقها.. استقبلوهوم بلمرشات دلورد والفرحة والضحكة مرسومة على وجه الكل.. خداو تصاور مع العائلة وغير صورو دفوع داوه باش يتجمع أو وقفات عليه رحيل ورنيم ماتهناو تاجمعو كلشي وسورتاو البيت عاد خرجو باش يحضرو لغزلان لي تاهي منزلينها وهي بلبيستها دلحنا والحزن كان باين فعويناتها.. جلسوها فبلاصتها باش تحني كيف أسماء وعقلها مرفوع ولقلب ربي لي عالم بيه.. غير بردات ليها لحنا وهي تعلمها رحيل بلي غايجي محمد طه ويدخلو دهازها.. كانت باغا واليديها معاها ويستقبلوهوم ولكن القدر كان عندو رأي خر.. قرب نوح مع رحيل ورحمة وبيسان وسناء ورؤوف والجد والجدة واقفين معاهاا وهي تضهشرات مكانتش متوقعاها وتارحيل كانت عوالة غير هي ونوح لي ويقفو تالقاتو علم عائلتو ودار جيست عمرها تنساه ليه.. وصل دفوع غزلان ودخل مولاي السلطان بنفس الجابادور رفقة باه وتانيرت وسيدرا لي شادة فمحمد طه واخدة بلاصة مها وريان ورنيم وزين العابدين وأمين لي جاتهوم الأوامر من الجهة العلية لي هو باه.. تاهو ماخلاش من حقو وجاب ليها دهاز دلفريع وكلشي اختارتو رحيل على دوقها بحال لاغاتشري لراسها ومخصصاتها من والو..كانت رحيل مبتاسمة بحنية لخوها لي شاف لبلان لي دارو مع غزلان وتبسم ليها وغمزها وتاهي رجعات ليه لغمزة بمعنى أنا هنا كون هاني.. قربو جهتهوم ورحيل تاترش عليهوم لورد وتزغرت فرحانة لخوهاا وكل مرة يجرها نوح بمعنى تبتي وهي توقف شوية وترجع تزغرت.. تاوقفو وسلمو عليهوم ومحمد طه عنق رحيل وهمس ليها فودنيها:شكراا

رحيل:(زيرات عليه بهمس)ماتشكرنيش الحنين ديالي هذا واجب

غزلان دموعها نزلو بلاماتحس مخلية كلشي متأثر مع عارفينها واليديها ميتين بقات فيهوم وتارحيل تغرغرو عينيها وكانت على سبة تحدرات تاتعنق فيها وغزلان زيرات عليها فتعنيقة لي من خلالها وصلات ليها شكرها وبلي عمرها غاتنسى الوقفة لي وقفات معاها لاهي ولانوح وعائلتو لي ساندوها فنهارها وماخلاوهاش تحس براسها بوحدها..

العائلة مكانتها خاصة بزاف وهي لي تاتعطيك الشان بين الناس وتخلي الواحد يعطيك قيمة.. كاين عائلات لي الله يسمح ليهوم مكيستاحقوش هاد السمية وكاينة لي بصح يستاحقوها عن جدارة واستحقاق.. من بين الأسباب لي خلاو غزلان ترفض دير لعرس هو هذا حيت مباغاش تحس براسها بوحدها وإدريس والبقية كانو عارفين هادشي عليها دارو واجبهوم معاهاا وكيف وقفو مع أسماء وكبرو بيها كبرو تابغزلان لي ولات فرد منهوم.. دخلو الدقايقية وتما زهات القضية ومكاين غير الزديح ورحيل واقفة وتصفق فقط حيت عارفة هاداك لي واقف وراها لادرات ها ولاها غايسيفطها كومة.. تاضور جهتو وتبسم ليه وهو يحرك ليها راسو وداير ليها خاطر فوق خاطرو غير مباغيش يخسر ليها فرحتها لاهضر.. نشطو وحيحو وركزو ورنيم وريان شدو لوسط وهي هازة جلايل تكشيطتها وتتزدح وريان تايحرك يديه متبع لميزان دالدقايقية.. ضارت رنيم تاتشتف وتحرك شعرها ومع كيتزاحمو دفعوها بلغلاط كانت غاتكربع تاشدوها يدين لي خلاوها ضور وتشوف شكون لقاتو رؤوف لي كان تيشوف فيها ببرود..

رنيم:شكرا

رؤوف:ردي لبال

رنيم:هوما دفعوني

رؤوف:(قلب وجهو وتمتم) بالسيف يدفعوك ونتي جالسة تحيحي

رنيم:ماسمعتكش اش قلتي

رؤوف:والو

بعد خارج من داك الزحام وهي كملات شطيحها تابردات عاد نزلات..

داز لعرس زوين وكلشي كان هو هداك لامن العرسان لي مواتين مع بعض ولامن لخدمة دالسربايا لي ماخلاو ماحطو فلپلا وبنادم ملي دخل وهو ياكل.. وصلات اللبسة اللخرة لبيضا وإدريس هنا جا دور ديالو باش يوصل بناتو على قولتو لعرسانهوم.. كان واقف إدريس فالدروج وفدراعو ليمن شادة أسماء بغوب بيضا زوينة ومعرية شوية من لكتاف مع مشيطة مرخوفة وهازة لورد وفدراعو ليسر كانت غزلان شادة فيه وتاهي بلبستها لبيضا لي كانت مستورة وجامعة جسمها بحميمية وشعرها مطلوق وبدورها هازة لورد.. كان منظرهوم زوين مخلي كلشي يشوف فيهم ويعجبو ديكورهوم لتحت كانو لعرسان لي كل واحد عينو على عروستو كيشوف فيها بإعجاب واضح.. نزلو تحت أنضار الجميع والأغنية كالم مطلوقة مناسبة للحظة.. بشوية عليهوم تاوصلو لتحت وإدريس وصل كل عروسة لراجلها أو وصاه عليها عاد قرب عند تانيرت لي جاوها الدموع متأثرة.. مشاو جهة لكيكات باش يقطعوهوم وهاد لمرة سبقات غزلان ومحمد طه قطعو لكيك وتصورو وجات نوبة تلوح لورد وكل لبنات لعازبات تصافو وسناء جرات بيسان تاهي وقفات مخليا ليازيد هاز حاجبو لسما فيها لاحت لورد ومغايجي غير فيد سناء لي كانت دايراها غير ضحك... . وصلات نوبة أسماء لي تاهي قطعات لكيكة وكلاو الضياف وتاهي لاحت لورد وجا بين رنيم وبيسان لي بداو يكركرو بالضحك وقالت رنيم:بصحة خوديه ههه مبغيتوش اختي

بيسان:هههه نقصموه

رنيم:باش نقصمو الراجل

ضحكو بيناتهوم وبيسان شافت فريان لي حرك ليها راسو بمعنى هالفال.. وصلات لحظة لوداع لي فكل عرس مغربي لابد مايكونو فيه دموع.. توادعو لعريسات مع العائلة وكل وحدة ركبات مع راجلها شادين طريق لفين غايدوزو ليلتهوم لولة مخلين لحضور تايدعيو معاهوم بلقلب الخالص يكمل عليهوم ربي بالخير ويسر ليهوم فحياتهوم الزوجية..

مشاو الحضور لي ساكن بعيد راه ايدوز ليلة فلوطيل ولخرين كل واحد شد طريق لدراو.. بقاو غير عائلة نوح لي جالسين وريان يضور يضور ويسيفط ميساج لبيسان باغي يهضر معاها طيط اطيط.. بقات تاتقلب على نوح ومع مبانش ليها وهي تنوض دايرة السبة بالطواليط.. طلعات لفوق وغير وصلات لواحد لبيت وهي تجر من يديها ودخلها ريان لداخل وسد لباب مخليها تاضور فعينيها ونطقات بهمس:واش حماقيتي كون شافنا شي حد دابا؟

ريان:نتي لي مباغاش تلقاي ليا حل أما أنا هاد الملاقيا بالتخبية مباغيهاش

بيسان:قلت ليك صبر شوية اريان ونيت نعرفو بعضياتنا كثر

ريان:(تعصب) اشمن صبر واش من نيتك عاجبك هاد لحال ابيسان تانتلاقاو بحال لاكانشفرو

بيسان:ريان عفاك

ريان :(حرك راسو ببرود) واخا غانصبر معااك مزال حيت ناوي لمعقول وماباغيش نتفلي وتانتي ماتعيقيش بزاف ابيسان (قرب جهتها ونطق باعجاب واضح فعينيه) جيتي غزالة امون دكتوغ

بيسان:(بخجل) شكرا تانتا جبتي زوين

عض علي شفتو وقرب باغي يبوسها حيت بصح دوخاتو وحمقاتو وهي جمدات بلاصتها وقبل مايوصل لشفايفها تحل لباب عليهوم بالجهد وبزوج ضارو جهة الباب وعينين بيسان تحلو بصدمة وخوف من شوفة الشخص لي قدامهوم..

فطوموبيل إسلام لي كان شاد طريق برفقة عروستو لي كانت جالسة جنبو بجلابة فالبلوناكسي مخزانية.. كانت حاطة راسها على الكرسي تاتشوف فطريق والعيا ديال دوك ليامات دالتوجاد رجع ليها.. حسات بيه زير على يديها لي وسط يديه وضارت شافت فيه:فين غانمشيو؟

إسلام:(شاف فيها ونطق بهدوء)غانمشيو لدار نرتاحو تم وغدا نسافرو

حركات راسها والخلعة شاداه من داكشي لي تابعهاا.. ليلة لولة ضروري مكاتكون لبنت مخلوعة وخايفة بحكم أنها غاتعيش تجربة جديدة عمرها عاشتهاا.. تجربة لي تاتبقا ديما فداكرة البنت وخصوصا لاكانت مع الشخص لي قلبها اختارو.. شد طريق لابارطمون وحبس الطوموبيل فلباركينغ لتحت ونزلو فداك السكات الصباح راه بدا كيطلع.. نزل لاڤاليز ديالها وشد ليها فيديها وتحركو جهة لباب دلموبل وصوت طالونها كاسر داك لهدوء... طلعو فلسونسور وأسماء كلما قربات كلما قلبها دق بالجهد واخا وجدات نفسيتها لهادشي قبل ولكن فاش تاتحطي أمام الأمر الواقع حاجة خرى... جرها برفق من يدييها جهة الباب ديال لاباخطمون لي مكانتش أول مرة تجي ليها ولكن هاد لمرة جاية وبصفتها مرتو ومولات هاد الدار.. حل لباب ورجع لور مخليها تسبق هي لولة وغير رمات خطوتها بليمن وعينيها انتابهو لداك التغير لي وقع فلاباخطمون.. كان لفراش كولو جديد ومبدل على لي كان فيهاا وريحة الجديد والنقا عاطية فالدار.. سد إسلام لباب وحط لاڤاليز ديالها وقرب جهتها شدها من دراعها تاضارت جهتو وقرب جهة وجهها شدو بين يديه وقال بهدوء:عجبك لفراش؟

أسماء:زوين بزاف كنتي قلتي ليا غاتبدل غير بيت النعاس

إسلام:بغيت كلشي يكون جديد (قرب وجهو كثر تاولى نيفو حدا نيفها وقال بهمس) تشوفي بيت نعاسك اغزالي

قبل ماتجاوبو أسماء كان سبقها وقرب جهة شفايفها بايسها قبلة خلاتها تسرط لي فجوفها وتغمض عينيها مبادلاها ديك البوسة لي كانت قوية..شاد وجهها ومتبتو مامخلي ليها فين تحرك وشفايفو تيمصو شفايفها تاكيتسمع صوت البوسة ويرجع يجرهوم ليها تاكتقول هذا غايطيرهوم.. تحولات القبلة لأخرى فرنسية مشاركين فيها الريق والأحاسيس لي منباعثين فالداخل ديالهوم...أحاسيس نمات من جديد بطعم الحلال...كانت أسماء سادة عينيها ومجرد مكاتحس بيه بعد شوية وكاتقول غانتنفس تايرجع تاني جامع ليها شفايفها بمصة.. بعد مدة بعد عليها مخليها تنفس شوية وهو تاينهج هاد لبوسة سكراتو وخلاتو يبغي يتعمق كثر فيها أما أسماء كانت الصهدة طالعة معاهاا

أسماء:(بهدوء)احم نمشي نبدل حوايجي هو لول

إسلام:(قبل ماتحرك شدها من يديها تاشافت فيه ونطق بهمس) أنا باغيك هاكا

رجع تاني تياكل ليها شفايفها بلبوسان.. وهزها بين يديه وشفايفو حالفين لاخلاو شفايفها يرتاحو ولاخلاها تنفس.. رجليه غادين بيه جهة بيت النعاس وهي بين يديه..حل لباب ودخل لشومبر لي كانت مزينة بلورد الحمر ولبيض لي كان منثور فوق النموسية والشماع لي محطوط فوق لكوافوزات وفالأرض خص غير يتشع ولكن هاد الساعة شكون مسالي لشي شماع وهي بين يديه نسى كلشي وباغي غير يزيد يغرق فحلاوتهاا.. حطها وسط داك لورد لمنثور وشفايفو باقيين فصراع مع شفايفها تاحسها تخنقات عاد طلع راسو وعينيه منيمين فيها وهي حطات راسها على النموسية وعينيها فعينيه لي كاتقرا فيهوم الرغبة..زول لاڤيست لي لابس ولاحها فالأرض وبدا تايحل صدايف الشوميز لي لابس تاعرى على صدرو وهو يتحدر جهتها ونطق بهمس:تزولي الجلابة ولا نقطعها

أسماء:(خرجات عينيها) أويلي على تقطعها هبلتي

إسلام:(عاض على شفتو)باقي ماشتي هبالي اغزالي

شد ليها يديها لي محطوطين على صدرو وكبلهوم فوق راسها وتحدر تيشوف فيها بمكر وهي شوفتو خلاتها تسرط ريقها.. ومرة خرى غرق فشفايفها وغرقها معاه..الخلعة بصح كاينة ولكن هادشي لي كاتعيشو تجربة جديدة عجباتها وخلاتها تحس بالراحة وهي بين يديه..أما هو حلاوتها وكيفاش جسمها كيستاجب للمساتو خلات عقلو يطير سبق ودار علاقات فهاد السنين لي دازو ولكن تيبقى الحلال طعمو زوين..بحكم تجربتو السابقة من لوهلة لولة عرف أنها صفحة بيضاا وجاهلة فلعلاقة وهي مسايرة غير مشاعرها فقط.. الحرارة دالغرفة خلات أجسامهوم تعرق وصوت الهمسات والآهات كاسر داك هدوء.. الجلابة مليوحة فالأرض وفجنبها لاڤيست والشوميز وتبعهوم سروال لي زولو عاد دابا ورجع تاني تايفرق قبلات على جسمها لي كان بين يديه كيفما تخلقات.. كل مكان فجسمها راه شافو وقاصو ومتع شوفاتو فيه.. أما هي بحكم المشاعر لي تاتعيش لأول مرة فمقدراتش تبت شوفتها فيه وهو فوق منها عريان وساترو غير لبوكسور فقط.. رجع تايبوس حناكهاا ويلهيها بالهضرة وهي تاتشوف فيه بعينين معسلين.. تاحسات بشي حاجة ماهياش وقبل ماتهضر كان بايسها فشفايفها متلفهاا ومخليها تاني ترخى باش ماتزيرش وتقصح تاحسهاا ترخات وهو يغفلها فلحظة مخليها تزير على كتافوو مقصحة وتاهو مافورصاش عليها بحكم أول مرة ليها... بعد تايشوف نقط عدريتها لي على لفراش وتبسم ليها بحنية وتحدر باسها فجبهتهاا ونطق بهدوء:ياك ماقصحتك

حركات راسها بلا وهو عنقها تايبوس فشفايفها وحنكها ويهضر معاها مدة والضحكة على وجهو باين فيه فرحان..

أسماء:(بهدوء)ماقلتيش ليا فين غانسافرو؟

إسلام:(تبسم ليها إسلام بمكر وقال)بان ليا هاد الساعة ماغادين فين اغزالي..

كان حادر جهتها ناوي يبوسها ولكن الباب لي تحل على غفلة منهوم وبديك الطريقة خلاتو يتقاد فوقفتو ويركز شوفتو على هاديك لي كانت واقفة فالباب بنظرة عادية عكس بيسان لي ريقها شحف عليها وعينيها تحلو بصدمة وخوف وهي تاتشوف قدامها سناء لي كانت هازة فيهوم لحاجب وتاتشوف فيهوم شوفة ديال حصلتكوم قيطي.. قربات جهتهوم سادة لباب وشافت جهتهوم ناطقة بصوت جااد:شكاديرو هنااا بزوووج؟

سؤالها خلى ريان يتعصب حيت الطريقة باش نطقاتو معجباتوش وزيد هو هادشي لي مباغيش فعلاقتو معاهاا وداكشي لي كان هاضر عليه ديك المرة معاهاا.. باغي يسمي علاقتهوم ويكون الكل عارفها.. أما بيسان فبصح كانت فموقف خايب ومكانتش باغا سناء تشوفها هاكا وهي عارفة بلي عقلها غاينويها فشكل..

بيسان:(بسرعة نطقات وهي تاتحاول تبان راه طبيعية)والو مكانديرو والو غير خويا ريان كان سولني على واحد صاحبو ناعس فالسبيطار لي خدامة فيه وكان باغي يطمن عليه وصاف

مكانش باغي يهضر حيت عارف راسو لاحل فمو غايحط كلشي فوق الطبلة ماعندو لاش يحشم ولايكدب فحاجة هو متأكد منهاا.. ولكن حاليا مبغاش يقول شي حاجة ويجبد ليها الصداع ويحطها فداك لموقف لي هو مباغيهش.. ملي سمعها تاتبرر ليها ودنيه لقطو غير ديك خويا لي خلاتو يشعل واحد الشعلة بانت فوجهو وحجبانو لي عقدهوم.. وقبل مايخرج من لبيت شاف فيها مخنزر عاد تخطى سناء وخرج بلامايهضر ولاينطق بتاشي حرف.. ساد لباب وراه بالجهد ونزل لتحت وهو قالب سيفتو ومن بعيد كيبان راه معصب.. ولي مولف يشوف ريان ديما فغايجيه دابا فشكل حيت هو ديما تاتلقاه مبسم ضاحك ولكن نهار يقلب الوجه تايتسيف.. وصل لتحت وكان غايخرج وهي تشوفو سيدرا لي جات تاتهز فديك التكشيطة لي لابسة وشعرها مجموع وقفات قدامو وشدات فرجليه ونطقات:رياني هزني

قبل ماتكملها ضار شاف فيها وديك العصبية خرجها فيها ونطق بصوت قاصح:سيدرا سيري جلسي بلااااصتك

وقفات سيدرا تاتشوف فيه وهي ساكتة جامعة شفايفها لي بداو يترعدو بلبكية.. خلاها ومشى وفديك الساعة راه باغي غير يبدل الساعة بخرى حيت بصح راه معصب وكلمة خويا لي نطقات بيها كطلع وتنزل فيه.. مشى وسيدرا حدرات راسها وطلقات ديك البكية المحگورة وكتيفاتها يتهزو وتاتبكي بلاصوت خلات أمين ينوض بالزربة جهتها بقات فيه خصوصا أنه شاف لبلان هو وزين العابدين.. قرب جهتها وتحدر هزها وهي عنقاتو تاتبكي ومراضياش يغوت عليها وهي مدايرة والو.. بصح بعض المرات تايغوت ولكن تاتكون دايرة علاش ولكن دابا هي غير بغاتو يهزها حيت عياات وبغات تنعس ومها مكايناش وتاجدها وجداها ونوح راه مسالين شغالهوم.. خرجات رحيل من البيت هي ومها وغير شافت سيدرا تاتبكي فحظن أمين وهي تخلع وقربات جهتها بزربة ونطقات:سيدرا علاش تتبكي شكون بكاك؟

دموع سيدرا هوما نقطة ضعف رحيل لي كانت كلها تترعد حيت عارفة سيدرا مكتنزلش دموعها تاكاتكون بصح راه تضررات وتقصحات..هزاتها من عند أمين تاتبوس فيها وسيدرا معنقاهاا ونطقات بصوت باكي:ريان غوت عليا مامي

رحيل:(لمسات شعرها)شنو درتي ليه امامي

سيدرا:(بصوت باكي قالت)والو هو غوت عليا

أمين:(تبسم لرحيل)راني كنت نشوف اش صرا هي مدارت والو يمكن خوك كان معصب

رحيل:(تبسمات ليه تاهي)صافي واخا شكرا ليك

أمين:لعفو (طبطب على سيدرا وقال بتبسيمة)ماتبكيش اسنفورة

رجع بلاصتو جنب زين العابدين لي كانو عينيه تيشوفو الديكور بكل برود وليزيات فودنيه ممسوقش.. أما رحيل فبدات تاتسكت فسيدرا وجلسات فوق الكرسي تاتمسح ليها دموعها..

سيدرا:(تادوي بصوت مقلق)أنا بغيت غير يهزني نيني مامي هو غوت عليا

رحيل:صافي نتي عارف خالك مكيغوتش عليك وغايكون غير معصب يبرد ويجي عندك امامي

سيدرا:(ربعات يديها ودلات شفايفها زعفانة)مبيتوش بعد مني هو

رحيل:(حمرات فيها الشوفة) سيدرا حشومة هداك خالك

سيدرا:(هزات كتيفاتها)همم خالي هو مودي وصافي..

فالفوق كانت سناء باقا واقفة قدام بيسان تاتحاول تقرا وجهها وتشوف واش لهضرة لي قالت بصح ولاكدوب.. ديكور لي لقاتهوم فيه كيخالف الهضرة لي قالت بيسان..

سناء:(ببرود)لاكان باغي يسولك لاش طلعتو لهنا ودخلتو لبيت وسديتو لباب على راسكوم؟

بيسان:(ضورات راسها) راه قلت ليك لي كاين اسناء واه

سناء:سمعي نگول ليك هضرتك راني مامتيقاهاش واش أنا دخلت ولقيت السيد قريب يبوسك ونتي تاتقولي خويا وكيسولني واش تاضحكي عليا

بيسان:(توثرات)نتي فاهمة الموضوع غالاط

سناء:(ضحكات بفقصة)شتي غير هاد الترعيدة لي فيك وعينيك لي تايضور بلاصتهوم مخليني نتأكد بلي نتي وياه بيناتكوم شي حاجة

بيسان:(باستسلام)اه بيناتنا

سناء:(شافت فيها بشوفة صارمة)واش ماعرفتيش ولد لحاج لاساق لخبار لهادشي غايفقد تقتو فيك وعمرها غاترجع..

دق قلب بيسان بخوف من هضرة سناء لخرة لي خلاتها تسرط ريقها وهي عارفة بلي سناء على حق.. مباغاش بيسان تخيل بلي هاد لهضرة غاتوقع وبلي هي غاتخسر تقة خوها حيت بصح مجرد التفكير فالموضوع تايخلي قلبها يتزير عليها.. بصح هي تاتحس بمشاعر جهة ريان وتايعجبها اهتمامو وكلامو ولغزل ديالو ليها وهو كلو على بعضو تايعجبها ولكن مستحيل تسبقو على خوهاا.. خوها لي عطاهاا التقة وهو عارف أنها عمرها مغادي تخيب ظنو.. خوها لي وقف معاهاا فأخر فترة فحياتها وساندها وعاونها تاحققات الحلم ديالها أو ولات طبيبة فالتخصص لي بغات.. نوح مكانش غير الأخ لكبير ليها إنما كاان باهاا وسندها وضهرها لي تتكى عليه كلما عياات وليد لي كاتنوضها فاش تاطيح.. كلام سناء لاح عليها الضيم وديك السويعة لي دوزات معاه وهي ضاحكة وناشطة هجراتهوم دابا

سناء:(سولاتها مرة خرى) من امتى؟

بيسان:(تنهدات وعرفات سناء مغاتفاكش عليها وبصراحة قالت) ماشي بزاف غير مأخراً

سناء:(مكانتش مستغربة من اعترافها)وهذا ناوي لمعقول ولاغير كيتفلى وعلاقتكوم واش رحيل عارفة بيها

بيسان:هو قال باغي يدوي مع خويا مي أنا مأجل الموضوع وبالنسبة لرحيل ماعرفتش صراحة

سناء:ختو غاتكون عارفة باينة (قربات جهتها وقالت بهدوء) نتي ماشي بنت صغيرة ولي قدك راه تباركالله دارو دار وأنا نيت ملي كنت فعمرك راني كنت بداري (طبطبات على كتفها) الاكنتي غاديري شي حاجة فكري فخوك وماماك هو لول الاكنتي نتي باغاه راه عارفة شنو غاديري ليوم سلكتي وفلتي منها وكنت غير أنا لي شفتكوم مي يقدر المرة الجايا يكون ولد لحاج ولخبار فراسك..

خرجات سناء وخلات بيسان شداها البكية من جيه خوها لي مباغاش تكسر تقتو واخا هي راه عمرها خلات ريان يدير شي تصرف خايب ليها حيت أصلا هو صاينها ليه ومن جيه ريان لي عرفات بلي غايكون تعصب حيت سبق وقالها ليها مامرة مازوج أو وضح ليها بلي هو باغي علاقتهوم تكون رسمية ويكون كلشي عارفها ولكن هي حاليا مباغاش دير شي خطوة قبل ماتعرفو مزيان وتعرف داك الشخص لي غاترتابط بيه كيف داير مباغاش دير شي خطوة وتندم عليها من بعد.. تنهدات وبقات جالسة فالبيت تاحسات براسها ولات شوية عاد نزلات لتحت وجات نيشان معاهوم وهوما ناويين يمشيو مور ماطرقو مسمار لقاعة وهزو لكادويات لي جاوهوم وگاع أغراضهوم لي وصلوهوم لدار إدريس.. كانت بيسان تاتقلب بعينيها على ريان لكن مبانش ليها تنهدات ومشات ركبات فطوموبيل رؤوف لي كان هاز دارهوم وطوموبيل نوح راه تاهي مشارجيا بعائلة إدريس لي مزاحمين تم بحكم أن محمد طه خدا طوموبيل باه باش يتحرك بيها براحتو.. تحركو من تم تحت نظرات ميس لي كانت مراقبة الأوضاع من لول وتقول واش تحركات من تم وعينيها كانو كيشوفو فكل شخص بحقد وكره.. تحركات تاهي من تم وصورة رحيل وهي مبسمة ومخشية فحظن نوح خلاتهاا تزيد تكرهها وتحقد عليهاا وتحلف فيها لاهي ولاگاع لي كان سباب دمار عائلتها..

---

قدام أوطيل المامونية لمتواجد فمراكش وقف محمد طه طوموبيل باه وضار جهة بيسان لي كانت جالسة وساكتة ونطق بهدوء:نزلي

نزل هو لول هاز لاڤيست فيديه وتمشى جهة الكوفر حلو وجبد لڤاليز ديالها وصاك فين داير حوايجو هزهوم ورجع شاف فيها هي لي كانت لابسة كسيوة بيضا عادية طويلة.. سبقها وهي تابعاه وقلبها تايشطح الرگادة معرفاش نهائيا شنو غايطرا وكيفاش غاتصرف.. تالفة وحايرة والأهم مخلوعة بزاف.. دخلو لغسيبسيون وهي بقات واقفة تاريگلى الأمور وقرب جهتها والسيد هاز ليهوم الأمتعة.. ركبو فلسونسور غادين لطبقة لي فيها السويت ديالها وغير وصلو دخل ولقاو الورد والشموع والديكورات الحميمية مخليا محمد طه مكمش حجبانو وغزلان شوية وتخشى فكسوتها

محمد طه:(شاف فيها وقال بهدوء) رحيل هي لي رزيرڤات لينا السويت كادو ديالها لينا

حركات راسها باه وهو سمع الدقان ومشى وشوية بان ليها راجع وجار معاه طبيلة فيها الديسير مشكل مع الشوكولا دايبة وعصير فريز وليمون دايرينو فواحد لبول فيه الگلاصمون..

محمد طه:(تحدر تايهز حوايجو)ندخل ندوش

مشى يدوش وهي جلسات تاتوجد شنو تلبس وتتحاول تفكر كيفاش غاتصرف معاه وهي عارفة هاد الزواج وهاد لعلاقة لي داخلين فيها بادية فشكل.. ماتعطلش بزاف وكان خرج لابس شورط فقط وهي راه مهزاتش فيه لعين دخلات نيشان هازة مسائلها مخلياه كيفرش الصلاية ولبس فوقيتو وصلى زوج ركعات وجلس تايخربق فتلفونو وسيفط لرحيل بلي وصلو وشكرها على لكادو وجلس تايشوف تصاور لي مسيفطين ليه دعرسهوم تاسمع حس لباب دلحمام تحل وهي خرجات لابسة شوميز دونوي طويل فالبيض وفوقو بنوار دستان جامعاه وشعرها القهوي مطلوق على راحتو ومبوكلي من لتحت.. لوجه مافيه تانقطة دلمك اب كان تيبري ولحنيكات حمرين وشفايف رطبين بچلوس..مشات جهة لڤاليز وحطات فيها حوايجها لي زولات وهو عينو تايشوفو فيها بنظرة إعجاب واضحة.. واخا كانت مستورة ومكيبان غير عنقها وگدامها ويديها إلا أنه لفتات نظرو وانتباهو لي خلاه يتفكر ليلة لي فاق ولقاها ناعسة جنبو.. ليلة لي مكانش عاقل فيها على شنو طرا بناتهوم بلديطاي ولكن عاقل على شي ضبابة خفيفة.. ناض من بلاصتو غادي جهتها وهي محنية على ڤاليزتها ومحسات غير بيديه لي ضارو على كرشها وصوتو لي همس ليها جنب ودنيها: باغيك

يتبع...