محتوى القصة
بدا كيمشط ليها شعرها بيديه وكيسمع ليها وهي تاتعاود ليه على مها لي مريضة وكيف كانت وهو مركز معاهاا ومجلسها فوق ركبتو مخلي راسها محطوط فوق صدرو مخشية فيه..
رؤوف:(وجه كلامو لبيسان)كون تشوفي الحالة لي رجع فيها الإسطبل كولو محروق عطاا الله نوح كان تم وجمع لخدامة وبداو كيطفيو لعافية قبل ماتوصل لبومبية وخرجو لخيول لي كانو هايجين مع العافية و'أيور' كون تشوفيه كيف كاان هااايج رااه المدربة ديالو والله مقدات عليه كون مامولاه لي كان حاضر وكالماااه الروينة نااضت تماا
سناء:شنو درتو مع هاداك لي كان السباب تاتشعلات العافية؟
رؤوف:(جاوبها بهدوء) شد خلاصو ومشى فحالو..
سناء:نيت باش لمرة الجايا يعرف فين يكمي بسباب غلط بسيط وقع مشكيل كبييير
الحاج لحسن: الحمدلله على كل حاال ملي تاواحد ماجرات ليه شي حاجة..
----
سرطات ريقها وقلبات وجهها لجهة لخرا وهي تاتنهد.. كلها عرقانة بحال لاكبيتي عليها الماا والصهد فيقهاا.. لاحت عليهاا لكاشة وناضت جالسة وهي تاضور عينيها فالبيت تاتفكر اش طرا.. قلبها حسات بيه ارتااح فاش عرفاتو بخير ومطاري ليه والو.. حدرات عينيها لرجيلاتها تاتشوف فالتقاشر وتفكرات فاش لبسهوم ليها.. تبسمات بهدوء وشافت جهة لكوافوز فين حاط ليها دواا.. مدات يديها هزاتو وكمشات حجبانها فاش شافت بلي هاداك الدوا كان نفسو لي تاتستعمل هي.. استغرباات كيفاش هو عرفو وهي مقالتها لحد.. ناضت بشوية عليها وهي مخسرة سيفتها وعايفة راسها.. كاتكره لبريود فاش تاتجيها حيت هرموناتها تايتخربقو فديك لوقيتة.. طرفات حالتهاا ورشات ريحتها ولبسات بيجامة خرى فالكحل بصدايف.. خرجات من لحمام وكمشات حجبانها فاش سمعات لحس فالدريسينغ ومشات بخطوات بسيطة لقاتو واقف وعاطيها بالضهر..
رحيل:(بصوت خافت)نووح
ضار جهتها كيشوف فيها وهي واقفة فلعتبة دلباب تاتفرك يديها مع بعض.. وتاتشوف فيه بحال شي بنيتة صغيرة دارت ليبيتيز وكاتسنى تسمع عقوبتها.. تفكرات لغضبة ديالو ولخلعة لي تخلعاتها عليه ومع لهرمونات مخربقين عندها بلاماتشعر دموعها نزلو وقربات جهتو بزربة بدون تردد ترماات فحظنو مضورة يديها على عنقو أو واقفة على صبيعات رجليهاا بااش توصل ليه.. دافنة راسها فصدرو تاتبكي وهو غير سمع صوت بكاها ضور يديه على نصها مطلعها ليه وهي غير حسات بيه مبادلها العنااق زادت فبكاهاا.. هزها عندو تادفنات راسها فعنقو وتمشى بيها لبراا وهو كيدوز يديه على ضهرها.. تمشى بيها تاوصل لنموسية وجلس مجلسها عليه وهي على حالهاا..
نوح:(بصوت هامس) علاش تاتبكي (حط يديه باااغي يزولها من حظنو باش يشوف فيها وهي حلفات لاطلقاتو) رحييل شوفي فيا
بعدات وجهها عليه وهو بدا كيرد ليها شعرها مور ودنيها وتايمسح ليها دموعها وهي تاتنخصص.. باسها ففمها قبلة سطحية ونطق بهمس: باقي فيك الوجع الفثنة ديالي؟
رحيل:(غير سمعات ديك الفثنة ديالي وهي تحس بالروح رجعات فيها حركات راسها بلا ونطقات بخفوت) سمحليا أنا مكنتش باغا نقلقك أنا غير كنت معصبة
نوح:(شد وجهها بين يديه وقال بهدوء ممزوج بجدية)عارفة راسك اش درتي؟(حركات راسها باه وهو كمل كلامو ) آخر مرة هاد لبلان يتعاود حيت لمرة الجايا تصرفي مغايعجبكش ضراتك شي حاجة وسولتك قوليها لياا نتي راك وليتي مرتي وأي حاجة وقعات ليك خصني نعرفها ولاشي حد هضر معااك ولاقال ليك شي كلام ماعجبكش أجي عندي أناا نتفاهم معاه ونتي رجعي لوور.. بحال هاد التصرفات مانبفيش يتعاودو مرة خرى
رحيل:(نطقات بهدوء)واخاا
نوح:(باسها فجبهتهاا ونزل باسها فأرنبة نيفهاا) بقااي تسمعي لكلام ومايكوونش راسك قااصح الفثنة
جرها من قرفادتها وبدون سابق إنذار هجم على شفايفها بقبلة فرنسية تايروي شوقو فهاد اليوماين لي بعدهوم عليها.. وتاهي مابخلاتش عليه وبدلاتو لبوسة بطريقتهاا هي ويديها على صدرو تاتحركهوم بشوية.. لساانو كاان تايجوب فثغرها ويمتص ريقهاا.. كل شفة عاطيها حقها ببوستو تاجمع ليها شفايفهاا وعضهووم بسنانو تاحساات بيهوم غايتقلعو عاد بعد ومد إبهامو تايمررو فوق شفتها لي حماارت وتفلحات ليها فالجنب ونطق بصوت هامس: نهار تفكري تقولي أووف تفكري هاد لعضة الفثنة ديالي
رحيل:(تبسمات فداخلهاا ونطقات فنفسها على أنا نعااودها.. وبصوت جدي نطقات) نسيت ماسولتكش شنو وقع فالفيرمة؟
نوح:(تايدوز يديه على حنكها وبهدوء نطق) مشكيل وتحل ماتشغليش باالك معاه
رحيل:ياك بعدا مكاينش شي خسائر بزااف؟
نوح: لعافية شعلات فالإسطبل والحمدلله الخيول ماضرروش من غير سيديل هو لي تحرق فرجليه حيت كان قريب لبلاصة لي شعلات فيها لعافية
رحيل:(كمشات حجبانها بحزن) مسكين سيدرا لاعرفات غايبقا فيها لحاال
نوح:(حك لحيتو)تازين العابدين فااش عرف لي كااين جاا طاير وفاش شاف لخيل ديالو فديك الحالة مبقاش بغا يفارقو وراني خليتو تم
رحيل: نقدر نمشي معاك غدا لاكنتي غادي؟
نوح:(باسها ففمها بلخف)واخاا فيك الجوع؟
رحيل:(كاتفشش عليه)بزاف من الصباح ماواكلاش (شدات فيديه تاضار شاف فيها ونطقات بهمس)خفت عليك بزاف..
فديك اللحظة مقدراتش أنها تخبي باش تتحس وأنها تحشم وتسكت.. فلداخل ديالها كان كلام كثير باغا تقولو ولكن فضلات أنها تختازلو فجملة قصيرة عندها معنى كبير.. عاشت واحد لخوف فهاد نص نهار ربي لي عارفو.. جميع الأفكار الخايبة طاحت فبالها دقة وحدة وكون مكانش لوجع هلكها كون ماترداتش دقيقة تمشي عندو واخا يغووت عليها ويتعصب لمهم غير تشوفو وطمن قلبها على روح راحتها.. كان تيشوف فيها بتبسيمة خفيفة بلامايجاوب ولكن نظراتو ليها كانت كافية أنها تشوف مدى تأثير ديك الجملة عليه.. قرب جهتها بلامايدوي شد وجهها وباسها فشفايفها بقبلة قووية غفلها بيها.. بعد عليها عاد نااض عيط من لفيكس باش يجيبو ليها لعشا حيت هوما تعشاو قبيلة ورجع تكى فالنموسية وجرها لعندو تاجابها جالسة وسط رجليه ومقابلة معااه.. حط يديه على نصها تايحرك يديه ويطلعها تال لفوق ويرجع ينزلها تال جهة مؤخ.رتها..
رحيل:(رجعات شعرها ورى ضهرها ونطقات بهدوء) سيدرا تعشات؟
نوح:(جاوبها بصوت هادئ) تعشات وراه فبيتها ناعسة ماتهزيش ليها لهم
رحيل:(تبسمات ليه)مزيان باش غدا تفيق بكري وماتغلبنيش (تفكرات مسااج أسماء وكمشات حجبانها بفضول) شنو درتو مزال فقضية زواج اليازيد حيت ماهضرتش مع لبنات باااش نعرف جواب غزلان؟
مكانتش باغا تبين أنها عارفة داكشي علاش قالت ليه هكاك..
نوح:(بهدوء) عيط ليا سي إدريس لبارح وقال بلي لبنت مموافقاش
رحيل:اهاا وشنو درتي علمتي السيد؟
نوح:علمتو لبارح
رحيل:وشنو غايدير دابا زعمة واش باقي نااوي يتزوج ولا لا شفت خالتك الصباح گاعما عجبها لحااال واقيلا بااقي تتبغيه؟
نوح:(شاف فيها مكمش حجبانو ونطق بجدية) لحب عمرو كان كاافي باش تكون فبالك وخصوصا فالزواج حيت فيه بزاف دلحوايج مهمين من غير لحب.. شحال من زوج تاتلقايهوم مزوجين ولكن مكيكونش الانسجام بناتهوم والتفاهم حيت واحد كيشرق والتاني كيغرب وكاين شي قرارات لي تايخص لمرا والراجل يتافقو عليها بزووج تايخرجو بقرار يرضيهوم بزوج ماشي واحد يفرض قرارو ويدير لي قال ليه راسو بلامايعطي اعتبار لاخر..
رحيل:(كلامو عجبها وتحمسات لموضوع)وي متافقة معاك فكل كلمة قلتيها شحاال من وحدة كطلق بسباب أنها مبقاتش مفاهمة مع راجلها وهو تبدل عليها وكاين گاع لي فاش تيوقعو لمشاكيل تايخونو
نوح:(قرصها فحنكها بلخف) لي كيخونو مايجيبوش سبتهوم على المشاكيل ومبقاش مفاهم مع مرتو حيت هاد لهضرة كلاها مواكلاش لخبر.. وقعو مشاكيل جلس حلهوم وناقش وديك الساعة راه كون على يقين غاتخرجو بزوج بيكوم بشي قرار لي غايريحكوم نتا وياها ولامبقااتش حلات لعيشة بناتكوم طلقو وديك الساعة تاحد مغايلومك لاشفتي فجيهة خرى
كانت باغا تحاوبو ساعة دقان لي تسمع فباب جناحهوم خلاها تسرط كلامها وتسكت.. ناض مخليها تاتفكر فكلامو وتتحللو فدماغها.. ومغاتنكرش بلي عجبها لموضوع لي تفتح وكيفاش كيناقشها بهدوء بدون تعصب.. رجع هاز صينية فيها عشاها حطو فوق الطبيلة لي عندهوم تم وشاف فيهاا بهدوء:اجي تعشااي الفثنة
قربات جهتو وغير شافت فالصينية كرشها غرغرات بالجوع.. جلسات تتاكل وضربات گاع داك لماكلة حيت من صباح وهي على جوعها وزيد ردات فمعدتها خوات.. سالات وضارت عندو لقاتو كيخربق فتلفونو..
رحيل:شبعت الحمدلله
نوح:بصحة وراحة (باسها ففمها بوسة سطحية)
رحيل:غانمشي لحمام
ناضت غادة تقضي روتينها ليلي وبدلات عليها عاد خرجات وضورات وجهها مبانش ليها فالبيت وغير سمعات حس فجهة الدريسينغ وهي تمشي عندو.. ومع وقفات جنب لباب شهقات بالجهد فاش بانت ليها ضربة لي فكتفو مع كان تيبدل تيشورت.. ضار جهتها وهي قربات عندو مخرجة عينيها:مااالك فكتفك؟
نوح:(بهدوء) ضربة خفيفة وصاف
رحيل:واش كتفك كولو مزرق وتاتقول ضربة خفيفة ضوور نشووف
ضوراتو وعينيها تايشوفو فكتفو لي مزرق وفيه جروح لي خلاوها تكمش حجبانها ونطقات بخفوت:كايوعتك؟
نوح:لا
رحيل:كيفاش تاتضربتي؟
نوح:(كمش حجبانو)شكون عرف
رحيل:ماتلبسش تيشورت أنا جايا
مشات جهة لحمام هزات ديك لبواطة ورجعات عندو لقاتو باقي واقف فبلاصتو شداتو فيديه وجلساتو فوق الكرسي وضارت وراه وغير شافت تاني الضربة قلبها ضرهاا.. هزات لقطن ودارت فيه لانكول على قبل دوك الجريحات لي فيهاا وبدات تادوزو عليهوم بشوية وتاتسوط وحاولات ماأمكن ماتقصحوش
رحيل: ياكما قصحتك؟
نوح:(مسح على وجهو)يديك حنينة محاسش بيها
رحيل:(بجدية)تاتقدر طلع كتفك وتحركها
نوح:ااه (ضار جهتها وشد يديها باسها) صافي غير خليها دابا تبرى بوحدها
رحيل:(بجدية) غدا قبل مانتحركو لفيرمة غانمشيو عند طبيب يشوفهاا ديك الزروقية ديالها معجباتنيش
نوح:(ربع يديه وهز حاحبو)اهاا وشنو اخرر الفثنة ديالي
رحيل:(ضحكات)هادشي لي كاين هاد الساعة ههه
تبسم ليها وناض لبس عليه شورط وخرج مدرعها..
تخشات رحيل بلاصتها وشافت فيه:ماتنعسش عليها باش ماضركش
نوح:(تقلب عاطيها بالضهر على قبل كتفو.. سرح دراعو وضور راسو شاف فيها ونطق بهمس)اجي لبلاصتك الفثنة
تبسمات ليه رحيل ودازت فوق منو تاجات لجهة لخرى وحطات راسها على دراعو وهو جرها عندو وحدر راسو دافنو فعنقها ونطق بصوت خافت:تباتي ليا فراحة الله الفثنة ديالي..
كاتشوف فساعتها لي مزينة يديها وطلعات راسها لجهة الشارع فين واقفة تاتقلب على طاكسي.. ليوم صبحات معطلة حيت لغڤي ماصوناتش ليها فالوقت وعطا الله ضرباتها لفيقة قبل ماتزيد تعطل كثر.. عاضة على شفايفهاا وباين فيها كااعية غير من تكميشة حجبانهاا القهويين..
أسماء:تفووو على خرااا طاكسيات كلهوم عامرين
مكانش عندها خياار اخر من غير تركب طوبيس واخا ايحطها فبلاصة بعيدة مي اللهم العمش ولالعمى.. هزات تلفونها هو لول وعيطات لبنت لي خدامة معاهاا سولاتها واش جا الشاف ومن زهرها لعوج لقاتو جاا.. كمشات حجبانها وعارفة راسها غاتسمع واحد لكاسيط من عندو عليها بلاتردد دخلات لنمرة إسلام وحيدات ليه لبلوك هو لول عاد صونات عليه وفزوج رنات جاوبها بنبرة باين فيه مامتيقش:غزاالي هداك الله وحيدتي لبلوك؟؟
أسماء: فينك؟
إسلام:(باستغراب)يالاه خارج من الدار غادي لخدمة
أسماء:دوز عندي ف*** غاتلقاني كانتسنااك وماتعطلش..
قطعات عليه أو وقفات بلاصتها كاتسناه بيما أنه قريب ليها يوصلها ونيت ماتعدبش فطوبيس لي ماعندهاش معاه وكانت غاتركب فيها غير بزز.. عشرة دقايق وكانت طوموبيلتو تتبان ليها جايا جهتها.. وقف ليها تاطلعات ودارت لسانتوغ ونطقات بزربة:كسيري راه تعطلت
إسلام:(شد طريق ونطق بسخرية)الناس تاتقول صباح الخير هو لول اغزالي
أسماء:صبااح الزفت على هاد التجرجير لي تجرجرت أوكاان اشمن صباح الخير
إسلام:مال غزالي معصبة؟؟
أسماء:لخرا دلغڤي مصوناتش ليا وتعطلت وداك الزمر غايسمعني تاني لهضرة على تعطااال
إسلام:(شاف فيها هاز حاجبو)شكون؟
أسماء:الشاف شكوون مثلا اوووف ضووبليه المررض لابقيتي تابعو مغانتحركووش
إسلام:اجي سوگي بلاصتي
أسماء:والله ماكرهت كون مداتش رحيل طوموبيلتها كنت ركبت فيها وتهنيت
إسلام:شريها
أسماء:(فقصها)واااااو مكنتش عارفة شكرا على لمعلومة لي عطيتيني
فضل ميجاوبهاش حيت بانت ليه ماشي على برجها.. وقف طوموبيلتو قدام الشركة فين خدامة وهي بزربة زولات لسانتوغ وبغات تخرج ساعة شدها من يديها ونطق بهدوء:مكاينش شكرا فقاموسك؟
أسماء:(نطقات بسرعة)شكراا وخليني نمشي دابا
إسلام:تسنااي معاياش اتخرجي
أسماء:وااااش اعباد الله أناا دخلت باااش نخرج
إسلام:ملي نصوني عليك جاااوبي واخا يالاه سيري دابا
خرجات بزربة تاتجري وهو متبع ليها لعين كيشوف فيها ويتبسم.. غير شافها دخلات دمارا ومشى تاهو لخدمتو.. أما أسماء فكانت باغا تسلت باش مايشوفش وقتااش جاات ساعة كان واقف ليها فلباب بحال قبااض الرواح.. راجل فأواخر الثلاتينات باااقي جوون ومن نوع لي مهلي فرااسو والروايح اخر مكاااين.. شاف فيها ونطق وعينو على ساعتو:مادموزيل شحال هادي فالساعة
أسماء:(نطقات تاتبحلس وتكدب)سمحليا بزاف موسيو هشام كنت جايا فطاكسي ودرنا كسيدة مع واحد مول لموطور والروينة ناااضت ويالاه عاد قدرت نتفك ونجي سمحليا بزاااف
هشام:(تنهد)على سلامتك نتمنى هادشي مايتكررش مرة خرى
أسماء:واخا شكرا
عطاتو أسمااء بالضهر ونطقات بصوت هامس وهي غادة لبوسطهاا: الله يسمح لياا ماعرفت فينا غادة بهاد لكدوووب..
شدات بلاصتها وقبل ماتبدا خدمتها شافت فتلفونها لقات مساج من إسلام فيه 📩"ياكما غوت عليك الشاف"
أسماء:(ميقات جوباتو) 📩"يغوت مالي بنت صغيرة تت ماوقع والو ودابا خليني نخدم على ولادي"
إسلام 📩 " ولادك مع من؟"
أسماء: 📩 "مع باهوم مع من فنظااارك حييد عليا راه ممساليااش"
شاف فأخر مساج ليها وهو مكمش حجبانو وكلامها خلى الخوف يتسلل لقلبو.. هي مجرد كلمة قالتها عادية ولكن بالنسبة ليه فيقاتو وخلاتو يحل عينيه.. مغاينكرش بلي كايحس شي حاجة من جهتها وفاش تيكون معاهاا تاينسى همومو وشنو داز عليه.. الجلسة معاها حلوة ومكيسخااش بيهاا.. اه هو مباغيش يتزوج وعااف زواج بسبب لي جرى معاه ولكن ميقدرش يتقبل فكرة أنها غاتزوج بشي حد اخر.. هي بنت زوينة لاقلبا ولاقالباً وفاش تاتعاشرها نيت عاد تاتعرف معدنها وهو فلول خدا عليها فكرة وفاش عاشرها تبدلات فكرتو.. اه عارفهاا من نوع لي تايدوي مع دراري وتاتصااحب وهادشي شافو بعينيه ونيت هادشي لي خالعو دابا تكون مصاحبة مع شي واحد وتبغيه ويبغيها ويجي لدارهوم يتزوح بيهاا.. ناض من بلاصتو غادي جااي وعقلو صافي ترفع مبقااش عندو خاطر لخدمة.. باغيها ليه وفنفس الوقت هو مباغيش يتزوج.. معادلة ماعندها حل ومولاها مخربق ومعارف شنو يشد..
كانو شادين طريق لفيرمة مور ما دازو عند طبيب لي فحص كتف نوح وعطاه الدوا.. وكون جات عليه ايخليه تايبرا لرااسو ولكن رحيل وقفات ليه فوق رااسو مع فااق تاتفكرو بلي غايمشيو لطبيب وتاهو دار ليها لخاطر.. كانت معاهوم تاسيدرا لي راكبة لور مع إيڤانا.. دايرة گريناات ولابسة سالوبيط مع تيشورت بيضاا وسبرديلة بيضاا تاهي وصاكادو ديالهاا.. متكية رحيل راسها على لكرسي وعينيها على نوح لي شبك صبعاتو مع صباعهاا وحط يديها فوق فخدو.. مرة مرة يطلعها لجهة فمو ويبوسها وهي تاتبسم ليه بفرحة وعينيها كيلمعوو..
سيدرا:ماي بلو آيز بوس ليا تاأنا يديداتي بحال مامي
مدات ليه يديها وهو تبسم وهز عينو شاف فيها من لمرايا ونطق بتبسيمة حنينة:واخا ملي نزلو ونبوسها ليك
رحيل:(ضاحكات وضارت شافت فيها)ههه هالغيرة بدات ههه
تبسم ليها نوح وكملو طريقهوم فجو زوين تااوصلو لباب لفيرمة لي حلها ليهوم لعسااس وعلى عكس الأيام العادية ليوم مكاين حد من غير لخدامة والتدريبات لي مولفة كيكونو كل نهار ليوم مكينيش على قبل شي لي وقع لبارح.. نزلات رحيل بسروال كحل وااسع مع شوميز بيضاا تاهي واسعة وطويلة وفوق منها ڤيست نفس توب دالسروال.. وجهها يادوب دايرة چلووس وريسيل فقط.. شبك صباعو مع صبعانها وهز سيدرا بين يديه لي كانت هازة لقطيطة وعينيها كايضورو على لفيرمة ونطقات بحمااس:ماي بلو آيز بغيت نركب سيديل توحشتو
رحيل:(شافت فيها ونطقات بهدوء)سيديل مريض امامي داكشي علاش مغاتقدريش تركبيه
سيدرا:وعلاش مالو مامي
رحيل:تاهو تحرق فرجيلتو بحالك
سكتات سيدرا وهي مكمشة حجبانهاا ونوح قرب لبلاصة فين كانو دايرين لخيوول مع الإسطبل كايصلحوه.. سرح عينو على لبلاصة كيقلب على ولدو لي مبانش ليه وشاف فبّاسالم لي كان واقف حداه ونطق بهدوء:زين العابدين فين؟
بّاسالم:مشى لدار يبدل عليه من لبارح ماتزعزعش حدا لخيل ديالو
كمش نوح حجبانو وحط سيدرا فالأرض لي عينيها على دوك لخيول وضارت جهة نوح ونطقات:ماي بلو آيز فين سيديل؟
نوح:(أشار ليها لبلاصة فين كاين مع دارو ليهوم بيوت مفرقين) لهيه
حطات سيدرا إيڤانا ومشات تاتجري لفين نعت ليها تاوصلات لديك لبيت فين كان سيديل ناااعس وملوين على رجليه فااصمة مسرحها وحاط راسو فالأرض.. كان منظرو تايقطع فالقلب وسيدرا بقا فيها ومشات دخلات عندو بلاماتخااف منوو تاوصلات جهة راسو وجلسات قفازي وحركات يديها على راسو تاهزو ونطقات ببرائة: سيديل توحشتك شوف(وراتو يديها لي محروقة) تاأنا تحرقت بحاالك صافي غير صبر دابا تبرى واخاا
تحنات باستو وبدات تاتحرك يديها على راسو وهو عرفها وسبحان الله حنيتها وبرائتها فلمساتها ليه خلاتو يتهدن ويحط الراس فالأرض..
كان جااي من الدار مبدل حوايجو بسروال دجين كحل وتيشورت نفس اللون.. ليل كولو وهو سهران جنب حصاانو ومشافش النعااس.. عينو لمحات نوح واقف مدرع رحيل تايهضر معاهاا ويوريها لبلاصة لي تحرقات وبخطوات بطيئة قرب جهتهوم تاوقف قدامهوم ونطق بهدوء:لواليد
نوح:(زول يديه على كتف رحيل وجرو لعندو من قرفادتو كيف ديما وباسو فجبهتو) رتاحيتي شوية؟
زين العابدين:ااه
نوح:(بحنية كايقيس وجهو وشعرو)كليتي؟
زين العابدين:مابغيتش
جرو نوح معنقو ورحيل عينيها عليهوم ومغاتنكرش بلي عجباتو علاقتو مع ولدو.. تعلق زين العابدين جهة باه باين وتانوح كيبان متعلق بيه بزااف..
زين العابدين:(شاف فيها ونطق بهدوء)سلام
رحيل:واعليكوم السلام
زين العابدين:أنا لهيه
حرك ليه نوح راسو وتبع ليه عينيه تاغبر ورجع عند رحيل يكمل معاها كلامو..
وصل لعند لخيل ديالو ومع دخل بانت ليه سيدرا مقردة عليه تاتقيش وجهو وتهضر معاه.. كمش حجبانو وقرب جهتها تاوقف قدامها وهي هزات راسها ونطقات:زينبيدين شووف سيديل عندو ديدي فرجيلة ديالو بحالي
زين العابدين:(نطق ببرود) نوض
سيدرا:(بعناد)لا غانبقا هنا
زير على يديه وأكره شي عندو هي لمعاندة.. تحدر جهتها بلاماينطق وهزها من سالوبيط بيديه كيف لكمشة تادلات يديها ورجليها ونطق بصوت بارد:سير عند ماماك
بدات سيدرا تاضرب برجليهاا وتحرك راسها مجننة ونطقات بصوت عاالي:مابغيييتش أنا بغييت نبقا مع سيديل ماااي بلوو
باقي مكملتهاش كان ساد ليها فمها وخنزر فيها: قطع لحس
بقات تاتنين وتضرب برجليها تادرونجاتو وحطها فالارض وهي ضرب رجليها وكمشات حجبانها مخرجة فيه عينيه ونطقات بصوت غاضب: غانبقا هناا
ساط زين العابدين النفس ودخل جهة لحصان جلس حداه وتحنى باسو فراسو وهي تبعاتو وجلسات تاني قفازي ونطقات مكمشة حجبانها: تاأنا بووسني بحالو
ضار جهتها وهو مكمش حجباانو وشاف فيها وهي تاتسبل عويناتهاا.. ماتسوقش ليها ورجع ضار لعند لخيل مامعبرهاش وهي تقلقات وتنفخاات.. شكون هو لي مايديرش ليهاا لي قالت وعلاش مكيبغيش يهضر معاها وهي لي مولفة أي واحد تايجي يلعب معاهاا ويهضر معاهاا ويعطيها لخااطر..
سيدرا:(تاتنغزو فدراعو) زينبيدين زينبيدين زينبيدين
مبغااش يضور وبااش يهني راسو دار ليزياتو وطلق لموسيقى وهي صافي هنا تنفخاات وناضت جات ورااه ومع كان حادر راسو لقدام مدات يديها وشداتو فشعرو تاااطلعاات ليه راسو وغوتات عليه فوجهو:نتاا خايب صافي مغانبقاش نهضرر معاااك
من الحوايج لي عند زين العابدين خط حمر هي يقيسو شي حد فشعرو شخص واحد لي تايقيصو ويخليه هو نوح أما شي حد آخر مكيخليهش وتيتعصب وهي راه ماشي غير قاصتو راه نتفااتو وشدة لي دايرة ليه لبرهوشة قااصحة.. مد يديه شد يديهاا مزير عليها تاطلقاتو وضار جهتها مخنزر فيهاا ونطق بصوت معصب:راه غانضربك القلا*وي
دفعها وهي خنزرات فيه ودلات شنايفها ومشات تاتجري مخلياه تايسوط النفس معصب ويقاد شعرو.. تاتجري وتاتقلب على نوح لي بان ليها جالس مع رحيل فالكراسى وهازين كيسان دلعصيير.. مشات نيشان عندو تاوقفات قدامو ونطقات وهي مدلية شنايفهاا وتاترمش بعوينات البابوشة:ماي بلو آيز زينبيدين غوت علياا
مد لرحيل الكاس وهزها جلسها فوق ركبتو ونطق بجدية:شنو دار ليك؟
سيدرا:(بدات تاضور عينيها) مبغاش يخليني نجلس مع سيديل وقبيلة قال ليا راه غانضربك القلا*وي
خرجات رحيل عينيها ولكيسان دلعصير تقرقبو بين يديها ونطقات بصرامة:شحااال من مرة تانقول ليك ماتبقااايش تعاودي لكلااام لي سمعتيه
سيدرا:(تخشات فنوح)ومامي هو غوت علياا
نوح:(حك لحيتو ونطق بهدوء)أناا جااي
جلسها بلاصتو وناض غادي باين فيه معصب وسيدرا شافت فرحيل لي قالت:شنو درتي ليه تاغوت عليك؟
سيدرا:(قربات ليها ونطقات بخفوت)والو مامي مدرت والو
بقات تاضور عينيها ورحيل غير شافت فيها عرفات بلي غاتكون دايرة شي زبلة عليها خاصم عليه وتعصب.. هي عارفة بنتها مكتهدااش ومكتسكتش تنهدات ونطقات بجدية:ماتبقاايش ديري تانتي لبسالات لانتقلق عليك سمعتي
حركات سيدرا راسها باه ورحيل مدات ليها كاسها تاتشرب منو وهي ساكتة..
وصل نوح عند زين العابدين لي باقي فبلاصتو.. وقف عليه ونطق بحدية مكمش حجبانو:زين العابدين اجي ندوي معاك
ناض زين من بلاصتو وتبعو وهو كيزول ليزياتو وتيخشيهوم فجيبو تابان ليه نوح وقف وضار عندو ونطق بهدوء: شنو قلتي لسيدرا؟
زين العابدين:(كمش حجبانو ونطق بالإنجليزية)هي شداتني من شعري
نوح:(هز فيه حاحبو)ونتا خسرتي الهضرة قدامها؟
زين العابدين:(زير على يديه ونطق) اه
نوح:(جرو من قرفادتو ونطق بصوت صارم جدي) وأنا شنو قلت على تخساار لهضرة همم (سكت زين العابدين وحدر راسو ماجاوبوش ونوح كمل كلامو) اخر مرة احفيد لحااج نعرفك خسرتيها وخصوصاً قدام سيدرا كلامي مفهووم
حرك راسو باه ونوح واخا بعض المرات كيقصح معاه طبعا لمصلاحتو الإأن قلبو مكيطاوعوش يخليه مقلق.. جرو بااسو فجبهتو ونطق بهدوء وحنية:الله يرضي عليك اولدي (درعو ونطق بتبسيمة)يالاه زيد نمشيو لدار نتغداو
تمشى معاه زين العابدين تاوصلو لعند رحيل لي تبسمات ليهوم ونطقات: نمشيو لدار؟
نوح:اه يالاه اتاتبيرت إينو
ناضت سيدرا مدات يديها لرحيل لي هزاتها وهي معنقاها بيديها من عنقها وسبقاتهوم هي وياها وموراهاا نوح مدرع زين العابدين كيدوي معااه ويطبطب على كتفو ويبوس راسو وزين العابدين طالق معاه ودنيه وعينيه على سيدرا لي مرة مرة تهز راسها وتشوف فيه بعويناتها المبطنين وترجع تخشي راسها فعنق مها وتبقا طل عليه..
فالكوزينة كانت تانيرت واقفة تاطيب لغدا بحكم غزلان مكانتش فدار مشات لفاك تسول على وقتاش غاتبدا لقرايا حيت باقي أقل من شهر على لعام الدراسي الجديد.. كانت غير بوحدها فدار ودايرة أبيل فيديو مع رحيل لي كانت فدريسينغ طالقة لابيل وتاتبدل حوايجهاا..
تانيرت:والعشا دايرين بحسابكوم ونيت نشوف ديك الضرة راني توحشتها وخلات بلاصتها هنا
رحيل:(تايتسمع صوتها بعيد)هههه الضرة شافت البيت الجديد لي دار ليها نوح والألعاب ونساتني تاأنا هههه
تانيرت:بصتحها لحبيبة ديالي
رحيل:(جات جهة تلفون لي حاطة فوق الطبيلة وبدات تاتجمع شعرها) دابا نييت خليتها لتحت مع نوح وزين العابدين وجيت نبدل اوووف هاد الزمرة فاش تاتكون فيا تانقط وتانبغي غير وقتاش دوز ست ياام وتمشي
تانيرت:ماعليش ابنتي كلنا هاكاك ماعليك غير بالصبر وصاف
رحيل:اجي ماسولتكش شنو درتو مزال واش غزلان ردات عليكوم جوابها؟
تانيرت:لا باقي خليناها تفكر ونيت تاخد وقتها ومانحسسوهاش بلي زربانين
رحيل: ومحمد طه اش قال؟
تانيرت:مقال والو راه غارق مسكين فالخدمة نهار كولو كيجي عيان يدخل لبيت ومكيخرج منها تالوقيتة دلعشا يتعشى ويمشي ينعس
رحيل:(كانت فاهمة اش كاين وبهدوء قالت) على دكر الخدمة شحال هادي مامشيت ليها
تانيرت:وليتي مرات مول الشي هههه تفششي ابنتي
رحيل:ههه والله تاتفششت اماما بعض لمرات تانمل وتانبغي نرجع صراحة وبعض لمرات تانستحلهاا خصوصا فوقيتة دلفياق بكري ههه
تانيرت:واشوفي نتي اش باغا وفاش مرتاحة
رحيل:أكيد غانرجع غير دابا كيف تاتعرفي باقي مدازت مدة طويلة على لعرس ومجاتش نخدم ولاجيتي لصراحة اماما ماكرهتش ندير بروجي ديااالي خااص بيا
تانيرت:(وقفات قدام لكاميرا لابسة بيجامة قصيرة وغير سميطات تيبانو دراعها مطبزين وبيضين كيشعلو والشعر مجموع بقراصة وباين فيها التهلو ماتقولش راه كبيرة فلعمر)بروجي ديالاش راه ماشي غير اجي وديري بروجي ونتي أصلا ممحدداش ديالاش؟
رحيل:مكرهتش صراحة ندير محل دحوايج لمحجباات عرفتي كانت طاحت فكرة ديال واحد لعباية فبالي وراني رسمتها باش مانساهااش تانوريها ليك نيت راه خليت لوراق ديالي ولاطغوز دالرسم تماا
تانيرت:اوا اماما خصك لول تدرسي لبروجي وتحديدي اش غايكون فيه ولبااس لي غاديري ولاكنتي نتي لي غاتصممي كيف قلتي ولاغاتجيبي السلعة من برا يعني لاكنتي غادخلي لدااك الشغل خصك تكوني عارفة عليه كلشي وقبل خصك تشوفي محال لي يكون فموقع استراتيجي وديري ليتووود دوماخشي وزيد وزيد
رحيل:امم وي عرفت وفكرت فهادشي كولو
تانيرت:ولفلوس تاهوما خصهوم يكونو تحتك نيت حيت غاتبغي مصاريف بزاف
رحيل:عندي فلوس الصداق فلكونط وزيدي عليها فلوس لخلاص لي مكنتش تانقيصو بزاف وفلوس لي كان سيفط ليا نوح باش نتقدى فيامات التوجاد عندي شي برااكة
تانيرت:تاأنا اماما ديالي نعطيك لاحتاجيتي شي حاجة واياااك ديري السلاااف سمعتي أنا كاينة
رحيل:يخليك ليا اتانيرت إينوو نشوف بعدا البروجي وندرسو وديك ساعة يكون خير
تانيرت:آمين ابنتي يالاه سيري عند راجلك راه يكون تايتسنى فيك
رحيل:داكووغ تال ليل ونشوفك بيزوو ماما
تانيرت:بيزوو حبيبة دماماها..
قطعات معاها لابيل ورجعات تاتكمل لغدا تاوجد غرفات لي غاتاكل وخلات حق غزلان..كانت جالسة فالكرسي وحاطة لبيسي فوق الطبلة مراقبة خدمتها دالتعاونية تاسمعات صوت الساروت والباب تسد.. هزات تانيرت عينيها وزولات نضاضر دلبروطيكسيون لي لابسة وتبسمات لغزلان لي كانت داخلة وباين فيها لعياا..
غزلان:سلام أوعليكوم اخالتي
تانيرت:واعليكوم السلام ابنتي شنو درتي فلفاك؟
غزلان:لقيتها عامرة وتلاقيت بلبنات صحباتي تم وشفنا وقتاش غانبداو مبقا والو قل من شهر
تانيرت:اوا مزيان الله يوفقك ابنتي
غزلان:آمين (نزلاا راسها وقالت بخفوت)خالتي بغيت ندوي معااك
تانيرت:كانسمعك ابنتي
غزلان:أحمم بيما أننا بوحدنا بغيت نقول ليك جوابي
تانيرت: اييه شنو قررتي ابنتي
غزلان:(سرطات ريقها) أناا موافقة..
هاد لمدة لي جلسات فيها بوحدها صفاات فيها دماغها وفكرات بلعقل وشافت شنو هي مصلاحتها.. زواجها بمحمد طه هو لحل لوحيد واخا هي مباغاش تزوحو بهاد الطريقة ولكن القدر عندو رأي آخر.. مبقاتش باغا طول الأمر عليها علماتها بقرارها وانساحبات مخلية تانيرت مبتاسمة وهزات تلفونها فلبلاصة دوزات لخط لإدريس لي جاوبها فالبلاصة:تانيرت إينو
تانيرت:(مبتاسمة) تاسانو عندي ليك خباار زوينة
إدريس:شنو هي؟
تانيرت:غزلان عطاتني الموافقة ديالها
إدريس:(تبسم) إوا الله يجعل كلشي مبارك ومسعود خصنا نعلمو العريس تاهو ونفرحوه ههه
تانيرت:اوا علمو وفرحوو ونيت ليوم غاتجي رحيل أو ولد لحاج نهضرو على أمور الخطبة وشنو باغيين يديرو
إدريس:هاد لعام دلعرسااات اتانيرت إينو اش بان ليك نعاودو أنا وياك الزواج
تانيرت:(ضحكات وحناكها حمارو)هههههه حنااا دازت وقتنا اتسانو وهادي وقيتة دولادنا وعقباااال حفادنا ياااربي
إدريس:آمين يالاه نخليك دابا تال لعشية لاخصات شي حاجة صوني علياا واخا
تانيرت:واخا الله يعاون ورد لبال لراسك
قطعات معاه وناضت تاتجمع فين كلات ونيت تشوف اش غاتوجد لعشاا..
---
فلميزون دڤواتيغ كان محمد طه واقف فالبيرو تايطوي صلايتو.. من نهار صلى ليومنا هادا عمرو قطعهاا وعمرو فلت شي صلاة فوقيتة ديالها.. تامن الفجر كيعمر لغڤي وكيصليه عاد كيرجع ينعس.. ودابا نيت شرى صلاية وجابها لبيرو وخلاها باش يبقا يصلي هنا.. رجع جلس فبلاصتو وشد تلفونو لقى باه مصوني عليه وعاود ليه لابيل..
محمد طه:لواليد صونيتي عليا كنت تانصلي مشفتش لابيل ديالك
إدريس:الله يتقباال اولدي كنت غير باغي نعلمك بلي غزلان عطات جوابها لخالتك تانيرت
محمد طه:(نطق بتوثر) لي هو؟
إدريس:(تبسم براحة وفرحة) لبنت وافقات ودابا غايخص نهضرو على لخطبة ولعرس وتفاهمو عليه نتوما بزوج
محمد طه:(مسح وجهو بيديه ونطق بهدوء)واخا الواليد
إدريس:تال ليل ونتفاهمو تهلا
زفر بالراحة وهو حاط تلفونو فوق لبيرو واخا كان متوثر هاد لفترة كلها إلا أنه كان شبه متأكد بلي غاتوافق عليه خصوصا مور مارفضات اليازيد.. مبغاش يفكر فالأمر ويدخل تاني فديك دوامة التفكير لي غاتمرضو عليها فضل يشغل بالو وداكشي لي دار كمل خدمتو وغير وصلات وقيتة دلخروج ناض هز تلفونو وخرج داير يديه فجياب السروال وتمشى لشارع لكبير شد طاكسي ورجع لدار وهو باغي غير يتكى حيت راسو ضرو مع خدم يزاف فالبيسي.. مسافة طريق وكان وصل لحومة نزل ومع دخل بان ليه ريان تاهو يالاه كيسكت مطورو باش يدخلو لگاراج..
ريان:(شاف فيه) جيتي الخو كون علمتيني كون جبتك معايا
محمد طه:جيت فطاكسي
ريان:(سد باب لگاراج وشاف فيه) مالك واش عيان
محمد طه:(حل لباب ودخل) النهار كولو وأنا خدام فالبيسي ضرني راااسي
ريان:الله يشافي
طلعو بزوج ومحمد طه حدو قال السلام بلامايشوف جهة غزلان وكمل طريقو لفوق عكس ريان لي دخل وعنق تانيرت ونطق:زين ديااالي توحشتك
تانيرت:اش باغي تاني هاد الدخلة دياالك عارفة وراها مصلاحة
ريان:اوا اش غانقول ليك نيتك ناقصة الواليدة
تانيرت:(جمعات ليه حناكو بزووج ونطقات بتبسيمة) سير بدل عليك ورتاح راه الليل غاتجي رحيل تعشى معانا ونيت غانهضرو على زواج خوك
ريان:(شاف فغزلان لي حدرات راسها وقال بضحك)صااافي هي نقولو مبروك ههه
تانيرت:اه غير قولها الله يكمل عليهوم بالخير وعقباالك نتا ولبنات لي بقااو
ريان:اووودي خليني سااكت
ناض طالع لفوق وجبد تلفونو دوز لخط لبيساان لي باقي على حالها مكتجاوبوش.. طالق أوت باغلوغ وحط تلفون فوق الطبلة ومشى كيجيد حوايجو باش يبدل وهو يتفتح لخط وجاه صوتها لي نطق بهدوء:ألو
ريان:(ممتيقش بلي جوباتو طار بزربة هز تلفون وحيد لوت باغلوغ ونطق)مون دكتوغ توحشتك
بيسان:(ببرود) شنو باغي؟
ريان:واش باقي مقلقة مني على لكلام لي قلت ليك؟
بيسان:(الصمت)
ريان:(زفر ونطق بجدية)كلامي راه مقصدتوش كيف فهمتيه أنا طبعي هاكا تانتمازح مكنتش ناوي نقلقك ونخليك تغضبي
بيسان:الضحك عندو حدود وكلامك لي قلتي معجبنيش ودابا ممساليااش باش ندوي عندي مايدار
قطعات فوجهو مخلياه كيشوف فشاشة دالتلفون بشوفة جدية.. ندماتو على ضحكوو معاها وهاد لوقت كولو وهو منرفز بوحدو باغي غير تجاوبو ويشرح ليها نيتو من لكلام.. لاح تلفونو معصب وبدل حوايجو وتكى باغي ينعس حسن ليه ونيت يرتاح من لعياا دلخدمة..
ظلام طاح ولگمرة نورات سماها.. لجو ديك ليلة كان مبرد شوية عكس الأيام العادية.. نزلات رحيل من طوموبيل نوح بسروال دجين بوي فرااند مع شوميز بيضا وڤيست بااج سبور طويلة.. حلات لباب لوراني لسيدرا لي نزلات تاهي لابسة عليها قبية فوق السالوبيت حيت جاها لبرد.. مشات تاتجري جهة لباب وبدات تادق ورحيل تابعاها كاضحك.. ضارت شافت فنوح لي جاي جهتها محمل هو وزين العابدين بداكشي لي تقداو.. تحل لباب وغير شافت سيدرا ريان وهي طير عليه:ريااااااني هزززني
هزهاا تايبوسها فحناكها بالجهد تاكتسمع لبوسة وهي كااضحك..
رحيل:(عوجات راسها)عيييو
ريان:عوينات الجلباانة طولتي لغيبة
تحدر باسها تاهي فحنكها بالجهد ودرعها وهي تخشات فيها تاطبطب على ضهرو موحشاااه بزاف..
دخلو جميع لداخل فين كان كلشي مجموع ومعاهوم تاإسلام.. سلمات عليهوم رحيل أوصلات عند إسلام لي مد ليها يديه باش يسلم عليها كيف مولف
مرگات من لموقف وسرطات ريقها تاتشوف يديه لممدودة.. هي ماتقدرش تهرس كلام راجلها وماتقدرش أيضا تفرط إسلام.. وفديك اللحظة جات سيدرا وترمات على إسلام وعتقاتها من لموقف وبزربة مشات جلسات جنب لبنات وهزات عينيها فنوح لي كان حاضيهاا ومع شافت فيه غمض ليها عينو بالخف بحال لاتيقول ليها الله يرضي عليك..
جلسو جميع فالصالة وسيدرا مخشية فجدها تتعاود ليه اش دارت فنهارها وعلى بيتها لي كاين فالريااض.. وكيف عادتها تاتعطيه لخباار وهو كيسمع ليها ومبسم لفرحتها..
فالقنت دالصالة كانو لبنات مجمعين بربعة بشوية باش صوتهوم مايوصلش لبقية.. نطقات أسماء بضحك:غبرك علينا ولد لحاج
رحيل:(ضحكات) ههه غير داك النهار كنت هناا
رنيم:راه مكرهاتش تجيبي راجلك وتسكني معاها هههه
رحيل:اوا صااافي هادشي لبقا ههه اوا قولو ليا كاين شي جديد؟
أسماء:لجديد هو ديك الطحبة لي جالسة ساكتة وافقات على خوك وقريب تاااكل لحلوى بحااالك (كركرات بالضحك)عقباالي اختي راه الرتيلة قرباات تنوض فيه ههههه
رحيل:ههههه الله يمسخك عند بالك الزواج فيه غير داكشي
أسماء:اوا راه لكوى دووى احنينتي زعمة راكي مزوجة وعارفة معنى كلامي
رحيل:(تبسمات وشافت فنوح ونطقات بلاماتشعر) مكدبتيش
طلقاتها أسماء بواحد الضحكة خلاتهوم جميع يهزو فيها لعين وهي مرگات خصوصا قدام نوح حيت كتحتارمو جمعاتها بزربة وبدات تاضحك بسيلونس ورحيل تاتقرص فيهاا على شوهة لي شوهاتها..
متكي نوح على لمخدة ومزول الجاكيط لي لابس تابقا غير بتشورت كحلة مجموعة على دراعو لي حاطهوم فوق المخدة لي مور ضهر إدريس..
نوح:اوا الله يجعل كلشي مبارك اومسعود اسي إدريس والأرزاق بيدي الله
إدريس:داكشي لي كااين الله يسهل عليه بشي بنت النااس
نوح:آمين (تبسم بلخف) اوا هي نوجدو راسنا من دابا ههه
إدريس:ههه يالاه ليوم غاندويو على لخطوبة وقتاش يديروها هي لولة ههه
جابو لبنات الضيافة هي لولة قبل مايتحط لعشا متكية على السداري حيت حسات بشوية دلوجع تاني.. كل واحد فين كان مجمع وريان تاهو مجمع مع زين العابدين لي تايجاوبو بحدود وبالإنجليزية حيت أصلا ريان تاهو شاد لغة بحالو..
رحيل:(شافت فمحمد طه)حددتو نهار لعرس؟
محمد طه:(كلشي سكت كيشوف فيه وهو شاف فغزلان لي سكتات وحدرات راسها ونطق)باااقي
رحيل:وشنو كاتسناو جلسو بزوج وحددو شنو باغيين ديرو راه لقرايا مبقا ليها والو وتبدا وغايجي صعيب على غزلان توجد لعرسها فيامات القرايا غاتشطن وغاتصدق مضيعة العام على والو
إدريس:(شاف فمحمد طه)نوضو جلسو بزووج وتافقو وحطو النقط على الحروف باش تفااهمو
ناض محمد طه وشاف فغزلان لي تاهي ناضت تبعاتو وطلعو لفوق.. الجو كان مكهرب بيناتهوم تاحد ماقدر يبدا لكلام.. هي حادرة راسها تاتحك يديها متوثرة وهو سااكت كيتنهد تانطق بهدوء: نتي شنو باغا؟
غزلان:(شافت فيه ونطقات بهدوء مماثل)مباغاش العرس مكاين لاش منو
محمد طه:علاش
غزلان:هاكا حسن نديرو غير عراضة وصااف
محمد طه:(ببرود)لي بان ليك خلينا نزلو لتحت
سبقها وهو كاعي ومحاملش راسو.. غير دخل وهو ينطق ريان بضحك:ههه مكملتوش خمسة دقايق
محمد طه:(تبسم بزز باش مايفرطش راسو)كاتحسب لينا
رحيل:(تقادات فجلستها)علياش تافقتو؟
محمد طه:غزلان مباغاش العرس وباغا نديرو غير عراضة وصااف
إدريس:(شاف فيها ونطق بحنية)علاش ابنتي مباغاش العرس؟
غزلان:(حسات براسها مزيرة وبصوت خافت نطقات) فيه غير لخسران اعمي مكاين لاش منو
إدريس:ماتهزيش لهم من هاد الناحية نتي لابغيتي نديرو ليك عرس نديروه
غزلان:(سرطات ريقها)عراضة خفيفة باركة اعمي
رحيل:(كانت لوحيدة لي فاهمة اش واقع وبجدية نطقات) اوا الاكان البلان هاكا نديرو لخطبة هاد ليوماين يكون فيها تركاب لخواتم ونهار لاكط نديرو لعراضة كيف بغيتو
تانيرت: يوماين ابنتي قليلة
رحيل:يهديك الله اماما اشمن قليلة لماكلة وداك التخربيق نكلفو تريتور اوا الناس أصلا ماعندناش لعائلة كثيرة (شافت فغزلان وقالت بجدية) نشوفو غزلان على من باغا تعرض ونعلمو الضياف وصافي هاحنا دوزنا الخطبة بخير وعلى خير
أسماء:بصح عندك لحق مغاديش نتعدبو بزاف حيت غير خطبة ماشي عرس يعني داكشي غايكون خفيف
إدريس:مالين الري والشواار اش قلتو؟
محمد طه:(تنهد)واخا لي بان ليكوم
إدريس:ونتي ابنتي؟
غزلان:واخا اعمي
رحيل:اوا لاكاانت هااكاا اجيو ندويو فالمفيد يوماين غاتجي فالسبت (شافت فسيدرا)سيري جيبي لياا ورقة وستيلو فبيتي يالاه امامي
مشات سيدرا تاطير ورحيل تقادات فالجلسة وجرات الطبلة:اييه نقيدو الناس لي غانعيطو ليهوم ونشوفو اش غانديرو فالماكلة نرصيو أمورنا باش مانتخربقووش
ريان:ههه بنتي ليا متحمسة بزاف
رحيل:(ضحكات)اوا شنو راه خطبة خويااا ضروري مانتحمس (جرات محمد طه لي كان جالس حداها وباستو فحنكو وقالت)راه الحنين هو لي غايتزوج ماشي شي حد رخييص عندي..
جات سيدرا جايبة ورقة وستيلو ومداتها لرحيل لي جلساتها فوق الطبلة ونطقات رحيل: اوا بابا على من انعرضو؟
إدريس:(بضحك غامز نوح)كتبي ولد لحاج
رحيل:(هزات عينيها وشافت فباها بضحك)هههه هو مايحتاجش عرااضة ابابا
إدريس:(شاف فنوح ونطق)هانتا لمدام كدافع عليك
نوح:(كيلعب بلسانو ففمو وعينو كيف النسر عليها وبصوت تقيل نطق) الله يخليها ليا
تزنگات رحيل وهبطاات راسها حشمانة وأسماء تاتغامز مع لبنات حابسين الضحكة.. قيدات الضياف لي كانو قلال منهوم عائلة نوح المقربة أو ومت إسلام وزوج صحبات غزلان وطبعا ببات وممات جيداء لي ضروري مايكونو حاضرين معاهوم.. قادو الأمور ديك الليلة بناتهوم وتعشاو عاد ناضت رحيل هي ونوح وزين العابدين أما سيدرا فبغات تبات عند جدها وخلاتها رحيل براحتها..
----
يوماين دازت طايرة فالتوجاد واخا الخطوبة كانت عائلية وفيها لمقربين فقط الإأن رحيل بغات دير لخوها وغزلان خطوبة زوينة لي تبقا فبالهوم.. كانت رحيل نازلة بعباية ديالها واسعة وفولار أو وجهها مافيه تانقطة دلمكيااج.. عينيها على ديك الجلسة لي كانو تايقادوها البنات وطبالي لي كانو ربعة وجامعين الرجال ولعيالات حيت قلالين.. شافت فتلفونها لي كيصوني كان نوح جوباتو بسرعة:وي فينك؟
نوح:(مكمش حجبانو وعينو على شيلان رحيل لي مستفين فالدريسينغ وقال بجدية) اشمن زيف قلتي نجيب ليك؟
رحيل:(حكات جبهتها) قلت ليك لفولار لبااج
نوح:(تايقلب وهو مكمش حجبانو ونطق ببرود)ميات ألف زيف ونصهوم بااج باش غانعرفو؟
رحيل:(ضحكات)هههه أويلي واش لهاد الدرجة ماعرفتيهش؟
نوح:(جر واحد غير قمر فيه ونطق بهدوء) غانجيب ليك واحد كيفما بغا يكون لبسيه
رحيل:صورو ليا وسيفطو فالواتس نشوف واش هو نيت وغايجي ليا مع القفطان
دوز أبيل فيديو وجاوباتو فلبلاصة لقاتو مكمش حجبانو ونطق بهدوء:هاهو
قلب ليها لكام وهي شافتو لقاتو ماشي هو لي قالت ليه ونطقات بضحك:ضور جهة لفولارات نوريه ليك
نفد هضرتها وهي كمشات حجبانها تاقشعاتو ونطقات:هاداك لي حدا لمارون
نوح:(حط عليه يديه)هادا؟
رحيل:اييه هو على سلامتي
نوح:(قلب لكام ونطق بجدية)اشمن قفطان غاتلبسي صوريه ليا نشوفو؟
رحيل:(قلبات عينيها فبلاصتهوم ونطقات بسرعة)غايخصني نقطع ماما تاتعيط ليا بيزو تاتجي
قطعات بزربة وهي تاتسوط وتحمد الله حيت صدراتو قبل مايشوف اللون والقفطان ويصدق محرمها عليها كيف دار قبل.. كملو توجاد وغير وصلات لوقيتة مشات كل وحدة لبيت توجد راسها..
---
وصل نوح هو ولعائلة ومعاهوم تاسناء أما شيماء مجاتش.. هاز بين يديه صويك فيه داكشي لي طلبات منو رحيل يجيب ليها ودخل لدار لي كان بابها محلول والعائلة وراه.. سلم على إدريس لي استقبلو فالباب ودخلو بزوح وعينو تاتقلب عليها مابانتش ليه عرفها غاتكون تاتوجد راسها.. قشع سيدرا لي كانت تاضور بقفطان جوهارة على قدها وطالقة شعورات ودايرة عكر.. تبسم وتحدر هزها وهي عنقاتو ونطقات بتبسيمة:جيت زوينة ماي بلو آيز ياكا؟
بدات تاتسبل عينيها عاجبها داك شوية دلمكياج لي دارت ليها أسماء وهو مد صبعو ومسح ليها لعكر ونطق بهدوء:هاكا حسن ابابا (باسها فحنكها) فين ماماك
سيدرا:فلبيت عند غيزو
نوح:(حطها ومد ليها الصاك ونطق بجدية) عطيها لماماك يالاه سيري
مشات تاتجري طلعات لفوق وهو مشى جر كرسي وجلس جنب إدريس وأب جيداء لي وصلو ليوم وجاو يشاركوهوم فرحتهوم كيف مولفين ديما..
فالفوق كانو لبنات ضايرين على غزلان لي ساكت وعاطية وجهها لأسماء تقادو ليها وتفننات فالمك اب وطلعاتها غزالة.. أما رحيل تكلفات بالشعر دارتو ليها بوكل وجمعاتو ليها بمشيطة مرخوفة ودارت ليها خيط الريح فلون الموڤ على لون تكشيطة لي لابسة.. كانت تاتشوف فالمرايا وفرحتها ناقصة.. بصح كانت تاتسنى هاد النهار ولكن ماشي هاكا.. تبسيمة كانت طافية فوجهها وملامحها لي باين فيهوم لحزن.. جابت سيدرا الأمانة لمها ورجعات تاني عند نوح ولبنات نزلو لتحت مخلين معاها غير رحيل فقط.. كانت تاتسنى الفرصة لي تستفرد بيهاا باش تهضر معاها وغير مشاو لبنات شدات يديها ونطقات بهدوء:غزلان شوفي فياا (شافت فيها غزلان وكملات رحيل كلامها) داكشي لي داز نسايه ماتخليهش يخسر نهارك وفرحتك نتوما عرفتو غلاطكوم وهانتوما كاتصححوه دابا.. حاولو تبداو حياة جديدة ونساو كلشي نتي ومحمد طه باش تقدرو تعيشو مرتاحين..
غزلان:(تاترمش بعينيها باش تحبس بكيتها) عارفة ارحيل بلي هاد الزواح غير بااش نصلحو الغلط وبلي كون ماوقع داكشي بيني وبينو عمروو غايكون أصلا أنا وافقت حيت مكاان عندي تاشي حل خر وأنا عارفة بلي تاحد مغايقبل يتزوج بوحدة غلطات مع واحد.. كاانحس براسي مجبوورة على هاد لخطبة وأنا مفرحااناش بيهاا وكل مرة تانقول ياريت كون غير قبلت باليازيد كنت على الأقل مغانطيحش فهاد الغلط لي ندمت عليه حياتي كلها..
مالقات ماتقول رحيل وفضلات تسكت حيت عارفة غزلان مدمرة داخليا وتاكلام مغاينفع معااهاا.. تبسمات ليها ومشات تقاد فولارها ودير آخر لمساتها تاسالات وهي تشوف فراسها بداك لقفطان لگرونة لي جااهاا زوين وطويل مع فولار بااج على لون الخيااطة ومك اب خفيف فيه غير آيلاينر وريسيل وعكر.. جات زوينة ولون جا مع بشرتهاا.. هزات تلفونها وشافت مساجات نوح لي سيفط ليها 📩"فينك؟" والثاني فيه "صوري ليا نشوف اش لابسة؟" عضات على شنافتها ودارت راسها ماشافتش لمساجات باش ماتصورش ليه حيت عرفاتو لاشاف لقفطان مغايعجبووش حيت جااها على فصالتها تقول مخيطينو عليها وهي عارفة مغايعجبوش لحاال وغايدير ليها كيف دار فبلان الجلابة.. بقات مع غزلان لي كانت جالسة وساهية تاااجات عندها أسماء ونطقات بتبسيمة:هاهوو العريس جااا
وقفات غزلان بتوثر وداخلها فيه تنااقض كبير هي براسها معرفااش تفسرو.. فرحانة حيت خطوبتها غاتكون مع لي بغا قلبها ومفرحاناش حيت عارفة بلي طلب منها الزواج غير بااش يصحح الغلط.. قادات ليها رحيل تكشيطة لي لابسة وسبقاتهوم وموراها أسماء ورحيل ورنيم كيصليو على النبي.. منزلينها وهي كلها تاترعد.. جايبين ليها مصور لي يصور الخطوبة وتاديدجي لي منشط الطرح وهادشي هي معرفااش عليه.. تضهشرات وبزز باش رسمات تبسيمة وهي داخلة لصالة فين كان جااالس بسروال دجين وشوميز مكلفش راسو نهائيا أنه يلبس لكلااص وكان عااقد تغوبيشة تقول جايبينو بزز.. مادققاتش فيه حيت حشمات وحدرات راسها ورحيل شدات يديها موصلاها لعندو وهي راسمة ضحيكة خفيفة.. جلساتها جنبو تاتقااد ليهاا تكشيطتهاا وشدات يديها شبكاتها مع يديه وهو شاف فرحيل لي غير بلعينين هضرات معااه.. قلب عينو ورحيل رجعات لور وضارت شافت فنوح لي كاانو عينيه عليها غير هي.. ضارب فيها واحد التخنزيرة خلاتها ترعد فداخلهاا.. أما هو مع سمعو صوت التعاشق كمش عينو وقلع صوتهاا ومع دلك مضاارش وكلشي وقف وهو بقاا جالس تابانت ليه لالة ومالي بداك لقفطان لي مفصلها وكملاتها بالطااالون.. تعصب وشعلات فيه ناار لغيرة وضاار جهة الرجال لي معاه فالطبلة وشاف ياكما شي حد شاف فيها واخا راه مكاينش شي واحد براني وكاين غير جدو وببات جيداء وإسلام وريان فقط.. حك لحيتو وحط عليها لعيين وماتسوق لالعرساان لاتاحاجة باغي غير تشوف فيه ودابا عاد فهم علااش السيدة مبغاتش توريه اش غاتلبس وفاش سيفط مساج مجاوباتوش.. بقا جااالس كيزعزع فرجليه تابانت ليه شافت فيه وهو يخنزر فيهاا وحرك ليها راسو بمعنى تبعيني.. ناض خرج من الصالة ورحيل سرطات ريقها وتبعاتو.. طلع فدوك زوح درجات تابانت ليه جايا أو وقف كيشوف فيها وهي تقول بخفوت:نعام؟
نوح:(بصرامة)طلعي
تخطاتو وطلعات هازة جلايلها وهو عينيه على مؤخرتها وكلما تحركات كلما زاد شعل من فكرة أن شي راجل خر تيشوف فيها بنفس الشووفة.. طلعو لفوق ودخلات رحيل لبيتها وغير دخل سد لباب وجرها لعندو مخلي ضهرها يلصق مع لباب وبصوت هامس كالفحيح نطق: اش هاد لمرض لابسة؟
رحيل:(سرطات ريقها) قفطان
نوح:(هز فيها حاحبو وقاال بخشونة) وايلي مكنتش عاارف الفثنة (خنزر فيها) واش تاتبوهلي علياا
رحيل:(مدات يديها وحطاتها على عنقو ونطقات بخفوت) والله مكنتبوهل شوف راه القفطان طوويل وممزيرش
نوح:(حاجبو طالع تال سما باين فيه معصب) ممزيرش غير مفصل فورمتك كيف نتي (تحدر عندها تاقاس نيفو نيفها ونطق بهمس باح) نهار العراضة فالفيرمة اش قالت ليك على ديك الجلابة لي كنتي باغا تلبسي؟
رحيل:(تكمشات فبعضها)قلتي مزيرة
نوح:المعنى؟
رحيل:( باغا تقنعو وربي كبير ) والله مامزير هانتا شوف
تاتوريه لقفطان وهو أصلا راه شايف لي بااغي واخا تعيى ماتهضر مغاتبردش الفقصة والغيرة لي شعلاات فيه..
نوح:(تقاد فوقفتو ونطق مغدد) غانزلو وغاتركني فبلاصتك وبرب ونلقااك مقلزة ليا فشي قنت ياتنصدق مقوددها معااك الفثنة
رحيل:(حركات راسها باه ونطقات بخفوت)واخا غانمشي لحمام هو لول
خرجو ومشات لحمام وهو فيما يشوف فيها يتغدد.. خرجاتو على طوعو وكان كيتسناها تاصونى عليه إدريس كيقلب عليه لدلك نزل نوح سبقها مخليها تاتبعو.. خرجات رحيل من لحمام وزفرات النفس فاش مالقاتوش ونطقات بصوت هامس وهي هابطة لتحت: عمري شفت شي واحد مغياار بحالو
وصلات لطبقة الثانية وتلقات مع إسلام لي تبسم ليها وهي تبسمات ليه وبغات تخطاه ساعة نطق:رحيل
رحيل:وي
إسلام:باغي ندوي معاك فواحد لموضوع متعلق بأسماء
رحيل:خبار الخير؟
إسلام: هههه كل خير ماتخلعيش غير ناوي نشري ليها طوموبيل
رحيل:مافهمتش علاش اتشريها
إسلام:من بعد ونشرح ليك بالتدقيق مهم باش تكون لخبار فراسك حيت غانبغيك تعاونيني واخا
حركات راسها باه على مضض وإسلام تبسم ليها وبعفوية حط يديه على كتفها كيف مولف ونطق:الله يحفظك
رحيل:العفو
مع ضارت رحيل بان ليها نوح لي كان واقف كيشوف فيهوم بشوفات كيف لقرطاااااس..
الغيرة دايرة بحال سم كاتبقا تقتل فيك بلمهل.. عينيه كانو كيف القرطااس وهو مخنزر فيهوم بزوج ورحيل دوك الشوفات ديالو خلاوها تفافا فبلاصتها وباين بلي غايكون شاف يد إسلام فاش حطها عليها.. قرب جهتهوم بخطوات سريعة وهو عاقد غوباشتو وباين فيه كاااعي.. وقف حداها ونطق بصوت قوي: ياك لبااس؟
إسلام:(حك راسو والجو حس بيه متوثر ونطق بصوت هادئ كيبرر ليه) ولد لحاج جابك الله كنت كانهضر مع رحيل وعلمتها بلي ناوي نشري طوموبيل جديدة وبيما أنك جيتي نيت ندوي معاك نتاا غاتنفعني كثر
نوح:(هز حاجبو وقرب جهة رحيل وحط يدو على دراعها.. نفس داك الدراع لي حط عليها إسلام يديه وجرها عندو تاخشاها فيه ونطق ببرود) دوز عندي لميزون دڤواتيغ وختار طوموبيل لي بغيتي
إسلام:الله يحفظك شكرا
نوح:(حرك راسو وكمل كلامو بنبرة جادة وعينو فقلب عين إسلام) العفو المرة الجايا لاكنتي باغي شي حاجة اجي عندي نيشاان
كلامو فهمو إسلام وحرك ليه راسو بالإيجااب وانساحب وهو حشمااان من الموقف لي تحط فيه.. وبيما أنه راجل فمغاديش ياخد موقف من كلام نوح لي وصل ليه بطريقة غير مباشرة أنه معجبوش لحال فاش وقف ليه مع مرتو ومن حقو وتاهو فهم راسو.. حك إسلاام لحيتو وجلس فبلاصتو وهز عينو فمو لي جالسة مع النسا تايهضرو عاد قلب عينيه لجهة أسماء لي حاطة الراس هي ورنيم ودودو بالهضرة ومرة مرة يشوفو فغزلان ويضحكو.. دقق فيها مزيان والمك اب لي دايرة ولي كان خفيف فعينيها عكس شفايفها لي مصبغاهوم بالحمر.. ربع يديه وبقا حااضيها ومانزلش عينو وهي مكيناش هناا ومتسوقاتش ليه نهائيا بلعكس السيدة شابعة تصاور هي ورنيم وجات عندهوم تاسيدرا وجلساتها معاها وبدات تاتخرج شفايفها وتقلد فأسماء وتعوج تم وأسماء تاتموت بضحك.. تاهزات عينيها بالخطفة وجاو فقلب عينيه.. كان تايدير فيها شوفات فشكل خلاوهاا تستغرب منو.. وبزربة قلبات شوفتها عليه وهي باقا مكمشة حجبانها ومستفربة من ديك الشوفة لي دار فيها ولي حركات فيها شي حاجة من لداخل هي مباغاش تحس بيها..
وفالجانب الآخر كانت سناء بحال الاجالسة على الشوك.. من نهار فتحات موضوع الزواج داليازيد وقمعها نوح ديك لقمعة معاوداتش جبدات لهضرة عليه.. وملي رحيل قالت ليهوم شكون لي خطب هي مكانتش وغير بيسان ورحمة لي عرفو شكون ومقالوهاش ليها وتاهي ماسولاتش حيت كرامتها مسمحاتش ليها تمرمد كثر من هاكا.. كانو عينيها على أسماء ورنيم وتاتسائل شكون فيهوم لي خطب وبحكم أن ليوم خطوبة غزلان فحيداتها من بالها ومافكراتش فيها وبقا ليها زوج احتمالات ياأسماء يارنيم.. ولكن عقلها رشح ليها أسماء حيت رنيم بانت ليها باقي صغيرة وأكيد اليازيد مغايديش وحدة قد بنتو عكس أسماء لي تتبان كبيرة وبعقلها وزوينة.. خنزرات فيها وهي تاتخيل اليازيد مزوج بيها راه الحرارة شعلات فيها والغيرة بغات تقتلها وترجماتها بشوفاتها المفضوحين.. لدرجة أن رنيم عاقت بيها حيت جات أونفاص معاهاا..
رنيم:(تحدرات عند أسماء ونطقات بهمس) بلافرطة خالة ولد لحاج كاتشوف فيك بشي شوفات كيف لقرطاس تقولي سارقة ليها الراجل
أسماء:(رجعات شعرها لور وتبسمات ودوزات شوفاتها عليهوم بلاماتعيق) لاهي ولاديك لقح*بة لي تاتكون معاها سبق ليا لاحظت شوفاتهاا لرحيل تاهي وصراحة مافهمتش علاش
رنيم:(تاضحك وتهضر باش ماتفرطش راسها) سبق تاأنا لاحظتها المهم ماتسوقيش ليها وشوفي فخووك تقولي حاطين ليه سيف على رقبتو وجايبينو بزز مكيضحك ماوالو وتاغزلان بانت لياا بحاال الامقلقة
أسماء: اوا اش غانقول ليك ماعرفتش يقدر يكونو تناقشو بناتهوم
رنيم:ماشي غير ليوم لاحظتها تافاش تانكونو بوحدنا أنا وياهاا وبعض لمرات تاضربني لفيقة تانسمعها تاتبكي فالليل ولكن مكانقدرش نسولها مالها حيت غير كانتحرك وتاتقطع لحس
أسماء:(تنهدات)يقدر تفكرات واليديها وعائلتها داكشي علاش راه صعيب تخطبي واليديك ميتين
رنيم:(حركات كتافها بأسف) هادي هي سنة الحياة تاحد مالقاها كيف بغاها
أسماء:(شافت فطبلة دالرجال ورجعات شافت فرنيم) المسخوطة درحيل مبانتش ليا لاهي ولاولد لحاااج
رنيم:هههههه حاضية معاهوم
أسماء:هههه واشنو اتلقاااي السيد مباغيش يطلقهاا وعجباتو فالقفطااان ههههه فاش كريناهوم گاعما بغات توريه ليه هههه
تبسمات ليها رنيم ورجعو كيشوفو فغزلان ومحمد طه لي كان عاقد حجبانو وباين فيه معصب.. كل مرة يتحرك فبلاصتو تقول شي حاجة كاتنغزو ويزير على يديه لي شاد بيها يد غزلان لي جالسة حداه وساكتة ومرة مرة تبسم باش ماتبينش بلي كاين شي حاجة.. يديها حسات بيها كاتوعتها وهو محاسش براسو فاش كيزير عليها.. اليوم خطوبتها من لمفروض أنها تكون أسعد وحدة حيت غاتزوج بحبيب لقلب.. ولكن الحزن مع الأسف طغى على فرحتها..
غزلان:(تبسمات ونطقات بخفوت بلاماتشوف فيه) زيرتي ليا على يدي
محمد طه:(نزل عينو وشاف يديها حمارت وعاد عاق براسو ونطق ببرود) مارديتش لباال
غزلان:(باقي مبسمة)ماعليش
محمد طه:(عينو على ضياف وبنبرة قاصحة) عاجبك لحاال ياك؟؟
غزلان:(نطقات بخفوت) مافهمتش اش كتقصد؟
محمد طه:(قرب جهتها تاوصل جهة ودنيها ومال عليها شوية ونطق بهمس خافت وحجبانو معقودين) هاد الزواج مبزز عليا كيف مبزز عليك وديري فباالك اغزلان بلي عمرك مغاتوصلي لقلبي عمررررك..
حسات بغصة فقلبها وعينيها دمعااات وباش ماتنزلش دموعها عضات على شفتهاا ومضارتش جهتو ولاشافت فيه.. بقات جامدة وقلبها كانت تاتحس بيه كيبكي الدم.. كانت أصلا مدمرة وعلى سبة وبكلامو لي قال دابا زادت تأكدت بلي هو بصح مباغيهاش وكيدير غير لواجب وكيصحح غلطو وصاف.. مارجعاتش شافت فيه ومارجعاتش نطقات ولاجاوباتو أما هو رجع بلاصتو وهو كيرعد رجليه مغدد.. كلامو لي قال ليها مكانش طالع من قلبو.. كلام قالو باش يرجع بيه كرامتو ورجولتو لي حس بيها تهانت بسبابها..
🔙🔙
ملي فاق صباح دوش وخرج هو وريان غاديين عند لحسان.. كان عامر عليها سبق ريان هو لول وغير سالى صونى عليه باه ومشى مخلي محمد طه جالس فبلاصتو كيوري لحسان كيفاش باغي تحسينة.. نص ساعة وكان سالى خلصو وخرج غادي زربان باش يمشي يدوش ويبدل عليه.. وصل لدار لقى لباب محلول.. دخل نيشان طلع لفوق وتلاقى بأسماء هي ورنيم لي قالت:واسربي العريس راه النااس بداو يجيو
محمد طه:عشرة دقايق وهاني واجد
طلع لطبقة لفوقانية وتمشى جهة بيتو باش ياخد حوايجو لي غايلبس وقبل مايدخل لبيتو ضار شاف فباب بيت لبنات.. كاين شي كلام باغي يقولو لغزلان.. كلام كان مخبيه هاد لمدة كلها وجا وقتو.. يمكن ظروف الزواج كانت مغايرة ولكن مغاينكرش أنه باغي هاد الزواج ماشي باش يسترها لا حيت هو باغي يتزوج بيها.. حيت هو ولى تايحس بمشاعر جهتها ولي مبقاش قادر يتحكم فيهوم.. هي مهمة عندو وباغي مصلاحتها وباغي فرحتها.. مباغيش تبقا مقلقة عليها قرر يهضر معاها هو لول.. يوضح ليها بلي هو باغيها كمرا ليه وبلي هاد الزواج غايدوم تايدي مول الأمانة أمانة واحد فيهوم.. قرب جهة لباب ومع مد يديه لبواني وحل بشوية بلامايدير لحس وصلو صوتها وكلامها لي جمدوه بلاصتو مخلينو حال عينيه فالأرض كيسمع لكلام لي كان تيغددو من لداخل.. وخصوصا ملي جبدات سمية اليازيد هاديك كانت بالنسبة ليه النقطة لي فيضات لكااس.. ماشي أول مرة تقول هاد لكلام سبق قالتو نهار جاها الانهيار وهو قال مع راسو ماعليش كانت معصبة ومعرفااش اش تتقول.. وتكرر تاني نهار رجع باه وتانيرت من السفر ومع دلك ماقال ليها والو وسكت ولكن هاد لمرة كلامها جرحو بزاااف.. بينات ليه أنها مجبورة على زواج ومفرحاناش حيت غاتزوج بيه وهادي بالدات راه مرضااتو.. رجع بلور وهو مزير على يديه وقلب طريقو لبيت وسد لباب ومجرد مطاحت عينو على لكوستوم لي حاطين ليه فوق النموسية وهو يصعر وهزو ضاربيه ولايحو الأرض وعفس عليه ممسوقش.. كان مغمض عينيه كيكالمي روحوو دقائق وخرج لحمام وحدو غسل راسو تحت روبيني وعنقو على قبل الزغب لي لاصق ليه فيه ورجع لبيت بكل هدوء هز سروال دجين وشوميز ومكلفش راسو تاأنه يشوف فالمرايا حدو رش ريحتو ولبس ساعتو وسبرديلتو ونزل لتحت داخل لصالة ولبنات غير شافوه بداو يضور عينيهوم ومالقاو مايديرو من غير يصليو على النبي وهو جلس بلاصتو مبعد ماسلم على الرجال وأسماء طارت لعند غزلان ورجيل تعلمهوم بلي لعريس جاا..
🔜🔜
معاودش شااف فيها كيف تاهي معاوداتش ضارت عندو كل واحد فيهوم كيتبسم تبسيمة صفرا وكل واحد فيهوم حاس بمشاعر جهة الثاني ولكن سوء التفاهم لي طرا بناتهوم خلى كل واحد يجرح لاخر بكلامو..
ملي حط يدو على كتفها وهي حاسة بصباعو شوية ويتقبو جلدتهاا بقوة ماورك عليها.. مانطقاتش كانت فقط تاتسمع كلامو لإسلام وكدعي الله مايوقعش شي مشكيل بيناتهوم وخصوصا سبق ليه نبهها أنه ماتسلمش معااه وهو راه ماشي غير سلم هو راه حط يديه گاع عليهاا.. بالنسبة ليها هي عادي حيت ولفاتها فيه بحكم هاد السنين لي عاشوها مع بعض وعلاقتها هي وإسلام قواات ولى بحال خوها وزيد المشاكيل لي عاشو بزوج خلاتهوم يفهمو بعضياتهوم.. بالنسبة لشي حد غايجيه لوضع عادي ولكن نوووح أبداا واش عندو عاادي وغيرتوو من إسلام باينة قبل گاعما يتزوج بيها حيت شاف كيفاش هو كيتعامل معااهاا وعمرو تنسى ليه ليد لي حطها عليها فاش كانت كاتلبس النقاب وكيفاش كانت كاتكشف وجهها ليه وهو ماشي من محارمهاا ونوح من النوع لي مكينساااش.. فاش نزل إسلام وخلاهوم بزوج هي ترعدات بين يديه طلعات راسها ويادوب لمحات فكو لي كان مطرااسي ولي مبين أن السيد شوية ويتفرگع عليهاا..
رحيل:(بخفووت)نوووح
نوح:(هبط عينو وخنزر فيها ونطق بصرامة) هاااد الساااعة مباااغيش ندوووي حيت لادويت غانصدق غير مبكيك وأناا مباغيش هادشي
طلق منها وقلب الطريق طالع لفوق مخليها واقفة فبلاصتها.. باغا تبعو وتشرح ليه اش كاين باش مايفهمش الأمر بطريقة عوجة ومن جيه خايفة من ردة فعلو.. حطات يديها على حنكهاا ونطقات بصوت خافت: ااااش هاد الزهر عندي تفووو
قلبات الطريق ونزلات لتحت ومع وقفات قدام باب الصالة وهي تبسم بزز باش ماتخلي حد يعيق بااش طااري وبلي هي وياه مناقشين.. جلسات جنب البنات تاتبسم ليهوم وعقلها معاه غير هوو لي كان فهاد الأثنااء واقف فالسطح مخلي الهوى يضرب فيه عالله وعسى يطفي ديك العافية لي شعلاات فيه دلغيييرة.. كانت يديه ليسرية كلها تاترعد عليه وهاكا تايوقع ليه فاش كايتعصب بزااااف.. عليها سكتهاا وانساحب حيت عااارف راسو فاش تايتعصب كيكايكون وعارف لابقااات غايصدق داير شي بلااان لي مغايعجبوووش هو لول عاد هي.. كيغزز شفايفو بسنانو ويحك يديه على وجهو وصورتها واقفة مع إسلام وحاط عليها يديه رااااه مرضاااتو وصعرااتو.. داك النهار قال ليها ماتبقااش تسلم عليه وبين ليها أنه مكيبغيش يشوفها معاه ومع أي راجل كيفما بغى يكون من غير خوتها بزوج وباهاا فقط.. زير على عينيه وبدا تايحل صدايف لاشوميز لفوقانين مخلي عنقوو يتهوى.. جر واحد الكرسي تمااا وحدر راسو كايتنفس بالجهد ويديه راه باقي تاترعد عليه ومبغاتش تهدا.. تايغمض عينيه بالجهد ويرجع يحلهوم..
نوح:(تمتم بصوت هامس)أستغفر الله العلي العظيم
بقا تايستغفر فنفسو عالله يبرد شوية.. تاسمع صوت الأدان مع الجامع كان قريب ليهوم.. هز راسو لسما وبقا ساكت تايسمع الأدان لي جاي من الجامع ومن تلفونو تاهو تاسالى وناض غادي يصلي.. نزل لتحت وتلاقى فطريقو إدريس ومعاه بات جيداء والبقية وتامن محمد طه غادين يصليو وديدجي حبس لموسيقى..
إدريس: ولد لحاج غادي لجامع
نوح:(بصوت مبحوح) اه
خرجو كاملين سادين لباب ومخلين لعيالات ورحيل جالسة غير تاتسوط تقولي جالسة على الشوك.. ناضت غادة عند غزلان لي جالسين معاها البنات تايهضرو معاها شوية وتاصحباتها بزوج ويتصورو وهي راه ربي لي عارف حالتها... تصورات معاها رحيل من تلفون أسماء وناضت خارجة من الصالة غادة تبدل عليها.. دخلات لبيت وهزات أولويز من صاكها ومشات لحمام بدلات ورجعات لبيت أسماء تاتحل فالفولار لي لابسة وقلعات داك القفطان لايحاه بعصبية: ختاريتك بالشهوة وفلخر جبدتي ليا غير الصداااع يييخ على نحس..
مشات لبلاكار أسماء تاتشوف لقفاطن لي عندها واخا عاديين ديال الدار.. كاين جوهارة ولكن هي بعدات عليها حيت جوهارة كاتبين وهي ماناقصها صدااع معاه.. تحل عليها لباب وكانت أسماء لي داخلة..
أسماء: علاش زولتي قفطاانك؟؟
رحيل:مبقاش عاجبني غاناخد شي واحد من عندك ونلبسو
أسماء:تسنااي راه كنت كريت زوج هاهو الثاني حاطاه هنا گاعما حليتو لبسيه لابغيتيه..
رحيل:أراي نشوفو بعدا
هزات ديك البلاستيكة لي تايدارو فيها لقفاطن وحلاتها وبان ليها لونو زوين عجبها بحال لمارون غادي لموف.. هزاتو ولبساتو وااسع من لتحت والاهم مكيبينش لفورمة حيت تقطيعتو واسعة وفيه زواقة من جهة الصدر فجهة وحدة نازلة وجهة التانية فوق لكتاف ويديها مجموعين وفيه لعقادي وجنابو فلتحت تاهوما فيهوم زواقة .. حزماتو بحزامو ودارت نفس لفولار جاها زوين وتالون جاا مع لون بشرتها..
أسماء:اوه جااك زوووين تاهادا
رحيل:كون عرفتو عندك كون لبستو هو وهنيت مخي
أسماء:علاش ؟
رحيل:غير مارتاحيتش فلاخر وصااف
مبغاتش تقول لي كاين حيت داكشي شخصي بينها وبين راجلهاا.. نزلو لبنات لتحت ولقاو رجال رجعو من الجامع والموسيقى تطلقات.. ومع دخلات عينيها بداو تيقلبو عليه مبانش ليها وتاسيدرا مكيناش تماا.. تحدرات عند إدريس ونطقات بهمس:فين سيدرا؟
إدريس:داها ولد لحاج معاه
حركات راسها ورجعات بلاصتها جلسات ورنيم وصحبات غزلان مجمعين وكلشي شكر ليها لقفطان وبلي لون جاها زوين وجاا معاها..
واقف قدام البقاال وهاز سيدرا لي تاتعزل وتخيير اش باغا تاخد تاعمر ليها لبقال لخنشة بالسقاطة وجبد نوح خلصو وهز لخنشة عاطيها ليها وهي هازاها وعينيها تايخرجو منهوم لقلوبة فرحانة.. باستو فحنكوو ونطقات بصوتها البرئ: ماي بلوو آيز حبيبي شكرا
تبسم ليها نوح وباسها فحنكها تاهو ومع دخلو لحومة بانت ليه طوموبيلة رؤوف وهو نازل منها.. قرب جهتو تاوقف حداه وتارؤوف غير قشعو وقف تايتسناه
نوح:(بنبرة هادئة)ياك قلتي مغاتجيش؟
رؤوف:جاني لملل وقلت نجي نشوف الأجواء كيف دايرة عندكوم
قربو جهة باب دار ونزل نوح سيدرا لي بدات تادق تاحل ليهوم ريان ودخلات تاتجري نيشان عند رحيل وحطات ليها ديك لخنشة فحجرها ونطقات بحماس:مامي ماي بلو آيز شرى ليا حلويات بزاف شووفي
تاتوريها ورحيل هزات عينيها فيه بان ليها داخل مع خوه.. كايبان مهدن على قبل وديك التكميشة دلحجبان مبقااتش.. هز فيها تاهو عينيه ودقق فيها مزيااان عاد رجع جلس جنب إدريس..
رحيل:(شافت فسيدرا)خودي غير شوية وأراي نخبي ليك داكشي لاخر
سيدرا:(بدات تاتعزل)ناخد مسيكة وطوفيطاات
رحيل:ماتكتريش راه لحنيشاات عوتاني
هزات ليها أسماء مسكة وتارنيم وسيدرا هزات ديك لخنشة ومشات عند تانيرت تاهي مداتها ليها باش تاخد لي بغات وضارت عليهوم كاملين كاين لي خدا كاين لي تبسم ليها وباسها.. من صغرها ولفها إدريس ورحيل هاد لقاعدة.. حاجتها تفرقها مع غيرها ومامسموماش فهاد القضية بلعكس تكون تتاكل شي حاجة وتجي دوقك وتوكلك.. رجعات عند رحيل عطاتها داكشي لي بقا باش تخبيه وهي مشات عند محمد طه وغزلان.. تحنى محمد طه وهزها وجلسها فوق ركبتو وهي بدات تادوي معاه بشوية ودوقاتو تاهو...
كانت الخطبة عائلية وكل زوج تاتلقاهوم مجمعين مع بعضياتهوم ورجال خلاص هادوك فعالمهوم لخااص..
كاضور جهتو وتاتشوف فيه بنص عين بان ليها جالس متكي على الكرسي وتيلعب بكاغيط المسكة فيديه ومرة مرة يهز راسو ويجاوب إدريس لي جالس جنبو.. محملاااتش راسها فديك اللحظة حيت عصباتو واخا مكانتش قاصدة ملي خدات داك لقفطان مقالتش مع راسها راه مغايعجبووش ولاغايجيه مزير حيت هي شافتو بالنسبة ليها عادي وعجبهاا وفاش طلب منها تصورو ليه مبغاتش وخلاتو زعمة تايشوفو وهي لابساه.. وهاهي ندماات على نهار حطات عليه لعين وكراتو وكون عرفات غايطرى هادشي كون بقات بعبايتها حسن ليها من هاد الزمر كولو.. أما موضوع إسلام هاديك حريرة خراا مبغاتش تفكر فيها واخا عارفة بلي جاي من وراها واحد لغضبة من عندو بحال ديال ديك لمرة.. غير تفكراتها نفسها ضياق عليها وهزات تلفونهاا وكتبات ليه مساااج وغير سيفطاتو ضارت جهتو وبان ليها هز تلفون ورجعات ديك تكميشة دلحجبان وهو محني تايقراااه بتركيز
رحيل 📩 "ماباغاش تقلق مني انوح والله ماقصدت نعصبك القفطان فاش قيستو جاني عادي وااسع مكنتش عارفة بلي مغايعجبكش ومكانتش عندي نية خرى والله "
عض على شفتو بنابو وبدا تاهو كيكتب تاسالى وحط تلفون على وجهو فوق الطبلة ورجع لجلستو وعندها هي غير شافت إشعار المساج وهي تقفز وتكات على لكرسي باش تاخد راحتها..
نوح 📩 " كاتبوهلي علياا ولاشنوو؟ مشايفاااش بلي داك لخراا مزييير عليك كنتي حيديه وتمشاااي عريااانة حسن لاااش لابساااه "
رحيل:(عضات على شفتها ومن جوابو بان ليها راه باقي معصب وكتبات ليه بتبرير) 📩 وراه قلت ليك فاش جربتو جاني هو هدااك والله ماجاني مزير معرفتش علاش قلتي مزير وكلشي شافو عجبوو وقال ليا جاك زوين"
نوح:(قرى لمساج وبدا كيرعد رجليه وهز حاحبو فالسما تايسوط) 📩 "شكون قال ليك زوين؟؟"
رحيل:(عضات لسانها ونطقات بخفوت)جيت نكحلها وأنا نعميهاا (كتبات ليه) 📩 " والله تاغير لبنات وماما"
جات عندها السرباية وتحنات جهتها سولاتها على شي حاجة ورحيل ناضت معاهاا وهو ضور راسو وتبعها بعينيه تاغبرات من قدامو وتحنى جاوبها على لمساج ولاح تلفونو وشاف فإدريس وبدا تيدوي معاه..
واقفة رحيل مع السربايات لي كانو تيوجدو لعشا حيت غايتحط داباا هو لول عاد غايديرو تركاب لخواتم.. كانو تايجيبو لماكلة من برا سخوونة ومع هي لي هضرات مع تريتور وختارت الماكلة عليها تايجيو يسولوها الاخصاتهوم شي حاجة.. مدات ليها رحيل باكية دكلينيكس ونطقات بهدوء:صافي خاصة حاجة خرا؟
س:العرسان غايجلسو فطبلة بوحدهوم مع العائلة؟
رحيل:لا غايتفرقو هاكا حسن
س:صافي دابا غانحطو صالاد غير سيري اختي تجلسي
تبسمات ليها رحيل وهزات جلايلها خارجة من لكوزينة وقبل ماتنزل شافت واش جاوبها ولقاتو مسيفط ليها مساج بلهفة دخلات تاتقرا فيه..
نوح 📩 "علاااش ما لبستيش هادا من لول وهنيتينا من هاد المرررض ضروري من هاد لفعاايل دالزمرر المهم عندك هو تحرقي ليا فدمي "
قرات المساج وخاطرها تغيير من كلامو لي قال.. جوباتو على كلامو باش تصحح ليه باش هو مايبقاش فاهم غالط.. مباغااش يبقا مقلق وحيت عارفة الغلط منها هي كاتحاول أنها تصلحو بأي طريقة ممكنة.. دير هي لي عليها بااش من بعد ماتندمش وماتقولش كون غير يرجع بيا الزمان لور وندير ونفعل.. حبسات الصوت لتلفونها شدات جلايل قفطانها ونزلات لتحت داخلة لعندهوم وهو واخا معصب منها وطالع ليه الزمر لراس إلا أنه حااضي معاااه ومارتاح تبانت ليه جالسة فبلاصتهاا.. هز تلفونو فاش جاو السربايا تايقادو البلايص باش يسربيو لعشا وشاف مساج لي سيفطات ليه..
رحيل 📩" هاد لقفطان راه مكنتش عارفة بلي كاين عند أسماء تاكنت باغا نبدل لاخر حيت ماعجبكش عاد عطاتو ليا وأنا من هادشي كولو ماقصدتش نحرق دمك سمحليا"
جوابها بين ليه أنها تقلقات من كلامو وتاهو معاودش سيفط ليها وجمع تلفونو عندو وسكت.. جات سيدرا لعندو وجر ليها كرسي جلسها فيه ودار ليها مخدة باش تعلى وتقدر تاكل براحتها وهز سغڤيت دارو ليها فوق لقفطان باش ماتوسخش وهي جمعات يديها عندها وجالسة مركنة وعينيها كايضور فبلاصتهوم.. كان مجلسها فلوسط بينو وبين زين العابدين.. ضارت رحيل تاتقلب عليها باش تعشيها معاها ساعة غير شافتها معاه وهي ترجع ضور راسها عند لبنات وعارفة بلي هو غايتكلف بيها ويوكلها بحال الاهي كاينة.. من ديما مكتهزش رجيل هم سيدرا لامشات عند شي حد من عائلتها يوكلها حيت عارفة بلي غايردو ليها لبال وغايتكلفو بيها بحال الاهي كاينة.. وتاهو فاش كايكون حاضر كترتاح من جهة بنتها.. بداو يتعشاو وطبعا لبنات غير كيهضرو مجمعين وناقصاهوم غير بيسان لي خدامة ومقدراتش تجي.. وتاريان حس بشي حاجة ناقصة حيت هي مكينااش وكان باغي تجي باش يهضر معاهاا ساعة خاب ظنوو واكتفى أنه يسيفط ليها مساج فلواتس لي باقي مقراتوش حيت كانت فلبلووك..
جابو لبسطيلة وسيدرا تحدرات عند نوح مكمشة حجبانها ونطقات بهمس:ماي بلو آيز بغيت هاديك؟
شيرات ليه لديك لبريوات باش مزوقينها وهو حرك ليها راسو تاقطعو ليها حقها وعطاوها فطبسيل وهو يهز بريوة وعطاها ليهاا وقال بهدوء: كولي هو لول عاد شربي موناضة
حركات راسها ليه وهو نقب شوية ورجع لور تاشاف فيه إدريس وقال بهدوء: ولد لحاج شفتك ماكليتي والو؟
نوح:الله يجعل لبراكة اسي إدريس داكشي لي قديت عليه كليتو
إدريس:ياك ماعياان؟؟
نوح:(تبسم ليه بهدوء)لا غير شبعت وصااف الله يخلف
ماحكرش عليه ورجع كياكل ونوح ضور راسو لجهتها ومع جالسة جنب بانت ليه غير تاتقلب فطبسيلها بالفورشيط ومرة تهز تاكل ومرة تحنى عند أسماء وتجاوبها.. تاهزات كاس دلموناضة ورجعات لور متكية تاتجغم فيه..
عند ريان ومحمد طه لي كانو جالسين جنب بعض.. تحدر ريان ونطق بهمس:علاش مالبستيش لكوستوم ديالك؟
محمد طه:(ببرود) مارتاحيتش فيه
ريان:مارتاحيتيش فيه اجي بعد نتا معجبنيش ليوم ياك لباااس
محمد طه:مكاين والو اش كااين فنظااارك؟
ريان:زعمة شووف اوكاان؟
محمد طه:لكانت تتبان ليك شي حاجة مانعرف أما أنا مابيا والو
سكت ريان مبغاش يحكر عليه واخا هو حاس بلي تغيير على صباح فاش مشاو لعند لحساان وتصرفاتو دابا وتغوبيشتو أكدو ليه هادشي.. تسربى لعشاا لي كان على حقو وطريقو ومع تهز الديسير والناس غسلو يديهوم رجعو لعرسان لبلايصهوم وسيدرا ناضت غادة عند رحيل لي هزاتها وجلساتها فوق حجرها تاتبوس فيها..
رحيل:تعشيتي امامي؟
سيدرا:اه كليت مع ماي بلو آيز
رحيل:بصحة بوسيني
حنات رحيل حنكها وسيدرا شدات وجهها وباستها من فمها كيف مولفة معاهاا عاد نزلات لتحت غادة تلعب وتنقز.. شافت فيها أميمة صاحبت غزلان وتبسمات ليها:واش هاديك بنتك؟
رحيل:اه
أميمة:الله يخليها ليك مكتشبهش ليك گاااع
رحيل:كاتشبه لجدهاا هه
أميمة:(ضارت جهة رجال وقشعات سيدرا جالسة مع نوح تاتفشش عليه تاهو ورجعات شافت فرحيل) هاداك هو راجلك؟
رحيل:(ضارت شافت فنوح ونطقات بتبسيمة)اه
أميمة:الله يخليكوم لبعضيااتكوم صراحة مكتشبهش ليكووم گااع لانتي لاباباهاا
اكتفت رحيل بتبسيمة ليها وكلامها خلاها تزير خصوصا فاش تجبدات سيرة بابات سيدرا لي رحيل تاتقرص منها وكاتخنق.. هاديك هي لحاجة لوحيدة لي رحيل كاتمنى كوون غير قدرات تبدلهاا ولكن مع الأسف ماشي گاع داكشي لي كانبغيو هو لي كيكون.. رجعات شافت جهة نووح لي باقي على نفس جلستو مع سيدرا لي تاتلوى بين يديه تاضحك وهو مبسم ليها بحنية وتنهدااات وعينيها على فرحة بنتها وتبسيمتهاا لي طالعة من لقلب.. قدر يدير بلاصة فحياة سيدرا تاولات متعلقة بيه بزاااف وهادشي لاحظاتو فبزاف دلمراات.. تصرفاتو تجاهها وحنيتو عليها لي واخا سيدرا مولفاها مع إدريس إلاأن هاديك الحنية ديال جد لحفيدتو.. أماا نووح فحنيتو ليها وحبو ليها كان حب أب لبنتوو..
حاطة راسها على صدرو وعينيها على زين العابدين لي كيخربق فتلفونو عاقد حجباانو.. لي فيها مامهنيها تحنات جهتو ونغزاتو تاهز راسو وشاف فيها ببرود وهي نطقات تاتسبل عويناتها:زينبيدين صورني
هز زين العابدين عينو فنوح لي كان تايسمع وساكت ورجع شاف فسيدرا وببرود:اجي
غير سمعات ديك اجي بلفرحات عليها نزلات من عند نوح وشدات فيد زين العابدين تاتوريه لبلاصة حدا ديديجي:نتصورو لهيها
شدات يديه وتاهو ناض باستسلام حيت باه كااين مايقدرش يقول لا.. داتو لفين بغات أو وقفات تاتبوزا عليه تما وتخرج فقزيبتهاا وهو حال لكام وبلامايكلف نفسو أنه يشوف فتلفونو بدا غير كيضرب فتصاور وهي تاتعوج تاشبعات وقنعات عاد جات عندو وقالت بحماس:نشوف
جلس قفازي ودخل گالوري وسبحان الله زهرها زوووين گاع التصاور صدقو ليها فنين وتقول واش كاينة شي وحدة خايبة ولاشي وحدة مضببة وزين العابدين براسو تعجب.. بدات تاتحنقز عليه تم وهي فرحانة تاتموت على شي حاجة سميتها تصاور من صغرها تشوف التلفون ولاشي حد يصورها تلقاها تاتبسم وتقاد..
سيدرا:صورني أنا ويااك؟
زفر النفس ودار السيلفي ومع هز تلفونو قربات هي جهتو وعنقاتو من عنقوو وقبل مايصور تحدرات باستو فحنكوو.. جات لافوطو عفوية هو ملامحو باردين وجامدين وشعرو الكورلي كيف عادتو طايح على جبهتو وهي معلقة فيه كيف لگراادة ويادوب كيبان نص وجهها.. بعدات عليه تاتشوف التصويرة ومشات تاتجري توريها ليهوم وزين العابدين بقا جالس فبلاصتو مكمش حجبانو ومد يديه بدا كيمسح حنكوو فلبلاصة لي باستو فيها.. راجع لبلاصتو ولقاها تاتوري لنوح ودوز ليه التصاور وهو كيشوف ومبسم معاهااا..
سيدرا:نتصور أنا وياك ماي بلوو آيز وزينبيدين؟
نوح:(هزها عندو ونطق بهدوء)يالاه زيدي
رجع زين العابدين بلاصتو وجر الكرسي عند باه ودار السلفي محني باش يشد كلشي وسيدرا دارت يديها على عنقو وخداو صورة بتلاتة جاتهوم زوينة.. وغير تجبد حس التصاور وسيدرا باغا تصور مع كلشي تاتجر إدريس تاهو يتصور معاها وزين العابدين شوية وينوض يطوعهاا فقصااتو يالاه تايقول تهنيت غانرجع نتكونكطى تاكاتجيب ليه شي حد وتقول ليه صورني وطبعا مكيكون عندو تاحل آخر من غير يصوورهاا.. والزوينة هي فااش سالات التصاااور ورجع باش يتكونكطى السيدة جراتو تاشاف فيها ومدات يديها باش يهزها ويجلسها عندو.. وهو تيعض فمو من لداخل باغي غير يقمعها كيف مولف ولكن مقدرش ونوح كااين.. هزها وجلسها فوق ركبتو وهي طلع ليها لقفطان مع لابسة غير شورط قصير لداخل.. هي ماتسوقاتش ليه وأصلا مولفة تاتلبس لقصير وهو كمش حجبانو وبدا كينزل ليها داك لقفطان تاغطى ليهاا رجيلاتها الصغاار كاملين عاد رجع مكونكطي وهي حاضياه كان تايدوي مع أمين تاسالى معاه ودخل ليوتوب باش يتفرج فشي كومبة.. داكشي لي مولف يتفرج فيه ولي تايموت عليه ملي كان صغير.. حبس الصوت وطلق واحد لفيديو وكمش حجبانو مركز معاه وتاهي كاتشوف فيه.. وغير بدات لكومبة بناتهوم سيدرا شافت فيه مكمشة حجبانها:عليااش تايضربو؟
كان مركز مجاوبهااش وهي تاتشوف فداكشي مكمشة حجبانها وداك لعنف خلاها تحدر وطير ليه التلفون من يديه ونطقات مخنزرة: هادي خايبة مازوينااش
زين العابدين:(تحدر جهتها ونطق بصوت هامس قاصح) أرا التلفون
سيدرا:(هزات فيه عينيها وقالت بعناد)لا
زين العابدين:(هز عينو جهة نوح لقاه مجمع مع إدريس ورجع شاف فيها وخنزر وزرب عليها مزولو ليها ونزلها فالأرض ناطق ببرود) سير
كمشات فيه سيدرا عينيها معجبهااش لحاال وقربات جهتو مع كان طالق يديه قرصااتو ومشات هربات وهو ضار كيشوف فيها مخنزر.. بقات تاتحرك ليه حجبانهاا بندالة وهي جالسة عند رحيل وهو كون جات عليه يشدها يفرسها بقوة ماعصباتو.. تاتنرفزو وفشوشها وبسالتها كيعصبوه بزاااف.. رجع حدر عينو جهة لقرصة لي دارت ليه الشنيولة ولقاها بدات تاتحمر حكهاا ورجع تايتفرج فلكومبة...
رحيل:(مجلساها عندها) باركة من تحنقيز امامي دابا طيحي
سيدرا:لاء مامي مغانطيحش
أسماء:(جمعات حناك سيدرا وباستها تاخلات ليها طبعة دلغوج أليڤغ ونطقاات) سيري تصوري مع مودي وغزلان
سيدرا:(شافت فرحيل)نمشيو مامي
رحيل:أنا غانوض نقاد داكشي لي باقي اجي نتي ورنيم عاونوني..
كحزات رحيل لكرسي وناضت جهة تانيرت تحنات عندها وشوشات ليها بشي حاجة عاد خرجات من الصالة تحت نظرات نوح..
كان محمد طه باقي على جلستو غير كيسوط وكايتسنى وقتاش يجيبو ليهوم لخواتم ويلبسها ويساليو هاد ليلة.. بانو ليه السرباية جايبين طابلة طويلة دزاج وحاطينها قدامهوم عرف بلي وصل لوقت.. جابو ورد مقطع ورشوه فوق الطبلة ومحمد طه مكمش حجبانو تايشوف هادو اش كيديرو.. جابت أسماء حلوى دلكريم وحطاتها فالوسط كانت مكتوبة فيها "خطوبة مباركة" وحروف من سمياتهوم "M.R" وفيها ديكور دلخواتم.. تبعاتها رنيم ببوكي دلورد فالحمر حطاتو جنب الكيكة وعاد جات رحيل هازة صينية ديال لخواتم مقادة على حقها وطريقها وحطاتها فوق الطبيلة وغزلان كانت غير تاتشوف وهي مدهشرة مكانتش عارفة راهوم دايرين هادشي عند بالها غايكون غير تركاب لخواتم وصاف وهاد لجيست لي دارو لبنات خلى عينيها يعمرو بدموع الشكر والإمتنان..
تاحد مكان عارف على عاد لقضية من غير لبنات بناتهوم لي تافقو واختارو الكيكة وديكورها وعطاو لي يصاوبها ويوجدها فلوقت.. جيست بسيط داروه ولكن عند غزلان كان عندو مكانة كبيرة بزاااف.. جا لمصور كياخد تصاور طبيلة ورحيل ولبنات واقفين جنب ولبقية كلشي جالس بلاصتو حيت لبشار مكتيرش.. وقفات رحيل جنب محمد طه وهزات طببيسيل دالتمر مداتو ليه باش يوكلها.. خدا تمرة وضار جهة غزلان لي كانت مهبطة راسها ومع هزات فيه لعين وشافت فيه السيد جمد بلاصتو وعينو تفيكساو على وجهها.. داك لمك اب لي كانت دايرة جاا مع ملامحها وبينها زوينة بزااف.. ولعينين لي مرسومين بدقة ومع شوفتها ليه حس بشي حاجة انفاجرات فلداخل ديالو ومغاينكرش إعجابو بيهاا وبجمالها لمميز.. يديه كانت باقا مفيكسيا فلهواا والسيد بحال لادرتي ليه پوز ورحيل ولبنات جمعو الضحكة وقاستو رحيل تاضار شاف فيها
محمد طه:(شاف فيها وقال)هااا
رحيل: وكلها
ضار تايرمش بعينيه ويحك لحيتو وعطاها تمرة عضات منها وعينو راه غير عليها هي حيت ملي جلسات جنبو مشافش فيها ومدققش فيها ويالاه السيد عاق وشاف لوك ديالها لي بقدر ماكان بسيط بقدر مكاان تيجدب.. وصلات وقيتة دتركاب لخواتم ومدات ليه رحيل خاتم غزلان لي كان من الذهب الأبيض بجوهرة مضورة ولحاجب فيه جوهرات صغار مستفين.. هز يديها ولبسو ليها ونفس الشي دارت هي والمصور راه مفلت تاالقطة.. خدا لبراسلي لي جاب ليها مع لكولي لي شرى ليها ولمگانة.. تحدرات رحيل جهتو ونطقات بهمس:بوسها فجبهتها
حرك راسو وتحدر جهتها مع هي قصيرة عليه وحط شفايفو على جبهتهاا ولبنات كيصليو على النبي..
أسماء:(جمعات الضحكة) السيد استحلاها ههه
رحيل:(نفزاتو بلافرطة فاش شافتو حط شفايفو ومبقاش باغي يحيدهوم ونطقات بضحكة)باركة ههه
شبعو عليه ضحك وريان مسخوط جالس كيفيلمي تاهوو.. بدات أسماء تتقاد ليهوم يديهوم باش يتصورو وتتقاد تالبوزيسيون هي ورحيل ومحمد طه مادوااش ولاقاال لا تامن عصبيتو لي كان تيحس بيها تبخراات فلمح لبصر مجرد ماشاف فيها بحال لاسحرااتو.. مدو ليهوم موس باش يقطعو لكيكة وحط يديه فوق يديها لي فيها لخواتم وقطعو وكملات لبنت لي مكلفة عطاتهوم يدوقو بعضياتهوم.. هز محمد طه معلقة عمرها بحال الاهو لي غياكل وعطاها ليها وهي غير داقت شوية وفاش بعد نزل عينو لداك لكريم لي فجنب شفايفها مد يدو وزولو ليها بالإبهام ديالو ولحس صبعو وغزلان فديك اللحظة راه حسات بالدوخة من حركتو لي تلفاتها وأصلا ملي وقفات قدامو باش يركبو لخواتم وهي تاتحس بتصرفاتو مبدليين وهادشي راه دوخها.. كلامو لي قاال ليهاا قبيلة ودابا تصرفاتو معاها وشوفاتو ليها خلاوها حايرة ومعارفة فين تشد..
عند رنيم لي كانت مجمعة مع صحابات غزلان كيتبادلو النوامر باش يبقاو على تواصل ديما.. هزات عينيها بعفوية وماتجي غير على رؤوف لي كان جالس أونفاص معاها ومع ضار تاهو شاف فيها السيدة تكرشخات بالضحك وتحنات تاتكركر وهو مكمش حجبانوو.. أما هي راه مع شافت فيه تفكرات نهار الطبيب فاش تخلع من ليبرة وكيفااش بدا كيدوي مخلوع وجهو صفرر مباغييش يضربها.. والطبيب تايحاول معااه يقنعو وهو راه شوية ويسخف ليه.. مغاتنساش ديك لقطة نهائيا وفيما تشوف فيه كاتفكرو وتتقول مع راسها واش هادا لي جالس قدامي هو نفسو هاداك لي كان تيترعد من ليبراا.. وتاهو فاش شاف ضحكتها عرف سبابها وضور وجهو عليها مرااضيش.. كيسووط ويشوف فيها وغير تايقشع ضحكتها تايخنزر فيها وهي تقول واش حشماات..
رؤوف:(حرك ليها راسو ونطق بصوت هامس)ياك لباس؟
ماسمعاتوش ومعرفاتش اش قاال عليها مداتهاش فيه وهو قلب وجهوو ونطق بهمس مغدد: هادشي لي بقا يضحكو علينا لبراااهش..
---
رجعات رحيل لبلاصتها وبان ليها نوح مكحز لكرسي شوية بعيد وجالس مع سيدرا لي شادة تلفونو.. عضات على شفايفها ورجعات هزات زوج طبااسل ديال الحلوى وتمشات جهتو.. هز عينو فيها وهي قربات ليه ومدات ليه طبسيل هزو من عندها وعطات تال سيدرا طبسيلهاا ونطقات بهدوء:سيري امامي جلسي ليه وحطيها فوق الطبلة باش مايطيحش ليك
سيدرا:فين عصير مامي
رحيل:اجي نعطيه ليك
مشات سيدرا مع رحيل جلساتها جنب تانيرت وعطاتها عصير عاد رجعات اوقفات عليه ونطقات بهدوء:نجيب ليك عصير؟
نوح:(بهدوء)لا
رحيل:واخا لي بغيتي
مشات جابت كرسي وجلسات شوية بعيدة عليه مربعة يديها تاجات عندها السربايا باش تعطيها لحلوى وهي مبغاتهاش حاسة بمعدتها ليوم مروونة تامن لعشا ماتعشاتوش بززاف.. جبدات تلفونها تاتشوف تصاور لي سيفطو ليها تاحسات بلكرسي تجرر وبالدعقة هزات عينيها لقااتو هو لي جرو لجهتو وجابها قدامو.. ماهضرش حدو جابها قدامو ورجع تينقب من داك الطبسيل تابانت ليه السرباية وهو يمدو ليها ورجع ربع يديه..
رحيل:(ضارت جهتو ونطقات بهدوء)نقدرو نهضرو؟
نوح:(شاف فيها ونطق بصوت تقيل)ماشي دااابا
رحيل:(قلبات وجهها)واخا لي بغيتي
ضارت وهي مقلقة وجمعات فمها عندها.. عند بالها راه برد هاد لمدة لي خلاتو بوحدو وخصوصاً شافتو كيدوي مع الرجاال عادي ساعة كانت غالطة هو مباغي يبين لحد شنو كاين وهادي طباعو مكيخلي حد يعرف اش تحت راسو ولاشنو بيه وهي براسها تخدعات فداك السكات ديالو..ومعرفاش بلي سكت ومخلي الكلام تايكونو هو وياها الراس فالراس وديك الساعة كلام اخر..
نوح:(قرب جهتها وحط يديه على لكرسي ديالها وقال بخشونة) علاش ماتعشيتيش؟
رحيل:(ضارت لعندو أو وجهها تقابل مع وجهو) كليت داكشي لي قديت عليه
نوح:(تايشوف فوجهها وهو مكمش حجبانو) كاضرك شي حاجة؟
رحيل:لا
ضارت تاني قدامها وهي مكمشة حجبانها ومكانتش متوقعة بلي غايكون راد معاها لبااال وعارفها مكلاتش وهي لي فيما دور جهتو تلقاه ملاهي مع شي حد.. ومعرفااش بلي راه السيد رااد لباال معاها وفيما تنوض يتبعها بعينيه.. تبسمات فلداخل ديالها وتتقول مع راسها واخا معصب مني راد معايا لباال.. عجبها لحال ولكن مابيناتهاش ليه.. هزات عينيها تاتشوف فمحمد طه وغزلان لي كيتصورو معاهوم لعائلة.. شيرات ليها أسماء باش تصور معاهوم صورة عائلية وضارت جهة نوح مدات ليه تلفونها ونطقات بهدوء:أنا جايا
ناضت غادة عندهوم وهو حط تلفونها فجيبو وربع يديه وعينو عليها وهي جالسة جنب إدريس لي درعها كيتصورو مع لعرسان.. شبعو تصااور وتامن رحمة وسناء ناضو خداو معاهوم تصويرة ورجعو بلاصتهوم كلشي نااض ورحيل ضارت جهتو بغات تصور معاه تاهي.. بقات تاضور عينيها وخافت تمشي عندو ويقمعهاا ولامايبفيش..
من شوفاتها ليه أو وقفتها فهم بلي باغا تصور معاه وتاهو مكانش من لعاگزين ناض مقرب جهتها تاوقف وراها وحط يديه على ضهرها مهبطها تال خصرها وضورها عليها مقربها ليه تالصق ضهرها مع صدرو وهي حطات راسها فوق كتفو مستمتعة بدك القرب ديالو ليها وفرحانة حيت فهمها بلاماتهضر..
غير خوات لبلاصة ومشات رحيل جلسات جنب غزلان ونوح جلس جنب محمد طه وخداو تصيورات وعيطو تال سيدرا وزين العابدين خداو معاهوم تصويرة وهو نااض رجع لبلاصتو ورحيل مشات عند محمد طه تصور معااه..
ضارت سناء جهة رحمة وشافت فساعتها وقالت بهدوء:مغاتمشيوش؟
رحمة:باقي مقال نوح تاحاجة
سناء:واسيري سوليه واش غانبقاو جالسين هنا ياك لبسو لخواتم وسالات لحفلة
رحمة:خليك هانا غادة عندو
ناضت رحمة بداك الطالون لي لابسة وديك الجلابة المخزانية لواسعة لي ممبيناش فصالتها ولايحة على شعرهاا فولار.. قربات جهة نوح وجلسات فالكرسي جنبو وقالت بهدوء:ولدي مغانمشيوش؟
نوح:(شاف فساعتو)باقي شوية لاكنتو باغيين تمشيو يديكوم رؤوف
رحمة:(ضورات عينيها) ونتا شنو غاتبقا دير هنا يالاه نمشيو جميع
نوح:(شير لرؤوف لي جا لعندهوم ونطق بهدوء) وصلهوم معاك لدار
رؤوف:(شاف فرحمة) صافي واخا يالاه
رجعات رحمة عند سناء وزاينة وعلماتهوم باش ينوضو حيت غايمشيو لاحت سناء كاب عليها مع بدا تايتحرك لبرد فهاد ليامات.. ورحيل غير شافتهوم ناضو قربات جهتهوم ونطقات بهدوء:واش صافي غاتمشيو باقي لحال اخالتي خليكوم مزال معانا
رحمة:(تبسمات ليها ببرود) لا مشى لحال تاتلحقو علينا (ضارت جهة زاينة) يالاه اخالتي
سبقات سناء لي محاشاتهاش لرحيل ولاخسرات عليها تاكلمة وموراها رحمة تاهي.. زاينة بوحدها لي تبسمات ليها ونطقات بالسوسية: أركودناغ نتوشكام أيلي "تاتجيو ابنتي"
رحيل:(فهمات هضرتها وقالت بتبسيمة)واخا اجدة
باست ليها راسها وزاينة مشات ورحيل بقات واقفة فبلاصتها ساهية.. هي ماشي مكلخة ولاوحدة غشيمة لي ماتعرفش بلي رحمة كاتعاملها ببرود وكاينة واحد لحساسية بناتهوم لي معرفاش سبابها.. واخا هي كاتحاول أنها تعاملها عادي وتحيد أي حواجز بناتهوم حيت هي ممات راجلها وعايشين تحت سقف واحد ولكن كيبان ليها لمشوار طوويل.. فاقت من سرحانها على يد تحطات على كتفها وكانت ممات إسلام لي تاهي غاتمشي سلمات مع رحيل وحركات راسها من بعيد لإسلام.. كلشي مشى وبقاو غير ببات وممات جيداء لي غايبقاو معاهوم هاد لفترة..
السربايا كيجمعو لمطريال ويقادوه ورحيل مشات مع غزلان ولبنات يبدلو حوايجهوم... زولات قفطانها ولبسات عليها عباية وفولار وخرجات من لبيت هازة داك لقفطان وغادة بيه لبيت أسماء لي كانت تاهي بدلات حوايجها ببيجامة..
رحيل:هاهي أمانتك تاترجعيهوم لبنت لي كرينا عندها
أسماء:صافي علقيه يتهوى غدا ونرجعو
رحيل:صافي ورجعي تاتكشيطة ديال غزلان متنسايهااش
أسماء: عارفة راسي وجه تمارة
رحيل:صافي باركة من سكوندال ودي طوموبيلة بابا (تفكرات كلام إسلام وقربات جهتها ناطقة بهدوء) كاينة واحد لهضرة باغا نقولها ليك ولكن قبل انسولك وجاوبيني بكل صرااحة
أسماء:مالكي شواقع؟
رحيل:واش نتي وإسلام بيناتكوم شي حاجة؟
أسماء:مابيناتنا والو نتي عارفة أصلا كلشي من داك لبلان لي طراا محاشيتهاش ليه تاال واحد نهار كنت محتاجة لي يوصلني حيت تعطلت على لخدمة وعيط ليه هادشي لي كااين
رحيل:(جلسات فوق النموسية)قال لياا بلي باغي يشري ليك طوموبيل
أسماء:(كمشات حجبانها وقالت بعدم تصديق)واااش تادوي من نيتك؟
رحيل:اه هادشي لي قال وماشرحش لياا حيت وقع واحد لبلان مهم هاد لهضرة ماتقوليهااش ليه سمعتي بينااااتنااا
أسماء:وهااد الز*مل شنو بيني وبينو باااش يشري لياا طوموبيل ماالو ضارب بيا لاكط شفتوو ضسر وعيييق
رحيل:لهضرة قلتها ليك باش تحطيها فبااالك والاعرفت اأسماء راكي قلتيها ليه نقووودهاا معاك
أسماء:لا لا ماديريش فباالك مغانقول ليه والو تايقولها ليا بنفسوو وديك الساعة تشوفي اش غاندير ليه.. ندمني على النهار بستو يييخ كون عرفت كون قطعت شفايفي لي جبدو ليا الصدااع
رحيل:هههه اوا أنا بان ليا السيد باغيك ههه
أسماء:يييع داكشي لي بقاا
رحيل:(بجدية)أسمااء زعمة نتي مكتحسيش بشي حاااجة من جهتو ؟
أسماء:(بقات تاضور عينيها وبخفوت نطقات) وابغيتي نقول ليك الحقيقة هوو ماشي كيعجبني ولكن تت ماعرفتش كيفاش نشرح ليك دابا هو فاش تايدوي معايا ويبين ليا اهتمامو كيعجبني لحاال فهمتي يااك وبعض لمراات تاني كيعصبني وأنا أصلا مباغا نبغي حد باركة غير نهار بغيت داااك القو*د ديال وليد وخوورني ديك تخويرة لي عمري نساها
رحيل:هاديك نتي سبابها وطيرانك هو لي دارها ليك نهار تصاحبتي مع آدم قلتها ليك راه داك السيد ميصلاحش ليك ونتي كنتي مقصحة رااسك وعاجبك لحاال حيت السيد كيخسر عليك الفلوس ويديك فيما بغيتي وفاش خدمتي عندهوم باان داك خوه لي تاهو قال ليه مكتعرف والو ودخلك ديك الدخلة بااش يخليك تبغيه وتباركالله دغيا دارها بيك
أسماء:(تنهدات) بصح آدم فيه لفعايل ودار شي حوايج معحبونيش ولكن مغانكرش بلي كان عزيز عليا الله يرحمو تيقيني نهار عرفتو ماات بقا فياا بزااف أما خوه فعندك لحق أنا فتحت ليه مجاال واخا عارفاه مزوج.. أنا لي غلطت وكان عليا نخليه تايطلق يمكن دنوب مرتو هوما لي خرجو فيا وحيت كنت مكلخة وتيقت بلي غايطلقها ساعة السيد عاش حياتو ودايرني غير لعبة هو وخوه
رحيل:ماعليش هادي دير ليك لعقل لمرة الجاايا وتعرفي بلي الطريق لي كنتي غادة فيه هادي هي عاقبتو.. الله يسمح لينا على مافاات
نزلات رحيل لتحت وهي مكمشة حجبانها لقات كلشي جاالس ومبدل حوايجو وزين العابدين جالس فالقنت داير ليزيات ومرجع راسو لور مغمض عينيه.. ضورات عينيها تاتقلب على سيدرا لي بانت ليها جالسة جنب تانيرت تاتحل وتسد عينيها باين فيها النعاااس.. قربات جهتها ونطقات بهدوء:مامي ماتنعسيش راه غانمشيو دابا
سيدرا:واخا مامي
إدريس:كون غير بتو معانا ليوووم اولد لحاج
نوح: ماعليش مرة خرا اسي إدريس
رحيل:(جلسات جنب حنان) خالتي باقا مطولين هناا؟
حنان:واعلى حساب عمك ابنتي
رحيل:ماتمشيوش تاتجيو عندي لريااض واخا راه لامشيتي انتقلق منك
حنان:إن شاء الله ابنتي
طلات على سيدرا لقاتها سدات عينيها ناضت عندها ومع حطات يديها باش تهزها حلات سيدرا عينيها ونطقات:ماناعسااش امامي أنا فايقة
تبسمات ليها رحيل بحنية وهزاتها معنقاها ونطقات بحب:غير نعسي امامي ديالي
حطات ليها راسها على صدرها ونوح شاف فإدريس ونطق بهدوء:يالاه اسي إدريس الله يعاون
إدريس:الله يعاونكوم
ناضو سلمو عليهوم ونوح قرب جهة رحيل هز عليها سيدرا لي صافي نعساات بين يدين مها.. توداعو معاهوم وركبات رحيل لور حاطة سيدرا عندها وزين العابدين جلس جنب باه.. شدو الطريق لرياض فالسكاات ورحيل هي تاتنهد باقي عقلها مع لمشكيل لي طرا ومعدتها لي ضراتها وكل مرة تگرع لحموضة.. وصلو لرياض وبلاصا الطوموبيل فالگاراج لي فلحومة ورحيل نزلات هازة سيدرا.. سبقهوم زين العابدين وهي بقات تاتسناه حيت كان تايدوي مع لعساس..
نوح:(جا جهتها ومد يديه باش ياخد سيدرا) اراي نهزها
رحيل:ماعليش ماتقيلاش غير خليهاا
مبغاش يحكر عليها ودرعها بيديه تاوصلو لرياض ودخلو ورحيل مشات نيشان بيت سيدرا نعساتها فوق النموسية وبدلات ليها حويجاتها باش ترتاح فالنعسة ومع ناااضت باش تخرج حسات بمعدتها تقلبات عليها ومشاات لحمام رداات گااع لي كلات تابقات تاترد لمرار وغسلات وجهها شللات فمها عاد خرجات من عند سيدرا غادة لجناحها.. دخلات وهي تاتفسخ الفولار وبان ليها نوح خارج من الدريسينغ مبدل حوايجو بحوايج الدار.. لاحت فولارها وقربات جهتو وقاالت بهدوء:نقدرو ندويو دابا
نوح:بدلي حوايجك واجي
دخلات لدريسينغ خدات حوايجها عاد مشات لحمام زولات حوايجها ولقات راسها صفات ولغيگل مشاات وتهنات منها.. دخلات فركات راسها ودوشات تدويشة دلغدايد توضاات وخرجات دارت روتينها مور لحمام ولبسات عليها شوميز دونوي طوويل فلون لعسل ستاان خفيف ومبرد.. لبسات عليه بينوار ديالو وشعرها نشفاتو ودارت ليه ضفيرة... خرجات من لحمام لقاتو نعس.. كمشات حجبانها بخيبة أمل تعطلات فلحمام تانعس.. تمشات بلخف وتخشات فبلاصتها عاطية بوجهها ليه.. كانت تاتشوف فيه مغمض عينو وباين فوجهو لعياا.. غمضات تاهي عينيها ونعسات..
----
على تقرقيب لي فالبيت حلات رحيل عينيها وهي تاتفوه.. شافت فالساعة لي فتلفونها لقاتها تسعود دالصبااح.. تقدات فجلستها وعينيها عليه وهو كيضور فالبيت بشورط وتقاشر بويض فقط.. ناضت من بلاصتها وبدات تتقاد النموسية عاد قربات جهتو ونطقات بخفوت: صباح الخير
نوح:(بدون مايشوف فيها)صباح الخير
دخلات لحمام وهي معاجبها حاال.. دارت روتينها الصباحي وهي تتفكر بلي ليوم خصها دوي معااه وماتخليه تاتصفي معاه لخاطر.. خرجات وهي ناوية تشدو وتهضر معاه لكن وجود سيدرا خلاها تسرط لكلام لي فجوفها وتأجلو.. قربات جهتهوم وتبسمات لسيدرا لي نطقات بحماس:مامي صباح الخير
تحنات رحيل باستها:صباح الخير امامي
نوح:(نطق بهدوء)لبسي حوايجك باش نزلو لتحت
حركات راسها ودخلات لاحت عليها گندورة ديال الدار واسعة مع فولار ونزلو لتحت فين كان كلشي حاضر لفطور.. واخا ميكونوش خدامين الاأنه مولفين لفيااق بكري.. تجمعو على لفطور ورحيل غير تاتبسم بزز وكاتسنى غير فين تشدو بوحدو ومع ليوم تاحد فيهوم ماخدام وكلشي حاضر مقدرات دير تاحاجة.. فطرو وجلسو مجمعين تاناض نوح وقال بهدوء:أنا لهيه
خلاهوم ومشاو لبيرو لي عندو تم ورحيل وأخيرا جاتها لفرصة تسنات واحد شوية قبل ماتنوض تبعاو مخليا شيماء تاتسوط كي لفعة..دقات باب البيرو تاسمعات صوتو عاد دخلات لقاتو طالق القرآن من البيسي ومغمض عينو كيسمع ليه..
نوح:(حل عينو وشاف فيها)اجي
جلسات قدامو وهو حبس القرآن وشاف فيها بلامايهضر.. شي لي خلاها تسرط ريقها وتنطق بهدوء كاتبرر ليه لموقف: مكنتش باغا نقلقك لبارح انوح أنا لقفطان فاش شفتو مكان فيه تاعييب عجبني عليها خديتو وفاش ماوريتوش ليك حيت كنت باغا نخليك تاتشوفني لابساه ماشي باش نعصبك (هزات فيه لعين ونطقات بعتاب) ونحرق دمك
نوح:(كان مربع يديه وعينو عليها وهي كادوي وتبرر مقطعهااش وخلاها تقول اش عندها وغير سكتات وهو ينطق بجدية) سبق ودويت وغانعاود نهضر لآخر مرة على هاد لقضية العناااد فلبااس مانبغيهش يتعاوود ارحييل
رحيل:(نطقات بسرعة)مغانعاودوش غير تهنى
نوح:(حرك راسو ونطق وهو كيعض على شفتو) لاغير عاوديه بااش نيت أنا نلبسك النقااب ونهني مخي..
يتبع...
التعليقات
لا توجد تعليقات بعد، كن أول من يعلق.