محتوى القصة
تاتمشى فداك الربيع هي وسيدرا لي تاتحدر وتهز لحجيرات وتجمع فيهوم... حسات براسها عياات وجلسات فداك الضس ومراقبة سيدرا لي تاتلعب غير جنبهاا...
رنيم:سيدرا ماتبعديش بزاف خليك غير هنا
سيدرا:(حركات راسها تاطار شعرها طويل)واخاا
هزات رنيم واحد لعود وبدات تاتلعب بيه فالأرض وفنفس الوقت راه عينيها على سيدرا لاتلف واخا راه هوما غير جنب الدار ولكن راها مسؤوليتهاا دابا... سمعات صوت لخطوات وضارت وراها لقات رؤوف جااي تايجر فداك الصندالة ولايس شورط بيض حد الركبة مع تيشورط نفس اللون... وقف عليها تاغطاها بضلوو عاد تحدر جلس قفازي وغمزهاا..
رؤوف:هاني شديتك دابا ماعندك فين تهربي
رنيم:(تبسمات) ماكنتش أصلا غانهرب
رؤوف:كيف جااتك لبلاد ديالناا؟
رنيم:فنة وفيها مايدار صراحة ماتسخااش بيها
رؤوف:هي زوينة ولكن غير فالصيف والربيع حيت لخضورية تتكون زاهية مي شتاا قاصحة
رنيم:مكاتجيش ليها بزاف نتا؟
رؤوف:عماين هادي ماجيت
رنيم:هااء بزاف كون كنت أنا منك كون كل عام جيت لهنا وعيدت فيه
رؤوف:(غمزها)صافي دابا نبقاو نجيو أنا وياك ليها اش بان ليك
رنيم:(فهمات اش قصد وغيرات ليه لكلام) بلاتي نشوف فين سيدرا
كحز شوية وضار تيشوفو سيدرا غادة ممسوقااش ليهوم..
رؤوف:اوا اش بلانك
رنيم:اينا بلان؟
رؤوف:مكاتجاوبيش على لزابيل ديالي تكانشحف مالكي على هاد التعفار؟
رنيم:مامعفرااش
رؤوف:وعلاش مكاتجاوبيش
رنيم:(بكدب) غير مكانكونش مسالية وصافي وزايدون فاش كانكونو مجموعين مجاتش نهز تلفون ونهضر
رؤوف:(شاف فيها بجدية)رنيم عمرك دويتي لياا على عائلتك متشوق نتعرف عليهوم وشنو لعلاقة لي كاتربطك مع عائلة سي إدريس ؟
شي لي كاتهرب منو رنيم هاد لمدة كلها لي تصاحبات معاه هاهو طاحت فيه وهاسؤال لي مكاتلقى ليه إجابة تطرح ليها... بصح تاتلقى راحتها مع رؤوف وتيعجبهاا ويمكن تكون تتبغيه ولكن هادشي مامنعهاش دير حدود بناتهوم وتحاول ماأمكن ماتسرحش فعلاقتها معااه وتنسى ماضيها لي متعلق بعائلتهاا... توترات وحسات براسها تزيرات عينيها بداو كيضورو هنا ولهيه ومقداتش أنها تصارحو حيت ماعندها ماتگول ليه وهي براسها تاتحشم من هادشي ومكترضااش تهضر عليه...
رنيم:عائلتي مااتت كلها ومبقا عندي حد وعمي إدريس وعائلتو هوما عائلتي دابا لي معاهوم لاقية راحتي
رؤوف:(كمش حجبانو) الله يرحمهوم واش مااعندكش عمامك ولاخوالك؟؟
رنيم:(نطقات بانزعاج واضح من نبرة صوتها) لاماعنديش (شافت فيه) ماعندي حد من غير الله وعمي إدريس وعائلتو
رؤوف:صافي تهدني بلاماتعصبي أنا سولتك حيت كنت باغي نعرف عليك كلشي (شد فيديها وباسها) ماتقلقيش مني الصفريطة ديالي
رنيم:(حيدات يديها وقالت مكمشة حجبانها) بزاف عليك أنا مصفريطاااش
رؤوف:(تبسم) صفريطة ديالي الالة
رنيم:تت ومشكيلة معاااك گاعما تتعرف تهضر فمك مراجل
رؤوف:(قرب جهتها وقال بغزل)مال تافونااست إينو مقلقة عجباتك هادي
رنيم:(مافهماتش اش قال) وتانفهمهاا
نقزات عليهوم سيدرا تاقفزاتهوم بزوج مع مكانوش عوالين عليها وقالت وهي حاطة يديها على خصرهاا تاتشوف فيهوم بنظرات شيطانية:شتاديرووو
رنيم:ناري خلعتيني اوووف بقااي ديري لحس اديك الفارة
سيدرا:(حركات كتيفاتها) نتوما ماشفتونيش
رؤوف:جنية هاد لبنت
رنيم:خمسة على عينيك
سيدرا:رانو يالاه نمشيو فياا پيپي
رنيم:زيدي يالاه
شدات فيديها وتمشاو ورؤوف وراهوم تاوصلو لدار وهي داتها لطواليط ولاخر كمل طريقو لصالة فين جالسين مجمعين... داز نهارهوم لول زوين وتعشااو بطواجن طايبين على لفاخر ولخبر دتفارنوت وموراها كل واحد مشى فين ينعس حيت غدا تابعهوم نهار طويل...
***
مع ضربات السبعة دالصبااح كاان نوح فايق ولابس حوايجو موجد راسو حيت ليوم غايمشيو يجيبو لحوالى من عند السيد لي كياخدو عندو ... خلى رحيل باقا ناعسة وخرج لكوزينة فين كانت زاينة تتوجد لفطور... غير كيودن لفجر تاتفيق تصلي تمشي توجد لفطور ومكترجعش تنعس تاني... مع دخل شم ريحة القهوة لمعطرة لي تاتعطرها على يديها فيقاتو ونعشاتو على صباح... تبسم بحنية وهو كيشوفها محنية على تفارنوت تاطيب لخبر دلفطور..
نوح:(ببحة صباحية) زاينة نوو صباح الخير
زاينة:(شافت فيه وحنيكاتها حمرين بالسخونية وتبسمات تاتكمشو جناب عينيها وديك الزرقة ديالهوم بانت تتلمع) يوي يعزاان تنكرت صباح لخير "ولدي لعزيز فقتي"
نوح:(درعها وباس راسهاا)ياه لحاج اينكر؟
زاينة:يااه اتي ايسكا يفوغ اديسمون إيميك ليازير دنعناع لي اسنيغ "اه راه غير مشى يجيب شوية دليازير ونعناع لي گلت ليه"
نوح:ايعدااال "مزياان"
مشات تاضور ديك لحسوة لي دايرة دسميدة وكبات ليه زلافة ودارت ليها زيت لبلدية مع شوية دلكمون وحطات ليه تميرات... مولف كل صباح تيعبر السكار ودابا نيت قبل مايجي لعندها عبرو كان مزيان... بدا كيشرب فديك لحسوة وخدا تميرة وحدة فقط ومزادش عليها حيت غاطلع ليه السكاار فطر بديك لحسوة وخدا كاس دلقهوة وخرج لبرا باش يكمي وتلاقى مع جدو فطريق.. كمى وغير سالى دخل لقى إدريس فاق هو وتانيرت وتارحمة ودراري لي واجدين حيت غاديين من غير زين لعابدين...
خلاهوم كيفطرو ومشى لبيت زين العابدين حلها لقاه نااعس على كرشو مامغطيش حيت الصهد.. جلس حدا راسو وبقا تيحك ليه فشعرو تاحرك زين راسو بانزعااج قبل مايحل عينيه ويشوف فبااه...
نوح:يالاه نووض راه شوية ونتحركو
زين العابدين:(قلب وجهو لجهة لخرا وقال بصوت مبحوح بالنعاس) غير سيرو
نوح:(عطااه دقة لضهرو ونطق بنبرة جدية) عشرة دقايق نلقااك براا يالاه تگعد
خرج من عندو مخليه بزز منو ينوض ويمشي لدوش لي تم دوش بلماا بارد... ورجع لبس تيشورت بيضاا مع سروال توني رمادي وهز كاسكيط وتلفون وليزيات وخرج لقاهوم واجدين تايتسناوه غير هو وبحكم مكيفطرش فاش يالاه كيفيق مشى نيشان لطوموبيل باه وتأنسطالى فيها... تحركو طوموبيلات بزوج لي فيها رجال مخلين نساا بوحدهوم فدار...
أما عند البنات ملي فاقو وفطرو قررو يسيقو الدار ويقادوهاا وكل وحدة وشنو ناضت دير ورحيل وأسماء مع لحمالة عطاوهوم داكشي لخفيف... وتكلفو بفطور لعيد ورحيل تشهات دير شي حليوات خفاف وجدو ليها گاع لي تحتاج وهي بدات تتفنن فالشكيلات بالمقادير لي عندها تم... مع ضربات التلاتة دلعشية كان كلشي واجد لحلوى راه لي برد فالطاسات ولي تفمس فالشكلاط راه كيتسناوه ينشف ولي باقي سخون راه تيبرد... ولفطور وجدو كلشي وغلفوه على قبل غداا...سمعو لكلاكصون وخرجات سيدرا هي لولة لبرا غير شافت لكاميو لي فيه لحوالى وبدات تنقز فرحانة
سيدرا:حاااولياات جاوو حاوليااات جااو
نزل نوح من الطوموبيل وتمشى جهة الكاميو وطلع وسط دوك لحوالى وبدا ينزلهوم لدراري باش يديوهوم لفين كاتكون لكسيبة... جابو ربعة دلحوالى منهوم صرادى منهوم البلدين... نزلوهوم وسيدرا غاتموت بالفرحة بحال أي ولد صغير فسنها شاف لحوالى... ملي أنسطالاوهوم فالكوري عاد جاو البنات وتانيرت يشوفوهوم..
سيدرا:(شافت فنوح)بابانو فين حاوليك؟
نوح:(أشار ليها لواحد الحولي راسو قهوي) هاهو (وأشار لتاني الصردي) وهاداك
سيدرا: ونتا بّاديدي
إدريس:(تبسم) هو داك الصردي لي لهيه
سيدرا:وهادا ديال من؟
نوح:هاداك ديال لحاج لحسن
سيدرا:اه دميمة زوينة
تبسم ليهاا وهز عينو فرحيل لقاهاا واقفة مع لبنات تايهضرو ويصورو فالحوالى... تحدرات جهة واحد الصردي بغات تقيسو فراسو ساعة رجع لور باغي ينطحهاا وتاهي دغيا بعدات شادة كرشهاا...
أسماء:عنداك يضربك فكرشك
رحيل:باين فيه قبيح
تانيرت:كيف داير السوق؟
إدريس:فاش مشينا نتقداو داكشي لي خاص سولنا شي كسابة كل حاجة بتمانهاا
نوح:(جر جدو مدرعو لبعيد ونطق بصوت هادئ) راه واحد شوية غايجي لكاميو التاني فيه شي ريوسة تاتمشي معاهوم يعطيوهوم لناس لي مولفين كل عيد نعطيوهوم هنا
لحاج لحسن:اييه واخا اولدي الله يرضي عليك
نوح:صافي تكلف نتا الحاج واخا
حرك ليه راسو ونوح رجع لعند سيدرا لي تتبغي تقيس لحوالى ولكن فاش شافت لاخر تاينطح خافت...وتاريان هزهاا وبدا كيشير بيها جهة داك لحولي لي كان مربوط ولي بدا تيضرب برجلو..
سيدرا:(تتغوت بخوف)ماااامي طلق مني
ريان:نلوحك ليه ياكلك راه فيه الجوع
شدات فيه كيف الگرادة برجليها ويديها وريان تيخري بالضحك وهي تتغوت ليه فودنيه...
رحيل:المرض راه فليل غاتفيق تاني تاتبكي ليا
ريان:هادي راه الجن يخااف منهاا
سيدرا:(عضاااتو فحنكوو بالجهد تاحطها الأرض وهي تحرك ليه حجبانها) يالاااه
ريان:(خلات ليه طراس دسنينات لفارة فحنكو ضرو شاف فيها كيتحلف) والله لابقات فيك ابلاتي اعيشة الدميعة
تخبات عند نوح حيت عرفاتو مغايوصلش ليهاا وبيسان بدات تتشوف فيه وضحك وبهمس قالت: عبرات عليك
سمعها ريان وضار شاف فيها مكمش حجبانهاا وهي نخلاتو ورجعات تادوي مع لبنات بحال لامگالت والو... دخل نوح وسط لحوالى ودخل سيدرا لي تاتسبق رجل وتوخر لخرا تاطمنها وشد ليها داك لحولي من لگرون عاد زعمات تقيسو وتبوسو وغير گال ليها نوح تمشي راه غايطلقو مشات تاتجري عند رحيل تتخبى فيها..
رجع لحاج لحسن مبعد مامشى لعند الناس لي تم فالدوار قرابين ليهوم مفحالهومش عطاوهوم باش يعيدو وكيف عادتو طلع لبيت لي فالطبقة التانية وبقا تاني مخشي فيهاا..نزل زين من السطح فين كان جالس وفاش بانت ليه لبيت محاولة قرب ليها ولقى جد باه جالس وقدامو واحد الراديو حالو تيبقشش فيه.. تبسم لحاج لحسن ونطق:فين كنتي؟
زين العابدين:لفوق
بقا زين كيضور عينيه ويشوف فلبيت لي دخل ليها مرات قليلة... عينو تحطات على ديك لموكحلة تيشوف فيها بهدوء تاسمعو صوت نوح كيعيط لجدو لي نااض شاف فيه وقبل مايخرج مد ليه الساروت باش يسد لباب... بقا بوحدو فلبيت وبخطوات هاديين قرب لديك لموكحلة حيدها من لبلاصة فاش كانت معلقة وبقا تيشوف فيها وضور عينو جهة البواطة فين كان القرطاس محطوط وبحكم ديك لبيت تتسد ولحاج مكيخلي حد يدخل ليها فمكانش مخبي لقرطاس فشي بلاصة ومخليه غير تم...هزو زين وبدا كيعمر فلموكحلة حيت سبق وشاف باه وهو تيعمرها..قادها وبقا تيشوف فيها قبل مايسمع صوت سيدرا لي نطقات:زينبيدين
ضار جهتها لقاها واقفة تتشوف فيه مبتاسمة فيكسى شوفتو فيها قبل مايهز ديك الموكحلة ويقادها معاها نيشان..بقا تيشوف فيها وبدون سابق إندار تسمع صوت القرطاس لي خرج من ديك لموكحلة...
تسمعات صوت ديك القرطاسة فالفيلا وفالدوار تاهو مجهد مخلية الصدى.. گاع لي لتحت قفزو بالخلعة ورحيل لي كانت فالكوزينة تتگاد فالحلوى وتكملو طيحات الطاس تاتشتت الحلوى وشدات على كرشها لي ضراتها بالخلعة... ونوح لي كان واقف مع جدو تيهضرو غير سمع لقرطاس وهو ينوض تيجري طالع فالدروج.. درجة يعفط عليها وينقز تلاتة تاوصل لبيت وهو يوقف فلباب وعينو على الديكور لي كان تيشوفو قدامو... زين العابدين واقف وهاز ديك لموكحلة فيديه وسيدرا واقفة مفيكسية فبلاصتها وباقي مخرجة عينيها بالخلعة وجهها بيض... قرب جهتها وتحدر هزها وهي غير شافتو عنقاتو وبدات تبكي بالجهد... زيرات عليه بقوة الخلعة وكلها تترعد بين يديه... بدا كيدوز يديه على ضهرها ويقرا عليها القرآن وعينو على زين العابدين مخنزر... جاو البقية لاحقين عليه مفاهمينش اش وقع وغير شافو سيدرا تاتبكي وزين شاد لموكحلة وهوما يتخلعو كلشي تجمع على نوح يسولو مالها وباين فيهوم خايفين عليهاا... أما هو فكان واقف تيشوف فيهوم بهدوء قبل مايحط ديك الموكحلة ويخرج من البيت بلاماينطق بتاشي حرف...
وأخيرا طلعات رحيل لفوق ومع لقات سيدرا تتبكي وهي تخلع وكانت اطيح ليهوم غير بقاو يسكتو فيهاا وتاهي مرتاحت تاجات سيدرا لعندهاا تخشات فيهاا وداتها معاها لتحت...
لحاج لحسن:(علق ديك لموكحلة ونطق وهو عاقد حجبانو) أوجيغت غلبيت فكغااس تاساروت باش استيقن أورسنغ مانيك أيسكر أيليغ إعمر الجويجة "خليتو فلبيت وعطيتو الساروت باش يسدها ماعرفتش كيفاش دار تاعمر الموكحلة"
تعمد ينطق بالسوسية موجه كلامو لنوح بااش مايخلقش شي مشكيل حيت كانو غير الرجال والنسا راه نزلو لتحت...
نوح:(كمش حجبانو) لقرطاس يتجمع الحاج تم ماتبقاش تحطو هنا خليه فبيتك وسدو فلبلاكار
إدريس:الحمدلله مجاتش فشي حد ونيت ولد لحاج عندو لحق لقرطاس مانخليهش فبلاصة لي غايوصلوها ليدين..
قرب نوح جهة لبلاصة فين لقى سيدرا واقفة وتحدر تيشوف فالأرض وبالضبط لبلاصة لي ضربات فيها القرطاسة... زاد تيقلب كتر بشوفاتو تالمح قزيبة دلعقرب فالصفر كبيرة گاعما كتبان...كمش حجبانو وجبد مشوار وهزها بيه وبدا كيشوف فيها عاد نزل شوفاتو لديك البلاصة كيدقق فيهاا... قرب جهتو إدريس لي تحدر تاهو وجلس وغير لمح شنو هاز نوح وهو ينطق بتساؤل:واش هاداك عقرب؟
نوح:(حرك راسو) تت كان فالبلاصة لي جات فيه لقرطاسة
الحاج لحسن:واه كيفاش دخل لهنا
إدريس:غايكون دخل من الشرجم الحاج
فلتحت كانت سيدرا جالسة جنب رحيل ومتكية عليهاا وهي باقي تاترعد بالخلعة... قربات لعندها أسماء وقالت بصوت هادئ:حبيبة ديالي شنو طرا لفوق عاودي ليا
سيدرا:(بدات تاضور عويناتها وقالت بصوت خافت) مشيت عند زينبيدين باش نلعب معاه ولقيتو فديك لبيت ياكاا وفاش ضار عندي هز هاديك أمامي شاف فيااا وشوية مامي ضرب هاديك تاخلعني
رحيل:(نطقات وهي عاقدة حجبانها) أويلي الموكحلة ولقرطااس واااش بعقلو
رحمة:ماعرفتش كيفاش تاعمرهاا وعلاش أصلا ضرب بلقرطااس
سمعو صوت نوح لي نطق برزانة وهو داخل لجهتهوم: ضرب باش يقتل لعگرب
رحمة:(شافت فيه)اشمن عقرب؟
نوح:فلبيت لفوق لقيت هادا فالبلاصة فين تضربات لقرطاسة ولي كانت قريبة لبلاصة فين كانت واقفة سيدرا يعني باين غايكون قاصد سيدرا عليها ضربو زين العابدين
رحيل:وكيفاش دخل لعقرب لهنا؟؟
نوح:(شاف فيهاا ونطق ببرود وهدوء) فهاد الوقيتة لعگارب ولحنوشى تايكونو موجودين هنا يعني الواحد يرد لبال وهاد لعگرب غايكون دخل من الشرجم دلبيت
تانيرت:(تنهدات)ولد لحاج عندو لحق هادشي تيكون فلبلاد ولواحد يرد لبال شحال من مرة دخلو لعگارب لدارنا ولحنوشى تاهوما غير ربي كيحفظ وصاف
أسماء:اوا على هاد لحساب خصنا نبقاو نسدو الشراجم
انساحب نوح من عندهوم غادي لبيت زين العابدين تيقلب عليه... لقاها خاوية مكاينش طلع لسطح يشوف ياك ماكاين تم ونفس الشي داكشي علاش قرر يشوف فبرا... كان الضو ديال برا مشعول ومضوي ولكن غير تتفوت الباب الكبير ظلام ولقفاار دسيدي ربي... خدم لبيل من تلفونو وخرج تيضور عينو هنا ولهيه ويقلب عليه تاسمع نباح دلكلاب وهو يضوي جهتهوم وهو يبان ليه جالس وهوما كيضورو بيه وينبحو وهو جالس مامسوقش ليهوم بحال لامكاينينش... مع سمعو لحس هربو ونوح وقف على زين العابدين وقال بصوت هادئ ولكن فنفس الوقت صارم:نوض
ناض زين العابدين تاوقف قدامو ونوح هز فيه حاجبو وقال ببرود:صدقتي مولوع بالصيادة داكشي علاش كنتي باغي تجربها (حط يدو على كتفو وزير عليه) ملين تعلمتي تعمرها وعلاش عمرتيهاا؟
زين العابدين:(بهدوء)شفتك فاش كنتي تتعمرها
نوح: مزيان تباركالله شفتيني تنعمرها وگلتي اجي تاأنا ندير بحال لواليد ياك
زين العابدين:لا
نوح:(زاد ورك على كتفو وقال بجدية)شكانت نيتك فاش عمرتيها وماتگولش ليا على قبل لعگرب لي كان غايضرب سيدرا (هز حاجبو) شكايدور ليك فداك الراس احفيد لحاج..
مكانتش شي حاجة لي تخفى على نوح مجرد ماشاف زين هاز ديك لموكحلة... كيفاش دار تاعمرها وعلاش أصلا عمرها اش قصدو؟ حيت مايمكنش يكون عمرها باش غير يضرب لعگرب ومن كلام سيدرا فهو أصلا كان ديجا معمرهاا... كيشوف فيه ويتسنى منو جوابو ولكن كيف العادة لقى غير الصمت... قرب ليه نوح وحط جبهتو على جبهة ولدو ونطق بصوت هادئ: علاش هازها ملين تقالت اولدي رخف على راسك وماتبقاش دخل لهاد الراس شي حوايج لي عمرهوم يكونوو وبحال هاد لبلان لي طرا ليوم مانبغيش نعاود نشوفو.. القرطاس مامعاهش لعب وكون زگلتي الضربة غير بشوية كنتي غاتجيبها فسيدرا فين كنا غانوليووو؟؟ (شاف فيه بجدية) نتا أصلا عمرك هزيتي سلا ح وماخصكش أصلا تهزو وتقرب ليه هاد لكلام نبغيك دخلو لدماغك وتميموريزيه مزيان تافقنااا
زين العابدين:تافقنااا
نوح:واش كاتعجبك الصيادة؟
زين العابدين:(حرك راسو باه)
نوح:علاش عمرك ماگلتيهاا ؟
زين العابدين:مجاتش فرصة
نوح:المرة الجايا الحاجة لاكنتي باغيها گولها لياا ماتخبيش على باك...
***
ليلة قبل لعيد بالنسبة لنسا هي يضورو بالحالة وهادشي لي دارو لبنات مور مسالاو گاع شغالاتهوم... قررو يتحممو فالحمام لي كاين برا لڤيلا ملاصق عليها بلدي على أصولو وكولو مزلج الدخلة ليه تاتخليك تحس بالراحة... وجدو لبنات التبريمات ولماسكات دالشعر وكل وحدة وشنو مولفة دير فروتين دلحمام...
أسماء:دابا يصليها معانا شي جن داخلين فنص ليل ندوشو
بيسان:ههه بلاتي تجربي تدويشة هنا والله لابغيتي تخرجي
رحيل: شحال بيني وبين حمام الزنقة
غزلان:هي لاشديناااك وكسلنااك دابا ههههه
رحيل:والله ماكرهت
جلسات كل وحدة بلاصتها وغير حلو الروبيني دلما سخون وهي تبدا ضبابة طالعة فالسمااا وسخن مع شعلوه قبل بلعوااد... لي طلسات شي حاجة راه بدات تنقي وشابعين ضحك... ورحيل تغسل جهة فشعرها وتجلس ترتاح وتكمل الجهة التانية... ناضت ليها غزلان وفركاتها نيت تاولات حمرا وجلدتها طايبة... وجلسات ملوية عليها بنوار تستارح وبدات تاضرب فليمون ولبنات تيكملو... دوشو وشبعو تفواج وتقشاب عاد خرجو كل وحدة هازة مسائلها ورحيل شافت فأسماء وقالت:تقدي تصاوبي ليا شعري ؟
أسماء:نديرو ليك باتشا؟ حيت لادرتي ليه الحرارة دابا غاياكل الدق
رحيل:لاباتشا غانشفو غير بسيشوار بارد
أسماء:صافي يالاه زيدي
مشاو لبيت فين كينعسو لبنات وبدات تنشف ليها شعرهاا بالسشوار بلاحرارة تانشف وهي تمشطو ليها... وبدات تتقاد ليها لباتشا وفلخر دارت ليه زيف حياتي...
رحيل:(باستها) يخليك ليلي
أسماء:اجي قبل ماتمشي (شافت جهة لباب وقالت بخفوت) كنت بغيت نسولك مي مجابتهاش لفرصة وااش نتي وراجلك مخاصمين؟؟
رحيل:(شاافت فيها بتفاجأ) شكون گالها ليك؟
أسماء:مگالها ليا حد مي باانت ليا اش واقع بناتكوم؟
رحيل:(تنهدات مقاداش تجاوبها وتگول ليها اش كااين حيت الأمر متعلق بيهاا داكشي علاش ختاصرات كلامها) درت واحد لغلط وهو وتقلق مني هادا ماكان
أسماء:(تفهماتها وقالت) ونتي محاولتيش تصالحيه؟
رحيل:فلول حاولت ندوي معاه ونطلب منو السماحة ولكن هو كان معصب ومبغاش يدوي وخليتو
أسماء:وشكاتسناااي وغدا لعيد
رحيل:نتي معرفااش نوح وتقليقتو شتي واخا ديري لي درتي لابقا هاز شوكتو والله لانزلتيها ليه
أسماء:ولو حاولي معاه وشوفي يقدر يتعصب ولكن فاش يبرد متأكد بلي غايسمع ليك
رحيل:الغلط لي درت كبير بلعربية تعرابت زبلتها
أسماء:اوا حيت زبلتيها ديري حنة يديك وطلبي السماحة وزعمة منحتاجش نعلمك
رحيل:(تنهدات)يكون خير زيدي نتعشاو راه تعطلنا
خرجو بزوجات ورحيل غير تتنهد وتغكر فكلام أسماء... هي ماشي ترخات ونسات شنو كاين هي فقط عطاتو وقت فين يرتاح ويبرد باش لاهضرات معاه يسمع ليها أما فاش كان معصب فهو أصلا مشافش فيها وتالكلام مكيهضرش معاها... لقات لبنات ورحمة وتانيرت وزاينة كيتسناوهوم لعشا... تجمعو عليه وتعشااو أما الرجال كانو سبقو تاهوما والأغلبية مشى ينعس حيت غدا تابعهوم لفياق بكري... تعشاو وتانيرت شافت فسيدرا لي ناعسة وقالت:خليها تبات معايا ليوم وسيري تنعسي ابنتي راه مشى لحاال
رحيل:(تتفوه)واخا تصبحو على خير
مشات هازة قرعة دلما ودخلات لبيت مالقاتوش ماعرفاتش فين مشى... بدات تزول حوايجها ولبسات بيجامة خفيفة وجلسات تسنى فيه باغا تدوي معاه ليوم... مدازش وقت بزاف تكان داخل من لباب لي سدو بالساقطة وقرب بشوية عليه ساكت مكيهضرش..
رحيل:نوح
شاف فيها بلامايحاوب وهي ناضت وتشجعات قالت:نقدرو نهضرو أنا ويااك ؟
نوح:(بهدوء)فاش غاندويو؟
رحيل:(شدات يديه وقالت) واش غانبقاو هاكا مخاصمين مكانهضروش عارفة بلي نتا مقلق مني بزاف ولكن نتا عارف نيتي وعارف بلي واخا غلطت مكنتش قاصدة..(شافت فيه) سمحليا
نوح:(مسح لحيتو وقال بنفس الهدوء) ملي عارفة راسك غالطة اش داك من لول ديري لفالطة مامرة مازوج اش غانسى ليك (خنزر فيهاا وقال بخشونة) مشيتك لعندو لدار بوحدك ولا لكدوب ولاشدان اليدين عاين بااين (تخطاها وقال بإنزعاج واضح فصوتو المبحوح) لعواشر هادو خليني ترونكيل مع مخي حيت لاشعلت غانبكيك الد'م بلاصة الدموع
واخا دازت هاد الأيام كلها إلا أنه منساش ليها شنو دارت... حاول ولكن ماقدرش حيت حجم لغلط ديالها كان كبير بزاف... وهي براسها راه معتارفة بيه وباش ينسى ويسمح خصو وقت... نوح من طبعوو حنين وكيتعامل معاك مزيان وكلشي ولكن فاش كيتعصب ويشوف شي حاجة ماعجباتوش تايتقلب قلبة وحدة... شحال من واحد فالعائلة تقلب عليه حيت شاف فيهوم شلى حوايج وكلاصاهوم وماشي غير لعائلة تالمعارف... ولكن هاد لمرة جاتو فواحد الإنسانة لي مشارك معاها الحياة... إنسانة عاطيها واحد القيمة أو واحد الاحترام والتقة... ماعمرو نافقها ونهار لول گال ليها اش كاين ولكن هي طيحات بكلامو...
رحيل:(واخا هضرتو جاتها قاصحة قررات تكمل مابدات) من حقك مغانلومكش ولكن على الأقل عدرني وفهمني
نوح:(خنزر فيها) اش غانفهم ياااك النهار لول گلت ليك هاداك خوناا يكون بينك وبينو الاحتراااام ماضسريهش عليك داكشي لي كان قبل الزواج مايبقااش.. من لول جيتك نيشان مازوقتش هضرتي حيت عاارف روحي كيفاااش داااير
رحيل:اه عارفة راسي غلطة ولكن راه مكنتش قاصدة
نوح:(هز حاجبو)شنو لي مكنتيش قاصدة؟
رحيل:(تاتشرح وتعبر بيديها) مكنتش قاصدة نخلق مشكيل بيني وبينك أنا نيتي كانت غير نحل مشكيل لأسماء معاه هدا مكان
نوح:(غوت بخشونة تاقفزت ) ونتي مااالك ؟ اش دخلك بين الرااجل ومرتو؟
رحيل: نتا معارفش شنو واقع وأنا مانقدرش نقول ليك ولكن تيقني لمشكيل كبير بناتهوم وأنا نيتي كانت صافية
نوح:باغا تحلي ليهوم لمشكيل علاش تكدبي عليااا ؟؟ علااااش تمشي عندو بوحدك لداااار باغااا تحلي لمشكيل لاش مخلياااه يتلمس فيك يديه تياكلوووه متلا معاارفش بلي نتي مرا مزوجة ؟ باغا نفهمك ونتي دايرااها گد راسك ولمشكيل هو نتي عارفة شكااين ومع دلك مشيتي ودرتي لي گال ليك مخك بلاماضربي حساااب لحد وكون غير كان غلط واحد وبسيط نگد نسرطوو ونميك عليه ونگول ماعليش افلان ماتعاودهااش ولكن نتي لحاجة لي نگول ليك عليها بعدي منها مكترتاحي تاكاتقربي ليهاا ودابا نيت تانگول ليك ميكي علياا ونتي باقا شادة فلكلااام
رحيل:(شدات دراعو) حيت باغا نشرح ليك باش تعرف اش كاين
نوح:(قرب وجهو جهة وجهها كتر) هاد الساعة باغي نريح دمااغي نسى ماشفت ومادرتي
گالها وهو عاض شنافتو بنابو وتخطاها غادي لباب يبدل ساعة بخرا... بكلامها عوتاني شعلاتو وخلاتو تاني يتفكر داكشي لي ميك عليه هاد ليامااات... واخا مكانش باغي يفتح هاد لموضوع باش مايگولش ليها شي كلام لي يجرحها وهي حاملة ولكن بيما أنها بغات دوي تاهو دوى وگال ليها شنو كااين... وتارحيل مزادتش معاه لهضرة حيت عارفة حجم الغلط ديالها وبلي غلطات فحقو... هي هاكا طبعها لاغلطات تتعتارف ومشكيلتهاا بعض المرات تاتصرف بلاعقل وبطيبة تاكاتلقى راسها حاصلة فشي مشكيل بحال دابا نيت...
هي عارفاه بلي واخا يتعصب منهاا ويتقلق لابدما غايسمح ليهاا غير هي غتاخد وقت طويل شوية باش تنسيه...نعسات بلاصتهاا ونسبياا حسات بالراحة عكس ليامات لي فات فاش مكانش تيعبرها ويتجاهلها.. واخا راه متصالحوش ولكن على الأقل هضر معاهاا... غمضات عينيها ونعسات دغياا مع لعياا دلحمام عكسو هو لي شد لعسة فبرا الدار بوحدو... وفبالو شلى مطااارق تيخمم فيهوم...
***
أشرقت شمس يوم جديد.. يوم لعيد لي كايكون كلشي فايق بكري منهوم تاسيدرا لي صابحة ناشطة بداك القفطان ديال الدار لي كاان على قدهاا مخيط ليها خصيصاا وكان كادو دنوح لي لبسو ليهاا... تاضور بيناتهوم فالكوزينة وهوما تيوجدو لفطور دلعيد... كانت رحيل وسطهوم بقفطان لي خيطات فلبلوغوا دارتو سامبل وزوين جاي معاهاا ومبين ليها لكريشة لي ماشاء الله كبرات وبدات تنزل ليها شوية لتحت...مع فولار مناسب ليه وماشي غير هي لي كانت موجدة راسها إنما كلهوم كانو متأنقات بقفاطن الدار ولبنات طالقين الشعورات ولمكياج فلوجه كل وحدة تگول لتانية أنا حسن منك.. تحط الفطور فوق الطبلة على حقو وطريقو ولملحون مطلوق فالصالة مع لبخور دلعود... قربات رحيل عند باها وباست ليه يديه وراسو وقالت:عيد مبارك سعيد ابابا الله يخليك لينا وعقبال مانشوفوك حاج إن شاء الله
إدريس:علينا وعليك ابنتي آمين ياربي
مشات سلمات مع لحاج لحسن تاهو بركات ليه لعيد وخوتها لي كانو بلبلدي مأنتكيين تاني... عنقاتهوم ورؤوف غير من بعيد بركات ليه.. ضورات راسها تاتقلب على نوح مبانش ليها وخرجات مخلياهوم تيباركو لبعضياتهوم ومشات لبيت لقاتو لابس فوقيتو لكحلة مبينة كتافو لعرااض والروايح كيتشمو من بعيد... شافت فيه بإعجاب تيحمقهاا بلبلدي فاش كيلبسو حيت كيجي معااه... قربات لجهتو تاوقفات وراه وهي تحنحن تاضار شاف فيهاا وهو كيلبس فساعتو... متشاوفوش فالصباح حيت هو فاق بكري وخرج نزل عينو تايشوف فيها بقفطاان لبلوغواا لي مخيطاه جديد وتيتأكد ياكما مزير واخا راه غير لعائلة لي كاينة ولكن لي فيه شي حاجة فيه وقاعدة عندو يسكانيهاا شنو لابسة ويتأكد بنفسو... تبسمات ليه رحيل برقة ونطقات بصوت هادئ وهي واقفة على صبيعات رجليها وطبعاات قبلة على حنكو: عيد مبارك سعيد نوحينو..
حرك ليها راسو بهدوء قال: عيدك مبارك
رحيل:لفطور واجد وكلشي كيتسنااك براا
حرك راسو باه وهي زعمات وشدات فيديه وشافت فيه مبسمة.. ماحكرش وماقمعهااش خرجو من لبيت غاديين لصالة وغير وصل بدا يبارك ليهوم... تجمعو على لفطور كاملين ضاحكين ناشطين.. محمد طه كان حاط عينو غير على غزلان والاناضت يتبعها بعينيه...شحال من مرة حصلاتو ولكن ميكات وماتسوقااتش ليه حيت عارفة لاش باغي يلمح... وتاهي دارتها ليه على قد تخمامو وجلسات جنب ريان تاضحك وتجمع معاه ومحمد طه ينغز فيه ويخنزر باش يفهمو راسهوم وهي ماتسوقاتش... باغا تفقصو وباغا توريه الإحساس ديال داكشي لي دار فحقهاا... تيگول بلي مغايتفرقش معاها وباغيها ولكن كاتشوفو مدايرش جهد وغير هضرة وصاف... وهي بغاتو يبين ليها بلي بصح متشبت بيها واخا راه رافضة ترجع ليه ولكن هادشي كيعزز من تقتها بنفسهاا... وصلات وقت الدبي'جة والرجاال ناضو يوجدو راسهوم ولي لالبس شي جلابة ولاشي فوقية راه حيدهاا...
ورا دار كاانو دايرين أصلا جليسة وديك لبلاصة فين مولفين تيد بحو وكيجمعو الروينة تم مكيدخلوهاش لدار... كانت رحمة وزاينة وتانيرت هوما لي مكلفات بمواعن لي غايحتاجو كيوجدو كلشي باش تسهال عليهوم لقضية... خرج نوح مبدل حوايجو بتيشورت كحلة مع شورط كحل حد الركبة وداير كاسكيط على قبل الشمس.. جايب معاه مطريااال لي غايحتاج ولقى إدريس ولحاج لحسن كيتسناوه...
إدريس:نبداو اولد لحاج
نوح:(قلب عينو تيقلب على زين العابدين تابان ليه جاي تيجر فالكلاكيط تاهو ضارب شورط كحل مع تيشورت سماطي) صافي نبداو لاكان كلشي واجد
سيدرا:(قربات جهتو وشدات فيديه وقالت بزعل) بابانو صافي غايمشيو لحوليات
نوح:صافي غايمشيو ابابا
سيدرا:انتوحشهوم
ريان:ملي تكوني كاضربي فالشوا غاتنسايهوم غير تهناااي
نوح:سي إدريس نبداو دابا باش نيت نجيبوها مع لوقت هي هاديك
خرجو لحولي لول ولبنات راه جالسات تيتفرجو ويصورو مخلين الرجال يديرو خدمتهوم.. نعسو لحولي وشدو نوح وإدريس مع محمد طه وجاا لحاج لحسن تيقرا فالدعاء قبل مايدوز عليه ويد'بحو مخلي دمياااتو كيشرشرو مع الأرض
رحيل: شحال زوين هاد لسبااس هنا وتا الروينة مكادخلش لدار وتتبقا فبرا
أسماء:شحال زوين لعيد هنا حسن من لمدينة والله شوفي الطبيعة ياسلام
صونى تلفونها بنمرة إسلام وهي شافتها وحبسات الصوت وبقات جالسة ورحيل لي فجنبهاا لمحات السمية وماهضراتش خلاتها على راحتهاا... رجعو كيتفرجوو فالرجال لي داينها فداكشي لي تابعهوم وكلشي داير يديه... محمد طه وريان عطاوهوم السليخ وخلاوهوم يتكلفو ورؤوف راه تيشد معاهوم... دب حو لحوالى بتلاتة وبقا التاني دنوح لي شير لزين العابدين لي جاا جهتو ونطق بهدوء:دوز تعلم الدب'يحة
مد ليه المو س لي كان عامر د م وشدو من عندو زين العابدين وطلق ودنيه مع باه لي تيگول ليه الدعاء وكيوريه كيفاش يدير..
نوح:(نزل شد ليه راس لحولي وقال بهدوء) حط لمو س هنا ودوز مرة وحدة باااش ماتعدبووش ورد لبال راااه لموووس ماااضي..
شد ليه هو وإدريس ورؤوف وزين العابدين بالحرف طبق كلام باه لي كان باغي يعلمو الدب يحة... عارف ولدو زعايمي وبلي راسو خفيف دغيا كيشد عليها وراه وخلاه يجرب باش يولف من هنا لقدام... وماشي غير الدب يحة خلاه يتكلف بلحولي كاامل واخا مرة مرة تيعاونو فلعيود ولكن هاد لمرة حكم عليه يكملو بنفسو..
الدوارة خرجات والنسا شمرو على يديهوم يغسلوهاا وحطاو لعزبات عقوبة باش يغسلوها... بيسان ورنيم وغزلان أما رحيل وأسماء فهادوك ماخلاوهومش يتحركو حيت متقلات خصوصا رحيل لي قربات...
تانيرت:(تاتغسل الدوارة وتتوريهوم كيفاش) ديرو هاكا باش ماطرطقش ليكوم شدوها هنااا مزيان وكبو لما هاكا..
رنيم:أنا أصلا مكناكلهااش ومكاين لاش نعرف ليها
تانيرت:اييه ولاكان راجلك تياكلها اش ديري تلوحيها شدي باركة من لفشوش راه كاملات غاتغسلو تباركالله كاين ربعة دوارات ارا ماتغسلوو وطلقو يديكوم
وقفات ليهوم تانيرت وزاينة بحال البو ليس ممخلينهومش يفلتو منها...
ريان:(نغز محمد طه بلموس) ضرب على غيزو تاتغسل لكرشة
محمد طه:(ضار متبعها بعينو وضحك بهدوء) حادگة منخافش عليهاا
ريان:تاتغسل وتخسر سيفتها
محمد طه:خرج خرج ديك الدوارة وعطيها لدكتورة ديالك تغسلها تاهي
ريان:هاديك فنيانة باااين گاعما تاتهز المعلقة فدارهوم
محمد طه:(جاتو الضحكة) ضرب ليااا على كيفاش شادة الدوارة
ريان:(شاف فيها لقاها شاداها بصبع يديها ومخسرة سيفتهاا) راه گلت ليك مون دكتوغ ممولفاش بهادشي
خلاو اش تابعهوم وتبعو لبنات تيشوفو اش تيصنعوو... وبيسان خلاص محاملاش تغسلهاا وكون ماتانيرت لي گالتها ليها بفمها والله لادارتهاا... تاتغسل الدوارة ومخسرة السيفة وماكرهاتش ترد...
ريان:(دار السبة غادي يجيب بانيو وهو يدوز حداها ونطق بهمس) زين كيف النوارة كيغسل فالدوارة..
خلعهاا حيت مكانتش عوالو عليه وجل تفكيرها فديك الدوارة لي بين يديها... أما هو كيف جا بالخف هز داكشي لي بغا ورجع باش مايجيدش ليها الصداع وهو عارف نوح غايون حاضيه وبلفعل كان واقف جنب زين العابدين كيوريه ومع شافو تحرك لتم وهو يفيكسي عينيه فيه تاشافو رجع... سالاو الرجال شغلاتهوم وخلاو نوبة النسا دابا... رحيل وأسماء تكلفو ليهوم بولفاف ولبقية راه كل وحدة شنو كادير... سيدرا تجي هنا وتمشي لهيه وتشوف فالحوالى معلقين بربعة وتوقف عند واحد وتمشي لعند مها وتسول وتجي عند هادا وتسولو...
ريحة القطبان مالية المكاان تجمعو على طبيلة ولحاج لحسن موجد ليهوم أتاي بنعناااع ريحتو تشهي...
رحيل:زگي اسيدرا يديك لاتعمي شي حد
سيدرا:(تتاكل فلكبدة دلحاولي تتحمقها) لا مامي أنا شادة مزيان
تانيرت: كون كنا معيدين فمراكش كون باقي لدابا ماكملنا الدبي حة
رحمة:حيت لبلاد لوسخ كيبقا برا ماشي بحال لهيه
تانيرت:واه وتاالمعاونة دغياا كاتسالي
أجواء العيد الكبير ماليها متيل... العائلة والحباب كيتجمعو مع بعضياتهوم وكلشي تاتلقاه داير يدو ومعاون...
لحاح لحسن:دوك الريوس خصهوم يتشوطو لايخنازو اولدي
نوح:(حك مدمع عينيه ونطق بهدوء) غير خليهوم تال ورا لغدا الحاج (ناض) غاتمشي نتكى شوية بلاماتفيقوني لغدا
دخل لدار وعينو تيتسدو بلعياا وبالنعااس وغير دخل لبيت حيد لفوقية وبقا بشورط فقط ومع حط راسو نعس دغيااا...حلات رحيل لباب باغا تجي طمن عليه وغير شافتو نعس وهي تخليه براحتو عرفاتو عيى ومبغاتش ديرونجيه تاوكان يفيق لخاطرو...
**
غير تغداو مشاو دراري تنشرو فالسطح ينعسو باش يرتاحو من لعياا وتمارة لي ضربو...ولبنات فلبيت شادين الحديت كيهضرو من غير نساا لي نعسو حيت عياااو...
ناضت أسماء خرجات لبرا وأكبستات لابيل دإسلام لي نطق بعصبية:علاش مكتحاوبينيش؟
أسماء:(ببرود)ماشفتش التلفون
إسلام:ماشفتيهش ولامابغيتيش تجاوبي
أسماء:دابا من لخر معيط باش دابز
إسلام:معيط باش نسول فيك ساعة نتي مباغاش تجاوبي
أسماء:الاكنتي غاتهضر بهاد الطريقة غير بلامااتصوني
إسلام:نتي تاتندمي لواحد حين باغي يدوي معاك من الصباح نصوني باش لواليدة تهضر وتبارك ليك ونتي مكاتجاوبيش
أسماء:دوزها ليا ندويو معاهاا
دوز ليها مو لي بدات تبارك الله وأسماء عاطياها صوابهاا... وموراها بداو يباركو ليها تاخوتاتو وعيالات خوتو والطاسيلة لكبيرة... وهي غير تاتفرق لصواب ومادا بيها تقطع طلعو ليها فراسها بصوابهوم لخاوي... غير دوزو ليهاا إسلام وهي تقطع فوجهو مامخلياااهش يكمل لابيل معاهاا... رجعات عند لبنات لقات رحيل مشات تنعس ووجلسات معاهوم...
غزلان:بغيت نخرج
رنيم:والله ماكرهت تاأنا نخرج
أسماء:زيدو نخرحو نمشيو غير هناا
بيسان: مكاين فين تخرجي هناا لابغيتو نمشيو لجهة فين كاينة لعوينة تما زوينة
أسماء:زيدو نمشيو
بيسان:والبسو حوايجكوم
لبسو وخرجو بلامايعلمو حد غاديين مع بيسان حيت هي لي عارفة تم... الدنيا خاوية حيت كلشي فدارو وغير هوما لي كيدورو تم.. مشاو لعوينة لي فيها لواد لي گالت ليهوم بيسان ولي كانت نفسها لبلاصة فين شاف إدريس تانيرت أول مرة... ضارو تم وشربو لماا ديال ديك لبلاصة وشبعو تصاور غير بناتهم قبل مايرجعو لدار...
***
حلات عينيها فاش سمعات الصداع وقوة لهضرة برا.. شافت بلاصة نوح لقاتها خاوية وهزات تلفونها لقات بلي الستة دلعشية ونعسات بزاف تاتنفخو عينيها... ناضت تاتجمع فشعرها مسخسخة والصهد قتلها تاشحفات... لبسات عليها قفطانهاا وگدات فولارها ومع جات تخرج لمحات واحد لبلاستيكة دتوب كحلة فوق النموسية... كمشات حجبانها وبفضول قربات هزاتها وحلاتهاا تشوف اش فيها...يديها لمسو توب حرير رطب جبداتو وهي مستغربة... حطات لبلاستيكة وحلات داك توب لي كان فالأخضر ملكي وكملات ليها صورة داك لقفطاان لي كان مخيط بخياطة زوينة وهماوية... فيه لمجدول ديالو بتوبو نيت... حطاتو فوق النموسية وهزات ديك البلاستيكة لي كان فيها فولار بلون لخيااطة... تبسمات وهي عاضة شفايفهاا ورجعات هزات داك لقفطاان والفرحة شوية وتخرج من عينيها فاش عرفاتو جاب ليها كادو دلعيد...
الفرحة باش حسات رحيل فاش شافت القفطان مع فولارو نساتها ديك لغببنة دلخصام دأيام... عينيها لمعو ومكرهاتش تنقز بالفرحة وتغوت... جيست بسيط ولكن بالنسبة ليهاا غالي بزاف...فاش شافت سيدرا بقفطانها وسولاتها على شكون شراه ليها وگالت ليها بابانو مغاتنكرش بلي تقلقات وبقا فيها لحال فاش ماتفكرهاش... بحماس لي فيها زولات داك لقفطان لي كانت ديجا لابسة ولبساتو جاها على طولتها واسع ومبرد وتوب تايجي واقف... دارت ليه داك لمجدول ولبسات لفولار وتما اكتملت الصورة... حباتو لامن لونو لاخياطتو هزات تلفونها تاتصور بيه وشبعات سلفيات وتصاور وطاحت فبالها واحد لفكرة بغات طبقهاا... دخلات لواتساب ومشات نيشان لنمرة نوح وبدات تتشوف تصاور واشمن وحدة زوينة باش تسيفطها ليه وقع اختيارها فواحد لفوطو كانت واقفة جنب وشادة كرشهاا ومصورة سيلفي من لمرايا جاتها زوينة...سيفطاتها وكتبات عليها "شكرا نوحينو على لقفطان حبيتو بزاف" سيفطاتها وخرجات لعندهوم مبسمة وباين على وجهها مرتاحة... لقات غير لبنات جالسات أما لبقية مكينينش كمشات حجبانها وقالت:فين مشاو؟
أسماء:هاي هاي هاي الناس ولقفطان الجديد شفتو لغدر
رحيل:(ضحكات)هههه والله تجاني كادو
أسماء:اوا الله يجيب لينا لي يعطينا لكادو تاحنا
غزلان:جاك لون فن
رنيم:بصحتك وراحتك
رحيل:واگولو ليا فين مشاو
رنيم:برا كيقطعو لحم وخالتي تانيرت كاتوجد لقطبان
رحيل:اوا علاش جالسين هنا ممعاونينهومش؟
أسماء:خصنا نعمرو أتاي
رحيل:أنا مشيت نطل عليهوم
خلاتهوم ومشات متبعة الصوت ملين جااي لقاتهوم جالسين فديك الجلسة نيت لي كانو فيها ورجال لي تيقطعو لحم راه مفرشين فالأرض باااش نقي... ومها ورحمة وزاينة تيعمرو فلقطبان...
سيدرا:(جات لعندها تاتجري وقالت بنظرات إعجاب) واو مامي جيتي زوينة
رحيل:(جراتها باستها وقالت بحب) الحبيبة دمامي عويناتك زوينة
شافت بجنب عينيها جهة نوح لي كان عاطيها بضهرو تيقطع فلحم هو وإدريس غير سمع سيدرا اش گالت وهو يحبس وضار جهتها تايشوف فيها... مهزاتش راسها ولكن مراقباه بجنب عينيها وهي تادوي مع سيدرا وتقيس ليها شعرها زعمة راه مركزة معاهاا... رجع تيكمل شغلاتو وكلشي معاون تاسالاو وجلسو برا فداك الريح لخفيف مجمعين تياكلو لقطبان... هادا هو لعيد لكبير فيه تمارة ولماكلة وقوة اللحم تاكطلع فالراس كيف وقع مع نوح لي من طبعو مكايكترش لحم وكينوع فالعيد وداكشي لي دارت ليه رحمة حيت هي لي تكلفات بلعشاا وجدات ليه صلاد خفيفة مع ستيك دجاج ساعة كلات ليه سيدرا عشاتو... كانت بغات رحيل تنوض توجدو ليه ساعة مابغاااش...
رحيل:عزيز عليك لحاجة لي ماشي ديالك علاش كليتي عشاا باباك
سيدرا:وحيت عجبني امامي
تخشات فنوح وهي معبسة شنافتها وقالبة وجهها... درعها بيديه تامبقاتش تبان وهز تلفونو كيبقشش فيه... كانت وصلاتو التصويرة لي سيفطات ليه رحيل... شافها وخرج بلامايجاوب مطلع ليها لڤو... كملو لعشا وقصرو شوية ولي فيه نعاس مشى ولبنات بقاو سهرانات ومعاهوم رحيل لي كانت نسات التصويرة ومع بداو يهضرو على لواتساب تفكراتها ومشات تشوف واش جاوبها ومع لقاتو قراها ومجاوبهاش تغددات وماعرفات مزال شنو دير معاه... السماحة وطلباتها وشرحات ليه ودارت جهدها ولكن هو راسو قصح من لحجرة... ماعرفاتش كيفاش غاتخليه ينسى مادارت واخا راه فالحقيقة هي براسها مانساتش ودابا كاتجلس مع راسها وتگول باشمن عقل كدبت عليه وعلاش ماصارحتوش وأنا مولفة ماتنخبيش عليه...أما موضوع لمشية لعندو لدار ماحمقاتش راسها فيه حيت أصلا ديك لفترة كانت فلوحم وهي عارفة راسها بلي كانت كارهاه وممسوقاش ليه يعني كاين عدر فديك الفترة ولكن دابا لا... وبصح بعض المرات تانديرو شي أغلاط وفاش تانجلسو مع راسنا وتانبقاو نسولو ونگولو فين كان عقلناا وهادا هو حال بنادم ضروري مايغلط ويتعلم من لغلط ديالو واخا كاين نوع لي واخا يوقع لي يوقع مكايتعلمش وكاين نوع لي تايدير أطونسيو من لغلط لول ومكيعاودوش... كان سيفط ليها إسلام عيد مبارك فلواتساب وبقات تاتشوف فلمساج ماعرفاتش واش تجاوبو ولا لا... ولمشكيل هي فواحد الموقف لاتحسد عليه... اه راجلها من حقو يغير عليها ويتعصب لاهضرات مع إسلام ولكن راه إسلام عاش معاها فترة ومجاتش تسد عليه هاكاك... غير هو غلطها أنها ولفات تعاملو بحال خوهاا وضسراتو شوية عليها وهادشي لي خلاها تلقى مشكيل مور الزواج...
مجاوباتوش مزال وخرجات مخليا مساجو معلق وفضلات أنها تخليه باش نيت يفهم راسو ومايبقاش يسيفط ليها....
دازو يوماين دلعيد والصهد فتارودانت كل نهار تايزيد...كانو مقررين ليوم يمشيو لفيرمة ديال تانيرت يدوزو فيها واحد النهار ولايوماين... فالصباح بكري كان لجو باقي مبرد شدو الطريق كاملين دايين معاهوم داكشي لي غايحتاجوو... كانت الفيرمة دتانيرت بعيدة شوية على دار لحاج لحسن وتاتاخد تقريبا فالطريق تلاتة دسوايع ولاربعة... وصلو ليهاا وكانت تانيرت علمات واحد سيدة تاتعرفها هنا فالدوار نقات ليها لفيرمة حيت شحاال هادي مجات ليها... عجبات نوح وجدو لي كانو أول مرة يجيو لهاد النواحي... البلاصة مخضرة ومفوجة تاتخليك ترتاح خرج نوح غادي يتسارا تم ولصقات فيه سيدرا وجر معاه تازين العابدين غاديين بتلاتة...
شاد يد سيدرا لي مجمعة معاه تاتسول فيه وهو تيجاوب بلخاطر... وزين موخر شوية داير يديه فجيابو كايتمشى بشوية عليه وداير ليزيات... وصلو لجهة واحد لمسيد قديم ونص دحيوطو رايبين..
سيدرا:فين هنا ابابانو؟
نوح:هاد لبلاصة كانو تيحفظو فيها لوليدات صغار قرآن
سيدرا:واش إكول؟؟
نوح:(حرك راسو) بحالها ولكن متيگولوش ليها إكول تيگولو مسيد
سيدرا:زينبيدين شوووف هادي إكول
كان غير واقف بملل كيسمع لكلام ويشوف بعينيه... هاد لبلاصة جاتو مملة حيت مكاين فين يخرج غير لخلى دسيدي ربي... وهو مولف تيخرج مكيجلسش فالدار على الأقل كيبغي يتريني وهنا مكاين فين وتاباش يتريني مكاينش يالاه يقدر يجري وصاف والجرا طلع لو فصحتو... كملو طريقهوم وهاد لمرة نوح داهوم لواحد لبلاصة بحال لواد دايز منها لماا ومقسم الطريق لزوج جوايه ولماا دايز فلوسط...تايتسمع صوت الخرير ديالو...
سيدرا:بغيت نقيس لماا
نوح:سيري وبشوية
مشات تاتجري وجلسات بشوية تاتقيس لمااا وترش راسها ونوح ضار جهة ولدو لقاه جلس فوق واحد لحجرة... مشى جلس جنبو ونطق بخشونة:عجبك هنا؟
زين العابدين: شوية
نوح: شنو لي ماعجبكش؟؟
زين العابدين:خاوي ومافيه حد
نوح:وهادشي راه خصو يعجبك حيت هنا غاتكونسونطرا لمخك مكااين لي يدرونجيك
زين العابدين:باغي نتريني
نوح:(تايهضر معاه وفنفس لوقت راه حاضي مع سيدرا) دابا نرجعو لمراكش وتريني على خاطرك ريح شوية ورتااح مع راسك (حرك راسو باه ونوح ضرب على فخدو وشاف فيه) تعلم الصيادة ومنها نشوف كيفاش تاتشد الموكحلة وتعمرهاا
زين العابدين:(شاف فيه) غاطيح
نوح:(هز حاجبو وشاف فسيدرا مع كان مضور وجهو لقاها جالسة فلحافة ومع محنية غير تفقد توازن اتجي مزدوحة تم وزيد لحجر كاين تما يعني غاتمشي فيها... ناض نوح بزربة جرها وشاف فيهاا مكمش حجبانو بصرامة: ياك گلت ليك ردي لباااال وماتقربيش
سيدرا:بغيت نشد هاديك لحجرة
نوح:وكون طحتي فين كنااا غانوليو ابابا
سيدرا:صافي مانعاودش سمحليا ابابانو
حرك ليها راسو باه وهزها غادي لجهة زين... لي غير شافتو سيدرا ومشات عندو تتعاود ليه داك لما كيداير وباغاه يمشي معاها ويشوفو... بقات تتلح عليه تازنزنات ليه الراس وماكرهش يزدحها مع شي حيط ساعة نعل الشيطان... ناض بزز حيت باه گالها ليه ومشى معاهاا ونوح تكى على ديك الشجرة وعينو عليهوم بزوج... عارف ولدو باقي لدابا مامتقبلش لا رحيل ولاسيدرا فحياتو وعارف بلي صعيب يتأقلم مع الوضع ويتقبلهوم... كايشوف فولدو عايش فعزلة خاصة بيه بوحدو... مكيحاولش بتاتا يدير علاقات مع الناس لي ضايرة بيه... فقط هو لوحيد لي مقتاحم الغزلة ديالو والشخص لي زين العابدين معتابرو كلشي فحياتو... كان فصغرو متشبت بيه ولكن من نهار سمع داك لكلام بمحظ الصدقة ودرجة التعلق ديالو زادت كتر...ويمكن يصنفها فخانة التملك..
🔙🔙
مسؤولية ولد مكانتش ساهلة نهائيا وكتاخد مجهود منك... فمابالك لاكنتي مسؤول تاعلى عائلتك وعلى فلوس خوتك لي خصك تحافظ عليهوم تاتوصل ليهوم أمانتهوم... كان جهد كبير منو وعمرو تشكى لشي حد بكلمة... ولكن الحاجة لوحيدة لي كانت تتهلكو هي زين العابدين لي كان من صغرو وهو منعازل ومكيبغيش يلعب مع دراري لي قدو فلعمر... تامن رحمة وبيسان مكانش مقرب ليهوم واخا راه تايديرو لي فجهدهوم ولكن مكيعبرهومش ومكيخليش ليهوم مجال أنهوم يتعاملو معاه... معارفينش اش كيبغي وشنو مكيبغيش وضروري لكانو غايديرو لحاجة يسولو نوح عليهاا... وفاش طرا لمشكيل وسمع ديك الهضرة لي ماخصهاش تسمع زاد بعد على ناس كتر أو ولى عنيف كتر لواحد درجة لي صعيبة... كان كل مرة يجيه شكايات من مدراستو وكل مرة كايمشي يشوف اشنو لمشكيل تايلقاه ضارب شي واحد شي ضربة خايبة وهو باقي صغير... مامرة مازوج لدرجة كايبدل ليه فالمدارس باش يتفادى هاد لمشاكيل ولكن تايلقى راسو طايح تاني فنفس المشكيل...حاول يدوي معاه بلخاطر يسولو مالو علاش كيدابز وحرف هو لخر مكيخرجش منو... تايبقا ساكت ومعبس تعبيسة مجاياش مع عمرو وأصلا تصرفاتو كلها كبر من عمرو...
نهار وصلو اتصال من لمدرسة فاش ضرب داك لوليد وخشى ليه قلم فعينو ناض كيف العادة كيجري يشوف اش واقع خصوصا لمديرة غير گالت ليه يجي وصاف وهو عارف ولدو دار شي كارتة... وصل وتصدم فاش شاف دري لي على شوية كانت عينو غاتمشي ويتعمى فيها... واليديه معصبين والمديرة تاهي من تصرفات زين العابدين لي كل مرة شكاية ونوح تايحاول يسايس مع لخرين وفلأخير قدرو يتهدنو وغير مشاو المديرة بدات تشكي عليه بلي زين كل مرة جايب إندار وبلي خصو حل وهضرة كتيرة ولف نوح يسمعهاا... وفالأخير خرجات بقرار أنها تحول زين من داك الكلاس لكلاس اخر ودير ليه توقيف....
خرجو من لمدرسة شاد ليه يديه ومكمش حجبانو وعقلو راه مية مطرق ضرب فيه... ركبو لور وركب غادي فالطريق وعينو من لمرايا حاضياه... كان ساكت ومتكي راسو على لكرسي كيشوف فالزاج... تنهد نوح وغير وصل لاباخطمون وزين العابدين مشى نيشان لبيتو... تبعو ولقاه تيزول حويجاتو كيف مولف وتيلبس حوايج ديال الدار... بقا حاضيه تاسالى ونطق نوح بهدوء:زين اجي ابابا
قرب جهتو وهز راسو شاف فيه بدوك لعوينات القهوين لي هوما سلاح فتاك بالنسبة لنوح كيجيب ليه التمام...هاد لعوينات لي سلبوه نهاار هزو بين يديه أول مرة وهو لحيمة صغيرة... جلس قفازي وشد فدراعو وقال بهداوة:علاش ضربتي صاحبك؟
زين العابدين:ماشي صاحبي
نوح:واخا اسيدي ماشي صاحبك ولكن علاش ضربتيه
زين العابدين:(الصمت)
تنهد نوح وكمل كلامو: عارف الضربة لي عطيتيه كانت غاتمشي فيها عينو؟ واش كانضربو شي حد بديك الطريقة (شد وجهو الصغير بين يديه وقال بحنية) مالك اولدي گول لياا مالك باش نعرف نعاونك
نفس النتيجة تلقاهاا الصمت وهادشي هلك نوح وخلاه يتنهد ويستغفر مولاه... ناض خارج من عندو غادي يطيب ليه شي حاجة ياكلها... وجد ليها ماكلتو وحطها ليه وشعل ليه تلفازة على رسوم وزين جالس كياكل ومرة مرة يلوح عينو فالتلفازة... ونوح جالس فالفوطوي متكي راسو لور ومغمض عينيه كيفكر فالحل لهادشي لي تايوقع لولدو... ضروري ماخصو يدخل حيت الأمر زاد على لحد ديالو شي نهار يدير شي كارتة ويمشي فيهاا... عدوانيتو كتارت لدرجة تتخلع...اه عارف دراري صغار تيديرو فعاايل ولكن بزاف تاني... حل عينو وشاف فيه مدة طويلة قبل مايهز تلفونو كيقلب فيه على شي حاجة. مدة وهو كيقرا فتلفون قبل ماينوض لبيتو باش يدوز أبيل مهمة....
لغد ليه مجرد مافاق زين العابدين ودار روتينو لي مولف كل صباح لبس حوايجو وخرج لقى نوح تاهو واجد شد فيديه وخرجو من لاباخطمون وفطريقو تلاقى نوح بواحد جارتو مرا كبيرا أصلها من إسبانيا وعندها كليب زوين لقات عليه تحية وكمل طريقو مع ولدو لي مكانش عارف فين غايمشي... فطرقان سويسرا لي كانت عامرة فديك لوقيتة مع صباح كلشي خدام كلشي قاري... شاد نوح طريق ومتبع جي بي إس تاوصل لواحد ليموبل تتبان عريقة من برا بلاصا طوموبيلتو وخرج هو ولدو لي غير كيشوف وساكت... طلعو فلاسونسور لطبقة لخامسة ولقاو لباب محلول... دخل نوح لاباخطمون لي كانو فيها بعض الناس جالسين فصال داطونط ومعاهوم وليدات صغار... ديك لاصال كانو فيها تصاور ديال الدراري صغار وكبار... وكانت هاديك عيادة الطب النفسي الخاص بالأطفال...
كان جالس هو ويااه فداك لاصال كيتسنى نوبتو وفنفس الوقت حاضي مع زين العابدين لي جالس حداه كيف غاتكون ردة فعلو... كان جالس وساكت غير تيشوف بعويناتو فلبلاصة لي هوما فيها وفدوك لوليدات لي جالسين حدا واليديهوم... كانت شوفتو مركزة على واحد الوليد جالس هو وباه ومو كيهضرو معاه ومرة مرة مو تبوسو... بقا مركز معاهوم وتامن نوح رد ليه لبال كيشوف فيه وعارف هو فاش تيفكر دابا... وقت طويل داز قبل ماتعيط ليهوم السكرتيرة حيت وصلات نوبتهوم... حل نوح لباب ودخل غير هو بوحدو مخلي زين العابدين مع سكرتيرة... تبسم فوجه الطبيب لي كان راجل كبير فلعمر وباين فوجهو لبشاشة... البيرو فيه جيهة خاصة بألعاب ديال دراري مستفين وفجيه بيرو وكراسى ديالو... جلس نوح فالكرسي لي قدام الطبيب لي بدا كيسول فيه أسئلة روتينة قبل مايتعمق معاه فلموضوع باش يفهم مشكيلتو...
نوح:(بهدوء)ولدي من طبعو عنيف بزاف وحركي دغياا تيتعصب عليها دخلتو لصال باش يتعلم لكيك بوكسينغ ويفرغ داك لغضب ديالو فديك الرياضة... وبالفعل من نهار دخل ليه وهو يهدا ومبقاش كيف كاان... ولكن نهار سمع بالغلط وعرف بلي مو سمحات فيه وماشي ميتة وأنا كانحس بيه تبدل زاد تقوقع على راسو ومكيهضر مع حد فلكلاس ديما ساكت واخا راه تايقرا مزيان ولكن الأساتدة ديالو كاملين تيگولو لياا بلي لولد بيه شي حاجة ماشي بحال لوليدات لخرين مكايلعب مع حد وديما بوحدو... حاولت ندوي معاه ونشوف شنو باغي ولكن مكيگولش لياا وماشي غير هاكاك ولى كيدابز مع لولاد لي تيقراو معاه وشحال من مرة بدلت ليه ليكول على هاد لمشكيل وغير مأخرا ضرب وليد صغير بقلم رصاص فعينيه ومن زهرو معماهش... الطبيب كان كيسمع ليه بتركيز وفنفس الوقت كيحلل الحالة ونوح كيعاود ليه على أي حاجة متعلقة بزين باش يزيد يعرف ويفهم الحالة لي هو فيهاا.. طرح عليه بعض الأسئلة باش يزيد يفهم قبل مايعيط لاسكرتير بااش دخل ليه زين العابدين لي داخل معبس وغير شاف نوح وهو يقرب جهتو بلامايعير اهتمام لطبيب نطق بصوت خافت:يالاه
نوح:(تايدوز يديه على شعر زين ونطق بهدوء وحنية) شنو تانگولو فاش كاندخلو لعند شي حد؟
زين العابدين:(الصمت)
ناض طبيب لعندو ومد يديه لزين العابدين ببشاشة ونطق:سميتك زين العابدين يااك سميتك زوينة شكون سماك؟
هز فيه زين العابدين عينيه كيشوفو فيه وماهضرش واخا حاول طبيب يسولو ويتبسم ويقشب معاه ولكن وتگول واش هضرو... داه جهة دوك الألعاب زعمة باش يلفت انتباهو ساعة ماتسوقش ليهوم بلعكس قرب جهة نوح جرو من يديه وهو مغوبش:يالاه
نوح:(بجدية)زين العابدين حشومة
زين العابدين:(حرك كتافو) مابغيتيش نبقا يالاه
كيجر فيه ونوح مباغيش يغوت عليه أصلا بلا والو عارف نفسية ولدو مهزوزة... حلف لابقا ليه تم وگاع لمحاولات دالطبيب مالفتوش انتباهو وماهضرش معاه ومارتااح وماتهنى تانوضو وخرجو من عند طبيب لي بقا غير تيشوف فيه...
خرج نوح وبالو غير مع تصرف زين العابدين لي مافك تغوبيشة تاطلعو فالطوموبيل...
🔜🔜
عارف بلي ولدو باقي مأتر عليه داكشي لي سمع من فم رحمة وديك لكلمة راه مساهلاش على وليد صغير... واخا كبر إلا أن زين العابدين باقي تصرفاتو كيف الصغر الحاجة لوحيدة لي تحسنات هو دار واحد الصداقة وربطها مع أمين لي قدر يكسر واحد لحاجز كان دايرو زين العابدين وتامن لعائلة كيتجاوب شوية معاهوم واخا معاطيهومش مجال كبير وحدودي معااهوم مي كوميم على قبل... كراكطير ولدو ولى عارفو ونهار لموكحلة راه شك بشي حاجة تم ولاحها ليه نهار سولو بالفن باش يوريه بلي عارف اش كايضور فراسو... حاضيه وهو واقف داير يديه فجيبو وسيدرا تاتوريه داك لماا ولحجر... مدة وهو جالس فداك لبلاصة مكونسونطري مع لكالم لي تم وصوت لماا لي مخليه يحس بالراحة ويغمض عينيه مدة طويلة تاسمع لغوتة ديال سيدرا لي قفزاتو من بلاصتو وخلاتو يحل عينيه بزربة...
بانت ليه سيدرا تاتجري جهة زين العابدين لي كان واقف بعيد عليها... لصقات فرجليه وفديك الساعة ناض جهتهوم نوح لي قرب جهة سيدرا وقال:مالكي؟
سيدرا:(تاتشير جهة الربيع) بخوشة لهيه خلعاتني
شادة فرجل زين العابدين لي گالب وجهوو عليها ونوح تحدر هزهاا وشاف فولدو:يالاه نرجعو
حرك راسو وتبعو غادين فالطريق وسيدرا مجمعة مع نوح تتعاود ليه وهو تيحرك راسو ويجاوبهاا... فاش رجعو لدار لقاوهوم كيتسناو فيهوم لغدا وهاكا دوزو دوك الأيام تم مرة مرة يخرجو يتساراو فالنواحي...
ليوم كانو مقررين يرجعو لمراكش مبعد مدازت تسع يام على لعيد... مسخاوش يمشيو والجو عجبهوم تم خصوصا البنات وريان وطه... جمعو أغراضهوم وتازاينة ولحاج لحسن لي غايرجعو لمراكش معاهوم... وهاد لمرة محمد طه هو لي صاگ طوموبيل باه...عينو على لمرايا حاضي غزلان وكل مرة يشوف فيها وهي مجالساش مرتاحة... تعيى ماتخنزر فيه وتقلب وجهها وتگول واش فهم راسو ولانگولو شاد معاها ضد حيت عارفها شنو باغا وعارفها بلي استافزها بتصرفاتو دابا وهادشي لي باغي... وصلو لمراكش فليل وغزلان مشات مع إدريس باش تبات معاهوم حيت مشى لحااال... ونيت أميمة باقي مسافرة
****
ليوم أول نهار ليها مبعد العطلة دلعيد لي شدات... كانت مدوزة صباح فالسبيطار ولعشية غاتمشي لكابيني ديالها... هزات طاس دلقهوة وخرجات لجردة تجلس فيها شوية ونيت ترتاح شوية من الخدمة...
جالسة وعينيها على المارة بنظرات شاردة... ماكرهاتش كون بقاو مزال فالبلاد مجموعين وخصوصا معاه هو لي كان هاد لمدة كلها تيلوح ليها شي نويطاات دلغزل ديالو... تصرفاتو خلاتها تأكد بلي نوح باقي مگال لريان والو حيت كون علمو برفضها كون راه جمع راسو وماتصرفش معاها هاكاك... ولكن هادشي مكيعنيش بلي خصها ترتااح حيت خوها معاودش فتح معاها لموضوع من داك لمرة وندمات لاش گالت لا قبل ماتعرف شكون لي جا وخطبهاا... تنهدات بحسرة معرفاش راسها شنو دير ميمكنش تهضر مع خوها وتگولها ليه واخا تكون تتموت على ريان... ماعندها تاحل من غير تسنى الوقت شنو غاتوريها... كانت ساهية تاحسات بشي حد جلس معاها فداك لكرسي وريحة دبرفان رجالي مألوف وصلات لجيوبها الأنفية... ضارت جهة الشخص وهي تهز حاجبها فاش شافت عمر لي كان جالس تيشوف فيها مبسم بالخف:توحشتك
بيسان:(ببرود) وشنو بيني وبينك باش توحشني
عمر:مغاتفهميش هادشي (شاف فوجهها بتركيز وقال)جا معاك السفر گالو لياا حليتي لكابيني ديالك مبروك وعلى هاد لحساااب كنتسالك شي عراضة
بيسان:ماعنديش مع لعرايض بلاماضيع وقتك معايا
جات بغات تنوض وهو يشد يديها حابسها ونطق بهدوء:عارفك باقي واخدة مني موقف بسبب التصرف لي درت باغي نطلب منك السماحة حيت غلطت فحقك ماعرفتش كيفاش تادرتهااا
بيسان:(هزات حاجبها) نتا ماشي شي واحد صغير باش ماتكونش عارف شنو تادير
عمر:(شاف فيها بتبسيمة خفيفة) عارف بلي مادرت فيها مايصلاح مي بغيتك تفهميني نتي كاتعجبيني بزاف ابيسان وملي تقربت منك نيتي كانت باش نتعرف عليك كتر ولكن فاش وقع داك سوء فهم حقدت عليك وكنت باغي نرد دقتي وخرجت داك لهضرة وأنا بصح نادم عليها وبااش تأكدي من ندامتي أنا غانگول لكلشي لي فلوبيطال بلي داكشي مامنو والو وبلي الغلط مني غانوضح ليهوم لي كاين (طبطب على يديها) ونعتادر منك قدام كلشي
كانت تتشوف فيه باستغراب تايبان فيه نادم على مادار فحقهاا وهادشي باين على وجهو ولكن فنفس الوقت مانساتش ليه شنو دار حيت غلط فحقهاا بزاف... ودابا فاش عتارف ليها وقرر يعتادر خلاهاا تزيد تخربق...
بيسان:لاكنتي عارف راسك غلطتي مزيان باش ماتعاودهاش مرة خرى وهادشي داز عليه مدة مكاين لاش نعاودو نجبدوه واخاا
ناضت مخلياه جالس وعينو عليها تادخلات لداخل وهو ينطق بهمس: لاكنتي نسيتيه أنا مانسيتش خوك اش دار فياا ودقتي غانرجعها ليه (تبسم بمكر) ونتي لي غتعاونيني...
جالسة فلاكيس تاتحسب الفلوس وتقيد كلشي فلبيسي ومرة مرة تجي شي كليانة تخلص... مكانش الرواج بزاف كيف الأيام العادية حيت كلشي كان باقي مسافر وتامن بعض لبنات باقي مجااو ومنهوم أميمة... دخل عتمان لمحال وغير شافتو غزلان وهي تحدر راسها متجاهلاه أما هو تبسم ليها وقرب لاكيس ناطق:غزلان أهلا لباس عليك؟
غزلان:حمدلله اخوياا ونتا لبااس
عتمان:سانك سانك (نطق بمزاح) صحيبتك هربات عليك هه
غزلان:تاوكان ترجع
عتمان:داكشي لي كاين اجي گولي ليا السلعة لي عندكوم هنا واش باقي مسطوكين بزاف؟؟
غزلان:لفولارات هوما لي خاصين وراه عيطت لمرات ولد لحاج وعلمتهاا
عتمان:اييه سيري شوفي ليا شنو خااص باش نمشي الديبو فين كاينة السلعة نشوف شنو بقا وشنو لي خااص
غزلان:صافي واخا بلاتي رد معاك لبال عفاك
حرك راسو باه وهي مشات تشوف البيت لي عندهوم تما فين حاطين بعض السلعة باش مايتحنسروش شافت شنو خاص وشنو باقي وخرجات عندو وبدات تتوريه الورقة وتكتب ليه وهو واقف حداها تايدوز يديه على لحيتو ومركز معاهاا... كانت وقيتة دلغدا وديك الساعة ونص لي عندو قرر يمشي يدوزها عندهاا... شد طاكسي وحطو قدام لمحال دختو... تم داخل وعينو تايقلبو عليها تاقشعها واقفة هي وعتمان وداك لقرب بناتهوم خلاه يهز حاجبو ويحس بدمو كيغلي... قرب جهتهوم تاوقف جنبهوم ونطق ببرود:السلام أوعليكوم
هزو راسهوم دقة وحدة وغزلان غير شافتو وهي تميقو ورجعات حدرات راسها عكس عتمان لي تبسم ليه وبمزاح قال:خليتك فلاميزون وتبعتيني لهنا هههه
محمد طه:(ببرود تبسم) جيت على قبل غزلان
غزلان:(شافت فيه باستنكار هازة حاجبها) شنو بغيتيني؟
محمد طه:اجي معايا واحد الدقيقة
غزلان:خدامة اخويا وماعندي كيف ندير (شافت فعتمان) مهم هانتا اعتمان هادشي لي كاين وهادشي لي خاص تاتشوف الديبو شنو فيه
تايعض فشنافتو بالفقصة وعينو خارجين فيهاا كايشوف كيفاش هو قالت ليه خويا ولاخر عيطات ليه بسميتو... مشى عتمان وغير بقاو بزوج وهو يقرب جهتها ونطق بحدة تايغزز سنانو:اشمن خوياا ولاز*ي واش باغا نصعر على ملتك
غزلان:(خنزرات فيه) ماتبقاش تخسر لهضرة ابنادم وزايدون مابيني وبينك والو نعيط ليك كيف بغيت
محمد طه:(بالفقصة)أنا تعيطي ليا بخويا وهو بسميتو ضسارة وزعامة خايبة هادي
غزلان:الله يرحم بااك عطيني بالتيساااع بلاماتفقصني تاني هاد النهاار اش باغي تاجااي عندي؟
محمد طه:(تايهضر بنفخة مراضيش) باغي نشوفك ونديك نتغداو بزوج
غزلان:(مربعة يديها وهزات حجبانها) الله يكتر خيرك مافياش الجووع
محمد طه:(قلب وجهو عليها وسد عينيه كيكالمي راسو قبل مايگول شي كلمة ماتعجبوش.. ضار شاف فيها) لاش هاد لقصوحية دابا ولعناد
غزلان:مكانعاندش جيتك من لخر مافياش الجوع وتالكان فيا مغانمشيش نتغدى معاك غير عدبتي راسك ودابا خليني نگابل خدمتي الله يسهل عليك
بقا تايشوف فيها مدة قبل ماينساحب بدون مايزيد حرف مخليها حادرة راسها تاتخربق فلوراق قدامها تاتأكدات أنه مشى وهي تنهد وضارت جهة الزاج وبخفوت نطقات:ماشي بالساهل امحمد نسى ماجرى خصني وقت وتانتاا خصك تعلم وتعرف بقيمتي ولاكنتي بصح نادم راه مغاتستسلمش دغياا نتا غير بين ليا بلي بصح باغيني
مسحات على وجهها وتفكرات بلان لكرا لي كانت باغا تقلب عليه وهي تخرج لبرا عند السكريتي لي فلباب قربات جهتو وقالت بتبسيمة:محسن لباس
محسن:حمدلله اختي ياكما محتاجة شي حاجة
غزلان:بغيت غير نسولك تاتعرف شي سمسار يكون تقة؟
محسن:سمسار واش تاتقلبي على لكرا؟
غزلان:اييه
محسن: السيكتور لي ساكن فيه كاينة واحد لعمارة فيها ديور خاويين ونقية ماتخافي من والو وتاكلشي قريب ليك
غزلان:اه اينا بلاصة بالضبط
محسن:ف***** مابعيداش بزاف على هناا
غزلان:(بتفكير) ايييه مزيان واخا تشوف ليا عفاك وترد عليا لخبار
محسن:شحاال جهدك ؟ ودار باغاها بوحدك ولانتي وصاحبتك؟
غزلان:لا بوحدي وجهدي صراحة 1800 درهم گاع لاعيقت مابغيتهاش تكون كبيرة بزاف يعني على قدي راك عارف
محسن:صافي نعسي على جنب الراحة اختي انا نشوف ليك ونرد عليك باشما كان
غزلان:الله يحفظك وهانتا بيناتنا لهضرة ماتوصل لحد واخا
محسن:صافي كوني هانياا اختي هنا فين غاتبقا الهضرة
غزلان:شكرا بزاااف اخويا محسن الله يجازيك بالخير
محسن:الله ياودي مرحبا
رجعات لداخل وبالها مع بلان لكرا لي خصها تقلب عليه فأقرب وقت... هي ماشغلهااش فالدار كبيرة لمهم عندها تلقى حاجة على قدهاا تابيت فالسطح راه مزيانة ليها وتسد عليها بابها بلاصداع وبلانفاق لمهم عندها تشري راحة بالها وراحتها وماتفكر لحد وماتهز هم لحد من غير راسهااا...
واقفة قدام مرايتها تاتجرب لبيسة لي شرات كيف جاتها مع كروشتها بارزاهاا... تاتقيس كرشها وتبسم فرحانة بلحمالة والاحساس الجديد لي تاتعيشو ولي عمرو غايتعوض...باغا تعيش كل مرحلة كما يجب وتاخد صور لكرشها وهي تاتكبر... تحل عليها باب بيتها ودخلات سيدرا لي جات جهتها تاتجري:سومة گالك بّاديدي اجي عندو
أسماء:واش جااا؟
سيدرا:اه هو فلتحت
أسماء:صافي نبدل حوايجي ونجي سيري گوليها ليه
سيدرا:واش غاتديني نقطع شعري؟
أسماء:واخا غانديك غير تهنااي
مشات سيدرا بحمااس تاتجري نزلات لتحت وگالت لإدريس بلي هي نازلة ومشات تكمل لعبها مع نوسيد وإيڤانا... دقائق وتمات نازلة أسماء لي تبسمات لباه لي كان جالس بوحدو فالصالة كيتسنى فيها...تبسم ليها تاهو بحنية وطبطب جنبو ومشات جلسات حداه وباست يديه:محتاجني ابابا
إدريس:بغيت ندوي معاك ابنتي فواحد لموضوع
أسماء:كانسمعك
إدريس:(بجدية ممزوجة بحنية)سمعي ابنتي أنا عارف بلي داكشي لي طرا بينك وبين إسلام كبير بزاف وبلي هو غلط فحقك وأنا بقيت ساكت ومادخلتش حيت هادشي متعلق بيكوم بزوج ولكن ابنتي إسلام راه هضر معايا وگال ليا ندوي معاك ونقنعك ترجعي ليه هو ولد الناس ومغانكروش هادشي عارف بلي تسرع ولكن لاجينا نشوفو من ناحيتو راه من حقو حيت هو راجل ومني وجبد ابنتي وتانتي من حقك تهزي فخاطرك حيت شك فيك ولكن ماتنسااايش بلي نتوما دابا قراب توليو واليدين ومسؤولين على حياة ولد ولابنت وخصكوم تكونو گد لمسؤولية... (طبطب على كتفها) جلسو بزوج بلاقصوحية الراس وهضرو بزوج وكل واحد يگول اش ضارو باش تصفى لقلوب ويرتاحو لخواطر
أسماء:(كانت كاتسنط ليه بتركيز وقالت) يكون خير ابابا
إدريس:إن شاء الله المهم راه غايجي ليوم من كازا وغير غايوصل غايجي لهنا باش يشوفك ودويو مع بعضياتكوم
ناضت أسماء راجعة لبيتها تاتفكر فكلام باها وفتصرف إسلام... معارفااش شنو غادير معاه من جيه باغا ترجع تاهي ومباغاش تشتت شمل عائلتها الصغيرة... تنهدات وبقات جالسة تاتخمم فهادشي لي هي فيه... تاجات سيدرا تاتعلمها بلي جا إسلام وكيتسنى فيها... ناضت بشوية عليها وجدات راسها ولبسات حوايجها وهزات صاكها ونزلات لتحت... لقاتو جالس مع العائلة وجهو مبقاش فيه لاطاش ديال الضرب ويديه حيد ليها لكبص مي داير ليها باندة... شاف فيها وتبسم وناض مودعهوم وخرجو بزوج... ركبو فسكات وأسماء مادواتش وبقات غير ساكتة... وتاهو ماحكرش ومشى بيها لواحد لكافي باش يهضرو على راحتهوم... شدو بلاصتهوم وخداو شنو يشربو وإسلام قرر يفتح لحديت معاها:صافا
أسماء:حمدلله ونتا وماماك كيف بقات؟
إسلام:لباس عليها راها كاتسلم عليك كانت باغاك تعيدي معاها ساعة مكتابش
أسماء: فيها خير
إسلام:(تنهد) ماعيتيش من هاد لحالة اأسماء؟
أسماء:فنظارك عجباني هاد لحالة تاأنا؟؟
إسلام:اوا علاش مقصحة راسك مباغاش ترجعي لدارك؟؟
أسماء:اشمن دار غانرجع ليها ونتا مسمعني فيها كلام كيف سم واش نسيتي اش گلتي ولاتصرفاتك لي كنتي تاتصرفهوم معايا؟ فنظارك غير جيت وقررت نبقا فدار بابا هاكاك؟؟
إسلام:وفنظارك نتي كون كنتي بلاصتي اش غاديري متلا
أسماء:غانسمع ليك ومغانحكمش عليك وغانعطيك فرصة ماشي ندير كيف درتي فلول عدرتك حيت عارفة مناش دزتي ولكن موراها ماقدرتش حيت نتاا زدتي فيه تكبرتي وبقيتي هاز خنافرك وكتسناني أنا لي ندير خطوة ونطلب السماحة لي المفروض نتا لي خصك طلبها
إسلام:(حرك راسو ونطق بصراحة) من حقك ومانكرش بلي غلطت ولكن متنسااايش بلي تانتي غلطتي ملي خبيتي عليا فعايل داك زااا*مل كون گلتيها ليا فلول كون راه حنا مهنين وگاعما طرا لي طرااا
أسماء:حيت خفت نسبب مشكيل لينا وحيت أصلا داك خينا مكيهمنيش عليها ماتسوقتش ليه راه كيفما نتا عندك ماضي تاأنا عندي وخصك تفهم هادشي ماضي ديالي ماعندو علاقة بيك
إسلام:ماضيك راه هو سباب مشكيلتناا ماتنسايش
أسماء:وتاماضيك نتا لي باقي واقف فطريقناا (بجدية قالت) نتا عمرك نسيتي شنو دارت فيك ديك خيتي وبلي هي غدراتك
إسلام:دابا لاش كاتجبدي هادشي
أسماء:هانتا غير جبدت سيرتها ونتا تعصبتي وكون شفتيها راه كون قتلتي ها
أسماء:(تكات على لكرسي ونطقات بهدوء)نتا مشكلتك اإسلام هو الماضي ديالك باقي مانسيتيه ومباغيش تنساه هانتا شوف رحيل مناش دازت وكيفاش تعدبات واش عارف بلي كانت بحال شي وحدة حمقة؟؟ عارف بلي داكشي لي دارو فيهاا دوك لحيوانات خلاوها تهز بنتها من لحمها وتحطها جنب لبركااسة هاا شوف كيف كانت وشنو دوزات وسير دابا تشوفها كيفاش بدات حياتها ونسات كلشي.. حيت هي بغات وحيت هي دارت خطوة ومشاات عالجات راسها بيديها وهادشي لي خلاها تكمل حياتها مرتاحة ماشي بحالك لي تااسيرة لماضي كاتخليك تعصب وتنوض تغوت وتگلب لهضرة... ااه عارفة بلي مغاتنسااش موت بنتك حيت قاصحة بزااف أنا براسي لي برانية وغير سمعت قصتها وأترات فيك عساك نتاا لي باهاا ولكن واش هادشي فنظارك مزيان ليك ولينا؟؟ واش فكل مشكيل غايطرا بيني وبينك غايكون بسباب ماضيك؟ لاكان هادشي غايبقى هاكا من الأحسن نحبسو هنا قبل مانزيدو نجرحو فبعضياتنا حسن حيت أنا مباغاش نمرض راسي اإسلام... أنا باغا نعيش مرتاحة مع ولدي ولابنتي ماشي نبقا فصداع ومشاكيل ونتا كل مرة تتگول نساو ونتا راه مناسي والو
إسلام:بالنسبة ليك نتي تقدري تنسااي بسهولة؟
أسماء:غانسى على قبل مصلاحتي وعلى قبل صحتي وعلى قبل لي فكرشي هانتاا شوف بعينيك واش هادي لي جالسة قدامك هي هاديك لي عرفتي نهار لول؟ ولكن نتا باقي كيفما نتاا
إسلام:وهاني كانحاول نبدل وكانحاول نسى
أسماء:تتحاول ولكن مكاديرش جهد اإسلام
إسلام:عاونيني نتي (شد يديها) نسيني نتي
أسماء:نتا لي خص تعاون راسك وتنسى لراسك عاد لياا اإسلام نجيك من لخر أناا جيت جلست معاك هاد لجلسة حيت بابا هضر معايا وحيت فكرت بلي كلامو على حق خصنا نهضرو على شحال من حاجة ونوضحو شحال من حاجة بااش مانبقاوش كل مرة نطيحو فنفس المشكيل لانتا باغي نكملو بزوج فتاأنا باغاا وباغا بنتي ولاولدي يتزاد بين واليديه ولكن قبل خص باااه يدير حل لراااسو (هزات صاكها) فكر فهضرتي مزيااان ولاقررتي راك عارف فين غاتلقاااني ودابا خلينا نمشيو...
تاحد مالقاها كيف بغااهاا وكل واحد فينا تايكون عايش مهني فحياتو تاكيجيه شي حاجة لي تاتقلب ليه داك لهنا فاش عايش بحال رحيل لي كانت هانياا فحياتها تالقات راسها فمشكيل بسبب نيتها... ظنات فلول أنه بدا يلين وينسى ساعة كانت غالطة حيت منسى والو وبلعكس مجرد مارجعو من السفر ورجعات ريما لعادتها لقديمة... ماعرفات كيف دير باش تنسيه وتخليه يرطاب ويسمح ليهااا...ندمات تابغات تاكل راسها بالندامة ولكن ماعندها باش تفيدها وهي لي دارتها لراسها... نازلة من الدروج وهي تاتنهج وبالسيف راها فشهرها مبقا ليها والو تولد... دخلات لصالة عند رحمة وزاينة وسناء لي جات عندهوم... سلمات عليهوم وجلسات تاتستارح..
زاينة:تريت أيلي أتاي؟ "بغيتي ابنتي أتاي ؟
رحيل:(فهماتها ) لا اخالتي طبيبة حيداتو ليا
سناء:مابقا والو وتولدي ياك؟
رحيل:اه
سناء:وجدتي بعدا حوايج لبيبيات وحوايجك لاقدر الله لشدك لوجع تلقاي كلشي مجموع
رحيل:يالاه وصلوني حويجات توينز لي كنت دومونديت ولحوايج لي شريت ليهوم تاهوما خصني غير نجمعهوم فلاڤاليز أما حوايجي جمعتهوم صراحة
سناء:اوا مزياان نيت بااش تسهال عليك لقضية اجي غاتولدي سيزاغيان ولاعادي
رحيل:طبيبة قالت لياا بلي لاجاك لوجع فلوقت فغاتولدي عادي حيت دارت معايا لاداط
سناء:اوا الله يفك على خير ودعي ليا معاك بشي درية صالحة
رحيل:الله يرزقك ياربي ويفرحك
بقاو مجمعين ورحيل جلسات معاهوم تامشات سناء ومع ماتقدرش تبقا غير طالعة ونازلة فبقات تم تاتعشاو بلانوح... مور لعشاا طلعات لبيتها ودوشات بزز منها غير على قبل ريحة العرق ولبسات عليها بيجامتها وشافت فالساعة كانت الطناش دليل... طفات الضو ومشات جهة الشرجم تاطل ومن زهرها بانت ليها طوموبيل نوح لي يالاه وقفها جنب الدار... نزل منها ودخل وهي مشات لبلاصتها وبقات جالسة تاتسناه ولكن طول... ودازت ساعة بالضبط وهي تاتسنى فيه وفاش ماطلعش قررات هي تنزل عندو... لاحت عليها بنوار وفولار وعلى سعدها وعدها نزلات تاني فدوك الدروج... عرفاتو غايكون فبيروه وماعندو فين يمشي حلات لباب وهي تلقاه جالس فلكرسي ومرجع راسو لور وداك الصمت كسرو صوت عبد الحليم حافظ لي كان طالقو من البيسي ديالو وكأنو الاغنية كانت تتهضر عليه هو بالضبط...
بحياتك ياولدي امرأة عيناها سبحان المعبود
فمها مرسوم كالعنقود ضحكاتها أنغام وورود والشعر الغجري المجنون يسافر في كل الدنياا قد تغدو مرأة ياولدي يهوااها القلب هي الدنيا
ماحلش عينو واخا راه سمع صوت لباب وشم ريحتها لي صاوب ليهاا... أما هي فبقات تاتشوف فيه مدة قبل ماتقرب جهتو تاوصلات حداه وهي تمد يديها وفكات يديه لي كان مربعهاا تاحل عينو وشاف فيها وهي ماقالت والو حدها جلسات فوق ركابيه وحطات راسها على صدرو وقالت بصوت خافت:خصاامك هلكني (شافت فيه بعيون لامعة) مقدراش نزيد نصبر على هاد السكات ديالك انوح (رجعات حطات راسها وكملات هاد لمرة وهي تتبكي) تتعاقبني على حاجة مادرتهاش بخاطري ومكنتش قصداهاا واش عارف بلي خصامك مرضني ومخلانيش مرتاحة (بدات تشهق) والله ماكنت قاصدة نكدب عليك أنا غير مكنتش باغاك تقلق مني وكنت باغا غير نهضر معاه وصاف علاش انوح مكتيقنيش... غوت وخاصم ولكن ماتقطعش عليا لكلام ومتجلهنيش انووح متجاهلنيش (بدات تتبكي بهسترية وهي تاتحرك راسها يمين وشمال ) أنا مباغااش هاد لحالة وعييت منهاا ومكانتش نيتي نوصل لهاد لمواصل تيقني
كان تيسمع ليها وهو مكمش حجبانو وبكاها كان هستيري تاخلعاتو ومغاينكرش هادشي...ضور يديه على ضهرها ونطق بهدوء:رحيل شووو تهدني
رحيل:(حركات راسها وغوتات بهسترية) لا نتااا مكتيقش فياا وأنا السباب حيت كدبت عليك ولكن أنا والله مااقصدتهاش (زيرات على لبودي لي لابس ونطقات بعتاب هستيري) علاش تادير ليا هاكا انووح علاش كتعاقبني هاد لعقااب علاااش
كاتبكي وتحرك راسها وتشهق وتعاتب فيه وتعاتب تاراسهاا تاافلحظة شدات راسهاا وغوتاات بالجهد خلاتو ينطق بخوف باين من نبرة صوتو:رحييل ماالك شوفي فياا
تاتحرك فراسها وهي شاداه بيديها بزوج ومغمض عينيها مزيرة عليهوم وراسها حاسة بيه غايتهرس بسباب الصداع لي كاتحس بيه... ونوح كيحاول معااه باش تحل عينيها وتشوف فيه وهي ماقداااتش وكل مرة تغوت كان تيحس بقلبو كيضرو مخلوع عليها وعلى حالتها...
نوح:(حط راسو على راسهاا ونطق بخفوت وحنية) الفتنة ديالي شش تهدني وشوفي فياا
فلول ماقداتش رحيل تحل عينيها حيت صداع راسها هلكها وبزز باش بدات تاتحلهوم وتاترمش بزربة وبصوت عالي ممزوج بخووف وألم نطقات: مكنشوف والووو نوح أناا مكانشوف والو أنا تعميييييت
غادي جاي فالكولوار وكل مرة يصدر تنهيدة من أعماق قلبو ويستغفر مولاه... هادي شي نص ساعة باش جابها لكلينيك وفاش دخلوها معاودش شافها وتامن الطبيبة ماخرجاتش مزال عندوو... صورتها وهي فديك الحالة مبغاتش تمحى من بين عينيه... باقي لدابا صوت غواتها تيسمع ليه وحالتها كيف كانت عمرو فحياتو شاف بحالهاا... رجع شاف فساعتو وتلفون فجيبو راه تيصوني وعارف بلي غاتكون غير مو ولاشي حد من خوتو...
وقف جنب الحيط وتكى براسو عليه وغمض عينوو تايتفكر حالتهاا لي هلكاتو فصحتو...
~~ الألم والخلعة خلاوها تصدر غوتة عالية وهي شادة على راسها لي حاسة بيه غايتشق بقوة الصداع لي فيها... سادة عينيها وبين شفايفها غير:تعميت مبقيتش تنشوف
وتبكي وتغوت بواحد الحالة هسترية خلعاتو وخلاتو يشد يديها حيت تاضرب فراسهاا لي كاتحس بلمطارق تيضربوها فيه... معرفاش بلي راه تتجهد الصداع وتاتخلي حالتها تدهور...
نوح:(بخشونة غوت)رحيييل زگاااي رااه كاتزيدي توعتي راسك
رحيل:(تاتحرك راسها وتشهق بغات تموت بداك الصداع دالراس) تعميييت أنا تعمييييت ااااااع
خلعاتو ومغاينكرش هادشي تيحاول معاهاا وهي مباغاش تزگى وتاتعاود تحل عينيها مقدراتش زيرها على صدرو ومد يديه لبيرو هز تلفونو وعيط لمو لي غير جوباتو وهو ينطق بسرعة وخشونة:جيبي ليا شي عباية درحيل ونزلي عندي لبيروو داباا
خلع رحمة لي ماعرفات اش واقع ومع سمعات الصداع حداه ناضت ببنوارها غادة لجناحو ومع دخلات مالقات حد مشات لدريسينغ هزات عباية ونزلات تاتجري ومع وصلات لبيرو سمعات صوت بكاا رحيل وغواتها دخلات مخلوعة لقاتها جالسة فوق ركابيه وهو معنقها وحابس عليها الحركة باش ماتزيدش توعت راسها... قربات جهتهوم وعوناتو تالبسها ليها وهزها بين يديه ومو وراه تتجري وتسول مالها ساعة شكون يجاوب وهو بالو غير معاها ومع حالتها لي خلعاتو... قادها فالكرسي الطوموبيل ودمارا مخلي رحمة عقلها مشوش... أما هو جبد تلفونو بيد ويد سايگ بيها تايطحن الطريق لي كانت خاوية...دوز نمرة الطبيبة لي جوباتو ومن زهرو كانت فلكلينيك لي خدامة فيه وطلبات منو يجيبها لعندها وبلي كاتسناهوم... قطع وضار شاف فرحيل لي كاتحرك راسها فاشلة وطلق تنهيدات ودموعها نازلين جنب عينيها بحال لودياان...مد يديه وحطها على حنكها ونطق بحنية:رحييل إينو حلي عينيك وشوفي فيا
رحيل:(نطقات بصوت خافت كاتنهد وتشهق) هممم مقدااش
نوح:(شاد يديه وقال بهدوء كيطمن فيها) كلشي غايكون بخير متخافيش
وصل لكلينيك وبلاصا الطوموبيل بعشوائية قدام لباب ونزل غادي جهتها تايحل ليها السمطة وهزها بين يديه مدخلها وهوما غير شافوه جابو ليه بيااص وحطها فيه ودخلوها مور ماعلم لفرملية بسمية الطبيبة لي متبعة عندها...شوية بانت ليه طبيبة جايا جهتو..
طبيبة:شنو وقع معاها بالضبط؟
نوح:كانت بخير شوية بدات تغوت وراسها ضارها مقداش تحل عينيها حاولت معاها بزز باش حلاتهوم وگالت ليا بلي مبقاتش تتشوف وتعمااات..
الطبيبة:غانمشي نفحصها خليك هنا اسي السليماني~~
رجع صونى تلفونو مرة خرا وجبدو من جيبو لقاها بيسان لي تتعيط... غير جاوبها وهي تنطق بسرعة:خويا شنو واقع مال رحيل؟؟ عيطات ليا ماما وگالت ليا بلي كانت تتغوت وحالتها كانت فشكل اش واقع واش شدها وجع دلولادة؟؟
ماعطاتوش فرصة فين يدوي بقات تتسول فيه وباين فيها خايفة...
نوح:(بهدوء وتعب) راه الطبيبة عندها دابا ملي تخرج وطمني غانعيط ليكوم
بيسان:نجي عندك؟
نوح:مكاين لاش عيطي ليمّا وعلميها ماتشطنش واخا باشما كان غانعيط ليكوم
قطع عليها وماقدرش يهضر حس بالضبابة وعارف بلي غايكون السكار طايح ليه...جلس فوق الكرسي وحط راسو بين يديه تايزفر النفس والرعدة باقي شاداه... بزز باش هز راسو وناض غادي جهة الخرجة دلباب فين كاين واحد التلاجة دايرين فيها العواصر والما والموناضات وتلاجة فيها الماكلة... هز لفلوس ولاحهوم وخدا كوكا كانيط حيت هي لي تاطلع السكار بزربة وتاتعتقو فاش كيطيح ليه...جغم جغمة كبيرة تاتگرعها حيت فيها لگايز ومدازتش خمسة الدقايق تاديك الرعدة والسخفة مبقاتش... خرج لبرا وحط ديك الكانيط فالأرض ورجع دخل لداخل باش يطمن عليها... ولقى نيت الطبيبة جايا لعندو...
نوح:امدرا؟
الطبيبة:نهار جات لعندي دارت لكونطرول گلت ليها ترد لبال لطونسيو لقيناه طالع وهو لي سبب ليها داك الصداع لي شدها فراسها وتفقد بصرها بشكب مؤقت دابا راه دخلنا والأمور مزيانة حاليا ولكن هي راه غاتبقا معانا هنا فلكلينيك تاتولد باش نراقبو حالتها وحالة توينز حيت كيف گلت ليها فأخر كونطرول من هنا ل25 غاتكون لولادة ولاجاها لوجع قبل من هاد التاريخ راه مزيان غاتولد طبيعي ولكن لامجاهاش غانولدوها سيزاغيان ومع حالتها دابا خصها تبقا تحت المراقبة 24/24 ساعة...
حل لباب ودخل لعندها لشومبر فين ناعسة...كانت مجهزة بكلشي وفيها تلفازة وحمام خاص بيهاا بحال شي بيت فأوطيل... ناعسة فوق النموسية الطبية بلباس طبي ودايرين ليها سيروم فيديهاا شعرها مطلوق براحة فوق النموسية... وجهها صفر وشفايفها بويض مشققين... ناعسة ومحساش بشنو ضاير بيها ومرة مرة تصدر منها تنهيدة... قرب جهتها وجلس بشوية جنب النموسية ومد يديه حطها على وجهها...كيبان ليه خط الدموع نازلين من جناب عينيها...مسح ليها دموعها بيديه وتحدر باسها فحنكهاا بشوية باش مايفيقهاش... كيشوف فيها ويتفكر عتابها ليه وتبريراتها... عارف راسو قسى عليها فتجاهلو ولكن الله غالب داكشي لي شاف راه مساهلش يدوز ويميك عليه... كيف ميك على بلان تصاور لي فاش وصلوه ماجبدش سيرتهوم ليها وبقا ساكت وماشكش فيها نهائيا... ماشي بحال فاش شافها بعينيه وهي غادة عندو وشاد فيديها وزايداها كادبة عليه... هو حاجتو كيغير عليها ويطيح على قبلها الرووح... من حقو وتاحد مايلومو على تصرفو وهو على قد مكيعطي الزوين على قد مكيعطي تالخايب وديما تيگولها ليها وتينبهها باش مايطيحوش فمشاكيل بحال كيف وقع دابا... حيت هو عارف الكراكتير ديالو وكيتفادى بحال هاد الأمور... مباغيش يشوفها فهاد الحالة ولاتقاس ليه بنبشة وكون يقدر يهز عليها لي ضارها مغايترددش...
مدة وهو جالس حداها تاتفكر مو لي غايكون بالها مشوش عليهوم وهز تلفونو عيط ليها طمنها لاهي لابيسان وتفكر تاإدريس ولكن مشى لحال ولاعيط ليه دابا غايخلعو وأصلا حالتها دابا راه مستاقرة عليها قرر يأجلهاا تال صباح ويعيط ليه... ليل كولو وهو مفارقش جنبهاا ويدو شادة يديها وهي كل مرة تحرك وتنهد واخا راه ناعسة ولكن ممرتاحااش... والفرمليات تايجيو يراقبو ليها الضغط والسكر مفارقوهاش...
طلعات الشميشة ونوح قرر يعيط لإدريس وبالفعل دوز ليه لخط لقاه فايق غادي لگاراج
نوح:سي إدريس غير بغيت نعلمك رحيل لبارح طلع ليها طونسيو وجبتها لكلينيك
إدريس:(بخوف ولهفة)ياك لباااس هي بخير دابا؟
نوح:(واقف حدا الشرجم وعينو عليهاا وبهدوء قال) مزيان مكاين لاش تخاف عليهاا حنا ف****
ادريس:واخا انا جاي
قطع معاه إدريس ورجع لبيت فين كانت تانيرت ناعسة فيقها بشوية باش مايخلعهااش وهي فاقت مگلوبة:إدريس مالك راجع؟
إدريس:تانيرت إينو توكضي معايا ولد لحاج عيط ليا وعلمني بلي رحيل فلكلينيك لبارح طلع ليها الطونسيو وداها
تانيرت:(حلات عينيها وقفزات) بنتي ياك بخير هي ماطرا ليها والو
إدريس:اييه بخير ماتشطنيش نوضي لبسي حوايجك نطلع عند ريان نعلمو بلي كاين يالاه ماتعطليش
طلع عند ريان لي تاهو يالاه بدا يفيق علمو وصدق ماشي غير ريان لي عرف تامحمد طه وأسماء لي تخلعات عليها وكانت بغات تمشي معاهوم ساعة خلاو ليها سيدرا ترد ليها لبال وعلموها تحاول ماتبينش قدامها باش ماتخلعهااش... مشاو بربعة وخلاو أسماء جالسة بعقل مهموم على ختهاا...
فالصباح جات الطبيبة دوزات لرحيل كونطرول تاني لي حلات شوية عينيها ولكن تاتحس براسها عيانة... دوزو ليها تاتلفازة وطمنو على توينز لقاوهوم بصحة جيدة واحد فيهوم فلتحت والتاني فوق منو...
الطبيبة:ماتحاوليش تعصبي ارحيل نتي عارفة بلي الطونسيو لاطلع مصيبة وراه شفتي حالتك لبارح وزيدي نتي دابا قريبة تولدي وهادشي راه غايشكل خطر على حياتك وحياة توينز دونك بعدي من الستريس والأعصاب هاد لمدة لي غاتبقاي معانا هنا..
كانت غير تتسمع ليها رحيل ومرة مرة تحس براسها ضارها وغير خرجات طبيبة وهي ضور وجهها لجهة لخرى وسدات عينيها ويديها على كرشهاا... لبارح فاش حلات عينيها وبان ليها الظلام تخلعات وقلبها كان ايخرج من بلاصتو حيت عمرها وقع ليها بحال هاكاك وعمرها عرفات بلي الطونسيو فاش كيطلع كيدير بحال دوك الأعراض... خافت لاتكون تعماات وغاتبقا حياتها كلها هاكا وأي واحد فين كون كان بلاصتها غايطرا ليه نفس الشي وغايحس بنفس الخوف ولكن ربي لطف... سمعات صوت خطاويه تايقربو عندها وحسات بيديه تحطات على حنكها تايقيسو بحنية... البكية فديك اللحظة شداتها ولكن مانزلاتهااش بقا فيها لحال على داك لعقاب القاصح لي عاقبهاا واخا راه عارفة راسها غلطات ولكن قصح معاهاا بزاف وهي لي مولفة الخنات والفشوش لي تتفشش عليه والاهتمام لي تايغرفها فيه... ماحلاتش عينيها وهو عارفها مناعسااش تحدر جهتها وحط جبهتو على جهتها ونطق بحنية وخشونة:خلعتيني عليك الفتنة ديالي
رحيل:(حلات عينيها وهوما مدمعين بسباب الضو لي جاها مجهد شافت فيه وبنبرة خافتة ممزوجة بعتاب واضح) ظلمتيني بزاف..
وصل إدريس ونزل بقلب ملهوف هو وتانيرت لي شادة فيديه وراهوم ريان ومحمد... سولو عليها فلغيسبسيون وغير عطاوهوم رقم الشومبر وهوما يطيرو كايجريو.. لواليدين واخا تكون شرفتي تيبقاو ديما كيخافو عليك وغير تيعرفو بلي طارية معاك شي حاجة قلبهوم كيبغي يخرج من بلاصتو... كيف طاري مع إدريس وتانيرت دابا لي واخا نوح طمنهوم بلي ولات بخير ولكن هوما مغايرتاحو تايشوفوها بعينيهوم...وصلو قدام الشومبر ودق إدريس قبل مايحل لباب وفديك اللحظة بعد نوح عليها وضار جهتهوم...قربو لعندها ضايرين بيها مخلوعين كيسولو فيها وخصوصا فاش شافوها صفرا ونقطة دم مافيهاش...
تانيرت:اش واقع ليك ابنتي كاضرك شي حاجة؟
رحيل:(بصوت خافت بزز باش كاتحل عينيها) غير راسي تيضرني
إدريس:(شاف فنوح وقال بتساؤل) شنو قالت ليك طبيبة؟
نوح:طونسيو طلع ليها بسباب الأعصاب
تانيرت:الله يابنتي علاش تعصبي راسك ونتي عارفة بلي الأعصاب خايبين نسيتي كيف كانو يطيحوك
ريان:لواليدة صافي بلاماتزيديها تانتي المهم كلشي دابا بخير
تانيرت:راه غير خفت عليها وصاف وهي دابا راه واحلة فروحهاا راه الطونسيو دلحمل صعيب
محمد طه:مزيان دابا (تايقيس وجهها بحنية)
رحيل:(غمضات عينيها) همممم
غير طمن عليها ريان ومحمد طه وهوما يمشيو لخدمتهوم وبقا إدريس وتانيرت شوية جات لعندهوم رحمة مع بيسان وزاينة... وحيت الصداع بزاف مخصهاش تسمع ليه فغير طمنو عليها خرجو لبرا مخلين غير نوح معاهاا وجات تاني الفرملية عبرات ليها طونسيو لقاتو كيطلع عاود وممستاقرش...
رحيل:(بخفوت)طفيو الضو
لباو طلبها وطفاو الضو لي ماقداتش عليه وتالصداع وغير خرجات لفرملية وهي تغمض عينيها ونعسات بتعب ونوح خرج لعند إدريس برا مخليها ترتاح ومأجلين لكلام تال وقت اخر...
***
فاقت سيدرا ولقات غير أسماء بوحدها وتانيرت مكيناش جاتها عجب... وخصوصا أسماء لي كانت غير شادة تلفون وملهية بيه تاتسول على حالة رحيل وتهضر مع بيسان لي طمناتها... كانت سيدرا جالسة تتفطر وفنفس الوقت عينيها على أسماء..
سيدرا:سومة فين تانيرت إينو ؟
أسماء:(شافت فيها بتبسيمة) مشات تسخر يالاه فطري
سيدرا: وقتاش انمشي عند مامي توحشتها أنا؟
تنهدات أسماء وتفكرات بلي رحيل هاد لمدة لي بقات ليها فالحمالة غادوزها فالسبيطار يعني غاتسيق خبارها وفنفس الوقت مباغاش تخلعهاا...
أسماء:تايجي جدك وگوليها ليه
سيدرا:(هزات كتيفاتها) وابّاديدي غايتعطل
سمعات السرسار وناضت تتجري مخليا اسماء نايضة تابعاها وشادة كرشهاا... حلات سيدرا لباب ولقات إسلام فوجهها تلاحت عليه تاهزها:إسلامي لبااس
إسلام: لباس الخنفوسة ونتي؟
سيدرا:أنا لبااس
أسماء لي كانت واقفة تاتشوف شكون غير قشعاتو هو وهي ترجع دخل لداخل وتاإسلام دخل وسد لباب وسيدرا معلقة فيه تاتسرسب عليه وتسول فيه... دخل لسيجور فين كانت اسماء جالسة هي وسيدرا كيفطرو...حط سيدرا لي مشات طلعات لفوق وشاف فأسماء:لباس عليك؟
أسماء:صافا
إسلام:مالك؟ حالك معاجبنيش؟
أسماء:(تنهدات)رحيل فلكلينيك لبارح طلع ليها طونسيو وداوها أوغجون
إسلام:ودابا كيف بقات؟
أسماء:شوية وصاف غايبقاو شادينها فالكلينيك تاتولد
إسلام:(كمش حجبانو فاش تفكر لمشكيل لي كان هو سبابو) مامشيتيش عندها ؟
أسماء:أنا لي حاضية سيدرا حيت ماما تانيرت مشات
إسلام:(ناض لجهتها وجلس فالكرسي جنبها وشد يديها وقال بهدوء) ماتخافيش عليها هي غاتكون بخير
أسماء:(بلاماتحس حطات راسها على كتفو وتنهدات) عقلي مشوش معاها ماكرهتش نمشي نشوفها
إسلام:(جاتو من لجنة والناس درعها وباس راسها وقال) ملي تجي خالتي تانيرت نمشيو عندها واخا
حركات راسها باه وغير تفكرات لخصام لي بيناتهوم وهي تبعد عليه وناضت مخلياه كيتنهد...
أما فلكلينيك فگاع لي عرف رحيل ناعسة تم قررو يجيو يشوفوها ساعة رحمة علماتهوم بلي حالتها دابا مكاتسمحش لصداع وبالفعل الطبيبة منعات عليها الصداع بزاف على قبل الطونسيو حيت باقي كايطلع ليها وباقي ممستاقرش... كلشي انساحب حيت الليل ونوح هو لوحيد لي بقا يبات معاها...خرج من لحمام وبلامايدير لحس قرب جهة لفوطوي فين كان محطوط لغطاا وحلو وقبل ماينعس ضار شاف فيها وقرب جهتها يطمن عليها... كان راسها عوج ومع بدا يقادو ليها وهي تحل عينيها بزز وغير شافتو وهي تقلب وجهها عليه ومدات يديها مزولة يديه بنثرة..
مخفاتش عليه الحركة لي دارت وكيفاش قلبات وجهها عليه وتاهو ماحكرش بعد عليها ومشى لفوطوي تكى فيه وغير غمض عينيه مانعسش أما رحيل فكانت عاطياه بالجنب وسادة عينيها... مبغاتش تهضر معاه ومقلقة منو بزاف وفهاد اللحظة باغا غير ترتاح ودوز هاد الأيام لي بقاو ليها بخير...مباغا تفكر مزال فتاشي حاجة ولاتهضر فتاحاجة معاه... السكات فديك الشومبر وتاواحد فيهوم مانعس حيت رحيل نهار كولو وهي كاتنعس فطار عليها النعاس أما نوح فميات مطرقة كاضرب عندو فداك الراس مامخلياهش يغمض لعين ويرتاح...صونى ليه تلفونو بنمرة بيسان وجاوبها بصوت هادئ وخافت:باقي مانعستيش
ودنين رحيل تحلو وجميع حواسها فهاد اللحظة منتابهين معاه... ناض من بلاصتو وبهدوء خرج ساد لباب وهي دغيا هزات راسها من فوق الوسادة تاتشوف فلباب لي مسدود... قلبها بدا يضرب وعقلها تايسول فشكون غاتكون هادي لي معيطة عليه فهاد الليل وخرج باش يجاوبها... الغيرة خلاتها تنسى ختو وعقلها ومگال ليها فديك الساعة والوسواس تاهو خدام...شي ربع ساعة وهو برا وغير سمعات لباب تحل وهي ترجع تكى فبلاصتها بحال لامكاين والو ودنيها كيلقطو الحركات الخفاف ديالو تاحبس وهي ضور راسها بشوية بلاحس لقاتو متكي ومغمض عينيه... بقات تتشوف فيه وهي مكمشة حجبانهاا وليل كولو وهي حاضياه تاقرب الفجر يودن وهي تغمض عينيها نعسات... أما هو قبل مايأدن صونى ليه تلفونو وناض توضى وخرج يصلي فالجامع...
فالصباح بكري جات تانيرت جايبة معاها فطور طبيعي وصحي وجايا عند بنتهاا هي وإدريس...لقاوها باقي ناعسة ونوح مكاينش جلسو بزوج بلامايديرو لحس..
تانيرت:(شافت فرحيل) بنتي لحبيبة زهرها غير فالسبيطارات
إدريس:(شاف فيها وقال بخفوت) هاداك مكتابها وبلاماتگولي هاد لكلام قدامها نتي عرفة نفسيتها دابا كيف دايرة
تانيرت:عارفة وعليها گلتها ليك هي مكتحملش سبيطارات وصعيب تصبر هنا تاتولد
إدريس:اوا ماعليها غير بالصبر
تحل لياب ودخل نوح لي كان جايب لفطور تبسم ليهوم وقرب جهة إدريس سلم عليه وسلم من بعيد على تانيرت لي بدات تجبد الفطور وتحطو مخليا فطور رحيل جنب تاتفيق على خاطرها... فطرو مجموعين مجمعين مع بعضياتهوم ورحيل بدات تتحرك راسها وترمش بعويناتها تاحلاتهوم تتفوه... قربات جهة تانيرت تاتسول فيها كيف بقات وعوناتها تمشي لحمام تقضي حاجتها وطرف... عاد رجعاات جلسات وقبل ماتفطر جات لفرملية طلات عليها وعبرات ليها طونسيو والسكار عاد فطرات مزيان وجلسات معاها مها شوية قبل ماتجي تارحمة جايبة معاها لماكلة...غرقوها بالاهتمام ولفشوش وماجلسوش معاها بزاف وتانيرت مشات لدار على قبل سيدرا لي خصها ترجع لرياض ولي خصهوم يعلموها بلي كاين حيت كاتسول على مهاا بزاف...
كتقاد ليها لانفغميغ سيروم ورحيل جالسة شادة تلكوموند مونسة راسهاا بيها تاسمعاتها قالت:لابغيتي تقدري تخرجي شوية تمشاي فلكولوار
رحيل:عييت من هنا وريحة السبيطارات تتخنقني
لانفغميغ:ماعليش عليك بالصبر دغيا غايفوت هادشي وتهزي لتوينز ديالك فيديك وتنساي كلشي
رحيل:(تبسمات وهي حاطة يديها على كرشها) إن شاء الله
لانفغميغ:لاحتاجيتي شي حاجة بركي على هاد لبوطون ونجي عندك واخا
خلاتها تاتسوط وتنهد تلفونها ماعرفاتش فين هو ملي دخلات لهنا مشافتوش وتانوح فاش مشاو دارهوم ماولاش بان ... وعلى دكرو تحل لباب ودخل مبدل حوايجو وريحة برفانو الرجولية كاتشم من بعيد...شافت فيه رحيل ودغيا قلبات وجهها عليه تاتشوف فالتلفازة... قرب جهتها وحط واحد لبلاستيكة جنبها وهي دايرة راسها متفرجة تاحسات بشي حاجة محطوطة فوق حجرها حنات راسها ولقاتو تلفونها....
نوح:تقدي تمشاي برا؟
رحيل:(ببرود) هممم
قرب جهة البلاكار وجبد ليها عباية وفولار وقرب جهتها باش يلبسهوم ليها وهي تحيدهوم ليه وقالت بنفخة:بلاش غانلبسهوم لراسي
وتاهو ماحكرش وماهضرش حطهوم ليها وبعد مخليها تاتلبس فيهوم وتقاتل مع ليد لي فيها سيروم ومبغاتش تگول ليه يعاونها زعمى مقلقة منو وهو بقا واقف مربع يديه كيشوف فيها اش غاتصنعى ويدوز يديه على لحيتو مبرررد....
رحيل:(معصبة غير مع جلايلها) خراا مال هاد لمرض
قرب جهتها بلامايدوي حيد يديها وعاونها تالبساتو محيد داك سيروم لي معلق فداك لعمود تالبسات ورجعو لبلاصتو وهي بدات ضور عينيها وتلعن فراسها على لكلاخ لي نزل عليها... لاح عليها فولار وقادو ليها مامخليش زغبة هي لخرة تباان ليها...
نوح:(مد دراعو باش تشد فيه ونطق بخشونة)يالاه
شدات فيه على مضض وتحركات تتجر فداك لعمود لي فيه السيروم تاخرجو لبرا... كاتمشى بشوية عليها فداك لكولوار تحرك شوية دورة دموية ونيت مع قربات تولد خصها تحرك باش تسهال عليها لولادة... كانت غادة تاتمشى تاحسات بلوجع فأسفل ضهرها خلاها تكمش حجبانها وتعض على شفتهاا تاتبرد فيه داك لوجع تاامشى...
ضربات ضورة تم مدة لابأس بيها ورجعات لبيت تاني غير دخلات ليه وهي تزفر محملاش دخل ليه وماكرهاتش تمشي لدار...كرهاات شي حاجة سميتها سبيطارات وريحتهوم بقوة مكانت شحال هادي تاتنعس فيه... تسطحات بلاصتها وعاونها نوح تاتأنسطالات وشاف فيها بهدوء:محتاجة شي حاجة ؟
رحيل:لا
خلاها ودخل لحمام وهي بقات متبعة شوفتها ليه تاغبر وضورات وجهها تاتبرگم:مالو باقي منفخ عليا وگاعما حزرني...
يتبع...
التعليقات
لا توجد تعليقات بعد، كن أول من يعلق.