محتوى القصة
مجرد ماسمعات رحيل هضرة سيدرا وهي ترجع خطوة لور وهزات لقب ديال لقبية لي لابسة دارتها على راسها وزيرات سيورها باش ماتزهقش ليهاا عاد رجعات خرجات عندهوم وبان ليها إسلام هاز سيدرا لي كادلع عليه وهازة واحد لخنشة قدها قداااش جاابها ليها.. كان تيهضر معاها والضحكة باينة على شفايفو.. ضحكة حقيقية طالعة من لقلب.. هز راسو جهة رحيل وغير شاف وجهها والضحكة لي كانت على وجهو بدات تتغبر شوية بشوية وعينيه خارجين فيها ونطق بتساؤل: رحيل مالكي فوجهك؟
سيدرا:(كمشات فمها ونطقات بحنان) مامي مسكينة طاحت فلحمام عليها عندها ديدي فوجهها
رحيل:(قاست وجهها ونطقات بهدوء) دخل
سكت إسلام وهو ممتيقش هضرة سيدرا حيت وجهها كيبان واكل الدق ماشي ديال الطيحة.. طلع لفوق معاها وسيدرا بين يديه فرحانة بديك لخنشة لي جاب ليهاا إسلام ولي معرفاتش اش فيها.. وصلو لفوق ولقاااو تانيرت واقفة مبتاسمة وقربات جهتو سلمات عليه بلوجه ونطقات:نهار كبييير هادا ملي تفكرتينااا
إسلام:(جلس فالصالة وجلس حداه سيدرا وقال بهدوء) راك عارفة لخدمة وتمارة ديالهاا شغلاتنااا
تانيرت: اوا ماتخليش الخدمة تاني تلهيك عليناا وعلى حياتك رخف شوية على راسك
إسلام:(حرك ليها راسو وقال) هي لولة الالة تانيرت
تانيرت:(ضحكات) ههه نوض نعمر واحد لبراد دأتاي
إسلام:بلاااش جيبي ليا غير لقهوة ديااالك لمعطرة راه توحشتهاا
تانيرت:هي لولة
مشات تانيرت وإسلام ضار لعند سيدرا لي قالت بحماس:شنو جبتي لياا
إسلام:(بحنان) بزاااف دلكادويات غايعجبووك
رحيل:(بتسمات بهدوء) عدبتي رااسك
إسلام:(حرك راسو بلا) عدابها راحة
هزات سيدرا ديك لخنشة ومشات تتجري لبيت تشوف اش فيهاا.. أما إسلام غير شافها مشات ضار جهة رحيل وقال بجدية: شكون دار ليك هاد لحالة وبلاماتقولي طحتي حيت هاد لوجه ماشي ديال الطيحة
رحيل:(ربعاات يديها ونطقات بخفوت) بدر الدين هو السباب
تبوريشة طلعات معاها فاش نطقات سميتو لي مدة هادي مخرجاتهاش من شفايفهااا.. زادت حظنات راسها بيديهاا مخلياا إسلام كيشوف فيها وهو ممتيقش وبصوت معصب حاول ماأمكن مايعليهش: كيفااااش ياك داك لحيوااان تحكم عليه بخمسنين وثمن شهوور كيف دار ليهاا؟
رحيل:(حركات راسها) ماعرفتش أنا براسي بحالك معرفاااش كيفاش خرج
إسلام: رفعتو عليه بعدا شكاية؟
رحيل:وي ضروري
إسلام:(مسح على وجهو) عاودي ليا شنو وقع
تنهدات رحيل وبدات تتعاود ليه شنو طرا من لول تاحبسات هضرتها وسهااات فاللحظة لي جا داك الشخص وعاونهاا.. ليل كولو وهي تتقول واش بصح عاوني شي حد ولاغير تخايل لياا وصااف خصوصا فاش فاقت وملقاتوش.. ولكن الفرملية قالت بلي وصلها واحد الراجل زعمة يكووون هوو نفسوو..
إسلام:(عيى مايعيط ليها ساعة والو.. قرب جهتها وحركها من كتفها تاقفزات وشافت فيه وهو ينطق) مالكي سكتي
رحيل:هااا لا غير سهيت
دخلات تانيرت هازة صينية فيها بريق لقهوة ولطااس ديالو وطبسيل فيه لحلوى لبلدية..
إسلام:(شاف فرحيل) ماكملتيش ليا
حركات راسها وبدات تتكمل ليه وتاتانيرت جالسة حداهووم تتسمع ليها حيت تاهي معوداتش ليها شنو طرا..كملات رحيل هضرتها وقالت بهدوء: هادشي علياش عقلت
تانيرت:(كمشات حجبانها) وماعرفتيش شكون هوو ؟
رحيل:لا كاان ظلااام ومشفتش ملامح وجهوو وفاش فقت مكاانش فالسبيطار حيت مشى
إسلام:(كمش عينيه) كيفاش زعمة وصلك لسبيطار ومشى بلامايخلي تاشي حاجة وراه؟
تانيرت: الحمدلله ربي حط فطريقك داك السيد وعتقك منوو بغيت ربي ينووور طريقو ويبعد عليه ولاد لحرام كيفما عتقك من بين يدين داك لحيوان
جات سيدرا تتجري لابسة واحد لجيپ كحلة دجلد واصلة لفوق ركبة مع بودي سخون دالصوف فالغوز بارد وجاكيط كحلة طوويلة جلد وبوط كحل طالع.. وقفات فوسط الصالة وحطات يديها على خصرها وردات شعرها بغرور ممناسبش سنها وقالت:مامي شوووفي شنو جاب ليا إسلامي جااااو معايا ياكي
رحيل:(بتسمات ليه بحب) بصحتك امامي قلت ليه شكرا
سيدرا:(مشات عند إسلام باستو فحنكو ونطقات) قلتها ليه مااامي قبيلة
تانيرت: اوا بالصحة الالة لبسة الجديدة وشكون بحااالك كل نهااار جاايب ليك شي حد لبيسة جديدة ههه
سيدرا:(نقزات بحماس) فاش نخرجو اتانيرت إينو غانلبسها ياكي
تانيرت:اييه غانلبسوها يالاه سيري بدلي حوايجك لايتوسخوو ليك
مشات سيدرا ورحيل نااضت شافت فيهوم ونطقااات بهدوء:غانمشي ندير الدوا لوجهي
خلاتهوم جالسين بزووج ومشات لبيت لقات سيدرا تتبدل حوايجهاا جلسات فوق الفوطوي ونطقات بهدوء:لبسي بيجامة سخونة راه كاين لبرد
سيدرا:نوو مامي أناا فيا صهودات
رحيل:(حطات يديها على راسها) راه غاينفخك لبرد يالاه لبسي حويجاتك امامي
مشات سيدرا جبدات بيجامة سخونة لبساتها وخرجات من لبيت ورحيل وقفات قدام المرايا تتشوف فوجهها وعينيها لي تسدات ليها.. هزات بوماضة وبدات تدهنها على وجهها وهي ساهية فانعكاسها تاجات صورة عينيه بين عينيها والنظرة لي دار فيها قبل ماتغيب وبصوت هامس نطقات: شكون نتا؟
خرج محمد طه من لمگازان مكمش حجبانو وباين فيه كاعي وماشي على برجوو.. غادي فالطريق وليزيات فودنيه وخاشي يديه فجيب جاااكيط.. عينيه الخضرين كيبانو مطفين ومبقاااش فيهوم ديك اللمعة دالراحة لي كانت فيهوم.. تتحس بيه واخا عايش ومكمل حياتو الاانه فقد شحال من حاجة كاانت زوينة فالداخل ديالو.. محاولش فهاد الخمسنين أنه يدير شي علاقة باش يقدر يخرج من دكرياتو وحبوو لجيداء بل بقا منغااالق على راااسو وساد عليه فقوقعة خاصة بيه.. سمع صوت شي حد كيعيط ليه أو وقف محيد ليزيات وضار كيشوف جهة ريان لي كان جاااي كيجري جهتو وهو كينهج.. كمش محمد طه حجبانو فيه وقال:اش كادير نتا هنا؟
ريان:(كينهج) سخفتيني اصاااحبي واو الناااس كلهاا ضارت تتشوف فيا وأنا كنعيط عليك بحال شي بوهالي
محمد طه:اش كاين ؟
ريان:خرجت من لخدمة وداز بيا الطاكسي هنا وقلت نهبط ونتحركو أنا وياك لدار
محمد طه:(حك لحيتو لمغوفلة وقال) ساليت ساعتي وخرجت ونتا لي باغي نتحركو بزوج ماعندكش واحد لحاجة كيسميوها التلفون راه مستطيل الشكل وكيخدم بلومبخانط وفيه واحد التقابي لور كيصورو بيه الناااس
ريان:(ضحك وقال بمزاح) عارف غار تقابي حاجة خرا مكنعرفهاش ههه
محمد طه:(خنزر فيه) هادشي لي فالح فيه لمسخ
ريان:(غاديين كيتمشاو وقال بضحك وعينيه على واحد خيتي لابسة دجين مزير وجاكيط قصير تتحرك فمسعودة وتهز فيها) ضرب لياا على الديكور لي قدامك هازة مااااهز قلبي
محمد طه:(حدو شاف فيها شوفة لولة وقلب وجهو) مايغركش داكشي لي كتشوف
ريان:(كمش حجبانو) دابا هادي شحال من كيلو غاتكون هازة؟
محمد طه:(هز فيه حاجبو) قالو ليك عليا ميزان زيد تحرك ونتاا تابع ليا غير الطرووفة
جرو محمد طه وريان غادي وكيقلب وجهوو حاضي الطرف تاوصلو لبلاصة الطاكسيات وشدو طاكسي غادين لدار.. مسافة الطريق تاكانو وصلو وتلقاو نيت مع أسماء يالاه نزلات من طاكسي صغير
ريان:(غادي جهتها) الحشايشية مرفحة ديما تتجي فپتي طاااكسي بريستيجهاا مكيسمحش ليها تزاحم فطوبيسات وتشد الصف
أسماء:(رجعات شعرها وقلبات عينيها ببرود) لي حاسدني يدير بحالي أالسالوبار وزايدون قريب نشري طوموبيل ونهني رااسي
ريان:(درعها ونطق بهمس بينو وبينها) أنا باغي نشري موطور وفهاد ليامات غاتلقااايني خديتو
أسماء:(شافت فالطوموبيل لي واقفة حدا لباب وقالت) هاديك ماشي لخرشاشة ديال إسلام
محمد طه:(بسخرية) مرسيديس ولات خرشاشة الله يسمح ليك وصاااف
أسماء:(هزات كتافها) شوية ويجي يشد عندنا شهادة السكنة
ريان:ونتي سوقك اربي واااش سوقك السيد دايرنا عائلتو ولاقي معانا راحتو ونتي اش مشى ليك
أسماء:(كمشات حجبانها) عائلتو مالو مراضع معانااا تت خليني ساكتة
دخلات لدار تتقرقب طالونها وكيف عادتها الأناقة عنوانهاا وصاليرها كيمشي غير فالحوايج والصبابط مهتمة براسهاا كيف ديماا وصلو لفوق فين كان إسلام وسيدرا جالسين فالصالة متفرجين فالرسوم حطات أسماء صاكها فوق الطبلة ونطقات بهدوء: السلام أو عليكوم
سيدرا:(ناعسة فوق ركاب إسلام تتاكل الشيبس) سومة جبتي لياا شوكولا لي قلت ليك
أسماء:(هزات فيها حاجبها) هادي هي سلام ديالك
سيدرا:(ناضت عندها) فين شكلاطي
أسماء:(حلات صاكها وجبدات ليها باكية دميلكا بأوريو وعطاتها ليها) صافي تهنيتي دابا
سيدرا:(طلعات فوق الكرسي وباستهاا فحنكها) نتي زوينة سومة ديالي
أسماء:(هزات حاجبهاا وحركات راسها) احيااااني عليك اشويطينة
محمد طه:با إسلام افين صافاا
إسلام:ولله لحمد ونتا هاني كيف غادي مع لعمل
محمد طه:(تنهد) اودي سولوكات وصاف
ريان:(دخل وهو ضاحك وقال) معلمتيناش نتلگاوك بلحليب والتمر ههه
إسلام:(ناض معنقو) تادابا باقي لحااال هههه افين لبرهوووش ناس تتكبر ودير عقلها ونتا كيطير ليك
ريان:(جلس فوق السداري) أودي كيفما درنا معاكوم وحلة جمعنا راسنا قلتو هادا معقد تفرفشنا معاكوم قلتو هادا مفروح زعمة نتوما علاااام
سيدرا:(تلاحت عليه) فريييييييد
ريان:(كمش حجبانو) قتليني نتي وقتلي ولادي تاهوما
محمد طه:(ضربو بمخدة) جمع رااااسك اهيااا
سيدرا:(تتشوف فيه وببرائة قالت) فين هوما وليداتك
محمد طه:اجي عندي گاعما بستيني
مشات لعندو وهزها مجلسها على ركابيهاا وباسها فحنكهاا تابعزو ليها ورجع ليها شعرها مور ودنيها تبانو لزبغاي لي دايرة وقال: شنو درتي ليوم
سيدرا:(باستو ففمو) مودي عرفتي شنو إسلامي جاب لياا لبيسة زوووينة
محمد طه:بصحتك اروح مودي
ريان:فين رحيل؟
سيدرا: خليتها فلبيت رياني (رجعات شافت فمحمد طه وقالت بهدوء) مامي مريضة كاضرها عينيها بزااف مودي ولات ليها بحال هاكا (غمضات عين وخلات لخرا وقالت بحزن) مسكينة مامي ديالي
سكتو كاملين وكل واحد كيشوف فالثاني تاسمعو صوت إدريس لي جاااي كيعيط على سيدرا وهي تنقز غادة عندو: بّا ديدي
كان واقف حدا باب الكوزينة هاز كرطونة صغيرة نص مسدودة وقالت:شنو داكشي؟
إدريس:(ابتاسم ليها) سدي عويناتك
نفدات سيدرا طلبو وهو تحدر على ركابيه وحل ليها لكرطونة ونطق بحنان: شوفي دابا
حلات سيدرا عينيها وغير شافت داكشي لي جاب ليها وهي تنقز عليه معنقاااه وهي تتبكي..
شحال زوينة اللمة العائلية فاش كيكونو فيها القلوب الصافية هي لي مجموعة.. ديك اللمة لي مخلية إسلام كل مرة يجي عندهم ويولي واحد منهوم.. ويكون بينو وبين كل واحد فيهوم واحد لعلاقة زوينة وخصوصا سيدرا لي كااانت بحال داك لبلسم لي تيتحط على لجروووح.. كان معتابرها بحال بنتو وديما شاري ليها حوايج ومهلي فيهاا وكيعوض فقدان سُكرتو معاهاا.. وصلات لعشية ومشى إسلام لباخطمون ديالو فين مستاقر بوحدو وبقاو غير مالين الدااار جالسين ومجمعين مع بعضياتهوووم.. وسيدرا لي كانت غاتهبااال على لقطيطة لي جاب ليها إدريس كادوو.. هازاها فكميشة تتشربها لحليب لي داوره ليه فإبرا حيت باقي صغيرة..
سيدرا:(شافت فإدريس لي كيوريها كيفاش تعطيها لحليب وقالت بهدوء) بّا ديدي فين ماميتها؟
إدريس:(كيجاوبها بهدوء) كانت بوحدها حدا لگاراج تالفة على ماماها
سيدرا:(كمشات حجبانها) ودابا ماميتها غاتخاف عليها وغاتبغي تعطيها حليبات باش تكبر دغيا
إدريس:(حرك راسو بهدوء) ماعرفناااش شكون ماماها باش نرجعوها ليهاا
سيدرا:(شافت فرحيل ونطقات بتساؤل) مامي ياك تانتي عطيتيني حليبات باش نكبر
هز إدريس عينيه فرحيل لي جمدات من سؤال سيدرا لي كان عفووي ولكن بالنسبة لرحيل كاان بحال شي تصرفيقة خلاتها تسرط ريقها وتنطق بهدوء: اه
مقدراتش رحيل تبقاا وناضت غادة لبيت وكلهوم عارفين مالهاا من غير سيدرا.. دخلات رحيل لبيت وعينيها مدمعة وتاديك لي تسدات ليها بدات تدمع.. حاسة بالخنقة ومحملاتش راسها فهاد الساااعة.. كلما تفكرااات راسها كيغاش كانت تتعامل بنتهاا وكيفااش مبغاتش ترضعها وكااانت غاتسمح فيهاا.. هادشي كولو كانت تتحاول تنساه وتعوضها على تعاملها لبارد ولكن غاتبقى ديك الدكرى السوداااء ديما فبالها وعمرها غاتنساها.. تحل لباب ودخلات تانيرت لي نطقات بهدوء: واش نتي بخير ابنتي؟
رحيل:(حركات راسها بحزن)عمري غانسى بلي حرمتها من حليبي تامشى
تانيرت:ماشي بخاطرك ارحيل ماتلوميش راسك نتي كنتي فحالة ربي عالم بيهاا وكون مكنتيش أم مزيانة مكانتش سيدرا غاتعلق بيك وتبغيك (عنقاتها) حاولي ابنتي تنساااي وتكملي حياتك ماتبقاايش مقلقة رااسك الله يرضي عليك واخاا
حركات ليها رحيل راسها وتانيرت خرجات مخلياها ترتاح.. تنفسات رحيل بهدوء وتمشات جهة لبلاكااار جبدات بيجامة دالنعاااس بدلاتها وتمشات جهة نموسية تخشات فبلاصتها وتنهدااات تنهيدة طالعة من لقلب.. غمضات عينيها وبغات تنعس وهي تسمع الدقان فباب لبيت وبصوت هادئ نطقات:وي دخل
تحل لباب ودخل محمد طه مبتاسم:صافي غاتنعسي؟
رحيل:عيييت وعيني ضراتني بزاااف
محمد طه:(جلس حداها وقااال بهدوء) داومي ليها دوااا ودغيا غاتفش
رحيل:على هاد لحساب غايخصني كثر من شهر
محمد طه:لخدمة دفعتي ليها شهادة طبية صافي هني
مخك
رحيل:عند بالك غايصبروو خصوصا الخدمة عندنا مزيرة هاد ليامات
محمد طه: گاعلا يصبرو عطاااا الله فين تخدمي راه السڤي ديالك هو لي كيهضر اه قبل مانسى هاكي
(جبد من جيبو بواطة ديال التلفون ومدها ليها) باش تلفي لوقت
رحيل:(تقادات فجلستها ونطقات بهدوء) علاش عدبتي راااسك
محمد طه:(ناض غادي) شدي باااركة من الهضرة راااه فيه كارط سيم جديدة وفيها لكونكسيون يالاااه تُصبحين
رحيل:(صيفطات ليه بوسة) مواااح تصبح على خير احبيبي وشكرا
سد لباب وهي حلات لبواطة تتشوف فالتلفون لي جايب ليها مبتاااسمة بحنية.. شعلاتو وبدات تتأنسطالي لزابليكاسيون لي كانو عندها وغير سالات حطاتو حداها فوق الكوافوز ويالاه غمضات عينيها تنعس وهو يتحل لباب.. ضارت تشوف شكون لقاتو ريان لي جايب معاه مخدتو وجاي كيجر فبانطوفتو ونطق بهدوء:نعس حداك؟
رحيل:(ضحكات) اجي البرهوووش
تخشى حداها وهي عنقاااتو وبدات تتخربق فشعرو لكحل تاحساتو حط ليها شي حاجة فحجرها وفاش نزلات عينيها لقاتو حاط ليها طابليط جديدة.. ونطق وهو مغمض عينيه: كنت غناخد ليك تلفون ساعة قال ليا محمد طه راه شراه ليك عليها خديت ليك طابليط
رحيل:(باستو فحنكو) يخليكوم لياا
ريان:بصحتك اعوينات الجلبانة..
غمض عينيه ونعس وهي بقاات مدة تتلعب فشعرو مبتاسمة من لجيست لي دارو معاهاا بزووج.. طفات لفيوز لي حداها وغمضات عينيها ناااعسة..
صباح جديد مشمش على غير لعااادة وكيف كل دار مغربية نهار الأحد نهار الراحة والنعااس.. التلفون كيصوني وإدريس كان ناااعس مسمعووش تافاقت تانيرت هي لولة وبدات تتنغز فيه ونطقات بصوت نعسان: إدريس تلفوووونك
مد إدريس يديه وخدا تلفون وغير شاف النمرة وهو يتوگض ودوز لخط وبقا ساكت تايسمع لطرف الثاني تاتقطع لخط وشاف فتانيرت لي نطقات بتساؤل:ياك لباس؟
إدريس:(ببرود)لقاو لكلب دعاصم ليوم مقتوول فالحبس وطاعنينو خمسين طعنة..
لخبر بالنسبة لإدريس كان بحال شي ثلج تحط على شي عافية وطفاهاا خصوصا داكشي لي دار عاصم فحقهوم كان قاااصح بزاااف حيت عاصم عدبهوم نيت وبسبابو شحال من حاجة تبدلات وشحال من قلوب تهرسات بسبابو .. زائد أنه قتل أروااح بريئة ماعندها تاشي ذنب ويستاهل هاد النهاية.. أما تانيرت فديك الضهشيرة دالنعاااس مشااات ملي سمعات هضرة إدريس لي قال بكل برود..
تانيرت:(حالة عينيها على جهدهوم) اويلي على خمسين طعنة ولكن شكووون دارها
إدريس:(شاف فيها) لقاوه فالطواليط دلحبس طايح وغارق فدمو باينة شي حد دارها حسيفة
تانيرت:ولكن خمسين طعنة بزااااف راه لعقل مباغيش يستوعبها
إدريس: يعلم الله شكون حالفها فيه.. نسيتيه اش دااار وشحال من رواح قتل
تانيرت:(تنهدات) يستاهل على داكشي لي داااار ولعقباااال لداااك عمووو بغيت ليه غباااارة
إدريس:(زير على التلفون وقال ببرود) هادااك مغايرتاااح ومغانرتاحوش معاه تايموت
تانيرت:بغيت ربي يبعدو علينااا يارررربي
إدريس:مانبغيش رحيل تعرف بلخبااار صافي
تانيرت:لا لا كون هااااني مغاتعرفش أصلا سيرتو كلهاا متتبغيش تسمعهاا
إدريس:(رجع تكى فبلاصتو وقال بهدوء) إن شاء الله
تنهدات تانيرت وناضت من بلاصتها وهي تتجمع شعرهاا ومشات لحمام دارت روتينهاا وتوضات عاد رجعات تاني لبيت صلات صلاتها ونزلات لتحت تصاوب لفطور.. بداات تتوجد لكريپ بالشكلاط لي تيعجبو رحيل وسيدرا وهي كدندن بأغنية سوسية وكل حاجة كاديرها كانت تاديرها بحب.. وجدات الطبلة وسخنااات المسمن لي تتحط ديما فالفريگو أو وجدات مقيلة دلبيض لي تتعجب محمد طه وريان تاديرها ليهوم بالخضرة ولفرماااج عاد ختماتهاا بأتاااي منعنع وقهوة لإدريس.. طلعات لفوق باش تفيقهوم ولقات إدريس فاااق وصلى وبدل حوايجو بفوقية ديال الدار..
تانيرت:(قربات جهتو وباستو فشفايفو وقالت بحب) الزين إينو
إدريس:(ضحك بهدوء) راشقة ليك اتانيرت إينو ليوووم
تانيرت:(جبدات ليه حناكو بحال شي دري صفير وقالت تدلع) على لي عندو هاد الزين ماترشقش ليه همم أيمي حنااا نخاااف غير يطيروك لياا
إدريس:(درعهاا وتحنى جهتها ونطق بهمس حدا ودنيها) هادا لمسخوط لي كيضرب وسط صدري باغيك غار نتي هه
تانيرت:(حطات يديها على قلبو) يخليه ليااا
كانو واقفين حدا باب بيت رحيل وإدريس محني جهة تانيرت حيت قصيرة عليه وتيهضر معاهاا بهمس وهي تاضحك تاحناكهاا حمارررو ورجعات بحال شي درية صغييييرة.. تحل لباب وخرج ريان لي ضرب على ديكوووور وقلب عينيه جهة رحيل لي كانت وراه تاهي ونطق بهمس: زووووجوووووني واااازوووجوني اعباد الله
رحيل:(هزات عينيها فباها ومها ورجعات شافت فريان وجوباتو بنفس لهمس) سهلتي زواااج غير اجي وتزوووج
ريان:(بقا كيعبر بيديه) مالكي حگرتيني تزوجيني ليوووم غداا تلقااايني محمل لمدااام ولاشي حلال عليه وشي حرااام عليه (رجع شاف فتانيرت تتقاد لكول دلفوقية لإدريس ونطق وهو كيبرگم) لمنكررر على الصباااح يالعياذو بالله (تنحنح بالجهد ونطق وهو حادر راسو) صباح الخير
مشى لحمام ورحيل قربات جهتهوم حاطة يديها على عينيها لمنفوخة وقالت:صباح الخير
إدريس:(قرب جهتها وباسها فراسها وقال) واش كضرك عينيك بزاااف
رحيل:همم شوية غانمشي نغسل وجهي باش ندير ليها بوماضة تاني
مشات لحمام لاخر وتانيرت مشات تفيق أسماء وإدريس دخل لبيت محمد طه فين كان ناعس هو وسيدرا.. قرب جهة سيدرا ومد يديه باش يفيقها ولقاهاا سخوونة كاتفوور.. كمش حجبانو وبدا كيزول عليها لفطا وهو يفيق محمد طه كيحك عينيه ونطق: لواليد
إدريس:لبنت طالعة ليها السخانة ونتا محاااسش بيها
محمد طه:(توگض) وايلي
حيد إدريس لغطا على سيدرا لي حلات عويناتهاا المبطنين والدابلين ونطقات بصوت مبحوح: بّا ديدي
هزها إدريس وهي حطات راسها على كتفو فاااشلة وخرج بيها من لبيت ومحمد طه تابعوو تالقى تانيرت وهو ينطق: طالعة ليها السخانة
تانيرت:(قربات جهتها وقاست جبهتها) ااااحيييه اراهاا ندوووش ليها باش تهبط ليها السخانة أسماء سيري لبيت رحيل جيبي ليا حوااايجهاا ولبرودويات دلحمام ديالهاا..
هزاتها تانيرت وإدريس حيد ليها لزبغااي تادووش وداتها لحمام..
محمد طه:(حك شعرو) غايكون ضربها لبرد حيت مكتلبسش مزيان
ريان:لموت دلبرد وهي تتلبس بيجامة دالصيف ديما مدابز معاهاا
رحيل:(جايا جهتهوم تتمسح وجهها بفوطة نقية وبشوية عليها وقالت) مالكوم واقفين هناا (شافت فمحمد طه) سيدرا فاقت
محمد طه:فاقت وراه خالتي تانيرت تادوش ليها حيت طالعة ليها السخانة
رحيل:(قلبها قفز من وسط صدرها) غانمشي نشوفها
إدريس:(جرها عندو معنقها) ماماك غاتكلف نزلو تفطرو يالاه
نزلات معاهوم رحيل وبالها مشطون على سيدرا حيت هي مرضها قاااصح وقليل فين كاتمرض.. تنهدات وجلسات معاهوم وعقلها غايب تاسمعات صوت تانيرت لي كانت جايا وشادة لسيدرا فيديها لي توگضات شوية مور لحمام وكل مرة تشمر نيفها.. وصلات عند رحيل لي هزاتها وجلساتها فوق حجرها وحطات يديها على جبهتها لقات السخانة هبطات شوية..
سيدرا:(حطات تاهي يديها على وجه مها ونطقات بصوتها لمبحوح) مااامي واش باقي ديدي كيضرك؟
رحيل:(حطات جبهتها على جبهة بنتها)تت برات ليا فاش بستيها ارووح مااامي
مشات تانيرت عصرات ليها عصير ليموون باش تهبط ليها السخانة وجابتو ليها باش تفطر وبقات رحيل معاها تتوكلها غير بزز حيت حلقها كيضرهاا.. كل واحد فيهوم يعطيها شي حاجة تاكلها ويسولهاا اش بغااات يجيبوه ليها.. كانت لمدللة ديالهوم كاملين ملي كانت صغيرة وهي كابرة على لخناث والدلع..
تانيرت:شنو ندير ليكوم لغداا؟؟
إدريس:شوفي الدراري اش بغاو؟
سيدرا:(حطات يديها على تانيرت لي كانت جالسة حداها )تانيرت إينو ديري ليا رفيشة
تانيرت:(باست يديها بحب) ندير لشميشتي رفيسة.. نوض نوجد التريد راه كياخد لوقت (شافت فإدريس) تسخر ليا حيت شحال من حاجة مكيناش فالدار
إدريس:واخا
رحيل:(مدات سيدرا لريان) أنا غانوض نعاونك اماما
تانيرت:يديك باقي مضروبة غير خليك
أسماء: أنا غانعاونهاا
رحيل:نصاوب ليكوم لاصوص ونتوما ديرو تريد
سيدرا:كح كح ( صدرها كيتخرشش) فين إيڤانا
محمد طه:(جاب ليها لقطة وهو هازها فكميشة حيت باقي صغيرة) هاهي مبغااتش تسكت فرعااات لياا راسي
مشى محمد طه جاب لحليب فطاسة وبدا كيديروه فإبرا باش تقدر تشربوو وسيدرا متكية على رياان وحالة عينيها بزز.. أما تانيرت فبدات تتعجن فالتريد وأسماء تتستف لمواعن فمكينة ديالهوم باش يتغسلوو..
تانيرت:(شافت فرحيل) صوني على إسلام قولي ليه يجي يتغداا عندنا
رحيل:(جالسة فالكرسي تتنقي لعدس) واخاا
أسماء:(ميقات فيهوم) واش ضروري هاد خونا أي حاجة تعيطو ليه
تانيرت: علاااش مالكي معااه واش دار ليك شي حاجة ولاقال شي حاجة
أسماء:مقاااال ومدار والو معايا ولكن شفتكوووم عاطينو قيمة بزاااف
رحيل:(تنهدات) خصك تعرفي داك السيد من اشنو داااز هو دابا معتابرنا عائلتو وسيدرا معتابرها بحال بنتو (كمشات حجبانها وقالت بأسف) عرفتي اشناااهي بنتك تموووت والسباب هي مهاا وفوق هادشي كولو تعرفهاا كتخووونك راه لحماااق هاداك
أسماء:(هزات كتافها) هو لي طلق ليها السرج تاضسراااات اااوف خليونااا منووو داباا
سكتو كاملين ورحيل جبدات تلفونها سيفطات ليه مسااج وجاوبها فديك الساع بلي غايجي.. أما إدريس فجاااب السخرة وناضت رحيل تتوجد لمرقة دالرفيسة وتانيرت وأسماء مكتافين بالتررريد يقادوه.. طالقين الموسيقى سوسية مونسين بيهاا لوقت وأسماء واخا معرفااااش كلمات الأغنية الاأنها تتحرك كتافها ناشطة.. تعاونوو جميع تادارو لغدا وأسماء مشات دوووش ورحيل مشات تطمن على سيدرا لي ناعسة فوق السداري لابسة بيجامة سخونة ودايرة زيف حياتي حيت شعرها باااقي سارد ونيفها حمررر وكل مرة تكحب وإيڤاناا ناعسة فوق صدرها مخشية فيهااا..
واقفة أسماء فالبيت قدام مرايتها ببيجامة سخونة قصيرة تتنشف شعرهاا القهوووي الطوويل من لمااا ودارت كريم إيدغاطون لوجهها ورشات ريحتهاا وخرجات من لبيت تتلبس بنوارها وصوت لهضرة واصلة لعندهاا حيت كانو جالسين فالصالة لفوقااانية.. دخلات لعندهوم ولقات إسلام جاا جالس حدا سيدراا وجايب ليها تاني خنشة لحلاوي..
أسماء:سلام أوعليكوم
الجميع:وعليكوم السلام
أسماء:(جلسات حدا ريان لي كان مكونكطي وطلات على تلفونو بانت ليها سمية "نور" وميقات فيه) شكون هااادي تاني
ريان:(تيكتب وفنفس لوقت تيجاوبها) وحدة خدامة معايااا علاااش تتسولي
هز فيها حاجبو وهي ميقات فيه: خدامة معاااك ولامصاحبة معاااك
ريان:(ببرود) ياكما ضاااربين أنا وياك لاكط ومفخبااااري الحشايشية
أسماء:(كمشات حجبانها) أصلا أنا كبيرة عليك
ريان:وشنو فيها شحاال من وحدة تتزوج شي واحد صغر منها (حرك حجبااانو كيستافزها) غير گررري الحشايشية وقووولي راه تتحبيني هههه
أسماء:(ضربات على كتفو تاضحك) وباااز ختارعتي سيناريوو وتيقتيه
ريان:(نطق بجدية) باقي تتبغي داك خوناا؟
سؤال ريان كان مفاجئ لأسماء لي تنهدات مجرد ماسمعات سيرتو وحركات راسها بلا وبصوت هادئ قالت: نتا عارف مكنبغيش تجبد سيرتوو قدااامي لاهو ولاخووووه
ريان:(ربع يديه وقال بهدوء) لحاجة لي دازت على الراااس تنفع يمكن كانت تجربة فاااشلة ليك ولكن خرجتي بتجربة منهاا
أسماء:(حركات راسها) تجربة غاتبقاا ديما فلبااال
سكتوو بزووج وكل واحد فين سهى.. التجربة لي دوز ريان فحياتو دالإدمان خلات واحد البصمة فحياتو وأثر لي صعيب يتمحى.. دوز صباعو على معصم يديه فين كااان الأثر ديال الغرارز وتنهد وهو كيتفكر نهار بغا ينتاحر ربي كتب ليه عمررر جديد بااش يرجع يعيش مع عائلتو لي كااان غايضيع بسباب طيشوو.. تنهد وشاف فأسماء لي كانت سااهية وعرفهاا فااش سهاات مد يديه نغزهاا تاشافت فيه وقال بمزاااح: صافي ماتبقااايش ساااهية فياا عارف رااسي محمقك
أسماء:(ميقاتو) التقة فالنفس حيييد علياا
ناضت نازلة لتحت عند تانيرت تعاونها وفطريقها سمعات الدقان فالباب ومشات جهتو وغير حلات لباب وهي تبسم فاش بانت ليها واقفة بسروال دجين مع بوط طااالع دالجلد وجاكيط دودون وشعرها مطلوق دايرة ليه بيرية..
أسماء:(عنقاتها) رنييييم
بادلاتها رنيم التعنيقة وهي كاضحك عاد بعدات عليهاا وبدات تتقاد فشعرهاا ودخلات لداخل وبدات تتزول جاكيط تابقات غير بتريكو دلخيط قصير وفاش تطلع يديها تيبان بوطها..
أسماء:غبرتي الزمرررررة
رنيم:(بدات تتنش على راسها) لبااارح كااان عندي سوتنونس قولي ليا على سلامتي سااااليت
أسماء:اوا على سلامتك كيف داز بعدا
رنيم:بورفيكت الساااطة اش تتعرفي عليا
أسماء:جيتي مع الرفيسة دايرينها ليوم
رنيم:وايلي هي عندي الزهر توحشت لماكلة لبلدية تقهرت اختي بلسناااك
خرجات لعندهوم تانيرت ملي سمعات صوت الهضرة وفاش شافت رنيم بتسمات ليها وعنقاتهاا حيت شحال عادي مشافوهاا مع القراياا غبراتهاا.. طلعو لفوق فين مجمعين كاملين ورنيم داخلة تتسلم عليهوم تاوصلات جهة إسلام ونطقات بهدوء:صافا عليك
إسلام:(حرك راسو بهدوء) وي ونتي صافا
رنيم:مزيان (قربات جهة سيدرا وتحنات بااستهاا فحنوكها وقااالت بحب) القطيطة ديالي مريضة همم
سيدرا:(بدات تترد ليها شعرها ونطقات بصوت مبحوح يدوب كيتسمع) علاش مبقيتيش تتجي عندنا
رنيم:(مسحات على حنوكهاا بحنان) كانت عندي لقرايا احبيبة راه جبت ليك كادويااات بزاااف ملي تبراااي شوفيهوم واخا
تقادات فوقفتها وضورات عينيها فالصالة وقالت:فين رحيل
محمد طه:(بهدوء) فبيتهاا
خلاتهوم رنيم ومشات جهة بيت رحيل دقات عاد دخلات ولقاتها تدهن الدواا لوجهها.. شهقات رنيم وقربات جهتها بخطوات سريعة:شكووون ضربك ؟
رحيل:(تنهدات) بدر الدين خرج من لحبس
سكتات رنيم وعينيها كيشوفو فرحيل لي كانت تتبادلها نفس الشووفة وبلاماتهضر عنقاتهاا وتارحيل تشبتات بيها وحابسة بكيتها غير بزز..
🔙🔙
كانت حاسة بداتها تبنجات بسباب الطيحة لي طاااحت.. حاولات أنها تنوض وتفك رحيل من بين يدين بدر الدين لي داها وصوت غواتها غادي وكيبعد.. عينيها مدمعين وصوت أنين خفيف طااالع منهاا.. مكاين حد لي يعتقهاا مها راه فبيتها مغاتسمعهاش وربيعة مكينااش مشات تسخر.. بدات تتغمض عينيها شوية بشوية كتغيب تاسمعات صوت كيعيط ليهاا وحلات عينيها لقاتو واحد من رجال بدر الدين "علي" وبعدها غمضات عينيها وغيبااات بخطرة.. حلات عينيها وهي حاسة بريقهاا ناشف وجسمها كلها كيعطيها الحريق... ضورات راسها فالشومبر لي كانت ناعسة فيه والسيروم فيديهاا وبانضة ملوووية على كتفهااا لي عاطيهاا لحريق.. من زهرها الطيحة لي طاااحت مكانتش قاااصحة وطاحت فوق الطابي وزيد عليها غير طبقة وحدة والمسااافة مكانتش كبيرة... يادوب تهرسات فكتفهاا وداتهاا تتحرقهاا.. تحل لباب ودخل علي لي عتقها وقرب جهتها وقال بهدوء:باش كتحسي دابا؟
رنيم:(بتعب)شنو وقع وفين رحيل؟
علي:(كمش حجبانو) من الأفضل ماتسوليش الابغيتي ترتاااحي
رنيم:(مقصحة ولكن لي فيها مامهنيها) واش نتوماا ماعندكومش قلب همم
علي:(قرب جهتها وحط يديه على حنكهاا) دابا فكري غير فصحتك واخاا
مدات رنيم يديها لي ممضرورااش وحيدات يديه وقلبات وجهها عليه ساااكتة وهو بدورو خرج مخليها ترتاح.. معرفاتش شحال من لوقت وهي فالسبيطار ومعرفاتش شنو طرا لرحيل وشنو الجديد فيما كانت تتسول علي كان تايسكت ومكيجاوبهااش وهادشي غير مكيزيد يخلعهاا.. وأخيرا جاا وقت خروجها من السبيطاار كان كتفها بااقي كيضرهاا ولكن حسن من لول.. دخل لعندها علي وقرب جهتهاا ونطق بدون مقدمات: قال ليك بدر الدين الافكرتي تحلي فمك وتهضري نهارك مغايطلعش فيه شمس
رنيم:(ناضت بالجهد تاغمضات عينيها وغوتات فوجهوو) وااش نتوما مكتعيااااوش هااا اش هاد لخرااا كااامل واش عند باااالك أنااا غااانسكت ليه
علي:هو دابا فالحبس ورحيل رجعات لدارهوم
رنيم:(حكات راسها ونطقات) وشنو لي غايخليني نتيقكوم ونتوما لكدووب ماشي ليكوم فالدم
علي: فاش غاتمشي لدار غاتأكدي
قال كلامو وخرج وهي ناضت تابعاه تاخرجو من السبيطار وركبات فطوموبيل والطريق كلها وهي تتفكر واش بصح رحيل تحررات ورجعات لدارهوم واش صافي تهنااات من ديك لعيشة.. تنهدات فاش شافت راسها وصلات لحومة ونزلات من الطوموبيل داخلة لداخل وبانت ليها مليكة جالسة فالصالة وغير شافتها وهي تنوض لعندها تتعرج حيت باقي ضهرها كيضرهاا ومع كبيرة فالعمر.. عنقات رنيم لي كانت جامدة ممبادلاهااش التعنيقة تابعدات وبدات تتلمس وجهها وقالت: الله ياربي الله اش هاد النحس ياربي من النهار دخلات ديك لكلبة وحنا لور لور شتتات ليا عائلتي وخرجااات عليهوم بنتي أو ولدي فلحبس وبنتي لخرا كانت غاتموت لياا ولي راد لينا لباااا ومكبر بيناا تاهو تلاح فالحبس
رنيم:(نطقات ببرود) واش نتي داوية من نيتك هاا عااارفة اش تتخرجي من فمك
مليكة:(كمشات حجبانها) رنيم
رنيم:(غوتات بجنون) واااااش عااارفة نتي أو ولدك اش درتو فديك السيدة هااا واااش عارفة بلي خرجتوو على حياة ديك السييدة وداباا كدعي فيهاا راه هي لي خصهااا دعي فيييك نتي سمعتي هي حيت نتوما خربقتوو ليها حياااتهاا وماشي غير هي خربقتوهاا ليا تاأنااااا وهادااك لي مكبر بيك كااان غايقتل بنتك ورااااه هو لي قتللل رااجلك ويتمنااا (حركات راسها ودموعها نازلين)بابا مااات بسبابو هوو ونتي وخويا وختي بقيتو ساكتين حيت الطمع عمى ليكوم عينيكوم ولكن تااال هنا وبرااكة كنت ساكتة قبل ولكن داباا كلشي غايتبدل كللللشي..
كاان صعيب عليها تعرف بلي باها مات مغدور وبلي مها وخوتها كانو عارفين شكون لي قتلوو وبقاو عايشين معاه بحال لي مات كلب ماشي باهوم.. مسحات دموعها وشافت فمليكة لي مخرجة عينيها فيها مصدومة وقالت ببرود: أنا مغانبقاش معاكوم هنا غانمشي بحالي تخنقت منكووم ومن نفاقكوم ولحسد والشر لي فيكوم تخنقت
مليكة:هبلتي نتي فين غاتمشي هاا فيه
رنيم:(غوتات) غانمشي لجهنااام سمعتي
مشات تتجري لبيتها مخلياا مليكة جالسة وهي فاشلة واخر حاجة توقعاتها هي اخر لعنقود يخليها كيف خلاوها لخرين.. طلعات رنيم لبيتها ومشات جابدة فاليز بليد لي مكضرهاش وبدات تتجمع فيها حوايجها كاملين وهزات دهبها لي عندها ولفلوس تاهوما ديالها.. جمعات كلشي وماخلات والو تامن كتوباتها داتهوم.. لبسات شكارة على لكتف لي مامضرورش ودفعات لڤاليز فالدروج تتكركب ونزلات تاهي ومليكة فاش شافتها دارتها بصح تخلعات.. بقات تترغب فيها وتزاوگ ورنيم تصمكات لقات علي فالباب ماهضرش معاها حدو هز ليها لڤاليزها باش يوصلها لمحطة وهي خرجات مخلية مليكة طايحة تتبكي وتشهق وربيعة تتنوض فيها.. مضارتش وراهاا بل ركبات بكل بروود وعينيها ساهين بعيييد..
🔜🔜
عائلة التجاني كبرات وتزاد ليها إسلام ورنيم لي كل واحد فيهوم لقى راحتو فالجو لي بغى.. رنيم لي واخا عاشت فوسط ديك لعيشة الاأن الجوهر الحر لي فداخلها كاان نقي بزااف وماسودوهش ليام.. انساحبت رحيل كيف لعادة مخلياهوم جالسين مجمعين تيضحكو وهي دخلات لبيتها وسدات لباب عليها وبخطوات بطيئة تمشات جهة البلاكار جبدات منو وراق بويض ولاطغوز كبيرة فيها أدوات الرسم.. جلسات فوق لفوطوي وجرات ديك الطبيلة حطات عليها أدواتها وجبدات قلم الرصاص وبدات تترسم.. بين عينيها الصورة لي مقدراتش تفارقها من النهار شافتها عليها بغات ترجمها كرسمة وتحتافظ بيها كانت حادرة راسها واخا عينيها كضرها الاانها ماهتماتش ليها وماتسوقاتش.. عقلها تتحس بيه مزداحم بقوة الأفكار وكانت باغا تفرغ مكنوناتها فالرسم.. بقات لساعات تترسم وكل مرة تغلط تمسح ولاتعاود الرسمة من أول وجديد وهي متخشعة فيهاا.. وكل مرة تسهى بينها وبين نفسهاا عاد كترجع تكمل ماعياااتش ومملاتش تااحطاات القلم وهزات ديك لورقة تتشوف فيهاا.. مكانتش رسمة عادية حيت كانت رسمة مطابقة لشكل عينين داك الشخص لي عتقها ولونهوم لي كيشبه لون لبحر.. نفس الشووفة ونفس التفاصيل الدقيقة لي شافت قبل ماتغيب حطاتهوم فديك لورقة.. بقات تتشوف فيهاا ونفس الإحساس لي حساتو معاه رجعات تتحس بيه دابا وهي تتشوف فهاد الرسمة وكأنه وااقف قدامها.. ريحتو الرجولية القوية وصوتو الهامس ودفء حضنوو هاد التفاصيل كلها مقدراتش تنساهاا وتخطاها مدات يديها وبدات تتلمس ديك الرسمة بهدوء وسهوة وراحة غريييبة عمرها حساااات بيها..
---
ريحة القهوة المعطرة لي كانت تطبخ فوق من ديك البوطة الصغير عاطية فالمكااان واحد الريحة زوينة ممزوجة مع ريحة البخوور لي كانو مطلوقين فديك المبيخرة.. وصوت الراديو لي كان تيتسمع منوو أغنية سوسية قديمة.. الغرفة كان ديكورها من العصر القديم بالأتاث ديالها..ريح خفيف داخل من الشرجم لي كان محلول مخلي دوك لخوامي لي كان توبهوم تقيل فالذهبي كيبري كيتحركو.. فالقنت دلبيت كان بيرو من خشب لعرعار محطوط فوق منو قراعي صغاار فيهوم سوائل بألوان مختالفة ومغطين بغلاقة دلخشب .. هز واحد لقريعة صغيرة وقربها جهة نيفو وهو مغمض عينيه كيتنغم بديك الريحة.. هز حاجبو وقاد النضاضر دلبروطيكسيون لي لابس ولي كانت حاجبة لون عينيه لي كان شبيه بلون لبحر.. خدا الستيلو لي كان محطوط فجنبو فوق من ديك لاجوندا وبدا كيكتب شي حاجة فيها وهو مركز.. تاسالا وهو يقلب وجهو جهة لبوطة وناض بخطوات بطيئة غادي جهتها تاوقف وطفاهاا وهز ديك التلموسة فين تطبخات القهوة وجبد واحد لفنجان فالكحل صغير وكب فيه لقهوة وهز طوبة السكار دارها ليها ورجع ثاني لبلاصتو بخطوات تقيلة.. حط الفنجان فوق البيرو وهز كمام التريكو لبلوماغين لي لابس تبانو درعانو القويين والعروقة باينين منهوم مغطين بزغيبات الشعر فالقهوي بااارد.. هز يديه ليسرية فين كااان لابس خاتم دالنقرة فيه جوهااارة فالكحل ولي كان ملوووي عليه فاصمة بيضاا.. جلس فكرسيه ومد يديه بدا كيحل ديك الفاصمة تازولها وبانو أثاار ضفاار.. تنهد وهز عينيه جهة الشرجم لي كان محلول والگمرة مضوية لبيت مع الضو الخفيف لي كان شاعل.. كان ساهي ومحسش بالباب لي دق وتحل تادخل منو راجل كبير فالعمرو فأواخر الستينات لابس جلابة سخونة وداير ترازة على راسو.. قرب جهتو مبتاسم ابتسامة بشوشة وحط يديه على كتفو تاهز فيه عينيه الزرقين ونطق الراجل بصوتو لبشووش دو لكنة سوسية: هاد السهوو ديالك مبقاااش عاجبني اولد لحاج..
تنهد تنهيدة طوويلة ومد يديه زول نضاضر دلبروطيكسيون ورجع شاف ف بّا سالم وقال بصوتو الهادئ لمبحوح:لعقل فيه شلى مطارق ابّا
بّا سالم:(جر لكرسي لي حداه وجلس جنبو ومد يديه حطها على فخضو وقال بحنان) ورخف على راسك أولدي وماتهزهاش ملين تقااالت
حرك راسو بهدوء وبتاسم ابتسامة خفيفة يادوب بانت على شفاهو:ونتا اش مسهرك تال هاد لوقت ابّا
بّا سالم:(ضحك ببشاشة) كنت غادي نعس وفاش شفت الضو مشعول هنا قلت نجي نونسك اولد لحاج
ولد لحاج:(ناض من بلاصتو غادي جهة تلموسة دلقهوة وكب فنحان خر ورجع لعندو وقال بصوت تقيل) اوا تنغم ليا بهاد لكويس وقول لي كيف جاك
بّا سالم:(جغم من لقهوة وغمض عينيه ونطق بالسوسية) اااح لعشوب نمتازيرت أوريلي ماتنيوفن "لعشوب ديال لبلاد مكاين ماحسن منهوم"
ولد لحاج:(رجع لبس نضاضر وحرك ليه راسو بلهداوة وقال) هادوك جداد يالاه سيفطاتهوم ليا لحاجة
بّا سالم: تاتخلي ليا شوية منهوم أولدي
ولد لحاج:(غمض عينيه بلخف وحط يديه على صدرو وقال بصوت رزين) الله ياودي ابّا كلشي ديالك
بّا سالم:(هز داك لفنجان دلقهوة وبتاسم ليه) اوا نخليك نمشي نعس غدا تابعني لفياق بكري حيت غايجيبو ليا لعلف الجديد لي وصيتي عليه
ولد لحاج:(كمش حجبانو وشاف فالساعة لي فيديه وقال بجدية) غدا الصباح غانشد الطريق بكري تكلف نتاا والاكانت شي حاجة ماهياااش عيط ليا واخا ابّا
بّا سالم:واخا اولد لحاج يالاه تمنسيوين "تصبح على خير"
ولد لحاج:تيمنسيون
مشى بّا سالم مخليه على نفس لجلسة ولفنجان دلقهوة بين يديه كل مرة يجغم منوو مكمش حجبانو القهويين وباين فيه كيخمم قلب وجهو جهة لقرعة لي كان حاط فوق لبيرو ورجع هزها وخدا غلاقة دلخشب سدها بيهاا وهز لقراعي لخرين تاهوما وناض بخطوات تقيلة غادي لواحد المجر عندو تما حطهوم فيه وسد عليهوم ومشى جهة الراديو طفااه عاد خرج من لبيت سادها وراه بالساروت وتمشى فداك لكولوار الطويل وصوت السكاااات هو لي كان كيتسمع فداك الليل.. خرج من لباب الصغير لي فأخر داك لكولوار وضور عينو جهة لفيرمة لي كان لحس مقطووع فيهاا وتمشى لجهة لمعاكسة فين كاين لباب لكبير حلو ودخل بهدوء غادي لبيتو لي كاينة لفوق.. حل باب لبيت لي كان غالب عليه الطابع التقليدي.. فجنب كاين بلاكار من لخشب الاصيل وديكورو عريييق وقديم فلون البني وفلوسط كاينة نموسية ذو أعمدة تقليدية فيهاا ستاااير مغطينها من الجوانب وكاين كوافوزات بنفس شكل لبلاكار وفوطوي فالجهة لمقابلة لنموسية بالجلد فلكحل..وعاد لبالكون لي فيه خوامي توبهوم فلبيض والذهبي.. فاش كدخلي لبيت كتحسي براسك بحال الاراكي فشي رواية الف ليلة وليلة.. وقف كيزول سمطة دالسروال وحطها فوق لكوافوز وزول صباطو وتمشى بخطوات بطيئة جهة لباب لي كاين فالقنت ولي كان باب دلحمام.. دخل ليه وبدا كيزول فالتريكو لي لابس تابقى فلفوق عريان.. كانو كتافو عرااض وعامرين على الصح وزغيبات خفاف مرشوشين فصدرو لمبرونزي.. شعل الرشاشة وتخشى تحتها متكي بيديه على لحيط وضهروو كااانو فيه لطرااس ديال شي ضراابي باين دازت عليهوم مدة واخاا براو الاأنهم خلاو سيكاطريس ديالهوم.. واقف وشعرو لقهوي كاان نازل ليه على عينيه.. مد يديه خدا شامبوان دارو لشعرو وغسلو مزيان ودوز لباندوش على داتو ولوى عليه فوطة فلكحل على نص التحتاني وخرج من لحمام مخلي ريحة الشومبوان ولباندوش عاطية.. جبد كالسو جديد لبسو ولبس سروال بيجامة بلكارويااات وتيشورت كحل وتمشى جهة النموسية وتخشى بلاصتو ناعس على ضهرو وعينو فالسقف لمنقوووش ساهي كيف عادتو.. هز يديه ليسرية ورجع شاف فدوك الآثار لي فيه وتنهد تنهيدة طويلة قبل مايمد يديه ويطفي الضووو دلبيت...
فجهة خرى كانت رحيل مخشية فبلاصتها مبعد ماتعشاو وإسلام مشى لدارو ورنيم بقات معاهوم وباتت مع أسماء فبيتهاا أما سيدرا فنعسات مع تانيرت وإدريس باش يردو ليها لباااال كيف عادتهوم فيماا كاتمرض هوما لي كيسهروو عليهاا وكيخليو رحيل ترتاااح واخا قلبها وعقلها كيكونو مشطونين على بنتها.. هازة ديك الرسمة بين يديها كتشوف فيها وهي ساكتة.. معرفاااش مالهاا وعلاش كتحس بهاد الأحاسيس كلها كلما شافت فالصورة.. هاد الشخص لي عتقهاا ولي مشى بلامايخلي وراه تاشي حاجة باش تقدر تعرفوو وتشكروو حيتاش خاطر بحياتو باش يعتقها وهو مكيعرفهااش هي بصح ممتنة ليه على شنوو دااار..
رحيل:(هزات عينيها فباب لبالكون تتشوف فالگمرة ونطقات بصوت هامس) يمكن يكتاب لينا نتلاقى مرة خرا..
فبيت أسماء لي كانت ناعسة ومخشية فلكاشة عكس رنيم لي مجهاااش النعااس نهائيا.. عيات ماتقلب فبلاصتهاا وتغمض عينيها عالله وعسى تنعس ساعة واااالو.. تنهدات وحيدات عليها لغطاا وناضت لابسة بانطوفة أسمااء وهزات بنوارهاا لايحاه على ديك لبيجامة لي عطاتها أسمااء وخرجات من لبيت بلامادير لحس.. كان الضوو مطفي والسكات فالدار شعلات رنيم لپيل دتلفونهاا وتمشات بشوية عليهاا غادة جهة الدرووج طالعة لسطح يضربها شوية دالبرد.. مع حلات لباب دالسطاااح غمضات عينيها من لبرد لي ضربها فوجهها تاخلى تبوريشة طلع معاهااا حلات عينيها وهو يبان ليها محمد طه واقف عاطيها بالضهر متكي على السطاارة ولابس سروال التوني مع قبية.. قربات جهتو بخطوات تقيلو ونطقات: تانتا مجاااكش النعاس
محمد طه:(ضار جهتها وشاف فيها بهدوء محرك راسو) لا
رنيم:(وقفات حداه وتكات على لحيط ونطقات بهدوء) غدا اااجاااب مافيقنااا عاااود هه
محمد طه:(حرك كتافو) مولفين السهييير ولفياق بكري
رنيم:ولكن فهاد لبرد راه لفياق بكري عدااااااب متتقدش تسخى بلكاااشة السخوووونة
محمد طه:ضروري من الصبر (شاف فيها وبسخرية نطق) ماشي غير اجي وخدم
رنيم:(طلعات فوق الدريجة تطل على الشارع لي كان لكالم فيه وقالت) شنوو زعمة تتحشي ليا لهضرة
محمد طه:نتي مقرووصة بوحدك أنا غير هضرت
رنيم:هممم تيقناااك أسيدي
سكت محمد طه وسكتات تارنيم لي بقات تتشوف فيه بنظرة هادئة.. وبعد مدة صمت نطقات بصوت هامس: مقدرتيش تنساها ياك؟
محمد طه:(كان قالب وجهو لجهة لخرا وفاش سمعها اش قالت بقاا على نفس وضعيتو بدون مايجاوبها)
رنيم:(كملات هضرتها بنبرة حزينة) عارفة بلي صعيب تنسى شي حد كان عزيز عليك ومات حاااسة بداكشي لي نتا تتحس بيه
محمد طه:(ببرود) مغاتحسيش
رنيم:(شافت قدامها ونطقات بهدوء) تاهو مااات
محمد طه:(شاف فيها وكمش حجبانو) شكووون؟
رنيم: لي حرمك من لبنت لي تتبغي
كلامهاا لي نطقات بيه خلى محمد طه يستغرب فلول ولكن مجرد مافهم قصدها كمش حجباااانو على جهدهوم وضرب بيديه على السطارة وقال بحقد: كنت باغيه يتعدب قبل مايموت
رنيم:(حركات راسها ولغصة فحلقها) أصلا راه تعدب فموتو (شافت فيه) طعنوه خمسين طعنة
محمد طه:(قلب وجهو وهو معصب من سيرة عاصم ) يستاهل ماكثر
رنيم:(تنهدات) عندك لحق يستاااهل كثر
تنهدات رنيم وقلبات وجهها حابسة دموعهاا لي كانو معمرين عينيها.. واخا يوقع لي يوقع هاداك راه خوها ودمو من دمهاا.. يمكن عاااصم ماشي إنسان مزيااان وأداهوم ولكن مغاتنكرش أنه قراها وكاان فمتابة باها واخا خاااايب وممزياانش الاأنه كيبقا خوها.. ماعرفاتش إينا خانة غاتصنف فيها مشاعرها تجاهو واش الحزن ولا لكره او الشفقة.. وهاهي فقدات مرة خرا فرد من أفراد عائلتهاا..
🔙🔙
بعد ماخرجات من تحت رعاية عائلتها وهي باقا قاصر مكملاتش السن لقانوني قررات أنها تلجىء لشخص لوحيد لي عارفاه مغاديش يسمح فيها وهو رحيل.. سافرات لربااط وجات عندها ولكن مالقاتهااش فدارهوم وفاش سولات عليها مالين لحومة تاحد ماقدر يعطيها خبار حيت تاواحد ماعرف فين مشاو.. تنهدات وقررات تمشي لدار عاصم لي فحي الرياض تبقى فيها على ماتقاد أمورها.. كان الكونسيرج دلعمارة كيعرفها عليها عطاها الساروت حيت هاديك لاباخطمون دعاصم شراهاا.. دخلات لاباخطمون لي كانت مقلوبة سفاها على علاهاا مور مفتشوهاا لبوليس خلاوها مرونة وتاحد مادخل ليهاا.. قادات داكشي لي قدات عليه حيت كتفها باقي كيضرهاا.. ومشان جبدات الدهب لي عندها ولفلوس وحسباتهوم لقاتهوم 5000 درهم هزات منهوم باش تشري تلفون ووخدات الدهب لواتو فزيف ودارتو فالشكارة وخرجات من لاباخطمون غادة تبيعوو ومن زهرها كانت مليكة تتشري ليها كل مرة شي حاجة ديال الذهب تاجمعات نيت حصيصة كبيرة منو.. وصلات عند مول الذهب وجبدات ليه واحد لأونصومبل كان وازن وعاطي لعين فيه كولي وگرميط وخاتم وحويلقات.. باعتو بثمن قل من لي شراتو وباعت شي حوايج خرين وخرجات من عند مول الذهب وهي حاضية مزيان وحيت أول مرة تسافر بوحدها وتمشي لشي بلاصة بعيدة على دارهوم لخوف كان ولابد منوو وفيما تشوف شي واحد كيشوف فيها كانت تتنوى.. ماوصلات لدار تاغفر ليها الله ذنوبهاا وكانت شرات تلفون عادي تقضي بيه وكارط جديدة.. كل مرة كانت تمشي تسول فلحومة على رحيل وعائلتها ونفس لخبار كانت تتسمع... تانهار عرفاتهوم رحلو وتما كان الأمل لوحيد لي عندها تبخر.. حسات بالفشلة ولفلوس بداو كينقصو شوية بشوية واخا زيرات راسها وكانت تتجيب غير الضروريات لي غاتحتاج..بقات سبع شهور على حالهاا وكل مرة كانت تتخرج تتقلب على شي خدمة تعاون بيها راسها واخا ماعندها لاباك لاديبلوم لاحرفة مهم ماتبقااش بلاش.. كانت كاضور على محالات دلحوايج تاجاها لفرج ولقات بوتيك كانو محتاجين لبنت تخدم معاهوم.. مكانتش عندها تجربة ولكن راسها كان خفيف ونهارها لول دوزاتو مزيان واخا فيه تمارة.. رجعات لاباخطمون وفطريقها جابت معاها لعشاا وقبل ماتوصل لباب بان ليها علي واقف.. غير شافتو وهي تكحل بلعما ومشات جهتو وقالت:نتا اش كادير هنا؟
علي:(شاف فيها) رنيم نتي خصك تمشي معايا
رنيم:(غوتات بعصبية) بعدوو مني وعطيوني تيساااع سمعتي مغانمشي معاك لفين
تخطاتو باش تمشي وهو يجرها ونطق بدون مقدمة:مك ماتت
جمدات فبلاصتها وعينيها على علي لي كانت لجدية تتبان فملامح وجهو.. مدة وهي مكتحركش ومدارت تاشي رد فعل تاقرب جهتها وحركها من جهة كتافها ونطق:رنيم
رنيم:(هزات فيه عينيها ونطقات بصوت هامس) وقتاش؟
علي:لبارح فالليل وليوم دفنوهاا
رنيم:(الصمت)
علي:ملي خويتي الدار وهي طايحة فلفرااش مبقاتش تتنوض ولاتحرك.. ديناها لسبيطار وبقات تما واحد الشهر وهوما يخرجوها ورجعناها تاني لدار وبقات ربيعة مقابلاهاا وكل مرة نجيبو ليها طبيب.. تال لبارح بالليل مشات ربيعة باش طل عليها وهي تلقى مول الأمانة دا أمانتو.. أنا غير عرفت جيت ديريكت لعندك هنا ساعة لكونسيرج قال ليا خرجتي فالصباح.. بقيت كنساينك تاعيطو ليا دراري وقالو ليا راه دفنوهاا مع الضهر
رنيم:(هبطات راسها ونطقات بصوت مخنوق) سير من هنا
نثرات يديها ومشات جهة باب ليموبل مخلياه واقف كيشوف فيها.. دخلات لداخل وعينيها تضببو بالدموع تمبقاتش الرؤية واضحة ليها.. كانت كلها تترعد وبزز باش قدرات تطلع فالدروح ونسات بلي كاين سونسور.. دخلات لدار وخلات لباب مردود بلاماتسوق ليه وطاحت على ركابيها فبلاصتها ودموعها بداو ينزلو كيف الشلال.. تتبكي وتشهق وعقلها باغي يخرج من بلاصتو وهب تاضرب على صدرها وتتحرك راسها بلا مامتيقااش لخبار لي وصلاتها.. مها مااتت ومبقاتش غاتشوفها مشااات تاهي وخلاتهاا بوحدهاا وشحال صعيبة ومغايحس بيها غير لي مكوي بحالهاا.. يمكن رنيم تعصبات من مها ويمكن مليكة كانت شرانية مع لغير ولكن مع ولادها كانت حنينة وعاطياهوم لخاطر.. بدات رنيم تاضرب بيديها على الأرض وصوت بكاها تيتسمع مجهد تاحسات بشي حد عنقهااا وبلاماتفكر خشات راسها فصدر علي لي تبعهاا وبقا واقف تيسمع بكاهاا وفاش شاف حالتها مبغاش يخليها حيت بقات فيه.. بقااا معنقها وهي تتبكي تاحس بيها ترخات وسخفات بين يديه وهو يهزهاا بزربة وخرج غادي بيها لسبيطار..
🔜🔜
كانو دموعها نازلين فاش تفكرااات موت مها لي محضراتش ليه ولي جاها على غفلة ومكانت دايرة لو حساااب.. أما محمد طه فمكان عارف واش هو فرحان حيت لي كان سباب فعدابهوم ماات بديك لموتة ولامعصب حيت ماخداش لعقاب لي يستاهل.. مسح على وجهو ونطق بدون مايشوف فرنيم:تصبحي على خير
قال هضرتو ونزل وهي عاد قدرات تبكي براحتهاا وتخرج دوك الشهقات لي كانت حابسة.. وكلما مسحات دموعها كانو ينزلو عاود.. بقات على ديك لحال تاحسات بيد تحطات على كتفها ومع ضاارت لقاتو ريان لي كان كيشوف فيها بشفقة.. قرب جهتهاا وجرهاا معنقها وهي بدورهاا دورات يديها عليه معنقاه بالجهد تتبكي.. كانت محتاجة هاد التعنيقة وجااات فوقتهاا.. بقا كايطبطب على ضهرها تاحس بيهاا سكتات وحبسات لبكاا وهو يبعد عليها وبدات تتمسح فدموعها وقالت بصوت نبرتو باكية:شكرا
ريان:على واجب صافا شوية
رنيم:(هزات عينيها فيه وقالت بابتسامة ذابلة) اه شكراا
ريان:(حرك راسو ) زوج دلمرات؟
رنيم:(بعدم فهم) كيفاااش؟
ريان:قلتي ليا شكرا زوج دلمراات باقي خصك تزيدي التالتة باش تبقا تابتة
رنيم:(قلبات عينيها وقالت بضحك) شكراا
ريان:لعفوو يالاه بونوي
رنيم: bonne rêve
دار ليها باي باي ونزل لتحت وهي بقات واقفة جهد خمس دقايق قبل ماتنزل تاهي راجعة لبيت أسماء لي كانت ناعسة كيف خلاتها.. حيدات رنيم لبينوار وتخشات بلاصتها مغمضة عينيها ناااعسة..
فالبيت لي حدا بيت أسماء فين كان جالس محمد طه وتلفون بين يديه كيشوف فتصويرة جيداء لي كانت مبتاااسمة فيهاا.. عينيه كانت تتلمع بدموووع حبيسة مبغهااش تنزل وحاااالف ماينزلهاااش.. صورتهاا وهي فديك لبلاستيكة لكحلة باقا بين عينيه وصوت الأوديو لي خلات ليه قبل ماتموووت فمسامعوو مخليه مايحسش بالراااحة.. قلبو حاااس بيه مكووووي واحد لكوية صعيب تبراا ولخنقة لي فصدروو ممخلياااهش مرتااااح.. متمني أنه يرجع بيه الزمااان لور ويخبرها بمشاااعرو لي كايحس بيها من جهتهااا.. ولكن القدر كااان ليه رأي اخر.. ومكتاااب لداك لحب لي كان هاز من جهتها أنه مايتعرفش ويبقااا بينو وبين نفسووو.. غمض عينيه وتنفس بالجهد وحلهوم ورجع شاف فالتصويرة ديالها وقااال بصوت هادئ:الله يرحمك
خرج من داك الضوسي فين مخبي تصاورهاا وطفى تلفون وتخشى تاهو بلاصتو مستني النعاااس يزورو..
يوم جديد وبداية أسبوع جديدة بطااقة جديدة.. كان تانيرت كيف عادتها موجدة لفطوور لي تجمعو عليه كااملين من غير رحيل لي باقا مغاترجعش لخدمتها وسيدرا لي كانت باقي مريضة.. كان إدريس جالس كيشرب من كاس لقهوة وعينو على محمد طه لي كان ساهي وگاعما كيفطر.. تنهد بهدوء ونطق بصوت هادئ: خدامة ليوم ارنيم
رنيم:(هزات فيه عينيه ونطقات بابتسامة) اه اعمي مع لعشرة
إدريس:ياك بعداا مرتاحة فخدمتك
رنيم:وي الطبيب مع من خدامة الله يعمر ليه الدار وتاديك لبنت لي معاياا ضريفة ومكنلقاااش مشكيل
أسماء:(تتاكل فالتوست) بعدا الاكانت ضرستك كاضرك تحيديها فابور
رنيم:اش هاااد لفاااال على الصباااح اصاحبتي
ريان:(مبوووق بالنعاااس ولكن لي فيه مامهنيهش) أسماء عندك ضرسة لعقل؟
أسماء:اه
ريان:و اااا لعجب گاعما كاتكسابيه
أسماء:(كانت باغا تسبو وهي تفراني حيت كاين باها وقالت بسخرية) لانتا لي كاتكسااابو نوووض سير لخدمتك راك تعطلتي
ريان:(حرك ليها حجبانو) سيري نتي اكيليوباترا راه بنتي ليا تعطلتي يالاااه ديگااااج
تانيرت:(كحبات وبصوت مبحوح قالت) ونتا زعمة مغاتعطلش
إدريس:(كمش حجبانو وقال بحنية) فطري باش نعطيك الدواا تشربيه وتنعسي
تانيرت:(تكمشات فبنوارها وقالت) غانمشي دابا نعس راسي غايتشق عليا
ريان:(ناض جهتها باسها فحنكها وقال بصوت حنين) نجيب ليك شي حاجة معايا ملي نجي
تانيرت:(بتسمات ليه) غير رد لبال لراااسك واخاا وملي ترجع عندي مانقول ليك
ريان:(باس جبهتها) واخا الله يشافي
محمد طه:(ناض باس راسها وقال) الله يجيب الشفاا أنا غادي
أسماء:(باست تانيرت فحنكها) ردي لبال لراسك تانجيو باااي
رنيم:(سلمات عليها) خالتو الله يشافيك
خرجو بربعة بيهوم مخلين تانيرت غادة مع إدريس لي مدرعهاا لبيت النعااس نعسها حدا سيدرا لي كانت محطوط على جبهتها درت حياتي وفنواضرها دايرين ليها لبطاطا.. زولو ليها إدريس ورجع شاف فحرارتها لقاها شوية حسن من لبارح.. خرج من لبيت ومشى جاب كااس فيه لما ومعلقة وخوا فيه خنيشة ديال الدواا وجابها لتانيرت لي شرباتها وتسطحات بلاصتهاا وغمضات عينيهاا.. تحنى باسها فشفايفها ونطق بهمس حنين: مغانتعطلش ليوم غير غانطل فلگاراج ونرجع واخا الابغيتي شي حاجة عيطي لياا اتانيرت إينو
تانيرت:(بصوت هامس) رد لبال لراسك اإدريس
حرك ليها راسو وخرج تاهو غادي لگاراج مخليها ناعسة جنب سيدرا وبزوج بيهوم مريضات..
---
وصلات رنيم لحي فين سااكنة ودخلات لدار لي كانت كارياها هي واحد لبنت تتقرا معاهااا.. دار عادية فيها زوج بيوت وصالون صغير وكوزينة وحمام مشروك مع طواليط.. مشات لبيتها وهي زربانة تتشوف فالساعة ولوقت خايفة تعطل حيت ليوم هي لي غاتحل لكابيني فين خدامة.. بدلات عليها بسروال كحل جلد مع واحد تريكو دالصوف فلبااج لكول ديالها واسع ومونطوو طويل كحل.. مشات تتجري لطواليط غسلات سنانهاا ورجعات لمراياا تقاد حالتها.. دارت كريم مرطب لوجهها ومشطات حجبانها ورسمات أيلاينر خفيف مع عكر نيووود فلغوز وبلاشر فلحنيكات باش ماتبانش صفرااا.. رشات ريحتها ولبسات تقاشرهاا وسبرديلتهاا وهزات صاكها وسدات باب بيتها بالساروت وخرجات تاني من الدار وعينيها كيقلبو على طاكسي صغير باش يوصلها لمحطة طاكسيات.. واقفة فالشارع تبانت ليهاا واحد الأودي جايا جهتها تاوقفات جنبهاا ونزل زاجهاا وهي طلع حجبانهاا لسماا ونطقات بصووت باين فيه معصب: نتااا عااااود؟
نزل علي من الطوموبيل داير يديه فجيب الجاكيط لي لابس وعينو على رنيم لي كانت واقفة وهازة حاجبها وباين من الشوفة راه معصبة.. طلع لطروطوار او وقف قدامها ناطق بهدوء:صباح الخير صافا؟
رنيم: مكاين تاشي خير ملي شفت وجهك اش باغي ؟
علي:طلعي نوصلك لخدمتك
رنيم:واااش نتاا مباغيش تبعددد مني تابعني كيف خيااالي اووو وااعطيني التساااااع
علي:(قرب جهتها باغي يشدهاا ساعة رجعات لور ونطق بهدوء وهو كيحاول يكالمي راسو) ماتقصحيش راااسك ارنيم وطلعي وزايدون ماشي بدر الدين لي مسيفطني غير تهناااي
رنيم:(حركات راسها بستهزاء) شتي واخا يكون مسيفطك مغايهمنيش حيت مبقاااش كيخلعني ولي فجهدو يديرو أصلا واحد بحااالو كيعرف يستقوى غير على الناااس الضعيفة
علي:عارفة هو الاسمع هضرتك عليه اش غايدير
رنيم: اوا سير تتجري وقول ليه رنيم عيراااتك اش تتسنى عند بالك اتخلعني بيه
علي:طلعي نوصلك
رنيم:(خنزرات فيه) فرقني عليك
تخطاتو وقطعات الشانطي لجهة الثانية وشيرات لطاكسي لي كانت جايا تاوقفات ليها وهي طلع ومشات أما علي بقا واقف كيشوف فيها وهضرتها وتصرفهاا معجبوهش نهائيا.. زير على يديه وتمشى بزربة جهة طوموبيلتو ركب وتبع الطاااكسي..
---
فمدينة مراكش وبالتحديد فواحد لجناح كبير بديكور تقليدي فخم وأنيق يخلي أي واحد داخل ليه ميسخاش منو بلحيوطة دياالو لمنقوشة نقش تقليدي متوارث عن سنين ومتناسق مع الاثات ديالو الفاخر..وهادشي كان عاطيه جمالية خاصة... جالسة قدام لمراياا بجلسة أنثوية وشعرها لكحل مطلوق مسرسب فوق كتافها وضهرها مبينها صغيرة على سنها هزات لكحول البلدي ودوزاتو على عينيها لي كيشبهو لعسل تاخلاتهوم مغرغين بلكحول.. هزات ريحة من الروايح لي كااانو محطوطين فوق من لكوافوز قدامهاا رشات منها زوج رشات وغمضات عينيها كتستنشق الريحة لي عمرات داك الجناح كولو.. وقفات بهدوء تتقاد ديك لفراشة لي لابسة فالزرق بااارد ومع هي طويلة جات بحال شي عارضة أزياء...صوت كعب صندالتها تيتسمع فالأرجااء وهي خارجة من جناحها كتمشى فداك لكولوار الطويل ولي كانو فيه بيباان دلبيوت خرين.. قربات جهة السطارة تطل من لفوق على الحركة لي كانت فالرياااض.. هزات يديها لمزينة بگرميط ديال الذهب شادة بيها أطراف لفراشة لي لابسة وهي نازلة بشوية عليها تاهزات فيها السعدية راسها ونطقات: لالة بيتي شي حاجة؟
ردات شعرها مور ودنيها ونطقات بصوتها دو لكنة مراكشية: وجدتو كلشي مابيت تاحاجة تنقص اسُعدية
سعدية:وجدنا الالة كوني هانيا ونعسي على جنب الراحة
حركات ليها راسها وخلاتها كتنقي فالخصة وترش عليها لورد كيف لعادة فكل صباح...تمشات جهة الصالة لكبيرة لي كان بابها منقوش ومقوص ودخلات ليها.. كانت الصالة مفرشة بأخر مكاين فالطلامط والزراابي والنقش فالسقف مناسب الزليج لي فالحيوط.. جلسات فوق السداري وهزات تلفونها دوزات لخط وبقات مدة تتسنى وتتحرك رجليها بستريس وغير تقطع لخط وهي تنطق وباين من تكميشة حجبانها راه معصبة: هاهو ايبدا تاني بدوك لفعايل
سعدية:(جات عندها وقالت) لالة نجيب ليك قهوتك هنا
عينيها فالتلفون وجوباتها: لا ولكن قولي لهنية توجدهاا وكيف كيبغيها تايجي ونشربها معاه..
سعدية:هي لولة الالة..
مشات السعدية وهي رجعات تاني تتصوني ونفس المشكيل شي لي خلاهاا تنهد وحطات التلفون وناضت خارجة من الصالة غادة جهة لكوزينة تابانت ليها السعدية جايا تتجري عندها ونطقات وهي تضحك: ولد لحااج جاا الالة
ديك التكميشة لي كانت فحجبانها طلقات بلاماتحس وهي تبسم تابانت تبسيمتها فلمعة عينيها لعسلية وقربات بخطوات متلهفة جهة لباب ديال الرياض لي كان بابو الصغير محلول تتسناه يدخل بقلب ملهوف تبان ليها وااقف قدامها وهاز صويك صغير فيديه ولابس سروال توب فالبلوماغين مع شوميز فنفس اللون وجاكيط كحلة.. شعرو لقهوي رادو لوور ولحية مخليها كبيرة شوووية جهة الدقن ديالو.. هزات السعدية من عندو الصاك ونطقات بترحيب:على سلامتك اولد الحاج نورتي الريااض
حط يديه على كتفها وجوبهاا بصوت هادئ: الله يسلمك
هز عينو فهاديك لي كانت جايا جهتو مبسمة وعينيها بداو كيلمعو بالدموع تاوقفات قدامو وتلاحت على صدرو ونطقات بصوت باكي: ولدي نوح
فجليسة دلقصب لي كانت قدام لخصة جالس نوح جلسة رجولية واليد لي فيهاا لخاتم حاطها حدا دقنو وعينو على مو لي كانت جالسة أونفاص معاه والفرحة باينة فعينيها وهي تتعاود ليه اشنوو وقع فغيابو.. جات السعدية جايبة صينية فيها طويسات دلقهوة فالكحل والذهبي مع بريق ديالهوم فنفس الديكور.. حطاتها فديك الطبيلة لي كاينة لوسط وكبات لفنجان لول لنوح لي حرك ليها راسو بهدوء عاد مدات لفنجان الثاني لماماه لي شافت فيها ونطقات بسرعة:فين لحلوى اسُعدية؟
سعدية:(حركات راسها بحرج) غانجيبها دابا الالة رحمة
نوح:(جغم من كاس لقهوة وقال بهدوء) بلاش منها
رحمة:(شافت فيه) فطرتي بعدا اولدي؟
نوح: فطرت مع بّا سالم
رحمة: كيدايرة الأمور تم بعدا
نوح:مزيان
رحمة:(حطات طاس دلقهوة فوق من الطبيلة وقالت) كيف دوزتي السفر ديالك بعدا كنت كنتسنااك تجي داك النهار ساعة مشيتي لفيرمة
نوح:(حك حاجبو ونطق بصوت تقيل) وقع مشكيل وكان واجب عليا نمشي لفيرمة (قلب عينو على البلاصة ونطق ببرود) مباتش تاني فالدار؟
رحمة:(تنهدات) عييط ليه ساعة مكيجاوبش (حطات يديها على فخدو وقالت بحنية ) حاول عليه أولدي راك عااارفو كيف الدري الصغير كيبغي لخاااطر
نوح:(حمر الشوفة فمو ونطق بصوت قاصح) الخاطر هوو لي مكاينش هاد الساعة مع مثالو وقوة لفشوش ماعنديش معاه
رحمة:(بقات تادوز يديها على فخدو ونطقات بصوت هامس دو نبرة حزينة) مباغااش هاد لحالة ولكن الرجافالله
نوح:(تنهد وتقاد فجلستوو شاد يديها وباسها ونطق بصوت تقيل) يمّا ماتشطنيش بالك أنا هنا
رحمة:(حطات يديها على حنكو وبدات تادوزها على لحيتو ونطقات بصوت حنين) الله يخليك ليا أولدي
نوح:(ناض من بلاصتو وباس جبهتها وقال بهدوء) هاني جاي
تخطاها غادي جهة لبيرو لي عندو فالطبقة لتحتانية وبقات رحمة تتشرب فقهوتها وكل مرة طلق تنهيدة عميقة طالعة من لقلب.. سد لباب دبيروه لي كان ستيلو بحال باقي لغرف لي كاينين فالرياض.. تمشى بخطوات تقيلة كيزول الجاكيط لي لابس وبقا غير بشوميز لي بدا كيطوي كمامهاا لفوق وشعل ضوو لخفيف لي فوق البيرو وجلس فالكرسي دلخشب لي كاان كيبان بحال كرسي لملوك.. تكى على ضهرو بأريحية وبقاا كيدوز يديه على لحيتو وعينو ساهييين تاسمع صوت تلفونو لي صونى وجبدو..
نوح:(بصوت مريح) باقي عااايش؟
تسمع صوت ضحكات رجولية: هههه ياكما توحشتيني اولد لحاج
نوح:(حك جبهتو بتعب وقال) اش اوا درتي فداكشي لي قلت ليك؟
بصوت جدي قال:سيفط ليك الإيميل داكشي نااااضي اولد لحاااج أنا بعدا عجباتني اجي واش اتجي ليوم؟
نوح:(شعل لبيسي لي عندو فالبيرو وقال) ليوم مجايش تال غدا ونتشاوفو ادا عثمان
عثمان:(حط يدو على صدرو وقال) غدا تلقاني وجدت ليك الطنجية بلملوج بيدي اولد لحاج
نوح:(ضحك بثقالة) ودابا دويتي ادا عثمان يالاه تهلا تاال غدا
قطع معاه لخط وجبد من جيب الجاكيط بواطة دنضاضرو دلبروطيكسيون ورجع مركز فالإيميل لي وصلو..
--
خارجة تتجري وصوت طالونها كيتسمع فالأرضية ديال الرخاام وكل مرة تشوف فساعتها وترجع تشوف فطريقها تاسمعات صوت كيعيط ليها:دكتوغ دكتوووووغ
ضارت بالجهد تاضار معاهاا شعرها لقهوي وقالت بصوت انثوي رقيق: شنوو بيتي تانتي ؟
الفرملية:واش مغاترجعيش ليوم؟
حطات يديها على خصرها ونطقات:لا مرجعاش تال غدا ودابا خليني اسمهان راه تعطلت
قلبات الضورة مكملة طريقها تتجري تاخرجات من السبيطار ومشات جهة الباركينغ وهي تتقلب فصاكها على الكونطاكط.. بدات تتقلب فالصاك وهي مدابزة مع شعرها تتردو لور.. حلات باب الطوموبيل وركبات شادة طريقها وكل مرة تشوف فالتلفون.. طريق طويلة شداتها تاوقفات فالباركينغ دلحومة وشافت فالعساس وهي تتقاد كسوتها دلخيط لي لابسة فالماغون وقالت ببشاشة: بلاصيها معاك المحجوب
خلاتها ليه ومشات تتجري فالحومة تاوصلات باب الرياض ودفعاتو مع كان مردود كيف ديما ودخلات لداخل وعينيها كيقلبو عليه بلهفة.. ملي عرفاتو غايرجع وهي متشوقة تشوفو حيت توحشاتو بزاف..بانت ليها السعدية وهي تنطق بسرعة:فين نوح؟
السعدية:فبيروه الالة
مشات تاطير جهة لبيرو وبلامادق حلات لباب تاهز راسو وتبسم تبسيمة خفيفة وهي قربات جهتو ونطقات بحب: حبيبي..
ماخلاتش ليه وقت تالقاهاا تلاحت عليه فبلاصتو معنقاااه بالجهد وتاهو عنقهاا وبدا كيدوز يديه على شعرهاا مدة عاد بعدات وبدات تترد شعرها وعينيها الزرقين كانو كيلمعوو ونطقات:توحشتك بزاااف اخوياا لحبيب
نوح:(جمع ليها حناكهاا وباسها فيهوم) لبرهووشة غادة وتتزياني
بيسان:(متكية على لبيرو وردات شعرها لور بعجرفة) عارفة راااسي أصلاا أنا زوينة
نوح:(حرك راسو بلاحول وقال بهدوء) عاد ساليتي خدمتك؟
بيسان:وي دوزت لگاغد دلبارح بااش نربح ليووم ونبقا معاااك
رجعات عنقاتو وتاهوو درعها بيدو وقاااال بحنية: سيري دوشي ونعسي شوية غاتكوني عييتي
بيسان:(تقادات فجلستها وهي تتفوه وقالت) بصح عييت ولكن لعياا ديالي مشى ملي شفتك مهم غانمشي لبيتي تال وقيتة دلغداا ونتشاوفو احبيبي
نوح:(بتاسم ليها بهدوء) سيري ترتاحي
هزات صاكها ومشات خارجة من لبيرو وهي تتفوه تابانت ليها رحمة جايا جهتها.. عنقاتها بيسان ونطقات تتفشش:ماما عيييت
رحمة:(بدات تطبطب على ضهرها وقالت بحنية) بالسيف ابنتي تعيااي ونتي دوزتي ليل كولو بلانعاااس (هزات ليها راسها) فطرتي بعدا
بيسان:يس موم خديت شي حاجة فلكافيتيريا ديال السبيطار غانمشي دابا ندوووش ونعس تال وقيتة دلغداا أوكي
رحمة: واخا ابنتي سيري ونيت أنا نشوف هادا فين غابر تاني
بيسان:(كمشات حجبانها) واش مجاش؟
رحمة:(حركات راسها بعصبية) فااين هو نعيط ليه وميجاوبش ماعرفتشاااي لاش داير داك التلفون
بيسان:(جبدات ليها حنكها وباستها) ماتعصبيش راااسك نتي عارفاااه كيداير
رحمة:سيري نتي ترتاحي ابنتي سيري
---
خارجة أسماء من خدمتها غادة تغدا كانت تتشوف لي خدامين معاهاا شي مجمع مع شي وشي غادي مع شي الاهي لي كانت بوحدهاا حيت مكانت تتخلي حد يضسر عليها ومكانت هي ضاسرة مع حد.. تادير خدمتهاا وترجع فحالهاا وأصلا أغلبية لبنات لي خدامين معاهاا مكانوووش كيقربو ليها حيت تايحسو بيها عااايقة براسها خصوصا أناقتها لمعهودة مخلياهوم يحسو بلغيرة جهتهاا.. هزات تلفونها لقات ريان مصوني عليها عاودات صونات ليه تاجاوبها وقالت: اش باغي السالوبار فاش صونيتي علياا
ريان:(تيمدغ حيت تاهو تايتغدا) كنت باغي غير نسول فيك الحشايشية
أسماء:(ميقات فيه) تاتغدا
ريان؛همم
أسماء:بغيتو يوحل ليك السالوبار
ريان:نتي مغاتغدايش ولاواقيلا دايرة ريجيم باااش متغلاضيش ياك
أسماء:ماعرفتش فين نمشي هاد لسناك لي حدايا مكلتهوم طلعات ليا فراااسي
ريان:كون كنتي قريية ليا كون جيتي لهنا كاين واااحد لغيسطو واعر ولكن طالع ثمااان
أسماء: أودي خصني نبقا نجيب معاياا غداياا حيت هادشي ممسلكنيش
ريان: نتي بحال محمد طه يالاه عيط ليه لقيتو تاهو كينگر مهم سيري قلبي فين تاكلي تالعشية ونتشاوفو الحشايشية
أسماء:باي
قطعات عليه وتنهدات وهي غادة لواحد السناك تماا حداهاا خدات سونديش مع صلاد وقرعة دلموناضة وعصرات ساعة عليه بزز باش كملاتو بقوة ماطلع ليها فراسها ولكن كان هو لحل لوحيد.. سالات وخرجات من تم غادة لشارع فين كاين واحد مول لحانوت خدات عندو باكية دلمسكة وشي تقاوت تلهى بيهوم عاد رجعات ومع كانت غاتقطع الشانطي جات واحد الطوموبيل بواحد السرعة كااانت غاضربها كون ماضربات فرااان الصيك فالبلاصة وگاع النااس لي تما بقاو كيشوفو حيت بصح على بونت كانت غاضربها مع العلم مول الطوموبيل هو لي غالط.. بقات أسماء واقفة جامدة والبلاستيكة لي كانت هازة طاحت الأرض وتشتت داكشي لي فيهاا والناس تتسولها واش هي بخير ولكن مكانتش تتجاوب حيت بصح لخلعة سكتاتها.. تحل لباب ديال الطوموبيل وخرج منوو مولاهاا لي كان جااي جهة أسماااء وسمع واحد الراجل كبير نطق ليه: ابقا تردو ليااال اولادي ردو لبااال
بقاو الناس كينساحبو فاش بانت ليهوم أسماء بخير ومابيها والو.. أما هي يالاه توگضات وعرفات اش كان غايطرا ليها وهزات عينيها فهاداك لي كان واقف قدامها لابس نضاضر دالشمش ونطقات بعصبية وهي تتشير بيديها:واااااش عووووور هااا كنتي غاااضربني الخراااا ماعرفتش أنا علاااااش تتسوگووو الامكنتوش تتعرفو ليه
قلب وجهو لجهة لخرا وشاف فبعض الناس لي متبعة الديكور ونطق ببرود: ياك ماوقع ليك والو إذا بلاش من هاد السكوندال الخااوي
أسماء:(قربات جهتو عاقدة غوباشتها ونطقات بصوت مرتفع) واااااش نتااا مخووور فدمااااغك
شاف فيها من تحت النضاضر وهز حاجبو باستهزاء وقال:هاد السيناريوهااات دلمسلسلات التركية طلعو ليا فك*ي بدلووو شوية
ضار باش يمشي وهي تجرو من الجاكيط لي لابس ونطقات بصوت ساخر: أصلا الرجااال هوما لي كيعتارفوو بغلطهوم ماشي زو*مل
ضار جهتها بالجهد وباين فيه معصب ونطق بصوت قاصح: زو*مل كيعرفوهوم غير لق*اب بحااالك
خلاهاا ومشى جهة الطوموبيل ركب وهي غير سمعات صوت الديماراج وهي تبعد بزربة فلحظة لي تحرك ودازت الرويضة على داكشي لي شرات تاتبغج كولو ولقرعة ديال العصير طرطقات ومشى طاااير مخليهاا واقفة مزيرة على يديها ونطقات بصووووت غاضب: شماااتة
فاش حلات عويناتها لقات السكات فالدار عرفات بلي كلشي مشى لخدمتو.. ناضت توضات وصلات صلاتها عاد خرجات طل على سيدرا لقاتها ناعسة جنب مهاا لي كانت تاهي مريضة.. خلاتهوم بزوجات ونزلات لتحت فطرااات وجمعات لمواعن حطاتهوم فلماشين ديالهوم ومشات تتشوف اش غاتوجد لغدا.. كانت مونسة راسها بليزيات وهي تطيب لغدا تاااحسات بشي حد وراها وهي ضور لقاتو إدريس لي جا بكري عكس ياماتو ونطق بابتسامة حنينة: كيبقيتي شوية
رحيل:(زولات ليزيات ونطقات بهدوء) حمدلله قلت نوجد لغدا حيت ماما مريضة
إدريس: هاد لجوو خص لواحد يرد فيه لبال مرة تلقى صهد مرة برد
رحيل:ااه بصح سيدرا نزلات ليها السخاانة بعداا
وعلى دكر سيدرا بانت ليهوم نازلة ببجامتها وشعرها مشنتف وباينة فيها يالاه فايقة مهلووكة.. قربات جهة إدريس لي هزها عندو ونطق بحنية: نخشيشة جدها
سيدرا:(تخشات فيه ونطقات بصوت مبحوح) فيا جوع
رحيل:(قربات جهتها هزاتها من عند باها ونطقات) اجي نغسل ليك وجهك ونبدل ليك حويجاتك امامي
داتها لبيت وإدريس نقص على لبوطة ومشى لبيت يطل على تانيرت لي بدات تتحل عينيها لي كانو حمرين بسباب الرواح لي شدها.. بتاسم ليها وقرب جهتها ونطق بهمس: كيف بقيتي شوية؟
تانيرت:(هزات كلينيكس تتمسح بيه ونطقات) همم بعد اإدريس راه غانعاديك
إدريس:(قرب جهتهاا جارها لعندو معنقهاا تاخشات راسها فصدرو وحنى عينيه لعندها ونطق بحب) ماتعاوديهاش اتانيرت إينو واخاا
تانيرت:(تتشمر نيفها) غانمشي ندوش عالله يخفف هادشي
إدريس:نعاونك
تانيرت:غير جبد ليا حواجي
ناضت بخطوات بطيئة خارجة من لبيت مخلياه حال لبالكو باش تهوى لبيت ومشى يجبد ليها حوايجهاا وقاد النموسية وحطهوم فوقها عاد خرج ودق فلحمام ونطق: لحوايج راهوم فلبيت
تانيرت:واخا
رجع سد لبالكو باش مايضربهاش لبرد ونزل لتحت عند رحيل لي كانت تتكمل لغدا وسيدرا لي جالسة فالكرسي تتفطر وإيڤانا جالسة فوق ركابيهاا مخشية فيها..
سيدرا:(مدات ليه طريف دلكريب ونطقات ببحة) بّا ديدي تميمي معايا
إدريس:(كلى داك الطرف ونطق بحب) يالاه كملي فطورك كولو واخا..
---
خرج من بيروه غادي لطبقة الثانية فين كااان جناحو فالجهة لمعاكسة لجناح رحمة.. حل لباب ودخل وريحة لبخوور واصلين عندوو مخلينو يتبسم حيت عارف مو هي لي غاتكون طلبات منهوم يبخرو لبيت.. فالداخلة كانو لفوطوي بالتوب فالرماادي مع مخيدات ملونين وطبيلة فلوسط ديال الزاااج فيها ڤاز فيه ورد لياسمين وزربية دالريش فالرمادي بااارد فالارض وفالحيط لمقابل كاااينة فالتلفازة قدها قداااش...حط جاكيطو فوق لفوطوي وتمشى لداخل فين كاااين باب خر ديال بيت النعاااس.. حلو وبرك على بوطن لي حدا الساقطة ديال الضو هز البااالكون لي كاااان مسدود تاتنورات البيت وبااان ديكورها التقليدي لممزوج بالعصري.. النموسية كانت فالوسط كبيرة ولخشب ديالها تقيل وستيل بيتو قريب لستيل دبيتو فلفيرمة خصوصا النموسية لي مضورة بأعمدة فيها الستاار شفافة فالبيض.. من طبعو كتعجبو لحاجة التقليدية والتوراث التقليدي وضروري أي حاجة متعلقة بيه يكون فيها شي توووش تقليدية..دخل لحمام خدا دووش وخرج مخلي ريحة ورااه كيف لعادة ومشى جهة دريسينغ روم لبس عليه سورال توب كحل مع تيشورت كحلة تاهي نص كم رجع شعرو غير بيديه لور ورش ريحتووو ومسح لحيتو بيديه مقادهاا وخرج من لبيت داير يديه فجيب السروال ونزل لتحت تاسمع لباب دالرياض تحل وهو يبان ليه داخل كيلعب بالسوارت فيديه وموراه السعدية لي نطقات بهدوء: لغدا باقي شوية ويوجد بيتي نجيب ليك شي حاجة؟
شاف فيهاا ببرود: كاس دلقهوة معصرة راه راسي غايتشق
نوح:(نازل من الدروج وبصوت بارد كيف الثلج نطق) بالسيف مايتشق ونتا عاطيها لسهير
هز فيه عينيه بالدعقة مكانش عارفو رجع أما السعدية هبطات راسها ومشات وهي تتبرگم: جا لي يحدهوم ليك..
نوح:(وقف قدامو وحط يديه ورا ضهرو مكروازيهوم وكمل هضرتو) على سلامتك اسي رؤوف فاش تفكرتي طريق الرياااض ومانسيتيهش
رؤوف:(قلب وجهو وجاوب ببرود) مكانش يسحاب لي الدخول ولخروح بلوقت
نوح:(قرب جهتو تاوقف قدامو وتقابلو عينيهوم بزوج لي كانو شبه بعض فزروقيتهوم وقال بهدوء) كون كنتي سيدي ومولاي وعريتي على الدراع كون حد محاسبك على دخولك وخروجك
رؤوف:(تخطاه ونطق بسخرية) رجعتي تاني باش تعطينا محضرات كيف عادتك ونسيتي بلي هادا لي واقف قدامك ماشي هو نفسو لبرهوش لي ضحكتي عليه بزوج كلمات شحال هادي
نوح:(تبسم ببرود وبقا على وقفتو) من ناحية تبرهيش راااك باقي برهوووش واخا كتافك قد الحيط
رحمة:(جات بخطاوي سريعة تاوقفات حداهوم ساكتة)
نوح:(شاف فرؤوف وقال بجدية) السيستيم غايتبدل من ليووم وديك الضسااارة غاتزولهاا الالقيتيني ساكت فغير على وجه يمّا..
واقفة قدام مرايتها تتشوف فوجهها لي رجع كيف كااان وكأنه عمرو كانت فيه شي خبشة.. شهر ونص وهي فالدار ومخرجاااتش لدرجة حسات بالملل.. جمعات شعرهاا شفينجة وبدات تتلبس ففولارهاا القهوي تاسالات وهي تهز صاكها وخرجات من لبيت وصوت طالون بوطها كيتسمع.. لقات أسماء ورنيم جالسات فالصالة كيتسناوها تاهوما لابسين حويجاتهوم..
رحيل:صافي أنا واجدة خليونا نمشيو
سيدرا:(شافت فرحيل) ماامي جيبي ليا معاك الشيبس واخا
رحيل:(تحنات باستها فشفتها وقالت بحب) واخا امامي ماديريش ليبيتيز واخا
سيدرا:(مشات شدات فإدريس ونطقات) أنا أصلا غانمشي مع بّا ديدي لگاراج
أسماء:سيري تعلمي حرفتووو هه
خرجو لبناات وداو معاهوم طوموبيل إدريس باش مايتعدبوش فالطريق وطبعا رحيل هي لي ساگتها.. شدو لبنات بلايصهوم وتحركو غاااديين لمول..
رنيم:(جالسة لور) حمدلله جانا هاد الشوبينغ مع بداية الشهر باقي لفلوس فجيبناا ههه
أسماء:واخا مايكونوش نتسلف على قبلهوم
رحيل:(وقفات طوموبيلتها فلفوغوج وقالت بسخرية) شغانقول أنا لي مبقات لاخدمة لاستة حمص
رنيم:دوك ولاد لق*اب تاهوما دغيا بدلوك
أسماء:مالهوم غايتسناوها تانتي راه شهر ونص هوما لي ضايعين
رنيم:غاتقلبي على خدمة فبلاصة خرا ولا غاتجلسي
رحيل:اشمن جلاااس اصاحبتي راه غانقلب تاني على شي خدمة
بلاصات الطوموبيل فالباركينغ دلمول ونزلو داخلين لداخل وكل وحدة شادة فلخراا.. ماخلاو فين مشاو وشنو خداو خصوصا أسماء لي تشري وتقول ماشريت.. خلصتها كلها طباتهاا تماا أما رحيل بعدات عليهوم شوية أو ودخلات لمحل ديال لمحجبات تما وخدات شي حوايج بغاتهوم عاد رجعات عند لبنات مكملين ضورانهوم وفاللخر جلسو فواحد لكافي خداو لگوفغ دارو بيهوم كاسكروط وموراها رجعو لدار ومعاهوم رنيم لي أغلب لوقت تتبات معاهوم.. مكانتش رحيل ناوية تبقا جالسة فالدار خصوصا مور ماخرجات من خدمتها... كانو مجمعين فالصالة على براد دأتاي وتقيوتاتو متفرجين تانطقات سيدرا بهدوء: بّا ديدي بغيت تاأنا نركب فالحصان
قالت هضرتها وهي تتشير لتلفازة فين كان إشهار دالريحة ديال واحد غادي فالبحر وراكب فالحصااان.. شاف فيها إدريس وقاس شعرها بحنان: بغيتي تعلمي ركوب لخيل انخشيشة جدها
سيدرا:(لمعو عينيها بحمااس وجلسات فوق ركابيه) اه ابّا ديدي بغيت تاأنا نعرف نركب لحصاان بحال هاداك
تانيرت:(مبتاسمة) خصنا نشوفو شي بلاصة تيعلمو فيها ركوب لخيل
إدريس:(حرك راسو) كاينين فيرمات برا مراكش واحد لمرة قالها ليا واحد السيد كليان عندي حفيدو كيتعلم تاهو ركوب لخيل تما
تانيرت: صافي سولو ونمشي نقيدوها فيه (جراتها عندها وباستها فحنكها) ياختي على الناس باغيين يتعلمو ركوووب لخيل..
ريان:(شاف فباه) بابا غدا تمشي معايا نشوفو لموطور لي قلت ليك عليه
أسماء:(حكات شعرها ونطقات) تاأنا باغا شي طوموبيل نعدي بيها تهلكت فالطرونسبور
ريان:(هز حاجبو فيها) تابعة ياربي السلامة
أسماء:راه ديجا قلتها ليه أصلا وقال لياا بلي غايشوف شي طوموبيل بون أوكازيو نشريها
إدريس:(حرك راسو) واحد السيد كنعرفو عندو واحد الطوموبيل باغي يبيعها نتغاهمو على ثمانهاا هو لول
أسماء:(بحماس) واخا ابابا
إدريس:(شاف فريان) واخا تانمشيو نشوفوه
تانيرت:(بهدوء)راه أستاد الرحموني قال ليا بلي صيفط ليك مدخولات لكافي لي فكندا فلكونط ديالك
ريان:وي شفتهوم وهوما باش غانشري الموطور
مع قال هضرتو ناض إدريس من حداهوم طالع لفوق وتانيرت غير شافتو فهمااات مالو وناضت تابعاه لقاتو جالس فلبيت ونطقات:مالك؟
إدريس:(هز فيها حاجبو) مافهمتش علاش باقي كاتصرفي من فلوس هاداك
تانيرت:(تنهدات) هاداك حق ريان اإدريس نتا عارف عبدالله ماعندوش لوراثة وريان هو لوريث ديالو
إدريس:(ناض من بلاصتو معصب وقال) هاداك ولدي اتانيرت
تانيرت:(حركات راسها بهدوء) وأنا قلت لعكس يهديك الله راه ديك لكافي مكملة خدمتها بفضلي أنا لي ديما متبعة أمورهاا وهادشي راه حق ولدي
إدريس:حقوو هو حقك نتي ماشي حق هادااااك مغانبقااااش نعاود لهضرة اتانيرت
قربات جهتو وشدات فوجهو لي لعصبية باينة فملامحو السمراء وقالت بحنية: مكنبغيش كل مرة نتقلقو ونتعصبو من بعضياتنا بسباب هاد لموضوع اإدريس عارفة بلي نتا مباغي تاحاجة جايا من جهتو ولكن خصك تعرف بلي هاديك خدمة وديك لكافي بصح فالأصل ديالو ولكن راه أنا لي موقفاها على الصح وراه شفتي عمري قبلت فلوسها وكنعيطهوم لرياان
إدريس:(حيد يديها من على وجهو ونطق ببرود) وريان راه ولدي..
تخطاها وهز جاكيط وخرج من لبيت مخليهاا معارفة مادير.. أما خرج لبرا وركب فطوموبيلتو شاد طريقو لگاراج واخا مشى لحااال وهادي وقيتة دالسدان.. وصل وحط طوموبيلتو حدا لباب ولقا تما سفيان دري لي مخدم معاه
وقال وهو كيحيد جاكيطو:غير سير نتا لدار تال غدا
سفيان:واخا لمعلم
مشى يبدل عليه حوايجوو وإدريس جر لكرسي وجلس وباين فيه ماشي على بورجو.. مشى سفيان وخلاه بوحدو تما والحركة برا كانت تتقل حيت كلشي بدا يسد من غيرو هو.. وصلات لحداش دليل وهو باقي فبلاصتو.. بقا جالس تيخمم تاسمع صوت لحس وهو يهز راسو فجهة الباب وغير بان ليه الشخص لي داخل وهو يتبسم تبسيمة خفيفة وقال بصوت هادئ رزين:زارتنا لبراكة أولد لحاج..
ابتسامة خفيفة ضهرات على شفاه نوح لي كان داخل من لباب وداير يديه فجياب سروال توب لي لابس وقرب جهة إدريس لي وقف ومد ليه يديه تاتسالمو وقال نوح بصوت تقيل خاتر:بوجود ماليهاا اسي إدريس
إدريس:مرحبا
جر الكرسي لي كان محطوط حدا لبيرو وإدريس مشى جهة واحد الدخيلة دايرة بحال كوزينة حاطين فيها بوطة صغيرة وشي مواعن خفاف حيت الدراري لي خدامين عندو بعض لمرات تايتغداو تما.. دار لماا فمقرااج صغير وحطو فوق لبوطة ورجع عند نوح لي كان جالس ونطق بابتسامة: غبرتي علينا ؟
نوح:(حط يديه على صدرو وقال بصوت هادئ) مع الخدمة وصاف
إدريس:الله يسر الخدمة مساهلاش خصوصا الاكنتي نتا لي هاز الدرك
نوح:(حرك ليه راسو بهدوء) الصبر وصاف (شاف فالارجاء ورجع شاف فإدريس) واحد سفيان كيف غادي مع الخدمة
إدريس:راسو خفيف ودغيااا كيتعلم صراحة كيف قلتي عليه درويش وكيتمشى جنب لحيط
نوح:(غمض عينيه ورجع فتحهوم) عليها جبتو يخدم عندك حيت عارفك بنادم معقول وهو مغايلقاش واحد بحالك
إدريس:(ضرب على فخد نوح وقال بابتسامة) الله ينورك أولد لحاج (ناض وقال بمزاح) نمشي نوجد واحد الدكة كيف كتعجبك
نوح:(ضحك بتقالة) هه واتوحشناها صراحة الله
مشى إدريس يعمر أتاااي ونوح بقا جاالس فبلاصتو تاصونى تلفونو.. جبدو من الجيب لقا مو هي لي تتعيط ليه..
نوح:(بصوت هادئ) ألو يمّا
رحمة:(بحنية) ألو لحنين ديالي فينك اولدي واش باقي معطل
نوح:باقي معطل بلاماتسنايني ونعسي ايمّا
رحمة:(تنهدات) واخا ا لحنين ديالي رد لبال لراسك الله يرضي عليك
نوح:فأمان الله
قطع معاها لابيل فاللحظة لي جا إدريس جايب معاه صينية فيها براد دأتاي وزوج كيسان.. حط الصينية فوق البيرو وجر الكرسي وبدا كيكب فأتاي وهز كاس مدو ليه ونطق بابتسامة خفيفة: تنغم ليا مع راسك اولد لحاج
نوح:(جفم من لكاس ونطق بصوت هادئ وعينيه سارحين) هاد لمداق من زماااان ماحسيت بيه الله يعطيك الصحة
إدريس:(حرك راسو بهدوء) بصحتك
نوح:(شاف فيه وقال بتبسيمة خفيفة) ماشي من عادتك تبقى تاال هاد لوقت
إدريس:أودي بعض لمرات تاتبغي تجلس مع راسك وتكونسونطرا
نوح:كاينة
إدريس:(شاف فيه بجدية) باغي نسولك.. حفيدتي باغا تعلم ركوب لخيل واش عارف شي بلاصة كيعلموه فيها؟
نوح:(كمش حجبانو) شحال فعمرها؟
إدريس:خمسنين وسبع شهور
نوح:الله يصلح (جبد من جيب الجاكيط لدخلاني ستيلو كحل منقوش بالذهبي فيه "N.S" وجبد ورقة كانت محطوطة فبيرو إدريس وكتب شي حاجة عاد مدها ليه) هادي لفيرمة ديالي كاينة برا دمراكش مخصصين فيها بلاصة لركوب لخيل غاتلقا تما راجل كبير بّا سالم قول ليه غير راني من طرف ولد لحاج وتوكل عالله
إدريس:(جمع الورقة عندو وقال بتساؤل)والتوقيت كيداير؟
نوح:(ربع يديه وبدا كيشرح ليه) على حساب لكوتش لي غايشدهاا وشحال من حصة غاتختار فالسيمانة
إدريس:اه فهمت
نوح:واش هي لي بغات ولانتا لي باغي تقيدها؟
إدريس:(ضحك بهدوء) هي اسيدي لي شافت إشهار فالتلفازة وقالت ليك والو باغا نتعلم ركوب لخيل ههه
نوح:(تبسم تبسيمة خفيفة) الله يحفظهاا (شاف فساعتو لي لابس فيديه ونطق) هادا لوقت نتحركو فيه
إدريس:(حرك ليه راسو) واه مشى لحال
ناض إدريس رجع الصينية لبلاصتها وخلاها تم وتأكد واش البوطة مسدودة عاد خرج هز جاكيط لبسها وخرجو هو ونوح لبرا تعاونو تاهبطو لگريااج وسدو بلقفل
نوح:(حل باب طوموبيلتو لجيب فالرمادي غامق وقال) طلع نوصلك
إدريس:جبت طوموبيلتي بلاماتعدب راسك
نوح:(ركب وقال بهدوء) غير زيد نوصلك (وبمزاح) ونكملو الأجر هه
إدريس:(حل لباب وركب تاهو وضحك) اوا الاكان هاكا سير عالله هه
ديمارا الطوموبيل وعطاه إدريس لعنوان والطريق كلها وهوما كيهضرو مونسين تاوصل قدام باب الدار وقال نوح بهدوء:تبات فراحة الله اسي إدريس
إدريس:لينا وليك اولد لحاج سلم على العائلة
نوح:مرحبا بسلامك تهلا
حل إدريس لباب ونزل فاللحظة لي تحل فيها باب الدار من طرف رحيل لي كانت تطل من لبالكون ديالها وفاش شافت الطوموبيل ولمحات باها نزلات تتجري.. شاف فيها إدريس وسد لباب وفنفس لوقت تحرك نوح بالطوموبيل وقبل مايبعد هز عينيه فالمراياا بخطفة جهة رحيل لي بانت ليه من الجنب ورجع مكمل طريقو..
دخل إدريس وسد لباب وشاف فرحيل لي كانت لابسة بيجامة ببينوارها ودايرة لقب على لبرد.. ملي خرج بلامايعلمهوم وبداو كيصونيو عليه ومكيجاوبهومش تخلعو عليه وكانو غايخرجو يقلبو عليه كون ماتانيرت لي عارفة اش كاين وطمناتهوم واخا مقالتش ليهوم لمشكيل..
رحيل:(بهدوء) بابا فين كنتي عيينا مانصونيو عليك ومكتجاوبش
إدريس:(درعها وقال بهدوء) كنت فلگاراج
رحيل:شكون وصلك يااك ديتي طوموبيلتك فين هي؟
إدريس:(نطق وهوما طالعين فالدروج) هادا ولد لحاج واحد السيد لقاتني بيه الظروف غير صدفة والله يعمر ليه الدار فيما حتاجينو كنلقاااه
رحيل:(كمشات حجبانها) عمرك هضرتي لينا عليه
إدريس:(حرك راسو) مجابتهاش الوقت (وقف قدام باب بيتها وقال بحنية) سيري تنعسي ابنتي تصبحي على خير
رحيل:تبات فراحة الله ابابا
دخلات لبيتها ومشات جهة بلاكارها جبدات ديك الرسمة لي كانت مخبية وبقات تتشوف فيها بهدوء لمدة دقائق قصيرة عاد رجعاتها بلاصتها وبدات تتزول فبنوارها وشافت فسيدرا لي كانت مشبحة فوق النموسية وبتسمات بهدوء وقربات جهتهاا تتقادها تاحلات سيدرا عينيها ونطقات بصوت نعسان:مامي
رحيل:(باستها فجبهتها وهمسات ليها) امامي
تخشات فيها سيدرا ورحيل عنقاتها وبقات تتمشط على شعرها وهي ساهية..
أما إدريس كمل طريقو لبيتو وحل لباب كان ضووو مشعول خفيف وتانيرت كانت جالسة فوق النموسية باينة فيها تاهي كتسناه.. هزات راسها فيه لقاتو تيزول الجاكيط وماهضرش معاهاا ومقال تاشي كلمة.. تنهدات وهي عارفااه واخد موقف منهااا واخا هي مقصدات والو فيهااا.. شافت فيه غادي جهة لبلاكار جبد حوايجوو وفوطة ومشى خارج تاني لحمام يدوش.. جلسات بلاصتها تتسناه تاسالى ورجع عاد ناضت غادة عندو وبلاماتهضر عنقاتو وتاهو مبعدهاش عليه عنقهاا وبقااو ساكتين تانطقات هي بصوت هامس: مباغاش نتخاصمو ونتقلقو من بعضياتنا بسباب حوايج دازوو شحال هادي.. عارفة بلي نتا عندك حساسية فالموضوع وهادشي من حقك.. أنا وياك مدازش علينا لقليل باش نتجمعو وكل واحد فينا دوز حياااتو مبعد على لاخر أنا تزوجت غيرك ونتا تزوجتي غيري (هزات راسها فيه ونطقات بحزن) وماشي حنا لي ختارينا هاديك لحياة لي تبززات علينا.. (تنهدات) ديك لكافي لي فكنداا بصح هي ملكو ولكن راه أنا لي مسيراهاا ومتبعة أمورهاا من نهار مااات وفلوسها عمري هزيتهوم كنت كنحطهوم فكونط ريان عارفة غاتقول ليا هو ولدك ومغانكروش هاد لهضرة وأنا أصلا مانويتش فيها شي حاجة لي تقلقك ولاتعصبك لياا نتا عارفني مكنحملش نخليك معصب
إدريس:(تنهد وقال ليها بهدوء) مباغي تاحاجة عندها علاقة بداك السيد اتانيرت وراه قلتها ليك مامرة مازوج
تانيرت:عارفة هادشي وراه شرحت ليك بلي هاديك خدمة ماعندها علاقة بالماضي اإدريس
إدريس:واخا ديري لي بغيتي مغانقول ليك والو
خلاها ومشى لبلاصتو حيد لغطاا وتخشى بلاما يزيد شي حرف خر.. تنهدات تانيرت وعرفات بلي واخا تعياا تشرح وتبرر هو مغايتنازلش على لموقف ديااالو هادشي علاش فضلات تسكت.. طفات الضوو وتخشات بلاصتها عاطياااه بالضهر وكل واحد حاااال عينيه فالظلام كيخمم.. كرجل شرقي طبيعي يتصرف داك التصرف خصوصا أن مول ديك لقهوة الأصلي هو نفسو راجلها الثاني وعند ذكر هاد النقطة غيرتوو هي لي تتخليه يتصرف ومن حقووو.. هاداك الراجل راه كان مزوج بيها سنين يعني ضروري مايكون احتكاك بناتهوم واخا هي مقالتهاااش ولكن راه شي باين أو واضح وهادشي غير مكيزيد يشعلووو..بدا كيسمع تنخصيصها شي لي خلاه يغمض عينيه معصب.. واخا يتقلق منها الاأنه مكيحملش يكون سباب بكاهااا ضار لجهتها تيشوف فيها وفكتافها لي كيتهزوو بالتنخصيص وتنهد محاملش راسو.. مد يديه وحطهوم على كتافهاا وهي غير حسات بيه ضاارت لعندو تخشات فيه مكملة بكيتهاا فوسط صدرو وهو كيطبطب على كتافها وضهرهاا.. بقااات هاكا مدة تاداتها عينيها وديك الساعة هو عااد قدر يغمض عينيه وينعسوو تاهوو..
الملل لي حسات بيه رحيل فهاد لياام مخليهاا باغا تحماق خصوصا أنها ولفات لخدمة وروتينهاا ودابا فاش مبقاتش خداامة حساااات بشي حاجة ناقصاهااا... كانت جالسة قدام لبيسي تاتشوف فالسيت دلوظيفة واش كاين شي خدمة باش دفع ليها تاسمعات صوت لباب تحل مع كانت جالسة فالطبقة التحتانية فالسيجور وهي تهز عينيها وبان ليها محمد طه داخل عاقد حجبانو كيف عادتو فالآونة الأخيرة..
رحيل:(شافت فيه بتساؤل) ياك لباس شفتك جيتي بكري ليوم
محمد طه:(جر الكرسي وقال بنبرة غاضبة) طلع لياا لخراا فالراااس
رحيل:مااالك تاني ؟
محمد طه:(حك شعرو تاخربقو وقال وهو معاحبو حال) أودي خلينا ساكتين وصااااف (شاف فيها وفلبيسي وقال) لقيتي شي حاجة؟
رحيل: مكاينش شي حاجة فدومين ديالي فمراكش أغلبية فالرباط وكازا
محمد طه:(كمش حجبانو) غايخصك تخرجي وتقلبي برجليك النواحي فين خدام ريان كاينين دسوسيتي زوينين
رحيل:اجي نتا ياك commerce علاش ماتشوف شي بلاصة خرا تخدم فيها ونتا تتمشي غير لگغوند سوغفااس ولا لمگازان
محمد طه:بحال والو نشوف شي بانكا وندفع ليها نكدب عليك مبقيتش حامل ديك لخدمة ولبشار مگابلك غير نتا
رحيل:وسع خاطرك امحمد وليتي عصبي بزاااف مالاحظتيش هادشي؟
محمد طه:(هز حاجبو)غير كيبان ليك
رحيل:(شافت فيه بنظرة عندها معنى) أنا أكثر وحدة تنعرفك وغير من الشوفة عارفة اش هاز فداخل ديالك واخا مكتبغيش تبين ولكن كيف قلت ليك أنا كنعرفك مزيااان
محمد طه:(قلب وجهو مباغيش يشوف فيها حيت عارف هضرتها صحيحة واخا يبغي يكدب هي تتعرفو مزياااان.. تنهد وقال بهدوء) مكاين والو من هاد لهضرة ارحيل
رحيل:(بدات تتخربق بالستيلو فديك لورقة لي كانت قدامها وقالت بصوت تتحس بيه مضيوووم وهااااز بزاف) عارفة بلي تاواحد فينا مغايقدر ينسى داكشي لي دزنا منوو بصح دازو خمسنين لي تبدلو فيها شحال من حاجة...ربحنا حاجات ولكن خسرنااا حاجااات بزاااف عمرها تعوووض (عينيها ضببو بالدموع وصوتها تخنق ومع دلك كملات بلاماتهز فيه عينيها) بلاصتهاا بقااات خااوية بزااف وتاحد ماقدر يعمرهاا كل نهار كنفيق فيه كنت نتمنى تكووون باقي كاينة معاناا ونكونو باااقي فحومتناا ونسمع صوتهاا وهي جاياا عندي تتعيط لياا.. نعاود ليهاا كيف دوزت نهاري وتاهي تعااود لياا شنو طراا.. نخرجو أنا وياها ونمشيو نضورو وفاش نبغي نشري شي حاجة ناخد بريها وتاهي نفس الشي.. توحشت هضرتهاا وتجعويقهااا وتوحشت زبايلهاا وكلشي فيهاا (كملات بهمس) توحشتوو..
غمضات عينيها ودموعها طاحو فوق من ديك لورقة كيف لحبيبات وماشي غير هي تامحمد طه كاانو عينيه حمرين ومدمعين ولكن مبغاش ينزلهوم.. أول مرة تدكرها مور موتهاا.. عمرها جبدات سيرتهاا وعمرها مشات تشوف قبرهاا وهادشي كاان مخليهوم يحسو بالراحة من جهتها حيت عند بالهوم راه قدرات تخطى موت جيداء ولكن الحقيقة غيرر وهي عمرها قدرات تخطاهااا وداك لجرح لي فقلبها من جهة صاحبتهاا وختهاا عمرو مابرى وعمرو مغايبراا.. يمكن محمد طه مقصح من فراقها ولكن تاحد مغايحس بإحساس رحيل حيت هي أقرب وحدة ليهاا على الناااس كااملين..
رحيل:(سرطات ريقها وخدات نفس طويل قبل ماتكمل كلامها) عمر هاد سنين مانساوني فيها
محمد طه:(قاطعها بصوت هامس) وعمري نسيتها تاأناا هي مشات ودات معاها كل حاجة زوينة كنت تنحس بيها
رحيل:(شافت فيه) كاين اختلاف بيني وبينك امحمد طه
محمد طه:(قاطعها مرة خرا مباغيهاش تكمل هضرتها وقال) مطلبيش مني نساها ارحيل ونكمل حيااااتي عاااادي حيت هادشي عمروو مغاااايكون نتي عارفاااني شحال كنبغيها
رحيل:(مكانتش باغا تهضر على لموضوع حيت كانت تتحس بطاقتها كتنزف ولكن كان ضروري خصوصا حالة محمد طه مبقاتش عجباها) هي معتابراك خوها وعمرها فكرات فيك بطريقة خراا دوك لمشاعر لي نتا هااز من جهتهاا كااانو غير من طرفك نتااا امحمد طه عارف بلي هضرتي مغاتعجبكش ولكن هادشي لي كاين نتااا كتمرض راسك بحاجة عمرها كانت وعمرها غاتكووون
محمد طه:(كان عارف هضرتها صحيحة ولكن مبغااش يتقبلها وقال بعصبية مفرطة وهو نااايض من بلاصتو وعينيه حمررين) مغاتفهمينيش.. تااااواااحد مغااايقدر يفهمني ويفهم أنااا باش كنحس
رحيل:( ناضت رحيل من بلاصتها وقربات جهتو وحالو خلى قلبها يتزير) محمد أنا عارفة نتا باش تتحس
محمد طه:(حرك راسو ودمعة نزلات تتجري على خدوو وقال بصوت مبحوح ضعيف) معرفااش.. معرفاااش
عطاهاا بالضهر طالع لبيتو وهي بقات واقفة بلاصتها ودموعها نازلين كيجريوو مغرقين حناكهاا..
لعشية كولهغ ومحمد طه ماخرجش من بيتو وگاعما كلى معاهوم.. تاحد معارف مالو وكلشي قال غير مع لعياا من غير رحيل لي قلبها كان ضارها عليه.. واخا تاهي حالتها مكانتش قل منوو ولكن مكانتش باغا حد يعرف اش طراا وتزيد تشغلهوم تاني بمشاكيلها.. باركة غير شنو دوزو بسبابهاا عليها فظلات تحتافظ بهادشي بينها وبين محمد طه لي كانت عارفو مغايهضرش.. كانت مخشية فبلاصتهاا وبواطة ديال دوا لي مولفة تتاخدو فالفترة لولة دعلاجها بين يديها.. كان داك الدوا هو لي كيخليهاا تنعس.. خدات منو حبة صغيرة وشربات لما وتقادات فبلاصتها مغمضة عينيها..
يوم جديد.. كانت رحيل فايقة بكري صلات صلاتهاا ولبسات حوايجها وبدات تاتشوف راسها فلمرايا وفداك التغير لواضح لي خلاها تبسم وتخرج من بيتها نازلة لتحت ومع وقفات قدامها كلهوم شافو فيها متفاجئين وريان نطق بصوت مصدوم: رحيل واش هادي نتي؟
تانيرت:واش درتي النقاب؟؟
قربات جهتهوم رحيل بديك لكسوة لحجابية الواسعة لي لابسة والنقاب لي دايرة فالباج مبين غير عويناتها فقط..
رحيل:جا معايا ياكو
إدريس:(ناض جهتها وباس راسها ونطق بافتخار) الله يرضي عليك ابنتي الله يرضي عليك
أسماء:وقتاش شريتي هادشي
رحيل:نهار لي خرجنا شفت هاد لكسوة نقابها وحسيت بشي حاجة فشكل وفاش دخلت جربتو عجبني وقررت نلبسو
ابتاسمو ليها وهي جلسات هازة نقابها تتفطر وفاش سالات ناضت خرجات هي وريان غادة تقلب على خدمة.. كانت هازة بين يديه ملف فيه سڤيات ديالها وفجنبها ريان لي كيوريها لبلايص لي تمشي دفع ليهوم حيت هو كان معطل على خدمتو.. تفارفات معاه رحيل وهي كملات طريقها وفيما تبان ليها شي سوسيتي ولاشي أسورونس ولاشي بنك ولا أجونس دخل ليها ولمشكيل لي كانت تتلقى هو المظهر خصوصا النقاب لي دارت خلى أغلبية يقول ليها راه كلشي عامر ومايتسوقش ليها أصلا وكاين لي هز سڤي ديالها وغير عطاتو بالضهر لاحو فلبوبيل.. كانت عارفة غاتلقى مشكيل ولكن دارتها فيد الله وكملات طريقهاا تاوصلات حدا واحد ل "maison de voiture" وهي توقف تتشوف فلوگو ديالها لي كان منقوش بالذهبي وكلها زااج تتبين أنواع ديال الطوموبيلات لي كاينين لداخل.. قربات بهدوء تتشوف فالسكوريتي لي كان تم والجيلي لي لابس فيها نفس لوگو.. مع حلات لباب ضربها ريح خفيف دلكليما حركات أطراف كسوتهاا وعينيها بقاو يضور على البلاصة لي كانت تتحمق.. الطبقة لولة كانو فيها غير الطوموبيلات بالأنواع وفالجهة ليسرية فالجنب كاينين دروج كيجيو مايلين كيطلعو لطبقة الثانية.. بقات داخلة تتقلب على شي حد خدام هنا تسولو تبان ليها واحد واقف بملابس كلاس كيهضر مع واحد لابس جيلي فيه لوگو قربات جهتو تاوقفات وراه وقالت بصوت هادئ:سلام أوعليكوم
ضار الراجل وشاف فيها بابتسامة: سلام اوعليكوم الالة اش حب لخاطر؟
رحيل:(بتسمات بحرج تحت نقابها وقالت) أنا عندي دبلوم ديال لكونطابيليطي وليسونس فلكونومي و
الشخص:(قاطعها بلاماتكمل بصوت بارد فاش عرف اش بغات تقول وشاف فيها من رجليها تاوصل لعينيها وقال) دزولي لبوسط كاملين عامرين
رحيل:(الشوفة لي دار فيها فهماتها مزيانة وقالت) ممكن نخلي ليك سڤي ديالي
حلات لملف لي هازة وجبدات سڤي مداتو ليه وهو مشدوش ورجع قال: جوبونص امدام مافهمتيش هضرتي حنا مكنقلبوووش على لخدامة دابا لبوسط عامرين دونك تفضلي عفاااك
عطاها بالضهر عند بالو مشات وقال بصوت ساخر: داكشي لي بقا نخدمو وحدة مكيبان فيها غار لعينين تخلع لينا لكليان..
رحيل:(كمشات حجبانها فاش سمعات شنو قال وردات بصوت قوي) ومالها وحدة مكيبان فيها غير لعنين ماشي بنااادم
ضار الشخص كيشوف فيهاا وكمش حجبانو وقال:شوفي الله يرحم ليك لواليدين هضرنا معاك بأداب وقلنا ليك اش كااين دونك بلاصداع ولاواقيلة بغيتي نخدموك بزز
رحيل:(هزات حاجبها وقالت) ماكنسعاكش باش تخدمني مي أومواان اسي عرف كيفاش تهضر
صوتهوم كان عالي خلى گاع لي خدامين تم وشي كليان يشوفو اش واقع.. أما رحيل فلهضرة لخرة لي قال وكيفاش تصرف استفزها صراحة وأصلا ماشي أول واحد دارها ليها ليوم غير حيت هي منقبة قالو لا وماهتموش ليها عواض مايهزو السڤي ويشوفو لكومبتونس ديالهاا ولكن دائما لمظاهر هي لي تتغلب فمجتمعنا.. كان داك خونا باغي يرجع يجاااوبهاا تاسمع صوتو لي خلى لما يجمد ليه فالركاابي ويهز عينو فهاداك لي واقف قبالتو ولي نطق بصوتو لخاتر: اش واقع هناا؟
"ولنَا فِي اللِّقاءِ مَوعدْ"
يتبع..
التعليقات
لا توجد تعليقات بعد، كن أول من يعلق.