محتوى القصة
مكانتش عارفة اش باغي يدير ومتجاحداتش معاه ولكن مجرد ماعضهاا حسات بالضو ضربهاا وكمشات على عينيها لي دمعو بقوة لحريق وحطات يديها على صدرو بعداتو وتاهو دغيا بعد عليها وخلى ليها لسانها كيوزوز بلحريق واخا راه طلقها بزربة وماطولش فلعضة ولكن قصحها... بقات تتسوط على لسانهاا وداك الشعور شحال صعيب... بعدات عليه عاطياه بالضهر غادة لحمام تبرد لسانهاا وهو تبعهاا تابانت ليه واقفة فلمرايا تتشوف بلي خلى ليها لطراس تقولي شدها لقاااط ماشي سنانو... تحدرات حالة فمها تتغسل لسانهاا ومقدراتش دوي... بعد عليها وتمشى تالخر دلكولوار وعيط على السعدية لي جات تتجري
السعدية:نعام اولد لحاج؟
نوح:جيبي التلج
مشات تتجري لكوزينة هزات لگلاصمون لي مولفين تيديروه فدوك المربعات حطاتهوم ليه فطبسيل ومشات تتجري لقاتو تايتسنى فيها عاقد حجبانو...مداتو ليه بلاكلمة بلازوج خلاها ورجع لعند رحيل لي باقي تادير لمااا لسانهاا...تاوقف عليهاا وسد الروبيني وقال:شوفي فياا
هزات عينيها وهي عاقدة حجبانهاا وغير شاف شوفتها وهو يهز حاجبو ونطق بهدوء:حلي فمك
رحيل:(تادوي ولسانها تايعگرها) باش تعاود تعضني
نوح:(حط طبسيل فوق الطاجير وشد ليها دقنهاا) خرجي لسانك ندير ليك تلج
خرجاتو وهز مورصو تلج دارو ليها وهي تقفز وبدا كيدوزو ليها على لسانهاا وهي تتخنزر فيه بلاماتشعر...
نوح:(ببرود كيدوي وعينو على لسانها) مزوج شيخة مرة تحزمها وتحركها ليا فوق لقعدة مرة تزغرت ليا قدام لعباااد
رحيل:(زولات يديه ونطقات ولسانها حاسة بيه مبنج بالتلج) زغرت غير قدام با وخوتي واش فيها عيب
نوح:(خنزر فيهاا) بانو ليك غير باك وخوتك ودوك لحلالف لي جالسين اش كيجيوك باش تزغرتي گدامهوم
رحيل:راه قلت ليك جات عفوية وماشي بلعاني
نوح:(بسخرية) سبحان الله بحالك بحال خوك ديما مبلوزين وجيب يافم وگول
رحيل:(ضورات عينيها عليه) فرحت لخويا واش مانفرحش ليه
نوح:(شد تاني دقنها وحل ليها فمهاا وهي خرجات لسانها ودار ليها تلج وقال بخشونة) خوك فرحي ليه بينك وبينو وديك الساعة زغرتي حد مايشدك ولكن باااش تزغرتي ليااا قدام لقماقم لي مجامعك معاهوم تااخريااا راه لسانك نگطعو ليك ماشي غير نعضك فيه
سكتات رحيل ماجوباتوش حيت أصلا لسانها راه داير عليه تلج وتاهو سكت تايدير ليها تلج تاحسات بلسانها مبقاش ديالها تبنج بالتلج ومقدراش تهضر... شافت راسها فلمرايا وقدات زيفها ورجعات شافت فييه وماهضراتوش وتخطاتو وهي مقلقة منو حيت مدارتهاش بلعاني فرحات لخوها ومن حقهاا وهو عارف هادشي ولكن هو ماعجبوش لحاال حيت ليازيد وإسلام كاينين وأصلا باقي لحساسية بينو وبين إسلام من اخر مشكيل وباقي متسرطش ليه وغير ميك على قبل لعائلة باش ماتحسش ونعل الشيطان...وكيف گال ليها تزغرت وتفرح لخوها وهي معاه ماشي قدام رجال خرين... دخلو لصالة لقاو كلشي مجمع تيهضرو ويضحكو وبيسان تاهي لي كاتبسم بخجل فاش استوعبات شنو كاين وفرحات بزاف حيت ريان وفى بلوعد ديالو وجاا خطبها تاني من دارهوم...
وصل وقت لعشا والرجال مشاو لصالة لخرى باش يتعشاو بوحدهوم ونسا ياخدو راحتهوم... ناضت رحيل تشوف واش كلشي واجد ولسانها باقي مرة مرة فاش تبغي تهضر يعگرهاا... تحطات طبسيل دشلاظة منوعة وشهوة منها غير فالشوفة تشهيك بالالوان دالخضرة وبالديكور ديالهاا... بداو ياكلو ورحيل مع هزات لفرشيط وخدات دغمة وهو يعگرها لسانها ودارت بناقص..
تانيرت:(شافت فيها)كولي ابنتي
رحيل:(بصوت تقيل) عضيت لساني مقادراش ناكل
تانيرت:تت واه واخودي ليك فطبسيل ابنتي
رحيل:غير كولو راه كاين لخير
تانيرت:(خدات طبسيل وبدات تغرف ليها من كل حاجة شوية) تاتاكلي من بعد وماديريش بناقص راه تترضعي
حركات ليها رحيل راسها وأسماء لي جالسة جنبها تحنات عندها وقالت بصوت ماكر:هممم عضيتي لسانك ولاالغدنفر ديالك لي عضك
رحيل:(طلعاتها معاها بقرصة) لحلاقم
أسماء:(عضات على شفايفها) هو مولاهاا ااااح ياختي الغدنفر عندك مجهد
رحيل:(خمسات ليها قدام كلشي) قل هو الله أحد خمسة وخمامس على عين لحساااااد
رنيم:مالكوم
أسماء:والو والو هههه غير شي حاجة بيني وبينها
كلاو ديك الشلاظة وتحط لبلى التاني لي كان دجاج معمر بلڤغميسيل ولكبدة مع الخضرة سوطي ورحيل نقبات غير شوية مبغاتش تعيق وأسماء حضياها بعينيها وهي ترجع تحدر عندها ولي فيها مامهنيها وقالت بخفوت:لغدنفر ديالك عزيز عليه يخلي ليك لماااارة تت كون غير خلاها تالورا لعشاا بعدا وارا مايعض...
مور لعشاا جلسو مونسين بكويس دأتاي منعنع ولفاكية وريان كل مرة يشوف فباه لي نغامس فلحديت مع لبقية... تايتحرك هنا ولهية باغي يخلي باه يضور جهتو...ضربو محمد طه بلكود وقال بصوت خافت:رييح اصاحبي تگول فيك حريق لبول
ريان:وراه از*ي باغي باك يشوف فيا
محمد طه:اش باغيه؟
ريان:بغيتو يگول لولد لحاج يخليني نجلس مع مون دكتوغ ندويو شوية
محمد طه:(حابس الضحكة) الله يمسخك شحال ونتا دوي معاها
ريان:شغلك اخويا ودخول الصحة
جبد ريان تلفونو وسيفط لباه مساج وإدريس مع شاف نمرتو ضار شاف فيه وريان تايدير ليه بعينيه قراا...جبد إدريس نضاضرو دالشوف وبدا يقرا لمساج دولدو ورجع زولهوم وضار مكمل هضرتو مخلي ريان حال فيه فمو وضار شاف فمحمد طه وقال:واش باك طلع ليا لvu
محمد طه:مع الأسف
جمع ريان لجلسة مفقوص و إدريس ممسوقش ليه تادازت واحد نص ساعة عاد رحمو فاش نطق:ولد لحاج نخليو لولاد يجلسو مع بعضياتهوم يدويو شوية ويتفاهمو بناتهوم
نوح:مرحبا
ريان وقف فلبلاصة تايقاد لاشوميز زعمة متبت وهو راه شوية ويزغرت... خرج مع نوح وداه لصالة خرى جلس تم وبقا كيساين تابانت ليه داخلة تاتعكز بعكازها ومعاها نوح...تقاد فجلستو وبيسان وجلسات فالسداري لاخر ونوح جلس جنبهاا...ريان بقا تيشوف فيه مفاهمش..
نوح:(هز فيه حاجبو ونطق ببرود) تقدر تسولها لي بغيتي وتانتي
ريان:(حس بسطل دلما تكب عليه عند بالو غايبقاو الراس فالراس ساعة مع من هو) اه مرحباا احم بيسان لبااس
بيسان:(حشمات قدام خوها) حمدلله ونتا
ريان:صافا كيف غادة مع الترويض
بيسان: مزيان مبقاش بزاف
ريان:(حك دقنو ونطق بجدية) مهم ابيسان لاعندك أي سؤال ولاشي حاجة بغيتي تعرفيها عليا أنا كانسمعك؟
بيسان:(تاتحك يديها وشافت فيه) ماعنديش
ريان:(حك ودنيه مابقا عارف مايقول) لمهم مبروك علينا
لهضرة تلفات ليهوم بزوج ونوح جالس مبرد تيخربق فتلفونو وهاز حاجبو ببرود تاشافهوم سكتو وهو يشوف فبيسان:سيري رجعي لعندهوم
داكشي لي دارت وبقاو بزوج بيهوم تانطق نوح بجدية: نتا وبيسان دابا غادخلو لواحد تجربة جديدة وحياة جديدة يعني فترة الهضرة وتصاحيب تيكون داكشي زوين وسطحي ماشي بحال فاش تتجمعو فدار وحدة وكل واحد تيعرف التاني مزيااان وتيعاشرو بعضياتهوم وعيب كل واحد تايهزو التاني كلنا فينا عيووب ومكاينش شي واحد كامل ولكمال لله وحده ولكن لي خصك تعرف اولد سي إدريس بلي كااين عيوب لي لواحد يميك عليها وكاين عيوب لي مايقدرش حد يسرطهوم...نتا مادرتيش هاد لخطوة إلا ونتا متيقن من راسك قاد بيها وأنا غانأمنك على ختي وبنتي تصونهاا وتكون ليها السند لي هي باغاه وايااك هاد لكلام تنساااه وديما تفكرو (شاف فساعتو ورجع شاف فيه بهدوء) دوي نتا وياها وتافقو على لعرس شنو بغيتو هاد الأمور خاصة بيكوم بزوج رصيوها وباشما كان علمونااا والله يكمل بلخير
ريان:الله يكبر بيك وبلاماتوصيني عليها راه نديرها فعيني
نوح:وهادشي لي باغي
سالات ديك الليلة لي تجمعو فيها زوج قلوب عاناو بزاف وأخيرا ربي كتب ليهوم يتجمعوو...ودعهوم ورحيل وصلات معاهوم تال لباب ومع كانت بغات تمشي غزلان شداتها رحيل ماخلاتهاش وطلبات من باها يمشي وبلي غاتبات معاها وهادشي غير ماخلى محمد طه يتنوى ويستغرب...
طلعات معاها رحيل لبيت الضياف وغزلان حشمانة منها ومن عائلتهاا ولكن مكان عندها مادير حيت بصح ماقدراش ترجع مزال لديك لعمارة...
رحيل:(جابت ليها بيجامة باقي بتيكي ديالها) هانتي لبسي وارتاحي وغدا لينا كلام طويل اغزلان
غزلان:إن شاء الله شكرا بزاف وسمحيليا عدبتك
رحيل:ماتگوليش هاكا يالاه بونوي
خلاتها رحيل ورجعات لجناحها ومع سمعات حسو وهي تغوبش باقي منساتش ليه لعضة واخا راه لسانها مبقاش يعگرها بزااف...مشات لحمام طرفات حالتها حيت باقي ماتنقاتش كليا والد م واخا خفافت ليها ولكن ممشاتش بمرة حيت باقي ماكملاتش ربعين يوم...
خرجات لابسة بيجامة شورط ودباردور وجناب عامرين ومع ديك الدباردور لبساتها بلاسوتياان حيت كاترضع... لقات نوح جالس تايلعب مع توينز وتاهو لابس غير شورط هز عينو تايشوفها جاياا وضرب على صدرهاا بانو ليه الريوس واقفين وتباركالله لخير فاايض... عض على شفتو بنابو وهي تخطاتو ومشات لكونة دراري تتقادها وتزول داكشي لي فيها تاحسات بواحد الصلية جاتهاا لترمتهاا خلاتها تشهق وضارت شافت فيه:وااااش شوية لباااس
نوح:(ببرود) لباس حمدلله ونتي؟
رحيل:(بدات تحك فيهاا قصحها) لعب دلبناية
دازت لجهة لخرا كاتقاد وتنتر تاسالات ومشات جلسات متكية على لمخدة وهزات إسماعيل وجبدات ليه لبزولة تترضعو...
نوح:(قاص بزولتها لخرى بحركة بورشاتها ونطق بصوت خشن خافت)مال لفتنة غضبانة علينا
رحيل:(نطقات تتفشش) شوف نتا اش درتي ليهاا
نوح:(هز حاجبو)الله اودي غير عضيناها وصاف
رحيل:سهلتيها لساني كيعگرني وبسبابك ماتعشيتش
نوح:(قرصها فبزولتها فوق دباردور ونطق بصوت مبحوح) ماتعطيناش نرضعو تاحناا الفتنة
يديه مارصاتش من على صدرهاا عجبو لحجم ديالو وكل مرة يبرك عليه تاكاتكمش حجبانها وعينيها على ولدها لي رضعاتو تاشبع وخدات إسحاق تاهو وبدات ترضع فيه تااني...ناض نوح دخل لدريسينغ لاح عليه فوقية وخرج من الجناح مخليها مع إسحاق مجمعة تاضحك
حطاتهوم بلاصتهوم ومع تخشات بلاصتها بان ليها دخل هاز بلاطو فيه لعشااا...حقها لي وصى أصلا السعدية تخليه ليهاا حيت كان عارفها مغاتقدرش تاكل...حط ليها لبلاطو فوق ركابيها وقال بهدوء:تعشاي
تبسمات بلخف وبدات تعشا بشوية عليهاا ولسانها مبقاش مقصحها كيف قبيلة...ضربات كلشي لي تم ومشات غسلات فمهاا وخرجات لقاتو متكي بلاصتو... شدات بلاصتهاا حداه وهو جرها تاحطات راسها على صدرو وحسات بيه طبع قبلة على راسهاا ونطق بخفوت:باقي لسانك تايضرك ؟
رحيل:(تاتلعب فزغيبات لي فصدرو) همم معلوم يضرني (كاتزيد تفشش) نتا عاضني وماحنيتيش فيا وقصحتيني بزاف
نوح: حمدي الله جاتك غير فلسان ومجاتكش فبلاصة خرا(حدر شوفاتو ليها) عرفاني كيداير وعارفة بحال هاد لحوايج مكانميكش عليهوم
رحيل:(هزات فيه عويناتها) واش كلشي عندك بلعضاان
نوح:(تايقيس حنكهاا) مكاين ماحسن من لعضاان
رحيل:يااك (تحدرات لصدرو وعضاتو تاهي بلغدايد وطلعات راسها شافت فيه) ماشي بوحدك لي غاتبقاا تعض يالاه
نوح:(قلبها تاجات تحتو وقال بخشونة)نعلت الشيطان ونتي جبدتيني (قرصها فصدرها) هادشي يصلاح فيه لعضان
رحيل:(تاضحك بحفوت باش ماتفيقش توينز وقالت) ههه كيوعتوني والله هههه نوح لاا اااع
تحدر عليها مسكتها ببوسة دلغدايد وگاع داكشي لي جامع ليها خرجو فديك لبوسة لي حبسات فيها النفس وهي ضور يديها على عنقو مبدلاه لقبلة بكل شغف... يديه على جنابها كيطلع ليها دباردور ويقيس لحمهاا باغيها ومشتاق ليهاا ولكن الغالب الله..
نوح:(شاف فيها بعيون معسلة)هاد لكافرة بالله باقي مابغات تمشي
رحيل:(ضحكات بخفوت) باقي ماكملتش ربعين
نوح:تت (مسح على وجهو) ياصبر أيوب (شاف فيهاا وهي ناعسة وشعرها تفرش تحتهاا وشفايفها مبلولين بريقهوم بزوج وحناكها حمرين... كاتزيد دير ليه الإغراء بلاماتحس) هاد ربعين باقي ليهاا عشرين يوم مزاال (كان شاد ليها لحساب بالضبط...كمش حجبانو قرصها فجنبها تاقفزات تاضحك) لحساب كايتقاال ابلاتي ونشدك
ناض من حداها وهي تاتبسم مخليها راشقة ليهاا على كلاموو... بان ليها خرج مدوش ومشى جهة الدريسينغ لبس فوقيتو وخرج شاف فيهاا:غير نعسي لفجر قرب يأدن نمشي لجامع نصليه
رحيل:واخا الله يتقباال
مشى نوح لجامع لي كان فلحومة ورحيل عينيها بداو يتسدو ومع يالاه بغات تنعس سمعات صوت الأدان لي خلاها تحل عينيها وداك الصوت الرجولي لخشن مغريبش عليهاا وبلاماتحس ناضت لاحت بنوار وحلات الشرجم تاتسمع ليه مزياان... هادا صوتو مايمكنش ماتعرفوش وهو شحاال صلى بيها وجلسات معااه وهو تيقرا القرآن... بقات واقفة تابانو ليها رجال لحومة تايرجعو من الجاامع وبقات عاسة عليه تابان ليها جاااي مع واحد الراجل كبير تفارقو هو وياه وهو دخل لريااض وهي سدات الشراجم وبقات تسنى فيه تادخل لجناحهوم وهو يكمش حجبانو فاش قشعها باقي منعساتش:مالكي باقي فايقة؟؟
رحيل:واش نتا لي آدنتي؟
نوح:(زول لفوقية) شكون گالها ليك؟
رحيل:صوتك عرفتو مع قلتي الله أكبر ياك نتاا
نوح:اييه الإمام دالجامع كان مريض عليها آدنت بلاصتو
رحيل:(عنقاتو) نوحينو صوتك تيجيب الراحة ماكدبتش نهار سميتك راحة روحي
نوح:زيدي اراحتي نعسووو راه مشى لحال
***
ملي فاقت رحمة وهي هازة شوكتها وغير عاقدة حجبانها مراضياش بداكشي لي طرا لبارح ومقابلاش من لخر بداك النسيب... نزلات رحيل لي كانت عكسهاا راشقة ليها وهادشي غير مزاد فقص رحمة وعند بالها راه كاتشفى فيها وتفقصها زعمة بلعاني ساعة رحيل ماقصدات والو بلعكس راه فرحانة لخوها حيت غايتجمع بلي باغي وحيت غايدير دارو ويستاقر تاهو...
جالسات بتلاتة فالصالة وبيسان راه شادة تلفون تتهضر مع ريان تاسمعات صوت رحمة لي قالت بغيض:زولي داك تلفون لي شاداه من صباح
بيسان:يالاه شديتو وزايدون مالكي اماما كتباني معصبة؟
رحمة:مامعصباش غير كانشوفكوم وليتو تختارو وديرو لي بغيتو بلاماتجيو تشاوروني بحال الاراني يهو.دية
بيسان:(باستغراب) ماما مالكي ياك لبااس وااش شي حد قلقك وكيفاش تاحد مكيشاوركش
رحمة:اه مكتشاورونيش (بانفعال) وزايدون لبارح نتي علاش ماقلتيش ليهوم بغيت نفكر غير سولك خوك قلتي اه بحال لراكي ملهوفة
رحيل:(كمشات حجبانها) علاش ماتقولش اه ياك هي باغاه ومفاهمة معاه
رحمة:(خنزرات فيه) نتي ماهضرتكش بيني وبين بنتي من نهار دخلتي لدارنا وقدامك قدام نحس وزايدينها بخوك تاهو أنا مقابلاش على هادشي ولابغيتي سخطي تزوجي بيه
رحيل:(كاترعد بالاعصاب) خويا باغي بنتك وهي باغاه اخالتي ماتوقفيش فطريقهوم وتدي دنبهوم
رحمة:دنب راه ديتو من نهار قبلت بيك عروستي
قفزو بتلاتة فاش سمعت صوتو لي نطق بنبرة قااصحة:يمّااا
كلام لعيب ساهل يخرج من لفم بحالو بحال الدفلة... ساهل تخرج سمك فلواحد وتجرحو ولكن صعيب تنسيه فلي قلتي ليه ولي درتي فحقو... وتخليه يتعامل معاك عادي... وبالأخص لكان لواحد عمرو جرحك ولادار معاك شي عييب... موقرك وعاطيك احترام ولكن نتا ديما مخرج عيبك معاه... ملي سمعاتها نهضات فبيسان بديك الطريقة قدامها ودوات على خوها ناقص ماعجبهاش لحال وماقداتش تسكت ليهاا وهي تتشوفها كيفاااش تاتلوي ليها يديها بديك لهضرة دالسخط والرضى... وتارحمة ماخلاتش من جهدها وعطاتهاا كلام خلاها تحس بالحگرة والغصة تاطلع وتنزل فيهاا... هي عمرها دارت شي حاجة دلعيب معاها واخا كاتسمعهوم ليها رحمة إلا أنها عمررها قللات عليها حيااها ولاجوباتهاا تتجاوبهاا جواب دبلومااااسي ومافيه تاكلمة لعيييب...
بزوجات ماتوقعوهش يرجع فديك لوقيتة حيت باقي لحال على وقيتة لغدا لي تيرجع فيها بعض لمرات لاكانت لخدمة مرخوفة عندو... وليوم رجع على قبل واحد لبون ديال السلعة كان نسااه ومع دخل تيسمع صوت مو ولكلام لي مخرجاه من فمهاا جهة مرتو...
ضارو بتلاتة تيشوف جهة الباب دالصالة فين كان واقف تيشوف فيهوم وهو عاقد تغوبيشتو مخنزر... رحمة غير شافتو بحال لاكبيتي عليها سطل دلماا باارد خلاهاا تسرط لسانهاا وعينيها على ولدها لي كان تيشوف فيها شوفات تمنات الارض تشق وتبلعها...بدات تتسرط فريقهاا وقفات تتشوف فيه معارفة ماتقول..
رحمة:(بصوت خافت) ولدي
نوح:(هز فيها حاجبو ونطق ببرود) شنو لي باقي ليك ماگلتيهش ايمّا تگوليه ماحدي كاين هناا
رحمة:(سرطات ريقها وقربات جهتو) ولدي ماتگولش هاكا سمعني أنا
سكتات رحمة مالقات ماتگول وباش تبرر وهي عارفة راسها بلي ولدها سمع كلامها اشمن عدر اتعطيه ليه...
نوح:(كمل هضرتو ببرود وعينو فقلب عين مو) هادا هو لكلام لي تيتگال لمرتي فغيبتي ايمّا
رحمة:(لاإراديا عينيها دمعو ونزلو دموعهاا) أنا كنت غير معصبة اولدي وكلامي خرج فلحظة غضب وصاف
نوح:(تمتم بسخرية)لحظة غضب (عقد غوباشتو تاتلاقاو حجبانو وقال بصوت قوي قاصح) علاش بالسلامة شنو لي خلاك تغضبي وتجي تكبي لغضبة ديالك فمرتي واش كاتبان ليك حيط قصير باش كل مرة تجي تسمعيهوم ليهاا وهي تبقاا ساكتة ليك ياك ايمّا نهار لول قلت ليك مرتي خط حمر تاحد مايحل عليها فمو ولاهي غلطت معاااك جي عندي أناا وگوليها ليا وعيب وعااار علياا لاجيت فصفهااا ونتي عرفاااني واخا يكون لواحد من دمي لاغلط تانجي فصف لحق
رحمة:(بقهرة) تاواحد فيكوم محاس بيا ومعارفينش بلي أنا كنخااف عليكووم راه سبق وخسرت واحد من ولادي على غفلة مني وتحرقت بناار غياابو وااش عند بالك مك عايشة مرتاحة وفرحاانة كيت خوك بااقي فقلبي وبالسيف مانخاف عليكوم ومانبغي حد ياخدكوم مني
نوح:هاد الهضرة كلها ماعندها معنى ايمّا (أشار ليها جهة رحيل وقاال بانفعال) راه هاديك السيدة ماجبتهاااش من الزنقة تاهي عندها واليديها وتاهوما راه تيخافو عليها كيف تتخافي عليناا ولكن عمرهوم خرجو شي كلمة دلعيب فحق شي حد... ديك لمرة جريتي عليها من الريااض وهي واحلة فروحهاا وماحنيتيش فيهاا أو واخا سقت لخباار مالمتكش حيت عارفك فديك لفترة كنتي مقهورة وعطيتك عدر ايمّا دوويت معااك ونتي گلتي بفمك بلي هادشي مغايتعاودش
كانت رحيل ساكتة تتشوف فيه وماقدراتش دخل ولكن داخليا حاسة بالراحة من كلام نوح لي خلاه يزيد يكبر فعينيها كتر وتزيد تعلق بيه وتبغيه... ومن جيهة خرا مكانتش باغا تكون سباب لمشكيل بينو وبين مو ولكن الرجافالله مو لي قلبات عليها وهي لي فكل مرة تاتجبدها وتسمعها سمها وليوم جاا لي يوقفها على حدهاا باش ماتزيدش تمادى... وبيسان تاهي مكانتش راضية بهضرة مهاا على رياان والطريقة باش نقصات منو قدامهاا...معرفاش علاش مها محاملاهش لهاد الدرجة شنو شافت فيه لي يخليهاا ترفضو وتحكم عليه حكم مسبق...هي معاشراتوش باش تعرف لمعدن والأصل ديالو وتعرف بلي راه راجل تعول عليه أو ولد لحلال... كاتشوف داك النقاش لي بين خوها ومهاا وهي مكمشة حجبانها ومقدراتش دخل حيت كيبان ليها نوح معصب وحيت هضرتو على حق ومقال تاكلمة لعيب...
مسح على وجهو وضاار عاطيهوم بالضهر كيستغفر مولاه... هضرة مو لي سمعها من فمها خلاتو يتقلق منها وياخد موقف منهاا...قربات جهتو رحمة وشدات فيه من يديه وقالت بصوت خافت:ولدي أنا ماقصدتش وكنت غير معصبة وصااف
نوح:(شاف فيها وقال ببرود) واخا نگولو ديك لمرة كنتي مشطونة عليا وخايفة ودابت ماقصدتيش وكنتي معصبة (هز حاجبو وشاف فيها بنظرات دات معنى) اوا ونهار لكلينيك اش دارت ليك تاخرجتي معاها لعيب؟؟
عيون رحيل تحلو على جهدهوم مع كلامو لخر لي نطق بيه...وسؤال واحد تيضور فدماغها هو كيفاش عرف؟ داك نهار هو مكانش حاضر فديك اللحظة وماعرفاتش بلي راه كان تيسمع لكلامهوم من لول تال لخر بلامايدخل... سمع لكلام لي خرجات مو من فمها كيف السم وبقا ساكت وكان عارف بلي رحيل مغاتجيش تگولها ليه حيت سبق وطرا نفس لبلان وخباتو عليه وزيد عارفها ماشي من نوع لي غاتشعل لعافية بينو وبين موو واخا غاتجيبها فراسهاا... ماهضرش فديك لفترة وسكت على قبل بيسان وحالتهاا لي كانت شاطناه وكان تيتسنى لوقت فين يدوي مع مو وهاهو جا لوقت لي جمع ليها كلشي خطرة وحدة... ورحمة راه سكتها وعينيها نيشان توجهو جيهة رحيل عند بالها هي لي شكات ليه...
نوح:(ببرود)بلاماتشوفي فيها ماگالت ليا والو ولهضرة ديالك سمعتها بودني ايمّا خارجة من فمك
رحمة:(شدات راسهاا ونطقات ببكاء) نتا محااسش براسك وبلي من نهار تزوجتيها ودخلتيها لدار ونتا مبدل علياا (شافت فيه) أنا راه ماماك لي ولدتك وكبرتك واش على قبل مراا تنسى مك
نوح:(شاف فيها معجب وقال بخشونة) وقتااش نسيتك وأنا ديما داير ليك اعتباار وحاطك فوق راسي عمري قلت ليك لا على شي حاجة تجي عندي وتگولي لياا نوح سير جيب ليا لحاجة واخا تكون فلموزمبيق نمشي نجيبهاا من نهار لواليد ماات ونتوما أمااانة عندي مسبق ديما راحتكوم على رااحتي وعمري دوويت ولاتشكييت حيت ماشي من شياام ديالي نبقا نتشكى وماشي ولد لحاج لي يديرها ايمّاا
بيسان:(قربات جهتو وهي تتعرج ونطقات بخفوت)خوياا نتا عمرك قصرتي من جهتنا ماما ماقصداتش هادشي يااكي اماما
رحمة:(حركات راسها بلا تتبكي وتشهق) تاحد فيكوم مغايفهمني وتاحد مغايحس بيااا
نوح:(غوت بلامايحس عينو خارجين) وأناااا شكون لي غااااايحس بملتي (مسح على لحيتو باغي بنرفزة) نتي نهار لول مابغيتيهااش بلا مانغطيو الشمس بلغرباال وعمرك حاولتي تقربي منها وتعرفي لمعدن ديالها لاكنتي عرفتيهاا اش تتسوى مكنتيش اتخرجي هاد لكلام ايمّااا
نزل لحاج لحسن من طوموبيلتو ومعاه زاينة لي كانو راجعين من عند سليماان...دخلو لريااض ومع قربو لصالة سمعو صوت الصداع ودخل لحاج لحسن هو لول مخلوع بانت ليه رحمة تتبكي ونوح واقف قالب وجهو كيغزز شفتو بفقصة...
ح.لحسن:ياك اودي لبااس اش واقع
بيسان:(شافت فخوها ومها) والو اجدي بلاماتشطن راسك
زاينة:(قربات جهة رحمة ونطقات بالسوسية) ماكم يااغن أيلي لي غاتالات "مالك ابنتي علاش تتبكي"
ماجوباتش رحمة وكملات بكاهاا تتحس براسها هي لي عندها لحق ومحسااش بلغلط حيت بكل بساطة غايرة من رحيل... فاش تتشوف كيفاش ولدها كيعامل رحيل لي تتحس بيها دخيلة دخلات بينها وبين ولدها وخلاتو يتبدل عليها ومايبقاش كيف كاان هي هادشي لي تتشوفو ودخل لراسها مع لعلم أن هادشي مكاينش وماشي هو لي تبدلو مرا وتحكم فيه وهي براسها معارفااش بلي رحيل لي مرتو ومعرفااش كلشي عليه وتاهي تتحس بيه بير غااارق وقليل فين تيجي ويصارحهاا...
بقات تتسكت فيها زاينة لي مكانتش عارفة مالها وشنو طاري أما نوح سكت ومقاال باقي تاكلمة فحضور جدو وجداتو...حدو شاف فموو بنظرة خيبة حيت بصح خيباات ظنو وبكلامها لي قالت جرحااتو...خرج من الصالة مخليهوم ورحيل بزربة خرجات تابعااه ساعة لقاتو طار بزربة مخليهاا تاتنهد بحسرة وعلى هادشي ماهضراتش وبقات ساكتة حيت مبغااتش لمشكيل ينوض بناتهوم... قلبات طريقها تابان ليها لحاج لحسن خارج شاف فيها وقال:نتي ابنتي لي غاتقولي ليا اش طاري ومال ولد لحاج خرج وهو معصب مخلي مو تتبكي
رحيل:(بدات تضور عينيها وقالت بتبسيمة) بلاماتشطن بالك اجدي راه مكاين والو وخالتي غير تفكرات لمرحوم دنااصر داكشي علاش تتبكي
ح.لحسن:(تنهد وماتيقش هضرتها وحاس بلي شي حاجة واقعة) اوا ابنتي الله يرحمو هادي هي الدنيا تاحد فينا معارف اش مخبية ليه
رحيل:لمهم اجدي غانطلع نشوف ياك مافاق إسحاق ولاإسماعيل
ح.لحسن:لافاقو ابنتي هبطيهوم لياا نشوفهوم
رحيل:(تبسمات)هي لولة
خلاتو وطلعات لجناحها ومع دخلات مشات نيشان هزات تلفونها تتصوني عليه مجاوبهااش وبقات تتجربها مامرة مازوج ساعة نفس الشي... مشات رضعات ولادها ونزلات واحد فيهوم لعند لحاج لحسن وطلعات نزلات التاني عاد توجهات نيشان لعند رحمة لي عرفاتها طلعات لجناحهاا ودقات لباب ودخلات...لقاتها جالسة تتبكي ومع شافتها قلبات عليها وجهها وهي تنطق رحيل بهدوء:نقدرو ندويو
فجوف رحيل كلام كتير باغا تقولو ليها واخا عارفة بلي غاتلقاا نفس النتيجة من طرف رحمة...لي كانت باقي قالبة وجهها عليها...ومع دلك ماهتماتش رحيل ليها وقالت بنفس الهدوء: ماجيتش باش نكتر لكلام ولكن بغيت نوضح ليك واحد لحاجة أنا نهار دخلت لهاد الدار اعتابرت گاع الناس لي عايشين فيها عائلتي حيت بصح هوما عائلتي واخا ماشي من دمي... حتارمتك حيت نتي مت راجلي ومقامك عالي واخا نتي ماحملتينيش وشغلك هداك مغانفرضش لمحبة ديالي عليك ولكن مغانخليكش تبقااي واخدة علياا نظرة لي نتي شفتيها وتيقتيها بلاماتعاشريني... نهار جيت لررياض وجريتي عليا سكت وفهمتك حيت عارفة لحرقة لي كنتي تتحسي بيها جهة ولدك لي غبر ولي كاتگولي أنا سبابو مغانكرش حتى أنا لمت راسي... فاش رجع نوح كان يمكن ليا نگول ليه اش طرا ولكن سكت عرفتي علاش؟؟ حيت ماشي أنا لي نبغي نجبد الصداع بين راجلي ومو... سكت وكمدتها فالداخل ديالي ومابينتهاش ليه جبتها فنفسيتي على قبلو هو حيت مباغااهش يتعصب وكيفما هو كيفكر لمصلاحتي تاأنا فكرت فمصلاحتو... وفكل مرة كان يطرا شي مشكيل بيني وبينك مكنتش تانقولو ليه واخا راني متأكدة بلي يسحاب ليك أنا لي مشيت شكيت ليه فلمرة لولة هضرتي دابا ماشي تبرير ( حركات راسها) أنا جيت غير ياش نخليك تشوفي لي نتي مباغاش تشوفيه وخصك تعرفي بلي تاأنا أم وعندي ولادي لي إن شاء الله تاهوما غيديرو ديورهوم وكل واحد غايجيب مرتو وديك الساعة مغانديرش بحالك ونحكم عليهوم قبل مانعاشرهوم... ومغانجرحش ولادي ونفكر بكل أنانية (كمشات حجبانها وشافت فيها) هضرتك ليوم ماقصحاتنيش أنا ولكن قصحااات راجلي لي هو ولدك لي عمري فحياتي شفتو مخسر ليك لخاطر خصك تفرحي وتحمدي الله حيت فضهرك راجل لي يهز بيك وعمرو يسمح فيك واخا فيه عرق واحد تينبض... ولدك لي هز لمسؤولية ديال لعائلة من نهار باه مات واش عمرو تشكى عليك عمرو جااا لعندك وقالك ليك عيييت ؟؟؟ لااا هز مسؤولية ولدو بوحدوو ومسؤلية خوتو وخدمة بااه ورزقو ومسؤليتك واش هادشي نسيتيه اخالتي دغيااا؟؟ مكتحملينيش ومباغانيش فهمتهاا ولكن بااش تشكي بلي ولدك نسااك من نهار تزوج بيا راك غالطة حيت قبل مانتزوج بيه جاا وعلمني بلي غانعيشو معاكوم وبلي واخا عندو دارو غايبقا فالرياض حيت مغايقدرش يخليكوم بوحدكووم كوون بصح نسااك كون نهار عقد عليا يهزني لدارنا ويبقا يجي يزورك بحال شي براني ولكن مدارهااش وهادشي كافي يخليك تعرفي بلي هو مناسيكش وتيفكر فيك وفخوتو ومصلاحتهوم وأنا عمري نفكر نكون سباب فراقكوم معاه حيت أنا ماشي بنت لحرام وعارفة بلي الدنيا دوارة وتاأنا غايجي نهار لي نكون فيه عگوزة... (تنهدات) ماعرفتش هضرتي واش غاتفهميها كيف بغيتها توصلك ولكن لي عليا درتو وشحال من مرة حاولت معاك ولكن نتي سديتي عليا لبيبان وماخليتي ليا فين نزيد مزاال أو واخا نبغي مغانحاولش باقي حيت لعيب خرج وماخلى ليا فين نزيد وراني دابا دايرة لواجب معاك حيت نتي مت راجلي... (شافت فيها بنظرة أخيرة )خليت ليك الراحة
خرجات رحيل مبعد ماخوات داكشي لي هازاه من جهتها ولي كانت باغا تقولو ليها زمان...وجا وقتو دابا دخلات لجناحها وبقات جالسة وعقلها كولو معاه هو...
طاح الظلام ولجو فالرياض كان متوتر رحمة ملي طلعات لجناحها معاود نزلات وبيسان عقلها مع الصداع لي ناض ومرة مرة يهضر معاها ريان فلواتساب وتجاوبو بلاماتبين ليه اش طاري... ضربات لوحدة دالليل ورحيل عينيها كيتسدو بالنعاس...تتفوه وبزز باش مصبرة راسها باش تبقا فايقة تايحي ساعة باقي مبغا يبان... ولات عرفاه فاش كايتعصب ولاكاطرا معاه شي حاجة تيبغي يبقاا بوحدو واخا راه مشطونة عليه ولكن خلاتو على راحتو... وكل واحد فينا وطبيعتو فاش كايتعصب كيف تتكون... ضارت شافت فوليداتها ناعسين وبقات تتشوف فيهوم وبلامانحس عينيها بداو يتسدو تانعساات...
داخل من الرياض بهدوء غادي نيشان لبيتو وبلاحس دخل وبانت ليه ناعسة وهي جالسة ومتكية راسها على لكادر عرفها كانت تسنى فيه...دخل نيشان لدريسينغ وجر لڤاليز لي مستفين تم خدا لكبيرة وحلها وبدا يجمع فيها حوايجو وعلى داك لحس حلات رحيل عينيها تتحس بعنقها تعوكف...بدات تتماصيه وناضت غادة لدريسينغ وغير بان ليها تايستف لڤاليز ديالو وهي تقرب جهتو مكمشة حجبانها وقالت بتساؤل:نووح علاش كاتجمع حوايجك فين غادي؟
نوح:(نطق بهدوء ممزوج ببرود بلامايشوف فيها) جمعي حوايجك وحوايج توينز تاهو وسيدرا نمشيو لدارنا
رحيل:(شدات فيديه ونطقات بتساؤل) وهناا
نوح:(شاف فيها وقال بخشونة) مابقاا لينا گلاس فهاد الرياض...
كاتشوف فيه كيفاش نطق بكلامو لي مكانش فيه نقاااش ورجع تيكمل شنو تيدير وتيستف حوايجو بكل عناية ودقة فلڤاليز كيف مولف... من جيه فرحانة حيت غاتبعد على الصداع بينها وبين رحمة وغاتستاقر فدارها بوحدهاا ولكن واخا هاكاك هي ماشي قليلة الأصل لي تبغي داك الفجوة بين نوح ورحمة تكبر وبسبابها هي...حكات على جبهتهاا وقالت بخفوت:واش غانمشيو دابا؟
نوح:اه
رحيل:(تنهدات)نوحينو أنا عارفة بلي نتا معصب دابا داكشي باااش خديتي هاد لقرار و
نوح:(ضار جهتها معلي حاجبو وقطع فيها لكلام بصوتو الخشن) بعدا قبل مانسى (قرب جهتهاا تاوقف قدامها) نهار لكلينيك وداك لكلام لي ضار بينك وبين يمّا علاش ماگلتيهش لياا وخبيتيه بحال ديك لمرة فاش جرات عليك من الريااض؟
رحيل:حيت مباغاش نجبد الصداع ونكون سبب المشكيل (تنهدات)دابا نيت راني مراضيااش على شنو طااري انوح عارفة بلي ماماك مقابلاش بيا من نهار لول ودرت جهدي وربي عالم ولكن ماتقبلاتنيش ومع دلك ماهضرتش وبقيت ساكتة حيت ماشي من عادتي نوض الصداع ونخليك مشطون باركة غير لخدمة لي ملاهي فيها راسك ونزيد أنا نشكي عليك ونزيدك هم فوق همك؟
نوح:ماتخبيش (هز صبعو بتحدير فوجهها وقال بصرامة) يوقع لي يوقع مانبغيكش تخبي علياا شي حاجة كيفما بغات تكون... كيفما مّي مانبغيش لي يقلل حياه عليهاا راه تانتي مرتي ومانبغي حد يحل فمو عليك ودابا سيري جمعي لحوايج باركة من لهضرة الخاوية
رحيل:واخا
مزادتش هضرات معاه ومشات نيشان جرات باليزتها وبدات تاهي تتجمع حوايجهاا... كان سكات بيناتهوم وكل مرة تهز راسها تاتشوف فيه تاتلقاه ساكت ومباين على وجهو تاشي حاجة...جمع كلشي وماخلى والو لڤاليز ديالو كاملين عمرهوم وخرج غادي يجمع برودويات لحمام...
وقت طويل وهوما تيجمعو تافاقو توينز ومشات رحيل ترضعهوم وهو كمل ليها حوايجهاا تاسالى وبدا يخرج فالشوانط...
نوح:لارضعتيهوم سيري جمعي حوايج سيدرا
خرج من جناحو غادي لعند زين العابدين دق وحل لباب لقاه شاد النموسية كاملة وناعس على كرشو مافيقوش...مشى تيجمع ليه حوايجوو لي كلهوم سبور وخرج تايتحرك فالجناح ويجمع ليه لي خصو يتجمع... تاحل زين العابدين نص عين تايشوف فباه قبل مايتوگض ويجلس تيحك عينو ونطق بصوت مبحوح:لواليد؟
نوح:(شاف فيه بهدوء) نوض لبس حوايجك وجمع لي بقاا من مسائلك شوية ونتحركو لدار
زين العابدين:(ببرود)اشمن دار ؟
نوح:(لاح عليه تيشورت وقال بنفس لبرود قبل مايخرج من عندو) دارنا يالاه نوض تحرك
مافهم زين والو بقا غير تيشوف ويتفوه قبل ماينوض تايتعكل فداك ليزار غادي لحمام يغسل وجهو ويتوگض ويدير لي قال ليه بااه...
جمعو گاع حوايجهوم وكلهوم وجدو وبالسكات بدا يخرج فلفاليز ويستفهوم فلهونضة ومعاه دري لي كيعرف ولي مولف تيجيب ليه السلعة دلمحالات... انسطالى توينز فلبوسيت ديالهوم فالطوموبيل وسيدرا لي جالسة مدوخة بنعاس معارفااش اش طاري وزين العابدين لي تيعاون فبااه... مشى دري سابقهوم ونوح سد باب الريااض وبقا واقف تيشوف فيه مدة قبل مايركب فبلاصتو ويدماري تاهو غادي لدار جديدة... كان السكات طاغي عليهوم وحد ماهضر وكل واحد أصلا فين تيخمم.... وصلو لدار ونزل نوح حل لباب لدري لي بدا يدخل لي ڤاليز غير لدخلة دلباب وزين معاونو ورحيل بقات جالسة فالطوموبيل تاسالاو عااد جبد نوح لفلوس خلصو ومشى دري...
نوح:(حل عليها لباب وقال بهدوء) نزلي
رحيل:(نزلات تتقاد فعبايتها) أنا غانهز إسماعيل (شافت فسيدرا لي نعسات) رجعات نعسات
نوح:غير طلعي أنا نجيبها
دخلات لدارها ومشات نيشان لبيتها لي كان مفرش ومقاد ومعطر بريحة لبخوور دلحج... كمشات حجبانهاا فاش شافت لكونة لي تماا وحطات فيها إسماعيل...زولات فولارها ومشات تبدل عليها وهي تتفوه وفيها لموت دالنعااس... خرجات لقات نوح جالس فوق النموسية ومزول لاشوميز بقا غير بسروال توب...
رحيل:(قربات جهتو) نوحينوو واش جيتي لهنا ليوم
نوح:سي (جرها تاجلسات فوق حجرو ومد يديه حل ليها شعرها) غدا غانمشي لفيرمة ويقدر نبات تم
رحيل:(عضات على شفتها) تخليني بوحدي
نوح:تمشي معايا؟
رحيل:(حطات راسها على كتفو وقالت) تت ماكرهتش مي سيدرا غدا عندها لمدرسة خليها تال مرة خرا
نوح:(باسها فراسها)غانحاول نكمل كلشي غدا ونجي فالليل
رحيل:(شافت فيه)تكايس على راسك مافيها بااس لابقيتي تم (تبسمات ليه بحنية) وزايدون راه زين العابدين هنا غايرد ليناا لباال فغيبتك
نوح:إن شاء الله انوض ندوش
ناضت رحيل وناض تاهو غادي لحمام وقبل مايخطي خطوة شدات ليه فيديه تاضار شاف فيها وهي تنطق بهدوء وحنية: واش نتا بخيير؟
جالسة فالمحال وكل مرة تنهد وتفكر فشنو طرا معاها داك النهار دلخطبة ديال بيسان وريان... ديك الليلة باتت عند رحيل ولكن فالصباح بكري غير فاقت وهي تخرج ومبغاتش تعيق وتقل عليها على قولتهاا... دوزات لبارح فلمحاال وفالليل باتت فيه بلامايعرف حد ولايسيق ليها لخبار... وليوم نهار التاني وأكيد مغاتباتش تاني فلمحال وغايخصهاا تلقى لحل...ولحل لي كاين هو تخوي ديك الدار ولكن المشكيل مابقاش هناا حيت هادي أسهل حاجة ديرها لمشكيل هو فين غاتلقى تاني لكراا وفشي بلاصة زوينة ونقية ولي تأمن راسها فيهاا وماتخافش...عياات بتخمام وهلكات نفسيتها وماعرفات مادير...
كانت أميمة واقفة فلاكيس خدامة ومرة مرة تلوح عينيها وتشوفها كيفاش ساهية وتخمم عرفات غايكون عندها شي مشكيل...ملي ترخفات الحركة قربات جهتهاا أميمة تاوقفات وراهاا وحطات يديها على كتفها..
أميمة:(تبسمات ليها)صافا؟
غزلان:(ببرود) حمدالله
أميمة:كاتباني لياا مهمومة وعقلك مرفوع
غزلان:(تبسمات ليها تبسيمة صفرا)لاأنا بخير بلاماتشطني باالك معاياا (أشارت ليها)سيري راه لكليان واقف حدا لاكيس
مشات أميمة وغزلان توجهات لداك لبيت فين تيحطو السلعة هزات صاكهاا وخرجات غادة لدار تجمع مسائلها... وتمشي تبقا ليها فشي أوطيل تاتلقى السكنة هادا هو لحل لي غايريحهاا...وصلات لحومة ونزلات وهي تتقفقف بالخلعة وكل مرة دور وتشوف جنابها لايبان ليها داك الشمكار تاني... واخا راه باقي نهار وناس كاينين ولكن لخوف غلب... مع يالاه جات دخل لعمارة سمعاات صوت محمد طه لي عيط ليها بسميتهاا:غزلان
ضارت غزلان بزربة وغير شافتو تبسمات ومغاتنكرش بلي مجيتو خلاتها ترتااح وديك لخلعة مبقاتش... أما هو غير شافها تاضحك ليه وهو يهز حاجبو مستغرب...مولف تايلقاها مغوبشة ومخنزرة...
محمد طه:(وقف قدامها وقال) صافا ؟ جيت لبارح ومالقيتكش واش بقيتي عند رحيل؟
غزلان:احم لا
محمد طه:فين كنتي؟
غزلان:(قلبات ليه لهضرة) لاش جااي؟
محمد طه:جيت نشوفك نهار لخطبة ديال ريان بنتي ليا ماشي هي هاديك مالك؟
غزلان:والو (بدات تاضور فعينيها) مغانبقاوش واقفين هنا الجيران غايدويو علينا
محمد طه:يالاه نطلعو
شد فدراعهاا وهي خلاتو وطلعو لفوق ودخلات غزلان غادة لبيتها وهو بقا جالس تم تيضور عينو على الصالة تابانت ليها خارجة وجايبة باليزتها...
محمد طه:فين غادة؟ وعلاش جمعتي بگاجاك؟
غزلان:(حكات شعرها) ماشي شغلك شفتك بغيتي دخل فيا ؟
محمد طه:(خنز فيها) بلاتقح*بين فين غاتمشي؟
غزلان:ماتخسرش معايا لهضرة واش نتا كلمة زوج تخسر لكلام؟
محمد طه:واخا الالة فين غاتمشي؟
غزلان:(ببرود)ماشغلكش
جات تمشي وهو يجرها تاتزدحات معاه وعلى حجبانو بزوج وقال:خرجو رجليك لشواري وليتي داخلة خارجة ماعندك راجل يحكمك
غزلان:لاماعنديش وبصحتي ندير لي بغيت
محمد طه:راه ماحدي عااايش راه مانخليكش بخاطرك غير تهناااي وغانبقا تابعك فيما مشيتي
غزلان:(زفرات بتعب)غانمشي لأوطيل بغيت نبدل لجوو شوية
محمد طه:(بشك) أوطيل علاش ؟ غزلان اش مخبية عليا
غزلان:(بتهرب)مامخبية والو
محمد طه:(هز حاجبو)لامخبية (شد وجهها ونطق بحنية) مالكي واش شي حاجة مقلقااك؟ شي حد خسر ليك لخاطر ولاضسر عليك؟؟
تاتشوف فيه وفخاطرها باغاا تعاود ليه اش طرا معااه وتشكي عليه بغات تبكي وسط صدرو وتريح خاطرها ولكن مغاتقدرش حيت عارفاه تيتعصب بزربة وكيشعل دغياا وخايفة يدير شي حاجة لي تخليها تندم وزيد مباغاش تحل ليه داك لمجاال وتعطيه أمل فعلاقتهوم لي معرفااش مصيرها...
غزلان:(زولات يديها وعطاتو بالضهر) علاش امحمد طه تتعدبني وتتعدب راسك؟
محمد طه:(عنقها من لور وضمها لصدرو وقال بحنية وصوت خافت) نتي لي علاش تتعدبينا بقصوحية راسك وعلاش مبغيتيش تنساي مافات
غزلان:(بصوت منغنغ بلبكا) لهضرة عندك ساهلة واش بالنسبة ليك داكشي ساهل يتنسى؟
محمد طه:(زير عليهاا) ندير جهدي ونسيك فيه نتي غير گولي اه ومغاتندميش غزلان أنا بااغيك ومباغيش نفرط فيك
غزلان:(نطقات بخفوت ودموعها سايلين) خايفة نتيقك وتعاود تجرحني بحال قبل
محمد طه:(بلهفة) نكون حمااار لاعاود ضيعتك من بين يديا (باس عنقها بحب) على أنا نقدر نفرط فعمري...
~~أَصابَني بَعدَكَ ضَرُّ الهَوى... وَاِعتادَني لِلبُعدِ إِقلاقُ
قَد يَعلَمُ المَولى وَحَسبي بِهِ....إِنّي إِلى وَجهِكَ مُشتاقُ~~
فجناح رحمة لي فاقت وخاطرها مغير كلما تفكرات الشي لي وقع تتحس بقلبها كيتزير عليهاا وهي عارفة أنها جرحات ولدها وعارفة طبيعتو... وصلها لفطور لجنااح ويادوب قاست شي حاجة منوو وموراها ناضت دوشات وخرجات توجد راسهاا... لبسات سروال توب بيض مع شوميز فالڤيغ بترولي طويلة واسعة... صندالة طالون وشعرها مسرسب ورى ضهرها... نزلات لتحت لقات بيسان جالسة مع جداها...
رحمة:صباح لخير (شافت فبيسان) خوك كاين هنا؟
بيسان:ماعرفتش ماشفتووش فالصباح وتارحيل مانزلاتش
حركات راسها باه ومشات راجعة لجنااح ولدهاا...دقات لباب وماسمعات حس حد ورجعات مرة خرا دقاتو ونفس الشي تاحلات لباب ونطقات بهدوء:نوووح ولدددي
دخلات لداخل تتعيط ليه ومع وصلات لبيت النعاس لقااتها خاوية ومافيها حد... ضورات راسها وقلبها ضرب وهي تتشوف الكوافوز مافيها تاحاجة وخاوية دخلات لدريسينغ ومع شافتو خاااوي وهي تشهق وحطات يديها على فمهاا مصدومة... داكشي لي كانت خايفة منو هو لي وقع ولدها خوى ليها الرياض ومشى... شدات على راسها وبقات تتبكي وتحركو بلا.. انهارت وبقات جالسة فالأرض تاتبكي وتشهق مقادراش تخيل الرياض بلاولدهاا وفكرة أنه صافي مشى تاتقتلهاا وتاتخلي غصة توقف ليها فحلقها مامخلياهاش تنفس...بكات تاشبعات وكلما قالت دموعي نشفو تايزيدو ينزلو ليها من جديد... بزز باش وقفات وخرجات من تم وفطريقها لقات عفاف جايا لعندهاا ولي كانت يالاه رجعات هي وباها من أگادير..مشات دوزات فيه شي يامات مبدلين لجوو... بانت ليها تتبكي ومنهارة خلعاتها وقربات جهتها ورحمة تلاحت عليها تعنق فيها وتزيد تبكي...
بعد مدة كانو بزوج جالسات فجناح رحمة لي حاطة راسها على صدر عفااف وتتبكي بالسكاات
عفاف:عاودي لياا اش طاري؟
رحمة:(بخفوت)ولدي مشى اختي خوى الريااض ومشى ومغايبقاش يرجع
عفاف:واش رؤوف ؟ نتي عرفااه حال وحوال عندك داك لولد وماتخافيش دابا يتولاه ولد لحاج
رحمة:(حركات راسها بلا) ولدي نوح لي مشى اختي نوووح
عفاف:ولد لحاج فين مشى؟
بدات تتعاود ليها رحمة اش طرا وعفاف تسمع ليها بتركيز بلامتقاطعهاا...تاخوات رحمة لمزيودة كاملة عاد سمعات عفاف لي قالت بهدوءها المعتاد ورزانتهاا فلكلام: ملي كان ولد لحاج عايش بوحدو كنتي ديما هازة ليه لهم وظلي تگولي بغيت ولدي يتزوج ويجيب بنت الناس لي تهتم بيه وترد ليه لباال ملي مات لمرحوم ودازت مدة جيتي عندي وگلتي ليا بغيت نوح يتزوج بنور الهدى هي لي غاتناسبو وأمانة لمرحووم...گلتي غاتكون أم لزين العابدين ومشيتي عندو گلتيها ليه عقلتي باش جاوبك؟ ومع دلك نتي بقيتي ملصقة ديك لفكرة فدماغك ومابغيتيش تنسايها تانهار بانت ليك فشيماء وگلتي ربما يبغيها ومشيتي خطبتيها ليه وماكملوش بقا فيك لحال ديك الساعة وكنتي بغيتي تعرفي السباب ساعة هو ماعطاكش راس لخيط... هزيتي ليه لهم وديما تگولي بلي هاز مسؤوليتناا وكايظل يعيى فراسو وبغيتي ليه مرا تريحوو تانهار كتاب ليه ولقى بنت النااس لي توالمو ولي بغاا خاطرو... بنت النااس لي تزوج بيهاا وجابها ليك عروسة وسكنها معاك... وكون مكانت تستاهل مكانش ولد لحاج يدخلها لدارو وتحت جناحو...لقى راحتو معاهاا والراجل فاش تايلقى راحتو مع شي مرا عرفي بلي لقى فيها داكشي لي باغي وبلي هي موفرة ليه كلشي...وهادشي خاصو يفرحك حيت داكشي لي كنتي هازة ليه لهم مابقاش... عارفاك ارحمة ماشي من عادتك تزربي ولحاجة تتعطيها وقتها وتفكري فيهاا وماعمرك حكمتي على شي حد ونتي ممعاشراهش اش طرا ليك مع ديك بنت الناس تامحملتيهاش؟!
رحمة:(بخفوت) حيت خدات ليا ولدي اختي ولدي لي عمرو خسر ليا خاطري...ولدي لي كان دوايا نهار مات ناصر وإسماعيل الله يرحمهوم...لقيتو راجل وقف مع مو وماسمحش فياا كبر خوتو بزوج ولفتو فحياتي أو ولفت نكون انا لمرا لي كاينة فحياتو
عفاف:(كمشات حجبانها) رجوع الله ارحمة واش غاتقارني راسك مع مرتو راه بلاصة لأم ماشي هي بلاصة لمرا...ولدك راه داير ليك قيمة واعتبار هانتي نهار تزوج لاش مداهاش لدارو وعاشو فيهاا وجابها ليك لهناا وعيشها معااك؟؟ كون دارها راه مغايلومو حد شوفي غير ولاد خوتك لي كلهوم مزوجين وبديورهوم وحد مساكن مع مو وباه...
رحمة:(عينيها منفوخين وصوتها تبح بلبكا) دابا ولدي مشى وهي داتو لياا
عفاف:(حمرات شوفتها وقالت بجدية) نعلي الشيطان واستغفري مولاك ارحمة السيدة مدارت ليك والو ولاولدك خوى الريااض رااه لكلام لي قلتي فحق مرتوو وفحقو هو السباب واش كاينة لي تجري على مرات ولدها وهي واحلة فروحهاا ؟ وزايدون لاش مابغيتيش خوها يتزوح بنتك ياك جاا من لباب وخطبها وماتفلاش عليها وهي بغاتو علاش باغا توقفي فطريقهوم؟
رحمة:(شدات راسها بين يديها وقالت بصوت باكي) أنا دابا باغا غير ولدي يرجع لي اختي راه الريااض كيظلام بلابيه ويااربي تاخد لحق فلي كاان السباب...
وقفات الطاكسي قدام باب الدار ديال إدريس ونزل منهاا محمد طه لي تمشى بزربة جهة لكوفر حلو وجبد لڤاليز دغزلان لي نزلات تاهي بدورها وبقات واقفة تاتشوف فيه وتتفكر داك لكلام لي تقال بناتهوم قبل ساعات... ولقرار لي خرجات بيه ولي ماعلماتوش بيه وقررات تحتافظ بيه لراسهاا تاتشوف اخرتها معاه... فهاد لمدة هو بين ليها ندامتو وبلي باغيهاا ترجع ليه ومستاعد يدير كلشي على قبلهاا... تاتعقل على معاملتو قبل كانت مختالفة تماما كاان مبرد معاها ومكيبينش مشاعرو وديما غضبان ومعصب... كانت مشهية تشوفو شي نهار وهو ضاحك... أما دابا هادا لي قدامها ماشي هو هاداك لي عرفات قبل... اعترفاو ليها وتشبتو بيها خلاها تعيد حسباتها وتفكر تعطيه فرصة ولكن قبل ماتگولها ليه وتبينها ليه هي خصها تأكد واش بصح تبدل ومبقاش كيف كان ولاغير طالقها عليها تايحكمها ويظمنها ويرجع لعادتو لقديمة وهي هادشي لي غادير دابااا...
محمد طه:(قرب جهتها ونطق بتبسيمة) ماتحتاجيش عراضة دار دارك
غزلان:دار عمي إدريس ماشي داري
محمد طه:وعمك إدريس راه فمقام بااك (حل لباب) دخلي
دخلات غزلان وهي حشمانة ولكن ماعندها تاشي خيار اخر من غير هادا... ماحدها باقي مالقات دار فين تسكن وتأمن على راسها فغايخصها تبقا هناا...
تانيرت:(بتفاجأ)غزلان مرحباا بيك
شافت فمحمد طه لي دخل وراها وجايب معاه لڤاليز وزاد استغربات وعند بالها تصالحوو..
محمد طه:غزلان غاتبقا معانا هنا شي يامات (شاف فيها) دار لي كارية فيها مشكيل وغاتبدلها داكشي علاش
غزلان:(بخجل) كاين عند جيران لي فوق مني فويت فروبيني دلحمام وكيدخل ليا لماا لبيت نعاس وفاش دويت معاهوم مبغاوش يديرو حل عليها قررت نبدل الدار
هاديك هي لكدبة لي عطات غزلان لمحمد طه فاش أصر عليها يعرف سبب لي خلاها تخرج من دار وتمشي لأوطيل ومالقات تاشي حل من غير هاد لكدبة واخا كان باغي يشوف لبيت ولكن ماخلاتوش وتاهو جاتو من لجنة والناس أصلا باغيها تمشي معااه وماحكرش...وصل ليها حوايجها لبيت رنيم لي مولفة تشرك معاها لبيت...
محمد طه:غايخصني نرجع لخدمة واش محتاجبن شي حاجة؟؟
تانيرت:لا اولدي الله يوصلك على خير
حرك راسو وشاف فغزلان بمعنى عندك يزغبك راسك وتعلقي وهي قلبات عينيها عليه منخلاه ومشى...
تانيرت:نهار كبير هادا ابنتي فرحت بمجيتك عندنا
غزلان:سمحوليا غانتقل عليكووم (حكات جبهتها) ولكن بزز مني
تانيرت:ولاواه ماتگوليش هاكا وزايدون راه حنا عائلتك ولامجيتيش عندنا عندمن تمشي
غزلان:(ساطت النفس) كنت باغا نستاقر بوحدي ساعة سكنة بوحدي فيها تمارة فالحقيقة ديك لهضرة لي قلت ليك مامنها والو اخالتي مكاين تامشيكل فالداار
تانيرت:(باستغراب) اوا شنو كاااين؟؟
غزلان:نهار مشيتو باش تخطبو لرياان ديك الليلة نسيت بزطامي ورجعت نجيبو واحد الشمكار دخل عندي لدار وتهجم علياا كان باغي يتكرفص علياا اخالتي داكشي علاش تعطلت
تانيرت:(حطات يديها على صدرها مخرجة عينيها) أيمي حناااا
قفزات غزلان ملي سمعات صوت محمد طه لي نطق بغضب وهو جاااي جهتهاا مخرج فيها عينيه:شكووون هاد ولد لقح*بة ؟؟؟
وقفات غزلان تاتشوف فيه وماعرفات كيدار رجع ياك مشى لخدمة اش رجعوو...
محمد طه:(قرب جهتها وشدها من دراعها) سولتك جاوبي شكووون هاد لحمااار؟
تانيرت:ولدي محمد طه تهدن
كان طافي ديك الساعة وعقلو غير مع كلامها لي سمع وكيفاش كدبات عليه وخبات عليه بحال هاد لهضرة لي خصو يعرفها... نسى بلي تانيرت هنا وخسر لهضرة قدامهاا...
محمد طه:(جرها من يديهاا) زيدي وريني شكوون هاد الزا*مل ليوووم نشرب من دمووو زيدي
غزلان:(نترات يديها) واش هبلتي طلق مني فين غاديين
محمد طه:(كيترعد ولى كولو حمر) برب تاتزيدي قدامي وحسابك من بعد نتفاهمو على لكدوووب زيدي
جرها بزز وتانيرت وراهوم تاتعيط ليه ساعة لمن غاتعيط وهو مصمك ودنيه ولي فبالو دابا هو يلقى هاداك ويوريه كيفاش يتهجم عليها ويبغي يتكرفص عليهاا...
جرها وهي مبغاتش تعيق فالزنقة وتتهضر من تحت سنانها باش يدير عقلوو ويرجعوو ولكن والو... شد طاكسي وركبها بزز محمر فيها الشوفة وعطاه لعنوان وبقا تيشوف قدامو ويرعد فرجليه...
غزلان:(تحدرات جهتو)محمد طه راه مغانلقااو والو تيقني مكنعرفووش شكون هادا وزيد ماعمري شفتوو تم
محمد طه:(ضار عطاها شوفة دلقتي لة) هاد لهضرة ماتگوليهاش لياا داباا ومن بعد ونتفاهمو على كدوبك
غزلان:(قلبات وجهها) شنو بغيتي ندير وزايدون اش بيني وبينك باش نگولها ليك
محمد طه:(تحدر جهتها وقال ليها بهمس) دابا تعرفي اش بيني وبينك
وصلو ونزل وهي تابعاه معرفاش اش باغي يدير..شدها من يديها وعينو تيشوفو فدوك دراري لي فلحومة ونطق:حلي عينك وشوفي لابان ليك
غزلان:(ضورات عينيها عليهوم تاتشوف بلاماتعيق تاضارت جهة العمارة وبان ليها خارج وغير شافتو وهي تنطق بزربة) هو هاداك لي تهجم علياا
غير قشعو خارج وشاف كمارتو المصدية وهو يزير على يديه وطار من حداها على غفلة ماعرفاتو كيف دار ليها تالقاتو وصل لعند داك الشمكار وشنق عليه ولاخر ماعرفو ملين نزل عليه... دراري دالحومة كلشي تجمع وغزلان بقات غير واقفة بعيد تتشوف فيه تايملخو عصاا ومع تگجگيج دعباد الله مبقاش تيبان ليها محمد طه ولاخر ولات تتسمع غير الصداع ولغوات ديالهوم... أما محمد طه لصق فيه لصقة وحدة يضرب ويسب ولاخر باغي يفك راسو ساعة مالقاش كيفاش يدير...ناضت بناتهوم وغزلان خافت يتسبب ليه هادشي فشي مشكيل ومشات تتجري وتتعيط ليه ودخلات فداك الزحاام تالقاتو شانق على لاخر لي تاهو كيدفع فيه وشدات فدراعو وقالت بترجي:صافي امحمد طه خليه
محمد طه:(غوت تاترش الدفال من فمو) أنا نوري لزااا*مل بوه يتهجم عليك ويبغي يتكرفص عليك
ضربو بنص وطيحو الأرض ونزل عليه وفديك الساعة دراري تحمااو على محمد طه وجرووه تابعدووه وبداو يهدنو فيه وهو تيغوت ويسب وغزلان غير تبعاااه خافتو يدير شي مشكيل ويصدق خارج على حياتو ومستقبالو وتكون هي سبابو...جروه شي رجال كيسايسو معاه ويهدنو فيه ويسولوه وهو جاوبهوم اش طاري ودوك الجيران لي كانو عاقلين على لبلان وشافو غزلان عرفو اش كاين...وهو أصلا راه باينة من وجهو وعارفينو جيرانو ومع دلك بداو يدخلو فخيط بيض تااتهدن وخوى السيكتور وهي وراه تاتشوف فيه كيفاش غادي مدماري وسابقها بمسافة..
***
حاطة تلفونها فووق البوطااجي تتهضر مع أسماء أبيل عادية وفنفس الوقت تتوجد فطورها... سالات وحطات كلشي فلبلاطو وهزاتو خارجة لصالة تفطر...مشات جهة لمبيخرة وشعلات البخور دلحج لي ولات تتحماق على ريحتوو فالداار... وشعلات تلفازة ودارت سورة الكهف حيت ليوم الجمعة... قطعات مع أسماء وبدات تاكل فطورهاا بوحدهاا ومرة مرة تنهد... مامولفاش تكون بوحدها عزيز عليها الجماعة والسكنة فالرياض ولفاتها ونهارها لول فدارها بوحدها جااها ممل.. سيدرا لي مولفة تونسها راه مشات لمدراستها فالصباح وزين العابدين راه واخا تيكون فالدار ديما مخشي فبيتو... شافت فساعتها وناضت مور ماكملات ماكلتهاا تمشي تشوف وليداتها واش فاقو...
لقاتهوم حلو عويناتهوم وإسحاق تيبكي عطاتو يرضع ورضعات تاإسماعيل ونزلاتهوم لتحت حطاهوم فالصالة ولقرآن مطلوق مخلياهوم تايشوفو فالسقف وساكتين...
دخلات لكوزينة تتشوف اش كاين وشنو خاص...باقي التقدية مجابها نوح وكاين غير الضروريات باش تعدي حاليا...بدات تاتقيد اش خص تاسالات ومشات توجد لغدا...دارت بحق سيدرا وزين العابدين حيت عندهوم غير الصباح ومقاريينش فلعشية...
مع الطناش وقف الطرونسبور ونزلات سيدرا وهي مكمشة حجبانها معاجبها حال...تحل لباب وخرجات رحيل تستقبلها بتبسيمة وغير شافت تغوبيشتها وهي تنطق:امالكي مخنزرة؟
سيدرا:(تاتزول سباطها) داك الطبوزي خسر ليا رسمتي
رحيل:اشمن طبوزي وشمن رسمة؟
سيدرا:لاميتخير قالت لينا رسمو باش نعلقوو رسمات وهو جاا خسر ليا رسمتي
رحيل:(تتجاوبها تاهي بلخاطر) اها وشنو طرا؟
سيدرا:غوتات عليه لاميتخيز (رجعات شعرها لور بغرور طفولي) وأنا خسرت ليه رسمتو تاهو
رحيل:ههه دقتك ابنتي متتنسايهاش سيري غسلي يدك وگابلي خوتك راه فالصالة
مشات سيدرا تتجري ورحيل رجعات لكوزينة تكمل داكشي لي تادير تاصونى تلفونها وكان نوح لي سول فيها ودغيا قطع مع عندو لخدمة كتيرة فلفيرمة...
تغدات هي وبنتهاا وسيدرا مشات تنعس ورحيل هزات ولادها تنعسهوم تاهوما...
نهارها داز ممل مكاين مع من تهضر وخصوصا هي مكاتحملش السكات وكاتبغي مع من توانس...شدات لهضرة مع بيسان لي تاهي عرفات بلي خواو الرياض وماعجبهااش لحال ولفات خوها عايش معاهوم واخا تيسافر ولكن اخرتها تايرجع لرياض ولكن هاد لمرة هو خلاه بخطرة...ناضت رحيل غادة توجد لعشا...
خرج من بيتو لابس غير شورط كحل سبور فقط وصندالة فرجلو وشعرو سارد بلما حيت يالاه دوش...كان نازل لتحت يجيب قرعة دلماا ومع داز جنب بيت رحيل وباه وهو يسمع صوت بكاا توينز مع لباب كان محلول خلاتو رحيل باش يوصلها صوت بكا ولادها... كمل طريقو ومع نزل فالدرجة لولة وهو يوقف مدة قبل مايرجع لبيت ودق ساعة ماسمع تاجواب وهو يكمل طريقو ومع وصل بانو ليه بزوج تيبكيو... ضور عينو فاش شاف السكاتات ودارها ليهوم وهوما يسكتو ومع بغا يتحرك حس بإسماعيل شدو فصبعو وزير عليه...
دايرة لكيت تتصوني لنوح لي جاوبها بصوت خشن مبحوح:الفتنة
رحيل:(بخفوت)نوحينو توحشتك
نوح:بزاف ولاشوية؟
رحيل:بزااف (تاتجبد من التلاجة اش محتاجة) تعشيتي؟
نوح:باقي ونتي؟
رحيل:تت يالاه غانوجد غرتان دلباط اجي زين العابدين تياكلو بعدا؟
نوح:سي
رحيل:غاتبات مزال؟
نوح:تت غانبقا تال غدا فلعشية ونجي
رحيل:صافي واخا (نطقات تتغبن) صعيب يديني النعااس وأنا مولفة نعس حداك
نوح:(عض على شفتو بنابو وقال بخشونة) شنو نگول أنا لي غاتخطاني راحتي هاد الليلة
جالسين لبنات فبيت أسماء تايسمعو لغزلان لي تتعاود ليهوم على داكشي لي طرا معاها هاد النهار ولغضبة لي غضب عليها محمد طه.. ولبنات تياكلو فزريعة ويشوفو فيها تگولي متفرجين ففيلم...
أسماء:وداك لحيوان ماديكلاريتوووش بيه
غزلان:لا مااديكلاريناش بزز باش تفارق معاه محمد طه كان غايقتلووو غير نااس لي فرقوهوم
رنيم:دابا شنو غاديري مغاتبقاايش تم طبعا ؟
غزلان:غانقلب تاني على كرااا جديد اوووف (حكات راسها) عرفتو على تمارة تبعاني تاني
أسماء:وعلاش ضربي تماارة مالك على حالتك بقاي معانا هناا
غزلان:نبقا باشمن صفة اأسماء ؟ وزايدون نتي عارفة لحساسية لي بيني وبين خوك مايصلاحش نبقاو أنا وياه فبلاصة وحدة
أسماء:مكاين تاشي حساسية وزايدون نتوما طلقتو واش غاتبقاي ديما محسوسة من جهتو؟ شوفي فمصلاحتك اغزلان اه بصح محمد طه خويا ولكن كون ماعرفتش شنو دار مغانجيش ونگول هاد لكلام هو غلط فحقك بزاااف داكشي علاش أنا باغااك تخرجيها منو باش يعرف بقيمتك
رنيم:شوفي اغزلان محمد طه شحال هادي كان مختالف على هادا تخيلي معايا الضحكة مكانتش تتفارقو ونشايطي بزاف
أسماء:كلنا مكناش كيف دابا كون جيتي قبل تسع سنين كنتي اتلقااي وحدين خرين أنا لي تاندوي معاك كنت واحد بنت لحر.ام فعايلي فعاااايل ليهووود هههه تانتفكر ياماتي تاتشدني الضحكة وتانگول ياربي تسمح لياا على مادرت
غزلان:(حطات يديها على حنكها) شوقتوني كون عرفتكوم قبل
أسماء:(طلقاتها بضحكة الشيخات) كنتي غاتندمي لاعرفتيني هههه كنت جلاخة والله عرفتي رحيل ومحمد طه كنت ديما مشادة معاهوم راه غير دابا تهدييت
غزلان:ههه كتعتارفي
أسماء:اوا شنو ضروري نقول الحق
بقاو مجمعات ولبنات تيعاودو ليها على يامات زمان ومحمد طه كيف كان وهي تسمع ليهوم تااجاهوم نعاس وناضوو لبنات بزوج مخلين أسماء تنعس...
طلعات غزلان لسطح تبدل الجو ومع حلات لباب بان ليها محمد طه واقف بسروال بيجامة وتيشورت عاطيها بالضهر... تنهدات وقربات جهتو تاوقفات جنبو وشافت فيه بخفوت:شكرا
محمد طه:(بنفس لخفوت) علاش تتشكريني
غزلان:(تنهدات) حيت جبتي ليا حقي
محمد طه:(شاف فيها بهدوء) داكشي علاش سكتي وماقلتيهاش كون ماسمعتكش بالصدفة مكنتش غانعرف
غزلان:حيت مكنتش باغا نوض الصداع ونتا أصلا عصبي دغيا تتشعل ماعندكش مع حاجة سميتها لحواااار
محمد طه:(بسخرية)عندي هاد الساعة غير مع لح*واااا
غزلان:هاا شفتي علاش مكاندويش معاك حيت نتاا غادي ديما عوج واش حنا تاندويو فحاجة ونتا جابد حاجة خرااا
محمد طه:(ضار جهتها وقال ببرود)ماالي كدبت عليك ؟ أنا هاكا طبيعتي ماغانجيش ونبدلها
غزلان:(بخفوت) ولكن ماكنتيش هاكا قبل ماتموت جيدااء
زفر بصوت مسموع وضار شاف قدامو مدة وهو ساكت تاقالت مغايجاوبش ودابا غايكون تيفكر فيها هي... ندمات علاش جبدات سيرتها ولكن بلاهواها لقات راسها جابدة سيرة جيداء وهضرة أسماء لي عاودات ليهاا عليها وعلى محمد طه وصداقتهوم خلات الغيرة تشعل فيهاا... كمشات حجبانهاا ويالاه كانت باغا تحرك تمشي بحالها وهي تسمعو نطق بهدوء:جيداء تربات معانا ملي كنت صغار وهي معانا كانت هي ورحيل مكيتفارقوش وكانت كبر مني...كانت ضريفة بزاف وهبيلة لي فقلبها على طرف لسانها وحاجتها ماشي ديالهاا وحنينة... موتها غفلنا كاملين وتاحد فينا مكانش متوقعو
كاتسمع ليه بالسكات وهي تاتعض على شفتها كابتة داك الشعور لي حاسة بيه... ماحملاتش تسمعو وهو كيعاود على شي وحدة بداك لهدوء والحنية ويوصفهاا واخا هاد لوحدة ميتة ولكن القلب فاش كاتشعل فيه لغيرة كيولي يهووودي... زيرات على يديها وبقات تتشوف قدامها ومانطقات بتاحرف تاتلوم راسها حيت جبدات هاد السيرة لي حرقات دمها فهاد الليل
محمد طه:(شاف فيها) جيداء عمرنا نساوها حيت كانت وحدة مناا وغير تهنااي حيت قلبي دابا ولى باغيك نتي (تنهد) ونتي لي نسيتيه فشنو داز عليه وخليتيه يولي يبغي من جديد
غزلان:(ببرود) يمكن يكون هادشي لي تتحس بيه من جهتي غير ولف (شافت فيه) تيگولو لحب لول عمرو يتنسى وهادشي لي بان ليا ونتا تتعاود عليها
محمد طه:(حرك راسو) هي عمرها بغاتني وأنا لي كنت تانحمق راسي (قرب جهتها) وكون كنت غير مولفك مكنتش غادي نحس بالعافية شاعلة فياا نهار عرفت داك خونا خاطبك ولكن من حقك ماتيقينيش ولكن لي طالب منك هو ماتحكميش ونتي معرفاااش أنا اش هاز من جهتك
غزلان:تصبح على خير
بغات تهرب من هاد لحوار لي عرفات راسها ايكون لصالحو ويالاه تحركات وهو يشدها وقال بجدية:علاش كاتهربي ياك نتي لي بغيتينا نتحاورو
غزلان:لحواار معاك ماعندو فايدة دابا
محمد طه:(تبسم بخفوت) وهو بصح لحوار راه ماعندو باش يفيد وگلتها ليك الجبينة ديالي (غمزهاا بمكر وبكلام مقصود) ولكن هاداك لي تيشبهوو فالسمية هو لي محتاااج هاد الساعة...
هضرتو معاها تتنسيها فكلشي كيف طرا معاها دابا وهي شادة معاه الكلام وتتصاوب لعشاا تاسمعات حس زين لي داخل لكوزينة تايجر فصندالتو... ماهضرش معاها مشى نيشان هز قرعة دلما ومشا تايقلب على لكاس فين يكب لماا لي كان بارد ورحيل متبعة ليه لعين تالقاتو وحل ومالقاش لكيسان وهي تنطق بهدوء:راه لكيسان لهيه صبر نعطيه ليك
مدات ليه لكاس وكب لماا وحرك راسو ليها...
نوح:واش زين العابدين هاداك؟
رحيل:اه هو (شافت فزين) باباك تايسلم عليك
عطاهاا شوفة باردة مامسوقش ليها ولا لكلامها مخليها تادوي مع نوح... خرج غادي لصالة وتنشر فوق السداري شاعل تلفازة كيتفرج تادخلات لبخووشة دسيدرا لي كانت لابسة شورط قصير مع دباردور وغير شافتو مشات جرات لعندو تاوقفات جنبو وقالت بحماس:زينبيدين فين كنتي؟
عوج راسو متفرج محاسبهاش گاع واش كاينة وهي قربات كتر جهتو ومدات يديها مضورة ليه راسو تانتر يديه وقالت:زينبيدين واش مخاصم معايا؟؟
زين العابدين:حيدي
سيدرا:(بعناد) لامامحيداااش يالاه
بقات مربعة يديها واقفة على راسو وهو مامسوقش ليها يقتلك غير بلامبالاة ديالو...متفرج تاصونى تلفونو بنمرة "رحمة" وهو يخليها تتصوني تاقطعات لمرة لولة ورجعات تاني تتصوني عاد جاوب ببرود:ألو
رحمة:لحبيب ديالي لباس عليك
زين العابدين:مزيان
رحمة:وباباك لباس عليه وخوتك تاهوما توحشتكوم احبيبي والرياض بلابيكوم خاوي
زين العابدين:مزياان
ماعندوش مع شي حاجة سميتها لهضرة والصواب الزايد ورحمة مولفاها فيه وماشي غير هي گاع لي عارف زين العابدين عارفو قليل لكلام وماشي اجتماااعي بحال باه لي تبارك الله فيما مشيتي تسول عليه تلقى الناس عارفة ولد لحاج... تنهدات رحمة وقالت بحفوت:واش باباك كاين حداك
زين العابدين:لا فالفيرمة
رحمة:اه صافي اولدي تهلى فراسك واخا وبوس ليا خواتك بزاف
زين العابدين:واخا
قطع معاها ورجع داير يديه تحت راسو متفرج وسيدرا بقات واقفة تاتشوف فيه تاعيات وطلعات لسداري لي نيت متكي فيه وبجكارة لاحت رجليها فوق راسو وهو ضار جهتها بزربة مخنزر وشد ليها رجليهاا جارهاا منهاا وقال بنرفزة:اتريحي ولانفلعص مك
سيدرا:(خرجات ليه لسانها) نااءح زينبيدين شنو هي نفلعص مك؟
زين العابدين:ريحي
رجع متكي وهي وتگول واش هدات كل مرة تلوح رجليها ليه ويضور يخنزر فيها وهي تاضور عينيها بحال لببوشة... باغي يعطيها شي دقة باش تريح ولكن مرشقاش ليه عليهاا...
بقاو هاكا تادخلات رحيل جايبة معاها لعشاا حطاتو فوق الطبيلة وقالت بهدوء:سيدرا اجي عاونيني امامي جيبي طبااسل لي حطيت ليك لهيه(مشات سيدرا تتجري ورحيل شافت فزين) واخا تجي تعاوني نزل خوتك باش نتعشاو
زين لعابدين:(بنظرة باردة)لا
رحيل:(ربعات يديها وهزات حاجبها) ولايني راسك قاصح احفيد الحاج ولكن مع من نتاا يالاه نووض عاوني (جبدات تلفون من جيبهاا وقالت باستفزاز) ولانعيط لباك
زين العابدين:(باستفزاز مماتل)عيطي
هي مكانتش نيتها تعيط ويستحيل تجبد ليه الصداع وغير كانت باغا زعمة تلوي ليه دراعو حيت عارفة نقطة ضعفو ولكن هاد لولد تيحدهوم ليها... فكرها غير فيامات ريان وعنادو ولكن بعدا ريان مكانش كراكتيرو بحال هادا لي جالس قدامها فريگو...
رحيل:واخا نعيطو ليه
بقات تتخربق فتلفونها زعمة راه غاتعيط وفاش شافتو جالس مربع ماتحرك ماتالعبة وهي تشوف فيه وزفرات:وانووض خلاص عاوني مالك معكس
جات سيدرا جايبة طباسل وتتمشى بشوية عليها حطاتهوم فوق الطبلة وقربات جهة رحيل:مامي نعاونك أنا؟
رحيل:خص يعاوني هو باش نزلو خوتك
سيدرا:اه نزلو إيسو وسوسّة مامي يالاه زينبيدين يالاه
تاتجر فيه ورحيل غير تتشوف تابان ليه نااض وزول يد سيدرا بنترة وتحرك تخطاها وهي تابعاه...طلع لفوق ومادخلش تادخلات هي عاد تبعها وهز إسحاق لي بان بين يديه بحال شي نملة... نزلوهوم لتحت وتجمعو جميع على لعشاا وسيدرا لي مجمعة مع مها أما داك لمتوحد غير ساكت تياكل ويلوح عينو فتلفازة...
رحيل:غدا مكايناش قرايا يعني غانوضو معطلين (شافت فزين وتبسمات) تتبغي تفطر بشي حاجة سبيسياال نوجدها ليك؟
حرك راسو بلا وسيدرا ربعات يديها معاجبها حال:مامي ماسولتينيش أناا؟
رحيل:عارفة نتي امامي باغا لكريب بشكلاط ياك
سيدرا:(بغيرة)اه وماتسوليش زينبيدين سوليني غير انا بوحديتي
ضحكات رحيل على غيرة بنتهاا وكملو عشاهوم وناضت جمعات داكشي مخليا توينز مع زين العابدين تاسالات ونقات لكوزينة عاد رجعات باش ترضعهوم...عطات بضهرها لزين العابدين وبدات ترضعهوم تانعسو وهي تهز واحد فيهوم طلعاتو لفوق ونزلات على سعدها وعدها طلع تاني...
دارت روتينها الليلي وتسرحات بلاصتها ترتاح مور مانعسو توينز وسيدرا أما زين خلاتو باقي لتحت...
فاقت على لمسات يديه لي حاوطوها من لور وريحتو لي مخلياها تنهد عند بالهاا راه غير كاتخيلو تاحسات بدفء أنفاسو على عنقها وبصوتو لي همس ليها:راحتي
~محاولتك أن تجعلني سعيدًه ، تُسعدني أكثر من الشئ الذي فعلته~
ضارت بزربة جهتو ممتيقاش ومع شافتو
متكي جنبها وباقي بحوايج الخروج تبسمات تابانت ضرسة لعقل وتخشات فصدرو معنقااه...
رحيل:نوحينوو توحشتك
نوح:(تايلعب بشعرها) هاني جيت الفتنة ديالي (تحدر شاف فيها) ليلة وماقدرتش نبعدها عليك
رحيل:(تعلات باستو فشفتوو بالجهد) كون تشوف أناا من صباح نتقلب وبزز باش غمضت عيني
نوح:(قرصها فجنبها) نوض ندوش ونجي
رحيل:تعشيتي؟
نوح:تت
رحيل:(ناضت بزربة) غانوض نوجد ليك متاكل باش تشرب دواك
نزلات بفرحة مسيعاهااش توجد ليه مياكل هو لي دخل لحمام يحيد عليه لعياا ديال الطريق لي طحن على قبلهاا باش ماتباتش بوحدها واخا باقي مسالاش خدمتو ولكن خلى بّاسالم يتكلف بلي بقاا ورجع...خرج من لحمام تايمسح شعرو بفوطة وملوي عليه فوطة خرا...لبس عليه بوكسور ورش ديدوغون تحت باطو وعلى صدرو وتمشى جهة نموسية تكسل فيها تاجات رحيل جايبة ليه لعشاا وعصير طبيعي بلاسكاار... تعشاا وشرب دوااه وتخشات معاه رحيل وبقاو مجمعين وكل مرة يخطف منها بوسة فشي قنت تاااغمضو عينيهوم ناعسين بزووج...
***
جالسة فالجليسة دلقصب تاتشرب قهوتها وعقلها سارح تاتشوف فالرياض لي خاوي ومابقاش فيه لحس كيف كان قبل... بصح مكانش نوح تيعمر الرياض وأغلبية كيسافر ولكن على الأقل كانت كاترتاح وطمن حيت عارفة ولدها اخرتو يرجع لهنا ولكن دابا هو مشى وداتو لمرا كيفاش قالت هي... تبدل عليها ولدها ومبقاش كيف كان وفالحقيقة هي مبغاتش تشوف أنها هي لي غلطات وبلي المشكيل لي ناض تجبد بسبابهاا...
مراضيااش تعتارف أو بالأحرى مكاتشوفش راسها غالطة حيت تاتقول أنا مو يعني أنا لي عندي لحق فيه ولدتو كبرتو وتجي مراا برانية وتديه لياا وتقلبو علياا هادشي لي هي مبغاتوش خصوصا أن بعد موت ناصر وإسماعيل هي تعلقات بزاف بنوح ولقاتو داك السند لي عوضها على ولدها لي مات وراجلهاا... داكشي علاش متشبتة بيه بزااف وماتقدرش على غضبتو وبعادو حيت كيعني ليها لكتير... هزات تلفونها تتشوف فنمرتو باغا تعييط ليه ولكن حشمات وفلخر قررات ودوزات نمرتوو...
كيصوني تلفون تاقالت غايتقطع لخط عاد سمعات صوتو لي نطق ببحة صباحية:يمّاا
رحمة:(بصوت خافت مخنوق) ولدي لحبيب
نوح:(بهدوء) لبااس عليك
رحمة:(دموعها كانو على سبة وغير سمعات صوتو وسؤالو وهوما ينزلو مسرسبين) مالبااسش اولدي من نهار خويتي الريااض وأنا ماشي بخير
نوح:(تنهد) هاكا حسن ايمّا باش نتفاداو الصدااع والمشاكيل وتعيشي مرتااحة
رحمة:(حركات راسها بلا بحال لاكيشوف فيها) شكوون لي قال ليك انعيش مرتاحة بلابيك اولدي وااش عارف قيمتك عندي أنا مانقدرش اولدي نرتاح ونتا بعيد علياا ومامعاياش الريااض خاوي علياا بزاف نتا لي معمروو ومعاك تاولادك
نوح::كاين رؤوف وبيسان تاهوما غايعمروه عليك ايمّا
رحمة:كل واحد وبلاصتو (صوت شهقاتها كيتسمعو عالين وباين فيها مقصحة) بلاصتك راه عمر شي حد يعمرها كل واحد وبلاصتو عندي (بصوت حزين) كيفما بلاصة خوك نااصر باقي خااوية وحد ماعمرها لياا
نوح:(بخشونة) دعي معاه بالرحمة ايمّا
رحمة:كل ليلة تاندعي معاه هو وباك لي حرقتهوم فقلبي عمرها تطفى... ودابا حرقتك تانتا مامخلياانيش نرتااح اولدي معدباني فقلبي ومخلياا راحتي تغيب من نهار فقت ولقيتك مشيتي نتا أو ولادك وسمحتي فياا
نوح:(تنهد) لكلام ايمّا ماعندو باش يفيد دابا وزايدون أنا ماسمحتش فيك حاشا واش نديرهاا ولكن صداع الراس ولمشاكيل عياوني ايمّا والبعاد هو لحل باش تاوحدة فيكوم ماتهز من جهة لخراا نتي تعيشي مرتاحة وتاهي
رحمة:(ببكاء)أنا ماماك ومحتاجااك اولدي
نوح:(بجدية)تاهي مرتي ومت ولادي ايمّا وزايدون أنا عمري نخطيك وغانبقا نجي عندك نزورك ولابغيتي تجي لعندنا مغانگولش ليك لا الدار دارك ومغانسدش فوجهك لباب ونكون قليل الأصل
رحمة:وختك مغاتوقفش معاهاا فعرسهاا
نوح:(كمش حجبانو من كلامها) راه گلت ليك ايمّا مسمحتش فيكوم وختي راه غاتبقاا تحت وصايتي تانهار نزوجهاا لراجلهاا
رحمة:(بترجي) عفااك اولدي رجع لرياض هانتا شوف عمري نقلقك مزااال ولانخليك تغضب مني وتامرتك مغانبقااش نحاديهاا غير ارتااح ورجع لياا عفااك وماتخلينيش بوحديتي
نوح:(زفر النفس) نهار رجعت وسقت لخبار بلي جريتي عليها دويت معاك ايمّاا وگلتي نفس لكلام وشنو طرا من بعد ؟؟ واش كل مرة يبقا يطرا نفس البلان ونبقاو نعاودو نفس لكلام ؟ لمرة لولة دوزنااها وميكت وعطيت عدر ايمّا ولكن لامتى؟؟ تاديك بنت النااس راه عندها قلب وتتحس واخا مكادويش وتشطي ولكن كلامك كيقصحهاا(كمل بهدوء ورزانة) كون هي لي قللات حياها معاك وجبدات لعيب كوون كان ليا معاها كلام خر نتي عرفاااني مكانبغيش الظلم كيفماا نتي مّي هي مرتي وبزوج بيكوم مانبغي كلمة لعيب تگال عليكوم
رحمة:(بخفوت) واش مغاترجعش مزال؟
نوح:(تنهد) الله يدير تاويل دلخير ايمّا
القرار لي خداتو جاا بعد تفكير أياام ولياالي باش تاخدو... لحد الان ماعلمات حد وتاإسلام براسو مگالتهاش ليه وقررات تخليها ليه مفاجأة...نزلات تتقلب على باها تابان ليها جالس فوق السداري وشاد التلكوموند متفرج فالأخبار... قربات لعندو ونطقات بتبسيمة:بابا مسالي نهضر معاك؟
إدريس:(حرك راسو باه ونقص التلفازة) كانسمعك ابنتي
أسماء:فالحقيقة كنت باغا نعلمك بلي أنا صافي قررت نرجع لداري فكرت مزيان ولقيت بلي هاد لحالة مغادومش وبنتي إن شاء الله قريب تزااد وغايخصها تكون بين واليديها (تنهدات)هضرة مع إسلام قبل وهو ندم على تصرفو وعرف راسو غلط فحقي وطلب السماحة مني وأنا سمحت ليه وجيت دابا باش نعلمك بلي غانمشي ليووم لداري
إدريس:(بهدوء ورزانة) الله يرضي عليك ابنتي نتي عرفااني بلي باغي مصلاحتكوم ولاكنت سكت ومادخلتش بينك وبين راجلك حيت عارف بلي نتوما بزوج كباار وبعقلكوم وأكيد غاتخرجو بقرار لي غادي يكون مرضي ليكوم بزوج والأهم انكي فكرتي فبنتك واختاريتي مصلاحتها
أسماء:هادشي لي فكرت فيه ماباغاش بنتي تعيش فوسط لمشاكيل واخا نبغي نفكر فراسي وفراحتي مغانقدرش نكون أنانية ونسى مصلاحة بنتي (شدات يديه) وااش نتا راضي عليا ابابا
إدريس:راضي عليك ابنتي دنيا واخرة
تبسمات ليه وناضت باست راسو قبل ماتمشي عند تانيرت وتعلمها تاهي بقرارها وطبعاا ماطلقاتها تانيرت تاعطاتها نصائح وكلام لي غاينفعهاا...فرحات أسماء لهضرتها وحسات بيها كيفاش مهتمة بيها تگولي مها ماشي مرات باهاا... طلعات لبيتها وبدلات عليها حوايجها وشافت فساعتها ماعرفاتش واش غايكون فالدار ولا لا ولكن غاتمشي المهم عندها سوارتهاا وداكشي لي كاااين نزلات لتحت وطلبات من ريان ينزل ليها حوايجها وسلمات عليهوم وهي مساخيااش بيهوم...ولفات تفيق فدار باها وتلقى تانيرت موجدة ليها فطور ومفششاها وأي حاجة تشهاتها تلقاها مطيباها ليها...ركبات فطوموبيل باهاا وتحرك بيها ريان لدارها..
ريان:صافي نعلتي الشيطاان ورجعتي لزمانك
أسماء:ياك محاسدني السالوبار
ريان:من زيناتك نحسدك راه غانتهناو منك شوية الحشايشية
أسماء:(ضرباتو لقرفادتو)الله يعطيك غبارة السالوبار بيسان مسكينة تزرفات فيك
ريان:هييي أغيط وماتجبديش مون دكتوغ ديالي
أسماء:بزعطة
طريق كولو وهوما مناگرين كي القط والفار تاوصلها قدام لعمارة ونزل ليها بگاجها وطلع معاها تال لفوق
ريان:يالاه حلي لباب ودخلي باش نتحرك
أسماء:مغادخلش؟
ريان:تت عندي مايداار مرة خرا
حلات لباب وبان ليها الظلام مدات يديها وشعلات الضو وضارت لعند ريان لي دخل ليها الڤاليز وغمزها قبل مايمشى يرجع لدار... سدات لباب وعينيها على دارها لي مغاتنكرش بلي توحشاتهاا بزاف واخا دوزات فيها أيام قليلة ولكن ربات عليها لكبدة... كاتشوف فالصالة لي مقادة والحاجة لي نقصات فيها هي ديك لاڤيتخين لي كان تيحط فيها الشرااب مابقاتش...مشات تسكتشف شنو تزاد وشنو تنقص فدار تاوصلات لبيت لي كانت تاتنعس فيه ومع بغات تحلو لقاتو مطرق...كمشات حجبانها مستغربة ماعرفات علاش مطرقو...كملات طريقها تاتقلب وتامن التلاجة حلاتهاا وجبدات عصير بردات بيه عاد مشات لبيتها جارة لاڤاليز وضرباتها بتدويشة ديال لغدايد خرجات تاتشعل...جلسات تاتدهن فلحمهاا ولبسات بيجامة بحال كسيوة قصيرة ومقزبة مبينة ليه كرشهاا وشعرها صوباتو بوكلي ورشات ريحتها ودارت مك اب خفيف تتقاد ليه باغا تفاجأو... شافت فالساعة وقررات توجد شي عشيوة خفيفة وداكشي لي كان دخلات لكوزينة وجبدات لي غاتحتاج وبدات طيب وتوجد تاسالات وخلات داكشي تايجي وتسخنو...جلسات فالصالة وهي تتشوف فساعتها وتسنى فيه...تعطل على لوقت لي مولف تايجي فيه وجاتها عجب...بقات تسنى تاضربات لحداش دالليل وهي تهز تلفونها باش تعيط ليه وتسولو بلاماتگولها ليه ولكن صوت ساروت لي سمعات فالباب خلاها توقف وتلوح تلفونها تاتسناه يدخل تابان ليها داخل هاز حاجبو وغير شافها وهو يوقف بلاصتو مسمر مصدوم ممتوقعش يشوفها هنا وحس براسو بحال الاكيحلم... قربات جهتو وهي مبسمة ليه بهدوء:غاتبقا واقف تما كاتشوف فياا
إسلام:نتي رجعتي
أسماء:لابغيتي
إسلام:(تبسم وهو تيقرب جهتها وعنقها بالجهد) توحشتك بزاف ودار بلابيك كانت ظلام
أسماء:(بدلاتو لعناق) عرفتي بعدا بقيمتي؟
إسلام:(بعد عليها شوية ولكن باقي فحظنو مد يديه وحطها على حنكها) بزاف گاع
تحدر جهة شفايفها بايسها بوسة قوية مشتاقة خلاتها تجاوب معاه وتغمض عينيها عايشة اللحظة معاه ومغاتنكرش بلي توحشاتو تاهي... بعد عليها وهو كينهج وشاف فيها بعيون مشتاقة:غبرتي وزيانيتي علياا
أسماء:انا من ديما زوينة
إسلام:عارف (تبسم) اجي معايا تشوفي واحد المفاجأة درتها ليك
جرها من يديها غادي بيها جهة لبيت لي كانت مطرقة وجبد الساروت حلها ودخلات أسماء لي حلات فمها مجرد مالمحات لبيت لي كانت مجهزة لبنتهوم بأدق تفاصيلها
إسلام:(بحنية)مستني النهار لي نهزها بين يدي
ليوم الأحد عليها قررات تانيرت وإدريس يجمعو ولادهوم ويديرو ليهوم غديوة لي كانت من تحت يدين تانيرت لي حداگت وعلى الصبااح فاقت مشمرة على درعانها وناضت تتوجد وعاونوها رنيم وغزلان فتوجاد...
فالدار عند رحيل لي كانت واجدة ولابسة جليليبتها وكاتلبس فوليداتها لي بداو ملامحهوم كايبانو وماحدهوم كيكبرو تيبان بلي شابهين باهوم نسخة مصغرة عليه من لعوينات الزرقين ومن الشعير وتالحريفات... لبساتهوم وخرجات من بيتها غادة تشوف واش سيدرا سالات فاللبس ديالهاا..لقاتها مدابزة مع صدايف شوميز لي كاتلبس
رحيل:اجي نسدهوم ليك امامي
عاوناتها تاسالات ومشطات ليها شعرها وخلاتو ليها مطلوق ونزلات سيدرا لتحت وهي رجعات لبيتها لقات نوح جالس جنب وليداتو كيلعب معاهوم...
رحيل:(ربعات يديها)شفتيهوم ماحدهوم تيكبرو ماحدهوم كيشبهو ليك
نوح:بالسيف مايشبهو ليا نسيتي الفتنة شنو دوزتي علينا
رحيل:(ضحكات)هههه زهرك وشنو عطاك وهانتيجة گدام عينيك
نوح:(غمزها)تانعمرو لكريشة تاني ونشوفو لمن غايشبه
رحيل:(حركات راسها بلا) الله ينجيني نتكافى غير مع دوك الزوج لي مشيبيني سير تال واحد ست سنين ولاكتر وديك الساعة شوف تشوف
نوح:(حرك راسو ببرود) إن شاء الله يالاه خلينا نتحركو راه تعطلنا
هز شكارت دراري و إسماعيل تايلعب معاه وهي تابعاه هازة صاكها وإسحاق ونزلو لتحت تأنسطالاو بلاصتهوم بدون مايمشي معاهوم زين العابدين لي كان فلاصال... وصلو ولقاو أسماء جات تاهي وتجمعو كاملين رجال فصالة ونسا فصالة باش ياخدو راحتهوم ومع الصهد ورضاعة رحيل حيدات جلابة وبقات بكندورة ديال الدار....
رحيل:(تبسمات لغزلان) فرحت حيت درتي عقلك وبقيتي هناا معانا حسن ليك من السكنة بوحدك
غزلان:(تبسمات) ولكن واخا هاكاك ماباغاش نتقل عليهوم
رحيل:اشمن تقل الله يهديك راه نتي وحدة منا ماتقوليش هاكا
غزلان:يدير ربي تاويل دلخير
رحيل:اوا كاين شي جديد بينك وبين مودي
غزلان:تت مكاين والو هاد الساعة ماعرفتش باقي مخربقة وماقدراش نفكر وناخد قرار لي ماندمش عليه
أسماء:لاكنتي باقي تتبغيه بلاماتقصحي راسك حيت غاتجيبيها غير فقلبك ولكن قبل دوزيه من عين لبراا عاد تصالحو هههه
رحيل:سي متافقة معاهاا حكيه مزياااان وعاد تصالحوو باش مايعاودهاش
رنيم:وهانتي شكون بحالك لويساتك واقفين معاك لاتگوليشاااي لويساتي سوسااات هههه
رحيل:نتي بعدا جاايا نوبتك فين وصلتي مع لوسي واش كاين شي ولالفرشي
رنيم:حاليا باقي غير كانهضرو مع بعضياتناا راك عارفة وباقي ماجبدش معايا بلان ديال الزواج وتاأنا سكت ومابغيتش نبين راسي ملهوفة عليه
أسماء:مزيان لابينتي ليه راه ملهوفة غايضسر وغايبغي يطول غير هو ماتحليش ليه لمجاال راه تصااحيب عارفة اش فيه ونتي عارفة الراجل لالقى لي بغاا فالتصاحيب مغايفكرش فالزواج
رحيل:عندها لحق داكشي علاش عزيها تعزك وماتخليهش يتجاوز لحدود باش ماتندميش راه واخا لوسي مي ماكنعرفش كراكتيرو
رنيم:تاتخلعوني والله
رحيل:ماشي كانخلعوك مي تانقولو ليك الحقيقة ونصحوك أنا جربت التصاحيب فيامات زماان وصراحة عمري ضسرتو واخا راه كيبغي يضسر مي تانحبسو فبلاصتو وهادشي دايراه على قبل نفسي والله يسمح لياا على دوك الأيام
أسماء:أنا لي جربت وراه گلت ليك اش كاين ونتي وجهك
هادي هي جماعة لبنات فاش كايتلاقااو تايجبدو الضواسى ديالهوم وكل وحدة تعاود تجربتها ولاتنصح ورنيم تاتسمع ليهوم بأدان صاغية حيت عارفة مانصحوهاش تابصح تايعزوها ومعتابرينها وحدة منهوم وغزلان مشاركة معاهوم لحديت وتاتانيرت لي تاهي غادة معاهوم فلخط...تحط لغدا وتجمعو عليه وموراه جلسو يكملو جماعتهوم...
تاتلعب بتلفون رحيل لي كانت عطاتو ليها واحد ساعة...مكسلة فوق السداري بشورط ودباردور وشعرها مخربق بقوة التحنقيز لي حنقزاتو... وفنفس الصالة جالسة رحيل مع مها ولبنات تيتعاود تجابت رنيم صينية ديال أتاي وحطاتهاا فوق الطبلة
تانيرت:ديتي ليهوم ابنتي أتاي ولحلوة؟
رنيم:اه راه داه ريان ومحمد طه (تاتنش بيديها) أوووف الصهد غانموت
رحيل:(هازة فولارهاا تاضرب بيه الريح ولابسة غير گندورة ديال الدار خفيفة) ياربي تلطف العااافية ليوم
تانيرت:اوا هادا راه وقتو ابنتي
تتكب تانيرت أتاي فلكيسان وهو يتزاگل ليها وكباتو فالصينية وهي تنطق بعفوية لكلمة لي ديما تتخرجها فاش تاطرا ليها شي حاجة بالسوسية "تيبشيت مام"
رحيل:عنداك امي تحرقي
تانيرت:لا ابنتي
كبات ليهوم أتاي ورجعو تيهضرو وسيدرا رجعات تلفون لمها وطلعات لفوق فين كانو جالسين إدريس ونوح ودراري ومشات جهة نوح طلعات فوق ركابيه وجلسات وهو بدا يجمع ليها شعرها ونطق بهدوء:فين لاستيك ديالك
سيدرا:عند مامي
بدات ضور عينيها وهوما رجعو تيهضرو تاعلات يديها وحطاتها فوق حنك نوح ضورات ليه وجهو باش يشوف فيها وهي تنطق بصوت عالي:بابانو شنو هي تيبشيت مام "طبو* مك" سمعت تانيرت إينو گالتها...
إدريس لي كان تايشرب أتاي مع سمعها اش گالت شهق بالجهد تاشافو فيه الدراري مفاهمينش اش طاري...هو عارف ديك لكلمة اش تتعني حيت مولف تانيرت تاتگولها بزاف فاش كاطرا معاها شي حاجة فمها لاإراديين تايخرجها وسبق وسولهاا اش تتعني وشرحاتها ليه وهو عيى معاها ماتعاودش تگولهاا ولكن فمها حرايمي... وسيدرا هي مولفة الحاجة فاش مكاتعرفهاش تتمشي تسول وكيفما بغات تكون وشحال من مرة تتحط شي واحد فموقف محرج كيف طرا دابا وهي تتسول على ديك لكلمة باغا تعرفهاا...
نوح:(شاف فيها بجدية وهدوء ونطق)ياك گلت ليك شحال من مرة منعاودوش لكلام لي كانسمعوه؟
سيدرا:(ببرائة)أنا غير بغيت نعرف بابانو سمحلي
نوح:(حدر جهتها وكمل بنفس لهدوء) ماعليش ابابا ولكن آخر مرة
حركات راسها باه وتركنات حدا نوح لي كمل كلامو عادي بحال لاماسمع والو وإدريس دار السبة بلبراد باش يسخنو ونزل لتحت مصوني على تانيرت لي جات لعندو ومع دخلت لكوزينة سد لباب ونطق بجدية:شحال من مرة قلت ليك اتانيرت ماتعاوديش تگولي ديك لكلمة
تانيرت:(مفاهمة والو)اشمن كلمة؟
إدريس:لكلمة لي خصني نكويك عليها (حمر فيها الشوفة) سيدرا سمعاتك ومشات لعند ولد لحاج تتسولو اش تتعني
خرجات تانيرت عينيها وضربات جنابهاا وبدات تولول مصدومة:اويلي اويلي اويلي على غدايدي وشوهتي مع نسيبي ويلي ويلي
إدريس:هاعلاش تانگول ليك ماتبقاايش تگوليهاا ونتي والو فيما طرا شي حاجة تبداي علياا بيهاا
تانيرت:(جاتها لبكية بقوة لحشمة موقف محرج دبصح ومغايحس بيها غير لي تحط فنفس لموقف) ايمي حنا كيفااش غانشوف فيه دابا
إدريس:(تنهد) شتي مكاتسمعيش لهضرة (جاتو الضحكة وقهقه بخشونة)
تانيرت:(مفقوصة)كاضحك علياا يااك واش أنا فين ونتا تاضحك (ضرباتو فصدرو)
إدريس:(حضنها وهي تخشات فيه) شفتي النخشيشة حطاتك بوجهك مع نسيبك
تانيرت:تانگول ليك هاديك ضرتي مكتيقنيش ولكن ابلاتي دابا نقرصها على هاد الفعااايل لي فيهااا...
شبع عليها إدريس ضحك قبل مايرجع لعندهوم وهي بقات غير تتفكر كيفاش غاتشوف فيه مزال...رجعات لصالة وغير قشعات سيدرا وهي تمشي ليها نيشان وطلعاتها معاها بقرصة بين فخادها تاغوتات سيدرا وبدات تبكي
تانيرت:(حمرات فيها الشوفة) شحال من مرة تانگول ليك ماتبقاايش تعاودي الهضرة لي تتسمعي مناا لشي حد
رحيل:اش واقع؟
تانيرت:(عاودات ليها) شوفي لبرهوشة فاش حطاتني
رحيل:(خنزرات فسيدرا) ياك تانگول ليك ماتبقاايش تعاودي لهضرة كيفما كااانت واش باغا نوض نصليها معاك ولاندير ليك لفلفلة لداك الفم
تانيرت:مافهمتيش لحاجة جي سوليني أناا لي گلتهاا
تخشات سيدرا بين لمخاد تتبكي وبقا فيها لحال بزاف وتانيرت بدات تاتهضر وتخاصم عليهاا...
رحيل:تاديريها وتبكي وحد ماظلمك
أسماء:صافي خليوهاا مدارتهاش بلعااني
تانيرت: راه ماشي غير فهادي راه دارتها شحال من مرة ودوينا معااها وهي والو مكاتبغيش تووب مشوهااني مع ولد لحاج فين غانحط وجهي دابا معاااه
رحيل:صافي اماما نساااي وبلاماتهزيها ملين تقااالت وزيدي نوح غايكون نسى ومغايديهاش فهاد لكلام
جلسات تانيرت وهي تاتنهد وتسوط وسيدرا ناضت تاتشهق خرجات من الصالة... بقاو مدة كيدويو وينسيو تانيرت فشنو طرا وجبدو لكلام على خطبة ديال ريان وبيسان وتانيرت دغيا نسات وبدات تهضر معاهوم وتگول اقتراحها وطبعا القرار الأخير راه لريان وبيسان...
رحيل:أنا من نظري نديرو خطبة بين لعائلات ويركبو لخواتم وديك الساعة يديرو لعرس
أسماء:يقدر هي تبغي تجمع كلشي دقة وحدة
رحيل:ماعرفتش ماهضرتش صراحة معاها وسولتها لهضرة مع ريان بلاتي نعيط ليه
صونات ليه ونزل عندهوم ضاحك وجلس جنب مو ونطق:اش بيتوني
رحيل:كنا تانهضرو على العرس ولخطبة ديالك نتا وبيسان مكاين لاش نبقاو مأجلين ونتا وياها مفاهمين
ريان:(بجدية) راه دويت معاها وسولتها اش باغا دير وهي گالت ليا تشاور مع خوها ومها وديك الساعة تعطيني جوابها
تانيرت:ونتا اش باغي دير واش باغي الخطبة بوحدها ولعرس بوحدو
ريان:صراحة ماعندي مشكيل الواليدة لمهم نتزوج بيها
تانيرت:(ضرباتو فكتفو وقالت بصوت ضاحك)الله يمسخك البرهوش
رحيل:ولعرس غاديروه كبير
تانيرت:أول مرة ولدي يتزوج ضروري ندير ليه عرس كبير ومطرطق
رحيل:هانتا شكون بحالك اريان
أسماء:اااح غانشطو تاني ولحيوح
رنيم:,من دابا نگول ليكوم غانكري تكشيطة فلخضر
ريان:(ريشها) غاتولي بحال شي جرانة هههه
رجع ريان لفوق وتانيرت تفكرات سيدرا وتنهدات عرفات راسها قصحات معاها فاش غوتات عليها وضرباتهاا وناضت تقلب عليهاا باش تراضيهاا حيت حسها غابر... طلعات لفوق تتقلب عليها ولكن مالقاتهاش وعيطات لإدريس سولاتو واش جالسة عندهوم وگال ليها مشافهاش... نزلات تاني لتحت تتقلب وتگول واش بان ليها الأتار فدار وهنا قلب تانيرت قفز من بلاصتو بلخلعة وخلاص فاش لقات لباب ديال الزنقة محلول تما حسات بقلبها غايسكت والدوخة شداتهاا من لفكرة لي طاحت فبالها..
ماقدراتش تانيرت تخيل الفكرة وبلي سيدرا ممكن تكون خرجات من الدار... رجليها فشلو عليها وريقها نشف وبزز باش مشات جهة لباب تاطل وتشوف ياكماا كاينة تم تتلعب مبانتش ليهاا ولكن شافت شي ولاد تيلعبو لكورة وشيرات لواحد فيهوم تاجاا تايجري عندها وقاال:نعام اخالتي بيتي شي حاجة؟
تانيرت:واش شفتي شي بنت صغيرة خارجة من هاد الدار لابسة شورط ودباردور فالغوز بارد وطالقة شعرهاا؟
دري:لاماشفتش
تانيرت:عفاك اولدي سول الدراري لي معاك واش شافوهاا
مشى الدري سول صحابو ونفس الشي وهي صاف ماعرفات مادير...رجعات لدار ودخلات لعند لبنات لي كانو تياكلو لفاكية ويهضرو على لعرس وكل وحدة وشنو غاتكري ويوريو لبعضياتهوم تادخلات عليهوم تانيرت وجهها مسقطر من الدم شافوها تخلعو وناضو جهتها هي لي ماقداتش توقف مزال...جلسوها فالسدراي وجابو ليها الما دالسكار وشربوها وهي مغمضة عينيها وحاسة بقلبها غايخرج قلبات عليها الدار كلها ولبيوت والحمامات وعند الرجال مكاينااش وزيد لباب لي كان محلول خلاها تبغي تحمااق من لفكرة لي وصلات ليها...
رحيل:(بخوف)ماما مالكي اش واقع ليك؟؟
أسماء:باش تتحسي دابا واش شوية؟
غزلان:نعيطو لعمي إدريس؟
تانيرت:(بصوت متقطع) سيدرا
رحيل:(خرجات عينيها) مالها سيدار؟؟
تانيرت:(ببكااء) مالقيتهااش ابنتي مالقيتهاش قلبت عليها الدار ومبانتش ليا وباك قال ليا مشافهاش وماعندهومش فالصالة وملي نزلت لتحت لقيت الباب محلول (شدات راسها) غاتكون خرجات حيت غوت عليها وضربتها(بدات تلوم فراسها) أنا سباب حيت غوت عليها أنااا
رحيل قلبها ضرب بخوف من كلام مها وبنتها لي ماعرفات فين مشات خرجات من الصالة بلاعقل وبلازيف وبدات تتغوت وتعيط ليها:سيدرااااا سيدراااا
طالعة فالدروج وتتعيط ليهااا ومع وصلات لفوق سمعوها الرجال وأول وااحد خرج لعندها هو نوح لي سمع صراخها وتبعو إدريس والبقية وإسلام مع ضرب عليها بلازيف رجع لور وبقا فالصالة باش مايسبب تاشي مشكيل ليهاا... باركة غير داك لمشكيل لي خلى ديك الحساسية بينو وبين نوح...
نوح:(شدها من دراعها وشاف فيها بنظرات جدية وبنبرة قاصحة نطق) اش كاين ؟ مالكي طالعة لهنا وتتغوتي بسمية سيدرا
رحيل:(شدات فيديه وقالت بنبرة باين فيها لخوف وعينيها تغرغرو بالدموع) سيدرا مكاينااش هنا انووح ماما قلبات عليها ومالقاتهاش بنتي انووح مالقيتهااش
إدريس:(بخوف)واش قلبتو الدار كلها؟؟
رحيل:(تاتحرك راسها والخنقة شداها) قلباات ماما مالقاتهاااش ماعرفتش فين مشات غانحماااق اعباد الله
نوح:(كمش حجبانو)متأكدين قلبتو الدار كلهاا؟
رحيل:(حركات راسها باه تتبكي) لقات لباب محلول يقدر تكون خرجات
إدريس:لا لا سيدرا مغاديرهااش
نوح:ماقلبتوش السطااح
رحيل:(شافت فيه وهي تالفة) ماعرفتش
خلاها وطلع نيشان لسطح وهوما وراه مع دخل كمش عينو من الشمش لي كانت تتحرق وضور شوفاتو فالسطاح كااامل تابانت ليه مخشية حدا الضليلة جالسة فوق الحجيرة وحاطة راسها على ركبتهاا...تمشى بزربة عندها ورحيل تابعااه وقلبها ارتااح وبحال لاكبيتي مااا بارد على العافية لي شعلات فقلبها وطفاهاا...جلسات جنبها وعيطات بسميتها ساعة مجاوباتهاش...
نوح:(حط يديه على راسها ونده باسمهاا بحنية) سيدراا
هزات راسها وشافت فيه بشوفاات حزينين وقبل مايهضر حلات يديها وراتو لزباغاي ديالها وقالت بصوت خافت:سالاو لياا
شاف نوح فيديها ورجع شاف فيها هي لي كانت مقلقة وباين فيها باكية...هز دوك لزبغاي ومد يديه ليها تاتخشات فحظنو وتعلقات فيه... هزها ونزل بيها لتحت ورحيل وراه تاتنهد وتتشوف فسيدرا لي خشات راسها فعنقو... مع هبطو بيها لتحت وشافتها تانيرت وهي ترجع فيها الروح وناضت تتسول فين كانت وغير عرفات لزباغاي سالاو ليها وهي تسكت حيت عارفة كيف تتكون نفسيتهاا... شاف فرحيل وأشار ليها بعينيه تبقا وخرج بسيدرا لبرا..
إدريس:(مسح على وجهو وشاف فتانيرت) صافي ماتبقايش تلومي فراسك
تانيرت:مكانش عليا نغوت عليها ونضربها هي مكتمشيش بالضرب ولغوات كون شديتها ودويت معاها بلخاطر وشرحت ليها مكانتش غاتعاود
إدريس:ماعليش ماعليش (شاف فرحيل لي جالسة شادة راسها وقال بحنية) رحيل ابنتي (هزات راسها شافت فيه)راه ولد لحاج معاها غير تهنااي من جهتها
رحيل:(حركات راسها باه بدون كلام)
فالطوموبيل ديالو لي مبلاصيها جنب الدار كان جالس نوح وسيدرا جالسة فوق ركابيه...هاز بين يديه لحجرا ديال لزبغااي لي عندو فالطوموبيل حاطهوم سكوور...قادهوم ليها وركبهوم ليها ونطق بهدوء:مزيان ابابا؟؟
سيدرا:(حركات راسها باه)
نوح:(حط يديه على راسها وقال بنفس الهدوء) علاش طلعتي لسطاح وبقيتي تما؟؟
سيدرا:(بصوت خافت) حيت غوتو علياا
نوح:شكون؟
سيدرا:مامي وتانيرت إينو وقرصاتني (وراتها ليه) وغوتو عليا وأنا مادرت تاحاجة والله
نوح:(بجدية) ياك ديك لمرة گلت ليك الكلام لي نسمعوه مانجيوش نعاودوه قدام الناس حيت عيب وحشومة؟
عارف بلي لغوات والضرب مغايفيدوش وهو أصلا مكيستعملهومش مع زين العابدين يقصح معاه فالهضرة وغير بلكلام يخليه يندم ويعرف غلاطو وهادي طبيعتو وماشي غير مع زين إنما مع كلشي من غير شي ناس لي مكيفهموش بلهضرة وتيبغيو لغواات هادوك راه حالة خاصة...ملي هضر معاها شحال هادي على قضية لهضرة قالت واخا ومبقاتش عوداتها ولكن ليوم رجعات دارتها يمكن تصرفها كان بريء حيت لكلمة فاش سمعاتها مكانتش عارفة اش هي ومشات تتسول عليها عادي بحالها بحال أي ولد فعمرها غير هو لغلط لي دارت هو كان عليها تسول جداتها ماشي تمشي وتعاود لهضرة قدام الرجال وتاني غلط دارتو تانيرت لي عارفة سيدرا تبارك الله عليها مكاتخفاش عليها لحاجة ولاسمعات كلمة گلتيها وماعرفاتش اش هي ماتترتاح تاتعرفهاا... وهاد لغلط معظم الواليدين كيديروه مع ولادهوم تايبقاو يهضرو ومكيردوش لبال بلي لوليدات تايلقطو لكلام وتيبقاو يعاودوه ولاسولتيهوم فين سمعتيها يقولو ليك بابا گالها ولاماما گالتهاا...
كان ناوي يجبد معاها هاد لموضوع مرة خرا ويقصح معاها فلكلام بااش نيت تعرف بلي غلطات ونيت متعاودهاش قدام النااس...يمكن هاد لمرة جات غير فيه هو ومالين الدار ولكن يقدر لمرة الجايا تقولها قدام شي حد اخر براني...
نوح:(قصح معاها لهضرة) لاسمعتي شي كلمة وماعرفتيهااش سيري بينك وبين ماماك وسوليهاا هي بوحدها وهي غاتشرح ليك ديك لكلمة؟
سيدرا:(شافت فيه بعيونها السود لمبطنين وقالت بخفوت) صافي مانبقاش نعاود بابانو
نوح:( هز حاجبو) ديك لمرة هاكا گلتي لياا ولكن دابا نتي عاودتيها
سيدرا:(تتحك يديها مع بعض وجمعات شنافتها) لا مانعاودش مزال صافي والله
نوح:(بجدية) دابا حلفتي ولحلوف بالله ممعاهش لعب اسيدرا راه لاسمعتك مرة خرا عاودتيها غاندير ليك عقوبة تفاهمنا (حركات راسها باه بزربة واسترسل كلامو بهدوء) علياش تافقنا دابا؟
سيدرا:مانبقاش نعاود لهضرة ولاماعرفتش شي حاجة نمشي عند مامي بوحديتها ونگولها ليها
نوح:مزياان دابا تفاهمنا على هادشي
سيدرا:اه بابانو
جرها باسها فراسها وهي عنقاتو وحطات راسها على كتفو... حل لباب ديال الطوموبيل ونزل غادي لدار مور ماسدها... حطها حدا لباب وهي دخلات شادة فيه مع بغا يطلع سمع رحيل تتعيط ليه ولي كانت تاطل من الشرجم رادة ليهوم لبال تادخلو... دخل لوسط الدار لقاها جالسة فوق الكرسي وهازة إسحاق تترضعو..
رحيل:(شافت فسيدرا وقالت بهدوء) قاديتيهوم ليها
نوح:اه
سيدرا:(كمشات حجبانها) أنا غانمشي عند بّاديدي
طلعات لفوق ورحيل تنهدات وشافت فنوح لي واقف مكمش حجبانو فيها:مالك؟
نوح:(بصوت خشن)مالي؟ بعدا نتافهمو على لحالة لي طلعتي بيهاا لفوق بلازيف وزايداها بداكشي لي لابسة ؟
رحيل:(تنهدات) عقلي مكانش خدام انوح مع سمعت ماما اش گالت ومشيت نقلب عليها يعني ماشب لخاطري
نوح :(حك لحيتو وقال بخشونة) عيطي ليا نزل عندك ارحييل عارفة معانا لبراني (بنرفزة) مرة خرا متعاوديهاش راه مافيا لي يبقاا يتصاادع معاك على نفس لحاجة
رحيل:وصافي انوحينو راه قلت ليك اش كاين واه
نوح:وعلى هادشي راني ميكت ودوزتها
رحيل:(تبسمات) شنو قلتي لسيدرا من الصباح وأنا حاضياكوم من الشرجم
نوح:(هز فيها حاجبو وتحدر جهتها تاولى قريب ليها ونطق بصوت خافت كالفحيح) طليتي بهاد الحالة؟
رحيل:(ضورات عينيها كي المونيكة تاقشعات فولارها مليوح تما) لا كنت دايرة لفولار هاهو أصلا مغانطلش بشعري عريان ويلي حشومة
نوح:(شاف بعينيه فداك الفولار ورجع شاف فيها وقال ببرود) لاغير ديريها باش نقطع ليك داك السالف من الجدر
رحيل:(بدلع تاتشوف فيه وتسبل عينيها) وتسخى بيه
نوح:(بصوت خشن باح) هادي هي لمشكيلة مانسخاش بيه لاهو ولامولاتو..
يتبع...
التعليقات
لا توجد تعليقات بعد، كن أول من يعلق.