الجوهر الحر الجزء 34

صدرها كان تيطلع وينزل ويديها بزوج تلوااو على ضهرو معنقينوو بالجهد وراسهاا مدفون وسط صدروو.. كان مضور يد على نصها والتانية على راسها وعينو على داك لكلب لي غير شافو وهو يجلس كيلهث.. هز نوح عينو وهو مخنزر فداك الراجل لي واقف جنبو لابس سروال توب مع بووط وقميجة عامرين بالتراب وداير طربوش دلقصب..

نوح:(نطق بصوتو الرجولي الخشن وهو مخنزر فيه) علاش طلقتيه؟

قاسم:(هبط راسو)كنت باغي نقي بلاصتو داكشي علاش طلقتو ونتا تعيط ليا وخليتوو

نوح:(لعب بلسانو ففمو وعينو باقي مخنزرين فيه وقال بصرامة) ميات مرة قلت ليك ماتبقاش طلقو والناس فلفيرمة ديه ومن بعد نتفاهمو مزيان

قاسم:سمحليا اولد لحاج

قرب جهة لكلب لي ناض من بلاصتو تينبح ورحيل غير سمعاتو قفزات بين يديه ومشى تابع قاسم.. غير بان ليه غبر قاسم ومبقاش كيبان وهو يحرر جسمها لي كان مدفون وسط جسمو وهبط عينو على وجهها لي كان لفولار زلق ليها ونص شعرها باين ونطق بخشونة:مشى

هزات فيه عينيها وسرطات ريقها وقلبها باقي كيضرب.. هي مكتخافش من لكلاب ولكن فاش شافتو قداش وكيفاش كان تيشوف فيها وريوگو سايلين تخلعات وكرد فعل طبيعي هربات منووو.. مدات يديها وهي تترعش وبدات تترجع شعرها بزز مع ليد لخرى مگبصة.. بقا تيشوف فيها مدة وكيفاش معافرة مع داك الفولار وشعرها بيد وحدة وهو ينطق بجدية:بلاتي

شافت فيه رحيل وهو قرب مد يديه هبط ليها لفولار لي كان زلق وبدا كيدخل ليها شعرها بصباعو ورحيل لفرشات كيلعبو فكرشهاا من لمساتو لي كاتحس بيهوم فحنكها ملي كيرجع شعرهاا..

نوح:(بعد عليها ونطق بالتقالة) دابا مزيان

رحيل:(حدرات راسها)شكرا

نوح:(خشى يديه فجياب السروال التوني وتخطاها) اجي

تبعاتو وهي باقا كاتسترجع أنفاسها من الشي لي وقع وقربها ليه وكيفاش كانت بين يديه ودفئ حظنو لي خلاها ماتسخاااش بيه.. عضات على شفايفها فاش تفكرات داك لقرب وتبسيمة خفيفة على شفتهاا... بقاو غاديين تاوصلو لواحد لبلاصة فيها الشاريج كبير عامر بالمااا وبانت ليها سيدرا كاتلعب بلماا وإدريس جالس جنبهاا وراد ليها لبال لاطيح حيت الشاريج كان غارق وهو فين كايجيبو لماا ديال السقي.. هز إدريس عينو فرحيل ونطق بتبسيمة:جيتي مزال

رحيل:(شافت فنوح لي كان واقف جنبها ونطقات)اه كان واحد لكلب لهيه خلعني

سيدرا:(قربات جهتها ونطقات بحماس) فينووو مامي بيت نشوفوو

نوح:(حط يديه على راسها وقال بتبسيمة خفيفة)هاهو لهيه تانرجعو ونديك تشوفيه

سيدرا:شنو سميتو؟

نوح: ماعندوش سمية

سيدرا:(شدات فيديه وقالت بعيون تتبري)واخا نسميه أناا؟؟

نوح:(تبسم)اش غاتسميه؟

سيدرا:(حاطة يديها على راسها تتفكر تاقالت بحماس) ليو

نوح:(جلس قفازي قدامها وقال بتبسيمة)صافي مشات

سيدرا:(عنقاتو)واخا نديه معايا لدار؟

رحيل:ياك عندك إيڤاناا ولانتي باغا تدي كلشي وتسكنيه معاك

إدريس:(ضحك)ههه غاتشوفيه غير هنا ومغانديوهش

سيدرا:واخا بّا ديدي

إدريس:فين هو زين العابدين مبانش ليا گاع

نوح:غايكون غير هنا (جلس حدا إدريس)هو ماعزيزش عليه يبقا فبلاصة وحدة وراك عارف ممولفش هنا بزاف

إدريس:اوا الصبر وصاف تاريان كان بحاالو ولف كندا ومكانش باغي يبقا هنااا ولكن لحمدلله هاهو دابا دار عقلو

نوح:(شاف فيه وقال بخشونة) زين العابدين عقليتو وتفكيروو فشكااال اسي إدريس من صغروو قاااصح

إدريس:الصبر وصاف الدراري كيكونو شوية صعابين فالتربية ماشي بحال لبنات

نوح:(تنهد) داكشي لي كاين

إدريس:ياك باقي مدخلو لصال

نوح:اه عندو زوج دلِكوتش واحد فأستراليا والتاني هناا ولكن هو ولف لكوتش ديالو لي تم كيتفاهم معاه

إدريس:شوية بشوية غايبدا يولف وملي غاتبدا لقرايا خلاص مغايبقاش عندو لوقت لي يفكر فيه فشي سفر ياك بعدا داك صاحبو تاهو غايقرا هنا

نوح:(تبسم نوح وشاف فإدريس) هادوك الزوج راه مكيتفارقوووش اسي إدريس وغير هاد ليامات مشى فيهوم أمين لبلادو داكشي علاش هاداك لي عندي بقا بوحدو

إدريس:(ضحك تاهو)تاسيدرا هاد لعام غادخل تقراا ههه

نوح:(شاف فسيدرا لي كانت تاتلعب مع رحيل لي جالسة بعيد عليهوم شوية ونطق بهدوء) لقيتي لمدرسة فين غاتقرا؟

إدريس:باقي كانقلب راك عارف هي وضعها مختاالف على الدراري لي فسنهاا

ضار نوح جهتو باش يجاوبو وهو يسمع تلفونو صونى بنمرة بّا سالم وهو يجاوبو:بّا سالم اش كاااين؟

بّا سالم:(صوتو باين فيه مخلوع)ولد لحاج نتا فين؟

نوح:(مكمش حجبانو وبصوت خشن قال)اش كاين ابّا سالم

بّا سالم:(سرط ريقو)زين العابدين..

صوت لغوات والسبان ولمعيوور مخلي الناس تجمع عليهوم وكل واحد كيسول اش واقع وشنو طاااري.. بّا سالم واقف وعينو على الطريق لي غايجي منها نوح وفنفس لوقت كايحاول يهدن داك البركان لي على وشك الإنفجار ولي غير شادينوو بزز.. واحد الضربة باينة فحنكوو بدات تتزراگ وتحت عينيه تاهي.. والشوميز لي لابس مقطعة من جهة كتفو وشعررو الكحل مخربق.. غير شادينوو شي رجاال خدامين فلفيرمة وهو عينو على هاداك لي كان جالس ببرود فوق الكرسي مفرق رجليه وكيلعب بواحد الگرميط فيديه ديال الجلد وفيها واحد لبلاكة دالنقرة.. شعرو لقهوي طايح على عينيها ومغطي ديك الضربة لي فوق حاجبو ولي كانت تتسيل بالدم... بقا على جلستو تاسمع صوت نوح لي نطق بصوتو الجوهري وهو مكمش حجبانو:اش واقع هنا؟؟

قرب جهتو بّا سالم باش يشرح ليه شنو طرا وقبل ماينطق تسمع صوت داك السيد لي كان كيغوت وعينو على نوح: اش هااااد قلة الإحتراااام واش هاكااا تتعاملو مع كليااانكوووم هاااا

نوح:(هز فيه حاجبو ونطق بصوت جدي صاارم) اااالشررريف هبط صووتك ونتا تااادوي

كان مخنزر وعينو على زين العابدين لي كان باقي على جلستو ومتحركش ونطق بعصبية: ماعندكش لحق توريني اش ندير وزييييد هاااد قليل الأصل لي هاااز يديه عليااا ولكن والله تانربيه

ضار نوح جهة زين العابدين لي هز عينو مع كلام داك خوناا وهو مخنزر واحد تخنزيرة قاصحة.. وعاد قدر يشوف داك الدم لي كان نازل على حاجبو وفهم اش كااااين.. رجع شاف نوح فداك خونا وقرب لعندو وشنق عليه من لكووول مخنزر فيه وقال بصوت صااارم: قلة الأصل هي لي غانوررريك الازدتي شي كلمة خرااا

بدا لاخر كيمد يديه باش يزول يدين نوح لي لصق عليه وخلاه بحال شي دجااجة بين يديه..مكانش عارف اشنو لمشكيل ولكن ديك لكلمة لي قال ديال قليل الأصل ولي كان تيقصد بيه ولدو نرفزاتو وخلاتو مايقشعش قدامو.. طلق منو وهو مخنزر فيه ولاخر تيقاد فلكول دلاشوميز ونطق وهو كيجبد تلفونو:أنا غانسيفطكوم فين تربااااو

بدا كيخربق فتلفونو وهي تقرب جهتو واحد البنت خدامة عند نوح ونطقات وهي مخنزرة فداك خونا:سي السليماني هاد السيد لي قدامك كان تيتتحرش بياا أو ولدك هو لي دافع عليااا

🔙🔙

كانت جالسة فالبيرو تتراقب الخدمة تاحسات بشي ظل وقف قدامها وهي تهز راسها وتبسمات:وي سيدي اش حب لخاطر

مد يديه ونطق بتبسيمة:سميتي خالد

مدات يديها وسلمات عليه باحترام:متشرفين موسيو خالد اش حب لخاطر

كانت باغا تزول يديها ساعة هو شدها ليهاا وبدا كيحك إبهامو مع يديها فحركة خلاتها تكمش حجبانها وجرات يديها بالجهد وقالت بجدية:وي فاش نقدر نعاونك

خالد:باغي نتقيد فدورات التدريب (غمزها)

لبنت:(تتشوف فلبيسي) حاليا كاين نهار لخميس مع الربعة تال الستة هو لي خاوي

خالد:كانكون خدام مكرهتش يكون فلويكاند

لبنت:لويكاند كومبلي موسيو حيت أغلبية الناس ختاروه

خالد:(تكى على البيرو وقال وهو عاض على شفتو)تقدري تشوفي ليا كيف ديري ازين

لبنت:(باغا غير تصدرو)تفضل معايا

ناضت غادة سابقاه وهو تابعها من لور كيعبر فيها وفحركة جريئة مد يديه وقاسها فمؤخرتها وهي ضارت عندو وغوتات بعصبية:واااش نتا مريض حتارم راسك المررررض اش هاد التصرف الحيوااااني

خالد:(غمزها)شووو مالك الزين معصبة تكالماااي وبردي النفس فيك

مد يدو باش يشدها وهو يحس براسو تدفع من كتفوو ومع هز عينو جات بوكس لوجهو من طرف زين العابدين لي كان واقف من لول كيتفرج فلمنظر.. ناضت بناتهوم كومبة وتالاخر بدا يضرب ولكن زين العابدين كان عارف يحامي ويدافع على راسو ويدو تقيلة بحكم أنه من صغرو وهو داخل لصال وربى الجهد.. بدات لمدابزة ولبنت فاش شافت لقضية حمات مشات تعيط على الدراري وبّا سالم باش يجيو يفكو وبالفعل جاو وبداو يفكو فيهوم وشدو داك خونا وزين العابدين مد يديه بمعنى حد مايشدني وتاهوما ماقربوش ليه حيت ولد مول الشي.. جر زين العابدين كرسي وجلس ببرود ولاخر بدا يسب ويهلل مراضيش وباغي يقلب الگفة عليهوم..

🔜🔜

سرسبات ليه لبنت كلشي ونوح كيسمع وعينو على داك خونا لي بدا يضور عينيه مكانش متوقع المشكيل غايكبر لهاد الدرجة وباش ميبينش ليهوم قال بعصبية:نتي كاتلوحي عليا لباطل أنا مقربتش ليك نتي لي بديتي ضوري بيا وتقللي لعفة

تخطاها نوح بخطوات تقيلة وعينو على خالد لي كيشوف فيه تاوقف قدامو وهو يعطيه بوكس جهة كرشو تانزل لاخر مبهط راسو وشاد كرشو تيتوجع ونوح شدو من لكول مطلع ليه راسو ونطق بصوت جوهري:أنا غانوريك قلة لعفة (شاف فبّا سالم ونطق بصوت مرتافع) عييط لبولييس يجيو يديوه فين يتربى

وبالفعل عيط ليهوم بّا سالم ونوح خلى دوك الدراري يشدووه وهو قرب جهة زين العابدين وكمش فيه حجبانو ونطق بجدية:تهز من تم

ناض زين العابدين وقف قدامو ونوح طلع ليه شعرو وبان ليه حاجبو لي كان محلول والدم بدا يبس ليه... كمش حجبانو ولعب بلسانو ففمو وقال بخشونة:مقصح بزاف

زين العابدين:(ببرود) لا

نوح:(حط يديه على كتفو وقال بهدوء)سير لدار أنا نعيط لبيسان تجي تشوف ليك الضربة

حرك زين العابدين راسو ومشى أما نوح فجلس فلكرسي مربع يديه كيشوف فخالد... تاوصلو لبوليس لي جاو داوه ومشات معاه لبنت لي تحرش بيها هي أو واحد الدري باش تعطي إفادتها...

وصلات طوموبيلة إسلام لي تبع النعث لي عطاه إدريس ونزلو لبنات وعينهوم كيضورو على الدار ولبلاصة لي عمرهوم وصلو ليهاا.. قلبات أسماء وجهها جهة لباب لي تحل وخرجات منو رحيل لي كانت علماتها بوصولهوم.. تبسمات ليهوم ونطقات:على السلامة

أسماء:الله يسلمك

ريان:(قرب عند رحيل ودرعها)وهادشي زييين صراااحة فين يباااان لبلاصة لي مولفين نمشيو ليها

رحيل:وتاتشوف الجنان أو واحد لبلاصة فيها الشاريج اتحماق عليها

محمد طه:فين لواليد أو ولد لحاج

رحيل:بابا لداخل هو وماما

رنيم:(همسات ليها)هاداك ماشي ولد ولد لحاج

ضارت رحيل جهة زين العابدين لي كان راجع مكمش حجبانو وتخطاهوم بلامايهضر مع حد داخل لداخل..

رحيل:اه هو خليونا ندخلو

هزات أسماء صاكها وخدات تلفونها وبدات تتسيلفى تاقشعات إسلام وراها كان مهبط راسو على التلفون وقالت بنفخة:حيد نتا من تم راه مخسر ليا المنظر

إسلام:(شاف فيها وهز حاجبو ومجوبهاش)

أسماء:ييييخ على بشااار

دخلات بنثرة معصبة وهو مداهاش فيها ومبقاش كيعمر راسو بكلامها حيت عارف الادار فيها عقلو غير غايصدق داير شي حاجة ماتعجبهااش اللهم يبعد عليها ويعطيها النخال.. دخلو لداخل لقاو تانيرت فاقت وعينيها باقي مبوقين بالنعاااس ومنفوخين وجالسة جنبها سيدرا تاتحرك يديها على كرشها لمنفوخة تاشوية قفزات سيدرا ونطقات:ضرباااتني

رحيل:(جلسات حداهوم وقالت ضاحكة)هههه حس بيك

سيدرا:(تاتهضر مع كرش تانيرت)علاش تادير بيتيز؟

إدريس:(شاف فإسلام ولبقية)ماتعطلتوش بزاااف

إسلام:الطريق كانت مسرحة داكشي علاش (جلس حداه ونطق ) هاد لبلاصة زوينة بزاااف

محمد طه:شري شي فيرمة تانتا هنااا تجي ليها فلعطلة

إسلام:الاكانت شي وحدة فلبيع نشريها علاش لا

إدريس:غير سول ولد لحاج هو ينفعك

دخل نوح مع لباب دالصالة ونطق بصوت قوي:السلام أوعليكووم

ناضو الدراري كيسلمو عليه ولبنات غير حركو راسهوم ليه وصاف وهو جلس جنب إدريس لي نطق:ياك لباس اش وقع؟

نوح:(حرك راسو)واحد لمشكيل وتحل زين العابدين هنا

أسماء:اه فاش جينا شفناه

نوح:(تبسم ليه وشاف فإدريس)خود راحتك اسي إدريس انا جاي

ناض مخليهوم مجمعين بناتهوم ومحمد طه جالس مرجع راسو لور تاسمع تلفونو صونى وكانت كلثوم.. شاف جهة باه وناض خارج باش يجاوبها على راحتو..

محمد طه:الواليدة لباس

كلثوم:(بصوت باين فيه حزين) مالباس والو أولدي

محمد طه:(مكمش حجبانو)مال صوتك ياك لباس شكاين؟

كلثوم:(تنهدات وقالت بصوت مضيوم) نتا فين بغيت نشوفك

محمد طه:(باين فيه مخلوع)اش واااقع مالكي؟؟

كلثوم:(بصوت خافت نطقات)مك اولدي باغا تشوفكوم قبل مايدي مول الأمانة أمانتو

محمد طه:(هضرتها خربقاتو)مافهمتش

كلثوم:(بصوت حزين)مك فيها لكونسييير اولدي

لسانو عقاد عليه من الهضرة لي سمع ومبقاش قادر يخرج تاشي حرف وهو كيسمع بكااا كلثوم وشهيقها.. واخا دارت لي دارت تتبقا ماماه وباش يسيق خبار بلي هي فيها لكونسير جاتو قاصحة وبزاااف.. بقا شاد راسو ومعارف مايقول ولاشنو يخرج من فمو غير ساكت ويضور فعينيه تاسمع لخط تقطع وهو ينزل التلفون وبقا شادو بين يديه وعينيه ساهين فلعدم.. كلثوم بصح ماشي إنسانة مزيانة ودارت بزاف دلحوايج وأدات باه وتانيرت ورحيل وأداتو تاهو وختو ملي عرفو حقيقتها أو وجهها لخبيث ولكن باش تمرض بداك لمرض فهادشي مكانش يطيح على لبال.. بلاصة مايرجع لداخل خرج على برا يضرب فيه شوية دلهوا ونيت يهضم ديك الصدمة لي كانت تقيلة على لقلب.. قادوه رجليه جهة لباب لكبير لي كانت مسدود وبقا واقف جنبو متكي على لحيط ويشوف هنا ولهيه وعقلو خدام يفكر فماماه وتاباش يرجع يصوني عليها ويسولها كيفاش عرفات ويطمن على وضعها ماقدرش.. بقا جالس تما مدة طويلة تابان ليه ريان جاي جهتو وباين فيه كان كيقلب عليه.. وقف قدامو ومد يديه شد كتفو وزير عليه وقال بجدية فاش شاف ملامح وجهو مغيرين على قبل:مالك؟

محمد طه:(هز فيه عينيه ونطق بخفوت)لواليدة

ريان:(مكمش حجبانو)مالها؟

محمد طه:(بصوت مألم قال)فيها كونسير

خرج ريان عينيه وبقا غير كيشوف ومعارفش اش يقول تاهو.. ولكن فاش شاف محمد طه هبط راسو وعينو تغرغرو بقا فيه بالجهد ومالقى باش يواسيه من غير أنه يجرو ويعنقوو وديك التعنيقة بضبط هي لي كان محتاج محمد طه فديك اللحظة.. بادلو لعناق وتيحاول يحبس دموعو ومينزلهومش وريان غير معنقو ومقال تاشي كلمة.. بعد عليه محمد طه وقلب وجهو لجهة لخرا وريان نطق بهدوء:مزيان دابا؟

محمد طه:(حرك راسو)اه شكراا

ريان:مبناتنااش راك خوياا واجب عليا نوقف جنبك عارف بلي نتا دابا تالف بسباب لخبار لي سمعتي ولكن لي نبغيك تعرف بلي أنا معاك وأي حاجة بغيتيها غانعطيها ليك سمعتي

سكت ريان فاش سمع صوت لكلاكسون وبان ليه العساس حل لباب لكبير لي كانو واقفين جنبو وطوموييل من نوع رانج روڤر فلبيض داخلة.. كمش حجبانو كيدقق فلي سايگها وغير قشعها وهو يتبسم بلخف.. أما بيسان فبلاصات طوموبيلتها ونزلات وهي هازة صاكها وحلات لباب اللوراني جبدات منو واحد الشنطة صغيرة دليد هزاتها تاهي ودخلات لداخل بلاماتنتابه ليهوم حيت تفكيرها كان مع نوح لي كان فهاد اللحظة جالس قدام زين العابدين لي مربع يديه ساكت.. كيشوف فيه وفملامح وجهو لي هادية وباردة.. قرب يديه وطلع ليه شعرو لفوق تابانت الضربة لي يبس الدم ديالها.. هبط نوح عينو وشد ليه وجهو مقربو جهتو ونطق بصوتو الخشن لحنين: كاضرك بزاف

حرك زين العابدين راسو بلا ونوح نطق بصوت حنين وعينو فقلب عينين ولدو: الجيست لي درتي ليوم خلاني نفتاخر بيك واش عارف هادشي؟

هز زين العابدين عينو فيه ورجع حرك تاني راسو باه ونوح طبع بوسة على جبهتو ونطق بصوت جدي قوي: وغانبقا ديما فخووور بيك عمرك تنسى هادشي السبع ديالي

قطع حديتهوم الدقان فلباب وصوت بيسان لي نطقات وهي داخلة:نوح نتا هنا؟؟

نوح:(بخشونة)دخلي

دخلات لعندهوم وشافت فزين العابدين وحاجبو لي تفلح ونطقات بخوف:مالو كيفاش تضرب

قربات جهتو وجلسات بلاصة نوح لي ناض ليها ونطق بجدية:ديري خدمتك ابيسان

حلات بيسان ديك الشنطة لي فيها مستلزماتها الطبية وجبدات لگوانتي لبساتهوم وخدات إبرة فيها لبنج ضرباتها ليه فلبلاصة لي غاتخيط وهو بقا غير ساكت ماتحركش حيت مولف هادشي بسباب الكومبات لي كيلعب والدق لي تياكل فيها لحمو ولف وربى المناعة.. بدات بيسان تتخيط ليه وهي مكمشة حجبانها مع التفليحة كانت كبيرة شوية.. كملات ليه ودارت ليه فاصمة ونطقات بهدوء:غايخصك تشرب واحد الدوا أنا غانكتبو ليك أنوح باش تجيبو ليه

خدات لوغدونوس كتبات فيها الدوا وكشاتها وقطعات لورقة ومداتها لنوح لي شدها ونطق وعينو على زين العابدين:نزل لتحت وماتبقاش بوحدك هنا واخا

شاف فبيسان لي غمزاتو ونزل لتحت وهي ضارت عند زين ونطقات بحنية:مال حبيب عميتو مقلق؟

زين العابدين:(هز حجبانو ونطق ببرود) بغيت نعس

ناض من بلاصتو غادي لنموسية زول لغطا وتخشى فبلاصتو وبيسان بقات غير تتشوف وتنهد.. جمعات العدة ديالها وطفات الضو وخرجات مخلياه حال عينو فالظلام..

دازت لبيتها حطات فيها مسائلها وغسلات يديها عاد نزلات لتحت فين كان الكل مجموع ومعاهوم تاريان ومحمد طه لي واخا جالس ومبسم الاأنه باين فيه بلي مشطون وماشي على برجوو.. دخلات لصالة وهي مبسمة ونطقات بترحيب:أهلااا لفيرمة نورات بحضوركووم

قربات جهة رحيل لي ناضت سلمات عليها بلابيز عاد دازت سلمات مع لبقية ورجعات جلسات جنب رحيل ونطقات بتبسيمة:على سلامتك ماشيغي كيف بقيتي شوية؟

رحيل:حمدلله احبيبة

بيسان:دزولي مكانش عندي لوقت نجي نشوفك راك عارفة لخدمة مامخليا ليا فين نحك راسي

رحيل:باركة غير سولتي وعيطتي ليا هاداك هو الأهم

بيسان:(شافت فتانيرت)خالتي لباس كيف غادة مع لحمل؟

تانيرت:حمدلله ابنتي هاحنا معديين مع لوقت هه

بيسان:ياك صحيحة لباس بعدا

تانيرت:اللهم لك الحمد

بيسان:ونعم بالله المهم ماتغفليش على لكونطرول راه لحمالة فهاد اللاج مامعاهاش اللعب وزيدي تتباني ليا صفراا وسخفانة

تانيرت:(كانت حشمانة تهضر وتاخد راحتها قدام الدراري وإسلام ومن زهرها نوح مكينش) اوا لابدا شوية دلعياا

بيسان:ضروري ماخصك تشوفي الطبيب وتأكدي من السكر والطونسيون لايكونو طالعين وديري تحليل فقر الدم تاهو

تانيرت:إن شاء الله

سيدرا:(قربات جهة رحيل ونطقات بخفوت)مامي فيا جويعات

رحيل:(رجعات ليها شعرها ورا ضهرها وقالت بحنية)ياك امامي قبيلة قلت ليك كولي مزيان ونتي مبفيتيش

سيدرا:(تتشرح ليها ببرائة)حيت مكانوش فيا جويعات

بيسان:(تبسمات ليها)لفنووون لباس

سيدرا:(تبسمات ليها)هممم الفنون أنا لاباس

بيسان:(ضحكات من قلبها)ياختي على عسيلة وشحال زوينة اجي بوسيني

قربات سيدرا باستها فحنكها وبيسان شافت فرحيل:واش فيها الجوع؟

رحيل:اه ماكلااش مزيان

بيسان:اجي معايا

شدات يد سيدرا وداتها معاها لكوزينة فين كاينة جميعة هي ومرا خرا تايوجدو لعشا ونطقات:خالتي جميعة كاين ميتاكل؟

جميعة:لعشا ابنيتي باقي ماوجد ولكن لابغيتي نصايب ليك شي حاجة خفيفة تسدي بيها جوعك على ما يطيب لعشا

بيسان:(شافت فسيدرا وقالت بهدوء)شنو تبغي تاكلي؟

سيدرا:(هزات فيها عينيها ونطقات بهمس)بغيت حليب بشكلاط وكيك باركة

بيسان:(تبسمات لسيدرا وشافت فجميعة)عطيني كاس دلحليب بالشكلاط ولكيك الاكاين

جميعة:اييه ابنيتي كاين

مشات جميعة فيضات لحليب ودارت ليه الشكلاط وحطات لكيك لي بقا وسيدرا شافت فبيسان:واخا نديه لهيه عند مامي

جابت ليها بلاطو وحطات فيه الطبسيل ولكاس وهزاتو وسيدرا سبقاتها لصالة وجلسات جنب رحيل لي تبسمات لبيسان وقالت:شكرا عدبناك

بيسان:ولو مادرت والو هه بالصحة والراحة

هزات بيسان عينيها بعفوية قدامها وجات على ريان لي كان حاضيها من الصبح وغير شافت فيه وهو يتبسم ليه وهي هزات فيه حاجبو وقلبات وجهها عليه تاخلاتو يطلق ضحكة مجهدة وإسلام لي جالس جنبو نطق:مالك ياك لباس ؟

ريان:لا غير تفكرت واحد النكتة وصاف ههه

إسلام:(تحنى جهتو ونطق بشوية)هاديك خت ولد لحاج ياااك؟

ريان:اه علاش تتسول؟

إسلام:لا والو غير باغي نتأكدو

ريان:(تقاد بلاصتو)مناااش

إسلام:قلنا ليك والو اصاحبي مالك جلاخة

شاف ريان فبيسان لي كانت تتهضر هي ورحيل ورجع قلب عينيه جهة إسلام وهو هاز حاجبو وكلامو لي قال دخل ليه التناوي..

---

حل باب دلبيت ودخل بلحس تاوصل حدا النموسية فين ناعس زين وطل عليه لقاه مغمض عينو.. حط الدوا فوق الطابل لي حداه وقاد عليه لغطا عاد تحرك خارج من لبيت وغادي لبيتو لي كان جنب بيت زين العابدين.. حل لباب ودخل وهو كيزول فالقبية وغادي جهة لحمام.. ماخداش وقت بزاف وكان خارج ملوي على نصو التحتاني فوطة فلكحل وغادي جهة الدريسينغ كيمسح شعرو.. حط لفوطة فوق الكرسي وهز كالصو جديد لبسو ولبس سروال توب فلكحل مع شوميز فلبلوسيال كولها قصير..بدا يسد لعقادي تاسالا وخشاه فالسروال ودار ليه السمطة ومشط شعرو غير بيديه ورش ريحتو الرجولية ودوز يديه على لحيتو مشطها عاد جبد التقاشر لبسهوم ولبس سباطو وخرج من البيت نازل لتحت..

ويد فجيب السروال وليد الثانية شاد بيها التلفون داز لكوزينة ولقى جميعة كاتصاوب فالتريد ونطق بصوتو المبحوح:مي جميعة ياكما خصاك شي حاجة؟؟

جميعة:لا اولدي كلشي كاااين غير سير رتاح

نوح:(قرب جهتها وباس راسها ونطق بهدوء) الله يعطيك الصحة

رجع عندهوم لصالة لقاهوم مجمعين والطبيلة محطوط فيها براد دأتاي ولوز ولگرگاع والتمر ولحلوى لبلدية.. قرب جهة إدريس ونطق بتبسيمة خفيفة:سي إدريس ياكما نعستي

إدريس:(كيقشب)واعلى شوية وكنتي غاتلقاني سرحت لعجووول

نوح:(حك لحيتو)لاكنتي باغي تكى راه لبيوت لفوق خود راحتك

إدريس:لامرتاحين هاكا (شاف فتانيرت وسولها باهتمام) ياكما تبغي تكاااي

تانيرت:(تبسمات ليه)لا تاهاكا مزيان

ريان:(شاف فباه ونطق وهو مكمش حجبانو)من ديما الواليد كنبغي نسولك ولكن كنسى

إدريس:(شاف فيه وقال بجدية)اش كاااين؟

ريان:عمرك ماقلتي لينا كيفاش تلاقيت بولد لحاج وفين عرفتيه؟؟

"صدفة خيرٌ من ألف معاد..."

🔙🔙

بعض المرات الصدف كيخليونا نتلاقاو بأشخاص لي كيوليو من أعز الناس على قلوبنا.. نشاركو معاهوم فرحنا وتاقرحنا.. يوليو منا ونكونو منهوم.. ديك الليلة كانت سيدرا مريضة وكان خصها دوا داكشي علاش اضطر إدريس أنه يخرج ويمشي لفرماسي.. ركب طوموبيلتو وتحرك لأقرب فرماسيان حداهوم لي كان مسدود ونزل من طوموبيلتو غادي جهة الباب دلفرماسي فين كانو معلقين واحد لافيش ودايرين فيه لادريسة ديال لبرمانونس.. صورها ورجع لطوموبيلتو كيشوف لادريسة لي كانت بعيدة شوية .. حرك طوموبيل وشد طريق لفارماسي..غادي ومركز فالطريق تاحبسات ليه الطوموبيل وسكتات كمش حجبانو ونزل يشوف المشكيل ملاين.. وبحكم خدمتو كان عارف بلي الطوموبيل غايخصها ضروري تمشي لگاراج باش يصاوبها سد لكابو ورجع خدا تلفونو وسدها وبدا واقف جنب الطريق تيشوف الاكانت شي طاكسي دايزة تديه.. مدة وهو واقف وقليل فين كيدوزو الطوموبيلات مع كانت الثلاتة دليل ولحركة كانت شوية قليلة.. واقف تبانت ليه واحد لجيپ كاتسينيالي ليه وجايا جهتو تاوقفات جنب الطريق وتحل بابها ونزل منو نوح لي كان جاي جهتو بسروال توب فالنواغ مع شوميز بيضاا حال ليها زوج صدايف لفوقانين.. وقف قدامو ونطق بصوتو الخشن وهو داير يديه فجيابو:الشريف كاين شي مشكيل؟؟

إدريس:(أشار لطوموبيلتو)سكتات ليا الطوموبيل ومالقيت تاشي طاكسي هنا

نوح:(حك لحيتو ونطق بصوتو الخشن الهادئ) صعيب تلقى شي طاكسي فهاد لوقت هنا الابغيتي نقدر نوصلك فين غادي

إدريس:غادي لفرماسيان نجيب شي دوا ولبرمانونس كاين ف****

نوح:(تبسم ليه بالخف)زيد نوصلك

إدريس:الله يرحم الواليدين

تمشى معاه جهة الطوموبيل وركبو بزوج فصمت.. حرك نوح طوموبيل وشد طريق لبلاصة فين قال ليه إدريس لي تبسم ونطق بهدوء:كون ماوقفتيش ليا كنت غانبقا باقي حاصل لهيه الله يجازيك بالخير

نوح:(ضار شاف فيه ونطق بهدوء) آمين

مسافة الطريق وكان نوح موقف طوموبيلتو قدام لفارماسي وشاف جهة إدريس:وصلنا

إدريس:(حيد لاسانتوغ ونطق بهدوء)شكرا على التوصيلة ا..

نوح:(مد ليه يديه)نوح وتقدر تعيط ليا بولد لحاج

إدريس:متشرفين اولد لحاج معاك إدريس

نوح:مرحبا اسي إدريس

إدريس:الاعندك شي مكشيل فطوموبيل ولاحتاجيتي شي حاجة راه عندي گاراج ف*** مرحبا بيك عندي فأي وقت

نوح:(تبسم بالتقالة)بارك الله أفيك اسي إدريس

إدريس:مع السلامة

حل لباب ونزل غادي لفرماسي ونوح حرك طوموبيلتو مكمل طريقو..وكان هاداك هو أول لقاء بناتهوم لي كان صدفة تاحد مداير ليها حساب...

🔜🔜

كانو مركزين جميع مع إدريس لي كان تيعاود ليهوم ورحيل كانت مركزة بكل حواسها تتسمع ليهوم وهي مبسمة بلخف وكاتشوف نوح لي كان حادر عينيه تيلعب بالمگانة لي فيدو ومبسم بلخف تاهز عينو بالخطفة وشاف فيها وهي تزيد تبسم ليه..ماقلباتش شوفاتها وتاهو مبعدش عينيه عليها وبقا كيشوف فيها بنظرات ممفهومينش..

ريان:(نطق بمكر وعينو على بيسان)صدفة زوينة هادي صراحة

هزات فيه أسماء حاجبها فاش شافت شوفاتو لبيسان وضورات عينيها ليها لقاتها قلبات وجهها بطريقة مفروشة خلاتها تعيق بلي شي حاجة كاينة بين هاد الزوج..

أسماء:صراحة شي نااس تتكون معرفتهوم خير عليك وشي ناس تيكونو نحس عليك

قالت كلامها وهي تتمعني على إسلام لي فهم لمقصد ولكن مجاوبش حيت عارفها تتستاغل كل فرصة باش تحشي ليه لهضرة..

نزلات عينيها جهة تلفونها لي كان تيصوني وسرطات ريقها وقلبها بدا يضرب.. حبسات ليه الصوت وناضت من بلاصتهاا مخلياهوم مكملين الهضرة بناتهوم.. زربات خطاويها تاخرجات من لباب ديال الدار وبعدات عاد دوزات لخط ونطقات بصوت مرعود:ألووو

وصلها صوت رجولي معصب:عاااام باااش تجاااوبي

غزلان:(بدات تتعض فشفايغها)كنت فلحمام ماشفتش التلفون

نطق بسخرية:راه الوقت قرب يسالي وأنا مبقيتش غانصبر ليك

غزلان:(غادة جايا فبلاصتها وبصوت باين فيه لخوف)مانقدرش عفاااك ماطلبش مني حاجة بحال هادي

قاطعها صوتو لي كان باين فيه معصب:مغانبقاش نعاود هضرتي لي عندي قلتووو عندك زوج سيمانة بلحساااب سمعتي زوج سيمانات تسالي فيهوم لي عندك..

قطع لخط مخليها واقفة فبلاصتها ولبكية ولخووف شادينهااا حطات يديها على راسها ودمعتها نازلة وبصوت مضيوم نطقات:شنووو غاندير دابا ياسيدي ربي..

داز نهار زوين فلفيرمة لي فوجو فيه مع بعضياتهوم وشبعو تقشاااب.. ومع تعشاو وسالاو ناض إدريس ولبقية ودعو نوح لي اقتارح عليهوم يباتو ولكن حيت غدا الإثنين بداية الأسبوع ولخدمة فمكانش عندهوم كيف يديرو.. خرج معاهوم تال جهة الطوموبيلات لي كانو مبلاصين تم.. وقربات رحيل جهتهوم ولي كانت غادة جنب إسلام لي كان هاز سيدرا وداها لطوموبيل إدريس وعطاها لرنيم لي باش تهز حيت رحيل مغاتقدرش تهزها بيد وحدة.. سد إسلام لباب وسلم على نوح ومشى لطوموبيلتو ركب ورحيل قبل ماتحرك طوموبيل باها هزات عينيها لخضرين جهتو بان ليها واقف داير يديه فجياب السروال التوب لي لابس وبيسان جنبو متكية عليه وشادة فدراعو وهو باين فيه مركز مع كلامهاا.. تنهدات رحيل وحطات راسها على التكاية دالكرسي وغمضات عينيها براحة..

كل واحد فيهوم وتفكيرو فين مسافر بيه.. محمد طه لي كان مشطون على مو ولخبار لي سمع منها ولي خلاوه يتلف ويحزن ومن جيه غزلان ولابيل لي جاتهاا ولكلام لي تقال ليهاا.. كانت حاسة بيديها مربوطين وماعندها تاشي حل من غير تنفد اش تقال ليهاا.. زفرات النفس وضمات جسمهاا وعينيها على الطريق والضواو لي شاعلين فالشواريع.. دازت مدة وكانو الطوموبيلات بزوح وصلو لدار إدريس لي سكت طوموبيلتو ونزل غادي لباب لي حداه حلو وعاون تانيرت لي نزلات وهي مكمشة حجبانهاا ونطق ليها باهتمام:ياك ماكضرك شي بلاصة؟

تانيرت:لاغير بغيت نريح ضهري

نزل معاهوم تاإسلام لي غايبات عندهوم هاد الليلة ودخلو لداخل وكل واحد فيهوم مشى لبيتو وإسلام طلع مع ريان لبيتو باش يبات تم..

فبيت محمد طه لي جنب بيت رحيل كان جالس هو وأسماء مبعد مابدلو حوايجهوم وعينين أسماء على خوها لي كان باين فيه باغي يقول شي هضرة ولكن بحال الامتردد.. ربعات يديها ونطقات بهدوء:اش كاين امحمد طه علاش بغيتي دوي معايا؟

محمد طه:(حك لحيتو ونطق بصوت هادئ) لواليدة

أسماء:(قطعاتو أسماء بنرفزة)الاكان هاد لموضوع خليه تال غدا دابا راسي كيضرني وخصني نعس حيت غدا خدامة أوكي

محمد طه:(خنزر فيها)ريحي وخليني ندوي عارفك تتهربي من لهضرة على هاد لموضوع (كمش حجبانو) علاش مكادويش معاها وتتسولي فيها همم نسيتي بلي هاديك مك واخا دير لي دارت نتي خصك تسولي فيها وتشوفي ياكما خصاها شي حاجة

أسماء:(زفرات النفس)داك النهار دويت والاعلى لفلوس راني مرة مرة كنسيفط ليها شي براااكة وزايدون امحمد نتا عارفني مكنبغيش ندوي على هاد لموضوع حيت تيعصبني

محمد طه:(تنهد) هي عيطات ليوم و..(حدر راسو) منّا فيها لكونسير

أسماء:(رمشات عينيها ونطقات بعدم تصديق)اش فيها؟

محمد طه:(صوت باين فيه مدمر)كونسير اأسمااء

أسماء:ميمكنش كيفاااش (حطات يديها على راسها ونطقات وهي تالفة)باش عرفات شكون قالها ليها؟؟

محمد طه:ماسولتهاش ملي قالتها ليا تصدمت ولساني عقاد عليا وتلفت (شاف فيها بجدية)عارف بلي هي دارت بزاف دلحوايج خايبين وأدااات لواليد وخالتي تانيرت بزاف ولكن مغانقدروش نكروو بلي هي تتبقى لمرا لي ولداتنا ورباتنا واخا دير لي دارت غايخصنا نوقفو معاها فهاد الوقيتة ومانخليوهاش بوحدها

أسماء:(عينيها مغرغرين بالدموع) وشنو غانديرو؟

محمد طه:(شد يديها)غانمشيو عندها نشوفوهاا هو لول ونشوفوو مرضها ولكونسير لي عندها فإينا بلاصة وإلا خصها دير لعملية نعاونوها ونخلصوها ليها لمهم حنا نديرو لي علينا ومانخليوهااش بوحدها بحال إلا ماعندها حد

أسماء:وبابا فخبارو؟

محمد طه:تت ماقلتها لحد من غير ريان هو لي فخبااارو ونتي ولكن غانقولها ليه ومغانخبيش عليه غير هي ماشي دابا نمشيو بعدا ونشوفوهاا عاد نقولوها ليه

أسماء:هي باقي مع خازينو النار يااك

محمد طه:اه لمهم نتي سيري تنعسي وغدا أنا غانعيط ليها ونسولها ونشوفو كيف نديرو نمشيو عندها

أسماء:غايخصنا نتسناو تال لويكاند حيت لخدمة مزيرة عندي هاد ليامات

محمد طه:تاأنا بحالك لمهم يصبح ويفتح سير تنعسي

أسماء:تصبح على خير

خرجات أسماء من بيتو وهي حاسة بالضيم طايح عليها.. مارجعاتش لبيتها حيت رنيم وغزلان ناعسات تم نزلات لتحت لصالة وجلسات وسط الظلام بلاماتشعل الضوو ودموعها نزلو بلاسابق إندار.. حاسة براسها مخنوقة وبقات فيها مها بزااف ومكانتش باغا ليها هاد لمرضة وخصوصا لكونسير لي مجرد مكانسمعو بيه كايجي فبالنا حاجة وحدة وهي "لموت".. فمابالك الاعرفتي بلي مك هي لي فيها هاد لمرض.. بصح أسماء مبقاتش على تواصل بزاف بكلثوم بحال محمد طه ولكن تاتعيط ليها مرة مرة تسول فيها وتسيفط ليها لفلوس واخا أسماء عارفة بلي مها تتبغي محمد طه كثر منها وديما كاتلاحظ معاملتها معاهاا مقارنة بمعاملة خوها وكانت تتشوف لفرق وهادشي عاشت معاه وملي صرا لي صرا صافي أسماء بعدات عليها ونيت كلثوم مكانتش طالبة عليها وعمرها عيطات ليها ماشي بحال طه كاتعيط ليه وتتسول فيه ونهار لعملية شافتها كيفاش خافت عليه وكبفاش تعاملات معاها وهادشي خلاه تزيد تنفر وتبعد.. حدرات راسها وشهقاتها كيتسمعو خفافين وكلشي تجمع عليها فهاد اللحظة وخلاها تبكي وتفرغ داكشي لي فداخل ديالها عالله وعسى ترتاح.. تاتشعل الضو عليها فجأة خلاها تغمض عينيها وتحط يديها على وجهها مغطية دموعها..

كان نازل باش يشرب وفطريقو لكوزينة سمع صوت لبكا والشهيق خلاه يكمش حجبانو ويتبع الصوت لي جاي من الصالة وشاف خيال جالس ولكن مقدرش يحدد شكوون.. مد يديه وشعل الضو وهي تقفز فبلاصتها وغطات وجهها بيديها.. ملي شافها إسلام زاد كمش حجبانو ممتيقش المنظر لي كيشووف قدام عينيه.. قرب جهتها وهي غير حسات بلخطاوي ضورات وجهها وبدات تمسح دموعها تاحسات بيه وقف قدامها عاد ضارت وهزات عينيها لحمرين فيه ولي أثار الدموع باينة فيهوم..

إسلام:(كمش حجبانو) علاش جالسة هنا تتبكي؟

أسماء:(بهدوء) شكون لي قالك ليك كنت تنبكي احم غير دخلات ليا شي حاجة لعيني

إسلام:(هز حجبانو) وشنو مجلسك فالظلام ؟

أسماء:(ناضت من بلاصتها) نجلس فيما بغيت نتا شغلك

إسلام:(دقق فرموشها لفازگين ونطق بهدوء) مافيها باس الاعتارفتي بلي كنتي تتبكي مكاين لاش تكدبي

أسماء:اه كنت تنبكي عندك شي مشكيل

إسلام:(ببرود)لا بكي نتي وغوتي گاع ونطحي راسك مع لحيط ماشغليش فيك ضبري راسك

أسماء: اوا ديها فراسك وماتبقاش دخل شبوقات غيرك

تخطاتو غادة لبيتها وهي مرضيااش بالمنظر لي شافها فيه وبكاها لي كانت تتبكيه.. هي معزيزش عليها لواحد يشفق عليها وخصوصاً واحد بحال إسلام لي مكتحمل فيه شعرة ودم سنانها.. أما هو حرك راسو بلا حول ومشى لكوزينة عمر قريعة وداها معاه راجع لبيت ريان ينعس حسن ليه..

---

حلات عينيها على صوت لغڤي لي تيصوني جنبها وناضت تتكسل بيد وحدة وشافت جنبها سيدرا باقي ناعسة وهي تفوه وهزات تلفونها شافت فلادات لقات بلي باقي عندها سيمانة خرا دلكونجي على قبل لاكسيدون لي دارت.. زفرات النفس وبدات تحك شعرها وناضت لحمام طرفات حالتها وتوضات ورجعات لبيتها لبسات إسدالها وبدات تصلي مع غفلاتها لغڤي ومصوناتش ليها وقيتة دلفجر.. سالات وجمعات صلايتها وزولات عليها إسدالها وبقات ببجامة خفيفة قصيرة حد الركبة ونزلات لتحت فين كانت غزلان جالسة بوحدها ومتكية بيديها على خدها وليد الثانية شادة بيها التلفون وباين فيها ساهية.. قربات رحيل جهتها وجرات لكرسي:صباح لخير

مكانتش تتسمع ليها وأصلا عقلها مكانش حاضر داكشي علاش مجوباتهاش.. كمشات رحيل حجبانها وحركات كتفها تاقفزات وقالت بهدوء:فين سهيتي؟

غزلان:(تبسمات بزز) ماسهيت فين صباح الخير

رحيل:صباح النور (ضورات وجهها هنا ولهيه وقالت)كلشي مشى لخدمة؟

غزلان:اه كلشي وخالتي تانيرت فطرات ورجعات تكى حيت حاسة بلعياا

رحيل:ياكما مريضة؟؟

غزلان:شوية راه غاتمشي لعند الطبيب هي وعمي إدريس غير مشى لگاراج باش يشوف الخدمة تما

رحيل:اه واخا تجي تجمعي ليا شعري صهدني

ناضت غزلان وقفات جنبها وبدات تجمع ليها شعرها شفينجة ونطقات بتبسيمة:كانبغي ديما نسولك واش شعرك صبغتيه؟

رحيل:عمري درتها هاد لونو الطبيعي

غزلان:ماشاء الله تباركالله لونو زوين بزاف أصلا الصبايغ كيخرجو على الشعر وكيخليوه قاااصح وكيفقد اللمعان ديالو

رحيل:أنا من نهار عقلت عليه ولونو عاجبني وحتى طولتو هاكا

غزلان:(ضحكات)أنا كيعجبني نگرجو ههه دابا نيت حسيت بيه طوال بزاف

رحيل:كل واحد وفين كيرتاح صراحة

غزلان:نجيب ليك لفطور؟؟

رحيل:غير كويس دلقهوة تاتفيق سيدرا ونفطر معاهاا

ناضت غزلان غادة لكوزينة ورحيل حلات لبيسي ديال ماماها وبدات تتخربق فيه تاسمعات تلفونها كيصوني بنمرة رجاء لبنت لي خدامة معاها.. جوباتها رحيل بتبسيمة: أهلا بلالة لعروسة هه

رجاء:هههه اشمن عروسة يهديك الله صافي سالات ساعتي ههه صافا

رحيل:حمدلله ونتي بخير اش خبارك وشخبار راجلك

رجاء:حمدلله ازين دخلت من لكونجي وقالو ليا راكي درتي أكسيدون ياك لباس بعدا

رحيل:حمدلله دازت طريفة

رجاء:اوا على سلامتك بغيت نجي نشوفك ونطمن عليك

رحيل:اه مرحبا انا ف**** ملي توصلي غير صوني نخرج عندك

رجاء:صافي واخا يالاه تهلااي تانتشاوفو راه ياسر تايسلم عليك تاهو

رحيل:مرحبا بسلامو تانتي سلمي عليه

قطعات لخط تزامناً مع غزلان لي رجعات جايبة ليها لكافي وطبيسيل ديال لگاطو دوز بيه.. تبسمات ليها رحيل ونطقات بهدوء:شكرا ليك

غزلان:واش غايجي شي حد؟

رحيل: اه لبنت لي خدامة معايا غاتجي طل عليا واخا نعدبك توجدي شي كاسكروط خفيف اغيزو

غزلان:مرحباا شنو تبغي نصاوب

رحيل:لي كان شوفي نتي علياش قادة

غزلان:(بقات ساكتة مدة قبل ماتقول بهدوء) رحييل دابا الاجاب الله عرفتي بلي شي حد كدب عليك واش غاتقدري تسمحي ليه؟؟

رحيل:(شافت فيها بجدية) على حساب لكدبة الاكانت شي كدبة خفيفة نقدر نتغاضى عليها اه ولكن لاكانت شي حاجة كبيرة لا ابدا واش نسااامح

غزلان:(سرطات ريقها) والاشي حد كدب حيت بزز عليه؟

رحيل:مكيناش شي حاجة سميتها بزز اغزلان مغانقولش بلي حنا عمرنا كدبنا فحياتنا لاكنكدوب ولكن كيف قلت قبل كدبة لي تقدري تغاضاي عليهاا ولكن إلا كانت شي كدبة كبيرة لي نيتك فيها تسببي دمار ديال الناس وتخرجي ليهوم على حياتهوم فهادي مغاتقدريش دوزيها

غزلان:(تبسمات بزز ونطقات بضحك) قريت بوسط فالفايس وصراحة بالي تشطن مع مولاتو وفاش شفت التعاليق قلت نسولك تانتي ونشوف وجهة نضرك ههه

كملو هضرتهوم تارجع إدريس ومشى هو وتانيرت لكونطرول ديال الطبيبة لي عندها باش يطمنو على صحتها وصحة لبيبي..

كانت خارجة من السبيطار وشادة فيد إدريس لي كان مبسم وعينو على داك الإيكو لي دارت ونطق بتبسيمة حنينة:من دابا خصنا نقلبو على سمية ههه

تانيرت:(كاتنهج)ههه خلي سيدرا هي لي تختار ههه

إدريس:(حل ليها باب الطوموبيل ونطق بتبسيمتو الحنينة)أصلا هي لي خصها تختار

ركبات فبلاصتها كاتقاد لاسانتوغ وركب جنبها إدريس لي نطق:تانيرت إينو مشهية شي حاجة؟؟

تانيرت:(ضارت جهتو ونطقات وعينيها كيضورو بلاصتهوم)تشهيت ديك ملفااي اتسانو لي جبتي ليا ديك لمرة

إدريس:هي لولة ندوزو لمخبزة وناخدوها عاد نرجعو لدار

تانيرت:قالت ليا رحيل غاتجي شي بنت خدامة معاها تشوفوها

إدريس:مزيان

شدو طريقهوم لمخبزة وخدا إدريس ملفاي لي مشهية تانيرت مع حلوى دلكريم وشي تخربيقات وكملو طريقهوم لدار فين كانت غزلان موجدة لكاسكروط عطاها إدريس داكشي لي جابو ومشات تانيرت لعند رحيل فالصالة لي كانت ببجامة سروال ولفوقاني بالصدايف فلغوز بارد وجامعة شعرها وروايح كيتشمشو من بعيد.. وجنبها سيدرا لي لابسة تاهي بيجامة بحالها وجامعة تاهي شعرها كيف مها..جلسات تانيرت مبسمة جنبهوم ونطقات رحيل:أمضرا شنو قال ليكوم الطبيب؟؟

تانيرت:(تبسمات تاتهزو خدودها وبانت غمازتها)شنو كظني غايكون خوك ولاختك

رحيل:(بحماس)عندي زوج خوتي وتلاتة دخوتاتي وباش نديرو التعادل خص يكون ولد ههه

تانيرت:ونتي اسيدرا شنو تتقولي مومو بنيتة ولا وليد؟

سيدرا:(مدات شنيفاتها ونطقات تتفشش) مومو وليد

تانيرت:هههه اوا يالالة وجدو راسكوم لشنيولة لي جايا فالطريق ههه

رحيل:بنت هههه (شافت فسيدرا)غاتكون عندك ختيتو صغيرة

سيدرا:(ناضت من بلاصتها وضربات برجليها الأرض ونطقات بغيرة واضحة)مبيتهااااش أناا مبيتهااش

مشات تتجري لبيتها معاجبها حال ورحيل تنهدات وشافت فتانيرت لي كمشات حجبانها:هالي مبغيناااش

رحيل:مبغاتش بنت حيت خايفة تاخد بلاصتهاا ههه بنتي مغياااارة

تانيرت:وابزاااف گااع كانتفكر ملي تزاد لبنت كيفاش غاتعامل معاهاا الله ياربي تابعانا حرب مع ديك الضرة ههههه

رحيل:(سمعات تلفونها كيصوني وكانت رجاء)الو الزين

رجاء:رحيل أنا وصلت لفين نعتي ليا

رحيل:خليك تم أنا غانسيفط ليك بابا

رجاء:صافي صافي هامحمد طه بان ليا

رحيل:اوكي

ناضت تانيرت مشات لبيت تبدل حوايجها ورحيل بقات واقفة فالصالة وريحة البخور عاطية فالدار.. تحل لباب وتسمع صوت محمد طه مع صوت رجولي اخر خلاها تكمش حجبانها وفلبلاصة طارت غادة لكوزينة ولقات غزلان تتستف الحلوى البلدية..

رحيل:سيري شوفي شكون جااا؟؟

خرجات غزلان من الكوزينة ولقات محمد طه واقف فالصالة وبنص عين شافت شكون كاين عاد رجعات لكوزينة فين كانت واقفة رحيل تتعض شنافتها ونطقات:كاين واحد الراجل

رحيل:(مكمشة حجبانها)شكون هادا وصفيه ليا؟

غزلان:عندو لحية خفيفة وشعرو كحل

رحيل:عرفتي شنو سيري جيبي ليا الإسدال ديالي

مشات غزلان جابت ليها لي قالت عليه ورحيل لبساتو وغطات شعرها قبل ماتخرج لصالة وتشوف شكون ومع وقفات قدام لباب وهي تهز حجبانها ونطقات بهدوء:السلام اوعليكوم

رجاء:(تبسمات ليها بإحراج)اهلا صافا

رحيل:حمدلله مرحبا بيكوم (ضارت جهتو ونطقات بتبسيمة صفرا) أهلا زكرياء صافا

زكرياء:رحيل لباس

مد يديه باش يسلم عليها وهي تبسمات ليه بنفس الابتسامة الصفرا تاعاق براسو وجمع يديه عندو وجلس.. دخل إدريس لصالة لي مكانش ناوي ينزل ولكن فاش عرف بلي زكرياء كاين لابد ماخصو ينزل يدير الواجب.. سلم عليهوم وجلس جنب زكرياء وبداو كيدويو هو ومحمد طه ورجاء قربات جهة رحيل وهمسات ليها:سمحيليا مكنتش باغا نجي مع حد مي فاش خرجت تلاقيت بيه وسولني عليك وأنا من نيتي قلت ليه غادة عندك وهو يلصق فيا وناري عييت مانصدر فيه ساعة حلف لافهم ك*و

رحيل:(حكات حاحبها)ماعليش ارجاء ماشي لخاطرك

رجاء:كنت باغا نعيط ليك ونقولها ليك ساعة جا معايا فالطوموبيل ومكان عندي كيف ندير

رحيل: ماتلوميش راسك ارجااء

رجاء:عرفتي شكون سلم عليك تاهو

رحيل:شكون؟

رجاء:موسيو سعيد هههه

رحيل:(عوجات شفايفها)مرحبا بسلامو

دازت لجليسة لي ماقدراتش تاخد فيها رحيل راحتها بحضور زكرياء لي عينيه منزلهومش عليها ومرة مرة يلوح ليها شي هضرة باش يفتح معاها لكلام.. وفاش وصلات لوقيتة ناضت رجاء ودعات رحيل وناض تازكرياء سلم عليهوم أو خرجات معاهوم رحيل تال لباب ومشات رجاء فطوموبيلتها وزكرياء شاف فيها ونطق بتبسيمة:فاش سولت عليك رجاء وعرفت لي طرا معاك خفت عليك بزاااف ولكن حمدلله ملي شفتك على خير

رحيل:(هزات فيه حاحبها) شكرا عدبتي راسك اخويا زكرياء

زكرياء:(بدون سابق إندار نطق)رحيل فالحقيقة نتي كتعجبيني بزاف..

تلميحاتو ليها كل مرة جاتو فرصة وشافها مخلينها تعرف اش تحت راسو وكانت ديما تدير حدود فتعاملها معاه وكلامو باش هو يفهم راسو ويبعد.. وليوم بكل وقاحة واقف قدامها وتيقولها ليها بلاحشمة بلاحياا.. هزات فيه حاجبهاا وعطاتو واحد النظرة خلاتو يجمع ديك الابتسامة لي داير ونطقات بصوت بارد: هاد التصرفات وهاد لكلام ماتيعجبونيش داكشي علاش غاندير راسي ماسمعت منك تاكلمة لي جامعني معاك هي لخدمة وبس ودابا الله يهنيك

سدات الباب فوجهو ودخلات وهي مخسرة سيفتها وبصوت هامس قالت:هادشي لي كان ناقصني أناا تت

دخلات وهي تتزول فالإسدال ولقاتهوم مجموعين تايديرو كاسكروط مور مانزلات تانيرت..

محمد طه:(شاف فيها)ماقلتيش ليا غايجيو عندك

رحيل:رجاء لي عطيات فالصباح وقالت ليا غادوز عندي وملي خرجات تلاقات بزكرياء وجا معاها

أسماء:داك خونا وشحال تقيل على لقلب

رنيم:(ضحكات)هههه ماحملتوووش

رحيل:تقيل على القلب وسكتوو

محمد طه:(مكمش حجبانو) انا غانطلع نتكى شوية تال وقيت دلعشا

مشى محمد طه ورحيل حسات بلي شي حاجة مبدلة فيه ومعرفاتش شناهي؟ ناضت تاهي مخلياهوم مجمعين وطلعات لبيتها هو لول مشات تشوف سيدرا لقاتها نعساات قداتها فبلاصتها وخرجات غادة لبيت محمد طه ودقات قبل ماتحل لباب لقاتو جالس فنموسيتو مور مابدل حوايجو.. تبسم ليها ابتسامة خفيفة لي خلاتها تاهي تبسم وتمشات لجهتو وقالت بهدوء:مسالي ندويو شوية؟

محمد طه:تالاماكنتش مسالي نسالي ليك اعوينات الجلبانة

رحيل:(تبسمات)يخليك ليا (زفرات النفس) بنتي ليا ماشي على برجك واش بيك شي حاجة ياكما كيضرك عاود راسك

قالتها ولخوف باين عليها شي لي خلاه يتنهد وينطق بهدوء:كنت باغي ندوي معاك غير مجابتهاش لوقت

رحيل:مالك خلعتيني اش كاين؟

محمد طه:(تقاد فبلاصتو)لبارح عيطات ليا لواليدة وقالت ليا بلي هي مريضة ومريضة بزاااف

رحيل: ياك لباس؟؟

محمد طه:فيها لكونسير

لهضرة تسرطات ليها من داكشي لي سمعات ومتنكرش بلي تاهي تأترات واخا عمرها ماشافت نهار زوين مع كلثوم وبلي دوزاتها عليها فالصغر وتافلكبر ولكن هادشي مكيعنيش أنها متأتراتش شدات يد محمد طه لي شاف فيها ونطقات بخفوت: عارفة كلثوم أداتنا بزاف ولكن تيق بلي بقات فيا بزاف ومغانساش بلي فواحد النهار كانت مرات بّا وبلي هي مك نتا وأسمااء وتيقني عمري كنت نبغي ليها شي حاجة خايبة واخا دير لي دارت

محمد طه:عارف تاأنا نهار عرفتها كانت سباب فراق لواليد وخالتي تانيرت وبلي هي كانت عارفة بلي ريان خويا ومقالتهاش وخباتها وبلي فالصغر تكرفصات عليك بزاااف حقدت عليها ومغانكرش وهاد السنين كلها كنت فقط كاندير واجبي باش مانتسماش مسخوط لواليدين ولكن ارحيل ملي هضرت معاها وسمعت هضرتها ودموعها حسيت براسي تهرست من لداخل هي واخا دير لي دارت تتبقا لمرا لي ولداتني

رحيل:(تنهدات وقلبها ضرها عليه) عارفة احبيبي عارفة واش قلتيها لأسماء؟

محمد طه:اه لبارح قلتها ليها وراه دايرين لويكاند نمشيو عندها ونشوفوهاا

رحيل:قولها لبابا تاهو باش يكون فخبارو ويقدر لاحتاجيتو شي حاجة يعاونكوم

محمد طه:كنت ناوي ندوي معاه ليل ونقولها ليه

رحيل:غانعيط عليه دابا ودوي معاه والاحتاجيتيني فشي حاجة أنا معاك واخا

عنقها عندو محمد طه وباس راسها ونطق بهدوء:لحنينة ديالي

رحيل:(تبسمات ليه)لحنين ديالي ههه انا غانمشي نعيط لباب ونتا هضر معاه واخا

خرجات رحيل من لبيت وهي تتنهد وخبار مرض كلثوم خلاها تحس بالشفقة من جهتها ودعي معاها بالشفاااء واخا تكون كيما بغات تكون تتبقى عبد ضعيف قدام لي خالقو.. نزلات لتحت وشافت فإدريس:بابا محمد طه باغي يدوي معاك

إدريس:(كمش حجبانو وقال بجدية)ياكما كاين شي مشكيل

رحيل:لا والو مهم راهو فبيتو

ناض إدريس ديك الساع غادي عندو وأسماء شافت فرحيل لي غمضات ليها عينيها بمعنى كلشي غايكون مزيان وبدورها أسماء تبسمات ليها بخفوت.. بعد مدة كان خارج إدريس من بيت محمد طه عاقد حجبانو وغادي لبيتو فين كانت تانيرت تاتلبس حوايجها مع يالاه دوشات شافت فوجهو وديك تكميشة لحجبان ونطقات بتساؤل:إدريس مالك ياك لباس؟

جلس إدريس فالنموسية وشاف فيها وبهدوء عاود ليها لهضرة لي قال ليه محمد طه بخصوص مرض كلثوم لي خلى تانيرت تصدم ويبقا فيها لحال من جهتها.. قربات جهتو ونطقات بهدوء:وشنو غايديرو دابا

إدريس: قال ليك غايمشيو يشوفها فلويكاند

تانيرت:من حقهوم تتبقا مهوم واخا دير لي دارت الله يشافيها

إدريس:آمين

تانيرت:كنتي قلتي ليا باغي دوي معايا فشي موضوع واش هو نيت؟

إدريس:لا (حك لحيتو) كنت تنخمم بيما أنه عائلتنا غادة وتتكبر قلت مع راسي علاش لامانبدلوش الدار ونشريو شي وحدة كبر ومتيسعة ونيت كل واحد ياخد راحتو عارفة سيدرا تتكبر وبلي غاتحتاج بيت بوحدها وزيد رنيم وغزلان لي ولاو ساكنين معانا وكيبقاو فبيت أسماء لي صغير مغايلقاوش راحتهوم فيه وبلامانساو التريبية لي جايا فالطريق تاهي داكشي علاش قلت نشوف شي دار فالنواحي تكون كبيرة نشريوها ونبيعو هادي

تانيرت:(حطات راسها على كتفو) عندك الصح ولكن تقلاب غاياخد لينا وقت اإدريس

إدريس:راني وصيت ولد لحاج إلا بانت ليه شي دار لبيع يعلمني وإلا لقيناها ديك الساع لبيع دهادي غايكون حالها ساهل..

تانيرت:فكرتيني اإدريس فخبارك عيد ميلاد سيدرا بعد غدا..

إدريس:(حرك راسو) عارف وراه كنت تانفكر فين غانديروه ليها واش غير فالدار ولافشي بلاصة خرا

تانيرت:قبيلة هضرة مع رحيل راه دوموندات لكيكة عند واحد لبنت كاتصاوبهوم زوينين وبالنسبة لوكال نشوف رحيل فين بغات ديرو

إدريس:صافي مزيان لمهم هي مخصهاش تعرف ردو لبال راااه مكتفلت ليها تاشي حاجة

تانيرت:ههه ماشفتيش ليوم ملي عرفات غاتجيني بنيتة اش دارت ههههه

إدريس:(تبسم)اش دارت؟

تانيرت:تعصبات ومبغاتهاش حيت جاتها لغيرة وقالت ليك بغات مومو وليد

إدريس:(شاف فيها بشوفاتو لحنانين)مافيها باش نجيبو ليها مومو وليد لي بغات

تانيرت:(تبسمات وحنيكاتها تزنگو) الله يجعل لباركة اتسانو

درعها عندو تاتخشات فيه ونطق بهمس خافت:نعوضو السنين لي معشناهومش مع بعضياتنااا ونيت الدار لي غانشريو غاتكون متيسعة خصنا نعمروهااا

تانيرت:(حطات راسها فعنقو ونطقات بنفس لخفوت)نعمروها بحفايدنااا

إدريس:(تبسم ليها) هاد الساعة نعمروها بولادنا لي ظامنين أما لحفايد باقي ماشفناهوم هه

تانيرت:(باستو ففمو بوسة سطحية) غي بلاتي دابا يجي النهار لي تلقى فيه ولادنا كلهوم تزوجو وكل واحد دار دارو

إدريس:(كمش حجبانو بجدية)ولادي غايعيشو معايا هوما وحفايدي والامقداتهومش الدار نشري ليهوم قصر المهم يبقاو ديما معايا وتحت جناحي

تانيرت:(ضحكات من نيتها)هههه كانو لعريسات تايوحلو مع العگوزة دابا غايولي يوحلو مع شيخهوووم هههههههه

إدريس:(هز فيها حاجبو)كاضحكي عليا اتانيرت إينو هممم

بدا تيهر فيها بشوية مكايس عليها وهي تاضحك على كلامو ولجدية لي كانت فصوتوو وكيفاش حاسب حساب لكلشي وكيف عادتو كيسبق مصلاحة ولادو على مصلاحتو وهادشي لي كيخلي تانيرت تغرق فيه تال الجدر.. تسطحات فوق النموسية حاطة يديها على كرشها لي كانت تتحرك ونطقات بتبسيمة:إدريس اجي تشوف كاتحرك

تحنى إدريس حاط راسو على كرشها بلامايفورصي عليها وتبسم فاش حس بحركاتها ونطق بحنية: حبيبة باباهاا تاهي ناشطة

تانيرت:ههه اجااب ماخلاهاا تهدن دابا غاتبقا تركل تاتعيى

إدريس:(شاف فيها ونطق بهدوء)تاريان فاش حملتي بيه كان تيتحرك فكرشك؟

تانيرت:(جمعات ضحكتها فاش لمسات لحزن فصوتو ونطقات بخفوت)كاين تيشيبني فلوحم وتامور لولادة هههه كان راسو قاصح يشبه ليك

إدريس:(مسح وحهو بيديه وتنهد) تمنيت كون حضرت ليه

تانيرت:(ناضت وشدات فيديه ونطقات بحنية) عرفتي ملي كان تيكبر كنت تانشوف قدامي غير نتا كيشبه ليك فلملامح والتصرفات وهادابا ربي عوضناا وغاتحضر لهاد الشنيولة ههه

تبسم ليها وهي تحنات عنقاتو وتخشات فيه تاتحل لباب ودخلات مفسدة اللحظات وهي مكمشة حجبانها ونطقات:تانيرت إينو شنو تاديري لبّا ديدي؟؟

بعدات تانيرت على إدريس لي ضار شاف فسيدرا لي مخرجة شنايفها ومكمشة حجبانها وقربات جهتوم تاوقفات قدامهوم ونطقات تانيرت:واش اضرتي ماتقدريش تخليني شوية مع راجلي ديما خارحة ليا من الجنب

سيدرا:(تعلقات فإدريس لي جرها لعندو ونطقات وهي مدلية شنيفاتها)بّا ديدي حبيب ديالي أنا

تانيرت:غانصدقو مرايشين أناا وياااك تي بعدي ليا من الراااجل

سيدرا:(سبلات عويناتها)هاااء الأسمرااني تااع قلبي أناا

تانيرت:(شافت فإدريس لي مبسم)عاجبك لحال ياااك شكون بحالك مدابزين عليك زوج غزالات تيحمقوو

إدريس:(ضحك)هههه اوا نستاهل

تانيرت:(ناضت تتجمع لبنوار لي زولات ونطقات)اييه تستاهل ونستاهل أنا لي مادرتش الزكرون لداك لباب

بقا تيضحك إدريس وسيدرا معنقاه ومعلقة فيه وعينيها على تانيرت لي تتجمع الروينة تاسمعات إدريس لي نطق بهدوء:فخبارك اسيدرا مومو لي عند جداك فكرشها بنت

سيدرا:(خنزرات وقالت وهي مقلقة)هممم

إدريس:مالك معجبكش لحال

سيدرا:(شافت فيه وبدات تتعبر بيديها)لا حيت غاتولي عزيزة عليك

إدريس:(بجدية)شنو قلنا داك النهار؟

سيدرا:(قلبات عينيها ونطقات وهي غضبانة) علاش ميميتيها تانيرت إينو ومميتيش مومو وليد

تانيرت:(جاتها الضحكة)حيت هي لي لقيت قدامي ههه

إدريس:سيدرا شوفي فيا (شافت فيه وكمل كلامو بجدية)داك النهار قلت ليك بلي بلاصتك عندي مغاياخدها حد تامومو علاش دابا مقلقة

سيدرا:(رجعات شعرها مور ضهرها)حيت أنا لي بغيت نكون عزيزة عليك بّا ديدي (دلات شنايفها) مومو غاياخدك ليا

غطات وجهها بيديها تتبكي وإدريس تنهد وعنقها عندو مخلي تانيرت تاتشوف فيهوم وخاطرها مغيير وبقات فيها بالحهد تاعينيها تغرغرو تاهي.. عارفة المكانة ديال إدريس عند سيدرا وبلي هو فمقام باها داكشي علاش تتحماق عليه وتغير عليه..

إدريس:(نطق بحنية وهو حادر وجهو جهة سيدرا)تاحد مغايقدر ياخدني منك حيت بّا ديدي ديال سيدرا بوحديتهاا انخشيشتي..

بقا معاها تاسكتات ونزلها لتحت تفرج فالرسوم وتنسى ويلعب معاها واخا عياان وباغي يتكى ولكن داير ليها لخاطر وكيف كيقول ليها هي نخشيشتو وبلاصتها عندو غااالية ووبزاف..

---

ليوم هو عيد ميلاد النخشيشة وكيف تافقو بناتهوم بلاخبارها قررو يديرو ليها لحفلة فواحد لكافي منها نيت يبدلو لجو.. كانت رحيل فداك ليوماين مبرزطة مع رزيرڤاسيون دكافي وزيد لكيك لي تاهو وصات عليه وبلامانساو لكادو لي كانت تتفكر تهديها شي حاجة سبيسيل لي تبقا معاهاا ديماا.. وبعد تفكير قررات شنو غايكون لكادو وهاهي ليوم هازاه بين يديها تتشوف فيه بتبسيمة خفيفة وهو مغلف..حطاتو فالبلاكار وجبدات واحد لكومبين حجابي فالبلوغوا مع فولار باج وفيه لبلوغوا تاهو وصويك وصندالة باح.. حطات كلشي فوق النموسية وبدات تتزول البيجامة بواحد ليد معافرة معاهاا عاد لبسات ديك لكومبين لي اختارتها واسعة من ليدين إكسبخي على قبل الگبص لي دايرة.. تحل لباب ودخلات أسماء لي كانت موجدة راسها ولابسة كسيوة ببيضا صيفية مع صندالة بلا والشعر مطلوق ومسرح..

رحيل:اجي عاونيني

عوناتها أسماء تالبسات وصاوبات ليها مك اب خفيف ولبساتها لفولار عاد خرجو من لبيت ورحيل تتشوف فتلفونها مع كانت تاتهضر مع ريان لي مشى يجيب لكيك من عند لبنت لي صوباتو باش يديه لكافي..

رحيل:صافي كلشي واجد ياكو؟

أسماء:اه راه بابا خرجها وداها تلعب شوية فالحريدة قبل مايجيو لكافي

رحيل:صافي خصنا نمشيو نشوفو واش قادو بعدا الكافي كيف طلبت منهوم فين محمد طه

محمد طه: هانا

ضارت جهتو رحيل ولقاتو جاي بسروال دجين مع تيشورت وفوق منها شوميز غليضة حالها وشعرو لقهوي مشوط عادي.. درع رحيل ونطق:نمشيو

تانيرت:زيدو راه إسلام كيتسنانا برا

خرجو لبرا لقاوه واقف حدا الطوموبيل بشوميز كحلة وطاوي كمامها مبين طاطواح وسمية ليليان لي باين منو مع دجين نواغ تاهو سلم عليهوم ركبو عندو لبنات لور وتانيرت لقدام ومحمد طه مشى يشد طاكسي حيت مكيناش بلاصتو وتحركو غاديين لكافي فين غايديرو لعيد ميلاد.. لقاتهوم وجدو الكافي بالنفاخات ودايرين سيمة "Sidra" لوسط.. وطبيلة كبيرة بكراسي ديالها والجناب دايرين لورد.. جلسو بلاصتهوم وسيفطو مساج لإدريس لي انظم ليهوم مع لبخانسيس لي كانت بكسيوة فالغوز بارد مع ليبا موس وشعرها دايرة ليه گرينات.. مع وصلات فرگعو دوك لعيبات دالاحتفالات وسيدرا عينيها كيلمعو وهي تتشوف فواحد لبنت جايا وهازة لكيك لي مرسومة فيها ربونزل.. وطالقين ليها موسيقى دلعيد ميلاد وقفوها فلوسط وجنبها رحيل ولجنب لاخر إدريس وتانيرت وريان كيفيلمي هو ومحمد طه.. شافت فالشميعة لي كانت رقم ستة وطفاتها وبدات تاتصفق وتبوزا باش يصوروهاا.. عاد قطعو لكيك وسيدرا هزات طريف وشافت فإدريس:بّا ديدي هاكا

وكلاتو هو لول عاد رحيل ولبقية..

جلسو فبلايصهوم ورحيل نطقات بحب:عجباتك السوربريز امامي

سيدرا:(لفرحة كانت باينة فعويناتها السود لي كيلمعو)بزااف مامي شكراا

عنقاتها سيدرا ورحيل تاهي بدلاتها تعنيقة وهي فرحانة لفرحة بنتهاا.. ومن حظن رحيل انتاقلات لحظن إدريس ولي تم كيباركو ليها ويعايدوها وفرحانين لعسيلتهوم لي كبرات..جات رحيل تهز كاس لعصير وهو يتهرق ليها وتكب على لبستها شافت فتانيرت لي جالسة جنبها ونطقات:غانمشي لحمام

مشات لحمام لي نعتو ليها بلاصتو فالجهة لخرى ولقاتو خاوي وقفات قدام لاڤابو وتحنات وهي تتغسل بلاصة الطبعة بيد وحدة ومركزة فشنو كادير تاسالات وطلعات عينيها جهة لمرايا وهي تجمد فحركتها وبؤبؤ عينيها وسااع وريقها نشف وهي تتشوفو واقف قدام عينيها ومتكي على لحيط مربع يديه ومبسم تبسيمتو لمريضة وبصوت هامس نطق وهو غامزها: هاني جيت اعموو

كانت بحال شي تمثال مكتحركش وتابؤبؤ عينيها تفيكسى عليه.. وقلبها شوية ويخرج من صدرها بقوة ضرباتو والنفس مبقاتش تاطلع ليها وهي كاتشوفو واقف قدامها بسروال دجين مع شوميز خضرا حال صدايفها لفوقانين ومخلي داك لوشام لي فصدرو يبان.. مكانتش عارفة وقتاش دخل وكيفاش جاا لهناا؟.. أما هو فكان موحشها بزاااف وشوفتها خلاتو يرتاااح بحال شي واحد كان لابدما خصو يتدروگا باش يقدر يريح دماغو.. وبالفعل كانت هي بالنسبة ليه لادروگ لي كيخليه ناشط ومرتااح غير من شوفتها.. ماتحركش لعندها بقا واقف كيف هي بقات بلاماتصدر تاشي صوت جامدة بفعل الصدمة..

بدر الدين:(نطق بهمس محموم) واخا تبدلي لمدينة وتمشي فيما بغيتي غانلقاااك وعمرك غاتقدري تهربي مني اعموو

طلعات النفس بالجهد وكلامو خلاها توگض وتحل فمها باش تغوت ساعة كان سابقهاا ومدور يديه على نصهااا مزيرها ليه واليد لخرى ساد بيها فمها وكاتم ليها ديك لغوتة لي ولات آنين كيتسمع.. دافن راسو فعنقها لي حاجبو الزيف ومغمض عينيه كيشم ريحتها ونطق بصوت هامس: شحال ونتي هاربة مني همم شحال ونتي مبعدة عند بالك غانخليك تبعدي مزاااال اعمووو ديالي

تتحرك راسها ودابز معاه بكل جهدها ولكن قوتو الجسمانية كبلاتهاا... هضرتو حسساتها بالنفور والخووف والهلع ومشاعر كثيرة زاروها فديك اللحظة.. أما هو تبسم وكمل على هضرتو:ديك لمرة قدرتي تهربي مني ويعتقك باااك ويرجعك وداك النهار قدرتي تفلتي مني وتخرجي راسك من لغااابة ولكن عمرك مغاتقدري تهربي مزااال مني حيت أنا مغانخليكش مزاااال ارحيييل كيف خديتك نهار لول من يدين عاصم غاناخدك دابا من يدين باااك

دموعها كينزلو مسرسبين كيف حبات الرمان على حناكها وقلبها حاساا بيه غايخرج من بلاصتو بسباب كلامو لي خلاها تفكر معاناتها فالداخلة بسبابو.. بدات تاضرب برااااسهاا فاش حسااات بيه طبع بوسة على عنقهااا فوق الزيف وكاتحاول تفك ليد ديالها باش ضربو وتبعدو عليها وهو غير مزاد زير عليها مستاغل فرصة تواجدها بين يديه..

فبااصة الحفلة كانت الاجواء مبهجة وصوت ضحكات سيدرا مالين المكان والفرحة باينة فعويناتها لمبطنين.. تحنات تانيرت جهة إدريس ونطقات بهمس:ولد لحاج شتو گاعما جاا

إدريس:مغايقدرش عندو شي مشكيل فالمگازان داكشي علاش مغايجيش وقال لي بلي كادو دسيدرا غايعطيه ليها نهار يشوفها

تانيرت:لبرهوشة غاتجمع لكادويات ههه

تبسم ليها وهي شافت فأسماء لي شادة السيلفي وتتبوزا هي وسيدرا لي مخرجة شنوفتها وتتعوج فعويناتها:سيري شوفي رحيل فلحمام شتها تعطلات

أسماء:واخا بلاتي..

عقلها باغي يخرج من بلاصتو وتلماسو ليها عيفهاا باغا تغوت باغا ضربو ولكن مقدراش وهو مكبلهاا ومستاغل لفرصة بلمزياااان..

بدر الدين:(قرب جهة ودنيها ونطق بهمس كالفحيح)باقي غانتلاقااو اعموو وقريييييب..

دفعها بكل جهدو على لحيط تاحسات بيديها لمگبص عگراتهاا والدوخة شداتها مدات يديها لجبهتها تاتحسسها وقلبها يضرب يضرب وداتها بدات ترعد عليها وضارت وهي تتبكي بالجهد وتشهق وبان ليها لحمام خاااوي بحال الامكان فيه حد..

طالعة أسماء مع الدرووج فين كاين لحمام وهي تتقاد الكسوة تاحسات بشي حد دخل فيها بكتفوو وهي تهز راسها ونطقات مخيخة:بشوية ابنادم

ماعبرهاااش حدو كمل خطواتو نااازل وعينين أسماء على ضهرو الوااسع وديك الشوميز الخضراا لي لاصقة على كتافو.. هزات حجبانها ونطقات بهمس:تفوو على بشااار

كملات خطواتها ومع وصلات لحمام بانت ليها رحيل خارجة وجهها صفر وكلها تترعد وعينيها عامرين دمووع قربات عندها بزربة ونطقات بخوف:اويلي مااااالك شواقع ليك؟

رحيل:(بزز باش كاطلع النفس)كان هنا هوووو كااان هنااا (تتبكي وتشهق) هوو لقااااني تاااني وغايديني هء هء

أسماء:(مخرجة عينيها)شكون؟

رحيل:(نطقات سميتو وهي حاسة براسها عايفة)بدر

خرجات أسماء عينيها وأوطوماتيكمو تفكرات هاداك لي دخل فيها قبل شوية إذا كان هووو؟؟ عنقاتها أسماء فاش شافتها شوية وطيح وبالفعل مع عنقاتها رحيل فشلات ولاحت تقلها عليها تاطاحو بزوجات الأرض ونطقات أسماء بصوت مرتافع:شي حد يجي يعااااوني (كاضرب على حناكها وتشوف فعينيها لي كيتقلبو تاولى يبان غير لبياااض ونطقات بصوت مخلوع تترعد)رحيييل ماتخلعينيش عليك

فبرا جبد جوا ومدو لهاداك لي شدو وعينيه كيلمعو وقال:الله يخلف اسيدي ومرحبا فيما تبغي شي حاجة أنا كاين

بدر الدين:(حط يديه على كتف لاخر وبرك عليه تاكمش عينيه ونكق بصوتو لبارد) الالقيت شي غلاط بسيط نتا لي غاتمشي فيها

...:(سرط ريقو)كون هااني الكاميرات طفيتهوم كيف قلتي لياا..

تجمعو السرباايا وشي ناس على رحيل لي غيبات بين يدين أسماء كيرشو عليها لمااا أو واحد لبنت مشات تتجري لفين نعتات ليها أسماء ولقاتهوم مكملين احتفالهوم وموسيقى مطلوقة وسيدرا تتشطح وتكوز ديك التريمة عندها وتلعب بشعرها.. قربات جهة إدريس وشوشات ليه فودنيه وديك الضحكة لي كان داير تمحات ورجع بلاصتها لخوف لي لاحظوه كلهوم.. ناض تابعها وتانيرت نطقات وقلبها حسسها بلي شحاجة ماهيااش:اش واقع ؟

تبعاتو تاهي وإسلام ومحمد طه وخلاو غير ريان وغزلان ورنيم لي ناضت تتشطح مع سيدرا باش ماتغيقش وتبعهوم وعقلها مشطون.. وصل إدريس وغير شاف رحيل قلبو تهز وتحدر عندها جارها ليه وبدا يضرب فحنيكاتها:بنتي جيبو ليا لما دالسكار

شربوها لماا دالسكار وشمو ليها الريحة وهي بدات تحرك جفونها وصوت تنهيداتها وأنينها مسموع.. هزها إدريس بين يديه وخرج بيها لبرا ومن زهرهوم الجهة فين كاين الاحتفال جايا فواحد الدخيلة وبعيدة على لحمامات لي كاينين فالطبقة الثانية.. حل ليه محمد طه باب الطوموبيل وحطوها لور وتانيرت شادة كرشها لي حسات بيها ضراتها بسباب منظر بنتها لي كانت صحة سلام وركبات جنب بنتها معنقاها عندها.. ركبات معاهوم تاأسماء وإسلام ومحمد طه بقاو واقفين متبعين لطوموبيل لعين تامشات وضارو تيشوف فالناس لي واقفين وشي جالس فالكافي كلشي كيطل يشوف اش واقع.. خنزر فيهوم محمد طه ونطق:شنو غايكون واقع ليها؟

إسلام:ماعرفتش خلينا ندخلو ومانخليوش سيدرا تحس بلي كاينة شي حاجة

محمد طه:(كرز على يديه) زيد

دخلو ولقاو لبنات وريان كيتسناو فيهوم وباين لفضول ولخوف على وجههوم

سيدرا:(قربات جهة محمد طه ونطقات) مودي فين مامي وبّا ديدي وتانيرت إينو

محمد طه:(هزها عندو وقال بتبسيمة صفرا) دابا يجيو اروح مودي عجبك لعيد ميلاد؟

سيدرا:(تتعبر بيديها)زوووووين مودي حبيبي ولكن بغيت تجي مامي باش ناخدو تصاور

محمد طه: دابا تاخدوهوم

هبطها وشاف فريان لي ناض عندو:اش واقع فين مشاو؟

محمد طه:(همس ليه) رحيل سخفات وداوها لسبيطار

ريان:(غوت)كيفاااااااش؟

سيدرا:(هزات عينيها ولفورشيط بين يديها ونطقات وهي مكمشة حجبانها)رياني علاش تتعوت؟

ريان:(تبسم ليها بزز)ههه مكاين والو ازين ديالي غير كملي لگاطو ديالك..

---

وصلو لسبيطار ودخلوها لشومبر باش يفحصوها وإدريس واقف جنب أسماء لي كانت تتعاودي ليه داكشي لي نطقات بيه رحيل وأيضا شوفتها ليه لي واخا مشافتش وجهوو ولكن تلقاتو.. حس بإدريس براسو غاينفاجر من فكرة رجوع بدر الدين تااااني.. هز تلفونو ودوز لخط لمحمد طه ونطق بجدية:سول على لجيغون دلقهوة وقول ليه بلي باغي تشوف التسجيلات دلكاميرا ضروري

محمد طه:(ناض ونطق بجدية)شواقع مال رحيل؟

إدريس:(مزير على سنيه)داك لحيوااان رجع تاني وشافهاا سير دير لي قلت ليك عليه والاشتيهوم خودهوم باش تمشيو لكوميسارية نديكلاريو بيه

محمد طه:واخا

قطع إدريس معاه وهو كولو كيغزل باغي غير يشوفو فاص افاااص وديك الساعة يوريه اش كيسوى.. ويخرج منو گاع داكشي لي دار فبنتو ولعداب لي شافت ولي باقي تتشوفووو.. باغي يخرج عليها ويحمقهاا وهو مغايخليهش يديرها واخت يعرف يقت'لو ويدخل عليه لح'بس هانياا عندوو مغايندمش بلعكس غايرتاح حيت عارف راسو هنى بنتو من تمارة.. حل تلفونو وسيفط مسااج ورجع خشاه فجيبو ملي بانت ليه الطبيبة خارجة عندهوم ونطقات بتبسيمة:الطونوسيون طاح ليها داكشي علاش غيبات دابا راه فاقت وتوگضات تقدرو دخلو عندها وبالنسبة لخروج غير يسالي السيروم وتقدر تمشي على سلامتها

مشات الطييبة من هنا ودخلو هوما عند رحيل لي غير شافت إدريس وهي تمد يديها وعينيها تغرغرو بالدموع ونطقات بصوت باااكي بحال شي بنوتة صغيرة تاتستنجد بباها:بابا

ضمها إدريس لصدرو وحجبانو لغلاض مكمشهوم او وجهو مكيبشرش بلخير.. تيسمع لبكااها ورجفة جسمها لي بين يديه وكيزييد يكعى..

رحيل:(صوتها هاز هموم الدنيا)هو مغايخلينيش ابابا هوو غايديني معااه (بدات تتشبت بإدريس بخوف) هو مغايخلينيش ابابا مغايخلينيش غايديني

بدات تتعاود فدوك لكلمات مخليا إدريس بحال شي ثور كيزيد يتشارجى بهضرتهاا وهي تتبكي وتشهق تاسمعات صوت باها لي نطق بصوت صارم:واخا يبقى عرق واحد فيا كيزدخ مانخليهش يديك ولايعااود يأديك سمعتي مغانخليهش

كلامو طمنها وهي أصلا عارفة باها مغايخليهش ولكن شوفة بدر وهضرتو خربقات ورجعات زرعات الخوف فيها وشي طبيعي يكون تصرفها هاكا تاحد معارف هي اش دوزات ومع من عاشت وداكشي لي خلى نفسيتها تمرض وخاطرها يتغييير.. بقا معاه إدريس تاحس بيها بردات ونطق بحنية:تقدري تخرجي دابا ولانبقاو شوية

رحيل:(هزات عينيها لمتورمين ونطقات بصوت تقيل) نمشيو لدار سيدرا غاتكون تتسول علينا ماخصش نخليها تقلق وليوم عيد ميلادها

كانت تانيرت واقفة ودموعها مغطين وجهها غير تتشوف فبنتها لي تتحس بلي هازة فوق طاقتها.. قربات عندهوم وحطات يديها على راسها ونطقات بتبسمتها لحنينة:نمشيو لدار اماما المهم عندنا هو راحتك

رحيل:(شافت فيهوم ونطقات بصوت بارد)راحتي غاتكووون فموتو هو..

وصلو لدار وأسماء طلعات مع رحيل لبيتها عاوناتها تازولات حوايجها وهي ساكتة وغير ساهية ودايرة بحال سي روبو تتحركيه كيف بغيتي..نطقات بصوت خافت:واخا تعاونيني ندوووش

أسماء:واخا انمشي نسخن لحمام ونجي

مشات أسماء ورحيل نثرات فولارها تاشعرها تخربق وبدات تتمسح جهة عنقها فين باسها واخا لبوسة كانت فوق لفولار ولكن هي حسات بيها بحال الاطبعها فوق جلدها.. بدات تتحكها بضفارها تاخلات لطراس دلقميش واخا هاكاك مبرداتش.. بقات على حالها تارجعات أسماء لي خرجات عينيها وزولات ليها يديها:راه قمشتي راسك اصاحبتي

رحيل:(بصوت هامس)حاسة براسي موسخة بزااااف

أسماء:(سرطات ريقها)يالاه تمشي دوشي

----

رجعو لبقية من الكافي لي حاولو ماأمكن أنهوم مايبينوش لسيدرا بلي شي حاجة كاينة حيت قويفزة وتتعيق ومبغاوش يخسرو ليها نهارها.. قربات جهة إدريس لي حاط راسو بين يديه باين فيه مهموم ونطقات:بّا ديدي فين مامي؟؟

إدريس:(جرها جلسها فوق ركابيه ونطق بصوت هادئ)ماماك لفوق عيانة شوية

سيدرا:(كمشات شنافتها)مال مامي؟

تانيرت:(تبسمات ليها باش ماتخلعهاش)راسها كيضرها احبيبة ماتخافيش

سيدرا:(نطقات وخاطرها مغير)بغيت نشوفها

غزلان:(دخلات واخا معارفاش اش كاين)اجي معايا نوريك كادو لي جبت ليك وتوريك تارنيم شنو جابت ليك

رنيم:اه زيدي وملي تفيق ماماك توريها شنو عطيناك

داوها بزز وهي ساكتة وغير طلعات محمد طه ضار جهتهوم وقال:شنو كااااين علاش رحيل سخفات مالها؟

بدا كيعاود إدريس شنو وقع ومحمد طه مزير على يديه وعينو مظلمين.. حاقد على بدر الدين بسباب لي دار فختو وبسبابو ماتت جيداء لي كانت ضحيتهوم.. ضرب بيديه داك الڤاز وغوت بعصبية:دابا حنا غانربعو يدينا ونخليوه يفرح حيت وصل لداكشي لي بغاا ياكو كيف دار قبل خمسنين ملي مرضناا وخدا منا الناس لي كانبغيو ودابا تاني غايرجع يدير نفس الشي فلول قال لسيدرا بلي هو باها وبغاها تعقد من صغرها ودابا بان تاني لرحيل باش يرجع تاني يأزمهاا وحنا غانبقاااو مربعييين يدينااا

إسلام:(تاهو منيرڤي)واش هادااا مبغاااش يتهد

إدريس:(بجدية)شنو درتو فلكاميرات

محمد طه:(بسخرية)لقيناهوم خاسرين

ريان:غايكون داك الز (جمع لكلمة قدام باه ومو) لحيوان هوو مول لفعلة باش مايتشدش (شاف فإدريس) واش لبوليس مقادينش عليه هااا واش غايبقاا عايش حر ومحرر عيشتو على ختي الامقضااااش فيه لقا'نون أناا (ضرب صدروو تاتسمعات الزدح) أنااا ناااخد روووحوو وندخل على بوووووه لح'بس

هز إدريس عينو فولادو لي كانو معصبين وبزوج مخنزرين وباين فيهوم على نقشة.. عارف ولادو دمهوم حامي بحالو وعارف بلي يفديو ختهوم بدمهوم وهو مباغيش يديرو شي حاجة لي تخرج ليهوم على حياتهوم وهوما باقي قدامهوم طريق طويلة أما هو بعدا لادار شي حاجة راه جات معاه حيت دوز حياتو ودار علاش يرجع ماشي بحال ولادو

إدريس:(شاف فيهوم بجدية)تاحد فيكوم مغايدير شي حاجة سمعتتو هو هادشي لي باغي يخرج علينا ويشتتنا الاكااان شي حد غايتحرك هو أناا وماحدي عااااايش وباقي النفس كاطلع وتنزل فياا مانخلي حد يقيسكوم ولايأديكوم سمعتووو

إسلام: عارف كيف يلعبهاا ومستاغل لوقت مزيااان داكشي علاش مكنقدروش نشدو عليه تاحاجة

قاطعات كلامهم أسماء لي نزلات ببيجامة وباين فيها مغيرة ونطقات:نعسات

إدريس:تانيرت سيري طلعي لفوق وبقاي معاها

تانيرت:واخا

مشات تانيرت وأسماء جلسات ونطقات تاهي معصبة:مكنتش عارفاه هو ااااخ كون كنت عارفة كون غوت وجمعت عليه أمة لاإله إلا الله لحمار باااغي يرجع يمرضها وحنا يالاه قلنا رجعات كيف كانت وبدات تضحك هاهو تاني خلاهاا ترجع بحال شي وحدة ميتة واخا فيها الروووح

إدريس:(كيسمع ليهاا ومزير على يديه تابياضت ومانطقش)

محمد طه:(صافي جعر ومحس على راسو تاغوت وعروق دعنقو تنفخو)شنوووووو واااش الواليد هادا غايبقااا خالع فيناا كل مرة هااا مغانساليوش هاد لمرض خمسنين وحناا عايشين فهاد لجوو وكل مرة نقولو هااادي لخررررة وهو حلف لاتهد (دفع الطبلة ومع فيها الروايض ماتجي غير إسلام ضارباه فرجلو ومحمد طه كمل غواتو صاعر مكيقشعش)كون جاا قدامي برب تااااااندبج الزا*ب بووووه

ناض إدريس من بلاصتو وعينو خارجين من بلاصتهوم كيشوف فمحمد طه لي سكت وهو كينهج فاش حس بشي حاجة سخوونة نازلة ليه نيفوو ومع مد يديه لقاه الدم..

شد ليه راسو وعينو على نيفو لي كيسيل بالدم وهو مخلوع أما محمد طه فكان حاس بشي حاجة سخونة نازلة ليه من نيفوو ومد يديه لقا الدم.. تخلعو عليه وناضو جهتو كيسولو فيه أسماء طارت لحمام جابت فوطة نقية ورجعات عطاتها لإدريس يديرهاا ليه باش تشرب الدم وداوه لحمام وأسماء غاتموت بالخلعة بقا معاه إدريس تاتقطع الدم وشاف فيه:واش كاتحس بالدوخة ؟

محمد طه:لا أنا بخير الواليد ماتخممش

إدريس:دوز نديك لعند الطبيب

محمد طه: لواليد

إدريس:(غوت بالجهد)دوز قدامي لانصليهاا معااااك

نفد محمد طه هضرتو وهو عارف بلي غوات باه ناتج على خوفو.. مشاو لسبيطار معاهوم تاريان وأسماء بدات تتجمع الزج لي تهرس وقلبها كيضرب من داكشي لي وقع ومنظر محمد طه ودمو نازل من نيفو.. سهات فيها ومحسات غير بيد إسلام لي حركاتها فكتفها فاش شافها تفيكسات فبلاصتها ونطق:أسماء

شافت فيه ودمعة نزلات من عينيها: لإمتى غانبقاو عايشين فهاد لخوووف واش مغاترتاحوووش

نزل إسلام وجلس قفازي وشد ليها فيديها ونطق بهمس: دابا يسالي هادشي ويرجع كلشي تعاويد

أسماء: مبغيتش نعاود نعيش داكشي لي عشت قبل خمس سنين مابغيتش نشوف رحيل وهي تتعدب ومابغيتش نخسر خوياا

إسلام:(أول مرة يشوفها وهي هاكا ضعيفة وتادوي بلخاطر عزات فيه هاد لحظة) مغاتخسري حد

أسماء:(حدرات راسها وبدات تبكي)عيييت هء هء

جرها عندو معنقها وهي ضورات يديها على عنقو مبادلاه تعنيقة وتتبكي.. تيقيس شعرها ويمشطو بيديه ويسمع لصوت بكاهاا وهو ساكت مخليها تابكات وتفشات وهي تبعد تتمسح دموعها ونطقات بتبسيمة خفيفة:شكرا

إسلام:لعفو حنا عائلة ولعائلة ولابدما خاصها توقف جنب بعضها..

كملات جميع ديك الروينة وهو معاونها تارجعو لخرين مبعد ماطمنو على محمد طه لي من زهرو غير رعف ومكانش عندو علاقة بمرضو ولعملية لي دار ولكن الطبيب نصحو باش يبعد على الأعصاب حيت حالتو باقا سونسيبل.. دوزو ديك الليلة مهمومين وكل واحد فاش يفكر وشنو هاز فخاطرو وربي وحدو لي عارف شنو فلقلوب...

---

شرقات الشميشة وحلات رحيل عينيها وهي تتفكر فأحداث الليلة لي فاتت.. زولات لغطا وناضت تتشوف راسها فلمرايا ولعيا لي باين فوجهها وهي تنهد وخرجات من لبيت غادة لحمام وفطريقها سمعات صوت سيدرا لي نطقات بغوات:ماااامي

جات عندها عنقاتها من رجليها ورحيل تبسمات وشوفة بنتها بحال شي مهدئ خلاها ترتاح..

سيدرا:(نطقات بحنية)حبيبة مامي باقي ديدي فراسك

رحيل:لا فاش شفتك مبقاااش

سيدرا:نبوسك مامي وماتبقايش مريضة

تحنات رحيل باستها ففمها ونطقات بتبسيمة خفيفة:سيري قولي ليهوم يوجدو ليا لفطور

سيدرا:واخا مااامي (رجعات شافت فيها بجدية) مامي إسلامي هنا مخسوش يشوف شعرك

ضحكات رحيل من قلبها ومشات سيدرا دير بهضرتها ورحيل غسلات وجهها ونشفاتو وخرجات لبيت لاحت زيفها ونزلات كان غير إسلام ومها وباها وغزلان ولبقية خدامين.. جلسات معاهوم تاتفطر وهوما كيهضرو معاها وكيف لعادة مجبدوش اش وقع معاها بل كانو يدويو على حمل تانيرت لي قالت:فكرتو ليها فشي سمية

إدريس:نخشيشة هي لي غاتسميها

تانيرت:(شادة فيها)لا هي مبغاتهاش

سيدرا:(وقفات فبلاصتها ونطقات بجدية)لاا أنا غانسميهاا تانيرت إينو

إسلام:(تبسم) خنفوستي اش غاتسميها

سيدرا:(شافت فرحيل لي ساكتة ونطقات)ليليان

تبسيمة إسلام بدات شوية بشوية تجمع وعينو على سيدرا لي نطقات الإسم بعفوية ولي من الصدفة كايصادف سمية السُكرة ديالو.. هزات رحيل عينيها فيه لقاتو جامد ومهبط عينو تيشوف فداك التاتو لي فيها سميتها وتانيرت نطقات بهدوء:ملين جبتي هاد السمية؟

سيدرا:سمعتها تانيرت إينو فتلفازة

إسلام:(ناض بزربة ونطق بصوت تقيل)خاصني نمشي

مشى بلامايتسناهوم يجاوبوه مخليهوم تيتنهدو عليه تاهو على داكشي لي هاز فقلبو.. كملو فطورهوم وسيدرا ممفرقاش رحيل تتوريها الطابليط لي جاب ليها إدريس وتتلعب معاها تاتعشات لعشية ورجعو لبقية من خداميهوم.. وتجمعو على طبيلة لگوتي لي صاوبات غزلان..

محمد طه:(جر رحيل وعنقها) عوينات الجلبانة لخدمة بلابيك مظلمة

رحيل:(تبسمات بخفوت)مبقا والو ونرجع

محمد طه:فخبارك أخر الأخبار؟

رحيل:شنو

محمد طه:سعيد رجع خدام معايا فنفس لاطاش و عندنا بيرو واحد

رحيل:(شافت فيه بتفاجأ)وايلي

محمد طه:اه ولغريب فالامر السيد ولى مزيان ومكيديرش مشاكيل معايا ويحشي لهضور كيف مولف ههه

رحيل:(هزات حجبانها) او سبحان مبدل الأحوال

شاف إدريس فساعتو وناض غادي لبيتو وتانيرت وراه مخليين الدراري يكملو جماعتهوم وكيف لعادة ريان منشط ليهوم الطرح بهضورو.. هزات رحيل راسها فاش بان ليها إدريس نازل ومأنتك على لحالة بجلابة فالسوسدي جاتو فصالة وشعرو لكحل لممزوج بشعيرات بيضاء ضارب ليه تحسينة عادية وروايح لعود كيتشمو من بعيد.. كلشي انتابه ليه وريان تبسم:لواليد فين معرووض بلابينا ههه تبارك الله جيتي بحال شي عريس

اسماء:(تبسمات)واش غادي لشي بلاصة بلابينا؟

إدريس:(فيكساا عينو فرحيل لي مبسمة بخفوت بشوفات فشكل مدة قبل ماينطق بهدوء)معروض لواحد لخطبة

محمد طه:ديالمن واش شي حد كنعرفوه؟

إدريس:(تنهد وبصوت هادئ قال) دولد لحاج..

متيكية يديها بزوج على لحديدة دلبالكون ومهبطة راسها مخلية شعرها يهبط ويغطي وجهها والريح خفيف كيحركوو.. حاسة بواحد الألم فشكل فقلبها معرفاش تفسرو.. صوت أنفاسها كانو كيتسمعو بحال معزوفة بقوة هيجانهوم.. فودنيها باقي كاتسمع ديك لكلمة لي نطق بيها باهاا ولي خلاتها على حالتها لي هي فيها داباا.. سعتاين دازت وهي واقفة فبلاصتها بجمود هزات راسها وغمضات عينيها وهي كاتسرط ريقهاا بزز وحاسة بحال الشوك واقف فحلقها.. علاش قلبها كيضرها؟ وعلاش حاسة بواحد الشعور فشكل عمرها حسات بيه فحياتها؟ علاش حاسة براسها باغاا تبكي وتغوت؟ والأهم علاش تأترات ملي سمعات خبار خطبتو؟ ياك هي لي رفضاتو نهار طلب يديها لزواج وهي لي هانتو فكرامتو ورجولتو وطلبات منو يبعد عليها؟ وهاهو بعد ومشى يشوف حياتو هي شنو كانت تتسنى أصلا منو يبقا تابعها حياتها كلها؟ غمضات عينيها حابسة ديك الدمعة لي حسات بيها غاتنزل وعقلها سرح بيها لگاع اللحظات لي جمعاتهوم مع بعض ودوك لحوادث لي كانو يطراو ليها فحضورو مشاعرها لي كانت تتحس بيهوم معااه.. وراحتهاا لي كانت تتلقاها فجنبو.. اهتمامو لي كان تيخليها تفرح وقلبها يتفاجى.. هادشي كولو زار دماغها مخليها تشهق بخفوت وتشد جهة قلبها تتحك ديك لمنطقة لي حاسة بالعافية شاعلة فيها.. تايهة وسط تفكيرها ومحساتش بأسماء لي واقفة جنب لباب تتشوف فيها وفحالتها لي عارفة سبابها.. تاهي ملي قال ليهوم إدريس لخبر مشى وخلاهوم شي يشوف فشي مكانوش متوقعينها.. وملي شافوها ناضت وخلاتهوم بلاماتنطق تما عرفات أسماء بلي الخبر أثر فيهاا

أسماء:(بهدوء)ياك نتي رفضتيه علاش دابا كانشوف بلي بقا فيك لحال ومعجبكش شنو سمعتي

رحيل:(مجوباتهاش)

أسماء:(كملات كلامها) من حقو السيد جا طلب يديك من عند بابا ونتي رفضتيه وهو شاف بلاصة خرا مغانلومووش باغي يدير لحلال الله يسهل عليه خصك تفرحي ليه يااك

رحيل:(ضارت شافت فيها ونطقات بصوت باينة فيه لعصبية) ليااااش باغا توصلي بكلامك

أسماء:(قربات جهتها)ماباغا نوصل لوالو غير كنشرح ليك لحاجة لي نتي مباغااش تفهيمهاا ارحيل (وقفات قدامها ونطقات وهي مكمشة فيها حجبانها) قلبك كيضرك وحاسة بيه غايخرج من بلاصتو حاسة بالخنقة باغا تبكي وتغوتي (هزات فيها حاجبها) كدبت

جميع النقط لي دكرات هي حاسة بيهوم.. زيرات على يديها وقلبات وجهها وأسماء ضحكات من حركتها ونطقات بخفوت: هربي وزيدي هربي وبقاااي حياتك كلها تتهربي

رحيل:(داخلة لبيت ونطقات بصوت معصب)أسماء الله يرحم باك خليني عليك وسيري من هنا

أسماء:(تبعاتها ونطقات بصوت مرتافع) تتهربي من كلامي حيت هو الصح وهادشي كامل لي قلت كاااين ونتي مباغاش تعتاااارفي

رحيل:(غوتات فوجهها وهي مخرجة عينيها فيها) نتي معارفة والو ماتبقااايش تحكمي بلاماتعرفي

أسماء:لا عارفة وعااارفة بلي نتي كاتهربي من مشاعرك ومباغااااش تعتارفي بيهوم حيت خايفة تعاودي نفس التجربة

رحيل:أسماء سيري من هنا

أسماء:(ضوراتها لجهتها ونطقات وهي ممسوقاش لهضرتها) من امتى وليتي تتهربي ومكتواجهيش هااااء من امتى رحيييييل لي كنعرف فااااشلة وضعيفة رحيييييل لي خلاها يااااسين وتزوج غيرها ولي وقفات على رجليها وضربااااات عليه ومعاودااااتش شاااافت وراهاااا فين هي دابا فين؟؟

كانت أسماء تتهضر بلغوات مخرجة عينيها..نثرات رحيل يديها وغوتات تاهي مجننة: مااااتت ديك رحييييل مااااتت وقتلوهااا نهااار طاااحت فيدين داك لمريض لي خرج ليها على حياتهااا ومرضها فعقلهاا وصحتهاااا.. داك لمريض لي حبسها وهددها بعائلتهاااا لمرريض لي غتاااصبها.. لمررريض لي فيمااا تغلط يحبسها فلگاراااج بحاااال شي كلبة ويخليهاا فالظلام وبالجووع بليامات.. لمرريض لي قتل ليها صاااحبتها غير حيتااااش طلبات منهااا تعااااونها... دبحهاااا ورزااها فيهاا..لمريييض لي باااااعها لعموو بحال شي سلعة مكتسووووى وااالو وشد عليهااا لفلوووووس ومافكرش فيهااا باعهااا لحمق كثررر منووو كاااان باغي تااااهو يغتاااصبها كون مادفعاتش على رااااسها وضرباااااتو بمووووس.. رحيل لي عمرهااا أدااااات شي حد هزات مووس وخشاااتو فيه بااااش دافع على شراااافهااا والارجع بياااا الزماااان مرة خراااا نديرهاا ومانخليهش يحط عليااا يديه لموسخين

سكتات وهي تتنهج وعروق جبهتها كيزدحو مخليا أسماء تتشوف وعينيها محلولين على جهدهووم من كلامها لي نصو مكانتش عارفااه.. غير سمعات هادشي وحسات بتبوريشة طالعة معاها فمابالك الإنسانة لي عااشتو بحدافيرو وبقا راسخ فدهنها.. كملات كلامها بهدوء وهي تتنهج وعينيها عمرو بالدموع:تاأنا مكرهتش نسى تيقيني ماكرهتش نفيق شي نهار ونلقى هادشي تمسح من دماغي ومبقاااش..نخرج فيما بغيت بوحدي ومانخافش.. نرجع ديك رحيل لي كانت شحاال هاادي تيقيني توحشت ديك رحيل وباغاها ترجع (صوتها بانت فيه الغصة ديال الدموع) باغا تاأنا نعيش حياتي كيف الناااس بلاخوف وبلامرررض..

حدرات راسها تتبكي عزات على أسماء فهاد اللحظة هادي وجراتها عنقاتها بالجهد ولخرى تشبتات بيها وبزوج كيبكيو وحدة تتبكي على معاناة ختها والتانية تتبكي على داكشي لي قساتو وعاشتو..

بعد مدة كانو جلسات بزوج فالأرض متكين على النموسية ومقابلين وجههوم مع لبالكون لي كان لباب ديالو محلول والهوا لخفيف كيدخل منو.. كل وحدة فين ساهية تاتسمع صوت رحيل لي كان خافت: نهار كنت هربانة فلغابة كنت حاسة بلخوف وعقلي كان غايخرج من بلاصتو قلت صافي انا طحت فيديه ومغايخلينيش غايديني معاه وغانرحع تاني لدوك ليام لكحلين.. تاجا هو ومد ليا يديه وجرني من وسط ديك الظلمة.. عتقني وخرجني من تم.. هضرتو وهو كيطمني وكيفاش دافع عليا باقي فدماغي مانسيتهومش وعينيه لي شفت تحفرو هنا (أشارت لدماغها) ملي رجعت لدار وأنا كنفكر فيه وفشكون غايكون تانهار لفيرمة لي شتو بالصدفة وعتقني عاود ومن تما وأنا كنشوفو وكل مرة كنت تنحس بشي حاجة كتجرني ليه ماعرفتش اشنو هي.. فارض وجودو ومخليني محترماه لكاريزما لي كانحس بيها غير من الشوفة والتقالة ديالو هادشي كولو مخليني نتعمق فيه داير بحال لمتاهة فاش كادخلي ليها عمرك غاتقدري تخرجي منها بلاصة تجرك لختها هو هاكا داير كل مرة كيجرني عندو تاخلاني تايهة فيه.. نهار طلب يدي لزواج فرحت بزاف وخفت.. خفت عليه حيت عارفة بلي أي واحد تيكون قريب ليا ولابدما يعاني فخبارك نهار صليت صلاة الاستخارة حلمت واحد الحلمة خلاتني نحس بالراحة.. واخا هاكاك رفضتو عرفتي علاش حيت ديك رحيل لمريضة خافت واخا هي متأكدة بلي هو ماشي بحال لاخر ولكن خافت قلت لا واخا لداخل ديالي كان تيقول اه..وملي رفضتو هو سولني عطاني فرصة نشرح ليه وأنا سكت عرفتي علاش حيت مقدرتش نقول شنو دوزت ومقدرتش نعاود ليه حيت كرامتي مغاتسمحش ليا نشوف فعينيه الشفقة قصحت راسي وقلبي وقلت ليه كلام لي جرح كرامتو هنتو فرجولتو وخليتو يبعد عليا كيف بغيت ولكن فالداخل ديالي مكنتش فرحااانة.. فاش شفتو بعد قلبي ضرني كنت باغاه يبقاا ولكن مغانلوموش عرفتي علاش حيت هو راجل قاااصح وكرامتوو فوق كلشي.. نفسو عزيزة ومغايبقاش مع وحدة بحالي لي مدارتش ليه اعتبار وقالت لكلام لي ندمات عليه.. (حدرات راسها وكملات كلامها) من حقو يشوف حياتو ويلقى شي وحدة لي تستاهلو ماتكونش عامرة عُقد بحالي ومريضة شي وحدة لي تعطيه كيفما هو غايعطيهاا أما أنا مكتوب عليا نبقا حياتي كلها وحدي (شافت فأسماء ونطقات ببكاء) مبغيتوووش يتزوج أأسمااااء

تخشات فيها تتبكي وأسماء تتسكت فيها.. مالقات ليها جهد ومكرهاتش تعاونها ولكن الغالب الله ويمكن فيها خييير وعسى أن تكرهو شيئاً وهو خيرٌ لكم وربي يمكن مكتب ليها ماحسن فصبراً جميلاً..

---

حل لباب ودخل بهدوء والسكات تيتسمع فالدار.. حط الساروت فبلاصتو وتمشى بخطوات تقيلة تاوصل لكوزينة وشعل الضو ومشى ديريكت جهة التلاجة حلها وجبد قرعة باردة وعاود سدها ومشى لجهة لبلاكار جبد كاس وكب ليه لماا روى بيه عطشو عاد رجع حط لقرعة بلاصتها وطفى الضو وخرج بهدوء مدايرش لحس طالع لفوق.. وصل قدام باب بيتو وضار جهة لباب دبيت رحيل تيشوف فيه مدة قبل مايدخل لبيتو فين كانت تانيرت باقا فايقة تتسناه.. تبسم ليها ونطق بهدوء:باقي مانعستيش؟

تانيرت:كنت نتسنى فيك تعطلتي؟

إدريس:(تيزول جلابتو) غير تفك لمجمع جيت

تانيرت:نعاونك؟

إدريس:غير خليك مرتاحة تانيرت إينوو

جبد من لبلاكار سروال بيجامة مع تيشورت لبسهوم وقرب جهة النموسية مزول لغطا وتخشى بلاصتو وشاف فتانيرت لي نطقات:كيف دازت لخطبة؟؟

إدريس:مزيان راك عارفة لمجالس دالرجال كيف كادوز فيها لجلسة ماشي بحال دالنسا

تانيرت:(هزات حاجبها) اجي نتااا كيفاااش بلان خطبة ولد لحاااج ياك قلتي لياا معرووض لخطبة ديال ولد واحد السيد كليان عندك؟

إدريس:(هز حاجبو) مافهمتيش؟

تانيرت:لا قلتي داك لكلام خليتيني نبقا نبلق فعينيا مبقيت فهمت تاحاجة

إدريس:شنو دارت رحيل ملي مشيت؟

تانيرت:طلعات لبيتها ومعاوداتش نزلات مشات عندها أسماء وبقات معاها وفلعشا ملي سولت أسماء قالت ليا نعسات

إدريس:(نطق بسهو)كنت عاارف

تانيرت:اش عارف وعلاش كدبتي فهمني؟

إدريس:(بجدية)باش بنتك تعيق وتفيق على راسها قبل مايفوت لفوت..

تقادات تانيرت فبلاصتها ونطقات وهي باقي ممستوعباش كلامو ومفهماتوش:كيفاش؟

إدريس:(بجدية ونبرة صوت هادية)تعقلي نهار قلت ليك لقيت خاتم ولد لحاج عندها فاش سولتها شفت فعينيها لكدوب (تبسم بخفوت) كانعرفها ملي كاتكدب مكتقدرش تحط عينيها فعيني وداك النهار مقدراتش تشوف فيا حيت كانت كاتكدب واخا هاكا درت راسي معقتش بيها وخليتها على راحتها..

تانيرت:(تبسمات)تباركالله عليك مكتفلت ليك تاحاجة

إدريس:(شاف فيها بتبسمية)هادوك ولادي غير الشوفة فيهوم تتخليني نعرف اش بيهوم.. (تنهد وبدا يدوز يديه على لحيتو) نهار تضرب ولد لحاج شفت لخوف فعينيها وكيفااش نسات راسها وخرجات بلانقاب مع لعلم عمرها دارتها.. كيفاش كانت تتبكي وتهضر معاه هادشي كولو بقا هناا (أشار لدماغو) عارف رحيل حدودية مع جنس الرجال ويستحيل تزعم على شي حد من غير هادوك لي كيهموهاا.. هادشي كولو كنت شايفو وساكت عليه ونهار طلبها ولد لحاج لزواح كنت باغي نشوف كيفاش غاتصرف.. ملي قلتها ليها حسيت بحال الامكانتش متيقة وتصدمات ولي زاد خلاني نتشبت بداكشي لي حاس بيه هو أنه مرفضاتش فلبلاصة ومبيناتش ليا نفورها وخوفها من الزواج ومتأكد دابا الإمشيت وقلت ليها شي واحد طلب يديك لزواج غاترفض فلبلاصة ومغاتقبلش گاع تفكر فيه ولكن ولد لحاج كان غيرر.. بصح هي رفضاتو ولكن حسيت بيها مراضياش على قرارها ومترددة وخايفة ماشي منو ولكن عليه.. وبزاف دلحوايج شفتهوم خلاوني نفكر فهاد لخطوة نديرها باش نشوف هي اش غادير وكيف توقعت طرا بقا فيها لحال وتصدمات حيت هي كاتحس بشي حاجة من جهتو وخايفة دير لخطوة لقدام وترجع تكرر نفس ديكشي لي وقع ليها مع داك الشماتة..

تانيرت:(تنهدات)وشنو غادير دابا راه طال الزمان ولاقصار غاتعرف بلي ولد لحاج ماخطب ماوالو

إدريس:(تقاد فبلاصتو ونطق بهدوء) وهنا فين بقاات اتانيرت إينو نشوف بنتي وشطارتها (غمزها ونطق)طفي الضو واجي تنعسي

حركات راسها وهي مبسمة وطفات الضو دلفيوز وتخشات فحظنو ناعسة براحة..

----

يوماين دازت لاجديد يذكر فيهوم من غير رحيل لي خاطرها تغيير ومبقاتش تتجمع بزاف مع مالين الدار وتاسيدرا وهادشي لاحظو إدريس لي مانطق بتاشي حرف مخليها على راحتها.. وصل لويكاند لي كانو متافقين فيه محمد طه وأسماء يمشيو لتازة عند كلثوم.. وحيت أسماء شافت رحيل خاطرها مغيير قررات تديها تبدل لجو شوية واخا مكانتش باغا تمشي وتشوف كلثوم لي غاتصدق تاني ناطقة ليها بشي كلام ماشي تال تم ولكن دارتها فيد الله.. ومور لغدا تحركو من مراكش بتلاتة بيهوم واخدين طوموبيل إدريس لي صاگتها أسماء وشدو طريقهوم لتازة.. كان الراديو مطلوق على الأغاني ورحيل جالسة لور تتلعب بتلفونها تاصورات فيديو ديال الطريق وفيه يديها لي عامرة خواتم وبراسليزديال الدهب وحطاتها فالسطوري وأول واحد شافها كانت بيسان لي كتبات ليها 📩الناس فين غاديين بلابينا ههه

رحيل (تبسمات وجوباتها) 📩 ههه مسافرة لتازة مرحبا باقي لحال اجي ونسينا

بيسان 📩 بصحتك ماشيغي ومغسي بوغ لانڤيطاسيون "شكرا على الدعوة"

رحيل 📩 مرحبا حبيبة

بدات تتشوف رحيل فالشاشة وعقلها تيقول ليها تبارك ليها على خطبة خوها وعقل اخر تيقول ليها بلاش أصلا محطاتش سطوريات باش ديريها سبة.. حطات التلفون جنبها ورجعات راسها لور مغمضة عينيها ومحسات براسها تانعسات.. الطريق كانت طويلة تبادلو فيها محمد طه وأسماء لبلايص وكمل محمد طه لي ولى كيسوگ مور لعملية غير ماخصوش يطول لمسافة.. أما عوينات الجلبانة فالطريق كلها وهي ناعسة وملي فيقوها تاكل مبغاتش وفضلات تنعس تافيقوها ملي وصلو وناضت مبوقة بالنعاس تتفوه.. نزلات تتشوف فدار إيطو تاسمعات محمد طه لي نطق:خليونا ندخلو

دقات أسماء لباب وبقات تتسنى تاتحل وكانت مرات خالها واقفة تتشوف فيهوم ومع مدة مشافتهومش ماعرفاتهومش:شكون نتوما؟؟

أسماء:(ماعندهاش مع تريكة مها كلها نطقات بنفخة) أنا أسماء كاينة ماما

مرات خالها:(تتحنزز فيها)هاويلي على أسماء تي كيف راااكي اجي حبيني "عنقيني"

جراتها وبدات تتبوس فيها وأسماء تتبعد عليها ورحيل جامعة الضحكة فاش شافت وجه أسماء لي رجع حمر.. دخلو لداخل ومرات خالهوم تترحب وتعاود وضور ضور تشوف فيهوم وطلعهوم وتهبطهوم من لباسهوم لأكسيسوارت لي فيديهوم ومع رحيل دايرة گرميط ديال الدهب قشعاتها مع الدخلة.. دخلاتهوم لصالة لمتواضعة ونطقات وهي تتبسم:ونهار كبير هاداااو زارتنا لبركاااو

كانو عارفين بلي هاد الضحكة لي تضحك فوجههوم وهاد لكلام لي تتقول خارح من قرجوطتها لبرا وبينها وبين الصواب لخير والإحسااان.. هزو عينيهوم فاش دخلات عندهوم كلثوم لي كانت لابسة واحد القميص ديال الدار مبهدل وجهها صفر وعينيها داخلين وضعافت علي كيف كانت.. غير شافها محمد طه وهو ينوض جهتها عنقها وتاهي ضورات يديها معنقهاا.. كانت رحيل جالسة تتشوف فيها ومنظرها خلاها تبقا فيهاا.. عنقاتها تاأسماء لي بزز شدات دمعتها من منظر مها.. بعدات كلثوم لي شافت فرحيل لي بقات جالسة ونطقات بنبرة خافتة وعينيها عامرين دموع:باقي هازة من جهتي داكشي علاش مبفيتيش تسلمي عليا؟؟

حلات رحيل عينيها من كلامها لي ماتوقعاتوش وداك النبرة باش نطقات خلاتها تنوض عندها تاوقفات قدامها ونطقات بهدوء: كيف بقيتي؟

كلثوم:(جراتها معنقاها ونطقات بصوت باين فيه الندم) سمحيليا ابنتي على مادوزت عليك ربي خدا ليك حقك مني هء هء

بدات تتبكي كلثوم وتعتادر تاطاحت دمعة لرحيل لي عنقاتها تاهي ونطقات:الله يساامح

بعد السلام جلسو فالصالة ومشات مرات خو كلثوم تجيب أتاي وكلثوم جالسة وسط ولادها

كلثوم:(شادة يدين ولادها عندها ونطقات بصوت ضعيف) فرحتوني ملي جيتو تشوفوني

محمد طه:(بحنية) كيف بقيتي شوية؟

كلثوم:الحمدلله

أسماء:(لمسات وجهها)ضعافيتي؟

كلثوم:(تبسمات)مك راه كبرات هه (تنهدات) خفت نموت قبل مانشوفكوم ونطلب السماحة منكوم على گاع داكشي لي درت معاكوم

محمد طه:ماتقوليش هاد لهضرة نتي غاتبرااي وترجعي كيف كنتي

أسماء:(بألم)فين عندك لكونسير؟

كلثوم:(هبطات راسها وبصوت ضعيف) فلوالدة (عينيها تغرغرو بالدموع) قال ليا ولابدما غايخصني نفتح ونحيد لوالدة حيت انتاشر فيها

رحيل :(تنهدات بأسف ونطقات بهدوء) عطاك وقتاش غاديري لوبغاسيون؟

كلثوم:(شافت فيها وقالت بصوت خافت)خصني فلوسها وكيف كاتشوفي حالتي ضعيفة والدهب لي نكساب تشفر ليا وملي قلت لخوتي كل واحد خارح ليا بسبة من غير عبد الصمد لي عطاني شي براكة نعاون بيها.. اوا ودابا وليت تانخدم ونقش لعريسات ونجمع الفلوس

محمد طه:(خنزر فيها ونطق بصوت بان فيه معصب) وعلاش ماعيطتيش علينا حنا ؟

كلثوم:(بصوت باكي)مابغيتش نشطنكوم وزيد عارفاكوم هازين من جهتي على مادرت فيكوم وفتانيرت ولكن ربي شاهد عليا راني ندمت على مادرت فياماتي الشيطان عمى ليا عيني وخلاني نغلط بزااف هء هء

بدات تتبكي ومحمد طه محملش يشوفها هاكاك وناض خارج من الصالة معصب وبقات معاها أسماء لي تاهي دموعها نزلو ورحيل ناضت جلسات فلبلاصة فين كان جالس محمد طه وشدات يد كلثوم ونطقات بهدوء: إن الله غفورٌ رحيم وحنا غير عبد ضعيف قدام لي خالقنا نتي غلطتي وندمتي وحنا سمحنا ليك..

كلثوم:(شافت فيها بعيون حمرين بلبكا) عارفة بلي غلطت ابنتي فحقك وحق مك وباك وخوتك تاولادي غلطت فحقهوم ولكن أنا ندمت (شدات يدين رحيل ونطقات بخفوت)نطلب منك طللاااب ابنتي الموت والحيا هادا قولي لتانيرت تسمح ليا على مادرت فيهاا طلبي منها تسمحلي حيت أديتها بزاااف

حركات رحيل راسها وعينيها تغرغرو بالدموع وأسماء تاهي بكات وشبعات بكااا تاجات مرات خو كلثوم جايبة صينية دأتااي حطاتها ونطقات وهي تتنهد:ربي شاهد بلي نهار عرفنا بمرض كلثوم قلبنا تقطع عليها وفاش عرفنا غاتفتح عبد الصمد (راجلها) مسيكين كان مخبي شي براكة عاونها بيها وهانتي تتشوفي لحااالة راحنا على قد لحاال ويالاه مكافيين مع الزمان

أسماء:(متسوقاتش لهضرة لخرا وشافت فمها)فين إيطو؟

كلثوم:مشات عند خالك غاتبات تم ليوم.. هنية كبي أتاي

كبات ليهوم هنية أتاي وأسماء كيف شدات لكاس حطاتو فوق الطبلة تارجع محمد طه من برا مبعد مابرد شوية وقرب جهة مو جلس ونطقات كلثوم بحنية:كيف بقيتي نتا ورا لعملية احبيبي مبقاش راسك تايضرك

محمد طه:لا أنا بخير ماتشطنيش بالك

كلثوم:الله يرضي عليكوم أوليداتي ويخليكوم ديما فرحانين

أسماء:(شافت فساعتها) ماما جيبي لينا الملف ديال الطبيب نصوروه باش ملي نمشيو لمراكش نوريوه لشي طبيب تم نشوفو اش غايقول

كلثوم:(ناضت) اييه ابنتي بلاتي

ماطولاتش بزاف تاكانت راجعة جايبة لملف وعطاتو لأسماء لي شداتو صورات الوراق كاملين لي تم ورداتو لكلثوم وبقاو جالسين معاها كيسولو فيها وهنية تقول واش ناضت طيب شي حاجة من غير داك براد دأتاي لي حطات وبزز منها.. شافت رحيل تاعيات ونطقات بهدوء:خصنا نمشيو تعطلنا وباقي تابعانا الطريق

كلثوم:(شافت فيها)مغاتمشيو فين فهاد الليل باتو هنا تال غدا وتيسرو

رحيل:(تبسمات ليها بهدوء) خصنا نمشيو ضروري خليت سيدرا فالدار كتسناني

كلثوم:(تبسمات ليها تاهي) الله يخليها ليك ويحفضها من كل شر

رحيل:(من قلبها)آمين

كلثوم:(شافت فيهوم ونطقات بصوت باين فيه الترجي) خليكوم معايا هاد الليلة ماتعرف مول الأمانة يدي أمانتو ونتوما حدايا

نزلات راسها تتبكي وأسماء حطات راسها على كتفها تتسكت فيها وحال محمد طه ربي لي عالم بيه وهو كيسمع لكلام مو لي كيف لمواس كيتغرزو فقلبو بلارحمة.. قلب وجهو جنب عاض على شفتو وملي شافتو رحيل هاكا مدات يديها وحطاتها على فخدو تتواسيه..

رحيل:(نطقات بعد تفكير) واخا نبقاو تال غدا الصباح ونمشيو غانوض نعيط لبابا

ونعلمو باش مايتشطن علينا

ناضت رحيل هازة تلفونها غادة.. حلات باب الدار وعينيها على الزنقة لي كانت شبه خاوية ودوزات لخط لنمرة باباها لي نطق بهدوء:ألو بنتي

رحيل:بابا لباس ؟

إدريس:حمدلله كيف وصلتو؟

رحيل:مزيان كانعيط ليك غير باش نعلمك بلي غانبقاو هاد ليلة هنا تال غدا ونجيو

إدريس:(سكت شوية قبل ماينطق) واخا ردو لبال لراسكوم ابنتي

رحيل:واخا ابابا

قطعات لابيل وهزات عينيها وماتجي غير فديك لبوجو لي واقفة جنب الطريق ولي كانت نفسها لبوجو لي تبعاتها هي ومحمد طه داك النهار..

يتبع...