الجوهر الحر الجزء 69

~~~متكية فبيتها مور ماسالات شغاالها وتأكدات بلي كلشي نعس وخصوصا باها...حيت خايفة لايفيق ويلقى عندها تلفون وتصدق جابدة الصداع لراسها... كانت مبسمة وعينيها كيلمعو وهي كاتسمع لصوتو لي ولى بالنسبة ليها إدماان... ضحكات وهي تاتسمع لكلاموو لي نطق بهدوء وبحة:نوري

نور الهدى:(وقالت بصوتها لخافت تاضحك بخجل) نعام

ناصر:گاعما گلتي ليا شنو غاتبغي تسمي ولادنا واش فبالك شي سمية مميزة تتعجبك؟

نور الهدى:(تبسمات وقالت وهي تتخيل راسها هازة وليد ولابنينة من صلبو) صراحة تتعجبني واحد السمية دلبنات بسمة

ناصر:بسمة زوينة مشتقة من الابتساامة والبسمة

نور الهدى: ونتا كاتعجبك شي سمية ؟؟

ناصر:إن شاء الله لاتزاد عندنا ولد غانسميوه زين العابدين هاد الإسم كيعجبني بزاف واحد لمرة شفت واحد لوليد من متلازمة داون صغير كان مع باباه هازو وغير شافني وهو يجي عندي وهزيتو وهو حط راسو على صدري ومبقاش بغا يبعد ولايمشي عند باه وفاش سولت على سميتو لقيتها زين العابدين والاسم بقا مرسخ فالدهن ديالي وعجبني بزاف ولاكتاب إن شاء الله نسميوه لولدنا

نور الهدى:إن شاء الله~~~

ماقدراتش تحكم نفسها وماتعنقووش وهي كلما سمعات سميتو كاتفكر كلام ناصر وكيفاش كانت أمنيتو يسمي ولدهوم بنفس الإسم...أما زين العابدين فالوهلة لولة كان جامد شوية تاعقد حجبانو ومد يديه بزوج مبعدها عليه وهي بدورها تحرجات منو ولكن ماشي لخاطرها... هز حاجبو فيها وخلاها واقفة فبلاصتها وهو طلع لبيتو أما رحيل فكانت مستغربة من ديك ردة لفعل لي دارت نور مع زين العابدين خصوصا أنه ماشي من نوع لي كيدير علاقات مع العائلة والغير ومنغالق مع كلشي لاعساك هي لي تاتجي مرة فقرن... خرجو من الرياض مبعد ماودعات نور العائلة ورحمة لي مسخاتش بيها وبقات توصي فيها باش ترد لبال لراسها تاركبو فطوموبيل نوح لي كان مبلاصيها قدام باب الدار وشاف فمو بلامايدوي حرك ليها راسو بمعنى دخلي لدااار وهي فهماتو ودخلات سادة لباب عاد تحرك لقامرة...الطريق كلها وهوما ساكتين ونور الهدى عينيها فالزاج باين فيها ساهية ومقلقة... وصلو لقامرة ونزلو ورحيل وقفات جنبها ونطقات بتبسيمة:ماسخيناش بيك كون غير بقيتي مزال معانا هنا

نور الهدى:تاأنا ماسخينش ولكن خصني ضروري نمشي راك عارفة تبعاني خدمة خصني نكوون حااضرة ضروري

رحيل:ماعليش مرة الجايا واجي إن شاء الله واخاا

نور الهدى:إن شاء الله تانتوما مرحبا بيكوم فتطوان لانزلتو اجيو عندي

هز ليها نوح بگاجها ودخلو لداخل ومشى سول على وقت لكار لقاه قرب يدخل بقاو واقفين معاها تادخل ودعاتها رحيل بعناق حاار تگولي مدة وهي عرفاهاا ومعاشرين ولكن صح لقول أن ماشي لمدة هي لي تتخلي لعشرة طول إنما معدن الناس هو لي كيخليها تقوى وطول...

نور الهدى:(وقفات جنب رحيل ونطقات وعينيها متيشوفوش فجهة نوح)شكرا أخي نوح وسمحليا على الإزعاج

نوح:(بهدوء قال) الله ياودي مرحبا وقتما بغيتي هادي دارك التانية

مشات وعيون رحيل مرقباها تاركبات وتأنسطالات بلاصتها وهي تشوف جهة الزاج وشيرات ليها ورحيل بدورها دارت نفس الشي... ماتحركوش من تم تامشى لكاار عاد نطقات رحيل وهي تتنهد:مسكينة خلات بلاصتهاا الله يوصلها على خير

نوح:آمين

خرجو من تم وركبو فالطوموبيل وقبل مايدماري نوح ضار شاف فيها ونطق بهدوء:تبغي نمشيو لشي بلاصة؟

رحيل:(تبسمات)فهاد لوقت؟؟

نوح:(نطق بهدوء وهو كيدماري) باقي لحاال

رحيل:(تجبدات فالكرسي وقالت وهي حاطة يديها على كرشها) كون علمتيني نلبس حوايجي وأنا خارجة غير بعبااية عادية

نوح:وشنو فيها (شاف فيها وغمزها) تاهاك مزيان الفتنة ديالي

رحيل:اوا فين غادي بيناا

نوح:(شاف فيها وتبسم بخفة) اش بان ليك فشي جبانية دلحريرة عند بّا علي

رحيل:(نطقات بحماس) ماكرهتش فخبارك مداقها باقي ففمي من نهار دقتهاا

نوح:خصك دوقي لحم الرااس من عندو

تحرك بيها لعند السيد لي عندو محال صغير على قد الحال ولكن نقي وماكلتو بنينة... شدو بلاصتهوم فلداخل وناض نوح عند داك الراجل لكبير وسلم عليه بحرارة وگال ليه الطلبية ديالو ورجع لعند رحيل وجلس جنبها وهي قالت بهدوء:علمهوم بلي غانتعطلو باش مايتسناونااش فلعشاا

جبد نوح تلفونو سيفط لبيسان ميساج ورجع حط تلفون وشاف فرحيل بهدوء: العيد لكبير غانطلعو لبلاد تقدي طلعي؟؟

رحيل:اه نقد صراحة ونيت نبدلو لجوو (بتدكير) نسيت نعلمك بلي راه البلان لي گلتي ليا راه طرقتو وراه البنت موافقة علم عتمان باش يجيب دارهوم

نوح:مزياان نيت راه سولني ليوم عوتاني

رحيل:صافي هاد السبت يجي ويجيب عائلتو مرحبا بيه

نوح:(شاف فيها وقال بصوت خشن) لبنت قابلة بعداا؟

رحيل:معلووم قابلة

كملو حديتهوم على هاداك لموضوع وتافقو بيناتهوم باش هو يعلم عتمان باش يدير بحسابو ويجيب دارهوم نهار السبت وهي نيت تقاد لي خاصها... تعشاو ورجعو لدار لقاو كلشي ناعس طلعات رحيل لبيت سيدرا هو لول ودخلات لقاتها ناعسة فبلاصتها قداتها وغطاتها مزيان ومشات لكخطابل ديالها قلبات ياك مانسات شي دفتار ولاشي حاجة مهمة وغير ڤيريفياات الأمور وهي تخرج مخليا ليها ضو خفيف ديال لفيووز.. عاد مشات لجناحها ومع دخلات سمعات لحس مقطوع وهي دخل لبيت وعينيها تيقلبو عليه ساعة مالقاتوش مشات جهة تلفونها تتصوني عليه ومكيجاوبش جاتها عجب حيت مگال ليها والو وماعلمهااش بلي غايخرج فين غايكون مشى زعمة غايكون داز عند بيسان ولارحمة... دخلات لحمام ومشات سخنات الدوش وخدات تحمحيمة خفيفة وخرجات لابسة بيجامة دالنعاس لقاتو باقي مكاينش ومجااش... هزات تلفونها تشوف ياكما عيط ليها لقاتو ممعيطش وهناا قلبها ضرب بالجهد وكرشها تلوات عليها بقوة لخلعة تجاها لوجع...شدات كرشها ونطقات بصووت خافت:ياربي مايكووونش داكشي لي فبالي هو لي كاااين

****

فأباخطمون بديكور عصري وفنفس الوقت كلاسيكي ومع الإضاءة كانت خفيفة وكايتسمع صوت لموسيقى الهادية لي كان طالقها من التلفازة وجالس قدامها فواحد الكنابي وهاز بين يديه كاس دالشراب والقرعة محطوطة فوق ديك الطبيلة دالزااج لي قدامو...مغمض عينيه كيتفكر داكشي لي طرا بينو وبين بيسان وهضرتها لي قاالت ليه ولي خلاتو يزيد يتعصب منهاا... هادشي لي دار معاهاا كان هدفو باش يربيهاا ويندمها حيت رفضااتو... عجبو لحال فاش هرسها ولكن فنفس لوقت مكانش باغي هادشي يوقع حيت كان باغي يتعمق فعلاقتو معاهاا ويطورهاا...من نهار خرج معاها ديك الليلة وهو كان طامع فجوايج خراا وحيت عارفها سكنات وقرات برا فعند بالو راه دغيا غاتحل ليه بحال هادوك لي ديجا شااف وعرف...ساعة الطابع لي فبيسان غلب التطبع واخا عاشت برا لبلاد بين شعب متحرر ودارت صداقة مع أجاانب إلا أن هادشي مأترش عليهاا فشخصيتها والاهم فتربيتهاا... حل عينو حمرين والسكرة بدات تطلع معاه وبالسيف وهو ضارب ديك لقرعة لي بقا فيها غير شوية... حك عينو وضار تيقلب على تلفونو باغي يعيط لوحدة من دوك لبنات لي كايعرف وتيجيو يونسوه...صونى عليها وعلمها تجي ورجع تكى كيتسناها وفنفس الوقت كيكمل ديك القرعة تاضربهااا كلها وهو يسمع صوت السرسار وناض كيجر رجليه ويحك عينيه باش يتوگض ويوجد راسو ليلة لي تبعااه...حل لباب ونطق فنفس لوقت بصوت تقيل:اش هاد التعطيلة؟

نوح:(ببرود) ماعليش لمهم جييت

هز عمر راسو بزربة كيشوف فهاد الشخص لي قدامو ولي ماعرفووش شكون هوو... مع جا يحل فمو ويسولو وهو يحس بكروشي جااه لكمارة رجعو لور تارتد بالجهد ودخل نوح ساد لباب وبدا يحل فديك لاشوميز لي لابس من جهة اليدين كيطوي فيهاا وعمر بدا كيكالي يديه باش يتكى على لحيط ينوض وهو يسمع صوت نوح لي قال بهدوء:لاعبها واعر وعند بالك راه البنت ماعندها حد باغي تحگر عليهاا

عمر:(خنزر فيه وقال وهو باقي شاد فراسو واحد شوية) شكوون نتاا؟

نوح:(تحدر طبطب على كتفو وقال بصوت قاصح) أنا هو هداك لي غيعاود لجد بوووك الختااانة اولد لقح*بة

هزو من ديك التيشورت لي لابس وجرو داخل بيه لصالة وهو يقشع داك القرعة ولكاس لي كانو خاويين وهو ينطق بسخرية دافعو على الفوطي: مزياان راك مزهيها مع كر*ك

بغا لاخر يهز الراس ساعة نزل عليه نوح بالضرب بحال لاكيضرب خنشة دلبطاطا ولاخر كيدافع بيديه باش يبعدو عليه ساعة نوح كان جاعر عليه ومحلف فيه نيت...بعد عليه وعمر كيكحب الدم وقال نوح ببرود:عند بالك هي ماعندهاش لي يدافع عليها گلتي اجي نحگر عليها ونتاهمها فشرفها ومعارفش بلي خوهاا يقت.ل على ودهاا (هز ليه راسو وهو محنزر فيه تخنزيرة دلموت) هادشي لي غانديرو فيك دابا باش تعلم تجمع كرررك وتعرف تفرق بين بناات الناس وبنات لقح*اااب لي معاشر معاهوم...

عمر:(كيدفع فيه وبلسان ملوي قال)طللق

تلفون نوح كيصوني جبدو وهو مخنزر وحبس ليه صوت ورجعو بلاصتو ورجع تاااني ليه كيكب فيه جنون داكشي لي سمع ولي عرف وقع مع ختو خلاه يتعصب ويحس بالعافية شاعلة فيه...طلق منو وضار تيحرك راسو يمين وشمال تبانت ليه لقرعة دالشراااب وهو يهزها قاصدو وهرسها ليه على راسوو تاهبط ليه الدم...

فالجهة المقابلة كانت رحيل تاتعض ضفارها وتلفون باقي فيديها تتعيط تاكيتقطع وترجع تصوني...ماملاتش وماعياااتش وقلبها غايخرج بلخوف...عارفة فين غايكون مشى حيت أكيد هو مغايسكتش على داكشي لي سمع منها وعرف... ملي عودات ليها بيسان شنو طرى معاها ولمشكيل لي طاحت فيه عقلها ماتقبلش أنها تسكت على لموضوع...حيت عارفة بلي الاهو ساق لخبار مغايعجبو حال حيت خبات عليه وغايصدق مقلق منهاا وتقليقتوو خاايبة ومباغاش تعاود تجربهاا وزيد لابيسان سكتات فأكيد لاخر غادي يضسر ويقدر يتمادى فحوايج خراا ويدير حاجة لي يندمو عليهاا من بعد.... عليها گالت اللهم نعلموو ونصاارحو وبالفعل ملي كانو راجعين لدار قبل ماينزلو من طوموبيل مهدات ليه الموضوع وسرسبات ليه كلشي وبقات تاتسنى ردة فعلو وهو مكانش باين فيه راه معصب وماقدراتش تعرف ردة فعلو واش معصب ولا لا... طلبات منو مايتسرعش وعيااات ماتدوي وفلخر خسر عليها كلمة وحدة "واخا" طمنهاا ودخل معاها لريااض وهي عند بالها راه مغايدير والو ساعة راها غالطة حيت نسات بلي هو دمو حامي وتقيسيه فكلشي إلا عائلتو وشرافو... مايخلي حد يحل عليه فموو وهاديك لي تقاست راه ختو...جلسات فالكرسي وحطات تلفونها فوق الطبلة بخيبة أمل ..عارفة أنها واخا تعيى ماتصوني والله لاجاوب واخا راه خايفة من تهورو حيت هو فاش كيتعصب راه كيطفى ومكيبقاش عاقل على تاحاجة وكينسى كلشي وعصبيتو هي لي كااتكلم... شافتهاا قبل وعارفة بلي صعييب يكونطرولي راسو ودابا ماعندها مادير من غير طلب الله يدوز هادشي بخير وعلى خيرر ومايوقعش شي مشكيل لي مايلقاو ليه حل ويكون المتضرر فيه هوو نووح...

**

فلاباخطمون لي كانت مقلوبة سفاها على علاهاا... كلشي كان مروون ومقلووب والدم منقط فالزليج... كان واقف نوح لي شوميز ديالو فيها شوية دم وعينو تيشوفو فعمر لي ولى بحال شرويطة... كلى ماكلى الطبل نهار العيد تاوجهو تخسر ومبقااوش معالمو واضحين... طايح تيحرك راسو بشوية والجهد مبقاش عندو بالدق لي كلى...هاد الضرب لي خدا يستاهل ماكتر منو حيت هو لي بدااا وهو لي لعب لعب لي ماخصوش يلعبو وباغي يقيسو فختو ساعة مع من طاح.... تمشى جهة البوطاجي فين كاان الفورنو شاعل وحاط فيه فرشيط لي ولات حمرااا هزها وقرب جهة عمر لي شبه مغييب وشد يديه وحطها ليه فراحتو تاالاخر قفز وبدا كينين وريحة الشيااط دلحم عاطية وتگول واش حن فيه...خلاه تااتطبعات الفرشيط وطيرها مخلي ليه لاطراس باينين...لاح لفرشيط وهز ليه راسو وعمر حل عينيه نص حلة ونطق نوح ببرود:عندك يوماااين تكدب فيهوم لهضرة لي خرجتي عليها يوصل نهار التالت ونلقااك مادرتيهااش ديك الساعة غاتشوف حساااب خرر...

خلاه مليوح فوسط لكوزينة وحالتو حالة وخرج من لاباخطمون ممسوقش لشنو خلى وراه حيت داكشي لي دااار من حقو وعمر هو لي سبق... فطريقو تخالف مع واحد خيتي لي كانت لابس ومزيزة وروااايح ديالها يتشمو من بعيد... طلعاتو ونزلاتو بنظرة تقيمية عاضة على شنافتها بطريقة مااايعة وهو تگول واش حشاها ليها تخطاهاا وكمل نزول ديالو فالدرووج حيت لاسونسور خسر... وهي بدورها كملات طريقها تاطرطق فديك المسكة تاوصلات لباب لاباخطمون وهي تلقى لباب مردود دفعاتو ومع حطات رجليها لقاات الدنيا مروونة...كملات طريقها تاتعيط ليه والخوف كيتسلل لقلبها وماحدهاا تادخل ماحد تاتلقى الروينة والزااج وغير ضربات على داك الدم وهي تخرج عينيها من بلاصتهوم تبعات لاطراس تاوصلات لكوزينة وهي تشوفو فديك الحالة بحال لميت وجهو ماتعرفيهش بقوة ماتنفخ ودم مجلخووو...خرجات عينيها وغوتااات على جهد بسميتو وهي مطيحة الصااك:عمررررر

حل طوموبيلتو ودخل جلس ممسوقش لديك الروينة لي خلى وراه وهاداك لي ماعرفو واااش حي ولا مييت... هز تلفونو لي كان حابس ليه صوت ولقى رحيل مصونياا عليه ودوز ليها لخط باش يطمنهاا وغير صونى لمرة لولة وهو يسمع صوتهاا وهي ناطقة بسرعة وخوف:نوووح فينك؟

نوح:(نطق بخشونة) أنا جااي الفتنة ماتشطنيش بالك

رحيل:(بهدوء)مشيتي عندو ياااك؟

نوح:رحييل أناا جاااي

رحيل:(تنهدات) واخا رد البااال لراسك

قطع لابيل وتحرك من تم غادي لرياض فصمت رهييب...عارفة بلي هادشي لي طرا يقدر يسبب ليه مشكيل وهو راه دااير حساابو واخا الأعصاب تيخليوه يطفى ولكن من بعد تايعرف كيفاااش يكونطرولي لموضوع ويحلو... طريقو كلها وهو كيخمم لبلان تاوصل لرياض ونزل بخطوات تقيلة حاس بيديه كاضرو من لكتف حيت خدمها بزااف... كان باغي يمشي لعند ختو ولكن عارفها غاتكون ناعسة وزيد خصو يجبد ليها وديناتهاا حيت خبات عليه وكون مارحيل لي گالتها ليه كون واهلي فين وصلات القضية...مع حل لباب دالجناح لقى رحيل فوجهو مع شافتو من الشرجم فاش نزل من الطوموييل...

رحيل:نووحينو

قربات جهتو وعنقاتو وهو بادلها تعنيقة وباااس راسها وهي تخشات فيه..تخلعات عليه وهو طمنها بتعنيقتو تااابعدات وشافت فيه شوفة كاملة كطمن عليه وهي تبان ليها داك شوية دم لي فيه وقالت وهي سارطة ريقها:شنو درتي ليه؟

نوح:(باسها فجبهتها وقال بحنية) ماتهزيش لهم لهادشي واخاا

رحيل:أنا خايفة عليك انوح وعارفاك فاش تتعصب كاتنسى راسك ومكاتبقاش عاقل على تاحاجة

نوح:(خنزر فيها) درت لي خصو يدار شنو تبغي ندير ليه مثلا نعنقو ولانصفق ليه هو باغي يلعب لعب كبير عليه وماجاا غير لختي عند بالو راه ماعندهااش لي يدافع عليها باغي يحگر عليهاا ساعة لقى لي يحگر عليه

رحيل:عارفة بلي من حقك ولكن فكر فينا حنا وفختك عارفاك فاش تتعصب مكتعقل على حد واش نسيتي شنو درتي لولد عمك

نوح:(قاطعها وهو هاز حاجبو لسمااا) حيت هوما ولاد لقح*اب تايقلبو علياا انا عاطي تقاار ولكن لي جبد عيبي رااه غايشوفوو وعيبي راه خاااايب

رحيل:(لمسات كتفو بحنية)صافي ماتعصبش راه غايطلع ليك تاني السكاار

نوح:(باسهاا فجبهتها وقال بخفوت)مامعصبش غير تهنااي غاندخل ندوش ونجي

خلاها وراه كاتنهد وطلب الله يدوز هادشي على خير... مشات لبلاصتها جالسة تاتسنااه تاخرج مدوش ولابس غير شورط ولفوق عرياان وهاز معاه زيت ديال لمساج جلس قدامها عاطيها بالضهر وشعرو باقي سارد بلمااا وروايح عاطين منو...

نوح:(مد ليها زيت)ديري مساج لكتافي وخصوصا ليمن

رحيل:واخا

شدات الزيت وبدات تماصي ليه وهو تايحرك عنقو وتايحس براسو ترخى وماكرهش دير ليه مساج كامل غير عارفها مغاتقدرش... سالات وهو طلع لبلاصتو تأنسطالى وهي مشات غسلات يديها وقضات حاجتهاا وحسات بضهرها ضارها ولوجع هلكهاا...جات جهتو تخشات ونطقات بألم:فيا لوجع

نوح:(تكى وشاف فيها بجدية) واش فيك بزاف

رحيل:من هنا(حطات يديها تحت صدرها) فاش كيتقلبو كيبركو ليا عليه اااممم نااري

نوح:نديك لطبيبة؟

رحيل:تت غير تايتحركو اووووف (بدات تادوز يديها على كرشها)امامي بشوية عليااا

دوز يديه على كرشها تايمسدها ليها تاحس بركيلات لي خلاوه يتبسم مغمض عينو ورحيل قالت بضحك:هانتا شفتي حسو بيك

نوح:شوية دابا؟

رحيل:ااه حمدلله

نوح:يالاه نعسي باش نرتااحي لياا

رحيل:(حطات راسها على دراعو وقالت بخفوت)تصبح على خير...

**

دازت الليلة بخير وعلى خير وطلعات شميشة معلنة على قدوم يوم جديد...وصلات بيسان لسبيطاار ومع دخلات لقات صاحبتها تاتسنى فيهاا شداتها من يديها وقالت بضحك:فخبارك عميمير مغايجيش

بيسان:(خنزرات)وأنا مالي ؟؟

ص:واسمعي بعدا السيد راه ناعس فلكلينيك شي حد شدو لبارح وعطاه سلخة دلكلاب راه داك صاحبو لي كان جا ديك لمرة عاود جا ليوم وگالها ليااا باقي مغيب مفااقش وگال ليك وجهو تشوه بالضرب

بيسان:الله يزيدو من عندو ماكرهتش ليه ماكتر

ص:مهم فاش گالها ليا صاحبو بديت نجبد منو لهضرة زعمة راه بقا فياا وهو على نيتو تيعاود گال ليك غالبا غايكون شي شفاار حيت لقاو دار كلها مگلوبة بااين شي حد كان باغي يگريسيه ولاشي حد محلفها فيه واخا صاحبو گال بلي عميمير راه ماعندوش أعداااء ولكن شكون عرف

بيسان:دنوبي خرجو فيه وربي خدا ليا حقي منوو

عند بال بيسان راه ربي جاب حقهاا ساعة مكانتش عارفة بلي خوها هو لي جاب حقهااا بيديه...ارتاحت من الخبر لي سمعاات واخا توشويش الفرمليات باقي ولكن مكتسوقش ليهوم حيت عارفة راسها اش دارت وزيد هاد الايام غاتفتاتح عيادتها وأغلب وقتها غاتبقا تم وهادشي لي مخليهاا ترتاح نسبيااا... أما عند نوح فكان جالس فالميزون دڤواتيغ هو وعتمان وطاسات دلقهوة قدامهوم...

نوح:(رجع ضهرو على لكرسي وقال بخشونة) نتاا هضر مع لحاج ولحاجة ونهار السبت اجيو

عتمان:صافي مزيان اولد لحاج ياك البنت قابلة بعداا

نوح:(هز حاجبو فيه)كانلعبو هناا اياااغيول دويناا

عتمان:(ضحك بالجهد) سامحاااس اولد لحاج راك عارف غير لحماااس وصااف (ناض كيتكسل) غانعيط نيت دابا لحاجة ونعلمها باش تشوف داكشي لي خص يوجد توجدو السبت مبقا ليه والو

نوح:سير عالله

خلاه عتمان ومشى عيط لمو لي كانت تاهي على سبة وغير علمها ناضت هي وبنتها يوجدو لي خااص والحمااس شادهوم... أما نوح كمل نهارو فلخدمة وخرج غادي لسبيطار عند بيسان لي كانت تاتسناه حيت علمهاا مع وصل خرجات عندو وسمحات فالطوموبيل ديالها مخلياها تم وركبات معاه وهي ضاحكة:ههه شحال هادشي ماجيتي تاخدني من الخدمة

نوح:وهاني جييت ونيت نهضرو أنا وياك

بيسان:ياك لبااس؟

نوح:(غمزها بلخف) وليتي كاتخبي على خوك ابيسااان...

شافت فيه بيسان بتعجب معرفااش اش قصد بهضرتو وقالت بخفوت:شنو خبيت عليك ؟

نوح:(قال بلامايشوف فيها)شوفي اش خبيتي

قلبها دق والحاجة لي طاحت فبالها هي علاقتها بريان حيت هي لي خباات أما قضية عمر مشات من بالهااا... قالت بخفوت:ماخبيت والو

نوح:(حبس طوموبيل جنب الطريق وشاف فيها بهدوء)شنو بلان داك الطبيب لي خدام معاك؟

بيسان:(قلبها ضرب) گالتها ليك رحيل

نوح:ماشي نتي لي خصك تگوليهاا؟

تنهدات بيسان وهي عارفة بلي خوها عندو لحق وقالت: خفت عليك

نوح:داكشي مكيتسكتش عليه ابيسان

بيسان:مكنتش باغا نخبي أنا والله تاغير خفت ندير ليك شي مشكيل وصاف

نوح:(حمر فيها الشوفة وقصح معاها لهضرة)ماشغلكش الالة نتي اجي علميني وتسوخري اللور وأنا نتفااهم مع داك لحيواان بيني وبينو ماشي تسكتي وتخليه يتفرعن ويخرج كلاام عليك وتزيدي تعطيه فرصة فين يتمادى

بيسان:(ساكتة ومهبطة راسها )

نوح:عارف روحي مغالطش مغانسكتش على حقي وغانخرج عيني فبناادم ماشي نبقا ساكت وهو يضسر عند بالو غلبني واش هاكا علمتك همم دوي مالك بالعة لساانك

بيسان:عندك لحق اخويا

نوح:اخر مرة ابيسان (عاود هضرتو بصرامة) اخر مرة يتعاود بحال هاد لبلان سمعتي ماغلطتيش ماتحشميش اجي عندي وأناا عارف اش ندير تفاهمناا

حركات راسها باه وهو جرها وعنقها تيبوس على راسهاا وقال بهدوء:أي حاجة طرات معاك تجي وتگوليها لياا لاماخديتش ليك حقك شكون ياخدو ليك

بيسان:عارفة اخويا غير خفت نسبب مشكيل ليك وصاف

نوح:صافي دابا ماعليش لي وقع وقع

تحركو من تم وقرر نوح يخرج غير هو وياها ويساريها شوية كيف كان تيدير شحال هادي...مشاو كلاو وداها تشري لي خصها وموراها رجعو لريااض وبيسان حسات براسها ارتاحت ومبقاتش مزيرة كيف قبل...

**

وصل يوم السبت وفدار لي كارين غزلان وأميمة كانت سيدرا غادة جايا بكسيوتها فرحانة بيهاا...وفالبيت دلبنات كانت الروينة نايضة وكلشي مقلووب تاحاجة مافبلاصتهاا...هزات رحيل ريحتها ورشات منها وشافت فعبايتها وفولارها لي كانو مقادين ورجعات شافت فلبنات لي باقي مدابزين تيوجدو راسهوم وقالت:سربيو راه تعطلناا

غزلان:(تاتركب حلقاتها) واخا قربنا

أميمة:(تادير اخر لمسات فلمك اب) شحال من واحد غايجي

رحيل:مو وباه راه باينة والبقية ماعرفتش مهم غانخرج نشوف فين وصلو فتوجاد ماتعطلوش...خرجات وتلقات فطريقها نوح لي سولها واش قربو حيت عتمان ودارو راه وصلو غير واقفين فالطريق تايعلمهوم...گالت ليه راه قربو وغير يجيو ورجع خرج يعيط ليهوم وهي كملات طريقها لكوزينة تشوف اشنو وجد...

فدار سي إدريس كان داخل محمد طه وهو حاس بلعيا حيت ليوم خدم فلمحال لي مولف عتمان يشدو حيت مكاينش ..باغي غير ينعس طلع فالدروج وتايسمع لسكات ماعرف فين غايكونو مشاو...بدل عليه حوايجو وخرج غادي لعند ريان يسولو على باه وخالتو تانيرت فين مشاو ومع وصل لباب سمع صوت ريان لي قال بهدوء:ضروري مغايسيق لخبار وماعندنا مانديرو

أسماء:غاتجيه قاصحة لاعرف

رنيم:ريان عندو لحق ماعندنا مانديرو لبنت جاها رزقها تگول ليه لا

ريان:محمد طه وغزلان طلقو وهي راه لابد ماغاتبداا حياة جديدة مع حد خر

أسماء:(تنهدات) هازة ليه لهم

رنيم:ياك غيزو موافقة عليه وقابلة اوا خص تامحمد طه يتقبل بلي هي غاتزوج مرة خرا

مع سالات تحل عليهوم لباب ودخل محمد طه بحال شي تور كينهج وعينيه حمرين قرب جهة ريان شنق عليه وقال بصراخ:اش تتگول از*بي

ريان:(نطق وهو كيحيد يديه) لي سمعتي هو لي كااين غزلان جاوها لخطاب ليوم

محمد طه:واش من نيتكووم القلا*ي وااابربي لاتزوج بيهااا شي قووو*ااد سمعتو

دفعو على أسمااء لي كانت اطيح كون مشداتهاش رنيم وخرج مكيقشعش قدامو وهضرتهوم لي سمع شعلات فيه لحريگة فكرة أنها غاتزوح بواحد خر ماتقبلهاش نهائيا ..من زهرو كان باه مخلي طوموبيلتو هز سوارتها وركب غادي منير وشحال من ضو حمر حرگ وكان غايضرب شحال من واحد غير ربي لطف واخرتها شدو بوليسي على السرعة وهو رغبو وزاوگو باش يخليه يمشي وكدب عليه بلي مرتو حاملة وغاتولد ومن زهرو لبوليسي طلع ولد الناس وخلاه يمشي وهو كمل طريقو تاوصل ونزل وأول حاجة ضرب عليها هي طوموبيل لي كان ديجا شافها نزلات منها واقفة قدام باب لعمارة وهنا قلبو ضرب وبرزبة دخل تايطلع فالدروج وينهج ومع وصل لباب باغي يدق وهو يسمع صوت الزغاااريت وحدة مور وحدة خلاوه يجمد بلاصتو وقلبو حس بيه ضروو وداتو فشلات عليه فاش عرفها طارت من بين يديه...

بزاف دالناس مكيعرفوش بقيمة الحاجة لي عندهوم تاكاتمشي بين يديهوم...كانت بين يديه وردة مفتحة وهو كرفصها بتصرفاتو ومعاملتو معاها... من نهار حطات رجليها فالدار وهو تيعاملها بلخايب واخا عمرها أداتو وعمرو شاف منها لعيب ومع دلك كان تيقصح معاها... يمكن البداية كانت غالطة بناتهوم ولكن هادشي مكيعنيش أنهم ماخصهومش يعطيو فرصة لبعضياتهوم... كل واحد فيهوم كان عارف الغلط ديالو وحاولو يصلحوه ولكن هو مدارش مجهود باش ينجح ديك العلاقة...استاهن بيها وفالأخير هي مقدراتش على البرود والتعامل ديالو معاهاا... طلبات الطلاق وقررات تبدا حياة جديدة ومن حقهاا...هي إنسانة ماشي جمااد لي مايحسش ويبقا صاابر بصح تتبغيه ولكن الحب ماشي كافي باش ديك العلاقة تنجح... لمالقيتيش فالزواج الاحترام والاهتماام والتقة راه مكيتسمااش زوااج... محمد طه اعتارف بهادشي ولكن متأخر فاش فااات لفوت وطلقو وهي مشات تبني حيااتها...عرف راسو غلط وبلي داك الماضي لي كان موهم بيه راسو هو سبابو تاخرج على حاضرو... بقا مرض راسو ومرض معاه بنت الناس ماليها دنب... نهار نوى يتعالج كان داير فبالو أنه غايدير لي فجهدو باش يصلح من حالتو ونفسيتوو وميبقااش مريض فراسو... يرجع كيف كاان من قبل محمد طه لي الضحيكة عمرها خطات وجهو ولي ضارب الدنيا بركلة ومهازش لهم لتاشي حاجة... عايش كل حاجة بوقتها باغي يفتح قلبو وهاد لمرة يكون شعور متبادل بينو وبين غزلان...يعيش معاها حلاوة الحب وتامرارتو...

واقف قدام الباب جامد وعيينيه على لباب ديال الدار تيسمع لزغاريت وهو مرفوع وعقلو طرح عليه سؤال..واش أنا خسرتهاا ومبقااتش ديالي؟؟ واش صافي ضاعت من بين يدي وجاا لي يعرف قيمتهاا؟

حرك راسو يمين وشمال رافض ديك الفكرة وعينيه تزيرو وحموريتهوم خلات لونهوم لخضر مبقاش يباان... وماحس براسو تاندافع نيشاان جهة لباب كيدق بالجهاالة وفنفسو كيگول والله لاخليتها لشي حد هي ديااالي... تحل لباب من طرف رحيل لي كمشات عينيها وشافت فيه بتفاجأ قائلة:محمد طه نتا شنو كادير هنااا؟

محمد طه:(خنزر فيها وقال بصوت مرتافع) فين هي

رحيل:محمد

دفعهاا بشوية مكمل طريقو مكيقشعش وهي وراه ومحمد طه غير حط رجليه فالصالة ورجليه يبسو وعينو ماتجي غير فعتمان لي جالس فالسداري لابس لكلااص ومأنتك على لحالة وفجنبو جالسة أميمة لي كانت مأنتكة بقفطان سامبل وشعرها لي مصبغاه بزعيعر مطلوق ودايرة مك اب خفيف...عينيه ضارو على لحضور تجات فغزلان لي كانت جالسة جنب تانيرت لابسة كسيوة طويلة وتاهي مقادة حالتهاا ومصايبة شعرها وجمعاه كوت شوڤال مخليا لگصيصة... كلشي كان تيشوف فيه وهو حشم ومرگ وبقا غير تيضور فعينيه مفاهم والو...

تانيرت:(شافت فواليدين أميمة أو واليدين عتمان وقالت بتبسيمة) هادا ولدي محمد طه خو رحيل

ممات أميمة:مرحبا اولدي مرحبا

جلس محمد طه ولحد الآن باقي مفاهم والو شنو واقع ياك لخطبة ديال غزلان علاش صاحبتها لي جالسة جنب عتمان وزيد واش عتمان هو لعريس...حس براسو تخربق ودايخ وعينو غير على غزلان لي مكانتش تتشوف فيه وممعبرهااش گاع..

كانت رحيل جالسة جنب نوح وفيديها التلفون سيفطات مساج لريان " الخطة نجحات"

رجعات التلفون وشافت فمحمد طه مبسمة بالخف وماحسات غير بأنفاس نوح ضاربين فوجهها وصوتو الخشن لي همس جنب ودنيهاا:اش طاابخة تاني الفتنة ديالي

ضارت شافت فيه ودارت شوفات دلقطة تتمسكن وبنفس الخفوت قالت:هااء شنو؟

نوح:(غمزها بالخف) غير الشوفة فيك تاتخليني نعرف اش كيضور عندك فداك الراس

رحيل:(نكرات)والو ماكيضور والو

رجعات تتشوف قدامهاا ساكتة وهو حرك راسو بلاحول ورجع مجمع مع إدريس والبقية...

أما عند ريان وأسماء ورنيم غير وصلهوم لمساج وهوما يطلقوها بضحكة عالية حيت كيف بغااو طراا... نهار علماتهوم رحيل بلي عتمان لي خدام مع نوح ناوي يخطب أميمة اقتارح عليهوم ريان هاد لفكرة لي فالبداية خافو لاماتصدقش ويوقع شي مشكيل ولكن من بعد فكرات فيها رحيل من واحد الجيهة وقالت يمكن لاطبقناها ومحمد طه عرف بلي غزلان ضاعت من بين يديه يتحرك ويدير شي حاجة ومايبقاش مربع يديه... حيت يقدر يجي النهار لي بصح يبغي شي حد يخطبها وتوافق عليه وهو مغايقدر يدير والو وديك الساعة غايتحسر عليها حياتو كلها والندامة مغاتبقااش تفيد...شافت فخوها لي كانو نظراتو مفيكسين على غزلان وتنهدات من قلبها كاتمنى الأمور ترجع بيناتهوم حسن من قبل...وخوها يدير خطوة لقداام و ميبقاش مربع يديه وكيتفرج من بعيد...

الجلسة دازت زوينة وعائلة أميمة ناس بساط وتاعائلة عتماان لي كانو اجتماعين ومو الضحكة على وجهها وبشوشة باين فيها قلبها كبير أما ختو لكبيرة مزوجة تاهي مفروحة دغيا بنات صداقة هي ورحيل وجلس جنب مجمعيين مع غزلان لي حاولات تلهي راسها معاهوم واخا حاسة بنظرات محمد طه عليها مامخليهاش تجلس فراحتهاا...

فالجيهة لخرى دالصالة كانت أميمة جالسة هي وعتمان لي الضحكة على لوجه وعينو كاطلعها وتنزلهاا براحة...من نهار لول شافها فلمحال وعينو عليهاا عجباتو وعمرو بينها ليها وتامن هضرتو معاها كانت فقط على لخدمة والسلعة وصاف عكس غزلان لي تايجمع معاهاا ويعطيها لخااطر...نهار جات رحيل وعلماتها ماتيقااتش أميمة وعند بالها راه رحيل طانزة عليها حيت السيد عمرو بين شي حاجة بلعكس هي كانت ديما تتشد فغزلان وتگول ليها راه السيد طايح فيك وباغيك وتافاش علماتها رحيل بنيتو گالت ليها راه يقدر تكوني غلطتي وهو قصد غزلان... هي مكانتش مدخلاه لراسها ولكن مغاتنكرش بلي نهار عرفات حسات بالراحة من جهتو حيت باين فيه ولد الناس وشكلا مقبول وزوين بزينو الحرش... هزات عينيها فاش سمعاتو هضر معاها:غانبقاو ساكتين الزعرة

أميمة:شنو نگول؟

عتمان:لي بان ليك زعمة راه داباا حنا مخطوبين وخصنا نتعارفو على بعضياتناا

أميمة:مالقيت مانگول صراحة

عتمان:عجبك لخاتم لواليدة وختي لي عزلوه إن شاء الله فالخطبة لكبيرة نمشيو ونشريوه على دوقك

أميمة:واخا أصلا تاهاد زوين

عتمان:راه عينيك لي زوينين الزعرة

أميمة:الله يزين يامك

عتمان:اه قبل مانسى عطيني نمرتك باش نبقاو ندويو

أميمة:واخا عطيني نقيد ليك

شدات تلفون وقيدات نمرتها ورجعاتو ليه وكملو كلامهوم لبسيط وأميمة شاداها شوية دلحشمة والتوتر لي تيكون عادي فالمرة لولة...

فالكوزينة كانت تانيرت تتوجد طباسل وبحكم جايبين لماكلة واجدة كان خصهوم غير يوجد الطبلة ومعاونة هي وغزلان لي ناضت عندها حيت مت أميمة راه جالسة مع مو وختو ومجاتش تنوض وتخليهوم بوحدهوم مع رجاال... تحطات الطبلة فيها گاع لي تشهات خاطرك وحيت تانيرت عارفة نووح مكيبغيش يتجمع مع النسا فصلات المجامع... تعشاو وختموها بكويس دأتاي قبل ماينساحبو حيت مشى لحاال ومت عتمان عرضات عليهوم لدارها بااش تاهوما يجيو عندهوم ونيت العائلات يزيدو يتعارفو على بعضياتهوم كتر...مشى عتمان ودارهوم ونوح تاهو قرر يمشي حيت سيدرا قارية غدا وخصها تنعس بكري واخا رحيل بغات تزيد تبقا شوية...

جالس على الشوك كيسمع لباه ونوح وبات أميمة مجمعين وتانيرت ومت أميمة راه كيجمعو فالروينة أما لبنات تعزلو فالبيت...كان باغي يدوي معاهاا ولكن معرفش كيفااش غايدير ليها وهي فالبيت مع البنات...جبد تلفونو كيتلف فيه لوقت تاسمع صوتها وهي تاتهضر مع تانيرت وهو يهز راسو لقاها واقفة فالكولوار وجات قدامو بقا حاضيها وغير شافها مشات وهو ينوض تابعها وقبل ماتوصل لبيت شدها من دراعها وهي ضارت بالدعقة باغا تهضر وهو يسد ليها فمهاا وجرها جهة لباب دالزنقة حلو وخرجهاا وخرج تاهو راد لباب وراه باش مايسمعوش ليهوم...

غزلان:(خنزرات فيه) باشمن حق تتقيس فياا ومخرجني لهنا اش باغي مني؟

محمد طه:(تيحاول يكالمي راسو) باغي ندوي معاك

غزلان:مكاين فاش ندويو أنا وياك عطيني غير بالتيساااع

محمد طه:(نطق بجدية) غزلان بلاقصوحية الراس وعطيني وقت وفرصة باش نهضر معاك

غزلان: أنا وياك مابيناتنا تاشي حاجة باش نهضرو عليهاا سمعتي بلاماتحمق راسك وتحمقني معاك

محمد طه:(خنزر فيها) علاش مكاينش واااش نسيتي بلي أنا وياك كنا مزوجين ؟

غزلان:هانتا گلتيها بفمك كناا مزووجين أما دابا كل واحد فينا شد طريق لي مناسبااه

محمد طه:(بهدوء)وأنا هاد الطريق تانحس بيها ممناسبانيش حيت نتي مكينااش فيهاا

غزلان:(تبسمات ليه ببرود) ولكن أنا كانحس بطريقي منسباني حين نتا مافيهااش كانحس بالراحة حيت مبقيتش حابسة راسي فواحد لعلاقة لي مريضة ولي كاتهلك ليا فصحتي ونفسيتي باش نتا تكون مرتااح أناا مغاديش نضيع راسي على قبلك نتاا (كملات بسخرية) نتاا لي عمرك تسوقتي وكنتي تتفكر غير فراسك

محمد طه:(لهضرة لي تيسمع من فمها كانت قاصحة عليه وداخليا مامتقبلهااش..تنهد وقرب شدها فيديها واخا هي كانت باغا تنترهوم إلا أنه زير عليها مزياان وقاال وعينو فقلب عينيها بصوت حنين كيبورش) ضريتك قبل ولكن هاد لمرة عمري نعاود نضرك ونأديك علاش ماتخلينااش نعااود من جديد وهاد لمرة لبدية غاتكوون غيير

غزلان:(بخفوت نطقات) أصلا نتا أديتيني بيما فيما فيه الكفاية ومابقا عندي فين نزيد وطريقنا من لول كانت مسدودة لانتا مناسبني ولاأنا مناسبااك...

كان جالس معاهوم مجمعين وهو لكسدة لي حاضرة أما لعقل راه معاهاا كيفكر فكلامها لي قالت ليه وكيفاش جاتو من لخر... قطعات ليه لياااس وهو لي باقي باغي يقاد العلاقة ويصلح لي بناتهوم ويعوضها على مافات ساعة نسى بلي لي عضو لحنش يخاف من لحبل وغزلان خايفة لاتعاود تكرر ليها التجربة مرة خرا وتعاود نفس السيناريو عليها قررات ماتعطيش لراسها أمل وليه تاهو تجيه من لخر بااش تاهي بنفسها لافكرات أنها ترطب قلبها وتعطيه فرصة غير غاتفكر مدار ليها وداكشي لي عانات فزواجها معاه غاتلغي فكرة الرجوع بمرة... ماسخااش يمشي ولكن مجرد ماناض نوح وبااه اضطر تاهو ينوض معاهوم...ودعهوم وغزلان تعاملات معاه ببرود لي هو معاجبوش نهائيا كيحس بيها مبقاتش غزلان لي كان تيعرف ولات وحدة خرا وهادشي لي تيقتلوو من لدااخل... معارفش بلي لمرا فاش تتعطي ومكتاخدش تايجي نهار لي تاهي كاتقلب وكاتجمع راسها...سبق نوح وإدريس هوما لولين معاهوم محمد طه وبقات رحيل هي ومها مسندة عليها وتايهضرو فنفس الوقت..

رحيل:صراحة مافيا لي يمشي ولكن بزز علياا راه لحنة براسها ماحضرناش ليهاا

تانيرت:والطريق غايكون صعيب عليك ابنتي راه بديتي تتقلي وراك فشهرك التامن

رحيل:ماعندي كيف ندير سناء براسها عيطات ليا وعرضاتني وتانوح مايقدرش مايحضرش وصراحة مابغيتوش يمشي بوحدو لتم

تانيرت:شحال غاتبقاو؟

رحيل:غدا فالليل لعرس شي يوماين ولاتلتيام ونرجعو

تانيرت:وسيدرا خليها عندي تاتجي

رحيل:داكشي لي فبالي نديرو حيت مايصلاحش لياا نجلسهاا تاني وتسافر تبقا معاكوم تانرجع غدا جيبوها من لمدراسة

تانيرت:اوا ردي لبال لراسك واخا وماتجهديش على راسك ابنتي

رحيل:واخا سلمي على لبنات تانرجع

تسلمات هي ومها ومشات جهة باها ومحمد سلمات عليهوم وركبات فطوموبيل نوح وكل واحد شد الوجهة ديالو...

رحيل:(متكية على الزاج وبتعب قالت)وقتاش غانتحركو؟

نوح:مع العشرة دالصباح

رحيل:مغانتعطلوش ياك انوح راك عارف غادة غير بزز

نوح:(شاف فيها ولمس حنكها بضهر يديه ونطق بحنية)لامقدرتيش تمشي نأنوليو كولشي

رحيل:نووو منأنوليوش مي غير مانطولوش انوحينو

نوح:لي حبات خااطرك الفتنة

**

فبيت سيدرا لي كانت غضبانة مباغاش تلبس حوايجها ورحيل جالسة فوق نموسيتهاا وهي مكمشة حجبانها فيهاا... قصوحية رااس بنتهاا عمرها شافت بحالها...

رحيل:مغاتلبسييش حوايجك راه مشى لحال لمدرسة

سيدرا:(حركات راسها بعناد)بغيت نمشي معاكوم

رحيل:(بقصوحية)راه دويت معاااك مغاتمشيش وزايدون يوماين وغانرجعو هازين العابدين براسو مغااديش

سيدرا:(ضربات برجليهاا) وبغيت نمشي أنا وتازينبيدين يمشي معانا

رحيل:(نطقات تتحلف)والله وماتلبسي حوايجك يتااانجي نسلخك عمري درتها وليوم غانديرهاا

ضربات سيدرا برجليها وغوتااات بالجهد وخرجات من لبيت مجننة ورحيل بلاعگز ناضت تبعااهاا أصلا مبقاش عندها لخااطر وتاهي مكانتش باغا تمشي لفاس حيت مافيها لي يشوف شيماء وزيد لحمالة لي تاتعييها والنعاس لي مبقاتش تتشوف ملي دخل شهرها التامن...لقاتها طارت لعند نوح ومع دخلات بانت ليها مخشية فيه تتبكي وهو معارفش مالها عند بالو غوتات عليها رحيل وزاد تأكد فاش شافها مخنزرة..

رحيل:(خنزرات) عند بالك لاتخبيتي عند بااك راه مغتاكليهاش من عندي؟؟

نوح:(شاف فيها بجدية)اش واقع على صبااح؟

رحيل:هاديك راه خصها لعصا مقصحة راسها وبغات تمشي معانا وزايدااهاا بلغوااات

نوح:رحييل (هز حاجبو) بلخااطر

رحيل:هاهي منك ليها راه قرب يجي طرونسبور يديها وباقي مالبسات مامشطات مافطرات

مشات رحيل تاتزفر النفس وهو تحدر جهة سيدرا لي تخشات فيه وقال بهدوء وجدية:شوفي فياا اسيدرا

خرجات راسها وشافت فيه وعويناتها لمبطنين فازگين بدموع...مسحهوم ليها وقال فنفس الوقت:شنو گلناا على لغوااات؟

سيدرا:(نطقات وهي تاتهز كتيفاتها) مدرتهاش بلعاني بابانو

نوح:وأنا شنو گلت؟

سيدرا:(جامعة شنافتها)مانغوتش على مامي وعلى لي كبر مني حيت حشومة وناس غايگولو عليا أنا ممربيااش ومزويناااش ولكن أنا زوينة بابانو ياكا

نوح:لابقيني تتغوتي مغاتبقايش زوينة وغاتولي باسلة وناس مغاتبقاش تبغي تهضر معاك لاكنا بغينا نطلبو لحاجة من شي حد متانغوتوش تانهضرو بشوية وبأدب وعمرنا مكنعليو صوتنا على واليدين حيت الله سبحانه وتعالى وصانا على الواليدين (كمش حجبانو) عقلتي على الآية لي كنت حفظتك؟

سيدرا:(حركات راسها باه وقالت ببرائة وتركيز وهي مزيرة على يديها كاتستعقل الآية) ﴿وَقَضى رَبُّكَ ألا تَعْبُدُوا إلا إيّاهُ وبِالوالِدَيْنِ إحْسانًا إمّا يَبْلُغَنَّ عِنْدَكَ الكِبَرَ أحَدُهُما أو كِلاهُما فَلا تَقُلْ لَهُما أُفٍّ ولا تَنْهَرْهُما وقُلْ لَهُما قَوْلا كَرِيمًا﴾﴿واخْفِضْ لَهُما جَناحَ الذُلِّ مِنَ الرَحْمَةِ وقُلْ رَبِّي ارْحَمْهُما كَما رَبَّيانِي صَغِيرًا﴾ياك ابابانو گلتها صحيحة يااكااا

نوح:(حرك راسو بهدوء) براافو وشنو كنت قلت ليك المعنى ديالها ؟؟

سيدرا:(نطقات بشوية وهي تاتشوف فيه بعوينات الببوشة) مانبقاوش نغوتو على ماميتنا وبابيتنا ونگولو ليهوم غير الكلام الزوين

نوح:ونتي شنو درتي ؟

سيدرا:غوت على مامي

نوح:وشنو خصك ديري؟

سيدرا:نگول ليها تسمح لياا ابابانو

نوح:(بجدية) ودابا سيري عند ماماك وسمعي كلامهاا واخر مرة نلقااك تتغوتي عليهاا

سيدرا:(عنقاتو)صافي بابانو سمحليا

نوح:(عنقها وباس راسها وقال بحنية) المسامحة ابابا ولكن متعاوديهااش يالاه لبسي حوايجك باش تمشي لمدراسة

حركات سيدرا راسها باه ونزلات من عندو غادة تتجري تقلب على رحيل باش تعتادر ليها...ممولفاش تتغوت ولكن راه فاش تتجنن وتتعصب كاتبقا تغوت بزاف أما لعناد اش كادير ليه راسها قصح من لحجرة..لقات رحيل تتوجد ليها لانش بوكس لي غاتدي لغدا ومشات عنقاتها من رجليها ونطقات ببرائة:سمحيليا مامي منعاودش نغوت عليك أناا

رحيل:(تنهدات وهبطات راسها تتشوف فيها) كاديريها قد راسك وتتجي تمسكني عليا كيف لقطة

بقات سيدرا تتشوف فيها بعوينات لقطة وهي ساكتة ورحيل تنهدات وقالت وهي تتلمس شعرها:واخا نبغي نتقلق منك قلبي مكيطاوعنيش...

سيدرا:(زيرات عليها فتعنيقة وقالت بحب) تانحملك بزااف امامي

رحيل:تاأنا امامي يالاه طلعي لبسي حوايجك راه تعطلتي

مشات سيدرا تاطير باش توجد راسها ورحيل تنهدات بصح قلبها مكيطاوعهاش تقلق من سيدرا ولاتغضب عليها حيت سيدرا معزتها غير عند رحيل والظروف لي كانت فيهوم خلاوهاا تبغيها بطريقة ميمكنش ليها توصف... رجعات تتكمل ليها لغدا بينما البخوشة طلعات لبيت وبدات تتلبس حويجاتها لي كانت ديجا جبداتهوم ليها رحيل... قدات كلشي وشعرها وحلات فيه حيت طويل...خرجات هازة لمشطة ومشات عند نوح باش يمشط ليهاا... دقات لباب ومع دخلات مالقاتوش حيت كان تيدوش بقات جالسة تتسنااه تاسمعات صوت زين العابدين لي كان تيعيط ليه:الواااليد

خرجات عندو سيدرا لقاتو واقف حدا لباب لي كان محلول حيت خلاتو وكان لابس حوايجو وهاز شكارتو تبسمات ليه وقالت: زينبيدين بابانو مكاينش هنا

زين العابدين:فين هو؟

سيدرا:تيدوش

شاف فساعتو وبقا واقف حدا لباب كيتسناه تاهو باغي يهضر معاه فشي حاجة وحيت باه غايسافر وهو قاري نهار كامل فهاد لوقيتة هي لوحيدة لي يقدر يشوفو فيهاا...

سيدرا:(شافت فيه ببرائة)زينبيدين مشط ليا شعري

زين العابدين:(داير ليزيات ومرجع راسو لور مامسوقش ليها كيف عادتو)

سيدرا:(جراتو من سروالو تاحل عينو وشاف فيها) وازينبيدين مشط ليا شعري

قلب وجهو وفنفس اللحظة خرج عندهوم نوح لي كان تيمسح شعرو ومع سمع صوت الهضرة مشى يشوف اش كاين..

نوح:(غمز زين العابدين)اش تم؟

زين العابدين:بغيت ندوي معاك على داكشي دلبارح

نوح:قاري دابا؟

زين العابدين:مع 9

نوح:دخل (شاف فسيدرا لي هازة لمشطة ولفلايلة فيديها وقال) ساليتي ابابا

سيدرا:(مدات ليه يدياتها وقالت ببرائة)بغيت نمشط شعري بابانو

نوح:(شاف فزين العابدين وقال بهدوء وهو غادي جهة دريسينغ باش يلبس عليه تاهو) مشط ليها شعرها أنا جااي

خلااه بزز منو يشد لمشطة وهو محاملش لبلان وزيد معارفش اش غايدير...جلس قفازي باش يالاه يلحگ يجي قدها وهي ضارت ومبقاتش تتحرك...خدا لمشطة ودوزها بالجهد على شعرها مع مخبل قصحها وضارت شافت فيه وقالت:بشوية زنبيدين راه تيضرني

ضور ليها وجهها وبدا تيمشط ليها باغي غير يتفك وهي ضراتها الجلدة دراسها..ملي فكو ليها ومشطو ليها عند بالو سالى ساعة النخشيشة باغا يضفر ليها وهنا فين بقاات لوحلة...

سيدرا:(مدات ليه لفيليلات وقالت ببرائة)دير ليا فيليلات

زين العابدين:(كيشوف فدوك لفيليلات ملونين وخنزر وبخفوت قال)اش هاد لقلااا*ي

هز راسو وضور ليها تاني راسها وجمع ليها شعرها بلاما يمشطو مزاال ودار ليها لاستيك عاادي ومع بدا يضور لاستيك راسها كيتجبد وغير سالى عطاها دوك لفلايل أو وقف وسيدرا بدات تتقيس شعرها وهي معاجبها حاااال باغا دير ضفيرة ساعة مع من هي كيمشط ليها وهاز نيفو لسمااا كون ماباه لي گالها ليه والله لاحط يدو على شعرها واخا تجدب ليه تم...

مشات سيدرا لمرايا لي تم وبقات تاتشوف فديك الجمعة لي دار ليها ولي جاتها جنب ونص من شعرها كيبان بحال لامشنتف وهي تخنزر ورجعات عندو ونطقات بصوت طفولي غاضب: معجباتنيش هادي خااايبة عاودها لياا

زين العابدين:(جرها من جيلي لي لابسة ونطق بصوت بارد) ماخداامش عند باك البرهووشة سيري تركني قبل مانفوت فيك شي دقة

سيدرا:(كمشات شنافتها) انگولها لبابانو

زين العابدين:(تقاد فوقفتو وقال ببرود)عاوديهاا لكررررك

سكتات سيدرا مربعة يديها ومخنزرة وغير سمعات حس نوح جااي ومشات عندو تتجري وقالت وهي مكمشة حجبانها مقلقة:بابانو زينبيدين غووت علياا وقال لياا عاوديهاا لكرررك..

بنظرة قاصحة شاف نوح فزين العابدين لي كانو عينيه على لبرهوشة لي حطاتو بوجهو قدام باه ولجميل فالأمر أنها قالت غير ديك لكلمة لي أصلا ماخصهااش تگال...هو عارف باه مكيحملش لي يخسر الهضرة قدام العائلة وضروري الاحترام يكون ولكن زين العابدين خارج ليه من جنب وهو فاش تاطلع ليه لقردة لراس راه يطليك بتخسار لهضرة لي تعلمو هو لول قبل مايتعلم يدوي بالعربية ولحد الآن باقي شي كلمات عندو بلعربية معارفهومش وتيجيوه فشكل وهادشي لي عارف راه غير بفضل السونطر لي دخل ليه ولبروف لي خصصو ليه نوح شخصيا باش يقريه فلعطلة دالصيف... برك على سنيه وعينو قرطاس عليها وكوون صابت تيري كون راه النخشيشة دابا فعداد الموتى... أما هي مكانتش أصلا عارفة ديك لكلمة اش تتعنى وبلي راه تخسار لهضرة هي سمعاتو گالها ومشات عاوداتها لباهاا... هزات راسها فنوح لي دوز يديه على شعرها وشاف فيها بجدية:هاد لكلام منعاودش نسمعك تتگوليه تافقنا اباابا

سيدرا:واخا بابانو

شاف فشعرها لي كان مخربق وشاف فزين العابدين لي خنزر فبااه على ديك كلمة بابا لي گال لسيدرا...مكيحملش يسمع ديك لكلمة خارجة من فمو وموجهة ليها هي بالدااات كيشوفها متستاهلهااش وكيشوف بلي هي خدات مكانة ماشي ليها إنما ليه هوو...قلب الضورة وخرج ونوح حرك راسو بهدوء وجر سيدرا تاجلس فالفوطوي أو وقفها قدامو...حل ليها شعرها بشوية وخدا لمشيطة دوزها عليه وهي ماحساتش بيها گاع ماشي بحال فاش كان تيمشط ليها زين العابدين جلدتها حسات بيها غاتقب ديك الساعة...

سيدرا:(ضارت عند نوح ونطقات تتفشش عليه ودلع)بابانو دير ليا گرينات وفيهوم شفينجاات ودير ليها فليلات دلفراشة

نوح:(كمش حجبانو وقال بتبسيمة خفيفة) هادشي كولو بغيتيه؟

حركات راسها بااه ورجعات ضارت ونوح لبى طلبها وفرق ليها شعرها من لوسط وخدا مشط جهة لولة ودار ليها لاستيك ودار لتانية نفس الشي عاد ضور شعرهاا على شكل شفينجة وشدو ليها بلاستيك اخر...كان مكمش حجبانو وراد لباال مزياان لشنو تايدير ومركز فيه ..دخلات رحيل باش تشوفها فين وصلات حيت مشى لحال ومع الدخلة لقات داك لمنظر لجميل لي خلاها تبسم وبقات واقفة تاتشوف فيهوم وخصوصا نوح لي تعابير وجهو الجدية خلاتهاا تبسم تابان صف سنانهاا... كمل ليها لگرينات لي بغات وخدا الفيليلات دلفراشة دارهوم ليهاا فشعرهاا من لتحت جاوها فنين وداكشي عباار تگولي حسبها بلمسطارة... هز عينو فاش سمع رحيل لي قالت بضحك وهي تاتقرب جهتهوم:الله يعطيك الصحة

نوح:(غمزها بخفة) نصايب ليك بحالها

رحيل:(تكرشخات بالضحك)اييه ماكرهتش هههه

سيدرا:(نقزات تاهي تاتكركر)اه بابانو صاوب لمامي بحالي هههه

رحيل:(ضرباتها فقزيبتها بلخف)سير تفطري راه السعدية تعطيك لحليب يالاه راه مشى لحال

سيدرا:(ضارت باست نوح فحنكو بالجهد وعنقااتو)بسلامة بابانو

نوح:(باسها فجبهتهاا وقال بجدية)بسلام ابابا وماديريش لبسالات لجدك تانرجع ونجيب ليك حاجة زوينة

باست تارحيل عاد مشات سيدرا فرحانة ورحيل تبسمات وقالت بصوت باين فيه لغيرة:وأنا مانستاهلش تجيب ليا حاجة زوينة؟

نوح:(مد يديه تانوضها وجابهاا فوق ركابيها وتكى على لفوطوي باش تكى تاهي وترتاح فلجلسة..مد يديه لكرشها وقال بصوت خشن) هااأنا عاطيك الفتنة زوج عسيلات ماعجبوكش

رحيل:هااء واقصدت كادو

نوح:عندي ليك كادو تجي وقتو ونعطيه لفتنة ديالي

جاب ليها لفضول تعرف شنو هو ولكن عارفة واخا ترغب وتزاوگ والله لاخرجات من فمو كلمة ورحم فضولهاا عليها فضلات تخليهاا تاتعرفو بنفسهاا...

نوح:بان ليك زين العابدين لتحت؟

رحيل:اه قبيلة خرج عيط ليه باش يفطر مي مجاوبنيش

حرك راسو وتنهد وجبد تلفونو دوز ليه لخط تاجاوبو وهو ينطق بهدوء:فينك؟

زين العابدين:(ببرود) قدام لمدرسة

نوح:مادخلش أنا جااي تسناني تم (قطع عليه وشاف فرحيل) غانمشي دابا وجدي راسك ولحوايج لي غاتاخدي أما حوايجي وجدتهوم مع لعشرة نلقاك واجدة نشدو الطريق

رحيل:(تكات عليه ويديها على حنكو تاتمشط لحيتو وقالت بهدوء)غانمشيو نيشان لريااض

نوح:تت غانمشيو لدار لي كريت تم

رحيل:(شافت فيه بتفاجأ) كريتي دااار؟

نوح:(كيجمع ليها شعرها جهة ودنيها ونطق بخشونة) الرياض غايكون عامر بالغاشي ومغاتاخديش ليا راحتك داكشي علاش كريتها

رحيل:(تحدرات باستو فحنكو وقالت بخفوت) الله يخليك لياا انوحينوو

نوح:(جرها من قرفادتها وقال بفحيح) هادشي خليه تانكونو ففاس بوحدنا ونتفاهمو عليه الفتنة

جمع ليها شفايفها بزوج فبووسة دلغدايد وماطلقها تانفخهوم ليهاا وخلاهوم كيوزوز بحال لادارت ليهوم السودانية عاد نااض غادي لعند زين العابدين لي كان فدوك الاتناء جالس فالجريدة لي تم داير ليزياتو كيتسنا باه وفنفس لوقت مكونكطي مع كحلوش...

أمين:(كيكتب بالإنجليزية) لكومبا عندك من هنا لشهر وجدتي ليها؟

زين العابدين:وي

أمين:غانجي نتفرج فعشيري (سيفط ليه إيموجي كيضحك وكتب) بلاتي شوف (سيفط ليه تصويرة لي تلشارجاها زين العابدين وكانت دواحد لبنت زعيعرة واقفة بليونيفورم ديال ليسي لي تيقرا فيها امين ولي كانت نفس ليسي لي قرا فيها زين...كانت لبنت واقفة كاتشوف فالجنب والتصويرة باينة مأخودة على غفلة..كتب أمين تحتهاا) مسكينة من نهار مشيتي وهي ضعاف..

مسح زين العابدين ديك التصويرة فلبلاصة وكتب ليه كلمة وحدة: قووود

وموراه مشى نيشان بلوكااه وأمين غير شاف لافوطو مبقاتش تبان وهو يتكرشخ بالضحك حيت عرفو بلوكااه وهادشي ماشي جديد عليه وسبق ليه ودارها ليه وهو عارف صاحبوو حال وحوال وكيف تيقولو ليه تما فليسي عندهوم لمتوحد حيت عايش فعالم خااص بيه وماعندوش مع لبشار بزااف لدرجة أن الأغلبية ضنوه بصح فيه توحد...

خشى يديه فجياب القبية لي لابس وبقا جالس فبلاصتو مراقب الغادي والجاي بعيون ساهية وباردة كبرود شهر ديسمبر... سمع صوت لبكا وضار جنبو بانت ليه بنت تقريبا فنفس عمر سيدرا تتبكي وباها واقف حداها تايحزر فيها وهي مبغاتش تسكت...كمش حجبانو بنفور وتقزز وقلب وجهو وعقلو مايفكرو غير فالنخشيشة وداك لفشوش لي كيعصبو فيها وتيخليه يحقد عليها... فيما كاتبغي حاجتها من باه كاتبقا تمسكن عليه... كايبغي ينعل الشيطان ولكن هي فكل مرة تادير شي بلان لي كيزيد يحقدو عليها كتر وكتر...زير على يديه وزاد فالموسيقى حيت داك لبكا درونجااه ورجع تيشوف قدامو تاحس بقطة تتحك معاه وهو ينزل راسو وبدا كيمسح على ضهرها بحنية تاهز راسو وبانت ليه طوموبيل باه وقفات قدامو ونزل منهاا جاي جهتو ونضاضر دالشمش فعينيه..جلس جنبو وزول نضاضرو وبهدو نطق:هاد لقاعيدة مباغيش تحيدها منك

زين العابدين:ماعمرها غاتحييد

نوح:(كمش حجبانو) قدام لعائلة ممنوع خص يكون الاحترام احفيد لحااج وخصك تعرف اش تتخرج من فمك سوى مع لقريب سوى مع لبعيد (كمل بهدوء)مغانكترش لغى حيت عارف بلي وقت لغضب لفم مكيعرف اش تيخرج مني وجبد ولكن نتا اولد لحاج فيك قاعيدة وتتخسر لهضرة بزااف

عيونو كشوفو قدامو ساكت تايسمع لهضرة باه لي استرسل كلامو: عارفني غنسافر على قبل عرس سناء واليازيد ومغانطولش بزاف نبغيك دير عقلك وغاترجع لاصال تريني تاني راني دويت مع لكوتش ديالك على قبل تدريبات لكومبا لي عندك من هنا شهر غاتكون فكولومبيا مغانوصيكش من هاد الناحية حيت عارف دمك حامي وهادشي عاجبني فيك شابه لياا وراه ڤيرسيت ليك شي أمانة تعدي بيهوم على ماانرجع غاتبقا غير بوحدك فالرياض حيت كلشي غاادي لفاس تارؤوف وبيسان غايجيو فليل (جرو من قرفادتو وباس راسو ونطق بحنية) ماتهلكش راسك بزاف فلونطريماا أنا متأكد الربحة إن شاء الله غاتكون مغربية كيف ديما أنا تاايق فيك(حرك ليه زين العابدين راسو وقال نوح) تحرك دابا لقرايتك وكيف گلت ليك دير عقلك

كررها ليه لمرة تانية حيت عارفو اش تيسوى وزين باس ليه راسو وهز شكارتو غادي لمدرسة لي كانو بداو الحصة لولة بقا نوح مراقبو من بعيد تاشافو دخل عاد قلب طريقو جهة طوموبيل وغير ركب وتحرك من تم تحركات وراه طوموبيل لي كانت مراقبااه من لي خرج من الرياض....

وقفات طوموبيل نوح قدام أفخم قااعة الحفلات المتواجدة فمدينة فاس...تحل لباب ونزل بطقم فلكلاس عبارة على كومبلي نواغ وشوميز بيضا وداير گرافااط نواغ وصباط كلاص تاهو فالنواغ كيبري... اللحية مرتبة ومنقص منها هي وشعرو كيف تايعجبو رحيل... ضار جهة الباب لي فجنبو ولي تحل من طرف رحيل لي شدات فيديه ونزلات تاهي بإطلالتها البلدية وديك التكشيطة لي كانت فالأخضر ملكي كلها منبتة بالحجر كيبري ودايرة فولار مناسب لون لحجيرات باش مخيط لقفطان... ولابسة صندالة مريحة فرجليها أو وجهها كان مزين بمكياج خفيف مكيباانش وأصلا متحتاجش لمكياج والسر طايح عليها لحنيكات زادو تنفخو وحمرين ولعيون تاتلمع والراحة عنوانها...شدات فيه وتمشاو بخطوات تقيلة جهة باب القاعة لي كانو واقف فيها سرباي وطبلة جنبو فيها طبق دالتمر بريستيج معمر بعجينة لوز ولبيسطاش ومزوق بالشوكولا نواغ إبلون... هز نوح تميرة عض منها شوية وعطاها ليهاا تكملها مع كانت تمرة كبيرة عارفها مغتكملهاش كلهاا ونفس الشي دار فالحليب غير جغم جغمة وعطاهاا لكاس تكملو ومع رماو لخطوة ناضو الدقايقية لي فلباب كيطبلو ويرحبو بيهوم... كمل و طريقهوم تاوصلو لباب لدخلاني دلقاعة باش تكتامل الصورة فعيون رحيل لقاعة لي كانت كبيرة بزاااف يجري فيها الخييل...كان ديكورهاا فخم وراقي وكل حاجة فبلاصتهاا ومفرقين الطبالي دالرجال وطبالي دلعيالات...لقاو طامو وراجلها وجد نوح وعفاف واقفين فالدخلة كيرحبو بالضيااف...تسالمو معاهوم تيرحبو بيهوم ورحيل مشات نيشان عند عفاف تخشات فيها معنقاها...

جدو:(باين فيه مقلق وهاو فخاطرو) ماشي حشومة عواض ماتجي لدار جدك كاري دار

نوح:(خاشي يديه فجياب السروال وقال بهدوء ووقار)نتا عارف الحاج الرياض فيه بنادم بزاف وأنا مرتي تتبغي تاخد راحتها

جدو:اوا الرياض فيه شلى بيوتة تختار لي عجبهاا وترتاح فيه

نوح:ماشي هادا هو مقصودي الحاااج الله يهديك وزايدون باقي يامات الله طويلة

جدو:اوا دابا نشوف اولد لحاج

فالجهة لمقابلة كانت عفاف كاطمن على أحوال رحيل وحملها وياكما الطريق عيااتهاا..

عفاف: لوقوف ايعيك اجي ترتاحي

شدات فيها عفاف ورحيل قبل ماتحرك شافت فنوح لي غمض ليها عينيه بمعنى غير سيري وهي كملات الطريق لطبيلة لي فيها لعاائلة لمقربة درحمة ومن زهر رحيل لعوج كانت تااشيماء جالسة ومتألقة بتكشيطتهاا لي كانت فالحمر وشعورات مطلوقيين وزينها برزاتو بمكيااجهاا...يديها كانت باقي ملوية عليها فاصمة...شافت جهة رحيل وقلبات عينيها نيشان لباب وهو يبان ليها نوح واقف مع جدو وبات ليازيد...فرحات ملي شافتو وبدات تترجع شعرها لور وتگاد تكشيطتها جهة صدرهاا ورجعات شافت فجهة رحيل لي تتسلم معاهوم تاوصلات جهتها ومن فوق قلبها سلمات عليها وتاشيماء نفس الشي...وحدة مكتحمل تانية ولكن ضروري من النفاق الاجتماعي باش كلشي يدوز بخير...جلسات رحيل مجمعة معاهوم وشيماء حمات فيها لبيضاا فاش شافتو...ناضت من بلاصتها هازة جلايلهاا وتمشات جهتهوم تاوصلات عندهوم وقالت بصوت خافت محلون:سلام أوعليكوم

ردو عليها السلام وتانوح نفس الشي حيت سلام ديال الله...وهي فرحات فاش سمعاتو رد عليها السلام وبقات واففة جنبهوم زعمة راه كاتستقبل معاهوم... ملي ناضت رحيل معبراتهاش وعند بالها راه مشات لحمام ولكن فاش بانت ليها تعطلات ضورات عينيها وهي تقشعها واقفة معاهوم فالدخلة دلباب...زيرات على يديها لي حطاهاا تحت الطبلة وعينيها تفيكساو عليهوم حاسة براسها معصبة والغيرة تتنهش فيها... الطريقة باش تتشوف شيماء فنوح مرة مرة محملاتهاش رحيل وكون ماحشماتش من الشوهة كون جراتها من شعرها ومسحات بيها الأرض دلقاعة ولكن دارتها الحشمة وتانيا التقل... بقات جالسة حامية فيها البيضة ومارتاحت تاشافتو انساحب من حداهوم غادي لجهة الرجال من لعائلة يسلم عليهوم...تبسمات ورجعات تاتصور الأجواء بدون ماتصور لوجوه ودارت سيلفي وسيفطات لمها ولبنات ورجعات هزات عينيها جهة نوح لقاتو جالس

م:كيدايرة مع لحمالة ابنيتي

رحيل:هاحنا لحمدلله معديين اخالتي

م:اوا الله يفكك على خير الحبيبة ويرزقك بالدرية الصالحة

رحيل:آمين اخالتي

م.شيماء:الله يفرحك ويفرح جميع المسلمات ولمسلمين

م:عقبال شيماء تاهي نفرحو بيهاا عن قريب

م.شيماء:إن شاء الله تيسر ليهاا مع داك ولد الناس

رحيل:(بفضول) شكون هادا؟

م.شيماء:واحد السيد من معارف باها شافها وعجباتو وبغاها لزواج

رحيل:(بفرحة)اوا الله يسهل عليها

رتاحت رحيل ملي سمعات دوك لخبار وبقات مجمعة مع النسا تاحسات براسها تزيرات وهي تنوض لحمام...قضات حاجتها وقادات حالتها ولعكيكر زادتو شوية ومع جات تخرج شافت الصندالة تحلات ليها مع تتسد بلبزيم...زفرات النفس ورجعات لقاعة وفطريقها تلقات بنوح لي كان باين تيقلب عليها قرب جهتها وقاال بخشونة:فين كنتي؟

رحيل:لحمام (أشارت ليه بعينيها لصندالة)تحلات لياا

شاف فيها وبدون تردد نزل قفاازي تيسد ليها البزيم فوسط القاعة ممسوقش لعيون لحضور لي كيشوفو فيهوم لبعض بدهشة ولبعض بحسد ولبعض بإعجاب من لمنظر لي قدامهوم...

مكانتش متوقعة منو هاد لجيست يديرو قدام عباد الله...صدمها وخلاها غير تتشوف فيه وهو جالس قدام رجليها تيصاوب لبزيم دالصندالة تاسالى وهز راسو وهو باقي على جلستو شاف فيها ونطق بهدوء:مزيان دابا ياكما مزيرة عليك؟؟

رحيل:(تبسمات ليه)لاهو هداك

نوح:(ناض تيقاد لڤيست ديالو وشدها من خصرها وهمس ليها بخشونة) مغاتعيايش من لجلاس بزاف؟

رحيل:غانعياا مي ماعليش نصبرو شوية (شافت فالقاعة ونطقات)ماماك مبانتش لياا؟

نوح:مع سنااء دابا يجيو

رحيل:وبيسان ورؤوف فين غايكونو وصلو؟

نوح:دويت معاهوم راه قربو يوصلو سيري تجلسي ولاحتاجيتي شي حاجة علميني واخا

رحيل:(تبسمات ليه وقالت بخفوت)بغيت نبوسك

نوح:(هز فيها حاجبو وقرب لودنيها همس بفحيح خشن) راني كانجمع ليك فلحساااب تانكونو بوحدنا وتخلصيه

رحيل:(تتقاد ليه لگرافاط وقالت بدلع) نخلصوه مالو غايغلبناا

عض على شنافتو بنابو ودار فيها شي شوفاتو خلاو قلبها يتزعزع من بلاصتو...دوك الشوفات القاصحين ولي فنفس الوقت ممزوجين بحنية وبمكر... تبسمات ليه وكملات طريقها لطبلة فين جالسة...أما هو فخرج من لقاعة غادي يتلاقى مع خوتو لي جاو...

كانت واقفة وعينيها باغيين يطلقو السم من داك الديكور لي ماحملاتش تشوفو...داك الجيست لي دار هي ماحملاتوش يديرو لرحيل وتمنات كون كانت هي فبلاصتها... غير شافتو خرج وهي تهز جلايلها وخرجات وراه...عقلها وماگال ليهاا والحرقة لي فيها خلاتها تبعو بلاماتفكر فالعواقب... مع حطات رجليها برا لقاعة وعينيها ضارو بين الطوموبيلات لي مصافين تم تابان ليها متكي على طوموبيلتو والدخان فوق راسو...قربات جهتو بجرائة ناسية أي حاجة فديك اللحظة... مجرد ماوصلات جنبو وضربات فيها ريحتو لممزوجة بريحة الگارو وهي تغمض عينيها وفديك اللحظة حسات بدموعهاا فطرف عينيهاا...

شيماء:(بصوت خافت)نووح

جر اخر جرة من داك لگارو لي كيكمي ولاحوو فالأرض عافس عليه وتقاد فوقفتو وببرود ضار جهتها تابانت ليه واقفة تتشوف فيه وعينيها كيلمعو بالدموع...قلب عينيه لقدامو ونطق ببرود: خروجك لهنا ابنت الناس مصالحش

شيماء:خرجت حيت باغا نهضر معاك

نوح:(قاطعها ببرود) مكاينة تاحاجة بناتنا ندويو عليها دخلي لداخل

شيماء:(جات قدامو قاطعة عليه الطريق ونطقات بترجي) سمع لياا غير هاد لمرة عفاك اولد لحاج

نوح:(هز راسو لسماا وقال بهمس) أستغفر الله ولا حول ولاقوة إلا بالله العلي العظيم

شيماء:عارفة بلي غلطت فحقك بزاف ولكن تيق بيا أنا ندمت (زيرات على يديها) تمنيت يرجع بيا الزمان لور باش نصلح شحال من حاجة غلطت فيها كون راني دابا كنت مراتك وماشي رحييل (كملات بحقد) شنو فيها زوين تاخلاتك تزوج بيهاا

نوح:(خنزر وبلامايشوف فيها نطق بصوت قاصح) بلاماتقارنيها معاك حيت مقامها عالي على مقامك

شيماء:علاش ياك أنا بنت خالك وأنا اولى بيك؟

نوح:(ضار عطاها شوفة دلقتيلة ونطق بسخرية) سمعي الله يرحم بااك باقي لدابا متاقي فيك وجه الله وناعل الشيطان على لفعايل لي درتي ولالقيتيني ميك راه غير على قبل بااك ماضسريش بزاف وبعدي من طريق مرتي (بتهديد وااضح فنبرة صوتو) وايااك تقربي منهاا حيت ديك الساعة غاتشوفي مني لي عمرك شفتيه...

تخطاها وركب فطوموبيلتو وتحرك من تم مخليها واقفة تاتغلي وهضرتو غير مكتزيد تحقدها على رحيل لي مدارت ليها والو... ياك هي لي من لول كانت ناوية لغدر وممشاتش معاه بنيتو تاربي فضحهاا... هزات تكشيطتهاا وهي مراضيااش على هضرتو لي قصحاتهاا دخلات ونيشان لحمامات تاتنهج..بقات تما تابردات عاد خرجات هازة راسها بحال لامدارت والو... جلسات فالطبلة وعينيها مرة مرة تهرب لجهة رحيل لي شادة تليفونها تاتهضر مع لبنات ومكاينااش هنا...

على صوت عيساوة دخلات العمارية لي فيها سناء بأبهى حلة العروس وتبسيمة على شفايفها فرحانة وكاتشير بيديها لمزينين بالحنة لضيوفها...واليازيد غادي قدامهاا بلكلاس مفرنس تابانت ليه ضرسة لعقل... كلشي كان نايض كيصور الارحيل لي بقات غير جالسة تاتشوف فالتلفازة مع النااس مگجگجين ومكيبان ليها والو... ونوح يالاه وصل هو ورؤوف وبيسان دخلو لقاو الضورة دلعمارية قربات تسالي مشات بيسان تتسلم على مها وخالتها عاد مشات لعند رحيل جلسات معاهاا...

سنااء كانت فرحانة حيت داكشي لي بغاتو وصلات ليه وهاهي دابا فرحانة بعرسها من حبيب لقلب لي واقف جنبها وهوما كياخدو تصاور ليلة لعمر لي غايبقاو دكرى ليهوم يوريوها لحفادهوم... جات لفاميلة تتصور معاهوم وتارحيل ناضت هي ونوح خداو صورة ورجعو بلاصتهوم...

العرس كان زوين بزاف وباين فيه بلي ماليه خسرو فيه لفلوس وبالسيف طامو مغاديرش شي حاجة مازويناش لولدها ضروري ماتباهاا بيه قدام العائلة والناس... غادة بتكشيطتها الموبرة واالدهوبات فاليد وفالعنق كلها تتبري ومعاهاا عفااف تيرحبو بالنساا وراه الرجال مكلفين بيهوم راجلها وبات سناء...

الاوركيسترا خدامة منشطة الطرح والسربايا كل مرة يحطو فالمقابلات والتقاوت تاوصل وقت لعشا ودخلات سنااء بلبيسة خراا هي واليازيد وتوجهو لجهة الطبالي وبدا كيضورو ويرحبو بيهوم عاد مشاو لطبيلة لي غايجلسو ويتعشاو فيهاا... صونى تلفون رحيل وكان نوح هزات راسها ولقاتو تيشير ليها باش تجي عندو وناضت غادة هازة جلايلها تاوصلات عندو وقالت:وي محتاج شي حاجة؟

نوح:(غمزها بالخف ونطق بخشونة) توحشت الفتنة ديالي...

تبسمات رحيل ونوح استرسل كلامو وهو شاد فيديها:غانجلسو معاهوم فالطبلة دلعشاا اجي

شد فيديها وانظمو لعائلة لقريبة دلعرسان وجلسو معاهوم تايتعشاو والمصور كيفيلمي كلشي...داز العرس زوين وكلشي كان على حقو وطريقوو وسناء بردات غدايدها فيه حيت كان كيف بغات... وصلات لقطة لي غايمشيو لعرسان وسناء حلفات لاتحركات تاتلوح ليهوم لورد وجمعات لعزبات لي تم مستفاهوم وضارت تاتشوف قدامها وقالت بالجهد:واجدات...واحد زوج تلااااتة

لاحت لبوكي ولبنات كيتخاطفو عليه ومع جات تشدو وحدة فيهوم وهي ضربو بلغلط تالاحتو جهة بيسان لي كانت جالسة فالكرسي ممسوقاش ليهوم ومضورة وجهها تاتهضر مع رحيل تاحسات بلبوكي طاح فوق حجرهاا... ضارت تتشوف فيهوم وفلبوكي وهي مضهشرة حيت أصلا جالسة تم ودايرة لخاطر غير لسناء لي حلفات ماتلوح لورد تاتكون هي حاضرة وشوف زهرها...جات عندهاا سناء ونطقات بضحك:هانتي لفاااال وشكون بحالك

قرصاتها سنااء قرصة لغدايد تاقفزات بيسان مكمشة حجبانهاا ورحيل تبسمات:وأحسن فاال ههه

ماهضراتش بيسان حيت الغصة لي فحلقها ماخلاتهاش تدوي وهي عارفة روحها ضيعات لفرصة لي غاتخليها تكون مع رياان وزيد مها لي مباغاهش ليهاا يعني واخا هي تبغي مها غاتوقف ليها فطريقها..

ودعاتهوم سناء ومشات هي وليازيد مخليا لعائلة وراها فرحانة ليهوم وطامو غير كاتبسم وصاف واخا راه داخليا مباغاهاش مي مالقات مادير من غير توافق وتسكت...

داخلة لدار لي كااريين وهي هازة صندالتهاا فيديها وبصوت تعبان قالت:ضهري كيضرني وكرشي عطياني لحريق

نوح:(زول لاڤيست ونطق بهدوء) الجلاس بزاف هو سباب تبغي نمشيو لبسبيطار؟؟

رحيل:لا بلاش راه كيف گلتي الگلاس بزاف هو سباب جلست تاقاعي تحفر فالكرسي

نوح:(وقف عليها وهي جالسة وبدا تيحل ليها فولارها) غانوجد ليك حمام باش دوشي وترخي عضامك

رحيل:(عنقاتو من كرشو)واخاا ولكن دوش ليا نتا راه يدي مقاداش نهزهوم

نوح:ندوش لفتنة ديالي

مشى وجد لحمام وهي بزز باش زولات ديك التكشيطة وعينيها مگلوبين بالنعاس...بقات بكولون ودباردور مشبكين ودخلات لعندو لحمام...ضار شاف فيها تيعبرها بعينيه والجناب لي عامرين والفخاد تاهوما...طلعها من صبيعات رجليها مسكانيها بشوفاتو كيف النسر... زولات حويجاتها قدام عينيه ومد ليها يديه وهي شدات فيه وجلسها فداك لبانيو وبقا تيدوش ليها وهي شوية وتنعس ليه تم ترخات ولعيا دار خدمتو... سالى ليهاا وعطاها لبينوار باش تلبسو وخرجات مخلياه يدوش بلخف...جبدات البرودويات ديالهاا وبدات طلس ودهن كريشتها تاهي بزيت اللوز عاد لبسات حوايج لداخل ولاحت عليها غير بيجامة بياسة وحدة فوق لحمها... تكات فبلاصتها كاتسنط لحريقها وعضامها وكرشها لي تيلعبو فيها توينز شبعوها ركيل وهي مغمضة عينيها نعاس كيديها تاحسات بنوح كيغطيها بلغطا وهي تحل عينيها وقالت بخفوت:كنت تنتسنااك

نوح:(باسها فحنكها) هانا جييت

رحيل:رجلي كيضروني

هز لغطا وشاف رجليها بداو كيتنفخو شوية وخدا واحد زيت تم دارها فيديه وبدا كيماصي ليهاا رجليهاا وهي استحلاتهاا...يديه ماحبسات غير تم طلع كيدير ليها مساااج بلخف فجنابهاا وديك لبيجامة قلعها ليهاا وبقات غير بحوايج لداخل... ماصى ليها كتافها ودراعهاا وكرشها تاهي دار ليها مسااج خفيف تاحس بيهاا نعساات وحالة فمهاا وتما حبس يديه مباغيش يدرونجيهااا... غطاها وغسل يديه ورجع تسطح جنبها وشد تلفونها حلو ودخل لتصاور لي صورو وبدا يكوشيهوم باش يسيفطهوم لراسو...برك على واتساب وطلعات ليه نمرتو وسيفطهوم لراسو ومع بغا يرجع عينيه لمحو نمرة دإسلام لي كان مسيفط ليها مساج فلواتس..

مادخلش ليه ورجع ببرود ساد لكونكسيون وحط تلفونها حداه مور ماسيفط داكشي لي بغا... ماشي هو لي غايقلب ليها خصوصياتهاا وهي ناعسة جنبو...وصلوه تصاور ودخل تيشوف فيهوم بلهداوة تالقى وحدة عجباتو ودارها فلاغيغ دالتلفون...كانت صورة سيلفي هي لي شاداها وهو معنقها من لور وحاط راسو على كتفها تيشوف فيها هي لي كانت مبسمة لكاميرا...حط تلفونو جنبو وتسطح فبلاصتو نااعس ويديه لايحها عليها معنقهاا...

دازت يوماين خرى لي استغلاتهوم رحيل فالتسركيل فاس وموراه قررو يرجعو على قبل سيدرا وزين العابدين لي خلاوهوم...

فدار سي إدريس كانت تانيرت جالسة تاتنقي لعطرية ديال سلو...تاجات لعندها أسماء لي جلسات جنبها وتبسمات ليها:بديتي اماما تانيرت من دابا

تانيرت:وشنو ابنتي نجلس تاتولد وندركو وزايدون مبقا ليها والو ودخل فشهرها

أسماء:نيت هاكا مزيان وجدي كلشي وماتخلطيهومش تاتقرب

جايا سيدرا عندهوم تتجري وقالت بحماس:تانيرت إينو بّاديدي قال ليا نلبس حويجاتي حيت مامي وبابانو جاايين

تانيرت:اييه صافي الضرة سخيتي بيا

سيدرا:(عنقاتها) لاتانيرت إينو ولكن توحشت مامي وبابانو

أسماء:غايكونو جابو ليك لباروك دفاس ههه

تانيرت:يالاه سيري لبسي حوايجك

مشات تتجري وتانيرت تتكمل لي فيديها تاجا عندها إدريس لي جلس جنبهوم وهز واحد لوزة كلاها وقال بهدوء:واحد شوية غاندي سيدرا نوصلها لريااض وغانمشي لمحال محتاجين شي حاجة؟

تانيرت:لا غير رد لبال لراسك

إدريس:(شاف فأسماء)عييط ليا إسلام وراه كيسلم عليكوم

قلبات أسماء وجهها وباها لاحظ تصرفها وسكت مادواش ومغايدخلش حيت لموضوع بناتهوم بزوج وهوما كبار أو واعيين وعارفين اش كيديرو...جات سيدرا ودعاتهوم ومشات مع جدها لي وصلها لرياض أو وصى عليها السعدية عاد تحرك وهي راه فرحانة حيت غاتجي مها وباها وغايجيبو ليها كادو...دازت ساعة بالضبط أو وصلات رحيل ونوح لرياض وسيدرا غير شافتهوم مشات تتجري عندهوم فرحانة...نزل زين العابدين لي كان فبيتو لقى السلام على رحيل من بعيد ومشى عنق باه لي تاهو بادلو تعنيقة ويديه كاتخبط على ضهرو تاكتسمع زدااف...

نوح:مزيااان اسبع ديالي

زين العابدين:حمدلله على سلامتكوم

نوح:الله يسلمك اولدي

سيدرا:بابانو شنو جبتي لياا؟

نوح:(تحدر هزهاا ونطق مكمش حجبانو) مادرتيش بسالات بعدا؟

سيدرا:(ببرائة)لا والله مادرتهوم سول بّاديدي وتانيرت إينو

نوح:(شاف فرحيل)هاماماك تعطيك لكادو راه عندها

نزلها وهي شدات فرحيل لي طلعات لفوق ونوح جر زين العابدين معاه غادي يسولو على لونطريما كيف غادة ونيت يجلس معاه ويعطيه وقتو كيف مولف....

**

مدة ممشاتش لمحال وحسات براسها هملاتو وليوم قررات أنها تمشي تشوف الأوضاع كيف غادة فيه...خرجات من الدريسينغ وهي متأنقة بلبيسة زوينة وصيفية عبارة على سروال توب لارج وااسع فالرمادي مع شوميز طويلة فالبلوغواا وفولار فيه مزيج ديال دوك الألوان...هازة بين يديها صاك وبيسي دييالهاا... لقات نوح تاهو لابس حيت غايمشي لخدمة شاف فيها وقال بهدوء:لاحاسة براسك مغاتقدريش تمشي جلسي

رحيل:لا لا غانقد وزيد لجلسة فالدار تاتعيىى

نوح:نتي تعرفي الفتنة

خرجات من لبيت سابقاه وهو موراهاا...من نهار تقلات مبقاتش تتسوگ طوموبيلتها...ركبات جنبو وانطالقو فشوارع مراكش لي فديك لوقيتة كان الزحام مع وقيتة دلغدا...

رحيل:(شافت فتلفونها) سيدرا غاتخرج دابا نعيط لسعدية باش توجد ليها غداهاا

دوزات لخط لسعدية وصاتها توجد لغدا لسيدرا وترد ليها لبال تاترجع...وصلها نوح قدام لمحال وقبل ماتنزل باستو فحنكو وقالت بتبسيمة:بسلامة

نوح:ردي لبال لراسك ولاكنتي باغا ترجعي لدار صوني عليا بااش نرجعك

رحيل:واخا باي

هزات صاكها ونزلات وهو ماتحركش تاشافها دخلات لمحال عاد كمل طريقو...

**

وقف الطرونسبور دلمدراسة قدام لحومة ونزلات سيدرا غادة تتجري جهة الرياض... لقات السعدية كاتسناها لي قالت:زيدي الفارة تاكلي

سيدرا:فيا بزاف دجويعات اسوسو

جلساتها فطبلة دلكوزينة مع مكاين حد وحطات ليها لغدا ومشات تعيط لزين تاهو يتغدا حيت ليوم مقاريش...وكيف لعادة مجاوبهاش وخلاها بلاكة تارجعات لتحت...كلات سيدرا غداها عاد مشات لبيت تبدل حويجاتهاا وتحفظ حفاظتهاا...وصلات لفرونسي وهي تلقى راسها بلي محتاجة شي حد يوريها وناضت هازة مسائلها غادة عند زينبيدين حلات لباب ولقاتو جالس فلبيرو لي عندو تم فبيتو وحاط حداه دفتار دلونغلي وكتاب كيكتب فيه...بلامايهز عينو عرفها هي لي مقتاحمة عليه مملكتو بلااحم ولادستور...وقفات جنبو وقالت ببرائة:زينبيدين مفهمتش واحد لحاجة فلفرونسي

ضار شاف فيها وهي مدات ليه الدفتار تاترمش عوينات لببوشة ببرائة...هز دفتار كيشوف فداكشي لي كان سااهل بطاطا ورجع شاف فيها ببرود كيشرح ليها شنو خصها دير... حلات وديناتها ليه وفهمات عاد هزات دفتار ومشات لنموسيتو باش تخدم وتاهو ماتسوقش ليها ورجع تيحفظ حيت عندو امتحان غدا... كل واحد كان مكونسونطري فحفاظتو تاحطات سيدرا ستيلوها وبقات تتشوف فزين العابدين مدة قبل ماتنطق بواحد سؤال لي كون غير سكتات ومگالتوش..

سيدرا: زينبيدين فين هي ماميتك؟

داخلة لمحال تتلقي السلام على لبنات لي خدامات تم وغزلان وأميمة قربو جهتها كيسلمو عليها...

رحيل:گاع هادا وحش ليا هههه

أميمة:خليتي بلاصتك هنا فلمحال

رحيل:اوا الضروف هي سبابنا كيف غاديين مع العمل

غزلان:كلشي مزيان ولمحال غادي عشرة على عشرة

رحيل:مزيان هادشي لي بغيت غانطلع لفوق تاتسيفطي السكوريتي يجيب ليا شي عصير بارد حلقي نشف

غزلان:هي لولة

طلعات رحيل لبيروها وهواتو وجلسات بلاصتها تأنسطالى وسمعات تلفونها صونى لقاتو إسلام...مجاوباتوش وكيف عادتها هاد لمدة كلها وهي قاطعة عليه...باقي هازة من جهتو على ديك لهضرة لي قال على ختهاا ماقدراتش تنساهاا ليه... كان عندها عزيز بزاف ومعتابراها خوها ولكن بكلامو تقب معاها لورقة دبصح... مباغاش تجبد مازال معاه داك لموضوع عليها قررات تسد عليه باش يفهم راسو ويعرف غلطو...جابت ليها غزلان لعصير وغير مشات صونى تاني وهنا قررات تجاوب وتسمعو شي كليمات باش يفهم راسو...

رحيل:ألو

إسلام:رحيل لباس

رحيل:حمدلله لقيتك معيط ليا شنو بغيتي

إسلام:(لمس نبرة البرود فصوتها) عارف بلي نتي مقلقة مني فلحقيقة كنت باغي ندوي معاك لاكان ممكن نقدرو نتلاقاو فشي كافي

رحيل:مكاين فاش ندويو اإسلام

إسلام:رحيل الله يرحم ليك الوالدين ماتقصحيش راسك مغاناخدش من وقتك بزاف

رحيل:(سكتات تتفكر وبعد مدة قالت)سيفط ليا لعنوان فمساج

قطعات معاه وفلحين وصلها عنوان لكافي لي مكانش بعيد وناضت هازة صاكها نزلات لتحت وقالت لبنات بلي عندها غرض خصها تمشي ليه...خرجات لشاريع وشيرات لطاكسي ركبات فيها وفديك اللحظة صونى تلفونها بنمرة نوح وغير شافت لابيل قلبها ضرب...

رحيل:ألو نوحينو

نوح:(بهدوء)صافا

رحيل:حمدلله

نوح:ياكما حاسة بلعياا

رحيل:لا ماعيتش أصلا راني خدامة دابا على شي لبيسات ولمحال عامر ليوم تباركالله

نوح:مزيان اوا ردي لبال لراسك واخا

رحيل:واخا نخليك دابا غزلان تتعيط ليا

قطعات عليه وهي عاضة على شفتها ومحاملاش راسها حيت كدبات عليه ولكن كانت مضطرة حيت عرفاه لاعرفها غاتمشي تلاقى إسلام مغايبغيش وأصلا هو عندو حساسية منو... سكتات وعينيها مراقبين طريق وحاسة بتأنيب الضمير حيت كدبات عليه...وصلات لكافي ونزلات بهدوء داخلة لداخل وعينيها كيقلبو على إسلام لي كان جالس فلكوان جهة الزاج غير شافها ناض مبسم ومع قربات جهتو مد يدو وهي مبغاتش تحرجو وسلمات عليه...

إسلام:شنو تبغي تشربي

رحيل:كاس دلما

طلب ليها عصير وشاف فيها وهو حشمان من راسو..نطق بهدوء:عارف بلي نتي محاملانيش بسباب داك لكلام لي كنت گلت ليك (تنهد) مكنتش قاصد ارحيل

رحيل:(كمشات حجبانها) مكنتيش قااصد؟ واش عارف ديك لهضرة لي خرجتي من فمك اش كاتعني ولامعارفش؟

إسلام:فهميني ارحيل نتي كون كنتي بلاصتي وقع ليك نفس الشي كيفاش كنتي غاتصرفي

رحيل:(بجدية)سمعني اإسلام أنا أكتر وحدة عارفة شنو كيعني تعيش واحد تجربة خايبة لي تخلي اتر فحياتك حيت سبق ليا وعشت نفس الشي... تجربة دمراتني وهلكات صحتي ولكن قاومتها وعالجت راسي منها وماخليتهاش تزيد تسيطر ليا على حياتي وهادشي درتو على قبل صحتي ونفسيتي وعلى قبل ناس لي ضايرين بيا باش منأديهومش (كمشات حجبانها)نتا واش درتي هادشي على قبل راسك وعلى قبل أسماء؟؟؟

إسلام:(قلب وجهو) مقادرش نديرها ونتي عارفة هادشي (شاف فيها مرة خرا) رحيل أنا ماجبتكش باش نهضرو فلي فات جبتك لهناا حيت عارف راسي غلطت فحقك نتي معرفااش مكانتك عندي قداش ومباغيش تقلقي مني

رحيل:وماغلطتيش فحق أسماء؟؟ ماغلطتيش نهار گلتي لياا بلي داك لولد ماشي ولدك عرفتي كون أسماء عرفات بكلامك لي خرجتيه من فمك والاتهام لي تهمتيهاا كانقسم ليك بالله بلي عمرك تشوف كمارتها ولاتلمح طيفها مزال

إسلام:(تنهد) كنت مخربق معارفش روحي اش تانگول

رحيل:حمدالله أنا بوحدي لي سمعت ديك لهضرة ولابابا ولاأسماء سمعوها حيت كانت غاتوقع حاجة خراا وملي سكت وماگلتهاش ماشي على قبلك على قبل ختي لي مباغاهاش تهرس ملي تسمع ديك لهضرة

حدر إسلام راسو ورحيل قلبات وجهها وهي تاتنهج...ماكرهاتش تسمعهوم ليه كتر ولكن هادشي كافي ليه... هز إسلام راسو ومد يديه حطها على يد رحيل لي كانت حاطاها فوق الطبلة تاضارت عندو وزير على يديها وقال بندم:عارف راسي غلطت ولكن تيقي بياا هادشي لي كانعيشو فوق طاقتي

قبل ماتجاوبو رحيل حسات بظل واقف عليهوم وريحتو الرجولية تغلغلات لجيوبها الأنفية شي لي خلاها تهز راسها بزربة جهتو وقلبها ضرب وهي تتشوفو واقف عليهوم بزوج وعينو على يديهوم قبل مايهز شوفتو فيها بنظرة تمووت ومتنساهااش وبصوت مرتاجف نطقات:نووح

بتبسيمة حنينة تفرقات معاه مخلياه يكمل طريقو لميزون دڤواتوغ مور ماتأكد بلي دخلات لمحالها... غادي فالطريق ومركز قدامو تاوصل لميزون وهو يحبس طوموبيلتو وسكتها ومع جاا ينزل عيونو لمحات بيسي ديالها لي كاانت نساتو شي لي خلاه يكمش حجبانو.. هو عارف بلي عندها خدمة بيه حيت فيه دايرة دوك تصاميم لي غاتخدم عليهوم ليوم... جبد تلفونو باش يعيط ليهاا ساعة لقاه طافي حيت ديشارجى ليه...زفر النفس وجبد الپاور بانك وبرونشاه مع تلفونو وديمارا تاني الطومويبل راجع لعندها.. وكل مرة يشوف فساعتو باش مايتعطلش على خدمتو لي تابعااه تاهو... ملي بان ليه تلفونو تشارجا شوية زولو من لپاور بانك وشعلو وفنفس لوقت كان مكمل طريقو لعندها حيت كان قرب يوصل... يعلمها بلي هو لتحت باش تسيفط ليه شي وحدة من لبنات يعطيها لبيسي ويتحرك حيت عارفها مغاتقدرش هي تنزل وتحرك بزاف مع التقل وتاهو تعطل على خدمتو...مع وصل لمحال كمش حجبانو فاااش قشعها خارجة من لمحال وهازة صاكهاا تاضور راسها يمين وشماال شوية شيرات لطاكسي لي وقف وركبات فيه وهو التلفون فيديه مدوز ليها لخط وفنفس الوقت تحرك تابع طاكسي...

تفتح الخط وتسمع صوتها لي قالت:ألو نوحينو

نوح:(بهدوء) صافا

رحيل:حمدلله

نوح:ياكما حاسة بالعيا

رحيل:لاماعيتش أصلا راني خدامة دابا على شي لبيسات ولمحال عامر ليوم تباركالله

نوح:(عض على شفتو بنابو وقال بهدوء وبرود)مزيان اوا ردي لبال لراسك واخا

رحيل:واخا نخليك دابا غزلان تتعيط ليا

مجرد ماتقطع لخط لاح نوح تلفونو فالكرسي لي جنبو بنثرة وهو عاقد حجباانو... عينو على الطاكسي لي راكبة فيها وعقلو كيسترجع هضرتهاا وكدوبهاا عليه... ماعرفش شنو لي خلاهاا تكدب وفنفسو تيقول ياكما عندها شي مشكيل ومبغاتنيش نعرف؟؟ هادشي لي قال مع راسو وهو باقي تابع الطاكسي تابانت ليه وقفات جنب واحد لكافي ونزلات رحيل داخلة لداخل... قلب على فين يبلاصي طوموبيلتو وهز عينو تيشوف فالكافي وماتجي شوفتو غير على إسلام لي كان جالس جنب الزاج دلكافي تاوقفات عليه رحيل ومد يديه وسلمات عليه... لعب بلسانو ففمو مغدد وعينو كيف القرطااس عليهوم بزووج...هي كدبات عليه باش تجي تشوف إسلام هنا ماحملش راسو وحس بأعصاابو على شفى الانهيااار... زير على لڤولون ديال الطوموبيل تابيااضت يديه وبانو عروقو زرقين... عوج راسو يمين وشماال وحل لباب ناازل...من برا كيبان مهدن ومبرد بحال شي فريگو ولكن من لداخل كان تيغلي بحال شي بركااان... دخل لكاافي غادي نيشان لجهتهوم وماتجي عينو غير على لقطة ديال إسلام وهو حاط يديه على يد رحيل... وهادي كانت هي النقطة لي فيضاات كاسوو... وقف عليهوم كيف قباااض الروااح وعينوو تايشوفو فيهوم بنظرات لاتبشر بالخير...

شوفاتو خلاو رحيل تحس بالفشلة وقلبها ضرب وسط صدرها بالجهد...نثرات يديها بين يدين إسلام وعينيها عليه تاتشوف ديك الشوفة لي دار فيها ولي تموت وماتنساهااش ونطقات بصوت مرتااجف:نووح

رجليها ماهازينهااش تاباش تنووض ويديها حسات بيهوم جمدو أما هوو شاف فيهاا ونطق بصوت بارد كالصقيع:سبقيني

قال ديك لكلمة ومد ليها لكونطاكط ديال الطوموبيل وهي داك لهدوء ديالو راه خلعهاا نيت... ناضت من بلاصتهاا وقربات جهتو وقالت بصوت خافت:نوح هانتاا سمعني

نوح:(ضار شاف فيها وقرب لجهتها تاأنفاسو السخان ضربو فوجهها ونطق بصوت خافت بارد) مانعاودش هضرتي

شدات لكونطاكط وهي تاتعض فشفايفها ولخلعة ركباهاا... عارفة بلي هاد لبرود باش تيدوي ويتصرف وراه شي كارتة... غادة بخطوات تقيلة وكل شوية تاضور لجهتهوم أما نوح غير شافها تحركات وهو ينزل جهة إسلام على غفلة شانق عليه من لكول منوضو من بلاصتو تاطاح لكرسي لور وصدر صوت لفت انتباه الكل ونطق بصوت قاصح: شايطين عليك يديك تاتحطهوم ليا على مرتي

تسمع صوت النسا لي كانو جالسين جنبهوم تيغوتو ورحيل مع وصلات لباب وسمعات صوت لغوات وهي تشد قلبهاا ورجعات بزربة لجهتهوم وجهها صفر مسقوط منو الدم... وداكشي لي خافت منو هو لي طراا...

حط إسلام يديه فوق يدين نوح ونطق بهدوء:ولد لحاج تهدن راه ماشي كيف كيسحاب ليك رحيل راه بحال ختي

نوح:(خرج فيه عينيه بخشونة نطق) ختك هي لي ولداتها ليك مك أما مرتي عندها زوج خوتهاا هوما لي تانعرف هاد الساعة ونتا ماشي منهوم

إسلام:(باغي يفك راسو وفنفس الوقت عارف بلي ردة فعل نوح طبيعية ونطق كيبرر) يهديك الله اولد الحاج داكشي لي فبالك مكاينش من مدة وأنا كانعرفها وكون كانت نيتي فيها كون تزوجت بيها شحال هادي

جاا إسلام يكحلها صدق عاميهاا بهضرتو لي شعلات نوح وخلاتو يرجع راسو لور ويعطيه ضربة نيشان لوجهو تانيفو شرشر بالدم وطاح الأرض والغوات فالكافي جهد والسربايا جاايين باش يفكو... دفع نوح واحد السربااي كان شادو من يدو ونزل عند إسلام تيضرب فيه وإسلام تيحاول يطاكي بيديه... تقلبات الطبلة ولكيسان تهرسو والروينة ناااضت ورحيل غير واقفة شادة كرشها لي حسات بيها كاضرها... ماقدراتش تقرب لجهتو وتحبسو حيت عارفاه فاش تيشعل مكيطفاااش بالزربة وعارفة بلي هاد الشعلة لي شعل غاتاخد نصيبها منهااا...

"زينبيدين فين ماميتك"

سؤال عفوي بريء نطقات بيه سيدرا لي كانت هاد لمدة كلها وهي ملاحظة هاد لقضية...وبحكم انها صغيرة وعزيز عليها تستكشف قررات تسولو داك السؤال لي ماعرفاتش بلي راه فتحاات بيه وااحد الجرح لي أصلا عمرو ماتسد بالنسبة لزين العابدين... لي كان جالس كيحفظ تاسمع سؤالها لي خلاه يزير على يديه بالجهد ولقلم بين صباعو ويهز فيهاا عينوو بشوفااات قاصحيين... أما سيدرا ناضت من بلاصتها وقربات جهتو وكملات هضرتها بتساؤل:مامي عندها ماميتها وبابانو تاهو عندو ماميتو وأنا عندي ماميتي ونتا فين هي ماميتك؟

حاط عينو لقهويين فقلب عينيها السود لي كاتشوف فيه وكاتسنااه يجاوب باش يرضي فضولها الطفولي... ولكن هو فديك اللحظة مكانش حاضر معااها حيت عقلو غااايب فشي حوايج هو مباغيش يتفكرهوم وباغي ينساهوم...

قربات سيدرا كتر جهتو وحطات يديداتها الصغاار على وجهو ونطقات وهي تاتسبل عويناتها ببرائة:واش ماميتك مشات عند الله بحال بابا ؟ تاأنا بابا مشى عند الله وگاعما شفتو ولكن بابانو بلو آيز ولى بابانو ديالي (حركات راسها بعوينات لببوشة تاتشوف فيه) بغيتي تولي مامي ماميتك؟

مانطق ومادار تاشي رد فعل بقا جامد تاتسمع الدقان فالباب ودخلات السعدية لي قربات جهة سيدرا وقالت:من صباح وأنا كانقلب عليك اديك لبخوشة اجي معايا راه خالك جاا باغي يديك معاه

سيدرا:(ضارت شافت فيها بحماس)شكووون واش مودي ولارياني؟

السعدية:محمد طه يالاه زيدي معايا

سيدرا:(ضارت شافت فزين وشيرات ليه بيديها) باي باي زينبيدين

مشات مع السعدية مخلياه وراها على نفس جلستو وعينو كيشوفو فنقطة وهمية وكيتفكر كلامهاا وخصوصا داك سؤال لي مباغيش يتمحى "فين ماميتك" زير على يديه تاهرس لقلم بين صباعو ودخل فيه تاسال دموو ومع دلك ماتحركش بقا بلاصتوو مغمض عينيه باغي يمحي ديك لهضرة دشحاال هادي لي رجعات تاتزنزن عليه فالراااس تاحس بيه غاينفاجر...شد راسو بيديه بزوج وبزاف دالاصوات كيتسمعو ليه فالداخل مخلينو يولي بحاال شي فاخرة زاندة بقوة ماااولى حمررر ولعرق لي فجبهتو كيضرب بالجهد تاطاح الأرض على ضهرو كيڤيبري كولو...يديه مطلوقين ورجليه وحدة تعوجات ليه... جاتو نوبة الصرع مرة خرا ومكان عندو تاشي حد ومن زهرو مطاحش على راسو... بدا تيهدا شوية بشوية تاااتكالمى وصدرو كيطلع وينزل تاحبس عن الحركة من غير عينيه لي كانو محلولين تايشوف فالسقف وصوت أنفاسو لي كايتسمع تاحس براسو قاد ينوض عاد ناض متكي بيديه بشوية عليه... وتمشى جهة الحمام دخل غسل يديه من دم عاد تحدر تيغسل وجهو وهز عينو جهة لمرايا تايشوف فانعكاسو مدة قبل مايخرج فاتجاه بيتو بخطوات تقيلة وتلاح بالجهد فوق نموسيتو وحط دراعو على عينيه مغطيهوم وقاطع لحس...

****

كايضرب فيه وإسلام تيحاول يطاكي ولكن الدق لي كلى فشلو.... شد ليه يدو ونطق بتهديد مخنزر فيه: ليد لي تحط ليا على مرتي نهرس جد بوها من جدر

مع نطق بيهاا مع تسمع ديك طق وصدرات من إسلام واحد الصرخة مألمة وهو عاض على سنيه تيكب فيه داك لحر لي حاس بيه فيديه...ناض نوح تايدفع بيديه دوك السربااي وجبد بزطامو هز منو لفلوس لي عندو ولاحهوم على واحد السربااي ونطق ببرود:هافلوس الأضرار

خرج مخلي وراه إسلام كايتوجع والسربايا تيسولو فيه وهو مقادرش يجاوب...كمل طريقو وغير شافها واقفة والجنون ركبوه ماسمعاتش هضرتو وخلاتو يتعصب....شدها من دراعها تاحسات بيه تحيد من بلاصتو وجرهاا وهي غادة معاه بخطوات سريعة... ماقدراتش دوي وصوتها حاسة بيه هرب ليها... وصلو قدام طوموبيل ونثر ليهاا لكونطاكط لي كان مدلي بين يديها تاحسات بالضو ضربها فصباعهااا واخا هاكاك مادواتش وبقات ساكتة...حل لباب ودفعها بشوية مكايس على كرشها تاطلعات وهو يسد لباب عليها بالجهد تاقفزات وقلب الضورة جهة الباب ديالو وطلع...داك السكات لي ساكت راه خلعهاا وحاسة بالبولة شوية وتنزل ليها... شافت كيف دار لإسلام وكيفاش ماحنش فيه وزعمة راه معرفة وباينة تاهي مغايحنش فيهاا... هزات راسها تاتشوف فيه بعيون خايفة وبصوت خافت قالت:نوح عفاااك خليني نشرح ليك

نوح:(ضرب لڤولون بالجهد وضار شاف فيها منير ونطق بصووت قاصح) مانسمعش حسك...

ضربات رحيل الطم وكحزات جهة الشرجم عاضة على شفتها حابسة لبكية... أما هو ديمارا طوموبيل تاتحكو الروايض فالأرض صادريين صوت مزعج وهي تكمشات فبلاصتها فاش ديمارا بالجهد...شدو الطريق فسكات من غير صوت أنفاسو لي كان تيتنفس دليل على عصبيتو...باقي لدابا مقادرش ينسى الديكور لي شااف...يديها لي كاان شادهوم إسلام وهي مخليااه والطامة لكبرى لكدبة لي كدبات عليه... تيعض فشفتو وتيكب فيه داك لحر دجنونو...أما رحيل كيف تكمشات فبلاصتها بقاات تامن النفس قطعاتو باش مايزيدش يتعصب عليها... عارفة بلي مغايدوزهاش ليهاا حيت كدبات عليه وحيت دارت حاجة لي هو منعهاا عليهاا...لاطالما كان إسلام نقطة كحلة لنوح قبل مايتزوج بيهاا كان كيشوف تصرفاتو معاهاا ومكانش تيعجبو الحال كيفاش ضاسر عليها وكل مرة يلوح يدو عليهاا ومكانش تيدوي حيت ماعندوش الحق... ولكن سبق ولمح ليها نهار سولها على نوع العلاقة بناتهوم وتعصبات عليه... ونهار طيح عليها العقد أو ولات على دمتو راه وضحها ليهاا وجااهاا من لخر ممنوع تسلم عليه وداك التصرفات لي كانت كادير معاه قبل ميبقاوش وهي براسها وفقااات عليهوم وليوم هاهي طيحات بهضرتوو وكدبات عليه... زيرات على يديها وقلبها مقبوض عليهااا... وداك السكات كسرو صوت تلفونها لي صونى بنمرة محمد طه...

رحيل:(جوباتو بصوت حاولات ماأمكن يبان هادئ وماتخليهش يشك بلي كاين شي مشكيل) ألو

محمد طه:زين لباااس

رحيل:حمدلله ونتا (نطقات بيهاا وشافت بجنب عينيها لقات نوح تايشوف فيهاا بدوك شوفات القاصحين)

محمد طه:صافا غير بغيت نعلمك بلي راه روح مودي معايا غانديهاا أنا وريان نخرجو شوية ونتعشاو براا اش بان ليك تمشي معانا تانتي

(سمعات صوت سيدرا لي كاتدوي بالجهد) ارااا مامي بيت نهضر معاها

رحيل:اراها امحمد طه نهضر معاها

سيدرا:مامي أنا مشيت مع رياني ومودي ناكلو برا واخا وغانمشي نشوف بّاديدي وتانيرت إينو ونيني معاهوم واخاا

رحيل:واخا وردي لبال لراسك وماديريش لبسالات بزاف

محمد طه:يالاه عوينات الجلبانة تهلاي فراسك تانتقاشعو

قطعات معاه ورجعات تلفونها لصاكها وضارت تاتشوف فيه كيف سايگ منير مكيضورش جهتهاا... باغا تهضر وتشرح ليه بااش مايفهمش غلط ولكن ماخلى ليها فين تحل فمها وبيما أنه معصب دابا فأكيد مغايسمعهاش... سبق ليه وقال ليها ممنوع تسلمي عليه وهي مشات گااع تلقات بيه وكدبات عليه وهادي أكيد مغايدوزهاش ليهاا... تنهدات بحرقة وحطات راسها على الكرسي مكمشة فبلاصتهاا وماحسات بوقتااش عينيها تسدات ونعسات...

ريحة الگارو خلاتها تكمش حجبانها بانزعاج وتحرك راسها يمين وشمال قبل ماتحل عينيها كاترمشهوم باش تزول ضبابة دالنعاس... عاد وضحات ليها رؤية فاش بان ليها حابس الطوموبيل قدام الحي لي فيه دارهوم الجديدة... وبان ليها نوح متكي على لكابو ديال الطوموبيل والدخان تيبان فوق راسو داير سحابة... بقات تاتسرط ريقهاا وتاتقول مع راسها واش ننزل ولالا وفلخر تشجعات وحلات لباب دطوموبيل ونزلات وهو ماتحركش من بلاصتو ومضاارش تاحس بيها وقفات جنبو ونطقات بهدوء:نوح

لاح لگارو لي كمل وعفس عليه وضار شاف فيهاا وحجبانو معقودين وقاال بصوت قاصح:تحركي قدامي

مشى سد الطوموبيل وسبقها جهة الباب وهي وراه تادخلو لدار...دخلات رحيل لصالة وحطات صاكها وشافت فيه بخفوت:عفاك سمعني انوح وخليني نشرح ليك

نوح:(زول جاكيط ديالو ولاحها باهمال وشاف فيها وهو حاط يديه على سمطة دسروال وقال ببرود)أنا شنو قلت ليك شحال هادي على داك خونا؟

رحيل:نوح

نوح:(جهد صوتو تاقفزات وقرب جهتها مخرج عينو فيها) ااااش گلت ؟ ماتسلميش عليه وماتقربيش ليه داك خونا ديري بينك وبينو حدود ولاشفتو حط يدو عليك نهرسها ليه گلتها ولامگلتهاااش

رحيل:(دموعها تينزلو بلاماتحس) قلتيها ولكن أنا والله ماقدرتش نفرطو فاش مد يديه

نوح:(هز حجبانو وجرها من دراعها تاحسات بيها ضراتها وقال بصوت عالي) ماتفرطيش جد بوووه وكلمتي طيح الأرض هانياا ياك (شاف فيها بشوفة غاضبة) ومكملاهاا بلكدوووب عليا عين بااين...

فاش عرفها كدبات عليه محكمش عليها وعطاهاا تبرير وگال يمكن تكون شي حاجة خلاتها تكدب... يمكن شي مشكيل مبغاتوش يعرفو عطاهاا عدر باش مايظلمهااش ويسبق لعيب وخصوصا هو طبعو مكيسبقش الاحدات ومكيعطيش حكم مسبق... تاكيتأكد من لحاجة عاد كيتصرف... ولكن فااش عرف السبب لي خلاها تكدب عليه تعصب وجعر... فكرة أنها كدبات عليه باش تلاقى بإسلام لي ماعندوش معاه وكيتحسس منو ماحملاهاش وماتقبلهاااش نهائيا... يقدر يدوز ليهاا كلشي ولكن ديك لكدبة يستحيل دووز...أما رحيل فكانت باغا غير تشرح ليه وتبرر ليه باش يفهم شنو طاري ومالقات كيف دير هو معصب وأي كلمة تتگولها تاتحسب ضدهاا...

هزات فيه عينيها لي كانو مدمعين وحركات راسها بلا وقالت: ماكنتش قاصدة انوح نطيح بهضرتك حاشا واش نديرها

نوح:(طلق منهاا وهو مخنزر وقال) لاراه درتيهاا ملي مشيتي لعندو وكدبتي عليااا راه درتيها الشريفة اش داك لعندو أصلاا

رحيل:(قربات جهتو وشدات فدراعو تاضورو لعندهاا) مشيت غير على قبل أسماء هو وياهاا وقع بناتهوم مشكيل وبغاني نعاونوو

نوح:(خنزر فيها) نتي هي نسيمة لحر تفكي ليهوم لمشكيل بينو وبين مرتوو اش دخلك نتي يمشي يفك مشكيلو لراسو مايهضرش معاك نتي ومايقربش ليك اش بينو وبينك يااك كاااين بااك يمشي عندو

رحيل: هو عارف أسماء مغاديش تسمع ليه عليها طلب مني نهضر معاها والله انوح تاهادشي لي كاااين

نوح:(هز يديه كيحسب وبخشونة قال) عصيتي هضرتي وتلاقيتي بيه بلاخباااري وزدتيهاا مسلمة عليه يديك شااايطين عليك نقطع جد باباهوم باش تهناااي حااط عليك يدو ونتي مخلياااه بحال لاماعندك راااجل يحكمك وبلاماندويو على لكدووب لي كادبة (كمش حجبانو وقال بصوت بارد كالفحيح) شكون گال لياا بلي هادي ماشي لمرة لولة لي تكدبي فيها علياا

رحيل:(خرجات عينيها وقالت وهي تتحرك راسهاا بلا وبهسترية قالت) لا لا والله ماعمري كدبت عليك تيق بياا أقسم بالله

عطاها بالضهر وكتافو بزوج كيتهزو بالأعصاب وكيمسح على لحيتو محاملش هادشي لي طاري وهاد لهضرة لي گال ولكن من حقو... حيت ماعندها تاشي مبرر لي يخليهاا تكدب عليه وهو عاطيها واحد التقة لي لامشات تاتهرسات صعيب ترجع وديك التقة نيت حس بيها تزعزعاات من الفعلة لي دارت... ديك لعصبية لي فيه داباا كيحاول ماأمكن يكالميها ومايتفرگعش عليهاا حيت حاملة... عليها رفض يهضر معاها فالطوموبيل وفضل يسكت تايبرد شوية وديك الساعة يتحاسب معاهاا... ولكن راه رجافالله مايقدرش حيت كلما هضرات وبررات ليه تايلقى راسو معصب كتر منهاا وكيشوف بلي تبريراتها كيزيدو يعصبوه... حس بيها شدات يديه لي كان مزير عليهاا وحطات راسها على دراعو وقالت بصوت خافت ودموعها سيالة:عارفة راسي غالطة ولكن نيتي مكانتش هاكا انوح أنا خفتك لاعرفتي شنو كاين تعصب عليها كدبت عليك وتيقني مكنتش غانمشي عندو هو طلبني وأنا كنت باغاا غير نعاونو ونسمع ليه وصاف إسلام والله تاكنعتابرو خوياا عافاااك شوف فيااا (قلبات وجهو جهتهاا تاشاف فيها وكملات هضرتها) تيق بيا انوح والله ماعمري كدبت عليك

نوح:(ببرود) ملي عارفة راني مقابلش تمشي عندو علاش مشيتي من لول ؟؟ اش دااك ليه

رحيل:هانتا سمعني فلفترة لي كنتي غابر فيها وقع مشكيل بينو وبين أسماء وهي خوات ليه الدار ورجعات لدار بابا ولمشكيل كان كبير بناتهوم وصعيب يتحل وأنا فاش شفت أسماء فديك الحالة ماقدرتش نخليهاا بوحدها وهي حاملة ومانعاونهاش هاديك راه ختي وبلاخبارها هي وبابا مشيت لعندو لدار بااش نهضر معاه ونشرح ليه وهو كان باقي معصب ومبغاش يسمع ليااا و

نوح:(ضار جهتها بزربة شاف فيهاا وهو مخرج عينيه وحدر راسو تاقرب لوجهها بحال الاغاينطحها وقال بصوت بارد وفنفس الوقت قااصح تايخلع) مشيتي لعندو لدار بوحدك؟؟

يتبع...