محتوى القصة
طريق كولو ونوح كيفكر فتصرفات رحيل وكيحاول يعطيها أعدار.. مكانش باغيها تبقا فدار واليديه وكان باغي يجيبها ولكن شاف راحتها ودار ليها لخاطر واخا بقا هو بلاخاطر... وفنفس الوقت راسو ضارو باغي يعرف شكون هضر معاها وعلمهاا وتاهي مبغاتش تقول وهادشي خلاه يشك.. وصل لدار وحط طوموبيلتو فلگاراج مكمل طريقو على رجليه تاوصل قدام لباب ودفعو بيديه داخل.. لقى رحمة كاتسناه تبسمات ليه وناضت عندو عنقاتوو
رحمة:من ايمتى وأنا نتسنى فيك تعطلتي
نوح:(جلس فالكرسي ونطق بهدوء) جلسي ايمّا ندوي معاااك
رحمة:(حسان بالخوف وقالت بقلق)ياك لباس خلعتيني اولدي عليك
نوح:(ضحك بهدوء)لالة رحمة بلاماتخلعي وعطيني ودنيك عندي مانقول ليك
رحمة:كانسمعك
نوح:رحيل حاملة وقريب غايجيو واحد زوج حفايد ولاحفيدات يونسوووك فالريااض
عطاهاا الخبر دقة وحدة خلاهاا كاتشوف فيه بتفاجأ ولكن دغيا تبسمات وفرحات من لقلب لدرجة عينيها دمعاات..
رحمة:غانولي جدة مرة خرى هههه (زغرتات) يويويويويوي
نوح:(ملامحو مبشورين وباينة فيه لفرحة) هانتي من دابا وجدي ليهوم والله يجيبهوم على خير إن شاء الله
رحمة:آمين ياااربي الله يفك وحايل رحيل على خير
نوح:(تمتم من قلبو)آمين ياربي
رحمة:(ناضت من بلاصتها وقالت)غانمشي نلبس حوايجي بااش نمشي نشوف رحيل ضروري ماخصني نمشي نبارك لعروستي على هاد لخبار الزوينين
نوح:(حرك راسو) واخاا خودي راحتك أنا غانطلع نرتاح شوية
رحمة:(بهدوء)وزين العابدين؟؟
نوح:(تنهد)أنا غانعلمو بطريقتي
هزات رحمة تلفونها تعيط لسناء باش تجي وتمشي معاها وهو خلاها وطلع لفوق.. داز عند زين العابدين لي كان برا وعينو تفشات وتاهي بدات تبرا ليه.. كان كيوجد لقرايا حيت غايبدا بحكم شهادة طبية سالات ليه.. قرب جهتو وباس فراسو ونطق بهدوء:شوية داباا احفيد لحاج
زين العابدين:وي مزيان
نوح: بعد غدا لقرايا واجد؟
زين العابدين:(بملل)وي
نوح:عندي ليك كلام مي ماشي دابا ماتمشي فين حيت غانحتاجك
زين العابدين: واخا
خلاه ومشى لجناحو مناعسش وحاس بلعياا وغير دخل لجناح وهو يلمح داك الزاج لي مهرس.. زفر النفس ودخل لحمام كينصل حوايجو وخدا دوش توضى وخرج صلى عااد هز لفيكس وصونى لسعدية لي جات جمعات الزاج وغير مشات وهو يظلم لبيت وغمض عينو ناعس..
عند رحيل لي فاقت من نعاسها وهي مبوقة وحاسة بلعياا.. مشات لحمام ودرات عوتاني عاد توضات باش تصلي لمغرب... جات عندها غزلان لي تبسمات ليها وقالت بهدوء:فقتي على سلامة ههه
رحيل:عرفتي حاسة بعضامي كيضروني بزاااف ومعدتي مقلوبة علياا اوووف
غزلان:اوا غير عولي حيت باقي تابعك الطريق
رحيل:(حطات يديها على كرشها) على قبل لعسيلات كولشي يهون والله يسمح لينا من لواليدين
غزلان:آمين عگوزتك وبيسان راه لتحت باغيين يشوفوك
رحيل:واخا أنا جايا
نزلات غزلان وهي مشات لبلاكار تشوف اش تلبس مجاتش تنزل ببيجامة.. خدات واحد لگندورة نص كوم وفيها فتحاات من جناب رجليها مبينين سيقانها كيلمعوو ومع دايرة ليزر زغبة مكاضورش فداتها وهي أصلا من نوع لي زغبتها رطبة وخفيفة.. جمعات شعرها ضفيرة ودارت شوية دلعكيكر ورشات ريحة وهي مخسرة سيفتها حيت جاتها خانزة..
نزلات لتحت ومع قربات لصالة فين جالسين وهي تسمع صوت لهضرة دخلات وغير شافتها رحمة وهي تبسم ليها وناضت جهتها معنقاهاا ورحيل تضهشرات فلول..
رحمة:(بفرحة) عروستي الغزالة مبرووك عليك ابنتي والله يفرحك بالذرية الصالحة ويفك وحايلك على خير ابنتي
رحيل:(بتبسيمة خفيفة)آمين اخالتي شكراا
بيسان:مرات خويا ههههه مبرووك احبيبة فرحة بزاااف حيت غانولي عميتو تاااني اتوينز هههه
رحيل:حبيبة عقبالك تانتي نفرحو بيك
بيسان:آمين
جلسات رحيل جنب رحمة لي كانت تاتهضر وتبسم وباينة فرحاانة ورحيل ارتاحت بزاف حيت صلحات العلاقة بينها وبين عگوزتهاا..
رحمة:ملي قالها ليا ولدي نووح طرت بالفرحة ههه واخا راني جدة ولكن الفرحة ضروري منها
قلبات رحيل عينيها وتأفافات فاش سمعات سميتو..
تانيرت:(تبسمات)هههه تاحنا واخا كاينة سيدرا ولكن فاش عرفنا فرحناا بحال الاأول مرة ههه وخصوصا فاش عرفنا بلي راه توام
بيسان:شنو تاتوقعي يكونو واش توينز ولاد ولابنات ولاولد وبنت
رحيل:ههه والله ماعرفت ولي جاات من عند سيدي ربي مرحبا بيهاا
رحمة:المهم هي الخلقة التامة ويكونو ذرية صالحة
تانيرت:اه عندك لحق سوى ولاد سوى بنات راه لمعزة ديالهوم غاتبقا هي هي
بيسان:سيدرا غبرات فين هي
تانيرت:مشات مع ريااان (سكتات فاش سمعات صوتهاا)هااء هاهوما جاو عمرهوم طويل..
مبقاتش بيسان جالسة فراحتها وتزيرات وهادشي بان فيها ولوحيدة لي عاقت هي رحيل بحكم عارفة اش كاين.. دخلات سيدرا وجات نيشان تاتجري عند رحيل هازة واحد لبلاستيكة
سيدرا:(حطات ليها لبلاستيكة فحجرها)مامي جبت لك حلوياااات بزاااف
رحيل:(بجدية)سلمي بعدا أمامي هو لول
ضورات سيدرا عويناتها على رحمة وبيسان ومشات سلمات عليهوم عاد رجعات عند رحيل تاتوريها اش جابت ليهاا..
كان واقف ريان حدا لباب وعينو لمحات بيسان لي جالسة تاهي تاتشوف فيه.. رمى السلام وطلع لبيتو بحكم أنه مكاين تاشي راجل ومحمد طه بنفسو راه بقا لفوق.. أما بيسان بقات غير تاتفكر فكلامو لي قال ليهاا..
رحمة:(حلات واحد لبواطة جبداتها من صاكها وضارت جهة رحيل ناطقة بتبسيمة خفيفة)جبت ليك واحد لكادو بسيط بمناسبة لخبار الزوينة لي سمعت ليوم نتمنى يعجبك
حلات رحيل لبواطة تاتشوف فديك الكرميط ديال الدهب لي كانت عاطية لعين وتاتجي بحال الضفيرة وفيها حجيرة لوسط فالخضر.. عجباتهاا وفرحات بيهاا:شكرا ليك اخالتي زوينة بزااف
رحمة:بصحتك ابنتي
تانيرت:لالة رحمة خودي ليك لحلوى ماكليتي والو
رحمة:الله يخلف غايخصني نووض نمشي تالغد ملي ترجعي ارحيل واخا
رحيل:(بهدوء)غانبقا شي يامات هنا اخالتي نرتااح شوية
رحمة:(بتفهم)واخا لمهم ردي لبال لصحتك وصحة حفايدي يالاه بسلامة عليكوم..
ناضت معاهوم رحيل تال لباب ومعاها تانيرت وصلوهوم وغير مشاو ورحيل بقات فالصالة مع طلوع ونزول بزاف منعاتو عليها طبيبة.. بقاو مجمعين ومعاهوم أسماء حيت دايرين أبيل فيديو معاهاا... وجدات تانيرت واحد الشلاظة لرحيل بحكم أنها مباغاش لمرقة تاتروعهاا وتعشات هي لولة وطلعات لفوق باش تنعس وترتاااح..
كانت رنيم واقفة قدام باب بيتهاا وهي حاسة براسها متوثرة خصوصا فاش قال ليها إدريس اشنو كاين حيت كان مضطر بحكم سولها واش قالتها لشي حد باش يعرفو شكون ساعة لقاها معارفة والو...دقات ودخلات ورحيل غير شافتها بقات ساكتة ولكن شوفاتها كانو عبارة عن عتاااب
رنيم:عمي إدريس قال ليا كولشي عارفة ارحيل بلي نتي مقلقة مني دابا وهازة من جهتي ولكن تيقي بياا أنا فكرت فمصلاحتك وماشي غير أنا تاباباك أو ولد لحاج حنا فاش سكتنا ماقصدناااش فيها شي حاجة خايبة.. حنا كانت نيتنا نخليوك ترتاحي وتعيشي حيااتك كيفك كيف الناااس
رحيل:(تنهدات) مطلبتش منكوم شي حاجة صعيبة كنتو غير قولوها لياا حطوني فالصورة وماتخليونيش مقلوبة عليا لقفة ارنيم
رنيم: ولد لحاج مكانش باغيك تعرفي باش ماتحرجيش حيت محتارم رغبة ديالك فالسكاات وهو كان باغي يخليك ترتاحي نتي معرفاش هو اش دار على قبلك وكيغااش كان يقلب وخااطر براااسو ارحيل غير على قبلك واااش فنظارك كاين شي واحد يديرها ونتي وياه مابيناتكوم والو؟؟ هو واجه داك لحيوان لي مكيرحمش ولي أدى خوه وبزاف دالناس غير على قبل راسو.. ولد لحاج نهار قال ليا نعاود ليه حيت كان باغي يعرف داك لحيوان علياش قااد وكان ضروري نعاود ليه اش دااار رحييل أنا عارفاك مقلقة مني ولكن سمحيلياا عفااك وتفهمي بلي حنا سبقنا مصلاحتك
رحيل:(مسحات دموعها لي نزلو ونطقات بخفوت) هادشي داز ومبقاتش لهضرة تنفع فيه ارنيم ومغانلومك لانتي لابابا ولكن خصكوم تعرفو باش حسيت نهااار وقف قدامي زكريااء وحط ليا كلشي قدامي حسيت براسي كنت مكلخة وماحملتش راااسي ارنيم وكانظن نتي غاتعرفي مزيااان أنا باش كاانحس تانتي فواحد النهار لمتيهوم حيت خباو عليك موت بااك وشكون سبابو
رنيم:عارفة وعليها عدرتك وجيت نطلب منك السماااحة
رحيل:(تنهدات)الله يسامح ارنيم الله يسامح
قربات جهتها رنيم عنقاتهاا وتارحيل بادلاتها تعنيقة..
رنيم:نخليك ترتاحي دابا
خرجات من عندها رنيم ونزلات لتحت وهي تاتقلب على إدريس غير لقاتو جالس بوحدو وهي تنطق بزربة:عمي أنا عرفت شكون لي قال لرحيل بلان بدر..
حل عينيه وسط الظلام ومع السكات لي فلبيت محسش براسو شحال وهو ناعس.. خدا التلفون وشاف فالساعة وهو مكمش عينيه الزرقين لي تبوقو بالنعاااس.. شعل الضو وناض كيتفوه ويجر فالبانطوفة ويطرطق فعنقو.. غسل وجهو وسنانو وتوضى صلى لعشا.. طلب من السعدية توجد ليه قهوة كحلة بااش يتوگض وهز تلفونو دوز لخط لفتنة ديالو.. كان تيصوني ولكن مكتجاوبش مرة زوج وفالرابعة عاد فتحات لخط ونطقات بصوت هادئ:ألو
نوح:(مكمش حجبانو)علاش مكتجاوبيش؟
رحيل:(تأففات)كنت فالطواليط شنو باغي؟
نوح:(حك حاحبو وقال بجدية)مالك تادوي هاكا ياك لبااااس
رحيل:مماليش وزايدون كانهضر عاادي نتا محسوس
نوح:(بحدة)رحييل هاد لفاصون دلهضرة مكتعجبنيش ونتي عارفة هادشي
رحيل:(الصمت)
نوح:(استغفر مولاه ونطق بهدوء) باقي تاتردي ؟
رحيل:اه
نوح:كليتي؟ ياك مامشهية نجيب ليك شي حاجة؟؟
رحيل:لا
نوح:(مكالمي راسو بزز)غدا مور لغدا غاندوز نجيبك وغانطلعو لفيرمة ندوزو تما شي يامات واخا
رحيل:همم غانقطع دابا فيا النعاس
نوح:(بهمس دافئ قال)تباتي ليا فراحة الله الفتنة
رحيل:بونوي
قطعات لخط مخليااه تايشوف فليكخون دالتلفون وهو معصب ومعاحبوش لحال نهائيا.. طريقة باش كادوي معاه نرفزاتو وغير شد راسو بزز حيت عارف وضعها... لاح تلفون فوق النموسية وناض يحل لسعدية لي جابت ليه لقهوة.. شرب قهوتو بشوية عليه تاسالاهاا وناض خارج من جناحو غادي لعند زين العابدين باش يدوي معاه ويعلمو بخبار الحمل... حاس بواحد لحمل تقيل بزاف فوق كتافو وهاز لهم لديك لجلسة مع ولدو حيت عارف مزيان اش غايوقع فيها... لقاه كيتسناه كيف قال ليه ماخرجش من الريااض نهائيا..
نوح:(جلس فالكرسي ونطق بهدوء)جلس اولدي (حك لحيتو)زين رحيل حاملة
زين العابدين:(زير على يديه وبنظرات باردة شاف فباه) مبروك
نوح:(حط يديه على كتفو وقال بجدية)علاش كاتقولها ونتا مفرحانش؟
زين العابدين:(بالإنجليزية) حيت هادي هي لحقيقة
نوح:(تنهد)انعاودو تاني نفس لهضرة ولكلام عوتاني لي قلناه شحال هادي احفيد الحاج
زين العابدين:(الصمت)
نوح:سمع اولدي عارفك من نهار عقلتي راسك وأنا باك بوحدك وعارف بلي غاتجيك صعيبة تولف يكون عندك خوتك لي يشاركوك فياا ولكن عارف بلي أنا يستحيل نميز بيناتكوم حيت كلكوم عندي بحال بحااال وكيفما كانبغيك نتا غانبغي خوتك بلعكس أنا خصك تكون فرحان حيت نتا غاتكون خوهوم لكبير لي غايهز مسؤوليتهوم حيت أناا عوااال عليك (ضحك بهدوء) بااك راه تيكبر فالعمر وخص لي يهز معااه المسؤولية ونتاا احفيد الحااج هوو لي غايهزهاا (بتساؤل)غاتعاون باك ياك
زين العابدين:(حرك راسو باه)
نوح:(حط جبهتو على جبهة ولدو وقال بهدوء وحنية) راه واخا يوقع لي يوقع عمري نبغيهوم كثر منك اولدي مانبغيش تخلي دماغك يحط ليك شي فكرة ماهياااش وتيقهاا أنا باغيك تبغي خووتك وتفرح حيت غاااتولي خوهوم لكبيرر (باسو فراسو) تفاهمنا
زين العابدين:(ببرود)مانقدرش نواعدك
ناض زين من بلاصتو وخرج مخلي نوح هاز واحد لهم ربي لي عالم بيه من جيهة رحيل لي مقلقة منو وتتعامل معاه ناقص وصحتها لي خصو يرد ليها لبااال ومن جهة سيدرا لي خص يدير دورو معاهاا وتاهي يعطيها وقتهاا ويسمع ليهاا ومن جيه زين العابدين لي هادا بوحدوو راه حكاية خرى ومع عارف ولدو وحساسيتو وتعلقو بيه لي صعيب يزول بين ليلة ونهار.. وبلاماينسى لخدمة لي هاز الدرك ديالها بوحدو راه لاإله إلا الله منو كلشي والمسؤولية لي هاااز خصو ينفدها على أكمل وجه نهار باه حط لمسؤولية فيديه أمنو على خوتو ومو ورزقوو وهو غادي بكلام بااه كينفدو بالحرف..
نوح:(ناض من بلاصتو وتمتم بصوت خافت)ياصبر أيوب..
---
نزل من العمارة وهو داير يديه فجياب الجاكيط والبرد كيضرب فعضاامو مع هاد ليل... معرفش واش غايلقى شي مول لحانوت حال باش يجيب السخرة لي قالت ليه وداد.. غادي فالزنقة ومع تما فيه غير لعمارات الدنيا خاوية... وصل عند لبقال وخدا ليه داكشي لي سخراتو وقبل مايخلص هز تلفونو وعيط لوداد..
زكرياء:واش صافي داكشي لي قلتي هو لي خاص راه مافيا لي يعاود يخرج
وداد:لا صافي هو هدااك
قطع وخلص وهز الخنيشة راجع فحالو.. غادي فطريق تاشوية سمع صوت طوموبيل ومااهتمش حيت الشارع طوموبيلات كيدوزو منو شي عاادي ولكن لي مكانش عادي هو فاش ضربات ديك الطوموبيل واحد الضورة أو وقفات حابسة ليه الطريق شي لي خلاه يوقف وعينو تايشوفو فالطوموييل باستغراب تبان ليه بابها تحل ونزل منها بسروال توني فالكحل مع قبية فنفس اللون وجاكيط وغير شاف فيه حل زكرياء فمو ونطق بصوت متسائل ومسنغرب:ولد لحاج هذا نتا ؟؟
نوح:(بصوت بارد كبرودة شهر ديسمبر)تت هذا غزرايل لي غاياخد روحك..
داخلة لرياض وهي مبسمة وباين على وجهها الراحة.. كل شوية تسهى وضحك غير بوحدها وحيت مشى لحال طلعات نيشان لبيتها ومع حلات لباب وشعلات ضو بانت ليها رحمة جالسة فوق الفوطوي مربعة يديها وهازة فيها داك لحاجب تاتشوف فيها بجدية.. سرطات سناء ديك الضحيكة وقربات جهتها تاوقفات قدامها..
سناء:(بهدوء)باقي مانعستيش؟
رحمة:فين كنتي تال هاد لوقت؟؟
سناء:هااء فين غانكون مثلا مشيت تساريت شوية وبدلت لجو وتعشيت براا
رحمة:(ناضت من بلاصتها وقربات جهتها)وليتي تاتكدبي عليا اسنااء؟ شحال وأنا كانعيط ليك فتلفونك ونتي متتجاوبيش كون كنتي بوحدك كنتي غاتشوفي التلفون وغاتجاوبي
سناء:(بتوثر)غير حبست ليه الصوت وصاف
رحمة:(ببرود)من امتى ونتي كاتحبسي الصوت لتلفونك خصوصا لاكنتي خارجة
سناء:(تنهدات وقربات جهتها شادة يديها) واخا أنا غادي نقول ليك كلشي مي جلسي وعطييني ودنيك
نفدات رحمة كلامها وجلسات وسناء تاهي جلسات قدامها وزفرات النفس قبل ماتنطق بهدوء:أنا مشيت نشوف اليازيد (بانت ليها رحمة غاتحل فمها وهي تنطق بزربة) ماتقاطعينيش خليني نكمل وديك الساعة هضري تت من نهار عرفتو خاني وطلقني ولحرقة ديالو فقلبي حاولت نسى ونكمل حياتي مي ماقدرتش واخا كنت تانبين ليكوم راني بخير مي الحقيقة كانت حاجة خرى ونتي عارفة هادشي نهار قررت نتخطب أنا وبدر الدين حين كنت باغا نعاندو ونبين ليه بلي هو مكيهمنيش.. كنت باغا نفقصو وندير ضد فيه هو وبابا ونبين ليهوم بلي أنا مامظطراش ندير لي بغااو.. بقوة مافكرت انني ندمو نسيت بلي راه تانهلك راسي وكنت غانلوح راسي فواحد الكارثة ربي نجاني منها أو ولد لحاج هو لي عندو لفضل وعمري غانسى ليه وقفتو معايا.. حاولت نكمل عادي وفيما كنت تانشوفو جاي عندي باش يطلب مني السماحة كانزيد نتغر ونحس براسي.. وتيعجبني لحاال ولكن فلخر هو عيى وقرر يبدا حياتو من جديد (تنهدات) فاش عرفت داك النهار حسيت بقلبي ضرني وماحملتش نهائيا فكرة أنه يرتابط بغيري حيت بالنسبة ليا اليازيد ديالي بوحدي ومامنحقوش يشوف فشي وحدة غيري تقدري تقولي عليا أنانية ومغانكرش ولكن نتي غاتفهميني اختي وغاتعرفي بلي صعيب تشوفي لي قلبك بغااه مع وحدة غيرك نهاار لخطبة حسيت بالعافية شاعلة فيااا تيقي بلي مشيت وأنا من لداخل تانموت ونتقطع وفاش شفتهوم بزوج راه كنت باغا نوض نغووت ونضربهوم ولكن مادرتهاش حيت مغانرضاااش نبين لناس أنني ضعيفة وهوما يشمتو خصوصا مو لي لقاتها سبة تسممني بلهضرة ديالهاا.. (عضات على شفتها) ملي مشيت عندو ليوم قررت نصارحو بداكشي لي كانحس بيه وتاهو قال لي عندو و(بدات تاتحك عنقها وترجع شعرها بتوثر) هو طلب مني نعطيه فرصة خرى ونبداو من جديد وأنااا عطيتها ليه
سكتات سناء وعينيها على وجه ختها كاتسنى منها شي رد فعل على شنو قالت ليهاا.. كانت حاسة براسها متوثرة وخايفة ومغاتنكرش بلي رأي ختها مهم ليها حيت هي لي عاوناتها فاش كانت محتاجة لي يوقف معاها ماخلاتهاش وماسمحاتش فيهاا..
رحمة:(تنهدات) شنو ستافدتي دابا ملي كنت تانصح فيك شحال هادي ونتي كنتي مقصحة راسك ضيعتي سنين من حياتك غير هاكاك (شدات يديها)ولكن هادشي كولو درس ليك باش لمرة جايا تعرفي كيفااش تصرفي فيما طيحي فشي مشكيل وتحيدي لعناد لي فيك وتفكري بعقلك أسناء راه أنا فاش كانصحك حيت عارفة مصلاحتك ومن هادشي كامل أنا لمهم عندي هي فرحتك وكنت حاسة بلي نتي واليازيد غاترجعو مع بعضياتكوم حيت بزوج بيكوم كنتو ضحايا ديال قصوحية راسكوم (تبسمات ليها) نتي ماشي بنت صغيرة لي نوريها شنو دير ولا شنو ماديرش نتي بعقلك غير هو داك لعقل بقاي تخدميه اسناء وملي تختاري قرارك تأكدي أنكي ماتكوني ضلمتي فيه تاحد واخاا
سناء:كوني هانيا أنا تعلمت واحد الدرس مهم وأكيد غادي ندير بنصيحتك
رحمة:(باستها فحنكها)يالاه نخليك دابا تبدلي عليك وترتاحي تصبحي على خير
انساحبات رحمة مخلية سناء كاتزفر النفس وهي مرتاحة.. مشات بدلات حوايجها ببيجامة ديال النعاس وديماكيات لمك اب ديالها وقبل ماتخشى بلاصتها هزات تلفونها وشافت فلزابيل ديال اليازيد.. صونات عليه وهو يجاوبها فالبلاصة وباين فيه مدرونجي
اليازيد:فين كنتي من صباح وأنا كانصوني ونتي مكتجاوبيش
سناء:كنت تانهضر مع رحمة عاودت ليها كلشي
اليازيد:مزيان غدا غانهضر مع الدار باش نجيو نخطبوك وجدي راااسك ماابيل وديري حسابك بلي غانديرو كلشي فنهار واحد راه صبر مبقاااش عندي ومادى بياا وقتااش نهزك ونهرب بيك
سناء:(ضحكات من قلبها)هههه لوااه عند بالك غاتديني بلانشاط وبلاعرس تت غير وجد راسك احبيبي تحطهوم صحاح على لعرس وصداق ماشي أنا لي نمشي بسكوتي
اليازيد:(تنهد بهمس محموم) وأنا مابقيتش فيك مابيل سبع سنين طالعين لثمن سنين وأنا نتسنى فيك ونتي باقا باغا طولي لمدة
سناء:صبرتي هاد لمدة كلها مافيها بااس تصبر ليك واحد شوية مزاال ولا قلبك عامر ازماني ههه
اليازيد:(عض على شفتو وقال بانحراف)هااد الساعة ز*ي لي عامر
ضحكات سناء من قلبها على هضرتو لي قاال تادمعات عينيها وهو فرح لضحكتها وباقي لدابا مامتيقش بلي هوما رجعو حاس براسو فحلمة وكيقول مع راسو شوية ونفيق ونلقى راسي فالواقع المر.. ساعة تاحاجة مابعيدة عند الله ولواحد غير يدير إيماانو فلي خالقو وكون على يقين ربي مغايخيب تاواحد... كمل معاها الكلام وماسخاش يقطع ولكن خص تنعس حيت مشى لحاال وتاهو كان متكي بلاصتو وكيرجع السينتة ديال اللقاء لقاءهوم بزوج كيف كمل...
🔙🔙
كاتشوف فيديه لممدودة وترجع تشوف فيه بحيرة داخليا باغا ترجع معاه ولكن خايفة يتكرر معاها نفس المشكيل.. وكيف تايقولو لي عضو لحنش يخاف من لحبل وهي خايفة تيق ويصدق راجع لعادتو لقديمة.. بقات مدة وهي تاتفكر وفلخر حطات يديها على يديه وهو ماتيقش وزير على يديها بحال لاخايفها تهرب ليه..
سناء:مباغاش ندم على هاد لفرصة لي عطيتك اليازيد
اليازيد:(بنبرة صادقة)كانواعدك مغاتندميش حيت عمري غانفرط فيك
باس يديها مرة وزوج وهي مبسمة وحاسة براسها مرتاحة.. ناض بزربة عيط لجيغون وصاه على لكافي وجمع دوك لوراق وشد فيديها خارج بيها لبرا
سناء:فين غاديين؟؟
اليازيد:غانهرب بيك هههه (درعها لعندو وهي تخشات فيه وقال بحب)ممتيقش مابيل بلي نتي رجعتي ليااا
سناء:اوا باش تعرف قيمتي
اليازيد:أودي قيمتك عارفهااا من شحال هادي
سناء:اوا هاحنا نشوفو (بجدية) سمع اليازيد أنا رجعت معاك حيت تايقة بلي نتا نادم وحيت عارفة راسي غلطت فحقك ولكن لافكرتي تعاود غلط عمرك غاتشوف وجهي مزااال واخا كانموت عليك
اليازيد: وأنا عمري مغانعاود لغلط اسنااء ونفرط فيك تاني
سناء:اوا دابا متافقين فين غانمشيو؟؟
اليازيد:نعوووضو لي فااات
شد يديها مزير عليها وركبو فالطوموبيل غاديين يعوضو سنين لي فاتو على قولتو..
شاديين الطريق لأكادير وسناء غير شافت ديك لبلاكا وهي ضور عندو وقالت بتساؤل:فين غادي بيااا؟؟
اليازيد:غانسرقك هههه
سناء:أكادير واش هبلتي ههه مخلي مراكش كلها وغادي بيا لأگادير؟؟
اليازيد:ناخد رااحتي معااك كثرر مابيل
سكتات وهي متحمسة لفين غادي بيهاا وشنو فبالو.. مدة ديال الطريق وصلو لأكادير لي كانت مغيمة وفيها الشتاء واخا هاكا جوها كان زووين.. مشاو لريسطو وكلاو هو لول عاد شدو الطريق لاكووط.. البحر والبرد واحد الجو زويين وخصوصا الغروب منظر ولاأروع...
جلسو بزوج وعينيهوم على لبحر لهاايج وفيديهوم قهوة أومبورطي مدفين بيهاا عضامهوم
سناء:(شافت فيه ونيفها حمر) نتا عوااال تمرضني واقيلا
اليازيد:نمرضو بزوج مابيل (درعها)واش فيك لبرد نتحركو من هنا؟
سناء:فيا ولكن عجبني الجو هنا والمنظر زوين بزااف
اليازيد:لي بغيتي
سناء:ماماك مغاتبغيش رجوعنااا
اليازيد:الواليدة معرفاش مصلاحتي وأنا ماشي برهوش لي توريني شنو ندير وزايدون وراحتي معاااك نتي
سناء:ولكن هي مكتبغينيش وراك عارف اش كاين
اليازيد:ماتهزيش البااال ليها أنا عارف كيفااش نقنعها نتي غير وجدي ليااا راسك (تحدر خطف بوسة فشفتها بزربة ونطق) وكون تعرفي شحال توحشتك
سناء:(حاسة براسها طايرة فوق السحاب) بزاف ولاشوية
اليازيد:فاش نعقدو ونوريك واش بزاف ولاشوية
سناء:ماااسخ تت مشى لحال خلينا نمشيو
اليازيد:يالاه
تحركو من تما مساخينش وشدو طريق راجعين بزوج واليازيد شاد يديهاا وكل مرة يبوسها وباقي لدابا ممستوعبش بلي هوما تصالحو ورجعو لبعضياتهوم..
🔜🔜
كلام نوح خلى قلب زكرياء يضرب بعنف وعيونو على ملامح وجهو لي كانت باردة كبرودة هاد الليلة.. مكانش متوقع يشوفو من اخر مرة ولي كانت نهار السلخة لي عطااه.. من تما معاود شافو وتامن فلوسو دلخدمة وصلهوم ليه سعيد... بدا حياة جديدة ونسى كلشي ولكن نهار شاف رحيل حدا باب دارو وتأنيب الضمير خدم عندو.. كان باغي فرصة فين يطلب منها السماحة على الشي لي دار فحقها.. خصوصا أنها عمرها أداتو بلعكس كانت ديما تتعاملو مزيان واخا حطات حدود بناتهوم ولكن دوك لحدود هوما لي خلاوه يحتارمهاا.. نهار وصل مرتو لرياض على قبل لعراضة وشافها لقى لفرصة فين يعتادر ويصفي خاطرو من جهتها حيت تأنيب الضمير هلكو وبالخصوص كان غايدمر ليها حياتهاا.. مكانتش نيتو خايبة ولكن هو مكانش عارف بلي دار أكبر غلط وبلي بسباب كلامو ناض مشكيل كبير.. عينو على نوح لي كان مقرب جهتو ويديه فجياب الجاكيط كيبان بحال شي زماگري.. غير وصل قدامو وهو يهز فيه عينو وحط يديه على كتفو..
نوح:(بخشونة) شنو قلت ليك أنا ديك لمرة
سؤالو كان تدكير لزكرياء على اخر مرة نبهو وبالعربية تعرابت هددو وعطااه إندار..
زكرياء:(بعدم فهم) مافهمتش
نوح:(يديه كانت تاتزير على كتف زكرياء لي كمش حجبانو وقال بصوت حااد) سخن عليك راسك ومشيتي درتي لي فبااالك يااك (ببرود) وتاأنا دابا غاندير لي فباااالي
ماخلاهش يجاوبو كان جارو من الجاكيط ودخل فيه براس تارعفووو والبلاستيكة طاحت لأرض وداكشي لي فيها تشتت..
نوح:(شادو من دقنو ومزير عليه وبعصبية نطق) قلت ليك مطووفش جهتها ونتاا سخن عليك ك*ك ودرتي لي فبااالك
زكرياء:(نطق بسرعة)كنت باغي غير نطلب السماااحة تيقني اولد لحااج والله ماقصدت شي حاجة..
ضربو كروشي فكرشو تاتزواه وتحدر وهو مكمش حجبانوو... هز ليه راسو من شعرو وشاف فيه وزكرياء كيكحب الدم.. عطاه زوج كروشياات خرين فكرشو بركبتو ودفعو على طوموبيلتو وعوج ليه راسو تاحط ليه حنكو على لكوووفر وبقا بااارك عليه..
نوح:(تحدر جهتو وقال بصوت قااصح)داك ولد لق*بة ديال دمااغك علمو يبقااا يدخل سوووق جوااااه ومايبقااش يدير لحاجة على هواااه (همس كالفحيح)حيت صبري راه عندووو حد لمرة لولة دزتي فوجه واليديك وهاد لمرة غادوز فوجه مرتك ولكن أقسم برب الكعبة ونعرررفك عاودتيهاا ياتاااأخرتك غاااتكون على يدي سمعتي
زكرياء:(بصوت خافت كينين)همممم
زدح ليه راسو مع الكوفر عاد طلقو كيتلوى بالحريق.. وهادي غير رطب معااه وماقصحش النيڤو أما كون قصح معاه راه غايهزووه أوغجوونس... طلع نوح فطوموبيلتو مخليه كيجمع شتات نفسو وكيزير على راسو باش يجمع داك السخرة ويمشي لدار قبل مايرجع ليه ثاني ويندمو على لحليب لي رضعو من مو.. أما نوح فشد طريقو وهو عاقد حجبانوو معصب... كان باغي يدير فيه ماكثر ساعة غير غياخد دنوبو... ولكن أكثر حاجة عصباتو هي رحيل لي خبات عليه شكون قالها ليهاا ومعصب حيت هي وقفات وهضراات معاااه.. عطاتو فرصة فين يهضر معاه وسمعات ليه وهاد الشي خلاه يحس بالغيييرة.. مكيحملش يشوفها كاتهضر مع شي رااجل تايحس برااسو غايرتاااكب شي جررريمة فيه... حاس براسو كيغلي عليهاا وكون مكانش ليل كون مشى عندها ساعة مجاتش وماعليه غير بالصبر تالغدا وديك الساعة يتفاهم معاهاا...
---
جالسة تتفطر غير فبيتها وتلفون فيديها تاتشوف حويجات دراري الصغار فواحد السيت حمقوهاا وأي حاجة شافتها تاتسكرينيها تاتعرف اش عندها باش تاخد لوان لي بغاات.. سالات فطورها وشربات دواها وتكات شوية حيت حاسة جنبها ضارها ليوم وگاعما نعسات مزيان.. بقات تادوز لوقت تاسمعات صوت تانيرت وهي تكمش حجبانها..
تانيرت:(داخلة عندها) فطرتي ابنتي؟
رحيل:ااه فطرت
تانيرت:راجلك راه لتحت باغي يشوفك
رحيل:(بنفور)ااوف قولي ليه ناعسة مافيا لي يشوفو
تانيرت:اش هاد لهضرة تاتقولي تاني ابنتي ؟؟
رحيل:وااااه اماما واش مكتفهموش مباغاش نشوفو
تانيرت:باباك قال ليا اش كاين ومكنتش باغا نهضر حيت عارفاك غاتبردي وغاتنسااي وتفهمي بلي راجلك شاف مصلاحتك وكون ماهو كون باقي لدابا معدبين مع داك إبليييس
رحيل:(بانفعال)راااجلك راجلك وااابزاااف اماما واااش أي حاجة دخلووه فيهاا سيري قولي ليه نااااعسة عيااانة
تانيرت:(كمشات حجبانها) نعلي الشيطان ونزلي ابنتي حشوومة
رحيل:منازلاااش ومباغااااش نشوفووو واعباااااد الله داك السيد مبغيتش نشوفوو ريحتو وصوتو كيخنقووووني كمااارتو مكنبغيش نشوووفهااا
سكتات تانيرت وهي تاتستوعب لهضرة درحيل لي قالت..وبحال لافهمااات تنهدات: نتي نعرفي بينك وبين راجلك
رحيل:(بنفور)مراجليييش
نزلات تانيرت ورحيل ناضت طرقات لباب ورجعات تاتفرج فالتلفون ببرود وعدم اهتمام..
فلتحت نزلات تانيرت وهي حشمااانة معرفااش كيفاش غاتقولها ليه.. لقاتو جالس مع سيدرا مجمع معاهاا وهي معنقااه تادلع عليه وتاتعاود ليه على حماسها لمدرسة حيت تاهي غدا غاتبدا بحال زين العابدين..
تانيرت:احم ولد لحاج رحيل ناعسة تبغي نفيقها؟
سيدرا:(ببرائة) هااء ولكن قبيلة مامي كانت فايقة تانيرت إينو
خرجات تانيرت عينيها فسيدرا لي حطاتها بوجهها ومرگات...تاولات كلها حمراا بحال مطيشة.. هي أصلا مكانتش ناوية تكدب عليه ولكن ماعندها تاشي حل وبنتها قالت مباغاش تشوفو.. عليها كدبات باش ميوقعش مشكيل كبير بناتهوم ساعة مع من هي وسيدرا حاضرة...
تانيرت:(بتلعثم)هه لانعسات اسيدرا دابا حيت لبارح فليل منعساتش مزيان
شاف فيها نوح بهدوء وحرك راسو وناض تيقاد فلاشوميز لي لابس وببرود نطق:ماعليش أنا غانطلع نشوفهاا
تخطى تانيرت لي بلقات دوك لعنين وهي ورحيل فاش تيحصلو كاتبان عليهوم غير من عينيهوم أو وجههوم لي كيرجع حمر.. قلعها نوح وعرفها كدبات ولكن مغايلومهاش حيت عارف الكلام جااي من عند رحيل.. طلع لفوق ونيشان لبيتها ومع حط يديه على لبواني لقاه مسدود.. عض على شفتو بالفقصة ودق لباب ورحيل غير سمعات لحس جمدات وحبسات صوت لتلفون...
نوح:(بصوت هادئ)عارفك منعسااش حلي لباب ندويو
رحيل:(قلبات عينيها ومجاوباتوش)
نوح:(رجع دق لباب) رحييل حلي لباااب
رحيل:(ناضت جهة الباب وربعات يديها وببرود قالت) واش مكتفهمش مباغاش نشوفك ولانهضر معاااك عطيني بالتسااااع
نوح:(حك لحيتو ونطق مغدد)واخا حلي لبااب بعدا باش نتفاهمو
رحيل:(ساطت النفس وقالت بانزعااج) محالاااااهش ومباغاش نتفاااهم
نوح:(قرب جهة الباب كثر ونطق بنبرة تهديد)غاتحليه بالخاطر ولاغانصدق فااارعو عليك
رجعات لبلاصتها ممسوقاش ليه ومادى بيها غير يمشي.. صوتو كيدرونجيها مكتحملش تسمعو وريحتوو خنقاتهاا ومن هنا كاتشم ليها بحال الزفورية حسات بالردة ومشات جهة البالكو حالاه تاتفوه واخا باااقي كاتشم ديك الريحة لي قلبات عليها معدتها.. أما عند نوح راه صبرو تقادى عيى مايدير لخااطر واخا بقا هو بلخااطر وعيى مايعطيها أعدار ولكن عصباتو حيت ممخلياهش تايدوي ويقول لي عندو... يشرح ليها تاهو باش تعرف بلي ماضحكش عليها وماستحمرهاش كيف هي فاهمة بلعكس هوو دار هادشي لمصلاحتها وسكت حيت احتارم الرغبة ديالها وكون مقالهاش ليها زكرياء هو مكانش غايقولها ليهاا حيت باغي لخطوة تجي منها ساعة كلشي وقع بلعكس... مزير على يديه وكيحاول يكالمي راسو ويفكر راسو بلي هي فدار واليديها يعني مايبينش لمشاكيل لي بناتهوم لتاشي واحد ولكن هي راه كاتخرجو على طوعو وهو أونفوا تايتعصب راه مكيبقا عاااقل على تاشي حاااجة...بحال دابا نيت عيى مايهضر معاه بالخاطر ساعة مع من راسها قااصح وتاهو كثر منها.. عوج عنقو وبلاميزيد يخمم رجع زوج خطوات لور وهز رجليه ضارب لباب بگاع جهدو تاتفرع وصدر واحد الصوت قفز رحيل لي كانت تاطل فلبالكووو وخلاها تشد قلبهاا وعينيها خارجين فاش بان ليها داخل مع لباب لي فرعو وهو عاقد حجباانو كيشوف فيها شوفاات قاصحيين... خنزرات فيه تاهي ونطقات بعصبية:واش نتااا مريض؟
عينو عليها وعلى لبيجامة لخفيفة لي لابسة وشعرها لي طالقاااه وكملاتها واقفة فالبالكوو بهاد لمنظر زاد شعلاتو وخلاتو يتعصب.. قرب جهتها وجرها من دراعهاا تاتضربات مع صدرو ونطق بصوت قاااصح:خارجة ليا لبالكوو بهاد لحااالة مخليا الرعوااانين يشبعوو شوفات فيك
رحيل:(كمشات حجبانها وقلبات وجهها بعصبية) مكاااين حد وزايدون ماشغلكش فيااا وطلق من يدي راك ضريتيني ابنااادم
نوح:(هز حاجبو)باقي لدابا صااابر على لساانك لي خصو يتقطع من الجدر وكلامك لي كيف السم وهادي آخر مرة نعاود نشوفك واقفة ليا فالبااالكو بهاد الحالة وطالقة شعرك مخلية لي دااايز يتفرج ويتمنظر لابغيتي نبقاا معاااك مزيااان سمعي لكلامي ارحييل وماتجبديش عيبي..
رحيل:(مدات يديها وحطاتها على صدرو كادفع فيه وخرجات عينيها) شنو بااان ليك تسد علياا فقص وتهنى وزايدون شكوون قال ليك صبببر عطيني تيساااع وسير تهنى ولامااافيك نفس
نوح:(غوت بصوت قاصح تاقفزها)رحييل
رحيل:(دفعاتو تاطلقها وبعدات عليه وهي مخنزرة فيه ومحاملاش تشوف وجهو) بعد مني واااش مكتفهمش عطيني بالتيسااااع مبقيتش حاااملة نشوووف وجهك فرقني عليك اعبااااد الله
نوح:(ماشعر براسو تاكان ضارب داك لكرسي لي جنبو برجليه ونطق بصوت حاد وصارم) صووووتك مايعلااااش عليااا ارحييل وكلاامك بقااي توزنيه ونتي تاتهضري معايا حيت ماشي كل مرة غاندوز ليك هاد لهبااال ديالك
رحيل:(ربعات يديها وساطت النفس) أنا ماشي عبدة عندك بااش نتا تحركني كيف بغيتي ملي قلت مابغيتش نشوفك هي مباغاش نشوووفك فهمهاا
نوح:(قلب وجهو وعض على حنكو من لداخل تيكب فيه داك الأعصاب لي حس بيهوم من كلامها لي تيحرق الأعصاب..شاف فيهاا بنضرة قااصحة وبصوت كالفحيح نطق) اش وقفك مع دااااك لق*اد دزكرياااء
خارجة غزلان من لونفي هي وداد كيتعاودو على لبروف الجديد وداك الشرح لي مشدو منو والو..
وداد:هههه تيشرح لراسو مافهمتش كيفاش غانكملو معاه لعام هههه
غزلان: أودي الصبر وصاف اووف الصهد
وداد:الصباح كاان لجو بااارد تت (جبدات تلفونها) غانصوني لزكرياء نسول فيه لبارح خرج يتسخر فالليل أو وقفو عليه شي شفارة بغاو يگريسيوه
غزلان:(حلات فمهاا بصدمة) وايلي وشنو وقع؟؟
وداد:(بحزن)ضربووه وعضاامو كيضروه ديتو لسبيطار أنا وبابا فالليل وقلت ليه لابقا عاقل عليهوم يديكلاري ساعة ماعقلش مكنتش غانجي حيت طلعات ليه السخانة فالليل مي مبغااش وبزز عليا نجي
غزلان:الله يشافيه
وداد:ندمت حيت قلت ليه يخرج يتسخر كلشي بسبابي
غزلان:ماتقوليش هاكاك واش نتي كنتي عارفة اش غايطرا معاااه حمدلله دازت طريفة وبنادم خصو يرد لبال مرة خرى
وداد:(حطات كتابها فوق الطبيلة وشافت فيها)هانتي غانعيط ليه ونرجع واخا
غزلان:سيري
مشات وداد وغزلان زولات جاكيط لي لابسة وبقات غير بدجين كحل مزير مع تريكو يادوب مغطي ليها قاعها شوية ولقدام قصير...كانت طالقة شعرها ومع صهد جبدات لاستيك وجمعات شعرها شفينجة مخربقة ومشات خدات قهوة ليها وعصير لوداد وجات جلسات بلاصتها تاتقلب فدفتارها وتتراجع.. تاحسات بكرسي لي قدامها تجر وفلول عند بالها وداد رجعات ساعة ضربات فيها ريحة برفان درجال خلاتها تهز راسها بزربة وتشوف فداك الدري لي كيقرا معاهاا فلونفي.. مد يديه ونطق بتبسيمة خفيفة:ماعرفتش واش غاتكون عارفة سميتي حيت لونفي عاامر معااك جاد
غزلان:(شافت فيديه وبخجل مدات تاهي يديها)غزلان
جاد:عارف ههه كنت باغي نطلب منك درس دليوم واش كتبتي فيه شي حاجة حيت ڤغيمو شديت شي حاجة خفيفة وصاف
غزلان:بحالك
مدات ليه كتابها وهو شدو تايقراه وفنفس الوقت هز تلغونو وصور وعاد مد ليها روجيستر فين تايكتب ونطق بهدوء:تقدري تصوري هادشي وتزيدي مع داكشي لي كتبتي
غزلان:(صوراتو وتبسمات ليه)واخا شكرا
فلباب ديال لفاك وقف محمد طه موطور ريان لي خلاه ليه ونزل مبعد ماوصى عليه لعساس لي تم ودخل وعينو تايشوفو أجواء القرايا لي زمان مشافهااش.. مغاينكرش بلي جاه لحنين لدوك ليامات دليسطيا ولعشران لي كان تيلعب معاهوم كورة.. داير يديه فجياب الجاكيط وعينو تيقلبو عليها حيت قالت ليه عندها بوز مع الطنااش تال لوحدة ونص وجا باش يديها تغدى ويرجعها تاني.. يالاه وقف قدام لبوڤيت وجبد تلفونو باش يصوني ليها وهو يهز راسو بالخف وماتجي غير فيها هي لي كانت جالسة مع جاد تايهضرو وهو تيشوف فيها مبتاسم... كمش حجبانو بحال لاكيدقق واش هي نيت ولاغير كاتشابه معاهاا.. وغير تأكد وهو يضربها بواحد تخنزيرة ورجليه تحركو نيشان لعندهاا.. في حيت هي كانت حادرة راسها تاتقرا وتشرح ليه اش فهمات تاحسو بزوج بيهوم بخيال واقف عليهوم وغزلان غير شافت محمد طه وهي تسرط ريقهاا وخصوصا تخنزيرة لي داير عرفااتها اش جاي وراهاا
غزلان:محمد طه وقتاش جيتي
جاد:(تبسم)واش خووك
محمد طه:(بسخرية)راجلها
جاد:(حل عينو بتفاجأ)ااه متشرفين احم نخليكوم دابا شكرا بزاف اغزلان
انساحب جاد لي كان شاب فمقتبل لعمر عندو حقو من زين وطويل وباين فيه كيلعب فالحديد غير من لكتاف لعامرين.. حروفو كحلين بحال عينيه لي كيف الظلام.. زوين ومقبووول وباين فيه نشاايطي...
محمد طه:(ضار شاف فيها وقال بعصبية)واش أنا مسيفطك تقراااي ولامسيفطك تجمعي ليا مع زو*مل
غزلان:(خرجات عينيها وضورات راسها تاتشوف ياكما شي حد تيشوف فيهوم) وااش هبلتي اااش هاد لهضرة تاتقول الدري راه تايقرا معايا وكنا جالسين كانهضرو على لقرايا لاغيير
محمد طه:(تحدر جهتها) مخلياا گاااع لبنات لي تاتقرااي معاهوم وجالسة لياا مع دري
غزلان:(تعصبات وناضت تاتجمع مسائلها)فهمها كيف بغيتي أنا عارفة راسي اش كاندير وزايدون السيد جا هضر معايا محتارم وكون كان باغي حاجة خرى كون گاعما حاشيتها ليه
محمد طه:لاغير عطيه فرصة لاماريبت عليك هاد لفاااك
مجاوباتوش جمعات كلشي ولبسات مونطوها وهزات تاحوايج وداد ومشات سبقاتو وهو موراها معاحبو حال.. لقاتها باقا تاتهضر فتلفون عطاتها مسائلها وقالت ليها راه غاتمشي مغادخلش لحصة لخرى ومشات ومحمد طه ماهضرش مزااال سبقاتو تاخرجات من لفاك أو وقفات مربعة يديها تاجاب لموطور وركب وهي تركب وراه..
محمد طه:(بصوت مرتافع مع سايگ)شدي فياا راه غاطيحي
شدات فيه بصباعها ومجاوباتوش حيت فقصهاا وتاهو سكت وعقلو كيفكرو غير فديكور لي لقاها فيه وشوفات داك خونا ليها لي خلاو عقلو يطير كثر ماهو طاااير... وقف قدام واحد لغيسطو وغزلان غير ساكتة وتاتشوف.. نزل وشد يديها ودخلو لداخل لي كان شوية عامر مع وقيتة دلغدا...شدو بلايصهوم وهي ربعات يديهاا وقلبات وجهها..
محمد طه:اش باغا تاكلي
غزلان:لي كااان
محمد طه:(هز حاجبو)شدي لموني وختاري اش بغيتي
غزلان:(حلاتو وبدات تاتشوف فالأثمنة كانت شوية طالعة هزات عينيها فيه ونطقات) هادشي غالي
محمد طه:ماتهزيش لهم لفلوس خودي لي بغيتي
اختارت شنو بغات وتاهو وتغداو فصمت غير سالاو خلصو وخرجو وشاف فيها:داك نهار قلتي باغا تشري حوايج زيدي نمشيو لمول..
شافت فيه بتفاجأ وتفكرات نهار قالتها لرنيم فاش كانو كيشوفو هي وياها واحد الكساوي.. قالتها بعفوية ومع كان جالس فالصالة شد لهضرة.. مغاتنكرش بلي عجبها لحاال واخا مبيناتش ليه.. شدو طريق لمول وسبقو لمحال دلحوايج وكانت تاتمشي لحوايج لي فيهوم صولد وتختار لبياسات لي عجبوها وتمشي لسياج تجرب ولي عجباتها تعطيها ليه يشدها.. خدات بياسات باش تبدل وزوج بوطات مع الشتاا أواحد الجاكيط سخوونة.. دازو حدا واحد لمحال ديال لحوايج دلداخل وهو يوقف محمد طه وعيط ليها تاجات عندو ونطق وهو كيشير ليها لواحد المانكان دايرين فيها شوميز دونوي فالباج كان كولو خيوط ويالاه فيه واحد زوج تواب مغطيين غير ديك الحلمة دصدر ولمايو.. وماتبقا عبارة عن خيوط لعنكبوت.. شافتو غزلان وهي تخرج عينيها وخصوصا فاش قال:خودي هاداك زوين
غزلان:(بسرعة)مغايجينيش
محمد طه:(سبقها ودخل)اجي نشوفو واش فيه لاطاي ولاسطونداغ
تبعاتو وهي تاتسب فيه من لداخل.. وقف تايسول لبنت على لطاي ومع سطونداغ عطاتها بياسة فميكتها خلصها وخدا ليها واحد بيجامات شورط وميني ڤونطخ على دوقو وهي شوية وتندب فحناكهاا...
محمد طه:بغيتي تاخدي حاجة خرى؟؟
غزلان:لا لا عندي كلشي
محمد طه:(كايدوي عادي مامسوقش)السليبات والسوتيانات عندك اجي نشوفوهوم
سبقها ومشى يعزل ليها على شهوتو ودوقو.. وهي تاتشوف غير فجنابها باغا غير تخرج محاملاش تشري قدامو هادشي فمابالك تلبسو ليه ومع هو كيختار غير لمسخ والخيوط وتاسليبات كيل ليها غير السترينغات وكلشي شبكة...
غير خرجو من تم وهي تنطق بسرعة: عييت نرجعوو لدار
محمد طه:يالااه
نزلو لتحت ومع عندهوم بلاستيكات بزاف مايصلاحش يركبو بزوج فلمطور ومع الشتاا والأرض كاتزلق فضل أنه يشد ليها طاكسي وخلصو وعطاها نص ديال البلاستيكات وركب هو لمطور تابعها بنص الثاني...
----
كان تيشوف فيها بشوفاات مظلمين وحجبانو معقودين وديك النار دلغيرة شعلات تاني وخلات داك شوية دالصبر لي بقا ليه يتبخر.. أما رحيل فكانت تاتشوف فيه بملامح متجهمة وسيفتو محاملاهاااش أما ريحتو حاسة بيها كاتخنقهاا وخاانزة وصوتو مزعج بالنسبة ليهاا.. حطات يديها على كرشها وقالت ببرود:دغيا وصلوهاا ليك
نوح:(لعب بلسانو ففمو ونطق بحدة) سولتك جااوبي ارحييل بلاماتعصبيني
رحيل:(بنرفزة)اييه شفتو وهضرت معاه شنو غادير غاتبقا تغوووت غووت جمونفو فيك ولا واقيلا غاضربني؟؟
شاف فيهاا وهو مستغرب من طريقتها الجديدة لي كاتهضر معاه بيهاا.. لي مامعصبش غير يسمع ديك لافاصون ديالها غايتنرفز لاعساك هو لي أصلا منيرڤي.. حط يديه على السمطة دالسروال وحدر راسو تايحك جبهتو وفنفسو كايستغفر مولاه.. أما رحيل مشاعر النفور والكره لي حاسة بيه جهتو غلبو باغاه غير يضرق زلافتو عليها وتهنى من شوفتو..
نوح:(شاف فيها بصوت قاصح) ملي هضر معاك داك الشماتة لاش ماقلتيهااش لياا وزايدون علاش وقفتي معاااه اش كيجيك باااش تجمعي معااه
رحيل:(ببرود)ماشغلكش فيا ندوي مع من مابغيت أنا ماشي عبدة عندك
ضار على غفلة ضرب لباب دلبالكو بيديه تاتضرب مع الحيط وهي تهزات من بلاصتها وصدرها يطلع وينزل.. أما هو ضار شاف فيها بشوفات كيف لقرطااس وقاال بخشونة وصرامة:لاعرفتك وقفتي مزااال مع شي قوووواد ولادويتي معاه غاتشوفي واحد لوجه عمرك شفتيه ارحييل واياااك تجبدي عيبي حيت مغايعجبكش داكشي لي غاتشوفي وغاتسمعي..
رحيل:(ضحكات بسخرية) شنو فجهدك دير (غوتات) يالاااه وريني ااااش غادير لياا مثلااا (خرجات فيه عينيها ونطقات بصوت مرتفع) مغاتخلعنيش سمعتي لي فجهدك ديروو ولاعرفتي شنووو بااااش نرتاااح وترتاااح طلقني وهنينااا نيت مبقيتش حاااملة نشوووف كمااارتك ونسمع صوتك (غوتات) طلقني وهنينااااا...
كان مزير على يديه وعينو ظلامو وبدا كيتكون فيهوم شعيرات دموية بقوة الأعصاب.. كلامها كان بحال لعافية لي كبيتي على لصانص تاشعلات.. قرب جهتها وشد دقنها وهو مزير عليه بلارحمة ونطق بصوت قااصح: لفراق عليا عمرك تحلمي بيه (كمل بهمس كالفحيح) حيت نقتلك ومانفرقكش ابنت إدريس...
فلتحت كانت تانيرت جالسة وهي متوثرة معرفاش شنو طاري بحكم جالسين فالطبقة لتحتانية ولبيوت راه فطبقة التالتة.. وبلاصوت التلفازة لي مجهداها بلعاني باش سيدرا ماتسمعش لشي صداع.. تحل لباب ديال الزنقة ودخلات غزلان هي ومحمد طه لي جاو محملين بساشيات دلحوايج..
محمد طه:(كمش حجبانو وشاف فسيدرا لي مكسلة فوق السداري) نقصي شوية من التلفازة اسيدرا راه مجهدة
سيدرا:تانيرت إينو هي لي جهداتها
تانيرت:(قربات جهة محمد طه وقالت بهمس) غير خليها بلعاني جهدتها
غزلان:واش رحيل لفوق؟؟
تانيرت:اه ومعاها ولد لحاج
محمد طه:(شاف فغزلان) مبانتش ليك طوموبيلتو براا
غزلان:مارديتش ليها لبااال
سيدرا:(ناضت جهة محمد طه وهي تتعوج فقزيبتها)شنو جبتي لياا؟
محمد طه:ماجبت ليك والو هادشي كولو ديال غزلان
سيدرا:(خنزرات فيه بدوك عينين لبوبشة) مخاصمة معاك حيت ماجبتيش ليا تاحاجة
مشات عند تانيرت وجلسات فحجرها وتخشات فيها مقلقة.. حل محمد طه جاكيط ديالو وجبد من جيبو لدخلاني واحد لبلاستيكة ونطق بهدوء:سيدرا
سيدرا:(خاشية وجهها فصدر تانيرت) مخاصمة معاااك
محمد طه:وشوفي فيا ولانتقلق منك
سيدرا:(شافت فيه بنص عين)
محمد طه:اجي عندي يالاه
ناضت وهي مادة شنافتها ميترو لقدام وعاقدة حجبانها زعمة راه مقلقة.. وقفات قدامو وهي مربعة يديها وقالبة وجهها عليه.. وهو ضحكاتو الغضبة ديالها لحلوة.. جرها من يديها وتحدر باسها فحنكها بالجهد ومد ليها ديك الخنيشة
محمد طه:(جر ليها نيفها)هاكي الفاارة حقك
سيدرا:(دغيا مشات لعضبة وتبسمات) جبتي ليا حلويات
محمد طه:اه ولكن متاكليش داكشي كولو على قبل الحنيشات
سيدرا:(تاتقلب لخنشة) انعطي لمامي تاهي وندوق بّاديدي وتانيرت إينو ورياني ورانو
غزلان:وأنا؟
سيدرا:(بقات تاتحرك ليها حجبانها بمكر طفولي)تت نتي مشيتي مع مودي وشرا ليك باركة عليك
غزلان:واخا عليك الفااارة ههه
سيدرا:(عنقات محمد طه) مودي ماي بلو آيز هناا
محمد طه: مزيان
حبسو كلامهوم فاش سمعو لحس وناض محمد طه وتانيرت خرجو لجهة الدروج وبان ليهوم نوح نازل عاقد حجبانو ومن شوفتو باين فيه كاااعي.. حرك ليوم غير راسو بمعنى الله يعاون وكمل طريقو حيت فهاد اللحظة مباغي يدوي تامع شي حد.. مشى نوح وتانيرت طلعات نيشات لعند بنتهاا وغير وصلات لقاتها جالسة فوق النموسية تاتبكي وتشهق تقولي ميت ليها شي حد..تخلعات عليها وخافت وبقلب ملهوف مشات لعندها بزربة عنقاتها ورحيل توسدات صدرها وعطاتها لبكااا تابغااات تسخف..
تانيرت:(تاتلمس شعرها بحنية)بسم الله عليك ابنتي شششش تهدني لاش لبكااا
رحيل:(بصوت مبحوح بلبكاا نطقات) مباغااش نرجع معااه مباغااااش نمشي معاااه اماما
تانيرت:(شدات فكتافها وقالت بحنية تاتمسح ليها دموعها) مسحي دموعك وخلينا نهضرو بلعقل اماما هاكي (مدات ليها قرعة دلماا كانت عندها فوق الطبلة) شربي لمااا وتهدني
دارت رحيل بهضرتهاا وبدات تاتهدن شوية وتاترجع النفس وتانيرت ناضت تاتجمع ليها شعرها باش تفوه حيت بانت ليها حمااارت دغياا ولعينين تنفخو بلبكاا..
تانيرت:دابا عاودي لياا اش وقع ابنتي؟
رحيل:(شافت فيهاا وقالت ببرود) أنا بغيت نطلق
تانيرت:(حلات عينيها بتفاجأ) الطلاق واش نتي عارفة راسك اش تاتقولي؟؟ اشمن طلاق ابنتي ونتي حاملة واش مافكرتيش فداكشي لي فكرشك اش غايجرى ليه استغفري ابنتي مولااك راه ماشي غير جي وطلق
رحيل:ولادي أنا قادة بيهوم وغانهزهوم بسناني غير هو يبعد مني
تانيرت:واش عارفة اش تتخرجي من فمك ابنتي واااش لي تخاصمات مع راجلها تنوض طلق لواااه اماما نعلي الشيطااان وفكري بعقلك وفكري فولادك حشومة ظلميهوم.. راه الغلط كيوقع ولخصام راه هو لملح ديال الحياة وراجلك راه باغيك وشاريك..
رحيل:(هزات كتافها ونطقات ودموعها كينزلو وتزيرات)وأنا مبغيتوش اماما مابقيتش باغا نرجع معااه اماما وجهو مبقيتش حاملة نشوفوو فيما كيقرب ليا كانحس براسي مخنوقة ريحتوو اماما كاتجيني خااانزة بحال ريحة لقادووش ولازفورية دجااااج أنا مبقيتش مرتاااحة معاااه اماما والله مامرتاحة ومباغااش نمشي معاااه
تانيرت:وهو شنو قال ليك؟؟
رحيل:(عقدات حجبانها وقالت بانفعااال)قال لياا وجدي راسك ليوم فليل غانجي نرجعك لدارك وأنا نموووووت ومانرجعش ليه والله تانقتل راااسي ومانمشيش معاااه اماما...
سكتات رحيل ورجعات تاتبكي وحاسة براسها عيانة وباقا عاقلة على كلامو بالحرف لي قااال ليها والصرامة ديالو وهادشي غير مزاد عصبهاا.. أما تانيرت سكتات وهي كاتشوف غير فبنتها وكيفاش تاتبكي ولكلام لي نطقات بيه وتتحاول تفهم.. بقات معاهاا شوية تانعسات رحيل مبعد ماحسات براسها كيزدح وخلاتها ونزلات لبيتهاا هي وإدريس وجلسات تم لعشية كولها وهي تاتخمم بوحدهااا تاتحل لباب دلبيت ودخل إدريس لي كاان سول عليها لتحت وقالو ليه راه مانزلاتش وماتغداتش تخلع عليها وعند بالو راه مريضة..
إدريس:(قرب جهتها وحط يديه على كتفها)تانيرت إينو مالك واش مريضة؟
تانيرت:(بتفاجأ)هاااء إدريس جيتي (ضارت شافت فالشرجم والظلام لي طاح وقالت بتساؤل) شحال فالساعة؟
إدريس:(كمش حجبانو)مالك اش واقع ليك؟
تانيرت:(تنهدات) جلس اإدريس عندي ليك شي كلام
إدريس:الله يسمعنا كلام لخير
تانيرت:ولد لحاج جا ليوم
إدريس:اييه راه عييط عليا هو لول سولني واش أنا فالدار وملي علمتو راني فالمحال قال ليا راه باغي يشوف رحيل علاش اش كاين؟
تانيرت: ماعرفتش كيفاش نشرح ليك فاش مشيت قلت لرحيل راه باغي يشوفها قالت ليك اسيدي مباغاش تشوفو ولاتهضر معاه وأنا عند بالي راه باقي هازة فخاطرها من جهتو على لبلان ديال داك الحيوااان
إدريس:(قاطعها)اييه ومن بعد
تانيرت:واخليني اإدريس نكمل وااااه المهم طلع السيد عندها وهضرو وفاش نزل من عندها كان باين فيه معصب ومغيير وغير مشى طلعت عندها لقيتها تاتبكي ملي سولتها مالها قالت ليك حگا ماحگا باغا طلق وبلي مبقاتش باغا راجلها وماحاملاش تشوفو وبلي ريحتو كاتجيها بحال ريحة الزفورية وكمارتو محاملاهااش وباغا طلق منو
إدريس:(كمش حجبانو وقال بجدية) طلق گاااع واش هي عارفة اش تتخرج من فمهاا وزيدي دابا هي حاملة وهازة زوج روااح فكرشهاا وزايدون اش دار ليهاا راجلها تاباغا طلق وتخرج على حياتها وزواجها...
هو راه شاف مصلاحتها وكون مكااانش ولد لحاج راجل لي يستاهلها مكنتش غانزوجهاا ليه وأنا عارفها اش دوزات فزواجها لولاني وزايدون ولد لحاج ماالو داير ليها كيف لماا لقليل ولي بغاتها يجيبها ليهاا واش كاين لي يكتب ليك فيرمة ساوية لملايين بسميتك ولايعطيك طوموبيل كادو ولا يشري ليك محال قد لخلى ويعمرو ليك ومن غير هادشي واش كاااين لي يخاطر بحياتو وبعائلتو باش يفكك من واحد بحاال داك لمريض
تانيرت:وراني متافقة معاااك وماشي هنا فين كاين المشكيل
إدريس:(زفر بانزعاج)اوا فين كاين لمشكيل الالة
تانيرت: المشكيل هو رحيل جاها لوحم على ولد لحاج وكرهاتو وهو لي مخليهاا تاتقول هاد لهضرة وتادير هاد التصرفات
إدريس:(بعدم تصديق)لوحم اتانيرت أنا كانعرف لوحم لمرا تاتشهى تاكل شي ماكلة مكيناش مثلا ولاشي ديسير اش تتخربقي تانتي
تانيرت:(هزات حاجبها) واش عند بالك كاين غير هاد لوحم هههه والله تاضحكتيني واخا ماشي وقتهاا راه اإدريس كل مرا أو وحامها كيف تيكون كاينة لي تايجيها فلماكلة كاينة لي تيكون الردان والدوخة وكاينة لي تاتبغي الراجل وتتشهاه وكاينة لي تاتكرهوو ومكتحملش تشوف خليقتو وريحتو تاتخنقها راه عيااالات كرهو رجالاتهوم أو صلو گاع لطلاق ونتا تاتقول ليا كانخربق
إدريس:(هز حجبانو) وايلي واش بصح؟
تانيرت:اييه وكاين ماكثر راه كل حمالة وكيف تاتكون لمرا شوف غير أنا حمالتي برحيل ماشي بحال ريان ماشي بحال بنتي لي ماتت الله يرحمها أنا فلول قلت راه غاتكون هازة فخاطرها من جيهتو على ماطرا ساعة فاش هضرات معايا وقالت باش تتحس فهمت بلي لوحم هو سبابهاا
إدريس:وشنو دابا غاتبقا كارهاه
تانيرت:اوا على حساب فترة لوحم كاين لي تتكره الراجل تاتولد كاينة لي ست شهور لولة (شدات يدو) سمع اإدريس سير هضر مع ولد لحاج وقول ليه اش كاين حيت هو مغايكونش عارف ولكن حنا خصنا نقولوها ليه باش مايهزش فخاطرو من جهتهاا ولاقالت نيت شي كلمة يكون عارف بلي هي تتوحم عليه ماشي مباغاهااش (تنهدات) عرفتي طيحاتهوم حجر فاش قال ليها ليوم نرجع نديك مبغاااتش أنا عارفااه غايتفهم وغايعرف بلي ماشي لخاطرها ونيت الابقات هنا ترتاح ونفسيتها تاهي ترتااح
إدريس:(حرك راسو) أودي أول مرة نعرف لمرا تاتكره راجلها فلوحم
تانيرت:(ضحكات)هههه ماشي غير راجل تقد تكره ختها لوسها أي واحد هههه ونزيد راه لي فكرشها كيطلع فوطوكوبي دهاداك لي كرهتي ههههه يعني رحيل غاتحطهوم بحال باهوم هههه
فلاباخطمون ديال إسلام وأسماء لي كانت يالاه خارجة من دوش ملوية فبينوار بيض على قدها وشعرها ملوياه ففوطة خرى.. وقفات قدام لمرايا لي عندها فالبيت وحيدات الفوطة تاتمسح شعرها وتنشفو تاتحل لباب ودخل إسلام لي جاي بشورط وتيشورت مبين داك لوشاام لي فيديه ولي مكتحملوش أسماء وتايعيفهاا..
أسماء:بقا تلبس شي حاجة لديك اليد
إسلام:(وقف جنبها وتكى على طابل دونوي مربع يديه)شنو مشكيلتك معاهاا؟
أسماء:مجاتش معااك كنتي باغي توشم سمية ديرها بوحدها ماشي دير داك لوساخ كولو
إسلام:(قرصها فحنكها) دخلي سوق راسك اغزااالي
أسماء:بعد يديك ازمر تت اه غدا غادة لدارنا غانبقا معاهوم نهار كامل
إسلام:(حك حاجبو)نسيت نقول ليك غدا غايجي خالي هو ومراتو
أسماء:(حطات لي فيديها وضارت شافت فيه)عاود اش قلتي؟
إسلام:راك سمعتي اأسماء
أسماء:(تعصبات)واش كاتسطى عليااا ابنااادم علاش جااايين وزايدون علاش ساكت تااال دابااا وقايلهااا
إسلام:(بجدية)قالوها ليا ليوم فالصباح ونسيت اأسماء
أسماء:ياااك اوا بقا قابلهوووم وزايدون واش هوماا مراااض جايين عندنا وحنااا باقي عرسااان جداد واش شوية لباااس
إسلام:(ساط بعصبية) ماتعصبينيش المررض عييط ليا وقال ليا راه معروض لعرس بنت خت مراااتو غايديروه فأگادير بعد غدا وغايجيو يباتو عندنا ويمشيو
أسماء:وأناااا ماااالي واش داري زااااوية لي جاااي يديرها طريق ياااك غادين عند خت مراتو اوا هي أقرب ليه
إسلام:الشريفة رااااه مغانسدش الباب على فاميلتي نهااار لول قلتهااا ليك
أسماء:وتاأناا نهار لول قلت ليك مك على راس ولعين ولكن ديك خيطي بيطي ديال تريكتك لاااا ليوم جااا خالك ومرتو غدااا عمك بعدو عمتك وزعمة حنااا يالاه مزوجين شهررر باااقي مادوزنااااه أونصومبل وداااارناا لي دارناااا باقي مجااااوش عندي ومحتارمين وتريكتك لا
إسلام:(هز يدو وبدا كيهلل)وصااااافي ابنااادمة بلاتق*بين وتمرضيني تااااااني غدا غايجيو وغايبااااتو ونتي غاتقومي بواجبك معاهوم وبرب وتصدقي دايرة شي بلان ولانلقاااك لايحة ليهوم شي كلمة تااانقودها معاااك داااك الفشوش لخاااوي ماعنديش معاااه
خرج من لبيت مخليهاا كلها تاتغلي معصبة وباغا طير عليه وتشتف على ريتو بلفقصة لي فقصهااا.. واش من نيتو هوما باقي عرسان وجايين الضياااف ونقولو مثلا جااو علاش مخليها تال دابا عاد عالمهااا وهوما غدا جااايين وماوجدات والو وأول مرة ضروري ماخص تكبر براسها ويعرفوهاا راه بنت الأصل... مشات سورتات لباب دلبيت وشدات تلفونها مدوزة لخط لمنقدة ديالهاا "رحيل" هي لي غاتفكها وتعاونها واخا غير بلهضرة.. دوزات ليها لخط وبعد رنة جوبات رحيل وهي تاتمدغ:همم
أسماء:بصحة اش تتاكلي
رحيل: طبسيل دلفروي طلعاتو ليا غزلان تايشهي
أسماء:كولي نتي لي جات معااك
رحيل:مالك
أسماء:(سرسبات ليها كلشي)فقصني ولد لقاااف
رحيل: أودي الصبر وصااف ماعليك غير دوزيها وديري لي عليك
أسماء:تال نهارها ارحيل كيغاندير ليها
رحيل:هانتي وجدي شلاظة ودوموندي على لبسطيلة دلحوت دابا نسيفط ليك داك لي كانتعاملو معاه وديري عواصر ونوضي نايضة
أسماء:أنا راه بقات فيا الشمتة اصاحبتي مخليني تال دقيقة تسعين وشوفي ليك لبلان وأنا لي كنت عوالة نجي عندكوم
رحيل:ماعليش ماجيتيش غدا بعدو اجي راك غير حداناا دابا نوضي وجدي لي غاتوجدي واش غايجيو لغداء؟؟
أسماء:مانعرف تجيهوم فالرااس نوض نسولو ردي لبال لتلفونك حيت انحتاجك
رحيل:سيري
قطعات معاها ولبسات بيجامة وخرجات لقاتو جالس متفرج بنفخة سولاتو وقتاش غايجيو قال ليها لغداء وزاد تجننات.. دخلات لكوزينة وبدات تاتشوف اش كاين باش تبدا توجد غير لگوتي بعدا... جا عندها وعطاتو يتسخر وشمرات على يديها تاتوجد داكشي لي عارفة وقبل دوموندات زوج بسطيلات دلحوت.. دوزات ليلة غير فالشقا ولعشا جابو إسلام من براا تعشاو وناضت كملات شقاها وهو جا باش يعاونها ساعة محشاتهاش ليه حيت بصح عصبهاا... مشى السيد ينعس ومخليها مفقوصة وغير رحيل لي مونساها بأبيل فيديو وتاتوريها شنو دير بحال لاحاضرة معاهاا.. مانعسات تال زوح دليل ومع السبعة دالصباح فاقت وضرباتها بتسيقة واخا دار نقية.. دازو ساعات وجدات فيهوم شلاظة وخلاتها تبرد وجات لبسطيلة وخلاتها تاهي تاتسخنهاا.. وجدات كلشي ومشات لبيتها لبسات عليها قفطان جوهرة وقادات وجهها ومع خرجات من لبيت سمعات لحس بزاف.. كمشات حجبانها وتمشات جهة الصالة ومع وقفات حدا بابها وهي تهز حاجبها بصدمة فاش بانت ليها الصالة عامرة بالنسا والرجاال..
واقفة قدام باب الصالة تاتشوف فدوك ربعة دالنساا وزوج بنات ولي كانت من بينهوم مرات خالو لي تاتعرفها وهي مضهشرة ولكن دغياا خفات ديك التضهشيرة فااش شافو فيها كاملين.. تبسماات تبسيمة صفرا مغطية بيها دوك الأعصاب لي تاتحس بيهوم فهاد اللحظة.. ودخلات تاتسلم عليهوم وتعطيهوم صوابهوم واخا مكيستاهلوهش.. سلمات على رجال غير بيديهاا وجلسات جنب مرات خال إسلام لي نطقات بضحكة:سمحولينا هجمنا عليك
أسماء:(فنفسها)عارفة راسك بعدا (ضحكات ضحكة صفرا وبصوت عالي) الله ياودي مرحبا
م.خ:ترحب بيك الجنة ابنيتي غير سمحولينا وصاف كنا عوالين نباتو عند ختي ساعة دار عند عامرة بلويساتها وراك عارفة دار لفرح كيف تتكون او وقلت أنا وخوتاتي نجيو ونباتو عندكوم تال غدا ونمشيو
أسماء:اه اوا مافيها بااس الله يكمل عليها بلخير
م.خ:أمين ازين اوا يالاه معانا لعرس تانتي ياك مخداماش
أسماء:(بضحكة صفرا)ههه ماعليش مرة خرى لا باقي مابديتش الخدمة حيت باقي شادة كونجي دلعرس كيف تاتعرفي باقي ماكملناا تازوج سيمانات صحاح مع بعضياتنا وأنا خديت شهر باااش نسافر مع إسلام وندوزو لوقت بوحدنا راك عارفة شهر لول ضروري مايكون بحلاوتو
حشات ليهوم الهضرة غير بلبارد ومع الضحكة الصفرا ومن لداخل راه شوية وتفرگع.. خلاتهوم ومشات تجيب صوابهوم على مايتحط لغداء.. غير دخلات وهي تسيف وبقات تاتخنزر وحطات يديها على نصها تابان ليها إسلام داخل وهي تمشي تسد لباب دالكوزينة وشافت فيه بانفعاال وبصوت منخافض باش مايسمعوهاش:ياك قلتي خااالك ومراتو لي غايجيو وعولت عليهوم تالقيت فرقة دلكورة جاااياا
إسلام:(عض على سنيه) تاأنا هادشي لي قال ليا مافخباري والو بلاماتعصبي علياا
أسماء:لاغانتعصب عليك حيت كلشي بسبابك مي لهضرة ماشي دابااا من بعد (مشات تاتجبد طباسل) سير جيب شي حاجة من لباتيسري تكون مالحة وحلوة نزيدها لهادشي لي جبتي نحطها مع لعصير قبل مانحط لغداء
إسلام:واخا هادشي لي خاص
أسماء:هاد الساعة اه
مشى إسلام هز بزطامو وعيط لكونسيرج لي طلع عندو عطاه لفلوس وسخرو حيت هو مايصلاحش ليه يخرج ويخليهوم.. رجع عندهوم داير صوابو معاهوم وأسماء تاتوجد الصينية دلعواصر لي دارت ومن زهرها دارت الغداء بالزايد ودوموندات زوج بسطيلات وشلاظة واخا صاوبات طبسيل إلا أنها خلات داكشي ممصاوبش فبواطات تاتزيد طبسيل تاني...وهادشي كولو كان نصيحة رحيل لي قالت ليها اللهم توفي ويشيط ولاتقللي ويخصك مع هي مولفة العراضات وخصوصا الرياض فكانت عارفة كيف تجيري الأمر..كانت تاتمنى كون كانت معاهاا ولفقصة شداتهاا.. وأي بنت فاش يالاه كاتزوج وتايجيو عندها حباب راجلها فالعراضة لولة كاتستريسا وتايجيها لحنين لعائلتها... حيت دابا تاتولي مسؤولة على دارها بنفسها ماشي بحال قبل تايكونو خوتك معاونينك وماماك تاهي فكيتهز الدرك على لبنت شوية واخا كاينين شي بنات لي مولفين من ديما العرايض مي بحال أسماء لا... وجدات داكشي متول وجاب ليها إسلام من المخبزة المالح ولحلو بالزايد خدات ستفات داكشي لي غاتحط وشي لاخر خلاتو لكاسكروط.. عاونها تاحطو المواعن ومرات خالها حاضية وتاتشوف وتنقط تقولي جالسة فلجنة.. أما خوتاتها مكاين غير لمقزدرة على ختهاا واخدين راحتهوم تقولي دار باهوم.. جلسو تيشربو لعصير ويهضرو الرجال فجيه والنساا فجيه.. صونى تلفون أسماء وناضت تجاوب رحيل مخلية النساا تايوشوشو بشوية..
خ1:(قربات جهة ختها وقالت بصوت خافت)كتبان حادگة ماشي بحال كيف قلتي لينا
م.خ:(تاتميق)اشمن حاداگة واش لي صوبات كاس دلعصير تتسمى حادگة تانتي
خ.2: شوفي غير دار متولة هي تعطيك لخببار
م.خ:اوا بالسيف راه السيدة بوحدها فدار مكاين لادراري لابجاغل لي يرونو (تقدات فجلستها)شفتي مرتو لولة دارها كانت حسن من هادي وعرفتي على فراااش فيها يحمقك نهار مشينا عندها راه ماسخيتش نخرج من دار وعلى لبس كاتلبس مرتو لولة عاامزيناتو كانت بحال شي باربي
خ.3:(عوجات فمها)باربي اتي سكتي واش هاديك يقولو عليها باربي رااها إبليس فصفة بنادم لي قاااتلة بنتهاا واش بنادمة هاديك
م.خ:ياختي أنا باقي ممتيقااش واش ديرهاا واخا طلقها ودخلها لحبببس حيت السيدة تتبان فيها بلي درويشة واخا مبعككة وشفتي فاش تزوج بيها يالاه مشينا لدارها شي زوح دلمرات مكانش عندها مع لبشااار بزااف والعائلة مكتعرضش عليهاا ودوك زوح مرات غير بالصدفة لمرة لولة مور ماتزوجو بخمس شهور والمرة التانية فاش ولدات لبنت الله يرحمهاا..
خ.2:اوا هي كانت عايشة فالجنة وزغبها راسهاا هاهي فلتات راجل غامزيناااتو شفتي فااش طلقها وقلتيها لي كنت باغياه لبنتي جميلة ساااعة تاديك الزغبية عكسية متتسمعش لكلام نهار قلت ليها سيري عند مو ودخليها باش تيق فيك وتبغيك وتزوجك ولدها حيحات علياا وفلخر هاهي تزوجات بولد عمها لمزلووط معيشها فلكرااا (تنهدات وحطات يد فوق لخرى)ايييه كون تزوجاتو كون هاد الدار هي مولاتهاا وكون عاشت فهاد لخييير (هزات راسها فاش شافت أسماء داخلة ونطقات تاتبرگم)اييه الفول كايتعطى غير لي ماعندووو ضرااس...
كاين واحد النوع ديال بنادم خاااايب كيعطيك الضحكة فلوجه ومور ضهرك تايسممك بلكلام وينافقك.. هاد لكلام لي قالو بيناتهوم راه مايقدروش يقولوه فوجهها وغير جلسات وتبسمو وقلبو لهضرة وهي عاطياهوم مكبرة بيهوم واخا معصبة على لبلان لي دار إسلام ولي دارو هوما نيت ولكن جاوها ضيااف ومن عائلتو وكون جاوها فياماتهاا كون سمعاتهوم المنقي خياارو ومغاتسوقش حيت عندها نيشان..
وجدات الطبلة دلفداء تاتشهي وشلاظة تفننات فيها ومبقاتش گااع ضربو كلشي وتبعوها لبسطيلة تاهي والديسير وغير سالاو ناضت تاتجمع ومعاونها إسلام وتقول واش ناضت شي وحدة فيهوم تعاون وتابنات خال إسلام لي جاو تاهوما غير كلاو شدو تلفون وتامهوم مقدات غير تقول ليهوم يديرو الصواب..
كانت أسماء تاتستف لمواعن فلمشين ديالهوم وخلاتها تاتخدمهاا ونقات لحالة باش ماتخليش عليها الدرك وعقلها من دابا تيفكر فالعشا اش غاطيب ليهوم وتباركالله تياكلو داكشي لي حطات مشاط منو تابزقة...
إسلام:اش غاديري لعشاا
أسماء:(خنزرات فيه)دااار ليك وليهوم فرقني عليك اإسلام حيت انصدق مقوداهااا معاك قدام تريكتك
إسلام:بديتي عاااود
أسماء:مساليتش أصلا باااش نبدا
حرك راسو وخلاها تكالمى وعارفها فاش تتشعل كيف تتكون.. خرج عندهوم وهي سدات لباب وجلسات فالكرسي هازة تلفونهاا تاتشكي على رحيل..
أسماء:(تادوي بشوية فالأوديو ) أويلي اصاحبتي ماقدو تايعاونوني تقولي خدامة عندهوم ودوك زوج طحبااات جالسين محنين وضفاار ملصقين ورموووش تاهوما غير يرمشو زوج رمشات يطيرووو
رحيل:(جاوباتها فالبلاصة كاضحك)هههه موجدين لعرس اصاحبتي
أسماء:ابغيت ليهوم لهرس نشاعلاه والله تاباقي الشمتة مبغاتش تمشي ودابا كنفكر شنو ندير لعشااا لدوك الجنون أما تاضياف مايستاهلوهااااش
رحيل:شوفي خودي دجااج شرمليه ودخليه لفران مع لخضرة وشلاظة دمطيشة وهني راااسك
أسماء:كون جات عليا ندير لباباهوم لحسوة وينووضوو يتقودووو تفف (شافت فالساعة) مبقا والو لكاسكروط انحط داكشي لي جاااب مع دوك لكيكات باركة
رحيل:صافي اش اتحطي مزاال ونتي يالاه جامعة مواعن دلغدااا
أسماء:سيري نمشي نخرج عندهوم شوية راك عارفة لي كاين
رحيل:سيري ازين تال من بعد
ناضت خارجة من لكوزينة غادة لبيتها لي طرقاتها على قبل الغاشي ومشات بدلات دداك لقفطان دجوهارة بواحد اخر توبو باارد وخفيف ديال الدار وجمعات شعرهاا وعاودات تريحات وضارت بلحالة وخرجات عندهوم وغير دخلات وبداو يطلعو وينزلو فيهاا وهي تهمس فنفسها:لعمى...
----
نزلات رحيل لصالة لابسة كسيوة ديال دار مقزبة ومبينة سيقااان معرين والشعر طالقاااه تايضرب فضهر مبوكلي.. دخلات لطبقة لوسطانية وغير وصلات لكوزينة وهي تسد نيفها من ريحة الطياب لي عيفاتهاا..
رحيل:(شافت فتانيرت)ماما
تانيرت:ابنتي ياك مامشهية شي حاجة؟
رحيل:تت واش ساليتو لكاسكروط اجي بعدا وقتاااش قالو غايجيو؟؟
تانيرت:مور لعصر ويجيو غير نزلي لتحت راه وجدت لكاسكروط ومحمد طه مشى يجيب شي حاجة نزيدوها مع لي موجدين
رحيل:اممم صافي أنا لتحت
نزلات لطبقة لتحتانية فين غايستقبلو رحمة وسناء وزاينة وطامو لي جاايين يباركو ليها لحمالة حيت ساقو لخبااار ونيت يطلو عليها كيف بقاات..
تكات فوق السداري وعينيها كيتسدو فيها النعااس واخا راه نعسات مور مافطرات ولكن باقي مشبعااش النعااس.. سمعات لحس وحلات عينيها ولقات ريان هو لي راجع من لخدمة بكري داخل والسيد ضارب واحد لاشوميز مع جيلي جاتو نااضية.. قرب جهتهاا وتحدر باااسها فحنكها:لفنووون
رحيل:(سادة نيفها)اووووف ريحتك مجهدة يييع
دارت يديها على فمها وناضت غادة لحمام ترد وهي حاسة بكرشها مرونة عليهاا.. روايح متتستحملهومش وهي براسها ريحتها مكتحملهااش تتعيفهااا...ردات گاع لي فمعدتهاا وخرجات صفرة وهي تاتنهج ومشات تكات بلاصتها ونطقات بتعب:حراام عليك اريااان اش بغيتي عندي
ريان:(ضحك) مانتريحوووش حناا نخنازو باااش نتي الالة تكوني على خاااطرك
رحيل:كاينة واحد لحاجة سميتها تدوااااش
ريان:واخا ندوش خص لبرفاان راه نتي لي فيك لفشوش
خنزرات فيه رحيل ولاحت عليه لمخدة وهو تايضحك عليهااا...
ريان: قالو ليا كاتوحمي على راجلك هههه مسكين ولد لحاج
رحيل:(بعصبية)مرااااجليش اعباااد الله واش باغيني نغووووت ونتعصب
ريان:شووو تكالمااي ونتي شتك شعلتي
دخلات تانيرت وهي مبدلة عليها حوايجها ببيجامة دار عادية طويلة.. بانت ليها رحيل عاقدة حجبانها ومعصبة وهي تنطق بتساؤل:مالكي ارحيل؟
ريان:(شاد فرحيل) قال ليك الالة ولد لحاج ماراجلهاااش
رحيل:(غوتاااات بانفعااال)ريااااااان
تانيرت:(خنزرات فيه)هنينااا اويلي واش نسيتي اش قلت ليك لبااارح؟؟
ريان:والله تاغير ضااحك
تانيرت:ماضحكش (غمزاتو) سير تبدل حوايجك هنينا
خرجات من الصالة وريان ناض تيضحك ويغمز فرحيل تيفقصها زعمة وهي عاقدة حجبانها فيه...
ريان:اصاااافي طلقي الضحكة مجاتش معاك تغوبيشة
رحيل:فرقني عليك وسير عند حبيبة لقلب بارك ليهاا راه ليوم عيد ميلادهاا...
دغيا جمع الضحكة فاااش تفكر بيسان والمشكيل لي بناتهوم وبلامايجاوبها طلع لشومبر ديالو وهو كيفكر فيها.. اخر مرة شافها هو نهار جات عندو وعطاها تختار ومن تما ماهضرش معاها وماصوناش عليها خلاه تفكر بعقلهاا باش ملي يسول وتجاوب يعرف هو اش غايدير... حيد الجاكيط وجلس كيتنهد وبلامايشعر دخل لتلفون ولواتساب بالضبط لقاها لايحة سطوري فيه تصويرة مكتوبة بلونجلي " It's My Birthday" بقا ساكت تايشوف فيهاا وبهدوء خرج بلامايسيفط مساج ولايعايدهاا.. بدل حوايحو وجا يرش ريحة وهو يتفكر رحيل ودار بناقص وخرج من لبيت غادي ياكل ليه شي حاجة..
وصلات رحمة هي وسناء وزاينة وطامو وجايين محملين بساشيات مكتوبة عليهوم أسماء لمارك والحلاويات وكيف ديما استقبلاتهوم تانيرت هي وغزلان أما رحيل كانت جالسة فالصالة مافيها لي ينووض دغيا حسات براسها عيااات.. بزز باش وقفات تاتسلم عليهوم وروايح خنقوهاا تاسدات نيفها وتاهوما تفهمو لي كاااين... جلسات فالسداري بعيدة عليهوم وباين فيها الراحة واخا شوية دلعيا مي حسن من لبارح..
سناء:مبروك عليك مجابتهاش لوقت نبارك ليك
رحيل:الله يبارك فيك شكراا
زاينة:(بالسوسية)أفْلاّم إسرخو ربي ايلي "الله يفك وحايلك على خير ابنتي"
رحيل:آمين اجدة
رحمة:كيف بقيتي دابا شوية مع لوحم؟؟
رحيل:شوية وصاف روايح مكنحملش نشمهوم تايروعوني وحتى ريحة الماكلة ياربي تسمح لياا تاتقلب معدتي
رحمة:ضروري منهاا الوحم راه صعيب
طامو:(حاطة يديها لمزررين بالدهب على كرشها وقالت) اييه ومالكي ابنيتي جالسة فداركوم ومخليا راجلك وحدو
رحيل:(هزات حجبانها) جالسة فدارر بّا اخالتي
رحمة:(شافت فطامو) شنو فيها لاجلسات فدار واليديهااا ياك راجلها باغي اوا صافي اطامو
طامو:ياختي غير سولتها شفتك شوية وتاكليني (ميقات)
رحمة:(تبسمات ببرود) نتي عارف ولدي مكيبغيش بحال هاد لهضرة توصلو هادشي علاااش
كانت رحيل ساكتة وقارنة حجبانهاا وتاتشوف فطامو وتخنزر... عصباتها فاش جبدات ليها سيررتو وهي مباغاش تسمع تاسميتو عساك تمشي عندو.. أما رحمة سدات لموضوع بكلامها حيت عارفة طامو عزيز عليها تنبش عليها جبدات ليها ولد لحاج باش تجمع راسها وتسكت..
سناء:(ضحكات)ههه قولي ليا ارحيل تاتشهااي شي ماكلة؟؟
رحيل:صراحة كل مرة وشنو بعد لمرات نتشهى بعض لمرات تاتروعني لماكلة
رحمة:(شافت فسناء)لحمالة ديالها فكراتني فراسي فاش كنت حاملة بنوح ههههه مكنتش تانحمل خالتي زاينة حيت جاني لوحم عليها تخيلي فلول فاش يالاه حملت بيه وجات عندي جريت عليهاا ولمرحووم مكانش عارف وتعصب علياا وتغاوتناا أو وغضبت ليه هههه وخالتي مسكينة عرفات بلي وحامي عليها وگالتها ليه وعاد تفش الله يرحمو
زاينة:(تبسمات بهدوء) اتيرحم ربي إيكاتن أوريسن مايلان حكودان "الله يرحمو مكانش عارف ديك الساعة"
رحمة:واييه الله يسمحليا منك اخالتي خرجتها منهاا تسع شهور كلها فيما نشوفها نتعصب وندابز ونغوت هههه وفلخر خرج ولد لحاج كيشبه ليهاا ههه لهضرة كانت عليه ورحيل بلاماتشعر ناضت من بلاصتها وخلاتهوم تايشوفو فبعضياتهوم وعاد عاقت رحمة بلي جبداتو فلهضرة وتفهماتهغ حيت نوح قال ليهاا شنو كاين بحكم تاتسول عليها وقتاش اترجع...
---
تاتشوف سميتو لي طلعات ليها مع ديك الطاشمة لي شافو الستاتو وتاتنهد من لقلب.. شافها وعرفها عندها عيد ميلاد ومعيدهااش.. جاتها الفقصة وبقا فيها الحاال واخا عارفة علاش هو ماهضرهاش ولكن قالت على الأقل عيد ميلادي يدير الصوااب معاياا... بقات ساهية تاتحل لباب ودخلات جيهان لي كانت صاحبتهاا نيت وطبيبة خدامة معاها..
جيهان:بيسو فين ساهية
بيسان:اووف والو
جيهان:صراحة بقيتي فيا عيد ميلادك وجايا تخدمي ههه ولمشكيل عندك لگارد دليل
بيسان:ماتزيدينيش تانتي ازمرة أصلا شداني الفقصة
جيهان:مالكي واش ريان السبب؟؟
بيسان:(كانت ديجا معاودة ليها)شاف سطوري لي دايرة ومعايدنيش
جيهان:اوا من حقو واش السيد عاطيك مهلة باش تفكري ونتي باقا لدابا مامقرراش
بيسان:(ناضت من بلاصتها وقالت بجدية) ماعرفت كيفااش غانشرح ليك ولكن حاسة براسي مخربقة بزااف شي حاجة فلداخل ديالي كاتمنعني وفنفس الوقت باغاه
جيهان:واش حيت صغير عليك ؟
بيسان: أپار صغير عليا أنا ماعرفتش كانشوف راسي ممناسباش معاه وفنفس الوقت خايفة نضيعو من يدي
جيهان:اشدي جيهة واش عاجبك اه لا باغاه اه لا السيد جاني مافيه تاشي عييب جاك نيشان واخا داكشي لي عاوتي عليه
بيسان: عينو زايغة بزااف وكان مع واحد خيتي ماعرفتش واش باقيين ولا لا (تنهدات) هو باغي نعطيو لعلاقتنا سمية وأنا باغا نزيد نطول ونعرفو كثر قبل مانزعم عليه وندم خايفة نتغر ونلقاه باقي صغير فعقلو واخاا فاش دويت معاه كيبان واعي ولكن خايفة مشكيل لاج يدير لينا عائق فعلاقتناا...
واقف قدام لباب لي كان مردود وگاع لكلام لي داز بناتهوم سمعو بالحرف..ملامح وجهو كانو باردين نزل عينو لديك الساشية لي هاز وبكل برود حطها جنب لباب وتحرك من تما بكل هدوء وبرود غريبين...
كانت جيهان واقفة تاتسمع هضرتها وتاتحللها فدماغهاا.. لاحظات ترددها فاتخاد لقرار ولاحظات كيفاش هي براسها معرفاش اش بغات.. تنهدات بهدوء وقربات جهتها حاطة يديها على كتفهاا..
جيهان:(بجدية)نتي ابيسان براسك معرفاش اش باغا كلامك كولو متناقض وهادشي كامل لي قلت ماعندو معنى راه لابقيتي تاتفكري بهاد الطريقة عمرك اتلقاااي حل لرااسك وعمرك غاتقدري تفكي مشاكيلك حيت كترددي.. أنا مكنعرفوش لهاد الشخص ولكن داكشي لي قلتي عليه خلاني نستنتج أن السيد معقول وهادي أهم حاجة حنا البنات كانقلبو عليها فالراجل.. وماخصكش تفكري فلاج ديالو وتخليه يكون عائق ليك بلعكس راه لاج غير رقم وصاف كاين لي كبير وعقلو خاوي وكاين لعكس.. وحاجة خرى داكشي لي كان مولفو شحال هادي راه داااز وأي راجل تتلقايه مدوز فياماتو راه مايمكنش تلقاي رااااجل متصاحبش ومانعسش مع شي وحدة وهادي عااادي لي معاديش هو يبقا شاد فداكشي ديال شحال هادي لدابا ويكون معاك ويلعب ورى ضهرك (تبسمات ليها) عارفة بلي هادي أول مرة تعطي فرصة لراسك ودخلي فعلاقة مع شي واحد عليها مترددة وخايفة ونصيحة مني ليك خودي لي يبغيك ماشي لي كاتبغي
بيسان:(تنهدات بهدوء)شكرا ليك بزاااف هضرتك تاتريحني
جيهان:(ضحكات)هههه اوا ماتفرطيش فيا هههه بصح ابيسان خصك تجلسي مع راااسك وتشوفي نتي اش باغااا حيت لابقيتي هاكا غاتوحلي حددي واختاري وأهم حاجة اختيارك ماخصش تندمي عليه
بيسان:واخا غناخد بنصيحتك
جيهان:نخليك نمشي بحالي راه تبعاني خدمة تال لبوز دلعشا ونتشاوفو
بيسان:داكوع باااي
رجعات بيسان لبيروها وجيهان حلات لباب لي كان مردود ومع جات تمشي انتبهات لديك الساشية لي كانت محطوطة حدا لباب وتحدرات هزاتها ورجعات عند بيسان لي كانت ساهية تاتفكر فالكلام لي ضار بينها وبين جيهان..
جيهان:لقيت هادي حدا لباب؟؟
مدات ليها الساشية وبيسان حلاتهاا ولقات فيها بواطة مغلفة بپاپي كادو وباكية ديال فريرو روشي مضورة بواحد الخيط فالذهبي..
بيسان:(باستغراب)ديالمن هادشي؟
جيهان:راه باين ديالمن أكيد ليك شي حد جاب ليك كادو
بيسان:ولكن شكوون غايجيبو ويحطو فلباب
بدات تاتحل داك الپاپي كادو تازولاتو ولقاتها بواطة كحلة.. حلاتها ولقات فيها واحد لخلخال ديال الدهب فيه حجيرات فالزرق بحال لون عينيهاا..أو وريقة صغيرة ديال لكارت ڤيسيت مكتوب عليها joyeux" anniversaire Mon docteur" بيسان غير قراتها ويالخصوص ديك الكلمة لخرى ديال مون دكتوغ عرفات شكون مول لكادو.. وأصلا شكون من غيرو لي كيقول ليها مون دكتوغ..
جيهان:شفتك سهيتي وااش عرفتي شكوون جاب ليك لكادو؟؟
بيسان:هدا رياان
جيهان:بصح ولكن علاش حط الساشية برا ومدخلهااش ليك
بيسان:(حلات عينيها ونطقات بخوف) زعمة يكوون سمعنا ملي كنا تانهضرو عليه؟؟
جيهان:لباب كان مردود مكنظش يقدر يكون سيفط ليك هادشي مع شي واحد مثلا؟؟
بيسان:لا لا أنا عارفة ريان مغايسيفطش شي حاجة مع شي واحد
خرجات بيسان بزربة غادة تسول فلغسيبسيون باش تأكد من شكوكها.. هي عارفة لكادو من ريان وعارفااه مغايسيفطوش مع شي حد غايجي بنفسو يعطيه ليهاا حيت عارفاه كيف داير وهاد الشوية لي عشراتو عرفاتو حنين واخا تسيفتو خايبة... وصلات لعند لبنت لي فلغسيبسيون ونطقات بزربة:نورة واش سول عليا شي واحد ليوم؟؟
نورة:اه ادكتوغ سول عليك واحد السيد شوية سميمر وطويل وشعرو كحل (نسات راسها)زوين تيحمق
بيسان:(خنزرات فيها)نورررة واش كان هاز شي حاجة فيديه
نورة:اييه اييه هاز واحد الساشية فالكحل (بفضول)علاش ادكتوغ واش كاين شي مشكيل
الشك تحول ليقين وبيسان عرفات بلي لي هو جا وجاب ليها كادو وبيما أنه مادخلش وخلاه فلباب فأكيد غايكون سمع لهضرة لي قاالت هي وجيهاان.. قلبها تزير عليهاا وحسات بالخنقة وبزربة رجعات لبيروها باش تعيط ليه..
جالس فوق لموطور والريح كيدي ويجيب فشعرو الكحل لي كان كيف الظلام... كان تيبان عليه مكالمي وساكت وعينو ساهين قدامو وطاس دلقهوة بين يديه.. هضرتها باقا لدابا كاتعاود بين ودنيه بالحرف.. الهضرة لي خلاتو يحس بواحد خيبة أمل من جهتها.. الهضرة لي كانت بالنسبة ليه بحال السم على قلبو.. واخا كان مقلق منها وهاز فخاطرو من جهتها فاش عرف عيد ميلادها ليوم قرر يعايدها وكان داير بلان ساعة تمشي الرياح بما لا تشتهي السفن... ولهضرة لي سمع بودنيه منها هرساتو وصعيب عليه ينساها.. كان كيتمنى أنها تصارحو وتقول اش فقلبها ديك لهضرة تقولها ليه نيشان كان يتقبلها عااادي بلعكس غايزيد يشرح ليها ويفهمها ولكن هي عواض ماتصارحو قالتها لصاحبتهاا.. ضحك بسخرية وهز داك لگوبلي دلقهوة لاحو مبعد ماخوااه وحس بتلفونو كيصوني ولكن ماجبدوش باش يجاوب حيت كان متأكد بلي هي لي غاتصوني عليه.. حدر راسو وتفكر كلامها " وأنا باغا نزيد نطول ونعرفو كثر قبل مانزعم عليه وندم خايفة نتغر ونلقاه باقي صغير فعقلو واخاا فاش دويت معاه كيبان واعي ولكن خايفة مشكيل لاج يدير لينا عائق فعلاقتناا" حس بلمرار فحلقو وبصوت ساخر نطق: صدق زهري كفس من زهرك امحمد طه هه...
كانت غاتحماااق وباغا غير تهضر معاه وتشرح ليه ساعة مكيجاوبش گااااع.. مشات جيهان لخدمتها وهي بقات جالسة فالبيرو تاتشوف فكادوه والبكية شداتهاا.. حاسة براسها تالفة ومعرفاش شنو باغاا.. صونى تلفونها وبزربة هزاتو على أساس هو ساعة كان "نوح" جوباتو بصوت حاولات ماأمكن يكوون عاادي باش مايعيقش بيهاا حيت عرفااه مكيفلت والو..
بيسان:ألو حبيبي لباس
نوح: حمدالله خرجي عندي لبراا
بيسان:هااء ياك لباس اخوياا
نوح:(بهدوء)لباس غير خرجي وجيبي مسائلك معااك ماتعطليش
قطع فوجهها مخليهاا كاتشوف بتساؤل معرفاش اش كاين..نفدات هضرتو وهزات تالكادو لي جاب ليها ريان وعلمات نورة بلي راه غاتمشي حيت عيانة وأصلا مكانتش خدمة دابا ولاكاينة شي حاجة أوغجون يعيطو ليها.. خرجات لبرا وبانت ليها الجيپ دخوها واقفة بعيد شوية.. تبسمات ليه فاش شافتو شير ليها ومشات بزربة قاطعة الشانطي تاوصلات عندو وركبات حداه.. مدات حنكها سلمات عليه بلابيز ونطقات بتبسيمة: درتي فيا خييير مكان أصلا فيا لي يخدم
نوح:(جرها من قرفادتها) وليتي معگازة ادكتووغ السليماني
بيسان:(حطات راسها على كتفو) عييت وأصلا ليوم عيد ميلادي
نوح:(تبسم ليها بلخف)شرفتي هه
بيسان:(ضحكات وتخشات فيه) هه حشومة عليك
نوح:(درعها بيدو وباسها فراسها) واخا تكبري غاتبقااي لبرهوشة ديالي غير تهنااي
هبطات ليها دمعة بلاماتحس من كلامو وتخشات فيه.. ساگ بيها وهي عقلها ساهي وتاتفكر فگاع هادشي لي طاري معاهاا من نهار دخل ريان لحياتها وكيفااش بغاها لحلال وهي قصحات راسها وقالت باغا تعرف عليه.. بحال الا يالاه بدات تاتفكر بمنطق ومع كلام جيهان زادت حسات بتأنيب الضمير من جهة ريان لي جرحاتو بهضرتها لي قالت وتصرفاتها معاه ومن جهة خوها لي عاطيها تقة وهي خانتهااا.. وقف نوح قدام واحد ليموبل وسكت طوموبيل وشاف فيها هي لي كاتشوف فيه باستغراب
نوح:(بهدوء)نزلي
بيسان:فين جاايين ؟
نوح:(بالسوسية)تگوت گيم لجميعت "كترات فيك لهضرة"
بيسان:(ضحكات)ههه ياك واخا عقل ماستنيت "واخا عليك عقل على كلامك"
نزلو ودرعها ودخلو ليموبل لي كانت جايا فبلاصة زوينة فالشارع.. طلعو فلسونسور لي كان كولو مرايات وباين وكبير تاوصلو لطاج التالت وخرجو وبيسان كاضور عينيها.. ليموبل زوينة وكتبااان نقية وباين شكون ساكن فيها.. معرفاتش فين جايين وعندمن.. بقات غير تابعااه تالقاتو وقف قدام واحد لباب فالكحل وجبد الساروت وحل داك لباب وشاف فيها:دخلي
دخلات وعينيها تايشوفو فلاباخطمون لي كانت خاوية ومع لباب كتبان واحد الصالة كبيرة ومهوية بالشراجم.. ضارت لعندو وشافت فيه وباقي وجهها عليه علامات الاستفهاام
نوح:دخلي وشوفيها لاش كاتشوفي فيا أناا
كملات خطاويها وصوت طالونها كيتسمع على ديك الأرضية ديال الرخام.. كاين واحد لكولوار فيه بيت كبيرة تاهي مهوية وجنبها بيت أخرى وحمام نقي وفيه لمرايات والكوزينة تاهي كبيرة وفيها لبلاكارات وبلاصة الثلاجة والفران ديال الضو وفيها بالكو كيطل على واحد الجردة زوينة.. تسارات لباخطمون كلها تاسالات على خاطرها وقربات جهة نوح لي كان واقف تيطل من الشرجم وكيكمي..
بيسان:(كمشات حجبانها) مامولفاكش تاتكمي بزاف
نوح:(طفى داك لگارو وضار شاف فيها بهدوء) كيف جاتك لاباخطمون؟
بيسان:(بتبسيمة)زوينة بزااف عجباتني كبيرة ومتيسعة والأهم مهوية ولكن ماعرفتش علاش جبتيني ليهاا واش ناوي تشريها ولاتكريهاا؟؟
نوح:(جرها لجهة ديك الصالة فلوسط أو وقف وراها ونطق بصوت خشن حنين) هناا غانديرو صااال دأطونط حيت مجاتش كابيني ديال دكتوغ ماتكونش فيها لصال دأطونط؟؟
بيسان:(ضارت جهتو ونطقات وهي تاترمش عويناتها) مافهمتش؟
نوح:(جرها من نيفها وتبسم)هاد لاباخطمون هي فين غاديري لاكابيني دياالك ادكتوغ بيسان السليماني..
مكانتش متوقعة نهائيا هاد الكادو والمفاجأة لي كانت أحسن مفاجأة بالنسبة ليهاا... لطالما كان حلمها يكون عندها كابيني خاصة بيهاا وهالحلم تحقق بفضل خوهاا لي عمرو تخلى عليها وكان واقف معاهاا من لبدية.. مساندهاا ومشجعهاا تاقرات شنو بغات وتخرجات وخدمات وهاهو باقي لدابا معاونها ومحقق ليها لحلم.. دموعها نزلو وماقدراتش تصبر عنقاتو وهي تاتشهق وتبكي بحال بنت صغيرة وهو عنقهاا تايطبطب عليها... ماهضرش حيت عارفهاا حساسة واخا كلشي الاأن هاد لبنت هشيشة بحااال البيكسوي دغيا كاتهرس.. من نهار مات باه وهو كيعتابرها بنتو قبل ماتكون ختو.. حاول ماأمكن يعوضها على بلاصة بااه واخا عارف بلي عمر بلاصة الاب ماكتعوض ولكن حاول يدير مافجهدو حيت هي كانت متعلقة بيه بزاف بحكم هي لبنت لوحيدة لحاج إسماعيل... دار لي عليه فهاد السنين كلهاا وباقي لدابا كيدير سوى ليها سوى لخوه رؤوف لي واخا مكيبينش ليه ولكن راه راد ليه لبااال ومخليه يتحك مع الزمان بااش يعرف بقيمة الحاجة.. فلول كان لاقي معاه صعوبة ولكن من ديك المحنة لي طاح فيها السيد تغير وفهم كلام خوه وستوعبو واخا الحال مشى ولكن رجع قاد أمور وبدل شحال من حاجة فيه وأولهوم دار عقلو وخدم وهاهو دابا شاد لمحال الجديد ومخليه يتكلف بيه واخا تاهو راه بعض لمرات تايحضر ويشوف ولكن الدرك خلاه لرؤوف باااش يعرف بحق لفلوس لي تيخسر ملين جايين.. كاين ناس لي تايخدمو ويعرقو عليهوم ويشدو لقليل وحامدين الله وهو باغيه يحس بهاد النعمة واخا راه عندهوم الخير فاايض ولكن مباغيش داك لفشوش يخرج عليه ويخسروو.. ونفس الشي غادي بيه مع زين العابدين لي من صغرو ونفسو حارة بحالو ومكيعولش على غيرو هو لي تيقضي أمورو لراسو..
نوح:(بعدها عليه ونطق بحنية)بلاش من لبكاا ابنتي
بيسان:(صوتها كيتقطع) أنا فرحاانة الله يخليك لياا
نوح:(طبطب عليها)شش واجي نشوفو شنو خااص يتزاد هناا ولمطرياال لي غايجيك من برا قريب يوصل (تبسم ليها) مابقا والو وتحلي لكابيني ديالي ودوزي لينا فابور هه
بيسان:(عنقاتو)الله ينجيك احبيبي ويطول فعمرك ويخليك تااج فوق راسنا (بصوت خافت)حنا بلابيك مكنسواو والو..
---
كانت حاسة بلعيااا وبدا يطلع ليها كلشي فالراااس.. هوما جالسين مجمعين وصوت لهضرة ديالهوم واصلة لعندهاا وتاحد فيهوم ماقد ينوض يسولها واش باغا لعوين عارفين ياكلو وصااف.. حطات لعشا فلفران ونقات الكوزينة ومشات لبيتها دخلات وسدات عليها لباب ومشات تكات ضهرها شوية وعقلها تيخمم فهاد البلان لي دار ليها إسلام ولي ماحملاتوش وماعجبهاش لحال.. حسات بيه ماعاطيها تااعتباار وهادشي نرفزهاا.. هادي غير فبداية زواجهوم وطرا هاكا لاعساك من هنا لقدام وهي طبعا مغاتخليش لحبل مرخووف ولي جااا يعشش عندهاا.. ليوم دوزاتو ليه حيت مباغاش تجبد لعيب مي أكيد مغاتسكتش ليه.. ارتاحت ليها شوية وبدلات تاني حوايجها على قبل ريحة لماكلة وخرجات تشوف لعشا باش يتعشاو وينعسو حيت غايفيقو مع لفجر يشدو الطريق لأكادير..
غير لقاتو واجد وهي تبدا توجد باش تحط لعشا... عاونها إسلام حطو لعشاا وتجمعو تاني تياكلو وهي خدات غير زوح دغمات ورجعات لور شبعانة أصلا..
م.خ:ماكليتيش ابنتي
أسماء:مكانكترش فلعشاا
مافيها مايهضر وتاتحس براسها لادوات غاتقول شي حاجة ماهياش اللهم تسكت.. تعشاو وجمعات الروينة دلمواعن.. ناضو الرجال لصالة التانية ينعسو وجابو ليهوم لفراش ونفس الشي لعيالات..
خدات ليها دوووش كمدات فيه عضامهاا ولبسات بيجامة دافية ومشات لبيتها لقات إسلام جالس كيتسنى فيها..رشات ريحتهاا ودارت چلوس لشفايفهاا باش يبقاو رطبين وكريم ليديها ومشات لبلاصتها جرات لغطاا ونعسات عاطياه بالضهر.. طفى الضو وتحدر جهتها معنقها من لور ونطق بصوت هامس:غزالي
أسماء:(ببرود)عيانة وبااغا نعس
بعدات عليه وسدات عينيها مخلياه كيشوف فيها وهو مكمش حجبانو وماعجبوش لحال على طريقتها فلهضرة تقاد فبلاصتو ونعس تاهو..
صونات لغڤي لإسلام مع لوقيتة لي غايفيقو وحل عينو لقى أسماء مكيناش جنبو..ناض من بلاصتو ومشى لحمام غسل وجهو وسنانو ولاح عليه قبية وخرج لقاها فالكوزينة وجدات لفطور وهي مكينااش.. سمع لحس فالصالة دلعيالات عرفها تما كتفيقهوم وتاهو دار نفس الشي ومشى فيق الرجاال..
وأخيرا مشاو وتهنات منهوم وغير سد إسلام لباب وهي تفركع عليه السيدة بحاال شي بوطة
أسماء:(بانفعال)هادي هي زوج دالنفوس جااية قشلة دلبشاار
إسلام:(مكمش حجبانو)أنا براسي عند بالي زوج دالناس تالقيت داك لعدد قدام لباب
أسماء:بالسيف غاتلقااه حيت نتا عاطيهوم الحق شفتي الضسارة فين تتوصل جاية هي وتريكتها وقالت ليك حگا ماحگا دار ختي عامرة ومباغاش نتقل عليها وحنا هانياا زعمة..
إسلام:(مسح وجهو بيديه وقال بهدوء) السيد عيط ليا مجاتش نقول ليه لا
أسماء:تعلم تقول لا اسيدي من هنا لقدام حيت عائلتك وسمحلياا على هاد لكلام ممصوابااش شفتي بعينيك نهار كولو وأنا واقفة على رجلي جات عندي شي وحدة تعاوني ودوك جغلات جالسين محنين أه ضيافك على راس ولعين ولكن مايضسروش ولي باغي يجي يعلم بشحال هادي وممنوع يجيب شي حد وهو معالمناش ونتا حط حدود بناتهوم اسي (بسخرية) كيف كنتي دااااير قبل وأكيد فهمتي اش قصدت..
لاحت هضرتها وخلاتو واقف فبلاصتو وهو معصب ومكمش حجبانو فاش فهم هي اش قصدات.. هنا بالضبط صعر عليها وماحملش تجبد ليه حاجة هو مباغيهاش تدكر فحياتو.. تبعها وحل لباب عليها بالجهد وعينو تايشوفو فيها بواحد الغضب..
إسلام:(شدها من يديها وجرها جهتو)اش قصدتي بكلامك لخرااااني
أسماء:كلامي واضح غير لامبغيتيش تفهموو
إسلام:(غوت بعصبية)أسماااء أقسم برب الكعبة وتزيدي شي كلمة على هاد لبلان غانصدق غالط فيك
أسماء:علاااش غانسكت هه (شافت فيه بجدية) أنا خصني نسكت ومانجبدش شي كلام لي يعصبك ياااك وضيااافك هانيا ياكلو فوجهك ويهضروو فقلب دارك ياااااك (نثرات يديها) أناا لي خصني نتعصب وأنا كانسمعهوووم بودني تيقارنو بيني وبين كلبة موووسخة دلخلى حليت ليهوم دااااري وعطيتهوم الاحترااام وكبرت بيهوم وفلخر هاباااش جزاوني مسمعيني كلاااام كيف السم وغير بصدفة سمعتو وربي بغااااني نعرف كل واحد وشنو فنيتووو ونتااا بقا حال فمك وقوول عائلتي (تفرگعات عليه وتعصبات من شنو سمعات) عائلتك لي نهار جات معاك تخطبوني بداو يقارنو بيني وبينها ومع دلك ماقلت ليك واااالو وبقيت ساااكتة حيت عارفة المشكيل ديالك ومتفهماااه ولكن باااش نعاود نسكت مرة خرى هنا وحبس أنا راه ماشي شاااايطة وحمدلله بكرااامتي وحسن من ديك الكلبة المووووسخة لي يجيو يقارنوني بيهااا ولكن أناا لي مانسواش حيت كاان علياا نسمعهوم خل ودنيهوووم وداك الصوااب الخاااوي نجيدو باباه... كان علياا نعطيهوم علياش كيقلبو بااش لي فكر يحل فمو يعرف راسو اش غايخرج منووو ولكن مادرتهااش باش مانتسمااش أنا لي خايبة وحيت مباغاااش لي يدوي فعائلتي وعليك نتاا باش مايهضرووش فيك بلخاايب...
سكتات وهي كاتنهج وكلها حمرة ومعصبة.. فاش فاقت وجدات لفطور ومشات تنوضهوم بالصدفة سمعاتهوم كيهضرو عليهاا وجابدين ميس فالهضرة ويقارنو بناتهوم وهي غير سمعات ديك لهضرة راه بحال لاشعلتيهاا وكانت غادخل تقربلها عليهوم خصوصا فاش سمعات مرات خالو قالت: وراه ميس كان داير ليها كي لماا لقليل والسيدة عندها خدامة مكدخلش لكوزينة كلشي كان موفرو ليهاا وكيحمااق عليهاا..
كانت كلها تترعد وتتغزل من لداخل تعصبااات من لهضرة لي سمعات ولي خلاتهاا تحقد عليهوم وعلى إسلام تاهو.. أخيب حاجة هي تسمعيهوم تيعاودو على علاقة راجلك بطليقتوو وكيفااش كان تيعاملها.. الغيرة شعلات فيها وخلاتهاا تبغي دخل وتعرعر عليهوم ولكن تكالمات وقالت ماعليش صبرتي مابقا قد مافات ويمشيو وديك الساعة كلام آخر...
أما إسلام فكان تيسمع ليها وهو معصب تاهو وممتيقش اش قالت.. حط راسو بلاصتها ومغاينكرش بلي حس بداكشي لي حساات وزيد مغاينكرش كيفاش كبرات بضيافو واخا معصبة إلا أنها ماخلات ليهوم فين يهضرو وكأول عراضة راه تباركالله عليهاا.. قرب جهتها وحط يديه على كتفها وهي دفعو وضارت شافت فيه ونطقات بصوت هادئ:كيفما أنا مكبرة بيك كبر بياا راه مواخدنيش خدامة ليك ولالعائلتك باش يحلو فامهوم..أنا راه ملي حليت عيني فدار بّا وأنا عايشة بخير ومهنية راسي ولي بغيت راه تاتحضر لياا عمر بّا ماخلاني مخصوصة من لحاجة وبقا هازني ليومنا هادا ونهار جيت عندك وتزوجت بيك حيت عارفاااك غاتوفر ليا وغاتعيشني كيف كنت عايشة فدار بّا الاكان عندك شي مشكيل وكنتي مدوز شي تجربة خايبة فحياتك فخصك تعرف بلي مغانهزش دنوبها اإسلام
ختمات هضرتها وخرجات من لبيت ديالهوم غادية لبيت الضياف والدمعة لي كانت حابسة نزلات على حنكها مسرسبة...
أما إسلام فكاان واقف بلاصتو وحاس براسو مغير وبقات فيه أسماء وهضرتها خلاتو يعرف راسو غلط فحقها فاش تصرف بديك الطريقة.. فزواجو لول عمر شي حد من عائلتو مشا عندو بلعكس كان ساد داك لمجاال عليه حيت عارف عائلتو كيف دايرة.. دار غلط فحق أسماء ومعتارف بيه بينو وبين نفسو.. مبقاش جاه النعااس وحس براسو مخنوق.. هز سوارتو وتلفونو وخرج من لاباخطمون.. كان الحال باقي مضلم وحس بنادم مكيضور تم.. نزل لباب ليموبل والبرد كان محرك.. ماعرفش فين غايمشي مي حاس براسو باغي غير يشم شي هواا ونيت يفكر ويقاد أمورو.. توجه لطوموبيلتو ومع غايحل لباب سمع شي حد عيط ليه بسميتو وداك الصوت ماغريبش عليه ولانقولو صوت عاارفو مزيااان ديالمن وشكون مولاتو...
يتبع...
التعليقات
لا توجد تعليقات بعد، كن أول من يعلق.