محتوى القصة
لموت البطيء هادا هو أقرب عنوان لحالة رحيل فهاد اللحظة... صوتها لي نطقات بيه داك السؤال ماتسمعش ليه نهائيا وباقي مانتابهش ليها حيت كان حادر راسو.. أما هي المنظر لي كانت تتشوف قدام عينيها خلى قلبها يتزير عليها والضبابة تبان ليها وعقلها تاني راه كيفصل ويخيط فشي حوايج لي هي مباغاش تفكر فيهوم.. كانت حاسة بالضيااع وبين عينيها غير هو داخل هاز لڤاليز وهاديك لي وراه داخلة بهدوء وأوطوماتيكمو غايمشي تفكيرها لموضوع الضرة لي كانت ديجاا نساتو من اخر هضرة هضرو بزوج... يديها تترعد وبزز باش شادة روحها باش ماتنهارش واخا راه جزء منها فالداخل انهار بحال شي زلزال فاش كيضرب شي دار وكاتبدا تريب هاكاك كانت هي فهاد الوقت...هز نوح عينو وغير شافها تتشوف فيه بدوك لعيون المتسائلة ولحايرة وهو يحط لڤاليز وقرب منهاا تاشد فيهاا وهي عينيها على هاديك وبصوت كيرجف قدرات تخرج دوك الكلمات لي خدات وقت باش تشكلهوم فجملة:شكون هادي انوح؟
جواب سؤالها سمعاتو من عند رحمة لي كانت نازلة ولي نطقات بنبرة ممتيقاش:نور الهدى
قربات جهتها رحمة وعنقاتها بالجهد ورحيل ديك السمية ماغريباش عليها...سبق ودنيها سمعوها فشي بلاصة ولكن فديك الساعة راه بصح حسات براسها مبلوكية... شحوب وجهها مخفاش على نوح لي شاد فيها ولي مراقب تفاصيل وجهها لي باين فيهوم الحيرة..قاس حنكهاا بضهر يدو ونطق بخشونة:رحييل كاضرك شي حاجة؟
شافت فيه وحركات راسها بلا ورجعات شافت فنور الهدى لي كانت تاتعنق فيها رحمة وتبوس وعاد انتبهاات لرؤوف لي كان تاهو واقف جنب الباب... بقوة أن داك المنظر لولاني صدمها ماقدراتش تنتابه ليه...
رحمة:(شدات فيها وقالت باشتياق)غبرتي ابنتي شحال وأنا نعيط ليك وتانلقى تلفونك طافي
نور الهدى:(بصوت أنثوي مبحوح وحنين نطقات) الهاتف ديالي خسر وضاعو ليا جميع الأرقام لي كانو عندي
صوتها كان نفسو الصوت لي سمعات رحيل من ديك لابيل لي عيطات لنوح داك لمرة...حيت صوتها فيه بحة حنينية مخفاتش عليها مجرد ماهضرات...
رحمة:ويلي استغفرت الله العطيم جالسة نسول فيك حدا لباب زيدي زيدي ندخلو السعدية السعدية (جات السعدية تاتمسح يديها فالفواطة) هزي لڤاليز وطلعيها لفوق بيت الضياف وجيبي معاك الضيافة بينما وجد لغدا (شدات فنور الهدى ونطقات بتبسيمة) زيدي ابنتي مرحبا بيك نورتي الريااض
نور الهدى(بخجل) الله يكبر بيك اخالتي
دخلو لصالة ورحيل شادة كرشها ونوح مدرعها...جلسو كاملين فالصالة ورحيل جات مقابلة مع هدى لي يالاه سمحات لعينيها يسقيو تفاصيل نور الهدى لي كانت من الشوفة كاتبان كادخل لخاطر... حريفاتها كحلين وغامقين وعينيها بحال الظلام... اللباس الشرعي زادها جمال وحشمة ولي لاحظاتو رحيل أنها عمرها هزات عينيها فنوح ولارؤوف تاتهضر وتشوف غير فرحمة... وماشي غير هادشي لي لاحظات إنما تاهضرتها كانت أغلبيتها تادوي باللغة العربية...
رحمة:اوا عاودي ليا ابنتي مال تلفونك
نور الهدى: كيف قلت ليك لهاتف ديالي خسر ومشاو الأرقام لي كانو عندي وماعرفتش كيف نتواصل معاكوم ومأخرا لقيت واحد لورقة كنت كاتبة فيها رقم الأخ نوح وعيط ليه ولكن مجاوبني حد الخط تفتح وموراه تقطع وأنا ظننت أنه غيّر رقمو عليها مابقيت تواصلت معاه..
تفكرات رحيل داك النهار لي عيطات وقطعات عليها وزيد انتابهات لديك الأخ نوح لي خلاها تفهم بلي داكشي لي كايضور فعقلها مكاينش..
رحمة: ولدي عمرو بدل رقمو بحكم لخدمة واش ماانتابهتيش انوح
نوح:(بهدوء ماهزش عينو جهتهوم)يمكن اتكوني غلطتي
نور الهدى:(شافت فرحيل وتبسمات ليها تبانو غمزاتها بزوج) احتمااال ملي ماعرفتش نتواصل مع شي حد فيكوم قررت نجي حيت عارفة غانلقاكوم هنا..
رؤوف:(مربع يديه) كنا جايين أنا ونوح نتغداو تابانت لينا هابطة من الطاكسي لي حطها فلحومة
رحمة:(شدات فيها وتبسمات) صراحة درتي خير كبير ملي جيتي نسيت ماسولتكش ماماك كيف بقات؟
نور الهدى:(نزلات عينيها لحجرها وبصوت خافت نطقات) الله يرحمها
رحمة:(تصدمات ونطقات بزعل) البراكة فراسك ابنتي مكنتش عارفة هي كيفاش ماتت؟؟
نور الهدى:(بصوت حزين نطقات وتبسيمة خفيفة على شفتها تتعكس بيها حزنها) فالآونة الأخيرة هي مرضات وشدات لفراش فالاول ظنيت بلي هادا مرض عادي مسألة أيام وتنوض وبالفعل ناضت ورجعات بخير ولله الحمد ولكن قدر الله وماشاء فعل وتوفات هادي ستة شهور
نوح:البراكة فراسك
رحيل:الله يرحمها
نور الهدى:آمين
جابت السعدية الضيافة ونوح ناض هو ورؤوف خرجو من الصالة وبقات معاها غير رحمة ورحيل لي اغلب الوقت ساكتة فقط كاتلاحظ ولكلام لي تايتقال تاتلقطو... وعاد دابا تفكراتها بلي هي مرات لمرحوم ناصر... عينيها كانو لاإراديا كيمشيو ليها وبلاماتشعر حاسة بالغيرة من جهتها... معرفاش علاش ولكن غارت منها بزاف يمكن حيت الطريقة باش تاتهضر معاها رحمة وكيفاش عملاتها وكبرات بيها ودابا نيت شادة معاها لهضرة وتقول واش حشاتها ليهاا واخا غير تگول ليهاا شكون هي بعدا
نور الهدى:(شافت فيها وتبسمات ليها)ماشاء الله نتي مرات الأخ نوح ياك؟
كانت رحيل ساهية تاصدماتها فاش ضارت جهتها وسولاتها داك السؤال لي خلاها تبسم ليها وتحرك راسهاا باه وبهدوء نطقات:اه رحيل
نور الهدى:تشرفت فمعرفتك أختي رحيل الله يفك وحايلك على خير والله يرزقك الذرية الصالحة
رحيل:آمين مرحبا بيك معانا
ناضت رحيل مبسمة ليها وهي حاسة براسها كيضرها وبزاف دالأسئلة فبالها بغات جوابهوم... طلعات نيشان لفوق تتقلب على نوح وسمعات صوت لحمام عرفاتو كيدوش... بقات جالسة فوق النموسية تتسنى فيه وتحرك فرجليها بتوتر تاجاها الفرج ملي تحل لباب وبان ليها خارج تيمسح بلفوطة شعرو..كان لابس غير شورط دخل لدريسينغ ولاح عليه فوقية بيضاا كاتشعل وجديدة ورش ريحة لي مخلطة بلعود وخرج وهو تيمسح بيديه لحيتو.. قرب جهتها تاجلس جنبها ومد يدو تايفك ليها الشال تاحيدو وهو يسمع صوتها لي نطقات بهدوء:فين شفتيها؟
نوح:(يديه تتفك خصلات شعرها لي كينسابو على ضهرها بأريحية وبخشونة قال) سمعتي رؤوف اش گال السيدة جات فطاكسي وتلاقيناها بزوج فلحومة
رحيل:(نطقات بغيرة وبدون شعور) وعلاش ماقلتيهاش لياا
نوح:(تيمسح ليها داك لمعة دلچلوس لي فشفايفها بإبهامو وقال مكمش حجبانو) فين تلفونك؟
رحيل:(حركات راسها ونطقات)خليتو غير هنا فاش مشيت ندوش؟
نوح:(بنبرة هادئة ولكن آمرة)سيري جيبيه
ناضت بلاعگز تاتقلب عليه تالقاتو وجابتو ومع جلسات شعلاتو وهي طلع ليهاا زوج مكالمات من راحة روحها ❤️...
نوح:(خدا التلفون من يديها ونطق بهدوء) صونيت باش نعلمك وديري حسابك ولكن مجاوبتيش شكون لغالط؟
رحيل:(حكات جبهتها وقالت بصدق) فاش شفتك داخل معاهاا قلت
نوح:(قاطعها بسخرية لاذعة)جاايب الضرة؟؟
رحيل:نوح
نوح:(شاف فيهاا بجدية وهو عاقد حجبانو وقال بصوت حرش مبحوح) لاكنت ارحييل غاندير الضرة فمغانخبيهااش باش تكون فبالك غانجي قدامك ونگول ليك افلانة أنا راه غانتزووج على سنة الله ورسوله ماشي نخبيهاا وندير فعايل دقلالين الأصل وزايدون أنا علاش فنظارك غانتزوج مرة تانية وااش مسالي مخي نجيب لراسي صداع ومشاكيل ونتي لي مدخلة لهااد لعقل الضرة عطيني سبب واحد يخليني نجيب عليك لمرا التانية؟
رحيل:(تنهدات وقالت بهدوء) حس بيا انوح ماشي لخاطري هادشي لي كانحس بيه.. أنا براسي محملاش عقلي لي كيخوني فتفكير وكيبقا يوسوس ليا بداك لموضوع
نوح:(قاس حنكهاا ونطق بهدوء) سمعي ارحييل وهاد لموضوع راه مغانعاودش ندوي فيه بلخاطر مرة خرا حيت لاتجبد غاتشوفي جيست خايب مني...أنا ماشي من نوع لي غايعدد يعني بلعربية تاعرابت مرا وحدة كافياااني ومعمرة لياا عيني وهي نتي وقعو مشاكيل بناتناا وتفرقنا ديك لمدة هادشي مغاديش يخليني نمشي نجيب مرا خراا ونتزوج بيها ونتي كاااينة؟؟ ولامثلا فيما نتخاصمو ولانتناقشو نوض أنا نتزوج تاني مسااالي مخي الفتنة؟؟ دوك الناس لي وصلو ليك بلي شافوني مع مرا خرا راه باغيين غير يديرو لمشاكيل بناتنا ويلوحو ديك السوسة لي مرة مرة تزنزن ليك فالراس وتخليك تشكي فشي حوايج مامنهوم تاساس...
رحيل:أنا مشاكااش فيك انوح بلعكس عاطيااك تقة كبيرة وعرفااك عمرك اتخونهاا
نوح:(قرصها فحنكها ونطق بهدوء ومع صوتو مبحوح تايخليك تبغي غير تسمعي ليه) نقصي شوية من التفكير لي غايخليك تهلكي راسك لاكنتي باغا تسولي على شي حاجة جي عندي وأنا غانطمن قلبك أما لهضرة ديال بنادم مانبغيكش دخليها لرااسك حيت غير غاتمرضي وتهلكي
رحيل:(تنهدات)عندي بزاف ديال لكلام بغيت نقولو ليك وبغيت نعرف شحال من حاجة
نوح:(تنهد)دابا تعرفي كلشي (هز حاجبو ودغيا تسيف ونطق بصرامة) اجي بعدا شنو بلانك نتي ؟
رحيل:(بخوف)مالي؟؟
نوح:(باقي حاجبو مهزوز لسماا وقال بجدية) علاش خبيتي عليا بلي يمّا جرات عليك من الريااض
رحيل:(تصدمات وبدات تاضور عينيها وقالت بصوت متوثر) أنا (تتحك يديها) هي مجراتش عليا غير تعصبات وصاف
مكانتش باغا تجبد مشكيل لرحمة وفضلات أنها تكدب عليه حيت عارفة بلي غاينوض الصداع وهي ماشي من شيامها دير تخلق مشكيل بين راجلها ومو واخا صدمها كيفاش عرف وعقلها فكرها فبيسان لي كانت حاضرة وقالت مع راسها غاتكون هي لي قالتها ليه أما نوح كان عارف مغاتگولهااش ولى حافضهاا لدرجة كبيرة..
نوح:(تنهد وشد يديها وقال بهدوء ممزوح بجدية) بصح مكنتش معاكوم ولكن هادشي مكيعنيش راه بحال هاد الأمور غايخفاو علياا ارحييل عارف بلي مباغاش تبقاي هناا ومن حقك أصلا قريب نمشيو لدارنا الجديدة كانتسنى غير فراش زين وسيدرا يوصلو باش نتهناو ولكن خصك تعرفي بلي ضروري لمجية لهنا تكون (باس باطن يديها) صبري معايا وكوني نتي مولات لعقل
رحيل:(ضارت جهتو ونطقات بخفوت وهي حاطة جبهتها على جبهتو) فيما كنتي نتا أنا غانكون انوح غير ارتاح من جهتي أنا مامقلقااش من خالتي على شنو طرا حيت عرفاها ماشي لخاطرها وزايدون هادي داري بحال لخرا وأكيد غانبقاو نجيو ليها وأنا عارفة بلي لمة دلحباب والعائلة مكاتباع مكاتشراا ومغانحرمهاش ليك بسباب مشكيل بسيط (تبسم ليها على هضرتهاا وهي كملات بتساؤل)احم نوح نور الهدى فين كانت هاد لمدة كلها؟؟
فلتحت كان لحديث باقي مطول بين رحمة ونور الهدى لي كان الهدوء والتبات هو عنوانهاا...جات بيسان لي تاهي مجرد مشافتها وهي تبسم من لقلب ومشات تعنق فيهاا... طلعات السعدية فديك الاثناء تعيط لنوح ورحيل ينزلو يتعشاو...دق باب الجناح شي لي خلى نوح ينوض يشوف شكون حل لباب ولقاها واقفة تاتشوف فيه تبسمات ليه وقالت:ولد لحاج لغدا واجد
نوح:درتو زوج مجامع؟
السعدية:(تبسمات ليه)اييه درناه كون هاني وراه طيبنا ليك لفوار حيت درنا اللحم بلبرقوق ولبرقوق فيه السكار وعرفاك مغاتاكلوش
نوح:(مسح ليها على راسها ونطق بحنية) ديك لفاك اش درتي فيها؟
السعدية:واحنا مسلكين إن شاء الله يجيب ربي فيها خير
نوح:(بجدية)كيفما زيرتي فلباك ليبغ تانجحتي فيه غاتزيري فلفاك لابغيتي تخدمي عندي فلميزون دڤواتيغ
السعدية:واخاا كون هاني غانمشي نعيط لزين العابدين تاهو من صباح وهو مخشي فبيتو
نوح:سيري
رجع لداخل ولقى رحيل نايضة تتلبس فولارها مع سمعاتو...
رحيل:غاتمشي تڤاليدي سوميستر كامل باش تنجح
نوح:ضروري من زياار لامكانش هاكا مكانت غادير والو ولكن بطبيعة لحاال لانجحاات راه ضامن ليها بوسطهاا تم خصها غير تزير راسها
رحيل: تستاهل ديك لبنت حلوة وقلبها كبير
نوح:(تحدر شقمها من شفايفها ونطق ملدد) مغاتكونش فحلاوتك الفتنة
رحيل:مجاوبتينيش انوح ؟
درعها وتمو خارجين وفنفس الوقت جاوبها بهدوء: ملي مات لمرحوم هي خوات مراكش مع فاميلتهاا ومشاو لتطوان تما فين استقروا
رحيل:(بحزن)غاتكون مسكينة تعدبات وصعيب تنساه
نوح:(تنهد وشاف فلخاتم دناصر لي بين صباعو وقال بسهو) تاحد أصلا مانساه
شافت فيه رحيل وفضلات تسكت حيت عارفة لموضوع غايفتح جرحو واخا هي باغا تعرف اش وقع ولكن سكتات ونيت وصلو لصالة تفارق معاها ومشى لصالة لخرا فين غايتغدا هو وخوه وزين ورحيل دخلات عندهوم ولقات بيسان مجمعة معاهوم وهنا زادت تأكدت بلي نور الهدى عندها مكانة زوينة وسطهوم واخا المرحوم مات ومسمحاتش ليها الظروف تجي لهاد الرياض عروستو حيت لقدر كاان قوى منهوم بزوج..
دخلات سيدرا وعينيها السود لمبطنين تايشوفو فاكتشاف فنور الهدى وقربات جهة رحيل همسات ليها فودنيها:مامي شكون هادي؟
رحيل:سيري سلمي على طااطا نور الهدى
قربات سيدرا جهتها وهي تبسمات ليها وباستها فحنكها ونطقات بحنية:شنو سميتك الغزالة؟
سيدرا:سيدرا التجاني ونتي سميتك نور الهدى
نور الهدى:(باستها مرة خرا وحمقاتها) اه سميتي نور الهدى
سيدرا:شكوون نتيا وعلاش جيتي عندنا؟؟
رحيل:سيدرا حشومة؟
نور الهدى:(شافت فرحيل وبطيبة قالت)ماعليش اأختي (رجعات شافت فسيدرا) أنا ضيفة عندكوم
رحمة:ولواه ابنتي نتي راه مراات لغاالي الله يوليه برحمة الله نتي مولات الدار ماشي ضيفة
نور الهدى:(سرطات ريقها وتبسمات تبسيمة حزينة) الله يرحمو
سيدرا:شكون مشى عند الله؟
نور الهدى:(تاتقيس شعرها) واحد الرجل متأكدة كون كان باقي عايش وشافك غادي يحبك بزاف
سيدرا:شنو سميتو؟
نور الهدى:ناصر
نطقات سميتو بخفوت ودموعها ملاو عينيها ونزلو..ضارت تاتمسحهوم ورحمة تاهي نزلات ليها دمعة وقلبوها بكا ورحيل عينيها غير على نور لي رغم أنها مبتاسمة إلا أن ابتسامتها حزينة...تسائلات فبالها واش هي باقي منساتو واش ليومنا هادا باقي مفكراه؟؟
تجمعو على لغدا وغير سالاو جلسو مجمعين على صينية ديال أتاي ودوازو... جا لرحمة اتصال وناضت تجاوب وخلات غير نور الهدى ورحيل أما تابيسان غير تغداو ناضت... الجو كان كالم بناتهوم ونور شادة كاس دأتاي ساهي ورحيل تتشوف فيها ومحسات تانطقات بهدوء: غاتكوني عييتي طلعي ارتاحي
نور الهدى:(تبسمات ليها ونطقات بهدوء) أنا بخير الحمدلله اأختي العياء ديال الطريق ماحسيتش بيه
رحيل:گال ليا نوح جيتي من تطوان ؟
نور الهدى:(حركات راسها) اه أنا مستقرة هناك وعندي داار تحفيظ القرآن لأطفال فسن الابنة ديالك
رحيل:(تبسمات باعجاب) ماشاء الله عليها لغتك تتبان فصيحة
نور الهدى:(تبسمات بخجل) نعم معك حق هه ونتي كيف غادة مع الحمالة ماشاء الله كيبان بلي قربتي
رحيل:(حطات يديها على كرشها وتبسمات) دخلت فشهري السابع وعندي توينز
نور الهدى:ماشاء الله الله يحجبك والله يقومك بخير وعلى خير..
سمعات رحيل نوح كيعيط ليها وناضت جهتو لقاتو واقف كيتسناها قربات لعندو وباستو فحنكو:شربتي دواك
نوح:ضروري أنا غانمشي لمحالات هاد لعشية ردي بالك لراسك واخا وداك التلفون ربطيه معاك مانصونيش ونلقااك بعيدة عليه ولاممجاوباش
رحيل:لا لا غير سير تهنى ورد لبال لراسك
باسها فراسها ومشى بديك لفوقية لي جاتو على فصالتو مع صندالة دالجلد وشعرو مرجعو لور مع نضاضر ديال البروطكسيون بقات حاضيااه تاغبر ومع بغات تمشي تفكرات سيدرا لي ماعرفات فين غبرات تاني مشات تاتقلب عليها وهي تلقى رحمة واقفة فلكولوار تاتهضر كانت غاتكمل طريقها تاوقفات خطواتها فاش سمعات هضرتها لي جمداتها بلاصتها..
رحمة:(بحسرة)اه جات تشوفني مسكينة... اييه اييه هاديك هي أمانة الغالي وماكرهتهاش تبقا معانا هنا نشم فيها ريحتو الحبيب ديالي ولكن الله غالب لحل لوحيد لي كان عندنا هو زواجها بنوح ولكن رفضوه بزوج...
كملات رحمة هضرتها ورحيل رجعات بلخف وبلامادير لحس وعقلها كيسترجع كلام رحمة... وفنفس الوقت كاتفكر فهضرتها مع نوح لي كانت بحال الثلج على قلبها وخلاتها تحيد داك الشك لي فبالها ولي كان مرة مرة كينغص عليها راحتها وتفكيرها... ملي تحاورو وجاوبها نيشان وبين ليها رأيو فلموضوع هي خدات فكرة وعرفات أنه لاقال لحاجة راه هي لي كاينة... مباغاش تخلي ولو واحد فلمية دالشك يدخل لعلاقتها معااه...هي مرتاحة وتايقة فيه وعارفااه مغاديش يخون تقتها ويغدرها حيت الغدر مكاينش فقاموسو...بلعكس هو شخص لي بكترة مكيكون صريح معاك بعض المرات تتقولي راه صراحتو قاصحة ولكن هو هاكا داير كيفضل يجيك نيشان واخا غايقصحك ولايبقا يدير تلاوي لخاويين... رجعات لصالة ولقات نور الهدى جالسة بوحدها كيف ليتيمة هازة تلفونها كاتشوف فيه بسهوو وباين بلي ماحساتش بيها رجعات... بقات رحيل تاتشوف فيها وتاتفكر غير لحظات لقليلة لي عرفاتها فيهاا... كاتبان بنت الناس وداخلة سوق راسها ومغاتنكرش رحيل بلي ارتاحت ليهاا...
رحيل:(بهدوء)بلاشك غاتكوني عيتي طلعي لبيت وارتاحي
مانتبهاتش ليها نور الهدى لي كانت باقة شادة تلفونها تاتشوف فيه...رجعات رحيل كررات هضرتها بصوت مرتافع شوية ولكن نفس الشي شي لي خلاهاا تحس بفضول وتقرب جهتها ومع وقفات جنبها عينيها لمحو تصويرة لي كانت تاتشوفها نور الهدى فتلفونهاا... تصويرة ديال نفس الشخص لي شافتو مصور مع نوح "ناصر" غير هنا كان شوية كبير على ديك الصورة لي كانت باينة قديمة... كان مبسم وعينيه على الكاميرا ولابس سورال دجين كحل مع جاكيط نفس اللون... جلسات رحيل بهدوء وعينيها مفارقوش ديك التصويرة... فديك الساعة حسات بلحزن جهة نور الهدى فاش تفكرات قصتهاا... قلبها تزير عليها وغير داك الشوية لي عاود ليها نوح على قصتهوم بزوج وأترات فيها فمابالك لاسمعاتهاا من لساان مولاتهاا...
رحيل:كيبان فرحان فهاد التصويرة؟
نور الهدى:(عاد انتبهات وبصوت خافت نطقات)هو ديما فرحان وعمرك تشوفيه معصب
رحيل:(تبسمات)كيشبه لنوح واخا لون لعينين مختالف
نور الهدى:(شافت فيها بعيون لامعة وتبسيمة حزينة على شفايفها) كان ديما تيگولها لون عيوني مختالف على أخوتي ولكن أنا فرحان حيت كنشبه لأمي
رحيل:الله يرحموا
نور الهدى:(تنهدات بقلب حزين)آمين فراقو عمرو كان على بالي ولكن الحمدلله على كل حال ماجتمعناش فالدنيا ولكن غانجتامعو فالجنة إن شاء الله
رحيل:(مدات يديها وشدات فيها) إن شاء الله هو محظوظ حيت خلى إنسانة بحالك ترحم عليه وباقي لدابا مفكرها وعمرها نساتو..
نور الهدى:(تنهدات) مانقدرش نساه حيت هو كاان أهم شخص فحياتي...إنسان طيب ومأدب والأهم متخلق وعارف بينو وبين لي خالقو... كان مواضب دائما على الصلاة وكان ديما كيوصيني عليها (تبسمات فاش تفكرات بعض دكرياتها معاه ملي كانو تايتعارفو على بعض) كان الهاتف هو الوسيلة لوحيدة لي متاحة لتعارف كنا تانهضرو لساعات وعمرو ماقلل عليا الحيااء وكان دائما فيما يوصل وقت الصلاة يقطع وقبل يوصيني نمشي نصلي...
رحيل:(عجبهاا تسمع الحديث وكانت متشوقة أنها تعرف عليه) كيفاش تعارفتو؟
نور الهدى:الصدفة كانت أحسن من ألف معاد
رحيل:متشوقة نسمع لقصتكوم ولكن غاتكوني عيتي وغايخصك تنوضي ترتاحي
نور الهدى:(تبسمات ليها)أكيد فالفترة دالبقاء ديالي هنا غانكملو حديثنا نخليك دابا
رحيل:أكيد اختي
ناضت نور الهدى ومعاها رحيل لي رفقاتها تال بيت الضياف وخلاتها ترتاح وهي مشات لجناحها...داخلة لبيت الضياف وداك الابتسامة لي كانت راسمة على شفاها تمحات..شحال صعيب فاش كاتكون راسم ضحكة على وجهك مزيفة تاترسمها باش تبين لناس راك بخير ولكن نتا ماشي بخير..ضحكة صفرا تادوز بيها يومك وتتخبي بيها مضارك... شحال من واحد كاتشوفو ضاحك وتتگول هادا سعداتو ماهاز لاهم ولامشاكيل عايش بخير..تتحكم على داكشي لي تاتشوفو ونتا معارفش هو باش تيحس ويقدر يكون عندو مشاكيل ربي لي عالم بيهوم..وملي يجلس معاك ويعاود ليك تبقا شاد على قلبك وتگول ليه سعداتك على الصبر لي صبرتيه... هادشي كينطابق على نور الهدى لي كانت تتبان لناس راه عايشة ونسات ولكن هي راه منساتش..
يمكن سنين دازو على ماجرا معاهاا ولكن باقي ليومنا هادا أثار ديك الليلة محفورين فقلبها وعقلهاا.. كيفاش غاتنسى نهار لي كان أحسن يوم فحياتهاا ولي تحول ليوم مأساوي..ماشي غير جات وخوات مراكش فخطرة ومشات لتطوان..كرهات هنا ولكن بعض لمرات كاضطر تجي لهناا باش تزور قبر العزيز على قلبها...وتزور عائلتو لي رغم مرور السنين إلا أنه باقي علاقتها بيهوم زوينة... تاتسول فيهوم ويسولو فيها وتجي تشوفهوم وتارحمة شحال من مرة زارتها فتطوان ملي كاتمشي لتم..واخا لي كان غايجمعهوم مشى ومبقاش الاأن العلاقة ولله الحمد بقات..ناضت بخطوات تقيلة بدات تتزول فلباسها الشرعي تبقات بأونصومبل لدخلاني وشعرها كان طويل وكحل وقوي...خلاتو على راحتو وتمشات جهة الڤاليز حلاتها وجبدات لالبوم لي فيه تصاور يوم فرحها لي تحول لقرحها..
🔙🔙
غاب وراسو محطوط فوق حجرهاا خلاها طلقهاا بواحد لغوتة صمكااتهوم...واحد لغوتة لي خلات كلشي تالف... رحمة مغيبة فقنت والحاج إسماعيل كولو تينرعد كيتسناو الإسعاف يجي ولبوليس لي تاهوما جااا ودغيا الحومة عمرات كلشي خارج يطل يشوف اش واقع.. هزو ناصر لي كان باقي عايش ولكن فالخطر وناضت نور الهدى تابعاه وهي كاتعتر فجلايلها لي عمرو دم...ركبات معاه وتحركو بيه وموراهوم طوموبيل دالحاج إسماعيل لي ركب معاه رحمة لي مغيبة ولعائلة تابعينهوم غادين تاهوما لسبيطار... فديك الساعة تاحد ماسول فنوح لي غاب على بالهوم...وصلو لسبيطار وخرجوه فوق داك لبياص ونور تابعاه تبكي وتشهق...شادة فيديه وقبل مايدخلوه زيرات عليه بالجهد وعينيها مازولاتهوتش على وجهو وكأنها حاسة بلي هادي اخر مرة غاتشوفو... داوه ومعاه داو قلب نور الهدى وروحهاا..تبعوه رحمة لي داوها باش يحفصوها وبقاو جالسين البقية فوق الكراسى كيتسناو وهي وسطهوم...كانت حاسة بروحها غاتخرج وديك لغصة فحلقها مابغات لاتنزل ولاطلع... تكشيطتها عامرة دم ويديها تاهوما ولي داز من داك لكولوار تيشوف فيها باستغراب... دازت ساعة بالضبط وموراهاا جااهوم أسوء خبر ممكن الإنسان يسمعو...
تكسر المكان بصوت لغووات ولبكاا والروينة ناااضت ولهضرة كانت كتيرة ولكن هي مكانتش كاتسمع هادشي باقي جالسة فبلاصتها بحال لادرتي ليها بوز...بين عينيها صورتو وهو لايح راسو فوق حجرها وغارق فدميااتو... وصوت الطبيب لي علمهوم بموتو كان أبشع صووت تسمعو فحياتها... تصدمات وبانت فعينيها لي حلاهوم على جهدهوم مكاترمش ومكاتحركش بحال الاتاهي روحها غدراتهاا رفقة حبيب قلبها... كان الخبر صادم على لعائلة تاحد ماعرف شنو طرا...كلشي كان جاي فرحاان وناشط حيت غايحضرو لفرح ناصر لي كان لبكر دالحاج إسماعيل أول فرحة ليه هو ورحمة لي فاش سمعات لخبر بحال لاحماااقت... بقات تتغوت وتهز بين يدين راجلها وتنتف فشعرهاا واحد الهسترية ولات فيهاا وديك لحرقة ديال ولدها لي ماات ترجماتها بديك الطريقة...
رحمة:(صوتها تبح) ولددددددددي رجعوووو ليااا ولدي لااااهو ممشااااش ولدددي ااااقلبي رجعوووه ليااا وااااارجعوووو ولدي وكاااانمووووت (كاتشد فلحاج إسماعيل وتتهضر وعينيها خارجين حمرين) ررررجع ليااا ولدي ماااتخليوهش يديوه لياااا وااااربي ولاترزينيشاااااي فيه يااااااربي ولدددددي
طاحت الأرض وحناكها تيسيلو بالدم بقوة ماندباتهووم وشعرها كولو تشعكك بالنتيف لي نتفااتو... تاتمرمد فالأرض وهوما شدوها تاغيبااات ليهوم وعينيها رجعو بووويض وقالو هادي راه صافي مااتت تاهي...هزوهاا وراجلهاا ماعرف فين يصد ماحيلتوو لولدو لي جااوه خبااارو بلي مااات ماحيلتو لمرتو لي حالتها حالة ماحيلة لقلبو لي حس بيه تزير عليه وضهرو لي حس بيه تهرس تهريسة خااايبة... أما نور الهدى فهاديك كانت غير ساكتة قربات جهتها مها تاتحرك فيها وباها كيهضر معاهاا ساعة شكون لي يجاوبو نوضوها وهي ناضت معاهوم بحال شي منيكة تيحركوهاا كيف بغااو.. غاديين بيها لعند شي طبيب يشوف حالتها لي خلعاتهوم وهي مشات معاهوم وعياو معاهاا يهضرو ويحركو تاحاجة ماقضااات فيهاا.. وباها هز يديه صرفقها والو تگول واااش تحركات ولاقالت حرف ولانزلات دمعة... حط باها يديه على راسو وبقا جالس تيتحسر على حالة بنتو لي كانت تقطع فلقلب...
ملي طمن لحاج إسماعيل على رحمة لي دارو ليها سيروم وخلاها ناعسة قرر يمشي يشوف ولدو لاخر مرة يودعوو...داخل ويديه كيرجفو حااس براسو ضعيف وهو داخل لاموغ وعينو على داك لبياااص لي فيه ناصر وهو مغمض عينيه تحلفي ناعس ماشي ميت كان لونو بيض ورطيطب بحال شي كيكة... وجهو مافيه تانبشة وعليه واحد نور يخليك ماتكرهش تزول عينيك عليه...تحدر باسو فجبهتو وهناا گاااع قصوحيتو وداك لجبروت ديالو تبخر ورجع كيف لولد الصغير وهو تيبكي بكااء لي كان خارج من لقلب...بكا وهو كيشوف كبدتو لي كيودعها لاخر مرة... شحال كانت قاصحة عليه وعلى كلشي... تفكر فاش هزو أول مرة وهو لحيمة صغير وفاش أدن ليه وسمع صوت بكيتو...جميع دكرياتو معاه تفكرهوم وحدة مور وحدة وتكبو عليه بحال الشتااا...كان وداع قاصح وصعيب بزاف...بزز باش تفرق عليه وخرج لعند لبوليس لي بداو يسولو وهو عطاهوم لأقوال ولقى ديجاا الجيران لي شافو مول لفعلة ولي كانو تيعرفوه وعطاوه سميتو وهوما راه تيقلبو عليه حيت هرب... خرج وهو مهبط راسو تايحس بلي شوية ويطيح وقلبو كيضرو وعاطيه واحد الألم فصدرو فضيع...شد على قلبو وجلس وعينو تايشوف الضبابة بيهوم... بقا تايتنفس بالجهد تاجا عندو خوه سليمان تيسول فيه وهو مقادرش يجاوب... غير كيتنفس تاصونى ليه تلفونو وجبدو كيشوف ديك النمرة لي ماعرفهااش... جاوب بصوت بزز باش تسمع وهنا كانت الصدمة التانية فاااش وصلوه خباار ولدو التاني داير كسيدة وبلي غاديين بيه لسبيطاار وحالتو خطيرة... فمو بياااض ويديه طيحات التلفون وعينيه بداو يتسدو ويتحلوو تابدا كيميل باش يطيح وهو يشدو خووه تايغوت بسميتو وهو غييب...
الحاج إسماعيل من الأصل عندو مشكيل فالقلب وبحال هاد الأخبار لي عرف على ولادو خلاوه يطيح... هزووه تاهو وسليمان شد تلفون خوه ورجع صونى لديك النمرة باش يعرف اش كاين وغير ساق لخبار تاهو تصدم.. خلى باه تم وهو مشى لسبيطار فين كاين نوح باش يطمن عليه... ديك الليلة كانت أطول ليلة ليهوم وأسوء ليلة... رحمة بقات مغيبة مفاقتش وناصر راه فلاموغ تايوصل لوقت باش يديوه يدفنوه والحاج إسماعيل راه بين الوعي واللاوعي فايق ومفايقش... أما نوح فمور مادوز لوبغاسيون دخل لكومة وخلاوه فلغينيماسيون حيت حالتو كانت خطيرة... ونور الهدى هاديك كانت حالة خاصة عطاوها مهدئ وبقاو شادينهاا وهي غير حالة عينيها وساكتة...
طلع الصباح مغيم داك النهار كيف حالتهووم...بزز باش ناض الحاج إسماعيل مور ماحس براسو ولى بخير... عيط لخوه وسولو على نوح وطلب منو يعطيه لعنوان باش يطل يمشي لعندو... وداكشي لي كان مشى طمن على ولدو وداك لخبار لي سمع فشلوه...رجع لسبيطار هو وسليمان واستلمو جثة ناااصر باش يدفنوهاا... هزوهاا بسيارة نقل الموتى قدام السبيطار فين كانو رجال لعائلة كلهوم مستفين وتاعائلة نور الهدى.. داوه لجامع وصلاو صلاة الضهر هو لول عاد صلاة الجنازة وسبحان الله شحال من واحد كاان تم وصلى عليه.. هزوه لمقبرة وتماا كاان لوداع الأخير...تحفر قبرو وحطو باااه وسطو وهو باغي يموت بلبكا.. عمر داك لكفن بدموعو والرجال معاونينو ومساندينوو...تدفن ناصر وخلى وراه قلوووب متألمة لفراقو... شحال صعيب هاد لحظة ولكن ماعندهوم مايديرو هادي هي سنة الحياة... تاحد فينا معارف نهارو وقتااش وكلنا تانقولو الله يحسن خاتمتنا... رجعو من لمقبرة والبقية مشاو لرياض فين دايرين الجنازة والحاج إسماعيل مشى خرج رحمة من السبيطاار وهي ساكتة وغير تاتنهد وصغرا وشفايفها بيضين... حاطة راسها فوق كتف راجلها وغاديين لرياض... عمر الرياض بالناااس ولي قريب وبعيد جاا گاع لي عارف كاينة جنازة فدار سي السليماني تيجي يدير لواجب...هالخارح هالداخل وتامن نور الهدى جابوهاا تاهي لي كانت باقي لدابا ماهضرات... ومدارت تاشي ردة فعل حطوها جنب لعيالات وكلشي كان يتحسر على هاد البنت لي ماعندها زهر... نهار كتب كتابها مات راجلها غير مجرد مكتسمع هاد لهضرة تاتحس بقلبك تزير عليك وضرك فمابالك هي لي عايشة هاد الوضع...تاتشوف بعينيها العيالات تيبكيو ورحمة سخفانة وحاطة راسها على سنااء لي عينيها منفوخين بلبكاا... تاتشوف فيهوم وبهدوء ناضت من جنبهوم خارجة ومع بغات تنوض مها تبعها جاو شي عيالات كيسلمو عليها وهي ماقدراتش تخليهوم...خرجات نور الهدى وتاضور راسها يمين وشماال تابان ليها الدروج ومشات طلعات تاوصلات لفوق وهي تبان ليها بيسان جايا وكان باين فعويناتها الزرقين لحمرين بلي كانت تتبكي..شداتها نور الهدى تاوقفاتهاا..
نور الهدى:(بصوت بزز باش تسمع) فين بيت خوك؟
مشات معاها بيسان تاوصلاتها لجناح ناصر وهي تخليها...دخلات بخطوات هادية ونيفها كيستنشق ريحتو بخطوات تقيلة تمشات جهة لداخل وعينيها كيشوفو فبيتو لي كان مرتب ومقاد كل حاجة بلاصتهاا... من غير فوق النموسية لي كانو فيها حوايجو لي بدل لبارح قبل مايمشي عندها... سرطاات ريقها ويديها كيرجفو هزاات حوايجو ودارتهوم على نيفهاا كاتستنشق ريحتو وتعنق فيهوم وبحال لاكاانو هادو النقطة لي فيضات دموعها لي نزلو وهي تاتبكي وتشهق بصوت عااالي... معنقة حوايجو والسينتة دلحدت دلبارح رجع فدماغهاا صوتو وجهو ودمو لي كان موسخ ليها حوايجها كلشي تفكراتو وخلات دموعهاا يعبرو على حالتها فديك اللحظة... نزلات راسها وغوتاااات غوتة مكتومة ولكن سرعان ماتبعوهاا غوتااات خرين عااالين...غوتة مووور ختهاا بحاال لابداك لغواات باغا تحيد داك الحرقة لي تاتخليك تحس بنفسك غايتقطع... تاتغووووت وهي طايحة فالأرض ويديها كارمة فحوايحووو... تحل لباب ودخلات سناء ومعاها مها دنور الهدى وعفااف...شافوها هاكا تخلعو عليهاا وهي راه غير تاتغووت... قربو جهتها باغيين يشدوهاا وهي والو محنية وكارمة على حوايحو واخا حاولو يزولوهوم ليها ساعة فديك اللحظة ربي عطاها واحد الجهد ماعرفات ملين جاا...مها تتبكي على حالة كبدتها لي ماخلاوهاش تفرح بنهارهاا ورزاوهاا فراجلهاا...
مها:ابننننتي الله يرضي عليك ماتعمليش فراسك هاكاا
سناء:(ببكااء) ختي دعي ليه بالرحمة
نور الهدى:(حركاات راسها بلامجننة ونطقات بغوات تاوجها رجع حمر ولعروق كينبضو فعنقهاا وجبهتها) سكتوووو سكتوووو
مها:(مخلوعة على بنتها) بنتي هانتي سمعي ليا وشوفي فيااا
نور الهدى:(تاتحرك راسها رافضة تسمع أي كلمة) لا لا هووو غايرجع هووو غايرجع واعدني أنااا ويااه غاندوزو لعرررس أنااا غاندوز معاااه لعرس سكتوووو واسكتووو
عفاف:قوي قلبك ابنتي بالإيماان ودعي معاه بالرحمة والمغفرة
نور الهدى:(فديك اللحظة بحال لاتجننات وحماقت) لا لا غااايجي هووو غايحي قالهااا ليااا أنااا عرووووسة أنا عروووسة اماماا أناااا عروووسة نااااصر...
🔜🔜
فلاباخطمون ديال اليازيد كانت خارجة سناء من الكوزينة هازة بين يديها صينية ديال أتاي... حطاتها فوق الطبيلة لي كانت ديجا حاطة فيها لكاسكروط لي تفننات فيه وجداتو... بقات تاتشوف ياكما ناقصة شي حاجة قبل مايجي اليازيد لقات كلشي هو هداك...تبسمات وجلسات فالفوطوي هازة تلفونها تاتشوف الجديد وكاتسناه يجي تاسمعات صوت الساروت وبقات جالسة بلاصتهاا مناضتش تبان ليها داخل مبسم ونطق: توحشتك
سناء:تعطلتي قلتي ليا قبيلة راك جاي
اليازيد:وراك عارفة يالاه رجعنا من سفر وضروري ماخصني نطل على شغلي ونشوف داكشي واش هو هداك
سناء:ماعليش سير غسل يديك واجي قبل مايبرد أتاي
خلاها تاتحط ليه فطبيسيل صغير داكشي لي صاوبات وغير جا بدات تكب أتاي
سناء:غانتعشاو ليوم فالرياض رحمة صونات علياا وقالت ليا راه كاتسنانا ( بتدكير) عرفتي شكوون جاا؟
اليازيد:(جاوبها وفمو عامر)شكوون؟
سناء:نور الهدى
اليازيد:مرات لمرحوم؟
سناء:اييه هي مسكينة ماتت مهاا
اليازيد:الله يرحمهاا واش غاطول عندهوم؟
سناء:الااا أكيد غاتبقا غير شي يامات وتمشي نتا عارفها لاعيقات مغاتفوتش سيمانة
اليازيد:اه اليوم شفت ولد لحاج وراه گال ليا بلي لبلان لواليدة على حسابو
سناء:نيت هو يعرف ليها
اليازيد:(شاف فيها وهو هاز حاحبو ونطق بتحدير) سناااء عرفي اش كاتخرجي من فمك
سناء:مالي كدبت راك شايف مك على عينيك اش دارت واش كاينة شي وحدة تغضب حيت ولدهاا بغاا يتزوح ويدير لحلال؟؟
اليازيد:(بانزعاج من لموضوع) نتي عارفة كلشي بلامانبقاو نجبدو فلي فات
سناء:(ميقات)كلمة لحق تاتقصح ياك ولكن غانسد فمي حسن ليا وغانوض نمشي ندوش أما لهضرة على مك تاتخليك دغيا تسيف
خلاتو تايسوط ولقمة وحلات ليه فلحلق حط داكشي لي فيديه وبقا جالس كيتنهد ويسوط... اه بصح خدا قرار دزواج من سناء ولكن هادشي مكيعنيش بلي باغي هاد لحالة لي بينو وبين مو... أما سناء وتگول واش تسوقات هزات برودوياتهاا ودخلات سخنات لحمام وجلسات كمدات عضيماتهاا.. ماخرجات من لحمام تابقا ليها شوية وتخلي الجلدة..دازت لروتينها مور لحمام واليازيد كيضور عليها تم وهي عارفاه عليااش تيقلب...
سناء:(جاتو نيشان) بلاماتسنى حيت داكشي لي باغيه مغتاخدوش داااباا
اليازيد:(حط يديه على سمطة دالسروال وقال مخنزر) وعلاش جالسة قدامي عريانة تطلسي فالزمر مخليااناا نقيموو بااطل
سناء:(جاتها الضحكة) اوا نتا لي عندك على سبة دغيا هاز لعلاام دخل كمد عضاامك ودوش راه هادي لوقيتة فين نتحركو
دخل وهو كيبرگم وهي تاتحرك راسهاا تاسالات ناضت لبسات عليها حوايج دلداخل وجلابة مخزانية يالاه خيطاتها شهوة منهاا...قدات حالتها وختماتها بعكر فالحمر وجلسات تاتسناه تاخرج وهو كيشوف فيها وتيمسح شعرو وقال:مسحي داك لمرض راه معييق
سناء:مامعيق والو وزايدون راه عجبني
اليازيد:(خنزر فيها)واش باغا ندابزو تاااني على تخربيق حيدي لمرض ملي تكوني فدارك وفبيتك طلسيه على كمارتك ولكن لخروح بيه لااا
لبس عليه وهي ناضت معاجبها حاال خففاتو وخرجات ماتسناتوش حيت ايبقا يدقق ليها تاني وهي غاتصدق معصبة وغايقلبوها سباط كيف ديما... خرجو من لباخطمون وهي تنطق:خصنا نديو معانا شي حاجة دوز لباتيسري
حرك ليها راسو وتحركو وكيف قالت ليه مشاو لباتيسري وخداو لي بغاو عاد كملو الطريق لريااض وفهاد الأثناء كانت رحمة واقفة فلكوزينة تاتفقد شغالها بنفسهاا...
رحمة:السعدية شوفي ديك السفة راه تفورات هبطيهاا وخليها تانقربو نتعشاو وسخنوها (شافت فساعتها) الطنجية ماعرفتشااي واش غاتكون وجدات
السعدية: عيطي لخويا رؤوف وسوليه الالة
جبدات تلفونها تتصوني ليه لقاتو مشغول بقات تاتسناه شوية وعاود صونات عليه ونفس الحاجة..
رحمة:مع من كيدوي هاد الولد تت
نوضات فيهوم الروبالة فلكوزينة ردي لبال لدجاج لي فلفران عندك الخضرة تسلق كتر من لقياااس عندك السفة تجي حلووة بزاف وعزلو دنوح لي مافيهاش لحلاوة عنداااك هادي ردي لبال لهادي ديري هاكا لا هاكا تقولي جاايين لخطااب وهي غير عراضة عادية... ماخرجات من الكوزينة تاخلاتهوم تيسوطوو عاد مشات تبدل عليهاا وطل واش فاقت نور الهدى لي كانت تتقاد لباسها الشرعي وتلبس فليگاتهاا... مكاتحط تاحاجة على وجهها وأصلا مع حريفاتها كحلين كاتبان بحال لادايرة لكحول... خرجات بهدوء وهي تاتسمع السكات تم تلاقات برحمة لي كانت طالعة وتبسمو لبعضياتهوم
رحمة:ارتاحيتي شوية؟؟
نور الهدى:(حركات راسها) الحمد لله مزيان
رحمة:هادشي لي بغييت المهم غانمشي نبدل علياا حيت سناء غاتجي هي وراجلهاا وغايتعشاو معانا
نور الهدى:واخا أنا غانزل لتحت
خلاتها وكملات طريقهاا تاوقفات قدام الباب دجناح زين العابدين ورجليها حسات بيهوم جمدو بلاصتهوم ومقدراتش تخطي خطوة مزاال... ضارت تاتشوف فباب الجنااح بسهو وقربات حطات يديها على لبواني وبلاماتحس حلات لباب ودخلات...كان الظلام تحسسات بيديها جهة الساقطة تاشعلات الضو وعينيها كيضورو بين دوك لحيووط... ماشعراتش براسها تالقات رجليها قادوها لبيتو فين كينعس..
حاسة بواحد الخنقة وهي كاتشوف فالجناح دزين العابدين لي كان نفسو جناح نااصر... كان فيه بعض التعديلات على كيف شافتو اخر مرة... لون الأسود كان طاغي على لفرااش والديكور وداك الكيس دلكيك بوكسينغ لي كان معلق كيخليك تعرف بلي مول هاد الجناح كيعشق شي حاجة سميتها الكيك بوكسينغ وولون الأسود...بانت ليها تيشورت طايحة فالأرض ونزلات هزات وطواتهاا بترتيب وحطاتها فوق النموسية ومسحات ديك الدمعة لي نزلات ليها وخرجات بهدوء... مع تسد باب الجناح تحل باب دلحمام وخرج زين العابدين لي كان ملوي عليه فوطة وكيمسح شعرو بفوطة خرا...مكمش حجبانو وهو كيشوف فالضو لي كان شاعل وهو عاقل بلي قبل مايدخل يدوش طفااه.. طاحت فبالو سيدرا حيت هي لي مولفة لهاد لفعايل ولكن مجرد مالمح داك التيشورت لي كان لاحها فالأرض مطوية فوق النموسية محى لفكرة من بالو...بقا واقف هاز حاجبو فالسما معارفش شكون دخل ليه تاني لجناحو... مشى جهة الدريسينغ لبس عليه سروال نواغ سپور وقبية ودار القب ديالها على راسو ورش ريحتو عاد رجع تكى فبلاصتو وهز تلفونو صونى لكحلوش..
أمين:( جاوبو بالإنجليزية) لعشير فين راك؟
زين العابدين:(ببرود)كحلوش نسافرو؟
أمين:لفين غانمشيو؟
زين العابدين:الشمال
أمين:وقتاش؟
زين العابدين:غدا
أمين:واشغانگول ليك حاليا ماعند جد مي تاشي لعبة نمشي مي لاخرج ليا شي بلان راه ماشتيني ماشتك
زين العابدين:(قلب عينو ببرود) اه لا ماتفرعش ليا كر*ي
أمين:باقي فالشك
قطع عليه معاودش معاه لهضرة وأصلا أمين مولفو حال وحوال...عارف عشيرو كيف داير ومكيحكرش فبحال هادشي... بقا زين العابدين جالس تيشوف فالسقف ساهي تاشوية نااض جهة داك كيس لملاكمة وبدا كيضرب فيه بلامايدير ليگات...بقا تيضرب ضربات قوية تكيتسمع صوت السنسلة لي معلق بيها كاتصدر واحد صوت مزعج ولكيس غادي جاي...
فبرا كانت سيدرا يالاه فاقت خرجات من بيتها وهي تاضور عينيها المبطنين لمنفوخين بالنعاس وبدات تتسوط بملل مها ناعسة ومبغاتش تفيقها ولقطيطاات راه تيلعبو ونوح مكاينش...تمشات لجناح بيسان دخلات ولقاتو خاوي ومظلم ورجعات أدراجهاا تلاقات برؤوف لي كان طالع فالدروج داير ليزيات وتيهضر... مبسم وباين فعينيه الراحة وبالسيف والسيد ممشى تاتصاحب مع رنيم لبنت لي حس من جهتها بشي حاجة فشكل وحلف مايفلتها...شافتو سيدرا بحال لاشافت درهم دلحلال قربات بجهتو ونطقات وهي شادة فسروالو وحالة يديداتها: هزني
بقا تيشوف فيها رؤوف وسمع صوت رنيم لي نطقات بضحك:يالاه هزها
تحدر هز سيدرا لي شافت فليزيات ونطقات بتساؤل:علاش تاديرو هادو تامودي ورياني تايديرهوم
رؤوف:تانسمعو بيهوم لكنا تانهضرو فالتلفون
سيدرا:(حركات راسها ببرائة وقالت تتشير ليه جهة لزيغاي ديالها)أنا مكانديرهومش حيت عندي هادو فودينات
رؤوف:(تبسم ليه بحنية)حسن أصلا هادو خايبين
سيدرا:مع من تاتهضر؟
رؤوف:اااصاااحبي
سيدرا:(حركات كتيفاتها) تارياني هاكا تيقول ليا باش بّاديدي مايغوتش عليه ولكن فاش تانسمع تانلقى بنيتة وهو تيكدب عليا ولكدوب حراام
خلاتو كيضور فعينيه ماعرف باش يجاوبهاا وهي ببرائة قالت لي كااين... حطها حدا باب جناحو وقال بتبسيمة:نمشي نبدل عليا ونجي
سيدرا:ماشتيش بابانو؟
رؤوف:لا ولكن غايجي دابا غير سيري تسناايه
حركات راسها ومشات تاضرب بداك الشعر لي طوال ليهاا ومكتحملش تجمعو عزيز عليها طلقوو واخا تتعيى معاها رحيل مي كاتقنط ودغيا كاطلقو... وصلات حدا باب جناح زين العابدين وهي دير ليها طرن فالراس ودخلات لعندو وهي تاتقلب عليه بعيونها السود وتتعيط ليه: زينبيدين زينبيدين
مكانش تيسمع ليها حيت صوت الكيس دلملاكمة كان عالي وتاهي غير شافتو قطعات لحس ومع كان تيضرب الكيس بالجهد مشات ليه من الجهة لخرى باش تفاجؤ ومايجي فيها غير داك لكيس لي ضربها على وجهها وخلاهاا ترتد لور وطيح بالجهد...
كلشي داز بزربة لدرجة زين العابدين مافهم والو... شد كيس الملاكمة وطل لقا سيدرا طاايحة جهة الحيط تتوجع...عض على شنافتو بفقصة وقرب جهتها جلس قفازي تايشوف فيها هي لي مسكينة داخت بقوة الدقة...ولكن لي خلاه يكمش حجبانو القهوين هو داك شوية الدم لي لمح فالحيط... ناض وتحدر هزها كيف لكمشة وحطهاا فوق النموسية وهي تحط يديها على راسها وقالت بصوت باكي:تايضرني هناا
زين العابدين:(جبد تلفونو ودوز النمرة لباه وهو كيشوف فيها ومجرد مجاوبو نطق بجدية) الواليد فينك
نوح:(كان سايگ)هاني جااي لرياض مالك؟
زين العابدين:(خنزر فسيدرا ونطق بغيض) ديك لبرهوشة تضربات فراسها
نوح:(نطق بتساؤل وصوت جدي) سيدرا؟
زين العابدين:(كايعض شفتو وببرود كمل) كنت تانتريني فلكيس دلملاكمة تاماعرفت كيوقع وضربتها بالغلاااط
أكد على ديك بالغلاط حيت عارف باه غايسحاب ليه ضربها تاني كيف طرا فبلان دلبوكس لي عطااهاا... أما نوح حك لحيتو ونطق باهتمام وصوت جدي:خليك أناا جاااي
قطع زين العابدين وبقا واقف تيشوف فيها وهي ساكتة تاتحك الدقة لي خدات...راه ميمكنش طووعها بدقة وحدة تاوصلات لحيط وهو هز راسو وزفر بعصبية على هاد لبرهوشة لي طلعات ليه فصحتوو... مدة وهو واقف عاطيها بالضهر وهي نطقات بصوت خافت:زينبيدين
ضار شاف فيها وهو هاز حاجبو وهي تنطق ببرائة:مبقاش تاضرني
مجاوبهااش سكت ومشى جهة الشرجم كيتسنى تاسمع لباب تحل عرفو باه وبالفعل دخل نوح وعينو تايقلبو على سيدرا لي غير شافتو وهي تنطق تتغبن:بابانو
نوح:(قرب جهتها)ابابا (جلس تايقلب فراسها) فين كايضرك
سيدرا:(وراتو بلاصة الدقة) هناا فيهاا ديدي كايضرني بزاف
قلب ليها راسهاا وهو يبان ليه الدم...أما زين العابدين فكاان واقف عاض على فكو تبان مطراسي وقلب وجهوو محاملش يشوف داك الديكور لي كيستافزو ولي تيخلي أفكار سودوية يطيحو فبالو...مكرهش يهزها يلوحها من هاد الشرجم يتهنى منهاا الفكرة عجبااتو وخلاتوو يسهى فيهاا....أما نوح هزها وخرجها غادي بيها لجناحو وفنفس الوقت كيهضر معاهاا..
نوح:(بحنية)كايضرك راسك بزاف؟
سيدرا:لاغير شوية هنا
وصلها لجناح ومع دخل بانت ليه رحيل جالسة وباين يالاه فايقة...عينيها منفوخين وجهها تاهو شافت فيه وتبسمات ليه وتاهو بادلها تبسيمة وجلس سيدرا فوق لفوطوي ونطق:خليك هنا
دخل لحمام وسيدرا قربات جهة رحيل ونطقات تاتشكي عليها وتغبن:مامي تضربت هنا شوفي
وراتها راسها ورحيل غير قشعات الدم وهي تخرج عينيها وقلبها حسات بيه شوية ويخرج...بدات تقلب فيها وفمها بياض بالخلعة:مالكي واش طحتي ؟؟
سيدرا:(يدات تتشرح ليها بصدق) لا دابا مشيت عند زينبيدين باكا وكان تيلعب فهاداك لي لي عندو معلق ياكا وأنا كنت باغا نلعب معاه وهو يضربني ولكن والله مشافتي اماما مدرهاش بلعاني
خرج نوح هاز فوطة نقية فيها الما دافي مسح ليها داك الدم باش يعرف واش غير تجرحات ولادقة خصها الغرارز...
رحيل:(نهضات فيها) واش مكترصااايش اش دااك عندو خلي عليك الدري هانتي تاطيري تاجبتيهاا فراسك غاتحمقيني اسيدراا مكتزگاايش
نوح:(نطق بنبرة فهماتها) رحيييل
سكتات وهي تاتشوف فسيدرا بهدوء وهو طمن بلي غير جرحة وقال بهدوء:غير جريحة خفيفة دابا تبرا ابابا
باسهاا فراسها ورحيل جراتها تتبوس فيها وطيب خاطرها حيت غوتات عليها عاد ناضت لحمام طرف حالتهاا وسيدرا خرجات من لبيت راجعة عند زين العابدين لقاتو باقي واقف فبلاصتو قربات جهتو وبدات تاتجرو فسروالو تاضار شاف فيها وخنزر..
سيدرا:(حركات راسها) صافي عندي غير جريحة خفيفة مبقاتش كاضرني والله
زين العابدين:سيري فحااالك
سيدرا:(شدات فيه بعناد) نلعبو أنا وياك
زين العابدين:(قلب وجهو ونطق تحت سنانو) واارب العالي
تحدر جهتها وهزها من بيجامتها بحاال لخنشة تبانو رجليها ويديها مطلوقين وتمشى بيها تاوصل لباب وخرج حطها وسد لباب عليها مسورتو...
وصلات سناء هي واليازيد لي مجرد ماعطاتو رحمة صوابو مشى لصالة لخرى يتسنى نوح ورؤوف... أما سناء جلسات جنب نور الهدى وبقاات تتسول على أحوالها تاانظمات ليهوم بيسان لي جاات من خدمتها بكري...
أما عند رحيل فملي طرفات حالتها لبسات عليها گندورة واسعة ولاحت فولارهاا ورشات ريحتها مغرقة راسها بيهاا ودارت عكر نيوود...عينيها باقي منفوخين بالنعاس ومجبدين... خرجات لقات نوح كيتسناهاا لابس سروال توني وتيشورت كحلة مبينة دراعو الصحاح...قربات جهتو وزولات ليه نضاضر ونطقات مكمشة حجبانها: ماتبقاش ديرهوم ديماا
نوح:(تبسم ليها)ماعجبوكش؟
رحيل:(نطقات بخفوت) تايغطيو ليا عينيك ومكيخليونيش نشوفهوم براحتي
نوح:يااك الالة؟
رحيل:همم وتالحيتك نقصها شوية انووح معجباانيش وهي كبيرة راه تتكني فاش كتبوسني
نوح:(ضد فيها خشى راسو فعنقهاا وبدا تيحك دقنو مع عنقهاا وشادها لاتهرب) خليها زوينة
رحيل:تت نقصها عفااك
بقات تاضور عينيها وتفرفر برموشهاا وهو حرك راسو بلاحول وجرها نازلين لتحت...تفرقو حدا باب الصالة هو مشى لعند اليازيد وخوه وهي دخلات عند النساا...تبسمات فاش شافت سناء لي ناضت وسلمات عليهاا:رحيل لباس عليك؟
رحيل:حمدلله ونتي مبروك عليك نتي واليازيد فرحت ليكوم
سناء:شكراا باقي لعرس غير وجدي راسك
بيسان:وايلي باقي غاديريه
سناء:معلوم مالي نفلتوو هههه غير كانتنسى ولد لحاج يدوي مع الشارفة دمو
رحمة: سناء حشومة
سناء:مالي كدبت ديك العاقيسة واقفة لياا فالحلق ياربي السلامة هزات شوكتها وحلفات لاتهدات
بيسان:هههه اوا هادو هوما لعگوزات
تبسمات رحيل بالخف وحلات فولارها بما أنه مغايجي حد زولاتو وبقات بشعرهاا لي جامعاه قراصة...
مجمعات والمواضيع كاملين تجبدو فلول شدو الحديت بالعرس دسناء لي حالفة بحلوفها دوزو واخا تكون بكرشهاا وغير سالاو دازو لسبوع درحيل تايسولوهاا شنو غادير..
رحيل:(تبسمات)ماعرفتش صراحة باقي ماهضرناش أنا ونوح فلموضوع
نور الهدى:المهم هو صحتك وتقومي بالسلامة
رحيل:ربي يخليك
بيسان:بطبيعة لحال السبوع مازربانينيش بيه مي لابد منو تاهو ياك اماما
رحمة:(نطقات وهي معاجبها) امم اوا شغلهوم هاداك أنا مغاندخلش
تبسمات رحيل تبسيمة صفرا على داك الجواب البارد ولي زاد خلاها تعرف بلي رحمة عمرها غاتقبلها ومغاتنكرش بلي هادشي تايخليها يبقا فيها الحال مي المحبة مكتجيش بالسيف هي دارت لي عليها من نهار حطات رجليها هنا وحاولات تقرب منها وتهضر معاهاا وفلول قالت راه كلشي مزيان مي كان هادشي لي ظناتو غير هي حيت نهاار وقع لمشكيل باانت الحقيقة وكيف كيقولو لهضرة لي تايقول لواحد وهو معصب تاتكون صادقة وخارجة من لقلب... قلبات سناء الهضرة وبقاو مجمعين ونور الهدى يادوب كاتسمعي صوتها وتتجاوب بتبسيمة تاتحط لعشاا لي كان على حقو وطريقو ورحيل مجلسة جنبها سيدرا تاتعطيها فطبسيل وهي ساكتة ضاربة الطم... نفس الشي عند الرجال لي تعشاو وجلسو مجمعين على كويس دأتاي ودوازو... وهضرتهوم عكس لعيالات غير لخدمة وصاف...وصل لوقت وناض ليازيد مودع نوح وجات عندو سنااء تاهي وسلماات عليه وتاهي مشات وهو نيشان طلع لجناحو لقى رحيل باقي مجات...دوش بالخف وخرج مفطح فوق النموسية هاز كتاب بين يديه تايقراه تاتمات داخلة عليه وهي كاتمشى بحال البطريق وتتسوط بالصهد...
نوح:مالك؟
رحيل:اوووف عييت نووح عاوني زول ليا هادي
ناض عندها زول ليها ديك لگندورة وخلاها بشورط ودباردور وحيد ليها السوتيان باش ترتاح وطلق ليها شعرهاا وهي بزز باش قضات حاجتها وغسلات سنانها...
متكية على دراعو وهو تايحك ليها شعرها وقال بهدوء وخشونة:نهار الأحد نطلعو لفاس تقدري تمشي؟
رحيل:اه نمشي واخا الجلاس بزاف ايعيني مي هانيا لمهم نبدل لجو تخنقت هنا
نوح:نديو معانا سيدرا وزين العابدين تاهوما يفوجو شوية (باسها فراسها) غدا عندك الرونديڤو نعسي باش تفيقي بكري الفتنة ديالي
رحيل:اووف دير ليا لمخاد هنا
مانعساتش ديك الليلة كل شوية تسوط وتقلب وهو راد ليها لباال...صبحات الصباح ماعندها خاطر بزز باش لبسات عليها كسيوة طويلة مع صباط وفولار ودارت شوية دلمك اب مغطية بيه الصفورية دقلة النعااس... خرجو بزوج مور ماوصى نوح السعدية ترد لبال لسيدرا حيت باقي ناعسة وهوما مشاو بكري لعند طبيبة...جالسين فصالة الانتظار لي كانو فيها زوج نسا ورحيل لي متكية على نوح لي خدام بتلفون... أول مرة يجي لفحص معاها وهادشي عجبها وريحهاا...وصلات نوبتها ودخلات هي لولة عبرات ليها الوزن وطونسيون تاهو عاد دازت لبيرو ودخل معاها نوح...أسئلة روتينة دوزاتهوم رحيل وداتهاا باش دوز التلفازة...كانت الصورة تتتبان كاملة فالإيكو واحد من توينز عاطي بتريمتو لوجه التاني... عيون نوح لمعو بحنية وهو كيشوف فداك المنظر لي كيخلي قلبك يتبورش عليك...وخلاص فاش طلقات صوت دقات قلبهوم كانت لحظة عمرها تنسى...عض على شفتو وشاف فرحيل لي تبسمات تاهي وشادة فيديه
طبيبة:اوا دابا نشوف لوسكس ديالهوم ؟
بقات تتبرك ليها على كرشها ورحيل صابرة وطبيبة مخشعة ناتشوف تاسالات وتبسمات:(بتبسيمة عملية) عندك زوج ولاد..
خارجة من عند طبيبة وهي مبسمة وفرحانة فاش عرفات جنس توينز وخصوصا فاش كان نوح معاها الفرحة ضاعفاات...تتقاد فلاسانتوغ وضارت شافت فنوح لي كان هاز الإيكو تيشوف فيه...حطات راسها على الكرسي ونطقات بهدوء: دابا خصني نبدا نشري ليهوم حويجات؟
نوح:(مد يديه وقاس حنكهاا وبخشونة قال) نمشيو ناخدو شي حاجة دابا
رحيل:اه واخا (تبسمات بحماس) دابا سيدرا غاتفرح حيت قالت هي لي غاتسمي مومويات ولاعرفاتهوم ولاد غاتفرح بزاااف
نوح:مغاتبغيش لبنات؟
رحيل:ههه قالت ليك بغيت نكون بوحديتي عندك امامي هههه
شدو الطريق ورحيل هزات تلفونها وبدات تاتسيفط لمها وأسماء وغزلان ورنيم أوديوات وتامن ريان ومحمد طه سيفطات ليهوم وعلماتهوم بجنس التوينز... وصلو لمول ونزلات وهي شادة فنوح لي غادي معاها دقة دقة... دخلو لمحال ديال دراري الصغار وتما عالم اخر...تلفات رحيل وماعرفات باش تبدا...
رحيل:ماشاء الله هادشي كولو زوين
نوح:اجي نشوفو حوايج لداخل
مشاو جهة لحوايج لداخل ورحيل باغا تسطى على داكشي وخصوصا حويجات زيادة تيكونو صغار... كانت تتهز زوج زوج من لحاجة...گاع لي فبالها شراتو ولقات نوح عارف حسن منهاا...كيلات نيت لحويجات ولبيسات تاهوما هازرق والبيض هالخضيضر هالقهوي هالصفيفر مهم خلطات لوينات وشافت واحد لكسيوة دلبنيتات حمقاتها وخداتها..
نوح:(بمزاح)ياكما ناوية تلبسي لعسيلات كسوة؟
رحيل:هههه لا انخليها عندي حمقاتني
نوح:(غمزها بمكر)تانعمرو لكريشة عوتاني
رحيل:(سابقها ونطقات بسخرية)سير وااحد الربع سنين فمافوق وشوف تشووف
نوح:سخطتي الفتنة
رحيل:(حطات يديها على كرشها ونطقات بضحك)كاين دووبل هنا الله يجعل لبراكة
نوح:(حرك راسو ببرود)هممم واخا
كملو لمسارية فالمحال عاد مشاو جهة لاكيس محملين ورحيل جلسات فلكرسي تاتسنااه... تاسالى وهي تنوض تابعاه كاتمشى كيف لبطريق...
نوح:(وقف وشاف فيها)خودي لكونطاكط من جيبي
خداتو وحلات طوموبيل وجلسات تاتستارح وتشرب وهو أنسطالى داكشي فالطوموبيل وشد طريقو يمشيو ياكلو حيت فيها الجوع... صونات لسعدية وسولات على سيدرا لقاتها فاقت وفبيتها تاتلعب...كلاو عاد شدو طريق لريااض باش يفرحوهوم تاهوماا...
شافت سيدرا فرحيل وجات تتجري جهتها ونطقات بحماس:مامي فين كنتي وشنو جبتي لياا؟
رحيل:جبت ليك واحد لحاجة زوينة
سيدرا:نشوفهاا
رحمة:(شافت فنوح ونطقات بتبسيمة)شنو قالت ليكوم الطبيبة؟
نوح: كلشي مزيان وصحة التونيز تاهي مزيانة
بيسان:عرفتو الجنس دتوينز؟
نوح:(تبسم وجر بيسان مدرعها) اه ولاد غير وجدي راسك اعمتهوم
بيسان:ههههه وايلي حلف هههه والله تاقالتها لبخوشة فاش سولتها قالت بغات زوج ولاد
سيدرا:(بدات تاتحنقز وتلعب بشعرها)مومويات وليدااات واااو
رحيل:ههه شفتي زهرك يالاه فرحي
سيدرا:(مشات عند نوح تعلقات فيه ونطقات بدلع طفولي) بابانو بلو آيز أنا نسيمهوم ياكاا؟؟
دخل زين العابدين لي كان فلاصال كيتريني جلس فالصالة بهدوء وسيدرا نزلات من عند نوح ومشات تاني عندو ونطقات بحماس:عرفتي زينبيدين مومويات وليدات
شاف فباه وقلب وجهو ببرود مامسوقش تگول ماشي خوتو...
نوح:(بهدوء) نتي اسيدرا غاتسمي واحد وزين العابدين يسمي واحد
سيدرا:(بدات تتغبن)بغيت نسميهوم بزوووج بابانو
نوح:(جلسها فوق ركبتو ونطق بهدوء) بغيتي نتقلق منك ابابا
سيدرا:(عنقاتو وحركات راسها بلا)صافي واخا بابانو نسمي واحيد
نوح:الله يرضي على بنتي
رحيل:اوا من دابا قلبي على سمية زوينة لخوك
سيدرا:زينبيدين شنوو تسيمه نتااا؟
زين العابدين:(ببرود)ماعرفتش
ناض من جنبهوم داير بناقص وفطريقو تلاقى بنور الهدى لي كانت جايا شافتو وقفات مبسمة ليه بحنية وعينيها عليه هو لي عطاها شوفة باردة وتخطاهاا ممسوقش ليها مخليهاا متبعة ليه لعين قبل ماتكمل طريقها لصالة لقاتهوم مجموعين وهي تنطق بهدوء:السلام عليكوم ورحمة الله تعالى وبركاته
ردو عليها السلام كاملين ونوح نااض مخليهوم ياخدو راحتهوم ونيت غايمشي باش يهضر مع زين العابدين...
حل لباب دجناحو ومع دخل سمع صوت الكيس دلملاكمة وصوت أنفاسو وهو كينهج... دخل لعندو ولقاه كيضرب داك لكيس بالجعرة كولو حمر وكيقطر بلعرق...
نوح:(قرب جهتو ونطق بهدوء)شنو لي معصبك؟
زين العابدين:(حبس وشد داك لكيس وهو كينهج ونطق بصوت بارد) مامعصبش
نوح:(هز حاجبو وجا قدامو فاصلهوم داك كيس لملاكمة ونطق بهدوء) ماشي هادشي لي باين فيك؟؟ مالك؟
زين العابدين:والو
نوح:(جرو من قرفادتو وخنزر فيه) داكشي لي كيضور فداك الراس راه مامنو والو حضر معايا عقلك احفيد الحااج
قلب وجهو مجاوبوش ونوح بعد عليه وبدا كيمسح على وجهو...جرو تاجلسو فوق النموسية وزين العابدين جامع يديه وقالب وجهو ورجليه كيزعزعها... واخا مايدويش نوح عارفو اشنو بيه وعادرو حيت هو لي فاهم اش كاين يمكن واحد خر يجيه هادشي باسل وفشوش خاوي ولكن هو ماشي فشوش إنما القضية كبر من هاكا
نوح:(بهدوء) نهار هزيتك بين يدي أول مرة عمري نساهاا كنتي قد لكمشة هزيتك فيد وحدة داك نهار باقي محفور هنا (أشار لراسو)وباقي لدابا مفكرو (شاف فزين العابدين لي كان باقي على جلستو ونطق بصوت حرش) فخباارك حوايجك لي لبستي أول نهار باقي ليومنا هادا محتافض بيهوم؟؟
(ضار شاف فيه زين العابدين ونوح حط يديه على كتفو وبقا بارك عليه وبنفس الهدوء كمل) نتا معارفش بلاصتك عندي قداااش وتوااحد مغايقدر يعمرها ديرها فباالك هادوك خوتك بلاصتهوم تاهوما عندي مغايعمرها حد ماتخليش هاد الأفكار يبقاو يزنزنو عليك وعطي الراحة لداك الدماااغ اولدي
((ناض وضرب على كتفو ونطق بجدية) وجد راسك ليوم فالليل نديرو واحد لكومباا بيناتناا نسلخك شوية تاني
زين العابدين:(حرك راسو وناض) وجد راسك نتا الواليد
نوح:(هز حاجبو ونطق بسخرية)ياك البرهووش ابلاتي على واليديك تاتنزلو لتحت
زين العابدين:واخا
باسو فراسو وخرج من عندو غادي لجناحو يبدل حوايجوو... صونى ليه التلفون ولقاهوم مالين الفراش دبيوت زين العابدين وسيدرا علموه بلي راه غايوصلو ليوم ودار معاهوم لوقيتة... لبس عليه تاني فوقية بيضاا حيت غادي غير لدار وبدا لحال كيسخن...
دخلات رحيل هازة دوك لخناشي لي فيهوم لحوايج حطاتهوم فوق النموسية وتمشات لعندو لقاتو كيرش ريحتو...
رحيل:واش خارج؟
نوح:اييه الفراش دلبيوت وصل وغانمشي لدار
رحيل:اه اوا بلاااتي
نوح:(كمش حجبانو)شنو؟؟
رحيل:(مشات تاتقلب فمجرها تاجبدات واحد لبواطة وقربات جهتو ونطقات بتبسيمة)كنت خديتها ليك من واحد السيت ماعرفتش واش غاتعجبك
حلات لبواطة واكتملت الصورة ديال ديك لمگانة الرجالية لي كاانت تتبان خطيرة ومن ماركة معروفة...ولوسط ديالها فالنواغ حيداتها من ديك لمخيدة وحلاتها ونطقات بتبسيمة:عطيني يديك
مد ليها يديه وهي لبساتها ليه جاتو زوينة فيدو تبسمات حيت جات عبارو ونطقات:عجباتك
نوح:(جرها بايسهاا فدقنهاا)الفتنة ديالي جابت ليا كادو بالسيف مايعجبني
رحيل: بصحتك وراحتك نوحينو
شدها من قرفادتها ودمج شفايفو مع شفايفها فقبلة عنيقة وقوية وخلى لسانو يجوب فوسط ثغرها يتمدق ريقهاا... فصل لبوسة وطبع قبلة فجبهتهاا ونطق بهدوء:غايخصني نمشي دابا تال ليل ونكملو الفتنة
رحيل:سير ورد لبال لراسك
خرج من لجناح نازل لتحت ومع رحمة ونور كانو جالسات فلجليسة لي جنب لخصة قلب الضور من الجهة لخرا تاسمع مو تاتعيط ليه بسميتو وناضت لعندو وقالت بهدوء:ولدي أنا ونور الهدى باغيين نمشيو لمقبرة نزورو قبر خوك
نوح:(شاف فيها وبهدوء قال) ملي يجي رؤوف يديكوم
خلاها وكمل طريقو تال طوموبيلتو ركب وساط النفس بالجهد... فيما كاتجبد سيرة ناصر كيحس بنفسو تقالة وريقو مكيقدرش يسرطو بشكل طبيعي... باقي غصتو فقلبو عمرو يقدر ينساهاا واخا دازو سنين على موتو... طلق القرآن ودمارا غادي وعقلو سااهي..
🔙🔙
كاان تيسمع صوت باه وهو كيقرا القرآن كيف عادتو فهاد الربع شهور لي دوز فلكومة كان كل نهار يجي ويقرا القرآن ويجلس يهضر معاه...دفن واحد من ولادو ومقادرش يصبر على فراق التاني... جفونو كيتحركو وباه مكانش راد لبال حيت مخشع فآيات الله لي تايقرا...حل عينيه نيشان لسقف وعاود سدهوم حيت الضو كان مجهد عليه..مدة وهو تيحاول يعتاد على الضو تاولفو عينيه عاد ضار بشوية وعينو على باه لي مجرد ماحس بحركتو هز راسو بزربة مصدوم... ربع شهور وهو كيتسنى فهاد النهار لي يحل فيه ولدو عينيه ويفرح قلبو... ناض بسرعة تيعيط لطبيب ونوح ساكت عقلو باقي مامستوعبش اش طاري وفين هو...ربع شهور كومة ماشي ساهلة وكياخد الإنسان وقت كيفما تاهو خدا وقت طويل باش يرجع يهضر ويتحرك... كلشي كان تيجي يشوفو الاداك الشخص لي كاان باغي هو...مدة هو فالسبيطار كيدير الترويض وتايهضر بحال شي دري صغير بكلمات متقطعة... وأول هضرة قال هو سمية خوه "ناصر"ولكن مالقى تاجواب من باه وهادشي كون عندو خووف... ديك لفترة لي كان كيدير الترويض مدازت تااحس براسو قريب يجن... وأخيرا قدر يتحرك بوحدو طبعا بمساعدة لعكاكز... خرج من السبيطار وباغي غير وقتاش يوصل لرياض يشوف خوه ويطمن عليه بنفسو...مع وصل نزل تيعكز فعكازو تادخل لرياض كانت لعائلة كلها كاتسنى فيه...هو مباغي حد باغي غير خوه...ضور عينو عليهوم ولكن مالقااهش عليها قرر يطلع لجناحو وقبل مايطلع جا عندو عادل لي كان تيشوف فيه ولي نطق بحزن مصطنع وعينو على نوح:على سلامتك اخويا والبراكة فراسك من جهة ناصر...
لعكاز باش كان شاد لكليبر طاح بين يديه وباه قرب جهتو مسندو وهو عينو تفيكسات على عادل لي من صغرو وهو حرايمي ومحساد... ماشي غير من جهة نوح أنما تاناصر مكانش عندو معاه....وبطبيعة لحال مغاديش يضيع فرصة بحال هادي يسمم فيها نوح... داير فيها راسو حزين وهو راه ممسوقش واخا عارف باه غايسمعو هضرة على هاد لفعلة ولكن لمهم عندو دار لي بغا...
أما نوح كان جامد مكيتحركش تامن عينيه مكيرمشش بيهوم...مكانش باه باغيه يعرف بهاد الطريقة وكان باغي يشرح ليه بشوية عليها هاد لمدة كلها وهو ساكت وموصي لعائلة تاحد مايخرج من فمو تابيسان ورؤوف وصاهوم ولكن عادل ضرب ليه كلشي فزيرو...
ح.إسماعيل:(تايشوف فنوح جامد تخلع عليه) ولدي نووح
ماحسش باه تكان تنفض نوح بين يديه وشنق على عادل ونطق بصوت غاضب وعينيه خارجين فعاادل:ااااش كاتخربق واااش عارف راسك اش تتگووول المرررض
بعدوه عليه وهو كيتنفض مامسوق لالرجلو لي تاضرو لاصحتو لي باقي مهدودة وباقي مابراش كليا....متسوق لتاشي حاجة وداك الشي لي سمع عصبو وجننو ضار جهة بااه ونطق بعصبية وانفعال:فين ناااصر من نهاار فقت مجااش طل علياا فين خوياااا الواليد (خنزر فعادل وكمل بكره) ديك لهضرة مكيناااش ياك الواليد
ح.إسماعيل:(تزير وبانت فعينيه وبصوت تقيل قال)ولدي سمع خووك ربي بغااه دعي معاه بالرحمة
حرك راسو رافض داك الهضرة لي خرجات من فم باه...ولكن بكاا مو وخولاتو خلاوه يزيد يتزير كان تيبعد ويعرج مباغيش يتقبل لهضرة لي تيگولو عطاهوم بالضهر غادي جهة جناح ناصر...عقلو ومقال ليه ديك الساعة تايشد فالحيوط تاطلع وباه وراه شاد راسو بزز وموت ناصر هرسو ومكانش ساهل على تاشي واحد يتقبلو... طلع لفوق ونيشان بيت خوه مع حلو بدا يضور راسو ويعيط ليه بلهفة:نااصر ناااااصر خويااا ها أنااا جيييت
بدا تيقلب عليه ويحل باب لحمام بحال شي هبيل تيگول هاهو غايبان ليه كيف ديما فاش تيجي من القرايا برا تايلقاه هنا ولكن هاد لمرة مالقاهش قلب عليه ومبانش ليه... ضار شاف فباه لي كان واقف وبدا كيحرك راسو لا وعينيه عمرو بالدموع ونطق بصوت خافت: خوياا فين هو؟مشى مع مرتووو ياااك؟؟؟
كان بحال شي وليد صغير وهو كيسول على خوه وشوفة باه لي دار فيه خلاتو يفهم بلي هضرة عادل بصح وبلي خوه مشى ومبقااش غايشوفو...حس بقلبو فديك اللحظة تزير عليه وتخنق وبدون سابق إندار طاح الأرض وهو جامع يديه وكيضرب فالأرض ومزير على عينيه مقادرش يتقبل فكرة أن خوه ماات وهو محاضرش لجنازتو... قرب جهتو باه وجلس قفازي وعنقو وفالحقيقة باه هو لي كان محتاج لديك التعنيقة كتر من نوح...وبداو يبكيو بزوج بحال ولاد صغار... يكدب عليك لكداب لي يقول ليك الرجال ماخصهومش يبكيو... لبكا ماشي عييب ولاشفتي شي راجل كيبيكي عرفي واصلة ليه لعضم...بزوج خسرو شخص مهم وغالي على قلبهوم ناصر الإبن والأخ والصديق وجميع الصفات لي مجموعين فيه خلاتو يكون قريب لكلشي...مكاينش لي عارف ناصر ومتأترش بموتوو... فمابالك خوه لي كان أقرب واحد ليه...
نوح:(شاف فباه ونطق بصوت مبحوح) بغيت نزور قبرو
ح.إسماعيل:خصك اولدي ترتاح يالاه خرجتي من السبيطار
نوح:(ناض بزز ونطق بنبرة مافيها نقاش) غانمشي ودابا
تنهد باه ومكان عندو مايدير من غير يشد يديه وينزلو غاديين لمقبرة..لقاو كلشي لتحت كيتسنى وبالهوم معاه أما هو تخطاهوم غادي تيعرج...ركبو فصمت وشد بيه باه طريق المقبرة تاوصلو ونزل وشد فيه غادي بيه لقبر خووه... كان تيحس بتبوريشة طالعة معااه وغير وقفو قدام قبر ناصر وقرا سميتو تما فشل نوح وماقدرش يكونطرولي راسو...جالس تيعنق فالشاهد بحال لاكيعنق خوه ويبكي مخلي باه تاهو يبكي معاه... ماقدرش يهضر حيت لهضرة ديك الساعة مكانت عندها فايدة... حاس بالغصة فحلقو ويديه كيرجفو عليه وكيتخيل غير منظر خوه وكيف شافو اخر مرة غارق فدمو... اخر لحظة يشوف فيها خوه كانت هي هاديك ومع الأسف ماودعووش مشى وغفلو غفلة خايبة...
🔜🔜
حبس الطوموبيل جنب الطريق ونزل الزاج وبدا كيتنفس بالجهد... حس براسو تخنق فاش تفكر ديك الدكرى لي عمرها تمحات فبالو... موتو غفلو والحرقة ديال أنه مات وماحضرش لجنازتو عمرو ينساها...عينيه كانو حمرين كيف الجمر بدا كيسوط النفس ويزفر بصوت مرتافع والضبابة بدات تبان ليه...عرف راسو طاح ليه السكر تاني وحل مجر واخد شكلاط تايحطو تم لضرورة...حلها وكلاها ورجع راسو لور مخلي لهوا يضرب فوجهو تاحس براسو مزياان عاد تحرك وماحس براسو تكان شاد طريق لمقبرة...دخل بخطوات تابتة حافظ طريقو بقوة مكان تيجي يزورو كل مرة...وصل قدام قبر خوه وبقا واقف تيشوف فيه...عاد هز يديه تايقرا ليه لقرآن بصوت مسموع ومتخشع...سالى وهز ديك الفوقية وجلس قفازي تايشوف فالقبر بسهوة... مدة وهو ساكت فجوفو بزاف دلكلام باغي يقولو ليه ولكن اللسان باش يهضر كايتشل مجرد مكيحط رجليه هنا... مد يديه تينقي ليه لقبر وضور راسو جهة لبراهش لي تم كيهزو قراعي دلماا شير لواحد فيهوم وجاو عندو زوج تيجريو خدا من عند كل واحد قرعة وخلصهوم بالزايد وبدا تيسقي ليه لقبر أو وقف تيشوف فيه مدة قبل ماينطق بصوت خشن مبحوح: أمانتك عمري نفرط فيها...
تنهد وهز لقرعة لي بقا فيها لماا وتحرك غادي لداخل فاتجااه قبر باه لي كان فلداخل...هنا كاينين زوج ناس غالين على قلبو خلاو فراغ فحياتو وخلاو فوق عاتقو مسؤولياات...وصل لقبر باه وتاهو نقااه وسقاه وقرا ليه القرآن عاد خرج من المقبرة غادي يقضي غراضو فسكاات...وصل لدار ونزل مبلاصي طوموبيل بلاصتها ودخل بتعب نيشان لصالة جلس فوق السداري وحط راسو على الحيط مغمض عينيه وعقلو خدام... مدة وهو هاكا مكونسونطري تاسمع تلفونو صونى بنغمة رسالة وجبدو لقاها رحيل مسيفطة ليه فلواتساب ✉️ نوحينو وصلتي لدار ؟
نوح:✉️ اه
رحيل:جاابو لفراش؟
نوح:✉️باقي أنا كانتسناهوم
رحيل:✉️ (سيفطات ليه تصويرة ديال كريشتهاا وهي لابسة واحد لكومبين مزيرة ومبين كرشها ودايرة عليها قليبات وكتبات ليه ) لعسيلات لاعبين ماتش 🫰
نوح:✉️(تبسم وهو كيزومي على تصويرة) غايطلعو كوايرين من الصغر
رحيل:✉️ هههه بحال خالهوم محمد طه
نوح:(دوز ليها أبيل فيديو وناض غادي لكوزينة غير تفتح لخط وهي تبان ليه مكسلة فوق النموسية وجامعة شعرها كوتشوفال ودايرة گصيصة حمقاتو وماكرهش كون كانت جنبو...حك لحيتو ونطق بخشونة) عارفة حسابك غادي وكيتقال؟
رحيل:(ضحكات بدلع وقالت وهي كاتفرفر عويناتها) علاش شنو درت؟
نوح:(حط التلفون فوق البوطاجي مكاليه ومشى يخدم لماشين دلقهوة ونطق بصوت عالي باش تسمع) تانشدك وغاتعرفي اش درتي
رحيل:فخبارك خصني مواعن جداد
نوح:(واقف قدام تلفون وحط يديه فوق البوطاجي) داكشي حالو ساهل باقي صالة وحدة تفرش وغانجيو نسكنو هنا
رحيل:اه والرياض؟
نوح:مرة مرة غانمشيو ليه ضروري
رحيل:(حركات راسها بتفهم) نهار غانتحولو غايخصني ندير عراضة لعائلة
نوح:تانرجعو من فااس خصني نسبق بعدا هاد لبلان ونحيدو عليا
رحيل:واش غانمشيو غير أنا ويااك ولاتاخالتي غادة؟
نوح:ماعرفتش نشوف لاكانت باغا تمشي ؟
مشى طفى لماشين دلقهوة وخدا الطاس كيشم ريحتها عاد جغم جغمة ورجع هز تلفونو ومشى جلس فالكرسي لي تم..
رحيل:(كاتفوه) فيا النعااس وضهري عاطيني لحريق
نوح:(كمش حجبانو) فيك الحريق بزاف؟
رحيل:شوية راك شفتي الطبيبة قالت ليك حاجة عادية حيت التقل وعطاتني دواا مبغيتش ناكلو
نوح:نعسي وارتاحي لبارح أصلا مانعستيش مزيان
رحيل:اه غانعس مهم فاش تساليو لنسطالاسيون دلبيوت صورهوم لياا واخاا نخليك دابا بونوي
سيفطات ليه بوسة وهو غمض عينو وتبسم ليها بلخف قبل مايقطع...كمل قهوتو وغير سالى صوناو عليه مالين لفراش تيعلموه بلي راه وصلو...خرج لعندهوم وبان ليه لكاميو كيتأنسطالى قدام لباب ونزلو دراري تايهبطو فالفراش وهو وراهوم لبيوت فين غايحطو داكشي..غير سالاو لحطان ديال لفراش ودازو لانسطالاسيون يقادو كل حاجة وهو تيوريهوم فين يحطوو كل حاجة بلاصتها... غير سالاو وكملو داكشي لي بقا عاد تهنى نوح من جهة البيوت دسيدرا وزين العابدين...مشاو وهو رجع طلع تيشوف فلبيوت لي كانو من دوقو صورهوم وخرج من الدار... كانت الدنيا خوات والليل...شد طريقو لرياض تاسمع تلفونو صونى بنمرة جدو...
نوح:الحاج على السلامة
ح.لحسن:الله يسلمك اولدي فينك؟
نوح:كنت فالدار الجديدة كملت فراش لبيوت ديال الدراري باقي مناوينش تجيو؟؟
ح.لحسن:واحد ليوماين ونجيو
نوح:صافي غاتكونو هنا قبل الأحد حيت غانطلع لفاس نقضي ليازيد شي شغاال ونيت يبدلو الدراري الجو
ح.لحسن:اوا عرفتي شنو خلي تاترجع من فاس ونجيو
نوح:(كمش حجبانو ونطق بهدوء) علاش اجيو نمشيو كاملين؟
ح.لحسن:غير خليها اولدي تااتجيو ونيت نتسنى نجيب معايا الزيت ملي تعصر
نوح:وانتا تعرف الحاج اه نسيت نسولك شنو درتي باقي فالأرض لي شريت ليك واش نضيتي شغلها؟
ح.لحسن:(بقا كيتلعثم ونطق بصوت عالي)هاا راه خدامين فيهاا اولدي ألو ألو و ولدي نوح كاتسمعني
نوح:(كمش حجبانو)اييه كانسمعك الحاج
ح.لحسن:الريزو تقيل ألوو
بقا تيردد ألو تاقطع ونوح هز حاجبو لسما وعاود صونى عليه مرة وزوج مكانش تيجاوبو وهنا جاه لعجب... الريزو دغيا مشى مامولفاش ليه...بقا شوية وعاود صونى ليه وهاد لمرة جاوبو..
نوح:أمدرا تقاد الريزو؟
ح.لحسن:اييه شوية وصاف
نوح:الأرض فين وصلتي فيها مشات ليا من بالي نعيط لدراري نسولهوم كيف غادة الأمور؟
ح.لحسن:(نطق بسرعة) ماتعييطش اه زعمة مكاين لاش تعيط غير خليني راني راد معاهوم لباال ماتهزش لهم لمهم اولدي بسلامة تانجيو نشاعلاه..
سكت نوح ومع جا يقطع سمع صوت جداه وعلى مايبدو أن جدو خلى لابيل باقي مطلوقة بالغلاط...
زاينة:(بالسوسية)مفاسورتنيت ايلي يلان؟ "علاش ماقلتيش ليه شنو كاين؟
ح.لحسن:(تنهد) أورتسنت كمين إغيسن رااداغ تنكر تاقورت گراتسن "ماشفتيش نتيا لاعرف غاتنوض القربالة بناتهوم"
زاينة:اوا ايسازا گيس تسكاركست هاان رادياوي لخبار راگيس إيغومو لحال أشكو تحضيت فلاس سلاوانت نتان دعادل ورحملن إينگراتسن "وشنو غاتبقا تكدب عليه راه غايجيب لخبار وغايبقا فيه لحال حيت خبيتي عليه خصوصا هو وعادل مكيحملوش بعضياتهوم"
ح.لحسن:أوا مرازا سكرغ وأوروفيغ أداسينيغ أكال لي يسغا يفكيت أكيس بنوغ فكيغت اعادل باش ايتنازل فالدعوة "وشنو غاندير مقادرش نقول ليه الأرض لي شرى ليا وعطاها ليا باش نبني فيها عطيتها لعادل باش يتنازل على دعوة"...
مكانش لحاج لحسن عارف بلي لابيل باقي مطلوقة حيت مكيعرفش يستعمل تلفون لي كان خدا ليه نوح دلبصماات وكان مولف غير عضيم...عند بالو راه قطعها ساعة راه بقات وهو بدا كيهضر مع زاينة وبالو فكرو فداك النهار وحديتو مع عادل...
🔙🔙
ماخلاش السبيطار من نهار دخل عادل منها بغا يطمن عليه ومنها باغي يشوف اخرة الروينة لي ناضت اش غاتكون... أيام دالصبر دوزها الحاج لحسن تاجاه الفرج فاش فاق عادل وغير جات الفرصة نفارد بيه واخا مو بقات لاصقة فيه ولكن سليمان عرف ليها... كان تيشوف فحفيدو وحالتو لي كان سبابها حفيدو التاني...تاواحد مايبغي يعيش هاد لمشاكيل بين زوج من حفادو واخا عارف عادل وطينتو ولكن تيبقى حفيدو...
ح.لحسن:كيف بقيتي اولدي؟
عادل:(بصوت يادوب كيتسمع)راك تتشوف حالتي وشنو دار فيا حفيدك
ح.لحسن:الله يهديك الله يهديك واش مباغيش تووب نوضتي الفتنة بين العائلة وخرجتي من فمك هضرة ماخصهاش تگال وباقي زايد فيه
عادل:(لي فيه مامهنيهش) علاش كدبت ولاحيت أنا عادل خصني نسكت وديما أنت لي ممزيانش وحفيدك ولد لحاج هو لي على صح
ح.لحسن:لاحول ولاقوة إلا بالله هادشي لي تايقول ليك لقران دماغك راه بزوجكوم حفادي ولكن نتاا حرايمي وأنا عارفك اشداك لمرتو واش هادو فعايل الرجال
عادل:(زاد كره نوح وحقد عليه) لا ولد لحاج هو لي كيدير فعايل الرجاال ياك اوا خليه يفك ديك الدعوة لي غانرفع عليه باش نوريه لحگرة بشحال تقام
ح.لحسن:(خنزر فيه) استغفر مولاك واش باقي زايد فيه الدعوة لارفعتيها نسخط عليك ليوم الدين
عادل:اودي غير سخط أصلا عمرك تسوقتي ليا ديما تجي من جهة حفيدك ولد لحاج
كان عارف لحسن بلي هضرتو مغاديش تنفع عادل حيت لي فراسو غايدرو... واش سخطو لي غايوقفو فطريقو واخا راه غير هددو بيه ولكن مانفعووش..
ح.لحسن:(بقلة حيلة) ماترفع الدعوة ولي بغيتيه نعطيه ليك
عادل:(بقا ساكت مدة كيشوف فجدو وهضرتو خلاتو يسهى وبمكر قال) لي بغيت؟
ح.لحسن:(حرك راسو) لي بغيتي غير ماترفعش الدعوة
عادل:باغي الأرض لي شرا ولد لحاج وعطاها ليك تكتب فسميتي
ح.لحسن:(بأسف) ياخسارة تربية ولدي فيك ملي تصح ونقادو الأمور
عادل:(ببرود) واخا وتالدعوة مغاترفعش اجدي
خلاه لحاج لحسن وهو مهبط كتافو بحزن...مبقاتش فيه الأرض راه تباركالله الخير لي عندو ولي عطااه لولادو راه يفوت داك الأرض لي بقا فيه وهرسو هو كيفاش خلاه حفيدو يطلبو يتنازل وكيفاش هو استاغلو وهنا كيبين ليه لفرق بينو وبين نوح ماشي غير جا ولى عزيز عليه هو عارف نوح يحيد لحاجة من عندو ويعيطها ليه...
🔜🔜
كان تيسمع لابيل وهو مزير على يديه باش شاد لڤولون وحس بدمو كيغلي من هضرة جدو لخرا لي نطق بيها...دابا عاد عرف علاش جدو توتر فاش سولو على الأرض قول هو عطاها لعادل فلمقابل يتنازل على الدعوة لي كان باغي يرفعها ضدو... بقا تيعض فشواربو باغي يطيرهوم...قطع لابيل وضرب الطم مكمل طريقو ودابا عاد فهم لاش خونا مدارش شكاية قول السيد ضمن الأرض أكيد غايكون طلبها من جدو حيت عارف عادل مكيسواش وغاتوصل بيه أنه يلوي لجدو يديه ويستاغلو على قبل مصلاحتو... مشكيل مبقاتش فيه الأرض واخا راه شراهاا بزبالة دالفلوس...وفموقع إستراتيجي وبحال دوك لهمزات قليل فين لواحد كيصادفهوم ولكن كلشي يهون على قبل جدو لي باغي يدير بروجي اخر عبارة على مول...ولكن لي صعرو هو دنائة ديال عادل فاستغلال جدو لي ياحسرة راجل كبير وبلاصة ماهو يشري ويعطيه صدق تياخد منو... راه مايمكنش دابا شحال منيرڤي وعقلو تايزن عليه يمشي يتفاهم معاه ولكن جدو ربط ليه يديه وعاقل نهار لفيرمة فاش هضر مع جدو وكان ناوي يقصدهوم مامسوقش ولكن جدو بقا يرغب فيه وشحال وهو يهضر معاه ويكالميه وهو مرگ أنه يهرس كلمتو وجدو مقامو عالي عندو مايقدرش يخسر ليه لخاطر... على قبلو تكالمى وسكت واخا راه فداخل ديالو مراضيش ولكن على وجه السكة يدوز التران... وعلى وجه جدو دوزها ليه وليهوم... ولكن هاد لبلان راه كعاااه نيت ديال بصح....
نوح:(ضرب على لڤولون ونطق بصوت قاصح كيتحلف)برب لاخليتك تهنى فيهاا اولد لقح*بة لاماندمتك عليها راني ماشي ولد لحاج غار صبرر گاع داكشي لي جاامع ليك غاتخلصو جملة من عندي...
وصل لدار وهو عاقد حجبانو ماهضر مع حد نيشان طلع لجناحو لقى رحيل جالسة تتهضر مع تانيرت رمى عليها السلام ودخل لحمام خلاها غير تاضور فعينيها وتتگول هادا مالو؟؟.. كملات لابيل مع مهاا موعداها غدا تمشي عندها ودوز معاها نهار حيت توحشاتها وقطعات وناضت تشوف مالو...حلات عليه لباب بان ليها واقف ملوي على نصو فوطة وهاز طوندوز تينقس لحيتو...قربات جهتو ونطقات بصوت حنين:نوحينو مالك؟
نوح:(ضار شاف فيها واخا هضر بهدوء ولكن حجبانو لي ضارب بيهوم مية وحداش مبينينو معصب) والو باقي لحريق فيك؟
رحيل:لا مشى غدا غانمشي عند ماما ندوز عندها نهار ونيت يقدر نخرج معاها ونشريو لي باقي خاصني
نوح:صافي واخا غانڤيرسي ليك شي حاجة فلكونط ديالك
رحيل:(حطات راسها على كتفو كاتشوف فانعكاسهوم)دابا لحية جاتك زوينة فاش نقصتيها
نوح:(باسها فجبهتها ناطق بخشونة) بقاي ليا على خاطرك
خرج من لحمام وهي مشات تقضي حاجتها وغير سالات خرجات لقات السيد شاد بلاصتو فلفراش وباين بلي مغاينزلش باقي...
رحيل:مغاتعشاش؟
نوح:تت راسي ضارني نزلي نتي تعشااي
رحيل:(قربات جهتو ونطقات بخوف)نوح مالك؟؟
تاتقيس جبهتو وهو شد يديها وباسها ونطق بهدوء:والو الفتنة فيا غير النعاس
سكتات وخلاتو على راحتو وهو غمض عينيه وشي نعاس مافيه... باقي داكشي لي سمع معصبو ومخليه منرڤي...ولكن أكيد مغايكستش ليه وداباا يردها ليه بالضوبل...
---
فاقت رحيل بكري وجدات راسها وسيدرا وهزات طوموبيلتها غادة لعند مهاا مور ماوصاها نوح ترد لبال لراسهاا ولتلفونها كيف لعادة... كانت تانيرت تتسنى فيهوم وموجدة لفطور لي كيعجب النخشيشة لي فرحات بشوفتها ولوقت كولو وهي مخشية فيها تتعاود ليها شنو دوزات فالرياض وتانيرت تتسمع ليها...
تانيرت:اييه خصني نقيد داكشي لي غانحتاج فسفوف باش نبدا نوجدو
رحيل:باقي لحال اماما
تانيرت:اشمن باقي لحال ياك نتي فالسابع دابا؟
رحيل:اييه قالت ليا الطبيبة راك دخلتي فالسابع
تانيرت:اوا هادا هو لوقت نقيد ونشوف وديك الساعة نمشي نشري لي خص وخلاص راه كياخدو ليد
رحيل:ماتعدبيش راسك بزاف اماما
تانيرت:سكتي أنا عارفة اش ندير وتاأسماء إن شاء الله غير تقرب ونوجدهوم ليها تاهي
رحيل:عگوزتها باقي عندها كنت عيطت ليها نتلاقاو هنا مي مبغاتش تخليها بوحدها
تانيرت:اوا ماعليش مرة خرا اجي مقالتش ليك كيف دايرة الامور بينها وبين إسلام؟
رحيل:اش غانقول ليك شوية وصاف الله يدير شي تاويل دلخير
تانيرت:عوينة وصابتهوم هاتامحمد طه حالتو ديما كيجي معطل فين تيمشي الله أعلم وتاريان حالتو معجبانيش غير ساكت وضارب الطم
رحيل:داك النهار قالت ليا غزلان تبعها محمد طه تال الدار
تانيرت:الزغبي باقي باغيها ماعرفتش علاش طلقو
رحيل:تاحد معارف اش كاين لمهم لاكانو مكتابين لبعضياتهوم راه أكيد غايرجعو يتجمعو
تانيرت:اييه وريان مگالش ليك ابنتي شي حاجة
رحيل:(مباغاش تفضحو عليها قالت)لا لا مگال والو مي غايكون غير مشطون مع لخدمة وصاف
تانيرت:داك السكات والسهو لي ولى فيه ديال البغوو ابنتي ماشي لخدمة
رحيل:هههه اوا سوليه يقول ليك اش كاين
تانيرت:لقيتي لي يدوي ويگول اش تيضرو احيااناا
رحيل:ماتهزيش لهم ولاكانت شي حاجة راه غاتعرفيها كوني على يقين...
على دكر اسمو وقفات طاكسي قادام لاميزون دڤواتيغ ونزل منها ريان وهو مكمش حجبانو...كيشوف قدامو وهو ساهي فالخطوة لي ناوي يدير...سم الله وكمل طريقو وعينو تيقلبو على شي حد لي يسولو تبان ليه خوه محمد طه لي شافو وتعجب..
محمد طه:(قرب جهتو)اش كادير هنا؟
ريان:ولد لحاج كاين؟
محمد طه:اه لاش بغيتيه
ريان:من بعد ونگول ليك فين كاين
محمد طه:لبيرو لفوق اجي معايا
وصلو وخلاه قدام لباب وريان ساط النفس ودق لباب تاسمع صوت نوح وحل لباب وهو راسم تبسيمة خفيفة على شفتو...
ريان:السلام أوعليكوم
ناض نوح مد ليه يديه ورد عليه السلام بتبسيمة خفيفة...كان التوثر لي حاس بيه ريان غريب عمرو حس بيه...
نوح:زارتنا البراكة العائلة بخير؟
ريان:حمدلله يسول فيك لخير
نوح:واحد لواليد اش خبارو؟
ريان:هاهو مشغول فلگاراج
نوح:اوا الله يسهل على لجميع اش باغي تشرب؟
ريان:لا مكاين لاش جيت غير باش ندوي معاك فواحد لموضوع مهم
نوح:(بتركيز)خبار الخير
ريان:(نحنح وشاف فيه بجدية) أنا جيت عندك ليوم على قبل ختك بيسان
نوح:لمعنى؟
ريان:أنا باغيها لحلال وحيت قصدي شريف جيت قاصدك
عم الصمت مور كلام ريان لي كانت الجدية مرسومة على ملامح وجهو وعينو على نوح لي كان ساكت كيتسنى جوابو ..طال الصمت شي لي خلاه يتوثر ولكن مابينش...
نوح:(بنبرة دات مغزى وبصوت حرش قال) ملي قصدك شريف وباغيها لحلال علاش نهار لول بلاصة ماتقصدني أنا مشيتي عندها هي وقصدتي الشرجم بلاصة الباب اولد سي إدريس...
كان واخد قرار الفراق بينو وبين بيسان هو لحل من اخر مشكيل طرا بناتهوم... ماقدرش ينسى ليها داك لهضرة واخا هي حاولات معاه وطلبات السماحة ولكن قصح معاها وجرحها كيف هي جرحاتو... قال مع راسو غانكمل حياتي وهي الله يعاونها اختارت شنو بغات وأنا مغانبززش عليها راسي...ولكن داخليا هو مكانش راضي على هاد لقرار حيت باقي باغيها.. عمرو ينسى ديك الغيرة لي حس بيها نهار شاف عمر وكيفاش تعامل معاها بأريحية وفكرة أنها ممكن طير من يديه راه شعلات لعوافي فالداخل ديالو... كان تيحاول يكمل حياتو وينسى شنو كاين ويتعامل عادي ولكن مقدرش.. عيى مايصبر ويميك ولكن كلما شافها فشي تجمع عائلي تايرجعو دوك لمشاعر لي تيقمع يحياو فالداخل ديالو... وهو لامتى غايبقا هاكا وهو عارف بلي هوما عائلة دابا يعني غايبقا يشوفها كل مرة غايعاود يتكرر نفس السيناريو وهو هادشي مبقاش باغيييه... وخصو ياخد قرار لي مايندمش عليه ولقرار لي خدا هو يطلب يديها لزواج... هو باغيها وعيى من هاد لحالة لي هو فيهاا وعارف راسو مغايقدرش ينساها إذا مغايمرضش راسو ويهلك صحتو وهو عارف بلي كاين لحل... ولكن قبل مايهضر مع ولد لحاج قرر يهضر مع باه هو لول وياخد رأيو فالموضوع... مكانش باغي يدوي معاه فالدار عليها قرر يمشي عندو لگاراج وبالفعل اختار لوقيتة لي عارف باه غايكون بوحدو ومشى...كان داخل تيشوف فباه لي خدام على واحد الطوموبيل بوحدو طالق الراديو كيتسنط ليه...
ريان:(تنحنح) الواليد
ضار إدريس وهو عاقد حجبانو وبدا يمسح فيديه وقرب جهتو مزول نضاضر دالشوف من على عينيه ونطق بتساؤل:رياان ياك اولدي لبااس؟؟
ريان:بخير الواليد غير كنت باغي ندوي معاك فواحد لموضوع وقلت نجي عندك لهنا ونيت تكون بوحدك
إدريس:ياك لبااس اش كاين واقع ليك شي مشكيل؟
ريان:لا لا مكاين تاشي مشكيل
إدريس:جلس وگول اشنو عندك
ريان:(بهدوء وجدية قال) لواليد أنا باغي نتزوج
إدريس:(بتفاجأ) تزوج گاع ؟ هي كاينة شي بنت الناس فحياتك؟
ريان:(حك جبهتو) اه كاينة ونتا تتعرفها حيت من العائلة
إدريس:شكون؟
ريان:خت ولد لحاج بيسان
إدريس:(هز حجبانو بتفاجأ ونطق بهدوء) واش كاتهضرو مع بعضياتكوم؟؟ ولاغير بانت ليك بنت الناس وبغيتي تزوج بيها؟
ريان:(جاه لصراحة) فالحقيقة كنت تاندوي معاهاا غير فالتلفون راك عارف خدمتها مزيرة ومكايكونش عندها لوقت لخروج واخا تلاقينا مرات قلال ولكن غير فشي قهوة وصاف
إدريس:(بجدية)من امتى هادشي؟؟
ريان:تقريبا من زواج رحيل أو ولد لحاج
إدريس:(هز حجبانو) هاد لمدة كلها ونتا سااكت ؟ اجي ختك عارفة؟
ريان:(حس براسو تزير وقال) اه عارفة
إدريس:(خنزر فيه) اتباركالله عليكوم هاد لمدة كلها ونتا مع لبنت ماقلتيش راه ولد لحاج يقدر يعرف ونصدقو فمشاكيل لا وتباركالله على مولات لعقل تاهي عارفة وساكتة
ريان:(بتبرير) لواليد أنا لي طلبت من رحيل تخرج من هاد السوق هي براسها راه عياات ماتوصي فياا وزايدون نيتي مكانتش خايبة جهة لبنت عارف أصلها وفصلها واش فنظارك أنا غانتفلى عليها؟ راه لابغيت نتفلى عطا الله بنات الزنقة مغانمشيش لبنت دارهوم ومن لعائلة من لفوگ
إدريس: ملي يادلي مانيتكش تفلى وكنتي باغي لمعقول علاش مامشيتيش نيشان عند ولد لحاج ودويتي معاه هو لول على الأقل يكون عارف وديك الساعة تعارفو على خاطر خاطركوم
ريان:(مباغيش يعلمو بشنو كاين وفضل يهز الدقة) كنت خايف لامنتفاهموش وراك عارف حنا عائلة
إدريس:اييه وماشتيش نتا لاساق خوها لخباار شنو غايطرا تت (زفر النفس وكمل بهدوء) دابا لهضرة ماعندها فايدة حيت لي جرا راه جرا المهم نتا باغي لبنت ولكن غايخصك تهضر مع خوها وطلبها منو
ريان:اه عارف ولكن گلت نجي عندك نتا لول ونعلمك قبل ماندير لحاجة
إدريس:(شاف فيه بديك الشوفة لي فاهمها ريان) احياااني عليك گول جيتي بااش نفكها ليك
ريان:(ضحك) لا الواليد والله تفهمتيني غالاط وظالمني وأنا بريء
إدريس:كون مكنت تانعرفك ومكنتيش ولدي (هو عارف ولدو واخا طنايزي وفيه الضحك وتيبان راه ممسوقش وضارب الدنيا بركلة الإأنه عارفو كبابل ويتعول عليه وبلعريية تعرابت راااجل..تبسم ليه بهدوء وقال) اجي بعدا لبنت واش تاهي باغااك؟
ريان:(كان عندو تخوف من ناحية هاد الأمر واخا بعض لمرات تيقول اه باغاني ولكن من داك لمشيكل مبقا عارف شنو الصح..حرك راسو بهدوء)اه
إدريس:اوا اش غانگول ليك اولدي المسؤولية لي نتا غادخل ليهاا صعيبة باش تكون فبالك راه زوفري ديالت راسك ماشي هي مزوج وعندك مرا لي غايخصك تكون مسؤول عليها فأي حاجة بغاات.. وزيد فاش تيكونو الدراري راه مسؤولية خراا يعني لاكنتي عارف راسك قدهاا فتوكل على الله ودوي مع ولد لحاج ولاكنتي باقي عارف راسك غاتزگزاگي وتشوف لهيه حسن ليك تميك...
كان عارف هضرة بااه معقولة ومجاتش من فراغ باغي يوضح لولدو أمور يقدر هو غافل عليها ومرادش ليها لبال...قبل مايطيح لفاس على الراس ويصدق جابد مشاكيل بين لعائلات بزوج...اه عارف ولادو وعارف تربيتو ولكن مافيها باش يعاود معاه لكلام بااش يزيد يتأكد ريان من قرارو قبل مايدوي مع ولد لحاج...
ريان:(حرك راسو بهدوء)عارف هادشي الواليد وأنا فاش جيت باش ندوي معاك كنت ديجا مقرر لموضوع وأنا عارف راسي غانقدر نتحمل مسؤوليتو وبلي أنا مقتانع بيه عليها جيت باش ناخد رأيك قبل ماندوي مع ولد لحاج
إدريس:(ضرب على كتفو ونطق بحنية) أنا من عندي اولدي غانگول ليك الله يسهل عليك والله يكمل عليك بالخير أنا معاك فأي حاجة بغيتيهاا
ريان:(تبسم وارتاح)الله يخليك لينا الواليد
ناض باس راسو ورجع جلس وهو مبسم واخا راه متوثر داخليا حيت معارفش شنو غاتكون ردة فعل بيسان خصوصا أنهوم تفارقو.. خايف تقول لا ويصدق محطم كتر ومدمر وفنفس الوقت عندو واحد البصيص من الأمل بلي غاتوافق حيت حاس بلي تاهي كتبادلو لمشاعر وهادشي لاحظو فاش كانت باغا طلب منو السماحة ندامتهاا وهضرتها كاتبين ليه بلي هو مهم ليهاا... تما فين تحبسات الهضرة مع باه وقرر مايعلم حد من خوتو وتامن مو تاايهضر مع ولد لحاج حيت بالنسبة ليه هااديك الخطوة هو لي كيحس بيها صعيبة وماحدو معارفش رأيو مغايقدرش يهضر ويسبق لفرح بليلة ولكن واخا هادشي كولو هو مستاعد لهاد لخطوة وكلشي على قبل زرقة لعيووون لي خلات قلبو مايوليش ديالووو...
رجع ريان بتفكيرو لحاضر وعينيه محلولين على جهدهوم ملي سمع هضرة نوح لي زعزعاتو وبحال لاكبيتي عليه سطل دلما باارد خلاه يجمد فبلاصتو ولسانو يتربط ولهضرة توحل فلجوف مباغاش تخرج...
تيقول مع راسو هو كيفاش عرف زعمة تكون بيسان قالتها ليه... ساط النفس وسرط ريقو بتوثر معارف ملين يبدا باش يوضح ليه ولي زاد وترو كتر هو سكات نوح وتعاملو لهادي لي ماتعرفي اشنو كاين وراه...
ريان:(بصوت هادئ نطق وهو كيشوف فنوح لي كان تيبان مهدن) أنا عمر نيتي مكانت شينة جهة ختك أنا كنت باغي غير نتعرف عليها قبل مانجلس قدامك هاد لجلسة
نوح:(كانت تيضرب بستيلو فوق البيرو وبهدوء قال) كنتي تقدر تجلسها قبل وتجيني نيشان وتگول شنو باغي تعلمني وتخليني نعرف نيتك
ريان:(تزير) اه عندك لحق يمكن غلطت فطريقة تفكيري حيت گلت مع راسي نهضر مع ختك قبل ونشوف رأيها هو لول ( بجدية كمل) ربي شاهد بلي عمري قللت عليها الحياا وبلي هضرتنا كلها كانت تعارف عمري شفت فيها شي حاجة قد هاكا دلعيب بنت الأصل مربية وصاينة راسها.. وهادشي لي خلاني نزيد نتعلق بيها...
نوح:(بكلام دو معنى نطق ولعين فلعين ولسان راه كينسج فخيوط لكلام) لحلال ديما ربي كيسر فيه ولحاجة لي كاتكون بتخبية عمرها تتكمل ولابدمايجي نهار وتقطع من الجدر
حس ريان بلي نوح حشى ليه لهضرة واخا راه كلامو معقول... وهو نيت شاهد على هادشي وشاف العلاقة كيف كانت اخرتها ولكن ماشي دنبو هو حيت من لول ونيتو كانت باينة وصارحها بيها وهي لي مبغاتش وهادشي ميقدرش يقولو لنوح ويخسر صورتها قدام خوهاا... مباغيش يگول ليه راه ختك لي مبغاتش نهضر معاك عليها فضل يهز الدقة ويسكت...
ريان:كلامك معقول هادشي علاش لحلال عندو قيمة كنعتارف بلي غلطت فاش گلت نسبق ختك ونشوف رأيها وخليتك نتاا ولكن كيف گلت ليك قبل نيتي ربي لي عالم بيها وقصدي مكانش خايب جهتها
نوح:(بصوت حرش كولو رزانة) ماگلتي عييب جيتيني نيشاان ومانكرتيش وهادا لمضمون فيك ولكن هادشي مكيعنيش راه دوزتها ليك اولد سي إدريس كنت نقدر ندوي نهار عرفت بلي كاين من نهار عرسي بختك وأنا على بال ولكن سكت وميكت باش نشوف اخرتها فين غاتوصل عيني كانت عليك وعليها واخا راني عارف اش مربي..
صدمة خرا تصدمها ريان فاش عرف بلي السيد كان عايق من عرسو يعني ملي بداو تيدويو مع بعضياتهوم وهو عند بالو راه معارفش فهاد اللحظة حس ريان بالشمتة ومغاينكرش بلي صدمو نوح صدمة عمرو ينساهاا...
ريان:من حقك دير لي بغيتي انا قابل بيه ومغانلومكش حيت تأنا كون كنت بلاصتك ندير نفس الشي
نوح:(تحدر لقدام دلبيرو وشاف فيه مدة بنظرة دات مغزى) اوا على هاد الحساااب أنا ماعنديش بنات لزوااج...
عند المعنية بالأمر كانت كيف عادتها جالسة فبيروها ونضيضرات فعينيها تاتشوف فالضواسى لي قدامها بعقل غااايب ماهوش هنا... ماعرفاش مالها تاتحس بنفسها ضايق عليها ومخنووقة وبعض لمرات تاتحس براسها باغا تبكي... حيدات نضاضرها وبدات تتمسد عينيها وتاتنفس بالجهد...ناضت جهة الشرجم حلاتو أو وقفات تاتنفس وتتفكر فهضرة مها على رياان... ماعجبهاش الحال كيفاش عيراتو ونفس ضرباتها عليه واخا راه مابقا بيناتهوم والو ولكن القلب مراضيش يسمع هضرة ناقصة على مولاه داكشي علاش ضرها خاطرها... تبسمات بسهو وهي كاتفكر لفترة لي كانو فيها مع بعض كانو أحسن أيام حياتها ومغاتنكرش هادشي...مغاتنسااش كيفاش كان تيعاملها وراد ليها لبال وفاش كان تيجيب ليها لعشاا وهضرتو واهتمامو صراحة خلى فرااغ فحياتها لي ولات تاتحس بيها مملة ولاجديد فيها طلع ليها السبيطار فراسها ومكرهاتش تشد كونجي غير محدود تمشي تبدل الجو وتخوي مراكش لفترة كبيرة... تفكرات لكابيني ديالها لي كملات ولي غايخصها فقط تحول ليها هاديك لحاجة لوحيدة لي مخلياها تصبر راسها وتفرح حيت حلمها صافي تحقق... هزات تلفونها تاتشوف فيه وعلى عكس شحاال هادي كانت تتلقاه عامر غير بمسجاتو وبأبيلاتو ولكن دابا تتلقاه خااوي... ملي كاتلقاي اهتمام من طرف اخر وكاتولفيه نهار كيمشي داك الاهتمام تيكون صعيب عليك تولفي الأمر وخصوصا لاكنتي بغيتي الشخص لي كيهتم بيك بحال بيسان لي معرفات راسها بغاتو تافات لفوت...ندمات وعضاات فالندامة وكون تصيب ترجع لوقت لور كون دارتها ولكن ماتمشي غير فيما مشاك الله وهاد الشي لي طرا معاهاا فيه خير حيت كون ماتفارقاتش معاه مكانتش غاتعرف راسها تتبغيه وتعرف قيمتو... رجعات التلفون لجيب لابلوز ورجعات لبيرو بهدوء تكمل خدمتهاا لي ماخصهاش تهملها حيت هي دابا ولات مسؤولة على حياااة نااس... رجعات لبسات قناع الهدوء والجدية ومع هزات لملف تحلو سمعات الدقان فلباب لي تحل ودخل عمر...شافت فيه ببرود من اخر بلان دار وهي تادير بينها وبينو حدود باااش يفهم راسو..
عمر:(بجدية)نقدرو نهضرو
بيسان:عندي خدمة ممسالياش دابا
عمر:علاش كاتهربي مني ابيسان واش أنا غلطت فحقك؟
بيسان:مكانتهربش منك إنما نتا لي فتي حدودك معايا هادشي لي خلاني نعاود نرسم دوك لحدود باش ماتفوتهومش مرة خرا
عمر:(قرب لعندها تاوصل جنيها وحط يديه على لبيرو وتحدر جهتها) نتي عارفة بلي انا معجب بيك هادشي علاش فت حدودي معاك
بيسان:عمر أنا وياك جمعانا خدمة وبس أما حاجة خرا عمرها تكون
عمر:علاش كاين شي واحد فحياتك؟
بيسان:ماشغلكش يكون ولاميكونش لي عندي قلتو احتارم راسك واخر مرة تصرف بحال هاد التصرفات
عمر:(مرضاش) نحتارم راسي واخا الالة ماقلتي عيييب
خرج زادح الباب وراه خلاها تاتخنزر بوحدها...حاولات تسايس وتبعد باش ماتجبدش لعيب ساعة هو لصق إذا يتحمل...جاتو نيشان ولي عندها قالتو أما عمر فكان غادي فلكولوار مراضيش بتصرفها معااه لي تقلب من داك النهار لي تعشاو فيه بزوج... كاتعجبو وجاتو على لگانة ولكن تصرفها دابا وكيفاش قللات منو خلاه يتعصب منها وديك لعصبية خلاتو يندافع فداكشي لي غايدير...
----
خنزر ريان وبلامايحس ناض من بلاصتو بحال لاعضاتو شي لفعة وفكرة أنه مقابلش بيه وبلي بيسان غاطير من يديه خلاتو يجن وينطق بسرعة بدون مايحس على راسو: عارف بلي من حقك تعصب ولكن هادشي مكيعنيش ترفض بلاماتعطيني فرصة ليا تعرفني وتشوف بلي كلامي لي گايلو ليك قاصدو بيسان عندي مهمة بزاف مانقدرش نعيش بلابيهاا باااغيهاا ليا اولد لحاج عليها جيت لعندك ندوي معااك ونطلبها منك على سنة الله ورسوله
نوح:(بهدوء مد ليه قرعة دلما ونطق بصوت أجش) هاك روي عطشك راه بنتي ليا شوية وتجيف
ريان:(بصدق) غانتجيف لاماقبلتيش نتزوج بختك
نوح:(حرك راسو ونطق بهدوء) بنتي ليا طايح على زنافرك اولد سي إدريس (لاح ليه القرعة تاشقمها وقال بجدية) جلس ندويو فالمعقول
جلس ريان وشرب من ديك لقرعة وحيت بصح حس بريقو نشف مجرد ماسمع رفض طلبو بينما نوح ربع يديه وكمل:نتا جيتي قصدتيني ولمقصود الله گلتي لي عندك وهادشي لي عجبني فيك صراحتك ونيتك لي باينة فكلامك وأنا مغانردكش حيت نتا ولد الأصل وعارف لمعدن ديالك وفين كاابر... وبغيت نشوف واش نيت متشبت بهضرتك ولا لا ولكن ماعندي مانساالك راك تم سمع كلامي وحل معايا ودنيك حيت هضرتي مغانعاودهااش ولي تگال هنا دخلو لراس وقيدو بيسان راه ماشي غير ختي هي راه بنتي مني وفيا عارفها اش تتسوى ونهار عرفتك تادوي معاه كان فيا مايهضر ويحبسها عليكوم ولكن أنا تايق فختي وعارفها مغاديرش شي حاجة لي تحشمني مربية وعارفة الشين من الزين وتقتي فيها مايوزنها تاميزان.. عاشت حياتها وعولات على راسها ودارت مستقبلها وهادشي لي باغي جيتي عندي وگلتي لي عندك وتاأنا غانگول لي عندي (خنزر فيه وهز صبعو السبابة والإبهام ) لاضريتيها غير قد هاكا غاتشوف مني لي عمرك شفتيه على هادشي غانوصيك صونها وخاف الله فيها ولاجات تشكات منك غير بكلمة غاتلقاني أنا فوجهك كلامي واضح
ريان بقوة الصدمة بقا غير تيحرك راسو بااه ساكت ونوح كمل بهدوء وتبات:ودابا لكلمة لخرة غاتكون ديال مولات الري والشوار..
يتبع...
التعليقات
لا توجد تعليقات بعد، كن أول من يعلق.