الجوهر الحر الجزء 51

فالجناح عند نوح لي دوش بالخف ولبس عليه شورط مع لبيت فيه لكليما مكيكترش لحوايج بزاف.. حدو دار فاصمة لداك لحاجب مور ماعقم بلاصة جرحة.. كان هاز حاجبو وهو كيشوف فالساعة وكيتسناها تجي.. لبس عليه تقيشرات صغاار بيضين وبقا غادي جاي كيتسناها وغير شافها تعطلات لاح عليه فوقية وخرج من جناحو غادي لبيت سيدرا.. حل لباب ولقى الإضاءة خفيفة قرب بلخف وبانو ليه بزوجات ناعسات فحظن بعض.. تنهد وقرب جهة رحيل تايقيس حنكها بحنية تاحلات عينيها وشافت فيه وهو يهمس ليها بخفوت:نوضي نعسي فبيتك

رحيل:(ببرود)غانعس هنا غير سير

نوح:(هز حاجبو)نوضي ارحييل

رحيل:(شافت فيه وهي مكمشة حجبانها)باغا نعس عند بنتي واش ممنوع؟

نوح:(لعب بلسانو ففمو)لا ماممنوعش (تحدر جهتها ونطق ببرود)ماعليش نعسو كاملين هناا

رحيل:(غمضات عينيها فاش حسات بيه تخشى وراها وعنقها من كرشها تاخلى ضهرها ملاصق مع كرشها.. تململات بين يديه بانزعاج ونطقات بخفوت) غير سير نعس فلبيت

نوح:(خشى راسو فعنقها ونطق بهمس كالفحيح)مالك هازة عليا خنافرك لسما؟

رحيل:(عضات على شفايفها وقالت بصوت خافت) عياانة وبغيت نرتاااح

نوح:(تهز شوية تاطل على وجهها وقال بنفس لخفوت)تاتكدبي عليا الفتنة ؟

ضارت شافت فيه وفجوفها بزاف دلكلام ولكن مباغاش تخرجو دابا قدام سيدرا.. حاسة براسها معصبة معرفاش شنو السباب...ناضت من بلاصتها تاتلبس فصندالتها ولاحت عليها زيفها وخرجات من لبيت.. مسح على وجهو تايسوط ويستغفر مولاه وتحدر باس سيدرا لي سارحة عجول ومحسااش بشنو كايضور حداها.. قادها عاد خرج غادي عند الفتنة ديالو يشوف مالهاا معصبة.. ونيت يتفاهم معاهاا على خروجهاا.. دخل وزول لفوقية حاطها فوق لفوطوي عاد حل لباب دلبيت وبانت ليه خارجة تاتسد لبنوار وهي عاقدة حجبانهاا..

نوح:(شدها من يديها ونطق وهو مكمش فيها حجبانو) مالك؟

رحيل:(حيدات يديها ونطقات بهدوء) مالي؟ (تاهضر وتحرك يديها)معاااارفش مااالي ياااك ؟ (عينيها تغرغرو ونطقات بصوت خافت)علااش مشيتي ضربتيه واش مخفتيش على راااسك

نوح:(بجدية)باش يتعلم يحتاارم غيرو ويعرف اش تيخرج من فمو وزايدون اجي نتي لهناا (خرج فيها عينيه وجرها من البنوار وقال بحدة) علاااش خرجتي لزنقة وسط الرجاال

رحيل:(عضات على شفتها وقالت هي تاتشوف فيه) حيت خفت عليك بزااف مابغيتش شي حاجة توقع ليك

نوح:(خفف حدة صوتو وقال بهدوء) ماتخرجيش خليتك فدار بقاااي تم واخا طييح الرووح مانلقااكش خارجة أو واقفة لياا وسط الرعوانين (عض على شفتو) لاقلت ليك لكلام بقاااي تسمعيه ارحييل ماتكونيش عنيدة حيت لعنااد مكينفعش معايا وأعدى حاجة عندي هو لي يقصح الرااس ومايكونش تايسمع لهضرة هاد لمرة غاندوزوها بحال خوتها ولكن ماتعاودش سمعتي

حركات رحيل راسها وحدرات راسها وهي تاتمسح دوك دميعات لي نازلين ليها بزز.. كمش حجبانو وقرب جهتهاا كثر ومد يديه تحت دقنها وهز ليها راسها تاتقااابل مع وجهو ونطق بهمس خشن:أي مشكيل وقع بناتنا كيفما بغا يتحل بناتنا (هز حاجبو)وداك عزيل لفرااش ممعنااش لاجاا كل واحد يعزل فراشو على الثاني فكل تخاصيمة بقينا هناا تعصبي وتقلقي ولكن ااخرتك فكل ليلة تنعسي بين يدياا

رحيل:(حطات يديها على حنكو تاتغلغل يديها فلحيتو) مكنتش قاصدة نعزل فراشي عليك غير كنت مقلقة منك وصااف فاش سديتي عليا لباب دطوموبيل ومشيتي تخلعت بزاف وخفت (زفرات النفس)حسيت بلخنقة فاش تسد لباب وقلبي تقبط عليا

نوح:(باسها فدقنهاا ونطق بخفوت) سديت عليك حيت عارفك غاتبغي تبعيني وبالي مغايتهنااش لامطمنت عليك

جرها وجلس فوق النموسية مجلسها فوقو ويديه شادة خصرها وليد الثاني تيحل ليها شعرهاا وطلقو ليها.. مكايبغيش ملي تكون معاه تجمع شعرهاا تايعجبو مطلوق ويغلغل فيه يديه ويشم ريحتو لي تاتخليه منشوي.. شد خصلة وجرها تايشم فيها بحال شي واحد تايتدروگاا..

نوح:(تمتم بخشونة وعينو على شعرها)شلال لعسل

(رجع شاف فيها وهو منيم فيها عينيها) علاش مغلفة ليا بهاد لبنواار

تبسيمتها عاد رجعات ملي تصغاو لخواطر وبجرأة حلات لبنوار وزولاتو.. كانت لابسة دباردو بلاسوتيان وسروالها ستان فالكحل..

نوح:(تبسم بلخف ونطق ببحة رجولية)هاكا مزياان ولاحيدتيهوم گااع مخيرة

ضحكات رحيل بخجل وحنيكاتها حمارو.. تيعجبها جرئتو فلكلام معاها ولسماتو لجسمها وكيفاش تيخليه يتخدر ويتبنج تحت يديه.. تحدر جهة عنقها وباسها فوق قرجوطتها تاحس بيها تحركات تحت شفايفو سخان وهي تاتسرط ريقها.. حط شفتو تما وبقا تايتنفس أنفاس ساخنة كيضربو جلدتها ويحرقوهاا.. كلما قاسها تاتحس بيه بحال لأول مرة.. مكتسخااش بيه وبلمساتو ليها فكل مرة.. هز راسو تايشوف فيها لقاها عاضة على شفايفهاا.. حط إبهامو عليهوم وبقا تايلمسهوم تاتأوهاات ليه بين يديه وحلات شفايفها وعينيها مغمضاهوم.. جسمها خانها وخرج عن طوعو.. تبسم بلخف وقال بهدوء:حلي تيوالين ديالك

شافت فيه وهو قرب جهة شفايفها ونطق بهمس محموم:كون تشوفي اش كديري فيا هنا (حطي يديه على قلبو)يضرك خاطرك الفتنة..

حلات عينيها وهي حاسة براسها مهدودة وعياانة.. كانت بوحدها لي ناعسة وسط لفراش مدات يديها جهة بلاصة نوح وقاستها لقاتها باردة عرفاتو فاق بكري على ود لخدمة واخا لويكاند..هزات يديها وخدات تلفونها من فوق لكوافوز شعلاتو وشافت فالساعة كانت لحداش.. دوزات لخط لنوح وهي باقي مفطحة فبلاصتها تاتحك عينيها وتفوه..

رحيل:(بصوت مبحوح بالنعاس) نووح

نوح:(بصوت خشن) االغتنة ديالو يالاه فقتي؟

رحيل:هممم حاسة بعضامي ضاريني بزاف وراسي غايتشق

نوح:(كمش حجبانو بجدية) دابا نجي نديك لسبيطار نشوفو مالك وجدي راسك

رحيل:(تقدات فجلستها دايرة سبيكر وتاتجمع فشعرها)لا لا مكاين لاش غير لعيا دلبارح رجع ليا وصااف

نوح:متأكدة؟

رحيل:اه الاكانت شي حاجة راه غانعلمك مهم أنا غانمشي لدارنا ليوم نتغدا عندهوم ونيت نشوف لبنات فين وصلو فتوجاد راك عارف مبقا والو لعرس

نوح:واخا سيري وردي لبال لراسك (وبجدية)وتلفونك ردي ليه لبال نصوني عليك جاوبي

رحيل:واخاا اه يقدر نخرج مع لبنات لاخصاتهوم شي حاجة يتقداوها

نوح:سيري المهم ردي ليا لبال لراسك نخليك دابا عندي لخدمة وميصلاحش ندوي براحتي

رحيل:واخا بسلامة

قطعات وناضت تاتسد داك لبنوار لي لابسة على لحم.. هوات لبيت وناضت تاتجمع لحوايج لي مليوحين الأرض هو وكلينيكس لي كبات عليه لما فلشاس عاد رجعات بدلات لغطا ديال النموسية وقداتهاا ومشات لحمام تاخد دوش تنعش بيه روحها وعضيماتها.. خدات وقتها فدوش وخرجات ملوية فبينوار وشعرها ملوي عليه فوطة.. هزات واحد لگام جديدة حلاتها وبدات تاطلس فكريم دات ورشات سبراي على داتها لي ريحتو كانت منعشة وزوينة.. شافت انعكاسها فلمرايا كلها مطبعة ماخلى فيها تاقنت ماطبعوش بقبلاتو.. تبسمات فاش تفكرات ليلة لبارح وكلامو ليها لي فكل مرة تايخليها ترفع وطير فالسما بحال شي حمامة.. لبسات عليها حوايجها وقدات زيفها واكتفت غير بچلوس وصاف.. هزات صاكها وخرجات مسورتة الباب دالشومبر ومشات لبيت سيدرا تشوف واش فاقت لقاتها فايقة وباقا ببيجامتها..

سيدرا:(عنقاتها)مامي

رحيل:فقتي بكري امامي؟

سيدرا:اه فقت أنا وماي بلو آيز وفطرنا بزوج مامي

رحيل:بصحتكوم امامي يالاه نلبسو حوايجنا باش نمشيو لعند جداك

نقزات سيدرا بفرحة ومشات تاتجري سبقاها لدريسينغ ورحيل وراها تاتبسم.. فلتحت كانو مجمعين على كويس دأتاي وهضرتهوم غير على شنو صرى لبارح والشوهة لي تشوهو.. طامو باقي الفقصة شداهاا والخلعة على اليازيد لي معرفاش فين طج البارح كولو وهي تاتعيط ليه مكيجاوبش وفلخر طفى تلفونو وباقي لدابا مطفي..

سعيدة:(بفضول) بغيت غير نعرف لبنت علاش هربات ويلي ياختي كانت مزيناتهاا وتواتات هي وياه

جليلة:اوا هاهي فلخر هربات (شافت فطامو)فين اليازيد اخالتي واش مقال ليك والو

طامو:(تفقصاات ونطقات معاجبها حال) ولدي شي عين خرجات فيه كان مزيناتو ناشط وفرحان تاتقلب فرحو

على كلامها دخلات سناء وهي مأنتكة كيف عادتها وطالون لي مكيخطاهاش.. جلسات وباينة من وجهها مرتاحة ومعلبالهااش.. كبات ليها رحمة كويس دأتاي وشداتو من عندها..

سناء:(شافت فرحمة)بيسان خدامة؟

رحمة:تال ليل عاد غاتخدم راه ناعسة كترتاح

سناء:ورحيل؟

رحمة:(جاتها عجب حيت تاتسول عليها وبهدوء جوبات)واقيلا تاهي باقي ناعسة

سعيدة:عروستك ارحمة شفتها معگازة واش كاين لي يجي عندو الضياف وينعس تال هاد لوقت حشومة گااع

سناء:(ببرود)واش حتى النعاس غاتشاور معاكوم فيه؟

سعيدة:متشاورناش ولكن بنادم يكون عارف الصوااب

سناء:صواب ههه هادشي لي خصكوم تعرفوه نتوما لي جالسين تنممو فالسيدة فقلب دارها أما هي راه دايرة صوابهاا وزيد لاعرف ولد لحاج بلي نتوما تادويو على مرتو هاكا مغايعجبو حال وراه شفتو بعينيكوم تسيفتو لباارح

رحمة:(نطقات بهدوء) سناء عندها لحق اسعيدة هاد لكلام لاسمعو ولدي ماحنا فخيير

سعيدة:(ميقات ومعحبهاش حيت ضوروها)اوا أنا غير هضرت وصاف

سناء:وزني هضرتك ومغاتلقاي تامشكيل

طامو:(سكتات تاعيات وهي تنقز) اش قلتي ليازيد لبارح تاتعصب ومشى مخليناا

سناء:(هزات فيها حجبانها)داوية معايا؟

طامو:اييه سايرة ندوي معااك اش قلتي ليه ولهضرة لي سممتيه بيها كيف عادتك معاه

سناء:(معجبهاش هضرتها)ولدك معصب حيت لعروسة لي فرحانين بيها ومكبرين بيها خلاتو فلبرزة وسلتات ماشي بكلامي وزايدون هضرتي قلتها لولدك نتي ماعندك لاش تعرفيهاا اعمتي

لوات طامو شنايفها وسكتات فاش شافت رحيل داخلة لابسة حويجاتها وشادة يد بنتها لي تاهي ملبساها حويجات دبرا..

رحيل:(بتبسيمة خفيفة)سلام أوعليكوم كيف صبحتو

ردو عليها كاملين ومبسمين بنفاق عكس هضرتهوم عليها قبيلة..

رحمة:خارجة؟

رحيل:اه غانمشي لدارنا راك عارفة اخالتي العرس مبقا ليه والو وخصني نوقف مع لبنات

رحمة:واخا غير سيري وسلمي عليهوم

رحيل:مرحبا بسلامكوم يالاه خليت ليكوم الراحة

غير تحركات خارجة من الصالة وهي تنطق طامو:شكون غايتزوج؟

رحمة:خوتها بزوج ولبنت لي معاهوم سميتها غزلان

طامو:(كمشات فمها)اييه ديك لي كان غايخطب ولدي..

هزات سناء حجبانها بزوج فاش سمعاتها اش قالت وشافت فختها لي حركات راسها بهدوء:اييه هي غاتزوج بخو رحيل

طامو:اييه واش عايشة معاهوم فدار وحدة؟

رحمة:اه

سعيدة:گلتي خوتها بزوج غايتزوجو؟

رحمة:اه خوها وختها غايديرو عرس مجموع

سناء جالسة تاتسترجع كلامهوم مع لخبار لي ساقت نهار كان ناوي يخطب من عائلة رحيل وكان عند بالها راه أسماء ساعة صدق هو بغا غزلان.. زيرات على يديها وناضت دايرة سبة بتلفون وهي غير مباغاش توريهوم بلي هضرة طامو عصباتها باش لخرى ماتشمتش.. دخلات لبيتها وبقات غادة جايا ونطقات بين سنانها:غادي ليا غير لبنات الصغاار اااااااااععع (نطقات تاتحلف)واخا واخااا اسي اليازيد غير صبر والله لابقااات فيك دابا نحد ليك الزيغة لي فيك

----

عند رحيل لي شدات طريقها لدار باها لي توحشاتهوم وتوحشات جماعتهوم.. تادوي هي وسيدرا لي راكبة لور وهازة إيفانا لي فيما مشات تاتديها..دازت لباتيسري خدات ليها المالح ولحلو وتحركات لتم وهي تتاكل من ديك الميني بسطيلة حيت مفطراتش..

سيدرا:(مدات يديها)مامي عطيني بيتزا

رحيل:(عطاتها ليها ومدات ليها سغڤيت)عنداك توسخي حويجاتك

بعد مدة وقفات رحيل قدام باب الدار ونزلات منزلة معاها سيدرا وداكشي لي جابت وتحركات جهة لباب دار حلاتو بساروت..وسيدرا دخلات تاتجري وتعيط بالجهد: بّاديدي بّاديدي تانيرت إينو تانيرت إينو

تلاحت على إدريس لي تلقاها بالأحضان موحشها بزاف وخلات بلاصتها وتاهي زيرات عليه تاتبوس فيه..

رحيل:(داخلة ضاحكة)ههه هاحنا جينا توحشتونا

تانيرت:(عنقاتها)بزاف غبرتو علينااا ابنتي

رحيل:تاحنا توحشناكوم بزاف

دخلو لصالة ورحيل تاتزول لفولار والجاكيط لي لابسة واخدة راحتها حيت مكاين حد براني.. دخل ريان مبوقل تايحك شعرو يالاه فايق مع لويكاند تايعطي صلية لنعااس..

ريان:(قرب جهتها وعنقها بالجهد) عوينات الجلبانة غبرتي علياا

رحيل:(معنقاه بحال شي وليد صغير) لحبيب ديالي توحشتك فين هو محمد طه

تانيرت:خرج يتسخر دابا يجي

دخلو لبنات لعندها وجلسو يهضرو وريان ناعس على فخاد رحيل تاتحك شعرو وهو مكمل نعاسو..

أسماء:ايوا كيف دازت لخطبة غبرتي مابقيتي صيفطتي تاتصويرة

رحيل:(تفكرات لحريرة دلبارح ونطقات)لهلا يوريييك اش طرااا

تانيرت:ياك ابنتي لباااس

سيدرا:كانو لعيالات تايبكيو ورجال بّاديدي كيغوتو وماي بلو آييز عندو ديدي هنا (تاتوريه حاجبها)

إدريس:شوقع ابنتي؟

رحيل: أودي قول ابابا شنو لي ماوقعش

دخل محمد طه مقاطع هضرتهوم.. تبسم لرحيل وقرب باسها فحنكها:دار نورااات بوجودك اعوينات الجلبانة

رحيل:مودي لحبيب يالاه سولت عليك كيغادي مع لخدمة

محمد طه:حمدلله ونتي بخير مغانسولكش على ولد لحاج حيت شابفو لبارح ههه

رحيل:انا بخير

أسماء:كملي لينا ارحيل اش طرا وخليونا من السلام ولكلام

بدات تتعاود ليهوم رحيل لافير لي طرات فالخطبة وسكوندال لي نااض وهوما تيسمعو وحالين فمهوم مصدومين..

تانيرت:ياربي السلامة وشنو طرا من بعد واش لبنت عرفو فين مشات؟

رحيل:موحال فديك الساعة راه فاش عرفو ناضت الروينة اماما وخوها يالطيف لعافية تاتخرج من فمو ماخلى مقاال وفلخر شبكوهاا بناتهوم أنا قلبي قفز بالخلعة

أسماء:داكشي بحال دالأفلام ههه لعروسة هربات هههه ناري ماعرفت علاش جاتني الضحكة وأنا كانتخيل هادشي لي عاودتي

رحيل:(ضحكات تاهي)هههه لهلا يوريك كون حضرتي وشفتي كون هجرتيه

رنيم:ملي مشى تادابز ولد لحاج عرفي لقضية حمااضت

إدريس:الخير فيما اختاره الله ماتعرف ربي شنو مخبي ليه

تانيرت:ونعم بالله اإدريس ولكن الشوهة صعيبة بزاااف دابا تريكتو كلها غاتسيق لخبار

ريان:(سكت تاسكت وهو يبلزها)اللهم الزهو ولازواج لقهرة

قرصاتو تانيرت تاحل عينيه مكمشهوم ونطقات:الله يمسخك قالك الزهو غاتبقا تزهى تاتشرف وتقلب على لي تكمل معاها حياتك وتهز هبااالك

ريان:(شاف فرحيل وهو باقي على جلستو)واش قلت لعيب هانتي السيد مشى يتزوح وتشوه هربات عليه لعروسة (كمش حجبانو)هادا هو نيت لي كان دوى معاك الواليد على قبل غزلان ياك؟

من الصباح وهو كيسمع وساكت وعينو على غزلان لي جالسة تاتسمع تاهي شنو طرا.. ماعندوش مع شي حاجة سميتهاا اليازيد كرهو وماحملش يسمع سيرتو وعقلو تايوسوس ليه.. ومع كلام ريان لخر زاد تعصب وتنرفز..

رحيل:اييه هو اوا ماتمشي غير فيما مشاك الله

سيدرا:مامي بغيت عصير

غزلان:أنا غانجيبو ليك

ناضت غادة لكوزينة وبدات تاتجبد الديسير باش طحن لعصير وتفكيرها مع اليازيد لي بقا فيهااا.. ماشي حيت كيعجبها ولاشي حاجة نو مي إنسانيا بقا فيها على لموقف لي تحط فيه.. كاتقشر داكشي وعقلها غايب محساتش بهاداك لي واقف وراها تايشوف فيها كيف ساهية وعند بالو راه سيرتو هي السباب وراه تتخمم فيه حيت كيعجبها وحيت باقي تاتحس بشي حاجة من جهتو وقال مع راسو راه نادمة حيت رفضاتو.. قرب جهتها بزربة فاش شافها ضربات يديها بلموس وشدها من يديها ناطق بعصبية:لهاد الدرجة شاغل بالك..

تضهشرات وقفزها من حركتو لي شد بيها يديها وكلامو لي قال.. هذا وقتاش ناض وعلاش ماحساتش بيه.. داها جهة لاڤابو وحل لما وخشى صبعها تحت الروبيني وهي تاتشوف فيه مخنزر..

غزلان:ماشي شي حاجة غير ضربة خفيفة

محمد طه:(مشافش فيها) عقلك سارح لعندو

غزلان:عند من؟

محمد طه:(خنزر فيها)شكون من غيرو داك خونااا

غزلان:(جرات يديها ورجعات تكمل لعصير) غير تاترون وصااف امحمد

محمد طه:(جرها قبالتو)كانرون يااك هبيل أنا ومعارفش اش كاين

غزلان:شوف مافيا لي يتشاد معاك على قبل حاجة تافهة السيد مابيني وبينو والو وداك الشك لي فيك نقصو حيت عيقتي بزاااف

كبات لحليب وبدات تاطحن لعصير وهو تايشوف فيها ويعض على شفايفو.. خرج مخليها تاتحرك راسها وتسوط.. مكتعرفش كيفاش تيفكر هاد بنادم وشنو تايضور ليه فداك الدماااغ.. واش لهاد الدرجة مكيتيقش فيها ولاكيفاااش حيت بزااف كل مرة يغوت ويرعر وخصوصا فاش تاتجبد سيرة اليازيد تايتسيف ومعرفاش بلي هو تصرفو ناتج على هضرتها لي كان سمع نهار خطبتهوم ولكلام لي كانت تاتقولو قبل.. لصق داك لكلام فدماغو ومبقاش باغي يزووول..

---

صوت الغوااااات والسباان كيتسمع والناااس مجمووعة على ديك لمدابزة لي طارية ليهوم فالحومة.. الرجااال كااانو داخلين كيفرقوو بيناتهوم ولكن دوك الزوج لصقو فبعضياتهووم ودمياتهوم يشرشرو واحد فيهوم تيشورت ديالو تقطعااات وبانو دوك لوشامات لي داير فدااتو أما لاخر فمكاانش تاهو قل منوو وجبهتوو كلهاا محلولة ودموو نااازل سخووون... بعد لولاني لي واشم ومشى كيجري عند لگارديان دلحوومة خدا ليه لعصية ديااالو ورجع كيجري قاااصد لاخر لي تاهوو هز واحد لحجرة ناوي يشير عليه..

نطق الدري لي واشم وفمو زرگ بقوة الكماية والحشيش: والله يحرق الز*مل بوووك ليووووم نح*ي مك غااابلاتي اولد لوااااااسعة

بدا لاخر تيحيد لاشوميز وتاهو كيسب ويعرق لاخر بلمعيوور من السمطة لتحت:وهااااانااا نوريك شكوووون غاي*وي لااااخر وبرب تااااليوم نجلسك على لقرعة نوريك از*ي

الناس مبقاتش دخلات حيت كل واحد خاف على راسو وهوما عارفين لگيرا لي غاتنووض بين هاد الزووج وخصوصا الريگاطة لي هو شمكار لحوومة ومعرووف بلحباسات وتجباااد الصدااااع..

كان جاااي بطوموبيلتو غادي لجهة لباركينغ دلحومة وبان ليه البشااار بزاف.. نزل الزااج دالطوموبيل وشاف فالگارديان وهو هاز حاجبو وبصوت هادئ خاثر نطق: المحجوب اش تم؟

المحجوب: والريگاطة منوضها تااني مع ولد لهاشمية الروووح غاطيح ليوم اولد لحاااج

نزل من الطوموبيل وهو عاقد حجبااانو وأشار ليه لطوموبيل وهو غادي بصوت تقيل وخاثر:بلاصيها معاااك

غادي وكيطوي فكمام لاشوميز لي لابس لعب بلسانو ففمو وهو عاقد حجبانو فاش بانت ليه ديك المداابزة ولعيالات تيغوتو خايفين ومبعدين على دوك الزوج مخلينهوم يدابزو براحتهوم حيت فااش شافو واحد هاز هراااوة ولاخر حجرة عرفوهوم ناويين على خزيت وكل واحد خاف على راسو.. دخل وسطهووم وجاا مع الرگاطة ناوي ينزل على ولد الهاشمية بديك لهراوة شدها ليه وجرو من قرفاادتو تاهز فيه لاخر راسو كان باغي يسب وغير شافو وهو يصقل وتالاخر لاح ديك الحجرة فاش شافو.. ضار جهتو وأشاار ليه بيديه بمعنى أجي عندي.. تمشى ولد الهاشمية عندو وهو حادر راسو وكيف شد الريگاطة من قرفادتو شد تال لاخر وحنى ليهوم راسهوم بزوج ونزل جهتهوم ناطق بصوت هادئ وتقيل مكيسمعو غير هوما بزوج: اش قلت ليكوم ؟

الريگاطة:(كيتفتف ومشات ليه لهضرة) هو لي جبدني اولد لحاج عاطيه حشيش جديد وقال ليك راه قولبتوو

ولد لهاشيمة:نتا ..

ماخلى ليهوم فين يكملو هضرتهوم حيت كان ملاقي ليهوم الريوووس مضهشرهوم..نطق بصوت قاصح وتقيل: تعاودو ديرو ليا هاد السكوندال وتخلعوو ليا لبشار نتفااهم معاكوم ودابا تحرك نتااا وياااه قبل مانخلطكوم بزووووج..

خنزر فيهوم تخنزيرة قاااصحة خلات كل واحد يهز شرويطتو ويمشي بحالو وتاهو عطاهوم بالضهر غادي وتمتم بين شفايفو بسخرية: تَجمّاعْتْ إيخْوَانْ "هضرة خاوية"..

قبل مايوصل لباب الرياض جا عندو لمحجوب عاطيه سوارت طوموبيل ودخل لقى العائلة مجموعة كلها وتارحيل لي رجعات من عند دارهوم مور مادوزات معاهوم لعشية وخرجات مع لبنات تقضاو لي خاص..

نوح:(جلس جنب رحيل ونطق بخشونة)سلام أوعليكوم

الكل رد عليه السلام وعينو ضارو فالصالة قبل مايشوف فرحيل وينطق بهدوء:سيدرا فين؟

رحيل:خليتها فدارنا مبغاش بابا يخليها توحشها

حرك راسو وتكى على ضهرو حاط يديه على ضهرها تيحركها

طامو:ولد لحاج واش دويتي مع اليازيد

نوح:راه بخير الحاجة بلاماتخممي ليه

طامو:اييه فين هوو؟؟

نوح:راه فاليونان

طامو:(شهقات) ولدي رجع تاني لبلاد النصااارة الله ياربي على ولدي ماعندو زهر

سناء:(ميقات فيها وهمسات) فرعتي لينا مخنا بولدك تت

نوح:(شاف فرحيل وهمس ليها) فين مشيتو؟

رحيل:مشينا تقدينا شي حوايج وصاف اه نوح تافقت أنا ولبنات وقلنا هاد السيمانة نطلعو لأگادير ونبدلو لجو بناتنا حنا لبناات وو

نوح:(قاطعها ببرود هاز فيها حاجبو) لا سفر بوحدك ممنوع..

ماخلى ليها مجال فين تكمل كلامها وجوابو خلاها ضرب الطم وتسكت ومخليا هاد لموضوع تايكونو بوحدهوم فبيتهوم.. حيت دابا واخا كايهضرو غير بشوية إلا أن عينين سعيدة وجليلة عليهوم وهوما كايتسناو غير شي تبرگيگة يسمعوها ولايشوفوها باش يشدو بيها لحديث وهي أبداً واش غاتخلي مجال لشي حد يدي خبارها وخبار راجلهاا.. قبل گاعما تزوج هي ممولفاش تبين لناس شنو بيها وشنو كاين فلعساك دابا.. تبسمات ليه بهدوء ونطقات بهمس:غانمشي نشوف لعشا واش وجد

حرك ليها راسو بمعنى واخا وهي ناضت لكوزينة فين كانت السيدة لي هي ممات السعدية مقابلة ديك السفة لي تاتفور..

رحيل:تفورات؟

لمرا:واه ابنتي راه لاصوص وجد

رحيل:صافي مزيان

دارت رحيل زوج طباسل حيت عارفة نوح مغايتجمعش فطبلة وحدة مع سعيدة وجليلة عليها عزلات رجال بوحدهوم والنسا بوحدهوم.. هزات طبسيل لي كان مزوق بالتمر واللوز والسكار والقرفة وموراها السعدية لي تاهي هازة طبسيل الثاني.. سبقات رحيل رجال وحطات ليهوم لعشا وشافت فنوح لي جالس جنب زين العابدين تايهضر معاه ويوشوش ليه وكل مرة يعطيه شي دقة لقرفادتو ولاكتفو وزين تايتبسم بلخف.. تبسمات لعلاقتهوم لي تاتعجبها وكاتجيها فشكل..

تجمعو على لعشا لي عجبهوم وظلو يشكرو فرحيل لي مطيباه وهي حشمات وغير تاتبسم.. مولفة هي تاطيب المالح وتتفنن فيه ولكن مع دابا فالرياض عندهوم السيدة لي كطيب ليهوم خاص فعليها مكادخلش لكوزينة بزاف مي مرة مرة ضروري مادير ليهوم شي شهيوة.. جمعو البنات المواعن وتعمر براد دأتاي مجمعين عليه..

نوح:(شاف فساعتو وناض من بلاصتو) تصبحو على خير

شاف فرحيل قبل مايطلع لفوق وهي فهمات شوفتو ولكن كلشي مجموع دابا وباركة غير الصباح لي تعطلات فلفياق ولخروج دليوم مبغاتش تخليهوم عليها بقات جالسة ونيت تفتح الموضوع لي فبالها..

رحيل:(قربات جهة رحمة وهضرات بهمس)خالتي

رحمة:(شافت فيها باستغراب)نعام

رحيل:فالحقيقة بغيت نتشاور معاك فواحد الموضوع

رحمة:(جاتها فشكل وبنفس الهمس قالت) كانسمعك ابنتي

رحيل:أنا باغا ندير واحد لعراضة فدارنا قبل لعرس بنهار بحال ليلة لحنا ولكن مغايكون فيها لاحنا لاوالو يكونو فيها غير النسا ونشطو بناتنا حيت كيف تاتعرفي لعرس مخلط ومغانقدروش ناخدو راحتنا كثر عليها بغيت نتشاور معاك فشي حوايج الاكان ممكن؟

رحمة:(عجبها لحال فاش هي تشورات معاهاا فموضوع بحال هذا وتبسمات بهدوء) اه واخا مرحبا (ضارت رحمة تاتشوف فسعيدة وجليلة لي لايحين ودنيهوم معاهوم حيت جالسين بعاد شوية وقالت بهدوء)خليها تال غدا نكونو بوحدنا وقولي ليا اش باغا ديري ونيت ناخدو راحتنا

رحيل:صافي واخاا اخالتي مهم غايخصني نطلع دابا (ناضت ونطقات بصوت مسموع)تصبحو على خير

خرجات من الصالة وهي مبسمة بلخف وفالحقيقة هي طلبات هاد الطلب باش تزيد تقرب من رحمة لي تاتشوف بلي علاقتها معاها باردة وهي مباغاش هادشي وبحكم هوما عايشين مجموعين فضروري ماخص داك البرود يزول وماتبقاش رحمة محسسة منها.. باغا دخلها شوية بشوية تاتصلح لعلاقة ونيت رحمة تعرفها كيف دايرة وماتبقاش واخدة عليها شي صورة خرى عكس شخصيتها.. طالعة فالدروج تاتخمم تاسمعات صوت الخطاوي وضارت تاتشوف فزين العابدين لي طالع بزربة وداز حداها بلامايعبرهاا غادي لبيتو تنهدات رحيل وضحكتها غبرات.. حال رحمة ساهل شوية مقارنة بزين العابدين لي تاتشوف بلي صعيب تقدر تقرب منو حيت تايدير حدود بينو وبين الغير وممضسر عليه حد.. تامن عمو وعمتو وجداه تاتشوفو كيتعامل معاهوم عادي بحدود من غير باه فمابالك هي لي مرات باه.. كيبان ليها طريق صعيبة باش توصل ليه.. هاد لولد عندو واحد لهيبة من الصغر فلعساك الاكبر كيف غايكون.. وصلات لجناحها ودخلات وهي تاطرقو.. غادة تاتمشى وتقلب على نوح تاوصلات لشومبر وسمعات صوت لماا عرفاتو كيدوش.. مشات لدريسينغ تبدل عليها قبل مايخرج زولات داكشي لي لابسة وبقات غير بدوبيااس فلون لحم بحال لملابسة والو.. هزات سروال بيجامة ويالاه تحنات تلبسو وهو يبان ليها نوح جااي تايتمختر فمشيتو ويتعنكز وهو كيمسح شعرو.. شاف فيها بهدوء وقرب جهتها وهي وقفات فبلاصتها شادة السروال لي مدخلاه فرجل ورجل لا

نوح:(بهدوء)شنو گلنا على لبااس؟

رحيل:(طلقات السروال تاضور عينيها)غير لغيكل قربات تجيني عليها بغيت نلبس باش منشربش لبرد

نوح:(حرك راسو وعض على شفتو) تاتجيك ولبسي (شاف فيها قبل مايخطي خطوة لقدام) دوا لي تاتشربي دلغيگل واش مخرجاه ليك طبيبة؟

رحيل:(حسات بالإحراج ونطقات بهدوء) وي حيت قبل كنت تانضرب ليبرا (وبخفوت كملات) خصوصا مور ماولدت سيدرا

نوح:(هز حاجبو)علاش؟

رحيل:(تاتهضر وطرطق فصباعها)ملي دوزت عند الطبيبة قالت ليا راك شاربة لبرد فاش ولدتي عليها

حرك راسو بهدوء ولبس عليه شورط ونطق مكمش حجبانو كأنه تفكر شي حاجة وشاف فيها بجدية:نسيت نسولك (قرب جهتها وقال بصوت جدي وعينو فقلب عينيها) مكتاخديش مانع لحمل؟؟

حلات عينيها من سؤالو المفاجئ لي لاحو فوجهها ومع عمرو مافتح معاها الموضوع جاتها فشكل.. أما هو فكان حاط الموضوع فبالو وفاش يالاه تزوجو وبحكم أنه عارف ماضيها فقال نأجلو تاوكان تولف وديك الساعة يكون خير.. وبيما أنه تجبد هاد لموضوع دابا فقال علاش لا يسولها ونيت يعرف اش كاين..

رحيل:(قالت بهدوء)لا مكناخد والو علاش؟

نوح:(حرك راسو وقال بهدوء) مزيان نيت داكشي بلاش منو غير مرض وزايدون مكاين لاش نأجلو موضوع دراري (حك لحيتو وقال بهدوء) نتي باغا لولاد دابا؟

فهاد لموضوع هو ميقدرش يقرر بوحدو حيت خاص بيهوم بزوج وضروري مايتشاور معاها ويسولها باش يعرف هي اشنو باغا.. من جهتو هو باغي لولاد حيت بالنسبة ليه مكاين تاشي حاجة لي تخليه يأجلهوم ولكن هو باغي يعرف هي اش باغا ومباغيش يكون أناني ويفرض عليها شي حاجة وهي مباغاش.. بزاف ديال الأزواج كيطيحو فهاد لمشكيل وخير دليل هو سناء واليازيد لي بسباب لولاد وقع داك لمشكيل بناتهوم وطلقو.. عليها هو باغي يعرف مرتو شبغات.. وزيد داكشي لي عارف عليها وداكشي لي دوزات مور لولادة وحالتها كانت مخلياه يبغي يعرف اش قرارهت فلموضوع..

رحيل:(حركات راسها بهدوء)فالحقيقة أنا ماعنديش مشكيل عليها عمري فكرت ناخد لبيلول وزيد أنا مانقدرش ندير تصرف بحال هادا قبل مناخد رأيك (شافت فيه بجدية)موضوع لولاد كيخصنا بزوج انوح ولاكنت غناخد شي قرار فغاتكون نتا أول واحد تعرف بيه

نوح:(تبسم بلخف من كلامها لي عجبو وقال بجدية)مزيان تاأنا هادشي لي باغي أي قرار يتخاد نكونو بزوج على دراية بيه عليها ديما كنقول ليك ارحييل الحوار مهم فأي علاقة.. ولي ضراتك اجي عندي علميني مانبغيش تخبي عليا تاحاجة تاتعلق بيك

رحيل: واخا بغيت نسولك؟

نوح:سولي الالة

رحيل:(نطقات بتوثر) واش نتا باغي لولاد دابا؟

نوح:(قرب جهتها وشدها من ضهرها مقربها ليه) معلوم باااغيهوم (حط يديه على كرشها ومسدها بشوية) نعمرو هاد لكريشة ونجيبو لسيدرا وزين العابدين شي خوهوم ولاختهوم إن شاء الله

رحيل:إن شاء الله(ضحكات) ههه ولكن غير عول على لغيرة دسيدرا

نوح:(قرصها فحنكها)بنتي كاتمسع لهضرة ماتهزيش ليها لهم

كلمة بنتي خلات قلبها يفرفر وتفرح داخليا..ماشي أول مرة يقولها عليها وهي عارفة أن لوعد لي قطع عليها نهار عقد عليها تينفدو بلحرف..

رحيل:(تفكرات موضوع السفر وقررات تفاتحو معاه) وبخصوص السفر لي قلت ليك علاش مابغيتيش ليا

نوح:(رسم ملامح لجدية على وجهو)حيت بالنسبة ليا داك لموضوع باين جوابو هو لا

رحيل:ولكن علاش ياك غانسافر غير مع لبنات علاش مبغيتيش تخليني نمشي

نوح:السفر بوحدك لا ارحييل باغا تسافري أنا غانديك فيما بغيتي وأصلا راه فباالي نسافرو ومناسيكش غير لخدمة مزيرة عندي وزيدي لمحال ديالك خاصني نوقف عليه بيدي هادشي علاش أجلت السفر

رحيل:ولكن أنا باغا نمشي مع لبنات نفوجو بناتنا راه يوماين مغانفوتوهااش

نوح:(مسح على وجهو وقال ببرود) لي عندي قلتو ارحييل مغانعاودش هضرتي

خرج من الدريسينغ مخليها واقفة وباين فيها تقلقات وتعصبات.. كانت دايرة بروگرام مع لبنات يبدلو لجو ونيت يديرو سفرية بيناتهوم لي ينشطو فيهاا ولكن هو لاح ليها لعصا فالرويضة.. كان عندها شك بلي غايرفض ولكن قالت مع راسها الاقنعتو غايبغي يخليني وزايدون حنا غير بناتنا ساعة معرفاش بلي هو لالموضوع مدخلش ليه لراسو وقال عليه لا فهي لا ويستحيل يبدل رأيو واخا يوقع لي يوقع.. تنهدات وضارت لبسات عليها بنوار ورجعات ديك لبيجامة لبلاصتها وخرجات وهي مكتشوفش جهتو حيت بصح تقلقات منو.. تخشات بلاصتها ونطقات بخفوت وهي عاطياه بالضهر:تصبح على خير

طفات لفيوز لي جنبها وغمضات عينيها ولفقصة شداهاا.. أما هو بقا جالس تيشوف فيها هاز حاجبو وماهضرهاش خلاهاا على خاطرها وتاهو تقاد فبلاصتو وطفى الضو وضار جهتها معنقها من لور وغمض عينو ناعس..

----

جالسة رحيل فجناح رحمة مور مافطرو وعينيها على ديكور ديال الميني صالة فين جالسين.. كان ديكورها غالب عليها الطابع التقليدي.. كانت هاديك أول مرة دخل ليه ومغاتنكرش بلي ارتاحت فداك الجناح.. هزات عينيها تاتشوف فديك التصويرة لي شادة لحيط.. صورة ديال رحمة فأيام الشباب هي وراجلها الحاج إسماعيل.. عينيها تاتحقق فملامح وجهو الرجولية الخشنة ودابا عاد عرفاات زين العابدين لمن تيشبه.. طلع نسخة مصغرة من جدو نفس الملامح ونفس لون لعينين ونفس الخشونة.. هزات راسها فاش شافت رحمة جايا جهتها ولابسة فراشة فلبلدي.. من ديما هي أنيقة ومهتمة بنفسها وبعض لمرات تاتقول مع راسها واش نيت هادي مات نوح.. السيدة بقوة ماشادة فراسها تاتبان صغيرة على عمرها.. جلسات رحمة قدامها حاطة رجل على ختها وتحدرات تاتكب القهوة لي جابت ليها السعدية ومدات لرحيل كويس..

رحمة:(جغمات من كاسها وقالت بهدوء)وقتاش قلتي غاديري لعراضة

رحيل:نهار قبل لعرس

رحمة:من الأفضل ديريها يوماين قبل باش هاكا لعريسات مايعياوش بلعراضة حيت كيف تاتعرفي العرس تايبغي لعروسة تكون أونفورم

رحيل:تاهذا نظر فالحقيقة فكرت ندير شي حوايح وبغيتك تعاونيني فيهوم

رحمة:داكوغ شكون غايكون فالعراضة؟

رحيل:غير لمقرابين وإلا كانت خالتي سعيدة وجليلة غايبقاو تال داك لوقت تاهوما غايحضرو

رحمة:أنا نعطيك تلفون ديال واحد التريتور تانتعاملو معاه ديما فكل مناسبة عندو داكشي زوين وتيعمر لعين (ضارت تاتقلب على تلفونها مالقاتوش وناضت)غانجيب تلفوني من لداخل

حركات ليها رحيل راسها ومشات رحمة لي ماتعطلاتش بزاف وتمات راجعة.. كملو هضرتهوم ورحيل عاودات ليها اش باغا دير بالضبط ورحمة تاتعطيها فرأيهاا.. الجلسة بناتهوم كانت كالم وزوينة وعجبات رحيل بزاف لي شافت أنها دارت خطوة مهمة باش تعمق فالعلاقة ديالها مع رحمة لي تاهي عجبها لحال فاش تشورات معاها رحيل وطلبات رأيها.. كملو دي لجلسة وبعد متافقو استأدنات رحيل وخرجات من عندها مور مشكراتها.. تاتمشى فالكولوار وتلفون فيديها لي صونى وهي تلقاها أسماء:هيلو

رحيل: هاي صافا؟

أسماء:سوبير لقيتيني دفعت ليهوم كونجي فيه شهر

رحيل:مزيان توجدي أليز ونيت ترتاحي قبل لعرس وغزلان فين شداها تاهي

أسماء:راه تاتوجد اه قولي ليا شنو درتي مزال فالتسافيرة

رحيل:(دخلات لجناحها تاتزول لفولار)أودي خلي داك الجمل راگد

أسماء:هههه سي السيد مبغااش ياك؟

رحيل:بحال لاشفتيها بعينيك قال ليك السفر بوحدك لا عييت معاه مي مبغااش راسو قصح من لحجر

أسماء:دوماج كنت قلت زعمة نفوجو ونديرو تسافيرة دوداع لعزوبية ساعة زهرنا عوج

رحيل:ماعليش سيرو نتوما لي تقدرو

أسماء:بغينا نمشيو مجموعيين مي ماعليش مكتابش

رحيل:ليوم مغانقدرش نجي عندكوم سيفطو ليا بنتي راه توحشتها

أسماء:لبرهوشة والله لجااتك فالصباح مشات مع بابا لگاراج وفاقت بكري قبل مني

رحيل:هههه جدها هو لي كيعرف ليها

أسماء:اوا خليها ليه يربيها هههه نيت هي هادشي لي باغا

رحيل:بغيتيني نموووت بلابيها واقيلا غير ليامات لي تاتبات فدارنا تانتوحشها فعساك لابقات ساكنة تم قلبي غايسكت

أسماء:(بمزاح)دابا تجيبي وليدات لي يعوضو بلاصتها

رحيل:لا لا سيدرا بلاصتهاا غير اصاحبتي واش من نيتك راه كل ولد وبلاصتو كيف دايرة عند واليديه (بسخرية)هه زوينة قالت ليك يعوضوهاا مالها لبسة راه بنتي هااديك الشريفة

أسماء:كليتيني بحوايجي اختي تهدني ههههه

رحيل:ونتي تاتعصبي فيا بكلامك (تفوهات)خرجتي ولاباقي

أسماء:خرجت وراني غادة لدار عييت ليوم وبغيت غير نعس

رحيل:كيدايرة علاقتك بإسلام باقي فداك شد ليا نقطع عليك

أسماء:ههه نو تهدنات القضية وتاهو غرق فالخدمة وغايشد كونجي

رحيل:اوا الله يسهل عليه نيت هاكا حسن تهدنو راه غاتجمعكوم دار وحدة وزيدي زواج راه تيبغي تفاهم

أسماء:نكدب عليك أنا درت عقلي ههه مي لادار شي فلاش ولاسخن عليه راسو ديك الساعة نجبدو أسماء لقديمة لي فمهاا كيف لفلفلة

رحيل:يالاه سيري تلاحي نمشي نتكى شوية راسي غايتشق

أسماء:تالبارح ضرك راسك واش ماخديتيش شي دواا

رحيل:ماخديت والو دوليبران مكادير ليا تاحاجة لشقيقة نعس ونخليها فنعااس

أسماء:اوا الله يشافي ازين تال غدا ونتلاقاو ونيت نمشيو نكملو لي خاص باقي تسعيام دغيا دوز

رحيل:إن شاء الله يالاه باي

قطعات عليها رحيل وبدلات حوايجها بوحدين خفاف وظلامات لبيت وتخشات فبلاصتها ناعسة..

----

فلگاراج ديال إدريس كان واقف مع سيدرا لي ملبسها كومبين قدهاا فالرمادي شراها ليها خصيصا باش ملي تجي لعندو تلبسها وجامعة شعرها كوت شوفال وعينيها على جدها تاتشوف اش كيدير.. كان تيعلمها الصنعة من الصغر ومع هي تايعجبها التقلاب وتنبش فدغيا كاتشد.. سد لكابو ومسح يديه بداك لمشوار ومشى يجرب الطوموبيل وسيدرا مخشية فيه كيف لگرادة.. غير سمعاتها دمارات وهي تنقز وبدات تاتصفق وقالت بصوت حماسي:صاوبناها بّاديدي صاوبناهاا

تبسم ليها تازادو بانو تكامش لي جنب عينيها وقال بحنية:برافو النخشيشة دجدهاا معلمة

سيدرا:(مشات جهة رشيد لي خدام مع إدريس)شاشيد شووف أناا صاوبت ديك طوموبيل وعاونت بّاديدي

رشيد:(قرصها فحنكها ونطق) لا نتي هي الخليفة دلمعلم إدريس

سيدرا:(كمشات حجبانها)شنو هي لخليفة؟

رشيد:(وحل ونطق تايحك شعرو) يعني تشدي بلاصتو

سيدرا:(جرات جهة إدريس عنقاتو من رجليه)لابّاديدي مغانشدش بلاصتو وتاواحيد مغايشدها

فبرا دلگاراج نزل نوح من لجيپ ديالو وهو خاشي يديه فجيب الجاكيط وتم داخل لداخل بملامح متجهمة ومجرد ماعينو جات فسيدرا ولباسها وهو يتبسم وهي غير قشعاتو جرات عندو كي الزواق

سيدرا:حبيبي ماااي بلو آيز جيتي تديني؟

نوح:(تحدر هزها كيف لكمشة وباسها فحنكها بالجهد) اه ابابا توحشتك وجيت نديك ماتوحشتيش ماماك؟

سيدرا:اه توحشتهاا بزااف

إدريس:امرحبا بولد لحاج طالت لغيبة وخصك تخلص لحق

نوح:(حط سيدرا فالأرض وقرب جهتو) عارف راسي داير لافوت السموحات اسي إدريس

إدريس:(سلم معاه سلام رجولي) هانيا مقبولة منك زيد دخل..

قربو جهة الكراسى وشدو بلايصهوم ونوح شاف فسيدرا لي كانت واقفة مع رشيد ورجع شاف فإدريس وبدون مقدمات نطق:صابر عيط ليا ليوم (شاف فيه بجدية) علمني بلي كلثوم ماتت..

الخبر كان صادم بالنسبة لإدريس لي حل عينيه وبقا ساكت تايشوف فنوح.. من نهار تشدات كلثوم وخدات عقابها وهو عمرو سول فيها وخلاها تعوم بحرها.. حيدها من الجدر بحال شي سوسة.. بصح كانت مرتو فواحد لوقيتة ولكن هي ماخلاتش بلاصتها نقية باش تبقا فيه.. من نهارها وهي تحفر وتكيد فالمكايد سوى ليه سوى لتانيرت ومكغاهاش داكشي دشحال هادي دازت لولادو وأداتهوم تاهوماا.. بسبابها ريان عاش بعيد عليه لسنواات وماعرفو تاكبر السيد ولاراجل وبسبابها رحيل كبرات بلامهاا.. غير هاد لفعلة خلاتو يكفر من جهتها ويكرهها وخلاص فاش دارت يديها فيد بدر باش ترون تاني حياة بنتو تما كعى عليها.. استاغلات ولادها ومرضها غير على قبل حسدها وغيرتها من تانيرت.. فحياتو صادف ناس أشكال وأنوااع ولكن بحال نوعها عمرو شافو.. مبقاتش فيه هي حيت هادشي لي صرى ليها هو نتيجة غلطها.. نهار مرضات بلكونسير بلاصة ماتوب وتغفر الله وترجع لطريق هي غير مزادت فيه وربي خدا حقهوم منهاا فهو يمهل ولايهمل.. مبقاتش فيه هي ولكن بقاو فيه ولادو لي عارف بلي لخبر مغايكوونش ساهل عليهوم واخا كلهوم سمحو فيها ولكن تتبقا لمرا لي ولداتهوم..

إدريس:(ببرود)الله يرحمها ويغفر ليها وقتاش ماتت؟

نوح:ليوم

إدريس: ها آخرة لحسد ولغيرة ديالها فين وصلها ماتت بوحدها فلحبس مامعاها لاولادها لاعائلتها

نوح:الإنسان مكيفكرش لآخرتو تتغرو الدنيا وكينسى بلي كاينة الآخرة الله يحسن خاتمتنا

إدريس:آمين هاز لهم لأسماء ومحمد طه كيف غانقولها ليهوم ومابقا ليهوم والو ويتزوجو لاحول ولاقوة إلا بالله

نوح:(عينيه على سيدرا لي تايوريها رشيد كيف تيصاوب لمطور ونطق بهدوء) مع الأسف بعض الناس مكيستاهلوش يكونو واليدين

إدريس:(فهم قصدو وتاهو ضار تيشوف فسيدرا وبحنية قال) أحسن حاجة هي معرفاهش وعمرها غاتعرفو ولاتشوفو (شاف فيه)هاديك التريكة ماشفنا منها غير الشر ولعداب ولحمدلله ربي خدا حقنا منهوم فالدنيا قبل لآخرة (ضرب على فخد نوح وقال بتبسيمة حنينة) مغانكرش خيرك اولد لحاج وبلي بفضلك بعد الله سبحانه وتعالى قدرنا نتهناو من دوك وجوه الشر وكانعيشو حياة طبيعية (تبسم ليه وبامتنان كمل) خيرك عمري نساه وفرحان حيت ربي حطك فطريق بنتي باش تعوضها على مافات من نهار تزوجات بيك رحيل وأنا شايف الفرحة والراحة فعينيها الراحة والفرحة لي هجروها سنين بسبابهوم..

نوح:(تبسم بلخف)بنتك مقامها عااالي عندي اسي إدريس وأي حاجة ضراتها راه ضراني تاأناا من نهار ولات مني وهمها هو همي وراحتها هي راحتي

إدريس:(زاد كبر فعينيه بكلامو لي قال) الله يرحم من ربااك راجل لي يعولو عليه وسعدات بنتي بيك

نوح:(بخشونة)وسعداتي بيها

إدريس:نهار قصدتيني باش نگول ليك على زواجها لولاني والإصرار ديالك خلاني نزيد نتأكد بلي بنتي لقات لي يعوضها.. بلابيك نتا مكناااش غانتهنااو من داك لحيواان كون ماطلبتيش مني نسكت كون راني علمتها بكلشي ساعة كتفتيني..

نوح:(رجع ضهرو لور وتكى على لكرسي وقال بهدوء) هادشي درتو باش هي ترتااح ليا (شاف فيه بجدية) مانبغيهاش اسي إدريس تعرف نهائيا بلي فخباري كلشي داكشي لي وقع بيني وبينك مانبغيش هي تسيق ليه لخباار

إدريس:عارف وكون هااني هضرتنا عمرها غاتوصلها

حرك نوح راسو بأه وهو مكمش حجبانو وضور عينو تايشوف فسيدرا بهدوء.. نهار جات عندو باش تعاود ليه اختزلات ليه شنو طرا فزواجها لولاني فكلام عادي بدون ماتعمق ليه فلموضوع شي لي خلاه يفهم أنها مباغاش تصارحو ومن حقهاا واخا هو مكرهش تقول ليه كولشي وتعاود ليه ولكن داكشي متعلق بيها هي وبماضيها فمغاديش يلومها عليه حيت مقالت والو وعارف أن الموضوع حساس وصعيب عليها تجي وتعاود ليه كيفااش راجلها باعها لعمو وكيفاش عمو كان باغي يتعدى عليها وتحرشو بيها شي حاجة مساهلاش تقاال وإدريس بنفسو مكانش عارف كلشي بالتفاصيل حيت هي معاودات لحد كون مارنيم لي كانت شاهدة كون تاهو ماعرفش هادشي.. تامن بلان لغابة نهار عرفها سكت عليه باش مايحرجهاش وخلاها يشوف واش تقول ليه شنو كاين ولا لا وفلخر راه هضرات معاه وعاودات ليه على لبلان بدون ماتقول السبب.. بعض لمرات تايقول مع راسو هاديك السيدة تستاهل وساام الشرف على الصبر لي صبرات والإيمان لي عمرات بيه قلبها وكيفاش تقتها فلي خلقها ماتزعزعاتش.. وحدة لي دوك لمصايب كلهوم دازو على راسها وباقا واقفة مكملة حياتها والأهم مفداتش عقلها راه تستاهل تقدير والإحترام.. نهار اختارها حيت شاف فيها ديك الإنسانة لي غاتناسبو قبل گاعما يعرف الماضي المؤلم وفاش عرفو زاد تعلق بيها.. رحيل عندها واحد المكانة فقلبو يستاحيل شي بنت لمرا تجي بلاصتهاا.. ولامكانتها تهز شي نهار حيت عارف الجوهر الحر ديالهاا نقي واخا القساوة دلقدر لي عاشت عمر داك لجوهر توسخ وبقا نقي ليومنا هذا وهادشي خير دليل يعرف بلي هي لي تصلاح ليه..

نوح:(همس بينو وبين نفسو)نهار عيني طاحت عليك عرفت بلي نتي هي لمرا دقلبي الفتنة..

دوز هو وإدريس عشية مجمعين على واحد لبراد دأتاي وسيدرا تاضور فلگاراج كيف لفراشة وكل مرة تجي لعندو وتعاود ليه اشنو دارت مع جدها وإدريس تيضحك على برائتهاا..

متكية على صدرو تتاكل داك السوندويش لي جايب ليه وعينيها على إدريس لي ناض يكمل واحد الطوموبيل حيت مولاها جا ليها..

نوح:(طل عليها ونطق بحنية)بغيتي لفريت؟

سيدرا:(شافت فيه وحركات راسها)اه ويكون فيها مانونيز

نوح:(ضحك تاتسدو عينيه وقال بتبسيمة)هه سميتو مايونيز ابابا

سيدرا:(حركات كتيفاتها)اه هو بغيتو مع فريت

غمس ليها لفريت فلمايونيز وكلها ليها وهي تاتفشش عليه وهو عاطيها لخاطر.. شبعات وحطات داك السوندويش لي مكملاتوش ونطقات:صافي شبعت

نوح:(تايمسح ليها شفايفو)شنو تانقولو فاش تانشبعو؟

سيدرا:الحمدلله

نوح:مزيان يالاه اجي نحيد ليك هاديك لي لابسة باش نمشيو لدار

وقفها قدامو وزول ليها لكومبين تابقات بسروال توني وبودي ديالو أوڤر سايز وقاد ليها شعرها وجمع ديك لماكلة فبلاستيكة وناض تايقاد سروالو..

إدريس:(قرب جهتهوم)صافي سخيتي بينا اولد لحاج

نوح:الله يجعل البراكة اسي إدريس هادي هي لوقيتة فين نمشي لدار

سيدرا:(عنقات إدريس)أنا غانجي عوتاني غدا بّاديدي مع مامي (شافت فنوح)ياك ماي بلو آيز

نوح:إن شاء الله يالاه نمشيو

سيدرا:هااء ولكن إيڤانا خليتها لهيه وأنا بغيتها

نوح:ندوزو ناخدوها عاد نمشيو

إدريس:كنت باغي نمشي معاكوم ولايني شايف كلشي على عينيك

نوح:ماعليش لخدمة هي هادي الله يعاون اسي إدريس

خرج هو وسيدرا وركبها لور مقاد ليها بلاصتها عاد تحرك غادي لدار إدريس باش يجيبو القطة وبالفعل غير وصل نزلات سيدرا ودخلات تاتجري ونوح كيتسناها واخا محمد طه عيى معاه يدخل ولكن مشى لحال.. جابت قطتها أو ودعاتهوم عاد شدو طريق لرياض.. وسيدرا مجمعة معاه تتعاود ليه شنو دارت فغيابهوم.. وصلو لرياض ونزل وهو هازها هي ولقطة ديالها ودخلو لداخل وعينو تاتقلب عليها مبانتش ليه.. دخل لصالة ولقى غير سناء بوحدها لي جالسة تاتفرج ولانقولو جالسة لايحة عينيها فالتلفازة ولكن عقلها غايب ومسافر ليونان عند ليازيد..

نوح:السلام أوعليكوم

سناء:(تنهدات)وعليكوم السلام

نوح:فين يمّا؟

سناء:راه متكية فجناحها

نوح:وفين لخرين؟

سناء:رجعو لفاس من غير عمي ومرتو لي مشاو لدار ولدهوم يبقاو تم

نوح:(حك لحيتو) ماعلمني حد بلي غايمشيو

سناء:مور ماتغداو تحركو قال ليك حگا ماحگا لخدمة مخلينها واقفة ومشاو

نوح:الله يوصلهوم على خير

ناض خارج من الصالة وسيدرا بقات واقفة هازة قطتها تاتشوف فسناء لي بدورها تاتشوف فيها.. ماعندهاش احتكاك مع الدراري الصغار ودايرة بينها وبينهوم حدود ولاد ولاد خوتها عمرها تحكات معاهوم..

سيدرا:(بخفوت)فين مامي؟

سناء:(بهدوء)لفوق

خرجات سيدرا تاتجري لبرا مخليا قطتها تاتلعب تم وسناء تنهدات ورجعات تاتخمم وتفكر فحريرتها..

فلفوق داخل نوح لبيت وهو مكمش حجبانو من داك الظلام لي كاين فالبيت.. شعل ضو خفيف وعينو جات على رحيل لي كانت ناعسة فوسط النموسية.. قرب جهتها بهدوء جلس وراها وتحدر قاس راسها ياكما مامريضة حيت مامولفاش ليها تنعس فهاد الوقت..

نوح:رحييل (تايحرك فيها) رحييل وارحييل

رحيل:(تململات وهمسات بصوت نعسان)هممم

نوح:(باس حنكها) نوضي تعشااي

ضارت رحيل تاتكسل وحاسة بداتها مهدودة بحال لاغاتجيها لاگريب أما راسها باغي يتشق بقوة الحريق.. جلسات تاتجمع شعرها وجهها منفوخ بالنعاس لي نعساتو..

نوح:(بحنية)كاضرك شي حاجة؟

رحيل:(تفكرات بلي مقلقة منو وقالت بهدوء)لا

نوح:(باس راسها)نوضي خودي ليك دوش

مجاوباتوش ناضت تاتكسل ودخلات لحمام وهو مشى لدريسينغ بدل عليه بحوايح دار مريحين.. بانت ليه خارحة ملوية فلبنوار ودازت حداه بلاماتهضرو عرفها غاتكون مقلقة منو على قبل التسافيرة لي رفضها ليها.. تاهو خلاها وسكت كيتسناها تاخرجات لابسة كيف لعادة مستور حيت غاينزلو لتحت.. درعها وخرجو من الشومبر وهي ساكتة وغير شافت سيدرا وهي تبسم ومشات عنقاتها بالجهد هزاها تاتبوس فيها

رحيل:توحشتك امامي (بعزات ليها حناكها)

سيدرا:تاأنا مامي توحشتك قد هاكا (حلات يديها على جهدهوم)

غادي نوح جنبهوم تايسمع ليها وهي تاتدوي مع بنتها بهمس وتاسيدرا تاتحاوبها بشوية وتتعاود ليها تاوصلو لتحت ولقاو كلشي مجموع على قبل لعشا.. جلسو تعشاو مع بعض وكيف ديما ولابد من الجلسة مع العائلة شي يسول على خبار شي تاوصل وقت النعاس وكلشي تنشر من غير رحيل لي نعاس طار ليها من عينيها.. جالسة تاتقلب فالتلفازة ونوح حداها لايح يديه على ضهرها تايطلع وينزل بشوية.. واخا غايفيق بكري مباغيش باقي سهراان..

مشات سيدرا بدلات حويجاتها ببيجامة دنعاس ونزلات لتحت تاتقلب على إيڤانا باش تعطيها لماكلة ساعة مالقاتهااش.. قلبات فالكولوار لتحتاني وهي تبان ليها إيڤانا مكسلة وسيزين طالع فوق منها وغير سمعو لحس وهو يهرب سيزين هزاتها ومشات تاتجري جهة الصالة وغير دخلات وهي تنطق ببرائة:مامي عرفتي شنو لقيت سيزين ناعس فوق إيڤانا..

فدار إدريس مور ماتعشاو كل واحد طلع لبيتو ينعس إلا هو لي بقا جالس فالصالة ساهي وكل مرة يطلع تنهيدة مسموعة..كيبان فيه مهموم وهادشي لاحظاتو تانيرت لي جات لعندو ملوية فبينوار طويل وجامعة شعرها كان جالس فالظلام مشاعل تاتلفازة هي لخرة.. شعلات ضو وهز عينو شاف فيها وهي تقرب حداه وقالت بتساؤل:إدريس ماالك؟؟

إدريس:(تنهد ومسح على وجهو) جلسي اتانيرت

جلسات حداها وهي مخلوعة حيت باين فيه ماشي على عادتو وهي عارفاااه مزياان فاش تيكون مهموم كيف تيكون وعارفة بلي دابا شاغلة شي حاجة بالو عليها السيد مدرونجي مع راسو..

إدريس: ليوم عرفت شي خبار

تانيرت:(قطعاتو بلهفة وخوف)ياك لباااس ؟

إدريس:خليتي نكمل اتانيرت تت كلثوم ماتت ليوم فالحبس

تانيرت:(خرجات عينيها ممتيقاش) ماتت اويلي واش تاتهضر بصح اإدريس

إدريس:وهادشي فيه التفلية يهديك الله

تانيرت:(كمشات عينيها وبان فيها بلي بقا فيها لحال على كلثوم)الله يرحمها اييه وشنو غادير واش جات مها ولاشي حد من عائلتها ومحمد طه وأسماء

إدريس:هادشي لي لقيتيني كانفكر فيه هي خاص تدفن غدا وخصني ولابد مانعلمهوم واخا داكشي لي دارت فحقهوم صعيب يتنسى وهوما قطعو علاقتهوم معاها ولكن ضروري ماخصهوم يعرفوو

تانيرت: عندك الحق هاديك مهوم ونتا خص تعلمهوم (شدات يديه) قولها ليهوم ليوم يقدر الاعرفو يبغيو يوقفو فگنازتها حيت تاتبقي مهوم..

حرك راسو باه وناض كيتنهد بحال لاشي حجرة محطوطة ليه فوق صدرو.. يالاه تسگدات يام ولادو وشاف فرحتهوم مور شي لي طرا وزيد فرحتهوم لعرس لي كايوجدوه مباغيش يهرسها بهاد الخبار ولكن هو مجبور حيت كيفما كان لحال هي ماماهوم والامقالهاش ليهوم وخبى لموضوع فاش غايعرفو يقدر يلوموه.. تلاقى بغزلان نازلة تعمر قريعة دلما تبسمات ليه وكملات طريقها وهو مشى لفوق دق على بيت أسماء هي لولة وحلات لباب كانت باقا مناعسة وكاتهضر مع إسلام فالواتساب..

أسماء:(تبسمات ليه وقال بهدو) بابا محتاج شي حاجة؟؟

إدريس:اجي معايا لبيت خوك محمد طه بغيت نقول ليكوم شي هضرة نتي وياه

أسماء:(بجدية)اه واخا أنا جايا

دخلات لبيت هزات تلفونها وسيفطات مساج لإسلام علماتو عاد مشات لبيت خوها لقات باها جالس فوق النموسية وحداه محمد طه لي تايشوف فيه بجدية كايتسناه يهضر.. حاسيين بلي شي حاجة كاينة خصوصاً أنه باغي يهضر معاهوم فهاد الليل إلا واشي حاجة ضرورية..

إدريس:(بهدوء داخل فصلب الموضوع)أنا عارف بلي داكشي لي دارت صعيب تنساوه وقلبكوم تضرر من فعايلها لي مكناش متوقعينهوم.. عارف بلي باقي لدابا خاطركوم مضرر من جهتها وبلي مغاتقدروش تنساو هي اش دارت مغانلومكومش لامابغيتوش تسمعو بسيرتها ولاتجبد سميتها فهاد الدار ولكن هادشي لابد ماخصني نقولو ليكوم

محمد طه:(كمش حجبانو فاش فهم باه على من كيهضر وقال وهو مكمش حجبانو وباين فيه تعصب) بلاماتكمل الواليد ديك السيدة مباغيينش نعرفو عليها تاحاجة هي مدارتش بحسابناا وحياتها كلها وهي تحفر ليك وكرهاتنا فعيشتنا وماخلات مدارت ومدارتش بعتبار لينا أنا وختي بحال لاماشي ولادها دارت يديها فداك لحيوااان وكانت غاتخرج لينا على حياتنا.. ديك السيدة هي لي بغات هادشي وأنا قلتها قبل هي مبقات تاتعني ليا والو وأنا خرجتها من حياتي

أسماء:محمد طه عندو الحق بابا عفااك حنا مبقيناش باغيين نسمعو بسميتها ولاسيرتها تجبد هاديك السيدة هي لي سمحات فينا نهار عمرات قلبها بالحسد والغيرة وتبعات ديك الطريق دارت أغلاط بزاف وحنا كنا تانسامحوها ولكن هاد لمرة مانقدروش حيت هي قتلات فينا كل حاجة زوينة لي تخلينا نشفعو ليها و

إدريس:(قاطعها) هي ماتت

لحظة صمت مكان تايتسمع فيها والو من غير صوت أنفاسهوم.. وجههوم كانت مرسومة عليها معالم الصدمة والحزن.. حزن قددر يشوفو إدريس فنظرات ولادو بزوج.. عارف بلي واخا يكرهوها تايعياو فاش يعرفوها ماتت غاتبقا فيهوم حيت هو عارف ولادو تيشبهوه واخا يقصاحو تايعياو ديك الحنية لي زرعها فيهوم تاتغلب..

إدريس: ليوم عيط ليا لبوليسي لي مكلف بالقضية ديالها وقال ليا لي كاين وحيت نتوما ولادها خصكوم تعرفو ضروري بلي كاين

ناضت أسماء بزربة خارجة من لبيت ومعاوداتش تلفتات ولاشافت فيهوم وإدريس متبع ليها الشوفة.. رجع شاف فمحمد طه لي ناض بخطوات تقيلة غادي لجهة لخرى من النموسية جلس ونطق بهدوء:أنا أصلا دفنتها داك النهار ومبقات تاتعني ليا والو تصبح على خير الواليد

تخشى بلاصتو وتغطى كامل تامن راسو غطاه مخلي إدريس كيشوف بقلب أب كيتحسر على ولادو وعلى الحالة لي هوما فيها واخا مبينو ليه والو ولكن غير الشوفة فعينيهوم كافية توريه بلي هوما مقصحين.. احتارم الرغبة ديالهوم وقرر يخليهوم براحتهوم وخرج من بيت محمد طه مور ماطفى الضو وسد لباب وقبل ماينزل لتحت شاف فلباب دبيت أسماء عاد نزل لتحت بقلب أب مهموم ومتحسر على حالة ولادو..

كانت رحيل تاتشرب فالما وغير سمعات هضرة سيدرا لي كانت بالنسبة ليها عادية بحكم هي باقي صغيرة وبريئة معرفاش شنو كاين وبالنسبة ليها داكشي عادي بحال لاكيلعبو لقطوط بناتهوم.. ماشي بحال رحيل لي فهمات اش كاين وأصلا داك لقط لي جاب زين العابدين قاافز حيت مولف الزنقة ماشي بحال إيڤانا لي تربية الداار.. وحل ليها داك لما لي كانت تاتشرب وبدات تاتكحب تاحسات بنوح تايطبطب على ضهرها ناطق بهدوء:حلال حلال

رحيل:(خنزرات فسيدرا) اجي لهنا

قربات سيدرا جهتها وطلقات لقطة وشداتها رحيل وهمسات ليها فودنيها: ياك ديك لمرة قلت ليك لاشفتي شي حاجة اجي قوليها ليا بوحدي؟

سيدرا:(بخفوت جامعة شنافتها)اه مامي سمحيليا

رحيل:ماتعاوديهااش واخاا

حركات سيدرا راسها باه وسكتات أما رحيل مقدراتش ضور جهة نوح مور هضرة دسيدرا لي بااين لمعنى ديالها... صافي هادشي لي بقا ليها تشوه معاه على قبل لقطوط.. جاتها الضحكة ولحشمة فنفس لوقت ولكن لي خلاها ترتاح هو داك السكات لي لتازم بيه..

نوح:(شاف فسيدرا لي نعسات فحظن رحيل ونطق بهمس)خلينا نطلعو لفوق

رحيل:واخا

هز عليها سيدرا وسبقها وهي رجعات لكيسان دلما ولبريق لكوزينة عاد هزات لقطة وشافت فيها بضحك:تانتي طلعتي مساهلاش ههه

بدات تاتمخشش فيها إيڤانا وهي تاضور راسها وتاتقلب على داك لقط لي غبر وباينة غايكون طلع لبيت زين العابدين حيت تما فين كينعس.. دخلات لبيت سيدرا لقات نوح حاطها بلاصتها ومغطيها وهي تبسم بهدوء.. حطات لقطة تاهي بلاصتها ومشات باست سيدرا وبقات جالسة تاتمشط على شعرها وتبوسها كل مرة.. مدة قصيرة عاد خرجات من بيت بنتها غادة لجناحها.. لقاتو فلحمام كيدوش وهي هزات بيجامتها لي غاتلبس وبقات تاتسنى تايخرج باش تبدل ونيت دير روتينها الليلي.. كانت تاتبقشش فتلفونها ولقات أسماء مسيفطة ليها شي تصاور ديال لِغوب دلعرس باش تختار معاهاا..

رحيل:(كاتسجل أوديو) هوما زوينين وعجبوني ولكن معريين اصاحبتي من جهة لكتااف ونتي عارفة لعرس مخلط وإسلام محاال واش غايبغي تلبسي بحال هاكا جوبخفيغ تختاري شي شكل يكون مستور من لفوق شوية ماشي معيق بحال هادو

كانت أسماء أونلاين ولكن مداخلاش ومجوباتهاش ورحيل جاتها عجب حيت مولفة غير تاتسيفط ليها والاكانت حالة دغيا تاتجاوبها فالبلاصة.. بقات طالعة فلواتس تتجاوب فالمساجات لي سيفطو ليها ومتلفة وقتها تابان ليها نوح خرج من لحمام وشاف فيها بنظرة خاطفة قبل مايكمل طريقو لدريسينغ مخليهاا باقي تتجاوب تاسالات وهي تسد لويفي وحطات تلفونها فوق لكوافوز وهزات مسائلها ودخلات تبدل عليهاا ودير روتينها قبل ماتنعس.. بعد مدة كانت خارجة من لحمام ببيجامة دالنعاس ساتان فالكحل وبانطوفة تاهي كحلة مزغبة.. جامعة شعرها شفينجة مخربقة مخلية لافخونش طايحة ليها على عويناتها... غادة جهة النموسية باش تنعس ومع زولات لغطاا سمعات صوتوو المبحوح وهو كيعيط ليها من الدريسينغ.. كمشات حجبانها وقلبات طريقها لعندو تاوصلات حدا لباب وهي تكى عليه ونطقات بهدوء:نعااام

نوح:(ضار شاف فيها ونطق بخشونة)مبانتش ليك التيشورت لكحلة ديالي؟

رحيل:(تتجاوب بنفخة) غاتكون فالمجر مطوية

نوح:(هز فيها حاجبو ودار يديه فجياب سروال توني ونطق بالتقالة)جبديها ليا

قلبات عينيها وتمشات لجهتو فين كان واقف وجات قدامو جهة المجورة حلاتو وبدات تتقلب ليه على التيشورت تاحسات بيديه ضارو على نصهاا وضهرها لاصق مع صدرو وأنفااسو السخان كيضربو فعنقهاا.. كمشات عنقها فاش حسات بيه حاط وجهو بين تجويف عنقها وهمس ليها بصوتو الخشن:مال لفتنة ديالي مقلقة؟

رحيل:(جوباتو تاهي بصوت هامس كتفشش)شوف نتا شنو درتي

نوح:(كيحرك نيفو مع عنقها ويديه كيتلمسو جنابها وبصوت تقيل جاوبها) هاد الساعة باقي مادرت

رحيل:(هزات عينيها فلمرايا لي قدامهوم كاتشوف انعكاسهوم ونطقات وهي مكمشة حجبانها)علاش ماخليتينيش نمشي مع لبنات لأگادير وتعكستي ليا

نوح:(لعب بلسانو ففمو ونطق ببرود) دويت ومغانعاودش هضرتي التسافيرة بوحدك لا الفتنة هي لااا

رحيل:(كمشات حجبانها وضارت بوجهها جهتو وقالت) وعلاش لا ياك قلت ليك يوماين مغانفوتهاش

نوح:(قرب وجهو جهتها وأنفاسو كيضربو فوجهها ونطق بصوت تقيل) ملي تكوني ديال راسك سيري فيما عجبك

رحيل:(قلبات وجهها عليه ونطقات وهي معاجبها حال) ومالي ماشي ديالت راسي؟؟

نوح:(خشى وجهو فعنقها تيدوز نيفو مع تجويف عنقها ونطق بصوت هامس تقيل)تت نتي ديالي..

ملي سمعات لخبار من عند تانيرت وهي حامية فيها البيضة.. عقلها مشطون مع محمد طه لي ماعرفاتوش كيف غاتكون حالتو.. باقا تاتعقل كيفاش كان ملي طرا المشكيل دمو وهضرتو لي قال.. عارفة بلي صعيب عليهوم الخبر لاهو ولاأسماء حيت القضية تاتعلق بمهوم.. كانت باغا تمشي عندو ولكن مقدراتش كل مرة تمشي تال لباب وترجع بتردد مزاعمااش.. خايفة تمشي وتلقاه معصب ويصدق جارحها كيف مولف معاهاا.. ولكن فنفس لوقت باغا توقف معاه وبجنبو فهاد الظرف.. هوما مخطوبين ومن واجبها تساندو.. بصح العلاقة بناتهوم فشكل ولكن هاد الأمر بالدات ممحتاجش منها تفكر فتصرفو إنما محتاج تمشي لعندو.. خرجات من لبيت وهي مقررة وزاعمة دخل هاد لمرة وبالفعل حلات لباب ولقات الظلام من غير ضو الكولوار لي كان مشعول ومع تحل لباب تنور وسط لبيت وقدرات تلمح خيالو جالس فوق النموسية عاطيها بالضهر.. خطات لخطوة لولة وردات لباب بلاماتسدو وبالها فديك الوقت كان تيحضر ليها دكريات ماشي وقتهوم..حاولاات تنفض تفكيرها وتصفي دهنها وتنفد الشي لي جات على قبلو.. قربات عندو وهي مجهزة راسها لكلامو ولعصبيتو وفنفس الوقت موجدة ليست طويلة دالأعدار لي غاتعطيها ليها فهاد اللحظة.. وقفات جنبو وهو ماتحركش ومحسش بيهاا.. فديك اللحظة كان عقلو غايب تيخمم ويفكر.. صعيب بزاف تنخادع فشي حد لي تيكون مهم بالنسبة ليك.. جرح ميمتو عمرو ينساه واخا كيبين ليهوم راه عادي وسد على السوجي ولكن كل ليلة ملي ينفارد فبيتو بوحدو تيتفكرها وتيعاتبها بينو وبين نفسو.. تاواحد فينا مايبغي ماماه ولاباباه يكونو خايبين.. كلثوم كانت من دوك الناس لي مكيستاحقوش يكونو عندها ولاد بحال محمد طه وأسماء.. من ديما هي إنسانة مشرارة ومحسادة وهو أكثر واحد عارفها اش تتسوى وباقي عاقل على معاملتها لرحيل فالصغر والتعدو لي كانت تتعدى عليها فاش مكيكونش باه.. كان تيشوف بعينيه ويقيد فدماغو وفاش كبر كان تيعطيها أعدار تافهة وفنفس الوقت كان تيوقف ضدها وينبهها.. ولكن مع مدة بدا كيشوف الوجه الثاني لي عمرو كان يتخيل بلي ماماها بديك الحقارة...تصدم فيها بزاف وعمرو توقع بلي غايخرج منها هاد لفعايل ونهار قال ليها ديك لهضرة كان قاصدهاا حيت بالفعل ميقدرش يسامحها على مدارت ويغفر ليها الغلط حيت أداتهوم بزاف وجرحاتهوم واحد الجرح لي صعيب يبرى.. تنهد تنهيدة مسموعة وعاد انتابه لغزلان لي كانت واقفة جنبو تاتشوف فيه.. شاف فيها بهدوء ورجع شاف قدامو ماهضرش وهي حركتو لي دار خلاتها تزعم وتقرب جهتو كثر تاجلسات جنبو..

غزلان:(بصوت خافت)خالتي تانيرت قالت ليا بلي ماماك ماتت ليوم البركة فراسك

محمد طه:(بصوت هادئ) هاديك لمرا مبقات تاتعني ليا والو

غزلان: أنا عارفة بلي بقا فيك لحال واخا تاتقول هاد لهضرة أنا متأكدة مطلعاش من قلبك

محمد طه:(شاف فيها وهو مكمش حجبانو) نتي معارفة والو بلاماتبقااي تخربقي عند بالك أنا تانقول هاد لهضرة حيت مقلق منها وداك التخربيق راك غالطة هاد لهضرة تانقولها حيت هي لي كاينة ديك لمرا مبقاتش تاتعني ليا والو هي لي دارت السبب لي خلاني أنا وختي نسمحو فيها هي سمحات فيناا وحنا ماعندنا مانديرو بيهاا وحياتنا بلابيها حسن

غزلان:(بهدوء) ولكن تاتبقا ماماك

محمد طه:(ضحك بسخرية) نتي اغزلان معارفاش اش كاين بلا ماتهضري على شي حاجة ماحضرتيش ليها وماعشتيهااش (تقاد فبلاصتو وكمل كلامو بانفعال) ديك الكلمة هي مكتستاهلش تقال ليها وحدة استاغلات ولادهاا على قبل مصلاحتها أم؟ وحدة تتشوف ولادها بحال شي حمااق تايجريو ويقلبو فين يتسلفو باش يديرو ليها عملية باش تبرى أم؟ وحدة لي واخا شافت دموع ولادها ماتهزاتش فيها الشعرة وكملات لي فبالها أم؟ وحدة لي فرقات بين زوج باغييين بعضياتهوم ودخلات وسطهوم كيف السوسة أم؟ وحدة لي فرقات زوج ولاد على واليديهوم وخلاتهوم يكبرو بلابيهوم أم؟؟ وحدة لي كاانت تاتعدب فبنت صغيرة يالاه عندها خمسنين أم؟ واش فنظارك هاديك تستاحق تعيط ليها مي (صوتو تخنق وهو كيكمل بحرقة) لا ماتستاحقش حيت هي قلبها كحل وكاتبغي غير مصلاحتها.. ديك المصلاحة لي سبقاتها على ولادها...شنو لي غايخليني نشفع ليها وتبقا فيا وهي أصلا مفكراتش فيناا.. هاديك لمرا كنت تانعطيها فالأعدار ولكن هي مكتستاهل منا والو وهي السباب تاخلات قلبي يقصاح عليها وميغفرش ليهاا وعمرووو غايغفر ليهاا وفديك الليلة أنا دفنت مي بيدي وهاد لمراا مكتهمنيش ومكنعرفهاااش..

نبرة صوتو كانت كافية توصل ليها بلي بصح هو مجروح منها وهادشي لي قال خلاها تحس بالحزن عليه لاهو ولاأسمااء.. واخا متعمقش ليها بشنو دارت كلثوم ليهوم ولكن هادشي كافي يخليها تاخد فكرة على شنو كاين وتعدرو.. بقا فيها ودموعها تغرغرو فعينيها أما هو قلب وجهو ورجع كيشوف قدامو تاحس بيها شدات فيديه بلاماتهضر وزيرات عليها.. فديك اللحظة بلامايفكر قرب جهتها وحط راسو فوق كتفهاا وبقا ساكت وهي سندات راسها فوق راسو وخلاتو على خاطرو بدون ماتكلم فقط صوت أنفاسهوم لي كيتسمع وكل واحد مزير على يد الثاني..

فبيت أسماء كانت جامعة رجليها ودموعها نازلين تاتبكي وتلفون جنبها كيصوني بنمرة إسلام لي كان يتسناها تعيط ليه باش يكملو كلامهوم.. في حين هي كانت تاتفكر فدكرياتها معاها من طفولتها لمراهقتها لشبابها ولنضجهاا..كل مرحلة وعندها دكرى متعلقة بمهاا لي يستحيل تمسحها واخا تبغي.. دور كلثوم فحياة أسماء كان مهم بزاااف وخصوصا قبل مايبان عاصم فحياتهوم ويباتو معاه المشاكيل.. كانت متطبعة بيها لدرجة كبيرة وتاتصرف بحالهاا حيت فصغرها كانت متعلقة بيها بزاف.. فلول مكانتش تاتشوف لخبث دمها حيت ماعمرها قاستها واخا تاتشوفها تاتعامل رحيل خايب إلا أن هادشي مكانش تيهمها فلول.. حيت داكشي حلات عليه عينيها ولفاتو وكانت فلول تاتجيها عادي مي من بعد بدات تاتشوف وتلاحظ وهي واخا قبيحة وفمها مكيسكتش من المعيور ولكن فلداخل ديالها كاين واحد النقى لي زرعو فيها إدريس..

جامعة رجليها عندها فهاد اللحظة بالضبط باغا غير تبكي عالله ديك الحرقة لي فقلبها تزول..كانت فديك اللحظة محتاجة لي تفضفض عليه وأول شخص طاح فبالها "رحيل" وكون ماخافتها تخلع وتشطن كون صونات عليها وفاش شافت نمرة إسلام بان بحال شي درهم دلحلال وبسرعة جوباتو بصوت باكي:إسلام

إسلام:(ناض من بلاصتو فاش سمع بكاها وقال بصوت باين فيه مخلوع)أسماء مالك علاش تتبكي واش واقع ليك شي حاجة؟

أسماء:(عضات على شفتها كاتمة ديك الشهقة) ماتت كلثوم ماتت

إسلام:(حط يديه على جبهتو ونطق بصوت هادئ)أنا جاي عندك ملي نصوني عليك خرجي عندي

أسماء:لا لا بلاش غير خليك معايا فالتلفون

إسلام:(جلس بلاصتو منفد كلامها وبهدوء قال) البراكة فراسك اغزالي

أسماء:(عاضة على شفتها حابسة لبكية) كون ماغدراتناش كون كانت دابا باقا عايشة

إسلام:استغفري مولاك اأسماء الموت علينا حق وتاواحد معارف نهارو وقتاش اش هاد لكلام تاتقوليه؟؟

أسماء:(بألم وحسرة قالت)كنا غانعالجوها أنا ومحمد طه ومكناش انسمحو فيها ولكن هي سمحات فينا ملي اختارت تبع طريق الغيرة والحسد والانتقام من حاجة عمرها كانت (شهقات)كون مدارتش هادشي فينا كون راه عتقناهاا واخا الأعمار بيدي الله ولكن مكانتش غاتبقا بوحدها وكنا غانكونو معاهااا ونوقفو فجنبها

إسلام:لي وقع وقع دابا اأسماء هضرتك مغاديش ترجع لي فات باش يتگاد (كمل بنبرة مجروحة) تاأنا كنت بحالك وكنت تانقول نفس كلامك "كون غير"(مسح وجهو وقال مغير كلامو مباغيش يجبد المواجع فهاد الليل) غاتحضرو لدفينة؟

أسماء:(ببرود)لاا (حكات يديها مع بعض) هي اختارت لي ينفعها وتاحنا اختارينا

إسلام:(بتفهم)واخا لي بان ليك

أسماء:(مسحات دموعها ونطقات بهمس)شكرا حيت سمعتي ليا بصح كنت محتاجة ندوي مع شي حد

إسلام:(تنهد)وقتما حتاجيتيني اغزالي غاتلقايني متنسايش هادشي

أسماء:مهم تصبح على خير

قطعات لابيل وهي تاتنهد وعينيها باقي تيبريو بالدموع..دخلات لواتساب وخلات مساج لرحيل علماتها وموراها حطات راسها فوق الوسادة وسدات عينيها باغا تنعس وتنسى كلشي فهاد اللحظة..

**

صبح صباح جديد حامل معاه أحداث جديدة.. كان لجو مغيم والنفسية ربي لي عالم بيها كلشي ساق خبار موت كلثوم..ومنهوم رحيل لي كانت شادة تلفونها تاتشوف فالمساج دأسماء بسكات.. عينيها كايشوفو فالشاشة وعقلها مسافر لدكريات طفولتها مع كلثوم وكيفاش كانت تتعدى عليها وتخليها تشقى وهي باقي صغيرة لي گدها راه تيلعب وهي حاطة ليها كرسي باش تجي قد لڤابو وتغسل لمواعن والاهرسات شي حاجة ضربها وبزاف دلحوايج رحيل تفكراتهوم خلاو قلبها يضرهاا.. نزلو دموعها من عينيها ومسحاتها بزربة فاش سمعات باب الحمام تحل.. بدات تاتنش على عينيها تاحسات بيه عنقها وطبع بوسة على عنقها ونطق بصوت مبحوح:علاش فايقة باقي لحال

رحيل:(بصوت حاولات يبان طبيعي)درت مع لبنات نمشيو عند النگافة داكشي علاش

نوح:(ضورها جهتو فاش حس بصوتها مغير وشاف فعينيها لي كانو حمرين شد وجهها وقال بجدية وحاجبو مهزوز لسما)كنتي تاتبكي؟؟

رحيل:(بدات تاتحك عويناتها وتبسمات)هه غير عيني ضروني وصاف (كاتحك عينيها بااش يتيقها)ماعرفت مالي

نوح:(شد يديها)اجي غسلي وجهك ولبسي حوايجك نمشيو لكلينيك دوزي على عينيك

رحيل:لا بلاش مكيضرونيش ديما غير هاد الصباح وصاف

تحنات على لاڤابو تاتغسل وجهها وهو واقف عليها بحال قباض الرواح تاغسلات وجهها وسنانها وشافت فيه وهي تاتمسح وجهها:صافي انوح الاباقي ضروني نمشي دابا مكاين لاش وأصلا عندي شغال بزاف

نوح:(تكى على لباب مربع يديه وشاف فيها بشوفة فشكل وقال بهدوء)علاش كنتي تتبكي؟

رحيل:(ضورات عينيها وخرجات من الحمام)مكانبكيش

نوح:(تبعها وهو هاز حجبانو وقال بجدية)بلاكدوب ارحييل سولتك جااوبي

رحيل:(تنهدات ونطقات بخفوت)مامات محمد طه وأسماء ماتت لبارح

نوح:(حرك راسو وقرب جهتها معنقها)الله يرحمها

رحيل:آمين غايخصني نمشي نشوف محمد طه وأسماء ضروري

نوح:(باسها فجبهتها)لبسي حوايجك نفطرو ونديك لعندهوم..

ملي وصلات رحيل أسماء لقات على من تفضفض وتبكي وگاعما مشات بخدمتها.. أما محمد طه فقرر بعد تفكير طويل يحضر لدفينة ويدير واجبو الأخير جهتها واخا هي مكتستاهلش.. وطبعا باه ساندو ومشى معاه.. كانت قاصحة عليه ولكن هادشي لي مكتب عليهوم الله أما رحيل وتانيرت قررو يديرو صدقة ويديوها لجامع وبالغعل شمرو على دراعهوم وعوناتهم غزلان تاهي..

وهاكا دازت ديك الليلة وتبعوها ليالي خرى لي قدرو ينساو فيها ماجرى ويكملو حياتهوم عادي ويبداو فتوجاد لعرس لي مبقا ليه والو وتحضيرات قبل لعرس تتاخد وقت طويل.. كانت رحيل مع لبنات فكل خطوة معاوناهوم وفنفس الوقت كانت تتوجد لعراضة ومعاوناهاا رحمة لي اقتارحات عليها ديرها فالرياض باش المفاجأة تكمل وميعيقوش بيهاا.. عجبها الاقتراح واخا سبق لنوح وقالها ليها ولكن فاش جات من عند رحمة حسات بالفرحة وعرفات بلي الطريقة لي اختارت باش تكسبها جابت نتيجة ليها وأيضا اكتشفات بلي رحمة عندها دوق خطير وأنيق عجب رحيل بزاف..

**

ليوم كان يوم العراضة كانت خارجة رحيل من لحمام تاتنشف شعرها ورمات شوفتها جهة نوح لي كان باقي ناعس فوق النموسية شادها كلهاا.. تمشات جهة الدريسينغ بلامادير لحس باش ماتفيقوش لبسات عليها حوايجها وفولارها ومشات صلات هو لول عاد خرجات من البيت هازة تلفونها.. نزلات لكوزينة وشمرات على دراعها باش توجد لفطور قبل مايفيقو.. فيها واحد الطاقة على الصباح خطيرة يمكن الفرحة بزواج خوتها هي السباب..

كاتوجد لفطور تادخلات ممات السعدية وبدات تتعاونها تاهي تاحطو الطبلة منوعة.. سالات لي فيديها ومشات لعند نوح باش تفيقو ساعة لقات السيد فايق تايلبس حوايجو..

رحيل:(قربات جهتو وباستو فحنكو)صباح الخير

نوح:(بصوت مبحوح)صباح النور

رحيل:(حطات يديها على وجهو لي كان دافي وقالت بحنية)باقي كيضرك حلقك؟

نوح:شوية

رحيل:تاندير ليك لعسل لحر مع لحامض ليوم فالليل حيت ماخصش يضربك عليها لبرد

حرك ليها راسو باه مافيه لي يهضر حيت ضربو لبرد وحلقو كيضرو..

رحيل:قلتي لرؤوف بلي غايكونو لعيالات عندنا هناا ليوم؟

نوح:(تيرش فريحتو وببحة)خودو راحتكوم تاحد مغايجي تاوكان تساليو تازين العابدين عندو لصال ليوم ولحاج راه عند ولدو

رحيل:صافي واخا باش لعيالات ياخدو راحتهوم كثر راك عارف لي كاين (ضارت عندو) نزلو نفطرو؟

نوح:(قرب جهتها وشدها من خصرها غادي بيها لبرا وقال بجدية وبصوت خشن مبحوح)قبل مانسى عارف بلي نتوما لعيالات عزيز عليكوم النشاط وكتسرحوو وتنساو راسكوم ولكن (شاف فيها بشوفة صارمة) مانلقااش شي وحدة مصورة هادشي لي دايرين هنا سمعتي

رحيل:(حركات راسها باه)لا كون هاني تاوحدة مغاتصور

نوح:(ببرود) المهم لي عندي قلتو

نزلو لتحت فين كانو لبقية حاضرين فطرو جميع وكل واحد تيسر لشغالو ورحيل تاهي ناضت تتعيط وتأكد مع لي متافقة معاهوم باش يجيو فالوقت وفنفس الوقت هضرات مع مها وعلماتها لوقيتة لي يجيو ولبنات غادين أساس عراضة عادية..الوقت دغيا كيدوز وهي من هنا ولهيه ومعاها تارحمة لي عوناتها ولحق يتقال ماخلاتش من جهدها تاهي.. مجات توصل لوقيتة تاكان كلشي واجد ومقااد.. فالصالة لكبيرة كانو محطوطين ربعة طبالي مزوقين بالطباسل ولكيسان ولورد الديكور كان بسيط وفنفس الوقت أنيق وشيك.. فجهة دالصالة كانو حاطين خمسة دكراسى واحد حدا واحد.. الصالة معطرة بالبخور لي مطلوقين من المبيخرة لي محطوطة فوق الكوان..

فبيت رحيل كانت دايرة أبيل مع رنيم وفنفس الوقت تاتوجد راسها..

رحيل:(سادة عينيها وتادير فلفغابوبيغ)فين وصلتو؟

رنيم:(تاتهضر بشوية)حنا باقي فالدار كانلبسو ملي غانخرجو ونسيفط ليك مساج حيت ميصلاحش ليا نهضر

رحيل:داكوغ واش جبتي قفطانك؟

رنيم:اه عندي هنا فالصاك مهم نخليك شي حد جاي باي

قطعات بزربة ورحيل بدات تاتكمل مك اب لي دارتو خفيف حدها دارت فغابوبيغ مع ريسيل وعكر نيود فالغوز مع چلوس وفغاجو فقط.. هزات من لعلاقة داك لقفطان لي كان فالباج بارد وفيه زواق خفيف فلكتاف.. كان على طولتها وحزماتو بلمجدول ديالو.. وقفات قدام لمرايا تاتحل فشعرها لي كانت مصاوباه بابيليز فلتحت ولفغونش تاهي قسماها فالوسط.. رشات ريحتهاا ولبسات صندالة بلاطالون وهزات تلفونها وخرجات من بيتها غادة لبيت سيدرا تلبسها ومع دخلات تبسيمتها شقات وجهها وهي تاتشوفها مدابزة مع صدايف ديال الصاية لي لابسة..

رحيل:(قربات جهتها)هانا على مامي ديالي لبسات حويجاتها بوحديتهاا

قربات جهتها وشداتها من وجهها تاتبوسها فحنيكاتها وفمها وسيدرا تاتكركر بالضحك

سيدرا:شوفي مامي جاتني زوينة ياكا؟

تاتوريها لبيستها لي ختارت لراسها.. صاية فوق الركبة مع لِبا وبودي طروا كار فيه وريداات جهة لكتف ليمنية.. تبسمات ليها رحيل أو وقفات وراها تاتمشط ليها شعرها وخلاتو ليها مطلوق بحالها..رشات ليها ريحتها وشدات يديها نزلو لتحت فين كانت رحمة لابسة تاهي قفطان انيق وخفيف ديال الدار فلبلوماغين وسناء تاهي لي لابسة قفطان جوهارة فالبلوسياال..

رحيل:(بتبسيمات)صافي كلشي واجد اخالتي..

رحمة:اه كلشي واجد شوفي غير مع الضياف فين وصلو حيت غايخصهوم يجيو قبل منهوم

سناء:واش غايجيو بزااف؟

رحيل:صحبات غزلان بتلاتة وممات إسلام وخوتاتو وعيالات خوتو وخالتي طامو وحنا

سناء:يعني ماشي بزااف (شافت فرحمة)بيسان خدامة

رحمة:راه جايا فطريق مستحيل تفلت العراضة مور ماعرفات اش غايكون فيها

سناء:(تبسمات)الله نشطو شوية ونفقصو العدو رحمة:(فهمات قصدها) اوا تكايسي شوية

سمعو الدقان ومشات رحيل باش تشوف شكون لقات دقايقية عيالات جاو وجابو لمطاريال ديالهوم تبسمات ليهوم وصلات تابيسان لي مشات تاتجري تبدل حيت تعطلات.. موراها جاو صحبات غزلان ومعاهوم تاوداد مرات زكرياء سلمات عليهوم ومع كانو لابسين قفاطن وفوق منهوم عبايات غير دخلو زولو لعبايات وكل وحدة مقادة ومأنتكة.. بدات تعمار الدار ولعيالات بداو يجيو تاكلشي جا وكلهوم لابس البلدي ومع مكاينش الرجال كلشي طالق الشعر واخد راحتو

رحيل:مرحباا بيكووم

م.إسلام:ترحب بيك الجنة ابنتي

خت إسلام:صراحة فكرة زوينة هادي خصوصا العرس مغانقدروش نشطو فيه كيف بغينا

رحيل:اوا عليها درنا هاد القضية هههه(وصلها مساج من عند رنيم بلي وصلو ونطقات بزربة) هاهوما جاااو

ناضو جميع غاديين جهة الباب فين واقفات زوج عيالات هازين الحليب والتمر بريستيج.. ودقايقيات بداو يسخنو المطريال وغير تسمع الدقان وحلات السعدية وهو يتسمع صوت الدقايقيات لي هز الرياض كامل أسماء وغزلان تدهشرو وتانيرت ورنيم كيطبلو ويزغرتو.. بداو لعيالات كيصليو على النبي والدقايقيات حماو الطرح بالنشااط ورحيل قربات ليهوم بضحكتها والشعورات نازلين على لوجه هزات تمرة وكلاتها لعريسات وشرباتهوم الحليب وجراتهوم يشطحو ودغيا نساو الصدمة وفرحو وكل وحدة دارت حقها مع الدقايقيات تاسخفو عاد بداو كيسلمو ويباركو ليهوم ورحيل شدات لبنات طلعاتهوم لبيت سيدرا فين حاطة ليهوم القفاطن لي كرات ليهوم أسماء ختارت ليها لبلوسيل وغزلان موڤ بارد.. على عبارهوم جاو لقفاطن ومع أصلا مقادين وجههوم بمك اب عادي حدهوم عاودو العكر وخلاو الوجه طبيعي..

أسماء:(عنقات رحيل بالجهد)شكرا بزاف والله مكنت متوقعاها

غزلان:(تاهي نطقات بتأثر) مفاجأة زوينة بزااف عمرنا نساوها ليك

رحيل:(بضحك)ههه وهادشي لي بغيت نصدمكوم يالاه مسحو عليا خناينكوم ونزلو تبعوني نزهاو ونساو لهم شوية

نزلو لتحت ودخلو لصالة ولعيالات حماوها تاني بصلى وسلام والعونيات لي جابت رحيل كانو جالسين فالكراسى ديالهوم كلهوم لابسين قفاطن فتفس لون الا لباطرونة لي متميزة عليهوم.. كانت رحيل معولة على نشاط وگاع داكشي لي مغايقدروش يديروه فالعرس يديروه دابا.. جلسو لبنات فالكراسى ولعونيات بداو يسخنو الطرح تانطقات ديك لبطرونة

🎵واسيادي ساعة مباركة باااش طلاقينا بالرمة وطلبة🎵

مع بداو الطرح سخن وناضت أسماء هي لولة وغزلان تايشطحو.. ونطقات لباطرونة بصوتها الغليظ:اتباركالله على لعريسات ديالنا

مشات أسماء علقات ليها ميتين درهم مية مية وهي ديماري السيدة وبدات تاتغني عليهوم بزوجات وهوما عطاو الصح وشطحو تاسخفو عاد جلسو.. ومع لعونيات جيباهوم رحيل وتهلات فيهوم ماسكتوش وسخنو الجلسة وكلشي نااض.. ولي ناضت تاتعلق وتيغنيو عليها وفنفس الوقت السربيات تيسربيو لعواصر والحلويات..

الباطرونة:(أشارت بيديها لجوق يحبسو) اوا امرات ولد لحاج ماديريش لباروك ديالك

ضحكات رحيل ولبنات بداو يصفقو وهي حشمات حيت عارفة راسها لاناضت مغاتجلسش مزال.. ناضت وهي تاضحك وقربات جهتهوم وعطاوها مزون ربطاتو على خصرها وطلعات جلايل لقفطان تابانو سيگان تيلمعو وهي تنطق الباطرونة بداك الصوت لمدعدع:

🎵واهادي فخاطر مرات ولد لحاج وتكااايس علينا ياااولد لحااج🎵

ضحكات رحيل وبدا الدق والنشاط وهي صافي غير بدات السيدة وشعلات وبينات مهاراتها فالشطيح لي معارفينهاش لخرين.. كانت سيدرا جالسة شادة تلفون تاتصور بيه راسها تاطلعات ليها أبيل فيديو ومشات ديريكت أكسبتاتها وكانت من نوح لي جالس فالطوموبيل.. كمش حجبانو فاش وصلو الصداع وقال بصوت مرتافع شوية:فين ماماك؟

سيدرا:(تادير ليه بلاتي بيديها ومع مولفة تاتهضر أبيل فيديو عرفات كيف تقلب لكاميرا وقربات وجهها وقالت بحماس)شوف مامي تاتشطح ماي بلو آيز

حبس جنب الطريق وعينو على تلفون وهي تبان ليه رحيل لي كانت طالعة فوق القعدة وتالبرهوشة دسيدرا ركزات غير عليها ومقلباتش لكام لعونيات.. عينيه عليها وهو كيشوفها محزمة بموزون وتاتحرك فداك الطرف واقفة على صباح رجيلها ولگدام ممحطوطينش فالأرض تاتشطح ودردگ وغير كسيراو فالموسيقى وهي تكسيري بحال لاخدامة بالضوو.. تقول واش عيااات وهو كيشوف أو واحد لحاجب طالع لسماا وعينو عليها غياكلوهاا.. وزادت كملاتها وجملاتها بدات تاتحيير بشعرها وفنفس الوقت تاتحرك مع لموسيقى.. وبقات هاكاك تاحبسو وهي توقف تاتنهج وصدرها يطلع وينزل ونوح غير شاف التلفون كيتحرك وبانت ليه لكاميرا ضارت جهة لعيالات وهو يطفي لابيل ولاح تلفونو فالكرسي جنبو وحرك طوموبيل بالجهد وحجبانو معقودين..

كانو لعينين دلعيالات كلهوم عليها وهي تاتشطح بهراتهوم حيت عمرهوم شافوها وهي تاتشطح وزيد شطيحها كان عاطي لعين وبلاداك التحيار لي حيراات وشعر طوويل مسبسب تما تانيرت تاتقول فنفسها دابا يضربوها ليا بلعيين..أما لالاهوم رحيل شطحات وبردات جنونها فالشطيح ومانزلات من لقعدة تاحسات بجنبها كيضرهاا بحال لاخشيتي فيها لموااس.. كانت كلها عرقانة وشعرها لاصق ليها على عنقها وجبهتها.. قربات بلحفى جهة الطبلة فين جالسين لبنات وجرات كرسيها جلسات تاتنهج.. نزلات على لكاس دلماا بدقة وعطاتها أسماء كلينيكس تاتمسح بيه..

أسماء:(تحنات جهتها وقالت بهمس)اتباركالله على شيخة تسونامي هههههه

رحيل:(تاتنهج)الله بردت غدايدي نيت لامشطحتش فالعرس مغايبقاش فيا لحال هههه

أسماء:شطحي فالعرس شكون حبسك

رحيل:(حركات راسها) نشطح باش يهرس ليا نوح رجلي ههه هبلتي نتي

أسماء:اوا بالسيف اختي يهرسهوم وخيورات ربي مزلعين وعاطين لعين السيد ميبفي حد يشوف ليه فخيرو هههههه

قربات سيدرا جهة رحيل وقفات بين رجليها محنية عليها تاتغبن: مامي بغيت تاأنا نطلع فوق هاديك ونشطح

أسماء:(كركرات بالجهد) هالخليفة ديااالك ارحييل ههههه

رحيل:(حيدات بوشيط تلفون وخدات منها ميتين درهم وناضت شادة يد سيدرا)اجي امامي

مشات علقات ديك لميتين لعونية وشوشات ليها فودنيها ولخرى حركات ليها راسها وضحكات.. طلعات رحيل سيدرا فوق القعدة ورجعات بلاصتها باش تصورهاا..

العونية:(بصوتها لغليض) 🎵اسيدرا لالة لبنااات🎵

العوينات: 🎵البناااات🎵

🎵سيدرا زين وتباات🎵

🎵البناات🎵

البخوشة غير سمعات سميتها وبدات تاتحنقز وتقلد فمها كيف كانت تاتشطح ورحيل تاتفيلميها باغا تخليه ليها سوڤونيغ.. كلشي تايصفق ويرد مع لعونيات لي حماوها بالزديح والرديح وسيدرا تاتحرك راسها وشعرها غادي جاي معاهاا رطيطب.. شطحات ونقزات وشبعات تكركير وتالعونيات ماسكتووش عطاوها لدق والنشاط تاعيات سيدرا ونزلات وصدرها يطلع وينزلها ومشات نيشان عند رحيل لي هزاتها تاتبوسهاا

رحيل:(تاتجمع ليها شعرها شفينجة حيت صهدها)فرحانة امامي ديالي

سيدرا:اه مامي بغيت نبدل حويجاتي فيا صهودات

رحيل:زيدي نبدلهوم ليك

ناضت معاهاا وخرجات من الصالة مخلي لبقية ناشطين ونايضين تاهوما يشطحوو.. كانت غادة جهة الدروج تابان ليها لباب تحل ودخل منو زين العابدين لي كان تايتمشى بشوية وكيف عادتو لابس السبور قبية مع سروال توني فالكحل وهاز صاكو دجلد.. دققات رحيل فوجهو وهي تبان ليها واحد لفاصمة فوق حاجبو وهابطة شوية على عينيه.. ولي لفت انتباه رحيل هو يديه لي حاطها على جنبو وهو كيتمشى.. وصل حداهوم ورحيل نطقات بتساؤل:زين العابدين مالك؟

زين العابدين:(شاف فيها ببرودو المعتاد)والو

تخطاها طالع فالدروج وهي بقات تاتشوف فيه غادي تاغبر وهي تشد يد سيدرا وطلعات معاها لبيتها.. بدلات ليها حويجاتها بكسيوة خفيفة شوية مع سيدرا مولفة من صغرها تاتلبس حوايج خفاف واخا تيكون لبرد مكتكترش لحوايج حيت تاتخنق.. نزلات سيدرا تاتجري لتحت ورحيل هزات تلفونها دوزات لخط لنوح باش تعلمو بلي زين جاا ومن حالتو باين بلي بيه شي حاجة..

---

وقف طوموبيلتو قدام واحد لكافي ونزل وهو هاز تلفونو وسوارتو وسد الجاكيط لي لابس وبخطوات تقيلة تم داخل وهو يبان ليه اليازيد جالس فواحد الطبيلة جايا فالكوان.. قرب جهتو وحط تلفونو وسوارتو عاد جر كرسي وجلس ونطق بصوت مبحوح:على السلامة

اليازيد:الله يسلمك (قال بمزاح)صوتك اولد لحاج غادي وكيمشي غدا تصبح تادوي بلشارات

أشار نوح لسرباي وطلب قهوة كحلة ورجع تكى على لكرسي ونطق:خلينا مني وگول ليا اش تم؟

اليازيد:(جغم من قهوتو) قررت غانستاقر فاليونان وغاندي لواليد والواليدة معايا

نوح:(تكى على الطبلة وقال بجدية) وبلادك باش ضراتك تاتخويها وتمشي تستاقر تم؟

اليازيد:(تنهد) حيت ماحدي باقي هنا عمري غانقدر نعيش مرتاح اولد لحاج كلما گلت غانكمل حياتي وغاندير دار ومرا لي غانكمل معاها لي بقا من عمري مكيكتابش وراك شايف كلشي على عينيك عليها گلت اللهم نمشي ليونان تما فيه ناس كانعرفهوم وزيد السيد لي كنت معاه شريك باغيني نرجع يعني كلشي ضامنو تم والواليدين لي كانجي على قبلهوم راه غانديهوم معايا

نوح:(حط ليه السرباي قهوتو وغير مشى نطق بهدوء) هاد لكلام كامل لي قلتيه ماعندو تامعنى (بجدية) ماشي غير حيت ربي مايسرش ليك فالزواج مع ديك بنت الناس راه صافي هدااك سبب يخليك تخوي بلادك (ضرب بصبعو على الطبلة وعينو فعين ليازيد) عمر لهروب مكان حل اليازيد أي واحد وقعو ليه مشاكيل فحياتو راه كيواجههوم ماشي تايهز باليزتو ويبدل البلاد كيف باغي دير نتاا مقادرش تبقا هنا على قبلها..

اليازيد:(كمش حجبانو)راه قلت ليك أنا وياها سالينا زماان اولد لحاج أنا درت لي علياا وطلبت السماحة تاطبت وهي مقصحة قلبها

نوح:(بتقة)مساليتوش بلاماتكدب على راسك وعليا شتي نتوما باقي واقفين بلاصتكوم لي كنتو فيها قبل سبع سنين..

كمل نوح كلامو بجدية: ولاطلبتي السماحة راه ماشي عييب حيت نتا غلطتي فحقهاا ونتا عارفني مغانجي لافصفك ولافصفها وغانقول كلام لحق كيفما حنا الرجاال مانبغيوش لمرا لي تخونا ومانرضاوهااش وكنحسو برجولتنا تهانت راه نفس الشي لمرا تاهي مغاتقبلش بيها وغاتحس بكرامتها تمرمدات فالأرض (كمش حجبانو)كون كانت هي لي دارتها كون نبصم ليك عليها تاغاتق.تلها ودخل عليها لحب.س ومغاتحرك فيك تاشعرة دندامة حيت غاتقول مع راسك داكشي لي درت هو لي خاصو يدار (شاف فيه بتركيز ولقى ملامح وجهو تزيرو وقال وهو كيشير ليه) هانتا شوف راسك غير ملي قلت ليك ديك لهضرة كي وليتي إيما كون طرات واهلي فين كنا غانوصلو..المضمون دكلامي ليك اليازيد هو نتا خصك تجلس مع راسك وتشوف اش باغي لاكنتي بصح مقتانع بلي طريقك وطريقها تفرق زمان وبلي مبقا جامعكوم غير الدم ولعائلة فديك الساعة لي درتيه راه من حقك أما لاكنتي تاتعاند وتاتقصح راسك باش تبدا حياة جديدة باش تبين ليها بلي نسيتيها كيف دارت هي فعرف راسك غير تتخربق..

من ديما اليازيد كيحس براسو مفاهم مع نوح واخا هو كبير عليه بسنوات ولكن كلامو وطريقة تفكيرو تاتعجبو وتاتخليه يرتاح ليه ولهضرتو وفيما تيوقع ليه مشكيل تيلتاجأ ليه حيت بالنسبة ليه نوح شارب عقلو وإنسان حقاني ومينافقكش لي فيك خايب تيقولو ليك نيشان.. مغاينساش وقفتو معاه قبل سبع سنين فاش تم الطلاق كيفاش كان تيعاتبو وكيبين ليه غلطو وفنفس الوقت كان واقف معاه وتينصحو..

صونى تلفون نوح وغير هزو وشاف نمرتها وهو ينوض باش يجاوبهاا.. بعد لواحد لكوان وفتح لخط وهو يوصلو صوتها لي تينغمو وخصوصا فاش تتعيط ليه بسميتو:نووح

نوح:(بصوت خشن مبحوح)ياكما واقعة شي حاجة؟

رحيل:زين العابدين راه رجع لرياض مضروب فحاجبو وداير ليه فاصمة كبيرة

نوح:(شاف فساعتو وقال وهو مكمش حجبانو)فين هو دابا؟

رحيل:فبيتو (وبتساؤل)نمشي عندو؟؟

نوح:سيري وماتقطعيش لابيل

نفدات كلامو ومشات جهة باب جناح زين العابدين دقات وفاش ماسمعاتش لحس دخلات وكانت هاديك تاني مرة دخل لعندو حيت لمرة لولة كانت نهار طاح بلكريز دالصرع وبقوة الخلعة مكانش عندها لوقت تفقد جناحو بحال دابا.. كان لون الجناح غالب عليه اللون الرمادي.. وصلات لباب بيت النعاس ودقات ونطقات بصوت هادئ:زين العابدين؟

كان واقف فالحمام قدام المرايا بسروال توني ولفوق عريان عينيه لقهوين كانو مركزين على ديك الضربة لي عندو فجنبو ولي بدات تزراق.. هز تشورت لبسها ببرود وغير خرج وهو يسمع الدقان وصوت رحيل شي لي خلاه يقرب جهة الباب وحلو وهي من لغفلة لي دار تضهشرات ولكن سرعان ماتبسمات ليه بحنية وبلاماتشعر مدات يديها وحطاتها على لفاصمة وقالت:واش نتا بخير؟

كان واقف تيشوف فيها ببرود مد يديه وزول يديها ونطق بهدوء:بخير

رحيل:(حسات بالإحراج) غايكون فيك الجوع نمشي نجيب ليك غداك

زين العابدين:مابغيتوش

قال هضرتو وسد لباب فوجهها مخليها تاتشوف فيه وهي مستغربة من تصرفاتو وبرودو لي تاتحس بيه فكل مرة بغات تهضر معاه.. معرفاتش علاش كيجيها هاد الولد فشكل وشخصيتو كلها على بعض ممفهومااش وصعيب تفهمها.. تنهدات وتفكرات بلي نوح على لخط جوباتو وهي خارجة من جناح زين: ألو نوح

نوح:(كان سامع كلشي حك حاجبو بتعب وقال ببحة)سيفطي ليه لغدا لجناحو تانجي ونشوفو

رحيل:واخاا باقي حلقك تايضرك؟

نوح:شوية (تفكر داكشي لي شاف وقال هاز حاجبو)قربتو تساليو

رحيل:باقي (كمشات حجبانها وحسات بواحد الألم جهة الحوض) اااح

نوح:(تقاد فوقفتو)ماالك

رحيل:(مبغاتش تشطنو)غير زدحت رجلي مع لباب وصااف مهم نخليك دابا وملي غنساليو ويبغيو يمشيو غانعيط ليك باش تجي ونيت يكون تابابا ودراري جاو

نوح:واخا

غير قطعات وهي تجلس بلاصتها تاتمسد ديك لبلاصة وهي مكمشة حجبانها.. بقات مدة تاحسات براسها مزيان عاد نزلات لتحت وصات السعدية طلع لغدا لزين العابدين عاد رجعات لصالة فين كان النشاط باقي حاضر بقوة وخوتات إسلام نايضين كيشطحو مع أسماء وغزلان.. جلسات فالكرسي تاتصفق وتحرك غير فبلاصتها..

دوزو وقت زوين ولعونيات عطاو لي عندهوم وكثر نشطو ليها العشية كيف بغات.. وصل وقت لماكلة وتستفو العيالات فالطبالي ومعاهوم تالعونيات لي شدو بلايصهوم وتسربات الماكلة على حقها وطريقها والخير موجود كلاو الناس وشاط.. وغير عمرو العيالات كرشهوم وهوما ينوضو تاني عاطينها لشطيح عاود وتقول واش عياااو.. تفرق الحلوى وأتاي كأخر حاجة ومع وصلات التمنية سالات لحفلة ولي عندها شي دار راه ناضت تمشي ليها وكلهوم شكرو رحيل على لعراضة لي عجباتهوم ونشطو فيها وخواو الطاقة السلبية.. وتالعونيات عجباتهوم لخلصة وكلهوم بداو يدعيو معاها

الباطرونة:سيري ابنتي الله ينقي طريقك من الشوك ويبعد عليك ولاد لحراام

الكل:آمين

الباطرونة:سيري الله يرزقك من عندو ويخلي ليك زمانك ولي عزيز عليك ويرزقك الدرية الصالحة ابنتي ويخلي يامك كلها سمن وعسل..

كلشي مشى لدارو من غير تانيرت ولبنات وطامو حيت غايجي إدريس ومحمد طه وريان وإسلام يتعشاو هنا عليها بقاو تايمشيو مجموعين.. بدلو لبنات قفاطنهوم ورحيل حدها زولات لحزام دلقفطان مع كان جامعها ومبين فصالتها وخلاتو دابا مطلوق وزادت فولار على راسها.. علمات نوح بلي مشاو لعيالات باش يجيو هو ورؤوف.. جالسين فالصالة كيهضرو على لعراضة ورحيل مجمعة مع لبنات ومتكية فبلاصتها حيت عياات..

أسماء:(تاتشوف تصاورها لي صورات) جاو تصاور غزالين ماعرفت اشمن وحدة نبوسطي فلواتس

رحيل:(شادة تاهي تلفونها) ديري هاديك لي كنتي جالسة جنب زوينة

أسماء:(وراتها ليها) هادي؟؟

رحيل:اه هي (جمعات شنافتها) دوماج كلشي مصوراه بلادرة ومالقيت مانحط ههه

غزلان:تالعرس وتصوري وحطي

رحيل:إن شاء الله

سمعو صوت الرجال وهي تنوض رحيل من بلاصتها غادة تسلم مع باها واخا شافتو غير لبارح توحشاتو.. تبسم ليها إدريس وهي عنقاتو بالجهد وقالت بصوت خافت:بابا توحشتك

إدريس:(تبسم بحنية) فرحتي اللولة لباس عليك

رحيل:حمدلله ونتا (باست راسو ويديه) كيف غادي مع لخدمة وتمارة ديالها

إدريس:الحمدلله ابنتي

مشات رحيل سلمات على خوتها وإسلام غير حركات ليه راسها من بعيد وتاهو مامدش يديه حيت فاهم وعارف اش كاين..

إدريس:ولد لحاج مكاينش هنا

رحيل:ماعرفتش فين هو بلاتي نعيط ليه

مع قالتها تحل لباب ودخل نوح هو واليازيد وقربو جهتهوم وهو عينو سكناتها تاشاف كلشي مغطي ومكيبان فيها والو من غير وجهها ويديها عاد ضار لعند إدريس سلم عليه كيف لعادة بتبسيمة خفيفة ورحب بيهوم ودخلو لصالون التاني لي ملاصق مع الصالون لي فيه النسا.. رجعات رحيل لعندهوم وتكات بلاصتها مزولة فولارها.. هزات تلفونها ودخلات لواتساب وهي طلع ليها بلي نوح صونى عليها أبيل فيديو دخلات تاتشوف لوقيتة وهي مكمشة حجبانها حيت مشافتهااش.. بقات تاتفكر واش تزعم تسيفط ليه شي تصويرة ليها وفلخر سيفطات صورة ليها بإطلالتها البسيطة.. كان حال لويفي ولكن مداخلش وتاهي محكراتش وخرجات من كلشي وجلسات تاتهضر مع لبنات وتسولهوم فين قربو فالتوجاد وشنو باقي خاص في حين نوح كان غادي لزين العابدين يشوفو كيف بقا.. دخل لعندو بلامايدير لحس ولقاه ناعس قرب جهتو وقاد عليه لغطاا وقاص ديك لفاصمة لي كانت كبيرة شوية.. مولفو فاش كيتريني ولاكيلعب لكومبات ضروري ما كيجي مضروب واحد لمرة راه تهرس ليه نيفو گاع.. وهادشي جاري بيه لعمل وعارف ولدو يستحيل يحبس ومايبقاش يلعب لكيك بوكسينغ حيت مستحيل وهو داخل ليها ملي كان ولد لخمس سنين.. باسو فراسو وخرج من عندو راجع لعند الرجال لي كانو جالسين ومضورين عليهوم صينية دأتاي ودوازها.. مخشعين فالهضرة على لخدمة ومواضيع آخرى..

كان جالس معاهوم وعقلو مع بيسان باغي يشوفها حيت هاد لمدة كلها كانت مدروكة مع لخدمة ومتلاقاوش وقليل فين كانو كيهضرو فالتلفون حيت لوقت مكانش عندها.. توحشها وتوحش يسمع صوتها المبعكك كيف تيقول ليها.. هز تلفونو وسيفط ليها مساج عادي حيت مداخلاش لواتس� بغيت نشوفك؟

مجوباتوش ولمساج أصلا موصلهااش كمش حجبانو وبقا كيتسنى واحد الشوية وفاش شاف المساج باقي ماوصلها دخل لعند رحيل وبانت ليه أونلاين وكتب ليها�عيووو بيسان حداك؟

رحيل:(بندالة)�علاش بيتيها؟

ريان:(عض على شفتو) �نديرو صلة الرحم

رحيل: �ياسلام على مصواااب كاتعرف دير صلة رحم غير معاهاا ختك لا

ريان: �دغيا نكرتي شحال من مرة كانعيط ليك فالنهار ولمساجات لي كنسيفط ليك نسيتي اعوينات الجلبانة

رحيل:(سيفطات ليه أوديو كاتبعكك فيه) �اوا بالسيف تسول فيا وتحتارمني راني ختك لكبيرة البرهووش

خدا ليزيات دمحمد طه ودارهوم وعند بالو راه دخلهوم مزيان ساعة غير طلق الأوديو وهو يتسمع صوتها عند الرجال شي لي خلى نوح يضور بزربة جهتو مجرد مالمح صوتها وريان بقوة الدعقة حبس لوديو وطفى لكونكسيون.. أما ولد لحاج غير سمع صوتها وهي تاتهضر بديك النبرة شعلات فيه لعوافي وهز تلفونو دخل نيشان لواتس لقاها مسيفطة ليه تصويرتها.. تكى على الوسادة وقبل مايشوف تصويرتها ويدقق فيها سيفط ليها مساج بالعربية كيف مولف � تبعكيك فالهضرة لاش الفتنة ؟؟

سيفطو وعاد جاا وقت يزومي فديك لافوطو ويشوفها عن قرب بداك لقفيطين لي لابسة وشعورات مصاوبين ومطلوقين على راحتهوم ولوجه مكتراتش ليه المكياج كيف تيعجبو هو يشوفها طبيعية.. مكيحملش قوة الصباغة بزااف ونهار لول قالها ليها وجاها نيشان.. دقق فديك الضحيكة وصف السنان لي كيبان وديك لمعة لي فعويناتها وكل حاجة فيها كان تيعطيها لخاطر باغي يحفضها عن ضهر قلب..

وصلو مساج من عندها: � اينا تبعكيك مافهمتش اش قصدتي؟

نوح:(تايكتب وهو عاقد حجبانو)� لأوديو لي مسيفطة لخوك ريان

رحيل:(تقدات فبلاصتها ونطقات بهمس)لحماري طلق الأوديو قدامهوم كون قلت شي حاجة على بيسان تت (كتبات ليه)� راه سيفطتو غير لخوياا انوح وزايدون ماتبعككتش فيه هضرة عادي

نوح:(تايعض على شفتو)� هضرتك لي تاتقولي عليها عادي حركات شلى حوايج فيا الفتنة..

يتبع...