محتوى القصة
فدار إدريس كان غير هو وتانيرت وسيدرا فالدار أما البقية مكانوش حيت باقي مادخلوش من لخدمة...جايا تانيرت وهازة معاها صينية صغيرة فيها بريريد دأتاي منعنع وطبسيل دلفاكية...جلسات جنبو وهزات داك لبراد وكبات ليه واحد لكويس داير لكشكوشة ومداتو ليه ونطقات بتبسيمة:هانتاا اتسانو أتاي كيف كيعجبك
إدريس:الله يعطيك الصحة
تانيرت:(هزات تاهي كاسها وتكات على دراعو ونطقات براحة) فاش هضرتو نتا او ولد لحاج؟
إدريس:كلام عادي راك عارفة التلفون لهضرة فيه تتكون خفيفة ملي نتلاقاو الراس فالراس ونگلسو وديك الساعة اراك لحديت
تانيرت:لمهم غير ملي رجع دابا هاداك هو لفضل ملي هضرة مع رحيل حسيت بيها مرتاحة دابا وبالسيف وهي هاد لمدة كلها مهمومة وتسنى فيه لحبيبة دقلبي
إدريس:بالسيف ماترتااح راه كلنا تشطنا عليه والغيبة ديالو طولات وبالخصوص مكناش عارفين عليه تاشي خبار وهو قاطع گاع لحبول باش نوصولو ليه
تانيرت:بالسيف مايقطعهوم السيد راه عيى وصحتو تهدات والمشاكيل مبغاوش يهداو...باقي منسيتش الروينة لي ناضت نهار الصدقة وكيف كاان خلعني وعمري شفتو هاكاك السيد تسيف تگولي هزيتي ولد لحاج لمرزن وحطيتي واحد خر بلاصتو
إدريس:أي راجل نفسو حارة راه غايدير نفس الشي واش واحد كيتفرج فتصاور مرتك بلاحشمة بلاحياا ويخرج فعينيه ويلوح علبها لباطل راه لامدوزتي على والديه من لودن لودن راه كيف والو
تانيرت:شفتيه هو كيف ردو السيد متحركش گااع تقولي ماات
إدريس:يستاهل ماكتر بحال داك النوع
تانيرت:(شافت فيه ونطقات بتردد) إدريس ديك لهضرة لي گالت زهرة مت عادل ديك النهار زعمة تكوون بصح
إدريس:(بعدم فهم)اشمن هضرة؟
تانيرت:فاش گالت راه ولد لحاج دار الضرة وشافوه معاهاا
إدريس:(كمش حجبانو فيها ونطق بجدية) وهاد لهضرة تيقتيهاا راه باينة كدوب واحد بحال ولد لحاج لاباغي يجيب التانية ولاتالتة راه غايجيبها قداك الناس مغايخبيهااش
تانيرت:واشكون عرف يقدر يكون مباغي حد يعرف ورحيل تاهي مع حاملة
إدريس:واش كادوي من نيتك اتانيرت؟؟
تانيرت:مالي كانضحك راه بصح كانهضر معااك عارفة بلي هضرتي مغاتعجبكش وغاتجيك ماشي منطقية ولكن راه هوما گالو شافوه معاها ولغياب ديالو دخل ليا الشك مكنتش باغا نگولها قدام رحيل بااش مانخليهاش توسوس ولكن راه خاطري مهنانيش
إدريس:واش السيد مشى لعمرة يغسل دنوبو ويريح خاطرو ويتقرب من لي خالقو ونتي تاتگولي ضربها بتزويجة خرا كون كان باغي يتزوح راه كون دارها قبل مايعرف بنتك راه السيد بعقلوو وعارف بينو وبين الله ماشي برهوش تابع غير زنطيطو
تانيرت:ايوا ماتعرف شوف غير إسلام وشنو دار
إدريس:متقارنيش ولد لحاج بإسلام..راه ولد لحاج وقعو ليه مشاكيل مع مرتو بسباب لوحم وهجرات فراشو وخوات دارو وزيد مشاكيل لعائلة أما إسلام راه تخاان فزواجو لول ومرض فصحتو ومادارش لحل لرااسو وملي عاود تزوج وتحط فنفس لمشكيل بدا يخربق حيت حكم على لحاجة من التجربة لي دوز وزيد ولد لحاج ماشي واحد كيزرب كايسمع ويعطي لخاطر واخا راه كيتعصب أما إسلام جيب يافم وگول
تانيرت:اوا أنا غير هضرة وصاف أنا براسي محاملاش هاد لوسواس لي دخلت لراسي ولكن خفت على بنتي
إدريس:نهار لول شفت ولد لحاج وعرفتو ولد الناس وجيت عطيتو بنتي بعيني مغمضين باركة غير داكشي لي دوز على قبلها وشنو دار واش كاين شي واحد لي يخاطر بحياتو وبعائلتو ويدخل راسو فمشكيل بحال هاداك غير هاكاك لا وزايدون بنااتي عارف راسي عاطيهوم لرجال لي يصونوهوم وتاإسلام واخا قلقني منو على هضرتو ولكن ميكت حيت عارف السيد منااش داز والله يحسن لعواان راه كلنا دوزنا حوايج فحياتنا كانو نقطة كحلة فيهاا ومغانعيبووهش لي تعجب يتبلى
تانيرت:(شافت فيه مكمشة دوك لعينين ونطقات بتساؤل) واش عمر ولد لحاج جبد ليك هضرة على مت زين العابدين ؟؟
إدريس:(حرك راسو وضحك بلاحول) لحاجة لي عاارف راه گلتها ليك مو سمحات فيه حاجة خراا الله أعلم
تانيرت:دخلنا عليك بالله كاينة لي تسمح فكبدتهاا ماعرفتش هاديك مناش غاتكون مصنوعة
إدريس:مغانهضرش على حاجة معارفهااش
تانيرت:(بحسرة) عارفة بلي بعد لمرات كانطيحو فحوايج لي كيخصنا نديروها بزز منا وكاين عوتاني بعض الناس لي كيكون قلبهوم حجرة مكيفكروش فكبدتهوم
إدريس:(تنهد فاش عرف اش قصدات بهضرتها وجرها باسها فوق راسها وقال بهدوء) الله يرحمو ويسمح ليه
تانيرت:(مسحات دمعة نزلات من عينيها)آمين أنا مسامحة ليه دنيا وآخرة وعمري غانحقد عليه...
واقفة قدام الشرجم كاتفرج فالشارع لي كان خاوي بحكم الليل وقليل لي خارج وعقلهاا غااايب محاضرش معااهااا... حيت كان عقلها مسافر لشنو طرا معاهاا قبل شهر ونص بالضبط...
🔙🔙
حطات لمشطة من يديها وضارت عندو وهي مامتوقعاش تشوفو فهاد اللحظة وفبيتهاا...أما هو فكان جالس مع راسو مدة كيفكر فقرارو وبعد عنااء طويل خرج بحل يرضيه...قرب جهتها وهي بقات واقفة فبلاصتها بحال لادرتي ليها بوز...تكدب لاقالت ماتوحشاتوش بلعكس توحشاتو وفراقها عليه هاد ليامات خلاها تأزم ولكن مقالتهاش ليه وبقات محتافضة بهادشي فنفسهاا...
إسلام:(بهدوء وعينو على كرشها)واش نتي حاملة؟
كان عارف جواب هاد السؤال ومع دلك سولها حيت باغي يسمعها من فمهاا ماشي يقراها فمساج باارد مافيه تامشاعر...
أسماء:(حطات يديها على كرشها ونطقات بخفوت)اه درت تحليل وطلع بوزيتيف (ضارت جهة لكوافوز فين كان داك لونڤلوپ محطوط وهزاتو مداتو ليه)هانتا شوف عندي شهر
هزو بأيادي مرتاجفة وهادشي مخفاش عليها وحلو تيشوف فيه ويسرط ريقوو...مدة تانطق:نقدرو نهضرو؟
حركات راسها باه وجلسو بزوج مقابلين بعضياتهوم وقبل ماينطق سبقاتو هي لي قالت بصوت هادئ:تيقني اإسلام لموضوع ماشي كيفما فهمتيه انا كنت تانعرفو من شحال هادي فاش كنت باقي فالرباط وقبل گاعما نعرفك نتاا...(حاولات مادخلش فلديطااي وتجبد سيرة آدم وهضرات غير على وليد وبس) كنت خدامة فشركتهوم وتما عرفتو كان تيبين ليا إعجابو سوى فنظراتو سوى فهضرتو تاخلاني نتعلق بيه (شافتو. زير على يديه وملامح وجهو تقلبو وكملات بسرعة) ديك الساعة كنت باغا تاأنا لي يبغيني وهو قال ليا بلي غايجي يطلب يدي من بابا وبلي باغيني لمعقول وبلي غايطلق مرتو حيت كان مزوج وتاأنا وافقت عليه وتيقتو هضر مع بابا وطلبني منو ولكن موراها كتاشفت بلي كلشي كان كدوب وبلي مرتو حاملة ومغايطلقووش بقا فيا لحال وتهرست على كدوبو وتفارقت معااه ونيت فديك الفترة طرا مع رحيل داك لمشكيل وتاخالتي تانيرت كانت كومة وريان كيتعالح... جاني ففترة لي كانو لمشاكيل فوق من راسنا بحال الشتا وقررنا نخليو الرباط ونجيو لهنا تما نسيت كلشي وسديت ديك الصفحة بدلت نمرتي ومابقيتش جبدت سيرتو ونسيتو ومأخرا بدلو لينا الشاف وجا هو بلاصتو فاش شافني بغا يصلح لعلاقة ولكن أنا قلت ليه بلي تزوجت ونسيتو وهو مرضااش فلول قلت نكمل فلخدمة عادي مي فاش بقا محكر عليا وكيهددني قررت نخلي لخدمة ونصارحك ساعة وقع لي وقع (قربات جهتو وشدات يديه ونطقات بترجي) إسلام أنا عارفة مناش دزتي وتيقيني عمري فكرت نخونك حيت هادي ماشي تربيتي
إسلام:(شاف فيها وقال ببرود) علاش ماقلتيهاش ليا وسكتي
أسماء:حيت خفت والله هادشي لي خلاني نسكت
إسلام:شفتي سكاتك فين وصلنا (تحدر جهتها وخنزر فيها)هاد الأيام كلها وأنا ممرتاحش كانتفكر غير صورتك معاه وكلامك لي سمعت اأسماء واش عارفة نتي اش درتي حليتي باب أنا كنت سديتوو شحال هادي
أسماء:ماقصدتش
إسلام:(مسح وجهو ونطق بهدوء) خاصني مدة اأسماء باش نسى
أسماء:متايقش فياا؟
إسلام:(قلب لهضرة) سمعيني اأسماء أنا جيت باش نصارحك بلي صعيب نسى ماجرى ونكمل معاك عادي حيت داكشي لي درتيه ماعندوش عدر
ولكن نتي دابا حاملة (سرط ريقو بزز كمل)مني هادشي علاش غايخصنا قبل مناخدو شي قرار نفكرو فلبيبي لي فكرشك حيت هو ماعندو دنب لاكنتي غاتصبري وتسنايني تانسرط مادرتي فمزيان لامكنتيش غاتصبري فغانحتارم قرارك
أسماء:(عينيها تغرغرو بالدموع)علاش ماتقدرش تنسى وتيقني
إسلام: مغانكدبش عليك ونقول ليك نسيت حيت أنا باقي مناسي ودابا جيتك نيشان بغيتي تصبري تانسى غدا غانجي نديك لدار مابغيتيش ومغاتقدريش فحريتك هاديك ومغانبزز عليك والو (ناض وقف وشاف فيها بنظرة أخيرة)عطيني لوقت اأسماء
خرج من عندها مخليها جالسة تتبكي فصمت هضرتو على قد مكانت صريحة على قد مكانت كاتجرح...من جيه مغاتقدرش تلومو حيت عرفات راسها غلطاات واخا تاهو غلط ولكن الجيهة مايلة ليها هي بزااف وهو جاهاا نيشان مسحات دموعهاا وخرجات من لبيت غادة عند رحيل لي لقاتها جالسة فبيتها وبدات تبكي وتشكي عليهاا ومع لحمل ولات شوية حساسة على كيف كانت أسماء لي ياجبل مايهزك ريح هاهي دابا تاتبكي على قبل راجل...وشكون هاد الراجل هاداك لي مكانتش تاتحمل فيه الشعرة ولكن گالوها الحب ولد لحرااام...
رحيل:(تبسمات ليها وهي كاتمسح ليها دموعها ونطقات بهدوء) فكري نتي وشوفي نتي شنو غاترتاحي فيه لاكنتي غاتقدري تصبري معاه تاينسى فرجعي معاه لاماكنتيش غاتصبري فدار باك خير ليك ولكن قبل ماتختاري أي اختيااار فكري فلبيبي لي فكرشك هو لول حيت دابا وليتي مسؤولة على روح ومبقيتيش ديال راسك...
ليل كولو مشافتش فيه أسماء النعااس وعقلها كيخمم فهضرة إسلام لي جا ولاحها ليها وخلاها واحلة بين نارين... ولمشكيل هو جاها من لخر مازوقش ليها لهضرة ولانافقهاا قال ليها لي كاين وهادشي لي زاد خلاها توحل... وكيف قالت ليها رحيل هي مبقاتش ديال راسها باش تفكر غير فنفسها هي هازة روح فكرشهاا لي خصها تفكر فيها وفراحتها قبل من راسها... هي مغاتبغيش تشوف بنتها ولاولدها عايش نفس الشي لي عاشت هي فقدات باها على سن صغيرة وماعقلاتش عليه ولكن إدريس دار واجبو معااهاا وملى ليها داك لفراغ من جهة الاب وماخلاهاش تحس بيه واخا بعض لمرات تتقول هو ماشي با لبيولوجي ولكن هو رباني وراه الأب هو لي كيربي ماشي غير لي كيولد... وهي مغاتبغيش تشوف كبدتها بلا باه وباه راه عايش...تفكرات سيدرا وحالتها وتحسرات حيت مكبراتش مع باها لي مايستاهلهااش ولكن إدريس رباها واخا هاكاك هي كطفلة صغيرة راه غاتحتاج أب واخا راه عمرها قالتها ولكن أسماء عرفااها محتاجاه والدليل هو ملي ارتاحت لنوح ولات تاتعيط ليه بابانو... زوج أمثلة حية خلاوها تزيد تشبت بقرارها لي ختارتو بعد ليلة متعبة...ملي صبح لحال سيفطات ليه مساج خبراتو بقرارها "أجي ديني"
ناضت جمعات حوايجها ونزلات عند باها علماتو بلي غاترجع معاه وتاهو ماسولش وحكر وخلاها على راحتهاا... جا إسلام ومشات معاه مور ماودعاتهوم وفصمت قاتل تحركو بزوج لاباخطمون لي خرجات منها أسماء وهي باكية...دخلات لدار لي كانت نقية بحكم إسلام مولف النقى وتايصوڤي راسو فيامات تزوفريت ديالو...بقات واقفة تتفكر هضرتو لي قال وكيفاش قارنها بميس وگاع داك لهضرة لي خرج من فمو قدرات تميك عليها وتعطيها عدر ولكن فاش جبد ليها مها وجرحها بيها ماقدراتش تنساهاا نهائيا...ضار جهتها ولقاها واقفة تاتشوف فيه وبهدوء نطقات: نتا قلتي هضرتك وأنا وافقت عليها وتاأنا غانقول ليك هضرتي (تنهدات) مغانلومكش على ماقلتيه فاش كنتي معصب حيت عارفة اش دوزتي ولكن اإسلام تيقني عمري غانسى ليك كيفاش جرحتيني بمي ونتا أكتر واحد عارف شنو عانيت بسبابهااا ضربتيني بلهضرة لي كنت نقولها ليك ونشكي ليك بيها باش نخفف لي فقلبي ونتا فأول مشكيل ضربتيني بيهاا (مسحات دمعتهاا) كيفما نتا غاتبغي وقت تاأنا غانبغي باش نسى هضرتك (جرات لڤاليز ديالها ونطقات بهدوء) فهاد لفترة غانبقا فبيت الضياف
جرات لڤاليز داخلة لبيت الضياف وخلاتو واقف متبع ليها لعين بهدوء... كمش حجبانو فاش تفكر هضرتها لي مغاينكرش بلي خلاتو يحس بتأنيب الضمير ويندم حيت جبد ليها سيرة كلثوم...حك لحيتو وخرج من الدار..
🔜🔜
تنهدات أسماء ومشات جهة النموسية وهي حاسة بالعيا والنعاس...تخشات بلاصتها ودغيا غفات...
حل باب لاباخطمون ودخل بخطوات بطيئة عاقد حجبانو وريحة الشراب عاطية منو...سد لباب وبقا واقف متكي عليه مدة قبل مايخطي خطواتو لجهة الشومبر ديالو...وصل ليها ومع مد يديه يحل لباب وهو يضور جهة باب بيت الضياف لي كان قريب ليه وبقا تيشوف فيه مدة بسهو...قلب طريقو ومشى لباب بلامايدق حلو وبانت ليه ناعسة فوق النموسية وصوت شخيرها كيتسمع...بقا واقف تيشوف فيها مدة ساهي تارجع بلور وتعكل فخطواتو تاقاس لڤاز لي كان جنب لباب وطاح تهرس ومعاه حلات أسماء عينيها وجلسات تاتشوف فيه مكمشة عويناتها... كانت ناعسة نعسة زوينة وقفزها منها تاخلى قلبها يضرب بالجهد...
إسلام:(بصوت هادئ) مكنتش قاصد نفيقك سمحيليا
أسماء:(ببرود)أصلا خصني نفيق
إسلام: واخا
خرج من عندها غادي لبيت وهي بقات جالسة وسط فراشها وريحة الشراب ماخفاتش عليها خلاتها تسد نيفها وتقلب عينيها بانزعااج...تنهدات وجمعات شعرها شفينجة مخربقة وناضت من بلاصتها كاتفوه...مع دازت قدام لمرايا تبسمات وقاست كريشتها لي يالاه فيها واحد نفيخة خفيفة يادوب كتبان لادققتي فيها...تفكرات بلي غدا عندها كونطرول عند الطبيبة وخصها تعلمو...خرجات لحمام غسلات وجهها ومشات لكوزينة باش توجد لعشاا... لوحم مجاهاش على شي حاجة غريبة من غير النعاس وصاف نهارها تقريبا كولو كادوزو وهي ناعسة ودابا نيت فيها نعااس خطير... ماعرفات ماطيب وباش ماتصدعش راسهاا جبدات سباغيتي هي لي ساهلة ومافيهاش تمارة بزاف...وجدات لي غاتحتاج وحطاتو وبدات تاتنقي وتصاوب تاسمعات حسو وضارت شافت فيه بنص عين كان بحوايج الدار وشعرو باقي سارد بلماا وريحة لباندوش والشامبوان عاطية منو...مشى نيشان لمكينة ديال لقهوة وبقا واقف حداها تيتسناها تعصر ليه واحد طاس يگاد بيه لمزاج ويحيد أتار السكرة لي باقي شادينو...
أسماء:(ببرود)غدا عندي كونطرول عند الطبيبة مع التسعود ونص
إسلام:(شاف فيها وحرك راسو)واخا لواليدة بحال والو غاتجي فهاد ليامات
حركات راسها باه ومانطقاتش وتاهو معاودش هضر هز ديك الطاس دلقهوة وخرج لبرا مخليها غارقة فتفكيرهاا وفداك لبرود لي ولات تتحسو فعلاقتهوم بزووج....
قلبها ضرب بعنف وسط صدرها وهي كاتسمع لداك الصوت الأنتوي لي خلى جميع حواسها يجمدو وعقلها يتبلوكا ولسانها يتسرط... وبدون شعور قطعات لابيل بدون ماتنطق بتاشي كلمة وصدرها كيطلع وينزل بزربة بحال لامخنوقة وكاتنفس بالجهد... عينيها على ديك النمرة وعقلها تيختارع سيناريوهات خلاوها دخل فدوامة الشك...شكون هااادي؟؟ وعلاش معيطة ليه؟؟ زعمة يكوون تيعرفها؟؟ وهنا رجعات هضرة زهرة لي نساتها ولاحتها ورى ضهرها كاتزنزن فراسها وخلات قلبها يتكمش عليهاا... زعمة تكون لهضرة بصح؟؟ ويكون نوح تزوج علياا؟؟
رجليها فشلو عليها وجلسات فوق النموسية وعقلها ساهي فعلاقتها بنوح وخصوصا الأحدات الأخيرة ولمشكيل لي طرا بناتهوم ورجع داك الشيطان كيوسوس ليهاا بهضرتو..
علاش هو مايتزوجش ونتي أصلا خليتيه وهجرتي فراشو مدة وهو راجل من حقو يقلب على راحتو الشرع عاطي ربعة وهو تباركالله شنو لي مايخليهش يدير تعدد واحد عارف بينو وبين الله أكيد يديرهاا ماعندو تاشي عدر والسيد مسك عليها الله وعندو لي مايتحرق... يعني يقدر يعدل بينك وبين الضرة ومايخليكومش مخصوصين بزوج...
حطات يديها على ودنيها وغمضات عينيها شاهقة بألم مبغااش تخلي عقلها ينجارف ورى هاد التفكير حيت متأكدة غاتحمااق مافيهااش.... قلبها مغايتقبلش هاد الهضرة لاكانت بصح مستحيل تقدر تفكر فيها وتقبلها... تموووت وماتخليش شي وحدة تشاركهاا فيه...هو راحة روحها بوحدهاا وماتخيلش يكون مع غيرها يبوسها كيف تيبوسها هي وينعس معاها كيفما كينعس معاها هي ويعاملها كيفما كيعاملها هي....ماتقدرش تخيلهاا...حركات راسها يمين وشمال بعدم تقبل وهزات تلفونو مدخلة لكود لي عرفاه حيت كيحل تلفون حداها عادي ودخلات لجوغنال دابيل ولقات نمرة معيطة ليه تلاتة دلمرات مكالمات فائتة ولمرة الرابعة راه شدات لابيل فقط... مسحات النمرة ولزابيل ديالها وحطات تلفونو فبلاصتو كيتشارجا ونطقات بصوت خافت كأنها كاتقنع راسها:هادي غير نمرة غلاط اااه نمرة غلاااط
بقات جالسة جنب التلفون حاضياه وعقلها كل مرة يزهق ويفكر فحاجة تاادازت ساعة ومعاوداتش ديك النمرة عيطات وهناك ارتاحت شوية واخا راه الشك خدااام...كانت ساهية ماحساتش بيه وقتاش دخل تاضور يديه على خصرهاا ودفن راسو فشعرها وهي تنقز بحال لاعضاتها لفعة ونطقات:خلعتيني
نوح:(شاف فوجهها مدة طويلة ونطق بهدوء)مالك؟؟
رحيل:(تبسمات تبسيمة صفرا)والو غير سهيت وصاف
نوح:(كمش حجبانو)فاش سهيتي عوتاني الفتنة ديالي
رحيل:(حطات يديها على كرشها ونطقات متلفة ليه لهضرة) فاش كنت ناعسة فلكلينيك ودوزات ليا الطبيبة التلفازة قالت ليا بلي ممكن نعرف جنس لتوينز ولكن أنا أجلتها تاتجي
نوح: (كمش حجبانو) كيفاش نعستي فلكلينيك
رحيل:(تنهدات) فاش مشيتي كان وقع ليا مشكيل وتعصبت تاجاني لوجع وداوني لكلينيك وطبيبة قالت ليا نبقا ناعسة شي يامات فيه على مايطمنو على صحة لتوينز
نوح:(هز حاجبو تال سما ونطق بصوت جدي خشن)اشمن مشكيل خلاك تعصبي؟
رحيل:(عضات على شفتها مباغاش تجبد الصداع ولكن ماعندها مادير) مرات عمك وعروستها جاو لعندنا لدار وبقاو تيگولو عليك شي هضرة معجباتنيش و
نوح:(قاطعها بصرامة)اش گالو؟
رحيل:(نطقات بهضرتها وهي كاتشوف فوجهو بتركيز باغا تلقط ردة فعلو) قالو بلي نتا تزوجتي عليا وجبتي الضرة وبلي الناس شافوك معاها
عوج نوح عنقو ولعب بلسانو ففمو مغدد وبقا مدة كيدوز يديه على لحيتو ورحيل مراقباه فصمت وداخليا كانت حاسة براسها مخنوقة... ضار جهتها على غفلة ونطق ببرود:وشنو مزال؟؟
رحيل:بقاو تيعايروك وينقصو منك ولكن أنا ماخليتهومش وماسكتش ليهوم وهضرو تاعلى زين العابدين گالو بلي هو (سكتات)
نوح:(قاطعها بصوت لادع) هو اش؟؟
رحيل:(نطقات بصوت خافت)ولد لحرام
نقزات من بلاصتها وغوتات بلاماتشعر وهي حاطة يديها على كرشها فاش ضرب الطبيلة لي كانت محطوطة تم ديال الزاح وتشتات بلي فيها وناض تيعوج راسو ومخنزر...
نوح:(مزير على يديه وبصوت قااصح نطق)ولاد لقح*اب مغايتهناااو تاندير فيهوم شي مصيبة
رحيل:(ناضت جهتو وشدات فيه ونطقات بصوت كيرجف)نوح عفااك تهدن ماخصكش تعصب ونتا مريض
نوح:(نثر يديه)هوما سبابك تادخلتي لكلينيك؟؟؟
رحيل:نووح
نوح:(غوت عليها تاتهزات من بلاصتها)سولتك جاااوبي اه لاااا
رحيل:اااه
نوح:(نطق بصرامة) وشنو طرا مزال ؟
سكتات رحيل بدون ماتجبد سيرة مو حيت عارفة بلي غاتسبب فمشكيل كبير وزيد هو دابا معصب...حركات راسها بلا وهو بقا واقف تيغزز سنانو فشفتو مشى جهة التلفون زول الشارج بنثرة وتخطااها وهي وراه ناطقة بخوف:نووح فين غااادي؟
نوح:(ضار شاف فيها مخنزر ونطق بخشونة) ماتبعينيش خليك هاني جاااي..
ندمات علاش حلات فمها وجبدات ليه داك لموضوع لي عارفاه غايشعلو..على هي غاتنسى التسيفة لي تسيفها نهار الصدقة...كان بحال شي وحش تيخلع ماشي داك نوح لي تتعرف الرزين..حيد قشابة الرزانة والختورية أو ولى واحد خر ماتعرفيهش... وهي دابا اش دارت مشات جبدات ليه تاني لموضوع باش ينوض عاود شي مشكيل لي ماليه حل... عقلها غايخرج مشات جهة لبالكو حلاتو وبدات تاطل شوية بان ليهاا خارج كيتمشى بزربة حل طوموبيلتو وركب فيها وهي تعيط ليه بصوت عالي:نوووووح
مالقاتش منو جواب حيت كان ركب وحرك طوموبيل خارج من لفيرمة...جرات شعرها بلغدايد ونطقات بصوت معصب:عااااا اش داك تدوي ارحيل اش داااك
رجعات تاني لبيت هزات تلفونهاا وبدات تعيط ليه ساعة لقات لخط أوكوپي... واقفة فلبالكو وشعرها كيديه الريح وعينيها على البلاصة فين كانت طوموبيلتو تلفونو لي مشغول دخل التناوي لعقلها وبلاماتحس تفكرات النمرة لي عيطات وداك الصوت وقلبها زدح وسط صدرها..خصوصا فاش تفكرات ردة فعلو ملي جبدات ليه موضوع الضرة هو منكرش ومبانت عليه تاشي ردة فعل... خافت تكون لهضرة بصح ويكون مزوحة عليها.. بقات تاتحك صدرها وتنهج وهزات تاني تلفون ونفس الشي وهنا لوسواس تمكن منهاا..جلسات فوق لكرسي لي كان فالبالكو مخلية داك الريح يضرب فوجهها ويوكضها شوية.
مناضتش من داك الكرسي وبقات جالسة كاتسنااه وتلفون فودنيه...كان فلول أوكوپي شي نص ساعة ومن بعد كاتصوني مكيجاوبش خلاهاا تشوش عليه ماعرفاتو فين زاد وشنو باغي يدير...بقات هاكاك بحال لحنش مقطوع ليه الرااس كل مرة تقلب لجيه حاسة بقاعها وجعها بلگلاس وكرشها ضراتهاا...ولكن ماتتزعزعاتش من بلاصتها مدة طويلة تاسمعات صوت طوموبيلتو وهي تنوض بلهفة لقاتو راجع قلبها ارتااح وبرد من ديك العافية لي شعلات فيه فدوك الساعات لي دازو... تنهدات فاش شافتو نزل من الطوموبيل صحييح مابيه والو وقبل مايدخل هز عينو جهة لبالكو وعاد كمل طريقو... وهي دخلات تاتحك كرشها وتسوط النفس بحال لاكانو قاجينها... سمعات لباب تحل ودخل بخطوات هادية وجهو كيبان مهدن ماتقولش هادا هو لي كان تيغوت ومعصب قبيلة...قرب جهتهاا تاوقف قدامها وهي تعنقو فصمت بدون ماتنطق بكلمة وتاهو مانطق بوالو حدو زير عليها وخشى وجهو بين خصلات شعرها كيستنشق ريحتهاا... ماسخاتش تبعد عليه ولكن دوك الركيلات خلاوها تبعد وتنطق بخفووت: فين كنتي؟
نوح:(شد يديها وداها جهة النموسية وعاونها تاتكات ونطق بهدوء) مشيت نقضي واحد لغرااض
رحيل:شنو هو؟؟
نوح:ماتهزيش لهم لتاشي حاجة فكري غير فصحتك وصحة لعسيلات
رحيل:كيفاش مانفكرش قبل ساعات خرجتي من الدار معصب حالتك تاتخلع ودابا تتقول ليا مانهزش لهم لاماهزيتش لهم ليك لكن غانهزوو يااك نتاا هازو لياا من نهار تزوجتيني (عينيه دمعو) ماخليتي تاحاجة طرا ليا وقفتي فوجه داك لحيواان وخاطرتي بحياتك بلاماتخليني نحس حميتيني أنا وعائلتي وكون مانتا كنت لدابا كنعاني ومغانرتاحش..علاش أنا مامنحقيش نهز همك ونخففها عليك انووح علاش مكاتقول لياا والو وعلاش كاتخبي وكاتخلي عقلي يفصل ويخيط تاكانبغي نحماااق(تقدات فجلستهاا ونطقات بجدية) نهار جااو عندي دوك زوجات وگالو هضرتهوم عرفتي باش حسيت تعصبت حيت گالو كلاام عليك تايضر فلخاطر جااين ودايرين لياا فيها راه قلبهوم كيضرهوم من جهتي وبلي هازين ليااا همي
نوح:(نطق بجدية) لفم لي تحل عليك نسد باباه
رحيل:كايتحلوو انوح واخا دير لي درتي ضروري ماكاتسمع هضرة كاضر ومن لقريب (سرطات غصتها وكلامها قصدات بيه هضرة رحمة) ولكن گالوها ناس زماان خافي من رمشك لايعميك أما لحاجب بعيد عليك... هضرة الناس لي بعيدة كاتحرقك نهار وتنسااها ولكن لقريب كاتبقا طلع فيك وتنزل عمرك تقدر تنسى ودوزها
نوح:(كمش حجبانو وهضرتها دخلات ليه الشك وبهدوء خطير نطق) شكوون هادا ؟
رحيل:(حركات راسها) مكاين تاواحد أنا غير شرحت ليك وصاف
نوح:(هز حاجبو) عند بالك غاضحكي عليا بهاد زوج كلماات ؟
رحيل:مكنضحكش عليك انوح ولكن تاتقول ليك لي كااين زهرة وعروستها هضرتهوم جايا من سمهوم لي فيهوم بزوجاات وراه عطيتهوم لي يستاهلو
نوح:(حك لحيتو) رحييل من لخر شكوون گالك ليك هضرة من لقريب وجرحااتك
رحيل:(عضات حنكها من لداخل وندمات لاش دوات بلمعاني وقالت وهي تاترقع) نوح عفااك ماوقع والو تيق بيا أنا غير هضرة وماقصدت والو نتا عارفني مع لحمالة وليت غير تنخربق
نوح:(نطق بمعنى)نتبعو لكداب تال باب الدار
رحيل:(ربعات يديها ونطقات مخسرة سيغتها) أنا ماكدابااش
نوح:(جرها من نيفها تاتحدرات جهتو ونطق بهدوء) لكلام وصل الفتنة وكلى وفهماتو
رحيل:علاش تادوي معايا هاكا بلمعاني من نهار عرفتك ونتا تلوح علياا شي معنى؟
نوح:لمعاني كايوصلو لكلام كيف خصو يتفهم
رحيل:(فرفات بعويناتها كيف لمونيكة)لي عقلو خفيف وكيفهم فلمعاني
نوح:اش غاندير لكانت الفتنة فهامتها تقيلة
رحيل:خلينا من لمعاني دابا و
نوح:(قاطعها)جيبي لكلام من لخر اش تم؟
رحيل:(كاتعرق وتنشف وبتردد نطقات)قالو شافوك مع مرا
نوح:(بهدوء غريب)ونتي اش بان ليك؟
شافت فيه بتركيز وطال السكات بيناتهوم هو كيشوف فيها بهدوء وهي عقلها كيبلاني ويفصل... هي تايقة فيه ولكن راه الشك ولابد منو مع هاد الشي لي شافت فليوم... بقات مدة ساكتة تارجعات شافت فيه ونطقات بجواب صريح:قلبي تاايق فيك وعقلي هالكني بالتخمام
نوح:(قرب جهتها وحط شفايفو فوق جبهتهاا ونطق بهمس خشن) تبعي لي غايريحك وتما غاتلقاي جواب هضرتك
رحيل:(شدات فيدو ونطقات بهمس) تايقة فيك وعرفااك مغاتخونش تقتي
باس فجبهتهاا ونزل باسها فحنيكاتهاا بزووج وهي تبسمات ليه ونطقات بخفوت:لحيتك كاتكني (غلغلات يديها وسطها) علاش مكبرها أو وليتي كادير النضاضر
نوح:نضاضر دلبروطكسيون هادو
رحيل:(زولاتهوم ليه ولبساتهوم ونطقات بضحك)كيف جاااوني؟؟
نوح:(بمزاح)ماعرفتش واش نتي لي لابساهوم ولاهوما لابسينك
رحيل:(ضحكاات ونطقات كادلع) همم كاتنمر عليااا
نوح:(قرصها فجنبها ونطق بمكر)على أناا نقدر عليهاا..أنا غانمشي ندوش
رحيل:واخاا
دخل لحمام وزول عليه حوايجو لي لابس لفوق تابقا عرياان مبين صدرو لمفتول وعضلاتو لي مربيهوم بالسبور لي متبع هاد المدة لي فاتت بانتظاام... تبع ليها السروال تابقا بشورط ودخل تحت الرشاش كيدوش وعقلو خدام يخمم ماتعرفيه عليااش طاوي...مدة وهو غير واقف مخلي لماا ينزل على كتافو وصدرو تاسمع لحس وضار حل لباب دالزاج لي مضور جهة الرشاشة وبانت ليه رحيل تاتنزل سروالها وجلسات فلشاس تبسم بلخف وبقا متبع ليها لعين تابانت ليه مسحات بكلينيكس وهزات سروالها ونطق بصوت عالي:الفتنة اجي دوزي ليا على ضهري
رحيل:(تاتنشف يديها)واخاا بلاتي
زولات داكشي لي لابسة تابقات بشورط ودباردو وتمشات بديك لكريشة لمقنبلة تاوصلات لعندو دخلات ونطقات وعينيها على ضهرو وعلى دراعو وقالت بخفوت:عطيني ليفة
نوح:(جرها بلخف تاجابها قدامو مكالية مع لحيط وحدر راسو ولما نازل عليهوم بزوج ونطق بصوت هامس) اش بلانك الفتنة خليتك هاد لمدة ورجعت لقيتك زيانيتي على كيف كنتي
رحيل:(تبسمات وحطات يديها تاتحركها على صدرو وداك الزغب لخفيف لي فيه) راه غير لوحش هاداك
نوح:(قرصها جنبها تاتعوجات ونطق بمكر) داك لوحش غير خليه راگد حيت لفااق صعيب يطفى
رحيل:(قربات باستو على شفتو ونطقات بهمس) مغايكونش بحال لوحش ديالي اراحة روحي
مزگلهااش وهي بداك لقرب لمهلك ليه...لحرارة ديال لحمام وداك لما لي نازل عليهوم خلى حرارة أجسامهوم ترتاافع والاشياق يلعب دور فتقريب أجسامهوم لبعض..معوج راسو وقاصد شفايها لي كيعيطو ليه بسميتو فلهفة وتاهو لبى الطلب بكل سرور... جردها من لقطع لمتبقية من حوايجهاا مخلي عينيه يتمتعو بجسمهاا لي كاان فكل مرة تيقرب ليه كيعتابرو أول مرة ومكيسخااش بيه... مروضو ومخليه يندامج بمهارة مع حركاتو ولمساتو لي خاصين بيه...بحال لاكايدير ليها التنويم المغناطيسي...شهد داك لحمام على لحظاتهوم لحميمية لي كملوهوم فوق نموسيتهوم مع رحيل مقاداش على لوقوف بزاف وكرشها كانت حاجز ليه ونيت باش ماتعيااش... ماطلقهااش وتسخسات واخا راه راد ليها لباال ومعاشرها بوضعية مريحة لكرشها وليها ولكن جهدو عياهاا وخلاها طلب السلة بلاعنب... هزها بين يديه غادي بيها لحمام يدوش ليها وهي تاتفوه عيااات...حطها فلبانيو لي فيه لماا سخون وبدا يغسل ليها ماخلاها دير تاحاجة..
خرج نشفها وجبد لگام ديال كريمات لجسم وهي كاتفشش عليه ودلع لقات على من تجيب فشوشهاا خصها تستاغل لفرصة نطقات وعينيها مغمضين:يديك حنينة غانعس
كيماصي ليها لكريم فصدرها وفنفس لوقت كيداعبهاا:هاد الرمان لحلو كيحل الشهية
رحيل:(ضحكات فتش قرصها فراس بزولتها)ههه كيضروني راه فيهوم لحليب
نوح:(غمزها بمكر)شفتو قبيلة فاش كنت نرضع فيهوم
غطات وجهها لي حمار وطلقاتها بضحكة مجهدة وهو تبسم بلخف وكمل داكشي لي كان يدير تاسالى ولبسها حويجاتهاا ونطق وهو مصمص ليها شفتها:نكمل ونجي
بقات فبلاصتها تارجع ونزلو لتحت لقاو مرات بّاسالم موجدة لعشا خصو غير يتسخن.. تعشاو وجاب دواه شربو قدامها مخليها تاتنهد بحسرة...
نوح:اجي معايا نوريك واحد لحاجة
ناضو مور ماجمعو المواعن وتمشى بيها لجهة البيت لي كانت رحيل سولات عليه بّاسالم...وقفها قدامو وجبد من جيبو ساروت معلقة فعلاقة بوحدها على سوارتو لخرين وحل لباب وضار جهتها:دخلي
دخلات رحيل لبيت وأول ماحطات رجليها تم استنشقات ريحة عطرة خلاتها تغمض عينيها وتستنشقها بعشق..البيت كان غريب على لبيوت لخرين بحال شي بيت من لعصور القديمة...كان فيه بيرو وبلاصة بحال الڤيتخين فيها شي قراعي تبعات ليه لعين وهو كيحل واحد لمجر جابد منو علبة فلون الاسود من لمليفة وقرب جهتها ونطق بخشونة:حليها
حلاتها بلهفة وعيونها لمعو وهي كاتشوف فديك لقرعة دالريحة لي كانت مربعة ولي زاد خلاها تبسم هو داكشي لي مكتوب فلقرعة بخط يدو لي عرفاتو من الشوفة رحيل روحي
نوح:(همس ليها جنب ودنيها بخشونة) هاد لبرفان صاوبتها خصيصا ليك
حلات فيه عويناتها متفاجئة من هضرتو لي نطق بيها ورجعات شافت فالريحة لي بين يديها ونطقات بعدم تصديق:واش نتا صاوبتيها؟؟
نوح:اه
هادي هي لي عمرها طيح ليها على لباال...هزات ديك القرعة تاتشوف فيها بإعجاب وفداك السائل لي كان فلغوز فاتح..قبل ماتشمها حمقاتهاا ولكن زادت تغرمات بيها فااش حلات غلاقتها ورشات منها رشة فلهواا...كانت ريحتها زوينة مسكرة وخفيفة مكانتش قاصحة وديك الرشة لوحيدة لي رشات بقات عاطية وماحدها كاتبرد ماحدها تاتزيد تعطي ريحة زوينة...
نوح:(عطاها وقتها باش تشوفها وتشم ريحتها) عجباتك؟
رحيل:(تبسمات ليه تاتسدو عويناتها)زوينة بزاف نفس النوع دالروايح لي كيعجبوني (باستو فعنقو) دابا عاد فهمت علاش ريحتك مميزة وعمري شميتها فشي بلاصة أكيد حيت نتا لي مصاوبها لراسك ياك؟
نوح:(تبسم بهدوء) اه
رحيل:عمرك قلتي ليا راه كاتصاوب الروايح
نوح:(جرها وگلسها فوق الكرسي وتكى هو على لبيرو تايشوف فيها) ملي كنت صغير كنت مبلي بالروايح بزااف ودوقي كان صعيب وبقوة مكان عندي الشغف مشيت تانقلب على هادشي ونبحث ولقيت بلي ساهل تصاوب لعطور فالدار خص غير يكونو عندك لبرودويات وهادشي حالو ساهل...فلول كانت تجربة شوية صعيبة مع مكاتعرفش لاملونجيتي شي زيوت عطرية واش غايعطيوك داكشي لي باغي نتا تجربة مور تجربة تاولينا عارفين لاستوس وصاوبت أول برفان كاان لزين العابدين
رحيل:(عجبها لحديث ومكرهاتش تعرف كتر) صراحة تحمست نشوفك ونتا كاتصاوب شي برفان ونتعلم معاك
نوح:باقي يامات الله طويلة شي نهار ونعلمك تصاوبيه
خرجو غادين لبيتهوم وغير بدلات عليها وهي ترش عليها ديك الريحة وجات تخشات بين دراعو وهو حاضنها كيشم ريحتها بثمالة...
صباح جديد فاقت رحيل على صوت نوح كيهضر فالتلفون...حلات عينيها وتوگضات وناضت من بلاصتها بزز غادة جهة لبالكو أو ودنيها لقطو ليها كلامو لي قال:ليوم غانجيو ايمّا ومانبغيش شي هرااج وهضرتي منعاودهاش
كمشات رحيل حجبانها ومع تحركات ضار شاف فيها وجرها لعندو باسها فعنقها وهي تخشات فيه وتتسمع صوت مو لي مكانش مفرز تانطق بهدوء:نخليك دابا تانجيو
قطع ورحيل نطقات بهدوء:واش غانمشيو لرياض؟
نوح:(ببحة صباحية)همم مور مانتغداو غانتحركو ديري حسابك
رحيل:(بانزعاج)ماكرهتش نبقاو هنا
نوح:(شاف فيها بهدوء)ولابدما غايخصني نمشي لرياض ونرجع لخدمة ارحيل ملي ندوزو تاني شي يامات لهيه نرجعو هناا
حركات راسها على مضض ومشات تقضي روتينها الصباحي...
كانت جالسة فالطوموبيل بكسيوة واسعة مع فولارها وسباطها وصويك وكيف عادتها أناقتها فبساطتها...ساهية فالطريق ولمشية لرياض محملاهااش وممتقبلاهااش...وماتنساش كيفاش جرات عليها رحمة من وسط داك الرياض ولهضرة لي سمماتها بيها...جايا غير بزز مباغاش تفرط راسها وتخليه يعيق بشنو كاين...ضغطات على راسها وقالت ماعليش دوزو يامات قليلة وسيري لدارك ديك الساع... شافت فنوح لي كان جالس جنبها ومطلع كمايم التريكو دالصوف لي لابس تبان الزغب ولعروقة لمنفوخين وتنهدات وهي كاتسمع ليه كيهضر مع عتمان على لخدمة...تقريبا طريق كلها وهو كيهضر معاه تاوصلو ورحيل قلبها تقبض عليها وتفكرات كيفاش خرجات من هنا اخر مرة باكية...شد فيها نوح وغمزها بلخف ودخلو بزوج لرياض فين كانت رحمة غادة جايا كاتسناهوم وغير شافت نوح وهي تمشى بخطوات سريعة جهتو وترمات على حضنو معنقاه وكاتبكي وهو عنقها كيسكت فيها ورحيل واقفة جنبو تاشافت بيسان جايا مبتاسمة ليها وهي تبتاسم...تسالمو لبنات وبقاو تيسولو فأحوال بعض عاد مشات بيسان عنقات خوهاا ورحمة واقفة تاتمسح دموعها ولحد الساعة ماعبرات رحيل بتاكلمة ولاضارت جهتهاا ..تركيزها كولو على ولدها نطقات وهي تتقيس وجهو بحنية:خلعتيني عليك المرضي ديالي كون تعرف هاد لفترة كيف دوزتها عقلي كان غايخرج من بلاصتو
نوح:(باس راسها) يمّا ماشي أول مرة نخليكوم ونمشي
رحمة:اه ماشي أول مرة ولكن على الأقل كانكونو على تواصل معاك ولكن هاد لمرة قطعتي لحبل بناتنا
نوح:ساعتو لله لواحد كيبغي يرتاح ويصفي دماغو
رحمة:لحبيب ديالي خليتي بلاصتك
نوح:(بهدوء) خليت بلاصتي أنا ومرتي ياك ايمّا؟؟
رحمة:(شافت فيه وهي مزيرة وعاد ضارت شافت فرحيل وبحال الا يالاه عاد شافتها وعاقت بوجودها وتبسمات ليها بزز)معلوم اولدي هي ونتا راكوم واحد
نوح:(كمش حجبانو وحرك راسو ببرود) عليها سلمتي عليها فاش جينا
رحمة:(سرطات ريقها ومضناتوش غاينتابه لهادشي وتاهي مغاتنكرش بلي مدارتهاش بلعاني ولاعن قصد) فاش شفتك تلهفت عليك هادا مكان
نوح:(شاف فمو ونطق بهدوء)يمّا اجي
سبقها مخلين لبنات كيشوفو فبعض بعدم فهم ورحيل قلبها مارتاحش أما رحمة شافت فيها وهي هازة حاجبها وتبعات نوح لي وصل لبيروه ومع دخل ضار ودار يديه فجياب السروال ونطق بخشونة:جلسي ايمّا تابعنا شلى كلام
رحمة:(هزات حجبانها وجلسات بهدوء)كانسمعك اولدي
نوح:(تكى على لبيرو ومد رجل والتانية طواها ونطق بهدوء وهو كيلعب بالستيلو بين يديه) شنو طرا فغيبتي ؟
رحمة:(بهدوء) كيف خليتينا لقيتينا من غير سناء واليازيد لي تزوجو
نوح:هادوك ماشي موضوعناا دابا.. نتي عرفاني ايمّا مكانبغيش الحگرة ومكنسكتش عليها فمابالك لاكانت مرتي هي لي تحگرات(شاف فيها وقبل ماتحل فمها نطق بدون مقدمات وبمعنى) هادو ماشي من شيامك تجري على مراتي من دارها وهي حاملة بولادي ايمّا...
كانت رحيل جالسة مع بيسان فالصالة وهي مامرتاحااش...حيت ديك الراحة لي كانت تاتحس بيها شحال هادي مابقاتش من نهار خرجات رحمة داك لكلام من فمهاا... حاسة راسها بحال شي ضيفة هنا ومادا بيها وقتاش ترجع لفيرمة ولاتمشي لدارها الجديدة فين غاتلقى راحتهاا... ولكن ماعليها غير بالصبر وصاف وضغط على راسها وتبقا هنا... حيت عارفة بلي واخا عندها دارها خاصة بيها إلا أن نوح سبق وعلمها بلي لعيشة فالرياض ولابد منهاا...بحكم هو لي مسؤول على عائلتو وكيف تانگولو هو راجل الدار فأكيد مغاديش يخلي الرياض بصفة نهائية... والأهم مغاديش ترضى أنها تكون سبب لي يخليه يبعد على مو وخوتو واخا راه مو ماخلات ماقالت ليهاا ولكن رحيل ماشي بحالها ودليل هو أنها ماجبداتش حس المشكيل نهائيا غير باش مايكبرش لموضوع..
بيسان:(شدات فيديها ونطقات بصوت خافت)عارفة بلي نتي باقا مقلقة من ماما على كلامها ليك تاأنا ماعجبنيش تصرفها ولكن نتمنى منك تسمحي ليها وتعدريها ارحيل
رحيل:(تبسمات ليها ببرود ونطقات بهدوء) غانكون كنافقك لاقلت ليك راني نسيت حيت كلام مك عمرو يتنسى لياا واخا حاولت نعطيها أعدار ولكن الرجا فالله مقدرتش نسى داك لكلام وباقي لدابا كيطلع وينزل فيا
بيسان:(تنهدات وحركات راسها بالإيجاب) مغانلومكش حيت تاأنا كون كنت بلاصتك غانتصرف نفس التصرف مغانجيش من جيهتها حيت هي ماما وتيقي بيا أنا براسي مراضياش على داك لكلام
رحيل:(بطيبة)ماتلوميش راسك عفااك أنا ممقلقاش منك حيت نتي مادرتي ليا والو بلعكس من نهار دخلت لهاد لعائلة ونتي كاتعامليني مزياان وعمرك درتي معايا شي فلاش خاايب ههه كايگولو لوسة سوسة ولكن ربي عطاني لوسة كيف لعسل
بيسان:( عنقاتها وتبسمات ليها بطيبة) قلبك لي بيض هو لي خلاني نرتاح ليك تاأنا حياتي كلها وأنا عايشة وسط لعزارة ومكانش عندي ختي لي نتوانس معاها ونعاود ليها على أسراري ومن نهار دخلتي لعائلتنا وأنا حاسبااك ختي حيت ارتاحيت ليك
رحيل:اوا لهلا يحاشمناا بيسان بغيت نسولك وجاوبيني بصراحة(حركات ليها بيسان راسها باه وكملات رحيل كلامها بتردد) نتي واش باقا كاتحسي بشي حاجة من جهة ريان؟؟
***
فالبيرو مور مالاح نوح ديك لهضرة فوجه مو خلاها غير تاتشوف فيه وهي مصدومة معارفة ماتقول...حسات براسها تزيرات وتوترات خصوصا من شوفاتو لهادين..وتاالطريقة بااش هضر معااها على قد مكانت تتبان هادية وعادية على قد مكانت قاصحة... زيرات على يديها وهي مكمشة حجبانها وداكشي لي مكانش باغا هو لي طرا... مكانتش تاظن بلي رحيل غاتگولها ليه وغاتحطها بوجهها قدام ولدهاا زادت نفراتها بهاد التصرف وتعصبات منها ولكن مبيناتش هادشي قدامو هو لي كان حاضيها بعينيه تايتسناها تهضر...كون كان شي حد اخر دار هاد لفعلة كوون ندمو عليها ولكن هادي لي قدامو راه موو ومحتارمهاا بزاف هادشي علاش باقي لدابا جالس مهدن كيتحاور معااها وباغي يسمع منهاا...
طال سكاتها وماعرفات باش تجاوبو وشنو غاتقول وتاباش تشوف فيه مقداتش واخا راه ولدها وهي مو ولكن عاطياه قيمة ومحترماه..
نوح:(كمل هضرتو بهدوء) ملي نتي جريتي عليها اش خليتي لبراني ايمّا
رحمة:(هضرتو غير مكاتزيد تخليهاا تزير شافت فيه ونطقات بهدوء) مكنتش اولدي قاصدة أنا كنت خايفة عليك ملي مشيتي وماخليتي خبار لتاشي حد خفت لاتكون طرات ليك شي حاجة
نوح:(هز حاجبو) وهي شنو دنبها؟
رحمة:(حركات راسها) أنا كنت معصبة وهي جات فطريقي راه ماشي غير هي لي تعصبت عليها تاختك وسنااء فداك لوقت مكنتش عارفة اش كانگول واش تانخرج من فمي حرقتي عليك وخوفي خلاو عيني يتغمضو اولدي
نوح:(مسح على لحيتو وشاف فيها بجدية) هادا ماشي سبب ايمّا وزايدون ماشي أول مرة نغبر ونبعد راه حياتي كلها عايشها هاكاا ماشي حاجة جديدة
رحمة:ولكن كنت تانهضر معاك واخا تاتكون بعيد وهاد لمرة قطعتي لهضرة معانا كاملين تاباش نعرفوك فين كنتي ماخليتي ليناا خباار
نوح:نتي عرفااني كانبغي نريح مخي ونبعد وأنا ماشي ولد صغيير ايمّا وزايدون لاكان مكتاب يوقع ليا شي حاجة راه غاتوقع واخا نكون قدام عينيك
رحمة:(دموعها نزلو ونطقات بصوت مخنوق) نتا معارفش بااش كانحس أنا راه خسرت كبدتي وتشويت فيهاا ولدابا ديك لحرقة مبغات تنسى لياا لداباا صورة خووك وهو غارق فدمو بين عيني وعمري غانسى موتو راني تشووويت فكبدتي ومغانقدرش نستحمل توقع ليك شي حاجة اولدي تانتا حيت غانمشي فيهاا
نوح:(قلب نوح وجهو وهو حاس براسو تزير سيرة ناصر كاتخليه يحس بلخنقة) هادي هي الحياة ايمّا ماشي گاااع الناس لي كانبغيوهوم كيبقاو معانا ولابد مايجي النهار لي يدي فيه مول الأمانة أمانتو
رحمة:(كاتبكي وتشهق)موت الغفلة صعيب انووح حيت مكتوقعهاش وفاش تاطرا تاتجيك قاصحة (شافت فيه) أنا خفت لايطرا ليك بحال لي طرا فخووك خفت عليك ومكانتش نيتي خاايبة انوح
نوح:(كمش حجبانو ونطق بهدوء) لنفترض ربي كتبها عليناا ومول الأمانة داا أمانتو ومابقيتش معاكووم واش غاتجري عليها هي وحفايدك كيف درتي...
ناضت من بلاصتها بحال لاعضاتها لفعة ملي سمعات كلامو لي خلاها تحرك راسها بهلع وبهسترية حضنااتو مقدراش تخيل تخسروو ولاتخسر باقي شي واحد من ولادها..زيرات عليه وبدات تاتبكي بحرقة وهي تاتهضر:لا لا ماتگولش هاكا اولدي ماتحرقش لياا قلبي بهضرتك اووولدي ماتحرقنيش
زير عليها معنقهاا وحالتها فكراتو فكيف كانت ملي مات نااصر ولي باقي عاقل عليها.. بدا كيطبطب على ضهرها ونطق بحنية كيسكت فيها: يمّاا تهدني
باقي مزيرة عليه تاتبكي وهو غير كيطبطب عليها ويسكت فيها..بقات فيه ولكن خصو يهضر معاها ويوضح ليها غلطها لي غلطات اه هي مو ولكن تارحيل مرتو.. بعد مدة تهدنات رحمة وهو جلسها فوق الكرسي وعيط لسعدية جابت ليها لماا شرباتو وارتاحت وهو بقا غير تيسول فيها تاتنفسات عاد كمل هضرتو وهي شادة فيديه مبغاتش طلقهاا..
نوح:(بهدوء) نهار نويت نتزوج بديك بنت الناس علمتها بلي أنا لمسؤول عليكوم وبلي عمري نفرقكوم وهي قبلات وعمرها قالت ليا باغا داري بوحدي واخا راه عارفة روحها عندها دار بوحدها ولكن قبلات تجي وتسكن هنا فهاد الريااض لتاهو دارهاا (كمش حجبانو) عمرها جبدات سيرتك بلخاايب وعمرها قللات منك بلعكس متحرمااك ومكبرة بيك ايمّا حيت هي بنت الأصل وعارفة لي عليها.. ملي مشيت راه خليتها أمانة عندكوم تحتارموها سوا فحضوري سوا فغيبتي حيت هي مني كيفما مانبغيش تقلل عليك الاحترام مانبغيش ايمّا تانتي تنقصي منهاا لاكاانت هي دارت ليك شي حاجة خليني تانرجع وديك الساعة أناا غانعرف شغالي معاهاا أما داك الصداع ماعندي ماندير بيه...ملي هي رجعات ونتي معصبة منها خليهاا ماتهضريهااش (بجدية وبصوت حرش) ولكن نتي مشيتي جريتي عليها گاع ايمّااا نتي بداكشي لي درتيه قصتيني تاأناا معاهاا ومادرتيش ليا اعتباار...
رحمة:(شهقات)ماتقولش هاكاك اولدي عفااك
نوح:(بهدوء) أنا گلت لي كااين ولي باين أو واضح
رحمة:سمحليا عفااك ولابغيتي غانطلب السماحة من رحيل و
نوح:(قاطعها بانزعاج) يمّا واش عند بالك هضرتي كاملة لي گلتها دابا على قبل طليب السماااحة؟؟ تت راه مبقاتش فهادشي بقاات فالهضرة لي خرجتي من فمك وشنو درتي لماكنتيش باغاهاا تسكن معاك هنا كنتي اجي علميني من لول وديك الساع أنا نهز مرتي ونديها لدارها ونقطعو لمشاكيل من جدر حنا ونتهناااو ماتوصلك بعيب ماتوصليهاا..
رحمة:(حركات راسها بلا ونطقات بخفوت) لا اولدي ماتگولش هاد لهضرة هادي تاهي دارك ونتا أولى بيهاا
نوح:ماشي هادشي لي كانشوف ايمّا لاكانت بصح هادي داري ماكنتيش غاتجري على مرتي منها وهي واحلة فروحها..(تنهد) لمهم لكلام دابا مابقا عندو فايدة حيت لي طرا راه طرا ومغانرجعوش الزمان لور ولكن هادشي خلاني نعيد حسبااتي ايمّا.. أنا غاندي مرتي أو ولادي وغانكسنو فالدار الجديدة وهاكا نتي تكوني مرتاحة وتاهي غاترتاااح..
رحمة:(هزات عينيها مصدومة وديك لهضرة لي نطق بيها هي لي خافت منهاا نزلو تاني دموعها ونطقات بترجي) لا اولدي ماتقولش هاكا هادي راه داركووم ماعندك فين تمشي أنا غاندوي مع رحيل وغانخليهاا تنسى لي گلت وغانطلب السمااحة غير نتا اولدي ماتخلينيش وتمشي نتوما لي معمرين عليا هاد الريااض ومنورينوو ونهار تمشيو غايرجع يطفى نورو..
***
داخل من باب الرياض بملابسو السبور وهاز شكارة وداير نضاضر ديال الشوف...كان ليوم اخر نهار بالنسبة ليه قبل لعطلة... عيونو تايقلبو على باه لي علمو برجوعو لريااض ساعة مبانش ليه...سمع صوت لبنات جاي من الصالة وتمشى لجهتها تاوقف فلباب وبانت ليه رحيل وبيسان فقط كيهضرو ويتعاودو تاضارت رحيل هي لولة وغير شافتو وهي تبسم ونطقات:ها زين العابدين جيتي
زين العابدين:(حرك راسو باه على مضض ونطق ببرود) فين لواليد؟
رحيل:راه كايهضر مع جداك
بيسان:صافي شديتي لعطلة ؟
زين العابدين:همم
بيسان:اجي اداك بورااس لهناا مبقيناش تانشوفوك يغبر باك تغبر تانتاا تقول متافقين (شافت فرحيل) عرفتي من امتى ماشفتو (رجعات شافت فزين) گاعما كتسول فعميتو واخا عليك
مجاوبهاش بحال لامادواتش خرج وبيسان ضحكات بالجهد ونطقات: ههه هاد بوراس كيعرف ليه غير نوح
رحيل:بالسيف راه ولد باه هداك
طلع زين العابدين لجناحو وحط شكارتو ومسائلو وتلفونو يتشارجى ودخل لحمام دوش ولبس عليه تاني سروال سبور كحل مع تيشورت فنفس اللون وقبية خلاها محلولة ومع شعرو سارد وكيتبوكلى خلاه هاكاك مور مدار ليه كريم ورش ريحتو لي كانت فقنينة كحلة محفور فيها "Z.E" جبد تقاشر جداد لبسهوم مع سبرديلة وخرج من لجناح نازل لتحت وفديك الأثناء كانت طالعة رحمة كاتمسح دموعها وتخلفات معاه فالدروج وهو ماهضرهااش و تبع ليها لعين تاطلعات ورجع كمل طريقوو تابان ليه نوح واقف وعاطيه بالضهر وهو يتبسم مبين ديك لغمازة لي عندو فحنكو وقرب جهتو ونوح غير حس بيه ضاار وتبسم ليه وهو حال يديه تاعنقو زين العابدين مزير عليه ونوح كايضرب على ضهرو وبخشونة قال: السبع ديالي
زين العابدين:(تبسم بخفة)خليتي بلاصتك
نوح:(غمزو ونطق بمعنى)عارف راسي مخلي لي نعول عليه ويرد لبال فغيبتي..
هضرة نوح كانت واضحة لحفيد لحاج لي فهمها طايرة.. حرك ليه راسو بهدوء ونوح طبطب على كتفو عدة مراات ونطق بخشونة: الله يرضي على ولدي
زين العابدين:آمين
نوح:خلينا نمشيو لصالة
تحركو بزوج ونوح مدرعو كل مرة ينزل عليه بشي دقة لضهرو ويجرو من قرفادتو كيف مولف معاه..
🔙🔙
ملي فاق وهو جالس كيخمم فهضرتها لي نطقات ولي خلاتو يشك بلي طاري شي حاجة معاها معارفش اشنو هي... تفكر هضرتها لي قالت ليه لبارح "هضرة الناس لي بعيدة كاتحرقك نهار وتنساها ولكن لقريب كاتبقا طالعة فيك وتنزل عمرك تقدر تنسى ودوزها" فهم بلي شي حد قريب ليهت گال ليها شي حاجة جرحات ولكن شكون ماعرفووش ولمشكيل مبغاتش تهضر وتريحو داكشي علاش قرر يقلب لراسو ويعرف اش طاري..تنهد وناض داخل لبيت فين كانت رحيل ناعسة تاتشخر ومشى جهة الكومودينو حلها باش يجبد لاباراي ديال السكر يعبرو مع باقي مافطرش وبانت ليه لاجوندا ديالها لي مكانش منتابه ليها...كمش حجبانو وهزها مع حلها تايلقاها مكتوبة بخط يديها..سد لمجر وخرج تاني لبالكو وجلس تايقرا فيها من أول حرف وهو ساكت ومنغامس مع كلامها لي وصل ليه داكشي لي حسات بيه فغيابو..تيحك سنانو بصبعو صغير وتيقرا كل صفحة بتركيز تاوصل لواحد الصفحة...شي لي خلاه يكمش حجبانو ورجع تايقرا ديك لجملة بالضبط لي كتبات "خالتي رحمة عندها لحق وهضرتها كلها على صواب أنا لي غالطة" هضرتها كانت بحال لغز على قد مكان ساهل على قد مكان صعيب يتحل...سد لاجوندا وسرح عينيه بعيد كيخمم ويفصل فديك الجملة مدة عاد هز تلفونو دوز لخط لزين العابدين لي كان ديجا هضر معاه قبل بحكم أنه أول واحد علمو بلي رجع وبلي هو فالفيرمة..
زين العابدين:(جابو فالرنة اللولة)لواليد
نوح:السبع ديالي رجعتي لرياض؟
زين العابدين:باقي تاترجع ونرجع
نوح:(ضحك وحرك راسو بلاحول وكمل بجدية) نهار دويت معاك نسيت مانسولك على ماجرا فغياابي (بجدية) رحيل واش جات لريااض فاش مكنتش
زين العابدين:(نطق بهدوء) هممم كنت راجع من لصال وشفتها كاتبكي
نوح:(عقد مية وحداش) علاش؟
زين العابدين:(نطق بالإنجليزية) حيت رحمة جرات عليهاا من الرياض
قلب نوح وجهو ساخط ومكانش متوقعها من مو نهائيا..سكت وزين العابدين نطق بهدوء:لواليد؟؟
نوح:(بهدوء) ابابا أنا ليوم راجع لرياض اجي دوزتي امتحانك؟
زين العابدين:نو عندي فلعشية غير غاندوزو وغانجي لرياض
نوح:صافي ابابا نشوفك تم ورد لبال لراااسك
قطع معاه ورجع راسو متكيه على لكرسي ودابا وضاح ليه كلشي وعرف علاش رحيل مقالت ليه والو أكيد حيت مباغاش تجبد الصداع عارفها كيف تتفكر وحافضها بحال نفسو تنهد ونطق بصوت خافت: اااه ايمّاا
🔜🔜
دخلو لصالة ولقاو رحيل متكية فالسداري حيت عيات بلگلاس كمش فيها نوح حجبانو وقرب جهتها قايسها فحنكها بلطف:علاش ماطلعتيش لبيتك ترتاحي
رحيل:(تبسمات ليه بزز)كنت تانتسنااك
نوح:(باسها فجبهتها وقال بهدوء)فيك الجوع؟؟
رحيل:لا كليت قبيلة
نوح:سيري ارتاحي أنا غانعيط لسي إدريس باش يجيب سيدرا توحشتهاا
رحيل:(تبسمات ونطقات)هي معرفاتكش رجعتي قلت ليها عندي ليها مفاجأة
نوح:صافي مزياان ونيت تاأنا عندي مفاجأة ليها ولمهاا
طلعات رحيل لفوق ترتاح وحاولات تنسى اش وقع وقالت ماعليش صبري ارحيل هو يالاه رجع ماتكونيش سباب لمشاكيل تاااني... أما نوح جلس فالصالة شاد لحديث مع بيسان كيسولها على الكابيني ديالهاا فين وصلات...
***
كانت سيدرا متحمسة تمشي عند مهاا ملي عيط إدريس لتانيرت علمها وهي ناضت تاتلبس وتوجد راسها... مشطات ليها تانيرت شعرها وباستها بالجهد مساخياش بيها حيت ولفاتها تاني مي الله غالب... ودعاتهوم سيدرا ومشات مع ريان لي غايوصلها حيت إدريس باقي فلگاراج عندو لخدمة بزااف... غادة مجمعة مع ريان تاوصلها لريااض وهي تكمش حجبانها وقالت:واش مامي هنا ماشي عند سيديل؟
ريان:لاهي هنا
شد فيديها ودخلو وعينو تايقلبو على رحيل ساعة مبانتش ليه وبانت ليه بيسان هي لي كانت تاتسنى وتاهي مكانتش معولة تشوفو... برسمية سلمات عليه ونطقات موجهة كلامها لسيدرا:لبخوشة سيري لبيتك تما فين كاينة ماماك
طلقات منهوم سيدرا ومشات تاتجري لبيتهاا وحلات لباب تاتعيط لرحيل لي نطقات:دخلي اسيدرا
وصلات عندها وتلاحت عليها تتبوس فيها وتعنق موحشاها ورحيل كدلك...مدة عاد بعدات عليها ونطقات سيدرا:مامي علاش جينا هنا ؟
رحيل:عقلتي امامي كنت قلت ليك عندي ليك مفاجأة غاتعجبك؟
سيدرا:اه مامي (بعيون لامعة)فين هي؟؟
سمعات سيدرا صوت نوح لي نطق من وراها بتبسيمة حنينة:تاتبيرت إينو ماتوحشتينيش (جلس قفازي حال يديه) اجي عندي ابابا
غير شافتو سيدرا وهي تعقد حجبانها بانزعااج وقربات جهة رحيل لي واقفة جنبها وخشات وجهها بين رجليها ونطقات
بصوت غااضب:مامي مابغيتووش ومابقيتش تانحملو (وبصوت باكي)أنا بغيت نمشي عند بّاديدي...
حلات رحيل عينيها بتفاجأ من تصرف سيدرا لغير متوقع وشافت جهة نوح لي كمش حجبانو وبقا غير كيشوف فسيدرا لي كانت باقي دافنة وجهها فرجلين رحيل وشداها فحوايجها بيديها بزوج كاتنخصص...
رحيل:(كاتلمس شعرها ونطقات بحنية) حشومة امامي تقولي ديك لهضرة شوفي فياا (بجدية)سيدرا شوفي فيا
سيدرا:(حلفات لاهزات راسها بقات دافناه ونطقات بعناد) بغيت نمشي عند بّاديدي داباا
نوح:(قرب جهتها وشاف فرحيل بهدوء) ماعليش (تحدر جهة سيدرا وحط يديه على كتفها ونطق بحنية) سيدرا شوفي فياا
سيدرا:(حركات كتيفاتها وزاد تخشات فرحيل) لا بعد مني نتايا
رحيل:(حمرات فيها)سيدرا اش هاد قلة الأداب
سيدرا:(شافت فرحيل وهي تتبكي)مابغيتووش أنا
غمز نوح رحيل لي كانت باغا تهضر وقرب جهة سيدرا هزها من خصرها على غفلة منها تاغوتات وشاف فرحيل بهدوء:خليناا بزوج
سيدرا:(تاضرب فيه وتغووت وهي تاتشوف فرحيل)ولااا بعد مني ماااامي
كانت واقفة معارفة مادير واش تمشي ولاتبقى استنجاد سيدرا ليها وداك لغوتات خلاوها تفشل فبلاصتها..هزات شوفتها فنوح لي عطاها شوفة بعينيه بمعنى خلينا وسيري وهي قلبها حسات بيه غايخرج...عمرها شافت سيدرا وهي معصبة هاكا وتاتغوت...
رحيل:(بصوت خافت)نوح
نوح:(شاد سيدرا لي كاتفركل ليه وقال بجدية) غير سيري أنا هناا ماتخافيش
حركات راسها باه وبتردد خرجات وبقات واقفة جنب الباب لي خلاتو مردود...أما نوح قرب جهة النموسية وجلس وجلس سيدرا فوق ركابيه وهي تاتجبد باغا تمشي... زير عليها مزيان تامبقات قدرات تملل وتحدر حدا ودنيها ونطق بصوت هادئ:مال تاتبيرت إينو معصبة؟
سيدرا:(صدرها تيطلع وينزل بتنخصيص وبصوت باكي نطقات) أنا مابقيتش حملتك بعد مني
نوح:(كمش حجبانو وبهدوء وحنية قال) وعلاش مابقيتيش حملتيني ؟؟
سيدرا:(ضورات وجهها وعيونها المبطنة عامرين دموع وشافت فيه بواحد الشوفة فشلاتو وخصوصا فاش نطقات ببرائة)حيت مشيتي وخليتيني بوحديتي
تنهد نوح وهضرتها زادت على مابيه... تصرفها شي طبيعي لبنت صغيرة لي عاشت بدون أب تانهار دخل هو لحياتها وخلاها تولفو وتعيش معاه داك لعوض لي كان خاصها من جهة باهاا... تعودات عليه فحياتها وقالت راه عندي بابا تاجا نهار وغبر مخليها بوحديتها وعند بالها راه مشى وخلاهاا...
نوح:(ضورها لجهتو وبدا يمسح ليها دموعها وقال بهدوء) أنا ماخليتكش وعمري نخليك بوحدك
سيدرا:(هزات كتيفاتها) وعلاش مشيتي؟
نوح:مشيت حيت كان ولابد ماخصني نمشي
سيدرا:(بدات تاتشكي عليه ببرائة) كنت تانتسناك باش تديني نلعبو فزليقات كيف گلتي ليا ديك النهاريات ولكن ماجيتيش باش تديني وتامامي كاانت ديما تتبقا بوحديتها مبقاتش تاتلعب معايا بزاف فاش مشيتي وبّاديدي كيكون فلخدمة ديما عرفتي تازينبيدين كان عندنا ديك النهاريات ولكن مبغاش يلعب معايا
كاتشكي عليه ببرائة حوايج بساط لي ممكن الإنسان البالغ يجيوه تافهين ولكن هي كطفلة صغيرة كانو هاد لحوايج مهمين ليها بزاف...
نوح:(تايدوز يديه على شعرها ونطق بحنية)هاني دابا جيت نديك تلعبي فالزليقات ونديك فيما بغيتي فهاد لعطلة ابابا
سيدرا:(كمشات شنافتها ونطقات بتدمر)ديك النهاريات قلت لصحباتي بلي بابانو غايجي معايا لكول ولكن نتا مجيتيش وهوما بقاو تيضحكو عليا وقالو ليا نتي كدابة ودابا گاعما تيبغيو يهضرو معاياا ويلعبو معايا
نوح:باسلين هادو لي تيضحكو ليا على بنتي (قرصها فنيفها) ملي تسالي لعطلة أنا لي غانديك لكول ومانخلي حد يضحك ليا على تاتبيرت إينو
سيدرا:(شدات فيديه) مغاتخلينيش باقي بوحديتي ياكا؟
نوح:(جرها معنقهاا ونطق بخشونة) على أنا نقدر نخلي تاتبيرت إينو
سيدرا:(حطات حنكها على حنكو ونطقات بحب)حبيبي بابانو بلو آيز توحشتك أنا
ضحك نوح وزيرها لعندو كيطبطب على ضهرها... قدر بكلامو وحوارو معاها يخليها تشكي ليه وتعاود ليه شنو كاين...وهي لخاطرها عودات لحوايج لبساط لي طراو معاها ففترة غيابو وباش حسات فاش غبر عليهاا...
نوح:(ناض هازها وهي باقا معنقاه) خلينا نمشيو عند ماماك
تمشى بيها لجهة لباب ومع حلو بانت ليه رحيل واقفة شادة كرشها لي وجعاتها بلوقوف ومع دلك ماتزعزعاتش وغير بانو ليها خارجين بزوج معانقين وهي تحس بقلبها برد وارتاحت... تبسمات وهي كاتشوف فسيدرا لي معنقة نوح ومزيرة عليه بحال لاخايفاه يهرب وهي تبسم ونطقات:صافي تصالحتو؟
نوح:(درعها بيد ونطق بخشونة) الله يبعد علينا لخصام..
كانت واقفة فلكوزينة تتوجد لغدا حيت مت إسلام غاتجي ليوم...دخل عندها وريحة البرفان تاتعطعط منو... كان لابس ومقاد حيت غايمشي لقامرة يجيبها بحكم جات بوحدها فلكار... شاف فيها هي لي ماهزاتش راسها وحشاتها ليه بحال لامكاينش...
إسلام:(حط حجبانو ونطق بهدوء)محتاجة شي حاجة قبل مانمشي؟
أسماء:لا
إسلام:هانا مشيت (ضار باش يمشي وهو يرجع شاف فيها وقال)ماتعييش راسك بزاف أنا غانجيب معايا لماكلة واجدة
أسماء:مكاين لاش
معاودش هضر خرج بحالو وهي رسمات ضحكة سخرية على شفايفها...كملات داكشي لي كادير وهزات كاس دلعصير تبرد بيه ومشات لصالة لي كانت مقادة ومعطرة وجلسات هازة تلفونها كاتسيفط لرحيل فلواتساب لقاتها نيت كاينة حاضرة...وبقات مكونكطية معاها مساجات
رحيل:✉️كيغادة مع لوحم؟
أسماء:✉️عادي قليل فين كاتعجيني الترويعة
رحيل:✉️وحمك ساهل اختي سعداتك
أسماء:✉️عرفتي شنو كانتشهى بعض لمرات داك الزيتون لمشرمل لي كليت عندكوم فالفيرمة ياختي باقي مداقو ففمي لدابا اااح
رحيل:✉️علاش ماقلتيهاش لياا نعطيه ليك تانتي خصك لعصا
أسماء:✉️تادابا باقي لحال عليه هه
رحيل:✉️اجي كيدايرة الأوضاع بينك وبين إسلام؟
أسماء:✉️ اودي خلي داك الجمل راگد فخبارك ماماه جايا لعندنا
رحيل:✉️ اه مزيان نيت تونسك وتعمر عليك الدار
أسماء:✉️واييه صراحة هادشي لي بغيت مليت وكاين مع من ندوي حاسة براسي بوحدي
رحيل:✉️كنت باغا نجي عندك ولكن دابا رجع نوح ومالقيت كيف ندير
أسماء:✉️ماعليش عارفة لي كاين اجي واش كاين شي باروك دلعمرة ولاوالو واخا غير بخور هههه
رحيل:✉️نكدب عليك والله ماعرفت هههه
أسماء:(شمات ريحة لماكلة وكتبات ليها بسرعة)✉️نخليك تال من بعد ونكملو واخاا خصني نكمل لغدا
خلات تلفونها وناضت تكمل داكشي لي بقاا عاد مشات بدلات عليها وتعطرات كيف العادة الأناقة ولابد منهاا...خرجات من لبيت وفطريقها سمعات صوت الباب تحل وهضرة إسلام مع مو وقربات جهتهوم مبسمة لمو لي تاهي غير شافتها تبسمات وبقات تاتبوس فيها وتعنق...
مو:اش خبارك ابنيتي وكيف درتي مع شي وحم
أسماء:حمدلله اخالتي على سلامتك ياك ماتكرفصتي فالطريق؟
مو:لا ابنيتي جيت فواحد لكار من زيناتو بحال لاجالسة فالدار ماحسيت گاع بالطريق تالگيت راسي وصلت لمحطة ولگيت ولدي إسلام يتسنا فيا
أسماء:اوا على سلامتك دخلي ارتاحي ليك الدار دارك اخالتي متحتاجيش عراضة
مو:الله يكبر بيك ابنيتي اش خبار داركوم ورحيل كيف غادة مع التقل؟
أسماء:هاهي كاتعدي وصاف
تمشاو لجهة الصالة وجلسات مو تتفك زيفها وتنش على راسها وأسماء ناضت جابت صينية دلعصير حطاتها فوق الطبيلة وكبات ليها كاس..تاسمعات صوت إسلام كيعيط ليها وهي تمشي جهتو لقاتو واقف جهة لبيوت..
أسماء:(نطقات ببرود)شنو؟
إسلام:هزي حوايجك من بيت الضياف ورديهوم لبيتك
أسماء:(هازة حاجبها)وعلاش؟
إسلام:باش نعطيو لمي هاد لبيت وزايدون مجاتش كل واحد فينا ينعس فبيت وهي كاينة معانا
أسماء:(ربعات يديها)ياك من نهار رجعت وأنا نعس فيها شنو بغيتي نكدبو عليها
إسلام:(بجدية)أسماء هادشي خليه بناتنا مانبغيش مي تسيق خبارو ولاشي حد اخر
أسماء:(ضحكها بهضرتو لي فقصاتها) علاش ماباغيش يسيقو لخبار ياك نتا بفمك قلتي باغي وقت على ماتسرط داكشي لي طرا وتاأنا قلت ليك باغا وقت على مانسى ماقلتي إذا فين لمشكيل؟
إسلام:(مسح على وجهو) مشاكلنا مانبغي حد يسيق ليهوم لخبار (هز حاجبو)سيري ماتخليش مي بوحدها وأنا غانهز ليك حوايجك لبيتنا
دخل لبيت مخليها واقفة تاتشوف فالبلاصة فين واقف بفقصة...بلاصة مايقول ليها نعلو الشيطان ونساو مافاات ونبداو من جديد بحال لاماواقعة والو غير مزايد فيه...أما هي حركات راسها وقلبات طريقها لعند مو راسمة ضحكة صفرا على وجهها باش ماتبينش ليها اش كاين...
تيجمع ليها فحوايجها ومستلزماتها لي حاطة تم ماخلى ليها والو...خرج لبيتهوم وحط داكشي تما ورجع بدل الغطا دالنموسية وهوا لبيت وحط باليزة دمو تم وخرج راجع لبيت وبدا يستف ليها أغراضها فبلاصتهوم لي مولفة تاتحطهوم فيهاا... بدل عليه بحوايج الدار وخرج لعندهوم لقاهوم مجمعات كايهضرو على لوحم ولحمالة وهو غير جالس كيسمع ليهوم...تحط لغدا لي كان على حقو وطريقو وغير سالاو ناض إسلام معاونهاا واخا واحد مكيهضر مع لاخر...واقفين فلكوزينة وكل واحد فين قالب وجهو ومگابل شغالو...كان عاطيها بالضهر كيعصر لقهوة حيت عارف مو فهاد لوقيتة ولابد ماتشربها تاسمع صوت الطبسيل لي تهرس ومع ضار بانت ليه أسماء شادة فلبوطاجي ومهبطة راسها...
بزربة قرب جهتها شادها من دراعها ومخليها تلوح تقلها على صدرو وهي مغمضة عينيها وديك الدوخة لي جاتها خلاتها تشوف غير الضباب قبالتها... كانت صحة سلام تاسمعات صوت تصفار فودنيهاا وقلبها حسات بيه غايخرج من بلاصتو...جرها تاجلسها فوق الكرسي وهي مرجعة راسها ومتكياه على لحيط...ضرب على حناكها بلطف وعينو عليها وهو تيشوف فوجهها لي كان صفر وشفايفها دغيا بيااضو...
إسلام:(باهتمام) أسماء كاتسمعيني؟؟
أسماء:(باقا مغمضة عينيها وبصوت خافت)هممم
ناض جاب ليها لماا وعطاها تشرب وموراها عطاها بنانة كلاتها عاد بدات توگض وتحل عينيها... شافت فيه هو لي كان جالس قفازي قدامهاا حاضيها بعيون باين فيهوم لخوف والاهتمام ونطق ويديه كاتقيس وجهها وحنكها:شوية داباا باش كاتحسي
أسماء:(بعدات وجهها ونطقات بهدوء)شوية غانمشي نتكى
إسلام:واخا زيدي نعاونك
أسماء:مكاين لاش
إسلام:زيدي باركة من لهضرة لخاوية
شد فيها وخرجو من لكوزينة غادي بيها لبيتهوم عاونها تاتسطحات فوق النموسية وغطاها وهي غمضات عينيها تنعس وترتاح... تأكد بلي هي بخير عاد خرج مخليها ناعسة... رجع لكوزينة هز طاسة دلقهوة ومدها لمو لي سولاتو على أسماء وقال:جاتها دوخة وراه فلبيت كاترتاح
مو:إوا مسكينة راه بالسيف تعيى وهي موجدة لغدا وضاربا تمارة واش اولدي أنا برانية ضربو تمارة على قبلي
إسلام:ماتگوليش هاكا الواليدة راه نتي مولات الدار
مو:اوا گولها لراسك راه ماجيتش بااش نعدب الدرية ونخليها تشقى عليا وهي واحلة فروحها راه أنا لي خصني نگابلها
إسلام:(باس يديها)الله يخليك لينا الواليدة غاتكوني عيتي من الطريق دابا نوضي ارتاحي ليك شوية واخا
مو:اييه راني كانتسنى غير لعصر يودن باش نصليه اولدي وزايدون غانتكى غير هناا جيب ليا غير شي كاشة حفيفة
إسلام:هالبيت نعسي فيهاا
مو:لا هنا مزيان
ناض جاب ليها كاشة وبقا معاها تاودن عاد ناض مخليها تصلي وهو مشى طل على أسماء لقاها ناعسة...قرب جهتها وبقا تيشوف فيه مدة قبل مايتحدر ويبوسها فشفتها وهو مغمض عينيه وبعد كيتنهد...تنهد وتخشى بلاصتو حاط يديه تحت راسو كيفكر فحالتهوم لي عياتو... باغي ينسى ويبدا من جديد ولكن مقادرش كيحس براسو عياان نفسيا... باقي حاس بضباب الماضي واقف ليه فطريقو بحال شي حاجز ممخليهش يعرف يحدد قرارو...كلما كيبغي يفكر بالمنطق ويتيقها كيلقى راسو مقادرش...واش حيت سبق ليه وتحط فنفس الموقف لي أداه وخلاه مايبقاش يتيق...الشك لي حاس بيه كيقتلو نهار على نهار... بصح هو قال ليها تعطيه وقت ينسى ويسرط ماطرا ولكن مداير تامجهود باش ينسى بلعكس لعلاقة بيناتهوم غير مزادت بردات وداك الشرخ زاد كبر على كيف كان...
🔙🔙
كان جالس فالكافي كيتسنى فيه وهو على أعصابو تابان ليه داخل وناض سلم عليه وتبسم ليه بهدوء:افين ابا منير
منير:هاحنا مع لخدمة وتمارة دالسبيطارات ونتا كيف غادي مع لعمل غبرتي اخاي
إسلام:وراك عارف فهاد لوقيتة لخدمة كاتزير شوية وزيد واحد لبروجي خدام عليه مبرزطني
منير:اوا الله يسهل شحاال هادي مادرنا خريجة بناتنا ومعانا ياسر وعبدالله تاهوما غبرو
إسلام: كل واحد فين ملهي
بقاو شادين الهضرة وكل واحد كيسول التاني على اخر مستجداتو وإسلام نيتو كانت حاجة خرا..وهاد الملاقية مكانتش بدافع يشوف صاحبو إنما كان باغي يرضي فضولو وكان تيتسنى غير لفرصة يجبد ليه لموضوع بطريقة غير مباشرة...وفرصتو جات ملي بدا صاحبو كيدوي على خدمة السبيطارات وتمارتها...
إسلام:داك النهاريات شفت واحد لبوسط فسوشل ميديا على واحد السيد قال ليك شاك بلي ولدو ماشي هو ولدو..
منير:اودي هادشي عطااه الله بحال هاد لحالات ولاو بكترة غير الله يخرجنا من دار العيب بلاعيب
إسلام:(نطق بعدم اهتمام زائف باش مايبين ليه والو) عندك لحق شفت لكومنطير لقيت شحال من واحد تيقول ليه يدير تحليل الأبوة باش يتأكد وهو گال ليهوم مرتو باقا حاملة
منير:على هاد لحساب خصو يتسنى تاتولدو ويديرو حيت لاكانت باقا حاملة غايشكل هادشي خطر على لجنين وعلى لمامون داكشي علاش من الأحسن يدير مور مايتزاد لبيبي
كمل منير كلامو وعقل إسلام حبس تما فديك الهضرة لي كان باغي يعرف جوابها لي خلاتو يدخل فدوامة التفكير عوتاني...
🔜🔜
ضار جهتها كيشوف فيها هي لي ناعسة بهدوء ومضورة وجهها جهتو... باغي يرضي فضولو ويخلي الشك لي فداخل ديالو يطفى من جهة لبيبي لي فكرشها واخا راه شي حاجة كاينة لداخل ديالو تاتغوت وتتقول ليه راه هاداك ولدك اإسلام ماتغلطش هاد لغلط...هبط عينو جهة كرشها وبقا كيدقق فيها بسهو... تيگول مع بالو مبقا قد مافات شهور قليلة وغادي نطمن قلبي ملي ندير تحليل الأبوة...
نازلة من الدروج وعينيها على عتمان لي واقف قدام لباب تيوري لدراري لي جايبين السلعة فين يحطوها تاتستف...قربات جهتهوم وهو غير شافها تبسم ليها..
غزلان:سلام أوعليكوم
عتمان: واعليكوم السلام
غزلان:يالاه وصلات السلعة؟
عتمان:يالاه وصلت حطينيا شي حاجة فالديبو دولد لحاج ولي بقا جبناه هنا باش يتستف
غزلان:جبتو الشيلان والدرور لي قلت ليك عليهوم؟
عتمان:واه كلشي تم (وجه كلامو لدراري لي تيدخلو لكوليات دالسلعة)ديهوم لداخل وحطوهوم تماا تاتستفوهوم
غزلان:ماعليش أنا غانستفهوم غير خلي الدراري يمشيو
عتمان:السلعة بزاف واخا تبقاي تال ليل وزايدون هوما غايبقاو هنا ويستفوها غدا غاتلقايها ناضية غير تهناي
غزلان:صافي لي بان ليك اه عطيني لبونات نصورهوم
عتمان:(جبدهوم من جيبو ونطق)هاكي
صوراتهوم كيف مولفين باش توريهوم لرحيل واخا راه هاد لبونات كيمشيو نيشان ليد ولد لحاج حيت هو لي مكلف ولكن هي كدير خدمتها...حطو دراري السلعة تايرجعو ليها مور مايسدو لمحال ويستفوهاا كيف قال ليها عتمان وهي كملات خدمتها وكانت مدروكة حيت أميمة مكيناش مشات تشوف واليديها وخلاتها هاد الأيام تشد هي المحال...مدة طويلة دازت وعتمان كان فالمحال ممشاش بقا معاها كيبيع تاهو بحكم العشية تايكون الرواج ولاكيس تايخص يكونو فيه زوج... ماسالات تاغفر ليها الله عييات وحسات برجليها وجعوهاا وبغات غير تمشي لدار وتنعس...حسبات لاكيس وجمعات كل حاجة بلاصتها وقيداتها فالدفتار مع تاريخ ليوم عاد سداتو ومشات لبيت فين كيبدلو وكياكلو بدلات فيه ولبسات جاكيط ديالها وطلقات شعرها وعكرات عاد خرجات لقات الدراري هبطو الريدو ولبنات لي خدامين مشاو وجاو دراري لي غايستفو...
عتمان:(شاف فساعتو) مشى لحال زيدي نوصلك
غزلان:لابلاش غانشد طاكسي ونمشي غير خليك
عتمان:(باعتراض)لا لا الزنقة خاوية انا نوصلك (موجه كلامو لدراري)واحمزة ستفو داكشي كيف گلت ليكوم شوية ونجي
حمزة:واخا
خرجو بزوج وهي مبتاسمة بخجل ركبو فطوموبيلتو وعطاتو لادريسة وشدو الطريق فهدوء مرة مرة يفتح معاها الهضرة...
عتمان:(بمزاح)الزعرة خلاتك بوحدك ماصدقاتش
غزلان:(ضحكات وعرفاتو قصد أميمة حيت مأخر زعرات شعرها)ههه توحشات واليديها ومشات تشوفهوم
عتمان:مزيان فيها خير
غزلان:(شافت فواحد السناك كان باقي حال ونطقات بهدوء)عفااك واخا توقف هنا
عتمان:(شاف فيها وقال)علاش محتاجة شي حاجة؟
غزلان:ناخد ليا لعشا باش نتهنى
عتمان:اه واخا
وقف وخرج هو بنفسو بعد إصرار منو تقول ليه اش غايجيب ليها مخليها جالسة كاتخربق فالتلفون تارجع جاب ليها العشا شكراتو وكانت باغا تخلصو ساعة شوفتو كانت كافية تخليها تجمع فلوسها عندها...كمل الطريق تاوصل قدام باب العمارة وهي تشوف فيه مبسمة:شكرا بزاف عدبتك معايا
عتمان:مرحبا سيري تعشااي ونعسي تال غدا إن شاء الله
غزلان:تصبح على خير
حلات لسانتوغ ونزلات وهو بقا واقف تابانت ليه دخلات عاد تحرك راجع لمحال...كانت طالعة فالدروج بشوية عليها ومع جبدات الساروت سمعات صوتو لي نطق من وراها بنبرة حادة:شكوون هاداك لي وصلك؟؟؟
نقزات غزلان من لغفلة لي دار ليها وضارت بالجهد عندو لقاتو واقف تيشوف فيها وهو مخنزر وباين فيه كاعي...سؤال طاح فبالها هو هدا شنو كايدير هنا أما محمد طه قرب جهتها وشدها من دراعها وهو منيرڤي ورجع كرر سؤال بصيغة خرا:شنو بينك وبين هاداك لي وصلك؟؟؟
غزلان:(نثرات يديها وخرجات عينيها) ونتا اش مشاا ليك حياتي هادي ندير فيها مابغيت
محمد طه:(عوج عنقو يمين وشمال وقال بنبرة حادة)اشمم حياااة هااا عند بالك غانخليك ديري مابغيتي
غزلان:(خنزرات فيه) وابعد مني وااه أنا وياك طلقنا وأنا بادية حياتي بعيد عليك وماشغلكش فياا سمعتي ديها فرااسك وفرقني عليك
محمد طه:(غوت مامسوقش لجيران)مامفااارقكش ابناادم دخليها لرااسك أناا غانبقاا بحال خياالك مانخليكش ترتاحي مني ولاعند بالك ديك لورقة ديال الطلاق هي لي غاتفرقني عليك راك غالطة (خنزر فييها وبتهديد واضح كمل) سمعي اغزلان وبرب لكعبة ونشوفك بااقي نازلة من طوموبيل شي زاا*مل فهاد لوقت ولانشوفك تاتهضري مع شي حد ولاحتي تشوفي فيه لي غانديرو فيك مغايطيحش فبااالك (طبطب على حنكها بهدوء)ودابا دخلي لدار
قلبات وجهها ومشات حلات لباب وبلاماتسنى طرقات لباب عليه مخلياه واقف جامع يديه معصب من لمنظر لي شاف...كان واقف كيتسناها تابانت ليه نازلة ضاحكة من الطوموبيل لي كان سايگها راجل ومع لأسف مشافوش حدو شاف يديه لي كان مخرجها من الشرجم أما تاوجهو ماقدرش يلمحو إيما كون عرفو...زير على يديه ورجع شاف فباب دارها لي كان مسدود ونطق بصوت خافت:غير غبرت عليك وهوما يخرجو رجليك لشواري...
كانت غادة جابا مفقوصة من هضرتو وديك التقة باش كيدوي عصبها ونرفزها...ضربات برجليها على الأرض وهي باغا تنتف شعرهاا... تمشات جهة الشرجم وزولات الخامية وهو يبان ليها غادي فحالو ويديه فجيب الجاكيط...خنزرات فيه ورجعات لخامية ومشات تاتجري جهة التلفون هزاتو ودوزات النمرة لأميمة لي جوباتها بضحك:توحشتيني ههه
غزلان:خصنا نقلبو على كرا جديد
أميمة:بسم الله عليك احنينتي واش بتي تحلمي بلكرا
غزلان:(كاتمشي وتجي وبنرفزة نطقات) من نهار عرفني فين ساكنة وهو تابعني فالطلعة والنزلة مامخلينيش نرتاح منو
أميمة:عوتاني محمد طه اش دار ليك هاد لمرة؟
غزلان:(بدات تعاود ليها) أنا طلقتو باش نرتاح ونبعد عليه وهو مبغاش يخليني عليه عييت وطلع ليا هادشي فراسي
أميمة:وعتمان علاش وصلك يشد ليك طاكسي ويوصيه تاهو جبد ليك الصداع
غزلان:واش أنااا فين ونتي فين أميمية ماتعصبينيش اصاااحبتي
أميمة:غزلان راه واخا تبدلي المدينة هاداك غايتبعك غايتبعك حيت باين ليا مباغيش يخليك واش فنظارك لابدلنا هاد الدار مغايلقاكش عوتاني ونتي خدامة فمحال ختو هاا راه غايتبعك تايلقى تاني السكنة الجديدة وديك الساعة غاتبداي تاني نفس الفيلم يعني غير غاتعدبي راسك وصافي
غزلان:(جلسات الأرض وبصوت خافت قالت)بغيت نسى وهو مخلانيش
أميمة:هو باين فيه باقي باغيك ماعرفتش شنو طرا بناتكوم تاطلقتو عليها مغانحكمش ولكن نتي لي عشتي داكشي غاتقدري تعرفي كتر مني اغزلان لاكنتي باغاه مافيها باش تعاودي تعطيه فرصة جديدة كلنا تانغلطو وحنا بشر ولكن لاكنتي حسيتي براسك مبقيتيش باغاه ومبقيتيش حاسة بشي حاجة جهتو فكملي حيااتك عادي ماتسوقيش ليه (نطقات بسرعة) غيزو نخليك تايعيطو ليا لعشاا تهلاي تال من بعد ونعاود نعيط ليك
قطعات عليها وخلاتها فحيرة من أمرها هي مبغاتش فرصة تانية باركة لفرصة لولة لي عطاتو ولي مكانش يستاحقهاا... باقي مانساتش ليه اش دار فيها وتصرفاتو معاهاا وهضرتو لي تجرح...باقي مانساتش ديك التصرفيقة لي خلات أتر فنفسيتها ماشي فحنكهاا...مقدراش تنسى داكشي لي عاشت معاه باغا غير شي حاجة زوينة لي تشفع ليه ساعة تاتلقى الخايب غاالب وهادشي كيزيد يخليها تحقد...ناضت وهي مخنزرة مسحات الدموع لي غفلوها ونطقات ببرود: فات لفوووت ولي فرط يكرط
***
وصل محمد طه لدار وهو عاقد غوباشتو تسوليه مالك يتفرگع عليك...لقاهوم مجموعين فالصالة وبزز باش تبسم باش مايبينش ليهوم شي حاجة حيت عارف باه يحصلو مع الدخلة... لفت انتباهو عدم تواجد سيدرا شي لي خلاه يشوف فباه وينطق:فين سيدرا؟
تانيرت:(حاطة يد على خدها) وصلها ريان لعند رحيل
محمد طه:(شاف فيها وقال بهدوء) خوات علينا الدار عوتاني
تانيرت:اودي خليني ساكتة
ناضت وهي مكمشة حجبانها حابسة لبكية حيت مولفة سيدرا بزاف وخلات تاني بلاصتها شي لي خلاها تأزم...تبعها إدريس مخلين غير ريان ومحمد طه أما تارنيم راه فلبيت مريضة فيها لوجع...
محمد طه:(شاف فريان لي كيلعب بلگرميط فيديه ساهي)مالك تانتاا
ريان:(شاف فيه)معايا
محمد طه:(بسخرية)مع جدا معلوم معاك
ريان:والو غير عيان وصاف
محمد طه:لاباين (غمزو)اش تم؟
ريان:(كمش حجبانو ونطق بنرفزة) والو امحمد غير مدرونجي وصاف نخليك نمشي نعس تصبح على خير
طلع ريان لبيتو وغير دخل وهو يكمش حجبانو غادي لشرجم يتنفس وعقلو ساهي فشنو طرا ليوم ملي وصل سيدرا لرياض...شوفة بيسان مكانش عوال عليها ولكن لي مكانش عوال عليه كتر هو كيفاش تعاملات معاه ببرود...استقبلاتو بحال شي ضيف عادي وخلات السعدية تجيب ليه القهوة وجلسات ضيفاتو عادي...تعصب من ديك لمعاملة ومرضااش وماعجبوش لحال ولي زاد عصبو فاش شاف تلفونها لي كان محطوط فوق الطبلة صونى بنمرة لي كانت مدخلاها ب "Dr Omar" عرفو شكون وكيفاش غاينساه وهو باقي مفكر كيفاش سلم عليها داك النهار وهضر معاها براحة..كيحس براسو منيرڤي ولكن ماعندو مايدير دابا كلشي سالى بناتهوم وهي مبقاتش كاتخصو...حرك راسو بلا عند هاد النقطة مباغيش يتقبلهاا هاديك بالنسبة ليه أول وحدة خلات قلبو يتحرك ليها ويبغيها هي... نساتو فداك الزهو لي كان عايش فيه ومعاها ولى واحد خر... جبد تلفونو بزربة وطاپى نمرتها مدوز ليها لخط فديك الساعة مابقاش عاقل على كلامو لي قال ليها وبلي هو لي سالى هاد العلاقة...بدون مايشعر براسو نطق بعصبية بلهضرة لي كان ساكت عليها مدة مجرد ماتفتح لخط وقبل مايسمع صوتها:دابا عاد فهمت علاش مكنتيش باغا حد يعرف لي بناتنا حيت بالنسبة ليك أنا مصالحش ليك ياك ماشي بحال داك لقواااد لي خدام معاك من امتى ونتي تعرفيه همم هو لي خلااك ترفضيني ياك
وصلو صوت الطرف التاني لي مكانش صوت بيسان إنما صوت رحمة لي نطقات بنبرة متسائلة:شكوون نتاا؟؟
لوات على شعرها فوطة وخرجات من لحمام وهي تاتسد الحزام دلبنوار ومع هزات عينيها بانت ليها مها واقفة جنب الطابل دونوي وهازة تلفونها تاتهضر منو...قربات جهتها بخطوات سريعة ونطقات:ماما؟؟
ضارت رحمة لعندها وهي مخنزرة وبيسان بزربة خدات ليها التلفون وغير شافت فالنمرة لي كانت باقا مدخلاها عندها بالسالوبار وهي تخرج عينيها وقلبها ضرب قطعات لابيل وشافت فمها بتوتر ونطقات:ماما نتي اش كاديري هنا؟
رحمة:(خرجات فيها عينيها)شكون هاداك الشمكار لي معيط ليك؟
بيسان:(بتوتر وخوف)اشمن شمكار وزايدون علاش هازة تلفوني كاتجاوبي فيه
رحمة:(قربات جهتها وشداتها من دراعها ونطقات وهي مخيخة عليها) وليتي تتحاسبي معاياا وزايدون نتي مدخلة نمرتوو عندك سولتك ابيسان شكون هادا وماتخلينيش نتعصب عليك
بيسان:(كمشات حجبانها)أنا ماشي بنت صغيرة اماما وعارفة اش كاندير
رحمة:(نطقات مغددة) ماشي بنت صغيرة عند بالك راك كبرتي وغادة تعارفي ليا مع شمكاار تيخسر فلهضرة ومعيط كيهدد فيك سمعي ابيساان وايااك يسخن عليك راسك وتفكري ديري شي حاجة لي طيح بوجهي لأرض سمعتي هاد لمرة غانميك وگولي لهاد الشمكاار مايعاودش يعيط ليك ولاعرفت راه تادوي معاه مزاال غانگولها لخوك نوح وديك الساعة فكيهاا معاه
طلقاتها وخنزرات فيها قبل ماتمشي مخلياهاا واقفة تاتحك فجبهتهاا بتوثر...هزات تلفونهاا ولقاتو معاودش صونى عليها...معرفاتش اش قال وشنو سمعات معاها تاقالت عليه شمكار تيخسر فلهضرة والأهم علاش عيط عليهاا...جلسات بلاصتها وهي تاتنهد من هضرة مها لي لاحت عليها الضيم...
****
مور مافطرو مجموعين مع العائلة طلعات رحيل لبيت هي وسيدرا ونوح توجه لطوموبيلتو حل لكوفر وجبد واحد لڤاليز كبيرة فلكحل كان مخليها تاتجي وقتها... رجع لرياض وطلع نيشان لبيتو لقا رحيل طالقة موسيقى لسيدرا لي كانت تاتحرك وتشطح تبسم وهز ديك لڤاليز حطها فوق النموسية ورحيل شافت فيه ونطقات بتساؤل:ملين جبتي هاد لڤاليز؟
نوح:كانت فالطوموبيل
حلها وهي تلقاها عامرة غير بالساشيات جات سيدرا تاتجري طلعات فوق النموسية ونطقات:شنو هادشي بابانو
نوح:سيري ابابا عيط لزين العابدين واجيو نقول ليك شنو هادشي
مشات طايرة تاتجري لبيت زين العابدين حلات لباب تاني بلادقان وقربات جهتو فين كان متكي تايلعب بلمانيطة:زينبيدين بابانو گال ليك اجي دابا يالاه
لاح لمانيطة وناض تايقاد فتيشورت ديالو وهي سابقاه تاتجري.. دخل لبيت فين كانت رحيل باقا جالسة متكية على لمخدة ونوح واقف جنب ديك لڤاليز شاف فزين العابدين ونطق بخشونة: اجي السبع ديالي ريح لهيه
سيدرا:(تخشات جنب زين ونطقات بغيرة)تاأنا سبعة ديالك
نوح:(ضحك)ههه تانتي يالاه جلسي حداه
ريحو بزوج وهو جبد الساشي لول مدو لزين العابدين ونطق بهدوء:هاك لبروك دلعمرة
زين العابدين:(شدها وباس راسو)شكرا
مد ساشية لسيدرا تاهي لي تعلقات فيه بايساه فحنكو تاهي...كان كل واحد جايب ليه ساشي ديالو هز دمو ودختو باش يعطيوهوم ليهوم وزين العابدين دغيا خرج وتبعاتو سيدرا فرحانة تشوف اش جاب ليها...
نوح:(هز واحد ساشيات وشاف فرحيل)هادو ديال داركوم تاتديهوم ليهوم
رحيل:عدبتي راسك انوح
نوح:(قرب جهتها وباسها فعنقهاا بالجهد) مغاتشوفيش اش جبت ليك
رحيل:(بحماس)نشوف
نوح:(حل ديك الساشية وخدا منها واحد لكرطونة عاد مدها ليها)هاكي الالة
رحيل:(بفضول)شنو داكشي لي خديتي؟
نوح:(رجعها بلاصتها ونطق بخشونة)تاتوصل وقتها ونعطيها ليك
حلات رحيل داكشي لي جاب ليها تاتشوف فدوك لعبايات لي كانو تيحمقو مستيلين مع صندالة ديالهوم وحدة فالكحل وتانية فالباج...وفولاراتهوم وجايب ليها زوج مخاوير واعرين داكشي كاليطي...ورحيل حمقوها باستو فحنكو بالجهد وهو تبسم ليهاا ومسح على شعرها:بصحتك الفتنة ديالي
(باسها فشفتها وغمزها)غانمشي نعطي ليمّا وبيسان كادواتهوم
خرج مخليها تاتقلب الساشيات ديال دارهوم كان جايب تلاتة دلعبايات وربعة ديال الفوقيات مع طاگيات ولبخور والتسبيح وصلايات...تبسمات على هاد لجيست وناضت حطاهوم فالدريسينغ تاتمشي لدارهوم وتديهوم ليهوم...رجعات تاتشوف فديك لڤاليز فين باقين شي ساشيات عرفاتو غايكون دلبقية جدو وجداه... مشات لحمام قضات حاجتها وخرجات لقات سيدرا جايا عندها كاتغبن:مامي حنيشات ضروني هنا
بقات تاتحك فتريمتها ورحيل جلسات وحيدات ليها يديها ونطقات بهدوء:عرگتيها عوتاني عند جدك شكلاط وحلوى تارجعو ليك لحنيشات
سيدرا:وتايضروني مامي
رحيل:صافي امامي دابا يبراو (باستها) ماوريتينيش شنو جاب ليك باباك
سيدرا:(بحماس)جاب ليا ماما بحال هاديك لي تاتلبسي زوينة وكسيوات امامي وفليلات زوينين
رحيل:(تبسمات ليها)سيري جيبي نشوفهوم
مشات سيدرا تاتجري لبيتها وفطريقها تلقات زين العابدين لي كان غادي جهة الدروج..
سيدرا:زينبيدين زينبيدين (وقف شاف فيها وهو عاقد حجبانو وهي كملات ببرائة مدلية شنافتها) عرفتي زينبيدين فيا حنيشات فزكيكة تايضروني
قالتها وهي تاتحك فتريمتهاا وتتعوج فرجليها مكمشة حجبانها باغا تبكي...
كان واقف تيشوف فيها وهو عاقد حجبانو مفاهمش اش تاتخربق وشنو تتگول؟؟ ...حدو كيشوفها تاترطى عليه تم وتاتحك فزكيكتها وهي باغا تبكي... قلب عينو ببرود ومد صبعو دفعها فجبهتها تانحاها من قدامو وكمل طريقو مخليهاا مغبونة...هلكوها لحناش ومالقات ليهوم جهد...مشات لبيت هزات ديك الساشية وجابتها لرحيل لي كانت تاتسناهاا..
رحيل:فين تعطلتي؟
سيدرا:(باغا تبكي)ومامي ضروني حنيشات
رحيل:(معنقاها تاتبوس فيها وجلساتها فوق ركابيها واخا كرشها معدباها وبقات تاتمسح ليها على شعرها وسيدرا طلقات بكية تاتنخصص...على إثرها دخل نوح لي كان عاقد حجبانو تيشوف فيها وقرب جهتهوم:مالها علاش تتبكي؟
رحيل:فيها لحنيشات (تنهدات) ديما تانگولها ليها داك الشكلاط ولحلوى كولي غار شوية منو وهي تاطيح فيه عمى وتابابا كيدير ليها خاطرها وفليل تاتبقا تحصل مع لحنيشات
نوح:نوضي نديوها لطبيب (هز سيدرا لي ضورات يديها على عنقو ونطق بحنية)اجي ابابا نمشيو لعند طبيب يعطينا دواء
ناضت رحيل تاتعگز ومشات لاحت عليها عباية مبينة ديك لكريشة مع درتها وهزات غير بوشيط وصندالة فرجليها لي تنفخوو ليها وخرجات ناطقة:نسيت انوح سيمانة الجايا عندي كونطرول عند طبيبة عيطات ليا السكرتيرة ديالها وعلماتني
نوح:(ضار جهتها وطلعها ونزلها شنو لابسة عاد نطق بخشونة)إينا نهار؟
رحيل:نهار 15
خرجو من لجناح غادييين يدوزو لسيدرا ورحمة كانت واقفة متبعة ليهوم الشوفة تاركبو فالطوموبيل وهي عاقدة حجبانهاا... باقي مانسات كلام ولدها ليها لي خلاها تعصب على رحيل وتعتاقد بلي هي لي شكات ليه...معرفاتش بلي خبارها عطاهوم ليه حفيدها...رجعات جالسة فوق الفوطوي وهزات تلفونها مدوزة لخط لسناء لي كانت فهاد الأثناء كاتسنى اليازيد يدوش باش يخرجو يتساراو فأزقة طنجة... تالقات ختها تتصوني وهي تهز تلفونها وجوباتها:الو رحمة لباس
رحمة:(بانزعاج)مالبااس والو اسناء ولدي كيضيع ليا من بيني يدي عندهوم لحق لي قالو لعروسة تاتبدل الراجل على مو ودارو
سناء:(تنهدات)اش طاري عااود؟
رحمة:(نطقات مغددة)مافخباركش بلي مشات شكاتني ليه داكشي لي درت ليها حطاتو ليه كولو
سناء:(بان ليها ليازيد خارج حرك ليها راسو بمعنى مع من كاتهضري وهي حركات يديها وناضت مباغاش يسمع لكلام...دخلات لبالكو وسدات عليها ونطقات بهدوء) من حقها تعاود ليه على نتي نسيتي كيفاش جريتي عليهاا اختي
رحمة:سنااء واش نتي معاياا ولاضدي وزايدون أنا كنت معصبة ملي جريت عليها راه لي فيا كافيني ديك الساعة
سناء:(بجدية) رحمة عارفة بلي فديك الساعة كنتي حالتك حالة والله يحسن لعوان ولكن هاولد لحاج رجع دابا بخير وعلى خير علاش باقي هازة شوكتك على رحيل
رحمة:(بانزعاج) حيت من نهار دخلات لحياتنا ولمشاكيل تابعيناا
سناء:بحال لاهاد لمشاكيل مكانوش قبل ماتجي شوفي ارحمة أنا كنت فلول واخدة فكرة خايبة على رحيل ماعرفتش علاش ولكن ماحملتهااش وقلت راه ماتستاهلش ولد لحاج ولكن من بعد لقيت راسي ظلماها السيدة ماشي كيف كنت نتخايلها بلعكس ضريفة وبنت الناس غير نتي مباغاش تعطيها وقتها وتقربي منهاا
رحمة:شنو طرا تاوليتي تقولي بحال هاد لكلام ياك نتي لي من لول مابغيتيهاش
سناء:راه قلتها ليك فلول خديت عليها فكرة خايبة مي من بعد عرفت شنو كاين
رحمة:(حركات راسها بلا ونطقات بعدم ارتياح) أنا أصلا مارتاحيتش ليها وماعندي لاش نتقرب منها تعطيني غير بتيساع باركة غير كيفاش بيناتني قدامو ممزياناش
سناء:(حركات راسها بلاحول) نتي راه فتي طامو لهيه والله
رحمة:غير سكتي ماشفتيش لفقصة التانية لي طارية ليااا
سناء:مالك عوتاني؟
رحمة:بيسان لي تانگول عليها مرزنة تاهي لقيتها كادوي مع واحد الشمكار ماعرفت فين عرفاتو وشافتو تخيلي لباارح مشيت نطل عليها لقيتو كيصوني وجاوبت وبدا يسب ويهدد فيهاا
سناء:(ضورات عينيها ونطقات بخفوت)شكون هادا؟
رحمة:ماعرفتش حدي شفت سمية باش مدخلاه السالوبار (بسخرية)همم راه نيت سالوباار على لكلام لي گااال يعلم الله اش وقع بناتهوم
سناء:(باغا تجر ليها لسانها) وشنو گال ليك
رحمة:اش غايگول تگال ليه واقيلا خلاتو وهو مبغاتش تسرط ليه (بدات تتحك جبهتها ونطقات بفقصة)مانقدرش اسنااء نتخيل بلي بيساان تتعرف بحال هاد الأشكاال فين شافتو وشنو كان بناتهوم عرفتي راسي باغي يتفرگع وفاش واجهتها بدات تاتهز علياا تخيلي بيسان وقفات فوجهي
سناء:البنت راه ماشي صغيرة ارحمة باش تبقااي دايرة ليها هاد الزياار وزايدون مافهمتش علاش خديتي موقف من هادا لي عيط ليها ونتي مشايفاهش گااع
رحمة:من نيتك تادوي لابلامانشوفو حيت لي سمعت كااافي يخليني ناخد فكرة على شكلو ولبيئة لي كابر فيهااا
سناء:لبنت راه كبيرة ولي قدها معارف ومصاحب ومزوج گاع بولادو ونتي بقاي حاضيااها تاضفر الشيب عندك خلي السيدة تعيش حياتها واه ارحمة عصبتيني عوتاني
رحمة:(ناضت غادة جايا ونطقات معصبة)أنا عارفة مصلاحة ولادي اسنااء وبيسان خصها واحد لي يليق بيهاا واش لبنت تعدبنا عليها تاكبرات وقرات فأحسن لجامعات فبرا أو ولات طبيبة وتجي نتي تقولي ليا خليها تعيش حياتهاا...باش فلخر تجيب ليا واحد بحال داك الشمكاار لي كانت تادوي معاه أبدااا سمعتي نموت ومنزوجهااش ليه ولا لشي واحد مايستاهلهاااش..
ليوم قررات تانيرت دير عراضة لبناتها ونسابها بزوج...هاد ليامات حسات بالدار خوات عليها خصوصا واحد محمد طه وريان تتشوفهوم من ليل ليل ورنيم بوحدها لي تاتبقا تونس فيها...شمرات على دراعها هي ورنيم أو وجدو لعشا على حقو وطريق وتهناو منو...الدار نقية ومبخرة... نزلات تانيرت لابسة قميص ديال الدار تاتشوف فالساعة لي فالحيط ونطقات بهدوء وهي داخلة لصالة:تعطلو تاواحد باقي مجا فيهوم
إدريس:دابا يجيو راه باقي لحال
سمعو السرسار وناض إدريس يحل لقاها أسماء هي وإسلام ومو...
إدريس:لحاجة على سلامة
م.إسلام:الله يسلمك اسي إدريس صحيحة لبااس
إدريس:حمدلله مرحبا دخلو (درع أسماء) لباس ابنتي
أسماء:حمدلله ابابا ونتا
إدريس:بخير ابنتي
دخلو لداخل فين كانو لبقية جالسين تسالمو مع بعضياتهوم وبقا جااسين مجمعين تايهضرو ويسولو فأحوال بعض... مدازتش مدة كتيرة تاسمعو الباب دق وهاد لمرة ناض محمد طه يحل لقى سيدرا فوجهو مبسمة ومادة يديها ليه:مودي هزني
محمد طه:روح مودي توحشتك
هزها تايبوس فيها عاد داز تيسلم عليهوم..
دخلات رحيل وهي هازة عبايتها لي جاب ليها نوح والسيدة تحلفي عليها خليجية...دخلات لصالة ونطقات بصوت ضاحك:سلام أو عليكوم
ناضو كيسلمو عليها وهي غير وصلات جهة إسلام وهي تعطيه ضحكة صفرا وحركات ليه راسها ببرود ومشات جلسات جنب مها وأسماء..
تانيرت: فين رحمة علاش مجاتش؟
رحيل:عيانة شوية كانت باغا تجي ساعة طاح ليها الطونسيو تاني ليوم
تانيرت:اه ومايكون باس (شافت فبيسان لي جالسة جنب رنيم وتبسمات ليها)اش خبارك ابنتي لباس عليك
بيسان:حمدلله اخالتي ونتي
تانيرت:لباس ومرحبا بيكوم دار داركوم
فالجهة لمقابلة كان جالس نوح جنب إدريس لي نطق بهدوء:طالت لغيبة اولد لحاج وخليتي بلاصتك
نوح:(حرك راسو وبهدوء نطق) الله يكبر بيك اسي إدريس (ضرب على ركبتو ونطق بتبسيمة خفيفة) عدبناك معانا هاد لفترة هادي
إدريس:وايلي ماتگولش هاكا ياك بعدا لأمور كلها مزيانة وداك ولد عمك مناويش على شي حاجة
نوح:(عقد حجبانو وبدا تيدوز يديه على لحيتو وبخشونة نطق) لحاج ربط ليا يدي
إدريس:من الأحسن بعد عليه وهني راسك من لمشاكيل وزايدون هاداك نوع راه باين طينتو
مقابلين مع بعض وحاضيها ملي دخلت مكانش متوقعها غاتجي وخصوصا بعد الكارتة لخرة لي وقعات...كان باغي يعاود يعيط ليها فديك الساعة ويسولها ولكن خاف تكون مها باقا شادة تلفون...استاغل لفرصة وهز تلفونو سيفط ليها مساج وسيفطو وعينو عليها كيتسناها تجاوبو...حسات بتلفونها ومع هزاتو لقات مساج منو وهي تعقد حجبانها بلاماتعيق حيت خوها جالس فنفس الصالة وأكيد غايعيق...قراتها ✉️ بغيت نهضر معاك ؟
بيسان:(جوباتو) ✉️مكاين فاش نهضرو
ريان:(كيكتب وهو كيعض على شفايفو بلفقصة)✉️ بيسااان مغاديش ناخد من وقتك زوج دقايق مانفوتهومش
بيسان:✉️ واش تسطيتي ؟؟ خويا هنا بغيتيه يحصلنا حيت هو لي بقا معارفش
ريان:✉️واش ماماك گالت ليك شي حاجة
بيسان:✉️ ماشغلكش بيني وبينها وزايدون ياك قلتي مبقيتيش باقي تهضر معايا ياك ملي جيت عندك باش نشرح ليك ماخليتي ماقلتي لياا نفكرك هناا فداركووم وفلكوزينة بالضبط فين قلتي كلام عمري نساه هاني دابا بعدت ولكن نتا ممخلينيش
سيفطاتو ولاحت تلفونها حابسة ليه صوت وضارت تاتشوف فلبنات وبزز تبسمات تاتدوي معاهوم محاولة تنسى لفقصة ديالو أما هو تنهد وشاف فداك لميساج وهو ساهي.... واخا باغي يبعد مكيقدرش تيحس براسو مخنوق وممرتاحش...هضرتها على صح فاش جات تشرح ليه مخلاهاش ودابا علياش تيقلب...شاف جهة نوح لي كان مخشع مع إدريس كيهضرو وتنهد قبل ماينوض مخلي الصالة وعيون بيسان متبعاه بلاشعور...
مور ماتعشاو وكلاو خلاو الرجال جالسين فالصالة مع بريريد أتاي وطلعو لبنات لبيت لفوق باش تعطيهوم رحيل داكشي لي جاب ليهوم نوح...
رنيم:(تتقيس ديك لعباية)حبيتها والله زوينة بزاف
أسماء:كنا طالبين غير لبخور وربي فتح لينا فالعبااية هههه
رحيل:اوا بصحتكوم هادي ديال إسلام تاتعطيها ليه وهادي ديال مودي ورياني وبابا
رنيم:بنات باغا نقول ليكوم شي حاجة؟
رحيل:خبار لخير اش تم؟
رنيم:(شافت فبيسان)أنا ورؤوف أونغولاصيون
حلو لبنات عينيهوم مصدومات وحدة تشوف فلخرة وبيسان حطات صبعها فوق صدرها ونطقات:باغا تقصدي رؤوف خوياا؟؟
رنيم:(بخجل)اه
رحيل:لوسي ياك؟
رنيم:(حركات راسها) اه مالكوم
أسماء:صدمتيهوم وصدمتيناا ههه من امتى ونتي وياه تاتهضرو؟
رنيم:كنا كانهضرو عادي كوم دزامي مي من بعد ولينا أونكوبل
أسماء:همم اوا هي شي عراشية جايا فالطريق؟
رنيم:نتي دغيا نقزتي لعرس
بيسان:واشوف ليك لخوينز عليها السيد ساكت وأنا تانگول مسكين هلكاتو لخدمة قولي هلكو لحب ههههه
شدو فرنيم تاندموها لاش هضرات وكل وحدة تلوح ليها هضرة وهي تميق فيهوم تاصونى ليها وهي تنوض تهضر معاه ولخرين نزلو لتحت حيت وصل وقت يمشيو... توادعو على أمل لقاء مرة خرا وتانيرت شدات فسيدرا باغاها تبات معاها وتارحيل خلاتها ليها عارفة مها مولفاها بزاف خصوصا أنها هي لي كبراتها فكاتوحشها وكاتبغيها معاها يمكن تعوض فيها الفترة لي عاشتها بعيدة على رحيل ومشافتهاش تتكبر بين عينيها واخا دازو عليها السنين إلا أنها عمرها تنساها...
----
داخل لميزون دڤواتيغ وعينيه كيتساراو على البلاصة شنو تزاد وشنو نقص فغيابو...جاهوم فجأة خلى كلشي يتلبك مع مكيعلمش تامن سعيد مكانش عارفو جاي...طلع نيشان لدروج وموراه سعيد لي نطق:سي السليماني مرحبا بيك على سلامتك
نوح:(ببرود)الله يسلمك عيط لفام دميناج وجيب ليا لكاطالوغ لخراني ولضوسي لي خصهوم يتسناو
مشى سعيد وهو حل لباب دلبيرو لي مدة وهو مسدود مشى نيشان حل الشراجم يتهواو وهي تجي لفام دميناج دير خدمتها بلامايوريها..جبد من الساشية لي جاب معاه لبخور ودارهوم فلمبيحرة ومشى جلس فالبيرو لي سبقات نقاتو مع فيه غير لغبرة وحداه سعيد كيوريه لي ضوسي ويعلمو باخر المستجدات تاسالى وخلاوه بزوج مقابل خدمتو بهدوء وتركيز...
غير حط رجليه فمراكش وصل سناء لاباخطمون ومشى نيشان عندو... دق لباب وغير سمع صوتو وهو ييحل لباب ونطق بضحك:خصني نزغرت حيت رجعتي
نوح:(حك لحيتو بهدوء)ديرها
اليازيد:(قرب جهتو وناض سلم عليه وقال بصدق)والله تاخليتي بلاصتك
نوح:(بمزاح)غير بغيتكوم توحشوني وصاف
اليازيد:واهي توحشناك وطراو شلى بلانات بلابيك
نوح:(جمع يديه فوق البيرو وقال بجدية) بحال زواجك بسناء؟
اليازيد:(هز يديه وقال بتبسيمة) هاد الجهد عيت نصبر والصبر مبقا ينفع
نوح:ومك؟
اليازيد:نتا عارفها صعيب تهبط الراس جربت ندوي معاها ساعة حلفات لاقبلات وماخلات ليا تاحل بغيت لحلال وهي وقفات ليا فعودي واقيلا بغاتني نمشي نزني
نوح:(تكى على لكرسي وقال ببرود) الزواج راه مافيهش غير الكوا الشريف راه فيه حوايج خرين ومن بناتهوم لعائلة اييه من حقك تزوج بلي بغيتي ولكن راه خصك تعرف بلي مغاتبقاش بلاعائلة حياتك كلها مك مقصحة راسها ولكن راه اخرتها غاترطاب
اليازيد:على أنا كرهت
نوح:هاد لبلان خليه علياا ولكن سمع (هز صبعو فوجهو بجدية ونطق)هادشي دخلو لراسك داك تخربيق دشحال هادي ضرب عليه اليازيد نتا عشتي تجربة وغاتكون تعلمتي منهاا شحال من حوايج نتوما دابا تزوجتوو واختاريتو داكشي لي باغين إذا كونو قدوو وماتنساوش بلي مستقبلا غايكون عندكوم ولاد ونتوما خصكوم تكونو قد لمسؤولية وغايخصك تسبقهوم على أي حاجة سمعتي
***
ملي فاقت وهي فجناحها مبغاتش تحاك باقي مع رحمة على اخر مرة طرا لمشكيل ولي بقا فيها هي رحمة تقول واش طلبات السماحة كانت على الأقل غاتسرطها ولكن عدم اهتمام رحمة خلى رحيل تاهي تعطيها شبر التساع وتصبر على مايرجع جد نوح وجداه لي فهاد الأيام راجعين على الأقل غاتلقى مع من توانس...فطرات فجناحها وهزات لبيسي وبدات تخربق فيه وتفرج وعيطات لبنات شدات معاهوم لخط وتامها وعاد ناضت دوش...خدات وقت وهي فلحمام تاخرجات تاتشعل ولبسات گندورة طويلة مع فولارها وريحات بريحة لي جاب ليها نوح ولمعات شنايفها وقررات تنزل لتحت..كانت هبطة بشوية عليها فالدروج ومع وصلات لوسط بان ليها لباب تحل دالرياض ونوح داخل....تبسمات وهبطات عينيها جهة لفاليز لي هاز ورجعات شافت فيه مبسمة باستغراب ولكن تبسيمتها بدات تتمحى شوية بشوية وعينيها على هاديك لي كانت داخلة ورا نوح بلباسها الشرعي الطويل فلكحل لي مبين وجهها الدائري البيض ويديها لابسة ليهوم ليگات كحلين... بطأت رحيل المشية ديالها وبقات واقفة تاتشوف فيهوم وهوما داخلين وقلبها حسات بيه تزمت ويديها تيترعدو وعراقو وحاسة برجليها مهازينهاش شوية وطيح ومع دلك وقفات صامدة وبصوت خافت بزز باش خرجاتو قالت:شكون هادي انوح؟
يتبع...
التعليقات
لا توجد تعليقات بعد، كن أول من يعلق.