الجوهر الحر الجزء 83

فجناح رحمة لي كانت فايقة والراحة باينة على وجهها وعينيها لي مكحلاهوم مبينة لونهوم لعسلي... قادات ديك الگندورة لي لابسة فوق كتافهاا وتمشات بالنخوة جهة الباب ومع حلاتو لقات رؤوف هاز يديه نااوي يدق... تبسمات بحنية فوجهوو وقربات حطات يديها على حنكو:صبااح الخيير العزيز ديالي

رؤوف:صباح النور الواليدة كيف صبحتي

رحمة:مزياان كنتي غادي لخدمة

رؤوف:اه ولكن قبل بغيت نهضر معااك لاكنتي مسالية

رحمة:دخل

دخل رؤوف وهو حااس براسو متوتر وجلس فالكرسي قبالتهاا هي لي كانت تتشوف فيه وعارفة بلي عندو شي حاجة مهم مايگول ليه..

رحمة:غاتبقاا ساكت ؟؟

رؤوف:كنت مأجل هاد الهضرة وگلت تايدوز عرس بيساان ونتهناو من جهتها

رحمة:(مقاطعها) ياك لباااس اولدي خلعتيني عليك

رؤوف:لا لا ماتخلعيش راه كلشي هو هداك وزايدون هاد لهضرة ديجا هضرنا فيهااا وغير أجلتهاا

رحمة:(يخووف) واجيني من لخر مالك تاضور علياا هناا ارؤوف شوشتيني عليك

رؤوف: لواليدة أنا باغي نخطب رنيم

رحمة:زعمة مُصر على كلامك

رؤوف:(تنهد) قراري راه داك النهار گلتو ليك الواليدة وجيتك نيشااان ديك لبنت هي لي باغي نكمل معاها حياتي ماعرفتش مشكيلتك معاها وعلاش نتي مباغاهاش مع العلم هي عمرها قربات جهتك ولاغلطات فيك

رحمة:(ببرود) ماشي بالضرورة تغلط غير مارتاحيتش ليها وصاف

رؤوف:وأنا مرتااح ليهاا وباغيهاا وتاهي بنت النااس وبغااني

رحمة:وشنو باغي دابا مني حيت من كلامك بااين بلي مغاترجعش على قرارك

رؤوف:باغيك تمشي معاياا نخطبوهاا هضرت مع خويا لبارح وخص غير نعلمو دارهوم بااش يوجدو راسهوم وصاف

رحمة:اوا ملي خططتي وقررتي راه بااين لبلان (على مضض) مهم شوف نهار لي يناسبك

رؤوف:والواليدة راه باغي تمشي معاياا ونتي عاجبك لحااال وماشي مغوبشة هاكا وتاتگوليها من فوق قلبك راه لامكاانش خاطرك مغانرتاااحش

رحمة:صافي داباا ياك نتا باغيها اوا حددو نهار نمشيو نخطبوها ليك

رؤوف:(ناض باس راسها) باغيين رضااك الواليدة

رحمة:(تنهدات)راضية عليك اولدي

رؤوف:(تبسم) مهم غانمشي داباا لخدمة نتشاوفو فالليل

رحمة:رد لبااال اولدي راسك

حرك راسو وخرج فرحان ولهم لي كان هاز من جهة مو زااح وهاهي قبلات دابا خص غير لموافقة درنيم لي باقي ماعلمهااش وقرر مايگولهااش ليهاا گاع ويديرها ليها مفاجأة وماتعرف تانهار يمشيو عندهوم ويطلبو يديها... وزيد أصلا هي مأخرا مابقاتش كيف كانت وحس بيها طافية وتتهضر معاه غير بزز وأغلب الأوقات متتكونش مسالية ولاكاتحجج بلي مريضة... ماعرفش مالها ولكن گال مع راسو بلي غاتكون السيدة قنطااات من هاد لعلاقة لي باقي ماتحدد ليها ساس وبالسيف هو براسو راه عيى من التصاحيب ولهضرة وباغي المعقول واخا راه ديجاا هضر معااه وصارحهاا بنيتو ولكن بيما أنه مدارش شي خطوة لي تشوفها هي فأكيد غايحساب ليها بلي باغي غير يدوز لوقت ومن حقهاا... ولكن دابا غايبين ليها بلي نهار هضر معااهاا وگال ليهاا راني باااغيك وغانتزوح بيك كان قاصدها ومامشى تادارهاا...

دوز داك النهار خدام ومع السلعة الجديدة دخلات تشغل وماهضرش معاها نهائيا تالليل فااش كان متكي فبيتوو وعينو تايتسدو بالنعاااس والتلفون فودنيه تايتسناهاا تجاوب وتااقرب يقطع عاد سمع صوتها لي كاان فيه نوع من لبروود:ألو

رؤوف:على السلامة من الصبااح تانصوني فين كنتي

رنيم:كنت مشغولة ماشتووش

رؤوف:مولف تانعيط ليك فأي وقت كنتي تتجاوبي مالك مباغاش تهضري معايا

رنيم:تت راه قلت ليك بلي مشغولة مالك تتكدبني

رؤوف:لا ماكدبتكش مهم صافا كيف دوتي نهارك ليوم مصلاحش ليا ندوي معاك حيت لخدمة كانت عندنا كتيرررة بزااف

رنيم:ماعليش أنا نيت مساليتش

رؤوف:(حاس بلي بيها شي حاجة ولكن مبغااش يحكر) غدا مسالية نمشيوو نخرجو شوية أنا مخداامش اش بان ليك ندوزو نهار أونصومبل؟؟

رنيم:غير عدرني ارؤوف حيت غدا ممساليااش

رؤوف:علاش اش عندك؟

رنيم: وراه خدامة غدا

رؤوف:(تبسم بسخرية وببرود نطق) غدا الأحد ارنيم ولكابينيات تايكونو ساديين على ماأظن (بدون مايسمع جوابها) تصبحي على خييير...

لاح التلفون معصب وتكى وعينو فالسقف ساهي كيفكر فهاد القلبة لي قلباتها عليه بلاسبب..تايحاول يرجع السينتة ياكما دار معاها شي غلط ولاجرحها بلاقصد كايتفكر بلي مادار والو..نهار لعرس دختو لي تناقش معاهاا مي غير حيت غاار عليها وماحملش يشوف داك لبلاان وصاف يعني ماشي شي حاجة لي تستاهل هاد الجفاا..

دازت ديك الليلة وتبعوها ليالي لي التواصل بين رؤوف ورنيم تقطع بمرة لاهي صونات واعتادرات لاهو صونى واستفسر منها... فضل يعطيها واحد لوقت ونيت فديك الأثنااء كانو تيوجدو لمشية عندهوم وغير تايتسنااو بيسان ترجع من شهر لعسل هي وريان حيت مشااو لشمال...

وتاسيدرا كاانت تادوز لحصص ديالها عند الطبيبة وطبعاا تاتكون معاهاا غير رحيل ونوح معاودش دخل معاها تايوصلهوم لباب ويتسناوهوم فالطوموبيل تايخرجو...واخا مكانتش رحيل تاتحمل ديك الطبيبة ولكن مغاتنكرش بلي تادير خدمتها على أحسن وجه ودليل هو استجابة سيدرا ليها وكيفااش بداات تتهضر معاها ومابقاتش غير ساكتة وصاف..

فرحات رحيل ملي سمعات صوت بنتها وفرحو گاع لعائلة داك النهااار

كانت سيدرا فبيتها تاتمشط ليها رحيل مور مادوشات ليها وهي تسمعها قالت بخوف:مامي ديك لمرا مغاتجيش عندي مزال ياكي

رحيل:(عنقاتها) لاماغاتجيش عندك امامي صافي هي مشات وعمرها ترجع مزاال

سيدرا:(بخوف) ولكن امامي فاش تانكون ناعسة تاتجي عندي وتاتبغي تلوحني من السطااح

رحيل:غير تاتحلمي امامي وصاافي أما هي مغاتجيش وباباك مغايخلي حد يجي يقرب ليك (طلات عليها) عقلتي اش گالت ليك جنات "الطبيبة"

سيدرا:(حركات راسها باه) أنا ماخصنيش نخااف ولكن هي تتخلعني

رحيل:نقراو قرآن بزوجات بااش ترتاحي واخا

طلقات ليها رحيل سورة البقرة وجلسات جنبهاا تاتقرا عليهاا وسيدرا تاتسمع لقرآن وعينيها بداو كيتسدو تانعساات وناضت رحيل مخلية ليها الضو لي خصو يكون مشعول كاامل من نهار طرا داكشي لي طرا وهي مكاتبغيش الظلام وبعض لمرات تتفيق وتبقا تغووت وتبكي فاش تتشوف شي حلمة خلعاتهاا... القرآن ديما كايتطلق ليها فاش تتبغي تنعس وكل ليلة تايرقيهاا نوح وزيد الحصص مع الطبيبة كان عندهوم مفعوول إيجابي واخا راه الطريق باقا طويلة قدامهوم وأتار ديك الليلة مساهلش يتمحى فداكرتها ولكن راها فتحسن والدليل هو أنها بدات تتقبل تنعس فبيتها بوحديتها...

دخلات رحيل لجناحها تاتزول البنوار وعينيها على نوح لي كان متكي فوق النموسية بصدرو لعرياان ونضاضر ديال البروطيكسيون فعينيه تايقراا واحد لكتاب وباين فيه مندامج...تخشات جنبو رحيل لي طيرات ليه الدفتار وحطاتو جنبها بإهمال وموراها زولات ليه نضاضر وقالت بتبسيمة:ماباغا تاحاجة تشغلك علياا

مشات تخشات بين رجليه حاطة راسها على صدرو وتكاات وهو كيلعب بشعرها...هاد لبلاصة ولات مفضلة عندها وهاكا تاتنعس مابقاتش السيدة تاتبغي تنعس جنبو ولات تتنعس فوقو وتكسل عليه...

رحيل:خوك زربان مع غاتجي بيسان وريان غدا من السفر مع غانمشيو نخطبوها هههه

نوح:من حقوو

رحيل:دابا غدا غايخصني نمشي بكري لدارنا

نوح:(هاز حاجبو)علاش

رحيل:نعاونهوم وزيد نكون حاضرة ملي تجيوو

نوح:(ببرود ساخر) وتانخليك تمشي بوحدك وديك الساعة سيري

رحيل:علااش؟

نوح:(بجدية) حيت غاتمشي معايا الشريفة بصفتك مراات ولد لحاج

رحيل:(ضحكات) ههه واخا انوحينو لي بغيتي

حطات راسها على صدرو موسداه ونعسات

**

فدار إدريس كانو تيوجدو لمجية ديال ريان وبيسان وفنفس لوقت ديال ولد لحاج وعائلتو... كلشي كان عارف من غير رنيم لي داروها ليها مفاجأة ودابا تتوجد معاهوم على أساس غير عراضة بمناسبة مجية لعررسان... كانت ساكتة وغير مقلقة وعينيها غارقين باين بلي فيها شي حاجة ولكن تاحد ماسولها حيت عارفين السبب... سالاو لعشاا لي وجدوه ومشاو يلبسو عليهوم وطبعا أسماء تكلفات وجبدات ليها قفطان وجلسات باش تقاد ليها وجهها مي رنيم مابغااتش ولكن بززات عليها أسماء وقاداتهاا... رجعو لعرسان واستقبلوهوم بلحليب والتمر والزغارت وبيسان طايح عليها السر...رحبو بيهوم وموراها بشوية جا نوح ولبقية محملين بلكادوات ولورد ورؤوف مبسم واخا گاع داكشي لي طرا فرحان...

عمرات الصالة بالعائلة ورنيم فلبيت ماخلاوهاش تخرج..

رنيم:علاش غانبقا هنا

أسماء:غاتبقااي تانعيطو ليك

رنيم:وعلاش

رحيل:(بتبسيمة) باش ناخدو جوابك حيت ليوم لخطبة ديالك برؤوف ههه

صدموها وخلاوها غير تتشوف ونزلو لتحت مجمعين تاوصل لوقت لي لحاج السليماني فتح لموضوع وخلاهوم يعيطو لرنيم باش يسمعو لموافقة ديالها...نازلة مع رحيل وراسها فالأرض ويديها كاترعد جلسوها جنب إدريس لي تبسم ليها بحنية وحداه تانيرت... هزات راسها وشافت فرؤوف لي تبسم ليها وهو جالس جنب خوه ولابس سروال توب مع شوميز بيضا ورجعات حدرات راسها

سولها إدريس وجلس تايتسنى جوابها وتارؤوف لي جالس على أعصابو تايرعد رجليه تاحبس وحل عينه بصدمة فاش سمعها قالت بصوت مسموع:مموافقااش

"مموافقاااش"

ديك الجملة لي خرجات من فم رنيم سكتات بيها گاع لي فالصالة وكلشي وجه شوفااتو ليها وهوما مصدومين ومستغربين... ولكن صدمتهوم مكانتش بحال صدمتو هو لي عينو تفيكسات عليهاا وباقي ممتيقش بلي سمعها رفضاتو... حس بحال لاشي حاجة تهرسات فلداخل ديالو معارفش اش هي عينو غير عليهاا كيفاش نطقات بهضرتها ونزلات راسهاا شوية ناضت من بيناتهوم وخرجات من الصالة مخليااه مفيكسي عينو على لبلاصة لي كانت فيهاا بلامايتحرك...

كانت ضحكة على وجه لبنات ومنهوم رحيل لي كيشوفو فرنيم ومتأكدين بلي غاتواافق تاااسمعو لجواب لي فشلهوم ورحيل مجرد مشافتها ناضت خرجات تبعاتها مخلية تانيرت تاتشوف فرحمة لي عقدات حجبانها باستنكاار وقالت بتبسيمة خفيفة:هه لبنت غاتكون مخلوعة داكشي علاش يااك إدريس

نغزاتو باش يعاونها ويرقعو لالقاو مايرقعو وتاهو قال بهدوء:داكشي لي كاااين

تانيرت:(مالقات ماتقول) اوا شربو أتاااي

طلعات بزربة فالدروج وهي هازة قفطانها وغير دخلات لبيتها وهي طرقهاا وتكات بجبهتها على لباب مزيرة على فمهاا تااولات حمررا بحال شي مطيشة... هزات راسها وبدات تاتشوف فلبيت بضيااع وتشتت ولخنقة لي حسات بيهاا مخلياهاا تلقى صعوبة فالتنفس...مشات حلات الشرجم باغا دخل الريح بااش تنفس ساعة والو واخااا الهوا كيضرب فوجهها ولكن النفس ماواصلش... سمعات الدقان فلباب وصوت لبواني مرفوق بصوت رحيل لي قالت:رنيم حلي لبااااب

ماجاوباتش وبقاات غير ساكتة تاتقلب على لهواا وعينيها عامريين بالدمووع لي بداو ينزلو كيف الشتاا...

حبسات رحيل الدقان ونزلات لبيت باها غادة نيشان لمجر لي فيه الدوبل دالساروت دلبيوت لي مخلي عندو فحالة ماوقع شي حاجة يعرف يتصرف... هزاتهوم ورجعات لبيت رنيم وغزلان وبدات تتجرب فالساروت تالقاتها وحلات لباب داخلة وملامح وجهو باين فيها الاستيااء والغضب...بانت ليها واقفة جنب الشرجم وقربات جهتهاا وغير لمحات دموعهاا وهي تستغرب...

رحيل:علاااش رفضتي؟؟

رنيم:(الصمت)

رحيل:(بجدية)غاتبقااي ساكتة (ضوراتها جهتها وقالت بحدة)شوووفي فياا علاش تتبكي هممم نتي علاش رفضتيه ارنيم شنو المشكيل

رنيم:رحيل عفااك بغيت نبقاا بوحدي

رحيل:(بحدة أكتر) مغانمشيش تاتجاوبي ونعرف السباب نتي علاش رفضتيه ماشي نتي لي كنتي تتگولي رااه تتبغيه وباغاا وقتااش يجي لداركوم ماشي نتي لي تمنيتي يجي ويخطبك وتزوجي بيه ماااشي نتي لي فيمااا يعيط ليك وتكوني مقلقة دغياا تبسيمتك تبان وتاتولي الفرحة تاتنقز ليك من عينيك علاااش رفضتيه ارنيم شنو السبب لي خلاك تگولي لا جاااوبي

رنيم:(نترات يديها وقالت بعصبية) حييييت مانصلااااحش ليه سمعتي مانصلاحش ليه

سكتات رحيل وعقلها نيشان فكرها بنهار سولها نوح على رفضهاا ليه وجاوباتو بنفس الجوااب لي تتسمع دابا من رنيم... ديك الفترة هي كان عندها سبب مقنع لرفضها ولكن رنيم شنو سبب لي عندها تارفضااتو..

رحيل:علاش ماتصلاحيش ليه رنيم (شداتها من دراعها وقالت بهدوء) جيني نيشاان واش رؤوف غلط معااك همم دوي (عقلها مشى لبلاصة خراا وقالت بخوف واهتمام) ياااكماا شي حد تكرفص عليك گولي ليااا هادشي علاش رفضتيه؟؟

رنيم:(بشهقة عالية قالت) عاائلتي هي لي تكرفصات عليااا هوماا لي خرجووو ليا على حيااااتي

رحيل:(بعدم فهم) نتي اش تتگولي ارنيم كيفااش عائلتك؟؟

رنيم:(دموعها ماحبسوش من النزول) العائلة نفسها لي دمراتك هي ديك لعائلة لي أنا جييت منها

رحيل:(قطعاتها) سكتي باااركة ياك شحال من مرة دوينااا فهادشي نتي ماعندك تاشي دخل فيهوم

رنيم:لا ارحييل عندي هاداك لي خرج عليك وكدب عليك هوو خوياا وهادااك لي ق.تل ليك صاحبتك وأداك راااه عمي وهااديك لي كانت باغا ترزيك فبنتك ختي (كملات بحرقة وانفعاال) واخاا نعيااااو مانگولو رااه ماشي منهوم كانبقا هازة دمهوم لموسخ ومن نهار عرفتوهوم ونتوما فمشاااكيل وعمركووم شفتو النهاار لبيض دمرو ليكوم حيااااتكوووم ودمروها لياا تاأناا (نترات لكول دلقفطاان مجبداه على عنقها بحال لاتخنقات) عيييت مانصبر وعييت مانحاول نسى ونكمل حيااااتي ولكن مانقدرش ارحييل مانقدرش وأناا عارف بلي دوك النااس لي من دمي هلكوكووم وهاااديك لي راهاا ختي كاانت باغا تقتل بنتك

رحيل:هوماا لي غلطو وراه خلصوو ونتي مادرتي والو ارنيم (قربات جهتها) وتارؤوف ماعندو تاشي دنب

رنيم:عندك لحق هو ماعندو تاشي دنب ولاكنت بغيت فحياتي شي واحد فهو رؤوف ولكن هو مايستاهلش وحدة بحالي وحدة عائلتها كلهاا موسخة ومكتشرفش مرضى نفسيين عاشو فلحرااام وماااتو فيه هو يستاهل شي وحدة لي عندها عائلة مزيااانة بنت الناااس مايكون عندها تاشي مشكيل ماشي بحالي وحدة حياتها كانت كلها مشاكيل هو يستاهل شي وحدة لي تفتااخر بعائلتهاا أما أنا باش انفتاخر هااا والو تاولادي نهار يسولوني على عائلتي نحشم نجاوبهوم (كملات كلامها بحزن)وحدة بحالي تستاهل تبقا بوحدها حياتها كلها...

خوات لي فقلبها وخرجات گاع داكشي لي كانت هازة من زمااان... كانت كارهة ديك الحقيقة لي ديما مخلياها حشمانة من نسبهاا ومن عائلتها...العائلة لي ماخلات ليها تادكرى زوينة باااش تدكرها بيهاا وتعاودها لناااس... فلول كانت تتحاول تأقلم مع الوضع ولكن فكل مرة تاايوقع شي حاجة بسبابهوم تاترجع لومة لراااسها... الشي لي دارت ميس فحق سيدرا كان هو النقطة لي فيضات كاسها وخلاها تاخد القرار ديالها وتشبت بيه... كانت عارفة راسها غااضرو وبلي غااتخليه يكرهها ولكن هاكا حسن ليه... واخا رؤوف عارف ماضيها وتقبلو ولكن هي ماتقدرش تقبلو ومراضيااش بيه... ولنفرض متلا شي نهار شي حد من عائلتو عرفو بفعايل عائلتها كيفاش غاتكون النظرة ديالهوم ليهاا... أكيد مغايقولوش هي مدارت والو وأكيد غاينسبوها ليهوم حيت هادي هي الحقيقة ورنيم هازة نسب ودم الجوهري... داك الدم لي تمنات كون كاان مااا... دم دبااها النقي لي وسخوه هومااا... ماباغاش تعدبو معاها ومبغاتش تمرضو وفضلات تنفاصل عليه داكشي علاش كاانت تاتعامل معاه بلبروود وتتحاول تخليه يرفضها وتجي منو البادرة ويتفارقوو سااعة هو صدمها ملي جاا يخطبها بلاماتعرف... مكانتش باغياا تجرحو وتحطو فهاد الموقف وتمنات تموت وماديرهااش ولكن هادا أنسب خيااار ليهاا... لوقت لي عاشرات فيه رؤوف عرفات بلي قلبو بيض وبلي نية بزاف وفاش تيبغي كيبغي من قلبو واخا كيتعصب عليها بعض لمراات وتايتخاصمو بسباب لغيرة ولكن دغيا تيرجعو ويتصالحوو... تتبغيه وتتحماق عليه ولكن تاتشوف بلي هي ماتصلاحش ليه وبلي هو شخص يستاهل ماحسن منهاا بزاف...

ختمات كلامها وهي متوجهة جهة النموسية وجلسات عاطية بالضهر لرحيل لي بقات غير تتشوف فيها بحزن وفاهمة موقفها وعدراهاا... صعيب أنكي ماتكونيش راضية بعائلتك حيت بكل بساطة هوما مكيستاهلوش... العائلة هي جزء مهم فحياتناا وهي لي تتكبر بينا قدام لي يسوى ومايسواش وكاتخلي لفاام يتسدو عليك وتعطيك هيبة بين الناااس... شحال من وحدة تاتلقايهاا عائلتها ماتسوى ماتصلاح واخا تزوج تاتبقا ديما تسمع الهضرة سوى من راجلها سوى من عائلتو... ورنيم مبغاتش تحط فهاد الموقف ومباغااش تحط رؤوف فيه وفضلات تحررو من هاد العلاقة لي تكسرو فيها زوج قلووووب فهاد الليلة...

كانت تانيرت تاتحاول تخلي الكل يتلاهي وينسى اش طراا وتاإدريس معاونهاا والحاج السليماني كاان تيدوي عادي... أما رحمة فمكانتش باقا باغا تزيد الدقيقة وغير مبغاتش تحاشم معاهوم حيت تيبقاو عائلة عروستهاا...

كان باقي على جلستو متايدوي مع حد ومكيشوف فحد من غير لبلاصة فين كاانت جالسة وديك لكلمة تاطلع وتهبط فيه بحرقة... نزل راسو وبعد مدة قلبلة نااض مخلي كلشي تايشوف فيه... ضار جهة نووح وقاال بصوت بارد:خليناا نمشيوو

ماتسنى حد وماهضر مع حد مزاال ورحمة تاهي ناااضت وشافت فتانيرت بهدوء:بسلامة عليكوم

تانيرت:سمحووو ليناا بزااف ماعرفتش اش وقع مع رنيم

رحمة:(تبسمات ليها بزز) ماعليش اتانيرت ماشي دنبكووم

تبعات ولدها مور ماسلمات مع لخرين ومع بنتهاا وكلشي خرج من غير نوح لي شاف فسيدرا وقال بهدوء:سير كلمي ماماك

ناضت سيدرا من حداه مشات عيطات لرحيل لي ماكانتش باغا تخلي رنيم مي خصها تمشي مع راجلها....وصات لبنات عليهاا وخرجات سلمات مع باها ومهاا ومشات سابقة لطوموبيل نووح لي كانت بوحدها على برا فيها زين العابدين أما البقية مشااو مع رؤوف...

إدريس:ولد لحاج سمحليناا بزاف

نوح:(كمش حجبانو وقال بتقالة) هاد لكلام مانبغيش نسمعو اسي إدريس لخواطر دابا مغييرة وخصها لوقت باش تفاجى

حرك ليه إدريس راسو باه وهو فاهم قصدو وخرج نوح قاصد طوموبيلتوو...

أسماء:غانمشي نشوف رنيم

بقات بيسان جالسة وسطهوم وهي متوترة أول نهار ليها مع عائلة راجلها ولموقف لي طراا خلاها تلف وماتعرف شنو ديير

تانيرت:(تبسمات ليها) بنتي بيسان اتكوني عيتي نتي ورياان طلعو لبيتكوم وارتااحو

ريان:(بجدية)غانشوف رنيم هو لول (ضار لعند بيسان) دار دارك ماتحشميش

تانيرت:(بطيبة) معلووم دارهاا وحنا عائلتهاا زيدي ابنتي ترتااحي

بيسان:ربي يخليك اخالتي تصبحو على خير

كلشي طلع وبقاا غير إدريس وتانيرت لي كانو يزوج ساكتين وكل واحد فين ساهي تانطقات تانيرت بهدوء:كانت تتسنى نهار لي يجي يخطبهاا فيه ماعرفتش اش وقع معاها تاماقبلاتووش

إدريس:(بجدية)مكانش عليا نتبعكوم فهبالكووم أمور بحال هادي مكيتسكتش عليهاا وكان علينا نعلمو لبنت بلي جاايين النااس يخطبووهاا وديك الساعة تالارفضااات كنا نشوفو الحل...

تعصب إدريس وماعجبوش الحال على شنو وقع ولام تانيرت على هاد التصررف حيت بلفعل كوون علموها كان حسن من هاد الموقف لي تحطو فيه

تانيرت:كتا باغيين نديرو ليها مفاجأة هادشي لي گلنا

إدريس:(بجدية وصرامة) بحال هاد لأمور ماشي دلمفاجأت اتانيرت لبنت كون گلتوها ليها كانت اترفض وديك الساعة كنا نعرفو السباب ولاقدرنا نقنعوها مزيان قبل ماايجي السيد جاايب عائلتوو ماعرفناش السباب وعلاش رفضات ولكن لموقف لي تحط فيه رؤوف تاحد مايبغيه واش ترضايها لواحد من ولادك اتانيرت والمشكيل أن ديك العائلة حنا مناسبين معاهاا بنتك راه عروستهوم أو ولدك مزوج ببنتهوم واش مافكرتيش فيها؟ دابا هاهو لمشكيل طرا بسباب هاد التخربيق ديالكوم

تانيرت:إدريس يهديك الله واش أنا كانعلم الغييب استغفر الله باش نعرف لبنت مغاتوافقش راه أصلا هي وياه كايهضرو من شحال هادي كيف گالو ليا لبناات يعني عند بالي راه غاتفرح هادشي لي قصدنا

إدريس:ولو خصك تعلميها وتحيدي لومة عليك اتانيرت راه مكااينش شي بنت يجيوها لخطاب وماتعرفش هادشي كان زماننا وزمان واليديناا أما دابا مابقااش زمان كانو يمشيو يتزوجو وعمر المرا شافت راجلها تانهار يدخل عليها وكلشي كان عادي ولكن دابا لوقت تبدلات...

تانيرت:عارفة وأنا براسي كون عرفت ايطرا هادشي مكنتش انخلي لبنات يديروهاا

إدريس:لاكانو هوما معارفينش نتي مولات لعقل ماشي تبعيهوم فهبالهوم اتانيرت راه داك السيد ماعرفتيش حالتو كيف غاتكون راه الرااجل واخا يبغيك تاايموت على ترابك فااش تايتقااس فرجولتو وكرامتو بربي لاعقل عليك وكانظن نتي عارفو هادشي مزياااان

عينيها تغرغرو بالدموع وكلامو كان قاصح عليها وكيفاش رد ليها لومة وهي ماقصداتش ولكن كلامو لخر خلى دموعها ينزلو وقبل ماتنوض قالت بخفوت وبرود:عاارفة الله ياودي مالي نسى

خرجات من الصالة ولغصة فحلقهاا غادة لبيت رحيل تبكي فيها وماتخلي حد من ولادها يشوفهاا... أما إدريس زفر بعصبية وماحملش راسو حيت جرحها وجبد ليها حوايج لي هي مدارتهومش بخاطرهاا... ولكن فنفس لوقت كان باغي يوضح ويبين ليهاا بلي هوما غلطوو وبلي هادشي لي طراا يقدر يكون عندو عواقب على العائلات بزوج من هنا لقدااام...

**

ملي وصلهوم تسناهوم تانزلو ورحمة حاولات تدوي معااه ساعة ماعطاهاش وقت ودمارا غادي فحالو فين معارفش... باقي ممتيقش بلي هي رفضاتو بلاتاشي سبب مخليااه معارف تاواش غلط معاها... الطريق خاوية والليل مكاين حد من غير بعض الطوموبيلات لي تيدوزو فداك الشانطي... بعد مدة طويلة وقف فواحد لخلا ومعارف تافين هو... وقف طوموبيلتو وحط راسو على لكوساان والخنقة فيه... ملي هي غاترفضو ومباغاهش علاش علقاتو فيها نهار لول وخلاتو يبغيهاا ويولي يهتهت بيهاا... عمرو فحياتو ظن بلي غايجي نهار لي ينزل دمعة على قبل بنت وهاهي ليوم تمردات ونزلات من عينيه مراضيااش... هو لي عاش حياتو بواحد الاستهتار وجميع علاقتو مع الناس مخداهومش على محمل الجد... تصاحب بلاعدد وعمرو دخل مع شي وحدة فعلاقة جدية تاليها هي لي جراتو ليهاا وخلاتو ينتابه لوجودها... بغاهاا وملي دار محاولة ولقاها متقبلاه فرح وزاد تشبت بيهاا... محسش براسو وهو هاز تلفونو مدوز ليها لخط واخا عارف بلي مغاتجاوبش ولكن كان عندو أمل بسيط يسمع السبب وتمنى يكون سبب قوي لي يخليه ينسى ديك الجرحة لي جرحاتو ويلملم شتات كرامتو لي بعتراات بكل بروود

خاب ظنوو فاش سمع الخط تفتح وبدون ماتنطق ولاتقول كلمة عرفهاا غير من صوت أنفاسهاا لي مخفاوش عليه

رؤوف:(بخفوت) علاش

رنيم:(لارد)

رؤوف:گولي لياا غير علاش واااش غلطت فحقك؟؟أديتك وماحسيتش؟ علااش درتي فياا هاكا ابنت الناااس

رنيم:(الصمت وغير صوت شهقاتها لي كايتسمعو)

رؤوف:بغيتك من قلبي هاد لقلب لي عمري خليتو يضرب لشي وحدة ضرب ليك نتي وبغااك وعلى جالك بدلت فراسي كتر بااش نكون كيف باغا نتي..لقيت معاك راحتي وتعلقت بيك بزاااف ونهار واعدتك بلي غانجي لداركوم مارتاحيت تادرتهاا واخاا لواليدة مكانتش موافقة بقيت نطلب فيهاا على قبلك نتي حيت باغيك وعاطيك كلمة علاش درتي فيااا هاكا

رنيم:(بصوت متقطع بلبكا) سمحليا

رؤوف:(تبسم بسخرية وعينو تايلمعو بالدموع)نسمح ليك؟(كمل بحقد وحرقة) شتي واخا يگولو ليا راك تتموت وخصك سماحتي باش ترتاحي والله لاسمحت ليك وبغيتك دوقي من هاد لعداب لي دوقتيني منو وقلبي لي بغاك نحرق جد بوه ونفخ فرماادو نتي ماتستاهليش لي يبغيك وتستاهلي تبقااي بوحدك حياتك كلها حيت قلبك كحل ولافرق بينك وبين عائلتك

قطع عليها ولاح تلفونو وعض على شفتو حابس دموع لي حلف لانزلهوم ودمارا راجع لدار...

صبح الصباح وحلات غزلان عينيها تاتشوف بلاصة رنيم خاوية استغربات ومع جات تنوض لمحات ورقة مطوية فوق وسادتها وغير شافت اش فيها وعينيها عمرو بالدموع وناضت تتجري بلاعقل لتحت فين كانو جالسين جميع وبصوت باكي قالت:رنيم مشاات..

دوزات ليلتها فبيت رحيل سادة عليها بابهاا ماباغااش تشوفو واخاا جاا لعندها ودق لباب ولكن ماحلاتش ليه وبقات ساكتة تامشى... من نهار تصالحو ورجعو وعمر شي خصاام وقع بناتهوم ولكن ليوم وكلامو معاها وطريقتو لقاصحة جرحاتهاا... هي مكانتش نيتهاا دير مشكيل لبنتها ولاولدها بلعكس لاكان شي حد تيفكر فمصلاحة ولادو هي تانيرت لي على قبل مصلاحة بنتهاا فالماااضي تخلات عليهاا وفضلات تكون فمنظر الأم المهملة بلاصة مااتأدى بنتهاا... عارفة بلي كلام إدريس صحيح وعارفة بلي هي مكانش عليها تبع لبنات فشنوو خططو وكان عليها تهضر مع رنيم بناتهوم وتگول ليها شنوو كااين وتحيد لومة عليهاا.. هي قبلات تبع بناتها حيت عارفة رنيم ورؤوف كيبغيو بعضياتهوم وقالت مع راسها أكيد غاتوافق ساعة كلشي تقلب فاااش رفضات رنيم... مكانتش باغا تدوي مع رنيم مي قالت الصباح ونشوف معاها ونسولها سباب رفضهاا ونيت تجبد ليها ودنيها وتبين ليها قمة الغلط لي دارت ولي تاحد مراضي بيه ومنهوم هي... عارفة بلي تاحاجة مابزز وأكيد لاكان سبب الرفض مقنع فغاتوقف جنب رنيم وتجي فصفها...

نزلات لكوزينة بخاطر مغير تتوجد لفطور تادخلات عليها أسماء تاهي طايرة ليها... باتت حيت لبارح مبغاتش تمشي وتخلي رنيم وحاولات تدوي معاها لاهي ولاغزلان وريان وتامن محمد طه لي تجمعو عندها فلبيت ولكن هي ماقالت والو ورفضااات تهضر مع حد... عيااو معاهاا ولكن الصمت لي كان جااي من طرفهاا كافي يخليهوم يعرفو بلي السيدة ماباغاش تدوي وخلاوها على راحتهاا وگالو غدا يشوفو تاني معاااها...

أسماءصباح الخير اماما تانيرت

تانيرت:صباح الخير اينتي

أسماء:(بدات تتعاونها) غير ارتاحي أنا نتكلف بالفطور

تانيرت:ماعليش ابنتي راه قربت نوجدو

دخل عليهوم إدريس فديك الأثنااء وعينو على تانيرت ومن الشوفة باين فيه مناعسش..

إدريس:(بهدوء)صباح الخير

أسماء:صباح الخير ابابا

مارداتش عليه وتجاهلاتو وهادشي مخفااش على إدريس وتاأسماء لي ضورات عينيها عليهوم وقدرات تفهم بلي باها ومها مناقشين..

إدريس:خاصة شي حاجة نجيبها

عينو على تانيرت لي عايطاه بالضهر تاطيب فداك البان كيك بلاماتلتف ليه...

أسماء:الخبز وخص لحليب وشي كرواصة

حرك راسو على مضض وخرج كيتنهد معاجبو حااال... مدازتش مدة كتيرة تاكانت انظمات ليهوم بيسان لي لابسة بيجامتها مع بنوار وجامعة شعرها او وجهها خالي من أي نقطة دلمكيااج..

بيسان:(بخجل)صباح الخييير

تبسمو ليها وتاتانيرت قربات جهتها وبستها فحنكها تتسولها واش ارتاحت فبيتها الجديد وكيف دوزات ليلتهاا ياكماا خصاتها شي حاجة... اهتمامها خلى بيسان ترتاح وتطلق شوية واخا راه مطلوقة معاهوم مي الوضع دابا مختالف وهي باقا عروسة جديدة وخصها وقت تولف...

بيسان:أنا نعاونكوم

أسماء:سيري ارتااحي نتي باقي عروسة جديدة وماخصكش دخلي لكوزينة

بيسان:ههه الله يجعل لبراكة مابقيتش عرسة جديدة وخليني نعاونكوم (يالاه بغات تهضر تانيرت وهي تسبق ببيسان) ياك أنا منكوم وفمقام بناتك اوا خليني نعاونك اخالتي

خلاوها على راحتهاا وتاهي عاجبها لحاال ولاقية راحتها معاهوم... رجع إدريس محمل بلفطور لي گالت ليه أسماء ولي مگالتش... قربات جهتو بيسان وباست يديه باحترام وهو جلس فالصالة وعينو تاتسنى غير تانيرت تبان ليه... كلشي فااق وتجمع لفطور من غير غزلان ورنيم... كانو تيفطرو عادي ومرة مرة يجبدو شي موضوع تااوقفات عليهوم غزلان بداك بمنظر لبااكي قطعات فيهوم لكلام ملي نطقات:رنيم مشاات

كان كلشي تيشوف فيها وحاليين عينهوم وإدريس نطق بجدية:فين مشااات؟

غزلان:(قربات جهتو ومدات ليه ديك لوقة) خلات هادي

حلهاا إدريس وكلشي تايشوف فيه وأسماء لي كانت جنبو تحدرات تاتقرا معاه وعلى وجههوم بانت نظرة الحزن وعدم الرضى من قِبل إدريس وعيووون أسماء عمرو بالدموع تابداو ينزلو... طوى إدريس ديك لورقة وقال بصوت خافت:هاد لبنت الله يهديها خلاتناا تاولفنااه او ولات وحدة مناا ومشات وخلاتنا

محمد طه:فين مشاات؟؟

إدريس:(مكمش حجبانو معاجبوش الحال) مشات لبلاصة لي يمكن تلقى راحتها...

كلامو خلى كلشي يبقا تيشوف فيه ومحمد طه هز ديك لورقة من بين يدين باه وبدا يقرا وتاهو تأتر بداكشي لي فيها ومن يد ليد ديك لورقة ضارت عليهوم كاملين تامن بيسان لي قراتها وبقات فيهاا رنيم لي واخا جرحات خوها لباارح ولكن مور ماقرات ديك الورقة عدراتهاا... كانو هازين هم لحاجة وصدقو فحاجة خرا وأسماء كاتبكي لاهي ولاغزلان لي جلسات جنب محمد طه لي درعهاا بيدو مخليها تبكي على خاطرها...

أسماء:رحيل خصهاا تعرف تاهي

إدريس:(ناض) بلاماتخلعوها وخليوها تاتجي على خاطرها..

تفرق داك لمجمع وشي كلى وشي مابقاش قادر يدوز الدغمة وناض كل واحد يلهي راسو بشي حاجة مع ليوم مكاينااش خدمة وكلشي جالس... وأسماء رجعات مع إسلام وبنتها لدارها...

***

نوم جفى عينيها وليل كولو وهي تتفكر فحديتها مع رنيم... متكية على الكادر دالنموسية تاتشوف فالشرجم لي محلول وداخلة منو الشميشة... حسات بنوح تململ من بلاصتو وضارت تتشوف فضهرو لعاري وراسو لي دافنو وسط لمخدة تايتحرك تاضار جهتها مكمش عينو وقال ببحة صباحية:علاش مانعستيش؟

رحيل:مجانيش النعااس وصااف وزايدون باش عرفتيني مانعستش وأنا ليل كولو ماتملمتش من بلاصتي

نوح:(بخشونة)حسيت بيك

رحيل:(تحدرات باستو فشفتو ونطقات بتبسيمة) صباح الخييير نوحينوو

نوح:(جرها تاتسطحات جنبو وخشى ليها راسها فعنقو) صباح النور

رحيل:غانوض نوجد لفطور ونيت نفيق سيدرا (شافت فيه) غاتمشي لريااض باش تشوف خوك؟؟

نوح:(حرك راسو باه بلاماينطق)

رحيل:تاأنا باغا نمشي نشوف رنيم

نوح:(ببرود) لي باان ليك

ناضت من بين أحضانو مساخيااش بداك الدفئ ومشات دارت روتينها الصباحي وهزات بنورا طوبل لبساتو على حوايجها قبل ماتخرج مخلياا نوح تايشوف فالسقف بسهوو مدة قبل مايزول الغطاا وينوض جهة لحمام...

وجدات لفطور بعقل مشوش وغير حطاتو فوق الطبلة مشات لبيت سيدرا لي كان الضو ديالو شاعل ولقرآن لي مطلوق من التلفون لي طلقو ليها فالليل على سورة البقرة كتعاود كلما سالات... طفات الضو وطفات تلفون وحلات الشراجم ومشات تتفيق فيها وتبوسها على وجهها...

سيدرا:(حلات عينيها وبدات تكسل بحال لقطة)مااامي

رحيل:صباح الخير امامي يالاه نوضي تغسلي وجهك وتغسلي سناانك باش نزلو نفطرو

سيدرا :(بفرحة)مامي عرفتي ديك لمرا مجاتش عندي فاش كنت ناعسة

رحيل:(براحة) اوا شتي شنو قلت ليك هي عمرها غاتجي يالاه نوضي امامي

ناضت سيدرا لحمام ورحيل تبعاتها وبقات واقفة جنب لباب فقط مخلياها دير روتينها لراسها ولبسات عليها كسيوة ديال الدار وخرجات تتجري جهة جناح مها مخلياها وراها تتغوت بصوت عالي:اجي مشطي شعررررك

دقات سيدرا لباب ودخلات تاتقلب بعويناتها على نوح وغير شافتو مشات جهتو تاتجري وتتعيط ليه:بابانو

نوح:تاتبيرت إينو فقتي؟

سيدرا:اه بابانو عرفتي ديك لمرا مجاتش عندي فاش كنت ناعسة

تتعاود فرحانة حيت مسكينة فكل ليلة كانت تاتشوف لكوشمار على داكشي لي طرا وأول ليلة ليها بلا بيهوم كانت بالنسبة ليها فرحة ونوح تيسمع ليهاا... بدات تاترجع كيف كاانت وهادا بحد داتو خطوة مفرحة ليهوم... فطرو بتلاتة ومعاهوم توينز لي بداو تيصدرو أصوات خفيفة...

رحيل:غانمشي نوجد راسي سيدرا سيري لبسي حوايجك راه غانمشيو عند جدك

مشات سيدرا وتبعاتها رحيل مخلين نوح مع إسماعيل وإسحاق تايلعب فيهوم وهو أصلا كان ديجا لابس...

تحركو بربعة لدار إدريس ونزلات رحيل هازة إسحاق ومشات دقات تاتحل لباب من طرف ريان ومداتو ليه ورجعات دات إسماعيل ونوح بقا فبلاصتو سااكت

رحيل:(وقفات قدام الباب لي جنب نوح وقالت بهدوء) ملي نهضر مع رنيم غانگول لمحمد طه يجيبني لريااض واخا

نوح:(مكمش حجبانو بجدية)أنا نجي نديك

تبسميات ليه ومشات جهة لباب وهو ماتحرك تااشافهاا دخلات عاد توجه لرياااض...

**

مجموعات فالريااض ومعاهوم رحمة لي جالسة عاقدة حجبانها محاملاش داكشي لي وقع معاهوم ومبغاتش تسرط ليها..

رحمة:كنت حاسة بلي ديك البنت متستاهلوش وگلتها ليه ولكن هوو ماسمعش لياا وقصح راااسو

سناء:(مامشاتش معاهوم مي عاودو ليها) تت مافهمتش علاش رفضات ياك هوما كانو مصاحبين؟

عفاف:(بهدوء)تاحد معارف السبب اسناء

سناء:ماسولتوهاش باش تعرفو حيت لي عارفة هو مكاينااش شي وحدة تتبغي شي واحد وتصاحب معاه مدة وگاع العائلات يسيقو خبار ليهوم ونهار ينوي معاهاا المعقول ترفضو

رحمة:(باستنكار) وشكون عرف واش بغااتو ولاغير كانت مدوزة بيه لوووقت (بغيض) درت ليه خاطرو واخا مكنتش باغا وگلت ماعليش ارحمة ماتقصحيش راسك كبرنا بيها وماخلى مادى معاه فيدو ليهاا وفلخر هاا اااش طراا صغرات بينا ومدارتش لينا حسااب وقيمة...

كانت أصلا حساسة من جهتها ومباغاهاش ودابا مور مارفضات ليها ولدها بديك الطريقة قدام عباد الله ومدارتش بحساب العائلة ولابحسابو زادت كرهاتها ومبقاتش بغااات تسمع بسيرتهاا... هازة لهم غير لرؤوف لي مبانش ليها من لباارح ماعرفاتو فين مشى...

سناء:وصافي ارحمة تانتي ماتبقايش تعصبي راسك لي وقع وقع

رحمة:واش من نيتك تاتهضري فنظااارك داكشي لي عاودنا ليك يستاهل هاد ردة الفعل لباردة منك وااش تانگولو ليك السيدة مكبرين بيهاا وهي صغرات بينااا قدام العائلة مافهمتش أصلا لاش گالو لينا نجيو لاكانت هي رافضة

عفاف:(بجدية) اش قاصدة بكلامك

رحمة:(بدون شعور) شكوون عرف يقدر يكونو داروها لينا بلعاني

عفاف:(بصرامة) اش هاد لكلام تايخرج من فمك ارحمة نتي معاشرة دوك ناااس من زماان وبنتهوم راه عروستك وبنتك راه عروستهوم وااش عمرهوم قللو منك شي نهار ؟؟ بلعكس من لعراضات لقلال لي حضرت ليهوم عندهوم شفت بعيني كيفاش تايكبروو بالنااس وباين فيهوم مالين الخييير ماشي ناااس ماصالحينش بلاماتعاودي تگولي هاد لكلام وتخلي المشاكيل ينوضو على والو لبنت إلا رفضات هادشي مكيعنيش تاهوما عرفو شتي غير لبارح وجههوم كيفاش تقلب وكيفااش ظلات معانا تانيرت تاتحاول تنسيناا وهي حشمااانة... مغانكروش بلي الطريقة لي دارت ديك البنت غالطة وبلي مكانش عليها تحط رؤوف وتحط تاديك العائلة فداك الموقف راه كيفماا نتي مارضيتيش ومبغاتش تنسى ليك راه باينة تاهوما بحالك

سناء:عفاف عندها بحق ارحمة واش نتي عاد اتعاشريهوم باااش تشكي فيهوم وبلااماتجبدي هادشي قدام ولد لحاج ونتي عارفة اش تانقصد

سكتات رحمة تاتنهد وتسوط هي الحرقة لي فيها خلاتها تدوي بلاماتفكر وهادا هو عيبهااا... سمعو صوت السعدية لي كانت تترحب بنوح لي طل عليهوم بعد مدة قصيرة ونطق بهدوء:السلام أوعليكوم

الجميع ردو عليه وهو عينو ضارو على الصالة فين جالسات غير بتلاتة قبل مايقول بجدية:فين رؤوف؟

رحمة:(بحرقة)ماعرفتش لبارح وصلنا ومشى ومعاودش شفتوو واش رجع وخرج فالصباح ولا لا

حرك راسو وخرج لبراا هاز تلفونو مخلي رحمة جالسة بعقل مشطون على ولدها

***

كانت جالسة فبيتها مخلية ولادها لمهاا وبين يديها ديك الورقة لي خلات رنيم ولي عطاها ليهاا باها

باقي مطوية ماحلاتهاش باش تعرف اش فيها وجانب منها خايف يحلها ولكن فأخر المطاف دارتها وحلاتهاا وبدات تتقراهاا

" عارفة بلي ملي غاتكونو تاتقراو هاد الورقة انا غانكون مشيت من عندكوم بغيت نطلب منكوم السماحة على داكشي لي درت فحقكوم لباارح عارفة راسي غلطت حيت حطيتكوم فموقف صعيب مع عائلة ولد لحاج... سمحولياا حيت قلقتكوم مني ونتوما عمركوم قلقتوني حليتو ليا باب داركوم وحسبتوني منكوم واخا گاع داكشي لي شفتو من عائلتي الإأنكوم استاضفتوني عندكوم... السنين لي دوزت معاكوم خلاتني نعرف بحق العائلة لي واخا كنت عايشة وسطها زمان إلا أنني عمري حسيت معاها بداكشي لي حسيت معاكووم... خوفك اعمي إدريس لانتا ولاخالتي تانيرت على ولادكوم عمري حسيتو مع المرا لي ولداتني... كبرت مفششة وكلشي كان بين يدي ولكن الحنان والأمان لي حسيتو معاكوم مكاانش عندي.. فلول ماكنتش مهتمة بيه ولكن نهار حطيت رجلي عندكوم ودقت منو عجبني وتمنيت كون عرفتو من شحال هادي

نتوما نااس مزيانين بزاف واخا گاع داكشي لي دزتو منوو إلا أنكوم عمركوم سمحتو فبعضياتكوم وبقيتوو شادين فيد بعض وماطلقتوهااش هاد السنين لي عشت معاكوم فيها تعلمت منها شحال من حاجة لي فرحانة حيت عرفتها... كل مرة فاش تانشوف الضرر لي ضروكوم بيه هادوك لي من عائلتي كنت تانحشم بزاف منكوم وكانزيد نحشم فاش تانشوفكوم تتحنو فيا ومكاتعاتبونيش حيت أنا منهوم... حاولت ديماا أنني مانهتمش ونحيدهوم من بالي حيت هوما مايستاهلوش وحدة بحالي كيف ديما كانت تتگول ليا رحيل ولكن داكشي لي دارت ميس فحقكووم وكيفااش حقارتها وصلاا بيها تقيس سيدرا لي ماليهاا دنب وتأديها بديك الطريقة ماكنتش نقدر نساه ونميك عليها كيف لمرات لي فاتو..أنا هازة دمهوم وكنيتهوم ومستحيل نقدر نسى اش دارو فيكوم ومن الأحسن أنني نبعد ونخليكوم تعيشو بلادكرى ديك العائلة...عارفة غاتقلقو فلول مي أكيد غاتفهموني بغيت نطلب منكوم السماحة مرة خراا وبغيت تارؤوف يسمح ليا حيت جرحتو واخا عارفاه مغايسمحش ليا كيف گال ليا ولكن غانبقا كل مرة نطلب من ربي يسمح ليا حيت غلطة فحق.و بزاف... ماعرفتش فين غانمشي ومابغيتش نعرف لمهم هو نبعد ونمشي لبلاصة نكون فيها بوحدي على الله نلقى فيها راحتي واخا راني متأكدة بلي راحتي معاكوم ولكن مابغيتش نكون أنانية وأنا عارفة عائلتي مادوزاتش عليكوم لقليل... مع الأسف هاديك عائلتي ومغانقدرش نبدل هاد لحقيقة بمرة...

عمي إدريس خالتي تانيرت رحيل محمد ريان أسماء غزلان إسلام وسيدرا سمحوليا وتيقو بياا بلي عمري نساكوم وغاتبقاو ديما فبالي كانبغيكوم.... رنيم "

وقف طوموبيلتو قدام ديبو ديالو وقبل ماينزل هز عينو وشاف طوموبيل درؤوف لي كان مبلاصيها تم... نزل وتمشى جهة الباب بخطواتو الرزينة وجبد سوارت باش يحل دااك لباب لي كان مسدود... مع حل لباب صدر صرير حيت دلحديد وقبل مايسدو شعل الضوو عاد سد لباب وراه وضور عينو وسط دوك لكولياات ديال السلعة لي كانو معمرين ديبو كااامل... كان ديبو كبير وفيه تاتكون السلعة كلهااا دلمحالات...لمحو وسط من دوك لكوليات ناااعس معلاباالوش... قرب جهتو وصوت صباطو داير لحس فوق ديك الأرضية... وقف عليه تايشوف فيه مدة قبل مايتحدر ويجلس قفازي وبقا تايحرك فيه تاااحل السيد عينيه تايمسح ضبابة دالنعاااس وزيد الشعى ديال الضو...

نوح:(بهدوء) على قلة الديور جااي ناعس هنا؟؟

رؤوف:(باقي على نعستو فوق واحد من لكوليات وبهدوء قال)كنت تانستف السلعة ديال المحالات باش يجيو الدراري يديوها

نوح:(جلس فوق واحد لكولي متكي) يمّا من الصباح وهي تسول عليك

رؤوف:كنت فالصباح تم غير هي مشافتنيش ومابغيتش نفيقها

نوح:نتا مزيان

سؤال كان ليه معنى كتير عند رؤوف لي كان حااس براسو بلي ماشي بخير واخا تيتصرف ببرود ولكن فالداخل ديالو تايحس بشي حاجة مهرسة فيه... ليلة دلبارح مكانتش ساهلة عليه وليل كامل مانعسش وهو غير تيضور فالطرقان تاعيى عاد مشى بدل عليه ورجع خرج قبل مايشوف شي حد حيت مكانش باغي يهضر مع تاواحد وخصوصا مو...

رؤوف:(بسخرية) عادي راني بخير علاش اش واقع هههه واقيلا ماشي أنا أول واحد يترفض نسيتي اليازيد لي هربات عليه عروستو ههه

قلب وجهو تايضحك بسخرية لي مخبي وراها ديك الكية والشمتة لي تشمت من عندها

نوح:(شاف فيه) الرزق عند الله سبحانه وتعالى تاحد فينا معارف الدنيا اش مخبية ليه وعسى أن تكرهوا شيئا وهو خيرا لكم

رؤوف:(مسح على وجهو) مافيهاا خير وعارف الواليدة كان عندها لحق كان عليا نسمع ليها ونتبعهاا فكلامهاا أصلا تايگولو ليك الحاجة لي مافيها رضى دالواليدين مكاادومش غير أنا بغيت نقصح راسي ونعاند وها اخرة عناادي فين وصلاتني

نوح:(تقاد فجليتو وقال بجدية) ماسولتيش السيدة علاش گالت لا؟

رؤوف:(تبسم بفقصة) خسرات عليا كلمة سمحلياا (ضار شاف فيه ونطق بعصبية) هاد سمحليااا اش غادير لياا فنظاارك واش غاتنسيني فهي شنو دااارت وكيفاااش رداتني حماااار بودنين گدام كلشي؟؟ علااش رفضات شنو مشكيلتهاا ياك أنا عمري درت معاها شي حاجة لي تخليهاا تعصب وتقلق وعمري قصحت معاهاا ولاقللت لعيب وفلخر هاا بااش جزاتني...

نوح:شي حوايج مكايتگالوش ارؤوف ولكن خصك تفهمهوم (كمل بجدية) ملي فكرتي تزوج بديك البنت كنتي خصك تسول على شحال من حاجة عليها قبل مادير ديك لخطوة جهتها

رؤوف:لاكنتي قاصد على فاميلتها راه كانت مخبية عليها وديما كنت تانسولها عليهوم مي هي مكانتش تتعطيني رااس الخيط وعمرها معاودات عليهوم وتاأنا مكنتش تانحكر عليها ومخليهاا على راحة راحتهاا تالنهار سبوع ديال توينز وتما سمعتها بالصدفة وفاش بززت عليها عاودات ليا عليهوم

نوح:شنو عاودات

بقا رؤوف تيعاود ليه على داكشي لي قالت ليه رنيم بخصوص عائلتها وهو كيسمع ليه...

نوح:(كمش حجبانو) ومافخباركش بلي داكشي لي وقع مع سيدرا سبابو هي ختهاا؟؟

رؤوف:(تقاد فبلاصتو وقال بجدية) كيفاش؟؟

نوح:يقدر داكشي لي عاودات ليك يجيك عادي وتگول مع مخك راه كااين عائلات ماكفس ولكن الدرية مادوزاتش الساهل ومجاتش وعاشت مع عائلة سي إدريس تامالقاات حد من حبابها معاهاا.. تقدر تگول راه مقطوعة من شجرة لاحباب لاصحاب من غير سي إدريس وعائلتو لي حلو ليها باب دارهوم... معارفش اش وقع بيناتكوم وعلاش رفضاتك وشنو السبب ديالها تاحطاتك فداك لموقف لانتا لا لعائلة حيت هاد لبلان ماخصوش يدار لامكانتش باغاك نهار علمتيها بلخطبة تگول ليك حبس ماتجيش

رؤوف:(قلب وجهو وقال بخفوت) مگلتهاش ليها كنت بغيت ندير ليها مفاجأة زعمة

نوح:(تحدر لعندو ونطق بصرامة) شنو زعمة ديتينا نخطبو ليك ولعروسة مكانش فخبارها؟؟

رؤوف:تت

نوح:(خنزر فيه وقال بسخرية) راه مبقاتش فباغي نتزوج وندير دار راه بقات فالمخ لي تگول واش تكساابو..

طوات ديك الورقة وسمحات لدموعها ينزلو على حناكها بكل هدوء...كون كانت عارفاها غاتمشي كون باتت معاها لبارح وماخلاتهاش... معرفاش فين غاتكون مشات وهي ماعندها حد وگاع عائلتها ميتين... فين غاتمشي وباش غاتعيش واخا راها خدامة ولكن باش تعيش بوحدها غاتكرفص وهي ممولفاش هادشي وزيد هي بنت بوحدها وعطى الله لكلاب لي يطمعو فيهاا...

هي أكتر وحدة عارفة رنيم اش عاشت حيت تاهي عاشت معاها ديك المدة ماشي بحال لخرين لي غير تتعاود ليهوم... راه واخا يعيى بنادم مايعاود ليك ولكن مكيحس بيك غير لي جرب ديك لعيشة... هي بصح حاقدة على عائلة لجوهري ولكن عمرها حقدات على رنيم وعمرها لامتها حيت هي شافت تضحياتها او وقوفها معاها فاش كانت محتاجة لي يوقف معاها... وهزات حمل فوق طاقتهاا ولامت راسها واخا هي ماعندها تاشي دنب...

بقات فيها بزااف وتمنات ليها من قلبها تعيش مرتاحة وتلقى داكشي لي باغاا والاكان بعادها عليهوم غادي يريحها فأكيد مغاديش تقلق عليهاا... هزات تلفونها صونات عليها وكيف توقعات التلفون طافي وهنا عرفات بلي رنيم خدات قرار لا رجعة فيه... معرفااش واش غاتشوفها مزال ولاهادي اخر مرة ولكن لي عارفة بلي هي خلات بلاصتها وسطهوم...

حطات ديك لورقة فجيبها وناضت تتمسح دموعها عاد خرجات لبرا ومع بانت ليها بيسان تبسمات فوجهها وقربات جهتها:ولفتي شوية

بيسان:على لي يعيش هنا مغايولفش

رحيل:هادشي أصلا لي بغينا ههه اجي وقتاش غاتبداي خدمتك؟؟

بيسان:مابقااش بزاف شي دي جوغ ونبداو تاني هههه

رحيل:اوا نيت ترتاحي شوية

بيسان:داكشي لي كااين رحيل واش معارفينش رنيم فين مشات؟؟

رحيل:تت ماعرفتش هي ماگالتش لينا (بحسرة) تمنيت كون مدارتش هاد لخطوة وبقاات

بيسان:تارؤوف كانعيط ليه مكيجاوبنيش

رحيل:مشى نوح يشوفو أكيد غايدوي معااه خلينا نزلو لتحت نشوفو ولادي واش فاقو

نزلو لتحت ولقاو غزلان جالسة مع توينز جلسو جنبها ونطقات رحيل:فين سيدرا؟

غزلان:مشات مع محمد طه

رحيل:وماما؟؟

غزلان:گالت ليا غاطلع لسطح تنشر النشير عييت معاها نطلع بلاصتها ساعة مابغاتش

رحيل:كلشي بقا فيه لحاال على رنيم وعلى مشيتها لي مكانتش طييح على لبااال

فالسطاح كانت حاطة السلة فالأرض وتاتهز منها النشير وتنشر تاسالات داك الصف دالنشير ورجعات ديك السلة حداا المكينة ديال التصبين لي كاين تم فواحد الدخيلة... وبدات تاتلوح تاني فيها لحوايج لي باقيين تم تاعمراتها وخدماتهاا تاني ومع ضارت تمشي لقات إدريس فوجهها كيشوف فيها بشوفات هاديين... قبل مايهضر تخطاتو بزربة ونزلات لتحت مخليااه كيتنهد على هاد لحاال لي طاري ليهوم... تمشى جهة ديك الطاجيرة وهز ديك لباكية ديال الگارو وجبد واحد وبدا تيكمي ويفكر فهادشي لي وقع ورنيم لي مشات وماعلماتهومش وهاز ليها لهم فين غاتكون...دابا هي ولات من عائلتو واحد من ولادو واخا كان معصب منها على تصرف لبارح وكان ناوي يهضر معاها ويجبد ليها ودنيها ولكن دابا هي مشات ومعارف گاع فين غايقلب عليها وتالامشى عند. لبولييس السيدة بالغة وخرجات بإرادتها وماعندهوم مايديرو معاه... سالى داك لگارو ونزل لتحت باغي غير فرصة فين يهضر مع تانيرت لي ماعطاتهاش ليه... وصل ليل وجاا نوح يدي رحيل وحلف عليه إدريس يدخل ويتعشى معاهوم... ومور لعشاا طلعو بزوج لسطح يكميو ونيت يديرو جليسة بحال يامات زمان...

حاطين براد دأتاي فوق الطبيلة وجالسين بزوج على لكراسى وقدامهوم لفاكية...

نوح:مگالتش فين مشات؟؟

إدريس:تت ماعطاتناش راس لخيط زعمة مانقدروش نعرفو فين كاينة؟

نوح:بحال الاكانقلبو على برا وسط القش اسي إدريس

إدريس: أودي هم وتزاد لياا هاد لبنت ماعرفتش فاش تتفكر ملي دارت هادشي تاحد ماهضر معاها ولاخسر ليها لخاطر مافهمتش علاش خرجات من الدار عند بالها غير اجي وسيير لاكنا حناا الرجال وتكرفصناا بلاواليدين بلادار بلاوالو عسااك هي لي بنت

نوح:(جغم من كاسو) هي مابغاتش تبقا حيت حشمانة منكوم من داكشي لي عاودتي لياا الدرية مراضيااش بداكشي لي دارت ختهاا مع سيدرا داكشي علاش بغات تهنيكوم منهاا باش ماتبقااش حمل تقيل عليكوم

إدريس:اه نسيت مااگلت ليك اولد لحاج بلي شفت واحد الريااض مولاه تايمشي لبرا ودابا باغي يستاقر تم وباغي يبيعو حيت مغايرجعش لهنا باقي... وصاحبو هو لي گالها لياا حيت كليااني وملي مشيت صراحة شفت الرياض زوين واخا صغير مقارنة بديالكوم مي مزياان ليناا راك عارف دابا ريان تزوج وتامحمد طه راه ناوي وخصهوم خصوصيتهوم وزيد حفادي تاهوما غايبغيو فين يلعبو ويكبرو داكشي علاش گلت نغامر ونشريه...

نوح:فاينا بلاصة؟؟

إدريس:ف **** بلاصة زوينة فاش مشيت ليها وعامرة وتالحومة نقية زعمة كلشي هو هداك وتاداك الرياض نقي وماخصو لاإصلاحات لاوالو

نوح:اوا لاكان مناسبك علاش لا خلي تال بعد غدا ونمشيو نشوفوه اش بان ليك؟؟

إدريس:صافي مزيان

كملو كلامهوم وديك لجليسة غير بزوج بيهوم وتاحد مابقا جبد فيهوم موضوع رنيم ورؤوف... نزلو بزوج ورحيل لقاها نوح تاتسنى فيه باش يمشيو توادعو مع العائلة ونوح قرب جهة بيسان وعنقها بايسها فراسها وگال بهدوء:تهلاي فرااسك وراه طوموبيلتك غانخلي شي حد يجيبها ليك لهنا لاحتاجيتيها تلقايها..

بيسان:واخا سلم على ماما تاندوز عندهاا نشوفها هي و رؤوف..

حرك ليها راسو باه ومشى وموراها كلشي مشى لبيتو ينعس...

دخلات بيسان لبيتها هي وريان لي كان الديكور كامل مبدل وكيوت وفيه لمسة أنثوية... بدلات عليها حوايجهاا بشوميز خفيف وتكات بلاصتها تاتصوني على رؤوف لي مجاوبهاش كيف لعادة...ساطت النفس وحطات تلفونها فوق لكوافوز ساهية تاجا ريان لي نطق بحب:مون دكتوغ مالك ساهية

بيسان:رؤوف مكايجاوبنيش فتلفون عييت نصوني عليه نهار كولو

ريان:خليه على راحتو داكشي لي طرا معاه لبارح مكانش ساهل داكشي علاش السيد اتلقايه باغي يتكوانى مع راسو (جرها لعندو ونطق بمزاح)واجي نگول ليك واحد لحاجة

ضحكات بخفوت فاش فهمات اش قصد وتاهو ماعطاهاش لوقت وشدهاا شدة لعمى فالظلمى...

***

تاهاد الليلة باتت فبيت رحيل وهادشي مكانش عاجب إدريس داكشي علاش قرر يدوي معاها ويشوف حل لهاد الخصاام لي مكانش يطيح على لباال... خصامها صعيب وبعادها قااصح وغير يومااين ودازت عليه فشكل... مع فاق مع خرج لكوزينة فين كانت تاتوجد لفطور وكيف لعادة كانت وحدهاا... سد لباب دلكوزينة تاضارت تاتشوف فيه وببرود رجعات تاتكمل داكشي لي كانت تادير...

إدريس:(وقف جنبها ونطق بهدوء) عاجبك هاد لحالة لي حنا فيها اتانيرت؟

تانيرت:(الصمت)

إدريس:(كمش حجبانو) تانيرت وااش غاتبقااي ساكتة مغانهضروش كيفنا كيف النااس؟

تانيرت:لكلام لي عندك راه گلتيه داك النهار أو وفيتي ولاياكما باقي شي كلام كيف السم نسيتي ماگلتيه؟؟

إدريس:دابا كلامي ولى عندك كيف السم؟

تانيرت:وشنوو نسيتي اش خرجتي من فمك على حاجة مكنتش ناوياها وقصداها سمعتيني داك لكلام اإدريس

إدريس:(قرب جهتها كتر) فنظارك داكشي لي طرا كيتسكت عليه واش غلطت ملي لمتك اتانيرت راه نتي براسك غاتكوني تتلومي راسك ولاقصحت معاك باش تعرفي لغلط ديالك (تنهد) وعارف مكاانش علياا نگول ديك لهضرة ونجبد حوايج لي نتي ماكنتيش قصداهوم

تانيرت:سمع اإدريس سنين عمري وأنا صابرة وساكتة وعمري دويت تاملي كنتي نتا تتلوم فيا وتقصح هضرتك كنت تانسكت حيت عارفة العافية لي كانت شاعلة فقلبك على داكشي لي طرا زماان تصفاوو لقلوب ورجعنا كيف كناا زمان ولكن نتا بهضرتك لي خرجتي من فمك ديك الليلة خليتيني نعرف بلي واخا هاد السنين كلها لي دازو نتا عمرك تنسى اااش طرا اإدريس

إدريس:(بعتاب) واش معارفااش اتانيرت قيمتك عندي گداش (شد يديها وحطها على قلبو) هاد لگلب ضرب ليك غير نتي ومن نهار هجرتيه مشاف الراحة تارجعتي ليه

تانيرت:(بعيون لامعة بالدموع) وعلاش گلتي لياا داك لهضرة واش ماعرفتيش باش حسيت فاش سمعتها خرجات من فمك اإدريس

إدريس:(عنقها ونطق بحنية) عارف بلي غلطت معاك وطالب من السماحة اتانيرت إينو على كلامي ليك (طل عليها وقال بتبسيمة حنينة) واش نتي غاتديها فهاد الشااارف وتقلقي منو راه نتي هي لعسل لي محلي لياا يامي وغير خطيتيني فهاد ليوماين وهي تمرار لياا عيشتي

تانيرت:(ضربات فدراعو بشوية) اوا عرف اش تتخرج من فمك باش ماتمرارش عيشتك

إدريس:هانتي الالة ديري فيا مابغيتي لمهم ماتهجريش فراشك راه هاد ليوماين ماشفت نعااس ماشفت راحة بعاادك علياا قااصح وجربتو مرة ومانبغيش نعاود نجربو

تانيرت:(تادلع وعاجبها لحال) اوا ماتبقااش تخسر لياا خاطري وعرف اش تتخرج من فمك لامابغيتيش نتقلق منك راه غير نعلت الشيطاان أما والله تاكنت نغضب عليك شهر

إدريس:(كمش فيها دوك لحجباان لغلاض وقال برزانة) الله ياودي على أنا نقدر نعااودها تانيرت إينو (شد وجهها بين يديه وقرب جهة شفايفها) هه يوماين وخليتيني بحال ليتيم أما شهر اتخليني بحال لحمق...

زوج سيمانات دازو هادين وعادين عند كلشي ومافيهوم تاشي جديد... كلهوم كانو مكملين حياتهوم واخا جزء منهوم مشتاق لرنيم وهازين ليها لهم ولكن ماباليد حيلة... وفنفس لوقت كانو مدروكين مع الرحيل لريااض لي شرى إدريس مور مامشى هو أو ولد الحاج شافوه بزوج... غير خدا إدريس لقرار أنه غاياخدو هضر مع واحد السمسار باش يلقى ليه شي شاري لي يشري الدار وبحكم كانت جايا فمنطقة زوينة والدار كبيرة ومتيسعة ونقية فدغيا لقاو ليها الشاااري... وتكاتبو وعطاهوم وقت باش يخويو ليه الدار...الكاميوات قدام الدار هازين الفياجات دالرحيل غاديين بيه لرياض لي كانو فيه لبنات لي مشاو سيقوه ونقاوه تارجع كيشعل... واقف إدريس وعينو كيشوفو فديك الدار لي خوااات ورجعات كيف كانت نهار لول فاش جاا ليها... فهاد الدار دازو شلى حوايج وعاشو فيها الفرح وتالقرح... لاكانو لحيوط كيهضرو كانو غايعاودو على شنو عاشو مالين هاد الدار... ماسخااش بديك الدار ولف لعيشة فيها كيفما تاولادو ولفوهاا ولكن كان ضروري خصو يفكر فراحة ولادو لي تاهوما بداو كيستاقرو فحياتهوم.. كان باغي يجمعهوم عليه ويحس بدفىء العائلة لي تحرم منو زماان ويشوف حفادو كيكبرو معاه وفجنبو...

تنهد تنهيدة طالعة من القلب وخرج مبعد متأكد بلي ماخلاو وراهوم تاحاجة ومع خرج لباب بان ليه الشاري لي كان تايتسنى باش ياخد ساروتو... مدها ليه إدريس وسلم عليه بحرارة قبل مايركب طوموبيلتو ويتحرك من لحومة مودعهاا وغادي لحومتو الجديدة...

زوج كاميوات كبااار ديال الرحيل واقفين فلحومة لي كانو ناسها كيطلو ويشوفو جيرانهوم الجداد... حومة كانت زوينة ونقية وأيضا شعبية... بداو كينزلو الرحيل ومعاونينو الدراري تااجااو ولاد لحومة يديرو ليد معاهوم وحلفو تايعاونوهوم... دخلو گاع الرحيل ولي غايتحط فالصالات راه حطوهوم تايقادوهوم وداكشي لاخر غير حطوهوم تم... خلص محمد طه صحاب الرحيل ومع بغا يخلص تادوك دراري دلحومة حلفو لاشدو رياااال كانو تلاتة وباين فيهوم معروفين فلحومة...

رحيل:(عينيها على داك لكم الهائل دلباگاج وبضحك) الله الله اش تابعكووم هه

تانيرت:واياااك تهزي شي حاجة ولاتحطي شي حاجة

رحيل:مغانهزش غير تهنااااي ولكن انستف ليكوم الكوزينة اااح حبيتهاا متيسعة بزااف

تانيرت:دار كولها تبارك الله كبيرة وزوينة

سيدرا:مامي نمشي نختار بيتي

أسماء:هههه تاهنا طامعة فبيتك

سيدرا:بّاديدي قالها لياا

رحيل:وزارة الخااارجية عاطية الاوكي "قصدات إدريس"

أسماء:واييه اجي بيسان اشمن شومبغ خديتو حيت كاينين تلاتة لي كبااار فيهوم لحمامات؟؟

بيسان:خلينا أنا وريان خالتي تاانيرت تختار بيتها هي وعمي عاد نشوف أنا وغزلان

غزلان:ماعنديش مشكيل ختاري لي بغيتي ولي بقات تكون ديالناا

أسماء:هاناا على عريسات تانيرت مفاهمات كيف لخوتات

رحيل:قل أعود برب الفلق اضربيهوم بلعين

أسماء:(صبعات ليها)هاكي گالت ليك انعينهوم ودابا سيرووو تقااااود نستفو هاد إيخااان قبل ماتفيق ليا لبنت

تفرقو لبنات كل وحدة وشنو شغلها ورحيل كيف گالت مشات لكوزينة لي كانت زوينة وكبيرة كانت مزلجة كلها بزليج بلدي على أصولو ودوك البلاكارت ديال لخشب الصحيح... بدا ريان تايدخل ليها لكراطن دلمواعن وتايحطوهوم ليها تم تاسالاو ونطق ريان بتعب:عظامي مابقاوش خوت

رحيل:(بضحك)مالهوم مخاصمين

ريان:تي واش غير مخاصمين راه مايمكنش خصني شي مساااج باش يالاه نولي بخير

محمد طه:ها مرتك دير ليك مسااج

ريان:(تايحك كرشو)اااح خايف دوك صبيعات يتهرسو ليها (بمزاح)ديرو ليا نتا حيت دوك لخبطات عندك هوما لي غانحتاج لعضامي

نخلو محمد طه وخرج مخلي رحيل تاضحك عليهوم وهي تاتحل فلكراطن وتستف كل حاجة بلاصتها... بينما لبقية كل واحد وفين تخشى كيستف... دخل إدريس وعينو على داك البگاج لي تم...

تانيرت:جيتي صافي عطيتي الساروت لسيد؟؟

إدريس:اييه عطيتوو (جر واحد لكرسي وجلس يستارح) هادشي خصو وقت يتستف

تانيرت:غانستفو لبيوت لي مهمين وهاد وسط الرياض بالجليسة لي كنا تافقنا عليها ونخليو داكشي تالغد ليه ونكملوه

إدريس:ولد لحاج راه عيييط ليا غير يسالي شغالو من لفيررمة وغايجي لهنا (شاف فساعت ) هادي وقيتة دلغدا غايخص نمشي نجيب مناكلو اش بغيتو ن..

باقي تاماكملها كاان الباب تايدق ومشات تانيرت حلات لباب وبانو ليها بنت أو ولد فعمرو عشر سنين من ملامحو كيبان بلي تيعاني من متلازمة داون

ولبنت غاتكون فايتاه شوية تقريبا شي ربعطاش لعام... هازين فيديهوم طنجرة أو صينية مغطية

لبنت:(مبسمة)سلام خالتي ماما سيفطات ليك لماكلة وگالت ليك مرحبا بيكوم معانا

تانيرت:(بتبسيمة حنينة) شكرا ابنتي علاش عدبتو راسكوم

لبنت:ماشي مشكيل اخالتي

هزات تانيرت الطنجرة وعيطات لإدريس لي جاا وهو مكمش حجبانو مستغرب وهز ديك الصينية مور ماگالتها ليه... جرات لبنت داك لولد وبغاو يمشيو وهي تنطق تانيرت:اشنو سميتك؟

لبنت:(بتبسيمة) جيداء

مشات لبنت جارة خوها مخلياا تانيرت وإدريس كيشوفو فبعضياتهوم بنظرات دات معنى قبل مايتنهد إدريس ويدخل بداك الصينية وداها نيشان لكوزينة... هز عينو فرحيل لي كانت مشغولة مع المواعن وبقا تايشوف فيها مدة ساهي... عارف بلي هادي مجرد صدفة ولكن داك الإسم بالضبط بالنسبة ليه ولولادو عندو معنى كبييير..

رحيل:(ضارت باش تلوح لكرطون وشافت باها) بابا جيتي ؟ (كمشات حجبانها فاش شافت فالصينية) اش هادشي

تانيرت:(داخلة هازة الطنجرة) هادو غير الجيران الجداد الله يكتر من خيرهوم جابو لينا لغدا

رحيل:(بدات تاتشمشم) هادشي زوين

حيدات لغطا على الصينية ولقات فيها طبسيل ديال السردين مقلي مع طبسيل ديال التكتوكة وديك الطنجرة فيها لعدس...

رحيل:هاد الجيران فكروني غير فجيرانا دالرباط عقلتي ابابا

إدريس:اه شنو غانجيب مزال لغدا

تانيرت:شوف شنو بغاو الدراري

رحيل:بلاماتعدب راه نوح جاااي فالطريق وگلت ليه يجيب معاه لغدا

تانيرت: حشومة علاش گلتيها ليه

رحيل:تت تانتي اماما راه عادي اش فيها

حطو داكشي تم وتانيرت مگالت والو وكملو داكشي تاجا نوح وجاب معاه لغدا وبرفقتو زين العابدين... كانو ديجا قادو ديك وسط الرياض ودارو فيه السدادر ملمطين طلامط جداد حيت هاديك تفصيلة جديدة خصيصا لوسط الرياض وكاينين الصالات تاهوما لي شراجمهوم محلولين على وسط الدار... وعاد لفوق فين كاانو لبيووت دالنعاس...

تجمعو على لغدا لي عطاوهوم الجيران ولي جاب معاه نوح تاهو... رحيل طاحت عمية فديك العدس والسردين... لدرجة هوما غير داقو وهي لي ضربات داكشي كامل...

سيدرا:مامي راه ماخليتيش ليا حويتاات

ريان:(شهق متلف الضحكة لي كانت اتخرج ليه مور ماسمع ديك الكلمة) بيسان ارااي ديك لقرعة دلمااا

بيسان:(بهمس) بشوية عليك شوية وتموت

ريان:(بهمس تاهو) تشهييت شي حويتاات امون دكتوغ

عفطات عليه تحت الطبلة تااهز ركبتو على غفلة ضارب الطبلة وهي قلبات وجهها زعمة مادارت والو مخليااه تايشوف فيهوم وضحك ببلاهة:قرصاتني شي حاجة اااي

محمد طه:(غمزو)رد لبااال

رحيل:الله يعطي الصحة لي مطيب هادشي واحد لبنة فشكااال

تانيرت:نسيت گاعما سولت ديك لبنت على دارهوم فين باش نرجعو ليها لمواعن

أسماء:ماعليش يقدر ترجع ليهوم

ناضو جمعو ديك الطبلة ونوح ضار شاف فإدريس وقال بهدوء:نوضو نهزو داكشي لفوق بااش يتخوا هناا ونيت يتگادو لبيوت باش لابغيتو ترتاحو فيهوم

سيدرا:بابانو تاأنا ختاريت بيتي

نوح:(تبسم بحنية) هي عوالة تبقااي هنا ابابا وتخليني بوحدي

سيدرا:(مشات جلسات فحظنو وحطات يديها على حنكو) لابابانو مانخليكش ولكن بّاديدي عزيز عليا

إدريس:ماتبغيش تخسر لخاطر لتاواحد

نوح:(تبسم) ضروري يالاه سيري تلعبي ابابا

مشات سيدرا تاني عند مها ونوح نااض وشاف فزين العابدين لي جالس بحال لامعروض..

نوح:زين اجي عاوني

ناض ورى باه ومعاهوم إدريس وبقاو تيهزو فداك الرحيل التقيل ويطلعوه لفوق... وحيت كانو كتار دغيا سالاو وخواو وسط الرياض وكل بيت حطو فيها مسائلهاا وعاد بدات مهمة يفيكسيو النموسيات لي فكو... لعشية كلها وهوما خدامين ولبنات تاهوما تعاونو على الصالات وفرشوهوم وبقات وحدة خاوية تايجيبو ليها فراشهاا...

جلسات أسماء جنب الشرجم لي كيطل على وسط الدار وقالت بتعب:ضهري تقسم اوووف

غزلان:(تاتنش عليها) كانكره الرحيل بسباب تمارتو

بيسان:فين رحيل؟

بانت ليهوم جايا وهي تاتجر صندالتهاا وجهها صفر وشادة كرشهاا... تسطحات فوق السداري وقالت بتعب: اوووف گاع داكشي لي كليت رديتو

بيسان:(ناضت عندها) شوية ياكما بغيتي نجيب ليك شي حاجة

رحيل:(خسرات سيفتها) تت ماتجبدوش لياا سيرة الماكلة عفتهاا ياربي تسمح ليااا

أسماء:تلت شهور لولة هي لي تاتكون صعيبة فلوحم

بيسان:وبعض لمرات تاتكون تالست شهور ويقدر لحمالة كلها ماشي ديما تلت شهور

رحيل:كلشي ندوزو ونصبر عليه من غير الرداان معدتي تااتهلك ليااا اوووف

غزلان:تكااي هناا وارتاحي ولابغيتي نجيبو ليك شي عصير تبردي بيه

رحيل:تت غير خليوني نعس

تقلبات على جنبها مغمضة عينيها وتالبنات خرجو من الصالة مخلينها ناعسة...

ريحتو الرجولية لقوية تغلغلات فجيوبها الأنفية مخلياهاا تحل عينيها وهي حاسة بيديه تاترجع ليها شعرهاا لي زهق من الزيف...

رحيل:(بعيون معسلة بنعاس) نوحينو

نوح:(مكمش حجبانو ويديه على حنكها) باقا معدتك تاضرك الفتنة؟

رحيل:تت شوية دابا

قربات جهتو مع كان جالس قفازي وخشات راسها فعنقو وقالت بخفوت:الله على ريحة

نوح:(يدو على ضهرها تايحركها بحنية ونطق بخشونة) هادي هي الريحة لي مولف ندير ديما الفتنة وعمري بدلتها

رحيل:(زادت تخشات فيه كتر) تت جات زوينة وخصوصا وهي مخلطة بريحة الگارو...

هز حاجبو فاش سمع هضرتهاا هي لي مخشية فيه تاتشم ريحتو لي مخلطة مع ريحة لگارو لي حمقاتهااا... كانت قبل مكاتحملش ريحة لگارو وتاتخنقها ودابا ولات عجباها

نوح:(بسخرية) شي نهار توحمي على شي عجب

رحيل:(ناضت جالسة)فيا الجوع

نوح:نوضي نمشيو نتعشاو برا وموراها عاد نمشيو لرياض

حركات راسها باه ومشات طرف حالتها وهو جلس تايتسناها تابانت ليه داخلة ودايرة عكر وشوية دلفاغاجو وريسيل... حوايج بسااط دغياا بينو ليه لفرق ولاحظهوم...

نوح:(بصوت أجش)داك تخربيق لي دايرة بلاش منو

رحيل:(هزات بوشيطتها) ونبقا صفراا ؟

نوح:(جرها وباسها فوق شفايفها بلخف) عاجبااني بكل حالاتك الفتنة

تبسمات ليه بحب وقربات هي هاد لمرة باستو فشفتو وماكرهانش تعمق ساعة الوقت والمكان مكيسمحش ليهاا... شد يديها وخرجو لبرا فين كانو لبقية ودعوهوم ومشاو ولكن خلاو سيدرا تبات معاهوم هاد ليلة حيت شحال هادي ماباتتش ونيت غدا يدوزو عليها ويديوها لعند طبيبة حيت عندها معاها حصة أخيرة...

الجو كان كالم وضواو دالزنقة عاطين منظر جميل لشوارع مراكش الحمرااء... عشقات هاد المدينة لي جات ليها باش تنسى فيها همها وتبدا فيها حياة جديدة حيت لقات فيها حب حياتهاا وشريكهاا... ضارت جهتو ومدات يديها لجهة يدو وفلحين شبكها معاها وطلقات موسيقة مونسة بيها الطريق... حاسة بسعاادة وهي عايشة حياتها بلاهم وبلاحزن... كلشي فات ودابا بداية جديدة لي هي غاتستاغلهاا فكل دقيقة وتانية... وصل لواحد ريسطو وبلاصا طوموبيل قبل ماينزلو شاديين يد بعضياتهوم وداخلين لداخل...

ختارو طبيلة فيها لفوطويات باش ياخدو راحتهوم وجلس جنبها وهي تكات عليه وهازين لموني تايشوف اش غادي ياخدو...

رحيل:تشهيت شي حاجة فيها لحم ناخد هاد ونشوف من التصويرة باين تايشهي

نوح:(باسها فحنكها) ختاري لي بغيتي الفتنة

رحيل:نوحينو واخا نسولك؟ (حرك راسو بالإيجاب وهي كملات هضرتها) علاش تاتگول لياا الفتنة؟؟

نوح:(بصوت بااح وعينو فقلب عينيها) حيت من نهار شفت هاد تيوالين وأنا مفتون بيهوم (عض على شفتو بنابو) وزدت تفتنت بيك فااش شفت وجهك أول مرة

رحيل:(بضحك) هههه فخبارك مكنتش ناوية نحيد النقاب حيت كان عاجبني ولكن نهار تضربتي وشفتك خرجت بلاعقل ناسيااه وصافي من تما حيدتو

نوح:تادابا باقي لحاال رجعي ديريه

تبسمات ليه بلاماتهضر وعارفة بلي ماكرهش يلبسو ليها ولكن عارفة مغاديش يديرها وباغيها تلبسو بلخااطر... تعشاو فجوو حميمي زويين وكل مرة يلوح ليها كلمة مخليهاا غير تاتبسم وعينيها تيلمعو... عماين دالزواج وكاتحس براسها بلي يالاه فبداية زواجهوم... رجعو لريااض فين كان كلشي ناعس وتاهوما توجهو نيشان لجناحهوم ولقات رحيل إسحاق وإسماعيل مكاينينش تم وعرفات بلي رحمة بيتاتهوم عندها وخلاتهوم ليهااا... وخصوصا دابا كياخدو غير الرضاعة يعني ماشي ضروري تنعسهوم معاها واخا راه مكتقدرش تفارقهوم وتوحشاتهوم ولكن تارحمة جداهوم وتتبغيهوم وتاتهلى فيهوم وغير فهاد زوج سيمانة كل مرة تشري ليهوم حوايج وتغرقهوم فالألعاب وأيضا شرات ليهوم بقعة أرضية ودارتها بسميتهوم...

وحيت مكاين لاتوينز لاسيدرا قررات رحيل دير ليه شي ليلة حمي.مة تاني... خلاتو تادوش وسالى عاد هزات داكشي لي غاتلبس ودخلات لحمااام طرقات عليها... كان هاز لكتاب لي مولف يقرا فيه مونس بيه على ماتجي تااسمع لباب تحل ومع خطات لخطوة تسمع صوت موزون شي لي خلاه يهز عينو وبانت ليه السيدة لابسة كسيوة فالبلوغوا لاصقة عليها ومبينة جنابهاا وكريشتها لي منفوخة بشوية ومكتبان تاكدقق فيها حيت دخلات لتلت شهور... كانت سيمطات ومبينة عنقها بسخااء وكانت مزيناه بسنسلة لي جاب ليها نوح ليلة عرسهوم... حفيانة وصباع رجليها مصبوغين بالحمر وفخصرها عليه موزون وطالقة شعرها وضاربة تعكيرة فلحمر

نوح:(حط لكتاب وقال بخشونة وهو كيتنهد) الفتنة

رحيل:(تبسمات بغنج)عيونها

مشات طلقات أغنية شرقية وبدات تاتهز خصرها بشوية مكايسة على راسها وفنفس لوقت غادة مع إيقاع لموسيقى...عض على شفتو فاش سمعها قالت بدلع:وجد لغرامة ههه

شطحات ليه الشرقي وكل مرة تقرب جهتو وتنزل لمستواه تاتلوى وضرب بشعرها مخليااه كيزند وشوفاتو ليها تايغليوو... عطاتو بالضهر وبدات تتلوز تادارت نص ضورة وهزات قاعهاا وماحسات بيه غير هازها من الأرض غادي بيها جهة النموسية وبلاكلام تحدر تيمص شفايفها ويديه كيجردوها من لموزون ولبسة تازولهوم ونزل عليها بقبلاتو وهي تحت منو مرخية ومستاجبة معاه... دوزو ليلة حمي.مية بمعنى لكلمة لي بزوج بيهوم فرغو داك لوحش لي هازين لبعض تاقرب يأدن عاد طلقها سخفانة

حلات عينيها وهي ملوية فإزار ومع ضارت جهتو لقات بلاصتو خاوية...ضارت تتقلب عليه وبان ليها واحد لونڤلوب فوق الكومودينو لي حداها...حلاتو وبانو ليها زوج تيكي دالطيارة بسميتها هي وياه وقبل ماتشوف الوجهة سمعاتو صوتو فاش قال:عجباتك لغرامة الفتنة؟

هزات راسها ملي سمعات صوتو وبان ليها جاي جهتها بسروال توني فالرمادي وتيشورت نواغ مع كاسكيط وسبرديلة بيضاا تاتشعل...كان ستيلو سبوور وقليل فين تايلبسوو ولكن فاش تيلبسو كايجي معاه وتايحمقها تشوفو بيه... قرب جهتها تاجلس جنبهاا وبااسها فشفتها بوسة خفيفة سطحية ونطق بهدوء:صباح الخير

رحيل:صباح نوور نوحينووو (تكات على كتفو)فين كنتي؟؟

نوح:مشيت نقضي واحد لغرااض

رحيل:(تفكرات دوك لبي ديال الطيارة وقبل ماتشوف الوجهة قالت)شنو هادشي؟؟

نوح:(غمزها وقال بخشونة) غرامتك دلبارح

رحيل:هههه واغرامة هادي نشوف فين غاديين

(هزات لبي ومع شافت لوجهة كمشات حجبانها وقالت باستغراب) كازا؟؟ واش غانمشيو فالطيارة لكازا؟؟؟

نوح:هممم ماعجباتكش؟؟

رحيل:لاغير جاتني بيزاغ زعمة نقدرو نمشيو فالطوموبيل بلاطياارة

نوح:(تحدر جهتها بايسها فرقبتها وقال بخشونة) دابا تعرفي يالاه وجدي راسك الطيارة عندنا مع السبعة دلعشية

رحيل:وتوينز وسيدرا فين غانخليوهوم

نوح:إسماعيل وإسحاق يبقاو مع يمّا وسيدرا راه أصلا باغا تبقا مع سي إدريس

ناض غادي جهة الدريسينغ وخلى رحيل مستغربة من هاد التسافيرة لي معطاهاش راس لخيط ديالها...متأكدة بلي الوجهة الاصلية ماشي كازا ولكن عجبها لحال وتحمساات حيت غاتساافر غير هي ويااه... ناضت تاتجر داك ليزار غادة جهة لحمام تاخد ليها دوش... خرج نوح من الدريسينغ فاش مبانتش ليه مشى نيشان لحمام حلو وبانت ليه من زااج لمضبب واقفة تادوش والدخاان دياال الما داير سحابة...

نوح:رحييل

حبسات لماا فاش سمعاتو وحلات لباب كاطل عليه بعويناتها لحمرين بشومبوان:وي

نوح:أنا غادي ندي سيدرا لعند طبيبة جمعي حوايجنا واخا

رحيل:(تفكرات الطبيبة وكشرات على ملامحها)زعمة واش ضروري تديها نتا صبر نسالي ونديها

نوح:(بجدية وبنبرة غير قابلة لنقاش) ديري لي قلت ليك بلا كترة لكلام

خرج ساد لباب مخليها تاتسوط وهي راجعة تادووش وتفكر بلي غايشوف الطبيبة وبلي غاتبقا تبسم ليه ودير دوك تصرفات لي رحيل تاتعتابرهوم مايعين ومعرفاش بلي غير غيرتها هي لي خلاتهاا تحس بدوك لمشاعر وتفسر دوك تصرفات بديك الطريقة... دوشات وخرجات وعقلها غير تايخمم فديك لمشية تالبسات عليها ونزلات باش تفطر ونيت تشوف ولادها...وكيف توقعات لقاتهوم مع رحمة مونسينهاا هي وعفاف لي بقات هاد لمدة عند ختهاا مونساها تاهي ونيت تبدل لجوو شوية...

رحيل: صباح الخير (قربات جهة ولادها وتحدرات تاتبووس فيهوم) امامي توحشتووني هاا اجيو عندي اجيوو

هزات إسحاق وطلبات من عفاف تعطيها تاإسماعيل باش تهزهوم بزووج... ونيت داكشي لي دارت حطاتهوم فحظنها وهوما غير حسو بيها وبحنانتها تخشاو فحظنهاا وبداو يصدرو أصواتهوم لي تيخليو تبسيمة رحيل ترسم على وجهها...

دوزات مع ولادها نهار كولو وفنفس الوقت كانت تاتجمع الحوايج دنوح لي بقاو ليها وبحكم معرفااش البلاصة لي غايمشيو ليها الجو فيها كيف داير فدات معاها تاواحد زوج بياسات سخاان...

كلشي وجداتو وباقي نوح مبانش ليها وماعيطش من الصبااح... هضرات مع مهاا وسولاتها على فين وصلو فالروينة وهضرات تامع سيدرا لي بداات تتعاود ليها على فين داها نوح وساراهاا ورحيل كاتسمع لحماسها وهي مبسمة وعلمات مها بلي غاتسافر مع نوح ولقات بلي ديجا عارفين حيت نوح علمهوم وتاسيدرا طلبات منها تجيب ليها لكادويات ملي يكونو راجعييين ومغاتنكرش بلي ارتاحت من جهتهاا ومهزاتش همها وتامن توينز لي غاتخلي مع رحمة..

شافت الساعة الخمسة ونص والطيارة عندهوم مع السبعة عليها قررات تلبس عليها واختارت كسيوة طويلة واسعة فالبيض وفيها ورديات فلگرونة ودارت ليها سميطة ديالها ومن يديها مجموعة ومفضفضة من جهة الدرعاان... لبسات ليها فولار فالكرونة ودارت مك اب خفيف وريحتها وجدات المسائل ومع الستة كانت واجدة...ويالاه هزات تلفونها باش تصوني عليه وهو يبان ليها داخل لابس عليه سروال توب مع شوميز وباين فيه تاهو واجد...

رحيل:(كمشات حجبانها)مشيتي لدار؟؟

نوح:سي واجدة؟

رحيل:اه

تحدر هز ولادو وبدا يبوس فيهوم وهوما تايتبسمو ليه ولغمازة ديال إسماعيل باينة فحنيكاتو...

رحيل:عندك راه يالاه رضعتهوم لايتق

باقي ماكملاتها تاكان إسماعيل راد عليه الحليب على صدروو مخلي رحيل تاتموت بالضحك:هههه كلتها ليك ههه بصحتك

نوح:(حط إسماعيل وقال هاز فيها حاجبو) ماشي جديدة عليا سبق ودارتها لياا مهوم..

جالس فالمحال وبالو ممعاهش كيف عادتو فهاد لفترة لي دازت... كان قليل فين تايهضر مع شي حد من غير الضرورة وبس تامن لكلياان كان مخلي دراري لي معاه هوما لي يتكلفو ليه... أما الريااض فكان غير تيباات فيه وصاف يجي فالليل ويطلع لبيتو وفالصباح يخرج بكري وهادشي لاحظاتو رحمة لي عيااات ماتحاول معاه ولكن تايخسر عليها جملة وحدة "ماتهزيش ليا لهم" واخا تايگولها ولكن هي كيفاش ماتقدرش تهز ليه لهم وهي تاتشوفو فديك الحالة لي تتخلي قليها يتقطع عليه.. مكانتش كاظن بلي ولدها كايبغي رنيم لديك الدرجة فلول قالت غير زعطة وغادوز وخصوصا مور مارفضاتو فكانت متأكدة بلي غادي ينساهاا ولكن لي بان ليها غيير والحزن لي تاتشوف فعينين ولدها كافي يبين ليها بلي كيبغيهاا...

كان حاس براسو غايتشق بقلة النعااس واخا خدا دوليبران مدارت ليه والو بلعكس الصداع باقي تايضرب فدماغو حاس براسو غايتفرگع نااض مخلي الدراري يسدو وخرج راكب طوموبيلتو غادي لداار... كان باغي غير يحط راسو فوق المخدة وينعس بلامايفكر فتاحاجة وبلامايجي طيفها فدماغو يحرم عليه نعاااسو... وصل مع لوقت لي كان نوح ورحيل خارجين باش يمشيو لمطاار...

رؤوف:(بهدوء)طلعو نوصلكوم

نوح:(قرب جهتو وقال بحنية) غير سير ارتااح

رؤوف:تت طلعو يالاه

مشى حل ليهوم لكوفر تاحطو الڤاليز عاد ركبات رحيل لور ونوح جنبو شاديين الطريق لمطار مراكش المنارة الدولي...

كانت رحيل تاتشوف فرؤوف من لمرايا بنظرات حزينة تاهي لاحظات حالتو وبقا فيهاا بزاف... تنهدات ورجعات تاتشوف من الزاج تابان ليها وصلو وحبس الطوموبيل ونزلو بتلاتة

رؤوف:الله يوصلكوم على خير

نوح:(درعو بحنية)رد لباال لراسك وماتهلكش صحتك

رؤوف:(تبسم ليه بتعب) إن شاء الله

رحيل:بسلامة عليك

رؤوف:بسلامة اختي رحيل تهلاي فراسك وتهلاي فخويا هه

تبسم ليه نوح وشد يد رحيل جارين لڤاليز ديالهوم مخلين رؤوف راجع لطوموبيلتو لي ركبهاا بكل هدوء راجع لدار... مع وصل لقى بيسان جالسة هي ومو وخالتو مجمعين على كويس دلقهوة لقى عليهوم السلام وطلع فحالو لبيتو ساد عليه لباب مخليهوم تايتنهدو ويخممو لحالتو..

بيسان:(بحزن) أول مرة نشوف رؤوف فهاد الحالة

رحمة:(مكمشة حجبانها) مكنتش عارفة هادشي غايخليه يولي بحال هاكا لاماكلة تياكلها لانعاس تيشوفو (بخوف) كيهلك فصحتو تايمرض

عفاف:اوا البغو مساهلش ارحمة

بيسان:تت مكنتش كانتمنى علاقتهوم تسالي بهاد الشكل وتارنيم مسكينة يعلم الله بحالها

رحمة:(ببرود) علاش مالها ياك عايشة صحة سلام ممسوقاش لولدي ولداكشي لي دارت فحقو

بيسان:(باستغراب) على نتي مافخباركش تت نسيت نقولها ليك؟؟

رحمة:اش نسيتي ؟

بيسان:رنيم راه مبقاتش عايشة معانا

عفاف:وقتاش مشات وفين؟؟

بيسان:ليلة لي جيتو تخطبوها لغد ليه فاقت غزلان ومالقاتهاش وقبل ماتمشي خلات واحد الورقة طلبات فيها السماحة وگالت بلي غاتمشي ولكن ماوراتنااش فين (تنهدات فاش تفكرات ديك الورقة) مسكينة تاهي هاازة فقلبهاا ويعلم الله فين هي دابا وخصوصا ماعندها تاواحد من غير عائلة عمي إدريس

رحمة:مافهمتش أنا لاش هادشي كولو ياك تتبغيه وهو يبغيها لاش هاد لفعايل لاهي ارتاحت ولاهو ارتااح

بيسان:ماتلوميهاش اماما هي عندها أسبابها

فضلات بيسان ماتعمقش فلكلام مع مهاا فلموضع عليها ناضت ودعاتهوم ومشات طل على رؤوف ساعة لقاتو ناعس...طبعات قبلة على جبهتو وخرجات راجعة لريااض...

مكانش نااعس كان حاس بيها فاش جات وغير غمض عينو تفادياا أنه يهضر معاها وتجبد ليه داكشي لي باغي ينسى...رجع نعس على ضهرو تايشوف فالسقف والظلام ضاير بيه وكيفكر فيها هي... تايفكر اخر ابيل بناتهوم لي كانت كلها عتاااب وغضب كيتفكر بكاهاا لي باقي فودنيه مبغاش يتمحى... وتفكر تاكلامو لي قال ليها فاش شبهها بعائلتها وهو عارف موضوعهوم حساس بالنسبة ليها... ولكن هو عايرها بيهوم ومغاينكرش بلي ماحملش راااسو وبلي كررره راسو بزاااف واخا هي جرحاتو وطعناتو برفضها إلا أنه مكانش عليه يجبد سيرتهوم ويضربها بداااك لموس لي عطاتو ليه بيديهاا... ناض وهو حاس براسو مزير كل ليلة ضروري مايتفكر هادشي ويعيش عداب الضمير وناار الشوووق لي تاتاكل فيه بلمهل... عارفها قريبة ليه ولكن مقادرش يدير خطوة باقي واخا بعض لمرات قلبو لبائس تايحن ليها ولكلامها ولكن كرامتوو تاتوقف ليه فالطريق وتفكرو فشنو دااارت...جبد تلفونو ودخل لتصاور كيشوف صورهوم بزوج وبعض صورها لي كانت تاتسيفط ليه... مجرد ماشاف صورتهاا والحنين زارو من جديد وبلامايشعرو خرج بزربة غادي لجهة لكونطاكط تايقلب على سميتهاا بلهفة ومع لقى نمرتها دوز ليها لخط قبل مايتراجع وناض من بلاصتو متوتر كيتسناها تجاوب ولكن تفاجأ بديك العلبة الصوتية لي شداتو وبكل أسى هبط يديه وغمض على عينو ناطق بخفوت: باغي نسااك ولكن قلبي حلف لاعاوني...

جالسة فالكراسى وعينيها على الركاب لي شي داخل شي خارج... لمحات نوح لي جااي من بعيد جاايب معاه گوبلي دلقهوة وتبسمات ليه تاجا جلس حداها وقال بهدوء:بغيتي تشربيها

رحيل:غير غاندووق وصاف

داقتها وهي مخسرة سيفتها حيت بلاسكار ودغيا هزات لماا شرباتو مخلياه تايحرك راسو وتبسيمة خفيفة على شفايفو...

رحيل:باقي مابغيتي تقول ليا فين ماشيين؟؟

نوح:(غمزها) تت وتگول

رحيل:(درعاتو وحطات راسها عليه) ههههه حرام عليك يااك أنا الفتنة دياالك واگول لياا

بقات تاتفرفر ليه بدوك الرموووش ونوح درعها وقال بجدية: عينيك الفتنة

رحيل:(فهماتو)ههه واخا ويالاه گول لياا

نوح:(شاف فساعتو وقال بهدوء) يالاه نوضي هادي هي لوقيتة

شدات فيديو غادة معاه والفرحة كاتقطر من عينيها... هي جنبو غير ساكتة وتاتشوف فيه وهو مكلف بكلشي تاشد يديها وطلعو فالطيارة وشدات بلاصتها جنب الشرجم وهو حداهاا... تكات على كتفو وغمضات عينيها وهي حاسة بالرااحة مكيهمهااش فين غاديين الله يجعلها ضرب غير ضورة فكازا وترجع لمهم هي تكوون معاه وحداه وبس... حيت فرحتها وراحتها راه تاتحسها معاه وهو جنبهاا ماشي بعيد عليهاا... أقلعت الطائرة ورحيل شادة الجموع معااه وكل مرة تسولو فين غاديين وهو تگول واش خرج شي حرف... تقريبا ساعة دلمگانة وكانو نزلو فمطار محمد الخامس الدولي لي فالدار البيضاااء... شاف نوح فساعتو وضار شاف فيهاا بحنية:نمشيو ناكلو غايكون فيك الجووع

رحيل:واخاا

شد يديها وخرجو من لمطاار جاريين دوك لڤاليز وشدو طاكسي لشي غيسطو ياكلو فيه...

مور لعشاا خرجو كيتساراو على رجليهوم تاوصلو حدا واحد الدهايبي وشافت رحيل فلاڤيطخين واحد لبراسلي عجبها فيه لفراشات...

رحيل:زوين بزاااف داك لبراسلي

نوح:اجيو نشوفوه

دخلو لعند السيد لي جبد ليهوم داك البراسلي ومع رقيق ومستيلي حمقها وتانوح بلامايحتاج يسولها خلص وخداه ليها ملبسو ليهاا تم نيت عاد خرجو وهي مبسمة وقالت بحب:يخليك لياا نوحينوو تاأنا صراحة باغا نشري ليك شي حاجة

نوح:(شد فيديها بتملك وقال بخشونة) ونتي معايا مامحتاج لتاحاجة الفتنة ديالي

باستو فحنكو فالشارع مامسوقة لتاشي حد وكملو طريقهوم تاوصلات لوقيتة وركبو تاني طاكسي راجعين لمطار محمد الخامس...

دخلو ونوح كيتأكد من لبي لي كانو معاه ورحيل تاطل بنص عين تشوف واش اتقشع شي حاجة ساعة مع من هي... مشاو نيشان قادو الأمور ورصاوهوم وتم عرفات رحيل بلي هوما غادييين لدبي... ضربات الطم وسكتات والعياا تمكن منهاا... تفوهات بتعب وحطات راسها عليه ونعسااات مخليااه بوحدو شاد كتابو المفضل تايقراا فيه ومونس بيه لوقت...

طول الرحلة وهي ناعسة وهو مدابز غير مع راسهاا لي مرة مرة يزهق ويرجعو ليهاا جنب كتفو وفالاخير حطو على صدرو وشدها من دراعها متبتهاا وهي سارحة عجووول...

ماحلات عينيها تاوصلو وهي تاترمش وتشوف فجنايها كانو الناس تاينزلو من الطيااارة...

رحيل:(بتعب) وصلناا

نوح:اه وصلناا يالاه

رحيل:(تاتكسل) ماكرهتش نكمل نعاسي

نوح:(لمس حنكها بحنية) نمشيو لأوطيل باش ترتااحي

رحيل:(وقفات وشافت فساعتها) ناري لخمسة ونص على شحال وحنا مسافرين

نوح:(شاد يديها ونازلين من دروح طيارة)سبعة دالسوايع ونص دابا

خرجو وعيون رحيل توگضو وهوما تابعين الناس لي خارجين من لبوابة دلمسافرين... هز مسائلهوم وخرجو بزوج والجو فدبي كااان الشووم شدو طاكسي غاديين لوطيل وفطريقهوم داز على برج خليفة وعيون رحيل مراقبة الطريق بنظرات متحمسة... وصلهوم الطاكسي قدام الاوطيل ونزلو مخلصينو عاد دخل نوح نيشان لغيسبسيون وديجا كان داير الحجز باغ أنترنيت...

وأخيرا دخلو لسويت ديالهوم ورحيل عيونهاا مبهورة بداك لمنظر... تاتشوف من داك الزااج الزنقة وطوموبيلات لي تيبانو بحال دبان...غبر نوح مدة قبل مايخرج لجهتها وهي ضارت لقاتو لابس غير شورط قصير قرب جهتها مزول ليها داك لفولار لايحو فوق لفوطوي وتبعها لكسوة لي لابسة تابقات بدوني وشورط ديالو وهو يهزها بين يديه بخفة مخليها ضحكة برقة ومشى بيها جهة لحمااام...

كانت بين يديه ودافنة راسها فعنقو تاهزاتو ملي شمات ديك الريحة لي جدباتها... عيونها مباشرة ضارو فداك لحمام وهي تتشوف فيه بإعجاب... كان الزليج ديالو فلبلونكااسي وكبيير وفواحد الجنب كاين الجاكوزي لي تاطلعي ليه فواحد زوج دريجات والحيط لي مقابل معاه كاااان زااج مكيبينش لداخل ولكن تايبين على براا... الإضاءة كانت خافتة والشمااع مشعول فجناب الجاكوزي طالق واحد الريحة تاتخليك ترولاكساي بلاهوااك... طلع بيها لدوك الدريجاات وقدرات تلمح وسط لجاكوزي لي كان فيه لمااا وفيه لورد حمر وفيه كبسولات لي تايديرو الرغووة... وفجناب محطوطين كيسان فيهوم لعصيير وشوكولا مدوبة مع طبسيل ديال ديسير مقطع ومشكل بأشكال زوينة ودايرينو فعويدات... حطها فالدرجة وهي بدات تتزول حوايجهاا مامخليا تاقطعة على جسمها ودخلات مخلية داك لماا دافي يريح جسمهاا... جلسات مور ماجمعات شعرها ونوح تخشى معاها وجاو مقابلين لبعضياتهوم...

هزات رحيل كويس دلعصير شربات منو وقالت بارتيااح:هاد لبلاصة زوينة بزااف

نوح:(ناشر يديه بزوج وغمزها) قربي عندي الفتنة

لبات طلبو بكل سرور وهي غادة جهتو تاتخشات بين رجليه وتكات راسها على كتفو وهو شد واحد لعود فيه لفريز وغطسو فداك الشكلاط ومدو ليهاا...

كانت الجلسة زوينة فيها كمية الراحة والاسترخاء مع أصواتهوم الخافتة لمريحة لسمع... كان تيوكلها وفنفس الوقت تياخد من شفايفها قبلات يتمدق فيهوم داك الشكلاط تادار بناقص منو گاع فاش بانت ليه حاجة حسن.. انغامسو فقبلاتهوم والأيادي متمردة على أجسامهم وكل واحد عاطي لي عندو... تالقاو راسهوم فعلاقة حمي.مية لي أجسادهوم توحدات فيها كأنها جسم واااحد... صوت الأهات الخافتة مع صوتو الخشن لي تايتسمع مع صوت لماا لي تايصدر بسب احتكاك أجسامهوم...كل مرة تيعاشرهاا بطريقة غير ومختالفة على قبل وبحنية تاتخليها غير دايبة فيه... العياا والنعااس لي كانت حاسة بيه فالطيارة طاار ومابقااش وتالجهد ماعرفات فين جااهاا.. فرغات لي هازة من جهتوو وختماتهاا ليه بواحد لعضة فكتفووو ومصيصة مخلية فيه لاطرااس عاد بعدات تاضحك وعيونها تايشوفو فداك لاطراس بفرحة...

رحيل:(بصوت خافت)ماشي ديما نتا لي تخلي فيا لاماارة

نوح:(رجع راسو لور وقهقة بخشونة) هاانا گدامك الفتنة ديري لي عجبك

رحيل:(جالسة فوق ركابيه تادير لي مسااج وهو مرخي... عضات على شفتهاا وقالت بخفوت)نوحينووو

نوح:هممم

رحيل:(بدلع) مغانمشيوش مزال لشي بلاصة خرا يااك غانبقاو غير هناا؟

نوح:هممم

رحيل:(عارفة بلي تحت راسو شي حاجة خصوصا معاطيهااش راس لخيط) واگول لياا باش نعرف شحال غانبقاو هناا

نوح:هممم

رحيل:(قرصاتو فعنقو)ومالك جالس عليا غير همم هممم

نوح:(حل عينو حمرين وقال بصوت تقيل) ديري معاك مسااج لهناا

هبط ليها يديها بسلاسة من تحت كتافو تااخرجات عينيها ونوح غمزهاا ورجع تكى... بدات تاضور عينيها ماعرفات شنو دير... اه مبقاتش بيناتهوم لحشمة ولات مطلوقة معااه ولكن دابا حسات براسها حشمانة ولكن ماعليش خليها تجرب... بقات تتماصي ليه وعينيها تايضور على ملامحو لي كانو تيبانو ليها مزييرين وعروق فعنقو تنفخوو عرفات راسها زنداتو ماشي رخاتو وتاهو جرهاا بلاسابق إندار مقبل شفايفهاا بكل تملك وعنف ماسخاااتش بيه...

بعد ساعتاين خرجات من لحمام ببنوار قصير وشعرها مطلوق مسرح ومصاوب بلبلاك طوويل تايضرب قاعهاا... لقاتو واقف حدا واحد الشاريو فيه لماكلة لي جابوها ليهوم... جلسو كلاو بزوج مع بعض لقبلات ولهمساات تااعيااو ونعسو باش يستارحو حيت غدا تابعهوم مشوااار طووويل...

حلات عينيها فاش سمعات صوت الحركة فالبيت وشافت فيه بعيوون نعساانة وهو جالس فالفوطوي وشاد تلفونو داير ليزيات تايهضر مع شي حد أبيل فيديو...

رحيل:(تاتكسل)صبااح الخييير

نوح:(غمزها) اجي الفتنة

مشات جهتو ببنوارها لي لابساه فوق داك الدوبياس ومع طلات بانت ليها سيدرا لي نقزات بفرحة وقالت بحمااس:مااامي

حيد ليزيات وجر رحيل لي جلسات على ركبتو شادة تلفون تتهضر مع سيدرا لي توحشاتها ولي عطاتها خباار كلشي وشنو دارت...دوزات ساعة معاها عاد قطعات وفلحين عطاها واحد لافيديو ديال توينز سيفطاتو ليه مو وهوما ناعسين تايلاغيو ويتجبدو ويتبسمو... عينيها دمعو بلاماتحس توحشاتهوم..

نوح:(باسها فعنقها) لاش لبكااا

رحيل:توحشتهوم

نوح:نرجعوو لعندهوم؟

رحيل:(مسحات دموعها) ماكرهتش ولكن ماسخيتش بهاد التسافيرة وهاد الراحة لي كنت محتاجة خصوصا فهاد الوقت..

نوح:(باسها فشفتها) بلابكاا وسيري وجدي راسك

رحيل:فين ماشيين

نوح:(غمزها) تت بلاماتحاولي الفتنة

وأخيرا عاد قدرات تانيرت تنفس ملي فرشو الرياض وحيدو الروينة لي كانت فيه وعاد بان زينو فاش عمرر بالفرااش... جالسين فالجليسة لي وسط الداار وبراد دأتاي مع الحليوات محطوطين فوق الطبلة...

كانت رحمة جالسة هي وعفاف ومعاهوم تانيرت وبيسان وغزلان... توينز تايلعبو فلبوسيت ديالهوم مع سيدرا لي فرحو بشوفتهاا...

عفاف:الله يجعلها عتبة مباركة ماشاء الله زوينة وتالبلاصة فين جااات غزالة

تانيرت:واييه مريحة هاد لبلاصة وتالرياض ماتسخايش بيه

رحمة:ملي غاتولفي السكنة فيه وغاتشوفي الفرق بينو وبين الديور لعاديين وخصوصا التيسااع لي فيه والراحة لي تاتلقايها بين حيوطو

بيسان:ماما راه تتحماق على الريااض ولاسكنات فشي دار خرا تتجيها مقناطة وخصوصا الجلسة لي حدا لخصة مولفاها بزاف

رحمة:ههه تما فين تانلقى راحتي

تانيرت:اوا راه سنين ونتي عايشة فيه بالسيف ماتولفيه تاأنا قبل مانتزوج كنت مولفة الفيرمة لي فتارودانت ومكانسخاتش بيها ولكن ملي جييت لهناا كان ضروري تتأقلم مع أي بلاصة

عفاف: تارودانت تاهي ولافة فاش تانمشي مع رحمة مكانسخاش نجي من تم

رحمة:شي نهار ونطلعو تاااني إن شاء الله ولانمشيو لفيرمة تاهي زوينة ومريحة

دخل رياان تايلعب بساروتو تاشاف رحمة وعفاف وهو يتبسم ليهوم وقرب جهة رحمة مد ليها يديها:خالتي رحمة لباااس

رحمة:الحمدلله اولدي ونتا مزيان

ريان:ولله الحمد (سلم مع عفاف والبقية عاد جلس جنب بيسان) وأنا تانگول مال دار منورة

بيسان:هاوليدات ختك جااو ماتوحشتيهومش

ناض ليوم نيشان تايهز فيهوم ويبوووس وهوما يضحكو وسيدرا تنقز عليه باغا تاهي يهزها...

ريان:راك تقاليتي الشريفة اش نطير فيك فالسماا

سيدرا:وعفااك ريااني مودي ديما تايديرها لياا واخا كبيرة

هزها داير ليها لخااطر وطيشها لفوووق غير بشوية وهي عجبها لحال... دارها ليها مرة وحدة وحطها الأرض وهي تاضحك...

ريان:غانمشي نبدل

قبل مايطلع شاف فبيسان وغمزها وتاهي فهمات وغير مشى بشوية وهي طلع تابعااه لقاتو تاينصل فحوايجو ويتكسل بعيااء...

بيسان:(عنقاتو من لخلف) غدا غانبدا الخدمة

ريان:غاتمشي لكابيني ولاتاسبيطار؟؟

بيسان:غانمشي بعدا لسبيطار غداا عاد فلعشية انطلع لكابيني ونشوف لغونديڤو لي عندي تم مأجلين ونخلي لاسوكختيغ تعيط وتكونفيرمي معاهوم داط جديدة...

ريان:غاتعيااي ليا تاني امون دكتوغ

بيسان:اوا ضروري من الصبر احبيبي نتا عاررف تانعشق خدمتي

ريان:(باسها فعنقها) وعلى أنا نقدر نگول ليك عليها لا نتي عرفااني ماشي من داك النوع لي تايبغي لمرا تبقا جالسة فالدار نتي راه ماشي بنت صغيرة نبقا تابعك (جر ليها نيفها وتبسم بمزاح) نيت ملي نمرض نلقى لي يداويني ومانخسرش فليساتي هههه

بيسان:مالقيتي بااش تفاايل (قرصاتو) غير بلمرض تت

ريان:ومالها مكانمرضووش دابا نيييت راني مررريض

بيسان:(بخوف)ماااالك اش ضارك

ريان:(حط يديها على رجولتو وقال بصوت هامس) هاد لبلاصة هلكاااتني امون دكتوووغ

بيسان:تفووو هههه الله يمسخك

ماخلاهااش دوي هزهاا وهي تاضحك وتكركر غادي بيها لنموسية وقال وهو ضااحك:غاندوشو غاندوشو اللهم نديرو علاااش ومانضيعوش لمااا هاكاك

ضحكات عليه بيسان وتحدر تايبوس فيها ويجردها من حوايجهاا تاانساهاا فشنو بغات تگول وشكون هي أصلا...

واقفة قدام مرايتها تاتنشف شعرهاا وهي ساخطة وعينيها عليه هو لي تايسد سيور سروالو السپور لي لابس...

بيسان:(بانفعال) شنو غايگولو علياا دابا خليتهووم سعتاااين يتسنااو

ريان:(ببرود) گولي ليهوم كنت تانتكوا

بيسان:(خنزرات فيه) الله يسمخك تت أنا هبيلة تبعتك

ريان:(قرب جهتهاا وحط دقنو على كتفها وقال بهدوء) دخلنا عليك بالله ماشي هاد السعتااين لي دازو حسن من ديك الجلسة دلتحت

حمار وجهها وقلبات عليه شوفتوو وهو بدا يضحك عارف بلي زمطهاا فهادي... نزلات مور مانشفات شعرها بالسشوار باش ماتفرطش راسهاا ومع نزلات لقات أسماء جات هي وبنتهاا ونظمات ليهوم.. سلمات عليها بيساان وجلسات جنبهوم مجمعة معاهوم تاتحدرات غزلان عندها وقالت بمزاح: نسيتي تنشفي شعرك مزيااان هههه

أسماء:لكواا تايتلف ههه

شدو فيها وهي تاتقلب عينيها حابسة الضحكة... حلفات تانيرت على رحمة بلي غايبقاو معاهوم تايتعشاو وديك الساعة يوصلهوم ريان وتاهوما جلسو مجمعين... توينز طلعوهوم لبيت تانيرت ينعسو حيت غايبقاو هاد ليوماين معاهوم تاترجع تاني رحمة وتديهوم...

غزلان:محمددد اجي

ناض عندها لكوزينة لقاها هي ولبنات غارقين فلعشاا وتانيرت خلاوها جالسة معاهوم...

محمد طه:شنو التويشية ديالي

غزلان:خصنا الزيتون سير جيبهاا

محمد طه:صافي داكشي لي خااص؟؟

غزلان:اه ولموناضة تاهي وجيب لياا شيبس وشكلاط

حرك ليها راسو باه وباسها فحنكها قبل مايخرج غادي يتسخر... كان غادي لحومة لي بدات تخوى داير يديه فجيبو تاجمد بلاصتوو فاش سمع ديك السمية لي مكانتش غريبة عليه "جيدااء"..

وقف جامد بلاصتو وهو كيسمع سمية "جيدااء" تاتكرر بصوت قريب ليه.. فعيونو نظرة جامدة ولكن فالداخل ديالو حوايج لي خلاوه يتخربق... ضار ببطء وراه وعينو على داك المرا لي كانت تتنادي بداك الإسم... تاشووية بانت ليه بنت باقي صغيرة جاياا جهة ديك المراا باش تهز عليها التقدية... كانو ملامحها بويض ومايلين لزعورية والبرائة تاتقطر منهاا ومن تبسيمتهاا لي مرسومة على شفايفها... عونات ديك السيدة وبانو ليه دخلو لوحدة من الديور لي تم وتسد لباب وهو باقي على وقفتو وملامح وجهو لي كانو ساهيين فلعدم... حرك راسو بهدوء غادي مكمل طريقو يجيب السخرة... مشى لبيم وعمر ميكة لغزلان بتقاوت ورجع وهو فحالة سكوون غريييب... حط ليهوم السخرة فوق البوطاجي دلكوزينة ورجع لصالة فين كاين باه وريان وإسلام مخلين النسا ياخدو راحتهوم فالصالة التانية... كانو متفرجين فالأخباار وإدريس مركز فيهوم عكس ريان وإسلام لي شاديين الجموع ومرة مرة يشاركهوم محمد طه فشي حاجة تاتحط ليهوم لعشاا بوحدهوم وكلاو وموراها ناض ريان باش يوصل نسيبتو وعفاف مور مارفضو يباتو واخا عيااات معاهوم تانيرت...

طلع محمد طه لبيتو ودخل دوش وخرج متكي وهو كيفكر... سمية جيداء لي سمع خلات داكرتو تستيقظ وتفكرو فدكرياات متعلقة بيه وبصاحبة داك الإسم... صديقتو وبنت جيرانهوم لي كانت وحدة منهوم ولي كانت عزيزة عليه بزااف ودوزو أعوام مع بعض... مرحها وتفاهتهاا وأحيانا جديتها معاه عمرهوم ينساهوم حيت مكانتش شخص عادي...

سمع الدقان فلباب موراهاا تحل ودخل ريان لي كان يالاه راجع وقاال بهدوء: باقي مانعستيش؟؟

محمد طه:تت يالاه رجعتي

ريان:وي وصلت النسيبة تال باب الداار

محمد طه:(هز حاجبو) وعلاش مامشيتيش لبيتك عند مراتك وجااي عندي؟؟

ريان:(جلس جنبو وشاف فيه بجدية) مالك؟؟ ملي خرجتي تسخر ورجعتي ونتا مبدلة فييك شي حاجة؟؟ اش واقع ليك؟

محمد طه:(تنهد) فاش كنت خارج سمعت بالصدفة واحد السمية خلاتني نتلف

ريان:اشمن سمية؟؟

محمد طه:جيدااء

ريان:(شاف فيه باستغراب وتفاجأ)كيفااش جيداء فين سمعتيهااا؟؟

محمد طه:واحد لمرا كانت تتعيط لشي بنت باقي صغيرة غاتكون يالاه عندها ديك خمسطاش هاكا ولاقل

ريان:ونتا مالك لاسمعتي السمية بزاف دالنااس كيسمو بناتهوم جيداء مالك نتا فهادشي

محمد طه:(شاف فيه بهدوء) ماعرفتش شنو وقع ليا فاش سمعت سميتها

ريان:(بهدوء وجدية) محمد طه واااش نتاا باقي تتبغي جيدااء؟؟

محمد طه:جيداء مكانتش شخص عادي فحياتي ارياان كانت بنت جيرانا وكانت صديقة وكاانت أعز وحدة فحياااتي داكشي لي دوزت معاها ماشي ساهل يتنسى (وبجدية وصدق) مابقاتش فواش كانبغيهاا باش نتفكرها نتا عارف قلبي شكون فيه وشكون لي خلاتني نرجع كيف كنت... قلبي لاكان بغى فحياتو فهو بغاا غزلان ومعاهاا عشت حوايج عمري فحياتي جربتهوم معااه دقت حلاوة البغو ومرارتو ولكاان قلبي بغاا ولاغادي يبغي فأكيد كون على يقين غايبغي غزلان وبس

ريان:وعلاش ولات حالتك هاكا فاش سمعتي سمية جيداء

محمد طه:(تأفاف) كون كنتي نتا بلاصتي وعشتي عوام معاها وعرفتيها وعاشرتيها بحال لي عاشرتها أنا كنتي غادير نفس ردة الفعل بحالي راه ماشي كيستيون واش باقي تانبغيهاا حيت هاد السؤال جوابو عرفتو ملي دخلات غزلان لحياتي وخلاتني نشوف ونعرف بلي داكشي لي كنت هازو لجيداء كان ولف ماشي حب وبيما انها لبنت لوحيدة لي عرفت فدوك السنين كلها ولي حليت عيني وهي جنبي فتعلقت بيهاا وگلت راه تانبغيهاا وهادشي كولو مافهمتو تافات لفوووت عاد عيني تحلوو (مسح على وجهو) فاش سمعت سميتها تفكرتها هي ديك البنت لي كانت عايشة حياتها كيفها كيف لي فسنها عندها أحلامها وطموحاتهاا وعايشة مع واليديها وهي لي عندهوم... تتبغي الحياة وكلها تفاؤل قلبها حنين ولاوقفتي عليها تعاونك وتنصحك تتبان ليك ضحوكية وحمقة ومفروحة وضاربة الدنيا بركلة ولكن وقت الصح تتبان بعقلها وتحنتك هاد لبنت لي حياتهاا سالات بسباب واحد مريض طاحت بين يديه ومرحمهااش (تنهد) لاكنت تفكرتها فحيت عمري مانسيت موتهاا وكيفااش مشات ضحية وعمري مانسيت احر مرة شتهاا وهي فداك لكيس البلاستيكي ميتة مافيها تارووح

ريان:(تنهد بحزن) هادي هي الدنيا امحمد طه كيف گلتي جيداء كانت ضحية واخا هي ماتت ولكن حنا عمرنا نسيناهاا (حط يديه على ركبة خوه) أنا ملي سولتك داك سؤال حيت بغيت نتأكد ونعرف واش باقي گلبك هاز جهتها شي حاجة ولا لا

محمد طه:(تبسم ليه) غير تهنى هاد لگلب أصلا مابقااش ديالي وراه مولاتو ناعسة فلبيت لي فجنبي (تنهد بشوق)عقبااال ماتنعس بين يدي...

يتبع...