محتوى القصة
فاق وهو كيتكسل ويطرطق فعضاامو لي ضروه.. تقول بايت كيهز لحجر ليل كولو.. ضار لجهة لخرا بانت ليه بلاصة ريان خاوية عرفو فااق بكري.. أول حاجة دارها هي هز التلفون شاف فالساعة وحل لويفي عاد ناض يمشي يغسل وجهو.. كان تيحس بلعگز وفيه تقطااع لحم.. خرج تيمسح وجهو ورجع لبيتو جلس وشد تلفونو كيشوف لمساجات لي جااوه.. قشع ديك 300 مساج غير من عند ريان بوحدو وهز حاجبو لسماا.. دخل لاديسكوسيون ولقاه مسيفط ليه التصاور ولفيديوات دلبارح بقا تيتلشارجي ويتفرج فالتصاور لي كانو زوينين واخا هو بعض لمرات تايكون ضارب غوباشتو ولكن طلعو خطيرين... بقا تايدوز ويتفرج تاوصل لديال تركاب لخواتم وهي تبان ليه واحد تصويرة كانت غزلان تاتشوف فيه وهو هاز يديه فلهوا وحال فمو نص حلى كيشوف فيها وكيباان فيه مبهووض.. زفر النفس وبدا كيدوز وهو كاعي وتقريبا دوك التصاور كلهوم كان تيدير فيها نفس الشوفة بحال شي واحد طايح على زنافرو وهااايم فيها.. عض على شفتوو وحل عينيه على جهدهوم فاش شاف داك لافيديو فاش كان تيوكلها حلوى دلكريم وداك لبلان لي دار ولي ماتوقعوش من نفسو.. كانت لحظة عفوية وريان طبعا مافلتهاش.. كمل دوك التصااور تاوصل لواحد لفيديو ديال واحد لبيبي صغير هابط من الدروج وهو يتكربع وطااح وفلتحت كاتب ليه ريان "هاكا طحتي فغيزو لبااارح الخوو"
هنا مرضااش محمد طه ومعجبووش لحاال واخا داكشي عادي ومشاعرو مايقدرش يتحكم فيها حيت هو أصلا معجب بيها وكان غايعتارف بمشاعرو ليها ولكن بسباب اش سمع من فمها هو سرط كلامو واحتافظ بيه بينو وبين نفسو.. حيت بالنسبة ليه هو مغايفرضش راسو عليها ونفسو عزيزة..
سااط النفس ونااض وهو مكمش حجباانو ونزل لتحت لقاهوم جالسين كاملين تايهضرو ضور عينو عليهوم تايقلب عليها بلامايشعر مبانتش ليه..
ريان:(حرك حجبانو بندالة)صباح الخير اسي لعريس
محمد طه:(خنزر فيه) مسالي قبك نتا
ريان:معلوووم (غمزو)
تانيرت: سير اولدي لكوزينة راه غاتلقى لفطور تم
محمد طه:واخا
مشى لكوزينة لقى لفطور محطوط فوق الطبلة قاس لبراد ديال أتاي لقاه بارد..هزو وحطو فوق لبوطة وشعل ليه وبقا واقف تايتسنااه يسخن تاسمع لحس وهو يضور بانت ليه داخلة كاتهضر فالتلفون.. شافتو وتبسيمتها لي كانت دايرة تمحاات.. عينيها عليه وتاحد مانطق بتاشي كلمة وكل واحد كيشوف فالثاني..
غزلان:(تمشات جهة التلاجة ونطقات بهدوء) ماعرفتش اصاحبتي هي مقالت ليا والو
أميمة:وراه قلت ليك عيطاات ليا وعرضات عليا وقالت اجي نتي وغزلان
غزلان:(هزات الدجاج من لفريگو وحطاتو فوق البوطاجي) غانشوف مانقدرش نعطيك لكلمة دابا
أميمة:لمهم أنا ولبنات تافقنا نجمعو لفلوس ونعطيهوم ليها درنا مية درهم لوحدة
غزلان:واهدااي عليا نشوف بعدا واش غانمشي معاكوم ديك الساعة لفلوس حالهاا ساهلة
أميمة:اجي والله وجيبي معاك أسماء ورنيم ورحيل نتوانسو شوية راه دايرة غير لبناات نديرو عشية زااهية بيناتناا
غزلان:واش هي غاتبغي نجيبهوم؟
أميمة:لاتافقتو أنا نعيط ليهاا ونعلمها هي أصلا ماعندهاش مشكيل لمهم نتي تافقي مع لبنات وردي علياا ليوم فلعشية ولاغدا كأقصى حد بااش نعلمها دير بلحسااب ديالكوم
غزلان:صافي واخا مشات يالاه نخليك دابا تانعاود نعيط ليك
قطعات لابيل وحطات تلفونها فجيب بيجامتها وجبدات البصلة باش تبدا لغدا والسيد واقف طالق ودنيه معااهاا.. ضار شاف فيها ونطق ببرود: فين غاتمشي؟؟
غزلان:(شافت فيه متفاجأة ونطقات بصوت هادئ) صاحبتي عارضة عليا أنا ولبنات صحباتي
محمد طه:(ضار شاف فيها وهو مربع يديه) فين عارضة عليكوم؟
غزلان:(تتجاوبو بالخاطر) دارها
محمد طه:(طفى على أتاي وقال ببرود) ماعندك فين تمشي
جلس تايفطر وهي عاطيه بالضهر ومكمشة حجبانها.. صاحبتها لي عارضة عليهوم مزوجة أصلا ويالاه شرات دار هي وراجلها وبغات دير عراضة وعيطات ليهوم.. حطات لموس وضارت لعندو ناطقة بهدوء: غانمشي
محمد طه:(شاف فيها مخنزر)شناهو؟
غزلان:غانمشي
محمد طه:كلمة وحدة تقاالت مغادااااش هي مغادااش
كان تيشوف فيها وهو مخنزر وبحال لالقى السبة فين يكب ديك العصبية لي كيحس بيها وتاهي ماهبطاتش ليه الرااس وربعات يديها ناطقة بصوت هادئ: ممكن نعرف علاش مغانمشيش؟
محمد طه:(ناض جهتها) حيت مبااغيش تمشي صافي داكشي لي بقا ليا هاصاحبتي هاالقلا*ي (خرج فيها عينيه) هادشي دصحباات مباغيهش أناا
غزلان:(خرجات فيه تاهي عينيها)ماتخسرش الهضرة ودوي مقااد وبلاماتبقا تهز عليا ديك السيدة كانعرفها من زماان وكون كاان فيها شي عيب كون گاعما رديتها صاحبتي
محمد طه:(تحدر جهتها وهو معوج راسو) ماشغليش الاقلت مغاتمشيش هي مغاتمشيش
غزلان:واخا
رجع بلاصتو باش يكمل فطورو ساعة مبغاش يدوز ليه.. هز كاس دأتاي وخرج مخليها واقفة تاتعض على شفايفها معصبة منو.. كاتبغي تفهم شخصيتو وتحاول أنها توالف عليه ولكن تاتلقى راسها فشلات حيت كل مرة خارج ليها بنفسية جديدة.. تقلبات مزاجو كيخليوها مكتقشبل فيه تاحاجة..
كملات غزلان داك لغدا بزز وعاوناتها رنيم وغير سالاو رجعو لصالة وجلسو مع البقية وغزلان راه مهزاتش مزال فيه عينيها عكسو هو لي كل مرة يعيطها شوفة.. معصب منها ومن قصوحية راسها..
كانت تتعاود لبنات على لعراضة وكلام صاحبتها وأسماء غير كملات كلامها نطقات بسرعة:اييه قولي ليها اه
رنيم:صراحة ماعندي تاإشكااال لابغيتو تمشيو نمشيو
غزلان:ورحيل واش غاتبغي؟
أسماء:غانشوفو ياك قلتي عندها دار ف*** ماشي بعيدة بزااف (خدات تلفونها وقالت) غانسيفط ليها مساج ونعلمها ياكي ونتي هضري مع أميمة وقولي ليها اه غانمشيو والله تامليت من روتين الخدمة والداار
غزلان:صافي واخا (سيفطات تاهي مساج لأميمة ورجعات شافت فأسماء ورنيم) صافي نشوف اش غاتقول ولكن بلاتي رااه هاد لكلام بناتنا تانشوف اش كاين وديك الساعة نعلمو عمي إدريس
أسماء:وراجلك زعمة خطيبك مغاتعلميهش
غزلان:(ميقات) قال ليك لا
رنيم:هههه بدا من دابا لحكاام عندي إحساس تاارحيل غايقول ليها لا ههههه
أسماء:خصها غير تعرف كيفااش تعامل معااه يعني داكشي يكون بحلاوتو باش هو يوافق
غزلان:غير تاتهضري شفتي لاكان راسو قاصح والله لاهبطتيه
أسماء:ايييه كون جيتي فيامات محمد طه الحنين لي قلتي ليه غايقول ليك اه
غزلان:(بفضول) وعلاش دابا مالو ولى هاكا؟
أسماء:(عضات على شفتها فاش عرفات راسها غاتزبلها ونطقات بهدوء) مور لوبغاسيون لي دار ولى كيتعصب بزربة والخاطر مبقااش عندو هادشي لي كااين
غزلان:وشنو السباب تادارها؟
أسماء:كان دار كسيدة وضرب راسو مع طروطوار اوا موراها ديناه لطبيب ولحمدلله مكان تاشي مشكيل ديك الساع ولكن مع مدة تكون عندو ورم دموي ومع مكانش تايدير لكونطرول عند طبيب ومكناش عارفين تانهار طااح فالخدمة وهزوه أوغجون تما عرفنا ودخل فتح على راسو وبقا مدة فالسبيطار هي نفسها الفترة لي جيتي عندنا
غزلان:(هزات عينيها بالخف وشافت فيه ونطقات بهدوء) الحمدلله ملي ولى بخير
رنيم:(قلبات السوجي وبضحك)ههه سيدة شوية وتبكي على حبيب لقلب هههه
غزلان:باااز
أسماء:راه دابا نيت الأعصاب ممزيانينش ليه وخصو يبقا يدير كل مرة كونطرول باش مانطيحوش فنفس المشكيل دقبل
سكتات غزلان فاش سمعات تلفونها وشافت مساج أميمة وشافت فلبنات:صافي راه أميمة علماتها وهي قالت ليها مرحبا بيكوم كاملين
أسماء:(شافت فباها)بابا بعد غدا أنا ولبنات معروضين عند صاحبة غزلان دايرة عراضة بمناسبة دارها الجديدة وراه غانمشيو لعندها واخا
إدريس:(كمش حجبانو)شكون هادي؟
غزلان:صاحبتي كاتقرا معايا فلفاك مزوجة وعرضات علينا حنا لبنات نمشيو عندها هي ساكنة ف**** تما فين شراو دار وراه عرضات تاعلى رحيل
شافت فمحمد طه لي خنزر فيها ومعجبوووش لحاال حيت معبراتوش وحيت دارت لي فبالها وحس بيها معطياهش قيمة... نااض من بلاصتو خارج من الصالة وباين فيه معصب وكلشي لاحظاها
إدريس:(شاف فغزلان) شوفي محمد طه واش غايبغي هو لول ابنتي وديك الساعة سيرو
أسماء:(نقزات بسرعة)راه علماتو وقال ليها سيري
غمزات غزلان لي حركات ليه راسها زعمة بااه وناضت دايرة السبة باش طل على لغدا وهي راه مباغاش تبقا تما لايعيق بيها إدريس.. طلعات لفوق ومع وصلات لطبقة فين كاينين لبيوت حسات براسها تجرات وكانت غاتغوت كون مشافتوش.. قلب طريقو مطلعها لسطح وهو شادها من دراعها وهي نطقات بصوت خافت باش مايسمعوهاش:طلللق مني ابناادم
دخلها لسطاح ورد لباب باش مايتسمعش الصوت وضار خنزر فيها: بنت ليك دمدوومة ياااك
غزلان:نتا اش تتخربق؟
محمد طه:(غوت عليها كاعي) كتعاااندي معااياا وكلامي عندك زاايد نااقص قبيلة قلت ليك مغاداااش لتم ونتي تعاندتي معااياا ومشيتي علمتي لبناات ولواليد باااش تخليني نواافق بزز مني
غزلان:(تاتحاول ماتعصبش ولكن كلامو نرفزها) أنا ويااك مخطوبين ولكن هادشي مكيعنيش تبقا تحكم فياا فالطلعة والنزلة تاأنا عندي حياااتي وعندي صحبااتي لي مغانجيش نخرجهوم من حيااتي غير حيت نتا مباغيهومش وأصلا نتا مكتعرفش السيدة بااش ماتبغيش نمشي عندهاا نتا مباغينيش نمشي غير باااش تمشي عليا كلامك وربي كبير
محمد طه:(ورك على سنيه) هاد لكلااام ديال المرض ماتگوليهش ليا لاقلت ليك لهضرة ديري بيهاا اغزلااان سمعتي من هنا لفوق مانبغيش بحال هاد التصرفات الخاويين دابا وليتي محسووبة علياا ولاكنتي مولفة لخروج والدخول بلامايحاسبك عليه حد فهادشي مغايبقاش من هنا لفوق وكلشي غادي يتبدل ديري هادشي فبااالك ولي طراا لتحت آخر مرة يتعااود حيت لمرة الجاايا تصرفي مغايعجبكش..
غزلان:(هزات حاجبها) أنا ماشي بنت صغيرة وعارفة اش كاندير مكاين لاش تهز ليا الهم وكل واحد يديها فحياتو حسن ليه.. وماتنساش بلي هاد الزواج جامعنا بزوج غير باش نصلحو داكشي لي غلطنا فيه
خلاتو ونزلات بلاماتسنى جوابو ولكن من شوفتو لي دار فيها عرفات راسها أنها عصباتو ولكن هي مقالتش شي حاجة لي تعصبو ياك هادي هضرتو وقالها ليا وصارحها بيها لبارح وليوم غير رجعات فكراتو فيها..
مكانتش هادي أول مرة يلمح ليها بلي باغيها تلبس النقاب وسبق وقالها ليها ديك لمرة ومع دلك هي مادات مجابت وقالت ليه بلي هي مكتفكرش فيه حاليا.. هي عارفة بلي لامشات تالبساتو خصها تكون مقتانعة بيه وباغاه وتوفي شروطو كما هي.. هزات فيه عينيها وشافت الجدية فوجهو وبهدوء قالت: النقاب حاليا مكنفكرش فيه ومباغاش نديرو
نوح:(رجع ضهرو لور متكي وقال بنفس الهدوء) وتاأنا غير قلت ليك شنو كااين والنقاب لي كاندوي عليه ماشي هو لي كنتي دايراه شحال هادي ولي مغطية فيه غير وجهك..
حكات يديها مع بعض وحسات بالخنقة فاش عرفات على أشمن نقاب كيهضر عليه.. حيت سبق قلبات عليه فغوغل نهار هضر معاها عليه وشافت أنواع النقاب لي كاين ومغاتنكرش بلي حسات بالخنقة فاش شافت بعض الصور لي مكان تيبان فلي لابساه والو من غير شوية فعينيها.. ولابسة عباية طووويلة كحلة وفضفاضة وبانت ليها تاني صورة ديال النقاب الأفغاني وهاداك خلاص جاب ليها التمام حيت فيه غير شبيكة جهة العينين غير باش تقدر لي لابساه تشوف طريقها وديك الشبيكة مكتبينش لعنين.. فاش شافت داك النقاب عرفات أن هاداك لي كانت تادير فديك لفترة نواور ومغاتنكرش بلي حسات بتأنيب الضمير حيت مابحتاتش فالموضوع قبل ماتلبسو يقدر كون شافت هادشي مكانتش اتغلط فلباسها وتاخد حريتها..
رحيل:(حركات راسها ونطقات بخفوت)عرفتو
نوح:(هز حجبانو ونطق بجدية)فبيتك ملي تكوني بوحدك لبسي لي بغيتي وضوري نتي گاع عرياانة مكاين لي يقول ليك شي حاجة ولكن قداام لعباااد نبغي السترررة نتي داك لقفطاان شفتيه وقلتي زووين ومافيه والو وعادي حيت نتي ماشفتيش داكشي لي شفت أنا(تحنى جهتها وقال بهدوء)المهم هاد السوجي غايتسد هناا فخطرة واخا
رحيل:واخا (كانت باغا تفتح معاه تاموضوع إسلام ولكن فاش شافتو مجبدوش وماهضرش عليه تاهي سكتات..ناضت من بلاصتها وقالت بهدوء) محتاج مني شي حاجة؟
نوح:لا
خلاتو وخرجات وهي حاسة بواحد الراحة ملي هضرات وبررات موقفها ليه وهو سمعها واخا حسات بيه باقي معصب منها لكن ماشي بحال قبل.. رجعات لعندهوم فين كانو جالسين وبانت ليها بيسان تتصواني الحرقة لسيدرا.. جلسات بلاصتها وسيدرا شافت فيها ونطقات:مامي عرفتي بيسو گاعمات تاتقصحني
رحيل:اوا قولي ليها شكرا امامي
سيدرا:شكرا
بيسان:(باستها فحنكها) العفو الزوينة
شيماء:(تبسمات لرحيل وقالت) وقتاش غاتسافري نتي ونوح؟
رحيل:(بهدوء)ماعرفتش
شيماء:واش خايفة نحسدوك هههه
بيسان:ديها فراسك اشيماء يكون حسن بينها وبين راجلها ماشغلكش نتي
شيماء:قلت شي حاجة عيب وزايدون نوح راه ولد عمتي وشي عادي نسول مرتو وقتاش غيسافرو باش يدوزو شهر لعسل اش فيها؟
بيسان: فيها دخلي سوق راسك وباركة ماتبقااي تنبشي
سناء:بيسان اش هاد لافاصون دلهضرة كادوي بيها شيماء بنت خالك احتارميها شوية
بيسان:تاهي قولي ليها تحتارم راسها شوية وماتبقاش دخل فأمور مكتعنيهااش
سناء:زدتي فيه والله تازدتي فيه وندمتيها گاع علاش هضرات
شيماء:(تاتمسكن)ماعليش اسناء عارفة عزيز عليها تمازح معايا وأنا ممقلقلش منها
بيسان:(قلبات عينيها) شكون مسوق ليك تقلقي ولاتفرگعي
رحمة:(حمرات شوفتها فبيسان)هنينا
كانت رحيل بحال الأطرش في الزفة.. تاتشوف الهضرة نايضة بين بيسان وشيماء ومعارفاش علاش تاتحس بلي كاينة حساسية بيناتهوم.. مغاتنكرش أن شيماء تاتجيها فيها الدغل وقلبك مكيرتاحش ليها عكس بيسان لي لفون ديالها بيض وهي عاشراتها.. سؤال شيماء معحبهااش تاهي لدلك ختصرات جوابها بكلمة لي شدات فيها شيماء ودارت عليها سكوندال خااوي.. وغير فهاد الدقائق لي دازت استنتجات بلي سناء قريبة لشيماء وديما أصلا تاتشوفها معاها وسبحان الله تاتحس بلي بزوج بيهوم كيتشابهو..
رحيل:(نطقات تاتلطف لجو)ماعليش سوء تفاهم كيوقع
تبسمات ليها بيسان ورجعو مجمعين على المجية دعفاف لي غادوز معاهوم شي يامات كيف عادتها كل مرة تاتجي لعند ختها.. طوالت الجلسة تاوصل وقيتة دلغدا وكيف العادة تجمعو كاملين عليه وانظم ليهوم تانوح لي جلس جنب رحيل وبداو تياكلو فسكاات.. كانو دايرين طاجين دلحم بزبيب ولبرقوق وشلاظة.. هزات رحيل لفورشيط تاتنقب من شلاظة ونوح ضار جهتها وتحنى عند ودنيها ناطق بهمس: علاش مكتاكليش؟
رحيل:معدتي كاضرني ومباغاش ناكل لمرقة
نوح:(شاف بجدية فوجهها)وعلاش ماقلتيهاش لياا ؟
رحيل:ماعليش (حطات يديها على فمها فاش طلعات ليها تاني ديك لحموضة وخسرات سيفتها)
نوح:(حط يديه على ضهرها) يالاه نديك لسبيطار
رحيل:مكاين لاش
رجعات تتاكل فديك الشلاظة وهو راد معاها لبال.. من لبارح وهي ماشي نورمال وهو لاحظها غير من ماكلتها.. وتافالصباح مكلاتش بزاف فلفطور.. ضار لجهتها لقاها حاطة يديها على فمها ومكمشة حجبانها فاش حسات براسها باغا ترد... تاتحاول تكالميها ولكن مقدراتش وناضت بزربة على غفلة تاتجري جهة لحمام..
ناشرة رجليها فوق السداري وهازة تلفونها مكونطية تاتلف لوقت بيما تحط لغداا.. كانت تاتشوف اشمن تصويرة تحط فالسطوري فلواتس.. بقات تاتعزل وتخير تالقات وحدة زوينة عجباتها وحطاتها ورجعات تتجاوب لقوم لي عندها فلواتساب.. تاطلع ليها مساج من عند إسلام كاتب ليها فيه 📩 "غزالي" قراتها من نوتيفيكاسيون ورجعات مكملة لحديث ديالها منخلاه وفنفس لوقت كلام رحيل لي قالت ليها لبارح كيضور فبالها.. مغاتنكرش أنها تصدمات فاش عرفاتو ناوي يشري ليها طوموبيل وهي وياه مابيناتهوم تاحاجة.. اه بصح كيهضر معاها وتيبين ليها أنها كتعجبو ولكن مابيناتهومش شي علاقة لي تربطهوم باش يشري ليها طوموبيل لي بالنسبة ليها مستحيل تقبلهاا.. كانت تاتسنى غير يديرها باش تفرگع عليه بصح شحال هادي كان تيعجبها فاش آدم كيخسر عليها فلوسو ويشري ليها صيكان غالين وحوايج وصبابط ولكن دابا لا مبقاتش باغا شي حد يجيب ليها ولايشري ليها.. هي خدامة وبفلوسها ولاتشهات شي حاجة تاتمشي تجيبها وماكتخلي حد يمنن عليها.. سهاات ومافيقها من السهوة ديالها غير لابيل فيديو ديالو لي طلعات ليها فالشاشة..
أسماء:(هزات حاجبها ونطقات ببرود) وزعاامة خااايبة هادي
ناضت من بلاصتها وطلعات لبيتها سادة عليها لباب ورجعات تاتشوف فتلفونها ولابيل لي رجع دايرها ليها.. مع قبلاتها بان ليها واقف كيلبس تيشورت ديالو
أسماء:(نطقات ببرود)اش بغيتي؟
إسلام:(ضار جهتها وقرب لكاميرا هاز تلفون لي كان موقفو مع لمرايا) علاش مجاوبتينش على لمساج لي سيفطت ليك
أسماء:ممسالياش باش نجاوب
إسلام:(خنزر فيها) سبحان الله من صباح ونتي أونلاين وجيتي تالمساجي ومساليتيش تجاوبي كنتي تاتهزي لحجر
أسماء:(جلسات فالكرسي دطابل دونوي وحطات تلفونها قدامها) وهانتا تاتشوف بعينيك تانجي تال عندك وتانعگز (كملات بسخرية) واقيلا ساحرين ليا عليك
إسلام:(ماكرهش كون كانت قدامو يوريها هاد الفعايل لي تادير معاه) تانشوفك فاص وديك الساعة نجاوبك
(تسمع صوت مو لي تاتعيط ليه وهو حط تلفونو ونطق قبل مايخرج)ماتقطعيش
مشى محليها مقابلة التلفون تاتشوف فيه.. من زهرو لقاها مسالية ماعندها مايدار وقتلها لملال وقالت اجي نتونس بيه.. حلات لمجر وجبدات واحد صباغة فلغوز وخدات لما دالصباغة ولقطن وبقات تاتمسح لي كانت دايرة لباارح تاسالات عاد جلسات تاتصبغ وحادرة راسها تاسمعاتو نطق:اش كاديري اغزالي
أسماء:(شافت فالتلفون)كانصبغ
إسلام:(متكي فوق النموسية وهاز تلفون)انشوف اينا لون
أسماء:(هزات حاجبها) وعلاش تاتسول؟
إسلام:باغي نعرف
أسماء:غوووز
إسلام:مسالية ليوم نديرو شي كافي
أسماء:(ببرود)لا ممساليااش
إسلام:(نطق بجدية)غزاااالي بااركة من دوك لفعاايل دالز*
أسماء:صلح فمك راه مكادويش مع صاااحبك ابنادم
إسلام:(خنزر فيها) كون كنتي صاحبي نخسر عليك كروشي يرجع ليك عقلك لراسك
أسماء:(تاتسوط على ضفارها باش ينشفو) اوا دوماج زهرك مخري بحااالك
إسلام:(مسح على وجهو وقال بهدوء)شنو قلتي؟
أسماء: غانخرج مع لبنات
إسلام:فين؟
أسماء:لأرواس تمشي معايا
إسلام:(كمش حجبانو)شنو هي هادي؟
أسماء:(تكرشخات بالضحك حيت مافهمش بلي ديك لكلمة معيوور بالشلحة بقات تاترد النفس وقالت بهدوء) والو مغاتفهمهااش مهم غايخصني نقطع كيعيطو ليا باي
إسلام:بقاي تجاوبي على تلفونك اغزالي
قطعات عليه ونزلات لتحت وهو تنهد ولاح تلفونو حداه وناض خارج من بيتو لقى مو فالكوزينة تاطيب لغدا.. باسها فراسها ونطق بهدوء:كون خليتي نجيبو لغدا واجد
مو:هادشي بااش قتلتي راسك اولدي لماكلة دالزنقة شوف كيف ضعافيتي
إسلام:اشمن ضعف امّي الله يهديك
مو:اييه ماشفتيش راسك فالمرايا كيف وليتي اولدي واش غاتبقا حياتك كلها عايش تازوفريت مغاديرش دارك أو وليداتك..
ساط بعصبية عارف مو غاتشد تاني فالموضوع واجاا ماينسيها فيه.. ككل مرة مشى عندها لكازا ولاجات عندو لهنا ضروري هاد لموضوع مايتجبد وهو ديما كيتهرب من كلامها حيت بالنسبة ليه اخر حاجة باغي هي يتزوج ويعاود التجربة الفاشلة لي عاش.. عقلو صافي واخد فكرة لي صعيب يمحيها ليه شي حد.. سبق ورحيل دوات معاه فهاد الموضوع تاهي وحاولات تقنعو أنه يواجه ومو كدلك وخوتو فيما يهضرو معااه ضروري مايلوحو ليه لهضرة وهو كيتجاهل كلشي ولكن لإمتى؟ مو عندها لحق واش غايبقا حياتو كلها عايشها بوحدو هاهو كيكبر فالعمر ومو راه مدايمااش ليه وغايجي النهار غايدي مول الأمانة أمانتو وخوتو راه كل واحد بدارو أو ولادو وهو غايبقا بوحدو.. خلى مو فالكوزينة تاتنهد عليه وقلبها ضارها على كبدتها لي تاتشوفو غادي لهاوية.. دخل لبيت وتكى فوق نموسيتو وعينو مفيكسين فالسقف كيفكر فحياتو لي كان عايشها شحال هاادي.. ديك لعائلة الصغيرة لي كان مستاعد يفديها بروحو باش تبقا.. لمرا لي كان تيقول راه هي لي مناسبة ليا وعطاها لي فقلبو بلامايبخل عليها صدقات هي لي عطاتو دقة عمرو ينساها شمتاتو شمتة لي باقي لدابا تاطلع وتنزل فيه وصعيب يرجع يجدد تقتو فشي وحدة خرى..
نوضة ديالها خلات كلشي يهز عينو وعلامات الإستفهام فوق من راسهوم.. شيماء خرجات عينيها من لفكرة لي طاحت فبالها خصوصا فاش بانت ليها شادة فمهاا وماشي غير هي تاسناء لي ضارت تاتشوف فرحمة وتاتسولها بعينيها.. أما نوح فغير ناضت تبعها وهو مكمش حجبانو لقاها فالحمام لتحتاني تاترد.. حل لباب وبانت ليه متكية على لشاس تاترد لي فجوفهاا.. وقف جنبها وشدها مسندها عليه وهي راه شوية وتحط مسارنها بقوة ماتقياات تاردات الدم.. كمش نوح عينو فاش شاف الدم وهز ليها راسها وهي تاتنهج قربها جهة لاڤابو وبدا يغسل ليها وجهها وهي راه الدوخة شداتها فديك اللحظة وحلقها بحال لافيه الشوك بقوة ماتجرح.. حنى ليها راسها وعطاها بكفو لما تامضمضات فمهاا..
نوح:(شد وجهها وشاف فيها كيف لاوية ونطق بجدية) باش تاتحسي شنو كيضررك؟؟
رحيل:(تاتكرع غير لمرار وبصوت خافت قالت) هنا
حطات يديها على كرشها وهو تحدر هزها بين يديه بالخف وخرجها وهي حاطة راسها على صدرو.. لقى بيسان جايا عندو موراها سيدرا ونطقات بجدية:مالها؟؟
نوح:(تخطى بيسان وقال بخشونة)ماعرفتش كاضرها كرشها
طلعها لفوق وبيسان تابعاه تادخلو لجناح وحطها فوق لفوطوي لي فالصالة ودخل لبيت مخلي معاها بيسان لي قالت:باش تتحسي ارحيل
رحيل:(حالة عينيها بزز) كانحس بالحموضة كطلع ليا
بيسان:سبق وتقيتي ليوم؟
رحيل:لباارح زوج مرات فالصباح وفالليل
بيسان:اينا بلاصة فكرشك تاضرك؟
رحيل:هنا
بيسان:لمعدة واش سبق أو وقع معاك بحال هاكا
رحيل:أصلا فيا الأعصاب فالمعدة
سيدرا:(عيونها على رحيل وشوية وتبكي) مامي واش نتي مريضة بزاف
رحيل:لا امامي غير فيا وجيعات فكريشة وصااف
رجع نوح جايب عبااية وتحدر لبسها ليها وبيسان وقفات وقالت:أنا غانعيط لطبيبة خاصة بأمراض الجهاز العظمي عندها كابيني خاص وفنفس لوقت خدامة فالسبيطار لي أنا فيه ونوصيها عليك سميتها دكتوغ الودادي
خدات تلفونها وعلمات الطبيبة بلي غايجي خوها ومرتو ونوح تحدر جهة رحيل باش يهزها وهي تنطق:قادرة نمشي ماعليش
نوح:(خنزر فيها)سكتينا
هزها وهي ضربات الطم نزل لتحت وبيسان هزات سيدرا تادوي معاها بالخاطر وتشرح ليها شكاين فاش شافتها مخلوعة.. نزلو لتحت ولقاو كلشي كيتسنى ويسول ساعة هو تخطاهوم وخرج.. وتابيسان معطاتهومش اش كااين حيت هاداك غير استنتاج من عندها على حسب هضرة رحيل وضروري ماخص تدوز باش يتأكدو شنو كاين..
شد بيها الطريق وهي حاطة يديها على راسها مغمضة عينيها.. ضار جهتها وقاال بخشونة:شوية دابا؟
رحيل:(حركات راسها)هممم
حط يديه على خدها تلمسو ورجع كيشوف فالطريق تاوصلو لسبيطار ونزلو بزوج وهو مسندها.. سول على الطبيبة لي قالت ليه ختو ولقاها بالفعل كاتسناهوم ودخلو بزوج عندها..داتها باش تفحصها وبقا هو جاالس فبلاصتو كيحرك فرجليه ويشوف فساعتو ومرة مرة يحك لحيتو تبانت ليه الطبيبة راجعة جهتو هي ورحيل لي جلسات جنبو..
نوح:(بخشونة)أمدار؟
ط: لفحوصات الأولية تبين بلي عندها مشكيل فالمعدة هو السباب ديال ردان والحموضة لي كاطلع ليها وغالبا مغايكون عندها التهاب وباش حنا نحيدو الشك غايخصنا نديرو لمريضة "gastroscopy" لي هو عبارة على منظار تتكون فيه واحد لكاميرا لي تايقدر يصور لينا الجهاز الهظمي العلوي.. غاندخلو ليها داك الأنبوب ففمها صغير لي غادي يحدد لينا بلاصة الإلتهاب لي عندها وغانحيدو ليها واحد لعينة مغاتحسش بيها نهائيا غانسيفطوها لابو باش نعرفو نوع الإلتهاب لي عندها.. هي مكايناش خطورة نهائيا ومغاتحسش بيه حيت غادي نعطيوها كالمو وكيف قلت ليك هاد ل "gastroscopy" ماشي شي حاجة خطيرة لي تخافي منها الالة ومغاتحسيش بيها گااع
نوح:(حط يديه على يد رحيل لي جامعة فحجرها وزير عليها ونطق بجدية) نديروها دابا ؟
ط:وي لكانت لمريضة واجدة نديروها
ضار جهة رحيل لي شافت فيه وهي مخلوعة فاش سمعات بلي غاديخلو ليها داكشي ففمها تخلعات وبانت فيها فوجهها.. شد وجهها بين يديه ونطق بهدوء وحنية:الفثنة ديالي ماتخافيش
رحيل:(رمشات بعويناتها) واش ضروري ماديري ليا هاد لgastroscopy؟
نوح:سمعتيها اش قاالت ضروري منو متخاافيش أناا معااك
هز يديها وباسها فلدااخل وهي تنهدات.. خايفة ومخلوعة ولكن كلامو طمنها.. رجعات الطبيبة باش تديها لبلاصة فين غاتم لعملية لي هي بسيطة ومكتاخدش وقت بزاف وناض معاها تانوح لي مبغااش يخليها وتاطبيبة خلاتو يدخل... نعسوها فوق لبياص وهي تاتشوف فديك التلفازة لي كانت مطفية وكاضور عينيها ونوح فوق راسها مكمش حجبانو.. بداو كيقادو ليها المسائل ويشوف ضربات القلب و التنفس ديالها وضغط الدم تاهو..جات لبنت لي ضربات ليها كالمو فدراعهاا تاترخات ونعسوها على جنبها ليسر.. حلو ليها فمها وجات الطبيبة بدات تاتخشي ليها داك لمنظار بشوية وتتعاونها لفرملية تاهي.. عين نوح عليها وفنفس الوقت كيشوف فديك التلفازة لي تاتبين لداخل ديالها شنو فيه وطبيية دايرة نضيضرات ومركزة مع شنو كاتشوف فالتلفازة..
مخداتش العملية وقت طويل وخداو ليها واحد لعينية من لبلاصة لي عندها فيها الإلتهاب باش يسيفطوها لابو.. خرجو ليها داك المنظار وخلاوها تستارح تما واحد ساعة.. كانت حاسة بحلقها ضرها شوية وطبعا شي عادي تحس بهادشي..
نوح:(باس جبهتها) كاضرك شي حاجة؟
رحيل:(حطات يديها على حلقها وماهضراتش)
نوح:(كايخشي ليها بصبعو شعرها لي باين جهة حنيكاتها ونطق بحنية)ماعليش دابا تبرااي نمشي ندوي مع الطبيبة ونرجع واخا
حركات راسها باه وهو خرج مور ماخلى ليها تلفونو باش تونس بيه.. كانت متكية تاسمعات تلفونو صونى بنمرة رحمة لي مدخلها ب "يمّا" عضات على شفايفها وخلات التلفون تيصوني تايجي ويهضر معاها.. مدة ماطويلاش ورجع عندها..
رحيل:(بصوت خافت)ماماك صونات
عطاتو تلفونو وهو عيط ليها فلبلاصة:ألو يمّا... وي واحد شوية ونجيو.. تانجي ونهضرو الله يعاون..
جر الكرسي وجلس جنبها وهي ضورات وجهها ونطقات:شنو قالت ليك الطبيبة
نوح:سيفطو التحليلة لابو وكتبات ليك شي دوا تاخديه دابا وعطاتك تاواحد الريجيم فالماكلة وملي يخرجو تحاليل نرجعو تاني عندها
رحيل:واخا
بقاو تما تاحسات براسها مزيان عاد ناضت جلسات قادات زيفها وخرجات وهي شادة فيديه.. شكرو الطبيبة وخرجو من تم ركبو فطوموبيل وشدو الطريق لفرماسيان خداو الدوا عاد رجعو لرياض لقاو كلشي تيتسنى باغي يعرف واش داكشي لي طاح فبالهوم هو لي كاين..
رحمة:(شافت فيهوم وقالت بهدوء) شنو قالو ليكوم اولدي
نوح:(مدرع رحيل وقال بهدوء) عندها ميكروب فلمعدة هو السباب
سناء:هاااا اوا الله يشافيك
رحيل:آمين شكرا
نوح:(شاف فبيسان وقال بهدوء)علمي السعدية دير ليها شي حاجة تاكلها تكون دلفوار باش ماترجعش تنوض عليها لمعدة
بيسان:واخا
نوح:(شاف فرحيل وقال) نطلعو لفوق ترتاحي حسن
رحيل:(ضورات عينيها عليهوم)فين سيدرا؟
بيسان:راه فالبيت ديالها
طلعو لفوق ورحيل كانت غاتمشي لبيت سيدرا ساعة نطق نوح:أنا غانجيبها ليك
تبسمات ليه ومشات لجناحها تبدل وهو مشى عند سيدرا لقاها مكسلة فوق النموسية مكمشة حجبانهاا ومدلية شنايفها..
نوح:(تبسم ليها بحنية)تاتبيرت إينو
سيدرا:(ناضت لعندو ونطقات بسرعة)ماي بلو آيز فين مامي؟
نوح:(هزها وباسها فحنكها)زيدي نمشيو عند ماماك
داها لعندها لقاها بدلات حوايجها ببيجامة مبردة حيت لبيت فيه لاكليم.. نزل سيدرا لي مشات تاتجري عندها عنقاتها وباستها وتارحيل هزاتها تاتبوس فيها.. تبسم بلخف وهز حوايجو من دريسينغ عاد مشى يدوش وهي جلسات مع بنتها لي تاتسول فيها وتاطمن عليها مسكينة تخلعات قبيلة..
رحيل:(هزات تلفونها لي كان تيصوني بسمية أسماء) أهلا صافا
أسماء:واغبرتي اصاحبتي نهار كولو ونتي مبايناش
رحيل:لهلا يوريك اش وقع
أسماء:(بخوف)يااك لبااس مالكي؟؟
رحيل:(بدات تتعاود ليها شنو طرا) أول مرة دير ليها هاد لفعايل
أسماء:ياكما شي حاجة گغاف بعدا
رحيل:خرجات ليا شي دوا والتحليلة باقي ماعرفتش اش فيها
أسماء:ردي لبال لراسك غدا ونجيو عندك حيت دابا مشى لحال واخا
رحيل:مرحبا بيكووم
قطعات معاها أسماء ومكملاتش خمسة دقايق صونى عليها باها كيسول فيها وهي عاطياه لخاطر تتعاود ليه ودوز ليها تانيرت تاهي..
خرج نوح من لحمام وريحة لباندوش وشامبوان عاطية منو.. جلس حدا رحيل مدرعها وهي تادوي مع ريان تاسالات وقطعات وشافت فيه:سلمو عليك غدا غايجيو عندي
نوح:مرحبا بيهوم الدار دارهوم
جلسو مجمعين بتلاتة تاجات السعدية جايبة ليها لماكلة لي كانت خضرا مفورة مع دجاج.. كلات داكشي لي قدات عليه وناضت غسلات سنانها وشربات دواها ومشات تنعس..
كان جالس فالصالة لي عندهوم فالجناح والبيسي فوق الطبيلة خدام بيه.. جات عندو سيدرا وهي هازة واحد لملف وجارة واحد الشكارة ديال أدوات الرسم درحيل.. هز فيها عينز وكمش حجبانو:فين جبتي داكشي؟
سيدرا:(حطاتهوم فوق الطبلة وقالت)هادو دمامي غناخد وريقات باش نرسم
نوح:(سبق ليه وشافهوم فالدريسينغ وعمرو قلبهوم)شكون وراك بلاصتهوم؟
سيدرا:أنا شفت مامي حطاتهوم تما
ضحك على شطارتها ورجع تيخدم فالبيسي وهي تاتقلب على لوراق بويض خاويين مع رحيل جامعة كلشي فداك لملف.. بدات تاتقلب تاطاحت ليها ورقة حدا رجل نوح لي تحنى هزها باش يرجعها ليها ساعة لفت انتباهو داكشي لي لمح.. قلبها جهتو وهز حاجبو لسما فاش شاف صورتو مرسومة بدقة لي صدماتو بحال شي تصويرة غير هادي مرسومة.. كمش حجبانو كيشوف فيها ساهي تاسمع صوت سيدرا لي نطقات بحماس:مامي هي لي رسماتها ماي بلو آيز ديك نهاريات وخباتها هنا ولكن أنا شفتهاا (كركرات ببرائة) عرفتي ماي بلو آيز واحد النهاريات كنت نيني ياكا وفقت حيت فيا عطيشات وأنا نشوف مامي كانت هزاها تاتشوف فيها..
كان تيتسنط لكلامها بتركيز وهي تتعاود ليه بطفولية وتاتشرح ليه.. رجع تايشوف فديك الورقة وتايتسائل وقتاش غاتكون رسماتها؟؟ رجعات سيدرا مبعد ماخوات لمزيودة تاترسم وهو دار بناقص لخدمة.. رجع لور وعينو غير على ديك الرسمة.. تا داز لوقت وسيدرا بدا يجيها النعاس..
سيدرا:(تفوهات)ماي بلو آيز بغيت نيني
نوح:(حط ديك لورقة وناض هازها)يالاه
داها لبيتها ولبسها بيجامتها وغير حطها غفات مع عياات.. خلى ليها لفيوز مشعول..
غير دخل عينو تحطات على ديك التصويرة تنهد وبدا كيجمع روينة لي خلات سيدرا وشاف فرسمتها الطفولية وتبسم.. جمع كلشي من غير ديك الرسمة ورجع كل حاجة لبلاصتها..
حلات عينيها فاش حسات بيه تخشى جنبها وضارت لجهتو نطقات بخفوت:سيدرا نعسات؟
نوح:اه (تحدر باسها فشفتها قبلة سطحية) باقي كاضرك لمعدة؟
رحيل:لا (هزات فيه عويناتها تترمش)تعشيتي؟
نوح:مرشقاش ليا
رحيل:وشنو تنعس بلاعشاا
نوح:(خشى راسو فعنقها وعضها)نتعشى بيك
ضحكات رحيل وحطات يديها على عنقو تاتمررها بشوية ونطقات بخفوت: ماتهملش تانتا صحتك
نوح:(هز راسو وشاف فيها بعيون معسلين) خايفة عليا
رحيل:(نطقات بهمس)ضروري نخاف عليك
جرئتو معاها خلاتها بلاماتحس تبدا تزول فالحواجز لي كانو بيناتهوم قبل.. والحشمة ديالها منو بدات تتنقص وتاتقدر دابا تقول مشاعرها ليه وتبين اهتمامها من جهتو.. مد يديه وحطها على وجهها وبدا كيرد ليها شعرها ورى ودنيها وهي تاتشوف فيه وساكتة..
نوح:(بخفوت)مشات لكافرة بالله
رحيل:(تبسمات وحركات راسها باه)
معاودش هضر حدو تحدر جهة شفايفها واخدهوم فقبلة عميقة خلاتها تنغامس معاه وتبادلو مشاعرها فديك القبلة لي كانت قوية لدرجة حسات براسها شوية وتخشى فالمخدة موراها.. تيجوب تغرها ويمص ريقها وهي بين يديه تاطلق آهات خافتة.. معرفاتش وقتاش زول ليها لبيجامة وجا فوق منهاا تيقبل كل إنش من جسمها.. داعبها تاخلاهاا تنسى كلشي وتعيش اللحظة بكل جوارحها.. صوت الهمسات والآهات لي كايتسمعو أثناء علاقتهوم مالية البيت لي كان كالم ومشعولين فيه غير ضواو الفيووز.. اشتياقو ليها فهاد الأيام فرغو فيهاا وشدها شدة العمة فالظلمة.. مابعد عليها تاحس بيها عيااات ومبقااتش قادرة تهز الراس.. نعس فوق النموسية وصدرو كيطلع وينهج وجرها عندو تانعسها فوق منو.. دفنات وجهها فصدرو وجهها حمر.. دفء جسمو ودفء جسمها خلى الررغبة تحضر تاني.. ولكن صبر عليها تاترجع نفسها هو لول وترتاح وليل باقي طويل ولحكاية باقا مسالات وعمرها أصلا غتسالي.. يديه تاتلمس جسمها العاري لي فوق منو ولغطا مغطيهوم بزوج وبصوت هامس نطق:رحيييل شوفي فيا
هزات راسها من صدرو وشافت فيه وهي مكمشة حجبانها.. مولف تايعيط ليها بسميتها فاش كايكون معصب منها ولاباغي يدوي فشي موضوع جدي ومهم..
رحيل:(رمشات فيه عويناتها) وي
نوح:(حط يديه على راسها وقال بخفوت) شفت الرسمة لي رسمتي ليا
سرطات رحيل ريقها وحطات يديها بزوج فوق صدرو وتهزات عليه شوية.. ديك الرسمة كاانت رسماتها نهار عتقها فالغابة.. كانت رسمات غير لعينين لي شافت وخلات الرسمة هاكا ولكن نهار شافت ملامح وجهو وكملات الصورة لي كانت مضببة فمخيلتها لي كل ليلة كانت تاتحاول تكملها ولكن كانت تتفشل.. رسماتها وخلاتها عندها وكل مرة فاش تتحس بالحنين ليه كانت تاتهزها وتبقا تشوف فيها..
نوح:(نطق بهدوء)وقتاش رسمتيها؟
كانت متوقعة رحيل سؤالو ليها حيت شي طبيعي يسولها.. سكتات وهي تاتسول راسها وتقول واش نصارحو ونقولها ليه ولانسكت ونخرج راسي بشي كدبة.. سهات وهو لاحظ سهوة ديالها وسكت.. رجعات هزات عينيها فيه ونطقات بهدوء وهي مقررة تعلمو بلي كاين وتصارحو.. باغا تشوف ردة فعلو ملي يعرفها هي نفسها لي عتق فالغابة..
رحيل:(حدرات راسها وبدات تاتلعب فزغيبات لي فصدرو وقالت بخفوت) ماعرفتش واش غاتبقا عاقل ولكن أنا عقلت وعمري نسيت داك النهار (شافت فيه) نهار الغابة فاش كانت واحد لبنت هاربة من شي رجاال تابعينها تاجاا واحد السيد وعتقها من بين يديهوم مكانش تايعرفها ولكن خاطر بحياتو على قبلها وخرجها من لغابة.. هي بقات عاقلة علي عينيه لي لمحاتهوم واخا كان الظلام وسط داك لخوف كولو لي كانت حاسة بيه شوفتو ليها طمناتها وكلامو لي قال حسسها بالأمان معااه فاش شد فيديها وقال ليها ماتخافيش أنا معااك (عينيها تغرغرات) ديك لبنت كانت أنا.. أنا هي لي عتقتي فالغابة ديك لمرة انوح
نوح:(بنظرة هادئة وبصوت هامس نطق)عاارف
ملامح الصدمة بانت على وجه رحيل لي تكعدات من بلاصتها تاتلوي عليها ليزار باش تستر راسها وعينيها فقلب عينيه مبهوضة من لكلمة لي سمعاتو نطق بيها.. جلسات قدامو وهي مخرجة عينيها فيه هو لي كان باقي على نعستو كيشوف فيها وساكت..
رحيل:(رمشات بعينيها ونطقات بصوت باين فيه ممتيقاش) مافهمتش كيفااش عاارف
نوح:(حط يديه ورى راسو وقال بنفس الهدوء) عارف بلي هاديك لبنت كانت نتي
رحيل:(حطات يديها على راسها) وبااش عرفتيني او وجهي داك نهار كان حالتو أنا براسي فاش شفت وجهي فلمرايا ماعرفتش رااسي (شافت فيه وقالت بتساؤل) ونتا أصلا شنو كنتي تادير تم..
🔙🔙
غادي فطوموبيل طالق موسيقى غربية ومنقص صوتها وحال زاج لي جنبو مخلي داك لبرد يضرب فيه ويستنشق ريحة التراب المسقي بالشتا لي كانت تاتنقط.. مخرج يديه وسايگ بهدوء تاسمع تلفونو صونى وكان عثمان.. طلق سبيكر ونطق بهدوء:اش كاين
عثمان:فينك اولد لحاج؟
نوح:طالع لفيرمة علاش؟
عثمان:عيط ليا جواد السلعة وصلات وخصني ساروت لگاراج ضروري
نوح:(كمش حجبانو)ياك السلعة قلنا غاتوصل غدا؟
عثمان:جاابها قبل حيت عندو سلعة خرى خص يفرقها لماليها وسبقنا حنا راك عارف..فين وصلتي؟
نوح:باقي فطريق
عثمان:واعرفتي شدير سيفط ليا لوكاليزاسيون وأنا نجي ناخد من عندك الساروت ونتا كمل طريقك لفيرمة
نوح:سير عالله
قطع نوح أو وقف لجيپ ديالو جنب الطريق.. هز تلفونو سيفط ليه لوكاليزاسيون وسكت طوموبيل كيتسناه.. ظلام محيط بيه من كلى الجوانب..والطريق كانت خاوية وجنبو لغابة وحس لبشاار مقطوع وقليل فين تادوز شي طوموبيل.. حل لباب ونزل ضارب فيه داك لبرد لي دخل ليه مع لعضام.. مالبسش جاكيط وبقا هاكا بشوميز جبد من جيبو باكية دلگارو وشعلو كيكميه وعينو يضورو هنا ولهيه كيتسنى فعثماان.. مدة طويلة تبانت ليه طوموبيل عثمان وقفات جنبو ونزل منها مكبط وخاشي يديه فجياب المونطو..
عثمان:واش اولد لحاج مافيكش لبرد
نوح:(مد ليه السوارت)شد
عثمان:يالاه غانمشي دابا تانعاود نعيط ليك واخا
حرك ليه راسو وركب عثمان فطوموبيلتو ومشى ونوح حل لباب باش يركب تاهو ساعة لفت انتباهو داك الضو لي تيبان ليه كيضرب فجهة لغابة.. فلوهلة لولة ظن أنه كيتخيل ولكن فاش تكرر داك الضو هو كمش حجبانو وسد طوموبيلتو وقرب تايشوف وييتأكد..حرك راسو ومع بغى يحل لباب رجع شاف فجهة داك الضو لي كيبان ليه تايتحرك وغالبا شي حد شاعل لبيل مضوي بيه ويقدر يكون شي واحد حاصل تم وخصو المساعدة.. خصوصا ديك لبلاصة فين هو خايبة وخاوية...
هز تلفونو ولكونطاكط وسد الطوموبيل وتم داخل جهة لغابة وهو مضوي لبيل ديال التلفون.. غادي وفنفس لوقت تيحفظ الطريق باش مايتجلاش.. وكل مرة يشوف فالسما جهة داك الضو لي مرة مرة يمشي ويكمل طريقو تالمح جسد مرا واقفة ورى واحد الشجرة تاطل وشعرها مطلوق ومن حالتها باينة لعمى بلي هربانة لشي حد.. طفى لبيل وكمل طريقو جهتها تاوقف وراها وفتفس اللحظة سمع لحس دشي حد جاي وبلامايفكر زوج دلمرات كان مضور يديه على خصرها وليد الثانية حطها على شفايفها وقرب جهتها ناطق بهمس:ششش ماتخافيش أنا معاك
رجفة جسمها بين يديه وضفارها لي تغرسو فيدو خلاوه يعرف بلي هي خايفة وهربانة من شي حد.. وفاش شاف داك لخيال جاي جهتو رجع نطق بنفس لهمس:قطعي لحس
حررها ومشى بسرعة هجم على هاداك وضربو.. وفديك اللحظة نيتو كانت يعاونها واخا مكيعرفهاش.. ميمكنش يخليها هنا ويمشي بضمير مرتااح وهو عارف بلي شي وحدة هاجمين عليها شي وحدين وناوين ليها على الشر.. مد ليها يديه تاشدات فيه وغير شاف البلاصة آمنة جرى بيها باش يخرجو من تم.. معارفش شحال هوما وفنفس لوقت راد لباال لايخرج ليه شي حد من الجنب.. كان راجع من نفس الطريق لي جا منها حيت عقل عليها.. تاسمع تاني لحس وطلق يديها وتبع لحس وهو حادر راسو تابان ليه واحد اخر جاي جهتو وهجم عليه تايضرب فيه.. ماطلقو تاخلاه مهلوك ماباقيش يقدر ينوض.. رجع جهتها وبانت ليه جالسة تاتبكي وحادرة راسها.. مشافش فوجهها نهائيا حيت ديك الساعة همو يخرجها ويعتقها..
نوح:(بهمس رجولي) عطيني يديك
فاش مدات ليه يديها شدها وكمل طريقو تابدا كيحس بيها تاتقل فمشيتها.. ضار لعندها وبانت ليه حادرة راسها لقدام ونطقات بصوت تقيل:مابقي تش قادرة
فاش شافها غاطيح مد يدو بزربة تلقى جسدها وسط يديه وسخفات...طيحتها كانت معدبة شي لي خلاه يهزهااا بين يديه وهي مغيبة وشعرها كيلعب موراها مع كل حركة تحركهااا.. مكمل طريقو لي عاقل عليهاا وهي بين يديه محساش باشنو ضااااير بيها.. مدة من وكان خرج من لغاااابة فاتجااااه طوموبيلتو لي كان موقفها جنب الطريق.. سندها عليه وتما عاد قدر يلمح وجهها لي كان مش_وه بالضرب تامبقاوش ملامحها باينين.. وعينيها تنفخات ليها وحالتها حالة.. حل لباب ونعسها فلور مقادها ورجع ركب فطوموبيلتو مخدم لاكليم وشد بيها طريق لسبيطار فسن خدامة بيسان.. كان كل مرة يهز عينو يشوف واش فاقت ولا لا.. مكمش حجبانو وعينيه زرقين تيبانو مظلمين.. معارفش شكون هاد لحي_وان لي ضربها بهاد لعنف تاخلاها هاكا.. كان معصب وتيعض على شفتو بنابو وهو كيشوف فانعكاسها من لمرايا ديال طوموبيل كيف ناعسة بدون حراك..
طريق كولها وهو كيتأكد واش فاقت واش تحركات ساعة والو.. ماعرفش شكون هاد لحي_وان لي دار ليها هاكا وحقد عليه مزيان وهو أعدى حاجة عندو لي يمد يديه على شي مرا.. وصل لسبيطار وبلاصا طوموبيلتو حدا لباب ونزل منها بزربة وحل لباب لوراني وخرجها وهي باقي غايبة بين يديه.. رجع شاف فوجهها ودخل لداخل وهو ضارب لحداش فحجبانو.. شافوه لفرمليين وجابو ليه لبيااص فين حطها وداوها وفنفس الوقت صونى تلفونو وكان بّاسالم لي عيط ليه..
نوح:(بخشونة)نعام ابّاسالم
بّاسالم:أيور تزاد عليه لحال اولد لحاج
نوح:(خرج من سبيطار بزربة)أنا جاااي
قطع ومشى جهة طوموبيلتو ركب غادي لفيرمة.. هو دابا دار لي عليه عتقها وجابها لسبيطار..
من داك النهار وهي فبالو وفيما يسهى يتفكرها ويسول راسو شكون هي واش كانت تادير تم.. الحياة كانت ماشية بروتينها ومع لخدمة والمشاكيل ديالها وضهور رحيل فحياتو خلاه ينسى لموضوع بصفة نهائية..
كان بوحدو فالشومبر مور مامشاو لعائلة.. متكي ومغمض عينيه كيتفكر الشي لي وقع معاه ملي تضرب بموس ولكلام لي سمعو من رحيل قبل مايغيب..
"ماتخافش أنا معاك" كلامها أوطوماتيكمو فكرو فهاديك لي عاون فلغابة ولي شغلات تفكيرو لأيام.. الشك دخل لعقلو باغي يعرف واش داكشي لي طاح فبالو واش بصح ولاغير صدفة وصااف.. ملي خرج من السبيطار ورتااح ورجع صحتو قرر يدير الشي لي كان فبالو.. دخل لسبيطار غادي لبيرو بيسان لي غير شافتو تبسمات وناضت عنقاتو وقالت:حبيبي كيف بقيتي؟
نوح:(خربق ليها شعرها)مزياان كليتي غداك؟
بيسان:اه كليت جلس
نوح:(شاف فيها وقال بدون مقدمات) يقدرو يعطيوني معلومات ديال شي مريض فلغيسيبسيون؟
بيسان:(بجدية) لا كيف تاتعرف داكشي تايكون خاص ومتعلق بالمريض علاش واش باغي تسول على شي واحد؟
نوح:(حرك راسو)باغي نتأكد من واحد لحاجة تقدري تعاوني خوك ؟
بيسان:هي لولة ولكن فاش غانقدر نعاونك؟
نوح:باغي معلومات على واحد لمريض جا لهنا نهار ** فشهر ** الساعة **
كان عاقل على النهار والساعة ومانسيهش واخا دازت مدة عليه.. ناضت بيسان وهو تبعها تاوقفو فلغيسيبسيون وهي تبسم لبنت لي تم ونطقات:نورة باغياك دخلي لسجلات لمرض وتشوفي ليا لمريض لي دخل عندنا نهار (عطاتها لادات والساعة)
حركات نورة راسها ودخلات لبيسي تاطابي فيه لادات باش طلع ليها لاليست ديال المرضى لي تايكونو مسجلين عندهوم.. كان واقف نوح جنبها مكمش حجبانو كيتسنى يعرف ويرضي فضولو ويقطع شكو باليقين..
نورة:دخلو ربعة دلمرضى فديك لوقت ادكتور
بيسان:قولي ليا سمياتهوم
نورة: سعد *** / هيثم *** / حسن ****/ رحيل التجاني
مجرد ماسمع سميتها ديك التكميشة لي كان داير تفكاات وارتااح فاش عرفها هي نفسها ديك لبنت..
بيسان:واخا شكرا
شافت فنوح لي تبسم ليها وقال:صافي غير رجعي لخدمتك دابا نتلاقاو فدار
ماسولاتوش نهائيا حيت هي عارفة بلي خوها ماباغيش يدوي.. تبسمات ليه ومشات تكمل خدمتها وهو خرج من السبيطار وركب طوموبيلتو لجيپ وبقا جالس ساكت وساهي.. هز عينو فالكراسى لورانين وعقلو تاني خدام تيفكر تنهد ونطق بصوت هامس:شنو كنتي تادير تم الفثنة
🔜🔜
كلامو خلاها تفكر كل دوك الأحداث لي كان تيعاود ليه وهي مبهوضة من كلامو.. يعني من شحال هادي وهو عارفها هي نفس لي عاون وعتق وعمرو قالها ولابين ليه..
رحيل:وعلاش ماقلتيهاش لياا؟
نوح:(هز فيها حاجبو) اش غانگول نتي لي نوغمالمو خصك تهضري وتعلميني حيت داكشي متعلق بيك نتي والحوايج لي تايخصوك نتي لي خاص تعاوديهوم ليا ونعرفهوم منك ونتي ماهضرتيش وأنا مخليك على راحتك..
سكتات رحيل وهي مكمشة حجبانها معاوداتش هضرات وأصلا مبقاتش باغا تدوي فلموضوع حيت عارفة لاتعمقات فيه غايتجبد المستخبي وهي صراحة مباغاش يتجبد ولاهو يعرف شي حاجة على زواجها وداكشي لي دوزات.. داخليا مزال ممستاعداش دير هاد لخطوة عليها مأجلاها.. كاضور عينيها هنا ولهيه وباين فيها سرحاات وهو عينو عليها حاضيها كيف النمس.
رحيل(شوفاتو وثروها ونطقات باش تلف ليه لموضوع) غانمشي ندوش
نوح:ندوشو بزوج نيت قريب الفجر يأدن نصليو ونعسو
رحيل:واخا
ناضت سابقاه جارة داك ليزار ودخلات لحمام وهو وراها.. كملو ليلتهوم فالحمام عااد دوش ليها وصلاو الفجر عاد شدو بلايصهوم جنب بعض..
رحيل:(هزات عينيهت فيه لقاتو مغمض عينيه) نوح نعستي
نوح:(جاوبها وهو على وضعيتو)همم
رحيل:نتا عارف غدا دارنا غايجيو اش بان ليك يجيو لعشا ونيت ندير ليهوم عراضة حيت أول مرة غايزوروني مور الزواج
نوح:(حل عينو وشاف فيها بجدية)رحييل هادي دارك وهادوك واليديك مرحبا بيهوم فأي وقت وديري لي بغيتي مكاين لاش تشاوري معايا مانبقااش كل مرة نعاودها ليك
رحيل:(حطات يديها على صدرو)عارفة غير باغا نعلمك وصاف
نوح:ديري لي بان ليك والاخصات شي حاجة علميني (ضار جهتها وحط راسو على صدرها وقال بهدوء) نعسي الفثنة راه مشى لحال
ملي فاقت أول حاجة دارتها عيطات لمها وعرضات عليهوم لعشا كاملين وتاإسلام وماماه وخلات مها هي تكلف وتعيط ليه بحكم لحساسية ديال نوح من جهتو ولات تتحاول ماأمكن دير حدود بيناتهوم باش ماتجبدش صداع على راسها..
دوزات نهارها مع رحمة وسناء وزاينة وعطاتهوم وقتها وتتحاول تزول ديك لحساسية بينها وبين رحمة.. علماتهوم بلي دارهوم غايجيو عندها لعشا وكلفات لبنات بلعشا وطبعا عاوناتهوم.. وسيدرا كل شوية ضور وتسولها وقتاش يجي بّاديدي متحمسة حيت غايجي عندها..
----
كان خارج من لاصال لابس قبية وهاز شكارة وباين فيه عيان باغي غير ينعس.. جاي فالطريق بوحدو كيف ديما كيشوف قدامو ومكيتسوق لحد.. كان غادي فوق الطروطوار تالفت انتباهو صوت شي قط باين فيه حاصل فشي قنت.. كمش حجبانو وبدا كيضور راسو ويشوف بين الطوموبيلات لي واقفين جنب الشانطي متبع مصدر الصوت تابان ليه واحد لقط مخشي تحت واحد طوموبيل حالتو مسكين وغير تايبقا يغوت.. مد يديه وهزو وبانت ليه رجلو مهرسة باين داز عليه شي حد وعينيه مسدودين وحالتو مسكين بلوسخ والضعف.. مسح زين العابدين على ضهرو وناض هازو وتمشى لعند واحد مول لحانوت تم خدا كرطونة ودارو فيها وهزها وشد طاكسي غادي لعند لڤيطغينيغ باش يعالجو.. قادو ليه رجلو لمهرسة ودارو ليه تقاطر لعنينه ونقاوه وضربو ليه لڤاكسان ديالو حيت باغي يديه عندو.. هزو تاني فديك لكرطونة وتم راجع لدار.. كان بدا الحال تيظلام وغير وصل لحومة وهو يقشع باه يالاه نازل من طوموبيلتو.. ضار نوح شاف فيه وتبسم ليه وهو مكمش حجبانو
نوح:(حط يديه على كتف ولدو وقال بتبسيمة) يالاه جيتي من لاصال
زين العابدين:(بحكم عربيتو باقي ممقاداش فجاوبو بالإنجليزية)اه ولقيت فطريقي هاد لقط ديتو لعند لڤيطغينيغ باش يداويه
نوح:(شاف فلكرطونة) مزيان يالاه ندخلو وعطيه ياكل باش يرجع صحتو
دخلو بزوج ونوح طلع نيشان لفوق وزين العابدين حط لكرطونة جنب لخصة ومشى تاهو طلع لبيتو تايجري هز قبية من دريسينغ ورجع نازل لتحت عند داك لقطيط هزو من لكرطونة وفرش ليه ديك لقبية وحطو فيه ومشى جاب ليه لحليب فواحد طويسة ولفرماج ولما وحطو ليه باش ياكل.. جالس قفازي وحاضيه واش نيت تياكل ولا لا تابانت ليه إيڤانا جايا جهتو تاتمختر فمشيتها مع غليوضة.. باين فيها لعز وتهلو قربات لعندو بدات تتحاك معاه كيف مولفة دير مع كلشي وهو تايدوز يدو على ضهرها.. قربات لعند داك لقط وتحنات تاتشرب معاه لحليب.. كمش زين العابدين حجبانو ومشى جاب ليها طويسة ديالها بوحدها حيت بانت ليه هرفات عليه.. جرها وحط ليها طويسة وهي خلاتها ومشات تاتي لعند ديك الطاسة لي كيشرب منها داك لقط.. بقا حاضيهوم تاسمع صوتها وهي نازلة من دروج بقبية ميني فونطخ ومع سروالها وسبادري وشعرها مخلياه على راحتو وبدا كيطوال ليها..
سيدرا:(بصوت عالي) بّاديدي بّاديدي بّاديدي
تاتجري وتغوت ودازت جنبو كي زواق تاوصلات جهة لباب وضار فاش سمع صوت لهضرة وبانت ليه سيدرا معلقة فإدريس كيف لقملة تاتبوس فيه ومامخلياهش گاع يسلم على رحيل لي كانت نازلة وتبعاها بقفطان ديال الدار واسع وحجابها.. ناض مشى لحمام غسل يديه ورجع لعندهوم لقى نوح تاهو نزل.. دخلو لصالة لكبيرة وحيت كاين غير لعائلة تجمعو فبلاصة وحدة غير رجال جلسو بعاد شوية على النسا.. دخل زين العابدين وسلم عليهوم وقرب جهة إدريس لي جالس ومجلس سيدرا فحجرو تاتبوس فيه وتقيس شعرو ولحيتو وهو تايسول فيها.. تبسم ليه إدريس وهو مشى جلس بعيد مربع يديه وكيف لعادة ساكت ومكيدوي مع حد..
عند النسا كانت تانيرت تاتسول فرحيل على صحتها وهي جالسة جنبها وشادة فيديها..
رحيل: حمدلله دابا مزيان ومبقيتش كانرد وتاديك لحموضة لي كانت تاطلع ليا مابقاتش
تانيرت:والتحاليل خرجو؟
رحيل:اه ليوم عيطات الطبيبة لنوح وعلماتو وهو فاش خرج مشى عندها قالت ليه غير مكروب وكتبات ليا الدوا دلمكروب وجابو ليا
تانيرت:اوا حمدلله اماما
تسمع صوت رجولي برا وشوية تم داخل عندهوم اليازيد لي حل عينيه بتفاجأ فاش بانت ليه غزلان لي بدات ضور عينيها وضربات الطم.. دخل سلم على الرجال وجلس جنب نوح ومحمد طه غير شافو بحال لاشاف شي جن.. أما سناء فغير سمعات صوتو قبل مايدخل بلاماتشعر بدات تتقاد فشعرها وفجلستها وتاتشوف فيه هو لي ماعبرهاش كيف الآونة الأخيرة.. وهادشي خلاها تحس بالألم فقلبها وماحملاتش هاد لحالة وهاد التصرف الجديد لي ولى كيدير معاها.. رجعو لبنات مجمعين بيناتهوم وغزلان معاوداتش شافت جهتو تاتعاود لرحيل على العراضة دغدا لي دايرة صاحبتها..
رحيل: صراحة ماعرفتش خصني نسول نوح هو لول وغالبا مغايبغيش
أسماء:هانتي نعطيك لحل فالليل لبسي شي شوميز دونوي من دوك الماسخين لي شريت ليك وديري ليه ليلة حمراء وحيدي لحشمة وشوفي لمقالش ليك اه اجي دفلي عليا
ضحكو لبنات ونساو راسهوم ومحمد طه غير سمع ضحكتها وشاف عينين ليازيد لي هربو جهتها وهو يكعى وجبد تلفونو سيفط ليها مساج وفاش شافها معبراتوش صونى ليها وبقا تايشوف فيها تاشعلات تلفون وهزات عينيها ورجعات شافت فتلفونها وفلمساج لي مسيفط ليها فيه كلمة وحدة
محمد طه 📩 "ماضحكيش"
هزات حاجبها فالسما من ديك لكلمة لي سيفط ليها وهزات راسها تاتشوف فيه.. كان حاضيها ومخنزر فيها وهي حركات راسها بلاحول ورجعات تلفون لصاكها ماجاوباتوش وماتسوقاتش ليه.. اخر همها هي تخليه يمرضها ويعصبها تاني بداك لهبال لي كيجيه عليها مرة مرة.. رجعات تادوي مع لبنات ودغيا نسات اش كتب عكسو هو لي زاد تعصب فاش شاف لامبالاة ديالها.. ولتاني مرة مكديرش بهضرتو وتاتعامل معاه زايد ناقص فحياتها.. زفر النفس وبدا كيتململ فبلاصتو وفكل مرة يشوف فاليازيد واش تايشوف فيها تاهو ولا لا..
دخلات بيسان لي يالاه جات من لخدمة عندهوم سلمات عليهوم وضارت شافت فريان فنظرة خاطفة قبل ماترجع تجلس جنب لبنات..
أسماء:واغبورات اصاحبتي
بيسان:راك عارفة لخدمة مزيرة ويادوب تايكون عندي وقت فين نحك راسي (شافت فغزلان)مبروك كنت باغا نحضر لخطوبتك مي دوماج مقدرتش
غزلان:تال لعرس إن شاء الله وحضري
بيسان:ههه ضروري واخا نعرف نشد نهار هههه نخليكوم نمشي نبدل حوايجي ونرجع
هزات صاكها وخرجات وريان غير شافها مشات نااض تاهو داير السبة بلحمام.. طلعات بيسان لجناحها ومع جات تسد الباب حط ريان يديه ودفعها شوية ودخل.. خرجات فيه عينيها ونطقات بخوف:واش حماقيتي والاشافنا شي حد ولاخويا
ريان:ولد لحاج جالس مع نسيبو ممساليش (قرب جهتها وقال بجدية) شنو بلانك نتي اش هاد لفعايل تاديري
بيسان:(مخلوعة لايجي شي حد) اش كاندير ؟ وزايدون نتا لي بديتي وقلتي كلام ماخصوش يتقال
ريان:هضرنا بالضحك وندمتينا كون عرفتك هاكا كون گاعما ضحكت معاك
بيسان:ضحكك بااسل ودابا خرج اريان عفاااك
ريان:مخااارجش تااانوضحوو الأمور حيت هاد لمرض طلع لي فك_ري
بيسان:اش غانوضحوو وأصلا اش بيني وبينك
ريان:(خنزر فيها)من نيتك تتسولي اش بيناتنا؟ النهار لول قلت ليك ابنت الناس بلي نتي كتعجبيني وجيتك نيشان
بيسان:هادشي دالتصاحيب معاجبنيش ولاكنتي مولف بيه أنا لا
ريان:(قرب جهتها وقال بهدوء) اه مولف بيه ودوزت شلى بنات كنت غير مونس بيهوم وقتي ولكن نتي عمري فكرت فيك هاكا ونهار جيت ودويت معاك حيت باغي نتعرفو كثر وحيت قصدي شريف ماشي داكشي لي فبالك
بيسان:(توثرات من كلامو) أنا لي عندي قلتو خرج دابا
ريان:(شد يديها وجرها عندو تاقربات ليه كثر وقال بجدية) أناا باغيك ابيسان ومناويش نتفلى الانتي باغا نكملو وعلاقتنا تمشي بعيد جاوبيني فالليل ملي نعيط ليك والامجاوبتيش غانعرف بلي نتي مباغانيش وأنا غانحتارم قرارك وعمري غانضور باقي بساحتك لقرار ليك..
خلاها وخرج وهي بقات واقفة تاتشوف فيديها لي كان شاد ليها وتفكر هضرتو.. أول مرة تشوف جديتو وتشوف جانب اخر من شخصيتو لي عمرها شافتها.. ديما تاتشوفو ضاحك وضارب الدنيا بركلة وفاش قلب معاها لشخصيتو الجدية مغاتنكرش بلي حرك شي حاجة فيها.. عمرها بغات فحياتها وديما كانت مكرسة حياتها تتبني مستقبالها وراسها خواتو من داك الهيت دالتصاحيب ولبغو.. ملي تاتشوف لبنات صحباتها كانو تيعاودو ليها على لحب ولفرام وصحابهوم كيفاش تيعاملوهوم كانت مكتسوقش وفاش تايجي عندها شي واحد باغي يتصاحب تاتصدرو تاولاو يقولو عليها معقدة وهادشي ماتيحرك تاحاجة فداخلها حيت شخصيتها هاكا دايرة.. وبالفعل داتها فمستقبالها وحلمها تكون طبيبة فالتخصص لي باغا وغير شدات لبااك خوات المغرب ومشات تاتقرا فأستراليا.. وفاش تخرجات خدمات تما واحد لمدة عاد نزلات لمغرب واستقرات فيه.. تنهدات ومشات تبدل حوايجها وفنفس الوقت عقلها خدام تايحلل كلامو ليها..
دازت لعراضة فاعلة تاركة ورحيل كبرات بعائلتها لي أول مرة يجيو عندها مور ماتزوجات.. ماسخاتش بيهوم ولكن مشى لحال وخص يمشيو حيت غدا خدامين وتافقو لبنات بيناتهوم لكانت غاتمشي رحيل معاهوم غدا يتلاقاو فدار ويمشيو مجموعين..
--
وقفات طوموبيلة إدريس وموراها دإسلام قدام باب دار ونزل محمد طه وريان ورنيم وغزلان من عند إسلام لي شاف فمو لي نزلات تاهي وقربات جهة تانيرت لي تبسمات ليها:باتو عندنا ليوم
ممات إسلام:ولدي خدام غدا خليها تال نهار آخر
تانيرت:اوا قولي ليه يجيبك غدا فالصباح وهو غادي لخدمة حسن ماتبقايش وحدك فالدار
ممات إسلام:إن شاء الله (شدات يديها)سمعي اتانيرت نتي عارفة بلي ولينا عائلة دابا وجمعاتنا الحلوة والمرة وعمري شفت فيكوم شي عييب وخيركوم مع ولدي عمري نساه
تانيرت:الله ياودي راكي قلتيها حنا دابا عائلة
ممات إسلام:وحيت حنا عائلة جيت عندك وباغا نطلب منكوم بنتكوم أسماء لولدي إسلام على سنة الله ورسوله
كان جالس وعينو على مو لي بانت ليه تاتهضر مع تانيرت شوية بانت ليه جايا لجهتو.. ركبات وتحرك غادي لدار ومو كل مرة تشوف فيه وباينة باغا تقول ليه شي حاجة وهو حس بيها.. وصلو لدار وبلاصا طوموبيلتو عاد نزل شاد ليها يديها وهي غير تاتشوف فيه وباغا تهضر..دخلو لدار وحط سوارتو وشاف فيها هي لي جلسات فوق السداري تتزول الفولار تابقات ببوني..
إسلام:(ضار جهتها ونطق بهدوء) اش كاين الواليدة حالتك معجبانيش؟
مو:(جاتو نيشان) هضرة مع تانيرت وخطبت ليك أسماء
حل عينيه بصدمة من هضرتها لي فعفعاتو وعصباتو... وفنفس لوقت ماتيقش ااش سمع.. قرب جهة مو مخرج عينيه وقال ليها بعدم تصديق:عاودي اش قلتي؟؟
مو:لي سمعتي اولدي دويت مع تانيرت وخطبت ليك أسماء
إسلام:(حك لحيتو معصب) واش من نيتك الواليدة ياااك دويناا فهاد السوجي وقلت ليك أنا ماباغيش نتزوووج
مو:(خرجات فيه عينيها) لامتى غاتبقااا هاكا هااا واش عاجبااك حالتك اولدي عاااجبك تبقاا زوفري حياتك كلهاا خووتك كلهوم تزوجو تامن الصغير عليك راه بدارو وعندو زوج ولاد ونتااا بقا بوحدك لاحنين لارحيم
إسلام:(تعصب)أنا عاارف مصلاحتي الواليدة ومباغيش نتزوووج زواااج جربناااه مرة وندمناا مباااغيش نعاودها
مو:(ناضت تاهي مقابلة معاه تاتدوي بلقاصح) اشمن مصلاااااحة اولد كرشي واش هاد لحالة عاجباااك هاا لامتى غاندوم ليك أناا وخوتك واش كاين شي حد لي يعيط ويسول فيك واش واكل واش شاارب كلى ملهي مع دارو وتريكتوو مكاااين لي يخمم ليك ولايهز ليك لهم من غيري هاااباااك الله يرحمو مااات وشكون ضمن ليك بلي غانبقاا عايشة لك تاواحد معارف الأجل ديالو وأنا مغانرتاح تانزوجك ونشوفك عايش حياتك وديك الساعة لابغااات لمووت تجي مرحبا بيها (قربات جهتو وشدات فدراعو) أنا اولدي لي عارفة مصلاحتك وأسماء بنت النااس لي عاشرناهوم وشفنا لمعدن ديالهوم ونتا أكثر واحد عارفهوم وعاشرتيهوم
إسلام:كنتي تشاوري الواليدة ماشي ديريها من عقلك وعاد تجي تعلميني
خلاها ومشى معصب لبيتو على لخبار لي عرف وتصرف مو لي معجبوش نهائيا.. كيفاش حطاتو قدام الأمر الواقع ومشات خطبات ليه أسماء بلاماتشاورو.. اه بصح كاين واحد الإعجاب بينو وبين أسماء ولكن فكرة الزواج منها كانت ملغية حيت أصلا هو مباغيش يعاود التجربة.. جلس وهو تيفكر دابا ماعندو مايقول ولايدير تاشي حاجة حيت غايبان برهوش لارفض.. أكيد لخبار غاتوصل ليها ومغاينكرش بلي عندو فضول يعرف جوابها واش غاتقبل عليه ولا لا.. زفز النفس وناض غادي جهة البلاكار بدل حوايجو وخرج لعند مو كانت تاهي بدلات حوايجها ببيجامة طويلة وعاگدة راسها بزيف حياتي... جلس جنبها وباس راسها ونطق بهدوء:الواليدة مكنتش قاصد نغوت ونعلي صوتي عليك
مو:(حاطة يديها على فخدو ونطقات بحنية) غايجي نهار اولد كرشي وتقول ليا عندك لحق الواليدة
إسلام:(الصمت)
مو:سير تنعس راه مشى لحال نيت أنا غانوض نعس
ناض شاد يديها وصلها لبيتها لي مفرش ليها فلاباخطمون ومشى تاهو لبيت ينعس ويرتاح..واخا بالو مشغول بكلام مو وهاد الخبار لي خلاتو
----
فشومبر إدريس وتانيرت كانو تاهوما كيهضرو على نفس الموضوع.. عاودات ليه تانيرت كلشي وهو كيتسنط ليها بتركيز..
تانيرت:دابا غايخص نسولو أسماء ولاكانت موافقة نعلمهوم باش يجيو ويطلبوها رسمي
إدريس:صافي تاندوي معاها ونشوف اش كاين
تانيرت: نيت تاهي تفكر واخا كانقول غاتوافق
إدريس:(شاف فيها وقال بجدية)علاش واش هي سبق وقالت ليك شي حاجة
تانيرت:لا لا ولكن ماعرفتش غير قلتها وصاف
إدريس:واشكون عرف أنا المهم عندي تكون باغا بخاطرها مغانبزز عليها تاحاجة
تانيرت:بطبيعة لحال الزواج عمرو كان بزز (تبسمات بضحك)رحيل هي لي بدات ليهوم ههه سبحان الله غير تزوجات وهامحمد طه وغزلان تبعوها ودابا أسماء عقبال رنيم تاهي الله يسهل عليها بشي ولد النااس وداااك بورااس ديال ريان تاهو
إدريس:آمين اوا الأرزاق بيد الله الواحد ماعمرو يأس حيت ريي مكينساش عبادو
تانيرت:بطبيعة الحاال شوف غير حنا شحال دوزنا وفلخر ربي جمعنا مع بعضياتنا
إدريس:(جرها وباسها فشفتها بوسها سطحية) اييه دوك ليامات مغايتنساوش اتانيرت إينو
تانيرت:(تخشات فيه ونطقات بهدوء) المهم دابا أنا معاك وجمعنا ولادنا وهادشي هو لي كيهم واخا ضيعنا سنين مي راه حنا كنعوضوهوم دابا اتاسانو
فجناح بيسان كانت مخشية ففراشها وعقلها تيفكر فكلام ريان.. شادة تلفونها وتاتشوف فيه وكاتسناه يعيط.. والأهم كاتسول راسها واش غاتجاوبو ولا لا.. واش غاتعطي فرصة لهاد العلاقة واخا فرق كبير بيناتهوم فالعقليات وتامن العمر.. هي مغاتنكرش فليامات لي كانو تيهضرو بزوج كانت مرتاحة معاه وكيونسها ومكانتش تتحس بالملل.. تنهدات وشافت فالساعة كانت الوحدة ونص.. باينة غايكون نعس ولايمكن بدل قرارو.. حطات تلفونها فوق لكوافوز وتخشات فبلاصتها طافية لفيوز باش تنعس وترتاح ومع غمضات عينيها سمعات تلفونها كيصوني وناضت قافزة هزاتو لقاتو هو.. مدخلاه ب"السالوبار" حيت ديجا سمعات أسماء تاتعيط ليه بيها وعجباتها..
بيسان:(بصوت خافت)ألو
ريان: كنت عارفك غاتجاوبي دابا نفهم بلي نتي باغا هاد لغولاصيون
بيسان:(بدات تاضور عينيها) عندي شروط
ريان:لي هوما؟
بيسان:داك الضسارة لي تتكون بين لكوبلات مباغاهاش وديك فين غادة فين جايا ولحكام لخاوي تاهو وقوة الخروج ودخول بزوج تاهو مباغاهش.. ويكون بيناتنا احترام
ريان:احترام مافهمتش؟
بيسان:(عاضة على شفتها) يعني تكون محتارمني وما..
ريان:(نطق فاش سمعها سكتات)وما شنو؟
بيسان:اووف راك فاهم ماتقربش كثر من لازم
ريان:(بندالة) ااااه باغا تقصدي مانبوسكش امون دكتوغ
بيسان:اه لابغيني مرحبا مابغيتش باقي مادرنا فالطاجين مايتحرق
ريان:(تبسم وتكى على سطارة تايطل على الزنقة والبرد كايضرب فيه)واخا امون دكتوغ وشنو مزال ياك مانسيتي شي حاجة؟
بيسان:هاد الساعة هادشي لي تفكرت ملي نتفكر شي حاجة نعلمك تاني
ريان:اوا هاحنا تافقناا دابا وباش مانساش تاأنا عندي شرووط
بيسان:كانسمعك
ريان:(بجدية) أنا غانعطيك تقتي ابنت النااس ومانبغيش نتي تخربي هاد التقة وتخسريها حيت عمرها غاترجع والاشفتيني كانضحك معاك وبيس آند لوڤ فهادشي مكيعنيش بلي راه عندي عادي نلقااك واقفة ليا مع شي رعواني وديك لقضية دلخدمة وداك التخربيق.. اه خدمة وكتحاكي مع الرجاال مي يكون بينك وبينهوم دليميت وماتخلي تاولد لق*حبة يضسر عليك.. راه دمي حااامي ومغانضمنش ليك تصرفي معااه ومعااك تانتي..
بيسان:نتا عارف خدمتي وكيف قلتي أنا كانتحااك مع الرجاال مي أكيد ممضسرة عليا تاواحد وقبل تاماتكون نتا داخل فحياتي غير تهنى من هاد الناحية
ريان:اوا صافي حنا دابا متافقين وقبل مانسى لاطرات شي حاجة نبغي نعرف منك نتي مانسمعش من لبراااني
بيسان:شي حاجة بحالاش؟
ريان: شي مشكيل مثلا طرا بيني وبينك يتفك بناتنا مايدخلش طرف تالت حيت هاد لبلااان مكنحملوش أي حاجة نبغيك تجي عندي وتعلميني بيهاا
بيسان:داكوغ تافقنا
ريان:(ضحك) ههه اوا دابا امون دكتوغ اجي نتفاهمو ماشي حشومة عليك مجرجرانا هاد ليامات كلهااا على كلمة گلناهاا
بيسان:اوا نهار لول يموت لمش نتا عارف اش داير كاين شي واحد يقول ديك لهضرة لشي بنت
ريان:ضحكنا معاك وندمتينا
بيسان:نتا خضر مكتعرفش تدوي
ريان:لاواه زعتر ماشي خضر (بدا كيكح) كح كح شتي باش ندوي معاك طالع لسطح وريح ربي كيضرب فيا
بيسان:علاش طالع لسطح ومبقيتيش فبيتك؟
ريان:بيتي الالة جراو عليا منهاا وعاطينها لواليدين جيداء راني مشارك لبيت غير مع لخوو
بيسان:(بتفهم)اه اوا سير تنعس دابا أصلا خصني تاأنا نعس خدامة وجوبونص عندي نهار كامل
ريان:يالاه امون دكتوغ تهلاي فراسك تالغدا ونعيط ليك (نطق بضحك)عنداك ماتحلميش بيااا
قطعات عليه وهي تاضحك وتخشات فبلاصتها وهي شادة تلفونها تاتشوف فييه وحاسة بالراحة ومغاتنكرش بلي عاجبها الحال.. تفوهات وحطات تلفونها فوق الكوافوز وجرات عليها لغطا ونعسات.. وفالجهة المقابلة كان ريان تاهو واقف مبسم ونطق بخفوت: وهانتا اريان طحتي طيحة خاايبة ههه
نزل لتحت غادي نيشان لبيت محمد طه ودخل بان ليه تاهو فايق شاد تلفونو
محمد طه:فين كنتي؟
ريان:كنت فالسطح
محمد طه:(هز عاجبو) اش كادير فالسطااح (تقاد فجلستو) حالتك معجباتنيش هاد ليام
ريان: مالي كانقطع فحوايجي تانتا (نعس جنبو) نعس نعس غدا خدامين اش جاا مافيقناا تاني تصبح على خير
جالسة قدام المرايا تادير روتينها الليلي وغير سالات ناضت لبسات عليها بينوار قصير ستان فوق داك شورط وديباردو لي لابسة تاهوما ستان.. خرجات من الدريسينغ تاتجر فرجليها وشافت فيه هو لي جالس فالنموسية لابس نضاضر دلبروطيكسيون وهاز كتاب تيقرا فيه.. تمشات جهة بلاصتها وتخشات جنبو
رحيل:نوح (هز راسو وضار شاف فيها بلامايدوي وهي كملات كلامها) صاحبة غزلان عرضات علينا غدا لدارها وليوم علموني لبنات
نوح:(هز حاجبو بجدية) فين كاينة؟
رحيل: ف*** تما فين شراو دار ودايرة بحال لاقلتي عباسية تحتافل بدارها الجديدة وعارضة غير لبنات نشطو بناتنا
نوح:(رجع تيشوف فكتابو وقال ببرود) دابا نشوف
رحيل هزات حاجبها ومن جوابو حسات بيه مباغيش.. تفكرات كلام أسماء وضحكات بسخرية.. ورجعات شافت فيه بجدية نطقات: واش نمشي ولا لا
نوح:(ببرود قال كلمة وحدة)لا
معاوداتش هضراتو حدها زولات داك لبنوار وحطاتو حداها وضارت عاطيه بالضهر مغمضة عينيها وهي حابسة العصبية ديالها... فيها مايتجابه ويتقابح ولكن هي ولات عارفة كراكيطرو وعارفة بلي هو ماشي من نوع لي خصك تقابحي معاه حيت مغاتدي منو لاحق لاباااطل غايخليك بحال لحنش مقطوع ليه الراس وغايقتلك غير بالبارد وبالتجاهل.. مكانتش ناعسة وطالقة ودنيها معااه تاتسمح لحس ديالو شوية حسات بمخدتها مالت وأنفاسو كيضربو فوجهها وهي بقات على نعستها..
نوح:(حط إبهامو على شفايفها)شوفي فيا
حلات عينيها وضارت ناعسة على ضهرها تاتشوف فيه بلاماتهضر..
نوح:(هز حاجبو)معايش غاتمشيو عندها
رحيل:(تتجاوبو منفخة) مع الثلاتة وقت لغدا
نوح:وهاد السيدة كاتعرفيها نتي؟
رحيل:قلت ليك صاحبة غزلان وهي لي تتعرفها عرضات عليها وعلينا كاملين حنا لبناات
نوح:(قرصها فشفايفها) غدا نوصلك
رحيل:(حبسات ضحكتها ونطقات بهدوء) ماعليش ناخد طوموبيلتي وندوز عند لبنات ونمشيو أونصومبل
نوح:(حمر فيها الشوفة)دوويت واقيلة؟
رحيل:صافي واخا لي بان ليك
نوح:(تحدر عضها فشحيمة ودنيها تاعوجاات راسها وكمشات حجبانها عاد بعد وقال) لمرة الجايا بقاي تسمعي لهضرة
رحيل:(تتحكها) وضروري لعضان؟
نوح:(جرها منعسها على كتفو) هادشي لي عطا الله الفثنة
تخشات فيه وغمضات عينيها ناعسة وتاهو طفى الفيوز ونعس..
---
حلات عينيها وهي مبوقة بالنعاس تاتشوف هنا ولهيه ناضت لطواليط قضات حاجتها وخرجات وشعرها مشنتف.. هزات نونوسها وخرجات من بيتها غادة لعند مها..ومع خرجات من بيتها الظلام خلاها تخلع وبدات تاضور عينيها وتتعيط لرحيل بخفوت:مامي مااااامي
باغا تمشي عند مها ولكن خايفة مع الظلام ولكولوار تايخلع.. ضارت جهة لخرى وقشعات الضو تحت لباب دبيت زين العابدين وبدون تردد مدات يديها حلاتو ودخلات.. كانت تاتسمع صوت التلفازة مشات تتجري عندو تاوقفات قدامو وهو كان مكسل فوق النموسية ضار شاف فيها وهز حاجبو لسما وهي قربات جهتو وطلعات فوق نموسيتو ناطقة بخفوت:زينبيدين أنا خايفة
زين العابدين:(كمش حجبانو ونطق ببرود)سير عند ماماك
سيدرا:(زادت قربات جهتو وتخشات فيه)نيني حداك زينبيدين عفااك
غمض عينو وطلع راسو لسماا وهو كيزفر النفس... هادشي لي بقا ليه كون عرف كون طرق لباب وهنى مخو.. رجع شاف فيها وقال بانزعاح واضح: سير لبيتك ونعس
سيدرا:(بدات تاتسبل عينيها) نبقا معااك هناا
ناض زين العابدين محيد لغطا عليه وضار جهتها هزها كيف لكمشة وهي غير شافتو غادي بيها جهة الباب وبدات تاتغوت تاصدماتو وسد ليها فمها وهي شدات فيه كيف لگرادة مبغاتش طلقو.. حصل وتعصب وهي مبغاتش تفرقو.. غير طلقها مشات تاتجري جهة النموسية وتخشات فيها معنقة نونوسها وهو ضار شاف فيها وخنزر.. عرفها جلاخة مغاتمشيش رجع لبلاصتو تايسب فنفسو مكره وحاقد.. طفى التلفازة وتخشى نعس وهي بداات تاضور عينيها فوسط الظلام وبدات تاتخشى فيه وهو ماحد كيبعد ماحدها تاتزيد تخشى تاوصل لحافة دالنموسية ومابقا عندو فين يزيد..ومع غمض عينيه وبدا يديه النعاس حس بيها لاحت رجليها فوق كرشو ويديها على وجهو مصرفقاه..
ضور وجهو جهتها فداك الظلام بانت ليه ناعسة وصوت أنفاسها الصغيرة كايتسمعو.. شعل ضو لفيوز وضار شاف فيها وهو مخنزر.. هادشي لي بقا ليه حتى بيتو مالاقيش فيها راحتو بسباب هاد لبرهوشة.. زول يديها لي على وجهو وغمض عينو باش ينعس.. الليل كولو وهي مدرونجياه حيت تاتحرك فنعاسها بزاف.. مكتزگااش فبلاصة حتى فنعاسهاا.. وباش هو يتهنى منها ومن تحركاتها خشى رجليها وسط رجليه.. ولاح يدو عليها وغمض عينيه حيت هاداك هو لحل باش ينعس مرتاح..
فاقت رحيل بكري مع الستة دالصباح وجدات لفطور لنوح وجابتو ليه لبيت فطرو بزوج حيت باقي لحال وكلشي باقي ناعس.. خرج من دريسينغ تايسد مگانتو وشاف فيها بهدوء:وجدي راسك وملي نعيط ليك تكوني واجدة
رحيل:واخا رد بالك فطريق وملي توصل عيط ليا
نوح:واخا
جرها من خصرها تاتضربات فصدرو وتحنى بلمهل جهة شفايفها بايسها بوسة قوية تابعز ليها شفايفها وحسات بيهوم مبنجيين.. مصمهوم ليهاا مزيااان وماطلع راسو وبعد تاكان النفس تقطع فيها.. كانت كلها حمرة تاتنهج قاس حنكها بإبهامو وقال بهدوء: رجعي نعسي باقي لحاال
رحيل:(طلعات عويناتها فيه) صافي واخا
رجع باسها بوسة سطحية قبل مايهز جاكيط ديالو ويخرج غادي لغيرمة.. أما رحيل هزات لبلاطو لي فيه لفطور وداتو لكوزينة عاد رجعات غادة عند سيدرا طمن عليها.. دخلات لبيتها ومع مالقاتهاش فالبيت تخلعات وقلبات عليها فالحمام نفس الشي.. قلبها ضرب بالخلعة ومشات تاتجري لجناحها هزات تلفونها دوزات لخط لنوح لي كان شاد الطريق..
نوح:(جاوبها بهدوء)الفثنة ديالي
رحيل:(بخوف) نوح سيدرا مكيناش فبيتهااا
نوح:(مكمش حجبانو) قلبتي مزيان؟
رحيل:اه مالقيتهاش ماعرفت فين هي؟؟
نوح:(حط لحيتو)شوفي ياكما كاينة عند بيسان فبيتها
رحيل:واخاا
مشات تاتجري عند بيسان دقات لباب تاحلات ليها بيسان وهي مبوقة بالنعاس ونطقات بخفوت:رحيل
رحيل:سيدرا عندك؟؟
بيسان:لا (بدات تتوگض) احمم لا علاش
رحيل:(وجهها صفار)فين غاتكون مشات (حطات تلفون على ودنيها وقالت بصوت باكي)نوح مالقيتش بنتي
نوح:(قلب طريقو راجع لرياض وبجدية) أنا جااي قولي لبيسان تقلب معاك فلبيتو وعند زين العابدين تاهو
حركات راسها بحال لاكيشوفها ومشاو تايقلبو عليها.. دخلات رحيل لجناح زين العابدين مباغاش دير لحس ومع وصلات بيت نعاس وهي تزفر النفس فاش بانت ليها سيدرا ناعسة فحظن زين العابدين لي مغطيها بلكسدة ديالو.. بدات تاترجع النفس وخرجات من جناحو ورجليها فشلو عليها.. جلسات فالأرض وشافتها بيسان وجات تاتجري عندها وقالت وهي جالسة قفازي حداها:رحيل ماااالكي
رحيل:(تاتسوط النفس) لقيتها فبيت زين ناعسة
صونى تاني نوح وجوباتو رحيل بهدوء:صافي لقيتها فبيت زين العابدين
نوح: أصلا ماعندها فين تمشي
رحيل:صاافي مكاين لاش ترجع انوح
نوح:واخا سيري رتاحي تانعاود نعيط ليك
شكرات بيسان واعتدرات منها حيت فيقاتها وخلعاتها تاهي عاد رجعات لجناحها وهي حاطة يديها على قلبها.. ملي مالقاتهاش فبيتها ومجاتش عندها صافي تخلعات وخافت.. تسطحات فوق النموسية باغا تكمل نعاسها حيت باقي لحال..
---
فاق زين العابدين هو لول تايطرطق عضاامو وناض جلس فبلاصتو وهو مكمش حجبانو تايتوگض.. ضار جهة سيدرا لي كانت تاهي بدات تتحل عينيها لمبطنين لمعمشين تاتشوف فيه.. باين فيه معصب وكاره لوضعية ناض من بلاصتو وراسو ضارو حيت مانعسش مزيان دخل لحمام وسيدرا نزلات من بلاصتها تاهي تابعاه لقات لباب مسدود ودقات عليه ونطقات بصوت نعسان:زينبيدين حل ليااا (بدات تاتعوج رجيلاتها) غاندير پيپي حل لياا
مجاوبهااش وهي صافي تزيرات وخرجات من بيتو غادة لبيتها باش تقضي حاجتها.. ونيت غسلات وجهها وسنيناتها كيف مولفة عاد خرجات غادة لعند مها.. حلات لباب كيف لعادة بلامادق ودخلات لبيت لقات رحيل ناعسة.. طلعات لعندها وحطات يديها على وجهها ونطقات بخفوت:مامي ماااامي فيقي
حلاات رحيل عينيها وناضت تاتكسل وجراتها عندها باستها وقالت:طيرتيها مني خلعة (شافت فيها بجدية)ملي فقتي وخرجتي من بيتك علاش ماجيتيش عندي حشونة تمشي عند زين العابدين فبيتو بوحدو
سيدرا:كاان ظلاام مامي وخفت أناا وزينبيدين عزيز عليا بحال رياني ومودي (بدات تتعاود ليها بحماس)ولكن أنا نينيت عند زينبيدين مامي وماخفتش أنا گااع (بدات تاتقيس فشعر مها وقالت تاتفشش) مامي فيا جويعات
رحيل:ندوشو موراها نفطرو واخا
سيدرا:(نقزات من بلاصتها)انمشي نجيب حويجااتي مامي
مشات تاتجري وأعز حاجة عندها هي تدواش كاتحماق عليه ونقاا مولفااه من صغرها وكبرات عليه.. وقفات فزق الكرسي وهزات بنوارها لي مطروزة فيه سميتها "Sidra" وهزات تاحويجاتها لي غاتلبس عاد مشات لحمام هزات لبرودويات ديالهاا مانسات تاحاجة.. خرجات وهي تاتعكل بداكشي لي هازة وغير بان ليها زين وبدات تاتعيط ليه تاوقف تايشوف فيها هاز حاجبو وقالت ليه بحماس باين فصوتها:زينبيدين مامي غادوووش لياا يالاااه معايا تانتا دوووش معاياا..
حرك راسو ببرود وخلاها مكمل طريقو وهي حركات كتيفاتها ومشات عند مها.. لقاتها موجدة لحمام بلبرودوياات تبسمات رحيل وهزات عليها حوايجها
رحيل:يالاه نحيدو لوسيخات عوتاني
سيدرا:اه فيا وسيخات مامي
بدات تاتزول ليها لحوايج تابقات بسليب وحيدات لباراي وجلسات وسط لبينوار.. دوشات ليها ودوشات تاهي وخرجو بزوجات ملوين فبنوار.. تاتلبسها حوايجها وكل مرة تبوسها رحيل ففمها تاسالات ونزلو لتحت فين كانو لبقية تايفطرو.. جلسات رحيل تاتفطر سيدرا وفنفس الوقت تادوي مع زاينة لي تاتسول فيها وسولاتهاا على نوح وعلماتها بلي راه مشى لفيرمة وشيماء غير تاتلقط وتسمع وعينيها على رحيل.. أما سناء فكانت مرفوعة مكيناش هنا وعقلها غير فتصرف اليازيد لي دار معاها لبارح وكيفاش ولى متجاهلها.. وخلاص خبار زواجو تاهو زاد على مابيها.. لبارح لاحظات شوفاتو جهة لبنات وزادت الغيرة شعلات فقلبها.. ناضت من الطبلة بلاماتكمل فطورها تاوقفها صوت ختها..
رحمة:غانمشي عند لخياطة ليوم تمشي معايا؟
سناء:وقتاش؟؟
رحمة:مع الزوج ونيت نتغداو برا (ومن باب الصواب شافت فرحيل)لابغيتي تمشي معانا تانتي
رحيل:شكرا أنا ليوم معروضة لغدا عند صاحبة غزلان
رحمة:واخاا ونتي اخالتي
زاينة:غير سيرامت كاا "غير سيرو نتوما"
مشات سناء لبيتها وماعندهاش لونڤي لجلاس ولهضرة أما شيماء فغير فطرات مشات لخدمتها بحكم أنها كدبلاصا بين فاس ومراكش وهاد الأيام عندها لخدمة هنا داكشي علاش استغلات جلاسها فالريااض..
دوزات رحيل لوقت مع زاينة ورحمة وغير وصلات لوقيتة ديال لعراضة ناضت باش تمشي توجد راسها ودات معاها تاسيدرا..
رحيل:(واقفة قدام سيدرا لي جالسة فالفوطوي ونطقات بهدوء) علاش ماباغاش تمشي معايا؟
سيدرا:(تاتلعب برجيلاتها)غانبقا هنا مامي مع زينبيدين وميمة زوينة
رحيل:(باستها فيديها) وتبقاي بوحدك؟ مابغيتيش نديك عند ماما؟
سيدرا:أنبقا مامي وملي تجي نمشيو عند تانيرت إينو ياك مغاتعطليش امامي
رحيل:ماعرفتش امامي والابغيتي تبقاي هنا بقااي
مبغاتش تحكر عليها ونيت عجبها لحال حيت بنتها ولفات لعيشة هنا وتأقلمات معاها وهادشي لي كانت هازة ليه لهم.. وجدات رحيل راسها ولبسات جلابة لي جاب ليها نوح نهار لفيرمة فلبلوغوا جاتها زوينة مع فولارها وهزات رموشها بلمسكارا مع شوية دلفغاجو فلحنيكات مباينش وعكر نيود تاهو خفيف.. هزات صاكها ولبسات صباط طالون وخرجات من الدريسينغ لقات سيدرا جالسة متفرجة
سيدرا:(نطقات ببرائة)مامي جيتي زوينة
رحيل:(باستها مجننة عليها) زين دماااامي (صونى تلفونها وكان نوح) ألو
نوح:(باين من صوتو كااعي ماشي على برجو) مغايصلاحش ليا نجي خودي طوموبيلتك وسيري
رحيل:(كمشات حجبانها باستغراب) صافي واخا
نوح:ملي توصلي صوني عليا (وبجدية) ماتعطليش
قطع عليها وهي تاتشوف فالتلفون مستغربة من
عصبيتو لي باينة فصوتو ومافهماتش مالو..
رحيل:يالاه امامي (رجعات كررات سؤالها لاخر مرة) تمشي معايا
سيدرا:لا مامي غير سيري
باستها وخرجات هي وياها من ييت دنعاسها وسداتو بالساروت حيت ديجا نوح علمها بلي ملي تكون خارجة من الرياض طرق لبيت دالنعاس كيف مولف.. خلات سيدرا فبيتها مور ماوصاتها ماديرش لبسالات ونزلات وصات تاالسعدية ترد ليها لبال عاد خرجات جهة لباركبنغ لي فلحومة وركبات طوموبيلتها مدوزة لخط لأسماء:هيلووو خرجتي من لخدمة
أسماء:راني فدار تانبدل حوايجي كوون عرفتي اااش سمعت
رحيل:اش سمعتي؟
أسماء:(بصوت ساخر)زا*مل دإسلام طلب يدي لزواااج
حلات رحيل عينيها ونطقات بصوت مصدوم:واااات كاتفلااي
أسماء:والله تامعاك بصح يالاه رجعت من لخدمة ولقيت بابا كيتسناني قالها ليا ههههه عرفتي كنت غانطلقها بالضحكة قدامو بقوة الصدمة
رحيل:وهاااالي قلنا السيد طلع باغيك لمعقول عليها كان باغي يشري ليك طوموبيل
أسماء:والله مانكدب عليك ماستوعبتش وشكيت ماعرفتش
رحيل:علاش تشكي؟
أسماء:حيت مو هي لي هضرات مع ماما تانيرت وقالتها ليها على مقال ليا بابا
رحيل:اوا عادي خلى مو تكلف اش فيهاا مثلا؟
أسماء:ماعرفتش مهم عندي وقت نغكر فيه قبل مانردو عليهوم الجواب
رحيل:اوا فكري مزيان (ضحكات رحيل)ههه لقرصاات لي قرصتكوم نتي وغزلان بانت نتيجهوم عقباال رنيم
أسماء: قبل بعدا خصني ندوي معااه عاد نشوف
رحيل:من حقك ونيت تشوفي اش كااين
أسماء: نتي فين دابا؟
رحيل:جايا عندكوم قولي لبنات يوجدو باش مانتعطلوش
أسماء:جبتي سيدرا؟
رحيل:لا مابغاتش تجي قالت ليك اتبقا مع ميمة زوينة وزين العابدين
أسماء:شكون لميمة زوينة؟
رحيل:(بضحك) هههه جدات نوح تاتموت عليها حيت تاتعطيها لخاطر وتاتبقا تخبر عليها بالشلحة وهي تاتعرفيها تاتموت على لهضرة بالشلحة
أسماء:ههه وراه تعلمات الشلحة وحنا كاعما بغينا نتعلمو (شافت فتلفونها ورجعات قالت بهدوء)رحيل نكملو من بعد إسلام كيعيط لياا..
أسماء:(قطعات مع رحيل ودوزات جوباتو ببرود)ألو
إسلام:صافا
أسماء: حمدالله
إسلام:شفت لمساج ديالك وصلوك لخبار
أسماء:(ببرود) اه وصلوني علاش ماقلتيهااش ليا أنا لول
إسلام:(مكره)دوك الأمور تانهضرو فيهوم مع لكباار هوما لي كيتكلفو
أسماء:اه داكشي ديال الجدود ههه واش من نيتك لكبار هوما لي غايتزوجو ولاحنا؟
إسلام:هادشي لي عطا الله هاد الساعة
أسماء:مهم دابا ممسالياش باش نشد معاك لحديث غدا ونديرو كافي ونيت عندي مانقول ليك
إسلام:(بفضول)اش غاتقولي ؟
أسماء:ملي نشوفك ونهضرو باي (لاحت تلفون) اوا هادي لي مطاحتش ليا على لبااال
كملات لباسها وتامن البنات وجدو راسهوم كيتسناو رحيل.. دقائق وكانت تاهي وصلات سلمات على مها وحنان وجلسات معاهوم شوية عاد شدو الطريق لعند أميمة صاحبة غزلان يدوها معاهوم..
رحيل:واش غانمشيو بيدينا خاويين؟
غزلان:راه دايرين نجمعو مية درهم لوحدة
رحيل:اه نيت مزيان جمعتوهوم؟
أسماء:اه
رحيل:حلي صاكي خودي منو دوسون ديغام"200" اأسماء
خداتها أسماء وعطاتها لغزلان حيت هي لي مكلفة تايتلاقاو بأميمة ويعطيوها.. سهات غزلان تاتفكر لفلاش لي طرا معاها ليوم الصباح
🔙🔙
كانت موجدة لفطور وغير سالات طلعات لبيتها باش تكمل نعاسها وهي تلاقى بمحمد طه كان نازل.. شاف فيها بهدوء بينما هي ماعبراتوش وكملات طريقها لبيت تانطق بجدية: واش محتاجة شي حاجة؟
غزلان:(شافت فيه)لا علاش؟
محمد طه:(كايدوي بنفخة)ياك قلتي غادة عند صاحبتك نتي ولبنات (جبد من جيبو لوراني بزطامو وهز منو ميتين درهم مدها ليها) خليها عندك
غزلان:(تفاجأت)بلاش عندي
محمد طه:(شد يديها وحطها ليها وقال ببرود)لاخصاتك شي حاجة خرا عيطي ليا أنا مشيت
نزل لتحت وخلاها واقفة بلاصتها تاتشوف فيديها لي فيها ميتين درهم ورجعات شافت فلبلاصة فين كان ونطقات بخفوت: حنين هاد الزمر
🔜🔜
هزو أميمة لي كانت تاتسناهوم فلبلاصة فين متافقين وكملو هضرتهوم طالقين لمزيكاا تاوصلو لعند لبنت وبلاصات رحيل طوموبيل وقبل ماتنزل صونات على نوح ساعة مجاوبهااش واستغريات حيت عمرو دارها.. خلات ليه مساج علماتو راه وصلات ونزلات عند لبنات داخلين لعند مولات الدار لي كانت بنت صغيرة وزوينة تكون فمنتصف العشرينات.. سلمات عليهوم ورحبات بيهوم ودخلو لبنات لصالة لي مفرشة بغراش جديد وفيها شي بنات غالبا صحباتها وبنات عائلتها.. كانت أميمة مجمعة مع واحد صاحبتهوم ولبنات تاهوما حداهاا..
أسماء:(تحنات جهة رحيل ونطقات بهدوء)سمعتي شنو قالت لبنت؟
رحيل:شنو؟
أسماء:قالت ليك هاد الدار بات لبنت لي شراها ليها وكتبها ليها بسميتها
رحيل:ياك قلتو هي وراجلها شراو الدار؟
أسماء:هادشي لي سمعت قالتو ليهوم أصلا مدازش على زواجها مدة كبيرة يالاه تزوحات مأخراً
رحيل:واهداي عليا أنا سمعت مزوجة وشرات دار قلت راه هي وراجلها والسيدة غاتكون شحال هادي باش تزوجات
أسماء:بحالي بحالك راه يالاه سمعتهوم تايقولوها
سدو الهضرة فديك النقطة ورجعو لبنات لنشاط وجات مولات الدار سميتها "وداد" بنت مبشورة وتادخل لخطر.. جلسات مجمعة معاهوم ودغيا دخلو فلجو بحال لاتيعرفو بعضياتهوم من زمان.. شبعو ضحك ونشاط وزديح مع دايرة لباف ومكاينش حس الرجال.. كبرات بيهوم ودازت عراضة زوينة وحيت رحيل مخصش تعطل على قبل سيدرا لي خلات بوحدها فالرياض واخا عيطات لسعدية وسولات فيها وقالت ليها راه جالسة مع زاينة إلا أن ضروري بالها يتشطن معااها حيت أول مرة تخليها بوحدها.. مولفة تاتخليها مع مها ولاخوتها تاتنعس على جنب الراحة..
رحيل:نتحركو البنات راه هادي هي لوقت؟
أسماء:صافي يالاهو واخا صراحة ماسخينااش
رحيل؛زيدي نتي راه خليت بنتي بوحدها تم
ناضو لبنات كيسلمو على وداد لي نطقات بتبسيمة:وهانتوما دابا ولينا صحابات شي نهار نديرو خريجة أونصومبل
رحيل:إن شاء الله ازين تهلاي فراسك والله يقوي الخير
سلمو عليها ونزلو جميع.. ورحيل حنات راسها تاتقلب على لكونطاكط تانطقات مليكة صاحبة أميمة:رحيل عندك بلاصة فطوموبيل توصليني غير لشارع نشد طاكسي حيت هنا شوية خاوي
رحيل:اه مرحبا نوصلك ازين
مليكة:(نطقات بسرعة) بنات بلافرطة هاهو راجل وداد واقف مع دوك رجال لابس شوميز كحلة
هزو لبنات راسهوم ومعاهوم رحيل لي شافت فالبلاصة لي نعتات ليهوم مليكة وحلات عينيها بتفاجأ فاش شافت زكرياء واقف قدامها وهو نفسو مول شوميز نواغ..
تفاجأت ولكن ماهتماتش للموضوع بزااف داكشي علاش كملات طريقها لطوموبيل بينما أسماء بدات تادقق فيه وتتقول مع راسها هاد لكمارة ديجا شفتها فشي قنت.. هز زكرياء عينو تاهو
وقشعهاا دايزة حداه بطوموبيلتها خرج عينيه من بلاصتهوم وبقا حاضيهاا تامشات وهو ممتيقش بلي هاديك رحيل.. خلى رجال لي معاه ولي كانو من عائلة وداد وطلع لدارو وغير دخل بدا يعيط عليها
زكرياء:ودااد ودااد
وداد:(خرجات عندو بقفطان جوهارة وشعرها جمعاتو ونطقات) مااالك اش كاين؟
زكرياء:مشاو صحباتك؟
وداد:اه مشاو بقا غير بنات لعائلة علاش؟
زكرياء: لاغير فاش كنت جاي شفت واحد لكليكة دلبنات نزلو من لعمارة وقلت واقيلا هوما معاهوم وحدة لابسة واقيلا جلابة بلو غوا
وداد:(بحسن نية) اه هوما هاديك رحيل
زكرياء:اه اوا مزيان مهم نشطتو بعدا
وداد:(ضحكات)وايييه ههه فوجنا أنا غانمشي نسخن ليكوم ماتاكلو غايكون فيكوم الجوع
مشات لكوزينة وهو بقا واقف مكمش حجبانو وكيسول راسو هي اش كادير هنا وفين تاتعرف وداد مرتو.. تنهد وعقلو سرح بيه لبعييييد..
🔙🔙
ليام غادة بنفس الروتين عند زكرياء كاين تيوصل فيهوم خبار رحيل لبدر...تاوصل نهار لي مجاتش فيه رحيل شي لي خلاه يستغرب ومقدرش يسول عليها حيت خاف شي حد يشك فيه خصوصا كل واحد فبوسط مجلوق على الثاني.. داز داك النهار وتبعوه نهارات خرين وهنا دخلو الشك وطبعا علم بدر لي أصلا كان عارف سبب عدم قدومها لخدمة..فأحد الأيام كان مدوز نهارو عادي وغير سالى خرج شاد طريق لدارو تاوصل لدار ودخل مشى بدل حوايجو وحيت بوحدو وزوفري ديال راسو طيب ليه لبيض بمطيشة وشحر واحد لبريرد دأتاي وهز داكشي داه لفوق الطبيلة ومع قطع دغمة دلخبز باش ياكل سمع الدقان فلباب ناض وهو مستغرب شكون غايكون جا عندو.. مكيعرف حد هنا واليديه راه فالداخلة وماعندوش صحاب طاح فبالو بدر واستبعد لموضوع.. حل لباب وعينو تحلو بصدمة فاش بان ليه واقف متكي على الحيط ومربع يديه بشوميز نواغ وسروال دجين فنفس اللون..
زكرياء:موسيو السليماني
تقاد نوح فوقفتو وعينو على زكرياء بشوفات باردين وبدون مقدمات هز يديه وخشى ليه كروشي فوجهو تاداخ زكرياء ورجع لور طايح.. دخل نوح ورد لباب وقرب جهتو شدو من التشورت وزكرياء غير تايشوف مخلوع منو ومن شوفاتو لي مكيبشروش بالخير.. عمرو شافو فهاد المنظر لي خلاه يتخلع وماينكرش هادشي والأهم مكانش عارف علاش جاي عندو وضربو..
نوح:(بنبرة باردة كالصقيع) عند بالك مغانعرفش فعايلك وبلي داك الز*مل مسيفطك بااش تدي ليه لخبااار
كلامو خلى زكرياء يسرط ريقو بخوف من لفكرة لي طاحت فبالو وقبل مايحل فمو نزل عليه تاني بكروشي واحد مور لاخر ماكيجي فين يهز الراس تاكيدوخو تاني.. مقدرش يدافع على راسو حيت فشلو وأصلا نوح كان مخيخ عليه وگاع داكشي لي جامع عليه فديك لفترة صرفو ليه دابا تاخلاه منشور كيف الشرويطة ودمو ناازل ليه من وجهو.. ناض نوح وهزو من تيشورت وزكرياء نجوم تيبانو ليه نيفو تيسيل بدم وفمو تاهو ومع حلو بانو سنانو مجلخين بالدم وجهو كان كارتة.. جرو معاه ودخلو لصالة المتواضعة ديالو ولاحو فوق السداري وهو كيجمع النفس ويطلق أنين خافت.. حاس بعضامو كيضروه من الدق لي كلى..
نوح:(جبد من جيبو باكية دلگارو وخدا واحد حطو ففمو وشعلو وجر الجرة لولة قبل ماينطق بهدوء) من امتى وبدر مسيفطك؟
بزز باش حل فمو تيعاود ليه وماعندو تاشي خيار آخر هو أصلا غير مشى بين الرجلين.. تيعاود وكل مرة يتوجع ونوح تيكمي داك لگارو وتايسمع ليه بلامايقاطعو سرسب ليه كلشي من لبداية تال نهاية..
زكرياء:(بصوت متقطع كيكحب)كح كح أنا مكنتش باغي والله مكنت باغي ولكن خفت حيت واليديا هوما لي عندي ومانقدرش نكون سباب فموتهوم (شاف فيه) عمري نويت نأدي رحيل
دار فيه نوح واحد الشوفة خلعاتو وفلبلاصة ناض ودفع ديك الطبلة تاوصل لعندو فلمح لبصر وحط يد على دقنو مزيرو تاحل ليه فمو وخشى ليد الثانية جر ليه لسااانو وزكرياء تايحرك راسو بلا مخلوع..
نوح:(نطق بصوت قوي وكل كلمة كان تيبرك عليها) لاعاودتي جبدتي سميتهااا على لساانك القو*د نقطعوو ونوكلو ليك (حرك ليه زكرياء راسو باه بزربة ونوح حلف مايطلقو باقي شادو ديك الشدة ولاخر مقدرش يتحرك ويتنفس مزيان.. كان مخنزر فيه تخنزيرة دلموووت وبتهديد وااضح كمل كلامو) مانعاودش نشوف كمااارتك كاضور عندي لهيه ولازغبك الله وفكرتي طووف جهتهاا غايكووون اخر نهاار فحياااتك سمعتي..
حرك تاني راسو باه عاد طلق منو وزكرياء بدا كيطلع النفس ويسرط ريقو.. مكانش تيتوقع هاد ردة فعل منو لي خلعاتو.. جبد نوح من بزطامو كمشة دلفلوس ولاحها عليه ونطق ببرود:هاك باش داوي كمااارتك
خرج من عندو وهو ضارب لمية وحداش فحجبانو ومكيقعشش قدامو.. واخا ضربو ولكن مكبش فيه داك لغضب لي حاس بيه وتكايس عليه حيت مباغيهش يمو_ت بين يديه واخا يستاهل حيت دار يديه فيد داك لمريض.. من نهار عرفو من طرف بدر وهو كيجمع ليه فلحساب تاتقال ليه ونهار جااات لوقيتة خلص بالثاني والمتني.. ركب فطوموبيلتو وسد لباب وجر كلينيكس من البكية وبدا يمسح بيه يديه وهو باقي مخنزر.. لاح لكلينيكس وبدا تايسد يدو ولي ضربو بيها ويحلها وقبل مايدماري شاف جهة دار زكرياء ونطق بهمس كالفحيح: حمدلله حيت دزتي فوجه واليديك إيما كون كان ليا معاك كلام خر..
🔜🔜
فاق زكرياء من ديك الدكرى لي تفكر مجرد مشافها وتنهد.. باقي لدابا ديك لحسرة فقلبو ديال ديك لخدمة لي ضيع بين يديه بسباب بدر لي عرف من واليديه بلي مااات.. فرح ورتااح حيت تهنى منو ولكن بقا فيه لحال حيت خسر لخدمة لي كانت معيشها مزيان هو وعائلتو.. ولكن ماعندو مايدير ومن زهرو نوح ماديكلارش بيه وتفاهم معاه بنفسو.. من داك النهاريات وهو تيقلب على خدمة خرا لي يهز بيها واليديه تالقاها عند واحد السيد كبير فلعمر عندو مگازانة كبيرة دلمواعن خدم عندو وتما فين شاف وداد حيت تاهي كانت خدامة تماا وعجباتو يشخصيتها وعقليتها وفاش تعرف عليها عرفها بنت مول الشي وتتقرا فلفاك وفنفس لوقت تاتخدم عند باهاا.. فاش شافها معقولة طلب منها الزواج وهي وافقات ومشى خطبها من عند باهاا ودارو لعرس وقبل شرطات عليه بلي غاتكمل قرايتها وهو وافق.. فيامهوم لولة سكنو فديك الدار نيت دزكرياء وفاش باها شافها معجباتوش وشرى ليهوم هاد الدار كادو وكتبها بسمية بنتو حيت لوقت والزمان هادا خصو يضمن حقها.. وتازكرياء مطمعش فيها أصلا ونهار تزوح بيها حيت رتاح ليها وعجباتو وليوم فاش شاف رحيل تفاجأ ومكانش متوقعهاا ومشاعرو لي كان تيحس بيهوم من جهتها قتل_هوم من نهار كلى ديك السلخة من عند ولد لحاج...
---
وصلات رحيل لبنات عاد شدات طريق لدار وهي ساكتة تاتسمع لغزلان ورنيم وأسماء لي تايهضرو تانطقات أسماء:داك راجلها شفتو فشي قنت
رحيل:(بهدوء) هو لي جا مع رجااء ديك لمرة لدارنا لقديمة
أسماء:اييييه الله يبشرك بالشهاادة وأنا نقول كمارتو ماغريباااش اااايييه السيد تزوح وصراحة مرتو فنة ومأدبة
غزلان:اه كانت دايرة ليسطيا عماين وشدات ديبلوم عاد دارت لفاك ومن زهري أنا وياها تانقراو مع بعض ضريفة بزااف وباها عندو فلوس ولكن متواضعة وديما هي لي تتخلص علينا لاخرجنا مسكينة تاتقول لينا تاتخدمو وخلصو عليا
تبسمات رحيل وفرحات لزكرياء حيت ربي لقاه ببنت الناس لي زوينة.. واخا كان مبين إعجابو ليها ولكن هي سدات الباب عليه وفرحات حيت نسى وكمل حياتو وفقلبها دعات ربي يكمل عليهوم بلخير..
وصلو لدار ورحيل شافت فساعتها وقالت:غاندخل غير نسلم مع بابا وريان ومحمد ونمشي حيت تعطلت على سيدرا
أسماء:صافي واخا
دخلات لقاتهوم كلهوم كاينين سلمات على باهاا لي خشاها فيه وبدا تايدوز على كتفها بحال شي برهوشة صغيرة ويسول فيهاا.. ومجلساتش بزاف حيت خصها ترجع لدار على قبل بنتها..
----
ملي مشات رحيل وهي فلبيت تتفرج تاوصل وقت لغدا ونزلات تغدات غير هي وزاينة ولحسن وزين العابدين أما لبقية مكانوش.. مور لغدا زين العابدين مشى لبيتو حيت مكاينش ليوم لاصال ولاعندو السونطر وجد نوح مشى يتكى ليه مور لغدا حيت تايفيق بكري ومولف يتكى فهاد الوقيتة.. بقات غير سيدرا وزاينة لي تاتخبر عليها بالشلحة وتتعاود ليها لحجايات ومع سيدرا ملي كانت صغيرة وتانيرت تادوي معاها بالشلحة تاولات تاتفهم وتاتهضر بيها واخا ماشي كوغامون.. كانت سيدرا تاتشوف فزاينة وتقيس ليها حنيكاتها مع مطبزين وتايحمارو ليها ودوك التكامش لي فوجهها ديال الزمان وغير الشوفة فيها تاتريح.. مع ودن العصر ناضت زاينة باش تصلي وخلاتها فالصالة تاتفرج.. وسيدرا مشات تاهي لبيتها تجيب مونيكتها..
كانت داخلة شيماء بديك لمشية ديالها والراس مهزوز.. العياقة تاتقطر منها وعاجبها زينهاا وكل مرة تحرك شعرها لمطلوق بيديها.. سولات على رحمة وسناء وعلماتها السعدية بلي باقي مارجعو ومشات جهة الصالة تستارح فيها.. كانت هازة تلفونها وداخلة لصالة ومارضاتش لبال لإيڨانا تاعفطات ليها على قزيبتها وهي تغوت وهجمات عليها برد فعل تلقائي وشيماء رجعات لور بلخلعة وخنزرات فالقطة لي طلقات عليها حلوقها.. ضرباتها برجليها تابعدات عليها لقطة خايفة وهي مشات جهة السداري جلسات تاتنگر:داكشي لي بقا قطوط الزنقة يدخلو لدار
كانت سيدرا راجعة لصالة وجايبة مونيكتها وشافت تصرف شيماء مع قطتها شي لي خلاها تكمش حجبانها فيها وقربات جهتها هزات إيڤانا لي تخشات فمولاتها..
سيدرا:(نطقات ببرائة كدافع على قطتها)علاش ضربتيها
شيماء:(خنزرات فيها)نتي لي بقيتي ليا البرهوشة سيري بحااالك
سيدرا:ربي غايعدبك حيت ضربتيها نتي خااايبة ممزيانااش
شيماء:(هزات فيها حاجبها)سمعي البرهوشة أنا ممساليااش ليك ولهضرتك لخاوية وديك لقطة الموسخة ديها لوسخ لي جيتي منو نتي ومك
سيدرا:(خرجات فيها عيونات البوبشة) إيڤانا نقية وحنا مافينااش وسيخاات مامي عاد دوشات ليا وتاهي دوشات ماتقوليش هاكا حشومة
شيماء:واخا تغسلي نتي ومك غاتبقااو موسخااات (ناضت مخنزرة فيها) الصمكة
سيدرا:(عينيها تغرغز بالدموع ومع دلك ماهبطاتهومش وبصوت طفولي باكي) نتي حمارة
جعرات عليها شيماء ومقالتش مع راسها راه بنت صغيرة.. أصلا مكتحملش مها ومتتحملهاش تاهي حيت بسبابهوم هاد الرياض لي كانت ناوية تكون مولاتو طار بين يديها.. قربات جهتهاا وشداتها من ودنيها وسيدرا طلقات لقطة.. وشيماء زيرات عليها بحال لقااض وخرجات فيها عينيها: هادشي لي بقا تجي نتي الصمكة وتعاايريني (عوجات ليها ودنيها تانزلو دموعها) صمكة متتسمعيش وبااك خلااك ومشى غير حيت مكتسمعيش أو وحلنا فيك حنااا الصمكة
سيدرا:(تاتشهق بلبكاا وهزات يديها ضرباتها فيديها لي شادة بيها ودنيها) بعدي مني نتياااا
طلقاتها من ودنيها وهزات شيماء يديها ضرباتها فنفس اليد لي محروقة فيها وخنزرات فيها بكره عاد مشات لبيتها بلاماتسوق لدموعها ولاتحس بتأنيب الضمير..بدا صدر سيدرا تايتهز ويتحط بالبكية ومشات تاتجري لبيتها وفطريقها شافها زين العابدين لي هز حاجبو فيها وكمل طريقو نازل لتحت مامسوقش كيف لعادة..
وصلات رحيل وبلاصات طوموبيلتها ومن زهرها تلاقات بنوح لي تاهو يالاه جاا.. تبسمات ليه وبقات تاتسناه تاوصل عندها وشاف فيها كيف لعادة مطلعها من رجليها لراسها وهي تاتبسم ليه.. كان باين فوجهو بلي كاعي وهي شافت هادشي ومبغاتش تسول
رحيل:سلام
نوح:(تحدر باسها فحنكها)واعليكوم السلام (درعها ونطق بجدية)هادي هي مغانتعطلش امدام
رحيل:(تبسمات وقالت) دزت لدارنا وصلت لبنات وسلمت على بابا عليها تعطلت
نوح:صحيحة لبااس
رحيل: حمدالله راه سلم عليك
نوح:مرحبا بسلامو
دخلو لرياض ورحيل طلعات نيشان لبيت سيدرا ونوح جلس جنب زين العابدين كيسول فيه.. دخلات لبيت وهي ميسمة وموحشاها ولكن مجرد ماسمعات صوت بكيتها وشافت منظرها وهي ناعسة فوق نموسيتها وخاشية راسها فلمخدة قلبها ضرب بالجهد قربات جهتها تاتجري ونطقات بخوف وهي هزاها تاتشوف فعويناتها لمبطنين منفوخين بلبكا وجهها كولو حمر وأنينها كان بحال لمواس لي تغرسو فقلبها مدمينو..
رحيل:(تاتقلب وجهها وتتسول فيها بزربة وخوف)مالك علاش تاتبكي واش تاضرك شي حاجة هاا قلقك شي واحد دوي سيدرا ماالك امامي شوفي فيا
مجوباتهاش سيدرا وعنقاتها وهي مكملة بكيتها وعقل رحيل ايخرج من بلاصتو مال بنتها خلاتها صحة سلام ودابا لقاتها فديك لحالة..
رحيل:(تاتجرها من صدرها باش تشوف فيها ساعة شادة فيها سيدرا بالجهد) ماااالكي دووووي شكوووون بكااك
بدات تاتغوت رحيل بالجهد حاسة بعقلها غايخرج من بلاصتو والخلعة لاعبة عليها معرفاش اش بيهاا.. غواتها وصل عند نوح لي كان طالع غادي لجناحو وغير سمع لغوات وهو يقلب الضورة لبيت سيدرا ودخل وهو مكمش حجبانو وعينو على رحيل وسيدرا لي مخشية فيها تاتبكي بكااء تيقطع القلب.. قرب بخطوات سريعة وجلس جنب رحيل ونطق بصوت جدي وهو هاز حجبانو:مالها؟
رحيل:(شوية وتبكي تاهي) ماعرفتش مابغات تقول ليا والو
نوح:(حط يديه على سيدرا ونطق بصوت حنين) اجي عندي ابابا
مع كمل كلامو تلاحت عليه سيدرا وهو مجلسها عندو تايدوز على ضهرها وشعرها وتايقرا عليها القرآن ورحيل تاتزعزع رجليها باغا بنتها غير تدوي وتعرف مالها.. مدة وهوما على ديك لحاال ونوح ماهضرش غير تايقرا عليها تاحس بيه بدات تكالمى وهو يخرجها من حظنو ونطق بصوت حنين تيسول فيها بلخاطر:مااال تاتبيرت إينو تاتبكي (كايمسح ليها دموعها) شكون بكاها لياا
سيدرا:(صدرها تايتحط وينزل وصوتها تايتقطع بلبكية) هاديك لمرا غوتات علياا وضرباتني ماي بلو آيز
نوح:(كمش حجبانو وحط يديه على راسها تايدوزها بحنية)شكون هي؟
سيدرا:(بصوت تايقطع فالقلب نطقات) هاديك لي لهيه شعرها طويل قالت ليا نتي صمكة وشداتني ماي بلو آيز من ودينة شووف (بدات تتوريها ليه كانت حمرة) وقالت ليا نتي وماميتك موسخات (حركات راسها ودموعها تاينزلو بحال الشلال وبصوت بريء قالت ) أنا ومامي مافيناش وسيخات دوشنا ليوم
نوح:(نطق بهدوء)وشنو قالت ليك اخر؟
سيدرا:(جمعات شنافتها ونطقات بخفوت) قالت ليا بابا خلاني حيت أنا صمكة عليها مشى (شافت فرحيل)ياك مامي بابا مشى عند الله بحال مومو ديال تانيرت إينو
جالسة رحيل تاتسمع لكلام بنتها وكل كلمة خرجات من فمها كانت بحال شي سهم طلقتييه فقلبها.. صوت بكيتها ونبرة لحگرة لي فيه خلى رحيل تحس بقلبها تزير عليها.. وسؤالها البريء خلاها تعض على حنكها من لداخل كابة فيه لحر ديال داك لكلام لي سمعات والحگرة لي تحگرات بنتها..
نوح:(عض على شنافتو ومن وجهو باين فيه مخيخ) شكون هادي؟
سيدرا:(تاتشمر نيفها بلبودي) هاديك لي قالت على مامي ديك لكلمات ديك النهاريات ماي بلو آيز
عرفاتها رحيل أش قصدات وبكل هدوء ناضت من بلاصتها خارجة من لبيت وعينيها كانو بحال شي جفمة ديال الدم ويديها مزيرة عليهوم تادخلو ضفارها فراحة يديها.. غادة وقاااصدة بيت شيماء وكلام سيدرا كايتعاود فودنيها بالحرف مع كل شهقة وكل بكية وكل حگرة حسات بيهاا.. حلات باب بيت شيمااء بلامادق ولخرى غير شافتها هزات حاجبها ونطقات بعصبية:يواش داخلة لكوري
قربات جهتها رحيل وبدون ماتنطق بتاشي كلمة هزاات يديها تال السما وعطاتهاا واحد الصقلة دوخاتها..
يتبع...
التعليقات
لا توجد تعليقات بعد، كن أول من يعلق.